𑁯. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀁. 𑀢𑀢𑁆𑀣 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺, 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄’’𑀢𑀺 𑀯𑀸 ‘‘𑀓𑀢𑀫𑀁 𑀧𑀦𑀸𑀯𑀼𑀲𑁄, 𑀅𑀓𑀼𑀲𑀮’’𑀦𑁆𑀢𑀺 𑀯𑀸 𑀏𑀯𑀁 𑀬𑀢𑁆𑀢𑀓𑀸 𑀣𑁂𑀭𑁂𑀦 𑀧𑀼𑀘𑁆𑀙𑀸 𑀯𑀼𑀢𑁆𑀢𑀸, 𑀲𑀩𑁆𑀩𑀸 𑀓𑀣𑁂𑀢𑀼𑀓𑀫𑁆𑀬𑀢𑀸 𑀧𑀼𑀘𑁆𑀙𑀸 𑀏𑀯.

𑀢𑀢𑁆𑀣 𑀬𑀲𑁆𑀫𑀸 𑀚𑀸𑀦𑀦𑁆𑀢𑀸𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀯𑀤𑀦𑁆𑀢𑀺 𑀅𑀚𑀸𑀦𑀦𑁆𑀢𑀸𑀧𑀺 𑀩𑀸𑀳𑀺𑀭𑀓𑀸𑀧𑀺 𑀲𑀸𑀲𑀦𑀺𑀓𑀸𑀧𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦𑀸𑀧𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦𑀸𑀧𑀺, 𑀢𑀲𑁆𑀫𑀸 𑀢𑀁 𑀩𑀳𑀽𑀦𑀁 𑀯𑀘𑀦𑀁 𑀉𑀧𑀸𑀤𑀸𑀬 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀆𑀫𑀲𑀦𑁆𑀢𑁄 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀻’’𑀢𑀺 𑀆𑀳. 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄, 𑀅𑀧𑀭𑁂𑀳𑀺𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀯𑀼𑀘𑁆𑀘𑀢𑀺, 𑀅𑀣𑀸𑀧𑀭𑁂𑀳𑀺𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀯𑀼𑀘𑁆𑀘𑀢𑀺, 𑀲𑁆𑀯𑀸𑀬𑀁 𑀏𑀯𑀁 𑀯𑀼𑀘𑁆𑀘𑀫𑀸𑀦𑁄 𑀅𑀢𑁆𑀣𑀜𑁆𑀘 𑀮𑀓𑁆𑀔𑀡𑀜𑁆𑀘 𑀉𑀧𑀸𑀤𑀸𑀬 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀅𑀭𑀺𑀬𑀲𑀸𑀯𑀓𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀻𑀢𑀺. 𑀢𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀲𑁄𑀪𑀦𑀸𑀬 𑀧𑀲𑀢𑁆𑀣𑀸𑀬 𑀘 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀬𑀤𑀸 𑀧𑀦 𑀥𑀫𑁆𑀫𑁂𑀬𑁂𑀯 𑀅𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀢𑀤𑀸𑀲𑁆𑀲 𑀲𑁄𑀪𑀦𑀸 𑀧𑀲𑀢𑁆𑀣𑀸 𑀘 𑀤𑀺𑀝𑁆𑀞𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀸 𑀘𑀸𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀤𑀼𑀯𑀺𑀥𑀸 𑀳𑁄𑀢𑀺 𑀮𑁄𑀓𑀺𑀬𑀸 𑀮𑁄𑀓𑀼𑀢𑁆𑀢𑀭𑀸𑀢𑀺. 𑀢𑀢𑁆𑀣 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀁 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀜𑁆𑀘 𑀮𑁄𑀓𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀗𑁆𑀔𑁂𑀧𑀢𑁄 𑀯𑀸 𑀲𑀩𑁆𑀩𑀸𑀧𑀺 𑀲𑀸𑀲𑀯𑀸 𑀧𑀜𑁆𑀜𑀸. 𑀅𑀭𑀺𑀬𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸 𑀮𑁄𑀓𑀼𑀢𑁆𑀢𑀭𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀧𑀼𑀕𑁆𑀕𑀮𑁄 𑀧𑀦 𑀢𑀺𑀯𑀺𑀥𑁄 𑀳𑁄𑀢𑀺 𑀧𑀼𑀣𑀼𑀚𑁆𑀚𑀦𑁄 𑀲𑁂𑀓𑁆𑀔𑁄 𑀅𑀲𑁂𑀓𑁆𑀔𑁄 𑀘. 𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑁄 𑀤𑀼𑀯𑀺𑀥𑁄 𑀳𑁄𑀢𑀺 𑀩𑀸𑀳𑀺𑀭𑀓𑁄 𑀲𑀸𑀲𑀦𑀺𑀓𑁄 𑀘. 𑀢𑀢𑁆𑀣 𑀩𑀸𑀳𑀺𑀭𑀓𑁄 𑀓𑀫𑁆𑀫𑀯𑀸𑀤𑀻 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀺, 𑀦𑁄 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀸𑀬 𑀅𑀢𑁆𑀢𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀓𑀢𑁆𑀢𑀸. 𑀲𑀸𑀲𑀦𑀺𑀓𑁄 𑀤𑁆𑀯𑀻𑀳𑀺𑀧𑀺. 𑀲𑁂𑀓𑁆𑀔𑁄 𑀦𑀺𑀬𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀲𑁂𑀓𑁆𑀔𑁄 𑀅𑀲𑁂𑀓𑁆𑀔𑀸𑀬. 𑀇𑀥 𑀧𑀦 𑀦𑀺𑀬𑀢𑀸𑀬 𑀦𑀺𑀬𑁆𑀬𑀸𑀦𑀺𑀓𑀸𑀬 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑁂𑀯𑀸𑀳 ‘‘𑀉𑀚𑀼𑀕𑀢𑀸𑀲𑁆𑀲 𑀤𑀺𑀝𑁆𑀞𑀺 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀆𑀕𑀢𑁄 𑀇𑀫𑀁 𑀲𑀤𑁆𑀥𑀫𑁆𑀫’’𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁂𑀯 𑀳𑀺 𑀅𑀦𑁆𑀢𑀤𑁆𑀯𑀬𑀫𑀦𑀼𑀧𑀕𑀫𑁆𑀫 𑀉𑀚𑀼𑀪𑀸𑀯𑁂𑀦 𑀕𑀢𑀢𑁆𑀢𑀸, 𑀓𑀸𑀬𑀯𑀗𑁆𑀓𑀸𑀤𑀻𑀦𑀺 𑀘 𑀲𑀩𑁆𑀩𑀯𑀗𑁆𑀓𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀢𑀢𑁆𑀢𑀸 𑀉𑀚𑀼𑀕𑀢𑀸 𑀳𑁄𑀢𑀺, 𑀢𑀸𑀬𑁂𑀯 𑀘 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀦𑀯𑀧𑁆𑀧𑀓𑀸𑀭𑁂𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀅𑀘𑀮𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀲𑀩𑁆𑀩𑀤𑀺𑀝𑁆𑀞𑀺𑀕𑀳𑀦𑀸𑀦𑀺 𑀘 𑀯𑀺𑀦𑀺𑀩𑁆𑀩𑁂𑀞𑁂𑀦𑁆𑀢𑁄 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑁄 𑀚𑀸𑀢𑀺𑀲𑀁𑀲𑀸𑀭𑀸 𑀦𑀺𑀓𑁆𑀔𑀫𑀦𑁆𑀢𑁄 𑀧𑀝𑀺𑀧𑀢𑁆𑀢𑀺𑀁 𑀧𑀭𑀺𑀦𑀺𑀝𑁆𑀞𑀧𑁂𑀦𑁆𑀢𑁄 𑀅𑀭𑀺𑀬𑁂𑀦 𑀫𑀕𑁆𑀕𑁂𑀦 𑀆𑀕𑀢𑁄 𑀇𑀫𑀁 𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑀁 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀲𑀤𑁆𑀥𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀬𑀢𑁄 𑀔𑁄𑀢𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀘𑀦𑀫𑁂𑀢𑀁, 𑀬𑀲𑁆𑀫𑀺𑀁 𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀼𑀲𑀮𑀜𑁆𑀘 𑀧𑀚𑀸𑀦𑀸𑀢𑀻𑀢𑀺 𑀤𑀲𑀸𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑀁 𑀅𑀓𑀼𑀲𑀮𑀜𑁆𑀘 𑀧𑀚𑀸𑀦𑀸𑀢𑀺, 𑀦𑀺𑀭𑁄𑀥𑀸𑀭𑀫𑁆𑀫𑀡𑀸𑀬 𑀧𑀚𑀸𑀦𑀦𑀸𑀬 𑀓𑀺𑀘𑁆𑀘𑀯𑀲𑁂𑀦 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀅𑀓𑀼𑀲𑀮𑀁 𑀧𑀚𑀸𑀦𑀸𑀢𑀺. 𑀅𑀓𑀼𑀲𑀮𑀫𑀽𑀮𑀜𑁆𑀘 𑀧𑀚𑀸𑀦𑀸𑀢𑀻𑀢𑀺 𑀢𑀲𑁆𑀲 𑀫𑀽𑀮𑀧𑀘𑁆𑀘𑀬𑀪𑀽𑀢𑀁 𑀅𑀓𑀼𑀲𑀮𑀫𑀽𑀮𑀜𑁆𑀘 𑀧𑀚𑀸𑀦𑀸𑀢𑀺, 𑀢𑁂𑀦𑁂𑀯 𑀧𑀓𑀸𑀭𑁂𑀦 ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁄. 𑀏𑀲 𑀦𑀬𑁄 𑀓𑀼𑀲𑀮𑀜𑁆𑀘 𑀓𑀼𑀲𑀮𑀫𑀽𑀮𑀜𑁆𑀘𑀸𑀢𑀺 𑀏𑀢𑁆𑀣𑀸𑀧𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀇𑀢𑁄 𑀧𑀭𑁂𑀲𑀼 𑀲𑀩𑁆𑀩𑀯𑀸𑀭𑁂𑀲𑀼 𑀓𑀺𑀘𑁆𑀘𑀯𑀲𑁂𑀦𑁂𑀯 𑀯𑀢𑁆𑀣𑀼𑀧𑀚𑀸𑀦𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀢𑀸𑀯𑀢𑀸𑀧𑀻𑀢𑀺 𑀏𑀢𑁆𑀢𑀓𑁂𑀦 𑀇𑀫𑀺𑀦𑀸 𑀅𑀓𑀼𑀲𑀮𑀸𑀤𑀺𑀧𑁆𑀧𑀚𑀸𑀦𑀦𑁂𑀦𑀸𑀧𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀮𑁄𑀓𑀼𑀢𑁆𑀢𑀭𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀉𑀚𑀼𑀕𑀢𑀸𑀲𑁆𑀲…𑀧𑁂… 𑀇𑀫𑀁 𑀲𑀤𑁆𑀥𑀫𑁆𑀫𑀦𑁆𑀢𑀺 𑀏𑀢𑁆𑀢𑀸𑀯𑀢𑀸 𑀲𑀁𑀔𑀺𑀢𑁆𑀢𑀤𑁂𑀲𑀦𑀸 𑀦𑀺𑀝𑁆𑀞𑀺𑀢𑀸 𑀳𑁄𑀢𑀺. 𑀤𑁂𑀲𑀦𑀸𑀬𑁂𑀯 𑀘𑁂𑀲𑀸 𑀲𑀁𑀔𑀺𑀢𑁆𑀢𑀸, 𑀢𑁂𑀲𑀁 𑀧𑀦 𑀪𑀺𑀓𑁆𑀔𑀽𑀦𑀁 𑀯𑀺𑀢𑁆𑀣𑀸𑀭𑀯𑀲𑁂𑀦𑁂𑀯 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀯𑁂𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀢𑀺𑀬𑀯𑀸𑀭𑁂 𑀧𑀦 𑀤𑁂𑀲𑀦𑀸𑀧𑀺 𑀯𑀺𑀢𑁆𑀣𑀸𑀭𑁂𑀦 𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀯𑁂𑀥𑁄𑀧𑀺 𑀯𑀺𑀢𑁆𑀣𑀸𑀭𑁂𑀦𑁂𑀯 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 ‘‘𑀲𑀁𑀔𑀺𑀢𑁆𑀢𑀤𑁂𑀲𑀦𑀸𑀬 𑀤𑁆𑀯𑁂 𑀳𑁂𑀝𑁆𑀞𑀺𑀫𑀫𑀕𑁆𑀕𑀸, 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀬 𑀤𑁆𑀯𑁂 𑀉𑀧𑀭𑀺𑀫𑀫𑀕𑁆𑀕𑀸 𑀓𑀣𑀺𑀢𑀸’’𑀢𑀺 𑀪𑀺𑀓𑁆𑀔𑀽 𑀆𑀳𑀁𑀲𑀼 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀯𑀲𑀸𑀦𑁂 ‘‘𑀲𑀩𑁆𑀩𑀲𑁄 𑀭𑀸𑀕𑀸𑀦𑀼𑀲𑀬𑀁 𑀧𑀳𑀸𑀬𑀸’’𑀢𑀺𑀆𑀤𑀺𑀯𑀘𑀦𑀁 𑀲𑀫𑁆𑀧𑀲𑁆𑀲𑀫𑀸𑀦𑀸. 𑀣𑁂𑀭𑁄 𑀧𑀦𑀸𑀳 ‘‘𑀲𑀁𑀔𑀺𑀢𑁆𑀢𑀤𑁂𑀲𑀦𑀸𑀬𑀧𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀭𑀸𑀲𑀺𑀢𑁄 𑀓𑀣𑀺𑀢𑀸, 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀬𑀧𑀻’’𑀢𑀺. 𑀬𑀸 𑀘𑀸𑀬𑀁 𑀇𑀥 𑀲𑀁𑀔𑀺𑀢𑁆𑀢𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀲𑀼 𑀯𑀺𑀘𑀸𑀭𑀡𑀸 𑀆𑀯𑀺𑀓𑀢𑀸, 𑀲𑀸 𑀲𑀩𑁆𑀩𑀯𑀸𑀭𑁂𑀲𑀼 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀼𑀩𑁆𑀩𑀸𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸𑀫𑀢𑁆𑀢𑀫𑁂𑀯 𑀳𑀺 𑀇𑀢𑁄 𑀧𑀭𑀁 𑀓𑀭𑀺𑀲𑁆𑀲𑀸𑀫.

𑀅𑀓𑀼𑀲𑀮𑀓𑀫𑁆𑀫𑀧𑀣𑀯𑀡𑁆𑀡𑀦𑀸

𑀢𑀢𑁆𑀣 𑀧𑀞𑀫𑀯𑀸𑀭𑀲𑁆𑀲 𑀢𑀸𑀯 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀬 ‘‘𑀧𑀸𑀡𑀸𑀢𑀺𑀧𑀸𑀢𑁄 𑀔𑁄, 𑀆𑀯𑀼𑀲𑁄, 𑀅𑀓𑀼𑀲𑀮’’𑀦𑁆𑀢𑀺𑀆𑀤𑀻𑀲𑀼 𑀅𑀓𑁄𑀲𑀮𑁆𑀮𑀧𑁆𑀧𑀯𑀢𑁆𑀢𑀺𑀬𑀸 𑀅𑀓𑀼𑀲𑀮𑀁 𑀯𑁂𑀤𑀺𑀢𑀩𑁆𑀩𑀁, 𑀧𑀭𑀢𑁄 𑀯𑀢𑁆𑀢𑀩𑁆𑀩𑀓𑀼𑀲𑀮𑀧𑁆𑀧𑀝𑀺𑀧𑀓𑁆𑀔𑀢𑁄 𑀯𑀸. 𑀢𑀁 𑀮𑀓𑁆𑀔𑀡𑀢𑁄 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀁 𑀲𑀁𑀓𑀺𑀮𑀺𑀝𑁆𑀞𑀁 𑀯𑀸. 𑀅𑀬𑀁 𑀢𑀸𑀯𑁂𑀢𑁆𑀣 𑀲𑀸𑀥𑀸𑀭𑀡𑀧𑀤𑀯𑀡𑁆𑀡𑀦𑀸.

𑀅𑀲𑀸𑀥𑀸𑀭𑀡𑁂𑀲𑀼 𑀧𑀦 𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑀯𑀥𑁄 𑀧𑀸𑀡𑀖𑀸𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀡𑁄𑀢𑀺 𑀘𑁂𑀢𑁆𑀣 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀫𑀺𑀁 𑀧𑀦 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀯𑀥𑀓𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄. 𑀲𑁄 𑀕𑀼𑀡𑀯𑀺𑀭𑀳𑀺𑀢𑁂𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑀸𑀤𑀻𑀲𑀼 𑀧𑀸𑀡𑁂𑀲𑀼 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀲𑀭𑀻𑀭𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀓𑀲𑁆𑀫𑀸? 𑀧𑀬𑁄𑀕𑀫𑀳𑀦𑁆𑀢𑀢𑀸𑀬. 𑀧𑀬𑁄𑀕𑀲𑀫𑀢𑁆𑀢𑁂𑀧𑀺 𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀬. 𑀕𑀼𑀡𑀯𑀦𑁆𑀢𑁂𑀲𑀼 𑀫𑀦𑀼𑀲𑁆𑀲𑀸𑀤𑀻𑀲𑀼 𑀅𑀧𑁆𑀧𑀕𑀼𑀡𑁂 𑀧𑀸𑀡𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀕𑀼𑀡𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀲𑀭𑀻𑀭𑀕𑀼𑀡𑀸𑀦𑀁 𑀧𑀦 𑀲𑀫𑀪𑀸𑀯𑁂 𑀲𑀢𑀺 𑀓𑀺𑀮𑁂𑀲𑀸𑀦𑀁 𑀉𑀧𑀓𑁆𑀓𑀫𑀸𑀦𑀜𑁆𑀘 𑀫𑀼𑀤𑀼𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀢𑀺𑀩𑁆𑀩𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀲 𑀧𑀜𑁆𑀘 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑀧𑀸𑀡𑁄, 𑀧𑀸𑀡𑀲𑀜𑁆𑀜𑀺𑀢𑀸, 𑀯𑀥𑀓𑀘𑀺𑀢𑁆𑀢𑀁, 𑀉𑀧𑀓𑁆𑀓𑀫𑁄, 𑀢𑁂𑀦 𑀫𑀭𑀡𑀦𑁆𑀢𑀺. 𑀙 𑀧𑀬𑁄𑀕𑀸 𑀲𑀸𑀳𑀢𑁆𑀣𑀺𑀓𑁄, 𑀆𑀡𑀢𑁆𑀢𑀺𑀓𑁄, 𑀦𑀺𑀲𑁆𑀲𑀕𑁆𑀕𑀺𑀬𑁄, 𑀣𑀸𑀯𑀭𑁄, 𑀯𑀺𑀚𑁆𑀚𑀸𑀫𑀬𑁄, 𑀇𑀤𑁆𑀥𑀺𑀫𑀬𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦𑁂𑀢𑁆𑀣 𑀯𑀺𑀢𑁆𑀣𑀸𑀭𑀻𑀬𑀫𑀸𑀦𑁂 𑀅𑀢𑀺𑀧𑀧𑀜𑁆𑀘𑁄 𑀳𑁄𑀢𑀺, 𑀢𑀲𑁆𑀫𑀸 𑀦𑀁 𑀦 𑀯𑀺𑀢𑁆𑀣𑀸𑀭𑀬𑀸𑀫, 𑀅𑀜𑁆𑀜𑀜𑁆𑀘 𑀏𑀯𑀭𑀽𑀧𑀁. 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀁 𑀯𑀺𑀦𑀬𑀝𑁆𑀞𑀓𑀣𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁨) 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑁄.

𑀅𑀤𑀺𑀦𑁆𑀦𑀲𑁆𑀲 𑀆𑀤𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀧𑀭𑀲𑁆𑀲 𑀳𑀭𑀡𑀁 𑀣𑁂𑀬𑁆𑀬𑀁, 𑀘𑁄𑀭𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀅𑀤𑀺𑀦𑁆𑀦𑀦𑁆𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀬𑀢𑁆𑀣 𑀧𑀭𑁄 𑀬𑀣𑀸𑀓𑀸𑀫𑀓𑀸𑀭𑀺𑀢𑀁 𑀆𑀧𑀚𑁆𑀚𑀦𑁆𑀢𑁄 𑀅𑀤𑀡𑁆𑀟𑀸𑀭𑀳𑁄 𑀅𑀦𑀼𑀧𑀯𑀚𑁆𑀚𑁄 𑀘 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀦 𑀧𑀭𑀧𑀭𑀺𑀕𑁆𑀕𑀳𑀺𑀢𑁂 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀦𑁄 𑀢𑀤𑀸𑀤𑀸𑀬𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀢𑀁 𑀳𑀻𑀦𑁂 𑀧𑀭𑀲𑀦𑁆𑀢𑀓𑁂 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀧𑀡𑀻𑀢𑁂 𑀫𑀳𑀸𑀲𑀸𑀯𑀚𑁆𑀚𑀁. 𑀓𑀲𑁆𑀫𑀸? 𑀯𑀢𑁆𑀣𑀼𑀧𑀡𑀻𑀢𑀢𑀸𑀬. 𑀯𑀢𑁆𑀣𑀼𑀲𑀫𑀢𑁆𑀢𑁂 𑀲𑀢𑀺 𑀕𑀼𑀡𑀸𑀥𑀺𑀓𑀸𑀦𑀁 𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀲𑀸𑀯𑀚𑁆𑀚𑀁. 𑀢𑀁 𑀢𑀁 𑀕𑀼𑀡𑀸𑀥𑀺𑀓𑀁 𑀉𑀧𑀸𑀤𑀸𑀬 𑀢𑀢𑁄 𑀢𑀢𑁄 𑀳𑀻𑀦𑀕𑀼𑀡𑀲𑁆𑀲 𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑁆𑀧𑀲𑀸𑀯𑀚𑁆𑀚𑀁. 𑀢𑀲𑁆𑀲 𑀧𑀜𑁆𑀘 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀢𑀸, 𑀣𑁂𑀬𑁆𑀬𑀘𑀺𑀢𑁆𑀢𑀁, 𑀉𑀧𑀓𑁆𑀓𑀫𑁄, 𑀢𑁂𑀦 𑀳𑀭𑀡𑀦𑁆𑀢𑀺. 𑀙 𑀧𑀬𑁄𑀕𑀸 𑀲𑀸𑀳𑀢𑁆𑀣𑀺𑀓𑀸𑀤𑀬𑁄𑀯. 𑀢𑁂 𑀘 𑀔𑁄 𑀬𑀣𑀸𑀦𑀼𑀭𑀽𑀧𑀁 𑀣𑁂𑀬𑁆𑀬𑀸𑀯𑀳𑀸𑀭𑁄, 𑀧𑀲𑀬𑁆𑀳𑀸𑀯𑀳𑀸𑀭𑁄, 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄, 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄, 𑀓𑀼𑀲𑀸𑀯𑀳𑀸𑀭𑁄𑀢𑀺 𑀇𑀫𑁂𑀲𑀁 𑀅𑀯𑀳𑀸𑀭𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨) 𑀯𑀼𑀢𑁆𑀢𑁄.

𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄𑀢𑀺 𑀏𑀢𑁆𑀣 𑀧𑀦 𑀓𑀸𑀫𑁂𑀲𑀽𑀢𑀺 𑀫𑁂𑀣𑀼𑀦𑀲𑀫𑀸𑀘𑀸𑀭𑁂𑀲𑀼. 𑀫𑀺𑀘𑁆𑀙𑀸𑀘𑀸𑀭𑁄𑀢𑀺 𑀏𑀓𑀦𑁆𑀢𑀦𑀺𑀦𑁆𑀤𑀺𑀢𑁄 𑀮𑀸𑀫𑀓𑀸𑀘𑀸𑀭𑁄. 𑀮𑀓𑁆𑀔𑀡𑀢𑁄 𑀧𑀦 𑀅𑀲𑀤𑁆𑀥𑀫𑁆𑀫𑀸𑀥𑀺𑀧𑁆𑀧𑀸𑀬𑁂𑀦 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀅𑀕𑀫𑀦𑀻𑀬𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄.

𑀢𑀢𑁆𑀣 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫 𑀧𑀼𑀭𑀺𑀲𑀸𑀦𑀁 𑀢𑀸𑀯 𑀫𑀸𑀢𑀼𑀭𑀓𑁆𑀔𑀺𑀢𑀸, 𑀧𑀺𑀢𑀼𑀭𑀓𑁆𑀔𑀺𑀢𑀸, 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸, 𑀪𑀸𑀢𑀼𑀭𑀓𑁆𑀔𑀺𑀢𑀸, 𑀪𑀕𑀺𑀦𑀺𑀭𑀓𑁆𑀔𑀺𑀢𑀸, 𑀜𑀸𑀢𑀺𑀭𑀓𑁆𑀔𑀺𑀢𑀸, 𑀕𑁄𑀢𑁆𑀢𑀭𑀓𑁆𑀔𑀺𑀢𑀸, 𑀥𑀫𑁆𑀫𑀭𑀓𑁆𑀔𑀺𑀢𑀸, 𑀲𑀸𑀭𑀓𑁆𑀔𑀸, 𑀲𑀧𑀭𑀺𑀤𑀡𑁆𑀟𑀸𑀢𑀺 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀬𑁄 𑀤𑀲; 𑀥𑀦𑀓𑁆𑀓𑀻𑀢𑀸, 𑀙𑀦𑁆𑀤𑀯𑀸𑀲𑀺𑀦𑀻, 𑀪𑁄𑀕𑀯𑀸𑀲𑀺𑀦𑀻, 𑀧𑀝𑀯𑀸𑀲𑀺𑀦𑀻, 𑀑𑀤𑀧𑀢𑁆𑀢𑀓𑀺𑀦𑀻, 𑀑𑀪𑀝𑀘𑀼𑀫𑁆𑀩𑀝𑀸, 𑀤𑀸𑀲𑀻 𑀘 𑀪𑀭𑀺𑀬𑀸 𑀘, 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘, 𑀥𑀚𑀸𑀳𑀢𑀸, 𑀫𑀼𑀳𑀼𑀢𑁆𑀢𑀺𑀓𑀸𑀢𑀺 𑀏𑀢𑀸 𑀘 𑀥𑀦𑀓𑁆𑀓𑀻𑀢𑀸𑀤𑀬𑁄 𑀤𑀲𑀸𑀢𑀺 𑀯𑀻𑀲𑀢𑀺 𑀇𑀢𑁆𑀣𑀺𑀬𑁄. 𑀇𑀢𑁆𑀣𑀻𑀲𑀼 𑀧𑀦 𑀤𑁆𑀯𑀺𑀦𑁆𑀦𑀁 𑀲𑀸𑀭𑀓𑁆𑀔𑀸𑀲𑀧𑀭𑀺𑀤𑀡𑁆𑀟𑀸𑀦𑀁, 𑀤𑀲𑀦𑁆𑀦𑀜𑁆𑀘 𑀥𑀦𑀓𑁆𑀓𑀻𑀢𑀸𑀤𑀻𑀦𑀦𑁆𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀇𑀢𑁆𑀣𑀻𑀦𑀁 𑀅𑀜𑁆𑀜𑁂 𑀧𑀼𑀭𑀺𑀲𑀸, 𑀇𑀤𑀁 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫. 𑀲𑁄 𑀧𑀦𑁂𑀲 𑀫𑀺𑀘𑁆𑀙𑀸𑀘𑀸𑀭𑁄 𑀲𑀻𑀮𑀸𑀤𑀺𑀕𑀼𑀡𑀭𑀳𑀺𑀢𑁂 𑀅𑀕𑀫𑀦𑀻𑀬𑀝𑁆𑀞𑀸𑀦𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑀅𑀕𑀫𑀦𑀻𑀬𑀯𑀢𑁆𑀣𑀼, 𑀢𑀲𑁆𑀫𑀺𑀁 𑀲𑁂𑀯𑀦𑀘𑀺𑀢𑁆𑀢𑀁, 𑀲𑁂𑀯𑀦𑀧𑀬𑁄𑀕𑁄, 𑀫𑀕𑁆𑀕𑁂𑀦𑀫𑀕𑁆𑀕𑀧𑁆𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑀦𑁆𑀢𑀺. 𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄 𑀏𑀯.

