𑁪. 𑀘𑀽𑀴𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀁. 𑀢𑀢𑁆𑀣 𑀲𑀓𑁆𑀓𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀲𑁄 𑀳𑀺 𑀚𑀦𑀧𑀤𑁄 𑀲𑀓𑁆𑀬𑀸𑀦𑀁 𑀭𑀸𑀚𑀓𑀼𑀫𑀸𑀭𑀸𑀦𑀁 𑀯𑀲𑀦𑀝𑁆𑀞𑀸𑀦𑀢𑁆𑀢𑀸 𑀲𑀓𑁆𑀬𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀢𑁄. 𑀲𑀓𑁆𑀬𑀸𑀦𑀁 𑀧𑀦 𑀉𑀧𑁆𑀧𑀢𑁆𑀢𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 𑀆𑀕𑀢𑀸𑀯. 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀜𑁆𑀳𑀺 𑀓𑀧𑀺𑀮𑀲𑁆𑀲 𑀇𑀲𑀺𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑁂 𑀓𑀢𑀢𑁆𑀢𑀸 𑀓𑀧𑀺𑀮𑀯𑀢𑁆𑀣𑀽𑀢𑀺 𑀯𑀼𑀢𑁆𑀢𑀁, 𑀢𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸. 𑀦𑀺𑀕𑁆𑀭𑁄𑀥𑀸𑀭𑀸𑀫𑁂𑀢𑀺 𑀦𑀺𑀕𑁆𑀭𑁄𑀥𑁄 𑀦𑀸𑀫 𑀲𑀓𑁆𑀓𑁄, 𑀲𑁄 𑀜𑀸𑀢𑀺𑀲𑀫𑀸𑀕𑀫𑀓𑀸𑀮𑁂 𑀓𑀧𑀺𑀮𑀯𑀢𑁆𑀣𑀼𑀁 𑀆𑀕𑀢𑁂 𑀪𑀕𑀯𑀢𑀺 𑀅𑀢𑁆𑀢𑀦𑁄 𑀆𑀭𑀸𑀫𑁂 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀪𑀕𑀯𑀢𑁄 𑀦𑀺𑀬𑁆𑀬𑀸𑀢𑁂𑀲𑀺, 𑀢𑀲𑁆𑀫𑀺𑀁 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀫𑀳𑀸𑀦𑀸𑀫𑁄𑀢𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀪𑀸𑀢𑀸 𑀪𑀕𑀯𑀢𑁄 𑀘𑀼𑀴𑀧𑀺𑀢𑀼𑀧𑀼𑀢𑁆𑀢𑁄. 𑀲𑀼𑀤𑁆𑀥𑁄𑀤𑀦𑁄 𑀲𑀼𑀓𑁆𑀓𑁄𑀤𑀦𑁄 𑀲𑀓𑁆𑀓𑁄𑀤𑀦𑁄 𑀥𑁄𑀢𑁄𑀤𑀦𑁄 𑀅𑀫𑀺𑀢𑁄𑀤𑀦𑁄𑀢𑀺 𑀇𑀫𑁂 𑀧𑀜𑁆𑀘 𑀚𑀦𑀸 𑀪𑀸𑀢𑀭𑁄. 𑀅𑀫𑀺𑀢𑀸 𑀦𑀸𑀫 𑀤𑁂𑀯𑀻 𑀢𑁂𑀲𑀁 𑀪𑀕𑀺𑀦𑀻. 𑀢𑀺𑀲𑁆𑀲𑀢𑁆𑀣𑁂𑀭𑁄 𑀢𑀲𑁆𑀲𑀸 𑀧𑀼𑀢𑁆𑀢𑁄. 𑀢𑀣𑀸𑀕𑀢𑁄 𑀘 𑀦𑀦𑁆𑀤𑀢𑁆𑀣𑁂𑀭𑁄 𑀘 𑀲𑀼𑀤𑁆𑀥𑁄𑀤𑀦𑀲𑁆𑀲 𑀧𑀼𑀢𑁆𑀢𑀸, 𑀫𑀳𑀸𑀦𑀸𑀫𑁄 𑀘 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀘 𑀲𑀼𑀓𑁆𑀓𑁄𑀤𑀦𑀲𑁆𑀲. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀫𑀺𑀢𑁄𑀤𑀦𑀲𑁆𑀲, 𑀲𑁄 𑀪𑀕𑀯𑀢𑁄 𑀓𑀦𑀺𑀝𑁆𑀞𑁄. 𑀫𑀳𑀸𑀦𑀸𑀫𑁄 𑀫𑀳𑀮𑁆𑀮𑀓𑀢𑀭𑁄 𑀲𑀓𑀤𑀸𑀕𑀸𑀫𑀻 𑀅𑀭𑀺𑀬𑀲𑀸𑀯𑀓𑁄.

