𑁩. 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀦𑀺𑀓𑁆𑀔𑁂𑀧𑁄, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑁆𑀯𑀸 𑀯𑀲𑁆𑀲 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫. 𑀓𑀢𑀭𑀸𑀬 𑀘 𑀧𑀦𑀺𑀤𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺. 𑀮𑀸𑀪𑀲𑀓𑁆𑀓𑀸𑀭𑁂. 𑀪𑀕𑀯𑀢𑁄 𑀓𑀺𑀭 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀬𑀣𑀸 𑀢𑀁 𑀘𑀢𑁆𑀢𑀸𑀭𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀧𑀽𑀭𑀺𑀢𑀤𑀸𑀦𑀧𑀸𑀭𑀫𑀻𑀲𑀜𑁆𑀘𑀬𑀲𑁆𑀲. 𑀲𑀩𑁆𑀩𑀤𑀺𑀲𑀸𑀲𑀼 𑀬𑀫𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀳𑁄𑀖𑀁 𑀯𑀺𑀬 𑀲𑀩𑁆𑀩𑀧𑀸𑀭𑀫𑀺𑀬𑁄 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑀲𑁆𑀲𑀸𑀫𑀸𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑀸 𑀯𑀺𑀬 𑀮𑀸𑀪𑀲𑀓𑁆𑀓𑀸𑀭𑀫𑀳𑁄𑀖𑀁 𑀦𑀺𑀩𑁆𑀩𑀢𑁆𑀢𑀬𑀺𑀁𑀲𑀼. 𑀢𑀢𑁄 𑀢𑀢𑁄 𑀅𑀦𑁆𑀦𑀧𑀸𑀦𑀬𑀸𑀦𑀯𑀢𑁆𑀣𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀳𑀢𑁆𑀣𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀆𑀕𑀦𑁆𑀢𑁆𑀯𑀸 𑁋 ‘‘𑀓𑀳𑀁 𑀩𑀼𑀤𑁆𑀥𑁄, 𑀓𑀳𑀁 𑀪𑀕𑀯𑀸, 𑀓𑀳𑀁 𑀤𑁂𑀯𑀤𑁂𑀯𑁄, 𑀦𑀭𑀸𑀲𑀪𑁄, 𑀧𑀼𑀭𑀺𑀲𑀲𑀻𑀳𑁄’’𑀢𑀺 𑀪𑀕𑀯𑀦𑁆𑀢𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀲𑀓𑀝𑀲𑀢𑁂𑀳𑀺𑀧𑀺 𑀧𑀘𑁆𑀘𑀬𑁂 𑀆𑀳𑀭𑀺𑀢𑁆𑀯𑀸 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀲𑀫𑀦𑁆𑀢𑀸 𑀕𑀸𑀯𑀼𑀢𑀧𑁆𑀧𑀫𑀸𑀡𑀫𑁆𑀧𑀺 𑀲𑀓𑀝𑀥𑀼𑀭𑁂𑀦 𑀲𑀓𑀝𑀥𑀼𑀭𑀫𑀸𑀳𑀘𑁆𑀘𑀢𑀺𑀝𑁆𑀞𑀦𑁆𑀢𑀺 𑀘𑁂𑀯 𑀅𑀦𑀼𑀩𑀦𑁆𑀥𑀦𑁆𑀢𑀺 𑀘. 𑀅𑀦𑁆𑀥𑀓𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀯𑀺𑀬. 𑀲𑀩𑁆𑀩𑀁 𑀔𑀦𑁆𑀥𑀓𑁂 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀘 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘 𑀪𑀕𑀯𑀢𑁄, 𑀏𑀯𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸𑀧𑀺.

𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁, 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀔𑁄 𑀲𑀓𑁆𑀓𑀢𑁄 𑀳𑁄𑀢𑀺…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 (𑀉𑀤𑀸. 𑁧𑁪). 𑀢𑀣𑀸 𑁋 ‘‘𑀬𑀸𑀯𑀢𑀸 𑀔𑁄, 𑀘𑀼𑀦𑁆𑀤, 𑀏𑀢𑀭𑀳𑀺 𑀲𑀗𑁆𑀖𑁄 𑀯𑀸 𑀕𑀡𑁄 𑀯𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀦𑀸𑀳𑀁, 𑀘𑀼𑀦𑁆𑀤, 𑀅𑀜𑁆𑀜𑀁 𑀏𑀓𑀲𑀗𑁆𑀖𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀏𑀯𑀁 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑀢𑁆𑀢𑀁, 𑀬𑀣𑀭𑀺𑀯, 𑀘𑀼𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 (𑀤𑀻. 𑀦𑀺. 𑁩.𑁧𑁭𑁬).

𑀲𑁆𑀯𑀸𑀬𑀁 𑀪𑀕𑀯𑀢𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀉𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀤𑀻𑀦𑀁 𑀉𑀤𑀓𑀫𑀺𑀯 𑀅𑀧𑁆𑀧𑀫𑁂𑀬𑁆𑀬𑁄 𑀅𑀳𑁄𑀲𑀺. 𑀓𑀫𑁂𑀦 𑀪𑀺𑀓𑁆𑀔𑀽 𑀧𑀘𑁆𑀘𑀬𑀕𑀭𑀼𑀓𑀸 𑀧𑀘𑁆𑀘𑀬𑀩𑀸𑀳𑀼𑀮𑀺𑀓𑀸 𑀅𑀳𑁂𑀲𑀼𑀁. 𑀧𑀘𑁆𑀙𑀸𑀪𑀢𑁆𑀢𑀫𑁆𑀧𑀺 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀲𑀼 𑀆𑀳𑀝𑁂𑀲𑀼 𑀕𑀡𑁆𑀟𑀺𑀁𑀬𑁂𑀯 𑀧𑀳𑀭𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀤𑁂𑀣, 𑀉𑀧𑀚𑁆𑀛𑀸𑀬𑀲𑁆𑀲 𑀤𑁂𑀣𑀸’’𑀢𑀺 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀲𑀸 𑀘 𑀦𑁂𑀲𑀁 𑀧𑀯𑀢𑁆𑀢𑀺 𑀪𑀕𑀯𑀢𑁄𑀧𑀺 𑀧𑀸𑀓𑀝𑀸 𑀅𑀳𑁄𑀲𑀺. 𑀢𑀢𑁄 𑀪𑀕𑀯𑀸 𑀅𑀦𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀥𑀫𑁆𑀫𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋

‘‘𑀧𑀘𑁆𑀘𑀬𑀸 𑀅𑀓𑀧𑁆𑀧𑀺𑀬𑀸𑀢𑀺 𑀦 𑀲𑀓𑁆𑀓𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀼𑀁. 𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀸 𑀳𑀺 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀫𑀡𑀥𑀫𑁆𑀫𑀯𑀼𑀢𑁆𑀢𑀺. 𑀳𑀦𑁆𑀤𑀸𑀳𑀁 𑀥𑀫𑁆𑀫𑀤𑀸𑀬𑀸𑀤𑀧𑀝𑀺𑀧𑀤𑀁 𑀤𑁂𑀲𑁂𑀫𑀺. 𑀲𑀸 𑀲𑀺𑀓𑁆𑀔𑀸𑀓𑀸𑀫𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺 𑀯𑀺𑀬 𑀪𑀯𑀺𑀲𑁆𑀲𑀢𑀺 𑀦𑀕𑀭𑀤𑁆𑀯𑀸𑀭𑁂 𑀞𑀧𑀺𑀢𑀲𑀩𑁆𑀩𑀓𑀸𑀬𑀺𑀓𑀆𑀤𑀸𑀲𑁄 𑀯𑀺𑀬 𑀘, 𑀬𑀣𑀸 𑀳𑀺 𑀦𑀕𑀭𑀤𑁆𑀯𑀸𑀭𑁂 𑀞𑀧𑀺𑀢𑁂 𑀲𑀩𑁆𑀩𑀓𑀸𑀬𑀺𑀓𑁂 𑀆𑀤𑀸𑀲𑁂 𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑀅𑀢𑁆𑀢𑀦𑁄 𑀙𑀸𑀬𑀁 𑀤𑀺𑀲𑁆𑀯𑀸 𑀯𑀚𑁆𑀚𑀁 𑀧𑀳𑀸𑀬 𑀦𑀺𑀤𑁆𑀤𑁄𑀲𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀲𑀺𑀓𑁆𑀔𑀸𑀓𑀸𑀫𑀸 𑀓𑀼𑀮𑀧𑀼𑀢𑁆𑀢𑀸 𑀧𑀬𑁄𑀕𑀫𑀡𑁆𑀟𑀦𑁂𑀦 𑀅𑀢𑁆𑀢𑀸𑀦𑀁 𑀫𑀡𑁆𑀟𑁂𑀢𑀼𑀓𑀸𑀫𑀸 𑀇𑀫𑀁 𑀲𑀩𑁆𑀩𑀓𑀸𑀬𑀺𑀓𑀸𑀤𑀸𑀲𑀽𑀧𑀫𑀁 𑀤𑁂𑀲𑀦𑀁 𑀆𑀯𑀚𑁆𑀚𑀺𑀢𑁆𑀯𑀸 𑀆𑀫𑀺𑀲𑀤𑀸𑀬𑀸𑀤𑀧𑀝𑀺𑀧𑀤𑀁 𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑀤𑀸𑀬𑀸𑀤𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑀸 𑀔𑀺𑀧𑁆𑀧𑀫𑁂𑀯 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀇𑀤𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺.

𑀢𑀢𑁆𑀣 𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸𑀢𑀺 𑀥𑀫𑁆𑀫𑀲𑁆𑀲 𑀫𑁂 𑀤𑀸𑀬𑀸𑀤𑀸, 𑀪𑀺𑀓𑁆𑀔𑀯𑁂, 𑀪𑀯𑀣, 𑀫𑀸 𑀆𑀫𑀺𑀲𑀲𑁆𑀲. 𑀬𑁄 𑀫𑀬𑁆𑀳𑀁 𑀥𑀫𑁆𑀫𑁄, 𑀢𑀲𑁆𑀲 𑀧𑀝𑀺𑀕𑁆𑀕𑀸𑀳𑀓𑀸 𑀪𑀯𑀣, 𑀬𑀜𑁆𑀘 𑀔𑁄 𑀫𑀬𑁆𑀳𑀁 𑀆𑀫𑀺𑀲𑀁, 𑀢𑀲𑁆𑀲 𑀫𑀸 𑀧𑀝𑀺𑀕𑁆𑀕𑀸𑀳𑀓𑀸 𑀪𑀯𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀥𑀫𑁆𑀫𑁄𑀧𑀺 𑀤𑀼𑀯𑀺𑀥𑁄 𑁋 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄, 𑀧𑀭𑀺𑀬𑀸𑀬𑀥𑀫𑁆𑀫𑁄𑀢𑀺. 𑀆𑀫𑀺𑀲𑀫𑁆𑀧𑀺 𑀤𑀼𑀯𑀺𑀥𑀁 𑁋 𑀦𑀺𑀧𑁆𑀧𑀭𑀺𑀬𑀸𑀬𑀸𑀫𑀺𑀲𑀁, 𑀧𑀭𑀺𑀬𑀸𑀬𑀸𑀫𑀺𑀲𑀦𑁆𑀢𑀺. 𑀓𑀣𑀁? 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀪𑁂𑀤𑁄 𑀳𑀺 𑀦𑀯𑀯𑀺𑀥𑁄𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄 𑀦𑀺𑀩𑁆𑀩𑀢𑁆𑀢𑀺𑀢𑀥𑀫𑁆𑀫𑁄, 𑀦 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀓𑀸𑀭𑀡𑁂𑀦 𑀯𑀸 𑀮𑁂𑀲𑁂𑀦 𑀯𑀸 𑀥𑀫𑁆𑀫𑁄. 𑀬𑀁 𑀧𑀦𑀺𑀤𑀁 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀺𑀢𑀁 𑀓𑀼𑀲𑀮𑀁, 𑀲𑁂𑀬𑁆𑀬𑀣𑀺𑀤𑀁, 𑀇𑀥𑁂𑀓𑀘𑁆𑀘𑁄 𑀯𑀺𑀯𑀝𑁆𑀝𑀁 𑀧𑀢𑁆𑀣𑁂𑀦𑁆𑀢𑁄 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀯𑀢𑁆𑀣𑀼𑀧𑀽𑀚𑀁 𑀓𑀭𑁄𑀢𑀺, 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀤𑁂𑀲𑁂𑀢𑀺 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀏𑀯𑀁 𑀓𑀭𑁄𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀧𑀝𑀺𑀮𑀪𑀢𑀺, 𑀅𑀬𑀁 𑀧𑀭𑀺𑀬𑀸𑀬𑀥𑀫𑁆𑀫𑁄. 𑀢𑀣𑀸 𑀘𑀻𑀯𑀭𑀸𑀤𑀬𑁄 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀦𑀺𑀧𑁆𑀧𑀭𑀺𑀬𑀸𑀬𑀸𑀫𑀺𑀲𑀫𑁂𑀯, 𑀦 𑀅𑀜𑁆𑀜𑁂𑀦 𑀧𑀭𑀺𑀬𑀸𑀬𑁂𑀦 𑀓𑀸𑀭𑀡𑁂𑀦 𑀯𑀸 𑀮𑁂𑀲𑁂𑀦 𑀯𑀸 𑀆𑀫𑀺𑀲𑀁. 𑀬𑀁 𑀧𑀦𑀺𑀤𑀁 𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀁, 𑀲𑁂𑀬𑁆𑀬𑀣𑀺𑀤𑀁, 𑀇𑀥𑁂𑀓𑀘𑁆𑀘𑁄 𑀯𑀝𑁆𑀝𑀁 𑀧𑀢𑁆𑀣𑁂𑀦𑁆𑀢𑁄 𑀲𑀫𑁆𑀧𑀢𑁆𑀢𑀺𑀪𑀯𑀁 𑀇𑀘𑁆𑀙𑀫𑀸𑀦𑁄 𑀤𑀸𑀦𑀁 𑀤𑁂𑀢𑀺…𑀧𑁂… 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀏𑀯𑀁 𑀓𑀭𑁄𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀢𑀺, 𑀇𑀤𑀁 𑀧𑀭𑀺𑀬𑀸𑀬𑀸𑀫𑀺𑀲𑀁 𑀦𑀸𑀫.

𑀢𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄𑀧𑀺 𑀪𑀕𑀯𑀢𑁄𑀬𑁂𑀯 𑀲𑀦𑁆𑀢𑀓𑁄. 𑀪𑀕𑀯𑀢𑀸 𑀳𑀺 𑀓𑀣𑀺𑀢𑀢𑁆𑀢𑀸 𑀪𑀺𑀓𑁆𑀔𑀽 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀅𑀥𑀺𑀕𑀘𑁆𑀙𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄. 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸’’𑀢𑀺 (𑀫. 𑀦𑀺. 𑁩.𑁭𑁯) 𑀘 𑁋 ‘‘𑀲𑁄 𑀳𑀸𑀯𑀼𑀲𑁄, 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄’’𑀢𑀺 (𑀫. 𑀦𑀺. 𑁧.𑁨𑁦𑁩) 𑀘. 𑀧𑀭𑀺𑀬𑀸𑀬𑀥𑀫𑁆𑀫𑁄𑀧𑀺 𑀪𑀕𑀯𑀢𑁄𑀬𑁂𑀯 𑀲𑀦𑁆𑀢𑀓𑁄. 𑀪𑀕𑀯𑀢𑀸 𑀳𑀺 𑀓𑀣𑀺𑀢𑀢𑁆𑀢𑀸 𑀏𑀯𑀁 𑀚𑀸𑀦𑀦𑁆𑀢𑀺 ‘‘𑀯𑀺𑀯𑀝𑁆𑀝𑀁 𑀧𑀢𑁆𑀣𑁂𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑁄…𑀧𑁂… 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀧𑀝𑀺𑀮𑀪𑀢𑀻’’𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑀸𑀫𑀺𑀲𑀫𑁆𑀧𑀺 𑀘 𑀪𑀕𑀯𑀢𑁄𑀬𑁂𑀯 𑀲𑀦𑁆𑀢𑀓𑀁. 𑀪𑀕𑀯𑀢𑀸 𑀳𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀬𑁂𑀯 𑀪𑀺𑀓𑁆𑀔𑀽𑀳𑀺 𑀚𑀻𑀯𑀓𑀯𑀢𑁆𑀣𑀼𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀡𑀻𑀢𑀘𑀻𑀯𑀭𑀁 𑀮𑀤𑁆𑀥𑀁. 𑀬𑀣𑀸𑀳 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀳𑀧𑀢𑀺𑀘𑀻𑀯𑀭𑀁. 𑀬𑁄 𑀇𑀘𑁆𑀙𑀢𑀺, 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀼, 𑀬𑁄 𑀇𑀘𑁆𑀙𑀢𑀺, 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀬𑀢𑀼. 𑀇𑀢𑀭𑀻𑀢𑀭𑁂𑀦𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀼𑀝𑁆𑀞𑀺𑀁𑀬𑁂𑀯 𑀯𑀡𑁆𑀡𑁂𑀫𑀻’’𑀢𑀺 (𑀫𑀳𑀸𑀯. 𑁩𑁩𑁭).

𑀧𑀼𑀩𑁆𑀩𑁂 𑀘 𑀪𑀺𑀓𑁆𑀔𑀽 𑀧𑀡𑀻𑀢𑀧𑀺𑀡𑁆𑀟𑀧𑀸𑀢𑀁 𑀦𑀸𑀮𑀢𑁆𑀣𑀼𑀁. 𑀲𑀧𑀤𑀸𑀦𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀸 𑀏𑀯𑀸𑀳𑁂𑀲𑀼𑀁. 𑀢𑁂𑀳𑀺 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁂𑀦 𑀪𑀕𑀯𑀢𑀸 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀁 𑀲𑀮𑀸𑀓𑀪𑀢𑁆𑀢𑀁 𑀧𑀓𑁆𑀔𑀺𑀓𑀁 𑀉𑀧𑁄𑀲𑀣𑀺𑀓𑀁 𑀧𑀸𑀝𑀺𑀧𑀤𑀺𑀓’’𑀦𑁆𑀢𑀺 (𑀘𑀽𑀴𑀯. 𑁩𑁨𑁫) 𑀏𑀯𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀬𑁂𑀯 𑀧𑀡𑀻𑀢𑀪𑁄𑀚𑀦𑀁 𑀮𑀤𑁆𑀥𑀁. 𑀢𑀣𑀸 𑀲𑁂𑀦𑀸𑀲𑀦𑀁. 𑀧𑀼𑀩𑁆𑀩𑁂 𑀳𑀺 𑀅𑀓𑀢𑀧𑀩𑁆𑀪𑀸𑀭𑀭𑀼𑀓𑁆𑀔𑀫𑀽𑀮𑀸𑀤𑀺𑀲𑁂𑀦𑀸𑀲𑀦𑀸𑀬𑁂𑀯 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁. 𑀢𑁂 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀮𑁂𑀡𑀸𑀦𑀻’’𑀢𑀺 (𑀘𑀽𑀴𑀯. 𑁨𑁯𑁪) 𑀏𑀯𑀁 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀬𑁂𑀯 𑀯𑀺𑀳𑀸𑀭𑁄 𑀅𑀟𑁆𑀠𑀬𑁄𑀕𑁄 𑀧𑀸𑀲𑀸𑀤𑁄 𑀳𑀫𑁆𑀫𑀺𑀬𑀁 𑀕𑀼𑀳𑀸𑀢𑀺 𑀇𑀫𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀮𑀪𑀺𑀁𑀲𑀼. 𑀧𑀼𑀩𑁆𑀩𑁂 𑀘 𑀫𑀼𑀢𑁆𑀢𑀳𑀭𑀻𑀢𑀓𑁂𑀦𑁂𑀯 𑀪𑁂𑀲𑀚𑁆𑀚𑀁 𑀅𑀓𑀁𑀲𑀼. 𑀢𑁂 𑀪𑀕𑀯𑀢𑀸𑀬𑁂𑀯 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁, 𑀲𑀧𑁆𑀧𑀺, 𑀦𑀯𑀦𑀻𑀢𑀁, 𑀢𑁂𑀮𑀁, 𑀫𑀥𑀼, 𑀨𑀸𑀡𑀺𑀢’’𑀦𑁆𑀢𑀺 (𑀫𑀳𑀸𑀯. 𑁨𑁬𑁦) 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀦𑀸𑀦𑀸𑀪𑁂𑀲𑀚𑁆𑀚𑀸𑀦𑀺 𑀮𑀪𑀺𑀁𑀲𑀼.

𑀧𑀭𑀺𑀬𑀸𑀬𑀸𑀫𑀺𑀲𑀫𑁆𑀧𑀺 𑀪𑀕𑀯𑀢𑁄𑀬𑁂𑀯 𑀲𑀦𑁆𑀢𑀓𑀁. 𑀪𑀕𑀯𑀢𑀸 𑀳𑀺 𑀓𑀣𑀺𑀢𑀢𑁆𑀢𑀸 𑀬𑁂𑀯 𑀚𑀸𑀦𑀦𑁆𑀢𑀺 𑁋 ‘‘𑀲𑀫𑁆𑀧𑀢𑁆𑀢𑀺𑀪𑀯𑀁 𑀧𑀢𑁆𑀣𑁂𑀦𑁆𑀢𑁄 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁…𑀧𑁂… 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀬𑀸𑀬𑀸𑀫𑀺𑀲𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀢𑀻’’𑀢𑀺. 𑀢𑀤𑁂𑀯, 𑀬𑀲𑁆𑀫𑀸 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄𑀧𑀺 𑀧𑀭𑀺𑀬𑀸𑀬𑀥𑀫𑁆𑀫𑁄𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀸𑀫𑀺𑀲𑀫𑁆𑀧𑀺 𑀧𑀭𑀺𑀬𑀸𑀬𑀸𑀫𑀺𑀲𑀫𑁆𑀧𑀺 𑀪𑀕𑀯𑀢𑁄𑀬𑁂𑀯 𑀲𑀦𑁆𑀢𑀓𑀁, 𑀢𑀲𑁆𑀫𑀸 𑀢𑀢𑁆𑀣 𑀅𑀢𑁆𑀢𑀦𑁄 𑀲𑀸𑀫𑀺𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺.

