𑁩. 𑀫𑀳𑀸𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀢𑀬𑁄 𑀚𑀦𑀸 𑀲𑀫𑁆𑀩𑀳𑀼𑀮𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁄 𑀧𑀭𑀁 𑀲𑀗𑁆𑀖𑁄. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀢𑀬𑁄 𑀢𑀬𑁄 𑀏𑀯, 𑀢𑀢𑁄 𑀉𑀤𑁆𑀥𑀁 𑀲𑀫𑁆𑀩𑀳𑀼𑀮𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀥 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀲𑀫𑁆𑀩𑀳𑀼𑀮𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁𑀲𑀽𑀢𑀺 𑀧𑀯𑀺𑀝𑁆𑀞𑀸, 𑀢𑁂 𑀧𑀦 𑀦 𑀢𑀸𑀯 𑀧𑀯𑀺𑀝𑁆𑀞𑀸, 𑀧𑀯𑀺𑀲𑀺𑀲𑁆𑀲𑀸𑀫𑀸𑀢𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀦 𑀧𑀯𑀺𑀲𑀺𑀁𑀲𑀽𑀢𑀺 𑀯𑀼𑀢𑁆𑀢𑀸. 𑀬𑀣𑀸 𑀕𑀸𑀫𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀦𑀺𑀓𑁆𑀔𑀦𑁆𑀢𑀧𑀼𑀭𑀺𑀲𑁄 𑀢𑀁 𑀕𑀸𑀫𑀁 𑀅𑀧𑁆𑀧𑀢𑁆𑀢𑁄𑀧𑀺 ‘‘𑀓𑀼𑀳𑀺𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀯𑀼𑀢𑁆𑀢𑁂 ‘‘𑀕𑀸𑀫𑀁 𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁. 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄𑀢𑀺 𑀚𑁂𑀢𑀯𑀦𑀢𑁄 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀅𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳𑀁𑀲𑀼. 𑀲𑀫𑀡𑁄, 𑀆𑀯𑀼𑀲𑁄𑀢𑀺, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀸 𑀲𑀫𑀡𑁄 𑀕𑁄𑀢𑀫𑁄. 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀦𑁆𑀢𑀺 𑀓𑀸𑀫𑀸𑀦𑀁 𑀧𑀳𑀸𑀦𑀁 𑀲𑀫𑀢𑀺𑀓𑁆𑀓𑀫𑀁 𑀧𑀜𑁆𑀜𑀧𑁂𑀢𑀺. 𑀭𑀽𑀧𑀯𑁂𑀤𑀦𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀢𑀺𑀢𑁆𑀣𑀺𑀬𑀸 𑀲𑀓𑀲𑀫𑀬𑀁 𑀚𑀸𑀦𑀦𑁆𑀢𑀸 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀬𑁆𑀬𑀼𑀁 𑀧𑀞𑀫𑀚𑁆𑀛𑀸𑀦𑀁 𑀯𑀤𑀫𑀸𑀦𑀸, 𑀭𑀽𑀧𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀬𑁆𑀬𑀼𑀁 𑀅𑀭𑀽𑀧𑀪𑀯𑀁 𑀯𑀤𑀫𑀸𑀦𑀸, 𑀯𑁂𑀤𑀦𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀬𑁆𑀬𑀼𑀁 𑀅𑀲𑀜𑁆𑀜𑀪𑀯𑀁 𑀯𑀤𑀫𑀸𑀦𑀸. 𑀢𑁂 𑀧𑀦 ‘‘𑀇𑀤𑀁 𑀦𑀸𑀫 𑀧𑀞𑀫𑀚𑁆𑀛𑀸𑀦𑀁 𑀅𑀬𑀁 𑀭𑀽𑀧𑀪𑀯𑁄 𑀅𑀬𑀁 𑀅𑀭𑀽𑀧𑀪𑀯𑁄’’𑀢𑀺𑀧𑀺 𑀦 𑀚𑀸𑀦𑀦𑁆𑀢𑀺. 𑀢𑁂 𑀧𑀜𑁆𑀜𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀧𑀺 𑀓𑁂𑀯𑀮𑀁 ‘‘𑀧𑀜𑁆𑀜𑀧𑁂𑀫 𑀧𑀜𑁆𑀜𑀧𑁂𑀫𑀸’’𑀢𑀺 𑀯𑀤𑀦𑁆𑀢𑀺. 𑀢𑀣𑀸𑀕𑀢𑁄 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀜𑁆𑀜𑀧𑁂𑀢𑀺, 𑀭𑀽𑀧𑀯𑁂𑀤𑀦𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀢𑁂 𑀏𑀯𑀁 𑀫𑀳𑀦𑁆𑀢𑁂 𑀯𑀺𑀲𑁂𑀲𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀇𑀥 𑀦𑁄, 𑀆𑀯𑀼𑀲𑁄, 𑀓𑁄 𑀯𑀺𑀯𑁂𑀲𑁄𑀢𑀺𑀆𑀤𑀺𑀫𑀸𑀳𑀁𑀲𑀼.

𑀢𑀢𑁆𑀣 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀜𑁆𑀜𑀸𑀧𑀦𑁂. 𑀥𑀫𑁆𑀫𑀤𑁂𑀲𑀦𑀸𑀬 𑀯𑀸 𑀥𑀫𑁆𑀫𑀤𑁂𑀲𑀦𑀦𑁆𑀢𑀺 𑀬𑀤𑀺𑀤𑀁 𑀲𑀫𑀡𑀲𑁆𑀲 𑀯𑀸 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀬 𑀲𑀤𑁆𑀥𑀺𑀁 𑀅𑀫𑁆𑀳𑀸𑀓𑀁 𑀥𑀫𑁆𑀫𑀤𑁂𑀲𑀦𑀁, 𑀅𑀫𑁆𑀳𑀸𑀓𑀁 𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀲𑀤𑁆𑀥𑀺𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀆𑀭𑀩𑁆𑀪 𑀦𑀸𑀦𑀸𑀓𑀭𑀡𑀁 𑀯𑀼𑀘𑁆𑀘𑁂𑀣, 𑀢𑀁 𑀓𑀺𑀦𑁆𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀯𑁂𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀁 𑀯𑀺𑀬 𑀲𑀸𑀲𑀦𑁂𑀦 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀮𑀤𑁆𑀥𑀺𑀯𑀘𑀦𑀫𑀢𑁆𑀢𑁂𑀦 𑀲𑀫𑀥𑀼𑀭𑀁 𑀞𑀧𑀬𑀺𑀁𑀲𑀼. 𑀦𑁂𑀯 𑀅𑀪𑀺𑀦𑀦𑁆𑀤𑀺𑀁𑀲𑀽𑀢𑀺 𑀏𑀯𑀫𑁂𑀢𑀦𑁆𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁𑀲𑀽𑀢𑀺 𑀦𑀬𑀺𑀤𑀁 𑀏𑀯𑀦𑁆𑀢𑀺 𑀦𑀧𑁆𑀧𑀝𑀺𑀲𑁂𑀥𑁂𑀲𑀼𑀁. 𑀓𑀲𑁆𑀫𑀸? 𑀢𑁂 𑀓𑀺𑀭 𑀢𑀺𑀢𑁆𑀣𑀺𑀬𑀸 𑀦𑀸𑀫 𑀅𑀦𑁆𑀥𑀲𑀤𑀺𑀲𑀸, 𑀚𑀸𑀦𑀺𑀢𑁆𑀯𑀸 𑀯𑀸 𑀅𑀚𑀸𑀦𑀺𑀢𑁆𑀯𑀸 𑀯𑀸 𑀓𑀣𑁂𑀬𑁆𑀬𑀼𑀦𑁆𑀢𑀺 𑀦𑀸𑀪𑀺𑀦𑀦𑁆𑀤𑀺𑀁𑀲𑀼, 𑀧𑀭𑀺𑀜𑁆𑀜𑀦𑁆𑀢𑀺 𑀯𑀘𑀦𑁂𑀦 𑀈𑀲𑀓𑀁 𑀲𑀸𑀲𑀦𑀕𑀦𑁆𑀥𑁄 𑀅𑀢𑁆𑀣𑀻𑀢𑀺 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁𑀲𑀼. 𑀚𑀦𑀧𑀤𑀯𑀸𑀲𑀺𑀦𑁄 𑀯𑀸 𑀢𑁂 𑀲𑀓𑀲𑀫𑀬𑀧𑀭𑀲𑀫𑀬𑁂𑀲𑀼 𑀦 𑀲𑀼𑀝𑁆𑀞𑀼 𑀓𑀼𑀲𑀮𑀸𑀢𑀺𑀧𑀺 𑀉𑀪𑀬𑀁 𑀦𑀸𑀓𑀁𑀲𑀼.

