𑁫. 𑀤𑁆𑀯𑀸𑀭𑀧𑀸𑀮𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀦𑁆𑀢𑀺 𑀤𑁆𑀯𑀸𑀭𑀧𑀸𑀮𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀘𑀢𑁆𑀢𑀸𑀭𑀺 𑀦𑀺𑀘𑁆𑀘𑀪𑀢𑁆𑀢𑀸𑀦𑀺 𑀲𑀗𑁆𑀖𑀲𑁆𑀲 𑀤𑁂𑀢𑀺. 𑀢𑀲𑁆𑀲 𑀧𑀦 𑀕𑁂𑀳𑀁 𑀧𑀭𑀺𑀬𑀦𑁆𑀢𑁂 𑀞𑀺𑀢𑀁 𑀘𑁄𑀭𑀪𑀬𑁂𑀦 𑀬𑁂𑀪𑀼𑀬𑁆𑀬𑁂𑀦 𑀧𑀺𑀳𑀺𑀢𑀤𑁆𑀯𑀸𑀭𑀫𑁂𑀯 𑀳𑁄𑀢𑀺. 𑀪𑀺𑀓𑁆𑀔𑀽 𑀕𑀦𑁆𑀢𑁆𑀯𑀸 𑀓𑀤𑀸𑀘𑀺 𑀤𑁆𑀯𑀸𑀭𑀲𑁆𑀲 𑀧𑀺𑀳𑀺𑀢𑀢𑁆𑀢𑀸 𑀪𑀢𑁆𑀢𑀁 𑀅𑀮𑀤𑁆𑀥𑀸𑀯 𑀧𑀝𑀺𑀕𑀘𑁆𑀙𑀦𑁆𑀢𑀺. 𑀉𑀧𑀸𑀲𑀓𑁄 𑀪𑀭𑀺𑀬𑀁 𑀆𑀳 ‘‘𑀓𑀺𑀁, 𑀪𑀤𑁆𑀤𑁂, 𑀅𑀬𑁆𑀬𑀸𑀦𑀁 𑀲𑀓𑁆𑀓𑀘𑁆𑀘𑀁 𑀪𑀺𑀓𑁆𑀔𑀸 𑀤𑀻𑀬𑀢𑀻’’𑀢𑀺? 𑀲𑀸 𑀆𑀳 ‘‘𑀏𑀓𑁂𑀲𑀼 𑀤𑀺𑀯𑀲𑁂𑀲𑀼 𑀅𑀬𑁆𑀬𑀸 𑀦𑀸𑀕𑀫𑀺𑀁𑀲𑀽’’𑀢𑀺. ‘‘𑀓𑀺𑀁 𑀓𑀸𑀭𑀡’’𑀦𑁆𑀢𑀺? ‘‘𑀤𑁆𑀯𑀸𑀭𑀲𑁆𑀲 𑀧𑀺𑀳𑀺𑀢𑀢𑁆𑀢𑀸 𑀫𑀜𑁆𑀜𑁂’’𑀢𑀺. 𑀢𑀁 𑀲𑀼𑀢𑁆𑀯𑀸 𑀉𑀧𑀸𑀲𑀓𑁄 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀏𑀓𑀁 𑀧𑀼𑀭𑀺𑀲𑀁 𑀤𑁆𑀯𑀸𑀭𑀧𑀸𑀮𑀁 𑀓𑀢𑁆𑀯𑀸 𑀞𑀧𑁂𑀲𑀺 ‘‘𑀢𑁆𑀯𑀁 𑀅𑀚𑁆𑀚𑀢𑁄 𑀧𑀝𑁆𑀞𑀸𑀬 𑀤𑁆𑀯𑀸𑀭𑀁 𑀭𑀓𑁆𑀔𑀦𑁆𑀢𑁄 𑀦𑀺𑀲𑀻𑀤, 𑀬𑀤𑀸 𑀘 𑀅𑀬𑁆𑀬𑀸 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀢𑁂 𑀧𑀯𑁂𑀲𑁂𑀢𑁆𑀯𑀸 𑀧𑀯𑀺𑀝𑁆𑀞𑀸𑀦𑀁 𑀦𑁂𑀲𑀁 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀆𑀲𑀦𑀧𑀜𑁆𑀜𑀸𑀧𑀦𑀸𑀤𑀺 𑀲𑀩𑁆𑀩𑀁 𑀬𑀼𑀢𑁆𑀢𑀧𑀬𑀼𑀢𑁆𑀢𑀁 𑀚𑀸𑀦𑀸𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀢𑀣𑀸 𑀓𑀭𑁄𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀲𑀤𑁆𑀥𑁄 𑀓𑀫𑁆𑀫𑀨𑀮𑀁 𑀲𑀤𑁆𑀤𑀳𑀺𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀳𑀺, 𑀲𑀓𑁆𑀓𑀘𑁆𑀘𑀁 𑀪𑀺𑀓𑁆𑀔𑀽 𑀉𑀧𑀝𑁆𑀞𑀳𑀺.

