𑁭. 𑀯𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀢𑁆𑀣𑀲𑀼𑀢𑁆𑀢𑀁. 𑀢𑀢𑁆𑀣 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀯𑀢𑁆𑀣𑀦𑁆𑀢𑀺 𑀉𑀧𑀫𑀸𑀯𑀘𑀦𑀫𑁂𑀯𑁂𑀢𑀁. 𑀉𑀧𑀫𑀁 𑀓𑀭𑁄𑀦𑁆𑀢𑁄 𑀘 𑀪𑀕𑀯𑀸 𑀓𑀢𑁆𑀣𑀘𑀺 𑀧𑀞𑀫𑀁𑀬𑁂𑀯 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀓𑀢𑁆𑀣𑀘𑀺 𑀧𑀞𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀉𑀧𑀫𑀁, 𑀓𑀢𑁆𑀣𑀘𑀺 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀓𑀢𑁆𑀣𑀘𑀺 𑀅𑀢𑁆𑀣𑁂𑀦 𑀉𑀧𑀫𑀁.

𑀢𑀣𑀸 𑀳𑁂𑀲 𑁋 ‘‘𑀲𑁂𑀬𑁆𑀬𑀣𑀸𑀧𑀺𑀲𑁆𑀲𑀼, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀅𑀕𑀸𑀭𑀸 𑀲𑀤𑁆𑀯𑀸𑀭𑀸, 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀫𑀚𑁆𑀛𑁂 𑀞𑀺𑀢𑁄 𑀧𑀲𑁆𑀲𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁨𑁬𑁧) 𑀲𑀓𑀮𑀫𑁆𑀧𑀺 𑀤𑁂𑀯𑀤𑀽𑀢𑀲𑀼𑀢𑁆𑀢𑀁 𑀉𑀧𑀫𑀁 𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. ‘‘𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁩𑁮; 𑀧𑀝𑀺. 𑀫. 𑁧.𑁧𑁦𑁨) 𑀧𑀦 𑀦𑀬𑁂𑀦 𑀲𑀓𑀮𑀫𑁆𑀧𑀺 𑀇𑀤𑁆𑀥𑀺𑀯𑀺𑀥𑀫𑀢𑁆𑀣𑀁 𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. ‘‘𑀲𑁂𑀬𑁆𑀬𑀣𑀸𑀧𑀺 𑀩𑁆𑀭𑀸𑀳𑁆𑀫𑀡𑀧𑀼𑀭𑀺𑀲𑁄 𑀲𑀸𑀭𑀢𑁆𑀣𑀺𑀓𑁄 𑀲𑀸𑀭𑀕𑀯𑁂𑀲𑀻’’𑀢𑀺𑀆𑀤𑀺𑀦𑀸𑀯 (𑀫. 𑀦𑀺. 𑁧.𑁩𑁧𑁮) 𑀦𑀬𑁂𑀦 𑀲𑀓𑀮𑀫𑁆𑀧𑀺 𑀘𑀽𑀴𑀲𑀸𑀭𑁄𑀧𑀫𑀲𑀼𑀢𑁆𑀢𑀁 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁂 𑀓𑀼𑀮𑀧𑀼𑀢𑁆𑀢𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀲𑀼𑀢𑁆𑀢𑀁…𑀧𑁂… 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀅𑀮𑀕𑀤𑁆𑀤𑀢𑁆𑀣𑀺𑀓𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩𑁮) 𑀦𑀬𑁂𑀦 𑀲𑀓𑀮𑀫𑁆𑀧𑀺 𑀅𑀮𑀕𑀤𑁆𑀤𑀲𑀼𑀢𑁆𑀢𑀁 𑀫𑀳𑀸𑀲𑀸𑀭𑁄𑀧𑀫𑀲𑀼𑀢𑁆𑀢𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀲𑀼𑀢𑁆𑀢𑀸𑀦𑀺 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳.

𑀲𑁆𑀯𑀸𑀬𑀁 𑀇𑀥 𑀧𑀞𑀫𑀁 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀧𑀦𑁂𑀯𑀁 𑀪𑀕𑀯𑀸 𑀤𑀲𑁆𑀲𑁂𑀢𑀻𑀢𑀺? 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀯𑀸 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀯𑀸. 𑀬𑁂 𑀳𑀺 𑀧𑀼𑀕𑁆𑀕𑀮𑀸 𑀧𑀞𑀫𑀁 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀫𑀢𑁆𑀣𑀁 𑀲𑀼𑀔𑁂𑀦 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀧𑀞𑀫𑀁 𑀉𑀧𑀫𑀁 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀬𑀲𑁆𑀲𑀸 𑀘 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑀁 𑀧𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀲𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀢𑀲𑁆𑀫𑀸 𑀏𑀲 𑀤𑁂𑀲𑀦𑀸𑀯𑀺𑀮𑀸𑀲𑀫𑁆𑀧𑀢𑁆𑀢𑁄 𑀥𑀫𑁆𑀫𑀺𑀲𑁆𑀲𑀭𑁄 𑀥𑀫𑁆𑀫𑀭𑀸𑀚𑀸, 𑀲𑁄 𑀬𑀣𑀸 𑀬𑀣𑀸 𑀇𑀘𑁆𑀙𑀢𑀺, 𑀢𑀣𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀏𑀯𑀁 𑀇𑀫𑀺𑀦𑀸 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀯𑀸 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀯𑀸 𑀏𑀯𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀯𑀢𑁆𑀣𑀦𑁆𑀢𑀺 𑀧𑀓𑀢𑀺𑀧𑀭𑀺𑀲𑀼𑀤𑁆𑀥𑀁 𑀯𑀢𑁆𑀣𑀁. 𑀲𑀁𑀓𑀺𑀮𑀺𑀝𑁆𑀞𑀁 𑀫𑀮𑀕𑁆𑀕𑀳𑀺𑀢𑀦𑁆𑀢𑀺 𑀆𑀕𑀦𑁆𑀢𑀼𑀓𑁂𑀦 𑀧𑀁𑀲𑀼𑀭𑀚𑀸𑀤𑀺𑀦𑀸 𑀲𑀁𑀓𑀺𑀮𑁂𑀲𑁂𑀦 𑀲𑀁𑀓𑀺𑀮𑀺𑀝𑁆𑀞𑀁, 𑀲𑁂𑀤𑀚𑀮𑁆𑀮𑀺𑀓𑀸𑀤𑀺𑀦𑀸 𑀫𑀮𑁂𑀦 𑀕𑀳𑀺𑀢𑀢𑁆𑀢𑀸 𑀫𑀮𑀕𑁆𑀕𑀳𑀺𑀢𑀁. 𑀭𑀗𑁆𑀕𑀚𑀸𑀢𑁂𑀢𑀺 𑀏𑀢𑁆𑀣 𑀭𑀗𑁆𑀕𑀫𑁂𑀯 𑀭𑀗𑁆𑀕𑀚𑀸𑀢𑀁. 𑀉𑀧𑀲𑀁𑀳𑀭𑁂𑀬𑁆𑀬𑀸𑀢𑀺 𑀉𑀧𑀦𑀸𑀫𑁂𑀬𑁆𑀬. 𑀬𑀤𑀺 𑀦𑀻𑀮𑀓𑀸𑀬𑀸𑀢𑀺 𑀦𑀻𑀮𑀓𑀸𑀬 𑀯𑀸, 𑀦𑀻𑀮𑀓𑀢𑁆𑀣𑀸𑀬 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. 𑀭𑀚𑀓𑁄 𑀳𑀺 𑀦𑀻𑀮𑀓𑀢𑁆𑀣𑀸𑀬 𑀉𑀧𑀲𑀁𑀳𑀭𑀦𑁆𑀢𑁄 𑀓𑀁𑀲𑀦𑀻𑀮𑀧𑀮𑀸𑀲𑀦𑀻𑀮𑀸𑀤𑀺𑀓𑁂 𑀦𑀻𑀮𑀭𑀗𑁆𑀕𑁂 𑀉𑀧𑀲𑀁𑀳𑀭𑀢𑀺. 𑀧𑀻𑀢𑀓𑀢𑁆𑀣𑀸𑀬 𑀉𑀧𑀲𑀁𑀳𑀭𑀦𑁆𑀢𑁄 𑀓𑀡𑀺𑀓𑀸𑀭𑀧𑀼𑀧𑁆𑀨𑀲𑀤𑀺𑀲𑁂 𑀧𑀻𑀢𑀓𑀭𑀗𑁆𑀕𑁂. 𑀮𑁄𑀳𑀺𑀢𑀓𑀢𑁆𑀣𑀸𑀬 𑀉𑀧𑀲𑀁𑀳𑀭𑀦𑁆𑀢𑁄 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀲𑀤𑀺𑀲𑁂 𑀮𑁄𑀳𑀺𑀢𑀓𑀭𑀗𑁆𑀕𑁂. 𑀫𑀜𑁆𑀚𑀺𑀝𑁆𑀞𑀓𑀢𑁆𑀣𑀸𑀬 𑀉𑀧𑀲𑀁𑀳𑀭𑀦𑁆𑀢𑁄 𑀓𑀡𑀯𑀻𑀭𑀧𑀼𑀧𑁆𑀨𑀲𑀤𑀺𑀲𑁂 𑀫𑀦𑁆𑀤𑀭𑀢𑁆𑀢𑀭𑀗𑁆𑀕𑁂. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀤𑀺 𑀦𑀻𑀮𑀓𑀸𑀬…𑀧𑁂… 𑀬𑀤𑀺 𑀫𑀜𑁆𑀚𑀺𑀝𑁆𑀞𑀓𑀸𑀬𑀸’’𑀢𑀺.

𑀤𑀼𑀭𑀢𑁆𑀢𑀯𑀡𑁆𑀡𑀫𑁂𑀯𑀲𑁆𑀲𑀸𑀢𑀺 𑀤𑀼𑀝𑁆𑀞𑀼 𑀭𑀜𑁆𑀚𑀺𑀢𑀯𑀡𑁆𑀡𑀫𑁂𑀯 𑀅𑀲𑁆𑀲. 𑀅𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀫𑁂𑀯𑀲𑁆𑀲𑀸𑀢𑀺 𑀦𑀻𑀮𑀯𑀡𑁆𑀡𑁄𑀧𑀺𑀲𑁆𑀲 𑀧𑀭𑀺𑀲𑀼𑀤𑁆𑀥𑁄 𑀦 𑀪𑀯𑁂𑀬𑁆𑀬, 𑀲𑁂𑀲𑀯𑀡𑁆𑀡𑁄𑀧𑀺. 𑀢𑀸𑀤𑀺𑀲𑀜𑁆𑀳𑀺 𑀯𑀢𑁆𑀣𑀁 𑀦𑀻𑀮𑀓𑀼𑀫𑁆𑀪𑀺𑀬𑀸 𑀧𑀓𑁆𑀔𑀺𑀢𑁆𑀢𑀫𑁆𑀧𑀺 𑀲𑀼𑀦𑀻𑀮𑀁 𑀦 𑀳𑁄𑀢𑀺, 𑀲𑁂𑀲𑀓𑀼𑀫𑁆𑀪𑀻𑀲𑀼 𑀧𑀓𑁆𑀔𑀺𑀢𑁆𑀢𑀫𑁆𑀧𑀺 𑀧𑀻𑀢𑀓𑀸𑀤𑀺𑀯𑀡𑁆𑀡𑀁 𑀦 𑀳𑁄𑀢𑀺, 𑀫𑀺𑀮𑀸𑀢𑀦𑀻𑀮 𑀓𑀼𑀭𑀡𑁆𑀟-𑀓𑀡𑀺𑀓𑀸𑀭-𑀩𑀦𑁆𑀥𑀼𑀚𑀻𑀯𑀓-𑀓𑀡𑀯𑀻𑀭𑀧𑀼𑀧𑁆𑀨𑀯𑀡𑁆𑀡𑀫𑁂𑀯 𑀳𑁄𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀢𑀁 𑀯𑀢𑁆𑀣𑀁 𑀓𑀺𑀲𑁆𑀲 𑀳𑁂𑀢𑀼 𑀓𑀺𑀁 𑀓𑀸𑀭𑀡𑀸 𑀈𑀤𑀺𑀲𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀯𑀸 𑀯𑀢𑁆𑀣𑁂 𑀭𑀗𑁆𑀕𑀚𑀸𑀢𑀁 𑀓𑀺𑀲𑁆𑀲 𑀳𑁂𑀢𑀼 𑀈𑀤𑀺𑀲𑀁 𑀤𑀼𑀭𑀢𑁆𑀢𑀯𑀡𑁆𑀡𑀁 𑀅𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀁 𑀳𑁄𑀢𑀻𑀢𑀺? 𑀬𑀲𑁆𑀫𑀸 𑀧𑀦𑀲𑁆𑀲 𑀯𑀢𑁆𑀣𑀲𑁆𑀲 𑀲𑀁𑀓𑀺𑀮𑀺𑀝𑁆𑀞𑀪𑀸𑀯𑁄𑀬𑁂𑀯𑁂𑀢𑁆𑀣 𑀓𑀸𑀭𑀡𑀁, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺, 𑀢𑀲𑁆𑀫𑀸 ‘‘𑀅𑀧𑀭𑀺𑀲𑀼𑀤𑁆𑀥𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀯𑀢𑁆𑀣𑀲𑁆𑀲𑀸’’𑀢𑀺 𑀆𑀳.

𑀏𑀯𑀫𑁂𑀯 𑀔𑁄𑀢𑀺 𑀉𑀧𑀫𑀸𑀲𑀫𑁆𑀧𑀝𑀺𑀧𑀸𑀤𑀦𑀁. 𑀘𑀺𑀢𑁆𑀢𑁂 𑀲𑀁𑀓𑀺𑀮𑀺𑀝𑁆𑀞𑁂𑀢𑀺 𑀘𑀺𑀢𑁆𑀢𑀫𑁆𑀳𑀺 𑀲𑀁𑀓𑀺𑀮𑀺𑀝𑁆𑀞𑀫𑁆𑀳𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀲𑀁𑀓𑀺𑀮𑀺𑀝𑁆𑀞𑀯𑀢𑁆𑀣𑁂𑀦 𑀑𑀧𑀫𑁆𑀫𑀁 𑀅𑀓𑀸𑀲𑀻𑀢𑀺 𑀘𑁂, 𑀯𑀸𑀬𑀸𑀫𑀫𑀳𑀧𑁆𑀨𑀮𑀤𑀲𑁆𑀲𑀦𑀢𑁆𑀣𑀁. 𑀬𑀣𑀸 𑀳𑀺 𑀆𑀕𑀦𑁆𑀢𑀼𑀓𑁂𑀳𑀺 𑀫𑀮𑁂𑀳𑀺 𑀲𑀁𑀓𑀺𑀮𑀺𑀝𑁆𑀞𑀁 𑀯𑀢𑁆𑀣𑀁 𑀧𑀓𑀢𑀺𑀬𑀸 𑀧𑀡𑁆𑀟𑀭𑀢𑁆𑀢𑀸 𑀧𑀼𑀦 𑀥𑁄𑀯𑀻𑀬𑀫𑀸𑀦𑀁 𑀧𑀡𑁆𑀟𑀭𑀁 𑀳𑁄𑀢𑀺, 𑀦 𑀢𑀢𑁆𑀣 𑀚𑀸𑀢𑀺𑀓𑀸𑀴𑀓𑁂 𑀯𑀺𑀬 𑀏𑀴𑀓𑀮𑁄𑀫𑁂 𑀯𑀸𑀬𑀸𑀫𑁄 𑀦𑀺𑀧𑁆𑀨𑀮𑁄 𑀳𑁄𑀢𑀺, 𑀏𑀯𑀁 𑀘𑀺𑀢𑁆𑀢𑀫𑁆𑀧𑀺 𑀆𑀕𑀦𑁆𑀢𑀼𑀓𑁂𑀳𑀺 𑀓𑀺𑀮𑁂𑀲𑁂𑀳𑀺 𑀲𑀁𑀓𑀺𑀮𑀺𑀝𑁆𑀞𑀁. 𑀧𑀓𑀢𑀺𑀬𑀸 𑀧𑀦 𑀢𑀁 𑀲𑀓𑀮𑁂𑀧𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀯𑀸𑀭𑁂 𑀧𑀡𑁆𑀟𑀭𑀫𑁂𑀯. 𑀬𑀣𑀸𑀳 𑁋 ‘‘𑀧𑀪𑀲𑁆𑀲𑀭𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀜𑁆𑀘 𑀔𑁄 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞’’𑀦𑁆𑀢𑀺 (𑀅. 𑀦𑀺. 𑁧.𑁫𑁧). 𑀢𑀁 𑀯𑀺𑀲𑁄𑀥𑀻𑀬𑀫𑀸𑀦𑀁 𑀲𑀓𑁆𑀓𑀸 𑀧𑀪𑀲𑁆𑀲𑀭𑀢𑀭𑀁 𑀓𑀸𑀢𑀼𑀁, 𑀦 𑀢𑀢𑁆𑀣 𑀯𑀸𑀬𑀸𑀫𑁄 𑀦𑀺𑀧𑁆𑀨𑀮𑁄𑀢𑀺 𑀏𑀯𑀁 𑀯𑀸𑀬𑀸𑀫𑀫𑀳𑀧𑁆𑀨𑀮𑀤𑀲𑁆𑀲𑀦𑀢𑁆𑀣𑀁 𑀲𑀁𑀓𑀺𑀮𑀺𑀝𑁆𑀞𑀯𑀢𑁆𑀣𑁂𑀦 𑀑𑀧𑀫𑁆𑀫𑀁 𑀅𑀓𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸𑀢𑀺 𑀈𑀤𑀺𑀲𑁂 𑀘𑀺𑀢𑁆𑀢𑁂 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸, 𑀤𑀼𑀕𑁆𑀕𑀢𑀺𑀁 𑀏𑀯 𑀏𑀲 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀦𑀸𑀜𑁆𑀜𑀦𑁆𑀢𑀺 𑀏𑀯𑀁 𑀤𑀼𑀕𑁆𑀕𑀢𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀅𑀯𑀲𑁆𑀲𑀁 𑀪𑀸𑀯𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸 𑀘𑀸𑀬𑀁 𑀤𑀼𑀕𑁆𑀕𑀢𑀺 𑀦𑀸𑀫 𑀧𑀝𑀺𑀧𑀢𑁆𑀢𑀺𑀤𑀼𑀕𑁆𑀕𑀢𑀺, 𑀕𑀢𑀺𑀤𑀼𑀕𑁆𑀕𑀢𑀻𑀢𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀧𑀝𑀺𑀧𑀢𑁆𑀢𑀺𑀤𑀼𑀕𑁆𑀕𑀢𑀺𑀧𑀺 𑀅𑀕𑀸𑀭𑀺𑀬𑀧𑀝𑀺𑀧𑀢𑁆𑀢𑀺𑀤𑀼𑀕𑁆𑀕𑀢𑀺, 𑀅𑀦𑀕𑀸𑀭𑀺𑀬𑀧𑀝𑀺𑀧𑀢𑁆𑀢𑀺𑀤𑀼𑀕𑁆𑀕𑀢𑀻𑀢𑀺 𑀤𑀼𑀯𑀺𑀥𑀸 𑀳𑁄𑀢𑀺.