𑁧𑁬𑁫. 𑀦 𑀘𑁂𑀯 𑀲𑀫𑁆𑀧𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀉𑀢𑁆𑀢𑀭𑀺𑀜𑁆𑀘 𑀯𑀺𑀖𑀸𑀢𑀦𑁆𑀢𑀺 𑀅𑀲𑀫𑁆𑀧𑀸𑀬𑀦𑀢𑁄 𑀉𑀢𑁆𑀢𑀭𑀺𑀫𑁆𑀧𑀺 𑀤𑀼𑀓𑁆𑀔𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀦𑀸𑀫 𑀳𑀺 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀢𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑀬𑀲𑁆𑀫𑀺𑀦𑁆𑀢𑀺 𑀏𑀢𑁆𑀣 𑀬𑀣𑀸𑀢𑀺 𑀓𑀸𑀭𑀡𑀯𑀘𑀦𑀁, 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀲𑁆𑀫𑀸 𑀅𑀯𑀺𑀲𑀬𑁂 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁂𑀯𑀓𑁂𑀢𑀺 𑀲𑀳 𑀤𑁂𑀯𑁂𑀳𑀺 𑀲𑀤𑁂𑀯𑀓𑁂. 𑀲𑀫𑀸𑀭𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀢𑀻𑀡𑀺 𑀞𑀸𑀦𑀸𑀦𑀺 𑀮𑁄𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑁂 𑀧𑀚𑀸𑀬𑀸𑀢𑀺 𑀧𑀜𑁆𑀘𑀳𑀺𑀧𑀺 𑀲𑀢𑁆𑀢𑀮𑁄𑀓𑀫𑁂𑀯 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀏𑀢𑀲𑁆𑀫𑀺𑀁 𑀲𑀤𑁂𑀯𑀓𑀸𑀤𑀺𑀪𑁂𑀤𑁂 𑀮𑁄𑀓𑁂 𑀢𑀁 𑀤𑁂𑀯𑀁 𑀯𑀸 𑀫𑀦𑀼𑀲𑁆𑀲𑀁 𑀯𑀸 𑀦 𑀧𑀲𑁆𑀲𑀸𑀫𑀻𑀢𑀺 𑀤𑀻𑀧𑁂𑀢𑀺. 𑀇𑀢𑁄 𑀯𑀸 𑀧𑀦 𑀲𑀼𑀢𑁆𑀯𑀸𑀢𑀺 𑀇𑀢𑁄 𑀯𑀸 𑀧𑀦 𑀫𑀫 𑀲𑀸𑀲𑀦𑀢𑁄 𑀲𑀼𑀢𑁆𑀯𑀸 𑀅𑀢𑀣𑀸𑀕𑀢𑁄𑀧𑀺 𑀅𑀢𑀣𑀸𑀕𑀢𑀲𑀸𑀯𑀓𑁄𑀧𑀺 𑀆𑀭𑀸𑀥𑁂𑀬𑁆𑀬 𑀧𑀭𑀺𑀢𑁄𑀲𑁂𑀬𑁆𑀬. 𑀅𑀜𑁆𑀜𑀣𑀸 𑀆𑀭𑀸𑀥𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁬𑁬. 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀸𑀭𑀸𑀥𑀦𑀁 𑀤𑀲𑁆𑀲𑁂𑀦𑁆𑀢𑁄 𑀓𑁄 𑀘, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀓𑀸𑀫𑀕𑀼𑀡𑀸𑀢𑀺 𑀓𑀸𑀫𑀬𑀺𑀢𑀩𑁆𑀩𑀝𑁆𑀞𑁂𑀦 𑀓𑀸𑀫𑀸. 𑀩𑀦𑁆𑀥𑀦𑀝𑁆𑀞𑁂𑀦 𑀕𑀼𑀡𑀸. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀳𑀢𑀸𑀦𑀁 𑀯𑀢𑁆𑀣𑀸𑀦𑀁 𑀤𑁆𑀯𑀺𑀕𑀼𑀡𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺 (𑀫𑀳𑀸𑀯. 𑁩𑁪𑁮) 𑀏𑀢𑁆𑀣 𑀳𑀺 𑀧𑀝𑀮𑀝𑁆𑀞𑁄 𑀕𑀼𑀡𑀝𑁆𑀞𑁄. ‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄, 𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁧.𑁪) 𑀏𑀢𑁆𑀣 𑀭𑀸𑀲𑀝𑁆𑀞𑁄 𑀕𑀼𑀡𑀝𑁆𑀞𑁄. ‘‘𑀲𑀢𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁩.𑁩𑁭𑁯) 𑀏𑀢𑁆𑀣 𑀆𑀦𑀺𑀲𑀁𑀲𑀝𑁆𑀞𑁄 𑀕𑀼𑀡𑀝𑁆𑀞𑁄. ‘‘𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁 (𑀔𑀼. 𑀧𑀸. 𑁩 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂; 𑀤𑀻. 𑀦𑀺. 𑁨.𑁩𑁭𑁭) 𑀓𑀬𑀺𑀭𑀸 𑀫𑀸𑀮𑀸𑀕𑀼𑀡𑁂 𑀩𑀳𑀽’’𑀢𑀺 (𑀥. 𑀧. 𑁫𑁩) 𑀏𑀢𑁆𑀣 𑀩𑀦𑁆𑀥𑀦𑀝𑁆𑀞𑁄 𑀕𑀼𑀡𑀝𑁆𑀞𑁄. 𑀇𑀥𑀸𑀧𑀺 𑀏𑀲𑁂𑀯 𑀅𑀥𑀺𑀧𑁆𑀧𑁂𑀢𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑀦𑁆𑀥𑀦𑀝𑁆𑀞𑁂𑀦 𑀕𑀼𑀡𑀸’’𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀲𑁆𑀲𑀺𑀢𑀩𑁆𑀩𑀸. 𑀏𑀢𑁂𑀦𑀼𑀧𑀸𑀬𑁂𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀝𑁆𑀞𑀸𑀢𑀺 𑀧𑀭𑀺𑀬𑀺𑀝𑁆𑀞𑀸 𑀯𑀸 𑀳𑁄𑀦𑁆𑀢𑀼 𑀫𑀸 𑀯𑀸, 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀓𑀦𑁆𑀢𑀸𑀢𑀺 𑀓𑀫𑀦𑀻𑀬𑀸. 𑀫𑀦𑀸𑀧𑀸𑀢𑀺 𑀫𑀦𑀯𑀟𑁆𑀠𑀦𑀓𑀸. 𑀧𑀺𑀬𑀭𑀽𑀧𑀸𑀢𑀺 𑀧𑀺𑀬𑀚𑀸𑀢𑀺𑀓𑀸. 𑀓𑀸𑀫𑀽𑀧𑀲𑀁𑀳𑀺𑀢𑀸𑀢𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀓𑀸𑀫𑁂𑀦 𑀉𑀧𑀲𑀁𑀳𑀺𑀢𑀸. 𑀭𑀚𑀦𑀻𑀬𑀸𑀢𑀺 𑀭𑀚𑁆𑀚𑀦𑀺𑀬𑀸, 𑀭𑀸𑀕𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀪𑀽𑀢𑀸𑀢𑀺 𑀅𑀢𑁆𑀣𑁄.

