𑁯. 𑀫𑀝𑁆𑀞𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀮𑀗𑁆𑀓𑀢𑁄 𑀫𑀝𑁆𑀞𑀓𑀼𑀡𑁆𑀟𑀮𑀻𑀢𑀺 𑀫𑀝𑁆𑀞𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀯𑀸𑀲𑀻 𑀏𑀓𑁄 𑀩𑁆𑀭𑀸𑀳𑁆𑀫𑀡𑁄 𑀅𑀤𑁆𑀥𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀦 𑀤𑁂𑀢𑀺, 𑀅𑀤𑀸𑀦𑀢𑁄 𑀏𑀯 ‘‘𑀅𑀤𑀺𑀦𑁆𑀦𑀧𑀼𑀩𑁆𑀩𑀓𑁄’’𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀸𑀯𑁂𑀦 𑀘 𑀮𑀼𑀤𑁆𑀥𑀪𑀸𑀯𑁂𑀦 𑀘 𑀢𑀣𑀸𑀕𑀢𑀁 𑀯𑀸 𑀢𑀣𑀸𑀕𑀢𑀲𑀸𑀯𑀓𑀁 𑀯𑀸 𑀤𑀝𑁆𑀞𑀼𑀫𑁆𑀧𑀺 𑀦 𑀇𑀘𑁆𑀙𑀢𑀺. 𑀫𑀝𑁆𑀞𑀓𑀼𑀡𑁆𑀟𑀮𑀁 𑀦𑀸𑀫 𑀅𑀢𑁆𑀢𑀦𑁄 𑀧𑀼𑀢𑁆𑀢𑀜𑁆𑀘 𑀲𑀺𑀓𑁆𑀔𑀸𑀧𑁂𑀲𑀺 ‘‘𑀢𑀸𑀢, 𑀢𑀬𑀸 𑀲𑀫𑀡𑁄 𑀕𑁄𑀢𑀫𑁄 𑀢𑀲𑁆𑀲 𑀲𑀸𑀯𑀓𑀸 𑀘 𑀦 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸 𑀦 𑀤𑀝𑁆𑀞𑀩𑁆𑀩𑀸’’𑀢𑀺. 𑀲𑁄𑀧𑀺 𑀢𑀣𑀸 𑀅𑀓𑀸𑀲𑀺. 𑀅𑀣𑀲𑁆𑀲 𑀧𑀼𑀢𑁆𑀢𑁄 𑀕𑀺𑀮𑀸𑀦𑁄 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑁄 𑀥𑀦𑀓𑁆𑀔𑀬𑀪𑀬𑁂𑀦 𑀪𑁂𑀲𑀚𑁆𑀚𑀁 𑀦 𑀓𑀸𑀭𑁂𑀲𑀺, 𑀭𑁄𑀕𑁂 𑀧𑀦 𑀯𑀟𑁆𑀠𑀺𑀢𑁂𑀯 𑀯𑁂𑀚𑁆𑀚𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀯𑁂𑀚𑁆𑀚𑀸 𑀢𑀲𑁆𑀲 𑀲𑀭𑀻𑀭𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀢𑁂𑀓𑀺𑀘𑁆𑀙𑁄’’𑀢𑀺 𑀢𑀁 𑀜𑀢𑁆𑀯𑀸 𑀅𑀧𑀓𑁆𑀓𑀫𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 ‘‘𑀧𑀼𑀢𑁆𑀢𑁂 𑀅𑀩𑁆𑀪𑀦𑁆𑀢𑀭𑁂 𑀫𑀢𑁂 𑀦𑀻𑀳𑀭𑀡𑀁 𑀤𑀼𑀓𑁆𑀔’’𑀦𑁆𑀢𑀺 𑀧𑀼𑀢𑁆𑀢𑀁 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀦𑀺𑀧𑀚𑁆𑀚𑀸𑀧𑁂𑀲𑀺.

𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀫𑀝𑁆𑀞𑀓𑀼𑀡𑁆𑀟𑀮𑀻𑀫𑀸𑀡𑀯𑀁 𑀔𑀻𑀡𑀸𑀬𑀼𑀓𑀁 𑀢𑀤𑀳𑁂𑀯 𑀘𑀯𑀦𑀥𑀫𑁆𑀫𑀁, 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀜𑁆𑀘𑀲𑁆𑀲 𑀓𑀫𑁆𑀫𑀁 𑀓𑀢𑁄𑀓𑀸𑀲𑀁. ‘‘𑀲𑀘𑁂 𑀧𑀦𑀸𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺, 𑀲𑁄 𑀫𑀬𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀺𑀢𑀭𑀁 𑀆𑀴𑀸𑀳𑀦𑁂 𑀭𑁄𑀤𑀫𑀸𑀦𑀁 𑀉𑀧𑀕𑀦𑁆𑀢𑁆𑀯𑀸 𑀲𑀁𑀯𑁂𑀚𑁂𑀲𑁆𑀲𑀢𑀺, 𑀏𑀯𑀁 𑀲𑁄 𑀘 𑀢𑀲𑁆𑀲 𑀧𑀺𑀢𑀸 𑀘 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀢𑀺, 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺𑀲𑁆𑀲𑀢𑀺 𑀢𑀢𑁆𑀣 𑀫𑀬𑀸 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀫𑀳𑀸𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀦 𑀜𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀫𑀝𑁆𑀞𑀓𑀼𑀡𑁆𑀟𑀮𑀻𑀫𑀸𑀡𑀯𑀲𑁆𑀲 𑀧𑀺𑀢𑀼 𑀕𑁂𑀳𑀲𑀫𑀻𑀧𑁂 𑀞𑀢𑁆𑀯𑀸 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀸 𑀤𑀺𑀲𑁆𑀯𑀸 𑀫𑀸𑀡𑀯𑁄 ‘‘𑀓𑀺𑀫𑁂𑀢’’𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀪𑀕𑀯𑀦𑁆𑀢𑀁 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀤𑁆𑀯𑀢𑁆𑀢𑀺𑀁𑀲𑀸𑀬 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀅𑀲𑀻𑀢𑀺𑀬𑀸 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀩𑁆𑀬𑀸𑀫𑀧𑁆𑀧𑀪𑀸𑀬 𑀓𑁂𑀢𑀼𑀫𑀸𑀮𑀸𑀬 𑀘 𑀯𑀺𑀚𑁆𑀚𑁄𑀢𑀫𑀸𑀦𑀁 𑀅𑀦𑀼𑀧𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀅𑀘𑀺𑀦𑁆𑀢𑁂𑀬𑁆𑀬𑁂𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀯𑀺𑀭𑁄𑀘𑀫𑀸𑀦𑀁. 𑀤𑀺𑀲𑁆𑀯𑀸 𑀢𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀩𑀼𑀤𑁆𑀥𑁄 𑀦𑀼 𑀔𑁄 𑀪𑀕𑀯𑀸 𑀇𑀥𑀸𑀦𑀼𑀧𑁆𑀧𑀢𑁆𑀢𑁄, 𑀬𑀲𑁆𑀲𑀸𑀬𑀁 𑀭𑀽𑀧𑀲𑀫𑁆𑀧𑀤𑀸 𑀅𑀢𑁆𑀢𑀦𑁄 𑀢𑁂𑀚𑀲𑀸 𑀲𑀽𑀭𑀺𑀬𑀫𑁆𑀧𑀺 𑀅𑀪𑀺𑀪𑀯𑀢𑀺, 𑀓𑀦𑁆𑀢𑀪𑀸𑀯𑁂𑀦 𑀘𑀦𑁆𑀤𑀺𑀫𑀁, 𑀉𑀧𑀲𑀦𑁆𑀢𑀪𑀸𑀯𑁂𑀦 𑀲𑀩𑁆𑀩𑁂𑀧𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂, 𑀉𑀧𑀲𑀫𑁂𑀦 𑀦𑀸𑀫 𑀏𑀢𑁆𑀣𑁂𑀯 𑀪𑀯𑀺𑀢𑀩𑁆𑀩𑀁, 𑀅𑀬𑀫𑁂𑀯 𑀘 𑀫𑀜𑁆𑀜𑁂 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄, 𑀫𑀫𑁂𑀯 𑀘 𑀅𑀦𑀼𑀓𑀫𑁆𑀧𑀸𑀬 𑀇𑀥𑀸𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀩𑀼𑀤𑁆𑀥𑀸𑀭𑀫𑁆𑀫𑀡𑀸𑀬 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑀲𑀭𑀻𑀭𑁄 𑀅𑀦𑀧𑁆𑀧𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀺𑀧𑀚𑁆𑀚𑀺. 𑀢𑀁 𑀤𑀺𑀲𑁆𑀯𑀸 𑀪𑀕𑀯𑀸 ‘‘𑀅𑀮𑀁 𑀇𑀫𑀲𑁆𑀲 𑀏𑀢𑁆𑀢𑀓𑁂𑀦 𑀲𑀕𑁆𑀕𑀽𑀧𑀧𑀢𑁆𑀢𑀺𑀬𑀸’’𑀢𑀺 𑀧𑀓𑁆𑀓𑀸𑀫𑀺.

