𑁧𑁦. 𑀲𑁂𑀭𑀻𑀲𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀲𑀼𑀡𑁄𑀣 𑀬𑀓𑁆𑀔𑀲𑁆𑀲 𑀘 𑀯𑀸𑀡𑀺𑀚𑀸𑀦 𑀘𑀸𑀢𑀺 𑀲𑁂𑀭𑀻𑀲𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁂𑀢𑀩𑁆𑀬𑀦𑀕𑀭𑀁 𑀲𑀫𑁆𑀧𑀢𑁆𑀢𑁄. 𑀢𑀢𑁆𑀣 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀁 𑀯𑀺𑀧𑀭𑀻𑀢𑀕𑁆𑀕𑀸𑀳𑀢𑁄 𑀯𑀺𑀯𑁂𑀘𑁂𑀢𑁆𑀯𑀸 𑀲𑀫𑁆𑀫𑀸𑀤𑀲𑁆𑀲𑀦𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀜𑁆𑀜𑀧𑀲𑀼𑀢𑁄 𑀳𑀼𑀢𑁆𑀯𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀸𑀦𑀁 𑀤𑁂𑀦𑁆𑀢𑁄 𑀢𑀢𑁆𑀣 𑀅𑀓𑀢𑀧𑀭𑀺𑀘𑀬𑀢𑀸𑀬 𑀅𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑁂 𑀲𑀼𑀜𑁆𑀜𑁂 𑀲𑁂𑀭𑀻𑀲𑀓𑁂 𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺.

𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀩𑀳𑀺𑀕𑀸𑀫𑁂 𑀤𑁂𑀯𑀲𑀺𑀓𑀁 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀪𑀢𑁆𑀢𑀓𑀺𑀘𑁆𑀘𑀁 𑀅𑀓𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀏𑀓𑁄 𑀕𑁄𑀧𑀸𑀮𑀓𑁄 ‘‘𑀅𑀬𑁆𑀬𑁄 𑀲𑀽𑀭𑀺𑀬𑀸𑀢𑀧𑁂𑀦 𑀓𑀺𑀮𑀫𑀢𑀻’’𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀘𑀢𑀽𑀳𑀺 𑀲𑀺𑀭𑀻𑀲𑀣𑀫𑁆𑀪𑁂𑀳𑀺 𑀲𑀸𑀔𑀸𑀫𑀡𑁆𑀟𑀧𑀁 𑀓𑀢𑁆𑀯𑀸 𑀅𑀤𑀸𑀲𑀺, 𑀫𑀡𑁆𑀟𑀧𑀲𑁆𑀲 𑀲𑀫𑀻𑀧𑁂 𑀲𑀺𑀭𑀻𑀲𑀭𑀼𑀓𑁆𑀔𑀁 𑀭𑁄𑀧𑁂𑀲𑀻𑀢𑀺 𑀘 𑀯𑀤𑀦𑁆𑀢𑀺. 𑀲𑁄 𑀓𑀸𑀮𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀧𑀼𑀜𑁆𑀜𑀓𑀫𑁆𑀫𑁂𑀦 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀧𑀼𑀭𑀺𑀫𑀓𑀫𑁆𑀫𑀲𑁆𑀲 𑀲𑀽𑀘𑀓𑀁 𑀯𑀺𑀫𑀸𑀦𑀤𑁆𑀯𑀸𑀭𑁂 𑀲𑀺𑀭𑀻𑀲𑀯𑀦𑀁 𑀦𑀺𑀩𑁆𑀩𑀢𑁆𑀢𑀺 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀩𑁆𑀩𑀓𑀸𑀮𑀁 𑀉𑀧𑀲𑁄𑀪𑀫𑀸𑀦𑀁, 𑀢𑁂𑀦 𑀢𑀁 𑀯𑀺𑀫𑀸𑀦𑀁 ‘‘𑀲𑁂𑀭𑀻𑀲𑀓’’𑀦𑁆𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀘 𑀤𑁂𑀯𑀧𑀼𑀢𑁆𑀢𑁄 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑁂𑀲𑀼 𑀘𑁂𑀯 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀬𑀲𑀢𑁆𑀣𑁂𑀭𑀲𑁆𑀲 𑀘𑀢𑀽𑀲𑀼 𑀯𑀺𑀫𑀮𑀸𑀤𑀻𑀲𑀼 𑀕𑀺𑀳𑀺𑀲𑀳𑀸𑀬𑁂𑀲𑀼 𑀕𑀯𑀫𑁆𑀧𑀢𑀺 𑀦𑀸𑀫 𑀳𑀼𑀢𑁆𑀯𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄 𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦 𑀢𑀁 𑀲𑀼𑀜𑁆𑀜𑀯𑀺𑀫𑀸𑀦𑀁 𑀤𑀺𑀲𑁆𑀯𑀸 𑀅𑀪𑀺𑀡𑁆𑀳𑀁 𑀤𑀺𑀯𑀸𑀯𑀺𑀳𑀸𑀭𑀁 𑀕𑀘𑁆𑀙𑀢𑀺.

𑀲𑁄 𑀅𑀧𑀭𑀪𑀸𑀕𑁂 𑀧𑀸𑀬𑀸𑀲𑀺𑀤𑁂𑀯𑀧𑀼𑀢𑁆𑀢𑀁 𑀢𑀢𑁆𑀣 𑀤𑀺𑀲𑁆𑀯𑀸 ‘‘𑀓𑁄𑀲𑀺 𑀢𑁆𑀯𑀁, 𑀆𑀯𑀼𑀲𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 ‘‘𑀅𑀳𑀁, 𑀪𑀦𑁆𑀢𑁂, 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀇𑀥𑀽𑀧𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 ‘‘𑀦𑀦𑀼 𑀢𑁆𑀯𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑀓𑀣𑀫𑀺𑀥𑀽𑀧𑀧𑀦𑁆𑀦𑁄’’𑀢𑀺 𑀆𑀳. 𑀅𑀣 𑀦𑀁 𑀧𑀸𑀬𑀸𑀲𑀺𑀤𑁂𑀯𑀧𑀼𑀢𑁆𑀢𑁄 ‘‘𑀅𑀬𑁆𑀬𑁂𑀦𑀫𑁆𑀳𑀺 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀫𑀺𑀘𑁆𑀙𑀸𑀤𑀲𑁆𑀲𑀦𑀢𑁄 𑀯𑀺𑀯𑁂𑀘𑀺𑀢𑁄, 𑀧𑀼𑀜𑁆𑀜𑀓𑀺𑀭𑀺𑀬𑀸𑀦𑀁 𑀅𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀬 𑀧𑀦 𑀲𑀼𑀜𑁆𑀜𑁂 𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑁄. 𑀲𑀸𑀥𑀼, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀮𑁄𑀓𑀁 𑀕𑀢𑀓𑀸𑀮𑁂 𑀫𑀫 𑀧𑀭𑀺𑀚𑀦𑀲𑁆𑀲 𑀆𑀭𑁄𑀘𑁂𑀣 ‘𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀅𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀼𑀜𑁆𑀜𑀁 𑀲𑁂𑀭𑀻𑀲𑀓𑀯𑀺𑀫𑀸𑀦𑀁 𑀉𑀧𑀧𑀦𑁆𑀦𑁄, 𑀢𑀼𑀫𑁆𑀳𑁂 𑀧𑀦 𑀲𑀓𑁆𑀓𑀘𑁆𑀘𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀡𑀺𑀤𑀳𑀣𑀸’’𑀢𑀺. 𑀣𑁂𑀭𑁄 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀢𑀣𑀸 𑀅𑀓𑀸𑀲𑀺. 𑀢𑁂𑀧𑀺 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀣𑀸 𑀘𑀺𑀢𑁆𑀢𑀁 𑀧𑀡𑀺𑀥𑀸𑀬 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑁂𑀭𑀻𑀲𑀓𑁂 𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀲𑁂𑀭𑀻𑀲𑀓𑀤𑁂𑀯𑀧𑀼𑀢𑁆𑀢𑀁 𑀧𑀦 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀸 𑀫𑀭𑀼𑀪𑀽𑀫𑀺𑀬𑀁 𑀙𑀸𑀬𑀽𑀤𑀓𑀭𑀳𑀺𑀢𑁂 𑀫𑀕𑁆𑀕𑁂 𑀫𑀕𑁆𑀕𑀧𑀝𑀺𑀧𑀦𑁆𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀫𑀦𑀼𑀲𑁆𑀲𑀧𑀭𑀺𑀧𑀦𑁆𑀣 𑀫𑁄𑀘𑀦𑀢𑁆𑀣𑀁 𑀫𑀕𑁆𑀕𑀭𑀓𑁆𑀔𑀓𑀁 𑀞𑀧𑁂𑀲𑀺.

𑀅𑀣 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀗𑁆𑀕𑀫𑀕𑀥𑀯𑀸𑀲𑀺𑀦𑁄 𑀯𑀸𑀡𑀺𑀚𑀸 𑀲𑀓𑀝𑀲𑀳𑀲𑁆𑀲𑀁 𑀪𑀡𑁆𑀟𑀲𑁆𑀲 𑀧𑀽𑀭𑁂𑀢𑁆𑀯𑀸 𑀲𑀺𑀦𑁆𑀥𑀼𑀲𑁄𑀯𑀻𑀭𑀤𑁂𑀲𑀁 𑀕𑀘𑁆𑀙𑀦𑁆𑀢𑀸 𑀫𑀭𑀼𑀓𑀦𑁆𑀢𑀸𑀭𑁂 𑀤𑀺𑀯𑀸 𑀉𑀡𑁆𑀳𑀪𑀬𑁂𑀦 𑀫𑀕𑁆𑀕𑀁 𑀅𑀧𑁆𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀭𑀢𑁆𑀢𑀺𑀁 𑀦𑀓𑁆𑀔𑀢𑁆𑀢𑀲𑀜𑁆𑀜𑀸𑀬 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀢𑁂 𑀫𑀕𑁆𑀕𑀫𑀽𑀴𑁆𑀳𑀸 𑀳𑀼𑀢𑁆𑀯𑀸 𑀅𑀜𑁆𑀜𑀁 𑀤𑀺𑀲𑀁 𑀅𑀕𑀫𑀁𑀲𑀼. 𑀢𑁂𑀲𑀁 𑀅𑀦𑁆𑀢𑀭𑁂 𑀏𑀓𑁄 𑀉𑀧𑀸𑀲𑀓𑁄 𑀅𑀳𑁄𑀲𑀺 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀝𑁆𑀞𑀸𑀦𑀢𑁆𑀣𑀁 𑀯𑀡𑀺𑀚𑁆𑀚𑀸𑀬 𑀕𑀢𑁄. 𑀢𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀲𑁂𑀭𑀻𑀲𑀓𑀤𑁂𑀯𑀧𑀼𑀢𑁆𑀢𑁄 𑀲𑀳 𑀯𑀺𑀫𑀸𑀦𑁂𑀦 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀤𑀲𑁆𑀲𑁂𑀢𑁆𑀯𑀸 𑀘 𑀧𑀦 ‘‘𑀓𑀲𑁆𑀫𑀸 𑀢𑀼𑀫𑁆𑀳𑁂 𑀇𑀫𑀁 𑀙𑀸𑀬𑀽𑀤𑀓𑀭𑀳𑀺𑀢𑀁 𑀯𑀸𑀮𑀼𑀓𑀸𑀓𑀦𑁆𑀢𑀸𑀭𑀁 𑀧𑀝𑀺𑀧𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 𑀘𑀲𑁆𑀲 𑀢𑀢𑁆𑀣 𑀅𑀢𑁆𑀢𑀦𑁄 𑀆𑀕𑀢𑀧𑁆𑀧𑀓𑀸𑀭𑀁 𑀓𑀣𑁂𑀲𑀼𑀁, 𑀢𑀤𑀢𑁆𑀣𑀤𑀻𑀧𑀦𑀸 𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀸𑀡𑀺𑀚𑀸𑀦𑀜𑁆𑀘 𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸 𑀳𑁄𑀦𑁆𑀢𑀺. 𑀆𑀤𑀺𑀢𑁄 𑀧𑀦 𑀤𑁆𑀯𑁂 𑀕𑀸𑀣𑀸 𑀢𑀸𑀲𑀁 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀢𑁆𑀣𑀁 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀞𑀧𑀺𑀢𑀸 𑁋

𑁧𑁨𑁨𑁮. ‘‘𑀲𑀼𑀡𑁄𑀣 𑀬𑀓𑁆𑀔𑀲𑁆𑀲 𑀘 𑀯𑀸𑀡𑀺𑀚𑀸𑀦 𑀘, 𑀲𑀫𑀸𑀕𑀫𑁄 𑀬𑀢𑁆𑀣 𑀢𑀤𑀸 𑀅𑀳𑁄𑀲𑀺;

𑀬𑀣𑀸 𑀓𑀣𑀁 𑀇𑀢𑀭𑀺𑀢𑀭𑁂𑀦 𑀘𑀸𑀧𑀺, 𑀲𑀼𑀪𑀸𑀲𑀺𑀢𑀁 𑀢𑀜𑁆𑀘 𑀲𑀼𑀡𑀸𑀣 𑀲𑀩𑁆𑀩𑁂.

𑁧𑁨𑁨𑁯. ‘‘𑀬𑁄 𑀲𑁄 𑀅𑀳𑀼 𑀭𑀸𑀚𑀸 𑀧𑀸𑀬𑀸𑀲𑀺 𑀦𑀸𑀫, 𑀪𑀼𑀫𑁆𑀫𑀸𑀦𑀁 𑀲𑀳𑀩𑁆𑀬𑀕𑀢𑁄 𑀬𑀲𑀲𑁆𑀲𑀻;

𑀲𑁄 𑀫𑁄𑀤𑀫𑀸𑀦𑁄𑀯 𑀲𑀓𑁂 𑀯𑀺𑀫𑀸𑀦𑁂, 𑀅𑀫𑀸𑀦𑀼𑀲𑁄 𑀫𑀸𑀦𑀼𑀲𑁂 𑀅𑀚𑁆𑀛𑀪𑀸𑀲𑀻’’𑀢𑀺.

