𑁫. 𑀅𑀦𑀗𑁆𑀕𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀅𑀦𑀗𑁆𑀕𑀡𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀩𑁆𑀩𑀲𑀼𑀢𑁆𑀢𑁂𑀲𑀼. 𑀢𑀲𑁆𑀫𑀸 𑀇𑀢𑁄 𑀧𑀭𑀁 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀁𑀬𑁂𑀯 𑀓𑀭𑀺𑀲𑁆𑀲𑀸𑀫.

𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀧𑀼𑀕𑁆𑀕𑀮𑀸𑀢𑀺 𑀲𑀢𑁆𑀢𑀸 𑀦𑀭𑀸 𑀧𑁄𑀲𑀸. 𑀏𑀢𑁆𑀢𑀸𑀯𑀢𑀸 𑀘 𑀧𑀼𑀕𑁆𑀕𑀮𑀯𑀸𑀤𑀻 𑀫𑀳𑀸𑀣𑁂𑀭𑁄𑀢𑀺 𑀦 𑀕𑀳𑁂𑀢𑀩𑁆𑀩𑀁, 𑀅𑀬𑀜𑁆𑀳𑀺 𑀆𑀬𑀲𑁆𑀫𑀸 𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀲𑁂𑀝𑁆𑀞𑁄, 𑀲𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀤𑁂𑀲𑀦𑀁 𑀅𑀯𑀺𑀮𑁄𑀫𑁂𑀦𑁆𑀢𑁄𑀬𑁂𑀯 𑀤𑁂𑀲𑁂𑀢𑀺.

𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀤𑁂𑀲𑀦𑀸𑀓𑀣𑀸𑀯𑀡𑁆𑀡𑀦𑀸

𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀤𑀼𑀯𑀺𑀥𑀸 𑀤𑁂𑀲𑀦𑀸 𑀲𑀫𑁆𑀫𑀼𑀢𑀺𑀤𑁂𑀲𑀦𑀸, 𑀧𑀭𑀫𑀢𑁆𑀣𑀤𑁂𑀲𑀦𑀸 𑀘𑀸𑀢𑀺. 𑀢𑀢𑁆𑀣 𑀧𑀼𑀕𑁆𑀕𑀮𑁄 𑀲𑀢𑁆𑀢𑁄 𑀇𑀢𑁆𑀣𑀻 𑀧𑀼𑀭𑀺𑀲𑁄 𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑁄 𑀫𑀸𑀭𑁄𑀢𑀺 𑀏𑀯𑀭𑀽𑀧𑀸 𑀲𑀫𑁆𑀫𑀼𑀢𑀺𑀤𑁂𑀲𑀦𑀸. 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸, 𑀔𑀦𑁆𑀥𑀸 𑀥𑀸𑀢𑀽 𑀆𑀬𑀢𑀦𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀏𑀯𑀭𑀽𑀧𑀸 𑀧𑀭𑀫𑀢𑁆𑀣𑀤𑁂𑀲𑀦𑀸.

𑀢𑀢𑁆𑀣 𑀪𑀕𑀯𑀸 𑀬𑁂 𑀲𑀫𑁆𑀫𑀼𑀢𑀺𑀯𑀲𑁂𑀦 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀫𑁄𑀳𑀁 𑀧𑀳𑀸𑀬 𑀯𑀺𑀲𑁂𑀲𑀁 𑀅𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀸, 𑀢𑁂𑀲𑀁 𑀲𑀫𑁆𑀫𑀼𑀢𑀺𑀤𑁂𑀲𑀦𑀁 𑀤𑁂𑀲𑁂𑀢𑀺. 𑀬𑁂 𑀧𑀦 𑀧𑀭𑀫𑀢𑁆𑀣𑀯𑀲𑁂𑀦 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀫𑁄𑀳𑀁 𑀧𑀳𑀸𑀬 𑀯𑀺𑀲𑁂𑀲𑀫𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀸, 𑀢𑁂𑀲𑀁 𑀧𑀭𑀫𑀢𑁆𑀣𑀤𑁂𑀲𑀦𑀁 𑀤𑁂𑀲𑁂𑀢𑀺. 𑀢𑀢𑁆𑀣𑀸𑀬𑀁 𑀉𑀧𑀫𑀸, 𑀬𑀣𑀸 𑀳𑀺 𑀤𑁂𑀲𑀪𑀸𑀲𑀸𑀓𑀼𑀲𑀮𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀅𑀢𑁆𑀣𑀲𑀁𑀯𑀡𑁆𑀡𑀦𑀓𑁄 𑀆𑀘𑀭𑀺𑀬𑁄 𑀬𑁂 𑀤𑀫𑀺𑀴𑀪𑀸𑀲𑀸𑀬 𑀯𑀼𑀢𑁆𑀢𑁂 𑀅𑀢𑁆𑀣𑀁 𑀚𑀸𑀦𑀦𑁆𑀢𑀺, 𑀢𑁂𑀲𑀁 𑀤𑀫𑀺𑀴𑀪𑀸𑀲𑀸𑀬 𑀆𑀘𑀺𑀓𑁆𑀔𑀢𑀺. 𑀬𑁂 𑀅𑀦𑁆𑀥𑀓𑀪𑀸𑀲𑀸𑀤𑀻𑀲𑀼 𑀅𑀜𑁆𑀜𑀢𑀭𑀸𑀬, 𑀢𑁂𑀲𑀁 𑀢𑀸𑀬 𑀢𑀸𑀬 𑀪𑀸𑀲𑀸𑀬. 𑀏𑀯𑀁 𑀢𑁂 𑀫𑀸𑀡𑀯𑀓𑀸 𑀙𑁂𑀓𑀁 𑀩𑁆𑀬𑀢𑁆𑀢𑀁 𑀆𑀘𑀭𑀺𑀬𑀫𑀸𑀕𑀫𑁆𑀫 𑀔𑀺𑀧𑁆𑀧𑀫𑁂𑀯 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀢𑀢𑁆𑀣 𑀆𑀘𑀭𑀺𑀬𑁄 𑀯𑀺𑀬 𑀩𑀼𑀤𑁆𑀥𑁄 𑀪𑀕𑀯𑀸. 𑀢𑀬𑁄 𑀯𑁂𑀤𑀸 𑀯𑀺𑀬 𑀓𑀣𑁂𑀢𑀩𑁆𑀩𑀪𑀸𑀯𑁂𑀦 𑀞𑀺𑀢𑀸𑀦𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺. 𑀤𑁂𑀲𑀪𑀸𑀲𑀸𑀓𑁄𑀲𑀮𑁆𑀮𑀫𑀺𑀯 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀓𑁄𑀲𑀮𑁆𑀮𑀁. 𑀦𑀸𑀦𑀸𑀤𑁂𑀲𑀪𑀸𑀲𑀸 𑀫𑀸𑀡𑀯𑀓𑀸 𑀯𑀺𑀬 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑀺𑀚𑁆𑀛𑀦𑀲𑀫𑀢𑁆𑀣𑀸 𑀯𑁂𑀦𑁂𑀬𑁆𑀬𑀲𑀢𑁆𑀢𑀸. 𑀆𑀘𑀭𑀺𑀬𑀲𑁆𑀲 𑀤𑀫𑀺𑀴𑀪𑀸𑀲𑀸𑀤𑀺𑀆𑀘𑀺𑀓𑁆𑀔𑀦𑀁 𑀯𑀺𑀬 𑀪𑀕𑀯𑀢𑁄 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀯𑀲𑁂𑀦 𑀤𑁂𑀲𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀳 𑀘𑁂𑀢𑁆𑀣 𑁋

‘‘𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀺, 𑀲𑀫𑁆𑀩𑀼𑀤𑁆𑀥𑁄 𑀯𑀤𑀢𑀁 𑀯𑀭𑁄;

𑀲𑀫𑁆𑀫𑀼𑀢𑀺𑀁 𑀧𑀭𑀫𑀢𑁆𑀣𑀜𑁆𑀘, 𑀢𑀢𑀺𑀬𑀁 𑀦𑀽𑀧𑀮𑀩𑁆𑀪𑀢𑀺.

𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀸;

𑀧𑀭𑀫𑀢𑁆𑀣𑀯𑀘𑀦𑀁 𑀲𑀘𑁆𑀘𑀁, 𑀥𑀫𑁆𑀫𑀸𑀦𑀁 𑀪𑀽𑀢𑀓𑀸𑀭𑀡𑀸.

𑀢𑀲𑁆𑀫𑀸 𑀯𑁄𑀳𑀸𑀭𑀓𑀼𑀲𑀮𑀲𑁆𑀲, 𑀮𑁄𑀓𑀦𑀸𑀣𑀲𑁆𑀲 𑀲𑀢𑁆𑀣𑀼𑀦𑁄;

𑀲𑀫𑁆𑀫𑀼𑀢𑀺𑀁 𑀯𑁄𑀳𑀭𑀦𑁆𑀢𑀲𑁆𑀲, 𑀫𑀼𑀲𑀸𑀯𑀸𑀤𑁄 𑀦 𑀚𑀸𑀬𑀢𑀻’’𑀢𑀺.

𑀅𑀧𑀺𑀘 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺 𑁋 𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀁, 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀧𑀦𑀢𑁆𑀣𑀁, 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀤𑀻𑀧𑀦𑀢𑁆𑀣𑀁, 𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀁, 𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑀻𑀧𑀦𑀢𑁆𑀣𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀻𑀧𑀦𑀢𑁆𑀣𑀁, 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀤𑀻𑀧𑀦𑀢𑁆𑀣𑀁, 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀜𑁆𑀘𑀸𑀢𑀺. ‘‘𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀳𑀺𑀭𑀻𑀬𑀦𑁆𑀢𑀺 𑀑𑀢𑁆𑀢𑀧𑁆𑀧𑀦𑁆𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑁂 𑀫𑀳𑀸𑀚𑀦𑁄 𑀦 𑀚𑀸𑀦𑀸𑀢𑀺, 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺, 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺 ‘‘𑀓𑀺𑀫𑀺𑀤𑀁 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀳𑀺𑀭𑀻𑀬𑀦𑁆𑀢𑀺 𑀑𑀢𑁆𑀢𑀧𑁆𑀧𑀦𑁆𑀢𑀺 𑀦𑀸𑀫𑀸’’𑀢𑀺. ‘‘𑀇𑀢𑁆𑀣𑀻 𑀳𑀺𑀭𑀻𑀬𑀢𑀺 𑀑𑀢𑁆𑀢𑀧𑁆𑀧𑀢𑀺 𑀧𑀼𑀭𑀺𑀲𑁄 𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑁄 𑀫𑀸𑀭𑁄’’𑀢𑀺 𑀯𑀼𑀢𑁆𑀢𑁂 𑀧𑀦 𑀚𑀸𑀦𑀸𑀢𑀺, 𑀦 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺, 𑀦 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

‘‘𑀔𑀦𑁆𑀥𑀸 𑀓𑀫𑁆𑀫𑀲𑁆𑀲𑀓𑀸 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

‘‘𑀯𑁂𑀴𑀼𑀯𑀦𑀸𑀤𑀬𑁄 𑀫𑀳𑀸𑀯𑀺𑀳𑀸𑀭𑀸 𑀔𑀦𑁆𑀥𑁂𑀳𑀺 𑀓𑀸𑀭𑀸𑀧𑀺𑀢𑀸 𑀥𑀸𑀢𑀽𑀳𑀺 𑀆𑀬𑀢𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

‘‘𑀔𑀦𑁆𑀥𑀸 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺 𑀧𑀺𑀢𑀭𑀁 𑀅𑀭𑀳𑀦𑁆𑀢𑀁 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀲𑀗𑁆𑀖𑀪𑁂𑀤𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀔𑀦𑁆𑀥𑀸 𑀫𑁂𑀢𑁆𑀢𑀸𑀬𑀦𑁆𑀢𑀺 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

‘‘𑀔𑀦𑁆𑀥𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀫𑀦𑀼𑀲𑁆𑀲𑀭𑀦𑁆𑀢𑀺 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀔𑀦𑁆𑀥𑀸 𑀤𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀫𑀳𑀸𑀚𑀦𑁄 𑀦 𑀚𑀸𑀦𑀸𑀢𑀺, 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺, 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺 ‘‘𑀓𑀺𑀫𑀺𑀤𑀁 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀦𑀸𑀫𑀸’’𑀢𑀺. ‘‘𑀧𑀼𑀕𑁆𑀕𑀮𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀚𑀸𑀦𑀸𑀢𑀺, 𑀦 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺, 𑀦 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

𑀮𑁄𑀓𑀲𑀫𑁆𑀫𑀼𑀢𑀺𑀜𑁆𑀘 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀦𑀧𑁆𑀧𑀚𑀳𑀦𑁆𑀢𑀺, 𑀮𑁄𑀓𑀲𑀫𑀜𑁆𑀜𑀸𑀬 𑀮𑁄𑀓𑀦𑀺𑀭𑀼𑀢𑁆𑀢𑀺𑀬𑀁 𑀮𑁄𑀓𑀸𑀪𑀺𑀮𑀸𑀧𑁂 𑀞𑀺𑀢𑀸𑀬𑁂𑀯 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀫𑁆𑀧𑀺 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀆𑀬𑀲𑁆𑀫𑀸 𑀮𑁄𑀓𑀯𑁄𑀳𑀸𑀭𑀓𑀼𑀲𑀮𑀢𑀸𑀬 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀤𑁂𑀲𑀦𑀁 𑀅𑀯𑀺𑀮𑁄𑀫𑁂𑀦𑁆𑀢𑁄 𑀮𑁄𑀓𑀲𑀫𑁆𑀫𑀼𑀢𑀺𑀬𑀁 𑀞𑀢𑁆𑀯𑀸𑀯 𑀘𑀢𑁆𑀢𑀸𑀭𑁄𑀫𑁂, 𑀆𑀯𑀼𑀲𑁄, 𑀧𑀼𑀕𑁆𑀕𑀮𑀸𑀢𑀺 𑀆𑀳. 𑀢𑀲𑁆𑀫𑀸 𑀏𑀢𑁆𑀣 𑀧𑀭𑀫𑀢𑁆𑀣𑀯𑀲𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀲𑀫𑁆𑀫𑀼𑀢𑀺𑀯𑀲𑁂𑀦𑁂𑀯 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸𑀢𑀺 𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦 𑀅𑀢𑁆𑀣𑀺 𑀉𑀧𑀮𑀩𑁆𑀪𑀫𑀸𑀦𑀸. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀲𑀢𑁆𑀢𑀮𑁄𑀓𑁂. 𑀲𑀸𑀗𑁆𑀕𑀡𑁄𑀯 𑀲𑀫𑀸𑀦𑁄𑀢𑀺𑀆𑀤𑀻𑀲𑀼 𑀧𑀦 𑀅𑀗𑁆𑀕𑀡𑀦𑁆𑀢𑀺 𑀓𑀢𑁆𑀣𑀘𑀺 𑀓𑀺𑀮𑁂𑀲𑀸 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 ‘‘𑀢𑀢𑁆𑀣 𑀓𑀢𑀫𑀸𑀦𑀺 𑀢𑀻𑀡𑀺 𑀅𑀗𑁆𑀕𑀡𑀸𑀦𑀺? 𑀭𑀸𑀕𑁄 𑀅𑀗𑁆𑀕𑀡𑀁, 𑀤𑁄𑀲𑁄 𑀅𑀗𑁆𑀕𑀡𑀁, 𑀫𑁄𑀳𑁄 𑀅𑀗𑁆𑀕𑀡’’𑀦𑁆𑀢𑀺 (𑀯𑀺𑀪. 𑁯𑁨𑁪). 𑀓𑀢𑁆𑀣𑀘𑀺 𑀬𑀁𑀓𑀺𑀜𑁆𑀘𑀺 𑀫𑀮𑀁 𑀯𑀸 𑀧𑀗𑁆𑀓𑁄 𑀯𑀸, 𑀬𑀣𑀸𑀳 ‘‘𑀢𑀲𑁆𑀲𑁂𑀯 𑀭𑀚𑀲𑁆𑀲 𑀯𑀸 𑀅𑀗𑁆𑀕𑀡𑀲𑁆𑀲 𑀯𑀸 𑀧𑀳𑀸𑀦𑀸𑀬 𑀯𑀸𑀬𑀫𑀢𑀻’’𑀢𑀺. 𑀓𑀢𑁆𑀣𑀘𑀺 𑀢𑀣𑀸𑀭𑀽𑀧𑁄 𑀪𑀽𑀫𑀺𑀪𑀸𑀕𑁄, 𑀲𑁄 𑀩𑁄𑀥𑀺𑀬𑀗𑁆𑀕𑀡𑀁 𑀘𑁂𑀢𑀺𑀬𑀗𑁆𑀕𑀡𑀦𑁆𑀢𑀺𑀆𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀧𑀦 𑀦𑀸𑀦𑀧𑁆𑀧𑀓𑀸𑀭𑀸 𑀢𑀺𑀩𑁆𑀩𑀓𑀺𑀮𑁂𑀲𑀸 ‘‘𑀅𑀗𑁆𑀕𑀡’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀧𑀸𑀧𑀓𑀸𑀦𑀁 𑀔𑁄 𑀏𑀢𑀁, 𑀆𑀯𑀼𑀲𑁄, 𑀅𑀓𑀼𑀲𑀮𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀥𑀺𑀯𑀘𑀦𑀁, 𑀬𑀤𑀺𑀤𑀁 𑀅𑀗𑁆𑀕𑀡’’𑀦𑁆𑀢𑀺 (𑀫. 𑀦𑀺. 𑁧.𑁬𑁦). 𑀲𑀳 𑀅𑀗𑁆𑀕𑀡𑁂𑀦 𑀲𑀸𑀗𑁆𑀕𑀡𑁄.