𑀬𑁄 𑀫𑀬𑁆𑀳𑀁 𑀲𑀦𑁆𑀢𑀓𑁄 𑀤𑀼𑀯𑀺𑀥𑁄𑀧𑀺 𑀥𑀫𑁆𑀫𑁄, 𑀢𑀲𑁆𑀲 𑀤𑀸𑀬𑀸𑀤𑀸 𑀪𑀯𑀣. 𑀬𑀜𑁆𑀘 𑀔𑁄 𑀏𑀢𑀁 𑀫𑀬𑁆𑀳𑀫𑁂𑀯 𑀲𑀦𑁆𑀢𑀓𑀁 𑀆𑀫𑀺𑀲𑀁, 𑀢𑀲𑁆𑀲 𑀤𑀸𑀬𑀸𑀤𑀸 𑀫𑀸 𑀪𑀯𑀣. 𑀥𑀫𑁆𑀫𑀓𑁄𑀝𑁆𑀞𑀸𑀲𑀲𑁆𑀲𑁂𑀯 𑀲𑀸𑀫𑀺𑀦𑁄 𑀪𑀯𑀣, 𑀫𑀸 𑀆𑀫𑀺𑀲𑀓𑁄𑀝𑁆𑀞𑀸𑀲𑀲𑁆𑀲. 𑀬𑁄 𑀳𑀺 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀘𑁆𑀘𑀬𑀧𑀭𑀫𑁄 𑀯𑀺𑀳𑀭𑀢𑀺 𑀘𑀢𑀽𑀲𑀼 𑀢𑀡𑁆𑀳𑀼𑀧𑁆𑀧𑀸𑀤𑁂𑀲𑀼 𑀲𑀦𑁆𑀤𑀺𑀲𑁆𑀲𑀫𑀸𑀦𑁄 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀬𑀁, 𑀅𑀬𑀁 𑀆𑀫𑀺𑀲𑀤𑀸𑀬𑀸𑀤𑁄 𑀦𑀸𑀫. 𑀢𑀸𑀤𑀺𑀲𑀸 𑀫𑀸 𑀪𑀯𑀣. 𑀬𑁄 𑀧𑀦 𑀅𑀦𑀼𑀜𑁆𑀜𑀸𑀢𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀧𑀝𑀺𑀲𑀗𑁆𑀔𑀸 𑀲𑁂𑀯𑀫𑀸𑀦𑁄 𑀧𑀝𑀺𑀧𑀢𑁆𑀢𑀺𑀧𑀭𑀫𑁄 𑀯𑀺𑀳𑀭𑀢𑀺 𑀘𑀢𑀽𑀲𑀼 𑀅𑀭𑀺𑀬𑀯𑀁𑀲𑁂𑀲𑀼 𑀲𑀦𑁆𑀤𑀺𑀲𑁆𑀲𑀫𑀸𑀦𑁄, 𑀅𑀬𑀁 𑀥𑀫𑁆𑀫𑀤𑀸𑀬𑀸𑀤𑁄 𑀦𑀸𑀫. 𑀢𑀸𑀤𑀺𑀲𑀸 𑀪𑀯𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀬𑁂𑀲𑀁 𑀢𑀢𑁆𑀣 𑀏𑀢𑀤𑀳𑁄𑀲𑀺, 𑀪𑀯𑀺𑀲𑁆𑀲𑀢𑀺 𑀯𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀸 𑀲𑀸𑀯𑀓𑀸𑀦𑀁 𑀅𑀮𑀸𑀪𑀢𑁆𑀣𑀺𑀓𑁄 𑀏𑀯𑀫𑀸𑀳𑀸’’𑀢𑀺, 𑀢𑁂𑀲𑀁 𑀅𑀢𑀺𑀧𑀡𑀻𑀢𑀮𑀸𑀪𑀢𑁆𑀣𑀺𑀓𑁄 𑀅𑀳𑀁 𑀏𑀯𑀁 𑀯𑀤𑀸𑀫𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼…𑀧𑁂… 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸𑀢𑀺.

𑀢𑀲𑁆𑀲𑀸𑀬𑀫𑀢𑁆𑀣𑁄 𑁋 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸 𑀅𑀦𑀼𑀤𑁆𑀤𑀬𑀸 𑀳𑀺𑀢𑁂𑀲𑀺𑀢𑀸, 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀓𑁂𑀦 𑀉𑀧𑀸𑀬𑁂𑀦 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀅𑀲𑁆𑀲𑀼 𑀥𑀫𑁆𑀫𑀓𑁄𑀝𑁆𑀞𑀸𑀲𑀲𑀸𑀫𑀺𑀦𑁄, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸𑀢𑀺. 𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑁄, 𑀧𑀲𑁆𑀲𑀢𑀺 𑀓𑀺𑀭 𑀪𑀕𑀯𑀸 𑀆𑀫𑀺𑀲𑀕𑀭𑀼𑀓𑀸𑀦𑀁 𑀆𑀫𑀺𑀲𑁂 𑀉𑀧𑀓𑁆𑀔𑀮𑀺𑀢𑀸𑀦𑀁 𑀅𑀢𑀻𑀢𑀓𑀸𑀮𑁂 𑀢𑀸𑀯 𑀓𑀧𑀺𑀮𑀲𑁆𑀲 𑀪𑀺𑀓𑁆𑀔𑀼𑀦𑁄, ‘‘𑀲𑀗𑁆𑀖𑀸𑀝𑀺𑀧𑀺 𑀆𑀤𑀺𑀢𑁆𑀢𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁩𑁦; 𑀲𑀁. 𑀦𑀺. 𑁨.𑁨𑁧𑁮) 𑀦𑀬𑁂𑀦 𑀆𑀕𑀢𑀧𑀸𑀧𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔𑀫𑀸𑀦𑀸𑀤𑀻𑀦𑀜𑁆𑀘 𑀅𑀦𑁂𑀓𑀲𑀢𑀸𑀦𑀁 𑀅𑀧𑀸𑀬𑀧𑀭𑀺𑀧𑀽𑀭𑀡𑀢𑁆𑀢𑀁 𑀅𑀢𑁆𑀢𑀦𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸𑀦𑀜𑁆𑀘 𑀤𑁂𑀯𑀤𑀢𑁆𑀢𑀸𑀤𑀻𑀦𑀁. 𑀥𑀫𑁆𑀫𑀕𑀭𑀼𑀓𑀸𑀦𑀁 𑀧𑀦 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀫𑀳𑀸𑀓𑀲𑁆𑀲𑀧𑀸𑀤𑀻𑀦𑀁 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀕𑀼𑀡𑀧𑁆𑀧𑀝𑀺𑀮𑀸𑀪𑀁. 𑀢𑀲𑁆𑀫𑀸 𑀢𑁂𑀲𑀁 𑀅𑀧𑀸𑀬𑀸 𑀧𑀭𑀺𑀫𑀼𑀢𑁆𑀢𑀺𑀁 𑀲𑀩𑁆𑀩𑀕𑀼𑀡𑀲𑀫𑁆𑀧𑀢𑁆𑀢𑀺𑀜𑁆𑀘 𑀇𑀘𑁆𑀙𑀦𑁆𑀢𑁄 𑀆𑀳 𑁋 ‘‘𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸 𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀼𑀁, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺. 𑀧𑀘𑁆𑀘𑀬𑀕𑀭𑀼𑀓𑁄 𑀘 𑀘𑀢𑀼𑀧𑀭𑀺𑀲𑀦𑁆𑀢𑀭𑁂 𑀓𑀽𑀝𑀓𑀳𑀸𑀧𑀡𑁄 𑀯𑀺𑀬 𑀦𑀺𑀩𑁆𑀩𑀼𑀢𑀗𑁆𑀕𑀸𑀭𑁄 𑀯𑀺𑀬 𑀘 𑀦𑀺𑀢𑁆𑀢𑁂𑀚𑁄 𑀦𑀺𑀧𑁆𑀧𑀪𑁄 𑀳𑁄𑀢𑀺. 𑀢𑀢𑁄 𑀯𑀺𑀯𑀢𑁆𑀢𑀺𑀢𑀘𑀺𑀢𑁆𑀢𑁄 𑀥𑀫𑁆𑀫𑀕𑀭𑀼𑀓𑁄 𑀢𑁂𑀚𑀯𑀸 𑀲𑀻𑀳𑁄𑀯 𑀅𑀪𑀺𑀪𑀼𑀬𑁆𑀬𑀘𑀸𑀭𑀻, 𑀢𑀲𑁆𑀫𑀸𑀧𑀺 𑀏𑀯𑀫𑀸𑀳 𑁋 ‘‘𑀅𑀢𑁆𑀣𑀺 𑀫𑁂…𑀧𑁂… 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺.

𑀏𑀯𑀁 ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺 𑀇𑀤𑀁 𑀅𑀦𑀼𑀓𑀫𑁆𑀧𑀸𑀬 𑀧𑀡𑀻𑀢𑀢𑀭𑀁 𑀮𑀸𑀪𑀁 𑀇𑀘𑁆𑀙𑀦𑁆𑀢𑁂𑀦 𑀯𑀼𑀢𑁆𑀢𑀁, 𑀦𑁄 𑀅𑀮𑀸𑀪𑀢𑁆𑀣𑀺𑀓𑁂𑀦𑀸𑀢𑀺 𑀲𑀸𑀯𑁂𑀢𑁆𑀯𑀸 𑀇𑀤𑀸𑀦𑀺 𑀇𑀫𑀲𑁆𑀲 𑀑𑀯𑀸𑀤𑀲𑁆𑀲 𑀅𑀓𑀭𑀡𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀼𑀫𑁆𑀳𑁂 𑀘 𑀫𑁂, 𑀪𑀺𑀓𑁆𑀔𑀯𑁂…𑀧𑁂… 𑀦𑁄 𑀥𑀫𑁆𑀫𑀤𑀸𑀬𑀸𑀤𑀸’’𑀢𑀺. 𑀢𑀢𑁆𑀣 𑀢𑀼𑀫𑁆𑀳𑁂𑀧𑀺 𑀢𑁂𑀦 𑀆𑀤𑀺𑀬𑀸 𑀪𑀯𑁂𑀬𑁆𑀬𑀸𑀣𑀸𑀢𑀺 𑀢𑀼𑀫𑁆𑀳𑁂𑀧𑀺 𑀢𑁂𑀦 𑀆𑀫𑀺𑀲𑀤𑀸𑀬𑀸𑀤𑀪𑀸𑀯𑁂𑀦 𑀦𑁄 𑀥𑀫𑁆𑀫𑀤𑀸𑀬𑀸𑀤𑀪𑀸𑀯𑁂𑀦 𑀆𑀤𑀺𑀬𑀸 𑀪𑀯𑁂𑀬𑁆𑀬𑀸𑀣. 𑀅𑀧𑀤𑀺𑀲𑀺𑀢𑀩𑁆𑀩𑀸 𑀯𑀺𑀲𑀼𑀁 𑀓𑀸𑀢𑀩𑁆𑀩𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸, 𑀯𑀺𑀜𑁆𑀜𑀽𑀳𑀺 𑀕𑀸𑀭𑀬𑁆𑀳𑀸 𑀪𑀯𑁂𑀬𑁆𑀬𑀸𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀦𑁆𑀢𑀺? 𑀆𑀫𑀺𑀲𑀤𑀸𑀬𑀸𑀤𑀸 𑀲𑀢𑁆𑀣𑀼𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀦𑁄 𑀥𑀫𑁆𑀫𑀤𑀸𑀬𑀸𑀤𑀸𑀢𑀺.

𑀅𑀳𑀫𑁆𑀧𑀺 𑀢𑁂𑀦 𑀆𑀤𑀺𑀬𑁄 𑀪𑀯𑁂𑀬𑁆𑀬𑀦𑁆𑀢𑀺 𑀅𑀳𑀫𑁆𑀧𑀺 𑀢𑁂𑀦 𑀢𑀼𑀫𑁆𑀳𑀸𑀓𑀁 𑀆𑀫𑀺𑀲𑀤𑀸𑀬𑀸𑀤𑀪𑀸𑀯𑁂𑀦 𑀦𑁄 𑀥𑀫𑁆𑀫𑀤𑀸𑀬𑀸𑀤𑀪𑀸𑀯𑁂𑀦 𑀕𑀸𑀭𑀬𑁆𑀳𑁄 𑀪𑀯𑁂𑀬𑁆𑀬𑀁. 𑀓𑀺𑀦𑁆𑀢𑀺? 𑀆𑀫𑀺𑀲…𑀧𑁂… 𑀤𑀸𑀬𑀸𑀤𑀸𑀢𑀺. 𑀇𑀤𑀁 𑀪𑀕𑀯𑀸 𑀢𑁂𑀲𑀁 𑀅𑀢𑀻𑀯 𑀫𑀼𑀤𑀼𑀓𑀭𑀡𑀢𑁆𑀣𑀫𑀸𑀳. 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀘𑁂, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀆𑀫𑀺𑀲𑀮𑁄𑀮𑀸 𑀘𑀭𑀺𑀲𑁆𑀲𑀣, 𑀢𑀢𑁆𑀣 𑀯𑀺𑀜𑁆𑀜𑀽 𑀫𑀁 𑀕𑀭𑀳𑀺𑀲𑁆𑀲𑀦𑁆𑀢𑀺 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀩𑁆𑀩𑀜𑁆𑀜𑀽 𑀲𑀫𑀸𑀦𑁄 𑀅𑀢𑁆𑀢𑀦𑁄 𑀲𑀸𑀯𑀓𑁂 𑀥𑀫𑁆𑀫𑀤𑀸𑀬𑀸𑀤𑁂 𑀦𑁄 𑀆𑀫𑀺𑀲𑀤𑀸𑀬𑀸𑀤𑁂 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀕𑀭𑀳𑀦𑁆𑀢𑀺 ‘‘𑀓𑀲𑁆𑀲𑀺𑀫𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸, 𑀓𑀲𑁆𑀲𑀦𑁆𑀢𑁂𑀯𑀸𑀲𑀺𑀓𑀸’’𑀢𑀺; 𑀲𑁂𑀬𑁆𑀬𑀣𑀸 𑀯𑀸 𑀧𑀦 𑀓𑀼𑀮𑀓𑀼𑀫𑀸𑀭𑀓𑁂 𑀯𑀸 𑀓𑀼𑀮𑀓𑀼𑀫𑀸𑀭𑀺𑀓𑀸𑀬𑁄 𑀯𑀸 𑀤𑀼𑀲𑁆𑀲𑀻𑀮𑁂 𑀧𑀸𑀧𑀥𑀫𑁆𑀫𑁂 𑀤𑀺𑀲𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀕𑀭𑀳𑀦𑁆𑀢𑀺 ‘‘𑀓𑀲𑁆𑀲𑀺𑀫𑁂 𑀧𑀼𑀢𑁆𑀢𑀸, 𑀓𑀲𑁆𑀲 𑀥𑀻𑀢𑀭𑁄’’𑀢𑀺; 𑀏𑀯𑀫𑁂𑀯 𑀫𑀁 𑀯𑀺𑀜𑁆𑀜𑀽 𑀕𑀭𑀳𑀺𑀲𑁆𑀲𑀦𑁆𑀢𑀺 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀩𑁆𑀩𑀜𑁆𑀜𑀽 𑀲𑀫𑀸𑀦𑁄 𑀅𑀢𑁆𑀢𑀦𑁄 𑀲𑀸𑀯𑀓𑁂 𑀥𑀫𑁆𑀫𑀤𑀸𑀬𑀸𑀤𑁂 𑀦𑁄 𑀆𑀫𑀺𑀲𑀤𑀸𑀬𑀸𑀤𑁂 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺.

𑀏𑀯𑀁 𑀇𑀫𑀲𑁆𑀲 𑀑𑀯𑀸𑀤𑀲𑁆𑀲 𑀅𑀓𑀭𑀡𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀓𑀭𑀡𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 𑀢𑀼𑀫𑁆𑀳𑁂 𑀘 𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀳𑀫𑁆𑀧𑀺 𑀢𑁂𑀦 𑀦 𑀆𑀤𑀺𑀬𑁄 𑀪𑀯𑁂𑀬𑁆𑀬𑀦𑁆𑀢𑀺 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀯𑀢𑁆𑀢𑀧𑀭𑀺𑀧𑀽𑀭𑀓𑁂 𑀤𑀳𑀭𑀪𑀺𑀓𑁆𑀔𑀽 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀲𑀫𑁆𑀧𑀦𑁆𑀦𑁂 𑀯𑀲𑁆𑀲𑀲𑀢𑀺𑀓𑀢𑁆𑀣𑁂𑀭𑁂 𑀯𑀺𑀬 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑁂 𑀤𑀺𑀲𑁆𑀯𑀸, 𑀓𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸, 𑀓𑀲𑁆𑀲𑀦𑁆𑀢𑁂𑀯𑀸𑀲𑀺𑀓𑀸𑀢𑀺, 𑀅𑀲𑀼𑀓𑀲𑁆𑀲𑀸𑀢𑀺, ‘‘𑀧𑀢𑀺𑀭𑀽𑀧𑀁 𑀣𑁂𑀭𑀲𑁆𑀲, 𑀧𑀝𑀺𑀩𑀮𑁄 𑀯𑀢 𑀑𑀯𑀤𑀺𑀢𑀼𑀁 𑀅𑀦𑀼𑀲𑀸𑀲𑀺𑀢𑀼’’𑀦𑁆𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀦 𑀆𑀤𑀺𑀬𑀸 𑀦 𑀕𑀸𑀭𑀬𑁆𑀳𑀸 𑀪𑀯𑀦𑁆𑀢𑀺, 𑀏𑀯𑀫𑁂𑀯 𑀅𑀳𑀫𑁆𑀧𑀺 𑀢𑁂𑀦 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀤𑀸𑀬𑀸𑀤𑀪𑀸𑀯𑁂𑀦 𑀦𑁄 𑀆𑀫𑀺𑀲𑀤𑀸𑀬𑀸𑀤𑀪𑀸𑀯𑁂𑀦 𑀓𑀲𑁆𑀲 𑀲𑀸𑀯𑀓𑀸 𑀦𑀸𑀮𑀓𑀧𑀝𑀺𑀧𑀤𑀁 𑀢𑀼𑀯𑀝𑁆𑀝𑀓𑀧𑀝𑀺𑀧𑀤𑀁 𑀘𑀦𑁆𑀤𑀽𑀧𑀫𑀧𑀝𑀺𑀧𑀤𑀁 𑀭𑀣𑀯𑀺𑀦𑀻𑀢𑀧𑀝𑀺𑀧𑀤𑀁 𑀫𑀳𑀸𑀕𑁄𑀲𑀺𑀗𑁆𑀕𑀲𑀸𑀮𑀧𑀝𑀺𑀧𑀤𑀁 𑀫𑀳𑀸𑀲𑀼𑀜𑁆𑀜𑀢𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀪𑀸𑀯𑀦𑀸𑀭𑀸𑀫𑀅𑀭𑀺𑀬𑀯𑀁𑀲𑁂𑀲𑀼 𑀲𑀓𑁆𑀔𑀺𑀪𑀽𑀢𑀸 𑀧𑀘𑁆𑀘𑀬𑀕𑁂𑀥𑀢𑁄 𑀯𑀺𑀯𑀢𑁆𑀢𑀫𑀸𑀦𑀲𑀸 𑀅𑀩𑁆𑀪𑀸 𑀫𑀼𑀢𑁆𑀢𑀘𑀦𑁆𑀤𑀲𑀫𑀸 𑀯𑀺𑀳𑀭𑀦𑁆𑀢𑀻𑀢𑀺; ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀩𑁆𑀩𑀜𑁆𑀜𑀽 𑀯𑀢 𑀪𑀕𑀯𑀸, 𑀅𑀲𑀓𑁆𑀔𑀺 𑀯𑀢 𑀲𑀸𑀯𑀓𑁂 𑀆𑀫𑀺𑀲𑀤𑀸𑀬𑀸𑀤𑀧𑀝𑀺𑀧𑀤𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀥𑀫𑁆𑀫𑀤𑀸𑀬𑀸𑀤𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑁂 𑀓𑀸𑀢𑀼’’𑀦𑁆𑀢𑀺 𑀯𑀺𑀜𑁆𑀜𑀽𑀦𑀁 𑀦 𑀆𑀤𑀺𑀬𑁄 𑀦 𑀕𑀸𑀭𑀬𑁆𑀳𑁄 𑀪𑀯𑁂𑀬𑁆𑀬𑀦𑁆𑀢𑀺. 𑀏𑀯𑀫𑀺𑀫𑀲𑁆𑀫𑀺𑀁 𑀧𑀤𑁂 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀲𑁂𑀲𑀁 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑀦𑀬𑀧𑀘𑁆𑀘𑀦𑀻𑀓𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀇𑀫𑀲𑁆𑀲 𑀑𑀯𑀸𑀤𑀲𑁆𑀲 𑀓𑀭𑀡𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀑𑀯𑀸𑀤𑀁 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑀆𑀳 𑁋 ‘‘𑀢𑀲𑁆𑀫𑀸 𑀢𑀺𑀳 𑀫𑁂, 𑀪𑀺𑀓𑁆𑀔𑀯𑁂…𑀧𑁂… 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺.

𑁩𑁦. 𑀏𑀯𑀫𑀺𑀫𑀁 𑀑𑀯𑀸𑀤𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑀸 𑀥𑀫𑁆𑀫𑀤𑀸𑀬𑀸𑀤𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀺𑀧𑀽𑀭𑀓𑀸𑀭𑀺𑀁 𑀣𑁄𑀫𑁂𑀢𑀼𑀁 𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀪𑀕𑀯𑀢𑁄 𑀳𑀺 𑀣𑁄𑀫𑀦𑀁 𑀲𑀼𑀢𑁆𑀯𑀸𑀧𑀺 𑀳𑁄𑀦𑁆𑀢𑀺𑀬𑁂𑀯 𑀢𑀤𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀺𑀢𑀸𑀭𑁄.

𑀢𑀢𑁆𑀣 𑀇𑀥𑀸𑀢𑀺 𑀦𑀺𑀧𑀸𑀢𑀧𑀤𑀫𑁂𑀢𑀁. 𑀪𑀼𑀢𑁆𑀢𑀸𑀯𑀻𑀢𑀺 𑀪𑀼𑀢𑁆𑀢𑀯𑀸, 𑀓𑀢𑀪𑀢𑁆𑀢𑀓𑀺𑀘𑁆𑀘𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀯𑀸𑀭𑀺𑀢𑁄𑀢𑀺 𑀬𑀸𑀯𑀤𑀢𑁆𑀣𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑁄, 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑀪𑁄𑀚𑀦𑁄 𑀢𑀺𑀢𑁆𑀢𑁄𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀢𑀼𑀩𑁆𑀩𑀺𑀥𑀸 𑀳𑀺 𑀧𑀯𑀸𑀭𑀡𑀸 𑀯𑀲𑁆𑀲𑀁𑀯𑀼𑀝𑁆𑀞𑀧𑀯𑀸𑀭𑀡𑀸 𑀧𑀘𑁆𑀘𑀬𑀧𑀯𑀸𑀭𑀡𑀸 𑀅𑀦𑀢𑀺𑀭𑀺𑀢𑁆𑀢𑀧𑀯𑀸𑀭𑀡𑀸 𑀬𑀸𑀯𑀤𑀢𑁆𑀣𑀧𑀯𑀸𑀭𑀡𑀸𑀢𑀺. 𑀢𑀢𑁆𑀣, ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀯𑀸𑀭𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁦𑁯) 𑀅𑀬𑀁 𑀯𑀲𑁆𑀲𑀁𑀯𑀼𑀝𑁆𑀞𑀧𑀯𑀸𑀭𑀡𑀸. ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀘𑀢𑀼𑀫𑀸𑀲𑀁 𑀪𑁂𑀲𑀚𑁆𑀚𑁂𑀦 𑀧𑀯𑀸𑀭𑁂𑀢𑀼’’𑀦𑁆𑀢𑀺 (𑀧𑀸𑀘𑀺. 𑁩𑁦𑁩) 𑀘 ‘‘𑀅𑀜𑁆𑀜𑀢𑁆𑀭 𑀧𑀼𑀦𑀧𑀯𑀸𑀭𑀡𑀸𑀬 𑀅𑀜𑁆𑀜𑀢𑁆𑀭 𑀦𑀺𑀘𑁆𑀘𑀧𑀯𑀸𑀭𑀡𑀸𑀬𑀸’’𑀢𑀺 (𑀧𑀸𑀘𑀺. 𑁩𑁦𑁭) 𑀘 𑀅𑀬𑀁 𑀧𑀘𑁆𑀘𑀬𑀧𑀯𑀸𑀭𑀡𑀸. ‘‘𑀧𑀯𑀸𑀭𑀺𑀢𑁄 𑀦𑀸𑀫 𑀅𑀲𑀦𑀁 𑀧𑀜𑁆𑀜𑀸𑀬𑀢𑀺, 𑀪𑁄𑀚𑀦𑀁 𑀧𑀜𑁆𑀜𑀸𑀬𑀢𑀺, 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀅𑀪𑀺𑀳𑀭𑀢𑀺, 𑀧𑀝𑀺𑀓𑁆𑀔𑁂𑀧𑁄 𑀧𑀜𑁆𑀜𑀸𑀬𑀢𑀺, 𑀏𑀲𑁄 𑀧𑀯𑀸𑀭𑀺𑀢𑁄 𑀦𑀸𑀫𑀸’’𑀢𑀺 (𑀧𑀸𑀘𑀺. 𑁨𑁩𑁯) 𑀅𑀬𑀁 𑀅𑀦𑀢𑀺𑀭𑀺𑀢𑁆𑀢𑀧𑀯𑀸𑀭𑀡𑀸. ‘‘𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀻’’𑀢𑀺 (𑀤𑀻. 𑀦𑀺. 𑁧.𑁨𑁯𑁭, 𑁩𑁫𑁮) 𑀅𑀬𑀁 𑀬𑀸𑀯𑀤𑀢𑁆𑀣𑀧𑀯𑀸𑀭𑀡𑀸. 𑀅𑀬𑀫𑀺𑀥 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀯𑀸𑀭𑀺𑀢𑁄𑀢𑀺 𑀬𑀸𑀯𑀤𑀢𑁆𑀣𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑁄’’𑀢𑀺.

