𑁮. 𑀲𑀮𑁆𑀮𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀮𑁆𑀮𑁂𑀔𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀳𑀸𑀘𑀼𑀦𑁆𑀤𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀲𑀸𑀬𑀦𑁆𑀳𑀲𑀫𑀬𑀦𑁆𑀢𑀺 𑀲𑀸𑀬𑀦𑁆𑀳𑀓𑀸𑀮𑁂. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀏𑀢𑁆𑀣 𑀧𑀝𑀺𑀲𑀮𑁆𑀮𑀸𑀦𑀦𑁆𑀢𑀺 𑀢𑁂𑀳𑀺 𑀢𑁂𑀳𑀺 𑀲𑀢𑁆𑀢𑀲𑀗𑁆𑀔𑀸𑀭𑁂𑀳𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀮𑁆𑀮𑀸𑀦𑀁 𑀦𑀺𑀮𑀻𑀬𑀦𑀁, 𑀏𑀓𑀻𑀪𑀸𑀯𑁄 𑀧𑀯𑀺𑀯𑁂𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀢𑀢𑁄 𑀯𑀼𑀝𑁆𑀞𑀺𑀢𑁄, 𑀲𑁄 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺. 𑀅𑀬𑀁 𑀧𑀦 𑀬𑀲𑁆𑀫𑀸 𑀧𑀝𑀺𑀲𑀮𑁆𑀮𑀸𑀦𑀸𑀦𑀁 𑀉𑀢𑁆𑀢𑀫𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀲𑀺, 𑀢𑀲𑁆𑀫𑀸 ‘‘𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄’’𑀢𑀺 𑀯𑀼𑀢𑁆𑀢𑁄. 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸𑀢𑀺 𑀲𑀫𑀤𑀲𑀦𑀔𑀼𑀚𑁆𑀚𑀮𑀯𑀺𑀪𑀽𑀲𑀺𑀢𑁂𑀦 𑀲𑀺𑀭𑀲𑀸 𑀪𑀕𑀯𑀦𑁆𑀢𑀁 𑀲𑀓𑁆𑀓𑀘𑁆𑀘𑀁 𑀯𑀦𑁆𑀤𑀺𑀢𑁆𑀯𑀸, 𑀅𑀪𑀺𑀯𑀸𑀤𑀸𑀧𑁂𑀢𑁆𑀯𑀸 𑀯𑀸 ‘‘𑀲𑀼𑀔𑀻 𑀪𑀯, 𑀘𑀼𑀦𑁆𑀤𑀸’’𑀢𑀺 𑀏𑀯𑀁 𑀯𑀘𑀻𑀪𑁂𑀤𑀁 𑀓𑀸𑀭𑀸𑀧𑁂𑀢𑁆𑀯𑀸, 𑀪𑀕𑀯𑀸 𑀧𑀦 𑀓𑀺𑀭 𑀯𑀦𑁆𑀤𑀺𑀢𑁄 𑀲𑀫𑀸𑀦𑁄 𑀲𑀼𑀯𑀡𑁆𑀡𑀤𑀼𑀦𑁆𑀤𑀼𑀪𑀺𑀲𑀤𑀺𑀲𑀁 𑀕𑀻𑀯𑀁 𑀧𑀕𑁆𑀕𑀬𑁆𑀳 𑀓𑀡𑁆𑀡𑀲𑀼𑀔𑀁 𑀧𑁂𑀫𑀦𑀺𑀬𑀁 𑀅𑀫𑀢𑀸𑀪𑀺𑀲𑁂𑀓𑀲𑀤𑀺𑀲𑀁 𑀩𑁆𑀭𑀳𑁆𑀫𑀖𑁄𑀲𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 ‘‘𑀲𑀼𑀔𑀻 𑀳𑁄𑀳𑀻’’𑀢𑀺 𑀢𑀲𑁆𑀲 𑀢𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀤𑀢𑀺, 𑀏𑀢𑀁 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑀸𑀦𑀁. 𑀢𑀢𑁆𑀭𑀺𑀤𑀁 𑀲𑀸𑀥𑀓𑀲𑀼𑀢𑁆𑀢𑀁, ‘‘𑀲𑀓𑁆𑀓𑁄, 𑀪𑀦𑁆𑀢𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻𑀢𑀺, 𑀲𑀼𑀔𑀻 𑀳𑁄𑀢𑀼 𑀧𑀜𑁆𑀘𑀲𑀺𑀔 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑀦𑁄, 𑀲𑀼𑀔𑀓𑀸𑀫𑀸 𑀳𑀺 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸, 𑀬𑁂 𑀘𑀜𑁆𑀜𑁂 𑀲𑀦𑁆𑀢𑀺 𑀧𑀼𑀣𑀼𑀓𑀸𑀬𑀸’’𑀢𑀺. 𑀏𑀯𑀜𑁆𑀘 𑀧𑀦 𑀢𑀣𑀸𑀕𑀢𑀸 𑀏𑀯𑀭𑀽𑀧𑁂 𑀫𑀳𑁂𑀲𑀓𑁆𑀔𑁂 𑀬𑀓𑁆𑀔𑁂 𑀅𑀪𑀺𑀯𑀤𑀦𑁆𑀢𑀻𑀢𑀺.

𑀬𑀸 𑀇𑀫𑀸𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀸𑀪𑀺𑀫𑀼𑀔𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀆𑀳. 𑀅𑀦𑁂𑀓𑀯𑀺𑀳𑀺𑀢𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑀸. 𑀤𑀺𑀝𑁆𑀞𑀺𑀬𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄. 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀢𑁆𑀢𑁂𑀲𑀼 𑀧𑀸𑀢𑀼𑀪𑀯𑀦𑁆𑀢𑀺. 𑀅𑀢𑁆𑀢𑀯𑀸𑀤𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀅𑀢𑁆𑀢𑀯𑀸𑀤𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑀸, 𑀢𑀸 𑀯𑀻𑀲𑀢𑀺 𑀪𑀯𑀦𑁆𑀢𑀺. 𑀮𑁄𑀓𑀯𑀸𑀤𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀮𑁄𑀓𑀯𑀸𑀤𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑀸, 𑀢𑀸 𑀅𑀝𑁆𑀞 𑀳𑁄𑀦𑁆𑀢𑀺 𑀲𑀲𑁆𑀲𑀢𑁄, 𑀅𑀲𑀲𑁆𑀲𑀢𑁄, 𑀲𑀲𑁆𑀲𑀢𑁄 𑀘 𑀅𑀲𑀲𑁆𑀲𑀢𑁄 𑀘, 𑀦𑁂𑀯 𑀲𑀲𑁆𑀲𑀢𑁄 𑀦𑀸𑀲𑀲𑁆𑀲𑀢𑁄, 𑀅𑀦𑁆𑀢𑀯𑀸, 𑀅𑀦𑀦𑁆𑀢𑀯𑀸, 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘, 𑀦𑁂𑀯𑀦𑁆𑀢𑀯𑀸 𑀦𑀸𑀦𑀦𑁆𑀢𑀯𑀸 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀏𑀯𑀁 𑀧𑀯𑀢𑁆𑀢𑀢𑁆𑀢𑀸.

𑀆𑀤𑀺𑀫𑁂𑀯𑀸𑀢𑀺𑀆𑀤𑀻𑀲𑀼 𑀅𑀬𑀫𑀢𑁆𑀣𑁄 𑀓𑀺𑀁 𑀦𑀼 𑀔𑁄 𑀪𑀦𑁆𑀢𑁂 𑀆𑀤𑀺𑀫𑁂𑀯 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀅𑀧𑁆𑀧𑀢𑁆𑀯𑀸𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀯𑀺𑀧𑀲𑁆𑀲𑀦𑀸𑀫𑀺𑀲𑁆𑀲𑀓𑀧𑀞𑀫𑀫𑀦𑀲𑀺𑀓𑀸𑀭𑀫𑁂𑀯 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀫𑁂𑀢𑀸𑀲𑀁 𑀏𑀢𑁆𑀢𑀓𑁂𑀦𑁂𑀯 𑀉𑀧𑀸𑀬𑁂𑀦 𑀏𑀢𑀸𑀲𑀁 𑀤𑀺𑀝𑁆𑀞𑀻𑀦𑀁 𑀧𑀳𑀸𑀦𑀜𑁆𑀘 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘 𑀳𑁄𑀢𑀻𑀢𑀺. 𑀇𑀤𑀜𑁆𑀘 𑀣𑁂𑀭𑁄 𑀅𑀢𑁆𑀢𑀦𑀸 𑀅𑀦𑀥𑀺𑀫𑀸𑀦𑀺𑀓𑁄𑀧𑀺 𑀲𑀫𑀸𑀦𑁄 𑀅𑀥𑀺𑀫𑀸𑀦𑀺𑀓𑀸𑀦𑀁 𑀅𑀥𑀺𑀫𑀸𑀦𑀧𑁆𑀧𑀳𑀸𑀦𑀢𑁆𑀣𑀁 𑀅𑀥𑀺𑀫𑀸𑀦𑀺𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀧𑀼𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀭𑁂 𑀧𑀦𑀸𑀳𑀼 ‘‘𑀣𑁂𑀭𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸 𑀆𑀤𑀺𑀫𑀦𑀲𑀺𑀓𑀸𑀭𑁂𑀦𑁂𑀯 𑀤𑀺𑀝𑁆𑀞𑀻𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺 𑀏𑀯𑀁𑀲𑀜𑁆𑀜𑀺𑀦𑁄𑀧𑀺, 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀸 𑀲𑀮𑁆𑀮𑁂𑀔𑀯𑀺𑀳𑀸𑀭𑀸𑀢𑀺 𑀏𑀯𑀁𑀲𑀜𑁆𑀜𑀺𑀦𑁄𑀧𑀺 𑀅𑀢𑁆𑀣𑀺. 𑀲𑁄 𑀢𑁂𑀲𑀁 𑀅𑀢𑁆𑀣𑀸𑀬 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀢𑀻’’𑀢𑀺.

𑁮𑁨. 𑀅𑀣𑀲𑁆𑀲 𑀪𑀕𑀯𑀸 𑀢𑀸𑀲𑀁 𑀤𑀺𑀝𑁆𑀞𑀻𑀦𑀁 𑀧𑀳𑀸𑀦𑀽𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀬𑀸 𑀇𑀫𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀢𑁆𑀣 𑀘𑁂𑀢𑀸 𑀤𑀺𑀝𑁆𑀞𑀺𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺𑀆𑀤𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁂𑀲𑀼 𑀳𑀺 𑀏𑀢𑀸 𑀤𑀺𑀝𑁆𑀞𑀺𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀣𑀸𑀳 ‘‘𑀭𑀽𑀧𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑀺 𑀭𑀽𑀧𑀁 𑀅𑀪𑀺𑀦𑀺𑀯𑀺𑀲𑁆𑀲 𑀏𑀯𑀁 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀅𑀢𑁆𑀢𑀸 𑀲𑁄 𑀮𑁄𑀓𑁄 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄’’𑀢𑀺 (𑀲𑀁. 𑀦𑀺. 𑁩.𑁧𑁫𑁨) 𑀯𑀺𑀢𑁆𑀣𑀸𑀭𑁄. 𑀆𑀭𑀫𑁆𑀫𑀡𑀯𑀲𑁂𑀦 𑀧𑀦 𑀏𑀓𑀯𑀘𑀦𑀁 𑀓𑀢𑁆𑀯𑀸 𑀬𑀢𑁆𑀣 𑀘𑀸𑀢𑀺 𑀆𑀳, 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀦𑀼𑀲𑁂𑀦𑁆𑀢𑀺 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀇𑀫𑁂𑀲𑀁 𑀏𑀯𑀁 𑀦𑀸𑀦𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀚𑀸𑀢𑀺𑀯𑀲𑁂𑀦 𑀳𑀺 𑀅𑀚𑀸𑀢𑀸 𑀚𑀸𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀺𑀢𑀸 𑀣𑀸𑀫𑀕𑀢𑀸 𑀅𑀧𑁆𑀧𑀝𑀺𑀯𑀺𑀦𑀻𑀢𑀸 𑀅𑀦𑀼𑀲𑁂𑀦𑁆𑀢𑀻𑀢𑀺. 𑀓𑀸𑀬𑀯𑀘𑀻𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑀸 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺, 𑀇𑀤𑀫𑁂𑀢𑁂𑀲𑀁 𑀦𑀸𑀦𑀸𑀓𑀭𑀡𑀁. 𑀢𑀁 𑀦𑁂𑀢𑀁 𑀫𑀫𑀸𑀢𑀺𑀆𑀤𑀻𑀲𑀼 𑀢𑀁 𑀧𑀜𑁆𑀘𑀓𑁆𑀔𑀦𑁆𑀥𑀧𑁆𑀧𑀪𑁂𑀤𑀁 𑀆𑀭𑀫𑁆𑀫𑀡𑀫𑁂𑀢𑀁 𑀫𑀬𑁆𑀳𑀁 𑀦 𑀳𑁄𑀢𑀺, 𑀅𑀳𑀫𑁆𑀧𑀺 𑀏𑀲𑁄 𑀦 𑀅𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀧𑀺 𑀦 𑀳𑁄𑀢𑀻𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄𑀢𑀺 𑀏𑀯𑀁 𑀢𑀸𑀯 𑀧𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀏𑀢𑁆𑀣 𑀏𑀢𑀁 𑀫𑀫𑀸𑀢𑀺 𑀢𑀡𑁆𑀳𑀸𑀕𑀸𑀳𑁄, 𑀢𑀜𑁆𑀘 𑀕𑀡𑁆𑀳𑀦𑁆𑀢𑁄 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀧𑁆𑀧𑀪𑁂𑀤𑀁 𑀢𑀡𑁆𑀳𑀸𑀧𑀧𑀜𑁆𑀘𑀁 𑀕𑀡𑁆𑀳𑀸𑀢𑀺. 𑀏𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀕𑀸𑀳𑁄, 𑀢𑀜𑁆𑀘 𑀕𑀡𑁆𑀳𑀦𑁆𑀢𑁄 𑀦𑀯𑀧𑁆𑀧𑀪𑁂𑀤𑀁 𑀫𑀸𑀦𑀧𑀧𑀜𑁆𑀘𑀁 𑀕𑀡𑁆𑀳𑀸𑀢𑀺. 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀕𑀸𑀳𑁄, 𑀢𑀜𑁆𑀘 𑀕𑀡𑁆𑀳𑀦𑁆𑀢𑁄 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀧𑁆𑀧𑀪𑁂𑀤𑀁 𑀤𑀺𑀝𑁆𑀞𑀺𑀧𑀧𑀜𑁆𑀘𑀁 𑀕𑀡𑁆𑀳𑀸𑀢𑀺. 𑀢𑀲𑁆𑀫𑀸 𑀦𑁂𑀢𑀁 𑀫𑀫𑀸𑀢𑀺 𑀯𑀤𑀦𑁆𑀢𑁄 𑀪𑀕𑀯𑀸 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀁 𑀢𑀡𑁆𑀳𑀸𑀧𑀧𑀜𑁆𑀘𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀦𑁂𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀧𑀧𑀜𑁆𑀘𑀁. 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀧𑀧𑀜𑁆𑀘𑀁. 𑀤𑀺𑀝𑁆𑀞𑁂𑀓𑀝𑁆𑀞𑀸𑀬𑁂𑀯 𑀘𑁂𑀢𑁆𑀣 𑀢𑀡𑁆𑀳𑀸𑀫𑀸𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀫𑁂𑀢𑀦𑁆𑀢𑀺 𑀏𑀯𑀁 ‘‘𑀦𑁂𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀆𑀓𑀸𑀭𑁂𑀦 𑀏𑀢𑀁 𑀔𑀦𑁆𑀥𑀧𑀜𑁆𑀘𑀓𑀁. 𑀬𑀣𑀸𑀪𑀽𑀢𑀦𑁆𑀢𑀺 𑀬𑀣𑀸 𑀲𑀪𑀸𑀯𑀁, 𑀬𑀣𑀸 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑀦𑁆𑀥𑀧𑀜𑁆𑀘𑀓𑀜𑁆𑀳𑀺 𑀏𑀢𑁂𑀦𑁂𑀯 𑀆𑀓𑀸𑀭𑁂𑀦 𑀅𑀢𑁆𑀣𑀺. 𑀫𑀫𑀦𑁆𑀢𑀺𑀆𑀤𑀺𑀦𑀸 𑀧𑀦 𑀕𑀬𑁆𑀳𑀫𑀸𑀦𑀫𑁆𑀧𑀺 𑀢𑁂𑀦𑀸𑀓𑀸𑀭𑁂𑀦 𑀦𑁂𑀯𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀜𑁆𑀜𑀸𑀧𑀭𑀺𑀬𑁄𑀲𑀸𑀦𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀲𑀼𑀝𑁆𑀞𑀼 𑀧𑀲𑁆𑀲𑀦𑁆𑀢𑀲𑁆𑀲. 𑀏𑀯𑀫𑁂𑀢𑀸𑀲𑀦𑁆𑀢𑀺 𑀏𑀢𑁂𑀦 𑀉𑀧𑀸𑀬𑁂𑀦 𑀏𑀢𑀸𑀲𑀁. 𑀧𑀳𑀸𑀦𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑁄𑀢𑀺 𑀉𑀪𑀬𑀫𑁆𑀧𑁂𑀢𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀲𑁆𑀲𑁂𑀯𑀸𑀥𑀺𑀯𑀘𑀦𑀁.