𑁧𑁨𑁨𑁮-𑁯. 𑀢𑀢𑁆𑀣 𑀲𑀼𑀡𑁄𑀣𑀸𑀢𑀺 𑀲𑀯𑀦𑀸𑀡𑀢𑁆𑀢𑀺𑀓𑀯𑀘𑀦𑀁. 𑀬𑀁 𑀫𑀬𑀁 𑀇𑀤𑀸𑀦𑀺 𑀪𑀡𑀸𑀫, 𑀢𑀁 𑀲𑀼𑀡𑁄𑀣𑀸𑀢𑀺. 𑀬𑀓𑁆𑀔𑀲𑁆𑀲𑀸𑀢𑀺 𑀤𑁂𑀯𑀲𑁆𑀲. 𑀤𑁂𑀯𑁄 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀏𑀓𑀘𑁆𑀘𑀸𑀦𑀁 𑀤𑁂𑀯𑀸𑀦𑀜𑁆𑀘 𑀧𑀽𑀚𑀦𑀻𑀬𑀪𑀸𑀯𑀢𑁄 ‘‘𑀬𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀲𑀓𑁆𑀓𑁄𑀧𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄𑀧𑀺 𑀯𑁂𑀲𑁆𑀲𑀯𑀡𑀧𑀸𑀭𑀺𑀲𑀚𑁆𑀚𑀸𑀧𑀺 𑀧𑀼𑀭𑀺𑀲𑁄𑀧𑀺 ‘‘𑀬𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 ‘‘𑀅𑀢𑀺𑀩𑀸𑀴𑁆𑀳𑀁 𑀔𑁄 𑀅𑀬𑀁 𑀬𑀓𑁆𑀔𑁄 𑀧𑀫𑀢𑁆𑀢𑁄 𑀯𑀺𑀳𑀭𑀢𑀺, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀬𑀓𑁆𑀔𑀁 𑀲𑀁𑀯𑁂𑀚𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁯𑁩) 𑀲𑀓𑁆𑀓𑁄 ‘‘𑀬𑀓𑁆𑀔𑁄’’𑀢𑀺 𑀯𑀼𑀢𑁆𑀢𑁄. ‘‘𑀘𑀢𑁆𑀢𑀸𑀭𑁄 𑀬𑀓𑁆𑀔𑀸 𑀔𑀕𑁆𑀕𑀳𑀢𑁆𑀣𑀸’’𑀢𑀺𑀆𑀤𑀻𑀲𑀼 𑀫𑀳𑀸𑀭𑀸𑀚𑀸𑀦𑁄. ‘‘𑀲𑀦𑁆𑀢𑀺 𑀳𑀺, 𑀪𑀦𑁆𑀢𑁂, 𑀉𑀴𑀸𑀭𑀸 𑀬𑀓𑁆𑀔𑀸 𑀪𑀕𑀯𑀢𑁄 𑀅𑀧𑁆𑀧𑀲𑀦𑁆𑀦𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁨𑁭𑁬) 𑀯𑁂𑀲𑁆𑀲𑀯𑀡𑀧𑀸𑀭𑀺𑀲𑀚𑁆𑀚𑀸. ‘‘𑀏𑀢𑁆𑀢𑀸𑀯𑀢𑀸 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁪𑁮𑁨) 𑀧𑀼𑀭𑀺𑀲𑁄. 𑀇𑀥 𑀧𑀦 𑀯𑁂𑀲𑁆𑀲𑀯𑀡𑀧𑀸𑀭𑀺𑀲𑀚𑁆𑀚𑁄 𑀅𑀥𑀺𑀧𑁆𑀧𑁂𑀢𑁄. 𑀯𑀸𑀡𑀺𑀚𑀸𑀦 𑀘𑀸𑀢𑀺 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀫𑀸𑀕𑀫𑁄𑀢𑀺 𑀲𑀫𑁄𑀥𑀸𑀦𑀁. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀯𑀡𑁆𑀡𑀼𑀧𑀣𑁂. 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀫𑀕𑁆𑀕𑀫𑀽𑀴𑁆𑀳𑀸 𑀳𑀼𑀢𑁆𑀯𑀸 𑀕𑀫𑀦𑀓𑀸𑀮𑁂. 𑀇𑀢𑀭𑀺𑀢𑀭𑁂𑀦 𑀘𑀸𑀧𑀻𑀢𑀺 𑀇𑀢𑀭𑀻𑀢𑀭𑀜𑁆𑀘𑀸𑀧𑀺, 𑀇𑀤𑀁 𑀬𑀣𑀸𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀲𑁂𑀭𑀻𑀲𑀓𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀸𑀡𑀺𑀚𑀸𑀦𑀜𑁆𑀘 𑀢𑀤𑀸 𑀬𑀢𑁆𑀣 𑀲𑀫𑀸𑀕𑀫𑁄 𑀅𑀳𑁄𑀲𑀺, 𑀢𑀁 𑀲𑀼𑀡𑁄𑀣, 𑀬𑀣𑀸 𑀯𑀸𑀧𑀺 𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀼𑀪𑀸𑀲𑀺𑀢𑀁 𑀲𑀼𑀮𑀧𑀺𑀢𑀁 𑀓𑀣𑀁 𑀧𑀯𑀢𑁆𑀢𑀺𑀢𑀁, 𑀢𑀜𑁆𑀘 𑀲𑀩𑁆𑀩𑁂 𑀑𑀳𑀺𑀢𑀘𑀺𑀢𑁆𑀢𑀸 𑀲𑀼𑀡𑀸𑀣𑀸𑀢𑀺. 𑀪𑀼𑀫𑁆𑀫𑀸𑀦𑀦𑁆𑀢𑀺 𑀪𑀼𑀫𑁆𑀫𑀤𑁂𑀯𑀸𑀦𑀁.

𑀇𑀤𑀸𑀦𑀺 𑀬𑀓𑁆𑀔𑀲𑁆𑀲 𑀧𑀼𑀘𑁆𑀙𑀸𑀕𑀸𑀣𑀸𑀬𑁄 𑀳𑁄𑀦𑁆𑀢𑀺 𑁋

𑁧𑁨𑁩𑁦. ‘‘𑀯𑀗𑁆𑀓𑁂 𑀅𑀭𑀜𑁆𑀜𑁂 𑀅𑀫𑀦𑀼𑀲𑁆𑀲𑀝𑁆𑀞𑀸𑀦𑁂, 𑀓𑀦𑁆𑀢𑀸𑀭𑁂 𑀅𑀧𑁆𑀧𑁄𑀤𑀓𑁂 𑀅𑀧𑁆𑀧𑀪𑀓𑁆𑀔𑁂;

𑀲𑀼𑀤𑀼𑀕𑁆𑀕𑀫𑁂 𑀯𑀡𑁆𑀡𑀼𑀧𑀣𑀲𑁆𑀲 𑀫𑀚𑁆𑀛𑁂, 𑀯𑀗𑁆𑀓𑀁𑀪𑀬𑀸 𑀦𑀝𑁆𑀞𑀫𑀦𑀸 𑀫𑀦𑀼𑀲𑁆𑀲𑀸.

𑁧𑁨𑁩𑁧. ‘‘𑀦𑀬𑀺𑀥 𑀨𑀮𑀸 𑀫𑀽𑀮𑀫𑀬𑀸 𑀘 𑀲𑀦𑁆𑀢𑀺, 𑀉𑀧𑀸𑀤𑀸𑀦𑀁 𑀦𑀢𑁆𑀣𑀺 𑀓𑀼𑀢𑁄𑀥 𑀪𑀓𑁆𑀔𑁄;

𑀅𑀜𑁆𑀜𑀢𑁆𑀭 𑀧𑀁𑀲𑀽𑀳𑀺 𑀘 𑀯𑀸𑀮𑀼𑀓𑀸𑀳𑀺 𑀘, 𑀢𑀢𑁆𑀢𑀸𑀳𑀺 𑀉𑀡𑁆𑀳𑀸𑀳𑀺 𑀘 𑀤𑀸𑀭𑀼𑀡𑀸𑀳𑀺 𑀘.

𑁧𑁨𑁩𑁨. ‘‘𑀉𑀚𑁆𑀚𑀗𑁆𑀕𑀮𑀁 𑀢𑀢𑁆𑀢𑀫𑀺𑀯𑀁 𑀓𑀧𑀸𑀮𑀁, 𑀅𑀦𑀸𑀬𑀲𑀁 𑀧𑀭𑀮𑁄𑀓𑁂𑀦 𑀢𑀼𑀮𑁆𑀬𑀁;

𑀮𑀼𑀤𑁆𑀤𑀸𑀦𑀫𑀸𑀯𑀸𑀲𑀫𑀺𑀤𑀁 𑀧𑀼𑀭𑀸𑀡𑀁, 𑀪𑀽𑀫𑀺𑀧𑁆𑀧𑀤𑁂𑀲𑁄 𑀅𑀪𑀺𑀲𑀢𑁆𑀢𑀭𑀽𑀧𑁄.

𑁧𑁨𑁩𑁩. ‘‘𑀅𑀣 𑀢𑀼𑀫𑁆𑀳𑁂 𑀓𑁂𑀦 𑀯𑀡𑁆𑀡𑁂𑀦, 𑀓𑀺𑀫𑀸𑀲𑀫𑀸𑀦𑀸 𑀇𑀫𑀁 𑀧𑀤𑁂𑀲𑀜𑁆𑀳𑀺;

𑀅𑀦𑀼𑀧𑀯𑀺𑀝𑁆𑀞𑀸 𑀲𑀳𑀲𑀸 𑀲𑀫𑁂𑀘𑁆𑀘, 𑀮𑁄𑀪𑀸 𑀪𑀬𑀸 𑀅𑀣 𑀯𑀸 𑀲𑀫𑁆𑀧𑀫𑀽𑀴𑁆𑀳𑀸’’𑀢𑀺.

𑁧𑁨𑁩𑁦. 𑀢𑀢𑁆𑀣 𑀯𑀗𑁆𑀓𑁂𑀢𑀺 𑀲𑀁𑀲𑀬𑀝𑁆𑀞𑀸𑀦𑁂. 𑀬𑀢𑁆𑀣 𑀧𑀯𑀺𑀝𑁆𑀞𑀸𑀦𑀁 ‘‘𑀚𑀻𑀯𑀺𑀲𑁆𑀲𑀸𑀫 𑀦𑀼 𑀔𑁄, 𑀫𑀭𑀺𑀲𑁆𑀲𑀸𑀫 𑀦𑀼 𑀔𑁄’’𑀢𑀺 𑀚𑀻𑀯𑀺𑀢𑁂 𑀲𑀁𑀲𑀬𑁄 𑀳𑁄𑀢𑀺, 𑀢𑀸𑀤𑀺𑀲𑁂 𑀅𑀭𑀜𑁆𑀜𑁂. 𑀅𑀫𑀦𑀼𑀲𑁆𑀲𑀝𑁆𑀞𑀸𑀦𑁂𑀢𑀺 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀲𑀸𑀘𑀸𑀤𑀻𑀦𑀁 𑀲𑀜𑁆𑀘𑀭𑀡𑀝𑁆𑀞𑀸𑀦𑁂, 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀕𑁄𑀘𑀭𑀝𑁆𑀞𑀸𑀦𑁂. 𑀓𑀦𑁆𑀢𑀸𑀭𑁂𑀢𑀺 𑀦𑀺𑀭𑀼𑀤𑀓𑁂 𑀇𑀭𑀺𑀡𑁂, 𑀓𑀁 𑀢𑀸𑀭𑁂𑀦𑁆𑀢𑀺 𑀦𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀳𑀺 𑀓𑀦𑁆𑀢𑀸𑀭𑁄, 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀢𑀭𑀺𑀢𑀩𑁆𑀩𑀝𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀅𑀧𑁆𑀧𑁄𑀤𑀓𑁂’’𑀢𑀺. 𑀅𑀧𑁆𑀧-𑀲𑀤𑁆𑀤𑁄 𑀳𑁂𑀢𑁆𑀣 𑀅𑀪𑀸𑀯𑀢𑁆𑀣𑁄 ‘‘𑀅𑀧𑁆𑀧𑀺𑀘𑁆𑀙𑁄 𑀅𑀧𑁆𑀧𑀦𑀺𑀕𑁆𑀖𑁄𑀲𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁨𑁩; 𑀘𑀽𑀴𑀯. 𑁪𑁫𑁬) 𑀯𑀺𑀬. 𑀯𑀡𑁆𑀡𑀼𑀧𑀣𑀲𑁆𑀲 𑀫𑀚𑁆𑀛𑁂𑀢𑀺 𑀯𑀸𑀮𑀼𑀓𑀸𑀓𑀦𑁆𑀢𑀸𑀭𑀫𑀚𑁆𑀛𑁂𑀢𑀺 𑀅𑀢𑁆𑀣𑁄. 𑀯𑀗𑁆𑀓𑀁𑀪𑀬𑀸𑀢𑀺 𑀯𑀗𑁆𑀓𑁂𑀳𑀺 𑀪𑀻𑀢𑀸. 𑀯𑀗𑁆𑀓𑁂𑀳𑀺 𑀪𑀬𑀁 𑀏𑀢𑁂𑀲𑀦𑁆𑀢𑀺 ‘‘𑀯𑀗𑁆𑀓𑀪𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀲𑀼𑀔𑀢𑁆𑀣𑀁 𑀲𑀸𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 ‘‘𑀯𑀗𑁆𑀓𑀁𑀪𑀬𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀜𑁆𑀘 𑀯𑀸𑀮𑀼𑀓𑀸𑀓𑀦𑁆𑀢𑀸𑀭𑀧𑀯𑁂𑀲𑀦𑀢𑁄 𑀧𑀼𑀩𑁆𑀩𑁂 𑀢𑁂𑀲𑀁 𑀉𑀧𑁆𑀧𑀦𑁆𑀦𑀪𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀝𑁆𑀞𑀫𑀦𑀸𑀢𑀺 𑀫𑀕𑁆𑀕𑀲𑀢𑀺𑀯𑀺𑀧𑁆𑀧𑀯𑀸𑀲𑁂𑀦 𑀦𑀝𑁆𑀞𑀫𑀸𑀦𑀲𑀸, 𑀫𑀕𑁆𑀕𑀫𑀽𑀴𑁆𑀳𑀸𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀸𑀢𑀺 𑀢𑁂𑀲𑀁 𑀆𑀮𑀧𑀦𑀁.

𑁧𑁨𑁩𑁧. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀫𑀭𑀼𑀓𑀦𑁆𑀢𑀸𑀭𑁂. 𑀨𑀮𑀸𑀢𑀺 𑀅𑀫𑁆𑀩𑀚𑀫𑁆𑀩𑀼𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀨𑀮𑀸𑀦𑀺 𑀦 𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀫𑀽𑀮𑀫𑀬𑀸 𑀘𑀸𑀢𑀺 𑀫𑀽𑀮𑀸𑀦𑀺𑀬𑁂𑀯 𑀫𑀽𑀮𑀫𑀬𑀸, 𑀯𑀮𑁆𑀮𑀺𑀓𑀦𑁆𑀤𑀸𑀤𑀻𑀦𑀺 𑀲𑀦𑁆𑀥𑀸𑀬 𑀯𑀤𑀢𑀺. 𑀉𑀧𑀸𑀤𑀸𑀦𑀁 𑀦𑀢𑁆𑀣𑀻𑀢𑀺 𑀓𑀺𑀜𑁆𑀘𑀸𑀧𑀺 𑀓𑀺𑀜𑁆𑀘𑀺 𑀪𑀓𑁆𑀔𑀁 𑀦𑀢𑁆𑀣𑀺, 𑀉𑀧𑀸𑀤𑀸𑀦𑀁 𑀯𑀸 𑀇𑀦𑁆𑀥𑀦𑀁, 𑀅𑀕𑁆𑀕𑀺𑀲𑁆𑀲 𑀇𑀦𑁆𑀥𑀦𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀓𑁂𑀦 𑀓𑀸𑀭𑀡𑁂𑀦 𑀇𑀥 𑀫𑀭𑀼𑀓𑀦𑁆𑀢𑀸𑀭𑁂 𑀪𑀓𑁆𑀔𑁄 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀬𑀁 𑀧𑀦 𑀅𑀢𑁆𑀣𑀺 𑀢𑀢𑁆𑀣, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑀢𑁆𑀭 𑀧𑀁𑀲𑀽𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁨𑁩𑁨. 𑀉𑀚𑁆𑀚𑀗𑁆𑀕𑀮𑀦𑁆𑀢𑀺 𑀚𑀗𑁆𑀕𑀮𑀁 𑀯𑀼𑀘𑁆𑀘𑀢𑀺 𑀮𑀽𑀔𑀥𑀽𑀲𑀭𑁄 𑀅𑀦𑀼𑀤𑀓𑁄 𑀪𑀽𑀫𑀺𑀧𑁆𑀧𑀤𑁂𑀲𑁄, 𑀢𑀁 𑀧𑀦 𑀞𑀸𑀦𑀁 𑀚𑀗𑁆𑀕𑀮𑀢𑁄𑀧𑀺 𑀉𑀓𑁆𑀓𑀁𑀲𑁂𑀦 𑀚𑀗𑁆𑀕𑀮𑀦𑁆𑀢𑀺 𑀆𑀳 ‘‘𑀉𑀚𑁆𑀚𑀗𑁆𑀕𑀮’’𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀢𑀫𑀺𑀯𑀁 𑀓𑀧𑀸𑀮’’𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀓𑀧𑀸𑀮𑀲𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀕𑀸𑀣𑀸𑀲𑀼𑀔𑀢𑁆𑀣𑀜𑁆𑀘𑁂𑀢𑁆𑀣 𑀲𑀸𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀢𑁆𑀢𑀫𑀺𑀯𑀇𑀘𑁆𑀘𑁂𑀯 𑀤𑀝𑁆𑀞𑀩𑁆𑀩𑀁. 𑀅𑀦𑀸𑀬𑀲𑀦𑁆𑀢𑀺 𑀦𑀢𑁆𑀣𑀺 𑀏𑀢𑁆𑀣 𑀆𑀬𑁄 𑀲𑀼𑀔𑀦𑁆𑀢𑀺 𑀅𑀦𑀸𑀬𑀁, 𑀢𑀢𑁄 𑀏𑀯 𑀚𑀻𑀯𑀺𑀢𑀁 𑀲𑀻𑀬𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀅𑀦𑀸𑀬𑀲𑀁. 𑀅𑀣 𑀯𑀸 𑀦 𑀆𑀬𑀲𑀦𑁆𑀢𑀺 𑀅𑀦𑀸𑀬𑀲𑀁. 𑀧𑀭𑀮𑁄𑀓𑁂𑀦𑀸𑀢𑀺 𑀦𑀭𑀓𑁂𑀦 𑀢𑀼𑀮𑁆𑀬𑀁. 𑀦𑀭𑀓𑀜𑁆𑀳𑀺 𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀸𑀦𑀢𑁆𑀣𑀢𑀸𑀬 𑀧𑀭𑀪𑀽𑀢𑁄 𑀧𑀝𑀺𑀲𑀢𑁆𑀢𑀼𑀪𑀽𑀢𑁄 𑀮𑁄𑀓𑁄𑀢𑀺 𑀯𑀺𑀲𑁂𑀲𑀢𑁄 ‘‘𑀧𑀭𑀮𑁄𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑀫𑀦𑁆𑀢𑀢𑁄 𑀅𑀬𑁄𑀫𑀬𑀢𑁆𑀢𑀸 𑀆𑀬𑀲𑀜𑁆𑀘, 𑀇𑀤𑀁 𑀧𑀦 𑀢𑀤𑀪𑀸𑀯𑀢𑁄 𑀅𑀦𑀸𑀬𑀲𑀁, 𑀫𑀳𑀢𑁄 𑀤𑀼𑀓𑁆𑀔𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀧𑀭𑀮𑁄𑀓𑀲𑀤𑀺𑀲𑀦𑁆𑀢𑀺 𑀤𑀲𑁆𑀲𑁂𑀢𑀺, ‘‘𑀅𑀦𑀲𑁆𑀲𑀬’’𑀦𑁆𑀢𑀺 𑀘 𑀓𑁂𑀘𑀺 𑀧𑀞𑀦𑁆𑀢𑀺, 𑀲𑀼𑀔𑀲𑁆𑀲 𑀅𑀧𑁆𑀧𑀢𑀺𑀝𑁆𑀞𑀸𑀦𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀮𑀼𑀤𑁆𑀤𑀸𑀦𑀫𑀸𑀯𑀸𑀲𑀫𑀺𑀤𑀁 𑀧𑀼𑀭𑀸𑀡𑀦𑁆𑀢𑀺 𑀇𑀤𑀁 𑀞𑀸𑀦𑀁 𑀘𑀺𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀮𑀼𑀤𑁆𑀤𑀸𑀦𑀁 𑀤𑀸𑀭𑀼𑀡𑀸𑀦𑀁 𑀧𑀺𑀲𑀸𑀘𑀸𑀤𑀻𑀦𑀁 𑀆𑀯𑀸𑀲𑀪𑀽𑀢𑀁. 𑀅𑀪𑀺𑀲𑀢𑁆𑀢𑀭𑀽𑀧𑁄𑀢𑀺 ‘‘𑀏𑀯𑀁 𑀮𑀽𑀔𑁄 𑀖𑁄𑀭𑀸𑀓𑀸𑀭𑁄 𑀳𑁄𑀢𑀽’’𑀢𑀺 𑀧𑁄𑀭𑀸𑀡𑁂𑀳𑀺 𑀇𑀲𑀻𑀳𑀺 𑀲𑀧𑀺𑀢𑀲𑀤𑀺𑀲𑁄, 𑀤𑀺𑀦𑁆𑀦𑀲𑀧𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄.