𑀲𑁄𑀧𑀺 𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀅𑀯𑀺𑀚𑀳𑀦𑁆𑀢𑁄𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀧𑀺𑀢𑀸 𑀧𑀦𑀲𑁆𑀲 𑀲𑀭𑀻𑀭𑀲𑀓𑁆𑀓𑀸𑀭𑀁 𑀓𑀭𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀆𑀴𑀸𑀳𑀦𑀁 𑀕𑀦𑁆𑀢𑁆𑀯𑀸 ‘‘𑀳𑀸 𑀳𑀸 𑀫𑀝𑁆𑀞𑀓𑀼𑀡𑁆𑀟𑀮𑀺, 𑀳𑀸 𑀳𑀸 𑀫𑀝𑁆𑀞𑀓𑀼𑀡𑁆𑀟𑀮𑀻’’𑀢𑀺 𑀧𑀭𑀺𑀤𑁂𑀯𑀫𑀸𑀦𑁄 𑀆𑀴𑀸𑀳𑀦𑀁 𑀅𑀦𑀼𑀧𑀭𑀺𑀓𑁆𑀓𑀫𑀦𑁆𑀢𑁄 𑀭𑁄𑀤𑀢𑀺. 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀼𑀢𑁄 𑀦𑀼 𑀔𑁄 𑀅𑀳𑀁 𑀇𑀥𑀸𑀕𑀢𑁄 𑀓𑀺𑀜𑁆𑀘 𑀓𑀫𑁆𑀫𑀁 𑀓𑀢𑁆𑀯𑀸’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀅𑀢𑁆𑀢𑀦𑁄 𑀧𑀼𑀭𑀺𑀫𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀢𑀢𑁆𑀣 𑀘 𑀫𑀭𑀡𑀓𑀸𑀮𑁂 𑀪𑀕𑀯𑀢𑀺 𑀧𑀯𑀢𑁆𑀢𑀺𑀢𑀁 𑀘𑀺𑀢𑁆𑀢𑀧𑁆𑀧𑀲𑀸𑀤𑀁 𑀫𑀦𑁄𑀳𑀭𑀁 𑀅𑀜𑁆𑀚𑀮𑀺𑀓𑀭𑀡𑀫𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀫𑀳𑀸𑀦𑀼𑀪𑀸𑀯𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄’’𑀢𑀺 𑀲𑀸𑀢𑀺𑀲𑀬𑀁 𑀢𑀣𑀸𑀕𑀢𑁂 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑀩𑀳𑀼𑀫𑀸𑀦𑁄 ‘‘𑀅𑀤𑀺𑀦𑁆𑀦𑀧𑀼𑀩𑁆𑀩𑀓𑀩𑁆𑀭𑀸𑀳𑁆𑀫𑀡𑁄 𑀦𑀼 𑀔𑁄 𑀓𑀺𑀁 𑀓𑀭𑁄𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀆𑀴𑀸𑀳𑀦𑁂 𑀭𑁄𑀤𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀧𑀼𑀩𑁆𑀩𑁂 𑀪𑁂𑀲𑀚𑁆𑀚𑀫𑀢𑁆𑀢𑀫𑁆𑀧𑀺 𑀅𑀓𑀢𑁆𑀯𑀸 𑀇𑀤𑀸𑀦𑀺 𑀦𑀺𑀭𑀢𑁆𑀣𑀓𑀁 𑀆𑀴𑀸𑀳𑀦𑁂 𑀭𑁄𑀤𑀢𑀺, 𑀳𑀦𑁆𑀤 𑀦𑀁 𑀲𑀁𑀯𑁂𑀚𑁂𑀢𑁆𑀯𑀸 𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀤𑁂𑀯𑀮𑁄𑀓𑀢𑁄 𑀆𑀕𑀦𑁆𑀢𑁆𑀯𑀸 𑀫𑀝𑁆𑀞𑀓𑀼𑀡𑁆𑀟𑀮𑀻𑀭𑀽𑀧𑁂𑀦 𑀭𑁄𑀤𑀫𑀸𑀦𑁄 ‘‘𑀳𑀸 𑀳𑀸 𑀘𑀦𑁆𑀤, 𑀳𑀸 𑀳𑀸 𑀲𑀽𑀭𑀺𑀬𑀸’’𑀢𑀺 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑁄 𑀧𑀺𑀢𑀼 𑀲𑀫𑀻𑀧𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀬𑀁 𑀫𑀝𑁆𑀞𑀓𑀼𑀡𑁆𑀟𑀮𑀻 𑀆𑀕𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁧𑁨𑁦𑁭. ‘‘𑀅𑀮𑀗𑁆𑀓𑀢𑁄 𑀫𑀝𑁆𑀞𑀓𑀼𑀡𑁆𑀟𑀮𑀻, 𑀫𑀸𑀮𑀥𑀸𑀭𑀻 𑀳𑀭𑀺𑀘𑀦𑁆𑀤𑀦𑀼𑀲𑁆𑀲𑀤𑁄;

𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀲𑀺, 𑀯𑀦𑀫𑀚𑁆𑀛𑁂 𑀓𑀺𑀁 𑀤𑀼𑀓𑁆𑀔𑀺𑀢𑁄 𑀢𑀼𑀯’’𑀦𑁆𑀢𑀺.

