𑁧𑁦. (𑀉𑀢𑁆𑀢𑀭) 𑀧𑀸𑀬𑀸𑀲𑀺𑀯𑀺𑀫𑀸𑀦𑀯𑀡𑁆𑀡𑀦𑀸

𑀬𑀸 𑀤𑁂𑀯𑀭𑀸𑀚𑀲𑁆𑀲 𑀲𑀪𑀸 𑀲𑀼𑀥𑀫𑁆𑀫𑀸𑀢𑀺 𑀉𑀢𑁆𑀢𑀭𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀥𑀸𑀢𑀼𑀯𑀺𑀪𑀸𑀕𑁂 𑀘 𑀓𑀢𑁂 𑀢𑀢𑁆𑀣 𑀢𑀢𑁆𑀣 𑀣𑀽𑀧𑁂𑀲𑀼 𑀧𑀢𑀺𑀝𑁆𑀞𑀸𑀧𑀺𑀬𑀫𑀸𑀦𑁂𑀲𑀼 𑀥𑀫𑁆𑀫𑀯𑀺𑀦𑀬𑀁 𑀲𑀗𑁆𑀕𑀸𑀬𑀺𑀢𑀼𑀁 𑀉𑀘𑁆𑀘𑀺𑀦𑀺𑀢𑁆𑀯𑀸 𑀕𑀳𑀺𑀢𑁂𑀲𑀼 𑀫𑀳𑀸𑀓𑀲𑁆𑀲𑀧𑀧𑁆𑀧𑀫𑀼𑀔𑁂𑀲𑀼 𑀫𑀳𑀸𑀣𑁂𑀭𑁂𑀲𑀼 𑀬𑀸𑀯 𑀯𑀲𑁆𑀲𑀽𑀧𑀕𑀫𑀦𑀸 𑀅𑀜𑁆𑀜𑁂𑀲𑀼 𑀘 𑀣𑁂𑀭𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀢𑀢𑁆𑀣 𑀢𑀢𑁆𑀣 𑀯𑀲𑀦𑁆𑀢𑁂𑀲𑀼 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁂𑀢𑀩𑁆𑀬𑀦𑀕𑀭𑀁 𑀕𑀦𑁆𑀢𑁆𑀯𑀸 𑀲𑀺𑀁𑀲𑀧𑀸𑀯𑀦𑁂 𑀯𑀲𑀺. 𑀅𑀣 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀣𑁂𑀭𑀲𑁆𑀲 𑀢𑀢𑁆𑀣 𑀯𑀲𑀦𑀪𑀸𑀯𑀁 𑀲𑀼𑀢𑁆𑀯𑀸 𑀫𑀳𑀢𑀸 𑀚𑀦𑀓𑀸𑀬𑁂𑀦 𑀧𑀭𑀺𑀯𑀼𑀢𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀕𑀢𑀁 𑀧𑀯𑁂𑀤𑁂𑀲𑀺. 𑀅𑀣 𑀦𑀁 𑀣𑁂𑀭𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀽𑀤𑀸𑀳𑀭𑀡𑀸𑀤𑀻𑀳𑀺 𑀧𑀭𑀮𑁄𑀓𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀅𑀦𑁂𑀓𑀯𑀺𑀳𑀺𑀢𑀳𑁂𑀢𑀽𑀧𑀫𑀸𑀮𑀗𑁆𑀓𑀢𑀁 𑀤𑀺𑀝𑁆𑀞𑀺𑀕𑀡𑁆𑀞𑀺𑀯𑀺𑀦𑀺𑀯𑁂𑀞𑀦𑀁 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀁 𑀧𑀸𑀬𑀸𑀲𑀺𑀲𑀼𑀢𑁆𑀢𑀁 (𑀤𑀻. 𑀦𑀺. 𑁨.𑁪𑁦𑁬 𑀆𑀤𑀬𑁄) 𑀤𑁂𑀲𑁂𑀢𑁆𑀯𑀸 𑀢𑀁 𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀬𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀲𑁄 𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺𑀓𑁄 𑀳𑀼𑀢𑁆𑀯𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀤𑀸𑀦𑀁 𑀤𑁂𑀦𑁆𑀢𑁄 𑀅𑀦𑀼𑀴𑀸𑀭𑀚𑁆𑀛𑀸𑀲𑀬𑀢𑀸𑀬 𑀮𑀽𑀔𑀁 𑀅𑀤𑀸𑀲𑀺 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀁 𑀓𑀡𑀸𑀚𑀓𑀁 𑀩𑀺𑀮𑀗𑁆𑀕𑀤𑀼𑀢𑀺𑀬𑀁 𑀲𑀸𑀡𑀸𑀦𑀺 𑀘 𑀯𑀢𑁆𑀣𑀸𑀦𑀺. 𑀏𑀯𑀁 𑀧𑀦 𑀅𑀲𑀓𑁆𑀓𑀘𑁆𑀘𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀳𑀻𑀦𑀓𑀸𑀬𑀁 𑀉𑀧𑀧𑀚𑁆𑀚𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀲𑀳𑀩𑁆𑀬𑀢𑀁. 𑀢𑀲𑁆𑀲 𑀧𑀦 𑀓𑀺𑀘𑁆𑀘𑀸𑀓𑀺𑀘𑁆𑀘𑁂𑀲𑀼 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀉𑀢𑁆𑀢𑀭𑁄 𑀦𑀸𑀫 𑀫𑀸𑀡𑀯𑁄 𑀅𑀳𑁄𑀲𑀺 𑀤𑀸𑀦𑁂 𑀩𑁆𑀬𑀸𑀯𑀝𑁄. 𑀲𑁄 𑀲𑀓𑁆𑀓𑀘𑁆𑀘𑀤𑀸𑀦𑀁 𑀤𑀢𑁆𑀯𑀸 𑀢𑀸𑀯𑀢𑀺𑀁𑀲𑀓𑀸𑀬𑀁 𑀉𑀧𑀧𑀦𑁆𑀦𑁄, 𑀢𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀯𑀺𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀓𑀢𑀜𑁆𑀜𑀼𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 𑀲𑀳 𑀯𑀺𑀫𑀸𑀦𑁂𑀦 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀫𑀸𑀦𑀢𑁄 𑀑𑀭𑀼𑀬𑁆𑀳 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀢𑀁 𑀣𑁂𑀭𑁄 𑁋

