𑁮. 𑀅𑀦𑁂𑀓𑀯𑀡𑁆𑀡𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀦𑁂𑀓𑀯𑀡𑁆𑀡𑀁 𑀤𑀭𑀲𑁄𑀓𑀦𑀸𑀲𑀦𑀦𑁆𑀢𑀺 𑀅𑀦𑁂𑀓𑀯𑀡𑁆𑀡𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀅𑀦𑁂𑀓𑀯𑀡𑁆𑀡𑁄 𑀤𑁂𑀯𑀧𑀼𑀢𑁆𑀢𑁄 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀕𑀸𑀭𑀯𑀩𑀳𑀼𑀫𑀸𑀦𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑁋

𑁧𑁧𑁯𑁯. ‘‘𑀅𑀦𑁂𑀓𑀯𑀡𑁆𑀡𑀁 𑀤𑀭𑀲𑁄𑀓𑀦𑀸𑀲𑀦𑀁, 𑀯𑀺𑀫𑀸𑀦𑀫𑀸𑀭𑀼𑀬𑁆𑀳 𑀅𑀦𑁂𑀓𑀘𑀺𑀢𑁆𑀢𑀁;

𑀧𑀭𑀺𑀯𑀸𑀭𑀺𑀢𑁄 𑀅𑀘𑁆𑀙𑀭𑀸𑀲𑀗𑁆𑀕𑀡𑁂𑀦, 𑀲𑀼𑀦𑀺𑀫𑁆𑀫𑀺𑀢𑁄 𑀪𑀽𑀢𑀧𑀢𑀻𑀯 𑀫𑁄𑀤𑀲𑀺.

𑁧𑁨𑁦𑁦. ‘‘𑀲𑀫𑀲𑁆𑀲𑀫𑁄 𑀦𑀢𑁆𑀣𑀺 𑀓𑀼𑀢𑁄 𑀧𑀦𑀼𑀢𑁆𑀢𑀭𑁄, 𑀬𑀲𑁂𑀦 𑀧𑀼𑀜𑁆𑀜𑁂𑀦 𑀘 𑀇𑀤𑁆𑀥𑀺𑀬𑀸 𑀘;

𑀲𑀩𑁆𑀩𑁂 𑀘 𑀤𑁂𑀯𑀸 𑀢𑀺𑀤𑀲𑀕𑀡𑀸 𑀲𑀫𑁂𑀘𑁆𑀘, 𑀢𑀁 𑀢𑀁 𑀦𑀫𑀲𑁆𑀲𑀦𑁆𑀢𑀺 𑀲𑀲𑀺𑀁𑀯 𑀤𑁂𑀯𑀸;

𑀇𑀫𑀸 𑀘 𑀢𑁂 𑀅𑀘𑁆𑀙𑀭𑀸𑀬𑁄 𑀲𑀫𑀦𑁆𑀢𑀢𑁄, 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺 𑀧𑀫𑁄𑀤𑀬𑀦𑁆𑀢𑀺.

𑁧𑁨𑁦𑁧. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄,

𑀫𑀦𑀼𑀲𑁆𑀲𑀪𑀽𑀢𑁄 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑁄,

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀅𑀥𑀺𑀕𑀢𑀲𑀫𑁆𑀧𑀢𑁆𑀢𑀺𑀓𑀺𑀢𑁆𑀢𑀦𑀫𑀼𑀔𑁂𑀦 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑁋

𑁧𑁨𑁦𑁨. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂…𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋

𑀯𑀼𑀢𑁆𑀢𑀁. 𑀲𑁄𑀧𑀺 𑁋

𑁧𑁨𑁦𑁩. ‘‘𑀅𑀳𑀁 𑀪𑀤𑀦𑁆𑀢𑁂 𑀅𑀳𑀼𑀯𑀸𑀲𑀺 𑀧𑀼𑀩𑁆𑀩𑁂, 𑀲𑀼𑀫𑁂𑀥𑀦𑀸𑀫𑀲𑁆𑀲 𑀚𑀺𑀦𑀲𑁆𑀲 𑀲𑀸𑀯𑀓𑁄;

𑀧𑀼𑀣𑀼𑀚𑁆𑀚𑀦𑁄 𑀅𑀦𑀦𑀼𑀩𑁄𑀥𑁄𑀳𑀫𑀲𑁆𑀫𑀺, 𑀲𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀧𑀭𑀺𑀩𑁆𑀩𑀚𑀺𑀲𑁆𑀲𑀳𑀁.

