𑁧. 𑀫𑀽𑀮𑀧𑀭𑀺𑀬𑀸𑀬𑀯𑀕𑁆𑀕𑁄

𑁧. 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀬𑀁 𑀧𑀦𑁂𑀢𑀁 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀓𑀁 𑀦𑀺𑀤𑀸𑀦𑀁. 𑀢𑀢𑁆𑀣 𑀏𑀯𑀦𑁆𑀢𑀺 𑀦𑀺𑀧𑀸𑀢𑀧𑀤𑀁. 𑀫𑁂𑀢𑀺𑀆𑀤𑀻𑀦𑀺 𑀦𑀸𑀫𑀧𑀤𑀸𑀦𑀺. 𑀉𑀓𑁆𑀓𑀝𑁆𑀞𑀸𑀬𑀁 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀯𑀻𑀢𑀺 𑀉𑀧𑀲𑀕𑁆𑀕𑀧𑀤𑀁, 𑀳𑀭𑀢𑀻𑀢𑀺 𑀆𑀔𑁆𑀬𑀸𑀢𑀧𑀤𑀦𑁆𑀢𑀺 𑀇𑀫𑀺𑀦𑀸 𑀢𑀸𑀯 𑀦𑀬𑁂𑀦 𑀧𑀤𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀢𑁆𑀣𑀢𑁄 𑀧𑀦 𑀏𑀯𑀁-𑀲𑀤𑁆𑀤𑁄 𑀢𑀸𑀯 𑀉𑀧𑀫𑀽𑀧𑀤𑁂𑀲𑀲𑀫𑁆𑀧𑀳𑀁𑀲𑀦𑀕𑀭𑀳𑀡𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑀸𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀸𑀤𑀺𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸𑀳𑁂𑀲 𑁋 ‘‘𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀥. 𑀧. 𑁫𑁩) 𑀉𑀧𑀫𑀸𑀬𑀁 𑀆𑀕𑀢𑁄. ‘‘𑀏𑀯𑀁 𑀢𑁂 𑀅𑀪𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀝𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁨𑁨) 𑀉𑀧𑀤𑁂𑀲𑁂. ‘‘𑀏𑀯𑀫𑁂𑀢𑀁 𑀪𑀕𑀯𑀸, 𑀏𑀯𑀫𑁂𑀢𑀁 𑀲𑀼𑀕𑀢𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀲𑀫𑁆𑀧𑀳𑀁𑀲𑀦𑁂. ‘‘𑀏𑀯𑀫𑁂𑀯𑀁 𑀧𑀦𑀸𑀬𑀁 𑀯𑀲𑀮𑀻 𑀬𑀲𑁆𑀫𑀺𑀁 𑀯𑀸 𑀢𑀲𑁆𑀫𑀺𑀁 𑀯𑀸 𑀢𑀲𑁆𑀲 𑀫𑀼𑀡𑁆𑀟𑀓𑀲𑁆𑀲 𑀲𑀫𑀡𑀓𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁮𑁭) 𑀕𑀭𑀳𑀡𑁂. ‘‘𑀏𑀯𑀁 𑀪𑀦𑁆𑀢𑁂𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧) 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁂. ‘‘𑀏𑀯𑀁 𑀩𑁆𑀬𑀸𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁯𑁮) 𑀆𑀓𑀸𑀭𑁂. ‘‘𑀏𑀳𑀺 𑀢𑁆𑀯𑀁, 𑀫𑀸𑀡𑀯𑀓, 𑀬𑁂𑀦 𑀲𑀫𑀡𑁄 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀲𑀫𑀡𑀁, 𑀆𑀦𑀦𑁆𑀤𑀁, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙 𑁋 ‘𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄, 𑀪𑀯𑀦𑁆𑀢𑀁 𑀆𑀦𑀦𑁆𑀤𑀁, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀻’𑀢𑀺, 𑀏𑀯𑀜𑁆𑀘 𑀯𑀤𑁂𑀳𑀺 𑀲𑀸𑀥𑀼 𑀓𑀺𑀭 𑀪𑀯𑀁 𑀆𑀦𑀦𑁆𑀤𑁄 𑀬𑁂𑀦 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁, 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁪𑁫) 𑀦𑀺𑀤𑀲𑁆𑀲𑀦𑁂. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀓𑀸𑀮𑀸𑀫𑀸, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸𑀢𑀺? 𑀅𑀓𑀼𑀲𑀮𑀸, 𑀪𑀦𑁆𑀢𑁂. 𑀲𑀸𑀯𑀚𑁆𑀚𑀸 𑀯𑀸 𑀅𑀦𑀯𑀚𑁆𑀚𑀸 𑀯𑀸𑀢𑀺? 𑀲𑀸𑀯𑀚𑁆𑀚𑀸, 𑀪𑀦𑁆𑀢𑁂. 𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀯𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀯𑀸𑀢𑀺? 𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀪𑀦𑁆𑀢𑁂. 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀸, 𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻𑀢𑀺? 𑀲𑀫𑀢𑁆𑀢𑀸, 𑀪𑀦𑁆𑀢𑁂, 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀅𑀯𑀥𑀸𑀭𑀡𑁂. 𑀲𑁆𑀯𑀸𑀬𑀫𑀺𑀥 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑁂𑀲𑀼 𑀤𑀝𑁆𑀞𑀩𑁆𑀩𑁄.

𑀢𑀢𑁆𑀣 𑀆𑀓𑀸𑀭𑀝𑁆𑀞𑁂𑀦 𑀏𑀯𑀁𑀲𑀤𑁆𑀤𑁂𑀦 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺 𑁋 𑀦𑀸𑀦𑀸𑀦𑀬𑀦𑀺𑀧𑀼𑀡𑀁 𑀅𑀦𑁂𑀓𑀚𑁆𑀛𑀸𑀲𑀬𑀲𑀫𑀼𑀝𑁆𑀞𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁 𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀓𑀲𑀓𑀪𑀸𑀲𑀸𑀦𑀼𑀭𑀽𑀧𑀢𑁄 𑀲𑁄𑀢𑀧𑀣𑀫𑀸𑀕𑀘𑁆𑀙𑀦𑁆𑀢𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼𑀁, 𑀲𑀩𑁆𑀩𑀣𑀸𑀫𑁂𑀦 𑀧𑀦 𑀲𑁄𑀢𑀼𑀓𑀸𑀫𑀢𑀁 𑀚𑀦𑁂𑀢𑁆𑀯𑀸𑀧𑀺 𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸𑀧𑀺 𑀏𑀓𑁂𑀦𑀸𑀓𑀸𑀭𑁂𑀦 𑀲𑀼𑀢𑀦𑁆𑀢𑀺.

𑀦𑀺𑀤𑀲𑁆𑀲𑀦𑀝𑁆𑀞𑁂𑀦 ‘‘𑀦𑀸𑀳𑀁 𑀲𑀬𑀫𑁆𑀪𑀽, 𑀦 𑀫𑀬𑀸 𑀇𑀤𑀁 𑀲𑀘𑁆𑀙𑀺𑀓𑀢’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀦𑁆𑀢𑁄 𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸𑀧𑀺 𑀏𑀯𑀁 𑀲𑀼𑀢𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀓𑀮𑀁 𑀲𑀼𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀺.

𑀅𑀯𑀥𑀸𑀭𑀡𑀝𑁆𑀞𑁂𑀦 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄, 𑀕𑀢𑀺𑀫𑀦𑁆𑀢𑀸𑀦𑀁, 𑀲𑀢𑀺𑀫𑀦𑁆𑀢𑀸𑀦𑀁, 𑀥𑀺𑀢𑀺𑀫𑀦𑁆𑀢𑀸𑀦𑀁, 𑀉𑀧𑀝𑁆𑀞𑀸𑀓𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁧𑁯-𑁨𑁨𑁩) 𑀏𑀯𑀁 𑀪𑀕𑀯𑀢𑀸, ‘‘𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀢𑁆𑀣𑀓𑀼𑀲𑀮𑁄 𑀥𑀫𑁆𑀫𑀓𑀼𑀲𑀮𑁄 𑀩𑁆𑀬𑀜𑁆𑀚𑀦𑀓𑀼𑀲𑀮𑁄 𑀦𑀺𑀭𑀼𑀢𑁆𑀢𑀺𑀓𑀼𑀲𑀮𑁄 𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄’’𑀢𑀺 (𑀅. 𑀦𑀺. 𑁫.𑁧𑁬𑁯) 𑀏𑀯𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀘 𑀧𑀲𑀢𑁆𑀣𑀪𑀸𑀯𑀸𑀦𑀼𑀭𑀽𑀧𑀁 𑀅𑀢𑁆𑀢𑀦𑁄 𑀥𑀸𑀭𑀡𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀢𑀸𑀦𑀁 𑀲𑁄𑀢𑀼𑀓𑀫𑁆𑀬𑀢𑀁 𑀚𑀦𑁂𑀢𑀺 ‘‘𑀏𑀯𑀁 𑀫𑁂 𑀲𑀼𑀢𑀁, 𑀢𑀜𑁆𑀘 𑀔𑁄 𑀅𑀢𑁆𑀣𑀢𑁄 𑀯𑀸 𑀩𑁆𑀬𑀜𑁆𑀚𑀦𑀢𑁄 𑀯𑀸 𑀅𑀦𑀽𑀦𑀫𑀦𑀥𑀺𑀓𑀁, 𑀏𑀯𑀫𑁂𑀯 𑀦 𑀅𑀜𑁆𑀜𑀣𑀸 𑀤𑀝𑁆𑀞𑀩𑁆𑀩’’𑀦𑁆𑀢𑀺.

𑀫𑁂-𑀲𑀤𑁆𑀤𑁄 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺𑀲𑁆𑀲 ‘‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁧) 𑀫𑀬𑀸𑀢𑀺 𑀅𑀢𑁆𑀣𑁄. ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁮𑁮) 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑁄. ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁯) 𑀫𑀫𑀸𑀢𑀺 𑀅𑀢𑁆𑀣𑁄. 𑀇𑀥 𑀧𑀦 ‘‘𑀫𑀬𑀸 𑀲𑀼𑀢’’𑀦𑁆𑀢𑀺 𑀘 ‘‘𑀫𑀫 𑀲𑀼𑀢’’𑀦𑁆𑀢𑀺 𑀘 𑀅𑀢𑁆𑀣𑀤𑁆𑀯𑀬𑁂 𑀬𑀼𑀚𑁆𑀚𑀢𑀺.

𑀲𑀼𑀢𑀦𑁆𑀢𑀺 𑀅𑀬𑀁 𑀲𑀼𑀢-𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀘 𑀅𑀦𑀼𑀧𑀲𑀕𑁆𑀕𑁄 𑀘 𑀕𑀫𑀦-𑀯𑀺𑀲𑁆𑀲𑀼𑀢-𑀓𑀺𑀮𑀺𑀦𑁆𑀦-𑀉𑀧𑀘𑀺𑀢𑀸𑀦𑀼𑀬𑁄𑀕-𑀲𑁄𑀢𑀯𑀺𑀜𑁆𑀜𑁂𑀬𑁆𑀬-𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀸𑀤𑀺𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑀺𑀲𑁆𑀲 ‘‘𑀲𑁂𑀦𑀸𑀬 𑀧𑀲𑀼𑀢𑁄’’𑀢𑀺𑀆𑀤𑀻𑀲𑀼 𑀕𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀲𑀼𑀢𑀥𑀫𑁆𑀫𑀲𑁆𑀲 𑀧𑀲𑁆𑀲𑀢𑁄’’𑀢𑀺𑀆𑀤𑀻𑀲𑀼 (𑀉𑀤𑀸. 𑁧𑁧) 𑀯𑀺𑀲𑁆𑀲𑀼𑀢𑀥𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄, ‘‘𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲𑀸𑀢𑀺’’𑀆𑀤𑀻𑀲𑀼 (𑀧𑀸𑀘𑀺. 𑁬𑁫𑁭) 𑀓𑀺𑀮𑀺𑀦𑁆𑀦𑀸 𑀓𑀺𑀮𑀺𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀢𑀼𑀫𑁆𑀳𑁂𑀳𑀺 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓’’𑀦𑁆𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁭.𑁧𑁨) 𑀉𑀧𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀬𑁂 𑀛𑀸𑀦𑀧𑀲𑀼𑀢𑀸 𑀥𑀻𑀭𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁮𑁧) 𑀛𑀸𑀦𑀸𑀦𑀼𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁪𑁧) 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁩𑁯) 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀥𑀭𑁄𑀢𑀺 𑀅𑀢𑁆𑀣𑁄. 𑀇𑀥 𑀧𑀦𑀲𑁆𑀲 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 ‘‘𑀉𑀧𑀥𑀸𑀭𑀺𑀢’’𑀦𑁆𑀢𑀺 𑀯𑀸 ‘‘𑀉𑀧𑀥𑀸𑀭𑀡’’𑀦𑁆𑀢𑀺 𑀯𑀸𑀢𑀺 𑀅𑀢𑁆𑀣𑁄. 𑀫𑁂-𑀲𑀤𑁆𑀤𑀲𑁆𑀲 𑀳𑀺 𑀫𑀬𑀸𑀢𑀺 𑀅𑀢𑁆𑀣𑁂 𑀲𑀢𑀺 ‘‘𑀏𑀯𑀁 𑀫𑀬𑀸 𑀲𑀼𑀢𑀁 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀺𑀢’’𑀦𑁆𑀢𑀺 𑀬𑀼𑀚𑁆𑀚𑀢𑀺. 𑀫𑀫𑀸𑀢𑀺 𑀅𑀢𑁆𑀣𑁂 𑀲𑀢𑀺 ‘‘𑀏𑀯𑀁 𑀫𑀫 𑀲𑀼𑀢𑀁 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀡’’𑀦𑁆𑀢𑀺 𑀬𑀼𑀚𑁆𑀚𑀢𑀺.

𑀏𑀯𑀫𑁂𑀢𑁂𑀲𑀼 𑀢𑀻𑀲𑀼 𑀧𑀤𑁂𑀲𑀼 𑀏𑀯𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑀲𑁆𑀲𑀦𑀁. 𑀫𑁂𑀢𑀺 𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀲𑀼𑀢𑀦𑁆𑀢𑀺 𑀅𑀲𑁆𑀲𑀯𑀦𑀪𑀸𑀯𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀅𑀦𑀽𑀦𑀸𑀦𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦𑀁. 𑀢𑀣𑀸 𑀏𑀯𑀦𑁆𑀢𑀺 𑀢𑀲𑁆𑀲𑀸 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀧𑀯𑀢𑁆𑀢𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀪𑀸𑀯𑀧𑁆𑀧𑀓𑀸𑀲𑀦𑀁. 𑀫𑁂𑀢𑀺 𑀅𑀢𑁆𑀢𑀧𑁆𑀧𑀓𑀸𑀲𑀦𑀁. 𑀲𑀼𑀢𑀦𑁆𑀢𑀺 𑀥𑀫𑁆𑀫𑀧𑁆𑀧𑀓𑀸𑀲𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑁄 ‘‘𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀫𑀬𑀸 𑀦 𑀅𑀜𑁆𑀜𑀁 𑀓𑀢𑀁, 𑀇𑀤𑀁 𑀧𑀦 𑀓𑀢𑀁, 𑀅𑀬𑀁 𑀥𑀫𑁆𑀫𑁄 𑀲𑀼𑀢𑁄’’𑀢𑀺.

𑀢𑀣𑀸 𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀧𑁆𑀧𑀓𑀸𑀲𑀦𑀁. 𑀫𑁂𑀢𑀺 𑀧𑀼𑀕𑁆𑀕𑀮𑀧𑁆𑀧𑀓𑀸𑀲𑀦𑀁. 𑀲𑀼𑀢𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀧𑁆𑀧𑀓𑀸𑀲𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀲𑀼𑀢𑁆𑀢𑀁 𑀦𑀺𑀤𑁆𑀤𑀺𑀲𑀺𑀲𑁆𑀲𑀸𑀫𑀺, 𑀢𑀁 𑀫𑀬𑀸 𑀏𑀯𑀁 𑀲𑀼𑀢𑀦𑁆𑀢𑀺.

𑀢𑀣𑀸 𑀏𑀯𑀦𑁆𑀢𑀺 𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀁 𑀳𑁄𑀢𑀺, 𑀢𑀲𑁆𑀲 𑀦𑀸𑀦𑀸𑀓𑀸𑀭𑀦𑀺𑀤𑁆𑀤𑁂𑀲𑁄. 𑀏𑀯𑀦𑁆𑀢𑀺 𑀳𑀺 𑀅𑀬𑀁 𑀆𑀓𑀸𑀭𑀧𑀜𑁆𑀜𑀢𑁆𑀢𑀺, 𑀫𑁂𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄, 𑀲𑀼𑀢𑀦𑁆𑀢𑀺 𑀯𑀺𑀲𑀬𑀦𑀺𑀤𑁆𑀤𑁂𑀲𑁄. 𑀏𑀢𑁆𑀢𑀸𑀯𑀢𑀸 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁂𑀦 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 𑀢𑀁𑀲𑀫𑀗𑁆𑀕𑀺𑀦𑁄 𑀓𑀢𑁆𑀢𑀼𑀯𑀺𑀲𑀬𑁂 𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀁 𑀳𑁄𑀢𑀺.

𑀅𑀣 𑀯𑀸 𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄. 𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄. 𑀫𑁂𑀢𑀺 𑀉𑀪𑀬𑀓𑀺𑀘𑁆𑀘𑀬𑀼𑀢𑁆𑀢𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀫𑀬𑀸 𑀲𑀯𑀦𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑀸 𑀧𑀼𑀕𑁆𑀕𑀮𑁂𑀦 𑀯𑀺𑀜𑁆𑀜𑀸𑀡𑀯𑀲𑁂𑀦 𑀮𑀤𑁆𑀥𑀲𑀯𑀦𑀓𑀺𑀘𑁆𑀘𑀯𑁄𑀳𑀸𑀭𑁂𑀦 𑀲𑀼𑀢𑀦𑁆𑀢𑀺.

𑀢𑀢𑁆𑀣 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀓𑀺𑀜𑁆𑀳𑁂𑀢𑁆𑀣 𑀢𑀁 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺, 𑀬𑀁 𑀏𑀯𑀦𑁆𑀢𑀺 𑀯𑀸 𑀫𑁂𑀢𑀺 𑀯𑀸 𑀦𑀺𑀤𑁆𑀤𑁂𑀲𑀁 𑀮𑀪𑁂𑀣? 𑀲𑀼𑀢𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀬𑀜𑁆𑀳𑀺 𑀢𑀫𑁂𑀢𑁆𑀣 𑀲𑁄𑀢𑁂𑀦 𑀉𑀧𑀮𑀤𑁆𑀥𑀁, 𑀢𑀁 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀦𑁆𑀢𑀺.

𑀢𑀣𑀸 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀢𑀁 𑀢𑀁 𑀉𑀧𑀸𑀤𑀸𑀬 𑀯𑀢𑁆𑀢𑀩𑁆𑀩𑀢𑁄 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺. 𑀲𑀼𑀢𑀦𑁆𑀢𑀺 𑀤𑀺𑀝𑁆𑀞𑀸𑀤𑀻𑀦𑀺 𑀉𑀧𑀦𑀺𑀥𑀸𑀬 𑀯𑀢𑁆𑀢𑀩𑁆𑀩𑀢𑁄 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺. 𑀏𑀢𑁆𑀣 𑀘 𑀏𑀯𑀦𑁆𑀢𑀺 𑀯𑀘𑀦𑁂𑀦 𑀅𑀲𑀫𑁆𑀫𑁄𑀳𑀁 𑀤𑀻𑀧𑁂𑀢𑀺. 𑀦 𑀳𑀺 𑀲𑀫𑁆𑀫𑀽𑀴𑁆𑀳𑁄 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀫𑀢𑁆𑀣𑁄 𑀳𑁄𑀢𑀺. 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀲𑀼𑀢𑀲𑁆𑀲 𑀅𑀲𑀫𑁆𑀫𑁄𑀲𑀁 𑀤𑀻𑀧𑁂𑀢𑀺. 𑀬𑀲𑁆𑀲 𑀳𑀺 𑀲𑀼𑀢𑀁 𑀲𑀫𑁆𑀫𑀼𑀝𑁆𑀞𑀁 𑀳𑁄𑀢𑀺, 𑀦 𑀲𑁄 𑀓𑀸𑀮𑀦𑁆𑀢𑀭𑁂𑀦 𑀫𑀬𑀸 𑀲𑀼𑀢𑀦𑁆𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀇𑀘𑁆𑀘𑀲𑁆𑀲 𑀅𑀲𑀫𑁆𑀫𑁄𑀳𑁂𑀦 𑀧𑀜𑁆𑀜𑀸𑀲𑀺𑀤𑁆𑀥𑀺, 𑀅𑀲𑀫𑁆𑀫𑁄𑀲𑁂𑀦 𑀧𑀦 𑀲𑀢𑀺𑀲𑀺𑀤𑁆𑀥𑀺. 𑀢𑀢𑁆𑀣 𑀧𑀜𑁆𑀜𑀸 𑀧𑀼𑀩𑁆𑀩𑀗𑁆𑀕𑀫𑀸𑀬 𑀲𑀢𑀺𑀬𑀸 𑀩𑁆𑀬𑀜𑁆𑀚𑀦𑀸𑀯𑀥𑀸𑀭𑀡𑀲𑀫𑀢𑁆𑀣𑀢𑀸, 𑀲𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀬 𑀧𑀜𑁆𑀜𑀸𑀬 𑀅𑀢𑁆𑀣𑀧𑀝𑀺𑀯𑁂𑀥𑀲𑀫𑀢𑁆𑀣𑀢𑀸, 𑀢𑀤𑀼𑀪𑀬𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀓𑁄𑀲𑀲𑁆𑀲 𑀅𑀦𑀼𑀧𑀸𑀮𑀦𑀲𑀫𑀢𑁆𑀣𑀢𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀢𑁆𑀢𑀲𑀺𑀤𑁆𑀥𑀺.

𑀅𑀧𑀭𑁄 𑀦𑀬𑁄 𑁋 𑀏𑀯𑀦𑁆𑀢𑀺 𑀯𑀘𑀦𑁂𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀁 𑀤𑀻𑀧𑁂𑀢𑀺, 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀳𑀺 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀸𑀪𑀸𑀯𑀢𑁄. 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀅𑀯𑀺𑀓𑁆𑀔𑁂𑀧𑀁 𑀤𑀻𑀧𑁂𑀢𑀺, 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀲𑀯𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀦 𑀫𑀬𑀸 𑀲𑀼𑀢𑀁, 𑀧𑀼𑀦 𑀪𑀡𑀣𑀸’’𑀢𑀺 𑀪𑀡𑀢𑀺. 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀘𑁂𑀢𑁆𑀣 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀁 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀁 𑀲𑀸𑀥𑁂𑀢𑀺, 𑀲𑀫𑁆𑀫𑀸 𑀅𑀧𑀡𑀺𑀳𑀺𑀢𑀢𑁆𑀢𑀲𑁆𑀲 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀲𑁆𑀲 𑀯𑀸 𑀢𑀤𑀪𑀸𑀯𑀢𑁄. 𑀅𑀯𑀺𑀓𑁆𑀔𑁂𑀧𑁂𑀦 𑀧𑀦 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀜𑁆𑀘 𑀲𑀸𑀥𑁂𑀢𑀺. 𑀦 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀲𑁄𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀘 𑀲𑀧𑁆𑀧𑀼𑀭𑀺𑀲𑁂 𑀅𑀦𑀼𑀧𑀲𑁆𑀲𑀬𑀫𑀸𑀦𑀲𑁆𑀲 𑀲𑀯𑀦𑀁 𑀅𑀢𑁆𑀣𑀻𑀢𑀺.

𑀅𑀧𑀭𑁄 𑀦𑀬𑁄 𑁋 𑀬𑀲𑁆𑀫𑀸 𑀏𑀯𑀦𑁆𑀢𑀺 𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀁 𑀳𑁄𑀢𑀺, 𑀢𑀲𑁆𑀲 𑀦𑀸𑀦𑀸𑀓𑀸𑀭𑀦𑀺𑀤𑁆𑀤𑁂𑀲𑁄𑀢𑀺 𑀯𑀼𑀢𑁆𑀢𑀁. 𑀲𑁄 𑀘 𑀏𑀯𑀁 𑀪𑀤𑁆𑀤𑀓𑁄 𑀆𑀓𑀸𑀭𑁄 𑀦 𑀲𑀫𑁆𑀫𑀸 𑀅𑀧𑁆𑀧𑀡𑀺𑀳𑀺𑀢𑀢𑁆𑀢𑀦𑁄 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀲𑁆𑀲 𑀯𑀸 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀪𑀤𑁆𑀤𑀓𑁂𑀦 𑀆𑀓𑀸𑀭𑁂𑀦 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀁 𑀅𑀢𑁆𑀢𑀦𑁄 𑀤𑀻𑀧𑁂𑀢𑀺, 𑀲𑀼𑀢𑀦𑁆𑀢𑀺 𑀲𑀯𑀦𑀬𑁄𑀕𑁂𑀦 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀁. 𑀦 𑀳𑀺 𑀅𑀧𑁆𑀧𑀢𑀺𑀭𑀽𑀧𑀤𑁂𑀲𑁂 𑀯𑀲𑀢𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀯𑀺𑀭𑀳𑀺𑀢𑀲𑁆𑀲 𑀯𑀸 𑀲𑀯𑀦𑀁 𑀅𑀢𑁆𑀣𑀺. 𑀇𑀘𑁆𑀘𑀲𑁆𑀲 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀆𑀲𑀬𑀲𑀼𑀤𑁆𑀥𑀺 𑀲𑀺𑀤𑁆𑀥𑀸 𑀳𑁄𑀢𑀺. 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀧𑀬𑁄𑀕𑀲𑀼𑀤𑁆𑀥𑀺. 𑀢𑀸𑀬 𑀘 𑀆𑀲𑀬𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀺, 𑀧𑀬𑁄𑀕𑀲𑀼𑀤𑁆𑀥𑀺𑀬𑀸 𑀆𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀺. 𑀇𑀢𑀺 𑀧𑀬𑁄𑀕𑀸𑀲𑀬𑀲𑀼𑀤𑁆𑀥𑀲𑁆𑀲 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀲𑁆𑀲 𑀯𑀘𑀦𑀁 𑀅𑀭𑀼𑀡𑀼𑀕𑁆𑀕𑀁 𑀯𑀺𑀬 𑀲𑀽𑀭𑀺𑀬𑀲𑁆𑀲 𑀉𑀤𑀬𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀯𑀺𑀬 𑀘 𑀓𑀼𑀲𑀮𑀓𑀫𑁆𑀫𑀲𑁆𑀲 𑀅𑀭𑀳𑀢𑀺 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀁 𑀪𑀯𑀺𑀢𑀼𑀦𑁆𑀢𑀺 𑀞𑀸𑀦𑁂 𑀦𑀺𑀤𑀸𑀦𑀁 𑀞𑀧𑁂𑀦𑁆𑀢𑁄 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀺𑀫𑀸𑀳.

𑀅𑀧𑀭𑁄 𑀦𑀬𑁄 𑁋 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀤𑀻𑀧𑀓𑁂𑀦 𑀯𑀘𑀦𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀁 𑀤𑀻𑀧𑁂𑀢𑀺. 𑀲𑀼𑀢𑀦𑁆𑀢𑀺 𑀇𑀫𑀺𑀦𑀸 𑀲𑁄𑀢𑀩𑁆𑀩𑀪𑁂𑀤𑀧𑀝𑀺𑀯𑁂𑀥𑀤𑀻𑀧𑀓𑁂𑀦 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀁. 𑀏𑀯𑀦𑁆𑀢𑀺 𑀘 𑀇𑀤𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀤𑀻𑀧𑀓𑀁 𑀯𑀘𑀦𑀁 𑀪𑀸𑀲𑀫𑀸𑀦𑁄 𑁋 ‘‘𑀏𑀢𑁂 𑀫𑀬𑀸 𑀥𑀫𑁆𑀫𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸’’𑀢𑀺 𑀤𑀻𑀧𑁂𑀢𑀺. 𑀲𑀼𑀢𑀦𑁆𑀢𑀺 𑀇𑀤𑀁 𑀲𑀯𑀦𑀬𑁄𑀕𑀤𑀻𑀧𑀓𑀁 𑀯𑀘𑀦𑀁 𑀪𑀸𑀲𑀫𑀸𑀦𑁄 𑁋 ‘‘𑀩𑀳𑀽 𑀫𑀬𑀸 𑀥𑀫𑁆𑀫𑀸 𑀲𑀼𑀢𑀸 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸’’𑀢𑀺 𑀤𑀻𑀧𑁂𑀢𑀺. 𑀢𑀤𑀼𑀪𑀬𑁂𑀦𑀧𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀁 𑀤𑀻𑀧𑁂𑀦𑁆𑀢𑁄 𑀲𑀯𑀦𑁂 𑀆𑀤𑀭𑀁 𑀚𑀦𑁂𑀢𑀺. 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀜𑁆𑀳𑀺 𑀥𑀫𑁆𑀫𑀁 𑀆𑀤𑀭𑁂𑀦 𑀅𑀲𑁆𑀲𑀼𑀡𑀦𑁆𑀢𑁄 𑀫𑀳𑀢𑀸 𑀳𑀺𑀢𑀸 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀻𑀢𑀺 𑀆𑀤𑀭𑀁 𑀚𑀦𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑁄 𑀲𑁄𑀢𑀩𑁆𑀩𑁄𑀢𑀺.

‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀲𑀓𑀮𑁂𑀦 𑀯𑀘𑀦𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀁 𑀅𑀢𑁆𑀢𑀦𑁄 𑀅𑀤𑀳𑀦𑁆𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀅𑀢𑀺𑀓𑁆𑀓𑀫𑀢𑀺, 𑀲𑀸𑀯𑀓𑀢𑁆𑀢𑀁 𑀧𑀝𑀺𑀚𑀸𑀦𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀑𑀓𑁆𑀓𑀫𑀢𑀺. 𑀢𑀣𑀸 𑀅𑀲𑀤𑁆𑀥𑀫𑁆𑀫𑀸 𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀺𑀢𑁆𑀢𑀁 𑀧𑀢𑀺𑀝𑁆𑀞𑀸𑀧𑁂𑀢𑀺. ‘‘𑀓𑁂𑀯𑀮𑀁 𑀲𑀼𑀢𑀫𑁂𑀯𑁂𑀢𑀁 𑀫𑀬𑀸 𑀢𑀲𑁆𑀲𑁂𑀯 𑀧𑀦 𑀪𑀕𑀯𑀢𑁄 𑀯𑀘𑀦’’𑀦𑁆𑀢𑀺 𑀤𑀻𑀧𑁂𑀦𑁆𑀢𑁄 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀢𑀺, 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑀢𑀺, 𑀚𑀺𑀦𑀯𑀘𑀦𑀁 𑀅𑀧𑁆𑀧𑁂𑀢𑀺, 𑀥𑀫𑁆𑀫𑀦𑁂𑀢𑁆𑀢𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑀺.

𑀅𑀧𑀺𑀘 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑀪𑀸𑀯𑀁 𑀅𑀧𑁆𑀧𑀝𑀺𑀚𑀸𑀦𑀦𑁆𑀢𑁄 𑀧𑀼𑀭𑀺𑀫𑀯𑀘𑀦𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀫𑀺𑀤𑀁 𑀫𑀬𑀸 𑀢𑀲𑁆𑀲 𑀪𑀕𑀯𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑀲𑁆𑀲 𑀤𑀲𑀩𑀮𑀥𑀭𑀲𑁆𑀲 𑀆𑀲𑀪𑀝𑁆𑀞𑀸𑀦𑀝𑁆𑀞𑀸𑀬𑀺𑀦𑁄 𑀲𑀻𑀳𑀦𑀸𑀤𑀦𑀸𑀤𑀺𑀦𑁄 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀲𑁆𑀲 𑀥𑀫𑁆𑀫𑀺𑀲𑁆𑀲𑀭𑀲𑁆𑀲 𑀥𑀫𑁆𑀫𑀭𑀸𑀚𑀲𑁆𑀲 𑀥𑀫𑁆𑀫𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀤𑀻𑀧𑀲𑁆𑀲 𑀥𑀫𑁆𑀫𑀲𑀭𑀡𑀲𑁆𑀲 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀘𑀦𑀁, 𑀦 𑀏𑀢𑁆𑀣 𑀅𑀢𑁆𑀣𑁂 𑀯𑀸 𑀥𑀫𑁆𑀫𑁂 𑀯𑀸 𑀧𑀤𑁂 𑀯𑀸 𑀩𑁆𑀬𑀜𑁆𑀚𑀦𑁂 𑀯𑀸 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀓𑀢𑁆𑀢𑀩𑁆𑀩𑀸’’𑀢𑀺 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀅𑀲𑁆𑀲𑀤𑁆𑀥𑀺𑀬𑀁 𑀯𑀺𑀦𑀸𑀲𑁂𑀢𑀺, 𑀲𑀤𑁆𑀥𑀸𑀲𑀫𑁆𑀧𑀤𑀁 𑀉𑀧𑁆𑀧𑀸𑀤𑁂𑀢𑀻𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀯𑀺𑀦𑀸𑀲𑀬𑀢𑀺 𑀅𑀲𑁆𑀲𑀤𑁆𑀥𑀁, 𑀲𑀤𑁆𑀥𑀁 𑀯𑀟𑁆𑀠𑁂𑀢𑀺 𑀲𑀸𑀲𑀦𑁂;

𑀏𑀯𑀁 𑀫𑁂 𑀲𑀼𑀢𑀫𑀺𑀘𑁆𑀘𑁂𑀯𑀁, 𑀯𑀤𑀁 𑀕𑁄𑀢𑀫𑀲𑀸𑀯𑀓𑁄’’𑀢𑀺.

𑀏𑀓𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄. 𑀲𑀫𑀬𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀦𑀺𑀤𑁆𑀤𑁂𑀲𑁄. 𑀏𑀓𑀁 𑀲𑀫𑀬𑀦𑁆𑀢𑀺 𑀅𑀦𑀺𑀬𑀫𑀺𑀢𑀧𑀭𑀺𑀤𑀻𑀧𑀦𑀁. 𑀢𑀢𑁆𑀣 𑀲𑀫𑀬𑀲𑀤𑁆𑀤𑁄 𑁋

𑀲𑀫𑀯𑀸𑀬𑁂 𑀔𑀡𑁂 𑀓𑀸𑀮𑁂, 𑀲𑀫𑀽𑀳𑁂 𑀳𑁂𑀢𑀼𑀤𑀺𑀝𑁆𑀞𑀺𑀲𑀼;

𑀧𑀝𑀺𑀮𑀸𑀪𑁂 𑀧𑀳𑀸𑀦𑁂 𑀘, 𑀧𑀝𑀺𑀯𑁂𑀥𑁂 𑀘 𑀤𑀺𑀲𑁆𑀲𑀢𑀺.

𑀢𑀣𑀸 𑀳𑀺𑀲𑁆𑀲 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁪𑁭) 𑀲𑀫𑀯𑀸𑀬𑁄 𑀅𑀢𑁆𑀣𑁄. ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁨𑁯) 𑀔𑀡𑁄. ‘‘𑀉𑀡𑁆𑀳𑀲𑀫𑀬𑁄 𑀧𑀭𑀺𑀴𑀸𑀳𑀲𑀫𑀬𑁄’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁩𑁫𑁮) 𑀓𑀸𑀮𑁄. ‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀽𑀳𑁄. ‘‘𑀲𑀫𑀬𑁄𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀺, 𑀪𑀕𑀯𑀸 𑀔𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, 𑀪𑀕𑀯𑀸𑀧𑀺 𑀫𑀁 𑀚𑀸𑀦𑀺𑀲𑁆𑀲𑀢𑀺, ‘𑀪𑀤𑁆𑀤𑀸𑀮𑀺, 𑀦𑀸𑀫 𑀪𑀺𑀓𑁆𑀔𑀼 𑀲𑀢𑁆𑀣𑀼𑀲𑀸𑀲𑀦𑁂 𑀲𑀺𑀓𑁆𑀔𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻’𑀢𑀺, 𑀅𑀬𑀫𑁆𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀲𑀫𑀬𑁄 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁩𑁫) 𑀳𑁂𑀢𑀼. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀕𑁆𑀕𑀸𑀳𑀫𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂 𑀧𑀝𑀺𑀯𑀲𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁨𑁬𑁦) 𑀤𑀺𑀝𑁆𑀞𑀺.

‘‘𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀬𑁄 𑀅𑀢𑁆𑀣𑁄, 𑀬𑁄 𑀘𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄;

𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. 𑁋

𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁨𑁯) 𑀧𑀝𑀺𑀮𑀸𑀪𑁄. ‘‘𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁪) 𑀧𑀳𑀸𑀦𑀁. ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁩.𑁧) 𑀧𑀝𑀺𑀯𑁂𑀥𑁄. 𑀇𑀥 𑀧𑀦𑀲𑁆𑀲 𑀓𑀸𑀮𑁄 𑀅𑀢𑁆𑀣𑁄. 𑀢𑁂𑀦 𑀲𑀁𑀯𑀘𑁆𑀙𑀭-𑀉𑀢𑀼-𑀫𑀸𑀲𑀟𑁆𑀠𑀫𑀸𑀲-𑀭𑀢𑁆𑀢𑀺-𑀤𑀺𑀯-𑀧𑀼𑀩𑁆𑀩𑀡𑁆𑀳-𑀫𑀚𑁆𑀛𑀦𑁆𑀳𑀺𑀓-𑀲𑀸𑀬𑀦𑁆𑀳- 𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀬𑀸𑀫-𑀫𑀼𑀳𑀼𑀢𑁆𑀢𑀸𑀤𑀻𑀲𑀼 𑀓𑀸𑀮𑀧𑁆𑀧𑀪𑁂𑀤𑀪𑀽𑀢𑁂𑀲𑀼 𑀲𑀫𑀬𑁂𑀲𑀼 𑀏𑀓𑀁 𑀲𑀫𑀬𑀦𑁆𑀢𑀺 𑀤𑀻𑀧𑁂𑀢𑀺.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀏𑀢𑁂𑀲𑀼 𑀲𑀁𑀯𑀘𑁆𑀙𑀭𑀸𑀤𑀻𑀲𑀼 𑀲𑀫𑀬𑁂𑀲𑀼 𑀬𑀁 𑀬𑀁 𑀲𑀼𑀢𑁆𑀢𑀁 𑀬𑀫𑁆𑀳𑀺 𑀬𑀫𑁆𑀳𑀺 𑀲𑀁𑀯𑀘𑁆𑀙𑀭𑁂 𑀉𑀢𑀼𑀫𑁆𑀳𑀺 𑀫𑀸𑀲𑁂 𑀧𑀓𑁆𑀔𑁂 𑀭𑀢𑁆𑀢𑀺𑀪𑀸𑀕𑁂 𑀤𑀺𑀯𑀲𑀪𑀸𑀕𑁂 𑀯𑀸 𑀯𑀼𑀢𑁆𑀢𑀁, 𑀲𑀩𑁆𑀩𑀁 𑀢𑀁 𑀣𑁂𑀭𑀲𑁆𑀲 𑀲𑀼𑀯𑀺𑀤𑀺𑀢𑀁 𑀲𑀼𑀯𑀯𑀢𑁆𑀣𑀸𑀧𑀺𑀢𑀁 𑀧𑀜𑁆𑀜𑀸𑀬. 𑀬𑀲𑁆𑀫𑀸 𑀧𑀦 ‘‘𑀏𑀯𑀁 𑀫𑁂 𑀲𑀼𑀢𑀁 𑀅𑀲𑀼𑀓𑀲𑀁𑀯𑀘𑁆𑀙𑀭𑁂 𑀅𑀲𑀼𑀓𑀉𑀢𑀼𑀫𑁆𑀳𑀺 𑀅𑀲𑀼𑀓𑀫𑀸𑀲𑁂 𑀅𑀲𑀼𑀓𑀧𑀓𑁆𑀔𑁂 𑀅𑀲𑀼𑀓𑀭𑀢𑁆𑀢𑀺𑀪𑀸𑀕𑁂 𑀅𑀲𑀼𑀓𑀤𑀺𑀯𑀲𑀪𑀸𑀕𑁂 𑀯𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀥𑀸𑀭𑁂𑀢𑀼𑀁 𑀯𑀸 𑀉𑀤𑁆𑀤𑀺𑀲𑀺𑀢𑀼𑀁 𑀯𑀸 𑀉𑀤𑁆𑀤𑀺𑀲𑀸𑀧𑁂𑀢𑀼𑀁 𑀯𑀸, 𑀩𑀳𑀼 𑀘 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀏𑀓𑁂𑀦𑁂𑀯 𑀧𑀤𑁂𑀦 𑀢𑀫𑀢𑁆𑀣𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀆𑀳.

𑀬𑁂 𑀯𑀸 𑀇𑀫𑁂 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀲𑀫𑀬𑁄 𑀚𑀸𑀢𑀺𑀲𑀫𑀬𑁄 𑀲𑀁𑀯𑁂𑀕𑀲𑀫𑀬𑁄 𑀅𑀪𑀺𑀦𑀺𑀓𑁆𑀔𑀫𑀦𑀲𑀫𑀬𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀲𑀫𑀬𑁄 𑀫𑀸𑀭𑀯𑀺𑀚𑀬𑀲𑀫𑀬𑁄 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀬𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄 𑀤𑁂𑀲𑀦𑀸𑀲𑀫𑀬𑁄 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁄𑀢𑀺 𑀏𑀯𑀫𑀸𑀤𑀬𑁄 𑀪𑀕𑀯𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀅𑀢𑀺𑀯𑀺𑀬 𑀲𑀼𑀧𑁆𑀧𑀓𑀸𑀲𑀸 𑀅𑀦𑁂𑀓𑀓𑀸𑀮𑀧𑁆𑀧𑀪𑁂𑀤𑀸 𑀏𑀯 𑀲𑀫𑀬𑀸, 𑀢𑁂𑀲𑀼 𑀲𑀫𑀬𑁂𑀲𑀼 𑀤𑁂𑀲𑀦𑀸𑀲𑀫𑀬𑀲𑀗𑁆𑀔𑀸𑀢𑀁 𑀏𑀓𑀁 𑀲𑀫𑀬𑀦𑁆𑀢𑀺 𑀤𑀻𑀧𑁂𑀢𑀺. 𑀬𑁄 𑀘𑀸𑀬𑀁 𑀜𑀸𑀡𑀓𑀭𑀼𑀡𑀸𑀓𑀺𑀘𑁆𑀘𑀲𑀫𑀬𑁂𑀲𑀼 𑀅𑀭𑀼𑀡𑀸𑀓𑀺𑀘𑁆𑀘𑀲𑀫𑀬𑁄, 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀫𑀬𑁂𑀲𑀼 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀫𑀬𑁄, 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀓𑀭𑀡𑀻𑀬𑀤𑁆𑀯𑀬𑀲𑀫𑀬𑁂𑀲𑀼 𑀥𑀫𑁆𑀫𑀺𑀓𑀣𑀸𑀲𑀫𑀬𑁄, 𑀤𑁂𑀲𑀦𑀸𑀧𑀝𑀺𑀧𑀢𑁆𑀢𑀺𑀲𑀫𑀬𑁂𑀲𑀼 𑀤𑁂𑀲𑀦𑀸𑀲𑀫𑀬𑁄, 𑀢𑁂𑀲𑀼𑀧𑀺 𑀲𑀫𑀬𑁂𑀲𑀼 𑀅𑀜𑁆𑀜𑀢𑀭𑀁 𑀲𑀦𑁆𑀥𑀸𑀬 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀆𑀳.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀬𑀣𑀸 𑀅𑀪𑀺𑀥𑀫𑁆𑀫𑁂 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭’’𑀦𑁆𑀢𑀺 𑀘 𑀇𑀢𑁄 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 ‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 𑀘 𑀪𑀼𑀫𑁆𑀫𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀯𑀺𑀦𑀬𑁂 𑀘 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀓𑀭𑀡𑀯𑀘𑀦𑁂𑀦, 𑀢𑀣𑀸 𑀅𑀓𑀢𑁆𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺. 𑀢𑀢𑁆𑀣 𑀢𑀣𑀸 𑀇𑀥 𑀘 𑀅𑀜𑁆𑀜𑀣𑀸 𑀅𑀢𑁆𑀣𑀲𑀫𑁆𑀪𑀯𑀢𑁄. 𑀢𑀢𑁆𑀣 𑀳𑀺 𑀅𑀪𑀺𑀥𑀫𑁆𑀫𑁂 𑀇𑀢𑁄 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 𑀘 𑀅𑀥𑀺𑀓𑀭𑀡𑀢𑁆𑀣𑁄 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀅𑀥𑀺𑀓𑀭𑀡𑀜𑁆𑀳𑀺 𑀓𑀸𑀮𑀢𑁆𑀣𑁄 𑀘 𑀲𑀫𑀽𑀳𑀢𑁆𑀣𑁄 𑀘 𑀲𑀫𑀬𑁄, 𑀢𑀢𑁆𑀣 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀘 𑀲𑀫𑀬𑀲𑁆𑀲 𑀪𑀸𑀯𑁂𑀦 𑀢𑁂𑀲𑀁 𑀪𑀸𑀯𑁄 𑀮𑀓𑁆𑀔𑀻𑀬𑀢𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀢𑀢𑁆𑀣 𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀯𑀺𑀦𑀬𑁂 𑀘 𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀬𑁄 𑀳𑀺 𑀲𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀫𑀬𑁄 𑀲𑀸𑀭𑀺𑀧𑀼𑀢𑁆𑀢𑀸𑀤𑀻𑀳𑀺𑀧𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑁄, 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀢𑀢𑁆𑀣 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀇𑀥 𑀧𑀦 𑀅𑀜𑁆𑀜𑀲𑁆𑀫𑀺𑀜𑁆𑀘 𑀏𑀯𑀁𑀚𑀸𑀢𑀺𑀓𑁂 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀬𑀜𑁆𑀳𑀺 𑀲𑀫𑀬𑀁 𑀪𑀕𑀯𑀸 𑀇𑀫𑀁 𑀅𑀜𑁆𑀜𑀁 𑀯𑀸 𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑁂𑀲𑀺, 𑀅𑀘𑁆𑀘𑀦𑁆𑀢𑀫𑁂𑀯 𑀢𑀁 𑀲𑀫𑀬𑀁 𑀓𑀭𑀼𑀡𑀸𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀇𑀥 𑀉𑀧𑀬𑁄𑀕𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺.

𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀢𑀁 𑀢𑀁 𑀅𑀢𑁆𑀣𑀫𑀧𑁂𑀓𑁆𑀔𑀺𑀢𑁆𑀯𑀸, 𑀪𑀼𑀫𑁆𑀫𑁂𑀦 𑀓𑀭𑀡𑁂𑀦 𑀘;

𑀅𑀜𑁆𑀜𑀢𑁆𑀭 𑀲𑀫𑀬𑁄 𑀯𑀼𑀢𑁆𑀢𑁄, 𑀉𑀧𑀬𑁄𑀕𑁂𑀦 𑀲𑁄 𑀇𑀥𑀸’’𑀢𑀺.

𑀧𑁄𑀭𑀸𑀡𑀸 𑀧𑀦 𑀯𑀡𑁆𑀡𑀬𑀦𑁆𑀢𑀺 𑁋 ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀯𑀸 𑁋 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺 𑀯𑀸 𑁋 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀸 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄 𑀏𑀲, 𑀲𑀩𑁆𑀩𑀢𑁆𑀣 𑀪𑀼𑀫𑁆𑀫𑀫𑁂𑀯 𑀅𑀢𑁆𑀣𑁄𑀢𑀺. 𑀢𑀲𑁆𑀫𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀏𑀓𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀪𑀕𑀯𑀸𑀢𑀺 𑀕𑀭𑀼. 𑀕𑀭𑀼𑀜𑁆𑀳𑀺 𑀮𑁄𑀓𑁂 ‘‘𑀪𑀕𑀯𑀸’’𑀢𑀺 𑀯𑀤𑀦𑁆𑀢𑀺. 𑀅𑀬𑀜𑁆𑀘 𑀲𑀩𑁆𑀩𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁 𑀕𑀭𑀼, 𑀢𑀲𑁆𑀫𑀸 ‘‘𑀪𑀕𑀯𑀸’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑁄𑀭𑀸𑀡𑁂𑀳𑀺𑀧𑀺 𑀯𑀼𑀢𑁆𑀢𑀁 𑁋

‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀁, 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀁;

𑀕𑀭𑀼𑀕𑀸𑀭𑀯𑀬𑀼𑀢𑁆𑀢𑁄 𑀲𑁄, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀅𑀧𑀺𑀘 𑁋

‘‘𑀪𑀸𑀕𑁆𑀬𑀯𑀸 𑀪𑀕𑁆𑀕𑀯𑀸 𑀬𑀼𑀢𑁆𑀢𑁄, 𑀪𑀕𑁂𑀳𑀺 𑀘 𑀯𑀺𑀪𑀢𑁆𑀢𑀯𑀸;

𑀪𑀢𑁆𑀢𑀯𑀸 𑀯𑀦𑁆𑀢𑀕𑀫𑀦𑁄, 𑀪𑀯𑁂𑀲𑀼 𑀪𑀕𑀯𑀸 𑀢𑀢𑁄’’𑀢𑀺. 𑁋

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀯𑀲𑁂𑀦𑀲𑁆𑀲 𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑁄𑀬𑁂𑀯.

𑀏𑀢𑁆𑀢𑀸𑀯𑀢𑀸 𑀘𑁂𑀢𑁆𑀣 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀢𑁄 𑀥𑀫𑁆𑀫𑀲𑀭𑀻𑀭𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀺. 𑀢𑁂𑀦 𑁋 ‘‘𑀦𑀬𑀺𑀤𑀁 𑀅𑀢𑀺𑀓𑁆𑀓𑀦𑁆𑀢𑀲𑀢𑁆𑀣𑀼𑀓𑀁 𑀧𑀸𑀯𑀘𑀦𑀁, 𑀅𑀬𑀁 𑀯𑁄 𑀲𑀢𑁆𑀣𑀸’’𑀢𑀺 𑀲𑀢𑁆𑀣𑀼 𑀅𑀤𑀲𑁆𑀲𑀦𑁂𑀦 𑀉𑀓𑁆𑀓𑀡𑁆𑀞𑀺𑀢𑀁 𑀚𑀦𑀁 𑀲𑀫𑀲𑁆𑀲𑀸𑀲𑁂𑀢𑀺.

𑀏𑀓𑀁 𑀲𑀫𑀬𑀁 𑀪𑀕𑀯𑀸𑀢𑀺 𑀯𑀘𑀦𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀭𑀽𑀧𑀓𑀸𑀬𑀧𑀭𑀺𑀦𑀺𑀩𑁆𑀩𑀸𑀦𑀁 𑀲𑀸𑀥𑁂𑀢𑀺. 𑀢𑁂𑀦 ‘‘𑀏𑀯𑀁𑀯𑀺𑀥𑀲𑁆𑀲 𑀦𑀸𑀫 𑀅𑀭𑀺𑀬𑀥𑀫𑁆𑀫𑀲𑁆𑀲 𑀤𑁂𑀲𑀓𑁄 𑀤𑀲𑀩𑀮𑀥𑀭𑁄 𑀯𑀚𑀺𑀭𑀲𑀗𑁆𑀖𑀸𑀢𑀲𑀫𑀸𑀦𑀓𑀸𑀬𑁄, 𑀲𑁄𑀧𑀺 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀓𑁂𑀦 𑀅𑀜𑁆𑀜𑁂𑀦 𑀚𑀻𑀯𑀺𑀢𑁂 𑀆𑀲𑀸 𑀚𑀦𑁂𑀢𑀩𑁆𑀩𑀸’’𑀢𑀺 𑀚𑀻𑀯𑀺𑀢𑀫𑀤𑀫𑀢𑁆𑀢𑀁 𑀚𑀦𑀁 𑀲𑀁𑀯𑁂𑀚𑁂𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺.

𑀏𑀯𑀦𑁆𑀢𑀺 𑀘 𑀪𑀡𑀦𑁆𑀢𑁄 𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺. 𑀫𑁂 𑀲𑀼𑀢𑀦𑁆𑀢𑀺 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀁. 𑀏𑀓𑀁 𑀲𑀫𑀬𑀦𑁆𑀢𑀺 𑀓𑀸𑀮𑀲𑀫𑁆𑀧𑀢𑁆𑀢𑀺𑀁. 𑀪𑀕𑀯𑀸𑀢𑀺 𑀤𑁂𑀲𑀓𑀲𑀫𑁆𑀧𑀢𑁆𑀢𑀺𑀁.

𑀉𑀓𑁆𑀓𑀝𑁆𑀞𑀸𑀬𑀁 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀉𑀓𑁆𑀓𑀸𑀢𑀺 𑀤𑀻𑀧𑀺𑀓𑀸, 𑀢𑀜𑁆𑀘 𑀦𑀕𑀭𑀁 ‘‘𑀫𑀗𑁆𑀕𑀮𑀤𑀺𑀯𑀲𑁄 𑀲𑀼𑀔𑀡𑁄 𑀲𑀼𑀦𑀓𑁆𑀔𑀢𑁆𑀢𑀁 𑀫𑀸 𑀅𑀢𑀺𑀓𑁆𑀓𑀫𑀻’’𑀢𑀺 𑀭𑀢𑁆𑀢𑀺𑀫𑁆𑀧𑀺 𑀉𑀓𑁆𑀓𑀸𑀲𑀼 𑀞𑀺𑀢𑀸𑀲𑀼 𑀫𑀸𑀧𑀺𑀢𑀢𑁆𑀢𑀸 𑀉𑀓𑁆𑀓𑀝𑁆𑀞𑀸𑀢𑀺 𑀯𑀼𑀘𑁆𑀘𑀢𑀺. 𑀤𑀡𑁆𑀟𑀤𑀻𑀧𑀺𑀓𑀸𑀲𑀼 𑀚𑀸𑀮𑁂𑀢𑁆𑀯𑀸 𑀥𑀸𑀭𑀻𑀬𑀫𑀸𑀦𑀸𑀲𑀼 𑀫𑀸𑀧𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀲𑀁 𑀉𑀓𑁆𑀓𑀝𑁆𑀞𑀸𑀬𑀁. 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀯𑀺𑀳𑀭𑀢𑀻𑀢𑀺 𑀅𑀯𑀺𑀲𑁂𑀲𑁂𑀦 𑀇𑀭𑀺𑀬𑀸𑀧𑀣𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀲𑀼 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀺𑀧𑀭𑀺𑀤𑀻𑀧𑀦𑀫𑁂𑀢𑀁. 𑀇𑀥 𑀧𑀦 𑀞𑀸𑀦𑀕𑀫𑀦𑀦𑀺𑀲𑀺𑀦𑁆𑀦𑀲𑀬𑀦𑀧𑁆𑀧𑀪𑁂𑀤𑁂𑀲𑀼 𑀭𑀺𑀬𑀸𑀧𑀣𑁂𑀲𑀼 𑀅𑀜𑁆𑀜𑀢𑀭𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁. 𑀢𑁂𑀦 𑀞𑀺𑀢𑁄𑀧𑀺 𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀲𑀬𑀸𑀦𑁄𑀧𑀺 𑀪𑀕𑀯𑀸 𑀯𑀺𑀳𑀭𑀢𑀺𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀪𑀕𑀯𑀸 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺 𑀧𑀯𑀢𑁆𑀢𑁂𑀢𑀺, 𑀢𑀲𑁆𑀫𑀸 𑀯𑀺𑀳𑀭𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀲𑀼𑀪𑀕𑀯𑀦𑁂𑀢𑀺 𑀏𑀢𑁆𑀣 𑀲𑀼𑀪𑀕𑀢𑁆𑀢𑀸 𑀲𑀼𑀪𑀕𑀁, 𑀲𑀼𑀦𑁆𑀤𑀭𑀲𑀺𑀭𑀺𑀓𑀢𑁆𑀢𑀸 𑀲𑀼𑀦𑁆𑀤𑀭𑀓𑀸𑀫𑀢𑁆𑀢𑀸 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀳𑀺 𑀯𑀦𑀲𑁆𑀲 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀸 𑀫𑀦𑀼𑀲𑁆𑀲𑀸 𑀅𑀦𑁆𑀦𑀧𑀸𑀦𑀸𑀤𑀻𑀦𑀺 𑀆𑀤𑀸𑀬 𑀤𑀺𑀯𑀲𑀁 𑀢𑀢𑁆𑀣𑁂𑀯 𑀙𑀡𑀲𑀫𑀚𑁆𑀚𑀉𑀲𑁆𑀲𑀯𑁂 𑀓𑀭𑁄𑀦𑁆𑀢𑀸 𑀪𑁄𑀕𑀲𑀼𑀔𑀁 𑀅𑀦𑀼𑀪𑁄𑀦𑁆𑀢𑀺, 𑀲𑀼𑀦𑁆𑀤𑀭𑀲𑀼𑀦𑁆𑀤𑀭𑁂 𑀘𑁂𑀢𑁆𑀣 𑀓𑀸𑀫𑁂 𑀧𑀢𑁆𑀣𑁂𑀦𑁆𑀢𑀺 ‘‘𑀧𑀼𑀢𑁆𑀢𑀁 𑀮𑀪𑀸𑀫, 𑀥𑀻𑀢𑀭𑀁 𑀮𑀪𑀸𑀫𑀸’’𑀢𑀺, 𑀢𑁂𑀲𑀁 𑀢𑀁 𑀢𑀣𑁂𑀯 𑀳𑁄𑀢𑀺, 𑀏𑀯𑀁 𑀢𑀁 𑀲𑀼𑀦𑁆𑀤𑀭𑀲𑀺𑀭𑀺𑀓𑀢𑁆𑀢𑀸 𑀲𑀼𑀦𑁆𑀤𑀭𑀓𑀸𑀫𑀢𑁆𑀢𑀸 𑀘 𑀲𑀼𑀪𑀕𑀁. 𑀅𑀧𑀺𑀘 𑀩𑀳𑀼𑀚𑀦𑀓𑀦𑁆𑀢𑀢𑀸𑀬𑀧𑀺 𑀲𑀼𑀪𑀕𑀁. 𑀯𑀦𑀬𑀢𑀻𑀢𑀺 𑀯𑀦𑀁, 𑀅𑀢𑁆𑀢𑀲𑀫𑁆𑀧𑀤𑀸𑀬 𑀲𑀢𑁆𑀢𑀸𑀦𑀁 𑀪𑀢𑁆𑀢𑀺𑀁 𑀓𑀸𑀭𑁂𑀢𑀺, 𑀅𑀢𑁆𑀢𑀦𑀺 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀦𑀼𑀢𑁂 𑀇𑀢𑀺 𑀯𑀸 𑀯𑀦𑀁, 𑀦𑀸𑀦𑀸𑀯𑀺𑀥𑀓𑀼𑀲𑀼𑀫-𑀕𑀦𑁆𑀥𑀲𑀫𑁆𑀫𑁄𑀤𑀫𑀢𑁆𑀢𑀓𑁄𑀓𑀺𑀮𑀸𑀤𑀺𑀯𑀺𑀳𑀗𑁆𑀕𑀫𑀸𑀪𑀺𑀭𑀼𑀢𑁂𑀳𑀺 𑀫𑀦𑁆𑀤𑀫𑀸𑀮𑀼𑀢𑀘𑀮𑀺𑀢𑀭𑀼𑀓𑁆𑀔𑀲𑀸𑀔𑀸𑀯𑀺𑀝𑀧𑀧𑀮𑁆𑀮𑀯𑀧𑀮𑀸𑀲𑁂𑀳𑀺 𑀘 ‘‘𑀏𑀣 𑀫𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀲𑀩𑁆𑀩𑀧𑀸𑀡𑀺𑀦𑁄 𑀬𑀸𑀘𑀢𑀺 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀼𑀪𑀕𑀜𑁆𑀘 𑀢𑀁 𑀯𑀦𑀜𑁆𑀘𑀸𑀢𑀺 𑀲𑀼𑀪𑀕𑀯𑀦𑀁. 𑀢𑀲𑁆𑀫𑀺𑀁 𑀲𑀼𑀪𑀕𑀯𑀦𑁂. 𑀯𑀦𑀜𑁆𑀘 𑀦𑀸𑀫 𑀭𑁄𑀧𑀺𑀫𑀁, 𑀲𑀬𑀁𑀚𑀸𑀢𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀯𑁂𑀴𑀼𑀯𑀦𑀚𑁂𑀢𑀯𑀦𑀸𑀤𑀻𑀦𑀺 𑀭𑁄𑀧𑀺𑀫𑀸𑀦𑀺. 𑀅𑀦𑁆𑀥𑀯𑀦𑀫𑀳𑀸𑀯𑀦𑀅𑀜𑁆𑀚𑀦𑀯𑀦𑀸𑀤𑀻𑀦𑀺 𑀲𑀬𑀁 𑀚𑀸𑀢𑀸𑀦𑀺. 𑀇𑀤𑀫𑁆𑀧𑀺 𑀲𑀬𑀁𑀚𑀸𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀸𑀮𑀭𑀸𑀚𑀫𑀽𑀮𑁂𑀢𑀺 𑀏𑀢𑁆𑀣 𑀲𑀸𑀮𑀭𑀼𑀓𑁆𑀔𑁄𑀧𑀺 𑀲𑀸𑀮𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀸𑀫𑀲𑁆𑀲 𑀯𑀸 𑀦𑀺𑀕𑀫𑀲𑁆𑀲 𑀯𑀸 𑀅𑀯𑀺𑀤𑀽𑀭𑁂 𑀫𑀳𑀦𑁆𑀢𑀁 𑀲𑀸𑀮𑀯𑀦𑀁, 𑀢𑀜𑁆𑀘𑀲𑁆𑀲 𑀏𑀴𑀡𑁆𑀟𑁂𑀳𑀺 𑀲𑀜𑁆𑀙𑀦𑁆𑀦’’𑀦𑁆𑀢𑀺 (𑀫. 𑀦𑀺. 𑁧.𑁨𑁨𑁫) ‘‘𑀅𑀦𑁆𑀢𑀭𑁂𑀦 𑀬𑀫𑀓𑀲𑀸𑀮𑀸𑀦’’𑀦𑁆𑀢𑀺 𑀘 (𑀤𑀻. 𑀦𑀺. 𑁨.𑁧𑁯𑁫) 𑀯𑀦𑀧𑁆𑀧𑀢𑀺𑀚𑁂𑀝𑁆𑀞𑀓𑀭𑀼𑀓𑁆𑀔𑁄𑀧𑀺. 𑀬𑀣𑀸𑀳 𑁋