𑀲𑀸𑀗𑁆𑀕𑀡𑁄𑀯 𑀲𑀫𑀸𑀦𑁄𑀢𑀺 𑀲𑀓𑀺𑀮𑁂𑀲𑁄𑀬𑁂𑀯 𑀲𑀦𑁆𑀢𑁄. 𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀫𑀬𑁆𑀳𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀓𑀺𑀮𑁂𑀲𑁄 𑀅𑀢𑁆𑀣𑀻𑀢𑀺𑀧𑀺 𑀦 𑀚𑀸𑀦𑀸𑀢𑀺. ‘‘𑀇𑀫𑁂 𑀓𑀺𑀮𑁂𑀲𑀸 𑀦𑀸𑀫 𑀓𑀓𑁆𑀔𑀴𑀸 𑀯𑀸𑀴𑀸 𑀚𑀳𑀺𑀢𑀩𑁆𑀩𑀸 𑀦 𑀕𑀳𑀺𑀢𑀩𑁆𑀩𑀸 𑀯𑀺𑀲𑀤𑀼𑀝𑁆𑀞𑀲𑀮𑁆𑀮𑀲𑀤𑀺𑀲𑀸’’𑀢𑀺 𑀏𑀯𑀁 𑀬𑀸𑀣𑀸𑀯𑀲𑀭𑀲𑀢𑁄𑀧𑀺 𑀦 𑀚𑀸𑀦𑀸𑀢𑀺. 𑀬𑁄 𑀅𑀢𑁆𑀣𑀻𑀢𑀺 𑀘 𑀚𑀸𑀦𑀸𑀢𑀺, 𑀏𑀯𑀜𑁆𑀘 𑀚𑀸𑀦𑀸𑀢𑀺. 𑀲𑁄 ‘‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀧𑀦 𑀦 𑀘 𑀫𑀕𑁆𑀕𑁂𑀦 𑀲𑀫𑀽𑀳𑀢𑀸 𑀓𑀺𑀮𑁂𑀲𑀸, 𑀦 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺 𑀬𑁂𑀦 𑀯𑀸 𑀢𑁂𑀦 𑀯𑀸 𑀯𑀸𑀭𑀺𑀢𑀢𑁆𑀢𑀸, 𑀅𑀬𑀫𑀺𑀥 𑀅𑀦𑀗𑁆𑀕𑀡𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 ‘‘𑀫𑀬𑁆𑀳𑀁 𑀓𑀺𑀮𑁂𑀲𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀯𑀸𑀭𑀺𑀢𑀢𑁆𑀢𑀸 𑀦𑀢𑁆𑀣𑀺, 𑀦 𑀫𑀕𑁆𑀕𑁂𑀦 𑀲𑀫𑀽𑀳𑀢𑀢𑁆𑀢𑀸’’𑀢𑀺 𑀦 𑀚𑀸𑀦𑀸𑀢𑀺, ‘‘𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑀸 𑀫𑀳𑀸𑀅𑀦𑀢𑁆𑀣𑀁 𑀓𑀭𑀺𑀲𑁆𑀲𑀦𑁆𑀢𑀺 𑀓𑀓𑁆𑀔𑀴𑀸 𑀯𑀸𑀴𑀸 𑀯𑀺𑀲𑀤𑀼𑀝𑁆𑀞𑀲𑀮𑁆𑀮𑀲𑀤𑀺𑀲𑀸’’𑀢𑀺 𑀏𑀯𑀁 𑀬𑀸𑀣𑀸𑀯𑀲𑀭𑀲𑀢𑁄𑀧𑀺 𑀦 𑀚𑀸𑀦𑀸𑀢𑀺. 𑀬𑁄 𑀧𑀦 ‘‘𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦𑀢𑁆𑀣𑀻’’𑀢𑀺 𑀘 𑀚𑀸𑀦𑀸𑀢𑀺, 𑀏𑀯𑀜𑁆𑀘 𑀚𑀸𑀦𑀸𑀢𑀺, 𑀲𑁄 ‘‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼, 𑀢𑁂𑀲𑀼 𑀯𑀸 𑀤𑁆𑀯𑀻𑀲𑀼 𑀲𑀸𑀗𑁆𑀕𑀡𑁂𑀲𑀼, 𑀬𑁆𑀯𑀸𑀬𑀦𑁆𑀢𑀺 𑀬𑁄 𑀅𑀬𑀁, 𑀬𑀸𑀬𑀦𑁆𑀢𑀺𑀧𑀺 𑀧𑀸𑀞𑁄.

𑁫𑁮. 𑀓𑁄 𑀦𑀼 𑀔𑁄, 𑀆𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄𑀢𑀺 𑀉𑀪𑀬𑁂𑀦𑀸𑀧𑀺 𑀓𑀸𑀭𑀡𑀫𑁂𑀯 𑀧𑀼𑀘𑁆𑀙𑀢𑀺. 𑀬𑁂𑀦𑀺𑀫𑁂𑀲𑀦𑁆𑀢𑀺 𑀬𑁂𑀦 𑀳𑁂𑀢𑀼𑀦𑀸 𑀬𑁂𑀦 𑀧𑀘𑁆𑀘𑀬𑁂𑀦 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀏𑀓𑁄 𑀲𑁂𑀝𑁆𑀞𑀧𑀼𑀭𑀺𑀲𑁄 𑀏𑀓𑁄 𑀳𑀻𑀦𑀧𑀼𑀭𑀺𑀲𑁄𑀢𑀺 𑀅𑀓𑁆𑀔𑀸𑀬𑀢𑀺, 𑀲𑁄 𑀓𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀦𑀧𑁆𑀧𑀚𑀸𑀦𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁, 𑀧𑀚𑀸𑀦𑀦𑀸 𑀦𑀧𑁆𑀧𑀚𑀸𑀦𑀦𑀸𑀢𑀺 𑀇𑀤𑀫𑁂𑀯 𑀉𑀪𑀬𑀁 𑀳𑁂𑀢𑀼 𑀘𑁂𑀯 𑀧𑀘𑁆𑀘𑀬𑁄 𑀘.

𑁫𑁯. 𑀣𑁂𑀭𑁄 𑀧𑀦 𑀅𑀢𑁆𑀢𑀦𑁄 𑀯𑀺𑀘𑀺𑀢𑁆𑀭𑀧𑀝𑀺𑀪𑀸𑀦𑀢𑀸𑀬 𑀢𑀁 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀢𑀢𑁆𑀭𑀸𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀦𑁆𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀢𑀁 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀁. 𑀇𑀤𑀫𑁂𑀯 𑀏𑀲 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀦 𑀅𑀜𑁆𑀜𑀦𑁆𑀢𑀺 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀯𑀲𑁆𑀲𑀁 𑀪𑀸𑀯𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀦 𑀙𑀦𑁆𑀤𑀁 𑀚𑀦𑁂𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀅𑀙𑀦𑁆𑀤𑀚𑀦𑀦𑀸𑀤𑀺𑀁 𑀲𑀦𑁆𑀥𑀸𑀬𑀸𑀳.

𑀢𑀢𑁆𑀣 𑀘 𑀦 𑀙𑀦𑁆𑀤𑀁 𑀚𑀦𑁂𑀲𑁆𑀲𑀢𑀻𑀢𑀺 𑀅𑀧𑁆𑀧𑀚𑀸𑀦𑀦𑁆𑀢𑁄 𑀢𑀲𑁆𑀲 𑀅𑀗𑁆𑀕𑀡𑀲𑁆𑀲 𑀧𑀳𑀸𑀦𑀢𑁆𑀣𑀁 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁 𑀦 𑀚𑀦𑁂𑀲𑁆𑀲𑀢𑀺. 𑀦 𑀯𑀸𑀬𑀫𑀺𑀲𑁆𑀲𑀢𑀻𑀢𑀺 𑀢𑀢𑁄 𑀩𑀮𑀯𑀢𑀭𑀁 𑀯𑀸𑀬𑀸𑀫𑀁 𑀦 𑀓𑀭𑀺𑀲𑁆𑀲𑀢𑀺, 𑀦 𑀯𑀻𑀭𑀺𑀬𑀁 𑀆𑀭𑀪𑀺𑀲𑁆𑀲𑀢𑀻𑀢𑀺 𑀣𑀸𑀫𑀕𑀢𑀯𑀻𑀭𑀺𑀬𑀁 𑀧𑀦 𑀦𑁂𑀯 𑀆𑀭𑀪𑀺𑀲𑁆𑀲𑀢𑀺, 𑀦 𑀧𑀯𑀢𑁆𑀢𑁂𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀗𑁆𑀕𑀡𑁄𑀢𑀺 𑀇𑀫𑁂𑀳𑀺 𑀭𑀸𑀕𑀸𑀤𑀻𑀳𑀺 𑀅𑀗𑁆𑀕𑀡𑁂𑀳𑀺 𑀲𑀸𑀗𑁆𑀕𑀡𑁄. 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄𑀢𑀺 𑀢𑁂𑀳𑀺𑀬𑁂𑀯 𑀲𑀼𑀝𑁆𑀞𑀼𑀢𑀭𑀁 𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀫𑀮𑀻𑀦𑀘𑀺𑀢𑁆𑀢𑁄 𑀯𑀺𑀩𑀸𑀥𑀺𑀢𑀘𑀺𑀢𑁆𑀢𑁄 𑀉𑀧𑀢𑀸𑀧𑀺𑀢𑀘𑀺𑀢𑁆𑀢𑁄 𑀘 𑀳𑀼𑀢𑁆𑀯𑀸. 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻𑀢𑀺 𑀫𑀭𑀺𑀲𑁆𑀲𑀢𑀺.

𑀲𑁂𑀬𑁆𑀬𑀣𑀸𑀧𑀻𑀢𑀺 𑀬𑀣𑀸 𑀦𑀸𑀫. 𑀓𑀁𑀲𑀧𑀸𑀢𑀻𑀢𑀺 𑀓𑀁𑀲𑀮𑁄𑀳𑀪𑀸𑀚𑀦𑀁. 𑀆𑀪𑀢𑀸𑀢𑀺 𑀆𑀦𑀻𑀢𑀸. 𑀆𑀧𑀡𑀸 𑀯𑀸 𑀓𑀫𑁆𑀫𑀸𑀭𑀓𑀼𑀮𑀸 𑀯𑀸𑀢𑀺 𑀆𑀧𑀡𑀢𑁄 𑀯𑀸 𑀓𑀁𑀲𑀧𑀸𑀢𑀺𑀓𑀸𑀭𑀓𑀸𑀦𑀁 𑀓𑀫𑁆𑀫𑀸𑀭𑀸𑀦𑀁 𑀖𑀭𑀢𑁄 𑀯𑀸. 𑀭𑀚𑁂𑀦𑀸𑀢𑀺 𑀆𑀕𑀦𑁆𑀢𑀼𑀓𑀭𑀚𑁂𑀦 𑀧𑀁𑀲𑀼𑀆𑀤𑀺𑀦𑀸. 𑀫𑀮𑁂𑀦𑀸𑀢𑀺 𑀢𑀢𑁆𑀣𑁂𑀯 𑀉𑀝𑁆𑀞𑀺𑀢𑁂𑀦 𑀮𑁄𑀳𑀫𑀮𑁂𑀦. 𑀧𑀭𑀺𑀬𑁄𑀦𑀤𑁆𑀥𑀸𑀢𑀺 𑀲𑀜𑁆𑀙𑀦𑁆𑀦𑀸. 𑀦 𑀘𑁂𑀯 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀼𑀦𑁆𑀢𑀺 𑀉𑀤𑀓𑀔𑀸𑀤𑀦𑀻𑀬𑀧𑀓𑁆𑀔𑀺𑀧𑀦𑀸𑀤𑀻𑀳𑀺 𑀧𑀭𑀺𑀪𑁄𑀕𑀁 𑀦 𑀓𑀭𑁂𑀬𑁆𑀬𑀼𑀁. 𑀦 𑀘 𑀧𑀭𑀺𑀬𑁄𑀤𑀧𑁂𑀬𑁆𑀬𑀼𑀦𑁆𑀢𑀺 𑀥𑁄𑀯𑀦𑀖𑀁𑀲𑀦𑀸𑀤𑀻𑀳𑀺 𑀦 𑀧𑀭𑀺𑀲𑀼𑀤𑁆𑀥𑀁 𑀓𑀸𑀭𑀸𑀧𑁂𑀬𑁆𑀬𑀼𑀁. 𑀭𑀚𑀸𑀧𑀣𑁂𑀢𑀺 𑀭𑀚𑀧𑀣𑁂. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀭𑀚𑀲𑁆𑀲 𑀆𑀕𑀫𑀦𑀝𑁆𑀞𑀸𑀦𑁂 𑀯𑀸 𑀯𑀼𑀝𑁆𑀞𑀸𑀦𑀼𑀝𑁆𑀞𑀸𑀦𑁂 𑀯𑀸 𑀳𑁂𑀝𑁆𑀞𑀸𑀫𑀜𑁆𑀘𑁂 𑀯𑀸 𑀣𑀼𑀲𑀓𑁄𑀝𑁆𑀞𑀓𑁂 𑀯𑀸 𑀪𑀸𑀚𑀦𑀦𑁆𑀢𑀭𑁂 𑀯𑀸, 𑀬𑀢𑁆𑀣 𑀭𑀚𑁂𑀦 𑀑𑀓𑀺𑀭𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀲𑀁𑀓𑀺𑀮𑀺𑀝𑁆𑀞𑀢𑀭𑀸 𑀅𑀲𑁆𑀲 𑀫𑀮𑀕𑁆𑀕𑀳𑀺𑀢𑀸𑀢𑀺 𑀏𑀢𑁆𑀣 𑀭𑀚𑀸𑀧𑀣𑁂 𑀦𑀺𑀓𑁆𑀔𑀺𑀧𑀦𑁂𑀦 𑀲𑀁𑀓𑀺𑀮𑀺𑀝𑁆𑀞𑀢𑀭𑀸, 𑀅𑀧𑀭𑀺𑀪𑁄𑀕𑀸𑀧𑀭𑀺𑀬𑁄𑀤𑀧𑀦𑁂𑀳𑀺 𑀫𑀮𑀕𑁆𑀕𑀳𑀺𑀢𑀢𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸𑀯𑀘𑀦𑀜𑁆𑀘𑁂𑀢𑀁. 𑀢𑁂𑀦𑀲𑁆𑀲 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀆𑀯𑀼𑀲𑁄, 𑀲𑀸 𑀓𑀁𑀲𑀧𑀸𑀢𑀺 𑀏𑀯𑀁 𑀓𑀭𑀻𑀬𑀫𑀸𑀦𑀸 𑀅𑀧𑀭𑁂𑀦 𑀓𑀸𑀮𑁂𑀦 𑀲𑀁𑀓𑀺𑀮𑀺𑀝𑁆𑀞𑀢𑀭𑀸 𑀘 𑀫𑀮𑀕𑁆𑀕𑀳𑀺𑀢𑀢𑀭𑀸 𑀘 𑀫𑀢𑁆𑀢𑀺𑀓𑀧𑀸𑀢𑀻𑀢𑀺 𑀯𑀸 𑀓𑀁𑀲𑀧𑀸𑀢𑀻𑀢𑀺 𑀯𑀸 𑀇𑀢𑀺𑀧𑀺 𑀤𑀼𑀚𑁆𑀚𑀸𑀦𑀸 𑀪𑀯𑁂𑀬𑁆𑀬 𑀦𑀼 𑀔𑁄 𑀦𑁄𑀢𑀺, 𑀣𑁂𑀭𑁄 𑀢𑀁 𑀧𑀝𑀺𑀚𑀸𑀦𑀦𑁆𑀢𑁄 𑀆𑀳 ‘‘𑀏𑀯𑀫𑀸𑀯𑀼𑀲𑁄’’𑀢𑀺. 𑀧𑀼𑀦 𑀥𑀫𑁆𑀫𑀲𑁂𑀦𑀸𑀧𑀢𑀺 𑀑𑀧𑀫𑁆𑀫𑀁 𑀲𑀫𑁆𑀧𑀝𑀺𑀧𑀸𑀤𑁂𑀦𑁆𑀢𑁄, 𑀏𑀯𑀫𑁂𑀯 𑀔𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑁂𑀯𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀓𑀺𑀮𑀺𑀝𑁆𑀞𑀓𑀁𑀲𑀧𑀸𑀢𑀺𑀲𑀤𑀺𑀲𑁄 𑀲𑀸𑀗𑁆𑀕𑀡𑁄 𑀧𑀼𑀕𑁆𑀕𑀮𑁄. 𑀲𑀁𑀓𑀺𑀮𑀺𑀝𑁆𑀞𑀓𑀁𑀲𑀧𑀸𑀢𑀺𑀬𑀸 𑀦𑀧𑀭𑀺𑀪𑀼𑀜𑁆𑀚𑀦𑀫𑀸𑀤𑀺𑀁 𑀓𑀢𑁆𑀯𑀸 𑀭𑀚𑀸𑀧𑀣𑀦𑀺𑀓𑁆𑀔𑁂𑀧𑁄 𑀯𑀺𑀬 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀩𑁆𑀩𑀚𑁆𑀚𑀁 𑀮𑀪𑀫𑀸𑀦𑀲𑁆𑀲 𑀯𑁂𑀚𑁆𑀚𑀓𑀫𑁆𑀫𑀸𑀤𑀻𑀲𑀼 𑀧𑀲𑀼𑀢𑀧𑀼𑀕𑁆𑀕𑀮𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀸𑀧𑀝𑀺𑀮𑀸𑀪𑁄. 𑀲𑀁𑀓𑀺𑀮𑀺𑀝𑁆𑀞𑀓𑀁𑀲𑀧𑀸𑀢𑀺𑀬𑀸 𑀧𑀼𑀦 𑀲𑀁𑀓𑀺𑀮𑀺𑀝𑁆𑀞𑀢𑀭𑀪𑀸𑀯𑁄 𑀯𑀺𑀬 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀅𑀦𑀼𑀲𑀺𑀓𑁆𑀔𑀢𑁄 𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀓𑀭𑀡𑀁, 𑀏𑀢𑁆𑀣 𑀞𑀺𑀢𑀲𑁆𑀲 𑀲𑀸𑀗𑁆𑀕𑀡𑀓𑀸𑀮𑀓𑀺𑀭𑀺𑀬𑀸. 𑀅𑀣 𑀯𑀸 𑀅𑀦𑀼𑀓𑁆𑀓𑀫𑁂𑀦 𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀯𑀻𑀢𑀺𑀓𑁆𑀓𑀫𑀦𑀁, 𑀏𑀢𑁆𑀣 𑀞𑀺𑀢𑀲𑁆𑀲 𑀲𑀸𑀗𑁆𑀕𑀡𑀓𑀸𑀮𑀓𑀺𑀭𑀺𑀬𑀸. 𑀅𑀣 𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀸𑀘𑀺𑀢𑁆𑀢𑀺𑀬𑀣𑀼𑀮𑁆𑀮𑀘𑁆𑀘𑀬𑀯𑀻𑀢𑀺𑀓𑁆𑀓𑀫𑀦𑀁, 𑀲𑀗𑁆𑀖𑀸𑀤𑀺𑀲𑁂𑀲𑀯𑀻𑀢𑀺𑀓𑁆𑀓𑀫𑀦𑀁, 𑀧𑀸𑀭𑀸𑀚𑀺𑀓𑀯𑀻𑀢𑀺𑀓𑁆𑀓𑀫𑀦𑀁, 𑀫𑀸𑀢𑀼𑀖𑀸𑀢𑀸𑀤𑀺𑀆𑀦𑀦𑁆𑀢𑀭𑀺𑀬𑀓𑀭𑀡𑀁, 𑀏𑀢𑁆𑀣 𑀞𑀺𑀢𑀲𑁆𑀲 𑀲𑀸𑀗𑁆𑀕𑀡𑀓𑀸𑀮𑀓𑀺𑀭𑀺𑀬𑀸𑀢𑀺.

𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻𑀢𑀺 𑀏𑀢𑁆𑀣 𑀘 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻𑀢𑀺 𑀦 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀩𑁆𑀩𑀲𑀢𑁆𑀢𑀸 𑀳𑀺 𑀧𑀓𑀢𑀺𑀘𑀺𑀢𑁆𑀢𑁂𑀦 𑀪𑀯𑀗𑁆𑀕𑀘𑀺𑀢𑁆𑀢𑁂𑀦𑁂𑀯 𑀓𑀸𑀮𑀁 𑀓𑀭𑁄𑀦𑁆𑀢𑀺. 𑀅𑀬𑀁 𑀧𑀦 𑀅𑀯𑀺𑀲𑁄𑀥𑁂𑀢𑁆𑀯𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻𑀢𑀺 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀢𑀺𑀬𑀯𑀸𑀭𑁂 𑀧𑀭𑀺𑀬𑁄𑀤𑀧𑁂𑀬𑁆𑀬𑀼𑀦𑁆𑀢𑀺 𑀥𑁄𑀯𑀦𑀖𑀁𑀲𑀦𑀲𑀡𑁆𑀳𑀙𑀸𑀭𑀺𑀓𑀸𑀧𑀭𑀺𑀫𑀚𑁆𑀚𑀦𑀸𑀤𑀻𑀳𑀺 𑀧𑀭𑀺𑀲𑀼𑀤𑁆𑀥𑀁 𑀆𑀤𑀸𑀲𑀫𑀡𑁆𑀟𑀮𑀲𑀤𑀺𑀲𑀁 𑀓𑀭𑁂𑀬𑁆𑀬𑀼𑀁. 𑀦 𑀘 𑀦𑀁 𑀭𑀚𑀸𑀧𑀣𑁂𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀞𑀸𑀦𑁂 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀭𑀡𑁆𑀟𑀫𑀜𑁆𑀚𑀽𑀲𑀸𑀤𑀻𑀲𑀼 𑀯𑀸 𑀞𑀧𑁂𑀬𑁆𑀬𑀼𑀁, 𑀧𑀮𑀺𑀯𑁂𑀞𑁂𑀢𑁆𑀯𑀸 𑀯𑀸 𑀦𑀸𑀕𑀤𑀦𑁆𑀢𑁂 𑀮𑀕𑁂𑀬𑁆𑀬𑀼𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀕𑀳𑁂𑀢𑀩𑁆𑀩𑀁.

𑀉𑀧𑀫𑀸𑀲𑀁𑀲𑀦𑁆𑀤𑀦𑀸 𑀘𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀓𑀺𑀮𑀺𑀝𑁆𑀞𑀓𑀁𑀲𑀧𑀸𑀢𑀺𑀲𑀤𑀺𑀲𑁄 𑀲𑀸𑀗𑁆𑀕𑀡𑁄 𑀪𑀩𑁆𑀩𑀧𑀼𑀕𑁆𑀕𑀮𑁄. 𑀓𑀺𑀮𑀺𑀝𑁆𑀞𑀓𑀁𑀲𑀧𑀸𑀢𑀺𑀬𑀸 𑀧𑀭𑀺𑀪𑀼𑀜𑁆𑀚𑀦𑀫𑀸𑀤𑀺𑀁 𑀓𑀢𑁆𑀯𑀸 𑀲𑀼𑀤𑁆𑀥𑀝𑁆𑀞𑀸𑀦𑁂 𑀞𑀧𑀦𑀁 𑀯𑀺𑀬 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀩𑁆𑀩𑀚𑁆𑀚𑀁 𑀮𑀪𑀫𑀸𑀦𑀲𑁆𑀲 𑀧𑁂𑀲𑀮𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀸𑀧𑀝𑀺𑀮𑀸𑀪𑁄. 𑀬𑁂 𑀑𑀯𑀤𑀦𑁆𑀢𑀺 𑀅𑀦𑀼𑀲𑀸𑀲𑀦𑁆𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀫𑀸𑀤𑀁 𑀤𑀺𑀲𑁆𑀯𑀸 𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀲𑀁𑀓𑀺𑀮𑀺𑀝𑁆𑀞𑀓𑀁𑀲𑀧𑀸𑀢𑀺𑀬𑀸 𑀅𑀧𑀭𑀓𑀸𑀮𑁂 𑀧𑀭𑀺𑀲𑀼𑀤𑁆𑀥𑀧𑀭𑀺𑀬𑁄𑀤𑀸𑀢𑀪𑀸𑀯𑁄 𑀯𑀺𑀬 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀅𑀦𑀼𑀲𑀺𑀓𑁆𑀔𑀢𑁄 𑀅𑀦𑀼𑀓𑁆𑀓𑀫𑁂𑀦 𑀲𑀫𑁆𑀫𑀸𑀯𑀢𑁆𑀢𑀧𑀝𑀺𑀧𑀢𑁆𑀢𑀺, 𑀏𑀢𑁆𑀣 𑀞𑀺𑀢𑀲𑁆𑀲 𑀅𑀦𑀗𑁆𑀕𑀡𑀓𑀸𑀮𑀓𑀺𑀭𑀺𑀬𑀸. 𑀅𑀣 𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀲𑀼𑀤𑁆𑀥𑁂 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀅𑀢𑁆𑀢𑀦𑁄 𑀅𑀦𑀼𑀓𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀯𑀸𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀦𑁆𑀢𑀲𑁂𑀦𑀸𑀲𑀦𑀯𑀸𑀲𑁄, 𑀏𑀢𑁆𑀣 𑀞𑀺𑀢𑀲𑁆𑀲 𑀅𑀦𑀗𑁆𑀕𑀡𑀓𑀸𑀮𑀓𑀺𑀭𑀺𑀬𑀸. 𑀅𑀣 𑀯𑀸 𑀅𑀦𑀼𑀓𑁆𑀓𑀫𑁂𑀦 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑁂𑀦 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀁, 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀸 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀸𑀬 𑀓𑀺𑀮𑁂𑀲𑀸𑀦𑀁 𑀢𑀤𑀗𑁆𑀕𑀦𑀺𑀯𑀸𑀭𑀡𑀁, 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀥𑀺𑀕𑀫𑁄…𑀧𑁂… 𑀅𑀭𑀳𑀢𑁆𑀢𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀏𑀢𑁆𑀣 𑀞𑀺𑀢𑀲𑁆𑀲 𑀅𑀘𑁆𑀘𑀦𑁆𑀢𑀁 𑀅𑀦𑀗𑁆𑀕𑀡𑀓𑀸𑀮𑀓𑀺𑀭𑀺𑀬𑀸 𑀏𑀯.

𑀢𑀢𑀺𑀬𑀯𑀸𑀭𑁂 𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀭𑀸𑀕𑀝𑁆𑀞𑀸𑀦𑀺𑀬𑀁 𑀇𑀝𑁆𑀞𑀸𑀭𑀫𑁆𑀫𑀡𑀁. 𑀫𑀦𑀲𑀺 𑀓𑀭𑀺𑀲𑁆𑀲𑀢𑀻𑀢𑀺 𑀢𑀲𑁆𑀫𑀺𑀁 𑀯𑀺𑀧𑀦𑁆𑀦𑀲𑁆𑀲𑀢𑀺 𑀢𑀁 𑀦𑀺𑀫𑀺𑀢𑁆𑀢𑀁 𑀆𑀯𑀚𑁆𑀚𑀺𑀲𑁆𑀲𑀢𑀺. 𑀢𑀲𑁆𑀲 𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀫𑀦𑀲𑀺𑀓𑀸𑀭𑀸𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀼𑀪𑀦𑀺𑀫𑀺𑀢𑁆𑀢𑀫𑀦𑀲𑀺𑀓𑀸𑀭𑀓𑀸𑀭𑀡𑀸. 𑀅𑀦𑀼𑀤𑁆𑀥𑀁𑀲𑁂𑀲𑁆𑀲𑀢𑀻𑀢𑀺 𑀳𑀺𑀁𑀲𑀺𑀲𑁆𑀲𑀢𑀺 𑀅𑀥𑀺𑀪𑀯𑀺𑀲𑁆𑀲𑀢𑀺. 𑀭𑀸𑀕𑁄 𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑁄 𑀓𑀼𑀲𑀮𑀯𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀬𑀫𑁂𑀯 𑀅𑀓𑀼𑀲𑀮𑀚𑀯𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑁄 𑀓𑀼𑀲𑀮𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀕𑀳𑁂𑀢𑀩𑁆𑀩𑀁.

𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀸 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀧𑀭𑀺𑀲𑀼𑀤𑁆𑀥𑀓𑀁𑀲𑀧𑀸𑀢𑀺𑀲𑀤𑀺𑀲𑁄 𑀧𑀓𑀢𑀺𑀬𑀸 𑀅𑀧𑁆𑀧𑀓𑀺𑀮𑁂𑀲𑁄 𑀅𑀦𑀗𑁆𑀕𑀡𑀧𑀼𑀕𑁆𑀕𑀮𑁄. 𑀧𑀭𑀺𑀲𑀼𑀤𑁆𑀥𑀓𑀁𑀲𑀧𑀸𑀢𑀺𑀬𑀸 𑀦𑀧𑀭𑀺𑀪𑀼𑀜𑁆𑀚𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀭𑀚𑀸𑀧𑀣𑁂 𑀦𑀺𑀓𑁆𑀔𑁂𑀧𑁄 𑀯𑀺𑀬 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀩𑁆𑀩𑀚𑁆𑀚𑀁 𑀮𑀪𑀫𑀸𑀦𑀲𑁆𑀲𑀸𑀢𑀺 𑀇𑀢𑁄 𑀧𑀭𑀁 𑀲𑀩𑁆𑀩𑀁 𑀧𑀞𑀫𑀯𑀸𑀭𑀲𑀤𑀺𑀲𑀫𑁂𑀯.

𑀘𑀢𑀼𑀢𑁆𑀣𑀯𑀸𑀭𑁂 𑀲𑀼𑀪𑀦𑀺𑀫𑀺𑀢𑁆𑀢𑀁 𑀦 𑀫𑀦𑀲𑀺 𑀓𑀭𑀺𑀲𑁆𑀲𑀢𑀻𑀢𑀺 𑀢𑀲𑁆𑀫𑀺𑀁 𑀲𑀢𑀺𑀯𑀺𑀭𑀳𑀸𑀪𑀸𑀯𑀢𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀦𑀸𑀯𑀚𑁆𑀚𑀺𑀲𑁆𑀲𑀢𑀺, 𑀲𑁂𑀲𑀁 𑀤𑀼𑀢𑀺𑀬𑀯𑀸𑀭𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀬𑀁 𑀔𑁄, 𑀆𑀯𑀼𑀲𑁄’’𑀢𑀺𑀆𑀤𑀺 ‘‘𑀓𑁄 𑀦𑀼 𑀔𑁄, 𑀆𑀯𑀼𑀲𑁄’’𑀢𑀺𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀦𑀬𑀫𑁂𑀯.

𑁬𑁦. 𑀇𑀤𑀸𑀦𑀺 𑀢𑀁 𑀅𑀗𑁆𑀕𑀡𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀸𑀓𑀝𑀁 𑀓𑀸𑀭𑀸𑀧𑁂𑀢𑀼𑀓𑀸𑀫𑁂𑀦𑀸𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 ‘‘𑀅𑀗𑁆𑀕𑀡𑀁 𑀅𑀗𑁆𑀕𑀡’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀝𑁆𑀞𑁄 𑀢𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀧𑀸𑀧𑀓𑀸𑀦𑀁 𑀔𑁄 𑀏𑀢𑀁, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀘𑁆𑀙𑀸𑀯𑀘𑀭𑀸𑀦𑀦𑁆𑀢𑀺 𑀇𑀘𑁆𑀙𑀸𑀬 𑀅𑀯𑀘𑀭𑀸𑀦𑀁, 𑀇𑀘𑁆𑀙𑀸𑀯𑀲𑁂𑀦 𑀑𑀢𑀺𑀡𑁆𑀡𑀸𑀦𑀁 𑀧𑀯𑀢𑁆𑀢𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑁄𑀧𑀅𑀧𑁆𑀧𑀘𑁆𑀘𑀬𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀇𑀥𑁂𑀓𑀘𑁆𑀘𑀲𑁆𑀲𑀸𑀢𑀺 𑀬𑁂𑀦 𑀇𑀥𑁂𑀓𑀘𑁆𑀘𑀲𑁆𑀲 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀁 𑀞𑀸𑀦𑀁 𑀢𑀁 𑀓𑀸𑀭𑀡𑀁 𑀯𑀺𑀚𑁆𑀚𑀢𑀺 𑀅𑀢𑁆𑀣𑀺, 𑀉𑀧𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀧𑀦𑁆𑀦𑁄 𑀅𑀲𑁆𑀲𑀦𑁆𑀢𑀺 𑀆𑀧𑀦𑁆𑀦𑁄 𑀪𑀯𑁂𑀬𑁆𑀬𑀁. 𑀦 𑀘 𑀫𑀁 𑀪𑀺𑀓𑁆𑀔𑀽 𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀪𑀺𑀓𑁆𑀔𑀽 𑀘 𑀫𑀁 𑀦 𑀚𑀸𑀦𑁂𑀬𑁆𑀬𑀼𑀁. 𑀓𑀺𑀁 𑀧𑀦𑁂𑀢𑁆𑀣 𑀞𑀸𑀦𑀁, 𑀮𑀸𑀪𑀢𑁆𑀣𑀺𑀓𑀢𑀸. 𑀮𑀸𑀪𑀢𑁆𑀣𑀺𑀓𑁄 𑀳𑀺 𑀪𑀺𑀓𑁆𑀔𑀼 𑀧𑀓𑀢𑀺𑀬𑀸𑀧𑀺 𑀘 𑀓𑀢𑀧𑀼𑀜𑁆𑀜𑁄 𑀫𑀦𑀼𑀲𑁆𑀲𑁂𑀳𑀺 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀏𑀯𑀁 𑀘𑀺𑀦𑁆𑀢𑁂𑀢𑀺 ‘‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀁 𑀪𑀺𑀓𑁆𑀔𑀼𑀁 𑀣𑁂𑀭𑀸 𑀜𑀢𑁆𑀯𑀸 𑀫𑀚𑁆𑀛𑀺𑀫𑀸𑀦𑀁 𑀆𑀭𑁄𑀘𑁂𑀦𑁆𑀢𑀺, 𑀢𑁂 𑀦𑀯𑀓𑀸𑀦𑀁, 𑀦𑀯𑀓𑀸 𑀯𑀺𑀳𑀸𑀭𑁂 𑀯𑀺𑀖𑀸𑀲𑀸𑀤𑀸𑀤𑀻𑀦𑀁, 𑀢𑁂 𑀑𑀯𑀸𑀤𑀁 𑀆𑀕𑀢𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁, 𑀏𑀯𑀁 𑀓𑀫𑁂𑀦 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀚𑀸𑀦𑀦𑁆𑀢𑀺. 𑀏𑀯𑀫𑀲𑁆𑀲 𑀮𑀸𑀪𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀅𑀳𑁄 𑀯𑀢𑀸𑀳𑀁 𑀆𑀧𑀢𑁆𑀢𑀺𑀜𑁆𑀘 𑀯𑀢 𑀆𑀧𑀦𑁆𑀦𑁄 𑀅𑀲𑁆𑀲𑀁, 𑀦 𑀘 𑀫𑀁 𑀪𑀺𑀓𑁆𑀔𑀽 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺.

𑀬𑀁 𑀢𑀁 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀽 𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀢𑀁 𑀪𑀺𑀓𑁆𑀔𑀼𑀁 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀚𑀸𑀦𑁂𑀬𑁆𑀬𑀼𑀁, 𑀢𑀁 𑀓𑀸𑀭𑀡𑀁 𑀯𑀺𑀚𑁆𑀚𑀢𑀺 𑀔𑁄 𑀧𑀦 𑀅𑀢𑁆𑀣𑀺𑀬𑁂𑀯, 𑀦𑁄 𑀦𑀢𑁆𑀣𑀺. 𑀣𑁂𑀭𑀸 𑀳𑀺 𑀜𑀢𑁆𑀯𑀸 𑀫𑀚𑁆𑀛𑀺𑀫𑀸𑀦𑀁 𑀆𑀭𑁄𑀘𑁂𑀦𑁆𑀢𑀺. 𑀏𑀯𑀁 𑀲𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀘𑀢𑀽𑀲𑀼 𑀧𑀭𑀺𑀲𑀸𑀲𑀼 𑀧𑀸𑀓𑀝𑁄 𑀳𑁄𑀢𑀺. 𑀏𑀯𑀁 𑀧𑀸𑀓𑀝𑁄 𑀘 𑀅𑀬𑀲𑀸𑀪𑀺𑀪𑀽𑀢𑁄 𑀕𑀸𑀫𑀲𑀢𑀫𑁆𑀧𑀺 𑀧𑀯𑀺𑀲𑀺𑀢𑁆𑀯𑀸 𑀉𑀫𑁆𑀫𑀸𑀭𑀲𑀢𑁂𑀲𑀼 𑀞𑀸𑀦𑁂𑀲𑀼 𑀉𑀜𑁆𑀙𑀺𑀢𑁆𑀯𑀸 𑀬𑀣𑀸𑀥𑁄𑀢𑁂𑀦 𑀧𑀢𑁆𑀢𑁂𑀦 𑀦𑀺𑀓𑁆𑀔𑀫𑀢𑀺. 𑀢𑀢𑁄 𑀚𑀸𑀦𑀦𑁆𑀢𑀺 𑀫𑀁 𑀪𑀺𑀓𑁆𑀔𑀽 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀢𑀺 𑀢𑁂𑀳𑀺 𑀘𑀫𑁆𑀳𑀺 𑀏𑀯𑀁 𑀦𑀸𑀲𑀺𑀢𑁄𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀇𑀢𑀺 𑀲𑁄 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀧𑁆𑀧𑀢𑀻𑀢𑁄 𑀲𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀓𑀼𑀧𑀺𑀢𑁄 𑀘𑁂𑀯 𑀳𑁄𑀢𑀺 𑀓𑁄𑀥𑀸𑀪𑀺𑀪𑀽𑀢𑁄 𑀅𑀧𑁆𑀧𑀢𑀻𑀢𑁄 𑀘 𑀤𑁄𑀫𑀦𑀲𑁆𑀲𑀸𑀪𑀺𑀪𑀽𑀢𑁄.

𑀬𑁄 𑀘𑁂𑀯 𑀔𑁄, 𑀆𑀯𑀼𑀲𑁄, 𑀓𑁄𑀧𑁄 𑀬𑁄 𑀘 𑀅𑀧𑁆𑀧𑀘𑁆𑀘𑀬𑁄 𑀉𑀪𑀬𑀫𑁂𑀢𑀁 𑀅𑀗𑁆𑀕𑀡𑀦𑁆𑀢𑀺, 𑀆𑀯𑀼𑀲𑁄, 𑀬𑁄 𑀘𑀸𑀬𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑁄 𑀓𑁄𑀧𑁄, 𑀬𑁄 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑁄 𑀅𑀧𑁆𑀧𑀘𑁆𑀘𑀬𑁄, 𑀏𑀢𑀁 𑀉𑀪𑀬𑀁 𑀅𑀗𑁆𑀕𑀡𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀤𑀜𑁆𑀘 𑀢𑀸𑀤𑀺𑀲𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀮𑁄𑀪𑁄 𑀧𑀦 𑀇𑀫𑀲𑁆𑀲 𑀅𑀗𑁆𑀕𑀡𑀲𑁆𑀲 𑀧𑀼𑀩𑁆𑀩𑀪𑀸𑀕𑀯𑀲𑁂𑀦, 𑀫𑁄𑀳𑁄 𑀲𑀫𑁆𑀧𑀬𑁄𑀕𑀯𑀲𑁂𑀦𑀸𑀧𑀺 𑀕𑀳𑀺𑀢𑁄𑀬𑁂𑀯 𑀳𑁄𑀢𑀺.