𑀤𑀻𑀖𑀭𑀢𑁆𑀢𑀦𑁆𑀢𑀺 𑀫𑀬𑁆𑀳𑀁 𑀲𑀓𑀤𑀸𑀕𑀸𑀫𑀺𑀨𑀮𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀘𑀺𑀭𑀭𑀢𑁆𑀢𑀁 𑀚𑀸𑀦𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀮𑁄𑀪𑀥𑀫𑁆𑀫𑀸𑀢𑀺 𑀮𑁄𑀪𑀲𑀗𑁆𑀔𑀸𑀢𑀸 𑀥𑀫𑁆𑀫𑀸, 𑀦𑀸𑀦𑀧𑁆𑀧𑀓𑀸𑀭𑀓𑀁 𑀮𑁄𑀪𑀁𑀬𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀢𑀭𑁂𑀲𑀼𑀧𑀺 𑀤𑁆𑀯𑀻𑀲𑀼 𑀏𑀲𑁂𑀯 𑀦𑀬𑁄. 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀻𑀢𑀺 𑀔𑁂𑀧𑁂𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀇𑀤𑀜𑁆𑀳𑀺 𑀧𑀭𑀺𑀬𑀸𑀤𑀸𑀦𑀁 𑀦𑀸𑀫 ‘‘𑀲𑀩𑁆𑀩𑀁 𑀳𑀢𑁆𑀣𑀺𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀁 𑀅𑀲𑁆𑀲𑀓𑀸𑀬𑀁 𑀲𑀩𑁆𑀩𑀁 𑀭𑀣𑀓𑀸𑀬𑀁 𑀲𑀩𑁆𑀩𑀁 𑀧𑀢𑁆𑀢𑀺𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀚𑀻𑀯𑀦𑁆𑀢𑀁𑀬𑁂𑀯 𑀦𑀁 𑀑𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁨𑁬) 𑀏𑀢𑁆𑀣 𑀕𑀳𑀡𑁂 𑀆𑀕𑀢𑀁. ‘‘𑀅𑀦𑀺𑀘𑁆𑀘𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀩𑁆𑀩𑀁 𑀓𑀸𑀫𑀭𑀸𑀕𑀁 𑀧𑀭𑀺𑀬𑀸𑀤𑀺𑀬𑀢𑀻’’𑀢𑀺 (𑀲𑀁. 𑀦𑀺. 𑁩.𑁧𑁦𑁨) 𑀏𑀢𑁆𑀣 𑀔𑁂𑀧𑀦𑁂. 𑀇𑀥𑀸𑀧𑀺 𑀔𑁂𑀧𑀦𑁂 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸𑀢𑀺 𑀔𑁂𑀧𑁂𑀢𑁆𑀯𑀸’’𑀢𑀺.

𑀬𑁂𑀦 𑀫𑁂 𑀏𑀓𑀤𑀸 𑀮𑁄𑀪𑀥𑀫𑁆𑀫𑀸𑀧𑀻𑀢𑀺 𑀬𑁂𑀦 𑀫𑀬𑁆𑀳𑀁 𑀏𑀓𑁂𑀓𑀲𑁆𑀫𑀺𑀁 𑀓𑀸𑀮𑁂 𑀮𑁄𑀪𑀥𑀫𑁆𑀫𑀸𑀧𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀬𑀁 𑀓𑀺𑀭 𑀭𑀸𑀚𑀸 ‘‘𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀮𑁄𑀪𑀤𑁄𑀲𑀫𑁄𑀳𑀸 𑀦𑀺𑀭𑀯𑀲𑁂𑀲𑀸 𑀧𑀳𑀻𑀬𑀦𑁆𑀢𑀻’’𑀢𑀺 𑀲𑀜𑁆𑀜𑀻 𑀅𑀳𑁄𑀲𑀺, 𑀅𑀬𑀁 ‘‘𑀅𑀧𑁆𑀧𑀳𑀻𑀦𑀁 𑀫𑁂 𑀅𑀢𑁆𑀣𑀻’’𑀢𑀺𑀧𑀺 𑀚𑀸𑀦𑀸𑀢𑀺, 𑀅𑀧𑁆𑀧𑀳𑀻𑀦𑀓𑀁 𑀉𑀧𑀸𑀤𑀸𑀬 𑀧𑀳𑀻𑀦𑀓𑀫𑁆𑀧𑀺 𑀧𑀼𑀦 𑀧𑀘𑁆𑀙𑀢𑁄𑀯𑀸𑀯𑀢𑁆𑀢𑀢𑀻𑀢𑀺 𑀲𑀜𑁆𑀜𑀻 𑀳𑁄𑀢𑀺. 𑀅𑀭𑀺𑀬𑀲𑀸𑀯𑀓𑀲𑁆𑀲 𑀏𑀯𑀁 𑀲𑀦𑁆𑀤𑁂𑀳𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫 𑀉𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀧𑀡𑁆𑀡𑀢𑁆𑀢𑀺𑀬𑀸 𑀅𑀓𑁄𑀯𑀺𑀤𑀢𑁆𑀢𑀸. ‘‘𑀅𑀬𑀁 𑀓𑀺𑀮𑁂𑀲𑁄 𑀅𑀲𑀼𑀓𑀫𑀕𑁆𑀕𑀯𑀚𑁆𑀛𑁄’’𑀢𑀺 𑀇𑀫𑀺𑀲𑁆𑀲𑀸 𑀧𑀡𑁆𑀡𑀢𑁆𑀢𑀺𑀬𑀸 𑀅𑀓𑁄𑀯𑀺𑀤𑀲𑁆𑀲 𑀳𑀺 𑀅𑀭𑀺𑀬𑀲𑀸𑀯𑀓𑀲𑁆𑀲𑀧𑀺 𑀏𑀯𑀁 𑀳𑁄𑀢𑀺. 