𑀅𑀧𑀭𑀪𑀸𑀕𑁂 𑀦𑀺𑀘𑁆𑀘𑀪𑀢𑁆𑀢𑀤𑀸𑀬𑀓𑁄 𑀉𑀧𑀸𑀲𑀓𑁄 𑀓𑀸𑀮𑀁 𑀓𑀢𑁆𑀯𑀸 𑀬𑀸𑀫𑁂𑀲𑀼 𑀦𑀺𑀩𑁆𑀩𑀢𑁆𑀢𑀺. 𑀤𑁆𑀯𑀸𑀭𑀧𑀸𑀮𑁄 𑀧𑀦 𑀲𑀓𑁆𑀓𑀘𑁆𑀘𑀁 𑀪𑀺𑀓𑁆𑀔𑀽𑀦𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀧𑀭𑀲𑁆𑀲 𑀧𑀭𑀺𑀘𑁆𑀘𑀸𑀕𑁂 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑁂𑀦 𑀅𑀦𑀼𑀫𑁄𑀤𑀦𑁂𑀦 𑀘 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀚𑁆𑀚𑀺. 𑀢𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀓𑀦𑀓𑀯𑀺𑀫𑀸𑀦𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀓𑀓𑁆𑀓𑀝𑀓𑀯𑀺𑀫𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸 𑀏𑀯𑀫𑀸𑀕𑀢𑀸 𑁋

𑁯𑁧𑁮. ‘‘𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀁, 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺;

𑀓𑀽𑀝𑀸𑀕𑀸𑀭𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀯𑁂𑀴𑀼𑀭𑀺𑀬𑀣𑀫𑁆𑀪𑀸 𑀭𑀼𑀘𑀓𑀢𑁆𑀣𑀢𑀸 𑀲𑀼𑀪𑀸.

𑁯𑁧𑁯. ‘‘𑀢𑀢𑁆𑀣𑀘𑁆𑀙𑀲𑀺 𑀧𑀺𑀯𑀲𑀺 𑀔𑀸𑀤𑀲𑀺 𑀘, 𑀤𑀺𑀩𑁆𑀩𑀸 𑀘 𑀯𑀻𑀡𑀸 𑀧𑀯𑀤𑀦𑁆𑀢𑀺 𑀯𑀕𑁆𑀕𑀼𑀁;

𑀤𑀺𑀩𑁆𑀩𑀸 𑀭𑀲𑀸 𑀓𑀸𑀫𑀕𑀼𑀡𑁂𑀢𑁆𑀣 𑀧𑀜𑁆𑀘, 𑀦𑀸𑀭𑀺𑀬𑁄 𑀘 𑀦𑀘𑁆𑀘𑀦𑁆𑀢𑀺 𑀲𑀼𑀯𑀡𑁆𑀡𑀙𑀦𑁆𑀦𑀸.

𑁯𑁨𑁦. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂… 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁯𑁨𑁨. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁯𑁨𑁩. ‘‘𑀤𑀺𑀩𑁆𑀩𑀁 𑀫𑀫𑀁 𑀯𑀲𑁆𑀲𑀲𑀳𑀲𑁆𑀲𑀫𑀸𑀬𑀼, 𑀯𑀸𑀘𑀸𑀪𑀺𑀕𑀻𑀢𑀁 𑀫𑀦𑀲𑀸 𑀧𑀯𑀢𑁆𑀢𑀺𑀢𑀁;

𑀏𑀢𑁆𑀢𑀸𑀯𑀢𑀸 𑀞𑀲𑁆𑀲𑀢𑀺 𑀧𑀼𑀜𑁆𑀜𑀓𑀫𑁆𑀫𑁄, 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑁄.