‘‘𑀢𑀯𑁂𑀯 𑀤𑁂𑀯 𑀯𑀺𑀚𑀺𑀢𑁂, 𑀢𑀯𑁂𑀯𑀼𑀬𑁆𑀬𑀸𑀦𑀪𑀽𑀫𑀺𑀬𑀸;

𑀉𑀚𑀼𑀯𑀁𑀲𑀸 𑀫𑀳𑀸𑀲𑀸𑀮𑀸, 𑀦𑀻𑀮𑁄𑀪𑀸𑀲𑀸 𑀫𑀦𑁄𑀭𑀫𑀸’’𑀢𑀺. (𑀚𑀸. 𑁨.𑁧𑁯.𑁪);

𑀬𑁄 𑀓𑁄𑀘𑀺 𑀭𑀼𑀓𑁆𑀔𑁄𑀧𑀺. 𑀬𑀣𑀸𑀳 ‘‘𑀅𑀣 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀫𑀸𑀮𑀼𑀯𑀩𑀻𑀚𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀸𑀮𑀫𑀽𑀮𑁂 𑀦𑀺𑀧𑀢𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁧.𑁪𑁬𑁯). 𑀇𑀥 𑀧𑀦 𑀯𑀦𑀧𑁆𑀧𑀢𑀺𑀚𑁂𑀝𑁆𑀞𑀓𑀭𑀼𑀓𑁆𑀔𑁄 𑀅𑀥𑀺𑀧𑁆𑀧𑁂𑀢𑁄. 𑀭𑀸𑀚𑀲𑀤𑁆𑀤𑁄 𑀧𑀦𑀲𑁆𑀲 𑀢𑀫𑁂𑀯 𑀚𑁂𑀝𑁆𑀞𑀓𑀪𑀸𑀯𑀁 𑀲𑀸𑀥𑁂𑀢𑀺. 𑀬𑀣𑀸𑀳 ‘‘𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀲𑁆𑀲 𑀔𑁄 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓 𑀦𑀺𑀕𑁆𑀭𑁄𑀥𑀭𑀸𑀚𑀲𑁆𑀲𑀸’’𑀢𑀺 (𑀅. 𑀦𑀺. 𑁬.𑁫𑁪). 𑀢𑀢𑁆𑀣 𑀤𑁆𑀯𑁂𑀥𑀸 𑀲𑀫𑀸𑀲𑁄, 𑀲𑀸𑀮𑀸𑀦𑀁 𑀭𑀸𑀚𑀸𑀢𑀺𑀧𑀺 𑀲𑀸𑀮𑀭𑀸𑀚𑀸, 𑀲𑀸𑀮𑁄 𑀘 𑀲𑁄 𑀚𑁂𑀝𑁆𑀞𑀓𑀝𑁆𑀞𑁂𑀦 𑀭𑀸𑀚𑀸 𑀘 𑀇𑀢𑀺𑀧𑀺 𑀲𑀸𑀮𑀭𑀸𑀚𑀸. 𑀫𑀽𑀮𑀦𑁆𑀢𑀺 𑀲𑀫𑀻𑀧𑀁. 𑀅𑀬𑀜𑁆𑀳𑀺 𑀫𑀽𑀮𑀲𑀤𑁆𑀤𑁄, ‘‘𑀫𑀽𑀮𑀸𑀦𑀺 𑀉𑀤𑁆𑀥𑀭𑁂𑀬𑁆𑀬, 𑀅𑀦𑁆𑀢𑀫𑀲𑁄 𑀉𑀲𑀺𑀭𑀦𑀸𑀴𑀺𑀫𑀢𑁆𑀢𑀸𑀦𑀺𑀧𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁯𑁫) 𑀫𑀽𑀮𑀫𑀽𑀮𑁂 𑀤𑀺𑀲𑁆𑀲𑀢𑀺. ‘‘𑀮𑁄𑀪𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁦𑁫) 𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀺. ‘‘𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀙𑀸𑀬𑀸 𑀨𑀭𑀢𑀺, 𑀦𑀺𑀯𑀸𑀢𑁂 𑀧𑀡𑁆𑀡𑀸𑀦𑀺 𑀧𑀢𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀭𑀼𑀓𑁆𑀔𑀫𑀽𑀮’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀻𑀧𑁂. 𑀇𑀥 𑀧𑀦 𑀲𑀫𑀻𑀧𑁂 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀲𑀸𑀮𑀭𑀸𑀚𑀲𑁆𑀲 𑀲𑀫𑀻𑀧𑁂𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀢𑀢𑁆𑀣 𑀲𑀺𑀬𑀸 𑁋 𑀬𑀤𑀺 𑀢𑀸𑀯 𑀪𑀕𑀯𑀸 𑀉𑀓𑁆𑀓𑀝𑁆𑀞𑀸𑀬𑀁 𑀯𑀺𑀳𑀭𑀢𑀺, ‘‘𑀲𑀼𑀪𑀕𑀯𑀦𑁂 𑀲𑀸𑀮𑀭𑀸𑀚𑀫𑀽𑀮𑁂’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀅𑀣 𑀢𑀢𑁆𑀣 𑀯𑀺𑀳𑀭𑀢𑀺, ‘‘𑀉𑀓𑁆𑀓𑀝𑁆𑀞𑀸𑀬’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀦 𑀳𑀺 𑀲𑀓𑁆𑀓𑀸 𑀉𑀪𑀬𑀢𑁆𑀣 𑀏𑀓𑀁 𑀲𑀫𑀬𑀁 𑀯𑀺𑀳𑀭𑀺𑀢𑀼𑀦𑁆𑀢𑀺. 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁.

𑀦𑀦𑀼 𑀅𑀯𑁄𑀘𑀼𑀫𑁆𑀳 ‘‘𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦’’𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀕𑀗𑁆𑀕𑀸𑀬𑀫𑀼𑀦𑀸𑀤𑀻𑀦𑀁 𑀲𑀫𑀻𑀧𑁂 𑀕𑁄𑀬𑀽𑀣𑀸𑀦𑀺 𑀘𑀭𑀦𑁆𑀢𑀸𑀦𑀺 ‘‘𑀕𑀗𑁆𑀕𑀸𑀬 𑀘𑀭𑀦𑁆𑀢𑀺, 𑀬𑀫𑀼𑀦𑀸𑀬 𑀘𑀭𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀬𑀤𑀺𑀤𑀁 𑀉𑀓𑁆𑀓𑀝𑁆𑀞𑀸𑀬 𑀲𑀫𑀻𑀧𑁂 𑀲𑀼𑀪𑀕𑀯𑀦𑀁 𑀲𑀸𑀮𑀭𑀸𑀚𑀫𑀽𑀮𑀁, 𑀢𑀢𑁆𑀣 𑀯𑀺𑀳𑀭𑀦𑁆𑀢𑁄 𑀯𑀼𑀘𑁆𑀘𑀢𑀺 ‘‘𑀉𑀓𑁆𑀓𑀝𑁆𑀞𑀸𑀬𑀁 𑀯𑀺𑀳𑀭𑀢𑀺 𑀲𑀼𑀪𑀕𑀯𑀦𑁂 𑀲𑀸𑀮𑀭𑀸𑀚𑀫𑀽𑀮𑁂’’𑀢𑀺. 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣𑀜𑁆𑀳𑀺𑀲𑁆𑀲 𑀉𑀓𑁆𑀓𑀝𑁆𑀞𑀸𑀯𑀘𑀦𑀁, 𑀧𑀩𑁆𑀩𑀚𑀺𑀢𑀸𑀦𑀼𑀭𑀽𑀧𑀦𑀺𑀯𑀸𑀲𑀝𑁆𑀞𑀸𑀦𑀦𑀺𑀤𑀲𑁆𑀲𑀦𑀢𑁆𑀣𑀁 𑀲𑁂𑀲𑀯𑀘𑀦𑀁.

𑀢𑀢𑁆𑀣 𑀉𑀓𑁆𑀓𑀝𑁆𑀞𑀸𑀓𑀺𑀢𑁆𑀢𑀦𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀕𑀳𑀝𑁆𑀞𑀸𑀦𑀼𑀕𑁆𑀕𑀳𑀓𑀭𑀡𑀁 𑀤𑀲𑁆𑀲𑁂𑀢𑀺, 𑀲𑀼𑀪𑀕𑀯𑀦𑀸𑀤𑀺𑀓𑀺𑀢𑁆𑀢𑀦𑁂𑀦 𑀧𑀩𑁆𑀩𑀚𑀺𑀢𑀸𑀦𑀼𑀕𑁆𑀕𑀳𑀓𑀭𑀡𑀁. 𑀢𑀣𑀸 𑀧𑀼𑀭𑀺𑀫𑁂𑀦 𑀧𑀘𑁆𑀘𑀬𑀕𑁆𑀕𑀳𑀡𑀢𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀺𑀯𑀚𑁆𑀚𑀦𑀁, 𑀧𑀘𑁆𑀙𑀺𑀫𑁂𑀦 𑀯𑀢𑁆𑀣𑀼𑀓𑀸𑀫𑀧𑁆𑀧𑀳𑀸𑀦𑀢𑁄 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀯𑀺𑀯𑀚𑁆𑀚𑀦𑀼𑀧𑀸𑀬𑀤𑀲𑁆𑀲𑀦𑀁. 𑀧𑀼𑀭𑀺𑀫𑁂𑀦 𑀘 𑀥𑀫𑁆𑀫𑀤𑁂𑀲𑀦𑀸𑀪𑀺𑀬𑁄𑀕𑀁, 𑀧𑀘𑁆𑀙𑀺𑀫𑁂𑀦 𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑀺𑀁. 𑀧𑀼𑀭𑀺𑀫𑁂𑀦 𑀓𑀭𑀼𑀡𑀸𑀬 𑀉𑀧𑀕𑀫𑀦𑀁, 𑀧𑀘𑁆𑀙𑀺𑀫𑁂𑀦 𑀧𑀜𑁆𑀜𑀸𑀬 𑀅𑀧𑀕𑀫𑀦𑀁. 𑀧𑀼𑀭𑀺𑀫𑁂𑀦 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀸𑀥𑀺𑀫𑀼𑀢𑁆𑀢𑀢𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀳𑀺𑀢𑀲𑀼𑀔𑀓𑀭𑀡𑁂 𑀦𑀺𑀭𑀼𑀧𑀮𑁂𑀧𑀦𑀁. 𑀧𑀼𑀭𑀺𑀫𑁂𑀦 𑀥𑀫𑁆𑀫𑀺𑀓𑀲𑀼𑀔𑀸𑀧𑀭𑀺𑀘𑁆𑀘𑀸𑀕𑀦𑀺𑀫𑀺𑀢𑁆𑀢𑀁 𑀨𑀸𑀲𑀼𑀯𑀺𑀳𑀸𑀭𑀁, 𑀧𑀘𑁆𑀙𑀺𑀫𑁂𑀦 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀼𑀬𑁄𑀕𑀦𑀺𑀫𑀺𑀢𑁆𑀢𑀁. 𑀧𑀼𑀭𑀺𑀫𑁂𑀦 𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀸𑀭𑀩𑀳𑀼𑀮𑀢𑀁, 𑀧𑀘𑁆𑀙𑀺𑀫𑁂𑀦 𑀤𑁂𑀯𑀸𑀦𑀁. 𑀧𑀼𑀭𑀺𑀫𑁂𑀦 𑀮𑁄𑀓𑁂 𑀚𑀸𑀢𑀲𑁆𑀲 𑀮𑁄𑀓𑁂 𑀲𑀁𑀯𑀟𑁆𑀠𑀪𑀸𑀯𑀁, 𑀧𑀘𑁆𑀙𑀺𑀫𑁂𑀦 𑀮𑁄𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑀢𑀁. 𑀧𑀼𑀭𑀺𑀫𑁂𑀦 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁭𑁦) 𑀯𑀘𑀦𑀢𑁄 𑀬𑀤𑀢𑁆𑀣𑀁 𑀪𑀕𑀯𑀸 𑀉𑀧𑁆𑀧𑀦𑁆𑀦𑁄, 𑀢𑀤𑀢𑁆𑀣𑀧𑀭𑀺𑀦𑀺𑀧𑁆𑀨𑀸𑀤𑀦𑀁, 𑀧𑀘𑁆𑀙𑀺𑀫𑁂𑀦 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄, 𑀢𑀤𑀦𑀼𑀭𑀽𑀧𑀯𑀺𑀳𑀸𑀭𑀁. 𑀪𑀕𑀯𑀸 𑀳𑀺 𑀧𑀞𑀫𑀁 𑀮𑀼𑀫𑁆𑀩𑀺𑀦𑀺𑀯𑀦𑁂, 𑀤𑀼𑀢𑀺𑀬𑀁 𑀩𑁄𑀥𑀺𑀫𑀡𑁆𑀟𑁂𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀉𑀧𑁆𑀧𑀢𑁆𑀢𑀺𑀬𑀸 𑀯𑀦𑁂𑀬𑁂𑀯 𑀉𑀧𑁆𑀧𑀦𑁆𑀦𑁄, 𑀢𑁂𑀦𑀲𑁆𑀲 𑀯𑀦𑁂𑀬𑁂𑀯 𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭𑀸𑀢𑀺 𑀤𑁂𑀲𑀓𑀸𑀮𑀧𑀭𑀺𑀤𑀻𑀧𑀦𑀁. 𑀢𑀜𑁆𑀳𑀺 𑀬𑀁 𑀲𑀫𑀬𑀁 𑀯𑀺𑀳𑀭𑀢𑀺, 𑀢𑀢𑁆𑀭 𑀲𑀫𑀬𑁂. 𑀬𑀲𑁆𑀫𑀺𑀜𑁆𑀘 𑀲𑀸𑀮𑀭𑀸𑀚𑀫𑀽𑀮𑁂 𑀯𑀺𑀳𑀭𑀢𑀺, 𑀢𑀢𑁆𑀭 𑀲𑀸𑀮𑀭𑀸𑀚𑀫𑀽𑀮𑁂𑀢𑀺 𑀤𑀻𑀧𑁂𑀢𑀺. 𑀪𑀸𑀲𑀺𑀢𑀩𑁆𑀩𑀬𑀼𑀢𑁆𑀢𑁂 𑀯𑀸 𑀤𑁂𑀲𑀓𑀸𑀮𑁂 𑀤𑀻𑀧𑁂𑀢𑀺. 𑀦 𑀳𑀺 𑀪𑀕𑀯𑀸 𑀅𑀬𑀼𑀢𑁆𑀢𑁂 𑀤𑁂𑀲𑁂 𑀓𑀸𑀮𑁂 𑀯𑀸 𑀥𑀫𑁆𑀫𑀁 𑀪𑀸𑀲𑀢𑀺. ‘‘𑀅𑀓𑀸𑀮𑁄 𑀔𑁄 𑀢𑀸𑀯 𑀩𑀸𑀳𑀺𑀬𑀸’’𑀢𑀺 (𑀉𑀤𑀸. 𑁧𑁦) 𑀆𑀤𑀺𑀘𑁂𑀢𑁆𑀣 𑀲𑀸𑀥𑀓𑀁. 𑀔𑁄𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀅𑀯𑀥𑀸𑀭𑀡𑁂 𑀆𑀤𑀺𑀓𑀸𑀮𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄. 𑀪𑀕𑀯𑀸𑀢𑀺 𑀮𑁄𑀓𑀕𑀭𑀼𑀤𑀻𑀧𑀦𑀁. 𑀪𑀺𑀓𑁆𑀔𑀽𑀢𑀺 𑀓𑀣𑀸𑀲𑀯𑀦𑀬𑀼𑀢𑁆𑀢𑀧𑀼𑀕𑁆𑀕𑀮𑀯𑀘𑀦𑀁. 𑀅𑀧𑀺𑀘𑁂𑀢𑁆𑀣, ‘‘𑀪𑀺𑀓𑁆𑀔𑀓𑁄𑀢𑀺 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁫) 𑀦𑀬𑁂𑀦 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀫𑀦𑁆𑀢𑁂𑀲𑀻𑀢𑀺 𑀆𑀮𑀧𑀺 𑀅𑀪𑀸𑀲𑀺 𑀲𑀫𑁆𑀩𑁄𑀥𑁂𑀲𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀧𑀦 𑀜𑀸𑀧𑀦𑁂𑀧𑀺 𑀳𑁄𑀢𑀺. 𑀬𑀣𑀸𑀳 ‘‘𑀆𑀫𑀦𑁆𑀢𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂’’𑀢𑀺. 𑀧𑀓𑁆𑀓𑁄𑀲𑀦𑁂𑀧𑀺. 𑀬𑀣𑀸𑀳 ‘‘𑀏𑀳𑀺 𑀢𑁆𑀯𑀁 𑀪𑀺𑀓𑁆𑀔𑀼 𑀫𑀫 𑀯𑀘𑀦𑁂𑀦 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀳𑀻’’𑀢𑀺 (𑀅. 𑀦𑀺. 𑁯.𑁧𑁧).

𑀪𑀺𑀓𑁆𑀔𑀯𑁄𑀢𑀺 𑀆𑀫𑀦𑁆𑀢𑀦𑀸𑀓𑀸𑀭𑀤𑀻𑀧𑀦𑀁. 𑀢𑀜𑁆𑀘 𑀪𑀺𑀓𑁆𑀔𑀦𑀲𑀻𑀮𑀢𑀸𑀤𑀺𑀕𑀼𑀡𑀬𑁄𑀕𑀲𑀺𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀦𑀲𑀻𑀮𑀢𑀸𑀕𑀼𑀡𑀬𑀼𑀢𑁆𑀢𑁄𑀧𑀺 𑀳𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀦𑀥𑀫𑁆𑀫𑀢𑀸𑀕𑀼𑀡𑀬𑀼𑀢𑁆𑀢𑁄𑀧𑀺. 𑀪𑀺𑀓𑁆𑀔𑀦𑁂 𑀲𑀸𑀥𑀼𑀓𑀸𑀭𑀺𑀢𑀸𑀕𑀼𑀡𑀬𑀼𑀢𑁆𑀢𑁄𑀧𑀻𑀢𑀺 𑀲𑀤𑁆𑀤𑀯𑀺𑀤𑀽 𑀫𑀜𑁆𑀜𑀦𑁆𑀢𑀺. 𑀢𑁂𑀦 𑀘 𑀦𑁂𑀲𑀁 𑀪𑀺𑀓𑁆𑀔𑀦𑀲𑀻𑀮𑀢𑀸𑀤𑀺𑀕𑀼𑀡𑀬𑁄𑀕𑀲𑀺𑀤𑁆𑀥𑁂𑀦 𑀯𑀘𑀦𑁂𑀦 𑀳𑀻𑀦𑀸𑀥𑀺𑀓𑀚𑀦𑀲𑁂𑀯𑀺𑀢𑀁 𑀯𑀼𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑀉𑀤𑁆𑀥𑀢𑀤𑀻𑀦𑀪𑀸𑀯𑀦𑀺𑀕𑁆𑀕𑀳𑀁 𑀓𑀭𑁄𑀢𑀺. 𑀪𑀺𑀓𑁆𑀔𑀯𑁄𑀢𑀺 𑀇𑀫𑀺𑀦𑀸 𑀘 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀲𑁄𑀫𑁆𑀫𑀳𑀤𑀬𑀦𑀬𑀦𑀦𑀺𑀧𑀸𑀢𑀧𑀼𑀩𑁆𑀩𑀗𑁆𑀕𑀫𑁂𑀦 𑀯𑀘𑀦𑁂𑀦 𑀢𑁂 𑀅𑀢𑁆𑀢𑀦𑁄 𑀫𑀼𑀔𑀸𑀪𑀺𑀫𑀼𑀔𑁂 𑀓𑀭𑁄𑀢𑀺. 𑀢𑁂𑀦𑁂𑀯 𑀘 𑀓𑀣𑁂𑀢𑀼𑀓𑀫𑁆𑀬𑀢𑀸𑀤𑀻𑀧𑀓𑁂𑀦 𑀯𑀘𑀦𑁂𑀦 𑀦𑁂𑀲𑀁 𑀲𑁄𑀢𑀼𑀓𑀫𑁆𑀬𑀢𑀁 𑀚𑀦𑁂𑀢𑀺. 𑀢𑁂𑀦𑁂𑀯 𑀘 𑀲𑀫𑁆𑀩𑁄𑀥𑀦𑀝𑁆𑀞𑁂𑀦 𑀲𑀸𑀥𑀼𑀓𑀁 𑀲𑀯𑀦𑀫𑀦𑀲𑀺𑀓𑀸𑀭𑁂𑀧𑀺 𑀦𑁂 𑀦𑀺𑀬𑁄𑀚𑁂𑀢𑀺. 𑀲𑀸𑀥𑀼𑀓𑀲𑀯𑀦𑀫𑀦𑀲𑀺𑀓𑀸𑀭𑀸𑀬𑀢𑁆𑀢𑀸 𑀳𑀺 𑀲𑀸𑀲𑀦𑀲𑀫𑁆𑀧𑀢𑁆𑀢𑀺.

𑀅𑀧𑀭𑁂𑀲𑀼𑀧𑀺 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀓𑀲𑁆𑀫𑀸 𑀪𑀺𑀓𑁆𑀔𑀽𑀬𑁂𑀯 𑀆𑀫𑀦𑁆𑀢𑁂𑀲𑀻𑀢𑀺 𑀘𑁂. 𑀚𑁂𑀝𑁆𑀞𑀲𑁂𑀝𑁆𑀞𑀸𑀲𑀦𑁆𑀦𑀲𑀤𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄. 𑀲𑀩𑁆𑀩𑀧𑀭𑀺𑀲𑀲𑀸𑀥𑀸𑀭𑀡𑀸 𑀳𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸. 𑀧𑀭𑀺𑀲𑀸𑀬 𑀘 𑀚𑁂𑀝𑁆𑀞𑀸 𑀪𑀺𑀓𑁆𑀔𑀽, 𑀧𑀞𑀫𑀼𑀧𑁆𑀧𑀦𑁆𑀦𑀢𑁆𑀢𑀸. 𑀲𑁂𑀝𑁆𑀞𑀸, 𑀅𑀦𑀕𑀸𑀭𑀺𑀬𑀪𑀸𑀯𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀢𑁆𑀣𑀼𑀘𑀭𑀺𑀬𑀸𑀦𑀼𑀯𑀺𑀥𑀸𑀬𑀓𑀢𑁆𑀢𑀸 𑀲𑀓𑀮𑀲𑀸𑀲𑀦𑀧𑀝𑀺𑀕𑁆𑀕𑀸𑀳𑀓𑀢𑁆𑀢𑀸 𑀘. 𑀆𑀲𑀦𑁆𑀦𑀸, 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂𑀲𑀼 𑀲𑀢𑁆𑀣𑀼𑀲𑀦𑁆𑀢𑀺𑀓𑀢𑁆𑀢𑀸. 𑀲𑀤𑀸𑀲𑀦𑁆𑀦𑀺𑀳𑀺𑀢𑀸, 𑀲𑀢𑁆𑀣𑀼𑀲𑀦𑁆𑀢𑀺𑀓𑀸𑀯𑀘𑀭𑀢𑁆𑀢𑀸𑀢𑀺. 𑀅𑀧𑀺𑀘 𑀢𑁂 𑀥𑀫𑁆𑀫𑀤𑁂𑀲𑀦𑀸𑀬 𑀪𑀸𑀚𑀦𑀁, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀯𑀺𑀲𑁂𑀲𑀢𑁄 𑀘 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽𑀬𑁂𑀯 𑀲𑀦𑁆𑀥𑀸𑀬 𑀅𑀬𑀁 𑀤𑁂𑀲𑀦𑀸𑀢𑀺𑀧𑀺 𑀢𑁂 𑀏𑀯 𑀆𑀫𑀦𑁆𑀢𑁂𑀲𑀺.

