𑁭. 𑀓𑀡𑁆𑀟𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀧𑀼𑀡𑁆𑀡𑀫𑀸𑀲𑁂 𑀬𑀣𑀸 𑀘𑀦𑁆𑀤𑁄𑀢𑀺 𑀓𑀡𑁆𑀟𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀢𑁄. 𑀢𑀲𑁆𑀫𑀺𑀁 𑀔𑀡𑁂 𑀓𑀡𑁆𑀟𑀓𑁄 𑀤𑁂𑀯𑀧𑀼𑀢𑁆𑀢𑁄 𑀲𑀓𑀪𑀯𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀺𑀩𑁆𑀩𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀳𑀢𑀺𑀬𑀸 𑀤𑁂𑀯𑀺𑀤𑁆𑀥𑀺𑀬𑀸 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀕𑀸𑀭𑀯𑀩𑀳𑀼𑀫𑀸𑀦𑁄 𑀲𑀳𑀲𑀸 𑀬𑀸𑀦𑀢𑁄 𑀑𑀭𑀼𑀬𑁆𑀳 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀣𑁂𑀭𑁄 𑁋

𑁧𑁧𑁭𑁧. ‘‘𑀧𑀼𑀡𑁆𑀡𑀫𑀸𑀲𑁂 𑀬𑀣𑀸 𑀘𑀦𑁆𑀤𑁄, 𑀦𑀓𑁆𑀔𑀢𑁆𑀢𑀧𑀭𑀺𑀯𑀸𑀭𑀺𑀢𑁄;

𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀸𑀢𑀺, 𑀢𑀸𑀭𑀓𑀸𑀥𑀺𑀧𑀢𑀻 𑀲𑀲𑀻.

𑁧𑁧𑁭𑁨. ‘‘𑀢𑀣𑀽𑀧𑀫𑀁 𑀇𑀤𑀁 𑀩𑁆𑀬𑀫𑁆𑀳𑀁, 𑀤𑀺𑀩𑁆𑀩𑀁 𑀤𑁂𑀯𑀧𑀼𑀭𑀫𑁆𑀳𑀺 𑀘;

𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦, 𑀉𑀤𑀬𑀦𑁆𑀢𑁄𑀯 𑀭𑀁𑀲𑀺𑀫𑀸.

𑁧𑁧𑁭𑁩. ‘‘𑀯𑁂𑀴𑀽𑀭𑀺𑀬𑀲𑀼𑀯𑀡𑁆𑀡𑀲𑁆𑀲, 𑀨𑀮𑀺𑀓𑀸 𑀭𑀽𑀧𑀺𑀬𑀲𑁆𑀲 𑀘;

𑀫𑀲𑀸𑀭𑀕𑀮𑁆𑀮𑀫𑀼𑀢𑁆𑀢𑀸𑀳𑀺, 𑀮𑁄𑀳𑀺𑀢𑀗𑁆𑀕𑀫𑀡𑀻𑀳𑀺 𑀘.

𑁧𑁧𑁭𑁪. ‘‘𑀘𑀺𑀢𑁆𑀭𑀸 𑀫𑀦𑁄𑀭𑀫𑀸 𑀪𑀽𑀫𑀺, 𑀯𑁂𑀴𑀽𑀭𑀺𑀬𑀲𑁆𑀲 𑀲𑀦𑁆𑀣𑀢𑀸;

𑀓𑀽𑀝𑀸𑀕𑀸𑀭𑀸 𑀲𑀼𑀪𑀸 𑀭𑀫𑁆𑀫𑀸, 𑀧𑀸𑀲𑀸𑀤𑁄 𑀢𑁂 𑀲𑀼𑀫𑀸𑀧𑀺𑀢𑁄.

𑁧𑁧𑁭𑁫. ‘‘𑀭𑀫𑁆𑀫𑀸 𑀘 𑀢𑁂 𑀧𑁄𑀓𑁆𑀔𑀭𑀡𑀻, 𑀧𑀼𑀣𑀼𑀮𑁄𑀫𑀦𑀺𑀲𑁂𑀯𑀺𑀢𑀸;

𑀅𑀘𑁆𑀙𑁄𑀤𑀓𑀸 𑀯𑀺𑀧𑁆𑀧𑀲𑀦𑁆𑀦𑀸, 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑀸.

𑁧𑁧𑁭𑁬. ‘‘𑀦𑀸𑀦𑀸𑀧𑀤𑀼𑀫𑀲𑀜𑁆𑀙𑀦𑁆𑀦𑀸, 𑀧𑀼𑀡𑁆𑀟𑀭𑀻𑀓𑀲𑀫𑁄𑀢𑀢𑀸;

𑀲𑀼𑀭𑀪𑀺𑀁 𑀲𑀫𑁆𑀧𑀯𑀸𑀬𑀦𑁆𑀢𑀺, 𑀫𑀦𑀼𑀜𑁆𑀜𑀸 𑀫𑀸𑀢𑀼𑀢𑁂𑀭𑀺𑀢𑀸.

𑁧𑁧𑁭𑁭. ‘‘𑀢𑀲𑁆𑀲𑀸 𑀢𑁂 𑀉𑀪𑀢𑁄 𑀧𑀲𑁆𑀲𑁂, 𑀯𑀦𑀕𑀼𑀫𑁆𑀩𑀸 𑀲𑀼𑀫𑀸𑀧𑀺𑀢𑀸;

𑀉𑀧𑁂𑀢𑀸 𑀧𑀼𑀧𑁆𑀨𑀭𑀼𑀓𑁆𑀔𑁂𑀳𑀺, 𑀨𑀮𑀭𑀼𑀓𑁆𑀔𑁂𑀳𑀺 𑀘𑀽𑀪𑀬𑀁.

𑁧𑁧𑁭𑁮. ‘‘𑀲𑁄𑀯𑀡𑁆𑀡𑀧𑀸𑀤𑁂 𑀧𑀮𑁆𑀮𑀗𑁆𑀓𑁂, 𑀫𑀼𑀤𑀼𑀓𑁂 𑀕𑁄𑀦𑀓𑀢𑁆𑀣𑀢𑁂;

𑀦𑀺𑀲𑀺𑀦𑁆𑀦𑀁 𑀤𑁂𑀯𑀭𑀸𑀚𑀁𑀯, 𑀉𑀧𑀢𑀺𑀝𑁆𑀞𑀦𑁆𑀢𑀺 𑀅𑀘𑁆𑀙𑀭𑀸.

