𑁨. 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑀯𑁂𑀲𑀸𑀮𑀺𑀦𑀕𑀭𑀯𑀡𑁆𑀡𑀦𑀸

𑁧𑁪𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀁. 𑀢𑀢𑁆𑀣 𑀯𑁂𑀲𑀸𑀮𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀁 𑀓𑀺𑀭 𑀅𑀧𑀭𑀸𑀧𑀭𑀁 𑀯𑀺𑀲𑀸𑀮𑀻𑀪𑀽𑀢𑀢𑀸𑀬 ‘‘𑀯𑁂𑀲𑀸𑀮𑀻’’𑀢𑀺 𑀲𑀗𑁆𑀔𑀁 𑀕𑀢𑀁. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀓𑀣𑀸 𑁋 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀕𑀩𑁆𑀪𑁄 𑀲𑀡𑁆𑀞𑀸𑀲𑀺. 𑀲𑀸 𑀜𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀤𑁂𑀲𑀺. 𑀭𑀸𑀚𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀸𑀲𑀺. 𑀲𑀸 𑀲𑀫𑁆𑀫𑀸 𑀧𑀭𑀺𑀳𑀭𑀻𑀬𑀫𑀸𑀦𑀸 𑀕𑀩𑁆𑀪𑀧𑀭𑀺𑀧𑀸𑀓𑀓𑀸𑀮𑁂 𑀯𑀺𑀚𑀸𑀬𑀦𑀖𑀭𑀁 𑀧𑀸𑀯𑀺𑀲𑀺. 𑀧𑀼𑀜𑁆𑀜𑀯𑀦𑁆𑀢𑀻𑀦𑀁 𑀧𑀘𑁆𑀘𑀽𑀲𑀲𑀫𑀬𑁂 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀲𑀸 𑀘 𑀢𑀸𑀲𑀁 𑀅𑀜𑁆𑀜𑀢𑀭𑀸, 𑀢𑁂𑀦 𑀧𑀘𑁆𑀘𑀽𑀲𑀲𑀫𑀬𑁂 𑀅𑀮𑀢𑁆𑀢𑀓𑀧𑀝𑀮𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀲𑀤𑀺𑀲𑀁 𑀫𑀁𑀲𑀧𑁂𑀲𑀺𑀁 𑀯𑀺𑀚𑀸𑀬𑀺. 𑀢𑀢𑁄 ‘‘𑀅𑀜𑁆𑀜𑀸 𑀤𑁂𑀯𑀺𑀬𑁄 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀦𑁆𑀢𑀺, 𑀅𑀕𑁆𑀕𑀫𑀳𑁂𑀲𑀻 𑀫𑀁𑀲𑀧𑁂𑀲𑀺𑀦𑁆𑀢𑀺 𑀭𑀜𑁆𑀜𑁄 𑀧𑀼𑀭𑀢𑁄 𑀫𑀫 𑀅𑀯𑀡𑁆𑀡𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦 𑀅𑀯𑀡𑁆𑀡𑀪𑀬𑁂𑀦 𑀢𑀁 𑀫𑀁𑀲𑀧𑁂𑀲𑀺𑀁 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀭𑀸𑀚𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑁂𑀢𑁆𑀯𑀸 𑀕𑀗𑁆𑀕𑀸𑀬 𑀲𑁄𑀢𑁂 𑀧𑀓𑁆𑀔𑀺𑀧𑀸𑀧𑁂𑀲𑀺. 𑀫𑀦𑀼𑀲𑁆𑀲𑁂𑀳𑀺 𑀙𑀟𑁆𑀟𑀺𑀢𑀫𑀢𑁆𑀢𑁂 𑀤𑁂𑀯𑀢𑀸 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀁𑀲𑀼. 𑀲𑀼𑀯𑀡𑁆𑀡𑀧𑀝𑁆𑀝𑀓𑀜𑁆𑀘𑁂𑀢𑁆𑀣 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 ‘‘𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀧𑀚𑀸’’𑀢𑀺 𑀮𑀺𑀔𑀺𑀢𑁆𑀯𑀸 𑀩𑀦𑁆𑀥𑀺𑀁𑀲𑀼. 𑀢𑀢𑁄 𑀢𑀁 𑀪𑀸𑀚𑀦𑀁 𑀊𑀫𑀺𑀪𑀬𑀸𑀤𑀻𑀳𑀺 𑀅𑀦𑀼𑀧𑀤𑁆𑀤𑀼𑀢𑀁 𑀕𑀗𑁆𑀕𑀸𑀲𑁄𑀢𑁂𑀦 𑀧𑀸𑀬𑀸𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀢𑀸𑀧𑀲𑁄 𑀕𑁄𑀧𑀸𑀮𑀓𑀓𑀼𑀮𑀁 𑀦𑀺𑀲𑁆𑀲𑀸𑀬 𑀕𑀗𑁆𑀕𑀸𑀢𑀻𑀭𑁂 𑀯𑀺𑀳𑀭𑀢𑀺. 𑀲𑁄 𑀧𑀸𑀢𑁄𑀯 𑀕𑀗𑁆𑀕𑀁 𑀑𑀢𑀺𑀡𑁆𑀡𑁄 𑀢𑀁 𑀪𑀸𑀚𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀅𑀕𑁆𑀕𑀳𑁂𑀲𑀺. 𑀅𑀣𑁂𑀢𑁆𑀣 𑀢𑀁 𑀅𑀓𑁆𑀔𑀭𑀧𑀝𑁆𑀝𑀺𑀓𑀁 𑀭𑀸𑀚𑀫𑀼𑀤𑁆𑀤𑀺𑀓𑀸𑀮𑀜𑁆𑀙𑀦𑀁 𑀘 𑀤𑀺𑀲𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀢𑀁 𑀫𑀁𑀲𑀧𑁂𑀲𑀺𑀁 𑀅𑀤𑁆𑀤𑀲, 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀲𑀺𑀬𑀸 𑀕𑀩𑁆𑀪𑁄, 𑀢𑀣𑀸 𑀳𑀺𑀲𑁆𑀲 𑀤𑀼𑀕𑁆𑀕𑀦𑁆𑀥𑀧𑀽𑀢𑀺𑀓𑀪𑀸𑀯𑁄 𑀦𑀢𑁆𑀣𑀻’’𑀢𑀺. 𑀅𑀲𑁆𑀲𑀫𑀁 𑀦𑁂𑀢𑁆𑀯𑀸 𑀲𑀼𑀤𑁆𑀥𑁂 𑀑𑀓𑀸𑀲𑁂 𑀞𑀧𑁂𑀲𑀺. 𑀅𑀣 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀤𑁆𑀯𑁂 𑀫𑀁𑀲𑀧𑁂𑀲𑀺𑀬𑁄 𑀅𑀳𑁂𑀲𑀼𑀁. 𑀢𑀸𑀧𑀲𑁄 𑀤𑀺𑀲𑁆𑀯𑀸 𑀲𑀸𑀥𑀼𑀢𑀭𑀁 𑀞𑀧𑁂𑀲𑀺. 𑀢𑀢𑁄 𑀧𑀼𑀦 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀏𑀓𑀫𑁂𑀓𑀺𑀲𑁆𑀲𑀸 𑀫𑀁𑀲𑀧𑁂𑀲𑀺𑀬𑀸 𑀳𑀢𑁆𑀣𑀧𑀸𑀤𑀲𑀻𑀲𑀸𑀦𑀫𑀢𑁆𑀣𑀸𑀬 𑀧𑀜𑁆𑀘 𑀧𑀜𑁆𑀘 𑀧𑀺𑀴𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀅𑀣 𑀢𑀢𑁄 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀏𑀓𑀸 𑀫𑀁𑀲𑀧𑁂𑀲𑀺 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑁄 𑀤𑀸𑀭𑀓𑁄, 𑀏𑀓𑀸 𑀤𑀸𑀭𑀺𑀓𑀸 𑀅𑀳𑁄𑀲𑀺.

𑀢𑁂𑀲𑀼 𑀢𑀸𑀧𑀲𑀲𑁆𑀲 𑀧𑀼𑀢𑁆𑀢𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺, 𑀅𑀗𑁆𑀕𑀼𑀝𑁆𑀞𑀓𑀢𑁄 𑀘𑀲𑁆𑀲 𑀔𑀻𑀭𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁄 𑀧𑀪𑀼𑀢𑀺 𑀘 𑀔𑀻𑀭𑀪𑀢𑁆𑀢𑀁 𑀅𑀮𑀪𑀺𑀢𑁆𑀣, 𑀲𑁄 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀔𑀻𑀭𑀁 𑀤𑀸𑀭𑀓𑀸𑀦𑀁 𑀫𑀼𑀔𑁂 𑀆𑀲𑀺𑀜𑁆𑀘𑀢𑀺. 𑀢𑁂𑀲𑀁 𑀉𑀤𑀭𑀁 𑀬𑀁 𑀬𑀁 𑀧𑀯𑀺𑀲𑀢𑀺, 𑀢𑀁 𑀢𑀁 𑀲𑀩𑁆𑀩𑀁 𑀫𑀡𑀺𑀪𑀸𑀚𑀦𑀕𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀏𑀯𑀁 𑀦𑀺𑀘𑁆𑀙𑀯𑀻 𑀅𑀳𑁂𑀲𑀼𑀁. 𑀅𑀧𑀭𑁂 𑀆𑀳𑀼 ‘‘𑀲𑀺𑀩𑁆𑀩𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀦𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀮𑀻𑀦𑀸 𑀙𑀯𑀺 𑀅𑀳𑁄𑀲𑀻’’𑀢𑀺. 𑀏𑀯𑀁 𑀢𑁂 𑀦𑀺𑀘𑁆𑀙𑀯𑀺𑀢𑀸𑀬 𑀯𑀸 𑀮𑀻𑀦𑀘𑁆𑀙𑀯𑀺𑀢𑀸𑀬 𑀯𑀸 𑀮𑀺𑀘𑁆𑀙𑀯𑀻𑀢𑀺 𑀧𑀜𑁆𑀜𑀸𑀬𑀺𑀁𑀲𑀼.

𑀢𑀸𑀧𑀲𑁄 𑀤𑀸𑀭𑀓𑁂 𑀧𑁄𑀲𑁂𑀦𑁆𑀢𑁄 𑀉𑀲𑁆𑀲𑀽𑀭𑁂 𑀕𑀸𑀫𑀁 𑀲𑀺𑀓𑁆𑀔𑀸𑀬 𑀧𑀯𑀺𑀲𑀢𑀺, 𑀅𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀢𑀺. 𑀢𑀲𑁆𑀲 𑀢𑀁 𑀩𑁆𑀬𑀸𑀧𑀸𑀭𑀁 𑀜𑀢𑁆𑀯𑀸 𑀕𑁄𑀧𑀸𑀮𑀓𑀸 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀧𑀩𑁆𑀩𑀚𑀺𑀢𑀸𑀦𑀁 𑀤𑀸𑀭𑀓𑀧𑁄𑀲𑀦𑀁 𑀧𑀮𑀺𑀩𑁄𑀥𑁄, 𑀅𑀫𑁆𑀳𑀸𑀓𑀁 𑀤𑀸𑀭𑀓𑁂 𑀤𑁂𑀣, 𑀫𑀬𑀁 𑀧𑁄𑀲𑁂𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺. 𑀢𑀸𑀧𑀲𑁄 𑀲𑀸𑀥𑀽𑀢𑀺 𑀧𑀝𑀺𑀲𑁆𑀲𑀼𑀡𑀺. 𑀕𑁄𑀧𑀸𑀮𑀓𑀸 𑀤𑀼𑀢𑀺𑀬𑀤𑀺𑀯𑀲𑁂 𑀫𑀕𑁆𑀕𑀁 𑀲𑀫𑀁 𑀓𑀢𑁆𑀯𑀸 𑀧𑀼𑀧𑁆𑀨𑁂𑀳𑀺 𑀑𑀓𑀺𑀭𑀺𑀢𑁆𑀯𑀸 𑀥𑀚𑀧𑀝𑀸𑀓𑀸 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀽𑀭𑀺𑀬𑁂𑀳𑀺 𑀯𑀚𑁆𑀚𑀫𑀸𑀦𑁂𑀳𑀺 𑀅𑀲𑁆𑀲𑀫𑀁 𑀆𑀕𑀢𑀸. 𑀢𑀸𑀧𑀲𑁄 𑁋 ‘‘𑀫𑀳𑀸𑀧𑀼𑀜𑁆𑀜𑀸 𑀤𑀸𑀭𑀓𑀸 𑀅𑀧𑁆𑀧𑀫𑀸𑀤𑁂𑀦 𑀯𑀟𑁆𑀠𑁂𑀣, 𑀯𑀟𑁆𑀠𑁂𑀢𑁆𑀯𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑁄𑀣, 𑀧𑀜𑁆𑀘𑀕𑁄𑀭𑀲𑁂𑀦 𑀭𑀸𑀚𑀸𑀦𑀁 𑀢𑁄𑀲𑁂𑀢𑁆𑀯𑀸 𑀪𑀽𑀫𑀺𑀪𑀸𑀕𑀁 𑀕𑀳𑁂𑀢𑁆𑀯𑀸 𑀦𑀕𑀭𑀁 𑀫𑀸𑀧𑁂𑀣, 𑀢𑀢𑁆𑀣 𑀓𑀼𑀫𑀸𑀭𑀁 𑀅𑀪𑀺𑀲𑀺𑀜𑁆𑀘𑀣𑀸’’𑀢𑀺 𑀯𑀢𑁆𑀯𑀸 𑀤𑀸𑀭𑀓𑁂 𑀅𑀤𑀸𑀲𑀺. 𑀢𑁂 𑀲𑀸𑀥𑀽𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀤𑀸𑀭𑀓𑁂 𑀦𑁂𑀢𑁆𑀯𑀸 𑀧𑁄𑀲𑁂𑀲𑀼𑀁.

𑀤𑀸𑀭𑀓𑀸 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀓𑀻𑀴𑀦𑁆𑀢𑀸 𑀯𑀺𑀯𑀸𑀤𑀝𑁆𑀞𑀸𑀦𑁂𑀲𑀼 𑀅𑀜𑁆𑀜𑁂 𑀕𑁄𑀧𑀸𑀮𑀓𑀤𑀸𑀭𑀓𑁂 𑀳𑀢𑁆𑀣𑁂𑀦𑀧𑀺 𑀧𑀸𑀤𑁂𑀦𑀧𑀺 𑀧𑀳𑀭𑀦𑁆𑀢𑀺. 𑀢𑁂 𑀭𑁄𑀤𑀦𑁆𑀢𑀺. ‘‘𑀓𑀺𑀲𑁆𑀲 𑀭𑁄𑀤𑀣𑀸’’𑀢𑀺 𑀘 𑀫𑀸𑀢𑀸𑀧𑀺𑀢𑀽𑀳𑀺 𑀯𑀼𑀢𑁆𑀢𑀸 ‘‘𑀇𑀫𑁂 𑀦𑀺𑀫𑁆𑀫𑀸𑀢𑀸𑀧𑀺𑀢𑀺𑀓𑀸 𑀢𑀸𑀧𑀲𑀧𑁄𑀲𑀺𑀢𑀸 𑀅𑀫𑁆𑀳𑁂 𑀅𑀢𑀺𑀧𑀳𑀭𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀢𑁄 𑀢𑁂𑀲𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀇𑀫𑁂 𑀤𑀸𑀭𑀓𑀸 𑀅𑀜𑁆𑀜𑁂 𑀤𑀸𑀭𑀓𑁂 𑀯𑀺𑀦𑀸𑀲𑁂𑀦𑁆𑀢𑀺 𑀤𑀼𑀓𑁆𑀔𑀸𑀧𑁂𑀦𑁆𑀢𑀺, 𑀦 𑀇𑀫𑁂 𑀲𑀗𑁆𑀕𑀳𑁂𑀢𑀩𑁆𑀩𑀸, 𑀯𑀚𑁆𑀚𑁂𑀢𑀩𑁆𑀩𑀸 𑀇𑀫𑁂’’𑀢𑀺 𑀆𑀳𑀁𑀲𑀼. 𑀢𑀢𑁄 𑀧𑀪𑀼𑀢𑀺 𑀓𑀺𑀭 𑀲𑁄 𑀧𑀤𑁂𑀲𑁄 𑀯𑀚𑁆𑀚𑀻𑀢𑀺 𑀯𑀼𑀘𑁆𑀘𑀢𑀺 𑀬𑁄𑀚𑀦𑀲𑀢𑀺𑀓𑁄 𑀧𑀭𑀺𑀫𑀸𑀡𑁂𑀦. 𑀅𑀣 𑀢𑀁 𑀧𑀤𑁂𑀲𑀁 𑀕𑁄𑀧𑀸𑀮𑀓𑀸 𑀭𑀸𑀚𑀸𑀦𑀁 𑀢𑁄𑀲𑁂𑀢𑁆𑀯𑀸 𑀅𑀕𑁆𑀕𑀳𑁂𑀲𑀼𑀁. 𑀢𑀢𑁆𑀣 𑀘 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀓𑀼𑀫𑀸𑀭𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀸𑀚𑀸𑀦𑀁 𑀅𑀓𑀁𑀲𑀼. 𑀢𑀸𑀬 𑀘𑀲𑁆𑀲 𑀤𑀸𑀭𑀺𑀓𑀸𑀬 𑀲𑀤𑁆𑀥𑀺𑀁 𑀯𑀺𑀯𑀸𑀳𑀁 𑀓𑀢𑁆𑀯𑀸 𑀓𑀢𑀺𑀓𑀁 𑀅𑀓𑀁𑀲𑀼 ‘‘𑀩𑀸𑀳𑀺𑀭𑀓𑀤𑀸𑀭𑀺𑀓𑀸 𑀦 𑀆𑀦𑁂𑀢𑀩𑁆𑀩𑀸, 𑀇𑀢𑁄 𑀤𑀸𑀭𑀺𑀓𑀸 𑀦 𑀓𑀲𑁆𑀲𑀘𑀺 𑀤𑀸𑀢𑀩𑁆𑀩𑀸’’𑀢𑀺. 𑀢𑁂𑀲𑀁 𑀧𑀞𑀫𑀲𑀁𑀯𑀸𑀲𑁂𑀦 𑀤𑁆𑀯𑁂 𑀤𑀸𑀭𑀓𑀸 𑀚𑀸𑀢𑀸 𑀥𑀻𑀢𑀸 𑀘 𑀧𑀼𑀢𑁆𑀢𑁄 𑀘. 𑀏𑀯𑀁 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀤𑁆𑀯𑁂 𑀤𑁆𑀯𑁂 𑀚𑀸𑀢𑀸. 𑀢𑀢𑁄 𑀢𑁂𑀲𑀁 𑀤𑀸𑀭𑀓𑀸𑀦𑀁 𑀬𑀣𑀸𑀓𑁆𑀓𑀫𑀁 𑀯𑀟𑁆𑀠𑀦𑁆𑀢𑀸𑀦𑀁 𑀆𑀭𑀸𑀫𑀼𑀬𑁆𑀬𑀸𑀦𑀦𑀺𑀯𑀸𑀲𑀝𑁆𑀞𑀸𑀦𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀕𑀳𑁂𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑀸 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀕𑀸𑀯𑀼𑀢𑀦𑁆𑀢𑀭𑁂𑀦 𑀕𑀸𑀯𑀼𑀢𑀦𑁆𑀢𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀸𑀮𑀻𑀓𑀢𑀢𑁆𑀢𑀸 𑀯𑁂𑀲𑀸𑀮𑀻𑀢𑁆𑀯𑁂𑀯 𑀦𑀸𑀫𑀁 𑀚𑀸𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑁂𑀲𑀸𑀮𑀺𑀬𑀦𑁆𑀢𑀺 𑀏𑀯𑀁 𑀦𑀸𑀫𑀓𑁂 𑀦𑀕𑀭𑁂’’𑀢𑀺.

𑁦𑁧. 𑀩𑀳𑀺𑀦𑀕𑀭𑁂𑀢𑀺 𑀦𑀕𑀭𑀲𑁆𑀲 𑀩𑀳𑀺, 𑀦 𑀅𑀫𑁆𑀩𑀧𑀸𑀮𑀺𑀯𑀦𑀁 𑀯𑀺𑀬 𑀅𑀦𑁆𑀢𑁄𑀦𑀕𑀭𑀲𑁆𑀫𑀺𑀁. 𑀅𑀬𑀁 𑀧𑀦 𑀚𑀻𑀯𑀓𑀫𑁆𑀩𑀯𑀦𑀁 𑀯𑀺𑀬 𑀦𑀕𑀭𑀲𑁆𑀲 𑀩𑀳𑀺𑀤𑁆𑀥𑀸 𑀯𑀦𑀲𑀡𑁆𑀟𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑀳𑀺𑀦𑀕𑀭𑁂’’𑀢𑀺. 𑀅𑀧𑀭𑀧𑀼𑀭𑁂𑀢𑀺 𑀧𑀼𑀭𑀲𑁆𑀲 𑀅𑀧𑀭𑁂, 𑀧𑀘𑁆𑀙𑀺𑀫𑀤𑀺𑀲𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀯𑀦𑀲𑀡𑁆𑀟𑁂𑀢𑀺 𑀲𑁄 𑀓𑀺𑀭 𑀯𑀦𑀲𑀡𑁆𑀟𑁄 𑀦𑀕𑀭𑀲𑁆𑀲 𑀧𑀘𑁆𑀙𑀺𑀫𑀤𑀺𑀲𑀸𑀬𑀁 𑀕𑀸𑀯𑀼𑀢𑀫𑀢𑁆𑀢𑁂 𑀞𑀸𑀦𑁂. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺𑀁 𑀓𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀘𑀗𑁆𑀓𑀫𑀮𑁂𑀡𑀓𑀼𑀝𑀺𑀫𑀡𑁆𑀟𑀧𑀸𑀤𑀻𑀦𑀺 𑀧𑀢𑀺𑀝𑁆𑀞𑀧𑁂𑀲𑀼𑀁, 𑀪𑀕𑀯𑀸 𑀢𑀢𑁆𑀣 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑀭𑀧𑀼𑀭𑁂 𑀯𑀦𑀲𑀡𑁆𑀟𑁂’’𑀢𑀺. 𑀲𑀼𑀦𑀓𑁆𑀔𑀢𑁆𑀢𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀮𑀺𑀘𑁆𑀙𑀯𑀻𑀦𑀁 𑀧𑀦 𑀧𑀼𑀢𑁆𑀢𑀢𑁆𑀢𑀸 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑁄. 𑀅𑀘𑀺𑀭𑀧𑀓𑁆𑀓𑀦𑁆𑀢𑁄𑀢𑀺 𑀯𑀺𑀩𑁆𑀪𑀫𑀺𑀢𑁆𑀯𑀸 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦 𑀅𑀥𑀼𑀦𑀸𑀧𑀓𑁆𑀓𑀦𑁆𑀢𑁄. 𑀧𑀭𑀺𑀲𑀢𑀻𑀢𑀺 𑀧𑀭𑀺𑀲𑀫𑀚𑁆𑀛𑁂. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀏𑀢𑁆𑀣 𑀫𑀦𑀼𑀲𑁆𑀲𑀥𑀫𑁆𑀫𑀸 𑀦𑀸𑀫 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀸. 𑀢𑁂 𑀧𑀝𑀺𑀲𑁂𑀥𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀓𑀲𑁆𑀫𑀸? 𑀉𑀧𑀸𑀭𑀫𑁆𑀪𑀪𑀬𑀸. 𑀯𑁂𑀲𑀸𑀮𑀺𑀬𑀜𑁆𑀳𑀺 𑀩𑀳𑀽 𑀫𑀦𑀼𑀲𑁆𑀲𑀸 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑀸 𑀩𑀼𑀤𑁆𑀥𑀫𑀸𑀫𑀓𑀸 𑀥𑀫𑁆𑀫𑀫𑀸𑀫𑀓𑀸 𑀲𑀗𑁆𑀖𑀫𑀸𑀫𑀓𑀸. 𑀢𑁂 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲𑀸𑀢𑀺 𑀯𑀼𑀢𑁆𑀢𑁂 𑀢𑁆𑀯𑀁 𑀓𑀢𑁆𑀣 𑀪𑀕𑀯𑀦𑁆𑀢𑀁 𑀧𑀸𑀡𑀁 𑀳𑀦𑀦𑁆𑀢𑀁 𑀅𑀤𑁆𑀤𑀲, 𑀓𑀢𑁆𑀣 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀺? 𑀓𑀺𑀁 𑀤𑀦𑁆𑀢𑀸 𑀫𑁂 𑀅𑀢𑁆𑀣𑀻𑀢𑀺 𑀧𑀸𑀲𑀸𑀡𑀲𑀓𑁆𑀔𑀭𑀸 𑀔𑀸𑀤𑀲𑀺, 𑀅𑀳𑀺𑀦𑀗𑁆𑀕𑀼𑀝𑁆𑀞𑁂 𑀕𑀡𑁆𑀳𑀺𑀢𑀼𑀁 𑀯𑀸𑀬𑀫𑀲𑀺, 𑀓𑀓𑀘𑀤𑀦𑁆𑀢𑁂𑀲𑀼 𑀧𑀼𑀧𑁆𑀨𑀸𑀯𑀴𑀺𑀓𑀁 𑀓𑀻𑀴𑀺𑀢𑀼𑀁 𑀇𑀘𑁆𑀙𑀲𑀺? 𑀫𑀼𑀔𑀢𑁄 𑀢𑁂 𑀤𑀦𑁆𑀢𑁂 𑀧𑀸𑀢𑁂𑀲𑁆𑀲𑀸𑀫𑀸𑀢𑀺 𑀯𑀤𑁂𑀬𑁆𑀬𑀼𑀁. 𑀲𑁄 𑀢𑁂𑀲𑀁 𑀉𑀧𑀸𑀭𑀫𑁆𑀪𑀪𑀬𑀸 𑀏𑀯𑀁 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀯𑁂𑀲𑀸𑀮𑀺𑀦𑀕𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀤𑀺𑀯𑀡𑁆𑀡𑀦𑀸

𑀢𑀢𑁄 𑀉𑀢𑁆𑀢𑀭𑀺𑀁 𑀧𑀦 𑀯𑀺𑀲𑁂𑀲𑀸𑀥𑀺𑀕𑀫𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄𑀢𑀺 𑀆𑀳.

𑀢𑀢𑁆𑀣 𑀅𑀮𑀫𑀭𑀺𑀬𑀁 𑀜𑀸𑀢𑀼𑀦𑁆𑀢𑀺 𑀅𑀮𑀫𑀭𑀺𑀬𑁄, 𑀅𑀭𑀺𑀬𑀪𑀸𑀯𑀸𑀬 𑀲𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀜𑀸𑀡𑀤𑀲𑁆𑀲𑀦𑀫𑁂𑀯 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄. 𑀅𑀮𑀫𑀭𑀺𑀬𑁄 𑀘 𑀲𑁄 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀘𑀸𑀢𑀺 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄. 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀺 𑀯𑀺𑀧𑀲𑁆𑀲𑀦𑀸𑀧𑀺 𑀫𑀕𑁆𑀕𑁄𑀧𑀺 𑀨𑀮𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀯𑀼𑀘𑁆𑀘𑀢𑀺. ‘‘𑀅𑀧𑁆𑀧𑀫𑀢𑁆𑀢𑁄 𑀲𑀫𑀸𑀦𑁄 𑀜𑀸𑀡𑀤𑀲𑁆𑀲𑀦𑀁 𑀆𑀭𑀸𑀥𑁂𑀢𑀻’’𑀢𑀺 (𑀫. 𑀦𑀺. 𑁧.𑁩𑁧𑁧) 𑀳𑀺 𑀏𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼 𑀜𑀸𑀡𑀤𑀲𑁆𑀲𑀦𑀁 𑀦𑀸𑀫. ‘‘𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁩𑁫) 𑀏𑀢𑁆𑀣 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. ‘‘𑀅𑀪𑀩𑁆𑀩𑀸 𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬𑀸’’𑀢𑀺 (𑀅. 𑀦𑀺. 𑁪.𑁧𑁯𑁬) 𑀏𑀢𑁆𑀣 𑀫𑀕𑁆𑀕𑁄. ‘‘𑀅𑀬𑀫𑀜𑁆𑀜𑁄 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼 𑀯𑀺𑀳𑀸𑀭𑁄’’𑀢𑀺 (𑀫. 𑀦𑀺. 𑁧.𑁩𑁨𑁮) 𑀏𑀢𑁆𑀣 𑀨𑀮𑀁. ‘‘𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺, 𑀅𑀓𑀼𑀧𑁆𑀧𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺 (𑀫𑀳𑀸𑀯. 𑁧𑁬) 𑀏𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. ‘‘𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺 𑀲𑀢𑁆𑀢𑀸𑀳𑀓𑀸𑀮𑀗𑁆𑀓𑀢𑁄 𑀆𑀴𑀸𑀭𑁄 𑀓𑀸𑀴𑀸𑀫𑁄’’𑀢𑀺 (𑀫. 𑀦𑀺. 𑁨.𑁩𑁪𑁦) 𑀏𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀜𑁆𑀳𑀺 𑀲𑁄 𑀪𑀕𑀯𑀢𑁄 𑀧𑀝𑀺𑀲𑁂𑀥𑁂𑀢𑀺.

𑀢𑀓𑁆𑀓𑀧𑀭𑀺𑀬𑀸𑀳𑀢𑀦𑁆𑀢𑀺 𑀇𑀫𑀺𑀦𑀸 𑀆𑀘𑀭𑀺𑀬𑀁 𑀧𑀝𑀺𑀩𑀸𑀳𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀆𑀘𑀭𑀺𑀬𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀼𑀔𑀼𑀫𑀁 𑀥𑀫𑁆𑀫𑀦𑁆𑀢𑀭𑀁 𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀺, 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀧𑀦 𑀢𑀓𑁆𑀓𑁂𑀢𑁆𑀯𑀸 𑀏𑀯𑀁 𑀪𑀯𑀺𑀲𑁆𑀲𑀢𑀺 𑀏𑀯𑀁 𑀪𑀯𑀺𑀲𑁆𑀲𑀢𑀻𑀢𑀺 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺. 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀦𑁆𑀢𑀺 𑀇𑀫𑀺𑀦𑀸 𑀘𑀲𑁆𑀲 𑀮𑁄𑀓𑀺𑀬𑀧𑀜𑁆𑀜𑀁 𑀅𑀦𑀼𑀚𑀸𑀦𑀸𑀢𑀺. 𑀲𑀫𑀡𑁄 𑀕𑁄𑀢𑀫𑁄 𑀧𑀜𑁆𑀜𑀯𑀸, 𑀲𑁄 𑀢𑀁 𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀇𑀦𑁆𑀤𑀯𑀚𑀺𑀭𑀽𑀧𑀫𑀁 𑀯𑀻𑀫𑀁𑀲𑀁 𑀏𑀯𑀁 𑀯𑀝𑁆𑀝𑀺𑀲𑁆𑀲𑀢𑀺, 𑀏𑀯𑀁 𑀯𑀝𑁆𑀝𑀺𑀲𑁆𑀲𑀢𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀅𑀦𑀼𑀘𑀭𑀸𑀧𑁂𑀢𑁆𑀯𑀸 𑀯𑀻𑀫𑀁𑀲𑀸𑀬 𑀅𑀦𑀼𑀘𑀭𑀺𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀲𑀬𑀁𑀧𑀝𑀺𑀪𑀸𑀦𑀦𑁆𑀢𑀺 𑀇𑀫𑀺𑀦𑀸𑀲𑁆𑀲 𑀥𑀫𑁆𑀫𑁂𑀲𑀼 𑀧𑀘𑁆𑀘𑀓𑁆𑀔𑀪𑀸𑀯𑀁 𑀧𑀝𑀺𑀩𑀸𑀳𑀢𑀺. 𑀏𑀯𑀁 𑀳𑀺𑀲𑁆𑀲 𑀅𑀳𑁄𑀲𑀺 𑁋 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀼𑀔𑀼𑀫𑀁 𑀥𑀫𑁆𑀫𑀦𑁆𑀢𑀭𑀁 𑀯𑀺𑀧𑀲𑁆𑀲𑀦𑀸 𑀯𑀸 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑀸 𑀦𑀢𑁆𑀣𑀺, 𑀅𑀬𑀁 𑀧𑀦 𑀮𑀤𑁆𑀥𑀧𑀭𑀺𑀲𑁄, 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀯𑀺𑀬 𑀦𑀁 𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑀧𑀭𑀺𑀯𑀸𑀭𑁂𑀦𑁆𑀢𑀺, 𑀲𑀼𑀨𑀼𑀲𑀺𑀢𑀁 𑀧𑀦𑀲𑁆𑀲 𑀤𑀦𑁆𑀢𑀸𑀯𑀭𑀡𑀁, 𑀫𑀼𑀤𑀼𑀓𑀸 𑀚𑀺𑀯𑁆𑀳𑀸, 𑀫𑀥𑀼𑀭𑁄 𑀲𑀭𑁄, 𑀅𑀦𑁂𑀮𑀕𑀴𑀸 𑀯𑀸𑀘𑀸, 𑀲𑁄 𑀬𑀁 𑀬𑀤𑁂𑀯𑀲𑁆𑀲 𑀉𑀧𑀝𑁆𑀞𑀸𑀢𑀺, 𑀢𑀁 𑀢𑀁 𑀕𑀳𑁂𑀢𑁆𑀯𑀸 𑀲𑀬𑀁𑀧𑀝𑀺𑀪𑀸𑀦𑀁 𑀓𑀣𑁂𑀦𑁆𑀢𑁄 𑀫𑀳𑀸𑀚𑀦𑀁 𑀭𑀜𑁆𑀚𑁂𑀢𑀻𑀢𑀺.

𑀬𑀲𑁆𑀲 𑀘 𑀔𑁆𑀯𑀸𑀲𑁆𑀲 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺 𑀬𑀲𑁆𑀲 𑀘 𑀔𑁄 𑀅𑀢𑁆𑀣𑀸𑀬 𑀅𑀲𑁆𑀲 𑀥𑀫𑁆𑀫𑁄 𑀤𑁂𑀲𑀺𑀢𑁄. 𑀲𑁂𑀬𑁆𑀬𑀣𑀺𑀤𑀁, 𑀭𑀸𑀕𑀧𑀝𑀺𑀖𑀸𑀢𑀢𑁆𑀣𑀸𑀬 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁, 𑀤𑁄𑀲𑀧𑁆𑀧𑀝𑀺𑀖𑀸𑀢𑀢𑁆𑀣𑀸𑀬 𑀫𑁂𑀢𑁆𑀢𑀸𑀪𑀸𑀯𑀦𑀸, 𑀫𑁄𑀳𑀧𑀝𑀺𑀖𑀸𑀢𑀢𑁆𑀣𑀸𑀬 𑀧𑀜𑁆𑀘 𑀥𑀫𑁆𑀫𑀸, 𑀯𑀺𑀢𑀓𑁆𑀓𑀽𑀧𑀘𑁆𑀙𑁂𑀤𑀸𑀬 𑀆𑀦𑀸𑀧𑀸𑀦𑀲𑁆𑀲𑀢𑀺.