𑁧𑁧𑁦𑁮. ‘‘𑀬𑀸 𑀤𑁂𑀯𑀭𑀸𑀚𑀲𑁆𑀲 𑀲𑀪𑀸 𑀲𑀼𑀥𑀫𑁆𑀫𑀸, 𑀬𑀢𑁆𑀣𑀘𑁆𑀙𑀢𑀺 𑀤𑁂𑀯𑀲𑀗𑁆𑀖𑁄 𑀲𑀫𑀕𑁆𑀕𑁄;

𑀢𑀣𑀽𑀧𑀫𑀁 𑀢𑀼𑀬𑁆𑀳𑀫𑀺𑀤𑀁 𑀯𑀺𑀫𑀸𑀦𑀁, 𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀺 𑀅𑀦𑁆𑀢𑀮𑀺𑀓𑁆𑀔𑁂.

𑁧𑁧𑁦𑁯. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺;

𑁧𑁧𑁧𑁦. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁧𑁧𑁧. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑁄, 𑀭𑀜𑁆𑀜𑁄 𑀧𑀸𑀬𑀸𑀲𑀺𑀲𑁆𑀲 𑀅𑀳𑁄𑀲𑀺𑀁 𑀫𑀸𑀡𑀯𑁄;

𑀮𑀤𑁆𑀥𑀸 𑀥𑀦𑀁 𑀲𑀁𑀯𑀺𑀪𑀸𑀕𑀁 𑀅𑀓𑀸𑀲𑀺𑀁, 𑀧𑀺𑀬𑀸 𑀘 𑀫𑁂 𑀲𑀻𑀮𑀯𑀦𑁆𑀢𑁄 𑀅𑀳𑁂𑀲𑀼𑀁;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁.

𑁧𑁧𑁧𑁨. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀲𑁄 𑀤𑁂𑀯𑀧𑀼𑀢𑁆𑀢𑁄 𑀢𑀲𑁆𑀲 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺.

𑁧𑁧𑁦𑁮. 𑀢𑀢𑁆𑀣 𑀤𑁂𑀯𑀭𑀸𑀚𑀲𑁆𑀲𑀸𑀢𑀺 𑀲𑀓𑁆𑀓𑀲𑁆𑀲. 𑀲𑀪𑀸 𑀲𑀼𑀥𑀫𑁆𑀫𑀸𑀢𑀺 𑀏𑀯𑀁𑀦𑀸𑀫𑀓𑀁 𑀲𑀦𑁆𑀣𑀸𑀕𑀸𑀭𑀁. 𑀬𑀢𑁆𑀣𑀸𑀢𑀺 𑀬𑀲𑁆𑀲𑀁 𑀲𑀪𑀸𑀬𑀁. 𑀅𑀘𑁆𑀙𑀢𑀻𑀢𑀺 𑀦𑀺𑀲𑀻𑀤𑀢𑀺. 𑀤𑁂𑀯𑀲𑀗𑁆𑀖𑁄𑀢𑀺 𑀢𑀸𑀯𑀢𑀺𑀁𑀲𑀤𑁂𑀯𑀓𑀸𑀬𑁄. 𑀲𑀫𑀕𑁆𑀕𑁄𑀢𑀺 𑀲𑀳𑀺𑀢𑁄 𑀲𑀦𑁆𑀦𑀺𑀧𑀢𑀺𑀢𑁄.

𑁧𑁧𑁧𑁧. 𑀧𑀸𑀬𑀸𑀲𑀺𑀲𑁆𑀲 𑀅𑀳𑁄𑀲𑀺𑀁 𑀫𑀸𑀡𑀯𑁄𑀢𑀺 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑀲𑁆𑀲 𑀓𑀺𑀘𑁆𑀘𑀸𑀓𑀺𑀘𑁆𑀘𑀓𑀭𑁄 𑀤𑀳𑀭𑀢𑀸𑀬 𑀫𑀸𑀡𑀯𑁄, 𑀦𑀸𑀫𑁂𑀦 𑀧𑀦 𑀉𑀢𑁆𑀢𑀭𑁄 𑀦𑀸𑀫 𑀅𑀳𑁄𑀲𑀺𑀁. 𑀲𑀁𑀯𑀺𑀪𑀸𑀕𑀁 𑀅𑀓𑀸𑀲𑀺𑀦𑁆𑀢𑀺 𑀅𑀳𑀫𑁂𑀯 𑀅𑀪𑀼𑀜𑁆𑀚𑀺𑀢𑁆𑀯𑀸 𑀬𑀣𑀸𑀮𑀤𑁆𑀥𑀁 𑀥𑀦𑀁 𑀤𑀸𑀦𑀫𑀼𑀔𑁂 𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀲𑀁𑀯𑀺𑀪𑀚𑀦𑀁 𑀅𑀓𑀸𑀲𑀺𑀁. 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀭𑀺𑀘𑁆𑀘𑀚𑀦𑁆𑀢𑁄𑀢𑀺 𑀯𑀘𑀦𑀲𑁂𑀲𑁄. 𑀅𑀣 𑀯𑀸 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁. 𑀓𑀣𑀁? 𑀲𑀓𑁆𑀓𑀘𑁆𑀘𑀁. 𑀓𑀻𑀤𑀺𑀲𑀁? 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

(𑀉𑀢𑁆𑀢𑀭) 𑀧𑀸𑀬𑀸𑀲𑀺𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬 𑀯𑀺𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀁

𑀤𑀲𑀯𑀢𑁆𑀣𑀼𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀙𑀝𑁆𑀞𑀲𑁆𑀲 𑀧𑀸𑀬𑀸𑀲𑀺𑀯𑀕𑁆𑀕𑀲𑁆𑀲

𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.