𑁪. 𑀪𑀬𑀪𑁂𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀪𑀬𑀪𑁂𑀭𑀯𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀅𑀣𑀸𑀢𑀺 𑀅𑀯𑀺𑀘𑁆𑀙𑁂𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀔𑁄𑀢𑀺 𑀅𑀯𑀥𑀸𑀭𑀡𑀢𑁆𑀣𑁂, 𑀪𑀕𑀯𑀢𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀸𑀭𑁂 𑀅𑀯𑀺𑀘𑁆𑀙𑀺𑀦𑁆𑀦𑁂𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀸𑀡𑀼𑀲𑁆𑀲𑁄𑀡𑀻𑀢𑀺 𑀦𑁂𑀢𑀁 𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀦𑀸𑀫𑀁, 𑀅𑀧𑀺𑀘 𑀔𑁄 𑀞𑀸𑀦𑀦𑁆𑀢𑀭𑀧𑀝𑀺𑀮𑀸𑀪𑀮𑀤𑁆𑀥𑀁. 𑀚𑀸𑀡𑀼𑀲𑁆𑀲𑁄𑀡𑀺𑀝𑁆𑀞𑀸𑀦𑀁 𑀓𑀺𑀭 𑀦𑀸𑀫𑁂𑀢𑀁 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁, 𑀢𑀁 𑀢𑀲𑁆𑀲 𑀭𑀜𑁆𑀜𑀸 𑀤𑀺𑀦𑁆𑀦𑀁, 𑀢𑀲𑁆𑀫𑀸 ‘‘𑀚𑀸𑀦𑀼𑀲𑁆𑀲𑁄𑀡𑀻’’𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀭𑀳𑁆𑀫𑀁 𑀅𑀡𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀫𑀦𑁆𑀢𑁂 𑀲𑀚𑁆𑀛𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀫𑁂𑀯 𑀳𑀺 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀺𑀭𑀼𑀢𑁆𑀢𑀺𑀯𑀘𑀦𑀁. 𑀅𑀭𑀺𑀬𑀸 𑀧𑀦 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀬𑁂𑀦𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀢𑀲𑁆𑀫𑀸 𑀬𑀢𑁆𑀣 𑀪𑀕𑀯𑀸, 𑀢𑀢𑁆𑀣 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀦 𑀘 𑀓𑀸𑀭𑀡𑁂𑀦 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄? 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀸𑀥𑀺𑀧𑁆𑀧𑀸𑀬𑁂𑀦, 𑀲𑀸𑀤𑀼𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑁂𑀦 𑀤𑀺𑀚𑀕𑀡𑁂𑀳𑀺 𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁄 𑀯𑀺𑀬.

𑀉𑀧𑀲𑀗𑁆𑀓𑀫𑀻𑀢𑀺 𑀘 𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦𑀁. 𑀅𑀣 𑀯𑀸 𑀏𑀯𑀁 𑀕𑀢𑁄 𑀢𑀢𑁄 𑀆𑀲𑀦𑁆𑀦𑀢𑀭𑀁 𑀞𑀸𑀦𑀁 𑀪𑀕𑀯𑀢𑁄 𑀲𑀫𑀻𑀧𑀲𑀗𑁆𑀔𑀸𑀢𑀁 𑀕𑀦𑁆𑀢𑁆𑀯𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀻𑀢𑀺 𑀬𑀣𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄 𑀪𑀕𑀯𑀸 𑀢𑁂𑀦, 𑀏𑀯𑀁 𑀲𑁄𑀧𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀺, 𑀲𑀻𑀢𑁄𑀤𑀓𑀁 𑀯𑀺𑀬 𑀉𑀡𑁆𑀳𑁄𑀤𑀓𑁂𑀦 𑀲𑀫𑁆𑀫𑁄𑀤𑀺𑀢𑀁 𑀏𑀓𑀻𑀪𑀸𑀯𑀁 𑀅𑀕𑀫𑀸𑀲𑀺. 𑀬𑀸𑀬 𑀘 ‘‘𑀓𑀘𑁆𑀘𑀺 𑀢𑁂, 𑀪𑁄 𑀕𑁄𑀢𑀫, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀕𑁄𑀢𑀫𑀲𑀸𑀯𑀓𑀸𑀦𑀜𑁆𑀘 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺𑀆𑀤𑀺𑀓𑀸𑀬 𑀓𑀣𑀸𑀬 𑀲𑀫𑁆𑀫𑁄𑀤𑀺, 𑀢𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀲𑀗𑁆𑀔𑀸𑀢𑀲𑀫𑁆𑀫𑁄𑀤𑀚𑀦𑀦𑀢𑁄 𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄 𑀘 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀢𑁆𑀣𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀲𑀸𑀭𑁂𑀢𑀼𑀁 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑁂𑀢𑀼𑀁 𑀅𑀭𑀳𑀭𑀽𑀧𑀢𑁄 𑀲𑀭𑀺𑀢𑀩𑁆𑀩𑀪𑀸𑀯𑀢𑁄 𑀘 𑀲𑀸𑀭𑀸𑀡𑀻𑀬𑀁. 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄 𑀘 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄 𑀘 𑀲𑀸𑀭𑀡𑀻𑀬𑀁. 𑀢𑀣𑀸 𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀸𑀭𑀡𑀻𑀬𑀦𑁆𑀢𑀺 𑀏𑀯𑀁 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑁂𑀦𑀢𑁆𑀣𑁂𑀦 𑀆𑀕𑀢𑁄, 𑀢𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀏𑀓𑀫𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭𑁦) 𑀯𑀺𑀬. 𑀢𑀲𑁆𑀫𑀸 𑀬𑀣𑀸 𑀦𑀺𑀲𑀺𑀦𑁆𑀦𑁄 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀢𑀣𑀸 𑀦𑀺𑀲𑀻𑀤𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀦𑀺𑀲𑀻𑀤𑀻𑀢𑀺 𑀉𑀧𑀸𑀯𑀺𑀲𑀺. 𑀧𑀡𑁆𑀟𑀺𑀢𑀸 𑀳𑀺 𑀧𑀼𑀭𑀺𑀲𑀸 𑀕𑀭𑀼𑀝𑁆𑀞𑀸𑀦𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀲𑀦𑀓𑀼𑀲𑀮𑀢𑀸𑀬 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀦𑁆𑀢𑀺, 𑀅𑀬𑀜𑁆𑀘 𑀦𑁂𑀲𑀁 𑀅𑀜𑁆𑀜𑀢𑀭𑁄, 𑀢𑀲𑁆𑀫𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀓𑀣𑀁 𑀦𑀺𑀲𑀺𑀦𑁆𑀦𑁄 𑀧𑀦 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺. 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸. 𑀲𑁂𑀬𑁆𑀬𑀣𑀺𑀤𑀁, 𑀅𑀢𑀺𑀤𑀽𑀭𑀁 𑀅𑀘𑁆𑀘𑀸𑀲𑀦𑁆𑀦𑀁 𑀉𑀧𑀭𑀺𑀯𑀸𑀢𑀁 𑀉𑀦𑁆𑀦𑀢𑀧𑀤𑁂𑀲𑀁 𑀅𑀢𑀺𑀲𑀫𑁆𑀫𑀼𑀔𑀁 𑀅𑀢𑀺𑀧𑀘𑁆𑀙𑀸𑀢𑀺. 𑀅𑀢𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑀺 𑀲𑀘𑁂 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀘𑁆𑀘𑀸𑀲𑀤𑁆𑀤𑁂𑀦 𑀓𑀣𑁂𑀢𑀩𑁆𑀩𑀁 𑀳𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑁂 𑀦𑀺𑀲𑀺𑀦𑁆𑀦𑁄 𑀲𑀗𑁆𑀖𑀝𑁆𑀝𑀦𑀁 𑀓𑀭𑁄𑀢𑀺. 𑀉𑀧𑀭𑀺𑀯𑀸𑀢𑁂 𑀦𑀺𑀲𑀺𑀦𑁆𑀦𑁄 𑀲𑀭𑀻𑀭𑀕𑀦𑁆𑀥𑁂𑀦 𑀩𑀸𑀥𑀢𑀺. 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑁄 𑀅𑀕𑀸𑀭𑀯𑀁 𑀧𑀓𑀸𑀲𑁂𑀢𑀺. 𑀅𑀢𑀺𑀲𑀫𑁆𑀫𑀼𑀔𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀆𑀳𑀘𑁆𑀘 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀅𑀢𑀺𑀧𑀘𑁆𑀙𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀏𑀢𑁂 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺.

𑀬𑁂𑀫𑁂𑀢𑀺 𑀬𑁂 𑀇𑀫𑁂. 𑀓𑀼𑀮𑀧𑀼𑀢𑁆𑀢𑀸𑀢𑀺 𑀤𑀼𑀯𑀺𑀥𑀸 𑀓𑀼𑀮𑀧𑀼𑀢𑁆𑀢𑀸 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸. 𑀢𑀢𑁆𑀣 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀝𑁆𑀞𑀧𑀸𑀮𑁄 𑀦𑀸𑀫 𑀓𑀼𑀮𑀧𑀼𑀢𑁆𑀢𑁄 𑀢𑀲𑁆𑀫𑀺𑀁𑀬𑁂𑀯 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑁂 𑀅𑀕𑁆𑀕𑀓𑀼𑀮𑀲𑁆𑀲 𑀧𑀼𑀢𑁆𑀢𑁄’’𑀢𑀺 (𑀫. 𑀦𑀺. 𑁨.𑁨𑁯𑁪) 𑀏𑀯𑀁 𑀆𑀕𑀢𑀸 𑀉𑀘𑁆𑀘𑀸𑀓𑀼𑀮𑀧𑁆𑀧𑀲𑀼𑀢𑀸 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸 𑀦𑀸𑀫. ‘‘𑀬𑁂 𑀢𑁂 𑀓𑀼𑀮𑀧𑀼𑀢𑁆𑀢𑀸 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸’’𑀢𑀺 (𑀫. 𑀦𑀺. 𑁩.𑁭𑁮) 𑀏𑀯𑀁 𑀆𑀕𑀢𑀸 𑀧𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀼𑀮𑁂 𑀧𑀲𑀼𑀢𑀸𑀧𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑀸 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸 𑀦𑀸𑀫. 𑀇𑀥 𑀧𑀦 𑀤𑁆𑀯𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀓𑀼𑀮𑀧𑀼𑀢𑁆𑀢𑀸𑀬𑁂𑀯.

𑀲𑀤𑁆𑀥𑀸𑀢𑀺 𑀲𑀤𑁆𑀥𑀸𑀬. 𑀅𑀕𑀸𑀭𑀲𑁆𑀫𑀸𑀢𑀺 𑀅𑀕𑀸𑀭𑀢𑁄. 𑀅𑀦𑀕𑀸𑀭𑀺𑀬𑀦𑁆𑀢𑀺 𑀧𑀩𑁆𑀩𑀚𑁆𑀚𑀁 𑀪𑀺𑀓𑁆𑀔𑀼𑀪𑀸𑀯𑀜𑁆𑀘. 𑀧𑀩𑁆𑀩𑀚𑁆𑀚𑀸𑀧𑀺 𑀳𑀺 𑀦𑀢𑁆𑀣𑁂𑀢𑁆𑀣 𑀅𑀕𑀸𑀭𑀺𑀬𑀦𑁆𑀢𑀺 𑀅𑀦𑀕𑀸𑀭𑀺𑀬𑀸, 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀓𑀫𑁆𑀫𑀫𑁂𑀢𑁆𑀣 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀧𑀺 𑀦𑀢𑁆𑀣𑁂𑀢𑀲𑁆𑀲 𑀅𑀕𑀸𑀭𑀦𑁆𑀢𑀺 𑀅𑀦𑀕𑀸𑀭𑁄, 𑀅𑀦𑀕𑀸𑀭𑀲𑁆𑀲 𑀪𑀸𑀯𑁄 𑀅𑀦𑀕𑀸𑀭𑀺𑀬𑀁. 𑀧𑀩𑁆𑀩𑀚𑀺𑀢𑀸𑀢𑀺 𑀉𑀧𑀕𑀢𑀸, 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀅𑀦𑀕𑀸𑀭𑀺𑀬𑀲𑀗𑁆𑀔𑀸𑀢𑀁 𑀧𑀩𑁆𑀩𑀚𑁆𑀚𑀁 𑀪𑀺𑀓𑁆𑀔𑀼𑀪𑀸𑀯𑀁 𑀯𑀸 𑀉𑀧𑀕𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀩𑁆𑀩𑀗𑁆𑀕𑀫𑁄𑀢𑀺 𑀧𑀼𑀭𑀢𑁄 𑀕𑀸𑀫𑀻 𑀦𑀸𑀬𑀓𑁄. 𑀩𑀳𑀼𑀓𑀸𑀭𑁄𑀢𑀺 𑀳𑀺𑀢𑀓𑀺𑀭𑀺𑀬𑀸𑀬 𑀩𑀳𑀽𑀧𑀓𑀸𑀭𑁄. 𑀪𑀯𑀁 𑀢𑁂𑀲𑀁 𑀕𑁄𑀢𑀫𑁄 𑀲𑀫𑀸𑀤𑀧𑁂𑀢𑀸𑀢𑀺 𑀢𑁂 𑀓𑀼𑀮𑀧𑀼𑀢𑁆𑀢𑁂 𑀪𑀯𑀁 𑀕𑁄𑀢𑀫𑁄 𑀅𑀥𑀺𑀲𑀻𑀮𑀸𑀤𑀻𑀦𑀺 𑀕𑀸𑀳𑁂𑀢𑀸 𑀲𑀺𑀓𑁆𑀔𑀸𑀧𑁂𑀢𑀸. 𑀲𑀸 𑀚𑀦𑀢𑀸𑀢𑀺 𑀲𑁄 𑀚𑀦𑀲𑀫𑀽𑀳𑁄. 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑀦𑀸𑀦𑀼𑀕𑀢𑀺𑀁 𑀧𑀝𑀺𑀧𑀚𑁆𑀚𑀢𑀺, 𑀬𑀦𑁆𑀤𑀺𑀝𑁆𑀞𑀺𑀓𑁄 𑀪𑀯𑀁 𑀕𑁄𑀢𑀫𑁄 𑀬𑀁𑀔𑀦𑁆𑀢𑀺𑀓𑁄 𑀬𑀁𑀭𑀼𑀘𑀺𑀓𑁄, 𑀢𑁂𑀧𑀺 𑀢𑀦𑁆𑀤𑀺𑀝𑁆𑀞𑀺𑀓𑀸 𑀳𑁄𑀦𑁆𑀢𑀺 𑀢𑀁𑀔𑀦𑁆𑀢𑀺𑀓𑀸 𑀢𑀁𑀭𑀼𑀘𑀺𑀓𑀸𑀢𑀺 𑀅𑀢𑁆𑀣𑁄.

𑀓𑀲𑁆𑀫𑀸 𑀧𑀦𑀸𑀬𑀁 𑀏𑀯𑀫𑀸𑀳𑀸𑀢𑀺? 𑀏𑀲 𑀓𑀺𑀭 𑀧𑀼𑀩𑁆𑀩𑁂 𑀅𑀦𑁂𑀓𑁂 𑀓𑀼𑀮𑀧𑀼𑀢𑁆𑀢𑁂 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁂 𑀤𑁂𑀯𑀧𑀼𑀢𑁆𑀢𑁂 𑀯𑀺𑀬 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀧𑀭𑀺𑀘𑀸𑀭𑀺𑀬𑀫𑀸𑀦𑁂 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑁂 𑀤𑀺𑀲𑁆𑀯𑀸, 𑀢𑁂 𑀅𑀧𑀭𑁂𑀦 𑀲𑀫𑀬𑁂𑀦 𑀪𑀕𑀯𑀢𑁄 𑀫𑀥𑀼𑀭𑀭𑀲𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀤𑁆𑀥𑀸𑀬 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬 𑀲𑀦𑁆𑀢𑀼𑀝𑁆𑀞𑁂 𑀆𑀭𑀜𑁆𑀜𑀓𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀓𑁂𑀦𑀘𑀺 𑀅𑀭𑀓𑁆𑀔𑀺𑀬𑀫𑀸𑀦𑁂𑀧𑀺 𑀅𑀦𑀼𑀲𑁆𑀲𑀗𑁆𑀓𑀺𑀢𑀸𑀧𑀭𑀺𑀲𑀗𑁆𑀓𑀺𑀢𑁂 𑀳𑀝𑁆𑀞𑀧𑀳𑀝𑁆𑀞𑁂 𑀉𑀤𑀕𑁆𑀕𑀼𑀤𑀕𑁆𑀕𑁂 𑀅𑀤𑁆𑀤𑀲, 𑀤𑀺𑀲𑁆𑀯𑀸 𑀘 𑀇𑀫𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 ‘‘𑀅𑀬𑀁 𑀨𑀸𑀲𑀼𑀯𑀺𑀳𑀸𑀭𑁄 𑀓𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀲𑀫𑀡𑀁 𑀕𑁄𑀢𑀫’’𑀦𑁆𑀢𑀺 𑀪𑀕𑀯𑀢𑀺 𑀧𑀲𑀸𑀤𑀁 𑀅𑀮𑀢𑁆𑀣. 𑀲𑁄 𑀢𑀁 𑀧𑀲𑀸𑀤𑀁 𑀦𑀺𑀯𑁂𑀤𑁂𑀢𑀼𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀕𑀢𑁄, 𑀢𑀲𑁆𑀫𑀸 𑀏𑀯𑀫𑀸𑀳.

𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀅𑀩𑁆𑀪𑀦𑀼𑀫𑁄𑀤𑀦𑁆𑀢𑁄 𑀘 𑀏𑀯𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳. 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀼𑀫𑁄𑀤𑀦𑀢𑁆𑀣𑁄𑀬𑁂𑀯 𑀳𑀺 𑀏𑀢𑁆𑀣 𑀅𑀬𑀁 𑀏𑀯𑀦𑁆𑀢𑀺 𑀦𑀺𑀧𑀸𑀢𑁄. 𑀫𑀫𑀁 𑀉𑀤𑁆𑀤𑀺𑀲𑁆𑀲𑀸𑀢𑀺 𑀫𑀁 𑀉𑀤𑁆𑀤𑀺𑀲𑁆𑀲. 𑀲𑀤𑁆𑀥𑀸𑀢𑀺 𑀲𑀤𑁆𑀥𑀸𑀬𑁂𑀯. 𑀦 𑀇𑀡𑀝𑁆𑀞𑀸 𑀦 𑀪𑀬𑀝𑁆𑀝𑀸𑀢𑀺𑀆𑀤𑀻𑀦𑀺 𑀲𑀦𑁆𑀥𑀸𑀬𑀸𑀳. 𑀈𑀤𑀺𑀲𑀸𑀦𑀁𑀬𑁂𑀯 𑀳𑀺 𑀪𑀕𑀯𑀸 𑀧𑀼𑀩𑁆𑀩𑀗𑁆𑀕𑀫𑁄, 𑀦 𑀇𑀢𑀭𑁂𑀲𑀁. 𑀤𑀼𑀭𑀪𑀺𑀲𑀫𑁆𑀪𑀯𑀸𑀦𑀺 𑀳𑀻𑀢𑀺 𑀲𑀫𑁆𑀪𑀯𑀺𑀢𑀼𑀁 𑀤𑀼𑀓𑁆𑀔𑀸𑀦𑀺 𑀤𑀼𑀲𑁆𑀲𑀳𑀸𑀦𑀺, 𑀦 𑀲𑀓𑁆𑀓𑀸 𑀅𑀧𑁆𑀧𑁂𑀲𑀓𑁆𑀔𑁂𑀳𑀺 𑀅𑀚𑁆𑀛𑁄𑀕𑀸𑀳𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀻𑀢𑀺 𑀅𑀭𑀜𑁆𑀜𑀸𑀦𑀺 𑀘 𑀯𑀦𑀧𑀢𑁆𑀣𑀸𑀦𑀺 𑀘. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀪𑀺𑀥𑀫𑁆𑀫𑁂 𑀦𑀺𑀧𑁆𑀧𑀭𑀺𑀬𑀸𑀬𑁂𑀦, ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀺𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀬𑀦𑁆𑀢𑀁 ‘‘𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀆𑀭𑀜𑁆𑀜𑀺𑀓𑀗𑁆𑀕𑀦𑀺𑀧𑁆𑀨𑀸𑀤𑀓𑀁 𑀲𑁂𑀦𑀸𑀲𑀦𑀁 𑀯𑀼𑀢𑁆𑀢𑀁, 𑀢𑀤𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀦𑀧𑀢𑁆𑀣𑀦𑁆𑀢𑀺 𑀕𑀸𑀫𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑀝𑁆𑀞𑀸𑀦𑀁, 𑀬𑀢𑁆𑀣 𑀦 𑀓𑀲𑀻𑀬𑀢𑀺 𑀦 𑀯𑀧𑀻𑀬𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀯𑀦𑀧𑀢𑁆𑀣𑀦𑁆𑀢𑀺 𑀤𑀽𑀭𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀯𑀦𑀲𑀡𑁆𑀟𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀪𑀺𑀁𑀲𑀦𑀓𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀲𑀮𑁄𑀫𑀳𑀁𑀲𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀧𑀭𑀺𑀬𑀦𑁆𑀢𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀦 𑀫𑀦𑀼𑀲𑁆𑀲𑀽𑀧𑀘𑀸𑀭𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀏𑀢𑁆𑀣 𑀘 𑀧𑀭𑀺𑀬𑀦𑁆𑀢𑀸𑀦𑀦𑁆𑀢𑀺 𑀇𑀫𑀫𑁂𑀓𑀁 𑀧𑀭𑀺𑀬𑀸𑀬𑀁 𑀞𑀧𑁂𑀢𑁆𑀯𑀸 𑀲𑁂𑀲𑀧𑀭𑀺𑀬𑀸𑀬𑁂𑀳𑀺 𑀯𑀦𑀧𑀢𑁆𑀣𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻. 𑀧𑀦𑁆𑀢𑀸𑀦𑀻𑀢𑀺 𑀧𑀭𑀺𑀬𑀦𑁆𑀢𑀸𑀦𑀺 𑀅𑀢𑀺𑀤𑀽𑀭𑀸𑀦𑀺. 𑀤𑀼𑀓𑁆𑀓𑀭𑀁 𑀧𑀯𑀺𑀯𑁂𑀓𑀦𑁆𑀢𑀺 𑀓𑀸𑀬𑀯𑀺𑀯𑁂𑀓𑀁 𑀤𑀼𑀓𑁆𑀓𑀭𑀁. 𑀤𑀼𑀭𑀪𑀺𑀭𑀫𑀦𑁆𑀢𑀺 𑀅𑀪𑀺𑀭𑀫𑀺𑀢𑀼𑀁 𑀦 𑀲𑀼𑀔𑀁. 𑀏𑀓𑀢𑁆𑀢𑁂𑀢𑀺 𑀏𑀓𑀻𑀪𑀸𑀯𑁂. 𑀓𑀺𑀁 𑀤𑀲𑁆𑀲𑁂𑀢𑀺? 𑀓𑀸𑀬𑀯𑀺𑀯𑁂𑀓𑁂 𑀓𑀢𑁂𑀧𑀺 𑀢𑀢𑁆𑀣 𑀘𑀺𑀢𑁆𑀢𑀁 𑀅𑀪𑀺𑀭𑀫𑀸𑀧𑁂𑀢𑀼𑀁 𑀤𑀼𑀓𑁆𑀓𑀭𑀁. 𑀤𑁆𑀯𑀬𑀁𑀤𑁆𑀯𑀬𑀸𑀭𑀸𑀫𑁄 𑀳𑀺 𑀅𑀬𑀁 𑀮𑁄𑀓𑁄𑀢𑀺. 𑀳𑀭𑀦𑁆𑀢𑀺 𑀫𑀜𑁆𑀜𑁂𑀢𑀺 𑀳𑀭𑀦𑁆𑀢𑀺 𑀯𑀺𑀬 𑀖𑀲𑀦𑁆𑀢𑀺 𑀯𑀺𑀬. 𑀫𑀦𑁄𑀢𑀺 𑀫𑀦𑀁. 𑀲𑀫𑀸𑀥𑀺𑀁 𑀅𑀮𑀪𑀫𑀸𑀦𑀲𑁆𑀲𑀸𑀢𑀺 𑀉𑀧𑀘𑀸𑀭𑀲𑀫𑀸𑀥𑀺𑀁 𑀯𑀸 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀯𑀸 𑀅𑀮𑀪𑀦𑁆𑀢𑀲𑁆𑀲. 𑀓𑀺𑀁 𑀤𑀲𑁆𑀲𑁂𑀢𑀺? 𑀈𑀤𑀺𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀡𑀧𑀡𑁆𑀡𑀫𑀺𑀕𑀸𑀤𑀺𑀲𑀤𑁆𑀤𑁂𑀳𑀺 𑀯𑀺𑀯𑀺𑀥𑁂𑀳𑀺 𑀘 𑀪𑀺𑀁𑀲𑀦𑀓𑁂𑀳𑀺 𑀯𑀦𑀸𑀦𑀺 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀦𑁆𑀢𑀺 𑀫𑀜𑁆𑀜𑁂𑀢𑀺, 𑀲𑀩𑁆𑀩𑀁 𑀩𑁆𑀭𑀸𑀳𑁆𑀫𑀡𑁄 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀅𑀭𑀜𑁆𑀜𑀯𑀸𑀲𑁂 (𑀯𑀺𑀪. 𑁫𑁨𑁯) 𑀯𑀺𑀫𑁆𑀳𑀺𑀢𑁄 𑀆𑀳.

𑀓𑀸𑀬𑀓𑀫𑁆𑀫𑀦𑁆𑀢𑀯𑀸𑀭𑀓𑀣𑀸

𑁩𑁫. 𑀅𑀣𑀲𑁆𑀲 𑀪𑀕𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 ‘‘𑀏𑀯𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀻𑀳𑀺 𑀢𑀁 𑀢𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀩𑁆𑀪𑀦𑀼𑀫𑁄𑀤𑀺𑀢𑁆𑀯𑀸 𑀘 𑀬𑀲𑁆𑀫𑀸 𑀲𑁄𑀴𑀲𑀲𑀼 𑀞𑀸𑀦𑁂𑀲𑀼 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀭𑀳𑀺𑀢𑀸𑀦𑀁𑀬𑁂𑀯 𑀢𑀸𑀤𑀺𑀲𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀤𑀼𑀭𑀪𑀺𑀲𑀫𑁆𑀪𑀯𑀸𑀦𑀺, 𑀦 𑀢𑁂𑀲𑀼 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀸𑀳𑀬𑀼𑀢𑁆𑀢𑀸𑀦𑀁, 𑀅𑀢𑁆𑀢𑀦𑀸 𑀘 𑀩𑁄𑀥𑀺𑀲𑀢𑁆𑀢𑁄 𑀲𑀫𑀸𑀦𑁄 𑀢𑀸𑀤𑀺𑀲𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀢𑀸𑀤𑀺𑀲𑀸𑀦𑀁 𑀲𑁂𑀦𑀸𑀲𑀦𑀸𑀦𑀁 𑀤𑀼𑀭𑀪𑀺𑀲𑀫𑁆𑀪𑀯𑀢𑀁 𑀤𑀲𑁆𑀲𑁂𑀢𑀼𑀁, 𑀫𑀬𑁆𑀳𑀫𑁆𑀧𑀺 𑀔𑁄𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸𑀢𑀺 𑀲𑀫𑁆𑀩𑁄𑀥𑀢𑁄 𑀧𑀼𑀩𑁆𑀩𑁂𑀯, 𑀅𑀭𑀺𑀬𑀫𑀕𑁆𑀕𑀧𑁆𑀧𑀢𑁆𑀢𑀺𑀢𑁄 𑀅𑀧𑀭𑀪𑀸𑀕𑁂𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲𑀸𑀢𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀲𑁆𑀲. 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄𑀢𑀺 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲𑁂𑀯 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀦𑁆𑀢𑀼𑀁 𑀅𑀭𑀳𑀲𑀢𑁆𑀢𑀲𑁆𑀲𑁂𑀯 𑀲𑀢𑁄, 𑀩𑁄𑀥𑀺𑀬𑀸 𑀯𑀸 𑀲𑀢𑁆𑀢𑀲𑁆𑀲𑁂𑀯 𑀮𑀕𑁆𑀕𑀲𑁆𑀲𑁂𑀯 𑀲𑀢𑁄. 𑀤𑀻𑀧𑀗𑁆𑀓𑀭𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑁂𑀦 𑀅𑀪𑀺𑀦𑀻𑀳𑀸𑀭𑀲𑀫𑀺𑀤𑁆𑀥𑀺𑀢𑁄 𑀧𑀪𑀼𑀢𑀺 𑀢𑀣𑀸𑀕𑀢𑁄 𑀩𑁄𑀥𑀺𑀬𑀸 𑀲𑀢𑁆𑀢𑁄 𑀮𑀕𑁆𑀕𑁄 ‘‘𑀧𑀢𑁆𑀢𑀩𑁆𑀩𑀸 𑀫𑀬𑀸 𑀏𑀲𑀸’’𑀢𑀺 𑀢𑀤𑀥𑀺𑀕𑀫𑀸𑀬 𑀧𑀭𑀓𑁆𑀓𑀫𑀁 𑀅𑀫𑀼𑀜𑁆𑀘𑀦𑁆𑀢𑁄𑀬𑁂𑀯 𑀆𑀕𑀢𑁄, 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀫𑀬𑁆𑀳𑀦𑁆𑀢𑀺 𑀢𑀲𑁆𑀲 𑀏𑀯𑀁 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀫𑀬𑁆𑀳𑀁. 𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸𑀢𑀺 𑀬𑁂 𑀓𑁂𑀘𑀺 𑀧𑀩𑁆𑀩𑀚𑁆𑀚𑀽𑀧𑀕𑀢𑀸 𑀯𑀸 𑀪𑁄𑀯𑀸𑀤𑀺𑀦𑁄 𑀯𑀸.

𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀸𑀢𑀺 𑀅𑀧𑀭𑀺𑀲𑀼𑀤𑁆𑀥𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑀸 𑀓𑀸𑀬𑀓𑀫𑁆𑀫𑀦𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀳𑁂𑀢𑀽𑀢𑀺 𑀅𑀧𑀭𑀺𑀲𑀼𑀤𑁆𑀥𑀲𑁆𑀲 𑀓𑀸𑀬𑀓𑀫𑁆𑀫𑀦𑁆𑀢𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀦𑁄 𑀤𑁄𑀲𑀲𑁆𑀲 𑀳𑁂𑀢𑀼, 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀓𑀸𑀭𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀯𑁂𑀢𑀺 𑀏𑀓𑀁𑀲𑀯𑀘𑀦𑁂 𑀦𑀺𑀧𑀸𑀢𑁄. 𑀅𑀓𑀼𑀲𑀮𑀦𑁆𑀢𑀺 𑀲𑀸𑀯𑀚𑁆𑀚𑀁 𑀅𑀓𑁆𑀔𑁂𑀫𑀜𑁆𑀘. 𑀪𑀬𑀪𑁂𑀭𑀯𑀦𑁆𑀢𑀺 𑀪𑀬𑀜𑁆𑀘 𑀪𑁂𑀭𑀯𑀜𑁆𑀘. 𑀘𑀺𑀢𑁆𑀢𑀼𑀢𑁆𑀭𑀸𑀲𑀲𑁆𑀲 𑀘 𑀪𑀬𑀸𑀦𑀓𑀸𑀭𑀫𑁆𑀫𑀡𑀲𑁆𑀲 𑀘𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀭 𑀪𑀬𑀁 𑀲𑀸𑀯𑀚𑁆𑀚𑀝𑁆𑀞𑁂𑀦 𑀅𑀓𑀼𑀲𑀮𑀁, 𑀪𑁂𑀭𑀯𑀁 𑀅𑀓𑁆𑀔𑁂𑀫𑀝𑁆𑀞𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀯𑁆𑀳𑀸𑀬𑀦𑁆𑀢𑀻𑀢𑀺 𑀧𑀓𑁆𑀓𑁄𑀲𑀦𑁆𑀢𑀺. 𑀓𑀣𑀁? 𑀢𑁂 𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀢𑁆𑀯𑀸 ‘‘𑀫𑀬𑀁 𑀅𑀬𑀼𑀢𑁆𑀢𑀫𑀓𑀫𑁆𑀳𑀸, 𑀲𑀘𑁂 𑀦𑁄 𑀢𑁂 𑀚𑀸𑀦𑁂𑀬𑁆𑀬𑀼𑀁, 𑀬𑁂𑀲𑀁 𑀅𑀧𑀭𑀚𑁆𑀛𑀺𑀫𑁆𑀳𑀸, 𑀇𑀤𑀸𑀦𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀬𑁆𑀬𑀼’’𑀦𑁆𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀭𑁂 𑀯𑀸 𑀕𑀼𑀫𑁆𑀩𑀦𑁆𑀢𑀭𑁂 𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀢𑁂 ‘‘𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀢𑀺𑀡𑀲𑀤𑁆𑀤𑀁 𑀯𑀸 𑀧𑀡𑁆𑀡𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸, 𑀇𑀤𑀸𑀦𑀺𑀫𑁆𑀳𑀸 𑀦𑀝𑁆𑀞𑀸’’𑀢𑀺 𑀢𑀲𑀦𑁆𑀢𑀺 𑀯𑀺𑀢𑁆𑀢𑀲𑀦𑁆𑀢𑀺, 𑀆𑀕𑀦𑁆𑀢𑁆𑀯𑀸 𑀧𑀭𑁂𑀳𑀺 𑀧𑀭𑀺𑀯𑀸𑀭𑀺𑀢𑀸 𑀯𑀺𑀬 𑀩𑀤𑁆𑀥𑀸 𑀯𑀥𑀺𑀢𑀸 𑀯𑀺𑀬 𑀘 𑀳𑁄𑀦𑁆𑀢𑀺. 𑀏𑀯𑀁 𑀢𑀁 𑀪𑀬𑀪𑁂𑀭𑀯𑀁 𑀅𑀢𑁆𑀢𑀦𑀺 𑀲𑀫𑀸𑀭𑁄𑀧𑀦𑀝𑁆𑀞𑁂𑀦 𑀅𑀯𑁆𑀳𑀸𑀬𑀦𑁆𑀢𑀺 𑀧𑀓𑁆𑀓𑁄𑀲𑀦𑁆𑀢𑀺.

𑀦 𑀔𑁄 𑀧𑀦𑀸𑀳𑀁…𑀧𑁂… 𑀧𑀝𑀺𑀲𑁂𑀯𑀸𑀫𑀻𑀢𑀺 𑀅𑀳𑀁 𑀔𑁄 𑀧𑀦 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑁄 𑀳𑀼𑀢𑁆𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀦 𑀧𑀝𑀺𑀲𑁂𑀯𑀸𑀫𑀺. 𑀬𑁂 𑀳𑀺 𑀯𑁄𑀢𑀺 𑀏𑀢𑁆𑀣 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀭𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘. 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀸𑀢𑀺 𑀈𑀤𑀺𑀲𑀸 𑀳𑀼𑀢𑁆𑀯𑀸. 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄𑀢𑀺 𑀢𑁂𑀲𑀁 𑀅𑀳𑀫𑁆𑀧𑀺 𑀏𑀓𑁄 𑀅𑀜𑁆𑀜𑀢𑀭𑁄. 𑀩𑁄𑀥𑀺𑀲𑀢𑁆𑀢𑁄 𑀳𑀺 𑀕𑀳𑀝𑁆𑀞𑁄𑀧𑀺 𑀧𑀩𑁆𑀩𑀚𑀺𑀢𑁄𑀧𑀺 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑁄𑀯 𑀳𑁄𑀢𑀺. 𑀪𑀺𑀬𑁆𑀬𑁄𑀢𑀺 𑀅𑀢𑀺𑀭𑁂𑀓𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀮𑁆𑀮𑁄𑀫𑀦𑁆𑀢𑀺 𑀧𑀦𑁆𑀦𑀮𑁄𑀫𑀢𑀁, 𑀔𑁂𑀫𑀁 𑀲𑁄𑀢𑁆𑀣𑀺𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀆𑀧𑀸𑀤𑀺𑀦𑁆𑀢𑀺 𑀆𑀧𑀚𑁆𑀚𑀺𑀁, 𑀅𑀢𑀺𑀭𑁂𑀓𑀁 𑀲𑁄𑀢𑁆𑀣𑀺𑀪𑀸𑀯𑀁 𑀅𑀢𑀺𑀭𑁂𑀓𑁂𑀦 𑀯𑀸 𑀲𑁄𑀢𑁆𑀣𑀺𑀪𑀸𑀯𑀫𑀸𑀧𑀚𑁆𑀚𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬𑀸𑀢𑀺 𑀅𑀭𑀜𑁆𑀜𑁂 𑀯𑀺𑀳𑀸𑀭𑀢𑁆𑀣𑀸𑀬.

𑀓𑀸𑀬𑀓𑀫𑁆𑀫𑀦𑁆𑀢𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑀘𑀻𑀓𑀫𑁆𑀫𑀦𑁆𑀢𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁩𑁬. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀯𑀘𑀻𑀓𑀫𑁆𑀫𑀦𑁆𑀢𑀯𑀸𑀭𑁂 𑀢𑀸𑀯 𑀅𑀧𑀭𑀺𑀲𑀼𑀤𑁆𑀥𑀯𑀘𑀻𑀓𑀫𑁆𑀫𑀦𑁆𑀢𑀸𑀢𑀺 𑀅𑀧𑀭𑀺𑀲𑀼𑀤𑁆𑀥𑁂𑀦 𑀫𑀼𑀲𑀸𑀯𑀸𑀤𑀸𑀤𑀺𑀦𑀸 𑀯𑀘𑀻𑀓𑀫𑁆𑀫𑀦𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀢𑁂 𑀓𑀣𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺? 𑀢𑁂 𑀫𑀼𑀲𑀸𑀯𑀸𑀤𑁂𑀦 𑀧𑀭𑀲𑁆𑀲 𑀅𑀢𑁆𑀣𑀁 𑀪𑀜𑁆𑀚𑀺𑀢𑁆𑀯𑀸, 𑀧𑀺𑀲𑀼𑀡𑀯𑀸𑀘𑀸𑀬 𑀫𑀺𑀢𑁆𑀢𑀪𑁂𑀤𑀁 𑀓𑀢𑁆𑀯𑀸 𑀨𑀭𑀼𑀲𑀯𑀸𑀘𑀸𑀬 𑀧𑀭𑁂𑀲𑀁 𑀧𑀭𑀺𑀲𑀫𑀚𑁆𑀛𑁂 𑀫𑀫𑁆𑀫𑀸𑀦𑀺 𑀢𑀼𑀤𑀺𑀢𑁆𑀯𑀸 𑀦𑀺𑀭𑀢𑁆𑀣𑀓𑀯𑀸𑀘𑀸𑀬 𑀧𑀭𑀲𑀢𑁆𑀢𑀸𑀦𑀁 𑀓𑀫𑁆𑀫𑀦𑁆𑀢𑁂 𑀦𑀸𑀲𑁂𑀢𑁆𑀯𑀸 ‘‘𑀫𑀬𑀁 𑀅𑀬𑀼𑀢𑁆𑀢𑀫𑀓𑀫𑁆𑀳𑀸, 𑀲𑀘𑁂 𑀦𑁄 𑀢𑁂 𑀚𑀸𑀦𑁂𑀬𑁆𑀬𑀼𑀁, 𑀬𑁂𑀲𑀁 𑀅𑀧𑀭𑀚𑁆𑀛𑀺𑀫𑁆𑀳𑀸, 𑀇𑀤𑀸𑀦𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀬𑁆𑀬𑀼’’𑀦𑁆𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀭𑁂 𑀯𑀸 𑀕𑀼𑀫𑁆𑀩𑀦𑁆𑀢𑀭𑁂 𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀢𑁂 ‘‘𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀢𑀺𑀡𑀲𑀤𑁆𑀤𑀁 𑀯𑀸 𑀧𑀡𑁆𑀡𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀇𑀤𑀸𑀦𑀺𑀫𑁆𑀳𑀸 𑀦𑀝𑁆𑀞𑀸’’𑀢𑀺 𑀢𑀲𑀦𑁆𑀢𑀺 𑀯𑀺𑀢𑁆𑀢𑀲𑀦𑁆𑀢𑀺 𑀆𑀕𑀦𑁆𑀢𑁆𑀯𑀸 𑀧𑀭𑁂𑀳𑀺 𑀧𑀭𑀺𑀯𑀸𑀭𑀺𑀢𑀸 𑀯𑀺𑀬 𑀩𑀤𑁆𑀥𑀸 𑀯𑀥𑀺𑀢𑀸 𑀯𑀺𑀬 𑀘 𑀳𑁄𑀦𑁆𑀢𑀺. 𑀏𑀯𑀁 𑀢𑀁 𑀪𑀬𑀪𑁂𑀭𑀯𑀁 𑀅𑀢𑁆𑀢𑀦𑀺 𑀲𑀫𑀸𑀭𑁄𑀧𑀦𑀝𑁆𑀞𑁂𑀦 𑀅𑀯𑁆𑀳𑀸𑀬𑀦𑁆𑀢𑀺, 𑀧𑀓𑁆𑀓𑁄𑀲𑀦𑁆𑀢𑀺.

𑀫𑀦𑁄𑀓𑀫𑁆𑀫𑀦𑁆𑀢𑀯𑀸𑀭𑁂 𑀅𑀧𑀭𑀺𑀲𑀼𑀤𑁆𑀥𑀫𑀦𑁄𑀓𑀫𑁆𑀫𑀦𑁆𑀢𑀸𑀢𑀺 𑀅𑀧𑀭𑀺𑀲𑀼𑀤𑁆𑀥𑁂𑀦 𑀅𑀪𑀺𑀚𑁆𑀛𑀸𑀤𑀺𑀦𑀸 𑀫𑀦𑁄𑀓𑀫𑁆𑀫𑀦𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀢𑁂 𑀓𑀣𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺? 𑀢𑁂 𑀧𑀭𑁂𑀲𑀁 𑀭𑀓𑁆𑀔𑀺𑀢𑀕𑁄𑀧𑀺𑀢𑁂𑀲𑀼 𑀪𑀡𑁆𑀟𑁂𑀲𑀼 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀭𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀧𑀭𑀲𑀢𑁆𑀢𑁂 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀫𑀬𑀁 𑀅𑀬𑀼𑀢𑁆𑀢𑀫𑀓𑀫𑁆𑀳𑀸…𑀧𑁂… 𑀅𑀢𑁆𑀢𑀦𑀺 𑀲𑀫𑀸𑀭𑁄𑀧𑀦𑀝𑁆𑀞𑁂𑀦 𑀅𑀯𑁆𑀳𑀸𑀬𑀦𑁆𑀢𑀺 𑀧𑀓𑁆𑀓𑁄𑀲𑀦𑁆𑀢𑀺.

𑀆𑀚𑀻𑀯𑀯𑀸𑀭𑁂 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀸𑀢𑀺 𑀅𑀧𑀭𑀺𑀲𑀼𑀤𑁆𑀥𑁂𑀦 𑀯𑁂𑀚𑁆𑀚𑀓𑀫𑁆𑀫𑀤𑀽𑀢𑀓𑀫𑁆𑀫𑀯𑀟𑁆𑀠𑀺𑀧𑀬𑁄𑀕𑀸𑀤𑀺𑀦𑀸 𑀏𑀓𑀯𑀻𑀲𑀢𑀺𑀅𑀦𑁂𑀲𑀦𑀪𑁂𑀤𑁂𑀦 𑀆𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀢𑁂 𑀓𑀣𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺? 𑀢𑁂 𑀏𑀯𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀲𑀼𑀡𑀦𑁆𑀢𑀺 𑁋 ‘‘𑀲𑀸𑀲𑀦𑀲𑁄𑀥𑀓𑀸 𑀓𑀺𑀭 𑀢𑁂𑀧𑀺𑀝𑀓𑀸 𑀪𑀺𑀓𑁆𑀔𑀽 𑀲𑀸𑀲𑀦𑀁 𑀲𑁄𑀥𑁂𑀢𑀼𑀁 𑀦𑀺𑀓𑁆𑀔𑀦𑁆𑀢𑀸, 𑀅𑀚𑁆𑀚 𑀯𑀸 𑀲𑁆𑀯𑁂 𑀯𑀸 𑀇𑀥𑀸𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀭𑁂 𑀯𑀸…𑀧𑁂… 𑀢𑀲𑀦𑁆𑀢𑀺 𑀯𑀺𑀢𑁆𑀢𑀲𑀦𑁆𑀢𑀺. 𑀢𑁂 𑀳𑀺 𑀆𑀕𑀦𑁆𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀳𑀺𑀢𑀸 𑀯𑀺𑀬 𑀑𑀤𑀸𑀢𑀯𑀢𑁆𑀣𑀦𑀺𑀯𑀸𑀲𑀺𑀢𑀸 𑀯𑀺𑀬 𑀘 𑀳𑁄𑀦𑁆𑀢𑀻𑀢𑀺. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑁩𑁭. 𑀇𑀢𑁄 𑀧𑀭𑀁 𑀅𑀪𑀺𑀚𑁆𑀛𑀸𑀮𑀽𑀢𑀺𑀆𑀤𑀻𑀲𑀼 𑀓𑀺𑀜𑁆𑀘𑀸𑀧𑀺 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸 𑀫𑀦𑁄𑀓𑀫𑁆𑀫𑀦𑁆𑀢𑁂𑀦 𑀲𑀗𑁆𑀕𑀳𑀺𑀢𑀸 𑀢𑀣𑀸𑀧𑀺 𑀦𑀻𑀯𑀭𑀡𑀯𑀲𑁂𑀦 𑀧𑀼𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀅𑀪𑀺𑀚𑁆𑀛𑀸𑀮𑀽𑀢𑀺 𑀧𑀭𑀪𑀡𑁆𑀟𑀸𑀤𑀺𑀅𑀪𑀺𑀚𑁆𑀛𑀸𑀬𑀦𑀲𑀻𑀮𑀸. 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑀸𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀩𑀳𑀮𑀓𑀺𑀮𑁂𑀲𑀭𑀸𑀕𑀸, 𑀢𑁂 𑀓𑀣𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺? 𑀢𑁂 𑀅𑀯𑀯𑀢𑁆𑀣𑀺𑀢𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀯𑀯𑀢𑁆𑀣𑀺𑀢𑀸𑀭𑀫𑁆𑀫𑀡𑀸𑀦𑀁 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑀸𑀦𑀁 𑀤𑀺𑀯𑀸 𑀤𑀺𑀝𑁆𑀞𑀁 𑀭𑀢𑁆𑀢𑀺𑀁 𑀪𑀬𑀪𑁂𑀭𑀯𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺 𑁋 ‘‘𑀢𑁂 𑀆𑀓𑀼𑀮𑀘𑀺𑀢𑁆𑀢𑀸 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀢𑀲𑀦𑁆𑀢𑀺 𑀯𑀺𑀢𑁆𑀢𑀲𑀦𑁆𑀢𑀺, 𑀭𑀚𑁆𑀚𑀼𑀁 𑀯𑀸 𑀮𑀢𑀁 𑀯𑀸 𑀤𑀺𑀲𑁆𑀯𑀸 𑀲𑀧𑁆𑀧𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺, 𑀔𑀸𑀡𑀼𑀁 𑀤𑀺𑀲𑁆𑀯𑀸 𑀬𑀓𑁆𑀔𑀲𑀜𑁆𑀜𑀺𑀦𑁄, 𑀣𑀮𑀁 𑀯𑀸 𑀧𑀩𑁆𑀩𑀢𑀁 𑀯𑀸 𑀤𑀺𑀲𑁆𑀯𑀸 𑀳𑀢𑁆𑀣𑀺𑀲𑀜𑁆𑀜𑀺𑀦𑁄 𑀲𑀧𑁆𑀧𑀸𑀤𑀻𑀳𑀺 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑀺𑀢𑀸 𑀯𑀺𑀬 𑀳𑁄𑀦𑁆𑀢𑀻’’𑀢𑀺. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑁩𑁮. 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸𑀢𑀺 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑁂𑀦 𑀯𑀺𑀧𑀦𑁆𑀦𑀘𑀺𑀢𑁆𑀢𑀸. 𑀓𑀺𑀮𑁂𑀲𑀸𑀦𑀼𑀕𑀢𑀜𑁆𑀳𑀺 𑀘𑀺𑀢𑁆𑀢𑀁 𑀧𑀓𑀢𑀺𑀪𑀸𑀯𑀁 𑀯𑀺𑀚𑀳𑀢𑀺, 𑀧𑀼𑀭𑀸𑀡𑀪𑀢𑁆𑀢𑀩𑁆𑀬𑀜𑁆𑀚𑀦𑀁 𑀯𑀺𑀬 𑀧𑀽𑀢𑀺𑀓𑀁 𑀳𑁄𑀢𑀺. 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑀸𑀢𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑀸, 𑀅𑀪𑀤𑁆𑀭𑀓𑁂𑀦 𑀧𑀭𑁂𑀲𑀁 𑀅𑀦𑀢𑁆𑀣𑀚𑀦𑀓𑁂𑀦 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀓𑀣𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺? 𑀪𑀬𑀪𑁂𑀭𑀯𑀸𑀯𑁆𑀳𑀸𑀬𑀦𑀁 𑀇𑀢𑁄 𑀧𑀪𑀼𑀢𑀺 𑀅𑀪𑀺𑀚𑁆𑀛𑀸𑀮𑀼𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀢𑁆𑀣 𑀧𑀦 𑀯𑀺𑀲𑁂𑀲𑁄 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣 𑀯𑀓𑁆𑀔𑀸𑀫. 𑀦 𑀔𑁄 𑀧𑀦𑀸𑀳𑀁 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄𑀢𑀺 𑀏𑀢𑁆𑀣 𑀧𑀦 𑀫𑁂𑀢𑁆𑀢𑀘𑀺𑀢𑁆𑀢𑁄 𑀅𑀳𑀁 𑀳𑀺𑀢𑀘𑀺𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺, 𑀈𑀤𑀺𑀲𑀸 𑀳𑀺 𑀩𑁄𑀥𑀺𑀲𑀢𑁆𑀢𑀸 𑀳𑁄𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀤𑁄𑀲𑀧𑀝𑀺𑀧𑀓𑁆𑀔𑀯𑀲𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀸 𑀯𑀡𑁆𑀡𑁂𑀢𑀩𑁆𑀩𑀸.

𑁩𑁯. 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑀸𑀢𑀺 𑀘𑀺𑀢𑁆𑀢𑀕𑁂𑀮𑀜𑁆𑀜𑀪𑀽𑀢𑁂𑀦 𑀣𑀺𑀦𑁂𑀦 𑀲𑁂𑀲𑀦𑀸𑀫𑀓𑀸𑀬𑀕𑁂𑀮𑀜𑁆𑀜𑀪𑀽𑀢𑁂𑀦 𑀫𑀺𑀤𑁆𑀥𑁂𑀦 𑀘 𑀧𑀭𑀺𑀬𑀼𑀝𑁆𑀞𑀺𑀢𑀸, 𑀅𑀪𑀺𑀪𑀽𑀢𑀸 𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀦𑀺𑀤𑁆𑀤𑀸𑀩𑀳𑀼𑀮𑀸 𑀳𑁄𑀦𑁆𑀢𑀺.

𑁪𑁦. 𑀉𑀤𑁆𑀥𑀢𑀸𑀢𑀺 𑀉𑀤𑁆𑀥𑀘𑁆𑀘𑀧𑀓𑀢𑀺𑀓𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀘𑀺𑀢𑁆𑀢𑀸, 𑀉𑀤𑁆𑀥𑀘𑁆𑀘𑁂𑀦 𑀳𑀺 𑀏𑀓𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀯𑀺𑀧𑁆𑀨𑀦𑁆𑀤𑀢𑀺 𑀥𑀚𑀬𑀝𑁆𑀞𑀺𑀬𑀁 𑀯𑀸𑀢𑁂𑀦 𑀧𑀝𑀸𑀓𑀸 𑀯𑀺𑀬. 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸𑀢𑀺 𑀅𑀦𑀺𑀩𑁆𑀩𑀼𑀢𑀘𑀺𑀢𑁆𑀢𑀸, 𑀇𑀥 𑀓𑀼𑀓𑁆𑀓𑀼𑀘𑁆𑀘𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑁪𑁧. 𑀓𑀗𑁆𑀔𑀻 𑀯𑀺𑀘𑀺𑀓𑀺𑀘𑁆𑀙𑀻𑀢𑀺 𑀏𑀢𑁆𑀣 𑀏𑀓𑀫𑁂𑀯𑀺𑀤𑀁 𑀧𑀜𑁆𑀘𑀫𑀁 𑀦𑀻𑀯𑀭𑀡𑀁. 𑀓𑀺𑀁 𑀦𑀼 𑀔𑁄 𑀇𑀤𑀦𑁆𑀢𑀺 𑀆𑀭𑀫𑁆𑀫𑀡𑀁 𑀓𑀗𑁆𑀔𑀦𑀢𑁄 𑀓𑀗𑁆𑀔𑀸, 𑀇𑀤𑀫𑁂𑀯𑀺𑀤𑀦𑁆𑀢𑀺 𑀦𑀺𑀘𑁆𑀙𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀓𑀗𑁆𑀔𑀻 𑀯𑀺𑀘𑀺𑀓𑀺𑀘𑁆𑀙𑀻’’𑀢𑀺 𑀯𑀼𑀢𑁆𑀢𑀸.