𑀢𑀢𑁆𑀣 𑀅𑀮𑀗𑁆𑀓𑀢𑁄𑀢𑀺 𑀯𑀺𑀪𑀽𑀲𑀺𑀢𑁄. 𑀫𑀝𑁆𑀞𑀓𑀼𑀡𑁆𑀟𑀮𑀻𑀢𑀺 𑀲𑀭𑀻𑀭𑀧𑁆𑀧𑀤𑁂𑀲𑀲𑁆𑀲 𑀅𑀖𑀁𑀲𑀦𑀢𑁆𑀣𑀁 𑀫𑀸𑀮𑀸𑀮𑀢𑀸𑀤𑀬𑁄 𑀅𑀤𑀲𑁆𑀲𑁂𑀢𑁆𑀯𑀸 𑀫𑀝𑁆𑀞𑀸𑀓𑀸𑀭𑁂𑀦𑁂𑀯 𑀓𑀢𑀓𑀼𑀡𑁆𑀟𑀮𑁄. 𑀅𑀣 𑀯𑀸 𑀫𑀝𑁆𑀞𑀓𑀼𑀡𑁆𑀟𑀮𑀻𑀢𑀺 𑀯𑀺𑀲𑀼𑀤𑁆𑀥𑀓𑀼𑀡𑁆𑀟𑀮𑁄, 𑀢𑀸𑀧𑁂𑀢𑁆𑀯𑀸 𑀚𑀸𑀢𑀺𑀳𑀺𑀗𑁆𑀕𑀼𑀮𑀺𑀓𑀸𑀬 𑀫𑀚𑁆𑀚𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀲𑀽𑀓𑀭𑀮𑁄𑀫𑁂𑀦 𑀫𑀚𑁆𑀚𑀺𑀢𑀓𑀼𑀡𑁆𑀟𑀮𑁄𑀢𑀺 𑀅𑀢𑁆𑀣𑁄. 𑀫𑀸𑀮𑀥𑀸𑀭𑀻𑀢𑀺 𑀫𑀸𑀮𑀁 𑀥𑀸𑀭𑁂𑀦𑁆𑀢𑁄, 𑀧𑀺𑀴𑀦𑁆𑀥𑀺𑀢𑀫𑀸𑀮𑁄𑀢𑀺 𑀅𑀢𑁆𑀣𑁄. 𑀳𑀭𑀺𑀘𑀦𑁆𑀤𑀦𑀼𑀲𑁆𑀲𑀤𑁄𑀢𑀺 𑀭𑀢𑁆𑀢𑀘𑀦𑁆𑀤𑀦𑁂𑀦 𑀲𑀩𑁆𑀩𑀲𑁄 𑀅𑀦𑀼𑀮𑀺𑀢𑁆𑀢𑀕𑀢𑁆𑀢𑁄. 𑀓𑀺𑀦𑁆𑀢𑀺 𑀧𑀼𑀘𑁆𑀙𑀸𑀯𑀘𑀦𑀁. 𑀤𑀼𑀓𑁆𑀔𑀺𑀢𑁄𑀢𑀺 𑀤𑀼𑀓𑁆𑀔𑀧𑁆𑀧𑀢𑁆𑀢𑁄. 𑀓𑀺𑀁𑀤𑀼𑀓𑁆𑀔𑀺𑀢𑁄𑀢𑀺 𑀯𑀸 𑀏𑀓𑀫𑁂𑀯 𑀧𑀤𑀁, 𑀓𑁂𑀦 𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑁄𑀢𑀺 𑀅𑀢𑁆𑀣𑁄.

𑀅𑀣 𑀦𑀁 𑀤𑁂𑀯𑀧𑀼𑀢𑁆𑀢𑁄 𑀆𑀳 𑁋

𑁧𑁨𑁦𑁮. ‘‘𑀲𑁄𑀯𑀡𑁆𑀡𑀫𑀬𑁄 𑀧𑀪𑀲𑁆𑀲𑀭𑁄, 𑀉𑀧𑁆𑀧𑀦𑁆𑀦𑁄 𑀭𑀣𑀧𑀜𑁆𑀚𑀭𑁄 𑀫𑀫;

𑀢𑀲𑁆𑀲 𑀘𑀓𑁆𑀓𑀬𑀼𑀕𑀁 𑀦 𑀯𑀺𑀦𑁆𑀤𑀸𑀫𑀺, 𑀢𑁂𑀦 𑀤𑀼𑀓𑁆𑀔𑁂𑀦 𑀚𑀳𑀸𑀫𑀺 𑀚𑀻𑀯𑀺𑀢’’𑀦𑁆𑀢𑀺.

𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋

𑁧𑁨𑁦𑁯. ‘‘𑀲𑁄𑀯𑀡𑁆𑀡𑀫𑀬𑀁 𑀫𑀡𑀺𑀫𑀬𑀁, 𑀮𑁄𑀳𑀺𑀢𑀓𑀫𑀬𑀁 𑀅𑀣 𑀭𑀽𑀧𑀺𑀬𑀫𑀬𑀁;

𑀆𑀘𑀺𑀓𑁆𑀔 𑀫𑁂 𑀪𑀤𑁆𑀤𑀫𑀸𑀡𑀯, 𑀘𑀓𑁆𑀓𑀬𑀼𑀕𑀁 𑀧𑀝𑀺𑀧𑀸𑀤𑀬𑀸𑀫𑀺 𑀢𑁂’’𑀢𑀺.

𑀢𑀁 𑀲𑀼𑀢𑁆𑀯𑀸 𑀫𑀸𑀡𑀯𑁄 ‘‘𑀅𑀬𑀁 𑀧𑀼𑀢𑁆𑀢𑀲𑁆𑀲 𑀪𑁂𑀲𑀚𑁆𑀚𑀁 𑀅𑀓𑀢𑁆𑀯𑀸 𑀧𑀼𑀢𑁆𑀢𑀧𑀢𑀺𑀭𑀽𑀧𑀓𑀁 𑀫𑀁 𑀤𑀺𑀲𑁆𑀯𑀸 𑀭𑁄𑀤𑀦𑁆𑀢𑁄 ‘𑀲𑀼𑀯𑀡𑁆𑀡𑀸𑀤𑀺𑀫𑀬𑀁 𑀭𑀣𑀘𑀓𑁆𑀓𑀁 𑀓𑀭𑁄𑀫𑀻’𑀢𑀺 𑀯𑀤𑀢𑀺, 𑀳𑁄𑀢𑀼 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀻𑀯 𑀫𑀳𑀦𑁆𑀢𑀁 𑀫𑁂 𑀘𑀓𑁆𑀓𑀬𑀼𑀕𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 ‘‘𑀬𑀸𑀯 𑀫𑀳𑀦𑁆𑀢𑀁 𑀆𑀓𑀗𑁆𑀔𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀳𑀺 𑀫𑁂 𑀅𑀢𑁆𑀣𑁄, 𑀢𑁂 𑀫𑁂 𑀤𑁂𑀳𑀻’’𑀢𑀺 𑀬𑀸𑀘𑀦𑁆𑀢𑁄 𑁋