𑀢𑀢𑁆𑀣 𑀲𑀺𑀬𑀸 𑁋 𑀓𑀺𑀫𑀢𑁆𑀣𑀁 𑀧𑀦 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀧𑀞𑀫𑀁 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺, 𑀦 𑀥𑀫𑁆𑀫𑀫𑁂𑀯 𑀤𑁂𑀲𑁂𑀢𑀻𑀢𑀺. 𑀲𑀢𑀺𑀚𑀦𑀦𑀢𑁆𑀣𑀁. 𑀪𑀺𑀓𑁆𑀔𑀽 𑀳𑀺 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑀸𑀧𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀧𑀺 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀸𑀧𑀺 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀢𑁂 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑁋 ‘‘𑀅𑀬𑀁 𑀤𑁂𑀲𑀦𑀸 𑀓𑀺𑀦𑁆𑀦𑀺𑀤𑀸𑀦𑀸 𑀓𑀺𑀁𑀧𑀘𑁆𑀘𑀬𑀸 𑀓𑀢𑀫𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀤𑁂𑀲𑀺𑀢𑀸’’𑀢𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀤𑀼𑀕𑁆𑀕𑀳𑀺𑀢𑀁 𑀯𑀸 𑀕𑀡𑁆𑀳𑁂𑀬𑁆𑀬𑀼𑀁, 𑀦 𑀯𑀸 𑀕𑀡𑁆𑀳𑁂𑀬𑁆𑀬𑀼𑀁. 𑀢𑁂𑀦 𑀦𑁂𑀲𑀁 𑀲𑀢𑀺𑀚𑀦𑀦𑀢𑁆𑀣𑀁 𑀪𑀕𑀯𑀸 𑀧𑀞𑀫𑀁 𑀆𑀫𑀦𑁆𑀢𑁂𑀢𑁆𑀯𑀸 𑀧𑀘𑁆𑀙𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀪𑀤𑀦𑁆𑀢𑁂𑀢𑀺 𑀕𑀸𑀭𑀯𑀯𑀘𑀦𑀫𑁂𑀢𑀁, 𑀲𑀢𑁆𑀣𑀼𑀦𑁄 𑀧𑀝𑀺𑀯𑀘𑀦𑀤𑀸𑀦𑀁 𑀯𑀸, 𑀅𑀧𑀺𑀘𑁂𑀢𑁆𑀣 𑀪𑀺𑀓𑁆𑀔𑀯𑁄𑀢𑀺 𑀯𑀤𑀫𑀸𑀦𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀮𑀧𑀢𑀺. 𑀪𑀤𑀦𑁆𑀢𑁂𑀢𑀺 𑀯𑀤𑀫𑀸𑀦𑀸 𑀢𑁂 𑀪𑀕𑀯𑀦𑁆𑀢𑀁 𑀧𑀘𑁆𑀘𑀸𑀮𑀧𑀦𑁆𑀢𑀺. 𑀢𑀣𑀸 𑀪𑀺𑀓𑁆𑀔𑀯𑁄𑀢𑀺 𑀪𑀕𑀯𑀸 𑀆𑀪𑀸𑀲𑀢𑀺. 𑀪𑀤𑀦𑁆𑀢𑁂𑀢𑀺 𑀢𑁂 𑀧𑀘𑁆𑀘𑀸𑀪𑀸𑀲𑀦𑁆𑀢𑀺. 𑀪𑀺𑀓𑁆𑀔𑀯𑁄𑀢𑀺 𑀧𑀝𑀺𑀯𑀘𑀦𑀁 𑀤𑀸𑀧𑁂𑀢𑀺, 𑀪𑀤𑀦𑁆𑀢𑁂𑀢𑀺 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑀺. 𑀢𑁂 𑀪𑀺𑀓𑁆𑀔𑀽𑀢𑀺 𑀬𑁂 𑀪𑀕𑀯𑀸 𑀆𑀫𑀦𑁆𑀢𑁂𑀲𑀺. 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀦𑁆𑀢𑀺 𑀪𑀕𑀯𑀢𑁄 𑀆𑀫𑀦𑁆𑀢𑀦𑀁 𑀧𑀝𑀺𑀅𑀲𑁆𑀲𑁄𑀲𑀼𑀁, 𑀅𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀲𑀼𑀡𑀺𑀁𑀲𑀼 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼 𑀧𑀝𑀺𑀕𑁆𑀕𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀏𑀢𑀤𑀯𑁄𑀘𑀸𑀢𑀺 𑀪𑀕𑀯𑀸 𑀏𑀢𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀓𑀮𑀁 𑀲𑀼𑀢𑁆𑀢𑀁 𑀅𑀯𑁄𑀘.

𑀏𑀢𑁆𑀢𑀸𑀯𑀢𑀸 𑀘 𑀬𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀓𑀫𑀮𑀓𑀼𑀯𑀮𑀬𑀼𑀚𑁆𑀚𑀮𑀯𑀺𑀫𑀮𑀲𑀸𑀤𑀼𑀭𑀲𑀲𑀮𑀺𑀮𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀲𑀼𑀔𑀸𑀯𑀢𑀭𑀡𑀢𑁆𑀣𑀁 𑀦𑀺𑀫𑁆𑀫𑀮𑀲𑀺𑀮𑀸𑀢𑀮𑀭𑀘𑀦𑀯𑀺𑀮𑀸𑀲𑀲𑁄𑀪𑀺𑀢𑀭𑀢𑀦𑀲𑁄𑀧𑀸𑀦𑀁 𑀯𑀺𑀧𑁆𑀧𑀓𑀺𑀡𑁆𑀡𑀫𑀼𑀢𑁆𑀢𑀸𑀢𑀮𑀲𑀤𑀺𑀲𑀯𑀸𑀮𑀺𑀓𑀸𑀓𑀺𑀡𑁆𑀡𑀧𑀡𑁆𑀟𑀭𑀪𑀽𑀫𑀺𑀪𑀸𑀕𑀁 𑀢𑀺𑀢𑁆𑀣𑀁 𑀯𑀺𑀬 𑀲𑀼𑀯𑀺𑀪𑀢𑁆𑀢𑀪𑀺𑀢𑁆𑀢𑀺𑀯𑀺𑀘𑀺𑀢𑁆𑀭𑀯𑁂𑀤𑀺𑀓𑀸𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀦𑀓𑁆𑀔𑀢𑁆𑀢𑀧𑀣𑀁 𑀨𑀼𑀲𑀺𑀢𑀼𑀓𑀸𑀫𑀢𑀸𑀬 𑀯𑀺𑀬, 𑀯𑀺𑀚𑀫𑁆𑀪𑀺𑀢𑀲𑀫𑀼𑀲𑁆𑀲𑀬𑀲𑁆𑀲 𑀧𑀸𑀲𑀸𑀤𑀯𑀭𑀲𑁆𑀲 𑀲𑀼𑀔𑀸𑀭𑁄𑀳𑀡𑀢𑁆𑀣𑀁 𑀤𑀦𑁆𑀢𑀫𑀬-𑀲𑀡𑁆𑀳𑀫𑀼𑀤𑀼𑀨𑀮𑀓-𑀓𑀜𑁆𑀘𑀦𑀮𑀢𑀸𑀯𑀺𑀦𑀤𑁆𑀥- 𑀫𑀡𑀺𑀕𑀡𑀧𑁆𑀧𑀪𑀸𑀲𑀫𑀼𑀤𑀬𑀼𑀚𑁆𑀚𑀮𑀲𑁄𑀪𑀁 𑀲𑁄𑀧𑀸𑀦𑀁 𑀯𑀺𑀬, 𑀲𑀼𑀯𑀡𑁆𑀡𑀯𑀮𑀬𑀸𑀦𑀽𑀧𑀼𑀭𑀸𑀤𑀺𑀲𑀗𑁆𑀖𑀝𑁆𑀝𑀦𑀲𑀤𑁆𑀤𑀲𑀫𑁆𑀫𑀺𑀲𑁆𑀲𑀺𑀢𑀓𑀣𑀺𑀢𑀳𑀲𑀺𑀢𑀫𑀥𑀼𑀭𑀲𑁆𑀲𑀭𑀕𑁂𑀳𑀚𑀦𑀯𑀺𑀘𑀭𑀺𑀢𑀲𑁆𑀲 𑀉𑀴𑀸𑀭𑀇𑀲𑁆𑀲𑀭𑀺𑀬𑀯𑀺𑀪𑀯𑀲𑁄𑀪𑀺𑀢𑀲𑁆𑀲 𑀫𑀳𑀸𑀖𑀭𑀲𑁆𑀲 𑀲𑀼𑀔𑀧𑁆𑀧𑀯𑁂𑀲𑀦𑀢𑁆𑀣𑀁 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀧𑀯𑀸𑀴𑀸𑀤𑀺𑀚𑀼𑀢𑀺𑀯𑀺𑀲𑁆𑀲𑀭𑀯𑀺𑀚𑁆𑀚𑁄𑀢𑀺𑀢-𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀯𑀺𑀲𑀸𑀮𑀤𑁆𑀯𑀸𑀭𑀩𑀸𑀳𑀁 𑀫𑀳𑀸𑀤𑁆𑀯𑀸𑀭𑀁 𑀯𑀺𑀬 𑀘 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀜𑀸𑀡𑀕𑀫𑁆𑀪𑀻𑀭𑀪𑀸𑀯𑀲𑀁𑀲𑀽𑀘𑀓𑀲𑁆𑀲 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀼𑀔𑀸𑀯𑀕𑀸𑀳𑀡𑀢𑁆𑀣𑀁 𑀓𑀸𑀮𑀤𑁂𑀲𑀤𑁂𑀲𑀓𑀯𑀢𑁆𑀣𑀼𑀧𑀭𑀺𑀲𑀸𑀧𑀤𑁂𑀲𑀧𑀝𑀺𑀫𑀡𑁆𑀟𑀺𑀢𑀁 𑀦𑀺𑀤𑀸𑀦𑀁 𑀪𑀸𑀲𑀺𑀢𑀁, 𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀡𑁆𑀡𑀦𑀸

𑀇𑀤𑀸𑀦𑀺 ‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬𑀁 𑀯𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀕𑀯𑀢𑀸 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀡𑁆𑀡𑀦𑀸𑀬 𑀑𑀓𑀸𑀲𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀲𑀸 𑀧𑀦𑁂𑀲𑀸 𑀲𑀼𑀢𑁆𑀢𑀯𑀡𑁆𑀡𑀦𑀸 𑀬𑀲𑁆𑀫𑀸 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀯𑀺𑀘𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀢𑀸𑀯 𑀯𑀺𑀘𑀸𑀭𑀬𑀺𑀲𑁆𑀲𑀸𑀫. 𑀘𑀢𑁆𑀢𑀸𑀭𑁄 𑀳𑀺 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸 𑀅𑀢𑁆𑀢𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄 𑀧𑀼𑀘𑁆𑀙𑀸𑀯𑀲𑀺𑀓𑁄 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄𑀢𑀺.

𑀢𑀢𑁆𑀣 𑀬𑀸𑀦𑀺 𑀲𑀼𑀢𑁆𑀢𑀸𑀦𑀺 𑀪𑀕𑀯𑀸 𑀧𑀭𑁂𑀳𑀺 𑀅𑀦𑀚𑁆𑀛𑀺𑀝𑁆𑀞𑁄 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀓𑀣𑁂𑀲𑀺. 𑀲𑁂𑀬𑁆𑀬𑀣𑀺𑀤𑀁, 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀁, 𑀯𑀢𑁆𑀣𑀲𑀼𑀢𑁆𑀢𑀁, 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀁, 𑀫𑀳𑀸𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑀁, 𑀅𑀭𑀺𑀬𑀯𑀁𑀲𑀲𑀼𑀢𑁆𑀢𑀁, 𑀲𑀫𑁆𑀫𑀧𑁆𑀧𑀥𑀸𑀦𑀲𑀼𑀢𑁆𑀢𑀦𑁆𑀢𑀳𑀸𑀭𑀓𑁄, 𑀇𑀤𑁆𑀥𑀺𑀧𑀸𑀤𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀲𑀼𑀢𑁆𑀢𑀦𑁆𑀢𑀳𑀸𑀭𑀓𑁄𑀢𑀺 𑀏𑀯𑀫𑀸𑀤𑀻𑀦𑀺. 𑀢𑁂𑀲𑀁 𑀅𑀢𑁆𑀢𑀚𑁆𑀛𑀸𑀲𑀬𑁄 𑀦𑀺𑀓𑁆𑀔𑁂𑀧𑁄.

𑀬𑀸𑀦𑀺 𑀧𑀦 ‘‘𑀧𑀭𑀺𑀧𑀓𑁆𑀓𑀸 𑀔𑁄 𑀭𑀸𑀳𑀼𑀮𑀲𑁆𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸, 𑀬𑀁𑀦𑀽𑀦𑀸𑀳𑀁 𑀭𑀸𑀳𑀼𑀮𑀁 𑀉𑀢𑁆𑀢𑀭𑀺 𑀆𑀲𑀯𑀸𑀦𑀁 𑀔𑀬𑁂 𑀯𑀺𑀦𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁪.𑁧𑁨𑁧) 𑀏𑀯𑀁 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀁 𑀔𑀦𑁆𑀢𑀺𑀁 𑀫𑀦𑀁 𑀅𑀪𑀺𑀦𑀻𑀳𑀸𑀭𑀁 𑀩𑀼𑀚𑁆𑀛𑀦𑀪𑀸𑀯𑀜𑁆𑀘 𑀅𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀚𑁆𑀛𑀸𑀲𑀬𑀯𑀲𑁂𑀦 𑀓𑀣𑀺𑀢𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁, 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁, 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁, 𑀥𑀸𑀢𑀼𑀯𑀺𑀪𑀗𑁆𑀕𑀲𑀼𑀢𑁆𑀢𑀦𑁆𑀢𑀺 𑀏𑀯𑀫𑀸𑀤𑀻𑀦𑀺. 𑀢𑁂𑀲𑀁 𑀧𑀭𑀚𑁆𑀛𑀸𑀲𑀬𑁄 𑀦𑀺𑀓𑁆𑀔𑁂𑀧𑁄.

𑀪𑀕𑀯𑀦𑁆𑀢𑀁 𑀧𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀕𑀦𑁆𑀥𑀩𑁆𑀩𑀸 𑀅𑀲𑀼𑀭𑀸 𑀬𑀓𑁆𑀔𑀸 𑀫𑀳𑀸𑀭𑀸𑀚𑀸𑀦𑁄 𑀢𑀸𑀯𑀢𑀺𑀁𑀲𑀸𑀤𑀬𑁄 𑀤𑁂𑀯𑀸 𑀫𑀳𑀸𑀩𑁆𑀭𑀳𑁆𑀫𑀸𑀢𑀺 𑀏𑀯𑀫𑀸𑀤𑀬𑁄 ‘‘𑀩𑁄𑀚𑁆𑀛𑀗𑁆𑀕𑀸 𑀩𑁄𑀚𑁆𑀛𑀗𑁆𑀕𑀸’’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀦𑁆𑀢𑀺. ‘‘𑀦𑀻𑀯𑀭𑀡𑀸 𑀦𑀻𑀯𑀭𑀡𑀸’’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀦𑁆𑀢𑀺. 𑀇𑀫𑁂 𑀦𑀼 𑀔𑁄, 𑀪𑀦𑁆𑀢𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. ‘‘𑀓𑀺𑀁 𑀲𑀽𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁧𑁮𑁩) 𑀦𑀬𑁂𑀦 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺. 𑀏𑀯𑀁 𑀧𑀼𑀝𑁆𑀞𑁂𑀦 𑀪𑀕𑀯𑀢𑀸 𑀬𑀸𑀦𑀺 𑀓𑀣𑀺𑀢𑀸𑀦𑀺 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑀸𑀤𑀻𑀦𑀺. 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀤𑁂𑀯𑀢𑀸𑀲𑀁𑀬𑀼𑀢𑁆𑀢-𑀫𑀸𑀭𑀲𑀁𑀬𑀼𑀢𑁆𑀢-𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢-𑀲𑀓𑁆𑀓𑀧𑀜𑁆𑀳-𑀘𑀽𑀴𑀯𑁂𑀤𑀮𑁆𑀮-𑀫𑀳𑀸𑀯𑁂𑀤𑀮𑁆𑀮-𑀲𑀸𑀫𑀜𑁆𑀜𑀨𑀮- 𑀆𑀴𑀯𑀓-𑀲𑀽𑀘𑀺𑀮𑁄𑀫-𑀔𑀭𑀮𑁄𑀫𑀲𑀼𑀢𑁆𑀢𑀸𑀤𑀻𑀦𑀺, 𑀢𑁂𑀲𑀁 𑀧𑀼𑀘𑁆𑀙𑀸𑀯𑀲𑀺𑀓𑁄 𑀦𑀺𑀓𑁆𑀔𑁂𑀧𑁄.

𑀬𑀸𑀦𑀺 𑀧𑀦𑁂𑀢𑀸𑀦𑀺 𑀉𑀧𑁆𑀧𑀦𑁆𑀦𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀓𑀣𑀺𑀢𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁, 𑀥𑀫𑁆𑀫𑀤𑀸𑀬𑀸𑀤𑀁 𑀘𑀽𑀴𑀲𑀻𑀳𑀦𑀸𑀤𑀁 𑀘𑀦𑁆𑀤𑀽𑀧𑀫𑀁 𑀧𑀼𑀢𑁆𑀢𑀫𑀁𑀲𑀽𑀧𑀫𑀁 𑀤𑀸𑀭𑀼𑀓𑁆𑀔𑀦𑁆𑀥𑀽𑀧𑀫𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀁 𑀨𑁂𑀡𑀧𑀺𑀡𑁆𑀟𑀽𑀧𑀫𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀽𑀧𑀫𑀦𑁆𑀢𑀺 𑀏𑀯𑀫𑀸𑀤𑀻𑀦𑀺. 𑀢𑁂𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀦𑀺𑀓𑁆𑀔𑁂𑀧𑁄.

𑀏𑀯𑀫𑀺𑀫𑁂𑀲𑀼 𑀘𑀢𑀽𑀲𑀼 𑀦𑀺𑀓𑁆𑀔𑁂𑀧𑁂𑀲𑀼 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀦𑀺𑀓𑁆𑀔𑁂𑀧𑁄. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀜𑁆𑀳𑀺 𑀇𑀤𑀁 𑀪𑀕𑀯𑀢𑀸 𑀦𑀺𑀓𑁆𑀔𑀺𑀢𑁆𑀢𑀁. 𑀓𑀢𑀭𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸? 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁂 𑀫𑀸𑀦𑁂. 𑀧𑀜𑁆𑀘𑀲𑀢𑀸 𑀓𑀺𑀭 𑀩𑁆𑀭𑀸𑀳𑁆𑀫𑀡𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀅𑀧𑀭𑀪𑀸𑀕𑁂 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀲𑀩𑁆𑀩𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀉𑀧𑁆𑀧𑀸𑀤𑁂𑀲𑀼𑀁 ‘‘𑀬𑀁 𑀬𑀁 𑀪𑀕𑀯𑀸 𑀓𑀣𑁂𑀢𑀺, 𑀢𑀁 𑀢𑀁 𑀫𑀬𑀁 𑀔𑀺𑀧𑁆𑀧𑀫𑁂𑀯 𑀚𑀸𑀦𑀸𑀫, 𑀪𑀕𑀯𑀸 𑀳𑀺 𑀢𑀻𑀡𑀺 𑀮𑀺𑀗𑁆𑀕𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀲𑀢𑁆𑀢 𑀯𑀺𑀪𑀢𑁆𑀢𑀺𑀬𑁄 𑀫𑀼𑀜𑁆𑀘𑀺𑀢𑁆𑀯𑀸 𑀦 𑀓𑀺𑀜𑁆𑀘𑀺 𑀓𑀣𑁂𑀢𑀺, 𑀏𑀯𑀁 𑀓𑀣𑀺𑀢𑁂 𑀘 𑀅𑀫𑁆𑀳𑀸𑀓𑀁 𑀕𑀡𑁆𑀞𑀺𑀧𑀤𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀢𑁂 𑀪𑀕𑀯𑀢𑀺 𑀅𑀕𑀸𑀭𑀯𑀸 𑀳𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀫𑁆𑀧𑀺 𑀥𑀫𑁆𑀫𑀲𑁆𑀲𑀯𑀦𑀫𑁆𑀧𑀺 𑀅𑀪𑀺𑀡𑁆𑀳𑀁 𑀦 𑀕𑀘𑁆𑀙𑀦𑁆𑀢𑀺. 𑀪𑀕𑀯𑀸 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀘𑀸𑀭𑀁 𑀜𑀢𑁆𑀯𑀸 ‘‘𑀅𑀪𑀩𑁆𑀩𑀸 𑀇𑀫𑁂 𑀇𑀫𑀁 𑀫𑀸𑀦𑀔𑀺𑀮𑀁 𑀅𑀦𑀼𑀧𑀳𑀘𑁆𑀘 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺 𑀢𑁂𑀲𑀁 𑀲𑀼𑀢𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀫𑀸𑀦𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀤𑁂𑀲𑀦𑀸𑀓𑀼𑀲𑀮𑁄 𑀪𑀕𑀯𑀸 𑀫𑀸𑀦𑀪𑀜𑁆𑀚𑀦𑀢𑁆𑀣𑀁 𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬𑀦𑁆𑀢𑀺 𑀤𑁂𑀲𑀦𑀁 𑀆𑀭𑀪𑀺.

𑀢𑀢𑁆𑀣 𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬𑀦𑁆𑀢𑀺 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀫𑀽𑀮𑀧𑀭𑀺𑀬𑀸𑀬𑀁. 𑀲𑀩𑁆𑀩𑁂𑀲𑀦𑁆𑀢𑀺 𑀅𑀦𑀯𑀲𑁂𑀲𑀸𑀦𑀁. 𑀅𑀦𑀯𑀲𑁂𑀲𑀯𑀸𑀘𑀓𑁄 𑀳𑀺 𑀅𑀬𑀁 𑀲𑀩𑁆𑀩-𑀲𑀤𑁆𑀤𑁄. 𑀲𑁄 𑀬𑁂𑀦 𑀬𑁂𑀦 𑀲𑀫𑁆𑀩𑀦𑁆𑀥𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀢𑀲𑁆𑀲 𑀅𑀦𑀯𑀲𑁂𑀲𑀢𑀁 𑀤𑀻𑀧𑁂𑀢𑀺. 𑀬𑀣𑀸, ‘‘𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀲𑀩𑁆𑀩𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀩𑁆𑀩𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀥𑀫𑁆𑀫-𑀲𑀤𑁆𑀤𑁄 𑀧𑀦𑀸𑀬𑀁 𑀧𑀭𑀺𑀬𑀢𑁆𑀢𑀺-𑀲𑀘𑁆𑀘-𑀲𑀫𑀸𑀥𑀺-𑀧𑀜𑁆𑀜𑀸-𑀧𑀓𑀢𑀺-𑀲𑀪𑀸𑀯𑀲𑀼𑀜𑁆𑀜𑀢𑀸-𑀧𑀼𑀜𑁆𑀜𑀸𑀧𑀢𑁆𑀢𑀺-𑀜𑁂𑀬𑁆𑀬𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. ‘‘𑀇𑀥 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁭𑁩) 𑀳𑀺 𑀥𑀫𑁆𑀫𑀲𑀤𑁆𑀤𑁄 𑀧𑀭𑀺𑀬𑀢𑁆𑀢𑀺𑀬𑀁 𑀯𑀢𑁆𑀢𑀢𑀺. ‘‘𑀤𑀺𑀝𑁆𑀞𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁯𑁯) 𑀲𑀘𑁆𑀘𑁂𑀲𑀼. ‘‘𑀏𑀯𑀁 𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀲𑀫𑀸𑀥𑀺𑀫𑁆𑀳𑀺.

‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸, 𑀯𑀸𑀦𑀭𑀺𑀦𑁆𑀤 𑀬𑀣𑀸 𑀢𑀯;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀤𑀺𑀝𑁆𑀞𑀁 𑀲𑁄 𑀅𑀢𑀺𑀯𑀢𑁆𑀢𑀢𑀻’’𑀢𑀺. 𑁋

𑀆𑀤𑀻𑀲𑀼 (𑀚𑀸. 𑁧.𑁧.𑁫𑁭) 𑀧𑀜𑁆𑀜𑀸𑀬.

‘‘𑀚𑀸𑀢𑀺𑀥𑀫𑁆𑀫𑀸 𑀚𑀭𑀸𑀥𑀫𑁆𑀫𑀸, 𑀅𑀣𑁄 𑀫𑀭𑀡𑀥𑀫𑁆𑀫𑀺𑀦𑁄’’𑀢𑀺𑀆𑀤𑀻𑀲𑀼 𑀧𑀓𑀢𑀺𑀬𑀁. ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧.𑀢𑀺𑀓𑀫𑀸𑀢𑀺𑀓𑀸) 𑀲𑀪𑀸𑀯𑁂. ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀥𑀫𑁆𑀫𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁨𑁧) 𑀲𑀼𑀜𑁆𑀜𑀢𑀸𑀬𑀁. ‘‘𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀻’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁦.𑁧𑁦𑁨) 𑀧𑀼𑀜𑁆𑀜𑁂. ‘‘𑀤𑁆𑀯𑁂 𑀅𑀦𑀺𑀬𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁪𑁪𑁩) 𑀆𑀧𑀢𑁆𑀢𑀺𑀬𑀁. ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀜𑁂𑀬𑁆𑀬𑁂. 𑀇𑀥 𑀧𑀦𑀸𑀬𑀁 𑀲𑀪𑀸𑀯𑁂 𑀯𑀢𑁆𑀢𑀢𑀺. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸. 𑀫𑀽𑀮-𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀺𑀢𑁄 𑀏𑀯. 𑀇𑀥 𑀧𑀦𑀸𑀬𑀁 𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀺 𑀤𑀝𑁆𑀞𑀩𑁆𑀩𑁄.

𑀧𑀭𑀺𑀬𑀸𑀬𑀲𑀤𑁆𑀤𑁄 ‘‘𑀫𑀥𑀼𑀧𑀺𑀡𑁆𑀟𑀺𑀓𑀧𑀭𑀺𑀬𑀸𑀬𑁄𑀢𑀺 𑀦𑀁 𑀥𑀸𑀭𑁂𑀳𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁦𑁫) 𑀤𑁂𑀲𑀦𑀸𑀬𑀁 𑀯𑀢𑁆𑀢𑀢𑀺. ‘‘𑀅𑀢𑁆𑀣𑀺 𑀔𑁆𑀯𑁂𑀲 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑀅𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁩) 𑀓𑀸𑀭𑀡𑁂. ‘‘𑀓𑀲𑁆𑀲 𑀦𑀼 𑀔𑁄, 𑀆𑀦𑀦𑁆𑀤, 𑀅𑀚𑁆𑀚 𑀧𑀭𑀺𑀬𑀸𑀬𑁄 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁯𑁮) 𑀯𑀸𑀭𑁂. 𑀇𑀥 𑀧𑀦 𑀓𑀸𑀭𑀡𑁂𑀧𑀺 𑀤𑁂𑀲𑀦𑀸𑀬𑀫𑁆𑀧𑀺 𑀯𑀢𑁆𑀢𑀢𑀺. 𑀢𑀲𑁆𑀫𑀸 ‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀅𑀲𑀸𑀥𑀸𑀭𑀡𑀳𑁂𑀢𑀼𑀲𑀜𑁆𑀜𑀺𑀢𑀁 𑀓𑀸𑀭𑀡𑀦𑁆𑀢𑀺 𑀯𑀸 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀓𑀸𑀭𑀡𑀤𑁂𑀲𑀦𑀦𑁆𑀢𑀺 𑀯𑀸 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑁂𑀬𑁆𑀬𑀢𑁆𑀣𑀢𑁆𑀢𑀸 𑀘𑀲𑁆𑀲 𑀲𑀼𑀢𑁆𑀢𑀲𑁆𑀲, 𑀦 𑀘𑀢𑀼𑀪𑀽𑀫𑀓𑀸𑀧𑀺 𑀲𑀪𑀸𑀯𑀥𑀫𑁆𑀫𑀸 𑀲𑀩𑁆𑀩𑀥𑀫𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸 𑀧𑀦 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸𑀯 𑀅𑀦𑀯𑀲𑁂𑀲𑀢𑁄 𑀯𑁂𑀤𑀺𑀢𑀩𑁆𑀩𑀸, 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺.

𑀯𑁄𑀢𑀺 𑀅𑀬𑀁 𑀯𑁄-𑀲𑀤𑁆𑀤𑁄 𑀧𑀘𑁆𑀘𑀢𑁆𑀢𑀉𑀧𑀬𑁄𑀕𑀓𑀭𑀡𑀲𑀫𑁆𑀧𑀤𑀸𑀦𑀲𑀸𑀫𑀺𑀯𑀘𑀦𑀧𑀤𑀧𑀽𑀭𑀡𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀓𑀘𑁆𑀘𑀺 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁨𑁬) 𑀳𑀺 𑀧𑀘𑁆𑀘𑀢𑁆𑀢𑁂 𑀤𑀺𑀲𑁆𑀲𑀢𑀺. ‘‘𑀕𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀧𑀡𑀸𑀫𑁂𑀫𑀺 𑀯𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁫𑁭) 𑀉𑀧𑀬𑁄𑀕𑁂. ‘‘𑀦 𑀯𑁄 𑀫𑀫 𑀲𑀦𑁆𑀢𑀺𑀓𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁫𑁭) 𑀓𑀭𑀡𑁂. ‘‘𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁯𑁦) 𑀲𑀫𑁆𑀧𑀤𑀸𑀦𑁂. ‘‘𑀲𑀩𑁆𑀩𑁂𑀲𑀁 𑀯𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀪𑀸𑀲𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁪𑁫) 𑀲𑀸𑀫𑀺𑀯𑀘𑀦𑁂. ‘‘𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁫) 𑀧𑀤𑀧𑀽𑀭𑀡𑀫𑀢𑁆𑀢𑁂. 𑀇𑀥 𑀧𑀦𑀸𑀬𑀁 𑀲𑀫𑁆𑀧𑀤𑀸𑀦𑁂 𑀤𑀝𑁆𑀞𑀩𑁆𑀩𑁄.