𑁧𑁨𑁦𑁪. ‘‘𑀲𑁄𑀳𑀁 𑀲𑀼𑀫𑁂𑀥𑀲𑁆𑀲 𑀚𑀺𑀦𑀲𑁆𑀲 𑀲𑀢𑁆𑀣𑀼𑀦𑁄, 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲𑁄𑀖𑀢𑀺𑀡𑁆𑀡𑀲𑁆𑀲 𑀢𑀸𑀤𑀺𑀦𑁄;

𑀭𑀢𑀦𑀼𑀘𑁆𑀘𑀬𑀁 𑀳𑁂𑀫𑀚𑀸𑀮𑁂𑀦 𑀙𑀦𑁆𑀦𑀁, 𑀯𑀦𑁆𑀤𑀺𑀢𑁆𑀯𑀸 𑀣𑀽𑀧𑀲𑁆𑀫𑀺𑀁 𑀫𑀦𑀁 𑀧𑀲𑀸𑀤𑀬𑀺𑀁.

𑁧𑁨𑁦𑁫. ‘‘𑀦 𑀫𑀸𑀲𑀺 𑀤𑀸𑀦𑀁 𑀦 𑀘 𑀫𑀢𑁆𑀣𑀺 𑀤𑀸𑀢𑀼𑀁, 𑀧𑀭𑁂 𑀘 𑀔𑁄 𑀢𑀢𑁆𑀣 𑀲𑀫𑀸𑀤𑀧𑁂𑀲𑀺𑀁;

𑀧𑀽𑀚𑁂𑀣 𑀦𑀁 𑀧𑀽𑀚𑀦𑀻𑀬𑀲𑁆𑀲 𑀥𑀸𑀢𑀼𑀁, 𑀏𑀯𑀁 𑀓𑀺𑀭 𑀲𑀕𑁆𑀕𑀫𑀺𑀢𑁄 𑀕𑀫𑀺𑀲𑁆𑀲𑀣.

𑁧𑁨𑁦𑁬. ‘‘𑀢𑀤𑁂𑀯 𑀓𑀫𑁆𑀫𑀁 𑀓𑀼𑀲𑀮𑀁 𑀓𑀢𑀁 𑀫𑀬𑀸,

𑀲𑀼𑀔𑀜𑁆𑀘 𑀤𑀺𑀩𑁆𑀩𑀁 𑀅𑀦𑀼𑀪𑁄𑀫𑀺 𑀅𑀢𑁆𑀢𑀦𑀸;

𑀫𑁄𑀤𑀸𑀫𑀳𑀁 𑀢𑀺𑀤𑀲𑀕𑀡𑀲𑁆𑀲 𑀫𑀚𑁆𑀛𑁂,

𑀦 𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀔𑀬𑀫𑁆𑀧𑀺 𑀅𑀚𑁆𑀛𑀕’’𑀦𑁆𑀢𑀺. 𑁋 𑀓𑀣𑁂𑀲𑀺;

