𑁭. 𑀲𑀼𑀦𑀺𑀓𑁆𑀔𑀺𑀢𑁆𑀢𑀯𑀺𑀫𑀸𑀦𑀯𑀕𑁆𑀕𑁄

𑁧. 𑀘𑀺𑀢𑁆𑀢𑀮𑀢𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀬𑀣𑀸 𑀯𑀦𑀁 𑀘𑀺𑀢𑁆𑀢𑀮𑀢𑀁 𑀧𑀪𑀸𑀲𑀢𑀻𑀢𑀺 𑀘𑀺𑀢𑁆𑀢𑀮𑀢𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀤𑀮𑀺𑀤𑁆𑀤𑁄 𑀅𑀧𑁆𑀧𑀪𑁄𑀕𑁄 𑀧𑀭𑁂𑀲𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀢𑀺. 𑀲𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀚𑀺𑀡𑁆𑀡𑁂 𑀯𑀼𑀟𑁆𑀠𑁂 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀦𑁆𑀢𑁄 ‘‘𑀇𑀢𑁆𑀣𑀺𑀬𑁄 𑀦𑀸𑀫 𑀧𑀢𑀺𑀓𑀼𑀮𑁂 𑀞𑀺𑀢𑀸 𑀇𑀲𑁆𑀲𑀭𑀺𑀬𑀁 𑀓𑀭𑁄𑀦𑁆𑀢𑀺, 𑀲𑀲𑁆𑀲𑀼𑀲𑀲𑀼𑀭𑀸𑀦𑀁 𑀫𑀦𑀸𑀧𑀘𑀸𑀭𑀺𑀦𑀺𑀬𑁄 𑀤𑀼𑀮𑁆𑀮𑀪𑀸’’𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀘𑀺𑀢𑁆𑀢𑀤𑀼𑀓𑁆𑀔𑀁 𑀧𑀭𑀺𑀳𑀭𑀦𑁆𑀢𑁄 𑀤𑀸𑀭𑀧𑀭𑀺𑀕𑁆𑀕𑀳𑀁 𑀅𑀓𑀢𑁆𑀯𑀸 𑀲𑀬𑀫𑁂𑀯 𑀦𑁂 𑀉𑀧𑀝𑁆𑀞𑀳𑀢𑀺, 𑀲𑀻𑀮𑀸𑀦𑀺 𑀭𑀓𑁆𑀔𑀢𑀺, 𑀉𑀧𑁄𑀲𑀣𑀁 𑀉𑀧𑀯𑀲𑀢𑀺, 𑀬𑀣𑀸𑀯𑀺𑀪𑀯𑀁 𑀤𑀸𑀦𑀸𑀦𑀺 𑀤𑁂𑀢𑀺. 𑀲𑁄 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀕𑀦𑁆𑀢𑁆𑀯𑀸 𑀓𑀢𑀓𑀫𑁆𑀫𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺 𑁋

𑁧𑁧𑁧𑁪. ‘‘𑀬𑀣𑀸 𑀯𑀦𑀁 𑀘𑀺𑀢𑁆𑀢𑀮𑀢𑀁 𑀧𑀪𑀸𑀲𑀢𑀺, 𑀉𑀬𑁆𑀬𑀸𑀦𑀲𑁂𑀝𑁆𑀞𑀁 𑀢𑀺𑀤𑀲𑀸𑀦𑀫𑀼𑀢𑁆𑀢𑀫𑀁;

𑀢𑀣𑀽𑀧𑀫𑀁 𑀢𑀼𑀬𑁆𑀳𑀫𑀺𑀤𑀁 𑀯𑀺𑀫𑀸𑀦𑀁, 𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀺 𑀅𑀦𑁆𑀢𑀮𑀺𑀓𑁆𑀔𑁂.

𑁧𑁧𑁧𑁫. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁧𑁧𑁬. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁧𑁧𑁭. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑁄, 𑀤𑀮𑀺𑀤𑁆𑀤𑁄 𑀅𑀢𑀸𑀡𑁄 𑀓𑀧𑀡𑁄 𑀓𑀫𑁆𑀫𑀓𑀭𑁄 𑀅𑀳𑁄𑀲𑀺𑀁;

𑀚𑀺𑀡𑁆𑀡𑁂 𑀘 𑀫𑀸𑀢𑀸𑀧𑀺𑀢𑀭𑁄 𑀅𑀪𑀸𑀭𑀺𑀁, 𑀧𑀺𑀬𑀸 𑀘 𑀫𑁂 𑀲𑀻𑀮𑀯𑀦𑁆𑀢𑁄 𑀅𑀳𑁂𑀲𑀼𑀁;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁.

𑁧𑁧𑁧𑁮. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀲𑁄𑀧𑀺 𑀢𑀲𑁆𑀲 𑀩𑁆𑀬𑀸𑀓𑀸𑀲𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀘𑀺𑀢𑁆𑀢𑀮𑀢𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀦𑁆𑀤𑀦𑀯𑀺𑀫𑀸𑀦𑀯𑀡𑁆𑀡𑀦𑀸

𑀬𑀣𑀸 𑀯𑀦𑀁 𑀦𑀦𑁆𑀤𑀦𑀁 𑀧𑀪𑀸𑀲𑀢𑀻𑀢𑀺 𑀦𑀦𑁆𑀤𑀦𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄𑀢𑀺𑀆𑀤𑀺 𑀲𑀩𑁆𑀩𑀁 𑀅𑀦𑀦𑁆𑀢𑀭𑀯𑀺𑀫𑀸𑀦𑀲𑀤𑀺𑀲𑀁. 𑀅𑀬𑀁 𑀧𑀦 𑀤𑀸𑀭𑀧𑀭𑀺𑀕𑁆𑀕𑀳𑀁 𑀓𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀲𑀻𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑁧𑁧𑁨𑁦. 𑀬𑀣𑀸 𑀯𑀦𑀁 𑀦𑀦𑁆𑀤𑀦𑀁 𑀧𑀪𑀸𑀲𑀢𑀺, 𑀉𑀬𑁆𑀬𑀸𑀦𑀲𑁂𑀝𑁆𑀞𑀁 𑀢𑀺𑀤𑀲𑀸𑀦𑀫𑀼𑀢𑁆𑀢𑀫𑀁;

𑀢𑀣𑀽𑀧𑀫𑀁 𑀢𑀼𑀬𑁆𑀳𑀫𑀺𑀤𑀁 𑀯𑀺𑀫𑀸𑀦𑀁, 𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀺 𑀅𑀦𑁆𑀢𑀮𑀺𑀓𑁆𑀔𑁂.

𑁧𑁧𑁨𑁧. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄…𑀧𑁂…𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻𑀢𑀺.

𑁧𑁧𑁨𑁨. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁧𑁨𑁩. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑁄, 𑀤𑀮𑀺𑀤𑁆𑀤𑁄 𑀅𑀢𑀸𑀡𑁄 𑀓𑀧𑀡𑁄 𑀓𑀫𑁆𑀫𑀓𑀭𑁄 𑀅𑀳𑁄𑀲𑀺𑀁;

𑀚𑀺𑀡𑁆𑀡𑁂 𑀘 𑀫𑀸𑀢𑀸𑀧𑀺𑀢𑀭𑁄 𑀅𑀪𑀸𑀭𑀺𑀁, 𑀧𑀺𑀬𑀸 𑀘 𑀫𑁂 𑀲𑀻𑀮𑀯𑀦𑁆𑀢𑁄 𑀅𑀳𑁂𑀲𑀼𑀁;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁.

𑁧𑁧𑁨𑁪. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺. 𑀢𑀢𑁆𑀣 𑀕𑀸𑀣𑀸𑀲𑀼𑀧𑀺 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺.

𑀦𑀦𑁆𑀤𑀦𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀡𑀺𑀣𑀽𑀡𑀯𑀺𑀫𑀸𑀦𑀯𑀡𑁆𑀡𑀦𑀸

𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀦𑁆𑀢𑀺 𑀫𑀡𑀺𑀣𑀽𑀡𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀅𑀭𑀜𑁆𑀜𑀸𑀬𑀢𑀦𑁂 𑀯𑀺𑀳𑀭𑀦𑁆𑀢𑀺. 𑀢𑁂𑀲𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀕𑀫𑀦𑀫𑀕𑁆𑀕𑁂 𑀏𑀓𑁄 𑀉𑀧𑀸𑀲𑀓𑁄 𑀯𑀺𑀲𑀫𑀁 𑀲𑀫𑀁 𑀓𑀭𑁄𑀢𑀺, 𑀓𑀡𑁆𑀝𑀓𑁂 𑀦𑀻𑀳𑀭𑀢𑀺, 𑀕𑀘𑁆𑀙𑀕𑀼𑀫𑁆𑀩𑁂 𑀅𑀧𑀦𑁂𑀢𑀺, 𑀉𑀤𑀓𑀓𑀸𑀮𑁂 𑀫𑀸𑀢𑀺𑀓𑀸𑀲𑀼 𑀲𑁂𑀢𑀼𑀁 𑀩𑀦𑁆𑀥𑀢𑀺, 𑀯𑀺𑀯𑀦𑀝𑁆𑀞𑀸𑀦𑁂𑀲𑀼 𑀙𑀸𑀬𑀸𑀭𑀼𑀓𑁆𑀔𑁂 𑀭𑁄𑀧𑁂𑀢𑀺, 𑀚𑀮𑀸𑀲𑀬𑁂𑀲𑀼 𑀫𑀢𑁆𑀢𑀺𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑁂 𑀧𑀼𑀣𑀼𑀮𑀕𑀫𑁆𑀪𑀻𑀭𑁂 𑀓𑀭𑁄𑀢𑀺, 𑀢𑀺𑀢𑁆𑀣𑁂 𑀲𑀫𑁆𑀧𑀸𑀤𑁂𑀢𑀺, 𑀬𑀣𑀸𑀯𑀺𑀪𑀯𑀁 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀭𑀓𑁆𑀔𑀢𑀺. 𑀲𑁄 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺 𑁋

𑁧𑁧𑁨𑁬. ‘‘𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀁, 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺;

𑀓𑀽𑀝𑀸𑀕𑀸𑀭𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀯𑁂𑀴𑀼𑀭𑀺𑀬𑀣𑀫𑁆𑀪𑀸 𑀭𑀼𑀘𑀓𑀢𑁆𑀣𑀢𑀸 𑀲𑀼𑀪𑀸.