𑁧𑁨𑁧𑁦. ‘‘𑀲𑁄 𑀫𑀸𑀡𑀯𑁄 𑀢𑀲𑁆𑀲 𑀧𑀸𑀯𑀤𑀺, 𑀘𑀦𑁆𑀤𑀲𑀽𑀭𑀺𑀬𑀸 𑀉𑀪𑀬𑁂𑀢𑁆𑀣 𑀤𑀺𑀲𑁆𑀲𑀭𑁂;

𑀲𑁄𑀯𑀡𑁆𑀡𑀫𑀬𑁄 𑀭𑀣𑁄 𑀫𑀫, 𑀢𑁂𑀦 𑀘𑀓𑁆𑀓𑀬𑀼𑀕𑁂𑀦 𑀲𑁄𑀪𑀢𑀻’’𑀢𑀺.

𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋

𑁧𑁨𑁧𑁧. ‘‘𑀩𑀸𑀮𑁄 𑀔𑁄 𑀢𑁆𑀯𑀁 𑀅𑀲𑀺 𑀫𑀸𑀡𑀯, 𑀬𑁄 𑀢𑁆𑀯𑀁 𑀧𑀢𑁆𑀣𑀬𑀲𑁂 𑀅𑀧𑀢𑁆𑀣𑀺𑀬𑀁;

𑀫𑀜𑁆𑀜𑀸𑀫𑀺 𑀢𑀼𑀯𑀁 𑀫𑀭𑀺𑀲𑁆𑀲𑀲𑀺, 𑀦 𑀳𑀺 𑀢𑁆𑀯𑀁 𑀮𑀘𑁆𑀙𑀲𑀺 𑀘𑀦𑁆𑀤𑀲𑀽𑀭𑀺𑀬𑁂’’𑀢𑀺.

𑀅𑀣 𑀦𑀁 𑀫𑀸𑀡𑀯𑁄 ‘‘𑀓𑀺𑀁 𑀧𑀦 𑀧𑀜𑁆𑀜𑀸𑀬𑀫𑀸𑀦𑀲𑁆𑀲𑀢𑁆𑀣𑀸𑀬 𑀭𑁄𑀤𑀦𑁆𑀢𑁄 𑀩𑀸𑀮𑁄 𑀳𑁄𑀢𑀺, 𑀉𑀤𑀸𑀳𑀼 𑀅𑀧𑀜𑁆𑀜𑀸𑀬𑀫𑀸𑀦𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑁋

𑁧𑁨𑁧𑁨. ‘‘𑀕𑀫𑀦𑀸𑀕𑀫𑀦𑀫𑁆𑀧𑀺 𑀤𑀺𑀲𑁆𑀲𑀢𑀺, 𑀯𑀡𑁆𑀡𑀥𑀸𑀢𑀼 𑀉𑀪𑀬𑀢𑁆𑀣 𑀯𑀻𑀣𑀺𑀬𑀸;

𑀧𑁂𑀢𑁄 𑀓𑀸𑀮𑀓𑀢𑁄 𑀦 𑀤𑀺𑀲𑁆𑀲𑀢𑀺, 𑀓𑁄 𑀦𑀺𑀥 𑀓𑀦𑁆𑀤𑀢𑀁 𑀩𑀸𑀮𑁆𑀬𑀢𑀭𑁄’’𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 ‘‘𑀬𑀼𑀢𑁆𑀢𑀁 𑀏𑀲 𑀯𑀤𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑁋

𑁧𑁨𑁧𑁩. ‘‘𑀲𑀘𑁆𑀘𑀁 𑀔𑁄 𑀯𑀤𑁂𑀲𑀺 𑀫𑀸𑀡𑀯, 𑀅𑀳𑀫𑁂𑀯 𑀓𑀦𑁆𑀤𑀢𑀁 𑀩𑀸𑀮𑁆𑀬𑀢𑀭𑁄;

𑀘𑀦𑁆𑀤𑀁 𑀯𑀺𑀬 𑀤𑀸𑀭𑀓𑁄 𑀭𑀼𑀤𑀁, 𑀧𑁂𑀢𑀁 𑀓𑀸𑀮𑀓𑀢𑀸𑀪𑀺𑀧𑀢𑁆𑀣𑀬𑀺’’𑀦𑁆𑀢𑀺. 𑁋

𑀯𑀢𑁆𑀯𑀸 𑀢𑀲𑁆𑀲 𑀓𑀣𑀸𑀬 𑀦𑀺𑀲𑁆𑀲𑁄𑀓𑁄 𑀳𑀼𑀢𑁆𑀯𑀸 𑀫𑀸𑀡𑀯𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁧𑁪. ‘‘𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁨𑁧𑁫. ‘‘𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀲𑁄𑀓𑀁 𑀳𑀤𑀬𑀦𑀺𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁨𑁧𑁬. ‘‘𑀲𑁆𑀯𑀸𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯𑀸’’𑀢𑀺.

𑁧𑁨𑁦𑁮-𑁧𑁦. 𑀢𑀢𑁆𑀣 𑀭𑀣𑀧𑀜𑁆𑀚𑀭𑁄𑀢𑀺 𑀭𑀣𑀽𑀧𑀢𑁆𑀣𑀁. 𑀦 𑀯𑀺𑀦𑁆𑀤𑀸𑀫𑀻𑀢𑀺 𑀦 𑀮𑀪𑀸𑀫𑀺. 𑀪𑀤𑁆𑀤𑀫𑀸𑀡𑀯𑀸𑀢𑀺 𑀆𑀮𑀧𑀦𑀁. 𑀧𑀝𑀺𑀧𑀸𑀤𑀬𑀸𑀫𑀻𑀢𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀤𑀤𑀸𑀫𑀺, 𑀫𑀸 𑀘𑀓𑁆𑀓𑀬𑀼𑀕𑀸𑀪𑀸𑀯𑁂𑀦 𑀚𑀻𑀯𑀺𑀢𑀁 𑀚𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀪𑀬𑁂𑀢𑁆𑀣 𑀤𑀺𑀲𑁆𑀲𑀭𑁂𑀢𑀺 𑀉𑀪𑁄𑀧𑀺 𑀏𑀢𑁆𑀣 𑀘𑀦𑁆𑀤𑀲𑀽𑀭𑀺𑀬𑀸 𑀆𑀓𑀸𑀲𑁂 𑀤𑀺𑀲𑁆𑀲𑀦𑁆𑀢𑀺. 𑀬-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀉𑀪𑀬𑁂 𑀏𑀢𑁆𑀣𑀸𑀢𑀺 𑀯𑀸 𑀧𑀤𑀯𑀺𑀪𑀸𑀕𑁄.