𑁪𑁨. 𑀅𑀢𑁆𑀢𑀼𑀓𑁆𑀓𑀁𑀲𑀦𑀓𑀸 𑀧𑀭𑀯𑀫𑁆𑀪𑀻𑀢𑀺 𑀬𑁂 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀦𑁆𑀢𑀺 𑀉𑀓𑁆𑀔𑀺𑀧𑀦𑁆𑀢𑀺, 𑀉𑀘𑁆𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑀺, 𑀧𑀭𑀜𑁆𑀘 𑀯𑀫𑁆𑀪𑁂𑀦𑁆𑀢𑀺 𑀕𑀭𑀳𑀦𑁆𑀢𑀺 𑀦𑀺𑀦𑁆𑀤𑀦𑁆𑀢𑀺, 𑀦𑀻𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑀺, 𑀢𑁂𑀲𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂 𑀓𑀣𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺? 𑀢𑁂 𑀧𑀭𑁂𑀳𑀺 ‘‘𑀅𑀲𑀼𑀓𑁄 𑀘 𑀓𑀺𑀭 𑀅𑀲𑀼𑀓𑁄 𑀘 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀦𑁆𑀢𑀺, 𑀅𑀫𑁆𑀳𑁂 𑀕𑀭𑀳𑀦𑁆𑀢𑀺, 𑀤𑀸𑀲𑁂 𑀯𑀺𑀬 𑀓𑀭𑁄𑀦𑁆𑀢𑀺, 𑀕𑀡𑁆𑀳𑀣 𑀦𑁂’’𑀢𑀺 𑀅𑀦𑀼𑀩𑀤𑁆𑀥𑀸 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀭𑁂 𑀯𑀸 𑀕𑀼𑀫𑁆𑀩𑀦𑁆𑀢𑀭𑁂 𑀯𑀸𑀢𑀺 𑀓𑀸𑀬𑀓𑀫𑁆𑀫𑀦𑁆𑀢𑀲𑀤𑀺𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑁪𑁩. 𑀙𑀫𑁆𑀪𑀻𑀢𑀺 𑀓𑀸𑀬𑀣𑀫𑁆𑀪𑀦𑀮𑁄𑀫𑀳𑀁𑀲𑀦𑀓𑀭𑁂𑀦 𑀣𑀫𑁆𑀪𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀪𑀻𑀭𑀼𑀓𑀚𑀸𑀢𑀺𑀓𑀸𑀢𑀺 𑀪𑀻𑀭𑀼𑀓𑀧𑀓𑀢𑀺𑀓𑀸, 𑀕𑀸𑀫𑀤𑀸𑀭𑀓𑀸 𑀯𑀺𑀬 𑀪𑀬𑀩𑀳𑀼𑀮𑀸 𑀅𑀲𑀽𑀭𑀸 𑀓𑀸𑀢𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁪. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑁆𑀢𑀺 𑀏𑀢𑁆𑀣 𑀮𑀩𑁆𑀪𑀢𑀻𑀢𑀺 𑀮𑀸𑀪𑁄, 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀓𑁆𑀓𑀸𑀭𑁄𑀢𑀺 𑀲𑀼𑀦𑁆𑀤𑀭𑀓𑀸𑀭𑁄, 𑀧𑀘𑁆𑀘𑀬𑀸 𑀏𑀯 𑀳𑀺 𑀧𑀡𑀻𑀢𑀧𑀡𑀻𑀢𑀸 𑀲𑀼𑀦𑁆𑀤𑀭𑀲𑀼𑀦𑁆𑀤𑀭𑀸 𑀘 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀓𑀢𑀸 𑀲𑀓𑁆𑀓𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀸 𑀘 𑀧𑀭𑁂𑀳𑀺 𑀅𑀢𑁆𑀢𑀦𑁄 𑀕𑀸𑀭𑀯𑀓𑀺𑀭𑀺𑀬𑀸 𑀧𑀼𑀧𑁆𑀨𑀸𑀤𑀻𑀳𑀺 𑀯𑀸 𑀧𑀽𑀚𑀸. 𑀲𑀺𑀮𑁄𑀓𑁄𑀢𑀺 𑀯𑀡𑁆𑀡𑀪𑀡𑀦𑀁 𑀏𑀢𑀁, 𑀮𑀸𑀪𑀜𑁆𑀘 𑀲𑀓𑁆𑀓𑀸𑀭𑀜𑁆𑀘 𑀲𑀺𑀮𑁄𑀓𑀜𑁆𑀘 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁. 𑀦𑀺𑀓𑀸𑀫𑀬𑀫𑀸𑀦𑀸𑀢𑀺 𑀧𑀢𑁆𑀣𑀬𑀫𑀸𑀦𑀸. 𑀪𑀬𑀪𑁂𑀭𑀯𑀸𑀯𑁆𑀳𑀸𑀬𑀦𑀁 𑀅𑀪𑀺𑀚𑁆𑀛𑀸𑀮𑀼𑀯𑀸𑀭𑀲𑀤𑀺𑀲𑀫𑁂𑀯. 𑀢𑀤𑀢𑁆𑀣𑀤𑀻𑀧𑀓𑀁 𑀧𑀦𑁂𑀢𑁆𑀣 𑀧𑀺𑀬𑀕𑀸𑀫𑀺𑀓𑀯𑀢𑁆𑀣𑀼𑀁 𑀓𑀣𑁂𑀦𑁆𑀢𑀺 𑁋

𑀏𑀓𑁄 𑀓𑀺𑀭 𑀧𑀺𑀬𑀕𑀸𑀫𑀺𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀲𑀫𑀸𑀤𑀺𑀦𑁆𑀦𑀥𑀼𑀢𑀗𑁆𑀕𑀸𑀦𑀁 𑀪𑀺𑀓𑁆𑀔𑀽𑀦𑀁 𑀮𑀸𑀪𑀁 𑀤𑀺𑀲𑁆𑀯𑀸 ‘‘𑀅𑀳𑀫𑁆𑀧𑀺 𑀥𑀼𑀢𑀗𑁆𑀕𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀮𑀸𑀪𑀁 𑀉𑀧𑁆𑀧𑀸𑀤𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑁄𑀲𑀸𑀦𑀺𑀓𑀗𑁆𑀕𑀁 𑀲𑀫𑀸𑀤𑀸𑀬 𑀲𑀼𑀲𑀸𑀦𑁂 𑀯𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀓𑀫𑁆𑀫𑀫𑀼𑀢𑁆𑀢𑁄 𑀚𑀭𑀕𑁆𑀕𑀯𑁄 𑀤𑀺𑀯𑀸 𑀕𑁄𑀘𑀭𑁂 𑀘𑀭𑀺𑀢𑁆𑀯𑀸 𑀭𑀢𑁆𑀢𑀺𑀁 𑀢𑀲𑁆𑀫𑀺𑀁 𑀲𑀼𑀲𑀸𑀦𑁂 𑀧𑀼𑀧𑁆𑀨𑀕𑀼𑀫𑁆𑀩𑁂 𑀲𑀻𑀲𑀁 𑀓𑀢𑁆𑀯𑀸 𑀭𑁄𑀫𑀦𑁆𑀣𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀧𑀺𑀬𑀕𑀸𑀫𑀺𑀓𑁄 𑀭𑀢𑁆𑀢𑀺𑀁 𑀘𑀗𑁆𑀓𑀫𑀦𑀸 𑀦𑀺𑀓𑁆𑀔𑀦𑁆𑀢𑁄 𑀢𑀲𑁆𑀲 𑀳𑀦𑀼𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀤𑁆𑀥𑀸 𑀫𑀁 𑀮𑀸𑀪𑀕𑀺𑀤𑁆𑀥𑁄 𑀏𑀲 𑀲𑀼𑀲𑀸𑀦𑁂 𑀯𑀲𑀢𑀻𑀢𑀺 𑀜𑀢𑁆𑀯𑀸 𑀤𑁂𑀯𑀭𑀸𑀚𑀸 𑀯𑀺𑀳𑁂𑀞𑁂𑀢𑀼𑀁 𑀆𑀕𑀢𑁄’’𑀢𑀺, 𑀲𑁄 𑀚𑀭𑀕𑁆𑀕𑀯𑀲𑁆𑀲 𑀧𑀼𑀭𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀲𑀧𑁆𑀧𑀼𑀭𑀺𑀲 𑀤𑁂𑀯𑀭𑀸𑀚 𑀅𑀚𑁆𑀚 𑀫𑁂 𑀏𑀓𑀭𑀢𑁆𑀢𑀺𑀁 𑀔𑀫, 𑀲𑁆𑀯𑁂 𑀧𑀝𑁆𑀞𑀸𑀬 𑀦 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀫𑀲𑁆𑀲𑀫𑀸𑀦𑁄 𑀲𑀩𑁆𑀩𑀭𑀢𑁆𑀢𑀺𑀁 𑀬𑀸𑀘𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀢𑁄 𑀲𑀽𑀭𑀺𑀬𑁂 𑀉𑀝𑁆𑀞𑀺𑀢𑁂 𑀢𑀁 𑀤𑀺𑀲𑁆𑀯𑀸 𑀓𑀢𑁆𑀢𑀭𑀬𑀝𑁆𑀞𑀺𑀬𑀸 𑀧𑀳𑀭𑀺𑀢𑁆𑀯𑀸 𑀧𑀮𑀸𑀧𑁂𑀲𑀺 ‘‘𑀲𑀩𑁆𑀩𑀭𑀢𑁆𑀢𑀺𑀁 𑀫𑀁 𑀪𑀺𑀁𑀲𑀸𑀧𑁂𑀲𑀻’’𑀢𑀺.

𑁪𑁫. 𑀓𑀼𑀲𑀻𑀢𑀸𑀢𑀺 𑀓𑁄𑀲𑀚𑁆𑀚𑀸𑀦𑀼𑀕𑀢𑀸. 𑀳𑀻𑀦𑀯𑀻𑀭𑀺𑀬𑀸𑀢𑀺 𑀳𑀻𑀦𑀸 𑀯𑀻𑀭𑀺𑀬𑁂𑀦 𑀯𑀺𑀭𑀳𑀺𑀢𑀸 𑀯𑀺𑀬𑀼𑀢𑁆𑀢𑀸, 𑀦𑀺𑀩𑁆𑀩𑀻𑀭𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀓𑀼𑀲𑀻𑀢𑀸 𑀓𑀸𑀬𑀺𑀓𑀯𑀻𑀭𑀺𑀬𑀸𑀭𑀫𑁆𑀪𑀯𑀺𑀭𑀳𑀺𑀢𑀸 𑀳𑁄𑀦𑁆𑀢𑀺, 𑀳𑀻𑀦𑀯𑀻𑀭𑀺𑀬𑀸 𑀘𑁂𑀢𑀲𑀺𑀓𑀯𑀻𑀭𑀺𑀬𑀸𑀭𑀫𑁆𑀪𑀯𑀺𑀭𑀳𑀺𑀢𑀸. 𑀢𑁂 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀫𑀢𑁆𑀢𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀲𑀁 𑀅𑀯𑀯𑀢𑁆𑀣𑀺𑀢𑀸𑀭𑀫𑁆𑀫𑀡𑀸𑀦𑀦𑁆𑀢𑀺 𑀲𑀩𑁆𑀩𑀁 𑀧𑀼𑀩𑁆𑀩𑀲𑀤𑀺𑀲𑀫𑁂𑀯.

𑁪𑁬. 𑀫𑀼𑀝𑁆𑀞𑀲𑁆𑀲𑀢𑀻𑀢𑀺 𑀦𑀝𑁆𑀞𑀲𑁆𑀲𑀢𑀻. 𑀅𑀲𑀫𑁆𑀧𑀚𑀸𑀦𑀸𑀢𑀺 𑀧𑀜𑁆𑀜𑀸𑀭𑀳𑀺𑀢𑀸, 𑀇𑀫𑀲𑁆𑀲 𑀘 𑀧𑀝𑀺𑀧𑀓𑁆𑀔𑁂 ‘‘𑀉𑀧𑀝𑁆𑀞𑀺𑀢𑀲𑁆𑀲𑀢𑀻𑀳𑀫𑀲𑁆𑀫𑀻’’𑀢𑀺 𑀯𑀘𑀦𑀢𑁄 𑀲𑀢𑀺𑀪𑀸𑀚𑀦𑀺𑀬𑀫𑁂𑀯𑁂𑀢𑀁. 𑀧𑀜𑁆𑀜𑀸 𑀧𑀦𑁂𑀢𑁆𑀣 𑀲𑀢𑀺𑀤𑀼𑀩𑁆𑀩𑀮𑁆𑀬𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀤𑀼𑀯𑀺𑀥𑀸 𑀳𑀺 𑀲𑀢𑀺 𑀧𑀜𑁆𑀜𑀸𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸𑀯𑀺𑀧𑁆𑀧𑀬𑀼𑀢𑁆𑀢𑀸 𑀘. 𑀢𑀢𑁆𑀣 𑀧𑀜𑁆𑀜𑀸𑀲𑀫𑁆𑀧𑀬𑀼𑀢𑁆𑀢𑀸 𑀩𑀮𑀯𑀢𑀻, 𑀯𑀺𑀧𑁆𑀧𑀬𑀼𑀢𑁆𑀢𑀸 𑀤𑀼𑀩𑁆𑀩𑀮𑀸, 𑀢𑀲𑁆𑀫𑀸 𑀬𑀤𑀸𑀧𑀺 𑀢𑁂𑀲𑀁 𑀲𑀢𑀺 𑀳𑁄𑀢𑀺, 𑀢𑀤𑀸𑀧𑀺 𑀅𑀲𑀫𑁆𑀧𑀚𑀸𑀦𑀦𑁆𑀢𑀸 𑀫𑀼𑀝𑁆𑀞𑀲𑁆𑀲𑀢𑀻𑀬𑁂𑀯 𑀢𑁂, 𑀤𑀼𑀩𑁆𑀩𑀮𑀸𑀬 𑀲𑀢𑀺𑀬𑀸 𑀲𑀢𑀺𑀓𑀺𑀘𑁆𑀘𑀸𑀪𑀸𑀯𑀢𑁄𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀼𑀁 ‘‘𑀅𑀲𑀫𑁆𑀧𑀚𑀸𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑁂 𑀏𑀯𑀁 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑀸 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀫𑀢𑁆𑀢𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀲𑀩𑁆𑀩𑀁 𑀧𑀼𑀩𑁆𑀩𑀲𑀤𑀺𑀲𑀫𑁂𑀯.

𑁪𑁭. 𑀅𑀲𑀫𑀸𑀳𑀺𑀢𑀸𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺𑀯𑀺𑀭𑀳𑀺𑀢𑀸. 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸𑀢𑀺 𑀉𑀩𑁆𑀪𑀦𑁆𑀢𑀘𑀺𑀢𑁆𑀢𑀸. 𑀲𑀫𑀸𑀥𑀺𑀯𑀺𑀭𑀳𑁂𑀦 𑀮𑀤𑁆𑀥𑁄𑀓𑀸𑀲𑁂𑀦 𑀉𑀤𑁆𑀥𑀘𑁆𑀘𑁂𑀦 𑀢𑁂𑀲𑀁 𑀲𑀫𑀸𑀥𑀺𑀯𑀺𑀭𑀳𑀸𑀦𑀁 𑀘𑀺𑀢𑁆𑀢𑀁 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀧𑀭𑀺𑀩𑁆𑀪𑀫𑀢𑀺, 𑀯𑀦𑀫𑀓𑁆𑀓𑀝𑁄 𑀯𑀺𑀬 𑀯𑀦𑀲𑀸𑀔𑀸𑀲𑀼 𑀉𑀤𑁆𑀥𑀘𑁆𑀘𑁂𑀦 𑀏𑀓𑀸𑀭𑀫𑁆𑀫𑀡𑁂 𑀯𑀺𑀧𑁆𑀨𑀦𑁆𑀤𑀢𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀦 𑀢𑁂 𑀏𑀯𑀁 𑀅𑀲𑀫𑀸𑀳𑀺𑀢𑀸 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀫𑀢𑁆𑀢𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀲𑀩𑁆𑀩𑀁 𑀧𑀼𑀩𑁆𑀩𑀲𑀤𑀺𑀲𑀫𑁂𑀯.

𑁪𑁮. 𑀤𑀼𑀧𑁆𑀧𑀜𑁆𑀜𑀸𑀢𑀺 𑀦𑀺𑀧𑁆𑀧𑀜𑁆𑀜𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀜𑁆𑀜𑀸 𑀧𑀦 𑀤𑀼𑀝𑁆𑀞𑀸 𑀦𑀸𑀫 𑀦𑀢𑁆𑀣𑀺. 𑀏𑀴𑀫𑀽𑀕𑀸𑀢𑀺 𑀏𑀮𑀫𑀼𑀔𑀸, 𑀔-𑀓𑀸𑀭𑀲𑁆𑀲 𑀕-𑀓𑀸𑀭𑁄 𑀓𑀢𑁄. 𑀮𑀸𑀮𑀫𑀼𑀔𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀧𑁆𑀧𑀜𑁆𑀜𑀸𑀦𑀜𑁆𑀳𑀺 𑀓𑀣𑁂𑀦𑁆𑀢𑀸𑀦𑀁 𑀮𑀸𑀮𑀸 𑀫𑀼𑀔𑀢𑁄 𑀕𑀮𑀢𑀺, 𑀮𑀸𑀮𑀸 𑀘 𑀏𑀮𑀸𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀧𑀲𑁆𑀲𑁂𑀮𑀫𑀽𑀕𑀁 𑀉𑀭𑀕𑀁 𑀤𑀼𑀚𑁆𑀚𑀺𑀯𑁆𑀳’’𑀦𑁆𑀢𑀺. 𑀢𑀲𑁆𑀫𑀸 𑀢𑁂 ‘‘𑀏𑀴𑀫𑀽𑀕𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀏𑀮𑀫𑀼𑀔𑀸’’𑀢𑀺𑀧𑀺 𑀧𑀸𑀞𑁄. ‘‘𑀏𑀮𑀫𑀼𑀕𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀅𑀧𑀭𑁂 ‘‘𑀏𑀮𑀫𑀼𑀓𑀸’’𑀢𑀺𑀧𑀺, 𑀲𑀩𑁆𑀩𑀢𑁆𑀣 ‘‘𑀏𑀮𑀫𑀼𑀔𑀸’’𑀢𑀺 𑀅𑀢𑁆𑀣𑁄. 𑀢𑁂 𑀓𑀣𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺? 𑀢𑁂 𑀤𑀼𑀧𑁆𑀧𑀜𑁆𑀜𑀸 𑀏𑀴𑀫𑀽𑀕𑀸 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀫𑀢𑁆𑀢𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀲𑀁 𑀅𑀯𑀯𑀢𑁆𑀣𑀺𑀢𑀸𑀭𑀫𑁆𑀫𑀡𑀸𑀦𑀁 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑀸𑀦𑀁 𑀤𑀺𑀯𑀸 𑀤𑀺𑀝𑁆𑀞𑀁 𑀭𑀢𑁆𑀢𑀺𑀁 𑀪𑀬𑀪𑁂𑀭𑀯𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺 ‘‘𑀢𑁂 𑀆𑀓𑀼𑀮𑀘𑀺𑀢𑁆𑀢𑀸 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀢𑀲𑀦𑁆𑀢𑀺 𑀯𑀺𑀢𑁆𑀢𑀲𑀦𑁆𑀢𑀺, 𑀭𑀚𑁆𑀚𑀼𑀁 𑀯𑀸 𑀮𑀢𑀁 𑀯𑀸 𑀤𑀺𑀲𑁆𑀯𑀸 𑀲𑀧𑁆𑀧𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺, 𑀔𑀸𑀡𑀼𑀁 𑀤𑀺𑀲𑁆𑀯𑀸 𑀬𑀓𑁆𑀔𑀲𑀜𑁆𑀜𑀺𑀦𑁄, 𑀣𑀮𑀁 𑀯𑀸 𑀧𑀩𑁆𑀩𑀢𑀁 𑀯𑀸 𑀤𑀺𑀲𑁆𑀯𑀸 𑀳𑀢𑁆𑀣𑀺𑀲𑀜𑁆𑀜𑀺𑀦𑁄 𑀲𑀧𑁆𑀧𑀸𑀤𑀻𑀳𑀺 𑀅𑀦𑀬𑀯𑁆𑀬𑀲𑀦𑀁 𑀆𑀧𑀸𑀤𑀺𑀢𑀸 𑀯𑀺𑀬 𑀳𑁄𑀦𑁆𑀢𑀻’’𑀢𑀺. 𑀏𑀯𑀁 𑀢𑀁 𑀪𑀬𑀪𑁂𑀭𑀯𑀁 𑀅𑀢𑁆𑀢𑀦𑀺 𑀲𑀫𑀸𑀭𑁄𑀧𑀦𑀝𑁆𑀞𑁂𑀦 𑀅𑀯𑁆𑀳𑀸𑀬𑀦𑁆𑀢𑀺 𑀧𑀓𑁆𑀓𑁄𑀲𑀦𑁆𑀢𑀺. 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄𑀳𑀫𑀲𑁆𑀫𑀻𑀢𑀺 𑀏𑀢𑁆𑀣 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄𑀢𑀺 𑀧𑀜𑁆𑀜𑀸𑀬 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀦𑁄 𑀘 𑀔𑁄 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬, 𑀦 𑀫𑀕𑁆𑀕𑀧𑀜𑁆𑀜𑀸𑀬, 𑀅𑀧𑀺𑀘 𑀔𑁄 𑀧𑀦 𑀇𑀫𑁂𑀲𑀼 𑀲𑁄𑀴𑀲𑀲𑀼 𑀞𑀸𑀦𑁂𑀲𑀼 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀧𑀜𑁆𑀜𑀸𑀬𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀯𑀘𑀻𑀓𑀫𑁆𑀫𑀦𑁆𑀢𑀯𑀸𑀭𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀴𑀲𑀝𑁆𑀞𑀸𑀦𑀸𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑁄 𑀦𑀺𑀝𑁆𑀞𑀺𑀢𑁄.

𑀪𑀬𑀪𑁂𑀭𑀯𑀲𑁂𑀦𑀸𑀲𑀦𑀸𑀤𑀺𑀯𑀡𑁆𑀡𑀦𑀸

𑁪𑁯. 𑀢𑀲𑁆𑀲 𑀫𑀬𑁆𑀳𑀦𑁆𑀢𑀺 𑀓𑁄 𑀅𑀦𑀼𑀲𑀦𑁆𑀥𑀺? 𑀩𑁄𑀥𑀺𑀲𑀢𑁆𑀢𑁄 𑀓𑀺𑀭 𑀇𑀫𑀸𑀦𑀺 𑀲𑁄𑀴𑀲𑀸𑀭𑀫𑁆𑀫𑀡𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀘 𑀪𑀬𑀪𑁂𑀭𑀯𑀁 𑀅𑀤𑀺𑀲𑁆𑀯𑀸 𑀪𑀬𑀪𑁂𑀭𑀯𑀁 𑀦𑀸𑀫 𑀏𑀯𑀭𑀽𑀧𑀸𑀲𑀼 𑀭𑀢𑁆𑀢𑀻𑀲𑀼 𑀏𑀯𑀭𑀽𑀧𑁂 𑀲𑁂𑀦𑀸𑀲𑀦𑁂 𑀘 𑀧𑀜𑁆𑀜𑀸𑀬𑀢𑀺, 𑀳𑀦𑁆𑀤 𑀦𑀁 𑀢𑀢𑁆𑀣𑀸𑀧𑀺 𑀕𑀯𑁂𑀲𑀺𑀲𑁆𑀲𑀸𑀫𑀻𑀢𑀺 𑀪𑀬𑀪𑁂𑀭𑀯𑀕𑀯𑁂𑀲𑀦𑀫𑀓𑀸𑀲𑀺, 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀇𑀤𑀸𑀦𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 𑀢𑀲𑁆𑀲 𑀫𑀬𑁆𑀳𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀬𑀸 𑀢𑀸𑀢𑀺 𑀉𑀪𑀬𑀫𑁂𑀢𑀁 𑀭𑀢𑁆𑀢𑀻𑀦𑀁𑀬𑁂𑀯 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀯𑀘𑀦𑀁. 𑀅𑀪𑀺𑀜𑁆𑀜𑀸𑀢𑀸𑀢𑀺 𑀏𑀢𑁆𑀣 𑀅𑀪𑀻𑀢𑀺 𑀮𑀓𑁆𑀔𑀡𑀢𑁆𑀣𑁂 𑀉𑀧𑀲𑀕𑁆𑀕𑁄. 𑀢𑀲𑁆𑀫𑀸 𑀅𑀪𑀺𑀜𑁆𑀜𑀸𑀢𑀸𑀢𑀺 𑀘𑀦𑁆𑀤𑀧𑀸𑀭𑀺𑀧𑀽𑀭𑀺𑀬𑀸 𑀘𑀦𑁆𑀤𑀧𑀭𑀺𑀓𑁆𑀔𑀬𑁂𑀦𑀸𑀢𑀺 𑀏𑀯𑀫𑀸𑀤𑀻𑀳𑀺 𑀮𑀓𑁆𑀔𑀡𑁂𑀳𑀺 𑀜𑀸𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀮𑀓𑁆𑀔𑀺𑀢𑀸𑀢𑀺 𑀏𑀢𑁆𑀣 𑀉𑀧𑀲𑀕𑁆𑀕𑀫𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀅𑀪𑀺𑀮𑀓𑁆𑀔𑀺𑀢𑀸𑀢𑀺 𑀮𑀓𑁆𑀔𑀡𑀻𑀬𑀸 𑀇𑀘𑁆𑀘𑁂𑀯 𑀅𑀢𑁆𑀣𑁄, 𑀉𑀧𑁄𑀲𑀣𑀲𑀫𑀸𑀤𑀸𑀦𑀥𑀫𑁆𑀫𑀲𑁆𑀲𑀯𑀦𑀧𑀽𑀚𑀸𑀲𑀓𑁆𑀓𑀸𑀭𑀸𑀤𑀺𑀓𑀭𑀡𑀢𑁆𑀣𑀁 𑀮𑀓𑁆𑀔𑁂𑀢𑀩𑁆𑀩𑀸 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸 𑀉𑀧𑀮𑀓𑁆𑀔𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀘𑀸𑀢𑀼𑀤𑁆𑀤𑀲𑀻𑀢𑀺 𑀧𑀓𑁆𑀔𑀲𑁆𑀲 𑀧𑀞𑀫𑀤𑀺𑀯𑀲𑀢𑁄 𑀧𑀪𑀼𑀢𑀺 𑀘𑀢𑀼𑀤𑁆𑀤𑀲𑀦𑁆𑀦𑀁 𑀧𑀽𑀭𑀡𑀻 𑀏𑀓𑀸 𑀭𑀢𑁆𑀢𑀺. 𑀏𑀯𑀁 𑀧𑀜𑁆𑀘𑀤𑀲𑀻 𑀅𑀝𑁆𑀞𑀫𑀻 𑀘. 𑀧𑀓𑁆𑀔𑀲𑁆𑀲𑀸𑀢𑀺 𑀲𑀼𑀓𑁆𑀓𑀧𑀓𑁆𑀔𑀲𑁆𑀲 𑀓𑀡𑁆𑀳𑀧𑀓𑁆𑀔𑀲𑁆𑀲 𑀘. 𑀏𑀢𑀸 𑀢𑀺𑀲𑁆𑀲𑁄 𑀢𑀺𑀲𑁆𑀲𑁄 𑀓𑀢𑁆𑀯𑀸 𑀙 𑀭𑀢𑁆𑀢𑀺𑀬𑁄, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀧𑀓𑁆𑀔𑀯𑀘𑀦𑀁 𑀬𑁄𑀚𑁂𑀢𑀩𑁆𑀩𑀁 ‘‘𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑀻 𑀧𑀓𑁆𑀔𑀲𑁆𑀲 𑀧𑀜𑁆𑀘𑀤𑀲𑀻 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻’’𑀢𑀺. 𑀅𑀣 𑀧𑀜𑁆𑀘𑀫𑀻 𑀓𑀲𑁆𑀫𑀸 𑀦 𑀕𑀳𑀺𑀢𑀸𑀢𑀺? 𑀅𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀸. 𑀩𑀼𑀤𑁆𑀥𑁂 𑀓𑀺𑀭 𑀪𑀕𑀯𑀢𑀺 𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀧𑀭𑀺𑀦𑀺𑀩𑁆𑀩𑀼𑀢𑁂𑀧𑀺 𑀧𑀜𑁆𑀘𑀫𑀻 𑀅𑀦𑀪𑀺𑀮𑀓𑁆𑀔𑀺𑀢𑀸𑀬𑁂𑀯, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑀸 𑀘𑀺𑀦𑁆𑀢𑁂𑀲𑀼𑀁 ‘‘𑀥𑀫𑁆𑀫𑀲𑁆𑀲𑀯𑀦𑀁 𑀘𑀺𑀭𑁂𑀦 𑀳𑁄𑀢𑀻’’𑀢𑀺. 𑀢𑀢𑁄 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀧𑀜𑁆𑀘𑀫𑀻𑀢𑀺 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑀁 𑀞𑀧𑁂𑀲𑀼𑀁, 𑀢𑀢𑁄 𑀧𑀪𑀼𑀢𑀺 𑀲𑀸 𑀅𑀪𑀺𑀮𑀓𑁆𑀔𑀺𑀢𑀸 𑀚𑀸𑀢𑀸, 𑀏𑀯𑀁 𑀅𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀸 𑀏𑀢𑁆𑀣 𑀦 𑀕𑀳𑀺𑀢𑀸𑀢𑀺.