𑀏𑀯𑀁 𑀪𑀕𑀯𑀸 𑀆𑀤𑀺𑀫𑀦𑀲𑀺𑀓𑀸𑀭𑁂𑀦𑁂𑀯 𑀤𑀺𑀝𑁆𑀞𑀻𑀦𑀁 𑀧𑀳𑀸𑀦𑀁 𑀳𑁄𑀢𑀺 𑀦𑀼 𑀔𑁄 𑀦𑁄𑀢𑀺 𑀆𑀬𑀲𑁆𑀫𑀢𑀸 𑀫𑀳𑀸𑀘𑀼𑀦𑁆𑀤𑁂𑀦 𑀅𑀥𑀺𑀫𑀸𑀦𑀺𑀓𑀸𑀦𑀁 𑀯𑀲𑁂𑀦 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀬𑀫𑁂𑀯 𑀅𑀥𑀺𑀫𑀸𑀦𑀺𑀓𑀸𑀦𑀁 𑀛𑀸𑀦𑀁 𑀯𑀺𑀪𑀚𑀦𑁆𑀢𑁄 𑀞𑀸𑀦𑀁 𑀔𑁄 𑀧𑀦𑁂𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀥𑀺𑀫𑀸𑀦𑀺𑀓𑀸 𑀦𑀸𑀫 𑀬𑁂𑀲𑀁 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀸𑀬 𑀅𑀥𑀺𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁆𑀯𑀸𑀬𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑁂𑀯 𑀮𑁄𑀓𑀯𑀝𑁆𑀝𑀸𑀦𑀼𑀲𑀸𑀭𑀻𑀦𑀁 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀭𑀺𑀬𑀲𑀸𑀯𑀓𑀸𑀦𑀁. 𑀦 𑀳𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 ‘‘𑀲𑀓𑀤𑀸𑀕𑀸𑀫𑀻 𑀅𑀳’’𑀦𑁆𑀢𑀺 𑀅𑀥𑀺𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀲𑀓𑀤𑀸𑀕𑀸𑀫𑀺𑀲𑁆𑀲 ‘‘𑀅𑀦𑀸𑀕𑀸𑀫𑀻 𑀅𑀳’’𑀦𑁆𑀢𑀺, 𑀦 𑀅𑀦𑀸𑀕𑀸𑀫𑀺𑀦𑁄 ‘‘𑀅𑀭𑀳𑀸 𑀅𑀳’’𑀦𑁆𑀢𑀺, 𑀓𑀸𑀭𑀓𑀲𑁆𑀲𑁂𑀯 𑀧𑀦 𑀲𑀫𑀣𑀯𑀲𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀸 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀲𑁆𑀲 𑀦𑀺𑀘𑁆𑀘𑀁 𑀬𑀼𑀢𑁆𑀢𑀧𑀬𑀼𑀢𑁆𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀳𑀺 𑀲𑀫𑀣𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀸𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁 𑀯𑀸 𑀓𑀺𑀮𑁂𑀲𑀸𑀦𑀁 𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀢𑁄 ‘‘𑀲𑁄𑀢𑀸𑀧𑀦𑁆𑀦𑁄 𑀅𑀳𑀦𑁆𑀢𑀺 𑀯𑀸, 𑀲𑀓𑀤𑀸𑀕𑀸𑀫𑀻, 𑀅𑀦𑀸𑀕𑀸𑀫𑀻, 𑀅𑀭𑀳𑀸 𑀅𑀳’’𑀦𑁆𑀢𑀺 𑀯𑀸 𑀅𑀥𑀺𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀮𑀗𑁆𑀕𑀭𑀢𑀺𑀲𑁆𑀲𑀧𑀩𑁆𑀩𑀢𑀯𑀸𑀲𑀺𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑁂𑀦 𑀑𑀯𑀸𑀤𑀺𑀬𑀫𑀸𑀦𑀢𑁆𑀣𑁂𑀭𑀸𑀦𑀁 𑀯𑀺𑀬.

𑀣𑁂𑀭𑀲𑁆𑀲 𑀓𑀺𑀭 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀑𑀯𑀸𑀤𑁂 𑀞𑀢𑁆𑀯𑀸 𑀩𑀳𑀽 𑀪𑀺𑀓𑁆𑀔𑀽 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀺𑀁𑀲𑀼. 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀯𑀸𑀲𑀻 𑀪𑀺𑀓𑁆𑀔𑀼𑀲𑀗𑁆𑀖𑁄 ‘‘𑀦 𑀅𑀝𑁆𑀞𑀸𑀦𑀦𑀺𑀬𑁄𑀚𑀓𑁄 𑀣𑁂𑀭𑁄𑀢𑀺 𑀣𑁂𑀭𑀁 𑀆𑀦𑁂𑀣𑀸’’𑀢𑀺 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀧𑀸𑀳𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸, ‘‘𑀆𑀯𑀼𑀲𑁄, 𑀥𑀫𑁆𑀫𑀤𑀺𑀦𑁆𑀦 𑀪𑀺𑀓𑁆𑀔𑀼𑀲𑀗𑁆𑀖𑁄 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑀻’’𑀢𑀺 𑀆𑀳𑀁𑀲𑀼. 𑀲𑁄 𑀆𑀳 ‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀅𑀢𑁆𑀢𑀸𑀦𑀁 𑀕𑀯𑁂𑀲𑀣 𑀧𑀭’’𑀦𑁆𑀢𑀺? 𑀅𑀢𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀢𑀺, 𑀲𑁄 𑀢𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀫𑀤𑀸𑀲𑀺, 𑀲𑀩𑁆𑀩𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀼𑀦 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀧𑀸𑀳𑁂𑀲𑀺, 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀧𑀳𑀺𑀢𑀸 𑀲𑀩𑁆𑀩𑁂𑀧𑀺 𑀢𑀢𑁆𑀣𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑀺𑀳𑀭𑀺𑀁𑀲𑀼.

𑀢𑀢𑁄 𑀲𑀗𑁆𑀖𑁄 𑀕𑀢𑀕𑀢𑀸 𑀦𑀸𑀕𑀘𑁆𑀙𑀦𑁆𑀢𑀻𑀢𑀺 𑀅𑀜𑁆𑀜𑀢𑀭𑀁 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀁 𑀧𑀸𑀳𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀘, ‘‘𑀪𑀦𑁆𑀢𑁂, 𑀥𑀫𑁆𑀫𑀤𑀺𑀦𑁆𑀦 𑀢𑀺𑀓𑁆𑀔𑀢𑁆𑀢𑀼𑀁 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀯𑀸𑀲𑀻 𑀪𑀺𑀓𑁆𑀔𑀼𑀲𑀗𑁆𑀖𑁄 𑀢𑀼𑀬𑁆𑀳𑀁 𑀲𑀦𑁆𑀢𑀺𑀓𑁂 𑀧𑁂𑀲𑁂𑀲𑀺, 𑀢𑁆𑀯𑀁 𑀦𑀸𑀫 𑀲𑀗𑁆𑀖𑀲𑁆𑀲 𑀆𑀡𑀁 𑀕𑀭𑀼𑀁 𑀦 𑀓𑀭𑁄𑀲𑀺, 𑀦𑀸𑀕𑀘𑁆𑀙𑀲𑀻’’𑀢𑀺 𑀆𑀳. 𑀣𑁂𑀭𑁄 𑀓𑀺𑀫𑁂𑀢𑀦𑁆𑀢𑀺 𑀧𑀡𑁆𑀡𑀲𑀸𑀮𑀁 𑀅𑀧𑁆𑀧𑀯𑀺𑀲𑀺𑀢𑁆𑀯𑀸𑀯 𑀧𑀢𑁆𑀢𑀘𑀻𑀯𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀢𑀸𑀯𑀤𑁂𑀯 𑀦𑀺𑀓𑁆𑀔𑀫𑀺, 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀳𑀗𑁆𑀓𑀦𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀢𑀢𑁆𑀣 𑀘𑁂𑀓𑁄 𑀫𑀳𑀸𑀣𑁂𑀭𑁄 𑀲𑀝𑁆𑀞𑀺𑀯𑀲𑁆𑀲𑀸𑀢𑀻𑀢𑁄 𑀅𑀥𑀺𑀫𑀸𑀦𑁂𑀦 𑀅𑀭𑀳𑀢𑁆𑀢𑀁 𑀧𑀝𑀺𑀚𑀸𑀦𑀸𑀢𑀺. 𑀣𑁂𑀭𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀅𑀥𑀺𑀕𑀫𑀁 𑀧𑀼𑀘𑁆𑀙𑀺. 𑀣𑁂𑀭𑁄 𑀆𑀳 ‘‘𑀆𑀫 𑀥𑀫𑁆𑀫𑀤𑀺𑀦𑁆𑀦, 𑀬𑀁 𑀧𑀩𑁆𑀩𑀚𑀺𑀢𑁂𑀦 𑀓𑀸𑀢𑀩𑁆𑀩𑀁, 𑀘𑀺𑀭𑀓𑀢𑀁 𑀢𑀁 𑀫𑀬𑀸, 𑀅𑀢𑀻𑀢𑀲𑀝𑁆𑀞𑀺𑀯𑀲𑁆𑀲𑁄𑀫𑁆𑀳𑀺 𑀏𑀢𑀭𑀳𑀻’’𑀢𑀺. 𑀓𑀺𑀁, 𑀪𑀦𑁆𑀢𑁂, 𑀇𑀤𑁆𑀥𑀺𑀫𑁆𑀧𑀺 𑀯𑀴𑀜𑁆𑀚𑁂𑀣𑀸𑀢𑀺. 𑀆𑀫 𑀥𑀫𑁆𑀫𑀤𑀺𑀦𑁆𑀦𑀸𑀢𑀺. 𑀲𑀸𑀥𑀼 𑀯𑀢, 𑀪𑀦𑁆𑀢𑁂, 𑀳𑀢𑁆𑀣𑀺𑀁 𑀢𑀼𑀫𑁆𑀳𑀸𑀓𑀁 𑀧𑀝𑀺𑀫𑀼𑀔𑀁 𑀆𑀕𑀘𑁆𑀙𑀦𑁆𑀢𑀁 𑀫𑀸𑀧𑁂𑀣𑀸𑀢𑀺. 𑀲𑀸𑀥𑀸𑀯𑀼𑀲𑁄𑀢𑀺 𑀣𑁂𑀭𑁄 𑀲𑀩𑁆𑀩𑀲𑁂𑀢𑀁 𑀲𑀢𑁆𑀢𑀧𑁆𑀧𑀢𑀺𑀝𑁆𑀞𑀁 𑀢𑀺𑀥𑀸𑀧𑀪𑀺𑀦𑁆𑀦𑀁 𑀦𑀗𑁆𑀕𑀼𑀝𑁆𑀞𑀁 𑀩𑀻𑀚𑀬𑀫𑀸𑀦𑀁 𑀲𑁄𑀡𑁆𑀟𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀻𑀳𑀺 𑀤𑀦𑁆𑀢𑁂𑀳𑀺 𑀯𑀺𑀚𑁆𑀛𑀺𑀢𑀼𑀓𑀸𑀫𑀁 𑀯𑀺𑀬 𑀧𑀝𑀺𑀫𑀼𑀔𑀁 𑀆𑀕𑀘𑁆𑀙𑀦𑁆𑀢𑀁 𑀫𑀳𑀸𑀳𑀢𑁆𑀣𑀺𑀁 𑀫𑀸𑀧𑁂𑀲𑀺. 𑀲𑁄 𑀢𑀁 𑀅𑀢𑁆𑀢𑀦𑀸𑀬𑁂𑀯 𑀫𑀸𑀧𑀺𑀢𑀁 𑀳𑀢𑁆𑀣𑀺𑀁 𑀤𑀺𑀲𑁆𑀯𑀸 𑀪𑀻𑀢𑁄 𑀧𑀮𑀸𑀬𑀺𑀢𑀼𑀁 𑀆𑀭𑀪𑀺. 𑀢𑀤𑀸𑀯 𑀅𑀢𑁆𑀢𑀸𑀦𑀁 ‘‘𑀦𑀸𑀳𑀁 𑀅𑀭𑀳𑀸’’𑀢𑀺 𑀜𑀢𑁆𑀯𑀸 𑀥𑀫𑁆𑀫𑀤𑀺𑀦𑁆𑀦𑀲𑁆𑀲 𑀧𑀸𑀤𑀫𑀽𑀮𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀧𑀢𑀺𑀝𑁆𑀞𑀸 𑀫𑁂 𑀳𑁄𑀳𑀺, 𑀆𑀯𑀼𑀲𑁄’’𑀢𑀺 𑀆𑀳. 𑀥𑀫𑁆𑀫𑀤𑀺𑀦𑁆𑀦𑁄 ‘‘𑀫𑀸, 𑀪𑀦𑁆𑀢𑁂, 𑀲𑁄𑀘𑀺, 𑀫𑀸 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺, 𑀓𑀸𑀭𑀓𑀸𑀦𑀁𑀬𑁂𑀯 𑀅𑀥𑀺𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀣𑁂𑀭𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀫𑀤𑀸𑀲𑀺. 𑀣𑁂𑀭𑁄 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀘𑀺𑀢𑁆𑀢𑀮𑀧𑀩𑁆𑀩𑀢𑁂𑀧𑀺 𑀢𑀸𑀤𑀺𑀲𑁄𑀯 𑀣𑁂𑀭𑁄 𑀯𑀲𑀢𑀺. 𑀥𑀫𑁆𑀫𑀤𑀺𑀦𑁆𑀦𑁄 𑀢𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀣𑁂𑀯 𑀧𑀼𑀘𑁆𑀙𑀺. 𑀲𑁄𑀧𑀺 𑀢𑀣𑁂𑀯 𑀩𑁆𑀬𑀸𑀓𑀸𑀲𑀺. 𑀢𑀢𑁄 𑀦𑀁 𑀥𑀫𑁆𑀫𑀤𑀺𑀦𑁆𑀦𑁄 𑀓𑀺𑀁, 𑀪𑀦𑁆𑀢𑁂, 𑀇𑀤𑁆𑀥𑀺𑀫𑁆𑀧𑀺 𑀯𑀴𑀜𑁆𑀚𑁂𑀣𑀸𑀢𑀺 𑀆𑀳. 𑀆𑀫𑀸𑀯𑀼𑀲𑁄𑀢𑀺. 𑀲𑀸𑀥𑀼 𑀯𑀢, 𑀪𑀦𑁆𑀢𑁂, 𑀏𑀓𑀁 𑀧𑁄𑀓𑁆𑀔𑀭𑀡𑀺𑀁 𑀫𑀸𑀧𑁂𑀣𑀸𑀢𑀺. 𑀣𑁂𑀭𑁄 𑀫𑀸𑀧𑁂𑀲𑀺. 𑀏𑀢𑁆𑀣, 𑀪𑀦𑁆𑀢𑁂, 𑀧𑀤𑀼𑀫𑀕𑀼𑀫𑁆𑀩𑀁 𑀫𑀸𑀧𑁂𑀣𑀸𑀢𑀺. 𑀢𑀫𑁆𑀧𑀺 𑀫𑀸𑀧𑁂𑀲𑀺. 𑀧𑀤𑀼𑀫𑀕𑀼𑀫𑁆𑀩𑁂 𑀫𑀳𑀸𑀧𑀤𑀼𑀫𑀁 𑀫𑀸𑀧𑁂𑀣𑀸𑀢𑀺. 𑀢𑀫𑁆𑀧𑀺 𑀫𑀸𑀧𑁂𑀲𑀺. 𑀏𑀢𑀲𑁆𑀫𑀺𑀁 𑀧𑀤𑀼𑀫𑀕𑀼𑀫𑁆𑀩𑁂 𑀞𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑁂𑀦 𑀕𑀸𑀬𑀦𑁆𑀢𑀁 𑀦𑀘𑁆𑀘𑀦𑁆𑀢𑀜𑁆𑀘 𑀏𑀓𑀁 𑀇𑀢𑁆𑀣𑀺𑀯𑀺𑀕𑁆𑀕𑀳𑀁 𑀫𑀸𑀧𑁂𑀣𑀸𑀢𑀺. 𑀢𑀫𑁆𑀧𑀺 𑀫𑀸𑀧𑁂𑀲𑀺. 𑀲𑁄 𑀏𑀢𑀁, 𑀪𑀦𑁆𑀢𑁂, 𑀧𑀼𑀦𑀧𑁆𑀧𑀼𑀦𑀁 𑀉𑀧𑀦𑀺𑀚𑁆𑀛𑀸𑀬𑀣𑀸𑀢𑀺 𑀯𑀢𑁆𑀯𑀸 𑀲𑀬𑀁 𑀧𑀸𑀲𑀸𑀤𑀁 𑀧𑀸𑀯𑀺𑀲𑀺. 𑀣𑁂𑀭𑀲𑁆𑀲 𑀢𑀁 𑀉𑀧𑀦𑀺𑀚𑁆𑀛𑀸𑀬𑀢𑁄 𑀲𑀝𑁆𑀞𑀺𑀯𑀲𑁆𑀲𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀸 𑀘𑀮𑀺𑀁𑀲𑀼, 𑀲𑁄 𑀢𑀤𑀸 𑀅𑀢𑁆𑀢𑀸𑀦𑀁 𑀜𑀢𑁆𑀯𑀸 𑀧𑀼𑀭𑀺𑀫𑀢𑁆𑀣𑁂𑀭𑁄 𑀯𑀺𑀬 𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀥𑀫𑁆𑀫𑀤𑀺𑀦𑁆𑀦𑁄𑀧𑀺 𑀅𑀦𑀼𑀧𑀼𑀩𑁆𑀩𑁂𑀦 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀣𑁂𑀭𑀸 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀏𑀢𑀁 𑀓𑀺𑀭 𑀢𑁂𑀲𑀁 𑀯𑀢𑁆𑀢𑀁. 𑀢𑁂𑀦 𑀦𑁂𑀲𑀁 𑀏𑀓𑁄𑀧𑀺 ‘‘𑀇𑀥 𑀧𑀢𑁆𑀢𑀘𑀻𑀯𑀭𑀁 𑀞𑀧𑁂𑀳𑀻’’𑀢𑀺 𑀥𑀫𑁆𑀫𑀤𑀺𑀦𑁆𑀦𑀁 𑀯𑀢𑁆𑀢𑀸 𑀧𑀼𑀘𑁆𑀙𑀺𑀢𑀸𑀧𑀺 𑀦𑀸𑀳𑁄𑀲𑀺. 𑀥𑀫𑁆𑀫𑀤𑀺𑀦𑁆𑀦𑁄 𑀏𑀲𑁄 𑀪𑀯𑁂𑀬𑁆𑀬𑀸𑀢𑀺 𑀜𑀢𑁆𑀯𑀸 𑀧𑀦 𑀧𑀜𑁆𑀳𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀧𑀼𑀘𑁆𑀙𑀺𑀢𑀧𑀜𑁆𑀳𑁂 𑀢𑀺𑀡𑁆𑀳𑁂𑀦 𑀅𑀲𑀺𑀦𑀸 𑀓𑀼𑀫𑀼𑀤𑀦𑀸𑀴𑀓𑀮𑀸𑀧𑀁 𑀯𑀺𑀬 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀤𑀗𑁆𑀕𑀼𑀮𑀺𑀬𑀸 𑀫𑀳𑀸𑀧𑀣𑀯𑀺𑀁 𑀧𑀳𑀭𑀺. 𑀪𑀦𑁆𑀢𑁂 𑀅𑀬𑀁 𑀅𑀘𑁂𑀢𑀦𑀸 𑀫𑀳𑀸𑀧𑀣𑀯𑀻𑀧𑀺 𑀥𑀫𑁆𑀫𑀤𑀺𑀦𑁆𑀦𑀲𑁆𑀲 𑀕𑀼𑀡𑀁 𑀚𑀸𑀦𑀸𑀢𑀺. 𑀢𑀼𑀫𑁆𑀳𑁂 𑀧𑀦 𑀦 𑀚𑀸𑀦𑀺𑀢𑁆𑀣𑀸𑀢𑀺 𑀘 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀘𑁂𑀢𑀦𑀸𑀬𑀁 𑀧𑀣𑀯𑀻, 𑀯𑀺𑀚𑀸𑀦𑀸𑀢𑀺 𑀕𑀼𑀡𑀸𑀕𑀼𑀡𑀁;