𑀅𑀕𑀸𑀭𑀺𑀬𑁄 𑀳𑀺 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀲𑀓𑀮𑁂𑀧𑀺 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀧𑀽𑀭𑁂𑀢𑀺, 𑀅𑀬𑀫𑀲𑁆𑀲 𑀅𑀕𑀸𑀭𑀺𑀬𑀧𑀝𑀺𑀧𑀢𑁆𑀢𑀺𑀤𑀼𑀕𑁆𑀕𑀢𑀺. 𑀲𑁄 𑀢𑀢𑁆𑀣 𑀞𑀺𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀫𑁆𑀧𑀺 𑀕𑀘𑁆𑀙𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀫𑁆𑀧𑀺, 𑀧𑁂𑀢𑁆𑀢𑀺𑀯𑀺𑀲𑀬𑀫𑁆𑀧𑀺 𑀕𑀘𑁆𑀙𑀢𑀺, 𑀅𑀬𑀫𑀲𑁆𑀲 𑀕𑀢𑀺𑀤𑀼𑀕𑁆𑀕𑀢𑀺.

𑀅𑀦𑀕𑀸𑀭𑀺𑀬𑁄𑀧𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀁 𑀕𑀘𑁆𑀙𑀢𑀺, 𑀯𑁂𑀚𑁆𑀚𑀓𑀫𑁆𑀫𑀁 𑀓𑀭𑁄𑀢𑀺, 𑀲𑀗𑁆𑀖𑀪𑁂𑀤𑀸𑀬 𑀘𑁂𑀢𑀺𑀬𑀪𑁂𑀤𑀸𑀬 𑀧𑀭𑀓𑁆𑀓𑀫𑀢𑀺, 𑀯𑁂𑀴𑀼𑀤𑀸𑀦𑀸𑀤𑀻𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀲𑀓𑀮𑀫𑁆𑀧𑀺 𑀅𑀦𑀸𑀘𑀸𑀭𑀁 𑀅𑀕𑁄𑀘𑀭𑀜𑁆𑀘 𑀧𑀭𑀺𑀧𑀽𑀭𑁂𑀢𑀺, 𑀅𑀬𑀫𑀲𑁆𑀲 𑀅𑀦𑀕𑀸𑀭𑀺𑀬𑀧𑀝𑀺𑀧𑀢𑁆𑀢𑀺𑀤𑀼𑀕𑁆𑀕𑀢𑀺.𑀲𑁄 𑀢𑀢𑁆𑀣 𑀞𑀺𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀫𑁆𑀧𑀺 𑀕𑀘𑁆𑀙𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀫𑁆𑀧𑀺, 𑀧𑁂𑀢𑁆𑀢𑀺𑀯𑀺𑀲𑀬𑀫𑁆𑀧𑀺 𑀕𑀘𑁆𑀙𑀢𑀺 𑀲𑀫𑀡𑀬𑀓𑁆𑀔𑁄 𑀦𑀸𑀫 𑀳𑁄𑀢𑀺 𑀲𑀫𑀡𑀧𑁂𑀢𑁄, 𑀆𑀤𑀺𑀢𑁆𑀢𑁂𑀳𑀺 𑀲𑀗𑁆𑀖𑀸𑀝𑀺𑀆𑀤𑀻𑀳𑀺 𑀲𑀫𑁆𑀧𑀚𑁆𑀚𑀮𑀺𑀢𑀓𑀸𑀬𑁄 𑀅𑀝𑁆𑀝𑀲𑁆𑀲𑀭𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀢𑀺, 𑀅𑀬𑀫𑀲𑁆𑀲 𑀕𑀢𑀺𑀤𑀼𑀕𑁆𑀕𑀢𑀺.

𑀲𑁂𑀬𑁆𑀬𑀣𑀸𑀧𑀻𑀢𑀺 𑀲𑀼𑀓𑁆𑀓𑀧𑀓𑁆𑀔𑀁 𑀤𑀲𑁆𑀲𑁂𑀢𑀼𑀫𑀸𑀭𑀤𑁆𑀥𑁄, 𑀢𑀲𑁆𑀲𑀢𑁆𑀣𑁄 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑀧𑀘𑁆𑀘𑀦𑀻𑀓𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣𑀸𑀧𑀺 𑀘 𑀲𑀼𑀕𑀢𑀺 𑀦𑀸𑀫 𑀧𑀝𑀺𑀧𑀢𑁆𑀢𑀺𑀲𑀼𑀕𑀢𑀺 𑀕𑀢𑀺𑀲𑀼𑀕𑀢𑀻𑀢𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀧𑀝𑀺𑀧𑀢𑁆𑀢𑀺𑀲𑀼𑀕𑀢𑀺𑀧𑀺 𑀅𑀕𑀸𑀭𑀺𑀬𑀧𑀝𑀺𑀧𑀢𑁆𑀢𑀺𑀲𑀼𑀕𑀢𑀺 𑀅𑀦𑀕𑀸𑀭𑀺𑀬𑀧𑀝𑀺𑀧𑀢𑁆𑀢𑀺𑀲𑀼𑀕𑀢𑀻𑀢𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀅𑀕𑀸𑀭𑀺𑀬𑁄 𑀳𑀺 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀧𑀺 𑀯𑀺𑀭𑀫𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸𑀧𑀺, 𑀲𑀓𑀮𑁂𑀧𑀺 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑁂 𑀧𑀭𑀺𑀧𑀽𑀭𑁂𑀢𑀺, 𑀅𑀬𑀫𑀲𑁆𑀲 𑀅𑀕𑀸𑀭𑀺𑀬𑀧𑀝𑀺𑀧𑀢𑁆𑀢𑀺𑀲𑀼𑀕𑀢𑀺. 𑀲𑁄 𑀢𑀢𑁆𑀣 𑀞𑀺𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀫𑀦𑀼𑀲𑁆𑀲𑀫𑀳𑀦𑁆𑀢𑀢𑀫𑁆𑀧𑀺 𑀤𑁂𑀯𑀫𑀳𑀦𑁆𑀢𑀢𑀫𑁆𑀧𑀺 𑀉𑀧𑀧𑀚𑁆𑀚𑀢𑀺, 𑀅𑀬𑀫𑀲𑁆𑀲 𑀕𑀢𑀺𑀲𑀼𑀕𑀢𑀺.

𑀅𑀦𑀕𑀸𑀭𑀺𑀬𑁄𑀧𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑁄 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀲𑁄𑀥𑁂𑀢𑀺, 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀢𑀺, 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀼 𑀅𑀢𑁆𑀢𑀦𑁄 𑀅𑀦𑀼𑀓𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀧𑀦𑁆𑀢𑀲𑁂𑀦𑀸𑀲𑀦𑁂 𑀧𑀝𑀺𑀲𑁂𑀯𑀫𑀸𑀦𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀪𑀸𑀯𑁂𑀢𑀺…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀬𑀫𑀲𑁆𑀲 𑀅𑀦𑀕𑀸𑀭𑀺𑀬𑀧𑀝𑀺𑀧𑀢𑁆𑀢𑀺𑀲𑀼𑀕𑀢𑀺. 𑀲𑁄 𑀢𑀢𑁆𑀣 𑀞𑀺𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀫𑀦𑀼𑀲𑁆𑀲𑀮𑁄𑀓𑁂 𑀯𑀸 𑀢𑀻𑀲𑀼 𑀫𑀳𑀸𑀓𑀼𑀮𑁂𑀲𑀼, 𑀙𑀲𑀼 𑀯𑀸 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼, 𑀤𑀲𑀲𑀼 𑀯𑀸 𑀩𑁆𑀭𑀳𑁆𑀫𑀪𑀯𑀦𑁂𑀲𑀼, 𑀧𑀜𑁆𑀘𑀲𑀼 𑀯𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼, 𑀘𑀢𑀽𑀲𑀼 𑀯𑀸 𑀆𑀭𑀼𑀧𑁆𑀧𑁂𑀲𑀼 𑀉𑀧𑀧𑀚𑁆𑀚𑀢𑀺, 𑀅𑀬𑀫𑀲𑁆𑀲 𑀕𑀢𑀺𑀲𑀼𑀕𑀢𑀻𑀢𑀺.

𑁭𑁧. 𑀏𑀯𑀁 𑀲𑀁𑀓𑀺𑀮𑀺𑀝𑁆𑀞𑁂 𑀘𑀺𑀢𑁆𑀢𑁂 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸, 𑀅𑀲𑀁𑀓𑀺𑀮𑀺𑀝𑁆𑀞𑁂 𑀘 𑀲𑀼𑀕𑀢𑀻𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀲𑀁𑀓𑀺𑀮𑀺𑀝𑁆𑀞𑀁 𑀳𑁄𑀢𑀺, 𑀢𑁂 𑀤𑀲𑁆𑀲𑁂𑀦𑁆𑀢𑁄 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸? 𑀅𑀪𑀺𑀚𑁆𑀛𑀸 𑀯𑀺𑀲𑀫𑀮𑁄𑀪𑁄𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑁄 𑀅𑀪𑀺𑀚𑁆𑀛𑀸, 𑀧𑀭𑀪𑀡𑁆𑀟𑁂 𑀯𑀺𑀲𑀫𑀮𑁄𑀪𑁄. 𑀅𑀣 𑀯𑀸 𑀲𑀓𑀪𑀡𑁆𑀟𑁂 𑀯𑀸 𑀧𑀭𑀪𑀡𑁆𑀟𑁂 𑀯𑀸 𑀳𑁄𑀢𑀼, 𑀬𑀼𑀢𑁆𑀢𑀧𑀢𑁆𑀢𑀝𑁆𑀞𑀸𑀦𑁂 𑀙𑀦𑁆𑀤𑀭𑀸𑀕𑁄 𑀅𑀪𑀺𑀚𑁆𑀛𑀸, 𑀅𑀬𑀼𑀢𑁆𑀢𑀸𑀧𑀢𑁆𑀢𑀝𑁆𑀞𑀸𑀦𑁂 𑀯𑀺𑀲𑀫𑀮𑁄𑀪𑁄. 𑀣𑁂𑀭𑁄 𑀧𑀦𑀸𑀳 ‘‘𑀓𑀺𑀲𑁆𑀲 𑀯𑀺𑀦𑀺𑀩𑁆𑀪𑁄𑀕𑀁 𑀓𑀭𑁄𑀣, 𑀬𑀼𑀢𑁆𑀢𑁂 𑀯𑀸 𑀅𑀬𑀼𑀢𑁆𑀢𑁂 𑀯𑀸 𑀳𑁄𑀢𑀼, ‘𑀭𑀸𑀕𑁄 𑀯𑀺𑀲𑀫𑀁 𑀤𑁄𑀲𑁄 𑀯𑀺𑀲𑀫𑀁 𑀫𑁄𑀳𑁄 𑀯𑀺𑀲𑀫’𑀦𑁆𑀢𑀺 (𑀯𑀺𑀪. 𑁯𑁨𑁪) 𑀯𑀘𑀦𑀢𑁄 𑀦 𑀓𑁄𑀘𑀺 𑀮𑁄𑀪𑁄 𑀅𑀯𑀺𑀲𑀫𑁄 𑀦𑀸𑀫, 𑀢𑀲𑁆𑀫𑀸 𑀮𑁄𑀪𑁄𑀬𑁂𑀯 𑀅𑀪𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀅𑀪𑀺𑀚𑁆𑀛𑀸, 𑀯𑀺𑀲𑀫𑀝𑁆𑀞𑁂𑀦 𑀯𑀺𑀲𑀫𑀁, 𑀏𑀓𑀢𑁆𑀣𑀫𑁂𑀢𑀁 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺. 𑀲𑁄 𑀧𑀦𑁂𑀲 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀺𑀢𑁆𑀢𑀁 𑀤𑀽𑀲𑁂𑀢𑀺, 𑀑𑀪𑀸𑀲𑀺𑀢𑀼𑀁 𑀦 𑀤𑁂𑀢𑀺. 𑀢𑀲𑁆𑀫𑀸 ‘‘𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺 𑀯𑀼𑀘𑁆𑀘𑀢𑀺.