𑀢𑀣𑀸𑀭𑀽𑀧𑀸𑀲𑀽𑀢𑀺 𑀢𑀣𑀸𑀯𑀺𑀥𑀸𑀲𑀼. 𑀆𑀭𑀸𑀫𑀘𑁂𑀢𑀺𑀬𑀸𑀦𑀻𑀢𑀺 𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀸𑀤𑀬𑁄 𑀆𑀭𑀸𑀫𑀸 𑀏𑀯 𑀆𑀭𑀸𑀫𑀘𑁂𑀢𑀺𑀬𑀸𑀦𑀺. 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀳𑀺 𑀘𑁂𑀢𑀺𑀬𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀧𑀽𑀚𑀦𑀻𑀬𑀝𑁆𑀞𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀦𑀘𑁂𑀢𑀺𑀬𑀸𑀦𑀻𑀢𑀺 𑀩𑀮𑀺𑀳𑀭𑀡𑀯𑀦𑀲𑀡𑁆𑀟𑀲𑀼𑀪𑀕𑀯𑀦𑀤𑁂𑀯𑀲𑀸𑀮𑀯𑀦𑀸𑀤𑀻𑀦𑀺 𑀯𑀦𑀸𑀦𑀺𑀬𑁂𑀯 𑀯𑀦𑀘𑁂𑀢𑀺𑀬𑀸𑀦𑀺. 𑀭𑀼𑀓𑁆𑀔𑀘𑁂𑀢𑀺𑀬𑀸𑀦𑀻𑀢𑀺 𑀕𑀸𑀫𑀦𑀺𑀕𑀫𑀸𑀤𑀺𑀤𑁆𑀯𑀸𑀭𑁂𑀲𑀼 𑀧𑀽𑀚𑀦𑀻𑀬𑀭𑀼𑀓𑁆𑀔𑀸𑀬𑁂𑀯 𑀭𑀼𑀓𑁆𑀔𑀘𑁂𑀢𑀺𑀬𑀸𑀦𑀺. 𑀮𑁄𑀓𑀺𑀬𑀸 𑀳𑀺 𑀤𑀺𑀩𑁆𑀩𑀸𑀥𑀺𑀯𑀢𑁆𑀣𑀸𑀢𑀺 𑀯𑀸 𑀫𑀜𑁆𑀜𑀫𑀸𑀦𑀸 𑀢𑁂𑀲𑀼𑀬𑁂𑀯 𑀯𑀸 𑀤𑀺𑀩𑁆𑀩𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀆𑀭𑀸𑀫𑀯𑀦𑀭𑀼𑀓𑁆𑀔𑁂 𑀘𑀺𑀢𑁆𑀢𑀻𑀓𑀭𑁄𑀦𑁆𑀢𑀺, 𑀧𑀽𑀚𑁂𑀦𑁆𑀢𑀺, 𑀢𑁂𑀦 𑀢𑁂 𑀲𑀩𑁆𑀩𑁂𑀧𑀺 𑀘𑁂𑀢𑀺𑀬𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀪𑀺𑀁𑀲𑀦𑀓𑀸𑀦𑀻𑀢𑀺 𑀪𑀬𑀚𑀦𑀓𑀸𑀦𑀺, 𑀧𑀲𑁆𑀲𑀢𑁄𑀧𑀺 𑀲𑀼𑀡𑀢𑁄𑀧𑀺 𑀪𑀬𑀁 𑀚𑀦𑁂𑀦𑁆𑀢𑀺. 𑀲𑀮𑁄𑀫𑀳𑀁𑀲𑀸𑀦𑀻𑀢𑀺 𑀲𑀳𑁂𑀯 𑀮𑁄𑀫𑀳𑀁𑀲𑁂𑀦 𑀯𑀢𑁆𑀢𑀦𑁆𑀢𑀺, 𑀧𑀯𑀺𑀲𑀫𑀸𑀦𑀲𑁆𑀲𑁂𑀯 𑀮𑁄𑀫𑀳𑀁𑀲𑀚𑀦𑀦𑀢𑁄. 𑀅𑀧𑁆𑀧𑁂𑀯 𑀦𑀸𑀫 𑀧𑀲𑁆𑀲𑁂𑀬𑁆𑀬𑀦𑁆𑀢𑀺 𑀅𑀧𑀺 𑀦𑀸𑀫 𑀢𑀁 𑀪𑀬𑀪𑁂𑀭𑀯𑀁 𑀧𑀲𑁆𑀲𑁂𑀬𑁆𑀬𑀫𑁂𑀯. 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺, ‘‘𑀏𑀢𑀤𑀳𑁄𑀲𑀺 𑀬𑀁𑀦𑀽𑀦𑀸𑀳’’𑀦𑁆𑀢𑀺 𑀏𑀯𑀁 𑀘𑀺𑀦𑁆𑀢𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑁂𑀦 𑀓𑀸𑀮𑁂𑀦.

𑀢𑀢𑁆𑀣 𑀘 𑀫𑁂 𑀩𑁆𑀭𑀸𑀳𑁆𑀫𑀡 𑀯𑀺𑀳𑀭𑀢𑁄𑀢𑀺 𑀢𑀣𑀸𑀭𑀽𑀧𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀬𑀁 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀆𑀬𑀸𑀘𑀦𑀉𑀧𑀳𑀸𑀭𑀓𑀭𑀡𑀸𑀭𑀳𑀁 𑀬𑀓𑁆𑀔𑀝𑁆𑀞𑀸𑀦𑀁 𑀧𑀼𑀧𑁆𑀨𑀥𑀽𑀧𑀫𑀁𑀲𑀭𑀼𑀳𑀺𑀭𑀯𑀲𑀸𑀫𑁂𑀤𑀧𑀺𑀳𑀓𑀧𑀧𑁆𑀨𑀸𑀲𑀲𑀼𑀭𑀸𑀫𑁂𑀭𑀬𑀸𑀤𑀻𑀳𑀺 𑀑𑀓𑀺𑀡𑁆𑀡𑀓𑀺𑀮𑀺𑀦𑁆𑀦𑀥𑀭𑀡𑀺𑀢𑀮𑀁 𑀏𑀓𑀦𑀺𑀧𑀸𑀢𑀁 𑀯𑀺𑀬 𑀬𑀓𑁆𑀔𑀭𑀓𑁆𑀔𑀲𑀧𑀺𑀲𑀸𑀘𑀸𑀦𑀁, 𑀬𑀁 𑀤𑀺𑀯𑀸𑀧𑀺 𑀧𑀲𑁆𑀲𑀦𑁆𑀢𑀸𑀦𑀁 𑀳𑀤𑀬𑀁 𑀫𑀜𑁆𑀜𑁂 𑀨𑀮𑀢𑀺, 𑀢𑀁 𑀞𑀸𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁆𑀣 𑀘 𑀫𑁂, 𑀩𑁆𑀭𑀸𑀳𑁆𑀫𑀡, 𑀯𑀺𑀳𑀭𑀢𑁄’’𑀢𑀺. 𑀫𑀕𑁄 𑀯𑀸 𑀆𑀕𑀘𑁆𑀙𑀢𑀻𑀢𑀺 𑀲𑀺𑀗𑁆𑀕𑀸𑀦𑀺 𑀯𑀸 𑀔𑀼𑀭𑀸𑀦𑀺 𑀯𑀸 𑀓𑁄𑀝𑁆𑀝𑁂𑀦𑁆𑀢𑁄 𑀕𑁄𑀓𑀡𑁆𑀡𑀔𑀕𑁆𑀕𑀤𑀻𑀧𑀺𑀯𑀭𑀸𑀳𑀸𑀤𑀺𑀪𑁂𑀤𑁄 𑀫𑀕𑁄 𑀯𑀸 𑀆𑀕𑀘𑁆𑀙𑀢𑀺, 𑀲𑀩𑁆𑀩𑀘𑀢𑀼𑀧𑁆𑀧𑀤𑀸𑀦𑀜𑁆𑀳𑀺 𑀇𑀥 𑀫𑀕𑁄𑀢𑀺 𑀦𑀸𑀫𑀁. 𑀓𑀢𑁆𑀣𑀘𑀺 𑀧𑀦 𑀓𑀸𑀴𑀲𑀺𑀗𑁆𑀕𑀸𑀮𑁄𑀧𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀉𑀲𑀪𑀲𑁆𑀲𑁂𑀯 𑀢𑁂 𑀔𑀦𑁆𑀥𑁄, 𑀲𑀻𑀳𑀲𑁆𑀲𑁂𑀯 𑀯𑀺𑀚𑀫𑁆𑀪𑀺𑀢𑀁;

𑀫𑀕𑀭𑀸𑀚 𑀦𑀫𑁄 𑀢𑁆𑀬𑀢𑁆𑀣𑀼, 𑀅𑀧𑀺 𑀓𑀺𑀜𑁆𑀘𑀺 𑀮𑀪𑀸𑀫𑀲𑁂’’𑀢𑀺. (𑀚𑀸. 𑁧.𑁩.𑁧𑁩𑁩);

𑀫𑁄𑀭𑁄 𑀯𑀸 𑀓𑀝𑁆𑀞𑀁 𑀧𑀸𑀢𑁂𑀢𑀻𑀢𑀺 𑀫𑁄𑀭𑁄 𑀯𑀸 𑀲𑀼𑀓𑁆𑀔𑀓𑀝𑁆𑀞𑀁 𑀭𑀼𑀓𑁆𑀔𑀢𑁄 𑀘𑀸𑀮𑁂𑀢𑁆𑀯𑀸 𑀧𑀸𑀢𑁂𑀢𑀺. 𑀫𑁄𑀭𑀕𑁆𑀕𑀳𑀡𑁂𑀦 𑀘 𑀇𑀥 𑀲𑀩𑁆𑀩𑀧𑀓𑁆𑀔𑀺𑀕𑁆𑀕𑀳𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀢𑁂𑀦 𑀬𑁄 𑀓𑁄𑀘𑀺 𑀧𑀓𑁆𑀔𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀫𑁄𑀭𑁄 𑀯𑀸𑀢𑀺 𑀯𑀸 𑀲𑀤𑁆𑀤𑁂𑀦 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀧𑀓𑁆𑀔𑀻𑀢𑀺. 𑀏𑀲 𑀦𑀬𑁄 𑀧𑀼𑀭𑀺𑀫𑁂 𑀫𑀕𑀕𑁆𑀕𑀳𑀡𑁂𑀧𑀺. 𑀯𑀸𑀢𑁄 𑀯𑀸 𑀧𑀡𑁆𑀡𑀓𑀲𑀝𑀁 𑀏𑀭𑁂𑀢𑀻𑀢𑀺 𑀯𑀸𑀢𑁄 𑀯𑀸 𑀧𑀡𑁆𑀡𑀓𑀘𑀯𑀭𑀁 𑀖𑀝𑁆𑀝𑁂𑀢𑀺. 𑀏𑀢𑀁 𑀦𑀽𑀦 𑀢𑀁 𑀪𑀬𑀪𑁂𑀭𑀯𑀁 𑀆𑀕𑀘𑁆𑀙𑀢𑀻𑀢𑀺 𑀬𑀫𑁂𑀢𑀁 𑀆𑀕𑀘𑁆𑀙𑀢𑀺, 𑀢𑀁 𑀪𑀬𑀪𑁂𑀭𑀯𑀁 𑀦𑀽𑀦𑀸𑀢𑀺. 𑀇𑀢𑁄 𑀧𑀪𑀼𑀢𑀺 𑀘 𑀆𑀭𑀫𑁆𑀫𑀡𑀫𑁂𑀯 𑀪𑀬𑀪𑁂𑀭𑀯𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀢𑁆𑀢𑀲𑁆𑀲 𑀘 𑀅𑀥𑀺𑀫𑀢𑁆𑀢𑀲𑁆𑀲 𑀘 𑀪𑀬𑀲𑁆𑀲 𑀆𑀭𑀫𑁆𑀫𑀡𑀢𑁆𑀢𑀸 𑀲𑀼𑀔𑀸𑀭𑀫𑁆𑀫𑀡𑀁 𑀭𑀽𑀧𑀁 𑀲𑀼𑀔𑀫𑀺𑀯. 𑀓𑀺𑀁 𑀦𑀼 𑀔𑁄 𑀅𑀳𑀁 𑀅𑀜𑁆𑀜𑀤𑀢𑁆𑀣𑀼 𑀪𑀬𑀧𑀝𑀺𑀓𑀗𑁆𑀔𑀻 𑀯𑀺𑀳𑀭𑀸𑀫𑀻𑀢𑀺 𑀅𑀳𑀁 𑀔𑁄 𑀓𑀺𑀁 𑀓𑀸𑀭𑀡𑀁 𑀏𑀓𑀁𑀲𑁂𑀦𑁂𑀯 𑀪𑀬𑀁 𑀆𑀓𑀗𑁆𑀔𑀫𑀸𑀦𑁄 𑀇𑀘𑁆𑀙𑀫𑀸𑀦𑁄 𑀳𑀼𑀢𑁆𑀯𑀸 𑀯𑀺𑀳𑀭𑀸𑀫𑀺.

𑀬𑀣𑀸𑀪𑀽𑀢𑀁 𑀬𑀣𑀸𑀪𑀽𑀢𑀲𑁆𑀲𑀸𑀢𑀺 𑀬𑁂𑀦 𑀬𑁂𑀦 𑀇𑀭𑀺𑀬𑀸𑀧𑀣𑁂𑀦 𑀪𑀽𑀢𑀲𑁆𑀲 𑀪𑀯𑀺𑀢𑀲𑁆𑀲 𑀲𑀢𑁄 𑀯𑀢𑁆𑀢𑀫𑀸𑀦𑀲𑁆𑀲 𑀲𑀫𑀗𑁆𑀕𑀻𑀪𑀽𑀢𑀲𑁆𑀲 𑀯𑀸. 𑀫𑁂𑀢𑀺 𑀫𑀫 𑀲𑀦𑁆𑀢𑀺𑀓𑁂. 𑀢𑀣𑀸𑀪𑀽𑀢𑀁 𑀢𑀣𑀸𑀪𑀽𑀢𑁄 𑀯𑀸𑀢𑀺 𑀢𑁂𑀦 𑀢𑁂𑀦𑁂𑀯 𑀇𑀭𑀺𑀬𑀸𑀧𑀣𑁂𑀦 𑀪𑀽𑀢𑁄 𑀪𑀯𑀺𑀢𑁄 𑀲𑀦𑁆𑀢𑁄 𑀯𑀢𑁆𑀢𑀫𑀸𑀦𑁄 𑀲𑀫𑀗𑁆𑀕𑀻𑀪𑀽𑀢𑁄 𑀯𑀸𑀢𑀺 𑀅𑀢𑁆𑀣𑁄. 𑀲𑁄 𑀔𑁄 𑀅𑀳𑀁…𑀧𑁂… 𑀧𑀝𑀺𑀯𑀺𑀦𑁂𑀫𑀻𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀺𑀭 𑀘𑀗𑁆𑀓𑀫𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀫𑀕𑀲𑀺𑀗𑁆𑀕𑀔𑀼𑀭𑀲𑀤𑁆𑀤𑀸𑀤𑀺𑀪𑁂𑀤𑁂 𑀪𑀬𑀪𑁂𑀭𑀯𑀸𑀭𑀫𑁆𑀫𑀡𑁂 𑀆𑀕𑀢𑁂 𑀦𑁂𑀯 𑀫𑀳𑀸𑀲𑀢𑁆𑀢𑁄 𑀢𑀺𑀝𑁆𑀞𑀢𑀺, 𑀦 𑀦𑀺𑀲𑀻𑀤𑀢𑀺 𑀦 𑀲𑀬𑀢𑀺, 𑀅𑀣 𑀔𑁄 𑀘𑀗𑁆𑀓𑀫𑀦𑁆𑀢𑁄𑀯 𑀧𑀭𑀺𑀯𑀻𑀫𑀁𑀲𑀦𑁆𑀢𑁄 𑀧𑀭𑀺𑀯𑀺𑀘𑀺𑀦𑀦𑁆𑀢𑁄 𑀪𑀬𑀪𑁂𑀭𑀯𑀁 𑀦 𑀧𑀲𑁆𑀲𑀢𑀺, 𑀫𑀕𑀲𑀺𑀗𑁆𑀕𑀔𑀼𑀭𑀲𑀤𑁆𑀤𑀸𑀤𑀺𑀫𑀢𑁆𑀢𑀫𑁂𑀯 𑀘𑁂𑀢𑀁 𑀳𑁄𑀢𑀺, 𑀲𑁄 𑀢𑀁 𑀜𑀢𑁆𑀯𑀸 𑀇𑀤𑀁 𑀦𑀸𑀫𑁂𑀢𑀁, 𑀦 𑀪𑀬𑀪𑁂𑀭𑀯𑀦𑁆𑀢𑀺 𑀢𑀢𑁄 𑀢𑀺𑀝𑁆𑀞𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑀬𑀢𑀺 𑀯𑀸. 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀔𑁄 𑀅𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀲 𑀦𑀬𑁄 𑀲𑀩𑁆𑀩𑀧𑁂𑀬𑁆𑀬𑀸𑀮𑁂𑀲𑀼. 𑀇𑀢𑁄 𑀧𑀭𑀜𑁆𑀘 𑀇𑀭𑀺𑀬𑀸𑀧𑀣𑀧𑀝𑀺𑀧𑀸𑀝𑀺𑀬𑀸 𑀅𑀯𑀢𑁆𑀯𑀸 𑀆𑀲𑀦𑁆𑀦𑀧𑀝𑀺𑀧𑀸𑀝𑀺𑀬𑀸 𑀇𑀭𑀺𑀬𑀸𑀧𑀣𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀘𑀗𑁆𑀓𑀫𑀦𑁆𑀢𑀲𑁆𑀲 𑀳𑀺 𑀪𑀬𑀪𑁂𑀭𑀯𑁂 𑀆𑀕𑀢𑁂 𑀦 𑀞𑀺𑀢𑁄 𑀦 𑀦𑀺𑀲𑀺𑀦𑁆𑀦𑁄 𑀦 𑀦𑀺𑀧𑀦𑁆𑀦𑁄 𑀞𑀺𑀢𑀲𑁆𑀲𑀸𑀧𑀺 𑀆𑀕𑀢𑁂 𑀦 𑀘𑀗𑁆𑀓𑀫𑀻𑀢𑀺 𑀏𑀯𑀁 𑀢𑀲𑁆𑀲 𑀆𑀲𑀦𑁆𑀦𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑀸𑀢𑀺.

𑀪𑀬𑀪𑁂𑀭𑀯𑀲𑁂𑀦𑀸𑀲𑀦𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑀯𑀡𑁆𑀡𑀦𑀸

𑁫𑁦. 𑀏𑀯𑀁 𑀪𑀺𑀁𑀲𑀦𑀓𑁂𑀲𑀼𑀧𑀺 𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀪𑀬𑀪𑁂𑀭𑀯𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀛𑀸𑀬𑀻𑀦𑀁 𑀲𑀫𑁆𑀫𑁄𑀳𑀝𑁆𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀼𑀁 𑀲𑀦𑁆𑀢𑀺 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀦𑁆𑀢𑀻𑀢𑀺 𑀅𑀢𑁆𑀣𑀺 𑀲𑀁𑀯𑀺𑀚𑁆𑀚𑀦𑁆𑀢𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀭𑀢𑁆𑀢𑀺𑀁𑀬𑁂𑀯 𑀲𑀫𑀸𑀦𑀦𑁆𑀢𑀺 𑀭𑀢𑁆𑀢𑀺𑀁𑀬𑁂𑀯 𑀲𑀦𑁆𑀢𑀁, 𑀤𑀺𑀯𑀸𑀢𑀺 𑀲𑀜𑁆𑀚𑀸𑀦𑀦𑁆𑀢𑀻𑀢𑀺 ‘‘𑀤𑀺𑀯𑀲𑁄 𑀅𑀬’’𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀤𑀺𑀯𑀸𑀬𑁂𑀯 𑀲𑀫𑀸𑀦𑀦𑁆𑀢𑀺 𑀤𑀺𑀯𑀲𑀁𑀬𑁂𑀯 𑀲𑀦𑁆𑀢𑀁. 𑀭𑀢𑁆𑀢𑀻𑀢𑀺 𑀲𑀜𑁆𑀚𑀸𑀦𑀦𑁆𑀢𑀻𑀢𑀺 ‘‘𑀭𑀢𑁆𑀢𑀺 𑀅𑀬’’𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁂 𑀏𑀯𑀁𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀻𑀢𑀺. 𑀯𑀼𑀝𑁆𑀞𑀸𑀦𑀓𑁄𑀲𑀮𑁆𑀮𑀸𑀪𑀸𑀯𑀢𑁄 𑀯𑀸 𑀲𑀓𑀼𑀡𑀭𑀼𑀢𑀢𑁄 𑀯𑀸. 𑀓𑀣𑀁? 𑀇𑀥𑁂𑀓𑀘𑁆𑀘𑁄 𑀑𑀤𑀸𑀢𑀓𑀲𑀺𑀡𑀮𑀸𑀪𑀻 𑀤𑀺𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀤𑀺𑀯𑀸 𑀲𑀫𑀸𑀧𑀦𑁆𑀦𑁄 𑀤𑀺𑀯𑀸𑀬𑁂𑀯 𑀯𑀼𑀝𑁆𑀞𑀳𑀸𑀫𑀻𑀢𑀺 𑀫𑀦𑀲𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑀺, 𑀦𑁄 𑀘 𑀔𑁄 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁂 𑀓𑀼𑀲𑀮𑁄 𑀳𑁄𑀢𑀺. 𑀲𑁄 𑀤𑀺𑀯𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀯𑀼𑀝𑁆𑀞𑀸𑀢𑀺. 𑀑𑀤𑀸𑀢𑀓𑀲𑀺𑀡𑀨𑀭𑀡𑀯𑀲𑁂𑀦 𑀘𑀲𑁆𑀲 𑀯𑀺𑀲𑀤𑀁 𑀳𑁄𑀢𑀺 𑀯𑀺𑀪𑀽𑀢𑀁 𑀲𑀼𑀯𑀺𑀪𑀽𑀢𑀁. 𑀲𑁄, 𑀤𑀺𑀯𑀸 𑀯𑀼𑀝𑁆𑀞𑀳𑀸𑀫𑀻𑀢𑀺 𑀉𑀧𑁆𑀧𑀸𑀤𑀺𑀢𑀫𑀦𑀲𑀺𑀓𑀸𑀭𑀢𑀸𑀬 𑀑𑀤𑀸𑀢𑀓𑀲𑀺𑀡𑀨𑀭𑀡𑀯𑀺𑀲𑀤𑀯𑀺𑀪𑀽𑀢𑀢𑀸𑀬 𑀘 𑀭𑀢𑁆𑀢𑀺𑀁𑀬𑁂𑀯 𑀲𑀫𑀸𑀦𑀁 𑀤𑀺𑀯𑀸𑀢𑀺 𑀲𑀜𑁆𑀚𑀸𑀦𑀸𑀢𑀺. 𑀇𑀥 𑀧𑀦𑁂𑀓𑀘𑁆𑀘𑁄 𑀦𑀻𑀮𑀓𑀲𑀺𑀡𑀮𑀸𑀪𑀻 𑀭𑀢𑁆𑀢𑀺𑀁 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀭𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑁄 𑀭𑀢𑁆𑀢𑀺𑀁𑀬𑁂𑀯 𑀯𑀼𑀝𑁆𑀞𑀳𑀸𑀫𑀻𑀢𑀺 𑀫𑀦𑀲𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑀺, 𑀦𑁄 𑀘 𑀔𑁄 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁂 𑀓𑀼𑀲𑀮𑁄 𑀳𑁄𑀢𑀺. 𑀲𑁄 𑀭𑀢𑁆𑀢𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑀺𑀯𑀲𑀪𑀸𑀕𑁂 𑀯𑀼𑀝𑁆𑀞𑀸𑀢𑀺. 𑀦𑀻𑀮𑀓𑀲𑀺𑀡𑀨𑀭𑀡𑀯𑀲𑁂𑀦 𑀘𑀲𑁆𑀲 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀯𑀺𑀪𑀽𑀢𑀁. 𑀲𑁄 𑀭𑀢𑁆𑀢𑀺𑀁 𑀯𑀼𑀝𑁆𑀞𑀳𑀸𑀫𑀻𑀢𑀺 𑀉𑀧𑁆𑀧𑀸𑀤𑀺𑀢𑀫𑀦𑀲𑀺𑀓𑀸𑀭𑀢𑀸𑀬 𑀦𑀻𑀮𑀓𑀲𑀺𑀡𑀨𑀭𑀡𑀸𑀯𑀺𑀲𑀤𑀸𑀯𑀺𑀪𑀽𑀢𑀢𑀸𑀬 𑀘 𑀤𑀺𑀯𑀸𑀬𑁂𑀯 𑀲𑀫𑀸𑀦𑀁 𑀭𑀢𑁆𑀢𑀻𑀢𑀺 𑀲𑀜𑁆𑀚𑀸𑀦𑀸𑀢𑀺. 𑀏𑀯𑀁 𑀢𑀸𑀯 𑀯𑀼𑀝𑁆𑀞𑀸𑀦𑀓𑁄𑀲𑀮𑁆𑀮𑀸𑀪𑀸𑀯𑀢𑁄 𑀏𑀯𑀁𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺.

𑀲𑀓𑀼𑀡𑀭𑀼𑀢𑀢𑁄 𑀧𑀦 𑀇𑀥𑁂𑀓𑀘𑁆𑀘𑁄 𑀅𑀦𑁆𑀢𑁄𑀲𑁂𑀦𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀤𑀺𑀯𑀸 𑀭𑀯𑀦𑀓𑀲𑀓𑀼𑀡𑀸 𑀓𑀸𑀓𑀸𑀤𑀬𑁄 𑀘𑀦𑁆𑀤𑀸𑀮𑁄𑀓𑁂𑀦 𑀤𑀺𑀯𑀸𑀢𑀺 𑀫𑀜𑁆𑀜𑀫𑀸𑀦𑀸 𑀭𑀢𑁆𑀢𑀺𑀁 𑀭𑀯𑀦𑁆𑀢𑀺, 𑀅𑀜𑁆𑀜𑁂𑀳𑀺 𑀯𑀸 𑀓𑀸𑀭𑀡𑁂𑀳𑀺. 𑀲𑁄 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀭𑀢𑁆𑀢𑀺𑀁𑀬𑁂𑀯 𑀲𑀫𑀸𑀦𑀁 𑀤𑀺𑀯𑀸𑀢𑀺 𑀲𑀜𑁆𑀚𑀸𑀦𑀸𑀢𑀺. 𑀇𑀥 𑀧𑀦𑁂𑀓𑀘𑁆𑀘𑁄 𑀧𑀩𑁆𑀩𑀢𑀦𑁆𑀢𑀭𑁂 𑀕𑀫𑁆𑀪𑀻𑀭𑀸𑀬 𑀖𑀦𑀯𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀕𑀺𑀭𑀺𑀕𑀼𑀳𑀸𑀬 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀬 𑀯𑀢𑁆𑀢𑀫𑀸𑀦𑀸𑀬 𑀅𑀦𑁆𑀢𑀭𑀳𑀺𑀢𑀲𑀽𑀭𑀺𑀬𑀸𑀮𑁄𑀓𑁂 𑀓𑀸𑀮𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀭𑀢𑁆𑀢𑀺𑀁 𑀭𑀯𑀦𑀓𑀲𑀓𑀼𑀡𑀸 𑀉𑀮𑀽𑀓𑀸𑀤𑀬𑁄 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂𑀧𑀺 𑀢𑀢𑁆𑀣 𑀢𑀢𑁆𑀣 𑀲𑀫𑀦𑁆𑀥𑀓𑀸𑀭𑁂 𑀦𑀺𑀮𑀻𑀦𑀸 𑀭𑀢𑁆𑀢𑀺𑀲𑀜𑁆𑀜𑀸𑀬 𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀓𑀸𑀭𑀡𑁂𑀳𑀺 𑀭𑀯𑀦𑁆𑀢𑀺. 𑀲𑁄 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀤𑀺𑀯𑀸𑀬𑁂𑀯 𑀲𑀫𑀸𑀦𑀁 𑀭𑀢𑁆𑀢𑀻𑀢𑀺 𑀲𑀜𑁆𑀚𑀸𑀦𑀸𑀢𑀺. 𑀏𑀯𑀁 𑀲𑀓𑀼𑀡𑀭𑀼𑀢𑀢𑁄 𑀏𑀯𑀁𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀻𑀢𑀺. 𑀇𑀤𑀫𑀳𑀦𑁆𑀢𑀺 𑀇𑀤𑀁 𑀅𑀳𑀁 𑀏𑀯𑀁 𑀲𑀜𑁆𑀚𑀸𑀦𑀦𑀁. 𑀲𑀫𑁆𑀫𑁄𑀳𑀯𑀺𑀳𑀸𑀭𑀲𑁆𑀫𑀺𑀁 𑀯𑀤𑀸𑀫𑀻𑀢𑀺 𑀲𑀫𑁆𑀫𑁄𑀳𑀯𑀺𑀳𑀸𑀭𑀧𑀭𑀺𑀬𑀸𑀧𑀦𑁆𑀦𑀁 𑀅𑀦𑁆𑀢𑁄𑀕𑀥𑀁, 𑀲𑀫𑁆𑀫𑁄𑀳𑀯𑀺𑀳𑀸𑀭𑀸𑀦𑀁 𑀅𑀜𑁆𑀜𑀢𑀭𑀁 𑀯𑀤𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀳𑀁 𑀔𑁄 𑀧𑀦 𑀩𑁆𑀭𑀸𑀳𑁆𑀫𑀡…𑀧𑁂… 𑀲𑀜𑁆𑀚𑀸𑀦𑀸𑀫𑀻𑀢𑀺 𑀧𑀸𑀓𑀝𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑁄 𑀲𑀢𑁆𑀢𑀸𑀳𑀯𑀤𑁆𑀤𑀮𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀲𑀼 𑀅𑀤𑀺𑀲𑁆𑀲𑀫𑀸𑀦𑁂𑀲𑀼𑀧𑀺 𑀚𑀸𑀦𑀸𑀢𑀺𑀬𑁂𑀯 ‘‘𑀏𑀢𑁆𑀢𑀓𑀁 𑀧𑀼𑀭𑁂𑀪𑀢𑁆𑀢𑀓𑀸𑀮𑁄 𑀕𑀢𑁄, 𑀏𑀢𑁆𑀢𑀓𑀁 𑀧𑀘𑁆𑀙𑀸𑀪𑀢𑁆𑀢𑀓𑀸𑀮𑁄, 𑀏𑀢𑁆𑀢𑀓𑀁 𑀧𑀞𑀫𑀬𑀸𑀫𑁄, 𑀏𑀢𑁆𑀢𑀓𑀁 𑀫𑀚𑁆𑀛𑀺𑀫𑀬𑀸𑀫𑁄, 𑀏𑀢𑁆𑀢𑀓𑀁 𑀧𑀘𑁆𑀙𑀺𑀫𑀬𑀸𑀫𑁄’’𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁 𑀬𑀁 𑀧𑀽𑀭𑀺𑀢𑀧𑀸𑀭𑀫𑀻 𑀩𑁄𑀥𑀺𑀲𑀢𑁆𑀢𑁄 𑀏𑀯𑀁 𑀚𑀸𑀦𑀸𑀢𑀺. 𑀧𑀤𑁂𑀲𑀜𑀸𑀡𑁂 𑀞𑀺𑀢𑀸𑀦𑀁 𑀲𑀸𑀯𑀓𑀸𑀦𑀫𑁆𑀧𑀺 𑀳𑀺 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑁄 𑀧𑀸𑀓𑀝𑁄 𑀳𑁄𑀢𑀺.