𑀅𑀦𑀼𑀭𑀳𑁄 𑀫𑀦𑁆𑀢𑀺 𑀧𑀼𑀭𑀺𑀫𑀲𑀤𑀺𑀲𑀫𑁂𑀯 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀲𑁂𑀦𑀸𑀲𑀦𑀁 𑀧𑀯𑁂𑀲𑁂𑀢𑁆𑀯𑀸 𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸 𑀘𑁄𑀤𑁂𑀦𑁆𑀢𑁂 𑀇𑀘𑁆𑀙𑀢𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀦𑁆𑀢𑀺 𑀏𑀢𑀁 𑀓𑀸𑀭𑀡𑀁 𑀯𑀺𑀚𑁆𑀚𑀢𑀺, 𑀬𑀁 𑀢𑀁 𑀪𑀺𑀓𑁆𑀔𑀼𑀁 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀆𑀦𑁂𑀢𑁆𑀯𑀸 𑀩𑁆𑀬𑀢𑁆𑀢𑀸 𑀯𑀺𑀦𑀻𑀢𑀸 ‘‘𑀢𑀬𑀸 𑀅𑀲𑀼𑀓𑀫𑁆𑀳𑀺 𑀦𑀸𑀫 𑀞𑀸𑀦𑁂 𑀯𑁂𑀚𑁆𑀚𑀓𑀫𑁆𑀫𑀁 𑀓𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑁄𑀤𑁂𑀬𑁆𑀬𑀼𑀁. 𑀲𑁄 𑀘𑀢𑀽𑀲𑀼 𑀧𑀭𑀺𑀲𑀸𑀲𑀼 𑀧𑀸𑀓𑀝𑁄 𑀳𑁄𑀢𑀺. 𑀏𑀯𑀁 𑀧𑀸𑀓𑀝𑁄 𑀘 𑀅𑀬𑀲𑀸𑀪𑀺𑀪𑀽𑀢𑁄𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀲𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀲𑀫𑀸𑀦𑁄 𑀧𑀼𑀕𑁆𑀕𑀮𑁄. 𑀲𑀫𑀸𑀦𑁄𑀢𑀺 𑀲𑀸𑀧𑀢𑁆𑀢𑀺𑀓𑁄. 𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀘𑁄𑀤𑀓𑁄. 𑀅𑀬𑀁 𑀲𑀸𑀧𑀢𑁆𑀢𑀺𑀓𑁂𑀦𑁂𑀯 𑀘𑁄𑀤𑀦𑀁 𑀇𑀘𑁆𑀙𑀢𑀺, 𑀢𑁆𑀯𑀫𑁆𑀧𑀺 𑀇𑀫𑀜𑁆𑀘𑀺𑀫𑀜𑁆𑀘 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑀁 𑀢𑀸𑀯 𑀧𑀝𑀺𑀓𑀭𑁄𑀳𑀺 𑀧𑀘𑁆𑀙𑀸 𑀫𑀁 𑀘𑁄𑀤𑁂𑀲𑁆𑀲𑀲𑀻𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸𑀢𑀺 𑀫𑀜𑁆𑀜𑀫𑀸𑀦𑁄. 𑀅𑀧𑀺𑀘 𑀚𑀸𑀢𑀺𑀆𑀤𑀻𑀳𑀺𑀧𑀺 𑀲𑀫𑀸𑀦𑁄 𑀧𑀼𑀕𑁆𑀕𑀮𑁄 𑀲𑀧𑁆𑀧𑀝𑀺𑀧𑀼𑀕𑁆𑀕𑀮𑁄. 𑀅𑀬𑀜𑁆𑀳𑀺 𑀅𑀢𑁆𑀢𑀦𑁄 𑀚𑀸𑀢𑀺𑀬𑀸 𑀓𑀼𑀮𑁂𑀦 𑀩𑀸𑀳𑀼𑀲𑀘𑁆𑀘𑁂𑀦 𑀩𑁆𑀬𑀢𑁆𑀢𑀢𑀸𑀬 𑀥𑀼𑀢𑀗𑁆𑀕𑁂𑀦𑀸𑀢𑀺 𑀏𑀯𑀫𑀸𑀤𑀻𑀳𑀺𑀧𑀺 𑀲𑀫𑀸𑀦𑁂𑀦𑁂𑀯 𑀘𑁄𑀤𑀦𑀁 𑀇𑀘𑁆𑀙𑀢𑀺, 𑀢𑀸𑀤𑀺𑀲𑁂𑀦 𑀯𑀼𑀢𑁆𑀢𑀁 𑀦𑀸𑀢𑀺𑀤𑀼𑀓𑁆𑀔𑀁 𑀳𑁄𑀢𑀻𑀢𑀺 𑀫𑀜𑁆𑀜𑀫𑀸𑀦𑁄. 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀏𑀢𑁆𑀣 𑀅𑀬𑀼𑀢𑁆𑀢𑁄 𑀧𑀝𑀺𑀧𑀼𑀕𑁆𑀕𑀮𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄. 𑀇𑀫𑁂𑀳𑀺 𑀆𑀧𑀢𑁆𑀢𑀸𑀤𑀻𑀳𑀺 𑀅𑀲𑀤𑀺𑀲𑀢𑁆𑀢𑀸 𑀧𑀝𑀺𑀲𑀢𑁆𑀢𑀼 𑀧𑀝𑀺𑀲𑀮𑁆𑀮𑁄 𑀘𑁄𑀤𑀓𑁄 𑀪𑀯𑀺𑀢𑀼𑀁 𑀅𑀬𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀺 𑀲𑁄 𑀓𑀼𑀧𑀺𑀢𑁄𑀢𑀺 𑀇𑀢𑀺 𑀲𑁄 𑀇𑀫𑀸𑀬 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀘𑁄𑀤𑀦𑀸𑀬 𑀏𑀯𑀁 𑀓𑀼𑀧𑀺𑀢𑁄 𑀳𑁄𑀢𑀺.

𑀘𑀢𑀼𑀢𑁆𑀣𑀯𑀸𑀭𑁂 𑀅𑀳𑁄 𑀯𑀢𑀸𑀢𑀺 ‘‘𑀅𑀳𑁄 𑀯𑀢 𑀭𑁂 𑀅𑀫𑁆𑀳𑀸𑀓𑀁 𑀧𑀡𑁆𑀟𑀺𑀢𑀓𑀸, 𑀅𑀳𑁄 𑀯𑀢 𑀭𑁂 𑀅𑀫𑁆𑀳𑀸𑀓𑀁 𑀩𑀳𑀼𑀲𑁆𑀲𑀼𑀢𑀓𑀸 𑀢𑁂𑀯𑀺𑀚𑁆𑀚𑀓𑀸’’𑀢𑀺 (𑀤𑀻. 𑀦𑀺. 𑁧.𑁨𑁯𑁧) 𑀕𑀭𑀳𑀸𑀬𑀁 𑀤𑀺𑀲𑁆𑀲𑀢𑀺. ‘‘𑀅𑀳𑁄 𑀯𑀢 𑀫𑀁 𑀤𑀳𑀭𑀁𑀬𑁂𑀯 𑀲𑀫𑀸𑀦𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑁂𑀬𑁆𑀬𑀼’’𑀦𑁆𑀢𑀺 (𑀫𑀳𑀸𑀯. 𑁫𑁭) 𑀧𑀢𑁆𑀣𑀦𑀸𑀬𑀁. 𑀇𑀥 𑀧𑀢𑁆𑀣𑀦𑀸𑀬𑀫𑁂𑀯. 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀼𑀘𑁆𑀙𑀺𑀢𑁆𑀯𑀸. 𑀅𑀬𑀁 𑀪𑀺𑀓𑁆𑀔𑀼 𑀮𑀸𑀪𑀢𑁆𑀣𑀺𑀓𑁄 𑀪𑀕𑀯𑀢𑁄 𑀅𑀢𑁆𑀢𑀸𑀦𑀁 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑀁 𑀇𑀘𑁆𑀙𑀢𑀺, 𑀢𑀜𑁆𑀘 𑀔𑁄 𑀅𑀦𑀼𑀫𑀢𑀺𑀧𑀼𑀘𑁆𑀙𑀸𑀬, 𑀦𑁄 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀯𑀺𑀧𑀲𑁆𑀲𑀦𑀁 𑀯𑀸 𑀅𑀦𑁆𑀢𑀭𑀁 𑀓𑀢𑁆𑀯𑀸. 𑀅𑀬𑀜𑁆𑀳𑀺 𑀧𑀲𑁆𑀲𑀢𑀺 𑀪𑀕𑀯𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀸𑀤𑀬𑁄 𑀫𑀳𑀸𑀣𑁂𑀭𑁂 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀸𑀭𑀺𑀧𑀼𑀢𑁆𑀢, 𑀫𑁄𑀕𑁆𑀕𑀮𑁆𑀮𑀸𑀦, 𑀓𑀲𑁆𑀲𑀧, 𑀭𑀸𑀳𑀼𑀮 𑀘𑀓𑁆𑀔𑀼𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺 𑀏𑀯𑀁 𑀧𑀭𑀺𑀲𑀫𑀚𑁆𑀛𑁂 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁, 𑀫𑀦𑀼𑀲𑁆𑀲𑁂 𑀘 ‘‘𑀢𑁂𑀲 𑀧𑀡𑁆𑀟𑀺𑀢𑀸 𑀣𑁂𑀭𑀸 𑀲𑀢𑁆𑀣𑀼 𑀘𑀺𑀢𑁆𑀢𑀁 𑀆𑀭𑀸𑀥𑁂𑀦𑁆𑀢𑀻’’𑀢𑀺 𑀯𑀡𑁆𑀡𑀁 𑀪𑀡𑀦𑁆𑀢𑁂, 𑀮𑀸𑀪𑀲𑀓𑁆𑀓𑀸𑀭𑀜𑁆𑀘 𑀉𑀧𑀳𑀭𑀦𑁆𑀢𑁂. 𑀢𑀲𑁆𑀫𑀸 𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀇𑀘𑁆𑀙𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀔𑀡𑀺𑀢𑁆𑀯𑀸 𑀞𑀧𑀺𑀢𑀔𑀸𑀡𑀼 𑀯𑀺𑀬 𑀪𑀕𑀯𑀢𑁄 𑀧𑀼𑀭𑀢𑁄𑀯 𑀳𑁄𑀢𑀺.

𑀇𑀢𑀺 𑀲𑁄 𑀓𑀼𑀧𑀺𑀢𑁄𑀢𑀺 𑀅𑀣 𑀪𑀕𑀯𑀸 𑀢𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸𑀯 𑀅𑀜𑁆𑀜𑀁 𑀣𑁂𑀭𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀲𑁄 𑀓𑀼𑀧𑀺𑀢𑁄 𑀳𑁄𑀢𑀺 𑀪𑀕𑀯𑀢𑁄 𑀘 𑀣𑁂𑀭𑀲𑁆𑀲 𑀘. 𑀓𑀣𑀁 𑀪𑀕𑀯𑀢𑁄 𑀓𑀼𑀧𑁆𑀧𑀢𑀺? ‘‘𑀅𑀳𑀁 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀪𑀼𑀢𑀺 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀢𑁄 𑀩𑀳𑀺𑀦𑀺𑀓𑁆𑀔𑀫𑀦𑀁 𑀦 𑀚𑀸𑀦𑀸𑀫𑀺, 𑀲𑀩𑁆𑀩𑀓𑀸𑀮𑀁 𑀙𑀸𑀬𑀸𑀯 𑀦 𑀯𑀺𑀚𑀳𑀸𑀫𑀺, 𑀫𑀁 𑀦𑀸𑀫 𑀧𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺. 𑀢𑀁𑀫𑀼𑀳𑀼𑀢𑁆𑀢𑀁 𑀤𑀺𑀝𑁆𑀞𑀫𑀢𑁆𑀢𑀓𑀫𑁂𑀯 𑀣𑁂𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀏𑀯𑀁 𑀪𑀕𑀯𑀢𑁄 𑀓𑀼𑀧𑁆𑀧𑀢𑀺. 𑀓𑀣𑀁 𑀣𑁂𑀭𑀲𑁆𑀲 𑀓𑀼𑀧𑁆𑀧𑀢𑀺? ‘‘𑀅𑀬𑀁 𑀫𑀳𑀮𑁆𑀮𑀓𑀢𑁆𑀣𑁂𑀭𑁄 𑀪𑀕𑀯𑀢𑁄 𑀧𑀼𑀭𑀢𑁄 𑀔𑀸𑀡𑀼 𑀯𑀺𑀬 𑀦𑀺𑀲𑀻𑀤𑀢𑀺, 𑀓𑀤𑀸 𑀦𑀼 𑀔𑁄 𑀇𑀫𑀁 𑀥𑀫𑁆𑀫𑀓𑀫𑁆𑀫𑀺𑀓𑀸 𑀅𑀪𑀩𑁆𑀩𑀝𑁆𑀞𑀸𑀦𑀁 𑀧𑀸𑀧𑁂𑀢𑁆𑀯𑀸 𑀦𑀻𑀳𑀭𑀺𑀲𑁆𑀲𑀦𑁆𑀢𑀺, 𑀅𑀬𑀜𑁆𑀳𑀺 𑀬𑀤𑀺 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀦 𑀪𑀯𑁂𑀬𑁆𑀬, 𑀅𑀯𑀲𑁆𑀲𑀁 𑀪𑀕𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑁂𑀬𑁆𑀬𑀸’’𑀢𑀺 𑀏𑀯𑀁 𑀣𑁂𑀭𑀲𑁆𑀲 𑀓𑀼𑀧𑁆𑀧𑀢𑀺.

𑀧𑀼𑀭𑀓𑁆𑀔𑀢𑁆𑀯𑀸 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀧𑀼𑀭𑀢𑁄 𑀧𑀼𑀭𑀢𑁄 𑀓𑀢𑁆𑀯𑀸, 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀫𑁆𑀧𑀺 𑀮𑀸𑀪𑀢𑁆𑀣𑀺𑀓𑁄𑀬𑁂𑀯, 𑀅𑀬𑀜𑁆𑀳𑀺 𑀧𑀲𑁆𑀲𑀢𑀺 𑀩𑀳𑀼𑀲𑁆𑀲𑀼𑀢𑁂 𑀪𑀺𑀓𑁆𑀔𑀽 𑀫𑀳𑀸𑀧𑀭𑀺𑀯𑀸𑀭𑁂𑀦 𑀕𑀸𑀫𑀁 𑀧𑀯𑀺𑀲𑀦𑁆𑀢𑁂, 𑀘𑁂𑀢𑀺𑀬𑀁 𑀯𑀦𑁆𑀤𑀦𑁆𑀢𑁂, 𑀢𑁂𑀲𑀜𑁆𑀘 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀉𑀧𑀸𑀲𑀓𑁂 𑀧𑀲𑀦𑁆𑀦𑁂 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑁂. 𑀢𑀲𑁆𑀫𑀸 𑀏𑀯𑀁 𑀇𑀘𑁆𑀙𑀢𑀺. 𑀓𑀼𑀧𑀺𑀢𑁄𑀢𑀺 𑀅𑀬𑀫𑁆𑀧𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀼𑀧𑁆𑀧𑀢𑀺 𑀪𑀺𑀓𑁆𑀔𑀽𑀦𑀁 𑀣𑁂𑀭𑀲𑁆𑀲 𑀘. 𑀓𑀣𑀁 𑀪𑀺𑀓𑁆𑀔𑀽𑀦𑀁? ‘‘𑀇𑀫𑁂 𑀬𑀤𑁂𑀯 𑀫𑀬𑁆𑀳𑀁 𑀉𑀧𑁆𑀧𑀚𑁆𑀚𑀢𑀺 𑀘𑀻𑀯𑀭𑀁 𑀯𑀸 𑀧𑀺𑀡𑁆𑀟𑀧𑀸𑀢𑁄 𑀯𑀸, 𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀫𑀬𑁆𑀳𑀁 𑀧𑀦 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀆𑀕𑀘𑁆𑀙𑀦𑁆𑀢𑁄𑀧𑀺 𑀦𑀢𑁆𑀣𑀻’’𑀢𑀺 𑀏𑀯𑀁 𑀪𑀺𑀓𑁆𑀔𑀽𑀦𑀁 𑀓𑀼𑀧𑁆𑀧𑀢𑀺. 𑀓𑀣𑀁 𑀣𑁂𑀭𑀲𑁆𑀲? ‘‘𑀏𑀲𑁄 𑀫𑀳𑀮𑁆𑀮𑀓𑀢𑁆𑀣𑁂𑀭𑁄 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀲𑀬𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀓𑀼𑀤𑀸𑀲𑁆𑀲𑀼 𑀦𑀸𑀫 𑀦𑀁 𑀥𑀫𑁆𑀫𑀓𑀫𑁆𑀫𑀺𑀓𑀸 𑀦𑀺𑀓𑁆𑀓𑀟𑁆𑀠𑀺𑀲𑁆𑀲𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀅𑀯𑀲𑁆𑀲𑀁 𑀫𑀁𑀬𑁂𑀯 𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺.