𑀲𑀘𑁂𑀢𑀦𑀸𑀣 𑀔𑁄 𑀪𑀦𑁆𑀢𑁂, 𑀦 𑀚𑀸𑀦𑀸𑀣 𑀕𑀼𑀡𑀸𑀕𑀼𑀡’’𑀦𑁆𑀢𑀺.

𑀢𑀸𑀯𑀤𑁂𑀯 𑀘 𑀆𑀓𑀸𑀲𑁂 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀢𑀮𑀗𑁆𑀕𑀭𑀢𑀺𑀲𑁆𑀲𑀧𑀩𑁆𑀩𑀢𑀫𑁂𑀯 𑀅𑀕𑀫𑀸𑀲𑀺. 𑀏𑀯𑀁 𑀓𑀸𑀭𑀓𑀲𑁆𑀲𑁂𑀯 𑀅𑀥𑀺𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀢𑀸𑀤𑀺𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀛𑀸𑀦𑀁 𑀯𑀺𑀪𑀚𑀦𑁆𑀢𑁄 𑀞𑀸𑀦𑀁 𑀔𑁄 𑀧𑀦𑁂𑀢𑀦𑁆𑀢𑀺𑀆𑀤𑀺𑀫𑀸𑀳.

𑀢𑀲𑁆𑀲𑀢𑁆𑀣𑁄, 𑀅𑀢𑁆𑀣𑁂𑀢𑀁 𑀓𑀸𑀭𑀡𑀁, 𑀦𑁄 𑀦𑀢𑁆𑀣𑀺. 𑀬𑁂𑀦 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀩𑀸𑀳𑀺𑀭𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀸𑀥𑀸𑀭𑀡𑀁 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬, 𑀬𑀁 𑀧𑀦 𑀢𑀲𑁆𑀲 𑀏𑀯𑀫𑀲𑁆𑀲 𑀲𑀮𑁆𑀮𑁂𑀔𑁂𑀦 𑀯𑀺𑀳𑀭𑀸𑀫𑀻𑀢𑀺, 𑀬𑀁 𑀧𑀝𑀺𑀧𑀢𑁆𑀢𑀺𑀯𑀺𑀥𑀸𑀦𑀁 𑀓𑀺𑀮𑁂𑀲𑁂 𑀲𑀁𑀮𑀺𑀔𑀢𑀺, 𑀢𑁂𑀦𑀸𑀳𑀁 𑀯𑀺𑀳𑀭𑀸𑀫𑀻𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺, 𑀦 𑀳𑀺 𑀅𑀥𑀺𑀫𑀸𑀦𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀛𑀸𑀦𑀁 𑀲𑀮𑁆𑀮𑁂𑀔𑁄 𑀯𑀸 𑀲𑀮𑁆𑀮𑁂𑀔𑀧𑀝𑀺𑀧𑀤𑀸 𑀯𑀸 𑀳𑁄𑀢𑀺. 𑀓𑀲𑁆𑀫𑀸? 𑀅𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑁆𑀢𑀸. 𑀦 𑀳𑀺 𑀲𑁄 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑀺, 𑀛𑀸𑀦𑀁 𑀧𑀦𑀲𑁆𑀲 𑀘𑀺𑀢𑁆𑀢𑁂𑀓𑀕𑁆𑀕𑀫𑀢𑁆𑀢𑀁 𑀓𑀭𑁄𑀢𑀺, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄 𑀳𑁄𑀢𑀺. 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀦 𑀔𑁄 𑀧𑀦𑁂𑀢𑁂, 𑀘𑀼𑀦𑁆𑀤, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑀮𑁆𑀮𑁂𑀔𑀸 𑀯𑀼𑀘𑁆𑀘𑀦𑁆𑀢𑀺, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸 𑀏𑀢𑁂 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀆𑀳.

𑀢𑀢𑁆𑀣 𑀏𑀢𑁂𑀢𑀺 𑀛𑀸𑀦𑀥𑀫𑁆𑀫𑀯𑀲𑁂𑀦 𑀩𑀳𑀼𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀏𑀢𑁂 𑀧𑀞𑀫𑀚𑁆𑀛𑀸𑀦𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀸, 𑀏𑀓𑀫𑁆𑀧𑀺 𑀳𑀺 𑀧𑀞𑀫𑀚𑁆𑀛𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀩𑀳𑀼𑀢𑁆𑀢𑀁 𑀕𑀘𑁆𑀙𑀢𑀺. 𑀆𑀭𑀫𑁆𑀫𑀡𑀯𑀲𑁂𑀦 𑀯𑀸, 𑀏𑀓𑀫𑁆𑀧𑀺 𑀳𑀺 𑀧𑀞𑀫𑀚𑁆𑀛𑀸𑀦𑀁 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀧𑀯𑀢𑁆𑀢𑀺𑀯𑀲𑁂𑀦 𑀩𑀳𑀼𑀢𑁆𑀢𑀁 𑀕𑀘𑁆𑀙𑀢𑀻𑀢𑀺. 𑀏𑀲 𑀦𑀬𑁄 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀲𑀼. 𑀆𑀭𑀼𑀧𑁆𑀧𑀛𑀸𑀦𑁂𑀲𑀼 𑀧𑀦 𑀆𑀭𑀫𑁆𑀫𑀡𑀪𑁂𑀤𑀸𑀪𑀸𑀯𑀢𑁄 𑀧𑀼𑀭𑀺𑀫𑀓𑀸𑀭𑀡𑀤𑁆𑀯𑀬𑀯𑀲𑁂𑀦𑁂𑀯 𑀩𑀳𑀼𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀬𑀲𑁆𑀫𑀸 𑀘𑁂𑀢𑁂𑀲𑀁 𑀅𑀗𑁆𑀕𑀸𑀦𑀺𑀧𑀺 𑀲𑀦𑁆𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺𑀧𑀺, 𑀦𑀺𑀩𑁆𑀩𑀼𑀢𑀸𑀦𑀺 𑀘𑁂𑀯 𑀲𑀼𑀔𑀼𑀫𑀸𑀦𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀲𑀦𑁆𑀢𑀸 𑀏𑀢𑁂 𑀯𑀺𑀳𑀸𑀭𑀸𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀢𑀸𑀯 𑀢𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀸 𑀯𑀡𑁆𑀡𑀦𑀸. 𑀯𑀺𑀲𑁂𑀲𑀯𑀡𑁆𑀡𑀦𑀸 𑀧𑀦 ‘‘𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦’’𑀦𑁆𑀢𑀺𑀆𑀤𑀺𑀧𑀤𑀸𑀦𑀼𑀲𑀸𑀭𑀢𑁄 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀲𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀩𑁆𑀩𑀸𑀓𑀸𑀭𑁂𑀦 𑀯𑀼𑀢𑁆𑀢𑀸𑀬𑁂𑀯.

𑁮𑁩. 𑀏𑀯𑀁 𑀬𑀲𑁆𑀫𑀸 𑀅𑀥𑀺𑀫𑀸𑀦𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀛𑀸𑀦𑀯𑀺𑀳𑀸𑀭𑁄 𑀅𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑁆𑀢𑀸 𑀲𑀮𑁆𑀮𑁂𑀔𑀯𑀺𑀳𑀸𑀭𑁄 𑀦 𑀳𑁄𑀢𑀺, 𑀦 𑀳𑀺 𑀲𑁄 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑀺, 𑀘𑀺𑀢𑁆𑀢𑁂𑀓𑀕𑁆𑀕𑀓𑀭𑁄 𑀤𑀺𑀝𑁆𑀞𑀥𑀫𑁆𑀫𑁂 𑀲𑀼𑀔𑀯𑀺𑀳𑀸𑀭𑁄 𑀧𑀦𑀲𑁆𑀲 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀭𑀽𑀧𑀚𑁆𑀛𑀸𑀦𑀸𑀦𑀺 𑀘 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀘 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀘 𑀬𑀢𑁆𑀣 𑀲𑀮𑁆𑀮𑁂𑀔𑁄 𑀓𑀸𑀢𑀩𑁆𑀩𑁄 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺, 𑀢𑀜𑁆𑀘 𑀯𑀢𑁆𑀣𑀼𑀁 𑀢𑀜𑁆𑀘 𑀲𑀮𑁆𑀮𑁂𑀔𑀁 𑀤𑀲𑁆𑀲𑁂𑀦𑁆𑀢𑁄 𑀇𑀥 𑀔𑁄 𑀧𑀦 𑀯𑁄𑀢𑀺𑀆𑀤𑀺𑀫𑀸𑀳.