𑁧𑁧𑁨𑁭. ‘‘𑀢𑀢𑁆𑀣𑀘𑁆𑀙𑀲𑀺 𑀧𑀺𑀯𑀲𑀺 𑀔𑀸𑀤𑀲𑀺 𑀘, 𑀤𑀺𑀩𑁆𑀩𑀸 𑀘 𑀯𑀻𑀡𑀸 𑀧𑀯𑀤𑀦𑁆𑀢𑀺 𑀯𑀕𑁆𑀕𑀼𑀁;

𑀤𑀺𑀩𑁆𑀩𑀸 𑀭𑀲𑀸 𑀓𑀸𑀫𑀕𑀼𑀡𑁂𑀢𑁆𑀣 𑀧𑀜𑁆𑀘, 𑀦𑀸𑀭𑀺𑀬𑁄 𑀘 𑀦𑀘𑁆𑀘𑀦𑁆𑀢𑀺 𑀲𑀼𑀯𑀡𑁆𑀡𑀘𑁆𑀙𑀦𑁆𑀦𑀸.

𑁧𑁧𑁨𑁮. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀲𑁄𑀧𑀺 𑀢𑀲𑁆𑀲 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁧𑁧𑁩𑁦. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁧𑁩𑁧. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑁄, 𑀯𑀺𑀯𑀦𑁂 𑀧𑀣𑁂 𑀲𑀗𑁆𑀓𑀫𑀦𑀁 𑀅𑀓𑀸𑀲𑀺𑀁;

𑀆𑀭𑀸𑀫𑀭𑀼𑀓𑁆𑀔𑀸𑀦𑀺 𑀘 𑀭𑁄𑀧𑀬𑀺𑀲𑁆𑀲𑀁, 𑀧𑀺𑀬𑀸 𑀘 𑀫𑁂 𑀲𑀻𑀮𑀯𑀦𑁆𑀢𑁄 𑀅𑀳𑁂𑀲𑀼𑀁;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁.

𑁧𑁧𑁩𑁨. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁧𑁩𑁧. 𑀢𑀢𑁆𑀣 𑀯𑀺𑀯𑀦𑁂𑀢𑀺 𑀅𑀭𑀜𑁆𑀜𑁂. 𑀆𑀭𑀸𑀫𑀭𑀼𑀓𑁆𑀔𑀸𑀦𑀺 𑀘𑀸 𑀆𑀭𑀸𑀫𑀪𑀽𑀢𑁂 𑀭𑀼𑀓𑁆𑀔𑁂, 𑀆𑀭𑀸𑀫𑀁 𑀓𑀢𑁆𑀯𑀸 𑀢𑀢𑁆𑀣 𑀭𑀼𑀓𑁆𑀔𑁂 𑀭𑁄𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀫𑀡𑀺𑀣𑀽𑀡𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀼𑀯𑀡𑁆𑀡𑀯𑀺𑀫𑀸𑀦𑀯𑀡𑁆𑀡𑀦𑀸

𑀲𑁄𑀯𑀡𑁆𑀡𑀫𑀬𑁂 𑀧𑀩𑁆𑀩𑀢𑀲𑁆𑀫𑀺𑀦𑁆𑀢𑀺 𑀲𑀼𑀯𑀡𑁆𑀡𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀅𑀦𑁆𑀥𑀓𑀯𑀺𑀦𑁆𑀤𑁂 𑀯𑀺𑀳𑀭𑀢𑀺. 𑀢𑁂𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀢𑀲𑁆𑀲 𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀫𑀼𑀡𑁆𑀟𑀓𑀧𑀩𑁆𑀩𑀢𑁂 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀁 𑀪𑀕𑀯𑀢𑁄 𑀯𑀲𑀦𑀸𑀦𑀼𑀘𑁆𑀙𑀯𑀺𑀓𑀁 𑀕𑀦𑁆𑀥𑀓𑀼𑀝𑀺𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀪𑀕𑀯𑀦𑁆𑀢𑀁 𑀯𑀲𑀸𑀧𑁂𑀦𑁆𑀢𑁄 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺, 𑀲𑀬𑀜𑁆𑀘 𑀦𑀺𑀘𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀲𑀁𑀯𑀭𑁄 𑀳𑀼𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀓𑀫𑁆𑀫𑀸𑀦𑀼𑀪𑀸𑀯𑀲𑀁𑀲𑀽𑀘𑀓𑀁 𑀦𑀸𑀦𑀸𑀭𑀢𑀦𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑀁 𑀯𑀺𑀘𑀺𑀢𑁆𑀢𑀯𑁂𑀤𑀺𑀓𑀸𑀧𑀭𑀺𑀓𑁆𑀔𑀺𑀢𑁆𑀢𑀁 𑀯𑀺𑀯𑀺𑀥𑀯𑀺𑀧𑀼𑀮𑀸𑀮𑀗𑁆𑀓𑀸𑀭𑁄𑀧𑀲𑁄𑀪𑀺𑀢𑀁 𑀲𑀼𑀯𑀺𑀪𑀢𑁆𑀢𑀪𑀺𑀢𑁆𑀢𑀺𑀢𑁆𑀣𑀫𑁆𑀪𑀲𑁄𑀧𑀸𑀦𑀁 𑀆𑀭𑀸𑀫𑀭𑀫𑀡𑀻𑀬𑀓𑀁 𑀓𑀜𑁆𑀘𑀦𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀯𑀺𑀫𑀸𑀦𑀁 𑀉𑀧𑁆𑀧𑀚𑁆𑀚𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀤𑀺𑀲𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺 𑁋

𑁧𑁧𑁩𑁪. ‘‘𑀲𑁄𑀯𑀡𑁆𑀡𑀫𑀬𑁂 𑀧𑀩𑁆𑀩𑀢𑀲𑁆𑀫𑀺𑀁, 𑀯𑀺𑀫𑀸𑀦𑀁 𑀲𑀩𑁆𑀩𑀢𑁄𑀧𑀪𑀁;

𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀁, 𑀓𑀺𑀗𑁆𑀓𑀺𑀡𑀺𑀚𑀸𑀮𑀓𑀧𑁆𑀧𑀺𑀢𑀁.

𑁧𑁧𑁩𑁫. ‘‘𑀅𑀝𑁆𑀞𑀁𑀲𑀸 𑀲𑀼𑀓𑀢𑀸 𑀣𑀫𑁆𑀪𑀸, 𑀲𑀩𑁆𑀩𑁂 𑀯𑁂𑀴𑀼𑀭𑀺𑀬𑀸𑀫𑀬𑀸;

𑀏𑀓𑀫𑁂𑀓𑀸𑀬 𑀅𑀁𑀲𑀺𑀬𑀸, 𑀭𑀢𑀦𑀸 𑀲𑀢𑁆𑀢 𑀦𑀺𑀫𑁆𑀫𑀺𑀢𑀸.

𑁧𑁧𑁩𑁬. ‘‘𑀯𑁂𑀴𑀽𑀭𑀺𑀬𑀲𑀼𑀯𑀡𑁆𑀡𑀲𑁆𑀲, 𑀨𑀮𑀺𑀓𑀸 𑀭𑀽𑀧𑀺𑀬𑀲𑁆𑀲 𑀘;

𑀫𑀲𑀸𑀭𑀕𑀮𑁆𑀮𑀫𑀼𑀢𑁆𑀢𑀸𑀳𑀺, 𑀮𑁄𑀳𑀺𑀢𑀗𑁆𑀕𑀫𑀡𑀻𑀳𑀺 𑀘.

𑁧𑁧𑁩𑁭. ‘‘𑀘𑀺𑀢𑁆𑀭𑀸 𑀫𑀦𑁄𑀭𑀫𑀸 𑀪𑀽𑀫𑀺, 𑀦 𑀢𑀢𑁆𑀣𑀼𑀤𑁆𑀥𑀁𑀲𑀢𑀻 𑀭𑀚𑁄;

𑀕𑁄𑀧𑀸𑀦𑀲𑀻𑀕𑀡𑀸 𑀧𑀻𑀢𑀸, 𑀓𑀽𑀝𑀁 𑀤𑀸𑀭𑁂𑀦𑁆𑀢𑀺 𑀦𑀺𑀫𑁆𑀫𑀺𑀢𑀸.

𑁧𑁧𑁩𑁮. ‘‘𑀲𑁄𑀧𑀸𑀦𑀸𑀦𑀺 𑀘 𑀘𑀢𑁆𑀢𑀸𑀭𑀺, 𑀦𑀺𑀫𑁆𑀫𑀺𑀢𑀸 𑀘𑀢𑀼𑀭𑁄 𑀤𑀺𑀲𑀸;

𑀦𑀸𑀦𑀸𑀭𑀢𑀦𑀕𑀩𑁆𑀪𑁂𑀳𑀺, 𑀆𑀤𑀺𑀘𑁆𑀘𑁄𑀯 𑀯𑀺𑀭𑁄𑀘𑀢𑀺.

𑁧𑁧𑁩𑁯. ‘‘𑀯𑁂𑀤𑀺𑀬𑀸 𑀘𑀢𑀲𑁆𑀲𑁄 𑀢𑀢𑁆𑀣, 𑀯𑀺𑀪𑀢𑁆𑀢𑀸 𑀪𑀸𑀕𑀲𑁄 𑀫𑀺𑀢𑀸;

𑀤𑀤𑁆𑀤𑀮𑁆𑀮𑀫𑀸𑀦𑀸 𑀆𑀪𑀦𑁆𑀢𑀺, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸.

𑁧𑁧𑁪𑁦. ‘‘𑀢𑀲𑁆𑀫𑀺𑀁 𑀯𑀺𑀫𑀸𑀦𑁂 𑀧𑀯𑀭𑁂, 𑀤𑁂𑀯𑀧𑀼𑀢𑁆𑀢𑁄 𑀫𑀳𑀧𑁆𑀧𑀪𑁄;

𑀅𑀢𑀺𑀭𑁄𑀘𑀲𑀺 𑀯𑀡𑁆𑀡𑁂𑀦, 𑀉𑀤𑀬𑀦𑁆𑀢𑁄𑀯 𑀪𑀸𑀡𑀼𑀫𑀸.