𑀲𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀲𑁄 𑀥𑀫𑁆𑀫𑁄 𑀬𑁄 𑀢𑀁 𑀬𑀣𑀸𑀤𑁂𑀲𑀺𑀢𑀁 𑀓𑀭𑁄𑀢𑀺, 𑀢𑀲𑁆𑀲 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀓𑀸𑀭𑀡𑁂𑀦 𑀯𑀝𑁆𑀝𑀤𑀼𑀓𑁆𑀔𑀓𑁆𑀔𑀬𑀸𑀬 𑀦𑀺𑀬𑁆𑀬𑀸𑀢𑀺 𑀕𑀘𑁆𑀙𑀢𑀺 𑀢𑀫𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀤𑀻𑀧𑁂𑀢𑀺. 𑀇𑀤𑀁 𑀧𑀦𑁂𑀲 𑀦 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦 𑀯𑀤𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀥𑀫𑁆𑀫𑁄 𑀅𑀦𑀺𑀬𑁆𑀬𑀸𑀦𑀺𑀓𑁄𑀢𑀺 𑀏𑀯𑀫𑁂𑀯𑀁 𑀧𑀯𑁂𑀤𑁂𑀬𑁆𑀬, 𑀦 𑀧𑀦 𑀲𑀓𑁆𑀓𑁄𑀢𑀺 𑀯𑀢𑁆𑀢𑀼𑀁. 𑀓𑀲𑁆𑀫𑀸? 𑀉𑀧𑀸𑀭𑀫𑁆𑀪𑀪𑀬𑀸. 𑀯𑁂𑀲𑀸𑀮𑀺𑀬𑀜𑁆𑀳𑀺 𑀩𑀳𑀽 𑀲𑁄𑀢𑀸𑀧𑀦𑁆𑀦-𑀲𑀓𑀤𑀸𑀕𑀸𑀫𑀺-𑀅𑀦𑀸𑀕𑀸𑀫𑀺𑀉𑀧𑀸𑀲𑀓𑀸. 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀲𑀼𑀦𑀓𑁆𑀔𑀢𑁆𑀢 𑀢𑁆𑀯𑀁 𑀪𑀕𑀯𑀢𑀸 𑀤𑁂𑀲𑀺𑀢𑀥𑀫𑁆𑀫𑁄 𑀅𑀦𑀺𑀬𑁆𑀬𑀸𑀦𑀺𑀓𑁄𑀢𑀺 𑀯𑀤𑀲𑀺, 𑀬𑀤𑀺 𑀅𑀬𑀁 𑀥𑀫𑁆𑀫𑁄 𑀅𑀦𑀺𑀬𑁆𑀬𑀸𑀦𑀺𑀓𑁄, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀇𑀫𑁂 𑀓𑀲𑁆𑀫𑀸 𑀏𑀢𑁆𑀢𑀓𑀸 𑀲𑁄𑀢𑀸𑀧𑀦𑁆𑀦𑀸 𑀚𑀸𑀢𑀸, 𑀏𑀢𑁆𑀢𑀓𑀸 𑀲𑀓𑀤𑀸𑀕𑀸𑀫𑀻, 𑀏𑀢𑁆𑀢𑀓𑀸 𑀅𑀦𑀸𑀕𑀸𑀫𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀉𑀧𑀸𑀭𑀫𑁆𑀪𑀁 𑀓𑀭𑁂𑀬𑁆𑀬𑀼’’𑀦𑁆𑀢𑀺. 𑀲𑁄 𑀇𑀫𑀺𑀦𑀸 𑀉𑀧𑀸𑀭𑀫𑁆𑀪𑀪𑀬𑁂𑀦 𑀅𑀦𑀺𑀬𑁆𑀬𑀸𑀦𑀺𑀓𑁄𑀢𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀚𑁆𑀚𑀼𑀦𑁂𑀦 𑀯𑀺𑀲𑁆𑀲𑀝𑁆𑀞𑀓𑀡𑁆𑀟𑀁 𑀯𑀺𑀬 𑀅𑀲𑁆𑀲 𑀥𑀫𑁆𑀫𑁄 𑀅𑀫𑁄𑀖𑁄 𑀦𑀺𑀬𑁆𑀬𑀸𑀢𑀺, 𑀅𑀩𑁆𑀪𑀦𑁆𑀢𑀭𑁂 𑀧𑀦𑀲𑁆𑀲 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀯𑀤𑀢𑀺.

𑀅𑀲𑁆𑀲𑁄𑀲𑀺 𑀔𑁄𑀢𑀺 𑀯𑁂𑀲𑀸𑀮𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑀲𑁂𑀝𑁆𑀞𑀺𑀓𑀼𑀮𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀲𑀫𑀚𑁆𑀛𑁂 𑀏𑀯𑀁 𑀪𑀸𑀲𑀫𑀸𑀦𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀡𑀺, 𑀦 𑀧𑀦 𑀧𑀝𑀺𑀲𑁂𑀥𑁂𑀲𑀺. 𑀓𑀲𑁆𑀫𑀸? 𑀓𑀸𑀭𑀼𑀜𑁆𑀜𑀢𑀸𑀬. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑀅𑀬𑀁 𑀓𑀼𑀤𑁆𑀥𑁄 𑀛𑀸𑀬𑀫𑀸𑀦𑀁 𑀯𑁂𑀴𑀼𑀯𑀦𑀁 𑀯𑀺𑀬 𑀧𑀓𑁆𑀔𑀺𑀢𑁆𑀢𑀮𑁄𑀡𑀁 𑀉𑀤𑁆𑀥𑀦𑀁 𑀯𑀺𑀬 𑀘 𑀓𑁄𑀥𑀯𑀲𑁂𑀦 𑀧𑀝𑀧𑀝𑀸𑀬𑀢𑀺, 𑀫𑀬𑀸 𑀧𑀝𑀺𑀩𑀸𑀳𑀺𑀢𑁄 𑀧𑀦 𑀫𑀬𑀺𑀧𑀺 𑀆𑀖𑀸𑀢𑀁 𑀩𑀦𑁆𑀥𑀺𑀲𑁆𑀲𑀢𑀺, 𑀏𑀯𑀫𑀲𑁆𑀲 𑀢𑀣𑀸𑀕𑀢𑁂 𑀘 𑀫𑀬𑀺 𑀘𑀸𑀢𑀺 𑀤𑁆𑀯𑀻𑀲𑀼 𑀚𑀦𑁂𑀲𑀼 𑀆𑀖𑀸𑀢𑁄 𑀅𑀢𑀺𑀪𑀸𑀭𑀺𑀬𑁄 𑀪𑀯𑀺𑀲𑁆𑀲𑀢𑀻𑀢𑀺 𑀓𑀸𑀭𑀼𑀜𑁆𑀜𑀢𑀸𑀬 𑀦 𑀧𑀝𑀺𑀲𑁂𑀥𑁂𑀲𑀺. 𑀅𑀧𑀺 𑀘𑀲𑁆𑀲 𑀏𑀯𑀁 𑀅𑀳𑁄𑀲𑀺, 𑀩𑀼𑀤𑁆𑀥𑀸𑀦𑀁 𑀅𑀯𑀡𑁆𑀡𑀓𑀣𑀦𑀁 𑀦𑀸𑀫 𑀧𑀼𑀡𑁆𑀡𑀘𑀦𑁆𑀤𑁂 𑀤𑁄𑀲𑀸𑀭𑁄𑀧𑀦𑀲𑀤𑀺𑀲𑀁, 𑀓𑁄 𑀇𑀫𑀲𑁆𑀲 𑀓𑀣𑀁 𑀕𑀡𑁆𑀳𑀺𑀲𑁆𑀲𑀢𑀺? 𑀲𑀬𑀫𑁂𑀯 𑀔𑁂𑀴𑁂 𑀧𑀘𑁆𑀙𑀺𑀦𑁆𑀦𑁂 𑀫𑀼𑀔𑁂 𑀲𑀼𑀓𑁆𑀔𑁂 𑀑𑀭𑀫𑀺𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦 𑀧𑀝𑀺𑀲𑁂𑀥𑁂𑀲𑀺. 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄𑀢𑀺 𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀢𑁄 𑀅𑀧𑀕𑀢𑁄.

𑁧𑁪𑁭. 𑀓𑁄𑀥𑀦𑁄𑀢𑀺 𑀘𑀡𑁆𑀟𑁄 𑀨𑀭𑀼𑀲𑁄. 𑀫𑁄𑀖𑀧𑀼𑀭𑀺𑀲𑁄𑀢𑀺 𑀢𑀼𑀘𑁆𑀙𑀧𑀼𑀭𑀺𑀲𑁄. 𑀬𑀲𑁆𑀲 𑀳𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀺, 𑀢𑀁 𑀩𑀼𑀤𑁆𑀥𑀸 ‘‘𑀫𑁄𑀖𑀧𑀼𑀭𑀺𑀲𑁄’’𑀢𑀺 𑀯𑀤𑀦𑁆𑀢𑀺. 𑀉𑀧𑀦𑀺𑀲𑁆𑀲𑀬𑁂 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀫𑀕𑁆𑀕𑁂 𑀯𑀸 𑀨𑀮𑁂 𑀯𑀸 𑀅𑀲𑀢𑀺 ‘‘𑀫𑁄𑀖𑀧𑀼𑀭𑀺𑀲𑁄’’𑀢𑀺 𑀯𑀤𑀦𑁆𑀢𑀺𑀬𑁂𑀯. 𑀇𑀫𑀲𑁆𑀲 𑀧𑀦 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀲𑀫𑀼𑀘𑁆𑀙𑀺𑀦𑁆𑀦𑁄𑀬𑁂𑀯, 𑀢𑁂𑀦 𑀢𑀁 ‘‘𑀫𑁄𑀖𑀧𑀼𑀭𑀺𑀲𑁄’’𑀢𑀺 𑀆𑀳. 𑀓𑁄𑀥𑀸 𑀘 𑀧𑀦𑀲𑁆𑀲 𑀏𑀲𑀸 𑀯𑀸𑀘𑀸 𑀪𑀸𑀲𑀺𑀢𑀸𑀢𑀺 𑀏𑀲𑀸 𑀘 𑀧𑀦𑀲𑁆𑀲 𑀯𑀸𑀘𑀸 𑀓𑁄𑀥𑁂𑀦 𑀪𑀸𑀲𑀺𑀢𑀸.

𑀓𑀲𑁆𑀫𑀸 𑀧𑀦𑁂𑀲 𑀪𑀕𑀯𑀢𑁄 𑀓𑀼𑀤𑁆𑀥𑁄𑀢𑀺? 𑀅𑀬𑀜𑁆𑀳𑀺 𑀧𑀼𑀩𑁆𑀩𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 𑀓𑀣𑁂𑀲𑀺. 𑀲𑁄 𑀤𑀺𑀩𑁆𑀩𑀘𑀓𑁆𑀔𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀑𑀮𑁄𑀓𑁂𑀦𑁆𑀢𑁄 𑀦𑀦𑁆𑀤𑀦𑀯𑀦𑀘𑀺𑀢𑁆𑀢𑀮𑀢𑀸𑀯𑀦𑀨𑀸𑀭𑀼𑀲𑀓𑀯𑀦𑀫𑀺𑀲𑁆𑀲𑀓𑀯𑀦𑁂𑀲𑀼 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁂 𑀤𑁂𑀯𑀧𑀼𑀢𑁆𑀢𑁂 𑀘 𑀤𑁂𑀯𑀥𑀻𑀢𑀭𑁄 𑀘 𑀤𑀺𑀲𑁆𑀯𑀸 𑀏𑀢𑁂𑀲𑀁 𑀏𑀯𑀭𑀽𑀧𑀸𑀬 𑀅𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀞𑀺𑀢𑀸𑀦𑀁 𑀓𑀻𑀯𑀫𑀥𑀼𑀭𑁄 𑀦𑀼 𑀔𑁄 𑀲𑀤𑁆𑀤𑁄 𑀪𑀯𑀺𑀲𑁆𑀲𑀢𑀻𑀢𑀺 𑀲𑀤𑁆𑀤𑀁 𑀲𑁄𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀤𑀲𑀩𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀪𑀕𑀯𑀸 𑀧𑀦𑀲𑁆𑀲 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀬𑀸 𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀻𑀢𑀺 𑀜𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀦 𑀓𑀣𑁂𑀲𑀺. 𑀦 𑀳𑀺 𑀩𑀼𑀤𑁆𑀥𑀸 𑀉𑀧𑀦𑀺𑀲𑁆𑀲𑀬𑀯𑀺𑀭𑀳𑀺𑀢 𑀢𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀣𑁂𑀦𑁆𑀢𑀺. 𑀲𑁄 𑀪𑀕𑀯𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀧𑀞𑀫𑀁 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺𑀁, 𑀲𑁄 ‘𑀫𑀬𑁆𑀳𑀁 𑀢𑀁 𑀲𑀫𑁆𑀧𑀚𑁆𑀚𑀢𑀼 𑀯𑀸 𑀫𑀸 𑀯𑀸 𑀲𑀫𑁆𑀧𑀚𑁆𑀚𑀢𑀽’𑀢𑀺 𑀓𑀣𑁂𑀲𑀺. 𑀅𑀳𑀁 𑀧𑀦 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂𑀦 𑀢𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺𑀁, 𑀢𑀁 𑀫𑁂 𑀦 𑀓𑀣𑁂𑀲𑀺. 𑀅𑀤𑁆𑀥𑀸𑀲𑁆𑀲 𑀏𑀯𑀁 𑀳𑁄𑀢𑀺 ‘𑀅𑀬𑀁 𑀭𑀸𑀚𑀧𑀩𑁆𑀩𑀚𑀺𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀲𑀯𑀸𑀦𑀁 𑀔𑀬𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀫𑀬𑀸 𑀲𑀫𑀲𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀯𑀲𑁂𑀦 𑀫𑀬𑁆𑀳𑀁 𑀦 𑀓𑀣𑁂𑀢𑀻’’𑀢𑀺. 𑀪𑀺𑀬𑁆𑀬𑁄𑀲𑁄 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀕𑀺𑀳𑀺𑀪𑀸𑀯𑀁 𑀧𑀢𑁆𑀯𑀸𑀧𑀺 𑀦 𑀢𑀼𑀡𑁆𑀳𑀻𑀪𑀽𑀢𑁄 𑀯𑀺𑀘𑀭𑀢𑀺. 𑀤𑀲𑀩𑀮𑀁 𑀧𑀦 𑀅𑀲𑀢𑀸 𑀢𑀼𑀘𑁆𑀙𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁄 𑀯𑀺𑀘𑀭𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀓𑁄𑀥𑀸 𑀘 𑀧𑀦𑀲𑁆𑀲 𑀏𑀲𑀸 𑀯𑀸𑀘𑀸 𑀪𑀸𑀲𑀺𑀢𑀸’’𑀢𑀺.

𑀯𑀡𑁆𑀡𑁄 𑀳𑁂𑀲𑁄, 𑀲𑀸𑀭𑀺𑀧𑀼𑀢𑁆𑀢𑀸𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑁂𑀦 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀦 𑀏𑀢𑀤𑀢𑁆𑀣𑀫𑁂𑀯 𑀯𑀸𑀬𑀸𑀫𑁄 𑀓𑀢𑁄 ‘‘𑀤𑁂𑀲𑀦𑀸𑀥𑀫𑁆𑀫𑁄 𑀫𑁂 𑀦𑀺𑀬𑁆𑀬𑀸𑀦𑀺𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀬𑁄 𑀏𑀯𑀁 𑀯𑀤𑁂𑀬𑁆𑀬, 𑀲𑁄 𑀯𑀡𑁆𑀡𑀁𑀬𑁂𑀯 𑀢𑀣𑀸𑀕𑀢𑀲𑁆𑀲 𑀪𑀸𑀲𑀢𑀺. 𑀯𑀡𑁆𑀡𑁄 𑀳𑁂𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑀲𑁆𑀲 𑀕𑀼𑀡𑁄 𑀏𑀲𑁄 𑀢𑀣𑀸𑀕𑀢𑀲𑁆𑀲, 𑀦 𑀅𑀕𑀼𑀡𑁄𑀢𑀺 𑀤𑀲𑁆𑀲𑁂𑀢𑀺.

𑀅𑀬𑀫𑁆𑀧𑀺 𑀳𑀺 𑀦𑀸𑀫 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀲𑀼𑀦𑀓𑁆𑀔𑀢𑁆𑀢𑁂𑀦 𑀧𑀝𑀺𑀲𑀺𑀤𑁆𑀥𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀅𑀢𑁆𑀢𑀦𑀺 𑀅𑀢𑁆𑀣𑀺𑀢𑀁 𑀤𑀲𑁆𑀲𑁂𑀢𑀺. 𑀪𑀕𑀯𑀸 𑀓𑀺𑀭 𑀅𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀦𑀓𑁆𑀔𑀢𑁆𑀢𑁄 𑀫𑁄𑀖𑀧𑀼𑀭𑀺𑀲𑁄 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄𑀢𑀺 𑀯𑀤𑀢𑀺. 𑀫𑀬𑁆𑀳𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀤𑀲𑀩𑀮𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑁂𑀧𑀺 𑀘𑁂𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀬𑁂𑀯. 𑀏𑀯𑀭𑀽𑀧𑁂𑀲𑀼 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂𑀲𑀼 𑀏𑀓𑀲𑁆𑀲𑀸𑀧𑀺 𑀯𑀺𑀚𑀸𑀦𑀦𑀲𑀫𑀢𑁆𑀣𑀁 𑀥𑀫𑁆𑀫𑀦𑁆𑀯𑀬𑀫𑀢𑁆𑀢𑀫𑁆𑀧𑀺 𑀦𑀸𑀫 𑀏𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀬𑀫𑁆𑀧𑀺 𑀳𑀺 𑀦𑀸𑀫 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀅𑀦𑁆𑀯𑁂𑀢𑀻𑀢𑀺 𑀅𑀦𑁆𑀯𑀬𑁄, 𑀚𑀸𑀦𑀸𑀢𑀺, 𑀅𑀦𑀼𑀩𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀲𑁆𑀲 𑀅𑀦𑁆𑀯𑀬𑁄 𑀥𑀫𑁆𑀫𑀦𑁆𑀯𑀬𑁄, 𑀢𑀁 𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀥𑀫𑁆𑀫𑀁 𑀚𑀸𑀦𑀦𑀧𑀜𑁆𑀜𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀻𑀳𑀺 𑀏𑀯𑀭𑀽𑀧𑀫𑁆𑀧𑀺 𑀦𑀸𑀫 𑀫𑀬𑁆𑀳𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀅𑀢𑁆𑀣𑀻𑀢𑀺 𑀚𑀸𑀦𑀺𑀢𑀼𑀁 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀦𑁆𑀯𑀬𑁄𑀧𑀺 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀻𑀲𑀼𑀧𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀲𑀩𑀮𑀜𑀸𑀡𑀸𑀤𑀺𑀯𑀡𑁆𑀡𑀦𑀸

𑁧𑁪𑁮. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀦𑀦𑁆𑀢𑀭𑀁 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀬𑀲𑁆𑀫𑀸 𑀧𑀦 𑀢𑀸𑀲𑀼 𑀯𑀼𑀢𑁆𑀢𑀸𑀲𑀼 𑀉𑀧𑀭𑀺 𑀤𑀲𑀩𑀮𑀜𑀸𑀡𑀁 𑀦 𑀧𑀭𑀺𑀧𑀽𑀭𑀢𑀺, 𑀢𑀲𑁆𑀫𑀸 𑀢𑀸 𑀅𑀯𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀤𑀲𑀩𑀮𑀜𑀸𑀡𑀁 𑀧𑀭𑀺𑀧𑀽𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀤𑀲 𑀔𑁄 𑀧𑀦𑀺𑀫𑀸𑀦𑀺 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀣𑀸𑀕𑀢𑀩𑀮𑀸𑀦𑀻𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀢𑀣𑀸𑀕𑀢𑀲𑁆𑀲𑁂𑀯 𑀩𑀮𑀸𑀦𑀺. 𑀬𑀣𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀩𑀮𑀸𑀦𑀺 𑀧𑀼𑀜𑁆𑀜𑀼𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀕𑀢𑀸𑀦𑀺, 𑀢𑀣𑀸 𑀆𑀕𑀢𑀩𑀮𑀸𑀦𑀻𑀢𑀺𑀧𑀺 𑀅𑀢𑁆𑀣𑁄. 𑀢𑀢𑁆𑀣 𑀤𑀼𑀯𑀺𑀥𑀁 𑀢𑀣𑀸𑀕𑀢𑀩𑀮𑀁 𑀓𑀸𑀬𑀩𑀮𑀜𑁆𑀘 𑀜𑀸𑀡𑀩𑀮𑀜𑁆𑀘. 𑀢𑁂𑀲𑀼 𑀓𑀸𑀬𑀩𑀮𑀁 𑀳𑀢𑁆𑀣𑀺𑀓𑀼𑀮𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀓𑀸𑀮𑀸𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀙𑀤𑁆𑀤𑀦𑁆𑀢𑀺𑀫𑁂 𑀤𑀲𑀸’’𑀢𑀺.

𑀇𑀫𑀸𑀦𑀺 𑀳𑀺 𑀤𑀲 𑀳𑀢𑁆𑀣𑀺𑀓𑀼𑀮𑀸𑀦𑀺. 𑀢𑀢𑁆𑀣 𑀓𑀸𑀮𑀸𑀯𑀓𑀦𑁆𑀢𑀺 𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀁 𑀤𑀝𑁆𑀞𑀩𑁆𑀩𑀁. 𑀬𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀓𑀸𑀬𑀩𑀮𑀁, 𑀢𑀁 𑀏𑀓𑀲𑁆𑀲 𑀓𑀸𑀮𑀸𑀯𑀓𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀓𑀸𑀮𑀸𑀯𑀓𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀕𑀗𑁆𑀕𑁂𑀬𑁆𑀬𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀕𑀗𑁆𑀕𑁂𑀬𑁆𑀬𑀸𑀦𑀁, 𑀢𑀁 𑀏𑀓𑀲𑁆𑀲 𑀧𑀡𑁆𑀟𑀭𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀡𑁆𑀟𑀭𑀸𑀦𑀁, 𑀢𑀁 𑀏𑀓𑀲𑁆𑀲 𑀢𑀫𑁆𑀩𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀢𑀫𑁆𑀩𑀸𑀦𑀁, 𑀢𑀁 𑀏𑀓𑀲𑁆𑀲 𑀧𑀺𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀺𑀗𑁆𑀕𑀮𑀸𑀦𑀁, 𑀢𑀁 𑀏𑀓𑀲𑁆𑀲 𑀕𑀦𑁆𑀥𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀕𑀦𑁆𑀥𑀳𑀢𑁆𑀣𑀻𑀦𑀁, 𑀢𑀁 𑀏𑀓𑀲𑁆𑀲 𑀫𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀫𑀗𑁆𑀕𑀮𑀸𑀦𑀁, 𑀢𑀁 𑀏𑀓𑀲𑁆𑀲 𑀳𑁂𑀫𑀯𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀳𑁂𑀫𑀯𑀢𑀸𑀦𑀁, 𑀢𑀁 𑀏𑀓𑀲𑁆𑀲 𑀉𑀧𑁄𑀲𑀣𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀉𑀧𑁄𑀲𑀣𑀸𑀦𑀁, 𑀢𑀁 𑀏𑀓𑀲𑁆𑀲 𑀙𑀤𑁆𑀤𑀦𑁆𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁 𑀢𑀁 𑀏𑀓𑀲𑁆𑀲 𑀢𑀣𑀸𑀕𑀢𑀲𑁆𑀲. 𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮𑀦𑁆𑀢𑀺𑀧𑀺 𑀇𑀤𑀫𑁂𑀯 𑀯𑀼𑀘𑁆𑀘𑀢𑀺. 𑀢𑀤𑁂𑀢𑀁 𑀧𑀓𑀢𑀺𑀳𑀢𑁆𑀣𑀺𑀕𑀡𑀦𑀸𑀬 𑀳𑀢𑁆𑀣𑀻𑀦𑀁 𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁 𑀳𑁄𑀢𑀺. 𑀇𑀤𑀁 𑀢𑀸𑀯 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀁.

𑀜𑀸𑀡𑀩𑀮𑀁 𑀧𑀦 𑀧𑀸𑀴𑀺𑀬𑀁 𑀢𑀸𑀯 𑀆𑀕𑀢𑀫𑁂𑀯. 𑀤𑀲𑀩𑀮𑀜𑀸𑀡𑀁, 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀁, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁. 𑀲𑀁𑀬𑀼𑀢𑁆𑀢𑀓𑁂 (𑀲𑀁. 𑀦𑀺. 𑁨.𑁩𑁪) 𑀆𑀕𑀢𑀸𑀦𑀺 𑀢𑁂𑀲𑀢𑁆𑀢𑀢𑀺 𑀜𑀸𑀡𑀸𑀦𑀺 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀸𑀦𑀻𑀢𑀺 𑀏𑀯𑀁 𑀅𑀜𑁆𑀜𑀸𑀦𑀺𑀧𑀺 𑀅𑀦𑁂𑀓𑀸𑀦𑀺 𑀜𑀸𑀡𑀲𑀳𑀲𑁆𑀲𑀸𑀦𑀺, 𑀏𑀢𑀁 𑀜𑀸𑀡𑀩𑀮𑀁 𑀦𑀸𑀫. 𑀇𑀥𑀸𑀧𑀺 𑀜𑀸𑀡𑀩𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀜𑀸𑀡𑀜𑁆𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦 𑀘 𑀩𑀮𑀦𑁆𑀢𑀺 𑀯𑀼𑀢𑁆𑀢𑀁.

𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀬𑁂𑀳𑀺 𑀤𑀲𑀳𑀺 𑀜𑀸𑀡𑀩𑀮𑁂𑀳𑀺 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄. 𑀆𑀲𑀪𑀁 𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀝𑁆𑀞𑀸𑀦𑀁 𑀉𑀢𑁆𑀢𑀫𑀝𑁆𑀞𑀸𑀦𑀁. 𑀆𑀲𑀪𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸, 𑀢𑁂𑀲𑀁 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀕𑀯𑀲𑀢𑀚𑁂𑀝𑁆𑀞𑀓𑁄 𑀉𑀲𑀪𑁄, 𑀕𑀯𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄. 𑀯𑀚𑀲𑀢𑀚𑁂𑀝𑁆𑀞𑀓𑁄 𑀯𑀸 𑀉𑀲𑀪𑁄, 𑀯𑀚𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄. 𑀲𑀩𑁆𑀩𑀕𑀯𑀲𑁂𑀝𑁆𑀞𑁄 𑀲𑀩𑁆𑀩𑀧𑀭𑀺𑀲𑁆𑀲𑀬𑀲𑀳𑁄 𑀲𑁂𑀢𑁄 𑀧𑀸𑀲𑀸𑀤𑀺𑀓𑁄 𑀫𑀳𑀸𑀪𑀸𑀭𑀯𑀳𑁄 𑀅𑀲𑀦𑀺𑀲𑀢𑀲𑀤𑁆𑀤𑁂𑀳𑀺𑀧𑀺 𑀅𑀓𑀫𑁆𑀧𑀦𑀺𑀬𑁄 𑀦𑀺𑀲𑀪𑁄, 𑀲𑁄 𑀇𑀥 𑀉𑀲𑀪𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀇𑀤𑀫𑁆𑀧𑀺 𑀳𑀺 𑀢𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁. 𑀞𑀸𑀦𑀦𑁆𑀢𑀺 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑀁. 𑀇𑀤𑀁 𑀧𑀦 𑀆𑀲𑀪𑀁 𑀯𑀺𑀬𑀸𑀢𑀺 𑀆𑀲𑀪𑀁. 𑀬𑀣𑁂𑀯 𑀳𑀺 𑀦𑀺𑀲𑀪𑀲𑀗𑁆𑀔𑀸𑀢𑁄 𑀉𑀲𑀪𑁄 𑀉𑀲𑀪𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀢𑀣𑀸𑀕𑀢𑁄𑀧𑀺 𑀤𑀲𑀳𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑀧𑀸𑀤𑁂𑀳𑀺 𑀅𑀝𑁆𑀞𑀧𑀭𑀺𑀲𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦 𑀅𑀓𑀫𑁆𑀧𑀺𑀬𑁄 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺. 𑀏𑀯𑀁 𑀢𑀺𑀝𑁆𑀞𑀫𑀸𑀦𑁄𑀯 𑀢𑀁 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀉𑀧𑀕𑀘𑁆𑀙𑀢𑀺 𑀦 𑀧𑀘𑁆𑀘𑀓𑁆𑀔𑀸𑀢𑀺 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀻’’𑀢𑀺.

𑀧𑀭𑀺𑀲𑀸𑀲𑀽𑀢𑀺 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼. 𑀲𑀻𑀳𑀦𑀸𑀤𑀁 𑀦𑀤𑀢𑀻𑀢𑀺 𑀲𑁂𑀝𑁆𑀞𑀦𑀸𑀤𑀁 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺, 𑀲𑀻𑀳𑀦𑀸𑀤𑀲𑀤𑀺𑀲𑀁 𑀯𑀸 𑀦𑀸𑀤𑀁 𑀦𑀤𑀢𑀺. 𑀅𑀬𑀫𑀢𑁆𑀣𑁄 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀬𑀣𑀸 𑀯𑀸 𑀲𑀻𑀳𑁄 𑀲𑀳𑀦𑀢𑁄 𑀳𑀦𑀦𑀢𑁄 𑀘 𑀲𑀻𑀳𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀣𑀸𑀕𑀢𑁄 𑀮𑁄𑀓𑀥𑀫𑁆𑀫𑀸𑀦𑀁 𑀲𑀳𑀦𑀢𑁄 𑀧𑀭𑀧𑁆𑀧𑀯𑀸𑀤𑀸𑀦𑀜𑁆𑀘 𑀳𑀦𑀦𑀢𑁄 𑀲𑀻𑀳𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀻𑀳𑀲𑁆𑀲 𑀦𑀸𑀤𑀁 𑀲𑀻𑀳𑀦𑀸𑀤𑀁. 𑀢𑀢𑁆𑀣 𑀬𑀣𑀸 𑀲𑀻𑀳𑁄 𑀲𑀻𑀳𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀢𑁆𑀣 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀏𑀯𑀁 𑀢𑀣𑀸𑀕𑀢𑀲𑀻𑀳𑁄𑀧𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀇𑀢𑀺 𑀭𑀽𑀧𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀸𑀯𑀺𑀥𑀤𑁂𑀲𑀦𑀸𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀻’’𑀢𑀺. 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀦𑁆𑀢𑀺 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀯𑀺𑀲𑀺𑀝𑁆𑀞𑀁. 𑀘𑀓𑁆𑀓-𑀲𑀤𑁆𑀤𑁄 𑀧𑀦𑀸𑀬𑀁 𑁋

𑀲𑀫𑁆𑀧𑀢𑁆𑀢𑀺𑀬𑀁 𑀮𑀓𑁆𑀔𑀡𑁂 𑀘, 𑀭𑀣𑀗𑁆𑀕𑁂 𑀇𑀭𑀺𑀬𑀸𑀧𑀣𑁂;

𑀤𑀸𑀦𑁂 𑀭𑀢𑀦𑀥𑀫𑁆𑀫𑀽𑀭-𑀘𑀓𑁆𑀓𑀸𑀤𑀻𑀲𑀼 𑀘 𑀤𑀺𑀲𑁆𑀲𑀢𑀺;

𑀥𑀫𑁆𑀫𑀘𑀓𑁆𑀓𑁂 𑀇𑀥 𑀫𑀢𑁄, 𑀢𑀜𑁆𑀘 𑀤𑁆𑀯𑁂𑀥𑀸 𑀯𑀺𑀪𑀸𑀯𑀬𑁂.

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁧) 𑀳𑀺 𑀅𑀬𑀁 𑀲𑀫𑁆𑀧𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀻’’𑀢𑀺 (𑀤𑀻. 𑀦𑀺. 𑁨.𑁩𑁫) 𑀏𑀢𑁆𑀣 𑀮𑀓𑁆𑀔𑀡𑁂. ‘‘𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺 (𑀥. 𑀧. 𑁧) 𑀏𑀢𑁆𑀣 𑀭𑀣𑀗𑁆𑀕𑁂. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁯) 𑀏𑀢𑁆𑀣 𑀇𑀭𑀺𑀬𑀸𑀧𑀣𑁂. ‘‘𑀤𑀤𑀁 𑀪𑀼𑀜𑁆𑀚 𑀫𑀸 𑀘 𑀧𑀫𑀸𑀤𑁄, 𑀘𑀓𑁆𑀓𑀁 𑀧𑀯𑀢𑁆𑀢𑀬 𑀲𑀩𑁆𑀩𑀧𑀸𑀡𑀺𑀦’’𑀦𑁆𑀢𑀺 (𑀚𑀸. 𑁧.𑁭.𑁧𑁪𑁯) 𑀏𑀢𑁆𑀣 𑀤𑀸𑀦𑁂. ‘‘𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺 (𑀤𑀻. 𑀦𑀺. 𑁨.𑁨𑁪𑁩) 𑀏𑀢𑁆𑀣 𑀭𑀢𑀦𑀘𑀓𑁆𑀓𑁂. ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓’’𑀦𑁆𑀢𑀺 (𑀲𑀼. 𑀦𑀺. 𑁫𑁬𑁨) 𑀏𑀢𑁆𑀣 𑀥𑀫𑁆𑀫𑀘𑀓𑁆𑀓𑁂. ‘‘𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺 (𑀚𑀸. 𑁧.𑁧.𑁧𑁦𑁪; 𑁧.𑁫.𑁧𑁦𑁩) 𑀏𑀢𑁆𑀣 𑀉𑀭𑀘𑀓𑁆𑀓𑁂. ‘‘𑀔𑀼𑀭𑀧𑀭𑀺𑀬𑀦𑁆𑀢𑁂𑀦 𑀘𑁂𑀧𑀺 𑀘𑀓𑁆𑀓𑁂𑀦𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁬) 𑀏𑀢𑁆𑀣 𑀧𑀳𑀭𑀡𑀘𑀓𑁆𑀓𑁂. ‘‘𑀅𑀲𑀦𑀺𑀯𑀺𑀘𑀓𑁆𑀓’’𑀦𑁆𑀢𑀺 (𑀤𑀻. 𑀦𑀺. 𑁩.𑁬𑁧; 𑀲𑀁. 𑀦𑀺. 𑁨.𑁧𑁬𑁨) 𑀏𑀢𑁆𑀣 𑀅𑀲𑀦𑀺𑀫𑀡𑁆𑀟𑀮𑁂. 𑀇𑀥 𑀧𑀦𑀸𑀬𑀁 𑀥𑀫𑁆𑀫𑀘𑀓𑁆𑀓𑁂 𑀅𑀥𑀺𑀧𑁆𑀧𑁂𑀢𑁄.

𑀢𑀁 𑀧𑀦 𑀥𑀫𑁆𑀫𑀘𑀓𑁆𑀓𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀧𑀝𑀺𑀯𑁂𑀥𑀜𑀸𑀡𑀜𑁆𑀘𑁂𑀯 𑀤𑁂𑀲𑀦𑀸𑀜𑀸𑀡𑀜𑁆𑀘. 𑀢𑀢𑁆𑀣 𑀧𑀜𑁆𑀜𑀸𑀧𑀪𑀸𑀯𑀺𑀢𑀁 𑀅𑀢𑁆𑀢𑀦𑁄 𑀅𑀭𑀺𑀬𑀩𑀮𑀸𑀯𑀳𑀁 𑀧𑀝𑀺𑀯𑁂𑀥𑀜𑀸𑀡𑀁. 𑀓𑀭𑀼𑀡𑀸𑀧𑀪𑀸𑀯𑀺𑀢𑀁 𑀲𑀸𑀯𑀓𑀸𑀦𑀁 𑀅𑀭𑀺𑀬𑀩𑀮𑀸𑀯𑀳𑀁 𑀤𑁂𑀲𑀦𑀸𑀜𑀸𑀡𑀁. 𑀢𑀢𑁆𑀣 𑀧𑀝𑀺𑀯𑁂𑀥𑀜𑀸𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀼𑀲𑀺𑀢𑀪𑀯𑀦𑀢𑁄 𑀯𑀸 𑀬𑀸𑀯 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑀻𑀧𑀗𑁆𑀓𑀭𑀤𑀲𑀩𑀮𑀢𑁄 𑀧𑀝𑁆𑀞𑀸𑀬 𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑁂𑀲𑀦𑀸𑀜𑀸𑀡𑀫𑁆𑀧𑀺 𑀧𑀯𑀢𑁆𑀢𑀫𑀸𑀦𑀁 𑀧𑀯𑀢𑁆𑀢𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀬𑀸𑀯 𑀅𑀜𑁆𑀜𑀸𑀢𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸 𑀧𑀯𑀢𑁆𑀢𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀁 𑀦𑀸𑀫. 𑀢𑁂𑀲𑀼 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁, 𑀤𑁂𑀲𑀦𑀸𑀜𑀸𑀡𑀁 𑀮𑁄𑀓𑀺𑀬𑀁. 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁, 𑀩𑀼𑀤𑁆𑀥𑀸𑀦𑀁𑀬𑁂𑀯 𑀑𑀭𑀲𑀜𑀸𑀡𑀁.

𑀇𑀤𑀸𑀦𑀺 𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀬𑀸𑀦𑀺 𑀆𑀤𑀺𑀢𑁄𑀯 ‘‘𑀤𑀲 𑀔𑁄 𑀧𑀦𑀺𑀫𑀸𑀦𑀺, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀻’’𑀢𑀺 𑀦𑀺𑀓𑁆𑀔𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑀓𑀢𑀫𑀸𑀦𑀺 𑀤𑀲? 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀞𑀸𑀦𑀜𑁆𑀘 𑀞𑀸𑀦𑀢𑁄𑀢𑀺 𑀓𑀸𑀭𑀡𑀜𑁆𑀘 𑀓𑀸𑀭𑀡𑀢𑁄. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀨𑀮𑀁 𑀢𑀺𑀝𑁆𑀞𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀬𑀸𑀬 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘, 𑀢𑀲𑁆𑀫𑀸 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀪𑀕𑀯𑀸 ‘‘𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀳𑁂𑀢𑀽 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬, 𑀢𑀁 𑀢𑀁 𑀞𑀸𑀦𑀁. 𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀦 𑀳𑁂𑀢𑀽 𑀦 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬, 𑀢𑀁 𑀢𑀁 𑀅𑀝𑁆𑀞𑀸𑀦’’𑀦𑁆𑀢𑀺 𑀧𑀚𑀸𑀦𑀦𑁆𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀪𑀺𑀥𑀫𑁆𑀫𑁂 𑀧𑀦𑁂𑀢𑀁, ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁦𑁯) 𑀦𑀬𑁂𑀦 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀬𑀫𑁆𑀧𑀻𑀢𑀺 𑀬𑁂𑀦 𑀜𑀸𑀡𑁂𑀦. 𑀇𑀤𑀫𑁆𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑀲𑁆𑀲𑀸𑀢𑀺 𑀇𑀤𑀫𑁆𑀧𑀺 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀦𑁆𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀁, 𑀓𑀫𑁆𑀫𑀫𑁂𑀯 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀁. 𑀞𑀸𑀦𑀲𑁄 𑀳𑁂𑀢𑀼𑀲𑁄𑀢𑀺 𑀧𑀘𑁆𑀘𑀬𑀢𑁄 𑀘𑁂𑀯 𑀳𑁂𑀢𑀼𑀢𑁄 𑀘. 𑀢𑀢𑁆𑀣 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀸 𑀯𑀺𑀧𑀸𑀓𑀲𑁆𑀲 𑀞𑀸𑀦𑀁. 𑀓𑀫𑁆𑀫𑀁 𑀳𑁂𑀢𑀼. 𑀇𑀫𑀲𑁆𑀲 𑀧𑀦 𑀜𑀸𑀡𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 ‘‘𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀕𑀢𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁧𑁦) 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀬𑁂𑀯.

𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀦𑁆𑀢𑀺 𑀲𑀩𑁆𑀩𑀕𑀢𑀺𑀕𑀸𑀫𑀺𑀦𑀺𑀁 𑀅𑀕𑀢𑀺𑀕𑀸𑀫𑀺𑀦𑀺𑀜𑁆𑀘. 𑀧𑀝𑀺𑀧𑀤𑀦𑁆𑀢𑀺 𑀫𑀕𑁆𑀕𑀁. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀩𑀳𑀽𑀲𑀼𑀧𑀺 𑀫𑀦𑀼𑀲𑁆𑀲𑁂𑀲𑀼 𑀏𑀓𑀫𑁂𑀯 𑀧𑀸𑀡𑀁 𑀖𑀸𑀢𑁂𑀦𑁆𑀢𑁂𑀲𑀼 𑀇𑀫𑀲𑁆𑀲 𑀘𑁂𑀢𑀦𑀸 𑀦𑀺𑀭𑀬𑀕𑀸𑀫𑀺𑀦𑀻 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀘𑁂𑀢𑀦𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀸𑀫𑀺𑀦𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀏𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀲𑀗𑁆𑀔𑀸𑀢𑀸𑀦𑀁 𑀧𑀝𑀺𑀧𑀢𑁆𑀢𑀻𑀦𑀁 𑀅𑀯𑀺𑀧𑀭𑀻𑀢𑀢𑁄 𑀲𑀪𑀸𑀯𑀁 𑀚𑀸𑀦𑀸𑀢𑀺. 𑀇𑀫𑀲𑁆𑀲 𑀘 𑀜𑀸𑀡𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁? 𑀇𑀥 𑀢𑀣𑀸𑀕𑀢𑁄 𑀅𑀬𑀁 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸 𑀦𑀺𑀭𑀬𑀕𑀸𑀫𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁧𑁧) 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀬𑁂𑀯.

𑀅𑀦𑁂𑀓𑀥𑀸𑀢𑀼𑀦𑁆𑀢𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀳𑀺 𑀓𑀸𑀫𑀥𑀸𑀢𑀼𑀆𑀤𑀻𑀳𑀺 𑀯𑀸 𑀥𑀸𑀢𑀽𑀳𑀺 𑀩𑀳𑀼𑀥𑀸𑀢𑀼𑀁. 𑀦𑀸𑀦𑀸𑀥𑀸𑀢𑀼𑀦𑁆𑀢𑀺 𑀢𑀸𑀲𑀁𑀬𑁂𑀯 𑀥𑀸𑀢𑀽𑀦𑀁 𑀯𑀺𑀮𑀓𑁆𑀔𑀡𑀢𑀸𑀬 𑀦𑀸𑀦𑀧𑁆𑀧𑀓𑀸𑀭𑀥𑀸𑀢𑀼𑀁. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀮𑁄𑀓𑀁. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀢𑀸𑀲𑀁 𑀢𑀸𑀲𑀁 𑀥𑀸𑀢𑀽𑀦𑀁 𑀅𑀯𑀺𑀧𑀭𑀻𑀢𑀢𑁄 𑀲𑀪𑀸𑀯𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀇𑀤𑀫𑁆𑀧𑀺 𑀜𑀸𑀡𑀁 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁, 𑀇𑀥 𑀢𑀣𑀸𑀕𑀢𑁄 𑀔𑀦𑁆𑀥𑀦𑀸𑀦𑀢𑁆𑀢𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀦𑁆𑀢𑀺 𑀳𑀻𑀦𑀸𑀤𑀻𑀳𑀺 𑀅𑀥𑀺𑀫𑀼𑀢𑁆𑀢𑀻𑀳𑀺 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀪𑀸𑀯𑀁. 𑀇𑀤𑀫𑁆𑀧𑀺 𑀜𑀸𑀡𑀁, ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁, 𑀇𑀥 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺 𑀲𑀦𑁆𑀢𑀺 𑀲𑀢𑁆𑀢𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸’’𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀧𑀥𑀸𑀦𑀲𑀢𑁆𑀢𑀸𑀦𑀁. 𑀧𑀭𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀢𑀢𑁄 𑀧𑀭𑁂𑀲𑀁 𑀳𑀻𑀦𑀲𑀢𑁆𑀢𑀸𑀦𑀁. 𑀏𑀓𑀢𑁆𑀣𑀫𑁂𑀯 𑀯𑀸 𑀏𑀢𑀁 𑀧𑀤𑀤𑁆𑀯𑀬𑀁. 𑀯𑁂𑀦𑁂𑀬𑁆𑀬𑀯𑀲𑁂𑀦 𑀧𑀦 𑀤𑁆𑀯𑁂𑀥𑀸 𑀯𑀼𑀢𑁆𑀢𑀁. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀦𑁆𑀢𑀺 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀪𑀸𑀯𑀁 𑀅𑀧𑀭𑀪𑀸𑀯𑀜𑁆𑀘, 𑀯𑀼𑀤𑁆𑀥𑀺𑀜𑁆𑀘 𑀳𑀸𑀦𑀺𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀲𑀧𑀺 𑀜𑀸𑀡𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 𑁋 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁, 𑀇𑀥 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀧𑀚𑀸𑀦𑀸𑀢𑀺 𑀅𑀦𑀼𑀲𑀬𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁧𑁪) 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀬𑁂𑀯.

𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀧𑀞𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀫𑀸𑀥𑀻𑀦𑀁 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀆𑀤𑀻𑀦𑀜𑁆𑀘 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁. 𑀲𑀁𑀓𑀺𑀮𑁂𑀲𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑀁. 𑀯𑁄𑀤𑀸𑀦𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑀁. 𑀯𑀼𑀝𑁆𑀞𑀸𑀦𑀦𑁆𑀢𑀺 ‘‘𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦𑀁. 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 (𑀯𑀺𑀪. 𑁮𑁨𑁮) 𑀏𑀯𑀁 𑀯𑀼𑀢𑁆𑀢𑀧𑀕𑀼𑀡𑀚𑁆𑀛𑀸𑀦𑀜𑁆𑀘𑁂𑀯 𑀪𑀯𑀗𑁆𑀕𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀘. 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀜𑁆𑀳𑀺 𑀧𑀕𑀼𑀡𑀚𑁆𑀛𑀸𑀦𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀲𑁆𑀫𑀸 ‘‘𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀯𑀗𑁆𑀕𑁂𑀦 𑀧𑀦 𑀲𑀩𑁆𑀩𑀚𑁆𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁆𑀧𑀺 𑀜𑀸𑀡𑀁 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁, 𑀛𑀸𑀬𑀻𑀢𑀺 𑀘𑀢𑁆𑀢𑀸𑀭𑁄 𑀛𑀸𑀬𑀻, 𑀅𑀢𑁆𑀣𑁂𑀓𑀘𑁆𑀘𑁄 𑀛𑀸𑀬𑀻 𑀲𑀫𑁆𑀧𑀢𑁆𑀢𑀺𑀁𑀬𑁂𑀯 𑀲𑀫𑀸𑀦𑀁 𑀯𑀺𑀧𑀢𑁆𑀢𑀻𑀢𑀺 𑀧𑀘𑁆𑀘𑁂𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁨𑁮) 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀯𑀺𑀢𑁆𑀣𑀸𑀭𑀺𑀢𑀁. 𑀲𑀢𑁆𑀢𑀦𑁆𑀦𑀁 𑀜𑀸𑀡𑀸𑀦𑀁 𑀯𑀺𑀢𑁆𑀣𑀸𑀭𑀓𑀣𑀸𑀯𑀺𑀦𑀺𑀘𑁆𑀙𑀬𑁄 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸. 𑀆𑀲𑀯𑀓𑁆𑀔𑀬𑀓𑀣𑀸 𑀪𑀬𑀪𑁂𑀭𑀯𑁂.

𑁧𑁪𑁯. 𑀇𑀫𑀸𑀦𑀺 𑀔𑁄 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀬𑀸𑀦𑀺 𑀧𑀼𑀩𑁆𑀩𑁂 ‘‘𑀤𑀲 𑀔𑁄 𑀧𑀦𑀺𑀫𑀸𑀦𑀺, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀻’’𑀢𑀺 𑀅𑀯𑁄𑀘𑀁, 𑀇𑀫𑀸𑀦𑀺 𑀢𑀸𑀦𑀻𑀢𑀺 𑀅𑀧𑁆𑀧𑀦𑀁 𑀓𑀭𑁄𑀢𑀺. 𑀢𑀢𑁆𑀣 𑀧𑀭𑀯𑀸𑀤𑀻𑀓𑀣𑀸 𑀳𑁄𑀢𑀺 𑁋 𑀤𑀲𑀩𑀮𑀜𑀸𑀡𑀁 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀦𑀢𑁆𑀣𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯𑀸𑀬𑀁 𑀧𑀪𑁂𑀤𑁄𑀢𑀺. 𑀢𑀁 𑀦 𑀢𑀣𑀸 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀫𑁂𑀯 𑀳𑀺 𑀤𑀲𑀩𑀮𑀜𑀸𑀡𑀁, 𑀅𑀜𑁆𑀜𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀤𑀲𑀩𑀮𑀜𑀸𑀡𑀜𑁆𑀳𑀺 𑀲𑀓𑀲𑀓𑀓𑀺𑀘𑁆𑀘𑀫𑁂𑀯 𑀚𑀸𑀦𑀸𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀢𑀫𑁆𑀧𑀺 𑀢𑀢𑁄 𑀅𑀯𑀲𑁂𑀲𑀫𑁆𑀧𑀺 𑀧𑀚𑀸𑀦𑀸𑀢𑀺. 𑀤𑀲𑀩𑀮𑀜𑀸𑀡𑁂𑀲𑀼 𑀳𑀺 𑀧𑀞𑀫𑀁 𑀓𑀸𑀭𑀡𑀸𑀓𑀸𑀭𑀡𑀫𑁂𑀯 𑀚𑀸𑀦𑀸𑀢𑀺. 𑀤𑀼𑀢𑀺𑀬𑀁 𑀓𑀫𑁆𑀫𑀦𑁆𑀢𑀭𑀯𑀺𑀧𑀸𑀓𑀦𑁆𑀢𑀭𑀫𑁂𑀯. 𑀢𑀢𑀺𑀬𑀁 𑀓𑀫𑁆𑀫𑀧𑀭𑀺𑀘𑁆𑀙𑁂𑀤𑀫𑁂𑀯. 𑀘𑀢𑀼𑀢𑁆𑀣𑀁 𑀥𑀸𑀢𑀼𑀦𑀸𑀦𑀢𑁆𑀢𑀓𑀸𑀭𑀡𑀫𑁂𑀯. 𑀧𑀜𑁆𑀘𑀫𑀁 𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸𑀥𑀺𑀫𑀼𑀢𑁆𑀢𑀺𑀫𑁂𑀯. 𑀙𑀝𑁆𑀞𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀫𑁂𑀯. 𑀲𑀢𑁆𑀢𑀫𑀁 𑀛𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀲𑀁𑀓𑀺𑀮𑁂𑀲𑀸𑀤𑀺𑀫𑁂𑀯. 𑀅𑀝𑁆𑀞𑀫𑀁 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀔𑀦𑁆𑀥𑀲𑀦𑁆𑀢𑀢𑀺𑀫𑁂𑀯. 𑀦𑀯𑀫𑀁 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀫𑁂𑀯. 𑀤𑀲𑀫𑀁 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀫𑁂𑀯. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀏𑀢𑁂𑀳𑀺 𑀚𑀸𑀦𑀺𑀢𑀩𑁆𑀩𑀜𑁆𑀘 𑀢𑀢𑁄 𑀉𑀢𑁆𑀢𑀭𑀺𑀜𑁆𑀘 𑀧𑀚𑀸𑀦𑀸𑀢𑀺. 𑀏𑀢𑁂𑀲𑀁 𑀧𑀦 𑀓𑀺𑀘𑁆𑀘𑀁 𑀦 𑀲𑀩𑁆𑀩𑀁 𑀓𑀭𑁄𑀢𑀺. 𑀢𑀜𑁆𑀳𑀺 𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀤𑁆𑀥𑀺 𑀳𑀼𑀢𑁆𑀯𑀸 𑀯𑀺𑀓𑀼𑀩𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀕𑁆𑀕𑁄 𑀳𑀼𑀢𑁆𑀯𑀸 𑀓𑀺𑀮𑁂𑀲𑁂 𑀔𑁂𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀧𑀺𑀘 𑀧𑀭𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘‘𑀤𑀲𑀩𑀮𑀜𑀸𑀡𑀁 𑀦𑀸𑀫 𑀏𑀢𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺? 𑀚𑀸𑀦𑀦𑁆𑀢𑁄 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀜𑀸𑀡𑀸𑀦𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀦𑀻𑀢𑀺 𑀯𑀓𑁆𑀔𑀢𑀺. 𑀢𑀢𑁄 𑀧𑀭𑀸𑀦𑀺 𑀤𑁆𑀯𑁂 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸𑀦𑀻𑀢𑀺 𑀯𑀓𑁆𑀔𑀢𑀺. 𑀆𑀲𑀯𑀓𑁆𑀔𑀬𑀜𑀸𑀡𑀁 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀦𑁆𑀢𑀺 𑀯𑀓𑁆𑀔𑀢𑀺. 𑀢𑀣𑀸 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀓𑀸𑀫𑀸𑀯𑀘𑀭𑀸𑀦𑀺, 𑀢𑀢𑁄 𑀧𑀭𑀸𑀦𑀺 𑀤𑁆𑀯𑁂 𑀭𑀽𑀧𑀸𑀯𑀘𑀭𑀸𑀦𑀺, 𑀅𑀯𑀲𑀸𑀦𑁂 𑀏𑀓𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀯𑀓𑁆𑀔𑀢𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁂𑀯 𑀓𑀸𑀫𑀸𑀯𑀘𑀭𑀫𑁂𑀯 𑀮𑁄𑀓𑀺𑀬𑀫𑁂𑀯𑀸𑀢𑀺 𑀯𑀓𑁆𑀔𑀢𑀺.

𑀏𑀯𑀫𑁂𑀢𑁆𑀣 𑀅𑀦𑀼𑀧𑀤𑀯𑀡𑁆𑀡𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀢𑀣𑀸𑀕𑀢𑁄 𑀧𑀞𑀫𑀁𑀬𑁂𑀯 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑁂𑀦 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀆𑀲𑀯𑀓𑁆𑀔𑀬𑀸𑀥𑀺𑀕𑀫𑀲𑁆𑀲 𑀘𑁂𑀯 𑀅𑀦𑀥𑀺𑀕𑀫𑀲𑁆𑀲 𑀘 𑀞𑀸𑀦𑀸𑀝𑁆𑀞𑀸𑀦𑀪𑀽𑀢𑀁 𑀓𑀺𑀮𑁂𑀲𑀸𑀯𑀭𑀡𑀸𑀪𑀸𑀯𑀁 𑀧𑀲𑁆𑀲𑀢𑀺, 𑀮𑁄𑀓𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀝𑁆𑀞𑀸𑀦𑀤𑀲𑁆𑀲𑀦𑀢𑁄 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀪𑀸𑀯𑀤𑀲𑁆𑀲𑀦𑀢𑁄 𑀘. 𑀅𑀣 𑀦𑁂𑀲𑀁 𑀓𑀫𑁆𑀫𑀯𑀺𑀧𑀸𑀓𑀜𑀸𑀡𑁂𑀦 𑀯𑀺𑀧𑀸𑀓𑀸𑀯𑀭𑀡𑀸𑀪𑀸𑀯𑀁 𑀧𑀲𑁆𑀲𑀢𑀺, 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀤𑀲𑁆𑀲𑀦𑀢𑁄. 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻𑀧𑀝𑀺𑀧𑀤𑀸𑀜𑀸𑀡𑁂𑀦 𑀓𑀫𑁆𑀫𑀸𑀯𑀭𑀡𑀸𑀪𑀸𑀯𑀁 𑀧𑀲𑁆𑀲𑀢𑀺, 𑀅𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀪𑀸𑀯𑀤𑀲𑁆𑀲𑀦𑀢𑁄. 𑀏𑀯𑀁 𑀅𑀦𑀸𑀯𑀭𑀡𑀸𑀦𑀁 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀜𑀸𑀡𑁂𑀦 𑀅𑀦𑀼𑀓𑀽𑀮𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀘𑀭𑀺𑀬𑀯𑀺𑀲𑁂𑀲𑀁 𑀧𑀲𑁆𑀲𑀢𑀺, 𑀥𑀸𑀢𑀼𑀯𑁂𑀫𑀢𑁆𑀢𑀤𑀲𑁆𑀲𑀦𑀢𑁄. 𑀅𑀣 𑀦𑁂𑀲𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑁂𑀦 𑀅𑀥𑀺𑀫𑀼𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀧𑀬𑁄𑀕𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀧𑀺 𑀅𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀢𑁆𑀣𑀁. 𑀅𑀣𑁂𑀯𑀁 𑀤𑀺𑀝𑁆𑀞𑀸𑀥𑀺𑀫𑀼𑀢𑁆𑀢𑀻𑀦𑀁 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑁂𑀦 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀧𑀲𑁆𑀲𑀢𑀺, 𑀲𑀤𑁆𑀥𑀸𑀤𑀻𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀤𑀲𑁆𑀲𑀦𑀢𑁄. 𑀏𑀯𑀁 𑀧𑀭𑀺𑀜𑁆𑀜𑀸𑀢𑀺𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀸 𑀧𑀦 𑀢𑁂 𑀲𑀘𑁂 𑀤𑀽𑀭𑁂 𑀳𑁄𑀦𑁆𑀢𑀺, 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀯𑀲𑀻𑀪𑀽𑀢𑀢𑁆𑀢𑀸 𑀇𑀤𑁆𑀥𑀺𑀯𑀺𑀲𑁂𑀲𑁂𑀦 𑀢𑁂 𑀔𑀺𑀧𑁆𑀧𑀁 𑀉𑀧𑀕𑀘𑁆𑀙𑀢𑀺. 𑀉𑀧𑀕𑀦𑁆𑀢𑁆𑀯𑀸 𑀘 𑀦𑁂𑀲𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀧𑀼𑀩𑁆𑀩𑀚𑀸𑀢𑀺𑀪𑀸𑀯𑀦𑀁, 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀦𑀼𑀪𑀸𑀯𑀢𑁄 𑀧𑀢𑁆𑀢𑀩𑁆𑀩𑁂𑀦 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀲𑀫𑁆𑀧𑀢𑀺 𑀘𑀺𑀢𑁆𑀢𑀯𑀺𑀲𑁂𑀲𑀁 𑀧𑀲𑁆𑀲𑀦𑁆𑀢𑁄 𑀆𑀲𑀯𑀓𑁆𑀔𑀬𑀜𑀸𑀡𑀸𑀦𑀼𑀪𑀸𑀯𑁂𑀦 𑀆𑀲𑀯𑀓𑁆𑀔𑀬𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀯𑀺𑀕𑀢𑀲𑀫𑁆𑀫𑁄𑀳𑀢𑁆𑀢𑀸 𑀆𑀲𑀯𑀓𑁆𑀔𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀲𑁆𑀫𑀸 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀇𑀫𑀸𑀦𑀺 𑀤𑀲𑀩𑀮𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀸𑀘𑀁 𑀅𑀧𑁆𑀧𑀳𑀸𑀬𑀸𑀢𑀺𑀆𑀤𑀻𑀲𑀼 𑀧𑀼𑀦 𑀏𑀯𑀭𑀽𑀧𑀺𑀁 𑀯𑀸𑀘𑀁 𑀦 𑀯𑀓𑁆𑀔𑀸𑀫𑀻𑀢𑀺 𑀯𑀤𑀦𑁆𑀢𑁄 𑀢𑀁 𑀯𑀸𑀘𑀁 𑀧𑀚𑀳𑀢𑀺 𑀦𑀸𑀫. 𑀧𑀼𑀦 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀘𑀺𑀢𑁆𑀢𑀁 𑀧𑀚𑀳𑀢𑀺 𑀦𑀸𑀫. 𑀧𑀼𑀦 𑀏𑀯𑀭𑀽𑀧𑀁 𑀤𑀺𑀝𑁆𑀞𑀺𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀧𑀚𑀳𑀦𑁆𑀢𑁄 𑀤𑀺𑀝𑁆𑀞𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀦𑀸𑀫, 𑀢𑀣𑀸 𑀅𑀓𑀭𑁄𑀦𑁆𑀢𑁄 𑀦𑁂𑀯 𑀧𑀚𑀳𑀢𑀺, 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀲𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂𑀢𑀺 𑀬𑀣𑀸 𑀦𑀺𑀭𑀬𑀧𑀸𑀮𑁂𑀳𑀺 𑀆𑀳𑀭𑀺𑀢𑁆𑀯𑀸 𑀦𑀺𑀭𑀬𑁂 𑀞𑀧𑀺𑀢𑁄, 𑀏𑀯𑀁 𑀦𑀺𑀭𑀬𑁂 𑀞𑀧𑀺𑀢𑁄𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺𑀲𑁆𑀲 𑀅𑀢𑁆𑀣𑀲𑀸𑀥𑀓𑀁 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀻𑀲𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀮𑁄𑀓𑀼𑀢𑁆𑀢𑀭𑀯𑀲𑁂𑀦𑁂𑀯 𑀯𑀺𑀦𑀺𑀯𑀢𑁆𑀢𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀬𑀜𑁆𑀳𑀺 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑁂𑀳𑀺 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀲𑀫𑁆𑀫𑀸𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀻𑀳𑀺 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑁂𑀳𑀺 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄, 𑀲𑁄 𑀏𑀯𑀁 𑀲𑀻𑀮𑀸𑀤𑀺𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀬𑀣𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀤𑀸𑀫𑀺 𑀇𑀫𑀫𑁆𑀧𑀺 𑀓𑀸𑀭𑀡𑀁 𑀏𑀯𑀭𑀽𑀧𑀫𑁂𑀯. 𑀬𑀣𑀸 𑀳𑀺 𑀫𑀕𑁆𑀕𑀸𑀦𑀦𑁆𑀢𑀭𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸𑀯 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀏𑀯𑀫𑁂𑀯 𑀇𑀫𑀲𑁆𑀲𑀸𑀧𑀺 𑀧𑀼𑀕𑁆𑀕𑀮𑀲𑁆𑀲 𑀘𑀼𑀢𑀺𑀅𑀦𑀦𑁆𑀢𑀭𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸𑀯 𑀦𑀺𑀭𑀬𑁂 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀓𑀮𑀲𑁆𑀫𑀺𑀜𑁆𑀳𑀺 𑀩𑀼𑀤𑁆𑀥𑀯𑀘𑀦𑁂 𑀇𑀫𑀸𑀬 𑀉𑀧𑀫𑀸𑀬 𑀕𑀸𑀴𑁆𑀳𑀢𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀉𑀧𑀫𑀸 𑀦𑀸𑀫 𑀦𑀢𑁆𑀣𑀺.

𑁧𑁫𑁦. 𑀯𑁂𑀲𑀸𑀭𑀚𑁆𑀚𑀸𑀦𑀻𑀢𑀺 𑀏𑀢𑁆𑀣 𑀲𑀸𑀭𑀚𑁆𑀚𑀧𑀝𑀺𑀧𑀓𑁆𑀔𑁄 𑀯𑁂𑀲𑀸𑀭𑀚𑁆𑀚𑀁, 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀲𑀸𑀭𑀚𑁆𑀚𑀸𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀫𑀬𑀜𑀸𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄𑀢𑀺 𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑁂 𑀥𑀫𑁆𑀫𑀸 𑀫𑀬𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀏𑀯𑀁 𑀧𑀝𑀺𑀚𑀸𑀦𑀢𑁄 𑀢𑀯. 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀇𑀫𑁂 𑀦𑀸𑀫 𑀥𑀫𑁆𑀫𑀸 𑀢𑀬𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸. 𑀢𑀢𑁆𑀭 𑀯𑀢𑀸𑀢𑀺 𑀢𑁂𑀲𑀼 𑀯𑀢 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀏𑀯𑀁 𑀤𑀲𑁆𑀲𑀺𑀢𑀥𑀫𑁆𑀫𑁂𑀲𑀼. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀳𑁂𑀢𑀼𑀦𑀸 𑀲𑀓𑀸𑀭𑀡𑁂𑀦 𑀯𑀘𑀦𑁂𑀦 𑀲𑀼𑀦𑀓𑁆𑀔𑀢𑁆𑀢𑁄 𑀯𑀺𑀬 𑀯𑀺𑀧𑁆𑀧𑀮𑀧𑀦𑁆𑀢𑁄 𑀅𑀧𑁆𑀧𑀫𑀸𑀡𑀁. 𑀦𑀺𑀫𑀺𑀢𑁆𑀢𑀫𑁂𑀢𑀦𑁆𑀢𑀺 𑀏𑀢𑁆𑀣 𑀧𑀼𑀕𑁆𑀕𑀮𑁄𑀧𑀺 𑀥𑀫𑁆𑀫𑁄𑀧𑀺 𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀁 𑀧𑀼𑀕𑁆𑀕𑀮𑀁 𑀦 𑀧𑀲𑁆𑀲𑀸𑀫𑀺, 𑀬𑁄 𑀫𑀁 𑀧𑀝𑀺𑀘𑁄𑀤𑁂𑀲𑁆𑀲𑀢𑀺, 𑀢𑀁 𑀥𑀫𑁆𑀫𑀁 𑀦 𑀧𑀲𑁆𑀲𑀸𑀫𑀺, 𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀬𑀁 𑀦𑀸𑀫 𑀥𑀫𑁆𑀫𑁄 𑀢𑀬𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀫𑀁 𑀧𑀝𑀺𑀘𑁄𑀤𑁂𑀲𑁆𑀲𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀔𑁂𑀫𑀧𑁆𑀧𑀢𑁆𑀢𑁄𑀢𑀺 𑀔𑁂𑀫𑀁 𑀧𑀢𑁆𑀢𑁄, 𑀲𑁂𑀲𑀧𑀤𑀤𑁆𑀯𑀬𑀁 𑀇𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀩𑁆𑀩𑀜𑁆𑀳𑁂𑀢𑀁 𑀯𑁂𑀲𑀸𑀭𑀚𑁆𑀚𑀜𑀸𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀲𑀩𑀮𑀲𑁆𑀲 𑀳𑀺 𑀅𑀬𑀁 𑀦𑀸𑀫 𑀥𑀫𑁆𑀫𑁄 𑀢𑀬𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀘𑁄𑀤𑀓𑀁 𑀧𑀼𑀕𑁆𑀕𑀮𑀁 𑀯𑀸 𑀘𑁄𑀤𑀦𑀸𑀓𑀸𑀭𑀡𑀁 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀥𑀫𑁆𑀫𑀁 𑀯𑀸 𑀅𑀧𑀲𑁆𑀲𑀢𑁄 𑀲𑀪𑀸𑀯𑀩𑀼𑀤𑁆𑀥𑁄𑀬𑁂𑀯 𑀯𑀸 𑀲𑀫𑀸𑀦𑁄 𑀅𑀳𑀁 𑀩𑀼𑀤𑁆𑀥𑁄𑀲𑁆𑀫𑀻𑀢𑀺 𑀯𑀤𑀸𑀫𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀩𑀮𑀯𑀢𑀭𑀁 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀯𑁂𑀲𑀸𑀭𑀚𑁆𑀚𑀁 𑀦𑀸𑀫. 𑀢𑀁 𑀲𑀦𑁆𑀥𑀸𑀬 ‘‘𑀔𑁂𑀫𑀧𑁆𑀧𑀢𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀧𑀦 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸, 𑀢𑁂 𑀅𑀢𑁆𑀣𑀢𑁄 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀸 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸. 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀜𑁆𑀳𑀺 𑀅𑀦𑁆𑀢𑀫𑀲𑁄 𑀤𑀼𑀓𑁆𑀓𑀝-𑀤𑀼𑀩𑁆𑀪𑀸𑀲𑀺𑀢𑀫𑁆𑀧𑀺 𑀫𑀕𑁆𑀕𑀨𑀮𑀸𑀦𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺. 𑀇𑀥 𑀧𑀦 𑀫𑁂𑀣𑀼𑀦𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀫𑁂𑀣𑀼𑀦𑀁 𑀲𑁂𑀯𑀢𑁄 𑀳𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀺𑀲𑁆𑀲𑀁𑀲𑀬𑀫𑁂𑀯 𑀫𑀕𑁆𑀕𑀨𑀮𑀸𑀦𑀁 𑀅𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀬𑀲𑁆𑀲 𑀔𑁄 𑀧𑀦 𑀢𑁂𑀲𑀼 𑀅𑀢𑁆𑀣𑀸𑀬𑀸𑀢𑀺 𑀭𑀸𑀕𑀓𑁆𑀔𑀬𑀸𑀤𑀻𑀲𑀼 𑀬𑀲𑁆𑀲 𑀅𑀢𑁆𑀣𑀸𑀬. 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺 𑀅𑀲𑀼𑀪𑀪𑀸𑀯𑀦𑀸𑀤𑀺𑀥𑀫𑁆𑀫𑁄 𑀓𑀣𑀺𑀢𑁄. 𑀢𑀢𑁆𑀭 𑀯𑀢 𑀫𑀦𑁆𑀢𑀺 𑀢𑀲𑁆𑀫𑀺𑀁 𑀅𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂 𑀫𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀤𑀲𑀩𑀮𑀜𑀸𑀡𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀧𑀭𑀺𑀲𑀯𑀡𑁆𑀡𑀦𑀸

𑁧𑁫𑁧. ‘‘𑀅𑀝𑁆𑀞 𑀔𑁄 𑀇𑀫𑀸 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀯𑁂𑀲𑀸𑀭𑀚𑁆𑀚𑀜𑀸𑀡𑀲𑁆𑀲 𑀩𑀮𑀤𑀲𑁆𑀲𑀦𑀢𑁆𑀣𑀁. 𑀬𑀣𑀸 𑀳𑀺 𑀩𑁆𑀬𑀢𑁆𑀢𑀁 𑀧𑀭𑀺𑀲𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀯𑀺𑀜𑁆𑀜𑀽𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑀦𑀲𑀫𑀢𑁆𑀣𑀸𑀬 𑀓𑀣𑀸𑀬 𑀥𑀫𑁆𑀫𑀓𑀣𑀺𑀓𑀲𑁆𑀲 𑀙𑁂𑀓𑀪𑀸𑀯𑁄 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀇𑀫𑀸 𑀅𑀝𑁆𑀞 𑀧𑀭𑀺𑀲𑀸 𑀧𑀢𑁆𑀯𑀸 𑀯𑁂𑀲𑀸𑀭𑀚𑁆𑀚𑀜𑀸𑀡𑀲𑁆𑀲 𑀯𑁂𑀲𑀸𑀭𑀚𑁆𑀚𑀪𑀸𑀯𑁄 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀯𑁂𑀲𑀸𑀭𑀚𑁆𑀚𑀜𑀸𑀡𑀲𑁆𑀲 𑀩𑀮𑀁 𑀤𑀲𑁆𑀲𑁂𑀦𑁆𑀢𑁄, 𑀅𑀝𑁆𑀞 𑀔𑁄 𑀇𑀫𑀸 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀔𑀢𑁆𑀢𑀺𑀬𑀧𑀭𑀺𑀲𑀸𑀢𑀺 𑀔𑀢𑁆𑀢𑀺𑀬𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁, 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀫𑀸𑀭𑀓𑀸𑀬𑀺𑀓𑀸𑀦𑀁 𑀧𑀦 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀫𑀸𑀭𑀧𑀭𑀺𑀲𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀫𑀸𑀭𑀸𑀦𑀁. 𑀲𑀩𑁆𑀩𑀸𑀧𑀺 𑀘𑁂𑀢𑀸 𑀧𑀭𑀺𑀲𑀸 𑀉𑀕𑁆𑀕𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦 𑀕𑀳𑀺𑀢𑀸. 𑀫𑀦𑀼𑀲𑁆𑀲𑀸 𑀳𑀺 ‘‘𑀏𑀢𑁆𑀣 𑀭𑀸𑀚𑀸 𑀦𑀺𑀲𑀺𑀦𑁆𑀦𑁄’’𑀢𑀺 𑀧𑀓𑀢𑀺𑀯𑀘𑀦𑀫𑁆𑀧𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀉𑀕𑁆𑀕𑀸 𑀔𑀢𑁆𑀢𑀺𑀬𑀧𑀭𑀺𑀲𑀸. 𑀩𑁆𑀭𑀸𑀳𑁆𑀫𑀡𑀸 𑀢𑀻𑀲𑀼 𑀯𑁂𑀤𑁂𑀲𑀼 𑀓𑀼𑀲𑀮𑀸 𑀳𑁄𑀦𑁆𑀢𑀺, 𑀕𑀳𑀧𑀢𑀬𑁄 𑀦𑀸𑀦𑀸𑀯𑁄𑀳𑀸𑀭𑁂𑀲𑀼 𑀘𑁂𑀯 𑀅𑀓𑁆𑀔𑀭𑀘𑀺𑀦𑁆𑀢𑀸𑀬 𑀘. 𑀲𑀫𑀡𑀸 𑀲𑀓𑀯𑀸𑀤𑀧𑀭𑀯𑀸𑀤𑁂𑀲𑀼 𑀓𑀼𑀲𑀮𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀫𑀚𑁆𑀛𑁂 𑀥𑀫𑁆𑀫𑀓𑀣𑀸𑀓𑀣𑀦𑀁 𑀦𑀸𑀫 𑀅𑀢𑀺𑀯𑀺𑀬 𑀪𑀸𑀭𑁄. 𑀅𑀫𑀦𑀼𑀲𑁆𑀲𑀸𑀧𑀺 𑀉𑀕𑁆𑀕𑀸 𑀳𑁄𑀦𑁆𑀢𑀺. 𑀅𑀫𑀦𑀼𑀲𑁆𑀲𑁄𑀢𑀺 𑀳𑀺 𑀯𑀼𑀢𑁆𑀢𑀫𑀢𑁆𑀢𑁂𑀧𑀺 𑀫𑀦𑀼𑀲𑁆𑀲𑀸𑀦𑀁 𑀲𑀓𑀮𑀲𑀭𑀻𑀭𑀁 𑀲𑀗𑁆𑀓𑀫𑁆𑀧𑀢𑀺, 𑀢𑁂𑀲𑀁 𑀭𑀽𑀧𑀁 𑀯𑀸 𑀤𑀺𑀲𑁆𑀯𑀸 𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀲𑀢𑁆𑀢𑀸 𑀯𑀺𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺. 𑀏𑀯𑀁 𑀅𑀫𑀦𑀼𑀲𑁆𑀲𑀧𑀭𑀺𑀲𑀸 𑀉𑀕𑁆𑀕𑀸. 𑀢𑀸𑀲𑀼𑀧𑀺 𑀥𑀫𑁆𑀫𑀓𑀣𑀸𑀓𑀣𑀦𑀁 𑀦𑀸𑀫 𑀅𑀢𑀺𑀯𑀺𑀬 𑀪𑀸𑀭𑁄. 𑀇𑀢𑀺 𑀉𑀕𑁆𑀕𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦 𑀢𑀸 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀚𑁆𑀛𑁄𑀕𑀸𑀳𑀢𑀻𑀢𑀺 𑀅𑀦𑀼𑀧𑀯𑀺𑀲𑀢𑀺. 𑀅𑀦𑁂𑀓𑀲𑀢𑀁 𑀔𑀢𑁆𑀢𑀺𑀬𑀧𑀭𑀺𑀲𑀦𑁆𑀢𑀺 𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫 𑀜𑀸𑀢𑀺𑀲𑀫𑀸𑀕𑀫 𑀮𑀺𑀘𑁆𑀙𑀯𑀻𑀲𑀫𑀸𑀕𑀫𑀲𑀤𑀺𑀲𑀁. 𑀅𑀜𑁆𑀜𑁂𑀲𑀼𑀧𑀺 𑀘𑀓𑁆𑀓𑀯𑀸𑀴𑁂𑀲𑀼 𑀮𑀩𑁆𑀪𑀢𑀺𑀬𑁂𑀯. 𑀓𑀺𑀁 𑀧𑀦 𑀪𑀕𑀯𑀸 𑀅𑀜𑁆𑀜𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺𑀧𑀺 𑀕𑀘𑁆𑀙𑀢𑀻𑀢𑀺? 𑀆𑀫 𑀕𑀘𑁆𑀙𑀢𑀺. 𑀓𑀻𑀤𑀺𑀲𑁄 𑀳𑀼𑀢𑁆𑀯𑀸? 𑀬𑀸𑀤𑀺𑀲𑀸 𑀢𑁂, 𑀢𑀸𑀤𑀺𑀲𑁄𑀬𑁂𑀯. 𑀢𑁂𑀦𑁂𑀯𑀸𑀳 ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀆𑀦𑀦𑁆𑀤, 𑀅𑀦𑁂𑀓𑀲𑀢𑀁 𑀔𑀢𑁆𑀢𑀺𑀬𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀺𑀢𑀸, 𑀢𑀢𑁆𑀣 𑀬𑀸𑀤𑀺𑀲𑀓𑁄 𑀢𑁂𑀲𑀁 𑀯𑀡𑁆𑀡𑁄 𑀳𑁄𑀢𑀺, 𑀢𑀸𑀤𑀺𑀲𑀓𑁄 𑀫𑀬𑁆𑀳𑀁 𑀯𑀡𑁆𑀡𑁄 𑀳𑁄𑀢𑀺. 𑀬𑀸𑀤𑀺𑀲𑀓𑁄 𑀢𑁂𑀲𑀁 𑀲𑀭𑁄 𑀳𑁄𑀢𑀺, 𑀢𑀸𑀤𑀺𑀲𑀓𑁄 𑀫𑀬𑁆𑀳𑀁 𑀲𑀭𑁄 𑀳𑁄𑀢𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀫𑀺 𑀲𑀫𑀸𑀤𑀧𑁂𑀫𑀺 𑀲𑀫𑀼𑀢𑁆𑀢𑁂𑀚𑁂𑀫𑀺 𑀲𑀫𑁆𑀧𑀳𑀁𑀲𑁂𑀫𑀺. 𑀪𑀸𑀲𑀫𑀸𑀦𑀜𑁆𑀘 𑀫𑀁 𑀦 𑀚𑀸𑀦𑀦𑁆𑀢𑀺 ‘𑀓𑁄 𑀦𑀼 𑀔𑁄 𑀅𑀬𑀁 𑀪𑀸𑀲𑀢𑀺 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸’𑀢𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀸𑀫𑀺. 𑀅𑀦𑁆𑀢𑀭𑀳𑀺𑀢𑀜𑁆𑀘 𑀫𑀁 𑀦 𑀚𑀸𑀦𑀦𑁆𑀢𑀺 ‘𑀓𑁄 𑀦𑀼 𑀔𑁄 𑀅𑀬𑀁 𑀅𑀦𑁆𑀢𑀭𑀳𑀺𑀢𑁄 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸’’’𑀢𑀺 (𑀤𑀻. 𑀦𑀺. 𑁨.𑁧𑁭𑁨).

