𑁬. 𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑀁. 𑀢𑀢𑁆𑀣 𑀘𑁂𑀢𑁄𑀔𑀺𑀮𑀸𑀢𑀺 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑀸 𑀓𑀘𑀯𑀭𑀪𑀸𑀯𑀸 𑀔𑀸𑀡𑀼𑀓𑀪𑀸𑀯𑀸. 𑀘𑁂𑀢𑀲𑁄 𑀯𑀺𑀦𑀺𑀩𑀦𑁆𑀥𑀸𑀢𑀺 𑀘𑀺𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸 𑀯𑀺𑀬 𑀕𑀡𑁆𑀳𑀦𑁆𑀢𑀻𑀢𑀺 𑀘𑁂𑀢𑀲𑁄 𑀯𑀺𑀦𑀺𑀩𑀦𑁆𑀥𑀸. 𑀯𑀼𑀤𑁆𑀥𑀺𑀦𑁆𑀢𑀺𑀆𑀤𑀻𑀲𑀼 𑀲𑀻𑀮𑁂𑀦 𑀯𑀼𑀤𑁆𑀥𑀺𑀁, 𑀫𑀕𑁆𑀕𑁂𑀦 𑀯𑀺𑀭𑀼𑀴𑁆𑀳𑀺𑀁, 𑀦𑀺𑀩𑁆𑀩𑀸𑀦𑁂𑀦 𑀯𑁂𑀧𑀼𑀮𑁆𑀮𑀁. 𑀲𑀻𑀮𑀲𑀫𑀸𑀥𑀻𑀳𑀺 𑀯𑀸 𑀯𑀼𑀤𑁆𑀥𑀺𑀁, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀳𑀺 𑀯𑀺𑀭𑀼𑀴𑁆𑀳𑀺𑀁, 𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀯𑁂𑀧𑀼𑀮𑁆𑀮𑀁. 𑀲𑀢𑁆𑀣𑀭𑀺 𑀓𑀗𑁆𑀔𑀢𑀻𑀢𑀺 𑀲𑀢𑁆𑀣𑀼 𑀲𑀭𑀻𑀭𑁂 𑀯𑀸 𑀕𑀼𑀡𑁂 𑀯𑀸 𑀓𑀗𑁆𑀔𑀢𑀺. 𑀲𑀭𑀻𑀭𑁂 𑀓𑀗𑁆𑀔𑀫𑀸𑀦𑁄 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀦𑀸𑀫 𑀲𑀭𑀻𑀭𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻𑀢𑀺 𑀓𑀗𑁆𑀔𑀢𑀺, 𑀕𑀼𑀡𑁂 𑀓𑀗𑁆𑀔𑀫𑀸𑀦𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀚𑀸𑀦𑀦𑀲𑀫𑀢𑁆𑀣𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻𑀢𑀺 𑀓𑀗𑁆𑀔𑀢𑀺. 𑀯𑀺𑀘𑀺𑀓𑀺𑀘𑁆𑀙𑀢𑀻𑀢𑀺 𑀯𑀺𑀘𑀺𑀦𑀦𑁆𑀢𑁄 𑀓𑀺𑀘𑁆𑀙𑀢𑀺, 𑀤𑀼𑀓𑁆𑀔𑀁 𑀆𑀧𑀚𑁆𑀚𑀢𑀺, 𑀯𑀺𑀦𑀺𑀘𑁆𑀙𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦𑀸𑀥𑀺𑀫𑀼𑀘𑁆𑀘𑀢𑀻𑀢𑀺 𑀏𑀯𑀫𑁂𑀢𑀦𑁆𑀢𑀺 𑀅𑀥𑀺𑀫𑁄𑀓𑁆𑀔𑀁 𑀦 𑀧𑀝𑀺𑀮𑀪𑀢𑀺. 𑀦 𑀲𑀫𑁆𑀧𑀲𑀻𑀤𑀢𑀻𑀢𑀺 𑀕𑀼𑀡𑁂𑀲𑀼 𑀑𑀢𑀭𑀺𑀢𑁆𑀯𑀸 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀪𑀸𑀯𑁂𑀦 𑀧𑀲𑀻𑀤𑀺𑀢𑀼𑀁, 𑀅𑀦𑀸𑀯𑀺𑀮𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀆𑀢𑀧𑁆𑀧𑀸𑀬𑀸𑀢𑀺 𑀓𑀺𑀮𑁂𑀲𑀲𑀦𑁆𑀢𑀸𑀧𑀓𑀯𑀻𑀭𑀺𑀬𑀓𑀭𑀡𑀢𑁆𑀣𑀸𑀬. 𑀅𑀦𑀼𑀬𑁄𑀕𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀬𑁄𑀕𑀸𑀬. 𑀲𑀸𑀢𑀘𑁆𑀘𑀸𑀬𑀸𑀢𑀺 𑀲𑀢𑀢𑀓𑀺𑀭𑀺𑀬𑀸𑀬 𑀧𑀥𑀸𑀦𑀸𑀬𑀸𑀢𑀺 𑀧𑀤𑀳𑀦𑀢𑁆𑀣𑀸𑀬. 𑀅𑀬𑀁 𑀧𑀞𑀫𑁄 𑀘𑁂𑀢𑁄𑀔𑀺𑀮𑁄𑀢𑀺 𑀅𑀬𑀁 𑀲𑀢𑁆𑀣𑀭𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀗𑁆𑀔𑀸𑀢𑁄 𑀧𑀞𑀫𑁄 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑁄, 𑀏𑀯𑀫𑁂𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺. 