𑀓𑀺𑀁 𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀻𑀢𑀺? 𑀅𑀢𑁆𑀣𑀺. 𑀲𑀸 𑀧𑀦 𑀦 𑀲𑀩𑁆𑀩𑁂𑀲𑀁 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀺. 𑀏𑀓𑁄 𑀳𑀺 𑀧𑀳𑀻𑀦𑀓𑀺𑀮𑁂𑀲𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀏𑀓𑁄 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀫𑁂𑀯, 𑀏𑀓𑁄 𑀫𑀕𑁆𑀕𑀫𑁂𑀯, 𑀏𑀓𑁄 𑀨𑀮𑀫𑁂𑀯, 𑀏𑀓𑁄 𑀦𑀺𑀩𑁆𑀩𑀸𑀦𑀫𑁂𑀯. 𑀇𑀫𑀸𑀲𑀼 𑀧𑀦 𑀧𑀜𑁆𑀘𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀼 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀦𑁄 𑀮𑀤𑁆𑀥𑀼𑀁 𑀦 𑀯𑀝𑁆𑀝𑀢𑀺. 𑀇𑀢𑀺 𑀬𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦 𑀧𑀭𑀺𑀧𑀼𑀡𑁆𑀡𑀸, 𑀢𑀲𑁆𑀲 𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀧𑀡𑁆𑀡𑀢𑁆𑀢𑀺𑀬𑀁 𑀅𑀓𑁄𑀯𑀺𑀤𑀢𑁆𑀢𑀸 𑀏𑀯𑀁 𑀳𑁄𑀢𑀺.

𑁧𑁭𑁬. 𑀲𑁄 𑀏𑀯 𑀔𑁄 𑀢𑁂𑀢𑀺 𑀲𑁄𑀬𑁂𑀯 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀘 𑀢𑀯 𑀲𑀦𑁆𑀢𑀸𑀦𑁂 𑀅𑀧𑁆𑀧𑀳𑀻𑀦𑁄, 𑀢𑁆𑀯𑀁 𑀧𑀦 𑀧𑀳𑀻𑀦𑀲𑀜𑁆𑀜𑀻 𑀅𑀳𑁄𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀘 𑀳𑀺 𑀢𑁂𑀢𑀺 𑀲𑁄 𑀢𑀼𑀬𑁆𑀳𑀁 𑀮𑁄𑀪𑀤𑁄𑀲𑀫𑁄𑀳𑀥𑀫𑁆𑀫𑁄. 𑀓𑀸𑀫𑁂𑀢𑀺 𑀤𑀼𑀯𑀺𑀥𑁂 𑀓𑀸𑀫𑁂. 𑀦 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸𑀲𑀻𑀢𑀺 𑀫𑀬𑀁 𑀯𑀺𑀬 𑀧𑀩𑁆𑀩𑀚𑁂𑀬𑁆𑀬𑀸𑀲𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁭𑁭. 𑀅𑀧𑁆𑀧𑀲𑁆𑀲𑀸𑀤𑀸𑀢𑀺 𑀧𑀭𑀺𑀢𑁆𑀢𑀲𑀼𑀔𑀸. 𑀩𑀳𑀼𑀤𑀼𑀓𑁆𑀔𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀤𑀼𑀓𑁆𑀔𑀫𑁂𑀯𑁂𑀢𑁆𑀣 𑀩𑀳𑀼𑀓𑀁. 𑀩𑀳𑀼𑀧𑀸𑀬𑀸𑀲𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁄 𑀉𑀧𑀸𑀬𑀸𑀲𑀓𑀺𑀮𑁂𑀲𑁄𑀬𑁂𑀯𑁂𑀢𑁆𑀣 𑀩𑀳𑀼. 𑀆𑀤𑀻𑀦𑀯𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁄 𑀉𑀧𑀤𑁆𑀤𑀯𑁄. 𑀏𑀢𑁆𑀣 𑀪𑀺𑀬𑁆𑀬𑁄𑀢𑀺 𑀏𑀢𑁂𑀲𑀼 𑀓𑀸𑀫𑁂𑀲𑀼 𑀅𑀬𑀁 𑀆𑀤𑀻𑀦𑀯𑁄𑀬𑁂𑀯 𑀩𑀳𑀼. 𑀅𑀲𑁆𑀲𑀸𑀤𑁄 𑀧𑀦 𑀳𑀺𑀫𑀯𑀦𑁆𑀢𑀁 𑀉𑀧𑀦𑀺𑀥𑀸𑀬 𑀲𑀸𑀲𑀧𑁄 𑀯𑀺𑀬 𑀅𑀧𑁆𑀧𑁄, 𑀧𑀭𑀺𑀢𑁆𑀢𑀓𑁄. 