𑀪𑀢𑁆𑀢𑀕𑁆𑀕𑁂𑀢𑀺 𑀪𑁄𑀚𑀦𑀝𑁆𑀞𑀸𑀦𑁂. 𑀅𑀕𑁆𑀕𑀸𑀲𑀦𑀦𑁆𑀢𑀺 𑀲𑀗𑁆𑀖𑀢𑁆𑀣𑁂𑀭𑀸𑀲𑀦𑀁. 𑀅𑀕𑁆𑀕𑁄𑀤𑀓𑀦𑁆𑀢𑀺 𑀤𑀓𑁆𑀔𑀺𑀡𑁄𑀤𑀓𑀁. 𑀅𑀕𑁆𑀕𑀧𑀺𑀡𑁆𑀟𑀦𑁆𑀢𑀺 𑀲𑀗𑁆𑀖𑀢𑁆𑀣𑁂𑀭𑀧𑀺𑀡𑁆𑀟𑀁. 𑀲𑀩𑁆𑀩𑀢𑁆𑀣 𑀯𑀸 𑀅𑀕𑁆𑀕𑀦𑁆𑀢𑀺 𑀧𑀡𑀻𑀢𑀸𑀥𑀺𑀯𑀘𑀦𑀫𑁂𑀢𑀁. 𑀢𑀢𑁆𑀣 𑀅𑀳𑀫𑁂𑀯 𑀮𑀪𑁂𑀬𑁆𑀬𑀦𑁆𑀢𑀺 𑀇𑀘𑁆𑀙𑀸 𑀦𑀸𑀢𑀺𑀫𑀳𑀸𑀲𑀸𑀯𑀚𑁆𑀚𑀸. 𑀦 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀮𑀪𑁂𑀬𑁆𑀬𑀸𑀢𑀺 𑀧𑀦 𑀅𑀢𑀺𑀫𑀳𑀸𑀲𑀸𑀯𑀚𑁆𑀚𑀸. 𑀅𑀬𑀫𑁆𑀧𑀺 𑀮𑀸𑀪𑀢𑁆𑀣𑀺𑀓𑁄 𑀧𑀸𑀲𑀸𑀤𑀺𑀓𑁄 𑀳𑁄𑀢𑀺 𑀘𑀻𑀯𑀭𑀥𑀸𑀭𑀡𑀸𑀤𑀻𑀳𑀺, 𑀓𑀤𑀸𑀘𑀺 𑀧𑀩𑁆𑀩𑀚𑀢𑀺, 𑀓𑀤𑀸𑀘𑀺 𑀯𑀺𑀩𑁆𑀪𑀫𑀢𑀺. 𑀢𑁂𑀦 𑀲𑁄 𑀧𑀼𑀩𑁆𑀩𑁂 𑀮𑀤𑁆𑀥𑀧𑀼𑀩𑁆𑀩𑀁 𑀆𑀲𑀦𑀸𑀤𑀺𑀁 𑀧𑀘𑁆𑀙𑀸 𑀅𑀮𑀪𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀦 𑀲𑁄 𑀪𑀺𑀓𑁆𑀔𑀼 𑀮𑀪𑁂𑀬𑁆𑀬𑀸𑀢𑀺 𑀦 𑀲𑁄 𑀪𑀺𑀓𑁆𑀔𑀼 𑀣𑁂𑀭𑀸𑀦𑀁 𑀅𑀕𑁆𑀕𑀸𑀲𑀦𑀸𑀤𑀻𑀲𑀼 𑀢𑀤𑀦𑀼𑀲𑀸𑀭𑁂𑀦 𑀫𑀚𑁆𑀛𑀺𑀫𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀦𑀯𑀸𑀦𑀁 𑀓𑀤𑀸𑀘𑀺 𑀬𑀁 𑀯𑀸 𑀢𑀁 𑀯𑀸 𑀲𑀩𑁆𑀩𑀦𑀺𑀳𑀻𑀦𑀁 𑀆𑀲𑀦𑀸𑀤𑀺𑀁 𑀮𑀪𑀢𑀺. 𑀓𑀼𑀧𑀺𑀢𑁄𑀢𑀺 𑀅𑀬𑀫𑁆𑀧𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀼𑀧𑁆𑀧𑀢𑀺 𑀫𑀦𑀼𑀲𑁆𑀲𑀸𑀦𑀜𑁆𑀘 𑀣𑁂𑀭𑀸𑀦𑀜𑁆𑀘. 𑀓𑀣𑀁 𑀫𑀦𑀼𑀲𑁆𑀲𑀸𑀦𑀁? ‘‘𑀇𑀫𑁂 𑀫𑀗𑁆𑀕𑀮𑀸𑀤𑀻𑀲𑀼 𑀫𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺, 𑀏𑀢𑁂, ‘𑀪𑀦𑁆𑀢𑁂, 𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀅𑀦𑀼𑀓𑀫𑁆𑀧𑀁 𑀓𑀭𑁄𑀣𑀸’𑀢𑀺 𑀯𑀤𑀦𑁆𑀢𑀺, 𑀇𑀤𑀸𑀦𑀺 𑀢𑀁𑀫𑀼𑀳𑀼𑀢𑁆𑀢𑀁 𑀤𑀺𑀝𑁆𑀞𑀫𑀢𑁆𑀢𑀓𑀁 𑀫𑀳𑀮𑁆𑀮𑀓𑀢𑁆𑀣𑁂𑀭𑀁 𑀕𑀳𑁂𑀢𑁆𑀯𑀸 𑀕𑀢𑀸, 𑀳𑁄𑀢𑀼 𑀇𑀤𑀸𑀦𑀺, 𑀦𑁂𑀲𑀁 𑀓𑀺𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀫𑀦𑀼𑀲𑁆𑀲𑀸𑀦𑀁 𑀓𑀼𑀧𑁆𑀧𑀢𑀺. 𑀓𑀣𑀁 𑀣𑁂𑀭𑀸𑀦𑀁? ‘‘𑀇𑀫𑁂 𑀦𑀸𑀫 𑀬𑀤𑀺 𑀦 𑀪𑀯𑁂𑀬𑁆𑀬𑀼𑀁, 𑀫𑀁𑀬𑁂𑀯 𑀫𑀦𑀼𑀲𑁆𑀲𑀸 𑀦𑀺𑀫𑀦𑁆𑀢𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀣𑁂𑀭𑀸𑀦𑀁 𑀓𑀼𑀧𑁆𑀧𑀢𑀺.

𑀅𑀦𑀼𑀫𑁄𑀤𑁂𑀬𑁆𑀬𑀦𑁆𑀢𑀺 𑀅𑀦𑀼𑀫𑁄𑀤𑀦𑀁 𑀓𑀭𑁂𑀬𑁆𑀬𑀁. 𑀅𑀬𑀫𑁆𑀧𑀺 𑀮𑀸𑀪𑀢𑁆𑀣𑀺𑀓𑁄 𑀬𑀁 𑀯𑀸 𑀢𑀁 𑀯𑀸 𑀔𑀡𑁆𑀟𑀸𑀦𑀼𑀫𑁄𑀤𑀦𑀁 𑀚𑀸𑀦𑀸𑀢𑀺, ‘‘𑀲𑁄 𑀅𑀦𑀼𑀫𑁄𑀤𑀦𑀝𑁆𑀞𑀸𑀦𑁂 𑀩𑀳𑀽 𑀫𑀸𑀢𑀼𑀕𑀸𑀫𑀸 𑀆𑀕𑀘𑁆𑀙𑀦𑁆𑀢𑀺, 𑀢𑀸 𑀫𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀢𑀢𑁄 𑀧𑀪𑀼𑀢𑀺 𑀣𑀸𑀮𑀓𑀪𑀺𑀓𑁆𑀔𑀁 𑀤𑀲𑁆𑀲𑀦𑁆𑀢𑀻’’𑀢𑀺 𑀧𑀢𑁆𑀣𑁂𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀞𑀸𑀦𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀦𑀼𑀫𑁄𑀤𑀦𑀸 𑀪𑀸𑀭𑁄, 𑀢𑁂𑀦 𑀩𑀳𑀼𑀲𑁆𑀲𑀼𑀢𑁄 𑀅𑀦𑀼𑀫𑁄𑀤𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀧𑀺𑀢𑁄𑀢𑀺 𑀅𑀬𑀫𑁆𑀧𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀓𑀼𑀧𑁆𑀧𑀢𑀺 𑀫𑀦𑀼𑀲𑁆𑀲𑀸𑀦𑀁 𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀺𑀓𑀲𑁆𑀲 𑀘. 𑀓𑀣𑀁 𑀫𑀦𑀼𑀲𑁆𑀲𑀸𑀦𑀁? ‘‘𑀇𑀫𑁂 𑀧𑀼𑀩𑁆𑀩𑁂 𑀫𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀦𑁆𑀢𑀺 ‘𑀅𑀫𑁆𑀳𑀸𑀓𑀁 𑀦𑀸𑀕𑀢𑁆𑀣𑁂𑀭𑁄 𑀅𑀫𑁆𑀳𑀸𑀓𑀁 𑀲𑀼𑀫𑀦𑀢𑁆𑀣𑁂𑀭𑁄 𑀅𑀦𑀼𑀫𑁄𑀤𑀢𑀽’𑀢𑀺, 𑀅𑀚𑁆𑀚 𑀧𑀦 𑀦𑀸𑀯𑁄𑀘𑀼’’𑀦𑁆𑀢𑀺 𑀏𑀯𑀁 𑀫𑀦𑀼𑀲𑁆𑀲𑀸𑀦𑀁 𑀓𑀼𑀧𑁆𑀧𑀢𑀺. 𑀓𑀣𑀁 𑀣𑁂𑀭𑀲𑁆𑀲? ‘‘𑀅𑀬𑀁 𑀲𑀗𑁆𑀖𑀢𑁆𑀣𑁂𑀭𑁄 ‘𑀢𑀼𑀫𑁆𑀳𑀸𑀓𑀁 𑀓𑀼𑀮𑀼𑀧𑀓𑀁 𑀦𑀸𑀕𑀢𑁆𑀣𑁂𑀭𑀁 𑀲𑀼𑀫𑀦𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀣, 𑀅𑀬𑀁 𑀅𑀦𑀼𑀫𑁄𑀤𑀺𑀲𑁆𑀲𑀢𑀻’𑀢𑀺 𑀦 𑀪𑀡𑀢𑀻’’𑀢𑀺 𑀏𑀯𑀁 𑀣𑁂𑀭𑀲𑁆𑀲 𑀓𑀼𑀧𑁆𑀧𑀢𑀺. 𑀓𑀣𑀁 𑀥𑀫𑁆𑀫𑀓𑀣𑀺𑀓𑀲𑁆𑀲? ‘‘𑀣𑁂𑀭𑁂𑀦 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀧𑀳𑀸𑀭𑀁 𑀮𑀤𑁆𑀥𑀓𑀼𑀓𑁆𑀓𑀼𑀝𑁄 𑀯𑀺𑀬 𑀢𑀼𑀭𑀺𑀢𑀢𑀼𑀭𑀺𑀢𑀁 𑀯𑀲𑁆𑀲𑀢𑀺, 𑀇𑀫𑀁 𑀦𑀸𑀫 𑀦𑀺𑀓𑁆𑀓𑀟𑁆𑀠𑀦𑁆𑀢𑀸 𑀦𑀢𑁆𑀣𑀺, 𑀇𑀫𑀲𑁆𑀫𑀺𑀜𑁆𑀳𑀺 𑀅𑀲𑀢𑀺 𑀅𑀳𑀫𑁂𑀯 𑀅𑀦𑀼𑀫𑁄𑀤𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀥𑀫𑁆𑀫𑀓𑀣𑀺𑀓𑀲𑁆𑀲 𑀓𑀼𑀧𑁆𑀧𑀢𑀺.

𑀆𑀭𑀸𑀫𑀕𑀢𑀸𑀦𑀦𑁆𑀢𑀺 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑀸𑀦𑀁. 𑀅𑀬𑀫𑁆𑀧𑀺 𑀮𑀸𑀪𑀢𑁆𑀣𑀺𑀓𑁄 𑀬𑀁 𑀯𑀸 𑀢𑀁 𑀯𑀸 𑀔𑀡𑁆𑀟𑀥𑀫𑁆𑀫𑀓𑀣𑀁 𑀚𑀸𑀦𑀸𑀢𑀺, 𑀲𑁄 𑀧𑀲𑁆𑀲𑀢𑀺 𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀤𑁆𑀯𑀺𑀬𑁄𑀚𑀦𑀢𑀺𑀬𑁄𑀚𑀦𑀢𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀪𑀺𑀓𑁆𑀔𑀽 𑀲𑀩𑁆𑀩𑀭𑀢𑁆𑀢𑀺𑀓𑀸𑀦𑀺 𑀥𑀫𑁆𑀫𑀲𑁆𑀲𑀯𑀦𑀸𑀦𑀺 𑀲𑀼𑀡𑀦𑁆𑀢𑁂, 𑀢𑀼𑀝𑁆𑀞𑀘𑀺𑀢𑁆𑀢𑁂 𑀘 𑀤𑀳𑀭𑁂 𑀯𑀸 𑀲𑀸𑀫𑀡𑁂𑀭𑁂 𑀯𑀸 𑀲𑀸𑀥𑀼 𑀲𑀸𑀥𑀽𑀢𑀺 𑀫𑀳𑀸𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀁 𑀤𑁂𑀦𑁆𑀢𑁂, 𑀢𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀅𑀦𑁆𑀢𑁄𑀕𑀸𑀫𑀕𑀢𑁂 𑀪𑀺𑀓𑁆𑀔𑀽 𑀉𑀧𑀸𑀲𑀓𑀸 𑀧𑀼𑀘𑁆𑀙𑀦𑁆𑀢𑀺 ‘‘𑀓𑁂, 𑀪𑀦𑁆𑀢𑁂, 𑀥𑀫𑁆𑀫𑀁 𑀓𑀣𑁂𑀲𑀼’’𑀦𑁆𑀢𑀺. 𑀢𑁂 𑀪𑀡𑀦𑁆𑀢𑀺 ‘‘𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 𑀥𑀫𑁆𑀫𑀓𑀣𑀺𑀓𑀸𑀦𑀁 𑀫𑀳𑀸𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀲𑁄 𑀢𑀁 𑀇𑀘𑁆𑀙𑀫𑀸𑀦𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀞𑀸𑀦𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸𑀦𑀁 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑀸𑀦𑀁 𑀥𑀫𑁆𑀫𑀤𑁂𑀲𑀦𑀸 𑀪𑀸𑀭𑁄, 𑀢𑁂𑀦 𑀩𑀳𑀼𑀲𑁆𑀲𑀼𑀢𑁄 𑀤𑁂𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀧𑀺𑀢𑁄𑀢𑀺 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀫𑁆𑀧𑀺 𑀯𑀢𑁆𑀢𑀼𑀁 𑀑𑀓𑀸𑀲𑀁 𑀅𑀮𑀪𑀫𑀸𑀦𑁄 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀢𑁆𑀢𑀦𑁄 𑀫𑀦𑁆𑀤𑀪𑀸𑀯𑀲𑁆𑀲 ‘‘𑀅𑀳𑀜𑁆𑀳𑀺 𑀫𑀦𑁆𑀤𑁄 𑀤𑀼𑀧𑁆𑀧𑀜𑁆𑀜𑁄 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀺 𑀤𑁂𑀲𑁂𑀢𑀼’’𑀦𑁆𑀢𑀺.

𑀪𑀺𑀓𑁆𑀔𑀼𑀦𑀻𑀦𑀦𑁆𑀢𑀺 𑀑𑀯𑀸𑀤𑀢𑁆𑀣𑀁 𑀯𑀸 𑀉𑀤𑁆𑀤𑁂𑀲𑀢𑁆𑀣𑀁 𑀯𑀸 𑀧𑀭𑀺𑀧𑀼𑀘𑁆𑀙𑀢𑁆𑀣𑀁 𑀯𑀸 𑀧𑀽𑀚𑀸𑀓𑀭𑀡𑀢𑁆𑀣𑀁 𑀯𑀸 𑀆𑀭𑀸𑀫𑀁 𑀆𑀕𑀦𑁆𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀪𑀺𑀓𑁆𑀔𑀼𑀦𑀻𑀦𑀁. 𑀅𑀬𑀫𑁆𑀧𑀺 𑀮𑀸𑀪𑀢𑁆𑀣𑀺𑀓𑁄, 𑀢𑀲𑁆𑀲𑁂𑀯𑀁 𑀳𑁄𑀢𑀺 𑀇𑀫𑀸 𑀫𑀳𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 𑀪𑀺𑀓𑁆𑀔𑀼𑀦𑀺𑀬𑁄, 𑀢𑀸𑀲𑀼 𑀓𑀼𑀮𑁂𑀲𑀼 𑀧𑀯𑀺𑀲𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀲𑀼 𑀫𑀦𑀼𑀲𑁆𑀲𑀸 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺 ‘‘𑀓𑀲𑁆𑀲 𑀲𑀦𑁆𑀢𑀺𑀓𑁂 𑀑𑀯𑀸𑀤𑀁 𑀯𑀸 𑀉𑀤𑁆𑀤𑁂𑀲𑀁 𑀯𑀸 𑀧𑀭𑀺𑀧𑀼𑀘𑁆𑀙𑀁 𑀯𑀸 𑀕𑀡𑁆𑀳𑀣𑀸’’𑀢𑀺. 𑀢𑀢𑁄 𑀯𑀓𑁆𑀔𑀦𑁆𑀢𑀺 ‘‘𑀅𑀲𑀼𑀓𑁄 𑀦𑀸𑀫 𑀅𑀬𑁆𑀬𑁄 𑀩𑀳𑀼𑀲𑁆𑀲𑀼𑀢𑁄, 𑀢𑀲𑁆𑀲 𑀤𑁂𑀣 𑀓𑀭𑁄𑀣𑀸’’𑀢𑀺, 𑀢𑁂𑀦𑀲𑁆𑀲 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺. 𑀞𑀸𑀦𑀦𑁆𑀢𑀺 𑀑𑀯𑀸𑀤𑀸𑀤𑀬𑁄 𑀦𑀸𑀫 𑀩𑀳𑀼𑀲𑁆𑀲𑀼𑀢𑀸𑀦𑀁 𑀪𑀸𑀭𑁄, 𑀢𑁂𑀦 𑀩𑀳𑀼𑀲𑁆𑀲𑀼𑀢𑁄 𑀤𑁂𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀧𑀺𑀢𑁄𑀢𑀺 𑀅𑀬𑀫𑁆𑀧𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀼𑀧𑁆𑀧𑀢𑀺, 𑀢𑀸𑀲𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀁 ‘‘𑀇𑀫𑀸 𑀧𑀼𑀩𑁆𑀩𑁂 𑀫𑀁 𑀦𑀺𑀲𑁆𑀲𑀸𑀬 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸𑀤𑀻𑀦𑀺 𑀮𑀪𑀦𑁆𑀢𑀺, 𑀢𑀸 𑀇𑀤𑀸𑀦𑀺 𑀢𑀁𑀫𑀼𑀳𑀼𑀢𑁆𑀢𑀁 𑀤𑀺𑀝𑁆𑀞𑀫𑀢𑁆𑀢𑀓𑀫𑀳𑀮𑁆𑀮𑀓𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑀸’’𑀢𑀺. 𑀥𑀫𑁆𑀫𑀓𑀣𑀺𑀓𑀲𑁆𑀲 𑀘 ‘‘𑀏𑀲 𑀇𑀫𑀸𑀲𑀁 𑀲𑀳𑀲𑀸 𑀑𑀯𑀸𑀤𑀁 𑀅𑀤𑀸𑀲𑀺𑀬𑁂𑀯𑀸’’𑀢𑀺.

𑀉𑀧𑀸𑀲𑀓𑀸𑀦𑀦𑁆𑀢𑀺, 𑀆𑀭𑀸𑀫𑀕𑀢𑀸𑀦𑀁 𑀉𑀧𑀸𑀲𑀓𑀸𑀦𑀁. 𑀦𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑀸 𑀦𑀸𑀫 𑀫𑀳𑀸𑀉𑀧𑀸𑀲𑀓𑀸 𑀳𑁄𑀦𑁆𑀢𑀺, 𑀢𑁂 𑀧𑀼𑀢𑁆𑀢𑀪𑀸𑀢𑀼𑀓𑀸𑀦𑀁 𑀓𑀫𑁆𑀫𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸 𑀯𑀺𑀘𑀭𑀦𑁆𑀢𑀺, 𑀅𑀬𑀁 𑀢𑁂𑀲𑀁 𑀤𑁂𑀲𑁂𑀢𑀼𑀁 𑀇𑀘𑁆𑀙𑀢𑀺, 𑀓𑀺𑀁 𑀓𑀸𑀭𑀡𑀸? 𑀇𑀫𑁂 𑀧𑀲𑀻𑀤𑀺𑀢𑁆𑀯𑀸 𑀉𑀧𑀸𑀲𑀺𑀓𑀸𑀦𑀫𑁆𑀧𑀺 𑀆𑀭𑁄𑀘𑁂𑀲𑁆𑀲𑀦𑁆𑀢𑀺, 𑀢𑀢𑁄 𑀲𑀤𑁆𑀥𑀺𑀁 𑀉𑀧𑀸𑀲𑀺𑀓𑀸𑀳𑀺 𑀫𑀬𑁆𑀳𑀫𑁂𑀯 𑀮𑀸𑀪𑀲𑀓𑁆𑀓𑀸𑀭𑀁 𑀉𑀧𑀳𑀭𑀺𑀲𑁆𑀲𑀦𑁆𑀢𑀻𑀢𑀺. 𑀞𑀸𑀦𑀁 𑀩𑀳𑀼𑀲𑁆𑀲𑀼𑀢𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀓𑀼𑀧𑀺𑀢𑁄𑀢𑀺 𑀅𑀬𑀫𑁆𑀧𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀼𑀧𑁆𑀧𑀢𑀺, 𑀉𑀧𑀸𑀲𑀓𑀸𑀦𑀜𑁆𑀘 ‘‘𑀇𑀫𑁂 𑀅𑀜𑁆𑀜𑀢𑁆𑀣 𑀲𑀼𑀡𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀓𑀼𑀮𑀼𑀧𑀓𑀲𑁆𑀲 𑀲𑀦𑁆𑀢𑀺𑀓𑁂 𑀲𑀼𑀡𑀸𑀫𑀸𑀢𑀺 𑀦𑀸𑀕𑀘𑁆𑀙𑀦𑁆𑀢𑀺, 𑀳𑁄𑀢𑀼 𑀇𑀤𑀸𑀦𑀺, 𑀢𑁂𑀲𑀁 𑀉𑀧𑁆𑀧𑀦𑁆𑀦𑁂 𑀓𑀺𑀘𑁆𑀘𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀥𑀫𑁆𑀫𑀓𑀣𑀺𑀓𑀲𑁆𑀲 𑀘, ‘‘𑀅𑀬𑀫𑁂𑀢𑁂𑀲𑀁 𑀤𑁂𑀲𑁂𑀢𑀻’’𑀢𑀺.