𑀥𑀫𑁆𑀫𑁂𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂 𑀘 𑀧𑀝𑀺𑀯𑁂𑀥𑀥𑀫𑁆𑀫𑁂 𑀘. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂 𑀓𑀗𑁆𑀔𑀫𑀸𑀦𑁄, 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻𑀢𑀺 𑀯𑀤𑀦𑁆𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑀁 𑀦𑀢𑁆𑀣𑀻𑀢𑀺 𑀓𑀗𑁆𑀔𑀢𑀺. 𑀧𑀝𑀺𑀯𑁂𑀥𑀥𑀫𑁆𑀫𑁂 𑀓𑀗𑁆𑀔𑀫𑀸𑀦𑁄 𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀦𑁆𑀤𑁄 𑀫𑀕𑁆𑀕𑁄 𑀦𑀸𑀫, 𑀫𑀕𑁆𑀕𑀦𑀺𑀲𑁆𑀲𑀦𑁆𑀤𑁄 𑀨𑀮𑀁 𑀦𑀸𑀫, 𑀲𑀩𑁆𑀩𑀲𑀗𑁆𑀔𑀸𑀭𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀦𑀺𑀩𑁆𑀩𑀸𑀦𑀁 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀢𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻𑀢𑀺 𑀓𑀗𑁆𑀔𑀢𑀺. 𑀲𑀗𑁆𑀖𑁂 𑀓𑀗𑁆𑀔𑀢𑀻𑀢𑀺 𑀲𑀼𑀧𑁆𑀧𑀝𑀺𑀧𑀦𑁆𑀦𑁄𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀏𑀯𑀭𑀽𑀧𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸 𑀘𑀢𑁆𑀢𑀸𑀭𑁄 𑀨𑀮𑀝𑁆𑀞𑀸𑀢𑀺 𑀅𑀝𑁆𑀞𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀫𑀽𑀳𑀪𑀽𑀢𑁄 𑀲𑀗𑁆𑀖𑁄 𑀦𑀸𑀫, 𑀲𑁄 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻𑀢𑀺 𑀓𑀗𑁆𑀔𑀢𑀺. 𑀲𑀺𑀓𑁆𑀔𑀸𑀬 𑀓𑀗𑁆𑀔𑀫𑀸𑀦𑁄 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀦𑀸𑀫 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀦𑀸𑀫 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀲𑀸 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻𑀢𑀺 𑀓𑀗𑁆𑀔𑀢𑀺. 𑀅𑀬𑀁 𑀧𑀜𑁆𑀘𑀫𑁄𑀢𑀺 𑀅𑀬𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀓𑁄𑀧𑀲𑀗𑁆𑀔𑀸𑀢𑁄 𑀧𑀜𑁆𑀘𑀫𑁄 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑁄 𑀓𑀘𑀯𑀭𑀪𑀸𑀯𑁄 𑀔𑀸𑀡𑀼𑀓𑀪𑀸𑀯𑁄.