𑀬𑀣𑀸 𑀘𑁂𑀲, 𑀏𑀯𑀁 𑀦𑀯𑀯𑀺𑀥𑀆𑀖𑀸𑀢𑀯𑀢𑁆𑀣𑀼𑀲𑀫𑁆𑀪𑀯𑁄 𑀩𑁆𑀬𑀸𑀧𑀸𑀤𑁄. 𑀤𑀲𑀯𑀺𑀥𑀆𑀖𑀸𑀢𑀯𑀢𑁆𑀣𑀼𑀲𑀫𑁆𑀪𑀯𑁄 𑀓𑁄𑀥𑁄. 𑀧𑀼𑀦𑀧𑁆𑀧𑀼𑀦𑀁 𑀘𑀺𑀢𑁆𑀢𑀧𑀭𑀺𑀬𑁄𑀦𑀦𑁆𑀥𑀦𑁄 𑀉𑀧𑀦𑀸𑀳𑁄. 𑀅𑀕𑀸𑀭𑀺𑀬𑀲𑁆𑀲 𑀯𑀸 𑀅𑀦𑀕𑀸𑀭𑀺𑀬𑀲𑁆𑀲 𑀯𑀸 𑀲𑀼𑀓𑀢𑀓𑀭𑀡𑀯𑀺𑀦𑀸𑀲𑀦𑁄 𑀫𑀓𑁆𑀔𑁄. 𑀅𑀕𑀸𑀭𑀺𑀬𑁄𑀧𑀺 𑀳𑀺 𑀓𑁂𑀦𑀘𑀺 𑀅𑀦𑀼𑀓𑀫𑁆𑀧𑀓𑁂𑀦 𑀤𑀮𑀺𑀤𑁆𑀤𑁄 𑀲𑀫𑀸𑀦𑁄 𑀉𑀘𑁆𑀘𑁂 𑀞𑀸𑀦𑁂 𑀞𑀧𑀺𑀢𑁄, 𑀅𑀧𑀭𑁂𑀦 𑀲𑀫𑀬𑁂𑀦 ‘‘𑀓𑀺𑀁 𑀢𑀬𑀸 𑀫𑀬𑁆𑀳𑀁 𑀓𑀢’’𑀦𑁆𑀢𑀺 𑀢𑀲𑁆𑀲 𑀲𑀼𑀓𑀢𑀓𑀭𑀡𑀁 𑀯𑀺𑀦𑀸𑀲𑁂𑀢𑀺. 𑀅𑀦𑀕𑀸𑀭𑀺𑀬𑁄𑀧𑀺 𑀲𑀸𑀫𑀡𑁂𑀭𑀓𑀸𑀮𑀢𑁄 𑀧𑀪𑀼𑀢𑀺 𑀆𑀘𑀭𑀺𑀬𑁂𑀦 𑀯𑀸 𑀉𑀧𑀚𑁆𑀛𑀸𑀬𑁂𑀦 𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀳𑀺 𑀘 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀓𑀣𑀸𑀦𑀬𑀧𑀓𑀭𑀡𑀓𑁄𑀲𑀮𑁆𑀮𑀸𑀤𑀻𑀦𑀺 𑀲𑀺𑀓𑁆𑀔𑀸𑀧𑀺𑀢𑁄, 𑀅𑀧𑀭𑁂𑀦 𑀲𑀫𑀬𑁂𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀅𑀘𑀺𑀢𑁆𑀢𑀻𑀓𑀢𑁄 𑀘𑀭𑀫𑀸𑀦𑁄 ‘‘𑀅𑀬𑀁 𑀅𑀫𑁆𑀳𑁂𑀳𑀺 𑀤𑀳𑀭𑀓𑀸𑀮𑁂 𑀏𑀯𑀁 𑀅𑀦𑀼𑀕𑁆𑀕𑀳𑀺𑀢𑁄 𑀲𑀁𑀯𑀟𑁆𑀠𑀺𑀢𑁄 𑀘, 𑀅𑀣 𑀧𑀦𑀺𑀤𑀸𑀦𑀺 𑀦𑀺𑀲𑁆𑀲𑀺𑀦𑁂𑀳𑁄 𑀚𑀸𑀢𑁄’’𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀓𑀺𑀁 𑀫𑀬𑁆𑀳𑀁 𑀢𑀼𑀫𑁆𑀳𑁂𑀳𑀺 𑀓𑀢’’𑀦𑁆𑀢𑀺 𑀢𑁂𑀲𑀁 𑀲𑀼𑀓𑀢𑀓𑀭𑀡𑀁 𑀯𑀺𑀦𑀸𑀲𑁂𑀢𑀺, 𑀢𑀲𑁆𑀲 𑀲𑁄 𑀲𑀼𑀓𑀢𑀓𑀭𑀡𑀯𑀺𑀦𑀸𑀲𑀦𑁄 𑀫𑀓𑁆𑀔𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀺𑀢𑁆𑀢𑀁 𑀤𑀽𑀲𑁂𑀢𑀺, 𑀑𑀪𑀸𑀲𑀺𑀢𑀼𑀁 𑀦 𑀤𑁂𑀢𑀺. 𑀢𑀲𑁆𑀫𑀸 ‘‘𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺 𑀯𑀼𑀘𑁆𑀘𑀢𑀺.

𑀬𑀣𑀸 𑀘𑀸𑀬𑀁, 𑀏𑀯𑀁 𑀩𑀳𑀼𑀲𑁆𑀲𑀼𑀢𑁂𑀧𑀺 𑀧𑀼𑀕𑁆𑀕𑀮𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 ‘‘𑀈𑀤𑀺𑀲𑀲𑁆𑀲 𑀘𑁂𑀯 𑀩𑀳𑀼𑀲𑁆𑀲𑀼𑀢𑀲𑁆𑀲 𑀅𑀦𑀺𑀬𑀢𑀸 𑀕𑀢𑀺, 𑀢𑀯 𑀯𑀸 𑀫𑀫 𑀯𑀸 𑀓𑁄 𑀯𑀺𑀲𑁂𑀲𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀬𑀼𑀕𑀕𑁆𑀕𑀸𑀳𑀕𑀸𑀳𑀻 𑀧𑀴𑀸𑀲𑁄. 𑀧𑀭𑁂𑀲𑀁 𑀲𑀓𑁆𑀓𑀸𑀭𑀸𑀤𑀻𑀦𑀺 𑀔𑀻𑀬𑀦𑀸 𑀇𑀲𑁆𑀲𑀸. 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀁 𑀅𑀲𑀳𑀫𑀸𑀦𑀁 𑀫𑀘𑁆𑀙𑀭𑀺𑀬𑀁. 𑀯𑀜𑁆𑀘𑀦𑀺𑀓𑀘𑀭𑀺𑀬𑀪𑀽𑀢𑀸 𑀫𑀸𑀬𑀸. 𑀓𑁂𑀭𑀸𑀝𑀺𑀓𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀸𑀞𑁂𑀬𑁆𑀬𑀁. 𑀓𑁂𑀭𑀸𑀝𑀺𑀓𑁄 𑀳𑀺 𑀆𑀬𑀢𑀦𑀫𑀘𑁆𑀙𑁄 𑀯𑀺𑀬 𑀳𑁄𑀢𑀺. 𑀆𑀬𑀢𑀦𑀫𑀘𑁆𑀙𑁄 𑀦𑀸𑀫 𑀓𑀺𑀭 𑀫𑀘𑁆𑀙𑀸𑀦𑀁 𑀦𑀗𑁆𑀕𑀼𑀝𑁆𑀞𑀁 𑀤𑀲𑁆𑀲𑁂𑀢𑀺 𑀲𑀧𑁆𑀧𑀸𑀦𑀁 𑀲𑀻𑀲𑀁, ‘‘𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄 𑀅𑀳’’𑀦𑁆𑀢𑀺 𑀚𑀸𑀦𑀸𑀧𑁂𑀢𑀼𑀁. 𑀏𑀯𑀫𑁂𑀯 𑀓𑁂𑀭𑀸𑀝𑀺𑀓𑁄 𑀧𑀼𑀕𑁆𑀕𑀮𑁄 𑀬𑀁 𑀬𑀁 𑀲𑀼𑀢𑁆𑀢𑀦𑁆𑀢𑀺𑀓𑀁 𑀯𑀸 𑀆𑀪𑀺𑀥𑀫𑁆𑀫𑀺𑀓𑀁 𑀯𑀸 𑀉𑀧𑀲𑀗𑁆𑀓𑀫𑀢𑀺, 𑀢𑀁 𑀢𑀁 𑀏𑀯𑀁 𑀯𑀤𑀢𑀺 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀩𑀤𑁆𑀥𑀘𑀭𑁄, 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀅𑀦𑀼𑀓𑀫𑁆𑀧𑀓𑀸, 𑀦𑀸𑀳𑀁 𑀢𑀼𑀫𑁆𑀳𑁂 𑀫𑀼𑀜𑁆𑀘𑀸𑀫𑀻’’𑀢𑀺 ‘‘𑀏𑀯𑀫𑁂𑀢𑁂 ‘𑀲𑀕𑀸𑀭𑀯𑁄 𑀅𑀬𑀁 𑀅𑀫𑁆𑀳𑁂𑀲𑀼 𑀲𑀧𑁆𑀧𑀢𑀺𑀲𑁆𑀲𑁄’𑀢𑀺 𑀫𑀜𑁆𑀜𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀲𑁂𑀢𑀁 𑀓𑁂𑀭𑀸𑀝𑀺𑀓𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀸𑀞𑁂𑀬𑁆𑀬𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀺𑀢𑁆𑀢𑀁 𑀤𑀽𑀲𑁂𑀢𑀺, 𑀑𑀪𑀸𑀲𑀺𑀢𑀼𑀁 𑀦 𑀤𑁂𑀢𑀺. 𑀢𑀲𑁆𑀫𑀸 ‘‘𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺 𑀯𑀼𑀘𑁆𑀘𑀢𑀺.

𑀬𑀣𑀸 𑀘𑁂𑀢𑀁, 𑀏𑀯𑀁 𑀯𑀸𑀢𑀪𑀭𑀺𑀢𑀪𑀲𑁆𑀢𑀲𑀤𑀺𑀲𑀣𑀤𑁆𑀥𑀪𑀸𑀯𑀧𑀕𑁆𑀕𑀳𑀺𑀢𑀲𑀺𑀭𑀅𑀦𑀺𑀯𑀸𑀢𑀯𑀼𑀢𑁆𑀢𑀺𑀓𑀸𑀭𑀓𑀭𑀡𑁄 𑀣𑀫𑁆𑀪𑁄. 𑀢𑀤𑀼𑀢𑁆𑀢𑀭𑀺𑀓𑀭𑀡𑁄 𑀲𑀸𑀭𑀫𑁆𑀪𑁄. 𑀲𑁄 𑀤𑀼𑀯𑀺𑀥𑁂𑀦 𑀮𑀩𑁆𑀪𑀢𑀺 𑀅𑀓𑀼𑀲𑀮𑀯𑀲𑁂𑀦 𑀘𑁂𑀯 𑀓𑀼𑀲𑀮𑀯𑀲𑁂𑀦 𑀘. 𑀢𑀢𑁆𑀣 𑀅𑀕𑀸𑀭𑀺𑀬𑀲𑁆𑀲 𑀧𑀭𑁂𑀦 𑀓𑀢𑀁 𑀅𑀮𑀗𑁆𑀓𑀸𑀭𑀸𑀤𑀺𑀁 𑀤𑀺𑀲𑁆𑀯𑀸 𑀢𑀤𑁆𑀤𑀺𑀕𑀼𑀡𑀓𑀭𑀡𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄, 𑀅𑀦𑀕𑀸𑀭𑀺𑀬𑀲𑁆𑀲 𑀘 𑀬𑀢𑁆𑀢𑀓𑀁 𑀬𑀢𑁆𑀢𑀓𑀁 𑀧𑀭𑁄 𑀧𑀭𑀺𑀬𑀸𑀧𑀼𑀡𑀸𑀢𑀺 𑀯𑀸 𑀓𑀣𑁂𑀢𑀺 𑀯𑀸, 𑀫𑀸𑀦𑀯𑀲𑁂𑀦 𑀢𑀤𑁆𑀤𑀺𑀕𑀼𑀡𑀢𑀤𑁆𑀤𑀺𑀕𑀼𑀡𑀓𑀭𑀡𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀓𑀼𑀲𑀮𑁄. 𑀅𑀕𑀸𑀭𑀺𑀬𑀲𑁆𑀲 𑀧𑀦 𑀧𑀭𑀁 𑀏𑀓𑀁 𑀲𑀮𑀸𑀓𑀪𑀢𑁆𑀢𑀁 𑀤𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀤𑀸𑀢𑀼𑀓𑀸𑀫𑀢𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑁄, 𑀅𑀦𑀕𑀸𑀭𑀺𑀬𑀲𑁆𑀲 𑀘 𑀧𑀭𑁂𑀦 𑀏𑀓𑀦𑀺𑀓𑀸𑀬𑁂 𑀕𑀳𑀺𑀢𑁂 𑀫𑀸𑀦𑀁 𑀅𑀦𑀺𑀲𑁆𑀲𑀸𑀬 𑀓𑁂𑀯𑀮𑀁 𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑀸 𑀆𑀮𑀲𑀺𑀬𑀁 𑀅𑀪𑀺𑀪𑀼𑀬𑁆𑀬 𑀤𑁆𑀯𑁂 𑀦𑀺𑀓𑀸𑀬𑁂 𑀕𑀳𑁂𑀢𑀼𑀓𑀸𑀫𑀢𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑁄 𑀓𑀼𑀲𑀮𑁄. 𑀇𑀥 𑀧𑀦 𑀅𑀓𑀼𑀲𑀮𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀬𑀜𑁆𑀳𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀺𑀢𑁆𑀢𑀁 𑀤𑀽𑀲𑁂𑀢𑀺, 𑀑𑀪𑀸𑀲𑀺𑀢𑀼𑀁 𑀦 𑀤𑁂𑀢𑀺. 𑀢𑀲𑁆𑀫𑀸 ‘‘𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺 𑀯𑀼𑀘𑁆𑀘𑀢𑀺.

𑀬𑀣𑀸 𑀘𑀸𑀬𑀁, 𑀏𑀯𑀁 𑀚𑀸𑀢𑀺𑀆𑀤𑀻𑀦𑀺 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀲𑁆𑀲 𑀉𑀡𑁆𑀡𑀢𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀫𑀸𑀦𑁄, 𑀅𑀘𑁆𑀘𑀼𑀡𑁆𑀡𑀢𑀺𑀯𑀲𑁂𑀦 𑀅𑀢𑀺𑀫𑀸𑀦𑁄, 𑀫𑀤𑀕𑁆𑀕𑀳𑀡𑀸𑀓𑀸𑀭𑁄 𑀫𑀤𑁄, 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀧𑀫𑀸𑀤𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀺𑀢𑁆𑀢𑀁 𑀤𑀽𑀲𑁂𑀢𑀺, 𑀑𑀪𑀸𑀲𑀺𑀢𑀼𑀁 𑀦 𑀤𑁂𑀢𑀺. 𑀢𑀲𑁆𑀫𑀸 ‘‘𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺 𑀯𑀼𑀘𑁆𑀘𑀢𑀺.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀉𑀧𑀓𑁆𑀓𑀺𑀮𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀮𑁄𑀪𑀫𑀸𑀤𑀺𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺? 𑀢𑀲𑁆𑀲 𑀧𑀞𑀫𑀼𑀧𑁆𑀧𑀢𑁆𑀢𑀺𑀢𑁄. 𑀲𑀩𑁆𑀩𑀲𑀢𑁆𑀢𑀸𑀦𑀜𑁆𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑀧𑀦𑁆𑀦𑀸𑀦𑀁 𑀅𑀦𑁆𑀢𑀫𑀲𑁄 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺𑀬𑀫𑁆𑀧𑀺 𑀲𑀩𑁆𑀩𑀧𑀞𑀫𑀁 𑀪𑀯𑀦𑀺𑀓𑀦𑁆𑀢𑀺𑀯𑀲𑁂𑀦 𑀮𑁄𑀪𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀬𑀣𑀸𑀲𑀫𑁆𑀪𑀯𑀁 𑀇𑀢𑀭𑁂, 𑀦 𑀘 𑀏𑀢𑁂 𑀲𑁄𑀴𑀲𑁂𑀯 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸, 𑀏𑀢𑁂𑀦 𑀧𑀦 𑀦𑀬𑁂𑀦 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀕𑀳𑀺𑀢𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁭𑁨. 𑀏𑀢𑁆𑀢𑀸𑀯𑀢𑀸 𑀲𑀁𑀓𑀺𑀮𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑁄𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑀺 𑀯𑀺𑀤𑀺𑀢𑁆𑀯𑀸𑀢𑀺 𑀏𑀯𑀁 𑀚𑀸𑀦𑀺𑀢𑁆𑀯𑀸. 𑀧𑀚𑀳𑀢𑀻𑀢𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀧𑀚𑀳𑀢𑀺. 𑀢𑀢𑁆𑀣 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸𑀢𑀺 𑀤𑁆𑀯𑀺𑀥𑀸 𑀧𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀢𑀸𑀯 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑁄 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀫𑀤𑁄𑀢𑀺 𑀇𑀫𑁂 𑀙 𑀓𑀺𑀮𑁂𑀲𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺. 𑀩𑁆𑀬𑀸𑀧𑀸𑀤𑁄 𑀓𑁄𑀥𑁄 𑀉𑀧𑀦𑀸𑀳𑁄 𑀧𑀫𑀸𑀤𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺. 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀦𑁆𑀢𑀺 𑀇𑀫𑁂 𑀙 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀻𑀢𑀺. 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀧𑀦, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀦𑁆𑀢𑀺 𑀇𑀫𑁂 𑀙 𑀧𑀳𑀻𑀬𑀦𑁆𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀩𑁆𑀬𑀸𑀧𑀸𑀤𑁄 𑀓𑁄𑀥𑁄 𑀉𑀧𑀦𑀸𑀳𑁄 𑀧𑀫𑀸𑀤𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑁄 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀫𑀤𑁄𑀢𑀺 𑀇𑀫𑁂 𑀙 𑀧𑀳𑀻𑀬𑀦𑁆𑀢𑀻𑀢𑀺.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀇𑀫𑁂 𑀓𑀺𑀮𑁂𑀲𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀚𑁆𑀛𑀸 𑀯𑀸 𑀳𑁄𑀦𑁆𑀢𑀼, 𑀲𑁂𑀲𑀫𑀕𑁆𑀕𑀯𑀚𑁆𑀛𑀸 𑀯𑀸, 𑀅𑀣 𑀔𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦𑁂𑀯 𑀧𑀳𑀸𑀦𑀁 𑀲𑀦𑁆𑀥𑀸𑀬 ‘‘𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀢𑀻’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀧𑀯𑁂𑀡𑀺𑀫𑀕𑁆𑀕𑀸𑀕𑀢𑁄 𑀲𑀫𑁆𑀪𑀯𑁄, 𑀲𑁄 𑀘 𑀉𑀧𑀭𑀺 𑀘𑀢𑀼𑀢𑁆𑀣𑀫𑀕𑁆𑀕𑀲𑁆𑀲𑁂𑀯 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀬𑀼𑀚𑁆𑀚𑀢𑀺, 𑀢𑀢𑀺𑀬𑀫𑀕𑁆𑀕𑁂𑀦 𑀧𑀳𑀻𑀦𑀸𑀯𑀲𑁂𑀲𑀸𑀦𑀜𑁆𑀳𑀺 𑀯𑀺𑀲𑀫𑀮𑁄𑀪𑀸𑀤𑀻𑀦𑀁 𑀢𑁂𑀦 𑀧𑀳𑀸𑀦𑀁 𑀳𑁄𑀢𑀺, 𑀲𑁂𑀲𑀸𑀦𑀁 𑀇𑀫𑀺𑀦𑀸𑀯. 𑀬𑁂𑀧𑀺 𑀳𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀢𑁂𑀧𑀺 𑀢𑀁𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦𑁂𑀯 𑀲𑀼𑀧𑁆𑀧𑀳𑀻𑀦𑀸 𑀳𑁄𑀦𑁆𑀢𑀻𑀢𑀺. 𑀓𑁂𑀘𑀺 𑀧𑀦 𑀧𑀞𑀫𑀫𑀕𑁆𑀕𑁂𑀦 𑀘𑁂𑀢𑁆𑀣 𑀧𑀳𑀸𑀦𑀁 𑀯𑀡𑁆𑀡𑀬𑀦𑁆𑀢𑀺, 𑀢𑀁 𑀧𑀼𑀩𑁆𑀩𑀸𑀧𑀭𑁂𑀦 𑀦 𑀲𑀦𑁆𑀥𑀺𑀬𑀢𑀺. 𑀓𑁂𑀘𑀺 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀫𑁆𑀧𑀺, 𑀢𑀁 𑀢𑁂𑀲𑀁 𑀇𑀘𑁆𑀙𑀸𑀫𑀢𑁆𑀢𑀫𑁂𑀯.