𑀓𑀲𑁆𑀫𑀸 𑀧𑀦 ‘‘𑀅𑀝𑁆𑀞𑀳𑀺 𑀲𑀫𑀸𑀧𑀢𑁆𑀢𑀻𑀳𑀺 𑀅𑀯𑀺𑀳𑀺𑀁𑀲𑀸𑀤𑀬𑁄 𑀲𑀮𑁆𑀮𑁂𑀔𑀸’’𑀢𑀺 𑀯𑀼𑀢𑁆𑀢𑀸? 𑀮𑁄𑀓𑀼𑀢𑁆𑀢𑀭𑀧𑀸𑀤𑀓𑀢𑁆𑀢𑀸. 𑀩𑀸𑀳𑀺𑀭𑀓𑀸𑀦𑀜𑁆𑀳𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀯𑀝𑁆𑀝𑀧𑀸𑀤𑀓𑀸𑀬𑁂𑀯. 𑀲𑀸𑀲𑀦𑁂 𑀲𑀭𑀡𑀕𑀫𑀦𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀧𑀸𑀤𑀓𑀁, 𑀧𑀕𑁂𑀯 𑀅𑀯𑀺𑀳𑀺𑀁𑀲𑀸𑀤𑀬𑁄. 𑀇𑀫𑀺𑀦𑀸𑀬𑁂𑀯 𑀘 𑀲𑀼𑀢𑁆𑀢𑁂𑀦 𑀯𑁂𑀤𑀺𑀢𑀩𑁆𑀩𑀁 ‘‘𑀬𑀣𑀸 𑀩𑀸𑀳𑀺𑀭𑀓𑀲𑁆𑀲 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀧𑀜𑁆𑀘𑀸𑀪𑀺𑀜𑁆𑀜𑀲𑁆𑀲𑀸𑀧𑀺 𑀤𑀺𑀦𑁆𑀦𑀤𑀸𑀦𑀢𑁄 𑀲𑀸𑀲𑀦𑁂 𑀢𑀺𑀲𑀭𑀡𑀕𑀢𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁 𑀳𑁄𑀢𑀻’’𑀢𑀺. 𑀇𑀤𑀜𑁆𑀳𑀺 𑀲𑀦𑁆𑀥𑀸𑀬 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀲𑀼𑀢𑁆𑀢𑁂 ‘‘𑀩𑀸𑀳𑀺𑀭𑀓𑁂 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁂 𑀤𑀸𑀦𑀁 𑀤𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀕𑀼𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂 𑀤𑀸𑀦𑀁 𑀤𑀢𑁆𑀯𑀸 𑀅𑀲𑀗𑁆𑀔𑁂𑀬𑁆𑀬𑀸 𑀅𑀧𑁆𑀧𑀫𑁂𑀬𑁆𑀬𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸, 𑀓𑁄 𑀧𑀦 𑀯𑀸𑀤𑁄 𑀲𑁄𑀢𑀸𑀧𑀦𑁆𑀦𑁂’’𑀢𑀺 𑀯𑀼𑀢𑁆𑀢𑀁 (𑀫. 𑀦𑀺. 𑁩.𑁩𑁭𑁯). 𑀲𑀭𑀡𑀕𑀫𑀦𑀢𑁄 𑀧𑀝𑁆𑀞𑀸𑀬 𑀳𑀺 𑀢𑀢𑁆𑀣 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀅𑀥𑀺𑀧𑁆𑀧𑁂𑀢𑁄𑀢𑀺, 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀬𑁄𑀚𑀦𑀸.

𑀅𑀦𑀼𑀧𑀤𑀯𑀡𑁆𑀡𑀦𑀸𑀬𑀁 𑀧𑀦 𑀇𑀥𑀸𑀢𑀺 𑀯𑀺𑀳𑀺𑀁𑀲𑀸𑀤𑀺𑀯𑀢𑁆𑀣𑀼𑀤𑀻𑀧𑀦𑀫𑁂𑀢𑀁. 𑀔𑁄 𑀧𑀦𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀯𑁄𑀢𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀬𑀁 𑀧𑀦 𑀲𑀗𑁆𑀔𑁂𑀧𑀢𑁆𑀣𑁄, 𑀬𑀤𑁂𑀢𑀁 ‘‘𑀧𑀭𑁂 𑀯𑀺𑀳𑀺𑀁𑀲𑀓𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀳𑀺𑀁𑀲𑀸𑀤𑀺𑀯𑀢𑁆𑀣𑀼𑀁 𑀯𑀤𑀸𑀫. 𑀇𑀥, 𑀘𑀼𑀦𑁆𑀤, 𑀢𑀼𑀫𑁆𑀳𑁂𑀳𑀺 𑀲𑀮𑁆𑀮𑁂𑀔𑁄 𑀓𑀸𑀢𑀩𑁆𑀩𑁄𑀢𑀺.

𑀏𑀯𑀁 𑀲𑀗𑁆𑀔𑁂𑀧𑀢𑁄 𑀯𑀢𑁆𑀯𑀸 𑀇𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 ‘‘𑀧𑀭𑁂 𑀯𑀺𑀳𑀺𑀁𑀲𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀅𑀯𑀺𑀳𑀺𑀁𑀲𑀓𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀲𑀮𑁆𑀮𑁂𑀔𑁄 𑀓𑀭𑀡𑀻𑀬𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀭𑁂𑀢𑀺 𑀬𑁂 𑀓𑁂𑀘𑀺 𑀇𑀫𑀁 𑀲𑀮𑁆𑀮𑁂𑀔𑀫𑀦𑀦𑀼𑀬𑀼𑀢𑁆𑀢𑀸. 𑀯𑀺𑀳𑀺𑀁𑀲𑀓𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸𑀢𑀺𑀆𑀤𑀻𑀳𑀺 𑀲𑀢𑁆𑀢𑀸𑀦𑀁 𑀯𑀺𑀳𑁂𑀲𑀓𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀫𑀬𑀫𑁂𑀢𑁆𑀣 𑀅𑀯𑀺𑀳𑀺𑀁𑀲𑀓𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀫𑀬𑀁 𑀧𑀦 𑀬𑀢𑁆𑀣𑁂𑀯 𑀯𑀢𑁆𑀣𑀼𑀲𑁆𑀫𑀺𑀁 𑀧𑀭𑁂 𑀏𑀯𑀁 𑀯𑀺𑀳𑀺𑀁𑀲𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀢𑁆𑀣𑁂𑀯 𑀅𑀯𑀺𑀳𑀺𑀁𑀲𑀓𑀸 𑀪𑀯𑀺𑀲𑁆𑀲𑀸𑀫, 𑀅𑀯𑀺𑀳𑀺𑀁𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫. 𑀇𑀢𑀺 𑀲𑀮𑁆𑀮𑁂𑀔𑁄 𑀓𑀭𑀡𑀻𑀬𑁄𑀢𑀺 𑀏𑀯𑀁 𑀢𑀼𑀫𑁆𑀳𑁂𑀳𑀺 𑀲𑀮𑁆𑀮𑁂𑀔𑁄 𑀓𑀸𑀢𑀩𑁆𑀩𑁄. 𑀲𑀮𑁆𑀮𑁂𑀔𑁄𑀢𑀺 𑀘 𑀇𑀥 𑀅𑀯𑀺𑀳𑀺𑀁𑀲𑀸𑀯 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀺𑀳𑀺𑀁𑀲𑀸 𑀳𑀺 𑀯𑀺𑀳𑀺𑀁𑀲𑀁 𑀲𑀮𑁆𑀮𑁂𑀔𑀢𑀺, 𑀢𑀁 𑀙𑀺𑀦𑁆𑀤𑀢𑀺, 𑀢𑀲𑁆𑀫𑀸 𑀲𑀮𑁆𑀮𑁂𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀬𑀁 𑀧𑀦 𑀯𑀺𑀲𑁂𑀲𑁄. 𑀧𑀭𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀏𑀢𑁆𑀣 𑀓𑀫𑁆𑀫𑀧𑀣𑀸𑀦𑀁 𑀅𑀦𑁆𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀜𑁆𑀘 𑀫𑀺𑀘𑁆𑀙𑀢𑁆𑀢𑀸𑀦𑀁 𑀆𑀤𑀺𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀜𑁆𑀘 𑀫𑀺𑀲𑁆𑀲𑁂𑀢𑁆𑀯𑀸 𑀤𑀺𑀝𑁆𑀞𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀫𑀬𑀫𑁂𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀏𑀢𑁆𑀣 𑀘 𑀓𑀫𑁆𑀫𑀧𑀣𑀓𑀣𑀸 𑀯𑀺𑀢𑁆𑀣𑀸𑀭𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀫𑀺𑀘𑁆𑀙𑀢𑁆𑀢𑁂𑀲𑀼 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀤𑁆𑀯𑁂𑀥𑀸𑀯𑀺𑀢𑀓𑁆𑀓𑁂.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀧𑀸𑀡𑀁 𑀅𑀢𑀺𑀧𑀸𑀢𑁂𑀦𑁆𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀻 𑀧𑀸𑀡𑀖𑀸𑀢𑀓𑀸𑀢𑀺 𑀅𑀢𑁆𑀣𑁄. 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀻𑀢𑀺 𑀅𑀤𑀺𑀦𑁆𑀦𑀸𑀤𑀸𑀬𑀻, 𑀧𑀭𑀲𑁆𑀲 𑀳𑀸𑀭𑀺𑀦𑁄𑀢𑀺 𑀅𑀢𑁆𑀣𑁄. 𑀅𑀩𑁆𑀭𑀳𑁆𑀫𑀁 𑀳𑀻𑀦𑀁 𑀮𑀸𑀫𑀓𑀥𑀫𑁆𑀫𑀁 𑀘𑀭𑀦𑁆𑀢𑀻𑀢𑀺 𑀅𑀩𑁆𑀭𑀳𑁆𑀫𑀘𑀸𑀭𑀻, 𑀫𑁂𑀣𑀼𑀦𑀥𑀫𑁆𑀫𑀧𑁆𑀧𑀝𑀺𑀲𑁂𑀯𑀓𑀸𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀧𑀝𑀺𑀧𑀤𑀁 𑀘𑀭𑀦𑁆𑀢𑀻𑀢𑀺 𑀩𑁆𑀭𑀳𑁆𑀫𑀘𑀸𑀭𑀻, 𑀫𑁂𑀣𑀼𑀦𑀸 𑀧𑀝𑀺𑀯𑀺𑀭𑀢𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀮𑁆𑀮𑁂𑀔𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀳𑀺 𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀮𑁆𑀮𑁂𑀔𑀢𑀺. 𑀫𑀼𑀲𑀸 𑀯𑀤𑀦𑁆𑀢𑀻𑀢𑀺 𑀫𑀼𑀲𑀸𑀯𑀸𑀤𑀻, 𑀧𑀭𑁂𑀲𑀁 𑀅𑀢𑁆𑀣𑀪𑀜𑁆𑀚𑀦𑀓𑀁 𑀢𑀼𑀘𑁆𑀙𑀁 𑀅𑀮𑀺𑀓𑀁 𑀯𑀸𑀘𑀁 𑀪𑀸𑀲𑀺𑀢𑀸𑀭𑁄𑀢𑀺 𑀅𑀢𑁆𑀣𑁄. 𑀧𑀺𑀲𑀼𑀡𑀸 𑀯𑀸𑀘𑀸 𑀏𑀢𑁂𑀲𑀦𑁆𑀢𑀺 𑀧𑀺𑀲𑀼𑀡𑀯𑀸𑀘𑀸. 𑀧𑀭𑁂𑀲𑀁 𑀫𑀫𑁆𑀫𑀘𑁆𑀙𑁂𑀤𑀺𑀓𑀸 𑀨𑀭𑀼𑀲𑀸 𑀯𑀸𑀘𑀸 𑀏𑀢𑁂𑀲𑀦𑁆𑀢𑀺 𑀨𑀭𑀼𑀲𑀯𑀸𑀘𑀸. 𑀲𑀫𑁆𑀨𑀁 𑀦𑀺𑀭𑀢𑁆𑀣𑀓𑀯𑀘𑀦𑀁 𑀧𑀮𑀧𑀦𑁆𑀢𑀻𑀢𑀺 𑀲𑀫𑁆𑀨𑀧𑁆𑀧𑀮𑀸𑀧𑀻. 𑀅𑀪𑀺𑀚𑁆𑀛𑀸𑀬𑀦𑁆𑀢𑀻𑀢𑀺 𑀅𑀪𑀺𑀚𑁆𑀛𑀸𑀮𑀽, 𑀧𑀭𑀪𑀡𑁆𑀟𑀮𑀼𑀩𑁆𑀪𑀦𑀲𑀻𑀮𑀸𑀢𑀺 𑀅𑀢𑁆𑀣𑁄. 𑀩𑁆𑀬𑀸𑀧𑀦𑁆𑀦𑀁 𑀧𑀽𑀢𑀺𑀪𑀽𑀢𑀁 𑀘𑀺𑀢𑁆𑀢𑀫𑁂𑀢𑁂𑀲𑀦𑁆𑀢𑀺 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸. 𑀫𑀺𑀘𑁆𑀙𑀸 𑀧𑀸𑀧𑀺𑀓𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀏𑀢𑁂𑀲𑀁 𑀤𑀺𑀝𑁆𑀞𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻, 𑀓𑀫𑁆𑀫𑀧𑀣𑀧𑀭𑀺𑀬𑀸𑀧𑀦𑁆𑀦𑀸𑀬 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀯𑀢𑁆𑀣𑀼𑀓𑀸𑀬, 𑀫𑀺𑀘𑁆𑀙𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀸𑀬 𑀅𑀦𑀺𑀬𑁆𑀬𑀸𑀦𑀺𑀓𑀤𑀺𑀝𑁆𑀞𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸 𑀲𑁄𑀪𑀦𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀏𑀢𑁂𑀲𑀁 𑀤𑀺𑀝𑁆𑀞𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀻, 𑀓𑀫𑁆𑀫𑀧𑀣𑀧𑀭𑀺𑀬𑀸𑀧𑀦𑁆𑀦𑀸𑀬 𑀅𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀓𑀸𑀬 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀝𑁆𑀞𑀺𑀬𑀸, 𑀲𑀫𑁆𑀫𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀸𑀬 𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄.

𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀢𑀺 𑀅𑀬𑀸𑀣𑀸𑀯𑀅𑀦𑀺𑀬𑁆𑀬𑀸𑀦𑀺𑀓𑀅𑀓𑀼𑀲𑀮𑀲𑀗𑁆𑀓𑀧𑁆𑀧𑀸. 𑀏𑀲 𑀦𑀬𑁄 𑀫𑀺𑀘𑁆𑀙𑀸𑀯𑀸𑀘𑀸𑀢𑀺𑀆𑀤𑀻𑀲𑀼. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀯𑀺𑀬 𑀳𑀺 𑀫𑀺𑀘𑁆𑀙𑀸𑀲𑀢𑀺 𑀦𑀸𑀫 𑀧𑀸𑀝𑀺𑀏𑀓𑁆𑀓𑁄 𑀓𑁄𑀘𑀺 𑀥𑀫𑁆𑀫𑁄 𑀦𑀢𑁆𑀣𑀺, 𑀅𑀢𑀻𑀢𑀁 𑀧𑀦 𑀘𑀺𑀦𑁆𑀢𑀬𑀢𑁄 𑀧𑀯𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀅𑀓𑀼𑀲𑀮𑀓𑁆𑀔𑀦𑁆𑀥𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀫𑁆𑀧𑀺 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀅𑀢𑁆𑀣𑁂𑀲𑀸, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑁆𑀲𑀢𑀺, 𑀦𑁂𑀲𑀸 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺, 𑀧𑀼𑀢𑁆𑀢𑀮𑀸𑀪𑀁 𑀯𑀸, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑁆𑀲𑀭𑀢𑁄, 𑀥𑀦𑀮𑀸𑀪𑀁 𑀯𑀸, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑁆𑀲𑀭𑀢𑁄, 𑀬𑀲𑀮𑀸𑀪𑀁 𑀯𑀸, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑁆𑀲𑀭𑀢𑁄’’𑀢𑀺, 𑀢𑀫𑁆𑀧𑀺 𑀢𑀁 𑀢𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀲𑀢𑀺𑀧𑀢𑀺𑀭𑀽𑀧𑀓𑁂𑀦 𑀉𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀺𑀘𑁆𑀙𑀸𑀜𑀸𑀡𑀻𑀢𑀺 𑀏𑀢𑁆𑀣 𑀘 𑀫𑀺𑀘𑁆𑀙𑀸𑀜𑀸𑀡𑀦𑁆𑀢𑀺 𑀧𑀸𑀧𑀓𑀺𑀭𑀺𑀬𑀸𑀲𑀼 𑀉𑀧𑀸𑀬𑀘𑀺𑀦𑁆𑀢𑀸𑀯𑀲𑁂𑀦 𑀧𑀸𑀧𑀁 𑀓𑀢𑁆𑀯𑀸 ‘‘𑀲𑀼𑀓𑀢𑀁 𑀫𑀬𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀓𑀸𑀭𑁂𑀦 𑀘 𑀉𑀧𑁆𑀧𑀦𑁆𑀦𑁄 𑀫𑁄𑀳𑁄 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀧𑀼𑀕𑁆𑀕𑀮𑀸 𑀫𑀺𑀘𑁆𑀙𑀸𑀜𑀸𑀡𑀻. 𑀲𑀫𑁆𑀫𑀸𑀜𑀸𑀡𑀻𑀢𑀺 𑀏𑀢𑁆𑀣 𑀧𑀦 𑀏𑀓𑀽𑀦𑀯𑀻𑀲𑀢𑀺𑀪𑁂𑀤𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑀁 ‘‘𑀲𑀫𑁆𑀫𑀸𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀧𑀼𑀕𑁆𑀕𑀮𑀸 𑀲𑀫𑁆𑀫𑀸𑀜𑀸𑀡𑀻. 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻𑀢𑀺 𑀅𑀯𑀺𑀫𑀼𑀢𑁆𑀢𑀸𑀬𑁂𑀯 𑀲𑀫𑀸𑀦𑀸 ‘‘𑀯𑀺𑀫𑀼𑀢𑁆𑀢𑀸 𑀫𑀬’’𑀦𑁆𑀢𑀺 𑀏𑀯𑀁𑀲𑀜𑁆𑀜𑀺𑀦𑁄, 𑀅𑀯𑀺𑀫𑀼𑀢𑁆𑀢𑀺𑀬𑀁 𑀯𑀸 𑀯𑀺𑀫𑀼𑀢𑁆𑀢𑀺𑀲𑀜𑁆𑀜𑀺𑀦𑁄. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄, 𑀫𑀺𑀘𑁆𑀙𑀸 𑀧𑀸𑀧𑀺𑀓𑀸 𑀯𑀺𑀧𑀭𑀻𑀢𑀸 𑀯𑀺𑀫𑀼𑀢𑁆𑀢𑀺 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻. 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻𑀢𑀺 𑀘 𑀬𑀣𑀸𑀯𑀼𑀢𑁆𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀦𑀁 𑀅𑀓𑀼𑀲𑀮𑀓𑁆𑀔𑀦𑁆𑀥𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀨𑀮𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀺 𑀅𑀝𑁆𑀞𑀗𑁆𑀕𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀥𑀫𑁆𑀫𑀸 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀁 𑀲𑀮𑁆𑀮𑀺𑀔𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀲𑀮𑁆𑀮𑁂𑀔𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀦𑀺𑀬𑁄𑀚𑁂𑀦𑁆𑀢𑁄 𑀆𑀳 ‘‘𑀫𑀬𑀫𑁂𑀢𑁆𑀣 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀻 𑀪𑀯𑀺𑀲𑁆𑀲𑀸𑀫𑀸𑀢𑀺 𑀲𑀮𑁆𑀮𑁂𑀔𑁄 𑀓𑀭𑀡𑀻𑀬𑁄’’𑀢𑀺.