𑀇𑀢𑀺 𑀘𑁂𑀧𑀺 𑀫𑀳𑀸𑀦𑀸𑀫𑀸𑀢𑀺 𑀫𑀳𑀸𑀦𑀸𑀫 𑀏𑀯𑀁 𑀘𑁂𑀧𑀺 𑀅𑀭𑀺𑀬𑀲𑀸𑀯𑀓𑀲𑁆𑀲. 𑀬𑀣𑀸𑀪𑀽𑀢𑀦𑁆𑀢𑀺 𑀬𑀣𑀸𑀲𑀪𑀸𑀯𑀁. 𑀲𑀫𑁆𑀫𑀸 𑀦𑀬𑁂𑀦 𑀓𑀸𑀭𑀡𑁂𑀦 𑀧𑀜𑁆𑀜𑀸𑀬 𑀲𑀼𑀝𑁆𑀞𑀼 𑀤𑀺𑀝𑁆𑀞𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀧𑀜𑁆𑀜𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬, 𑀳𑁂𑀝𑁆𑀞𑀸𑀫𑀕𑁆𑀕𑀤𑁆𑀯𑀬𑀜𑀸𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁄 𑀘𑀸𑀢𑀺 𑀲𑁄 𑀏𑀯 𑀫𑀕𑁆𑀕𑀤𑁆𑀯𑀬𑁂𑀦 𑀤𑀺𑀝𑁆𑀞𑀓𑀸𑀫𑀸𑀤𑀻𑀦𑀯𑁄 𑀅𑀭𑀺𑀬𑀲𑀸𑀯𑀓𑁄. 𑀧𑀻𑀢𑀺𑀲𑀼𑀔𑀦𑁆𑀢𑀺 𑀇𑀫𑀺𑀦𑀸 𑀲𑀧𑁆𑀧𑀻𑀢𑀺𑀓𑀸𑀦𑀺 𑀤𑁆𑀯𑁂 𑀛𑀸𑀦𑀸𑀦𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀁 𑀯𑀸 𑀢𑀢𑁄 𑀲𑀦𑁆𑀢𑀢𑀭𑀦𑁆𑀢𑀺 𑀢𑀢𑁄 𑀛𑀸𑀦𑀤𑁆𑀯𑀬𑀢𑁄 𑀲𑀦𑁆𑀢𑀢𑀭𑀁 𑀅𑀜𑁆𑀜𑀁 𑀉𑀧𑀭𑀺𑀛𑀸𑀦𑀤𑁆𑀯𑀬𑀜𑁆𑀘𑁂𑀯 𑀫𑀕𑁆𑀕𑀤𑁆𑀯𑀬𑀜𑁆𑀘. 𑀦𑁂𑀯 𑀢𑀸𑀯 𑀅𑀦𑀸𑀯𑀝𑁆𑀝𑀻 𑀓𑀸𑀫𑁂𑀲𑀼 𑀳𑁄𑀢𑀻𑀢𑀺 𑀅𑀣 𑀔𑁄 𑀲𑁄 𑀤𑁆𑀯𑁂 𑀫𑀕𑁆𑀕𑁂 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑁄𑀧𑀺 𑀅𑀭𑀺𑀬𑀲𑀸𑀯𑀓𑁄 𑀉𑀧𑀭𑀺 𑀛𑀸𑀦𑀸𑀦𑀁 𑀯𑀸 𑀫𑀕𑁆𑀕𑀸𑀦𑀁 𑀯𑀸 𑀅𑀦𑀥𑀺𑀕𑀢𑀢𑁆𑀢𑀸 𑀦𑁂𑀯 𑀢𑀸𑀯 𑀓𑀸𑀫𑁂𑀲𑀼 𑀅𑀦𑀸𑀯𑀝𑁆𑀝𑀻 𑀳𑁄𑀢𑀺, 𑀅𑀦𑀸𑀯𑀝𑁆𑀝𑀺𑀦𑁄 𑀅𑀦𑀸𑀪𑁄𑀕𑁄 𑀦 𑀳𑁄𑀢𑀺. 𑀆𑀯𑀝𑁆𑀝𑀺𑀦𑁄 𑀲𑀸𑀪𑁄𑀕𑁄𑀬𑁂𑀯 𑀳𑁄𑀢𑀺. 𑀓𑀲𑁆𑀫𑀸? 𑀘𑀢𑀽𑀳𑀺 𑀛𑀸𑀦𑁂𑀳𑀺 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀲𑁆𑀲, 𑀤𑁆𑀯𑀻𑀳𑀺 𑀫𑀕𑁆𑀕𑁂𑀳𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀲𑁆𑀲 𑀅𑀪𑀸𑀯𑀸.

𑀫𑀬𑁆𑀳𑀫𑁆𑀧𑀺 𑀔𑁄𑀢𑀺 𑀦 𑀓𑁂𑀯𑀮𑀁 𑀢𑀼𑀬𑁆𑀳𑁂𑀯, 𑀅𑀣 𑀔𑁄 𑀫𑀬𑁆𑀳𑀫𑁆𑀧𑀺. 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸𑀢𑀺 𑀫𑀕𑁆𑀕𑀲𑀫𑁆𑀩𑁄𑀥𑀺𑀢𑁄 𑀧𑀞𑀫𑀢𑀭𑀫𑁂𑀯. 𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀑𑀭𑁄𑀥𑀦𑀸𑀝𑀓𑀸 𑀧𑀚𑀳𑀦𑀧𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸. 𑀧𑀻𑀢𑀺𑀲𑀼𑀔𑀁 𑀦𑀸𑀚𑁆𑀛𑀕𑀫𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀸𑀦𑀺 𑀤𑁆𑀯𑁂 𑀛𑀸𑀦𑀸𑀦𑀺 𑀦 𑀧𑀝𑀺𑀮𑀪𑀺𑀁. 𑀅𑀜𑁆𑀜𑀁 𑀯𑀸 𑀢𑀢𑁄 𑀲𑀦𑁆𑀢𑀢𑀭𑀦𑁆𑀢𑀺 𑀇𑀥 𑀉𑀧𑀭𑀺 𑀛𑀸𑀦𑀤𑁆𑀯𑀬𑀁 𑀘𑁂𑀯 𑀘𑀢𑁆𑀢𑀸𑀭𑁄 𑀘 𑀫𑀕𑁆𑀕𑀸 𑀅𑀥𑀺𑀧𑁆𑀧𑁂𑀢𑀸. 𑀧𑀘𑁆𑀘𑀜𑁆𑀜𑀸𑀲𑀺𑀦𑁆𑀢𑀺 𑀧𑀝𑀺𑀅𑀜𑁆𑀜𑀸𑀲𑀺𑀁.