𑁧𑁨𑁧𑁨. 𑀕𑀫𑀦𑀸𑀕𑀫𑀦𑀦𑁆𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀑𑀕𑀫𑀦𑀼𑀕𑁆𑀕𑀫𑀦𑀯𑀲𑁂𑀦 𑀘𑀦𑁆𑀤𑀲𑀽𑀭𑀺𑀬𑀸𑀦𑀁 𑀕𑀫𑀦𑀁 𑀆𑀕𑀫𑀦𑀜𑁆𑀘 𑀤𑀺𑀲𑁆𑀲𑀢𑀺. ‘‘𑀕𑀫𑀦𑁄𑀕𑀫𑀦’’𑀦𑁆𑀢𑀺𑀧𑀺 𑀧𑀸𑀴𑀺, 𑀉𑀕𑁆𑀕𑀫𑀦𑀁 𑀑𑀕𑀫𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀯𑀡𑁆𑀡𑀥𑀸𑀢𑀽𑀢𑀺 𑀲𑀻𑀢𑀺𑀪𑀸𑀯𑀯𑀺𑀲𑀺𑀝𑁆𑀞𑀸 𑀓𑀦𑁆𑀢𑀪𑀸𑀯𑀪𑀸𑀲𑀼𑀭𑀸, 𑀉𑀡𑁆𑀳𑀪𑀸𑀯𑀯𑀺𑀲𑀺𑀝𑁆𑀞𑀸 𑀢𑀺𑀓𑁆𑀔𑀪𑀸𑀯𑀪𑀸𑀲𑀼𑀭𑀸 𑀘 𑀯𑀡𑁆𑀡𑀦𑀺𑀪𑀸. 𑀉𑀪𑀬𑀢𑁆𑀣𑀸𑀢𑀺 𑀘𑀦𑁆𑀤𑁂 𑀲𑀽𑀭𑀺𑀬𑁂 𑀘𑀸𑀢𑀺 𑀤𑁆𑀯𑀻𑀲𑀼𑀧𑀺 𑀯𑀡𑁆𑀡𑀥𑀸𑀢𑀼 𑀤𑀺𑀲𑁆𑀲𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀻𑀣𑀺𑀬𑀸𑀢𑀺 𑀧𑀯𑀢𑁆𑀢𑀦𑀯𑀻𑀣𑀺𑀬𑀁 𑀆𑀓𑀸𑀲𑁂, 𑀦𑀸𑀕𑀯𑀻𑀣𑀺𑀬𑀸𑀤𑀺𑀯𑀻𑀣𑀺𑀬𑀁 𑀯𑀸. ‘‘𑀉𑀪𑀬𑁂𑀢𑁆𑀣𑀸’’𑀢𑀺𑀧𑀺 𑀧𑀸𑀞𑁄, 𑀉𑀪𑀬𑁂 𑀏𑀢𑁆𑀣𑀸𑀢𑀺 𑀧𑀤𑀯𑀺𑀲𑀦𑁆𑀥𑀺. 𑀩𑀸𑀮𑁆𑀬𑀢𑀭𑁄𑀢𑀺 𑀩𑀸𑀮𑀢𑀭𑁄 𑀅𑀢𑀺𑀲𑀬𑁂𑀦 𑀩𑀸𑀮𑁄.

𑁧𑁨𑁧𑁩. 𑀇𑀫𑀁 𑀧𑀦 𑀓𑀣𑀁 𑀲𑀼𑀢𑁆𑀯𑀸 ‘‘𑀅𑀮𑀩𑁆𑀪𑀦𑀻𑀬𑀯𑀢𑁆𑀣𑀼𑀁 𑀯𑀢𑀸𑀳𑀁 𑀧𑀢𑁆𑀣𑁂𑀢𑁆𑀯𑀸 𑀓𑁂𑀯𑀮𑀁 𑀲𑁄𑀓𑀕𑁆𑀕𑀺𑀦𑀸 𑀟𑀬𑁆𑀳𑀸𑀫𑀺, 𑀓𑀺𑀁 𑀫𑁂 𑀦𑀺𑀭𑀢𑁆𑀣𑀓𑁂𑀦 𑀅𑀦𑀬𑀩𑁆𑀬𑀲𑀦𑁂𑀦𑀸’’𑀢𑀺 𑀧𑀝𑀺𑀲𑀗𑁆𑀔𑀸𑀦𑁂 𑀅𑀝𑁆𑀞𑀸𑀲𑀺. 𑀅𑀣 𑀤𑁂𑀯𑀧𑀼𑀢𑁆𑀢𑁄 𑀫𑀝𑁆𑀞𑀓𑀼𑀡𑁆𑀟𑀮𑀻𑀭𑀽𑀧𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀺𑀩𑁆𑀩𑀭𑀽𑀧𑁂𑀦𑁂𑀯 𑀅𑀝𑁆𑀞𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀢𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀫𑀸𑀡𑀯𑀯𑁄𑀳𑀸𑀭𑁂𑀦𑁂𑀯 𑀯𑁄𑀳𑀭𑀦𑁆𑀢𑁄 ‘‘𑀲𑀘𑁆𑀘𑀁 𑀔𑁄 𑀯𑀤𑁂𑀲𑀺 𑀫𑀸𑀡𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀦𑁆𑀤𑀁 𑀯𑀺𑀬 𑀤𑀸𑀭𑀓𑁄 𑀭𑀼𑀤𑀦𑁆𑀢𑀺 𑀘𑀦𑁆𑀤𑀁 𑀅𑀪𑀺𑀧𑀢𑁆𑀣𑀬𑀁 𑀭𑀼𑀤𑀦𑁆𑀢𑁄 𑀤𑀸𑀭𑀓𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀓𑀸𑀮𑀓𑀢𑀸𑀪𑀺𑀧𑀢𑁆𑀣𑀬𑀺𑀦𑁆𑀢𑀺 𑀓𑀸𑀮𑀓𑀢𑀁 𑀅𑀪𑀺𑀧𑀢𑁆𑀣𑀬𑀺𑀁. ‘‘𑀅𑀪𑀺𑀧𑀢𑁆𑀣𑀬’’𑀦𑁆𑀢𑀺𑀧𑀺 𑀧𑀸𑀞𑁄.

𑁧𑁨𑁧𑁪-𑁫. 𑀆𑀤𑀺𑀢𑁆𑀢𑀦𑁆𑀢𑀺 𑀲𑁄𑀓𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁. 𑀦𑀺𑀩𑁆𑀩𑀸𑀧𑀬𑁂 𑀤𑀭𑀦𑁆𑀢𑀺 𑀦𑀺𑀩𑁆𑀩𑀸𑀧𑀬𑀺 𑀤𑀭𑀣𑀁 𑀲𑁄𑀓𑀧𑀭𑀺𑀴𑀸𑀳𑀁. 𑀅𑀩𑁆𑀩𑀳𑀻𑀢𑀺 𑀉𑀤𑁆𑀥𑀭𑀺.