𑁧𑁧𑁭𑁯. ‘‘𑀲𑀩𑁆𑀩𑀸𑀪𑀭𑀡𑀲𑀜𑁆𑀙𑀦𑁆𑀦𑀸, 𑀦𑀸𑀦𑀸𑀫𑀸𑀮𑀸𑀯𑀺𑀪𑀽𑀲𑀺𑀢𑀸;

𑀭𑀫𑁂𑀦𑁆𑀢𑀺 𑀢𑀁 𑀫𑀳𑀺𑀤𑁆𑀥𑀺𑀓𑀁, 𑀯𑀲𑀯𑀢𑁆𑀢𑀻𑀯 𑀫𑁄𑀤𑀲𑀺.

𑁧𑁧𑁮𑁦. ‘‘𑀪𑁂𑀭𑀺𑀲𑀗𑁆𑀔𑀫𑀼𑀤𑀺𑀗𑁆𑀕𑀸𑀳𑀺, 𑀯𑀻𑀡𑀸𑀳𑀺 𑀧𑀡𑀯𑁂𑀳𑀺 𑀘;

𑀭𑀫𑀲𑀺 𑀭𑀢𑀺𑀲𑀫𑁆𑀧𑀦𑁆𑀦𑁄, 𑀦𑀘𑁆𑀘𑀕𑀻𑀢𑁂 𑀲𑀼𑀯𑀸𑀤𑀺𑀢𑁂.

𑁧𑁧𑁮𑁧. ‘‘𑀤𑀺𑀩𑁆𑀩𑀸 𑀢𑁂 𑀯𑀺𑀯𑀺𑀥𑀸 𑀭𑀽𑀧𑀸, 𑀤𑀺𑀩𑁆𑀩𑀸 𑀲𑀤𑁆𑀤𑀸 𑀅𑀣𑁄 𑀭𑀲𑀸;

𑀕𑀦𑁆𑀥𑀸 𑀘 𑀢𑁂 𑀅𑀥𑀺𑀧𑁆𑀧𑁂𑀢𑀸, 𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸.

𑁧𑁧𑁮𑁨. ‘‘𑀢𑀲𑁆𑀫𑀺𑀁 𑀯𑀺𑀫𑀸𑀦𑁂 𑀧𑀯𑀭𑁂, 𑀤𑁂𑀯𑀧𑀼𑀢𑁆𑀢 𑀫𑀳𑀧𑁆𑀧𑀪𑁄;

𑀅𑀢𑀺𑀭𑁄𑀘𑀲𑀺 𑀯𑀡𑁆𑀡𑁂𑀦, 𑀉𑀤𑀬𑀦𑁆𑀢𑁄𑀯 𑀪𑀸𑀡𑀼𑀫𑀸.

𑁧𑁧𑁮𑁩. ‘‘𑀤𑀸𑀦𑀲𑁆𑀲 𑀢𑁂 𑀇𑀤𑀁 𑀨𑀮𑀁, 𑀅𑀣𑁄 𑀲𑀻𑀮𑀲𑁆𑀲 𑀯𑀸 𑀧𑀦;

𑀅𑀣𑁄 𑀅𑀜𑁆𑀚𑀮𑀺𑀓𑀫𑁆𑀫𑀲𑁆𑀲, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺. 𑁋

𑀅𑀥𑀺𑀕𑀢𑀲𑀫𑁆𑀧𑀢𑁆𑀢𑀺𑀓𑀺𑀢𑁆𑀢𑀦𑀫𑀼𑀔𑁂𑀦 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺.

𑁧𑁧𑁮𑁪. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑁄;

𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁧𑁮𑁫. ‘‘𑀅𑀳𑀁 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁, 𑀲𑀸𑀓𑀺𑀬𑀸𑀦𑀁 𑀧𑀼𑀭𑀼𑀢𑁆𑀢𑀫𑁂;

𑀲𑀼𑀤𑁆𑀥𑁄𑀤𑀦𑀲𑁆𑀲 𑀧𑀼𑀢𑁆𑀢𑀲𑁆𑀲, 𑀓𑀡𑁆𑀟𑀓𑁄 𑀲𑀳𑀚𑁄 𑀅𑀳𑀁.

𑁧𑁧𑁮𑁬. ‘‘𑀬𑀤𑀸 𑀲𑁄 𑀅𑀟𑁆𑀠𑀭𑀢𑁆𑀢𑀸𑀬𑀁, 𑀩𑁄𑀥𑀸𑀬 𑀫𑀪𑀺𑀦𑀺𑀓𑁆𑀔𑀫𑀺;

𑀲𑁄 𑀫𑀁 𑀫𑀼𑀤𑀽𑀳𑀺 𑀧𑀸𑀡𑀻𑀳𑀺, 𑀚𑀸𑀮𑀺𑀢𑀫𑁆𑀩𑀦𑀔𑁂𑀳𑀺 𑀘.

𑁧𑁧𑁮𑁭. ‘‘𑀲𑀢𑁆𑀣𑀺𑀁 𑀆𑀓𑁄𑀝𑀬𑀺𑀢𑁆𑀯𑀸𑀦, 𑀯𑀳 𑀲𑀫𑁆𑀫𑀸𑀢𑀺 𑀘𑀩𑁆𑀭𑀯𑀺;

‘𑀅𑀳𑀁 𑀮𑁄𑀓𑀁 𑀢𑀸𑀭𑀬𑀺𑀲𑁆𑀲𑀁, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁’.

𑁧𑁧𑁮𑁮. ‘‘𑀢𑀁 𑀫𑁂 𑀕𑀺𑀭𑀁 𑀲𑀼𑀡𑀦𑁆𑀢𑀲𑁆𑀲, 𑀳𑀸𑀲𑁄 𑀫𑁂 𑀯𑀺𑀧𑀼𑀮𑁄 𑀅𑀳𑀼;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀅𑀪𑀺𑀲𑀻𑀲𑀺𑀁 𑀢𑀤𑀸 𑀅𑀳𑀁.

𑁧𑁧𑁮𑁯. ‘‘𑀅𑀪𑀺𑀭𑀽𑀴𑁆𑀳𑀜𑁆𑀘 𑀫𑀁 𑀜𑀢𑁆𑀯𑀸, 𑀲𑀓𑁆𑀬𑀧𑀼𑀢𑁆𑀢𑀁 𑀫𑀳𑀸𑀬𑀲𑀁;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀫𑀼𑀤𑀺𑀢𑁄, 𑀯𑀳𑀺𑀲𑁆𑀲𑀁 𑀧𑀼𑀭𑀺𑀲𑀼𑀢𑁆𑀢𑀫𑀁.

