𑁬. 𑀧𑀸𑀬𑀸𑀲𑀺𑀯𑀕𑁆𑀕𑁄

𑁧. 𑀧𑀞𑀫𑀅𑀕𑀸𑀭𑀺𑀬𑀯𑀺𑀫𑀸𑀦𑀯𑀡𑁆𑀡𑀦𑀸

𑀬𑀣𑀸 𑀯𑀦𑀁 𑀘𑀺𑀢𑁆𑀢𑀮𑀢𑀁 𑀧𑀪𑀸𑀲𑀢𑀻𑀢𑀺 𑀅𑀕𑀸𑀭𑀺𑀬𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀏𑀓𑀁 𑀓𑀼𑀮𑀁 𑀉𑀪𑀢𑁄𑀧𑀲𑀦𑁆𑀦𑀁 𑀳𑁄𑀢𑀺 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀁 𑀑𑀧𑀸𑀦𑀪𑀽𑀢𑀁 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁. 𑀢𑁂 𑀤𑁆𑀯𑁂 𑀚𑀬𑀫𑁆𑀧𑀢𑀺𑀓𑀸 𑀭𑀢𑀦𑀢𑁆𑀢𑀬𑀁 𑀉𑀤𑁆𑀤𑀺𑀲𑁆𑀲 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀢𑁂𑀲𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀓𑀦𑀓𑀯𑀺𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀢𑁂 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁧𑁦𑁪𑁮. ‘‘𑀬𑀣𑀸 𑀯𑀦𑀁 𑀘𑀺𑀢𑁆𑀢𑀮𑀢𑀁 𑀧𑀪𑀸𑀲𑀢𑀺, 𑀉𑀬𑁆𑀬𑀸𑀦𑀲𑁂𑀝𑁆𑀞𑀁 𑀢𑀺𑀤𑀲𑀸𑀦𑀫𑀼𑀢𑁆𑀢𑀫𑀁;

𑀢𑀣𑀽𑀧𑀫𑀁 𑀢𑀼𑀬𑁆𑀳𑀫𑀺𑀤𑀁 𑀯𑀺𑀫𑀸𑀦𑀁, 𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀺 𑀅𑀦𑁆𑀢𑀮𑀺𑀓𑁆𑀔𑁂.

𑁧𑁦𑁪𑁯. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄, 𑀫𑀦𑀼𑀲𑁆𑀲𑀪𑀽𑀢𑁄 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑁄, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀣𑁂𑀭𑁄 𑀧𑀼𑀘𑁆𑀙𑀺.

𑁧𑁦𑁫𑁦. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑁄;

𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁦𑁫𑁧. ‘‘𑀅𑀳𑀜𑁆𑀘 𑀪𑀭𑀺𑀬𑀸 𑀘 𑀫𑀦𑀼𑀲𑁆𑀲𑀮𑁄𑀓𑁂, 𑀑𑀧𑀸𑀦𑀪𑀽𑀢𑀸 𑀖𑀭𑀫𑀸𑀯𑀲𑀺𑀫𑁆𑀳;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑀸, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀫𑁆𑀳.

𑁧𑁦𑁫𑁨. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀩𑁆𑀬𑀸𑀓𑀸𑀲𑀺. 𑀕𑀸𑀣𑀸𑀲𑀼𑀧𑀺 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺.

𑀧𑀞𑀫𑀅𑀕𑀸𑀭𑀺𑀬𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀅𑀕𑀸𑀭𑀺𑀬𑀯𑀺𑀫𑀸𑀦𑀯𑀡𑁆𑀡𑀦𑀸

𑀬𑀣𑀸 𑀯𑀦𑀁 𑀘𑀺𑀢𑁆𑀢𑀮𑀢𑀦𑁆𑀢𑀺 𑀤𑀼𑀢𑀺𑀬𑀅𑀕𑀸𑀭𑀺𑀬𑀯𑀺𑀫𑀸𑀦𑀁. 𑀏𑀢𑁆𑀣𑀸𑀧𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀅𑀦𑀦𑁆𑀢𑀭𑀲𑀤𑀺𑀲𑀸𑀯.

𑁧𑁦𑁫𑁪. ‘‘𑀬𑀣𑀸 𑀯𑀦𑀁 𑀘𑀺𑀢𑁆𑀢𑀮𑀢𑀁 𑀧𑀪𑀸𑀲𑀢𑀺, 𑀉𑀬𑁆𑀬𑀸𑀦𑀲𑁂𑀝𑁆𑀞𑀁 𑀢𑀺𑀤𑀲𑀸𑀦𑀫𑀼𑀢𑁆𑀢𑀫𑀁;

𑀢𑀣𑀽𑀧𑀫𑀁 𑀢𑀼𑀬𑁆𑀳𑀫𑀺𑀤𑀁 𑀯𑀺𑀫𑀸𑀦𑀁, 𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀺 𑀅𑀦𑁆𑀢𑀮𑀺𑀓𑁆𑀔𑁂.

𑁧𑁦𑁫𑁫. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄,

𑀫𑀦𑀼𑀲𑁆𑀲𑀪𑀽𑀢𑁄 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑁄,

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀧𑀼𑀘𑁆𑀙𑀺;

𑁧𑁦𑁫𑁬. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁦𑁫𑁭. ‘‘𑀅𑀳𑀜𑁆𑀘 𑀪𑀭𑀺𑀬𑀸 𑀘 𑀫𑀦𑀼𑀲𑁆𑀲𑀮𑁄𑀓𑁂, 𑀑𑀧𑀸𑀦𑀪𑀽𑀢𑀸 𑀖𑀭𑀫𑀸𑀯𑀲𑀺𑀫𑁆𑀳;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑀸, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀫𑁆𑀳.

𑁧𑁦𑁫𑁮. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀩𑁆𑀬𑀸𑀓𑀸𑀲𑀺. 𑀕𑀸𑀣𑀸𑀲𑀼𑀧𑀺 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺.