𑁧𑁬𑁭. 𑀬𑀤𑀺 𑀫𑀼𑀤𑁆𑀤𑀸𑀬𑀸𑀢𑀺𑀆𑀤𑀻𑀲𑀼 𑀫𑀼𑀤𑁆𑀤𑀸𑀢𑀺 𑀅𑀗𑁆𑀕𑀼𑀮𑀺𑀧𑀩𑁆𑀩𑁂𑀲𑀼 𑀲𑀜𑁆𑀜𑀁 𑀞𑀧𑁂𑀢𑁆𑀯𑀸 𑀳𑀢𑁆𑀣𑀫𑀼𑀤𑁆𑀤𑀸. 𑀕𑀡𑀦𑀸𑀢𑀺 𑀅𑀘𑁆𑀙𑀺𑀤𑁆𑀤𑀕𑀡𑀦𑀸. 𑀲𑀗𑁆𑀔𑀸𑀦𑀦𑁆𑀢𑀺 𑀧𑀺𑀡𑁆𑀟𑀕𑀡𑀦𑀸. 𑀬𑀸𑀬 𑀔𑁂𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀇𑀥 𑀏𑀢𑁆𑀢𑀓𑀸 𑀯𑀻𑀳𑀻 𑀪𑀯𑀺𑀲𑁆𑀲𑀦𑁆𑀢𑀺, 𑀭𑀼𑀓𑁆𑀔𑀁 𑀑𑀮𑁄𑀓𑁂𑀢𑁆𑀯𑀸 𑀇𑀥 𑀏𑀢𑁆𑀢𑀓𑀸𑀦𑀺 𑀨𑀮𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀆𑀓𑀸𑀲𑀁 𑀑𑀮𑁄𑀓𑁂𑀢𑁆𑀯𑀸 𑀇𑀫𑁂 𑀆𑀓𑀸𑀲𑁂 𑀲𑀓𑀼𑀡𑀸 𑀏𑀢𑁆𑀢𑀓𑀸 𑀦𑀸𑀫 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀚𑀸𑀦𑀦𑁆𑀢𑀺.