𑁧𑁧𑁯𑁦. ‘‘𑀧𑀭𑁂𑀲𑀁 𑀯𑀺𑀚𑀺𑀢𑀁 𑀕𑀦𑁆𑀢𑁆𑀯𑀸, 𑀉𑀕𑁆𑀕𑀢𑀲𑁆𑀫𑀺𑀁 𑀤𑀺𑀯𑀸𑀓𑀭𑁂;

𑀫𑀫𑀁 𑀙𑀦𑁆𑀦𑀜𑁆𑀘 𑀑𑀳𑀸𑀬, 𑀅𑀦𑀧𑁂𑀓𑁆𑀔𑁄 𑀲𑁄 𑀅𑀧𑀓𑁆𑀓𑀫𑀺.

𑁧𑁧𑁯𑁧. ‘‘𑀢𑀲𑁆𑀲 𑀢𑀫𑁆𑀩𑀦𑀔𑁂 𑀧𑀸𑀤𑁂, 𑀚𑀺𑀯𑁆𑀳𑀸𑀬 𑀧𑀭𑀺𑀮𑁂𑀳𑀺𑀲𑀁;

𑀕𑀘𑁆𑀙𑀦𑁆𑀢𑀜𑁆𑀘 𑀫𑀳𑀸𑀯𑀻𑀭𑀁, 𑀭𑀼𑀤𑀫𑀸𑀦𑁄 𑀉𑀤𑀺𑀓𑁆𑀔𑀺𑀲𑀁.

𑁧𑁧𑁯𑁨. ‘‘𑀅𑀤𑀲𑁆𑀲𑀦𑁂𑀦𑀳𑀁 𑀢𑀲𑁆𑀲, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀺𑀭𑀻𑀫𑀢𑁄;

𑀅𑀮𑀢𑁆𑀣𑀁 𑀕𑀭𑀼𑀓𑀸𑀩𑀸𑀥𑀁, 𑀔𑀺𑀧𑁆𑀧𑀁 𑀫𑁂 𑀫𑀭𑀡𑀁 𑀅𑀳𑀼.

𑁧𑁧𑁯𑁩. ‘‘𑀢𑀲𑁆𑀲𑁂𑀯 𑀆𑀦𑀼𑀪𑀸𑀯𑁂𑀦, 𑀯𑀺𑀫𑀸𑀦𑀁 𑀆𑀯𑀲𑀸𑀫𑀺𑀤𑀁;

𑀲𑀩𑁆𑀩𑀓𑀸𑀫𑀕𑀼𑀡𑁄𑀧𑁂𑀢𑀁, 𑀤𑁂𑀯𑁄 𑀤𑁂𑀯𑀧𑀼𑀭𑀫𑁆𑀳𑀺𑀯.

𑁧𑁧𑁯𑁪. ‘‘𑀬𑀜𑁆𑀘 𑀫𑁂 𑀅𑀳𑀼𑀯𑀸 𑀳𑀸𑀲𑁄, 𑀲𑀤𑁆𑀤𑀁 𑀲𑀼𑀢𑁆𑀯𑀸𑀦 𑀩𑁄𑀥𑀺𑀬𑀸;

𑀢𑁂𑀦𑁂𑀯 𑀓𑀼𑀲𑀮𑀫𑀽𑀮𑁂𑀦, 𑀨𑀼𑀲𑀺𑀲𑁆𑀲𑀁 𑀆𑀲𑀯𑀓𑁆𑀔𑀬𑀁.

𑁧𑁧𑁯𑁫. ‘‘𑀲𑀘𑁂 𑀳𑀺 𑀪𑀦𑁆𑀢𑁂 𑀕𑀘𑁆𑀙𑁂𑀬𑁆𑀬𑀸𑀲𑀺, 𑀲𑀢𑁆𑀣𑀼 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀫𑀫𑀸𑀧𑀺 𑀦𑀁 𑀯𑀘𑀦𑁂𑀦, 𑀲𑀺𑀭𑀲𑀸 𑀯𑀚𑁆𑀚𑀸𑀲𑀺 𑀯𑀦𑁆𑀤𑀦𑀁.

𑁧𑁧𑁯𑁬. ‘‘𑀅𑀳𑀫𑁆𑀧𑀺 𑀤𑀝𑁆𑀞𑀼𑀁 𑀕𑀘𑁆𑀙𑀺𑀲𑁆𑀲𑀁, 𑀚𑀺𑀦𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀁;