𑀤𑀼𑀢𑀺𑀬𑀅𑀕𑀸𑀭𑀺𑀬𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀨𑀮𑀤𑀸𑀬𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀦𑁆𑀢𑀺 𑀨𑀮𑀤𑀸𑀬𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀅𑀓𑀸𑀮𑁂 𑀅𑀫𑁆𑀩𑀨𑀮𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀺. 𑀲𑁄 𑀆𑀭𑀸𑀫𑀧𑀸𑀮𑀁 𑀆𑀳 𑁋 ‘‘𑀫𑀬𑁆𑀳𑀁 𑀔𑁄, 𑀪𑀡𑁂, 𑀅𑀫𑁆𑀩𑀨𑀮𑁂𑀲𑀼 𑀇𑀘𑁆𑀙𑀸 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀫𑀸 𑀅𑀫𑁆𑀩𑀸𑀦𑀺 𑀫𑁂 𑀆𑀦𑁂𑀢𑁆𑀯𑀸 𑀤𑁂𑀳𑀻’’𑀢𑀺. ‘‘𑀤𑁂𑀯, 𑀦𑀢𑁆𑀣𑀺 𑀅𑀫𑁆𑀩𑁂𑀲𑀼 𑀅𑀫𑁆𑀩𑀨𑀮𑀁, 𑀅𑀧𑀺𑀘𑀸𑀳𑀁 𑀢𑀣𑀸 𑀓𑀭𑁄𑀫𑀺, 𑀲𑀘𑁂 𑀤𑁂𑀯𑁄 𑀓𑀺𑀜𑁆𑀘𑀺 𑀓𑀸𑀮𑀁 𑀆𑀕𑀫𑁂𑀢𑀺, 𑀬𑀣𑀸 𑀅𑀫𑁆𑀩𑀸 𑀦 𑀘𑀺𑀭𑀲𑁆𑀲𑁂𑀯 𑀨𑀮𑀁 𑀕𑀡𑁆𑀳𑀦𑁆𑀢𑀻’’𑀢𑀺. ‘‘𑀲𑀸𑀥𑀼, 𑀪𑀡𑁂, 𑀢𑀣𑀸 𑀓𑀭𑁄𑀳𑀻’’𑀢𑀺. 𑀆𑀭𑀸𑀫𑀧𑀸𑀮𑁄 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀅𑀫𑁆𑀩𑀭𑀼𑀓𑁆𑀔𑀫𑀽𑀮𑁂𑀲𑀼 𑀧𑀁𑀲𑀼𑀁 𑀅𑀧𑀦𑁂𑀢𑁆𑀯𑀸 𑀢𑀸𑀤𑀺𑀲𑀁 𑀧𑀁𑀲𑀼𑀁 𑀆𑀓𑀺𑀭𑀺, 𑀢𑀸𑀤𑀺𑀲𑀜𑁆𑀘 𑀉𑀤𑀓𑀁 𑀆𑀲𑀺𑀜𑁆𑀘𑀺, 𑀬𑀣𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀫𑁆𑀩𑀭𑀼𑀓𑁆𑀔𑀸 𑀲𑀘𑁆𑀙𑀺𑀦𑁆𑀦𑀧𑀢𑁆𑀢𑀸 𑀅𑀳𑁂𑀲𑀼𑀁. 𑀅𑀣 𑀦𑀁 𑀧𑀁𑀲𑀼𑀁 𑀅𑀧𑀦𑁂𑀢𑁆𑀯𑀸 𑀨𑀸𑀭𑀼𑀲𑀓𑀓𑀲𑀝𑀫𑀺𑀲𑁆𑀲𑀓𑀁 𑀧𑀸𑀓𑀢𑀺𑀓𑀁 𑀧𑀁𑀲𑀼𑀁 𑀆𑀓𑀺𑀭𑀺𑀢𑁆𑀯𑀸 𑀲𑀸𑀥𑀼𑀓𑀁 𑀉𑀤𑀓𑀁 𑀅𑀤𑀸𑀲𑀺. 𑀢𑀤𑀸 𑀅𑀫𑁆𑀩𑀭𑀼𑀓𑁆𑀔𑀸 𑀦 𑀘𑀺𑀭𑁂𑀦𑁂𑀯 𑀓𑁄𑀭𑀓𑀺𑀢𑀸 𑀧𑀮𑁆𑀮𑀯𑀺𑀢𑀸 𑀓𑀼𑀝𑀫𑀮𑀓𑀚𑀸𑀢𑀸 𑀳𑀼𑀢𑁆𑀯𑀸 𑀧𑀼𑀧𑁆𑀨𑀺𑀁𑀲𑀼, 𑀅𑀣 𑀲𑀮𑀸𑀝𑀼𑀓𑀚𑀸𑀢𑀸 𑀳𑀼𑀢𑁆𑀯𑀸 𑀨𑀮𑀸𑀦𑀺 𑀕𑀡𑁆𑀳𑀺𑀁𑀲𑀼. 𑀢𑀢𑁆𑀣𑁂𑀓𑀲𑁆𑀫𑀺𑀁 𑀅𑀫𑁆𑀩𑀭𑀼𑀓𑁆𑀔𑁂 𑀧𑀞𑀫𑀢𑀭𑀁 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀫𑀦𑁄𑀲𑀺𑀮𑀸𑀘𑀼𑀡𑁆𑀡𑀧𑀺𑀜𑁆𑀚𑀭𑀯𑀡𑁆𑀡𑀸𑀦𑀺 𑀲𑀫𑁆𑀧𑀦𑁆𑀦𑀕𑀦𑁆𑀥𑀭𑀲𑀸𑀦𑀺 𑀧𑀭𑀺𑀡𑀢𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀢𑀸𑀦𑀺 𑀕𑀳𑁂𑀢𑁆𑀯𑀸 ‘‘𑀭𑀜𑁆𑀜𑁄 𑀤𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀸𑀦𑀺 𑀅𑀫𑁆𑀩𑀸𑀦𑀺 𑀅𑀕𑁆𑀕𑀨𑀮𑀪𑀽𑀢𑀸𑀦𑀺 𑀇𑀫𑀲𑁆𑀲 𑀅𑀬𑁆𑀬𑀲𑁆𑀲 𑀤𑀲𑁆𑀲𑀸𑀫𑀺, 𑀓𑀸𑀫𑀁 𑀫𑀁 𑀭𑀸𑀚𑀸 𑀳𑀦𑀢𑀼 𑀯𑀸 𑀧𑀩𑁆𑀩𑀸𑀚𑁂𑀢𑀼 𑀯𑀸, 𑀭𑀜𑁆𑀜𑁄 𑀳𑀺 𑀤𑀺𑀦𑁆𑀦𑁂 𑀤𑀺𑀝𑁆𑀞𑀥𑀫𑁆𑀫𑁂 𑀧𑀽𑀚𑀸𑀫𑀢𑁆𑀢𑀁 𑀅𑀧𑁆𑀧𑀫𑀢𑁆𑀢𑀓𑀁 𑀨𑀮𑀁, 𑀅𑀬𑁆𑀬𑀲𑁆𑀲 𑀤𑀺𑀦𑁆𑀦𑁂 𑀧𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀅𑀧𑀭𑀺𑀫𑀸𑀡𑀁 𑀨𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀦𑀺 𑀨𑀮𑀸𑀦𑀺 𑀣𑁂𑀭𑀲𑁆𑀲 𑀤𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀭𑀸𑀚𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺 ‘‘𑀯𑀻𑀫𑀁𑀲𑀣 𑀢𑀸𑀯, 𑀪𑀡𑁂, 𑀬𑀣𑀸𑀬𑀁 𑀆𑀳𑀸’’𑀢𑀺. 𑀣𑁂𑀭𑁄 𑀧𑀦 𑀢𑀸𑀦𑀺 𑀨𑀮𑀸𑀦𑀺 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺. 𑀪𑀕𑀯𑀸 𑀢𑁂𑀲𑀼 𑀏𑀓𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲, 𑀏𑀓𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲, 𑀏𑀓𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀤𑀢𑁆𑀯𑀸 𑀏𑀓𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺. 𑀧𑀼𑀭𑀺𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁.

𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 ‘‘𑀥𑀻𑀭𑁄 𑀯𑀢𑀸𑀬𑀁 𑀧𑀼𑀭𑀺𑀲𑁄, 𑀬𑁄 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀼𑀜𑁆𑀜𑀧𑀲𑀼𑀢𑁄 𑀅𑀳𑁄𑀲𑀺, 𑀅𑀢𑁆𑀢𑀦𑁄 𑀧𑀭𑀺𑀲𑁆𑀲𑀫𑀜𑁆𑀘 𑀞𑀸𑀦𑀕𑀢𑀫𑁂𑀯 𑀅𑀓𑀸𑀲𑀻’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀢𑀲𑁆𑀲 𑀏𑀓𑀁 𑀕𑀸𑀫𑀯𑀭𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀘 𑀤𑀢𑁆𑀯𑀸 ‘‘𑀬𑀁 𑀢𑀬𑀸 𑀪𑀡𑁂 𑀅𑀫𑁆𑀩𑀨𑀮𑀤𑀸𑀦𑁂𑀦 𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀢𑀢𑁄 𑀫𑁂 𑀧𑀢𑁆𑀢𑀺𑀁 𑀤𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀤𑁂𑀫𑀺, 𑀤𑁂𑀯, 𑀬𑀣𑀸𑀲𑀼𑀔𑀁 𑀧𑀢𑁆𑀢𑀺𑀁 𑀕𑀡𑁆𑀳𑀸𑀳𑀻’’𑀢𑀺 𑀅𑀯𑁄𑀘. 𑀆𑀭𑀸𑀫𑀧𑀸𑀮𑁄 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀚𑁆𑀚𑀺, 𑀢𑀲𑁆𑀲 𑀲𑁄𑀴𑀲𑀬𑁄𑀚𑀦𑀺𑀓𑀁 𑀓𑀦𑀓𑀯𑀺𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀺 𑀲𑀢𑁆𑀢𑀲𑀢𑀓𑀽𑀝𑀸𑀕𑀸𑀭𑀧𑀝𑀺𑀫𑀡𑁆𑀟𑀺𑀢𑀁. 𑀢𑀁 𑀤𑀺𑀲𑁆𑀯𑀸 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀼𑀘𑁆𑀙𑀺 𑁋

𑁧𑁦𑁬𑁦. ‘‘𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀁, 𑀲𑀫𑀦𑁆𑀢𑀢𑁄 𑀲𑁄𑀴𑀲 𑀬𑁄𑀚𑀦𑀸𑀦𑀺;

𑀓𑀽𑀝𑀸𑀕𑀸𑀭𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀯𑁂𑀴𑀼𑀭𑀺𑀬𑀣𑀫𑁆𑀪𑀸 𑀭𑀼𑀘𑀓𑀢𑁆𑀣𑀢𑀸 𑀲𑀼𑀪𑀸.

𑁧𑁦𑁬𑁧. ‘‘𑀢𑀢𑁆𑀣𑀘𑁆𑀙𑀲𑀺 𑀧𑀺𑀯𑀲𑀺 𑀔𑀸𑀤𑀲𑀺 𑀘, 𑀤𑀺𑀩𑁆𑀩𑀸 𑀘 𑀯𑀻𑀡𑀸 𑀧𑀯𑀤𑀦𑁆𑀢𑀺 𑀯𑀕𑁆𑀕𑀼𑀁;

𑀅𑀝𑁆𑀞𑀝𑁆𑀞𑀓𑀸 𑀲𑀺𑀓𑁆𑀔𑀺𑀢𑀸 𑀲𑀸𑀥𑀼𑀭𑀽𑀧𑀸, 𑀤𑀺𑀩𑁆𑀩𑀸 𑀘 𑀓𑀜𑁆𑀜𑀸 𑀢𑀺𑀤𑀲𑀘𑀭𑀸 𑀉𑀴𑀸𑀭𑀸;

𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺 𑀧𑀫𑁄𑀤𑀬𑀦𑁆𑀢𑀺.

𑁧𑁦𑁬𑁨. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁦𑁬𑁩. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁦𑁬𑁪. ‘‘𑀨𑀮𑀤𑀸𑀬𑀻 𑀨𑀮𑀁 𑀯𑀺𑀧𑀼𑀮𑀁 𑀮𑀪𑀢𑀺, 𑀤𑀤𑀫𑀼𑀚𑀼𑀕𑀢𑁂𑀲𑀼 𑀧𑀲𑀦𑁆𑀦𑀫𑀸𑀦𑀲𑁄;

𑀲𑁄 𑀳𑀺 𑀧𑀫𑁄𑀤𑀢𑀺 𑀲𑀕𑁆𑀕𑀕𑀢𑁄 𑀢𑀺𑀤𑀺𑀯𑁂, 𑀅𑀦𑀼𑀪𑁄𑀢𑀺 𑀘 𑀧𑀼𑀜𑁆𑀜𑀨𑀮𑀁 𑀯𑀺𑀧𑀼𑀮𑀁.

𑁧𑁦𑁬𑁫. ‘‘𑀢𑀯𑁂𑀯𑀸𑀳𑀁 𑀫𑀳𑀸𑀫𑀼𑀦𑀺, 𑀅𑀤𑀸𑀲𑀺𑀁 𑀘𑀢𑀼𑀭𑁄 𑀨𑀮𑁂.

𑁧𑁦𑁬𑁬. ‘‘𑀢𑀲𑁆𑀫𑀸 𑀳𑀺 𑀨𑀮𑀁 𑀅𑀮𑀫𑁂𑀯 𑀤𑀸𑀢𑀼𑀁, 𑀦𑀺𑀘𑁆𑀘𑀁 𑀫𑀦𑀼𑀲𑁆𑀲𑁂𑀦 𑀲𑀼𑀔𑀢𑁆𑀣𑀺𑀓𑁂𑀦;

𑀤𑀺𑀩𑁆𑀩𑀸𑀦𑀺 𑀯𑀸 𑀧𑀢𑁆𑀣𑀬𑀢𑀸 𑀲𑀼𑀔𑀸𑀦𑀺, 𑀫𑀦𑀼𑀲𑁆𑀲𑀲𑁄𑀪𑀕𑁆𑀕𑀢𑀫𑀺𑀘𑁆𑀙𑀢𑀸 𑀯𑀸.

𑁧𑁦𑁬𑁭. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀲𑁄𑀧𑀺𑀲𑁆𑀲 𑀩𑁆𑀬𑀸𑀓𑀸𑀲𑀺;

𑁧𑁦𑁬𑁧. 𑀢𑀢𑁆𑀣 𑀅𑀝𑁆𑀞𑀝𑁆𑀞𑀓𑀸𑀢𑀺 𑀏𑀓𑁂𑀓𑀲𑁆𑀫𑀺𑀁 𑀓𑀽𑀝𑀸𑀕𑀸𑀭𑁂 𑀅𑀝𑁆𑀞𑀝𑁆𑀞𑀓𑀸 𑀘𑀢𑀼𑀲𑀝𑁆𑀞𑀺𑀧𑀭𑀺𑀫𑀸𑀡𑀸. 𑀲𑀸𑀥𑀼𑀭𑀽𑀧𑀸𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀻𑀮𑀸𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀺𑀓𑁆𑀔𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀼𑀦𑁆𑀤𑀭𑀲𑀪𑀸𑀯𑀸. 𑀤𑀺𑀩𑁆𑀩𑀸 𑀘 𑀓𑀜𑁆𑀜𑀸𑀢𑀺 𑀤𑁂𑀯𑀘𑁆𑀙𑀭𑀸𑀬𑁄. 𑀢𑀺𑀤𑀲𑀘𑀭𑀸𑀢𑀺 𑀢𑀺𑀤𑀲𑁂𑀲𑀼 𑀲𑀼𑀔𑀸𑀘𑀸𑀭𑀸 𑀲𑀼𑀔𑀯𑀺𑀳𑀸𑀭𑀺𑀦𑀺𑀬𑁄. 𑀉𑀴𑀸𑀭𑀸𑀢𑀺 𑀉𑀴𑀸𑀭𑀯𑀺𑀪𑀯𑀸.