𑁧𑁧𑁪𑁧. ‘‘𑀤𑀸𑀦𑀲𑁆𑀲 𑀢𑁂 𑀇𑀤𑀁 𑀨𑀮𑀁, 𑀅𑀣𑁄 𑀲𑀻𑀮𑀲𑁆𑀲 𑀯𑀸 𑀧𑀦;

𑀅𑀣𑁄 𑀅𑀜𑁆𑀚𑀮𑀺𑀓𑀫𑁆𑀫𑀲𑁆𑀲, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀲𑁄𑀧𑀺𑀲𑁆𑀲 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁧𑁧𑁪𑁨. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁧𑁪𑁩. ‘‘𑀅𑀳𑀁 𑀅𑀦𑁆𑀥𑀓𑀯𑀺𑀦𑁆𑀤𑀲𑁆𑀫𑀺𑀁, 𑀩𑀼𑀤𑁆𑀥𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄;

𑀯𑀺𑀳𑀸𑀭𑀁 𑀲𑀢𑁆𑀣𑀼 𑀓𑀸𑀭𑁂𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁧𑁧𑁪𑁪. ‘‘𑀢𑀢𑁆𑀣 𑀕𑀦𑁆𑀥𑀜𑁆𑀘 𑀫𑀸𑀮𑀜𑁆𑀘, 𑀧𑀘𑁆𑀘𑀬𑀜𑁆𑀘 𑀯𑀺𑀮𑁂𑀧𑀦𑀁;

𑀯𑀺𑀳𑀸𑀭𑀁 𑀲𑀢𑁆𑀣𑀼 𑀅𑀤𑀸𑀲𑀺𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀢𑁂𑀦 𑀫𑀬𑁆𑀳𑀁 𑀇𑀤𑀁 𑀮𑀤𑁆𑀥𑀁, 𑀯𑀲𑀁 𑀯𑀢𑁆𑀢𑁂𑀫𑀺 𑀦𑀦𑁆𑀤𑀦𑁂.

𑁧𑁧𑁪𑁫. ‘‘𑀦𑀦𑁆𑀤𑀦𑁂 𑀘 𑀯𑀦𑁂 𑀭𑀫𑁆𑀫𑁂, 𑀦𑀸𑀦𑀸𑀤𑀺𑀚𑀕𑀡𑀸𑀬𑀼𑀢𑁂;

𑀭𑀫𑀸𑀫𑀺 𑀦𑀘𑁆𑀘𑀕𑀻𑀢𑁂𑀳𑀺, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄’’𑀢𑀺.

𑁧𑁧𑁩𑁪. 𑀢𑀢𑁆𑀣 𑀲𑀩𑁆𑀩𑀢𑁄𑀧𑀪𑀦𑁆𑀢𑀺 𑀲𑀩𑁆𑀩𑀪𑀸𑀕𑁂𑀳𑀺 𑀧𑀪𑀸𑀲𑀦𑁆𑀢𑀁 𑀧𑀪𑀸𑀫𑀼𑀜𑁆𑀘𑀦𑀓𑀁. 𑀓𑀺𑀗𑁆𑀓𑀺𑀡𑀺𑀚𑀸𑀮𑀓𑀧𑁆𑀧𑀺𑀢𑀦𑁆𑀢𑀺 𑀓𑀧𑁆𑀧𑀺𑀢𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀁.

𑁧𑁧𑁩𑁫. 𑀲𑀩𑁆𑀩𑁂 𑀯𑁂𑀴𑀼𑀭𑀺𑀬𑀸𑀫𑀬𑀸𑀢𑀺 𑀲𑀩𑁆𑀩𑁂 𑀣𑀫𑁆𑀪𑀸 𑀯𑁂𑀴𑀼𑀭𑀺𑀬𑀫𑀡𑀺𑀫𑀬𑀸. 𑀢𑀢𑁆𑀣 𑀧𑀦 𑀏𑀓𑀫𑁂𑀓𑀸𑀬 𑀅𑀁𑀲𑀺𑀬𑀸𑀢𑀺 𑀅𑀝𑁆𑀞𑀁𑀲𑁂𑀲𑀼 𑀣𑀫𑁆𑀪𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀅𑀁𑀲𑀪𑀸𑀕𑁂. 𑀭𑀢𑀦𑀸 𑀲𑀢𑁆𑀢 𑀦𑀺𑀫𑁆𑀫𑀺𑀢𑀸𑀢𑀺 𑀲𑀢𑁆𑀢𑀭𑀢𑀦𑀓𑀫𑁆𑀫𑀦𑀺𑀫𑁆𑀫𑀺𑀢𑀸, 𑀏𑀓𑁂𑀓𑁄 𑀅𑀁𑀲𑁄 𑀲𑀢𑁆𑀢𑀭𑀢𑀦𑀫𑀬𑁄𑀢𑀺 𑀅𑀢𑁆𑀣𑁄.

𑁧𑁧𑁩𑁬. ‘‘𑀯𑁂𑀴𑀽𑀭𑀺𑀬𑀲𑀼𑀯𑀡𑁆𑀡𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀸𑀦𑀸𑀭𑀢𑀦𑀸𑀦𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀯𑁂𑀴𑀽𑀭𑀺𑀬𑀲𑀼𑀯𑀡𑁆𑀡𑀲𑁆𑀲𑀸𑀢𑀺 𑀯𑁂𑀴𑀼𑀭𑀺𑀬𑁂𑀦 𑀘 𑀲𑀼𑀯𑀡𑁆𑀡𑁂𑀦 𑀘 𑀦𑀺𑀫𑁆𑀫𑀺𑀢𑀸, 𑀘𑀺𑀢𑁆𑀭𑀸𑀢𑀺 𑀯𑀸 𑀬𑁄𑀚𑀦𑀸. 𑀓𑀭𑀡𑀢𑁆𑀣𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁. 𑀨𑀮𑀺𑀓𑀸 𑀭𑀽𑀧𑀺𑀬𑀲𑁆𑀲 𑀘𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀫𑀲𑀸𑀭𑀕𑀮𑁆𑀮𑀫𑀼𑀢𑁆𑀢𑀸𑀳𑀻𑀢𑀺 𑀓𑀩𑀭𑀫𑀡𑀻𑀳𑀺. 𑀮𑁄𑀳𑀺𑀢𑀗𑁆𑀕𑀫𑀡𑀻𑀳𑀺 𑀘𑀸𑀢𑀺 𑀭𑀢𑁆𑀢𑀫𑀡𑀻𑀳𑀺.

𑁧𑁧𑁩𑁭. 𑀦 𑀢𑀢𑁆𑀣𑀼𑀤𑁆𑀥𑀁𑀲𑀢𑀻 𑀭𑀚𑁄𑀢𑀺 𑀫𑀡𑀺𑀫𑀬𑀪𑀽𑀫𑀺𑀓𑀢𑁆𑀢𑀸 𑀦 𑀢𑀲𑁆𑀫𑀺𑀁 𑀯𑀺𑀫𑀸𑀦𑁂 𑀭𑀚𑁄 𑀉𑀕𑁆𑀕𑀘𑁆𑀙𑀢𑀺. 𑀕𑁄𑀧𑀸𑀦𑀲𑀻𑀕𑀡𑀸𑀢𑀺 𑀕𑁄𑀧𑀸𑀦𑀲𑀻𑀲𑀫𑀽𑀳𑀸. 𑀧𑀻𑀢𑀸𑀢𑀺 𑀧𑀻𑀢𑀯𑀡𑁆𑀡𑀸, 𑀲𑀼𑀯𑀡𑁆𑀡𑀫𑀬𑀸 𑀘𑁂𑀯 𑀨𑀼𑀲𑁆𑀲𑀭𑀸𑀕𑀸𑀤𑀺𑀫𑀡𑀺𑀫𑀬𑀸 𑀘𑀸𑀢𑀺 𑀅𑀢𑁆𑀣𑁄. 𑀓𑀽𑀝𑀁 𑀥𑀸𑀭𑁂𑀦𑁆𑀢𑀻𑀢𑀺 𑀲𑀢𑁆𑀢𑀭𑀢𑀦𑀫𑀬𑀁 𑀓𑀡𑁆𑀡𑀺𑀓𑀁 𑀥𑀸𑀭𑁂𑀦𑁆𑀢𑀺.

𑁧𑁧𑁩𑁮-𑁯. 𑀦𑀸𑀦𑀸𑀭𑀢𑀦𑀕𑀩𑁆𑀪𑁂𑀳𑀻𑀢𑀺 𑀦𑀸𑀦𑀸𑀭𑀢𑀦𑀫𑀬𑁂𑀳𑀺 𑀑𑀯𑀭𑀓𑁂𑀳𑀺. 𑀯𑁂𑀤𑀺𑀬𑀸𑀢𑀺 𑀯𑁂𑀤𑀺𑀓𑀸. 𑀘𑀢𑀲𑁆𑀲𑁄𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑀲𑁆𑀲𑁄. 𑀢𑁂𑀦𑀸𑀳 ‘‘𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸’’𑀢𑀺.

𑁧𑁧𑁪𑁦. 𑀫𑀳𑀧𑁆𑀧𑀪𑁄𑀢𑀺 𑀫𑀳𑀸𑀚𑀼𑀢𑀺𑀓𑁄. 𑀉𑀤𑀬𑀦𑁆𑀢𑁄𑀢𑀺 𑀉𑀕𑁆𑀕𑀘𑁆𑀙𑀦𑁆𑀢𑁄. 𑀪𑀸𑀡𑀼𑀫𑀸𑀢𑀺 𑀆𑀤𑀺𑀘𑁆𑀘𑁄.

𑁧𑁧𑁪𑁩. 𑀲𑁂𑀳𑀺 𑀧𑀸𑀡𑀺𑀪𑀻𑀢𑀺 𑀓𑀸𑀬𑀲𑀸𑀭𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑁄 𑀅𑀢𑁆𑀢𑀦𑁄 𑀧𑀸𑀡𑀻𑀳𑀺 𑀢𑀁 𑀢𑀁 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀯𑀺𑀳𑀸𑀭𑀁 𑀲𑀢𑁆𑀣𑀼 𑀓𑀸𑀭𑁂𑀲𑀺𑀦𑁆𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀲𑁂𑀳𑀺 𑀧𑀸𑀡𑀺𑀪𑀻𑀢𑀺 𑀢𑀢𑁆𑀣 𑀅𑀦𑁆𑀥𑀓𑀯𑀺𑀦𑁆𑀤𑀲𑁆𑀫𑀺𑀁 𑀕𑀦𑁆𑀥𑀜𑁆𑀘 𑀫𑀸𑀮𑀜𑁆𑀘 𑀧𑀘𑁆𑀘𑀬𑀜𑁆𑀘 𑀯𑀺𑀮𑁂𑀧𑀦𑀜𑁆𑀘 𑀧𑀽𑀚𑀸𑀯𑀲𑁂𑀦. 𑀬𑀣𑀸 𑀓𑀣𑀁? 𑀯𑀺𑀳𑀸𑀭𑀜𑁆𑀘 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀲𑀢𑁆𑀣𑀼𑀦𑁄 𑀅𑀤𑀸𑀲𑀺𑀁 𑀧𑀽𑀚𑁂𑀲𑀺𑀁 𑀦𑀺𑀬𑁆𑀬𑀸𑀤𑁂𑀲𑀺𑀁 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁧𑁪𑁪. 𑀢𑁂𑀦𑀸𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀓𑀸𑀭𑀡𑀪𑀽𑀢𑁂𑀦. 𑀫𑀬𑁆𑀳𑀦𑁆𑀢𑀺 𑀫𑀬𑀸. 𑀇𑀤𑀦𑁆𑀢𑀺 𑀇𑀤𑀁 𑀧𑀼𑀜𑁆𑀜𑀨𑀮𑀁, 𑀇𑀤𑀁 𑀯𑀸 𑀤𑀺𑀩𑁆𑀩𑀁 𑀆𑀥𑀺𑀧𑀢𑁂𑀬𑁆𑀬𑀁. 𑀢𑁂𑀦𑀸𑀳 ‘‘𑀯𑀲𑀁 𑀯𑀢𑁆𑀢𑁂𑀫𑀻’’𑀢𑀺.

𑁧𑁧𑁪𑁫. 𑀦𑀦𑁆𑀤𑀦𑁂𑀢𑀺 𑀦𑀦𑁆𑀤𑀺𑀬𑀸 𑀤𑀺𑀩𑁆𑀩𑀲𑀫𑀺𑀤𑁆𑀥𑀺𑀬𑀸 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂 𑀇𑀫𑀲𑁆𑀫𑀺𑀁 𑀤𑁂𑀯𑀮𑁄𑀓𑁂, 𑀢𑀢𑁆𑀣𑀸𑀧𑀺 𑀯𑀺𑀲𑁂𑀲𑀢𑁄 𑀦𑀦𑁆𑀤𑀦𑁂 𑀯𑀦𑁂 𑀭𑀫𑁆𑀫𑁂, 𑀏𑀯𑀁 𑀭𑀫𑀡𑀻𑀬𑁂 𑀇𑀫𑀲𑁆𑀫𑀺𑀁 𑀦𑀦𑁆𑀤𑀦𑁂 𑀯𑀦𑁂 𑀭𑀫𑀸𑀫𑀻𑀢𑀺 𑀬𑁄𑀚𑀦𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀤𑁂𑀯𑀢𑀸𑀬 𑀅𑀢𑁆𑀢𑀦𑁄 𑀧𑀼𑀜𑁆𑀜𑀓𑀫𑁆𑀫𑁂 𑀆𑀯𑀺𑀓𑀢𑁂 𑀣𑁂𑀭𑁄 𑀲𑀧𑀭𑀺𑀯𑀸𑀭𑀲𑁆𑀲 𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀪𑀕𑀯𑀢𑁄 𑀢𑀫𑀢𑁆𑀣𑀁 𑀦𑀺𑀯𑁂𑀤𑁂𑀲𑀺. 𑀪𑀕𑀯𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀲𑀼𑀯𑀡𑁆𑀡𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀫𑁆𑀩𑀯𑀺𑀫𑀸𑀦𑀯𑀡𑁆𑀡𑀦𑀸

𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀦𑁆𑀢𑀺 𑀅𑀫𑁆𑀩𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑁄 𑀤𑀼𑀕𑁆𑀕𑀢𑀧𑀼𑀭𑀺𑀲𑁄 𑀧𑀭𑁂𑀲𑀁 𑀪𑀢𑁆𑀢𑀯𑁂𑀢𑀦𑀪𑀢𑁄 𑀳𑀼𑀢𑁆𑀯𑀸 𑀅𑀫𑁆𑀩𑀯𑀦𑀁 𑀭𑀓𑁆𑀔𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀕𑀺𑀫𑁆𑀳𑀲𑀫𑀬𑁂 𑀲𑀽𑀭𑀺𑀬𑀸𑀢𑀧𑀲𑀦𑁆𑀢𑀢𑁆𑀢𑁂 𑀉𑀡𑁆𑀳𑀯𑀸𑀮𑀺𑀓𑀸𑀦𑀺𑀧𑁆𑀧𑀻𑀴𑀺𑀢𑁂 𑀯𑀺𑀧𑁆𑀨𑀦𑁆𑀤𑀫𑀸𑀦𑀫𑀭𑀻𑀘𑀺𑀚𑀸𑀮𑀯𑀺𑀢𑁆𑀣𑀢𑁂 𑀪𑀽𑀫𑀺𑀧𑁆𑀧𑀤𑁂𑀲𑁂 𑀢𑀲𑁆𑀲 𑀅𑀫𑁆𑀩𑀸𑀭𑀸𑀫𑀲𑁆𑀲 𑀅𑀯𑀺𑀤𑀽𑀭𑁂𑀦 𑀫𑀕𑁆𑀕𑁂𑀦 𑀲𑁂𑀤𑀸𑀕𑀢𑁂𑀦 𑀕𑀢𑁆𑀢𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀕𑀸𑀭𑀯𑀩𑀳𑀼𑀫𑀸𑀦𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 ‘‘𑀫𑀳𑀸 𑀅𑀬𑀁, 𑀪𑀦𑁆𑀢𑁂, 𑀖𑀫𑁆𑀫𑀧𑀭𑀺𑀴𑀸𑀳𑁄, 𑀅𑀢𑀺𑀯𑀺𑀬 𑀧𑀭𑀺𑀲𑁆𑀲𑀦𑁆𑀢𑀭𑀽𑀧𑁄 𑀯𑀺𑀬 𑀤𑀺𑀲𑁆𑀲𑀢𑀺, 𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑁄 𑀇𑀫𑀁 𑀅𑀫𑁆𑀩𑀸𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀅𑀤𑁆𑀥𑀸𑀦𑀧𑀭𑀺𑀲𑁆𑀲𑀫𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀕𑀘𑁆𑀙𑀣 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀣𑁂𑀭𑁄 𑀯𑀺𑀲𑁂𑀲𑀢𑁄 𑀢𑀲𑁆𑀲 𑀘𑀺𑀢𑁆𑀢𑀧𑁆𑀧𑀲𑀸𑀤𑀁 𑀧𑀭𑀺𑀩𑁆𑀭𑀽𑀳𑁂𑀢𑀼𑀓𑀸𑀫𑁄 𑀢𑀁 𑀆𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀅𑀫𑁆𑀩𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀦𑀺𑀲𑀻𑀤𑀺.

𑀧𑀼𑀦 𑀲𑁄 𑀧𑀼𑀭𑀺𑀲𑁄 𑀆𑀳 ‘‘𑀲𑀘𑁂, 𑀪𑀦𑁆𑀢𑁂, 𑀦𑁆𑀳𑀸𑀬𑀺𑀢𑀼𑀓𑀸𑀫𑀢𑁆𑀣, 𑀅𑀳𑀁 𑀇𑀢𑁄 𑀓𑀽𑀧𑀢𑁄 𑀉𑀤𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀼𑀫𑁆𑀳𑁂 𑀦𑁆𑀳𑀸𑀧𑁂𑀲𑁆𑀲𑀸𑀫𑀺, 𑀧𑀸𑀦𑀻𑀬𑀜𑁆𑀘 𑀤𑀲𑁆𑀲𑀸𑀫𑀻’’𑀢𑀺. 𑀣𑁂𑀭𑁄𑀧𑀺 𑀅𑀥𑀺𑀯𑀸𑀲𑁂𑀲𑀺 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀲𑁄 𑀓𑀽𑀧𑀢𑁄 𑀉𑀤𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀣𑁂𑀭𑀁 𑀦𑁆𑀳𑀸𑀧𑁂𑀲𑀺, 𑀦𑁆𑀳𑀸𑀧𑁂𑀢𑁆𑀯𑀸 𑀘 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀧𑀸𑀦𑀻𑀬𑀁 𑀉𑀧𑀦𑁂𑀲𑀺. 𑀣𑁂𑀭𑁄 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀤𑀓𑀤𑀸𑀦𑁂 𑀘𑁂𑀯 𑀦𑁆𑀳𑀸𑀧𑀦𑁂 𑀘 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀲𑁄 𑀧𑀼𑀭𑀺𑀲𑁄 ‘‘𑀖𑀫𑁆𑀫𑀸𑀪𑀺𑀢𑀢𑁆𑀢𑀲𑁆𑀲 𑀯𑀢 𑀣𑁂𑀭𑀲𑁆𑀲 𑀖𑀫𑁆𑀫𑀧𑀭𑀺𑀴𑀸𑀳𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀲𑀺𑀁, 𑀩𑀳𑀼𑀁 𑀯𑀢 𑀫𑀬𑀸 𑀧𑀼𑀜𑁆𑀜𑀁 𑀧𑀲𑀼𑀢’’𑀦𑁆𑀢𑀺 𑀉𑀴𑀸𑀭𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀚𑁆𑀚𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀓𑀢𑀧𑀼𑀜𑁆𑀜𑀁 𑀧𑀼𑀘𑁆𑀙𑀺.

𑁧𑁧𑁪𑁬. ‘‘𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀁, 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺;

𑀓𑀽𑀝𑀸𑀕𑀸𑀭𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀯𑁂𑀴𑀼𑀭𑀺𑀬𑀣𑀫𑁆𑀪𑀸 𑀭𑀼𑀘𑀓𑀢𑁆𑀣𑀢𑀸 𑀲𑀼𑀪𑀸.