𑀤𑀼𑀮𑁆𑀮𑀪𑀁 𑀤𑀲𑁆𑀲𑀦𑀁 𑀳𑁄𑀢𑀺, 𑀮𑁄𑀓𑀦𑀸𑀣𑀸𑀦 𑀢𑀸𑀤𑀺𑀦’’𑀦𑁆𑀢𑀺. 𑁋

𑀲𑁄𑀧𑀺 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀓𑀣𑁂𑀲𑀺. 𑀅𑀬𑀜𑁆𑀳𑀺 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁂𑀦 𑀲𑀳𑀚𑀸𑀢𑁄 𑀓𑀡𑁆𑀟𑀓𑁄 𑀅𑀲𑁆𑀲𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀅𑀪𑀺𑀦𑀺𑀓𑁆𑀔𑀫𑀦𑀲𑀫𑀬𑁂 𑀅𑀪𑀺𑀭𑀼𑀴𑁆𑀳𑁄 𑀢𑁂𑀦𑁂𑀯 𑀭𑀢𑁆𑀢𑀸𑀯𑀲𑁂𑀲𑁂𑀦 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀫𑀳𑀸𑀧𑀼𑀭𑀺𑀲𑀁 𑀅𑀢𑀺𑀓𑁆𑀓𑀫𑀸𑀧𑁂𑀢𑁆𑀯𑀸 𑀅𑀦𑁄𑀫𑀸𑀦𑀤𑀻𑀢𑀻𑀭𑀁 𑀲𑀫𑁆𑀧𑀸𑀧𑁂𑀲𑀺. 𑀅𑀣 𑀲𑁄 𑀫𑀳𑀸𑀲𑀢𑁆𑀢𑁂𑀦 𑀲𑀽𑀭𑀺𑀬𑁂 𑀉𑀕𑁆𑀕𑀢𑁂 𑀖𑀝𑀺𑀓𑀸𑀭𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀉𑀧𑀦𑀻𑀢𑀸𑀦𑀺 𑀧𑀢𑁆𑀢𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀙𑀦𑁆𑀦𑁂𑀦 𑀲𑀤𑁆𑀥𑀺𑀁 𑀓𑀧𑀺𑀮𑀯𑀢𑁆𑀣𑀼𑀁 𑀉𑀤𑁆𑀤𑀺𑀲𑁆𑀲 𑀯𑀺𑀲𑁆𑀲𑀚𑁆𑀚𑀺𑀢𑁄. 𑀲𑀺𑀦𑁂𑀳𑀪𑀸𑀭𑀺𑀓𑁂𑀦 𑀳𑀤𑀬𑁂𑀦 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀸𑀤𑁂 𑀅𑀢𑁆𑀢𑀦𑁄 𑀚𑀺𑀯𑁆𑀳𑀸𑀬 𑀮𑁂𑀳𑀺𑀢𑁆𑀯𑀸 𑀧𑀲𑀸𑀤𑀲𑁄𑀫𑁆𑀫𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀬𑀸𑀯 𑀤𑀲𑁆𑀲𑀦𑀧𑀣𑀸 𑀑𑀮𑁄𑀓𑁂𑀦𑁆𑀢𑁄 𑀤𑀲𑁆𑀲𑀦𑀽𑀧𑀘𑀸𑀭𑀁 𑀧𑀦 𑀅𑀢𑀺𑀓𑁆𑀓𑀦𑁆𑀢𑁂 𑀮𑁄𑀓𑀦𑀸𑀣𑁂 ‘‘𑀏𑀯𑀁𑀯𑀺𑀥𑀁 𑀦𑀸𑀫 𑀮𑁄𑀓𑀕𑁆𑀕𑀦𑀸𑀬𑀓𑀁 𑀫𑀳𑀸𑀧𑀼𑀭𑀺𑀲𑀁 𑀅𑀳𑀁 𑀯𑀳𑀺𑀁, 𑀲𑀨𑀮𑀁 𑀯𑀢 𑀫𑁂 𑀲𑀭𑀻𑀭𑀁 𑀅𑀳𑁄𑀲𑀻’’𑀢𑀺 𑀧𑀲𑀦𑁆𑀦𑀫𑀸𑀦𑀲𑁄 𑀳𑀼𑀢𑁆𑀯𑀸 𑀧𑀼𑀦 𑀘𑀺𑀭𑀓𑀸𑀮𑀁 𑀲𑀗𑁆𑀕𑀢𑀲𑁆𑀲 𑀧𑁂𑀫𑀲𑁆𑀲 𑀯𑀲𑁂𑀦 𑀯𑀺𑀬𑁄𑀕𑀤𑀼𑀓𑁆𑀔𑀁 𑀅𑀲𑀳𑀦𑁆𑀢𑁄 𑀪𑀸𑀯𑀺𑀦𑀺𑀬𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀯𑀲𑁂𑀦 𑀥𑀫𑁆𑀫𑀢𑀸𑀬 𑀘𑁄𑀤𑀺𑀬𑀫𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀼𑀡𑁆𑀡𑀫𑀸𑀲𑁂 𑀬𑀣𑀸 𑀘𑀦𑁆𑀤𑁄…𑀧𑁂… 𑀅𑀳𑀁 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺𑀆𑀤𑀺.

𑁧𑁧𑁭𑁧. 𑀢𑀢𑁆𑀣 𑀧𑀼𑀡𑁆𑀡𑀫𑀸𑀲𑁂𑀢𑀺 𑀧𑀼𑀡𑁆𑀡𑀫𑀸𑀲𑀺𑀬𑀁 𑀲𑀼𑀓𑁆𑀓𑀧𑀓𑁆𑀔𑁂 𑀧𑀦𑁆𑀦𑀭𑀲𑀺𑀬𑀁. 𑀢𑀸𑀭𑀓𑀸𑀥𑀺𑀧𑀢𑀻𑀢𑀺 𑀢𑀸𑀭𑀓𑀸𑀦𑀁 𑀅𑀥𑀺𑀧𑀢𑀺. 𑀲𑀲𑀻𑀢𑀺 𑀲𑀲𑀮𑀜𑁆𑀙𑀦𑀯𑀸. ‘‘𑀢𑀸𑀭𑀓𑀸𑀥𑀺𑀧 𑀤𑀺𑀲𑁆𑀲𑀢𑀻’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀢𑀸𑀭𑀓𑀸𑀥𑀺𑀧𑀸𑀢𑀺 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄, 𑀢𑀸𑀭𑀓𑀸𑀦𑀁 𑀅𑀥𑀺𑀧𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀺 𑀅𑀦𑀼𑀧𑀭𑀺𑀬𑀸𑀢𑀺 𑀘𑀸𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑁧𑁧𑁭𑁨. 𑀤𑀺𑀩𑁆𑀩𑀁 𑀤𑁂𑀯𑀧𑀼𑀭𑀫𑁆𑀳𑀺 𑀘𑀸𑀢𑀺 𑀤𑁂𑀯𑀧𑀼𑀭𑀲𑁆𑀫𑀺𑀫𑁆𑀧𑀺 𑀤𑀺𑀩𑁆𑀩𑀁. 𑀬𑀣𑀸 𑀫𑀦𑀼𑀲𑁆𑀲𑀸𑀦𑀁 𑀞𑀸𑀦𑀢𑁄 𑀤𑁂𑀯𑀧𑀼𑀭𑀁 𑀉𑀢𑁆𑀢𑀫𑀁, 𑀏𑀯𑀁 𑀤𑁂𑀯𑀧𑀼𑀭𑀢𑁄 𑀘𑀸𑀧𑀺 𑀇𑀤𑀁 𑀢𑀯 𑀯𑀺𑀫𑀸𑀦𑀁 𑀉𑀢𑁆𑀢𑀫𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦, 𑀉𑀤𑀬𑀦𑁆𑀢𑁄𑀯 𑀭𑀁𑀲𑀺𑀫𑀸’’𑀢𑀺, 𑀉𑀕𑁆𑀕𑀘𑁆𑀙𑀦𑁆𑀢𑁄 𑀲𑀽𑀭𑀺𑀬𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄.

𑁧𑁧𑁭𑁩. 𑀯𑁂𑀴𑀽𑀭𑀺𑀬𑀲𑀼𑀯𑀡𑁆𑀡𑀲𑁆𑀲𑀸𑀢𑀺 𑀯𑁂𑀴𑀼𑀭𑀺𑀬𑁂𑀦 𑀲𑀼𑀯𑀡𑁆𑀡𑁂𑀦 𑀘 𑀇𑀤𑀁 𑀩𑁆𑀬𑀫𑁆𑀳𑀁 𑀦𑀺𑀫𑁆𑀫𑀺𑀢𑀦𑁆𑀢𑀺 𑀯𑀘𑀦𑀲𑁂𑀲𑁂𑀦 𑀬𑁄𑀚𑀦𑀸. 𑀨𑀮𑀺𑀓𑀸𑀢𑀺 𑀨𑀮𑀺𑀓𑀫𑀡𑀺𑀦𑀸.

𑁧𑁧𑁭𑁫. 𑀧𑁄𑀓𑁆𑀔𑀭𑀡𑀻𑀢𑀺 𑀧𑁄𑀓𑁆𑀔𑀭𑀡𑀺𑀬𑁄.

𑁧𑁧𑁭𑁭-𑁮. 𑀢𑀲𑁆𑀲𑀸𑀢𑀺 𑀢𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀬𑀸. 𑀯𑀦𑀕𑀼𑀫𑁆𑀩𑀸𑀢𑀺 𑀉𑀬𑁆𑀬𑀸𑀦𑁂 𑀲𑀼𑀧𑀼𑀧𑁆𑀨𑀕𑀘𑁆𑀙𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀤𑁂𑀯𑀭𑀸𑀚𑀁𑀯𑀸𑀢𑀺 𑀲𑀓𑁆𑀓𑀁 𑀯𑀺𑀬. 𑀉𑀧𑀢𑀺𑀝𑁆𑀞𑀦𑁆𑀢𑀻𑀢𑀺 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀺.

𑁧𑁧𑁭𑁯. 𑀲𑀩𑁆𑀩𑀸𑀪𑀭𑀡𑀲𑀜𑁆𑀙𑀦𑁆𑀦𑀸𑀢𑀺 𑀲𑀩𑁆𑀩𑁂𑀳𑀺 𑀇𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀧𑀝𑀺𑀘𑁆𑀙𑀸𑀤𑀺𑀢𑀸, 𑀲𑀩𑁆𑀩𑀲𑁄 𑀯𑀺𑀪𑀽𑀲𑀺𑀢𑀲𑀭𑀻𑀭𑀸𑀢𑀺 𑀅𑀢𑁆𑀣𑁄. 𑀯𑀲𑀯𑀢𑁆𑀢𑀻𑀯𑀸𑀢𑀺 𑀯𑀲𑀯𑀢𑁆𑀢𑀺𑀤𑁂𑀯𑀭𑀸𑀚𑀸 𑀯𑀺𑀬.

𑁧𑁧𑁮𑁦. 𑀪𑁂𑀭𑀺𑀲𑀗𑁆𑀔𑀫𑀼𑀤𑀺𑀗𑁆𑀕𑀸𑀳𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀪𑁂𑀭𑀻𑀳𑀺 𑀘 𑀲𑀗𑁆𑀔𑁂𑀳𑀺 𑀘 𑀫𑀼𑀤𑀺𑀗𑁆𑀕𑁂𑀳𑀺 𑀘𑀸𑀢𑀺 𑀬𑁄𑀚𑀦𑀸. 𑀭𑀢𑀺𑀲𑀫𑁆𑀧𑀦𑁆𑀦𑁄𑀢𑀺 𑀤𑀺𑀩𑁆𑀩𑀸𑀬 𑀭𑀢𑀺𑀬𑀸 𑀲𑀫𑀗𑁆𑀕𑀻𑀪𑀽𑀢𑁄. 𑀦𑀘𑁆𑀘𑀕𑀻𑀢𑁂 𑀲𑀼𑀯𑀸𑀤𑀺𑀢𑁂𑀢𑀺 𑀦𑀘𑁆𑀘𑁂 𑀘 𑀕𑀻𑀢𑁂 𑀘 𑀲𑀼𑀦𑁆𑀤𑀭𑁂 𑀯𑀸𑀤𑀺𑀢𑁂 𑀘, 𑀦𑀘𑁆𑀘𑀦𑁂 𑀘 𑀕𑀸𑀬𑀦𑁂 𑀘 𑀲𑀼𑀦𑁆𑀤𑀭𑁂 𑀯𑀸𑀤𑀺𑀢𑁂 𑀘 𑀳𑁂𑀢𑀼𑀪𑀽𑀢𑁂. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀳𑀺 𑀏𑀢𑀁 𑀪𑀼𑀫𑁆𑀫𑀁, 𑀧𑀯𑀢𑁆𑀢𑀺𑀢𑁂𑀢𑀺 𑀯𑀸 𑀯𑀘𑀦𑀲𑁂𑀲𑁄.

𑁧𑁧𑁮𑁧. 𑀤𑀺𑀩𑁆𑀩𑀸 𑀢𑁂 𑀯𑀺𑀯𑀺𑀥𑀸 𑀭𑀽𑀧𑀸𑀢𑀺 𑀤𑁂𑀯𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀸 𑀦𑀸𑀦𑀧𑁆𑀧𑀓𑀸𑀭𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀢𑀼𑀬𑁆𑀳𑀁 𑀅𑀥𑀺𑀧𑁆𑀧𑁂𑀢𑀸 𑀬𑀣𑀸𑀥𑀺𑀧𑁆𑀧𑁂𑀢𑀸 𑀫𑀦𑁄𑀭𑀫𑀸 𑀯𑀺𑀚𑁆𑀚𑀦𑁆𑀢𑀻𑀢𑀺 𑀓𑀺𑀭𑀺𑀬𑀸𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀤𑀺𑀩𑁆𑀩𑀸 𑀲𑀤𑁆𑀤𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁧𑁮𑁫. 𑀓𑀡𑁆𑀟𑀓𑁄 𑀲𑀳𑀚𑁄 𑀅𑀳𑀦𑁆𑀢𑀺 𑀏𑀢𑁆𑀣 𑀅𑀳𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. ‘‘𑀅𑀳𑀽’’𑀢𑀺 𑀓𑁂𑀘𑀺 𑀧𑀝𑁆𑀞𑀦𑁆𑀢𑀺, 𑀓𑀡𑁆𑀟𑀓𑁄 𑀦𑀸𑀫 𑀅𑀲𑁆𑀲𑀭𑀸𑀚𑀸 𑀫𑀳𑀸𑀲𑀢𑁆𑀢𑁂𑀦 𑀲𑀳 𑀏𑀓𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂 𑀚𑀸𑀢𑀢𑁆𑀢𑀸 𑀲𑀳𑀚𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁧𑁮𑁬. 𑀅𑀟𑁆𑀠𑀭𑀢𑁆𑀢𑀸𑀬𑀦𑁆𑀢𑀺 𑀅𑀟𑁆𑀠𑀭𑀢𑁆𑀢𑀺𑀬𑀁, 𑀫𑀚𑁆𑀛𑀺𑀫𑀬𑀸𑀫𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀩𑁄𑀥𑀸𑀬 𑀫𑀪𑀺𑀦𑀺𑀓𑁆𑀔𑀫𑀻𑀢𑀺 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀪𑀺𑀲𑀫𑁆𑀩𑁄𑀥𑀺𑀅𑀢𑁆𑀣𑀁 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀻𑀢𑀺 𑀅𑀢𑁆𑀣𑁄. 𑀫𑀼𑀤𑀽𑀳𑀺 𑀧𑀸𑀡𑀻𑀳𑀻𑀢𑀺 𑀫𑀼𑀤𑀼𑀳𑀢𑁆𑀣𑀢𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀯𑀤𑀢𑀺. 𑀚𑀸𑀮𑀺𑀢𑀫𑁆𑀩𑀦𑀔𑁂𑀳𑀻𑀢𑀺 𑀚𑀸𑀮𑀯𑀦𑁆𑀢𑁂𑀳𑀺 𑀅𑀪𑀺𑀮𑁄𑀳𑀺𑀢𑀦𑀔𑁂𑀳𑀺. 𑀢𑁂𑀦 𑀚𑀸𑀮𑀳𑀢𑁆𑀣𑀢𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀢𑀫𑁆𑀩𑀦𑀔𑀢𑀁 𑀅𑀦𑀼𑀩𑁆𑀬𑀜𑁆𑀚𑀦𑀜𑁆𑀘 𑀤𑀲𑁆𑀲𑁂𑀢𑀺.