𑀧𑀭𑀺𑀧𑀼𑀡𑁆𑀡𑁄𑀢𑀺 𑀪𑁄𑀚𑀦𑁂𑀦 𑀧𑀭𑀺𑀧𑀼𑀡𑁆𑀡𑁄. 𑀧𑀭𑀺𑀬𑁄𑀲𑀺𑀢𑁄𑀢𑀺 𑀧𑀭𑀺𑀬𑁄𑀲𑀺𑀢𑀪𑁄𑀚𑀦𑁄, 𑀉𑀢𑁆𑀢𑀭𑀧𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀬𑀸𑀯𑀢𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀢𑀸𑀯𑀢𑀓𑀁 𑀪𑀼𑀢𑁆𑀢𑀁 𑀳𑁄𑀢𑀺, 𑀅𑀯𑀲𑀺𑀢𑀸 𑀫𑁂 𑀪𑁄𑀚𑀦𑀓𑀺𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀼𑀳𑀺𑀢𑁄𑀢𑀺 𑀥𑀸𑀢𑁄, 𑀚𑀺𑀖𑀘𑁆𑀙𑀸𑀤𑀼𑀓𑁆𑀔𑀸𑀪𑀸𑀯𑁂𑀦 𑀯𑀸 𑀲𑀼𑀔𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀸𑀯𑀤𑀢𑁆𑀣𑁄𑀢𑀺 𑀬𑀸𑀯𑀢𑀓𑁄 𑀫𑁂 𑀪𑁄𑀚𑀦𑁂𑀦 𑀅𑀢𑁆𑀣𑁄, 𑀲𑁄 𑀲𑀩𑁆𑀩𑁄 𑀧𑀢𑁆𑀢𑁄𑀢𑀺. 𑀏𑀢𑁆𑀣 𑀘 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀧𑀘𑁆𑀙𑀺𑀫𑀸𑀦𑀺 𑀲𑀸𑀥𑀓𑀸𑀦𑀺. 𑀬𑁄 𑀳𑀺 𑀧𑀭𑀺𑀬𑁄𑀲𑀺𑀢𑁄, 𑀲𑁄 𑀪𑀼𑀢𑁆𑀢𑀸𑀯𑀻 𑀳𑁄𑀢𑀺. 𑀬𑁄 𑀘 𑀲𑀼𑀳𑀺𑀢𑁄, 𑀲𑁄 𑀬𑀸𑀯𑀤𑀢𑁆𑀣𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑁄. 𑀬𑁄 𑀬𑀸𑀯𑀤𑀢𑁆𑀣𑁄, 𑀲𑁄 𑀧𑀭𑀺𑀧𑀼𑀡𑁆𑀡𑁄𑀢𑀺. 𑀧𑀼𑀭𑀺𑀫𑀸𑀦𑀺 𑀯𑀸 𑀧𑀘𑁆𑀙𑀺𑀫𑀸𑀦𑀁. 𑀬𑀲𑁆𑀫𑀸 𑀳𑀺 𑀪𑀼𑀢𑁆𑀢𑀸𑀯𑀻, 𑀢𑀲𑁆𑀫𑀸 𑀧𑀭𑀺𑀬𑁄𑀲𑀺𑀢𑁄. 𑀬𑀲𑁆𑀫𑀸 𑀧𑀯𑀸𑀭𑀺𑀢𑁄, 𑀢𑀲𑁆𑀫𑀸 𑀲𑀼𑀳𑀺𑀢𑁄. 𑀬𑀲𑁆𑀫𑀸 𑀧𑀭𑀺𑀧𑀼𑀡𑁆𑀡𑁄, 𑀢𑀲𑁆𑀫𑀸 𑀬𑀸𑀯𑀤𑀢𑁆𑀣𑁄𑀢𑀺. 𑀲𑀩𑁆𑀩𑀜𑁆𑀘𑁂𑀢𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀺𑀬𑀸𑀢𑀺 𑀏𑀓𑀁𑀲𑁂 𑀘 𑀯𑀺𑀓𑀧𑁆𑀧𑀦𑁂 𑀘. ‘‘𑀧𑀣𑀯𑀻𑀥𑀸𑀢𑀼 𑀲𑀺𑀬𑀸 𑀅𑀚𑁆𑀛𑀢𑁆𑀢𑀺𑀓𑀸, 𑀲𑀺𑀬𑀸 𑀩𑀸𑀳𑀺𑀭𑀸’’𑀢𑀺 (𑀫. 𑀦𑀺. 𑁩.𑁩𑁪𑁯) 𑀏𑀓𑀁𑀲𑁂. ‘‘𑀲𑀺𑀬𑀸 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺 𑀯𑀻𑀢𑀺𑀓𑁆𑀓𑀫𑁄’’𑀢𑀺 (𑀫. 𑀦𑀺. 𑁩.𑁩𑁯) 𑀯𑀺𑀓𑀧𑁆𑀧𑀦𑁂. 𑀇𑀥 𑀉𑀪𑀬𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀢𑀺𑀭𑁂𑀓𑁄𑀯 𑀅𑀢𑀺𑀭𑁂𑀓𑀥𑀫𑁆𑀫𑁄. 𑀢𑀣𑀸 𑀙𑀟𑁆𑀟𑀦𑀻𑀬 𑀥𑀫𑁆𑀫𑁄. 𑀅𑀥𑀺𑀓𑁄 𑀘 𑀙𑀟𑁆𑀟𑁂𑀢𑀩𑁆𑀩𑁄 𑀘, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀣𑀸𑀢𑀺 𑀢𑀫𑁆𑀳𑀺 𑀓𑀸𑀮𑁂. 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀧𑀭𑁂𑀢𑀸𑀢𑀺 𑀚𑀺𑀖𑀘𑁆𑀙𑀸𑀬 𑀘 𑀤𑀼𑀩𑁆𑀩𑀮𑁆𑀬𑁂𑀦 𑀘 𑀧𑀭𑁂𑀢𑀸 𑀨𑀼𑀝𑁆𑀞𑀸 𑀅𑀦𑀼𑀕𑀢𑀸 𑀘 𑀅𑀝𑁆𑀞𑀧𑀺 𑀤𑀲𑀧𑀺 𑀤𑀺𑀯𑀲𑀸𑀦𑀺. 𑀢𑀢𑁆𑀣 𑀓𑁂𑀘𑀺 𑀚𑀺𑀖𑀘𑁆𑀙𑀺𑀢𑀸𑀧𑀺 𑀦 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀲𑀓𑁆𑀓𑁄𑀦𑁆𑀢𑀺 𑀚𑀺𑀖𑀘𑁆𑀙𑀁 𑀲𑀳𑀺𑀢𑀼𑀁. 𑀇𑀫𑁂 𑀧𑀦 𑀦 𑀢𑀸𑀤𑀺𑀲𑀸𑀢𑀺 𑀤𑀲𑁆𑀲𑁂𑀢𑀼𑀁 𑀉𑀪𑀬𑀫𑀸𑀳. 𑀢𑁆𑀬𑀸𑀳𑀦𑁆𑀢𑀺 𑀢𑁂 𑀅𑀳𑀁. 𑀲𑀘𑁂 𑀆𑀓𑀗𑁆𑀔𑀣𑀸𑀢𑀺 𑀬𑀤𑀺 𑀇𑀘𑁆𑀙𑀣.

𑀅𑀧𑁆𑀧𑀳𑀭𑀺𑀢𑁂𑀢𑀺 𑀅𑀧𑁆𑀧𑀭𑀼𑀴𑁆𑀳𑀳𑀭𑀺𑀢𑁂, 𑀬𑀲𑁆𑀫𑀺𑀁 𑀞𑀸𑀦𑁂 𑀧𑀺𑀡𑁆𑀟𑀧𑀸𑀢𑀚𑁆𑀛𑁄𑀢𑁆𑀣𑀭𑀡𑁂𑀦 𑀯𑀺𑀦𑀲𑁆𑀲𑀦𑀥𑀫𑁆𑀫𑀸𑀦𑀺 𑀢𑀺𑀡𑀸𑀦𑀺 𑀦𑀢𑁆𑀣𑀺, 𑀢𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀦𑀺𑀢𑁆𑀢𑀺𑀡𑀜𑁆𑀘 𑀫𑀳𑀸𑀢𑀺𑀡𑀕𑀳𑀦𑀁 𑀘, 𑀬𑀢𑁆𑀣 𑀲𑀓𑀝𑁂𑀦𑀧𑀺 𑀙𑀟𑁆𑀟𑀺𑀢𑁂 𑀧𑀺𑀡𑁆𑀟𑀧𑀸𑀢𑁂 𑀢𑀺𑀡𑀸𑀦𑀺 𑀦 𑀯𑀺𑀦𑀲𑁆𑀲𑀦𑁆𑀢𑀺, 𑀢𑀜𑁆𑀘 𑀞𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀁 𑀳𑁄𑀢𑀺. 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀲𑁆𑀲 𑀳𑀺 𑀅𑀯𑀺𑀓𑁄𑀧𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁.

𑀅𑀧𑁆𑀧𑀸𑀡𑀓𑁂𑀢𑀺 𑀦𑀺𑀧𑁆𑀧𑀸𑀡𑀓𑁂 𑀧𑀺𑀡𑁆𑀟𑀧𑀸𑀢𑀚𑁆𑀛𑁄𑀢𑁆𑀣𑀭𑀡𑁂𑀦 𑀫𑀭𑀺𑀢𑀩𑁆𑀩𑀧𑀸𑀡𑀓𑀭𑀳𑀺𑀢𑁂 𑀯𑀸 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁂. 𑀧𑀭𑀺𑀢𑁆𑀢𑁄𑀤𑀓𑁂 𑀏𑀯 𑀳𑀺 𑀪𑀢𑁆𑀢𑀧𑀓𑁆𑀔𑁂𑀧𑁂𑀦 𑀆𑀴𑀼𑀮𑀺𑀢𑁂 𑀲𑀼𑀔𑀼𑀫𑀧𑀸𑀡𑀓𑀸 𑀫𑀭𑀦𑁆𑀢𑀺, 𑀦 𑀫𑀳𑀸𑀢𑀴𑀸𑀓𑀸𑀤𑀻𑀲𑀽𑀢𑀺. 𑀧𑀸𑀡𑀓𑀸𑀦𑀼𑀭𑀓𑁆𑀔𑀡𑀢𑁆𑀣𑀜𑁆𑀳𑀺 𑀏𑀢𑀁 𑀯𑀼𑀢𑁆𑀢𑀁. 𑀑𑀧𑀺𑀮𑀸𑀧𑁂𑀲𑁆𑀲𑀸𑀫𑀻𑀢𑀺 𑀦𑀺𑀫𑀼𑀚𑁆𑀚𑀸𑀧𑁂𑀲𑁆𑀲𑀸𑀫𑀺.

𑀢𑀢𑁆𑀭𑁂𑀓𑀲𑁆𑀲𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀏𑀓𑀲𑁆𑀲. 𑀬𑁄 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀝𑁆𑀞𑀼 𑀲𑀼𑀢𑀯𑀸 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑁂𑀢𑀺 𑀘, 𑀢𑀁 𑀲𑀦𑁆𑀥𑀸𑀬𑀸𑀳 𑀯𑀼𑀢𑁆𑀢𑀁 𑀔𑁄 𑀧𑀦𑁂𑀢𑀦𑁆𑀢𑀺. 𑀅𑀬𑀁 𑀯𑀼𑀢𑁆𑀢-𑀲𑀤𑁆𑀤𑁄 𑀓𑁂𑀲𑁄𑀳𑀸𑀭𑀡𑁂𑀧𑀺 𑀤𑀺𑀲𑁆𑀲𑀢𑀺 ‘‘𑀓𑀸𑀧𑀝𑀺𑀓𑁄 𑀫𑀸𑀡𑀯𑁄 𑀤𑀳𑀭𑁄 𑀯𑀼𑀢𑁆𑀢𑀲𑀺𑀭𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁪𑁨𑁬). 𑀭𑁄𑀧𑀺𑀢𑁂𑀧𑀺 ‘‘𑀬𑀣𑀸 𑀲𑀸𑀭𑀤𑀺𑀓𑀁 𑀩𑀻𑀚𑀁, 𑀔𑁂𑀢𑁆𑀢𑁂 𑀯𑀼𑀢𑁆𑀢𑀁 𑀯𑀺𑀭𑀽𑀳𑀢𑀻’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁩.𑁩𑁧). 𑀓𑀣𑀺𑀢𑁂𑀧𑀺 ‘‘𑀯𑀼𑀢𑁆𑀢𑀫𑀺𑀤𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀺𑀤𑀁 𑀅𑀭𑀳𑀢𑀸’’𑀢𑀺𑀆𑀤𑀻𑀲𑀼. 𑀇𑀥 𑀧𑀦 𑀓𑀣𑀺𑀢𑁂 𑀤𑀝𑁆𑀞𑀩𑁆𑀩𑁄. 𑀓𑀣𑀺𑀢𑀁 𑀔𑁄 𑀧𑀦𑁂𑀢𑀦𑁆𑀢𑀺 𑀅𑀬𑀜𑁆𑀳𑀺𑀲𑁆𑀲 𑀅𑀢𑁆𑀣𑁄. 𑀆𑀫𑀺𑀲𑀜𑁆𑀜𑀢𑀭𑀦𑁆𑀢𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀫𑀺𑀲𑀸𑀦𑀁 𑀅𑀜𑁆𑀜𑀢𑀭𑀁, 𑀏𑀓𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀲𑀩𑁆𑀩𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑁂𑀲𑀼 𑀢𑀸𑀤𑀺𑀲𑁄𑀯 𑀢𑀢𑁆𑀣 𑀢𑀢𑁆𑀣 𑀅𑀢𑁆𑀣𑀢𑁄 𑀧𑀭𑀺𑀡𑀸𑀫𑁂𑀢𑀩𑁆𑀩𑁄. 𑀇𑀥 𑀧𑀦𑀸𑀲𑁆𑀲 𑀬𑁄 𑀏𑀲𑁄𑀢𑀺 𑀅𑀢𑁆𑀣𑁄. 𑀬𑁄 𑀏𑀲𑁄 𑀧𑀺𑀡𑁆𑀟𑀧𑀸𑀢𑁄 𑀦𑀸𑀫. 𑀇𑀤𑀁 𑀆𑀫𑀺𑀲𑀜𑁆𑀜𑀢𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀁𑀦𑀽𑀦𑀸𑀳𑀦𑁆𑀢𑀺 𑀲𑀸𑀥𑀼 𑀯𑀢𑀸𑀳𑀁. 𑀏𑀯𑀦𑁆𑀢𑀺 𑀬𑀣𑀸 𑀇𑀤𑀸𑀦𑀺 𑀇𑀫𑀁 𑀔𑀡𑀁 𑀯𑀻𑀢𑀺𑀦𑀸𑀫𑁂𑀫𑀺, 𑀏𑀯𑀫𑁂𑀯 𑀭𑀢𑁆𑀢𑀺𑀦𑁆𑀤𑀺𑀯𑀁. 𑀯𑀻𑀢𑀺𑀦𑀸𑀫𑁂𑀬𑁆𑀬𑀦𑁆𑀢𑀺 𑀔𑁂𑀧𑁂𑀬𑁆𑀬𑀁 𑀅𑀢𑀺𑀯𑀢𑁆𑀢𑀸𑀧𑁂𑀬𑁆𑀬𑀁.

𑀲𑁄 𑀢𑀁 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀲𑁄 𑀢𑀁 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀭𑀽𑀧𑀁 𑀲𑀼𑀕𑀢𑀸𑀢𑀺𑀭𑀺𑀢𑁆𑀢𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀥𑀫𑁆𑀫𑀤𑀸𑀬𑀸𑀤𑀪𑀸𑀯𑀁 𑀆𑀓𑀗𑁆𑀔𑀫𑀸𑀦𑁄 𑀆𑀤𑀺𑀢𑁆𑀢𑀲𑀻𑀲𑀽𑀧𑀫𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀢𑁂𑀦𑁂𑀯 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑁂𑀦 𑀏𑀯𑀁 𑀢𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀻𑀢𑀺𑀦𑀸𑀫𑁂𑀬𑁆𑀬.