𑀇𑀢𑁄 𑀧𑀭𑀸𑀦𑀺 𑀢𑀻𑀡𑀺 𑀦𑀻𑀯𑀭𑀡𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀅𑀪𑀺𑀚𑁆𑀛𑀸𑀮𑀽 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸𑀢𑀺 𑀏𑀯𑀁 𑀓𑀫𑁆𑀫𑀧𑀣𑁂𑀲𑀼 𑀯𑀼𑀢𑁆𑀢𑀢𑁆𑀢𑀸 𑀧𑀦𑁂𑀢𑁆𑀣 𑀧𑀞𑀫𑀸𑀦𑀺 𑀤𑁆𑀯𑁂 𑀦𑀻𑀯𑀭𑀡𑀸𑀦𑀺 𑀦 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀣𑀺𑀦𑀫𑀺𑀤𑁆𑀥𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀸 𑀅𑀪𑀺𑀪𑀽𑀢𑀸𑀢𑀺 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑀸. 𑀉𑀤𑁆𑀥𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀉𑀤𑁆𑀥𑀢𑀸. 𑀯𑀺𑀘𑀺𑀦𑀦𑁆𑀢𑀸 𑀓𑀺𑀘𑁆𑀙𑀦𑁆𑀢𑀺 𑀦 𑀲𑀓𑁆𑀓𑁄𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀸𑀢𑀼𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀻. 𑀓𑁄𑀥𑀦𑀸𑀢𑀺𑀆𑀤𑀻𑀦𑀺 𑀤𑀲 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀓𑁄𑀥𑀸𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀥𑀫𑁆𑀫𑀤𑀸𑀬𑀸𑀤𑀯𑀢𑁆𑀣𑀲𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀓𑁄𑀥𑀦𑀸𑀢𑀺 𑀓𑀼𑀚𑁆𑀛𑀦𑀲𑀻𑀮𑀸. 𑀉𑀧𑀦𑀸𑀳𑀻𑀢𑀺 𑀉𑀧𑀦𑀸𑀳𑀦𑀲𑀻𑀮𑀸, 𑀉𑀧𑀦𑀸𑀳𑁄 𑀯𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀉𑀧𑀦𑀸𑀳𑀻. 𑀢𑀣𑀸 𑀫𑀓𑁆𑀔𑀻 𑀧𑀮𑀸𑀲𑀻 𑀘. 𑀇𑀲𑁆𑀲𑀦𑁆𑀢𑀻𑀢𑀺 𑀇𑀲𑁆𑀲𑀼𑀓𑀻. 𑀫𑀘𑁆𑀙𑀭𑀸𑀬𑀦𑁆𑀢𑀻𑀢𑀺 𑀫𑀘𑁆𑀙𑀭𑀻, 𑀫𑀘𑁆𑀙𑁂𑀭𑀁 𑀯𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀫𑀘𑁆𑀙𑀭𑀻. 𑀲𑀞𑀬𑀦𑁆𑀢𑀻𑀢𑀺 𑀲𑀞𑀸, 𑀦 𑀲𑀫𑁆𑀫𑀸 𑀪𑀸𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀓𑁂𑀭𑀸𑀝𑀺𑀓𑀬𑀼𑀢𑁆𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀫𑀸𑀬𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀫𑀸𑀬𑀸𑀯𑀻. 𑀣𑀫𑁆𑀪𑀲𑀫𑀗𑁆𑀕𑀺𑀢𑀸𑀬 𑀣𑀤𑁆𑀥𑀸. 𑀅𑀢𑀺𑀫𑀸𑀦𑀬𑁄𑀕𑁂𑀦 𑀅𑀢𑀺𑀫𑀸𑀦𑀻. 𑀯𑀼𑀢𑁆𑀢𑀧𑀘𑁆𑀘𑀦𑀻𑀓𑀦𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀩𑁆𑀩𑀘𑀸𑀢𑀺 𑀯𑀢𑁆𑀢𑀼𑀁 𑀤𑀼𑀓𑁆𑀔𑀸 𑀓𑀺𑀜𑁆𑀘𑀺 𑀯𑀼𑀘𑁆𑀘𑀫𑀸𑀦𑀸 𑀦 𑀲𑀳𑀦𑁆𑀢𑀺. 𑀢𑀩𑁆𑀩𑀺𑀧𑀭𑀻𑀢𑀸 𑀲𑀼𑀯𑀘𑀸. 𑀤𑁂𑀯𑀤𑀢𑁆𑀢𑀸𑀤𑀺𑀲𑀤𑀺𑀲𑀸 𑀧𑀸𑀧𑀓𑀸 𑀫𑀺𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀧𑀸𑀧𑀫𑀺𑀢𑁆𑀢𑀸. 𑀩𑀼𑀤𑁆𑀥𑀸 𑀯𑀸 𑀲𑀸𑀭𑀺𑀧𑀼𑀢𑁆𑀢𑀸𑀤𑀺𑀲𑀤𑀺𑀲𑀸 𑀯𑀸 𑀓𑀮𑁆𑀬𑀸𑀡𑀸 𑀫𑀺𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀲𑀼 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑀯𑀲𑁂𑀦 𑀧𑀫𑀢𑁆𑀢𑀸. 𑀯𑀺𑀧𑀭𑀻𑀢𑀸 𑀅𑀧𑁆𑀧𑀫𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀸𑀦𑀺 𑀢𑀻𑀡𑀺 𑀧𑀓𑀺𑀡𑁆𑀡𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀅𑀲𑁆𑀲𑀤𑁆𑀥𑀸𑀢𑀺𑀆𑀤𑀻𑀦𑀺 𑀲𑀢𑁆𑀢 𑀅𑀲𑀤𑁆𑀥𑀫𑁆𑀫𑀯𑀲𑁂𑀦. 𑀢𑀢𑁆𑀣 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀲𑀤𑁆𑀥𑀸 𑀏𑀢𑁂𑀲𑀁 𑀦𑀢𑁆𑀣𑀻𑀢𑀺 𑀅𑀲𑁆𑀲𑀤𑁆𑀥𑀸. 𑀲𑀼𑀓𑁆𑀓𑀧𑀓𑁆𑀔𑁂 𑀲𑀤𑁆𑀤𑀳𑀦𑁆𑀢𑀻𑀢𑀺 𑀲𑀤𑁆𑀥𑀸, 𑀲𑀤𑁆𑀥𑀸 𑀯𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺𑀧𑀺 𑀲𑀤𑁆𑀥𑀸. 𑀦𑀢𑁆𑀣𑀺 𑀏𑀢𑁂𑀲𑀁 𑀳𑀺𑀭𑀻𑀢𑀺 𑀅𑀳𑀺𑀭𑀺𑀓𑀸, 𑀅𑀓𑀼𑀲𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀚𑀺𑀕𑀼𑀘𑁆𑀙𑀫𑀸𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀳𑀺𑀭𑀻 𑀏𑀢𑁂𑀲𑀁 𑀫𑀦𑁂, 𑀳𑀺𑀭𑀺𑀬𑀸 𑀯𑀸 𑀬𑀼𑀢𑁆𑀢𑀫𑀦𑀸𑀢𑀺 𑀳𑀺𑀭𑀺𑀫𑀦𑀸. 𑀦 𑀑𑀢𑁆𑀢𑀧𑁆𑀧𑀦𑁆𑀢𑀻𑀢𑀺 𑀅𑀦𑁄𑀢𑁆𑀢𑀧𑁆𑀧𑀻, 𑀅𑀓𑀼𑀲𑀮𑀲𑀫𑀸𑀧𑀢𑁆𑀢𑀺𑀬𑀸 𑀦 𑀪𑀸𑀬𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀩𑁆𑀩𑀺𑀧𑀭𑀻𑀢𑀸 𑀑𑀢𑁆𑀢𑀧𑁆𑀧𑀻. 𑀅𑀧𑁆𑀧𑀁 𑀲𑀼𑀢𑀫𑁂𑀢𑁂𑀲𑀦𑁆𑀢𑀺 𑀅𑀧𑁆𑀧𑀲𑁆𑀲𑀼𑀢𑀸, 𑀅𑀧𑁆𑀧𑀦𑁆𑀢𑀺 𑀘 𑀣𑁄𑀓𑀦𑁆𑀢𑀺 𑀦 𑀕𑀳𑁂𑀢𑀩𑁆𑀩𑀁, 𑀦𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀅𑀧𑁆𑀧𑀲𑁆𑀲𑀼𑀢𑀸’’𑀢𑀺 𑀳𑀺 𑀦𑀺𑀲𑁆𑀲𑀼𑀢𑀸 𑀲𑀼𑀢𑀯𑀺𑀭𑀳𑀺𑀢𑀸 𑀯𑀼𑀘𑁆𑀘𑀦𑁆𑀢𑀺. 𑀩𑀳𑀼 𑀲𑀼𑀢𑀫𑁂𑀢𑁂𑀲𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸, 𑀢𑀣𑀸𑀕𑀢𑀪𑀸𑀲𑀺𑀢𑀁 𑀏𑀓𑀫𑁆𑀧𑀺 𑀕𑀸𑀣𑀁 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸 𑀅𑀦𑀼𑀭𑀽𑀧𑀧𑀝𑀺𑀧𑀦𑁆𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀼𑀘𑁆𑀙𑀺𑀢𑀸 𑀲𑀻𑀤𑀦𑁆𑀢𑀻𑀢𑀺 𑀓𑀼𑀲𑀻𑀢𑀸, 𑀳𑀻𑀦𑀯𑀻𑀭𑀺𑀬𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀆𑀭𑀤𑁆𑀥𑀁 𑀯𑀻𑀭𑀺𑀬𑀫𑁂𑀢𑁂𑀲𑀦𑁆𑀢𑀺 𑀆𑀭𑀤𑁆𑀥𑀯𑀻𑀭𑀺𑀬𑀸, 𑀲𑀫𑁆𑀫𑀧𑁆𑀧𑀥𑀸𑀦𑀬𑀼𑀢𑁆𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀫𑀼𑀝𑁆𑀞𑀸 𑀲𑀢𑀺 𑀏𑀢𑁂𑀲𑀦𑁆𑀢𑀺 𑀫𑀼𑀝𑁆𑀞𑀲𑁆𑀲𑀢𑀻, 𑀦𑀝𑁆𑀞𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀏𑀢𑁂𑀲𑀦𑁆𑀢𑀺 𑀉𑀧𑀝𑁆𑀞𑀺𑀢𑀲𑁆𑀲𑀢𑀻, 𑀦𑀺𑀘𑁆𑀘𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀧𑁆𑀧𑀯𑀢𑁆𑀢𑀲𑀢𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀤𑀼𑀝𑁆𑀞𑀸 𑀧𑀜𑁆𑀜𑀸 𑀏𑀢𑁂𑀲𑀦𑁆𑀢𑀺 𑀤𑀼𑀧𑁆𑀧𑀜𑁆𑀜𑀸, 𑀦𑀝𑁆𑀞𑀧𑀜𑁆𑀜𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀜𑀸𑀬 𑀲𑀫𑁆𑀧𑀦𑁆𑀦𑀸𑀢𑀺 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸, 𑀧𑀜𑁆𑀜𑀸𑀢𑀺 𑀘 𑀇𑀥 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀧𑀲𑁆𑀲𑀦𑀸𑀲𑀫𑁆𑀪𑀸𑀭𑁄 𑀳𑀺 𑀧𑀭𑀺𑀧𑀽𑀭𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀆𑀕𑀢𑁄, 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀯 𑀅𑀬𑀦𑁆𑀢𑀺 𑀧𑁄𑀭𑀸𑀡𑀸𑀦𑀁 𑀆𑀡𑀸.

𑀇𑀤𑀸𑀦𑀺 𑀏𑀓𑀫𑁂𑀯 𑀮𑁄𑀓𑀼𑀢𑁆𑀢𑀭𑀕𑀼𑀡𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀁 𑀅𑀦𑀺𑀬𑁆𑀬𑀸𑀦𑀺𑀓𑀤𑀺𑀝𑁆𑀞𑀺𑀁 𑀢𑀻𑀳𑀸𑀓𑀸𑀭𑁂𑀳𑀺 𑀤𑀲𑁆𑀲𑁂𑀦𑁆𑀢𑁄 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀦𑁆𑀤𑀺𑀝𑁆𑀞𑀺𑀁 𑀧𑀭𑀸𑀫𑀲𑀦𑁆𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻. 𑀆𑀥𑀸𑀦𑀁 𑀕𑀡𑁆𑀳𑀦𑁆𑀢𑀻𑀢𑀺 𑀆𑀥𑀸𑀦𑀕𑁆𑀕𑀸𑀳𑀻, 𑀆𑀥𑀸𑀦𑀦𑁆𑀢𑀺 𑀤𑀴𑁆𑀳𑀁 𑀯𑀼𑀘𑁆𑀘𑀢𑀺, 𑀤𑀴𑁆𑀳𑀕𑁆𑀕𑀸𑀳𑀻𑀢𑀺 𑀅𑀢𑁆𑀣𑁄. 𑀬𑀼𑀢𑁆𑀢𑀓𑀸𑀭𑀡𑀁 𑀤𑀺𑀲𑁆𑀯𑀸𑀯 𑀮𑀤𑁆𑀥𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀻𑀢𑀺 𑀧𑀝𑀺𑀦𑀺𑀲𑁆𑀲𑀕𑁆𑀕𑀻, 𑀤𑀼𑀓𑁆𑀔𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀩𑀳𑀼𑀫𑁆𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀦 𑀲𑀓𑁆𑀓𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀓𑀸𑀢𑀼𑀦𑁆𑀢𑀺 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻, 𑀬𑁂 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀁 𑀤𑀺𑀝𑁆𑀞𑀺𑀁 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀤𑀴𑁆𑀳𑀁 𑀕𑀡𑁆𑀳𑀺𑀢𑁆𑀯𑀸 𑀅𑀧𑀺 𑀩𑀼𑀤𑁆𑀥𑀸𑀤𑀻𑀳𑀺 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀢𑁂𑀲𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀸𑀤𑀺𑀲𑀸 𑀳𑀺 𑀧𑀼𑀕𑁆𑀕𑀮𑀸 𑀬𑀁 𑀬𑀤𑁂𑀯 𑀥𑀫𑁆𑀫𑀁 𑀯𑀸 𑀅𑀥𑀫𑁆𑀫𑀁 𑀯𑀸 𑀕𑀡𑁆𑀳𑀦𑁆𑀢𑀺, 𑀢𑀁 𑀲𑀩𑁆𑀩𑀁 ‘‘𑀏𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁂𑀳𑀺 𑀓𑀣𑀺𑀢𑀁, 𑀏𑀯𑀁 𑀅𑀫𑁆𑀳𑁂𑀳𑀺 𑀲𑀼𑀢’’𑀦𑁆𑀢𑀺 𑀓𑀼𑀫𑁆𑀫𑁄𑀯 𑀅𑀗𑁆𑀕𑀸𑀦𑀺 𑀲𑀓𑁂 𑀓𑀧𑀸𑀮𑁂 𑀅𑀦𑁆𑀢𑁄𑀬𑁂𑀯 𑀲𑀫𑁄𑀤𑀳𑀦𑁆𑀢𑀺, 𑀓𑀼𑀫𑁆𑀪𑀻𑀮𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑀺 𑀦 𑀯𑀺𑀲𑁆𑀲𑀚𑁆𑀚𑀦𑁆𑀢𑀺. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄.