𑁧𑁨𑁩𑁩. 𑀓𑁂𑀦 𑀯𑀡𑁆𑀡𑁂𑀦𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀓𑀺𑀫𑀸𑀲𑀫𑀸𑀦𑀸𑀢𑀺 𑀓𑀺𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀸. 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. ‘‘𑀧𑀤𑁂𑀲𑀫𑁆𑀧𑀻’’𑀢𑀺 𑀘 𑀧𑀞𑀦𑁆𑀢𑀺, 𑀇𑀫𑀫𑁆𑀧𑀺 𑀦𑀸𑀫 𑀧𑀤𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀲𑀳𑀲𑀸 𑀲𑀫𑁂𑀘𑁆𑀘𑀸𑀢𑀺 𑀲𑀳𑀲𑀸 𑀆𑀤𑀻𑀦𑀯𑀸𑀦𑀺𑀲𑀁𑀲𑁂 𑀅𑀯𑀺𑀘𑀸𑀭𑁂𑀢𑁆𑀯𑀸 𑀲𑀫𑀯𑀸𑀬𑁂𑀦 𑀅𑀦𑀼𑀧𑀯𑀺𑀝𑁆𑀞𑀸 𑀲𑀧𑁆𑀧𑀯𑀺𑀝𑁆𑀞𑀸. 𑀮𑁄𑀪𑀸 𑀪𑀬𑀸 𑀅𑀣 𑀯𑀸 𑀓𑁂𑀦𑀘𑀺 𑀅𑀦𑀢𑁆𑀣𑀓𑀸𑀫𑁂𑀦 𑀧𑀮𑁄𑀪𑀺𑀢𑀸 𑀮𑁄𑀪𑀢𑁄 𑀓𑁂𑀦𑀘𑀺 𑀅𑀫𑀦𑀼𑀲𑁆𑀲𑀸𑀤𑀺𑀦𑀸 𑀧𑀭𑀺𑀧𑀸𑀢𑀺𑀢𑀸 𑀪𑀬𑀸 𑀯𑀸. 𑀅𑀣 𑀯𑀸 𑀲𑀫𑁆𑀧𑀫𑀽𑀴𑁆𑀳𑀸𑀢𑀺 𑀫𑀕𑁆𑀕𑀯𑀺𑀧𑁆𑀧𑀦𑀝𑁆𑀞𑀸 𑀇𑀫𑀁 𑀧𑀤𑁂𑀲𑀁 𑀅𑀦𑀼𑀧𑀯𑀺𑀝𑁆𑀞𑀸𑀢𑀺 𑀬𑁄𑀚𑀦𑀸.

𑀇𑀤𑀸𑀦𑀺 𑀯𑀸𑀡𑀺𑀚𑀸 𑀆𑀳𑀁𑀲𑀼 𑁋

𑁧𑁨𑁩𑁪. ‘‘𑀫𑀕𑀥𑁂𑀲𑀼 𑀅𑀗𑁆𑀕𑁂𑀲𑀼 𑀘 𑀲𑀢𑁆𑀣𑀯𑀸𑀳𑀸, 𑀆𑀭𑁄𑀧𑀬𑀺𑀢𑁆𑀯𑀸 𑀧𑀡𑀺𑀬𑀁 𑀧𑀼𑀣𑀼𑀢𑁆𑀢𑀁;

𑀢𑁂 𑀬𑀸𑀫𑀲𑁂 𑀲𑀺𑀦𑁆𑀥𑀼𑀲𑁄𑀯𑀻𑀭𑀪𑀽𑀫𑀺𑀁, 𑀥𑀦𑀢𑁆𑀣𑀺𑀓𑀸 𑀉𑀤𑁆𑀤𑀬𑀁 𑀧𑀢𑁆𑀣𑀬𑀸𑀦𑀸.

𑁧𑁨𑁩𑁫. ‘‘𑀤𑀺𑀯𑀸 𑀧𑀺𑀧𑀸𑀲𑀁𑀦𑀥𑀺𑀯𑀸𑀲𑀬𑀦𑁆𑀢𑀸, 𑀬𑁄𑀕𑁆𑀕𑀸𑀦𑀼𑀓𑀫𑁆𑀧𑀜𑁆𑀘 𑀲𑀫𑁂𑀓𑁆𑀔𑀫𑀸𑀦𑀸;

𑀏𑀢𑁂𑀦 𑀯𑁂𑀕𑁂𑀦 𑀆𑀬𑀸𑀫 𑀲𑀩𑁆𑀩𑁂, 𑀭𑀢𑁆𑀢𑀺𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸 𑀯𑀺𑀓𑀸𑀮𑁂.

𑁧𑁨𑁩𑁬. ‘‘𑀢𑁂 𑀤𑀼𑀧𑁆𑀧𑀬𑀸𑀢𑀸 𑀅𑀧𑀭𑀤𑁆𑀥𑀫𑀕𑁆𑀕𑀸, 𑀅𑀦𑁆𑀥𑀸𑀓𑀼𑀮𑀸 𑀯𑀺𑀧𑁆𑀧𑀦𑀝𑁆𑀞𑀸 𑀅𑀭𑀜𑁆𑀜𑁂;

𑀲𑀼𑀤𑀼𑀕𑁆𑀕𑀫𑁂 𑀯𑀡𑁆𑀡𑀼𑀧𑀣𑀲𑁆𑀲 𑀫𑀚𑁆𑀛𑁂, 𑀤𑀺𑀲𑀁 𑀦 𑀚𑀸𑀦𑀸𑀫 𑀧𑀫𑀽𑀴𑁆𑀳𑀘𑀺𑀢𑁆𑀢𑀸.

𑁧𑁨𑁩𑁭. ‘‘𑀇𑀤𑀜𑁆𑀘 𑀤𑀺𑀲𑁆𑀯𑀸𑀦 𑀅𑀤𑀺𑀝𑁆𑀞𑀧𑀼𑀩𑁆𑀩𑀁, 𑀯𑀺𑀫𑀸𑀦𑀲𑁂𑀝𑁆𑀞𑀜𑁆𑀘 𑀢𑀯𑀜𑁆𑀘 𑀬𑀓𑁆𑀔;

𑀢𑀢𑀼𑀢𑁆𑀢𑀭𑀺𑀁 𑀚𑀻𑀯𑀺𑀢𑀫𑀸𑀲𑀫𑀸𑀦𑀸, 𑀤𑀺𑀲𑁆𑀯𑀸 𑀧𑀢𑀻𑀢𑀸 𑀲𑀼𑀫𑀦𑀸 𑀉𑀤𑀕𑁆𑀕𑀸’’𑀢𑀺.

𑁧𑁨𑁩𑁪. 𑀢𑀢𑁆𑀣 𑀫𑀕𑀥𑁂𑀲𑀼 𑀅𑀗𑁆𑀕𑁂𑀲𑀼 𑀘 𑀲𑀢𑁆𑀣𑀯𑀸𑀳𑀸𑀢𑀺 𑀫𑀕𑀥𑀭𑀝𑁆𑀞𑁂 𑀘 𑀅𑀗𑁆𑀕𑀭𑀝𑁆𑀞𑁂 𑀘 𑀚𑀸𑀢𑀸 𑀲𑀁𑀯𑀟𑁆𑀠𑀸 𑀢𑀁𑀦𑀺𑀯𑀸𑀲𑀺𑀦𑁄 𑀲𑀢𑁆𑀣𑁂 𑀲𑀢𑁆𑀣𑀲𑁆𑀲 𑀘 𑀯𑀸𑀳𑀦𑀓𑀸 𑀲𑀢𑁆𑀣𑀓𑀸 𑀘𑁂𑀯 𑀲𑀢𑁆𑀣𑀲𑀸𑀫𑀺𑀓𑀸 𑀘. 𑀧𑀡𑀺𑀬𑀦𑁆𑀢𑀺 𑀪𑀡𑁆𑀟𑀁. 𑀢𑁂𑀢𑀺 𑀢𑁂 𑀫𑀬𑀁. 𑀬𑀸𑀫𑀲𑁂𑀢𑀺 𑀕𑀘𑁆𑀙𑀸𑀫. 𑀲𑀺𑀦𑁆𑀥𑀼𑀲𑁄𑀯𑀻𑀭𑀪𑀽𑀫𑀺𑀦𑁆𑀢𑀺 𑀲𑀺𑀦𑁆𑀥𑀼𑀤𑁂𑀲𑀁 𑀲𑁄𑀯𑀻𑀭𑀤𑁂𑀲𑀜𑁆𑀘. 𑀉𑀤𑁆𑀤𑀬𑀦𑁆𑀢𑀺 𑀆𑀦𑀺𑀲𑀁𑀲𑀁 𑀅𑀢𑀺𑀭𑁂𑀓𑀮𑀸𑀪𑀁.

𑁧𑁨𑁩𑁫. 𑀅𑀦𑀥𑀺𑀯𑀸𑀲𑀬𑀦𑁆𑀢𑀸𑀢𑀺 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸. 𑀬𑁄𑀕𑁆𑀕𑀸𑀦𑀼𑀓𑀫𑁆𑀧𑀦𑁆𑀢𑀺 𑀕𑁄𑀡𑀸𑀤𑀻𑀦𑀁 𑀲𑀢𑁆𑀢𑀸𑀦𑀁 𑀅𑀦𑀼𑀕𑁆𑀕𑀳𑀁. 𑀏𑀢𑁂𑀦 𑀯𑁂𑀕𑁂𑀦𑀸𑀢𑀺 𑀇𑀫𑀺𑀦𑀸 𑀚𑀯𑁂𑀦, 𑀬𑁂𑀦 𑀢𑀯 𑀤𑀲𑁆𑀲𑀦𑀢𑁄 𑀧𑀼𑀩𑁆𑀩𑁂 𑀆𑀬𑀸𑀫 𑀆𑀕𑀢𑀫𑁆𑀳. 𑀭𑀢𑁆𑀢𑀺𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸𑀢𑀺 𑀭𑀢𑁆𑀢𑀺𑀬𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸. 𑀯𑀺𑀓𑀸𑀮𑁂𑀢𑀺 𑀅𑀓𑀸𑀮𑁂 𑀅𑀯𑁂𑀮𑀸𑀬𑀁.

𑁧𑁨𑁩𑁬. 𑀤𑀼𑀧𑁆𑀧𑀬𑀸𑀢𑀸𑀢𑀺 𑀤𑀼𑀝𑁆𑀞𑀼 𑀧𑀬𑀸𑀢𑀸 𑀅𑀧𑀣𑁂 𑀕𑀢𑀸, 𑀢𑀢𑁄 𑀏𑀯 𑀅𑀧𑀭𑀤𑁆𑀥𑀫𑀕𑁆𑀕𑀸. 𑀅𑀦𑁆𑀥𑀸𑀓𑀼𑀮𑀸𑀢𑀺 𑀅𑀦𑁆𑀥𑀸 𑀯𑀺𑀬 𑀆𑀓𑀼𑀮𑀸, 𑀫𑀕𑁆𑀕𑀚𑀸𑀦𑀦𑀲𑀫𑀢𑁆𑀣𑀲𑁆𑀲 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀅𑀪𑀸𑀯𑁂𑀦 𑀅𑀦𑁆𑀥𑀸, 𑀢𑀢𑁄 𑀏𑀯 𑀆𑀓𑀼𑀮𑀸, 𑀯𑀺𑀧𑁆𑀧𑀦𑀝𑁆𑀞𑀸 𑀘 𑀫𑀕𑁆𑀕𑀲𑀫𑁆𑀫𑀽𑀴𑁆𑀳𑀢𑀸𑀬. 𑀤𑀺𑀲𑀦𑁆𑀢𑀺 𑀕𑀦𑁆𑀢𑀩𑁆𑀩𑀤𑀺𑀲𑀁, 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀲𑀺𑀦𑁆𑀥𑀼𑀲𑁄𑀯𑀻𑀭𑀤𑁂𑀲𑁄, 𑀢𑀁 𑀤𑀺𑀲𑀁. 𑀧𑀫𑀽𑀴𑁆𑀳𑀘𑀺𑀢𑁆𑀢𑀸𑀢𑀺 𑀤𑀺𑀲𑀸𑀲𑀁𑀲𑀬𑀲𑀼𑀫𑀽𑀴𑁆𑀳𑀘𑀺𑀢𑁆𑀢𑀸.