𑁭𑁩. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀬𑀢𑁄𑀢𑀺 𑀬𑀫𑁆𑀳𑀺 𑀓𑀸𑀮𑁂. 𑀧𑀳𑀻𑀦𑁄 𑀳𑁄𑀢𑀻𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂 𑀧𑀳𑀸𑀦𑀁 𑀲𑀦𑁆𑀥𑀸𑀬𑁂𑀯𑀸𑀳.

𑁭𑁪. 𑀲𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸𑀢𑀺 𑀏𑀢𑀁 ‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑁄 𑀧𑀳𑀻𑀦𑁄 𑀳𑁄𑀢𑀺, 𑀲𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻’’𑀢𑀺 𑀏𑀯𑀁 𑀏𑀓𑀫𑁂𑀓𑁂𑀦 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀇𑀫𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀮𑁄𑀓𑀼𑀢𑁆𑀢𑀭𑀧𑁆𑀧𑀲𑀸𑀤𑁄 𑀆𑀕𑀢𑁄, 𑀅𑀣𑀲𑁆𑀲 𑀅𑀧𑀭𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑀕𑀼𑀡𑁂 𑀥𑀫𑁆𑀫𑀕𑀼𑀡𑁂 𑀲𑀗𑁆𑀖𑀕𑀼𑀡𑁂 𑀘 𑀅𑀦𑀼𑀲𑁆𑀲𑀭𑀢𑁄 𑀮𑁄𑀓𑀺𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀫𑀲𑁆𑀲 𑀲𑀩𑁆𑀩𑀫𑁆𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀁 𑀧𑀲𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸𑀢𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑀸𑀦𑀁 𑀬𑀸𑀣𑀸𑀯𑀢𑁄 𑀜𑀸𑀢𑀢𑁆𑀢𑀸 𑀅𑀘𑀮𑁂𑀦 𑀅𑀘𑁆𑀘𑀼𑀢𑁂𑀦 𑀧𑀲𑀸𑀤𑁂𑀦. 𑀇𑀤𑀸𑀦𑀺 𑀬𑀣𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀲𑁆𑀲𑀭𑀢𑁄 𑀲𑁄 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄 𑀉𑀧𑁆𑀧𑀦𑁆𑀦𑁄, 𑀢𑀁 𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀻𑀡𑀺 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺 𑀯𑀺𑀢𑁆𑀣𑀸𑀭𑁂𑀲𑀺. 𑀢𑁂𑀲𑀁 𑀅𑀢𑁆𑀣𑀯𑀡𑁆𑀡𑀦𑀸 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀅𑀦𑀼𑀲𑁆𑀲𑀢𑀺𑀓𑀣𑀸𑀬𑀁 𑀯𑀼𑀢𑁆𑀢𑀸.

𑁭𑁫. 𑀏𑀯𑀫𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀁 𑀧𑀲𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑀫𑀦𑁆𑀦𑀸𑀕𑀢𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑁄𑀫𑀦𑀲𑁆𑀲𑀸𑀤𑀺𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 𑀬𑀣𑁄𑀥𑀺 𑀔𑁄 𑀧𑀦𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀅𑀦𑀸𑀕𑀸𑀫𑀺𑀲𑁆𑀲 𑀳𑀺 𑀧𑀘𑁆𑀘𑀦𑁆𑀢𑁂 𑀯𑀼𑀝𑁆𑀞𑀺𑀢𑀁 𑀘𑁄𑀭𑀼𑀧𑀤𑁆𑀤𑀯𑀁 𑀯𑀽𑀧𑀲𑀫𑁂𑀢𑁆𑀯𑀸 𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀫𑀳𑀸𑀦𑀕𑀭𑁂 𑀯𑀲𑀦𑁆𑀢𑀲𑁆𑀲 𑀭𑀜𑁆𑀜𑁄 𑀯𑀺𑀬 𑀇𑀫𑁂 𑀘𑀺𑀫𑁂 𑀘 𑀫𑀫 𑀓𑀺𑀮𑁂𑀲𑀸 𑀧𑀳𑀻𑀦𑀸𑀢𑀺 𑀅𑀢𑁆𑀢𑀦𑁄 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀩𑀮𑀯𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀬𑀣𑁄𑀥𑀺 𑀔𑁄 𑀧𑀦𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳.

𑀢𑀲𑁆𑀲𑀢𑁆𑀣𑁄 𑁋 𑀬𑁆𑀯𑀸𑀬𑀁 𑀅𑀦𑀸𑀕𑀸𑀫𑀻 𑀪𑀺𑀓𑁆𑀔𑀼 𑀏𑀯𑀁 ‘‘𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺…𑀧𑁂… 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺, 𑀢𑀲𑁆𑀲 𑀬𑀣𑁄𑀥𑀺 𑀔𑁄 𑀘𑀢𑁆𑀢𑀁 𑀳𑁄𑀢𑀺 𑀧𑀝𑀺𑀦𑀺𑀲𑁆𑀲𑀝𑁆𑀞𑀁, 𑀲𑀓𑀲𑀓𑀑𑀥𑀺𑀯𑀲𑁂𑀦 𑀘𑀢𑁆𑀢𑀫𑁂𑀯 𑀳𑁄𑀢𑀺, 𑀢𑀁 𑀢𑀁 𑀓𑀺𑀮𑁂𑀲𑀚𑀸𑀢𑀁 𑀯𑀦𑁆𑀢𑀁 𑀫𑀼𑀢𑁆𑀢𑀁 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁. 𑀲𑀓𑀲𑀓𑀑𑀥𑀺𑀯𑀲𑁂𑀦𑀸𑀢𑀺 𑀤𑁆𑀯𑁂 𑀑𑀥𑀻 𑀓𑀺𑀮𑁂𑀲𑁄𑀥𑀺 𑀘 𑀫𑀕𑁆𑀕𑁄𑀥𑀺 𑀘. 𑀢𑀢𑁆𑀣 𑀓𑀺𑀮𑁂𑀲𑁄𑀥𑀺𑀯𑀲𑁂𑀦𑀸𑀧𑀺 𑀬𑁂 𑀓𑀺𑀮𑁂𑀲𑀸 𑀬𑀁 𑀫𑀕𑁆𑀕𑀯𑀚𑁆𑀛𑀸, 𑀢𑁂 𑀅𑀜𑁆𑀜𑀫𑀕𑁆𑀕𑀯𑀚𑁆𑀛𑁂𑀳𑀺 𑀅𑀫𑀺𑀲𑁆𑀲𑀸 𑀳𑀼𑀢𑁆𑀯𑀸 𑀲𑀓𑁂𑀦𑁂𑀯 𑀑𑀥𑀺𑀦𑀸 𑀧𑀳𑀻𑀦𑀸. 𑀫𑀕𑁆𑀕𑁄𑀥𑀺𑀯𑀲𑁂𑀦𑀸𑀧𑀺 𑀬𑁂 𑀓𑀺𑀮𑁂𑀲𑀸 𑀬𑁂𑀦 𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀸, 𑀢𑁂𑀦 𑀢𑁂𑀬𑁂𑀯 𑀧𑀳𑀻𑀦𑀸 𑀳𑁄𑀦𑁆𑀢𑀺. 𑀏𑀯𑀁 𑀲𑀓𑀲𑀓𑀑𑀥𑀺𑀯𑀲𑁂𑀦 𑀢𑀁 𑀢𑀁 𑀓𑀺𑀮𑁂𑀲𑀚𑀸𑀢𑀁 𑀘𑀢𑁆𑀢𑀫𑁂𑀯 𑀳𑁄𑀢𑀺 𑀧𑀝𑀺𑀦𑀺𑀲𑁆𑀲𑀝𑁆𑀞𑀁, 𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀘 𑀮𑀤𑁆𑀥𑀲𑁄𑀫𑀦𑀲𑁆𑀲𑁄 𑀢𑀢𑀼𑀢𑁆𑀢𑀭𑀺𑀧𑀺 𑀲𑁄 ‘‘𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄𑀫𑁆𑀳𑀻’’𑀢𑀺 𑀮𑀪𑀢𑀺 𑀅𑀢𑁆𑀣𑀯𑁂𑀤𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀬𑀢𑁄𑀥𑀺 𑀔𑁄𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲 𑀯𑀲𑁂𑀦 𑀅𑀬𑀫𑀢𑁆𑀣𑁄, 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀢𑁄𑀥𑀺 𑀔𑁄 𑀧𑀦 𑀘𑀢𑁆𑀢𑀁 𑀳𑁄𑀢𑀺 𑀧𑀝𑀺𑀦𑀺𑀲𑁆𑀲𑀝𑁆𑀞𑀁. 𑀢𑀢𑁆𑀣 𑀬𑀢𑁄𑀢𑀺 𑀓𑀸𑀭𑀡𑀯𑀘𑀦𑀁, 𑀬𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀥𑀻𑀢𑀺 𑀳𑁂𑀝𑁆𑀞𑀸 𑀢𑀬𑁄 𑀫𑀕𑁆𑀕𑀸 𑀯𑀼𑀘𑁆𑀘𑀦𑁆𑀢𑀺. 𑀓𑀲𑁆𑀫𑀸? 𑀢𑁂 𑀳𑀺 𑀑𑀥𑀺𑀁 𑀓𑀢𑁆𑀯𑀸 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑀉𑀧𑀭𑀺𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑁂 𑀞𑀧𑁂𑀢𑁆𑀯𑀸 𑀧𑀚𑀳𑀦𑁆𑀢𑀺, 𑀢𑀲𑁆𑀫𑀸 𑀑𑀥𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀧𑀦 𑀓𑀺𑀜𑁆𑀘𑀺 𑀓𑀺𑀮𑁂𑀲𑀁 𑀅𑀦𑀯𑀲𑁂𑀲𑁂𑀢𑁆𑀯𑀸 𑀧𑀚𑀳𑀢𑀺, 𑀢𑀲𑁆𑀫𑀸 𑀅𑀦𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀳𑁂𑀝𑁆𑀞𑀸𑀫𑀕𑁆𑀕𑀢𑁆𑀢𑀬𑁂𑀦 𑀘𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀢𑁄𑀥𑀺 𑀔𑁄 𑀧𑀦𑀲𑁆𑀲 𑀘𑀢𑁆𑀢𑀁 𑀳𑁄𑀢𑀻’’𑀢𑀺. 𑀢𑀢𑁆𑀣 𑀔𑁄 𑀧𑀦𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀬𑀁 𑀧𑀦 𑀧𑀺𑀡𑁆𑀟𑀢𑁆𑀣𑁄. 𑀬𑀲𑁆𑀫𑀸 𑀅𑀲𑁆𑀲 𑀑𑀥𑀺 𑀘𑀢𑁆𑀢𑀁 𑀳𑁄𑀢𑀺 𑀧𑀝𑀺𑀦𑀺𑀲𑁆𑀲𑀝𑁆𑀞𑀁, 𑀢𑀲𑁆𑀫𑀸 𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀘 𑀮𑀤𑁆𑀥𑀲𑁄𑀫𑀦𑀲𑁆𑀲𑁄 𑀢𑀢𑀼𑀢𑁆𑀢𑀭𑀺𑀧𑀺 𑀲𑁄 ‘‘𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄𑀫𑁆𑀳𑀻’’𑀢𑀺 𑀮𑀪𑀢𑀺 𑀅𑀢𑁆𑀣𑀯𑁂𑀤𑀦𑁆𑀢𑀺 𑀬𑀣𑀸𑀧𑀸𑀴𑀺 𑀦𑁂𑀢𑀩𑁆𑀩𑀁.