𑀓𑀲𑀻𑀢𑀺 𑀓𑀲𑀺𑀓𑀫𑁆𑀫𑀁. 𑀯𑀡𑀺𑀚𑁆𑀚𑀸𑀢𑀺 𑀚𑀗𑁆𑀖𑀯𑀡𑀺𑀚𑁆𑀚𑀣𑀮𑀯𑀡𑀺𑀚𑁆𑀚𑀸𑀤𑀺𑀯𑀡𑀺𑀧𑁆𑀧𑀣𑁄. 𑀕𑁄𑀭𑀓𑁆𑀔𑀦𑁆𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀕𑀸𑀯𑁄 𑀭𑀓𑁆𑀔𑀺𑀢𑁆𑀯𑀸 𑀧𑀜𑁆𑀘𑀕𑁄𑀭𑀲𑀯𑀺𑀓𑁆𑀓𑀬𑁂𑀦 𑀚𑀻𑀯𑀦𑀓𑀫𑁆𑀫𑀁. 𑀇𑀲𑁆𑀲𑀢𑁆𑀣𑁄 𑀯𑀼𑀘𑁆𑀘𑀢𑀺 𑀆𑀯𑀼𑀥𑀁 𑀕𑀳𑁂𑀢𑁆𑀯𑀸 𑀉𑀧𑀝𑁆𑀞𑀸𑀦𑀓𑀫𑁆𑀫𑀁. 𑀭𑀸𑀚𑀧𑁄𑀭𑀺𑀲𑀦𑁆𑀢𑀺 𑀆𑀯𑀼𑀥𑁂𑀦 𑀭𑀸𑀚𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑀝𑁆𑀞𑀸𑀦𑀁. 𑀲𑀺𑀧𑁆𑀧𑀜𑁆𑀜𑀢𑀭𑀦𑁆𑀢𑀺 𑀕𑀳𑀺𑀢𑀸𑀯𑀲𑁂𑀲𑀁 𑀳𑀢𑁆𑀣𑀺𑀅𑀲𑁆𑀲𑀲𑀺𑀧𑁆𑀧𑀸𑀤𑀺. 𑀲𑀻𑀢𑀲𑁆𑀲 𑀧𑀼𑀭𑀓𑁆𑀔𑀢𑁄𑀢𑀺 𑀮𑀓𑁆𑀔𑀁 𑀯𑀺𑀬 𑀲𑀭𑀲𑁆𑀲 𑀲𑀻𑀢𑀲𑁆𑀲 𑀧𑀼𑀭𑀢𑁄, 𑀲𑀻𑀢𑁂𑀦 𑀩𑀸𑀥𑀻𑀬𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀉𑀡𑁆𑀳𑁂𑀧𑀺 𑀏𑀲𑁂𑀯 𑀦𑀬𑁄. 𑀟𑀁𑀲𑀸𑀤𑀻𑀲𑀼 𑀟𑀁𑀲𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸. 𑀫𑀓𑀲𑀸𑀢𑀺 𑀲𑀩𑁆𑀩𑀫𑀓𑁆𑀔𑀺𑀓𑀸, 𑀲𑀭𑀻𑀲𑀧𑀸𑀢𑀺 𑀬𑁂 𑀓𑁂𑀘𑀺 𑀲𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀭𑀺𑀲𑁆𑀲𑀫𑀸𑀦𑁄𑀢𑀺 𑀭𑀼𑀧𑁆𑀧𑀫𑀸𑀦𑁄, 𑀖𑀝𑁆𑀝𑀺𑀬𑀫𑀸𑀦𑁄. 𑀫𑀻𑀬𑀫𑀸𑀦𑁄𑀢𑀺 𑀫𑀭𑀫𑀸𑀦𑁄. 𑀅𑀬𑀁, 𑀪𑀺𑀓𑁆𑀔𑀯𑁂𑀢𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀫𑀼𑀤𑁆𑀤𑀸𑀤𑀻𑀳𑀺 𑀚𑀻𑀯𑀺𑀓𑀓𑀧𑁆𑀧𑀦𑀁 𑀆𑀕𑀫𑁆𑀫 𑀲𑀻𑀢𑀸𑀤𑀺𑀧𑀘𑁆𑀘𑀬𑁄 𑀆𑀩𑀸𑀥𑁄. 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄𑀢𑀺 𑀓𑀸𑀫𑁂𑀲𑀼 𑀉𑀧𑀤𑁆𑀤𑀯𑁄, 𑀉𑀧𑀲𑁆𑀲𑀕𑁆𑀕𑁄𑀢𑀺 𑀅𑀢𑁆𑀣𑁄. 𑀲𑀦𑁆𑀤𑀺𑀝𑁆𑀞𑀺𑀓𑁄𑀢𑀺 𑀧𑀘𑁆𑀘𑀓𑁆𑀔𑁄 𑀲𑀸𑀫𑀁 𑀧𑀲𑁆𑀲𑀺𑀢𑀩𑁆𑀩𑁄. 𑀤𑀼𑀓𑁆𑀔𑀓𑁆𑀔𑀦𑁆𑀥𑁄𑀢𑀺 𑀤𑀼𑀓𑁆𑀔𑀭𑀸𑀲𑀺. 𑀓𑀸𑀫𑀳𑁂𑀢𑀽𑀢𑀺𑀆𑀤𑀻𑀲𑀼 𑀧𑀘𑁆𑀘𑀬𑀝𑁆𑀞𑁂𑀦 𑀓𑀸𑀫𑀸 𑀅𑀲𑁆𑀲 𑀳𑁂𑀢𑀽𑀢𑀺 𑀓𑀸𑀫𑀳𑁂𑀢𑀼. 𑀫𑀽𑀮𑀝𑁆𑀞𑁂𑀦 𑀓𑀸𑀫𑀸 𑀦𑀺𑀤𑀸𑀦𑀫𑀲𑁆𑀲𑀸𑀢𑀺 𑀓𑀸𑀫𑀦𑀺𑀤𑀸𑀦𑁄. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀧𑀦 𑀓𑀸𑀫𑀦𑀺𑀤𑀸𑀦𑀦𑁆𑀢𑀺 𑀯𑀼𑀢𑁆𑀢𑁄. 𑀓𑀸𑀭𑀡𑀝𑁆𑀞𑁂𑀦 𑀓𑀸𑀫𑀸 𑀅𑀥𑀺𑀓𑀭𑀡𑀁 𑀅𑀲𑁆𑀲𑀸𑀢𑀺 𑀓𑀸𑀫𑀸𑀥𑀺𑀓𑀭𑀡𑁄. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦𑁂𑀯 𑀧𑀦 𑀓𑀸𑀫𑀸𑀥𑀺𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑁄. 𑀓𑀸𑀫𑀸𑀦𑀫𑁂𑀯 𑀳𑁂𑀢𑀽𑀢𑀺 𑀇𑀤𑀁 𑀦𑀺𑀬𑀫𑀯𑀘𑀦𑀁, 𑀓𑀸𑀫𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀉𑀝𑁆𑀞𑀳𑀢𑁄𑀢𑀺 𑀆𑀚𑀻𑀯𑀲𑀫𑀼𑀝𑁆𑀞𑀸𑀧𑀓𑀯𑀻𑀭𑀺𑀬𑁂𑀦 𑀉𑀝𑁆𑀞𑀳𑀦𑁆𑀢𑀲𑁆𑀲. 𑀖𑀝𑀢𑁄𑀢𑀺 𑀢𑀁 𑀯𑀻𑀭𑀺𑀬𑀁 𑀧𑀼𑀩𑁆𑀩𑁂𑀦𑀸𑀧𑀭𑀁 𑀖𑀝𑁂𑀦𑁆𑀢𑀲𑁆𑀲. 𑀯𑀸𑀬𑀫𑀢𑁄𑀢𑀺 𑀯𑀸𑀬𑀸𑀫𑀁 𑀧𑀭𑀓𑁆𑀓𑀫𑀁 𑀧𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲. 𑀦𑀸𑀪𑀺𑀦𑀺𑀧𑁆𑀨𑀚𑁆𑀚𑀦𑁆𑀢𑀻𑀢𑀺 𑀦 𑀦𑀺𑀧𑁆𑀨𑀚𑁆𑀚𑀦𑁆𑀢𑀺, 𑀳𑀢𑁆𑀣𑀁 𑀦𑀸𑀪𑀺𑀭𑀼𑀳𑀦𑁆𑀢𑀺. 𑀲𑁄𑀘𑀢𑀻𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑁂𑀦 𑀲𑁄𑀘𑀢𑀺. 𑀓𑀺𑀮𑀫𑀢𑀻𑀢𑀺 𑀓𑀸𑀬𑁂 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑁂𑀦 𑀓𑀺𑀮𑀫𑀢𑀺. 𑀧𑀭𑀺𑀤𑁂𑀯𑀢𑀻𑀢𑀺 𑀯𑀸𑀘𑀸𑀬 𑀧𑀭𑀺𑀤𑁂𑀯𑀢𑀺. 𑀉𑀭𑀢𑁆𑀢𑀸𑀴𑀺𑀦𑁆𑀢𑀺 𑀉𑀭𑀁 𑀢𑀸𑀴𑁂𑀢𑁆𑀯𑀸. 𑀓𑀦𑁆𑀤𑀢𑀻𑀢𑀺 𑀭𑁄𑀤𑀢𑀺. 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺 𑀯𑀺𑀲𑀜𑁆𑀜𑀻 𑀯𑀺𑀬 𑀲𑀫𑁆𑀫𑀽𑀴𑁆𑀳𑁄 𑀳𑁄𑀢𑀺. 𑀫𑁄𑀖𑀦𑁆𑀢𑀺 𑀢𑀼𑀘𑁆𑀙𑀁. 𑀅𑀨𑀮𑁄𑀢𑀺 𑀦𑀺𑀧𑁆𑀨𑀮𑁄. 𑀆𑀭𑀓𑁆𑀔𑀸𑀥𑀺𑀓𑀭𑀡𑀦𑁆𑀢𑀺 𑀆𑀭𑀓𑁆𑀔𑀓𑀸𑀭𑀡𑀸. 𑀓𑀺𑀦𑁆𑀢𑀻𑀢𑀺 𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦. 𑀬𑀫𑁆𑀧𑀺 𑀫𑁂𑀢𑀺 𑀬𑀫𑁆𑀧𑀺 𑀫𑀬𑁆𑀳𑀁 𑀓𑀲𑀺𑀓𑀫𑁆𑀫𑀸𑀤𑀻𑀦𑀺 𑀓𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀁 𑀥𑀦𑀁 𑀅𑀳𑁄𑀲𑀺. 𑀢𑀫𑁆𑀧𑀺 𑀦𑁄 𑀦𑀢𑁆𑀣𑀻𑀢𑀺 𑀢𑀫𑁆𑀧𑀺 𑀅𑀫𑁆𑀳𑀸𑀓𑀁 𑀇𑀤𑀸𑀦𑀺 𑀦𑀢𑁆𑀣𑀺.

𑁧𑁬𑁮. 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀓𑀸𑀫𑀳𑁂𑀢𑀽𑀢𑀺𑀆𑀤𑀺𑀦𑀸𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸𑀯 𑀆𑀤𑀻𑀦𑀯𑀁 𑀤𑀻𑀧𑁂𑀢𑀺. 𑀢𑀢𑁆𑀣 𑀓𑀸𑀫𑀳𑁂𑀢𑀽𑀢𑀺 𑀓𑀸𑀫𑀧𑀘𑁆𑀘𑀬𑀸 𑀭𑀸𑀚𑀸𑀦𑁄𑀧𑀺 𑀭𑀸𑀚𑀽𑀳𑀺 𑀯𑀺𑀯𑀤𑀦𑁆𑀢𑀺. 𑀓𑀸𑀫𑀦𑀺𑀤𑀸𑀦𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀓𑀸𑀫𑁂 𑀦𑀺𑀤𑀸𑀦𑀁 𑀓𑀢𑁆𑀯𑀸 𑀯𑀺𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀸𑀥𑀺𑀓𑀭𑀡𑀦𑁆𑀢𑀺𑀧𑀺 𑀪𑀸𑀯𑀦𑀧𑀼𑀁𑀲𑀓𑀫𑁂𑀯, 𑀓𑀸𑀫𑁂 𑀅𑀥𑀺𑀓𑀭𑀡𑀁 𑀓𑀢𑁆𑀯𑀸 𑀯𑀺𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀸𑀦𑀫𑁂𑀯 𑀳𑁂𑀢𑀽𑀢𑀺 𑀕𑀸𑀫𑀦𑀺𑀕𑀫𑀦𑀕𑀭𑀲𑁂𑀦𑀸𑀧𑀢𑀺𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀦𑁆𑀢𑀭𑀸𑀤𑀻𑀦𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼 𑀯𑀺𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀓𑁆𑀓𑀫𑀦𑁆𑀢𑀻𑀢𑀺 𑀧𑀳𑀭𑀦𑁆𑀢𑀺. 𑀅𑀲𑀺𑀘𑀫𑁆𑀫𑀦𑁆𑀢𑀺 𑀅𑀲𑀺𑀜𑁆𑀘𑁂𑀯 𑀔𑁂𑀝𑀓𑀨𑀮𑀓𑀸𑀤𑀻𑀦𑀺 𑀘. 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸𑀢𑀺 𑀥𑀦𑀼𑀁 𑀕𑀳𑁂𑀢𑁆𑀯𑀸 𑀲𑀭𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸. 𑀉𑀪𑀢𑁄𑀩𑁆𑀬𑀽𑀴𑀦𑁆𑀢𑀺 𑀉𑀪𑀢𑁄 𑀭𑀸𑀲𑀺𑀪𑀽𑀢𑀁. 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀧𑀯𑀺𑀲𑀦𑁆𑀢𑀺. 𑀉𑀲𑀽𑀲𑀽𑀢𑀺 𑀓𑀡𑁆𑀟𑁂𑀲𑀼. 𑀯𑀺𑀚𑁆𑀚𑁄𑀢𑀮𑀦𑁆𑀢𑁂𑀲𑀽𑀢𑀺 𑀯𑀺𑀧𑀭𑀺𑀯𑀢𑁆𑀢𑀦𑁆𑀢𑁂𑀲𑀼. 𑀢𑁂 𑀢𑀢𑁆𑀣𑀸𑀢𑀺 𑀢𑁂 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑁂.