𑁧𑁦𑁬𑁪. 𑀨𑀮𑀤𑀸𑀬𑀻𑀢𑀺 𑀅𑀢𑁆𑀢𑀦𑀸 𑀅𑀫𑁆𑀩𑀨𑀮𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀨𑀮𑀦𑁆𑀢𑀺 𑀧𑀼𑀜𑁆𑀜𑀨𑀮𑀁. 𑀯𑀺𑀧𑀼𑀮𑀦𑁆𑀢𑀺 𑀫𑀳𑀦𑁆𑀢𑀁 𑀮𑀪𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀤𑀦𑁆𑀢𑀺 𑀤𑀤𑀦𑁆𑀢𑁄 𑀤𑀸𑀦𑀳𑁂𑀢𑀼. 𑀉𑀚𑀼𑀕𑀢𑁂𑀲𑀽𑀢𑀺 𑀉𑀚𑀼𑀧𑀝𑀺𑀧𑀦𑁆𑀦𑁂𑀲𑀼. 𑀲𑀕𑁆𑀕𑀕𑀢𑁄𑀢𑀺 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀲𑀕𑁆𑀕𑀁 𑀕𑀢𑁄, 𑀢𑀢𑁆𑀣𑀸𑀧𑀺 𑀢𑀺𑀤𑀺𑀯𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀅𑀦𑀼𑀪𑁄𑀢𑀺 𑀘 𑀧𑀼𑀜𑁆𑀜𑀨𑀮𑀁 𑀯𑀺𑀧𑀼𑀮𑀁 𑀬𑀣𑀸𑀳𑀁, 𑀏𑀯𑀁 𑀅𑀜𑁆𑀜𑁄𑀧𑀻𑀢𑀺 𑀅𑀢𑁆𑀣𑁄.

𑁧𑁦𑁬𑁬. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀘𑀢𑀼𑀦𑁆𑀦𑀁 𑀨𑀮𑀸𑀦𑀁 𑀤𑀸𑀦𑀫𑀢𑁆𑀢𑁂𑀦 𑀈𑀤𑀺𑀲𑀻 𑀲𑀫𑁆𑀧𑀢𑁆𑀢𑀺 𑀅𑀥𑀺𑀕𑀢𑀸, 𑀢𑀲𑁆𑀫𑀸. 𑀅𑀮𑀫𑁂𑀯 𑀬𑀼𑀢𑁆𑀢𑀫𑁂𑀯. 𑀦𑀺𑀘𑁆𑀘𑀦𑁆𑀢𑀺 𑀲𑀩𑁆𑀩𑀓𑀸𑀮𑀁. 𑀤𑀺𑀩𑁆𑀩𑀸𑀦𑀻𑀢𑀺 𑀤𑁂𑀯𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀸𑀦𑀺. 𑀫𑀦𑀼𑀲𑁆𑀲𑀲𑁄𑀪𑀕𑁆𑀕𑀢𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀲𑀼𑀪𑀕𑀪𑀸𑀯𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀨𑀮𑀤𑀸𑀬𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀞𑀫𑀉𑀧𑀲𑁆𑀲𑀬𑀤𑀸𑀬𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀘𑀦𑁆𑀤𑁄 𑀬𑀣𑀸 𑀯𑀺𑀕𑀢𑀯𑀮𑀸𑀳𑀓𑁂 𑀦𑀪𑁂𑀢𑀺 𑀉𑀧𑀲𑁆𑀲𑀬𑀤𑀸𑀬𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀸𑀫𑀓𑀸𑀯𑀸𑀲𑁂 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑀼𑀁 𑀭𑀸𑀚𑀕𑀳𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀸𑀬𑀁 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀧𑀭𑀺𑀬𑁂𑀲𑀦𑁆𑀢𑁄 𑀅𑀜𑁆𑀜𑀢𑀭𑀁 𑀉𑀧𑀸𑀲𑀓𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀉𑀧𑀸𑀲𑀓, 𑀇𑀫𑀲𑁆𑀫𑀺𑀁 𑀕𑀸𑀫𑁂 𑀅𑀢𑁆𑀣𑀺 𑀓𑀺𑀜𑁆𑀘𑀺 𑀧𑀩𑁆𑀩𑀚𑀺𑀢𑀸𑀦𑀁 𑀯𑀲𑀦𑀬𑁄𑀕𑁆𑀕𑀝𑁆𑀞𑀸𑀦’’𑀦𑁆𑀢𑀺. 𑀉𑀧𑀸𑀲𑀓𑁄 𑀧𑀲𑀦𑁆𑀦𑀘𑀺𑀢𑁆𑀢𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀣𑁂𑀭𑀲𑁆𑀲 𑀯𑀲𑀦𑀬𑁄𑀕𑁆𑀕𑀁 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀢𑁆𑀣 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀣𑁂𑀭𑀁 𑀧𑀯𑁂𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀸𑀤𑁂 𑀥𑁄𑀯𑀦𑁆𑀢𑁂 𑀧𑀤𑀻𑀧𑀁 𑀉𑀚𑁆𑀚𑀸𑀮𑁂𑀢𑁆𑀯𑀸 𑀫𑀜𑁆𑀘𑁂 𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁆𑀯𑀸𑀢𑀦𑀸𑀬 𑀘 𑀦𑀺𑀫𑀦𑁆𑀢𑁂𑀢𑁆𑀯𑀸 𑀣𑁂𑀭𑀲𑁆𑀲 𑀤𑀼𑀢𑀺𑀬𑀤𑀺𑀯𑀲𑁂 𑀪𑁄𑀚𑁂𑀢𑁆𑀯𑀸 𑀧𑀸𑀦𑀓𑀢𑁆𑀣𑀸𑀬 𑀕𑀼𑀴𑀧𑀺𑀡𑁆𑀟𑀜𑁆𑀘 𑀤𑀢𑁆𑀯𑀸 𑀣𑁂𑀭𑀁 𑀕𑀘𑁆𑀙𑀦𑁆𑀢𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀳 𑀪𑀭𑀺𑀬𑀸𑀬 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺 𑁋

𑁧𑁦𑁬𑁯. ‘‘𑀘𑀦𑁆𑀤𑁄 𑀬𑀣𑀸 𑀯𑀺𑀕𑀢𑀯𑀮𑀸𑀳𑀓𑁂 𑀦𑀪𑁂, 𑀑𑀪𑀸𑀲𑀬𑀁 𑀕𑀘𑁆𑀙𑀢𑀺 𑀅𑀦𑁆𑀢𑀮𑀺𑀓𑁆𑀔𑁂;

𑀢𑀣𑀽𑀧𑀫𑀁 𑀢𑀼𑀬𑁆𑀳𑀫𑀺𑀤𑀁 𑀯𑀺𑀫𑀸𑀦𑀁, 𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀺 𑀅𑀦𑁆𑀢𑀮𑀺𑀓𑁆𑀔𑁂.

𑁧𑁦𑁭𑁦. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄, 𑀫𑀦𑀼𑀲𑁆𑀲𑀪𑀽𑀢𑁄 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑁄, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀲𑁄 𑀤𑁂𑀯𑀧𑀼𑀢𑁆𑀢𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁧𑁦𑁭𑁧. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁦𑁭𑁨. ‘‘𑀅𑀳𑀜𑁆𑀘 𑀪𑀭𑀺𑀬𑀸 𑀘 𑀫𑀦𑀼𑀲𑁆𑀲𑀮𑁄𑀓𑁂, 𑀉𑀧𑀲𑁆𑀲𑀬𑀁 𑀅𑀭𑀳𑀢𑁄 𑀅𑀤𑀫𑁆𑀳;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑀸, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀫𑁆𑀳.