𑀢𑀢𑁆𑀣 𑀘𑀢𑁆𑀢𑀦𑁆𑀢𑀺 𑀇𑀤𑀁 𑀲𑀓𑀪𑀸𑀯𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀦𑁆𑀢𑀦𑁆𑀢𑀺 𑀇𑀤𑀁 𑀧𑀦 𑀅𑀦𑀸𑀤𑀺𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦. 𑀫𑀼𑀢𑁆𑀢𑀦𑁆𑀢𑀺 𑀇𑀤𑀁 𑀲𑀦𑁆𑀢𑀢𑀺𑀢𑁄 𑀯𑀺𑀦𑀺𑀫𑁄𑀘𑀦𑀯𑀲𑁂𑀦. 𑀧𑀳𑀻𑀦𑀦𑁆𑀢𑀺 𑀇𑀤𑀁 𑀫𑀼𑀢𑁆𑀢𑀲𑁆𑀲𑀧𑀺 𑀓𑁆𑀯𑀘𑀺 𑀅𑀦𑀯𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦. 𑀧𑀝𑀺𑀦𑀺𑀲𑁆𑀲𑀝𑁆𑀞𑀦𑁆𑀢𑀺 𑀇𑀤𑀁 𑀧𑀼𑀩𑁆𑀩𑁂 𑀆𑀤𑀺𑀦𑁆𑀦𑀧𑀼𑀩𑁆𑀩𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀤𑀲𑁆𑀲𑀦𑀯𑀲𑁂𑀦 𑀧𑀝𑀺𑀫𑀼𑀔𑀁 𑀯𑀸 𑀦𑀺𑀲𑁆𑀲𑀝𑁆𑀞𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀪𑀸𑀯𑀦𑀸𑀩𑀮𑁂𑀦 𑀅𑀪𑀺𑀪𑀼𑀬𑁆𑀬 𑀦𑀺𑀲𑁆𑀲𑀝𑁆𑀞𑀪𑀸𑀯𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁 𑀮𑀪𑀢𑀺 𑀥𑀫𑁆𑀫𑀯𑁂𑀤𑀦𑁆𑀢𑀺 𑀏𑀢𑁆𑀣 𑀩𑀼𑀤𑁆𑀥𑀸𑀤𑀻𑀲𑀼 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄𑀬𑁂𑀯 𑀅𑀭𑀡𑀻𑀬𑀢𑁄 𑀅𑀢𑁆𑀣𑁄, 𑀉𑀧𑀕𑀦𑁆𑀢𑀩𑁆𑀩𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀸𑀭𑀡𑀢𑁄 𑀥𑀫𑁆𑀫𑁄, 𑀯𑀺𑀦𑀺𑀧𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑁂𑀤𑁄𑀢𑀺 𑀕𑀦𑁆𑀣𑁄𑀧𑀺 𑀜𑀸𑀡𑀫𑁆𑀧𑀺 𑀲𑁄𑀫𑀦𑀲𑁆𑀲𑀫𑁆𑀧𑀺. ‘‘𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁬) 𑀳𑀺 𑀕𑀦𑁆𑀣𑁄 ‘‘𑀯𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀬𑀁 𑀩𑁆𑀭𑀸𑀳𑁆𑀫𑀡𑀁 𑀯𑁂𑀤𑀕𑀼𑀫𑀸𑀪𑀺𑀚𑀜𑁆𑀜𑀸, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀸𑀯𑁂 𑀅𑀲𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁦𑁬𑁫) 𑀜𑀸𑀡𑀁. ‘‘𑀬𑁂 𑀯𑁂𑀤𑀚𑀸𑀢𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂’’𑀢𑀺𑀆𑀤𑀻𑀲𑀼 𑀲𑁄𑀫𑀦𑀲𑁆𑀲𑀁. 𑀇𑀥 𑀧𑀦 𑀲𑁄𑀫𑀦𑀲𑁆𑀲𑀜𑁆𑀘 𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀜𑁆𑀘 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 ‘‘𑀮𑀪𑀢𑀺 𑀅𑀢𑁆𑀣𑀯𑁂𑀤𑀁 𑀮𑀪𑀢𑀺 𑀥𑀫𑁆𑀫𑀯𑁂𑀤𑀦𑁆𑀢𑀺 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀸𑀭𑀫𑁆𑀫𑀡𑀲𑁄𑀫𑀦𑀲𑁆𑀲𑀜𑁆𑀘 𑀲𑁄𑀫𑀦𑀲𑁆𑀲𑀫𑀬𑀜𑀸𑀡𑀜𑁆𑀘 𑀮𑀪𑀢𑀻’’𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀣 𑀯𑀸 𑀅𑀢𑁆𑀣𑀯𑁂𑀤𑀦𑁆𑀢𑀺 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀉𑀧𑁆𑀧𑀦𑁆𑀦𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 𑀯𑁂𑀤𑀁. 𑀥𑀫𑁆𑀫𑀯𑁂𑀤𑀦𑁆𑀢𑀺 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑁆𑀲 𑀳𑁂𑀢𑀼𑀁 𑀑𑀥𑀺𑀲𑁄 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀉𑀧𑁆𑀧𑀦𑁆𑀦𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 𑀯𑁂𑀤𑀦𑁆𑀢𑀺 𑀏𑀯𑀫𑁆𑀧𑀺 𑀏𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁮-𑁭𑁧𑁯). 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀦𑁆𑀢𑀺 𑀢𑀫𑁂𑀯 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀅𑀢𑁆𑀣𑀥𑀫𑁆𑀫𑀸𑀦𑀺𑀲𑀁𑀲𑀪𑀽𑀢𑀁 𑀯𑁂𑀤𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀢𑁄 𑀉𑀧𑁆𑀧𑀦𑁆𑀦𑀁 𑀧𑀸𑀫𑁄𑀚𑁆𑀚𑀁. 𑀢𑀜𑁆𑀳𑀺 𑀅𑀦𑀯𑀚𑁆𑀚𑀮𑀓𑁆𑀔𑀡𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑁂𑀦 𑀥𑀫𑁆𑀫𑁂𑀦 𑀉𑀧𑀲𑀜𑁆𑀳𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀻𑀢𑀺 𑀇𑀫𑀺𑀦𑀸 𑀧𑀸𑀫𑁄𑀚𑁆𑀚𑁂𑀦 𑀧𑀫𑀼𑀤𑀺𑀢𑀲𑁆𑀲 𑀦𑀺𑀭𑀸𑀫𑀺𑀲𑀸 𑀧𑀻𑀢𑀺 𑀚𑀸𑀬𑀢𑀺. 𑀧𑀻𑀢𑀺𑀫𑀦𑀲𑁆𑀲𑀸𑀢𑀺 𑀢𑀸𑀬 𑀧𑀻𑀢𑀺𑀬𑀸 𑀧𑀻𑀡𑀺𑀢𑀫𑀦𑀲𑁆𑀲. 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀻𑀢𑀺 𑀓𑀸𑀬𑁄𑀧𑀺 𑀧𑀲𑁆𑀲𑀤𑁆𑀥𑁄 𑀳𑁄𑀢𑀺 𑀯𑀽𑀧𑀲𑀦𑁆𑀢𑀤𑀭𑀣𑁄. 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀦𑁆𑀢𑀺 𑀏𑀯𑀁 𑀯𑀽𑀧𑀲𑀦𑁆𑀢𑀓𑀸𑀬𑀤𑀭𑀣𑁄 𑀘𑁂𑀢𑀲𑀺𑀓𑀁 𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻𑀢𑀺 𑀘𑀺𑀢𑁆𑀢𑀁 𑀲𑀫𑁆𑀫𑀸 𑀆𑀥𑀺𑀬𑀢𑀺 𑀅𑀧𑁆𑀧𑀺𑀢𑀁 𑀯𑀺𑀬 𑀅𑀘𑀮𑀁 𑀢𑀺𑀝𑁆𑀞𑀢𑀺.

𑁭𑁬. 𑀏𑀯𑀫𑀲𑁆𑀲 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑀫𑀦𑁆𑀦𑀸𑀕𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑁄𑀫𑀦𑀲𑁆𑀲𑀸𑀤𑀺𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀬𑀣𑁄𑀥𑀺 𑀔𑁄 𑀧𑀦 𑀫𑁂’’𑀢𑀺 𑀯𑀸𑀭𑁂𑀦 𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀧𑀯𑀢𑁆𑀢𑀸𑀓𑀸𑀭𑀁 𑀧𑀓𑀸𑀲𑁂𑀢𑁆𑀯𑀸 𑀢𑀲𑁆𑀲𑁂𑀯 𑀅𑀦𑀸𑀕𑀸𑀫𑀺𑀫𑀕𑁆𑀕𑀸𑀦𑀼𑀪𑀸𑀯𑀲𑀽𑀘𑀓𑀁 𑀨𑀮𑀁 𑀤𑀲𑁆𑀲𑁂𑀦𑁆𑀢𑁄 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀏𑀯𑀁𑀲𑀻𑀮𑁄𑀢𑀺 𑀢𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺. 𑀏𑀯𑀁𑀥𑀫𑁆𑀫𑁄 𑀏𑀯𑀁𑀧𑀜𑁆𑀜𑁄𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑀜𑁆𑀘 𑀤𑀲𑁆𑀲𑁂𑀢𑀺. 𑀲𑀸𑀮𑀻𑀦𑀦𑁆𑀢𑀺 𑀮𑁄𑀳𑀺𑀢𑀲𑀸𑀮𑀺𑀕𑀦𑁆𑀥𑀲𑀸𑀮𑀺𑀆𑀤𑀻𑀦𑀁 𑀅𑀦𑁂𑀓𑀭𑀽𑀧𑀸𑀦𑀁. 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀑𑀤𑀦𑀁. 𑀯𑀺𑀘𑀺𑀢𑀓𑀸𑀴𑀓𑀦𑁆𑀢𑀺 𑀅𑀧𑀦𑀻𑀢𑀓𑀸𑀴𑀓𑀁. 𑀦𑁂𑀯𑀲𑁆𑀲 𑀢𑀁 𑀳𑁄𑀢𑀺 𑀅𑀦𑁆𑀢𑀭𑀸𑀬𑀸𑀬𑀸𑀢𑀺 𑀢𑀲𑁆𑀲 𑀏𑀯𑀁𑀯𑀺𑀥𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀺𑀡𑁆𑀟𑀧𑀸𑀢𑀪𑁄𑀚𑀦𑀁 𑀫𑀕𑁆𑀕𑀲𑁆𑀲 𑀯𑀸 𑀨𑀮𑀲𑁆𑀲 𑀯𑀸 𑀦𑁂𑀯 𑀅𑀦𑁆𑀢𑀭𑀸𑀬𑀸𑀬 𑀳𑁄𑀢𑀺, 𑀧𑀝𑀺𑀮𑀤𑁆𑀥𑀕𑀼𑀡𑀲𑁆𑀲 𑀳𑀺 𑀢𑀁 𑀓𑀺𑀫𑀦𑁆𑀢𑀭𑀸𑀬𑀁 𑀓𑀭𑀺𑀲𑁆𑀲𑀢𑀺? 𑀬𑁄𑀧𑀺𑀲𑁆𑀲 𑀅𑀧𑁆𑀧𑀝𑀺𑀮𑀤𑁆𑀥𑁄 𑀘𑀢𑀼𑀢𑁆𑀣𑀫𑀕𑁆𑀕𑁄 𑀘 𑀨𑀮𑀁 𑀘 𑀢𑀧𑁆𑀧𑀝𑀺𑀮𑀸𑀪𑀸𑀬 𑀯𑀺𑀧𑀲𑁆𑀲𑀦𑀁 𑀆𑀭𑀪𑀢𑁄𑀧𑀺 𑀦𑁂𑀯𑀲𑁆𑀲 𑀢𑀁 𑀳𑁄𑀢𑀺 𑀅𑀦𑁆𑀢𑀭𑀸𑀬𑀸𑀬, 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀫𑁂𑀯 𑀳𑁄𑀢𑀺. 𑀓𑀲𑁆𑀫𑀸? 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀻𑀮𑀥𑀫𑁆𑀫𑀧𑀜𑁆𑀜𑀸𑀲𑀗𑁆𑀕𑀳𑁂𑀦 𑀫𑀕𑁆𑀕𑁂𑀦 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀢𑁆𑀢𑀸.

𑀬𑀲𑁆𑀫𑀸 𑀘𑁂𑀢𑁆𑀣 𑀏𑀢𑀤𑁂𑀯 𑀓𑀸𑀭𑀡𑀁, 𑀢𑀲𑁆𑀫𑀸 𑀢𑀤𑀦𑀼𑀭𑀽𑀧𑀁 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀘𑁆𑀙𑀦𑁆𑀢𑀺 𑀯𑀺𑀧𑁆𑀧𑀲𑀦𑁆𑀦𑀁. 𑀧𑀭𑀺𑀲𑀼𑀤𑁆𑀥𑀁 𑀫𑀮𑀯𑀺𑀕𑀫𑁂𑀦. 𑀧𑀭𑀺𑀬𑁄𑀤𑀸𑀢𑀁 𑀧𑀪𑀲𑁆𑀲𑀭𑀢𑀸𑀬. 𑀉𑀓𑁆𑀓𑀸𑀫𑀼𑀔𑀦𑁆𑀢𑀺 𑀲𑀼𑀯𑀡𑁆𑀡𑀓𑀸𑀭𑀸𑀦𑀁 𑀫𑀽𑀲𑀸𑀫𑀼𑀔𑀁. 𑀲𑀼𑀯𑀡𑁆𑀡𑀓𑀸𑀭𑀸𑀦𑀁 𑀫𑀽𑀲𑀸 𑀳𑀺 𑀇𑀥 𑀉𑀓𑁆𑀓𑀸, 𑀅𑀜𑁆𑀜𑀢𑁆𑀣 𑀧𑀦 𑀤𑀻𑀧𑀺𑀓𑀸𑀤𑀬𑁄𑀧𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀉𑀓𑁆𑀓𑀸𑀲𑀼 𑀥𑀸𑀭𑀻𑀬𑀫𑀸𑀦𑀸𑀲𑀽’’𑀢𑀺 (𑀤𑀻. 𑀦𑀺. 𑁧.𑁧𑁫𑁯) 𑀳𑀺 𑀆𑀕𑀢𑀝𑁆𑀞𑀸𑀦𑁂 𑀤𑀻𑀧𑀺𑀓𑀸 ‘‘𑀉𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺. ‘‘𑀉𑀓𑁆𑀓𑀁 𑀩𑀦𑁆𑀥𑁂𑀬𑁆𑀬, 𑀉𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁩𑁬𑁦) 𑀆𑀕𑀢𑀝𑁆𑀞𑀸𑀦𑁂 𑀅𑀗𑁆𑀕𑀸𑀭𑀓𑀧𑀮𑁆𑀮𑀁. ‘‘𑀓𑀫𑁆𑀫𑀸𑀭𑀸𑀦𑀁 𑀬𑀣𑀸 𑀉𑀓𑁆𑀓𑀸, 𑀅𑀦𑁆𑀢𑁄 𑀛𑀸𑀬𑀢𑀺 𑀦𑁄 𑀩𑀳𑀻’’𑀢𑀺 (𑀚𑀸. 𑁨.𑁨𑁨.𑁬𑁪𑁯) 𑀆𑀕𑀢𑀝𑁆𑀞𑀸𑀦𑁂 𑀓𑀫𑁆𑀫𑀸𑀭𑀼𑀤𑁆𑀥𑀦𑀁. ‘‘𑀏𑀯𑀁𑀯𑀺𑀧𑀸𑀓𑁄 𑀉𑀓𑁆𑀓𑀸𑀧𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁪) 𑀆𑀕𑀢𑀝𑁆𑀞𑀸𑀦𑁂 𑀯𑀸𑀢𑀯𑁂𑀕𑁄 ‘‘𑀉𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀅𑀜𑁆𑀜𑁂𑀲𑀼 𑀘 𑀏𑀯𑀭𑀽𑀧𑁂𑀲𑀼 ‘‘𑀲𑀡𑁆𑀟𑀸𑀲𑁂𑀦 𑀚𑀸𑀢𑀭𑀽𑀧𑀁 𑀕𑀳𑁂𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑀢𑀻’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼 𑀲𑀼𑀯𑀡𑁆𑀡𑀓𑀸𑀭𑀸𑀦𑀁 𑀫𑀽𑀲𑀸 ‘‘𑀉𑀓𑁆𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀸 𑁋 𑀲𑀁𑀓𑀺𑀮𑀺𑀝𑁆𑀞𑀯𑀢𑁆𑀣𑀁 𑀯𑀺𑀬 𑀳𑀺 𑀲𑀁𑀓𑀺𑀮𑀺𑀝𑁆𑀞𑀚𑀸𑀢𑀭𑀽𑀧𑀁 𑀯𑀺𑀬 𑀘 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀓𑀸𑀫𑀭𑀸𑀕𑀸𑀤𑀺𑀫𑀮𑀸𑀦𑀼𑀕𑀢𑀁 𑀘𑀺𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀅𑀘𑁆𑀙𑁄𑀤𑀓𑀁 𑀯𑀺𑀬 𑀉𑀓𑁆𑀓𑀸𑀫𑀼𑀔𑀁 𑀯𑀺𑀬 𑀘 𑀅𑀦𑀸𑀕𑀸𑀫𑀺𑀫𑀕𑁆𑀕𑁄. 𑀢𑀁 𑀉𑀤𑀓𑀁 𑀉𑀓𑁆𑀓𑀸𑀫𑀼𑀔𑀜𑁆𑀘 𑀆𑀕𑀫𑁆𑀫 𑀯𑀢𑁆𑀣𑀲𑀼𑀯𑀡𑁆𑀡𑀸𑀦𑀁 𑀧𑀭𑀺𑀲𑀼𑀤𑁆𑀥𑀢𑀸 𑀯𑀺𑀬 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀻𑀮𑀥𑀫𑁆𑀫𑀧𑀜𑁆𑀜𑀸𑀲𑀗𑁆𑀕𑀳𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀆𑀕𑀫𑁆𑀫 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀢𑀺.