𑀪𑀺𑀓𑁆𑀔𑀯𑁂𑀢𑀺 𑀧𑀢𑀺𑀲𑁆𑀲𑀯𑁂𑀦 𑀅𑀪𑀺𑀫𑀼𑀔𑀻𑀪𑀽𑀢𑀸𑀦𑀁 𑀧𑀼𑀦𑀸𑀮𑀧𑀦𑀁. 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀤𑁂𑀲𑀦𑀸𑀧𑀝𑀺𑀚𑀸𑀦𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀥𑀫𑁆𑀫𑀸𑀦𑀁 𑀫𑀽𑀮𑀓𑀸𑀭𑀡𑀁 𑀢𑀼𑀫𑁆𑀳𑀸𑀓𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀤𑀼𑀢𑀺𑀬𑁂𑀦 𑀦𑀬𑁂𑀦 𑀓𑀸𑀭𑀡𑀤𑁂𑀲𑀦𑀁 𑀢𑀼𑀫𑁆𑀳𑀸𑀓𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺. 𑀢𑀁 𑀲𑀼𑀡𑀸𑀣𑀸𑀢𑀺 𑀢𑀫𑀢𑁆𑀣𑀁 𑀢𑀁 𑀓𑀸𑀭𑀡𑀁 𑀢𑀁 𑀤𑁂𑀲𑀦𑀁 𑀫𑀬𑀸 𑀯𑀼𑀘𑁆𑀘𑀫𑀸𑀦𑀁 𑀲𑀼𑀡𑀸𑀣. 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸𑀢𑀺 𑀏𑀢𑁆𑀣 𑀧𑀦 𑀲𑀸𑀥𑀼𑀓𑀁 𑀲𑀸𑀥𑀽𑀢𑀺 𑀏𑀓𑀢𑁆𑀣𑀫𑁂𑀢𑀁. 𑀅𑀬𑀜𑁆𑀘 𑀲𑀸𑀥𑀼 𑀲𑀤𑁆𑀤𑁄 𑀆𑀬𑀸𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑁆𑀧𑀳𑀁𑀲𑀦𑀲𑀼𑀦𑁆𑀤𑀭𑀤𑀴𑁆𑀳𑀻𑀓𑀫𑁆𑀫𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. ‘‘𑀲𑀸𑀥𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁯𑁫) 𑀳𑀺 𑀆𑀬𑀸𑀘𑀦𑁂 𑀤𑀺𑀲𑁆𑀲𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁮𑁬) 𑀲𑀫𑁆𑀧𑀝𑀺𑀘𑁆𑀙𑀦𑁂. ‘‘𑀲𑀸𑀥𑀼, 𑀲𑀸𑀥𑀼 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁪𑁯) 𑀲𑀫𑁆𑀧𑀳𑀁𑀲𑀦𑁂.

‘‘𑀲𑀸𑀥𑀼 𑀥𑀫𑁆𑀫𑀭𑀼𑀘𑀻 𑀭𑀸𑀚𑀸, 𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄;

𑀲𑀸𑀥𑀼 𑀫𑀺𑀢𑁆𑀢𑀸𑀦𑀫𑀤𑁆𑀤𑀼𑀩𑁆𑀪𑁄, 𑀧𑀸𑀧𑀲𑁆𑀲𑀸𑀓𑀭𑀡𑀁 𑀲𑀼𑀔’’𑀦𑁆𑀢𑀺.

𑀆𑀤𑀻𑀲𑀼 (𑀚𑀸. 𑁨.𑁧𑁮.𑁧𑁦𑁧) 𑀲𑀼𑀦𑁆𑀤𑀭𑁂. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀸𑀥𑀼𑀓𑀁 𑀲𑀼𑀡𑀸𑀳𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁧𑁯𑁨) 𑀲𑀸𑀥𑀼𑀓𑀲𑀤𑁆𑀤𑁄𑀬𑁂𑀯 𑀤𑀴𑁆𑀳𑀻𑀓𑀫𑁆𑀫𑁂, 𑀆𑀡𑀢𑁆𑀢𑀺𑀬𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀥𑀸𑀧𑀺 𑀅𑀬𑀁 𑀏𑀢𑁆𑀣𑁂𑀯 𑀤𑀴𑁆𑀳𑀻𑀓𑀫𑁆𑀫𑁂 𑀘 𑀆𑀡𑀢𑁆𑀢𑀺𑀬𑀜𑁆𑀘 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀦𑁆𑀤𑀭𑀢𑁆𑀣𑁂𑀧𑀺 𑀯𑀢𑁆𑀢𑀢𑀺. 𑀤𑀴𑁆𑀳𑀻𑀓𑀭𑀡𑀢𑁆𑀣𑁂𑀦 𑀳𑀺 𑀤𑀴𑁆𑀳𑀫𑀺𑀫𑀁 𑀥𑀫𑁆𑀫𑀁 𑀲𑀼𑀡𑀸𑀣 𑀲𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀦𑁆𑀢𑀸. 𑀆𑀡𑀢𑁆𑀢𑀺𑀅𑀢𑁆𑀣𑁂𑀦 𑀫𑀫 𑀆𑀡𑀢𑁆𑀢𑀺𑀬𑀸 𑀲𑀼𑀡𑀸𑀣. 𑀲𑀼𑀦𑁆𑀤𑀭𑀢𑁆𑀣𑁂𑀦 𑀲𑀼𑀦𑁆𑀤𑀭𑀫𑀺𑀫𑀁 𑀪𑀤𑁆𑀤𑀓𑀁 𑀥𑀫𑁆𑀫𑀁 𑀲𑀼𑀡𑀸𑀣𑀸𑀢𑀺 𑀏𑀯𑀁 𑀤𑀻𑀧𑀺𑀢𑀁 𑀳𑁄𑀢𑀺.

𑀫𑀦𑀲𑀺 𑀓𑀭𑁄𑀣𑀸𑀢𑀺 𑀆𑀯𑀚𑁆𑀚𑁂𑀣, 𑀲𑀫𑀦𑁆𑀦𑀸𑀳𑀭𑀣𑀸𑀢𑀺 𑀅𑀢𑁆𑀣𑁄, 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀦𑀺𑀲𑀸𑀫𑁂𑀣 𑀘𑀺𑀢𑁆𑀢𑁂 𑀓𑀭𑁄𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑁂𑀢𑁆𑀣 𑀢𑀁 𑀲𑀼𑀡𑀸𑀣𑀸𑀢𑀺 𑀲𑁄𑀢𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀫𑁂𑀢𑀁. 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸𑀢𑀺 𑀫𑀦𑀲𑀺𑀓𑀸𑀭𑁂 𑀤𑀴𑁆𑀳𑀻𑀓𑀫𑁆𑀫𑀦𑀺𑀬𑁄𑀚𑀦𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀁. 𑀧𑀼𑀭𑀺𑀫𑀜𑁆𑀘𑁂𑀢𑁆𑀣 𑀩𑁆𑀬𑀜𑁆𑀚𑀦𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑀁, 𑀧𑀘𑁆𑀙𑀺𑀫𑀁 𑀅𑀢𑁆𑀣𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑀁. 𑀧𑀼𑀭𑀺𑀫𑁂𑀦 𑀘 𑀥𑀫𑁆𑀫𑀲𑁆𑀲𑀯𑀦𑁂 𑀦𑀺𑀬𑁄𑀚𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀥𑀸𑀭𑀡𑀽𑀧𑀧𑀭𑀺𑀓𑁆𑀔𑀸𑀤𑀻𑀲𑀼. 𑀧𑀼𑀭𑀺𑀫𑁂𑀦 𑀘 𑀲𑀩𑁆𑀬𑀜𑁆𑀚𑀦𑁄 𑀅𑀬𑀁 𑀥𑀫𑁆𑀫𑁄, 𑀢𑀲𑁆𑀫𑀸 𑀲𑀯𑀦𑀻𑀬𑁄𑀢𑀺 𑀤𑀻𑀧𑁂𑀢𑀺. 𑀧𑀘𑁆𑀙𑀺𑀫𑁂𑀦 𑀲𑀸𑀢𑁆𑀣𑁄, 𑀢𑀲𑁆𑀫𑀸 𑀫𑀦𑀲𑀺 𑀓𑀸𑀢𑀩𑁆𑀩𑁄𑀢𑀺. 𑀲𑀸𑀥𑀼𑀓𑀧𑀤𑀁 𑀯𑀸 𑀉𑀪𑀬𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀬𑀲𑁆𑀫𑀸 𑀅𑀬𑀁 𑀥𑀫𑁆𑀫𑁄 𑀥𑀫𑁆𑀫𑀕𑀫𑁆𑀪𑀻𑀭𑁄 𑀤𑁂𑀲𑀦𑀸𑀕𑀫𑁆𑀪𑀻𑀭𑁄 𑀘, 𑀢𑀲𑁆𑀫𑀸 𑀲𑀼𑀡𑀸𑀣 𑀲𑀸𑀥𑀼𑀓𑀁, 𑀬𑀲𑁆𑀫𑀸 𑀅𑀢𑁆𑀣𑀕𑀫𑁆𑀪𑀻𑀭𑁄 𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑁄 𑀘, 𑀢𑀲𑁆𑀫𑀸 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀪𑀸𑀲𑀺𑀲𑁆𑀲𑀸𑀫𑀻𑀢𑀺 𑀤𑁂𑀲𑁂𑀲𑁆𑀲𑀸𑀫𑀺. ‘‘𑀢𑀁 𑀲𑀼𑀡𑀸𑀣𑀸’’𑀢𑀺 𑀏𑀢𑁆𑀣 𑀧𑀝𑀺𑀜𑁆𑀜𑀸𑀢𑀁 𑀤𑁂𑀲𑀦𑀁 𑀦 𑀲𑀁𑀔𑀺𑀢𑁆𑀢𑀢𑁄𑀯 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀧𑀺𑀘 𑀔𑁄 𑀯𑀺𑀢𑁆𑀣𑀸𑀭𑀢𑁄𑀧𑀺 𑀦𑀁 𑀪𑀸𑀲𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀯𑀸𑀘𑀓𑀸𑀦𑀺 𑀳𑀺 𑀏𑀢𑀸𑀦𑀺 𑀧𑀤𑀸𑀦𑀺. 𑀬𑀣𑀸𑀳 𑀯𑀗𑁆𑀕𑀻𑀲𑀢𑁆𑀣𑁂𑀭𑁄 𑁋

‘‘𑀲𑀁𑀔𑀺𑀢𑁆𑀢𑁂𑀦𑀧𑀺 𑀤𑁂𑀲𑁂𑀢𑀺, 𑀯𑀺𑀢𑁆𑀣𑀸𑀭𑁂𑀦𑀧𑀺 𑀪𑀸𑀲𑀢𑀺;

𑀲𑀸𑀴𑀺𑀓𑀸𑀬𑀺𑀯 𑀦𑀺𑀕𑁆𑀖𑁄𑀲𑁄, 𑀧𑀝𑀺𑀪𑀸𑀦𑀁 𑀉𑀤𑀻𑀭𑀬𑀻’’𑀢𑀺. (𑀲𑀁. 𑀦𑀺. 𑁧.𑁨𑁧𑁪);

𑀏𑀯𑀁 𑀯𑀼𑀢𑁆𑀢𑁂 𑀉𑀲𑁆𑀲𑀸𑀳𑀚𑀸𑀢𑀸 𑀳𑀼𑀢𑁆𑀯𑀸 𑀏𑀯𑀁 𑀪𑀦𑁆𑀢𑁂𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼, 𑀧𑀝𑀺𑀕𑁆𑀕𑀳𑁂𑀲𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀦𑁂𑀲𑀁 𑀪𑀕𑀯𑀸 𑀏𑀢𑀤𑀯𑁄𑀘 𑀏𑀢𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀇𑀥 𑀪𑀺𑀓𑁆𑀔𑀯𑁄𑀢𑀺𑀆𑀤𑀺𑀓𑀁 𑀲𑀓𑀮𑀁 𑀲𑀼𑀢𑁆𑀢𑀁 𑀅𑀯𑁄𑀘. 𑀢𑀢𑁆𑀣 𑀇𑀥𑀸𑀢𑀺 𑀤𑁂𑀲𑀸𑀧𑀤𑁂𑀲𑁂 𑀦𑀺𑀧𑀸𑀢𑁄. 𑀲𑁆𑀯𑀸𑀬𑀁 𑀓𑀢𑁆𑀣𑀘𑀺 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁯𑁦). 𑀓𑀢𑁆𑀣𑀘𑀺 𑀲𑀸𑀲𑀦𑀁. 𑀬𑀣𑀸𑀳 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺 (𑀅. 𑀦𑀺. 𑁪.𑁨𑁪𑁧). 𑀓𑀢𑁆𑀣𑀘𑀺 𑀑𑀓𑀸𑀲𑀁. 𑀬𑀣𑀸𑀳 𑁋

‘‘𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲, 𑀤𑁂𑀯𑀪𑀽𑀢𑀲𑁆𑀲 𑀫𑁂 𑀲𑀢𑁄;

𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀭𑀺𑀲𑀸’’𑀢𑀺. (𑀤𑀻. 𑀦𑀺. 𑁨.𑁩𑁬𑁯);

𑀓𑀢𑁆𑀣𑀘𑀺 𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯. 𑀬𑀣𑀸𑀳 ‘‘𑀇𑀥𑀸𑀳𑀁 𑁋 𑀪𑀺𑀓𑁆𑀔𑀯𑁂, 𑀪𑀼𑀢𑁆𑀢𑀸𑀯𑀻 𑀅𑀲𑁆𑀲𑀁 𑀧𑀯𑀸𑀭𑀺𑀢𑁄’’𑀢𑀺 (𑀫. 𑀦𑀺. 𑁧.𑁩𑁦). 𑀇𑀥 𑀧𑀦 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁨. 𑀪𑀺𑀓𑁆𑀔𑀯𑁂𑀢𑀺 𑀬𑀣𑀸𑀧𑀝𑀺𑀜𑁆𑀜𑀸𑀢𑀁 𑀤𑁂𑀲𑀦𑀁 𑀤𑁂𑀲𑁂𑀢𑀼𑀁 𑀧𑀼𑀦 𑀪𑀺𑀓𑁆𑀔𑀽 𑀆𑀮𑀧𑀢𑀺. 𑀉𑀪𑀬𑁂𑀦𑀸𑀧𑀺, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀮𑁄𑀓𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄𑀢𑀺 𑀏𑀢𑁆𑀣 𑀧𑀦 𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸 𑀜𑁂𑀬𑁆𑀬𑁄 𑀅𑀲𑁆𑀲𑀼𑀢𑀯𑀸 𑀇𑀢𑀺. 𑀬𑀲𑁆𑀲 𑀳𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀺𑀦𑀺𑀘𑁆𑀙𑀬𑀭𑀳𑀺𑀢𑀢𑁆𑀢𑀸 𑀫𑀜𑁆𑀜𑀦𑀸𑀧𑀝𑀺𑀲𑁂𑀥𑀓𑁄 𑀦𑁂𑀯 𑀆𑀕𑀫𑁄, 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 𑀦𑁂𑀯 𑀅𑀥𑀺𑀕𑀫𑁄 𑀅𑀢𑁆𑀣𑀺. 𑀲𑁄 𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸 𑀜𑁂𑀬𑁆𑀬𑁄 𑀅𑀲𑁆𑀲𑀼𑀢𑀯𑀸 𑀇𑀢𑀺. 𑀲𑁆𑀯𑀸𑀬𑀁 𑁋

𑀧𑀼𑀣𑀽𑀦𑀁 𑀚𑀦𑀦𑀸𑀤𑀻𑀳𑀺, 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄;

𑀧𑀼𑀣𑀼𑀚𑁆𑀚𑀦𑀦𑁆𑀢𑁄𑀕𑀥𑀢𑁆𑀢𑀸, 𑀧𑀼𑀣𑀼𑀯𑀸𑀬𑀁 𑀚𑀦𑁄 𑀇𑀢𑀺.

𑀲𑁄 𑀳𑀺 𑀧𑀼𑀣𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑀺𑀮𑁂𑀲𑀸𑀤𑀻𑀦𑀁 𑀚𑀦𑀦𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄. 𑀬𑀣𑀸𑀳 𑁋 𑀧𑀼𑀣𑀼 𑀓𑀺𑀮𑁂𑀲𑁂 𑀚𑀦𑁂𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀅𑀯𑀺𑀳𑀢𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀫𑀼𑀮𑁆𑀮𑁄𑀓𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀲𑀩𑁆𑀩𑀕𑀢𑀻𑀳𑀺 𑀅𑀯𑀼𑀝𑁆𑀞𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀪𑀺𑀲𑀗𑁆𑀔𑀸𑀭𑁂 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀑𑀖𑁂𑀳𑀺 𑀯𑀼𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀲𑀦𑁆𑀢𑀸𑀧𑁂𑀳𑀺 𑀲𑀦𑁆𑀢𑀧𑁆𑀧𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀧𑀭𑀺𑀴𑀸𑀳𑁂𑀳𑀺 𑀧𑀭𑀺𑀤𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀆𑀯𑀼𑀝𑀸 𑀦𑀺𑀯𑀼𑀢𑀸 𑀑𑀯𑀼𑀢𑀸 𑀧𑀺𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸𑀢𑀺 (𑀫𑀳𑀸𑀦𑀺. 𑁫𑁧). 𑀧𑀼𑀣𑀽𑀦𑀁 𑀯𑀸 𑀕𑀡𑀦𑀧𑀣𑀫𑀢𑀻𑀢𑀸𑀦𑀁 𑀅𑀭𑀺𑀬𑀥𑀫𑁆𑀫𑀧𑀭𑀫𑁆𑀫𑀼𑀔𑀸𑀦𑀁 𑀦𑀻𑀘𑀥𑀫𑁆𑀫𑀲𑀫𑀸𑀘𑀸𑀭𑀸𑀦𑀁 𑀚𑀦𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸𑀧𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀼 𑀯𑀸 𑀅𑀬𑀁, 𑀯𑀺𑀲𑀼𑀁𑀬𑁂𑀯 𑀲𑀗𑁆𑀔𑀁 𑀕𑀢𑁄, 𑀯𑀺𑀲𑀁𑀲𑀝𑁆𑀞𑁄 𑀲𑀻𑀮𑀲𑀼𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑁂𑀳𑀺 𑀅𑀭𑀺𑀬𑁂𑀳𑀺 𑀚𑀦𑁄𑀢𑀺𑀧𑀺 𑀧𑀼𑀣𑀼𑀚𑁆𑀚𑀦𑁄. 𑀏𑀯𑀫𑁂𑀢𑁂𑀳𑀺 ‘‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀬𑁂𑀢𑁂 𑁋

𑀤𑀼𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀅𑀦𑁆𑀥𑁄 𑀧𑀼𑀣𑀼𑀚𑁆𑀚𑀦𑁄 𑀏𑀓𑁄, 𑀓𑀮𑁆𑀬𑀸𑀡𑁂𑀓𑁄 𑀧𑀼𑀣𑀼𑀚𑁆𑀚𑀦𑁄𑀢𑀺. 𑁋

𑀤𑁆𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸. 𑀢𑁂𑀲𑀼 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻𑀢𑀺𑀆𑀤𑀻𑀲𑀼 𑀅𑀭𑀺𑀬𑀸𑀢𑀺 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦𑀇𑀭𑀺𑀬𑀦𑀢𑁄, 𑀅𑀬𑁂 𑀇𑀭𑀺𑀬𑀦𑀢𑁄, 𑀲𑀤𑁂𑀯𑀓𑁂𑀦 𑀘 𑀮𑁄𑀓𑁂𑀦 𑀅𑀭𑀡𑀻𑀬𑀢𑁄 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘 𑀯𑀼𑀘𑁆𑀘𑀦𑁆𑀢𑀺, 𑀩𑀼𑀤𑁆𑀥𑀸 𑀏𑀯 𑀯𑀸 𑀇𑀥 𑀅𑀭𑀺𑀬𑀸. 𑀬𑀣𑀸𑀳 ‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀢𑀣𑀸𑀕𑀢𑁄 𑀅𑀭𑀺𑀬𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁮). 𑀲𑀧𑁆𑀧𑀼𑀭𑀺𑀲𑀸𑀢𑀺 𑀏𑀢𑁆𑀣 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀢𑀣𑀸𑀕𑀢𑀲𑀸𑀯𑀓𑀸 𑀘 ‘‘𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺 𑀮𑁄𑀓𑀼𑀢𑁆𑀢𑀭𑀕𑀼𑀡𑀬𑁄𑀕𑁂𑀦 𑀲𑁄𑀪𑀦𑀸 𑀧𑀼𑀭𑀺𑀲𑀸𑀢𑀺 𑀲𑀧𑁆𑀧𑀼𑀭𑀺𑀲𑀸. 𑀲𑀩𑁆𑀩𑁂𑀯 𑀯𑀸 𑀏𑀢𑁂 𑀤𑁆𑀯𑁂𑀥𑀸𑀧𑀺 𑀯𑀼𑀢𑁆𑀢𑀸. 𑀩𑀼𑀤𑁆𑀥𑀸𑀧𑀺 𑀳𑀺 𑀅𑀭𑀺𑀬𑀸 𑀘 𑀲𑀧𑁆𑀧𑀼𑀭𑀺𑀲𑀸 𑀘, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀼𑀤𑁆𑀥𑀲𑀸𑀯𑀓𑀸𑀧𑀺. 𑀬𑀣𑀸𑀳 𑁋

‘‘𑀬𑁄 𑀯𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺 𑀥𑀻𑀭𑁄,

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀺;

𑀤𑀼𑀔𑀺𑀢𑀲𑁆𑀲 𑀲𑀓𑁆𑀓𑀘𑁆𑀘 𑀓𑀭𑁄𑀢𑀺 𑀓𑀺𑀘𑁆𑀘𑀁,

𑀢𑀣𑀸𑀯𑀺𑀥𑀁 𑀲𑀧𑁆𑀧𑀼𑀭𑀺𑀲𑀁 𑀯𑀤𑀦𑁆𑀢𑀻’’𑀢𑀺. (𑀚𑀸. 𑁨.𑁧𑁭.𑁭𑁮);

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀻𑀢𑀺 𑀏𑀢𑁆𑀢𑀸𑀯𑀢𑀸 𑀳𑀺 𑀩𑀼𑀤𑁆𑀥𑀲𑀸𑀯𑀓𑁄 𑀯𑀼𑀢𑁆𑀢𑁄, 𑀓𑀢𑀜𑁆𑀜𑀼𑀢𑀸𑀤𑀻𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀼𑀤𑁆𑀥𑀸𑀢𑀺. 𑀇𑀤𑀸𑀦𑀺 𑀬𑁄 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀲𑀻𑀮𑁄, 𑀦 𑀘 𑀤𑀲𑁆𑀲𑀦𑁂 𑀲𑀸𑀥𑀼𑀓𑀸𑀭𑀻, 𑀲𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀘𑀓𑁆𑀔𑀼𑀦𑀸 𑀅𑀤𑀲𑁆𑀲𑀸𑀯𑀻 𑀜𑀸𑀡𑁂𑀦 𑀅𑀤𑀲𑁆𑀲𑀸𑀯𑀻𑀢𑀺 𑀤𑀼𑀯𑀺𑀥𑁄, 𑀢𑁂𑀲𑀼 𑀜𑀸𑀡𑁂𑀦 𑀅𑀤𑀲𑁆𑀲𑀸𑀯𑀻 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀫𑀁𑀲𑀘𑀓𑁆𑀔𑀼𑀦𑀸 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀅𑀭𑀺𑀬𑀸 𑀤𑀺𑀝𑁆𑀞𑀸𑀧𑀺 𑀅𑀤𑀺𑀝𑁆𑀞𑀸𑀯 𑀳𑁄𑀦𑁆𑀢𑀺. 𑀢𑁂𑀲𑀁 𑀘𑀓𑁆𑀔𑀽𑀦𑀁 𑀯𑀡𑁆𑀡𑀫𑀢𑁆𑀢𑀕𑁆𑀕𑀳𑀡𑀢𑁄, 𑀦 𑀅𑀭𑀺𑀬𑀪𑀸𑀯𑀕𑁄𑀘𑀭𑀢𑁄. 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀬𑁄𑀧𑀺 𑀘 𑀘𑀓𑁆𑀔𑀼𑀦𑀸 𑀅𑀭𑀺𑀬𑁂 𑀧𑀲𑁆𑀲𑀦𑁆𑀢𑀺. 𑀦 𑀘 𑀢𑁂 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀺𑀦𑁄.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀸𑀲𑀺𑀦𑁄 𑀓𑀺𑀭 𑀔𑀻𑀡𑀸𑀲𑀯𑀢𑁆𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀏𑀓𑀤𑀺𑀯𑀲𑀁 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀆𑀕𑀘𑁆𑀙𑀦𑁆𑀢𑁄 𑀣𑁂𑀭𑀁 𑀧𑀼𑀘𑁆𑀙𑀺 ‘‘𑀅𑀭𑀺𑀬𑀸 𑀦𑀸𑀫, 𑀪𑀦𑁆𑀢𑁂, 𑀓𑀻𑀤𑀺𑀲𑀸’’𑀢𑀺. 𑀣𑁂𑀭𑁄 𑀆𑀳 ‘‘𑀇𑀥𑁂𑀓𑀘𑁆𑀘𑁄 𑀫𑀳𑀮𑁆𑀮𑀓𑁄 𑀅𑀭𑀺𑀬𑀸𑀦𑀁 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀳𑀘𑀭𑀦𑁆𑀢𑁄𑀧𑀺 𑀦𑁂𑀯 𑀅𑀭𑀺𑀬𑁂 𑀚𑀸𑀦𑀸𑀢𑀺, 𑀏𑀯𑀁 𑀤𑀼𑀚𑁆𑀚𑀸𑀦𑀸, 𑀆𑀯𑀼𑀲𑁄, 𑀅𑀭𑀺𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀲𑁄 𑀦𑁂𑀯 𑀅𑀜𑁆𑀜𑀸𑀲𑀺. 𑀢𑀲𑁆𑀫𑀸 𑀦 𑀘𑀓𑁆𑀔𑀼𑀦𑀸 𑀤𑀲𑁆𑀲𑀦𑀁 𑀤𑀲𑁆𑀲𑀦𑀁, 𑀜𑀸𑀡𑁂𑀦 𑀤𑀲𑁆𑀲𑀦𑀫𑁂𑀯 𑀤𑀲𑁆𑀲𑀦𑀁. 𑀬𑀣𑀸𑀳 ‘‘𑀓𑀺𑀁 𑀢𑁂, 𑀯𑀓𑁆𑀓𑀮𑀺, 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦, 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁭). 𑀢𑀲𑁆𑀫𑀸 𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑁄𑀧𑀺 𑀜𑀸𑀡𑁂𑀦 𑀅𑀭𑀺𑀬𑁂𑀳𑀺 𑀤𑀺𑀝𑁆𑀞𑀁 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀁 𑀅𑀧𑀲𑁆𑀲𑀦𑁆𑀢𑁄 𑀅𑀭𑀺𑀬𑀸𑀥𑀺𑀕𑀢𑀜𑁆𑀘 𑀥𑀫𑁆𑀫𑀁 𑀅𑀦𑀥𑀺𑀕𑀘𑁆𑀙𑀦𑁆𑀢𑁄 𑀅𑀭𑀺𑀬𑀓𑀭𑀥𑀫𑁆𑀫𑀸𑀦𑀁 𑀅𑀭𑀺𑀬𑀪𑀸𑀯𑀲𑁆𑀲 𑀘 𑀅𑀤𑀺𑀝𑁆𑀞𑀢𑁆𑀢𑀸 ‘‘𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀅𑀭𑀺𑀬𑀥𑀫𑁆𑀫𑁂 𑀅𑀓𑀼𑀲𑀮𑁄. 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄𑀢𑀺 𑀏𑀢𑁆𑀣 𑀧𑀦 𑁋

𑀤𑀼𑀯𑀺𑀥𑁄 𑀯𑀺𑀦𑀬𑁄 𑀦𑀸𑀫, 𑀏𑀓𑀫𑁂𑀓𑁂𑀢𑁆𑀣 𑀧𑀜𑁆𑀘𑀥𑀸;

𑀅𑀪𑀸𑀯𑀢𑁄 𑀢𑀲𑁆𑀲 𑀅𑀬𑀁, ‘‘𑀅𑀯𑀺𑀦𑀻𑀢𑁄’’𑀢𑀺 𑀯𑀼𑀘𑁆𑀘𑀢𑀺.