𑀅𑀣 𑀤𑀼𑀢𑀺𑀬𑀲𑁆𑀲𑀸𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀯𑀸𑀭𑁂 𑀏𑀲 𑀲𑀗𑁆𑀔𑁂𑀧𑁄, 𑀲𑀘𑁂 𑀲𑁄 𑀪𑀺𑀓𑁆𑀔𑀼, 𑀬𑀁𑀦𑀽𑀦𑀸𑀳𑀁…𑀧𑁂… 𑀯𑀻𑀢𑀺𑀦𑀸𑀫𑁂𑀬𑁆𑀬𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀏𑀯𑀫𑁆𑀧𑀺 𑀘𑀺𑀦𑁆𑀢𑁂𑀬𑁆𑀬, 𑀧𑀩𑁆𑀩𑀚𑀺𑀢𑁂𑀦 𑀔𑁄 𑀯𑀸𑀴𑀫𑀺𑀕𑀸𑀓𑀼𑀮𑁂 𑀅𑀭𑀜𑁆𑀜𑁂 𑀪𑁂𑀲𑀚𑁆𑀚𑀁 𑀯𑀺𑀬 𑀧𑀜𑁆𑀘𑀓𑀸𑀫𑀕𑀼𑀡𑀯𑀸𑀴𑀸𑀓𑀼𑀮𑁂 𑀕𑀸𑀫𑁂 𑀧𑀺𑀡𑁆𑀟𑀧𑀸𑀢𑁄𑀧𑀺 𑀤𑀼𑀓𑁆𑀔𑀁 𑀧𑀭𑀺𑀬𑁂𑀲𑀺𑀢𑀼𑀁. 𑀅𑀬𑀁 𑀧𑀦 𑀧𑀺𑀡𑁆𑀟𑀧𑀸𑀢𑁄 𑀇𑀢𑀺 𑀧𑀭𑀺𑀬𑁂𑀲𑀦𑀸𑀤𑀻𑀦𑀯𑀯𑀺𑀫𑀼𑀢𑁆𑀢𑁄 𑀘 𑀲𑀼𑀕𑀢𑀸𑀢𑀺𑀭𑀺𑀢𑁆𑀢𑁄 𑀘𑀸𑀢𑀺 𑀉𑀪𑀢𑁄 𑀲𑀼𑀚𑀸𑀢𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀯𑀺𑀬 𑀳𑁄𑀢𑀺, 𑀬𑁂𑀳𑀺 𑀘 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀧𑀺𑀡𑁆𑀟𑀧𑀸𑀢𑁄 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀧𑀼𑀕𑁆𑀕𑀮𑀁 𑀕𑀭𑀳𑀺𑀢𑁆𑀯𑀸 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄 𑀳𑁄𑀢𑀺 ‘‘𑀅𑀮𑀚𑁆𑀚𑀺𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀓𑁄’’𑀢𑀺. 𑀅𑀧𑀭𑀺𑀲𑀼𑀤𑁆𑀥𑀉𑀧𑁆𑀧𑀢𑁆𑀢𑀺𑀢𑀸𑀬 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄 𑀳𑁄𑀢𑀺 ‘‘𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀦𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀼𑀧𑁆𑀧𑀦𑁆𑀦𑁄’’𑀢𑀺. 𑀲𑀸𑀫𑀺𑀓𑀸𑀦𑀼𑀓𑀫𑁆𑀧𑀸𑀬 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄 𑀳𑁄𑀢𑀺 ‘‘𑀧𑀺𑀡𑁆𑀟𑀧𑀸𑀢𑀲𑀸𑀫𑀺𑀓𑁄 𑀪𑀺𑀓𑁆𑀔𑀼 𑀚𑀺𑀖𑀘𑁆𑀙𑀺𑀢𑁄’’𑀢𑀺. 𑀲𑁄 𑀥𑀸𑀢𑁄 𑀢𑀲𑁆𑀲𑁂𑀯 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀲𑀼 𑀅𑀦𑀼𑀓𑀫𑁆𑀧𑀸𑀬 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄 𑀳𑁄𑀢𑀺 ‘‘𑀅𑀦𑁆𑀢𑁂𑀯𑀸𑀲𑀺𑀓𑀸 𑀅𑀜𑁆𑀜𑁂 𑀯𑀸 𑀢𑀧𑁆𑀧𑀝𑀺𑀩𑀤𑁆𑀥𑀸 𑀚𑀺𑀖𑀘𑁆𑀙𑀺𑀢𑀸’’𑀢𑀺, 𑀢𑁂𑀧𑀺 𑀥𑀸𑀢𑀸 𑀲𑀼𑀳𑀺𑀢𑀸, 𑀅𑀧𑀺𑀘 𑀔𑁄 𑀅𑀲𑁆𑀲𑀤𑁆𑀥𑀢𑀸𑀬 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄 𑀳𑁄𑀢𑀺 ‘‘𑀧𑀺𑀡𑁆𑀟𑀧𑀸𑀢𑀲𑀸𑀫𑀺𑀓𑁄 𑀪𑀺𑀓𑁆𑀔𑀼 𑀅𑀲𑁆𑀲𑀤𑁆𑀥𑁄’’𑀢𑀺. 𑀢𑁂𑀳𑀺 𑀘 𑀓𑀸𑀭𑀡𑁂𑀳𑀺 𑀅𑀬𑀁 𑀯𑀺𑀫𑀼𑀢𑁆𑀢𑁄. 𑀪𑀕𑀯𑀸 𑀳𑀺 𑀮𑀚𑁆𑀚𑀻𑀦𑀁 𑀅𑀕𑁆𑀕𑁄, 𑀧𑀭𑀺𑀲𑀼𑀤𑁆𑀥𑀼𑀧𑁆𑀧𑀢𑁆𑀢𑀺𑀓𑁄 𑀧𑀺𑀡𑁆𑀟𑀧𑀸𑀢𑁄, 𑀪𑀕𑀯𑀸 𑀘 𑀥𑀸𑀢𑁄 𑀲𑀼𑀳𑀺𑀢𑁄, 𑀧𑀘𑁆𑀘𑀸𑀲𑀻𑀲𑀓𑁄𑀧𑀺 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀦𑀢𑁆𑀣𑀺, 𑀬𑁂 𑀮𑁄𑀓𑁂 𑀲𑀤𑁆𑀥𑀸, 𑀪𑀕𑀯𑀸 𑀢𑁂𑀲𑀁 𑀅𑀕𑁆𑀕𑁄𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀘 𑀲𑁄 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸…𑀧𑁂… 𑀯𑀻𑀢𑀺𑀦𑀸𑀫𑁂𑀬𑁆𑀬. 𑀏𑀢𑁆𑀢𑀸𑀯𑀢𑀸 𑀬𑁄𑀧𑀺 𑀅𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺, 𑀲𑁄𑀧𑀺 𑀪𑀼𑀜𑁆𑀚𑀺𑀢𑀩𑁆𑀩𑀓𑀫𑁂𑀯 𑀧𑀺𑀡𑁆𑀟𑀧𑀸𑀢𑀁 𑀦 𑀪𑀼𑀢𑁆𑀢𑁄 𑀳𑁄𑀢𑀺. 𑀬𑁄𑀧𑀺 𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺, 𑀲𑁄𑀧𑀺 𑀪𑀼𑀜𑁆𑀚𑀺𑀢𑀩𑁆𑀩𑀓𑀫𑁂𑀯 𑀪𑀼𑀢𑁆𑀢𑁄 𑀳𑁄𑀢𑀺. 𑀦𑀢𑁆𑀣𑀺 𑀧𑀺𑀡𑁆𑀟𑀧𑀸𑀢𑁂 𑀯𑀺𑀲𑁂𑀲𑁄. 𑀧𑀼𑀕𑁆𑀕𑀮𑁂 𑀧𑀦 𑀅𑀢𑁆𑀣𑀺 𑀯𑀺𑀲𑁂𑀲𑁄. 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀓𑀺𑀜𑁆𑀘𑀸𑀧𑀺 𑀲𑁄𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀻𑀢𑀺 𑀅𑀦𑀼𑀚𑀸𑀦𑀦𑀧𑁆𑀧𑀲𑀁𑀲𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀓𑀺𑀁 𑀅𑀦𑀼𑀚𑀸𑀦𑀸𑀢𑀺? 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀅𑀦𑀯𑀚𑁆𑀚𑀧𑀭𑀺𑀪𑁄𑀕𑀁. 𑀓𑀺𑀁 𑀧𑀲𑀁𑀲𑀢𑀺? 𑀪𑀼𑀢𑁆𑀯𑀸 𑀲𑀫𑀡𑀥𑀫𑁆𑀫𑀓𑀭𑀡𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑀬𑀤𑀺𑀧𑀺 𑀲𑁄 𑀪𑀺𑀓𑁆𑀔𑀼 𑀏𑀯𑀁 𑀪𑀼𑀜𑁆𑀚𑀺𑀢𑀩𑁆𑀩𑀫𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀓𑀸𑀢𑀩𑁆𑀩𑀫𑁂𑀯 𑀓𑀭𑁂𑀬𑁆𑀬. 𑀅𑀣 𑀔𑁄 𑀅𑀲𑀼𑀬𑁂𑀯 𑀫𑁂 𑀧𑀼𑀭𑀺𑀫𑁄 𑀪𑀺𑀓𑁆𑀔𑀽𑀢𑀺 𑀬𑁄 𑀧𑀼𑀭𑀺𑀫𑁄 𑀪𑀺𑀓𑁆𑀔𑀼 𑀢𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺, 𑀲𑁄𑀬𑁂𑀯 𑀫𑀫 𑀤𑁆𑀯𑀻𑀲𑀼 𑀲𑀽𑀭𑁂𑀲𑀼 𑀲𑀽𑀭𑀢𑀭𑁄 𑀯𑀺𑀬 𑀤𑁆𑀯𑀻𑀲𑀼 𑀧𑀡𑁆𑀟𑀺𑀢𑁂𑀲𑀼 𑀧𑀡𑁆𑀟𑀺𑀢𑀢𑀭𑁄 𑀯𑀺𑀬 𑀘 𑀧𑀼𑀚𑁆𑀚𑀢𑀭𑁄 𑀘 𑀧𑀸𑀲𑀁𑀲𑀢𑀭𑁄 𑀘, 𑀤𑀼𑀢𑀺𑀬𑀪𑀺𑀓𑁆𑀔𑀼𑀢𑁄 𑀅𑀢𑀺𑀭𑁂𑀓𑁂𑀦 𑀧𑀽𑀚𑀦𑀻𑀬𑁄 𑀘 𑀧𑀲𑀁𑀲𑀦𑀻𑀬𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀓𑀸𑀭𑀡𑁂𑀦 𑀲𑀸𑀥𑁂𑀦𑁆𑀢𑁄 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄, 𑀢𑀢𑁆𑀣 𑀲𑀺𑀬𑀸 𑀢𑀼𑀫𑁆𑀳𑀸𑀓𑀁, 𑀓𑀲𑁆𑀫𑀸 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀼𑀚𑁆𑀚𑀢𑀭𑁄 𑀘 𑀧𑀸𑀲𑀁𑀲𑀢𑀭𑁄 𑀘𑀸𑀢𑀺? 𑀢𑀜𑁆𑀳𑀺 𑀢𑀲𑁆𑀲𑀸𑀢𑀺 𑀬𑀲𑁆𑀫𑀸 𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀔𑀺𑀧𑀦𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀺𑀘𑁆𑀙𑀢𑀸𑀬…𑀧𑁂… 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺. 𑀓𑀣𑀁? 𑀢𑀲𑁆𑀲 𑀳𑀺 𑀲𑀘𑁂 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀘𑁆𑀘𑀬𑁂𑀲𑀼 𑀅𑀢𑁆𑀭𑀺𑀘𑁆𑀙𑀢𑀸 𑀯𑀸 𑀧𑀸𑀧𑀺𑀘𑁆𑀙𑀢𑀸 𑀯𑀸 𑀫𑀳𑀺𑀘𑁆𑀙𑀢𑀸 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀢𑁄 𑀦𑀁 𑀇𑀫𑀺𑀦𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀔𑁂𑀧𑀗𑁆𑀓𑀼𑀲𑁂𑀦 𑀦𑀺𑀯𑀸𑀭𑁂𑀲𑁆𑀲𑀢𑀺 ‘‘𑀅𑀭𑁂 𑀢𑁆𑀯𑀁 𑀲𑀼𑀕𑀢𑀸𑀢𑀺𑀭𑀺𑀢𑁆𑀢𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀈𑀤𑀺𑀲𑀁 𑀇𑀘𑁆𑀙𑀁 𑀉𑀧𑁆𑀧𑀸𑀤𑁂𑀲𑀻’’𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄. 𑀏𑀲 𑀦𑀬𑁄 𑀅𑀲𑀦𑁆𑀢𑀼𑀝𑁆𑀞𑀺𑀬𑀸 𑀅𑀲𑀁𑀮𑁂𑀔𑀲𑁆𑀲 𑀘𑀼𑀧𑁆𑀧𑀦𑁆𑀦𑀲𑁆𑀲 𑀦𑀺𑀯𑀸𑀭𑀡𑁂. 𑀏𑀯𑀁 𑀢𑀸𑀯𑀲𑁆𑀲 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀮𑁂𑀔𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺.

𑀲𑀼𑀪𑀭𑀢𑀸𑀬𑀸𑀢𑀺 𑀏𑀢𑁆𑀣 𑀅𑀬𑀁 𑀲𑀁𑀯𑀡𑁆𑀡𑀦𑀸 𑁋 𑀇𑀥𑁂𑀓𑀘𑁆𑀘𑁄 𑀅𑀢𑁆𑀢𑀦𑁄𑀧𑀺 𑀉𑀧𑀝𑁆𑀞𑀸𑀓𑀸𑀦𑀫𑁆𑀧𑀺 𑀤𑀼𑀩𑁆𑀪𑀭𑁄 𑀳𑁄𑀢𑀺 𑀤𑀼𑀧𑁆𑀧𑁄𑀲𑁄. 𑀏𑀓𑀘𑁆𑀘𑁄 𑀅𑀢𑁆𑀢𑀦𑁄𑀧𑀺 𑀉𑀧𑀝𑁆𑀞𑀸𑀓𑀸𑀦𑀫𑁆𑀧𑀺 𑀲𑀼𑀪𑀭𑁄 𑀳𑁄𑀢𑀺 𑀲𑀼𑀧𑁄𑀲𑁄. 𑀓𑀣𑀁? 𑀬𑁄 𑀳𑀺 𑀅𑀫𑁆𑀩𑀺𑀮𑀸𑀤𑀻𑀦𑀺 𑀮𑀤𑁆𑀥𑀸 𑀅𑀦𑀫𑁆𑀩𑀺𑀮𑀸𑀤𑀻𑀦𑀺 𑀧𑀭𑀺𑀬𑁂𑀲𑀢𑀺, 𑀅𑀜𑁆𑀜𑀲𑁆𑀲 𑀖𑀭𑁂 𑀮𑀤𑁆𑀥𑀁 𑀅𑀜𑁆𑀜𑀲𑁆𑀲 𑀖𑀭𑁂 𑀙𑀟𑁆𑀟𑁂𑀦𑁆𑀢𑁄 𑀲𑀩𑁆𑀩𑀁 𑀕𑀸𑀫𑀁 𑀯𑀺𑀘𑀭𑀺𑀢𑁆𑀯𑀸 𑀭𑀺𑀢𑁆𑀢𑀧𑀢𑁆𑀢𑁄𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀅𑀬𑀁 𑀅𑀢𑁆𑀢𑀦𑁄 𑀤𑀼𑀩𑁆𑀪𑀭𑁄. 𑀬𑁄 𑀧𑀦 𑀲𑀸𑀮𑀺𑀫𑀁𑀲𑁄𑀤𑀦𑀸𑀤𑀻𑀦𑀁 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀤𑀺𑀦𑁆𑀦𑁂𑀧𑀺 𑀤𑀼𑀫𑁆𑀫𑀼𑀔𑀪𑀸𑀯𑀁 𑀅𑀦𑀢𑁆𑀢𑀫𑀦𑀪𑀸𑀯𑀫𑁂𑀯 𑀘 𑀤𑀲𑁆𑀲𑁂𑀢𑀺, 𑀢𑁂𑀲𑀁 𑀯𑀸 𑀲𑀫𑁆𑀫𑀼𑀔𑀸𑀯 𑀢𑀁 𑀧𑀺𑀡𑁆𑀟𑀧𑀸𑀢𑀁 ‘‘𑀓𑀺𑀁 𑀢𑀼𑀫𑁆𑀳𑁂𑀳𑀺 𑀤𑀺𑀦𑁆𑀦’’𑀦𑁆𑀢𑀺 𑀅𑀧𑀲𑀸𑀤𑁂𑀦𑁆𑀢𑁄 𑀲𑀸𑀫𑀡𑁂𑀭𑀕𑀳𑀝𑁆𑀞𑀸𑀤𑀻𑀦𑀫𑁆𑀧𑀺 𑀤𑁂𑀢𑀺, 𑀅𑀬𑀁 𑀉𑀧𑀝𑁆𑀞𑀸𑀓𑀸𑀦𑀁 𑀤𑀼𑀩𑁆𑀪𑀭𑁄. 𑀏𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑀦𑁆𑀢𑀺 𑀤𑀼𑀩𑁆𑀪𑀭𑁄 𑀪𑀺𑀓𑁆𑀔𑀼 𑀦 𑀲𑀓𑁆𑀓𑀸 𑀧𑁄𑀲𑀺𑀢𑀼𑀦𑁆𑀢𑀺. 𑀬𑁄 𑀧𑀦 𑀬𑀁𑀓𑀺𑀜𑁆𑀘𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸 𑀮𑀤𑁆𑀥𑀸 𑀢𑀼𑀝𑁆𑀞𑀘𑀺𑀢𑁆𑀢𑁄𑀯 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀅𑀬𑀁 𑀅𑀢𑁆𑀢𑀦𑁄 𑀲𑀼𑀪𑀭𑁄. 𑀬𑁄 𑀘 𑀧𑀭𑁂𑀲𑀫𑁆𑀧𑀺 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸 𑀤𑀸𑀦𑀁 𑀅𑀳𑀻𑀴𑁂𑀢𑁆𑀯𑀸 𑀅𑀢𑁆𑀢𑀫𑀦𑁄 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑁄 𑀳𑀼𑀢𑁆𑀯𑀸 𑀢𑁂𑀲𑀁 𑀲𑀫𑁆𑀫𑀼𑀔𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀬𑀸𑀢𑀺, 𑀅𑀬𑀁 𑀉𑀧𑀝𑁆𑀞𑀸𑀓𑀸𑀦𑀁 𑀲𑀼𑀪𑀭𑁄. 𑀏𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀅𑀢𑀺𑀯𑀺𑀬 𑀯𑀺𑀲𑁆𑀲𑀢𑁆𑀣𑀸 𑀳𑁄𑀦𑁆𑀢𑀺 𑁋 ‘‘𑀅𑀫𑁆𑀳𑀸𑀓𑀁 𑀪𑀤𑀦𑁆𑀢𑁄 𑀲𑀼𑀪𑀭𑁄 𑀣𑁄𑀓𑁂𑀦𑀧𑀺 𑀢𑀼𑀲𑁆𑀲𑀢𑀺, 𑀫𑀬𑀫𑁂𑀯 𑀦𑀁 𑀧𑁄𑀲𑀺𑀲𑁆𑀲𑀸𑀫𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 𑀧𑁄𑀲𑁂𑀦𑁆𑀢𑀺.

𑀢𑀢𑁆𑀣 𑀲𑀘𑁂 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀲𑁆𑀲 𑀅𑀢𑁆𑀢𑀦𑁄 𑀯𑀸 𑀉𑀧𑀝𑁆𑀞𑀸𑀓𑀸𑀦𑀁 𑀯𑀸 𑀤𑀼𑀩𑁆𑀪𑀭𑀢𑀸𑀦𑀬𑁂𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀢𑁄 𑀦𑀁 𑀇𑀫𑀺𑀦𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀔𑁂𑀧𑀗𑁆𑀓𑀼𑀲𑁂𑀦 𑀦𑀺𑀯𑀸𑀭𑁂𑀲𑁆𑀲𑀢𑀺 𑁋 ‘‘𑀅𑀭𑁂 𑀢𑁆𑀯𑀁 𑀲𑀼𑀕𑀢𑀸𑀢𑀺𑀭𑀺𑀢𑁆𑀢𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀈𑀤𑀺𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀻’’𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄, 𑀏𑀯𑀫𑀲𑁆𑀲 𑀲𑀼𑀪𑀭𑀢𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺. 𑀲𑀘𑁂 𑀧𑀦𑀲𑁆𑀲 𑀓𑁄𑀲𑀚𑁆𑀚𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀫𑁆𑀧𑀺 𑀏𑀢𑁂𑀦𑁂𑀯𑀗𑁆𑀓𑀼𑀲𑁂𑀦 𑀦𑀺𑀯𑀸𑀭𑁂𑀲𑁆𑀲𑀢𑀺 𑁋 ‘‘𑀅𑀭𑁂 𑀢𑁆𑀯𑀁 𑀦𑀸𑀫 𑀢𑀤𑀸 𑀲𑀼𑀕𑀢𑀸𑀢𑀺𑀭𑀺𑀢𑁆𑀢𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀣𑀸 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀧𑀭𑁂𑀢𑁄𑀧𑀺 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀅𑀚𑁆𑀚 𑀓𑁄𑀲𑀚𑁆𑀚𑀫𑀦𑀼𑀬𑀼𑀜𑁆𑀚𑀲𑀻’’𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄, 𑀏𑀯𑀫𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺. 𑀏𑀯𑀫𑀲𑁆𑀲 𑀇𑀤𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀔𑀺𑀧𑀦𑀁 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀺𑀘𑁆𑀙𑀢𑀸𑀬…𑀧𑁂… 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺. 𑀏𑀯𑀫𑀲𑁆𑀲𑀺𑀫𑁂 𑀧𑀜𑁆𑀘 𑀕𑀼𑀡𑀸 𑀧𑀭𑀺𑀧𑀽𑀭𑀸 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺.

𑀓𑀣𑀁? 𑀅𑀢𑁆𑀭 𑀳𑀺 𑀧𑀸𑀴𑀺𑀬𑀁𑀬𑁂𑀯 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀢𑀸𑀯𑀻𑀭𑀺𑀬𑀸𑀭𑀫𑁆𑀪𑀯𑀲𑁂𑀦 𑀢𑀻𑀡𑀺 𑀆𑀕𑀢𑀸𑀦𑀺, 𑀲𑁂𑀲𑀸𑀦𑀺 𑀲𑀮𑁆𑀮𑁂𑀔𑁂𑀦 𑀲𑀗𑁆𑀕𑀳𑀺𑀢𑀸𑀦𑀺. 𑀇𑀤𑀜𑁆𑀳𑀺 𑀲𑀩𑁆𑀩𑀓𑀣𑀸𑀯𑀢𑁆𑀣𑀽𑀦𑀁 𑀦𑀸𑀫𑀫𑁂𑀯, 𑀬𑀤𑀺𑀤𑀁 𑀲𑀮𑁆𑀮𑁂𑀔𑁄. 𑀬𑀣𑀸𑀳 𑁋 ‘‘𑀬𑀸 𑀘 𑀔𑁄 𑀅𑀬𑀁, 𑀆𑀦𑀦𑁆𑀤, 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀦𑀻𑀯𑀭𑀡𑀲𑀧𑁆𑀧𑀸𑀬𑀸 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀅𑀧𑁆𑀧𑀺𑀘𑁆𑀙𑀓𑀣𑀸’’𑀢𑀺 (𑀫. 𑀦𑀺. 𑁩.𑁧𑁮𑁯, 𑁧𑁯𑁨) 𑀯𑀺𑀢𑁆𑀣𑀸𑀭𑁄. 𑀏𑀯𑀁 𑀇𑀫𑁂 𑀧𑀜𑁆𑀘 𑀕𑀼𑀡𑀸 𑀧𑀭𑀺𑀧𑀽𑀭𑀸 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺. 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀧𑀭𑀺𑀧𑀽𑀭𑀸𑀦𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺.

𑀓𑀣𑀁? 𑀏𑀢𑁂𑀲𑀼 𑀳𑀺 𑀅𑀧𑁆𑀧𑀺𑀘𑁆𑀙𑀓𑀣𑀸 𑀲𑀦𑁆𑀢𑁄𑀲𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸 𑀲𑀻𑀮𑀓𑀣𑀸𑀢𑀺 𑀇𑀫𑀸 𑀘𑀢𑀲𑁆𑀲𑁄 𑀓𑀣𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀲𑀗𑁆𑀕𑀳𑀺𑀢𑀸𑀬𑁂𑀯. 𑀧𑀯𑀺𑀯𑁂𑀓𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸 𑀲𑀫𑀸𑀥𑀺𑀓𑀣𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀲𑀗𑁆𑀕𑀳𑀺𑀢𑀸. 𑀧𑀜𑁆𑀜𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀲𑀗𑁆𑀕𑀳𑀺𑀢𑀸𑀢𑀺. 𑀏𑀯𑀁 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀧𑀭𑀺𑀧𑀽𑀭𑀸𑀦𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀭𑀺𑀧𑀽𑀭𑀸 𑀧𑀜𑁆𑀘 𑀅𑀲𑁂𑀓𑁆𑀔𑀥𑀫𑁆𑀫𑀓𑁆𑀔𑀦𑁆𑀥𑁂 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺.

𑀓𑀣𑀁? 𑀧𑀭𑀺𑀧𑀽𑀭𑀸 𑀳𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀅𑀲𑁂𑀓𑁆𑀔𑁄 𑀲𑀻𑀮𑀓𑁆𑀔𑀦𑁆𑀥𑁄𑀬𑁂𑀯 𑀳𑁄𑀢𑀺, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀅𑀲𑁂𑀓𑁆𑀔𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀅𑀲𑁂𑀓𑁆𑀔𑀸 𑀧𑀜𑁆𑀜𑀸-𑀯𑀺𑀫𑀼𑀢𑁆𑀢𑀺-𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀸 𑀏𑀯𑀸𑀢𑀺 𑀏𑀯𑀁 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀭𑀺𑀧𑀽𑀭𑀸 𑀧𑀜𑁆𑀘 𑀅𑀲𑁂𑀓𑁆𑀔𑀥𑀫𑁆𑀫𑀓𑁆𑀔𑀦𑁆𑀥𑁂 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺. 𑀧𑀜𑁆𑀘 𑀥𑀫𑁆𑀫𑀓𑁆𑀔𑀦𑁆𑀥𑀸 𑀧𑀭𑀺𑀧𑀽𑀭𑀸 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀉𑀧𑀭𑀺𑀧𑀩𑁆𑀩𑀢𑁂 𑀧𑀸𑀯𑀼𑀲𑁆𑀲𑀓𑁄 𑀫𑀳𑀸𑀫𑁂𑀖𑁄 𑀅𑀪𑀺𑀯𑀼𑀝𑁆𑀞𑁄 𑀧𑀩𑁆𑀩𑀢𑀓𑀦𑁆𑀤𑀭𑀲𑀭𑀲𑀸𑀔𑀸 𑀧𑀭𑀺𑀧𑀽𑀭𑁂𑀢𑀺. 𑀢𑀸 𑀧𑀭𑀺𑀧𑀽𑀭𑀸 𑀓𑀼𑀲𑁄𑀩𑁆𑀪𑁂, 𑀓𑀼𑀲𑁄𑀩𑁆𑀪𑀸 𑀫𑀳𑀸𑀲𑁄𑀩𑁆𑀪𑁂, 𑀫𑀳𑀸𑀲𑁄𑀩𑁆𑀪𑀸 𑀓𑀼𑀦𑁆𑀦𑀤𑀺𑀬𑁄, 𑀓𑀼𑀦𑁆𑀦𑀤𑀺𑀬𑁄 𑀫𑀳𑀸𑀦𑀤𑀺𑀬𑁄, 𑀫𑀳𑀸𑀦𑀤𑀺𑀬𑁄 𑀫𑀳𑀸𑀲𑀫𑀼𑀤𑁆𑀤𑀲𑀸𑀕𑀭𑀁 𑀧𑀭𑀺𑀧𑀽𑀭𑁂𑀦𑁆𑀢𑀺; 𑀏𑀯𑀫𑁂𑀯 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀫𑁂 𑀧𑀜𑁆𑀘 𑀕𑀼𑀡𑀸 𑀧𑀭𑀺𑀧𑀽𑀭𑀸 𑀤𑀲 𑀓𑀣𑀸𑀯𑀢𑁆𑀣𑀼𑀦𑀺 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺. 𑀏𑀯𑀫𑀬𑀁 𑀪𑀺𑀓𑁆𑀔𑀼 𑀥𑀫𑁆𑀫𑀤𑀸𑀬𑀸𑀤𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀧𑀭𑀫𑀥𑀫𑁆𑀫𑀤𑀸𑀬𑀸𑀤𑀁 𑀮𑀪𑀢𑀻𑀢𑀺 𑀏𑀢𑀫𑀢𑁆𑀣𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀸 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼 𑀢𑀜𑁆𑀳𑀺 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄’’𑀢𑀺𑀆𑀤𑀺𑀫𑀸𑀳.