𑁧𑁧𑁮𑁭. 𑀲𑀢𑁆𑀣𑀺 𑀦𑀸𑀫 𑀚𑀗𑁆𑀖𑀸, 𑀇𑀥 𑀧𑀦 𑀲𑀢𑁆𑀣𑀺𑀦𑁄 𑀆𑀲𑀦𑁆𑀦𑀝𑁆𑀞𑀸𑀦𑀪𑀽𑀢𑁄 𑀊𑀭𑀼𑀧𑁆𑀧𑀤𑁂𑀲𑁄 ‘‘𑀲𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁄. 𑀆𑀓𑁄𑀝𑀬𑀺𑀢𑁆𑀯𑀸𑀦𑀸𑀢𑀺 𑀅𑀧𑁆𑀧𑁄𑀞𑁂𑀢𑁆𑀯𑀸. ‘‘𑀯𑀳 𑀲𑀫𑁆𑀫𑀸’’𑀢𑀺 𑀘𑀩𑁆𑀭𑀯𑀻𑀢𑀺 ‘‘𑀲𑀫𑁆𑀫 𑀓𑀡𑁆𑀟𑀓, 𑀅𑀚𑁆𑀚𑁂𑀓𑀭𑀢𑁆𑀢𑀺𑀁 𑀫𑀁 𑀯𑀳, 𑀫𑀬𑁆𑀳𑀁 𑀑𑀧𑀯𑀼𑀬𑁆𑀳𑀁 𑀳𑁄𑀳𑀻’’𑀢𑀺 𑀘 𑀓𑀣𑁂𑀲𑀺. 𑀯𑀳𑀦𑁂 𑀧𑀦 𑀧𑀬𑁄𑀚𑀦𑀁 𑀢𑀤𑀸 𑀫𑀳𑀸𑀲𑀢𑁆𑀢𑁂𑀦 𑀤𑀲𑁆𑀲𑀺𑀢𑀁 𑀯𑀤𑀦𑁆𑀢𑁄 ‘‘𑀅𑀳𑀁 𑀮𑁄𑀓𑀁 𑀢𑀸𑀭𑀬𑀺𑀲𑁆𑀲𑀁, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫’’𑀦𑁆𑀢𑀺 𑀆𑀳. 𑀢𑁂𑀦 ‘‘𑀅𑀳𑀁 𑀉𑀢𑁆𑀢𑀫𑀁 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄 𑀅𑀥𑀺𑀕𑀢𑁄 𑀳𑀼𑀢𑁆𑀯𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀁𑀲𑀸𑀭𑀫𑀳𑁄𑀖𑀢𑁄 𑀢𑀸𑀭𑀬𑀺𑀲𑁆𑀲𑀸𑀫𑀺, 𑀢𑀲𑁆𑀫𑀸 𑀦𑀬𑀺𑀤𑀁 𑀕𑀫𑀦𑀁 𑀬𑀁𑀓𑀺𑀜𑁆𑀘𑀻𑀢𑀺 𑀘𑀺𑀦𑁆𑀢𑁂𑀬𑁆𑀬𑀸𑀲𑀻’’𑀢𑀺 𑀕𑀫𑀦𑁂 𑀧𑀬𑁄𑀚𑀦𑀲𑁆𑀲 𑀅𑀦𑀼𑀢𑁆𑀢𑀭𑀪𑀸𑀯𑀁 𑀤𑀲𑁆𑀲𑁂𑀢𑀺.

𑁧𑁧𑁮𑁮-𑁯. 𑀳𑀸𑀲𑁄𑀢𑀺 𑀢𑀼𑀝𑁆𑀞𑀺. 𑀯𑀺𑀧𑀼𑀮𑁄𑀢𑀺 𑀫𑀳𑀸𑀉𑀴𑀸𑀭𑁄. 𑀅𑀪𑀺𑀲𑀻𑀲𑀺𑀦𑁆𑀢𑀺 𑀆𑀲𑀺𑀲𑀺𑀁 𑀇𑀘𑁆𑀙𑀺𑀁 𑀲𑀫𑁆𑀧𑀝𑀺𑀘𑁆𑀙𑀺𑀁. 𑀅𑀪𑀺𑀭𑀽𑀴𑁆𑀳𑀜𑁆𑀘 𑀫𑀁 𑀜𑀢𑁆𑀯𑀸, 𑀲𑀓𑁆𑀬𑀧𑀼𑀢𑁆𑀢𑀁 𑀫𑀳𑀸𑀬𑀲𑀦𑁆𑀢𑀺 𑀧𑀢𑁆𑀣𑀝𑀯𑀺𑀧𑀼𑀮𑀬𑀲𑀁 𑀲𑀓𑁆𑀬𑀭𑀸𑀚𑀧𑀼𑀢𑁆𑀢𑀁 𑀫𑀳𑀸𑀲𑀢𑁆𑀢𑀁 𑀫𑀁 𑀅𑀪𑀺𑀭𑀼𑀬𑁆𑀳 𑀦𑀺𑀲𑀺𑀦𑁆𑀦𑀁 𑀚𑀸𑀦𑀺𑀢𑁆𑀯𑀸. 𑀯𑀳𑀺𑀲𑁆𑀲𑀦𑁆𑀢𑀺 𑀦𑁂𑀲𑀺𑀁.