𑁭𑁭. 𑀲𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀤𑁂𑀲𑀦𑀸 𑀆𑀕𑀢𑀸. 𑀢𑀬𑁄 𑀳𑀺 𑀅𑀦𑀼𑀲𑀦𑁆𑀥𑀻 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺 𑀬𑀣𑀸𑀦𑀼𑀲𑀦𑁆𑀥𑀻𑀢𑀺. 𑀢𑀢𑁆𑀣 ‘‘𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀩𑀳𑀺𑀤𑁆𑀥𑀸 𑀅𑀲𑀢𑀺 𑀧𑀭𑀺𑀢𑀲𑁆𑀲𑀦𑀸’𑀢𑀺? ‘𑀲𑀺𑀬𑀸 𑀪𑀺𑀓𑁆𑀔𑀽’𑀢𑀺 𑀪𑀕𑀯𑀸 𑀅𑀯𑁄𑀘𑀸’’𑀢𑀺 (𑀫. 𑀦𑀺. 𑁧.𑁨𑁪𑁨). 𑀏𑀯𑀁 𑀧𑀼𑀘𑁆𑀙𑀦𑁆𑀢𑀸𑀦𑀁 𑀯𑀺𑀲𑁆𑀲𑀚𑁆𑀚𑀺𑀢𑀲𑀼𑀢𑁆𑀢𑀯𑀲𑁂𑀦 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑁄. ‘‘𑀲𑀺𑀬𑀸 𑀔𑁄 𑀧𑀦 𑀢𑁂 𑀩𑁆𑀭𑀸𑀳𑁆𑀫𑀡 𑀏𑀯𑀫𑀲𑁆𑀲, 𑀅𑀚𑁆𑀚𑀸𑀧𑀺 𑀦𑀽𑀦 𑀲𑀫𑀡𑁄 𑀕𑁄𑀢𑀫𑁄 𑀅𑀯𑀻𑀢𑀭𑀸𑀕𑁄’’𑀢𑀺 (𑀫. 𑀦𑀺. 𑁧.𑁫𑁫) 𑀏𑀯𑀁 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀯𑀼𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀲𑁂𑀦 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑁄. 𑀬𑁂𑀦 𑀧𑀦 𑀥𑀫𑁆𑀫𑁂𑀦 𑀆𑀤𑀺𑀫𑁆𑀳𑀺 𑀤𑁂𑀲𑀦𑀸 𑀉𑀝𑁆𑀞𑀺𑀢𑀸, 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀥𑀫𑁆𑀫𑀯𑀲𑁂𑀦 𑀯𑀸 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀸 𑀬𑁂𑀲𑀼 𑀲𑀼𑀢𑁆𑀢𑁂𑀲𑀼 𑀉𑀧𑀭𑀺 𑀤𑁂𑀲𑀦𑀸 𑀆𑀕𑀘𑁆𑀙𑀢𑀺, 𑀢𑁂𑀲𑀁 𑀯𑀲𑁂𑀦 𑀬𑀣𑀸𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁, 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑁂 𑀳𑁂𑀝𑁆𑀞𑀸 𑀲𑀻𑀮𑁂𑀦 𑀤𑁂𑀲𑀦𑀸 𑀉𑀝𑁆𑀞𑀺𑀢𑀸, 𑀉𑀧𑀭𑀺 𑀙 𑀅𑀪𑀺𑀜𑁆𑀜𑀸 𑀆𑀕𑀢𑀸. 𑀓𑀓𑀘𑀽𑀧𑀫𑁂 𑀳𑁂𑀝𑁆𑀞𑀸 𑀅𑀓𑁆𑀔𑀦𑁆𑀢𑀺𑀬𑀸 𑀉𑀝𑁆𑀞𑀺𑀢𑀸, 𑀉𑀧𑀭𑀺 𑀓𑀓𑀘𑀽𑀧𑀫𑁄𑀯𑀸𑀤𑁄 𑀆𑀕𑀢𑁄. 𑀅𑀮𑀕𑀤𑁆𑀤𑁂 𑀳𑁂𑀝𑁆𑀞𑀸 𑀤𑀺𑀝𑁆𑀞𑀺𑀧𑀭𑀺𑀤𑀻𑀧𑀦𑁂𑀦 𑀉𑀝𑁆𑀞𑀺𑀢𑀸, 𑀉𑀧𑀭𑀺 𑀢𑀺𑀧𑀭𑀺𑀯𑀝𑁆𑀝𑀲𑀼𑀜𑁆𑀜𑀢𑀸𑀧𑀓𑀸𑀲𑀦𑀸 𑀆𑀕𑀢𑀸, 𑀘𑀽𑀴𑀅𑀲𑁆𑀲𑀧𑀼𑀭𑁂 𑀳𑁂𑀝𑁆𑀞𑀸 𑀓𑀺𑀮𑁂𑀲𑀧𑀭𑀺𑀤𑀻𑀧𑀦𑁂𑀦 𑀉𑀝𑁆𑀞𑀺𑀢𑀸, 𑀉𑀧𑀭𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀆𑀕𑀢𑀸. 𑀓𑁄𑀲𑀫𑁆𑀩𑀺𑀬𑀲𑀼𑀢𑁆𑀢𑁂 𑀳𑁂𑀝𑁆𑀞𑀸 𑀪𑀡𑁆𑀟𑀦𑁂𑀦 𑀉𑀝𑁆𑀞𑀺𑀢𑀸, 𑀉𑀧𑀭𑀺 𑀲𑀸𑀭𑀡𑀻𑀬𑀥𑀫𑁆𑀫𑀸 𑀆𑀕𑀢𑀸. 𑀇𑀫𑀲𑁆𑀫𑀺𑀫𑁆𑀧𑀺 𑀯𑀢𑁆𑀣𑀲𑀼𑀢𑁆𑀢𑁂 𑀳𑁂𑀝𑁆𑀞𑀸 𑀓𑀺𑀮𑁂𑀲𑀧𑀭𑀺𑀤𑀻𑀧𑀦𑁂𑀦 𑀉𑀝𑁆𑀞𑀺𑀢𑀸, 𑀉𑀧𑀭𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀆𑀕𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀣𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀤𑁂𑀲𑀦𑀸 𑀆𑀕𑀢𑀸’’𑀢𑀺. 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀧𑀦 𑀅𑀦𑀼𑀧𑀤𑀯𑀡𑁆𑀡𑀦𑀸 𑀘 𑀪𑀸𑀯𑀦𑀸𑀦𑀬𑁄 𑀘 𑀲𑀩𑁆𑀩𑁄 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑁄.

𑁭𑁮. 𑀏𑀯𑀁 𑀪𑀕𑀯𑀸 𑀅𑀪𑀺𑀚𑁆𑀛𑀸𑀤𑀻𑀦𑀁 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀁 𑀲𑀩𑁆𑀩𑀲𑁄 𑀘 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀧𑁆𑀧𑀳𑀸𑀦𑁂𑀦 𑀯𑀺𑀳𑀢𑀧𑀘𑁆𑀘𑀢𑁆𑀣𑀺𑀓𑀢𑁆𑀢𑀸 𑀮𑀤𑁆𑀥𑀧𑀤𑀝𑁆𑀞𑀸𑀦𑀁 𑀢𑀲𑁆𑀲 𑀅𑀦𑀸𑀕𑀸𑀫𑀺𑀦𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀅𑀭𑀳𑀢𑁆𑀢𑀸𑀬 𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀲𑁄 𑀅𑀢𑁆𑀣𑀺 𑀇𑀤𑀦𑁆𑀢𑀺𑀆𑀤𑀺𑀫𑀸𑀳.

𑀢𑀲𑁆𑀲𑀢𑁆𑀣𑁄 𑁋 𑀲𑁄 𑀅𑀦𑀸𑀕𑀸𑀫𑀻 𑀏𑀯𑀁 𑀪𑀸𑀯𑀺𑀢𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀏𑀢𑁂𑀲𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁 𑀬𑀢𑁄 𑀓𑀼𑀢𑁄𑀘𑀺 𑀯𑀼𑀝𑁆𑀞𑀸𑀬 𑀢𑁂 𑀏𑀯 𑀩𑁆𑀭𑀳𑁆𑀫𑀯𑀺𑀳𑀸𑀭𑀥𑀫𑁆𑀫𑁂 𑀦𑀸𑀫𑀯𑀲𑁂𑀦 𑀢𑁂𑀲𑀁 𑀦𑀺𑀲𑁆𑀲𑀬𑀁 𑀳𑀤𑀬𑀯𑀢𑁆𑀣𑀼𑀁 𑀯𑀢𑁆𑀣𑀼𑀦𑀺𑀲𑁆𑀲𑀬𑀸𑀦𑀺 𑀪𑀽𑀢𑀸𑀦𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀪𑀽𑀢𑀼𑀧𑀸𑀤𑀸𑀬𑀥𑀫𑁆𑀫𑁂 𑀭𑀽𑀧𑀯𑀲𑁂𑀦 𑀘 𑀯𑀯𑀢𑁆𑀣𑀧𑁂𑀢𑁆𑀯𑀸 𑀅𑀢𑁆𑀣𑀺 𑀇𑀤𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀏𑀢𑁆𑀢𑀸𑀯𑀢𑀸𑀦𑁂𑀦 𑀤𑀼𑀓𑁆𑀔𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺. 𑀢𑀢𑁄 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀅𑀢𑁆𑀣𑀺 𑀳𑀻𑀦𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀏𑀢𑁆𑀢𑀸𑀯𑀢𑀸𑀦𑁂𑀦 𑀲𑀫𑀼𑀤𑀬𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺. 𑀢𑀢𑁄 𑀢𑀲𑁆𑀲 𑀧𑀳𑀸𑀦𑀼𑀧𑀸𑀬𑀁 𑀯𑀺𑀘𑀺𑀦𑀦𑁆𑀢𑁄 𑀅𑀢𑁆𑀣𑀺 𑀧𑀡𑀻𑀢𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀏𑀢𑁆𑀢𑀸𑀯𑀢𑀸𑀦𑁂𑀦 𑀫𑀕𑁆𑀕𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺. 𑀢𑀢𑁄 𑀢𑁂𑀦 𑀫𑀕𑁆𑀕𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀁 𑀯𑀺𑀘𑀺𑀦𑀦𑁆𑀢𑁄 𑀅𑀢𑁆𑀣𑀺 𑀉𑀢𑁆𑀢𑀭𑀺 𑀇𑀫𑀲𑁆𑀲 𑀲𑀜𑁆𑀜𑀸𑀕𑀢𑀲𑁆𑀲 𑀦𑀺𑀲𑁆𑀲𑀭𑀡𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀇𑀫𑀲𑁆𑀲 𑀫𑀬𑀸 𑀅𑀥𑀺𑀕𑀢𑀲𑁆𑀲 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑀜𑁆𑀜𑀸𑀕𑀢𑀲𑁆𑀲 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀻𑀢𑀺 𑀏𑀯𑀁 𑀧𑀚𑀸𑀦𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀏𑀢𑁆𑀢𑀸𑀯𑀢𑀸𑀦𑁂𑀦 𑀦𑀺𑀭𑁄𑀥𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄𑀢𑀺 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀏𑀯𑀁 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀚𑀸𑀦𑀢𑁄, 𑀫𑀕𑁆𑀕𑀧𑀜𑁆𑀜𑀸𑀬 𑀏𑀯𑀁 𑀧𑀲𑁆𑀲𑀢𑁄, 𑀪𑀬𑀪𑁂𑀭𑀯𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺…𑀧𑁂… 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻𑀢𑀺.

𑀏𑀯𑀁 𑀬𑀸𑀯 𑀅𑀭𑀳𑀢𑁆𑀢𑀸 𑀤𑁂𑀲𑀦𑀁 𑀧𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀢𑀲𑁆𑀲𑀁 𑀧𑀭𑀺𑀲𑀢𑀺 𑀦𑁆𑀳𑀸𑀦𑀲𑀼𑀤𑁆𑀥𑀺𑀓𑁄 𑀩𑁆𑀭𑀸𑀳𑁆𑀫𑀡𑁄 𑀦𑀺𑀲𑀺𑀦𑁆𑀦𑁄, 𑀲𑁄 𑀏𑀯𑀁 𑀦𑁆𑀳𑀸𑀦𑀲𑀼𑀤𑁆𑀥𑀺𑀬𑀸 𑀯𑀡𑁆𑀡𑀁 𑀯𑀼𑀘𑁆𑀘𑀫𑀸𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀪𑀕𑀯𑀢𑀸 𑀯𑀺𑀤𑀺𑀢𑁄, 𑀢𑀲𑁆𑀫𑀸 𑀢𑀲𑁆𑀲 𑀘𑁄𑀤𑀦𑀢𑁆𑀣𑀸𑀬 ‘‘𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀺𑀦𑀸𑀢𑁄 𑀅𑀦𑁆𑀢𑀭𑁂𑀦 𑀲𑀺𑀦𑀸𑀦𑁂𑀦𑀸’’𑀢𑀺 𑀇𑀫𑀁 𑀧𑀸𑀝𑀺𑀬𑁂𑀓𑁆𑀓𑀁 𑀅𑀦𑀼𑀲𑀦𑁆𑀥𑀺𑀫𑀸𑀳. 𑀢𑀢𑁆𑀣 𑀅𑀦𑁆𑀢𑀭𑁂𑀦 𑀲𑀺𑀦𑀸𑀦𑁂𑀦𑀸𑀢𑀺 𑀅𑀩𑁆𑀪𑀦𑁆𑀢𑀭𑁂𑀦 𑀓𑀺𑀮𑁂𑀲𑀯𑀼𑀝𑁆𑀞𑀸𑀦𑀲𑀺𑀦𑀸𑀦𑁂𑀦.

𑁭𑁯. 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄𑀢𑀺 𑀪𑀸𑀭𑀤𑁆𑀯𑀸𑀚𑁄 𑀦𑀸𑀫 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀕𑁄𑀢𑁆𑀢𑀯𑀲𑁂𑀦, 𑀲𑀼𑀦𑁆𑀤𑀭𑀺𑀓𑀸𑀬 𑀧𑀦 𑀦𑀤𑀺𑀬𑀸 𑀲𑀺𑀦𑀸𑀢𑀲𑁆𑀲 𑀧𑀸𑀧𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺 𑀅𑀬𑀫𑀲𑁆𑀲 𑀤𑀺𑀝𑁆𑀞𑀺, 𑀢𑀲𑁆𑀫𑀸 ‘‘𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀢𑀁 𑀪𑀕𑀯𑀢𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀁 𑀲𑀺𑀦𑀸𑀦𑀲𑀼𑀤𑁆𑀥𑀺𑀁 𑀯𑀡𑁆𑀡𑁂𑀫, 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀢𑀣𑁂𑀯 𑀯𑀡𑁆𑀡𑁂𑀢𑀺, 𑀲𑀫𑀸𑀦𑀘𑁆𑀙𑀦𑁆𑀤𑁄 𑀤𑀸𑀦𑀺 𑀏𑀲 𑀅𑀫𑁆𑀳𑁂𑀳𑀻’’𑀢𑀺. 𑀅𑀣 𑀪𑀕𑀯𑀦𑁆𑀢𑀁 𑀩𑀸𑀳𑀼𑀓𑀁 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀢𑀁 𑀢𑀢𑁆𑀣 𑀧𑀸𑀧𑀁 𑀧𑀯𑀸𑀳𑁂𑀢𑁆𑀯𑀸 𑀆𑀕𑀢𑀁 𑀯𑀺𑀬 𑀫𑀜𑁆𑀜𑀫𑀸𑀦𑁄 𑀆𑀳 ‘‘𑀕𑀘𑁆𑀙𑀢𑀺 𑀧𑀦 𑀪𑀯𑀁 𑀕𑁄𑀢𑀫𑁄 𑀩𑀸𑀳𑀼𑀓𑀁 𑀦𑀤𑀺𑀁 𑀲𑀺𑀦𑀸𑀬𑀺𑀢𑀼’’𑀦𑁆𑀢𑀺? 𑀪𑀕𑀯𑀸 𑀢𑀲𑁆𑀲 𑀕𑀘𑁆𑀙𑀸𑀫𑀻𑀢𑀺 𑀯𑀸 𑀦 𑀕𑀘𑁆𑀙𑀸𑀫𑀻𑀢𑀺 𑀯𑀸 𑀅𑀯𑀢𑁆𑀯𑀸𑀬𑁂𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀢𑀁 𑀓𑀢𑁆𑀢𑀼𑀓𑀸𑀫𑁄 ‘‘𑀓𑀺𑀁 𑀩𑁆𑀭𑀸𑀳𑁆𑀫𑀡 𑀩𑀸𑀳𑀼𑀓𑀸𑀬 𑀦𑀤𑀺𑀬𑀸, 𑀓𑀺𑀁 𑀩𑀸𑀳𑀼𑀓𑀸 𑀦𑀤𑀻 𑀓𑀭𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑀓𑀺𑀁 𑀧𑀬𑁄𑀚𑀦𑀁 𑀩𑀸𑀳𑀼𑀓𑀸𑀬, 𑀓𑀺𑀁 𑀲𑀸 𑀓𑀭𑀺𑀲𑁆𑀲𑀢𑀺? 𑀅𑀲𑀫𑀢𑁆𑀣𑀸 𑀲𑀸 𑀓𑀲𑁆𑀲𑀘𑀺 𑀅𑀢𑁆𑀣𑀸𑀬, 𑀓𑀺𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀻𑀢𑀺?