𑁮𑁪. 𑀏𑀯𑀁 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀲𑀮𑁆𑀮𑁂𑀔𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀫𑀺𑀁 𑀲𑀮𑁆𑀮𑁂𑀔𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲𑀸𑀧𑀺 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀼𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑁆𑀧𑀺 𑀔𑁄 𑀅𑀳𑀦𑁆𑀢𑀺𑀆𑀤𑀺𑀫𑀸𑀳.

𑀢𑀲𑁆𑀲𑀢𑁆𑀣𑁄, 𑀅𑀳𑀁, 𑀘𑀼𑀦𑁆𑀤, 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑁆𑀧𑀺 𑀩𑀳𑀽𑀧𑀓𑀸𑀭𑀁 𑀯𑀤𑀸𑀫𑀺, 𑀬𑀸 𑀧𑀦𑁂𑀢𑀸 𑀓𑀸𑀬𑁂𑀦 𑀘 𑀯𑀸𑀘𑀸𑀬 𑀘 𑀅𑀦𑀼𑀯𑀺𑀥𑀺𑀬𑀦𑀸, 𑀬𑀣𑀸 𑀧𑀞𑀫𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀣𑁂𑀯 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀓𑀸𑀬𑁂𑀦 𑀓𑀭𑀡𑀁, 𑀯𑀸𑀘𑀸𑀬 𑀘 ‘‘𑀓𑀭𑁄𑀣𑀸’’𑀢𑀺 𑀆𑀡𑀸𑀧𑀦𑀁 𑀯𑀸, 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀺 𑀯𑀸, 𑀢𑀢𑁆𑀣 𑀯𑀸𑀤𑁄𑀬𑁂𑀯 𑀓𑁄, 𑀏𑀓𑀦𑁆𑀢𑀩𑀳𑀽𑀧𑀓𑀸𑀭𑀸𑀬𑁂𑀯 𑀳𑀺 𑀢𑀸 𑀅𑀦𑀼𑀯𑀺𑀥𑀺𑀬𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀧𑀺 𑀩𑀳𑀽𑀧𑀓𑀸𑀭𑁄𑀢𑀺? 𑀏𑀓𑀦𑁆𑀢𑀳𑀺𑀢𑀲𑀼𑀔𑀸𑀯𑀳𑀢𑁆𑀢𑀸 𑀅𑀦𑀼𑀯𑀺𑀥𑀺𑀬𑀦𑀸𑀦𑀁 𑀳𑁂𑀢𑀼𑀢𑁆𑀢𑀸 𑀘.

‘‘𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀬𑀫𑁆𑀧𑀺 𑀏𑀓𑀦𑁆𑀢𑀳𑀺𑀢𑀲𑀼𑀔𑀸𑀯𑀳𑁄 𑀅𑀦𑀼𑀯𑀺𑀥𑀺𑀬𑀦𑀸𑀦𑀫𑁆𑀧𑀺 𑀳𑁂𑀢𑀼, 𑀏𑀯𑀜𑁆𑀳𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀢𑁆𑀢𑀸𑀬𑁂𑀯 𑀤𑀼𑀢𑀺𑀬𑀤𑀺𑀯𑀲𑁂 𑀫𑀳𑀸𑀯𑀻𑀣𑀺𑀁 𑀧𑀺𑀤𑀳𑀺𑀢𑁆𑀯𑀸 𑀫𑀳𑀸𑀫𑀡𑁆𑀟𑀧𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀢𑀲𑁆𑀲 𑀯𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲 𑀯𑀸 𑀤𑀸𑀦𑀁 𑀤𑁂𑀢𑀺, ‘‘𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀣 𑀧𑀽𑀚𑁂𑀣 𑀧𑀭𑀺𑀯𑀺𑀲𑀣𑀸’’𑀢𑀺 𑀧𑀭𑀺𑀚𑀦𑁂 𑀆𑀡𑀸𑀧𑁂𑀢𑀺. 𑀏𑀯𑀁 ‘‘𑀲𑀗𑁆𑀖𑀲𑁆𑀲 𑀘𑀻𑀯𑀭𑀁 𑀲𑁂𑀦𑀸𑀲𑀦𑀁 𑀪𑁂𑀲𑀚𑁆𑀚𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀬𑀫𑁆𑀧𑀺 𑀏𑀓𑀦𑁆𑀢𑀳𑀺𑀢𑀲𑀼𑀔𑀸𑀯𑀳𑁄 𑀅𑀦𑀼𑀯𑀺𑀥𑀺𑀬𑀦𑀸𑀦𑀫𑁆𑀧𑀺 𑀳𑁂𑀢𑀼, 𑀏𑀯𑀁 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀢𑁆𑀢𑀸𑀬𑁂𑀯 𑀳𑀺 𑀘𑀻𑀯𑀭𑀸𑀤𑀻𑀦𑀺 𑀅𑀪𑀺𑀲𑀗𑁆𑀔𑀭𑁄𑀢𑀺 𑀤𑁂𑀢𑀺 𑀤𑀸𑀧𑁂𑀢𑀺 𑀘. 𑀏𑀲 𑀦𑀬𑁄 𑀲𑀭𑀡𑀕𑀫𑀦𑀸𑀤𑀻𑀲𑀼.

‘‘𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀳𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀯 𑀧𑀘𑁆𑀙𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀲𑀭𑀡𑀁 𑀕𑀡𑁆𑀳𑀸𑀢𑀺. 𑀢𑀣𑀸 ‘‘𑀧𑀜𑁆𑀘𑀗𑁆𑀕𑀁 𑀅𑀝𑁆𑀞𑀗𑁆𑀕𑀁 𑀤𑀲𑀗𑁆𑀕𑀁 𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀲𑀫𑀸𑀤𑀺𑀬𑀢𑀺, ‘‘𑀧𑀩𑁆𑀩𑀚𑀺𑀢𑁆𑀯𑀸 𑀘𑀢𑀽𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀘 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀸𑀬𑁂𑀦 𑀯𑀸𑀘𑀸𑀬 𑀘 𑀧𑀽𑀭𑁂𑀢𑀩𑁆𑀩𑀁 𑀲𑀻𑀮𑀁 𑀧𑀽𑀭𑁂𑀢𑀺. ‘‘𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀯 𑀏𑀓𑀁 𑀯𑀸 𑀦𑀺𑀓𑀸𑀬𑀁 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀯𑀸𑀘𑀸𑀬 𑀉𑀕𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀥𑀼𑀢𑀗𑁆𑀕𑀲𑀫𑀸𑀤𑀸𑀦-𑀓𑀫𑁆𑀫𑀝𑁆𑀞𑀸𑀦𑀼𑀕𑁆𑀕𑀳-𑀓𑀲𑀺𑀡𑀧𑀭𑀺𑀓𑀫𑁆𑀫-𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮- 𑀧𑀘𑁆𑀘𑁂𑀓𑀩𑁄𑀥𑀺-𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀯𑀲𑁂𑀦 𑀦𑁂𑀢𑀩𑁆𑀩𑀁.

‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀬𑀫𑁆𑀧𑀺 𑀏𑀓𑀦𑁆𑀢𑀳𑀺𑀢𑀲𑀼𑀔𑀸𑀯𑀳𑁄 𑀅𑀦𑀼𑀯𑀺𑀥𑀺𑀬𑀦𑀸𑀦𑀫𑁆𑀧𑀺 𑀳𑁂𑀢𑀼, 𑀏𑀯𑀜𑁆𑀳𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀢𑁆𑀢𑀸𑀬𑁂𑀯 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁂𑀬𑁆𑀬𑀸𑀦𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀢𑀸𑀭𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀧𑀺 𑀩𑀳𑀽𑀧𑀓𑀸𑀭𑁄. 𑀓𑀸𑀬𑀯𑀸𑀘𑀸𑀳𑀺 𑀧𑀦 𑀅𑀦𑀼𑀯𑀺𑀥𑀺𑀬𑀦𑀸 𑀅𑀢𑀺𑀩𑀳𑀽𑀧𑀓𑀸𑀭𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲𑀸𑀧𑀺 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀦𑀺𑀬𑁄𑀚𑁂𑀦𑁆𑀢𑁄 ‘‘𑀢𑀲𑁆𑀫𑀸 𑀢𑀺𑀳 𑀘𑀼𑀦𑁆𑀤𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀅𑀢𑁆𑀣𑀢𑁄 𑀧𑀸𑀓𑀝𑀫𑁂𑀯.

𑁮𑁫. 𑀏𑀯𑀁 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀤𑀲𑁆𑀲𑀺𑀢𑁂 𑀲𑀮𑁆𑀮𑁂𑀔𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲𑀸𑀧𑀺 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑁂𑀯 𑀲𑀮𑁆𑀮𑁂𑀔𑀲𑁆𑀲 𑀳𑀺𑀢𑀸𑀥𑀺𑀕𑀫𑀸𑀬 𑀫𑀕𑁆𑀕𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳.

𑀢𑀲𑁆𑀲𑀢𑁆𑀣𑁄, 𑀬𑀣𑀸 𑀦𑀸𑀫, 𑀘𑀼𑀦𑁆𑀤, 𑀔𑀸𑀡𑀼𑀓𑀡𑁆𑀝𑀓𑀧𑀸𑀲𑀸𑀡𑀸𑀤𑀻𑀳𑀺 𑀯𑀺𑀲𑀫𑁄 𑀫𑀕𑁆𑀕𑁄 𑀪𑀯𑁂𑀬𑁆𑀬, 𑀢𑀲𑁆𑀲 𑀧𑀭𑀺𑀓𑁆𑀓𑀫𑀦𑀸𑀬 𑀧𑀭𑀺𑀯𑀚𑁆𑀚𑀦𑀢𑁆𑀣𑀸𑀬 𑀅𑀜𑁆𑀜𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀯𑀺𑀬 𑀪𑀽𑀫𑀺𑀪𑀸𑀕𑁄 𑀲𑀫𑁄 𑀫𑀕𑁆𑀕𑁄 𑀪𑀯𑁂𑀬𑁆𑀬, 𑀬𑀣𑀸 𑀘 𑀭𑀼𑀓𑁆𑀔𑀫𑀽𑀮𑀧𑀸𑀲𑀸𑀡𑀧𑀧𑀸𑀢𑀓𑀼𑀫𑁆𑀪𑀻𑀮𑀫𑀓𑀭𑀸𑀤𑀺 𑀧𑀭𑀺𑀩𑁆𑀬𑀸𑀓𑀼𑀮𑀁 𑀯𑀺𑀲𑀫𑀁 𑀢𑀺𑀢𑁆𑀣𑀫𑀲𑁆𑀲, 𑀢𑀲𑁆𑀲 𑀧𑀭𑀺𑀓𑁆𑀓𑀫𑀦𑀸𑀬 𑀧𑀭𑀺𑀯𑀚𑁆𑀚𑀦𑀢𑁆𑀣𑀸𑀬 𑀅𑀜𑁆𑀜𑀁 𑀅𑀯𑀺𑀲𑀫𑀁 𑀅𑀦𑀼𑀧𑀼𑀩𑁆𑀩𑀕𑀫𑁆𑀪𑀻𑀭𑀁 𑀲𑁄𑀧𑀸𑀦𑀨𑀮𑀓𑀲𑀤𑀺𑀲𑀁 𑀢𑀺𑀢𑁆𑀣𑀁 𑀪𑀯𑁂𑀬𑁆𑀬, 𑀬𑀁 𑀧𑀝𑀺𑀧𑀦𑁆𑀦𑁄 𑀲𑀼𑀔𑁂𑀦𑁂𑀯 𑀢𑀁 𑀦𑀤𑀺𑀁 𑀯𑀸 𑀢𑀴𑀸𑀓𑀁 𑀯𑀸 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀦𑁆𑀳𑀸𑀬𑁂𑀬𑁆𑀬 𑀯𑀸 𑀉𑀢𑁆𑀢𑀭𑁂𑀬𑁆𑀬 𑀯𑀸, 𑀏𑀯𑀫𑁂𑀯 𑀔𑁄, 𑀘𑀼𑀦𑁆𑀤, 𑀯𑀺𑀲𑀫𑀫𑀕𑁆𑀕𑀯𑀺𑀲𑀫𑀢𑀺𑀢𑁆𑀣𑀲𑀤𑀺𑀲𑀸𑀬 𑀯𑀺𑀳𑀺𑀁𑀲𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲 𑀯𑀺𑀳𑀺𑀁𑀲𑀓𑀧𑀼𑀕𑁆𑀕𑀮𑀲𑁆𑀲 𑀲𑀫𑀫𑀕𑁆𑀕𑀲𑀫𑀢𑀺𑀢𑁆𑀣𑀲𑀤𑀺𑀲𑀸 𑀅𑀯𑀺𑀳𑀺𑀁𑀲𑀸 𑀳𑁄𑀢𑀺 𑀧𑀭𑀺𑀓𑁆𑀓𑀫𑀦𑀸𑀬. 𑀬𑀣𑁂𑀯 𑀳𑀺 𑀯𑀺𑀲𑀫𑀫𑀕𑁆𑀕𑀢𑀺𑀢𑁆𑀣𑀧𑀭𑀺𑀯𑀚𑁆𑀚𑀦𑀢𑁆𑀣𑀸𑀬 𑀲𑀫𑁄 𑀫𑀕𑁆𑀕𑁄 𑀘 𑀢𑀺𑀢𑁆𑀣𑀜𑁆𑀘 𑀧𑀝𑀺𑀬𑀢𑁆𑀢𑀁, 𑀏𑀯𑀁 𑀯𑀺𑀳𑀺𑀁𑀲𑀸𑀧𑀭𑀺𑀯𑀚𑁆𑀚𑀦𑀢𑁆𑀣𑀸𑀬 𑀅𑀯𑀺𑀳𑀺𑀁𑀲𑀸 𑀧𑀝𑀺𑀬𑀢𑁆𑀢𑀸, 𑀬𑀁 𑀧𑀝𑀺𑀧𑀦𑁆𑀦𑁄 𑀲𑀼𑀔𑁂𑀦𑁂𑀯 𑀫𑀦𑀼𑀲𑁆𑀲𑀕𑀢𑀺𑀁 𑀯𑀸 𑀤𑁂𑀯𑀕𑀢𑀺𑀁 𑀯𑀸 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀯𑀸 𑀅𑀦𑀼𑀪𑀯𑁂𑀬𑁆𑀬 𑀉𑀢𑁆𑀢𑀭𑁂𑀬𑁆𑀬 𑀯𑀸 𑀮𑁄𑀓𑀸. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀲𑀩𑁆𑀩𑀧𑀤𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑁮𑁬. 𑀏𑀯𑀁 𑀢𑀲𑁆𑀲𑁂𑀯 𑀳𑀺𑀢𑀸𑀥𑀺𑀕𑀫𑀸𑀬 𑀫𑀕𑁆𑀕𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀉𑀧𑀭𑀺𑀪𑀸𑀕𑀗𑁆𑀕𑀫𑀦𑀻𑀬𑀢𑀁 𑀤𑀲𑁆𑀲𑁂𑀦𑁆𑀢𑁄, 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳.