𑀫𑀼𑀲𑀸𑀢𑀺 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀅𑀢𑁆𑀣𑀪𑀜𑁆𑀚𑀓𑁄 𑀯𑀘𑀻𑀧𑀬𑁄𑀕𑁄 𑀓𑀸𑀬𑀧𑀬𑁄𑀕𑁄 𑀯𑀸. 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀦𑀲𑁆𑀲 𑀧𑀭𑀯𑀺𑀲𑀁𑀯𑀸𑀤𑀦𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀅𑀧𑀭𑁄 𑀦𑀬𑁄 𑀫𑀼𑀲𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀯𑀢𑁆𑀣𑀼. 𑀯𑀸𑀤𑁄𑀢𑀺 𑀢𑀲𑁆𑀲 𑀪𑀽𑀢𑀢𑁄 𑀢𑀘𑁆𑀙𑀢𑁄 𑀯𑀺𑀜𑁆𑀜𑀸𑀧𑀦𑀁. 𑀮𑀓𑁆𑀔𑀡𑀢𑁄 𑀧𑀦 𑀅𑀢𑀣𑀁 𑀯𑀢𑁆𑀣𑀼𑀁 𑀢𑀣𑀢𑁄 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀲𑁆𑀲 𑀢𑀣𑀸𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀲𑁄 𑀬𑀫𑀢𑁆𑀣𑀁 𑀪𑀜𑁆𑀚𑀢𑀺, 𑀢𑀲𑁆𑀲 𑀅𑀧𑁆𑀧𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀅𑀧𑀺𑀘 𑀕𑀳𑀝𑁆𑀞𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀤𑀸𑀢𑀼𑀓𑀸𑀫𑀢𑀸𑀬 𑀦𑀢𑁆𑀣𑀻𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀲𑀓𑁆𑀔𑀺𑀦𑀸 𑀳𑀼𑀢𑁆𑀯𑀸 𑀅𑀢𑁆𑀣𑀪𑀜𑁆𑀚𑀦𑀢𑁆𑀣𑀁 𑀯𑀼𑀢𑁆𑀢𑁄 𑀫𑀳𑀸𑀲𑀸𑀯𑀚𑁆𑀚𑁄. 𑀧𑀩𑁆𑀩𑀚𑀺𑀢𑀸𑀦𑀁 𑀅𑀧𑁆𑀧𑀓𑀫𑁆𑀧𑀺 𑀢𑁂𑀮𑀁 𑀯𑀸 𑀲𑀧𑁆𑀧𑀺𑀁 𑀯𑀸 𑀮𑀪𑀺𑀢𑁆𑀯𑀸 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 ‘‘𑀅𑀚𑁆𑀚 𑀕𑀸𑀫𑁂 𑀢𑁂𑀮𑀁 𑀦𑀤𑀻𑀫𑀜𑁆𑀜𑁂 𑀲𑀦𑁆𑀤𑀢𑀻’’𑀢𑀺 𑀧𑀼𑀭𑀸𑀡𑀓𑀣𑀸𑀦𑀬𑁂𑀦 𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀅𑀤𑀺𑀝𑁆𑀞𑀁𑀬𑁂𑀯 𑀧𑀦 𑀤𑀺𑀝𑁆𑀞𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀤𑀦𑁆𑀢𑀸𑀦𑀁 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑀅𑀢𑀣𑀁 𑀯𑀢𑁆𑀣𑀼, 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀁, 𑀢𑀚𑁆𑀚𑁄 𑀯𑀸𑀬𑀸𑀫𑁄, 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺. 𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄𑀯. 𑀲𑁄 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀯𑀺𑀲𑀁𑀯𑀸𑀤𑀓𑀓𑀺𑀭𑀺𑀬𑀸𑀓𑀭𑀡𑁂 𑀤𑀝𑁆𑀞𑀩𑁆𑀩𑁄. 𑀢𑀸𑀬 𑀘𑁂 𑀓𑀺𑀭𑀺𑀬𑀸𑀬 𑀧𑀭𑁄 𑀢𑀫𑀢𑁆𑀣𑀁 𑀚𑀸𑀦𑀸𑀢𑀺, 𑀅𑀬𑀁 𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀧𑀺𑀓𑀘𑁂𑀢𑀦𑀸𑀓𑁆𑀔𑀡𑁂𑀬𑁂𑀯 𑀫𑀼𑀲𑀸𑀯𑀸𑀤𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺.

𑀧𑀺𑀲𑀼𑀡𑀸 𑀯𑀸𑀘𑀸𑀢𑀺𑀆𑀤𑀻𑀲𑀼 𑀬𑀸𑀬 𑀯𑀸𑀘𑀸𑀬 𑀬𑀲𑁆𑀲 𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀢𑀲𑁆𑀲 𑀳𑀤𑀬𑁂 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁 𑀧𑀭𑀲𑁆𑀲 𑀘 𑀲𑀼𑀜𑁆𑀜𑀪𑀸𑀯𑀁 𑀓𑀭𑁄𑀢𑀺, 𑀲𑀸 𑀧𑀺𑀲𑀼𑀡𑀸 𑀯𑀸𑀘𑀸. 𑀬𑀸𑀬 𑀧𑀦 𑀅𑀢𑁆𑀢𑀸𑀦𑀫𑁆𑀧𑀺 𑀧𑀭𑀫𑁆𑀧𑀺 𑀨𑀭𑀼𑀲𑀫𑁆𑀧𑀺 𑀓𑀭𑁄𑀢𑀺, 𑀲𑀸 𑀯𑀸𑀘𑀸 𑀲𑀬𑀫𑁆𑀧𑀺 𑀨𑀭𑀼𑀲𑀸 𑀦𑁂𑀯 𑀓𑀡𑁆𑀡𑀲𑀼𑀔𑀸 𑀦 𑀳𑀤𑀬𑀲𑀼𑀔𑀸 𑀯𑀸, 𑀅𑀬𑀁 𑀨𑀭𑀼𑀲𑀸 𑀯𑀸𑀘𑀸. 𑀬𑁂𑀦 𑀲𑀫𑁆𑀨𑀁 𑀧𑀮𑀧𑀢𑀺 𑀦𑀺𑀭𑀢𑁆𑀣𑀓𑀁, 𑀲𑁄 𑀲𑀫𑁆𑀨𑀧𑁆𑀧𑀮𑀸𑀧𑁄. 𑀢𑁂𑀲𑀁 𑀫𑀽𑀮𑀪𑀽𑀢𑀸 𑀘𑁂𑀢𑀦𑀸𑀧𑀺 𑀧𑀺𑀲𑀼𑀡𑀸𑀯𑀸𑀘𑀸𑀤𑀺𑀦𑀸𑀫𑀫𑁂𑀯 𑀮𑀪𑀢𑀺, 𑀲𑀸 𑀏𑀯 𑀘 𑀇𑀥 𑀅𑀥𑀺𑀧𑁆𑀧𑁂𑀢𑀸𑀢𑀺. 𑀢𑀢𑁆𑀣 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀧𑀭𑁂𑀲𑀁 𑀯𑀸 𑀪𑁂𑀤𑀸𑀬 𑀅𑀢𑁆𑀢𑀦𑁄 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀺𑀲𑀼𑀡𑀸 𑀯𑀸𑀘𑀸. 𑀲𑀸 𑀬𑀲𑁆𑀲 𑀪𑁂𑀤𑀁 𑀓𑀭𑁄𑀢𑀺, 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲𑀸 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑀪𑀺𑀦𑁆𑀤𑀺𑀢𑀩𑁆𑀩𑁄 𑀧𑀭𑁄, ‘‘𑀇𑀢𑀺 𑀇𑀫𑁂 𑀦𑀸𑀦𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀦𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀢𑀸 𑀯𑀸, ‘‘𑀅𑀳𑀁 𑀧𑀺𑀬𑁄 𑀪𑀯𑀺𑀲𑁆𑀲𑀸𑀫𑀺 𑀯𑀺𑀲𑁆𑀲𑀸𑀲𑀺𑀓𑁄’’𑀢𑀺 𑀧𑀺𑀬𑀓𑀫𑁆𑀬𑀢𑀸 𑀯𑀸, 𑀢𑀚𑁆𑀚𑁄 𑀯𑀸𑀬𑀸𑀫𑁄, 𑀢𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺.

𑀧𑀭𑀲𑁆𑀲 𑀫𑀫𑁆𑀫𑀘𑁆𑀙𑁂𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀏𑀓𑀦𑁆𑀢𑀨𑀭𑀼𑀲𑀸 𑀘𑁂𑀢𑀦𑀸 𑀨𑀭𑀼𑀲𑀸 𑀯𑀸𑀘𑀸. 𑀢𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀫𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀤𑀸𑀭𑀓𑁄 𑀫𑀸𑀢𑀼𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀕𑀘𑁆𑀙𑀢𑀺, 𑀢𑀁 𑀫𑀸𑀢𑀸 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘‘𑀘𑀡𑁆𑀟𑀸 𑀢𑀁 𑀫𑀳𑀺𑀁𑀲𑀻 𑀅𑀦𑀼𑀩𑀦𑁆𑀥𑀢𑀽’’𑀢𑀺 𑀅𑀓𑁆𑀓𑁄𑀲𑀺. 𑀅𑀣𑀲𑁆𑀲 𑀢𑀢𑁆𑀣𑁂𑀯 𑀅𑀭𑀜𑁆𑀜𑁂 𑀫𑀳𑀺𑀁𑀲𑀻 𑀉𑀝𑁆𑀞𑀸𑀲𑀺. 𑀤𑀸𑀭𑀓𑁄 ‘‘𑀬𑀁 𑀫𑀫 𑀫𑀸𑀢𑀸 𑀫𑀼𑀔𑁂𑀦 𑀓𑀣𑁂𑀲𑀺 𑀢𑀁 𑀫𑀸 𑀳𑁄𑀢𑀼, 𑀬𑀁 𑀘𑀺𑀢𑁆𑀢𑁂𑀦 𑀘𑀺𑀦𑁆𑀢𑁂𑀲𑀺 𑀢𑀁 𑀳𑁄𑀢𑀽’’𑀢𑀺 𑀲𑀘𑁆𑀘𑀓𑀺𑀭𑀺𑀬𑀫𑀓𑀸𑀲𑀺. 𑀫𑀳𑀺𑀁𑀲𑀻 𑀢𑀢𑁆𑀣𑁂𑀯 𑀩𑀤𑁆𑀥𑀸 𑀯𑀺𑀬 𑀅𑀝𑁆𑀞𑀸𑀲𑀺. 𑀏𑀯𑀁 𑀫𑀫𑁆𑀫𑀘𑁆𑀙𑁂𑀤𑀓𑁄𑀧𑀺 𑀧𑀬𑁄𑀕𑁄 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀸 𑀯𑀸𑀘𑀸 𑀦 𑀳𑁄𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀓𑀤𑀸𑀘𑀺 𑀧𑀼𑀢𑁆𑀢𑀓𑁂 𑀏𑀯𑀫𑁆𑀧𑀺 𑀯𑀤𑀦𑁆𑀢𑀺 ‘‘𑀘𑁄𑀭𑀸 𑀯𑁄 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀭𑁄𑀦𑁆𑀢𑀽’’𑀢𑀺, 𑀉𑀧𑁆𑀧𑀮𑀧𑀢𑁆𑀢𑀫𑁆𑀧𑀺 𑀘 𑀦𑁂𑀲𑀁 𑀉𑀧𑀭𑀺 𑀧𑀢𑀦𑁆𑀢𑀁 𑀦 𑀇𑀘𑁆𑀙𑀦𑁆𑀢𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀘 𑀓𑀤𑀸𑀘𑀺 𑀦𑀺𑀲𑁆𑀲𑀺𑀢𑀓𑁂 𑀏𑀯𑀁 𑀯𑀤𑀦𑁆𑀢𑀺 ‘‘𑀓𑀺𑀁 𑀇𑀫𑁂 𑀅𑀳𑀺𑀭𑀺𑀓𑀸 𑀅𑀦𑁄𑀢𑁆𑀢𑀧𑁆𑀧𑀺𑀦𑁄 𑀘𑀭𑀦𑁆𑀢𑀺 𑀦𑀺𑀤𑁆𑀥𑀫𑀣 𑀦𑁂’’𑀢𑀺. 𑀅𑀣 𑀔𑁄 𑀦𑁂𑀲𑀁 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑀺. 𑀬𑀣𑀸 𑀘 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀸 𑀯𑀸𑀘𑀸 𑀦 𑀳𑁄𑀢𑀺, 𑀏𑀯𑀁 𑀯𑀘𑀦𑀲𑀡𑁆𑀳𑀢𑀸𑀬 𑀅𑀨𑀭𑀼𑀲𑀸 𑀯𑀸𑀘𑀸𑀧𑀺 𑀦 𑀳𑁄𑀢𑀺. 𑀦 𑀳𑀺 𑀫𑀸𑀭𑀸𑀧𑁂𑀢𑀼𑀓𑀸𑀫𑀲𑁆𑀲 ‘‘𑀇𑀫𑀁 𑀲𑀼𑀔𑀁 𑀲𑀬𑀸𑀧𑁂𑀣𑀸’’𑀢𑀺 𑀯𑀘𑀦𑀁 𑀅𑀨𑀭𑀼𑀲𑀸 𑀯𑀸𑀘𑀸 𑀳𑁄𑀢𑀺. 𑀘𑀺𑀢𑁆𑀢𑀨𑀭𑀼𑀲𑀢𑀸𑀬 𑀧𑀦𑁂𑀲𑀸 𑀨𑀭𑀼𑀲𑀸 𑀯𑀸𑀘𑀸𑀯. 𑀲𑀸 𑀬𑀁 𑀲𑀦𑁆𑀥𑀸𑀬 𑀧𑀯𑀢𑁆𑀢𑀺𑀢𑀸, 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲𑀸 𑀢𑀬𑁄 𑀲𑀫𑁆𑀪𑀸𑀭𑀸 𑀅𑀓𑁆𑀓𑁄𑀲𑀺𑀢𑀩𑁆𑀩𑁄 𑀧𑀭𑁄, 𑀓𑀼𑀧𑀺𑀢𑀘𑀺𑀢𑁆𑀢𑀁, 𑀅𑀓𑁆𑀓𑁄𑀲𑀦𑀸𑀢𑀺.

𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀅𑀓𑀼𑀲𑀮𑀘𑁂𑀢𑀦𑀸 𑀲𑀫𑁆𑀨𑀧𑁆𑀧𑀮𑀸𑀧𑁄. 𑀲𑁄 𑀆𑀲𑁂𑀯𑀦𑀫𑀦𑁆𑀤𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀆𑀲𑁂𑀯𑀦𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀸𑀤𑀺𑀦𑀺𑀭𑀢𑁆𑀣𑀓𑀓𑀣𑀸𑀧𑀼𑀭𑁂𑀓𑁆𑀔𑀸𑀭𑀢𑀸, 𑀢𑀣𑀸𑀭𑀽𑀧𑀻𑀓𑀣𑀸𑀓𑀣𑀦𑀦𑁆𑀢𑀺.

𑀅𑀪𑀺𑀚𑁆𑀛𑀸𑀬𑀢𑀻𑀢𑀺 𑀅𑀪𑀺𑀚𑁆𑀛𑀸, 𑀧𑀭𑀪𑀡𑁆𑀟𑀸𑀪𑀺𑀫𑀼𑀔𑀻 𑀳𑀼𑀢𑁆𑀯𑀸 𑀢𑀦𑁆𑀦𑀺𑀦𑁆𑀦𑀢𑀸𑀬 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑀸 ‘‘𑀅𑀳𑁄 𑀯𑀢 𑀇𑀤𑀁 𑀫𑀫𑀲𑁆𑀲𑀸’’𑀢𑀺 𑀏𑀯𑀁 𑀧𑀭𑀪𑀡𑁆𑀟𑀸𑀪𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑀸. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑀸 𑀘 𑀫𑀳𑀸𑀲𑀸𑀯𑀚𑁆𑀚𑀸 𑀘. 𑀢𑀲𑁆𑀲𑀸 𑀤𑁆𑀯𑁂 𑀲𑀫𑁆𑀪𑀸𑀭𑀸 𑀧𑀭𑀪𑀡𑁆𑀟𑀁, 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀜𑁆𑀘. 𑀧𑀭𑀪𑀡𑁆𑀟𑀯𑀢𑁆𑀣𑀼𑀓𑁂 𑀳𑀺 𑀮𑁄𑀪𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦 𑀢𑀸𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺, 𑀬𑀸𑀯 ‘‘𑀅𑀳𑁄 𑀯𑀢𑀻𑀤𑀁 𑀫𑀫𑀲𑁆𑀲𑀸’’𑀢𑀺 𑀅𑀢𑁆𑀢𑀦𑁄 𑀦 𑀧𑀭𑀺𑀡𑀸𑀫𑁂𑀢𑀺.

𑀳𑀺𑀢𑀲𑀼𑀔𑀁 𑀩𑁆𑀬𑀸𑀧𑀸𑀤𑀬𑀢𑀻𑀢𑀺 𑀩𑁆𑀬𑀸𑀧𑀸𑀤𑁄. 𑀲𑁄 𑀧𑀭𑀯𑀺𑀦𑀸𑀲𑀸𑀬 𑀫𑀦𑁄𑀧𑀤𑁄𑀲𑀮𑀓𑁆𑀔𑀡𑁄, 𑀨𑀭𑀼𑀲𑀸 𑀯𑀸𑀘𑀸 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑁄 𑀫𑀳𑀸𑀲𑀸𑀯𑀚𑁆𑀚𑁄 𑀘. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑀧𑀭𑀲𑀢𑁆𑀢𑁄 𑀘, 𑀢𑀲𑁆𑀲 𑀘 𑀯𑀺𑀦𑀸𑀲𑀘𑀺𑀦𑁆𑀢𑀸. 𑀧𑀭𑀲𑀢𑁆𑀢𑀯𑀢𑁆𑀣𑀼𑀓𑁂 𑀳𑀺 𑀓𑁄𑀥𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦 𑀢𑀸𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺, 𑀬𑀸𑀯 ‘‘𑀅𑀳𑁄 𑀯𑀢𑀸𑀬𑀁 𑀉𑀘𑁆𑀙𑀺𑀚𑁆𑀚𑁂𑀬𑁆𑀬 𑀯𑀺𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀢𑀲𑁆𑀲 𑀯𑀺𑀦𑀸𑀲𑀁 𑀦 𑀘𑀺𑀦𑁆𑀢𑁂𑀢𑀺.

𑀬𑀣𑀸𑀪𑀼𑀘𑁆𑀘𑀕𑀳𑀡𑀸𑀪𑀸𑀯𑁂𑀦 𑀫𑀺𑀘𑁆𑀙𑀸 𑀧𑀲𑁆𑀲𑀢𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀲𑀸 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀭𑀻𑀢𑀤𑀲𑁆𑀲𑀦𑀮𑀓𑁆𑀔𑀡𑀸. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑀸 𑀫𑀳𑀸𑀲𑀸𑀯𑀚𑁆𑀚𑀸 𑀘. 𑀅𑀧𑀺𑀘 𑀅𑀦𑀺𑀬𑀢𑀸 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀦𑀺𑀬𑀢𑀸 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲𑀸 𑀤𑁆𑀯𑁂 𑀲𑀫𑁆𑀪𑀸𑀭𑀸 𑀯𑀢𑁆𑀣𑀼𑀦𑁄 𑀘 𑀕𑀳𑀺𑀢𑀸𑀓𑀸𑀭𑀯𑀺𑀧𑀭𑀻𑀢𑀢𑀸, 𑀬𑀣𑀸 𑀘 𑀢𑀁 𑀕𑀡𑁆𑀳𑀸𑀢𑀺, 𑀢𑀣𑀸𑀪𑀸𑀯𑁂𑀦 𑀢𑀲𑁆𑀲𑀼𑀧𑀝𑁆𑀞𑀸𑀦𑀦𑁆𑀢𑀺.

𑀇𑀫𑁂𑀲𑀁 𑀧𑀦 𑀤𑀲𑀦𑁆𑀦𑀁 𑀅𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀥𑀫𑁆𑀫𑀢𑁄 𑀓𑁄𑀝𑁆𑀞𑀸𑀲𑀢𑁄 𑀆𑀭𑀫𑁆𑀫𑀡𑀢𑁄 𑀯𑁂𑀤𑀦𑀸𑀢𑁄 𑀫𑀽𑀮𑀢𑁄𑀢𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀥𑀫𑁆𑀫𑀢𑁄𑀢𑀺 𑀏𑀢𑁂𑀲𑀼 𑀳𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢, 𑀘𑁂𑀢𑀦𑀸𑀥𑀫𑁆𑀫𑀸𑀯 𑀳𑁄𑀦𑁆𑀢𑀺, 𑀅𑀪𑀺𑀚𑁆𑀛𑀸𑀤𑀬𑁄 𑀢𑀬𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸.

𑀓𑁄𑀝𑁆𑀞𑀸𑀲𑀢𑁄𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘𑀸𑀢𑀺 𑀇𑀫𑁂 𑀅𑀝𑁆𑀞 𑀓𑀫𑁆𑀫𑀧𑀣𑀸 𑀏𑀯 𑀳𑁄𑀦𑁆𑀢𑀺, 𑀦𑁄 𑀫𑀽𑀮𑀸𑀦𑀺. 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸 𑀓𑀫𑁆𑀫𑀧𑀣𑀸 𑀘𑁂𑀯 𑀫𑀽𑀮𑀸𑀦𑀺 𑀘. 𑀅𑀪𑀺𑀚𑁆𑀛𑀸 𑀳𑀺 𑀫𑀽𑀮𑀁 𑀧𑀢𑁆𑀯𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑀳𑁄𑀢𑀺. 𑀩𑁆𑀬𑀸𑀧𑀸𑀤𑁄 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁.

𑀆𑀭𑀫𑁆𑀫𑀡𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑀢𑁄 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀲𑀢𑁆𑀢𑀸𑀭𑀫𑁆𑀫𑀡𑀁 𑀯𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀯𑀸. 𑀫𑀺𑀘𑁆𑀙𑀸𑀘𑀸𑀭𑁄 𑀨𑁄𑀝𑁆𑀞𑀩𑁆𑀩𑀯𑀲𑁂𑀦 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄. 𑀲𑀢𑁆𑀢𑀸𑀭𑀫𑁆𑀫𑀡𑁄𑀢𑀺𑀧𑀺 𑀏𑀓𑁂. 𑀫𑀼𑀲𑀸𑀯𑀸𑀤𑁄 𑀲𑀢𑁆𑀢𑀸𑀭𑀫𑁆𑀫𑀡𑁄 𑀯𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄 𑀯𑀸. 𑀢𑀣𑀸 𑀧𑀺𑀲𑀼𑀡𑀸 𑀯𑀸𑀘𑀸. 𑀨𑀭𑀼𑀲𑀸 𑀯𑀸𑀘𑀸 𑀲𑀢𑁆𑀢𑀸𑀭𑀫𑁆𑀫𑀡𑀸𑀯. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀯𑀲𑁂𑀦 𑀲𑀢𑁆𑀢𑀸𑀭𑀫𑁆𑀫𑀡𑁄 𑀯𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄 𑀯𑀸, 𑀢𑀣𑀸 𑀅𑀪𑀺𑀚𑁆𑀛𑀸. 𑀩𑁆𑀬𑀸𑀧𑀸𑀤𑁄 𑀲𑀢𑁆𑀢𑀸𑀭𑀫𑁆𑀫𑀡𑁄𑀯. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀢𑁂𑀪𑀽𑀫𑀓𑀥𑀫𑁆𑀫𑀯𑀲𑁂𑀦 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸.

𑀯𑁂𑀤𑀦𑀸𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑁄 𑀤𑀼𑀓𑁆𑀔𑀯𑁂𑀤𑀦𑁄 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀭𑀸𑀚𑀸𑀦𑁄 𑀘𑁄𑀭𑀁 𑀤𑀺𑀲𑁆𑀯𑀸 𑀳𑀲𑀫𑀸𑀦𑀸𑀧𑀺 ‘‘𑀕𑀘𑁆𑀙𑀣 𑀦𑀁 𑀖𑀸𑀢𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀧𑀦 𑀦𑁂𑀲𑀁 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀸𑀯 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀢𑀺𑀯𑁂𑀤𑀦𑀁. 𑀫𑀺𑀘𑁆𑀙𑀸𑀘𑀸𑀭𑁄 𑀲𑀼𑀔𑀫𑀚𑁆𑀛𑀢𑁆𑀢𑀯𑀲𑁂𑀦 𑀤𑁆𑀯𑀺𑀯𑁂𑀤𑀦𑁄, 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑀺𑀢𑁆𑀢𑁂 𑀧𑀦 𑀫𑀚𑁆𑀛𑀢𑁆𑀢𑀯𑁂𑀤𑀦𑁄 𑀦 𑀳𑁄𑀢𑀺. 𑀫𑀼𑀲𑀸𑀯𑀸𑀤𑁄 𑀢𑀺𑀯𑁂𑀤𑀦𑁄, 𑀢𑀣𑀸 𑀧𑀺𑀲𑀼𑀡𑀸 𑀯𑀸𑀘𑀸. 𑀨𑀭𑀼𑀲𑀸 𑀯𑀸𑀘𑀸 𑀤𑀼𑀓𑁆𑀔𑀯𑁂𑀤𑀦𑀸𑀯. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀢𑀺𑀯𑁂𑀤𑀦𑁄. 𑀅𑀪𑀺𑀚𑁆𑀛𑀸 𑀲𑀼𑀔𑀫𑀚𑁆𑀛𑀢𑁆𑀢𑀯𑀲𑁂𑀦 𑀤𑁆𑀯𑀺𑀯𑁂𑀤𑀦𑀸, 𑀢𑀣𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀩𑁆𑀬𑀸𑀧𑀸𑀤𑁄 𑀤𑀼𑀓𑁆𑀔𑀯𑁂𑀤𑀦𑁄.

𑀫𑀽𑀮𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑁄 𑀤𑁄𑀲𑀫𑁄𑀳𑀯𑀲𑁂𑀦 𑀤𑁆𑀯𑀺𑀫𑀽𑀮𑀓𑁄 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀤𑁄𑀲𑀫𑁄𑀳𑀯𑀲𑁂𑀦 𑀯𑀸 𑀮𑁄𑀪𑀫𑁄𑀳𑀯𑀲𑁂𑀦 𑀯𑀸. 𑀫𑀺𑀘𑁆𑀙𑀸𑀘𑀸𑀭𑁄 𑀮𑁄𑀪𑀫𑁄𑀳𑀯𑀲𑁂𑀦. 𑀫𑀼𑀲𑀸𑀯𑀸𑀤𑁄 𑀤𑁄𑀲𑀫𑁄𑀳𑀯𑀲𑁂𑀦 𑀯𑀸 𑀮𑁄𑀪𑀫𑁄𑀳𑀯𑀲𑁂𑀦 𑀯𑀸, 𑀢𑀣𑀸 𑀧𑀺𑀲𑀼𑀡𑀸 𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑁄 𑀘. 𑀨𑀭𑀼𑀲𑀸 𑀯𑀸𑀘𑀸 𑀤𑁄𑀲𑀫𑁄𑀳𑀯𑀲𑁂𑀦. 𑀅𑀪𑀺𑀚𑁆𑀛𑀸 𑀫𑁄𑀳𑀯𑀲𑁂𑀦 𑀏𑀓𑀫𑀽𑀮𑀸, 𑀢𑀣𑀸 𑀩𑁆𑀬𑀸𑀧𑀸𑀤𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀮𑁄𑀪𑀫𑁄𑀳𑀯𑀲𑁂𑀦 𑀤𑁆𑀯𑀺𑀫𑀽𑀮𑀸𑀢𑀺.

𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀦𑁆𑀢𑀺𑀆𑀤𑀻𑀲𑀼 𑀮𑀼𑀩𑁆𑀪𑀢𑀻𑀢𑀺 𑀮𑁄𑀪𑁄. 𑀤𑀼𑀲𑁆𑀲𑀢𑀻𑀢𑀺 𑀤𑁄𑀲𑁄. 𑀫𑀼𑀬𑁆𑀳𑀢𑀻𑀢𑀺 𑀫𑁄𑀳𑁄. 𑀢𑁂𑀲𑀼 𑀮𑁄𑀪𑁄 𑀲𑀬𑀜𑁆𑀘 𑀅𑀓𑀼𑀲𑀮𑁄 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀝𑁆𑀞𑁂𑀦, 𑀇𑀫𑁂𑀲𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀅𑀓𑀼𑀲𑀮𑀸𑀦𑀁 𑀓𑁂𑀲𑀜𑁆𑀘𑀺 𑀲𑀫𑁆𑀧𑀬𑀼𑀢𑁆𑀢𑀧𑁆𑀧𑀪𑀸𑀯𑀓𑀝𑁆𑀞𑁂𑀦 𑀓𑁂𑀲𑀜𑁆𑀘𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀝𑁆𑀞𑁂𑀦 𑀫𑀽𑀮𑀦𑁆𑀢𑀺 𑀅𑀓𑀼𑀲𑀮𑀫𑀽𑀮𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀭𑀢𑁆𑀢𑁄 𑀔𑁄 𑀆𑀯𑀼𑀲𑁄 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀸𑀡𑀫𑁆𑀧𑀺 𑀳𑀦𑀢𑀻’’𑀢𑀺𑀆𑀤𑀺. 𑀤𑁄𑀲𑀫𑁄𑀳𑀸𑀦𑀁 𑀅𑀓𑀼𑀲𑀮𑀫𑀽𑀮𑀪𑀸𑀯𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀓𑀼𑀲𑀮𑀓𑀫𑁆𑀫𑀧𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀲𑀮𑀓𑀫𑁆𑀫𑀧𑀣𑀯𑀡𑁆𑀡𑀦𑀸

𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀓𑀼𑀲𑀮𑀦𑁆𑀢𑀺𑀆𑀤𑀻𑀲𑀼 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀯𑀼𑀢𑁆𑀢𑀢𑁆𑀣𑀸 𑀏𑀯. 𑀯𑁂𑀭𑀁 𑀫𑀡𑀢𑀻𑀢𑀺 𑀯𑁂𑀭𑀫𑀡𑀻, 𑀯𑁂𑀭𑀁 𑀧𑀚𑀳𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀭𑀫𑀢𑀺 𑀯𑀸 𑀏𑀢𑀸𑀬 𑀓𑀭𑀡𑀪𑀽𑀢𑀸𑀬, 𑀯𑀺𑀓𑀸𑀭𑀲𑁆𑀲 𑀯𑁂𑀓𑀸𑀭𑀁 𑀓𑀢𑁆𑀯𑀸𑀧𑀺 𑀯𑁂𑀭𑀫𑀡𑀻. 𑀅𑀬𑀁 𑀢𑀸𑀯𑁂𑀢𑁆𑀣 𑀩𑁆𑀬𑀜𑁆𑀚𑀦𑀢𑁄 𑀯𑀡𑁆𑀡𑀦𑀸. 𑀅𑀢𑁆𑀣𑀢𑁄 𑀧𑀦 𑀯𑁂𑀭𑀫𑀡𑀻𑀢𑀺 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀭𑀢𑀺. 𑀬𑀸 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀦𑁆𑀢𑀲𑁆𑀲, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀸𑀡𑀸𑀢𑀺𑀧𑀸𑀢𑀸 𑀆𑀭𑀢𑀺 𑀯𑀺𑀭𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀭𑀢𑀺, 𑀲𑀸 𑀪𑁂𑀤𑀢𑁄 𑀢𑀺𑀯𑀺𑀥𑁄 𑀳𑁄𑀢𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀻𑀢𑀺. 𑀢𑀢𑁆𑀣 𑀅𑀲𑀫𑀸𑀤𑀺𑀦𑁆𑀦𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀢𑁆𑀢𑀦𑁄 𑀚𑀸𑀢𑀺𑀯𑀬𑀩𑀸𑀳𑀼𑀲𑀘𑁆𑀘𑀸𑀤𑀻𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘‘𑀅𑀬𑀼𑀢𑁆𑀢𑀁 𑀅𑀫𑁆𑀳𑀸𑀓𑀁 𑀏𑀯𑀭𑀽𑀧𑀁 𑀓𑀸𑀢𑀼’’𑀦𑁆𑀢𑀺 𑀲𑀫𑁆𑀧𑀢𑁆𑀢𑀯𑀢𑁆𑀣𑀼𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑀺𑀭𑀢𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸 𑀲𑀻𑀳𑀴𑀤𑀻𑀧𑁂 𑀘𑀓𑁆𑀓𑀦𑀉𑀧𑀸𑀲𑀓𑀲𑁆𑀲 𑀯𑀺𑀬.