𑀅𑀣 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀧𑀲𑀁𑀲𑀦𑁆𑀢𑁄 𑀮𑁄𑀓𑁆𑀔𑀲𑀫𑁆𑀫𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀮𑁄𑀓𑁆𑀔𑀲𑀫𑁆𑀫𑀢𑀸𑀢𑀺 𑀮𑀽𑀔𑀪𑀸𑀯𑀲𑀫𑁆𑀫𑀢𑀸, 𑀮𑀽𑀔𑀪𑀸𑀯𑀦𑁆𑀢𑀺 𑀘𑁄𑀓𑁆𑀔𑀪𑀸𑀯𑀁, 𑀯𑀺𑀲𑀼𑀤𑁆𑀥𑀺𑀪𑀸𑀯𑀁 𑀤𑁂𑀢𑀻𑀢𑀺 𑀏𑀯𑀁 𑀲𑀫𑁆𑀫𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑁄𑀓𑁆𑀬𑀲𑀫𑁆𑀫𑀢𑀸𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄, 𑀲𑁂𑀝𑁆𑀞𑀁 𑀮𑁄𑀓𑀁 𑀕𑀫𑀬𑀢𑀻𑀢𑀺 𑀏𑀯𑀁 𑀲𑀫𑁆𑀫𑀢𑀸𑀢𑀺. 𑀧𑀼𑀜𑁆𑀜𑀲𑀫𑁆𑀫𑀢𑀸𑀢𑀺 𑀧𑀼𑀜𑁆𑀜𑀦𑁆𑀢𑀺 𑀲𑀫𑁆𑀫𑀢𑀸. 𑀧𑀯𑀸𑀳𑁂𑀢𑀻𑀢𑀺 𑀕𑀫𑀬𑀢𑀺 𑀯𑀺𑀲𑁄𑀥𑁂𑀢𑀺. 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀻𑀢𑀺 𑀕𑀸𑀣𑀸𑀳𑀺 𑀅𑀪𑀸𑀲𑀺. 𑀕𑀸𑀣𑀸 𑀘 𑀯𑀼𑀘𑁆𑀘𑀫𑀸𑀦𑀸 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀫𑁂𑀯 𑀯𑀸 𑀕𑀸𑀣𑀸𑀭𑀼𑀘𑀺𑀓𑀸𑀦𑀁 𑀯𑀼𑀘𑁆𑀘𑀢𑀺, 𑀯𑀺𑀲𑁂𑀲𑀢𑁆𑀣𑀤𑀻𑀧𑀦𑀢𑁆𑀣𑀁 𑀯𑀸. 𑀇𑀥 𑀧𑀦𑁂𑀢𑀸 𑀉𑀪𑀬𑀢𑁆𑀣𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀩𑀸𑀳𑀼𑀓𑀦𑁆𑀢𑀺 𑀇𑀤𑀫𑁂𑀯 𑀳𑀺 𑀏𑀢𑁆𑀣 𑀯𑀘𑀦𑀁 𑀢𑀤𑀢𑁆𑀣𑀤𑀻𑀧𑀓𑀁, 𑀲𑁂𑀲𑀸𑀦𑀺 𑀯𑀺𑀲𑁂𑀲𑀢𑁆𑀣𑀤𑀻𑀧𑀓𑀸𑀦𑀺. 𑀬𑀣𑁂𑀯 𑀳𑀺 𑀩𑀸𑀳𑀼𑀓𑀁, 𑀏𑀯𑀁 𑀅𑀥𑀺𑀓𑀓𑁆𑀓𑀸𑀤𑀻𑀦𑀺𑀧𑀺 𑀮𑁄𑀓𑁄 𑀕𑀘𑁆𑀙𑀢𑀺 𑀦𑁆𑀳𑀸𑀦𑁂𑀦 𑀧𑀸𑀧𑀁 𑀧𑀯𑀸𑀳𑁂𑀢𑀼𑀁. 𑀢𑀢𑁆𑀣 𑀬𑁂 𑀢𑁂𑀲𑀁 𑀞𑀸𑀦𑀸𑀦𑀁 𑀆𑀲𑀦𑁆𑀦𑀸 𑀳𑁄𑀦𑁆𑀢𑀺, 𑀢𑁂 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀦𑁆𑀳𑀸𑀬𑀦𑁆𑀢𑀺. 𑀬𑁂 𑀤𑀽𑀭𑀸, 𑀢𑁂 𑀬𑀣𑀸𑀓𑁆𑀓𑀫𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀲𑀓𑀺𑀁 𑀏𑀓𑀤𑀺𑀯𑀲𑀦𑁆𑀢𑀭𑀁, 𑀏𑀯𑀁 𑀬𑀸𑀯 𑀲𑀁𑀯𑀘𑁆𑀙𑀭𑀦𑁆𑀢𑀭𑀁 𑀦𑁆𑀳𑀸𑀬𑀦𑁆𑀢𑀺. 𑀬𑁂 𑀧𑀦 𑀲𑀩𑁆𑀩𑀣𑀸𑀧𑀺 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑁂 𑀖𑀝𑁂𑀳𑀺𑀧𑀺 𑀢𑀢𑁄 𑀉𑀤𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀦𑁆𑀳𑀸𑀬𑀦𑁆𑀢𑀺. 𑀲𑀩𑁆𑀩𑀜𑁆𑀘𑁂𑀢𑀁 𑀦𑀺𑀭𑀢𑁆𑀣𑀓𑀁, 𑀢𑀲𑁆𑀫𑀸 𑀇𑀫𑀁 𑀯𑀺𑀲𑁂𑀲𑀢𑁆𑀣𑀁 𑀤𑀻𑀧𑁂𑀢𑀼𑀁 𑀅𑀥𑀺𑀓𑀓𑁆𑀓𑀸𑀤𑀻𑀦𑀺𑀧𑀻𑀢𑀺 𑀆𑀳.

𑀢𑀢𑁆𑀣 𑀅𑀥𑀺𑀓𑀓𑁆𑀓𑀦𑁆𑀢𑀺 𑀦𑁆𑀳𑀸𑀦𑀲𑀫𑁆𑀪𑀸𑀭𑀯𑀲𑁂𑀦 𑀮𑀤𑁆𑀥𑀯𑁄𑀳𑀸𑀭𑀁 𑀏𑀓𑀁 𑀢𑀺𑀢𑁆𑀣𑀁 𑀯𑀼𑀘𑁆𑀘𑀢𑀺. 𑀕𑀬𑀸𑀢𑀺𑀧𑀺 𑀫𑀡𑁆𑀟𑀮𑀯𑀸𑀧𑀺𑀲𑀡𑁆𑀞𑀸𑀦𑀁 𑀢𑀺𑀢𑁆𑀣𑀫𑁂𑀯 𑀯𑀼𑀘𑁆𑀘𑀢𑀺. 𑀧𑀬𑀸𑀕𑀸𑀢𑀺 𑀏𑀢𑀫𑁆𑀧𑀺 𑀕𑀗𑁆𑀕𑀸𑀬 𑀏𑀓𑀁 𑀢𑀺𑀢𑁆𑀣𑀫𑁂𑀯 𑀫𑀳𑀸𑀧𑀦𑀸𑀤𑀲𑁆𑀲 𑀭𑀜𑁆𑀜𑁄 𑀕𑀗𑁆𑀕𑀸𑀬𑀁 𑀦𑀺𑀫𑀼𑀕𑁆𑀕𑀧𑀸𑀲𑀸𑀤𑀲𑁆𑀲 𑀲𑁄𑀧𑀸𑀦𑀲𑀫𑁆𑀫𑀼𑀔𑀝𑁆𑀞𑀸𑀦𑀁, 𑀩𑀸𑀳𑀼𑀓𑀸 𑀲𑀼𑀦𑁆𑀤𑀭𑀺𑀓𑀸 𑀲𑀭𑀲𑁆𑀲𑀢𑀻 𑀩𑀸𑀳𑀼𑀫𑀢𑀻𑀢𑀺 𑀇𑀫𑀸 𑀧𑀦 𑀘𑀢𑀲𑁆𑀲𑁄 𑀦𑀤𑀺𑀬𑁄. 𑀩𑀸𑀮𑁄𑀢𑀺 𑀤𑀼𑀧𑁆𑀧𑀜𑁆𑀜𑁄. 𑀧𑀓𑁆𑀔𑀦𑁆𑀤𑁄𑀢𑀺 𑀧𑀯𑀺𑀲𑀦𑁆𑀢𑁄. 𑀦 𑀲𑀼𑀚𑁆𑀛𑀢𑀻𑀢𑀺 𑀓𑀺𑀮𑁂𑀲𑀲𑀼𑀤𑁆𑀥𑀺𑀁 𑀦 𑀧𑀸𑀧𑀼𑀡𑀸𑀢𑀺, 𑀓𑁂𑀯𑀮𑀁 𑀭𑀚𑁄𑀚𑀮𑁆𑀮𑀫𑁂𑀯 𑀧𑀯𑀸𑀳𑁂𑀢𑀺.

𑀓𑀺𑀁 𑀲𑀼𑀦𑁆𑀤𑀭𑀺𑀓𑀸 𑀓𑀭𑀺𑀲𑁆𑀲𑀢𑀻𑀢𑀺 𑀲𑀼𑀦𑁆𑀤𑀭𑀺𑀓𑀸 𑀓𑀺𑀮𑁂𑀲𑀯𑀺𑀲𑁄𑀥𑀦𑁂 𑀓𑀺𑀁 𑀓𑀭𑀺𑀲𑁆𑀲𑀢𑀺? 𑀦 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀲𑀫𑀢𑁆𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲 𑀦𑀬𑁄 𑀧𑀬𑀸𑀕𑀩𑀸𑀳𑀼𑀓𑀸𑀲𑀼. 𑀇𑀫𑁂𑀳𑀺 𑀘 𑀢𑀻𑀳𑀺 𑀧𑀤𑁂𑀳𑀺 𑀯𑀼𑀢𑁆𑀢𑁂𑀳𑀺 𑀇𑀢𑀭𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀳𑀸𑀭𑀦𑀬𑁂𑀦 𑀯𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀬𑀣𑁂𑀯 𑀲𑀼𑀦𑁆𑀤𑀭𑀺𑀓𑀸 𑀧𑀬𑀸𑀕𑀸 𑀩𑀸𑀳𑀼𑀓𑀸 𑀦 𑀓𑀺𑀜𑁆𑀘𑀺 𑀓𑀭𑁄𑀦𑁆𑀢𑀺, 𑀢𑀣𑀸 𑀅𑀥𑀺𑀓𑀓𑁆𑀓𑀸𑀤𑀬𑁄𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀯𑁂𑀭𑀺𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀯𑁂𑀭𑀲𑀫𑀦𑁆𑀦𑀸𑀕𑀢𑀁. 𑀓𑀢𑀓𑀺𑀩𑁆𑀩𑀺𑀲𑀦𑁆𑀢𑀺 𑀓𑀢𑀮𑀼𑀤𑁆𑀤𑀓𑀫𑁆𑀫𑀁. 𑀦 𑀳𑀺 𑀦𑀁 𑀲𑁄𑀥𑀬𑁂𑀢𑀺 𑀲𑀼𑀦𑁆𑀤𑀭𑀺𑀓𑀸 𑀯𑀸 𑀧𑀬𑀸𑀕𑀸 𑀯𑀸 𑀩𑀸𑀳𑀼𑀓𑀸 𑀯𑀸 𑀦 𑀲𑁄𑀥𑀬𑁂, 𑀦 𑀲𑁄𑀥𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀧𑀓𑀫𑁆𑀫𑀺𑀦𑀦𑁆𑀢𑀺 𑀧𑀸𑀧𑀓𑁂𑀳𑀺 𑀯𑁂𑀭𑀓𑀺𑀩𑁆𑀩𑀺𑀲𑀓𑀫𑁆𑀫𑁂𑀳𑀺 𑀬𑀼𑀢𑁆𑀢𑀁, 𑀮𑀸𑀫𑀓𑀓𑀫𑁆𑀫𑁂 𑀬𑀼𑀢𑁆𑀢𑀁 𑀯𑀸 𑀯𑁂𑀭𑀓𑀺𑀩𑁆𑀩𑀺𑀲𑀪𑀸𑀯𑀁 𑀅𑀧𑁆𑀧𑀢𑁆𑀢𑁂𑀳𑀺 𑀔𑀼𑀤𑁆𑀤𑀓𑁂𑀳𑀺𑀧𑀺 𑀧𑀸𑀧𑁂𑀳𑀺 𑀬𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀼𑀤𑁆𑀥𑀲𑁆𑀲𑀸𑀢𑀺 𑀦𑀺𑀓𑁆𑀓𑀺𑀮𑁂𑀲𑀲𑁆𑀲. 𑀲𑀤𑀸 𑀨𑀕𑁆𑀕𑀽𑀢𑀺 𑀦𑀺𑀘𑁆𑀘𑀫𑁆𑀧𑀺 𑀨𑀕𑁆𑀕𑀼𑀦𑀻𑀦𑀓𑁆𑀔𑀢𑁆𑀢𑀫𑁂𑀯. 𑀨𑀕𑁆𑀕𑀼𑀦𑀫𑀸𑀲𑁂 𑀓𑀺𑀭 ‘‘𑀉𑀢𑁆𑀢𑀭𑀨𑀕𑁆𑀕𑀼𑀦𑀤𑀺𑀯𑀲𑁂 𑀬𑁄 𑀦𑁆𑀳𑀸𑀬𑀢𑀺, 𑀲𑁄 𑀲𑀁𑀯𑀘𑁆𑀙𑀭𑀁 𑀓𑀢𑀧𑀸𑀧𑀁 𑀲𑁄𑀥𑁂𑀢𑀻’’𑀢𑀺 𑀏𑀯𑀁 𑀤𑀺𑀝𑁆𑀞𑀺𑀓𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄, 𑀢𑁂𑀦𑀲𑁆𑀲 𑀪𑀕𑀯𑀸 𑀢𑀁 𑀤𑀺𑀝𑁆𑀞𑀺𑀁 𑀧𑀝𑀺𑀳𑀦𑀦𑁆𑀢𑁄 𑀆𑀳 ‘‘𑀲𑀼𑀤𑁆𑀥𑀲𑁆𑀲 𑀯𑁂 𑀲𑀤𑀸 𑀨𑀕𑁆𑀕𑀽’’𑀢𑀺. 𑀦𑀺𑀓𑁆𑀓𑀺𑀮𑁂𑀲𑀲𑁆𑀲 𑀦𑀺𑀘𑁆𑀘𑀁 𑀨𑀕𑁆𑀕𑀼𑀦𑀻𑀦𑀓𑁆𑀔𑀢𑁆𑀢𑀁, 𑀇𑀢𑀭𑁄 𑀓𑀺𑀁 𑀲𑀼𑀚𑁆𑀛𑀢𑀻𑀢𑀺? 𑀉𑀧𑁄𑀲𑀣𑁄 𑀲𑀤𑀸𑀢𑀺 𑀲𑀼𑀤𑁆𑀥𑀲𑁆𑀲 𑀘 𑀘𑀸𑀢𑀼𑀤𑁆𑀤𑀲𑀧𑀦𑁆𑀦𑀭𑀲𑀸𑀤𑀻𑀲𑀼 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀲𑀫𑀸𑀤𑀺𑀬𑀢𑁄𑀧𑀺 𑀦𑀺𑀘𑁆𑀘𑀫𑁂𑀯 𑀉𑀧𑁄𑀲𑀣𑁄. 𑀲𑀼𑀤𑁆𑀥𑀲𑁆𑀲 𑀲𑀼𑀘𑀺𑀓𑀫𑁆𑀫𑀲𑁆𑀲𑀸𑀢𑀺 𑀦𑀺𑀓𑁆𑀓𑀺𑀮𑁂𑀲𑀢𑀸𑀬 𑀲𑀼𑀤𑁆𑀥𑀲𑁆𑀲 𑀲𑀼𑀘𑀻𑀳𑀺 𑀘 𑀓𑀸𑀬𑀓𑀫𑁆𑀫𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀲𑀤𑀸 𑀲𑀫𑁆𑀧𑀚𑁆𑀚𑀢𑁂 𑀯𑀢𑀦𑁆𑀢𑀺 𑀈𑀤𑀺𑀲𑀲𑁆𑀲 𑀘 𑀓𑀼𑀲𑀮𑀽𑀧𑀲𑀜𑁆𑀳𑀺𑀢𑀁 𑀯𑀢𑀲𑀫𑀸𑀤𑀸𑀦𑀫𑁆𑀧𑀺 𑀦𑀺𑀘𑁆𑀘𑀁 𑀲𑀫𑁆𑀧𑀦𑁆𑀦𑀫𑁂𑀯 𑀳𑁄𑀢𑀻𑀢𑀺. 𑀇𑀥𑁂𑀯 𑀲𑀺𑀦𑀸𑀳𑀻𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀫𑀫 𑀲𑀸𑀲𑀦𑁂 𑀲𑀺𑀦𑀸𑀳𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? ‘‘𑀲𑀘𑁂 𑀅𑀚𑁆𑀛𑀢𑁆𑀢𑀺𑀓𑀓𑀺𑀮𑁂𑀲𑀫𑀮𑀧𑁆𑀧𑀯𑀸𑀳𑀦𑀁 𑀇𑀘𑁆𑀙𑀲𑀺, 𑀇𑀥𑁂𑀯 𑀫𑀫 𑀲𑀸𑀲𑀦𑁂 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀲𑀮𑀺𑀮𑁂𑀦 𑀲𑀺𑀦𑀸𑀳𑀺, 𑀅𑀜𑁆𑀜𑀢𑁆𑀭 𑀳𑀺 𑀇𑀤𑀁 𑀦𑀢𑁆𑀣𑀻’’𑀢𑀺.