𑀅𑀬𑀜𑁆𑀳𑀺 𑀲𑀁𑀯𑀭𑀯𑀺𑀦𑀬𑁄 𑀧𑀳𑀸𑀦𑀯𑀺𑀦𑀬𑁄𑀢𑀺 𑀤𑀼𑀯𑀺𑀥𑁄 𑀯𑀺𑀦𑀬𑁄. 𑀏𑀢𑁆𑀣 𑀘 𑀤𑀼𑀯𑀺𑀥𑁂𑀧𑀺 𑀯𑀺𑀦𑀬𑁂 𑀏𑀓𑀫𑁂𑀓𑁄 𑀯𑀺𑀦𑀬𑁄 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀺. 𑀲𑀁𑀯𑀭𑀯𑀺𑀦𑀬𑁄𑀧𑀺 𑀳𑀺 𑀲𑀻𑀮𑀲𑀁𑀯𑀭𑁄 𑀲𑀢𑀺𑀲𑀁𑀯𑀭𑁄 𑀜𑀸𑀡𑀲𑀁𑀯𑀭𑁄 𑀔𑀦𑁆𑀢𑀺𑀲𑀁𑀯𑀭𑁄 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀧𑀜𑁆𑀘𑀯𑀺𑀥𑁄. 𑀧𑀳𑀸𑀦𑀯𑀺𑀦𑀬𑁄𑀧𑀺 𑀢𑀤𑀗𑁆𑀕𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑀳𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑀁 𑀦𑀺𑀲𑁆𑀲𑀭𑀡𑀧𑀳𑀸𑀦𑀦𑁆𑀢𑀺 𑀧𑀜𑁆𑀘𑀯𑀺𑀥𑁄.

𑀢𑀢𑁆𑀣 ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄’’𑀢𑀺 (𑀯𑀺𑀪. 𑁫𑁧𑁧) 𑀅𑀬𑀁 𑀲𑀻𑀮𑀲𑀁𑀯𑀭𑁄. ‘‘𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁧𑁩; 𑀫. 𑀦𑀺. 𑁧.𑁨𑁯𑁫; 𑀲𑀁. 𑀦𑀺. 𑁪.𑁨𑁩𑁯; 𑀅. 𑀦𑀺. 𑁩.𑁧𑁬) 𑀅𑀬𑀁 𑀲𑀢𑀺𑀲𑀁𑀯𑀭𑁄.

‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, (𑀅𑀚𑀺𑀢𑀸𑀢𑀺 𑀪𑀕𑀯𑀸)

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺,

𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺. (𑀲𑀼. 𑀦𑀺. 𑁧𑁦𑁪𑁧);

𑀅𑀬𑀁 𑀜𑀸𑀡𑀲𑀁𑀯𑀭𑁄. ‘‘𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲𑀸’’𑀢𑀺 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁪.𑁧𑁧𑁪; 𑁬.𑁫𑁮) 𑀅𑀬𑀁 𑀔𑀦𑁆𑀢𑀺𑀲𑀁𑀯𑀭𑁄. ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁨𑁬; 𑀅. 𑀦𑀺. 𑁪.𑁧𑁧𑁪; 𑁬.𑁫𑁮) 𑀅𑀬𑀁 𑀯𑀻𑀭𑀺𑀬𑀲𑀁𑀯𑀭𑁄. 𑀲𑀩𑁆𑀩𑁄𑀧𑀺 𑀘𑀸𑀬𑀁 𑀲𑀁𑀯𑀭𑁄 𑀬𑀣𑀸𑀲𑀓𑀁 𑀲𑀁𑀯𑀭𑀺𑀢𑀩𑁆𑀩𑀸𑀦𑀁 𑀯𑀺𑀦𑁂𑀢𑀩𑁆𑀩𑀸𑀦𑀜𑁆𑀘 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀁𑀯𑀭𑀡𑀢𑁄 ‘‘𑀲𑀁𑀯𑀭𑁄’’, 𑀯𑀺𑀦𑀬𑀦𑀢𑁄 ‘‘𑀯𑀺𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀸𑀯 𑀲𑀁𑀯𑀭𑀯𑀺𑀦𑀬𑁄 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 𑀬𑀁 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀼 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀤𑀻𑀧𑀸𑀮𑁄𑀓𑁂𑀦𑁂𑀯 𑀢𑀫𑀲𑁆𑀲, 𑀢𑁂𑀦 𑀢𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀦𑀢𑁆𑀣𑀲𑁆𑀲 𑀧𑀳𑀸𑀦𑀁. 𑀲𑁂𑀬𑁆𑀬𑀣𑀺𑀤𑀁, 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀅𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀻𑀦𑀁, 𑀢𑀲𑁆𑀲𑁂𑀯 𑀅𑀧𑀭𑀪𑀸𑀕𑁂𑀦 𑀓𑀗𑁆𑀔𑀸𑀯𑀺𑀢𑀭𑀡𑁂𑀦 𑀓𑀣𑀁𑀓𑀣𑀻𑀪𑀸𑀯𑀲𑁆𑀲, 𑀓𑀮𑀸𑀧𑀲𑀫𑁆𑀫𑀲𑀦𑁂𑀦 ‘‘𑀅𑀳𑀁 𑀫𑀫𑀸’’𑀢𑀺 𑀕𑀸𑀳𑀲𑁆𑀲, 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑁂𑀦 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸𑀬, 𑀉𑀤𑀬𑀤𑀲𑁆𑀲𑀦𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸, 𑀯𑀬𑀤𑀲𑁆𑀲𑀦𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸, 𑀪𑀬𑀤𑀲𑁆𑀲𑀦𑁂𑀦 𑀲𑀪𑀬𑁂 𑀅𑀪𑀬𑀲𑀜𑁆𑀜𑀸𑀬, 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀅𑀲𑁆𑀲𑀸𑀤𑀲𑀜𑁆𑀜𑀸𑀬, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀅𑀪𑀺𑀭𑀢𑀺𑀲𑀜𑁆𑀜𑀸𑀬, 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑁂𑀦 𑀅𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀬, 𑀉𑀧𑁂𑀓𑁆𑀔𑀸𑀜𑀸𑀡𑁂𑀦 𑀅𑀦𑀼𑀧𑁂𑀓𑁆𑀔𑀸𑀬, 𑀅𑀦𑀼𑀮𑁄𑀫𑁂𑀦 𑀥𑀫𑁆𑀫𑀝𑁆𑀞𑀺𑀢𑀺𑀬𑀁 𑀦𑀺𑀩𑁆𑀩𑀸𑀦𑁂 𑀘 𑀧𑀝𑀺𑀮𑁄𑀫𑀪𑀸𑀯𑀲𑁆𑀲, 𑀕𑁄𑀢𑁆𑀭𑀪𑀼𑀦𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀲𑁆𑀲 𑀧𑀳𑀸𑀦𑀁, 𑀏𑀢𑀁 𑀢𑀤𑀗𑁆𑀕𑀧𑀳𑀸𑀦𑀁𑀦𑀸𑀫.

𑀬𑀁 𑀧𑀦 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂𑀦 𑀲𑀫𑀸𑀥𑀺𑀦𑀸 𑀧𑀯𑀢𑁆𑀢𑀺𑀪𑀸𑀯𑀦𑀺𑀯𑀸𑀭𑀡𑀢𑁄 𑀖𑀝𑀧𑁆𑀧𑀳𑀸𑀭𑁂𑀦𑁂𑀯 𑀉𑀤𑀓𑀧𑀺𑀝𑁆𑀞𑁂 𑀲𑁂𑀯𑀸𑀮𑀲𑁆𑀲 𑀢𑁂𑀲𑀁 𑀢𑁂𑀲𑀁 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑀸𑀦𑀁 𑀧𑀳𑀸𑀦𑀁, 𑀏𑀢𑀁 𑀯𑀺𑀓𑁆𑀔𑀫𑁆𑀪𑀦𑀧𑀳𑀸𑀦𑀁 𑀦𑀸𑀫.

𑀬𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀢𑀁𑀢𑀁𑀫𑀕𑁆𑀕𑀯𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 ‘‘𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁨𑁭𑁭) 𑀦𑀬𑁂𑀦 𑀯𑀼𑀢𑁆𑀢𑀲𑁆𑀲 𑀲𑀫𑀼𑀤𑀬𑀧𑀓𑁆𑀔𑀺𑀓𑀲𑁆𑀲 𑀓𑀺𑀮𑁂𑀲𑀕𑀡𑀲𑁆𑀲 𑀅𑀘𑁆𑀘𑀦𑁆𑀢𑀁 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀧𑀳𑀸𑀦𑀁, 𑀇𑀤𑀁 𑀲𑀫𑀼𑀘𑁆𑀙𑁂𑀤𑀧𑀳𑀸𑀦𑀁 𑀦𑀸𑀫. 𑀬𑀁 𑀧𑀦 𑀨𑀮𑀓𑁆𑀔𑀡𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀁 𑀓𑀺𑀮𑁂𑀲𑀸𑀦𑀁, 𑀏𑀢𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑀁 𑀦𑀸𑀫. 𑀬𑀁 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀝𑀢𑁆𑀢𑀸 𑀧𑀳𑀻𑀦𑀲𑀩𑁆𑀩𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁 𑀏𑀢𑀁 𑀦𑀺𑀲𑁆𑀲𑀭𑀡𑀧𑀳𑀸𑀦𑀁 𑀦𑀸𑀫. 𑀲𑀩𑁆𑀩𑀫𑁆𑀧𑀺 𑀘𑁂𑀢𑀁 𑀧𑀳𑀸𑀦𑀁 𑀬𑀲𑁆𑀫𑀸 𑀘𑀸𑀕𑀝𑁆𑀞𑁂𑀦 𑀧𑀳𑀸𑀦𑀁, 𑀯𑀺𑀦𑀬𑀦𑀝𑁆𑀞𑁂𑀦 𑀯𑀺𑀦𑀬𑁄, 𑀢𑀲𑁆𑀫𑀸 ‘‘𑀧𑀳𑀸𑀦𑀯𑀺𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀁𑀢𑀁𑀧𑀳𑀸𑀦𑀯𑀢𑁄 𑀯𑀸 𑀢𑀲𑁆𑀲 𑀢𑀲𑁆𑀲 𑀯𑀺𑀦𑀬𑀲𑁆𑀲 𑀲𑀫𑁆𑀪𑀯𑀢𑁄𑀧𑁂𑀢𑀁 ‘‘𑀧𑀳𑀸𑀦𑀯𑀺𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀧𑀳𑀸𑀦𑀯𑀺𑀦𑀬𑁄𑀧𑀺 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀫𑀬𑀁 𑀲𑀗𑁆𑀔𑁂𑀧𑀢𑁄 𑀤𑀼𑀯𑀺𑀥𑁄, 𑀪𑁂𑀤𑀢𑁄 𑀘 𑀤𑀲𑀯𑀺𑀥𑁄 𑀯𑀺𑀦𑀬𑁄 𑀪𑀺𑀦𑁆𑀦𑀲𑀁𑀯𑀭𑀢𑁆𑀢𑀸 𑀧𑀳𑀸𑀢𑀩𑁆𑀩𑀲𑁆𑀲 𑀘 𑀅𑀧𑁆𑀧𑀳𑀻𑀦𑀢𑁆𑀢𑀸 𑀬𑀲𑁆𑀫𑀸 𑀏𑀢𑀲𑁆𑀲 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀪𑀸𑀯𑀢𑁄 𑀢𑀲𑁆𑀲 𑀅𑀬𑀁 𑀅𑀯𑀺𑀦𑀻𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀲 𑀦𑀬𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄𑀢𑀺 𑀏𑀢𑁆𑀣𑀧𑀺. 𑀦𑀺𑀦𑁆𑀦𑀸𑀦𑀸𑀓𑀭𑀡𑀜𑁆𑀳𑀺 𑀏𑀢𑀁 𑀅𑀢𑁆𑀣𑀢𑁄. 𑀬𑀣𑀸𑀳 ‘‘𑀬𑁂𑀯 𑀢𑁂 𑀅𑀭𑀺𑀬𑀸, 𑀢𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀸. 𑀬𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀸, 𑀢𑁂𑀯 𑀢𑁂 𑀅𑀭𑀺𑀬𑀸. 𑀬𑁄 𑀏𑀯 𑀲𑁄 𑀅𑀭𑀺𑀬𑀸𑀦𑀁 𑀥𑀫𑁆𑀫𑁄, 𑀲𑁄 𑀏𑀯 𑀲𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑁄. 𑀬𑁄 𑀏𑀯 𑀲𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑁄, 𑀲𑁄 𑀏𑀯 𑀲𑁄 𑀅𑀭𑀺𑀬𑀸𑀦𑀁 𑀥𑀫𑁆𑀫𑁄. 𑀬𑁂𑀯 𑀢𑁂 𑀅𑀭𑀺𑀬𑀯𑀺𑀦𑀬𑀸, 𑀢𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑀸. 𑀬𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑀸, 𑀢𑁂𑀯 𑀢𑁂 𑀅𑀭𑀺𑀬𑀯𑀺𑀦𑀬𑀸. 𑀅𑀭𑀺𑀬𑁂𑀢𑀺 𑀯𑀸 𑀲𑀧𑁆𑀧𑀼𑀭𑀺𑀲𑁂𑀢𑀺 𑀯𑀸, 𑀅𑀭𑀺𑀬𑀥𑀫𑁆𑀫𑁂𑀢𑀺 𑀯𑀸 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂𑀢𑀺 𑀯𑀸, 𑀅𑀭𑀺𑀬𑀯𑀺𑀦𑀬𑁂𑀢𑀺 𑀯𑀸 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑁂𑀢𑀺 𑀯𑀸 𑀏𑀲𑁂𑀲𑁂 𑀏𑀓𑁂 𑀏𑀓𑀢𑁆𑀣𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂 𑀢𑀜𑁆𑀜𑁂𑀯𑀸’’𑀢𑀺.

‘‘𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀁 𑀅𑀤𑁂𑀲𑁂𑀢𑁆𑀯𑀸𑀯 ‘‘𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺 𑀏𑀯𑀁 𑀧𑀼𑀣𑀼𑀚𑁆𑀚𑀦𑀁 𑀦𑀺𑀤𑁆𑀤𑀺𑀲𑀻𑀢𑀺? 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀢𑀫𑀢𑁆𑀣𑀁 𑀆𑀯𑀺𑀓𑀸𑀢𑀼𑀁. 𑀪𑀕𑀯𑀢𑁄 𑀳𑀺 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀥𑀫𑁆𑀫𑀤𑁂𑀲𑀦𑀸, 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀧𑀼𑀕𑁆𑀕𑀮𑀤𑁂𑀲𑀦𑀸, 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀧𑀼𑀕𑁆𑀕𑀮𑀤𑁂𑀲𑀦𑀸, 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀥𑀫𑁆𑀫𑀤𑁂𑀲𑀦𑀸𑀢𑀺 𑀥𑀫𑁆𑀫𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀢𑀸𑀯 𑀘𑀢𑀼𑀩𑁆𑀩𑀺𑀥𑀸 𑀤𑁂𑀲𑀦𑀸.

𑀢𑀢𑁆𑀣, ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀯𑁂𑀤𑀦𑀸’’𑀢𑀺 (𑀲𑀁. 𑀦𑀺. 𑁪.𑁨𑁫𑁦) 𑀏𑀯𑀭𑀽𑀧𑀻 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀥𑀫𑁆𑀫𑀤𑁂𑀲𑀦𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀙 𑀥𑀸𑀢𑀼𑀬𑁄 𑀅𑀬𑀁 𑀧𑀼𑀢𑀺𑀲𑁄 𑀙 𑀨𑀲𑁆𑀲𑀸𑀬𑀢𑀦𑁄 𑀅𑀝𑁆𑀞𑀸𑀭𑀲 𑀫𑀦𑁄𑀧𑀯𑀺𑀘𑀸𑀭𑁄 𑀘𑀢𑀼𑀭𑀸𑀥𑀺𑀝𑁆𑀞𑀸𑀦𑁄’’𑀢𑀺 (𑀫. 𑀦𑀺. 𑁩.𑁩𑁪𑁩) 𑀏𑀯𑀭𑀽𑀧𑀻 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀧𑀼𑀕𑁆𑀕𑀮𑀤𑁂𑀲𑀦𑀸. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀅𑀦𑁆𑀥𑁄 𑀏𑀓𑀘𑀓𑁆𑀔𑀼 𑀤𑁆𑀯𑀺𑀘𑀓𑁆𑀔𑀼. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀦𑁆𑀥𑁄’’𑀢𑀺? (𑀅. 𑀦𑀺. 𑁩.𑁨𑁯) 𑀏𑀯𑀭𑀽𑀧𑀻 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀧𑀼𑀕𑁆𑀕𑀮𑀤𑁂𑀲𑀦𑀸. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀕𑁆𑀕𑀢𑀺𑀪𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺, 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑀁…𑀧𑁂… 𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀕𑁆𑀕𑀢𑀺𑀪𑀬’’𑀦𑁆𑀢𑀺 (𑀅. 𑀦𑀺. 𑁪.𑁧𑁨𑁧) 𑀏𑀯𑀭𑀽𑀧𑀻 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀥𑀫𑁆𑀫𑀤𑁂𑀲𑀦𑀸.

𑀲𑁆𑀯𑀸𑀬𑀁 𑀇𑀥 𑀬𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁄 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑁄, 𑀅𑀧𑀭𑀺𑀜𑁆𑀜𑀸𑀫𑀽𑀮𑀺𑀓𑀸 𑀘 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀫𑀽𑀮𑀪𑀽𑀢𑀸 𑀫𑀜𑁆𑀜𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀢𑀫𑀢𑁆𑀣𑀁 𑀆𑀯𑀺𑀓𑀸𑀢𑀼𑀁, ‘‘𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺 𑀏𑀯𑀁 𑀧𑀼𑀣𑀼𑀚𑁆𑀚𑀦𑀁 𑀦𑀺𑀤𑁆𑀤𑀺𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀣𑀯𑀻𑀯𑀸𑀭𑀯𑀡𑁆𑀡𑀦𑀸

𑀏𑀯𑀁 𑀧𑀼𑀣𑀼𑀚𑁆𑀚𑀦𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀧𑀣𑀯𑀻𑀆𑀤𑀻𑀲𑀼 𑀯𑀢𑁆𑀣𑀽𑀲𑀼 𑀲𑀩𑁆𑀩𑀲𑀓𑁆𑀓𑀸𑀬𑀥𑀫𑁆𑀫𑀚𑀦𑀺𑀢𑀁 𑀫𑀜𑁆𑀜𑀦𑀁 𑀤𑀲𑁆𑀲𑁂𑀦𑁆𑀢𑁄, 𑀧𑀣𑀯𑀺𑀁 𑀧𑀣𑀯𑀺𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀮𑀓𑁆𑀔𑀡𑀧𑀣𑀯𑀻 𑀲𑀲𑀫𑁆𑀪𑀸𑀭𑀧𑀣𑀯𑀻 𑀆𑀭𑀫𑁆𑀫𑀡𑀧𑀣𑀯𑀻 𑀲𑀫𑁆𑀫𑀼𑀢𑀺𑀧𑀣𑀯𑀻𑀢𑀺 𑀘𑀢𑀼𑀩𑁆𑀩𑀺𑀥𑀸 𑀧𑀣𑀯𑀻. 𑀢𑀸𑀲𑀼 ‘‘𑀓𑀢𑀫𑀸 𑀘, 𑀆𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼? 𑀬𑀁 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀓𑀓𑁆𑀔𑀴𑀁 𑀔𑀭𑀺𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀯𑀺𑀪. 𑁧𑁭𑁩) 𑀯𑀼𑀢𑁆𑀢𑀸 𑀮𑀓𑁆𑀔𑀡𑀧𑀣𑀯𑀻. ‘‘𑀧𑀣𑀯𑀺𑀁 𑀔𑀡𑁂𑀬𑁆𑀬 𑀯𑀸 𑀔𑀡𑀸𑀧𑁂𑀬𑁆𑀬 𑀯𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁮𑁫) 𑀯𑀼𑀢𑁆𑀢𑀸 𑀲𑀲𑀫𑁆𑀪𑀸𑀭𑀧𑀣𑀯𑀻. 𑀬𑁂 𑀘 𑀓𑁂𑀲𑀸𑀤𑀬𑁄 𑀯𑀻𑀲𑀢𑀺 𑀓𑁄𑀝𑁆𑀞𑀸𑀲𑀸, 𑀅𑀬𑁄𑀮𑁄𑀳𑀸𑀤𑀬𑁄 𑀘 𑀩𑀸𑀳𑀺𑀭𑀸. 𑀲𑀸 𑀳𑀺 𑀯𑀡𑁆𑀡𑀸𑀤𑀻𑀳𑀺 𑀲𑀫𑁆𑀪𑀸𑀭𑁂𑀳𑀺 𑀲𑀤𑁆𑀥𑀺𑀁 𑀧𑀣𑀯𑀻𑀢𑀺 𑀲𑀲𑀫𑁆𑀪𑀸𑀭𑀧𑀣𑀯𑀻. ‘‘𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁬𑁦) 𑀆𑀕𑀢𑀸 𑀧𑀦 𑀆𑀭𑀫𑁆𑀫𑀡𑀧𑀣𑀯𑀻, 𑀦𑀺𑀫𑀺𑀢𑁆𑀢𑀧𑀣𑀯𑀻𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀧𑀣𑀯𑀻𑀓𑀲𑀺𑀡𑀚𑁆𑀛𑀸𑀦𑀮𑀸𑀪𑀻 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀆𑀕𑀫𑀦𑀯𑀲𑁂𑀦 𑀧𑀣𑀯𑀻𑀤𑁂𑀯𑀢𑀸𑀢𑀺 𑀦𑀸𑀫𑀁 𑀮𑀪𑀢𑀺. 𑀅𑀬𑀁 𑀲𑀫𑁆𑀫𑀼𑀢𑀺𑀧𑀣𑀯𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀲𑀩𑁆𑀩𑀸𑀧𑀺 𑀇𑀥 𑀮𑀩𑁆𑀪𑀢𑀺. 𑀢𑀸𑀲𑀼 𑀬𑀁𑀓𑀜𑁆𑀘𑀺 𑀧𑀣𑀯𑀺𑀁 𑀅𑀬𑀁 𑀧𑀼𑀣𑀼𑀚𑁆𑀚𑀦𑁄 𑀧𑀣𑀯𑀺𑀢𑁄 𑀲𑀜𑁆𑀚𑀸𑀦𑀸𑀢𑀺, 𑀧𑀣𑀯𑀻𑀢𑀺 𑀲𑀜𑁆𑀚𑀸𑀦𑀸𑀢𑀺, 𑀧𑀣𑀯𑀻𑀪𑀸𑀕𑁂𑀦 𑀲𑀜𑁆𑀚𑀸𑀦𑀸𑀢𑀺, 𑀮𑁄𑀓𑀯𑁄𑀳𑀸𑀭𑀁 𑀕𑀳𑁂𑀢𑁆𑀯𑀸 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦 𑀲𑀜𑁆𑀚𑀸𑀦𑀸𑀢𑀺 𑀧𑀣𑀯𑀻𑀢𑀺. 𑀏𑀯𑀁 𑀧𑀣𑀯𑀻𑀪𑀸𑀕𑀁 𑀅𑀫𑀼𑀜𑁆𑀘𑀦𑁆𑀢𑁄𑀬𑁂𑀯 𑀯𑀸 𑀏𑀢𑀁 ‘‘𑀲𑀢𑁆𑀢𑁄𑀢𑀺 𑀯𑀸 𑀲𑀢𑁆𑀢𑀲𑁆𑀲𑀸’’𑀢𑀺 𑀯𑀸 𑀆𑀤𑀺𑀦𑀸 𑀦𑀬𑁂𑀦 𑀲𑀜𑁆𑀚𑀸𑀦𑀸𑀢𑀺. 𑀓𑀲𑁆𑀫𑀸 𑀏𑀯𑀁 𑀲𑀜𑁆𑀚𑀸𑀦𑀸𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬 𑀳𑀺 𑀧𑀼𑀣𑀼𑀚𑁆𑀚𑀦𑁄. 𑀲𑁄 𑀬𑀁𑀓𑀺𑀜𑁆𑀘𑀺 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀕𑀡𑁆𑀳𑀸𑀢𑀺. 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀺𑀢𑀸𑀤𑀺𑀪𑁂𑀤𑀫𑁂𑀯 𑀯𑀸 𑀏𑀢𑁆𑀣 𑀓𑀸𑀭𑀡𑀁. 𑀬𑀁 𑀯𑀸 𑀧𑀭𑀢𑁄 ‘‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’’𑀢𑀺 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸𑀯 𑀯𑀼𑀢𑁆𑀢𑀁.

𑀧𑀣𑀯𑀺𑀁 𑀧𑀣𑀯𑀺𑀢𑁄 𑀲𑀜𑁆𑀜𑀢𑁆𑀯𑀸𑀢𑀺 𑀲𑁄 𑀢𑀁 𑀧𑀣𑀯𑀺𑀁 𑀏𑀯𑀁 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀺𑀢𑁆𑀯𑀸, ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺 (𑀲𑀼. 𑀦𑀺. 𑁮𑁮𑁦) 𑀯𑀘𑀦𑀢𑁄 𑀅𑀧𑀭𑀪𑀸𑀕𑁂 𑀣𑀸𑀫𑀧𑀢𑁆𑀢𑁂𑀳𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑁂𑀳𑀺 𑀇𑀥 𑀫𑀜𑁆𑀜𑀦𑀸𑀦𑀸𑀫𑁂𑀦 𑀯𑀼𑀢𑁆𑀢𑁂𑀳𑀺 𑀫𑀜𑁆𑀜𑀢𑀺 𑀓𑀧𑁆𑀧𑁂𑀢𑀺 𑀯𑀺𑀓𑀧𑁆𑀧𑁂𑀢𑀺, 𑀦𑀸𑀦𑀧𑁆𑀧𑀓𑀸𑀭𑀢𑁄 𑀅𑀜𑁆𑀜𑀣𑀸 𑀕𑀡𑁆𑀳𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀣𑀯𑀺𑀁 𑀫𑀜𑁆𑀜𑀢𑀻’’𑀢𑀺. 𑀏𑀯𑀁 𑀫𑀜𑁆𑀜𑀢𑁄 𑀘𑀲𑁆𑀲 𑀢𑀸 𑀫𑀜𑁆𑀜𑀦𑀸 𑀑𑀴𑀸𑀭𑀺𑀓𑀦𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀸 𑀅𑀬𑀁 𑀓𑁂𑀲𑀸 𑀮𑁄𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀻𑀲𑀢𑀺𑀪𑁂𑀤𑀸 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻 𑀯𑀼𑀢𑁆𑀢𑀸. 𑀬𑀸 𑀘𑀸𑀬𑀁 𑀯𑀺𑀪𑀗𑁆𑀕𑁂 ‘‘𑀢𑀢𑁆𑀣 𑀓𑀢𑀫𑀸 𑀩𑀸𑀳𑀺𑀭𑀸 𑀧𑀣𑀯𑀻𑀥𑀸𑀢𑀼? 𑀬𑀁 𑀩𑀸𑀳𑀺𑀭𑀁 𑀓𑀓𑁆𑀔𑀴𑀁 𑀔𑀭𑀺𑀕𑀢𑀁 𑀓𑀓𑁆𑀔𑀴𑀢𑁆𑀢𑀁 𑀓𑀓𑁆𑀔𑀴𑀪𑀸𑀯𑁄 𑀩𑀳𑀺𑀤𑁆𑀥𑀸 𑀅𑀦𑀼𑀧𑀸𑀤𑀺𑀦𑁆𑀦𑀁. 𑀲𑁂𑀬𑁆𑀬𑀣𑀺𑀤𑀁, 𑀅𑀬𑁄 𑀮𑁄𑀳𑀁 𑀢𑀺𑀧𑀼 𑀲𑀻𑀲𑀁 𑀲𑀚𑁆𑀛𑀁 𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑀁 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀮𑁄𑀳𑀺𑀢𑀗𑁆𑀓𑁄 𑀫𑀲𑀸𑀭𑀕𑀮𑁆𑀮𑀁 𑀢𑀺𑀡𑀁 𑀓𑀝𑁆𑀞𑀁 𑀲𑀓𑁆𑀔𑀭𑀸 𑀓𑀞𑀮𑀁 𑀪𑀽𑀫𑀺 𑀧𑀸𑀲𑀸𑀡𑁄 𑀧𑀩𑁆𑀩𑀢𑁄’’𑀢𑀺 (𑀯𑀺𑀪. 𑁧𑁭𑁩) 𑀏𑀯𑀁 𑀩𑀸𑀳𑀺𑀭𑀸 𑀧𑀣𑀯𑀻 𑀯𑀼𑀢𑁆𑀢𑀸. 𑀬𑀸 𑀘 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀦𑀺𑀫𑀺𑀢𑁆𑀢𑀧𑀣𑀯𑀻, 𑀢𑀁 𑀕𑀳𑁂𑀢𑁆𑀯𑀸 𑀅𑀬𑀫𑀢𑁆𑀣𑀬𑁄𑀚𑀦𑀸 𑀯𑀼𑀘𑁆𑀘𑀢𑀺.