𑁧𑁧𑁪𑁭. ‘‘𑀢𑀢𑁆𑀣𑀘𑁆𑀙𑀲𑀺 𑀧𑀺𑀯𑀲𑀺 𑀔𑀸𑀤𑀲𑀺 𑀘, 𑀤𑀺𑀩𑁆𑀩𑀸 𑀘 𑀯𑀻𑀡𑀸 𑀧𑀯𑀤𑀦𑁆𑀢𑀺 𑀯𑀕𑁆𑀕𑀼𑀁;

𑀤𑀺𑀩𑁆𑀩𑀸 𑀭𑀲𑀸 𑀓𑀸𑀫𑀕𑀼𑀡𑁂𑀢𑁆𑀣 𑀧𑀜𑁆𑀘, 𑀦𑀸𑀭𑀺𑀬𑁄 𑀘 𑀦𑀘𑁆𑀘𑀦𑁆𑀢𑀺 𑀲𑀼𑀯𑀡𑁆𑀡𑀙𑀦𑁆𑀦𑀸.

𑁧𑁧𑁪𑁮. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁧𑁫𑁦. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂…

𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁧𑁫𑁧. ‘‘𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂, 𑀧𑀢𑀧𑀦𑁆𑀢𑁂 𑀤𑀺𑀯𑀗𑁆𑀓𑀭𑁂;

𑀧𑀭𑁂𑀲𑀁 𑀪𑀢𑀓𑁄 𑀧𑁄𑀲𑁄, 𑀅𑀫𑁆𑀩𑀸𑀭𑀸𑀫𑀫𑀲𑀺𑀜𑁆𑀘𑀢𑀺.

𑁧𑁧𑁫𑁨. ‘‘𑀅𑀣 𑀢𑁂𑀦𑀸𑀕𑀫𑀸 𑀪𑀺𑀓𑁆𑀔𑀼, 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀓𑀺𑀮𑀦𑁆𑀢𑀭𑀽𑀧𑁄 𑀓𑀸𑀬𑁂𑀦, 𑀅𑀓𑀺𑀮𑀦𑁆𑀢𑁄𑀯 𑀘𑁂𑀢𑀲𑀸.

𑁧𑁧𑁫𑁩. ‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀆𑀬𑀦𑁆𑀢𑀁, 𑀅𑀯𑁄𑀘𑀁 𑀅𑀫𑁆𑀩𑀲𑀺𑀜𑁆𑀘𑀓𑁄;

𑀲𑀸𑀥𑀼 𑀢𑀁 𑀪𑀦𑁆𑀢𑁂 𑀦𑁆𑀳𑀸𑀧𑁂𑀬𑁆𑀬𑀁, 𑀬𑀁 𑀫𑀫𑀲𑁆𑀲 𑀲𑀼𑀔𑀸𑀯𑀳𑀁.

𑁧𑁧𑁫𑁪. ‘‘𑀢𑀲𑁆𑀲 𑀫𑁂 𑀅𑀦𑀼𑀓𑀫𑁆𑀧𑀸𑀬, 𑀦𑀺𑀓𑁆𑀔𑀺𑀧𑀺 𑀧𑀢𑁆𑀢𑀘𑀻𑀯𑀭𑀁;

𑀦𑀺𑀲𑀻𑀤𑀺 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀙𑀸𑀬𑀸𑀬 𑀏𑀓𑀘𑀻𑀯𑀭𑁄.

𑁧𑁧𑁫𑁫. ‘‘𑀢𑀜𑁆𑀘 𑀅𑀘𑁆𑀙𑁂𑀦 𑀯𑀸𑀭𑀺𑀦𑀸, 𑀧𑀲𑀦𑁆𑀦𑀫𑀸𑀦𑀲𑁄 𑀦𑀭𑁄;

𑀦𑁆𑀳𑀸𑀧𑀬𑀻 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀙𑀸𑀬𑀸𑀬 𑀏𑀓𑀘𑀻𑀯𑀭𑀁.

𑁧𑁧𑁫𑁬. ‘‘𑀅𑀫𑁆𑀩𑁄 𑀘 𑀲𑀺𑀢𑁆𑀢𑁄 𑀲𑀫𑀡𑁄 𑀘 𑀦𑁆𑀳𑀸𑀧𑀺𑀢𑁄,

𑀫𑀬𑀸 𑀘 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓𑀁;

𑀇𑀢𑀺 𑀲𑁄 𑀧𑀻𑀢𑀺𑀬𑀸 𑀓𑀸𑀬𑀁, 𑀲𑀩𑁆𑀩𑀁 𑀨𑀭𑀢𑀺 𑀅𑀢𑁆𑀢𑀦𑁄.

𑁧𑁧𑁫𑁭. ‘‘𑀢𑀤𑁂𑀯 𑀏𑀢𑁆𑀢𑀓𑀁 𑀓𑀫𑁆𑀫𑀁, 𑀅𑀓𑀸𑀲𑀺𑀁 𑀢𑀸𑀬 𑀚𑀸𑀢𑀺𑀬𑀸;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀉𑀧𑀧𑀦𑁆𑀦𑁄𑀫𑁆𑀳𑀺 𑀦𑀦𑁆𑀤𑀦𑀁.

𑁧𑁧𑁫𑁮. ‘‘𑀦𑀦𑁆𑀤𑀦𑁂 𑀘 𑀯𑀦𑁂 𑀭𑀫𑁆𑀫𑁂, 𑀦𑀸𑀦𑀸𑀤𑀺𑀚𑀕𑀡𑀸𑀬𑀼𑀢𑁂;

𑀭𑀫𑀸𑀫𑀺 𑀦𑀘𑁆𑀘𑀕𑀻𑀢𑁂𑀳𑀺, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄’’𑀢𑀺. 𑁋

𑀲𑁄𑀧𑀺 𑀢𑀲𑁆𑀲 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺.

𑁧𑁧𑁫𑁧. 𑀢𑀢𑁆𑀣 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂𑀢𑀺 𑀆𑀲𑀸𑀴𑁆𑀳𑀺𑀫𑀸𑀲𑁂. 𑀧𑀢𑀧𑀦𑁆𑀢𑁂𑀢𑀺 𑀅𑀢𑀺𑀯𑀺𑀬 𑀤𑀺𑀧𑁆𑀧𑀦𑁆𑀢𑁂, 𑀲𑀩𑁆𑀩𑀲𑁄 𑀉𑀡𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀤𑀺𑀯𑀗𑁆𑀓𑀭𑁂𑀢𑀺 𑀤𑀺𑀯𑀸𑀓𑀭𑁂, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀲𑀺𑀜𑁆𑀘𑀢𑀻𑀢𑀺 𑀲𑀺𑀜𑁆𑀘𑀢𑀺, -𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁, 𑀲𑀺𑀜𑁆𑀘𑀢𑀺 𑀅𑀫𑁆𑀩𑀭𑀼𑀓𑁆𑀔𑀫𑀽𑀮𑁂𑀲𑀼 𑀥𑀼𑀯𑀁 𑀚𑀮𑀲𑁂𑀓𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀲𑀺𑀜𑁆𑀘𑀣𑀸’’𑀢𑀺 𑀘 𑀧𑀸𑀞𑁄, 𑀲𑀺𑀜𑁆𑀘𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. ‘‘𑀅𑀲𑀺𑀜𑁆𑀘𑀳’’𑀦𑁆𑀢𑀺 𑀘 𑀧𑀞𑀦𑁆𑀢𑀺, 𑀧𑀭𑁂𑀲𑀁 𑀪𑀢𑀓𑁄 𑀧𑁄𑀲𑁄 𑀳𑀼𑀢𑁆𑀯𑀸 𑀢𑀤𑀸 𑀅𑀫𑁆𑀩𑀸𑀭𑀸𑀫𑀁 𑀅𑀲𑀺𑀜𑁆𑀘𑀺𑀁 𑀅𑀳𑀦𑁆𑀢𑀺 𑀅𑀢𑁆𑀣𑁄.

𑁧𑁧𑁫𑁨. 𑀢𑁂𑀦𑀸𑀢𑀺 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀲𑁄 𑀅𑀫𑁆𑀩𑀸𑀭𑀸𑀫𑁄, 𑀢𑁂𑀦 𑀅𑀕𑀫𑀸 𑀅𑀕𑀜𑁆𑀙𑀺. 𑀅𑀓𑀺𑀮𑀦𑁆𑀢𑁄𑀯 𑀘𑁂𑀢𑀲𑀸𑀢𑀺 𑀘𑁂𑀢𑁄𑀤𑀼𑀓𑁆𑀔𑀲𑁆𑀲 𑀫𑀕𑁆𑀕𑁂𑀦𑁂𑀯 𑀧𑀳𑀻𑀦𑀢𑁆𑀢𑀸 𑀘𑁂𑀢𑀲𑀸 𑀅𑀓𑀺𑀮𑀦𑁆𑀢𑁄𑀧𑀺 𑀲𑀫𑀸𑀦𑁄 𑀓𑀺𑀮𑀦𑁆𑀢𑀼𑀭𑀽𑀧𑁄 𑀓𑀸𑀬𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀅𑀕𑀫𑀸𑀢𑀺 𑀬𑁄𑀚𑀦𑀸.

𑁧𑁧𑁫𑁩-𑁪. 𑀅𑀯𑁄𑀘𑀁 𑀅𑀳𑀁 𑀢𑀤𑀸 𑀅𑀫𑁆𑀩𑀲𑀺𑀜𑁆𑀘𑀓𑁄 𑀳𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀏𑀓𑀘𑀻𑀯𑀭𑁄𑀢𑀺 𑀦𑁆𑀳𑀸𑀬𑀺𑀢𑀼𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁧𑁫𑁬. 𑀇𑀢𑀻𑀢𑀺 𑀏𑀯𑀁 ‘‘𑀅𑀫𑁆𑀩𑁄 𑀘 𑀲𑀺𑀢𑁆𑀢𑁄, 𑀲𑀫𑀡𑁄 𑀘 𑀦𑁆𑀳𑀸𑀧𑀺𑀢𑁄, 𑀫𑀬𑀸 𑀘 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓𑀁, 𑀏𑀓𑁂𑀦𑁂𑀯 𑀧𑀬𑁄𑀕𑁂𑀦 𑀢𑀺𑀯𑀺𑀥𑁄𑀧𑀺 𑀅𑀢𑁆𑀣𑁄 𑀲𑀸𑀥𑀺𑀢𑁄’’𑀢𑀺 𑀇𑀫𑀺𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀧𑀻𑀢𑀺𑀬𑀸 𑀲𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀲𑀩𑁆𑀩𑀁 𑀓𑀸𑀬𑀁 𑀨𑀭𑀢𑀺, 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀓𑀭𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀢𑀻𑀢𑀢𑁆𑀣𑁂 𑀘𑁂𑀢𑀁 𑀯𑀢𑁆𑀢𑀫𑀸𑀦𑀯𑀘𑀦𑀁, 𑀨𑀭𑀻𑀢𑀺 𑀅𑀢𑁆𑀣𑁄.

𑁧𑁧𑁫𑁭. 𑀢𑀤𑁂𑀯 𑀏𑀢𑁆𑀢𑀓𑀁 𑀓𑀫𑁆𑀫𑀦𑁆𑀢𑀺 𑀢𑀁 𑀏𑀢𑁆𑀢𑀓𑀁 𑀏𑀯𑀁 𑀧𑀸𑀦𑀻𑀬𑀤𑀸𑀦𑀫𑀢𑁆𑀢𑀓𑀁 𑀓𑀫𑁆𑀫𑀁 𑀅𑀓𑀸𑀲𑀺𑀁, 𑀢𑀸𑀬 𑀢𑀲𑁆𑀲𑀁 𑀚𑀸𑀢𑀺𑀬𑀁 𑀅𑀜𑁆𑀜𑀁 𑀦𑀸𑀦𑀼𑀲𑁆𑀲𑀭𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀫𑁆𑀩𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀕𑁄𑀧𑀸𑀮𑀯𑀺𑀫𑀸𑀦𑀯𑀡𑁆𑀡𑀦𑀸

𑀤𑀺𑀲𑁆𑀯𑀸𑀦 𑀤𑁂𑀯𑀁 𑀧𑀝𑀺𑀧𑀼𑀘𑁆𑀙𑀺 𑀪𑀺𑀓𑁆𑀔𑀽𑀢𑀺 𑀕𑁄𑀧𑀸𑀮𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀭𑀸𑀚𑀕𑀳𑀯𑀸𑀲𑀻 𑀅𑀜𑁆𑀜𑀢𑀭𑁄 𑀕𑁄𑀧𑀸𑀮𑀓𑁄 𑀧𑀸𑀢𑀭𑀸𑀲𑀢𑁆𑀣𑀸𑀬 𑀧𑀺𑀮𑁄𑀢𑀺𑀓𑀸𑀬 𑀧𑀼𑀝𑀩𑀤𑁆𑀥𑀁 𑀓𑀼𑀫𑁆𑀫𑀸𑀲𑀁 𑀕𑀳𑁂𑀢𑁆𑀯𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀯𑀻𑀦𑀁 𑀘𑀭𑀡𑀝𑁆𑀞𑀸𑀦𑀪𑀽𑀢𑀁 𑀕𑁄𑀘𑀭𑀪𑀽𑀫𑀺𑀁 𑀲𑀫𑁆𑀧𑀸𑀧𑀼𑀡𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 ‘‘𑀅𑀬𑀁 𑀇𑀤𑀸𑀦𑁂𑀯 𑀓𑀸𑀮𑀁 𑀓𑀭𑀺𑀲𑁆𑀲𑀢𑀺, 𑀫𑀬𑁆𑀳𑀜𑁆𑀘 𑀓𑀼𑀫𑁆𑀫𑀸𑀲𑀁 𑀤𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀘 𑀜𑀢𑁆𑀯𑀸 𑀢𑀲𑁆𑀲 𑀲𑀫𑀻𑀧𑀁 𑀅𑀕𑀫𑀸𑀲𑀺. 𑀲𑁄 𑀯𑁂𑀮𑀁 𑀑𑀮𑁄𑀓𑁂𑀢𑁆𑀯𑀸 𑀣𑁂𑀭𑀲𑁆𑀲 𑀓𑀼𑀫𑁆𑀫𑀸𑀲𑀁 𑀤𑀸𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀕𑀸𑀯𑀺𑀬𑁄 𑀫𑀸𑀲𑀓𑁆𑀔𑁂𑀢𑁆𑀢𑀁 𑀧𑀯𑀺𑀲𑀦𑁆𑀢𑀺. 𑀅𑀣 𑀲𑁄 𑀕𑁄𑀧𑀸𑀮𑁄 𑀘𑀺𑀦𑁆𑀢𑁂𑀲𑀺 ‘‘𑀓𑀺𑀁 𑀦𑀼 𑀔𑁄 𑀣𑁂𑀭𑀲𑁆𑀲 𑀓𑀼𑀫𑁆𑀫𑀸𑀲𑀁 𑀤𑀤𑁂𑀬𑁆𑀬𑀁, 𑀉𑀤𑀸𑀳𑀼 𑀕𑀸𑀯𑀺𑀬𑁄 𑀫𑀸𑀲𑀓𑁆𑀔𑁂𑀢𑁆𑀢𑀢𑁄 𑀦𑀻𑀳𑀭𑁂𑀬𑁆𑀬’’𑀦𑁆𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀫𑀸𑀲𑀲𑀸𑀫𑀺𑀓𑀸 𑀫𑀁 𑀬𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀓𑀭𑁄𑀦𑁆𑀢𑀼, 𑀣𑁂𑀭𑁂 𑀧𑀦 𑀕𑀢𑁂 𑀓𑀼𑀫𑁆𑀫𑀸𑀲𑀤𑀸𑀦𑀦𑁆𑀢𑀭𑀸𑀬𑁄 𑀫𑁂 𑀲𑀺𑀬𑀸, 𑀳𑀦𑁆𑀤𑀸𑀳𑀁 𑀧𑀞𑀫𑀁 𑀅𑀬𑁆𑀬𑀲𑁆𑀲 𑀓𑀼𑀫𑁆𑀫𑀸𑀲𑀁 𑀤𑀲𑁆𑀲𑀸𑀫𑀻’’𑀢𑀺 𑀢𑀁 𑀣𑁂𑀭𑀲𑁆𑀲 𑀉𑀧𑀦𑁂𑀲𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀣𑁂𑀭𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬.

𑀅𑀣 𑀦𑀁 𑀕𑀸𑀯𑀺𑀬𑁄 𑀦𑀺𑀯𑀢𑁆𑀢𑁂𑀢𑀼𑀁 𑀧𑀭𑀺𑀲𑁆𑀲𑀬𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀯𑁂𑀕𑁂𑀦 𑀉𑀧𑀥𑀸𑀯𑀦𑁆𑀢𑀁 𑀧𑀸𑀤𑁂𑀦 𑀨𑀼𑀝𑁆𑀞𑁄 𑀆𑀲𑀻𑀯𑀺𑀲𑁄 𑀟𑀁𑀲𑀺. 𑀣𑁂𑀭𑁄𑀧𑀺 𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄 𑀢𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀆𑀭𑀪𑀺. 𑀕𑁄𑀧𑀸𑀮𑀓𑁄𑀧𑀺 𑀕𑀸𑀯𑀺𑀬𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀆𑀕𑀢𑁄 𑀣𑁂𑀭𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀸𑀯𑀤𑁂𑀯𑀲𑁆𑀲 𑀲𑀓𑀮𑀲𑀭𑀻𑀭𑀁 𑀯𑀺𑀲𑀁 𑀅𑀚𑁆𑀛𑁄𑀢𑁆𑀣𑀭𑀺. 𑀫𑀼𑀳𑀼𑀢𑁆𑀢𑀫𑁂𑀯 𑀯𑁂𑀕𑁂 𑀫𑀼𑀤𑁆𑀥𑀧𑀢𑁆𑀢𑁂 𑀓𑀸𑀮𑀫𑀓𑀸𑀲𑀺, 𑀓𑀸𑀮𑀓𑀢𑁄 𑀘 𑀢𑀸𑀯𑀢𑀺𑀁𑀲𑁂𑀲𑀼 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑀺𑀲𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺 𑁋

𑁧𑁧𑁫𑁯. ‘‘𑀤𑀺𑀲𑁆𑀯𑀸𑀦 𑀤𑁂𑀯𑀁 𑀧𑀝𑀺𑀧𑀼𑀘𑁆𑀙𑀺 𑀪𑀺𑀓𑁆𑀔𑀼, 𑀉𑀘𑁆𑀘𑁂 𑀯𑀺𑀫𑀸𑀦𑀫𑁆𑀳𑀺 𑀘𑀺𑀭𑀝𑁆𑀞𑀺𑀢𑀺𑀓𑁂;

𑀆𑀫𑀼𑀢𑁆𑀢𑀳𑀢𑁆𑀣𑀸𑀪𑀭𑀡𑀁 𑀬𑀲𑀲𑁆𑀲𑀺𑀁, 𑀤𑀺𑀩𑁆𑀩𑁂 𑀯𑀺𑀫𑀸𑀦𑀫𑁆𑀳𑀺 𑀬𑀣𑀸𑀧𑀺 𑀘𑀦𑁆𑀤𑀺𑀫𑀸.

𑁧𑁧𑁬𑁦. ‘‘𑀅𑀮𑀗𑁆𑀓𑀢𑁄 𑀫𑀮𑁆𑀬𑀥𑀭𑁄 𑀲𑀼𑀯𑀢𑁆𑀣𑁄, 𑀲𑀼𑀓𑀼𑀡𑁆𑀟𑀮𑀻 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼;

𑀆𑀫𑀼𑀢𑁆𑀢𑀳𑀢𑁆𑀣𑀸𑀪𑀭𑀡𑁄 𑀬𑀲𑀲𑁆𑀲𑀻, 𑀤𑀺𑀩𑁆𑀩𑁂 𑀯𑀺𑀫𑀸𑀦𑀫𑁆𑀳𑀺 𑀬𑀣𑀸𑀧𑀺 𑀘𑀦𑁆𑀤𑀺𑀫𑀸.

𑁧𑁧𑁬𑁧. ‘‘𑀤𑀺𑀩𑁆𑀩𑀸 𑀘 𑀯𑀻𑀡𑀸 𑀧𑀯𑀤𑀦𑁆𑀢𑀺 𑀯𑀕𑁆𑀕𑀼𑀁; 𑀅𑀝𑁆𑀞𑀝𑁆𑀞𑀓𑀸 𑀲𑀺𑀓𑁆𑀔𑀺𑀢𑀸 𑀲𑀸𑀥𑀼𑀭𑀽𑀧𑀸;

𑀤𑀺𑀩𑁆𑀩𑀸 𑀘 𑀓𑀜𑁆𑀜𑀸 𑀢𑀺𑀤𑀲𑀘𑀭𑀸 𑀉𑀴𑀸𑀭𑀸, 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺 𑀧𑀫𑁄𑀤𑀬𑀦𑁆𑀢𑀺.

𑁧𑁧𑁬𑁨. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀲𑁄𑀧𑀺 𑀢𑀲𑁆𑀲 𑀩𑁆𑀬𑀸𑀓𑀸𑀲𑀺 𑁋

𑁧𑁧𑁬𑁩. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂…𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁧𑁬𑁪. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑁄, 𑀲𑀗𑁆𑀕𑀫𑁆𑀫 𑀭𑀓𑁆𑀔𑀺𑀲𑁆𑀲𑀁 𑀧𑀭𑁂𑀲𑀁 𑀥𑁂𑀦𑀼𑀬𑁄;

𑀢𑀢𑁄 𑀘 𑀆𑀕𑀸 𑀲𑀫𑀡𑁄 𑀫𑀫𑀦𑁆𑀢𑀺𑀓𑁂, 𑀕𑀸𑀯𑁄 𑀘 𑀫𑀸𑀲𑁂 𑀅𑀕𑀫𑀁𑀲𑀼 𑀔𑀸𑀤𑀺𑀢𑀼𑀁.

𑁧𑁧𑁬𑁫. ‘‘𑀤𑁆𑀯𑀬𑀚𑁆𑀚 𑀓𑀺𑀘𑁆𑀘𑀁 𑀉𑀪𑀬𑀜𑁆𑀘 𑀓𑀸𑀭𑀺𑀬𑀁, 𑀇𑀘𑁆𑀘𑁂𑀯𑀳𑀁 𑀪𑀦𑁆𑀢𑁂 𑀢𑀤𑀸 𑀯𑀺𑀘𑀺𑀦𑁆𑀢𑀬𑀺𑀁;

𑀢𑀢𑁄 𑀘 𑀲𑀜𑁆𑀜𑀁 𑀧𑀝𑀺𑀮𑀤𑁆𑀥 𑀬𑁄𑀦𑀺𑀲𑁄, ‘𑀤𑀤𑀸𑀫𑀺 𑀪𑀦𑁆𑀢𑁂’𑀢𑀺 𑀔𑀺𑀧𑀺𑀁 𑀅𑀦𑀦𑁆𑀢𑀓𑀁.

𑁧𑁧𑁬𑁬. ‘‘𑀲𑁄 𑀫𑀸𑀲𑀔𑁂𑀢𑁆𑀢𑀁 𑀢𑀼𑀭𑀺𑀢𑁄 𑀅𑀯𑀸𑀲𑀭𑀺𑀁, 𑀧𑀼𑀭𑀸 𑀅𑀬𑀁 𑀪𑀜𑁆𑀚𑀢𑀺 𑀬𑀲𑁆𑀲𑀺𑀤𑀁 𑀥𑀦𑀁;

𑀢𑀢𑁄 𑀘 𑀓𑀡𑁆𑀳𑁄 𑀉𑀭𑀕𑁄 𑀫𑀳𑀸𑀯𑀺𑀲𑁄, 𑀅𑀟𑀁𑀲𑀺 𑀧𑀸𑀤𑁂 𑀢𑀼𑀭𑀺𑀢𑀲𑁆𑀲 𑀫𑁂 𑀲𑀢𑁄.

𑁧𑁧𑁬𑁭. ‘‘𑀲𑁆𑀯𑀸𑀳𑀁 𑀅𑀝𑁆𑀝𑁄𑀫𑁆𑀳𑀺 𑀤𑀼𑀓𑁆𑀔𑁂𑀦 𑀧𑀻𑀴𑀺𑀢𑁄, 𑀪𑀺𑀓𑁆𑀔𑀼 𑀘 𑀢𑀁 𑀲𑀸𑀫𑀁 𑀫𑀼𑀜𑁆𑀘𑀺𑀢𑁆𑀯𑀸𑀦𑀦𑁆𑀢𑀓𑀁;

𑀅𑀳𑀸𑀲𑀺 𑀓𑀼𑀫𑁆𑀫𑀸𑀲𑀁 𑀫𑀫𑀸𑀦𑀼𑀓𑀫𑁆𑀧𑀬𑀸, 𑀢𑀢𑁄 𑀘𑀼𑀢𑁄 𑀓𑀸𑀮𑀓𑀢𑁄𑀫𑁆𑀳𑀺 𑀤𑁂𑀯𑀢𑀸.

𑁧𑁧𑁬𑁮. ‘‘𑀢𑀤𑁂𑀯 𑀓𑀫𑁆𑀫𑀁 𑀓𑀼𑀲𑀮𑀁 𑀓𑀢𑀁 𑀫𑀬𑀸, 𑀲𑀼𑀔𑀜𑁆𑀘 𑀓𑀫𑁆𑀫𑀁 𑀅𑀦𑀼𑀪𑁄𑀫𑀺 𑀅𑀢𑁆𑀢𑀦𑀸;

𑀢𑀬𑀸 𑀳𑀺 𑀪𑀦𑁆𑀢𑁂 𑀅𑀦𑀼𑀓𑀫𑁆𑀧𑀺𑀢𑁄 𑀪𑀼𑀲𑀁, 𑀓𑀢𑀜𑁆𑀜𑀼𑀢𑀸𑀬 𑀅𑀪𑀺𑀯𑀸𑀤𑀬𑀸𑀫𑀺 𑀢𑀁.

𑁧𑁧𑁬𑁯. ‘‘𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀘, 𑀅𑀜𑁆𑀜𑁄 𑀫𑀼𑀦𑀺 𑀦𑀢𑁆𑀣𑀺 𑀢𑀬𑀸𑀦𑀼𑀓𑀫𑁆𑀧𑀓𑁄;

𑀢𑀬𑀸 𑀳𑀺 𑀪𑀦𑁆𑀢𑁂 𑀅𑀦𑀼𑀓𑀫𑁆𑀧𑀺𑀢𑁄 𑀪𑀼𑀲𑀁, 𑀓𑀢𑀜𑁆𑀜𑀼𑀢𑀸𑀬 𑀅𑀪𑀺𑀯𑀸𑀤𑀬𑀸𑀫𑀺 𑀢𑀁.

𑁧𑁧𑁭𑁦. ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀧𑀭𑀲𑁆𑀫𑀺𑀁 𑀯𑀸 𑀧𑀦, 𑀅𑀜𑁆𑀜𑁄 𑀫𑀼𑀦𑀻 𑀦𑀢𑁆𑀣𑀺 𑀢𑀬𑀸𑀦𑀼𑀓𑀫𑁆𑀧𑀓𑁄;

𑀢𑀬𑀸 𑀳𑀺 𑀪𑀦𑁆𑀢𑁂 𑀅𑀦𑀼𑀓𑀫𑁆𑀧𑀺𑀢𑁄 𑀪𑀼𑀲𑀁, 𑀓𑀢𑀜𑁆𑀜𑀼𑀢𑀸𑀬 𑀅𑀪𑀺𑀯𑀸𑀤𑀬𑀸𑀫𑀺 𑀢’’𑀦𑁆𑀢𑀺.

𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀅𑀢𑁆𑀢𑀦𑀸 𑀘 𑀤𑁂𑀯𑀢𑀸𑀬 𑀘 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀢𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀫𑀢𑁆𑀣𑀁 𑀧𑀘𑁆𑀘𑀦𑀼𑀪𑀸𑀲𑀺𑀢𑁆𑀯𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 ‘‘𑀤𑀺𑀲𑁆𑀯𑀸𑀦 𑀤𑁂𑀯𑀁 𑀧𑀝𑀺𑀧𑀼𑀘𑁆𑀙𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀫𑀸𑀳.

𑁧𑁧𑁫𑁯. 𑀢𑀢𑁆𑀣 𑀤𑁂𑀯𑀦𑁆𑀢𑀺 𑀕𑁄𑀧𑀸𑀮𑀤𑁂𑀯𑀧𑀼𑀢𑁆𑀢𑀁. 𑀪𑀺𑀓𑁆𑀔𑀽𑀢𑀺 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 𑀯𑀤𑀢𑀺. 𑀲𑁄 𑀳𑀺 𑀲𑀩𑁆𑀩𑀲𑁄 𑀪𑀺𑀦𑁆𑀦𑀓𑀺𑀮𑁂𑀲𑀢𑀸𑀬 𑀪𑀺𑀓𑁆𑀔𑀼. 𑀯𑀺𑀫𑀸𑀦𑀲𑁆𑀲 𑀩𑀳𑀼𑀓𑀸𑀮𑀸𑀯𑀝𑁆𑀞𑀸𑀬𑀺𑀢𑀸𑀬 𑀓𑀧𑁆𑀧𑀝𑁆𑀞𑀺𑀢𑀺𑀓𑀢𑀸𑀬 𑀏𑀯 𑀯𑀸 ‘‘𑀘𑀺𑀭𑀝𑁆𑀞𑀺𑀢𑀺𑀓𑁂’’𑀢𑀺 𑀯𑀼𑀢𑁆𑀢𑀁, ‘‘𑀘𑀺𑀭𑀝𑁆𑀞𑀺𑀢𑀺𑀓’’𑀦𑁆𑀢𑀺𑀧𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀢𑀜𑁆𑀳𑀺 ‘‘𑀤𑁂𑀯’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀲𑁄𑀧𑀺 𑀳𑀺 𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀥𑀺𑀓𑀸 𑀢𑀺𑀲𑁆𑀲𑁄 𑀯𑀲𑁆𑀲𑀓𑁄𑀝𑀺𑀬𑁄 𑀢𑀢𑁆𑀣 𑀅𑀯𑀝𑁆𑀞𑀸𑀦𑀢𑁄 ‘‘𑀘𑀺𑀭𑀝𑁆𑀞𑀺𑀢𑀺𑀓𑁂’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀬𑀣𑀸𑀧𑀺 𑀘𑀦𑁆𑀤𑀺𑀫𑀸𑀢𑀺 𑀬𑀣𑀸 𑀘𑀦𑁆𑀤𑀺𑀫𑀸 𑀤𑁂𑀯𑀧𑀼𑀢𑁆𑀢𑁄 𑀓𑀦𑁆𑀢𑀲𑀻𑀢𑀮𑀫𑀦𑁄𑀳𑀭𑀓𑀺𑀭𑀡𑀚𑀸𑀮𑀲𑀫𑀼𑀚𑁆𑀚𑀮𑁂 𑀅𑀢𑁆𑀢𑀦𑁄 𑀤𑀺𑀩𑁆𑀩𑁂 𑀯𑀺𑀫𑀸𑀦𑀫𑁆𑀳𑀺 𑀯𑀺𑀭𑁄𑀘𑀢𑀺, 𑀏𑀯𑀁 𑀯𑀺𑀭𑁄𑀘𑀫𑀸𑀦𑀦𑁆𑀢𑀺 𑀯𑀘𑀦𑀲𑁂𑀲𑀸.