𑀇𑀢𑁄 𑀓𑀺𑀭 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑁂 𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸 𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀫𑀦𑀼𑀲𑁆𑀲𑁂𑀳𑀺 𑀘 𑀪𑀕𑀯𑀢𑁄 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀭𑀢𑀦𑀘𑁂𑀢𑀺𑀬𑁂 𑀓𑀢𑁂 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀢𑀸𑀬 𑀓𑀼𑀓𑁆𑀓𑀼𑀘𑁆𑀘𑀓𑁄 𑀳𑀼𑀢𑁆𑀯𑀸 𑀉𑀧𑁆𑀧𑀩𑁆𑀩𑀚𑀺. 𑀉𑀧𑁆𑀧𑀩𑁆𑀩𑀚𑀺𑀢𑁄 𑀘 𑀲𑀁𑀯𑁂𑀕𑀩𑀳𑀼𑀮𑀢𑀸𑀬 𑀥𑀫𑁆𑀫𑀘𑁆𑀙𑀦𑁆𑀤𑀯𑀦𑁆𑀢𑀢𑀸𑀬 𑀘 𑀘𑁂𑀢𑀺𑀬𑀗𑁆𑀕𑀡𑁂 𑀲𑀫𑁆𑀫𑀚𑁆𑀚𑀦𑀧𑀭𑀺𑀪𑀡𑁆𑀟𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀦𑀺𑀘𑁆𑀘𑀲𑀻𑀮𑀉𑀧𑁄𑀲𑀣𑀲𑀻𑀮𑀸𑀦𑀺 𑀭𑀓𑁆𑀔𑀦𑁆𑀢𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀅𑀜𑁆𑀜𑁂 𑀘 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀲𑀫𑀸𑀤𑀧𑁂𑀦𑁆𑀢𑁄 𑀯𑀺𑀘𑀭𑀺. 𑀲𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀓𑀸𑀮𑀓𑀢𑁄 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀉𑀴𑀸𑀭𑀪𑀸𑀯𑁂𑀦 𑀫𑀳𑁂𑀲𑀓𑁆𑀔𑁄 𑀫𑀳𑀸𑀦𑀼𑀪𑀸𑀯𑁄 𑀲𑀓𑁆𑀓𑀸𑀤𑀻𑀳𑀺 𑀤𑁂𑀯𑀢𑀸𑀳𑀺 𑀲𑀓𑁆𑀓𑀢𑀧𑀽𑀚𑀺𑀢𑁄 𑀳𑀼𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀧𑀭𑀸𑀧𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺, ‘‘𑀅𑀦𑁂𑀓𑀯𑀡𑁆𑀡𑁄’’𑀢𑀺 𑀦𑀁 𑀤𑁂𑀯𑀢𑀸 𑀲𑀜𑁆𑀚𑀸𑀦𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀣 𑀦𑀁 𑀅𑀦𑁂𑀓𑀯𑀡𑁆𑀡𑁄 𑀤𑁂𑀯𑀧𑀼𑀢𑁆𑀢𑁄…𑀧𑁂… 𑀦 𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀔𑀬𑀫𑁆𑀧𑀺 𑀅𑀚𑁆𑀛𑀕𑀦𑁆𑀢𑀺 𑀓𑀣𑁂𑀲𑀻’’𑀢𑀺.