𑁧𑁨𑁩𑁭. 𑀢𑀯𑀜𑁆𑀘𑀸𑀢𑀺 𑀢𑀼𑀯𑀜𑁆𑀘. 𑀬𑀓𑁆𑀔𑀸𑀢𑀺 𑀆𑀮𑀧𑀦𑀁. 𑀢𑀢𑀼𑀢𑁆𑀢𑀭𑀺𑀁 𑀚𑀻𑀯𑀺𑀢𑀫𑀸𑀲𑀫𑀸𑀦𑀸𑀢𑀺 𑀬𑁄 ‘‘𑀇𑀢𑁄 𑀧𑀭𑀁 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀁 𑀦𑀢𑁆𑀣𑀻’’𑀢𑀺 𑀚𑀻𑀯𑀺𑀢𑀲𑀁𑀲𑀬𑁄 𑀉𑀧𑁆𑀧𑀦𑁆𑀦𑁄, 𑀇𑀤𑀸𑀦𑀺 𑀢𑀢𑁄 𑀉𑀢𑁆𑀢𑀭𑀺𑀫𑁆𑀧𑀺 𑀚𑀻𑀯𑀺𑀢𑀁 𑀆𑀲𑀻𑀲𑀦𑁆𑀢𑀸. 𑀤𑀺𑀲𑁆𑀯𑀸𑀢𑀺 𑀤𑀲𑁆𑀲𑀦𑀳𑁂𑀢𑀼. 𑀧𑀢𑀻𑀢𑀸𑀢𑀺 𑀧𑀳𑀝𑁆𑀞𑀸. 𑀲𑀼𑀫𑀦𑀸𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸. 𑀉𑀤𑀕𑁆𑀕𑀸𑀢𑀺 𑀉𑀤𑀕𑁆𑀕𑀸𑀬 𑀧𑀻𑀢𑀺𑀬𑀸 𑀉𑀤𑀕𑁆𑀕𑀘𑀺𑀢𑁆𑀢𑀸.

𑀏𑀯𑀁 𑀯𑀸𑀡𑀺𑀚𑁂𑀳𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀬𑀸 𑀧𑀓𑀸𑀲𑀺𑀢𑀸𑀬 𑀧𑀼𑀦 𑀤𑁂𑀯𑀧𑀼𑀢𑁆𑀢𑁄 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺 𑁋

𑁧𑁨𑁩𑁮. ‘‘𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀇𑀫𑀜𑁆𑀘 𑀯𑀡𑁆𑀡𑀼𑀁, 𑀯𑁂𑀢𑁆𑀢𑀸𑀘𑀭𑀁 𑀲𑀗𑁆𑀓𑀼𑀧𑀣𑀜𑁆𑀘 𑀫𑀕𑁆𑀕𑀁;

𑀦𑀤𑀺𑀬𑁄 𑀧𑀦 𑀧𑀩𑁆𑀩𑀢𑀸𑀦𑀜𑁆𑀘 𑀤𑀼𑀕𑁆𑀕𑀸, 𑀧𑀼𑀣𑀼𑀤𑁆𑀤𑀺𑀲𑀸 𑀕𑀘𑁆𑀙𑀣 𑀪𑁄𑀕𑀳𑁂𑀢𑀼.

𑁧𑁨𑁩𑁯. ‘‘𑀧𑀓𑁆𑀔𑀦𑁆𑀤𑀺𑀬𑀸𑀦 𑀯𑀺𑀚𑀺𑀢𑀁 𑀧𑀭𑁂𑀲𑀁, 𑀯𑁂𑀭𑀚𑁆𑀚𑀓𑁂 𑀫𑀸𑀦𑀼𑀲𑁂 𑀧𑁂𑀓𑁆𑀔𑀫𑀸𑀦𑀸;

𑀬𑀁 𑀯𑁄 𑀲𑀼𑀢𑀁 𑀯𑀸 𑀅𑀣 𑀯𑀸𑀧𑀺 𑀤𑀺𑀝𑁆𑀞𑀁, 𑀅𑀘𑁆𑀙𑁂𑀭𑀓𑀁 𑀢𑀁 𑀯𑁄 𑀲𑀼𑀡𑁄𑀫 𑀢𑀸𑀢𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲𑀸𑀢𑀺 𑀲𑀫𑀼𑀤𑁆𑀤𑀲𑁆𑀲 𑀧𑀭𑀢𑀻𑀭𑀁, 𑀇𑀫𑀜𑁆𑀘 𑀈𑀤𑀺𑀲𑀁, 𑀯𑀡𑁆𑀡𑀼𑀁 𑀯𑀡𑁆𑀡𑀼𑀧𑀣𑀁 𑀯𑁂𑀢𑁆𑀢𑀮𑀢𑀸 𑀩𑀦𑁆𑀥𑀺𑀢𑁆𑀯𑀸 𑀆𑀘𑀭𑀺𑀢𑀩𑁆𑀩𑀢𑁄 𑀯𑁂𑀢𑁆𑀢𑀸𑀘𑀭𑀁 𑀫𑀕𑁆𑀕𑀁, 𑀲𑀗𑁆𑀓𑀼𑀓𑁂 𑀔𑀸𑀡𑀼𑀓𑁂 𑀓𑁄𑀝𑁆𑀝𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀢𑁄 𑀲𑀗𑁆𑀓𑀼𑀧𑀣𑀁 𑀫𑀕𑁆𑀕𑀁, 𑀦𑀤𑀺𑀬𑁄 𑀧𑀦 𑀘𑀦𑁆𑀤𑀪𑀸𑀕𑀸𑀤𑀺𑀓𑀸, 𑀧𑀩𑁆𑀩𑀢𑀸𑀦𑀜𑁆𑀘 𑀯𑀺𑀲𑀫𑀧𑁆𑀧𑀤𑁂𑀲𑀸𑀢𑀺 𑀏𑀯𑀁 𑀤𑀼𑀕𑁆𑀕𑀸 𑀧𑀼𑀣𑀼𑀤𑁆𑀤𑀺𑀲𑀸 𑀪𑁄𑀕𑀦𑀺𑀫𑀺𑀢𑁆𑀢𑀁 𑀕𑀘𑁆𑀙𑀣, 𑀏𑀯𑀁 𑀕𑀘𑁆𑀙𑀦𑁆𑀢𑀸 𑀘 𑀧𑀓𑁆𑀔𑀦𑁆𑀤𑀺𑀬𑀸𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸, 𑀧𑀭𑁂𑀲𑀁 𑀭𑀸𑀚𑀽𑀦𑀁 𑀯𑀺𑀚𑀺𑀢𑀁 𑀢𑀢𑁆𑀣 𑀯𑁂𑀭𑀚𑁆𑀚𑀓𑁂 𑀯𑀺𑀤𑁂𑀲𑀯𑀸𑀲𑀺𑀓𑁂 𑀫𑀦𑀼𑀲𑁆𑀲𑁂 𑀧𑁂𑀓𑁆𑀔𑀫𑀸𑀦𑀸 𑀕𑀘𑁆𑀙𑀣, 𑀏𑀯𑀁𑀪𑀽𑀢𑁂𑀳𑀺 𑀯𑁄 𑀢𑀼𑀫𑁆𑀳𑁂𑀳𑀺 𑀬𑀁 𑀲𑀼𑀢𑀁 𑀯𑀸 𑀅𑀣 𑀯𑀸 𑀤𑀺𑀝𑁆𑀞𑀁 𑀯𑀸 𑀅𑀘𑁆𑀙𑁂𑀭𑀓𑀁 𑀅𑀘𑁆𑀙𑀭𑀺𑀬𑀁, 𑀢𑀁 𑀯𑁄 𑀲𑀦𑁆𑀢𑀺𑀓𑁂 𑀢𑀸𑀢𑀸 𑀯𑀸𑀡𑀺𑀚𑀸 𑀲𑀼𑀡𑁄𑀫𑀸𑀢𑀺 𑀅𑀢𑁆𑀢𑀦𑁄 𑀯𑀺𑀫𑀸𑀦𑀲𑁆𑀲 𑀅𑀘𑁆𑀙𑀭𑀺𑀬𑀪𑀸𑀯𑀁 𑀢𑁂𑀳𑀺 𑀓𑀣𑀸𑀧𑁂𑀢𑀼𑀓𑀸𑀫𑁄 𑀧𑀼𑀘𑁆𑀙𑀢𑀺.

𑀏𑀯𑀁 𑀤𑁂𑀯𑀧𑀼𑀢𑁆𑀢𑁂𑀦 𑀧𑀼𑀝𑁆𑀞𑀸 𑀯𑀸𑀡𑀺𑀚𑀸 𑀆𑀳𑀁𑀲𑀼 𑁋

𑁧𑁨𑁪𑁦. ‘‘𑀇𑀢𑁄𑀧𑀺 𑀅𑀘𑁆𑀙𑁂𑀭𑀢𑀭𑀁 𑀓𑀼𑀫𑀸𑀭, 𑀦 𑀦𑁄 𑀲𑀼𑀢𑀁 𑀯𑀸 𑀅𑀣 𑀯𑀸𑀧𑀺 𑀤𑀺𑀝𑁆𑀞𑀁;

𑀅𑀢𑀻𑀢𑀫𑀸𑀦𑀼𑀲𑀓𑀫𑁂𑀯 𑀲𑀩𑁆𑀩𑀁, 𑀤𑀺𑀲𑁆𑀯𑀸 𑀦 𑀢𑀧𑁆𑀧𑀸𑀫 𑀅𑀦𑁄𑀫𑀯𑀡𑁆𑀡𑀁.

𑁧𑁨𑁪𑁧. ‘‘𑀯𑁂𑀳𑀸𑀬𑀲𑀁 𑀧𑁄𑀓𑁆𑀔𑀭𑀜𑁆𑀜𑁄 𑀲𑀯𑀦𑁆𑀢𑀺, 𑀧𑀳𑀽𑀢𑀫𑀮𑁆𑀬𑀸 𑀩𑀳𑀼𑀧𑀼𑀡𑁆𑀟𑀭𑀻𑀓𑀸;

𑀤𑀼𑀫𑀸 𑀘𑀺𑀫𑁂 𑀦𑀺𑀘𑁆𑀘𑀨𑀮𑀽𑀧𑀧𑀦𑁆𑀦𑀸, 𑀅𑀢𑀻𑀯 𑀕𑀦𑁆𑀥𑀸 𑀲𑀼𑀭𑀪𑀺𑀁 𑀧𑀯𑀸𑀬𑀦𑁆𑀢𑀺.

𑁧𑁨𑁪𑁨. ‘‘𑀯𑁂𑀴𑀽𑀭𑀺𑀬𑀣𑀫𑁆𑀪𑀸 𑀲𑀢𑀫𑀼𑀲𑁆𑀲𑀺𑀢𑀸𑀲𑁂, 𑀲𑀺𑀮𑀸𑀧𑀯𑀸𑀴𑀲𑁆𑀲 𑀘 𑀆𑀬𑀢𑀁𑀲𑀸;

𑀫𑀲𑀸𑀭𑀕𑀮𑁆𑀮𑀸 𑀲𑀳𑀮𑁄𑀳𑀺𑀢𑀗𑁆𑀕𑀸, 𑀣𑀫𑁆𑀪𑀸 𑀇𑀫𑁂 𑀚𑁄𑀢𑀺𑀭𑀲𑀸𑀫𑀬𑀸𑀲𑁂.

𑁧𑁨𑁪𑁩. ‘‘𑀲𑀳𑀲𑁆𑀲𑀣𑀫𑁆𑀪𑀁 𑀅𑀢𑀼𑀮𑀸𑀦𑀼𑀪𑀸𑀯𑀁, 𑀢𑁂𑀲𑀽𑀧𑀭𑀺 𑀲𑀸𑀥𑀼𑀫𑀺𑀤𑀁 𑀯𑀺𑀫𑀸𑀦𑀁;

𑀭𑀢𑀦𑀦𑁆𑀢𑀭𑀁 𑀓𑀜𑁆𑀘𑀦𑀯𑁂𑀤𑀺𑀫𑀺𑀲𑁆𑀲𑀁, 𑀢𑀧𑀦𑀻𑀬𑀧𑀝𑁆𑀝𑁂𑀳𑀺 𑀘 𑀲𑀸𑀥𑀼𑀙𑀦𑁆𑀦𑀁.

𑁧𑁨𑁪𑁪. ‘‘𑀚𑀫𑁆𑀩𑁄𑀦𑀤𑀼𑀢𑁆𑀢𑀢𑁆𑀢𑀫𑀺𑀤𑀁 𑀲𑀼𑀫𑀝𑁆𑀞𑁄, 𑀧𑀸𑀲𑀸𑀤𑀲𑁄𑀧𑀸𑀦𑀨𑀮𑀽𑀧𑀧𑀦𑁆𑀦𑁄;

𑀤𑀴𑁆𑀳𑁄 𑀘 𑀯𑀕𑁆𑀕𑀼 𑀘 𑀲𑀼𑀲𑀗𑁆𑀕𑀢𑁄 𑀘, 𑀅𑀢𑀻𑀯 𑀦𑀺𑀚𑁆𑀛𑀸𑀦𑀔𑀫𑁄 𑀫𑀦𑀼𑀜𑁆𑀜𑁄.

𑁧𑁨𑁪𑁫. ‘‘𑀭𑀢𑀦𑀦𑁆𑀢𑀭𑀲𑁆𑀫𑀺𑀁 𑀩𑀳𑀼𑀅𑀦𑁆𑀦𑀧𑀸𑀦𑀁, 𑀧𑀭𑀺𑀯𑀸𑀭𑀺𑀢𑁄 𑀅𑀘𑁆𑀙𑀭𑀸𑀲𑀗𑁆𑀕𑀡𑁂𑀦;

𑀫𑀼𑀭𑀚𑀆𑀮𑀫𑁆𑀩𑀭𑀢𑀽𑀭𑀺𑀬𑀖𑀼𑀝𑁆𑀞𑁄, 𑀅𑀪𑀺𑀯𑀦𑁆𑀤𑀺𑀢𑁄𑀲𑀺 𑀣𑀼𑀢𑀺𑀯𑀦𑁆𑀤𑀦𑀸𑀬.

𑁧𑁨𑁪𑁬. ‘‘𑀲𑁄 𑀫𑁄𑀤𑀲𑀺 𑀦𑀸𑀭𑀺𑀕𑀡𑀧𑁆𑀧𑀩𑁄𑀥𑀦𑁄, 𑀯𑀺𑀫𑀸𑀦𑀧𑀸𑀲𑀸𑀤𑀯𑀭𑁂 𑀫𑀦𑁄𑀭𑀫𑁂;

𑀅𑀘𑀺𑀦𑁆𑀢𑀺𑀬𑁄 𑀲𑀩𑁆𑀩𑀕𑀼𑀡𑀽𑀧𑀧𑀦𑁆𑀦𑁄, 𑀭𑀸𑀚𑀸 𑀬𑀣𑀸 𑀯𑁂𑀲𑁆𑀲𑀯𑀡𑁄 𑀦𑀴𑀺𑀦𑁆𑀬𑀸.

𑁧𑁨𑁪𑁭. ‘‘𑀤𑁂𑀯𑁄 𑀦𑀼 𑀆𑀲𑀺 𑀉𑀤𑀯𑀸𑀲𑀺 𑀬𑀓𑁆𑀔𑁄,

𑀉𑀤𑀸𑀳𑀼 𑀤𑁂𑀯𑀺𑀦𑁆𑀤𑁄 𑀫𑀦𑀼𑀲𑁆𑀲𑀪𑀽𑀢𑁄;

𑀧𑀼𑀘𑁆𑀙𑀦𑁆𑀢𑀺 𑀢𑀁 𑀯𑀸𑀡𑀺𑀚𑀸 𑀲𑀢𑁆𑀣𑀯𑀸𑀳𑀸,

𑀆𑀘𑀺𑀓𑁆𑀔 𑀓𑁄 𑀦𑀸𑀫 𑀢𑀼𑀯𑀁𑀲𑀺 𑀬𑀓𑁆𑀔𑁄’’𑀢𑀺.

𑁧𑁨𑁪𑁦-𑁨. 𑀢𑀢𑁆𑀣 𑀓𑀼𑀫𑀸𑀭𑀸𑀢𑀺 𑀧𑀞𑀫𑀯𑀬𑁂 𑀞𑀺𑀢𑀢𑁆𑀢𑀸 𑀤𑁂𑀯𑀧𑀼𑀢𑁆𑀢𑀁 𑀆𑀮𑀧𑀢𑀺. 𑀲𑀩𑁆𑀩𑀦𑁆𑀢𑀺 𑀤𑁂𑀯𑀧𑀼𑀢𑁆𑀢𑀁 𑀢𑀲𑁆𑀲 𑀯𑀺𑀫𑀸𑀦𑀧𑀝𑀺𑀩𑀤𑁆𑀥𑀜𑁆𑀘 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑁄𑀓𑁆𑀔𑀭𑀜𑁆𑀜𑁄𑀢𑀺 𑀧𑁄𑀓𑁆𑀔𑀭𑀡𑀺𑀬𑁄. 𑀲𑀢𑀫𑀼𑀲𑁆𑀲𑀺𑀢𑀸𑀲𑁂𑀢𑀺 𑀲𑀢𑀭𑀢𑀦𑀼𑀩𑁆𑀩𑁂𑀥𑀸. 𑀲𑀺𑀮𑀸𑀧𑀯𑀸𑀴𑀲𑁆𑀲𑀸𑀢𑀺 𑀲𑀺𑀮𑀸𑀬 𑀧𑀯𑀸𑀴𑀲𑁆𑀲 𑀘, 𑀲𑀺𑀮𑀸𑀫𑀬𑀸 𑀧𑀯𑀸𑀴𑀫𑀬𑀸𑀢𑀺 𑀅𑀢𑁆𑀣𑁄. 𑀆𑀬𑀢𑀁𑀲𑀸𑀢𑀺 𑀤𑀻𑀖𑀁𑀲𑀸. 𑀅𑀣 𑀯𑀸 𑀆𑀬𑀢𑀸 𑀳𑀼𑀢𑁆𑀯𑀸 𑀅𑀝𑁆𑀞𑀲𑁄𑀴𑀲𑀤𑁆𑀯𑀢𑁆𑀢𑀺𑀁𑀲𑀸𑀤𑀺𑀅𑀁𑀲𑀯𑀦𑁆𑀢𑁄.

𑁧𑁨𑁪𑁨. 𑀢𑁂𑀲𑀽𑀧𑀭𑀻𑀢𑀺 𑀢𑁂𑀲𑀁 𑀣𑀫𑁆𑀪𑀸𑀦𑀁 𑀉𑀧𑀭𑀺. 𑀲𑀸𑀥𑀼𑀫𑀺𑀤𑀦𑁆𑀢𑀺 𑀲𑀼𑀦𑁆𑀤𑀭𑀁 𑀇𑀤𑀁 𑀢𑀯 𑀯𑀺𑀫𑀸𑀦𑀁. 𑀭𑀢𑀦𑀦𑁆𑀢𑀭𑀦𑁆𑀢𑀺 𑀭𑀢𑀦𑀦𑁆𑀢𑀭𑀯𑀦𑁆𑀢𑀁, 𑀪𑀺𑀢𑁆𑀢𑀺𑀣𑀫𑁆𑀪𑀲𑁄𑀧𑀸𑀦𑀸𑀤𑀻𑀲𑀼 𑀦𑀸𑀦𑀸𑀯𑀺𑀥𑁂𑀳𑀺 𑀅𑀜𑁆𑀜𑁂𑀳𑀺 𑀭𑀢𑀦𑁂𑀳𑀺 𑀬𑀼𑀢𑁆𑀢𑀁. 𑀓𑀜𑁆𑀘𑀦𑀯𑁂𑀤𑀺𑀫𑀺𑀲𑁆𑀲𑀦𑁆𑀢𑀺 𑀲𑀼𑀯𑀡𑁆𑀡𑀫𑀬𑀸𑀬 𑀯𑁂𑀤𑀺𑀓𑀸𑀬 𑀲𑀳𑀺𑀢𑀁 𑀧𑀭𑀺𑀓𑁆𑀔𑀺𑀢𑁆𑀢𑀁. 𑀢𑀧𑀦𑀻𑀬𑀧𑀝𑁆𑀝𑁂𑀳𑀺 𑀘 𑀲𑀸𑀥𑀼𑀙𑀦𑁆𑀦𑀦𑁆𑀢𑀺 𑀢𑀧𑀦𑀻𑀬𑀫𑀬𑁂𑀳𑀺 𑀅𑀦𑁂𑀓𑀭𑀢𑀦𑀫𑀬𑁂𑀳𑀺 𑀘 𑀙𑀤𑀦𑁂𑀳𑀺 𑀢𑀢𑁆𑀣 𑀢𑀢𑁆𑀣 𑀲𑀼𑀝𑁆𑀞𑀼 𑀙𑀸𑀤𑀺𑀢𑀁.

𑁧𑁨𑁪𑁪. 𑀚𑀫𑁆𑀩𑁄𑀦𑀤𑀼𑀢𑁆𑀢𑀢𑁆𑀢𑀫𑀺𑀤𑀦𑁆𑀢𑀺 𑀇𑀤𑀁 𑀢𑀯 𑀯𑀺𑀫𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀉𑀢𑁆𑀢𑀢𑁆𑀢𑀚𑀫𑁆𑀩𑀼𑀦𑀤𑀪𑀸𑀲𑀼𑀭𑀁. 𑀲𑀼𑀫𑀝𑁆𑀞𑁄 𑀧𑀸𑀲𑀸𑀤𑀲𑁄𑀧𑀸𑀦𑀨𑀮𑀽𑀧𑀧𑀦𑁆𑀦𑁄𑀢𑀺 𑀢𑀲𑁆𑀲 𑀘 𑀲𑁄 𑀲𑁄 𑀧𑀤𑁂𑀲𑁄 𑀲𑀼𑀫𑀝𑁆𑀞𑁄 𑀲𑀼𑀝𑁆𑀞𑀼 𑀫𑀚𑁆𑀚𑀺𑀢𑁄, 𑀢𑁂𑀳𑀺 𑀢𑁂𑀳𑀺 𑀅𑀦𑀦𑁆𑀢𑀭𑀧𑀸𑀲𑀸𑀤𑁂𑀳𑀺 𑀲𑁄𑀧𑀸𑀦𑀯𑀺𑀲𑁂𑀲𑁂𑀳𑀺 𑀭𑀫𑀡𑀻𑀬𑁂𑀳𑀺 𑀨𑀮𑀓𑁂𑀳𑀺 𑀘 𑀬𑀼𑀢𑁆𑀢𑁄. 𑀤𑀴𑁆𑀳𑁄𑀢𑀺 𑀣𑀺𑀭𑁄. 𑀯𑀕𑁆𑀕𑀽𑀢𑀺 𑀅𑀪𑀺𑀭𑀽𑀧𑁄 𑀲𑀫𑀼𑀕𑁆𑀕𑀢𑁄. 𑀲𑀼𑀲𑀗𑁆𑀕𑀢𑁄𑀢𑀺 𑀲𑀼𑀝𑁆𑀞𑀼 𑀲𑀗𑁆𑀕𑀢𑀸𑀯𑀬𑀯𑁄 𑀅𑀜𑁆𑀜𑀫𑀜𑁆𑀜𑀸𑀦𑀼𑀭𑀽𑀧𑀧𑀸𑀲𑀸𑀤𑀸𑀯𑀬𑀯𑁄. 𑀅𑀢𑀻𑀯 𑀦𑀺𑀚𑁆𑀛𑀸𑀦𑀔𑀫𑁄𑀢𑀺 𑀧𑀪𑀲𑁆𑀲𑀭𑀪𑀸𑀯𑁂𑀧𑀺 𑀅𑀢𑀺𑀯𑀺𑀬 𑀑𑀮𑁄𑀓𑀦𑀓𑁆𑀔𑀫𑁄. 𑀫𑀦𑀼𑀜𑁆𑀜𑁄𑀢𑀺 𑀫𑀦𑁄𑀭𑀫𑁄.

𑁧𑁨𑁪𑁫. 𑀭𑀢𑀦𑀦𑁆𑀢𑀭𑀲𑁆𑀫𑀺𑀦𑁆𑀢𑀺 𑀭𑀢𑀦𑀫𑀬𑁂, 𑀭𑀢𑀦𑀪𑀽𑀢𑁂 𑀯𑀸 𑀲𑀸𑀭𑀪𑀽𑀢𑁂 𑀯𑀺𑀫𑀸𑀦𑀲𑁆𑀲 𑀅𑀩𑁆𑀪𑀦𑁆𑀢𑀭𑁂. 𑀩𑀳𑀼𑀅𑀦𑁆𑀦𑀧𑀸𑀦𑀦𑁆𑀢𑀺 𑀧𑁂𑀲𑀮𑀁 𑀧𑀳𑀽𑀢𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀯𑀺𑀚𑁆𑀚𑀢𑀺, 𑀉𑀧𑀮𑀩𑁆𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀼𑀭𑀚𑀆𑀮𑀫𑁆𑀩𑀭𑀢𑀽𑀭𑀺𑀬𑀖𑀼𑀝𑁆𑀞𑁄𑀢𑀺 𑀫𑀼𑀤𑀺𑀗𑁆𑀕𑀸𑀦𑀁 𑀆𑀮𑀫𑁆𑀩𑀭𑀸𑀦𑀁 𑀅𑀯𑀲𑀺𑀝𑁆𑀞𑀢𑀽𑀭𑀺𑀬𑀸𑀦𑀜𑁆𑀘 𑀲𑀤𑁆𑀤𑁂𑀳𑀺 𑀦𑀺𑀘𑁆𑀘𑀖𑁄𑀲𑀺𑀢𑁄. 𑀅𑀪𑀺𑀯𑀦𑁆𑀤𑀺𑀢𑁄𑀲𑀻𑀢𑀺 𑀦𑀫𑀲𑁆𑀲𑀺𑀢𑁄, 𑀣𑁄𑀫𑀺𑀢𑁄 𑀯𑀸 𑀅𑀲𑀺. 𑀢𑁂𑀦𑀸𑀳 ‘‘𑀣𑀽𑀢𑀺𑀯𑀦𑁆𑀤𑀦𑀸𑀬𑀸’’𑀢𑀺.

𑁧𑁨𑁪𑁬. 𑀅𑀘𑀺𑀦𑁆𑀢𑀺𑀬𑁄𑀢𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑁄. 𑀦𑀴𑀺𑀦𑁆𑀬𑀸𑀢𑀺 𑀏𑀯𑀁𑀦𑀸𑀫𑀓𑁂 𑀓𑀻𑀴𑀦𑀝𑁆𑀞𑀸𑀦𑁂 𑀬𑀣𑀸 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸, 𑀏𑀯𑀁 𑀢𑁆𑀯𑀁 𑀫𑁄𑀤𑀲𑀻𑀢𑀺 𑀬𑁄𑀚𑀦𑀸.

𑁧𑁨𑁪𑁭. 𑀆𑀲𑀻𑀢𑀺 𑀅𑀲𑀺 𑀪𑀯𑀲𑀺. 𑀤𑁂𑀯𑀺𑀦𑁆𑀤𑁄𑀢𑀺 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸. 𑀫𑀦𑀼𑀲𑁆𑀲𑀪𑀽𑀢𑁄𑀢𑀺 𑀫𑀦𑀼𑀲𑁆𑀲𑁂𑀲𑀼 𑀪𑀽𑀢𑁄 𑀫𑀦𑀼𑀲𑁆𑀲𑀚𑀸𑀢𑀺𑀓𑁄. 𑀬𑀓𑁆𑀔𑁄𑀢𑀺 𑀤𑁂𑀯𑀸𑀤𑀺𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀬𑀓𑁆𑀔𑀪𑀸𑀯𑀁 𑀆𑀲𑀗𑁆𑀓𑀦𑁆𑀢𑀸 𑀯𑀤𑀦𑁆𑀢𑀺.

𑀇𑀤𑀸𑀦𑀺 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀦𑁆𑀢𑁄 𑁋

𑁧𑁨𑁪𑁮. ‘‘𑀲𑁂𑀭𑀻𑀲𑀓𑁄 𑀦𑀸𑀫 𑀅𑀳𑀫𑁆𑀳𑀺 𑀬𑀓𑁆𑀔𑁄, 𑀓𑀦𑁆𑀢𑀸𑀭𑀺𑀬𑁄 𑀯𑀡𑁆𑀡𑀼𑀧𑀣𑀫𑁆𑀳𑀺 𑀕𑀼𑀢𑁆𑀢𑁄;

𑀇𑀫𑀁 𑀧𑀤𑁂𑀲𑀁 𑀅𑀪𑀺𑀧𑀸𑀮𑀬𑀸𑀫𑀺, 𑀯𑀘𑀦𑀓𑀭𑁄 𑀯𑁂𑀲𑁆𑀲𑀯𑀡𑀲𑁆𑀲 𑀭𑀜𑁆𑀜𑁄’’𑀢𑀺. 𑁋

𑀆𑀳. 𑀢𑀢𑁆𑀣 𑀅𑀳𑀫𑁆𑀳𑀻 𑀬𑀓𑁆𑀔𑁄𑀢𑀺 𑀅𑀳𑀁 𑀬𑀓𑁆𑀔𑁄 𑀅𑀫𑁆𑀳𑀺. 𑀓𑀦𑁆𑀢𑀸𑀭𑀺𑀬𑁄𑀢𑀺 𑀆𑀭𑀓𑁆𑀔𑀡𑀢𑁆𑀣𑀁 𑀓𑀦𑁆𑀢𑀸𑀭𑁂 𑀦𑀺𑀬𑀼𑀢𑁆𑀢𑁄. 𑀕𑀼𑀢𑁆𑀢𑁄𑀢𑀺 𑀕𑁄𑀧𑀓𑁄. 𑀢𑁂𑀦𑀸𑀳 ‘‘𑀅𑀪𑀺𑀧𑀸𑀮𑀬𑀸𑀫𑀻’’𑀢𑀺.

𑀇𑀤𑀸𑀦𑀺 𑀯𑀸𑀡𑀺𑀚𑀸 𑀢𑀲𑁆𑀲 𑀓𑀫𑁆𑀫𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑀸 𑀆𑀳𑀁𑀲𑀼 𑁋

𑁧𑁨𑁪𑁯. ‘‘𑀅𑀥𑀺𑀘𑁆𑀘𑀮𑀤𑁆𑀥𑀁 𑀧𑀭𑀺𑀡𑀸𑀫𑀚𑀁 𑀢𑁂, 𑀲𑀬𑀁𑀓𑀢𑀁 𑀉𑀤𑀸𑀳𑀼 𑀤𑁂𑀯𑁂𑀳𑀺 𑀤𑀺𑀦𑁆𑀦𑀁;

𑀧𑀼𑀘𑁆𑀙𑀦𑁆𑀢𑀺 𑀢𑀁 𑀯𑀸𑀡𑀺𑀚𑀸 𑀲𑀢𑁆𑀣𑀯𑀸𑀳𑀸, 𑀓𑀣𑀁 𑀢𑀬𑀸 𑀮𑀤𑁆𑀥𑀫𑀺𑀤𑀁 𑀫𑀦𑀼𑀜𑁆𑀜’’𑀦𑁆𑀢𑀺.

𑀢𑀢𑁆𑀣 𑀅𑀥𑀺𑀘𑁆𑀘𑀮𑀤𑁆𑀥𑀦𑁆𑀢𑀺 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀓𑀁, 𑀬𑀤𑀺𑀘𑁆𑀙𑀓𑀁 𑀮𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀡𑀸𑀫𑀚𑀁 𑀢𑁂𑀢𑀺 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀁, 𑀓𑀸𑀮𑀧𑀭𑀺𑀡𑀢𑀁 𑀯𑀸. 𑀲𑀬𑀁𑀓𑀢𑀦𑁆𑀢𑀺 𑀢𑀬𑀸 𑀲𑀬𑀫𑁂𑀯 𑀓𑀢𑀁, 𑀤𑁂𑀯𑀺𑀤𑁆𑀥𑀺𑀬𑀸 𑀢𑀬𑀸 𑀲𑀬𑀫𑁂𑀯 𑀦𑀺𑀩𑁆𑀩𑀢𑁆𑀢𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀉𑀤𑀸𑀳𑀼 𑀤𑁂𑀯𑁂𑀳𑀺 𑀤𑀺𑀦𑁆𑀦𑀦𑁆𑀢𑀺 𑀢𑀬𑀸 𑀆𑀭𑀸𑀥𑀺𑀢𑁂𑀳𑀺 𑀤𑁂𑀯𑁂𑀳𑀺 𑀧𑀲𑀸𑀤𑀯𑀲𑁂𑀦 𑀦𑀺𑀲𑁆𑀲𑀝𑁆𑀞𑀁.