𑁧𑁭𑁯. 𑀏𑀓𑀫𑀺𑀤𑀸𑀳𑀁 𑀫𑀳𑀸𑀦𑀸𑀫 𑀲𑀫𑀬𑀦𑁆𑀢𑀺 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀅𑀬𑀁 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀳𑁂𑀝𑁆𑀞𑀸 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑁄𑀧𑀺 𑀆𑀤𑀻𑀦𑀯𑁄𑀧𑀺 𑀓𑀣𑀺𑀢𑁄, 𑀦𑀺𑀲𑁆𑀲𑀭𑀡𑀁 𑀦 𑀓𑀣𑀺𑀢𑀁, 𑀢𑀁 𑀓𑀣𑁂𑀢𑀼𑀁 𑀅𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸. 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀳𑀺 𑀏𑀓𑁄 𑀅𑀦𑁆𑀢𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀏𑀓𑁄𑀢𑀺 𑀇𑀫𑁂𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑀁 𑀫𑀫 𑀲𑀸𑀲𑀦𑀦𑁆𑀢𑀺 𑀉𑀧𑀭𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀻𑀲𑁂𑀦 𑀲𑀓𑀮𑀲𑀸𑀲𑀦𑀁 𑀤𑀲𑁆𑀲𑁂𑀢𑀼𑀫𑁆𑀧𑀺 𑀅𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸.

𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂𑀢𑀺 𑀢𑀲𑁆𑀲 𑀧𑀩𑁆𑀩𑀢𑀲𑁆𑀲 𑀕𑀺𑀚𑁆𑀛𑀲𑀤𑀺𑀲𑀁 𑀓𑀽𑀝𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀕𑀺𑀚𑁆𑀛𑀓𑀽𑀝𑁄𑀢𑀺 𑀯𑀼𑀘𑁆𑀘𑀢𑀺. 𑀕𑀺𑀚𑁆𑀛𑀸 𑀯𑀸 𑀢𑀲𑁆𑀲 𑀓𑀽𑀝𑁂𑀲𑀼 𑀦𑀺𑀯𑀲𑀦𑁆𑀢𑀻𑀢𑀺𑀧𑀺 𑀕𑀺𑀚𑁆𑀛𑀓𑀽𑀝𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀲𑀺𑀕𑀺𑀮𑀺𑀧𑀲𑁆𑀲𑁂𑀢𑀺 𑀇𑀲𑀺𑀕𑀺𑀮𑀺𑀧𑀩𑁆𑀩𑀢𑀲𑁆𑀲 𑀧𑀲𑁆𑀲𑁂. 𑀓𑀸𑀴𑀲𑀺𑀮𑀸𑀬𑀦𑁆𑀢𑀺 𑀓𑀸𑀴𑀯𑀡𑁆𑀡𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂. 𑀉𑀩𑁆𑀪𑀝𑁆𑀞𑀓𑀸 𑀳𑁄𑀦𑁆𑀢𑀻𑀢𑀺 𑀉𑀤𑁆𑀥𑀁𑀬𑁂𑀯 𑀞𑀺𑀢𑀓𑀸 𑀳𑁄𑀦𑁆𑀢𑀺 𑀅𑀦𑀺𑀲𑀺𑀦𑁆𑀦𑀸. 𑀑𑀧𑀓𑁆𑀓𑀫𑀺𑀓𑀸𑀢𑀺 𑀉𑀩𑁆𑀪𑀝𑁆𑀞𑀓𑀸𑀤𑀺𑀦𑀸 𑀅𑀢𑁆𑀢𑀦𑁄 𑀉𑀧𑀓𑁆𑀓𑀫𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀸. 𑀦𑀺𑀕𑀡𑁆𑀞𑁄, 𑀆𑀯𑀼𑀲𑁄𑀢𑀺 𑀅𑀜𑁆𑀜𑀁 𑀓𑀸𑀭𑀡𑀁 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀦𑀺𑀕𑀡𑁆𑀞𑀲𑁆𑀲 𑀉𑀧𑀭𑀺 𑀧𑀓𑁆𑀔𑀺𑀧𑀺𑀁𑀲𑀼. 