𑀢𑀲𑁆𑀲 𑀓𑀺𑀭 𑀤𑀳𑀭𑀓𑀸𑀮𑁂𑀬𑁂𑀯 𑀫𑀸𑀢𑀼𑀬𑀸 𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀯𑁂𑀚𑁆𑀚𑁂𑀦 𑀘 ‘‘𑀅𑀮𑁆𑀮𑀲𑀲𑀫𑀁𑀲𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀘𑀓𑁆𑀓𑀦𑀲𑁆𑀲 𑀪𑀸𑀢𑀸 ‘‘𑀕𑀘𑁆𑀙 𑀢𑀸𑀢 𑀔𑁂𑀢𑁆𑀢𑀁 𑀆𑀳𑀺𑀡𑁆𑀟𑀸𑀳𑀻’’𑀢𑀺 𑀘𑀓𑁆𑀓𑀦𑀁 𑀧𑁂𑀲𑁂𑀲𑀺. 𑀲𑁄 𑀢𑀢𑁆𑀣 𑀕𑀢𑁄. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀏𑀓𑁄 𑀲𑀲𑁄 𑀢𑀭𑀼𑀡𑀲𑀲𑁆𑀲𑀁 𑀔𑀸𑀤𑀺𑀢𑀼𑀁 𑀆𑀕𑀢𑁄 𑀳𑁄𑀢𑀺, 𑀲𑁄 𑀢𑀁 𑀤𑀺𑀲𑁆𑀯𑀸 𑀯𑁂𑀕𑁂𑀦 𑀥𑀸𑀯𑁂𑀦𑁆𑀢𑁄 𑀯𑀮𑁆𑀮𑀺𑀬𑀸 𑀩𑀤𑁆𑀥𑁄 ‘‘𑀓𑀺𑀭𑀺 𑀓𑀺𑀭𑀻’’𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀘𑀓𑁆𑀓𑀦𑁄 𑀢𑁂𑀦 𑀲𑀤𑁆𑀤𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀸𑀢𑀼 𑀪𑁂𑀲𑀚𑁆𑀚𑀁 𑀓𑀭𑁄𑀫𑀻’’𑀢𑀺. 𑀧𑀼𑀦 𑀘𑀺𑀦𑁆𑀢𑁂𑀲𑀺 ‘‘𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 𑀫𑀸𑀢𑀼 𑀚𑀻𑀯𑀺𑀢𑀓𑀸𑀭𑀡𑀸 𑀧𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬’’𑀦𑁆𑀢𑀺. 𑀅𑀣 𑀦𑀁 ‘‘𑀕𑀘𑁆𑀙 𑀅𑀭𑀜𑁆𑀜𑁂 𑀲𑀲𑁂𑀳𑀺 𑀲𑀤𑁆𑀥𑀺𑀁 𑀢𑀺𑀡𑁄𑀤𑀓𑀁 𑀧𑀭𑀺𑀪𑀼𑀜𑁆𑀚𑀸’’𑀢𑀺 𑀫𑀼𑀜𑁆𑀘𑀺. 𑀪𑀸𑀢𑀭𑀸 𑀘 ‘‘𑀓𑀺𑀁 𑀢𑀸𑀢 𑀲𑀲𑁄 𑀮𑀤𑁆𑀥𑁄’’𑀢𑀺 𑀧𑀼𑀘𑁆𑀙𑀺𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀢𑀢𑁄 𑀦𑀁 𑀪𑀸𑀢𑀸 𑀧𑀭𑀺𑀪𑀸𑀲𑀺. 𑀲𑁄 𑀫𑀸𑀢𑀼𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀬𑀢𑁄𑀳𑀁 𑀚𑀸𑀢𑁄, 𑀦𑀸𑀪𑀺𑀚𑀸𑀦𑀸𑀫𑀺 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀸’’𑀢𑀺 𑀲𑀘𑁆𑀘𑀁 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑀸𑀯𑀤𑁂𑀯𑀲𑁆𑀲 𑀫𑀸𑀢𑀸 𑀅𑀭𑁄𑀕𑀸 𑀅𑀳𑁄𑀲𑀺.

𑀲𑀫𑀸𑀤𑀺𑀦𑁆𑀦𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀦 𑀲𑀺𑀓𑁆𑀔𑀸𑀧𑀤𑀲𑀫𑀸𑀤𑀸𑀦𑁂 𑀘 𑀢𑀢𑀼𑀢𑁆𑀢𑀭𑀺 𑀘 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀯𑀢𑁆𑀣𑀼𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑀺𑀭𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸 𑀉𑀢𑁆𑀢𑀭𑀯𑀟𑁆𑀠𑀫𑀸𑀦𑀧𑀩𑁆𑀩𑀢𑀯𑀸𑀲𑀻𑀉𑀧𑀸𑀲𑀓𑀲𑁆𑀲 𑀯𑀺𑀬.

𑀲𑁄 𑀓𑀺𑀭 𑀅𑀫𑁆𑀩𑀭𑀺𑀬𑀯𑀺𑀳𑀸𑀭𑀯𑀸𑀲𑀻𑀧𑀺𑀗𑁆𑀕𑀮𑀩𑀼𑀤𑁆𑀥𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀳𑁂𑀢𑁆𑀯𑀸 𑀔𑁂𑀢𑁆𑀢𑀁 𑀓𑀲𑁆𑀲𑀢𑀺. 𑀅𑀣𑀲𑁆𑀲 𑀕𑁄𑀡𑁄 𑀦𑀝𑁆𑀞𑁄, 𑀲𑁄 𑀢𑀁 𑀕𑀯𑁂𑀲𑀦𑁆𑀢𑁄 𑀉𑀢𑁆𑀢𑀭𑀯𑀟𑁆𑀠𑀫𑀸𑀦𑀧𑀩𑁆𑀩𑀢𑀁 𑀆𑀭𑀼𑀳𑀺, 𑀢𑀢𑁆𑀭 𑀦𑀁 𑀫𑀳𑀸𑀲𑀧𑁆𑀧𑁄 𑀅𑀕𑁆𑀕𑀳𑁂𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀸𑀬𑀲𑁆𑀲 𑀢𑀺𑀔𑀺𑀡𑀯𑀸𑀲𑀺𑀬𑀸 𑀲𑀻𑀲𑀁 𑀙𑀺𑀦𑁆𑀤𑀸𑀫𑀻’’𑀢𑀺. 𑀧𑀼𑀦 𑀘𑀺𑀦𑁆𑀢𑁂𑀲𑀺 ‘‘𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 𑀪𑀸𑀯𑀦𑀻𑀬𑀲𑁆𑀲 𑀕𑀭𑀼𑀦𑁄 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀤𑀁 𑀕𑀳𑁂𑀢𑁆𑀯𑀸 𑀪𑀺𑀦𑁆𑀤𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀦 𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀅𑀁𑀲𑁂 𑀞𑀧𑀺𑀢𑀁 𑀢𑀺𑀔𑀺𑀡𑀤𑀡𑁆𑀟𑀯𑀸𑀲𑀺𑀁 𑀅𑀭𑀜𑁆𑀜𑁂 𑀙𑀟𑁆𑀟𑁂𑀲𑀺. 𑀢𑀸𑀯𑀤𑁂𑀯 𑀦𑀁 𑀫𑀳𑀸𑀯𑀸𑀴𑁄 𑀫𑀼𑀜𑁆𑀘𑀺𑀢𑁆𑀯𑀸 𑀅𑀕𑀫𑀸𑀲𑀻𑀢𑀺.

𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀯𑀺𑀭𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀲𑀸 𑀉𑀧𑁆𑀧𑀢𑁆𑀢𑀺𑀢𑁄 𑀧𑀪𑀼𑀢𑀺 ‘‘𑀧𑀸𑀡𑀁 𑀖𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀲𑀸 𑀧𑀦𑀸𑀬𑀁 𑀯𑀺𑀭𑀢𑀺 𑀓𑁄𑀲𑀮𑁆𑀮𑀧𑁆𑀧𑀯𑀢𑁆𑀢𑀺𑀬𑀸 𑀓𑀼𑀲𑀮𑀦𑁆𑀢𑀺 𑀯𑀼𑀢𑁆𑀢𑀸. 𑀓𑀼𑀘𑁆𑀙𑀺𑀢𑀲𑀬𑀦𑀢𑁄 𑀯𑀸 𑀓𑀼𑀲𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀤𑀼𑀲𑁆𑀲𑀻𑀮𑁆𑀬𑀁 𑀮𑀼𑀦𑀸𑀢𑀻𑀢𑀺𑀧𑀺 𑀓𑀼𑀲𑀮𑀁. 𑀓𑀢𑀫𑀜𑁆𑀘𑀸𑀯𑀼𑀲𑁄 𑀓𑀼𑀲𑀮𑀦𑁆𑀢𑀺 𑀇𑀫𑀲𑁆𑀲 𑀧𑀦 𑀧𑀜𑁆𑀳𑀲𑁆𑀲 𑀅𑀦𑀦𑀼𑀭𑀽𑀧𑀢𑁆𑀢𑀸 𑀓𑀼𑀲𑀮𑀸𑀢𑀺 𑀦 𑀯𑀼𑀢𑁆𑀢𑀸.

𑀬𑀣𑀸 𑀘 𑀅𑀓𑀼𑀲𑀮𑀸𑀦𑀁, 𑀏𑀯𑀁 𑀇𑀫𑁂𑀲𑀫𑁆𑀧𑀺 𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀥𑀫𑁆𑀫𑀢𑁄 𑀓𑁄𑀝𑁆𑀞𑀸𑀲𑀢𑁄 𑀆𑀭𑀫𑁆𑀫𑀡𑀢𑁄 𑀯𑁂𑀤𑀦𑀸𑀢𑁄 𑀫𑀽𑀮𑀢𑁄𑀢𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀥𑀫𑁆𑀫𑀢𑁄𑀢𑀺 𑀏𑀢𑁂𑀲𑀼 𑀳𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀘𑁂𑀢𑀦𑀸𑀧𑀺 𑀯𑀝𑁆𑀝𑀦𑁆𑀢𑀺, 𑀯𑀺𑀭𑀢𑀺𑀬𑁄𑀧𑀺. 𑀅𑀦𑁆𑀢𑁂 𑀢𑀬𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀯.

𑀓𑁄𑀝𑁆𑀞𑀸𑀲𑀢𑁄𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀓𑀫𑁆𑀫𑀧𑀣𑀸 𑀏𑀯, 𑀦𑁄 𑀫𑀽𑀮𑀸𑀦𑀺. 𑀅𑀦𑁆𑀢𑁂 𑀢𑀬𑁄 𑀓𑀫𑁆𑀫𑀧𑀣𑀸 𑀘𑁂𑀯 𑀫𑀽𑀮𑀸𑀦𑀺 𑀘. 𑀅𑀦𑀪𑀺𑀚𑁆𑀛𑀸 𑀳𑀺 𑀫𑀽𑀮𑀁 𑀧𑀢𑁆𑀯𑀸 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁 𑀳𑁄𑀢𑀺. 𑀅𑀩𑁆𑀬𑀸𑀧𑀸𑀤𑁄 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁.

𑀆𑀭𑀫𑁆𑀫𑀡𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑁂𑀯 𑀏𑀢𑁂𑀲𑀁 𑀆𑀭𑀫𑁆𑀫𑀡𑀸𑀦𑀺, 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁄𑀬𑁂𑀯 𑀳𑀺 𑀯𑁂𑀭𑀫𑀡𑀻 𑀦𑀸𑀫 𑀳𑁄𑀢𑀺. 𑀬𑀣𑀸 𑀧𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄 𑀅𑀭𑀺𑀬𑀫𑀕𑁆𑀕𑁄 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀏𑀯𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀆𑀭𑀫𑁆𑀫𑀡𑀸𑀧𑁂𑀢𑁂 𑀓𑀫𑁆𑀫𑀧𑀣𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀤𑀼𑀲𑁆𑀲𑀻𑀮𑁆𑀬𑀸𑀦𑀺 𑀧𑀚𑀳𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀯𑁂𑀤𑀦𑀸𑀢𑁄𑀢𑀺 𑀲𑀩𑁆𑀩𑁂 𑀲𑀼𑀔𑀯𑁂𑀤𑀦𑀸 𑀯𑀸 𑀳𑁄𑀦𑁆𑀢𑀺, 𑀫𑀚𑁆𑀛𑀢𑁆𑀢𑀯𑁂𑀤𑀦𑀸 𑀯𑀸. 𑀓𑀼𑀲𑀮𑀁 𑀧𑀢𑁆𑀯𑀸 𑀳𑀺 𑀤𑀼𑀓𑁆𑀔𑀯𑁂𑀤𑀦𑀸 𑀦𑀸𑀫 𑀦𑀢𑁆𑀣𑀺.

𑀫𑀽𑀮𑀢𑁄𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀓𑀫𑁆𑀫𑀧𑀣𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀯𑀺𑀭𑀫𑀦𑁆𑀢𑀲𑁆𑀲 𑀅𑀮𑁄𑀪𑀅𑀤𑁄𑀲𑀅𑀫𑁄𑀳𑀯𑀲𑁂𑀦 𑀢𑀺𑀫𑀽𑀮𑀸 𑀳𑁄𑀦𑁆𑀢𑀺. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀯𑀺𑀭𑀫𑀦𑁆𑀢𑀲𑁆𑀲 𑀤𑁆𑀯𑀺𑀫𑀽𑀮𑀸. 𑀅𑀦𑀪𑀺𑀚𑁆𑀛𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀯𑀺𑀭𑀫𑀦𑁆𑀢𑀲𑁆𑀲 𑀤𑁆𑀯𑀺𑀫𑀽𑀮𑀸. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀏𑀓𑀫𑀽𑀮𑀸. 𑀅𑀮𑁄𑀪𑁄 𑀧𑀦 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀫𑀽𑀮𑀁 𑀦 𑀳𑁄𑀢𑀺, 𑀅𑀩𑁆𑀬𑀸𑀧𑀸𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀅𑀮𑁄𑀪𑀸𑀤𑁄𑀲𑀯𑀲𑁂𑀦 𑀤𑁆𑀯𑀺𑀫𑀽𑀮𑀸𑀯𑀸𑀢𑀺.

𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀦𑁆𑀢𑀺𑀆𑀤𑀻𑀲𑀼 𑀦 𑀮𑁄𑀪𑁄𑀢𑀺 𑀅𑀮𑁄𑀪𑁄, 𑀮𑁄𑀪𑀧𑀝𑀺𑀧𑀓𑁆𑀔𑀲𑁆𑀲 𑀥𑀫𑁆𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀤𑁄𑀲𑀸𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀲𑀼 𑀅𑀮𑁄𑀪𑁄 𑀲𑀬𑀜𑁆𑀘 𑀓𑀼𑀲𑀮𑀁, 𑀇𑀫𑁂𑀲𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻𑀆𑀤𑀻𑀦𑀁 𑀓𑀼𑀲𑀮𑀸𑀦𑀁 𑀓𑁂𑀲𑀜𑁆𑀘𑀺 𑀲𑀫𑁆𑀧𑀬𑀼𑀢𑁆𑀢𑀧𑁆𑀧𑀪𑀸𑀯𑀓𑀝𑁆𑀞𑁂𑀦 𑀓𑁂𑀲𑀜𑁆𑀘𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀝𑁆𑀞𑁂𑀦 𑀫𑀽𑀮𑀦𑁆𑀢𑀺 𑀓𑀼𑀲𑀮𑀫𑀽𑀮𑀁. 𑀅𑀤𑁄𑀲𑀸𑀫𑁄𑀳𑀸𑀦𑀫𑁆𑀧𑀺 𑀓𑀼𑀲𑀮𑀫𑀽𑀮𑀪𑀸𑀯𑁂 𑀏𑀲𑁂𑀯 𑀦𑀬𑁄.

𑀇𑀤𑀸𑀦𑀺 𑀲𑀩𑁆𑀩𑀫𑁆𑀧𑀺 𑀢𑀁 𑀲𑀗𑁆𑀔𑁂𑀧𑁂𑀦 𑀘 𑀯𑀺𑀢𑁆𑀣𑀸𑀭𑁂𑀦 𑀘 𑀤𑁂𑀲𑀺𑀢𑀫𑀢𑁆𑀣𑀁 𑀦𑀺𑀕𑀫𑁂𑀦𑁆𑀢𑁄 𑀬𑀢𑁄 𑀔𑁄 𑀆𑀯𑀼𑀲𑁄𑀢𑀺𑀆𑀤𑀺𑀅𑀧𑁆𑀧𑀦𑀸𑀯𑀸𑀭𑀫𑀸𑀳. 𑀢𑀢𑁆𑀣 𑀏𑀯𑀁 𑀅𑀓𑀼𑀲𑀮𑀁 𑀧𑀚𑀸𑀦𑀸𑀢𑀻𑀢𑀺 𑀏𑀯𑀁 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀤𑀲𑀸𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀅𑀓𑀼𑀲𑀮𑀁 𑀧𑀚𑀸𑀦𑀸𑀢𑀺. 𑀏𑀯𑀁 𑀅𑀓𑀼𑀲𑀮𑀫𑀽𑀮𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀢𑀸𑀯𑀢𑀸 𑀏𑀓𑁂𑀦 𑀦𑀬𑁂𑀦 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀬𑀸𑀯 𑀅𑀭𑀳𑀢𑁆𑀢𑀸 𑀦𑀺𑀬𑁆𑀬𑀸𑀦𑀁 𑀓𑀣𑀺𑀢𑀁 𑀳𑁄𑀢𑀺. 𑀓𑀣𑀁? 𑀏𑀢𑁆𑀣 𑀳𑀺 𑀞𑀧𑁂𑀢𑁆𑀯𑀸 𑀅𑀪𑀺𑀚𑁆𑀛𑀁 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀘 𑀓𑀼𑀲𑀮𑀓𑀫𑁆𑀫𑀧𑀣𑀸 𑀘 𑀤𑀼𑀓𑁆𑀔𑀲𑀘𑁆𑀘𑀁. 𑀅𑀪𑀺𑀚𑁆𑀛𑀸 𑀘 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀜𑁆𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀫𑀼𑀤𑀬𑀲𑀘𑁆𑀘𑀁. 𑀧𑀭𑀺𑀬𑀸𑀬𑁂𑀦 𑀧𑀦 𑀲𑀩𑁆𑀩𑁂𑀧𑀺 𑀓𑀫𑁆𑀫𑀧𑀣𑀸 𑀤𑀼𑀓𑁆𑀔𑀲𑀘𑁆𑀘𑀁. 𑀲𑀩𑁆𑀩𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀸𑀦𑀺 𑀲𑀫𑀼𑀤𑀬𑀲𑀘𑁆𑀘𑀁. 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁. 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀫𑀼𑀤𑀬𑀁 𑀧𑀚𑀳𑀫𑀸𑀦𑁄 𑀦𑀺𑀭𑁄𑀥𑀁 𑀧𑀚𑀸𑀦𑀦𑁆𑀢𑁄 𑀅𑀭𑀺𑀬𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀇𑀢𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀲𑀭𑀽𑀧𑁂𑀦 𑀯𑀼𑀢𑁆𑀢𑀸𑀦𑀺, 𑀤𑁆𑀯𑁂 𑀆𑀯𑀢𑁆𑀢𑀳𑀸𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑁄 𑀲𑀩𑁆𑀩𑀲𑁄 𑀭𑀸𑀕𑀸𑀦𑀼𑀲𑀬𑀁 𑀧𑀳𑀸𑀬𑀸𑀢𑀺 𑀲𑁄 𑀏𑀯𑀁 𑀅𑀓𑀼𑀲𑀮𑀸𑀤𑀻𑀦𑀺 𑀧𑀚𑀸𑀦𑀦𑁆𑀢𑁄 𑀲𑀩𑁆𑀩𑀸𑀓𑀸𑀭𑁂𑀦 𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀺𑀢𑁆𑀯𑀸. 𑀧𑀝𑀺𑀖𑀸𑀦𑀼𑀲𑀬𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸𑀢𑀺 𑀧𑀝𑀺𑀖𑀸𑀦𑀼𑀲𑀬𑀜𑁆𑀘 𑀲𑀩𑁆𑀩𑀸𑀓𑀸𑀭𑁂𑀦𑁂𑀯 𑀦𑀻𑀳𑀭𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀓𑀣𑀺𑀢𑁄. 𑀅𑀲𑁆𑀫𑀻𑀢𑀺 𑀤𑀺𑀝𑁆𑀞𑀺𑀫𑀸𑀦𑀸𑀦𑀼𑀲𑀬𑀁 𑀲𑀫𑀽𑀳𑀦𑀺𑀢𑁆𑀯𑀸𑀢𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀦𑀯𑀓𑀸𑀭𑀻𑀓𑀭𑀺𑀢𑁆𑀯𑀸 ‘‘𑀅𑀲𑁆𑀫𑀻’’𑀢𑀺 𑀇𑀫𑀺𑀦𑀸 𑀲𑀫𑀽𑀳𑀕𑁆𑀕𑀳𑀡𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀤𑀺𑀝𑁆𑀞𑀺𑀫𑀸𑀦𑀸𑀦𑀼𑀲𑀬𑀁 𑀲𑀫𑀼𑀕𑁆𑀖𑀸𑀝𑁂𑀢𑁆𑀯𑀸.

𑀢𑀢𑁆𑀣 𑀤𑀺𑀝𑁆𑀞𑀺𑀫𑀸𑀦𑀸𑀦𑀼𑀲𑀬𑀦𑁆𑀢𑀺 𑀤𑀺𑀝𑁆𑀞𑀺𑀲𑀤𑀺𑀲𑀁 𑀫𑀸𑀦𑀸𑀦𑀼𑀲𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀜𑁆𑀳𑀺 𑀫𑀸𑀦𑀸𑀦𑀼𑀲𑀬𑁄 𑀅𑀲𑁆𑀫𑀻𑀢𑀺 𑀧𑀯𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀲𑀤𑀺𑀲𑁄 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑁄. 𑀇𑀫𑀜𑁆𑀘 𑀅𑀲𑁆𑀫𑀺𑀫𑀸𑀦𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀜𑁆𑀜𑀸𑀢𑀼𑀓𑀸𑀫𑁂𑀦 𑀔𑀦𑁆𑀥𑀺𑀬𑀯𑀕𑁆𑀕𑁂 𑀔𑁂𑀫𑀓𑀲𑀼𑀢𑁆𑀢𑀁 (𑀲𑀁. 𑀦𑀺. 𑁩.𑁮𑁯) 𑀑𑀮𑁄𑀓𑁂𑀢𑀩𑁆𑀩𑀦𑁆𑀢𑀺.

𑀅𑀯𑀺𑀚𑁆𑀚𑀁 𑀧𑀳𑀸𑀬𑀸𑀢𑀺 𑀯𑀝𑁆𑀝𑀫𑀽𑀮𑀁 𑀅𑀯𑀺𑀚𑁆𑀚𑀁 𑀧𑀚𑀳𑀺𑀢𑁆𑀯𑀸. 𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀢𑀲𑁆𑀲𑀸 𑀅𑀯𑀺𑀚𑁆𑀚𑀸𑀬 𑀲𑀫𑀼𑀕𑁆𑀖𑀸𑀝𑀺𑀓𑀁 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀏𑀢𑁆𑀢𑀸𑀯𑀢𑀸 𑀅𑀭𑀳𑀢𑁆𑀢𑀫𑀕𑁆𑀕𑁄 𑀓𑀣𑀺𑀢𑁄. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀻𑀢𑀺 𑀅𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀘𑁆𑀙𑁂𑀤𑀓𑀭𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸𑀧𑀺 𑀔𑁄, 𑀆𑀯𑀼𑀲𑁄𑀢𑀺 𑀤𑁂𑀲𑀦𑀁 𑀦𑀺𑀬𑁆𑀬𑀸𑀢𑁂𑀢𑀺, 𑀇𑀫𑀸𑀬 𑀓𑀫𑁆𑀫𑀧𑀣𑀤𑁂𑀲𑀦𑀸𑀬 𑀯𑀼𑀢𑁆𑀢𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀯𑁂𑀥𑀯𑀲𑁂𑀦𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀯𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀅𑀭𑀳𑀢𑁆𑀢𑀫𑀕𑁆𑀕𑁂𑀳𑀺 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀻𑀢𑀺.

𑀓𑀼𑀲𑀮𑀓𑀫𑁆𑀫𑀧𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀳𑀸𑀭𑀯𑀸𑀭𑀯𑀡𑁆𑀡𑀦𑀸

𑁯𑁦. 𑀲𑀸𑀥𑀸𑀯𑀼𑀲𑁄𑀢𑀺 𑀔𑁄…𑀧𑁂… 𑀆𑀕𑀢𑁄 𑀇𑀫𑀁 𑀲𑀤𑁆𑀥𑀫𑁆𑀫𑀦𑁆𑀢𑀺 𑀏𑀯𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑀫𑀼𑀔𑁂𑀦 𑀘𑀢𑀼𑀲𑀘𑁆𑀘𑀤𑁂𑀲𑀦𑀁 𑀲𑀼𑀢𑁆𑀯𑀸 𑀢𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀢𑁂 𑀪𑀺𑀓𑁆𑀔𑀽 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀇𑀫𑀲𑁆𑀲𑁂𑀯 𑀯𑀘𑀦𑀲𑁆𑀲 𑀲𑀫𑀼𑀝𑁆𑀞𑀸𑀧𑀓𑁂𑀦 𑀘𑀺𑀢𑁆𑀢𑁂𑀦 𑀅𑀦𑀼𑀫𑁄𑀤𑀺𑀢𑁆𑀯𑀸 𑀯𑀘𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀘𑁂𑀢𑀲𑀸 𑀲𑀫𑁆𑀧𑀺𑀬𑀸𑀬𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀸𑀦𑀺 𑀬𑀲𑁆𑀫𑀸 𑀣𑁂𑀭𑁄 𑀦𑀸𑀦𑀧𑁆𑀧𑀓𑀸𑀭𑁂𑀦 𑀘𑀢𑀼𑀲𑀘𑁆𑀘𑀤𑁂𑀲𑀦𑀁 𑀤𑁂𑀲𑁂𑀢𑀼𑀁 𑀧𑀝𑀺𑀩𑀮𑁄, 𑀬𑀣𑀸𑀳 ‘‘𑀲𑀸𑀭𑀺𑀧𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀧𑀳𑁄𑀢𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀆𑀘𑀺𑀓𑁆𑀔𑀺𑀢𑀼𑀁 𑀤𑁂𑀲𑁂𑀢𑀼’’𑀦𑁆𑀢𑀺 𑀬𑀲𑁆𑀫𑀸 𑀯𑀸 𑀉𑀢𑁆𑀢𑀭𑀺𑀫𑁆𑀧𑀺 𑀤𑁂𑀲𑁂𑀢𑀼𑀓𑀸𑀫𑁄𑀯 𑀳𑀼𑀢𑁆𑀯𑀸 ‘‘𑀏𑀢𑁆𑀢𑀸𑀯𑀢𑀸𑀧𑀺 𑀔𑁄’’𑀢𑀺 𑀅𑀯𑀘, 𑀢𑀲𑁆𑀫𑀸 𑀅𑀧𑀭𑁂𑀦𑀧𑀺 𑀦𑀬𑁂𑀦 𑀲𑀘𑁆𑀘𑀤𑁂𑀲𑀦𑀁 𑀲𑁄𑀢𑀼𑀓𑀸𑀫𑀸 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺𑀁𑀲𑀼. 𑀢𑁂𑀦 𑀲𑀬𑀫𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀧𑀜𑁆𑀳𑀢𑁄 𑀉𑀢𑁆𑀢𑀭𑀺𑀁 𑀲𑀺𑀬𑀸 𑀔𑁄 𑀧𑀦𑀸𑀯𑀼𑀲𑁄, 𑀅𑀜𑁆𑀜𑁄𑀧𑀺 𑀧𑀭𑀺𑀬𑀸𑀬𑁄 𑀪𑀯𑁂𑀬𑁆𑀬 𑀅𑀜𑁆𑀜𑀫𑁆𑀧𑀺 𑀓𑀸𑀭𑀡𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀜𑁆𑀜𑀁 𑀅𑀢𑀺𑀭𑁂𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀁𑀲𑀼, 𑀧𑀼𑀭𑀺𑀫𑀧𑀜𑁆𑀳𑀲𑁆𑀲 𑀯𑀸 𑀉𑀧𑀭𑀺𑀪𑀸𑀕𑁂 𑀧𑀼𑀘𑁆𑀙𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀦𑁂𑀲𑀁 𑀩𑁆𑀬𑀸𑀓𑀭𑀫𑀸𑀦𑁄 𑀣𑁂𑀭𑁄 𑀲𑀺𑀬𑀸, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸, 𑀆𑀳𑀸𑀭𑀦𑁆𑀢𑀺 𑀧𑀘𑁆𑀘𑀬𑀁. 𑀧𑀘𑁆𑀘𑀬𑁄 𑀳𑀺 𑀆𑀳𑀭𑀢𑀺 𑀅𑀢𑁆𑀢𑀦𑁄 𑀨𑀮𑀁, 𑀢𑀲𑁆𑀫𑀸 ‘‘𑀆𑀳𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺.

𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀦𑁆𑀢𑀺𑀆𑀤𑀻𑀲𑀼 𑀪𑀽𑀢𑀸𑀢𑀺 𑀲𑀜𑁆𑀚𑀸𑀢𑀸, 𑀦𑀺𑀩𑁆𑀩𑀢𑁆𑀢𑀸. 𑀲𑀫𑁆𑀪𑀯𑁂𑀲𑀻𑀦𑀦𑁆𑀢𑀺 𑀬𑁂 𑀲𑀫𑁆𑀪𑀯𑀁 𑀚𑀸𑀢𑀺𑀁 𑀦𑀺𑀩𑁆𑀩𑀢𑁆𑀢𑀺𑀁 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺. 𑀢𑀢𑁆𑀣 𑀘𑀢𑀽𑀲𑀼 𑀬𑁄𑀦𑀻𑀲𑀼 𑀅𑀡𑁆𑀟𑀚𑀚𑀮𑀸𑀩𑀼𑀚𑀸 𑀲𑀢𑁆𑀢𑀸 𑀬𑀸𑀯 𑀅𑀡𑁆𑀟𑀓𑁄𑀲𑀁 𑀯𑀢𑁆𑀣𑀺𑀓𑁄𑀲𑀜𑁆𑀘 𑀦 𑀪𑀺𑀦𑁆𑀤𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀺𑀦𑁄 𑀦𑀸𑀫. 𑀅𑀡𑁆𑀟𑀓𑁄𑀲𑀁 𑀯𑀢𑁆𑀣𑀺𑀓𑁄𑀲𑀜𑁆𑀘 𑀪𑀺𑀦𑁆𑀤𑀺𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀦𑁆𑀢𑀸 𑀪𑀽𑀢𑀸 𑀦𑀸𑀫. 𑀲𑀁𑀲𑁂𑀤𑀚𑀸 𑀑𑀧𑀧𑀸𑀢𑀺𑀓𑀸 𑀘 𑀧𑀞𑀫𑀘𑀺𑀢𑁆𑀢𑀓𑁆𑀔𑀡𑁂 𑀲𑀫𑁆𑀪𑀯𑁂𑀲𑀺𑀦𑁄 𑀦𑀸𑀫. 𑀤𑀼𑀢𑀺𑀬𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀪𑀼𑀢𑀺 𑀪𑀽𑀢𑀸 𑀦𑀸𑀫. 𑀬𑁂𑀦 𑀬𑁂𑀦 𑀯𑀸 𑀇𑀭𑀺𑀬𑀸𑀧𑀣𑁂𑀦 𑀚𑀸𑀬𑀦𑁆𑀢𑀺, 𑀬𑀸𑀯 𑀢𑁂 𑀢𑀢𑁄 𑀅𑀜𑁆𑀜𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀺𑀦𑁄 𑀦𑀸𑀫. 𑀢𑀢𑁄 𑀧𑀭𑀁 𑀪𑀽𑀢𑀸 𑀦𑀸𑀫.

𑀅𑀣 𑀯𑀸 𑀪𑀽𑀢𑀸𑀢𑀺 𑀚𑀸𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸, 𑀬𑁂 𑀪𑀽𑀢𑀸𑀬𑁂𑀯 𑀦 𑀧𑀼𑀦 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀔𑀻𑀡𑀸𑀲𑀯𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑁆𑀪𑀯𑀫𑁂𑀲𑀦𑁆𑀢𑀻𑀢𑀺 𑀲𑀫𑁆𑀪𑀯𑁂𑀲𑀺𑀦𑁄. 𑀅𑀧𑁆𑀧𑀳𑀻𑀦𑀪𑀯𑀲𑀁𑀬𑁄𑀚𑀦𑀢𑁆𑀢𑀸 𑀆𑀬𑀢𑀺𑀫𑁆𑀧𑀺 𑀲𑀫𑁆𑀪𑀯𑀁 𑀏𑀲𑀦𑁆𑀢𑀸𑀦𑀁 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀬𑀸𑀤𑀺𑀬𑀢𑀺. 𑀯𑀸𑀲𑀤𑁆𑀤𑁄 𑀘𑁂𑀢𑁆𑀣 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑀲𑁆𑀫𑀸 𑀪𑀽𑀢𑀸𑀦𑀜𑁆𑀘 𑀲𑀫𑁆𑀪𑀯𑁂𑀲𑀻𑀦𑀜𑁆𑀘𑀸𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀞𑀺𑀢𑀺𑀬𑀸𑀢𑀺 𑀞𑀺𑀢𑀢𑁆𑀣𑀁. 𑀅𑀦𑀼𑀕𑁆𑀕𑀳𑀸𑀬𑀸𑀢𑀺 𑀅𑀦𑀼𑀕𑁆𑀕𑀳𑀢𑁆𑀣𑀁 𑀉𑀧𑀓𑀸𑀭𑀢𑁆𑀣𑀁. 𑀯𑀘𑀦𑀪𑁂𑀤𑁄 𑀘𑁂𑀲, 𑀅𑀢𑁆𑀣𑁄 𑀧𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀏𑀓𑁄𑀬𑁂𑀯. 𑀅𑀣 𑀯𑀸 𑀞𑀺𑀢𑀺𑀬𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀩𑀦𑁆𑀥𑀯𑀲𑁂𑀦 𑀅𑀯𑀺𑀘𑁆𑀙𑁂𑀤𑀸𑀬. 𑀅𑀦𑀼𑀕𑁆𑀕𑀳𑀸𑀬𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀸𑀤𑀸𑀬. 𑀉𑀪𑁄𑀧𑀺 𑀘𑁂𑀢𑀸𑀦𑀺 𑀪𑀽𑀢𑀸𑀦𑀁 𑀞𑀺𑀢𑀺𑀬𑀸 𑀘𑁂𑀯 𑀅𑀦𑀼𑀕𑁆𑀕𑀳𑀸𑀬 𑀘. 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀞𑀺𑀢𑀺𑀬𑀸 𑀘𑁂𑀯 𑀅𑀦𑀼𑀕𑁆𑀕𑀳𑀸𑀬 𑀘𑀸𑀢𑀺 𑀏𑀯𑀁 𑀉𑀪𑀬𑀢𑁆𑀣 𑀤𑀝𑁆𑀞𑀩𑁆𑀩𑀸𑀦𑀺. 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺 𑀓𑀩𑀴𑀁 𑀓𑀢𑁆𑀯𑀸 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀢𑁄 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀑𑀤𑀦𑀓𑀼𑀫𑁆𑀫𑀸𑀲𑀸𑀤𑀺𑀯𑀢𑁆𑀣𑀼𑀓𑀸𑀬 𑀑𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀑𑀴𑀸𑀭𑀺𑀓𑁄 𑀯𑀸 𑀲𑀼𑀔𑀼𑀫𑁄 𑀯𑀸𑀢𑀺 𑀯𑀢𑁆𑀣𑀼𑀑𑀴𑀸𑀭𑀺𑀓𑀢𑀸𑀬 𑀑𑀴𑀸𑀭𑀺𑀓𑁄, 𑀯𑀢𑁆𑀣𑀼𑀲𑀼𑀔𑀼𑀫𑀢𑀸𑀬 𑀲𑀼𑀔𑀼𑀫𑁄. 𑀲𑀪𑀸𑀯𑁂𑀦 𑀧𑀦 𑀲𑀼𑀔𑀼𑀫𑀭𑀽𑀧𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀲𑀼𑀔𑀼𑀫𑁄𑀯 𑀳𑁄𑀢𑀺. 𑀲𑀸𑀧𑀺 𑀘𑀲𑁆𑀲 𑀯𑀢𑁆𑀣𑀼𑀢𑁄 𑀑𑀴𑀸𑀭𑀺𑀓𑀢𑀸 𑀲𑀼𑀔𑀼𑀫𑀢𑀸 𑀘 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀯𑁂𑀤𑀺𑀢𑀩𑁆𑀩𑀸.

𑀓𑀼𑀫𑁆𑀪𑀻𑀮𑀸𑀦𑀜𑁆𑀳𑀺 𑀆𑀳𑀸𑀭𑀁 𑀉𑀧𑀸𑀤𑀸𑀬 𑀫𑁄𑀭𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀓𑀼𑀫𑁆𑀪𑀻𑀮𑀸 𑀓𑀺𑀭 𑀧𑀸𑀲𑀸𑀡𑁂 𑀕𑀺𑀮𑀦𑁆𑀢𑀺. 𑀢𑁂 𑀘 𑀦𑁂𑀲𑀁 𑀓𑀼𑀘𑁆𑀙𑀺𑀧𑁆𑀧𑀢𑁆𑀢𑀸𑀯 𑀯𑀺𑀮𑀻𑀬𑀦𑁆𑀢𑀺. 𑀫𑁄𑀭𑀸 𑀲𑀧𑁆𑀧𑀯𑀺𑀘𑁆𑀙𑀺𑀓𑀸𑀤𑀺𑀧𑀸𑀡𑁂 𑀔𑀸𑀤𑀦𑁆𑀢𑀺. 𑀫𑁄𑀭𑀸𑀦𑀁 𑀧𑀦 𑀆𑀳𑀸𑀭𑀁 𑀉𑀧𑀸𑀤𑀸𑀬 𑀢𑀭𑀘𑁆𑀙𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂 𑀓𑀺𑀭 𑀢𑀺𑀯𑀲𑁆𑀲𑀙𑀟𑁆𑀟𑀺𑀢𑀸𑀦𑀺 𑀯𑀺𑀲𑀸𑀡𑀸𑀦𑀺 𑀘𑁂𑀯 𑀅𑀝𑁆𑀞𑀻𑀦𑀺 𑀘 𑀔𑀸𑀤𑀦𑁆𑀢𑀺. 𑀢𑀸𑀦𑀺 𑀘 𑀦𑁂𑀲𑀁 𑀔𑁂𑀴𑁂𑀦 𑀢𑁂𑀫𑀺𑀢𑀫𑀢𑁆𑀢𑁂𑀦𑁂𑀯 𑀓𑀦𑁆𑀤𑀫𑀽𑀮𑀁 𑀯𑀺𑀬 𑀫𑀼𑀤𑀼𑀓𑀸𑀦𑀺 𑀳𑁄𑀦𑁆𑀢𑀺. 𑀢𑀭𑀘𑁆𑀙𑀸𑀦𑀫𑁆𑀧𑀺 𑀆𑀳𑀸𑀭𑀁 𑀉𑀧𑀸𑀤𑀸𑀬 𑀳𑀢𑁆𑀣𑀻𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂𑀧𑀺 𑀦𑀸𑀦𑀸𑀭𑀼𑀓𑁆𑀔𑀲𑀸𑀔𑀸𑀬𑁄 𑀔𑀸𑀤𑀦𑁆𑀢𑀺. 𑀳𑀢𑁆𑀣𑀻𑀦𑀁 𑀆𑀳𑀸𑀭𑀢𑁄 𑀕𑀯𑀬𑀕𑁄𑀓𑀡𑁆𑀡𑀫𑀺𑀕𑀸𑀤𑀻𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂 𑀓𑀺𑀭 𑀦𑀺𑀲𑁆𑀲𑀸𑀭𑀸𑀦𑀺 𑀦𑀸𑀦𑀸𑀭𑀼𑀓𑁆𑀔𑀧𑀡𑁆𑀡𑀸𑀤𑀻𑀦𑀺 𑀔𑀸𑀤𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀆𑀳𑀸𑀭𑀢𑁄 𑀕𑀼𑀦𑁆𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂 𑀅𑀮𑁆𑀮𑀲𑀼𑀓𑁆𑀔𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑀺. 𑀢𑁂𑀲𑀁 𑀆𑀳𑀸𑀭𑀢𑁄 𑀲𑀲𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀲𑀲𑀸𑀦𑀁 𑀆𑀳𑀸𑀭𑀢𑁄 𑀲𑀓𑀼𑀡𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀲𑀓𑀼𑀡𑀸𑀦𑀁 𑀆𑀳𑀸𑀭𑀢𑁄 𑀧𑀘𑁆𑀘𑀦𑁆𑀢𑀯𑀸𑀲𑀻𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀧𑀘𑁆𑀘𑀦𑁆𑀢𑀯𑀸𑀲𑀻𑀦𑀁 𑀆𑀳𑀸𑀭𑀢𑁄 𑀕𑀸𑀫𑀪𑁄𑀚𑀓𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀕𑀸𑀫𑀪𑁄𑀚𑀓𑀸𑀦𑀁 𑀆𑀳𑀸𑀭𑀢𑁄 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂𑀲𑀫𑁆𑀧𑀺 𑀆𑀳𑀸𑀭𑀢𑁄 𑀘𑀓𑁆𑀓𑀯𑀢𑁆𑀢𑀺𑀦𑁄 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀆𑀳𑀸𑀭𑀢𑁄 𑀪𑀼𑀫𑁆𑀫𑀤𑁂𑀯𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀪𑀼𑀫𑁆𑀫𑀤𑁂𑀯𑀸𑀦𑀁 𑀆𑀳𑀸𑀭𑀢𑁄 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀏𑀯𑀁 𑀬𑀸𑀯 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀆𑀳𑀸𑀭𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄, 𑀢𑁂𑀲𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄𑀢𑁆𑀯𑁂𑀯 𑀦𑀺𑀝𑁆𑀞𑀁 𑀧𑀢𑁆𑀢𑁄.

𑀏𑀢𑁆𑀣 𑀘 𑀑𑀴𑀸𑀭𑀺𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀑𑀚𑀸 𑀧𑀭𑀺𑀢𑁆𑀢𑀸 𑀳𑁄𑀢𑀺 𑀤𑀼𑀩𑁆𑀩𑀮𑀸, 𑀲𑀼𑀔𑀼𑀫𑁂 𑀩𑀮𑀯𑀢𑀻. 𑀢𑀣𑀸 𑀳𑀺 𑀏𑀓𑀧𑀢𑁆𑀢𑀧𑀽𑀭𑀫𑁆𑀧𑀺 𑀬𑀸𑀕𑀼𑀁 𑀧𑀻𑀯𑀢𑁄 𑀫𑀼𑀳𑀼𑀢𑁆𑀢𑁂𑀦𑁂𑀯 𑀚𑀺𑀖𑀘𑁆𑀙𑀺𑀢𑁄 𑀳𑁄𑀢𑀺, 𑀬𑀁𑀓𑀜𑁆𑀘𑀺𑀤𑁂𑀯 𑀔𑀸𑀤𑀺𑀢𑀼𑀓𑀸𑀫𑁄. 𑀲𑀧𑁆𑀧𑀺𑀁 𑀧𑀦 𑀧𑀲𑀝𑀫𑀢𑁆𑀢𑀁 𑀧𑀺𑀯𑀺𑀢𑁆𑀯𑀸 𑀤𑀺𑀯𑀲𑀁 𑀅𑀪𑁄𑀢𑁆𑀢𑀼𑀓𑀸𑀫𑁄 𑀳𑁄𑀢𑀺. 𑀢𑀢𑁆𑀣 𑀯𑀢𑁆𑀣𑀼 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑀺, 𑀦 𑀧𑀦 𑀲𑀓𑁆𑀓𑁄𑀢𑀺 𑀧𑀸𑀮𑁂𑀢𑀼𑀁. 𑀑𑀚𑀸 𑀧𑀸𑀮𑁂𑀢𑀺, 𑀦 𑀲𑀓𑁆𑀓𑁄𑀢𑀺 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑀼𑀁. 𑀤𑁆𑀯𑁂 𑀧𑀦 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀭𑀺𑀲𑁆𑀲𑀫𑀜𑁆𑀘𑁂𑀯 𑀯𑀺𑀦𑁄𑀤𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀘𑀸𑀢𑀺.

𑀨𑀲𑁆𑀲𑁄 𑀤𑀼𑀢𑀺𑀬𑁄𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺 𑀙𑀩𑁆𑀩𑀺𑀥𑁄𑀧𑀺 𑀨𑀲𑁆𑀲𑁄. 𑀏𑀢𑁂𑀲𑀼 𑀘𑀢𑀽𑀲𑀼 𑀆𑀳𑀸𑀭𑁂𑀲𑀼 𑀤𑀼𑀢𑀺𑀬𑁄 𑀆𑀳𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑁂𑀲𑀦𑀸𑀦𑀬𑁄 𑀏𑀯 𑀘𑁂𑀲. 𑀢𑀲𑁆𑀫𑀸 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀤𑀼𑀢𑀺𑀬𑁄 𑀯𑀸 𑀢𑀢𑀺𑀬𑁄 𑀯𑀸𑀢𑀺 𑀇𑀤𑀫𑁂𑀢𑁆𑀣 𑀦 𑀕𑀯𑁂𑀲𑀺𑀢𑀩𑁆𑀩𑀁. 𑀫𑀦𑁄𑀲𑀜𑁆𑀘𑁂𑀢𑀦𑀸𑀢𑀺 𑀘𑁂𑀢𑀦𑀸 𑀏𑀯 𑀯𑀼𑀘𑁆𑀘𑀢𑀺. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀘𑀺𑀢𑁆𑀢𑀁.

𑀏𑀢𑁆𑀣𑀸𑀳, 𑀬𑀤𑀺 𑀧𑀘𑁆𑀘𑀬𑀝𑁆𑀞𑁄 𑀆𑀳𑀸𑀭𑀝𑁆𑀞𑁄, 𑀅𑀣 𑀓𑀲𑁆𑀫𑀸 𑀅𑀜𑁆𑀜𑁂𑀲𑀼𑀧𑀺 𑀲𑀢𑁆𑀢𑀸𑀦𑀁 𑀧𑀘𑁆𑀘𑀬𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀇𑀫𑁂𑀬𑁂𑀯 𑀘𑀢𑁆𑀢𑀸𑀭𑁄 𑀯𑀼𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂, 𑀅𑀚𑁆𑀛𑀢𑁆𑀢𑀺𑀓𑀲𑀦𑁆𑀢𑀢𑀺𑀬𑀸 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸. 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑀸𑀦𑀁 𑀲𑀢𑁆𑀢𑀸𑀦𑀁 𑀭𑀽𑀧𑀓𑀸𑀬𑀲𑁆𑀲 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄. 𑀦𑀸𑀫𑀓𑀸𑀬𑁂 𑀯𑁂𑀤𑀦𑀸𑀬 𑀨𑀲𑁆𑀲𑁄, 𑀯𑀺𑀜𑁆𑀜𑀸𑀡𑀲𑁆𑀲 𑀫𑀦𑁄𑀲𑀜𑁆𑀘𑁂𑀢𑀦𑀸, 𑀦𑀸𑀫𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀁. 𑀬𑀣𑀸𑀳 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀓𑀸𑀬𑁄 𑀆𑀳𑀸𑀭𑀝𑁆𑀞𑀺𑀢𑀺𑀓𑁄, 𑀆𑀳𑀸𑀭𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺, 𑀅𑀦𑀸𑀳𑀸𑀭𑁄 𑀦𑁄 𑀢𑀺𑀝𑁆𑀞𑀢𑀺. 𑀢𑀣𑀸 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺.

𑀓𑁄 𑀧𑀦𑁂𑀢𑁆𑀣 𑀆𑀳𑀸𑀭𑁄, 𑀓𑀺𑀁 𑀆𑀳𑀭𑀢𑀻𑀢𑀺? 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀑𑀚𑀝𑁆𑀞𑀫𑀓𑀭𑀽𑀧𑀸𑀦𑀺 𑀆𑀳𑀭𑀢𑀺. 𑀨𑀲𑁆𑀲𑀸𑀳𑀸𑀭𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸, 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀢𑀬𑁄 𑀪𑀯𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀦𑁆𑀢𑀺.

𑀓𑀣𑀁? 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀢𑀸𑀯 𑀫𑀼𑀔𑁂 𑀞𑀧𑀺𑀢𑀫𑀢𑁆𑀢𑁄𑀬𑁂𑀯 𑀅𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀤𑀦𑁆𑀢𑀯𑀺𑀘𑀼𑀡𑁆𑀡𑀺𑀢𑀁 𑀧𑀦 𑀅𑀚𑁆𑀛𑁄𑀳𑀭𑀺𑀬𑀫𑀸𑀦𑀁 𑀏𑀓𑁂𑀓𑀁 𑀲𑀺𑀢𑁆𑀣𑀁 𑀅𑀝𑁆𑀞𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺𑀬𑁂𑀯. 𑀏𑀯𑀁 𑀑𑀚𑀝𑁆𑀞𑀫𑀓𑀭𑀽𑀧𑀸𑀦𑀺 𑀆𑀳𑀭𑀢𑀺.

𑀨𑀲𑁆𑀲𑀸𑀳𑀸𑀭𑁄 𑀧𑀦 𑀲𑀼𑀔𑀯𑁂𑀤𑀦𑀺𑀬𑁄 𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀼𑀔𑀯𑁂𑀤𑀦𑀁 𑀆𑀳𑀭𑀢𑀺, 𑀢𑀣𑀸 𑀤𑀼𑀓𑁆𑀔𑀯𑁂𑀤𑀦𑀺𑀬𑁄 𑀤𑀼𑀓𑁆𑀔𑀁, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑁄 𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀨𑀲𑁆𑀲𑀸𑀳𑀸𑀭𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀆𑀳𑀭𑀢𑀺.

𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀓𑀸𑀫𑀪𑀯𑀽𑀧𑀕𑀁 𑀓𑀫𑁆𑀫𑀁 𑀓𑀸𑀫𑀪𑀯𑀁 𑀆𑀳𑀭𑀢𑀺, 𑀭𑀽𑀧𑀸𑀭𑀽𑀧𑀪𑀯𑀽𑀧𑀕𑀸𑀦𑀺 𑀢𑀁 𑀢𑀁 𑀪𑀯𑀁. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀢𑀬𑁄 𑀪𑀯𑁂 𑀆𑀳𑀭𑀢𑀺.

𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀧𑀦 𑀬𑁂 𑀘 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀢𑀬𑁄 𑀔𑀦𑁆𑀥𑀸, 𑀬𑀸𑀦𑀺 𑀘 𑀢𑀺𑀲𑀦𑁆𑀢𑀢𑀺𑀯𑀲𑁂𑀦 𑀢𑀺𑀁𑀲𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀦𑀬𑁂𑀦 𑀢𑀸𑀦𑀺 𑀆𑀳𑀭𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀆𑀳𑀭𑀢𑀻𑀢𑀺.

𑀏𑀢𑁆𑀣 𑀘 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀢𑀬𑁄 𑀪𑀯𑁂 𑀆𑀳𑀭𑀢𑀻𑀢𑀺 𑀲𑀸𑀲𑀯𑀸 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀯 𑀯𑀼𑀢𑁆𑀢𑀸. 𑀯𑀺𑀜𑁆𑀜𑀸𑀡𑀁 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀆𑀳𑀭𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀫𑁂𑀯 𑀯𑀼𑀢𑁆𑀢𑀁. 𑀅𑀯𑀺𑀲𑁂𑀲𑁂𑀦 𑀧𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀁𑀲𑀫𑀼𑀝𑁆𑀞𑀸𑀦𑀥𑀫𑁆𑀫𑀸𑀦𑀁 𑀆𑀳𑀭𑀡𑀢𑁄 𑀧𑁂𑀢𑁂 𑀆𑀳𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁂𑀲𑀼 𑀘𑀢𑀽𑀲𑀼 𑀆𑀳𑀸𑀭𑁂𑀲𑀼 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀨𑀲𑁆𑀲𑁄 𑀨𑀼𑀲𑀦𑁆𑀢𑁄𑀬𑁂𑀯, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀆𑀬𑀽𑀳𑀫𑀸𑀦𑀸𑀯. 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑁆𑀢𑀫𑁂𑀯.

𑀓𑀣𑀁? 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀳𑀺 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄𑀬𑁂𑀯 𑀓𑀸𑀬𑀝𑁆𑀞𑀧𑀦𑁂𑀦 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀳𑁄𑀢𑀺. 𑀓𑀫𑁆𑀫𑀚𑀦𑀺𑀢𑁄𑀧𑀺 𑀳𑀺 𑀅𑀬𑀁 𑀓𑀸𑀬𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑁄 𑀤𑀲𑀧𑀺 𑀯𑀲𑁆𑀲𑀸𑀦𑀺 𑀯𑀲𑁆𑀲𑀲𑀢𑀫𑁆𑀧𑀺 𑀬𑀸𑀯 𑀆𑀬𑀼𑀧𑀭𑀺𑀫𑀸𑀡𑀁 𑀢𑀺𑀝𑁆𑀞𑀢𑀺. 𑀬𑀣𑀸 𑀓𑀺𑀁? 𑀬𑀣𑀸 𑀫𑀸𑀢𑀼𑀬𑀸 𑀚𑀦𑀺𑀢𑁄𑀧𑀺 𑀤𑀸𑀭𑀓𑁄 𑀥𑀸𑀢𑀺𑀬𑀸 𑀣𑀜𑁆𑀜𑀸𑀤𑀻𑀦𑀺 𑀧𑀸𑀬𑁂𑀢𑁆𑀯𑀸 𑀧𑁄𑀲𑀺𑀬𑀫𑀸𑀦𑁄𑀯 𑀘𑀺𑀭𑀁 𑀢𑀺𑀝𑁆𑀞𑀢𑀺, 𑀬𑀣𑀸 𑀘𑀼𑀧𑀢𑁆𑀣𑀫𑁆𑀪𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑀕𑁂𑀳𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀣𑀸 𑀫𑀳𑀸𑀭𑀸𑀚 𑀕𑁂𑀳𑁂 𑀧𑀢𑀦𑁆𑀢𑁂 𑀅𑀜𑁆𑀜𑁂𑀦 𑀤𑀸𑀭𑀼𑀦𑀸 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀺, 𑀅𑀜𑁆𑀜𑁂𑀦 𑀤𑀸𑀭𑀼𑀦𑀸 𑀉𑀧𑀢𑁆𑀣𑀫𑁆𑀪𑀺𑀢𑀁 𑀲𑀦𑁆𑀢𑀁 𑀏𑀯𑀁 𑀢𑀁 𑀕𑁂𑀳𑀁 𑀦 𑀧𑀢𑀢𑀺, 𑀏𑀯𑀫𑁂𑀯 𑀔𑁄 𑀫𑀳𑀸𑀭𑀸𑀚 𑀅𑀬𑀁 𑀓𑀸𑀬𑁄 𑀆𑀳𑀸𑀭𑀝𑁆𑀞𑀺𑀢𑀺𑀓𑁄, 𑀆𑀳𑀸𑀭𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺.

𑀏𑀯𑀁 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀏𑀯𑀁 𑀲𑀸𑀥𑁂𑀦𑁆𑀢𑁄𑀧𑀺 𑀘 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀤𑁆𑀯𑀺𑀦𑁆𑀦𑀁 𑀭𑀽𑀧𑀲𑀦𑁆𑀢𑀢𑀻𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀘 𑀉𑀧𑀸𑀤𑀺𑀦𑁆𑀦𑀲𑁆𑀲 𑀘. 𑀓𑀫𑁆𑀫𑀚𑀸𑀦𑀁 𑀅𑀦𑀼𑀧𑀸𑀮𑀓𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀁 𑀚𑀦𑀓𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑀨𑀲𑁆𑀲𑁄 𑀧𑀦 𑀲𑀼𑀔𑀸𑀤𑀺𑀯𑀢𑁆𑀣𑀼𑀪𑀽𑀢𑀁 𑀆𑀭𑀫𑁆𑀫𑀡𑀁 𑀨𑀼𑀲𑀦𑁆𑀢𑁄𑀬𑁂𑀯 𑀲𑀼𑀔𑀸𑀤𑀺𑀯𑁂𑀤𑀦𑀸𑀧𑀯𑀢𑁆𑀢𑀦𑁂𑀦 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀳𑁄𑀢𑀺. 𑀫𑀦𑁄𑀲𑀜𑁆𑀘𑁂𑀢𑀦𑀸 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀯𑀲𑁂𑀦 𑀆𑀬𑀽𑀳𑀫𑀸𑀦𑀸𑀬𑁂𑀯 𑀪𑀯𑀫𑀽𑀮𑀦𑀺𑀧𑁆𑀨𑀸𑀤𑀦𑀢𑁄 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑁆𑀢𑀫𑁂𑀯 𑀦𑀸𑀫𑀭𑀽𑀧𑀧𑁆𑀧𑀯𑀢𑁆𑀢𑀦𑁂𑀦 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀳𑁄𑀢𑀺.

𑀏𑀯𑀁 𑀉𑀧𑀢𑁆𑀣𑀫𑁆𑀪𑀦𑀸𑀤𑀺𑀯𑀲𑁂𑀦 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑁂𑀲𑀼 𑀧𑀦𑁂𑀢𑁂𑀲𑀼 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁, 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀦𑀺𑀓𑀦𑁆𑀢𑀺𑀬𑁂𑀯 𑀪𑀬𑀁, 𑀨𑀲𑁆𑀲𑁂 𑀉𑀧𑀕𑀫𑀦𑀫𑁂𑀯, 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀆𑀬𑀽𑀳𑀦𑀫𑁂𑀯, 𑀯𑀺𑀜𑁆𑀜𑀸𑀡𑁂 𑀅𑀪𑀺𑀦𑀺𑀧𑀸𑀢𑁄𑀬𑁂𑀯 𑀪𑀬𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀳𑀺 𑀦𑀺𑀓𑀦𑁆𑀢𑀺𑀁 𑀓𑀢𑁆𑀯𑀸 𑀲𑀻𑀢𑀸𑀤𑀻𑀦𑀁 𑀧𑀼𑀭𑁂𑀓𑁆𑀔𑀢𑀸 𑀲𑀢𑁆𑀢𑀸 𑀆𑀳𑀸𑀭𑀢𑁆𑀣𑀸𑀬 𑀫𑀼𑀤𑁆𑀤𑀸𑀕𑀡𑀦𑀸𑀤𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀦𑁆𑀢𑀺. 𑀏𑀓𑀘𑁆𑀘𑁂 𑀘 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀓𑀸𑀬 𑀅𑀦𑁂𑀲𑀦𑀸𑀬 𑀆𑀳𑀸𑀭𑀁 𑀧𑀭𑀺𑀬𑁂𑀲𑀦𑁆𑀢𑀸 𑀤𑀺𑀝𑁆𑀞𑁂𑀧𑀺 𑀥𑀫𑁆𑀫𑁂 𑀕𑀸𑀭𑀬𑁆𑀳𑀸 𑀳𑁄𑀦𑁆𑀢𑀺. 𑀲𑀫𑁆𑀧𑀭𑀸𑀬𑁂𑀧𑀺 𑀢𑀲𑁆𑀲 𑀲𑀗𑁆𑀖𑀸𑀝𑀺𑀧𑀺 𑀆𑀤𑀺𑀢𑁆𑀢𑀸 𑀲𑀫𑁆𑀧𑀚𑁆𑀚𑀮𑀺𑀢𑀸𑀢𑀺𑀆𑀤𑀺𑀦𑀸 𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀲𑀫𑀡𑀧𑁂𑀢𑀸 𑀳𑁄𑀦𑁆𑀢𑀺. 𑀇𑀫𑀺𑀦𑀸𑀯 𑀢𑀸𑀯 𑀓𑀸𑀭𑀡𑁂𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀦𑀺𑀓𑀦𑁆𑀢𑀺𑀬𑁂𑀯 𑀪𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀨𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀸𑀧𑀺 𑀨𑀲𑁆𑀲𑀲𑁆𑀲𑀸𑀤𑀺𑀦𑁄 𑀧𑀭𑁂𑀲𑀁 𑀭𑀓𑁆𑀔𑀺𑀢𑀕𑁄𑀧𑀺𑀢𑁂𑀲𑀼 𑀤𑀸𑀭𑀸𑀤𑀻𑀲𑀼 𑀪𑀡𑁆𑀟𑁂𑀲𑀼 𑀅𑀧𑀭𑀚𑁆𑀛𑀦𑁆𑀢𑀺. 𑀢𑁂 𑀲𑀳 𑀪𑀡𑁆𑀟𑁂𑀦 𑀪𑀡𑁆𑀟𑀲𑀸𑀫𑀺𑀓𑀸 𑀕𑀳𑁂𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀲𑀗𑁆𑀓𑀸𑀭𑀓𑀽𑀝𑁂𑀲𑀼 𑀙𑀟𑁆𑀟𑁂𑀦𑁆𑀢𑀺. 𑀭𑀜𑁆𑀜𑁄 𑀯𑀸 𑀦𑀺𑀬𑁆𑀬𑀸𑀢𑁂𑀦𑁆𑀢𑀺. 𑀢𑀢𑁄 𑀦𑁂 𑀭𑀸𑀚𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑀸𑀧𑁂𑀢𑀺. 𑀓𑀸𑀬𑀲𑁆𑀲 𑀘 𑀪𑁂𑀤𑀸 𑀤𑀼𑀕𑁆𑀕𑀢𑀺 𑀦𑁂𑀲𑀁 𑀧𑀸𑀝𑀺𑀓𑀗𑁆𑀔𑀸 𑀳𑁄𑀢𑀺. 𑀇𑀢𑀺 𑀨𑀲𑁆𑀲𑀲𑁆𑀲𑀸𑀤𑀫𑀽𑀮𑀓𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀪𑀬𑀁 𑀲𑀩𑁆𑀩𑀫𑀸𑀕𑀢𑀫𑁂𑀯 𑀳𑁄𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀨𑀲𑁆𑀲𑀸𑀳𑀸𑀭𑁂 𑀉𑀧𑀕𑀫𑀦𑀫𑁂𑀯 𑀪𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀬𑀽𑀳𑀦𑁂𑀦𑁂𑀯 𑀧𑀦 𑀢𑀫𑁆𑀫𑀽𑀮𑀓𑀁 𑀢𑀻𑀲𑀼 𑀪𑀯𑁂𑀲𑀼 𑀪𑀬𑀁 𑀲𑀩𑁆𑀩𑀫𑀸𑀕𑀢𑀁𑀬𑁂𑀯 𑀳𑁄𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁂 𑀆𑀬𑀽𑀳𑀦𑀫𑁂𑀯 𑀪𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀜𑁆𑀘 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀞𑀸𑀦𑁂 𑀅𑀪𑀺𑀦𑀺𑀧𑀢𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀕𑀳𑁂𑀢𑁆𑀯𑀸𑀯 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀫𑀺𑀜𑁆𑀘 𑀦𑀺𑀩𑁆𑀩𑀢𑁆𑀢𑁂 𑀲𑀩𑁆𑀩𑀪𑀬𑀸𑀦𑀺 𑀦𑀺𑀩𑁆𑀩𑀢𑁆𑀢𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀢𑀫𑁆𑀫𑀽𑀮𑀓𑀢𑁆𑀢𑀸𑀢𑀺, 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀯𑀺𑀜𑁆𑀜𑀸𑀡𑀸𑀳𑀸𑀭𑁂 𑀅𑀪𑀺𑀦𑀺𑀧𑀸𑀢𑁄𑀬𑁂𑀯 𑀪𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀲𑀪𑀬𑁂𑀲𑀼 𑀧𑀦 𑀇𑀫𑁂𑀲𑀼 𑀆𑀳𑀸𑀭𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀢𑁆𑀣𑀁 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀚𑀸𑀬𑀫𑁆𑀧𑀢𑀺𑀓𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁬𑁩) 𑀦𑀬𑁂𑀦 𑀧𑀼𑀢𑁆𑀢𑀫𑀁𑀲𑀽𑀧𑀫𑀁 𑀤𑁂𑀲𑁂𑀲𑀺. 𑀨𑀲𑁆𑀲𑀸𑀳𑀸𑀭𑁂 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀢𑁆𑀣𑀁 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀸𑀯𑀻 𑀦𑀺𑀘𑁆𑀘𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀘𑁆𑀘𑀫𑁆𑀫𑀕𑀸𑀯𑀽𑀧𑀫𑀁 𑀤𑁂𑀲𑁂𑀲𑀺. 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁂 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀢𑁆𑀣𑀁 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑀸𑀭𑀓𑀸𑀲𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀁 𑀤𑁂𑀲𑁂𑀲𑀺. 𑀯𑀺𑀜𑁆𑀜𑀸𑀡𑀸𑀳𑀸𑀭𑁂 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀢𑁆𑀣𑀁 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑁄𑀭𑀁 𑀆𑀕𑀼𑀘𑀸𑀭𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀢𑁆𑀢𑀺𑀲𑀢𑀸𑀳𑀢𑀽𑀧𑀫𑀁 𑀤𑁂𑀲𑁂𑀲𑀺.

𑀢𑀢𑁆𑀭𑀸𑀬𑀁 𑀪𑀽𑀢𑀫𑀢𑁆𑀣𑀁 𑀓𑀢𑁆𑀯𑀸 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀬𑁄𑀚𑀦𑀸, 𑀤𑁆𑀯𑁂 𑀓𑀺𑀭 𑀚𑀸𑀬𑀫𑁆𑀧𑀢𑀺𑀓𑀸 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀢𑁆𑀢𑁂𑀦 𑀧𑀸𑀣𑁂𑀬𑁆𑀬𑁂𑀦 𑀬𑁄𑀚𑀦𑀲𑀢𑀺𑀓𑀁 𑀓𑀦𑁆𑀢𑀸𑀭𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀢𑁂𑀲𑀁 𑀧𑀜𑁆𑀜𑀸𑀲 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀧𑀸𑀣𑁂𑀬𑁆𑀬𑀁 𑀦𑀺𑀝𑁆𑀞𑀸𑀲𑀺. 𑀢𑁂 𑀔𑀼𑀧𑁆𑀧𑀺𑀧𑀸𑀲𑀸𑀢𑀼𑀭𑀸 𑀯𑀺𑀭𑀴𑀘𑁆𑀙𑀸𑀬𑀸𑀬𑀁 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁄 𑀧𑀼𑀭𑀺𑀲𑁄 𑀪𑀭𑀺𑀬𑀁 𑀆𑀳 ‘‘𑀪𑀤𑁆𑀤𑁂 𑀇𑀢𑁄 𑀲𑀫𑀦𑁆𑀢𑀸 𑀧𑀜𑁆𑀜𑀸𑀲 𑀬𑁄𑀚𑀦𑀸𑀦𑀺 𑀕𑀸𑀫𑁄 𑀯𑀸 𑀦𑀺𑀕𑀫𑁄 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑀁 𑀢𑀁 𑀧𑀼𑀭𑀺𑀲𑁂𑀦 𑀓𑀸𑀢𑀩𑁆𑀩𑀁 𑀩𑀳𑀼𑀫𑁆𑀧𑀺 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀓𑀫𑁆𑀫𑀁, 𑀦 𑀤𑀸𑀦𑀺 𑀲𑀓𑁆𑀓𑀸 𑀢𑀁 𑀫𑀬𑀸 𑀓𑀸𑀢𑀼𑀁, 𑀏𑀳𑀺 𑀫𑀁 𑀫𑀸𑀭𑁂𑀢𑁆𑀯𑀸 𑀉𑀧𑀟𑁆𑀠𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀉𑀧𑀟𑁆𑀠𑀁 𑀧𑀸𑀣𑁂𑀬𑁆𑀬𑀁 𑀓𑀢𑁆𑀯𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀸𑀳𑀻’’𑀢𑀺. 𑀲𑀸𑀧𑀺 𑀆𑀳 ‘‘𑀲𑀸𑀫𑀺 𑀫𑀬𑀸 𑀤𑀸𑀦𑀺 𑀬𑀁 𑀢𑀁 𑀇𑀢𑁆𑀣𑀺𑀬𑀸 𑀓𑀸𑀢𑀩𑁆𑀩𑀁 𑀩𑀳𑀼𑀫𑁆𑀧𑀺 𑀲𑀼𑀢𑁆𑀢𑀓𑀦𑁆𑀢𑀦𑀸𑀤𑀺𑀓𑀫𑁆𑀫𑀁, 𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀏𑀳𑀺 𑀫𑀁 𑀫𑀸𑀭𑁂𑀢𑁆𑀯𑀸 𑀉𑀧𑀟𑁆𑀠𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀉𑀧𑀟𑁆𑀠𑀁 𑀧𑀸𑀣𑁂𑀬𑁆𑀬𑀁 𑀓𑀢𑁆𑀯𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀸𑀳𑀻’’𑀢𑀺. 𑀢𑀢𑁄 𑀲𑁄 𑀢𑀁 𑀆𑀳 ‘‘𑀪𑀤𑁆𑀤𑁂 𑀫𑀸𑀢𑀼𑀕𑀸𑀫𑀫𑀭𑀡𑁂𑀦 𑀤𑁆𑀯𑀺𑀦𑁆𑀦𑀁 𑀫𑀭𑀡𑀁 𑀧𑀜𑁆𑀜𑀸𑀬𑀢𑀺. 𑀦 𑀳𑀺 𑀫𑀦𑁆𑀤𑁄 𑀓𑀼𑀫𑀸𑀭𑁄 𑀫𑀸𑀢𑀭𑀁 𑀯𑀺𑀦𑀸 𑀚𑀻𑀯𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀬𑀤𑀺 𑀧𑀦 𑀫𑀬𑀁 𑀚𑀻𑀯𑀸𑀫, 𑀧𑀼𑀦 𑀤𑀸𑀭𑀓𑀁 𑀮𑀪𑁂𑀬𑁆𑀬𑀸𑀫, 𑀳𑀦𑁆𑀤 𑀤𑀸𑀦𑀺 𑀧𑀼𑀢𑁆𑀢𑀓𑀁 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀕𑀳𑁂𑀢𑁆𑀯𑀸 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀸𑀫𑀸’’𑀢𑀺.

𑀢𑀢𑁄 𑀫𑀸𑀢𑀸 𑀧𑀼𑀢𑁆𑀢𑀫𑀸𑀳 ‘‘𑀢𑀸𑀢 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀳𑀻’’𑀢𑀺. 𑀲𑁄 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀧𑀺𑀢𑀸 ‘‘𑀫𑀬𑀸 𑀧𑀼𑀢𑁆𑀢𑀓𑀁 𑀧𑁄𑀲𑁂𑀲𑁆𑀲𑀸𑀫𑀻𑀢𑀺 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀳𑀺 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀫𑀦𑀼𑀪𑀽𑀢𑀁, 𑀦 𑀲𑀓𑁆𑀓𑁄𑀫𑀺 𑀧𑀼𑀢𑁆𑀢𑀁 𑀫𑀸𑀭𑁂𑀢𑀼𑀁, 𑀢𑁆𑀯𑀁𑀬𑁂𑀯 𑀢𑀯 𑀧𑀼𑀢𑁆𑀢𑀓𑀁 𑀫𑀸𑀭𑁂𑀳𑀻’’𑀢𑀺 𑀯𑀢𑁆𑀯𑀸 ‘‘𑀢𑀸𑀢 𑀫𑀸𑀢𑀼𑀲𑀦𑁆𑀢𑀺𑀓𑀫𑁂𑀯 𑀕𑀘𑁆𑀙𑀸𑀳𑀻’’𑀢𑀺 𑀆𑀳. 𑀲𑁄 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺 ‘‘𑀫𑀬𑀸 𑀧𑀼𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑀺𑀬𑀸 𑀕𑁄𑀯𑀢𑀓𑀼𑀓𑁆𑀓𑀼𑀭𑀯𑀢𑀤𑁂𑀯𑀢𑀸𑀬𑀸𑀘𑀦𑀸𑀤𑀻𑀳𑀺𑀧𑀺 𑀢𑀸𑀯 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀁 𑀅𑀦𑀼𑀪𑀽𑀢𑀁, 𑀓𑁄 𑀧𑀦 𑀯𑀸𑀤𑁄 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀦𑁆𑀢𑀺𑀬𑀸? 𑀦 𑀲𑀓𑁆𑀓𑀸𑀳𑀁 𑀧𑀼𑀢𑁆𑀢𑀁 𑀫𑀸𑀭𑁂𑀢𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀢𑀸𑀢 𑀧𑀺𑀢𑀼𑀲𑀦𑁆𑀢𑀺𑀓𑀁𑀬𑁂𑀯 𑀕𑀘𑁆𑀙𑀸𑀳𑀻’’𑀢𑀺 𑀆𑀳. 𑀏𑀯𑀁 𑀲𑁄 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑀸 𑀕𑀘𑁆𑀙𑀦𑁆𑀢𑁄𑀬𑁂𑀯 𑀫𑀢𑁄. 𑀢𑁂 𑀢𑀁 𑀤𑀺𑀲𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀫𑀁𑀲𑀸𑀦𑀺 𑀕𑀳𑁂𑀢𑁆𑀯𑀸 𑀔𑀸𑀤𑀦𑁆𑀢𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂𑀲𑀁 𑀲𑁄 𑀧𑀼𑀢𑁆𑀢𑀫𑀁𑀲𑀸𑀳𑀸𑀭𑁄 𑀦𑀯𑀳𑀺 𑀓𑀸𑀭𑀡𑁂𑀳𑀺 𑀧𑀝𑀺𑀓𑀼𑀮𑀢𑁆𑀢𑀸 𑀦𑁂𑀯 𑀤𑀯𑀸𑀬 𑀳𑁄𑀢𑀺, 𑀦 𑀫𑀤𑀸𑀬 𑀦 𑀫𑀡𑁆𑀟𑀦𑀸𑀬 𑀦 𑀯𑀺𑀪𑀽𑀲𑀦𑀸𑀬, 𑀓𑁂𑀯𑀮𑀁 𑀓𑀦𑁆𑀢𑀸𑀭𑀦𑀺𑀢𑁆𑀣𑀭𑀡𑀢𑁆𑀣𑀸𑀬𑁂𑀯 𑀳𑁄𑀢𑀺.

𑀓𑀢𑀫𑁂𑀳𑀺 𑀦𑀯𑀳𑀺 𑀓𑀸𑀭𑀡𑁂𑀳𑀺 𑀧𑀝𑀺𑀓𑀽𑀮𑁄𑀢𑀺 𑀘𑁂? 𑀲𑀚𑀸𑀢𑀺𑀫𑀁𑀲𑀢𑀸𑀬 𑀜𑀸𑀢𑀺𑀫𑀁𑀲𑀢𑀸𑀬 𑀧𑀼𑀢𑁆𑀢𑀫𑀁𑀲𑀢𑀸𑀬 𑀧𑀺𑀬𑀧𑀼𑀢𑁆𑀢𑀫𑀁𑀲𑀢𑀸𑀬 𑀢𑀭𑀼𑀡𑀫𑀁𑀲𑀢𑀸𑀬 𑀆𑀫𑀓𑀫𑀁𑀲𑀢𑀸𑀬 𑀅𑀕𑁄𑀭𑀲𑀫𑀁𑀲𑀢𑀸𑀬 𑀅𑀮𑁄𑀡𑀢𑀸𑀬 𑀅𑀥𑀽𑀧𑀺𑀢𑀢𑀸𑀬𑀸𑀢𑀺. 𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀏𑀯𑀁 𑀧𑀼𑀢𑁆𑀢𑀫𑀁𑀲𑀲𑀤𑀺𑀲𑀁 𑀧𑀲𑁆𑀲𑀢𑀺, 𑀲𑁄 𑀢𑀢𑁆𑀣 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀅𑀬𑀁 𑀢𑀸𑀯 𑀧𑀼𑀢𑁆𑀢𑀫𑀁𑀲𑀽𑀧𑀫𑀸𑀬𑀁 𑀅𑀢𑁆𑀣𑀬𑁄𑀚𑀦𑀸.

𑀦𑀺𑀘𑁆𑀘𑀫𑁆𑀫𑀕𑀸𑀯𑀽𑀧𑀫𑀸𑀬𑀁 𑀧𑀦 𑀬𑀣𑀸 𑀲𑀸 𑀕𑀸𑀯𑀻 𑀕𑀻𑀯𑀢𑁄 𑀬𑀸𑀯 𑀔𑀼𑀭𑀸, 𑀢𑀸𑀯 𑀘𑀫𑁆𑀫𑀁 𑀉𑀤𑁆𑀤𑀸𑀮𑁂𑀢𑁆𑀯𑀸 𑀫𑀼𑀢𑁆𑀢𑀸 𑀬𑀁 𑀬𑀤𑁂𑀯 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑀢𑀺, 𑀢𑀢𑁆𑀣 𑀧𑀸𑀡𑀓𑁂𑀳𑀺 𑀔𑀚𑁆𑀚𑀫𑀸𑀦𑀸 𑀤𑀼𑀓𑁆𑀔𑀲𑁆𑀲𑁂𑀯𑀸𑀥𑀺𑀓𑀭𑀡𑀁 𑀳𑁄𑀢𑀺, 𑀏𑀯𑀁 𑀨𑀲𑁆𑀲𑁄𑀧𑀺 𑀬𑀁 𑀬𑀤𑁂𑀯 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀯𑀸 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑀢𑀺, 𑀢𑀁𑀢𑀁𑀯𑀢𑁆𑀣𑀸𑀭𑀫𑁆𑀫𑀡𑀲𑀫𑁆𑀪𑀯𑀲𑁆𑀲 𑀯𑁂𑀤𑀬𑀺𑀢𑀤𑀼𑀓𑁆𑀔𑀲𑁆𑀲 𑀅𑀥𑀺𑀓𑀭𑀡𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀨𑀲𑁆𑀲𑀸𑀳𑀸𑀭𑀁 𑀏𑀯𑀁 𑀦𑀺𑀘𑁆𑀘𑀫𑁆𑀫𑀕𑀸𑀯𑀺𑀲𑀤𑀺𑀲𑀁 𑀧𑀲𑁆𑀲𑀢𑀺, 𑀲𑁄 𑀢𑀢𑁆𑀣 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀅𑀬𑀁 𑀦𑀺𑀘𑁆𑀘𑀫𑁆𑀫𑀕𑀸𑀯𑀽𑀧𑀫𑀸𑀬𑀁 𑀅𑀢𑁆𑀣𑀬𑁄𑀚𑀦𑀸.

𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸𑀬𑀁 𑀧𑀦 𑀬𑀣𑀸 𑀲𑀸 𑀅𑀗𑁆𑀕𑀸𑀭𑀓𑀸𑀲𑀼, 𑀏𑀯𑀁 𑀫𑀳𑀸𑀧𑀭𑀺𑀴𑀸𑀳𑀝𑁆𑀞𑁂𑀦 𑀢𑀬𑁄 𑀪𑀯𑀸. 𑀬𑀣𑀸 𑀦𑀸𑀦𑀸𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀉𑀧𑀓𑀟𑁆𑀠𑀓𑀸 𑀤𑁆𑀯𑁂 𑀧𑀼𑀭𑀺𑀲𑀸, 𑀏𑀯𑀁 𑀪𑀯𑁂𑀲𑀼 𑀉𑀧𑀓𑀟𑁆𑀠𑀦𑀝𑁆𑀞𑁂𑀦 𑀫𑀦𑁄𑀲𑀜𑁆𑀘𑁂𑀢𑀦𑀸. 𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀁 𑀏𑀯𑀁 𑀅𑀗𑁆𑀕𑀸𑀭𑀓𑀸𑀲𑀽𑀧𑀓𑀟𑁆𑀠𑀓𑀧𑀼𑀭𑀺𑀲𑀲𑀤𑀺𑀲𑀁 𑀧𑀲𑁆𑀲𑀢𑀺, 𑀲𑁄 𑀢𑀢𑁆𑀣 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀅𑀬𑀁 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸𑀬𑀁 𑀅𑀢𑁆𑀣𑀬𑁄𑀚𑀦𑀸.

𑀲𑀢𑁆𑀢𑀺𑀲𑀢𑀸𑀳𑀢𑀽𑀧𑀫𑀸𑀬𑀁 𑀧𑀦 𑀬𑁂𑀦 𑀲𑁄 𑀧𑀼𑀭𑀺𑀲𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀲𑀢𑁆𑀢𑀺𑀲𑀢𑁂𑀦 𑀳𑀜𑁆𑀜𑀢𑀺, 𑀢𑀫𑀲𑁆𑀲 𑀲𑀭𑀻𑀭𑁂 𑀯𑀡𑀫𑀼𑀔𑀲𑀢𑀁 𑀓𑀢𑁆𑀯𑀸 𑀅𑀦𑁆𑀢𑀭𑀸 𑀅𑀝𑁆𑀞𑀢𑁆𑀯𑀸 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀅𑀧𑀭𑀪𑀸𑀕𑁂𑀬𑁂𑀯 𑀧𑀢𑀢𑀺, 𑀏𑀯𑀁 𑀇𑀢𑀭𑀸𑀦𑀺 𑀤𑁆𑀯𑁂 𑀲𑀢𑁆𑀢𑀺𑀲𑀢𑀸𑀦𑀺, 𑀏𑀯𑀫𑀲𑁆𑀲 𑀧𑀢𑀺𑀢𑁄𑀓𑀸𑀲𑁂 𑀅𑀧𑀢𑀺𑀢𑁆𑀯𑀸 𑀅𑀧𑀢𑀺𑀢𑁆𑀯𑀸 𑀕𑀢𑀸𑀳𑀺 𑀲𑀢𑁆𑀢𑀻𑀳𑀺 𑀲𑀩𑁆𑀩𑀲𑀭𑀻𑀭𑀁 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀫𑁂𑀯 𑀳𑁄𑀢𑀺, 𑀢𑀲𑁆𑀲 𑀏𑀓𑀯𑀡𑀫𑀼𑀔𑁂𑀧𑀺 𑀉𑀧𑁆𑀧𑀦𑁆𑀦𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀺, 𑀓𑁄 𑀧𑀦 𑀯𑀸𑀤𑁄 𑀢𑀻𑀲𑀼 𑀯𑀡𑀫𑀼𑀔𑀲𑀢𑁂𑀲𑀼? 𑀢𑀢𑁆𑀣 𑀲𑀢𑁆𑀢𑀺𑀦𑀺𑀧𑀸𑀢𑀓𑀸𑀮𑁄 𑀯𑀺𑀬 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀦𑀺𑀩𑁆𑀩𑀢𑁆𑀢𑀓𑀸𑀮𑁄. 𑀯𑀡𑀫𑀼𑀔𑀚𑀦𑀦𑀁 𑀯𑀺𑀬 𑀔𑀦𑁆𑀥𑀚𑀦𑀦𑀁. 𑀯𑀡𑀫𑀼𑀔𑁂𑀲𑀼 𑀤𑀼𑀓𑁆𑀔𑀯𑁂𑀤𑀦𑀼𑀧𑁆𑀧𑀸𑀤𑁄 𑀯𑀺𑀬 𑀚𑀸𑀢𑁂𑀲𑀼 𑀔𑀦𑁆𑀥𑁂𑀲𑀼 𑀯𑀝𑁆𑀝𑀫𑀽𑀮𑀓𑀦𑀸𑀦𑀸𑀯𑀺𑀥𑀤𑀼𑀓𑁆𑀔𑀼𑀧𑁆𑀧𑀸𑀤𑁄. 𑀅𑀧𑀭𑁄 𑀦𑀬𑁄, 𑀆𑀕𑀼𑀘𑀸𑀭𑀻 𑀧𑀼𑀭𑀺𑀲𑁄 𑀯𑀺𑀬 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁. 𑀢𑀲𑁆𑀲 𑀲𑀢𑁆𑀢𑀺𑀖𑀸𑀢𑁂𑀳𑀺 𑀉𑀧𑁆𑀧𑀦𑁆𑀦𑀯𑀡𑀫𑀼𑀔𑀸𑀦𑀺 𑀯𑀺𑀬 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁. 𑀯𑀡𑀫𑀼𑀔𑀧𑀘𑁆𑀘𑀬𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀓𑁆𑀔𑀴𑀤𑀼𑀓𑁆𑀔𑀼𑀧𑁆𑀧𑀸𑀤𑁄 𑀯𑀺𑀬 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀓𑀫𑁆𑀫𑀓𑀸𑀭𑀡𑀅𑀝𑁆𑀞𑀦𑀯𑀼𑀢𑀺𑀭𑁄𑀕𑀸𑀤𑀺𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀓𑀤𑀼𑀓𑁆𑀔𑀼𑀧𑁆𑀧𑀸𑀤𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀯𑀺𑀜𑁆𑀜𑀸𑀡𑀸𑀳𑀸𑀭𑀁 𑀏𑀯𑀁 𑀲𑀢𑁆𑀢𑀺𑀲𑀢𑀸𑀳𑀢𑀲𑀤𑀺𑀲𑀁 𑀧𑀲𑁆𑀲𑀢𑀺. 𑀲𑁄 𑀢𑀢𑁆𑀣 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀅𑀬𑀁 𑀲𑀢𑁆𑀢𑀺𑀲𑀢𑀸𑀳𑀢𑀽𑀧𑀫𑀸𑀬𑀁 𑀅𑀢𑁆𑀣𑀬𑁄𑀚𑀦𑀸.