𑀓𑀮𑁆𑀬𑀸𑀡𑀺𑀬𑀫𑀳𑀸𑀯𑀺𑀳𑀸𑀭𑁂 𑀓𑀺𑀭 𑀕𑁄𑀤𑀢𑁆𑀢𑀢𑁆𑀣𑁂𑀭𑁄 𑀤𑁆𑀯𑀗𑁆𑀕𑀼𑀮𑀓𑀸𑀮𑁂 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀗𑁆𑀕𑀼𑀮𑀓𑀸𑀮𑁂 𑀪𑀼𑀜𑁆𑀚𑀢𑀺. 𑀲𑀽𑀭𑀺𑀬𑁂 𑀅𑀤𑀺𑀲𑁆𑀲𑀫𑀸𑀦𑁂𑀧𑀺 𑀧𑀸𑀢𑁄𑀬𑁂𑀯 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀸𑀬 𑀯𑁂𑀮𑀸𑀬 𑀦𑀺𑀓𑁆𑀔𑀫𑀢𑀺. 𑀏𑀓𑀤𑀺𑀯𑀲𑀁 𑀆𑀭𑀸𑀫𑀺𑀓𑀸 ‘‘𑀲𑁆𑀯𑁂 𑀣𑁂𑀭𑀲𑁆𑀲 𑀦𑀺𑀓𑁆𑀔𑀫𑀦𑀓𑀸𑀮𑁂 𑀧𑀲𑁆𑀲𑀸𑀫𑀸’’𑀢𑀺 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀸𑀮𑀢𑁆𑀣𑀫𑁆𑀪𑀫𑀽𑀮𑁂 𑀦𑀺𑀲𑀻𑀤𑀺𑀁𑀲𑀼. 𑀣𑁂𑀭𑁄 𑀤𑁆𑀯𑀗𑁆𑀕𑀼𑀮𑀓𑀸𑀮𑁂𑀬𑁂𑀯 𑀦𑀺𑀓𑁆𑀔𑀫𑀢𑀺. 𑀢𑀢𑁄 𑀧𑀪𑀼𑀢𑀺 𑀓𑀺𑀭 𑀲𑀽𑀭𑀺𑀬𑁂 𑀅𑀤𑀺𑀲𑁆𑀲𑀫𑀸𑀦𑁂𑀧𑀺 𑀣𑁂𑀭𑀲𑁆𑀲 𑀦𑀺𑀓𑁆𑀔𑀫𑀦𑀲𑀜𑁆𑀜𑀸𑀬 𑀏𑀯 𑀪𑁂𑀭𑀺𑀁 𑀆𑀓𑁄𑀝𑁂𑀦𑁆𑀢𑀺.

𑀅𑀚𑀕𑀭𑀯𑀺𑀳𑀸𑀭𑁂𑀧𑀺 𑀓𑀸𑀴𑀤𑁂𑀯𑀢𑁆𑀣𑁂𑀭𑁄 𑀅𑀦𑁆𑀢𑁄𑀯𑀲𑁆𑀲𑁂 𑀬𑀸𑀫𑀕𑀡𑁆𑀟𑀺𑀓𑀁 𑀧𑀳𑀭𑀢𑀺, 𑀆𑀘𑀺𑀡𑁆𑀡𑀫𑁂𑀢𑀁 𑀣𑁂𑀭𑀲𑁆𑀲. 𑀦 𑀘 𑀬𑀸𑀫𑀬𑀦𑁆𑀢𑀦𑀸𑀴𑀺𑀓𑀁 𑀧𑀬𑁄𑀚𑁂𑀢𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀧𑀬𑁄𑀚𑁂𑀦𑁆𑀢𑀺. 𑀅𑀣 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑁂 𑀬𑀸𑀫𑁂 𑀣𑁂𑀭𑁂 𑀫𑀼𑀕𑁆𑀕𑀭𑀁 𑀕𑀳𑁂𑀢𑁆𑀯𑀸 𑀞𑀺𑀢𑀫𑀢𑁆𑀢𑁂𑀬𑁂𑀯 𑀏𑀓𑀁 𑀤𑁆𑀯𑁂 𑀯𑀸𑀭𑁂 𑀧𑀳𑀭𑀦𑁆𑀢𑁂𑀬𑁂𑀯 𑀯𑀸 𑀬𑀸𑀫𑀬𑀦𑁆𑀢𑀁 𑀧𑀢𑀢𑀺, 𑀏𑀯𑀁 𑀢𑀻𑀲𑀼 𑀬𑀸𑀫𑁂𑀲𑀼 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀣𑁂𑀭𑁄 𑀧𑀸𑀢𑁄𑀬𑁂𑀯 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀪𑁄𑀚𑀦𑀯𑁂𑀮𑀸𑀬 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀤𑀺𑀯𑀸 𑀯𑀺𑀳𑀸𑀭𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺. 𑀪𑀺𑀓𑁆𑀔𑀽 𑀓𑀸𑀮𑀢𑁆𑀣𑀫𑁆𑀪𑀁 𑀤𑀺𑀲𑁆𑀯𑀸 𑀣𑁂𑀭𑀲𑁆𑀲 𑀅𑀤𑀺𑀲𑁆𑀯𑀸 𑀆𑀕𑀫𑀦𑀢𑁆𑀣𑀸𑀬 𑀧𑁂𑀲𑁂𑀦𑁆𑀢𑀺. 𑀲𑁄 𑀪𑀺𑀓𑁆𑀔𑀼 𑀣𑁂𑀭𑀁 𑀤𑀺𑀯𑀸 𑀯𑀺𑀳𑀸𑀭𑀝𑁆𑀞𑀸𑀦𑀸 𑀦𑀺𑀓𑁆𑀔𑀫𑀦𑁆𑀢𑀫𑁂𑀯 𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀸 𑀧𑀲𑁆𑀲𑀢𑀺. 𑀏𑀯𑀁 𑀧𑀤𑁂𑀲𑀜𑀸𑀡𑁂 𑀞𑀺𑀢𑀸𑀦𑀁 𑀲𑀸𑀯𑀓𑀸𑀦𑀫𑁆𑀧𑀺 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑁄 𑀧𑀸𑀓𑀝𑁄 𑀳𑁄𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀩𑁄𑀥𑀺𑀲𑀢𑁆𑀢𑀸𑀦𑀦𑁆𑀢𑀺.

𑀬𑀁 𑀔𑁄 𑀢𑀁 𑀩𑁆𑀭𑀸𑀳𑁆𑀫𑀡…𑀧𑁂… 𑀯𑀤𑁂𑀬𑁆𑀬𑀸𑀢𑀺 𑀏𑀢𑁆𑀣 𑀧𑀦 ‘‘𑀬𑀁 𑀔𑁄 𑀢𑀁, 𑀩𑁆𑀭𑀸𑀳𑁆𑀫𑀡, 𑀅𑀲𑀫𑁆𑀫𑁄𑀳𑀥𑀫𑁆𑀫𑁄 𑀲𑀢𑁆𑀢𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄…𑀧𑁂… 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀯𑀘𑀦𑀁 𑀯𑀤𑀫𑀸𑀦𑁄 𑀓𑁄𑀘𑀺 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀲𑀺𑀬𑀸, 𑀦 𑀯𑀺𑀢𑀣𑀯𑀸𑀤𑀻 𑀅𑀲𑁆𑀲. 𑀫𑀫𑁂𑀯 𑀢𑀁 𑀯𑀘𑀦𑀁 𑀯𑀤𑀫𑀸𑀦𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀲𑀺𑀬𑀸, 𑀦 𑀯𑀺𑀢𑀣𑀯𑀸𑀤𑀻 𑀅𑀲𑁆𑀲𑀸𑀢𑀺 𑀏𑀯𑀁 𑀧𑀤𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀅𑀲𑀫𑁆𑀫𑁄𑀳𑀥𑀫𑁆𑀫𑁄𑀢𑀺 𑀅𑀲𑀫𑁆𑀫𑁄𑀳𑀲𑀪𑀸𑀯𑁄. 𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂. 𑀩𑀳𑀼𑀚𑀦𑀳𑀺𑀢𑀸𑀬𑀸𑀢𑀺 𑀩𑀳𑀼𑀚𑀦𑀲𑁆𑀲 𑀳𑀺𑀢𑀢𑁆𑀣𑀸𑀬, 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀳𑀺𑀢𑀽𑀧𑀤𑁂𑀲𑀓𑁄𑀢𑀺. 𑀩𑀳𑀼𑀚𑀦𑀲𑀼𑀔𑀸𑀬𑀸𑀢𑀺 𑀩𑀳𑀼𑀚𑀦𑀲𑁆𑀲 𑀲𑀼𑀔𑀢𑁆𑀣𑀸𑀬, 𑀘𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀓𑀭𑀡𑀲𑀼𑀔𑀲𑁆𑀲 𑀤𑀸𑀬𑀓𑁄𑀢𑀺. 𑀮𑁄𑀓𑀸𑀦𑀼𑀓𑀫𑁆𑀧𑀸𑀬𑀸𑀢𑀺 𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀢𑁆𑀣𑀸𑀬, 𑀫𑁂𑀢𑁆𑀢𑀸𑀓𑀭𑀼𑀡𑀸𑀲𑀫𑁆𑀧𑀢𑁆𑀢𑀺𑀬𑀸 𑀫𑀸𑀢𑀸𑀧𑀺𑀢𑀭𑁄 𑀯𑀺𑀬 𑀮𑁄𑀓𑀲𑁆𑀲 𑀭𑀓𑁆𑀔𑀺𑀢𑀸 𑀕𑁄𑀧𑀬𑀺𑀢𑀸𑀢𑀺. 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀇𑀥 𑀤𑁂𑀯𑀫𑀦𑀼𑀲𑁆𑀲𑀕𑁆𑀕𑀳𑀡𑁂𑀦 𑀘 𑀪𑀩𑁆𑀩𑀧𑀼𑀕𑁆𑀕𑀮𑀯𑁂𑀦𑁂𑀬𑁆𑀬𑀲𑀢𑁆𑀢𑁂𑀬𑁂𑀯 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀦𑀺𑀩𑁆𑀩𑀸𑀦𑀫𑀕𑁆𑀕𑀨𑀮𑀸𑀥𑀺𑀕𑀫𑀸𑀬 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀸𑀬𑀸𑀢𑀺 𑀳𑀺 𑀯𑀼𑀢𑁆𑀢𑁂 𑀧𑀭𑀫𑀢𑁆𑀣𑀢𑁆𑀣𑀸𑀬 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀺𑀢𑀸𑀬𑀸𑀢𑀺 𑀯𑀼𑀢𑁆𑀢𑁂 𑀢𑀁 𑀲𑀫𑁆𑀧𑀸𑀧𑀓𑀫𑀕𑁆𑀕𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀫𑀕𑁆𑀕𑀢𑁄 𑀳𑀺 𑀉𑀢𑁆𑀢𑀭𑀺 𑀳𑀺𑀢𑀁 𑀦𑀸𑀫 𑀦𑀢𑁆𑀣𑀺. 𑀲𑀼𑀔𑀸𑀬𑀸𑀢𑀺 𑀯𑀼𑀢𑁆𑀢𑁂 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀢𑁄 𑀉𑀢𑁆𑀢𑀭𑀺 𑀲𑀼𑀔𑀸𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀘𑁂𑀢𑀁 ‘‘𑀅𑀬𑀁 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄 𑀘𑁂𑀯 𑀆𑀬𑀢𑀺𑀜𑁆𑀘 𑀲𑀼𑀔𑀯𑀺𑀧𑀸𑀓𑁄’’𑀢𑀺 (𑀤𑀻. 𑀦𑀺. 𑁩.𑁩𑁫𑁫; 𑀅. 𑀦𑀺. 𑁫.𑁨𑁭; 𑀯𑀺𑀪. 𑁮𑁦𑁪).

𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀤𑀺𑀯𑀡𑁆𑀡𑀦𑀸

𑁫𑁧. 𑀏𑀯𑀁 𑀪𑀕𑀯𑀸 𑀩𑀼𑀤𑁆𑀥𑀕𑀼𑀡𑀧𑀝𑀺𑀮𑀸𑀪𑀸𑀯𑀲𑀸𑀦𑀁 𑀅𑀢𑁆𑀢𑀦𑁄 𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀸𑀬 𑀧𑀝𑀺𑀧𑀤𑀸𑀬 𑀢𑀁 𑀓𑁄𑀝𑀺𑀧𑁆𑀧𑀢𑁆𑀢𑀁 𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑀁 𑀅𑀥𑀺𑀕𑀢𑁄, 𑀢𑀁 𑀧𑀼𑀩𑁆𑀩𑀪𑀸𑀕𑀢𑁄 𑀧𑀪𑀼𑀢𑀺 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳.

𑀓𑁂𑀘𑀺 𑀧𑀦𑀸𑀳𑀼 ‘‘𑀇𑀫𑀁 𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀺𑀢𑁆𑀢𑀫𑁂𑀯𑀁 𑀉𑀧𑁆𑀧𑀦𑁆𑀦𑀁 ‘𑀓𑀸𑀬 𑀦𑀼 𑀔𑁄 𑀧𑀝𑀺𑀧𑀤𑀸𑀬 𑀇𑀫𑀁 𑀧𑀢𑁆𑀢𑁄’𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀫𑀜𑁆𑀜𑀸𑀬 𑀇𑀫𑀸𑀬𑀸𑀳𑀁 𑀧𑀝𑀺𑀧𑀤𑀸𑀬 𑀇𑀫𑀁 𑀉𑀢𑁆𑀢𑀫𑀁 𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑀁 𑀧𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳𑀸’’𑀢𑀺.

𑀢𑀢𑁆𑀣 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀩𑁆𑀭𑀸𑀳𑁆𑀫𑀡, 𑀯𑀻𑀭𑀺𑀬𑀁 𑀅𑀳𑁄𑀲𑀻𑀢𑀺, 𑀩𑁆𑀭𑀸𑀳𑁆𑀫𑀡, 𑀦 𑀫𑀬𑀸 𑀅𑀬𑀁 𑀉𑀢𑁆𑀢𑀫𑁄 𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑁄 𑀓𑀼𑀲𑀻𑀢𑁂𑀦 𑀫𑀼𑀝𑁆𑀞𑀲𑁆𑀲𑀢𑀺𑀦𑀸 𑀲𑀸𑀭𑀤𑁆𑀥𑀓𑀸𑀬𑁂𑀦 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁂𑀦 𑀯𑀸 𑀅𑀥𑀺𑀕𑀢𑁄, 𑀅𑀧𑀺𑀘 𑀔𑁄 𑀢𑀤𑀥𑀺𑀕𑀫𑀸𑀬 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀯𑀻𑀭𑀺𑀬𑀁 𑀅𑀳𑁄𑀲𑀺, 𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀺𑀦𑁆𑀦𑁂𑀦 𑀫𑀬𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀅𑀳𑁄𑀲𑀺, 𑀧𑀕𑁆𑀕𑀳𑀺𑀢𑀁 𑀅𑀲𑀺𑀣𑀺𑀮𑀧𑁆𑀧𑀯𑀢𑁆𑀢𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀭𑀤𑁆𑀥𑀢𑁆𑀢𑀸𑀬𑁂𑀯 𑀘 𑀫𑁂𑀢𑀁 𑀅𑀲𑀮𑁆𑀮𑀻𑀦𑀁 𑀅𑀳𑁄𑀲𑀺.

𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸𑀢𑀺 𑀦 𑀓𑁂𑀯𑀮𑀜𑁆𑀘 𑀯𑀻𑀭𑀺𑀬𑀫𑁂𑀯, 𑀲𑀢𑀺𑀧𑀺 𑀫𑁂 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀻𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑀸 𑀅𑀳𑁄𑀲𑀺. 𑀉𑀧𑀝𑁆𑀞𑀺𑀢𑀢𑁆𑀢𑀸𑀬𑁂𑀯 𑀘 𑀅𑀲𑀫𑁆𑀫𑀼𑀝𑁆𑀞𑀸. 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄𑀢𑀺 𑀓𑀸𑀬𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺𑀲𑀫𑁆𑀪𑀯𑁂𑀦 𑀓𑀸𑀬𑁄𑀧𑀺 𑀫𑁂 𑀧𑀲𑁆𑀲𑀤𑁆𑀥𑁄 𑀅𑀳𑁄𑀲𑀺. 𑀢𑀢𑁆𑀣 𑀬𑀲𑁆𑀫𑀸 𑀦𑀸𑀫𑀓𑀸𑀬𑁂 𑀧𑀲𑁆𑀲𑀤𑁆𑀥𑁂 𑀭𑀽𑀧𑀓𑀸𑀬𑁄𑀧𑀺 𑀧𑀲𑁆𑀲𑀤𑁆𑀥𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀦𑀸𑀫𑀓𑀸𑀬𑁄 𑀭𑀽𑀧𑀓𑀸𑀬𑁄𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸𑀯 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄𑀢𑀺 𑀯𑀼𑀢𑁆𑀢𑀁. 𑀅𑀲𑀸𑀭𑀤𑁆𑀥𑁄𑀢𑀺 𑀲𑁄 𑀘 𑀔𑁄 𑀧𑀲𑁆𑀲𑀤𑁆𑀥𑀢𑁆𑀢𑀸𑀬𑁂𑀯 𑀅𑀲𑀸𑀭𑀤𑁆𑀥𑁄, 𑀯𑀺𑀕𑀢𑀤𑀭𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀦𑁆𑀢𑀺 𑀘𑀺𑀢𑁆𑀢𑀫𑁆𑀧𑀺 𑀫𑁂 𑀲𑀫𑁆𑀫𑀸 𑀆𑀳𑀺𑀢𑀁 𑀲𑀼𑀝𑁆𑀞𑀼 𑀞𑀧𑀺𑀢𑀁 𑀅𑀧𑁆𑀧𑀺𑀢𑀁 𑀯𑀺𑀬 𑀅𑀳𑁄𑀲𑀺. 𑀲𑀫𑀸𑀳𑀺𑀢𑀢𑁆𑀢𑀸 𑀏𑀯 𑀘 𑀏𑀓𑀕𑁆𑀕𑀁 𑀅𑀘𑀮𑀁 𑀦𑀺𑀧𑁆𑀨𑀦𑁆𑀤𑀦𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀓𑀣𑀺𑀢𑀸 𑀳𑁄𑀢𑀺.

𑀇𑀤𑀸𑀦𑀺 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀅𑀥𑀺𑀕𑀢𑀁 𑀧𑀞𑀫𑀚𑁆𑀛𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀺𑀚𑁆𑀚𑀸𑀢𑁆𑀢𑀬𑀧𑀭𑀺𑀬𑁄𑀲𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄 𑀔𑁄 𑀅𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀦𑁆𑀢𑀺 𑀏𑀢𑁆𑀣 𑀢𑀸𑀯 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀣𑀯𑀻𑀓𑀲𑀺𑀡𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 ‘‘𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 𑀆𑀕𑀢𑀁, 𑀇𑀥 ‘‘𑀯𑀺𑀳𑀸𑀲𑀺’’𑀦𑁆𑀢𑀺, 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀓𑀺𑀁 𑀓𑀢𑁆𑀯𑀸 𑀧𑀦 𑀪𑀕𑀯𑀸 𑀇𑀫𑀸𑀦𑀺 𑀛𑀸𑀦𑀸𑀦𑀺 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀻𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸. 𑀓𑀢𑀭𑀁? 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁.

𑀇𑀫𑀸𑀦𑀺 𑀘 𑀧𑀦 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀓𑁂𑀲𑀜𑁆𑀘𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀓𑁂𑀲𑀜𑁆𑀘𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺, 𑀓𑁂𑀲𑀜𑁆𑀘𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀺, 𑀓𑁂𑀲𑀜𑁆𑀘𑀺 𑀦𑀺𑀭𑁄𑀥𑀧𑀸𑀤𑀓𑀸𑀦𑀺, 𑀓𑁂𑀲𑀜𑁆𑀘𑀺 𑀪𑀯𑁄𑀓𑁆𑀓𑀫𑀦𑀢𑁆𑀣𑀸𑀦𑀺. 𑀢𑀢𑁆𑀣 𑀔𑀻𑀡𑀸𑀲𑀯𑀸𑀦𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀢𑁆𑀣𑀸𑀦𑀺 𑀳𑁄𑀦𑁆𑀢𑀺. 𑀢𑁂 𑀳𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀏𑀓𑀕𑁆𑀕𑀘𑀺𑀢𑁆𑀢𑀸 𑀲𑀼𑀔𑀁 𑀤𑀺𑀯𑀲𑀁 𑀯𑀺𑀳𑀭𑀺𑀲𑁆𑀲𑀸𑀫𑀸𑀢𑀺 𑀇𑀘𑁆𑀘𑁂𑀯𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀫𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦 𑀯𑀺𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀸𑀦𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺 𑀳𑁄𑀦𑁆𑀢𑀺. 𑀬𑁂 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁩𑁮; 𑀧𑀝𑀺. 𑀫. 𑁧.𑁧𑁦𑁨) 𑀯𑀼𑀢𑁆𑀢𑀦𑀬𑀸 𑀅𑀪𑀺𑀜𑁆𑀜𑀸𑀬𑁄 𑀧𑀢𑁆𑀣𑁂𑀦𑁆𑀢𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂𑀲𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀺 𑀳𑁄𑀦𑁆𑀢𑀺. 𑀬𑁂 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀅𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀸𑀫𑀸𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂𑀲𑀁 𑀦𑀺𑀭𑁄𑀥𑀧𑀸𑀤𑀓𑀸𑀦𑀺 𑀳𑁄𑀦𑁆𑀢𑀺. 𑀬𑁂 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀸𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂𑀲𑀁 𑀪𑀯𑁄𑀓𑁆𑀓𑀫𑀦𑀢𑁆𑀣𑀸𑀦𑀺 𑀳𑁄𑀦𑁆𑀢𑀺.

𑀪𑀕𑀯𑀢𑀸 𑀧𑀦𑀺𑀤𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀢𑀁 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀜𑁆𑀘𑁂𑀯 𑀅𑀳𑁄𑀲𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀜𑁆𑀘 𑀲𑀩𑁆𑀩𑀓𑀺𑀘𑁆𑀘𑀲𑀸𑀥𑀓𑀜𑁆𑀘, 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀤𑀸𑀬𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸

𑁫𑁨. 𑀬𑁂𑀲𑀜𑁆𑀘 𑀕𑀼𑀡𑀸𑀦𑀁 𑀤𑀸𑀬𑀓𑀁 𑀅𑀳𑁄𑀲𑀺, 𑀢𑁂𑀲𑀁 𑀏𑀓𑀤𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀯𑀺𑀚𑁆𑀚𑀸𑀦𑀁 𑀅𑀦𑀼𑀧𑀤𑀯𑀡𑁆𑀡𑀦𑀸 𑀘𑁂𑀯 𑀪𑀸𑀯𑀦𑀸𑀦𑀬𑁄 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑁄. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻’’𑀢𑀺 𑀯𑀼𑀢𑁆𑀢𑀁, 𑀇𑀥 ‘‘𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺’’𑀦𑁆𑀢𑀺. 𑀅𑀬𑀁 𑀔𑁄 𑀫𑁂 𑀩𑁆𑀭𑀸𑀳𑁆𑀫𑀡𑀸𑀢𑀺 𑀅𑀬𑀜𑁆𑀘 𑀅𑀧𑁆𑀧𑀦𑀸𑀯𑀸𑀭𑁄 𑀢𑀢𑁆𑀣 𑀅𑀦𑀸𑀕𑀢𑁄𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀢𑀢𑁆𑀣 𑀲𑁄𑀢𑀺 𑀲𑁄 𑀅𑀳𑀁. 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀦𑁆𑀢𑀺 𑀅𑀪𑀺𑀦𑀻𑀳𑀭𑀺𑀁. 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀦𑁆𑀢𑀺 𑀘 𑀯𑀘𑀦𑀢𑁄 𑀲𑁄𑀢𑀺 𑀏𑀢𑁆𑀣 𑀲𑁄 𑀅𑀳𑀦𑁆𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀘𑀺𑀤𑀁 𑀪𑀕𑀯𑀢𑁄 𑀯𑀲𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀆𑀕𑀢𑀁, 𑀢𑀲𑁆𑀫𑀸 ‘‘𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’’𑀢𑀺 𑀏𑀢𑁆𑀣 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀳𑀺 𑀲𑁄 𑀢𑀢𑁄 𑀘𑀼𑀢𑁄𑀢𑀺 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀁. 𑀢𑀲𑁆𑀫𑀸 𑀇𑀥𑀽𑀧𑀧𑀦𑁆𑀦𑁄𑀢𑀺 𑀇𑀫𑀺𑀲𑁆𑀲𑀸 𑀇𑀥𑀽𑀧𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀁. 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀦𑁆𑀢𑀺 𑀢𑀼𑀲𑀺𑀢𑀪𑀯𑀦𑀁 𑀲𑀦𑁆𑀥𑀸𑀬𑀸𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄𑀢𑀺 𑀢𑀢𑁆𑀭𑀸𑀧𑀺 𑀢𑀼𑀲𑀺𑀢𑀪𑀯𑀦𑁂 𑀲𑁂𑀢𑀓𑁂𑀢𑀼 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀅𑀳𑁄𑀲𑀺𑀁. 𑀏𑀯𑀁𑀕𑁄𑀢𑁆𑀢𑁄𑀢𑀺 𑀢𑀸𑀳𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀏𑀓𑀕𑁄𑀢𑁆𑀢𑁄. 𑀏𑀯𑀁𑀯𑀡𑁆𑀡𑁄𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑁄. 𑀏𑀯𑀫𑀸𑀳𑀸𑀭𑁄𑀢𑀺 𑀤𑀺𑀩𑁆𑀩𑀲𑀼𑀥𑀸𑀳𑀸𑀭𑁄. 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀏𑀯𑀁 𑀤𑀺𑀩𑁆𑀩𑀲𑀼𑀔𑀧𑀝𑀺𑀲𑀁𑀯𑁂𑀤𑀻. 𑀤𑀼𑀓𑁆𑀔𑀁 𑀧𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑀫𑀢𑁆𑀢𑀫𑁂𑀯. 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄𑀢𑀺 𑀏𑀯𑀁 𑀲𑀢𑁆𑀢𑀧𑀜𑁆𑀜𑀸𑀲𑀯𑀲𑁆𑀲𑀓𑁄𑀝𑀺𑀲𑀝𑁆𑀞𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀧𑀭𑀺𑀬𑀦𑁆𑀢𑁄. 𑀲𑁄 𑀢𑀢𑁄 𑀘𑀼𑀢𑁄𑀢𑀺 𑀲𑁄 𑀅𑀳𑀁 𑀢𑀢𑁄 𑀢𑀼𑀲𑀺𑀢𑀪𑀯𑀦𑀢𑁄 𑀘𑀼𑀢𑁄. 𑀇𑀥𑀽𑀧𑀧𑀦𑁆𑀦𑁄𑀢𑀺 𑀇𑀥 𑀫𑀳𑀸𑀫𑀸𑀬𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄.