𑀔𑀢𑁆𑀢𑀺𑀬𑀸 𑀓𑁂𑀬𑀽𑀭𑀗𑁆𑀕𑀤𑀫𑀸𑀮𑀸𑀕𑀦𑁆𑀥𑀸𑀤𑀺𑀯𑀺𑀪𑀽𑀲𑀺𑀢𑀸 𑀦𑀸𑀦𑀸𑀯𑀺𑀭𑀸𑀕𑀯𑀲𑀦𑀸 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸 𑀫𑁄𑀴𑀺𑀥𑀭𑀸 𑀳𑁄𑀦𑁆𑀢𑀺. 𑀓𑀺𑀁 𑀪𑀕𑀯𑀸𑀧𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀫𑀡𑁆𑀟𑁂𑀢𑀺? 𑀢𑁂 𑀘 𑀑𑀤𑀸𑀢𑀸𑀧𑀺 𑀳𑁄𑀦𑁆𑀢𑀺 𑀓𑀸𑀴𑀸𑀧𑀺 𑀫𑀁𑀕𑀼𑀮𑀘𑁆𑀙𑀯𑀻𑀧𑀺. 𑀓𑀺𑀁 𑀲𑀢𑁆𑀣𑀸𑀧𑀺 𑀏𑀯𑀭𑀽𑀧𑁄 𑀳𑁄𑀢𑀻𑀢𑀺? 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀧𑀩𑁆𑀩𑀚𑀺𑀢𑀯𑀲𑁂𑀦𑁂𑀯 𑀕𑀘𑁆𑀙𑀢𑀺, 𑀢𑁂𑀲𑀁 𑀧𑀦 𑀢𑀸𑀤𑀺𑀲𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀕𑀦𑁆𑀢𑁆𑀯𑀸 𑀭𑀸𑀚𑀸𑀲𑀦𑁂 𑀦𑀺𑀲𑀺𑀦𑁆𑀦𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺, 𑀢𑁂𑀲𑀁 ‘‘𑀅𑀚𑁆𑀚 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀅𑀢𑀺𑀯𑀺𑀬 𑀯𑀺𑀭𑁄𑀘𑀢𑀻’’𑀢𑀺 𑀳𑁄𑀢𑀺. 𑀢𑁂 𑀘 𑀪𑀺𑀦𑁆𑀦𑀲𑁆𑀲𑀭𑀸𑀧𑀺 𑀳𑁄𑀦𑁆𑀢𑀺 𑀕𑀕𑁆𑀕𑀲𑁆𑀲𑀭𑀸𑀧𑀺 𑀓𑀸𑀓𑀲𑁆𑀲𑀭𑀸𑀧𑀺. 𑀲𑀢𑁆𑀣𑀸 𑀩𑁆𑀭𑀳𑁆𑀫𑀲𑁆𑀲𑀭𑁂𑀦𑁂𑀯 𑀥𑀫𑁆𑀫𑀁 𑀓𑀣𑁂𑀢𑀺. 𑀢𑀸𑀤𑀺𑀲𑀓𑁄 𑀫𑀬𑁆𑀳𑀁 𑀲𑀭𑁄 𑀳𑁄𑀢𑀻𑀢𑀺 𑀇𑀤𑀁 𑀧𑀦 𑀪𑀸𑀲𑀦𑁆𑀢𑀭𑀁 𑀲𑀦𑁆𑀥𑀸𑀬 𑀓𑀣𑀺𑀢𑀁. 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀢𑀁 𑀲𑀼𑀢𑁆𑀯𑀸 ‘‘𑀅𑀚𑁆𑀚 𑀭𑀸𑀚𑀸 𑀫𑀥𑀼𑀭𑁂𑀦 𑀲𑀭𑁂𑀦 𑀓𑀣𑁂𑀢𑀻’’𑀢𑀺 𑀳𑁄𑀢𑀺. 𑀓𑀣𑁂𑀢𑁆𑀯𑀸 𑀧𑀓𑁆𑀓𑀦𑁆𑀢𑁂 𑀘 𑀪𑀕𑀯𑀢𑀺 𑀧𑀼𑀦 𑀭𑀸𑀚𑀸𑀦𑀁 𑀆𑀕𑀢𑀁 𑀤𑀺𑀲𑁆𑀯𑀸 ‘‘𑀓𑁄 𑀦𑀼 𑀔𑁄 𑀅𑀬’’𑀦𑁆𑀢𑀺 𑀯𑀻𑀫𑀁𑀲𑀸 𑀉𑀧𑁆𑀧𑀚𑁆𑀚𑀢𑀺.

𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑁄 𑀦𑀼 𑀔𑁄 𑀅𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀤𑀸𑀦𑁂𑀯 𑀫𑀸𑀕𑀥𑀪𑀸𑀲𑀸𑀬 𑀲𑀻𑀳𑀴𑀪𑀸𑀲𑀸𑀬 𑀫𑀥𑀼𑀭𑁂𑀦 𑀲𑀭𑁂𑀦 𑀓𑀣𑁂𑀦𑁆𑀢𑁄 𑀅𑀦𑁆𑀢𑀭𑀳𑀺𑀢𑁄, 𑀓𑀺𑀁 𑀤𑁂𑀯𑁄, 𑀉𑀤𑀸𑀳𑀼 𑀫𑀦𑀼𑀲𑁆𑀲𑁄𑀢𑀺? 𑀓𑀺𑀫𑀢𑁆𑀣𑀁 𑀧𑀦𑁂𑀯𑀁 𑀅𑀚𑀸𑀦𑀦𑁆𑀢𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺? 𑀯𑀸𑀲𑀦𑀢𑁆𑀣𑀸𑀬. 𑀏𑀯𑀁 𑀲𑀼𑀢𑁄𑀧𑀺 𑀳𑀺 𑀥𑀫𑁆𑀫𑁄 𑀅𑀦𑀸𑀕𑀢𑁂 𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯𑀸𑀢𑀺 𑀅𑀦𑀸𑀕𑀢𑀁 𑀧𑀝𑀺𑀘𑁆𑀘 𑀤𑁂𑀲𑁂𑀢𑀻𑀢𑀺.

𑀲𑀦𑁆𑀦𑀺𑀲𑀺𑀦𑁆𑀦𑀧𑀼𑀩𑁆𑀩𑀦𑁆𑀢𑀺 𑀲𑀗𑁆𑀕𑀫𑁆𑀫 𑀦𑀺𑀲𑀺𑀦𑁆𑀦𑀧𑀼𑀩𑁆𑀩𑀁. 𑀲𑀮𑁆𑀮𑀧𑀺𑀢𑀧𑀼𑀩𑁆𑀩𑀦𑁆𑀢𑀺 𑀆𑀮𑀸𑀧𑀲𑀮𑁆𑀮𑀸𑀧𑁄 𑀓𑀢𑀧𑀼𑀩𑁆𑀩𑁄. 𑀲𑀸𑀓𑀘𑁆𑀙𑀸𑀢𑀺 𑀥𑀫𑁆𑀫𑀲𑀸𑀓𑀘𑁆𑀙𑀸𑀧𑀺 𑀲𑀫𑀸𑀧𑀚𑁆𑀚𑀺𑀢𑀧𑀼𑀩𑁆𑀩𑀸. 𑀅𑀦𑁂𑀓𑀲𑀢𑀁 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀦𑁆𑀢𑀺𑀆𑀤𑀻𑀦𑀫𑁆𑀧𑀺 𑀲𑁄𑀡𑀤𑀡𑁆𑀟𑀲𑀫𑀸𑀕𑀫𑀸𑀤𑀺𑀯𑀲𑁂𑀦 𑀘𑁂𑀯 𑀅𑀜𑁆𑀜𑀘𑀓𑁆𑀓𑀯𑀸𑀴𑀯𑀲𑁂𑀦 𑀘 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀝𑁆𑀞𑀧𑀭𑀺𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀬𑁄𑀦𑀺𑀯𑀡𑁆𑀡𑀦𑀸

𑁧𑁫𑁨. 𑀘𑀢𑀲𑁆𑀲𑁄 𑀔𑁄 𑀇𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀬𑁄𑀦𑀺𑀬𑁄𑀢𑀺 𑀏𑀢𑁆𑀣 𑀬𑁄𑀦𑀻𑀢𑀺 𑀔𑀦𑁆𑀥𑀓𑁄𑀝𑁆𑀞𑀸𑀲𑀲𑁆𑀲𑀧𑀺 𑀓𑀸𑀭𑀡𑀲𑁆𑀲𑀧𑀺 𑀧𑀲𑁆𑀲𑀸𑀯𑀫𑀕𑁆𑀕𑀲𑁆𑀲𑀧𑀺 𑀦𑀸𑀫𑀁. ‘‘𑀘𑀢𑀲𑁆𑀲𑁄 𑀦𑀸𑀕𑀬𑁄𑀦𑀺𑀬𑁄 𑀘𑀢𑀲𑁆𑀲𑁄 𑀲𑀼𑀧𑀡𑁆𑀡𑀬𑁄𑀦𑀺𑀬𑁄’’𑀢𑀺 (𑀲𑀁. 𑀦𑀺. 𑁩.𑁩𑁪𑁨, 𑁩𑁯𑁨) 𑀏𑀢𑁆𑀣 𑀳𑀺 𑀔𑀦𑁆𑀥𑀓𑁄𑀝𑁆𑀞𑀸𑀲𑁄 𑀬𑁄𑀦𑀺 𑀦𑀸𑀫. ‘‘𑀬𑁄𑀦𑀺 𑀳𑁂𑀲𑀸 𑀪𑀽𑀫𑀺𑀚 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺 (𑀫. 𑀦𑀺. 𑁨.𑁨𑁨𑁭) 𑀏𑀢𑁆𑀣 𑀓𑀸𑀭𑀡𑀁. ‘‘𑀦 𑀘𑀸𑀳𑀁 𑀩𑁆𑀭𑀸𑀳𑁆𑀫𑀡𑀁 𑀩𑁆𑀭𑀽𑀫𑀺, 𑀬𑁄𑀦𑀺𑀚𑀁 𑀫𑀢𑁆𑀢𑀺𑀲𑀫𑁆𑀪𑀯’’𑀦𑁆𑀢𑀺 (𑀫. 𑀦𑀺. 𑁨.𑁪𑁫𑁭; 𑀥. 𑀧. 𑁩𑁯𑁬) 𑀏𑀢𑁆𑀣 𑀧𑀲𑁆𑀲𑀸𑀯𑀫𑀕𑁆𑀕𑁄. 𑀇𑀥 𑀧𑀦 𑀔𑀦𑁆𑀥𑀓𑁄𑀝𑁆𑀞𑀸𑀲𑁄 𑀬𑁄𑀦𑀻𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀢𑁆𑀣 𑀅𑀡𑁆𑀟𑁂 𑀚𑀸𑀢𑀸 𑀅𑀡𑁆𑀟𑀚𑀸. 𑀚𑀮𑀸𑀩𑀼𑀫𑁆𑀳𑀺 𑀚𑀸𑀢𑀸 𑀚𑀮𑀸𑀩𑀼𑀚𑀸. 𑀲𑀁𑀲𑁂𑀤𑁂 𑀚𑀸𑀢𑀸 𑀲𑀁𑀲𑁂𑀤𑀚𑀸. 𑀯𑀺𑀦𑀸 𑀏𑀢𑁂𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀢𑀺𑀢𑁆𑀯𑀸 𑀯𑀺𑀬 𑀦𑀺𑀩𑁆𑀩𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀑𑀧𑀧𑀸𑀢𑀺𑀓𑀸. 𑀅𑀪𑀺𑀦𑀺𑀩𑁆𑀪𑀺𑀚𑁆𑀚 𑀚𑀸𑀬𑀦𑁆𑀢𑀻𑀢𑀺 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑀯𑀲𑁂𑀦 𑀚𑀸𑀬𑀦𑁆𑀢𑀺. 𑀧𑀽𑀢𑀺𑀓𑀼𑀡𑀧𑁂 𑀯𑀸𑀢𑀺𑀆𑀤𑀻𑀳𑀺 𑀅𑀦𑀺𑀝𑁆𑀞𑀝𑁆𑀞𑀸𑀦𑀸𑀦𑁂𑀯 𑀤𑀲𑁆𑀲𑀺𑀢𑀸𑀦𑀺. 𑀇𑀝𑁆𑀞𑁂𑀲𑀼𑀧𑀺 𑀲𑀧𑁆𑀧𑀺𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀲𑀼 𑀲𑀢𑁆𑀢𑀸 𑀚𑀸𑀬𑀦𑁆𑀢𑀺 𑀏𑀯. 𑀤𑁂𑀯𑀸𑀢𑀺𑀆𑀤𑀻𑀲𑀼 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺𑀤𑁂𑀯𑀸 𑀑𑀧𑀧𑀸𑀢𑀺𑀓𑀸𑀯 𑀳𑁄𑀦𑁆𑀢𑀺. 𑀪𑀽𑀫𑀤𑁂𑀯𑀸 𑀧𑀦 𑀘𑀢𑀼𑀬𑁄𑀦𑀺𑀓𑀸. 𑀏𑀓𑀘𑁆𑀘𑁂 𑀘 𑀫𑀦𑀼𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑁂𑀲𑀼 𑀓𑁂𑀘𑀺 𑀤𑁂𑀯𑀸 𑀯𑀺𑀬 𑀑𑀧𑀧𑀸𑀢𑀺𑀓𑀸 𑀘 𑀳𑁄𑀦𑁆𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀧𑀦𑁂𑀢𑁂 𑀚𑀮𑀸𑀩𑀼𑀚𑀸𑀯, 𑀅𑀡𑁆𑀟𑀚𑀸𑀧𑀺 𑀏𑀢𑁆𑀣 𑀓𑁄𑀦𑁆𑀢𑀧𑀼𑀢𑁆𑀢𑀸 𑀤𑁆𑀯𑁂𑀪𑀸𑀢𑀺𑀬𑀢𑁆𑀣𑁂𑀭𑀸 𑀯𑀺𑀬, 𑀲𑀁𑀲𑁂𑀤𑀚𑀸𑀧𑀺 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀧𑁄𑀓𑁆𑀔𑀭𑀲𑀸𑀢𑀺𑀩𑁆𑀭𑀸𑀳𑁆𑀫𑀡𑀧𑀤𑀼𑀫𑀯𑀢𑀺𑀤𑁂𑀯𑀻𑀆𑀤𑀬𑁄 𑀯𑀺𑀬, 𑀏𑀯𑀁 𑀯𑀺𑀦𑀺𑀧𑀸𑀢𑀺𑀓𑁂𑀲𑀼 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀧𑁂𑀢𑀸 𑀦𑁂𑀭𑀬𑀺𑀓𑀸 𑀯𑀺𑀬 𑀑𑀧𑀧𑀸𑀢𑀺𑀓𑀸𑀬𑁂𑀯, 𑀅𑀯𑀲𑁂𑀲𑀸 𑀘𑀢𑀼𑀬𑁄𑀦𑀺𑀓𑀸𑀧𑀺 𑀳𑁄𑀦𑁆𑀢𑀺. 𑀬𑀣𑀸 𑀢𑁂 𑀏𑀯𑀁 𑀬𑀓𑁆𑀔𑀸𑀧𑀺 𑀲𑀩𑁆𑀩𑀘𑀢𑀼𑀧𑁆𑀧𑀤𑀧𑀓𑁆𑀔𑀺𑀚𑀸𑀢𑀺𑀤𑀻𑀖𑀚𑀸𑀢𑀺𑀆𑀤𑀬𑁄𑀧𑀺 𑀲𑀩𑁆𑀩𑁂 𑀘𑀢𑀼𑀬𑁄𑀦𑀺𑀓𑀸𑀬𑁂𑀯.

𑀘𑀢𑀼𑀬𑁄𑀦𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀕𑀢𑀺𑀯𑀡𑁆𑀡𑀦𑀸

𑁧𑁫𑁩. 𑀧𑀜𑁆𑀘 𑀔𑁄 𑀇𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀕𑀢𑀺𑀬𑁄𑀢𑀺 𑀏𑀢𑁆𑀣 𑀲𑀼𑀓𑀢𑀤𑀼𑀓𑁆𑀓𑀝𑀓𑀫𑁆𑀫𑀯𑀲𑁂𑀦 𑀕𑀦𑁆𑀢𑀩𑁆𑀩𑀸𑀢𑀺 𑀕𑀢𑀺𑀬𑁄. 𑀅𑀧𑀺𑀘 𑀕𑀢𑀺𑀕𑀢𑀺 𑀦𑀺𑀩𑁆𑀩𑀢𑁆𑀢𑀺𑀕𑀢𑀺 𑀅𑀚𑁆𑀛𑀸𑀲𑀬𑀕𑀢𑀺 𑀯𑀺𑀪𑀯𑀕𑀢𑀺 𑀦𑀺𑀧𑁆𑀨𑀢𑁆𑀢𑀺𑀕𑀢𑀻𑀢𑀺 𑀩𑀳𑀼𑀯𑀺𑀥𑀸 𑀕𑀢𑀺 𑀦𑀸𑀫. 𑀢𑀢𑁆𑀣 ‘‘𑀢𑀁 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀸𑀫𑀻’’𑀢𑀺 (𑀅. 𑀦𑀺. 𑁪.𑁧𑁮𑁪) 𑀘, ‘‘𑀬𑀲𑁆𑀲 𑀕𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀤𑁂𑀯𑀸 𑀕𑀦𑁆𑀥𑀩𑁆𑀩𑀫𑀸𑀦𑀼𑀲𑀸’’𑀢𑀺 (𑀥. 𑀧. 𑁪𑁨𑁦) 𑀘 𑀅𑀬𑀁 𑀕𑀢𑀺𑀕𑀢𑀺 𑀦𑀸𑀫. ‘‘𑀇𑀫𑁂𑀲𑀁 𑀔𑁄 𑀅𑀳𑀁 𑀪𑀺𑀓𑁆𑀔𑀽𑀦𑀁 𑀲𑀻𑀮𑀯𑀦𑁆𑀢𑀸𑀦𑀁 𑀦𑁂𑀯 𑀚𑀸𑀦𑀸𑀫𑀺 𑀕𑀢𑀺𑀁 𑀯𑀸 𑀅𑀕𑀢𑀺𑀁 𑀯𑀸’’𑀢𑀺 (𑀫. 𑀦𑀺. 𑁧.𑁫𑁦𑁮) 𑀅𑀬𑀁 𑀦𑀺𑀩𑁆𑀩𑀢𑁆𑀢𑀺𑀕𑀢𑀺 𑀦𑀸𑀫. ‘‘𑀏𑀯𑀫𑁆𑀧𑀺 𑀔𑁄 𑀢𑁂 𑀅𑀳𑀁 𑀩𑁆𑀭𑀳𑁆𑀫𑁂 𑀕𑀢𑀺𑀁 𑀘 𑀧𑀚𑀸𑀦𑀸𑀫𑀺 𑀚𑀼𑀢𑀺𑀜𑁆𑀘 𑀧𑀚𑀸𑀦𑀸𑀫𑀻’’𑀢𑀺 (𑀫. 𑀦𑀺. 𑁧.𑁫𑁦𑁩) 𑀅𑀬𑀁 𑀅𑀚𑁆𑀛𑀸𑀲𑀬𑀕𑀢𑀺 𑀦𑀸𑀫. ‘‘𑀯𑀺𑀪𑀯𑁄 𑀕𑀢𑀺 𑀥𑀫𑁆𑀫𑀸𑀦𑀁, 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻’’𑀢𑀺 (𑀧𑀭𑀺. 𑁩𑁩𑁯) 𑀅𑀬𑀁 𑀯𑀺𑀪𑀯𑀕𑀢𑀺 𑀦𑀸𑀫. ‘‘𑀤𑁆𑀯𑁂𑀬𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸’’𑀢𑀺 (𑀤𑀻. 𑀦𑀺. 𑁧.𑁨𑁫𑁮; 𑁨.𑁩𑁪) 𑀅𑀬𑀁 𑀦𑀺𑀧𑁆𑀨𑀢𑁆𑀢𑀺𑀕𑀢𑀺 𑀦𑀸𑀫. 𑀢𑀸𑀲𑀼 𑀇𑀥 𑀕𑀢𑀺𑀕𑀢𑀺 𑀅𑀥𑀺𑀧𑁆𑀧𑁂𑀢𑀸.

𑀦𑀺𑀭𑀬𑁄𑀢𑀺𑀆𑀤𑀻𑀲𑀼 𑀦𑀺𑀭𑀢𑀺𑀅𑀢𑁆𑀣𑁂𑀦 𑀦𑀺𑀭𑀲𑁆𑀲𑀸𑀤𑀝𑁆𑀞𑁂𑀦 𑀦𑀺𑀭𑀬𑁄. 𑀢𑀺𑀭𑀺𑀬𑀁 𑀅𑀜𑁆𑀙𑀺𑀢𑀸𑀢𑀺 𑀢𑀺𑀭𑀘𑁆𑀙𑀸𑀦𑀸. 𑀢𑁂𑀲𑀁 𑀬𑁄𑀦𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺. 𑀧𑁂𑀘𑁆𑀘𑀪𑀸𑀯𑀁 𑀧𑀢𑁆𑀢𑀸𑀦𑀁 𑀯𑀺𑀲𑀬𑁄𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑁄. 𑀫𑀦𑀲𑁄 𑀉𑀲𑁆𑀲𑀦𑁆𑀦𑀢𑁆𑀢𑀸 𑀫𑀦𑀼𑀲𑁆𑀲𑀸. 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀳𑀺 𑀘 𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸. 𑀦𑀺𑀭𑀬𑀜𑁆𑀘𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀻𑀲𑀼 𑀦𑀺𑀭𑀬𑁄𑀢𑀺 𑀲𑀤𑁆𑀥𑀺𑀁 𑀑𑀓𑀸𑀲𑁂𑀦 𑀔𑀦𑁆𑀥𑀸. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀘𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀕𑁆𑀕𑀁 𑀧𑀝𑀺𑀧𑀤𑀦𑁆𑀢𑀺 𑀉𑀪𑀬𑁂𑀦𑀸𑀧𑀺 𑀯𑀼𑀢𑁆𑀢𑀕𑀢𑀺𑀲𑀁𑀯𑀢𑁆𑀢𑀦𑀺𑀓 𑀓𑀫𑁆𑀫𑀫𑁂𑀯 𑀤𑀲𑁆𑀲𑁂𑀢𑀺. 𑀬𑀣𑀸 𑀘 𑀧𑀝𑀺𑀧𑀦𑁆𑀦𑁄𑀢𑀺 𑀬𑁂𑀦 𑀫𑀕𑁆𑀕𑁂𑀦 𑀬𑀸𑀬 𑀧𑀝𑀺𑀧𑀤𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀉𑀪𑀬𑀫𑁆𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀦𑀺𑀤𑁆𑀤𑀺𑀲𑀢𑀺. 𑀅𑀧𑀸𑀬𑀦𑁆𑀢𑀺𑀆𑀤𑀻𑀲𑀼 𑀯𑀟𑁆𑀠𑀺𑀲𑀗𑁆𑀔𑀸𑀢𑀸 𑀲𑀼𑀔𑀲𑀗𑁆𑀔𑀸𑀢𑀸 𑀯𑀸 𑀅𑀬𑀸 𑀅𑀧𑁂𑀢𑀢𑁆𑀢𑀸 𑀅𑀧𑀸𑀬𑁄. 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀤𑀼𑀕𑁆𑀕𑀢𑀺. 𑀤𑀼𑀓𑁆𑀓𑀝𑀓𑀸𑀭𑀺𑀦𑁄 𑀏𑀢𑁆𑀣 𑀯𑀺𑀦𑀺𑀧𑀢𑀦𑁆𑀢𑀻𑀢𑀺 𑀯𑀺𑀦𑀺𑀧𑀸𑀢𑁄. 𑀦𑀺𑀩𑁆𑀩𑀸𑀦𑀜𑁆𑀘𑀸𑀳𑀦𑁆𑀢𑀺 𑀇𑀤𑀁 𑀧𑀦 𑀦 𑀓𑁂𑀯𑀮𑀁 𑀕𑀢𑀺𑀕𑀢𑀺𑀫𑁂𑀯, 𑀕𑀢𑀺𑀦𑀺𑀲𑁆𑀲𑀭𑀡𑀁 𑀦𑀺𑀩𑁆𑀩𑀸𑀦𑀫𑁆𑀧𑀺 𑀚𑀸𑀦𑀸𑀫𑀻𑀢𑀺 𑀤𑀲𑁆𑀲𑀦𑀢𑁆𑀣𑀫𑀸𑀳. 𑀇𑀥 𑀫𑀕𑁆𑀕𑁄 𑀧𑀝𑀺𑀧𑀤𑀸𑀢𑀺 𑀉𑀪𑀬𑁂𑀦𑀸𑀧𑀺 𑀅𑀭𑀺𑀬𑀫𑀕𑁆𑀕𑁄𑀯 𑀯𑀼𑀢𑁆𑀢𑁄.

𑀧𑀜𑁆𑀘𑀕𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀜𑀸𑀡𑀧𑁆𑀧𑀯𑀢𑁆𑀢𑀸𑀓𑀸𑀭𑀯𑀡𑁆𑀡𑀦𑀸

𑁧𑁫𑁪. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀜𑀸𑀡𑀧𑁆𑀧𑀯𑀢𑁆𑀢𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀇𑀥𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀏𑀓𑀦𑁆𑀢𑀤𑀼𑀓𑁆𑀔𑀸𑀢𑀺 𑀦𑀺𑀘𑁆𑀘𑀤𑀼𑀓𑁆𑀔𑀸 𑀦𑀺𑀭𑀦𑁆𑀢𑀭𑀤𑀼𑀓𑁆𑀔𑀸. 𑀢𑀺𑀩𑁆𑀩𑀸𑀢𑀺 𑀩𑀳𑀮𑀸. 𑀓𑀝𑀼𑀓𑀸𑀢𑀺 𑀔𑀭𑀸. 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀻𑀦𑀺 𑀑𑀧𑀫𑁆𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀓𑀸𑀲𑀽𑀢𑀺 𑀆𑀯𑀸𑀝𑁄𑀧𑀺 𑀯𑀼𑀘𑁆𑀘𑀢𑀺 𑀭𑀸𑀲𑀺𑀧𑀺.

‘‘𑀓𑀺𑀦𑁆𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀓𑀸𑀲𑀼𑀁 𑀔𑀡𑀲𑀺 𑀲𑀸𑀭𑀣𑀺;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀺𑀁 𑀓𑀸𑀲𑀼𑀬𑀸 𑀓𑀭𑀺𑀲𑁆𑀲𑀲𑀻’’𑀢𑀺. (𑀚𑀸. 𑁨.𑁨𑁨.𑁩) 𑁋

𑀏𑀢𑁆𑀣 𑀳𑀺 𑀆𑀯𑀸𑀝𑁄 𑀓𑀸𑀲𑀼 𑀦𑀸𑀫.

‘‘𑀅𑀗𑁆𑀕𑀸𑀭𑀓𑀸𑀲𑀼𑀁 𑀅𑀧𑀭𑁂 𑀨𑀼𑀦𑀦𑁆𑀢𑀺, 𑀦𑀭𑀸 𑀭𑀼𑀤𑀦𑁆𑀢𑀸 𑀧𑀭𑀺𑀤𑀟𑁆𑀠𑀕𑀢𑁆𑀢𑀸’’𑀢𑀺. (𑀚𑀸. 𑁨.𑁨𑁨.𑁪𑁬𑁨) 𑁋

𑀏𑀢𑁆𑀣 𑀭𑀸𑀲𑀺. 𑀇𑀥 𑀧𑀦 𑀆𑀯𑀸𑀝𑁄 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑁂𑀯𑀸𑀳 ‘‘𑀲𑀸𑀥𑀺𑀓𑀧𑁄𑀭𑀺𑀲𑀸’’𑀢𑀺. 𑀢𑀢𑁆𑀣 𑀲𑀸𑀥𑀺𑀓𑀁 𑀧𑁄𑀭𑀺𑀲𑀁 𑀧𑀫𑀸𑀡𑀁 𑀅𑀲𑁆𑀲𑀸𑀢𑀺 𑀲𑀸𑀥𑀺𑀓𑀧𑁄𑀭𑀺𑀲𑀸, 𑀅𑀢𑀺𑀭𑁂𑀓𑀧𑀜𑁆𑀘𑀭𑀢𑀦𑀸𑀢𑀺 𑀅𑀢𑁆𑀣𑁄. 𑀯𑀻𑀢𑀘𑁆𑀘𑀺𑀓𑀸𑀦𑀁 𑀯𑀻𑀢𑀥𑀽𑀫𑀸𑀦𑀦𑁆𑀢𑀺 𑀏𑀢𑀁 𑀧𑀭𑀺𑀴𑀸𑀳𑀲𑁆𑀲 𑀩𑀮𑀯𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀅𑀘𑁆𑀘𑀺𑀬𑀸 𑀯𑀸 𑀲𑀢𑀺 𑀥𑀽𑀫𑁂 𑀯𑀸 𑀲𑀢𑀺, 𑀯𑀸𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀢𑁂𑀦 𑀧𑀭𑀺𑀴𑀸𑀳𑁄 𑀦 𑀩𑀮𑀯𑀸 𑀳𑁄𑀢𑀺. 𑀖𑀫𑁆𑀫𑀧𑀭𑁂𑀢𑁄𑀢𑀺 𑀖𑀫𑁆𑀫𑀸𑀦𑀼𑀕𑀢𑁄. 𑀢𑀲𑀺𑀢𑁄𑀢𑀺 𑀚𑀸𑀢𑀢𑀡𑁆𑀳𑁄. 𑀧𑀺𑀧𑀸𑀲𑀺𑀢𑁄𑀢𑀺 𑀉𑀤𑀓𑀁 𑀧𑀸𑀢𑀼𑀓𑀸𑀫𑁄. 𑀏𑀓𑀸𑀬𑀦𑁂𑀦 𑀫𑀕𑁆𑀕𑁂𑀦𑀸𑀢𑀺 𑀏𑀓𑀧𑀣𑁂𑀦𑁂𑀯 𑀫𑀕𑁆𑀕𑁂𑀦, 𑀅𑀦𑀼𑀓𑁆𑀓𑀫𑀦𑀺𑀬𑁂𑀦 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀦𑀺𑀭𑀦𑁆𑀢𑀭𑀓𑀡𑁆𑀝𑀓𑀭𑀼𑀓𑁆𑀔𑀕𑀳𑀦𑁂𑀦. 𑀧𑀡𑀺𑀥𑀸𑀬𑀸𑀢𑀺 𑀅𑀗𑁆𑀕𑀸𑀭𑀓𑀸𑀲𑀼𑀬𑀁 𑀧𑀢𑁆𑀣𑀦𑀸 𑀦𑀸𑀫 𑀦𑀢𑁆𑀣𑀺, 𑀅𑀗𑁆𑀕𑀸𑀭𑀓𑀸𑀲𑀼𑀁 𑀆𑀭𑀩𑁆𑀪 𑀧𑀦 𑀇𑀭𑀺𑀬𑀸𑀧𑀣𑀲𑁆𑀲 𑀞𑀧𑀺𑀢𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀅𑀗𑁆𑀕𑀸𑀭𑀓𑀸𑀲𑀼 𑀯𑀺𑀬 𑀳𑀺 𑀦𑀺𑀭𑀬𑁄 𑀤𑀝𑁆𑀞𑀩𑁆𑀩𑁄. 𑀅𑀗𑁆𑀕𑀸𑀭𑀓𑀸𑀲𑀼𑀫𑀕𑁆𑀕𑁄 𑀯𑀺𑀬 𑀦𑀺𑀭𑀬𑀽𑀧𑀕𑀁 𑀓𑀫𑁆𑀫𑀁. 𑀫𑀕𑁆𑀕𑀸𑀭𑀼𑀴𑁆𑀳𑁄 𑀯𑀺𑀬 𑀓𑀫𑁆𑀫𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄. 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀤𑀺𑀩𑁆𑀩𑀘𑀓𑁆𑀔𑀼𑀓𑁄 𑀪𑀕𑀯𑀸. 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀫𑀕𑁆𑀕𑀸𑀭𑀼𑀴𑁆𑀳𑀁 𑀤𑀺𑀲𑁆𑀯𑀸 𑀯𑀺𑀚𑀸𑀦𑀸𑀢𑀺 ‘‘𑀅𑀬𑀁 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀦𑁆𑀢𑁆𑀯𑀸 𑀅𑀗𑁆𑀕𑀸𑀭𑀓𑀸𑀲𑀼𑀬𑀁 𑀧𑀢𑀺𑀲𑁆𑀲𑀢𑀻’’𑀢𑀺, 𑀏𑀯𑀫𑁂𑀯𑀁 𑀪𑀕𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀓𑀫𑁆𑀫𑀁 𑀆𑀬𑀽𑀳𑀦𑁆𑀢𑀁 𑀏𑀯𑀁 𑀚𑀸𑀦𑀸𑀢𑀺 ‘‘𑀅𑀬𑀁 𑀇𑀫𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑁆𑀢𑀻’’𑀢𑀺. 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀅𑀧𑀭𑀪𑀸𑀕𑁂 𑀢𑀁 𑀅𑀗𑁆𑀕𑀸𑀭𑀓𑀸𑀲𑀼𑀬𑀸 𑀧𑀢𑀺𑀢𑀁 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀪𑀕𑀯𑀸 𑀅𑀧𑀭𑀪𑀸𑀕𑁂 ‘‘𑀲𑁄 𑀧𑀼𑀭𑀺𑀲𑁄 𑀢𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀁 𑀧𑀲𑁆𑀲𑀢𑀺 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀺𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀲𑁆𑀲 𑀓𑀫𑁆𑀫𑀸𑀬𑀽𑀳𑀦𑀓𑀸𑀮𑁂 𑀅𑀜𑁆𑀜𑁄 𑀯𑀡𑁆𑀡𑁄, 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀅𑀜𑁆𑀜𑁄. 𑀅𑀣𑀸𑀧𑀺 ‘‘𑀲𑁄 𑀲𑀢𑁆𑀢𑁄 𑀢𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀓𑀢𑁆𑀣 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀑𑀮𑁄𑀓𑁂𑀦𑁆𑀢𑀲𑁆𑀲 𑀅𑀦𑁂𑀓𑀲𑀳𑀲𑁆𑀲𑀸𑀦𑀁 𑀲𑀢𑁆𑀢𑀸𑀦𑀁 𑀫𑀚𑁆𑀛𑁂 𑀞𑀺𑀢𑁄𑀧𑀺 ‘‘𑀅𑀬𑀁 𑀲𑁄’’𑀢𑀺 𑀲𑁄𑀬𑁂𑀯 𑀲𑀢𑁆𑀢𑁄 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, ‘‘𑀤𑀺𑀩𑁆𑀩𑀘𑀓𑁆𑀔𑀼𑀩𑀮𑀁 𑀦𑀸𑀫 𑀏𑀢’’𑀦𑁆𑀢𑀺 𑀯𑀤𑀦𑁆𑀢𑀺.