𑀇𑀤𑀸𑀦𑀺 𑀤𑁂𑀯𑀧𑀼𑀢𑁆𑀢𑁄 𑀘𑀢𑀼𑀭𑁄𑀧𑀺 𑀧𑀓𑀸𑀭𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀜𑁆𑀜𑀫𑁂𑀯 𑀅𑀧𑀤𑀺𑀲𑀦𑁆𑀢𑁄 𑁋

𑁧𑁨𑁫𑁦. ‘‘𑀦𑀸𑀥𑀺𑀘𑁆𑀘𑀮𑀤𑁆𑀥𑀁 𑀦 𑀧𑀭𑀺𑀡𑀸𑀫𑀚𑀁 𑀫𑁂, 𑀦 𑀲𑀬𑀁𑀓𑀢𑀁 𑀦 𑀳𑀺 𑀤𑁂𑀯𑁂𑀳𑀺 𑀤𑀺𑀦𑁆𑀦𑀁;

𑀲𑀓𑁂𑀳𑀺 𑀓𑀫𑁆𑀫𑁂𑀳𑀺 𑀅𑀧𑀸𑀧𑀓𑁂𑀳𑀺, 𑀧𑀼𑀜𑁆𑀜𑁂𑀳𑀺 𑀫𑁂 𑀮𑀤𑁆𑀥𑀫𑀺𑀤𑀁 𑀫𑀦𑀼𑀜𑁆𑀜’’𑀦𑁆𑀢𑀺. 𑁋

𑀕𑀸𑀣𑀫𑀸𑀳.

𑀢𑀁 𑀲𑀼𑀢𑁆𑀯𑀸 𑀯𑀸𑀡𑀺𑀚𑀸 𑀧𑀼𑀦 ‘‘𑀦𑀸𑀥𑀺𑀘𑁆𑀘𑀮𑀤𑁆𑀥’’𑀦𑁆𑀢𑀺 𑀕𑀸𑀣𑀸𑀬𑀁 𑀧𑀼𑀜𑁆𑀜𑀸𑀥𑀺𑀓𑀫𑁂𑀯 𑀢𑁂 𑀘𑀢𑀼𑀭𑁄 𑀧𑀓𑀸𑀭𑁂 𑀆𑀭𑁄𑀧𑁂𑀢𑁆𑀯𑀸 𑀧𑀼𑀜𑁆𑀜𑀲𑁆𑀲 𑀘 𑀲𑀭𑀽𑀧𑀁 𑀧𑀼𑀘𑁆𑀙𑀺𑀁𑀲𑀼 𑁋

𑁧𑁨𑁫𑁧. ‘‘𑀓𑀺𑀁 𑀢𑁂 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀺𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀧𑀼𑀘𑁆𑀙𑀦𑁆𑀢𑀺 𑀢𑀁 𑀯𑀸𑀡𑀺𑀚𑀸 𑀲𑀢𑁆𑀣𑀯𑀸𑀳𑀸, 𑀓𑀣𑀁 𑀢𑀬𑀸 𑀮𑀤𑁆𑀥𑀫𑀺𑀤𑀁 𑀯𑀺𑀫𑀸𑀦’’𑀦𑁆𑀢𑀺.

𑀢𑀢𑁆𑀣 𑀯𑀢𑀦𑁆𑀢𑀺 𑀯𑀢𑀲𑀫𑀸𑀤𑀸𑀦𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑁂𑀝𑁆𑀞𑀘𑀭𑀺𑀬𑀁.

𑀧𑀼𑀦 𑀤𑁂𑀯𑀧𑀼𑀢𑁆𑀢𑁄 𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀬𑀣𑀽𑀧𑀘𑀺𑀢𑀁 𑀧𑀼𑀜𑁆𑀜𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑁋

𑁧𑁨𑁫𑁨. ‘‘𑀫𑀫𑀁 𑀧𑀸𑀬𑀸𑀲𑀻𑀢𑀺 𑀅𑀳𑀼 𑀲𑀫𑀜𑁆𑀜𑀸, 𑀭𑀚𑁆𑀚𑀁 𑀬𑀤𑀸 𑀓𑀸𑀭𑀬𑀺𑀁 𑀓𑁄𑀲𑀮𑀸𑀦𑀁;

𑀦𑀢𑁆𑀣𑀺𑀓𑀤𑀺𑀝𑁆𑀞𑀺 𑀓𑀤𑀭𑀺𑀬𑁄 𑀧𑀸𑀧𑀥𑀫𑁆𑀫𑁄, 𑀉𑀘𑁆𑀙𑁂𑀤𑀯𑀸𑀤𑀻 𑀘 𑀢𑀤𑀸 𑀅𑀳𑁄𑀲𑀺𑀁.

𑁧𑁨𑁫𑁩. ‘‘𑀲𑀫𑀡𑁄 𑀘 𑀔𑁄 𑀆𑀲𑀺 𑀓𑀼𑀫𑀸𑀭𑀓𑀲𑁆𑀲𑀧𑁄, 𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀢𑀓𑀣𑀻 𑀉𑀴𑀸𑀭𑁄;

𑀲𑁄 𑀫𑁂 𑀢𑀤𑀸 𑀥𑀫𑁆𑀫𑀓𑀣𑀁 𑀅𑀪𑀸𑀲𑀺, 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺 𑀯𑀺𑀦𑁄𑀤𑀬𑀻 𑀫𑁂.

𑁧𑁨𑁫𑁪. ‘‘𑀢𑀸𑀳𑀁 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀡𑀺𑀢𑁆𑀯𑀸, 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑀬𑀺𑀲𑁆𑀲𑀁;

𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑁄 𑀅𑀳𑁄𑀲𑀺𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀺𑀲𑁆𑀲𑀁;

𑀅𑀫𑀚𑁆𑀚𑀧𑁄 𑀦𑁄 𑀘 𑀫𑀼𑀲𑀸 𑀅𑀪𑀸𑀡𑀺𑀁, 𑀲𑀓𑁂𑀦 𑀤𑀸𑀭𑁂𑀦 𑀘 𑀅𑀳𑁄𑀲𑀺𑀁 𑀢𑀼𑀝𑁆𑀞𑁄.

𑁧𑁨𑁫𑁫. ‘‘𑀢𑀁 𑀫𑁂 𑀯𑀢𑀁 𑀢𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀢𑁂𑀳𑁂𑀯 𑀓𑀫𑁆𑀫𑁂𑀳𑀺 𑀅𑀧𑀸𑀧𑀓𑁂𑀳𑀺, 𑀧𑀼𑀜𑁆𑀜𑁂𑀳𑀺 𑀫𑁂 𑀮𑀤𑁆𑀥𑀫𑀺𑀤𑀁 𑀯𑀺𑀫𑀸𑀦’’𑀦𑁆𑀢𑀺. 𑁋

𑀆𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀣 𑀯𑀸𑀡𑀺𑀚𑀸 𑀤𑁂𑀯𑀧𑀼𑀢𑁆𑀢𑀁 𑀯𑀺𑀫𑀸𑀦𑀜𑁆𑀘𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀤𑀺𑀲𑁆𑀯𑀸 𑀓𑀫𑁆𑀫𑀨𑀮𑀁 𑀲𑀤𑁆𑀤𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀨𑀮𑁂 𑀲𑀤𑁆𑀥𑀁 𑀧𑀯𑁂𑀤𑁂𑀦𑁆𑀢𑀸 𑁋

𑁧𑁨𑁫𑁬. ‘‘𑀲𑀘𑁆𑀘𑀁 𑀓𑀺𑀭𑀸𑀳𑀁𑀲𑀼 𑀦𑀭𑀸 𑀲𑀧𑀜𑁆𑀜𑀸, 𑀅𑀦𑀜𑁆𑀜𑀣𑀸 𑀯𑀘𑀦𑀁 𑀧𑀡𑁆𑀟𑀺𑀢𑀸𑀦𑀁;

𑀬𑀳𑀺𑀁 𑀬𑀳𑀺𑀁 𑀕𑀘𑁆𑀙𑀢𑀺 𑀧𑀼𑀜𑁆𑀜𑀓𑀫𑁆𑀫𑁄, 𑀢𑀳𑀺𑀁 𑀢𑀳𑀺𑀁 𑀫𑁄𑀤𑀢𑀺 𑀓𑀸𑀫𑀓𑀸𑀫𑀻.

𑁧𑁨𑁫𑁭. ‘‘𑀬𑀳𑀺𑀁 𑀬𑀳𑀺𑀁 𑀲𑁄𑀓𑀧𑀭𑀺𑀤𑁆𑀤𑀯𑁄 𑀘, 𑀯𑀥𑁄 𑀘 𑀩𑀦𑁆𑀥𑁄 𑀘 𑀧𑀭𑀺𑀓𑁆𑀓𑀺𑀮𑁂𑀲𑁄;

𑀢𑀳𑀺𑀁 𑀢𑀳𑀺𑀁 𑀕𑀘𑁆𑀙𑀢𑀺 𑀧𑀸𑀧𑀓𑀫𑁆𑀫𑁄, 𑀦 𑀫𑀼𑀘𑁆𑀘𑀢𑀺 𑀤𑀼𑀕𑁆𑀕𑀢𑀺𑀬𑀸 𑀓𑀤𑀸𑀘𑀻’’𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀁 𑀅𑀯𑁄𑀘𑀼𑀁. 𑀢𑀢𑁆𑀣 𑀲𑁄𑀓𑀧𑀭𑀺𑀤𑁆𑀤𑀯𑁄𑀢𑀺 𑀲𑁄𑀓𑁄 𑀘 𑀧𑀭𑀺𑀤𑁂𑀯𑁄 𑀘. 𑀧𑀭𑀺𑀓𑁆𑀓𑀺𑀮𑁂𑀲𑁄𑀢𑀺 𑀯𑀼𑀢𑁆𑀢𑀸 𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺.

𑀏𑀯𑀁 𑀢𑁂𑀲𑀼 𑀓𑀣𑁂𑀦𑁆𑀢𑁂𑀲𑀼𑀬𑁂𑀯 𑀯𑀺𑀫𑀸𑀦𑀤𑁆𑀯𑀸𑀭𑁂 𑀲𑀺𑀭𑀻𑀲𑀭𑀼𑀓𑁆𑀔𑀢𑁄 𑀧𑀭𑀺𑀧𑀸𑀓𑁂𑀦 𑀫𑀼𑀢𑁆𑀢𑀩𑀦𑁆𑀥𑀦𑀸 𑀧𑀭𑀺𑀧𑀓𑁆𑀓𑀸 𑀲𑀺𑀧𑀸𑀝𑀺𑀓𑀸 𑀧𑀢𑀺, 𑀢𑁂𑀦 𑀤𑁂𑀯𑀧𑀼𑀢𑁆𑀢𑁄 𑀲𑀧𑀭𑀺𑀚𑀦𑁄 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀯𑀸𑀡𑀺𑀚𑀸 𑁋

𑁧𑁨𑁫𑁮. ‘‘𑀲𑀫𑁆𑀫𑀽𑀴𑁆𑀳𑀭𑀽𑀧𑁄𑀯 𑀚𑀦𑁄 𑀅𑀳𑁄𑀲𑀺, 𑀅𑀲𑁆𑀫𑀺𑀁 𑀫𑀼𑀳𑀼𑀢𑁆𑀢𑁂 𑀓𑀮𑀮𑀻𑀓𑀢𑁄𑀯;

𑀚𑀦𑀲𑁆𑀲𑀺𑀫𑀲𑁆𑀲 𑀢𑀼𑀬𑁆𑀳𑀜𑁆𑀘 𑀓𑀼𑀫𑀸𑀭, 𑀅𑀧𑁆𑀧𑀘𑁆𑀘𑀬𑁄 𑀓𑁂𑀦 𑀦𑀼 𑀔𑁄 𑀅𑀳𑁄𑀲𑀻’’𑀢𑀺. 𑁋

𑀕𑀸𑀣𑀫𑀸𑀳𑀁𑀲𑀼. 𑀢𑀢𑁆𑀣 𑀲𑀫𑁆𑀫𑀽𑀴𑁆𑀳𑀭𑀽𑀧𑁄𑀯𑀸𑀢𑀺 𑀲𑁄𑀓𑀯𑀲𑁂𑀦 𑀲𑀩𑁆𑀩𑀲𑁄 𑀫𑀽𑀴𑁆𑀳𑀲𑀪𑀸𑀯𑁄 𑀯𑀺𑀬. 𑀚𑀦𑁄𑀢𑀺 𑀤𑁂𑀯𑀚𑀦𑁄. 𑀅𑀲𑁆𑀫𑀺𑀁 𑀫𑀼𑀳𑀼𑀢𑁆𑀢𑁂𑀢𑀺 𑀇𑀫𑀲𑁆𑀫𑀺𑀁 𑀫𑀼𑀳𑀼𑀢𑁆𑀢𑀫𑀢𑁆𑀢𑁂. 𑀓𑀮𑀮𑀻𑀓𑀢𑁄𑀢𑀺 𑀓𑀮𑀮𑀁 𑀯𑀺𑀬 𑀓𑀢𑁄, 𑀓𑀮𑀮𑀦𑀺𑀲𑁆𑀲𑀺𑀢𑀉𑀤𑀓𑀻𑀪𑀽𑀢𑁄 𑀯𑀺𑀬 𑀆𑀯𑀺𑀮𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀚𑀦𑀲𑁆𑀲𑀺𑀫𑀲𑁆𑀲 𑀢𑀼𑀬𑁆𑀳𑀜𑁆𑀘𑀸𑀢𑀺 𑀇𑀫𑀲𑁆𑀲 𑀢𑀯 𑀧𑀭𑀺𑀚𑀦𑀲𑁆𑀲 𑀢𑀼𑀬𑁆𑀳𑀜𑁆𑀘. 𑀅𑀧𑁆𑀧𑀘𑁆𑀘𑀬𑁄𑀢𑀺 𑀤𑁄𑀫𑀦𑀲𑁆𑀲𑀁.

𑀢𑀁 𑀲𑀼𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑁄 𑁋

𑁧𑁨𑁫𑁯. ‘‘𑀇𑀫𑁂 𑀘 𑀲𑀺𑀭𑀻𑀲𑀯𑀦𑀸 𑀢𑀸𑀢𑀸, 𑀤𑀺𑀩𑁆𑀩𑀸 𑀕𑀦𑁆𑀥𑀸 𑀲𑀼𑀭𑀪𑀻 𑀲𑀫𑁆𑀧𑀯𑀦𑁆𑀢𑀺;

𑀢𑁂 𑀲𑀫𑁆𑀧𑀯𑀸𑀬𑀦𑁆𑀢𑀺 𑀇𑀫𑀁 𑀯𑀺𑀫𑀸𑀦𑀁, 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀢𑀫𑀁 𑀦𑀺𑀳𑀦𑁆𑀢𑁆𑀯𑀸.

𑁧𑁨𑁬𑁦. ‘‘𑀇𑀫𑁂𑀲𑀜𑁆𑀘 𑀔𑁄 𑀯𑀲𑁆𑀲𑀲𑀢𑀘𑁆𑀘𑀬𑁂𑀦, 𑀲𑀺𑀧𑀸𑀝𑀺𑀓𑀸 𑀨𑀮𑀢𑀺 𑀏𑀓𑀫𑁂𑀓𑀸;

𑀫𑀸𑀦𑀼𑀲𑁆𑀲𑀓𑀁 𑀯𑀲𑁆𑀲𑀲𑀢𑀁 𑀅𑀢𑀻𑀢𑀁, 𑀬𑀤𑀕𑁆𑀕𑁂 𑀓𑀸𑀬𑀫𑁆𑀳𑀺 𑀇𑀥𑀽𑀧𑀧𑀦𑁆𑀦𑁄.