𑀅𑀬𑀁 𑀔𑁄 𑀫𑁂 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀻𑀲𑀼 𑀫𑁂𑀢𑀺 𑀫𑀬𑀸. 𑀯𑀺𑀚𑁆𑀚𑀸𑀢𑀺 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀯𑀺𑀚𑁆𑀚𑀸. 𑀓𑀺𑀁 𑀯𑀺𑀤𑀺𑀢𑀁 𑀓𑀭𑁄𑀢𑀺? 𑀧𑀼𑀩𑁆𑀩𑁂𑀦𑀺𑀯𑀸𑀲𑀁. 𑀅𑀯𑀺𑀚𑁆𑀚𑀸𑀢𑀺 𑀢𑀲𑁆𑀲𑁂𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀲𑁆𑀲 𑀅𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑁄 𑀫𑁄𑀳𑁄 𑀯𑀼𑀘𑁆𑀘𑀢𑀺. 𑀢𑀫𑁄𑀢𑀺 𑀲𑁆𑀯𑁂𑀯 𑀫𑁄𑀳𑁄 𑀧𑀝𑀺𑀘𑁆𑀙𑀸𑀤𑀓𑀝𑁆𑀞𑁂𑀦 ‘‘𑀢𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀆𑀮𑁄𑀓𑁄𑀢𑀺 𑀲𑀸𑀬𑁂𑀯 𑀯𑀺𑀚𑁆𑀚𑀸 𑀑𑀪𑀸𑀲𑀓𑀭𑀡𑀝𑁆𑀞𑁂𑀦 ‘‘𑀆𑀮𑁄𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸𑀢𑀺 𑀅𑀬𑀁 𑀅𑀢𑁆𑀣𑁄, 𑀲𑁂𑀲𑀁 𑀧𑀲𑀁𑀲𑀸𑀯𑀘𑀦𑀁. 𑀬𑁄𑀚𑀦𑀸 𑀧𑀦𑁂𑀢𑁆𑀣 𑀅𑀬𑀁 𑀔𑁄 𑀫𑁂 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸, 𑀢𑀲𑁆𑀲 𑀫𑁂 𑀅𑀥𑀺𑀕𑀢𑀯𑀺𑀚𑁆𑀚𑀲𑁆𑀲 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀦𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸. 𑀏𑀲 𑀦𑀬𑁄 𑀇𑀢𑀭𑀲𑁆𑀫𑀺𑀫𑁆𑀧𑀺 𑀧𑀤𑀤𑁆𑀯𑀬𑁂.

𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀬𑀣𑀸𑀢𑀺 𑀑𑀧𑀫𑁆𑀫𑁂. 𑀢𑀦𑁆𑀢𑀺 𑀦𑀺𑀧𑀸𑀢𑁄. 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂𑀦 𑀅𑀧𑁆𑀧𑀫𑀢𑁆𑀢𑀲𑁆𑀲. 𑀯𑀻𑀭𑀺𑀬𑀸𑀢𑀸𑀧𑁂𑀦 𑀆𑀢𑀸𑀧𑀺𑀦𑁄. 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀢𑀸𑀬 𑀧𑀳𑀺𑀢𑀢𑁆𑀢𑀲𑁆𑀲, 𑀧𑁂𑀲𑀺𑀢𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀬𑀣𑀸 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀅𑀯𑀺𑀚𑁆𑀚𑀸 𑀯𑀺𑀳𑀜𑁆𑀜𑁂𑀬𑁆𑀬, 𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀢𑀫𑁄 𑀯𑀺𑀳𑀜𑁆𑀜𑁂𑀬𑁆𑀬, 𑀆𑀮𑁄𑀓𑁄 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀏𑀯𑀫𑁂𑀯 𑀫𑀫 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸. 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄. 𑀏𑀢𑀲𑁆𑀲 𑀫𑁂 𑀧𑀥𑀸𑀦𑀸𑀦𑀼𑀬𑁄𑀕𑀲𑁆𑀲 𑀅𑀦𑀼𑀭𑀽𑀧𑀫𑁂𑀯 𑀨𑀮𑀁 𑀮𑀤𑁆𑀥’’𑀦𑁆𑀢𑀺.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁫𑁩. 𑀘𑀼𑀢𑀽𑀧𑀧𑀸𑀢𑀓𑀣𑀸𑀬𑀁 𑀬𑀲𑁆𑀫𑀸 𑀇𑀥 𑀪𑀕𑀯𑀢𑁄 𑀯𑀲𑁂𑀦 𑀧𑀸𑀴𑀺 𑀆𑀕𑀢𑀸, 𑀢𑀲𑁆𑀫𑀸 ‘‘𑀧𑀲𑁆𑀲𑀸𑀫𑀺 𑀧𑀚𑀸𑀦𑀸𑀫𑀻’’𑀢𑀺 𑀯𑀼𑀢𑁆𑀢𑀁, 𑀅𑀬𑀁 𑀯𑀺𑀲𑁂𑀲𑁄. 𑀲𑁂𑀲𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀏𑀢𑁆𑀣 𑀧𑀦 𑀯𑀺𑀚𑁆𑀚𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀯𑀺𑀚𑁆𑀚𑀸. 𑀅𑀯𑀺𑀚𑁆𑀚𑀸𑀢𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀬𑀲𑁆𑀫𑀸 𑀘 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀫𑀳𑀸𑀲𑀢𑁆𑀢𑀸𑀦𑀁 𑀧𑀭𑀺𑀓𑀫𑁆𑀫𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀢𑁂 𑀳𑀺 𑀘𑀺𑀢𑁆𑀢𑁂 𑀅𑀪𑀺𑀦𑀺𑀦𑁆𑀦𑀸𑀫𑀺𑀢𑀫𑀢𑁆𑀢𑁂𑀬𑁂𑀯 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀲𑀢𑁆𑀢𑁂 𑀧𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 𑀬𑁄 𑀢𑀢𑁆𑀣 𑀧𑀭𑀺𑀓𑀫𑁆𑀫𑀁 𑀆𑀤𑀺𑀁 𑀓𑀢𑁆𑀯𑀸 𑀪𑀸𑀯𑀦𑀸𑀦𑀬𑁄 𑀯𑀼𑀢𑁆𑀢𑁄, 𑀦 𑀢𑁂𑀦 𑀇𑀥 𑀅𑀢𑁆𑀣𑁄𑀢𑀺.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁫𑁪. 𑀢𑀢𑀺𑀬𑀯𑀺𑀚𑁆𑀚𑀸𑀬 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀢𑁆𑀣𑀸𑀬. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀳𑀺 𑀆𑀲𑀯𑀯𑀺𑀦𑀸𑀲𑀦𑀢𑁄 𑀆𑀲𑀯𑀸𑀦𑀁 𑀔𑀬𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁆𑀭 𑀘𑁂𑀢𑀁 𑀜𑀸𑀡𑀁, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸𑀢𑀺. 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀺𑀁. 𑀲𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 ‘‘𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀲𑀘𑁆𑀘𑀁 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁 𑀚𑀸𑀦𑀺𑀁 𑀧𑀝𑀺𑀯𑀺𑀚𑁆𑀛𑀺𑀁. 𑀢𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀓𑀁 𑀢𑀡𑁆𑀳𑀁 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺. 𑀢𑀤𑀼𑀪𑀬𑀫𑁆𑀧𑀺 𑀬𑀁 𑀞𑀸𑀦𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀺𑀁 𑀦𑀺𑀩𑁆𑀩𑀸𑀦𑀁 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺. 𑀢𑀲𑁆𑀲 𑀲𑀫𑁆𑀧𑀸𑀧𑀓𑀁 𑀅𑀭𑀺𑀬𑀫𑀕𑁆𑀕𑀁 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁 𑀚𑀸𑀦𑀺𑀁 𑀧𑀝𑀺𑀯𑀺𑀚𑁆𑀛𑀺𑀦𑁆𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀲𑀭𑀽𑀧𑀢𑁄 𑀲𑀘𑁆𑀘𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀺𑀮𑁂𑀲𑀯𑀲𑁂𑀦 𑀧𑀭𑀺𑀬𑀸𑀬𑀢𑁄 𑀤𑀲𑁆𑀲𑁂𑀦𑁆𑀢𑁄 𑀇𑀫𑁂 𑀆𑀲𑀯𑀸𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀫𑁂 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄𑀢𑀺 𑀢𑀲𑁆𑀲 𑀫𑀬𑁆𑀳𑀁 𑀏𑀯𑀁 𑀚𑀸𑀦𑀦𑁆𑀢𑀲𑁆𑀲 𑀏𑀯𑀁 𑀧𑀲𑁆𑀲𑀦𑁆𑀢𑀲𑁆𑀲. 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀓𑁄𑀝𑀺𑀧𑁆𑀧𑀢𑁆𑀢𑀁 𑀫𑀕𑁆𑀕𑀁 𑀓𑀣𑁂𑀢𑀺. 𑀓𑀸𑀫𑀸𑀲𑀯𑀸𑀢𑀺 𑀓𑀸𑀫𑀸𑀲𑀯𑀢𑁄. 𑀯𑀺𑀫𑀼𑀘𑁆𑀘𑀺𑀢𑁆𑀣𑀸𑀢𑀺 𑀇𑀫𑀺𑀦𑀸 𑀨𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀺, 𑀫𑀕𑁆𑀕𑀓𑁆𑀔𑀡𑁂 𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀨𑀮𑀓𑁆𑀔𑀡𑁂 𑀯𑀺𑀫𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀦𑁆𑀢𑀺 𑀇𑀫𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀤𑀲𑁆𑀲𑁂𑀢𑀺. 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀻𑀳𑀺 𑀢𑀲𑁆𑀲 𑀪𑀽𑀫𑀺𑀁, 𑀢𑁂𑀦 𑀳𑀺 𑀜𑀸𑀡𑁂𑀦 𑀪𑀕𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀔𑀻𑀡𑀸 𑀚𑀸𑀢𑀻’’𑀢𑀺𑀆𑀤𑀻𑀦𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀓𑀢𑀫𑀸 𑀧𑀦 𑀪𑀕𑀯𑀢𑁄 𑀚𑀸𑀢𑀺 𑀔𑀻𑀡𑀸, 𑀓𑀣𑀜𑁆𑀘 𑀦𑀁 𑀅𑀩𑁆𑀪𑀜𑁆𑀜𑀸𑀲𑀻𑀢𑀺? 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀚𑀸𑀢𑀺 𑀔𑀻𑀡𑀸, 𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸, 𑀦 𑀅𑀦𑀸𑀕𑀢𑀸, 𑀅𑀦𑀸𑀕𑀢𑁂 𑀯𑀸𑀬𑀸𑀫𑀸𑀪𑀸𑀯𑀢𑁄, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀬𑀸 𑀧𑀦 𑀫𑀕𑁆𑀕𑀲𑁆𑀲 𑀅𑀪𑀸𑀯𑀺𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀪𑁂𑀤𑀸 𑀚𑀸𑀢𑀺, 𑀲𑀸 𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁂𑀦 𑀔𑀻𑀡𑀸, 𑀢𑀁 𑀲𑁄 𑀫𑀕𑁆𑀕𑀪𑀸𑀯𑀦𑀸𑀬 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘‘𑀓𑀺𑀮𑁂𑀲𑀸𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀫𑁆𑀫𑀁 𑀆𑀬𑀢𑀺𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀳𑁄𑀢𑀻’’𑀢𑀺 𑀚𑀸𑀦𑀦𑁆𑀢𑁄 𑀅𑀩𑁆𑀪𑀜𑁆𑀜𑀸𑀲𑀺.

𑀯𑀼𑀲𑀺𑀢𑀦𑁆𑀢𑀺 𑀯𑀼𑀢𑁆𑀣𑀁 𑀧𑀭𑀺𑀯𑀼𑀢𑁆𑀣𑀁, 𑀓𑀢𑀁 𑀘𑀭𑀺𑀢𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁, 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁂𑀦 𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀲𑁂𑀓𑁆𑀔𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀦𑁆𑀢𑀺 𑀦𑀸𑀫, 𑀔𑀻𑀡𑀸𑀲𑀯𑁄 𑀯𑀼𑀢𑁆𑀣𑀯𑀸𑀲𑁄. 𑀢𑀲𑁆𑀫𑀸 𑀪𑀕𑀯𑀸 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀓𑀢𑀁 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀯𑀲𑁂𑀦 𑀲𑁄𑀴𑀲𑀯𑀺𑀥𑀫𑁆𑀧𑀺 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀤𑀬𑁄 𑀳𑀺 𑀢𑀁 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀔𑀻𑀡𑀸𑀲𑀯𑁄 𑀓𑀢𑀓𑀭𑀡𑀻𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀅𑀢𑁆𑀢𑀦𑁄 𑀓𑀭𑀡𑀻𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀓𑀢𑀁 𑀓𑀭𑀡𑀻𑀬’’𑀦𑁆𑀢𑀺 𑀅𑀩𑁆𑀪𑀜𑁆𑀜𑀸𑀲𑀺.

𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀤𑀸𑀦𑀺 𑀧𑀼𑀦 𑀇𑀢𑁆𑀣𑀪𑀸𑀯𑀸𑀬 𑀏𑀯𑀁𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬, 𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸 𑀫𑀕𑁆𑀕𑀪𑀸𑀯𑀦𑀸𑀓𑀺𑀘𑁆𑀘𑀁 𑀫𑁂 𑀦𑀢𑁆𑀣𑀻𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀣 𑀯𑀸 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀢𑁆𑀣𑀪𑀸𑀯𑀢𑁄 𑀇𑀫𑀲𑁆𑀫𑀸 𑀏𑀯𑀁𑀧𑀓𑀸𑀭𑀸 𑀇𑀤𑀸𑀦𑀺 𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀸 𑀅𑀧𑀭𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀫𑀬𑁆𑀳𑀁 𑀦𑀢𑁆𑀣𑀺. 𑀇𑀫𑁂 𑀧𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸 𑀢𑀺𑀝𑁆𑀞𑀦𑁆𑀢𑀺 𑀙𑀺𑀦𑁆𑀦𑀫𑀽𑀮𑀓𑀸 𑀭𑀼𑀓𑁆𑀔𑀸 𑀯𑀺𑀬. 𑀢𑁂 𑀘𑀭𑀺𑀫𑀓𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦 𑀅𑀦𑀼𑀧𑀸𑀤𑀸𑀦𑁄 𑀯𑀺𑀬 𑀚𑀸𑀢𑀯𑁂𑀤𑁄 𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀩𑁆𑀪𑀜𑁆𑀜𑀸𑀲𑀺.

𑀇𑀤𑀸𑀦𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀧𑀭𑀺𑀕𑁆𑀕𑀳𑀺𑀢𑀁 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀥𑀺𑀕𑀫𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀦𑁆𑀢𑁄, 𑀅𑀬𑀁 𑀔𑁄 𑀫𑁂 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀚𑁆𑀚𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀯𑀺𑀚𑁆𑀚𑀸. 𑀅𑀯𑀺𑀚𑁆𑀚𑀸𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀢𑁆𑀢𑀸𑀯𑀢𑀸 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀁𑀲𑀜𑀸𑀡𑀁, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀜𑀸𑀡𑀁, 𑀆𑀲𑀯𑀓𑁆𑀔𑀬𑁂𑀦 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀦𑁆𑀢𑀺 𑀏𑀯𑀁 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀲𑀩𑁆𑀩𑁂𑀧𑀺 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀲𑀗𑁆𑀕𑀳𑁂𑀢𑁆𑀯𑀸 𑀧𑀓𑀸𑀲𑁂𑀦𑁆𑀢𑁄 𑀅𑀢𑁆𑀢𑀦𑁄 𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀲𑀺.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀜𑁆𑀜𑀯𑀸𑀲𑀓𑀸𑀭𑀡𑀯𑀡𑁆𑀡𑀦𑀸

𑁫𑁫. 𑀏𑀯𑀁 𑀯𑀼𑀢𑁆𑀢𑁂 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀅𑀚𑁆𑀚𑀸𑀧𑀺 𑀘 𑀅𑀭𑀜𑁆𑀜𑀯𑀸𑀲𑀁 𑀦 𑀯𑀺𑀚𑀳𑀢𑀺, 𑀅𑀢𑁆𑀣𑀺 𑀦𑀼 𑀔𑁆𑀯𑀲𑁆𑀲 𑀅𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀓𑀭𑀡𑀻𑀬’’𑀦𑁆𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀇𑀫𑀺𑀦𑀸 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺𑀦𑀸, 𑀲𑀺𑀬𑀸 𑀔𑁄 𑀧𑀦 𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀺𑀬𑀸 𑀔𑁄 𑀧𑀦 𑀢𑁂, 𑀩𑁆𑀭𑀸𑀳𑁆𑀫𑀡, 𑀏𑀯𑀫𑀲𑁆𑀲𑀸𑀢𑀺, 𑀩𑁆𑀭𑀸𑀳𑁆𑀫𑀡, 𑀓𑀤𑀸𑀘𑀺 𑀢𑀼𑀬𑁆𑀳𑀁 𑀏𑀯𑀁 𑀪𑀯𑁂𑀬𑁆𑀬. 𑀦 𑀔𑁄 𑀧𑀦𑁂𑀢𑀁 𑀩𑁆𑀭𑀸𑀳𑁆𑀫𑀡 𑀏𑀯𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀏𑀢𑀁 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡, 𑀢𑀬𑀸 𑀫𑀬𑁆𑀳𑀁 𑀧𑀦𑁆𑀢𑀲𑁂𑀦𑀸𑀲𑀦𑀧𑀝𑀺𑀲𑁂𑀯𑀦𑀁 𑀅𑀯𑀻𑀢𑀭𑀸𑀕𑀸𑀤𑀺𑀢𑀸𑀬𑀸𑀢𑀺 𑀏𑀯𑀁 𑀦 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀧𑀦𑁆𑀢𑀲𑁂𑀦𑀸𑀲𑀦𑀧𑀝𑀺𑀲𑁂𑀯𑀦𑁂 𑀅𑀓𑀸𑀭𑀡𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀤𑁆𑀯𑁂 𑀔𑁄 𑀅𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀣𑁄𑀬𑁂𑀯 𑀅𑀢𑁆𑀣𑀯𑀲𑁄. 𑀢𑀲𑁆𑀫𑀸 𑀤𑁆𑀯𑁂 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀅𑀢𑁆𑀣𑀯𑀲𑁂𑀢𑀺 𑀅𑀳𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀤𑁆𑀯𑁂 𑀅𑀢𑁆𑀣𑁂 𑀤𑁆𑀯𑁂 𑀓𑀸𑀭𑀡𑀸𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀢𑀦𑁄 𑀘 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀦𑁆𑀢𑀺 𑀏𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑁄 𑀦𑀸𑀫 𑀅𑀬𑀁 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄. 𑀲𑀼𑀔𑀯𑀺𑀳𑀸𑀭𑁄 𑀦𑀸𑀫 𑀘𑀢𑀼𑀦𑁆𑀦𑀫𑁆𑀧𑀺 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀸𑀦𑀁 𑀨𑀸𑀲𑀼𑀢𑀸, 𑀏𑀓𑀓𑀲𑁆𑀲 𑀳𑀺 𑀅𑀭𑀜𑁆𑀜𑁂 𑀅𑀦𑁆𑀢𑀫𑀲𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀺𑀘𑁆𑀘𑀁 𑀉𑀧𑀸𑀤𑀸𑀬 𑀲𑀩𑁆𑀩𑁂𑀯 𑀇𑀭𑀺𑀬𑀸𑀧𑀣𑀸 𑀨𑀸𑀲𑀼𑀓𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀤𑀺𑀝𑁆𑀞𑀥𑀫𑁆𑀫𑀲𑁆𑀲 𑀲𑀼𑀔𑀯𑀺𑀳𑀸𑀭𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀙𑀺𑀫𑀜𑁆𑀘 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄𑀢𑀺 𑀓𑀣𑀁 𑀅𑀭𑀜𑁆𑀜𑀯𑀸𑀲𑁂𑀦 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀅𑀦𑀼𑀓𑀫𑁆𑀧𑀺𑀢𑀸 𑀳𑁄𑀢𑀺? 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸 𑀳𑀺 𑀓𑀼𑀮𑀧𑀼𑀢𑁆𑀢𑀸 𑀪𑀕𑀯𑀢𑁄 𑀅𑀭𑀜𑁆𑀜𑀯𑀸𑀲𑀁 𑀤𑀺𑀲𑁆𑀯𑀸 𑀪𑀕𑀯𑀸𑀧𑀺 𑀦𑀸𑀫 𑀅𑀭𑀜𑁆𑀜𑀲𑁂𑀦𑀸𑀲𑀦𑀸𑀦𑀺 𑀦 𑀫𑀼𑀜𑁆𑀘𑀢𑀺, 𑀬𑀲𑁆𑀲 𑀦𑁂𑀯𑀢𑁆𑀣𑀺 𑀧𑀭𑀺𑀜𑁆𑀜𑀸𑀢𑀩𑁆𑀩𑀁 𑀦 𑀧𑀳𑀸𑀢𑀩𑁆𑀩𑀁 𑀦 𑀪𑀸𑀯𑁂𑀢𑀩𑁆𑀩𑀁 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀓𑀺𑀫𑀗𑁆𑀕𑀁 𑀧𑀦 𑀫𑀬𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀯𑀲𑀺𑀢𑀩𑁆𑀩𑀫𑁂𑀯 𑀫𑀜𑁆𑀜𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀔𑀺𑀧𑁆𑀧𑀫𑁂𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀅𑀦𑀼𑀓𑀫𑁆𑀧𑀺𑀢𑀸 𑀳𑁄𑀢𑀺. 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀘𑁆𑀙𑀺𑀫𑀜𑁆𑀘 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄’’𑀢𑀺.

𑀅𑀭𑀜𑁆𑀜𑀯𑀸𑀲𑀓𑀸𑀭𑀡𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁂𑀲𑀦𑀸𑀦𑀼𑀫𑁄𑀤𑀦𑀸𑀯𑀡𑁆𑀡𑀦𑀸

𑁫𑁬. 𑀢𑀁 𑀲𑀼𑀢𑁆𑀯𑀸 𑀅𑀢𑁆𑀢𑀫𑀦𑁄 𑀩𑁆𑀭𑀸𑀳𑁆𑀫𑀡𑁄 𑀅𑀦𑀼𑀓𑀫𑁆𑀧𑀺𑀢𑀭𑀽𑀧𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀼𑀓𑀫𑁆𑀧𑀺𑀢𑀭𑀽𑀧𑀸𑀢𑀺 𑀅𑀦𑀼𑀓𑀫𑁆𑀧𑀺𑀢𑀚𑀸𑀢𑀺𑀓𑀸 𑀅𑀦𑀼𑀓𑀫𑁆𑀧𑀺𑀢𑀲𑀪𑀸𑀯𑀸. 𑀚𑀦𑀢𑀸𑀢𑀺 𑀚𑀦𑀲𑀫𑀽𑀳𑁄. 𑀬𑀣𑀸 𑀢𑀁 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀬𑀣𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀓𑀫𑁆𑀧𑁂𑀬𑁆𑀬, 𑀢𑀣𑁂𑀯 𑀅𑀦𑀼𑀓𑀫𑁆𑀧𑀺𑀢𑀭𑀽𑀧𑀸𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦 𑀢𑀁 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀅𑀩𑁆𑀪𑀦𑀼𑀫𑁄𑀤𑀫𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫𑀸𑀢𑀺. 𑀢𑀢𑁆𑀣𑀸𑀬𑀁 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀔𑀬𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀅𑀩𑁆𑀪𑀦𑀼𑀫𑁄𑀤𑀦𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁮𑁩; 𑀅. 𑀦𑀺. 𑁮.𑁨𑁦) 𑀳𑀺 𑀔𑀬𑁂 𑀤𑀺𑀲𑁆𑀲𑀢𑀺. ‘‘𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁦𑁦) 𑀲𑀼𑀦𑁆𑀤𑀭𑁂.