𑁧𑁧𑁬𑁦. 𑀅𑀮𑀗𑁆𑀓𑀢𑁄𑀢𑀺𑀆𑀤𑀺 𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀸𑀓𑀸𑀭𑀤𑀲𑁆𑀲𑀦𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁧𑁧𑁬𑁪. 𑀲𑀗𑁆𑀕𑀫𑁆𑀫𑀸𑀢𑀺 𑀲𑀗𑁆𑀕𑀫𑁂𑀢𑁆𑀯𑀸, 𑀲𑀗𑁆𑀕𑀫𑁆𑀫𑀸𑀢𑀺 𑀯𑀸 𑀲𑀗𑁆𑀕𑀳𑁂𑀢𑁆𑀯𑀸. 𑀳𑁂𑀢𑁆𑀯𑀢𑁆𑀣𑁄𑀧𑀺 𑀳𑀺 𑀇𑀥 𑀅𑀦𑁆𑀢𑁄𑀦𑀻𑀢𑁄, 𑀩𑀳𑀽 𑀏𑀓𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀆𑀕𑀸𑀢𑀺 𑀆𑀕𑀜𑁆𑀙𑀺. 𑀫𑀸𑀲𑁂𑀢𑀺 𑀫𑀸𑀲𑀲𑀲𑁆𑀲𑀸𑀦𑀺.

𑁧𑁧𑁬𑁫. 𑀤𑁆𑀯𑀬𑀚𑁆𑀚𑀸𑀢𑀺 𑀤𑁆𑀯𑀬𑀁 𑀅𑀚𑁆𑀚 𑀏𑀢𑀭𑀳𑀺 𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁. 𑀉𑀪𑀬𑀜𑁆𑀘 𑀓𑀸𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀲𑀜𑁆𑀜𑀦𑁆𑀢𑀺 𑀥𑀫𑁆𑀫𑀲𑀜𑁆𑀜𑀁. 𑀢𑁂𑀦𑀸𑀳 ‘‘𑀬𑁄𑀦𑀺𑀲𑁄’’𑀢𑀺 𑀧𑀝𑀺𑀮𑀤𑁆𑀥𑀸𑀢𑀺 𑀧𑀝𑀺𑀮𑀪𑀺𑀢𑁆𑀯𑀸. 𑀔𑀺𑀧𑀺𑀦𑁆𑀢𑀺 𑀧𑀦𑀺𑀕𑁆𑀕𑀸𑀳𑀸𑀧𑀦𑀯𑀲𑁂𑀦 𑀳𑀢𑁆𑀣𑁂 𑀔𑀺𑀧𑀺𑀁. 𑀅𑀦𑀦𑁆𑀢𑀓𑀦𑁆𑀢𑀺 𑀦𑀦𑁆𑀢𑀓𑀁 𑀓𑀼𑀫𑁆𑀫𑀸𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀁 𑀧𑀺𑀮𑁄𑀢𑀺𑀓𑀁. 𑀅-𑀓𑀸𑀭𑁄 𑀘𑁂𑀢𑁆𑀣 𑀦𑀺𑀧𑀸𑀢𑀫𑀢𑁆𑀢𑀁.

𑁧𑁧𑁬𑁬. 𑀲𑁄𑀢𑀺 𑀲𑁄 𑀅𑀳𑀁. 𑀢𑀼𑀭𑀺𑀢𑁄𑀢𑀺 𑀢𑀼𑀭𑀺𑀢𑁄 𑀲𑀫𑁆𑀪𑀫𑀦𑁆𑀢𑁄. 𑀅𑀯𑀸𑀲𑀭𑀺𑀦𑁆𑀢𑀺 𑀉𑀧𑀕𑀘𑁆𑀙𑀺, 𑀧𑀸𑀯𑀺𑀲𑀺𑀁 𑀯𑀸. 𑀧𑀼𑀭𑀸 𑀅𑀬𑀁 𑀪𑀜𑁆𑀚𑀢𑀺 𑀬𑀲𑁆𑀲𑀺𑀤𑀁 𑀥𑀦𑀦𑁆𑀢𑀺 𑀬𑀲𑁆𑀲 𑀔𑁂𑀢𑁆𑀢𑀲𑀸𑀫𑀺𑀓𑀲𑁆𑀲 𑀇𑀤𑀁 𑀫𑀸𑀲𑀲𑀲𑁆𑀲𑀁 𑀥𑀦𑀁, 𑀢𑀁 𑀅𑀬𑀁 𑀕𑁄𑀕𑀡𑁄 𑀪𑀜𑁆𑀚𑀢𑀺 𑀧𑀼𑀭𑀸 𑀢𑀲𑁆𑀲 𑀪𑀜𑁆𑀚𑀦𑀢𑁄, 𑀆𑀫𑀤𑁆𑀤𑀦𑀢𑁄 𑀧𑀼𑀭𑁂𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀢𑀢𑁆𑀣. 𑀢𑀼𑀭𑀺𑀢𑀲𑁆𑀲 𑀫𑁂 𑀲𑀢𑁄𑀢𑀺 𑀲𑀫𑁆𑀪𑀫𑀦𑁆𑀢𑀲𑁆𑀲 𑀫𑁂 𑀲𑀫𑀸𑀦𑀲𑁆𑀲, 𑀲𑀳𑀲𑀸 𑀕𑀫𑀦𑁂𑀦 𑀫𑀕𑁆𑀕𑁂 𑀓𑀡𑁆𑀳𑀲𑀧𑁆𑀧𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀕𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁧𑁬𑁭. 𑀅𑀝𑁆𑀝𑁄𑀫𑁆𑀳𑀺 𑀤𑀼𑀓𑁆𑀔𑁂𑀦 𑀧𑀻𑀴𑀺𑀢𑁄𑀢𑀺 𑀢𑁂𑀦 𑀆𑀲𑀻𑀯𑀺𑀲𑀟𑀁𑀲𑀦𑁂𑀦 𑀅𑀝𑁆𑀝𑁄 𑀅𑀝𑁆𑀝𑀺𑀢𑁄 𑀉𑀧𑀤𑁆𑀤𑀼𑀢𑁄 𑀫𑀭𑀡𑀤𑀼𑀓𑁆𑀔𑁂𑀦 𑀩𑀸𑀥𑀺𑀢𑁄 𑀪𑀯𑀸𑀫𑀺. 𑀅𑀳𑀸𑀲𑀻𑀢𑀺 𑀅𑀚𑁆𑀛𑁄𑀳𑀭𑀺, 𑀧𑀭𑀺𑀪𑀼𑀜𑁆𑀚𑀻𑀢𑀺 𑀅𑀢𑁆𑀣𑁄. 𑀢𑀢𑁄 𑀘𑀼𑀢𑁄 𑀓𑀸𑀮𑀓𑀢𑁄𑀫𑁆𑀳𑀺 𑀤𑁂𑀯𑀢𑀸𑀢𑀺 𑀢𑀢𑁄 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀢𑁄 𑀘𑀼𑀢𑁄 𑀫𑀭𑀡𑀓𑀸𑀮𑀧𑁆𑀧𑀢𑁆𑀢𑀺𑀬𑀸, 𑀢𑀢𑁆𑀣 𑀯𑀸 𑀆𑀬𑀼𑀲𑀗𑁆𑀔𑀸𑀭𑀲𑁆𑀲 𑀔𑁂𑀧𑀦𑀲𑀗𑁆𑀔𑀸𑀢𑀲𑁆𑀲 𑀓𑀸𑀮𑀲𑁆𑀲 𑀓𑀢𑀢𑁆𑀢𑀸 𑀓𑀸𑀮𑀓𑀢𑁄, 𑀢𑀤𑀦𑀦𑁆𑀢𑀭𑀫𑁂𑀯 𑀘 𑀅𑀫𑁆𑀳𑀺 𑀤𑁂𑀯𑀢𑀸 𑀤𑁂𑀯𑀢𑁆𑀢𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀤𑁂𑀯𑀢𑀸 𑀳𑁄𑀫𑀻𑀢𑀺 𑀅𑀢𑁆𑀣𑁄.

𑁧𑁧𑁬𑁯. 𑀢𑀬𑀸𑀢𑀺 𑀢𑀬𑀸 𑀲𑀤𑀺𑀲𑁄 𑀅𑀜𑁆𑀜𑁄 𑀫𑀼𑀦𑀺 𑀫𑁄𑀦𑁂𑀬𑁆𑀬𑀕𑀼𑀡𑀬𑀼𑀢𑁆𑀢𑁄 𑀇𑀲𑀺 𑀦𑀢𑁆𑀣𑀺. 𑀢𑀬𑀸𑀢𑀺 𑀯𑀸 𑀦𑀺𑀲𑁆𑀲𑀓𑁆𑀓𑁂 𑀇𑀤𑀁 𑀓𑀭𑀡𑀯𑀘𑀦𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀕𑁄𑀧𑀸𑀮𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.