𑀅𑀣 𑀩𑁆𑀭𑀸𑀳𑁆𑀫𑀡𑁄 𑀲𑁄𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀤𑁂𑀲𑀤𑀸𑀬𑀓𑀁 𑀤𑀺𑀩𑁆𑀩𑀭𑀽𑀧𑁂𑀦 𑀞𑀺𑀢𑀁 𑀤𑀺𑀲𑁆𑀯𑀸 ‘‘𑀓𑁄 𑀦𑀸𑀫 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑁋

𑁧𑁨𑁧𑁭. ‘‘𑀤𑁂𑀯𑀢𑀸 𑀦𑀼𑀲𑀺 𑀕𑀦𑁆𑀥𑀩𑁆𑀩𑁄, 𑀅𑀤𑀼 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀓𑁄 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀧𑀼𑀢𑁆𑀢𑁄, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺. 𑁋

𑀆𑀳. 𑀲𑁄𑀧𑀺 𑀢𑀲𑁆𑀲 𑁋

𑁧𑁨𑁧𑁮. ‘‘𑀬𑀜𑁆𑀘 𑀓𑀦𑁆𑀤𑀲𑀺 𑀬𑀜𑁆𑀘 𑀭𑁄𑀤𑀲𑀺, 𑀧𑀼𑀢𑁆𑀢𑀁 𑀆𑀴𑀸𑀳𑀦𑁂 𑀲𑀬𑀁 𑀤𑀳𑀺𑀢𑁆𑀯𑀸;

𑀲𑁆𑀯𑀸𑀳𑀁 𑀓𑀼𑀲𑀮𑀁 𑀓𑀭𑀺𑀢𑁆𑀯𑀸 𑀓𑀫𑁆𑀫𑀁, 𑀢𑀺𑀤𑀲𑀸𑀦𑀁 𑀲𑀳𑀩𑁆𑀬𑀢𑀁 𑀕𑀢𑁄’’𑀢𑀺. 𑁋

𑀅𑀢𑁆𑀢𑀸𑀦𑀁 𑀓𑀣𑁂𑀲𑀺. 𑀢𑀢𑁆𑀣 𑀬𑀜𑁆𑀘 𑀓𑀦𑁆𑀤𑀲𑀺 𑀬𑀜𑁆𑀘 𑀭𑁄𑀤𑀲𑀻𑀢𑀺 𑀬𑀁 𑀢𑀯 𑀧𑀼𑀢𑁆𑀢𑀁 𑀫𑀝𑁆𑀞𑀓𑀼𑀡𑁆𑀟𑀮𑀺𑀁 𑀉𑀤𑁆𑀤𑀺𑀲𑁆𑀲 𑀭𑁄𑀤𑀲𑀺, 𑀅𑀲𑁆𑀲𑀽𑀦𑀺 𑀫𑀼𑀜𑁆𑀘𑀲𑀺.

𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋

𑁧𑁨𑁧𑁯. ‘‘𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀦𑀸𑀤𑁆𑀤𑀲𑀸𑀫, 𑀤𑀸𑀦𑀁 𑀤𑀤𑀦𑁆𑀢𑀲𑁆𑀲 𑀲𑀓𑁂 𑀅𑀕𑀸𑀭𑁂;

𑀉𑀧𑁄𑀲𑀣𑀓𑀫𑁆𑀫𑀁 𑀯𑀸 𑀢𑀸𑀤𑀺𑀲𑀁, 𑀓𑁂𑀦 𑀓𑀫𑁆𑀫𑁂𑀦 𑀕𑀢𑁄𑀲𑀺 𑀤𑁂𑀯𑀮𑁄𑀓’’𑀦𑁆𑀢𑀺.

𑀢𑀢𑁆𑀣 ‘‘𑀉𑀧𑁄𑀲𑀣𑀓𑀫𑁆𑀫𑀁 𑀯𑀸 𑀢𑀸𑀤𑀺𑀲𑀁 𑀦𑀸𑀤𑁆𑀤𑀲𑀸𑀫𑀸’’𑀢𑀺 𑀬𑁄𑀚𑀦𑀸.

𑀅𑀣 𑀦𑀁 𑀫𑀸𑀡𑀯𑁄 𑀆𑀳 𑁋

𑁧𑁨𑁨𑁦. ‘‘𑀆𑀩𑀸𑀥𑀺𑀓𑁄𑀳𑀁 𑀤𑀼𑀓𑁆𑀔𑀺𑀢𑁄 𑀕𑀺𑀮𑀸𑀦𑁄, 𑀆𑀢𑀼𑀭𑀭𑀽𑀧𑁄𑀫𑁆𑀳𑀺 𑀲𑀓𑁂 𑀦𑀺𑀯𑁂𑀲𑀦𑁂;

𑀩𑀼𑀤𑁆𑀥𑀁 𑀯𑀺𑀕𑀢𑀭𑀚𑀁 𑀯𑀺𑀢𑀺𑀡𑁆𑀡𑀓𑀗𑁆𑀔𑀁, 𑀅𑀤𑁆𑀤𑀓𑁆𑀔𑀺𑀁 𑀲𑀼𑀕𑀢𑀁 𑀅𑀦𑁄𑀫𑀧𑀜𑁆𑀜𑀁.

𑁧𑁨𑁨𑁧. ‘‘𑀲𑁆𑀯𑀸𑀳𑀁 𑀫𑀼𑀤𑀺𑀢𑀫𑀦𑁄 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀅𑀜𑁆𑀚𑀮𑀺𑀁 𑀅𑀓𑀭𑀺𑀁 𑀢𑀣𑀸𑀕𑀢𑀲𑁆𑀲;

𑀢𑀸𑀳𑀁 𑀓𑀼𑀲𑀮𑀁 𑀓𑀭𑀺𑀢𑁆𑀯𑀸𑀦 𑀓𑀫𑁆𑀫𑀁, 𑀢𑀺𑀤𑀲𑀸𑀦𑀁 𑀲𑀳𑀩𑁆𑀬𑀢𑀁 𑀕𑀢𑁄’’𑀢𑀺.

𑁧𑁨𑁨𑁦-𑁨𑁧. 𑀢𑀢𑁆𑀣 𑀆𑀩𑀸𑀥𑀺𑀓𑁄𑀢𑀺 𑀆𑀩𑀸𑀥𑀲𑀫𑀗𑁆𑀕𑀻. 𑀤𑀼𑀓𑁆𑀔𑀺𑀢𑁄𑀢𑀺 𑀢𑁂𑀦𑁂𑀯 𑀆𑀩𑀸𑀥𑀺𑀓𑀪𑀸𑀯𑁂𑀦 𑀚𑀸𑀢𑀤𑀼𑀓𑁆𑀔𑁄. 𑀕𑀺𑀮𑀸𑀦𑁄𑀢𑀺 𑀕𑀺𑀮𑀸𑀬𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀆𑀢𑀼𑀭𑀭𑀽𑀧𑁄𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀪𑀺𑀢𑀼𑀦𑁆𑀦𑀓𑀸𑀬𑁄. 𑀯𑀺𑀕𑀢𑀭𑀚𑀦𑁆𑀢𑀺 𑀯𑀺𑀕𑀢𑀭𑀸𑀕𑀸𑀤𑀺𑀭𑀚𑀁. 𑀯𑀺𑀢𑀺𑀡𑁆𑀡𑀓𑀗𑁆𑀔𑀦𑁆𑀢𑀺 𑀲𑀩𑁆𑀩𑀲𑁄 𑀲𑀁𑀲𑀬𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀁. 𑀅𑀦𑁄𑀫𑀧𑀜𑁆𑀜𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀧𑀜𑁆𑀜𑀁, 𑀲𑀩𑁆𑀩𑀜𑁆𑀜𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀭𑀺𑀦𑁆𑀢𑀺 𑀅𑀓𑀸𑀲𑀺𑀁. 𑀢𑀸𑀳𑀦𑁆𑀢𑀺 𑀢𑀁 𑀅𑀳𑀁.