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺. 𑁋

𑀆𑀤𑀻𑀲𑀼 (𑀯𑀺. 𑀯. 𑁮𑁫𑁭) 𑀅𑀪𑀺𑀭𑀽𑀧𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁦; 𑀧𑀸𑀭𑀸. 𑁧𑁫) 𑀅𑀩𑁆𑀪𑀦𑀼𑀫𑁄𑀤𑀦𑁂. 𑀇𑀥𑀸𑀧𑀺 𑀅𑀩𑁆𑀪𑀦𑀼𑀫𑁄𑀤𑀦𑁂𑀬𑁂𑀯. 𑀬𑀲𑁆𑀫𑀸 𑀘 𑀅𑀩𑁆𑀪𑀦𑀼𑀫𑁄𑀤𑀦𑁂, 𑀢𑀲𑁆𑀫𑀸 𑀲𑀸𑀥𑀼 𑀲𑀸𑀥𑀼 𑀪𑁄, 𑀕𑁄𑀢𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀪𑀬𑁂 𑀓𑁄𑀥𑁂 𑀧𑀲𑀁𑀲𑀸𑀬𑀁, 𑀢𑀼𑀭𑀺𑀢𑁂 𑀓𑁄𑀢𑀽𑀳𑀮𑀘𑁆𑀙𑀭𑁂;

𑀳𑀸𑀲𑁂 𑀲𑁄𑀓𑁂 𑀧𑀲𑀸𑀤𑁂 𑀘, 𑀓𑀭𑁂 𑀆𑀫𑁂𑀟𑀺𑀢𑀁 𑀩𑀼𑀥𑁄’’𑀢𑀺. 𑁋

𑀇𑀫𑀺𑀦𑀸 𑀘 𑀮𑀓𑁆𑀔𑀡𑁂𑀦 𑀇𑀥 𑀧𑀲𑀸𑀤𑀯𑀲𑁂𑀦 𑀧𑀲𑀁𑀲𑀸𑀯𑀲𑁂𑀦 𑀘𑀸𑀬𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀅𑀪𑀺𑀓𑀦𑁆𑀢𑀁. 𑀅𑀢𑀺𑀇𑀝𑁆𑀞𑀁 𑀅𑀢𑀺𑀫𑀦𑀸𑀧𑀁, 𑀅𑀢𑀺𑀲𑀼𑀦𑁆𑀤𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀏𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁂𑀦 𑀤𑁂𑀲𑀦𑀁 𑀣𑁄𑀫𑁂𑀢𑀺, 𑀏𑀓𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸, 𑀅𑀪𑀺𑀓𑁆𑀓𑀦𑁆𑀢𑀁 𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀆𑀕𑀫𑁆𑀫 𑀫𑀫 𑀧𑀲𑀸𑀤𑁄𑀢𑀺. 𑀪𑀕𑀯𑀢𑁄𑀬𑁂𑀯 𑀯𑀸 𑀯𑀘𑀦𑀁 𑀤𑁆𑀯𑁂 𑀤𑁆𑀯𑁂 𑀅𑀢𑁆𑀣𑁂 𑀲𑀦𑁆𑀥𑀸𑀬 𑀣𑁄𑀫𑁂𑀢𑀺 𑁋 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀘𑀦𑀁 𑀅𑀪𑀺𑀓𑁆𑀓𑀦𑁆𑀢𑀁 𑀤𑁄𑀲𑀦𑀸𑀲𑀦𑀢𑁄, 𑀅𑀪𑀺𑀓𑁆𑀓𑀦𑁆𑀢𑀁 𑀕𑀼𑀡𑀸𑀥𑀺𑀕𑀫𑀦𑀢𑁄, 𑀢𑀣𑀸 𑀲𑀤𑁆𑀥𑀸𑀚𑀦𑀦𑀢𑁄, 𑀧𑀜𑁆𑀜𑀸𑀚𑀦𑀦𑀢𑁄, 𑀲𑀸𑀢𑁆𑀣𑀢𑁄, 𑀲𑀩𑁆𑀬𑀜𑁆𑀚𑀦𑀢𑁄, 𑀉𑀢𑁆𑀢𑀸𑀦𑀧𑀤𑀢𑁄, 𑀕𑀫𑁆𑀪𑀻𑀭𑀢𑁆𑀣𑀢𑁄, 𑀓𑀡𑁆𑀡𑀲𑀼𑀔𑀢𑁄, 𑀳𑀤𑀬𑀗𑁆𑀕𑀫𑀢𑁄, 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑀢𑁄, 𑀅𑀧𑀭𑀯𑀫𑁆𑀪𑀦𑀢𑁄, 𑀓𑀭𑀼𑀡𑀸𑀲𑀻𑀢𑀮𑀢𑁄, 𑀧𑀜𑁆𑀜𑀸𑀯𑀤𑀸𑀢𑀢𑁄, 𑀆𑀧𑀸𑀣𑀭𑀫𑀡𑀻𑀬𑀢𑁄, 𑀯𑀺𑀫𑀤𑁆𑀤𑀓𑁆𑀔𑀫𑀢𑁄, 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄, 𑀯𑀻𑀫𑀁𑀲𑀻𑀬𑀫𑀸𑀦𑀳𑀺𑀢𑀢𑁄𑀢𑀺 𑀏𑀯𑀫𑀸𑀤𑀻𑀳𑀺 𑀬𑁄𑀚𑁂𑀢𑀩𑁆𑀩𑀁.

𑀢𑀢𑁄 𑀧𑀭𑀫𑁆𑀧𑀺 𑀘𑀢𑀽𑀳𑀺 𑀉𑀧𑀫𑀸𑀳𑀺 𑀤𑁂𑀲𑀦𑀁𑀬𑁂𑀯 𑀣𑁄𑀫𑁂𑀢𑀺. 𑀢𑀢𑁆𑀣 𑀦𑀺𑀓𑁆𑀓𑀼𑀚𑁆𑀚𑀺𑀢𑀦𑁆𑀢𑀺 𑀅𑀥𑁄𑀫𑀼𑀔𑀞𑀧𑀺𑀢𑀁, 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀁 𑀯𑀸. 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀸𑀢𑀺 𑀉𑀧𑀭𑀺 𑀫𑀼𑀔𑀁 𑀓𑀭𑁂𑀬𑁆𑀬. 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀢𑀺𑀡𑀧𑀡𑁆𑀡𑀸𑀤𑀺𑀘𑁆𑀙𑀸𑀤𑀺𑀢𑀁. 𑀯𑀺𑀯𑀭𑁂𑀬𑁆𑀬𑀸𑀢𑀺 𑀉𑀕𑁆𑀖𑀸𑀝𑁂𑀬𑁆𑀬. 𑀫𑀽𑀴𑁆𑀳𑀲𑁆𑀲𑀸𑀢𑀺 𑀤𑀺𑀲𑀸𑀫𑀽𑀴𑁆𑀳𑀲𑁆𑀲. 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀢𑀺 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀏𑀲 𑀫𑀕𑁆𑀕𑁄’’𑀢𑀺 𑀯𑀤𑁂𑀬𑁆𑀬. 𑀅𑀦𑁆𑀥𑀓𑀸𑀭𑁂𑀢𑀺 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻𑀅𑀟𑁆𑀠𑀭𑀢𑁆𑀢𑀖𑀦𑀯𑀦𑀲𑀡𑁆𑀟𑀫𑁂𑀖𑀧𑀝𑀮𑁂𑀳𑀺 𑀘𑀢𑀼𑀭𑀗𑁆𑀕𑁂 𑀢𑀫𑁂, 𑀅𑀬𑀁 𑀢𑀸𑀯 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑁄.

𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑁋 𑀬𑀣𑀸 𑀓𑁄𑀘𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀏𑀯𑀁 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀁 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀢𑀁 𑀫𑀁 𑀅𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑁂𑀦, 𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬. 𑀏𑀯𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑀢𑁄 𑀧𑀪𑀼𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀦𑀧𑀝𑀺𑀘𑁆𑀙𑀦𑁆𑀦𑀁 𑀲𑀸𑀲𑀦𑀁 𑀯𑀺𑀯𑀭𑀦𑁆𑀢𑁂𑀦, 𑀬𑀣𑀸 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀏𑀯𑀁 𑀓𑀼𑀫𑁆𑀫𑀕𑁆𑀕𑀫𑀺𑀘𑁆𑀙𑀸𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀫𑁂 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑁂𑀦, 𑀬𑀣𑀸 𑀅𑀦𑁆𑀥𑀓𑀸𑀭𑁂 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, 𑀏𑀯𑀁 𑀫𑁄𑀳𑀦𑁆𑀥𑀓𑀸𑀭𑁂 𑀦𑀺𑀫𑀼𑀕𑁆𑀕𑀲𑁆𑀲 𑀫𑁂 𑀩𑀼𑀤𑁆𑀥𑀸𑀤𑀺𑀭𑀢𑀦𑀭𑀽𑀧𑀸𑀦𑀺 𑀅𑀧𑀲𑁆𑀲𑀢𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀓𑀤𑁂𑀲𑀦𑀸𑀧𑀚𑁆𑀚𑁄𑀢𑀥𑀸𑀭𑀡𑁂𑀦 𑀫𑀬𑁆𑀳𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀧𑀓𑀸𑀲𑀺𑀢𑀢𑁆𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄𑀢𑀺.

𑀤𑁂𑀲𑀦𑀸𑀦𑀼𑀫𑁄𑀤𑀦𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀲𑀦𑁆𑀦𑀸𑀓𑀸𑀭𑀯𑀡𑁆𑀡𑀦𑀸

𑀏𑀯𑀁 𑀤𑁂𑀲𑀦𑀁 𑀣𑁄𑀫𑁂𑀢𑁆𑀯𑀸 𑀇𑀫𑀸𑀬 𑀤𑁂𑀲𑀦𑀸𑀬 𑀭𑀢𑀦𑀢𑁆𑀢𑀬𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑁄 𑀏𑀲𑀸𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀲𑀸𑀳𑀦𑁆𑀢𑀺 𑀏𑀲𑁄 𑀅𑀳𑀁. 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺 𑀪𑀯𑀁 𑀫𑁂 𑀕𑁄𑀢𑀫𑁄 𑀲𑀭𑀡𑀁 𑀧𑀭𑀸𑀬𑀡𑀁, 𑀅𑀖𑀲𑁆𑀲 𑀢𑀸𑀢𑀸, 𑀳𑀺𑀢𑀲𑁆𑀲 𑀘 𑀯𑀺𑀥𑀸𑀢𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀕𑀘𑁆𑀙𑀸𑀫𑀺, 𑀪𑀚𑀸𑀫𑀺, 𑀲𑁂𑀯𑀸𑀫𑀺, 𑀧𑀬𑀺𑀭𑀼𑀧𑀸𑀲𑀸𑀫𑀺, 𑀏𑀯𑀁 𑀯𑀸 𑀚𑀸𑀦𑀸𑀫𑀺, 𑀩𑀼𑀚𑁆𑀛𑀸𑀫𑀻𑀢𑀺. 𑀬𑁂𑀲𑀜𑁆𑀳𑀺 𑀥𑀸𑀢𑀽𑀦𑀁 𑀕𑀢𑀺𑀅𑀢𑁆𑀣𑁄, 𑀩𑀼𑀤𑁆𑀥𑀺𑀧𑀺 𑀢𑁂𑀲𑀁 𑀅𑀢𑁆𑀣𑁄. 𑀢𑀲𑁆𑀫𑀸 𑀕𑀘𑁆𑀙𑀸𑀫𑀻𑀢𑀺 𑀇𑀫𑀲𑁆𑀲 𑀚𑀸𑀦𑀸𑀫𑀺, 𑀩𑀼𑀚𑁆𑀛𑀸𑀫𑀻𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄. 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸𑀢𑀺 𑀏𑀢𑁆𑀣 𑀧𑀦 𑀅𑀥𑀺𑀕𑀢𑀫𑀕𑁆𑀕𑁂 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁂 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘 𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄, 𑀲𑁄 𑀅𑀢𑁆𑀣𑀢𑁄 𑀅𑀭𑀺𑀬𑀫𑀕𑁆𑀕𑁄 𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀅. 𑀦𑀺. 𑁪.𑁩𑁪) 𑀯𑀺𑀢𑁆𑀣𑀸𑀭𑁄. 𑀦 𑀓𑁂𑀯𑀮𑀜𑁆𑀘 𑀅𑀭𑀺𑀬𑀫𑀕𑁆𑀕𑁄 𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘, 𑀅𑀧𑀺𑀘 𑀔𑁄 𑀅𑀭𑀺𑀬𑀨𑀮𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀙𑀢𑁆𑀢𑀫𑀸𑀡𑀯𑀓𑀯𑀺𑀫𑀸𑀦𑁂 𑁋

‘‘𑀭𑀸𑀕𑀯𑀺𑀭𑀸𑀕𑀫𑀦𑁂𑀚𑀫𑀲𑁄𑀓𑀁, 𑀥𑀫𑁆𑀫𑀫𑀲𑀗𑁆𑀔𑀢𑀫𑀧𑁆𑀧𑀝𑀺𑀓𑀽𑀮𑀁;

𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀁, 𑀥𑀫𑁆𑀫𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺. (𑀯𑀺. 𑀯. 𑁮𑁮𑁭);

𑀏𑀢𑁆𑀣 𑀭𑀸𑀕𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄 𑀓𑀣𑀺𑀢𑁄. 𑀅𑀦𑁂𑀚𑀫𑀲𑁄𑀓𑀦𑁆𑀢𑀺 𑀨𑀮𑀁. 𑀥𑀫𑁆𑀫𑀫𑀲𑀗𑁆𑀔𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀧𑁆𑀧𑀝𑀺𑀓𑀽𑀮𑀁 𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀦𑁆𑀢𑀺 𑀧𑀺𑀝𑀓𑀢𑁆𑀢𑀬𑁂𑀦 𑀯𑀺𑀪𑀢𑁆𑀢𑀸 𑀲𑀩𑁆𑀩𑀥𑀫𑁆𑀫𑀓𑁆𑀔𑀦𑁆𑀥𑀸𑀢𑀺. 𑀤𑀺𑀝𑁆𑀞𑀺𑀲𑀻𑀮𑀲𑀗𑁆𑀖𑀸𑀢𑁂𑀦 𑀲𑀁𑀳𑀢𑁄𑀢𑀺 𑀲𑀗𑁆𑀖𑁄, 𑀲𑁄 𑀅𑀢𑁆𑀣𑀢𑁄 𑀅𑀝𑁆𑀞 𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀲𑁆𑀫𑀺𑀁𑀬𑁂𑀯 𑀯𑀺𑀫𑀸𑀦𑁂.

‘‘𑀬𑀢𑁆𑀣 𑀘 𑀤𑀺𑀦𑁆𑀦𑀫𑀳𑀧𑁆𑀨𑀮𑀫𑀸𑀳𑀼, 𑀘𑀢𑀽𑀲𑀼 𑀲𑀼𑀘𑀻𑀲𑀼 𑀧𑀼𑀭𑀺𑀲𑀬𑀼𑀕𑁂𑀲𑀼;

𑀅𑀝𑁆𑀞 𑀘 𑀧𑀼𑀕𑁆𑀕𑀮 𑀥𑀫𑁆𑀫𑀤𑀲𑀸 𑀢𑁂, 𑀲𑀗𑁆𑀖𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺. (𑀯𑀺. 𑀯. 𑁮𑁮𑁮);

𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀏𑀢𑁆𑀢𑀸𑀯𑀢𑀸 𑀩𑁆𑀭𑀸𑀳𑁆𑀫𑀡𑁄 𑀢𑀻𑀡𑀺 𑀲𑀭𑀡𑀕𑀫𑀦𑀸𑀦𑀺 𑀧𑀝𑀺𑀯𑁂𑀤𑁂𑀲𑀺.

𑀧𑀲𑀦𑁆𑀦𑀸𑀓𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀭𑀡𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑀇𑀤𑀸𑀦𑀺 𑀢𑁂𑀲𑀼 𑀲𑀭𑀡𑀕𑀫𑀦𑁂𑀲𑀼 𑀓𑁄𑀲𑀮𑁆𑀮𑀢𑁆𑀣𑀁 𑀲𑀭𑀡𑀁, 𑀲𑀭𑀡𑀕𑀫𑀦𑀁. 𑀬𑁄 𑀘 𑀲𑀭𑀡𑀁 𑀕𑀘𑁆𑀙𑀢𑀺, 𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁄, 𑀲𑀭𑀡𑀕𑀫𑀦𑀲𑁆𑀲 𑀨𑀮𑀁, 𑀲𑀁𑀓𑀺𑀮𑁂𑀲𑁄, 𑀪𑁂𑀤𑁄𑀢𑀺 𑀅𑀬𑀁 𑀯𑀺𑀥𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀤𑀢𑁆𑀣𑀢𑁄 𑀢𑀸𑀯 𑀳𑀺𑀁𑀲𑀢𑀻𑀢𑀺 𑀲𑀭𑀡𑀁, 𑀲𑀭𑀡𑀕𑀢𑀸𑀦𑀁 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦 𑀪𑀬𑀁 𑀲𑀦𑁆𑀢𑀸𑀲𑀁 𑀤𑀼𑀓𑁆𑀔𑀁 𑀤𑀼𑀕𑁆𑀕𑀢𑀺𑀧𑀭𑀺𑀓𑀺𑀮𑁂𑀲𑀁 𑀳𑀦𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀅𑀢𑁆𑀣𑁄, 𑀭𑀢𑀦𑀢𑁆𑀢𑀬𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁.

𑀅𑀣 𑀯𑀸 𑀳𑀺𑀢𑁂 𑀧𑀯𑀢𑁆𑀢𑀦𑁂𑀦 𑀅𑀳𑀺𑀢𑀸 𑀘 𑀦𑀺𑀯𑀢𑁆𑀢𑀦𑁂𑀦 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀺 𑀩𑀼𑀤𑁆𑀥𑁄. 𑀪𑀯𑀓𑀦𑁆𑀢𑀸𑀭𑀸 𑀉𑀢𑁆𑀢𑀸𑀭𑀡𑁂𑀦 𑀅𑀲𑁆𑀲𑀸𑀲𑀤𑀸𑀦𑁂𑀦 𑀘 𑀥𑀫𑁆𑀫𑁄. 𑀅𑀧𑁆𑀧𑀓𑀸𑀦𑀫𑁆𑀧𑀺 𑀓𑀸𑀭𑀸𑀦𑀁 𑀯𑀺𑀧𑀼𑀮𑀨𑀮𑀧𑀝𑀺𑀮𑀸𑀪𑀓𑀭𑀡𑁂𑀦 𑀲𑀗𑁆𑀖𑁄. 𑀢𑀲𑁆𑀫𑀸 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀭𑀢𑀦𑀢𑁆𑀢𑀬𑀁 𑀲𑀭𑀡𑀁. 𑀢𑀧𑁆𑀧𑀲𑀸𑀤𑀢𑀕𑁆𑀕𑀭𑀼𑀢𑀸𑀳𑀺 𑀯𑀺𑀳𑀢𑀓𑀺𑀮𑁂𑀲𑁄 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀭𑀡𑀕𑀫𑀦𑀁. 𑀢𑀁𑀲𑀫𑀗𑁆𑀕𑀺𑀲𑀢𑁆𑀢𑁄 𑀲𑀭𑀡𑀁 𑀕𑀘𑁆𑀙𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀏𑀢𑀸𑀦𑀺 𑀫𑁂 𑀢𑀻𑀡𑀺 𑀲𑀭𑀡𑀸𑀦𑀺 𑀲𑀭𑀡𑀁, 𑀏𑀢𑀸𑀦𑀺 𑀧𑀭𑀸𑀬𑀡𑀦𑁆𑀢𑀺 𑀏𑀯𑀁 𑀉𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀢𑀸𑀯 𑀲𑀭𑀡𑀁 𑀲𑀭𑀡𑀕𑀫𑀦𑀁 𑀬𑁄 𑀘 𑀲𑀭𑀡𑀁 𑀕𑀘𑁆𑀙𑀢𑀻𑀢𑀺 𑀇𑀤𑀁 𑀢𑀬𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁂 𑀧𑀦 𑀤𑀼𑀯𑀺𑀥𑀁 𑀲𑀭𑀡𑀕𑀫𑀦𑀁 𑀮𑁄𑀓𑀼𑀢𑁆𑀢𑀭𑀁 𑀮𑁄𑀓𑀺𑀬𑀜𑁆𑀘. 𑀢𑀢𑁆𑀣 𑀮𑁄𑀓𑀼𑀢𑁆𑀢𑀭𑀁 𑀤𑀺𑀝𑁆𑀞𑀲𑀘𑁆𑀘𑀸𑀦𑀁 𑀫𑀕𑁆𑀕𑀓𑁆𑀔𑀡𑁂 𑀲𑀭𑀡𑀕𑀫𑀦𑀼𑀧𑀓𑁆𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑁂𑀦 𑀆𑀭𑀫𑁆𑀫𑀡𑀢𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀓𑀺𑀘𑁆𑀘𑀢𑁄 𑀲𑀓𑀮𑁂𑀧𑀺 𑀭𑀢𑀦𑀢𑁆𑀢𑀬𑁂 𑀇𑀚𑁆𑀛𑀢𑀺. 𑀮𑁄𑀓𑀺𑀬𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀭𑀡𑀕𑀫𑀦𑀼𑀧𑀓𑁆𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑁂𑀦 𑀆𑀭𑀫𑁆𑀫𑀡𑀢𑁄 𑀩𑀼𑀤𑁆𑀥𑀸𑀤𑀺𑀕𑀼𑀡𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀇𑀚𑁆𑀛𑀢𑀺, 𑀢𑀁 𑀅𑀢𑁆𑀣𑀢𑁄 𑀩𑀼𑀤𑁆𑀥𑀸𑀤𑀻𑀲𑀼 𑀯𑀢𑁆𑀣𑀽𑀲𑀼 𑀲𑀤𑁆𑀥𑀸𑀧𑀝𑀺𑀮𑀸𑀪𑁄, 𑀲𑀤𑁆𑀥𑀸𑀫𑀽𑀮𑀺𑀓𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺 𑀤𑀲𑀲𑀼 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀲𑀼 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀬𑀺𑀤𑀁 𑀘𑀢𑀼𑀥𑀸 𑀧𑀯𑀢𑁆𑀢𑀢𑀺 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑁂𑀦 𑀢𑀧𑁆𑀧𑀭𑀸𑀬𑀡𑀢𑀸𑀬 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑁂𑀦 𑀧𑀡𑀺𑀧𑀸𑀢𑁂𑀦𑀸𑀢𑀺. 𑀢𑀢𑁆𑀣 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁 𑀦𑀸𑀫 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀅𑀳𑀁 𑀅𑀢𑁆𑀢𑀸𑀦𑀁 𑀩𑀼𑀤𑁆𑀥𑀲𑁆𑀲 𑀦𑀺𑀬𑁆𑀬𑀸𑀢𑁂𑀫𑀺, 𑀥𑀫𑁆𑀫𑀲𑁆𑀲, 𑀲𑀗𑁆𑀖𑀲𑁆𑀲𑀸’’𑀢𑀺 𑀏𑀯𑀁 𑀩𑀼𑀤𑁆𑀥𑀸𑀤𑀻𑀦𑀁 𑀅𑀢𑁆𑀢𑀧𑀭𑀺𑀘𑁆𑀘𑀚𑀦𑀁. 𑀢𑀧𑁆𑀧𑀭𑀸𑀬𑀡𑀢𑀸 𑀦𑀸𑀫 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀅𑀳𑀁 𑀩𑀼𑀤𑁆𑀥𑀧𑀭𑀸𑀬𑀡𑁄, 𑀥𑀫𑁆𑀫𑀧𑀭𑀸𑀬𑀡𑁄, 𑀲𑀗𑁆𑀖𑀧𑀭𑀸𑀬𑀡𑁄 𑀇𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 𑀏𑀯𑀁 𑀢𑀧𑁆𑀧𑀭𑀸𑀬𑀡𑀪𑀸𑀯𑁄. 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑀁 𑀦𑀸𑀫 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀅𑀳𑀁 𑀩𑀼𑀤𑁆𑀥𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀥𑀫𑁆𑀫𑀲𑁆𑀲, 𑀲𑀗𑁆𑀖𑀲𑁆𑀲𑀸𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 𑀏𑀯𑀁 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑁄. 𑀧𑀡𑀺𑀧𑀸𑀢𑁄 𑀦𑀸𑀫 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀅𑀳𑀁 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀁 𑀩𑀼𑀤𑁆𑀥𑀸𑀤𑀻𑀦𑀁𑀬𑁂𑀯 𑀢𑀺𑀡𑁆𑀡𑀁 𑀯𑀢𑁆𑀣𑀽𑀦𑀁 𑀓𑀭𑁄𑀫𑀺, 𑀇𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 𑀏𑀯𑀁 𑀩𑀼𑀤𑁆𑀥𑀸𑀤𑀻𑀲𑀼 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑁄. 𑀇𑀫𑁂𑀲𑀜𑁆𑀳𑀺 𑀘𑀢𑀼𑀦𑁆𑀦𑀁 𑀆𑀓𑀸𑀭𑀸𑀦𑀁 𑀅𑀜𑁆𑀜𑀢𑀭𑀫𑁆𑀧𑀺 𑀓𑀭𑁄𑀦𑁆𑀢𑁂𑀦 𑀕𑀳𑀺𑀢𑀁𑀬𑁂𑀯 𑀳𑁄𑀢𑀺 𑀲𑀭𑀡𑀕𑀫𑀦𑀁.

𑀅𑀧𑀺𑀘 𑀪𑀕𑀯𑀢𑁄 𑀅𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀥𑀫𑁆𑀫𑀲𑁆𑀲, 𑀲𑀗𑁆𑀖𑀲𑁆𑀲 𑀅𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀸𑀫𑀺. 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀧𑀭𑀺𑀘𑁆𑀘𑀢𑁆𑀢𑁄𑀬𑁂𑀯 𑀫𑁂 𑀅𑀢𑁆𑀢𑀸, 𑀧𑀭𑀺𑀘𑁆𑀘𑀢𑁆𑀢𑀁𑀬𑁂𑀯 𑀫𑁂 𑀚𑀻𑀯𑀺𑀢𑀁, 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀩𑀼𑀤𑁆𑀥𑁄 𑀫𑁂 𑀲𑀭𑀡𑀁 𑀮𑁂𑀡𑀁 𑀢𑀸𑀡𑀦𑁆𑀢𑀺 𑀏𑀯𑀫𑁆𑀧𑀺 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀲𑀢𑁆𑀣𑀸𑀭𑀜𑁆𑀘 𑀯𑀢𑀸𑀳𑀁 𑀧𑀲𑁆𑀲𑁂𑀬𑁆𑀬𑀁 𑀪𑀕𑀯𑀦𑁆𑀢𑀫𑁂𑀯 𑀧𑀲𑁆𑀲𑁂𑀬𑁆𑀬𑀁, 𑀲𑀼𑀕𑀢𑀜𑁆𑀘 𑀯𑀢𑀸𑀳𑀁 𑀧𑀲𑁆𑀲𑁂𑀬𑁆𑀬𑀁 𑀪𑀕𑀯𑀦𑁆𑀢𑀫𑁂𑀯 𑀧𑀲𑁆𑀲𑁂𑀬𑁆𑀬𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀜𑁆𑀘 𑀯𑀢𑀸𑀳𑀁 𑀧𑀲𑁆𑀲𑁂𑀬𑁆𑀬𑀁 𑀪𑀕𑀯𑀦𑁆𑀢𑀫𑁂𑀯 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀏𑀯𑀫𑁆𑀧𑀺 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑀭𑀡𑀕𑀫𑀦𑀁 𑀯𑀺𑀬 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑀁 𑀤𑀝𑁆𑀞𑀩𑁆𑀩𑀁.

‘‘𑀲𑁄 𑀅𑀳𑀁 𑀯𑀺𑀘𑀭𑀺𑀲𑁆𑀲𑀸𑀫𑀺, 𑀕𑀸𑀫𑀸 𑀕𑀸𑀫𑀁 𑀧𑀼𑀭𑀸 𑀧𑀼𑀭𑀁;

𑀦𑀫𑀲𑁆𑀲𑀫𑀸𑀦𑁄 𑀲𑀫𑁆𑀩𑀼𑀤𑁆𑀥𑀁, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢’’𑀦𑁆𑀢𑀺. (𑀲𑀼. 𑀦𑀺. 𑁧𑁯𑁪; 𑀲𑀁. 𑀦𑀺. 𑁧.𑁨𑁪𑁬) 𑁋

𑀏𑀯𑀫𑁆𑀧𑀺 𑀆𑀴𑀯𑀓𑀸𑀤𑀻𑀦𑀁 𑀲𑀭𑀡𑀕𑀫𑀦𑀁 𑀯𑀺𑀬 𑀢𑀧𑁆𑀧𑀭𑀸𑀬𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀅𑀣 𑀔𑁄 𑀩𑁆𑀭𑀳𑁆𑀫𑀸𑀬𑀼 𑀩𑁆𑀭𑀸𑀳𑁆𑀫𑀡𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀸𑀦𑀺 𑀫𑀼𑀔𑁂𑀦 𑀘 𑀧𑀭𑀺𑀘𑀼𑀫𑁆𑀩𑀢𑀺, 𑀧𑀸𑀡𑀻𑀳𑀺 𑀘 𑀧𑀭𑀺𑀲𑀫𑁆𑀩𑀸𑀳𑀢𑀺, 𑀦𑀸𑀫𑀜𑁆𑀘 𑀲𑀸𑀯𑁂𑀢𑀺 𑀩𑁆𑀭𑀳𑁆𑀫𑀸𑀬𑀼 𑀅𑀳𑀁, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄, 𑀩𑁆𑀭𑀳𑁆𑀫𑀸𑀬𑀼 𑀅𑀳𑀁, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄’’𑀢𑀺 (𑀫. 𑀦𑀺. 𑁨.𑁩𑁯𑁪) 𑀏𑀯𑀫𑁆𑀧𑀺 𑀧𑀡𑀺𑀧𑀸𑀢𑁄 𑀤𑀝𑁆𑀞𑀩𑁆𑀩𑁄.