𑀤𑀼𑀢𑀺𑀬𑀉𑀧𑀫𑀸𑀬𑀁 𑀬𑀲𑁆𑀫𑀸 𑀅𑀗𑁆𑀕𑀸𑀭𑀓𑀸𑀲𑀼𑀬𑀁 𑀯𑀺𑀬 𑀕𑀽𑀣𑀓𑀽𑀧𑁂 𑀧𑀭𑀺𑀴𑀸𑀳𑁄 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀏𑀓𑀦𑁆𑀢𑀤𑀼𑀓𑁆𑀔𑀸’’𑀢𑀺 𑀅𑀯𑀢𑁆𑀯𑀸 ‘‘𑀤𑀼𑀓𑁆𑀔𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀫𑁆𑀧𑀺 𑀳𑀺 𑀧𑀼𑀕𑁆𑀕𑀮𑀁 𑀪𑀕𑀯𑀸 𑀳𑀢𑁆𑀣𑀺𑀬𑁄𑀦𑀺𑀆𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀁 𑀯𑀥𑀩𑀦𑁆𑀥𑀦𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀸𑀤𑀻𑀳𑀺 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀫𑀸𑀦𑀁 𑀧𑀲𑁆𑀲𑀢𑀺𑀬𑁂𑀯.

𑀢𑀢𑀺𑀬𑀉𑀧𑀫𑀸𑀬𑀁 𑀢𑀦𑀼𑀧𑀢𑁆𑀢𑀧𑀮𑀸𑀲𑁄𑀢𑀺 𑀦 𑀅𑀩𑁆𑀪𑀧𑀝𑀮𑀁 𑀯𑀺𑀬 𑀢𑀦𑀼𑀧𑀡𑁆𑀡𑁄, 𑀯𑀺𑀭𑀴𑀧𑀡𑁆𑀡𑀢𑁆𑀢𑀁 𑀧𑀦𑀲𑁆𑀲 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁. 𑀓𑀩𑀭𑀘𑁆𑀙𑀸𑀬𑁄𑀢𑀺 𑀯𑀺𑀭𑀴𑀘𑁆𑀙𑀸𑀬𑁄. 𑀤𑀼𑀓𑁆𑀔𑀩𑀳𑀼𑀮𑀸𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑀲𑁆𑀫𑀺𑀜𑁆𑀳𑀺 𑀤𑀼𑀓𑁆𑀔𑀫𑁂𑀯 𑀩𑀳𑀼𑀮𑀁, 𑀲𑀼𑀔𑀁 𑀧𑀭𑀺𑀢𑁆𑀢𑀁 𑀓𑀤𑀸𑀘𑀺 𑀅𑀦𑀼𑀪𑀯𑀺𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀏𑀢𑁆𑀣𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀢𑁆𑀣𑀉𑀧𑀫𑀸𑀬𑀁 𑀩𑀳𑀮𑀧𑀢𑁆𑀢𑀧𑀮𑀸𑀲𑁄𑀢𑀺 𑀦𑀺𑀭𑀦𑁆𑀢𑀭𑀧𑀡𑁆𑀡𑁄 𑀧𑀢𑁆𑀢𑀲𑀜𑁆𑀙𑀦𑁆𑀦𑁄. 𑀲𑀦𑁆𑀢𑀘𑁆𑀙𑀸𑀬𑁄𑀢𑀺 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀖𑀦𑀘𑁆𑀙𑀸𑀬𑁄. 𑀲𑀼𑀔𑀩𑀳𑀼𑀮𑀸 𑀯𑁂𑀤𑀦𑀸𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀲𑀼 𑀲𑀼𑀔𑀩𑀳𑀼𑀮𑀸 𑀯𑁂𑀤𑀦𑀸 𑀯𑁂𑀤𑀬𑀺𑀢𑀩𑁆𑀩𑀸 𑀳𑁄𑀢𑀺, 𑀢𑀸 𑀯𑁂𑀤𑀬𑀫𑀸𑀦𑀁 𑀦𑀺𑀧𑀦𑁆𑀦𑀁 𑀯𑀸 𑀦𑀺𑀲𑀺𑀦𑁆𑀦𑀁 𑀯𑀸 𑀧𑀲𑁆𑀲𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀥𑀸𑀧𑀺 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀧𑀜𑁆𑀘𑀫𑀉𑀧𑀫𑀸𑀬𑀁 𑀧𑀸𑀲𑀸𑀤𑁄𑀢𑀺 𑀤𑀻𑀖𑀧𑀸𑀲𑀸𑀤𑁄. 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀦𑁆𑀢𑀺 𑀅𑀦𑁆𑀢𑁄 𑀘𑁂𑀯 𑀉𑀮𑁆𑀮𑀺𑀢𑁆𑀢𑀁 𑀩𑀳𑀺 𑀘 𑀅𑀯𑀮𑀺𑀢𑁆𑀢𑀁. 𑀨𑀼𑀲𑀺𑀢𑀕𑁆𑀕𑀴𑀦𑁆𑀢𑀺 𑀤𑁆𑀯𑀸𑀭𑀩𑀸𑀳𑀸𑀳𑀺 𑀲𑀤𑁆𑀥𑀺𑀁 𑀲𑀼𑀧𑀺𑀳𑀺𑀢𑀓𑀯𑀸𑀝𑀁. 𑀕𑁄𑀦𑀓𑀢𑁆𑀣𑀢𑁄𑀢𑀺 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀮𑁄𑀫𑁂𑀦 𑀓𑀸𑀴𑀓𑁄𑀚𑀯𑁂𑀦 𑀅𑀢𑁆𑀣𑀢𑁄. 𑀧𑀝𑀺𑀓𑀢𑁆𑀣𑀢𑁄𑀢𑀺 𑀉𑀡𑁆𑀡𑀸𑀫𑀬𑁂𑀦 𑀲𑁂𑀢𑀅𑀢𑁆𑀣𑀭𑀡𑁂𑀦 𑀅𑀢𑁆𑀣𑀢𑁄. 𑀧𑀝𑀮𑀺𑀓𑀢𑁆𑀣𑀢𑁄𑀢𑀺 𑀖𑀦𑀧𑀼𑀧𑁆𑀨𑀓𑁂𑀦 𑀉𑀡𑁆𑀡𑀸𑀫𑀬𑀅𑀢𑁆𑀣𑀭𑀡𑁂𑀦 𑀅𑀢𑁆𑀣𑀢𑁄. 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑁄𑀢𑀺 𑀓𑀤𑀮𑀺𑀫𑀺𑀕𑀘𑀫𑁆𑀫𑀫𑀬𑁂𑀦 𑀉𑀢𑁆𑀢𑀫𑀧𑀘𑁆𑀘𑀢𑁆𑀣𑀭𑀡𑁂𑀦 𑀅𑀢𑁆𑀣𑀢𑁄. 𑀢𑀁 𑀓𑀺𑀭 𑀧𑀘𑁆𑀘𑀢𑁆𑀣𑀭𑀡𑀁 𑀲𑁂𑀢𑀯𑀢𑁆𑀣𑀲𑁆𑀲 𑀉𑀧𑀭𑀺 𑀓𑀤𑀮𑀺𑀫𑀺𑀕𑀘𑀫𑁆𑀫𑀁 𑀅𑀢𑁆𑀣𑀭𑀺𑀢𑁆𑀯𑀸 𑀲𑀺𑀩𑁆𑀩𑁂𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀲𑀉𑀢𑁆𑀢𑀭𑀘𑁆𑀙𑀤𑁄𑀢𑀺 𑀲𑀳 𑀉𑀢𑁆𑀢𑀭𑀘𑁆𑀙𑀤𑁂𑀦, 𑀉𑀢𑁆𑀢𑀭𑀺𑀩𑀤𑁆𑀥𑁂𑀦 𑀭𑀢𑁆𑀢𑀯𑀺𑀢𑀸𑀦𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑁄𑀢𑀺 𑀲𑀻𑀲𑀽𑀧𑀥𑀸𑀦𑀜𑁆𑀘 𑀧𑀸𑀤𑀽𑀧𑀥𑀸𑀦𑀜𑁆𑀘𑀸𑀢𑀺 𑀧𑀮𑁆𑀮𑀗𑁆𑀓𑀲𑁆𑀲 𑀉𑀪𑀢𑁄 𑀞𑀧𑀺𑀢𑀮𑁄𑀳𑀺𑀢𑀓𑀽𑀧𑀥𑀸𑀦𑁄. 𑀇𑀥𑀸𑀧𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀬𑀁 𑀧𑀦𑁂𑀢𑁆𑀣 𑀅𑀧𑀭𑀪𑀸𑀕𑀬𑁄𑀚𑀦𑀸, 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀫𑀕𑁆𑀕𑀸𑀭𑀼𑀴𑁆𑀳𑀫𑁂𑀯 𑀚𑀸𑀦𑀸𑀢𑀺 ‘‘𑀅𑀬𑀁 𑀏𑀢𑁂𑀦 𑀫𑀕𑁆𑀕𑁂𑀦 𑀕𑀦𑁆𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀓𑀽𑀝𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀲𑁆𑀲𑀢𑀺 𑀯𑀸 𑀦𑀺𑀧𑀚𑁆𑀚𑀺𑀲𑁆𑀲𑀢𑀺 𑀯𑀸’’𑀢𑀺, 𑀏𑀯𑀫𑁂𑀯𑀁 𑀪𑀕𑀯𑀸 𑀤𑀸𑀦𑀸𑀤𑀻𑀲𑀼 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀲𑀼 𑀬𑀁𑀓𑀺𑀜𑁆𑀘𑀺 𑀓𑀼𑀲𑀮𑀓𑀫𑁆𑀫𑀁 𑀆𑀬𑀽𑀳𑀦𑁆𑀢𑀁𑀬𑁂𑀯 𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀇𑀫𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺. 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀅𑀧𑀭𑀪𑀸𑀕𑁂 𑀢𑀁 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀓𑀽𑀝𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀁 𑀯𑀸 𑀦𑀺𑀧𑀦𑁆𑀦𑀁 𑀯𑀸 𑀏𑀓𑀦𑁆𑀢𑀲𑀼𑀔𑀁 𑀦𑀺𑀭𑀦𑁆𑀢𑀭𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑀁 𑀧𑀲𑁆𑀲𑀢𑀺, 𑀏𑀯𑀫𑁂𑀯𑀁 𑀪𑀕𑀯𑀸 𑀅𑀧𑀭𑀪𑀸𑀕𑁂 ‘‘𑀲𑁄 𑀢𑀁 𑀓𑀮𑁆𑀬𑀸𑀡𑀁 𑀓𑀢𑁆𑀯𑀸 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀁 𑀧𑀲𑁆𑀲𑀢𑀺, 𑀦𑀦𑁆𑀤𑀦𑀯𑀦𑀸𑀤𑀻𑀲𑀼 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑀁.

𑀜𑀸𑀡𑀧𑁆𑀧𑀯𑀢𑁆𑀢𑀸𑀓𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀯𑀓𑁆𑀔𑀬𑀯𑀸𑀭𑀯𑀡𑁆𑀡𑀦𑀸

𑀆𑀲𑀯𑀓𑁆𑀔𑀬𑀯𑀸𑀭𑁂 ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸’’𑀢𑀺 𑀅𑀯𑀢𑁆𑀯𑀸 ‘‘𑀢𑀫𑁂𑀦𑀁 𑀧𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 𑀓𑀲𑁆𑀫𑀸𑀢𑀺 𑀘𑁂? 𑀦𑀺𑀬𑀫𑀸𑀪𑀸𑀯𑀸. 𑀇𑀫𑀜𑁆𑀳𑀺 𑀧𑀼𑀕𑁆𑀕𑀮𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀺 𑀧𑀲𑁆𑀲𑀺𑀲𑁆𑀲𑀢𑀺, 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦𑀸𑀧𑀺 𑀚𑀸𑀦𑀺𑀲𑁆𑀲𑀢𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑀧𑀺 𑀚𑀸𑀦𑀺𑀲𑁆𑀲𑀢𑀺𑀬𑁂𑀯. 𑀏𑀓𑀦𑁆𑀢𑀲𑀼𑀔𑀸 𑀯𑁂𑀤𑀦𑀸𑀢𑀺 𑀇𑀤𑀁 𑀓𑀺𑀜𑁆𑀘𑀸𑀧𑀺 𑀤𑁂𑀯𑀮𑁄𑀓𑀲𑀼𑀔𑁂𑀦 𑀲𑀤𑁆𑀥𑀺𑀁 𑀩𑁆𑀬𑀜𑁆𑀚𑀦𑀢𑁄 𑀏𑀓𑀁, 𑀅𑀢𑁆𑀣𑀢𑁄 𑀧𑀦 𑀦𑀸𑀦𑀸 𑀳𑁄𑀢𑀺. 𑀤𑁂𑀯𑀮𑁄𑀓𑀲𑀼𑀔𑀜𑁆𑀳𑀺 𑀭𑀸𑀕𑀧𑀭𑀺𑀴𑀸𑀳𑀸𑀤𑀻𑀦𑀁 𑀅𑀢𑁆𑀣𑀺𑀢𑀸𑀬 𑀦 𑀏𑀓𑀦𑁆𑀢𑁂𑀦𑁂𑀯 𑀲𑀼𑀔𑀁. 𑀦𑀺𑀩𑁆𑀩𑀸𑀦𑀲𑀼𑀔𑀁 𑀧𑀦 𑀲𑀩𑁆𑀩𑀧𑀭𑀺𑀴𑀸𑀳𑀸𑀦𑀁 𑀯𑀽𑀧𑀲𑀫𑀸𑀬 𑀲𑀩𑁆𑀩𑀸𑀓𑀸𑀭𑁂𑀦 𑀏𑀓𑀦𑁆𑀢𑀲𑀼𑀔𑀁. 𑀉𑀧𑀫𑀸𑀬𑀫𑁆𑀧𑀺 ‘‘𑀬𑀣𑀸 𑀧𑀸𑀲𑀸𑀤𑁂 𑀏𑀓𑀦𑁆𑀢𑀲𑀼𑀔𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀫𑀕𑁆𑀕𑀧𑀭𑀺𑀴𑀸𑀳𑀲𑁆𑀲 𑀅𑀯𑀽𑀧𑀲𑀦𑁆𑀢𑀢𑀸𑀬 𑀙𑀸𑀢𑀚𑁆𑀛𑀢𑁆𑀢𑀢𑀸𑀬 𑀧𑀺𑀧𑀸𑀲𑀸𑀪𑀺𑀪𑀽𑀢𑀢𑀸𑀬 𑀘 𑀦 𑀏𑀓𑀦𑁆𑀢𑀫𑁂𑀯 𑀲𑀼𑀔𑀁. 𑀯𑀦𑀲𑀡𑁆𑀟𑁂 𑀧𑀦 𑀧𑁄𑀓𑁆𑀔𑀭𑀡𑀺𑀬𑀁 𑀑𑀭𑀼𑀬𑁆𑀳 𑀭𑀚𑁄𑀚𑀮𑁆𑀮𑀲𑁆𑀲 𑀧𑀯𑀸𑀳𑀺𑀢𑀢𑁆𑀢𑀸 𑀫𑀕𑁆𑀕𑀤𑀭𑀣𑀲𑁆𑀲 𑀯𑀽𑀧𑀲𑀦𑁆𑀢𑀢𑀸𑀬 𑀪𑀺𑀲𑀫𑀽𑀮𑀔𑀸𑀤𑀦𑁂𑀦 𑀘𑁂𑀯 𑀫𑀥𑀼𑀭𑁄𑀤𑀓𑀧𑀸𑀦𑁂𑀦 𑀘 𑀔𑀼𑀧𑁆𑀧𑀺𑀧𑀸𑀲𑀸𑀦𑀁 𑀯𑀺𑀦𑀻𑀢𑀢𑀸𑀬 𑀉𑀤𑀓𑀲𑀸𑀝𑀓𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀫𑀝𑁆𑀞𑀤𑀼𑀓𑀽𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀡𑁆𑀟𑀼𑀮𑀢𑁆𑀣𑀯𑀺𑀓𑀁 𑀉𑀲𑁆𑀲𑀻𑀲𑀓𑁂 𑀓𑀢𑁆𑀯𑀸 𑀉𑀤𑀓𑀲𑀸𑀝𑀓𑀁 𑀧𑀻𑀴𑁂𑀢𑁆𑀯𑀸 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀫𑀦𑁆𑀤𑀫𑀦𑁆𑀤𑁂𑀦 𑀘 𑀯𑀸𑀢𑁂𑀦 𑀩𑀻𑀚𑀬𑀫𑀸𑀦𑀲𑁆𑀲 𑀦𑀺𑀧𑀦𑁆𑀦𑀢𑁆𑀢𑀸 𑀲𑀩𑁆𑀩𑀸𑀓𑀸𑀭𑁂𑀦 𑀏𑀓𑀦𑁆𑀢𑀲𑀼𑀔𑀁 𑀳𑁄𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀧𑁄𑀓𑁆𑀔𑀭𑀡𑀻 𑀯𑀺𑀬 𑀳𑀺 𑀅𑀭𑀺𑀬𑀫𑀕𑁆𑀕𑁄 𑀤𑀝𑁆𑀞𑀩𑁆𑀩𑁄. 𑀧𑁄𑀓𑁆𑀔𑀭𑀡𑀺𑀫𑀕𑁆𑀕𑁄 𑀯𑀺𑀬 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸. 𑀫𑀕𑁆𑀕𑀸𑀭𑀼𑀴𑁆𑀳𑁄 𑀯𑀺𑀬 𑀧𑀝𑀺𑀧𑀤𑀸𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄. 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀤𑀺𑀩𑁆𑀩𑀘𑀓𑁆𑀔𑀼 𑀪𑀕𑀯𑀸. 𑀯𑀦𑀲𑀡𑁆𑀟𑁄 𑀯𑀺𑀬 𑀦𑀺𑀩𑁆𑀩𑀸𑀦𑀁. 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀫𑀕𑁆𑀕𑀸𑀭𑀼𑀴𑁆𑀳𑀁 𑀤𑀺𑀲𑁆𑀯𑀸𑀯 𑀚𑀸𑀦𑀸𑀢𑀺 ‘‘𑀅𑀬𑀁 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀦𑁆𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀬𑀁 𑀦𑁆𑀳𑀢𑁆𑀯𑀸 𑀭𑀫𑀡𑀻𑀬𑁂 𑀯𑀦𑀲𑀡𑁆𑀟𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺𑀲𑁆𑀲𑀢𑀺 𑀯𑀸 𑀦𑀺𑀧𑀚𑁆𑀚𑀺𑀲𑁆𑀲𑀢𑀺 𑀯𑀸’’𑀢𑀺, 𑀏𑀯𑀫𑁂𑀯𑀁 𑀪𑀕𑀯𑀸 𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑀫𑁂𑀯 𑀦𑀸𑀫𑀭𑀽𑀧𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀫𑁂𑀯 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀭𑁄𑀦𑁆𑀢𑀫𑁂𑀯 𑀮𑀓𑁆𑀔𑀡𑀸𑀭𑀫𑁆𑀫𑀡𑀸𑀬 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀫𑁂𑀯 𑀚𑀸𑀦𑀸𑀢𑀺 ‘‘𑀅𑀬𑀁 𑀇𑀫𑀁 𑀧𑀝𑀺𑀧𑀤𑀁 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀆𑀲𑀯𑁂 𑀔𑁂𑀧𑁂𑀢𑁆𑀯𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀻’’𑀢𑀺. 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀅𑀧𑀭𑀪𑀸𑀕𑁂 𑀢𑀸𑀬𑀁 𑀧𑁄𑀓𑁆𑀔𑀭𑀡𑀺𑀬𑀁 𑀦𑁆𑀳𑀢𑁆𑀯𑀸 𑀯𑀦𑀲𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀯𑀸 𑀦𑀺𑀧𑀦𑁆𑀦𑀁 𑀯𑀸 𑀏𑀓𑀦𑁆𑀢𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑀁 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀪𑀕𑀯𑀸 𑀅𑀧𑀭𑀪𑀸𑀕𑁂 𑀢𑀁 𑀧𑀼𑀕𑁆𑀕𑀮𑀁 𑀧𑀝𑀺𑀧𑀤𑀁 𑀧𑀽𑀭𑁂𑀢𑁆𑀯𑀸 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀨𑀮𑀁 𑀲𑀘𑁆𑀙𑀺𑀓𑀢𑁆𑀯𑀸 𑀦𑀺𑀭𑁄𑀥𑀲𑀬𑀦𑀯𑀭𑀕𑀢𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀏𑀓𑀦𑁆𑀢𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑀁 𑀧𑀲𑁆𑀲𑀢𑀺.

𑀆𑀲𑀯𑀓𑁆𑀔𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀤𑀺𑀲𑀼𑀤𑁆𑀥𑀺𑀯𑀡𑁆𑀡𑀦𑀸

𑁧𑁫𑁫. ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀧𑀸𑀝𑀺𑀬𑁂𑀓𑁆𑀓𑀁 𑀅𑀦𑀼𑀲𑀦𑁆𑀥𑀺𑀯𑀲𑁂𑀦 𑀆𑀭𑀤𑁆𑀥𑀁. 𑀅𑀬𑀁 𑀓𑀺𑀭 𑀲𑀼𑀦𑀓𑁆𑀔𑀢𑁆𑀢𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀲𑀼𑀤𑁆𑀥𑀺 𑀳𑁄𑀢𑀻𑀢𑀺 𑀏𑀯𑀁 𑀮𑀤𑁆𑀥𑀺𑀓𑁄. 𑀅𑀣𑀲𑁆𑀲 𑀪𑀕𑀯𑀸 𑀫𑀬𑀸 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀤𑀼𑀓𑁆𑀓𑀭𑀁 𑀓𑀢𑀁, 𑀤𑀼𑀓𑁆𑀓𑀭𑀓𑀸𑀭𑀓𑁄 𑀦𑀸𑀫 𑀫𑀬𑀸 𑀲𑀤𑀺𑀲𑁄 𑀦𑀢𑁆𑀣𑀺. 𑀤𑀼𑀓𑁆𑀓𑀭𑀓𑀸𑀭𑁂𑀦 𑀲𑀼𑀤𑁆𑀥𑀺𑀬𑀸 𑀲𑀢𑀺 𑀅𑀳𑀫𑁂𑀯 𑀲𑀼𑀤𑁆𑀥𑁄 𑀪𑀯𑁂𑀬𑁆𑀬𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀅𑀧𑀺𑀘 𑀅𑀬𑀁 𑀲𑀼𑀦𑀓𑁆𑀔𑀢𑁆𑀢𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀧𑀲𑀦𑁆𑀦𑁄, 𑀲𑁄 𑀘𑀲𑁆𑀲 𑀧𑀲𑀦𑁆𑀦𑀪𑀸𑀯𑁄, ‘‘𑀅𑀤𑁆𑀤𑀲𑀸 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀅𑀘𑁂𑀮𑀁 𑀓𑁄𑀭𑀓𑁆𑀔𑀢𑁆𑀢𑀺𑀬𑀁 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑀁 𑀙𑀫𑀸𑀦𑀺𑀓𑀺𑀡𑁆𑀡𑀁 𑀪𑀓𑁆𑀔𑀲𑀁 𑀫𑀼𑀔𑁂𑀦 𑀔𑀸𑀤𑀦𑁆𑀢𑀁 𑀫𑀼𑀔𑁂𑀦 𑀪𑀼𑀜𑁆𑀚𑀦𑁆𑀢𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 ‘𑀲𑀸𑀥𑀼 𑀭𑀽𑀧𑁄 𑀯𑀢, 𑀪𑁄, 𑀅𑀬𑀁 𑀲𑀫𑀡𑁄 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑁄 𑀙𑀫𑀸𑀦𑀺𑀓𑀺𑀡𑁆𑀡𑀁 𑀪𑀓𑁆𑀔𑀲𑀁 𑀫𑀼𑀔𑁂𑀦𑁂𑀯 𑀔𑀸𑀤𑀢𑀺, 𑀫𑀼𑀔𑁂𑀦𑁂𑀯 𑀪𑀼𑀜𑁆𑀚𑀢𑀻’’’𑀢𑀺 𑀏𑀯𑀫𑀸𑀤𑀺𑀦𑀸 𑀧𑀸𑀣𑀺𑀓𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁭) 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀅𑀣 𑀪𑀕𑀯𑀸 𑀅𑀬𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀧𑀲𑀦𑁆𑀦𑁄, 𑀫𑀬𑀸 𑀘 𑀏𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀤𑀼𑀓𑁆𑀓𑀭𑀁 𑀓𑀢𑀁, 𑀤𑀼𑀓𑁆𑀓𑀭𑀓𑀸𑀭𑁂 𑀧𑀲𑀻𑀤𑀦𑁆𑀢𑁂𑀦𑀸𑀧𑀺 𑀅𑀦𑁂𑀦 𑀫𑀬𑀺 𑀧𑀲𑀻𑀤𑀺𑀢𑀩𑁆𑀩𑀁 𑀲𑀺𑀬𑀸, 𑀲𑁄𑀧𑀺𑀲𑁆𑀲 𑀧𑀲𑀸𑀤𑁄 𑀫𑀬𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀢𑀢𑁆𑀭 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀤𑀸𑀦𑀫𑁆𑀧𑀺 𑀯𑁂𑀬𑁆𑀬𑀸𑀯𑀘𑁆𑀘𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀧𑀺 𑀥𑀫𑁆𑀫𑀤𑁂𑀲𑀦𑀸𑀧𑀺 𑀫𑁂𑀣𑀼𑀦𑀯𑀺𑀭𑀢𑀺𑀧𑀺 𑀲𑀤𑀸𑀭𑀲𑀦𑁆𑀢𑁄𑀲𑁄𑀧𑀺 𑀉𑀧𑁄𑀲𑀣𑁄𑀧𑀺 𑀅𑀭𑀺𑀬𑀫𑀕𑁆𑀕𑁄𑀧𑀺 𑀲𑀓𑀮𑀲𑀸𑀲𑀦𑀫𑁆𑀧𑀺 𑀅𑀚𑁆𑀛𑀸𑀲𑀬𑁄𑀧𑀺 𑀯𑀻𑀭𑀺𑀬𑀫𑁆𑀧𑀺 𑀯𑀼𑀘𑁆𑀘𑀢𑀺.

‘‘𑀓𑀺𑀁 𑀢𑁂 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁,

𑀓𑀺𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀇𑀤𑁆𑀥𑀻 𑀚𑀼𑀢𑀻 𑀩𑀮𑀯𑀻𑀭𑀺𑀬𑀽𑀧𑀧𑀢𑁆𑀢𑀺,

𑀇𑀤𑀜𑁆𑀘 𑀢𑁂 𑀦𑀸𑀕 𑀫𑀳𑀸𑀯𑀺𑀫𑀸𑀦𑀁.

𑀅𑀳𑀜𑁆𑀘 𑀪𑀭𑀺𑀬𑀸 𑀘 𑀫𑀦𑀼𑀲𑁆𑀲𑀮𑁄𑀓𑁂,

𑀲𑀤𑁆𑀥𑀸 𑀉𑀪𑁄 𑀤𑀸𑀦𑀧𑀢𑀻 𑀅𑀳𑀼𑀫𑁆𑀳𑀸;

𑀑𑀧𑀸𑀦𑀪𑀽𑀢𑀁 𑀫𑁂 𑀖𑀭𑀁 𑀢𑀤𑀸𑀲𑀺,

𑀲𑀦𑁆𑀢𑀧𑁆𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘.

𑀢𑀁 𑀫𑁂 𑀯𑀢𑀁 𑀢𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁,

𑀢𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀇𑀤𑁆𑀥𑀻 𑀚𑀼𑀢𑀻 𑀩𑀮𑀯𑀻𑀭𑀺𑀬𑀽𑀧𑀧𑀢𑁆𑀢𑀺,

𑀇𑀤𑀜𑁆𑀘 𑀫𑁂 𑀥𑀻𑀭 𑀫𑀳𑀸𑀯𑀺𑀫𑀸𑀦’’𑀦𑁆𑀢𑀺. (𑀚𑀸. 𑁨.𑁨𑁨.𑁧𑁫𑁯𑁨, 𑁧𑁫𑁯𑁩, 𑁧𑁫𑁯𑁫) 𑁋

𑀇𑀫𑀲𑁆𑀫𑀺𑀜𑁆𑀳𑀺 𑀧𑀼𑀡𑁆𑀡𑀓𑀚𑀸𑀢𑀓𑁂 𑀤𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀓𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄, 𑀓𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀓𑁂𑀦 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀺.

𑀢𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄, 𑀢𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀢𑁂𑀦 𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀻’’𑀢𑀺. (𑀧𑁂. 𑀯. 𑁨𑁭𑁫) 𑁋

𑀇𑀫𑀲𑁆𑀫𑀺𑀁 𑀅𑀗𑁆𑀓𑀼𑀭𑀧𑁂𑀢𑀯𑀢𑁆𑀣𑀼𑀲𑁆𑀫𑀺𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀏𑀯𑀁 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀢𑀺𑀢𑁆𑀢𑀺𑀭𑀺𑀬𑀁 𑀦𑀸𑀫 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀳𑁄𑀲𑀻’’𑀢𑀺 (𑀘𑀽𑀴𑀯. 𑁩𑁧𑁧) 𑀇𑀫𑀲𑁆𑀫𑀺𑀁 𑀢𑀺𑀢𑁆𑀢𑀺𑀭𑀚𑀸𑀢𑀓𑁂 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀢𑀁 𑀔𑁄 𑀧𑀦 𑀫𑁂 𑀧𑀜𑁆𑀘𑀲𑀺𑀔 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑁂𑀯 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬, 𑀬𑀸𑀯𑀤𑁂𑀯 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸’’𑀢𑀺 (𑀤𑀻. 𑀦𑀺. 𑁨.𑁩𑁨𑁯) 𑀇𑀫𑀲𑁆𑀫𑀺𑀁 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑁂 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀏𑀓𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀫𑀺𑀁, 𑀲𑀳𑀲𑁆𑀲𑀁 𑀫𑀘𑁆𑀘𑀼𑀳𑀸𑀬𑀺𑀦’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁮𑁪) 𑀏𑀢𑁆𑀣 𑀥𑀫𑁆𑀫𑀤𑁂𑀲𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀸. ‘‘𑀧𑀭𑁂 𑀅𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀺𑀲𑁆𑀲𑀸𑀫𑀸’’𑀢𑀺 (𑀫. 𑀦𑀺. 𑁧.𑁮𑁩) 𑀲𑀮𑁆𑀮𑁂𑀔𑀲𑀼𑀢𑁆𑀢𑁂 𑀫𑁂𑀣𑀼𑀦𑀯𑀺𑀭𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀸.

‘‘𑀫𑀬𑀜𑁆𑀘 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀸𑀫,

𑀅𑀫𑁆𑀳𑁂 𑀘 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀦𑁆𑀢𑀺;

𑀅𑀜𑁆𑀜𑀢𑁆𑀭 𑀢𑀸𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫,

𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂’’𑀢𑀺. (𑀚𑀸. 𑁧.𑁧𑁦.𑁯𑁭) 𑁋

𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑁂 𑀲𑀤𑀸𑀭𑀲𑀦𑁆𑀢𑁄𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑁄.

‘‘𑀳𑀻𑀦𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀢𑀺;

𑀫𑀚𑁆𑀛𑀺𑀫𑁂𑀦 𑀘 𑀤𑁂𑀯𑀢𑁆𑀢𑀁, 𑀉𑀢𑁆𑀢𑀫𑁂𑀦 𑀯𑀺𑀲𑀼𑀚𑁆𑀛𑀢𑀻’’𑀢𑀺. (𑀚𑀸. 𑁧.𑁮.𑁭𑁫) 𑁋

𑀏𑀯𑀁 𑀦𑀺𑀫𑀺𑀚𑀸𑀢𑀓𑁂 𑀅𑀢𑁆𑀢𑀤𑀫𑀦𑀯𑀲𑁂𑀦 𑀓𑀢𑁄 𑀅𑀝𑁆𑀞𑀗𑁆𑀕𑀺𑀓𑁄 𑀉𑀧𑁄𑀲𑀣𑁄 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑁄. ‘‘𑀇𑀤𑀁 𑀔𑁄 𑀧𑀦 𑀫𑁂, 𑀧𑀜𑁆𑀘𑀲𑀺𑀔, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬…𑀧𑁂… 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 (𑀤𑀻. 𑀦𑀺. 𑁨.𑁩𑁨𑁯) 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀲𑁆𑀫𑀺𑀜𑁆𑀜𑁂𑀯 𑀅𑀭𑀺𑀬𑀫𑀕𑁆𑀕𑁄 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑁄. ‘‘𑀢𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢’’𑀦𑁆𑀢𑀺 (𑀤𑀻. 𑀦𑀺. 𑁩.𑁧𑁭𑁪) 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑁂 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀸𑀲𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀅𑀧𑀺 𑀅𑀢𑀭𑀫𑀸𑀦𑀸𑀦𑀁, 𑀨𑀮𑀸𑀲𑀸𑀯 𑀲𑀫𑀺𑀚𑁆𑀛𑀢𑀺;

𑀯𑀺𑀧𑀓𑁆𑀓𑀩𑁆𑀭𑀳𑁆𑀫𑀘𑀭𑀺𑀬𑁄𑀲𑁆𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀕𑀸𑀫𑀡𑀻’’𑀢𑀺. (𑀚𑀸. 𑁧.𑁧.𑁮) 𑁋

𑀏𑀢𑁆𑀣 𑀅𑀚𑁆𑀛𑀸𑀲𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑁄. 𑀇𑀥 𑀧𑀦 𑀯𑀻𑀭𑀺𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀯𑀻𑀭𑀺𑀬𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀳𑀺 𑀇𑀤𑀫𑁂𑀯 𑀲𑀼𑀢𑁆𑀢𑀁. 𑀢𑀤𑁂𑀢𑀁 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀘𑀢𑀼𑀩𑁆𑀩𑀺𑀥𑀲𑁆𑀲 𑀤𑀼𑀓𑁆𑀓𑀭𑀲𑁆𑀲 𑀓𑀢𑀢𑁆𑀢𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀧𑀲𑁆𑀲𑀻 𑀲𑀼𑀤𑀁 𑀳𑁄𑀫𑀻𑀢𑀺 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑀧𑀦𑀺𑀲𑁆𑀲𑀺𑀢𑀓𑁄 𑀳𑁄𑀫𑀻𑀢𑀺 𑀅𑀢𑁆𑀣𑁄. 𑀧𑀭𑀫𑀢𑀧𑀲𑁆𑀲𑀻𑀢𑀺 𑀧𑀭𑀫𑁄 𑀢𑀧𑀲𑁆𑀲𑀻, 𑀢𑀧𑀦𑀺𑀲𑁆𑀲𑀺𑀢𑀓𑀸𑀦𑀁 𑀉𑀢𑁆𑀢𑀫𑁄. 𑀮𑀽𑀔𑁄 𑀲𑀼𑀤𑀁 𑀳𑁄𑀫𑀻𑀢𑀺 𑀮𑀽𑀔𑁄 𑀳𑁄𑀫𑀺. 𑀚𑁂𑀕𑀼𑀘𑁆𑀙𑀻𑀢𑀺 𑀧𑀸𑀧𑀚𑁂𑀕𑀼𑀘𑁆𑀙𑀺𑀓𑁄. 𑀧𑀯𑀺𑀯𑀺𑀢𑁆𑀢𑁄 𑀲𑀼𑀤𑀁 𑀳𑁄𑀫𑀻𑀢𑀺 𑀧𑀯𑀺𑀯𑀺𑀢𑁆𑀢𑁄 𑀅𑀳𑀁 𑀳𑁄𑀫𑀺. 𑀢𑀢𑁆𑀭𑀸𑀲𑁆𑀲𑀼 𑀫𑁂 𑀇𑀤𑀁, 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀢𑀢𑁆𑀭 𑀘𑀢𑀼𑀭𑀗𑁆𑀕𑁂 𑀩𑁆𑀭𑀳𑁆𑀫𑀘𑀭𑀺𑀬𑁂 𑀇𑀤𑀁 𑀫𑀫 𑀢𑀧𑀲𑁆𑀲𑀺𑀢𑀸𑀬 𑀳𑁄𑀢𑀺, 𑀢𑀧𑀦𑀺𑀲𑁆𑀲𑀺𑀢𑀓𑀪𑀸𑀯𑁂 𑀫𑀬𑁆𑀳𑀁 𑀇𑀤𑀁 𑀅𑀘𑁂𑀮𑀓𑀸𑀤𑀺𑀢𑀧𑀲𑁆𑀲𑀺𑀢𑀓𑀢𑁆𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀅𑀘𑁂𑀮𑀓𑁄𑀢𑀺 𑀦𑀺𑀘𑁆𑀘𑁂𑀮𑁄 𑀦𑀕𑁆𑀕𑁄. 𑀫𑀼𑀢𑁆𑀢𑀸𑀘𑀸𑀭𑁄𑀢𑀺 𑀯𑀺𑀲𑀝𑁆𑀞𑀸𑀘𑀸𑀭𑁄, 𑀉𑀘𑁆𑀘𑀸𑀭𑀓𑀫𑁆𑀫𑀸𑀤𑀻𑀲𑀼 𑀮𑁄𑀓𑀺𑀬𑀓𑀼𑀮𑀧𑀼𑀢𑁆𑀢𑀸𑀘𑀸𑀭𑁂𑀦 𑀯𑀺𑀭𑀳𑀺𑀢𑁄, 𑀞𑀺𑀢𑀓𑁄𑀯 𑀉𑀘𑁆𑀘𑀸𑀭𑀁 𑀓𑀭𑁄𑀫𑀺, 𑀧𑀲𑁆𑀲𑀸𑀯𑀁 𑀓𑀭𑁄𑀫𑀺, 𑀔𑀸𑀤𑀸𑀫𑀺 𑀪𑀼𑀜𑁆𑀚𑀸𑀫𑀺 𑀘. 𑀳𑀢𑁆𑀣𑀸𑀧𑀮𑁂𑀔𑀦𑁄𑀢𑀺 𑀳𑀢𑁆𑀣𑁂 𑀧𑀺𑀡𑁆𑀟𑀫𑁆𑀳𑀺 𑀞𑀺𑀢𑁂 𑀚𑀺𑀯𑁆𑀳𑀸𑀬 𑀳𑀢𑁆𑀣𑀁 𑀅𑀧𑀮𑀺𑀔𑀸𑀫𑀺, 𑀉𑀘𑁆𑀘𑀸𑀭𑀁 𑀯𑀸 𑀓𑀢𑁆𑀯𑀸 𑀳𑀢𑁆𑀣𑀲𑁆𑀫𑀺𑀜𑁆𑀜𑁂𑀯 𑀤𑀡𑁆𑀟𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀳𑀢𑁆𑀣𑁂𑀦 𑀅𑀧𑀮𑀺𑀔𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂 𑀓𑀺𑀭 𑀤𑀡𑁆𑀟𑀓𑀁 𑀲𑀢𑁆𑀢𑁄𑀢𑀺 𑀧𑀜𑁆𑀜𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑁄 𑀏𑀯𑀫𑀓𑀸𑀲𑀺. 𑀪𑀺𑀓𑁆𑀔𑀸𑀕𑀳𑀡𑀢𑁆𑀣𑀁 𑀏𑀳𑀺 𑀪𑀤𑁆𑀤𑀦𑁆𑀢𑁂𑀢𑀺 𑀯𑀼𑀢𑁆𑀢𑁄 𑀦 𑀏𑀢𑀻𑀢𑀺 𑀦 𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄. 𑀢𑁂𑀦 𑀳𑀺 𑀢𑀺𑀝𑁆𑀞 𑀪𑀤𑁆𑀤𑀦𑁆𑀢𑁂𑀢𑀺 𑀯𑀼𑀢𑁆𑀢𑁄𑀧𑀺 𑀦 𑀢𑀺𑀝𑁆𑀞𑀢𑀻𑀢𑀺 𑀦 𑀢𑀺𑀝𑁆𑀞𑀪𑀤𑁆𑀤𑀦𑁆𑀢𑀺𑀓𑁄. 𑀢𑀤𑀼𑀪𑀬𑀫𑁆𑀧𑀺 𑀢𑀺𑀢𑁆𑀣𑀺𑀬𑀸 𑀏𑀯𑀁 𑀏𑀢𑀲𑁆𑀲 𑀯𑀘𑀦𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀦 𑀓𑀭𑁄𑀦𑁆𑀢𑀺. 𑀅𑀳𑀫𑁆𑀧𑀺 𑀏𑀯𑀁 𑀅𑀓𑀸𑀲𑀺𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀪𑀺𑀳𑀝𑀦𑁆𑀢𑀺 𑀧𑀼𑀭𑁂𑀢𑀭𑀁 𑀕𑀳𑁂𑀢𑁆𑀯𑀸 𑀆𑀳𑀝𑀁 𑀪𑀺𑀓𑁆𑀔𑀁. 𑀉𑀤𑁆𑀤𑀺𑀲𑁆𑀲𑀓𑀢𑀦𑁆𑀢𑀺 𑀇𑀤𑀁 𑀢𑀼𑀫𑁆𑀳𑁂 𑀉𑀤𑁆𑀤𑀺𑀲𑁆𑀲 𑀓𑀢𑀦𑁆𑀢𑀺 𑀏𑀯𑀁 𑀆𑀭𑁄𑀘𑀺𑀢𑀪𑀺𑀓𑁆𑀔𑀁. 𑀦 𑀦𑀺𑀫𑀦𑁆𑀢𑀦𑀦𑁆𑀢𑀺 𑀅𑀲𑀼𑀓𑀁 𑀦𑀸𑀫 𑀓𑀼𑀮𑀁 𑀯𑀸 𑀯𑀻𑀣𑀺𑀁 𑀯𑀸 𑀕𑀸𑀫𑀁 𑀯𑀸 𑀧𑀯𑀺𑀲𑁂𑀬𑁆𑀬𑀸𑀣𑀸𑀢𑀺 𑀏𑀯𑀁 𑀦𑀺𑀫𑀦𑁆𑀢𑀺𑀢𑀪𑀺𑀓𑁆𑀔𑀫𑁆𑀧𑀺 𑀦 𑀲𑀸𑀤𑀺𑀬𑀸𑀫𑀺 𑀦 𑀕𑀡𑁆𑀳𑀸𑀫𑀺.

𑀦 𑀓𑀼𑀫𑁆𑀪𑀺𑀫𑀼𑀔𑀸𑀢𑀺 𑀓𑀼𑀫𑁆𑀪𑀺𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀪𑀺𑀓𑁆𑀔𑀁 𑀦 𑀕𑀡𑁆𑀳𑀸𑀫𑀺. 𑀦 𑀓𑀴𑁄𑀧𑀺𑀫𑀼𑀔𑀸𑀢𑀺 𑀓𑀴𑁄𑀧𑀻𑀢𑀺 𑀉𑀓𑁆𑀔𑀮𑀺 𑀯𑀸 𑀧𑀘𑁆𑀙𑀺 𑀯𑀸. 𑀢𑀢𑁄𑀧𑀺 𑀦 𑀕𑀡𑁆𑀳𑀸𑀫𑀺. 𑀓𑀲𑁆𑀫𑀸? 𑀓𑀼𑀫𑁆𑀪𑀺𑀓𑀴𑁄𑀧𑀺𑀬𑁄 𑀫𑀁 𑀦𑀺𑀲𑁆𑀲𑀸𑀬 𑀓𑀝𑀘𑁆𑀙𑀼𑀦𑀸 𑀧𑀳𑀸𑀭𑀁 𑀮𑀪𑀦𑁆𑀢𑀻𑀢𑀺. 𑀦 𑀏𑀴𑀓𑀫𑀦𑁆𑀢𑀭𑀦𑁆𑀢𑀺 𑀉𑀫𑁆𑀫𑀸𑀭𑀁 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀦 𑀕𑀡𑁆𑀳𑀸𑀫𑀺. 𑀓𑀲𑁆𑀫𑀸? 𑀅𑀬𑀁 𑀫𑀁 𑀦𑀺𑀲𑁆𑀲𑀸𑀬 𑀅𑀦𑁆𑀢𑀭𑀓𑀭𑀡𑀁 𑀮𑀪𑀢𑀻𑀢𑀺. 𑀤𑀡𑁆𑀟𑀫𑀼𑀲𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀤𑁆𑀯𑀺𑀦𑁆𑀦𑀦𑁆𑀢𑀺 𑀤𑁆𑀯𑀻𑀲𑀼 𑀪𑀼𑀜𑁆𑀚𑀫𑀸𑀦𑁂𑀲𑀼 𑀏𑀓𑀲𑁆𑀫𑀺𑀁 𑀉𑀝𑁆𑀞𑀸𑀬 𑀤𑁂𑀦𑁆𑀢𑁂 𑀦 𑀕𑀡𑁆𑀳𑀸𑀫𑀺. 𑀓𑀲𑁆𑀫𑀸? 𑀓𑀩𑀴𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺. 𑀦 𑀕𑀩𑁆𑀪𑀺𑀦𑀺𑀬𑀸𑀢𑀺𑀆𑀤𑀻𑀲𑀼 𑀧𑀦 𑀕𑀩𑁆𑀪𑀺𑀦𑀺𑀬𑀸 𑀓𑀼𑀘𑁆𑀙𑀺𑀬𑀁 𑀤𑀸𑀭𑀓𑁄 𑀓𑀺𑀮𑀫𑀢𑀺, 𑀧𑀸𑀬𑀦𑁆𑀢𑀺𑀬𑀸 𑀤𑀸𑀭𑀓𑀲𑁆𑀲 𑀔𑀻𑀭𑀦𑁆𑀢𑀭𑀸𑀬𑁄 𑀳𑁄𑀢𑀺, 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬 𑀭𑀢𑀺𑀅𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺 𑀦 𑀕𑀡𑁆𑀳𑀸𑀫𑀺. 𑀦 𑀲𑀁𑀓𑀺𑀢𑁆𑀢𑀻𑀲𑀽𑀢𑀺 𑀲𑀁𑀓𑀺𑀢𑁆𑀢𑁂𑀢𑁆𑀯𑀸 𑀓𑀢𑀪𑀢𑁆𑀢𑁂𑀲𑀼. 𑀤𑀼𑀩𑁆𑀪𑀺𑀓𑁆𑀔𑀲𑀫𑀬𑁂 𑀓𑀺𑀭 𑀅𑀘𑁂𑀮𑀓𑀲𑀸𑀯𑀓𑀸 𑀅𑀘𑁂𑀮𑀓𑀸𑀦𑀁 𑀅𑀢𑁆𑀣𑀸𑀬 𑀢𑀢𑁄 𑀢𑀢𑁄 𑀢𑀡𑁆𑀟𑀼𑀮𑀸𑀤𑀻𑀦𑀺 𑀲𑀫𑀸𑀤𑀧𑁂𑀢𑁆𑀯𑀸 𑀪𑀢𑁆𑀢𑀁 𑀧𑀘𑀦𑁆𑀢𑀺. 𑀉𑀓𑁆𑀓𑀝𑁆𑀞𑀸𑀘𑁂𑀮𑀓𑁄 𑀢𑀢𑁄𑀧𑀺 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺.

𑀦 𑀬𑀢𑁆𑀣 𑀲𑀸𑀢𑀺 𑀬𑀢𑁆𑀣 𑀲𑀼𑀦𑀔𑁄 𑀧𑀺𑀡𑁆𑀟𑀁 𑀮𑀪𑀺𑀲𑁆𑀲𑀸𑀫𑀻𑀢𑀺 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀢𑀢𑁆𑀣 𑀢𑀲𑁆𑀲 𑀅𑀤𑀢𑁆𑀯𑀸 𑀆𑀳𑀝𑀁 𑀦 𑀕𑀡𑁆𑀳𑀸𑀫𑀺. 𑀓𑀲𑁆𑀫𑀸? 𑀏𑀢𑀲𑁆𑀲 𑀧𑀺𑀡𑁆𑀟𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺. 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑀻𑀢𑀺 𑀲𑀫𑀽𑀳𑀲𑀫𑀽𑀳𑀘𑀸𑀭𑀺𑀦𑀻, 𑀲𑀘𑁂 𑀳𑀺 𑀅𑀘𑁂𑀮𑀓𑀁 𑀤𑀺𑀲𑁆𑀯𑀸 𑀇𑀫𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀸𑀢𑀺 𑀫𑀸𑀦𑀼𑀲𑀓𑀸 𑀪𑀢𑁆𑀢𑀕𑁂𑀳𑀁 𑀧𑀯𑀺𑀲𑀦𑁆𑀢𑀺. 𑀢𑁂𑀲𑀼 𑀘 𑀧𑀯𑀺𑀲𑀦𑁆𑀢𑁂𑀲𑀼 𑀓𑀴𑁄𑀧𑀺𑀫𑀼𑀔𑀸𑀤𑀻𑀲𑀼 𑀦𑀺𑀮𑀻𑀦𑀸 𑀫𑀓𑁆𑀔𑀺𑀓𑀸 𑀉𑀧𑁆𑀧𑀢𑀺𑀢𑁆𑀯𑀸 𑀲𑀡𑁆𑀟𑀲𑀡𑁆𑀟𑀸 𑀘𑀭𑀦𑁆𑀢𑀺. 𑀢𑀢𑁄 𑀆𑀳𑀝𑀁 𑀪𑀺𑀓𑁆𑀔𑀁 𑀦 𑀕𑀡𑁆𑀳𑀸𑀫𑀺. 𑀓𑀲𑁆𑀫𑀸? 𑀫𑀁 𑀦𑀺𑀲𑁆𑀲𑀸𑀬 𑀫𑀓𑁆𑀔𑀺𑀓𑀸𑀦𑀁 𑀕𑁄𑀘𑀭𑀦𑁆𑀢𑀭𑀸𑀬𑁄 𑀚𑀸𑀢𑁄𑀢𑀺, 𑀅𑀳𑀫𑁆𑀧𑀺 𑀢𑀣𑀸 𑀅𑀓𑀸𑀲𑀺𑀁. 𑀦 𑀣𑀼𑀲𑁄𑀤𑀓𑀦𑁆𑀢𑀺 𑀲𑀩𑁆𑀩𑀲𑀲𑁆𑀲𑀲𑀫𑁆𑀪𑀸𑀭𑁂𑀳𑀺 𑀓𑀢𑀁 𑀮𑁄𑀡𑀲𑁄𑀯𑀻𑀭𑀓𑀁. 𑀏𑀢𑁆𑀣 𑀘 𑀲𑀼𑀭𑀸𑀧𑀸𑀦𑀫𑁂𑀯 𑀲𑀸𑀯𑀚𑁆𑀚𑀁, 𑀅𑀬𑀁 𑀧𑀦 𑀲𑀩𑁆𑀩𑁂𑀲𑀼𑀧𑀺 𑀲𑀸𑀯𑀚𑁆𑀚𑀲𑀜𑁆𑀜𑀻.

𑀏𑀓𑀸𑀕𑀸𑀭𑀺𑀓𑁄𑀢𑀺 𑀬𑁄 𑀏𑀓𑀲𑁆𑀫𑀺𑀜𑁆𑀜𑁂𑀯 𑀕𑁂𑀳𑁂 𑀪𑀺𑀓𑁆𑀔𑀁 𑀮𑀪𑀺𑀢𑁆𑀯𑀸 𑀦𑀺𑀯𑀢𑁆𑀢𑀢𑀺. 𑀏𑀓𑀸𑀮𑁄𑀧𑀺𑀓𑁄𑀢𑀺 𑀬𑁄 𑀏𑀓𑁂𑀦𑁂𑀯 𑀆𑀮𑁄𑀧𑁂𑀦 𑀬𑀸𑀧𑁂𑀢𑀺. 𑀤𑁆𑀯𑀸𑀕𑀸𑀭𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑀺𑀲𑁆𑀲𑀸𑀧𑀺 𑀤𑀢𑁆𑀢𑀺𑀬𑀸𑀢𑀺 𑀏𑀓𑀸𑀬 𑀤𑀢𑁆𑀢𑀺𑀬𑀸. 𑀤𑀢𑁆𑀢𑀺 𑀦𑀸𑀫 𑀏𑀓𑀸 𑀔𑀼𑀤𑁆𑀤𑀓𑀧𑀸𑀢𑀺 𑀳𑁄𑀢𑀺, 𑀬𑀢𑁆𑀣 𑀅𑀕𑁆𑀕𑀪𑀺𑀓𑁆𑀔𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀏𑀓𑀸𑀳𑀺𑀓𑀦𑁆𑀢𑀺 𑀏𑀓𑀤𑀺𑀯𑀲𑀦𑁆𑀢𑀭𑀺𑀓𑀁. 𑀅𑀤𑁆𑀥𑀫𑀸𑀲𑀺𑀓𑀦𑁆𑀢𑀺 𑀅𑀤𑁆𑀥𑀫𑀸𑀲𑀦𑁆𑀢𑀭𑀺𑀓𑀁. 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀦𑁆𑀢𑀺 𑀯𑀸𑀭𑀪𑀢𑁆𑀢𑀪𑁄𑀚𑀦𑀁. 𑀏𑀓𑀸𑀳𑀯𑀸𑀭𑁂𑀦 𑀤𑁆𑀯𑀻𑀳𑀯𑀸𑀭𑁂𑀦 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀟𑁆𑀠𑀫𑀸𑀲𑀯𑀸𑀭𑁂𑀦𑀸𑀢𑀺 𑀏𑀯𑀁 𑀤𑀺𑀯𑀲𑀯𑀸𑀭𑁂𑀦 𑀆𑀪𑀢𑀁 𑀪𑀢𑁆𑀢𑀪𑁄𑀚𑀦𑀁.

𑀲𑀸𑀓𑀪𑀓𑁆𑀔𑁄𑀢𑀺 𑀅𑀮𑁆𑀮𑀲𑀸𑀓𑀪𑀓𑁆𑀔𑁄. 𑀲𑀸𑀫𑀸𑀓𑀪𑀓𑁆𑀔𑁄𑀢𑀺 𑀲𑀸𑀫𑀸𑀓𑀢𑀡𑁆𑀟𑀼𑀮𑀪𑀓𑁆𑀔𑁄. 𑀦𑀻𑀯𑀸𑀭𑀸𑀤𑀻𑀲𑀼 𑀦𑀻𑀯𑀸𑀭𑀸 𑀦𑀸𑀫 𑀢𑀸𑀯 𑀅𑀭𑀜𑁆𑀜𑁂 𑀲𑀬𑀁𑀚𑀸𑀢𑀯𑀻𑀳𑀺𑀚𑀸𑀢𑀺. 𑀤𑀤𑁆𑀤𑀼𑀮𑀦𑁆𑀢𑀺 𑀘𑀫𑁆𑀫𑀓𑀸𑀭𑁂𑀳𑀺 𑀘𑀫𑁆𑀫𑀁 𑀮𑀺𑀔𑀺𑀢𑁆𑀯𑀸 𑀙𑀟𑁆𑀟𑀺𑀢𑀓𑀲𑀝𑀁. 𑀳𑀝𑀁 𑀯𑀼𑀘𑁆𑀘𑀢𑀺 𑀲𑀺𑀮𑁂𑀲𑁄𑀧𑀺 𑀲𑁂𑀯𑀸𑀮𑁄𑀧𑀺 𑀓𑀡𑀺𑀓𑀸𑀭𑀸𑀤𑀺𑀭𑀼𑀓𑁆𑀔𑀦𑀺𑀬𑁆𑀬𑀸𑀲𑁄𑀧𑀺. 𑀓𑀡𑀦𑁆𑀢𑀺 𑀓𑀼𑀡𑁆𑀟𑀓𑀁. 𑀆𑀘𑀸𑀫𑁄𑀢𑀺 𑀪𑀢𑁆𑀢𑀉𑀓𑁆𑀔𑀮𑀺𑀓𑀸𑀬 𑀮𑀕𑁆𑀕𑁄 𑀛𑀸𑀫𑀑𑀤𑀦𑁄, 𑀢𑀁 𑀙𑀟𑁆𑀟𑀺𑀢𑀝𑁆𑀞𑀸𑀦𑁂 𑀕𑀳𑁂𑀢𑁆𑀯𑀸 𑀔𑀸𑀤𑀢𑀺. ‘‘𑀑𑀤𑀦𑀓𑀜𑁆𑀚𑀺𑀬’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀺𑀜𑁆𑀜𑀸𑀓𑀸𑀤𑀬𑁄 𑀧𑀸𑀓𑀝𑀸 𑀏𑀯. 𑀧𑀯𑀢𑁆𑀢𑀨𑀮𑀪𑁄𑀚𑀻𑀢𑀺 𑀧𑀢𑀺𑀢𑀨𑀮𑀪𑁄𑀚𑀻.

𑀲𑀸𑀡𑀸𑀦𑀻𑀢𑀺 𑀲𑀸𑀡𑀯𑀸𑀓𑀘𑁄𑀴𑀸𑀦𑀺. 𑀫𑀲𑀸𑀡𑀸𑀦𑀻𑀢𑀺 𑀫𑀺𑀲𑁆𑀲𑀓𑀘𑁄𑀴𑀸𑀦𑀺. 𑀙𑀯𑀤𑀼𑀲𑁆𑀲𑀸𑀦𑀻𑀢𑀺 𑀫𑀢𑀲𑀭𑀻𑀭𑀢𑁄 𑀙𑀟𑁆𑀟𑀺𑀢𑀯𑀢𑁆𑀣𑀸𑀦𑀺. 𑀏𑀭𑀓𑀢𑀺𑀡𑀸𑀤𑀻𑀦𑀺 𑀯𑀸 𑀕𑀦𑁆𑀣𑁂𑀢𑁆𑀯𑀸 𑀓𑀢𑀦𑀺𑀯𑀸𑀲𑀦𑀸𑀦𑀺. 𑀧𑀁𑀲𑀼𑀓𑀽𑀮𑀸𑀦𑀻𑀢𑀺 𑀧𑀣𑀯𑀺𑀬𑀁 𑀙𑀟𑁆𑀟𑀺𑀢𑀦𑀦𑁆𑀢𑀓𑀸𑀦𑀺. 𑀢𑀺𑀭𑀺𑀢𑀸𑀦𑀻𑀢𑀺 𑀭𑀼𑀓𑁆𑀔𑀢𑁆𑀢𑀘𑀯𑀢𑁆𑀣𑀸𑀦𑀺. 𑀅𑀚𑀺𑀦𑀦𑁆𑀢𑀺 𑀅𑀚𑀺𑀦𑀫𑀺𑀕𑀘𑀫𑁆𑀫𑀁. 𑀅𑀚𑀺𑀦𑀓𑁆𑀔𑀺𑀧𑀦𑁆𑀢𑀺 𑀢𑀤𑁂𑀯 𑀫𑀚𑁆𑀛𑁂 𑀨𑀸𑀮𑀺𑀢𑀁. 𑀲𑀔𑀼𑀭𑀓𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀓𑀼𑀲𑀘𑀻𑀭𑀦𑁆𑀢𑀺 𑀓𑀼𑀲𑀢𑀺𑀡𑀁 𑀕𑀦𑁆𑀣𑁂𑀢𑁆𑀯𑀸 𑀓𑀢𑀘𑀻𑀭𑀁. 𑀯𑀸𑀓𑀘𑀻𑀭𑀨𑀮𑀓𑀘𑀻𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀲𑀓𑀫𑁆𑀩𑀮𑀦𑁆𑀢𑀺 𑀫𑀦𑀼𑀲𑁆𑀲𑀓𑁂𑀲𑁂𑀳𑀺 𑀓𑀢𑀓𑀫𑁆𑀩𑀮𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀬𑀸𑀦𑀺 𑀓𑀸𑀦𑀺𑀘𑀺, 𑀪𑀺𑀓𑁆𑀔𑀯𑁂, 𑀢𑀦𑁆𑀢𑀸𑀯𑀼𑀢𑀸𑀦𑀁 𑀯𑀢𑁆𑀣𑀸𑀦𑀁, 𑀓𑁂𑀲𑀓𑀫𑁆𑀩𑀮𑁄 𑀢𑁂𑀲𑀁 𑀧𑀝𑀺𑀓𑀼𑀝𑁆𑀞𑁄 𑀅𑀓𑁆𑀔𑀸𑀬𑀢𑀺. 𑀓𑁂𑀲𑀓𑀫𑁆𑀩𑀮𑁄, 𑀪𑀺𑀓𑁆𑀔𑀯𑁂, 𑀲𑀻𑀢𑁂 𑀲𑀻𑀢𑁄, 𑀉𑀡𑁆𑀳𑁂 𑀉𑀡𑁆𑀳𑁄, 𑀤𑀼𑀩𑁆𑀩𑀡𑁆𑀡𑁄 𑀤𑀼𑀕𑁆𑀕𑀦𑁆𑀥𑁄 𑀤𑀼𑀓𑁆𑀔𑀲𑀫𑁆𑀨𑀲𑁄’’𑀢𑀺 (𑀅. 𑀦𑀺. 𑁩.𑁧𑁩𑁮). 𑀯𑀸𑀮𑀓𑀫𑁆𑀩𑀮𑀦𑁆𑀢𑀺 𑀅𑀲𑁆𑀲𑀯𑀸𑀮𑀸𑀤𑀻𑀳𑀺 𑀓𑀢𑀓𑀫𑁆𑀩𑀮𑀁. 𑀉𑀮𑀽𑀓𑀧𑀓𑁆𑀔𑀓𑀦𑁆𑀢𑀺 𑀉𑀮𑀽𑀓𑀧𑀢𑁆𑀢𑀸𑀦𑀺 𑀕𑀦𑁆𑀣𑁂𑀢𑁆𑀯𑀸 𑀓𑀢𑀦𑀺𑀯𑀸𑀲𑀦𑀁. 𑀉𑀩𑁆𑀪𑀝𑁆𑀞𑀓𑁄𑀢𑀺 𑀉𑀤𑁆𑀥𑀁 𑀞𑀺𑀢𑀓𑁄. 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄𑀢𑀺 𑀉𑀓𑁆𑀓𑀼𑀝𑀺𑀓𑀯𑀻𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄, 𑀕𑀘𑁆𑀙𑀦𑁆𑀢𑁄𑀧𑀺 𑀉𑀓𑁆𑀓𑀼𑀝𑀺𑀓𑁄𑀯 𑀳𑀼𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀓𑀡𑁆𑀝𑀓𑀸𑀧𑀲𑁆𑀲𑀬𑀺𑀓𑁄𑀢𑀺 𑀅𑀬𑀓𑀡𑁆𑀝𑀓𑁂 𑀯𑀸 𑀧𑀓𑀢𑀺𑀓𑀡𑁆𑀝𑀓𑁂 𑀯𑀸 𑀪𑀽𑀫𑀺𑀬𑀁 𑀓𑁄𑀝𑁆𑀝𑁂𑀢𑁆𑀯𑀸 𑀢𑀢𑁆𑀣 𑀘𑀫𑁆𑀫𑀁 𑀅𑀢𑁆𑀣𑀭𑀺𑀢𑁆𑀯𑀸 𑀞𑀸𑀦𑀘𑀗𑁆𑀓𑀫𑀸𑀤𑀻𑀦𑀺 𑀓𑀭𑁄𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀬𑁆𑀬𑀦𑁆𑀢𑀺 𑀲𑀬𑀦𑁆𑀢𑁄𑀧𑀺 𑀢𑀢𑁆𑀣𑁂𑀯 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺. 𑀲𑀸𑀬𑀁 𑀢𑀢𑀺𑀬𑀫𑀲𑁆𑀲𑀸𑀢𑀺 𑀲𑀸𑀬𑀢𑀢𑀺𑀬𑀓𑀁. 𑀧𑀸𑀢𑁄 𑀫𑀚𑁆𑀛𑀦𑁆𑀳𑀺𑀓𑁂 𑀲𑀸𑀬𑀦𑁆𑀢𑀺 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀧𑀁 𑀧𑀯𑀸𑀳𑁂𑀲𑁆𑀲𑀸𑀫𑀻𑀢𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀸𑀫𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁫𑁬. 𑀦𑁂𑀓𑀯𑀲𑁆𑀲𑀕𑀡𑀺𑀓𑀦𑁆𑀢𑀺 𑀦𑁂𑀓𑀯𑀲𑁆𑀲𑀕𑀡𑀲𑀜𑁆𑀚𑀸𑀢𑀁. 𑀭𑀚𑁄𑀚𑀮𑁆𑀮𑀦𑁆𑀢𑀺 𑀭𑀚𑀫𑀮𑀁, 𑀇𑀤𑀁 𑀅𑀢𑁆𑀢𑀦𑁄 𑀭𑀚𑁄𑀚𑀮𑁆𑀮𑀓𑀯𑀢𑀲𑀫𑀸𑀤𑀸𑀦𑀓𑀸𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀚𑁂𑀕𑀼𑀘𑁆𑀙𑀺𑀲𑁆𑀫𑀺𑀦𑁆𑀢𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀪𑀸𑀯𑁂. 𑀬𑀸𑀯 𑀉𑀤𑀓𑀩𑀺𑀦𑁆𑀤𑀼𑀫𑁆𑀳𑀺𑀧𑀻𑀢𑀺 𑀬𑀸𑀯 𑀉𑀤𑀓𑀣𑁂𑀯𑀓𑁂𑀧𑀺 𑀫𑀫 𑀤𑀬𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀅𑀜𑁆𑀜𑁂𑀲𑀼 𑀲𑀓𑁆𑀔𑀭𑀓𑀞𑀮𑀤𑀡𑁆𑀟𑀓𑀯𑀸𑀮𑀺𑀓𑀸𑀤𑀻𑀲𑀼. 𑀢𑁂 𑀓𑀺𑀭 𑀉𑀤𑀓𑀩𑀺𑀦𑁆𑀤𑀼𑀁 𑀘 𑀏𑀢𑁂 𑀘 𑀲𑀓𑁆𑀔𑀭𑀓𑀞𑀮𑀸𑀤𑀬𑁄 𑀔𑀼𑀤𑁆𑀤𑀓𑀧𑀸𑀡𑀸𑀢𑀺 𑀧𑀜𑁆𑀜𑀧𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀬𑀸𑀯 𑀉𑀤𑀓𑀩𑀺𑀦𑁆𑀤𑀼𑀫𑁆𑀳𑀺𑀧𑀺 𑀫𑁂 𑀤𑀬𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀻’’𑀢𑀺. 𑀉𑀤𑀓𑀩𑀺𑀦𑁆𑀤𑀼𑀫𑁆𑀧𑀺 𑀦 𑀳𑀦𑀸𑀫𑀺 𑀦 𑀯𑀺𑀦𑀸𑀲𑁂𑀫𑀺, 𑀓𑀺𑀁 𑀓𑀸𑀭𑀡𑀸. 𑀫𑀸𑀳𑀁 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀯𑀺𑀲𑀫𑀕𑀢𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀲𑀺𑀦𑁆𑀢𑀺. 𑀦𑀺𑀦𑁆𑀦𑀣𑀮𑀢𑀺𑀡𑀕𑁆𑀕𑀭𑀼𑀓𑁆𑀔𑀲𑀸𑀔𑀸𑀤𑀻𑀲𑀼 𑀯𑀺𑀲𑀫𑀝𑁆𑀞𑀸𑀦𑁂 𑀕𑀢𑁂 𑀉𑀤𑀓𑀩𑀺𑀦𑁆𑀤𑀼𑀲𑀗𑁆𑀔𑀸𑀢𑁂 𑀔𑀼𑀤𑁆𑀤𑀓𑀧𑀸𑀡𑁂 𑀲𑀗𑁆𑀖𑀸𑀢𑀁 𑀯𑀥𑀁 𑀫𑀸 𑀆𑀧𑀸𑀤𑁂𑀲𑀺𑀦𑁆𑀢𑀺. 𑀏𑀢𑀫𑀢𑁆𑀣𑀁 ‘‘𑀲𑀢𑁄𑀯 𑀅𑀪𑀺𑀓𑁆𑀓𑀫𑀸𑀫𑀻’’𑀢𑀺 𑀤𑀲𑁆𑀲𑁂𑀢𑀺. 𑀅𑀘𑁂𑀮𑀓𑁂𑀲𑀼 𑀓𑀺𑀭 𑀪𑀽𑀫𑀺𑀁 𑀅𑀓𑁆𑀓𑀦𑁆𑀢𑀓𑀸𑀮𑀢𑁄 𑀧𑀪𑀼𑀢𑀺 𑀲𑀻𑀮𑀯𑀸 𑀦𑀸𑀫 𑀦𑀢𑁆𑀣𑀺. 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀸𑀧𑀺 𑀤𑀼𑀲𑁆𑀲𑀻𑀮𑀸𑀯 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀉𑀧𑀝𑁆𑀞𑀸𑀓𑀸𑀦𑀁 𑀕𑁂𑀳𑁂 𑀪𑀼𑀜𑁆𑀚𑀦𑁆𑀢𑀸𑀧𑀺 𑀤𑀼𑀲𑁆𑀲𑀻𑀮𑀸𑀯 𑀳𑀼𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺. 𑀆𑀕𑀘𑁆𑀙𑀦𑁆𑀢𑀸𑀧𑀺 𑀤𑀼𑀲𑁆𑀲𑀻𑀮𑀸𑀯 𑀳𑀼𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺. 𑀬𑀤𑀸 𑀧𑀦 𑀫𑁄𑀭𑀧𑀺𑀜𑁆𑀙𑁂𑀦 𑀨𑀮𑀓𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀲𑀻𑀮𑀁 𑀅𑀥𑀺𑀝𑁆𑀞𑀸𑀬 𑀦𑀺𑀲𑀻𑀤𑀦𑁆𑀢𑀺, 𑀢𑀤𑀸 𑀲𑀻𑀮𑀯𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺.

𑀯𑀦𑀓𑀫𑁆𑀫𑀺𑀓𑀦𑁆𑀢𑀺 𑀓𑀦𑁆𑀤𑀫𑀽𑀮𑀨𑀮𑀸𑀨𑀮𑀸𑀤𑀻𑀦𑀁 𑀅𑀢𑁆𑀣𑀸𑀬 𑀯𑀦𑁂 𑀯𑀺𑀘𑀭𑀦𑁆𑀢𑀁. 𑀯𑀦𑁂𑀦 𑀯𑀦𑀦𑁆𑀢𑀺 𑀯𑀦𑀢𑁄 𑀯𑀦𑀁, 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑀁𑀧𑀢𑀸𑀫𑀻𑀢𑀺 𑀕𑀘𑁆𑀙𑀸𑀫𑀺. 𑀆𑀭𑀜𑁆𑀜𑀓𑁄𑀢𑀺 𑀅𑀭𑀜𑁆𑀜𑁂 𑀚𑀸𑀢𑀯𑀼𑀤𑁆𑀥𑁄, 𑀇𑀤𑀁 𑀅𑀢𑁆𑀢𑀦𑁄 𑀆𑀚𑀻𑀯𑀓𑀓𑀸𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀓𑀺𑀭 𑀧𑀸𑀲𑀡𑁆𑀟𑀧𑀭𑀺𑀕𑁆𑀕𑀡𑁆𑀳𑀡𑀢𑁆𑀣𑀸𑀬 𑀢𑀁 𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺, 𑀦𑀺𑀭𑀢𑁆𑀣𑀓𑀪𑀸𑀯𑀁 𑀧𑀦 𑀜𑀢𑁆𑀯𑀸𑀧𑀺 𑀦 𑀉𑀧𑁆𑀧𑀩𑁆𑀩𑀚𑁆𑀚𑀺𑀢𑁄, 𑀩𑁄𑀥𑀺𑀲𑀢𑁆𑀢𑀸 𑀳𑀺 𑀬𑀁 𑀬𑀁 𑀞𑀸𑀦𑀁 𑀉𑀧𑁂𑀦𑁆𑀢𑀺, 𑀢𑀢𑁄 𑀅𑀦𑀺𑀯𑀢𑁆𑀢𑀺𑀢𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀧𑀩𑁆𑀩𑀚𑀺𑀢𑁆𑀯𑀸 𑀧𑀦 𑀫𑀸 𑀫𑀁 𑀓𑁄𑀘𑀺 𑀅𑀤𑁆𑀤𑀲𑀸𑀢𑀺 𑀢𑀢𑁄𑀯 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄. 𑀢𑁂𑀦𑁂𑀯𑀸𑀳 ‘‘𑀫𑀸 𑀫𑀁 𑀢𑁂 𑀅𑀤𑁆𑀤𑀲𑀁𑀲𑀼 𑀅𑀳𑀜𑁆𑀘 𑀫𑀸 𑀢𑁂 𑀅𑀤𑁆𑀤𑀲’’𑀦𑁆𑀢𑀺.