𑀏𑀯𑀁 𑀢𑀲𑁆𑀫𑀺𑀁 𑀓𑀣𑁂𑀦𑁆𑀢𑁂𑀬𑁂𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀓𑀮𑀲𑀭𑀻𑀭𑀁 𑀧𑀻𑀢𑀺𑀬𑀸 𑀧𑀭𑀺𑀧𑀽𑀭𑀺. 𑀲𑁄 𑀢𑀁 𑀧𑀻𑀢𑀺𑀁 𑀧𑀯𑁂𑀤𑁂𑀦𑁆𑀢𑁄 𑁋

𑁧𑁨𑁨𑁨. ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀅𑀩𑁆𑀪𑀼𑀢𑀁 𑀯𑀢,

𑀅𑀜𑁆𑀚𑀮𑀺𑀓𑀫𑁆𑀫𑀲𑁆𑀲 𑀅𑀬𑀫𑀻𑀤𑀺𑀲𑁄 𑀯𑀺𑀧𑀸𑀓𑁄;

𑀅𑀳𑀫𑁆𑀧𑀺 𑀫𑀼𑀤𑀺𑀢𑀫𑀦𑁄 𑀧𑀲𑀦𑁆𑀦𑀘𑀺𑀢𑁆𑀢𑁄,

𑀅𑀚𑁆𑀚𑁂𑀯 𑀩𑀼𑀤𑁆𑀥𑀁 𑀲𑀭𑀡𑀁 𑀯𑀚𑀸𑀫𑀻’’𑀢𑀺. 𑁋 𑀆𑀳;

𑀢𑀢𑁆𑀣 𑀅𑀦𑀪𑀺𑀡𑁆𑀳𑀧𑁆𑀧𑀯𑀢𑁆𑀢𑀺𑀢𑀸𑀬 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑁄𑀕𑁆𑀕𑀦𑁆𑀢𑀺 𑀅𑀘𑁆𑀙𑀭𑀺𑀬𑀁, 𑀅𑀪𑀽𑀢𑀧𑀼𑀩𑁆𑀩𑀢𑀸𑀬 𑀅𑀩𑁆𑀪𑀼𑀢𑀁. 𑀉𑀪𑀬𑁂𑀦𑀧𑀺 𑀯𑀺𑀫𑁆𑀳𑀬𑀸𑀯𑀳𑀢𑀁𑀬𑁂𑀯 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀫𑀼𑀤𑀺𑀢𑀫𑀦𑁄 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀅𑀚𑁆𑀚𑁂𑀯 𑀩𑀼𑀤𑁆𑀥𑀁 𑀲𑀭𑀡𑀁 𑀯𑀚𑀸𑀫𑀻’’𑀢𑀺 𑀆𑀳.

𑀅𑀣 𑀦𑀁 𑀤𑁂𑀯𑀧𑀼𑀢𑁆𑀢𑁄 𑀲𑀭𑀡𑀕𑀫𑀦𑁂 𑀲𑀻𑀮𑀲𑀫𑀸𑀤𑀸𑀦𑁂 𑀘 𑀦𑀺𑀬𑁄𑀚𑁂𑀦𑁆𑀢𑁄 𑁋

𑁧𑁨𑁨𑁩. ‘‘𑀅𑀚𑁆𑀚𑁂𑀯 𑀩𑀼𑀤𑁆𑀥𑀁 𑀲𑀭𑀡𑀁 𑀯𑀚𑀸𑀳𑀺, 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄;

𑀢𑀣𑁂𑀯 𑀲𑀺𑀓𑁆𑀔𑀸𑀬 𑀧𑀤𑀸𑀦𑀺 𑀧𑀜𑁆𑀘, 𑀅𑀔𑀡𑁆𑀟𑀨𑀼𑀮𑁆𑀮𑀸𑀦𑀺 𑀲𑀫𑀸𑀤𑀺𑀬𑀲𑁆𑀲𑀼.

𑁧𑁨𑁨𑁪. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀲𑁆𑀲𑀼 𑀔𑀺𑀧𑁆𑀧𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀲𑁆𑀲𑀼;

𑀅𑀫𑀚𑁆𑀚𑀧𑁄 𑀫𑀸 𑀘 𑀫𑀼𑀲𑀸 𑀪𑀡𑀸𑀳𑀺, 𑀲𑀓𑁂𑀦 𑀤𑀸𑀭𑁂𑀦 𑀘 𑀳𑁄𑀳𑀺 𑀢𑀼𑀝𑁆𑀞𑁄’’𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀫𑀸𑀳.

𑁧𑁨𑁨𑁩. 𑀢𑀢𑁆𑀣 𑀢𑀣𑁂𑀯𑀸𑀢𑀺 𑀬𑀣𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀯𑀚𑁂𑀲𑀺, 𑀢𑀣𑁂𑀯 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀯𑀚𑀸𑀳𑀺. 𑀬𑀣𑀸 𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀭𑀢𑀦𑀢𑁆𑀢𑀬𑀁 𑀲𑀭𑀡𑀁 𑀯𑀚𑁂𑀲𑀺, 𑀢𑀣𑁂𑀯 ‘‘𑀅𑀬𑀁 𑀏𑀓𑀁𑀲𑀢𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀳𑀺𑀢𑀲𑀼𑀔𑀸𑀯𑀳𑁄’’𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀺𑀓𑁆𑀔𑀸𑀬 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀧𑀤𑀸𑀦𑀺 𑀓𑁄𑀝𑁆𑀞𑀸𑀲𑀪𑀽𑀢𑀸𑀦𑀺 𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀬 𑀯𑀸 𑀉𑀧𑀸𑀬𑀪𑀽𑀢𑀸𑀦𑀺 𑀧𑀜𑁆𑀘𑀲𑀻𑀮𑀸𑀦𑀺 𑀅𑀯𑀺𑀓𑁄𑀧𑀦𑀢𑁄 𑀘 𑀅𑀲𑀁𑀓𑀺𑀮𑀺𑀲𑁆𑀲𑀦𑀢𑁄 𑀘 𑀅𑀔𑀡𑁆𑀟𑀨𑀼𑀮𑁆𑀮𑀸𑀦𑀺 𑀲𑀫𑀸𑀤𑀺𑀬𑀲𑁆𑀲𑀼, 𑀲𑀫𑀸𑀤𑀸𑀬 𑀯𑀢𑁆𑀢𑀲𑁆𑀲𑀽𑀢𑀺 𑀅𑀢𑁆𑀣𑁄.

