𑁭. 𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑀁. 𑀢𑀢𑁆𑀣 𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑀦𑁆𑀢𑀺 𑀯𑀦𑀧𑀢𑁆𑀣𑀓𑀸𑀭𑀡𑀁, 𑀯𑀦𑀧𑀢𑁆𑀣𑀤𑁂𑀲𑀦𑀁 𑀯𑀸.

𑁧𑁯𑁧. 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀻𑀢𑀺 𑀫𑀦𑀼𑀲𑁆𑀲𑀽𑀧𑀘𑀸𑀭𑀸𑀢𑀺𑀓𑁆𑀓𑀦𑁆𑀢𑀁 𑀯𑀦𑀲𑀡𑁆𑀟𑀲𑁂𑀦𑀸𑀲𑀦𑀁 𑀦𑀺𑀲𑁆𑀲𑀸𑀬 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀳𑀭𑀢𑀺. 𑀅𑀦𑀼𑀧𑀝𑁆𑀞𑀺𑀢𑀸𑀢𑀺𑀆𑀤𑀻𑀲𑀼 𑀧𑀼𑀩𑁆𑀩𑁂 𑀅𑀦𑀼𑀧𑀝𑁆𑀞𑀺𑀢𑀸 𑀲𑀢𑀺 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄𑀧𑀺 𑀦 𑀉𑀧𑀝𑁆𑀞𑀸𑀢𑀺, 𑀧𑀼𑀩𑁆𑀩𑁂 𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀧𑀼𑀩𑁆𑀩𑁂 𑀅𑀧𑀭𑀺𑀓𑁆𑀔𑀻𑀡𑀸 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀧𑀼𑀩𑁆𑀩𑁂 𑀅𑀦𑀦𑀼𑀧𑁆𑀧𑀢𑁆𑀢𑀁 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀜𑁆𑀘 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀢𑀺 𑀚𑀻𑀯𑀺𑀢𑀲𑀫𑁆𑀪𑀸𑀭𑀸. 𑀲𑀫𑀼𑀤𑀸𑀦𑁂𑀢𑀩𑁆𑀩𑀸𑀢𑀺 𑀲𑀫𑀸𑀳𑀭𑀺𑀢𑀩𑁆𑀩𑀸. 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀻𑀢𑀺 𑀤𑀼𑀓𑁆𑀔𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀭𑀢𑁆𑀢𑀺𑀪𑀸𑀕𑀁 𑀯𑀸 𑀤𑀺𑀯𑀲𑀪𑀸𑀕𑀁 𑀯𑀸𑀢𑀺 𑀭𑀢𑁆𑀢𑀺𑀓𑁄𑀝𑁆𑀞𑀸𑀲𑁂 𑀯𑀸 𑀤𑀺𑀯𑀲𑀓𑁄𑀝𑁆𑀞𑀸𑀲𑁂 𑀯𑀸. 𑀏𑀢𑁆𑀣 𑀘 𑀭𑀢𑁆𑀢𑀺𑀪𑀸𑀕𑁂 𑀧𑀝𑀺𑀲𑀜𑁆𑀘𑀺𑀓𑁆𑀔𑀫𑀸𑀦𑁂𑀦 𑀜𑀢𑁆𑀯𑀸 𑀭𑀢𑁆𑀢𑀺𑀁𑀬𑁂𑀯 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀭𑀢𑁆𑀢𑀺𑀁 𑀘𑀡𑁆𑀟𑀯𑀸𑀴𑀸𑀤𑀻𑀦𑀁 𑀧𑀭𑀺𑀩𑀦𑁆𑀥𑁂 𑀲𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀁 𑀆𑀕𑀫𑁂𑀢𑀩𑁆𑀩𑀁. 𑀤𑀺𑀯𑀲𑀪𑀸𑀕𑁂 𑀜𑀢𑁆𑀯𑀸 𑀤𑀺𑀯𑀸𑀯 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀤𑀺𑀯𑀸 𑀧𑀭𑀺𑀩𑀦𑁆𑀥𑁂 𑀲𑀢𑀺 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀁 𑀆𑀕𑀫𑁂𑀢𑀩𑁆𑀩𑀁.

𑁧𑁯𑁨. 𑀲𑀗𑁆𑀔𑀸𑀧𑀻𑀢𑀺 𑀏𑀯𑀁 𑀲𑀫𑀡𑀥𑀫𑁆𑀫𑀲𑁆𑀲 𑀅𑀦𑀺𑀧𑁆𑀨𑀚𑁆𑀚𑀦𑀪𑀸𑀯𑀁 𑀚𑀸𑀦𑀺𑀢𑁆𑀯𑀸. 𑀅𑀦𑀦𑁆𑀢𑀭𑀯𑀸𑀭𑁂 𑀧𑀦 𑀲𑀗𑁆𑀔𑀸𑀧𑀻𑀢𑀺 𑀏𑀯𑀁 𑀲𑀫𑀡𑀥𑀫𑁆𑀫𑀲𑁆𑀲 𑀦𑀺𑀧𑁆𑀨𑀚𑁆𑀚𑀦𑀪𑀸𑀯𑀁 𑀚𑀸𑀦𑀺𑀢𑁆𑀯𑀸.

𑁧𑁯𑁪. 𑀬𑀸𑀯𑀚𑀻𑀯𑀦𑁆𑀢𑀺 𑀬𑀸𑀯 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀢𑀸𑀯 𑀯𑀢𑁆𑀣𑀩𑁆𑀩𑀫𑁂𑀯.

𑁧𑁯𑁫. 𑀲𑁄 𑀧𑀼𑀕𑁆𑀕𑀮𑁄𑀢𑀺 𑀧𑀤𑀲𑁆𑀲 𑀦𑀸𑀦𑀼𑀩𑀦𑁆𑀥𑀺𑀢𑀩𑁆𑀩𑁄𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀦𑀸𑀧𑀼𑀘𑁆𑀙𑀸𑀢𑀺 𑀇𑀥 𑀧𑀦 𑀢𑀁 𑀧𑀼𑀕𑁆𑀕𑀮𑀁 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁧𑁯𑁭. 𑀲𑀗𑁆𑀔𑀸𑀧𑀻𑀢𑀺 𑀏𑀯𑀁 𑀲𑀫𑀡𑀥𑀫𑁆𑀫𑀲𑁆𑀲 𑀅𑀦𑀺𑀧𑁆𑀨𑀚𑁆𑀚𑀦𑀪𑀸𑀯𑀁 𑀜𑀢𑁆𑀯𑀸 𑀲𑁄 𑀧𑀼𑀕𑁆𑀕𑀮𑁄 𑀦𑀸𑀦𑀼𑀩𑀦𑁆𑀥𑀺𑀢𑀩𑁆𑀩𑁄, 𑀢𑀁 𑀆𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀁.

𑁧𑁯𑁮. 𑀅𑀧𑀺 𑀧𑀦𑀼𑀚𑁆𑀚𑀫𑀸𑀦𑁂𑀦𑀸𑀧𑀻𑀢𑀺 𑀅𑀧𑀺 𑀦𑀺𑀓𑁆𑀓𑀟𑁆𑀠𑀻𑀬𑀫𑀸𑀦𑁂𑀦𑀸𑀧𑀺. 𑀏𑀯𑀭𑀽𑀧𑁄 𑀳𑀺 𑀧𑀼𑀕𑁆𑀕𑀮𑁄 𑀲𑀘𑁂𑀧𑀺 𑀤𑀸𑀭𑀼𑀓𑀮𑀸𑀧𑀲𑀢𑀁 𑀯𑀸 𑀉𑀤𑀓𑀖𑀝𑀲𑀢𑀁 𑀯𑀸 𑀯𑀸𑀮𑀺𑀓𑀫𑁆𑀩𑀡𑀲𑀢𑀁 𑀯𑀸 𑀤𑀡𑁆𑀟𑀁 𑀆𑀳𑀭𑀸𑀧𑁂𑀢𑀺, 𑀫𑀸 𑀇𑀥 𑀯𑀲𑀻𑀢𑀺 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀢𑀁 𑀢𑀁 𑀔𑀫𑀸𑀧𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀯𑀢𑁆𑀣𑀩𑁆𑀩𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.