𑀉𑀧𑀸𑀲𑀺𑀓𑀸𑀦𑀦𑁆𑀢𑀺 𑀆𑀭𑀸𑀫𑀕𑀢𑀸𑀦𑀁. 𑀉𑀧𑀸𑀲𑀺𑀓𑀸 𑀦𑀸𑀫 𑀆𑀲𑀦𑀧𑀽𑀚𑀸𑀤𑀺𑀓𑀭𑀡𑀢𑁆𑀣𑀁 𑀯𑀸 𑀉𑀧𑁄𑀲𑀣𑀤𑀺𑀯𑀲𑁂 𑀯𑀸 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀢𑀸. 𑀲𑁂𑀲𑀁 𑀉𑀧𑀸𑀲𑀓𑀯𑀸𑀭𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀓𑁆𑀓𑀭𑁂𑀬𑁆𑀬𑀼𑀦𑁆𑀢𑀺 𑀲𑀓𑁆𑀓𑀘𑁆𑀘𑀜𑁆𑀘 𑀓𑀭𑁂𑀬𑁆𑀬𑀼𑀁, 𑀲𑀼𑀦𑁆𑀤𑀭𑀜𑁆𑀘 𑀓𑀭𑁂𑀬𑁆𑀬𑀼𑀁. 𑀇𑀫𑀺𑀦𑀸 𑀅𑀢𑁆𑀢𑀦𑀺 𑀓𑀸𑀭𑀁 𑀓𑀭𑀻𑀬𑀫𑀸𑀦𑀁 𑀲𑀓𑁆𑀓𑀘𑁆𑀘𑀁 𑀓𑀢𑀜𑁆𑀘 𑀲𑀼𑀦𑁆𑀤𑀭𑀜𑁆𑀘 𑀧𑀢𑁆𑀣𑁂𑀢𑀺. 𑀕𑀭𑀼𑀁 𑀓𑀭𑁂𑀬𑁆𑀬𑀼𑀦𑁆𑀢𑀺 𑀪𑀸𑀭𑀺𑀬𑀁 𑀓𑀭𑁂𑀬𑁆𑀬𑀼𑀁. 𑀇𑀫𑀺𑀦𑀸 𑀪𑀺𑀓𑁆𑀔𑀽𑀳𑀺 𑀅𑀢𑁆𑀢𑀸𑀦𑀁 𑀕𑀭𑀼𑀝𑁆𑀞𑀸𑀦𑁂 𑀞𑀧𑀻𑀬𑀫𑀸𑀦𑀁 𑀧𑀢𑁆𑀣𑁂𑀢𑀺. 𑀫𑀸𑀦𑁂𑀬𑁆𑀬𑀼𑀦𑁆𑀢𑀺 𑀧𑀺𑀬𑀸𑀬𑁂𑀬𑁆𑀬𑀼𑀁. 𑀧𑀽𑀚𑁂𑀬𑁆𑀬𑀼𑀦𑁆𑀢𑀺 𑀏𑀯𑀁 𑀲𑀓𑁆𑀓𑀭𑁄𑀦𑁆𑀢𑀸 𑀕𑀭𑀼𑀁 𑀓𑀭𑁄𑀦𑁆𑀢𑀸 𑀫𑀸𑀦𑁂𑀦𑁆𑀢𑀸 𑀧𑀘𑁆𑀘𑀬𑁂𑀳𑀺 𑀧𑀽𑀚𑁂𑀬𑁆𑀬𑀼𑀦𑁆𑀢𑀺 𑀧𑀘𑁆𑀘𑀬𑀧𑀽𑀚𑀁 𑀧𑀢𑁆𑀣𑁂𑀢𑀺. 𑀞𑀸𑀦𑀦𑁆𑀢𑀺 ‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀺𑀬𑁄’’𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀩𑀳𑀼𑀲𑁆𑀲𑀼𑀢𑁄 𑀘 𑀲𑀻𑀮𑀯𑀸 𑀘 𑀏𑀢𑀁 𑀯𑀺𑀥𑀺𑀁 𑀅𑀭𑀳𑀢𑀺 𑀢𑁂𑀦 𑀪𑀺𑀓𑁆𑀔𑀽 𑀏𑀯𑀭𑀽𑀧𑀁 𑀏𑀯𑀁 𑀓𑀭𑁂𑀬𑁆𑀬𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀧𑀺𑀢𑁄𑀢𑀺 𑀅𑀬𑀫𑁆𑀧𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀼𑀧𑁆𑀧𑀢𑀺 𑀪𑀺𑀓𑁆𑀔𑀽𑀦𑀜𑁆𑀘 ‘‘𑀇𑀫𑁂 𑀏𑀢𑀁 𑀲𑀓𑁆𑀓𑀭𑁄𑀦𑁆𑀢𑀻’’𑀢𑀺 𑀣𑁂𑀭𑀲𑁆𑀲 𑀘 ‘‘𑀇𑀫𑀲𑁆𑀫𑀺𑀁 𑀅𑀲𑀢𑀺 𑀫𑀁𑀬𑁂𑀯 𑀲𑀓𑁆𑀓𑀭𑁂𑀬𑁆𑀬𑀼’’𑀦𑁆𑀢𑀺. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼 𑀢𑀻𑀲𑀼 𑀯𑀸𑀭𑁂𑀲𑀼.

𑀧𑀡𑀻𑀢𑀸𑀦𑀁 𑀘𑀻𑀯𑀭𑀸𑀦𑀦𑁆𑀢𑀺 𑀧𑀝𑁆𑀝𑀤𑀼𑀓𑀽𑀮𑀧𑀝𑁆𑀝𑀼𑀡𑁆𑀡𑀓𑁄𑀲𑁂𑀬𑁆𑀬𑀸𑀤𑀻𑀦𑀁 𑀫𑀳𑀕𑁆𑀖𑀲𑀼𑀔𑀼𑀫𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀁 𑀘𑀻𑀯𑀭𑀸𑀦𑀁. 𑀇𑀥𑀸𑀧𑀺 𑀅𑀳𑀫𑁂𑀯 𑀮𑀸𑀪𑀻 𑀅𑀲𑁆𑀲𑀦𑁆𑀢𑀺 𑀇𑀘𑁆𑀙𑀸 𑀦𑀸𑀢𑀺𑀫𑀳𑀸𑀲𑀸𑀯𑀚𑁆𑀚𑀸. 𑀦 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀮𑀸𑀪𑀻 𑀅𑀲𑁆𑀲𑀸𑀢𑀺 𑀧𑀦 𑀫𑀳𑀸𑀲𑀸𑀯𑀚𑁆𑀚𑀸.

𑀧𑀡𑀻𑀢𑀸𑀦𑀁 𑀧𑀺𑀡𑁆𑀟𑀧𑀸𑀢𑀸𑀦𑀦𑁆𑀢𑀺 𑀲𑀧𑁆𑀧𑀺𑀢𑁂𑀮𑀫𑀥𑀼𑀲𑀓𑁆𑀓𑀭𑀸𑀤𑀺𑀧𑀽𑀭𑀺𑀢𑀸𑀦𑀁 𑀲𑁂𑀝𑁆𑀞𑀧𑀺𑀡𑁆𑀟𑀧𑀸𑀢𑀸𑀦𑀁. 𑀧𑀡𑀻𑀢𑀸𑀦𑀁 𑀲𑁂𑀦𑀸𑀲𑀦𑀸𑀦𑀦𑁆𑀢𑀺 𑀅𑀦𑁂𑀓𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀸𑀦𑀁 𑀫𑀜𑁆𑀘𑀧𑀻𑀞𑀸𑀤𑀻𑀦𑀁 𑀧𑀡𑀻𑀢𑀸𑀦𑀁. 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀲𑀧𑁆𑀧𑀺𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀁 𑀉𑀢𑁆𑀢𑀫𑀪𑁂𑀲𑀚𑁆𑀚𑀸𑀦𑀁. 𑀲𑀩𑁆𑀩𑀢𑁆𑀣𑀸𑀧𑀺 𑀞𑀸𑀦𑀁 𑀩𑀳𑀼𑀲𑁆𑀲𑀼𑀢𑁂𑀳𑀺 𑀧𑀼𑀜𑁆𑀜𑀯𑀦𑁆𑀢𑁂𑀳𑀺 𑀘 𑀬𑁄𑀚𑁂𑀢𑀩𑁆𑀩𑀁. 𑀓𑀼𑀧𑀺𑀢𑁄𑀢𑀺 𑀲𑀩𑁆𑀩𑀢𑁆𑀣𑀸𑀧𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀼𑀧𑁆𑀧𑀢𑀺, 𑀫𑀦𑀼𑀲𑁆𑀲𑀸𑀦𑀜𑁆𑀘 ‘‘𑀇𑀫𑁂𑀲𑀁 𑀦𑀸𑀫 𑀧𑀭𑀺𑀘𑀺𑀢𑀪𑀸𑀯𑁄𑀧𑀺 𑀦𑀢𑁆𑀣𑀺, 𑀤𑀻𑀖𑀭𑀢𑁆𑀢𑀁 𑀏𑀓𑀢𑁄 𑀯𑀲𑀦𑁆𑀢𑀲𑁆𑀲 𑀧𑀁𑀲𑀼𑀓𑀽𑀮𑀢𑁆𑀣𑀸𑀬 𑀯𑀸 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀯𑀸 𑀲𑀧𑁆𑀧𑀺𑀢𑁂𑀮𑀸𑀤𑀺𑀓𑀸𑀭𑀡𑀸 𑀯𑀸 𑀖𑀭𑀧𑀝𑀺𑀧𑀸𑀝𑀺𑀬𑀸 𑀘𑀭𑀦𑁆𑀢𑀲𑁆𑀲𑀸𑀧𑀺 𑀫𑁂 𑀏𑀓𑀤𑀺𑀯𑀲𑀫𑁆𑀧𑀺 𑀓𑀺𑀜𑁆𑀘𑀺 𑀧𑀡𑀻𑀢𑀁 𑀧𑀘𑁆𑀘𑀬𑀁 𑀦 𑀤𑁂𑀦𑁆𑀢𑀺. 𑀆𑀕𑀦𑁆𑀢𑀼𑀓𑀁 𑀫𑀳𑀮𑁆𑀮𑀓𑀁 𑀧𑀦 𑀤𑀺𑀲𑁆𑀯𑀸𑀯 𑀬𑀁 𑀇𑀘𑁆𑀙𑀢𑀺, 𑀢𑀁 𑀤𑁂𑀦𑁆𑀢𑀻’’𑀢𑀺, 𑀣𑁂𑀭𑀲𑁆𑀲 𑀘 ‘‘𑀅𑀬𑀫𑁆𑀧𑀺 𑀫𑀳𑀮𑁆𑀮𑀓𑁄 𑀇𑀫𑁂𑀲𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄𑀬𑁂𑀯 𑀘𑀭𑀢𑀺, 𑀓𑀼𑀤𑀸𑀲𑁆𑀲𑀼 𑀦𑀸𑀫 𑀦𑀁 𑀥𑀫𑁆𑀫𑀓𑀫𑁆𑀫𑀺𑀓𑀸 𑀦𑀺𑀓𑁆𑀓𑀟𑁆𑀠𑁂𑀬𑁆𑀬𑀼𑀁, 𑀏𑀯𑀁 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀅𑀳𑀫𑁂𑀯 𑀮𑀸𑀪𑀻 𑀅𑀲𑁆𑀲’’𑀦𑁆𑀢𑀺.

𑀇𑀫𑁂𑀲𑀁 𑀔𑁄, 𑀏𑀢𑀁 𑀆𑀯𑀼𑀲𑁄𑀢𑀺 𑀇𑀫𑁂𑀲𑀁 𑀳𑁂𑀝𑁆𑀞𑀸 𑀏𑀓𑀽𑀦𑀯𑀻𑀲𑀢𑀺𑀯𑀸𑀭𑁂𑀳𑀺 𑀯𑀼𑀢𑁆𑀢𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦𑀁.

𑁬𑁧. 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀽𑀬𑀦𑁆𑀢𑀺 𑀘𑀸𑀢𑀺 𑀦 𑀇𑀘𑁆𑀙𑀸𑀯𑀘𑀭𑀸 𑀘𑀓𑁆𑀔𑀼𑀦𑀸 𑀤𑀺𑀲𑁆𑀲𑀦𑁆𑀢𑀺, 𑀦 𑀲𑁄𑀢𑁂𑀦 𑀲𑀽𑀬𑀦𑁆𑀢𑀺, 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀲𑀬𑀢𑁆𑀢𑀸. 𑀅𑀧𑁆𑀧𑀳𑀻𑀦𑀇𑀘𑁆𑀙𑀸𑀯𑀘𑀭𑀲𑁆𑀲 𑀧𑀦 𑀧𑀼𑀕𑁆𑀕𑀮𑀲𑁆𑀲 𑀇𑀘𑁆𑀙𑀸𑀯𑀘𑀭𑀯𑀲𑁂𑀦 𑀧𑀯𑀢𑁆𑀢𑀓𑀸𑀬𑀓𑀫𑁆𑀫𑀁 𑀤𑀺𑀲𑁆𑀯𑀸 𑀤𑀺𑀝𑁆𑀞𑀸 𑀯𑀺𑀬 𑀯𑀘𑀻𑀓𑀫𑁆𑀫𑀁 𑀲𑀼𑀢𑁆𑀯𑀸 𑀲𑀼𑀢𑀸 𑀯𑀺𑀬 𑀘 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀽𑀬𑀦𑁆𑀢𑀺 𑀘𑀸’’𑀢𑀺. 𑀧𑀘𑁆𑀘𑀓𑁆𑀔𑀓𑀸𑀮𑁂 𑀤𑀺𑀲𑁆𑀲𑀦𑁆𑀢𑀺, ‘‘𑀅𑀲𑀼𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀈𑀤𑀺𑀲𑁄’’𑀢𑀺 𑀢𑀺𑀭𑁄𑀓𑁆𑀔𑀓𑀸𑀮𑁂 𑀲𑀽𑀬𑀦𑁆𑀢𑀺. 𑀓𑀺𑀜𑁆𑀘𑀸𑀧𑀻𑀢𑀺 𑀅𑀦𑀼𑀕𑁆𑀕𑀳𑀕𑀭𑀳𑀯𑀘𑀦𑀁. 𑀢𑁂𑀦 𑀆𑀭𑀜𑁆𑀜𑀺𑀓𑀢𑁆𑀢𑀁 𑀅𑀦𑀼𑀕𑁆𑀕𑀡𑁆𑀳𑀸𑀢𑀺, 𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀧𑁆𑀧𑀳𑀸𑀦𑀁 𑀕𑀭𑀳𑀢𑀺.

𑀢𑀢𑁆𑀭𑀸𑀬𑀁 𑀬𑁄𑀚𑀦𑀸, 𑀓𑀺𑀜𑁆𑀘𑀸𑀧𑀺 𑀲𑁄 𑀪𑀺𑀓𑁆𑀔𑀼 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺, 𑀅𑀦𑁆𑀢𑁂 𑀧𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑀢𑀺, 𑀇𑀫𑁂 𑀘𑀲𑁆𑀲 𑀏𑀢𑁆𑀢𑀓𑀸 𑀇𑀘𑁆𑀙𑀸𑀯𑀘𑀭𑀸 𑀅𑀧𑁆𑀧𑀳𑀻𑀦𑀸. 𑀓𑀺𑀜𑁆𑀘𑀸𑀧𑀺 𑀲𑁄 𑀅𑀢𑀺𑀭𑁂𑀓𑀮𑀸𑀪𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀲𑁄 𑀮𑁄𑀮𑀼𑀧𑁆𑀧𑀘𑀸𑀭𑀁 𑀯𑀚𑁆𑀚𑁂𑀢𑁆𑀯𑀸 𑀲𑀧𑀤𑀸𑀦𑀘𑀸𑀭𑀻 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀲𑁄 𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀺.