𑀏𑀯𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀚𑁆𑀚𑀢𑀭𑀧𑀸𑀲𑀁𑀲𑀢𑀭𑀪𑀸𑀯𑀁 𑀓𑀸𑀭𑀡𑁂𑀦 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂 𑀪𑀺𑀓𑁆𑀔𑀽 𑀢𑀣𑀢𑁆𑀢𑀸𑀬 𑀲𑀦𑁆𑀦𑀺𑀬𑁄𑀚𑁂𑀦𑁆𑀢𑁄 𑀢𑀲𑁆𑀫𑀸 𑀢𑀺𑀳 𑀫𑁂 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀬𑀲𑁆𑀫𑀸 𑀬𑁄 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁂𑀬𑁆𑀬, 𑀲𑁄 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀫𑀽𑀮𑀕𑀼𑀡𑁂𑀳𑀺 𑀧𑀭𑀺𑀩𑀸𑀳𑀺𑀭𑁄. 𑀬𑁄 𑀧𑀦 𑀅𑀪𑀼𑀜𑁆𑀚𑀺𑀢𑁆𑀯𑀸 𑀓𑀭𑁂𑀬𑁆𑀬, 𑀲𑁄 𑀇𑀫𑁂𑀲𑀁 𑀪𑀸𑀕𑀻 𑀳𑁄𑀢𑀺 𑁋 ‘‘𑀢𑀲𑁆𑀫𑀸 𑀢𑀺𑀳 𑀫𑁂, 𑀪𑀺𑀓𑁆𑀔𑀯𑁂…𑀧𑁂… 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸𑀢𑀺 𑀇𑀤𑀁 𑀦𑀺𑀤𑀸𑀦𑀧𑀭𑀺𑀬𑁄𑀲𑀸𑀦𑀢𑁄 𑀧𑀪𑀼𑀢𑀺 𑀬𑀸𑀯 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸𑀢𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑀁 𑀪𑀕𑀯𑀸 𑀅𑀯𑁄𑀘. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄𑀢𑀺 𑀇𑀤𑀜𑁆𑀘 𑀲𑀼𑀢𑁆𑀢𑀧𑁆𑀧𑀤𑁂𑀲𑀁 𑀯𑀢𑁆𑀯𑀸𑀯 𑀲𑁄𑀪𑀦𑀸𑀬 𑀧𑀝𑀺𑀧𑀤𑀸𑀬 𑀕𑀢𑀢𑁆𑀢𑀸 𑀲𑀼𑀕𑀢𑁄𑀢𑀺 𑀲𑀗𑁆𑀔𑀁 𑀧𑀢𑁆𑀢𑁄𑀬𑁂𑀯 𑀪𑀕𑀯𑀸. 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀯𑀺𑀳𑀸𑀭𑀁 𑀅𑀢𑁆𑀢𑀦𑁄 𑀫𑀳𑀸𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺 𑀅𑀲𑀫𑁆𑀪𑀺𑀦𑁆𑀦𑀸𑀬 𑀏𑀯 𑀧𑀭𑀺𑀲𑀸𑀬. 𑀓𑀲𑁆𑀫𑀸 𑀥𑀫𑁆𑀫𑀣𑁄𑀫𑀦𑀢𑁆𑀣𑀁.

𑀩𑀼𑀤𑁆𑀥𑀸 𑀓𑀺𑀭 𑀅𑀧𑀭𑀺𑀦𑀺𑀝𑁆𑀞𑀺𑀢𑀸𑀬 𑀤𑁂𑀲𑀦𑀸𑀬 𑀯𑀺𑀳𑀸𑀭𑀁 𑀧𑀯𑀺𑀲𑀦𑁆𑀢𑀸 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀧𑀯𑀺𑀲𑀦𑁆𑀢𑀺 𑀧𑀼𑀕𑁆𑀕𑀮𑀣𑁄𑀫𑀦𑀢𑁆𑀣𑀁 𑀯𑀸 𑀥𑀫𑁆𑀫𑀣𑁄𑀫𑀦𑀢𑁆𑀣𑀁 𑀯𑀸. 𑀧𑀼𑀕𑁆𑀕𑀮𑀣𑁄𑀫𑀦𑀢𑁆𑀣𑀁 𑀧𑀯𑀺𑀲𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀝𑁆𑀞𑀁, 𑀯𑀺𑀢𑁆𑀣𑀸𑀭𑁂𑀦 𑀅𑀯𑀺𑀪𑀢𑁆𑀢𑀁, 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸 𑀪𑀺𑀓𑁆𑀔𑀽 𑀉𑀕𑁆𑀕𑀳𑁂𑀢𑁆𑀯𑀸 𑀆𑀦𑀦𑁆𑀤𑀁 𑀯𑀸 𑀓𑀘𑁆𑀘𑀸𑀦𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀢𑁂 𑀫𑀬𑁆𑀳𑀁 𑀜𑀸𑀡𑁂𑀦 𑀲𑀁𑀲𑀦𑁆𑀤𑁂𑀢𑁆𑀯𑀸 𑀓𑀣𑁂𑀲𑁆𑀲𑀦𑁆𑀢𑀺, 𑀢𑀢𑁄 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸 𑀧𑀼𑀦 𑀫𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀅𑀳𑀁 𑀲𑀼𑀓𑀣𑀺𑀢𑀁, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁂𑀦 𑀲𑀼𑀓𑀣𑀺𑀢𑀁 𑀓𑀘𑁆𑀘𑀸𑀦𑁂𑀦, 𑀫𑀁 𑀘𑁂𑀧𑀺 𑀢𑀼𑀫𑁆𑀳𑁂 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀸𑀣, 𑀅𑀳𑀫𑁆𑀧𑀺 𑀦𑀁 𑀏𑀯𑀫𑁂𑀯 𑀩𑁆𑀬𑀸𑀓𑀭𑁂𑀬𑁆𑀬𑀦𑁆𑀢𑀺 𑀏𑀯𑀁 𑀢𑁂 𑀧𑀼𑀕𑁆𑀕𑀮𑁂 𑀣𑁄𑀫𑁂𑀲𑁆𑀲𑀸𑀫𑀺, 𑀢𑀢𑁄 𑀢𑁂𑀲𑀼 𑀕𑀸𑀭𑀯𑀁 𑀚𑀦𑁂𑀢𑁆𑀯𑀸 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀺, 𑀢𑁂𑀧𑀺 𑀪𑀺𑀓𑁆𑀔𑀽 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘 𑀦𑀺𑀬𑁄𑀚𑁂𑀲𑁆𑀲𑀦𑁆𑀢𑀺, 𑀢𑁂 𑀢𑁂𑀳𑀺 𑀦𑀺𑀬𑁄𑀚𑀺𑀢𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀭𑀺𑀧𑀽𑀭𑁂𑀦𑁆𑀢𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺.

𑀥𑀫𑁆𑀫𑀣𑁄𑀫𑀦𑀢𑁆𑀣𑀁 𑀧𑀯𑀺𑀲𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀬𑀣𑀸 𑀇𑀥𑁂𑀯 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀺 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁂 𑀢𑀫𑁂𑀯 𑀆𑀫𑀺𑀲𑀤𑀸𑀬𑀸𑀤𑀁 𑀕𑀭𑀳𑀦𑁆𑀢𑁄 𑀥𑀫𑁆𑀫𑀤𑀸𑀬𑀸𑀤𑀜𑁆𑀘 𑀣𑁄𑀫𑁂𑀦𑁆𑀢𑁄 𑀇𑀫𑀺𑀲𑁆𑀲𑀁𑀬𑁂𑀯 𑀧𑀭𑀺𑀲𑀢𑀺 𑀦𑀺𑀲𑀺𑀦𑁆𑀦𑁄 𑀲𑀸𑀭𑀺𑀧𑀼𑀢𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀺, 𑀏𑀯𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀫𑁆𑀳𑀸𑀓𑀁 𑀏𑀓𑀚𑁆𑀛𑀸𑀲𑀬𑀸𑀬 𑀫𑀢𑀺𑀬𑀸 𑀤𑁂𑀲𑀺𑀢𑀸 𑀅𑀬𑀁 𑀤𑁂𑀲𑀦𑀸 𑀅𑀕𑁆𑀕𑀸 𑀘 𑀕𑀭𑀼𑀓𑀸 𑀘 𑀪𑀯𑀺𑀲𑁆𑀲𑀢𑀺 𑀧𑀸𑀲𑀸𑀡𑀘𑁆𑀙𑀢𑁆𑀢𑀲𑀤𑀺𑀲𑀸. 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀝𑁆𑀞𑁂𑀦 𑀢𑀺𑀢𑁆𑀣𑁂 𑀞𑀧𑀺𑀢𑀸 𑀦𑀸𑀯𑀸 𑀯𑀺𑀬 𑀫𑀕𑁆𑀕𑀕𑀫𑀦𑀝𑁆𑀞𑁂𑀦 𑀘𑀢𑀼𑀬𑀼𑀢𑁆𑀢𑀆𑀚𑀜𑁆𑀜𑀭𑀣𑁄 𑀯𑀺𑀬 𑀘 𑀪𑀯𑀺𑀲𑁆𑀲𑀢𑀺. 𑀬𑀣𑀸 𑀘 ‘𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀅𑀬𑀁 𑀤𑀡𑁆𑀟𑁄’𑀢𑀺 𑀧𑀭𑀺𑀲𑀢𑀺 𑀆𑀡𑀁 𑀞𑀧𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀸𑀲𑀸𑀤𑀁 𑀆𑀭𑀼𑀴𑁆𑀳𑁂 𑀭𑀸𑀚𑀺𑀦𑀺 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁄 𑀲𑁂𑀦𑀸𑀧𑀢𑀺 𑀢𑀁 𑀭𑀜𑁆𑀜𑀸 𑀞𑀧𑀺𑀢𑀁 𑀆𑀡𑀁 𑀧𑀯𑀢𑁆𑀢𑁂𑀢𑀺; 𑀏𑀯𑀫𑁆𑀧𑀺 𑀫𑀬𑀸 𑀞𑀧𑀺𑀢𑀁 𑀤𑁂𑀲𑀦𑀁 𑀇𑀫𑀺𑀲𑁆𑀲𑀁𑀬𑁂𑀯 𑀧𑀭𑀺𑀲𑀢𑀺 𑀦𑀺𑀲𑀺𑀦𑁆𑀦𑁄 𑀲𑀸𑀭𑀺𑀧𑀼𑀢𑁆𑀢𑁄 𑀣𑁄𑀫𑁂𑀢𑁆𑀯𑀸 𑀤𑁂𑀲𑁂𑀲𑁆𑀲𑀢𑀺, 𑀏𑀯𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀫𑁆𑀳𑀸𑀓𑀁 𑀫𑀢𑀺𑀬𑀸 𑀤𑁂𑀲𑀺𑀢𑀸 𑀅𑀬𑀁 𑀤𑁂𑀲𑀦𑀸 𑀩𑀮𑀯𑀢𑀭𑀸 𑀫𑀚𑁆𑀛𑀦𑁆𑀳𑀺𑀓𑀲𑀽𑀭𑀺𑀬𑁄 𑀯𑀺𑀬 𑀧𑀚𑁆𑀚𑀮𑀺𑀲𑁆𑀲𑀢𑀻’’𑀢𑀺. 𑀏𑀯𑀫𑀺𑀥 𑀥𑀫𑁆𑀫𑀣𑁄𑀫𑀦𑀢𑁆𑀣𑀁 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀈𑀤𑀺𑀲𑁂𑀲𑀼 𑀘 𑀞𑀸𑀦𑁂𑀲𑀼 𑀪𑀕𑀯𑀸 𑀦𑀺𑀲𑀺𑀦𑁆𑀦𑀸𑀲𑀦𑁂𑀬𑁂𑀯 𑀅𑀦𑁆𑀢𑀭𑀳𑀺𑀢𑁄 𑀘𑀺𑀢𑁆𑀢𑀕𑀢𑀺𑀬𑀸 𑀯𑀺𑀳𑀸𑀭𑀁 𑀧𑀯𑀺𑀲𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀺 𑀳𑀺 𑀓𑀸𑀬𑀕𑀢𑀺𑀬𑀸 𑀕𑀘𑁆𑀙𑁂𑀬𑁆𑀬, 𑀲𑀩𑁆𑀩𑀸 𑀧𑀭𑀺𑀲𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀲𑀸 𑀏𑀓𑀯𑀸𑀭𑀁 𑀪𑀺𑀦𑁆𑀦𑀸 𑀧𑀼𑀦 𑀤𑀼𑀲𑁆𑀲𑀦𑁆𑀦𑀺𑀧𑀸𑀢𑀸 𑀪𑀯𑁂𑀬𑁆𑀬𑀸𑀢𑀺 𑀪𑀕𑀯𑀸 𑀘𑀺𑀢𑁆𑀢𑀕𑀢𑀺𑀬𑀸 𑀏𑀯 𑀧𑀸𑀯𑀺𑀲𑀺.

𑁩𑁧. 𑀏𑀯𑀁 𑀧𑀯𑀺𑀝𑁆𑀞𑁂 𑀧𑀦 𑀪𑀕𑀯𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑀽𑀧𑀁 𑀢𑀁 𑀥𑀫𑁆𑀫𑀁 𑀣𑁄𑀫𑁂𑀢𑀼𑀓𑀸𑀫𑁄 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄…𑀧𑁂…𑀏𑀢𑀤𑀯𑁄𑀘. 𑀢𑀢𑁆𑀣 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁. 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁, 𑀢𑀜𑁆𑀘 𑀔𑁄 𑀫𑀸𑀢𑀺𑀢𑁄, 𑀦 𑀧𑀺𑀢𑀺𑀢𑁄. 𑀭𑀽𑀧𑀲𑀸𑀭𑀺𑀬𑀸 𑀳𑀺 𑀩𑁆𑀭𑀸𑀳𑁆𑀫𑀡𑀺𑀬𑀸 𑀲𑁄 𑀧𑀼𑀢𑁆𑀢𑁄, 𑀢𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲𑀸𑀢𑀺 𑀧𑀓𑁆𑀓𑀦𑁆𑀢𑀲𑁆𑀲 𑀲𑀢𑁄 𑀦𑀘𑀺𑀭𑁂𑀦. 𑀆𑀯𑀼𑀲𑁄, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀧𑀦 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀲𑀸𑀯𑀓𑁂 𑀆𑀮𑀧𑀦𑁆𑀢𑀸 𑀪𑀺𑀓𑁆𑀔𑀯𑁂𑀢𑀺 𑀆𑀮𑀧𑀦𑁆𑀢𑀺. 𑀲𑀸𑀯𑀓𑀸 𑀧𑀦 𑀩𑀼𑀤𑁆𑀥𑁂𑀳𑀺 𑀲𑀤𑀺𑀲𑀸 𑀫𑀸 𑀳𑁄𑀫𑀸𑀢𑀺 𑀆𑀯𑀼𑀲𑁄𑀢𑀺 𑀧𑀞𑀫𑀁 𑀯𑀢𑁆𑀯𑀸 𑀧𑀘𑁆𑀙𑀸 𑀪𑀺𑀓𑁆𑀔𑀯𑁂𑀢𑀺 𑀪𑀡𑀦𑁆𑀢𑀺. 𑀩𑀼𑀤𑁆𑀥𑁂𑀳𑀺 𑀘 𑀆𑀮𑀧𑀺𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀪𑀤𑀦𑁆𑀢𑁂𑀢𑀺 𑀧𑀝𑀺𑀯𑀘𑀦𑀁 𑀤𑁂𑀢𑀺, 𑀲𑀸𑀯𑀓𑁂𑀳𑀺 𑀆𑀯𑀼𑀲𑁄𑀢𑀺.

𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄𑀢𑀺 𑀏𑀢𑁆𑀣 𑀓𑀺𑀢𑁆𑀢𑀸𑀯𑀢𑀸𑀢𑀺 𑀧𑀭𑀺𑀘𑁆𑀙𑁂𑀤𑀯𑀘𑀦𑀁, 𑀓𑀺𑀢𑁆𑀢𑀓𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀼𑀓𑀸𑀭𑁄 𑀧𑀼𑀘𑁆𑀙𑀸𑀬𑀁. 𑀔𑁄𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄𑀢𑀺, 𑀢𑀻𑀳𑀺 𑀯𑀺𑀯𑁂𑀓𑁂𑀳𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁂𑀳𑀺 𑀲𑀢𑁆𑀣𑀼𑀦𑁄 𑀯𑀺𑀳𑀭𑀦𑁆𑀢𑀲𑁆𑀲. 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻𑀢𑀺 𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀁 𑀅𑀜𑁆𑀜𑀢𑀭𑀫𑁆𑀧𑀺 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀺, 𑀆𑀫𑀺𑀲𑀤𑀸𑀬𑀸𑀤𑀸𑀯 𑀳𑁄𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺. 𑀏𑀲 𑀦𑀬𑁄 𑀲𑀼𑀓𑁆𑀓𑀧𑀓𑁆𑀔𑁂𑀧𑀺.

𑀏𑀯𑀁 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀲𑁄𑀢𑀼𑀓𑀸𑀫𑀸 𑀪𑀺𑀓𑁆𑀔𑀽 𑀤𑀽𑀭𑀢𑁄𑀧𑀺 𑀔𑁄𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑀢𑁆𑀣 𑀤𑀽𑀭𑀢𑁄𑀧𑀻𑀢𑀺 𑀢𑀺𑀭𑁄𑀭𑀝𑁆𑀞𑀢𑁄𑀧𑀺 𑀢𑀺𑀭𑁄𑀚𑀦𑀧𑀤𑀢𑁄𑀧𑀺 𑀅𑀦𑁂𑀓𑀬𑁄𑀚𑀦𑀕𑀡𑀦𑀢𑁄𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀦𑁆𑀢𑀺𑀓𑁂𑀢𑀺 𑀲𑀫𑀻𑀧𑁂. 𑀅𑀜𑁆𑀜𑀸𑀢𑀼𑀦𑁆𑀢𑀺 𑀚𑀸𑀦𑀺𑀢𑀼𑀁 𑀩𑀼𑀚𑁆𑀛𑀺𑀢𑀼𑀁. 𑀆𑀬𑀲𑁆𑀫𑀦𑁆𑀢𑀁𑀬𑁂𑀯 𑀲𑀸𑀭𑀺𑀧𑀼𑀢𑁆𑀢𑀁 𑀧𑀝𑀺𑀪𑀸𑀢𑀽𑀢𑀺 𑀆𑀬𑀲𑁆𑀫𑀢𑁄𑀬𑁂𑀯 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀸𑀕𑁄 𑀳𑁄𑀢𑀼, 𑀆𑀬𑀲𑁆𑀫𑀸 𑀧𑀦 𑀲𑀸𑀭𑀺𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀪𑀸𑀕𑀁 𑀓𑀢𑁆𑀯𑀸 𑀯𑀺𑀪𑀚𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀬𑀲𑁆𑀫𑀢𑁄 𑀳𑀺 𑀪𑀸𑀕𑁄 𑀬𑀤𑀺𑀤𑀁 𑀅𑀢𑁆𑀣𑀓𑁆𑀔𑀸𑀦𑀁, 𑀅𑀫𑁆𑀳𑀸𑀓𑀁 𑀧𑀦 𑀲𑀯𑀦𑀁 𑀪𑀸𑀕𑁄𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄, 𑀏𑀯𑀁 𑀲𑀤𑁆𑀤𑀮𑀓𑁆𑀔𑀡𑁂𑀦 𑀲𑀫𑁂𑀢𑀺. 𑀓𑁂𑀘𑀺 𑀧𑀦 𑀪𑀡𑀦𑁆𑀢𑀺 ‘‘𑀧𑀝𑀺𑀪𑀸𑀢𑀽𑀢𑀺 𑀤𑀺𑀲𑁆𑀲𑀢𑀽’’𑀢𑀺. 𑀅𑀧𑀭𑁂 ‘‘𑀉𑀧𑀝𑁆𑀞𑀸𑀢𑀽’’𑀢𑀺. 𑀥𑀸𑀭𑁂𑀲𑁆𑀲𑀦𑁆𑀢𑀻𑀢𑀺 𑀉𑀕𑁆𑀕𑀳𑁂𑀲𑁆𑀲𑀦𑁆𑀢𑀺 𑀧𑀭𑀺𑀬𑀸𑀧𑀼𑀡𑀺𑀲𑁆𑀲𑀦𑁆𑀢𑀺. 𑀢𑀢𑁄 𑀦𑁂𑀲𑀁 𑀓𑀣𑁂𑀢𑀼𑀓𑀸𑀫𑁄 𑀣𑁂𑀭𑁄 𑀢𑁂𑀦 𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀦𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀳𑀺𑀓𑀸𑀭𑁄 𑀦𑀺𑀧𑀸𑀢𑁄. 𑀬𑀲𑁆𑀫𑀸 𑀲𑁄𑀢𑀼𑀓𑀸𑀫𑀸𑀢𑁆𑀣, 𑀬𑀲𑁆𑀫𑀸 𑀘 𑀫𑀬𑁆𑀳𑀁 𑀪𑀸𑀭𑀁 𑀆𑀭𑁄𑀧𑀬𑀺𑀢𑁆𑀣, 𑀢𑀲𑁆𑀫𑀸 𑀲𑀼𑀡𑀸𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀧𑀺 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼, 𑀢𑁂𑀦𑀸𑀳 ‘‘𑀏𑀯𑀫𑀸𑀯𑀼𑀲𑁄𑀢𑀺…𑀧𑁂…𑀧𑀘𑁆𑀘𑀲𑁆𑀲𑁄𑀲𑀼’’𑀦𑁆𑀢𑀺.