𑁧𑁮𑁬. 𑀯𑀺𑀦𑀺𑀩𑀦𑁆𑀥𑁂𑀲𑀼 𑀓𑀸𑀫𑁂𑀢𑀺 𑀯𑀢𑁆𑀣𑀼𑀓𑀸𑀫𑁂𑀧𑀺 𑀓𑀺𑀮𑁂𑀲𑀓𑀸𑀫𑁂𑀧𑀺. 𑀓𑀸𑀬𑁂𑀢𑀺 𑀅𑀢𑁆𑀢𑀦𑁄 𑀓𑀸𑀬𑁂. 𑀭𑀽𑀧𑁂𑀢𑀺 𑀩𑀳𑀺𑀤𑁆𑀥𑀸 𑀭𑀽𑀧𑁂. 𑀬𑀸𑀯𑀤𑀢𑁆𑀣𑀦𑁆𑀢𑀺 𑀬𑀢𑁆𑀢𑀓𑀁 𑀇𑀘𑁆𑀙𑀢𑀺, 𑀢𑀢𑁆𑀢𑀓𑀁. 𑀉𑀤𑀭𑀸𑀯𑀤𑁂𑀳𑀓𑀦𑁆𑀢𑀺 𑀉𑀤𑀭𑀧𑀽𑀭𑀁. 𑀢𑀜𑁆𑀳𑀺 𑀉𑀤𑀭𑀁 𑀅𑀯𑀤𑁂𑀳𑀦𑀢𑁄 𑀉𑀤𑀭𑀸𑀯𑀤𑁂𑀳𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀬𑁆𑀬𑀲𑀼𑀔𑀦𑁆𑀢𑀺 𑀫𑀜𑁆𑀘𑀧𑀻𑀞𑀲𑀼𑀔𑀁, 𑀉𑀢𑀼𑀲𑀼𑀔𑀁 𑀯𑀸. 𑀧𑀲𑁆𑀲𑀲𑀼𑀔𑀦𑁆𑀢𑀺 𑀬𑀣𑀸 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀬𑀦𑁆𑀢𑀲𑁆𑀲 𑀤𑀓𑁆𑀔𑀺𑀡𑀧𑀲𑁆𑀲𑀯𑀸𑀫𑀧𑀲𑁆𑀲𑀸𑀦𑀁 𑀲𑀼𑀔𑀁 𑀳𑁄𑀢𑀺, 𑀏𑀯𑀁 𑀉𑀧𑁆𑀧𑀦𑁆𑀦𑀲𑀼𑀔𑀁. 𑀫𑀺𑀤𑁆𑀥𑀲𑀼𑀔𑀦𑁆𑀢𑀺 𑀦𑀺𑀤𑁆𑀤𑀸𑀲𑀼𑀔𑀁. 𑀅𑀦𑀼𑀬𑀼𑀢𑁆𑀢𑁄𑀢𑀺 𑀬𑀼𑀢𑁆𑀢𑀧𑀬𑀼𑀢𑁆𑀢𑁄 𑀯𑀺𑀳𑀭𑀢𑀺.

𑀧𑀡𑀺𑀥𑀸𑀬𑀸𑀢𑀺 𑀧𑀢𑁆𑀣𑀬𑀺𑀢𑁆𑀯𑀸. 𑀲𑀻𑀮𑁂𑀦𑀸𑀢𑀺𑀆𑀤𑀻𑀲𑀼 𑀲𑀻𑀮𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀯𑀢𑀦𑁆𑀢𑀺 𑀯𑀢𑀲𑀫𑀸𑀤𑀸𑀦𑀁. 𑀢𑀧𑁄𑀢𑀺 𑀢𑀧𑀘𑀭𑀡𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺. 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀻𑀢𑀺 𑀫𑀳𑁂𑀲𑀓𑁆𑀔𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺. 𑀤𑁂𑀯𑀜𑁆𑀜𑀢𑀭𑁄 𑀯𑀸𑀧𑀺 𑀅𑀧𑁆𑀧𑁂𑀲𑀓𑁆𑀔𑀤𑁂𑀯𑁂𑀲𑀼 𑀯𑀸 𑀅𑀜𑁆𑀜𑀢𑀭𑁄.

𑁧𑁮𑁯. 𑀇𑀤𑁆𑀥𑀺𑀧𑀸𑀤𑁂𑀲𑀼 𑀙𑀦𑁆𑀤𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀺. 𑀧𑀥𑀸𑀦𑀪𑀽𑀢𑀸 𑀲𑀗𑁆𑀔𑀸𑀭𑀸 𑀧𑀥𑀸𑀦𑀲𑀗𑁆𑀔𑀸𑀭𑀸. 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁂𑀢𑀁. 𑀇𑀤𑁆𑀥𑀺𑀬𑀸 𑀧𑀸𑀤𑀁, 𑀇𑀤𑁆𑀥𑀺𑀪𑀽𑀢𑀁 𑀯𑀸 𑀧𑀸𑀤𑀦𑁆𑀢𑀺 𑀇𑀤𑁆𑀥𑀺𑀧𑀸𑀤𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄, 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁂 𑀆𑀕𑀢𑁄 𑀬𑁂𑀯. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀧𑀺𑀲𑁆𑀲 𑀅𑀢𑁆𑀣𑁄 𑀤𑀻𑀧𑀺𑀢𑁄. 𑀇𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀇𑀤𑁆𑀥𑀺𑀧𑀸𑀤𑁂𑀳𑀺 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀓𑀣𑀺𑀢𑀁. 𑀉𑀲𑁆𑀲𑁄𑀴𑁆𑀳𑀻𑀬𑁂𑀯 𑀧𑀜𑁆𑀘𑀫𑀻𑀢𑀺 𑀏𑀢𑁆𑀣 𑀉𑀲𑁆𑀲𑁄𑀴𑁆𑀳𑀻𑀢𑀺 𑀲𑀩𑁆𑀩𑀢𑁆𑀣 𑀓𑀢𑁆𑀢𑀩𑁆𑀩𑀯𑀻𑀭𑀺𑀬𑀁 𑀤𑀲𑁆𑀲𑁂𑀢𑀺. 𑀉𑀲𑁆𑀲𑁄𑀴𑁆𑀳𑀻𑀧𑀦𑁆𑀦𑀭𑀲𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀜𑁆𑀘 𑀘𑁂𑀢𑁄𑀔𑀺𑀮𑀧𑁆𑀧𑀳𑀸𑀦𑀸𑀦𑀺 𑀧𑀜𑁆𑀘 𑀯𑀺𑀦𑀺𑀩𑀦𑁆𑀥𑀧𑁆𑀧𑀳𑀸𑀦𑀸𑀦𑀺 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀉𑀲𑁆𑀲𑁄𑀴𑁆𑀳𑀻𑀢𑀺 𑀏𑀯𑀁 𑀉𑀲𑁆𑀲𑁄𑀴𑁆𑀳𑀺𑀬𑀸 𑀲𑀤𑁆𑀥𑀺𑀁 𑀧𑀦𑁆𑀦𑀭𑀲𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀪𑀩𑁆𑀩𑁄𑀢𑀺 𑀅𑀦𑀼𑀭𑀽𑀧𑁄, 𑀅𑀦𑀼𑀘𑁆𑀙𑀯𑀺𑀓𑁄. 𑀅𑀪𑀺𑀦𑀺𑀩𑁆𑀪𑀺𑀤𑀸𑀬𑀸𑀢𑀺 𑀜𑀸𑀡𑁂𑀦 𑀓𑀺𑀮𑁂𑀲𑀪𑁂𑀤𑀸𑀬. 𑀲𑀫𑁆𑀩𑁄𑀥𑀸𑀬𑀸𑀢𑀺 𑀘𑀢𑀼𑀫𑀕𑁆𑀕𑀲𑀫𑁆𑀩𑁄𑀥𑀸𑀬. 𑀅𑀦𑀼𑀢𑁆𑀢𑀭𑀲𑁆𑀲𑀸𑀢𑀺 𑀲𑁂𑀝𑁆𑀞𑀲𑁆𑀲. 𑀬𑁄𑀕𑀓𑁆𑀔𑁂𑀫𑀲𑁆𑀲𑀸𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀲𑁆𑀲 𑀅𑀭𑀳𑀢𑁆𑀢𑀲𑁆𑀲. 𑀅𑀥𑀺𑀕𑀫𑀸𑀬𑀸𑀢𑀺 𑀧𑀝𑀺𑀮𑀸𑀪𑀸𑀬. 𑀲𑁂𑀬𑁆𑀬𑀣𑀸𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀻𑀢𑀺 𑀲𑀫𑁆𑀪𑀸𑀯𑀦𑀢𑁆𑀣𑁂. 𑀉𑀪𑀬𑁂𑀦𑀧𑀺 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫, 𑀪𑀺𑀓𑁆𑀔𑀯𑁂𑀢𑀺 𑀤𑀲𑁆𑀲𑁂𑀢𑀺.

𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀅𑀝𑁆𑀞 𑀯𑀸 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸𑀢𑀺 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀓𑀼𑀓𑁆𑀓𑀼𑀝𑀺𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀊𑀦𑀸𑀥𑀺𑀓𑀸𑀦𑀺𑀧𑀺 𑀅𑀡𑁆𑀟𑀸𑀦𑀺 𑀳𑁄𑀦𑁆𑀢𑀺, 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀧𑀦 𑀏𑀯𑀁 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀮𑁄𑀓𑁂 𑀲𑀺𑀮𑀺𑀝𑁆𑀞𑀁 𑀯𑀘𑀦𑀁 𑀳𑁄𑀢𑀺. 𑀢𑀸𑀦𑀲𑁆𑀲𑀽𑀢𑀺 𑀢𑀸𑀦𑀺 𑀅𑀲𑁆𑀲𑀼, 𑀪𑀯𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀓𑁆𑀓𑀼𑀝𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀻𑀢𑀺 𑀢𑀸𑀬 𑀚𑀦𑁂𑀢𑁆𑀢𑀺𑀬𑀸 𑀓𑀼𑀓𑁆𑀓𑀼𑀝𑀺𑀬𑀸 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀲𑀬𑀦𑁆𑀢𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀺. 𑀲𑀫𑁆𑀫𑀸 𑀧𑀭𑀺𑀲𑁂𑀤𑀺𑀢𑀸𑀦𑀻𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀉𑀢𑀼𑀁 𑀕𑀸𑀳𑀸𑀧𑁂𑀦𑁆𑀢𑀺𑀬𑀸 𑀲𑀼𑀝𑁆𑀞𑀼 𑀲𑀫𑀦𑁆𑀢𑀢𑁄 𑀲𑁂𑀤𑀺𑀢𑀸𑀦𑀺 𑀉𑀲𑁆𑀫𑀻𑀓𑀢𑀸𑀦𑀺. 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀻𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀲𑀼𑀝𑁆𑀞𑀼 𑀲𑀫𑀦𑁆𑀢𑀢𑁄 𑀪𑀸𑀯𑀺𑀢𑀸𑀦𑀺, 𑀓𑀼𑀓𑁆𑀓𑀼𑀝𑀕𑀦𑁆𑀥𑀁 𑀕𑀸𑀳𑀸𑀧𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀸𑀧𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸𑀢𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀇𑀫𑀁 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀅𑀧𑁆𑀧𑀫𑀸𑀤𑀁 𑀓𑀢𑁆𑀯𑀸 𑀓𑀺𑀜𑁆𑀘𑀸𑀧𑀺 𑀦 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀅𑀣 𑀔𑁄 𑀪𑀩𑁆𑀩𑀸𑀯 𑀢𑁂𑀢𑀺 𑀅𑀣 𑀔𑁄 𑀢𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀯𑀼𑀢𑁆𑀢𑀦𑀬𑁂𑀦 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑀺𑀢𑀼𑀁 𑀪𑀩𑁆𑀩𑀸𑀯. 𑀢𑁂 𑀳𑀺 𑀬𑀲𑁆𑀫𑀸 𑀢𑀸𑀬 𑀓𑀼𑀓𑁆𑀓𑀼𑀝𑀺𑀬𑀸 𑀏𑀯𑀁 𑀢𑀻𑀳𑀸𑀓𑀸𑀭𑁂𑀳𑀺 𑀢𑀸𑀦𑀺 𑀅𑀡𑁆𑀟𑀸𑀦𑀺 𑀧𑀭𑀺𑀧𑀸𑀮𑀻𑀬𑀫𑀸𑀦𑀸𑀦𑀺 𑀦 𑀧𑀽𑀢𑀻𑀦𑀺 𑀳𑁄𑀦𑁆𑀢𑀺. 𑀬𑁄𑀧𑀺 𑀦𑁂𑀲𑀁 𑀅𑀮𑁆𑀮𑀲𑀺𑀦𑁂𑀳𑁄, 𑀲𑁄𑀧𑀺 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀓𑀧𑀸𑀮𑀁 𑀢𑀦𑀼𑀓𑀁 𑀳𑁄𑀢𑀺, 𑀧𑀸𑀤𑀦𑀔𑀲𑀺𑀔𑀸 𑀘 𑀫𑀼𑀔𑀢𑀼𑀡𑁆𑀟𑀓𑀜𑁆𑀘 𑀔𑀭𑀁 𑀳𑁄𑀢𑀺, 𑀲𑀬𑀁 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀓𑀧𑀸𑀮𑀲𑁆𑀲 𑀢𑀦𑀼𑀢𑁆𑀢𑀸 𑀩𑀳𑀺 𑀆𑀮𑁄𑀓𑁄 𑀅𑀦𑁆𑀢𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 ‘‘𑀘𑀺𑀭𑀁 𑀯𑀢 𑀫𑀬𑀁 𑀲𑀗𑁆𑀓𑀼𑀝𑀺𑀢𑀳𑀢𑁆𑀣𑀧𑀸𑀤𑀸 𑀲𑀫𑁆𑀩𑀸𑀥𑁂 𑀲𑀬𑀺𑀫𑁆𑀳𑀸, 𑀅𑀬𑀜𑁆𑀘 𑀩𑀳𑀺 𑀆𑀮𑁄𑀓𑁄 𑀤𑀺𑀲𑁆𑀲𑀢𑀺, 𑀏𑀢𑁆𑀣 𑀤𑀸𑀦𑀺 𑀦𑁄 𑀲𑀼𑀔𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀓𑀧𑀸𑀮𑀁 𑀧𑀸𑀤𑁂𑀦 𑀧𑀳𑀭𑀦𑁆𑀢𑀺, 𑀕𑀻𑀯𑀁 𑀧𑀲𑀸𑀭𑁂𑀦𑁆𑀢𑀺, 𑀢𑀢𑁄 𑀢𑀁 𑀓𑀧𑀸𑀮𑀁 𑀤𑁆𑀯𑁂𑀥𑀸 𑀪𑀺𑀚𑁆𑀚𑀢𑀺. 𑀅𑀣 𑀢𑁂 𑀧𑀓𑁆𑀔𑁂 𑀯𑀺𑀥𑀼𑀦𑀦𑁆𑀢𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑀁 𑀯𑀺𑀭𑀯𑀦𑁆𑀢𑀸 𑀦𑀺𑀓𑁆𑀔𑀫𑀦𑁆𑀢𑀺𑀬𑁂𑀯, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘 𑀕𑀸𑀫𑀓𑁆𑀔𑁂𑀢𑁆𑀢𑀁 𑀉𑀧𑀲𑁄𑀪𑀬𑀫𑀸𑀦𑀸 𑀯𑀺𑀘𑀭𑀦𑁆𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀇𑀤𑀁 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀢𑀁 𑀏𑀯𑀁 𑀅𑀢𑁆𑀣𑁂𑀦 𑀲𑀁𑀲𑀦𑁆𑀤𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁 𑁋 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑁂𑀲𑀼 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑀁 𑀯𑀺𑀬 𑀳𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀲𑁆𑀲𑁄𑀴𑁆𑀳𑀻𑀧𑀦𑁆𑀦𑀭𑀲𑁂𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀪𑀸𑀯𑁄. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀲𑀫𑁆𑀧𑀸𑀤𑀦𑁂𑀦 𑀅𑀡𑁆𑀟𑀸𑀦𑀁 𑀅𑀧𑀽𑀢𑀺𑀪𑀸𑀯𑁄 𑀯𑀺𑀬 𑀧𑀦𑁆𑀦𑀭𑀲𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀅𑀧𑀭𑀺𑀳𑀸𑀦𑀺. 𑀢𑀲𑁆𑀲𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀅𑀡𑁆𑀟𑀸𑀦𑀁 𑀅𑀮𑁆𑀮𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁 𑀯𑀺𑀬 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀪𑀯𑀢𑁆𑀢𑀬𑀸𑀦𑀼𑀕𑀢𑀦𑀺𑀓𑀦𑁆𑀢𑀺𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁. 𑀅𑀡𑁆𑀟𑀓𑀮𑀸𑀧𑀸𑀦𑀁 𑀢𑀦𑀼𑀪𑀸𑀯𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀢𑀦𑀼𑀪𑀸𑀯𑁄. 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀸𑀤𑀦𑀔𑀫𑀼𑀢𑀼𑀡𑁆𑀟𑀓𑀸𑀦𑀁 𑀣𑀤𑁆𑀥𑀔𑀭𑀪𑀸𑀯𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀢𑀺𑀓𑁆𑀔𑀔𑀭𑀯𑀺𑀧𑁆𑀧𑀲𑀦𑁆𑀦𑀲𑀽𑀭𑀪𑀸𑀯𑁄. 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀭𑀺𑀡𑀸𑀫𑀓𑀸𑀮𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀧𑀭𑀺𑀡𑀸𑀫𑀓𑀸𑀮𑁄 𑀯𑀟𑁆𑀠𑀺𑀢𑀓𑀸𑀮𑁄 𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁄. 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀓𑁆𑀔𑀫𑀦𑀓𑀸𑀮𑁄 𑀯𑀺𑀬 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀲𑁆𑀲 𑀢𑀚𑁆𑀚𑀸𑀢𑀺𑀓𑀁 𑀉𑀢𑀼𑀲𑀧𑁆𑀧𑀸𑀬𑀁 𑀯𑀸 𑀪𑁄𑀚𑀦𑀲𑀧𑁆𑀧𑀸𑀬𑀁 𑀯𑀸 𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀁 𑀯𑀸 𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀁 𑀯𑀸 𑀮𑀪𑀺𑀢𑁆𑀯𑀸 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑀲𑁆𑀲 