𑀢𑀲𑁆𑀲𑀢𑁆𑀣𑁄, 𑀬𑀣𑀸 𑀦𑀸𑀫, 𑀘𑀼𑀦𑁆𑀤, 𑀬𑁂 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀝𑀺𑀲𑀦𑁆𑀥𑀺𑀬𑀸 𑀚𑀦𑀓𑀸 𑀯𑀸 𑀅𑀚𑀦𑀓𑀸 𑀯𑀸, 𑀤𑀺𑀦𑁆𑀦𑀸𑀬𑀧𑀺 𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀧𑀸𑀓𑀚𑀦𑀓𑀸 𑀯𑀸 𑀅𑀚𑀦𑀓𑀸 𑀯𑀸, 𑀲𑀩𑁆𑀩𑁂 𑀢𑁂 𑀚𑀸𑀢𑀺𑀯𑀲𑁂𑀦 𑀅𑀥𑁄𑀪𑀸𑀕𑀗𑁆𑀕𑀫𑀦𑀻𑀬𑀸𑀢𑀺 𑀏𑀯𑀁𑀦𑀸𑀫𑀸𑀯 𑀳𑁄𑀦𑁆𑀢𑀺, 𑀯𑀺𑀧𑀸𑀓𑀓𑀸𑀮𑁂 𑀅𑀦𑀺𑀝𑁆𑀞𑀸𑀓𑀦𑁆𑀢𑀯𑀺𑀧𑀸𑀓𑀢𑁆𑀢𑀸. 𑀬𑀣𑀸 𑀘 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀝𑀺𑀲𑀦𑁆𑀥𑀺𑀬𑀸 𑀚𑀦𑀓𑀸 𑀯𑀸 𑀅𑀚𑀦𑀓𑀸 𑀯𑀸 𑀤𑀺𑀦𑁆𑀦𑀸𑀬𑀧𑀺 𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀧𑀸𑀓𑀚𑀦𑀓𑀸 𑀯𑀸 𑀅𑀚𑀦𑀓𑀸 𑀯𑀸, 𑀲𑀩𑁆𑀩𑁂 𑀢𑁂 𑀚𑀸𑀢𑀺𑀯𑀲𑁂𑀦 𑀉𑀧𑀭𑀺𑀪𑀸𑀕𑀗𑁆𑀕𑀫𑀦𑀻𑀬𑀸𑀢𑀺 𑀏𑀯𑀁𑀦𑀸𑀫𑀸𑀯 𑀳𑁄𑀦𑁆𑀢𑀺, 𑀯𑀺𑀧𑀸𑀓𑀓𑀸𑀮𑁂 𑀇𑀝𑁆𑀞𑀓𑀦𑁆𑀢𑀯𑀺𑀧𑀸𑀓𑀢𑁆𑀢𑀸, 𑀏𑀯𑀫𑁂𑀯 𑀔𑁄, 𑀘𑀼𑀦𑁆𑀤, 𑀯𑀺𑀳𑀺𑀁𑀲𑀓𑀲𑁆𑀲…𑀧𑁂… 𑀉𑀧𑀭𑀺𑀪𑀸𑀕𑀸𑀬𑀸𑀢𑀺. 𑀢𑀢𑁆𑀭𑀸𑀬𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀸 𑁋 𑀬𑀣𑀸 𑀲𑀩𑁆𑀩𑁂 𑀅𑀓𑀼𑀲𑀮𑀸 𑀅𑀥𑁄𑀪𑀸𑀕𑀗𑁆𑀕𑀫𑀦𑀻𑀬𑀸, 𑀏𑀯𑀁 𑀯𑀺𑀳𑀺𑀁𑀲𑀓𑀲𑁆𑀲 𑀏𑀓𑀸 𑀯𑀺𑀳𑀺𑀁𑀲𑀸𑀧𑀺. 𑀬𑀣𑀸 𑀘 𑀲𑀩𑁆𑀩𑁂 𑀓𑀼𑀲𑀮𑀸 𑀉𑀧𑀭𑀺𑀪𑀸𑀕𑀗𑁆𑀕𑀫𑀦𑀻𑀬𑀸, 𑀏𑀯𑀁 𑀅𑀯𑀺𑀳𑀺𑀁𑀲𑀓𑀲𑁆𑀲 𑀏𑀓𑀸 𑀅𑀯𑀺𑀳𑀺𑀁𑀲𑀸𑀧𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀓𑀼𑀲𑀮𑀁 𑀅𑀓𑀼𑀲𑀮𑁂𑀦 𑀓𑀼𑀲𑀮𑀜𑁆𑀘 𑀓𑀼𑀲𑀮𑁂𑀦 𑀉𑀧𑀫𑁂𑀢𑀩𑁆𑀩𑀁, 𑀅𑀬𑀁 𑀓𑀺𑀭𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺.

𑁮𑁭. 𑀏𑀯𑀁 𑀢𑀲𑁆𑀲𑁂𑀯 𑀲𑀮𑁆𑀮𑁂𑀔𑀲𑁆𑀲 𑀉𑀧𑀭𑀺𑀪𑀸𑀕𑀗𑁆𑀕𑀫𑀦𑀻𑀬𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀺𑀦𑀺𑀩𑁆𑀩𑀸𑀧𑀦𑁂 𑀲𑀫𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀲𑁄 𑀯𑀢 𑀘𑀼𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁄𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄. 𑀢𑀲𑁆𑀲 𑀬𑁄𑀢𑀺 𑀇𑀫𑀁 𑀉𑀤𑁆𑀤𑁂𑀲𑀯𑀘𑀦𑀁 𑀆𑀳𑀭𑀺𑀢𑁆𑀯𑀸 𑀬𑁄 𑀅𑀢𑁆𑀢𑀦𑀸 𑀧𑀮𑀺𑀧𑀧𑀮𑀺𑀧𑀦𑁆𑀦𑁄, 𑀲𑁄 𑀯𑀢, 𑀘𑀼𑀦𑁆𑀤, 𑀧𑀭𑀁 𑀧𑀮𑀺𑀧𑀧𑀮𑀺𑀧𑀦𑁆𑀦𑀁 𑀉𑀤𑁆𑀥𑀭𑀺𑀲𑁆𑀲𑀢𑀻𑀢𑀺 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀮𑀺𑀧𑀧𑀮𑀺𑀧𑀦𑁆𑀦𑁄𑀢𑀺 𑀕𑀫𑁆𑀪𑀻𑀭𑀓𑀤𑁆𑀤𑀫𑁂 𑀦𑀺𑀫𑀼𑀕𑁆𑀕𑁄 𑀯𑀼𑀘𑁆𑀘𑀢𑀺, 𑀦𑁄 𑀘 𑀔𑁄 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂. 𑀅𑀭𑀺𑀬𑀲𑁆𑀲 𑀧𑀦 𑀯𑀺𑀦𑀬𑁂 𑀧𑀮𑀺𑀧𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀯𑀼𑀘𑁆𑀘𑀦𑁆𑀢𑀺. 𑀧𑀮𑀺𑀧𑀦𑁆𑀦𑁄𑀢𑀺 𑀢𑀢𑁆𑀣 𑀦𑀺𑀫𑀼𑀕𑁆𑀕𑁄 𑀩𑀸𑀮𑀧𑀼𑀣𑀼𑀚𑁆𑀚𑀦𑁄, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸, 𑀘𑀼𑀦𑁆𑀤, 𑀓𑁄𑀘𑀺 𑀧𑀼𑀭𑀺𑀲𑁄 𑀬𑀸𑀯 𑀦𑀸𑀲𑀺𑀓𑀕𑁆𑀕𑀸 𑀕𑀫𑁆𑀪𑀻𑀭𑁂 𑀓𑀤𑁆𑀤𑀫𑁂 𑀦𑀺𑀫𑀼𑀕𑁆𑀕𑁄 𑀅𑀧𑀭𑀁 𑀢𑀢𑁆𑀣𑁂𑀯 𑀦𑀺𑀫𑀼𑀕𑁆𑀕𑀁 𑀳𑀢𑁆𑀣𑁂 𑀯𑀸 𑀲𑀻𑀲𑁂 𑀯𑀸 𑀕𑀳𑁂𑀢𑁆𑀯𑀸 𑀉𑀤𑁆𑀥𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀦 𑀳𑀺 𑀢𑀁 𑀓𑀸𑀭𑀡𑀫𑀢𑁆𑀣𑀺, 𑀬𑁂𑀦 𑀲𑁄 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀧𑁂𑀬𑁆𑀬, 𑀏𑀯𑀫𑁂𑀯 𑀬𑁄 𑀅𑀢𑁆𑀢𑀦𑀸 𑀧𑀜𑁆𑀘𑀓𑀸𑀫𑀕𑀼𑀡𑀧𑀮𑀺𑀧𑁂 𑀧𑀮𑀺𑀧𑀦𑁆𑀦𑁄, 𑀲𑁄 𑀯𑀢 𑀧𑀭𑀁 𑀢𑀣𑁂𑀯 𑀧𑀮𑀺𑀧𑀧𑀮𑀺𑀧𑀦𑁆𑀦𑀁 𑀉𑀤𑁆𑀥𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑀢𑀢𑁆𑀣 𑀲𑀺𑀬𑀸 𑀅𑀬𑀼𑀢𑁆𑀢𑀫𑁂𑀢𑀁, 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀦𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀳𑁄𑀦𑁆𑀢𑀺𑀬𑁂𑀯 𑀥𑀫𑁆𑀫𑀁 𑀅𑀪𑀺𑀲𑀫𑁂𑀢𑀸𑀭𑁄, 𑀢𑀲𑁆𑀫𑀸 𑀧𑀮𑀺𑀧𑀧𑀮𑀺𑀧𑀦𑁆𑀦𑁄 𑀉𑀤𑁆𑀥𑀭𑀢𑀻𑀢𑀺, 𑀢𑀁 𑀦 𑀢𑀣𑀸 𑀤𑀝𑁆𑀞𑀩𑁆𑀩𑀁. 𑀪𑀕𑀯𑀸𑀬𑁂𑀯 𑀳𑀺 𑀢𑀢𑁆𑀣 𑀉𑀤𑁆𑀥𑀭𑀢𑀺, 𑀧𑀲𑀁𑀲𑀸𑀫𑀢𑁆𑀢𑀫𑁂𑀯 𑀧𑀦 𑀥𑀫𑁆𑀫𑀓𑀣𑀺𑀓𑀸 𑀮𑀪𑀦𑁆𑀢𑀺 𑀭𑀜𑁆𑀜𑀸 𑀧𑀳𑀺𑀢𑀮𑁂𑀔𑀯𑀸𑀘𑀓𑁄 𑀯𑀺𑀬. 𑀬𑀣𑀸 𑀳𑀺 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀚𑀦𑀧𑀤𑁂 𑀧𑀳𑀺𑀢𑀁 𑀮𑁂𑀔𑀁 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀮𑁂𑀔𑀁 𑀯𑀸𑀘𑁂𑀢𑀼𑀁 𑀅𑀚𑀸𑀦𑀦𑁆𑀢𑀸 𑀬𑁄 𑀯𑀸𑀘𑁂𑀢𑀼𑀁 𑀚𑀸𑀦𑀸𑀢𑀺, 𑀢𑁂𑀦 𑀯𑀸𑀘𑀸𑀧𑁂𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀭𑀜𑁆𑀜𑁄 𑀆𑀡𑀸’’𑀢𑀺 𑀆𑀤𑀭𑁂𑀦 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀦 𑀘 𑀦𑁂𑀲𑀁 𑀳𑁄𑀢𑀺 ‘‘𑀮𑁂𑀔𑀯𑀸𑀘𑀓𑀲𑁆𑀲 𑀅𑀬𑀁 𑀆𑀡𑀸’’𑀢𑀺. 𑀮𑁂𑀔𑀯𑀸𑀘𑀓𑁄 𑀧𑀦 ‘‘𑀯𑀺𑀲𑁆𑀲𑀝𑁆𑀞𑀸𑀬 𑀯𑀸𑀘𑀸𑀬 𑀯𑀸𑀘𑁂𑀲𑀺 𑀅𑀦𑁂𑀮𑀕𑀴𑀸𑀬𑀸’’𑀢𑀺 𑀧𑀲𑀁𑀲𑀸𑀫𑀢𑁆𑀢𑀫𑁂𑀯 𑀮𑀪𑀢𑀺, 𑀏𑀯𑀫𑁂𑀯 𑀓𑀺𑀜𑁆𑀘𑀸𑀧𑀺 𑀲𑀸𑀭𑀺𑀧𑀼𑀢𑁆𑀢𑀧𑀪𑀼𑀢𑀬𑁄 𑀥𑀫𑁆𑀫𑀓𑀣𑀺𑀓𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀅𑀣 𑀔𑁄 𑀮𑀺𑀔𑀺𑀢𑀧𑀡𑁆𑀡𑀯𑀸𑀘𑀓𑁄 𑀯𑀺𑀬 𑀢𑁂 𑀳𑁄𑀦𑁆𑀢𑀺. 𑀪𑀕𑀯𑀢𑁄𑀬𑁂𑀯 𑀧𑀦 𑀲𑀸 𑀥𑀫𑁆𑀫𑀤𑁂𑀲𑀦𑀸 𑀭𑀜𑁆𑀜𑁄 𑀆𑀡𑀸 𑀯𑀺𑀬. 𑀬𑁂 𑀘 𑀢𑀁 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀅𑀪𑀺𑀲𑀫𑁂𑀦𑁆𑀢𑀺, 𑀢𑁂 𑀪𑀕𑀯𑀸𑀬𑁂𑀯 𑀉𑀤𑁆𑀥𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀥𑀫𑁆𑀫𑀓𑀣𑀺𑀓𑀸 𑀧𑀦 ‘‘𑀯𑀺𑀲𑁆𑀲𑀝𑁆𑀞𑀸𑀬 𑀯𑀸𑀘𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀅𑀦𑁂𑀮𑀕𑀴𑀸𑀬𑀸’’𑀢𑀺 𑀧𑀲𑀁𑀲𑀸𑀫𑀢𑁆𑀢𑀫𑁂𑀯 𑀮𑀪𑀦𑁆𑀢𑀻𑀢𑀺. 𑀢𑀲𑁆𑀫𑀸 𑀬𑀼𑀢𑁆𑀢𑀫𑁂𑀯𑁂𑀢𑀦𑁆𑀢𑀺. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀤𑀦𑁆𑀢𑁄 𑀅𑀯𑀺𑀦𑀻𑀢𑁄 𑀅𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀏𑀢𑁆𑀣 𑀧𑀦 𑀅𑀦𑀺𑀩𑁆𑀩𑀺𑀲𑀢𑀸𑀬 𑀅𑀤𑀦𑁆𑀢𑁄. 𑀅𑀲𑀺𑀓𑁆𑀔𑀺𑀢𑀯𑀺𑀦𑀬𑀢𑀸𑀬 𑀅𑀯𑀺𑀦𑀻𑀢𑁄. 𑀅𑀦𑀺𑀩𑁆𑀩𑀼𑀢𑀓𑀺𑀮𑁂𑀲𑀢𑀸𑀬 𑀅𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀢𑀸𑀤𑀺𑀲𑁄 𑀧𑀭𑀁 𑀤𑀫𑁂𑀲𑁆𑀲𑀢𑀺, 𑀦𑀺𑀩𑁆𑀩𑀺𑀲𑀁 𑀓𑀭𑀺𑀲𑁆𑀲𑀢𑀺, 𑀯𑀺𑀦𑁂𑀲𑁆𑀲𑀢𑀺 𑀯𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀸𑀧𑁂𑀲𑁆𑀲𑀢𑀺, 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀺 𑀯𑀸 𑀢𑀲𑁆𑀲 𑀓𑀺𑀮𑁂𑀲𑁂 𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀫𑁂𑀯 𑀔𑁄, 𑀘𑀼𑀦𑁆𑀤, 𑀯𑀺𑀳𑀺𑀁𑀲𑀓𑀲𑁆𑀲…𑀧𑁂… 𑀧𑀭𑀺𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀏𑀢𑁆𑀣 𑀧𑀦 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑀣𑀸 𑀳𑀺 𑀅𑀢𑁆𑀢𑀦𑀸 𑀅𑀧𑀮𑀺𑀧𑀧𑀮𑀺𑀧𑀦𑁆𑀦𑁄 𑀧𑀭𑀁 𑀧𑀮𑀺𑀧𑀧𑀮𑀺𑀧𑀦𑁆𑀦𑀁 𑀉𑀤𑁆𑀥𑀭𑀺𑀲𑁆𑀲𑀢𑀺, 𑀤𑀦𑁆𑀢𑁄 𑀤𑀫𑁂𑀲𑁆𑀲𑀢𑀺, 𑀯𑀺𑀦𑀻𑀢𑁄 𑀯𑀺𑀦𑁂𑀲𑁆𑀲𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻𑀢𑀺. 𑀓𑀺𑀁 𑀧𑀦 𑀢𑀦𑁆𑀢𑀺? 𑀅𑀧𑀮𑀺𑀧𑀧𑀮𑀺𑀧𑀦𑁆𑀦𑀢𑁆𑀢𑀁, 𑀤𑀦𑁆𑀢𑀢𑁆𑀢𑀁 𑀯𑀺𑀦𑀻𑀢𑀢𑁆𑀢𑀁 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀜𑁆𑀘, 𑀏𑀯𑀫𑁂𑀯 𑀔𑁄, 𑀘𑀼𑀦𑁆𑀤, 𑀯𑀺𑀳𑀺𑀁𑀲𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀅𑀯𑀺𑀳𑀺𑀁𑀲𑀸 𑀳𑁄𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀸𑀬. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁄 𑀅𑀢𑁆𑀢𑀦𑀸 𑀅𑀯𑀺𑀳𑀺𑀁𑀲𑀓𑁄, 𑀢𑀲𑁆𑀲 𑀬𑀸 𑀅𑀯𑀺𑀳𑀺𑀁𑀲𑀸, 𑀅𑀬𑀁 𑀬𑀸 𑀏𑀲𑀸 𑀯𑀺𑀳𑀺𑀁𑀲𑀓𑀲𑁆𑀲 𑀧𑀭𑀲𑁆𑀲 𑀯𑀺𑀳𑀺𑀁𑀲𑀸, 𑀢𑀲𑁆𑀲𑀸 𑀧𑀭𑀺𑀦𑀺𑀩𑁆𑀩𑀸𑀦𑀸𑀬 𑀳𑁄𑀢𑀺, 𑀅𑀢𑁆𑀢𑀦𑀸 𑀳𑀺 𑀅𑀯𑀺𑀳𑀺𑀁𑀲𑀓𑁄 𑀧𑀭𑀲𑁆𑀲 𑀯𑀺𑀳𑀺𑀁𑀲𑀸𑀘𑁂𑀢𑀦𑀁 𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀓𑀺𑀁 𑀧𑀦 𑀢𑀦𑁆𑀢𑀺? 𑀅𑀯𑀺𑀳𑀺𑀁𑀲𑀓𑀢𑁆𑀢𑀫𑁂𑀯. 𑀬𑀜𑁆𑀳𑀺 𑀬𑁂𑀦 𑀅𑀢𑁆𑀢𑀦𑀸 𑀅𑀥𑀺𑀕𑀢𑀁 𑀳𑁄𑀢𑀺, 𑀲𑁄 𑀧𑀭𑀁 𑀢𑀤𑀢𑁆𑀣𑀸𑀬 𑀲𑀫𑀸𑀤𑀧𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺.