𑀲𑁄 𑀏𑀯𑀁 𑀇𑀫𑁂𑀲𑀼 𑀆𑀳𑀸𑀭𑁂𑀲𑀼 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑁄 𑀘𑀢𑁆𑀢𑀸𑀭𑁄𑀧𑀺 𑀆𑀳𑀸𑀭𑁂 𑀧𑀭𑀺𑀚𑀸𑀦𑀸𑀢𑀺, 𑀬𑁂𑀲𑀼 𑀧𑀭𑀺𑀜𑁆𑀜𑀸𑀢𑁂𑀲𑀼 𑀲𑀩𑁆𑀩𑀫𑁆𑀧𑀺 𑀧𑀭𑀺𑀜𑁆𑀜𑀸𑀢𑀁 𑀯𑀢𑁆𑀣𑀼 𑀧𑀭𑀺𑀜𑁆𑀜𑀸𑀢𑀫𑁂𑀯 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑀩𑀴𑀻𑀓𑀸𑀭𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀧𑀭𑀺𑀜𑁆𑀜𑀸𑀢𑁂 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀧𑀭𑀺𑀜𑁆𑀜𑀸𑀢𑁄 𑀳𑁄𑀢𑀺. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁂 𑀭𑀸𑀕𑁂 𑀧𑀭𑀺𑀜𑁆𑀜𑀸𑀢𑁂 𑀦𑀢𑁆𑀣𑀺 𑀢𑀁 𑀲𑀁𑀬𑁄𑀚𑀦𑀁, 𑀬𑁂𑀦 𑀲𑀁𑀬𑁄𑀚𑀦𑁂𑀦 𑀲𑀁𑀬𑀼𑀢𑁆𑀢𑁄 𑀅𑀭𑀺𑀬𑀲𑀸𑀯𑀓𑁄 𑀧𑀼𑀦 𑀇𑀫𑀁 𑀮𑁄𑀓𑀁 𑀆𑀕𑀘𑁆𑀙𑁂𑀬𑁆𑀬. 𑀨𑀲𑁆𑀲𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀧𑀭𑀺𑀜𑁆𑀜𑀸𑀢𑁂 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺. 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀧𑀭𑀺𑀜𑁆𑀜𑀸𑀢𑀸𑀲𑀼 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑀦𑁆𑀢𑀺 𑀯𑀤𑀸𑀫𑀺. 𑀫𑀦𑁄𑀲𑀜𑁆𑀘𑁂𑀢𑀦𑀸𑀬, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀧𑀭𑀺𑀜𑁆𑀜𑀸𑀢𑁂 𑀢𑀺𑀲𑁆𑀲𑁄 𑀢𑀡𑁆𑀳𑀸 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺. 𑀢𑀻𑀲𑀼 𑀢𑀡𑁆𑀳𑀸𑀲𑀼 𑀧𑀭𑀺𑀜𑁆𑀜𑀸𑀢𑀸𑀲𑀼 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑀦𑁆𑀢𑀺 𑀯𑀤𑀸𑀫𑀺. 𑀯𑀺𑀜𑁆𑀜𑀸𑀡𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀧𑀭𑀺𑀜𑁆𑀜𑀸𑀢𑁂 𑀦𑀸𑀫𑀭𑀽𑀧𑀁 𑀧𑀭𑀺𑀜𑁆𑀜𑀸𑀢𑀁 𑀳𑁄𑀢𑀺. 𑀦𑀸𑀫𑀭𑀽𑀧𑁂 𑀧𑀭𑀺𑀜𑁆𑀜𑀸𑀢𑁂 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑀦𑁆𑀢𑀺 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁨.𑁬𑁩).

𑀢𑀡𑁆𑀳𑀸𑀲𑀫𑀼𑀤𑀬𑀸 𑀆𑀳𑀸𑀭𑀲𑀫𑀼𑀤𑀬𑁄𑀢𑀺 𑀧𑀼𑀭𑀺𑀫𑀢𑀡𑁆𑀳𑀸𑀲𑀫𑀼𑀤𑀬𑀸 𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀆𑀳𑀸𑀭𑀸𑀦𑀁 𑀲𑀫𑀼𑀤𑀬𑁄 𑀦𑀺𑀩𑁆𑀩𑀢𑁆𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀣𑀁? 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀳𑀺 𑀢𑀺𑀲𑀦𑁆𑀢𑀢𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑀫𑀢𑀺𑀁𑀲𑀭𑀽𑀧𑀩𑁆𑀪𑀦𑁆𑀢𑀭𑁂 𑀚𑀸𑀢𑀸 𑀑𑀚𑀸 𑀅𑀢𑁆𑀣𑀺. 𑀅𑀬𑀁 𑀢𑀡𑁆𑀳𑀸𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑁄 𑀉𑀧𑀸𑀤𑀺𑀦𑁆𑀦𑀓𑀓𑀩𑀴𑀻𑀓𑀸𑀭𑀸𑀳𑀸𑀭𑁄. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀨𑀲𑁆𑀲𑀘𑁂𑀢𑀦𑀸 𑀲𑀬𑀜𑁆𑀘 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀫𑁂 𑀢𑀡𑁆𑀳𑀸𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑀸 𑀉𑀧𑀸𑀤𑀺𑀦𑁆𑀦𑀓𑀨𑀲𑁆𑀲𑀫𑀦𑁄𑀲𑀜𑁆𑀘𑁂𑀢𑀦𑀸 𑀯𑀺𑀜𑁆𑀜𑀸𑀡𑀸𑀳𑀸𑀭𑀸𑀢𑀺. 𑀏𑀯𑀁 𑀢𑀸𑀯 𑀧𑀼𑀭𑀺𑀫𑀢𑀡𑁆𑀳𑀸𑀲𑀫𑀼𑀤𑀬𑀸 𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀆𑀳𑀸𑀭𑀸𑀦𑀁 𑀲𑀫𑀼𑀤𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦𑀺𑀥 𑀉𑀧𑀸𑀤𑀺𑀦𑁆𑀦𑀓𑀸𑀧𑀺 𑀅𑀦𑀼𑀧𑀸𑀤𑀺𑀦𑁆𑀦𑀓𑀸𑀧𑀺 𑀆𑀳𑀸𑀭𑀸 𑀫𑀺𑀲𑁆𑀲𑁂𑀢𑁆𑀯𑀸 𑀓𑀣𑀺𑀢𑀸, 𑀢𑀲𑁆𑀫𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀸𑀦𑀫𑁆𑀧𑀺 𑀏𑀯𑀁 𑀢𑀡𑁆𑀳𑀸𑀲𑀫𑀼𑀤𑀬𑀸 𑀆𑀳𑀸𑀭𑀲𑀫𑀼𑀤𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀝𑁆𑀞𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑁂𑀲𑀼 𑀳𑀺 𑀭𑀽𑀧𑁂𑀲𑀼 𑀑𑀚𑀸 𑀅𑀢𑁆𑀣𑀺, 𑀅𑀬𑀁 𑀲𑀳𑀚𑀸𑀢𑀢𑀡𑁆𑀳𑀸𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑁄 𑀅𑀦𑀼𑀧𑀸𑀤𑀺𑀦𑁆𑀦𑀓𑀓𑀩𑀴𑀻𑀓𑀸𑀭𑀸𑀳𑀸𑀭𑁄. 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀨𑀲𑁆𑀲𑀘𑁂𑀢𑀦𑀸 𑀲𑀬𑀜𑁆𑀘 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀫𑁂 𑀢𑀡𑁆𑀳𑀸𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀨𑀲𑁆𑀲𑀫𑀦𑁄𑀲𑀜𑁆𑀘𑁂𑀢𑀦𑀸 𑀯𑀺𑀜𑁆𑀜𑀸𑀡𑀸𑀳𑀸𑀭𑀸𑀢𑀺.

𑀢𑀡𑁆𑀳𑀸𑀦𑀺𑀭𑁄𑀥𑀸 𑀆𑀳𑀸𑀭𑀦𑀺𑀭𑁄𑀥𑁄𑀢𑀺 𑀇𑀫𑀺𑀲𑁆𑀲𑀸 𑀉𑀧𑀸𑀤𑀺𑀦𑁆𑀦𑀓𑀸𑀦𑀜𑁆𑀘 𑀅𑀦𑀼𑀧𑀸𑀤𑀺𑀦𑁆𑀦𑀓𑀸𑀦𑀜𑁆𑀘 𑀆𑀳𑀸𑀭𑀸𑀦𑀁 𑀧𑀘𑁆𑀘𑀬𑀪𑀽𑀢𑀸𑀬 𑀢𑀡𑁆𑀳𑀸𑀬 𑀦𑀺𑀭𑁄𑀥𑁂𑀦 𑀆𑀳𑀸𑀭𑀦𑀺𑀭𑁄𑀥𑁄 𑀧𑀜𑁆𑀜𑀸𑀬𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀇𑀥 𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀲𑀭𑀽𑀧𑁂𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀬𑀣𑀸 𑀘 𑀇𑀥, 𑀏𑀯𑀁 𑀇𑀢𑁄 𑀉𑀢𑁆𑀢𑀭𑀺𑀫𑁆𑀧𑀺 𑀲𑀩𑁆𑀩𑀯𑀸𑀭𑁂𑀲𑀽𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀲𑀘𑁆𑀘𑀸𑀦𑀺 𑀉𑀤𑁆𑀥𑀭𑀺𑀢𑀩𑁆𑀩𑀸𑀦𑀺. 𑀲𑀩𑁆𑀩𑀯𑀸𑀭𑁂𑀲𑀼 𑀘 ‘‘𑀏𑀢𑁆𑀢𑀸𑀯𑀢𑀸𑀧𑀺 𑀔𑁄 𑀆𑀯𑀼𑀲𑁄’’𑀢𑀺 𑀇𑀤𑀁 𑀤𑁂𑀲𑀦𑀸𑀦𑀺𑀬𑁆𑀬𑀸𑀢𑀦𑀁 𑀢𑀢𑁆𑀣 𑀢𑀢𑁆𑀣 𑀤𑁂𑀲𑀺𑀢𑀥𑀫𑁆𑀫𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀲 𑀇𑀥 𑀢𑀸𑀯 𑀅𑀬𑀁 𑀬𑁄𑀚𑀦𑀸 𑀏𑀢𑁆𑀢𑀸𑀯𑀢𑀸𑀧𑀻𑀢𑀺 𑀇𑀫𑀸𑀬 𑀆𑀳𑀸𑀭𑀤𑁂𑀲𑀦𑀸𑀬 𑀯𑀼𑀢𑁆𑀢𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀯𑁂𑀥𑀯𑀲𑁂𑀦𑀸𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸𑀧𑀺.

𑀆𑀳𑀸𑀭𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀘𑁆𑀘𑀯𑀸𑀭𑀯𑀡𑁆𑀡𑀦𑀸

𑁯𑁧. 𑀇𑀤𑀸𑀦𑀺 ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀣𑁂𑀭𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀉𑀢𑁆𑀢𑀭𑀺𑀫𑁆𑀧𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺𑀁𑀲𑀼. 𑀣𑁂𑀭𑁄 𑀘 𑀦𑁂𑀲𑀁 𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀩𑁆𑀬𑀸𑀓𑀸𑀲𑀺. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺 𑀲𑀩𑁆𑀩𑀯𑀸𑀭𑁂𑀲𑀼. 𑀢𑀲𑁆𑀫𑀸 𑀇𑀢𑁄 𑀧𑀭𑀁 𑀏𑀯𑀭𑀽𑀧𑀸𑀦𑀺 𑀯𑀘𑀦𑀸𑀦𑀺 𑀅𑀦𑀸𑀫𑀲𑀺𑀢𑁆𑀯𑀸 𑀬𑁂𑀦 𑀬𑁂𑀦 𑀧𑀭𑀺𑀬𑀸𑀬𑁂𑀦 𑀩𑁆𑀬𑀸𑀓𑀭𑁄𑀢𑀺, 𑀢𑀲𑁆𑀲 𑀢𑀲𑁆𑀲𑁂𑀯 𑀅𑀢𑁆𑀣𑀁 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀇𑀫𑀲𑁆𑀲 𑀧𑀦 𑀯𑀸𑀭𑀲𑁆𑀲 𑀲𑀗𑁆𑀔𑁂𑀧𑀤𑁂𑀲𑀦𑀸𑀬𑀁 𑀤𑀼𑀓𑁆𑀔𑀜𑁆𑀘 𑀧𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀁. 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀬𑀁 𑀧𑀦 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀘𑁆𑀘𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀫𑁂𑀯𑀸𑀢𑀺.

𑀲𑀘𑁆𑀘𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀭𑀸𑀫𑀭𑀡𑀯𑀸𑀭𑀯𑀡𑁆𑀡𑀦𑀸

𑁯𑁨. 𑀇𑀢𑁄 𑀧𑀭𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦 𑀤𑁂𑀲𑀦𑀸 𑀳𑁄𑀢𑀺. 𑀢𑀢𑁆𑀣 𑀚𑀭𑀸𑀫𑀭𑀡𑀯𑀸𑀭𑁂 𑀢𑀸𑀯 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁄 𑀅𑀦𑁂𑀓𑁂𑀲𑀁 𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁄𑀢𑀺 𑀜𑀸𑀢𑀩𑁆𑀩𑁄. 𑀬𑀸 𑀤𑁂𑀯𑀤𑀢𑁆𑀢𑀲𑁆𑀲 𑀚𑀭𑀸, 𑀬𑀸 𑀲𑁄𑀫𑀤𑀢𑁆𑀢𑀲𑁆𑀲 𑀚𑀭𑀸𑀢𑀺 𑀏𑀯𑀜𑁆𑀳𑀺 𑀤𑀺𑀯𑀲𑀫𑁆𑀧𑀺 𑀓𑀣𑁂𑀦𑁆𑀢𑀲𑁆𑀲 𑀦𑁂𑀯 𑀲𑀢𑁆𑀢𑀸 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀇𑀫𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀦 𑀓𑁄𑀘𑀺 𑀲𑀢𑁆𑀢𑁄 𑀅𑀧𑀭𑀺𑀬𑀸𑀤𑀺𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀬𑀁 𑀲𑀗𑁆𑀔𑁂𑀧𑀢𑁄 𑀅𑀦𑁂𑀓𑁂𑀲𑀁 𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁄’’𑀢𑀺.

𑀢𑀫𑁆𑀳𑀺 𑀢𑀫𑁆𑀳𑀻𑀢𑀺 𑀅𑀬𑀁 𑀕𑀢𑀺𑀚𑀸𑀢𑀺𑀯𑀲𑁂𑀦 𑀅𑀦𑁂𑀓𑁂𑀲𑀁 𑀦𑀺𑀓𑀸𑀬𑀸𑀦𑀁 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁄. 𑀲𑀢𑁆𑀢𑀦𑀺𑀓𑀸𑀬𑁂𑀢𑀺 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀲𑀭𑀽𑀧𑀦𑀺𑀤𑀲𑁆𑀲𑀦𑀁. 𑀚𑀭𑀸 𑀚𑀻𑀭𑀡𑀢𑀸𑀢𑀺𑀆𑀤𑀻𑀲𑀼 𑀧𑀦 𑀚𑀭𑀸𑀢𑀺 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀚𑀻𑀭𑀡𑀢𑀸𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀔𑀡𑁆𑀟𑀺𑀘𑁆𑀘𑀦𑁆𑀢𑀺𑀆𑀤𑀬𑁄 𑀓𑀸𑀮𑀸𑀢𑀺𑀓𑁆𑀓𑀫𑁂 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑀸. 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀧𑀓𑀢𑀺𑀦𑀺𑀤𑁆𑀤𑁂𑀲𑀸. 𑀅𑀬𑀜𑁆𑀳𑀺 𑀚𑀭𑀸𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀲𑀪𑀸𑀯𑀢𑁄 𑀤𑀻𑀧𑀺𑀢𑀸, 𑀢𑁂𑀦𑀲𑁆𑀲𑀸𑀬𑀁 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀚𑀻𑀭𑀡𑀢𑀸𑀢𑀺 𑀇𑀫𑀺𑀦𑀸 𑀆𑀓𑀸𑀭𑀢𑁄. 𑀢𑁂𑀦𑀲𑁆𑀲𑀸𑀬𑀁 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀔𑀡𑁆𑀟𑀺𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 𑀓𑀸𑀮𑀸𑀢𑀺𑀓𑁆𑀓𑀫𑁂 𑀤𑀦𑁆𑀢𑀦𑀔𑀸𑀦𑀁 𑀔𑀡𑁆𑀟𑀺𑀢𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄. 𑀧𑀸𑀮𑀺𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 𑀓𑁂𑀲𑀮𑁄𑀫𑀸𑀦𑀁 𑀧𑀮𑀺𑀢𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄. 𑀯𑀮𑀺𑀢𑁆𑀢𑀘𑀢𑀸𑀢𑀺 𑀇𑀫𑀺𑀦𑀸 𑀫𑀁𑀲𑀁 𑀫𑀺𑀮𑀸𑀧𑁂𑀢𑁆𑀯𑀸 𑀢𑀘𑁂 𑀯𑀮𑀺𑀢𑁆𑀢𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄 𑀤𑀻𑀧𑀺𑀢𑀸. 𑀢𑁂𑀦𑀲𑁆𑀲𑀸 𑀇𑀫𑁂 𑀔𑀡𑁆𑀟𑀺𑀘𑁆𑀘𑀦𑁆𑀢𑀺𑀆𑀤𑀬𑁄 𑀢𑀬𑁄 𑀓𑀸𑀮𑀸𑀢𑀺𑀓𑁆𑀓𑀫𑁂 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑀸. 𑀢𑁂𑀳𑀺 𑀇𑀫𑁂𑀲𑀁 𑀯𑀺𑀓𑀸𑀭𑀸𑀦𑀁 𑀤𑀲𑁆𑀲𑀦𑀯𑀲𑁂𑀦 𑀧𑀸𑀓𑀝𑀻𑀪𑀽𑀢𑀸 𑀧𑀸𑀓𑀝𑀚𑀭𑀸 𑀤𑀲𑁆𑀲𑀺𑀢𑀸. 𑀬𑀣𑁂𑀯 𑀳𑀺 𑀉𑀤𑀓𑀲𑁆𑀲 𑀯𑀸 𑀅𑀕𑁆𑀕𑀺𑀦𑁄 𑀯𑀸 𑀯𑀸𑀢𑀲𑁆𑀲 𑀯𑀸 𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀁 𑀲𑀫𑁆𑀪𑀕𑁆𑀕𑀧𑀮𑀺𑀪𑀕𑁆𑀕𑀢𑀸𑀬 𑀯𑀸 𑀛𑀸𑀫𑀢𑀸𑀬 𑀯𑀸 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄 𑀳𑁄𑀢𑀺, 𑀦 𑀘 𑀲𑁄 𑀕𑀢𑀫𑀕𑁆𑀕𑁄 𑀢𑀸𑀦𑁂𑀯 𑀉𑀤𑀓𑀸𑀤𑀻𑀦𑀺, 𑀏𑀯𑀫𑁂𑀯 𑀚𑀭𑀸𑀬 𑀤𑀦𑁆𑀢𑀸𑀤𑀻𑀲𑀼 𑀔𑀡𑁆𑀟𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄, 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸𑀧𑀺 𑀕𑀬𑁆𑀳𑀢𑀺. 𑀦 𑀘 𑀔𑀡𑁆𑀟𑀺𑀘𑁆𑀘𑀸𑀤𑀻𑀦𑁂𑀯 𑀚𑀭𑀸, 𑀦 𑀳𑀺 𑀚𑀭𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀢𑀺.

𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄𑀢𑀺 𑀇𑀫𑁂𑀳𑀺 𑀧𑀦 𑀧𑀤𑁂𑀳𑀺 𑀓𑀸𑀮𑀸𑀢𑀺𑀓𑁆𑀓𑀫𑁂𑀬𑁂𑀯 𑀅𑀪𑀺𑀩𑁆𑀬𑀢𑁆𑀢𑀢𑀸𑀬 𑀆𑀬𑀼𑀓𑁆𑀔𑀬𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀲𑀜𑁆𑀜𑀺𑀢𑀸𑀬 𑀧𑀓𑀢𑀺𑀬𑀸 𑀤𑀻𑀧𑀺𑀢𑀸. 𑀢𑁂𑀦𑀲𑁆𑀲𑀺𑀫𑁂 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀧𑀓𑀢𑀺𑀦𑀺𑀤𑁆𑀤𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀬𑀲𑁆𑀫𑀸 𑀚𑀭𑀁 𑀧𑀢𑁆𑀢𑀲𑁆𑀲 𑀆𑀬𑀼 𑀳𑀸𑀬𑀢𑀺, 𑀢𑀲𑁆𑀫𑀸 𑀚𑀭𑀸 ‘‘𑀆𑀬𑀼𑀦𑁄 𑀲𑀁𑀳𑀸𑀦𑀻’’𑀢𑀺 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀘 𑀤𑀳𑀭𑀓𑀸𑀮𑁂 𑀲𑀼𑀧𑁆𑀧𑀲𑀦𑁆𑀦𑀸𑀦𑀺 𑀲𑀼𑀔𑀼𑀫𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀲𑀼𑀔𑁂𑀦𑁂𑀯 𑀕𑀡𑁆𑀳𑀦𑀲𑀫𑀢𑁆𑀣𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀚𑀭𑀁 𑀧𑀢𑁆𑀢𑀲𑁆𑀲 𑀧𑀭𑀺𑀧𑀓𑁆𑀓𑀸𑀦𑀺 𑀆𑀮𑀼𑀴𑀺𑀢𑀸𑀦𑀺 𑀅𑀯𑀺𑀲𑀤𑀸𑀦𑀺 𑀑𑀴𑀸𑀭𑀺𑀓𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄’’𑀢𑀺𑀧𑀺 𑀨𑀮𑀽𑀧𑀘𑀸𑀭𑁂𑀦𑁂𑀯 𑀯𑀼𑀢𑁆𑀢𑀸. 𑀲𑀸 𑀧𑀦𑀸𑀬𑀁 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀸 𑀲𑀩𑁆𑀩𑀸𑀧𑀺 𑀚𑀭𑀸 𑀧𑀸𑀓𑀝𑀸 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀤𑀼𑀯𑀺𑀥𑀸 𑀳𑁄𑀢𑀺.

𑀢𑀢𑁆𑀣 𑀤𑀦𑁆𑀢𑀸𑀤𑀻𑀲𑀼 𑀔𑀡𑁆𑀟𑀪𑀸𑀯𑀸𑀤𑀺𑀤𑀲𑁆𑀲𑀦𑀢𑁄 𑀭𑀽𑀧𑀥𑀫𑁆𑀫𑁂𑀲𑀼 𑀚𑀭𑀸 𑀧𑀸𑀓𑀝𑀚𑀭𑀸 𑀦𑀸𑀫. 𑀅𑀭𑀽𑀧𑀥𑀫𑁆𑀫𑁂𑀲𑀼 𑀧𑀦 𑀢𑀸𑀤𑀺𑀲𑀲𑁆𑀲 𑀯𑀺𑀓𑀸𑀭𑀲𑁆𑀲 𑀅𑀤𑀲𑁆𑀲𑀦𑀢𑁄 𑀧𑀝𑀺𑀘𑁆𑀙𑀦𑁆𑀦𑀚𑀭𑀸 𑀦𑀸𑀫. 𑀢𑀢𑁆𑀣 𑀬𑁆𑀯𑀸𑀬𑀁 𑀔𑀡𑁆𑀟𑀸𑀤𑀺𑀪𑀸𑀯𑁄 𑀤𑀺𑀲𑁆𑀲𑀢𑀺, 𑀲𑁄 𑀢𑀸𑀤𑀺𑀲𑀸𑀦𑀁 𑀤𑀦𑁆𑀢𑀸𑀤𑀻𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀡𑁆𑀡𑁄𑀬𑁂𑀯, 𑀢𑀁 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀫𑀦𑁄𑀤𑁆𑀯𑀸𑀭𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀫𑁂 𑀤𑀦𑁆𑀢𑀸 𑀚𑀭𑀸𑀬 𑀧𑀳𑀝𑀸’’𑀢𑀺 𑀚𑀭𑀁 𑀚𑀸𑀦𑀸𑀢𑀺 𑀉𑀤𑀓𑀝𑁆𑀞𑀸𑀦𑁂 𑀩𑀤𑁆𑀥𑀸𑀦𑀺 𑀕𑁄𑀲𑀻𑀲𑀸𑀤𑀻𑀦𑀺 𑀑𑀮𑁄𑀓𑁂𑀢𑁆𑀯𑀸 𑀳𑁂𑀝𑁆𑀞𑀸 𑀉𑀤𑀓𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀚𑀸𑀦𑀦𑀁 𑀯𑀺𑀬. 𑀧𑀼𑀦 𑀅𑀯𑀻𑀘𑀺 𑀲𑀯𑀻𑀘𑀻𑀢𑀺 𑀏𑀯𑀫𑁆𑀧𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀫𑀡𑀺𑀓𑀦𑀓𑀭𑀚𑀢𑀧𑀯𑀸𑀴𑀲𑀽𑀭𑀺𑀬𑀸𑀤𑀻𑀦𑀁 𑀫𑀦𑁆𑀤𑀤𑀲𑀓𑀸𑀤𑀻𑀲𑀼 𑀧𑀸𑀡𑀻𑀦𑀁 𑀯𑀺𑀬 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀻𑀲𑀼 𑀘 𑀅𑀧𑀸𑀡𑀻𑀦𑀁 𑀯𑀺𑀬 𑀅𑀦𑁆𑀢𑀭𑀦𑁆𑀢𑀭𑀸 𑀯𑀡𑁆𑀡𑀯𑀺𑀲𑁂𑀲𑀸𑀤𑀻𑀦𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀚𑀭𑀸 𑀅𑀯𑀻𑀘𑀺𑀚𑀭𑀸 𑀦𑀸𑀫, 𑀦𑀺𑀭𑀦𑁆𑀢𑀭𑀚𑀭𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀅𑀜𑁆𑀜𑁂𑀲𑀼 𑀧𑀦 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀦𑁆𑀢𑀭𑀦𑁆𑀢𑀭𑀸 𑀯𑀡𑁆𑀡𑀯𑀺𑀲𑁂𑀲𑀸𑀤𑀻𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀚𑀭𑀸 𑀲𑀯𑀻𑀘𑀺𑀚𑀭𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀢𑁄 𑀧𑀭𑀁, 𑀢𑁂𑀲𑀁 𑀢𑁂𑀲𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀘𑀼𑀢𑀺 𑀘𑀯𑀦𑀢𑀸𑀢𑀺𑀆𑀤𑀻𑀲𑀼 𑀧𑀦 𑀘𑀼𑀢𑀻𑀢𑀺 𑀘𑀯𑀦𑀓𑀯𑀲𑁂𑀦 𑀯𑀼𑀘𑁆𑀘𑀢𑀺, 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀸𑀦𑀁 𑀲𑀸𑀫𑀜𑁆𑀜𑀯𑀘𑀦𑀫𑁂𑀢𑀁. 𑀘𑀯𑀦𑀢𑀸𑀢𑀺 𑀪𑀸𑀯𑀯𑀘𑀦𑁂𑀦 𑀮𑀓𑁆𑀔𑀡𑀦𑀺𑀤𑀲𑁆𑀲𑀦𑀁. 𑀪𑁂𑀤𑁄𑀢𑀺 𑀘𑀼𑀢𑀺𑀓𑁆𑀔𑀦𑁆𑀥𑀸𑀦𑀁 𑀪𑀗𑁆𑀕𑀼𑀧𑁆𑀧𑀢𑁆𑀢𑀺𑀧𑀭𑀺𑀤𑀻𑀧𑀦𑀁. 𑀅𑀦𑁆𑀢𑀭𑀥𑀸𑀦𑀦𑁆𑀢𑀺 𑀖𑀝𑀲𑁆𑀲𑁂𑀯 𑀪𑀺𑀦𑁆𑀦𑀲𑁆𑀲 𑀪𑀺𑀦𑁆𑀦𑀸𑀦𑀁 𑀘𑀼𑀢𑀺𑀓𑁆𑀔𑀦𑁆𑀥𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀞𑀸𑀦𑀸𑀪𑀸𑀯𑀧𑀭𑀺𑀤𑀻𑀧𑀦𑀁. 𑀫𑀘𑁆𑀘𑀼 𑀫𑀭𑀡𑀦𑁆𑀢𑀺 𑀫𑀘𑁆𑀘𑀼𑀲𑀗𑁆𑀔𑀸𑀢𑀁 𑀫𑀭𑀡𑀁. 𑀢𑁂𑀦 𑀲𑀫𑀼𑀘𑁆𑀙𑁂𑀤𑀫𑀭𑀡𑀸𑀤𑀻𑀦𑀺 𑀦𑀺𑀲𑁂𑀥𑁂𑀢𑀺. 𑀓𑀸𑀮𑁄 𑀦𑀸𑀫 𑀅𑀦𑁆𑀢𑀓𑁄, 𑀢𑀲𑁆𑀲 𑀓𑀺𑀭𑀺𑀬𑀸𑀢𑀺 𑀓𑀸𑀮𑀓𑀺𑀭𑀺𑀬𑀸. 𑀏𑀢𑁂𑀦 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀫𑀭𑀡𑀁 𑀤𑀻𑀧𑁂𑀢𑀺.

𑀇𑀤𑀸𑀦𑀺 𑀧𑀭𑀫𑀢𑁆𑀣𑁂𑀦 𑀤𑀻𑀧𑁂𑀢𑀼𑀁, 𑀔𑀦𑁆𑀥𑀸𑀦𑀁 𑀪𑁂𑀤𑁄𑀢𑀺𑀆𑀤𑀺𑀫𑀸𑀳. 𑀧𑀭𑀫𑀢𑁆𑀣𑁂𑀦 𑀳𑀺 𑀔𑀦𑁆𑀥𑀸𑀬𑁂𑀯 𑀪𑀺𑀚𑁆𑀚𑀦𑁆𑀢𑀺, 𑀦 𑀲𑀢𑁆𑀢𑁄 𑀦𑀸𑀫 𑀓𑁄𑀘𑀺 𑀫𑀭𑀢𑀺. 𑀔𑀦𑁆𑀥𑁂𑀲𑀼 𑀧𑀦 𑀪𑀺𑀚𑁆𑀚𑀫𑀸𑀦𑁂𑀲𑀼 𑀲𑀢𑁆𑀢𑁄 𑀫𑀭𑀢𑀺, 𑀪𑀺𑀦𑁆𑀦𑁂𑀲𑀼 𑀫𑀢𑁄𑀢𑀺 𑀯𑁄𑀳𑀸𑀭𑁄 𑀳𑁄𑀢𑀺.