𑁧𑁧𑁯𑁦-𑁯𑁧. 𑀧𑀭𑁂𑀲𑀦𑁆𑀢𑀺 𑀧𑀭𑀭𑀸𑀚𑀽𑀦𑀁. 𑀯𑀺𑀚𑀺𑀢𑀦𑁆𑀢𑀺 𑀤𑁂𑀲𑀁 𑀧𑀭𑀭𑀚𑁆𑀚𑀁. 𑀑𑀳𑀸𑀬𑀸𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸. 𑀅𑀧𑀓𑁆𑀓𑀫𑀻𑀢𑀺 𑀅𑀧𑀓𑁆𑀓𑀫𑀺𑀢𑀼𑀁 𑀆𑀭𑀪𑀺. ‘‘𑀧𑀭𑀺𑀩𑁆𑀩𑀚𑀻’’𑀢𑀺 𑀘 𑀧𑀞𑀦𑁆𑀢𑀺. 𑀧𑀭𑀺𑀮𑁂𑀳𑀺𑀲𑀦𑁆𑀢𑀺 𑀧𑀭𑀺𑀢𑁄 𑀮𑁂𑀳𑀺𑀁. 𑀉𑀤𑀺𑀓𑁆𑀔𑀺𑀲𑀦𑁆𑀢𑀺 𑀑𑀮𑁄𑀓𑁂𑀲𑀺𑀁.

𑁧𑁧𑁯𑁨-𑁩. 𑀕𑀭𑀼𑀓𑀸𑀩𑀸𑀥𑀦𑁆𑀢𑀺 𑀕𑀭𑀼𑀓𑀁 𑀩𑀸𑀴𑁆𑀳𑀁 𑀆𑀩𑀸𑀥𑀁, 𑀫𑀭𑀡𑀦𑁆𑀢𑀺𑀓𑀁 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀔𑀺𑀧𑁆𑀧𑀁 𑀫𑁂 𑀫𑀭𑀡𑀁 𑀅𑀳𑀽’’𑀢𑀺. 𑀲𑁄 𑀳𑀺 𑀅𑀦𑁂𑀓𑀸𑀲𑀼 𑀚𑀸𑀢𑀻𑀲𑀼 𑀫𑀳𑀸𑀲𑀢𑁆𑀢𑁂𑀦 𑀤𑀴𑁆𑀳𑀪𑀢𑁆𑀢𑀺𑀓𑁄 𑀳𑀼𑀢𑁆𑀯𑀸 𑀆𑀕𑀢𑁄, 𑀢𑀲𑁆𑀫𑀸 𑀯𑀺𑀬𑁄𑀕𑀤𑀼𑀓𑁆𑀔𑀁 𑀲𑀳𑀺𑀢𑀼𑀁 𑀦𑀸𑀲𑀓𑁆𑀔𑀺, ‘‘𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀦𑁆𑀢𑀼𑀁 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀧𑀦 𑀲𑀼𑀢𑁆𑀯𑀸 𑀦𑀺𑀭𑀸𑀫𑀺𑀲𑀁 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀜𑁆𑀘 𑀉𑀧𑁆𑀧𑀚𑁆𑀚𑀺, 𑀢𑁂𑀦 𑀫𑀭𑀡𑀸𑀦𑀦𑁆𑀢𑀭𑀁 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺, 𑀉𑀴𑀸𑀭𑀸 𑀘𑀲𑁆𑀲 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀢𑀼𑀭𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀲𑁂𑀯 𑀆𑀦𑀼𑀪𑀸𑀯𑁂𑀦𑀸’’𑀢𑀺, 𑀞𑀸𑀦𑀕𑀢𑀲𑁆𑀲 𑀧𑀲𑀸𑀤𑀫𑀬𑀧𑀼𑀜𑁆𑀜𑀲𑁆𑀲 𑀩𑀮𑁂𑀦. 𑀤𑁂𑀯𑁄 𑀤𑁂𑀯𑀧𑀼𑀭𑀫𑁆𑀳𑀺𑀯𑀸𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀬.

𑁧𑁧𑁯𑁪. 𑀬𑀜𑁆𑀘 𑀫𑁂 𑀅𑀳𑀼𑀯𑀸 𑀳𑀸𑀲𑁄, 𑀲𑀤𑁆𑀤𑀁 𑀲𑀼𑀢𑁆𑀯𑀸𑀦 𑀩𑁄𑀥𑀺𑀬𑀸𑀢𑀺 ‘‘𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫’’𑀦𑁆𑀢𑀺 𑀧𑀞𑀫𑀢𑀭𑀁 𑀩𑁄𑀥𑀺𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀤𑀸 𑀫𑀬𑁆𑀳𑀁 𑀳𑀸𑀲𑁄 𑀅𑀳𑀼, 𑀬𑀁 𑀳𑀸𑀲𑀲𑁆𑀲 𑀪𑀯𑀦𑀁 𑀲𑀼𑀲𑁆𑀲𑀦𑀁, 𑀢𑁂𑀦𑁂𑀯 𑀓𑀼𑀲𑀮𑀫𑀽𑀮𑁂𑀦 𑀢𑁂𑀦𑁂𑀯 𑀓𑀼𑀲𑀮𑀩𑀻𑀚𑁂𑀦 𑀨𑀼𑀲𑀺𑀲𑁆𑀲𑀦𑁆𑀢𑀺 𑀨𑀼𑀲𑀺𑀲𑁆𑀲𑀸𑀫𑀺 𑀧𑀸𑀧𑀼𑀡𑀺𑀲𑁆𑀲𑀸𑀫𑀺.