𑀕𑁄𑀝𑁆𑀞𑀸𑀢𑀺 𑀕𑁄𑀯𑀚𑀸. 𑀧𑀝𑁆𑀞𑀺𑀢𑀕𑀸𑀯𑁄𑀢𑀺 𑀦𑀺𑀓𑁆𑀔𑀦𑁆𑀢𑀕𑀸𑀯𑁄. 𑀢𑀢𑁆𑀣 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑁄𑀢𑀺 𑀯𑀦𑀦𑁆𑀢𑁂𑀬𑁂𑀯 𑀞𑀺𑀢𑁄 𑀕𑁄𑀧𑀸𑀮𑀓𑀸𑀦𑀁 𑀕𑀸𑀯𑀻𑀳𑀺 𑀲𑀤𑁆𑀥𑀺𑀁 𑀅𑀧𑀕𑀢𑀪𑀸𑀯𑀁 𑀤𑀺𑀲𑁆𑀯𑀸 𑀤𑁆𑀯𑁂 𑀳𑀢𑁆𑀣𑁂 𑀤𑁆𑀯𑁂 𑀘 𑀚𑀡𑁆𑀡𑀼𑀓𑀸𑀦𑀺 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀏𑀯𑀁 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀸𑀦𑀺 𑀲𑀼𑀤𑀁 𑀆𑀳𑀸𑀭𑁂𑀫𑀻𑀢𑀺 𑀫𑀳𑀮𑁆𑀮𑀓𑀯𑀘𑁆𑀙𑀓𑀸𑀦𑀁 𑀕𑁄𑀫𑀬𑀸𑀦𑀺 𑀓𑀲𑀝𑀸𑀦𑀺 𑀦𑀺𑀭𑁄𑀚𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀬𑀸𑀦𑀺 𑀢𑀭𑀼𑀡𑀯𑀘𑁆𑀙𑀓𑀸𑀦𑀁 𑀔𑀻𑀭𑀧𑀸𑀦𑁂𑀦𑁂𑀯 𑀯𑀟𑁆𑀠𑀦𑁆𑀢𑀸𑀦𑀁 𑀲𑀑𑀚𑀸𑀦𑀺 𑀕𑁄𑀫𑀬𑀸𑀦𑀺 𑀢𑀸𑀦𑀺 𑀓𑀼𑀘𑁆𑀙𑀺𑀧𑀽𑀭𑀁 𑀔𑀸𑀤𑀺𑀢𑁆𑀯𑀸 𑀧𑀼𑀦 𑀯𑀦𑀲𑀡𑁆𑀟𑀫𑁂𑀯 𑀧𑀯𑀺𑀲𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀸𑀦𑀺 𑀲𑀼𑀤𑀁 𑀆𑀳𑀸𑀭𑁂𑀫𑀻’’𑀢𑀺. 𑀬𑀸𑀯𑀓𑀻𑀯𑀜𑁆𑀘 𑀫𑁂𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁 𑀫𑀫 𑀲𑀓𑀁 𑀫𑀼𑀢𑁆𑀢𑀓𑀭𑀻𑀲𑀁 𑀅𑀧𑀭𑀺𑀓𑁆𑀔𑀻𑀡𑀁 𑀳𑁄𑀢𑀺. 𑀬𑀸𑀯 𑀫𑁂 𑀤𑁆𑀯𑀸𑀭𑀯𑀴𑀜𑁆𑀚𑁄 𑀧𑀯𑀢𑁆𑀢𑀺𑀢𑁆𑀣, 𑀢𑀸𑀯 𑀢𑀤𑁂𑀯 𑀆𑀳𑀸𑀭𑁂𑀫𑀻𑀢𑀺 𑀅𑀢𑁆𑀣𑁄. 𑀓𑀸𑀮𑁂 𑀧𑀦 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀧𑀭𑀺𑀓𑁆𑀔𑀻𑀡𑀫𑀁𑀲𑀮𑁄𑀳𑀺𑀢𑁄 𑀉𑀧𑀘𑁆𑀙𑀺𑀦𑁆𑀦𑀤𑁆𑀯𑀸𑀭𑀯𑀴𑀜𑁆𑀚𑁄 𑀯𑀘𑁆𑀙𑀓𑀸𑀦𑀁 𑀕𑁄𑀫𑀬𑀸𑀦𑀺 𑀆𑀳𑀸𑀭𑁂𑀫𑀺. 𑀫𑀳𑀸𑀯𑀺𑀓𑀝𑀪𑁄𑀚𑀦𑀲𑁆𑀫𑀺𑀦𑁆𑀢𑀺 𑀫𑀳𑀦𑁆𑀢𑁂 𑀯𑀺𑀓𑀝𑀪𑁄𑀚𑀦𑁂, 𑀅𑀧𑀓𑀢𑀺𑀪𑁄𑀚𑀦𑁂𑀢𑀺 𑀅𑀢𑁆𑀣𑁄.

𑁧𑁫𑁭. 𑀢𑀢𑁆𑀭𑀸𑀲𑁆𑀲𑀼𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀁𑀲𑀦𑀓𑀲𑁆𑀲 𑀯𑀦𑀲𑀡𑁆𑀟𑀲𑁆𑀲 𑀪𑀺𑀁𑀲𑀦𑀓𑀢𑀲𑁆𑀫𑀺𑀁 𑀳𑁄𑀢𑀻𑀢𑀺. 𑀢𑀢𑁆𑀭𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀦𑀁. 𑀲𑀼𑀤𑀦𑁆𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄. 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀆𑀮𑀧𑀦𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑁋 𑀢𑀢𑁆𑀭𑀸𑀢𑀺 𑀬𑀁 𑀯𑀼𑀢𑁆𑀢𑀁 𑀅𑀜𑁆𑀜𑀢𑀭𑀁 𑀪𑀺𑀁𑀲𑀦𑀓𑀁 𑀯𑀦𑀲𑀡𑁆𑀟𑀦𑁆𑀢𑀺, 𑀢𑀢𑁆𑀭 𑀬𑁄 𑀲𑁄 𑀪𑀺𑀁𑀲𑀦𑀓𑁄 𑀯𑀦𑀲𑀡𑁆𑀟𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀪𑀺𑀁𑀲𑀦𑀓𑀲𑁆𑀲 𑀯𑀦𑀲𑀡𑁆𑀟𑀲𑁆𑀲 𑀪𑀺𑀁𑀲𑀦𑀓𑀢𑀲𑁆𑀫𑀺𑀁 𑀳𑁄𑀢𑀺, 𑀪𑀺𑀁𑀲𑀦𑀓𑀓𑀺𑀭𑀺𑀬𑀸𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀳𑁄𑀢𑀺? 𑀇𑀤𑀁 𑀳𑁄𑀢𑀺, 𑀬𑁄 𑀓𑁄𑀘𑀺 𑀅𑀯𑀻𑀢𑀭𑀸𑀕𑁄…𑀧𑁂… 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀻𑀢𑀺.

𑀅𑀣 𑀯𑀸 𑀢𑀢𑁆𑀭𑀸𑀢𑀺 𑀲𑀸𑀫𑀺𑀅𑀢𑁆𑀣𑁂 𑀪𑀼𑀫𑁆𑀫𑀁. 𑀲𑀼 𑀇𑀢𑀺 𑀦𑀺𑀧𑀸𑀢𑁄. 𑀓𑀺𑀁 𑀲𑀼 𑀦𑀸𑀫 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀻𑀲𑀼 𑀯𑀺𑀬. 𑀇𑀤𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀧𑀘𑁆𑀘𑀓𑁆𑀔𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑀦𑀯𑀘𑀦𑀁. 𑀲𑀼𑀤𑀦𑁆𑀢𑀺 𑀲𑀼 𑀇𑀤𑀁, 𑀲𑀦𑁆𑀥𑀺𑀯𑀲𑁂𑀦 𑀇𑀓𑀸𑀭𑀮𑁄𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀓𑀺𑀁 𑀲𑀽𑀥𑀯𑀺𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸, 𑀢𑀲𑁆𑀲, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀁𑀲𑀦𑀓𑀲𑁆𑀲 𑀯𑀦𑀲𑀡𑁆𑀟𑀲𑁆𑀲 𑀪𑀺𑀁𑀲𑀦𑀓𑀢𑀲𑁆𑀫𑀺𑀁 𑀇𑀤𑀁𑀲𑀼 𑀳𑁄𑀢𑀻𑀢𑀺. 𑀪𑀺𑀁𑀲𑀦𑀓𑀢𑀲𑁆𑀫𑀺𑀦𑁆𑀢𑀺 𑀪𑀺𑀁𑀲𑀦𑀓𑀪𑀸𑀯𑁂𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀲 𑀢𑀓𑀸𑀭𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. ‘‘𑀪𑀺𑀁𑀲𑀦𑀓𑀢𑁆𑀢𑀲𑁆𑀫𑀺’’𑀦𑁆𑀢𑀺𑀬𑁂𑀯 𑀯𑀸 𑀧𑀸𑀞𑁄, 𑀪𑀺𑀁𑀲𑀦𑀓𑀢𑀸𑀬 𑀇𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀓𑀢𑁄, 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀢𑀲𑁆𑀫𑀸 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀪𑀺𑀁𑀲𑀦𑀓𑀪𑀸𑀯𑁂 𑀇𑀤𑀁𑀲𑀼 𑀳𑁄𑀢𑀺, 𑀪𑀺𑀁𑀲𑀦𑀓𑀪𑀸𑀯𑀦𑀺𑀫𑀺𑀢𑁆𑀢𑀁 𑀪𑀺𑀁𑀲𑀦𑀓𑀪𑀸𑀯𑀳𑁂𑀢𑀼, 𑀪𑀺𑀁𑀲𑀦𑀓𑀪𑀸𑀯𑀧𑀘𑁆𑀘𑀬𑀸 𑀇𑀤𑀁𑀲𑀼 𑀳𑁄𑀢𑀺. 𑀬𑁄 𑀓𑁄𑀘𑀺 𑀅𑀯𑀻𑀢𑀭𑀸𑀕𑁄 𑀢𑀁 𑀯𑀦𑀲𑀡𑁆𑀟𑀁 𑀧𑀯𑀺𑀲𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀺 𑀩𑀳𑀼𑀢𑀭𑀸𑀦𑀺 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀺, 𑀉𑀤𑁆𑀥𑀁 𑀫𑀼𑀔𑀸𑀦𑀺 𑀲𑀽𑀘𑀺𑀲𑀤𑀺𑀲𑀸𑀦𑀺 𑀓𑀡𑁆𑀝𑀓𑀲𑀤𑀺𑀲𑀸𑀦𑀺 𑀘 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀅𑀧𑁆𑀧𑀸𑀦𑀺 𑀦 𑀳𑀁𑀲𑀦𑁆𑀢𑀺, 𑀩𑀳𑀼𑀢𑀭𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀳𑀁𑀲𑀦𑁆𑀢𑀺, 𑀅𑀧𑁆𑀧𑀓𑀸𑀦𑀁 𑀅𑀢𑀺𑀲𑀽𑀭𑀧𑀼𑀭𑀺𑀲𑀸𑀦𑀁 𑀦 𑀳𑀁𑀲𑀦𑁆𑀢𑀻𑀢𑀺.

𑀅𑀦𑁆𑀢𑀭𑀝𑁆𑀞𑀓𑀸𑀢𑀺 𑀫𑀸𑀖𑀫𑀸𑀲𑀲𑁆𑀲 𑀅𑀯𑀲𑀸𑀦𑁂 𑀘𑀢𑀲𑁆𑀲𑁄, 𑀨𑀕𑁆𑀕𑀼𑀡𑀫𑀸𑀲𑀲𑁆𑀲 𑀆𑀤𑀺𑀫𑁆𑀳𑀺 𑀘𑀢𑀲𑁆𑀲𑁄𑀢𑀺 𑀏𑀯𑀁 𑀉𑀪𑀺𑀦𑁆𑀦𑀁 𑀅𑀦𑁆𑀢𑀭𑁂 𑀅𑀝𑁆𑀞𑀭𑀢𑁆𑀢𑀺. 𑀅𑀩𑁆𑀪𑁄𑀓𑀸𑀲𑁂𑀢𑀺 𑀫𑀳𑀸𑀲𑀢𑁆𑀢𑁄 𑀳𑀺𑀫𑀧𑀸𑀢𑀲𑀫𑀬𑁂 𑀭𑀢𑁆𑀢𑀺𑀁 𑀅𑀩𑁆𑀪𑁄𑀓𑀸𑀲𑁂 𑀯𑀺𑀳𑀭𑀢𑀺, 𑀅𑀣𑀲𑁆𑀲 𑀮𑁄𑀫𑀓𑀽𑀧𑁂𑀲𑀼 𑀆𑀯𑀼𑀢𑀫𑀼𑀢𑁆𑀢𑀸 𑀯𑀺𑀬 𑀳𑀺𑀫𑀩𑀺𑀦𑁆𑀤𑀽𑀦𑀺 𑀢𑀺𑀝𑁆𑀞𑀦𑁆𑀢𑀺, 𑀲𑀭𑀻𑀭𑀁 𑀲𑁂𑀢𑀤𑀼𑀓𑀽𑀮𑀧𑀸𑀭𑀼𑀢𑀁 𑀯𑀺𑀬 𑀳𑁄𑀢𑀺. 𑀤𑀺𑀯𑀸 𑀯𑀦𑀲𑀡𑁆𑀟𑁂𑀢𑀺 𑀤𑀺𑀯𑀸 𑀳𑀺𑀫𑀩𑀺𑀦𑁆𑀤𑀽𑀲𑀼 𑀲𑀽𑀭𑀺𑀬𑀸𑀢𑀧𑀲𑀫𑁆𑀨𑀲𑁆𑀲𑁂𑀦 𑀯𑀺𑀕𑀢𑁂𑀲𑀼 𑀅𑀲𑁆𑀲𑀸𑀲𑁄𑀧𑀺 𑀪𑀯𑁂𑀬𑁆𑀬, 𑀅𑀬𑀁 𑀧𑀦 𑀲𑀽𑀭𑀺𑀬𑁂 𑀉𑀕𑁆𑀕𑀘𑁆𑀙𑀦𑁆𑀢𑁂𑀬𑁂𑀯 𑀯𑀦𑀲𑀡𑁆𑀟𑀁 𑀧𑀯𑀺𑀲𑀢𑀺, 𑀢𑀢𑁆𑀭𑀸𑀧𑀺𑀲𑁆𑀲 𑀲𑀽𑀭𑀺𑀬𑀸𑀢𑀧𑁂𑀦 𑀧𑀕𑁆𑀖𑀭𑀦𑁆𑀢𑀁 𑀳𑀺𑀫𑀁 𑀲𑀭𑀻𑀭𑁂𑀬𑁂𑀯 𑀧𑀢𑀢𑀺. 𑀤𑀺𑀯𑀸 𑀅𑀩𑁆𑀪𑁄𑀓𑀸𑀲𑁂 𑀯𑀺𑀳𑀭𑀸𑀫𑀺 𑀭𑀢𑁆𑀢𑀺𑀁 𑀯𑀦𑀲𑀡𑁆𑀟𑁂𑀢𑀺 𑀕𑀺𑀫𑁆𑀳𑀓𑀸𑀮𑁂 𑀓𑀺𑀭𑁂𑀲 𑀤𑀺𑀯𑀸 𑀅𑀩𑁆𑀪𑁄𑀓𑀸𑀲𑁂 𑀯𑀺𑀳𑀸𑀲𑀺, 𑀢𑁂𑀦𑀲𑁆𑀲 𑀓𑀘𑁆𑀙𑁂𑀳𑀺 𑀲𑁂𑀤𑀥𑀸𑀭𑀸 𑀫𑀼𑀘𑁆𑀘𑀺𑀁𑀲𑀼, 𑀭𑀢𑁆𑀢𑀺𑀁 𑀅𑀲𑁆𑀲𑀸𑀲𑁄 𑀪𑀯𑁂𑀬𑁆𑀬, 𑀅𑀬𑀁 𑀧𑀦 𑀲𑀽𑀭𑀺𑀬𑁂 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑁂𑀬𑁂𑀯 𑀯𑀦𑀲𑀡𑁆𑀟𑀁 𑀧𑀯𑀺𑀲𑀢𑀺. 𑀅𑀣𑀲𑁆𑀲 𑀤𑀺𑀯𑀸 𑀕𑀳𑀺𑀢𑀉𑀲𑁆𑀫𑁂 𑀯𑀦𑀲𑀡𑁆𑀟𑁂 𑀅𑀗𑁆𑀕𑀸𑀭𑀓𑀸𑀲𑀼𑀬𑀁 𑀧𑀓𑁆𑀔𑀺𑀢𑁆𑀢𑁄 𑀯𑀺𑀬 𑀅𑀢𑁆𑀢𑀪𑀸𑀯𑁄 𑀧𑀭𑀺𑀤𑀬𑁆𑀳𑀺𑀢𑁆𑀣. 𑀅𑀦𑀘𑁆𑀙𑀭𑀺𑀬𑀸𑀢𑀺 𑀅𑀦𑀼𑀅𑀘𑁆𑀙𑀭𑀺𑀬𑀸. 𑀧𑀝𑀺𑀪𑀸𑀲𑀻𑀢𑀺 𑀉𑀧𑀝𑁆𑀞𑀸𑀲𑀺.

𑀲𑁄𑀢𑀢𑁆𑀢𑁄𑀢𑀺 𑀤𑀺𑀯𑀸 𑀆𑀢𑀧𑁂𑀦 𑀭𑀢𑁆𑀢𑀺𑀁 𑀯𑀦𑀉𑀲𑁆𑀫𑀸𑀬 𑀲𑀼𑀢𑀢𑁆𑀢𑁄. 𑀲𑁄𑀲𑀺𑀦𑁆𑀦𑁄𑀢𑀺 𑀭𑀢𑁆𑀢𑀺𑀁 𑀳𑀺𑀫𑁂𑀦 𑀤𑀺𑀯𑀸 𑀳𑀺𑀫𑁄𑀤𑀓𑁂𑀦 𑀲𑀼𑀝𑁆𑀞𑀼 𑀢𑀺𑀦𑁆𑀢𑁄. 𑀪𑀺𑀁𑀲𑀦𑀓𑁂𑀢𑀺 𑀪𑀬𑀚𑀦𑀓𑁂. 𑀦𑀕𑁆𑀕𑁄𑀢𑀺 𑀦𑀺𑀘𑁆𑀘𑁂𑀮𑁄. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁂 𑀳𑀺 𑀲𑀢𑀺 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸 𑀦 𑀅𑀢𑀺𑀩𑀸𑀥𑁂𑀬𑁆𑀬, 𑀢𑀫𑁆𑀧𑀺 𑀫𑁂 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀘𑀕𑁆𑀕𑀺𑀫𑀸𑀲𑀺𑀦𑁄𑀢𑀺 𑀅𑀕𑁆𑀕𑀺𑀫𑁆𑀧𑀺 𑀦 𑀉𑀧𑀕𑀢𑁄. 𑀏𑀲𑀦𑀸𑀧𑀲𑀼𑀢𑁄𑀢𑀺 𑀲𑀼𑀤𑁆𑀥𑀺𑀏𑀲𑀦𑀢𑁆𑀣𑀸𑀬 𑀧𑀲𑀼𑀢𑁄, 𑀧𑀬𑀼𑀢𑁆𑀢𑁄. 𑀫𑀼𑀦𑀻𑀢𑀺, 𑀢𑀤𑀸 𑀅𑀢𑁆𑀢𑀸𑀦𑀁 𑀫𑀼𑀦𑀻𑀢𑀺 𑀓𑀢𑁆𑀯𑀸 𑀓𑀣𑁂𑀢𑀺.

𑀙𑀯𑀝𑁆𑀞𑀺𑀓𑀸𑀦𑀻𑀢𑀺 𑀉𑀧𑀟𑁆𑀠𑀤𑀟𑁆𑀠𑀸𑀦𑀺 𑀅𑀝𑁆𑀞𑀻𑀦𑀺. 𑀉𑀧𑀥𑀸𑀬𑀸𑀢𑀺 𑀬𑀣𑀸 𑀲𑀻𑀲𑀽𑀧𑀥𑀸𑀦𑀜𑁆𑀘 𑀧𑀸𑀤𑀽𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀲𑀦𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀕𑀸𑀫𑀡𑁆𑀟𑀮𑀸𑀢𑀺 𑀕𑁄𑀧𑀸𑀮𑀤𑀸𑀭𑀓𑀸. 𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀲𑀼𑀫𑁂𑀥, 𑀢𑁆𑀯𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀲𑁆𑀫𑀸 𑀦𑀺𑀲𑀺𑀦𑁆𑀦𑁄, 𑀓𑀣𑁂𑀳𑀻𑀢𑀺 𑀯𑀤𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀥𑁄𑀫𑀼𑀔𑁄 𑀦𑀺𑀲𑀻𑀤𑀢𑀺, 𑀦 𑀓𑀣𑁂𑀢𑀺. 𑀅𑀣 𑀦𑀁 𑀢𑁂 𑀅𑀓𑀣𑁂𑀢𑀼𑀁 𑀦 𑀤𑀲𑁆𑀲𑀸𑀫𑀸𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀑𑀝𑁆𑀞𑀼𑀪𑀦𑁆𑀢𑀺 𑀲𑀭𑀻𑀭𑁂 𑀔𑁂𑀴𑀁 𑀧𑀸𑀢𑁂𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀏𑀯𑀫𑁆𑀧𑀺 𑀦 𑀓𑀣𑁂𑀢𑀺. 𑀅𑀣 𑀦𑀁 𑀢𑁆𑀯𑀁 𑀦 𑀓𑀣𑁂𑀲𑀻𑀢𑀺 𑀑𑀫𑀼𑀢𑁆𑀢𑁂𑀦𑁆𑀢𑀺 𑀧𑀲𑁆𑀲𑀸𑀯𑀫𑀲𑁆𑀲 𑀉𑀧𑀭𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀏𑀯𑀫𑁆𑀧𑀺 𑀦 𑀓𑀣𑁂𑀢𑀺𑀬𑁂𑀯. 𑀢𑀢𑁄 𑀦𑀁 𑀓𑀣𑁂𑀳𑀺 𑀓𑀣𑁂𑀳𑀻𑀢𑀺 𑀧𑀁𑀲𑀼𑀓𑁂𑀦 𑀑𑀓𑀺𑀭𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀏𑀯𑀫𑁆𑀧𑀺 𑀦 𑀓𑀣𑁂𑀢𑀺𑀬𑁂𑀯. 𑀅𑀣𑀲𑁆𑀲 𑀦 𑀓𑀣𑁂𑀲𑀻𑀢𑀺 𑀤𑀡𑁆𑀟𑀓𑀲𑀮𑀸𑀓𑀸 𑀕𑀳𑁂𑀢𑁆𑀯𑀸 𑀓𑀡𑁆𑀡𑀲𑁄𑀢𑁂𑀲𑀼 𑀧𑀯𑁂𑀲𑁂𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀅𑀥𑀺𑀯𑀸𑀲𑁂𑀦𑁆𑀢𑁄 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀦 𑀓𑀭𑀺𑀲𑁆𑀲𑀸𑀫𑀻𑀢𑀺 𑀫𑀢𑀓𑁄 𑀯𑀺𑀬 𑀅𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀦 𑀔𑁄 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀅𑀪𑀺𑀚𑀸𑀦𑀸𑀫𑀺 𑀢𑁂𑀲𑀼 𑀧𑀸𑀧𑀓𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀸’’𑀢𑀺. 𑀦 𑀫𑀬𑀸 𑀢𑁂𑀲𑀼 𑀧𑀸𑀧𑀓𑀁 𑀘𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀲𑁆𑀫𑀺𑀁 𑀳𑁄𑀢𑀻𑀢𑀺 𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑁄 𑀳𑁄𑀢𑀺. 𑀯𑀺𑀳𑀸𑀭𑁄 𑀏𑀯 𑀳𑀺 𑀯𑀺𑀳𑀸𑀭𑀲𑁆𑀫𑀺𑀦𑁆𑀢𑀺 𑀯𑀼𑀢𑁆𑀢𑁄. 𑀢𑁂𑀦𑁂𑀯 𑀘 ‘‘𑀇𑀤𑀁𑀲𑀼 𑀫𑁂’’𑀢𑀺 𑀏𑀢𑁆𑀣𑀸𑀧𑀺 𑀅𑀬𑀁𑀲𑀼 𑀫𑁂𑀢𑀺 𑀏𑀯𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀦𑀬𑁂𑀦 𑀅𑀜𑁆𑀜𑀸𑀦𑀺𑀧𑀺 𑀏𑀯𑀭𑀽𑀧𑀸𑀦𑀺 𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀫𑀺𑀦𑀸 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀧𑀽𑀭𑀺𑀢𑀁 𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀺. 𑀬𑀁 𑀲𑀦𑁆𑀥𑀸𑀬𑀸𑀳 𑁋

‘‘𑀲𑀼𑀔𑀧𑀢𑁆𑀢𑁄 𑀦 𑀭𑀚𑁆𑀚𑀸𑀫𑀺, 𑀤𑀼𑀓𑁆𑀔𑁂 𑀦 𑀳𑁄𑀫𑀺 𑀤𑀼𑀫𑁆𑀫𑀦𑁄;

𑀲𑀩𑁆𑀩𑀢𑁆𑀣 𑀢𑀼𑀮𑀺𑀢𑁄 𑀳𑁄𑀫𑀺, 𑀏𑀲𑀸 𑀫𑁂 𑀉𑀧𑁂𑀓𑁆𑀔𑀸𑀧𑀸𑀭𑀫𑀻’’𑀢𑀺.

𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀤𑀺𑀲𑀼𑀤𑁆𑀥𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀳𑀸𑀭𑀲𑀼𑀤𑁆𑀥𑀺𑀯𑀡𑁆𑀡𑀦𑀸

𑁧𑁫𑁮. 𑀆𑀳𑀸𑀭𑁂𑀦 𑀲𑀼𑀤𑁆𑀥𑀻𑀢𑀺 𑀓𑁄𑀮𑀸𑀤𑀺𑀦𑀸 𑀏𑀓𑀘𑁆𑀘𑁂𑀦 𑀧𑀭𑀺𑀢𑁆𑀢𑀓𑀆𑀳𑀸𑀭𑁂𑀦 𑀲𑀓𑁆𑀓𑀸 𑀲𑀼𑀚𑁆𑀛𑀺𑀢𑀼𑀦𑁆𑀢𑀺 𑀏𑀯𑀁𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀏𑀯𑀫𑀸𑀳𑀁𑀲𑀽𑀢𑀺 𑀏𑀯𑀁 𑀯𑀤𑀦𑁆𑀢𑀺. 𑀓𑁄𑀮𑁂𑀳𑀻𑀢𑀺 𑀧𑀤𑀭𑁂𑀳𑀺. 𑀓𑁄𑀮𑁄𑀤𑀓𑀦𑁆𑀢𑀺 𑀓𑁄𑀮𑀸𑀦𑀺 𑀫𑀤𑁆𑀤𑀺𑀢𑁆𑀯𑀸 𑀓𑀢𑀧𑀸𑀦𑀓𑀁. 𑀓𑁄𑀮𑀯𑀺𑀓𑀢𑀺𑀦𑁆𑀢𑀺 𑀓𑁄𑀮𑀲𑀸𑀴𑀯𑀓𑁄𑀮𑀧𑀽𑀯𑀓𑁄𑀮𑀕𑀼𑀴𑀸𑀤𑀺𑀓𑁄𑀮𑀯𑀺𑀓𑀸𑀭𑀁. 𑀏𑀢𑀧𑀭𑀫𑁄𑀢𑀺 𑀏𑀢𑀁 𑀧𑀫𑀸𑀡𑀁 𑀧𑀭𑀫𑀁 𑀅𑀲𑁆𑀲𑀸𑀢𑀺 𑀏𑀢𑀧𑀭𑀫𑁄. 𑀢𑀤𑀸 𑀏𑀓𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀧𑀦 𑀦 𑀩𑁂𑀮𑀼𑀯𑀧𑀓𑁆𑀓𑀢𑀸𑀮𑀧𑀓𑁆𑀓𑀧𑀫𑀸𑀡𑁄 𑀓𑁄𑀮𑁄 𑀳𑁄𑀢𑀺, 𑀬𑀁 𑀏𑀢𑀭𑀳𑀺 𑀓𑁄𑀮𑀲𑁆𑀲 𑀧𑀫𑀸𑀡𑀁, 𑀏𑀢𑁆𑀢𑀓𑁄𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁫𑁯. 𑀅𑀥𑀺𑀫𑀢𑁆𑀢𑀓𑀲𑀺𑀫𑀸𑀦𑀦𑁆𑀢𑀺 𑀅𑀢𑀺𑀯𑀺𑀬 𑀓𑀺𑀲𑀪𑀸𑀯𑀁. 𑀆𑀲𑀻𑀢𑀺𑀓𑀧𑀩𑁆𑀩𑀸𑀦𑀺 𑀯𑀸 𑀓𑀸𑀴𑀧𑀩𑁆𑀩𑀸𑀦𑀺 𑀯𑀸𑀢𑀺 𑀬𑀣𑀸 𑀆𑀲𑀻𑀢𑀺𑀓𑀯𑀮𑁆𑀮𑀺𑀬𑀸 𑀯𑀸 𑀓𑀸𑀴𑀯𑀮𑁆𑀮𑀺𑀬𑀸 𑀯𑀸 𑀲𑀦𑁆𑀥𑀺𑀝𑁆𑀞𑀸𑀦𑁂𑀲𑀼 𑀫𑀺𑀮𑀸𑀬𑀺𑀢𑁆𑀯𑀸 𑀫𑀚𑁆𑀛𑁂 𑀉𑀦𑁆𑀦𑀢𑀼𑀦𑁆𑀦𑀢𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀫𑀬𑁆𑀳𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀑𑀝𑁆𑀞𑀧𑀤𑀦𑁆𑀢𑀺 𑀬𑀣𑀸 𑀑𑀝𑁆𑀞𑀲𑁆𑀲 𑀧𑀤𑀁 𑀫𑀚𑁆𑀛𑁂 𑀕𑀫𑁆𑀪𑀻𑀭𑀁 𑀳𑁄𑀢𑀺, 𑀏𑀯𑀫𑁂𑀯𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀺𑀮𑀸𑀢𑁂 𑀫𑀁𑀲𑀮𑁄𑀳𑀺𑀢𑁂 𑀯𑀘𑁆𑀘𑀤𑁆𑀯𑀸𑀭𑀲𑁆𑀲 𑀅𑀦𑁆𑀢𑁄𑀧𑀯𑀺𑀝𑁆𑀞𑀢𑁆𑀢𑀸 𑀆𑀦𑀺𑀲𑀤𑀁 𑀫𑀚𑁆𑀛𑁂 𑀕𑀫𑁆𑀪𑀻𑀭𑀁 𑀳𑁄𑀢𑀺. 𑀅𑀣𑀲𑁆𑀲 𑀪𑀽𑀫𑀺𑀬𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀲𑀭𑀧𑁄𑀗𑁆𑀔𑁂𑀦 𑀅𑀓𑁆𑀓𑀦𑁆𑀢𑀁 𑀯𑀺𑀬 𑀫𑀚𑁆𑀛𑁂 𑀉𑀦𑁆𑀦𑀢𑀁 𑀳𑁄𑀢𑀺. 𑀯𑀝𑁆𑀝𑀦𑀸𑀯𑀴𑀻𑀢𑀺 𑀬𑀣𑀸 𑀭𑀚𑁆𑀚𑀼𑀬𑀸 𑀆𑀯𑀼𑀦𑀺𑀢𑁆𑀯𑀸 𑀓𑀢𑀸 𑀯𑀝𑁆𑀝𑀦𑀸𑀯𑀴𑀻 𑀯𑀝𑁆𑀝𑀦𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀦𑀺𑀦𑁆𑀦𑀸 𑀳𑁄𑀢𑀺, 𑀯𑀝𑁆𑀝𑀦𑀝𑁆𑀞𑀸𑀦𑁂𑀲𑀼 𑀉𑀦𑁆𑀦𑀢𑀸, 𑀏𑀯𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑁄 𑀉𑀦𑁆𑀦𑀢𑀸𑀯𑀦𑀢𑁄 𑀳𑁄𑀢𑀺, 𑀚𑀭𑀲𑀸𑀮𑀸𑀬 𑀕𑁄𑀧𑀸𑀦𑀲𑀺𑀬𑁄𑀢𑀺 𑀚𑀺𑀡𑁆𑀡𑀲𑀸𑀮𑀸𑀬 𑀕𑁄𑀧𑀸𑀦𑀲𑀺𑀬𑁄, 𑀢𑀸 𑀯𑀁𑀲𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀫𑀡𑁆𑀟𑀮𑁂 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀫𑀡𑁆𑀟𑀮𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀪𑀽𑀫𑀺𑀬𑀦𑁆𑀢𑀺; 𑀏𑀯𑀁 𑀏𑀓𑀸 𑀉𑀧𑀭𑀺 𑀳𑁄𑀢𑀺, 𑀏𑀓𑀸 𑀳𑁂𑀝𑁆𑀞𑀸𑀢𑀺 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀸 𑀪𑀯𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀦 𑀦 𑀏𑀯𑀁 𑀨𑀸𑀲𑀼𑀴𑀺𑀬𑁄, 𑀢𑀲𑁆𑀲 𑀳𑀺 𑀮𑁄𑀳𑀺𑀢𑁂 𑀙𑀺𑀦𑁆𑀦𑁂 𑀫𑀁𑀲𑁂 𑀫𑀺𑀮𑀸𑀢𑁂 𑀨𑀸𑀲𑀼𑀴𑀦𑁆𑀢𑀭𑁂𑀳𑀺 𑀘𑀫𑁆𑀫𑀸𑀦𑀺 𑀳𑁂𑀝𑁆𑀞𑀸 𑀑𑀢𑀺𑀡𑁆𑀡𑀸𑀦𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀑𑀓𑁆𑀔𑀸𑀬𑀺𑀓𑀸𑀢𑀺 𑀳𑁂𑀝𑁆𑀞𑀸 𑀅𑀦𑀼𑀧𑀯𑀺𑀝𑁆𑀞𑀸. 𑀢𑀲𑁆𑀲 𑀓𑀺𑀭 𑀮𑁄𑀳𑀺𑀢𑁂 𑀙𑀺𑀦𑁆𑀦𑁂 𑀫𑀁𑀲𑁂 𑀫𑀺𑀮𑀸𑀢𑁂 𑀅𑀓𑁆𑀔𑀺𑀆𑀯𑀸𑀝𑀓𑀸 𑀫𑀢𑁆𑀣𑀮𑀼𑀗𑁆𑀕𑀁 𑀆𑀳𑀘𑁆𑀘 𑀅𑀝𑁆𑀞𑀁𑀲𑀼, 𑀢𑁂𑀦𑀲𑁆𑀲 𑀏𑀯𑀭𑀽𑀧𑀸 𑀅𑀓𑁆𑀔𑀺𑀢𑀸𑀭𑀓𑀸 𑀅𑀳𑁂𑀲𑀼𑀁. 𑀆𑀫𑀓𑀘𑁆𑀙𑀺𑀦𑁆𑀦𑁄𑀢𑀺 𑀅𑀢𑀺𑀢𑀭𑀼𑀡𑀓𑀸𑀮𑁂 𑀙𑀺𑀦𑁆𑀦𑁄, 𑀲𑁄 𑀳𑀺 𑀯𑀸𑀢𑀸𑀢𑀧𑁂𑀦 𑀲𑀁𑀨𑀼𑀲𑀢𑀺 𑀘𑁂𑀯 𑀫𑀺𑀮𑀸𑀬𑀢𑀺 𑀘. 𑀬𑀸𑀯𑀲𑁆𑀲𑀼 𑀫𑁂, 𑀲𑀸𑀭𑀺𑀧𑀼𑀢𑁆𑀢𑀸𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀫𑀬𑁆𑀳𑀁 𑀉𑀤𑀭𑀘𑁆𑀙𑀯𑀺 𑀬𑀸𑀯 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀅𑀮𑁆𑀮𑀻𑀦𑀸 𑀳𑁄𑀢𑀺. 𑀅𑀣 𑀯𑀸 𑀬𑀸𑀯𑀲𑁆𑀲𑀼 𑀫𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀸𑀭𑀺𑀬𑀪𑀸𑀭𑀺𑀬𑀸 𑀅𑀳𑁄𑀲𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀸, 𑀫𑀬𑁆𑀳𑀁 𑀉𑀤𑀭𑀘𑁆𑀙𑀯𑀺 𑀬𑀸𑀯 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀅𑀮𑁆𑀮𑀻𑀦𑀸 𑀅𑀳𑁄𑀲𑀻𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀺𑀝𑁆𑀞𑀺𑀓𑀡𑁆𑀝𑀓𑀁𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀫𑀻𑀢𑀺 𑀲𑀳𑀉𑀤𑀭𑀘𑁆𑀙𑀯𑀺𑀁 𑀕𑀡𑁆𑀳𑀸𑀫𑀺. 𑀉𑀤𑀭𑀘𑁆𑀙𑀯𑀺𑀁𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀫𑀻𑀢𑀺 𑀲𑀳𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀕𑀡𑁆𑀳𑀸𑀫𑀺. 𑀅𑀯𑀓𑀼𑀚𑁆𑀚𑁄 𑀧𑀧𑀢𑀸𑀫𑀻𑀢𑀺 𑀢𑀲𑁆𑀲 𑀳𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀧𑀲𑁆𑀲𑀸𑀯𑁄 𑀦𑁂𑀯 𑀦𑀺𑀓𑁆𑀔𑀫𑀢𑀺, 𑀯𑀘𑁆𑀘𑀁 𑀧𑀦 𑀏𑀓𑀁 𑀤𑁆𑀯𑁂 𑀓𑀝𑀓𑀝𑁆𑀞𑀺𑀫𑀢𑁆𑀢𑀁 𑀦𑀺𑀓𑁆𑀔𑀫𑀢𑀺. 𑀩𑀮𑀯𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺. 𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀢𑀢𑁆𑀣𑁂𑀯 𑀅𑀯𑀓𑀼𑀚𑁆𑀚𑁄 𑀪𑀽𑀫𑀺𑀬𑀁 𑀧𑀢𑀢𑀺. 𑀢𑁂𑀦𑀸𑀳 ‘‘𑀅𑀯𑀓𑀼𑀚𑁆𑀚𑁄 𑀧𑀧𑀢𑀸𑀫𑀻’’𑀢𑀺. 𑀢𑀫𑁂𑀯 𑀓𑀸𑀬𑀦𑁆𑀢𑀺 𑀢𑀁 𑀏𑀓𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀓𑀸𑀬𑀁. 𑀫𑀳𑀸𑀲𑀘𑁆𑀘𑀓𑀲𑀼𑀢𑁆𑀢𑁂 𑀧𑀦 𑀧𑀘𑁆𑀙𑀺𑀫𑀪𑀯𑀺𑀓𑀓𑀸𑀬𑀁 𑀲𑀦𑁆𑀥𑀸𑀬 𑀇𑀫𑀫𑁂𑀯 𑀓𑀸𑀬𑀦𑁆𑀢𑀺 𑀆𑀳. 𑀧𑀽𑀢𑀺𑀫𑀽𑀮𑀸𑀦𑀻𑀢𑀺 𑀫𑀁𑀲𑁂 𑀯𑀸 𑀮𑁄𑀳𑀺𑀢𑁂 𑀯𑀸 𑀲𑀢𑀺 𑀢𑀺𑀝𑁆𑀞𑀦𑁆𑀢𑀺. 𑀢𑀲𑁆𑀲 𑀧𑀦 𑀅𑀪𑀸𑀯𑁂 𑀘𑀫𑁆𑀫𑀔𑀡𑁆𑀟𑁂 𑀮𑁄𑀫𑀸𑀦𑀺 𑀯𑀺𑀬 𑀳𑀢𑁆𑀣𑁂𑀬𑁂𑀯 𑀮𑀕𑁆𑀕𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀽𑀢𑀺𑀫𑀽𑀮𑀸𑀦𑀺 𑀮𑁄𑀫𑀸𑀦𑀺 𑀓𑀸𑀬𑀲𑁆𑀫𑀸 𑀧𑀢𑀦𑁆𑀢𑀻’’𑀢𑀺.

𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀦𑁆𑀢𑀺 𑀅𑀭𑀺𑀬𑀪𑀸𑀯𑀁 𑀓𑀸𑀢𑀼𑀁 𑀲𑀫𑀢𑁆𑀣𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀁. 𑀇𑀫𑀺𑀲𑁆𑀲𑀸𑀬𑁂𑀯 𑀅𑀭𑀺𑀬𑀸𑀬 𑀧𑀜𑁆𑀜𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀅𑀦𑀥𑀺𑀕𑀫𑀸. 𑀬𑀸𑀬𑀁 𑀅𑀭𑀺𑀬𑀸𑀢𑀺 𑀬𑀸 𑀅𑀬𑀁 𑀫𑀕𑁆𑀕𑀧𑀜𑁆𑀜𑀸 𑀅𑀥𑀺𑀕𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀏𑀢𑀭𑀳𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀅𑀥𑀺𑀕𑀢𑀢𑁆𑀢𑀸 𑀫𑀕𑁆𑀕𑀧𑀜𑁆𑀜𑀸 𑀅𑀥𑀺𑀕𑀢𑀸, 𑀏𑀯𑀁 𑀏𑀓𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀅𑀦𑀥𑀺𑀕𑀢𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀧𑀜𑁆𑀜𑀁 𑀦𑀸𑀥𑀺𑀕𑀢𑁄𑀲𑁆𑀫𑀻𑀢𑀺, 𑀫𑀚𑁆𑀛𑀺𑀫𑀪𑀸𑀡𑀓𑀢𑁆𑀣𑁂𑀭𑀸 𑀧𑀦𑀸𑀳𑀼, 𑀇𑀫𑀺𑀲𑁆𑀲𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀧𑀜𑁆𑀜𑀸𑀧𑀺 𑀬𑀸𑀬𑀁 𑀅𑀭𑀺𑀬𑀸𑀢𑀺 𑀯𑀼𑀢𑁆𑀢𑀧𑀜𑁆𑀜𑀸𑀧𑀺 𑀫𑀕𑁆𑀕𑀧𑀜𑁆𑀜𑀸𑀬𑁂𑀯. 𑀅𑀣 𑀦𑁂 𑀪𑀺𑀓𑁆𑀔𑀽 𑀆𑀳𑀁𑀲𑀼 ‘‘𑀏𑀯𑀁 𑀲𑀦𑁆𑀢𑁂 𑀫𑀕𑁆𑀕𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 𑀫𑀕𑁆𑀕𑀁 𑀦𑀸𑀥𑀺𑀕𑀢𑁄𑀲𑁆𑀫𑀻𑀢𑀺 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀪𑀦𑁆𑀢𑁂’’𑀢𑀺. 𑀆𑀯𑀼𑀲𑁄, 𑀓𑀺𑀜𑁆𑀘𑀸𑀧𑀺 𑀤𑀻𑀧𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀤𑁆𑀯𑁂𑀧𑀺 𑀧𑀦 𑀫𑀕𑁆𑀕𑀧𑀜𑁆𑀜𑀸𑀬𑁂𑀯𑀸𑀢𑀺, 𑀏𑀢𑀤𑁂𑀯 𑀘𑁂𑀢𑁆𑀣 𑀬𑀼𑀢𑁆𑀢𑀁. 𑀇𑀢𑀭𑀣𑀸 𑀳𑀺 𑀬𑀸 𑀅𑀬𑀦𑁆𑀢𑀺 𑀦𑀺𑀤𑁆𑀤𑁂𑀲𑁄 𑀅𑀦𑀦𑀼𑀭𑀽𑀧𑁄 𑀲𑀺𑀬𑀸.

𑀆𑀳𑀸𑀭𑀲𑀼𑀤𑁆𑀥𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀁𑀲𑀸𑀭𑀲𑀼𑀤𑁆𑀥𑀺𑀆𑀤𑀺𑀯𑀡𑁆𑀡𑀦𑀸

𑁧𑁬𑁦. 𑀲𑀁𑀲𑀸𑀭𑁂𑀦 𑀲𑀼𑀤𑁆𑀥𑀻𑀢𑀺 𑀩𑀳𑀼𑀓𑀁 𑀲𑀁𑀲𑀭𑀺𑀢𑁆𑀯𑀸 𑀲𑀼𑀚𑁆𑀛𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀉𑀧𑀧𑀢𑁆𑀢𑀺𑀬𑀸 𑀲𑀼𑀤𑁆𑀥𑀻𑀢𑀺 𑀩𑀳𑀼𑀓𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀲𑀼𑀚𑁆𑀛𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀆𑀯𑀸𑀲𑁂𑀦 𑀲𑀼𑀤𑁆𑀥𑀻𑀢𑀺 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀯𑀲𑀺𑀢𑁆𑀯𑀸 𑀲𑀼𑀚𑁆𑀛𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀻𑀲𑀼𑀧𑀺 𑀞𑀸𑀦𑁂𑀲𑀼 𑀲𑀁𑀲𑀭𑀡𑀓𑀯𑀲𑁂𑀦 𑀲𑀁𑀲𑀸𑀭𑁄. 𑀉𑀧𑀧𑀚𑁆𑀚𑀦𑀓𑀯𑀲𑁂𑀦 𑀉𑀧𑀧𑀢𑁆𑀢𑀺. 𑀯𑀲𑀦𑀓𑀯𑀲𑁂𑀦 𑀆𑀯𑀸𑀲𑁄𑀢𑀺 𑀔𑀦𑁆𑀥𑀸𑀬𑁂𑀯 𑀯𑀼𑀢𑁆𑀢𑀸. 𑀬𑀜𑁆𑀜𑁂𑀦𑀸𑀢𑀺 𑀩𑀳𑀼𑀬𑀸𑀕𑁂 𑀬𑀚𑀺𑀢𑁆𑀯𑀸 𑀲𑀼𑀚𑁆𑀛𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁂𑀦𑀸𑀢𑀺 𑀢𑀻𑀳𑀺 𑀲𑀗𑁆𑀔𑁂𑀳𑀺 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦 𑀫𑀼𑀤𑁆𑀥𑀦𑀺 𑀅𑀪𑀺𑀲𑀺𑀢𑁆𑀢𑁂𑀦. 𑀅𑀕𑁆𑀕𑀺𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀩𑀳𑀼𑀅𑀕𑁆𑀕𑀺𑀧𑀭𑀺𑀘𑀭𑀡𑁂𑀦 𑀲𑀼𑀚𑁆𑀛𑀦𑁆𑀢𑀻𑀢𑀺 𑀯𑀤𑀦𑁆𑀢𑀺.

𑁧𑁬𑁧. 𑀤𑀳𑀭𑁄𑀢𑀺 𑀢𑀭𑀼𑀡𑁄. 𑀬𑀼𑀯𑀸𑀢𑀺 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀼𑀲𑀼𑀓𑀸𑀴𑀓𑁂𑀲𑁄𑀢𑀺 𑀲𑀼𑀝𑁆𑀞𑀼 𑀓𑀸𑀴𑀓𑁂𑀲𑁄. 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀇𑀫𑀺𑀦𑀸𑀲𑁆𑀲 𑀬𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀬𑀼𑀯𑀸, 𑀢𑀁 𑀬𑁄𑀩𑁆𑀩𑀦𑀁 𑀪𑀤𑁆𑀤𑀁 𑀮𑀤𑁆𑀥𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀞𑀫𑁂𑀦 𑀯𑀬𑀲𑀸𑀢𑀺 𑀧𑀞𑀫𑀯𑀬𑁄 𑀦𑀸𑀫 𑀢𑁂𑀢𑁆𑀢𑀺𑀁𑀲 𑀯𑀲𑁆𑀲𑀸𑀦𑀺, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄, 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦𑀸𑀢𑀺 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀪𑀸𑀯𑁂𑀦. 𑀚𑀺𑀡𑁆𑀡𑁄𑀢𑀺 𑀚𑀭𑀸𑀚𑀺𑀡𑁆𑀡𑁄. 𑀯𑀼𑀤𑁆𑀥𑁄𑀢𑀺 𑀯𑀟𑁆𑀠𑀺𑀢𑁆𑀯𑀸 𑀞𑀺𑀢𑀅𑀗𑁆𑀕𑀧𑀘𑁆𑀘𑀗𑁆𑀕𑁄. 𑀫𑀳𑀮𑁆𑀮𑀓𑁄𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑁄. 𑀅𑀤𑁆𑀥𑀕𑀢𑁄𑀢𑀺 𑀩𑀳𑀼𑀅𑀤𑁆𑀥𑀸𑀦𑀁 𑀕𑀢𑁄 𑀘𑀺𑀭𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑁄. 𑀯𑀬𑁄 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀯𑀲𑁆𑀲𑀲𑀢𑀲𑁆𑀲 𑀢𑀢𑀺𑀬𑀓𑁄𑀝𑁆𑀞𑀸𑀲𑀁 𑀧𑀘𑁆𑀙𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀆𑀲𑀻𑀢𑀺𑀓𑁄 𑀫𑁂 𑀯𑀬𑁄 𑀯𑀢𑁆𑀢𑀢𑀻𑀢𑀺 𑀇𑀫𑀁 𑀓𑀺𑀭 𑀲𑀼𑀢𑁆𑀢𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑀁𑀯𑀘𑁆𑀙𑀭𑁂 𑀓𑀣𑁂𑀲𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀧𑀭𑀫𑀸𑀬𑀸𑀢𑀺 𑀉𑀢𑁆𑀢𑀫𑀸𑀬. 𑀲𑀢𑀺𑀬𑀸𑀢𑀺𑀆𑀤𑀻𑀲𑀼 𑀧𑀤𑀲𑀢𑀫𑁆𑀧𑀺 𑀧𑀤𑀲𑀳𑀲𑁆𑀲𑀫𑁆𑀧𑀺 𑀯𑀤𑀦𑁆𑀢𑀲𑁆𑀲𑁂𑀯 𑀕𑀳𑀡𑀲𑀫𑀢𑁆𑀣𑀢𑀸 𑀲𑀢𑀺 𑀦𑀸𑀫. 𑀢𑀤𑁂𑀯 𑀆𑀥𑀸𑀭𑀡𑀉𑀧𑀦𑀺𑀩𑀦𑁆𑀥𑀦𑀲𑀫𑀢𑁆𑀣𑀢𑀸 𑀕𑀢𑀺 𑀦𑀸𑀫. 𑀏𑀯𑀁 𑀕𑀳𑀺𑀢𑀁 𑀥𑀸𑀭𑀺𑀢𑀁 𑀲𑀚𑁆𑀛𑀸𑀬𑀁 𑀓𑀸𑀢𑀼𑀁 𑀲𑀫𑀢𑁆𑀣𑀯𑀻𑀭𑀺𑀬𑀁 𑀥𑀺𑀢𑀺 𑀦𑀸𑀫. 𑀢𑀲𑁆𑀲 𑀅𑀢𑁆𑀣𑀜𑁆𑀘 𑀓𑀸𑀭𑀡𑀜𑁆𑀘 𑀤𑀲𑁆𑀲𑀦𑀲𑀫𑀢𑁆𑀣𑀢𑀸 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀦𑀸𑀫.

𑀤𑀴𑁆𑀳𑀥𑀫𑁆𑀫𑀸 𑀥𑀦𑀼𑀕𑁆𑀕𑀳𑁄𑀢𑀺 𑀤𑀴𑁆𑀳𑀁 𑀥𑀦𑀼𑀁 𑀕𑀳𑁂𑀢𑁆𑀯𑀸 𑀞𑀺𑀢𑁄 𑀇𑀲𑁆𑀲𑀸𑀲𑁄. 𑀤𑀴𑁆𑀳𑀥𑀦𑀼 𑀦𑀸𑀫 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀯𑀼𑀘𑁆𑀘𑀢𑀺, 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀦𑀸𑀫 𑀬𑀲𑁆𑀲 𑀆𑀭𑁄𑀧𑀺𑀢𑀲𑁆𑀲 𑀚𑀺𑀬𑀸𑀩𑀤𑁆𑀥𑁄 𑀮𑁄𑀳𑀲𑀻𑀲𑀸𑀤𑀻𑀦𑀁 𑀪𑀸𑀭𑁄 𑀤𑀡𑁆𑀟𑁂 𑀕𑀳𑁂𑀢𑁆𑀯𑀸 𑀬𑀸𑀯 𑀓𑀡𑁆𑀟𑀧𑁆𑀧𑀫𑀸𑀡𑀸 𑀉𑀓𑁆𑀔𑀺𑀢𑁆𑀢𑀲𑁆𑀲 𑀧𑀣𑀯𑀺𑀢𑁄 𑀫𑀼𑀘𑁆𑀘𑀢𑀺. 𑀲𑀺𑀓𑁆𑀔𑀺𑀢𑁄𑀢𑀺 𑀤𑀲 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀆𑀘𑀭𑀺𑀬𑀓𑀼𑀮𑁂 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄. 𑀓𑀢𑀳𑀢𑁆𑀣𑁄𑀢𑀺 𑀓𑁄𑀘𑀺 𑀲𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀸𑀢𑀺. 𑀓𑀢𑀳𑀢𑁆𑀣𑁄 𑀦 𑀳𑁄𑀢𑀺, 𑀅𑀬𑀁 𑀧𑀦 𑀓𑀢𑀳𑀢𑁆𑀣𑁄 𑀘𑀺𑀡𑁆𑀡𑀯𑀲𑀻𑀪𑀸𑀯𑁄. 𑀓𑀢𑀽𑀧𑀸𑀲𑀦𑁄𑀢𑀺 𑀭𑀸𑀚𑀓𑀼𑀮𑀸𑀤𑀻𑀲𑀼 𑀤𑀲𑁆𑀲𑀺𑀢𑀲𑀺𑀧𑁆𑀧𑁄. 𑀮𑀳𑀼𑀓𑁂𑀦 𑀅𑀲𑀦𑁂𑀦𑀸𑀢𑀺 𑀅𑀦𑁆𑀢𑁄 𑀲𑀼𑀲𑀺𑀭𑀁 𑀓𑀢𑁆𑀯𑀸 𑀢𑀽𑀮𑀸𑀤𑀻𑀦𑀺 𑀧𑀽𑀭𑁂𑀢𑁆𑀯𑀸 𑀓𑀢𑀮𑀸𑀔𑀸𑀧𑀭𑀺𑀓𑀫𑁆𑀫𑁂𑀦 𑀲𑀮𑁆𑀮𑀳𑀼𑀓𑀓𑀡𑁆𑀟𑁂𑀦. 𑀏𑀯𑀁 𑀓𑀢𑀜𑁆𑀳𑀺 𑀏𑀓𑀉𑀲𑀪𑀕𑀸𑀫𑀻 𑀤𑁆𑀯𑁂 𑀉𑀲𑀪𑀸𑀦𑀺 𑀕𑀘𑁆𑀙𑀢𑀺, 𑀅𑀝𑁆𑀞𑀉𑀲𑀪𑀕𑀸𑀫𑀻 𑀲𑁄𑀴𑀲𑀉𑀲𑀪𑀸𑀦𑀺 𑀕𑀘𑁆𑀙𑀢𑀺. 𑀅𑀧𑁆𑀧𑀓𑀲𑀺𑀭𑁂𑀦𑀸𑀢𑀺 𑀦𑀺𑀤𑀼𑀓𑁆𑀔𑁂𑀦. 𑀅𑀢𑀺𑀧𑀸𑀢𑁂𑀬𑁆𑀬𑀸𑀢𑀺 𑀅𑀢𑀺𑀓𑁆𑀓𑀫𑁂𑀬𑁆𑀬. 𑀏𑀯𑀁 𑀅𑀥𑀺𑀫𑀢𑁆𑀢𑀲𑀢𑀺𑀫𑀦𑁆𑀢𑁄𑀢𑀺 𑀬𑀣𑀸 𑀲𑁄 𑀥𑀦𑀼𑀕𑁆𑀕𑀳𑁄 𑀢𑀁 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀙𑀸𑀬𑀁 𑀲𑀻𑀖𑀁 𑀏𑀯 𑀅𑀢𑀺𑀓𑁆𑀓𑀫𑁂𑀢𑀺, 𑀏𑀯𑀁 𑀧𑀤𑀲𑀢𑀫𑁆𑀧𑀺 𑀧𑀤𑀲𑀳𑀲𑁆𑀲𑀫𑁆𑀧𑀺 𑀉𑀕𑁆𑀕𑀳𑁂𑀢𑀼𑀁 𑀉𑀧𑀥𑀸𑀭𑁂𑀢𑀼𑀁 𑀲𑀚𑁆𑀛𑀸𑀬𑀺𑀢𑀼𑀁 𑀅𑀢𑁆𑀣𑀓𑀸𑀭𑀡𑀸𑀦𑀺 𑀘 𑀉𑀧𑀧𑀭𑀺𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀸𑀢𑀺 𑀅𑀲𑀺𑀢𑀧𑀻𑀢𑀸𑀤𑀻𑀦𑀺 𑀳𑀺 𑀪𑀕𑀯𑀢𑀸𑀧𑀺 𑀓𑀸𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺, 𑀪𑀺𑀓𑁆𑀔𑀽𑀳𑀺𑀧𑀺. 𑀢𑀲𑁆𑀫𑀸 𑀢𑁂𑀲𑀁 𑀓𑀭𑀡𑀫𑀢𑁆𑀢𑀓𑀸𑀮𑀁 𑀞𑀧𑁂𑀢𑁆𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀅𑀧𑀭𑀺𑀬𑀸𑀤𑀺𑀦𑁆𑀦𑀸𑀬𑁂𑀯𑀸𑀢𑀺 𑀅𑀧𑀭𑀺𑀓𑁆𑀔𑀻𑀡𑀸𑀬𑁂𑀯. 𑀲𑀘𑁂 𑀳𑀺 𑀏𑀓𑁄 𑀪𑀺𑀓𑁆𑀔𑀼 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀧𑀼𑀘𑁆𑀙𑀢𑀺, 𑀅𑀜𑁆𑀜𑁄 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀁, 𑀅𑀜𑁆𑀜𑁄 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀁, 𑀅𑀬𑁆𑀬𑁄 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁. 𑀇𑀫𑀺𑀦𑀸 𑀧𑀼𑀝𑁆𑀞𑀁 𑀅𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀏𑀓𑁄 𑀏𑀓𑀁 𑀦 𑀑𑀮𑁄𑀓𑁂𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑁂𑀲𑀁 𑀯𑀸𑀭𑁄 𑀧𑀜𑁆𑀜𑀸𑀬𑀢𑀺. 𑀏𑀯𑀁 𑀩𑀼𑀤𑁆𑀥𑀸𑀦𑀁 𑀧𑀦 𑀯𑀸𑀭𑁄 𑀦 𑀧𑀜𑁆𑀜𑀸𑀬𑀢𑀺, 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀙𑀸𑀬𑀁 𑀅𑀢𑀺𑀓𑁆𑀓𑀫𑀢𑁄 𑀧𑀼𑀭𑁂𑀢𑀭𑀁𑀬𑁂𑀯 𑀪𑀕𑀯𑀸 𑀘𑀼𑀤𑁆𑀤𑀲𑀯𑀺𑀥𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁, 𑀦𑀯𑀯𑀺𑀥𑁂𑀦 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀁, 𑀲𑁄𑀴𑀲𑀯𑀺𑀥𑁂𑀦 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀁, 𑀧𑀜𑁆𑀘𑀯𑀺𑀥𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀓𑀣𑁂𑀢𑀺. 𑀢𑀺𑀝𑁆𑀞𑀦𑁆𑀢𑀼 𑀯𑀸 𑀢𑀸𑀯 𑀏𑀢𑁂 𑀘𑀢𑁆𑀢𑀸𑀭𑁄. 𑀲𑀘𑁂 𑀳𑀺 𑀅𑀜𑁆𑀜𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼, 𑀅𑀜𑁆𑀜𑁂 𑀇𑀤𑁆𑀥𑀺𑀧𑀸𑀤𑁂𑀲𑀼, 𑀅𑀜𑁆𑀜𑁂 𑀧𑀜𑁆𑀘 𑀇𑀦𑁆𑀤𑁆𑀭𑀺𑀬𑁂𑀲𑀼, 𑀅𑀜𑁆𑀜𑁂 𑀧𑀜𑁆𑀘 𑀩𑀮𑁂𑀲𑀼, 𑀅𑀜𑁆𑀜𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂𑀲𑀼, 𑀅𑀜𑁆𑀜𑁂 𑀅𑀝𑁆𑀞 𑀫𑀕𑁆𑀕𑀗𑁆𑀕𑁂𑀲𑀼 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀼𑀁, 𑀢𑀫𑁆𑀧𑀺 𑀪𑀕𑀯𑀸 𑀓𑀣𑁂𑀬𑁆𑀬. 𑀢𑀺𑀝𑁆𑀞𑀦𑁆𑀢𑀼 𑀯𑀸 𑀏𑀢𑁂 𑀅𑀝𑁆𑀞. 𑀲𑀘𑁂 𑀅𑀜𑁆𑀜𑁂 𑀲𑀢𑁆𑀢𑀢𑀺𑀁𑀲 𑀚𑀦𑀸 𑀩𑁄𑀥𑀺𑀧𑀓𑁆𑀔𑀺𑀬𑁂𑀲𑀼 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀼𑀁, 𑀢𑀫𑁆𑀧𑀺 𑀪𑀕𑀯𑀸 𑀢𑀸𑀯𑀤𑁂𑀯 𑀓𑀣𑁂𑀬𑁆𑀬. 𑀓𑀲𑁆𑀫𑀸? 𑀬𑀸𑀯𑀢𑀸 𑀳𑀺 𑀮𑁄𑀓𑀺𑀬𑀫𑀳𑀸𑀚𑀦𑀸 𑀏𑀓𑀁 𑀧𑀤𑀁 𑀓𑀣𑁂𑀦𑁆𑀢𑀺. 𑀢𑀸𑀯 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀝𑁆𑀞 𑀧𑀤𑀸𑀦𑀺 𑀓𑀣𑁂𑀢𑀺. 𑀆𑀦𑀦𑁆𑀤𑀢𑁆𑀣𑁂𑀭𑁂 𑀧𑀦 𑀏𑀓𑀁 𑀧𑀤𑀁 𑀓𑀣𑁂𑀦𑁆𑀢𑁂𑀬𑁂𑀯 𑀪𑀕𑀯𑀸 𑀲𑁄𑀴𑀲𑀧𑀤𑀸𑀦𑀺 𑀓𑀣𑁂𑀢𑀺. 𑀓𑀲𑁆𑀫𑀸? 𑀪𑀕𑀯𑀢𑁄 𑀳𑀺 𑀚𑀺𑀯𑁆𑀳𑀸 𑀫𑀼𑀤𑀼𑀓𑀸 𑀤𑀦𑁆𑀢𑀸𑀯𑀭𑀡𑀁 𑀲𑀼𑀨𑀼𑀲𑀺𑀢𑀁 𑀯𑀘𑀦𑀁 𑀅𑀕𑀮𑀺𑀢𑀁 𑀪𑀯𑀗𑁆𑀕𑀧𑀭𑀺𑀯𑀸𑀲𑁄 𑀮𑀳𑀼𑀓𑁄. 𑀢𑁂𑀦𑀸𑀳 ‘‘𑀅𑀧𑀭𑀺𑀬𑀸𑀤𑀺𑀦𑁆𑀦𑀸𑀬𑁂𑀯𑀲𑁆𑀲, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸’’𑀢𑀺.

𑀢𑀢𑁆𑀣 𑀥𑀫𑁆𑀫𑀤𑀲𑁂𑀦𑀸𑀢𑀺 𑀢𑀦𑁆𑀢𑀺𑀞𑀧𑀦𑀸. 𑀥𑀫𑁆𑀫𑀧𑀤𑀩𑁆𑀬𑀜𑁆𑀚𑀦𑀦𑁆𑀢𑀺 𑀧𑀸𑀴𑀺𑀬𑀸 𑀧𑀤𑀩𑁆𑀬𑀜𑁆𑀚𑀦𑀁, 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀦𑀓𑀁 𑀅𑀓𑁆𑀔𑀭𑀁. 𑀧𑀜𑁆𑀳𑀧𑀝𑀺𑀪𑀸𑀦𑀦𑁆𑀢𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑀁. 𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀢𑀣𑀸𑀕𑀢𑁄 𑀧𑀼𑀩𑁆𑀩𑁂 𑀤𑀳𑀭𑀓𑀸𑀮𑁂 𑀅𑀓𑁆𑀔𑀭𑀸𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀧𑀤𑀁 𑀯𑀢𑁆𑀢𑀼𑀁 𑀲𑀓𑁆𑀓𑁄𑀢𑀺, 𑀧𑀤𑀸𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀕𑀸𑀣𑀁 𑀯𑀢𑁆𑀢𑀼𑀁 𑀲𑀓𑁆𑀓𑁄𑀢𑀺, 𑀘𑀢𑀼𑀅𑀓𑁆𑀔𑀭𑁂𑀳𑀺 𑀯𑀸 𑀅𑀝𑁆𑀞𑀅𑀓𑁆𑀔𑀭𑁂𑀳𑀺 𑀯𑀸 𑀲𑁄𑀴𑀲𑀅𑀓𑁆𑀔𑀭𑁂𑀳𑀺 𑀯𑀸 𑀧𑀤𑁂𑀳𑀺 𑀬𑀼𑀢𑁆𑀢𑀸𑀬 𑀕𑀸𑀣𑀸𑀬 𑀅𑀢𑁆𑀣𑀁 𑀯𑀢𑁆𑀢𑀼𑀁 𑀲𑀓𑁆𑀓𑁄𑀢𑀺. 𑀇𑀤𑀸𑀦𑀺 𑀧𑀦 𑀫𑀳𑀮𑁆𑀮𑀓𑀓𑀸𑀮𑁂 𑀅𑀓𑁆𑀔𑀭𑀸𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀧𑀤𑀁 𑀯𑀸, 𑀧𑀤𑀸𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀕𑀸𑀣𑀁 𑀯𑀸, 𑀕𑀸𑀣𑀸𑀬 𑀅𑀢𑁆𑀣𑀁 𑀯𑀸 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀏𑀯𑀁 𑀦𑀢𑁆𑀣𑀺. 𑀤𑀳𑀭𑀓𑀸𑀮𑁂 𑀘 𑀫𑀳𑀮𑁆𑀮𑀓𑀓𑀸𑀮𑁂 𑀘 𑀲𑀩𑁆𑀩𑀫𑁂𑀢𑀁 𑀢𑀣𑀸𑀕𑀢𑀲𑁆𑀲 𑀅𑀧𑀭𑀺𑀬𑀸𑀤𑀺𑀦𑁆𑀦𑀫𑁂𑀯𑀸𑀢𑀺 𑀇𑀫𑀁 𑀤𑀲𑁆𑀲𑁂𑀢𑀺. 𑀫𑀜𑁆𑀘𑀓𑁂𑀦 𑀘𑁂𑀧𑀺 𑀫𑀦𑁆𑀢𑀺 𑀇𑀤𑀁 𑀩𑀼𑀤𑁆𑀥𑀩𑀮𑀤𑀻𑀧𑀦𑀢𑁆𑀣𑀫𑁂𑀯 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀆𑀳. 𑀤𑀲𑀩𑀮𑀁 𑀧𑀦 𑀫𑀜𑁆𑀘𑀓𑁂 𑀆𑀭𑁄𑀧𑁂𑀢𑁆𑀯𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀧𑀭𑀺𑀳𑀭𑀡𑀓𑀸𑀮𑁄 𑀦𑀸𑀫 𑀦𑀢𑁆𑀣𑀺. 𑀢𑀣𑀸𑀕𑀢𑀸 𑀳𑀺 𑀧𑀜𑁆𑀘𑀫𑁂 𑀆𑀬𑀼𑀓𑁄𑀝𑁆𑀞𑀸𑀲𑁂 𑀔𑀡𑁆𑀟𑀺𑀘𑁆𑀘𑀸𑀤𑀻𑀳𑀺 𑀅𑀦𑀪𑀺𑀪𑀽𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀲𑀭𑀻𑀭𑀲𑁆𑀲 𑀯𑁂𑀯𑀡𑁆𑀡𑀺𑀬𑁂 𑀅𑀦𑀦𑀼𑀧𑁆𑀧𑀢𑁆𑀢𑁂 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑀫𑀦𑀸𑀧𑀓𑀸𑀮𑁂𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺.

𑁧𑁬𑁨. 𑀦𑀸𑀕𑀲𑀫𑀸𑀮𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀧𑀞𑀫𑀩𑁄𑀥𑀺𑀬𑀜𑁆𑀳𑀺 𑀯𑀻𑀲𑀢𑀺𑀯𑀲𑁆𑀲𑀩𑁆𑀪𑀦𑁆𑀢𑀭𑁂 𑀉𑀧𑀯𑀸𑀦𑀦𑀸𑀕𑀺𑀢𑀫𑁂𑀖𑀺𑀬𑀢𑁆𑀣𑁂𑀭𑀸 𑀯𑀺𑀬 𑀅𑀬𑀫𑁆𑀧𑀺 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀩𑀻𑀚𑀬𑀫𑀸𑀦𑁄𑀢𑀺 𑀫𑀦𑁆𑀤𑀫𑀦𑁆𑀤𑁂𑀦 𑀢𑀸𑀮𑀯𑀡𑁆𑀝𑀯𑀸𑀢𑁂𑀦 𑀪𑀕𑀯𑀢𑁄 𑀉𑀢𑀼𑀲𑀼𑀔𑀁 𑀲𑀫𑀼𑀝𑁆𑀞𑀸𑀧𑀬𑀫𑀸𑀦𑁄. 𑀏𑀢𑀤𑀯𑁄𑀘𑀸𑀢𑀺 𑀲𑀓𑀮𑀲𑀼𑀢𑁆𑀢𑀦𑁆𑀢𑀁 𑀲𑀼𑀢𑁆𑀯𑀸 𑀪𑀕𑀯𑀢𑁄 𑀧𑀼𑀩𑁆𑀩𑀘𑀭𑀺𑀢𑀁 𑀤𑀼𑀓𑁆𑀓𑀭𑀓𑀸𑀭𑀓𑀁 𑀆𑀕𑀫𑁆𑀫 𑀧𑀲𑀦𑁆𑀦𑁄 𑀏𑀢𑀁 ‘‘𑀅𑀘𑁆𑀙𑀭𑀺𑀬𑀁 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀅𑀘𑁆𑀙𑀭𑀺𑀬𑀁. 𑀅𑀪𑀽𑀢𑀧𑀼𑀩𑁆𑀩𑀁 𑀪𑀽𑀢𑀦𑁆𑀢𑀺 𑀅𑀩𑁆𑀪𑀼𑀢𑀁. 𑀉𑀪𑀬𑁂𑀦𑀧𑀺 𑀅𑀢𑁆𑀢𑀦𑁄 𑀯𑀺𑀫𑁆𑀳𑀬𑀫𑁂𑀯 𑀤𑀻𑀧𑁂𑀢𑀺. 𑀓𑁄 𑀦𑀸𑀫𑁄 𑀅𑀬𑀁 𑀪𑀦𑁆𑀢𑁂𑀢𑀺 𑀇𑀤𑀁 𑀪𑀤𑁆𑀤𑀓𑁄 𑀯𑀢𑀸𑀬𑀁 𑀥𑀫𑁆𑀫𑀧𑀭𑀺𑀬𑀸𑀬𑁄, 𑀳𑀦𑁆𑀤𑀲𑁆𑀲 𑀪𑀕𑀯𑀦𑁆𑀢𑀁 𑀆𑀬𑀸𑀘𑀺𑀢𑁆𑀯𑀸 𑀦𑀸𑀫𑀁 𑀕𑀡𑁆𑀳𑀸𑀧𑁂𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀆𑀳. 𑀅𑀣𑀲𑁆𑀲 𑀪𑀕𑀯𑀸 𑀦𑀸𑀫𑀁 𑀕𑀡𑁆𑀳𑀦𑁆𑀢𑁄 𑀢𑀲𑁆𑀫𑀸 𑀢𑀺𑀳 𑀢𑁆𑀯𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄, 𑀬𑀲𑁆𑀫𑀸 𑀇𑀤𑀁 𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀢𑀯 𑀮𑁄𑀫𑀸𑀦𑀺 𑀳𑀝𑁆𑀞𑀸𑀦𑀺, 𑀢𑀲𑁆𑀫𑀸 𑀢𑀺𑀳 𑀢𑁆𑀯𑀁, 𑀦𑀸𑀕𑀲𑀫𑀸𑀮, 𑀇𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 ‘‘𑀮𑁄𑀫𑀳𑀁𑀲𑀦 𑀧𑀭𑀺𑀬𑀸𑀬𑁄’’𑀢𑁆𑀯𑁂𑀯 𑀦𑀁 𑀥𑀸𑀭𑁂𑀳𑀻𑀢𑀺.

𑀲𑀁𑀲𑀸𑀭𑀲𑀼𑀤𑁆𑀥𑀺𑀆𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.