𑀲𑁄 𑀧𑀦𑁂𑀲 𑀜𑀸𑀢𑀺𑀪𑀬𑀸𑀘𑀭𑀺𑀬𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀤𑀓𑁆𑀔𑀺𑀡𑁂𑀬𑁆𑀬𑀧𑀡𑀺𑀧𑀸𑀢𑁂𑀦 𑀲𑀭𑀡𑀕𑀫𑀦𑀁 𑀳𑁄𑀢𑀺, 𑀦 𑀇𑀢𑀭𑁂𑀳𑀺. 𑀲𑁂𑀝𑁆𑀞𑀯𑀲𑁂𑀦𑁂𑀯 𑀳𑀺 𑀲𑀭𑀡𑀁 𑀕𑀬𑁆𑀳𑀢𑀺, 𑀲𑁂𑀝𑁆𑀞𑀯𑀲𑁂𑀦 𑀪𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀬𑁄 𑀲𑀸𑀓𑀺𑀬𑁄 𑀯𑀸 𑀓𑁄𑀮𑀺𑀬𑁄 𑀯𑀸 ‘‘𑀩𑀼𑀤𑁆𑀥𑁄 𑀅𑀫𑁆𑀳𑀸𑀓𑀁 𑀜𑀸𑀢𑀓𑁄’’𑀢𑀺 𑀯𑀦𑁆𑀤𑀢𑀺, 𑀅𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺 𑀲𑀭𑀡𑀁. 𑀬𑁄 𑀯𑀸 ‘‘𑀲𑀫𑀡𑁄 𑀕𑁄𑀢𑀫𑁄 𑀭𑀸𑀚𑀧𑀽𑀚𑀺𑀢𑁄 𑀫𑀳𑀸𑀦𑀼𑀪𑀸𑀯𑁄, 𑀅𑀯𑀦𑁆𑀤𑀺𑀬𑀫𑀸𑀦𑁄 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀯𑀦𑁆𑀤𑀢𑀺, 𑀅𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺 𑀲𑀭𑀡𑀁. 𑀬𑁄 𑀯𑀸 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀉𑀕𑁆𑀕𑀳𑀺𑀢𑀁 𑀲𑀭𑀫𑀸𑀦𑁄 𑀩𑀼𑀤𑁆𑀥𑀓𑀸𑀮𑁂 𑀯𑀸 𑁋

‘‘𑀏𑀓𑁂𑀦 𑀪𑁄𑀕𑁂 𑀪𑀼𑀜𑁆𑀚𑁂𑀬𑁆𑀬, 𑀤𑁆𑀯𑀻𑀳𑀺 𑀓𑀫𑁆𑀫𑀁 𑀧𑀬𑁄𑀚𑀬𑁂;

𑀘𑀢𑀼𑀢𑁆𑀣𑀜𑁆𑀘 𑀦𑀺𑀥𑀸𑀧𑁂𑀬𑁆𑀬, 𑀆𑀧𑀤𑀸𑀲𑀼 𑀪𑀯𑀺𑀲𑁆𑀲𑀢𑀻’’𑀢𑀺. (𑀤𑀻. 𑀦𑀺. 𑁩.𑁨𑁬𑁫) 𑁋

𑀏𑀯𑀭𑀽𑀧𑀁 𑀅𑀦𑀼𑀲𑀸𑀲𑀦𑀺𑀁 𑀉𑀕𑁆𑀕𑀳𑁂𑀢𑁆𑀯𑀸 ‘‘𑀆𑀘𑀭𑀺𑀬𑁄 𑀫𑁂’’𑀢𑀺 𑀯𑀦𑁆𑀤𑀢𑀺, 𑀅𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺 𑀲𑀭𑀡𑀁. 𑀬𑁄 𑀧𑀦 ‘‘𑀅𑀬𑀁 𑀮𑁄𑀓𑁂 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄’’𑀢𑀺 𑀯𑀦𑁆𑀤𑀢𑀺, 𑀢𑁂𑀦𑁂𑀯 𑀕𑀳𑀺𑀢𑀁 𑀳𑁄𑀢𑀺 𑀲𑀭𑀡𑀁.

𑀏𑀯𑀁 𑀕𑀳𑀺𑀢𑀲𑀭𑀡𑀲𑁆𑀲 𑀘 𑀉𑀧𑀸𑀲𑀓𑀲𑁆𑀲 𑀯𑀸 𑀉𑀧𑀸𑀲𑀺𑀓𑀸𑀬 𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀲𑀼 𑀧𑀩𑁆𑀩𑀚𑀺𑀢𑀫𑁆𑀧𑀺 𑀜𑀸𑀢𑀺𑀁 ‘‘𑀜𑀸𑀢𑀓𑁄 𑀫𑁂 𑀅𑀬’’𑀦𑁆𑀢𑀺 𑀯𑀦𑁆𑀤𑀢𑁄 𑀲𑀭𑀡𑀕𑀫𑀦𑀁 𑀦 𑀪𑀺𑀚𑁆𑀚𑀢𑀺, 𑀧𑀕𑁂𑀯 𑀅𑀧𑀩𑁆𑀩𑀚𑀺𑀢𑀁. 𑀢𑀣𑀸 𑀭𑀸𑀚𑀸𑀦𑀁 𑀪𑀬𑀯𑀲𑁂𑀦 𑀯𑀦𑁆𑀤𑀢𑁄, 𑀲𑁄 𑀳𑀺 𑀭𑀝𑁆𑀞𑀧𑀽𑀚𑀺𑀢𑀢𑁆𑀢𑀸 𑀅𑀯𑀦𑁆𑀤𑀺𑀬𑀫𑀸𑀦𑁄 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀸𑀢𑀺. 𑀢𑀣𑀸 𑀬𑀁𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑀓𑀁 𑀢𑀺𑀢𑁆𑀣𑀺𑀬𑀁 ‘‘𑀆𑀘𑀭𑀺𑀬𑁄 𑀫𑁂 𑀅𑀬’’𑀦𑁆𑀢𑀺 𑀯𑀦𑁆𑀤𑀢𑁄𑀧𑀺 𑀦 𑀪𑀺𑀚𑁆𑀚𑀢𑀻𑀢𑀺 𑀏𑀯𑀁 𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀮𑁄𑀓𑀼𑀢𑁆𑀢𑀭𑀲𑁆𑀲 𑀲𑀭𑀡𑀕𑀫𑀦𑀲𑁆𑀲 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀯𑀺𑀧𑀸𑀓𑀨𑀮𑀁, 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁄 𑀆𑀦𑀺𑀲𑀁𑀲𑀨𑀮𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁄 𑀘 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀢𑁄;

𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺.

𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀜𑁆𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑀏𑀢𑀁 𑀔𑁄 𑀲𑀭𑀡𑀁 𑀔𑁂𑀫𑀁, 𑀏𑀢𑀁 𑀲𑀭𑀡𑀫𑀼𑀢𑁆𑀢𑀫𑀁;

𑀏𑀢𑀁 𑀲𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺. (𑀥. 𑀧. 𑁧𑁯𑁦-𑁧𑁯𑁨);

𑀅𑀧𑀺𑀘 𑀦𑀺𑀘𑁆𑀘𑀢𑁄 𑀅𑀦𑀼𑀧𑀕𑀫𑀦𑀸𑀤𑀺𑀯𑀲𑁂𑀦 𑀧𑁂𑀢𑀲𑁆𑀲 𑀆𑀦𑀺𑀲𑀁𑀲𑀨𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁, ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀲𑀼𑀔𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀧𑀺𑀢𑀭𑀁 𑀅𑀭𑀳𑀦𑁆𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀤𑀼𑀝𑁆𑀞𑀘𑀺𑀢𑁆𑀢𑁄 𑀢𑀣𑀸𑀕𑀢𑀲𑁆𑀲 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬, 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁩.𑁧𑁨𑁮; 𑀅. 𑀦𑀺. 𑁧.𑁨𑁬𑁮-𑁨𑁭𑁬).

𑀮𑁄𑀓𑀺𑀬𑀲𑁆𑀲 𑀧𑀦 𑀲𑀭𑀡𑀕𑀫𑀦𑀲𑁆𑀲 𑀪𑀯𑀲𑀫𑁆𑀧𑀤𑀸𑀧𑀺 𑀪𑁄𑀕𑀲𑀫𑁆𑀧𑀤𑀸𑀧𑀺 𑀨𑀮𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁂𑀓𑁂𑀘𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂,

𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁,

𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺. (𑀲𑀁. 𑀦𑀺. 𑁧.𑁩𑁭);

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀲𑀻𑀢𑀺𑀬𑀸 𑀤𑁂𑀯𑀢𑀸𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀔𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑀤𑀯𑁄𑀘 ‘𑀲𑀸𑀥𑀼 𑀔𑁄 𑀤𑁂𑀯𑀸𑀦𑀫𑀺𑀦𑁆𑀤 𑀩𑀼𑀤𑁆𑀥𑀁 𑀲𑀭𑀡𑀕𑀫𑀦𑀁 𑀳𑁄𑀢𑀺, 𑀩𑀼𑀤𑁆𑀥𑀁 𑀲𑀭𑀡𑀕𑀫𑀦𑀳𑁂𑀢𑀼 𑀔𑁄 𑀤𑁂𑀯𑀸𑀦𑀫𑀺𑀦𑁆𑀤 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’𑀢𑀺. 𑀢𑁂 𑀅𑀜𑁆𑀜𑁂 𑀤𑁂𑀯𑁂 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀦𑁆𑀢𑀺 𑀤𑀺𑀩𑁆𑀩𑁂𑀦 𑀆𑀬𑀼𑀦𑀸 𑀤𑀺𑀩𑁆𑀩𑁂𑀦 𑀯𑀡𑁆𑀡𑁂𑀦 𑀲𑀼𑀔𑁂𑀦 𑀬𑀲𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦 𑀤𑀺𑀩𑁆𑀩𑁂𑀳𑀺 𑀭𑀽𑀧𑁂𑀳𑀺 𑀲𑀤𑁆𑀤𑁂𑀳𑀺 𑀕𑀦𑁆𑀥𑁂𑀳𑀺 𑀭𑀲𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀻’’𑀢𑀺 (𑀲𑀁. 𑀦𑀺. 𑁪.𑁩𑁪𑁧). 𑀏𑀲 𑀦𑀬𑁄 𑀥𑀫𑁆𑀫𑁂 𑀲𑀗𑁆𑀖𑁂 𑀘. 𑀅𑀧𑀺𑀘 𑀯𑁂𑀮𑀸𑀫𑀲𑀼𑀢𑁆𑀢𑀸𑀤𑀺𑀯𑀲𑁂𑀦𑀸𑀧𑀺 (𑀅. 𑀦𑀺. 𑁯.𑁨𑁦) 𑀲𑀭𑀡𑀕𑀫𑀦𑀲𑁆𑀲 𑀨𑀮𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑀭𑀡𑀕𑀫𑀦𑀨𑀮𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀮𑁄𑀓𑀺𑀬𑀲𑀭𑀡𑀕𑀫𑀦𑀁 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀅𑀜𑁆𑀜𑀸𑀡𑀲𑀁𑀲𑀬𑀫𑀺𑀘𑁆𑀙𑀸𑀜𑀸𑀡𑀸𑀤𑀻𑀳𑀺 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀦 𑀫𑀳𑀸𑀚𑀼𑀢𑀺𑀓𑀁 𑀳𑁄𑀢𑀺, 𑀦 𑀫𑀳𑀸𑀯𑀺𑀧𑁆𑀨𑀸𑀭𑀁. 𑀮𑁄𑀓𑀼𑀢𑁆𑀢𑀭𑀲𑁆𑀲 𑀦𑀢𑁆𑀣𑀺 𑀲𑀁𑀓𑀺𑀮𑁂𑀲𑁄. 𑀮𑁄𑀓𑀺𑀬𑀲𑁆𑀲 𑀘 𑀲𑀭𑀡𑀕𑀫𑀦𑀲𑁆𑀲 𑀤𑀼𑀯𑀺𑀥𑁄 𑀪𑁂𑀤𑁄 𑀲𑀸𑀯𑀚𑁆𑀚𑁄 𑀅𑀦𑀯𑀚𑁆𑀚𑁄 𑀘. 𑀢𑀢𑁆𑀣 𑀲𑀸𑀯𑀚𑁆𑀚𑁄 𑀅𑀜𑁆𑀜𑀲𑀢𑁆𑀣𑀸𑀭𑀸𑀤𑀻𑀲𑀼 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀸𑀤𑀻𑀳𑀺 𑀳𑁄𑀢𑀺, 𑀲𑁄 𑀅𑀦𑀺𑀝𑁆𑀞𑀨𑀮𑁄. 𑀅𑀦𑀯𑀚𑁆𑀚𑁄 𑀓𑀸𑀮𑀁 𑀓𑀺𑀭𑀺𑀬𑀸𑀬, 𑀲𑁄 𑀅𑀯𑀺𑀧𑀸𑀓𑀢𑁆𑀢𑀸 𑀅𑀨𑀮𑁄. 𑀮𑁄𑀓𑀼𑀢𑁆𑀢𑀭𑀲𑁆𑀲 𑀧𑀦 𑀦𑁂𑀯𑀢𑁆𑀣𑀺 𑀪𑁂𑀤𑁄. 𑀪𑀯𑀦𑁆𑀢𑀭𑁂𑀧𑀺 𑀳𑀺 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀲𑀢𑁆𑀣𑀸𑀭𑀁 𑀦 𑀉𑀤𑁆𑀤𑀺𑀲𑀢𑀻𑀢𑀺 𑀏𑀯𑀁 𑀲𑀭𑀡𑀕𑀫𑀦𑀲𑁆𑀲 𑀲𑀁𑀓𑀺𑀮𑁂𑀲𑁄 𑀘 𑀪𑁂𑀤𑁄 𑀘 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀽𑀢𑀺 𑀫𑀁 𑀪𑀯𑀁 𑀕𑁄𑀢𑀫𑁄 ‘‘𑀉𑀧𑀸𑀲𑀓𑁄 𑀅𑀬’’𑀦𑁆𑀢𑀺 𑀏𑀯𑀁 𑀥𑀸𑀭𑁂𑀢𑀼, 𑀚𑀸𑀦𑀸𑀢𑀽𑀢𑀺 𑀅𑀢𑁆𑀣𑁄.

𑀲𑀭𑀡𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀲𑀓𑀯𑀺𑀥𑀺𑀓𑀣𑀸𑀯𑀡𑁆𑀡𑀦𑀸

𑀉𑀧𑀸𑀲𑀓𑀯𑀺𑀥𑀺𑀓𑁄𑀲𑀮𑁆𑀮𑀢𑁆𑀣𑀁 𑀧𑀦𑁂𑀢𑁆𑀣 𑀓𑁄 𑀉𑀧𑀸𑀲𑀓𑁄, 𑀓𑀲𑁆𑀫𑀸 𑀉𑀧𑀸𑀲𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀓𑀺𑀫𑀲𑁆𑀲 𑀲𑀻𑀮𑀁, 𑀓𑁄 𑀆𑀚𑀻𑀯𑁄, 𑀓𑀸 𑀯𑀺𑀧𑀢𑁆𑀢𑀺, 𑀓𑀸 𑀲𑀫𑁆𑀧𑀢𑁆𑀢𑀻𑀢𑀺 𑀇𑀤𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀓𑁄 𑀉𑀧𑀸𑀲𑀓𑁄𑀢𑀺 𑀬𑁄 𑀓𑁄𑀘𑀺 𑀢𑀺𑀲𑀭𑀡𑀕𑀢𑁄 𑀕𑀳𑀝𑁆𑀞𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀬𑀢𑁄 𑀔𑁄 𑀫𑀳𑀸𑀦𑀸𑀫 𑀉𑀧𑀸𑀲𑀓𑁄 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄 𑀫𑀳𑀸𑀦𑀸𑀫 𑀉𑀧𑀸𑀲𑀓𑁄 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁩𑁩).

𑀓𑀲𑁆𑀫𑀸 𑀉𑀧𑀸𑀲𑀓𑁄𑀢𑀺 𑀭𑀢𑀦𑀢𑁆𑀢𑀬𑀲𑁆𑀲 𑀉𑀧𑀸𑀲𑀦𑀢𑁄. 𑀲𑁄 𑀳𑀺 𑀩𑀼𑀤𑁆𑀥𑀁 𑀉𑀧𑀸𑀲𑀢𑀻𑀢𑀺 𑀉𑀧𑀸𑀲𑀓𑁄. 𑀥𑀫𑁆𑀫𑀁, 𑀲𑀗𑁆𑀖𑀁 𑀉𑀧𑀸𑀲𑀢𑀻𑀢𑀺 𑀉𑀧𑀸𑀲𑀓𑁄.

𑀓𑀺𑀫𑀲𑁆𑀲 𑀲𑀻𑀮𑀦𑁆𑀢𑀺 𑀧𑀜𑁆𑀘 𑀯𑁂𑀭𑀫𑀡𑀺𑀬𑁄. 𑀬𑀣𑀸𑀳 ‘‘𑀬𑀢𑁄 𑀔𑁄 𑀫𑀳𑀸𑀦𑀸𑀫 𑀉𑀧𑀸𑀲𑀓𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀸, 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸𑀘𑀸𑀭𑀸, 𑀫𑀼𑀲𑀸𑀯𑀸𑀤𑀸, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄 𑀫𑀳𑀸𑀦𑀸𑀫 𑀉𑀧𑀸𑀲𑀓𑁄 𑀲𑀻𑀮𑀯𑀸 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁩𑁩).

𑀓𑁄 𑀆𑀚𑀻𑀯𑁄𑀢𑀺 𑀧𑀜𑁆𑀘 𑀫𑀺𑀘𑁆𑀙𑀸𑀯𑀡𑀺𑀚𑁆𑀚𑀸 𑀧𑀳𑀸𑀬 𑀥𑀫𑁆𑀫𑁂𑀦 𑀲𑀫𑁂𑀦 𑀚𑀻𑀯𑀺𑀢𑀓𑀧𑁆𑀧𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀧𑀜𑁆𑀘𑀺𑀫𑀸, 𑀪𑀺𑀓𑁆𑀔𑀯𑁂, 𑀯𑀡𑀺𑀚𑁆𑀚𑀸 𑀉𑀧𑀸𑀲𑀓𑁂𑀦 𑀅𑀓𑀭𑀡𑀻𑀬𑀸. 𑀓𑀢𑀫𑀸 𑀧𑀜𑁆𑀘? 𑀲𑀢𑁆𑀣𑀯𑀡𑀺𑀚𑁆𑀚𑀸, 𑀲𑀢𑁆𑀢𑀯𑀡𑀺𑀚𑁆𑀚𑀸, 𑀫𑀁𑀲𑀯𑀡𑀺𑀚𑁆𑀚𑀸, 𑀫𑀚𑁆𑀚𑀯𑀡𑀺𑀚𑁆𑀚𑀸, 𑀯𑀺𑀲𑀯𑀡𑀺𑀚𑁆𑀚𑀸. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀯𑀡𑀺𑀚𑁆𑀚𑀸 𑀉𑀧𑀸𑀲𑀓𑁂𑀦 𑀅𑀓𑀭𑀡𑀻𑀬𑀸’’𑀢𑀺 (𑀅. 𑀦𑀺. 𑁫.𑁧𑁭𑁭).

𑀓𑀸 𑀯𑀺𑀧𑀢𑁆𑀢𑀻𑀢𑀺 𑀬𑀸 𑀢𑀲𑁆𑀲𑁂𑀯 𑀲𑀻𑀮𑀲𑁆𑀲 𑀘 𑀆𑀚𑀻𑀯𑀲𑁆𑀲 𑀘 𑀯𑀺𑀧𑀢𑁆𑀢𑀺, 𑀅𑀬𑀫𑀲𑁆𑀲 𑀯𑀺𑀧𑀢𑁆𑀢𑀺. 𑀅𑀧𑀺𑀘 𑀬𑀸𑀬 𑀏𑀲 𑀘𑀡𑁆𑀟𑀸𑀮𑁄 𑀘𑁂𑀯 𑀳𑁄𑀢𑀺 𑀫𑀮𑀜𑁆𑀘 𑀧𑀢𑀺𑀓𑀼𑀝𑁆𑀞𑁄 𑀘. 𑀲𑀸𑀧𑀺𑀲𑁆𑀲 𑀯𑀺𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀘 𑀅𑀢𑁆𑀣𑀢𑁄 𑀅𑀲𑁆𑀲𑀤𑁆𑀥𑀺𑀬𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀬𑀣𑀸𑀳 ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀘𑀡𑁆𑀟𑀸𑀮𑁄 𑀘 𑀳𑁄𑀢𑀺 𑀉𑀧𑀸𑀲𑀓𑀫𑀮𑀜𑁆𑀘 𑀉𑀧𑀸𑀲𑀓𑀧𑀢𑀺𑀓𑀼𑀝𑁆𑀞𑁄 𑀘. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺, 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀳𑁄𑀢𑀺, 𑀫𑀗𑁆𑀕𑀮𑀁 𑀧𑀘𑁆𑀘𑁂𑀢𑀺 𑀦𑁄 𑀓𑀫𑁆𑀫𑀁, 𑀇𑀢𑁄 𑀘 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑀢𑀺 𑀢𑀢𑁆𑀣 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀻’’𑀢𑀺 (𑀅. 𑀦𑀺. 𑁫.𑁧𑁭𑁫).

𑀓𑀸 𑀲𑀫𑁆𑀧𑀢𑁆𑀢𑀻𑀢𑀺 𑀬𑀸 𑀘𑀲𑁆𑀲 𑀲𑀻𑀮𑀲𑀫𑁆𑀧𑀤𑀸 𑀘 𑀆𑀚𑀻𑀯𑀲𑀫𑁆𑀧𑀤𑀸 𑀘, 𑀲𑀸 𑀲𑀫𑁆𑀧𑀢𑁆𑀢𑀺. 𑀬𑁂 𑀘𑀲𑁆𑀲 𑀭𑀢𑀦𑀪𑀸𑀯𑀸𑀤𑀺𑀓𑀭𑀸 𑀲𑀤𑁆𑀥𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸. 𑀬𑀣𑀸𑀳 ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀭𑀢𑀦𑀜𑁆𑀘 𑀳𑁄𑀢𑀺 𑀉𑀧𑀸𑀲𑀓𑀧𑀤𑀼𑀫𑀜𑁆𑀘 𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑀜𑁆𑀘. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀲𑀤𑁆𑀥𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺, 𑀦 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀳𑁄𑀢𑀺, 𑀓𑀫𑁆𑀫𑀁 𑀧𑀘𑁆𑀘𑁂𑀢𑀺 𑀦𑁄 𑀫𑀗𑁆𑀕𑀮𑀁, 𑀦 𑀇𑀢𑁄 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀢𑀺, 𑀇𑀥 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀻’’𑀢𑀺 (𑀅. 𑀦𑀺. 𑁫.𑁧𑁭𑁫).

𑀅𑀚𑁆𑀚𑀢𑀕𑁆𑀕𑁂𑀢𑀺 𑀏𑀢𑁆𑀣 𑀅𑀬𑀁 𑀅𑀕𑁆𑀕𑀲𑀤𑁆𑀤𑁄 𑀆𑀤𑀺𑀓𑁄𑀝𑀺𑀓𑁄𑀝𑁆𑀞𑀸𑀲𑀲𑁂𑀝𑁆𑀞𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀅𑀚𑁆𑀚𑀢𑀕𑁆𑀕𑁂, 𑀲𑀫𑁆𑀫 𑀤𑁄𑀯𑀸𑀭𑀺𑀓, 𑀆𑀯𑀭𑀸𑀫𑀺 𑀤𑁆𑀯𑀸𑀭𑀁 𑀦𑀺𑀕𑀡𑁆𑀞𑀸𑀦𑀁 𑀦𑀺𑀕𑀡𑁆𑀞𑀻𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁭𑁦) 𑀳𑀺 𑀆𑀤𑀺𑀫𑁆𑀳𑀺 𑀤𑀺𑀲𑁆𑀲𑀢𑀺. ‘‘𑀢𑁂𑀦𑁂𑀯 𑀅𑀗𑁆𑀕𑀼𑀮𑀕𑁆𑀕𑁂𑀦 𑀢𑀁 𑀅𑀗𑁆𑀕𑀼𑀮𑀕𑁆𑀕𑀁 𑀧𑀭𑀸𑀫𑀲𑁂𑀬𑁆𑀬, (𑀓𑀣𑀸. 𑁪𑁪𑁧) 𑀉𑀘𑁆𑀙𑀕𑁆𑀕𑀁 𑀯𑁂𑀴𑀕𑁆𑀕’’𑀦𑁆𑀢𑀺𑀆𑀤𑀻𑀲𑀼 𑀓𑁄𑀝𑀺𑀬𑀁. ‘‘𑀅𑀫𑁆𑀩𑀺𑀮𑀕𑁆𑀕𑀁 𑀯𑀸 𑀫𑀥𑀼𑀭𑀕𑁆𑀕𑀁 𑀯𑀸 𑀢𑀺𑀢𑁆𑀢𑀓𑀕𑁆𑀕𑀁 𑀯𑀸 (𑀲𑀁. 𑀦𑀺. 𑁫.𑁩𑁭𑁪), 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑀕𑁆𑀕𑁂𑀦 𑀯𑀸 𑀧𑀭𑀺𑀯𑁂𑀡𑀕𑁆𑀕𑁂𑀦 𑀯𑀸 𑀪𑀸𑀚𑁂𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁧𑁮) 𑀓𑁄𑀝𑁆𑀞𑀸𑀲𑁂. ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸…𑀧𑁂… 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁪) 𑀲𑁂𑀝𑁆𑀞𑁂. 𑀇𑀥 𑀧𑀦𑀸𑀬𑀁 𑀆𑀤𑀺𑀫𑁆𑀳𑀺 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀅𑀚𑁆𑀚𑀢𑀕𑁆𑀕𑁂𑀢𑀺 𑀅𑀚𑁆𑀚𑀢𑀁 𑀆𑀤𑀺𑀁 𑀓𑀢𑁆𑀯𑀸, 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀚𑁆𑀚𑀢𑀦𑁆𑀢𑀺 𑀅𑀚𑁆𑀚𑀪𑀸𑀯𑀁. 𑀅𑀚𑁆𑀚𑀤𑀕𑁆𑀕𑁂𑀢𑀺 𑀯𑀸 𑀧𑀸𑀞𑁄, 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀚𑁆𑀚 𑀅𑀕𑁆𑀕𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀸𑀡𑀼𑀧𑁂𑀢𑀦𑁆𑀢𑀺 𑀧𑀸𑀡𑁂𑀳𑀺 𑀉𑀧𑁂𑀢𑀁, 𑀬𑀸𑀯 𑀫𑁂 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀢𑀸𑀯 𑀉𑀧𑁂𑀢𑀁. 𑀅𑀦𑀜𑁆𑀜𑀲𑀢𑁆𑀣𑀼𑀓𑀁 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀭𑀡𑀁 𑀕𑀢𑀁 𑀉𑀧𑀸𑀲𑀓𑀁 𑀓𑀧𑁆𑀧𑀺𑀬𑀓𑀸𑀭𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀚𑀸𑀦𑀸𑀢𑀼. 𑀅𑀳𑀜𑁆𑀳𑀺 𑀲𑀘𑁂𑀧𑀺 𑀫𑁂 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀤𑁂𑀬𑁆𑀬, 𑀦𑁂𑀯 𑀩𑀼𑀤𑁆𑀥𑀁 ‘‘𑀦 𑀩𑀼𑀤𑁆𑀥𑁄’’𑀢𑀺 𑀯𑀸 𑀥𑀫𑁆𑀫𑀁 ‘‘𑀦 𑀥𑀫𑁆𑀫𑁄’’𑀢𑀺 𑀯𑀸, 𑀲𑀗𑁆𑀖𑀁 ‘‘𑀦 𑀲𑀗𑁆𑀖𑁄’’𑀢𑀺 𑀯𑀸 𑀯𑀤𑁂𑀬𑁆𑀬𑀦𑁆𑀢𑀺. 𑀏𑀯𑀁 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑁂𑀦 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀘𑀢𑀽𑀳𑀺 𑀘 𑀧𑀘𑁆𑀘𑀬𑁂𑀳𑀺 𑀧𑀯𑀸𑀭𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺.

𑀉𑀧𑀸𑀲𑀓𑀯𑀺𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