𑁧𑁦𑁭𑁩. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂… 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀢𑀢𑁆𑀣 𑀕𑀸𑀣𑀸𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯;

𑀧𑀞𑀫𑀉𑀧𑀲𑁆𑀲𑀬𑀤𑀸𑀬𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀼𑀢𑀺𑀬𑀉𑀧𑀲𑁆𑀲𑀬𑀤𑀸𑀬𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀲𑀽𑀭𑀺𑀬𑁄 𑀬𑀣𑀸 𑀯𑀺𑀕𑀢𑀯𑀮𑀸𑀳𑀓𑁂 𑀦𑀪𑁂𑀢𑀺 𑀤𑀼𑀢𑀺𑀬𑀉𑀧𑀲𑁆𑀲𑀬𑀤𑀸𑀬𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀕𑀸𑀫𑀓𑀸𑀯𑀸𑀲𑁂 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀭𑀸𑀚𑀕𑀳𑀁 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀦𑁆𑀢𑀸 𑀲𑀸𑀬𑀁 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀲𑁂𑀲𑀁 𑀅𑀦𑀦𑁆𑀢𑀭𑀯𑀺𑀫𑀸𑀦𑀲𑀤𑀺𑀲𑀫𑁂𑀯.

𑁧𑁦𑁭𑁫. ‘‘𑀲𑀽𑀭𑀺𑀬𑁄 𑀬𑀣𑀸 𑀯𑀺𑀕𑀢𑀯𑀮𑀸𑀳𑀓𑁂 𑀦𑀪𑁂…𑀧𑁂….

(𑀬𑀣𑀸 𑀧𑀼𑀭𑀺𑀫𑀯𑀺𑀫𑀸𑀦𑀁, 𑀢𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁;)

𑁧𑁦𑁭𑁯. ‘‘𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀢𑀢𑁆𑀣 𑀕𑀸𑀣𑀸𑀲𑀼𑀧𑀺 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺;

𑀤𑀼𑀢𑀺𑀬𑀉𑀧𑀲𑁆𑀲𑀬𑀤𑀸𑀬𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀪𑀺𑀓𑁆𑀔𑀸𑀤𑀸𑀬𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀦𑁆𑀢𑀺 𑀪𑀺𑀓𑁆𑀔𑀸𑀤𑀸𑀬𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀏𑀓𑀲𑁆𑀲 𑀖𑀭𑀤𑁆𑀥𑀸𑀭𑁂 𑀅𑀝𑁆𑀞𑀸𑀲𑀺. 𑀢𑀢𑁆𑀣 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀥𑁄𑀢𑀳𑀢𑁆𑀣𑀧𑀸𑀤𑁄 ‘‘𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑁄 𑀪𑁄𑀚𑀦𑀁 𑀉𑀧𑀦𑁂𑀢𑁆𑀯𑀸 𑀧𑀸𑀢𑀺𑀬𑀸 𑀧𑀓𑁆𑀔𑀺𑀢𑁆𑀢𑁂 𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀧𑀸𑀢𑀺𑀬𑀸 𑀪𑀢𑁆𑀢𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑁂 𑀆𑀓𑀺𑀭𑀦𑁆𑀢𑁄 𑀢𑁂𑀦 ‘‘𑀏𑀓𑀤𑁂𑀲𑀫𑁂𑀯 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁄𑀧𑀺 𑀲𑀩𑁆𑀩𑀫𑁂𑀯 𑀆𑀓𑀺𑀭𑀺. 𑀲𑁄 𑀪𑀺𑀓𑁆𑀔𑀼 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀧𑀼𑀭𑀺𑀲𑁄 ‘‘𑀙𑀸𑀢𑀚𑁆𑀛𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀬𑀸 𑀅𑀪𑀼𑀜𑁆𑀚𑀺𑀢𑁆𑀯𑀸 𑀪𑀢𑁆𑀢𑀁 𑀤𑀺𑀦𑁆𑀦’’𑀦𑁆𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑁄 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀮𑀪𑀺. 𑀲𑁄 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀫𑀳𑀢𑀺𑀬𑀸 𑀤𑁂𑀯𑀺𑀤𑁆𑀥𑀺𑀬𑀸 𑀯𑀺𑀭𑁄𑀘𑀫𑀸𑀦𑀁 𑀤𑀺𑀲𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺 𑁋

𑁧𑁦𑁮𑁧. ‘‘𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀁, 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺;

𑀓𑀽𑀝𑀸𑀕𑀸𑀭𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀯𑁂𑀴𑀼𑀭𑀺𑀬𑀣𑀫𑁆𑀪𑀸 𑀭𑀼𑀘𑀓𑀢𑁆𑀣𑀢𑀸 𑀲𑀼𑀪𑀸.

𑁧𑁦𑁮𑁨. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀲𑁄𑀧𑀺 𑀢𑀲𑁆𑀲 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁧𑁦𑁮𑁩. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁦𑁮𑁪. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑁄, 𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀼𑀁 𑀢𑀲𑀺𑀢𑀁 𑀓𑀺𑀮𑀦𑁆𑀢𑀁;

𑀏𑀓𑀸𑀳𑀁 𑀪𑀺𑀓𑁆𑀔𑀁 𑀧𑀝𑀺𑀧𑀸𑀤𑀬𑀺𑀲𑁆𑀲𑀁, 𑀲𑀫𑀗𑁆𑀕𑀺 𑀪𑀢𑁆𑀢𑁂𑀦 𑀢𑀤𑀸 𑀅𑀓𑀸𑀲𑀺𑀁.