𑀅𑀣 𑀦𑁂𑀲𑀁, 𑀆𑀫𑀺𑀲𑀤𑀸𑀬𑀸𑀤𑀁 𑀕𑀭𑀳𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀢𑀼𑀫𑁆𑀳𑁂𑀧𑀺 𑀢𑁂𑀦 𑀆𑀤𑀺𑀬𑀸 𑀪𑀯𑁂𑀬𑁆𑀬𑀸𑀣𑀸’’𑀢𑀺 𑀏𑀓𑁂𑀦𑁂𑀯𑀸𑀓𑀸𑀭𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀤𑀲𑁆𑀲𑁂𑀦𑁆𑀢𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀯𑀼𑀲𑁄, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄…𑀧𑁂… 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’’𑀢𑀺.

𑀏𑀢𑁆𑀢𑀸𑀯𑀢𑀸 𑀬𑀜𑁆𑀘 𑀪𑀕𑀯𑀸 𑀆𑀫𑀺𑀲𑀤𑀸𑀬𑀸𑀤𑀧𑀝𑀺𑀧𑀤𑀁 𑀕𑀭𑀳𑀦𑁆𑀢𑁄 ‘‘𑀢𑀼𑀫𑁆𑀳𑁂𑀧𑀺 𑀢𑁂𑀦 𑀆𑀤𑀺𑀬𑀸 𑀪𑀯𑁂𑀬𑁆𑀬𑀸𑀣𑀸’’𑀢𑀺 𑀆𑀳, 𑀬𑀜𑁆𑀘 𑀅𑀢𑁆𑀢𑀦𑀸 𑀧𑀼𑀘𑁆𑀙𑀁 𑀧𑀼𑀘𑁆𑀙𑀺 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄…𑀧𑁂… 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’’𑀢𑀺, 𑀢𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀅𑀢𑁆𑀣𑁄 𑀲𑀼𑀯𑀺𑀪𑀢𑁆𑀢𑁄 𑀳𑁄𑀢𑀺. 𑀲𑁄 𑀘 𑀔𑁄 𑀪𑀕𑀯𑀢𑁄 𑀆𑀤𑀺𑀬𑀪𑀸𑀯𑀁 𑀅𑀦𑀸𑀫𑀲𑀺𑀢𑁆𑀯𑀸𑀯. 𑀪𑀕𑀯𑀢𑁄𑀬𑁂𑀯 𑀳𑀺 𑀬𑀼𑀢𑁆𑀢𑀁 𑀲𑀸𑀯𑀓𑁂 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀲𑁆𑀲 ‘‘𑀅𑀳𑀫𑁆𑀧𑀺 𑀢𑁂𑀦 𑀆𑀤𑀺𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀼𑀁, 𑀦 𑀲𑀸𑀯𑀓𑀸𑀦𑀁. 𑀏𑀲 𑀦𑀬𑁄 𑀲𑀼𑀓𑁆𑀓𑀧𑀓𑁆𑀔𑁂𑀧𑀺, 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀦𑀼𑀲𑀦𑁆𑀥𑀺𑀓𑁆𑀓𑀫𑀬𑁄𑀚𑀦𑀸.

𑀅𑀬𑀁 𑀧𑀦𑀢𑁆𑀣𑀯𑀡𑁆𑀡𑀦𑀸 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀢𑀺 𑀲𑀢𑁆𑀣𑀼𑀦𑁄 𑀢𑀻𑀳𑀺 𑀯𑀺𑀯𑁂𑀓𑁂𑀳𑀺 𑀅𑀘𑁆𑀘𑀦𑁆𑀢𑀧𑀯𑀺𑀯𑀺𑀢𑁆𑀢𑀲𑁆𑀲. 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻𑀢𑀺 𑀓𑀸𑀬𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀺, 𑀦 𑀧𑀭𑀺𑀧𑀽𑀭𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀧𑀦 𑀢𑀺𑀯𑀺𑀥𑀁 𑀯𑀺𑀯𑁂𑀓𑀁 𑀲𑀦𑁆𑀥𑀸𑀬 𑀯𑀤𑁂𑀬𑁆𑀬, 𑀧𑀼𑀘𑁆𑀙𑀸𑀬 𑀅𑀯𑀺𑀲𑁂𑀲𑁄 𑀲𑀺𑀬𑀸. 𑀩𑁆𑀬𑀸𑀓𑀭𑀡𑀧𑀓𑁆𑀔𑁄 𑀳𑀺 𑀅𑀬𑀁. 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀤𑁂𑀦 𑀓𑀸𑀬𑀯𑀺𑀯𑁂𑀓𑀁, ‘‘𑀬𑁂𑀲𑀜𑁆𑀘 𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑀯𑀺𑀯𑁂𑀓𑀁, ‘‘𑀩𑀸𑀳𑀼𑀮𑀺𑀓𑀸’’𑀢𑀺𑀆𑀤𑀺𑀦𑀸 𑀉𑀧𑀥𑀺𑀯𑀺𑀯𑁂𑀓𑀜𑁆𑀘 𑀤𑀲𑁆𑀲𑁂𑀢𑀻𑀢𑀺 𑀏𑀯𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀬𑁂𑀲𑀜𑁆𑀘 𑀥𑀫𑁆𑀫𑀸𑀦𑀦𑁆𑀢𑀺 𑀮𑁄𑀪𑀸𑀤𑀬𑁄 𑀲𑀦𑁆𑀥𑀸𑀬𑀸𑀳, 𑀬𑁂 𑀧𑀭𑀢𑁄 ‘‘𑀢𑀢𑁆𑀭𑀸𑀯𑀼𑀲𑁄 𑀮𑁄𑀪𑁄 𑀘 𑀧𑀸𑀧𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀓𑁆𑀔𑀢𑀺. 𑀦𑀧𑁆𑀧𑀚𑀳𑀦𑁆𑀢𑀻𑀢𑀺 𑀦 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀘𑀺𑀢𑁆𑀢𑀯𑀺𑀯𑁂𑀓𑀁 𑀦 𑀧𑀭𑀺𑀧𑀽𑀭𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀸𑀳𑀼𑀮𑀺𑀓𑀸𑀢𑀺 𑀘𑀻𑀯𑀭𑀸𑀤𑀺𑀩𑀸𑀳𑀼𑀮𑁆𑀮𑀸𑀬 𑀧𑀝𑀺𑀧𑀦𑁆𑀦𑀸. 𑀲𑀸𑀲𑀦𑀁 𑀲𑀺𑀣𑀺𑀮𑀁 𑀕𑀡𑁆𑀳𑀦𑁆𑀢𑀻𑀢𑀺 𑀲𑀸𑀣𑀮𑀺𑀓𑀸. 𑀑𑀓𑁆𑀓𑀫𑀦𑁂 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀏𑀢𑁆𑀣 𑀑𑀓𑁆𑀓𑀫𑀦𑀁 𑀯𑀼𑀘𑁆𑀘𑀦𑁆𑀢𑀺 𑀅𑀯𑀕𑀫𑀦𑀝𑁆𑀞𑁂𑀦 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺, 𑀢𑁂𑀦 𑀧𑀜𑁆𑀘𑀦𑀻𑀯𑀭𑀡𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀯𑀺𑀯𑁂𑀓𑁂𑀢𑀺 𑀉𑀧𑀥𑀺𑀯𑀺𑀯𑁂𑀓𑁂 𑀦𑀺𑀩𑁆𑀩𑀸𑀦𑁂. 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸𑀢𑀺 𑀑𑀭𑁄𑀧𑀺𑀢𑀥𑀼𑀭𑀸, 𑀢𑀤𑀥𑀺𑀕𑀫𑀸𑀬 𑀆𑀭𑀫𑁆𑀪𑀫𑁆𑀧𑀺 𑀅𑀓𑀼𑀭𑀼𑀫𑀸𑀦𑀸𑀢𑀺, 𑀏𑀢𑁆𑀢𑀸𑀯𑀢𑀸 𑀉𑀧𑀥𑀺𑀯𑀺𑀯𑁂𑀓𑀁 𑀦 𑀧𑀭𑀺𑀧𑀽𑀭𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑁆𑀢𑀸𑀯𑀢𑀸 𑀅𑀦𑀺𑀬𑀫𑁂𑀦𑁂𑀯 𑀯𑀢𑁆𑀯𑀸 𑀇𑀤𑀸𑀦𑀺 𑀤𑁂𑀲𑀦𑀁 𑀦𑀺𑀬𑀫𑁂𑀦𑁆𑀢𑁄 ‘‘𑀢𑀢𑁆𑀭𑀸𑀯𑀼𑀲𑁄’’𑀢𑀺𑀆𑀤𑀺𑀫𑀸𑀳. 𑀓𑀲𑁆𑀫𑀸? 𑀲𑀸𑀯𑀓𑀸 ‘‘𑀢𑀻𑀳𑀺 𑀞𑀸𑀦𑁂𑀳𑀻’’𑀢𑀺 𑀏𑀯𑀜𑁆𑀳𑀺 𑀅𑀦𑀺𑀬𑀫𑁂𑀢𑁆𑀯𑀸𑀯 𑀯𑀼𑀘𑁆𑀘𑀫𑀸𑀦𑁂 ‘‘𑀓𑀫𑁆𑀧𑀺 𑀫𑀜𑁆𑀜𑁂 𑀪𑀡𑀢𑀺, 𑀦 𑀅𑀫𑁆𑀳𑁂’’𑀢𑀺 𑀉𑀤𑀸𑀲𑀺𑀦𑀸𑀧𑀺 𑀳𑁄𑀦𑁆𑀢𑀺. ‘‘𑀣𑁂𑀭𑀸 𑀦𑀯𑀸 𑀫𑀚𑁆𑀛𑀺𑀫𑀸’’𑀢𑀺 𑀏𑀯𑀁 𑀧𑀦 𑀦𑀺𑀬𑀫𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁂 𑀅𑀫𑁆𑀳𑁂 𑀪𑀡𑀢𑀻𑀢𑀺 𑀆𑀤𑀭𑀁 𑀓𑀭𑁄𑀦𑁆𑀢𑀺. 𑀬𑀣𑀸 𑀭𑀜𑁆𑀜𑀸 ‘‘𑀅𑀫𑀘𑁆𑀘𑁂𑀳𑀺 𑀦𑀕𑀭𑀯𑀻𑀣𑀺𑀬𑁄 𑀲𑁄𑀥𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀓𑁂𑀦 𑀦𑀼 𑀔𑁄 𑀲𑁄𑀥𑁂𑀢𑀩𑁆𑀩𑀸’’𑀢𑀺 𑀫𑀜𑁆𑀜𑀫𑀸𑀦𑀸 𑀦 𑀲𑁄𑀥𑁂𑀦𑁆𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑀁 𑀲𑁄𑀥𑁂𑀢𑀩𑁆𑀩𑀦𑁆𑀢𑀺 𑀧𑀦 𑀪𑁂𑀭𑀺𑀬𑀸 𑀦𑀺𑀓𑁆𑀔𑀦𑁆𑀢𑀸𑀬 𑀲𑀩𑁆𑀩𑁂 𑀫𑀼𑀳𑀼𑀢𑁆𑀢𑁂𑀦 𑀲𑁄𑀥𑁂𑀦𑁆𑀢𑀺 𑀘 𑀅𑀮𑀗𑁆𑀓𑀭𑁄𑀦𑁆𑀢𑀺 𑀘, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀲𑀸𑀯𑀓𑁂𑀲𑀼. 𑀣𑁂𑀭𑀸𑀢𑀺 𑀤𑀲𑀯𑀲𑁆𑀲𑁂 𑀉𑀧𑀸𑀤𑀸𑀬 𑀯𑀼𑀘𑁆𑀘𑀦𑁆𑀢𑀺. 𑀢𑀻𑀳𑀺 𑀞𑀸𑀦𑁂𑀳𑀻𑀢𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺. 𑀅𑀬𑀜𑁆𑀳𑀺 𑀞𑀸𑀦𑀲𑀤𑁆𑀤𑁄 𑀇𑀲𑁆𑀲𑀭𑀺𑀬𑀝𑁆𑀞𑀺𑀢𑀺𑀔𑀡𑀓𑀸𑀭𑀡𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀓𑀺𑀁 𑀧𑀦𑀸𑀬𑀲𑁆𑀫𑀸 𑀤𑁂𑀯𑀸𑀦𑀫𑀺𑀦𑁆𑀤𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑀁 𑀞𑀸𑀦𑀁 𑀧𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀳𑀺 𑀇𑀲𑁆𑀲𑀭𑀺𑀬𑁂 𑀤𑀺𑀲𑁆𑀲𑀢𑀺. ‘‘𑀞𑀸𑀦𑀓𑀼𑀲𑀮𑁄 𑀳𑁄𑀢𑀺 𑀅𑀓𑁆𑀔𑀡𑀯𑁂𑀥𑀻’’𑀢𑀺𑀆𑀤𑀻𑀲𑀼 𑀞𑀺𑀢𑀺𑀬𑀁. ‘‘𑀞𑀸𑀦𑀲𑁄𑀯𑁂𑀢𑀁 𑀢𑀣𑀸𑀕𑀢𑀁 𑀧𑀝𑀺𑀪𑀸𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁮𑁭) 𑀔𑀡𑁂. ‘‘𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄’’𑀢𑀺𑀆𑀤𑀻𑀲𑀼 (𑀯𑀺𑀪. 𑁮𑁦𑁯; 𑀫. 𑀦𑀺. 𑁧.𑁧𑁪𑁮) 𑀓𑀸𑀭𑀡𑁂. 𑀇𑀥 𑀧𑀦 𑀓𑀸𑀭𑀡𑁂𑀬𑁂𑀯. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀨𑀮𑀁 𑀢𑀺𑀝𑁆𑀞𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀪𑀸𑀯𑁂𑀦, 𑀢𑀲𑁆𑀫𑀸 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸𑀢𑀺 𑀏𑀢𑁆𑀣 𑀕𑀸𑀭𑀬𑁆𑀳𑀸𑀢𑀺 𑀕𑀭𑀳𑀺𑀢𑀩𑁆𑀩𑀸. 𑀣𑁂𑀭𑀸 𑀦𑀸𑀫 𑀲𑀫𑀸𑀦𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀦 𑀉𑀧𑁂𑀦𑁆𑀢𑀺, 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀦 𑀫𑀼𑀜𑁆𑀘𑀦𑁆𑀢𑀺, 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀯𑀟𑁆𑀠𑁂𑀦𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀓𑀸𑀬𑀯𑀺𑀯𑁂𑀓𑀫𑁆𑀧𑀺 𑀦 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀦𑀯𑀫𑀚𑁆𑀛𑀺𑀫𑀓𑀸𑀮𑁂 𑀓𑀻𑀤𑀺𑀲𑀸 𑀅𑀳𑁂𑀲𑀼𑀦𑁆𑀢𑀺 𑀏𑀯𑀁 𑀦𑀺𑀦𑁆𑀤𑀺𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀇𑀫𑀁 𑀦𑀺𑀦𑁆𑀤𑀁 𑀆𑀯𑀼𑀲𑁄 𑀮𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀇𑀫𑁂 𑀦𑀸𑀫 𑀆𑀯𑀼𑀲𑁄 𑀣𑁂𑀭𑀸𑀧𑀺 𑀲𑀫𑀸𑀦𑀸 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀲𑀢𑁆𑀣𑀸 𑀧𑀳𑀸𑀦𑀫𑀸𑀳, 𑀢𑁂 𑀮𑁄𑀪𑀸𑀤𑀺𑀥𑀫𑁆𑀫𑁂 𑀦 𑀚𑀳𑀦𑁆𑀢𑀺, 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀦 𑀮𑀪𑀦𑁆𑀢𑀺, 𑀦𑀯𑀫𑀚𑁆𑀛𑀺𑀫𑀓𑀸𑀮𑁂 𑀓𑀻𑀤𑀺𑀲𑀸 𑀅𑀳𑁂𑀲𑀼𑀦𑁆𑀢𑀺 𑀏𑀯𑀁 𑀦𑀺𑀦𑁆𑀤𑀺𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀇𑀫𑀁 𑀦𑀺𑀦𑁆𑀤𑀁 𑀆𑀯𑀼𑀲𑁄 𑀮𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀻𑀢𑀺 𑀏𑀯𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀢𑀺𑀬𑁂𑀦 𑀞𑀸𑀦𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀇𑀫𑁂 𑀦𑀸𑀫𑀸𑀯𑀼𑀲𑁄, 𑀣𑁂𑀭𑀸𑀧𑀺 𑀲𑀫𑀸𑀦𑀸 𑀇𑀢𑀭𑀻𑀢𑀭𑁂𑀦 𑀦 𑀬𑀸𑀧𑁂𑀦𑁆𑀢𑀺, 𑀘𑀻𑀯𑀭𑀧𑀢𑁆𑀢𑀲𑁂𑀦𑀸𑀲𑀦𑀧𑀽𑀢𑀺𑀓𑀸𑀬𑀫𑀡𑁆𑀟𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺 𑀉𑀧𑀥𑀺𑀯𑀺𑀯𑁂𑀓𑀁 𑀅𑀧𑀽𑀭𑀬𑀫𑀸𑀦𑀸, 𑀦𑀯𑀫𑀚𑁆𑀛𑀺𑀫𑀓𑀸𑀮𑁂 𑀓𑀻𑀤𑀺𑀲𑀸 𑀅𑀳𑁂𑀲𑀼𑀦𑁆𑀢𑀺 𑀏𑀯𑀁 𑀦𑀺𑀦𑁆𑀤𑀺𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀇𑀫𑀁 𑀦𑀺𑀦𑁆𑀤𑀁, 𑀆𑀯𑀼𑀲𑁄, 𑀮𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀻𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀫𑀚𑁆𑀛𑀺𑀫𑀦𑀯𑀯𑀸𑀭𑁂𑀲𑀼.

𑀅𑀬𑀁 𑀧𑀦 𑀯𑀺𑀲𑁂𑀲𑁄. 𑀫𑀚𑁆𑀛𑀺𑀫𑀸𑀢𑀺 𑀧𑀜𑁆𑀘𑀯𑀲𑁆𑀲𑁂 𑀉𑀧𑀸𑀤𑀸𑀬 𑀬𑀸𑀯 𑀦𑀯 𑀯𑀲𑁆𑀲𑀸 𑀯𑀼𑀘𑁆𑀘𑀦𑁆𑀢𑀺. 𑀦𑀯𑀸𑀢𑀺 𑀊𑀦𑀧𑀜𑁆𑀘𑀯𑀲𑁆𑀲𑀸 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸 𑀘 𑀢𑀢𑁆𑀣 𑀦𑀯𑀫𑀚𑁆𑀛𑀺𑀫𑀓𑀸𑀮𑁂 𑀓𑀻𑀤𑀺𑀲𑀸 𑀅𑀳𑁂𑀲𑀼𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥 𑀦𑀯𑀓𑀸𑀮𑁂 𑀓𑀻𑀤𑀺𑀲𑀸 𑀅𑀳𑁂𑀲𑀼𑀁, 𑀣𑁂𑀭𑀓𑀸𑀮𑁂 𑀓𑀻𑀤𑀺𑀲𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀚𑁆𑀛𑀺𑀫𑀣𑁂𑀭𑀓𑀸𑀮𑁂 𑀓𑀻𑀤𑀺𑀲𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀯𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑁩𑁨. 𑀇𑀫𑀲𑁆𑀫𑀺𑀜𑁆𑀘 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑀧𑀘𑁆𑀘𑀦𑀻𑀓𑀦𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁂 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀇𑀫𑁂 𑀯𑀢 𑀣𑁂𑀭𑀸𑀧𑀺 𑀲𑀫𑀸𑀦𑀸 𑀬𑁄𑀚𑀦𑀧𑀭𑀫𑁆𑀧𑀭𑀸𑀬 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀲𑁂𑀯𑀦𑁆𑀢𑀺, 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀉𑀧𑀕𑀦𑁆𑀢𑀼𑀁 𑀬𑀼𑀢𑁆𑀢𑀓𑀸𑀮𑁂𑀧𑀺 𑀦 𑀉𑀧𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀚𑀺𑀡𑁆𑀡𑀲𑀭𑀻𑀭𑀸𑀧𑀺 𑀆𑀭𑀤𑁆𑀥𑀯𑀻𑀭𑀺𑀬𑀸 𑀧𑀘𑁆𑀘𑀬𑀤𑀸𑀬𑀓𑀸𑀦𑀁 𑀧𑀲𑀸𑀤𑀁 𑀚𑀦𑁂𑀦𑁆𑀢𑀺, 𑀦𑀯𑀫𑀚𑁆𑀛𑀺𑀫𑀓𑀸𑀮𑁂 𑀓𑀻𑀤𑀺𑀲𑀸 𑀅𑀳𑁂𑀲𑀼𑀦𑁆𑀢𑀺 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀣𑁂𑀭𑀸 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺, 𑀧𑀲𑀁𑀲𑀁 𑀮𑀪𑀦𑁆𑀢𑀺. 𑀮𑁄𑀪𑀸𑀤𑀬𑁄 𑀧𑀳𑀸𑀬 𑀘𑀺𑀢𑁆𑀢𑀯𑀺𑀯𑁂𑀓𑀁 𑀧𑀽𑀭𑁂𑀦𑁆𑀢𑀺, 𑀅𑀬𑀫𑁆𑀧𑀺 𑀫𑀳𑀸𑀣𑁂𑀭𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀧𑀭𑀺𑀯𑀸𑀭𑀺𑀢𑁄 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀬𑀼𑀢𑁆𑀢𑀓𑀸𑀮𑁂𑀧𑀺 𑀈𑀤𑀺𑀲𑁂𑀧𑀺 𑀯𑀬𑁂 𑀯𑀢𑁆𑀢𑀫𑀸𑀦𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀯𑀺𑀝𑁆𑀞𑁄 𑀲𑀸𑀬𑀁 𑀦𑀺𑀓𑁆𑀔𑀫𑀢𑀺, 𑀲𑀸𑀬𑀁 𑀧𑀯𑀺𑀝𑁆𑀞𑁄 𑀧𑀸𑀢𑁄 𑀦𑀺𑀓𑁆𑀔𑀫𑀢𑀺, 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀫𑀕𑁆𑀕𑀨𑀮𑀸𑀦𑀺 𑀅𑀥𑀺𑀕𑀘𑁆𑀙𑀢𑀺, 𑀲𑀩𑁆𑀩𑀣𑀸𑀧𑀺 𑀘𑀺𑀢𑁆𑀢𑀯𑀺𑀯𑁂𑀓𑀁 𑀧𑀽𑀭𑁂𑀢𑀻𑀢𑀺 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺, 𑀧𑀲𑀁𑀲𑀁 𑀮𑀪𑀦𑁆𑀢𑀺. 𑀬𑀲𑁆𑀫𑀺𑀁 𑀓𑀸𑀮𑁂 𑀣𑁂𑀭𑀲𑁆𑀲 𑀧𑀝𑁆𑀝𑀤𑀼𑀓𑀽𑀮𑀓𑁄𑀲𑁂𑀬𑁆𑀬𑀸𑀤𑀻𑀦𑀺 𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺 𑀮𑀳𑀼𑀘𑀻𑀯𑀭𑀸𑀤𑀻𑀦𑀺 𑀬𑀼𑀢𑁆𑀢𑀸𑀦𑀺, 𑀢𑀲𑁆𑀫𑀺𑀫𑁆𑀧𑀺 𑀦𑀸𑀫 𑀓𑀸𑀮𑁂 𑀅𑀬𑀁 𑀫𑀳𑀸𑀣𑁂𑀭𑁄 𑀧𑀁𑀲𑀼𑀓𑀽𑀮𑀸𑀦𑀺 𑀥𑀸𑀭𑁂𑀢𑀺, 𑀅𑀲𑀺𑀣𑀺𑀮𑀁 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀯𑀺𑀕𑀢𑀦𑀻𑀯𑀭𑀡𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀉𑀧𑀥𑀺𑀯𑀺𑀯𑁂𑀓𑀁 𑀧𑀭𑀺𑀧𑀽𑀭𑀬𑀫𑀸𑀦𑁄 𑀯𑀺𑀳𑀭𑀢𑀺, 𑀦𑀯𑀫𑀚𑁆𑀛𑀺𑀫𑀓𑀸𑀮𑁂 𑀓𑀻𑀤𑀺𑀲𑁄 𑀅𑀳𑁄𑀲𑀻𑀢𑀺 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀞𑀸𑀦𑁂𑀦 𑀣𑁂𑀭𑀸 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺, 𑀧𑀲𑀁𑀲𑀁 𑀮𑀪𑀦𑁆𑀢𑀻𑀢𑀺. 𑀏𑀲 𑀦𑀬𑁄 𑀫𑀚𑁆𑀛𑀺𑀫𑀦𑀯𑀯𑀸𑀭𑁂𑀲𑀼.