𑀇𑀤𑀸𑀦𑀺𑀲𑁆𑀲 𑀲𑀧𑁆𑀧𑀸𑀬𑀤𑁂𑀲𑀦𑀸𑀯𑀲𑁂𑀦 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀲𑀩𑁆𑀩𑀪𑀽𑀢𑁂𑀲𑀼 𑀓𑀭𑁄𑀳𑀺 𑀔𑁂𑀫𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑁂𑀫𑀢𑀦𑁆𑀢𑀺 𑀅𑀪𑀬𑀁 𑀳𑀺𑀢𑀪𑀸𑀯𑀁, 𑀫𑁂𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦𑀲𑁆𑀲 𑀫𑀦𑁄𑀤𑁆𑀯𑀸𑀭𑀲𑀼𑀤𑁆𑀥𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺.

𑀲𑀘𑁂 𑀫𑀼𑀲𑀸 𑀦 𑀪𑀡𑀲𑀻𑀢𑀺 𑀏𑀢𑁂𑀦𑀲𑁆𑀲 𑀯𑀘𑀻𑀤𑁆𑀯𑀸𑀭𑀲𑀼𑀤𑁆𑀥𑀺. 𑀲𑀘𑁂 𑀧𑀸𑀡𑀁 𑀦 𑀳𑀺𑀁𑀲𑀲𑀺 𑀲𑀘𑁂 𑀅𑀤𑀺𑀦𑁆𑀦𑀁 𑀦𑀸𑀤𑀺𑀬𑀲𑀻𑀢𑀺 𑀏𑀢𑁂𑀳𑀺 𑀓𑀸𑀬𑀤𑁆𑀯𑀸𑀭𑀲𑀼𑀤𑁆𑀥𑀺. 𑀲𑀤𑁆𑀤𑀳𑀸𑀦𑁄 𑀅𑀫𑀘𑁆𑀙𑀭𑀻𑀢𑀺 𑀏𑀢𑁂𑀳𑀺 𑀧𑀦 𑀦𑀁 𑀏𑀯𑀁 𑀧𑀭𑀺𑀲𑀼𑀤𑁆𑀥𑀤𑁆𑀯𑀸𑀭𑀁 𑀲𑀤𑁆𑀥𑀸𑀲𑀫𑁆𑀧𑀤𑀸𑀬 𑀘𑀸𑀕𑀲𑀫𑁆𑀧𑀤𑀸𑀬 𑀘 𑀦𑀺𑀬𑁄𑀚𑁂𑀲𑀺. 𑀓𑀺𑀁 𑀓𑀸𑀳𑀲𑀺 𑀕𑀬𑀁 𑀕𑀦𑁆𑀢𑁆𑀯𑀸, 𑀉𑀤𑀧𑀸𑀦𑁄𑀧𑀺 𑀢𑁂 𑀕𑀬𑀸𑀢𑀺 𑀅𑀬𑀁 𑀧𑀦 𑀉𑀧𑀟𑁆𑀠𑀕𑀸𑀣𑀸, 𑀲𑀘𑁂 𑀲𑀩𑁆𑀩𑀪𑀽𑀢𑁂𑀲𑀼 𑀔𑁂𑀫𑀢𑀁 𑀓𑀭𑀺𑀲𑁆𑀲𑀲𑀺, 𑀫𑀼𑀲𑀸 𑀦 𑀪𑀡𑀺𑀲𑁆𑀲𑀲𑀺, 𑀧𑀸𑀡𑀁 𑀦 𑀳𑀦𑀺𑀲𑁆𑀲𑀲𑀺, 𑀅𑀤𑀺𑀦𑁆𑀦𑀁 𑀦𑀸𑀤𑀺𑀬𑀺𑀲𑁆𑀲𑀲𑀺, 𑀲𑀤𑁆𑀥𑀳𑀸𑀦𑁄 𑀅𑀫𑀘𑁆𑀙𑀭𑀻 𑀪𑀯𑀺𑀲𑁆𑀲𑀲𑀺, 𑀓𑀺𑀁 𑀓𑀸𑀳𑀲𑀺 𑀕𑀬𑀁 𑀕𑀦𑁆𑀢𑁆𑀯𑀸 𑀉𑀤𑀧𑀸𑀦𑁄𑀧𑀺 𑀢𑁂 𑀕𑀬𑀸, 𑀕𑀬𑀸𑀬𑀧𑀺 𑀳𑀺 𑀢𑁂 𑀦𑁆𑀳𑀸𑀬𑀦𑁆𑀢𑀲𑁆𑀲 𑀉𑀤𑀧𑀸𑀦𑁂𑀧𑀺 𑀇𑀫𑀸𑀬 𑀏𑀯 𑀧𑀝𑀺𑀧𑀢𑁆𑀢𑀺𑀬𑀸 𑀓𑀺𑀮𑁂𑀲𑀲𑀼𑀤𑁆𑀥𑀺, 𑀲𑀭𑀻𑀭𑀫𑀮𑀲𑀼𑀤𑁆𑀥𑀺 𑀧𑀦 𑀉𑀪𑀬𑀢𑁆𑀣 𑀲𑀫𑀸𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀬𑀲𑁆𑀫𑀸 𑀘 𑀮𑁄𑀓𑁂 𑀕𑀬𑀸 𑀲𑀫𑁆𑀫𑀢𑀢𑀭𑀸, 𑀢𑀲𑁆𑀫𑀸 𑀢𑀲𑁆𑀲 𑀪𑀕𑀯𑀸 ‘‘𑀕𑀘𑁆𑀙𑀢𑀺 𑀧𑀦 𑀪𑀯𑀁 𑀕𑁄𑀢𑀫𑁄 𑀩𑀸𑀳𑀼𑀓’’𑀦𑁆𑀢𑀺 𑀧𑀼𑀝𑁆𑀞𑁄𑀧𑀺 ‘‘𑀓𑀺𑀁 𑀓𑀸𑀳𑀲𑀺 𑀩𑀸𑀳𑀼𑀓𑀁 𑀕𑀦𑁆𑀢𑁆𑀯𑀸’’𑀢𑀺 𑀅𑀯𑀢𑁆𑀯𑀸 ‘‘𑀓𑀺𑀁 𑀓𑀸𑀳𑀲𑀺 𑀕𑀬𑀁 𑀕𑀦𑁆𑀢𑁆𑀯𑀸’’𑀢𑀺 𑀆𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁮𑁦. 𑀏𑀯𑀁 𑀯𑀼𑀢𑁆𑀢𑁂𑀢𑀺 𑀏𑀯𑀫𑀸𑀤𑀺 𑀪𑀬𑀪𑁂𑀭𑀯𑁂 𑀯𑀼𑀢𑁆𑀢𑀢𑁆𑀢𑀸 𑀧𑀸𑀓𑀝𑀫𑁂𑀯. 𑀏𑀓𑁄 𑀯𑀽𑀧𑀓𑀝𑁆𑀞𑁄𑀢𑀺𑀆𑀤𑀻𑀲𑀼 𑀧𑀦 𑀏𑀓𑁄 𑀓𑀸𑀬𑀯𑀺𑀯𑁂𑀓𑁂𑀦. 𑀯𑀽𑀧𑀓𑀝𑁆𑀞𑁄 𑀘𑀺𑀢𑁆𑀢𑀯𑀺𑀯𑁂𑀓𑁂𑀦. 𑀅𑀧𑁆𑀧𑀫𑀢𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑁂 𑀲𑀢𑀺 𑀅𑀯𑀺𑀚𑀳𑀦𑁂𑀦. 𑀆𑀢𑀸𑀧𑀻 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀲𑀗𑁆𑀔𑀸𑀢𑁂𑀦 𑀆𑀢𑀸𑀧𑁂𑀦. 𑀧𑀳𑀺𑀢𑀢𑁆𑀢𑁄 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀢𑀸𑀬. 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦. 𑀦𑀘𑀺𑀭𑀲𑁆𑀲𑁂𑀯𑀸𑀢𑀺 𑀧𑀩𑁆𑀩𑀚𑁆𑀚𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀓𑀼𑀮𑀧𑀼𑀢𑁆𑀢𑀸𑀢𑀺 𑀤𑀼𑀯𑀺𑀥𑀸 𑀓𑀼𑀮𑀧𑀼𑀢𑁆𑀢𑀸 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸 𑀘 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸 𑀘, 𑀅𑀬𑀁 𑀧𑀦 𑀉𑀪𑀬𑀣𑀸𑀧𑀺 𑀓𑀼𑀮𑀧𑀼𑀢𑁆𑀢𑁄. 𑀅𑀕𑀸𑀭𑀲𑁆𑀫𑀸𑀢𑀺 𑀖𑀭𑀸. 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀅𑀕𑀸𑀭𑀺𑀬𑀁, 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀓𑀼𑀝𑀼𑀫𑁆𑀩𑀧𑁄𑀲𑀦𑀓𑀫𑁆𑀫𑀁 𑀯𑀼𑀘𑁆𑀘𑀢𑀺, 𑀦𑀢𑁆𑀣𑀺 𑀏𑀢𑁆𑀣 𑀅𑀕𑀸𑀭𑀺𑀬𑀦𑁆𑀢𑀺 𑀅𑀦𑀕𑀸𑀭𑀺𑀬𑀁, 𑀧𑀩𑁆𑀩𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀩𑁆𑀩𑀚𑀦𑁆𑀢𑀻𑀢𑀺 𑀉𑀧𑀕𑀘𑁆𑀙𑀦𑁆𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀢𑀤𑀦𑀼𑀢𑁆𑀢𑀭𑀦𑁆𑀢𑀺 𑀢𑀁 𑀅𑀦𑀼𑀢𑁆𑀢𑀭𑀁. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑀁, 𑀅𑀭𑀳𑀢𑁆𑀢𑀨𑀮𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀳𑀺 𑀅𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀧𑀩𑁆𑀩𑀚𑀦𑁆𑀢𑀺. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑀸𑀬𑁂𑀯 𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀅𑀧𑀭𑀧𑁆𑀧𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀻𑀢𑀺 𑀧𑀸𑀧𑀼𑀡𑀺𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀸𑀲𑀻𑀢𑀺, 𑀏𑀯𑀁 𑀯𑀺𑀳𑀭𑀦𑁆𑀢𑁄 𑀘 𑀔𑀻𑀡𑀸 𑀚𑀸𑀢𑀺…𑀧𑁂… 𑀅𑀩𑁆𑀪𑀜𑁆𑀜𑀸𑀲𑀺. 𑀏𑀢𑁂𑀦𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀪𑀽𑀫𑀺𑀁 𑀤𑀲𑁆𑀲𑁂𑀢𑀺.

𑀓𑀢𑀫𑀸 𑀧𑀦𑀲𑁆𑀲 𑀚𑀸𑀢𑀺 𑀔𑀻𑀡𑀸? 𑀓𑀣𑀜𑁆𑀘 𑀦𑀁 𑀅𑀩𑁆𑀪𑀜𑁆𑀜𑀸𑀲𑀻𑀢𑀺? 𑀯𑀼𑀘𑁆𑀘𑀢𑁂, 𑀓𑀸𑀫𑀜𑁆𑀘𑁂𑀢𑀁 𑀪𑀬𑀪𑁂𑀭𑀯𑁂𑀧𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀦𑀁 𑀇𑀥 𑀧𑀞𑀫𑀧𑀼𑀭𑀺𑀲𑀯𑀲𑁂𑀦 𑀬𑁄𑀚𑀦𑀸𑀦𑀬𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 𑀲𑀗𑁆𑀔𑁂𑀧𑀢𑁄 𑀪𑀡𑀸𑀫. 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀚𑀸𑀢𑀺 𑀔𑀻𑀡𑀸, 𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸. 𑀦 𑀅𑀦𑀸𑀕𑀢𑀸, 𑀢𑀢𑁆𑀣 𑀯𑀸𑀬𑀸𑀫𑀸𑀪𑀸𑀯𑀢𑁄. 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀫𑀕𑁆𑀕𑀲𑁆𑀲 𑀧𑀦 𑀅𑀪𑀸𑀯𑀺𑀢𑀢𑁆𑀢𑀸 𑀬𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀧𑁆𑀧𑀪𑁂𑀤𑀸 𑀚𑀸𑀢𑀺, 𑀲𑀸 𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁂𑀦 𑀔𑀻𑀡𑀸, 𑀢𑀁 𑀲𑁄 𑀫𑀕𑁆𑀕𑀪𑀸𑀯𑀦𑀸𑀬 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀓𑀺𑀮𑁂𑀲𑀸𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀫𑁆𑀫𑀁 𑀆𑀬𑀢𑀺𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀳𑁄𑀢𑀻𑀢𑀺 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺.

𑀯𑀼𑀲𑀺𑀢𑀦𑁆𑀢𑀺 𑀯𑀼𑀢𑁆𑀣𑀁 𑀧𑀭𑀺𑀯𑀼𑀢𑁆𑀣𑀁, 𑀓𑀢𑀁 𑀘𑀭𑀺𑀢𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀓𑀢𑀁 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀪𑀸𑀯𑀦𑀸𑀯𑀲𑁂𑀦 𑀲𑁄𑀴𑀲𑀯𑀺𑀥𑀫𑁆𑀧𑀺 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀤𑀸𑀦𑀺 𑀧𑀼𑀦𑀇𑀢𑁆𑀣𑀪𑀸𑀯𑀸𑀬 𑀏𑀯𑀁𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬, 𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸 𑀫𑀕𑁆𑀕𑀪𑀸𑀯𑀦𑀸 𑀦𑀢𑁆𑀣𑀻𑀢𑀺. 𑀅𑀣 𑀯𑀸, 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀢𑁆𑀣𑀪𑀸𑀯𑀢𑁄 𑀇𑀫𑀲𑁆𑀫𑀸 𑀏𑀯𑀁𑀧𑀓𑀸𑀭𑀸 𑀇𑀤𑀸𑀦𑀺 𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀸 𑀅𑀧𑀭𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀦𑀢𑁆𑀣𑀺. 𑀇𑀫𑁂 𑀧𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀙𑀺𑀦𑁆𑀦𑀫𑀽𑀮𑀓𑁄 𑀭𑀼𑀓𑁆𑀔𑁄 𑀯𑀺𑀬𑀸𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄𑀢𑀺 𑀏𑀓𑁄. 𑀅𑀭𑀳𑀢𑀦𑁆𑀢𑀺 𑀅𑀭𑀳𑀦𑁆𑀢𑀸𑀦𑀁, 𑀪𑀕𑀯𑀢𑁄 𑀲𑀸𑀯𑀓𑀸𑀦𑀁 𑀅𑀭𑀳𑀢𑀁 𑀅𑀩𑁆𑀪𑀦𑁆𑀢𑀭𑁄 𑀅𑀳𑁄𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀯𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.