𑁧𑁦𑁮𑁫. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂… 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁦𑁮𑁪. 𑀢𑀢𑁆𑀣 𑀏𑀓𑀸𑀳𑀁 𑀪𑀺𑀓𑁆𑀔𑀦𑁆𑀢𑀺 𑀏𑀓𑀁 𑀅𑀳𑀁 𑀪𑀺𑀓𑁆𑀔𑀸𑀫𑀢𑁆𑀢𑀁, 𑀏𑀓𑀁 𑀪𑀢𑁆𑀢𑀯𑀟𑁆𑀠𑀺𑀢𑀓𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀧𑀸𑀤𑀬𑀺𑀲𑁆𑀲𑀦𑁆𑀢𑀺 𑀧𑀝𑀺𑀧𑀸𑀤𑁂𑀲𑀺𑀁 𑀅𑀤𑀸𑀲𑀺𑀁. 𑀲𑀫𑀗𑁆𑀕𑀺 𑀪𑀢𑁆𑀢𑁂𑀦𑀸𑀢𑀺 𑀪𑀢𑁆𑀢𑁂𑀦 𑀲𑀫𑀗𑁆𑀕𑀻𑀪𑀽𑀢𑀁, 𑀮𑀤𑁆𑀥𑀪𑀺𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀫𑀳𑀸𑀣𑁂𑀭𑁄 𑀢𑁂𑀦 𑀤𑁂𑀯𑀧𑀼𑀢𑁆𑀢𑁂𑀦 𑀅𑀢𑁆𑀢𑀦𑁄 𑀲𑀼𑀘𑀭𑀺𑀢𑀓𑀫𑁆𑀫𑁂 𑀧𑀓𑀸𑀲𑀺𑀢𑁂 𑀲𑀧𑀭𑀺𑀯𑀸𑀭𑀲𑁆𑀲 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀫𑀸𑀕𑀢𑁄, 𑀢𑀁 𑀧𑀯𑀢𑁆𑀢𑀺𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑀣𑁂𑀲𑀺. 𑀲𑀢𑁆𑀣𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀪𑀺𑀓𑁆𑀔𑀸𑀤𑀸𑀬𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀬𑀯𑀧𑀸𑀮𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀦𑁆𑀢𑀺 𑀬𑀯𑀧𑀸𑀮𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑁄 𑀤𑀼𑀕𑁆𑀕𑀢𑀤𑀸𑀭𑀓𑁄 𑀬𑀯𑀔𑁂𑀢𑁆𑀢𑀁 𑀭𑀓𑁆𑀔𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀸𑀢𑀭𑀸𑀲𑀢𑁆𑀣𑀸𑀬 𑀓𑀼𑀫𑁆𑀫𑀸𑀲𑀁 𑀮𑀪𑀺𑀢𑁆𑀯𑀸 ‘‘𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀓𑀼𑀫𑁆𑀫𑀸𑀲𑀁 𑀕𑀳𑁂𑀢𑁆𑀯𑀸 𑀬𑀯𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀅𑀜𑁆𑀜𑀢𑀭𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀉𑀧𑀓𑀝𑁆𑀞𑁂 𑀓𑀸𑀮𑁂 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀬𑀯𑀧𑀸𑀮𑀓𑁂𑀦 𑀦𑀺𑀲𑀺𑀦𑁆𑀦𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀲𑀗𑁆𑀓𑀫𑀺. 𑀬𑀯𑀧𑀸𑀮𑀓𑁄 𑀯𑁂𑀮𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀘𑁆𑀘𑀺, 𑀪𑀦𑁆𑀢𑁂, 𑀆𑀳𑀸𑀭𑁄 𑀮𑀤𑁆𑀥𑁄’’𑀢𑀺 𑀆𑀳. 𑀣𑁂𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑁄 𑀅𑀮𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 ‘‘𑀪𑀦𑁆𑀢𑁂, 𑀉𑀧𑀓𑀝𑁆𑀞𑀸 𑀯𑁂𑀮𑀸, 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀲𑀓𑁆𑀓𑀸, 𑀫𑀬𑁆𑀳𑀁 𑀅𑀦𑀼𑀓𑀫𑁆𑀧𑀸𑀬 𑀇𑀫𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑀲𑁆𑀲 𑀢𑀁 𑀓𑀼𑀫𑁆𑀫𑀸𑀲𑀁 𑀅𑀤𑀸𑀲𑀺. 𑀣𑁂𑀭𑁄 𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑁄 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄𑀧𑀺 𑀤𑀸𑀭𑀓𑁄 ‘‘𑀲𑀼𑀤𑀺𑀦𑁆𑀦𑀁 𑀯𑀢 𑀫𑀬𑀸 𑀈𑀤𑀺𑀲𑀲𑁆𑀲 𑀓𑀼𑀫𑁆𑀫𑀸𑀲𑀤𑀸𑀦𑀁 𑀤𑀤𑀦𑁆𑀢𑁂𑀦𑀸’’𑀢𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺 𑁋

𑁧𑁦𑁮𑁭. ‘‘𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀁…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀲𑁄𑀧𑀺 𑀢𑀲𑁆𑀲 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁧𑁦𑁮𑁯. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁦𑁯𑁦. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑁄, 𑀅𑀳𑁄𑀲𑀺𑀁 𑀬𑀯𑀧𑀸𑀮𑀓𑁄;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀪𑀺𑀓𑁆𑀔𑀼𑀁, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁.

𑁧𑁦𑁯𑁧. ‘‘𑀢𑀲𑁆𑀲 𑀅𑀤𑀸𑀲𑀳𑀁 𑀪𑀸𑀕𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺;

𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀁 𑀤𑀢𑁆𑀯𑀸𑀦, 𑀫𑁄𑀤𑀸𑀫𑀺 𑀦𑀦𑁆𑀤𑀦𑁂 𑀯𑀦𑁂.

𑁧𑁦𑁯𑁨. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀢𑀢𑁆𑀣 𑀕𑀸𑀣𑀸𑀲𑀼𑀧𑀺 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺.

𑀬𑀯𑀧𑀸𑀮𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀞𑀫𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀮𑀗𑁆𑀓𑀢𑁄 𑀫𑀮𑁆𑀬𑀥𑀭𑁄 𑀲𑀼𑀯𑀢𑁆𑀣𑁄𑀢𑀺 𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀲𑀧𑀭𑀺𑀯𑀸𑀭𑀸 𑀓𑀸𑀲𑀻𑀲𑀼 𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸𑀬𑀁 𑀅𑀜𑁆𑀜𑀢𑀭𑀁 𑀯𑀺𑀳𑀸𑀭𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀕𑁄𑀘𑀭𑀕𑀸𑀫𑁂 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀸𑀤𑀥𑁄𑀯𑀦𑀁 𑀧𑀸𑀤𑀩𑁆𑀪𑀜𑁆𑀚𑀦𑀢𑁂𑀮𑀁 𑀫𑀜𑁆𑀘𑀧𑀻𑀞𑀁 𑀧𑀘𑁆𑀘𑀢𑁆𑀣𑀭𑀡𑀁 𑀧𑀤𑀻𑀧𑀺𑀬𑀜𑁆𑀘 𑀉𑀧𑀦𑁂𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀘 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀣𑁂𑀭𑀸 𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺 𑁋

𑁧𑁦𑁯𑁪. ‘‘𑀅𑀮𑀗𑁆𑀓𑀢𑁄 𑀫𑀮𑁆𑀬𑀥𑀭𑁄 𑀲𑀼𑀯𑀢𑁆𑀣𑁄, 𑀲𑀼𑀓𑀼𑀡𑁆𑀟𑀮𑀻 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼;

𑀆𑀫𑀼𑀢𑁆𑀢𑀳𑀢𑁆𑀣𑀸𑀪𑀭𑀡𑁄 𑀬𑀲𑀲𑁆𑀲𑀻, 𑀤𑀺𑀩𑁆𑀩𑁂 𑀯𑀺𑀫𑀸𑀦𑀫𑁆𑀳𑀺 𑀬𑀣𑀸𑀧𑀺 𑀘𑀦𑁆𑀤𑀺𑀫𑀸.

𑁧𑁦𑁯𑁫. ‘‘𑀤𑀺𑀩𑁆𑀩𑀸 𑀘 𑀯𑀻𑀡𑀸 𑀧𑀯𑀤𑀦𑁆𑀢𑀺 𑀯𑀕𑁆𑀕𑀼𑀁, 𑀅𑀝𑁆𑀞𑀝𑁆𑀞𑀓𑀸 𑀲𑀺𑀓𑁆𑀔𑀺𑀢𑀸 𑀲𑀸𑀥𑀼𑀭𑀽𑀧𑀸;

𑀤𑀺𑀩𑁆𑀩𑀸 𑀘 𑀓𑀜𑁆𑀜𑀸 𑀢𑀺𑀤𑀲𑀘𑀭𑀸 𑀉𑀴𑀸𑀭𑀸, 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺 𑀧𑀫𑁄𑀤𑀬𑀦𑁆𑀢𑀺.