𑁧𑁨𑁬𑁧. ‘‘𑀤𑀺𑀲𑁆𑀯𑀸𑀦𑀳𑀁 𑀯𑀲𑁆𑀲𑀲𑀢𑀸𑀦𑀺 𑀧𑀜𑁆𑀘,

𑀅𑀲𑁆𑀫𑀺𑀁 𑀯𑀺𑀫𑀸𑀦𑁂 𑀞𑀢𑁆𑀯𑀸𑀦 𑀢𑀸𑀢𑀸;

𑀆𑀬𑀼𑀓𑁆𑀔𑀬𑀸 𑀧𑀼𑀜𑁆𑀜𑀓𑁆𑀔𑀬𑀸 𑀘𑀯𑀺𑀲𑁆𑀲𑀁,

𑀢𑁂𑀦𑁂𑀯 𑀲𑁄𑀓𑁂𑀦 𑀧𑀫𑀼𑀘𑁆𑀙𑀺𑀢𑁄𑀲𑁆𑀫𑀻’’𑀢𑀺. 𑁋 𑀆𑀳;

𑁧𑁨𑁫𑁬. 𑀢𑀢𑁆𑀣 𑀲𑀺𑀭𑀻𑀲𑀯𑀦𑀸𑀢𑀺 𑀲𑀺𑀭𑀻𑀲𑀯𑀺𑀧𑀺𑀦𑀢𑁄. 𑀢𑀸𑀢𑀸𑀢𑀺 𑀯𑀸𑀡𑀺𑀚𑁂 𑀆𑀮𑀧𑀢𑀺. 𑀇𑀫𑁂 𑀢𑀼𑀫𑁆𑀳𑀸𑀓𑀁 𑀫𑀬𑁆𑀳𑀜𑁆𑀘 𑀧𑀘𑁆𑀘𑀓𑁆𑀔𑀪𑀽𑀢𑀸 𑀤𑀺𑀩𑁆𑀩𑀸 𑀕𑀦𑁆𑀥𑀸 𑀲𑀼𑀭𑀪𑀻 𑀅𑀢𑀺𑀯𑀺𑀬 𑀲𑀼𑀕𑀦𑁆𑀥𑀸𑀬𑁂𑀯 𑀲𑀫𑀦𑁆𑀢𑀢𑁄 𑀧𑀯𑀦𑁆𑀢𑀺 𑀧𑀯𑀸𑀬𑀦𑁆𑀢𑀺. 𑀢𑁂 𑀤𑀺𑀩𑁆𑀩𑀸 𑀕𑀦𑁆𑀥𑀸 𑀏𑀯𑀁 𑀯𑀸𑀬𑀦𑁆𑀢𑀸 𑀇𑀫𑀁 𑀯𑀺𑀫𑀸𑀦𑀁 𑀲𑀫𑁆𑀧𑀯𑀸𑀬𑀦𑁆𑀢𑀺 𑀲𑀫𑁆𑀫𑀤𑁂𑀯 𑀕𑀦𑁆𑀥𑀁 𑀕𑀸𑀳𑀸𑀧𑁂𑀦𑁆𑀢𑀺, 𑀦 𑀓𑁂𑀯𑀮𑀁 𑀲𑀫𑁆𑀧𑀯𑀸𑀬𑀦𑀫𑁂𑀯, 𑀅𑀣 𑀔𑁄 𑀅𑀢𑁆𑀢𑀦𑁄 𑀧𑀪𑀸𑀬 𑀢𑀫𑀫𑁆𑀧𑀺 𑀦𑀺𑀳𑀦𑁆𑀢𑀺. 𑀢𑁂𑀦𑀸𑀳 ‘‘𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀢𑀫𑀁 𑀦𑀺𑀳𑀦𑁆𑀢𑁆𑀯𑀸’’𑀢𑀺.

𑁧𑁨𑁬𑁦-𑁬𑁧. 𑀇𑀫𑁂𑀲𑀦𑁆𑀢𑀺 𑀲𑀺𑀭𑀻𑀲𑀸𑀦𑀁. 𑀲𑀺𑀧𑀸𑀝𑀺𑀓𑀸𑀢𑀺 𑀨𑀮𑀓𑀼𑀝𑁆𑀞𑀺𑀮𑀺𑀓𑀸. 𑀨𑀮𑀢𑀻𑀢𑀺 𑀧𑀘𑁆𑀘𑀺𑀢𑁆𑀯𑀸 𑀯𑀡𑁆𑀝𑀢𑁄 𑀫𑀼𑀘𑁆𑀘𑀢𑀺, 𑀧𑀼𑀝𑀪𑁂𑀤𑀁 𑀯𑀸 𑀧𑀢𑁆𑀯𑀸 𑀲𑀺𑀲𑁆𑀲𑀢𑀺. 𑀫𑀸𑀦𑀼𑀲𑁆𑀲𑀓𑀁 𑀯𑀲𑁆𑀲𑀲𑀢𑀁 𑀅𑀢𑀻𑀢𑀦𑁆𑀢𑀺 𑀬𑀲𑁆𑀫𑀸 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀇𑀫𑀲𑁆𑀲 𑀲𑀺𑀭𑀻𑀲𑀲𑁆𑀲 𑀲𑀺𑀧𑀸𑀝𑀺𑀓𑀸 𑀨𑀮𑀢𑀺, 𑀅𑀬𑀜𑁆𑀘 𑀨𑀮𑀺𑀢𑀸, 𑀢𑀲𑁆𑀫𑀸 𑀫𑀬𑁆𑀳𑀁 𑀫𑀸𑀦𑀼𑀲𑁆𑀲𑀓𑀁 𑀯𑀲𑁆𑀲𑀲𑀢𑀁 𑀅𑀢𑀻𑀢𑀁. 𑀬𑀤𑀕𑁆𑀕𑁂 𑀬𑀢𑁄 𑀧𑀝𑁆𑀞𑀸𑀬, 𑀓𑀸𑀬𑀫𑁆𑀳𑀺 𑀇𑀥 𑀇𑀫𑀲𑁆𑀫𑀺𑀁 𑀤𑁂𑀯𑀦𑀺𑀓𑀸𑀬𑁂 𑀉𑀧𑀧𑀦𑁆𑀦𑁄 𑀦𑀺𑀩𑁆𑀩𑀢𑁆𑀢𑁄. 𑀫𑀬𑁆𑀳𑀜𑁆𑀘 𑀤𑁂𑀯𑀕𑀡𑀦𑀸𑀬 𑀧𑀜𑁆𑀘 𑀯𑀲𑁆𑀲𑀲𑀢𑀸𑀦𑀺 𑀆𑀬𑀼, 𑀢𑀲𑁆𑀫𑀸 𑀔𑀻𑀬𑀢𑀺 𑀫𑁂 𑀆𑀬𑀽𑀢𑀺 𑀲𑁄𑀓𑀯𑀲𑁂𑀦 𑀲𑀫𑁆𑀧𑀫𑀽𑀴𑁆𑀳𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀤𑀺𑀲𑁆𑀯𑀸𑀦𑀳𑀁 𑀯𑀲𑁆𑀲𑀲𑀢𑀸𑀦𑀺 𑀧𑀜𑁆𑀘…𑀧𑁂… 𑀢𑁂𑀦𑁂𑀯 𑀲𑁄𑀓𑁂𑀦 𑀧𑀫𑀼𑀘𑁆𑀙𑀺𑀢𑁄𑀲𑁆𑀫𑀻’’𑀢𑀺.

𑀅𑀣 𑀦𑀁 𑀯𑀸𑀡𑀺𑀚𑀸 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑁋

𑁧𑁨𑁬𑁨. ‘‘𑀓𑀣𑀁 𑀦𑀼 𑀲𑁄𑀘𑁂𑀬𑁆𑀬 𑀢𑀣𑀸𑀯𑀺𑀥𑁄 𑀲𑁄, 𑀮𑀤𑁆𑀥𑀸 𑀯𑀺𑀫𑀸𑀦𑀁 𑀅𑀢𑀼𑀮𑀁 𑀘𑀺𑀭𑀸𑀬;

𑀬𑁂 𑀘𑀸𑀧𑀺 𑀔𑁄 𑀇𑀢𑁆𑀢𑀭𑀫𑀼𑀧𑀧𑀦𑁆𑀦𑀸, 𑀢𑁂 𑀦𑀽𑀦 𑀲𑁄𑀘𑁂𑀬𑁆𑀬𑀼𑀁 𑀧𑀭𑀺𑀢𑁆𑀢𑀧𑀼𑀜𑁆𑀜𑀸’’𑀢𑀺. 𑁋

𑀆𑀳𑀁𑀲𑀼. 𑀢𑀢𑁆𑀣 𑀬𑀸𑀤𑀺𑀲𑁂𑀳𑀺 𑀅𑀧𑁆𑀧𑀸𑀬𑀼𑀓𑁂𑀳𑀺 𑀫𑀭𑀡𑀁 𑀧𑀝𑀺𑀘𑁆𑀘 𑀲𑁄𑀘𑀺𑀢𑀩𑁆𑀩𑀁 𑀲𑀺𑀬𑀸, 𑀢𑀸𑀤𑀺𑀲𑁄 𑀧𑀦 𑀏𑀯𑀁 𑀤𑀺𑀩𑁆𑀩𑀸𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁄 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀓𑁄 𑀓𑀣𑀁 𑀦𑀼 𑀲𑁄𑀘𑁂𑀬𑁆𑀬, 𑀦 𑀲𑁄𑀘𑀺𑀢𑀩𑁆𑀩𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑁂𑀯𑀧𑀼𑀢𑁆𑀢𑁄 𑀢𑀢𑁆𑀢𑀓𑁂𑀦𑁂𑀯 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀢𑁂𑀲𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀢𑁂𑀲𑀜𑁆𑀘 𑀉𑀧𑀤𑁂𑀲𑀁 𑀤𑁂𑀦𑁆𑀢𑁄 𑁋

𑁧𑁨𑁬𑁩. ‘‘𑀅𑀦𑀼𑀘𑁆𑀙𑀯𑀺𑀁 𑀑𑀯𑀤𑀺𑀬𑀜𑁆𑀘 𑀫𑁂𑀢𑀁, 𑀬𑀁 𑀫𑀁 𑀢𑀼𑀫𑁆𑀳𑁂 𑀧𑁂𑀬𑁆𑀬𑀯𑀸𑀘𑀁 𑀯𑀤𑁂𑀣;

𑀢𑀼𑀫𑁆𑀳𑁂 𑀘 𑀔𑁄 𑀢𑀸𑀢𑀸 𑀫𑀬𑀸𑀦𑀼𑀕𑀼𑀢𑁆𑀢𑀸, 𑀬𑁂𑀳𑀺𑀘𑁆𑀙𑀓𑀁 𑀢𑁂𑀦 𑀧𑀮𑁂𑀣 𑀲𑁄𑀢𑁆𑀣𑀺’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀦𑀼𑀘𑁆𑀙𑀯𑀺𑀦𑁆𑀢𑀺 𑀅𑀦𑀼𑀘𑁆𑀙𑀯𑀺𑀓𑀁, 𑀢𑀼𑀫𑁆𑀳𑀸𑀓𑀫𑁂𑀯 𑀢𑀁 𑀬𑀼𑀢𑁆𑀢𑀭𑀽𑀧𑀁. 𑀑𑀯𑀤𑀺𑀬𑀜𑁆𑀘 𑀫𑁂𑀢𑀦𑁆𑀢𑀺 𑀫𑁂 𑀫𑀬𑁆𑀳𑀁 𑀢𑀼𑀫𑁆𑀳𑁂𑀳𑀺 𑀑𑀯𑀤𑀺𑀬𑀁 𑀑𑀯𑀸𑀤𑀯𑀲𑁂𑀦 𑀯𑀢𑁆𑀢𑀩𑁆𑀩𑀫𑁂𑀢𑀁. 𑀬𑀁 𑀬𑀲𑁆𑀫𑀸, 𑀫𑀁 𑀫𑀬𑁆𑀳𑀁, 𑀢𑀼𑀫𑁆𑀳𑁂 ‘‘𑀓𑀣𑀁 𑀦𑀼 𑀲𑁄𑀘𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀧𑁂𑀬𑁆𑀬𑀯𑀸𑀘𑀁 𑀧𑀺𑀬𑀯𑀘𑀦𑀁 𑀯𑀤𑁂𑀣. 𑀬𑀁 𑀯𑀸 𑀧𑁂𑀬𑁆𑀬𑀯𑀸𑀘𑀸𑀬 𑀯𑀤𑀦𑀁 𑀓𑀣𑀦𑀁, 𑀢𑀁 𑀢𑀼𑀫𑁆𑀳𑀸𑀓𑀫𑁂𑀯 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀬𑀁 𑀬𑀲𑁆𑀫𑀸 𑀢𑀼𑀫𑁆𑀳𑁂 𑀧𑁂𑀬𑁆𑀬𑀯𑀸𑀘𑀁 𑀯𑀤𑁂𑀣, 𑀢𑀲𑁆𑀫𑀸 𑀅𑀦𑀼𑀘𑁆𑀙𑀯𑀺𑀓𑀁 𑀑𑀯𑀤𑀺𑀬𑀜𑁆𑀘 𑀑𑀯𑀤𑀺𑀢𑀩𑁆𑀩𑀁 𑀑𑀯𑀸𑀤𑀸𑀦𑀼𑀭𑀽𑀧𑀁 𑀓𑀸𑀢𑀩𑁆𑀩𑀜𑁆𑀘 𑀫𑁂 𑀫𑀬𑀸 𑀓𑀢𑀁, 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀢𑀼𑀫𑁆𑀳𑁂 𑀘 𑀔𑁄 𑀢𑀸𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀫𑀬𑀸𑀦𑀼𑀕𑀼𑀢𑁆𑀢𑀸𑀢𑀺 𑀇𑀫𑀲𑁆𑀫𑀺𑀁 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑁂 𑀫𑀭𑀼𑀓𑀦𑁆𑀢𑀸𑀭𑁂 𑀬𑀸𑀯 𑀓𑀦𑁆𑀢𑀸𑀭𑀸𑀢𑀺𑀓𑁆𑀓𑀫𑀸 𑀫𑀬𑀸 𑀅𑀦𑀼𑀕𑀼𑀢𑁆𑀢𑀸 𑀭𑀓𑁆𑀔𑀺𑀢𑀸, 𑀬𑁂𑀦𑀺𑀘𑁆𑀙𑀓𑀁 𑀬𑀣𑀸𑀭𑀼𑀘𑀺𑀢𑁂𑀦, 𑀲𑁄𑀢𑁆𑀣𑀺𑀁 𑀔𑁂𑀫𑁂𑀦, 𑀧𑀮𑁂𑀣 𑀕𑀘𑁆𑀙𑀣𑀸𑀢𑀺 𑀅𑀢𑁆𑀣𑁄.

𑀅𑀣 𑀯𑀸𑀡𑀺𑀚𑀸 𑀓𑀢𑀜𑁆𑀜𑀼𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑀸 𑁋

𑁧𑁨𑁬𑁪. ‘‘𑀕𑀦𑁆𑀢𑁆𑀯𑀸 𑀫𑀬𑀁 𑀲𑀺𑀦𑁆𑀥𑀼𑀲𑁄𑀯𑀻𑀭𑀪𑀽𑀫𑀺𑀁, 𑀥𑀦𑀢𑁆𑀣𑀺𑀓𑀸 𑀉𑀤𑁆𑀤𑀬𑀁 𑀧𑀢𑁆𑀣𑀬𑀸𑀦𑀸;

𑀬𑀣𑀸𑀧𑀬𑁄𑀕𑀸 𑀧𑀭𑀺𑀧𑀼𑀡𑁆𑀡𑀘𑀸𑀕𑀸, 𑀓𑀸𑀳𑀸𑀫 𑀲𑁂𑀭𑀻𑀲𑀫𑀳𑀁 𑀉𑀴𑀸𑀭𑀦𑁆𑀢𑀺. 𑁋

𑀕𑀸𑀣𑀫𑀸𑀳𑀁𑀲𑀼. 𑀢𑀢𑁆𑀣 𑀬𑀣𑀸𑀧𑀬𑁄𑀕𑀸𑀢𑀺 𑀇𑀤𑀸𑀦𑀺 𑀓𑀢𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀧𑀬𑁄𑀕𑀸. 𑀧𑀭𑀺𑀧𑀼𑀡𑁆𑀡𑀘𑀸𑀕𑀸𑀢𑀺 𑀲𑀫𑀢𑁆𑀢𑀘𑀸𑀕𑀸, 𑀉𑀴𑀸𑀭𑀲𑁆𑀲 𑀫𑀳𑀲𑁆𑀲 𑀧𑀭𑀺𑀬𑀢𑁆𑀢𑀧𑀭𑀺𑀘𑁆𑀘𑀸𑀕𑀸. 𑀫𑀳𑀦𑁆𑀢𑀺 𑀉𑀲𑁆𑀲𑀯𑀧𑀽𑀚𑀁.