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻𑀢𑀺 𑀲𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀩𑁆𑀩𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀭𑀺𑀲𑁂𑀲𑀁 𑀜𑀸𑀡𑀤𑀲𑁆𑀲𑀦𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀲𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀅𑀧𑀭𑀺𑀲𑁂𑀲𑀁 𑀥𑀫𑁆𑀫𑀁 𑀚𑀸𑀦𑀦𑁆𑀢𑁄 𑀅𑀧𑀭𑀺𑀲𑁂𑀲𑀲𑀗𑁆𑀔𑀸𑀢𑀁 𑀜𑀸𑀡𑀤𑀲𑁆𑀲𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀝𑀺𑀚𑀸𑀦𑀦𑁆𑀢𑁄 𑀘 𑀏𑀯𑀁 𑀧𑀝𑀺𑀚𑀸𑀦𑀸𑀢𑀺 ‘‘𑀘𑀭𑀢𑁄 𑀘 𑀫𑁂 𑀢𑀺𑀝𑁆𑀞𑀢𑁄 𑀘…𑀧𑁂… 𑀧𑀘𑁆𑀘𑀼𑀧𑀝𑁆𑀞𑀺𑀢’’𑀦𑁆𑀢𑀺. 𑀢𑀢𑁆𑀣 𑀲𑀢𑀢𑀦𑁆𑀢𑀺 𑀦𑀺𑀘𑁆𑀘𑀁. 𑀲𑀫𑀺𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑁧𑁮𑁦. 𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀦𑀺𑀕𑀡𑁆𑀞𑀸 𑀚𑀸𑀦𑀸𑀣 𑀏𑀢𑁆𑀢𑀓𑀁 𑀯𑀸 𑀤𑀼𑀓𑁆𑀔𑀁 𑀦𑀺𑀚𑁆𑀚𑀺𑀡𑁆𑀡𑀦𑁆𑀢𑀺 𑀇𑀤𑀁 𑀪𑀕𑀯𑀸 𑀧𑀼𑀭𑀺𑀲𑁄 𑀦𑀸𑀫 𑀬𑀁 𑀓𑀭𑁄𑀢𑀺, 𑀢𑀁 𑀚𑀸𑀦𑀸𑀢𑀺. 𑀯𑀻𑀲𑀢𑀺𑀓𑀳𑀸𑀧𑀡𑁂 𑀇𑀡𑀁 𑀕𑀳𑁂𑀢𑁆𑀯𑀸 𑀤𑀲 𑀤𑀢𑁆𑀯𑀸 ‘‘𑀤𑀲 𑀫𑁂 𑀤𑀺𑀦𑁆𑀦𑀸 𑀤𑀲 𑀅𑀯𑀲𑀺𑀝𑁆𑀞𑀸’’𑀢𑀺 𑀚𑀸𑀦𑀸𑀢𑀺, 𑀢𑁂𑀧𑀺 𑀤𑀢𑁆𑀯𑀸 ‘‘𑀲𑀩𑁆𑀩𑀁 𑀤𑀺𑀦𑁆𑀦’’𑀦𑁆𑀢𑀺 𑀚𑀸𑀦𑀸𑀢𑀺. 𑀔𑁂𑀢𑁆𑀢𑀲𑁆𑀲 𑀢𑀢𑀺𑀬𑀪𑀸𑀕𑀁 𑀮𑀸𑀬𑀺𑀢𑁆𑀯𑀸 ‘‘𑀏𑀓𑁄 𑀪𑀸𑀕𑁄 𑀮𑀸𑀬𑀺𑀢𑁄, 𑀤𑁆𑀯𑁂 𑀅𑀯𑀲𑀺𑀝𑁆𑀞𑀸’’𑀢𑀺 𑀚𑀸𑀦𑀸𑀢𑀺. 𑀧𑀼𑀦 𑀏𑀓𑀁 𑀮𑀸𑀬𑀺𑀢𑁆𑀯𑀸 ‘‘𑀤𑁆𑀯𑁂 𑀮𑀸𑀬𑀺𑀢𑀸, 𑀏𑀓𑁄 𑀅𑀯𑀲𑀺𑀝𑁆𑀞𑁄’’𑀢𑀺 𑀚𑀸𑀦𑀸𑀢𑀺. 𑀢𑀲𑁆𑀫𑀺𑀫𑁆𑀧𑀺 𑀮𑀸𑀬𑀺𑀢𑁂 ‘‘𑀲𑀩𑁆𑀩𑀁 𑀦𑀺𑀝𑁆𑀞𑀺𑀢’’𑀦𑁆𑀢𑀺 𑀚𑀸𑀦𑀸𑀢𑀺, 𑀏𑀯𑀁 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀓𑀢𑀜𑁆𑀘 𑀅𑀓𑀢𑀜𑁆𑀘 𑀚𑀸𑀦𑀸𑀢𑀺, 𑀢𑀼𑀫𑁆𑀳𑁂𑀳𑀺𑀧𑀺 𑀢𑀣𑀸 𑀜𑀸𑀢𑀩𑁆𑀩𑀁 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀦𑁆𑀢𑀺 𑀇𑀫𑀺𑀦𑀸 𑀅𑀓𑀼𑀲𑀮𑀁 𑀧𑀳𑀸𑀬 𑀓𑀼𑀲𑀮𑀁 𑀪𑀸𑀯𑁂𑀢𑁆𑀯𑀸 𑀲𑀼𑀤𑁆𑀥𑀦𑁆𑀢𑀁 𑀧𑀢𑁆𑀢𑁄 𑀦𑀺𑀕𑀡𑁆𑀞𑁄 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺.

𑀏𑀯𑀁 𑀲𑀦𑁆𑀢𑁂𑀢𑀺 𑀢𑀼𑀫𑁆𑀳𑀸𑀓𑀁 𑀏𑀯𑀁 𑀅𑀚𑀸𑀦𑀦𑀪𑀸𑀯𑁂 𑀲𑀢𑀺. 𑀮𑀼𑀤𑁆𑀤𑀸𑀢𑀺 𑀮𑀼𑀤𑁆𑀤𑀸𑀘𑀸𑀭𑀸. 𑀮𑁄𑀳𑀺𑀢𑀧𑀸𑀡𑀺𑀦𑁄𑀢𑀺 𑀧𑀸𑀡𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀸 𑀮𑁄𑀳𑀺𑀢𑁂𑀦 𑀫𑀓𑁆𑀔𑀺𑀢𑀧𑀸𑀡𑀺𑀦𑁄. 𑀧𑀸𑀡𑀁 𑀳𑀺 𑀳𑀦𑀦𑁆𑀢𑀲𑁆𑀲𑀧𑀺 𑀬𑀲𑁆𑀲 𑀮𑁄𑀳𑀺𑀢𑁂𑀦 𑀧𑀸𑀡𑀺 𑀦 𑀫𑀓𑁆𑀔𑀺𑀬𑀢𑀺, 𑀲𑁄𑀧𑀺 𑀮𑁄𑀳𑀺𑀢𑀧𑀸𑀡𑀻𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸𑀢𑀺 𑀤𑀸𑀭𑀼𑀡𑀓𑀫𑁆𑀫𑀸. 𑀫𑀸𑀢𑀭𑀺 𑀧𑀺𑀢𑀭𑀺 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀤𑀻𑀲𑀼 𑀘 𑀓𑀢𑀸𑀧𑀭𑀸𑀥𑀸. 𑀫𑀸𑀕𑀯𑀺𑀓𑀸𑀤𑀬𑁄 𑀯𑀸 𑀓𑀓𑁆𑀔𑀴𑀓𑀫𑁆𑀫𑀸.

𑀦 𑀔𑁄, 𑀆𑀯𑀼𑀲𑁄, 𑀕𑁄𑀢𑀫𑀸𑀢𑀺 𑀇𑀤𑀁 𑀦𑀺𑀕𑀡𑁆𑀞𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀯𑀸𑀤𑁂 𑀤𑁄𑀲𑀁 𑀤𑁂𑀢𑀺, 𑀫𑀬𑀫𑁆𑀧𑀺𑀲𑁆𑀲 𑀤𑁄𑀲𑀁 𑀆𑀭𑁄𑀧𑁂𑀫𑀸’’𑀢𑀺 𑀫𑀜𑁆𑀜𑀫𑀸𑀦𑀸 𑀆𑀭𑀪𑀺𑀁𑀲𑀼. 𑀢𑀲𑁆𑀲𑀢𑁆𑀣𑁄, ‘‘𑀆𑀯𑀼𑀲𑁄, 𑀕𑁄𑀢𑀫 𑀬𑀣𑀸 𑀢𑀼𑀫𑁆𑀳𑁂 𑀧𑀡𑀻𑀢𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀸 𑀲𑀸𑀮𑀺𑀫𑀁𑀲𑁄𑀤𑀦𑀁 𑀪𑀼𑀜𑁆𑀚𑀦𑁆𑀢𑀸 𑀤𑁂𑀯𑀯𑀺𑀫𑀸𑀦𑀯𑀡𑁆𑀡𑀸𑀬 𑀕𑀦𑁆𑀥𑀓𑀼𑀝𑀺𑀬𑀸 𑀯𑀲𑀫𑀸𑀦𑀸 𑀲𑀼𑀔𑁂𑀦 𑀲𑀼𑀔𑀁 𑀅𑀥𑀺𑀕𑀘𑁆𑀙𑀣, 𑀦 𑀏𑀯𑀁 𑀲𑀼𑀔𑁂𑀦 𑀲𑀼𑀔𑀁 𑀅𑀥𑀺𑀕𑀦𑁆𑀢𑀩𑁆𑀩𑀁. 𑀬𑀣𑀸 𑀧𑀦 𑀫𑀬𑀁 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀸𑀤𑀻𑀳𑀺 𑀦𑀸𑀦𑀧𑁆𑀧𑀓𑀸𑀭𑀡𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀸𑀫, 𑀏𑀯𑀁 𑀤𑀼𑀓𑁆𑀔𑁂𑀦 𑀲𑀼𑀔𑀁 𑀅𑀥𑀺𑀕𑀦𑁆𑀢𑀩𑁆𑀩’’𑀦𑁆𑀢𑀺. 𑀲𑀼𑀔𑁂𑀦 𑀘 𑀳𑀸𑀯𑀼𑀲𑁄𑀢𑀺 𑀇𑀤𑀁 𑀲𑀘𑁂 𑀲𑀼𑀔𑁂𑀦 𑀘 𑀲𑀼𑀔𑀁 𑀅𑀥𑀺𑀕𑀦𑁆𑀢𑀩𑁆𑀩𑀁 𑀲𑀺𑀬𑀸. 𑀭𑀸𑀚𑀸 𑀅𑀥𑀺𑀕𑀘𑁆𑀙𑁂𑀬𑁆𑀬𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀸𑀕𑀥𑁄𑀢𑀺 𑀫𑀕𑀥𑀭𑀝𑁆𑀞𑀲𑁆𑀲 𑀇𑀲𑁆𑀲𑀭𑁄. 𑀲𑁂𑀦𑀺𑀬𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀩𑀺𑀫𑁆𑀩𑀻𑀢𑀺 𑀅𑀢𑁆𑀢𑀪𑀸𑀯𑀲𑁆𑀲 𑀦𑀸𑀫𑀁. 