𑁧𑁦𑁯𑁬. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀲𑁄𑀧𑀺 𑀢𑀲𑁆𑀲 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁧𑁦𑁯𑁭. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁦𑁯𑁮. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑁄, 𑀤𑀺𑀲𑁆𑀯𑀸𑀦 𑀲𑀫𑀡𑁂 𑀲𑀻𑀮𑀯𑀦𑁆𑀢𑁂;

𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑁂 𑀬𑀲𑀲𑁆𑀲𑀻, 𑀩𑀳𑀼𑀲𑁆𑀲𑀼𑀢𑁂 𑀢𑀡𑁆𑀳𑀓𑁆𑀔𑀬𑀽𑀧𑀧𑀦𑁆𑀦𑁂;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁.

𑁧𑁦𑁯𑁯. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁦𑁯𑁪. 𑀢𑀢𑁆𑀣 𑀲𑀼𑀓𑀼𑀡𑁆𑀟𑀮𑀻𑀢𑀺 𑀲𑀼𑀦𑁆𑀤𑀭𑁂𑀳𑀺 𑀓𑀼𑀡𑁆𑀟𑀮𑁂𑀳𑀺 𑀅𑀮𑀗𑁆𑀓𑀢𑀓𑀡𑁆𑀡𑁄. ‘‘𑀲𑀓𑀼𑀡𑁆𑀟𑀮𑀻’’𑀢𑀺𑀧𑀺 𑀧𑀸𑀞𑁄, 𑀲𑀤𑀺𑀲𑀁 𑀓𑀼𑀡𑁆𑀟𑀮𑀁 𑀲𑀓𑀼𑀡𑁆𑀟𑀮𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀓𑀼𑀡𑁆𑀟𑀮𑀻, 𑀬𑀼𑀢𑁆𑀢𑀓𑀼𑀡𑁆𑀟𑀮𑀻 𑀅𑀜𑁆𑀜𑀫𑀜𑁆𑀜𑀜𑁆𑀘 𑀢𑀼𑀬𑁆𑀳𑀜𑁆𑀘 𑀅𑀦𑀼𑀘𑁆𑀙𑀯𑀺𑀓𑀓𑀼𑀡𑁆𑀟𑀮𑀻𑀢𑀺 𑀅𑀢𑁆𑀣𑁄. 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽𑀢𑀺 𑀲𑀫𑁆𑀫𑀸𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼. 𑀆𑀫𑀼𑀢𑁆𑀢𑀳𑀢𑁆𑀣𑀸𑀪𑀭𑀡𑁄𑀢𑀺 𑀧𑀝𑀺𑀫𑀼𑀓𑁆𑀓𑀅𑀗𑁆𑀕𑀼𑀮𑀺𑀬𑀸𑀤𑀺𑀳𑀢𑁆𑀣𑀸𑀪𑀭𑀡𑁄.

𑁧𑁦𑁯𑁮. 𑀢𑀡𑁆𑀳𑀓𑁆𑀔𑀬𑀽𑀧𑀧𑀦𑁆𑀦𑁂𑀢𑀺 𑀢𑀡𑁆𑀳𑀓𑁆𑀔𑀬𑀁 𑀅𑀭𑀳𑀢𑁆𑀢𑀁, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀉𑀧𑀕𑀢𑁂, 𑀅𑀥𑀺𑀕𑀢𑀯𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀞𑀫𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀮𑀗𑁆𑀓𑀢𑁄 𑀫𑀮𑁆𑀬𑀥𑀭𑁄 𑀲𑀼𑀯𑀢𑁆𑀣𑁄𑀢𑀺 𑀤𑀼𑀢𑀺𑀬𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀓𑀸𑀲𑀻𑀲𑀼 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸𑀢𑀺𑀆𑀤𑀺 𑀲𑀩𑁆𑀩𑀁 𑀅𑀦𑀦𑁆𑀢𑀭𑀲𑀤𑀺𑀲𑀫𑁂𑀯.

𑁧𑁧𑁦𑁧. ‘‘𑀅𑀮𑀗𑁆𑀓𑀢𑁄 𑀫𑀮𑁆𑀬𑀥𑀭𑁄 𑀲𑀼𑀯𑀢𑁆𑀣𑁄, 𑀲𑀼𑀓𑀼𑀡𑁆𑀟𑀮𑀻 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼;

𑀆𑀫𑀼𑀢𑁆𑀢𑀳𑀢𑁆𑀣𑀸𑀪𑀭𑀡𑁄 𑀬𑀲𑀲𑁆𑀲𑀻, 𑀤𑀺𑀩𑁆𑀩𑁂 𑀯𑀺𑀫𑀸𑀦𑀫𑁆𑀳𑀺 𑀬𑀣𑀸𑀧𑀺 𑀘𑀦𑁆𑀤𑀺𑀫𑀸.

𑁧𑁧𑁦𑁨. ‘‘𑀤𑀺𑀩𑁆𑀩𑀸 𑀘 𑀯𑀻𑀡𑀸 𑀧𑀯𑀤𑀦𑁆𑀢𑀺 𑀯𑀕𑁆𑀕𑀼𑀁;

𑀅𑀝𑁆𑀞𑀝𑁆𑀞𑀓𑀸 𑀲𑀺𑀓𑁆𑀔𑀺𑀢𑀸 𑀲𑀸𑀥𑀼𑀭𑀽𑀧𑀸;

𑀤𑀺𑀩𑁆𑀩𑀸 𑀘 𑀓𑀜𑁆𑀜𑀸 𑀢𑀺𑀤𑀲𑀘𑀭𑀸 𑀉𑀴𑀸𑀭𑀸, 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺 𑀧𑀫𑁄𑀤𑀬𑀦𑁆𑀢𑀺.

𑁧𑁧𑁦𑁩. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀧𑀼𑀘𑁆𑀙𑀺;

𑁧𑁧𑁦𑁪. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁧𑁦𑁫. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑁄, 𑀤𑀺𑀲𑁆𑀯𑀸𑀦 𑀲𑀫𑀡𑁂 𑀲𑀸𑀥𑀼𑀭𑀽𑀧𑁂;

𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑁂 𑀬𑀲𑀲𑁆𑀲𑀻, 𑀩𑀳𑀼𑀲𑁆𑀲𑀼𑀢𑁂 𑀲𑀻𑀮𑀯𑀦𑁆𑀢𑁂 𑀧𑀲𑀦𑁆𑀦𑁂;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁.

𑁧𑁧𑁦𑁬. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀕𑀸𑀣𑀸𑀲𑀼𑀧𑀺 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺.