𑁧𑁧𑁯𑁯. 𑀢𑀢𑁆𑀣 𑀅𑀦𑁂𑀓𑀯𑀡𑁆𑀡𑀦𑁆𑀢𑀺 𑀦𑀻𑀮𑀧𑀻𑀢𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑀯𑀡𑁆𑀡𑀢𑀸𑀬 𑀅𑀦𑀦𑁆𑀢𑀭𑀯𑀺𑀫𑀸𑀦𑀸𑀤𑀻𑀦𑀁 𑀯𑀺𑀯𑀺𑀥𑀲𑀡𑁆𑀞𑀸𑀦𑀢𑀸𑀬 𑀘 𑀦𑀸𑀦𑀸𑀯𑀺𑀥𑀯𑀡𑁆𑀡𑀁. 𑀤𑀭𑀲𑁄𑀓𑀦𑀸𑀲𑀦𑀦𑁆𑀢𑀺 𑀲𑀻𑀢𑀮𑀪𑀸𑀯𑁂𑀦 𑀤𑀭𑀣𑀧𑀭𑀺𑀴𑀸𑀳𑀸𑀦𑀁 𑀯𑀺𑀦𑁄𑀤𑀦𑀢𑁄 𑀫𑀦𑀼𑀜𑁆𑀜𑀢𑀸𑀬 𑀤𑀲𑁆𑀲𑀦𑀻𑀬𑀢𑀸𑀬 𑀘 𑀲𑁄𑀓𑀲𑁆𑀲 𑀅𑀦𑁄𑀓𑀸𑀲𑀢𑁄 𑀤𑀭𑀲𑁄𑀓𑀦𑀸𑀲𑀦𑀁. 𑀅𑀦𑁂𑀓𑀘𑀺𑀢𑁆𑀢𑀦𑁆𑀢𑀺 𑀦𑀸𑀦𑀸𑀯𑀺𑀥𑀘𑀺𑀢𑁆𑀢𑀭𑀽𑀧𑀁. 𑀲𑀼𑀦𑀺𑀫𑁆𑀫𑀺𑀢𑁄 𑀪𑀽𑀢𑀧𑀢𑀻𑀯𑀸𑀢𑀺 𑀢𑀸𑀯𑀢𑀺𑀁𑀲𑀓𑀸𑀬𑀺𑀓𑁄𑀧𑀺 𑀉𑀴𑀸𑀭𑀤𑀺𑀩𑁆𑀩𑀪𑁄𑀕𑀢𑀸𑀬 𑀲𑀼𑀦𑀺𑀫𑁆𑀫𑀺𑀢𑀤𑁂𑀯𑀭𑀸𑀚𑀸 𑀯𑀺𑀬 𑀫𑁄𑀤𑀲𑀺 𑀢𑀼𑀲𑁆𑀲𑀲𑀺 𑀅𑀪𑀺𑀭𑀫𑀲𑀺.

𑁧𑁨𑁦𑁦. 𑀲𑀫𑀲𑁆𑀲𑀫𑁄𑀢𑀺 𑀲𑀫𑁄 𑀏𑀯 𑀳𑀼𑀢𑁆𑀯𑀸 𑀲𑀫𑁄, 𑀦𑀺𑀩𑁆𑀩𑀭𑀺𑀬𑀸𑀬𑁂𑀦 𑀲𑀤𑀺𑀲𑁄 𑀢𑁂 𑀢𑀼𑀬𑁆𑀳𑀁 𑀦𑀢𑁆𑀣𑀺, 𑀓𑀼𑀢𑁄 𑀧𑀦 𑀓𑁂𑀦 𑀓𑀸𑀭𑀡𑁂𑀦 𑀉𑀢𑁆𑀢𑀭𑀺 𑀅𑀥𑀺𑀓𑁄 𑀓𑁄 𑀦𑀸𑀫 𑀲𑀺𑀬𑀸. 𑀓𑁂𑀦 𑀧𑀦 𑀲𑀫𑀢𑀸 𑀉𑀢𑁆𑀢𑀭𑀺𑀢𑀭𑀢𑀸 𑀘𑀸𑀢𑀺 𑀆𑀳 ‘‘𑀬𑀲𑁂𑀦 𑀧𑀼𑀜𑁆𑀜𑁂𑀦 𑀘 𑀇𑀤𑁆𑀥𑀺𑀬𑀸 𑀘𑀸’’𑀢𑀺. 𑀢𑀢𑁆𑀣 𑀬𑀲𑁂𑀦𑀸𑀢𑀺 𑀧𑀭𑀺𑀯𑀸𑀭𑁂𑀦. 𑀇𑀤𑁆𑀥𑀺𑀬𑀸𑀢𑀺 𑀆𑀦𑀼𑀪𑀸𑀯𑁂𑀦. 𑀬𑀲𑁂𑀦𑀸𑀢𑀺 𑀯𑀸 𑀇𑀲𑁆𑀲𑀭𑀺𑀬𑁂𑀦, 𑀇𑀤𑁆𑀥𑀺𑀬𑀸𑀢𑀺 𑀤𑁂𑀯𑀺𑀤𑁆𑀥𑀺𑀬𑀸. 𑀬𑀲𑁂𑀦𑀸𑀢𑀺 𑀯𑀸 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀬𑀸, 𑀇𑀤𑁆𑀥𑀺𑀬𑀸𑀢𑀺 𑀬𑀣𑀺𑀘𑁆𑀙𑀺 𑀢𑀲𑁆𑀲 𑀓𑀸𑀫𑀕𑀼𑀡𑀲𑁆𑀲 𑀇𑀚𑁆𑀛𑀦𑁂𑀦. 𑀬𑀲𑁂𑀦𑀸𑀢𑀺 𑀯𑀸 𑀓𑀺𑀢𑁆𑀢𑀺𑀖𑁄𑀲𑁂𑀦, 𑀇𑀤𑁆𑀥𑀺𑀬𑀸𑀢𑀺 𑀲𑀫𑀺𑀤𑁆𑀥𑀺𑀬𑀸. 𑀧𑀼𑀜𑁆𑀜𑁂𑀦𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀸𑀯𑀲𑀺𑀝𑁆𑀞𑀧𑀼𑀜𑁆𑀜𑀨𑀮𑁂𑀦, 𑀧𑀼𑀜𑁆𑀜𑀓𑀫𑁆𑀫𑁂𑀦𑁂𑀯 𑀯𑀸.