𑀏𑀢𑁆𑀣 𑀘 𑀘𑀢𑀼𑀯𑁄𑀓𑀸𑀭𑀯𑀲𑁂𑀦 𑀔𑀦𑁆𑀥𑀸𑀦𑀁 𑀪𑁂𑀤𑁄, 𑀏𑀓𑀯𑁄𑀓𑀸𑀭𑀯𑀲𑁂𑀦 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄. 𑀘𑀢𑀼𑀯𑁄𑀓𑀸𑀭𑀯𑀲𑁂𑀦 𑀯𑀸 𑀔𑀦𑁆𑀥𑀸𑀦𑀁 𑀪𑁂𑀤𑁄, 𑀲𑁂𑀲𑀤𑁆𑀯𑀬𑀯𑀲𑁂𑀦 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀪𑀯𑀤𑁆𑀯𑀬𑁂𑀧𑀺 𑀭𑀽𑀧𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀓𑀴𑁂𑀯𑀭𑀲𑁆𑀲 𑀲𑀫𑁆𑀪𑀯𑀢𑁄. 𑀅𑀣 𑀯𑀸 𑀬𑀲𑁆𑀫𑀸 𑀘 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀔𑀦𑁆𑀥𑀸 𑀪𑀺𑀚𑁆𑀚𑀦𑁆𑀢𑁂𑀯, 𑀦 𑀓𑀺𑀜𑁆𑀘𑀺 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀔𑀦𑁆𑀥𑀸𑀦𑀁 𑀪𑁂𑀤𑁄, 𑀫𑀦𑀼𑀲𑁆𑀲𑀸𑀤𑀻𑀲𑀼 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄. 𑀏𑀢𑁆𑀣 𑀘 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑀓𑀸𑀭𑀡𑀢𑁄 𑀫𑀭𑀡𑀁 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀇𑀢𑀺 𑀅𑀬𑀜𑁆𑀘 𑀚𑀭𑀸 𑀇𑀤𑀜𑁆𑀘 𑀫𑀭𑀡𑀁. 𑀇𑀤𑀁 𑀯𑀼𑀘𑁆𑀘𑀢𑀸𑀯𑀼𑀲𑁄𑀢𑀺 𑀇𑀤𑀁 𑀉𑀪𑀬𑀫𑁆𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑁆𑀢𑀺 𑀓𑀣𑀻𑀬𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀚𑀭𑀸𑀫𑀭𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀸𑀢𑀺𑀯𑀸𑀭𑀯𑀡𑁆𑀡𑀦𑀸

𑁯𑁩. 𑀚𑀸𑀢𑀺𑀯𑀸𑀭𑁂 𑀚𑀸𑀢𑀺 𑀲𑀜𑁆𑀚𑀸𑀢𑀻𑀢𑀺𑀆𑀤𑀻𑀲𑀼 𑀚𑀸𑀬𑀦𑀝𑁆𑀞𑁂𑀦 𑀚𑀸𑀢𑀺, 𑀲𑀸 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀯𑀲𑁂𑀦 𑀬𑀼𑀢𑁆𑀢𑀸. 𑀲𑀜𑁆𑀚𑀸𑀬𑀦𑀝𑁆𑀞𑁂𑀦 𑀲𑀜𑁆𑀚𑀸𑀢𑀺, 𑀲𑀸 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀯𑀲𑁂𑀦 𑀬𑀼𑀢𑁆𑀢𑀸. 𑀑𑀓𑁆𑀓𑀫𑀦𑀝𑁆𑀞𑁂𑀦 𑀑𑀓𑁆𑀓𑀦𑁆𑀢𑀺, 𑀲𑀸 𑀅𑀡𑁆𑀟𑀚𑀚𑀮𑀸𑀩𑀼𑀚𑀯𑀲𑁂𑀦 𑀬𑀼𑀢𑁆𑀢𑀸. 𑀢𑁂 𑀳𑀺 𑀅𑀡𑁆𑀟𑀓𑁄𑀲𑀜𑁆𑀘 𑀯𑀢𑁆𑀣𑀺𑀓𑁄𑀲𑀜𑁆𑀘 𑀑𑀓𑁆𑀓𑀫𑀦𑁆𑀢𑀸 𑀧𑀯𑀺𑀲𑀦𑁆𑀢𑀸 𑀯𑀺𑀬 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺. 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺, 𑀲𑀸 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀯𑀲𑁂𑀦 𑀬𑀼𑀢𑁆𑀢𑀸, 𑀢𑁂 𑀳𑀺 𑀧𑀸𑀓𑀝𑀸𑀬𑁂𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀅𑀬𑀁 𑀢𑀸𑀯 𑀯𑁄𑀳𑀸𑀭𑀤𑁂𑀲𑀦𑀸.

𑀇𑀤𑀸𑀦𑀺 𑀧𑀭𑀫𑀢𑁆𑀣𑀤𑁂𑀲𑀦𑀸 𑀳𑁄𑀢𑀺. 𑀔𑀦𑁆𑀥𑀸𑀬𑁂𑀯 𑀳𑀺 𑀧𑀭𑀫𑀢𑁆𑀣𑀢𑁄 𑀧𑀸𑀢𑀼𑀪𑀯𑀦𑁆𑀢𑀺, 𑀦 𑀲𑀢𑁆𑀢𑁄. 𑀢𑀢𑁆𑀣 𑀘 𑀔𑀦𑁆𑀥𑀸𑀦𑀦𑁆𑀢𑀺 𑀏𑀓𑀯𑁄𑀓𑀸𑀭𑀪𑀯𑁂 𑀏𑀓𑀲𑁆𑀲 𑀘𑀢𑀼𑀯𑁄𑀓𑀸𑀭𑀪𑀯𑁂 𑀘𑀢𑀼𑀦𑁆𑀦𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀜𑁆𑀘𑀦𑁆𑀦𑀫𑁆𑀧𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀢𑀼𑀪𑀸𑀯𑁄𑀢𑀺 𑀉𑀧𑁆𑀧𑀢𑁆𑀢𑀺. 𑀆𑀬𑀢𑀦𑀸𑀦𑀦𑁆𑀢𑀺 𑀏𑀢𑁆𑀣 𑀢𑀢𑁆𑀭 𑀢𑀢𑁆𑀭 𑀉𑀧𑁆𑀧𑀚𑁆𑀚𑀫𑀸𑀦𑀸𑀬𑀢𑀦𑀯𑀲𑁂𑀦𑁂𑀯 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀮𑀸𑀪𑁄𑀢𑀺 𑀲𑀦𑁆𑀢𑀢𑀺𑀬𑀁 𑀧𑀸𑀢𑀼𑀪𑀸𑀯𑁄𑀬𑁂𑀯. 𑀧𑀸𑀢𑀼𑀪𑀯𑀦𑁆𑀢𑀸𑀦𑁂𑀯 𑀳𑀺 𑀢𑀸𑀦𑀺 𑀧𑀝𑀺𑀮𑀤𑁆𑀥𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄 𑀚𑀸𑀢𑀻𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀯𑁄𑀳𑀸𑀭𑀢𑁄 𑀧𑀭𑀫𑀢𑁆𑀣𑀢𑁄 𑀘 𑀤𑁂𑀲𑀺𑀢𑀸𑀬 𑀚𑀸𑀢𑀺𑀬𑀸 𑀦𑀺𑀕𑀫𑀦𑀁 𑀓𑀭𑁄𑀢𑀻𑀢𑀺. 𑀪𑀯𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀧𑀦 𑀚𑀸𑀢𑀺𑀬𑀸 𑀧𑀘𑁆𑀘𑀬𑀪𑀽𑀢𑁄 𑀓𑀫𑁆𑀫𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀚𑀸𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀯𑀯𑀸𑀭𑀯𑀡𑁆𑀡𑀦𑀸

𑁯𑁪. 𑀪𑀯𑀯𑀸𑀭𑁂 𑀓𑀸𑀫𑀪𑀯𑁄𑀢𑀺 𑀓𑀫𑁆𑀫𑀪𑀯𑁄 𑀘 𑀉𑀧𑀧𑀢𑁆𑀢𑀺𑀪𑀯𑁄 𑀘. 𑀢𑀢𑁆𑀣 𑀓𑀫𑁆𑀫𑀪𑀯𑁄 𑀦𑀸𑀫 𑀓𑀸𑀫𑀪𑀯𑀽𑀧𑀕𑀁 𑀓𑀫𑁆𑀫𑀫𑁂𑀯. 𑀢𑀜𑁆𑀳𑀺 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀓𑀸𑀭𑀡𑀢𑁆𑀢𑀸 ‘‘𑀲𑀼𑀔𑁄 𑀩𑀼𑀤𑁆𑀥𑀸𑀦𑀫𑀼𑀧𑁆𑀧𑀸𑀤𑁄 (𑀥. 𑀧. 𑁧𑁯𑁪) 𑀤𑀼𑀓𑁆𑀔𑁄 𑀧𑀸𑀧𑀲𑁆𑀲 𑀉𑀘𑁆𑀘𑀬𑁄’’𑀢𑀺𑀆𑀤𑀻𑀦𑀺 (𑀥. 𑀧. 𑁧𑁧𑁭) 𑀯𑀺𑀬 𑀨𑀮𑀯𑁄𑀳𑀸𑀭𑁂𑀦 𑀪𑀯𑁄𑀢𑀺 𑀯𑀼𑀢𑁆𑀢𑀁. 𑀉𑀧𑀧𑀢𑁆𑀢𑀺𑀪𑀯𑁄 𑀦𑀸𑀫 𑀢𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀁 𑀉𑀧𑀸𑀤𑀺𑀦𑁆𑀦𑀔𑀦𑁆𑀥𑀧𑀜𑁆𑀘𑀓𑀁. 𑀢𑀜𑁆𑀳𑀺 𑀢𑀢𑁆𑀣 𑀪𑀯𑀢𑀻𑀢𑀺 𑀓𑀢𑁆𑀯𑀸 𑀪𑀯𑁄𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀇𑀤𑀁 𑀓𑀫𑁆𑀫𑀜𑁆𑀘 𑀉𑀧𑀧𑀢𑁆𑀢𑀺 𑀘 𑀉𑀪𑀬𑀫𑁆𑀧𑁂𑀢𑀫𑀺𑀥 ‘‘𑀓𑀸𑀫𑀪𑀯𑁄’’𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀼. 𑀉𑀧𑀸𑀤𑀸𑀦𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀧𑀦 𑀉𑀧𑀸𑀤𑀸𑀦𑀁 𑀓𑀼𑀲𑀮𑀓𑀫𑁆𑀫𑀪𑀯𑀲𑁆𑀲 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀓𑀼𑀲𑀮𑀓𑀫𑁆𑀫𑀪𑀯𑀲𑁆𑀲 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀧𑀺 𑀲𑀳𑀚𑀸𑀢𑀸𑀤𑀺𑀯𑀲𑁂𑀦𑀧𑀺. 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀧𑀦 𑀲𑀩𑁆𑀩𑀲𑁆𑀲𑀸𑀧𑀺 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀪𑀯𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀤𑀸𑀦𑀯𑀸𑀭𑀯𑀡𑁆𑀡𑀦𑀸

𑁯𑁫. 𑀉𑀧𑀸𑀤𑀸𑀦𑀯𑀸𑀭𑁂 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺𑀆𑀤𑀻𑀲𑀼 𑀯𑀢𑁆𑀣𑀼𑀓𑀸𑀫𑀁 𑀉𑀧𑀸𑀤𑀺𑀬𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀢𑀁 𑀉𑀧𑀸𑀤𑀺𑀬𑀢𑀻𑀢𑀺 𑀓𑀸𑀫𑀼𑀧𑀸𑀤𑀸𑀦𑀁. 𑀓𑀸𑀫𑁄 𑀘 𑀲𑁄 𑀉𑀧𑀸𑀤𑀸𑀦𑀜𑁆𑀘𑀸𑀢𑀺 𑀯𑀸 𑀓𑀸𑀫𑀼𑀧𑀸𑀤𑀸𑀦𑀁. 𑀉𑀧𑀸𑀤𑀸𑀦𑀦𑁆𑀢𑀺 𑀤𑀴𑁆𑀳𑀕𑁆𑀕𑀳𑀡𑀁 𑀯𑀼𑀘𑁆𑀘𑀢𑀺. 𑀤𑀴𑁆𑀳𑀢𑁆𑀣𑁄 𑀳𑀺 𑀏𑀢𑁆𑀣 𑀉𑀧𑀲𑀤𑁆𑀤𑁄, ‘‘𑀉𑀧𑀸𑀬𑀸𑀲 𑀉𑀧𑀓𑀝𑁆𑀞𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁 ‘‘𑀢𑀢𑁆𑀣 𑀓𑀢𑀫𑀁 𑀓𑀸𑀫𑀼𑀧𑀸𑀤𑀸𑀦𑀁, 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺 (𑀥. 𑀲. 𑁧𑁨𑁨𑁦; 𑀯𑀺𑀪. 𑁯𑁩𑁮) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀢𑀣𑀸 𑀤𑀺𑀝𑁆𑀞𑀺 𑀘 𑀲𑀸 𑀉𑀧𑀸𑀤𑀸𑀦𑀜𑁆𑀘𑀸𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀅𑀣 𑀯𑀸 𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺, 𑀉𑀧𑀸𑀤𑀺𑀬𑀦𑁆𑀢𑀺 𑀯𑀸 𑀏𑀢𑁂𑀦 𑀤𑀺𑀝𑁆𑀞𑀺𑀦𑁆𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀉𑀧𑀸𑀤𑀺𑀬𑀢𑀺 𑀳𑀺 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀢𑁆𑀢𑀭𑀤𑀺𑀝𑁆𑀞𑀺. 𑀉𑀧𑀸𑀤𑀺𑀬𑀦𑁆𑀢𑀺 𑀘 𑀢𑀸𑀬 𑀤𑀺𑀝𑁆𑀞𑀺𑀁. 𑀬𑀣𑀸𑀳 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁩.𑁨𑁭), 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀯𑀚𑁆𑀚𑀲𑁆𑀲 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁 ‘‘𑀢𑀢𑁆𑀣 𑀓𑀢𑀫𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 (𑀥. 𑀲. 𑁧𑁨𑁨𑁦; 𑀯𑀺𑀪. 𑁯𑁩𑁮) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀢𑀣𑀸 𑀲𑀻𑀮𑀩𑁆𑀩𑀢𑀁 𑀉𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀢𑀁 𑀉𑀧𑀸𑀤𑀺𑀬𑀢𑀺, 𑀲𑀻𑀮𑀩𑁆𑀩𑀢𑀜𑁆𑀘 𑀢𑀁 𑀉𑀧𑀸𑀤𑀸𑀦𑀜𑁆𑀘𑀸𑀢𑀺 𑀯𑀸 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀦𑀺 𑀳𑀺 𑀏𑀯𑀁 𑀲𑀼𑀤𑁆𑀥𑀻𑀢𑀺 𑀅𑀪𑀺𑀦𑀺𑀯𑁂𑀲𑀢𑁄 𑀲𑀬𑀫𑁂𑀯 𑀉𑀧𑀸𑀤𑀸𑀦𑀸𑀦𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁 ‘‘𑀢𑀢𑁆𑀣 𑀓𑀢𑀫𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁, 𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀻𑀮𑁂𑀦 𑀲𑀼𑀤𑁆𑀥𑀻’’𑀢𑀺 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄. 𑀉𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀧𑀸𑀤𑀸𑀦𑀁. 𑀓𑀺𑀁 𑀯𑀤𑀦𑁆𑀢𑀺, 𑀉𑀧𑀸𑀤𑀺𑀬𑀦𑁆𑀢𑀺 𑀯𑀸? 𑀅𑀢𑁆𑀢𑀸𑀦𑀁. 𑀅𑀢𑁆𑀢𑀦𑁄 𑀯𑀸𑀤𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁. 𑀅𑀢𑁆𑀢𑀯𑀸𑀤𑀫𑀢𑁆𑀢𑀫𑁂𑀯 𑀯𑀸 𑀅𑀢𑁆𑀢𑀸𑀢𑀺 𑀉𑀧𑀸𑀤𑀺𑀬𑀢𑀺 𑀏𑀢𑁂𑀦𑀸𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁, 𑀯𑀻𑀲𑀢𑀺𑀯𑀢𑁆𑀣𑀼𑀓𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁 ‘‘𑀢𑀢𑁆𑀣 𑀓𑀢𑀫𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁, 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺 (𑀥. 𑀲. 𑁧𑁨𑁨𑁩) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀢𑀡𑁆𑀳𑀸𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀢𑀡𑁆𑀳𑀸 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀦𑀢𑁆𑀣𑀺𑀯𑀺𑀕𑀢𑀸𑀲𑁂𑀯𑀦𑀯𑀲𑁂𑀦 𑀯𑀸 𑀧𑀘𑁆𑀘𑀬𑁄. 𑀅𑀯𑀲𑁂𑀲𑀸𑀦𑀁 𑀧𑀦 𑀲𑀳𑀚𑀸𑀢𑀸𑀤𑀺𑀯𑀲𑁂𑀦𑀸𑀧𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀉𑀧𑀸𑀤𑀸𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀡𑁆𑀳𑀸𑀯𑀸𑀭𑀯𑀡𑁆𑀡𑀦𑀸

𑁯𑁬. 𑀢𑀡𑁆𑀳𑀸𑀯𑀸𑀭𑁂 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸𑀢𑀺 𑀏𑀯𑀁 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀚𑀯𑀦𑀯𑀻𑀣𑀺𑀬𑀁 𑀧𑀯𑀢𑁆𑀢𑀸𑀬 𑀢𑀡𑁆𑀳𑀸𑀬 ‘‘𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀧𑀺𑀢𑀺𑀢𑁄 𑀦𑀸𑀫𑀁 𑀯𑀺𑀬 𑀧𑀺𑀢𑀺𑀲𑀤𑀺𑀲𑀸𑀭𑀫𑁆𑀫𑀡𑀢𑁄 𑀦𑀸𑀫𑀁. 𑀏𑀢𑁆𑀣 𑀘 𑀭𑀽𑀧𑀸𑀭𑀫𑁆𑀫𑀡𑀸 𑀢𑀡𑁆𑀳𑀸, 𑀭𑀽𑀧𑁂 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸. 𑀲𑀸 𑀓𑀸𑀫𑀭𑀸𑀕𑀪𑀸𑀯𑁂𑀦 𑀭𑀽𑀧𑀁 𑀅𑀲𑁆𑀲𑀸𑀤𑁂𑀦𑁆𑀢𑀻 𑀧𑀯𑀢𑁆𑀢𑀫𑀸𑀦𑀸 𑀓𑀸𑀫𑀢𑀡𑁆𑀳𑀸. 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑀭𑀸𑀕𑀪𑀸𑀯𑁂𑀦 𑀭𑀽𑀧𑀁 𑀦𑀺𑀘𑁆𑀘𑀁 𑀥𑀼𑀯𑀁 𑀲𑀲𑁆𑀲𑀢𑀦𑁆𑀢𑀺 𑀏𑀯𑀁 𑀅𑀲𑁆𑀲𑀸𑀤𑁂𑀦𑁆𑀢𑀻 𑀧𑀯𑀢𑁆𑀢𑀫𑀸𑀦𑀸 𑀪𑀯𑀢𑀡𑁆𑀳𑀸. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑀭𑀸𑀕𑀪𑀸𑀯𑁂𑀦 𑀭𑀽𑀧𑀁 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀧𑁂𑀘𑁆𑀘 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀅𑀲𑁆𑀲𑀸𑀤𑁂𑀦𑁆𑀢𑀻 𑀧𑀯𑀢𑁆𑀢𑀫𑀸𑀦𑀸 𑀯𑀺𑀪𑀯𑀢𑀡𑁆𑀳𑀸𑀢𑀺 𑀏𑀯𑀁 𑀢𑀺𑀯𑀺𑀥𑀸 𑀳𑁄𑀢𑀺. 𑀬𑀣𑀸 𑀘 𑀭𑀽𑀧𑀢𑀡𑁆𑀳𑀸, 𑀢𑀣𑀸 𑀲𑀤𑁆𑀤𑀢𑀡𑁆𑀳𑀸𑀤𑀬𑁄𑀧𑀻𑀢𑀺 𑀏𑀢𑀸𑀦𑀺 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀅𑀝𑁆𑀞𑀸𑀭𑀲, 𑀩𑀳𑀺𑀤𑁆𑀥𑀸𑀭𑀽𑀧𑀸𑀤𑀻𑀲𑀼 𑀅𑀝𑁆𑀞𑀸𑀭𑀲𑀸𑀢𑀺 𑀙𑀢𑁆𑀢𑀺𑀁𑀲. 𑀇𑀢𑀺 𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑀸𑀦𑀺 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀙𑀢𑁆𑀢𑀺𑀁𑀲𑀸𑀢𑀺 𑀅𑀝𑁆𑀞𑀲𑀢𑀁. ‘‘𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀼𑀧𑀸𑀤𑀸𑀬 ‘𑀅𑀲𑁆𑀫𑀻’𑀢𑀺 𑀳𑁄𑀢𑀺, ‘𑀇𑀢𑁆𑀣𑀲𑁆𑀫𑀻’𑀢𑀺 𑀳𑁄𑀢𑀻’’𑀢𑀺 (𑀯𑀺𑀪. 𑁯𑁭𑁩-𑁯𑁭𑁪) 𑀯𑀸 𑀏𑀯𑀫𑀸𑀤𑀻𑀦𑀸 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀸𑀤𑀺𑀦𑀺𑀲𑁆𑀲𑀺𑀢𑀸𑀦𑀺 𑀅𑀝𑁆𑀞𑀸𑀭𑀲, ‘‘𑀩𑀸𑀳𑀺𑀭𑀲𑁆𑀲𑀼𑀧𑀸𑀤𑀸𑀬 ‘𑀇𑀫𑀺𑀦𑀸 𑀅𑀲𑁆𑀫𑀻’𑀢𑀺 𑀳𑁄𑀢𑀺, ‘𑀇𑀫𑀺𑀦𑀸 𑀇𑀢𑁆𑀣𑀲𑁆𑀫𑀻’𑀢𑀺 𑀳𑁄𑀢𑀻’’𑀢𑀺 𑀯𑀸 (𑀯𑀺𑀪. 𑁯𑁭𑁫) 𑀏𑀯𑀫𑀸𑀤𑀺𑀦𑀸 𑀩𑀸𑀳𑀺𑀭𑀭𑀽𑀧𑀸𑀤𑀺𑀦𑀺𑀲𑁆𑀲𑀺𑀢𑀸𑀦𑀺 𑀅𑀝𑁆𑀞𑀸𑀭𑀲𑀸𑀢𑀺 𑀙𑀢𑁆𑀢𑀺𑀁𑀲. 𑀇𑀢𑀺 𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑀸𑀦𑀺 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀙𑀢𑁆𑀢𑀺𑀁𑀲𑀸𑀢𑀺 𑀏𑀯𑀫𑁆𑀧𑀺 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀧𑀼𑀦 𑀲𑀗𑁆𑀕𑀳𑁂 𑀓𑀭𑀻𑀬𑀫𑀸𑀦𑁂 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀙𑀴𑁂𑀯 𑀢𑀡𑁆𑀳𑀸𑀓𑀸𑀬𑀸 𑀢𑀺𑀲𑁆𑀲𑁄𑀬𑁂𑀯 𑀓𑀸𑀫𑀢𑀡𑁆𑀳𑀸𑀤𑀬𑁄 𑀳𑁄𑀦𑁆𑀢𑀻𑀢𑀺 𑀏𑀯𑀁 𑁋

𑀦𑀺𑀤𑁆𑀤𑁂𑀲𑀢𑁆𑀣𑁂𑀦 𑀦𑀺𑀤𑁆𑀤𑁂𑀲-𑀯𑀺𑀢𑁆𑀣𑀸𑀭𑀸 𑀯𑀺𑀢𑁆𑀣𑀸𑀭𑀲𑁆𑀲 𑀘;

𑀧𑀼𑀦 𑀲𑀗𑁆𑀕𑀳𑀢𑁄 𑀢𑀡𑁆𑀳𑀸, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸𑀢𑀺.

𑀯𑁂𑀤𑀦𑀸𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀧𑀦 𑀯𑁂𑀤𑀦𑀸𑀢𑀺 𑀯𑀺𑀧𑀸𑀓𑀯𑁂𑀤𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀓𑀣𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀡𑁆𑀳𑀸𑀬 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀘𑁂? 𑀅𑀲𑁆𑀲𑀸𑀤𑀦𑀻𑀬𑀢𑁄. 𑀲𑀼𑀔𑀸𑀬 𑀳𑀺 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑀦𑁂𑀦 𑀲𑀢𑁆𑀢𑀸 𑀯𑁂𑀤𑀦𑀁 𑀫𑀫𑀸𑀬𑀦𑁆𑀢𑀸 𑀯𑁂𑀤𑀦𑀸𑀬 𑀢𑀡𑁆𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑁂𑀤𑀦𑀸𑀭𑀸𑀕𑀭𑀢𑁆𑀢𑀸 𑀳𑀼𑀢𑁆𑀯𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀇𑀝𑁆𑀞𑀫𑁂𑀯 𑀭𑀽𑀧𑀁 𑀧𑀢𑁆𑀣𑁂𑀦𑁆𑀢𑀺, 𑀮𑀤𑁆𑀥𑀸 𑀘 𑀦𑀁 𑀅𑀲𑁆𑀲𑀸𑀤𑁂𑀦𑁆𑀢𑀺, 𑀆𑀭𑀫𑁆𑀫𑀡𑀤𑀸𑀬𑀓𑀸𑀦𑀜𑁆𑀘 𑀘𑀺𑀢𑁆𑀢𑀓𑀸𑀭𑀸𑀤𑀻𑀦𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀢𑀣𑀸 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼 𑀇𑀝𑁆𑀞𑁂 𑀘 𑀲𑀤𑁆𑀤𑀸𑀤𑀬𑁄 𑀧𑀢𑁆𑀣𑁂𑀦𑁆𑀢𑀺, 𑀮𑀤𑁆𑀥𑀸 𑀘 𑀦𑁂 𑀅𑀲𑁆𑀲𑀸𑀤𑁂𑀦𑁆𑀢𑀺, 𑀆𑀭𑀫𑁆𑀫𑀡𑀤𑀸𑀬𑀓𑀸𑀦𑀜𑁆𑀘 𑀯𑀻𑀡𑀸𑀯𑀸𑀤𑀓-𑀕𑀦𑁆𑀥𑀺𑀓𑀲𑀽𑀤-𑀢𑀦𑁆𑀢𑀯𑀸𑀬-𑀦𑀸𑀦𑀸𑀯𑀺𑀥𑀲𑀺𑀧𑁆𑀧𑀲𑀦𑁆𑀤𑀲𑁆𑀲𑀓𑀸𑀤𑀻𑀦𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀬𑀣𑀸 𑀓𑀺𑀁? 𑀬𑀣𑀸 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀧𑀼𑀢𑁆𑀢𑀁 𑀫𑀫𑀸𑀬𑀦𑁆𑀢𑀸 𑀥𑀸𑀢𑀺𑀬𑀸 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀲𑀧𑁆𑀧𑀸𑀬𑀲𑀧𑁆𑀧𑀺𑀔𑀻𑀭𑀸𑀤𑀻𑀦𑀺𑀬𑁂𑀯 𑀦𑀁 𑀧𑀸𑀬𑁂𑀦𑁆𑀢𑀺 𑀘𑁂𑀯 𑀪𑁄𑀚𑁂𑀦𑁆𑀢𑀺 𑀘. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀢𑀡𑁆𑀳𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀯𑀸𑀭𑀯𑀡𑁆𑀡𑀦𑀸

𑁯𑁭. 𑀯𑁂𑀤𑀦𑀸𑀯𑀸𑀭𑁂 𑀯𑁂𑀤𑀦𑀸𑀓𑀸𑀬𑀸𑀢𑀺 𑀯𑁂𑀤𑀦𑀸𑀲𑀫𑀽𑀳𑀸. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸𑀢𑀺 𑀏𑀢𑀁 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀅𑀢𑁆𑀣𑀺 𑀓𑀼𑀲𑀮𑀸, 𑀅𑀢𑁆𑀣𑀺 𑀅𑀓𑀼𑀲𑀮𑀸, 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑀸’’𑀢𑀺 (𑀯𑀺𑀪. 𑁩𑁪) 𑀏𑀯𑀁 𑀯𑀺𑀪𑀗𑁆𑀕𑁂 𑀆𑀕𑀢𑀢𑁆𑀢𑀸 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀧𑀯𑀢𑁆𑀢𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑁂𑀤𑀦𑀸𑀦𑀁 ‘‘𑀲𑀸𑀭𑀺𑀧𑀼𑀢𑁆𑀢𑁄, 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀫𑀸𑀢𑀺𑀢𑁄 𑀦𑀸𑀫𑀁 𑀯𑀺𑀬 𑀫𑀸𑀢𑀺𑀲𑀤𑀺𑀲𑀯𑀢𑁆𑀣𑀼𑀢𑁄 𑀦𑀸𑀫𑀁. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀳𑁂𑀢𑀼 𑀚𑀸𑀢𑀸 𑀯𑁂𑀤𑀦𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀬𑀁 𑀢𑀸𑀯𑁂𑀢𑁆𑀣 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀓𑀣𑀸. 𑀯𑀺𑀧𑀸𑀓𑀯𑀲𑁂𑀦 𑀧𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀤𑁆𑀯𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀺, 𑀤𑁆𑀯𑁂 𑀫𑀦𑁄𑀥𑀸𑀢𑀼𑀬𑁄, 𑀢𑀺𑀲𑁆𑀲𑁄 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄𑀢𑀺 𑀏𑀢𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀯𑁂𑀤𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼. 𑀫𑀦𑁄𑀤𑁆𑀯𑀸𑀭𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀯.