𑀧𑀼𑀦 𑀤𑁂𑀯𑀧𑀼𑀢𑁆𑀢𑁄 𑀫𑀳𑀓𑀭𑀡𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀓𑀢𑁆𑀢𑀩𑁆𑀩𑁂𑀲𑀼 𑀘 𑀢𑁂 𑀦𑀺𑀬𑁄𑀚𑁂𑀦𑁆𑀢𑁄 𑁋

𑁧𑁨𑁬𑁫. ‘‘𑀫𑀸 𑀘𑁂𑀯 𑀲𑁂𑀭𑀻𑀲𑀫𑀳𑀁 𑀅𑀓𑀢𑁆𑀣, 𑀲𑀩𑁆𑀩𑀜𑁆𑀘 𑀯𑁄 𑀪𑀯𑀺𑀲𑁆𑀲𑀢𑀺 𑀬𑀁 𑀯𑀤𑁂𑀣;

𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀯𑀺𑀯𑀚𑁆𑀚𑀬𑀸𑀣, 𑀥𑀫𑁆𑀫𑀸𑀦𑀼𑀬𑁄𑀕𑀜𑁆𑀘 𑀅𑀥𑀺𑀝𑁆𑀞𑀳𑀸𑀣𑀸’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀬𑀁 𑀯𑀤𑁂𑀣𑀸𑀢𑀺 𑀬𑀁 𑀢𑀼𑀫𑁆𑀳𑁂 𑀔𑁂𑀫𑁂𑀦 𑀲𑀺𑀦𑁆𑀥𑀼𑀲𑁄𑀯𑀻𑀭𑀤𑁂𑀲𑀧𑀢𑁆𑀢𑀺𑀁 𑀢𑀢𑁆𑀣 𑀘 𑀯𑀺𑀧𑀼𑀮𑀁 𑀉𑀤𑁆𑀤𑀬𑀁 𑀮𑀸𑀪𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀸 ‘‘𑀕𑀦𑁆𑀢𑁆𑀯𑀸 𑀫𑀬’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀣. 𑀲𑀩𑁆𑀩𑀁 𑀢𑀁 𑀯𑁄 𑀢𑀼𑀫𑁆𑀳𑀸𑀓𑀁 𑀢𑀣𑁂𑀯 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣 𑀦𑀺𑀓𑁆𑀓𑀗𑁆𑀔𑀸 𑀳𑁄𑀣, 𑀢𑀼𑀫𑁆𑀳𑁂 𑀧𑀦 𑀇𑀢𑁄 𑀧𑀝𑁆𑀞𑀸𑀬 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀯𑀺𑀯𑀚𑁆𑀚𑀬𑀸𑀣 𑀧𑀭𑀺𑀯𑀚𑁆𑀚𑁂𑀣. 𑀥𑀫𑁆𑀫𑀸𑀦𑀼𑀬𑁄𑀕𑀦𑁆𑀢𑀺 𑀤𑀸𑀦𑀸𑀤𑀺𑀓𑀼𑀲𑀮𑀥𑀫𑁆𑀫𑀲𑁆𑀲 𑀅𑀦𑀼𑀬𑀼𑀜𑁆𑀚𑀦𑀁. 𑀅𑀥𑀺𑀝𑁆𑀞𑀳𑀸𑀣𑀸𑀢𑀺 𑀅𑀦𑀼𑀲𑀺𑀓𑁆𑀔𑀣 𑀇𑀤𑀁 𑀲𑁂𑀭𑀻𑀲𑀓𑀫𑀳𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀬𑀁 𑀧𑀦 𑀉𑀧𑀸𑀲𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀢𑁂𑀲𑀁 𑀭𑀓𑁆𑀔𑀸𑀯𑀭𑀡𑀁 𑀓𑀸𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀢𑀲𑁆𑀲 𑀕𑀼𑀡𑀁 𑀓𑀺𑀢𑁆𑀢𑁂𑀢𑁆𑀯𑀸 𑀢𑀁 𑀢𑁂𑀲𑀁 𑀉𑀤𑁆𑀤𑀺𑀲𑀦𑁆𑀢𑁄 𑀇𑀫𑀸 𑀕𑀸𑀣𑀸𑀬𑁄 𑀆𑀳 𑁋

𑁧𑁨𑁬𑁬. ‘‘𑀉𑀧𑀸𑀲𑀓𑁄 𑀅𑀢𑁆𑀣𑀺 𑀇𑀫𑀫𑁆𑀳𑀺 𑀲𑀗𑁆𑀖𑁂, 𑀩𑀳𑀼𑀲𑁆𑀲𑀼𑀢𑁄 𑀲𑀻𑀮𑀯𑀢𑀽𑀧𑀧𑀦𑁆𑀦𑁄;

𑀲𑀤𑁆𑀥𑁄 𑀘 𑀘𑀸𑀕𑀻 𑀘 𑀲𑀼𑀧𑁂𑀲𑀮𑁄 𑀘, 𑀯𑀺𑀘𑀓𑁆𑀔𑀡𑁄 𑀲𑀦𑁆𑀢𑀼𑀲𑀺𑀢𑁄 𑀫𑀼𑀢𑀻𑀫𑀸.

𑁧𑁨𑁬𑁭. ‘‘𑀲𑀜𑁆𑀚𑀸𑀦𑀫𑀸𑀦𑁄 𑀦 𑀫𑀼𑀲𑀸 𑀪𑀡𑁂𑀬𑁆𑀬, 𑀧𑀭𑀽𑀧𑀖𑀸𑀢𑀸𑀬 𑀦 𑀘𑁂𑀢𑀬𑁂𑀬𑁆𑀬;

𑀯𑁂𑀪𑀽𑀢𑀺𑀓𑀁 𑀧𑁂𑀲𑀼𑀡𑀁 𑀦𑁄 𑀓𑀭𑁂𑀬𑁆𑀬, 𑀲𑀡𑁆𑀳𑀜𑁆𑀘 𑀯𑀸𑀘𑀁 𑀲𑀔𑀺𑀮𑀁 𑀪𑀡𑁂𑀬𑁆𑀬.

𑁧𑁨𑁬𑁮. ‘‘𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄 𑀯𑀺𑀦𑀻𑀢𑁄, 𑀅𑀧𑀸𑀧𑀓𑁄 𑀅𑀥𑀺𑀲𑀻𑀮𑁂 𑀯𑀺𑀲𑀼𑀤𑁆𑀥𑁄;

𑀲𑁄 𑀫𑀸𑀢𑀭𑀁 𑀧𑀺𑀢𑀭𑀜𑁆𑀘𑀸𑀧𑀺 𑀚𑀦𑁆𑀢𑀼, 𑀥𑀫𑁆𑀫𑁂𑀦 𑀧𑁄𑀲𑁂𑀢𑀺 𑀅𑀭𑀺𑀬𑀯𑀼𑀢𑁆𑀢𑀺.

𑁧𑁨𑁬𑁯. ‘‘𑀫𑀜𑁆𑀜𑁂 𑀲𑁄 𑀫𑀸𑀢𑀸𑀧𑀺𑀢𑀽𑀦𑀁 𑀓𑀸𑀭𑀡𑀸, 𑀪𑁄𑀕𑀸𑀦𑀺 𑀧𑀭𑀺𑀬𑁂𑀲𑀢𑀺 𑀦 𑀅𑀢𑁆𑀢𑀳𑁂𑀢𑀼;

𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀬𑁄 𑀅𑀘𑁆𑀘𑀬𑁂𑀦, 𑀦𑁂𑀓𑁆𑀔𑀫𑁆𑀫𑀧𑁄𑀡𑁄 𑀘𑀭𑀺𑀲𑁆𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁.

𑁧𑁨𑁭𑁦. ‘‘𑀉𑀚𑀽 𑀅𑀯𑀗𑁆𑀓𑁄 𑀅𑀲𑀞𑁄 𑀅𑀫𑀸𑀬𑁄, 𑀦 𑀮𑁂𑀲𑀓𑀧𑁆𑀧𑁂𑀦 𑀘 𑀯𑁄𑀳𑀭𑁂𑀬𑁆𑀬;

𑀲𑁄 𑀢𑀸𑀤𑀺𑀲𑁄 𑀲𑀼𑀓𑀢𑀓𑀫𑁆𑀫𑀓𑀸𑀭𑀻, 𑀥𑀫𑁆𑀫𑁂 𑀞𑀺𑀢𑁄 𑀓𑀺𑀦𑁆𑀢𑀺 𑀮𑀪𑁂𑀣 𑀤𑀼𑀓𑁆𑀔𑀁.

𑁧𑁨𑁭𑁧. ‘‘𑀢𑀁𑀓𑀸𑀭𑀡𑀸 𑀧𑀸𑀢𑀼𑀓𑀢𑁄𑀫𑁆𑀳𑀺 𑀅𑀢𑁆𑀢𑀦𑀸, 𑀢𑀲𑁆𑀫𑀸 𑀥𑀫𑁆𑀫𑀁 𑀧𑀲𑁆𑀲𑀣 𑀯𑀸𑀡𑀺𑀚𑀸𑀲𑁂;

𑀅𑀜𑁆𑀜𑀢𑁆𑀭 𑀢𑁂𑀦𑀺𑀳 𑀪𑀲𑁆𑀫𑀻 𑀪𑀯𑁂𑀣, 𑀅𑀦𑁆𑀥𑀸𑀓𑀼𑀮𑀸 𑀯𑀺𑀧𑁆𑀧𑀦𑀝𑁆𑀞𑀸 𑀅𑀭𑀜𑁆𑀜𑁂;

𑀢𑀁 𑀔𑀺𑀧𑁆𑀧𑀫𑀸𑀦𑁂𑀦 𑀮𑀳𑀼𑀁 𑀧𑀭𑁂𑀦, 𑀲𑀼𑀔𑁄 𑀳𑀯𑁂 𑀲𑀧𑁆𑀧𑀼𑀭𑀺𑀲𑁂𑀦 𑀲𑀗𑁆𑀕𑀫𑁄’’𑀢𑀺.

𑁧𑁨𑁬𑁬. 𑀢𑀢𑁆𑀣 𑀲𑀗𑁆𑀖𑁂𑀢𑀺 𑀲𑀢𑁆𑀢𑀲𑀫𑀽𑀳𑁂. 𑀯𑀺𑀘𑀓𑁆𑀔𑀡𑁄𑀢𑀺 𑀢𑀢𑁆𑀣 𑀢𑀢𑁆𑀣 𑀓𑀢𑁆𑀢𑀩𑁆𑀩𑀢𑀸𑀬 𑀓𑀼𑀲𑀮𑁄. 𑀲𑀦𑁆𑀢𑀼𑀲𑀺𑀢𑁄𑀢𑀺 𑀲𑀦𑁆𑀢𑀼𑀝𑁆𑀞𑁄. 𑀫𑀼𑀢𑀻𑀫𑀸𑀢𑀺 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀸𑀤𑀺𑀦𑀸 𑀇𑀥𑀮𑁄𑀓𑀧𑀭𑀮𑁄𑀓𑀳𑀺𑀢𑀸𑀦𑀁 𑀫𑀼𑀦𑀦𑀢𑁄 𑀫𑀼𑀢𑀺𑀫𑀸.

𑁧𑁨𑁬𑁭. 𑀲𑀜𑁆𑀚𑀸𑀦𑀫𑀸𑀦𑁄 𑀦 𑀫𑀼𑀲𑀸 𑀪𑀡𑁂𑀬𑁆𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀦 𑀪𑀸𑀲𑁂𑀬𑁆𑀬. 𑀯𑁂𑀪𑀽𑀢𑀺𑀓𑀦𑁆𑀢𑀺 𑀲𑀳𑀺𑀢𑀸𑀦𑀁 𑀯𑀺𑀦𑀸𑀪𑀸𑀯𑀓𑀭𑀡𑀢𑁄 ‘‘𑀯𑁂𑀪𑀽𑀢𑀺𑀓’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀧𑀺𑀲𑀼𑀡𑀁, 𑀦𑁄 𑀓𑀭𑁂𑀬𑁆𑀬 𑀦 𑀯𑀤𑁂𑀬𑁆𑀬.

𑁧𑁨𑁬𑁮. 𑀲𑀧𑁆𑀧𑀢𑀺𑀲𑁆𑀲𑁄𑀢𑀺 𑀧𑀢𑀺𑀲𑁆𑀲𑀬𑁄 𑀕𑀭𑀼𑀝𑁆𑀞𑀸𑀦𑀺𑀬𑁂𑀲𑀼 𑀦𑀺𑀯𑀸𑀢𑀯𑀼𑀢𑁆𑀢𑀺𑀓𑀢𑁆𑀢𑀸 𑀲𑁄𑀭𑀘𑁆𑀘𑀁, 𑀲𑀳 𑀧𑀢𑀺𑀲𑁆𑀲𑁂𑀦𑀸𑀢𑀺 𑀲𑀧𑁆𑀧𑀢𑀺𑀲𑁆𑀲𑁄. 𑀅𑀥𑀺𑀲𑀻𑀮𑁂𑀢𑀺 𑀉𑀧𑀸𑀲𑀓𑁂𑀦 𑀭𑀓𑁆𑀔𑀺𑀢𑀩𑁆𑀩𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬. 𑀅𑀭𑀺𑀬𑀯𑀼𑀢𑁆𑀢𑀻𑀢𑀺 𑀧𑀭𑀺𑀲𑀼𑀤𑁆𑀥𑀯𑀼𑀢𑁆𑀢𑀺.

𑁧𑁨𑁬𑁯. 𑀦𑁂𑀓𑁆𑀔𑀫𑁆𑀫𑀧𑁄𑀡𑁄𑀢𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑁄. 𑀘𑀭𑀺𑀲𑁆𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀧𑀩𑁆𑀩𑀚𑁆𑀚𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀢𑀺.

𑁧𑁨𑁭𑁦. 𑀮𑁂𑀲𑀓𑀧𑁆𑀧𑁂𑀦𑀸𑀢𑀺 𑀓𑀧𑁆𑀧𑀺𑀬𑀮𑁂𑀲𑁂𑀦. 𑀦 𑀘 𑀯𑁄𑀳𑀭𑁂𑀬𑁆𑀬𑀸𑀢𑀺 𑀫𑀸𑀬𑀸𑀲𑀸𑀞𑁂𑀬𑁆𑀬𑀯𑀲𑁂𑀦 𑀯𑀘𑀦𑀁 𑀦 𑀦𑀺𑀘𑁆𑀙𑀸𑀭𑁂𑀬𑁆𑀬. 𑀥𑀫𑁆𑀫𑁂 𑀞𑀺𑀢𑁄 𑀓𑀺𑀦𑁆𑀢𑀺 𑀮𑀪𑁂𑀣 𑀤𑀼𑀓𑁆𑀔𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀥𑀫𑁆𑀫𑁂 𑀞𑀺𑀢𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 𑀓𑀺𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦 𑀤𑀼𑀓𑁆𑀔𑀁 𑀮𑀪𑁂𑀣 𑀧𑀸𑀧𑀼𑀡𑁂𑀬𑁆𑀬.