𑀤𑀼𑀢𑀺𑀬𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. (𑀉𑀢𑁆𑀢𑀭) 𑀧𑀸𑀬𑀸𑀲𑀺𑀯𑀺𑀫𑀸𑀦𑀯𑀡𑁆𑀡𑀦𑀸

𑀬𑀸 𑀤𑁂𑀯𑀭𑀸𑀚𑀲𑁆𑀲 𑀲𑀪𑀸 𑀲𑀼𑀥𑀫𑁆𑀫𑀸𑀢𑀺 𑀉𑀢𑁆𑀢𑀭𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀥𑀸𑀢𑀼𑀯𑀺𑀪𑀸𑀕𑁂 𑀘 𑀓𑀢𑁂 𑀢𑀢𑁆𑀣 𑀢𑀢𑁆𑀣 𑀣𑀽𑀧𑁂𑀲𑀼 𑀧𑀢𑀺𑀝𑁆𑀞𑀸𑀧𑀺𑀬𑀫𑀸𑀦𑁂𑀲𑀼 𑀥𑀫𑁆𑀫𑀯𑀺𑀦𑀬𑀁 𑀲𑀗𑁆𑀕𑀸𑀬𑀺𑀢𑀼𑀁 𑀉𑀘𑁆𑀘𑀺𑀦𑀺𑀢𑁆𑀯𑀸 𑀕𑀳𑀺𑀢𑁂𑀲𑀼 𑀫𑀳𑀸𑀓𑀲𑁆𑀲𑀧𑀧𑁆𑀧𑀫𑀼𑀔𑁂𑀲𑀼 𑀫𑀳𑀸𑀣𑁂𑀭𑁂𑀲𑀼 𑀬𑀸𑀯 𑀯𑀲𑁆𑀲𑀽𑀧𑀕𑀫𑀦𑀸 𑀅𑀜𑁆𑀜𑁂𑀲𑀼 𑀘 𑀣𑁂𑀭𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀢𑀢𑁆𑀣 𑀢𑀢𑁆𑀣 𑀯𑀲𑀦𑁆𑀢𑁂𑀲𑀼 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁂𑀢𑀩𑁆𑀬𑀦𑀕𑀭𑀁 𑀕𑀦𑁆𑀢𑁆𑀯𑀸 𑀲𑀺𑀁𑀲𑀧𑀸𑀯𑀦𑁂 𑀯𑀲𑀺. 𑀅𑀣 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀣𑁂𑀭𑀲𑁆𑀲 𑀢𑀢𑁆𑀣 𑀯𑀲𑀦𑀪𑀸𑀯𑀁 𑀲𑀼𑀢𑁆𑀯𑀸 𑀫𑀳𑀢𑀸 𑀚𑀦𑀓𑀸𑀬𑁂𑀦 𑀧𑀭𑀺𑀯𑀼𑀢𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀕𑀢𑀁 𑀧𑀯𑁂𑀤𑁂𑀲𑀺. 𑀅𑀣 𑀦𑀁 𑀣𑁂𑀭𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀽𑀤𑀸𑀳𑀭𑀡𑀸𑀤𑀻𑀳𑀺 𑀧𑀭𑀮𑁄𑀓𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀅𑀦𑁂𑀓𑀯𑀺𑀳𑀺𑀢𑀳𑁂𑀢𑀽𑀧𑀫𑀸𑀮𑀗𑁆𑀓𑀢𑀁 𑀤𑀺𑀝𑁆𑀞𑀺𑀕𑀡𑁆𑀞𑀺𑀯𑀺𑀦𑀺𑀯𑁂𑀞𑀦𑀁 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀁 𑀧𑀸𑀬𑀸𑀲𑀺𑀲𑀼𑀢𑁆𑀢𑀁 (𑀤𑀻. 𑀦𑀺. 𑁨.𑁪𑁦𑁬 𑀆𑀤𑀬𑁄) 𑀤𑁂𑀲𑁂𑀢𑁆𑀯𑀸 𑀢𑀁 𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀬𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀲𑁄 𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺𑀓𑁄 𑀳𑀼𑀢𑁆𑀯𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀤𑀸𑀦𑀁 𑀤𑁂𑀦𑁆𑀢𑁄 𑀅𑀦𑀼𑀴𑀸𑀭𑀚𑁆𑀛𑀸𑀲𑀬𑀢𑀸𑀬 𑀮𑀽𑀔𑀁 𑀅𑀤𑀸𑀲𑀺 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀁 𑀓𑀡𑀸𑀚𑀓𑀁 𑀩𑀺𑀮𑀗𑁆𑀕𑀤𑀼𑀢𑀺𑀬𑀁 𑀲𑀸𑀡𑀸𑀦𑀺 𑀘 𑀯𑀢𑁆𑀣𑀸𑀦𑀺. 𑀏𑀯𑀁 𑀧𑀦 𑀅𑀲𑀓𑁆𑀓𑀘𑁆𑀘𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀳𑀻𑀦𑀓𑀸𑀬𑀁 𑀉𑀧𑀧𑀚𑁆𑀚𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀲𑀳𑀩𑁆𑀬𑀢𑀁. 𑀢𑀲𑁆𑀲 𑀧𑀦 𑀓𑀺𑀘𑁆𑀘𑀸𑀓𑀺𑀘𑁆𑀘𑁂𑀲𑀼 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀉𑀢𑁆𑀢𑀭𑁄 𑀦𑀸𑀫 𑀫𑀸𑀡𑀯𑁄 𑀅𑀳𑁄𑀲𑀺 𑀤𑀸𑀦𑁂 𑀩𑁆𑀬𑀸𑀯𑀝𑁄. 𑀲𑁄 𑀲𑀓𑁆𑀓𑀘𑁆𑀘𑀤𑀸𑀦𑀁 𑀤𑀢𑁆𑀯𑀸 𑀢𑀸𑀯𑀢𑀺𑀁𑀲𑀓𑀸𑀬𑀁 𑀉𑀧𑀧𑀦𑁆𑀦𑁄, 𑀢𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀯𑀺𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀓𑀢𑀜𑁆𑀜𑀼𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 𑀲𑀳 𑀯𑀺𑀫𑀸𑀦𑁂𑀦 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀫𑀸𑀦𑀢𑁄 𑀑𑀭𑀼𑀬𑁆𑀳 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀢𑀁 𑀣𑁂𑀭𑁄 𑁋

𑁧𑁧𑁦𑁮. ‘‘𑀬𑀸 𑀤𑁂𑀯𑀭𑀸𑀚𑀲𑁆𑀲 𑀲𑀪𑀸 𑀲𑀼𑀥𑀫𑁆𑀫𑀸, 𑀬𑀢𑁆𑀣𑀘𑁆𑀙𑀢𑀺 𑀤𑁂𑀯𑀲𑀗𑁆𑀖𑁄 𑀲𑀫𑀕𑁆𑀕𑁄;

𑀢𑀣𑀽𑀧𑀫𑀁 𑀢𑀼𑀬𑁆𑀳𑀫𑀺𑀤𑀁 𑀯𑀺𑀫𑀸𑀦𑀁, 𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀺 𑀅𑀦𑁆𑀢𑀮𑀺𑀓𑁆𑀔𑁂.

𑁧𑁧𑁦𑁯. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺;

𑁧𑁧𑁧𑁦. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁧𑁧𑁧. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑁄, 𑀭𑀜𑁆𑀜𑁄 𑀧𑀸𑀬𑀸𑀲𑀺𑀲𑁆𑀲 𑀅𑀳𑁄𑀲𑀺𑀁 𑀫𑀸𑀡𑀯𑁄;

𑀮𑀤𑁆𑀥𑀸 𑀥𑀦𑀁 𑀲𑀁𑀯𑀺𑀪𑀸𑀕𑀁 𑀅𑀓𑀸𑀲𑀺𑀁, 𑀧𑀺𑀬𑀸 𑀘 𑀫𑁂 𑀲𑀻𑀮𑀯𑀦𑁆𑀢𑁄 𑀅𑀳𑁂𑀲𑀼𑀁;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁.

𑁧𑁧𑁧𑁨. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀲𑁄 𑀤𑁂𑀯𑀧𑀼𑀢𑁆𑀢𑁄 𑀢𑀲𑁆𑀲 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺.