𑁫. 𑀅𑀦𑀼𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀅𑀦𑀼𑀫𑀸𑀦𑀲𑀼𑀢𑁆𑀢𑀁. 𑀢𑀢𑁆𑀣 𑀪𑀕𑁆𑀕𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂, 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀲𑀼𑀫𑀸𑀭𑀕𑀺𑀭𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀲𑁆𑀲 𑀓𑀺𑀭 𑀦𑀕𑀭𑀲𑁆𑀲 𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀤𑀺𑀯𑀲𑁂 𑀅𑀯𑀺𑀤𑀽𑀭𑁂 𑀉𑀤𑀓𑀭𑀳𑀤𑁂 𑀲𑀼𑀁𑀲𑀼𑀫𑀸𑀭𑁄 𑀲𑀤𑁆𑀤𑀫𑀓𑀸𑀲𑀺, 𑀕𑀺𑀭𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀅𑀣 𑀦𑀕𑀭𑁂 𑀦𑀺𑀝𑁆𑀞𑀺𑀢𑁂 𑀲𑀼𑀁𑀲𑀼𑀫𑀸𑀭𑀕𑀺𑀭𑀁 𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀪𑁂𑀲𑀓𑀴𑀸𑀯𑀦𑁂𑀢𑀺 𑀪𑁂𑀲𑀓𑀴𑀸𑀦𑀸𑀫𑀓𑁂 𑀯𑀦𑁂. ‘‘𑀪𑁂𑀲𑀕𑀴𑀸𑀯𑀦𑁂’’𑀢𑀺𑀧𑀺 𑀧𑀸𑀞𑁄. 𑀫𑀺𑀕𑀤𑀸𑀬𑁂𑀢𑀺 𑀢𑀁 𑀯𑀦𑀁 𑀫𑀺𑀕𑀧𑀓𑁆𑀔𑀻𑀦𑀁 𑀅𑀪𑀬𑀤𑀺𑀦𑁆𑀦𑀝𑁆𑀞𑀸𑀦𑁂 𑀚𑀸𑀢𑀁, 𑀢𑀲𑁆𑀫𑀸 𑀫𑀺𑀕𑀤𑀸𑀬𑁄𑀢𑀺 𑀯𑀼𑀘𑁆𑀘𑀢𑀺.

𑀧𑀯𑀸𑀭𑁂𑀢𑀻𑀢𑀺 𑀇𑀘𑁆𑀙𑀸𑀧𑁂𑀢𑀺. 𑀯𑀤𑀦𑁆𑀢𑀽𑀢𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀯𑀲𑁂𑀦 𑀯𑀤𑀦𑁆𑀢𑀼, 𑀅𑀦𑀼𑀲𑀸𑀲𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀯𑀘𑀦𑀻𑀬𑁄𑀫𑁆𑀳𑀻𑀢𑀺 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀯𑀢𑁆𑀢𑀩𑁆𑀩𑁄, 𑀅𑀦𑀼𑀲𑀸𑀲𑀺𑀢𑀩𑁆𑀩𑁄 𑀑𑀯𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑁄 𑀘 𑀳𑁄𑀢𑀺 𑀤𑀼𑀩𑁆𑀩𑀘𑁄𑀢𑀺 𑀲𑁄 𑀘 𑀤𑀼𑀓𑁆𑀔𑁂𑀦 𑀯𑀢𑁆𑀢𑀩𑁆𑀩𑁄 𑀳𑁄𑀢𑀺, 𑀯𑀼𑀢𑁆𑀢𑁄 𑀦 𑀲𑀳𑀢𑀺. 𑀤𑁄𑀯𑀘𑀲𑁆𑀲𑀓𑀭𑀡𑁂𑀳𑀻𑀢𑀺 𑀤𑀼𑀩𑁆𑀩𑀘𑀪𑀸𑀯𑀓𑀸𑀭𑀓𑁂𑀳𑀺 𑀉𑀧𑀭𑀺 𑀆𑀕𑀢𑁂𑀳𑀺 𑀲𑁄𑀴𑀲𑀳𑀺 𑀥𑀫𑁆𑀫𑁂𑀳𑀺. 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻 𑀅𑀦𑀼𑀲𑀸𑀲𑀦𑀺𑀦𑁆𑀢𑀺 𑀬𑁄 𑀳𑀺 𑀯𑀼𑀘𑁆𑀘𑀫𑀸𑀦𑁄 𑀢𑀼𑀫𑁆𑀳𑁂 𑀫𑀁 𑀓𑀲𑁆𑀫𑀸 𑀯𑀤𑀣, 𑀅𑀳𑀁 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀅𑀢𑁆𑀣𑀸𑀦𑀢𑁆𑀣𑀁 𑀚𑀸𑀦𑀸𑀫𑀻𑀢𑀺 𑀯𑀤𑀢𑀺. 𑀅𑀬𑀁 𑀅𑀦𑀼𑀲𑀸𑀲𑀦𑀺𑀁 𑀧𑀤𑀓𑁆𑀔𑀺𑀡𑀢𑁄 𑀦 𑀕𑀡𑁆𑀳𑀸𑀢𑀺, 𑀯𑀸𑀫𑀢𑁄 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻𑀢𑀺 𑀯𑀼𑀘𑁆𑀘𑀢𑀺.

𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀦𑁆𑀢𑀺 𑀮𑀸𑀫𑀓𑀸𑀦𑀁 𑀅𑀲𑀦𑁆𑀢𑀲𑀫𑁆𑀪𑀯𑀦𑀧𑀢𑁆𑀣𑀦𑀸𑀦𑀁. 𑀧𑀝𑀺𑀧𑁆𑀨𑀭𑀢𑀻𑀢𑀺 𑀧𑀝𑀺𑀯𑀺𑀭𑀼𑀤𑁆𑀥𑁄, 𑀧𑀘𑁆𑀘𑀦𑀻𑀓𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀅𑀧𑀲𑀸𑀤𑁂𑀢𑀻𑀢𑀺 𑀓𑀺𑀁 𑀦𑀼 𑀔𑁄 𑀢𑀼𑀬𑁆𑀳𑀁 𑀩𑀸𑀮𑀲𑁆𑀲 𑀅𑀩𑁆𑀬𑀢𑁆𑀢𑀲𑁆𑀲 𑀪𑀡𑀺𑀢𑁂𑀦, 𑀢𑁆𑀯𑀫𑁆𑀧𑀺 𑀦𑀸𑀫 𑀪𑀡𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀲𑀻𑀢𑀺 𑀏𑀯𑀁 𑀖𑀝𑁆𑀝𑁂𑀢𑀺. 𑀧𑀘𑁆𑀘𑀸𑀭𑁄𑀧𑁂𑀢𑀻𑀢𑀺, 𑀢𑁆𑀯𑀫𑁆𑀧𑀺 𑀔𑁄𑀲𑀺 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑀁 𑀢𑀸𑀯 𑀧𑀝𑀺𑀓𑀭𑁄𑀳𑀻𑀢𑀺 𑀏𑀯𑀁 𑀧𑀝𑀺𑀆𑀭𑁄𑀧𑁂𑀢𑀺.

𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀻𑀢𑀺 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀯𑀘𑀦𑁂𑀦 𑀯𑀸 𑀅𑀜𑁆𑀜𑀁 𑀓𑀸𑀭𑀡𑀁 𑀯𑀘𑀦𑀁 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀺. ‘‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑁄 𑀆𑀧𑀦𑁆𑀦𑁄, 𑀓𑀺𑀁 𑀆𑀧𑀦𑁆𑀦𑁄, 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑁄, 𑀓𑀁 𑀪𑀡𑀣, 𑀓𑀺𑀁 𑀪𑀡𑀣𑀸’’𑀢𑀺 𑀯𑀸 𑀯𑀤𑀢𑀺. ‘‘𑀏𑀯𑀭𑀽𑀧𑀁 𑀓𑀺𑀜𑁆𑀘𑀺 𑀢𑀬𑀸 𑀤𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀦 𑀲𑀼𑀡𑀸𑀫𑀻’’𑀢𑀺 𑀲𑁄𑀢𑀁 𑀯𑀸 𑀉𑀧𑀦𑁂𑀢𑀺. 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀢𑀻𑀢𑀺 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀦 𑀢𑀯 𑀧𑀸𑀝𑀮𑀺𑀧𑀼𑀢𑁆𑀢𑀕𑀫𑀦𑀁 𑀧𑀼𑀘𑁆𑀙𑀸𑀫, 𑀆𑀧𑀢𑁆𑀢𑀺𑀁 𑀧𑀼𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑀢𑁄 𑀭𑀸𑀚𑀕𑁂𑀳𑀁 𑀕𑀢𑁄𑀫𑁆𑀳𑀻’’𑀢𑀺, 𑀭𑀸𑀚𑀕𑁂𑀳𑀁 𑀯𑀸 𑀬𑀸𑀳𑀺 𑀩𑁆𑀭𑀸𑀳𑁆𑀫𑀡𑀕𑁂𑀳𑀁 𑀯𑀸, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻𑀢𑀺. 𑀢𑀢𑁆𑀣 𑀫𑁂 𑀲𑀽𑀓𑀭𑀫𑀁𑀲𑀁 𑀮𑀤𑁆𑀥𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀓𑀣𑀁 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀧𑀢𑀺.

𑀅𑀧𑀤𑀸𑀦𑁂𑀢𑀺 𑀅𑀢𑁆𑀢𑀦𑁄 𑀘𑀭𑀺𑀬𑀸𑀬. 𑀦 𑀲𑀫𑁆𑀧𑀸𑀬𑀢𑀻𑀢𑀺, 𑀆𑀯𑀼𑀲𑁄, 𑀢𑁆𑀯𑀁 𑀓𑀼𑀳𑀺𑀁 𑀯𑀲𑀲𑀺, 𑀓𑀁 𑀦𑀺𑀲𑁆𑀲𑀸𑀬 𑀯𑀲𑀲𑀻𑀢𑀺 𑀯𑀸, 𑀬𑀁 𑀢𑁆𑀯𑀁 𑀯𑀤𑁂𑀲𑀺 ‘‘𑀫𑀬𑀸 𑀏𑀲 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀦𑁄 𑀤𑀺𑀝𑁆𑀞𑁄’’𑀢𑀺. 𑀢𑁆𑀯𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀺𑀁 𑀓𑀭𑁄𑀲𑀺, 𑀅𑀬𑀁 𑀓𑀺𑀁 𑀓𑀭𑁄𑀢𑀺, 𑀓𑀢𑁆𑀣 𑀯𑀸 𑀢𑁆𑀯𑀁 𑀅𑀘𑁆𑀙𑀲𑀺 𑀓𑀢𑁆𑀣 𑀯𑀸 𑀅𑀬𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀭𑀺𑀬𑀁 𑀧𑀼𑀝𑁆𑀞𑁄 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑁧𑁮𑁩. 𑀢𑀢𑁆𑀭𑀸𑀯𑀼𑀲𑁄𑀢𑀺, 𑀆𑀯𑀼𑀲𑁄, 𑀢𑁂𑀲𑀼 𑀲𑁄𑀴𑀲𑀲𑀼 𑀥𑀫𑁆𑀫𑁂𑀲𑀼. 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀏𑀯𑀁 𑀅𑀦𑀼𑀫𑀺𑀦𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸 𑀅𑀦𑀼𑀫𑁂𑀢𑀩𑁆𑀩𑁄 𑀢𑀼𑀮𑁂𑀢𑀩𑁆𑀩𑁄 𑀢𑀻𑀭𑁂𑀢𑀩𑁆𑀩𑁄.

𑁧𑁮𑁪. 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄. 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸𑀢𑀺 𑀤𑀺𑀯𑀸𑀧𑀺 𑀭𑀢𑁆𑀢𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑁂𑀦, 𑀭𑀢𑀺𑀜𑁆𑀘 𑀤𑀺𑀯𑀸 𑀘 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀦𑁆𑀢𑁂𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑀫𑁂𑀯 𑀉𑀧𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀅𑀘𑁆𑀙𑁂 𑀯𑀸 𑀉𑀤𑀓𑀧𑀢𑁆𑀢𑁂𑀢𑀺 𑀧𑀲𑀦𑁆𑀦𑁂 𑀯𑀸 𑀉𑀤𑀓𑀪𑀸𑀚𑀦𑁂. 𑀫𑀼𑀔𑀦𑀺𑀫𑀺𑀢𑁆𑀢𑀦𑁆𑀢𑀺 𑀫𑀼𑀔𑀧𑀝𑀺𑀩𑀺𑀫𑁆𑀩𑀁. 𑀭𑀚𑀦𑁆𑀢𑀺 𑀆𑀕𑀦𑁆𑀢𑀼𑀓𑀭𑀚𑀁. 𑀅𑀗𑁆𑀕𑀡𑀦𑁆𑀢𑀺 𑀢𑀢𑁆𑀣 𑀚𑀸𑀢𑀓𑀁 𑀢𑀺𑀮𑀓𑀁 𑀯𑀸 𑀧𑀺𑀴𑀓𑀁 𑀯𑀸. 𑀲𑀩𑁆𑀩𑁂𑀧𑀺𑀫𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀳𑀻𑀦𑁂𑀢𑀺 𑀇𑀫𑀺𑀦𑀸 𑀲𑀩𑁆𑀩𑀧𑁆𑀧𑀳𑀸𑀦𑀁 𑀓𑀣𑁂𑀲𑀺. 𑀓𑀣𑀁? 𑀏𑀢𑁆𑀢𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀩𑁆𑀩𑀚𑀺𑀢𑀲𑁆𑀲 𑀦𑀸𑀦𑀼𑀘𑁆𑀙𑀯𑀺𑀓𑀸𑀢𑀺 𑀧𑀝𑀺𑀲𑀗𑁆𑀔𑀸𑀦𑀁 𑀉𑀧𑁆𑀧𑀸𑀤𑀬𑀢𑁄 𑀳𑀺 𑀧𑀝𑀺𑀲𑀗𑁆𑀔𑀸𑀦𑀧𑁆𑀧𑀳𑀸𑀦𑀁𑀓𑀣𑀺𑀢𑀁 𑀳𑁄𑀢𑀺. 𑀲𑀻𑀮𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀆𑀭𑀪𑀺𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀓𑀣𑀺𑀢𑀁. 𑀲𑀫𑀸𑀧𑀢𑁆𑀢𑀺𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑀲𑁆𑀲 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀓𑀣𑀺𑀢𑀁. 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀲𑁆𑀲 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀓𑀣𑀺𑀢𑀁. 𑀨𑀮𑁂 𑀆𑀕𑀢𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁, 𑀦𑀺𑀩𑁆𑀩𑀸𑀦𑁂 𑀆𑀕𑀢𑁂 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀦𑁆𑀢𑀺 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀩𑁆𑀩𑀧𑁆𑀧𑀳𑀸𑀦𑀁 𑀓𑀣𑀺𑀢𑀁𑀯 𑀳𑁄𑀢𑀺.

𑀇𑀤𑀜𑁆𑀳𑀺 𑀲𑀼𑀢𑁆𑀢𑀁 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀁 𑀦𑀸𑀫𑀸𑀢𑀺 𑀧𑁄𑀭𑀸𑀡𑀸 𑀯𑀤𑀦𑁆𑀢𑀺. 𑀇𑀤𑀁 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀧𑀸𑀢𑁄 𑀏𑀯 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 ‘‘𑀇𑀫𑁂 𑀏𑀢𑁆𑀢𑀓𑀸 𑀓𑀺𑀮𑁂𑀲𑀸 𑀅𑀢𑁆𑀣𑀺 𑀦𑀼 𑀔𑁄 𑀫𑀬𑁆𑀳𑀁 𑀦𑀢𑁆𑀣𑀻’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀲𑀘𑁂 𑀅𑀢𑁆𑀣𑀻𑀢𑀺 𑀧𑀲𑁆𑀲𑀢𑀺, 𑀢𑁂𑀲𑀁 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀦𑁄 𑀘𑁂 𑀧𑀲𑁆𑀲𑀢𑀺, 𑀲𑀼𑀧𑀩𑁆𑀩𑀚𑀺𑀢𑁄𑀲𑁆𑀫𑀻𑀢𑀺 𑀅𑀢𑁆𑀢𑀫𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑁂 𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸𑀧𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀲𑀸𑀬𑀁 𑀯𑀲𑀦𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸𑀧𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀢𑀺𑀓𑁆𑀔𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀤𑁆𑀯𑁂 𑀯𑀸𑀭𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀤𑁆𑀯𑁂 𑀯𑀸𑀭𑁂 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀦 𑀅𑀯𑀲𑁆𑀲𑀁 𑀏𑀓𑀯𑀸𑀭𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁, 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀦𑀼𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.