𑁩𑁩. 𑀢𑀢𑁆𑀭𑀸𑀯𑀼𑀲𑁄𑀢𑀺 𑀓𑁄 𑀅𑀦𑀼𑀲𑀦𑁆𑀥𑀺, 𑀏𑀯𑀁 𑀦𑀯𑀳𑀸𑀓𑀸𑀭𑁂𑀳𑀺 𑀆𑀫𑀺𑀲𑀤𑀸𑀬𑀸𑀤𑀧𑀝𑀺𑀧𑀤𑀁 𑀕𑀭𑀳𑀦𑁆𑀢𑁄, 𑀦𑀯𑀳𑀺 𑀥𑀫𑁆𑀫𑀤𑀸𑀬𑀸𑀤𑀧𑀝𑀺𑀧𑀤𑀁 𑀣𑁄𑀫𑁂𑀦𑁆𑀢𑁄, 𑀅𑀝𑁆𑀞𑀸𑀭𑀲𑀳𑀸𑀓𑀸𑀭𑁂𑀳𑀺 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸, 𑀬𑁂 𑀢𑁂 ‘‘𑀬𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀲𑀢𑁆𑀣𑀸 𑀧𑀳𑀸𑀦𑀫𑀸𑀳, 𑀢𑁂 𑀘 𑀥𑀫𑁆𑀫𑁂 𑀦 𑀧𑀚𑀳𑀦𑁆𑀢𑀻’’𑀢𑀺 𑀏𑀯𑀁 𑀧𑀳𑀸𑀢𑀩𑁆𑀩𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀢𑁂 𑀲𑀭𑀽𑀧𑀢𑁄 ‘‘𑀇𑀫𑁂 𑀢𑁂’’𑀢𑀺 𑀤𑀲𑁆𑀲𑁂𑀢𑀼𑀫𑀺𑀤𑀁 ‘‘𑀢𑀢𑁆𑀭𑀸𑀯𑀼𑀲𑁄, 𑀮𑁄𑀪𑁄 𑀘𑀸’’𑀢𑀺𑀆𑀤𑀺𑀫𑀸𑀳, 𑀅𑀬𑀁 𑀅𑀦𑀼𑀲𑀦𑁆𑀥𑀺.

𑀅𑀧𑀺𑀘 𑀳𑁂𑀝𑁆𑀞𑀸 𑀧𑀭𑀺𑀬𑀸𑀬𑁂𑀦𑁂𑀯 𑀥𑀫𑁆𑀫𑁄 𑀓𑀣𑀺𑀢𑁄. 𑀆𑀫𑀺𑀲𑀁 𑀧𑀦 𑀧𑀭𑀺𑀬𑀸𑀬𑁂𑀦𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀧𑀺 𑀓𑀣𑀺𑀢𑀁. 𑀇𑀤𑀸𑀦𑀺 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀁 𑀓𑀣𑁂𑀢𑀼𑀫𑀺𑀤𑀫𑀸𑀳. 𑀅𑀬𑀁 𑀧𑁂𑀢𑁆𑀣 𑀅𑀦𑀼𑀲𑀦𑁆𑀥𑀺.

𑀢𑀢𑁆𑀣 𑀢𑀢𑁆𑀭𑀸𑀢𑀺 𑀅𑀢𑀻𑀢𑀤𑁂𑀲𑀦𑀸𑀦𑀺𑀤𑀲𑁆𑀲𑀦𑀁, ‘‘𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀤𑁂𑀲𑀦𑀸𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑁄𑀪𑁄 𑀘 𑀧𑀸𑀧𑀓𑁄, 𑀤𑁄𑀲𑁄 𑀘 𑀧𑀸𑀧𑀓𑁄𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀧𑀸𑀧𑀓𑀸 𑀮𑀸𑀫𑀓𑀸, 𑀇𑀫𑁂 𑀧𑀳𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀮𑀼𑀩𑁆𑀪𑀦𑀮𑀓𑁆𑀔𑀡𑁄 𑀮𑁄𑀪𑁄. 𑀤𑀼𑀲𑁆𑀲𑀦𑀮𑀓𑁆𑀔𑀡𑁄 𑀤𑁄𑀲𑁄. 𑀢𑁂𑀲𑀼 𑀮𑁄𑀪𑁄 𑀆𑀫𑀺𑀲𑀤𑀸𑀬𑀸𑀤𑀲𑁆𑀲 𑀧𑀘𑁆𑀘𑀬𑀸𑀦𑀁 𑀮𑀸𑀪𑁂 𑀳𑁄𑀢𑀺, 𑀤𑁄𑀲𑁄 𑀅𑀮𑀸𑀪𑁂. 𑀮𑁄𑀪𑁂𑀦 𑀅𑀮𑀤𑁆𑀥𑀁 𑀧𑀢𑁆𑀣𑁂𑀢𑀺, 𑀤𑁄𑀲𑁂𑀦 𑀅𑀮𑀪𑀦𑁆𑀢𑁄 𑀯𑀺𑀖𑀸𑀢𑀯𑀸 𑀳𑁄𑀢𑀺. 𑀮𑁄𑀪𑁄 𑀘 𑀤𑁂𑀬𑁆𑀬𑀥𑀫𑁆𑀫𑁂 𑀳𑁄𑀢𑀺, 𑀤𑁄𑀲𑁄 𑀅𑀤𑀸𑀬𑀓𑁂 𑀯𑀸 𑀅𑀫𑀦𑀼𑀜𑁆𑀜𑀤𑀸𑀬𑀓𑁂 𑀯𑀸. 𑀮𑁄𑀪𑁂𑀦 𑀦𑀯𑀢𑀡𑁆𑀳𑀸𑀫𑀽𑀮𑀓𑁂 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀢𑀺, 𑀤𑁄𑀲𑁂𑀦 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺.

𑀇𑀤𑀸𑀦𑀺 𑀢𑁂𑀲𑀁 𑀧𑀳𑀸𑀦𑀽𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀮𑁄𑀪𑀲𑁆𑀲 𑀘 𑀧𑀳𑀸𑀦𑀸𑀬𑀸𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄, 𑀢𑀲𑁆𑀲 𑀧𑀦 𑀧𑀸𑀧𑀓𑀲𑁆𑀲 𑀮𑁄𑀪𑀲𑁆𑀲 𑀘 𑀤𑁄𑀲𑀲𑁆𑀲 𑀘 𑀧𑀳𑀸𑀦𑀸𑀬. 𑀅𑀢𑁆𑀣𑀺 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸𑀢𑀺 𑀫𑀕𑁆𑀕𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁. 𑀫𑀕𑁆𑀕𑁄 𑀳𑀺 𑀮𑁄𑀪𑁄 𑀏𑀓𑁄 𑀅𑀦𑁆𑀢𑁄, 𑀤𑁄𑀲𑁄 𑀏𑀓𑁄 𑀅𑀦𑁆𑀢𑁄𑀢𑀺 𑀏𑀢𑁂 𑀤𑁆𑀯𑁂 𑀅𑀦𑁆𑀢𑁂 𑀦 𑀉𑀧𑁂𑀢𑀺, 𑀦 𑀉𑀧𑀕𑀘𑁆𑀙𑀢𑀺, 𑀯𑀺𑀫𑀼𑀢𑁆𑀢𑁄 𑀏𑀢𑁂𑀳𑀺 𑀅𑀦𑁆𑀢𑁂𑀳𑀺, 𑀢𑀲𑁆𑀫𑀸 ‘‘𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁂𑀲𑀁 𑀫𑀚𑁆𑀛𑁂 𑀪𑀯𑀢𑁆𑀢𑀸 ‘‘𑀫𑀚𑁆𑀛𑀺𑀫𑀸, 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄 𑀘 𑀧𑀝𑀺𑀧𑀤𑀸𑀢𑀺. 𑀢𑀣𑀸 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀏𑀓𑁄 𑀅𑀦𑁆𑀢𑁄, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀏𑀓𑁄 𑀅𑀦𑁆𑀢𑁄, 𑀲𑀲𑁆𑀲𑀢𑀁 𑀏𑀓𑁄 𑀅𑀦𑁆𑀢𑁄, 𑀉𑀘𑁆𑀙𑁂𑀤𑁄 𑀏𑀓𑁄 𑀅𑀦𑁆𑀢𑁄𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀘𑀓𑁆𑀔𑀼𑀓𑀭𑀡𑀻𑀢𑀺𑀆𑀤𑀻𑀳𑀺 𑀧𑀦 𑀢𑀫𑁂𑀯 𑀧𑀝𑀺𑀧𑀤𑀁 𑀣𑁄𑀫𑁂𑀢𑀺. 𑀲𑀸 𑀳𑀺 𑀲𑀘𑁆𑀘𑀸𑀦𑀁 𑀤𑀲𑁆𑀲𑀦𑀸𑀬 𑀲𑀁𑀯𑀢𑁆𑀢𑀢𑀺 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦𑀸𑀢𑀺 𑀘𑀓𑁆𑀔𑀼𑀓𑀭𑀡𑀻. 𑀲𑀘𑁆𑀘𑀸𑀦𑀁 𑀜𑀸𑀡𑀸𑀬 𑀲𑀁𑀯𑀢𑁆𑀢𑀢𑀺 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦𑀸𑀢𑀺 𑀜𑀸𑀡𑀓𑀭𑀡𑀻. 𑀭𑀸𑀕𑀸𑀤𑀻𑀦𑀜𑁆𑀘 𑀯𑀽𑀧𑀲𑀫𑀦𑀢𑁄 𑀉𑀧𑀲𑀫𑀸𑀬 𑀲𑀁𑀯𑀢𑁆𑀢𑀢𑀺. 𑀘𑀢𑀼𑀦𑁆𑀦𑀫𑁆𑀧𑀺 𑀲𑀘𑁆𑀘𑀸𑀦𑀁 𑀅𑀪𑀺𑀜𑁆𑀜𑁂𑀬𑁆𑀬𑀪𑀸𑀯𑀤𑀲𑁆𑀲𑀦𑀢𑁄 𑀅𑀪𑀺𑀜𑁆𑀜𑀸𑀬 𑀲𑀁𑀯𑀢𑁆𑀢𑀢𑀺. 𑀲𑀫𑁆𑀩𑁄𑀥𑁄𑀢𑀺 𑀫𑀕𑁆𑀕𑁄, 𑀢𑀲𑁆𑀲𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑀢𑁄 𑀲𑀫𑁆𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺. 𑀫𑀕𑁆𑀕𑁄𑀬𑁂𑀯 𑀳𑀺 𑀫𑀕𑁆𑀕𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺 𑀫𑀕𑁆𑀕𑁂𑀦 𑀓𑀸𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑀢𑁄. 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀅𑀧𑁆𑀧𑀘𑁆𑀘𑀬𑀁 𑀢𑀲𑁆𑀲 𑀧𑀦 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀘𑁆𑀘𑀓𑁆𑀔𑀓𑀫𑁆𑀫𑀸𑀬 𑀲𑀁𑀯𑀢𑁆𑀢𑀦𑀢𑁄 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀫𑁂𑀢𑁆𑀣 𑀲𑀸𑀭𑁄. 𑀇𑀢𑁄 𑀅𑀜𑁆𑀜𑀣𑀸 𑀯𑀡𑁆𑀡𑀦𑀸 𑀧𑀧𑀜𑁆𑀘𑀸.

𑀇𑀤𑀸𑀦𑀺 𑀢𑀁 𑀫𑀚𑁆𑀛𑀺𑀫𑀁 𑀧𑀝𑀺𑀧𑀤𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀓𑀸𑀫𑁄 ‘‘𑀓𑀢𑀫𑀸 𑀘 𑀲𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀬𑀫𑁂𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀺.

𑀢𑀢𑁆𑀣 𑀅𑀬𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑀯𑀘𑀦𑀁, 𑀅𑀜𑁆𑀜𑀫𑀕𑁆𑀕𑀧𑁆𑀧𑀝𑀺𑀲𑁂𑀥𑀦𑀢𑁆𑀣𑀁, 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀲𑀸𑀥𑀸𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘. 𑀯𑀼𑀢𑁆𑀢𑀜𑁆𑀘𑁂𑀢𑀁 ‘‘𑀏𑀲𑁂𑀯 𑀫𑀕𑁆𑀕𑁄 𑀦𑀢𑁆𑀣𑀜𑁆𑀜𑁄 𑀤𑀲𑁆𑀲𑀦𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 (𑀥. 𑀧. 𑁨𑁭𑁪). 𑀲𑁆𑀯𑀸𑀬𑀁 𑀓𑀺𑀮𑁂𑀲𑀸𑀦𑀁 𑀆𑀭𑀓𑀢𑁆𑀢𑀸𑀧𑀺 𑀅𑀭𑀺𑀬𑁄. 𑀅𑀭𑀺𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺𑀧𑀺 𑀅𑀭𑀺𑀬𑁂𑀦 𑀤𑁂𑀲𑀺𑀢𑁄𑀢𑀺𑀧𑀺 𑀅𑀭𑀺𑀬𑀪𑀸𑀯𑀧𑁆𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀻𑀢𑀺𑀧𑀺 𑀅𑀭𑀺𑀬𑁄. 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀉𑀧𑁂𑀢𑀢𑁆𑀢𑀸 𑀅𑀝𑁆𑀞𑀗𑁆𑀕𑀺𑀓𑁄, 𑀦 𑀘 𑀅𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑁄 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀸𑀤𑀻𑀦𑀺 𑀯𑀺𑀬. 𑀓𑀺𑀮𑁂𑀲𑁂 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀫𑀕𑁆𑀕𑀢𑀺 𑀯𑀸 𑀦𑀺𑀩𑁆𑀩𑀸𑀦𑀁, 𑀫𑀕𑁆𑀕𑀻𑀬𑀢𑀺 𑀯𑀸 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺, 𑀕𑀫𑁆𑀫𑀢𑀺 𑀯𑀸 𑀢𑁂𑀳𑀺 𑀧𑀝𑀺𑀧𑀚𑁆𑀚𑀻𑀬𑀢𑀻𑀢𑀺 𑀫𑀕𑁆𑀕𑁄. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀓𑀢𑀫𑁄 𑀲𑁄 𑀇𑀢𑀺 𑀘𑁂𑀢𑀺 𑀅𑀢𑁆𑀣𑁄, 𑀓𑀢𑀫𑀸𑀦𑀺 𑀯𑀸 𑀢𑀸𑀦𑀺 𑀅𑀝𑁆𑀞𑀗𑁆𑀕𑀸𑀦𑀻𑀢𑀺. 𑀏𑀓𑀫𑁂𑀓𑀜𑁆𑀳𑀺 𑀅𑀗𑁆𑀕𑀁 𑀫𑀕𑁆𑀕𑁄𑀬𑁂𑀯. 𑀬𑀣𑀸𑀳 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀕𑁆𑀕𑁄 𑀘𑁂𑀯 𑀳𑁂𑀢𑀼 𑀘𑀸’’𑀢𑀺 (𑀥. 𑀲. 𑁧𑁦𑁩𑁯). 𑀧𑁄𑀭𑀸𑀡𑀸𑀧𑀺 𑀪𑀡𑀦𑁆𑀢𑀺 𑁋 ‘‘𑀤𑀲𑁆𑀲𑀦𑀫𑀕𑁆𑀕𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀪𑀺𑀦𑀺𑀭𑁄𑀧𑀦𑀫𑀕𑁆𑀕𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄…𑀧𑁂… 𑀅𑀯𑀺𑀓𑁆𑀔𑁂𑀧𑀫𑀕𑁆𑀕𑁄 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺.

𑀲𑀫𑁆𑀫𑀸𑀤𑀺𑀝𑁆𑀞𑀸𑀤𑀻𑀲𑀼 𑀘𑁂𑀢𑁂𑀲𑀼 𑀲𑀫𑁆𑀫𑀸 𑀤𑀲𑁆𑀲𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑀫𑁆𑀫𑀸 𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸 𑀲𑀫𑁆𑀫𑀸𑀯𑀸𑀘𑀸. 𑀲𑀫𑁆𑀫𑀸 𑀲𑀫𑀼𑀝𑁆𑀞𑀸𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀲𑀫𑁆𑀫𑀸 𑀯𑁄𑀤𑀸𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀆𑀚𑀻𑀯𑁄. 𑀲𑀫𑁆𑀫𑀸 𑀧𑀕𑁆𑀕𑀳𑀮𑀓𑁆𑀔𑀡𑁄 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀲𑀫𑁆𑀫𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀲𑀢𑀺. 𑀲𑀫𑁆𑀫𑀸 𑀲𑀫𑀸𑀥𑀸𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀲𑀫𑀸𑀥𑀺. 𑀦𑀺𑀩𑁆𑀩𑀘𑀦𑀫𑁆𑀧𑀺 𑀦𑁂𑀲𑀁 𑀲𑀫𑁆𑀫𑀸 𑀧𑀲𑁆𑀲𑀢𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀏𑀢𑁂𑀦𑁂𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀢𑀧𑁆𑀧𑀘𑁆𑀘𑀦𑀻𑀬𑀓𑀺𑀮𑁂𑀲𑁂 𑀘 𑀅𑀯𑀺𑀚𑁆𑀚𑀜𑁆𑀘 𑀧𑀚𑀳𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀧𑀲𑁆𑀲𑀢𑀺, 𑀢𑁂 𑀘 𑀔𑁄 𑀅𑀲𑀫𑁆𑀫𑁄𑀳𑀢𑁄, 𑀦𑁄 𑀆𑀭𑀫𑁆𑀫𑀡𑀢𑁄, 𑀢𑀲𑁆𑀫𑀸 ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀯𑀼𑀘𑁆𑀘𑀢𑀺.

𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀁 𑀢𑀧𑁆𑀧𑀘𑁆𑀘𑀦𑀻𑀬𑀓𑀺𑀮𑁂𑀲𑁂 𑀘 𑀧𑀚𑀳𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀲𑀫𑁆𑀫𑀸 𑀅𑀪𑀺𑀦𑀺𑀭𑁄𑀧𑁂𑀢𑀺, 𑀢𑀲𑁆𑀫𑀸 ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀫𑁆𑀫𑀸𑀯𑀸𑀘𑀸 𑀫𑀺𑀘𑁆𑀙𑀸𑀯𑀸𑀘𑀁 𑀢𑀧𑁆𑀧𑀘𑁆𑀘𑀦𑀻𑀬𑀓𑀺𑀮𑁂𑀲𑁂 𑀘 𑀧𑀚𑀳𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀲𑀫𑁆𑀫𑀸 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 ‘‘𑀲𑀫𑁆𑀫𑀸𑀯𑀸𑀘𑀸’’𑀢𑀺 𑀯𑀼𑀘𑁆𑀘𑀢𑀺.

𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀁 𑀢𑀧𑁆𑀧𑀘𑁆𑀘𑀦𑀻𑀬𑀓𑀺𑀮𑁂𑀲𑁂 𑀘 𑀧𑀚𑀳𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀲𑀫𑁆𑀫𑀸 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀲𑁆𑀫𑀸 ‘‘𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀫𑁆𑀫𑀸𑀆𑀚𑀻𑀯𑁄 𑀫𑀺𑀘𑁆𑀙𑀸𑀆𑀚𑀻𑀯𑀁 𑀢𑀧𑁆𑀧𑀘𑁆𑀘𑀦𑀻𑀬𑀓𑀺𑀮𑁂𑀲𑁂 𑀘 𑀧𑀚𑀳𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀲𑀫𑁆𑀫𑀸 𑀯𑁄𑀤𑀸𑀧𑁂𑀢𑀺, 𑀢𑀲𑁆𑀫𑀸 ‘‘𑀲𑀫𑁆𑀫𑀸𑀆𑀚𑀻𑀯𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀫𑁆𑀫𑀸𑀯𑀸𑀬𑀸𑀫𑁄 𑀫𑀺𑀘𑁆𑀙𑀸𑀯𑀸𑀬𑀸𑀫𑀁 𑀢𑀧𑁆𑀧𑀘𑁆𑀘𑀦𑀻𑀬𑀓𑀺𑀮𑁂𑀲𑁂 𑀘 𑀓𑁄𑀲𑀚𑁆𑀚𑀜𑁆𑀘 𑀧𑀚𑀳𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀲𑀫𑁆𑀫𑀸 𑀧𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 ‘‘𑀲𑀫𑁆𑀫𑀸𑀯𑀸𑀬𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀫𑁆𑀫𑀸𑀲𑀢𑀺 𑀫𑀺𑀘𑁆𑀙𑀸𑀲𑀢𑀺𑀁 𑀢𑀧𑁆𑀧𑀘𑁆𑀘𑀦𑀻𑀬𑀓𑀺𑀮𑁂𑀲𑁂 𑀘 𑀧𑀚𑀳𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀲𑀫𑁆𑀫𑀸 𑀉𑀧𑀝𑁆𑀞𑀸𑀧𑁂𑀢𑀺, 𑀢𑀲𑁆𑀫𑀸 ‘‘𑀲𑀫𑁆𑀫𑀸𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀲𑀫𑁆𑀫𑀸𑀲𑀫𑀸𑀥𑀺 𑀫𑀺𑀘𑁆𑀙𑀸𑀲𑀫𑀸𑀥𑀺𑀁 𑀢𑀧𑁆𑀧𑀘𑁆𑀘𑀦𑀻𑀬𑀓𑀺𑀮𑁂𑀲𑁂 𑀘 𑀉𑀤𑁆𑀥𑀘𑁆𑀘𑀜𑁆𑀘 𑀧𑀚𑀳𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺, 𑀢𑀲𑁆𑀫𑀸 ‘‘𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀯𑀼𑀘𑁆𑀘𑀢𑀺.