𑀮𑀽𑀔𑀘𑀻𑀯𑀭𑀥𑀭𑁄𑀢𑀺 𑀏𑀢𑁆𑀣 𑀧𑀦 𑀮𑀽𑀔𑀦𑁆𑀢𑀺 𑀲𑀢𑁆𑀣𑀮𑀽𑀔𑀁 𑀲𑀼𑀢𑁆𑀢𑀮𑀽𑀔𑀁 𑀭𑀚𑀦𑀮𑀽𑀔𑀦𑁆𑀢𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀮𑀽𑀔𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀲𑀢𑁆𑀣𑁂𑀦 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀦𑀁 𑀲𑀢𑁆𑀣𑀮𑀽𑀔𑀁 𑀦𑀸𑀫, 𑀢𑀁 𑀅𑀕𑁆𑀖𑁂𑀦 𑀧𑀭𑀺𑀳𑀸𑀬𑀢𑀺, 𑀣𑀽𑀮𑀤𑀻𑀖𑀲𑀼𑀢𑁆𑀢𑀓𑁂𑀦 𑀲𑀺𑀩𑁆𑀩𑀺𑀢𑀁 𑀲𑀼𑀢𑁆𑀢𑀮𑀽𑀔𑀁 𑀦𑀸𑀫, 𑀢𑀁 𑀨𑀲𑁆𑀲𑁂𑀦 𑀧𑀭𑀺𑀳𑀸𑀬𑀢𑀺 𑀔𑀭𑀲𑀫𑁆𑀨𑀲𑁆𑀲𑀁 𑀳𑁄𑀢𑀺. 𑀭𑀚𑀦𑁂𑀦 𑀭𑀢𑁆𑀢𑀁 𑀭𑀚𑀦𑀮𑀽𑀔𑀁 𑀦𑀸𑀫, 𑀢𑀁 𑀯𑀡𑁆𑀡𑁂𑀦 𑀧𑀭𑀺𑀳𑀸𑀬𑀢𑀺 𑀤𑀼𑀩𑁆𑀩𑀡𑁆𑀡𑀁 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀲𑁄 𑀪𑀺𑀓𑁆𑀔𑀼 𑀏𑀯𑀁 𑀲𑀢𑁆𑀣𑀮𑀽𑀔𑀲𑀼𑀢𑁆𑀢𑀮𑀽𑀔𑀭𑀚𑀦𑀮𑀽𑀔𑀘𑀻𑀯𑀭𑀥𑀭𑁄 𑀳𑁄𑀢𑀺, 𑀇𑀫𑁂 𑀘𑀲𑁆𑀲 𑀏𑀢𑁆𑀢𑀓𑀸 𑀇𑀘𑁆𑀙𑀸𑀯𑀘𑀭𑀸 𑀅𑀧𑁆𑀧𑀳𑀻𑀦𑀸 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀽𑀬𑀦𑁆𑀢𑀺 𑀘, 𑀅𑀣 𑀔𑁄 𑀦𑀁 𑀯𑀺𑀜𑁆𑀜𑀽 𑀲𑀩𑁆𑀭𑀳𑁆𑀫𑀘𑀸𑀭𑀻 𑀦𑁂𑀯 𑀲𑀓𑁆𑀓𑀭𑁄𑀦𑁆𑀢𑀺…𑀧𑁂… 𑀦 𑀧𑀽𑀚𑁂𑀦𑁆𑀢𑀻𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀓𑀺𑀁 𑀓𑀸𑀭𑀡𑀸. 𑀢𑁂 𑀳𑀺 𑀢𑀲𑁆𑀲…𑀧𑁂… 𑀲𑀽𑀬𑀦𑁆𑀢𑀺 𑀘 𑀬𑀲𑁆𑀫𑀸 𑀢𑀲𑁆𑀲 𑀢𑁂 𑀧𑀸𑀧𑀓𑀸 𑀲𑀽𑀬𑀦𑁆𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑁂𑀲𑀁 𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀼𑀡𑀧𑀦𑁆𑀢𑀺 𑀫𑀢𑀓𑀴𑁂𑀯𑀭𑀁. 𑀅𑀳𑀺𑀲𑁆𑀲 𑀓𑀼𑀡𑀧𑀁 𑀅𑀳𑀺𑀓𑀼𑀡𑀧𑀁. 𑀏𑀯𑀁 𑀇𑀢𑀭𑀸𑀦𑀺. 𑀅𑀢𑀺𑀧𑀝𑀺𑀓𑀽𑀮𑀚𑀺𑀕𑀼𑀘𑁆𑀙𑀦𑀻𑀬𑀪𑀸𑀯𑀢𑁄 𑀘𑁂𑀢𑁆𑀣 𑀇𑀫𑀸𑀦𑁂𑀯 𑀢𑀻𑀡𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀜𑁆𑀜𑁂𑀲𑀜𑁆𑀳𑀺 𑀲𑀲𑀲𑀽𑀓𑀭𑀸𑀤𑀻𑀦𑀁 𑀓𑀼𑀡𑀧𑀁 𑀫𑀦𑀼𑀲𑁆𑀲𑀸 𑀓𑀝𑀼𑀓𑀪𑀡𑁆𑀟𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀧𑀺. 𑀇𑀫𑁂𑀲𑀁 𑀧𑀦 𑀓𑀼𑀡𑀧𑀁 𑀅𑀪𑀺𑀦𑀯𑀫𑁆𑀧𑀺 𑀚𑀺𑀕𑀼𑀘𑁆𑀙𑀦𑁆𑀢𑀺𑀬𑁂𑀯, 𑀓𑁄 𑀧𑀦 𑀯𑀸𑀤𑁄 𑀓𑀸𑀮𑀸𑀢𑀺𑀓𑁆𑀓𑀫𑁂𑀦 𑀧𑀽𑀢𑀺𑀪𑀽𑀢𑁂. 𑀭𑀘𑀬𑀺𑀢𑁆𑀯𑀸𑀢𑀺 𑀯𑀟𑁆𑀠𑁂𑀢𑁆𑀯𑀸, 𑀧𑀭𑀺𑀧𑀽𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀓𑀼𑀡𑀧𑀁 𑀕𑀳𑁂𑀢𑁆𑀯𑀸 𑀓𑀁𑀲𑀧𑀸𑀢𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀺𑀲𑁆𑀲𑀸𑀢𑀺 𑀅𑀧𑀭𑀸𑀬. 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸𑀢𑀺 𑀧𑀺𑀤𑀳𑀺𑀢𑁆𑀯𑀸. 𑀅𑀦𑁆𑀢𑀭𑀸𑀧𑀡𑀦𑁆𑀢𑀺 𑀆𑀧𑀡𑀸𑀦𑀫𑀦𑁆𑀢𑀭𑁂 𑀫𑀳𑀸𑀚𑀦𑀲𑀁𑀓𑀺𑀡𑁆𑀡𑀁 𑀭𑀘𑁆𑀙𑀸𑀫𑀼𑀔𑀁. 𑀧𑀝𑀺𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀕𑀘𑁆𑀙𑁂𑀬𑁆𑀬𑀼𑀁. 𑀚𑀜𑁆𑀜𑀚𑀜𑁆𑀜𑀁 𑀯𑀺𑀬𑀸𑀢𑀺 𑀘𑁄𑀓𑁆𑀔𑀘𑁄𑀓𑁆𑀔𑀁 𑀯𑀺𑀬 𑀫𑀦𑀸𑀧𑀫𑀦𑀸𑀧𑀁 𑀯𑀺𑀬. 𑀅𑀧𑀺𑀘 𑀯𑀥𑀼𑀓𑀸𑀧𑀡𑁆𑀡𑀸𑀓𑀸𑀭𑀁 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀥𑀼𑀓𑀸𑀢𑀺 𑀚𑀦𑁂𑀢𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀸 𑀦𑀻𑀬𑀫𑀸𑀦𑀁 𑀧𑀡𑁆𑀡𑀸𑀓𑀸𑀭𑀁 𑀚𑀜𑁆𑀜𑀁, 𑀉𑀪𑀬𑀢𑁆𑀣𑀸𑀧𑀺 𑀆𑀤𑀭𑀯𑀲𑁂𑀦 𑀯𑀸 𑀧𑀲𑀁𑀲𑀸𑀯𑀲𑁂𑀦 𑀯𑀸 𑀧𑀼𑀦𑀭𑀼𑀢𑁆𑀢𑀁. ‘‘𑀚𑀜𑁆𑀜𑀚𑀜𑁆𑀜𑀁 𑀩𑁆𑀬𑀸’’𑀢𑀺𑀧𑀺 𑀧𑀸𑀞𑁄.

𑀅𑀧𑀸𑀧𑀼𑀭𑀺𑀢𑁆𑀯𑀸𑀢𑀺 𑀯𑀺𑀯𑀭𑀺𑀢𑁆𑀯𑀸. 𑀢𑀲𑁆𑀲 𑀲𑀳 𑀤𑀲𑁆𑀲𑀦𑁂𑀦 𑀅𑀫𑀦𑀸𑀧𑀢𑀸 𑀘 𑀲𑀡𑁆𑀞𑀳𑁂𑀬𑁆𑀬𑀸𑀢𑀺 𑀢𑀲𑁆𑀲 𑀓𑀼𑀡𑀧𑀲𑁆𑀲 𑀤𑀲𑁆𑀲𑀦𑁂𑀦 𑀲𑀳𑁂𑀯 𑀢𑀲𑁆𑀲 𑀚𑀦𑀲𑁆𑀲 𑀅𑀫𑀦𑀸𑀧𑀢𑀸 𑀢𑀺𑀝𑁆𑀞𑁂𑀬𑁆𑀬. 𑀅𑀫𑀦𑀸𑀧𑀢𑀸𑀢𑀺 𑀘 ‘‘𑀅𑀫𑀦𑀸𑀧𑀫𑀺𑀤’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀲 𑀦𑀬𑁄 𑀧𑀝𑀺𑀓𑀼𑀮𑁆𑀬𑀚𑁂𑀕𑀼𑀘𑁆𑀙𑀢𑀸𑀲𑀼. 𑀚𑀺𑀖𑀘𑁆𑀙𑀺𑀢𑀸𑀦𑀫𑁆𑀧𑀻𑀢𑀺 𑀙𑀸𑀢𑀸𑀦𑀫𑁆𑀧𑀺. 𑀦 𑀪𑁄𑀢𑁆𑀢𑀼𑀓𑀫𑁆𑀬𑀢𑀸 𑀅𑀲𑁆𑀲𑀸𑀢𑀺 𑀪𑀼𑀜𑁆𑀚𑀺𑀢𑀼𑀓𑀸𑀫𑀢𑀸 𑀦 𑀪𑀯𑁂𑀬𑁆𑀬. 𑀧𑀕𑁂𑀯 𑀲𑀼𑀳𑀺𑀢𑀸𑀦𑀦𑁆𑀢𑀺 𑀥𑀸𑀢𑀸𑀦𑀁 𑀧𑀦 𑀧𑀞𑀫𑀢𑀭𑀫𑁂𑀯 𑀪𑀼𑀜𑁆𑀚𑀺𑀢𑀼𑀓𑀸𑀫𑀢𑀸 𑀦 𑀪𑀯𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀭𑀸𑀬𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀸 𑁋 𑀧𑀭𑀺𑀲𑀼𑀤𑁆𑀥𑀓𑀁𑀲𑀧𑀸𑀢𑀺𑀲𑀤𑀺𑀲𑀁 𑀇𑀫𑀲𑁆𑀲 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑀁, 𑀓𑀼𑀡𑀧𑀭𑀘𑀦𑀁 𑀯𑀺𑀬 𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀧𑁆𑀧𑀳𑀸𑀦𑀁, 𑀅𑀧𑀭𑀓𑀁𑀲𑀧𑀸𑀢𑀺𑀬𑀸 𑀧𑀝𑀺𑀓𑀼𑀚𑁆𑀛𑀦𑀁 𑀯𑀺𑀬 𑀆𑀭𑀜𑁆𑀜𑀺𑀓𑀗𑁆𑀕𑀸𑀤𑀻𑀳𑀺 𑀇𑀘𑁆𑀙𑀸𑀯𑀘𑀭𑀧𑁆𑀧𑀝𑀺𑀘𑁆𑀙𑀸𑀤𑀦𑀁, 𑀓𑀁𑀲𑀧𑀸𑀢𑀺𑀁 𑀯𑀺𑀯𑀭𑀺𑀢𑁆𑀯𑀸 𑀓𑀼𑀡𑀧𑀤𑀲𑁆𑀲𑀦𑁂𑀦 𑀚𑀦𑀲𑁆𑀲 𑀅𑀫𑀦𑀸𑀧𑀢𑀸 𑀯𑀺𑀬 𑀆𑀭𑀜𑁆𑀜𑀺𑀓𑀗𑁆𑀕𑀸𑀤𑀻𑀦𑀺 𑀅𑀦𑀸𑀤𑀺𑀬𑀺𑀢𑁆𑀯𑀸 𑀇𑀘𑁆𑀙𑀸𑀯𑀘𑀭𑀤𑀲𑁆𑀲𑀦𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀲𑀓𑁆𑀓𑀸𑀭𑀓𑀭𑀡𑀸𑀤𑀺𑀢𑀸𑀢𑀺.

𑁬𑁨. 𑀲𑀼𑀓𑁆𑀓𑀧𑀓𑁆𑀔𑁂 𑀧𑀦, 𑀓𑀺𑀜𑁆𑀘𑀸𑀧𑀻𑀢𑀺 𑀅𑀦𑀼𑀕𑁆𑀕𑀳𑀧𑀲𑀁𑀲𑀸𑀯𑀘𑀦𑀁, 𑀢𑁂𑀦 𑀆𑀭𑀜𑁆𑀜𑀺𑀓𑀢𑁆𑀢𑀁 𑀅𑀦𑀼𑀕𑁆𑀕𑀡𑁆𑀳𑀸𑀢𑀺, 𑀇𑀘𑁆𑀙𑀸𑀯𑀘𑀭𑀧𑁆𑀧𑀳𑀸𑀦𑀁 𑀧𑀲𑀁𑀲𑀢𑀺. 𑀦𑁂𑀫𑀦𑁆𑀢𑀦𑀺𑀓𑁄𑀢𑀺 𑀦𑀺𑀫𑀦𑁆𑀢𑀦𑀧𑀝𑀺𑀕𑁆𑀕𑀸𑀳𑀓𑁄. 𑀯𑀺𑀘𑀺𑀢𑀓𑀸𑀴𑀓𑀦𑁆𑀢𑀺 𑀯𑀺𑀘𑀺𑀦𑀺𑀢𑁆𑀯𑀸 𑀅𑀧𑀦𑀻𑀢𑀓𑀸𑀴𑀓𑀁. 𑀅𑀦𑁂𑀓𑀲𑀽𑀧𑀁 𑀅𑀦𑁂𑀓𑀩𑁆𑀬𑀜𑁆𑀚𑀦𑀦𑁆𑀢𑀺 𑀏𑀢𑁆𑀣 𑀲𑀽𑀧𑁄 𑀦𑀸𑀫 𑀳𑀢𑁆𑀣𑀳𑀸𑀭𑀺𑀬𑁄 𑀯𑀼𑀘𑁆𑀘𑀢𑀺. 𑀩𑁆𑀬𑀜𑁆𑀚𑀦𑀦𑁆𑀢𑀺 𑀉𑀢𑁆𑀢𑀭𑀺𑀪𑀗𑁆𑀕𑀁, 𑀢𑁂𑀦 𑀫𑀘𑁆𑀙𑀫𑀁𑀲𑀫𑀼𑀕𑁆𑀕𑀲𑀽𑀧𑀸𑀤𑀻𑀳𑀺 𑀅𑀦𑁂𑀓𑀲𑀽𑀧𑀁, 𑀦𑀸𑀦𑀧𑁆𑀧𑀓𑀸𑀭𑀫𑀁𑀲𑀸𑀤𑀺𑀩𑁆𑀬𑀜𑁆𑀚𑀦𑁂𑀳𑀺 𑀅𑀦𑁂𑀓𑀩𑁆𑀬𑀜𑁆𑀚𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀫𑀸𑀲𑀁𑀲𑀦𑁆𑀤𑀦𑁂 𑀘 𑀲𑀸𑀮𑀺𑀯𑀭𑀪𑀢𑁆𑀢𑀭𑀘𑀦𑀁 𑀯𑀺𑀬 𑀇𑀘𑁆𑀙𑀸𑀯𑀘𑀭𑀧𑁆𑀧𑀳𑀸𑀦𑀁, 𑀅𑀧𑀭𑀓𑀁𑀲𑀧𑀸𑀢𑀺𑀬𑀸 𑀧𑀝𑀺𑀓𑀼𑀚𑁆𑀛𑀦𑀁 𑀯𑀺𑀬 𑀅𑀧𑁆𑀧𑀺𑀘𑁆𑀙𑀢𑀸𑀲𑀫𑀼𑀝𑁆𑀞𑀸𑀦𑁂𑀳𑀺 𑀕𑀸𑀫𑀦𑁆𑀢𑀯𑀺𑀳𑀸𑀭𑀸𑀤𑀻𑀳𑀺 𑀇𑀘𑁆𑀙𑀸𑀯𑀘𑀭𑀧𑁆𑀧𑀳𑀸𑀦𑀧𑁆𑀧𑀝𑀺𑀘𑁆𑀙𑀸𑀤𑀓𑀁, 𑀓𑀁𑀲𑀧𑀸𑀢𑀺𑀁 𑀯𑀺𑀯𑀭𑀺𑀢𑁆𑀯𑀸 𑀲𑀸𑀮𑀺𑀯𑀭𑀪𑀢𑁆𑀢𑀤𑀲𑁆𑀲𑀦𑁂𑀦 𑀚𑀦𑀲𑁆𑀲 𑀫𑀦𑀸𑀧𑀢𑀸 𑀯𑀺𑀬 𑀕𑀸𑀫𑀦𑁆𑀢𑀯𑀺𑀳𑀸𑀭𑀸𑀤𑀻𑀦𑀺 𑀅𑀦𑀸𑀤𑀺𑀬𑀺𑀢𑁆𑀯𑀸 𑀇𑀘𑁆𑀙𑀸𑀯𑀘𑀭𑀧𑁆𑀧𑀳𑀸𑀦𑀤𑀲𑁆𑀲𑀦𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀓𑁆𑀓𑀸𑀭𑀓𑀭𑀡𑀸𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁬𑁩. 𑀉𑀧𑀫𑀸 𑀫𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀧𑀝𑀺𑀪𑀸𑀢𑀻𑀢𑀺 𑀫𑀬𑁆𑀳𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀉𑀧𑀫𑀸 𑀉𑀧𑀝𑁆𑀞𑀸𑀢𑀺. 𑀏𑀓𑀁 𑀉𑀧𑀫𑀁 𑀯𑀢𑁆𑀢𑀼𑀓𑀸𑀫𑁄 𑀅𑀳𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀪𑀸𑀢𑀼 𑀢𑀦𑁆𑀢𑀺 𑀢𑀼𑀬𑁆𑀳𑀁 𑀧𑀝𑀺𑀪𑀸𑀢𑀼 𑀉𑀧𑀝𑁆𑀞𑀸𑀢𑀼, 𑀯𑀤 𑀢𑁆𑀯𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀓𑀫𑀺𑀤𑀸𑀳𑀦𑁆𑀢𑀺 𑀏𑀢𑁆𑀣 𑀇𑀤𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀅𑀳𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀕𑀺𑀭𑀺𑀩𑁆𑀩𑀚𑁂𑀢𑀺, 𑀭𑀸𑀚𑀕𑀳𑀦𑁆𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀦𑀸𑀫𑀁. 𑀲𑀫𑀦𑁆𑀢𑀢𑁄 𑀧𑀦 𑀕𑀺𑀭𑀺𑀧𑀭𑀺𑀓𑁆𑀔𑁂𑀧𑁂𑀦 𑀯𑀚𑁄 𑀯𑀺𑀬 𑀲𑀡𑁆𑀞𑀺𑀢𑀢𑁆𑀢𑀸 𑀕𑀺𑀭𑀺𑀩𑁆𑀩𑀚𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀦𑀕𑀭𑁂 𑀯𑀺𑀳𑀭𑀸𑀫𑀺, 𑀢𑀁 𑀦𑀺𑀲𑁆𑀲𑀸𑀬 𑀅𑀳𑀁 𑀯𑀺𑀳𑀭𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀔𑁆𑀯𑀸𑀳𑀦𑁆𑀢𑀺 𑀅𑀣 𑀔𑁄 𑀅𑀳𑀁. 𑀏𑀢𑁆𑀣 𑀘 𑀅𑀣𑀸𑀢𑀺 𑀅𑀜𑁆𑀜𑀸𑀥𑀺𑀓𑀸𑀭𑀯𑀘𑀦𑀸𑀭𑀫𑁆𑀪𑁂 𑀦𑀺𑀧𑀸𑀢𑁄. 𑀔𑁄𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂. 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀤𑀺𑀯𑀲𑀲𑁆𑀲 𑀧𑀼𑀩𑁆𑀩𑀪𑀸𑀕𑀲𑀫𑀬𑀁. 𑀧𑀼𑀩𑁆𑀩𑀡𑁆𑀳𑀲𑀫𑀬𑁂𑀢𑀺 𑀅𑀢𑁆𑀣𑁄, 𑀧𑀼𑀩𑁆𑀩𑀡𑁆𑀳𑁂 𑀯𑀸 𑀲𑀫𑀬𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁, 𑀧𑀼𑀩𑁆𑀩𑀡𑁆𑀳𑁂 𑀏𑀓𑀁 𑀔𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁 𑀮𑀩𑁆𑀪𑀢𑀺. 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀧𑀭𑀺𑀤𑀳𑀺𑀢𑁆𑀯𑀸, 𑀯𑀺𑀳𑀸𑀭𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀯𑀲𑁂𑀦𑁂𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀕𑀸𑀫𑀧𑁆𑀧𑀯𑁂𑀲𑀦𑀢𑁆𑀣𑀸𑀬 𑀯𑀸 𑀲𑀡𑁆𑀞𑀧𑁂𑀢𑁆𑀯𑀸 𑀦𑀺𑀯𑀸𑀲𑀦𑀯𑀲𑁂𑀦, 𑀦 𑀳𑀺 𑀲𑁄 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀺𑀯𑀢𑁆𑀣𑁄 𑀅𑀳𑁄𑀲𑀺.

𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬𑀸𑀢𑀺 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀓𑀸𑀬𑁂𑀦 𑀆𑀤𑀺𑀬𑀺𑀢𑁆𑀯𑀸. 𑀧𑀺𑀡𑁆𑀟𑀸𑀬𑀸𑀢𑀺 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬. 𑀲𑀫𑀻𑀢𑀻𑀢𑀺 𑀢𑀲𑁆𑀲 𑀦𑀸𑀫𑀁. 𑀬𑀸𑀦𑀓𑀸𑀭𑀧𑀼𑀢𑁆𑀢𑁄𑀢𑀺 𑀭𑀣𑀓𑀸𑀭𑀧𑀼𑀢𑁆𑀢𑁄. 𑀧𑀡𑁆𑀟𑀼𑀧𑀼𑀢𑁆𑀢𑁄𑀢𑀺 𑀧𑀡𑁆𑀟𑀼𑀲𑁆𑀲 𑀧𑀼𑀢𑁆𑀢𑁄. 𑀆𑀚𑀻𑀯𑀓𑁄𑀢𑀺 𑀦𑀕𑁆𑀕𑀲𑀫𑀡𑀓𑁄. 𑀧𑀼𑀭𑀸𑀡𑀬𑀸𑀦𑀓𑀸𑀭𑀧𑀼𑀢𑁆𑀢𑁄𑀢𑀺 𑀧𑁄𑀭𑀸𑀡𑀬𑀸𑀦𑀓𑀸𑀭𑀓𑀼𑀮𑀲𑁆𑀲 𑀧𑀼𑀢𑁆𑀢𑁄. 𑀧𑀘𑁆𑀘𑀼𑀧𑀝𑁆𑀞𑀺𑀢𑁄𑀢𑀺 𑀉𑀧𑀕𑀦𑁆𑀢𑁆𑀯𑀸 𑀞𑀺𑀢𑁄. 𑀯𑀗𑁆𑀓𑀁 𑀦𑀸𑀫 𑀏𑀓𑀢𑁄 𑀓𑀼𑀝𑀺𑀮𑀁. 𑀚𑀺𑀫𑁆𑀳𑀁 𑀦𑀸𑀫 𑀲𑀧𑁆𑀧𑀕𑀢𑀫𑀕𑁆𑀕𑀲𑀤𑀺𑀲𑀁. 𑀤𑁄𑀲𑀦𑁆𑀢𑀺 𑀨𑁂𑀕𑁆𑀕𑀼𑀯𑀺𑀲𑀫𑀕𑀡𑁆𑀞𑀺𑀓𑀸𑀤𑀺. 𑀬𑀣𑀸 𑀬𑀣𑀸𑀢𑀺 𑀓𑀸𑀮𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀤𑀸 𑀬𑀤𑀸 𑀬𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀢𑀣𑀸𑀢𑀺 𑀅𑀬𑀫𑁆𑀧𑀺 𑀓𑀸𑀮𑀢𑁆𑀣𑁄𑀬𑁂𑀯, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀅𑀢𑁆𑀢𑀦𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑁂𑀦 𑀘𑀺𑀦𑁆𑀢𑁂𑀲𑀺, 𑀇𑀢𑀭𑁄 𑀢𑁂𑀦 𑀘𑀺𑀦𑁆𑀢𑀺𑀢𑀓𑁆𑀔𑀡𑁂 𑀘𑀺𑀦𑁆𑀢𑀺𑀢𑀝𑁆𑀞𑀸𑀦𑀫𑁂𑀯 𑀢𑀘𑁆𑀙𑀢𑀺. 𑀅𑀢𑁆𑀢𑀫𑀦𑁄𑀢𑀺 𑀲𑀓𑀫𑀦𑁄 𑀢𑀼𑀝𑁆𑀞𑀫𑀦𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀳𑀺 𑀕𑀳𑀺𑀢𑀫𑀦𑁄. 𑀅𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀻𑀢𑀺 𑀅𑀢𑁆𑀢𑀫𑀦𑀢𑀸𑀬 𑀯𑀸𑀘𑀁, 𑀅𑀢𑁆𑀢𑀫𑀦𑀪𑀸𑀯𑀲𑁆𑀲 𑀯𑀸 𑀬𑀼𑀢𑁆𑀢𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺 𑀉𑀤𑀻𑀭𑀬𑀺, 𑀧𑀩𑁆𑀬𑀸𑀳𑀭𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀤𑀬𑀸 𑀳𑀤𑀬𑀁 𑀫𑀜𑁆𑀜𑁂 𑀅𑀜𑁆𑀜𑀸𑀬𑀸𑀢𑀺 𑀘𑀺𑀢𑁆𑀢𑁂𑀦 𑀘𑀺𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀯𑀺𑀬.

𑀅𑀲𑁆𑀲𑀤𑁆𑀥𑀸𑀢𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑁂𑀲𑀼 𑀲𑀤𑁆𑀥𑀸𑀯𑀺𑀭𑀳𑀺𑀢𑀸. 𑀚𑀻𑀯𑀺𑀓𑀢𑁆𑀣𑀸𑀢𑀺 𑀇𑀡𑀪𑀬𑀸𑀤𑀻𑀳𑀺 𑀧𑀻𑀴𑀺𑀢𑀸 𑀩𑀳𑀺 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀇𑀥 𑀚𑀻𑀯𑀺𑀓𑀢𑁆𑀣𑀺𑀓𑀸 𑀳𑀼𑀢𑁆𑀯𑀸. 𑀦 𑀲𑀤𑁆𑀥𑀸𑀢𑀺 𑀦 𑀲𑀤𑁆𑀥𑀸𑀬. 𑀲𑀞𑀸 𑀫𑀸𑀬𑀸𑀯𑀺𑀦𑁄𑀢𑀺 𑀫𑀸𑀬𑀸𑀲𑀸𑀞𑁂𑀬𑁆𑀬𑁂𑀳𑀺 𑀬𑀼𑀢𑁆𑀢𑀸. 𑀓𑁂𑀢𑀩𑀺𑀦𑁄𑀢𑀺 𑀲𑀺𑀓𑁆𑀔𑀺𑀢𑀓𑁂𑀭𑀸𑀝𑀺𑀓𑀸, 𑀦𑀺𑀧𑁆𑀨𑀦𑁆𑀦𑀣𑀸𑀫𑀕𑀢𑀲𑀸𑀞𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀞𑁂𑀬𑁆𑀬𑀜𑁆𑀳𑀺 𑀅𑀪𑀽𑀢𑀕𑀼𑀡𑀤𑀲𑁆𑀲𑀦𑀢𑁄 𑀅𑀪𑀽𑀢𑀪𑀡𑁆𑀟𑀕𑀼𑀡𑀤𑀲𑁆𑀲𑀦𑀲𑀫𑀁 𑀓𑀢𑁆𑀯𑀸 ‘‘𑀓𑁂𑀭𑀸𑀝𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀦𑁆𑀦𑀴𑀸𑀢𑀺 𑀉𑀕𑁆𑀕𑀢𑀦𑀴𑀸, 𑀉𑀝𑁆𑀞𑀺𑀢𑀢𑀼𑀘𑁆𑀙𑀫𑀸𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀧𑀮𑀸𑀢𑀺 𑀧𑀢𑁆𑀢𑀘𑀻𑀯𑀭𑀫𑀡𑁆𑀟𑀦𑀸𑀤𑀺𑀦𑀸 𑀘𑀸𑀧𑀮𑁆𑀮𑁂𑀦 𑀬𑀼𑀢𑁆𑀢𑀸. 𑀫𑀼𑀔𑀭𑀸𑀢𑀺 𑀫𑀼𑀔𑀔𑀭𑀸, 𑀔𑀭𑀯𑀘𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀯𑀺𑀓𑀺𑀡𑁆𑀡𑀯𑀸𑀘𑀸𑀢𑀺 𑀅𑀲𑀁𑀬𑀢𑀯𑀘𑀦𑀸, 𑀤𑀺𑀯𑀲𑀫𑁆𑀧𑀺 𑀦𑀺𑀭𑀢𑁆𑀣𑀓𑀯𑀘𑀦𑀧𑁆𑀧𑀮𑀸𑀧𑀺𑀦𑁄. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀸𑀢𑀺 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀲𑀁𑀯𑀼𑀢𑀓𑀫𑁆𑀫𑀤𑁆𑀯𑀸𑀭𑀸. 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀦𑁄𑀢𑀺 𑀪𑁄𑀚𑀦𑁂 𑀬𑀸 𑀫𑀢𑁆𑀢𑀸 𑀚𑀸𑀦𑀺𑀢𑀩𑁆𑀩𑀸 𑀧𑀭𑀺𑀬𑁂𑀲𑀦𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑁂𑀲𑀼 𑀬𑀼𑀢𑁆𑀢𑀢𑀸, 𑀢𑀲𑁆𑀲𑀸 𑀅𑀚𑀸𑀦𑀦𑀓𑀸. 𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑀸𑀢𑀺 𑀚𑀸𑀕𑀭𑁂 𑀅𑀦𑀦𑀼𑀬𑀼𑀢𑁆𑀢𑀸. 𑀲𑀸𑀫𑀜𑁆𑀜𑁂 𑀅𑀦𑀧𑁂𑀓𑁆𑀔𑀯𑀦𑁆𑀢𑁄𑀢𑀺 𑀲𑀫𑀡𑀥𑀫𑁆𑀫𑁂 𑀦𑀺𑀭𑀧𑁂𑀓𑁆𑀔𑀸, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀲𑀺𑀓𑁆𑀔𑀸𑀬 𑀦 𑀢𑀺𑀩𑁆𑀩𑀕𑀸𑀭𑀯𑀸𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀩𑀳𑀼𑀮𑀕𑀸𑀭𑀯𑀸 𑀦 𑀳𑁄𑀦𑁆𑀢𑀺, 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀩𑀳𑀼𑀮𑀸 𑀯𑀸. 𑀩𑀸𑀳𑀼𑀮𑀺𑀓𑀸𑀢𑀺𑀆𑀤𑀺 𑀥𑀫𑁆𑀫𑀤𑀸𑀬𑀸𑀤𑁂 𑀯𑀼𑀢𑁆𑀢𑀁, 𑀓𑀼𑀲𑀻𑀢𑀸𑀢𑀺𑀆𑀤𑀺 𑀪𑀬𑀪𑁂𑀭𑀯𑁂. 𑀥𑀫𑁆𑀫𑀧𑀭𑀺𑀬𑀸𑀬𑁂𑀦𑀸𑀢𑀺 𑀥𑀫𑁆𑀫𑀤𑁂𑀲𑀦𑀸𑀬.

𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸𑀢𑀺 𑀧𑀓𑀢𑀺𑀬𑀸𑀧𑀺 𑀲𑀤𑁆𑀥𑀸, 𑀧𑀩𑁆𑀩𑀚𑀺𑀢𑀸𑀧𑀺 𑀲𑀤𑁆𑀥𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸. 𑀧𑀺𑀯𑀦𑁆𑀢𑀺 𑀫𑀜𑁆𑀜𑁂 𑀖𑀲𑀦𑁆𑀢𑀺 𑀫𑀜𑁆𑀜𑁂𑀢𑀺 𑀧𑀺𑀯𑀦𑁆𑀢𑀺 𑀯𑀺𑀬 𑀖𑀲𑀦𑁆𑀢𑀺 𑀯𑀺𑀬. 𑀅𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑀸 𑀯𑀘𑀲𑀸 𑀧𑀺𑀯𑀦𑁆𑀢𑀺 𑀯𑀺𑀬, 𑀅𑀩𑁆𑀪𑀦𑀼𑀫𑁄𑀤𑀦𑁆𑀢𑀸 𑀫𑀦𑀲𑀸 𑀖𑀲𑀦𑁆𑀢𑀺 𑀯𑀺𑀬. 𑀲𑀸𑀥𑀼 𑀯𑀢𑀸𑀢𑀺 𑀲𑀼𑀦𑁆𑀤𑀭𑀁 𑀯𑀢. 𑀲𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀭𑀲𑁆𑀲𑀫𑁆𑀧𑀺 𑀯𑀝𑁆𑀝𑀢𑀺 𑀤𑀻𑀖𑀫𑁆𑀧𑀺. 𑀭𑀲𑁆𑀲𑁂 𑀲𑀢𑀺 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀉𑀧𑀭𑀺 𑀳𑁄𑀢𑀺, 𑀤𑀻𑀖𑁂 𑀲𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀬𑀤𑀸 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀉𑀧𑀭𑀺 𑀳𑁄𑀢𑀺, 𑀢𑀤𑀸 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀸𑀭𑀺𑀧𑀼𑀢𑁆𑀢𑁄 𑀅𑀫𑁆𑀳𑁂 𑀅𑀓𑀼𑀲𑀮𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀤𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀢𑀤𑀸 𑀲𑀩𑁆𑀭𑀳𑁆𑀫𑀘𑀸𑀭𑀬𑁄 𑀅𑀓𑀼𑀲𑀮𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀳𑀭𑁄𑀢𑀺 𑀢𑀭𑀼𑀡𑁄. 𑀬𑀼𑀯𑀸𑀢𑀺 𑀬𑁄𑀩𑁆𑀩𑀦𑀪𑀸𑀯𑁂 𑀞𑀺𑀢𑁄. 𑀫𑀡𑁆𑀟𑀦𑀓𑀚𑀸𑀢𑀺𑀓𑁄𑀢𑀺 𑀅𑀮𑀗𑁆𑀓𑀸𑀭𑀓𑀲𑀪𑀸𑀯𑁄. 𑀢𑀢𑁆𑀣 𑀓𑁄𑀘𑀺 𑀢𑀭𑀼𑀡𑁄𑀧𑀺 𑀬𑀼𑀯𑀸 𑀦 𑀳𑁄𑀢𑀺 𑀬𑀣𑀸 𑀅𑀢𑀺𑀢𑀭𑀼𑀡𑁄, 𑀓𑁄𑀘𑀺 𑀬𑀼𑀯𑀸𑀧𑀺 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀦 𑀳𑁄𑀢𑀺 𑀬𑀣𑀸 𑀉𑀧𑀲𑀦𑁆𑀢𑀲𑀪𑀸𑀯𑁄, 𑀆𑀮𑀲𑀺𑀬𑀩𑁆𑀬𑀲𑀦𑀸𑀤𑀻𑀳𑀺 𑀯𑀸 𑀅𑀪𑀺𑀪𑀽𑀢𑁄, 𑀇𑀥 𑀧𑀦 𑀤𑀳𑀭𑁄 𑀘𑁂𑀯 𑀬𑀼𑀯𑀸 𑀘 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀘 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀏𑀯𑀫𑀸𑀳. 𑀉𑀧𑁆𑀧𑀮𑀸𑀤𑀻𑀦𑀺 𑀮𑁄𑀓𑀲𑀫𑁆𑀫𑀢𑀢𑁆𑀢𑀸 𑀯𑀼𑀢𑁆𑀢𑀸𑀦𑀺. 𑀇𑀢𑀺𑀳 𑀢𑁂𑀢𑀺 𑀏𑀯𑀁 𑀢𑁂. 𑀉𑀪𑁄 𑀫𑀳𑀸𑀦𑀸𑀕𑀸𑀢𑀺 𑀤𑁆𑀯𑁂𑀧𑀺 𑀫𑀳𑀸𑀦𑀸𑀕𑀸, 𑀤𑁆𑀯𑁂𑀧𑀺 𑀳𑀺 𑀏𑀢𑁂 𑀅𑀕𑁆𑀕𑀲𑀸𑀯𑀓𑀸 ‘‘𑀫𑀳𑀸𑀦𑀸𑀕𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄, 𑀙𑀦𑁆𑀤𑀸𑀤𑀻𑀳𑀺 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀦𑀸𑀕𑀸, 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑁂 𑀓𑀺𑀮𑁂𑀲𑁂 𑀦 𑀆𑀕𑀘𑁆𑀙𑀦𑁆𑀢𑀻𑀢𑀺 𑀦𑀸𑀕𑀸, 𑀦𑀸𑀦𑀧𑁆𑀧𑀓𑀸𑀭𑀓𑀁 𑀆𑀕𑀼𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀦𑀸𑀕𑀸, 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁮𑁦) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑁋

‘‘𑀆𑀕𑀼𑀁 𑀦 𑀓𑀭𑁄𑀢𑀺 𑀓𑀺𑀜𑁆𑀘𑀺 𑀮𑁄𑀓𑁂,

𑀲𑀩𑁆𑀩𑀲𑀁𑀬𑁄𑀕𑁂 𑀯𑀺𑀲𑀚𑁆𑀚 𑀩𑀦𑁆𑀥𑀦𑀸𑀦𑀺;

𑀲𑀩𑁆𑀩𑀢𑁆𑀣 𑀦 𑀲𑀚𑁆𑀚𑀢𑀻 𑀯𑀺𑀫𑀼𑀢𑁆𑀢𑁄,

𑀦𑀸𑀕𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸’’𑀢𑀺. (𑀲𑀼. 𑀦𑀺. 𑁫𑁨𑁭; 𑀫𑀳𑀸𑀦𑀺. 𑁮𑁦);

𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀦𑁆𑀢𑀸 𑀦𑀸𑀕𑀸 𑀫𑀳𑀸𑀦𑀸𑀕𑀸, 𑀅𑀜𑁆𑀜𑁂𑀳𑀺 𑀔𑀻𑀡𑀸𑀲𑀯𑀦𑀸𑀕𑁂𑀳𑀺 𑀧𑀼𑀚𑁆𑀚𑀢𑀭𑀸 𑀘 𑀧𑀸𑀲𑀁𑀲𑀢𑀭𑀸 𑀘𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀫𑀜𑁆𑀜𑀲𑁆𑀲𑀸𑀢𑀺 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲. 𑀲𑀫𑀦𑀼𑀫𑁄𑀤𑀺𑀁𑀲𑀽𑀢𑀺 𑀲𑀫𑀁 𑀅𑀦𑀼𑀫𑁄𑀤𑀺𑀁𑀲𑀼. 𑀢𑀢𑁆𑀣 𑀇𑀫𑀸𑀬 𑀉𑀧𑀫𑀸𑀬 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀅𑀦𑀼𑀫𑁄𑀤𑀺, 𑀧𑀝𑀺𑀪𑀸𑀢𑀼 𑀢𑀁 𑀆𑀯𑀼𑀲𑁄𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀫𑀦𑀼𑀫𑁄𑀤𑀺𑀁𑀲𑀽’’𑀢𑀺.

𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀤𑁂𑀲𑀦𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀦𑀗𑁆𑀕𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.