𑀅𑀦𑀼𑀧𑀼𑀩𑁆𑀩𑀸𑀥𑀺𑀕𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀧𑀦 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀭𑀺𑀡𑀢𑀪𑀸𑀯𑀁 𑀜𑀢𑁆𑀯𑀸 𑀫𑀸𑀢𑀸𑀧𑀺 𑀅𑀡𑁆𑀟𑀓𑁄𑀲𑀁 𑀪𑀺𑀦𑁆𑀤𑀢𑀺, 𑀏𑀯𑀁 𑀢𑀣𑀸𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀜𑀸𑀡𑀧𑀭𑀺𑀧𑀸𑀓𑀁 𑀜𑀢𑁆𑀯𑀸 𑀲𑀢𑁆𑀣𑀸𑀧𑀺 𑁋

‘‘𑀉𑀘𑁆𑀙𑀺𑀦𑁆𑀤 𑀲𑀺𑀦𑁂𑀳𑀫𑀢𑁆𑀢𑀦𑁄, 𑀓𑀼𑀫𑀼𑀤𑀁 𑀲𑀸𑀭𑀤𑀺𑀓𑀁𑀯 𑀧𑀸𑀡𑀺𑀦𑀸;

𑀲𑀦𑁆𑀢𑀺𑀫𑀕𑁆𑀕𑀫𑁂𑀯 𑀩𑁆𑀭𑀽𑀳𑀬, 𑀦𑀺𑀩𑁆𑀩𑀸𑀦𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢’’𑀦𑁆𑀢𑀺. (𑀥. 𑀧. 𑁨𑁮𑁫) 𑁋

𑀆𑀤𑀺𑀦𑀸 𑀦𑀬𑁂𑀦 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀕𑀸𑀣𑀸𑀬 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀳𑀭𑀢𑀺, 𑀲𑁄 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀯𑀺𑀚𑁆𑀚𑀸𑀡𑁆𑀟𑀓𑁄𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀬𑀣𑀸 𑀢𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀕𑀸𑀫𑀓𑁆𑀔𑁂𑀢𑁆𑀢𑀁 𑀉𑀧𑀲𑁄𑀪𑀬𑀫𑀸𑀦𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀦𑁆𑀢𑀺, 𑀏𑀯𑀁 𑀅𑀬𑀫𑁆𑀧𑀺 𑀫𑀳𑀸𑀔𑀻𑀡𑀸𑀲𑀯𑁄 𑀦𑀺𑀩𑁆𑀩𑀸𑀦𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀲𑀗𑁆𑀖𑀸𑀭𑀸𑀫𑀁 𑀉𑀧𑀲𑁄𑀪𑀬𑀫𑀸𑀦𑁄 𑀯𑀺𑀘𑀭𑀢𑀺.

𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑀺 𑀧𑀳𑀸𑀦𑀸𑀦𑀺 𑀓𑀣𑀺𑀢𑀸𑀦𑀺. 𑀓𑀣𑀁? 𑀘𑁂𑀢𑁄𑀔𑀺𑀮𑀸𑀦𑀜𑁆𑀳𑀺 𑀘𑁂𑀢𑁄𑀯𑀺𑀦𑀺𑀩𑀦𑁆𑀥𑀸𑀦𑀁 𑀧𑀳𑀸𑀦𑁂𑀦 𑀧𑀝𑀺𑀲𑀗𑁆𑀔𑀸𑀦𑀧𑁆𑀧𑀧𑀳𑀸𑀦𑀁 𑀓𑀣𑀺𑀢𑀁, 𑀇𑀤𑁆𑀥𑀺𑀧𑀸𑀤𑁂𑀳𑀺 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀓𑀣𑀺𑀢, 𑀫𑀕𑁆𑀕𑁂 𑀆𑀕𑀢𑁂 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀓𑀣𑀺𑀢𑀁, 𑀨𑀮𑁂 𑀆𑀕𑀢𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁 𑀓𑀣𑀺𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.