𑀲𑁄 𑀢𑀲𑁆𑀲 𑀲𑀸𑀭𑀪𑀽𑀢𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀅𑀢𑁆𑀢𑀪𑀸𑀯𑀲𑀫𑀺𑀤𑁆𑀥𑀺𑀬𑀸 𑀩𑀺𑀫𑁆𑀩𑀺𑀲𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀔𑀯𑀺𑀳𑀸𑀭𑀺𑀢𑀭𑁄𑀢𑀺 𑀇𑀤𑀁 𑀢𑁂 𑀦𑀺𑀕𑀡𑁆𑀞𑀸 𑀭𑀜𑁆𑀜𑁄 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀢𑀺𑀯𑀺𑀥𑀯𑀬𑁂𑀳𑀺 𑀦𑀸𑀝𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀧𑀢𑁆𑀢𑀺𑀅𑀦𑀼𑀪𑀯𑀦𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀅𑀤𑁆𑀥𑀸𑀢𑀺 𑀏𑀓𑀁𑀲𑁂𑀦. 𑀲𑀳𑀲𑀸 𑀅𑀧𑁆𑀧𑀝𑀺𑀲𑀗𑁆𑀔𑀸𑀢𑀺 𑀲𑀸𑀳𑀲𑀁 𑀓𑀢𑁆𑀯𑀸, 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀯 𑀬𑀣𑀸 𑀭𑀢𑁆𑀢𑁄 𑀭𑀸𑀕𑀯𑀲𑁂𑀦 𑀤𑀼𑀝𑁆𑀞𑁄 𑀤𑁄𑀲𑀯𑀲𑁂𑀦 𑀫𑀽𑀴𑁆𑀳𑁄 𑀫𑁄𑀳𑀯𑀲𑁂𑀦 𑀪𑀸𑀲𑀢𑀺, 𑀏𑀯𑀫𑁂𑀯𑀁 𑀯𑀸𑀘𑀸 𑀪𑀸𑀲𑀺𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸 𑀯𑁄 𑀔𑀫𑁂𑀬𑁆𑀬𑀸𑀢𑀺 𑀬𑀣𑀸 𑀢𑀼𑀫𑁆𑀳𑀸𑀓𑀁 𑀭𑀼𑀘𑁆𑀘𑁂𑀬𑁆𑀬. 𑀧𑀳𑁄𑀢𑀻𑀢𑀺 𑀲𑀓𑁆𑀓𑁄𑀢𑀺.

𑀅𑀦𑀺𑀜𑁆𑀚𑀫𑀸𑀦𑁄𑀢𑀺 𑀅𑀘𑀮𑀫𑀸𑀦𑁄. 𑀏𑀓𑀦𑁆𑀢𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀻𑀢𑀺 𑀦𑀺𑀭𑀦𑁆𑀢𑀭𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀻. ‘‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀦𑀺𑀕𑀡𑁆𑀞𑀸 𑀧𑀳𑁄𑀫𑀺…𑀧𑁂… 𑀏𑀓𑀦𑁆𑀢𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀻’’𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀏𑀢𑁆𑀣 𑀘 𑀓𑀣𑀸𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀭𑀸𑀚𑀯𑀸𑀭𑁂 𑀲𑀢𑁆𑀢 𑀆𑀤𑀺𑀁 𑀓𑀢𑁆𑀯𑀸 𑀧𑀼𑀘𑁆𑀙𑀸 𑀓𑀢𑀸. 𑀲𑀢𑁆𑀢 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀦𑀧𑁆𑀧𑀳𑁄𑀢𑀻𑀢𑀺 𑀳𑀺 𑀯𑀼𑀢𑁆𑀢𑁂 𑀙 𑀧𑀜𑁆𑀘 𑀘𑀢𑁆𑀢𑀸𑀭𑀻𑀢𑀺 𑀲𑀼𑀔𑀁 𑀧𑀼𑀘𑁆𑀙𑀺𑀢𑀼𑀁 𑀳𑁄𑀢𑀺. 𑀲𑀼𑀤𑁆𑀥𑀯𑀸𑀭𑁂 𑀧𑀦 𑀲𑀢𑁆𑀢𑀸𑀢𑀺 𑀯𑀼𑀢𑁆𑀢𑁂 𑀧𑀼𑀦 𑀙 𑀧𑀜𑁆𑀘 𑀘𑀢𑁆𑀢𑀸𑀭𑀻𑀢𑀺 𑀯𑀼𑀘𑁆𑀘𑀫𑀸𑀦𑀁 𑀅𑀦𑀘𑁆𑀙𑀭𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀏𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀤𑁂𑀲𑀦𑀸 𑀓𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.