𑀅𑀤𑁆𑀤𑀸𑀯𑀮𑁂𑀧𑀦𑀸 𑀉𑀧𑀓𑀸𑀭𑀺𑀬𑁄𑀢𑀺 𑀘𑁂𑀢𑁆𑀣 𑀫𑀦𑀼𑀲𑁆𑀲𑀸 𑀧𑀸𑀓𑀸𑀭𑀧𑀸𑀤𑀁 𑀅𑀲𑁆𑀲𑀔𑀼𑀭𑀲𑀡𑁆𑀞𑀸𑀦𑁂𑀦 𑀇𑀝𑁆𑀞𑀓𑀸𑀳𑀺 𑀘𑀺𑀦𑀺𑀢𑁆𑀯𑀸 𑀉𑀧𑀭𑀺 𑀲𑀼𑀥𑀸𑀬 𑀮𑀺𑀫𑁆𑀧𑀦𑁆𑀢𑀺. 𑀏𑀯𑀁 𑀓𑀢𑀸 𑀧𑀸𑀓𑀸𑀭𑀧𑀸𑀤𑀸 𑀉𑀧𑀓𑀸𑀭𑀺𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸 𑀢𑀺𑀦𑁆𑀢𑁂𑀦 𑀓𑀮𑀮𑁂𑀦 𑀲𑀺𑀢𑁆𑀢𑀸 𑀅𑀤𑁆𑀤𑀸𑀯𑀮𑁂𑀧𑀦𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀢𑀸𑀲𑀁 𑀳𑁂𑀝𑁆𑀞𑀸 𑀢𑀺𑀔𑀺𑀡𑀅𑀬𑀲𑀽𑀮𑀸𑀤𑀻𑀳𑀺 𑀯𑀺𑀚𑁆𑀛𑀻𑀬𑀫𑀸𑀦𑀸𑀧𑀺 𑀧𑀸𑀓𑀸𑀭𑀲𑁆𑀲 𑀧𑀺𑀘𑁆𑀙𑀺𑀮𑀪𑀸𑀯𑁂𑀦 𑀆𑀭𑁄𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀧𑀺 𑀉𑀧𑀥𑀸𑀯𑀦𑁆𑀢𑀺𑀬𑁂𑀯. 𑀙𑀓𑀡𑀓𑀸𑀬𑀸𑀢𑀺 𑀓𑀼𑀣𑀺𑀢𑀕𑁄𑀫𑀬𑁂𑀦. 𑀅𑀪𑀺𑀯𑀕𑁆𑀕𑁂𑀦𑀸𑀢𑀺 𑀲𑀢𑀤𑀦𑁆𑀢𑁂𑀦. 𑀢𑀁 𑀅𑀝𑁆𑀞𑀤𑀦𑁆𑀢𑀸𑀓𑀸𑀭𑁂𑀦 𑀓𑀢𑁆𑀯𑀸 ‘‘𑀦𑀕𑀭𑀤𑁆𑀯𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀢𑁂 𑀉𑀧𑀭𑀺𑀤𑁆𑀯𑀸𑀭𑁂 𑀞𑀺𑀢𑀸 𑀢𑀲𑁆𑀲 𑀩𑀦𑁆𑀥𑀦𑀬𑁄𑀢𑁆𑀢𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀢𑁂𑀦 𑀅𑀪𑀺𑀯𑀕𑁆𑀕𑁂𑀦 𑀑𑀫𑀤𑁆𑀤𑀦𑁆𑀢𑀺.

𑁧𑁬𑁯. 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀻𑀢𑀺 𑀖𑀭𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺. 𑀦𑀺𑀮𑁆𑀮𑁄𑀧𑀦𑁆𑀢𑀺 𑀕𑀸𑀫𑁂 𑀧𑀳𑀭𑀺𑀢𑁆𑀯𑀸 𑀫𑀳𑀸𑀯𑀺𑀮𑁄𑀧𑀁 𑀓𑀭𑁄𑀦𑁆𑀢𑀺. 𑀏𑀓𑀸𑀕𑀸𑀭𑀺𑀓𑀦𑁆𑀢𑀺 𑀧𑀡𑁆𑀡𑀸𑀲𑀫𑀢𑁆𑀢𑀸𑀧𑀺 𑀲𑀝𑁆𑀞𑀺𑀫𑀢𑁆𑀢𑀸𑀧𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀚𑀻𑀯𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 𑀆𑀳𑀭𑀸𑀧𑁂𑀦𑁆𑀢𑀺. 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀦𑁆𑀢𑀻𑀢𑀺 𑀧𑀦𑁆𑀣𑀤𑀽𑀳𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀅𑀟𑁆𑀠𑀤𑀡𑁆𑀟𑀓𑁂𑀳𑀻𑀢𑀺 𑀫𑀼𑀕𑁆𑀕𑀭𑁂𑀳𑀺 𑀧𑀳𑀸𑀭𑀲𑀸𑀥𑀦𑀢𑁆𑀣𑀁 𑀯𑀸 𑀘𑀢𑀼𑀳𑀢𑁆𑀣𑀤𑀡𑁆𑀟𑀁 𑀤𑁆𑀯𑁂𑀥𑀸 𑀙𑁂𑀢𑁆𑀯𑀸 𑀕𑀳𑀺𑀢𑀤𑀡𑁆𑀟𑀓𑁂𑀳𑀺. 𑀩𑀺𑀮𑀗𑁆𑀕𑀣𑀸𑀮𑀺𑀓𑀦𑁆𑀢𑀺 𑀓𑀜𑁆𑀚𑀺𑀬𑀉𑀓𑁆𑀔𑀮𑀺𑀓𑀫𑁆𑀫𑀓𑀸𑀭𑀡𑀁, 𑀢𑀁 𑀓𑀭𑁄𑀦𑁆𑀢𑀸 𑀲𑀻𑀲𑀓𑀧𑀸𑀮𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀢𑁆𑀢𑀁 𑀅𑀬𑁄𑀕𑀼𑀴𑀁 𑀲𑀡𑁆𑀟𑀸𑀲𑁂𑀦 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀦𑁆𑀢𑀺, 𑀢𑁂𑀦 𑀫𑀢𑁆𑀣𑀮𑀼𑀗𑁆𑀕𑀁 𑀧𑀓𑁆𑀓𑀼𑀣𑀺𑀢𑁆𑀯𑀸 𑀉𑀧𑀭𑀺 𑀉𑀢𑁆𑀢𑀭𑀢𑀺. 𑀲𑀗𑁆𑀔𑀫𑀼𑀡𑁆𑀟𑀺𑀓𑀦𑁆𑀢𑀺 𑀲𑀗𑁆𑀔𑀫𑀼𑀡𑁆𑀟𑀓𑀫𑁆𑀫𑀓𑀸𑀭𑀡𑀁, 𑀢𑀁 𑀓𑀭𑁄𑀦𑁆𑀢𑀸 𑀉𑀢𑁆𑀢𑀭𑁄𑀝𑁆𑀞𑀉𑀪𑀢𑁄𑀓𑀡𑁆𑀡𑀘𑀽𑀴𑀺𑀓𑀕𑀴𑀯𑀸𑀝𑀧𑀭𑀺𑀘𑁆𑀙𑁂𑀤𑁂𑀦 𑀘𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀩𑁆𑀩𑀓𑁂𑀲𑁂 𑀏𑀓𑀢𑁄 𑀕𑀡𑁆𑀞𑀺𑀁 𑀓𑀢𑁆𑀯𑀸 𑀤𑀡𑁆𑀟𑀓𑁂𑀦 𑀯𑀮𑁆𑀮𑀺𑀢𑁆𑀯𑀸 𑀉𑀧𑁆𑀧𑀸𑀝𑁂𑀦𑁆𑀢𑀺, 𑀲𑀳 𑀓𑁂𑀲𑁂𑀳𑀺 𑀘𑀫𑁆𑀫𑀁 𑀉𑀝𑁆𑀞𑀳𑀢𑀺. 𑀢𑀢𑁄 𑀲𑀻𑀲𑀓𑀝𑀸𑀳𑀁 𑀣𑀽𑀮𑀲𑀓𑁆𑀔𑀭𑀸𑀳𑀺 𑀖𑀁𑀲𑀺𑀢𑁆𑀯𑀸 𑀥𑁄𑀯𑀦𑁆𑀢𑀸 𑀲𑀗𑁆𑀔𑀯𑀡𑁆𑀡𑀁 𑀓𑀭𑁄𑀦𑁆𑀢𑀺.