𑀧𑀣𑀯𑀺𑀁 𑀫𑀜𑁆𑀜𑀢𑀻𑀢𑀺 𑀢𑀻𑀳𑀺 𑀫𑀜𑁆𑀜𑀦𑀸𑀳𑀺 𑀅𑀳𑀁 𑀧𑀣𑀯𑀻𑀢𑀺 𑀫𑀜𑁆𑀜𑀢𑀺, 𑀫𑀫 𑀧𑀣𑀯𑀻𑀢𑀺 𑀫𑀜𑁆𑀜𑀢𑀺, 𑀧𑀭𑁄 𑀧𑀣𑀯𑀻𑀢𑀺 𑀫𑀜𑁆𑀜𑀢𑀺, 𑀧𑀭𑀲𑁆𑀲 𑀧𑀣𑀯𑀻𑀢𑀺 𑀫𑀜𑁆𑀜𑀢𑀺, 𑀅𑀣 𑀯𑀸 𑀅𑀚𑁆𑀛𑀢𑁆𑀢𑀺𑀓𑀁 𑀧𑀣𑀯𑀺𑀁 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀫𑀸𑀦𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺. 𑀓𑀣𑀁? 𑀅𑀬𑀜𑁆𑀳𑀺 𑀓𑁂𑀲𑀸𑀤𑀻𑀲𑀼 𑀙𑀦𑁆𑀤𑀭𑀸𑀕𑀁 𑀚𑀦𑁂𑀢𑀺 𑀓𑁂𑀲𑁂 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀮𑁄𑀫𑁂, 𑀦𑀔𑁂, 𑀤𑀦𑁆𑀢𑁂, 𑀢𑀘𑀁, 𑀅𑀜𑁆𑀜𑀢𑀭𑀁 𑀯𑀸 𑀧𑀦 𑀭𑀚𑁆𑀚𑀦𑀻𑀬𑀯𑀢𑁆𑀣𑀼𑀁. 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀁 𑀧𑀣𑀯𑀺𑀁 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺. 𑀇𑀢𑀺 𑀫𑁂 𑀓𑁂𑀲𑀸 𑀲𑀺𑀬𑀼𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁. 𑀇𑀢𑀺 𑀮𑁄𑀫𑀸𑀢𑀺𑀆𑀤𑀺𑀦𑀸 𑀯𑀸 𑀧𑀦 𑀦𑀬𑁂𑀦 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀢𑀺. ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀏𑀯𑀁 𑀲𑀺𑀦𑀺𑀤𑁆𑀥𑀫𑀼𑀤𑀼𑀲𑀼𑀔𑀼𑀫𑀦𑀻𑀮𑀓𑁂𑀲𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀸 𑀧𑀦 𑀦𑀬𑁂𑀦 𑀅𑀧𑁆𑀧𑀝𑀺𑀮𑀤𑁆𑀥𑀸𑀦𑀁 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑀺. 𑀏𑀯𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀁 𑀧𑀣𑀯𑀺𑀁 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺.

𑀢𑀣𑀸 𑀅𑀢𑁆𑀢𑀦𑁄 𑀓𑁂𑀲𑀸𑀤𑀻𑀦𑀁 𑀲𑀫𑁆𑀧𑀢𑁆𑀢𑀺𑀁 𑀯𑀸 𑀯𑀺𑀧𑀢𑁆𑀢𑀺𑀁 𑀯𑀸 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀦𑁂𑀢𑀺, ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀯𑀸 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀯𑀸 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀯𑀸’’𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀁 𑀧𑀣𑀯𑀺𑀁 𑀫𑀸𑀦𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺. ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 (𑀫. 𑀦𑀺. 𑁨.𑁧𑁮𑁭) 𑀆𑀕𑀢𑀦𑀬𑁂𑀦 𑀧𑀦 𑀓𑁂𑀲𑀁 ‘‘𑀚𑀻𑀯𑁄’’𑀢𑀺 𑀅𑀪𑀺𑀦𑀺𑀯𑀺𑀲𑀢𑀺. 𑀏𑀲 𑀦𑀬𑁄 𑀮𑁄𑀫𑀸𑀤𑀻𑀲𑀼. 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀁 𑀧𑀣𑀯𑀺𑀁 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺.

𑀅𑀣 𑀯𑀸 ‘‘𑀬𑀸 𑀘𑁂𑀯 𑀔𑁄 𑀧𑀦𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼, 𑀬𑀸 𑀘 𑀩𑀸𑀳𑀺𑀭𑀸 𑀧𑀣𑀯𑀻𑀥𑀸𑀢𑀼, 𑀧𑀣𑀯𑀻𑀥𑀸𑀢𑀼𑀭𑁂𑀯𑁂𑀲𑀸, 𑀢𑀁 𑀦𑁂𑀢𑀁 𑀫𑀫𑀸’’𑀢𑀺 (𑀫. 𑀦𑀺. 𑁧.𑁩𑁦𑁨) 𑀇𑀫𑀺𑀲𑁆𑀲𑀸 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀦𑀻𑀓𑀦𑀬𑁂𑀦 𑀓𑁂𑀲𑀸𑀤𑀺𑀪𑁂𑀤𑀁 𑀧𑀣𑀯𑀺𑀁 𑀏𑀢𑀁 𑀫𑀫 𑀏𑀲𑁄𑀳𑀫𑀲𑁆𑀫𑀺 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀅𑀪𑀺𑀦𑀺𑀯𑀺𑀲𑀢𑀺. 𑀏𑀯𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀁 𑀧𑀣𑀯𑀺𑀁 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺. 𑀏𑀯𑀁 𑀢𑀸𑀯 𑀅𑀚𑁆𑀛𑀢𑁆𑀢𑀺𑀓𑀁 𑀧𑀣𑀯𑀺𑀁 𑀢𑀻𑀳𑀺 𑀫𑀜𑁆𑀜𑀦𑀸𑀳𑀺 𑀫𑀜𑁆𑀜𑀢𑀺.

𑀬𑀣𑀸 𑀘 𑀅𑀚𑁆𑀛𑀢𑁆𑀢𑀺𑀓𑀁 𑀏𑀯𑀁 𑀩𑀸𑀳𑀺𑀭𑀫𑁆𑀧𑀺. 𑀓𑀣𑀁? ‘‘𑀅𑀬𑀜𑁆𑀳𑀺 𑀅𑀬𑀮𑁄𑀳𑀸𑀤𑀻𑀲𑀼 𑀙𑀦𑁆𑀤𑀭𑀸𑀕𑀁 𑀚𑀦𑁂𑀢𑀺. 𑀅𑀬𑀮𑁄𑀳𑀸𑀤𑀻𑀦𑀺 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀫𑀫 𑀅𑀬𑁄 𑀫𑀫 𑀮𑁄𑀳𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀬𑀸𑀤𑀻𑀦𑀺 𑀫𑀫𑀸𑀬𑀢𑀺 𑀭𑀓𑁆𑀔𑀢𑀺 𑀕𑁄𑀧𑀬𑀢𑀺, 𑀏𑀯𑀁 𑀩𑀸𑀳𑀺𑀭𑀁 𑀧𑀣𑀯𑀺𑀁 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺. 𑀇𑀢𑀺 𑀫𑁂 𑀅𑀬𑀮𑁄𑀳𑀸𑀤𑀬𑁄 𑀲𑀺𑀬𑀼𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀦𑁆𑀢𑀺 𑀯𑀸 𑀧𑀦𑁂𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀢𑀺, 𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀏𑀯𑀁 𑀲𑀫𑁆𑀧𑀦𑁆𑀦𑀅𑀬𑀮𑁄𑀳𑀸𑀤𑀺𑀉𑀧𑀓𑀭𑀡𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑀺. 𑀏𑀯𑀫𑁆𑀧𑀺 𑀩𑀸𑀳𑀺𑀭𑀁 𑀧𑀣𑀯𑀺𑀁 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺.

𑀢𑀣𑀸 𑀅𑀢𑁆𑀢𑀦𑁄 𑀅𑀬𑀮𑁄𑀳𑀸𑀤𑀻𑀦𑀁 𑀲𑀫𑁆𑀧𑀢𑁆𑀢𑀺𑀁 𑀯𑀸 𑀯𑀺𑀧𑀢𑁆𑀢𑀺𑀁 𑀯𑀸 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀦𑁂𑀢𑀺 ‘‘𑀇𑀫𑀺𑀦𑀸𑀳𑀁 𑀲𑁂𑀬𑁆𑀬𑁄𑀲𑁆𑀫𑀻𑀢𑀺 𑀯𑀸, 𑀲𑀤𑀺𑀲𑁄𑀲𑁆𑀫𑀻𑀢𑀺 𑀯𑀸 𑀳𑀻𑀦𑁄𑀲𑁆𑀫𑀻𑀢𑀺 𑀯𑀸’’𑀢𑀺 (𑀯𑀺𑀪. 𑁮𑁩𑁨) 𑀏𑀯𑀁 𑀩𑀸𑀳𑀺𑀭𑀁 𑀧𑀣𑀯𑀺𑀁 𑀫𑀸𑀦𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺. 𑀅𑀬𑁂 𑀚𑀻𑀯𑀲𑀜𑁆𑀜𑀻 𑀳𑀼𑀢𑁆𑀯𑀸 𑀧𑀦 𑀅𑀬𑀁 ‘‘𑀚𑀻𑀯𑁄’’𑀢𑀺 𑀅𑀪𑀺𑀦𑀺𑀯𑀺𑀲𑀢𑀺. 𑀏𑀲 𑀦𑀬𑁄 𑀮𑁄𑀳𑀸𑀤𑀻𑀲𑀼. 𑀏𑀯𑀁 𑀩𑀸𑀳𑀺𑀭𑀁 𑀧𑀣𑀯𑀺𑀁 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺.

𑀅𑀣 𑀯𑀸 ‘‘𑀇𑀥𑁂𑀓𑀘𑁆𑀘𑁄 𑀧𑀣𑀯𑀻𑀓𑀲𑀺𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀁 𑀧𑀣𑀯𑀻𑀓𑀲𑀺𑀡𑀁, 𑀲𑁄 𑀅𑀳𑀁. 𑀬𑁄 𑀅𑀳𑀁, 𑀢𑀁 𑀧𑀣𑀯𑀻𑀓𑀲𑀺𑀡𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁩𑁧) 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀫𑀺𑀢𑁆𑀢𑀧𑀣𑀯𑀺𑀁 ‘‘𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑀺𑀲𑀢𑀺. 𑀏𑀯𑀁 𑀩𑀸𑀳𑀺𑀭𑀁 𑀧𑀣𑀯𑀺𑀁 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺. 𑀏𑀯𑀫𑁆𑀧𑀺 𑀩𑀸𑀳𑀺𑀭𑀁 𑀧𑀣𑀯𑀺𑀁 𑀢𑀻𑀳𑀺 𑀫𑀜𑁆𑀜𑀦𑀸𑀳𑀺 𑀫𑀜𑁆𑀜𑀢𑀺. 𑀏𑀯𑀁 𑀢𑀸𑀯 ‘‘𑀧𑀣𑀯𑀺𑀁 𑀫𑀜𑁆𑀜𑀢𑀻’’𑀢𑀺 𑀏𑀢𑁆𑀣 𑀢𑀺𑀲𑁆𑀲𑁄𑀧𑀺 𑀫𑀜𑁆𑀜𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀢𑁄 𑀧𑀭𑀁 𑀲𑀗𑁆𑀔𑁂𑀧𑁂𑀦𑁂𑀯 𑀓𑀣𑀬𑀺𑀲𑁆𑀲𑀸𑀫.

𑀧𑀣𑀯𑀺𑀬𑀸 𑀫𑀜𑁆𑀜𑀢𑀻𑀢𑀺 𑀏𑀢𑁆𑀣 𑀧𑀣𑀯𑀺𑀬𑀸𑀢𑀺 𑀪𑀼𑀫𑁆𑀫𑀯𑀘𑀦𑀫𑁂𑀢𑀁. 𑀢𑀲𑁆𑀫𑀸 𑀅𑀳𑀁 𑀧𑀣𑀯𑀺𑀬𑀸𑀢𑀺 𑀫𑀜𑁆𑀜𑀢𑀺, 𑀫𑀬𑁆𑀳𑀁 𑀓𑀺𑀜𑁆𑀘𑀦𑀁 𑀧𑀮𑀺𑀩𑁄𑀥𑁄 𑀧𑀣𑀯𑀺𑀬𑀸𑀢𑀺 𑀫𑀜𑁆𑀜𑀢𑀺, 𑀧𑀭𑁄 𑀧𑀣𑀯𑀺𑀬𑀸𑀢𑀺 𑀫𑀜𑁆𑀜𑀢𑀺, 𑀧𑀭𑀲𑁆𑀲 𑀓𑀺𑀜𑁆𑀘𑀦𑀁 𑀧𑀮𑀺𑀩𑁄𑀥𑁄 𑀧𑀣𑀯𑀺𑀬𑀸𑀢𑀺 𑀫𑀜𑁆𑀜𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀅𑀣 𑀯𑀸 𑀬𑁆𑀯𑀸𑀬𑀁 ‘‘𑀓𑀣𑀁 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺? 𑀇𑀥𑁂𑀓𑀘𑁆𑀘𑁄 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀢𑀲𑁆𑀲 𑀏𑀯𑀁 𑀳𑁄𑀢𑀺, 𑀅𑀬𑀁 𑀔𑁄 𑀫𑁂 𑀅𑀢𑁆𑀢𑀸, 𑀲𑁄 𑀔𑁄 𑀧𑀦 𑀫𑁂 𑀅𑀢𑁆𑀢𑀸 𑀇𑀫𑀲𑁆𑀫𑀺𑀁 𑀭𑀽𑀧𑁂𑀢𑀺 𑀏𑀯𑀁 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁩𑁧) 𑀏𑀢𑀲𑁆𑀲 𑀅𑀢𑁆𑀣𑀦𑀬𑁄 𑀯𑀼𑀢𑁆𑀢𑁄, 𑀏𑀢𑁂𑀦𑁂𑀯 𑀦𑀬𑁂𑀦 𑀯𑁂𑀤𑀦𑀸𑀤𑀺𑀥𑀫𑁆𑀫𑁂 𑀅𑀢𑁆𑀢𑀢𑁄 𑀕𑀳𑁂𑀢𑁆𑀯𑀸 𑀢𑀢𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀲𑀼 𑀧𑀣𑀯𑀻𑀲𑀼 𑀬𑀁𑀓𑀺𑀜𑁆𑀘𑀺 𑀧𑀣𑀯𑀺𑀁 𑀢𑀲𑁆𑀲𑁄𑀓𑀸𑀲𑀪𑀸𑀯𑁂𑀦 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀺𑀲𑁆𑀲𑀸 𑀧𑀣𑀯𑀺𑀬𑀸𑀢𑀺 𑀫𑀜𑁆𑀜𑀦𑁆𑀢𑁄 𑀧𑀣𑀯𑀺𑀬𑀸 𑀫𑀜𑁆𑀜𑀢𑀺, 𑀅𑀬𑀫𑀲𑁆𑀲 𑀤𑀺𑀝𑁆𑀞𑀺𑀫𑀜𑁆𑀜𑀦𑀸. 𑀢𑀲𑁆𑀫𑀺𑀁𑀬𑁂𑀯 𑀧𑀦𑀲𑁆𑀲 𑀅𑀢𑁆𑀢𑀦𑀺 𑀲𑀺𑀦𑁂𑀳𑀁 𑀢𑀩𑁆𑀩𑀢𑁆𑀣𑀼𑀓𑀜𑁆𑀘 𑀫𑀸𑀦𑀁 𑀉𑀧𑁆𑀧𑀸𑀤𑀬𑀢𑁄 𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀸 𑀧𑀦 𑀢𑁂𑀦𑁂𑀯 𑀦𑀬𑁂𑀦 𑀲𑁄 𑀔𑁄 𑀧𑀦𑀲𑁆𑀲 𑀅𑀢𑁆𑀢𑀸 𑀧𑀣𑀯𑀺𑀬𑀸𑀢𑀺 𑀫𑀜𑁆𑀜𑀢𑀺, 𑀢𑀤𑀸 𑀤𑀺𑀝𑁆𑀞𑀺𑀫𑀜𑁆𑀜𑀦𑀸 𑀏𑀯 𑀬𑀼𑀚𑁆𑀚𑀢𑀺. 𑀇𑀢𑀭𑀸𑀬𑁄𑀧𑀺 𑀧𑀦 𑀇𑀘𑁆𑀙𑀦𑁆𑀢𑀺.

𑀧𑀣𑀯𑀺𑀢𑁄 𑀫𑀜𑁆𑀜𑀢𑀻𑀢𑀺 𑀏𑀢𑁆𑀣 𑀧𑀦 𑀧𑀣𑀯𑀺𑀢𑁄𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀢𑀲𑁆𑀫𑀸 𑀲𑀉𑀧𑀓𑀭𑀡𑀲𑁆𑀲 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀢𑁄 𑀧𑀣𑀯𑀺𑀢𑁄 𑀉𑀧𑁆𑀧𑀢𑁆𑀢𑀺𑀁 𑀯𑀸 𑀦𑀺𑀕𑁆𑀕𑀫𑀦𑀁 𑀯𑀸 𑀧𑀣𑀯𑀺𑀢𑁄 𑀯𑀸 𑀅𑀜𑁆𑀜𑁄 𑀅𑀢𑁆𑀢𑀸𑀢𑀺 𑀫𑀜𑁆𑀜𑀫𑀸𑀦𑁄 𑀧𑀣𑀯𑀺𑀢𑁄 𑀫𑀜𑁆𑀜𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀅𑀬𑀫𑀲𑁆𑀲 𑀤𑀺𑀝𑁆𑀞𑀺𑀫𑀜𑁆𑀜𑀦𑀸. 𑀢𑀲𑁆𑀫𑀺𑀁𑀬𑁂𑀯 𑀧𑀦𑀲𑁆𑀲 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀦𑁂𑀳𑀁 𑀫𑀸𑀦𑀜𑁆𑀘 𑀉𑀧𑁆𑀧𑀸𑀤𑀬𑀢𑁄 𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀭𑁂 𑀆𑀳𑀼 𑀧𑀣𑀯𑀻𑀓𑀲𑀺𑀡𑀁 𑀧𑀭𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑀁 𑀅𑀧𑁆𑀧𑀫𑀸𑀡𑀁 𑀅𑀢𑁆𑀢𑀸𑀦𑀁 𑀕𑀳𑁂𑀢𑁆𑀯𑀸 𑀧𑀣𑀯𑀺𑀢𑁄 𑀩𑀳𑀺𑀤𑁆𑀥𑀸𑀧𑀺 𑀫𑁂 𑀅𑀢𑁆𑀢𑀸𑀢𑀺 𑀫𑀜𑁆𑀜𑀫𑀸𑀦𑁄 𑀧𑀣𑀯𑀺𑀢𑁄 𑀫𑀜𑁆𑀜𑀢𑀻𑀢𑀺.

𑀧𑀣𑀯𑀺𑀁 𑀫𑁂𑀢𑀺 𑀫𑀜𑁆𑀜𑀢𑀻𑀢𑀺 𑀏𑀢𑁆𑀣 𑀧𑀦 𑀓𑁂𑀯𑀮𑀜𑁆𑀳𑀺 𑀫𑀳𑀸𑀧𑀣𑀯𑀺𑀁 𑀢𑀡𑁆𑀳𑀸𑀯𑀲𑁂𑀦 𑀫𑀫𑀸𑀬𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀸 𑀏𑀓𑀸 𑀢𑀡𑁆𑀳𑀸𑀫𑀜𑁆𑀜𑀦𑀸 𑀏𑀯 𑀮𑀩𑁆𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀘𑀸𑀬𑀁 𑀫𑀫 𑀓𑁂𑀲𑀸, 𑀫𑀫 𑀮𑁄𑀫𑀸, 𑀫𑀫 𑀅𑀬𑁄, 𑀫𑀫 𑀮𑁄𑀳𑀦𑁆𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀬 𑀲𑀩𑁆𑀩𑀸𑀬𑀧𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬 𑀧𑀣𑀯𑀺𑀬𑀸 𑀬𑁄𑀚𑁂𑀢𑀩𑁆𑀩𑀸𑀢𑀺.

𑀧𑀣𑀯𑀺𑀁 𑀅𑀪𑀺𑀦𑀦𑁆𑀤𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 𑀧𑀣𑀯𑀺𑀁 𑀢𑀡𑁆𑀳𑀸𑀤𑀻𑀳𑀺 𑀅𑀪𑀺𑀦𑀦𑁆𑀤𑀢𑀺, 𑀅𑀲𑁆𑀲𑀸𑀤𑁂𑀢𑀺, 𑀧𑀭𑀸𑀫𑀲𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀣𑀯𑀺𑀁 𑀫𑀜𑁆𑀜𑀢𑀻’’𑀢𑀺 𑀏𑀢𑁂𑀦𑁂𑀯 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀺𑀤𑁆𑀥𑁂 𑀓𑀲𑁆𑀫𑀸 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀘𑁂. 𑀅𑀯𑀺𑀘𑀸𑀭𑀺𑀢𑀫𑁂𑀢𑀁 𑀧𑁄𑀭𑀸𑀡𑁂𑀳𑀺. 𑀅𑀬𑀁 𑀧𑀦 𑀅𑀢𑁆𑀢𑀦𑁄 𑀫𑀢𑀺, 𑀤𑁂𑀲𑀦𑀸𑀯𑀺𑀮𑀸𑀲𑀢𑁄 𑀯𑀸 𑀆𑀤𑀻𑀦𑀯𑀤𑀲𑁆𑀲𑀦𑀢𑁄 𑀯𑀸. 𑀬𑀲𑁆𑀲𑀸 𑀳𑀺 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀭𑀤𑁂𑀲𑀦𑀸𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑁄, 𑀅𑀬𑀁 𑀲𑀸 𑀪𑀕𑀯𑀢𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀢𑀲𑁆𑀫𑀸 𑀧𑀼𑀩𑁆𑀩𑁂 𑀫𑀜𑁆𑀜𑀦𑀸𑀯𑀲𑁂𑀦 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀪𑀺𑀦𑀦𑁆𑀤𑀦𑀸𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀤𑁂𑀲𑀦𑀸𑀯𑀺𑀮𑀸𑀲𑀢𑁄 𑀯𑀸 𑀇𑀤𑀫𑀸𑀳. 𑀬𑁄 𑀯𑀸 𑀧𑀣𑀯𑀺𑀁 𑀫𑀜𑁆𑀜𑀢𑀺, 𑀧𑀣𑀯𑀺𑀬𑀸 𑀫𑀜𑁆𑀜𑀢𑀺, 𑀧𑀣𑀯𑀺𑀢𑁄 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀲𑁄 𑀬𑀲𑁆𑀫𑀸 𑀦 𑀲𑀓𑁆𑀓𑁄𑀢𑀺 𑀧𑀣𑀯𑀻𑀦𑀺𑀲𑁆𑀲𑀺𑀢𑀁 𑀢𑀡𑁆𑀳𑀁 𑀯𑀸 𑀤𑀺𑀝𑁆𑀞𑀺𑀁 𑀯𑀸 𑀧𑀳𑀸𑀢𑀼𑀁, 𑀢𑀲𑁆𑀫𑀸 𑀧𑀣𑀯𑀺𑀁 𑀅𑀪𑀺𑀦𑀦𑁆𑀤𑀢𑀺𑀬𑁂𑀯. 𑀬𑁄 𑀘 𑀧𑀣𑀯𑀺𑀁 𑀅𑀪𑀺𑀦𑀦𑁆𑀤𑀢𑀺, 𑀤𑀼𑀓𑁆𑀔𑀁 𑀲𑁄 𑀅𑀪𑀺𑀦𑀦𑁆𑀤𑀢𑀺, 𑀤𑀼𑀓𑁆𑀔𑀜𑁆𑀘 𑀆𑀤𑀻𑀦𑀯𑁄𑀢𑀺 𑀆𑀤𑀻𑀦𑀯𑀤𑀲𑁆𑀲𑀦𑀢𑁄𑀧𑀺 𑀇𑀤𑀫𑀸𑀳. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀪𑀕𑀯𑀢𑀸 ‘‘𑀬𑁄, 𑀪𑀺𑀓𑁆𑀔𑀯𑁂, 𑀧𑀣𑀯𑀻𑀥𑀸𑀢𑀼𑀁 𑀅𑀪𑀺𑀦𑀦𑁆𑀤𑀢𑀺, 𑀤𑀼𑀓𑁆𑀔𑀁 𑀲𑁄 𑀅𑀪𑀺𑀦𑀦𑁆𑀤𑀢𑀺, 𑀬𑁄 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺, 𑀅𑀧𑀭𑀺𑀫𑀼𑀢𑁆𑀢𑁄 𑀲𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀻’’𑀢𑀺.

𑀏𑀯𑀁 𑀧𑀣𑀯𑀻𑀯𑀢𑁆𑀣𑀼𑀓𑀁 𑀫𑀜𑁆𑀜𑀦𑀁 𑀅𑀪𑀺𑀦𑀦𑁆𑀤𑀦𑀜𑁆𑀘 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁂𑀦 𑀓𑀸𑀭𑀡𑁂𑀦 𑀲𑁄 𑀫𑀜𑁆𑀜𑀢𑀺, 𑀅𑀪𑀺𑀦𑀦𑁆𑀤𑀢𑀺 𑀘, 𑀢𑀁 𑀓𑀸𑀭𑀡𑀁 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 𑀢𑀁 𑀓𑀺𑀲𑁆𑀲 𑀳𑁂𑀢𑀼, 𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸𑀢𑀺 𑀯𑀤𑀸𑀫𑀻𑀢𑀺. 𑀢𑀲𑁆𑀲𑀢𑁆𑀣𑁄, 𑀲𑁄 𑀧𑀼𑀣𑀼𑀚𑁆𑀚𑀦𑁄 𑀢𑀁 𑀧𑀣𑀯𑀺𑀁 𑀓𑀺𑀲𑁆𑀲 𑀳𑁂𑀢𑀼 𑀫𑀜𑁆𑀜𑀢𑀺, 𑀓𑁂𑀦 𑀓𑀸𑀭𑀡𑁂𑀦 𑀫𑀜𑁆𑀜𑀢𑀺, 𑀅𑀪𑀺𑀦𑀦𑁆𑀤𑀢𑀻𑀢𑀺 𑀘𑁂. 𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸𑀢𑀺 𑀯𑀤𑀸𑀫𑀻𑀢𑀺, 𑀬𑀲𑁆𑀫𑀸 𑀢𑀁 𑀯𑀢𑁆𑀣𑀼 𑀢𑀲𑁆𑀲 𑀅𑀧𑀭𑀺𑀜𑁆𑀜𑀸𑀢𑀁, 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀳𑀺 𑀧𑀣𑀯𑀺𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀬 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀳𑀸𑀦𑀧𑀭𑀺𑀜𑁆𑀜𑀸𑀬𑀸𑀢𑀺.

𑀢𑀢𑁆𑀣 𑀓𑀢𑀫𑀸 𑀜𑀸𑀢𑀧𑀭𑀺𑀜𑁆𑀜𑀸. 𑀧𑀣𑀯𑀻𑀥𑀸𑀢𑀼𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀬𑀁 𑀧𑀣𑀯𑀻𑀥𑀸𑀢𑀼 𑀅𑀚𑁆𑀛𑀢𑁆𑀢𑀺𑀓𑀸, 𑀅𑀬𑀁 𑀩𑀸𑀳𑀺𑀭𑀸, 𑀇𑀤𑀫𑀲𑁆𑀲𑀸 𑀮𑀓𑁆𑀔𑀡𑀁, 𑀇𑀫𑀸𑀦𑀺 𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀻𑀢𑀺, 𑀅𑀬𑀁 𑀜𑀸𑀢𑀧𑀭𑀺𑀜𑁆𑀜𑀸. 𑀓𑀢𑀫𑀸 𑀢𑀻𑀭𑀡𑀧𑀭𑀺𑀜𑁆𑀜𑀸? 𑀏𑀯𑀁 𑀜𑀸𑀢𑀁 𑀓𑀢𑁆𑀯𑀸 𑀧𑀣𑀯𑀻𑀥𑀸𑀢𑀼𑀁 𑀢𑀻𑀭𑁂𑀢𑀺 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄𑀢𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺, 𑀅𑀬𑀁 𑀢𑀻𑀭𑀡𑀧𑀭𑀺𑀜𑁆𑀜𑀸. 𑀓𑀢𑀫𑀸 𑀧𑀳𑀸𑀦𑀧𑀭𑀺𑀜𑁆𑀜𑀸? 𑀏𑀯𑀁 𑀢𑀻𑀭𑀬𑀺𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑁂𑀦 𑀧𑀣𑀯𑀻𑀥𑀸𑀢𑀼𑀬𑀸 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺, 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸.

𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀁 𑀯𑀸 𑀜𑀸𑀢𑀧𑀭𑀺𑀜𑁆𑀜𑀸. 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀅𑀦𑀼𑀮𑁄𑀫𑀧𑀭𑀺𑀬𑁄𑀲𑀸𑀦𑀸 𑀢𑀻𑀭𑀡𑀧𑀭𑀺𑀜𑁆𑀜𑀸. 𑀅𑀭𑀺𑀬𑀫𑀕𑁆𑀕𑁂 𑀜𑀸𑀡𑀁 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺. 𑀬𑁄 𑀧𑀣𑀯𑀺𑀁 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀇𑀫𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀸𑀢𑀺, 𑀅𑀲𑁆𑀲 𑀘 𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑀸 𑀧𑀭𑀺𑀜𑁆𑀜𑀸𑀬𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀧𑀣𑀯𑀺𑀁 𑀫𑀜𑁆𑀜𑀢𑀺 𑀘 𑀅𑀪𑀺𑀦𑀦𑁆𑀤𑀢𑀺 𑀘𑀸𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄…𑀧𑁂… 𑀧𑀣𑀯𑀺𑀁 𑀫𑀜𑁆𑀜𑀢𑀺, 𑀧𑀣𑀯𑀺𑀬𑀸 𑀫𑀜𑁆𑀜𑀢𑀺, 𑀧𑀣𑀯𑀺𑀢𑁄 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸𑀢𑀺 𑀯𑀤𑀸𑀫𑀻’’𑀢𑀺.

𑀧𑀣𑀯𑀻𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀧𑁄𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑀆𑀧𑀁 𑀆𑀧𑀢𑁄𑀢𑀺 𑀏𑀢𑁆𑀣𑀸𑀧𑀺 𑀮𑀓𑁆𑀔𑀡𑀲𑀲𑀫𑁆𑀪𑀸𑀭𑀸𑀭𑀫𑁆𑀫𑀡𑀲𑀫𑁆𑀫𑀼𑀢𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀆𑀧𑁄. 𑀢𑁂𑀲𑀼 ‘‘𑀢𑀢𑁆𑀣, 𑀓𑀢𑀫𑀸 𑀅𑀚𑁆𑀛𑀢𑁆𑀢𑀺𑀓𑀸 𑀆𑀧𑁄𑀥𑀸𑀢𑀼. 𑀬𑀁 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀆𑀧𑁄 𑀆𑀧𑁄𑀕𑀢𑀁, 𑀲𑀺𑀦𑁂𑀳𑁄 𑀲𑀺𑀦𑁂𑀳𑀕𑀢𑀁 𑀩𑀦𑁆𑀥𑀦𑀢𑁆𑀢𑀁 𑀭𑀽𑀧𑀲𑁆𑀲 𑀅𑀚𑁆𑀛𑀢𑁆𑀢𑀁 𑀉𑀧𑀸𑀤𑀺𑀦𑁆𑀦’’𑀦𑁆𑀢𑀺𑀆𑀤𑀻𑀲𑀼 (𑀯𑀺𑀪. 𑁧𑁭𑁪) 𑀯𑀼𑀢𑁆𑀢𑁄 𑀮𑀓𑁆𑀔𑀡𑀆𑀧𑁄. ‘‘𑀆𑀧𑁄𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀆𑀧𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀻’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑁄 𑀲𑀲𑀫𑁆𑀪𑀸𑀭𑀸𑀧𑁄. 𑀲𑁂𑀲𑀁 𑀲𑀩𑁆𑀩𑀁 𑀧𑀣𑀯𑀺𑀬𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀓𑁂𑀯𑀮𑀁 𑀬𑁄𑀚𑀦𑀸𑀦𑀬𑁂 𑀧𑀦 ‘‘𑀧𑀺𑀢𑁆𑀢𑀁 𑀲𑁂𑀫𑁆𑀳’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀤𑁆𑀯𑀸𑀤𑀲𑀪𑁂𑀤𑀸 𑀅𑀚𑁆𑀛𑀢𑁆𑀢𑀺𑀓𑀸 𑀆𑀧𑁄𑀥𑀸𑀢𑀼, ‘‘𑀢𑀢𑁆𑀣, 𑀓𑀢𑀫𑀸 𑀩𑀸𑀳𑀺𑀭𑀸 𑀆𑀧𑁄𑀥𑀸𑀢𑀼? 𑀬𑀁 𑀩𑀸𑀳𑀺𑀭𑀁 𑀆𑀧𑁄 𑀆𑀧𑁄𑀕𑀢𑀁, 𑀲𑀺𑀦𑁂𑀳𑁄 𑀲𑀺𑀦𑁂𑀳𑀕𑀢𑀁 𑀩𑀦𑁆𑀥𑀦𑀢𑁆𑀢𑀁 𑀭𑀽𑀧𑀲𑁆𑀲 𑀩𑀳𑀺𑀤𑁆𑀥𑀸 𑀅𑀦𑀼𑀧𑀸𑀤𑀺𑀦𑁆𑀦𑀁. 𑀲𑁂𑀬𑁆𑀬𑀣𑀺𑀤𑀁, 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄 𑀢𑀘𑀭𑀲𑁄 𑀧𑀢𑁆𑀢𑀭𑀲𑁄 𑀧𑀼𑀧𑁆𑀨𑀭𑀲𑁄 𑀨𑀮𑀭𑀲𑁄 𑀔𑀻𑀭𑀁 𑀤𑀥𑀺 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀁 𑀪𑀼𑀫𑁆𑀫𑀸𑀦𑀺 𑀯𑀸 𑀉𑀤𑀓𑀸𑀦𑀺 𑀅𑀦𑁆𑀢𑀮𑀺𑀓𑁆𑀔𑀸𑀦𑀺 𑀯𑀸’’𑀢𑀺 (𑀯𑀺𑀪. 𑁧𑁭𑁪) 𑀏𑀯𑀁 𑀯𑀼𑀢𑁆𑀢𑀸 𑀘 𑀩𑀸𑀳𑀺𑀭𑀸 𑀆𑀧𑁄𑀥𑀸𑀢𑀼 𑀯𑁂𑀤𑀺𑀢𑀩𑁆𑀩𑀸, 𑀬𑁄 𑀘 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀦𑀺𑀫𑀺𑀢𑁆𑀢𑀆𑀧𑁄.

𑀢𑁂𑀚𑀁 𑀢𑁂𑀚𑀢𑁄𑀢𑀺 𑀇𑀫𑀲𑁆𑀫𑀺𑀁 𑀢𑁂𑀚𑁄𑀯𑀸𑀭𑁂𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄𑀚𑀦𑀸𑀦𑀬𑁂 𑀧𑀦𑁂𑀢𑁆𑀣 ‘‘𑀬𑁂𑀦 𑀘 𑀲𑀦𑁆𑀢𑀧𑁆𑀧𑀢𑀺, 𑀬𑁂𑀦 𑀘 𑀚𑀻𑀭𑀻𑀬𑀢𑀺, 𑀬𑁂𑀦 𑀘 𑀧𑀭𑀺𑀟𑀬𑁆𑀳𑀢𑀺, 𑀬𑁂𑀦 𑀘 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀻’’𑀢𑀺 (𑀯𑀺𑀪. 𑁧𑁭𑁫) 𑀏𑀯𑀁 𑀯𑀼𑀢𑁆𑀢𑀸 𑀘𑀢𑀼𑀧𑁆𑀧𑀪𑁂𑀤𑀸 𑀅𑀚𑁆𑀛𑀢𑁆𑀢𑀺𑀓𑀸 𑀢𑁂𑀚𑁄𑀥𑀸𑀢𑀼. ‘‘𑀢𑀢𑁆𑀣 𑀓𑀢𑀫𑀸 𑀩𑀸𑀳𑀺𑀭𑀸 𑀢𑁂𑀚𑁄𑀥𑀸𑀢𑀼? 𑀬𑀁 𑀩𑀸𑀳𑀺𑀭𑀁 𑀢𑁂𑀚𑁄 𑀢𑁂𑀚𑁄𑀕𑀢𑀁 𑀉𑀲𑁆𑀫𑀸 𑀉𑀲𑁆𑀫𑀸𑀕𑀢𑀁 𑀉𑀲𑀼𑀫𑀁 𑀉𑀲𑀼𑀫𑀕𑀢𑀁 𑀩𑀳𑀺𑀤𑁆𑀥𑀸 𑀅𑀦𑀼𑀧𑀸𑀤𑀺𑀦𑁆𑀦𑀁. 𑀲𑁂𑀬𑁆𑀬𑀣𑀺𑀤𑀁, 𑀓𑀝𑁆𑀞𑀕𑁆𑀕𑀺 𑀧𑀮𑀸𑀮𑀕𑁆𑀕𑀺 𑀢𑀺𑀡𑀕𑁆𑀕𑀺 𑀕𑁄𑀫𑀬𑀕𑁆𑀕𑀺 𑀣𑀼𑀲𑀕𑁆𑀕𑀺 𑀲𑀗𑁆𑀓𑀸𑀭𑀕𑁆𑀕𑀺 𑀇𑀦𑁆𑀤𑀕𑁆𑀕𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑁄 𑀲𑀽𑀭𑀺𑀬𑀲𑀦𑁆𑀢𑀸𑀧𑁄 𑀓𑀝𑁆𑀞𑀲𑀦𑁆𑀦𑀺𑀘𑀬𑀲𑀦𑁆𑀢𑀸𑀧𑁄 𑀢𑀺𑀡𑀲𑀦𑁆𑀦𑀺𑀘𑀬𑀲𑀦𑁆𑀢𑀸𑀧𑁄 𑀥𑀜𑁆𑀜𑀲𑀦𑁆𑀦𑀺𑀘𑀬𑀲𑀦𑁆𑀢𑀸𑀧𑁄 𑀪𑀡𑁆𑀟𑀲𑀦𑁆𑀦𑀺𑀘𑀬𑀲𑀦𑁆𑀢𑀸𑀧𑁄’’𑀢𑀺 (𑀯𑀺𑀪. 𑁧𑁭𑁫) 𑀏𑀯𑀁 𑀯𑀼𑀢𑁆𑀢𑀸 𑀘 𑀩𑀸𑀳𑀺𑀭𑀸 𑀢𑁂𑀚𑁄𑀥𑀸𑀢𑀼 𑀯𑁂𑀤𑀺𑀢𑀩𑁆𑀩𑀸.

𑀯𑀸𑀬𑀁 𑀯𑀸𑀬𑀢𑁄𑀢𑀺 𑀇𑀫𑀲𑁆𑀲 𑀯𑀸𑀬𑀯𑀸𑀭𑀲𑁆𑀲𑀸𑀧𑀺 𑀬𑁄𑀚𑀦𑀸𑀦𑀬𑁂 𑀧𑀦 ‘‘𑀉𑀤𑁆𑀥𑀗𑁆𑀕𑀫𑀸 𑀯𑀸𑀢𑀸 𑀅𑀥𑁄𑀕𑀫𑀸 𑀯𑀸𑀢𑀸 𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸 𑀓𑁄𑀝𑁆𑀞𑀸𑀲𑀬𑀸 𑀯𑀸𑀢𑀸 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀯𑀸𑀢𑀸 𑀲𑀢𑁆𑀣𑀓𑀯𑀸𑀢𑀸 𑀔𑀼𑀭𑀓𑀯𑀸𑀢𑀸 𑀉𑀧𑁆𑀧𑀮𑀓𑀯𑀸𑀢𑀸 𑀅𑀲𑁆𑀲𑀸𑀲𑁄 𑀧𑀲𑁆𑀲𑀸𑀲𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀅𑀚𑁆𑀛𑀢𑁆𑀢𑀺𑀓𑀸 𑀯𑀸𑀬𑁄𑀥𑀸𑀢𑀼. ‘‘𑀢𑀢𑁆𑀣 𑀓𑀢𑀫𑀸 𑀩𑀸𑀳𑀺𑀭𑀸 𑀯𑀸𑀬𑁄𑀥𑀸𑀢𑀼? 𑀬𑀁 𑀩𑀸𑀳𑀺𑀭𑀁 𑀯𑀸𑀬𑁄 𑀯𑀸𑀬𑁄𑀕𑀢𑀁 𑀣𑀫𑁆𑀪𑀺𑀢𑀢𑁆𑀢𑀁 𑀭𑀽𑀧𑀲𑁆𑀲 𑀩𑀳𑀺𑀤𑁆𑀥𑀸 𑀅𑀦𑀼𑀧𑀸𑀤𑀺𑀦𑁆𑀦𑀁. 𑀲𑁂𑀬𑁆𑀬𑀣𑀺𑀤𑀁, 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀸 𑀧𑀘𑁆𑀙𑀺𑀫𑀸 𑀯𑀸𑀢𑀸 𑀉𑀢𑁆𑀢𑀭𑀸 𑀯𑀸𑀢𑀸 𑀤𑀓𑁆𑀔𑀺𑀡𑀸 𑀯𑀸𑀢𑀸 𑀲𑀭𑀚𑀸 𑀯𑀸𑀢𑀸 𑀅𑀭𑀚𑀸 𑀯𑀸𑀢𑀸 𑀲𑀻𑀢𑀸 𑀯𑀸𑀢𑀸 𑀉𑀡𑁆𑀳𑀸 𑀯𑀸𑀢𑀸 𑀧𑀭𑀺𑀢𑁆𑀢𑀸 𑀯𑀸𑀢𑀸 𑀅𑀥𑀺𑀫𑀢𑁆𑀢𑀸 𑀯𑀸𑀢𑀸 𑀓𑀸𑀴𑀯𑀸𑀢𑀸 𑀯𑁂𑀭𑀫𑁆𑀪𑀯𑀸𑀢𑀸 𑀧𑀓𑁆𑀔𑀯𑀸𑀢𑀸 𑀲𑀼𑀧𑀡𑁆𑀡𑀯𑀸𑀢𑀸 𑀢𑀸𑀮𑀯𑀡𑁆𑀝𑀯𑀸𑀢𑀸 𑀯𑀺𑀥𑀽𑀧𑀦𑀯𑀸𑀢𑀸’’𑀢𑀺 (𑀯𑀺𑀪. 𑁧𑁭𑁬) 𑀏𑀯𑀁 𑀯𑀼𑀢𑁆𑀢𑀸 𑀘 𑀩𑀸𑀳𑀺𑀭𑀸 𑀯𑀸𑀬𑁄𑀥𑀸𑀢𑀼 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀬𑁆𑀯𑀸𑀬𑀁 𑁋

‘‘𑀯𑀼𑀢𑁆𑀢𑀫𑁆𑀳𑀺 𑀏𑀓𑀥𑀫𑁆𑀫𑁂, 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀢𑁂𑀦;

𑀯𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀩𑁆𑀩𑁂, 𑀇𑀢𑀺 𑀯𑀼𑀢𑁆𑀢𑁄 𑀮𑀓𑁆𑀔𑀡𑁄 𑀳𑀸𑀭𑁄’’𑀢𑀺. 𑁋

𑀏𑀯𑀁 𑀦𑁂𑀢𑁆𑀢𑀺𑀬𑀁 𑀮𑀓𑁆𑀔𑀡𑁄 𑀦𑀸𑀫 𑀳𑀸𑀭𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀯𑀲𑁂𑀦 𑀬𑀲𑁆𑀫𑀸 𑀘𑀢𑀽𑀲𑀼 𑀪𑀽𑀢𑁂𑀲𑀼 𑀕𑀳𑀺𑀢𑁂𑀲𑀼 𑀉𑀧𑀸𑀤𑀸𑀭𑀽𑀧𑀫𑁆𑀧𑀺 𑀕𑀳𑀺𑀢𑀫𑁂𑀯 𑀪𑀯𑀢𑀺, 𑀭𑀽𑀧𑀮𑀓𑁆𑀔𑀡𑀁 𑀅𑀦𑀢𑀻𑀢𑀢𑁆𑀢𑀸. 𑀬𑀜𑁆𑀘 𑀪𑀽𑀢𑁄𑀧𑀸𑀤𑀸𑀭𑀽𑀧𑀁 𑀲𑁄 𑀭𑀽𑀧𑀓𑁆𑀔𑀦𑁆𑀥𑁄. 𑀢𑀲𑁆𑀫𑀸 ‘‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀧𑀣𑀯𑀺𑀁 𑀆𑀧𑀁 𑀢𑁂𑀚𑀁 𑀯𑀸𑀬𑀁 𑀫𑀜𑁆𑀜𑀢𑀻’’𑀢𑀺 𑀯𑀤𑀦𑁆𑀢𑁂𑀦 𑀅𑀢𑁆𑀣𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀣𑀯𑀺𑀬𑀸 𑀆𑀧𑀲𑁆𑀫𑀺𑀁 𑀢𑁂𑀚𑀲𑁆𑀫𑀺𑀁 𑀯𑀸𑀬𑀲𑁆𑀫𑀺𑀁 𑀫𑀜𑁆𑀜𑀢𑀻’’𑀢𑀺 𑀯𑀤𑀦𑁆𑀢𑁂𑀦 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀫𑁆𑀧𑀺 𑀳𑁄𑀢𑀺. ‘‘𑀧𑀣𑀯𑀺𑀢𑁄 𑀆𑀧𑀢𑁄 𑀢𑁂𑀚𑀢𑁄 𑀯𑀸𑀬𑀢𑁄 𑀫𑀜𑁆𑀜𑀢𑀻’’𑀢𑀺 𑀯𑀤𑀦𑁆𑀢𑁂𑀦 𑀭𑀽𑀧𑀢𑁄 𑀅𑀜𑁆𑀜𑁄 𑀅𑀢𑁆𑀢𑀸𑀢𑀺 𑀲𑀺𑀤𑁆𑀥𑀢𑁆𑀢𑀸 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀻𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀫𑁂𑀢𑀸 𑀘𑀢𑀲𑁆𑀲𑁄 𑀭𑀽𑀧𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀫𑀜𑁆𑀜𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀏𑀓𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺, 𑀢𑀺𑀲𑁆𑀲𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄𑀢𑀺 𑀤𑁆𑀯𑁂𑀯 𑀤𑀺𑀝𑁆𑀞𑀺𑀬𑁄 𑀳𑁄𑀦𑁆𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀧𑁄𑀯𑀸𑀭𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀽𑀢𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁩. 𑀏𑀯𑀁 𑀭𑀽𑀧𑀫𑀼𑀔𑁂𑀦 𑀲𑀗𑁆𑀔𑀸𑀭𑀯𑀢𑁆𑀣𑀼𑀓𑀁 𑀫𑀜𑁆𑀜𑀦𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀲𑀗𑁆𑀔𑀸𑀭𑁂 𑀉𑀧𑀸𑀤𑀸𑀬 𑀲𑀢𑁆𑀢𑀸 𑀧𑀜𑁆𑀜𑀧𑀻𑀬𑀦𑁆𑀢𑀺, 𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀲𑀢𑁆𑀢𑁂𑀲𑀼𑀧𑀺 𑀬𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁄 𑀫𑀜𑁆𑀜𑀦𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀢𑁂 𑀲𑀢𑁆𑀢𑁂 𑀦𑀺𑀤𑁆𑀤𑀺𑀲𑀦𑁆𑀢𑁄 𑀪𑀽𑀢𑁂 𑀪𑀽𑀢𑀢𑁄 𑀲𑀜𑁆𑀚𑀸𑀦𑀸𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀬𑀁 𑀪𑀽𑀢𑀲𑀤𑁆𑀤𑁄 𑀧𑀜𑁆𑀘𑀓𑁆𑀔𑀦𑁆𑀥𑀅𑀫𑀦𑀼𑀲𑁆𑀲𑀥𑀸𑀢𑀼𑀯𑀺𑀚𑁆𑀚𑀫𑀸𑀦𑀔𑀻𑀡𑀸𑀲𑀯𑀲𑀢𑁆𑀢𑀭𑀼𑀓𑁆𑀔𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. ‘‘𑀪𑀽𑀢𑀫𑀺𑀤𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀧𑀲𑁆𑀲𑀣𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁦𑁧) 𑀳𑀺 𑀅𑀬𑀁 𑀧𑀜𑁆𑀘𑀓𑁆𑀔𑀦𑁆𑀥𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀬𑀸𑀦𑀻𑀥 𑀪𑀽𑀢𑀸𑀦𑀺 𑀲𑀫𑀸𑀕𑀢𑀸𑀦𑀻’’𑀢𑀺 (𑀲𑀼. 𑀦𑀺. 𑁨𑁨𑁪) 𑀏𑀢𑁆𑀣 𑀅𑀫𑀦𑀼𑀲𑁆𑀲𑁂𑀲𑀼. ‘‘𑀘𑀢𑁆𑀢𑀸𑀭𑁄 𑀔𑁄, 𑀪𑀺𑀓𑁆𑀔𑀼, 𑀫𑀳𑀸𑀪𑀽𑀢𑀸 𑀳𑁂𑀢𑀽’’𑀢𑀺 (𑀫. 𑀦𑀺. 𑁩.𑁮𑁬) 𑀏𑀢𑁆𑀣 𑀥𑀸𑀢𑀽𑀲𑀼. ‘‘𑀪𑀽𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁯) 𑀯𑀺𑀚𑁆𑀚𑀫𑀸𑀦𑁂. ‘‘𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄’’𑀢𑀺 (𑀚𑀸. 𑁧.𑁧𑁦.𑁧𑁯𑁦) 𑀏𑀢𑁆𑀣 𑀔𑀻𑀡𑀸𑀲𑀯𑁂. ‘‘𑀲𑀩𑁆𑀩𑁂𑀯 𑀦𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺 𑀪𑀽𑀢𑀸 𑀮𑁄𑀓𑁂 𑀲𑀫𑀼𑀲𑁆𑀲𑀬’’𑀦𑁆𑀢𑀺 (𑀤𑀻. 𑀦𑀺. 𑁨.𑁨𑁨𑁦) 𑀏𑀢𑁆𑀣 𑀲𑀢𑁆𑀢𑁂𑀲𑀼. ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬𑀸’’𑀢𑀺 (𑀧𑀸𑀘𑀺. 𑁯𑁦) 𑀏𑀢𑁆𑀣 𑀭𑀼𑀓𑁆𑀔𑀸𑀤𑀻𑀲𑀼. 𑀇𑀥 𑀧𑀦𑀸𑀬𑀁 𑀲𑀢𑁆𑀢𑁂𑀲𑀼 𑀯𑀢𑁆𑀢𑀢𑀺, 𑀦𑁄 𑀘 𑀔𑁄 𑀅𑀯𑀺𑀲𑁂𑀲𑁂𑀦. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀳𑀺 𑀳𑁂𑀝𑁆𑀞𑀸 𑀲𑀢𑁆𑀢𑀸 𑀇𑀥 𑀪𑀽𑀢𑀸𑀢𑀺 𑀅𑀥𑀺𑀧𑁆𑀧𑁂𑀢𑀸.

𑀢𑀢𑁆𑀣 𑀪𑀽𑀢𑁂 𑀪𑀽𑀢𑀢𑁄 𑀲𑀜𑁆𑀚𑀸𑀦𑀸𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀪𑀽𑀢𑁂 𑀫𑀜𑁆𑀜𑀢𑀻𑀢𑀺𑀆𑀤𑀻𑀲𑀼 𑀧𑀦 𑀢𑀺𑀲𑁆𑀲𑁄𑀧𑀺 𑀫𑀜𑁆𑀜𑀦𑀸 𑀬𑁄𑀚𑁂𑀢𑀩𑁆𑀩𑀸. 𑀓𑀣𑀁? 𑀅𑀬𑀜𑁆𑀳𑀺 ‘‘𑀲𑁄 𑀧𑀲𑁆𑀲𑀢𑀺 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀁 𑀯𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀁 𑀲𑀫𑀗𑁆𑀕𑀺𑀪𑀽𑀢’’𑀦𑁆𑀢𑀺 (𑀅. 𑀦𑀺. 𑁭.𑁫𑁦) 𑀯𑀼𑀢𑁆𑀢𑀦𑀬𑁂𑀦 𑀪𑀽𑀢𑁂 𑀲𑀼𑀪𑀸 𑀲𑀼𑀔𑀺𑀢𑀸𑀢𑀺 𑀕𑀳𑁂𑀢𑁆𑀯𑀸 𑀭𑀚𑁆𑀚𑀢𑀺, 𑀤𑀺𑀲𑁆𑀯𑀸𑀧𑀺 𑀦𑁂 𑀭𑀚𑁆𑀚𑀢𑀺, 𑀲𑀼𑀢𑁆𑀯𑀸𑀧𑀺, 𑀖𑀸𑀬𑀺𑀢𑁆𑀯𑀸𑀧𑀺, 𑀲𑀸𑀬𑀺𑀢𑁆𑀯𑀸𑀧𑀺, 𑀨𑀼𑀲𑀺𑀢𑁆𑀯𑀸𑀧𑀺, 𑀜𑀢𑁆𑀯𑀸𑀧𑀺. 𑀏𑀯𑀁 𑀪𑀽𑀢𑁂 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺. ‘‘𑀅𑀳𑁄 𑀯𑀢𑀸𑀳𑀁 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁩𑁭) 𑀯𑀸 𑀧𑀦 𑀦𑀬𑁂𑀦 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑀺, 𑀏𑀯𑀫𑁆𑀧𑀺 𑀪𑀽𑀢𑁂 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺. 𑀅𑀢𑁆𑀢𑀦𑁄 𑀧𑀦 𑀪𑀽𑀢𑀸𑀦𑀜𑁆𑀘 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀸𑀦𑀁 𑀯𑀸 𑀲𑁂𑀬𑁆𑀬𑀁 𑀤𑀳𑀢𑀺. 𑀪𑀽𑀢𑁂𑀲𑀼 𑀘 𑀬𑀁𑀓𑀺𑀜𑁆𑀘𑀺 𑀪𑀽𑀢𑀁 𑀳𑀻𑀦𑀁 𑀅𑀢𑁆𑀢𑀸𑀦𑀁 𑀯𑀸 𑀳𑀻𑀦𑀁, 𑀬𑀁𑀓𑀺𑀜𑁆𑀘𑀺 𑀪𑀽𑀢𑀁 𑀲𑁂𑀬𑁆𑀬𑀁. 𑀅𑀢𑁆𑀢𑀸𑀦𑀁 𑀯𑀸 𑀪𑀽𑀢𑁂𑀦, 𑀪𑀽𑀢𑀁 𑀯𑀸 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀤𑀳𑀢𑀺. 𑀬𑀣𑀸𑀳 ‘‘𑀇𑀥𑁂𑀓𑀘𑁆𑀘𑁄 𑀚𑀸𑀢𑀺𑀬𑀸 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀼𑀩𑁆𑀩𑀓𑀸𑀮𑀁 𑀧𑀭𑁂𑀳𑀺 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺. 𑀅𑀧𑀭𑀓𑀸𑀮𑀁 𑀅𑀢𑁆𑀢𑀸𑀦𑀁 𑀲𑁂𑀬𑁆𑀬𑀁 𑀤𑀳𑀢𑀺. 𑀧𑀭𑁂 𑀳𑀻𑀦𑁂 𑀤𑀳𑀢𑀺, 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 …𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀸𑀦𑀸𑀢𑀺𑀫𑀸𑀦𑁄’’𑀢𑀺 (𑀯𑀺𑀪. 𑁮𑁭𑁬-𑁮𑁮𑁦). 𑀏𑀯𑀁 𑀪𑀽𑀢𑁂 𑀫𑀸𑀦𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺.

𑀪𑀽𑀢𑁂 𑀧𑀦 ‘‘𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺 𑀯𑀸 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀩𑁆𑀩𑁂 𑀧𑀸𑀡𑀸 𑀲𑀩𑁆𑀩𑁂 𑀪𑀽𑀢𑀸 𑀲𑀩𑁆𑀩𑁂 𑀚𑀻𑀯𑀸 𑀅𑀯𑀲𑀸 𑀅𑀩𑀮𑀸 𑀅𑀯𑀻𑀭𑀺𑀬𑀸 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀸 𑀙𑀲𑁆𑀯𑁂𑀯𑀸𑀪𑀺𑀚𑀸𑀢𑀻𑀲𑀼 𑀲𑀼𑀔𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁬𑁮) 𑀯𑀸 𑀫𑀜𑁆𑀜𑀫𑀸𑀦𑁄 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺. 𑀏𑀯𑀁 𑀪𑀽𑀢𑁂 𑀢𑀻𑀳𑀺 𑀫𑀜𑁆𑀜𑀦𑀸𑀳𑀺 𑀫𑀜𑁆𑀜𑀢𑀺.