𑀨𑀲𑁆𑀲𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀧𑀦 𑀧𑀜𑁆𑀘𑀤𑁆𑀯𑀸𑀭𑁂 𑀧𑀜𑁆𑀘𑀯𑀢𑁆𑀣𑀼𑀓𑀯𑁂𑀤𑀦𑀸𑀦𑀁 𑀲𑀳𑀚𑀸𑀢𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀲𑀫𑀼𑀤𑀬𑀸 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀯𑀲𑁂𑀲𑀸𑀦𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀉𑀧𑀦𑀺𑀲𑁆𑀲𑀬𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀸. 𑀫𑀦𑁄𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀯𑁂𑀤𑀦𑀸𑀦𑀁 𑀅𑀤𑁆𑀯𑀸𑀭𑀺𑀓𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑁂𑀤𑀦𑀸𑀦𑀁 𑀲𑀳𑀚𑀸𑀢𑀫𑀦𑁄𑀲𑀫𑁆𑀨𑀲𑁆𑀲𑀲𑀫𑀼𑀤𑀬𑀸 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀯𑁂𑀤𑀦𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀨𑀲𑁆𑀲𑀯𑀸𑀭𑀯𑀡𑁆𑀡𑀦𑀸

𑁯𑁮. 𑀨𑀲𑁆𑀲𑀯𑀸𑀭𑁂 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀢𑀺 𑀘𑀓𑁆𑀔𑀼𑀫𑁆𑀳𑀺 𑀲𑀫𑁆𑀨𑀲𑁆𑀲𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄…𑀧𑁂… 𑀓𑀸𑀬𑀲𑀫𑁆𑀨𑀲𑁆𑀲𑁄𑀢𑀺 𑀏𑀢𑁆𑀢𑀸𑀯𑀢𑀸 𑀘 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸 𑀧𑀜𑁆𑀘𑀯𑀢𑁆𑀣𑀼𑀓𑀸 𑀤𑀲 𑀲𑀫𑁆𑀨𑀲𑁆𑀲𑀸 𑀯𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀇𑀫𑀺𑀦𑀸 𑀲𑁂𑀲𑀸 𑀩𑀸𑀯𑀻𑀲𑀢𑀺 𑀮𑁄𑀓𑀺𑀬𑀯𑀺𑀧𑀸𑀓𑀫𑀦𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀸. 𑀲𑀴𑀸𑀬𑀢𑀦𑀲𑀫𑀼𑀤𑀬𑀸𑀢𑀺 𑀙𑀦𑁆𑀦𑀁 𑀘𑀓𑁆𑀔𑀸𑀤𑀻𑀦𑀁 𑀆𑀬𑀢𑀦𑀸𑀦𑀁 𑀲𑀫𑀼𑀤𑀬𑁂𑀦 𑀇𑀫𑀲𑁆𑀲 𑀙𑀩𑁆𑀩𑀺𑀥𑀲𑁆𑀲𑀸𑀧𑀺 𑀲𑀫𑁆𑀨𑀲𑁆𑀲𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀨𑀲𑁆𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀴𑀸𑀬𑀢𑀦𑀯𑀸𑀭𑀯𑀡𑁆𑀡𑀦𑀸

𑁯𑁯. 𑀲𑀴𑀸𑀬𑀢𑀦𑀯𑀸𑀭𑁂 𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀘𑁂𑀯 𑀆𑀬𑀢𑀦𑀦𑀺𑀤𑁆𑀤𑁂𑀲𑁂 𑀘 𑀯𑀼𑀢𑁆𑀢𑀦𑀬𑀫𑁂𑀯. 𑀦𑀸𑀫𑀭𑀽𑀧𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀧𑀦 𑀬𑀁 𑀦𑀸𑀫𑀁 𑀬𑀜𑁆𑀘 𑀭𑀽𑀧𑀁, 𑀬𑀜𑁆𑀘 𑀦𑀸𑀫𑀭𑀽𑀧𑀁 𑀬𑀲𑁆𑀲 𑀆𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀲 𑀯𑀲𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀦𑀸𑀫𑀭𑀽𑀧𑀲𑀫𑀼𑀤𑀬𑀸 𑀲𑀴𑀸𑀬𑀢𑀦𑀲𑀫𑀼𑀤𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯𑀸𑀢𑀺.

𑀲𑀴𑀸𑀬𑀢𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀸𑀫𑀭𑀽𑀧𑀯𑀸𑀭𑀯𑀡𑁆𑀡𑀦𑀸

𑁧𑁦𑁦. 𑀦𑀸𑀫𑀭𑀽𑀧𑀯𑀸𑀭𑁂 𑀦𑀫𑀦𑀮𑀓𑁆𑀔𑀡𑀁 𑀦𑀸𑀫𑀁. 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁. 𑀯𑀺𑀢𑁆𑀣𑀸𑀭𑀯𑀸𑀭𑁂 𑀧𑀦𑀲𑁆𑀲 𑀯𑁂𑀤𑀦𑀸𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄. 𑀲𑀜𑁆𑀜𑀸𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑁄. 𑀘𑁂𑀢𑀦𑀸 𑀨𑀲𑁆𑀲𑁄 𑀫𑀦𑀲𑀺𑀓𑀸𑀭𑁄𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀫𑀜𑁆𑀘 𑀅𑀜𑁆𑀜𑁂𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀸 𑀥𑀫𑁆𑀫𑀸 𑀲𑀦𑁆𑀢𑀺, 𑀇𑀫𑁂 𑀧𑀦 𑀢𑀬𑁄 𑀲𑀩𑁆𑀩𑀤𑀼𑀩𑁆𑀩𑀮𑁂𑀲𑀼𑀧𑀺 𑀘𑀺𑀢𑁆𑀢𑁂𑀲𑀼 𑀲𑀦𑁆𑀢𑀺. 𑀢𑀲𑁆𑀫𑀸 𑀏𑀢𑁂𑀲𑀁𑀬𑁂𑀯 𑀯𑀲𑁂𑀦𑁂𑀢𑁆𑀣 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀧𑀺 𑀤𑀲𑁆𑀲𑀺𑀢𑁄. 𑀘𑀢𑁆𑀢𑀸𑀭𑀺 𑀘 𑀫𑀳𑀸𑀪𑀽𑀢𑀸𑀦𑀻𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑀻𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀫𑀳𑀸𑀪𑀽𑀢𑀸𑀦𑀻𑀢𑀺 𑀧𑀣𑀯𑀻𑀆𑀧𑀢𑁂𑀚𑀯𑀸𑀬𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀬𑁂𑀦 𑀧𑀦 𑀓𑀸𑀭𑀡𑁂𑀦 𑀢𑀸𑀦𑀺 𑀫𑀳𑀸𑀪𑀽𑀢𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀬𑁄 𑀘𑁂𑀢𑁆𑀣 𑀅𑀜𑁆𑀜𑁄 𑀯𑀺𑀦𑀺𑀘𑁆𑀙𑀬𑀦𑀬𑁄, 𑀲𑁄 𑀲𑀩𑁆𑀩𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀭𑀽𑀧𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑁄.

𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸𑀢𑀺 𑀏𑀢𑁆𑀣 𑀧𑀦 𑀘𑀢𑀼𑀦𑁆𑀦𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀘𑀢𑁆𑀢𑀸𑀭𑀺 𑀘 𑀫𑀳𑀸𑀪𑀽𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀸𑀤𑀸𑀬𑀸𑀢𑀺 𑀉𑀧𑀸𑀤𑀺𑀬𑀺𑀢𑁆𑀯𑀸, 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀸𑀬𑀸𑀢𑀺𑀧𑀺 𑀏𑀓𑁂. 𑀯𑀢𑁆𑀢𑀫𑀸𑀦𑀦𑁆𑀢𑀺 𑀅𑀬𑀜𑁆𑀘𑁂𑀢𑁆𑀣 𑀧𑀸𑀞𑀲𑁂𑀲𑁄. 𑀲𑀫𑀽𑀳𑀢𑁆𑀣𑁂 𑀯𑀸 𑀏𑀢𑀁 𑀲𑀸𑀫𑀺𑀯𑀘𑀦𑀁. 𑀢𑁂𑀦 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀲𑀫𑀽𑀳𑀁 𑀉𑀧𑀸𑀤𑀸𑀬 𑀧𑀯𑀢𑁆𑀢𑀫𑀸𑀦𑀁 𑀭𑀽𑀧𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑀩𑁆𑀩𑀢𑁆𑀣𑀸𑀧𑀺 𑀬𑀸𑀦𑀺 𑀘𑀢𑁆𑀢𑀸𑀭𑀺 𑀧𑀣𑀯𑀻𑀆𑀤𑀻𑀦𑀺 𑀫𑀳𑀸𑀪𑀽𑀢𑀸𑀦𑀺, 𑀬𑀜𑁆𑀘 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀢𑁆𑀢𑀫𑀸𑀦𑀁 𑀘𑀓𑁆𑀔𑀸𑀬𑀢𑀦𑀸𑀤𑀺𑀪𑁂𑀤𑁂𑀦 𑀅𑀪𑀺𑀥𑀫𑁆𑀫𑀧𑀸𑀴𑀺𑀬𑀫𑁂𑀯 𑀯𑀼𑀢𑁆𑀢𑀁 𑀢𑁂𑀯𑀻𑀲𑀢𑀺𑀯𑀺𑀥𑀁 𑀭𑀽𑀧𑀁, 𑀢𑀁 𑀲𑀩𑁆𑀩𑀫𑁆𑀧𑀺 ‘‘𑀭𑀽𑀧’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀧𑀦 𑀬𑀁 𑀯𑀺𑀜𑁆𑀜𑀸𑀡𑀁 𑀬𑀲𑁆𑀲 𑀦𑀸𑀫𑀲𑁆𑀲 𑀬𑀲𑁆𑀲 𑀘 𑀭𑀽𑀧𑀲𑁆𑀲 𑀬𑀲𑁆𑀲 𑀘 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀲 𑀯𑀲𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀸 𑀦𑀸𑀫𑀭𑀽𑀧𑀲𑀫𑀼𑀤𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀦𑀸𑀫𑀭𑀽𑀧𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀜𑁆𑀜𑀸𑀡𑀯𑀸𑀭𑀯𑀡𑁆𑀡𑀦𑀸

𑁧𑁦𑁧. 𑀯𑀺𑀜𑁆𑀜𑀸𑀡𑀯𑀸𑀭𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀓𑁆𑀔𑀼𑀫𑁆𑀳𑀺 𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼𑀢𑁄 𑀯𑀸 𑀚𑀸𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀏𑀯𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺. 𑀇𑀢𑀭𑀁 𑀧𑀦 𑀫𑀦𑁄𑀬𑁂𑀯 𑀯𑀺𑀜𑁆𑀜𑀸𑀡𑀦𑁆𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀁. 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀲𑁆𑀲 𑀢𑁂𑀪𑀽𑀫𑀓𑀯𑀺𑀧𑀸𑀓𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀗𑁆𑀔𑀸𑀭𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀧𑀦 𑀬𑁄 𑀲𑀗𑁆𑀔𑀸𑀭𑁄 𑀬𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀲 𑀯𑀲𑁂𑀦 𑀲𑀗𑁆𑀔𑀸𑀭𑀲𑀫𑀼𑀤𑀬𑀸 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀯𑀺𑀜𑁆𑀜𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀔𑀸𑀭𑀯𑀸𑀭𑀯𑀡𑁆𑀡𑀦𑀸

𑁧𑁦𑁨. 𑀲𑀗𑁆𑀔𑀸𑀭𑀯𑀸𑀭𑁂 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑁄 𑀲𑀗𑁆𑀔𑀸𑀭𑁄. 𑀯𑀺𑀢𑁆𑀣𑀸𑀭𑀯𑀸𑀭𑁂 𑀧𑀦𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀓𑀸𑀬𑀢𑁄 𑀧𑀯𑀢𑁆𑀢𑀲𑀗𑁆𑀔𑀸𑀭𑁄, 𑀓𑀸𑀬𑀤𑁆𑀯𑀸𑀭𑁂 𑀘𑁄𑀧𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀅𑀝𑁆𑀞𑀦𑁆𑀦𑀁, 𑀅𑀓𑀼𑀲𑀮𑀢𑁄 𑀤𑁆𑀯𑀸𑀤𑀲𑀦𑁆𑀦𑀦𑁆𑀢𑀺 𑀯𑀻𑀲𑀢𑀺𑀬𑀸 𑀓𑀸𑀬𑀲𑀜𑁆𑀘𑁂𑀢𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀘𑀻𑀲𑀗𑁆𑀔𑀸𑀭𑁄𑀢𑀺 𑀯𑀘𑀺𑀢𑁄 𑀧𑀯𑀢𑁆𑀢𑀲𑀗𑁆𑀔𑀸𑀭𑁄, 𑀯𑀘𑀻𑀤𑁆𑀯𑀸𑀭𑁂 𑀯𑀘𑀦𑀪𑁂𑀤𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀯𑀻𑀲𑀢𑀺𑀬𑀸 𑀏𑀯 𑀯𑀘𑀻𑀲𑀜𑁆𑀘𑁂𑀢𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺 𑀘𑀺𑀢𑁆𑀢𑀢𑁄 𑀧𑀯𑀢𑁆𑀢𑀲𑀗𑁆𑀔𑀸𑀭𑁄, 𑀓𑀸𑀬𑀯𑀘𑀻𑀤𑁆𑀯𑀸𑀭𑁂 𑀘𑁄𑀧𑀦𑀁 𑀅𑀓𑀢𑁆𑀯𑀸 𑀭𑀳𑁄 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀦𑁆𑀢𑀬𑀦𑁆𑀢𑀲𑁆𑀲 𑀧𑀯𑀢𑁆𑀢𑀸𑀦𑀁 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀏𑀓𑀽𑀦𑀢𑀺𑀁𑀲𑀫𑀦𑁄𑀲𑀜𑁆𑀘𑁂𑀢𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀧𑀦 𑀓𑀼𑀲𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀅𑀓𑀼𑀲𑀮𑀸𑀦𑀁 𑀲𑀳𑀚𑀸𑀢𑀸𑀤𑀺𑀯𑀲𑁂𑀦𑀸𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀗𑁆𑀔𑀸𑀭𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀯𑀺𑀚𑁆𑀚𑀸𑀯𑀸𑀭𑀯𑀡𑁆𑀡𑀦𑀸

𑁧𑁦𑁩. 𑀅𑀯𑀺𑀚𑁆𑀚𑀸𑀯𑀸𑀭𑁂 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑁂 𑀅𑀜𑁆𑀜𑀸𑀡𑀁, 𑀫𑁄𑀳𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀲 𑀦𑀬𑁄 𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀦𑁆𑀢𑀺𑀆𑀤𑀻𑀲𑀼. 𑀢𑀢𑁆𑀣 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁 𑀯𑁂𑀤𑀺𑀢𑀩𑁆𑀩𑀁 𑀅𑀦𑁆𑀢𑁄𑀕𑀥𑀢𑁄 𑀯𑀢𑁆𑀣𑀼𑀢𑁄 𑀆𑀭𑀫𑁆𑀫𑀡𑀢𑁄 𑀧𑀝𑀺𑀘𑁆𑀙𑀸𑀤𑀦𑀢𑁄 𑀘. 𑀢𑀣𑀸 𑀳𑀺 𑀢𑀁 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀤𑀼𑀓𑁆𑀔𑁂 𑀅𑀦𑁆𑀢𑁄𑀕𑀥𑀁, 𑀤𑀼𑀓𑁆𑀔𑀲𑀘𑁆𑀘𑀜𑁆𑀘𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦 𑀯𑀢𑁆𑀣𑀼, 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀆𑀭𑀫𑁆𑀫𑀡𑀁, 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀏𑀢𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀲𑁆𑀲 𑀬𑀸𑀣𑀸𑀯𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀦𑀺𑀯𑀸𑀭𑀡𑁂𑀦, 𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀸 𑀘𑁂𑀢𑁆𑀣 𑀅𑀧𑁆𑀧𑀤𑀸𑀦𑁂𑀦.

𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀁 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀯𑁂𑀤𑀺𑀢𑀩𑁆𑀩𑀁 𑀯𑀢𑁆𑀣𑀼𑀢𑁄 𑀆𑀭𑀫𑁆𑀫𑀡𑀢𑁄 𑀧𑀝𑀺𑀘𑁆𑀙𑀸𑀤𑀦𑀢𑁄 𑀘. 𑀦𑀺𑀭𑁄𑀥𑁂 𑀧𑀝𑀺𑀧𑀤𑀸𑀬𑀜𑁆𑀘 𑀅𑀜𑁆𑀜𑀸𑀡𑀁 𑀏𑀓𑁂𑀦𑁂𑀯 𑀓𑀸𑀭𑀡𑁂𑀦 𑀯𑁂𑀤𑀺𑀢𑀩𑁆𑀩𑀁 𑀧𑀝𑀺𑀘𑁆𑀙𑀸𑀤𑀦𑀢𑁄. 𑀦𑀺𑀭𑁄𑀥𑀧𑀝𑀺𑀧𑀤𑀸𑀬 𑀳𑀺 𑀧𑀝𑀺𑀘𑁆𑀙𑀸𑀤𑀓𑀫𑁂𑀯 𑀅𑀜𑁆𑀜𑀸𑀡𑀁 𑀢𑁂𑀲𑀁 𑀬𑀸𑀣𑀸𑀯𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀦𑀺𑀯𑀸𑀭𑀡𑁂𑀦, 𑀢𑁂𑀲𑀼 𑀘 𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀸 𑀅𑀧𑁆𑀧𑀤𑀸𑀦𑁂𑀦. 𑀦 𑀧𑀦 𑀢𑀢𑁆𑀣 𑀅𑀦𑁆𑀢𑁄𑀕𑀥𑀁, 𑀢𑀲𑁆𑀫𑀺𑀁 𑀲𑀘𑁆𑀘𑀤𑁆𑀯𑀬𑁂 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀦 𑀢𑀲𑁆𑀲 𑀢𑀁 𑀲𑀘𑁆𑀘𑀤𑁆𑀯𑀬𑀁 𑀯𑀢𑁆𑀣𑀼, 𑀅𑀲𑀳𑀚𑀸𑀢𑀢𑁆𑀢𑀸. 𑀦𑀸𑀭𑀫𑁆𑀫𑀡𑀁, 𑀢𑀤𑀸𑀭𑀩𑁆𑀪 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀧𑀘𑁆𑀙𑀺𑀫𑀜𑁆𑀳𑀺 𑀲𑀘𑁆𑀘𑀤𑁆𑀯𑀬𑀁 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑀁, 𑀦 𑀘𑁂𑀢𑁆𑀣 𑀅𑀦𑁆𑀥𑀪𑀽𑀢𑀁 𑀅𑀜𑁆𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀧𑀼𑀭𑀺𑀫𑀁 𑀧𑀦 𑀯𑀜𑁆𑀘𑀦𑀺𑀬𑀝𑁆𑀞𑁂𑀦 𑀲𑀪𑀸𑀯𑀮𑀓𑁆𑀔𑀡𑀲𑁆𑀲 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀁, 𑀢𑀢𑁆𑀣 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀲𑁂𑀦 𑀧𑀯𑀢𑁆𑀢𑀢𑀺.

𑀅𑀧𑀺𑀘 𑀤𑀼𑀓𑁆𑀔𑁂𑀢𑀺 𑀏𑀢𑁆𑀢𑀸𑀯𑀢𑀸 𑀲𑀗𑁆𑀕𑀳𑀢𑁄 𑀯𑀢𑁆𑀣𑀼𑀢𑁄 𑀆𑀭𑀫𑁆𑀫𑀡𑀢𑁄 𑀓𑀺𑀘𑁆𑀘𑀢𑁄 𑀘 𑀅𑀯𑀺𑀚𑁆𑀚𑀸 𑀤𑀻𑀧𑀺𑀢𑀸. 𑀤𑀼𑀓𑁆𑀔𑀲𑀫𑀼𑀤𑀬𑁂𑀢𑀺 𑀏𑀢𑁆𑀢𑀸𑀯𑀢𑀸 𑀯𑀢𑁆𑀣𑀼𑀢𑁄 𑀆𑀭𑀫𑁆𑀫𑀡𑀢𑁄 𑀓𑀺𑀘𑁆𑀘𑀢𑁄 𑀘. 𑀤𑀼𑀓𑁆𑀔𑀦𑀺𑀭𑁄𑀥𑁂 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬𑀸𑀢𑀺 𑀏𑀢𑁆𑀢𑀸𑀯𑀢𑀸 𑀓𑀺𑀘𑁆𑀘𑀢𑁄. 𑀅𑀯𑀺𑀲𑁂𑀲𑀢𑁄 𑀧𑀦 𑀅𑀜𑁆𑀜𑀸𑀡𑀦𑁆𑀢𑀺 𑀏𑀢𑁂𑀦 𑀲𑀪𑀸𑀯𑀢𑁄 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀜𑀸𑀢𑀩𑁆𑀩𑀸. 𑀆𑀲𑀯𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀧𑀦 𑀓𑀸𑀫𑀸𑀲𑀯𑀪𑀯𑀸𑀲𑀯𑀸 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀅𑀯𑀺𑀚𑁆𑀚𑀸𑀲𑀯𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯. 𑀧𑀼𑀩𑁆𑀩𑀼𑀧𑁆𑀧𑀦𑁆𑀦𑀸 𑀘𑁂𑀢𑁆𑀣 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀅𑀧𑀭𑀸𑀧𑀭𑀼𑀧𑁆𑀧𑀦𑁆𑀦𑀸𑀬 𑀅𑀯𑀺𑀚𑁆𑀚𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀅𑀯𑀺𑀚𑁆𑀚𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀯𑀯𑀸𑀭𑀯𑀡𑁆𑀡𑀦𑀸

𑁧𑁦𑁪. 𑀆𑀲𑀯𑀯𑀸𑀭𑁂 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸 𑀓𑀸𑀫𑀸𑀲𑀯𑀪𑀯𑀸𑀲𑀯𑀸𑀦𑀁 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀲𑀯𑀲𑁆𑀲 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯. 𑀅𑀧𑀭𑀸𑀧𑀭𑀼𑀧𑁆𑀧𑀦𑁆𑀦𑀸 𑀘𑁂𑀢𑁆𑀣 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀩𑁆𑀩𑀼𑀧𑁆𑀧𑀦𑁆𑀦𑀸 𑀅𑀯𑀺𑀚𑁆𑀚𑀸𑀬𑁂𑀯𑀲𑁆𑀲 𑀅𑀧𑀭𑀸𑀧𑀭𑀼𑀧𑁆𑀧𑀦𑁆𑀦𑀲𑁆𑀲 𑀅𑀯𑀺𑀚𑁆𑀚𑀸𑀲𑀯𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀅𑀬𑀁 𑀯𑀸𑀭𑁄 𑀬𑀸 𑀏𑀲𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀤𑁂𑀲𑀼 𑀚𑁂𑀝𑁆𑀞𑀺𑀓𑀸 𑀅𑀯𑀺𑀚𑁆𑀚𑀸, 𑀢𑀲𑁆𑀲𑀸𑀧𑀺 𑀧𑀘𑁆𑀘𑀬𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀏𑀯𑀁 𑀯𑀼𑀢𑁆𑀢𑁂𑀦 𑀯𑀸𑀭𑁂𑀦 𑀲𑀁𑀲𑀸𑀭𑀲𑁆𑀲 𑀅𑀦𑀫𑀢𑀕𑁆𑀕𑀢𑀸 𑀲𑀸𑀥𑀺𑀢𑀸 𑀳𑁄𑀢𑀺. 𑀓𑀣𑀁? 𑀆𑀲𑀯𑀲𑀫𑀼𑀤𑀬𑁂𑀦 𑀳𑀺 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄. 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁂𑀦𑀸𑀧𑀺 𑀆𑀲𑀯𑀲𑀫𑀼𑀤𑀬𑁄. 𑀏𑀯𑀁 𑀆𑀲𑀯𑀸 𑀅𑀯𑀺𑀚𑁆𑀚𑀸𑀬 𑀅𑀯𑀺𑀚𑁆𑀚𑀸𑀧𑀺 𑀆𑀲𑀯𑀸𑀦𑀁 𑀧𑀘𑁆𑀘𑀬𑁄𑀢𑀺 𑀓𑀢𑁆𑀯𑀸 𑀧𑀼𑀩𑁆𑀩𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬, 𑀢𑀲𑁆𑀲𑀸 𑀅𑀧𑀜𑁆𑀜𑀸𑀬𑀦𑀢𑁄 𑀲𑀁𑀲𑀸𑀭𑀲𑁆𑀲 𑀅𑀦𑀫𑀢𑀕𑁆𑀕𑀢𑀸 𑀲𑀺𑀤𑁆𑀥𑀸 𑀳𑁄𑀢𑀻𑀢𑀺.

𑀏𑀯𑀁 𑀲𑀩𑁆𑀩𑁂𑀧𑀺𑀫𑁂 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀓𑀫𑁆𑀫𑀧𑀣𑀯𑀸𑀭𑁄 𑀆𑀳𑀸𑀭𑀯𑀸𑀭𑁄 𑀤𑀼𑀓𑁆𑀔𑀯𑀸𑀭𑁄 𑀚𑀭𑀸-𑀫𑀭𑀡-𑀚𑀸𑀢𑀺-𑀪𑀯-𑀉𑀧𑀸𑀤𑀸𑀦-𑀢𑀡𑁆𑀳𑀸-𑀯𑁂𑀤𑀦𑀸-𑀨𑀲𑁆𑀲-𑀲𑀴𑀸𑀬𑀢𑀦-𑀦𑀸𑀫𑀭𑀽𑀧- 𑀯𑀺𑀜𑁆𑀜𑀸𑀡-𑀲𑀗𑁆𑀔𑀸𑀭-𑀅𑀯𑀺𑀚𑁆𑀚𑀸-𑀆𑀲𑀯𑀯𑀸𑀭𑁄𑀢𑀺 𑀲𑁄𑀴𑀲𑀯𑀸𑀭𑀸 𑀯𑀼𑀢𑁆𑀢𑀸.

𑀢𑁂𑀲𑀼 𑀏𑀓𑁂𑀓𑀲𑁆𑀲 𑀯𑀸𑀭𑀲𑁆𑀲 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀯𑀲𑁂𑀦 𑀤𑁆𑀯𑀺𑀥𑀸 𑀯𑀺𑀪𑀢𑁆𑀢𑀸 𑀤𑁆𑀯𑀢𑁆𑀢𑀺𑀁𑀲𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀇𑀫𑁂𑀲𑀼 𑀤𑁆𑀯𑀢𑁆𑀢𑀺𑀁𑀲𑀝𑁆𑀞𑀸𑀦𑁂𑀲𑀼 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀓𑀣𑀺𑀢𑀸𑀦𑀺. 𑀏𑀢𑁂𑀲𑀁𑀬𑁂𑀯 𑀯𑀺𑀢𑁆𑀣𑀸𑀭𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀲𑁄𑀴𑀲𑀲𑀼 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁 𑀓𑀣𑀺𑀢𑀁. 𑀣𑁂𑀭𑀲𑁆𑀲 𑀧𑀦 𑀫𑀢𑁂𑀦 𑀤𑁆𑀯𑀢𑁆𑀢𑀺𑀁𑀲𑀸𑀬𑀧𑀺 𑀞𑀸𑀦𑁂𑀲𑀼 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀘𑀢𑁆𑀢𑀸𑀭𑁄 𑀘 𑀫𑀕𑁆𑀕𑀸 𑀓𑀣𑀺𑀢𑀸𑀢𑀺. 𑀇𑀢𑀺 𑀲𑀓𑀮𑁂𑀧𑀺 𑀧𑀜𑁆𑀘𑀫𑀳𑀸𑀦𑀺𑀓𑀸𑀬𑀲𑀗𑁆𑀕𑀳𑀺𑀢𑁂 𑀩𑀼𑀤𑁆𑀥𑀯𑀘𑀦𑁂 𑀦𑀢𑁆𑀣𑀺 𑀢𑀁 𑀲𑀼𑀢𑁆𑀢𑀁, 𑀬𑀢𑁆𑀣 𑀤𑁆𑀯𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑁆𑀯𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀜𑁆𑀘 𑀅𑀭𑀳𑀢𑁆𑀢𑀁 𑀧𑀓𑀸𑀲𑀺𑀢𑀁 𑀅𑀜𑁆𑀜𑀢𑁆𑀭 𑀇𑀫𑀫𑁆𑀳𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀸𑀢𑀺.

𑀇𑀤𑀫𑀯𑁄𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀇𑀤𑀁 𑀤𑁆𑀯𑀢𑁆𑀢𑀺𑀁𑀲𑀸𑀬 𑀘𑀢𑀼𑀲𑀘𑁆𑀘𑀧𑀭𑀺𑀬𑀸𑀬𑁂𑀳𑀺 𑀤𑁆𑀯𑀢𑁆𑀢𑀺𑀁𑀲𑀸𑀬 𑀅𑀭𑀳𑀢𑁆𑀢𑀧𑀭𑀺𑀬𑀸𑀬𑁂𑀳𑀻𑀢𑀺 𑀘𑀢𑀼𑀲𑀝𑁆𑀞𑀺𑀬𑀸 𑀓𑀸𑀭𑀡𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀯𑁄𑀘, 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀆𑀲𑀯𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.