‘‘𑀲𑀩𑁆𑀩𑁂 𑀘 𑀤𑁂𑀯𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀕𑀳𑀺𑀢𑀫𑀢𑁆𑀣𑀁 ‘‘𑀢𑀺𑀤𑀲𑀕𑀡𑀸’’𑀢𑀺 𑀇𑀫𑀺𑀦𑀸 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀓𑀘𑁆𑀘𑀲𑁆𑀲 𑀧𑀘𑁆𑀘𑁂𑀓𑀁 𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑀸𑀧𑀺 𑀧𑀫𑀼𑀤𑀺𑀢𑀸 𑀦 𑀓𑀭𑁄𑀦𑁆𑀢𑀺, 𑀦 𑀏𑀯𑀫𑁂𑀢𑀲𑁆𑀲. 𑀏𑀢𑀲𑁆𑀲 𑀧𑀦 𑀧𑀫𑀼𑀤𑀺𑀢𑀸𑀧𑀺 𑀓𑀭𑁄𑀦𑁆𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁂𑀘𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀢𑀦𑁆𑀢𑀺 𑀢𑀁 𑀢𑁆𑀯𑀁. 𑀲𑀲𑀺𑀁𑀯 𑀤𑁂𑀯𑀸𑀢𑀺 𑀬𑀣𑀸 𑀦𑀸𑀫 𑀲𑀼𑀓𑁆𑀓𑀧𑀓𑁆𑀔𑀧𑀸𑀝𑀺𑀧𑀤𑀺𑀬𑀁 𑀤𑀺𑀲𑁆𑀲𑀫𑀸𑀦𑀁 𑀲𑀲𑀺𑀁 𑀘𑀦𑁆𑀤𑀁 𑀫𑀦𑀼𑀲𑁆𑀲𑀸 𑀤𑁂𑀯𑀸 𑀘 𑀆𑀤𑀭𑀚𑀸𑀢𑀸 𑀦𑀫𑀲𑁆𑀲𑀦𑁆𑀢𑀺, 𑀏𑀯𑀁 𑀢𑀁 𑀲𑀩𑁆𑀩𑁂𑀧𑀺 𑀢𑀺𑀤𑀲𑀕𑀡𑀸 𑀦𑀫𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁨𑁦𑁩. 𑀪𑀤𑀦𑁆𑀢𑁂𑀢𑀺 𑀣𑁂𑀭𑀁 𑀕𑀸𑀭𑀯𑀩𑀳𑀼𑀫𑀸𑀦𑁂𑀦 𑀲𑀫𑀼𑀤𑀸𑀘𑀭𑀢𑀺. 𑀅𑀳𑀼𑀯𑀸𑀲𑀺𑀦𑁆𑀢𑀺 𑀅𑀳𑁄𑀲𑀺𑀁. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀺𑀫𑀚𑀸𑀢𑀺𑀬𑀁. 