𑁧𑁧𑁯𑁫. 𑀏𑀯𑀁 𑀤𑁂𑀯𑀧𑀼𑀢𑁆𑀢𑁄 𑀬𑀣𑀸𑀥𑀺𑀕𑀢𑀸𑀬 𑀅𑀦𑀸𑀕𑀢𑀸𑀬 𑀪𑀯𑀲𑀫𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀁 𑀅𑀢𑁆𑀢𑀦𑁄 𑀓𑀼𑀲𑀮𑀓𑀫𑁆𑀫𑀁 𑀓𑀣𑁂𑀦𑁆𑀢𑁄 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄𑀧𑀺 𑀧𑀼𑀭𑁂𑀢𑀭𑀁 𑀣𑁂𑀭𑁂𑀦 𑀲𑀢𑁆𑀣𑀼 𑀯𑀦𑁆𑀤𑀦𑀁 𑀧𑁂𑀲𑁂𑀦𑁆𑀢𑁄 ‘‘𑀲𑀘𑁂’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀘𑁂 𑀕𑀘𑁆𑀙𑁂𑀬𑁆𑀬𑀸𑀲𑀻𑀢𑀺 𑀬𑀤𑀺 𑀕𑀫𑀺𑀲𑁆𑀲𑀲𑀺. ‘‘𑀲𑀘𑁂 𑀕𑀘𑁆𑀙𑀲𑀻’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀲𑁄 𑀏𑀯𑀢𑁆𑀣𑁄. 𑀫𑀫𑀸𑀧𑀺 𑀦𑀁 𑀯𑀘𑀦𑁂𑀦𑀸𑀢𑀺 𑀦 𑀓𑁂𑀯𑀮𑀁 𑀢𑀯 𑀲𑀪𑀸𑀯𑁂𑀦𑁂𑀯, 𑀅𑀣 𑀔𑁄 𑀫𑀫𑀸𑀧𑀺 𑀯𑀘𑀦𑁂𑀦 𑀪𑀕𑀯𑀦𑁆𑀢𑀁. 𑀯𑀚𑁆𑀚𑀸𑀲𑀻𑀢𑀺 𑀯𑀤𑁂𑀬𑁆𑀬𑀸𑀲𑀺, 𑀫𑀫𑀸𑀧𑀺 𑀲𑀺𑀭𑀲𑀸 𑀯𑀦𑁆𑀤𑀦𑀦𑁆𑀢𑀺 𑀬𑁄𑀚𑀦𑀸.

𑁧𑁧𑁯𑁬. 𑀬𑀤𑀺𑀧𑀺 𑀤𑀸𑀦𑀺 𑀯𑀦𑁆𑀤𑀦𑀜𑁆𑀘 𑀧𑁂𑀲𑁂𑀫𑀺, 𑀧𑁂𑀲𑁂𑀢𑁆𑀯𑀸 𑀏𑀯 𑀧𑀦 𑀦 𑀢𑀺𑀝𑁆𑀞𑀸𑀫𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀳𑀫𑁆𑀧𑀺 𑀤𑀝𑁆𑀞𑀼𑀁 𑀕𑀘𑁆𑀙𑀺𑀲𑁆𑀲𑀁, 𑀚𑀺𑀦𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮’’𑀦𑁆𑀢𑀺. 𑀕𑀫𑀦𑁂 𑀧𑀦 𑀤𑀴𑁆𑀳𑀢𑀭𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀮𑁆𑀮𑀪𑀁 𑀤𑀲𑁆𑀲𑀦𑀁 𑀳𑁄𑀢𑀺, 𑀮𑁄𑀓𑀦𑀸𑀣𑀸𑀦 𑀢𑀸𑀤𑀺𑀦’’𑀦𑁆𑀢𑀺 𑀆𑀳.

𑁧𑁧𑁯𑁭. ‘‘𑀲𑁄 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻, 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺;

𑀲𑀼𑀢𑁆𑀯𑀸 𑀕𑀺𑀭𑀁 𑀘𑀓𑁆𑀔𑀼𑀫𑀢𑁄, 𑀥𑀫𑁆𑀫𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺.

𑁧𑁧𑁯𑁮. ‘‘𑀯𑀺𑀲𑁄𑀥𑁂𑀢𑁆𑀯𑀸 𑀤𑀺𑀝𑁆𑀞𑀺𑀕𑀢𑀁, 𑀯𑀺𑀘𑀺𑀓𑀺𑀘𑁆𑀙𑀁 𑀯𑀢𑀸𑀦𑀺 𑀘;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀣𑀸’’𑀢𑀺. 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀸.

𑁧𑁧𑁯𑁭. 𑀢𑀢𑁆𑀣 𑀲𑀼𑀢𑁆𑀯𑀸 𑀕𑀺𑀭𑀁 𑀘𑀓𑁆𑀔𑀼𑀫𑀢𑁄𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸. 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁. 𑀯𑀺𑀲𑁄𑀥𑀬𑀻𑀢𑀺 𑀅𑀥𑀺𑀕𑀘𑁆𑀙𑀺. 𑀅𑀥𑀺𑀕𑀫𑁄𑀬𑁂𑀯 𑀳𑀺 𑀢𑀲𑁆𑀲 𑀯𑀺𑀲𑁄𑀥𑀦𑀁.

𑁧𑁧𑁯𑁮. 𑀯𑀺𑀲𑁄𑀥𑁂𑀢𑁆𑀯𑀸 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀤𑀺𑀝𑁆𑀞𑀺𑀕𑀢𑀁 𑀲𑀫𑀼𑀕𑁆𑀖𑀸𑀢𑁂𑀢𑁆𑀯𑀸. 𑀯𑀺𑀘𑀺𑀓𑀺𑀘𑁆𑀙𑀁 𑀯𑀢𑀸𑀦𑀺 𑀘𑀸𑀢𑀺 𑀲𑁄𑀴𑀲𑀯𑀢𑁆𑀣𑀼𑀓𑀁 𑀅𑀝𑁆𑀞𑀯𑀢𑁆𑀣𑀼𑀓𑀜𑁆𑀘 𑀯𑀺𑀘𑀺𑀓𑀺𑀘𑁆𑀙𑀜𑁆𑀘 ‘‘𑀲𑀻𑀮𑀩𑁆𑀩𑀢𑁂𑀳𑀺 𑀲𑀼𑀤𑁆𑀥𑀻’’𑀢𑀺 𑀧𑀯𑀢𑁆𑀢𑀦𑀓𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁂 𑀘 𑀯𑀺𑀲𑁄𑀥𑀬𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀳𑀺 𑀲𑀳 𑀧𑀭𑀺𑀬𑀸𑀬𑁂𑀳𑀺 𑀢𑀣𑀸 𑀧𑀯𑀢𑁆𑀢𑀸 𑀧𑀭𑀸𑀫𑀸𑀲𑀸 ‘‘𑀯𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀓𑀡𑁆𑀟𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.