𑀅𑀣 𑀯𑀸 𑀬𑀣𑀸 𑀅𑀢𑁆𑀢𑀦𑀸 𑀅𑀧𑀮𑀺𑀧𑀦𑁆𑀦𑁄 𑀤𑀦𑁆𑀢𑁄 𑀯𑀺𑀦𑀻𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑀁 𑀧𑀮𑀺𑀧𑀧𑀮𑀺𑀧𑀦𑁆𑀦𑀁 𑀅𑀤𑀦𑁆𑀢𑀁 𑀅𑀯𑀺𑀦𑀻𑀢𑀁 𑀅𑀧𑀭𑀺𑀦𑀺𑀩𑁆𑀩𑀼𑀢𑀜𑁆𑀘 𑀉𑀤𑁆𑀥𑀭𑀺𑀲𑁆𑀲𑀢𑀺 𑀤𑀫𑁂𑀲𑁆𑀲𑀢𑀺 𑀯𑀺𑀦𑁂𑀲𑁆𑀲𑀢𑀺 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀏𑀯𑀫𑁂𑀯 𑀯𑀺𑀳𑀺𑀁𑀲𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀯𑀺𑀳𑀺𑀁𑀲𑀸𑀧𑀳𑀸𑀦𑀸𑀬 𑀫𑀕𑁆𑀕𑀁 𑀪𑀸𑀯𑀬𑀢𑁄 𑀉𑀧𑁆𑀧𑀦𑁆𑀦𑀸 𑀅𑀯𑀺𑀳𑀺𑀁𑀲𑀸 𑀳𑁄𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀸𑀬. 𑀧𑀭𑀺𑀦𑀺𑀩𑁆𑀩𑀼𑀢𑁄 𑀯𑀺𑀬 𑀳𑀺 𑀅𑀧𑀭𑀺𑀦𑀺𑀩𑁆𑀩𑀼𑀢𑀁 𑀅𑀯𑀺𑀳𑀺𑀁𑀲𑀸𑀘𑁂𑀢𑀦𑀸𑀯 𑀯𑀺𑀳𑀺𑀁𑀲𑀸𑀘𑁂𑀢𑀦𑀁 𑀧𑀭𑀺𑀦𑀺𑀩𑁆𑀩𑀸𑀧𑁂𑀢𑀼𑀁 𑀲𑀫𑀢𑁆𑀣𑀸. 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀫𑁂𑀯 𑀔𑁄, 𑀘𑀼𑀦𑁆𑀤𑀸’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼. 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀧𑀦 𑀅𑀦𑀼𑀧𑀤𑀬𑁄𑀚𑀦𑀸 𑀦 𑀓𑀢𑀸𑀢𑀺.

𑁮𑁮. 𑀏𑀯𑀁 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀧𑀦𑁂 𑀲𑀫𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀤𑁂𑀲𑀦𑀁 𑀦𑀺𑀕𑀫𑁂𑀢𑁆𑀯𑀸 𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀁 𑀦𑀺𑀬𑁄𑀚𑁂𑀢𑀼𑀁 𑀇𑀢𑀺 𑀔𑁄, 𑀘𑀼𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀮𑁆𑀮𑁂𑀔𑀧𑀭𑀺𑀬𑀸𑀬𑁄𑀢𑀺 𑀲𑀮𑁆𑀮𑁂𑀔𑀓𑀸𑀭𑀡𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣 𑀏𑀢𑁆𑀣 𑀅𑀯𑀺𑀳𑀺𑀁𑀲𑀸𑀤𑀬𑁄 𑀏𑀯 𑀯𑀺𑀳𑀺𑀁𑀲𑀸𑀤𑀻𑀦𑀁 𑀲𑀮𑁆𑀮𑁂𑀔𑀦𑀢𑁄 𑀲𑀮𑁆𑀮𑁂𑀔𑀓𑀸𑀭𑀡𑀁. 𑀢𑁂𑀲𑀁 𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑁂𑀢𑀩𑁆𑀩𑀢𑁄 𑀘𑀺𑀢𑁆𑀢𑀼𑀧𑀸𑀤𑀓𑀸𑀭𑀡𑀁, 𑀯𑀺𑀳𑀺𑀁𑀲𑀸𑀤𑀺, 𑀧𑀭𑀺𑀓𑁆𑀓𑀫𑀦𑀲𑁆𑀲 𑀳𑁂𑀢𑀼𑀢𑁄 𑀧𑀭𑀺𑀓𑁆𑀓𑀫𑀦𑀓𑀸𑀭𑀡𑀁, 𑀉𑀧𑀭𑀺𑀪𑀸𑀕𑀦𑀺𑀧𑁆𑀨𑀸𑀤𑀦𑀢𑁄 𑀉𑀧𑀭𑀺𑀪𑀸𑀕𑀓𑀸𑀭𑀡𑀁, 𑀯𑀺𑀳𑀺𑀁𑀲𑀸𑀤𑀻𑀦𑀁 𑀧𑀭𑀺𑀦𑀺𑀩𑁆𑀩𑀸𑀧𑀦𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀳𑀺𑀢𑁂𑀲𑀺𑀦𑀸𑀢𑀺 𑀳𑀺𑀢𑀁 𑀏𑀲𑀦𑁆𑀢𑁂𑀦. 𑀅𑀦𑀼𑀓𑀫𑁆𑀧𑀓𑁂𑀦𑀸𑀢𑀺 𑀅𑀦𑀼𑀓𑀫𑁆𑀧𑀫𑀸𑀦𑁂𑀦. 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸𑀢𑀺 𑀅𑀦𑀼𑀓𑀫𑁆𑀧𑀁 𑀘𑀺𑀢𑁆𑀢𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸, 𑀧𑀭𑀺𑀘𑁆𑀘𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀢𑀁 𑀯𑁄 𑀢𑀁 𑀫𑀬𑀸𑀢𑀺 𑀢𑀁 𑀫𑀬𑀸 𑀇𑀫𑁂 𑀧𑀜𑁆𑀘 𑀧𑀭𑀺𑀬𑀸𑀬𑁂 𑀤𑀲𑁆𑀲𑁂𑀦𑁆𑀢𑁂𑀦 𑀢𑀼𑀫𑁆𑀳𑀸𑀓𑀁 𑀓𑀢𑀁. 𑀏𑀢𑁆𑀢𑀓𑀫𑁂𑀯 𑀳𑀺 𑀅𑀦𑀼𑀓𑀫𑁆𑀧𑀓𑀲𑁆𑀲 𑀲𑀢𑁆𑀣𑀼 𑀓𑀺𑀘𑁆𑀘𑀁, 𑀬𑀤𑀺𑀤𑀁 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀸. 𑀇𑀢𑁄 𑀧𑀭𑀁 𑀧𑀦 𑀧𑀝𑀺𑀧𑀢𑁆𑀢𑀺 𑀦𑀸𑀫 𑀲𑀸𑀯𑀓𑀸𑀦𑀁 𑀓𑀺𑀘𑁆𑀘𑀁. 𑀢𑁂𑀦𑀸𑀳 𑀏𑀢𑀸𑀦𑀺, 𑀘𑀼𑀦𑁆𑀤, 𑀭𑀼𑀓𑁆𑀔𑀫𑀽𑀮𑀸𑀦𑀺…𑀧𑁂… 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻𑀢𑀺.

𑀢𑀢𑁆𑀣 𑀘 𑀭𑀼𑀓𑁆𑀔𑀫𑀽𑀮𑀸𑀦𑀻𑀢𑀺 𑀇𑀫𑀺𑀦𑀸 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀢𑀺. 𑀲𑀼𑀜𑁆𑀜𑀸𑀕𑀸𑀭𑀸𑀦𑀻𑀢𑀺 𑀇𑀫𑀺𑀦𑀸 𑀚𑀦𑀯𑀺𑀯𑀺𑀢𑁆𑀢𑀝𑁆𑀞𑀸𑀦𑀁. 𑀉𑀪𑀬𑁂𑀦𑀸𑀧𑀺 𑀘 𑀬𑁄𑀕𑀸𑀦𑀼𑀭𑀽𑀧𑀲𑁂𑀦𑀸𑀲𑀦𑀫𑀸𑀘𑀺𑀓𑁆𑀔𑀢𑀺, 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑀺. 𑀛𑀸𑀬𑀣𑀸𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀸𑀦𑀺, 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀘 𑀅𑀦𑀺𑀘𑁆𑀘𑀸𑀤𑀺𑀢𑁄 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀺 𑀉𑀧𑀦𑀺𑀚𑁆𑀛𑀸𑀬𑀣, 𑀲𑀫𑀣𑀜𑁆𑀘 𑀯𑀺𑀧𑀲𑁆𑀲𑀦𑀜𑁆𑀘 𑀯𑀟𑁆𑀠𑁂𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀸 𑀧𑀫𑀸𑀤𑀢𑁆𑀣𑀸𑀢𑀺 𑀫𑀸 𑀧𑀫𑀚𑁆𑀚𑀺𑀢𑁆𑀣. 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣𑀸𑀢𑀺 𑀬𑁂 𑀳𑀺 𑀧𑀼𑀩𑁆𑀩𑁂 𑀤𑀳𑀭𑀓𑀸𑀮𑁂, 𑀆𑀭𑁄𑀕𑁆𑀬𑀓𑀸𑀮𑁂, 𑀲𑀢𑁆𑀢𑀲𑀧𑁆𑀧𑀸𑀬𑀸𑀤𑀺𑀲𑀫𑁆𑀧𑀢𑁆𑀢𑀺𑀓𑀸𑀮𑁂, 𑀲𑀢𑁆𑀣𑀼 𑀲𑀫𑁆𑀫𑀼𑀔𑀻𑀪𑀸𑀯𑀓𑀸𑀮𑁂 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀺𑀭𑀳𑀺𑀢𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀫𑀗𑁆𑀕𑀼𑀮𑀪𑀢𑁆𑀢𑀸 𑀳𑀼𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀫𑀦𑀼𑀪𑁄𑀦𑁆𑀢𑀸 𑀧𑀫𑀚𑁆𑀚𑀦𑁆𑀢𑀺, 𑀢𑁂 𑀧𑀘𑁆𑀙𑀸 𑀚𑀭𑀸𑀓𑀸𑀮𑁂, 𑀭𑁄𑀕𑀓𑀸𑀮𑁂, 𑀫𑀭𑀡𑀓𑀸𑀮𑁂, 𑀯𑀺𑀧𑀢𑁆𑀢𑀺𑀓𑀸𑀮𑁂, 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀘 𑀢𑀁 𑀧𑀼𑀩𑁆𑀩𑁂 𑀧𑀫𑀸𑀤𑀯𑀺𑀳𑀸𑀭𑀁 𑀅𑀦𑀼𑀲𑁆𑀲𑀭𑀦𑁆𑀢𑀸, 𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑀸𑀮𑀓𑀺𑀭𑀺𑀬𑀜𑁆𑀘 𑀪𑀸𑀭𑀺𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑁄𑀦𑁆𑀢𑀺, 𑀢𑀼𑀫𑁆𑀳𑁂 𑀧𑀦 𑀢𑀸𑀤𑀺𑀲𑀸 𑀫𑀸 𑀅𑀳𑀼𑀯𑀢𑁆𑀣𑀸𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣𑀸’’𑀢𑀺. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 ‘‘𑀛𑀸𑀬𑀣 𑀫𑀸 𑀧𑀫𑀸𑀤𑀢𑁆𑀣𑀸’’𑀢𑀺 𑀢𑀼𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻, 𑀑𑀯𑀸𑀤𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀮𑁆𑀮𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.