𑀲𑀼𑀫𑁂𑀥𑀦𑀸𑀫𑀲𑁆𑀲 𑀚𑀺𑀦𑀲𑁆𑀲 𑀲𑀸𑀯𑀓𑁄𑀢𑀺 𑀲𑀼𑀫𑁂𑀥𑁄𑀢𑀺 𑀏𑀯𑀁 𑀧𑀸𑀓𑀝𑀦𑀸𑀫𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀤𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀪𑀸𑀯𑁂𑀦 𑀲𑀸𑀯𑀓𑁄. 𑀧𑀼𑀣𑀽𑀚𑁆𑀚𑀦𑁄𑀢𑀺 𑀅𑀦𑀭𑀺𑀬𑁄. 𑀢𑀢𑁆𑀣𑀸𑀧𑀺 𑀲𑀘𑁆𑀘𑀸𑀦𑀁 𑀅𑀦𑀼𑀩𑁄𑀥𑀫𑀢𑁆𑀢𑀲𑁆𑀲𑀸𑀧𑀺 𑀅𑀪𑀸𑀯𑁂𑀦 𑀅𑀦𑀦𑀼𑀩𑁄𑀥𑁄. 𑀲𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀧𑀭𑀺𑀩𑁆𑀩𑀚𑀺𑀲𑁆𑀲𑀳𑀦𑁆𑀢𑀺 𑀲𑁄 𑀅𑀳𑀁 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀧𑀩𑁆𑀩𑀚𑁆𑀚𑀸𑀕𑀼𑀡𑀫𑀢𑁆𑀢𑁂𑀦 𑀯𑀺𑀘𑀭𑀺𑀁, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀦𑀸𑀥𑀺𑀕𑀘𑁆𑀙𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁨𑁦𑁪. 𑀭𑀢𑀦𑀼𑀘𑁆𑀘𑀬𑀦𑁆𑀢𑀺 𑀫𑀡𑀺𑀓𑀦𑀓𑀸𑀤𑀺𑀭𑀢𑀦𑁂𑀳𑀺 𑀉𑀘𑁆𑀘𑀺𑀢𑀁 𑀉𑀲𑁆𑀲𑀺𑀢𑀭𑀢𑀦𑀘𑁂𑀢𑀺𑀬𑀁. 𑀳𑁂𑀫𑀚𑀸𑀮𑁂𑀦 𑀙𑀦𑁆𑀦𑀦𑁆𑀢𑀺 𑀲𑀫𑀦𑁆𑀢𑀢𑁄 𑀉𑀧𑀭𑀺 𑀘 𑀓𑀜𑁆𑀘𑀦𑀚𑀸𑀮𑁂𑀦 𑀧𑀝𑀺𑀘𑁆𑀙𑀸𑀤𑀺𑀢𑀁. 𑀯𑀦𑁆𑀤𑀺𑀢𑁆𑀯𑀸𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀢𑀢𑁆𑀣 𑀢𑀢𑁆𑀣 𑀧𑀡𑀸𑀫𑀁 𑀓𑀢𑁆𑀯𑀸. 𑀣𑀽𑀧𑀲𑁆𑀫𑀺𑀁 𑀫𑀦𑀁 𑀧𑀲𑀸𑀤𑀬𑀺𑀦𑁆𑀢𑀺 ‘‘𑀲𑀩𑁆𑀩𑀜𑁆𑀜𑀼𑀕𑀼𑀡𑀸𑀥𑀺𑀝𑁆𑀞𑀸𑀦𑀸𑀬 𑀯𑀢 𑀥𑀸𑀢𑀼𑀬𑀸 𑀅𑀬𑀁 𑀣𑀽𑀧𑁄’’𑀢𑀺 𑀣𑀽𑀧𑀲𑁆𑀫𑀺𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺𑀁.