𑀭𑀸𑀳𑀼𑀫𑀼𑀔𑀦𑁆𑀢𑀺 𑀭𑀸𑀳𑀼𑀫𑀼𑀔𑀓𑀫𑁆𑀫𑀓𑀸𑀭𑀡𑀁, 𑀢𑀁 𑀓𑀭𑁄𑀦𑁆𑀢𑀸 𑀲𑀗𑁆𑀓𑀼𑀦𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄𑀫𑀼𑀔𑁂 𑀤𑀻𑀧𑀁 𑀚𑀸𑀮𑁂𑀦𑁆𑀢𑀺. 𑀓𑀡𑁆𑀡𑀘𑀽𑀴𑀺𑀓𑀸𑀳𑀺 𑀯𑀸 𑀧𑀝𑁆𑀞𑀸𑀬 𑀫𑀼𑀔𑀁 𑀦𑀺𑀔𑀸𑀤𑀦𑁂𑀦 𑀔𑀡𑀦𑁆𑀢𑀺. 𑀮𑁄𑀳𑀺𑀢𑀁 𑀧𑀕𑁆𑀖𑀭𑀺𑀢𑁆𑀯𑀸 𑀫𑀼𑀔𑀁 𑀧𑀽𑀭𑁂𑀢𑀺. 𑀚𑁄𑀢𑀺𑀫𑀸𑀮𑀺𑀓𑀦𑁆𑀢𑀺 𑀲𑀓𑀮𑀲𑀭𑀻𑀭𑀁 𑀢𑁂𑀮𑀧𑀺𑀮𑁄𑀢𑀺𑀓𑀸𑀬 𑀯𑁂𑀞𑁂𑀢𑁆𑀯𑀸 𑀆𑀮𑀺𑀫𑁆𑀧𑀦𑁆𑀢𑀺. 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀦𑁆𑀢𑀺 𑀳𑀢𑁆𑀣𑁂 𑀢𑁂𑀮𑀧𑀺𑀮𑁄𑀢𑀺𑀓𑀸𑀬 𑀯𑁂𑀞𑁂𑀢𑁆𑀯𑀸 𑀤𑀻𑀧𑀁 𑀯𑀺𑀬 𑀚𑀸𑀮𑁂𑀦𑁆𑀢𑀺. 𑀏𑀭𑀓𑀯𑀢𑁆𑀢𑀺𑀓𑀦𑁆𑀢𑀺 𑀏𑀭𑀓𑀯𑀢𑁆𑀢𑀓𑀫𑁆𑀫𑀓𑀸𑀭𑀡𑀁, 𑀢𑀁 𑀓𑀭𑁄𑀦𑁆𑀢𑀸 𑀕𑀻𑀯𑀢𑁄 𑀧𑀝𑁆𑀞𑀸𑀬 𑀘𑀫𑁆𑀫𑀩𑀤𑁆𑀥𑁂 𑀓𑀦𑁆𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂 𑀞𑀧𑁂𑀦𑁆𑀢𑀺. 𑀅𑀣 𑀦𑀁 𑀬𑁄𑀢𑁆𑀢𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀓𑀟𑁆𑀠𑀦𑁆𑀢𑀺. 𑀲𑁄 𑀅𑀢𑁆𑀢𑀦𑁄 𑀘𑀫𑁆𑀫𑀩𑀤𑁆𑀥𑁂 𑀅𑀓𑁆𑀓𑀫𑀺𑀢𑁆𑀯𑀸 𑀅𑀓𑁆𑀓𑀫𑀺𑀢𑁆𑀯𑀸 𑀧𑀢𑀢𑀺. 𑀘𑀻𑀭𑀓𑀯𑀸𑀲𑀺𑀓𑀦𑁆𑀢𑀺 𑀘𑀻𑀭𑀓𑀯𑀸𑀲𑀺𑀓𑀓𑀫𑁆𑀫𑀓𑀸𑀭𑀡𑀁, 𑀢𑀁 𑀓𑀭𑁄𑀦𑁆𑀢𑀸 𑀢𑀣𑁂𑀯 𑀘𑀫𑁆𑀫𑀩𑀤𑁆𑀥𑁂 𑀓𑀦𑁆𑀢𑀺𑀢𑁆𑀯𑀸 𑀓𑀝𑀺𑀬𑀁 𑀞𑀧𑁂𑀦𑁆𑀢𑀺. 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀓𑀦𑁆𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀞𑀧𑁂𑀦𑁆𑀢𑀺. 𑀉𑀧𑀭𑀺𑀫𑁂𑀳𑀺 𑀳𑁂𑀝𑁆𑀞𑀺𑀫𑀲𑀭𑀻𑀭𑀁 𑀘𑀻𑀭𑀓𑀦𑀺𑀯𑀸𑀲𑀦𑀦𑀺𑀯𑀢𑁆𑀣𑀁 𑀯𑀺𑀬 𑀳𑁄𑀢𑀺. 𑀏𑀡𑁂𑀬𑁆𑀬𑀓𑀦𑁆𑀢𑀺 𑀏𑀡𑁂𑀬𑁆𑀬𑀓𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀉𑀪𑁄𑀲𑀼 𑀓𑀧𑁆𑀧𑀭𑁂𑀲𑀼 𑀘 𑀚𑀸𑀡𑀽𑀲𑀼 𑀘 𑀅𑀬𑀯𑀮𑀬𑀸𑀦𑀺 𑀤𑀢𑁆𑀯𑀸 𑀅𑀬𑀲𑀽𑀮𑀸𑀦𑀺 𑀓𑁄𑀝𑁆𑀝𑁂𑀦𑁆𑀢𑀺. 𑀲𑁄 𑀘𑀢𑀽𑀳𑀺 𑀅𑀬𑀲𑀽𑀮𑁂𑀳𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀢𑀺. 𑀅𑀣 𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀕𑁆𑀕𑀺𑀁 𑀓𑀭𑁄𑀦𑁆𑀢𑀺. ‘‘𑀏𑀡𑁂𑀬𑁆𑀬𑀓𑁄 𑀚𑁄𑀢𑀺𑀧𑀭𑀺𑀕𑁆𑀕𑀳𑁄 𑀬𑀣𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀧𑀺 𑀇𑀤𑀫𑁂𑀯 𑀯𑀼𑀢𑁆𑀢𑀁. 𑀢𑀁 𑀓𑀸𑀮𑁂𑀦 𑀓𑀸𑀮𑀁 𑀲𑀽𑀮𑀸𑀦𑀺 𑀅𑀧𑀦𑁂𑀢𑁆𑀯𑀸 𑀘𑀢𑀽𑀳𑀺 𑀅𑀝𑁆𑀞𑀺𑀓𑁄𑀝𑀻𑀳𑀺𑀬𑁂𑀯 𑀞𑀧𑁂𑀦𑁆𑀢𑀺. 𑀏𑀯𑀭𑀽𑀧𑀸 𑀓𑀸𑀭𑀡𑀸 𑀦𑀸𑀫 𑀦𑀢𑁆𑀣𑀺.

𑀩𑀴𑀺𑀲𑀫𑀁𑀲𑀺𑀓𑀦𑁆𑀢𑀺 𑀉𑀪𑀢𑁄𑀫𑀼𑀔𑁂𑀳𑀺 𑀩𑀴𑀺𑀲𑁂𑀳𑀺 𑀧𑀳𑀭𑀺𑀢𑁆𑀯𑀸 𑀘𑀫𑁆𑀫𑀫𑀁𑀲𑀦𑁆𑀳𑀸𑀭𑀽𑀦𑀺 𑀉𑀧𑁆𑀧𑀸𑀝𑁂𑀦𑁆𑀢𑀺. 𑀓𑀳𑀸𑀧𑀡𑀺𑀓𑀦𑁆𑀢𑀺 𑀲𑀓𑀮𑀲𑀭𑀻𑀭𑀁 𑀢𑀺𑀡𑁆𑀳𑀸𑀳𑀺 𑀯𑀸𑀲𑀻𑀳𑀺 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀓𑀳𑀸𑀧𑀡𑀫𑀢𑁆𑀢𑀁 𑀓𑀳𑀸𑀧𑀡𑀫𑀢𑁆𑀢𑀁 𑀧𑀸𑀢𑁂𑀦𑁆𑀢𑀸 𑀓𑁄𑀝𑁆𑀝𑁂𑀦𑁆𑀢𑀺. 𑀔𑀸𑀭𑀸𑀧𑀢𑀘𑁆𑀙𑀺𑀓𑀦𑁆𑀢𑀺 𑀲𑀭𑀻𑀭𑀁 𑀢𑀢𑁆𑀣 𑀢𑀢𑁆𑀣 𑀆𑀯𑀼𑀥𑁂𑀳𑀺 𑀧𑀳𑀭𑀺𑀢𑁆𑀯𑀸 𑀓𑁄𑀘𑁆𑀙𑁂𑀳𑀺 𑀔𑀸𑀭𑀁 𑀖𑀁𑀲𑀦𑁆𑀢𑀺. 𑀘𑀫𑁆𑀫𑀲𑀁𑀲𑀦𑁆𑀳𑀸𑀭𑀽𑀦𑀺 𑀧𑀕𑁆𑀖𑀭𑀺𑀢𑁆𑀯𑀸 𑀲𑀯𑀦𑁆𑀢𑀺. 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸𑀯 𑀢𑀺𑀝𑁆𑀞𑀢𑀺. 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀦𑁆𑀢𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀓𑀡𑁆𑀡𑀘𑁆𑀙𑀺𑀤𑁆𑀤𑁂 𑀅𑀬𑀲𑀽𑀮𑀁 𑀓𑁄𑀝𑁆𑀝𑁂𑀢𑁆𑀯𑀸 𑀧𑀣𑀯𑀺𑀬𑀸 𑀏𑀓𑀸𑀩𑀤𑁆𑀥𑀁 𑀓𑀭𑁄𑀦𑁆𑀢𑀺. 𑀅𑀣 𑀦𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀆𑀯𑀺𑀚𑁆𑀛𑀦𑁆𑀢𑀺. 𑀧𑀮𑀸𑀮𑀧𑀻𑀞𑀓𑀦𑁆𑀢𑀺 𑀙𑁂𑀓𑁄 𑀓𑀸𑀭𑀡𑀺𑀓𑁄 𑀙𑀯𑀺𑀘𑀫𑁆𑀫𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀲𑀤𑀧𑁄𑀢𑁂𑀳𑀺 𑀅𑀝𑁆𑀞𑀻𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑁂𑀲𑀼 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀦𑁆𑀢𑀺. 𑀫𑀁𑀲𑀭𑀸𑀲𑀺𑀬𑁂𑀯 𑀳𑁄𑀢𑀺, 𑀅𑀣 𑀦𑀁 𑀓𑁂𑀲𑁂𑀳𑁂𑀯 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺. 𑀧𑀮𑀸𑀮𑀯𑀝𑁆𑀝𑀺𑀁 𑀯𑀺𑀬 𑀓𑀢𑁆𑀯𑀸 𑀧𑀦 𑀯𑁂𑀞𑁂𑀦𑁆𑀢𑀺. 𑀲𑀼𑀦𑀔𑁂𑀳𑀺𑀧𑀻𑀢𑀺 𑀓𑀢𑀺𑀧𑀬𑀸𑀦𑀺 𑀤𑀺𑀯𑀲𑀸𑀦𑀺 𑀆𑀳𑀸𑀭𑀁 𑀅𑀤𑀢𑁆𑀯𑀸 𑀙𑀸𑀢𑀓𑁂𑀳𑀺 𑀲𑀼𑀦𑀔𑁂𑀳𑀺 𑀔𑀸𑀤𑀸𑀧𑁂𑀦𑁆𑀢𑀺. 𑀢𑁂 𑀫𑀼𑀳𑀼𑀢𑁆𑀢𑁂𑀦 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀫𑁂𑀯 𑀓𑀭𑁄𑀦𑁆𑀢𑀺. 𑀲𑀫𑁆𑀧𑀭𑀸𑀬𑀺𑀓𑁄𑀢𑀺 𑀲𑀫𑁆𑀧𑀭𑀸𑀬𑁂 𑀤𑀼𑀢𑀺𑀬𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑁄𑀢𑀺 𑀅𑀢𑁆𑀣𑁄.

𑁧𑁭𑁦. 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀕𑀫𑁆𑀫 𑀓𑀸𑀫𑁂𑀲𑀼 𑀙𑀦𑁆𑀤𑀭𑀸𑀕𑁄 𑀯𑀺𑀦𑀻𑀬𑀢𑀺 𑀘𑁂𑀯 𑀧𑀳𑀻𑀬𑀢𑀺 𑀘, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀲𑀸𑀫𑀁 𑀯𑀸 𑀓𑀸𑀫𑁂 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀲𑀬𑀁 𑀯𑀸 𑀢𑁂 𑀓𑀸𑀫𑁂 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀺. 𑀢𑀣𑀢𑁆𑀢𑀸𑀬𑀸𑀢𑀺 𑀢𑀣𑀪𑀸𑀯𑀸𑀬. 𑀬𑀣𑀸𑀧𑀝𑀺𑀧𑀦𑁆𑀦𑁄𑀢𑀺 𑀬𑀸𑀬 𑀧𑀝𑀺𑀧𑀤𑀸𑀬 𑀧𑀝𑀺𑀧𑀦𑁆𑀦𑁄.

𑁧𑁭𑁧. 𑀔𑀢𑁆𑀢𑀺𑀬𑀓𑀜𑁆𑀜𑀸 𑀯𑀸𑀢𑀺𑀆𑀤𑀺 𑀅𑀧𑀭𑀺𑀢𑁆𑀢𑁂𑀦 𑀯𑀺𑀧𑀼𑀮𑁂𑀦 𑀓𑀼𑀲𑀮𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀮𑀪𑀦𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀧𑀦𑁆𑀦𑀭𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸𑀢𑀺 𑀧𑀦𑁆𑀦𑀭𑀲𑀯𑀲𑁆𑀲𑀯𑀬𑀸. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀯𑀬𑀧𑀤𑁂𑀲𑀁 𑀓𑀲𑁆𑀫𑀸 𑀕𑀡𑁆𑀳𑀸𑀢𑀺? 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀫𑀸𑀢𑀼𑀕𑀸𑀫𑀲𑁆𑀲 𑀳𑀺 𑀤𑀼𑀕𑁆𑀕𑀢𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀲𑁆𑀲𑀸𑀧𑀺 𑀏𑀢𑀲𑁆𑀫𑀺𑀁 𑀓𑀸𑀮𑁂 𑀣𑁄𑀓𑀁 𑀣𑁄𑀓𑀁 𑀯𑀡𑁆𑀡𑀸𑀬𑀢𑀦𑀁 𑀧𑀲𑀻𑀤𑀢𑀺. 𑀧𑀼𑀭𑀺𑀲𑀸𑀦𑀁 𑀧𑀦 𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀧𑀲𑀦𑁆𑀦𑀁 𑀳𑁄𑀢𑀺. 𑀦𑀸𑀢𑀺𑀤𑀻𑀖𑀸𑀢𑀺𑀆𑀤𑀻𑀳𑀺 𑀙𑀤𑁄𑀲𑀯𑀺𑀭𑀳𑀺𑀢𑀁 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀯𑀡𑁆𑀡𑀦𑀺𑀪𑀸𑀢𑀺 𑀯𑀡𑁆𑀡𑁄𑀬𑁂𑀯.

𑀚𑀺𑀡𑁆𑀡𑀦𑁆𑀢𑀺 𑀚𑀭𑀸𑀚𑀺𑀡𑁆𑀡𑀁. 𑀕𑁄𑀧𑀸𑀦𑀲𑀺𑀯𑀗𑁆𑀓𑀦𑁆𑀢𑀺 𑀕𑁄𑀧𑀸𑀦𑀲𑀻 𑀯𑀺𑀬 𑀯𑀗𑁆𑀓𑀁. 𑀪𑁄𑀕𑁆𑀕𑀦𑁆𑀢𑀺 𑀪𑀕𑁆𑀕𑀁, 𑀇𑀫𑀺𑀦𑀸𑀧𑀺𑀲𑁆𑀲 𑀯𑀗𑁆𑀓𑀪𑀸𑀯𑀫𑁂𑀯 𑀤𑀻𑀧𑁂𑀢𑀺. 𑀤𑀡𑁆𑀟𑀧𑀭𑀸𑀬𑀡𑀦𑁆𑀢𑀺 𑀤𑀡𑁆𑀟𑀧𑀝𑀺𑀲𑀭𑀡𑀁 𑀤𑀡𑁆𑀟𑀤𑀼𑀢𑀺𑀬𑀁. 𑀧𑀯𑁂𑀥𑀫𑀸𑀦𑀦𑁆𑀢𑀺 𑀓𑀫𑁆𑀧𑀫𑀸𑀦𑀁. 𑀆𑀢𑀼𑀭𑀦𑁆𑀢𑀺 𑀚𑀭𑀸𑀢𑀼𑀭𑀁. 𑀔𑀡𑁆𑀟𑀤𑀦𑁆𑀢𑀦𑁆𑀢𑀺 𑀚𑀺𑀡𑁆𑀡𑀪𑀸𑀯𑁂𑀦 𑀔𑀡𑁆𑀟𑀺𑀢𑀤𑀦𑁆𑀢𑀁. 𑀧𑀮𑀺𑀢𑀓𑁂𑀲𑀦𑁆𑀢𑀺 𑀧𑀡𑁆𑀟𑀭𑀓𑁂𑀲𑀁. 𑀯𑀺𑀮𑀽𑀦𑀦𑁆𑀢𑀺 𑀮𑀼𑀜𑁆𑀘𑀺𑀢𑁆𑀯𑀸 𑀕𑀳𑀺𑀢𑀓𑁂𑀲𑀁 𑀯𑀺𑀬 𑀔𑀮𑁆𑀮𑀸𑀝𑀁. 𑀔𑀮𑀺𑀢𑀲𑀺𑀭𑀦𑁆𑀢𑀺 𑀫𑀳𑀸𑀔𑀮𑁆𑀮𑀸𑀝𑀲𑀻𑀲𑀁. 𑀯𑀮𑀺𑀦𑀦𑁆𑀢𑀺 𑀲𑀜𑁆𑀚𑀸𑀢𑀯𑀮𑀺𑀁. 𑀢𑀺𑀮𑀓𑀸𑀳𑀢𑀕𑀢𑁆𑀢𑀦𑁆𑀢𑀺 𑀲𑁂𑀢𑀓𑀸𑀴𑀢𑀺𑀮𑀓𑁂𑀳𑀺 𑀯𑀺𑀓𑀺𑀡𑁆𑀡𑀲𑀭𑀻𑀭𑀁. 𑀆𑀩𑀸𑀥𑀺𑀓𑀦𑁆𑀢𑀺 𑀩𑁆𑀬𑀸𑀥𑀺𑀓𑀁. 𑀤𑀼𑀓𑁆𑀔𑀺𑀢𑀦𑁆𑀢𑀺 𑀤𑀼𑀓𑁆𑀔𑀧𑀢𑁆𑀢𑀁.

𑀩𑀸𑀴𑁆𑀳𑀕𑀺𑀮𑀸𑀦𑀦𑁆𑀢𑀺 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑀁. 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀦𑁆𑀢𑀺 𑀆𑀫𑀓𑀲𑀼𑀲𑀸𑀦𑁂 𑀧𑀸𑀢𑀺𑀢𑀁. 𑀲𑁂𑀲𑀫𑁂𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀫𑁂𑀯. 𑀇𑀥𑀸𑀧𑀺 𑀦𑀺𑀩𑁆𑀩𑀸𑀦𑀁𑀬𑁂𑀯 𑀙𑀦𑁆𑀤𑀭𑀸𑀕𑀯𑀺𑀦𑀬𑁄.

𑁧𑁭𑁩. 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀸𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀢𑁆𑀢𑀦𑁄𑀧𑀺 𑀤𑀼𑀓𑁆𑀔𑀢𑁆𑀣𑀸𑀬 𑀦 𑀘𑁂𑀢𑁂𑀢𑀺. 𑀅𑀩𑁆𑀬𑀸𑀩𑀚𑁆𑀛𑀁𑀬𑁂𑀯𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑀫𑁂𑀯.

𑁧𑁭𑁪. 𑀬𑀁, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸𑀢𑀺, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸, 𑀢𑀲𑁆𑀫𑀸 𑀅𑀬𑀁 𑀅𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑁄𑀯 𑀯𑁂𑀤𑀦𑀸𑀬 𑀆𑀤𑀻𑀦𑀯𑁄𑀢𑀺 𑀅𑀢𑁆𑀣𑁄, 𑀦𑀺𑀲𑁆𑀲𑀭𑀡𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.