𑀇𑀤𑀸𑀦𑀺 𑀅𑀬𑀁 𑀔𑁄 𑀲𑀸, 𑀆𑀯𑀼𑀲𑁄𑀢𑀺 𑀢𑀫𑁂𑀯 𑀧𑀝𑀺𑀧𑀤𑀁 𑀦𑀺𑀕𑀫𑁂𑀦𑁆𑀢𑁄 𑀆𑀳. 𑀢𑀲𑁆𑀲𑀢𑁆𑀣𑁄, 𑀬𑁆𑀯𑀸𑀬𑀁 𑀘𑀢𑁆𑀢𑀸𑀭𑁄𑀧𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁂 𑀏𑀓𑀢𑁄 𑀓𑀢𑁆𑀯𑀸 𑀓𑀣𑀺𑀢𑁄 ‘‘𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’, 𑀅𑀬𑀁 𑀔𑁄 𑀲𑀸, 𑀆𑀯𑀼𑀲𑁄…𑀧𑁂… 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺.

𑀏𑀯𑀁 𑀧𑀳𑀸𑀢𑀩𑁆𑀩𑀥𑀫𑁆𑀫𑁂𑀲𑀼 𑀮𑁄𑀪𑀤𑁄𑀲𑁂 𑀢𑀧𑁆𑀧𑀳𑀸𑀦𑀼𑀧𑀸𑀬𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀜𑁆𑀜𑁂𑀧𑀺 𑀧𑀳𑀸𑀢𑀩𑁆𑀩𑀥𑀫𑁆𑀫𑁂 𑀢𑁂𑀲𑀁 𑀧𑀳𑀸𑀦𑀼𑀧𑀸𑀬𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀢𑀢𑁆𑀭𑀸𑀯𑀼𑀲𑁄, 𑀓𑁄𑀥𑁄 𑀘𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀼𑀚𑁆𑀛𑀦𑀮𑀓𑁆𑀔𑀡𑁄 𑀓𑁄𑀥𑁄, 𑀘𑀡𑁆𑀟𑀺𑀓𑁆𑀓𑀮𑀓𑁆𑀔𑀡𑁄 𑀯𑀸, 𑀆𑀖𑀸𑀢𑀓𑀭𑀡𑀭𑀲𑁄, 𑀤𑀼𑀲𑁆𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀉𑀧𑀦𑀦𑁆𑀥𑀦𑀮𑀓𑁆𑀔𑀡𑁄 𑀉𑀧𑀦𑀸𑀳𑁄, 𑀯𑁂𑀭 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀭𑀲𑁄, 𑀓𑁄𑀥𑀸𑀦𑀼𑀧𑀩𑀦𑁆𑀥𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋 ‘‘𑀧𑀼𑀩𑁆𑀩𑀓𑀸𑀮𑁂 𑀓𑁄𑀥𑁄, 𑀅𑀧𑀭𑀓𑀸𑀮𑁂 𑀉𑀧𑀦𑀸𑀳𑁄’’𑀢𑀺𑀆𑀤𑀺 (𑀯𑀺𑀪. 𑁮𑁯𑁧).

𑀧𑀭𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑁄 𑀫𑀓𑁆𑀔𑁄, 𑀢𑁂𑀲𑀁 𑀯𑀺𑀦𑀸𑀲𑀦𑀭𑀲𑁄, 𑀢𑀤𑀯𑀘𑁆𑀙𑀸𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁄 𑀧𑀴𑀸𑀲𑁄, 𑀧𑀭𑀕𑀼𑀡𑁂𑀳𑀺 𑀅𑀢𑁆𑀢𑀦𑁄 𑀕𑀼𑀡𑀸𑀦𑀁 𑀲𑀫𑀻𑀓𑀭𑀡𑀭𑀲𑁄, 𑀧𑀭𑁂𑀲𑀁 𑀕𑀼𑀡𑀧𑁆𑀧𑀫𑀸𑀡𑁂𑀦 𑀉𑀧𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀧𑀭𑀲𑀫𑁆𑀧𑀢𑁆𑀢𑀺𑀔𑀻𑀬𑀦𑀮𑀓𑁆𑀔𑀡𑀸 𑀇𑀲𑁆𑀲𑀸, 𑀢𑀲𑁆𑀲𑀸 𑀅𑀓𑁆𑀔𑀫𑀦𑀮𑀓𑁆𑀔𑀡𑀸 𑀯𑀸, 𑀢𑀢𑁆𑀣 𑀅𑀦𑀪𑀺𑀭𑀢𑀺𑀭𑀲𑀸, 𑀢𑀢𑁄 𑀯𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀮𑀓𑁆𑀔𑀡𑀁 𑀫𑀘𑁆𑀙𑁂𑀭𑀁, 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀅𑀲𑀼𑀔𑀸𑀬𑀦𑀭𑀲𑀁, 𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀓𑀢𑀧𑀸𑀧𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸 𑀫𑀸𑀬𑀸, 𑀢𑀲𑁆𑀲 𑀦𑀺𑀕𑀽𑀳𑀦𑀭𑀲𑀸, 𑀢𑀤𑀸𑀯𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀅𑀢𑁆𑀢𑀦𑁄 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀧𑀓𑀸𑀲𑀦𑀮𑀓𑁆𑀔𑀡𑀁 𑀲𑀸𑀞𑁂𑀬𑁆𑀬𑀁, 𑀢𑁂𑀲𑀁 𑀲𑀫𑀼𑀤𑀸𑀳𑀭𑀡𑀭𑀲𑀁, 𑀲𑀭𑀻𑀭𑀸𑀓𑀸𑀭𑁂𑀳𑀺𑀧𑀺 𑀢𑁂𑀲𑀁 𑀯𑀺𑀪𑀽𑀢𑀓𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀼𑀫𑀸𑀢𑀪𑀸𑀯𑀮𑀓𑁆𑀔𑀡𑁄 𑀣𑀫𑁆𑀪𑁄, 𑀅𑀧𑁆𑀧𑀢𑀺𑀲𑁆𑀲𑀬𑀯𑀼𑀢𑁆𑀢𑀺𑀭𑀲𑁄, 𑀅𑀫𑀤𑁆𑀤𑀯𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀓𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑁄 𑀲𑀸𑀭𑀫𑁆𑀪𑁄, 𑀯𑀺𑀧𑀘𑁆𑀘𑀦𑀻𑀓𑀢𑀸𑀭𑀲𑁄, 𑀅𑀕𑀸𑀭𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀉𑀡𑁆𑀡𑀢𑀺𑀮𑀓𑁆𑀔𑀡𑁄 𑀫𑀸𑀦𑁄, 𑀅𑀳𑀁𑀓𑀸𑀭𑀭𑀲𑁄, 𑀉𑀤𑁆𑀥𑀼𑀫𑀸𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀅𑀩𑁆𑀪𑀼𑀡𑁆𑀡𑀢𑀺𑀮𑀓𑁆𑀔𑀡𑁄 𑀅𑀢𑀺𑀫𑀸𑀦𑁄, 𑀅𑀢𑀺𑀯𑀺𑀬 𑀅𑀳𑀗𑁆𑀓𑀸𑀭𑀭𑀲𑁄. 𑀅𑀘𑁆𑀘𑀼𑀤𑁆𑀥𑀼𑀫𑀸𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀫𑀢𑁆𑀢𑀪𑀸𑀯𑀮𑀓𑁆𑀔𑀡𑁄 𑀫𑀤𑁄, 𑀫𑀤𑀕𑁆𑀕𑀸𑀳𑀡𑀭𑀲𑁄, 𑀉𑀫𑁆𑀫𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑀮𑀓𑁆𑀔𑀡𑁄 𑀧𑀫𑀸𑀤𑁄, 𑀯𑁄𑀲𑁆𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀭𑀲𑁄, 𑀲𑀢𑀺𑀯𑀺𑀧𑁆𑀧𑀯𑀸𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 𑀏𑀯𑀁 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 ‘‘𑀢𑀢𑁆𑀣 𑀓𑀢𑀫𑁄 𑀓𑁄𑀥𑁄’’𑀢𑀺𑀆𑀤𑀺𑀦𑀸 𑀯𑀺𑀪𑀗𑁆𑀕𑁂 (𑀯𑀺𑀪. 𑁮𑁯𑁧) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀲𑁂𑀲𑀢𑁄 𑀘𑁂𑀢𑁆𑀣 𑀆𑀫𑀺𑀲𑀤𑀸𑀬𑀸𑀤𑁄 𑀅𑀢𑁆𑀢𑀦𑀸 𑀅𑀮𑀪𑀦𑁆𑀢𑁄 𑀅𑀜𑁆𑀜𑀲𑁆𑀲 𑀮𑀸𑀪𑀺𑀦𑁄 𑀓𑀼𑀚𑁆𑀛𑀢𑀺, 𑀢𑀲𑁆𑀲 𑀲𑀓𑀺𑀁 𑀉𑀧𑁆𑀧𑀦𑁆𑀦𑁄 𑀓𑁄𑀥𑁄 𑀓𑁄𑀥𑁄𑀬𑁂𑀯, 𑀢𑀢𑀼𑀢𑁆𑀢𑀭𑀺 𑀉𑀧𑀦𑀸𑀳𑁄. 𑀲𑁄 𑀏𑀯𑀁 𑀓𑀼𑀤𑁆𑀥𑁄 𑀉𑀧𑀦𑀬𑁆𑀳𑀦𑁆𑀢𑁄 𑀘 𑀲𑀦𑁆𑀢𑁂𑀧𑀺 𑀅𑀜𑁆𑀜𑀲𑁆𑀲 𑀮𑀸𑀪𑀺𑀦𑁄 𑀕𑀼𑀡𑁂 𑀫𑀓𑁆𑀔𑁂𑀢𑀺, 𑀅𑀳𑀫𑁆𑀧𑀺 𑀢𑀸𑀤𑀺𑀲𑁄𑀢𑀺 𑀘 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀫𑀓𑁆𑀔𑁄 𑀘 𑀧𑀴𑀸𑀲𑁄 𑀘, 𑀏𑀯𑀁 𑀫𑀓𑁆𑀔𑀻 𑀧𑀴𑀸𑀲𑀻 𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀸𑀤𑀻𑀲𑀼 𑀓𑀺𑀁 𑀇𑀫𑀲𑁆𑀲 𑀇𑀫𑀺𑀦𑀸𑀢𑀺 𑀇𑀲𑁆𑀲𑀢𑀺 𑀧𑀤𑀼𑀲𑁆𑀲𑀢𑀺, 𑀅𑀬𑀫𑀲𑁆𑀲 𑀇𑀲𑁆𑀲𑀸. 𑀲𑀘𑁂 𑀧𑀦𑀲𑁆𑀲 𑀓𑀸𑀘𑀺 𑀲𑀫𑁆𑀧𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀲𑀸 𑀢𑁂𑀦 𑀲𑀸𑀥𑀸𑀭𑀡𑀪𑀸𑀯𑀁 𑀦 𑀲𑀳𑀢𑀺, 𑀇𑀤𑀫𑀲𑁆𑀲 𑀫𑀘𑁆𑀙𑁂𑀭𑀁. 𑀮𑀸𑀪𑀳𑁂𑀢𑀼 𑀔𑁄 𑀧𑀦 𑀅𑀢𑁆𑀢𑀦𑁄 𑀲𑀦𑁆𑀢𑁂𑀧𑀺 𑀤𑁄𑀲𑁂 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀅𑀬𑀫𑀲𑁆𑀲 𑀫𑀸𑀬𑀸. 𑀅𑀲𑀦𑁆𑀢𑁂𑀧𑀺 𑀕𑀼𑀡𑁂 𑀧𑀓𑀸𑀲𑁂𑀢𑀺. 𑀇𑀤𑀫𑀲𑁆𑀲 𑀲𑀸𑀞𑁂𑀬𑁆𑀬𑀁. 𑀲𑁄 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀲𑀘𑁂 𑀬𑀣𑀸𑀥𑀺𑀧𑁆𑀧𑀸𑀬𑀁 𑀮𑀸𑀪𑀁 𑀮𑀪𑀢𑀺, 𑀢𑁂𑀦 𑀣𑀤𑁆𑀥𑁄 𑀳𑁄𑀢𑀺 𑀅𑀫𑀼𑀤𑀼𑀘𑀺𑀢𑁆𑀢𑁄, 𑀦𑀬𑀺𑀤𑀁 𑀏𑀯𑀁 𑀓𑀸𑀢𑀩𑁆𑀩𑀦𑁆𑀢𑀺 𑀑𑀯𑀤𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄, 𑀅𑀬𑀫𑀲𑁆𑀲 𑀣𑀫𑁆𑀪𑁄. 𑀲𑀘𑁂 𑀧𑀦 𑀦𑀁 𑀓𑁄𑀘𑀺 𑀓𑀺𑀜𑁆𑀘𑀺 𑀯𑀤𑀢𑀺 ‘‘𑀦𑀬𑀺𑀤𑀁 𑀏𑀯𑀁 𑀓𑀸𑀢𑀩𑁆𑀩’’𑀦𑁆𑀢𑀺, 𑀢𑁂𑀦 𑀲𑀸𑀭𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺 𑀪𑀸𑀓𑀼𑀝𑀺𑀓𑀫𑀼𑀔𑁄 ‘‘𑀓𑁄 𑀫𑁂 𑀢𑁆𑀯’’𑀦𑁆𑀢𑀺 𑀧𑀲𑀬𑁆𑀳 𑀪𑀸𑀡𑀻, 𑀅𑀬𑀫𑀲𑁆𑀲 𑀲𑀸𑀭𑀫𑁆𑀪𑁄. 𑀢𑀢𑁄 𑀣𑀫𑁆𑀪𑁂𑀦 ‘‘𑀅𑀳𑀫𑁂𑀯 𑀲𑁂𑀬𑁆𑀬𑁄’’𑀢𑀺 𑀅𑀢𑁆𑀢𑀸𑀦𑀁 𑀫𑀜𑁆𑀜𑀦𑁆𑀢𑁄 𑀫𑀸𑀦𑀻 𑀳𑁄𑀢𑀺. 𑀲𑀸𑀭𑀫𑁆𑀪𑁂𑀦 ‘‘𑀓𑁂 𑀇𑀫𑁂’’𑀢𑀺 𑀧𑀭𑁂 𑀅𑀢𑀺𑀫𑀜𑁆𑀜𑀦𑁆𑀢𑁄 𑀅𑀢𑀺𑀫𑀸𑀦𑀻, 𑀅𑀬𑀫𑀲𑁆𑀲 𑀫𑀸𑀦𑁄 𑀘 𑀅𑀢𑀺𑀫𑀸𑀦𑁄 𑀘. 𑀲𑁄 𑀢𑁂𑀳𑀺 𑀫𑀸𑀦𑀸𑀢𑀺𑀫𑀸𑀦𑁂𑀳𑀺 𑀚𑀸𑀢𑀺𑀫𑀤𑀸𑀤𑀺𑀅𑀦𑁂𑀓𑀭𑀽𑀧𑀁 𑀫𑀤𑀁 𑀚𑀦𑁂𑀢𑀺. 𑀫𑀢𑁆𑀢𑁄 𑀲𑀫𑀸𑀦𑁄 𑀓𑀸𑀫𑀕𑀼𑀡𑀸𑀤𑀺𑀪𑁂𑀤𑁂𑀲𑀼 𑀯𑀢𑁆𑀣𑀽𑀲𑀼 𑀧𑀫𑀚𑁆𑀚𑀢𑀺, 𑀅𑀬𑀫𑀲𑁆𑀲 𑀫𑀤𑁄 𑀘 𑀧𑀫𑀸𑀤𑁄 𑀘𑀸𑀢𑀺.

𑀏𑀯𑀁 𑀆𑀫𑀺𑀲𑀤𑀸𑀬𑀸𑀤𑁄 𑀅𑀧𑀭𑀺𑀫𑀼𑀢𑁆𑀢𑁄 𑀳𑁄𑀢𑀺 𑀇𑀫𑁂𑀳𑀺 𑀧𑀸𑀧𑀓𑁂𑀳𑀺 𑀥𑀫𑁆𑀫𑁂𑀳𑀺 𑀅𑀜𑁆𑀜𑁂𑀳𑀺 𑀘 𑀏𑀯𑀭𑀽𑀧𑁂𑀳𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀧𑀳𑀸𑀢𑀩𑁆𑀩𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀳𑀸𑀦𑀼𑀧𑀸𑀬𑁄 𑀧𑀸𑀞𑀢𑁄 𑀘 𑀅𑀢𑁆𑀣𑀢𑁄 𑀘 𑀲𑀩𑁆𑀩𑀢𑁆𑀣 𑀦𑀺𑀩𑁆𑀩𑀺𑀲𑁂𑀲𑁄𑀬𑁂𑀯.

𑀜𑀸𑀡𑀧𑀭𑀺𑀘𑀬𑀧𑀸𑀝𑀯𑀢𑁆𑀣𑀁 𑀧𑀦𑁂𑀢𑁆𑀣 𑀅𑀬𑀁 𑀪𑁂𑀤𑁄 𑀘 𑀓𑀫𑁄 𑀘 𑀪𑀸𑀯𑀦𑀸𑀦𑀬𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀪𑁂𑀤𑁄 𑀢𑀸𑀯, 𑀅𑀬𑀜𑁆𑀳𑀺 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀓𑀤𑀸𑀘𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀺, 𑀓𑀤𑀸𑀘𑀺 𑀲𑀢𑁆𑀢𑀗𑁆𑀕𑀺𑀓𑁄. 𑀅𑀬𑀜𑁆𑀳𑀺 𑀮𑁄𑀓𑀼𑀢𑁆𑀢𑀭𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀺, 𑀅𑀯𑀲𑁂𑀲𑀚𑁆𑀛𑀸𑀦𑀯𑀲𑁂𑀦 𑀲𑀢𑁆𑀢𑀗𑁆𑀕𑀺𑀓𑁄. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀢𑁄 𑀧𑀦𑀺𑀥 𑀅𑀝𑁆𑀞𑀗𑁆𑀕𑀺𑀓𑁄𑀢𑀺 𑀯𑀼𑀢𑁆𑀢𑁄. 𑀇𑀢𑁄 𑀧𑀭𑀜𑁆𑀳𑀺 𑀫𑀕𑁆𑀕𑀗𑁆𑀕𑀁 𑀦𑀢𑁆𑀣𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀲𑀩𑁆𑀩𑀓𑀼𑀲𑀮𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑁂𑀝𑁆𑀞𑀸, 𑀬𑀣𑀸𑀳 ‘‘𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀓𑀼𑀲𑀮𑀸 𑀯𑀤𑀦𑁆𑀢𑀻’’𑀢𑀺 (𑀚𑀸. 𑁨.𑁧𑁭.𑁮𑁧). 𑀓𑀼𑀲𑀮𑀯𑀸𑀭𑁂 𑀘 𑀧𑀼𑀩𑁆𑀩𑀗𑁆𑀕𑀫𑀸, 𑀬𑀣𑀸𑀳 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀼𑀩𑁆𑀩𑀗𑁆𑀕𑀫𑀸 𑀳𑁄𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀧𑀚𑀸𑀦𑀸𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺 (𑀫. 𑀦𑀺. 𑁩.𑁧𑁩𑁬) 𑀯𑀺𑀢𑁆𑀣𑀸𑀭𑁄. 𑀬𑀣𑀸 𑀘𑀸𑀳 ‘‘𑀯𑀺𑀚𑁆𑀚𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑀗𑁆𑀕𑀫𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺. 𑀢𑀧𑁆𑀧𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀸𑀦𑀺 𑀲𑁂𑀲𑀗𑁆𑀕𑀸𑀦𑀺, 𑀬𑀣𑀸𑀳 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀲𑀢𑀺𑀲𑁆𑀲 𑀲𑀫𑁆𑀫𑀸𑀲𑀫𑀸𑀥𑀺 𑀧𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁧𑁪𑁧). 𑀢𑀲𑁆𑀫𑀸 𑀇𑀫𑀺𑀦𑀸 𑀓𑀫𑁂𑀦 𑀏𑀢𑀸𑀦𑀺 𑀅𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀏𑀯𑀫𑁂𑀢𑁆𑀣 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀪𑀸𑀯𑀦𑀸𑀦𑀬𑁄𑀢𑀺 𑀓𑁄𑀘𑀺 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀺, 𑀓𑁄𑀘𑀺 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁. 𑀓𑀣𑀁? 𑀇𑀥𑁂𑀓𑀘𑁆𑀘𑁄 𑀧𑀞𑀫𑀁 𑀉𑀧𑀘𑀸𑀭𑀲𑀫𑀸𑀥𑀺𑀁 𑀯𑀸 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀯𑀸 𑀉𑀧𑁆𑀧𑀸𑀤𑁂𑀢𑀺, 𑀅𑀬𑀁 𑀲𑀫𑀣𑁄; 𑀲𑁄 𑀢𑀜𑁆𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑁂 𑀘 𑀥𑀫𑁆𑀫𑁂 𑀅𑀦𑀺𑀘𑁆𑀘𑀸𑀤𑀻𑀳𑀺 𑀯𑀺𑀧𑀲𑁆𑀲𑀢𑀺, 𑀅𑀬𑀁 𑀯𑀺𑀧𑀲𑁆𑀲𑀦𑀸. 𑀇𑀢𑀺 𑀧𑀞𑀫𑀁 𑀲𑀫𑀣𑁄, 𑀧𑀘𑁆𑀙𑀸 𑀯𑀺𑀧𑀲𑁆𑀲𑀦𑀸. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀻’’𑀢𑀺. 𑀢𑀲𑁆𑀲 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀢𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺, 𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄 𑀪𑀸𑀯𑀬𑀢𑁄 𑀩𑀳𑀼𑀮𑀻𑀓𑀭𑁄𑀢𑁄 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺, 𑀏𑀯𑀁 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀺.

𑀇𑀥 𑀧𑀦𑁂𑀓𑀘𑁆𑀘𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀫𑀣𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸𑀯 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀸𑀤𑀻𑀳𑀺 𑀯𑀺𑀧𑀲𑁆𑀲𑀢𑀺, 𑀅𑀬𑀁 𑀯𑀺𑀧𑀲𑁆𑀲𑀦𑀸. 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑁄𑀲𑁆𑀲𑀕𑁆𑀕𑀸𑀭𑀫𑁆𑀫𑀡𑀢𑁄 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸, 𑀅𑀬𑀁 𑀲𑀫𑀣𑁄. 𑀇𑀢𑀺 𑀧𑀞𑀫𑀁 𑀯𑀺𑀧𑀲𑁆𑀲𑀦𑀸 𑀧𑀘𑁆𑀙𑀸 𑀲𑀫𑀣𑁄. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁 𑀪𑀸𑀯𑁂𑀢𑀻’’𑀢𑀺. 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁 𑀪𑀸𑀯𑀬𑀢𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺…𑀧𑁂… 𑀩𑀳𑀼𑀮𑀻𑀓𑀭𑁄𑀢𑀺, 𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄…𑀧𑁂… 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺 (𑀅. 𑀦𑀺. 𑁪.𑁧𑁭𑁦; 𑀧𑀝𑀺. 𑀫. 𑁨.𑁧), 𑀏𑀯𑀁 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁 𑀪𑀸𑀯𑁂𑀢𑀺.

𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀧𑀦 𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀢𑁄𑀧𑀺 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁 𑀪𑀸𑀯𑀬𑀢𑁄𑀧𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸𑀯 𑀳𑁄𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀪𑀸𑀯𑀦𑀸𑀦𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.