𑀏𑀯𑀁 𑀤𑁂𑀯𑀧𑀼𑀢𑁆𑀢𑁂𑀦 𑀲𑀭𑀡𑀕𑀫𑀦𑁂 𑀲𑀻𑀮𑀲𑀫𑀸𑀤𑀸𑀦𑁂 𑀘 𑀦𑀺𑀬𑁄𑀚𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀯𑀘𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑁋

𑁧𑁨𑁨𑁫. ‘‘𑀅𑀢𑁆𑀣𑀓𑀸𑀫𑁄𑀲𑀺 𑀫𑁂 𑀬𑀓𑁆𑀔, 𑀳𑀺𑀢𑀓𑀸𑀫𑁄𑀲𑀺 𑀤𑁂𑀯𑀢𑁂;

𑀓𑀭𑁄𑀫𑀺 𑀢𑀼𑀬𑁆𑀳𑀁 𑀯𑀘𑀦𑀁, 𑀢𑁆𑀯𑀁𑀲𑀺 𑀆𑀘𑀭𑀺𑀬𑁄 𑀫𑀫𑀸’’𑀢𑀺. 𑁋

𑀕𑀸𑀣𑀁 𑀯𑀢𑁆𑀯𑀸 𑀢𑀢𑁆𑀣 𑀧𑀢𑀺𑀝𑁆𑀞𑀳𑀦𑁆𑀢𑁄 𑁋

𑁧𑁨𑁨𑁬. ‘‘𑀉𑀧𑁂𑀫𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀜𑁆𑀘𑀸𑀧𑀺 𑀅𑀦𑀼𑀢𑁆𑀢𑀭𑀁;

𑀲𑀗𑁆𑀖𑀜𑁆𑀘 𑀦𑀭𑀤𑁂𑀯𑀲𑁆𑀲, 𑀕𑀘𑁆𑀙𑀸𑀫𑀺 𑀲𑀭𑀡𑀁 𑀅𑀳𑀁.

𑁧𑁨𑁨𑁭. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀸𑀫𑀺 𑀔𑀺𑀧𑁆𑀧𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀸𑀫𑀺;

𑀅𑀫𑀚𑁆𑀚𑀧𑁄 𑀦𑁄 𑀘 𑀫𑀼𑀲𑀸 𑀪𑀡𑀸𑀫𑀺, 𑀲𑀓𑁂𑀦 𑀤𑀸𑀭𑁂𑀦 𑀘 𑀳𑁄𑀫𑀺 𑀢𑀼𑀝𑁆𑀞𑁄’’𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀫𑁆𑀧𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀢𑀢𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀓𑀢𑀁 𑀫𑀬𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁, 𑀇𑀤𑀸𑀦𑀺 𑀲𑀬𑀫𑁂𑀯 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀔𑁄 𑀪𑀕𑀯𑀢𑀺 𑀲𑀜𑁆𑀚𑀸𑀢𑀧𑀲𑀸𑀤𑀩𑀳𑀼𑀫𑀸𑀦𑁄 𑀤𑁂𑀯𑀢𑀸𑀬 𑀘 𑀘𑁄𑀤𑀺𑀬𑀫𑀸𑀦𑁄 ‘‘𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀣𑀸𑀕𑀢𑀁 𑀅𑀦𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀚𑁆𑀚 𑀧𑀼𑀢𑁆𑀢𑀲𑁄𑀓𑁂𑀦 𑀉𑀧𑀲𑀗𑁆𑀓𑀫𑀢𑀺, 𑀓𑀻𑀤𑀺𑀲𑀻 𑀦𑀼 𑀔𑁄 𑀥𑀫𑁆𑀫𑀤𑁂𑀲𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀅𑀦𑀼𑀩𑀦𑁆𑀥𑀺.

𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀯𑀫𑀸𑀳 ‘‘𑀲𑀓𑁆𑀓𑀸 𑀦𑀼 𑀔𑁄 𑀪𑁄 𑀕𑁄𑀢𑀫 𑀓𑀺𑀜𑁆𑀘𑀺 𑀤𑀸𑀦𑀁 𑀅𑀤𑀢𑁆𑀯𑀸 𑀲𑀻𑀮𑀁 𑀯𑀸 𑀅𑀭𑀓𑁆𑀔𑀺𑀢𑁆𑀯𑀸 𑀓𑁂𑀯𑀮𑀁 𑀢𑀼𑀫𑁆𑀳𑁂𑀲𑀼 𑀧𑀲𑀸𑀤𑀫𑀢𑁆𑀢𑁂𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑀼’’𑀦𑁆𑀢𑀺. ‘‘𑀦𑀦𑀼, 𑀩𑁆𑀭𑀸𑀳𑁆𑀫𑀡, 𑀅𑀚𑁆𑀚 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀫𑀝𑁆𑀞𑀓𑀼𑀡𑁆𑀟𑀮𑀺𑀦𑀸 𑀤𑁂𑀯𑀧𑀼𑀢𑁆𑀢𑁂𑀦 𑀅𑀢𑁆𑀢𑀦𑁄 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀓𑀸𑀭𑀡𑀁 𑀢𑀼𑀬𑁆𑀳𑀁 𑀓𑀣𑀺𑀓’’𑀦𑁆𑀢𑀺 𑀪𑀕𑀯𑀸 𑀅𑀯𑁄𑀘. 𑀢𑀲𑁆𑀫𑀺𑀁 𑀔𑀡𑁂 𑀫𑀝𑁆𑀞𑀓𑀼𑀡𑁆𑀟𑀮𑀻𑀤𑁂𑀯𑀧𑀼𑀢𑁆𑀢𑁄 𑀲𑀳 𑀯𑀺𑀫𑀸𑀦𑁂𑀦 𑀆𑀕𑀦𑁆𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑀭𑀽𑀧𑁄 𑀯𑀺𑀫𑀸𑀦𑀢𑁄 𑀑𑀭𑀼𑀬𑁆𑀳 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀪𑀕𑀯𑀸 𑀢𑀲𑁆𑀲𑀁 𑀧𑀭𑀺𑀲𑀢𑀺 𑀢𑁂𑀦 𑀤𑁂𑀯𑀧𑀼𑀢𑁆𑀢𑁂𑀦 𑀓𑀢𑀲𑀼𑀘𑀭𑀺𑀢𑀁 𑀓𑀣𑁂𑀢𑁆𑀯𑀸 𑀧𑀭𑀺𑀲𑀸𑀬 𑀘𑀺𑀢𑁆𑀢𑀓𑀮𑁆𑀮𑀢𑀁 𑀜𑀢𑁆𑀯𑀸 𑀲𑀸𑀫𑀼𑀓𑁆𑀓𑀁𑀲𑀺𑀓𑀁 𑀥𑀫𑁆𑀫𑀤𑁂𑀲𑀦𑀁 𑀅𑀓𑀸𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀧𑀼𑀢𑁆𑀢𑁄 𑀘 𑀩𑁆𑀭𑀸𑀳𑁆𑀫𑀡𑁄 𑀘 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸 𑀘𑀸𑀢𑀺 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀫𑀝𑁆𑀞𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.