𑁧𑁨𑁦𑁫. 𑀦 𑀫𑀸𑀲𑀺 𑀤𑀸𑀦𑀦𑁆𑀢𑀺 𑀫𑁂 𑀫𑀬𑀸 𑀓𑀢𑀁 𑀤𑀸𑀦𑀁 𑀦𑀸𑀲𑀺 𑀦𑀸𑀳𑁄𑀲𑀺. 𑀓𑀲𑁆𑀫𑀸 𑀧𑀦? 𑀦 𑀘 𑀫𑁂𑀢𑁆𑀣𑀺 𑀤𑀸𑀢𑀼𑀦𑁆𑀢𑀺 𑀫𑁂 𑀫𑀫 𑀧𑀭𑀺𑀕𑁆𑀕𑀳𑀪𑀽𑀢𑀁 𑀤𑀸𑀦𑀁 𑀤𑀸𑀢𑀼𑀁 𑀦 𑀅𑀢𑁆𑀣𑀺, 𑀦 𑀓𑀺𑀜𑁆𑀘𑀺 𑀤𑁂𑀬𑁆𑀬𑀯𑀢𑁆𑀣𑀼 𑀯𑀺𑀚𑁆𑀚𑀢𑀺, 𑀧𑀭𑁂 𑀘 𑀔𑁄 𑀲𑀢𑁆𑀢𑁂 𑀢𑀢𑁆𑀣 𑀤𑀸𑀦𑁂 𑀲𑀫𑀸𑀤𑀧𑁂𑀲𑀺𑀁. ‘‘𑀧𑀭𑁂𑀲𑀜𑁆𑀘 𑀢𑀢𑁆𑀣 𑀲𑀫𑀸𑀤𑀧𑁂𑀲𑀺’’𑀦𑁆𑀢𑀺 𑀘 𑀧𑀞𑀦𑁆𑀢𑀺, 𑀢𑀢𑁆𑀣 𑀧𑀭𑁂𑀲𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀽𑀚𑁂𑀣 𑀦𑀦𑁆𑀢𑀺𑀆𑀤𑀺 𑀲𑀫𑀸𑀤𑀧𑀦𑀸𑀓𑀸𑀭𑀤𑀲𑁆𑀲𑀦𑀁, 𑀢𑀁 𑀥𑀸𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀏𑀯𑀁 𑀓𑀺𑀭𑀸𑀢𑀺 𑀓𑀺𑀭-𑀲𑀤𑁆𑀤𑁄 𑀅𑀦𑀼𑀲𑁆𑀲𑀯𑀢𑁆𑀣𑁄.

𑁧𑁨𑁦𑁬. 𑀦 𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀔𑀬𑀫𑁆𑀧𑀺 𑀅𑀚𑁆𑀛𑀕𑀦𑁆𑀢𑀺 𑀢𑀲𑁆𑀲 𑀢𑀤𑀸 𑀲𑀼𑀫𑁂𑀥𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀓𑀢𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀧𑀭𑀺𑀓𑁆𑀔𑀬𑀁 𑀦𑀸𑀥𑀺𑀕𑀘𑁆𑀙𑀺𑀁, 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑀁 𑀧𑀘𑁆𑀘𑀦𑀼𑀪𑁄𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀁 𑀧𑀦𑁂𑀢𑁆𑀣 𑀦 𑀯𑀼𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀦𑁂𑀓𑀯𑀡𑁆𑀡𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.