𑁯𑁨𑁪. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁯𑁨𑁩. 𑀢𑀢𑁆𑀣 𑀤𑀺𑀩𑁆𑀩𑀁 𑀫𑀫𑀁 𑀯𑀲𑁆𑀲𑀲𑀳𑀲𑁆𑀲𑀫𑀸𑀬𑀽𑀢𑀺 𑀬𑀲𑁆𑀫𑀺𑀁 𑀤𑁂𑀯𑀦𑀺𑀓𑀸𑀬𑁂 𑀲𑀬𑀁 𑀉𑀧𑁆𑀧𑀦𑁆𑀦𑁄, 𑀢𑁂𑀲𑀁 𑀢𑀸𑀯𑀢𑀺𑀁𑀲𑀤𑁂𑀯𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀫𑁂𑀯 𑀯𑀤𑀢𑀺. 𑀢𑁂𑀲𑀜𑁆𑀳𑀺 𑀫𑀦𑀼𑀲𑁆𑀲𑀸𑀦𑀁 𑀕𑀡𑀦𑀸𑀬 𑀯𑀲𑁆𑀲𑀲𑀢𑀁 𑀏𑀓𑁄 𑀭𑀢𑁆𑀢𑀺𑀤𑀺𑀯𑁄, 𑀢𑀸𑀬 𑀭𑀢𑁆𑀢𑀺𑀬𑀸 𑀢𑀺𑀁𑀲𑀭𑀢𑁆𑀢𑀺𑀓𑁄 𑀫𑀸𑀲𑁄, 𑀢𑁂𑀦 𑀫𑀸𑀲𑁂𑀦 𑀤𑁆𑀯𑀸𑀤𑀲𑀫𑀸𑀲𑀺𑀓𑁄 𑀲𑀁𑀯𑀘𑁆𑀙𑀭𑁄, 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀲𑀳𑀲𑁆𑀲𑀲𑀁𑀯𑀘𑁆𑀙𑀭𑀸𑀦𑀺 𑀆𑀬𑀼, 𑀢𑀁 𑀫𑀦𑀼𑀲𑁆𑀲𑀸𑀦𑀁 𑀕𑀡𑀦𑀸𑀬 𑀢𑀺𑀲𑁆𑀲𑁄 𑀯𑀲𑁆𑀲𑀓𑁄𑀝𑀺𑀬𑁄 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀯𑀸𑀘𑀸𑀪𑀺𑀕𑀻𑀢𑀦𑁆𑀢𑀺 𑀯𑀸𑀘𑀸𑀬 𑀅𑀪𑀺𑀕𑀻𑀢𑀁, ‘‘𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀤𑀁 𑀆𑀲𑀦𑀁 𑀧𑀜𑁆𑀜𑀢𑁆𑀢𑀁, 𑀇𑀥 𑀦𑀺𑀲𑀻𑀤𑀣𑀸’’𑀢𑀺𑀆𑀤𑀺𑀦𑀸, ‘‘𑀓𑀺𑀁 𑀅𑀬𑁆𑀬𑀸𑀦𑀁 𑀲𑀭𑀻𑀭𑀲𑁆𑀲 𑀆𑀭𑁄𑀕𑁆𑀬𑀁, 𑀓𑀺𑀁 𑀯𑀲𑀦𑀝𑁆𑀞𑀸𑀦𑀁 𑀨𑀸𑀲𑀼𑀓’’𑀦𑁆𑀢𑀺𑀆𑀤𑀺𑀦𑀸 𑀧𑀝𑀺𑀲𑀦𑁆𑀣𑀸𑀭𑀯𑀲𑁂𑀦 𑀘 𑀯𑀸𑀘𑀸𑀬 𑀓𑀣𑀺𑀢𑀫𑀢𑁆𑀢𑀁. 𑀫𑀦𑀲𑀸 𑀧𑀯𑀢𑁆𑀢𑀺𑀢𑀦𑁆𑀢𑀺 ‘‘𑀇𑀫𑁂 𑀅𑀬𑁆𑀬𑀸 𑀧𑁂𑀲𑀮𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀥𑀫𑁆𑀫𑀘𑀸𑀭𑀺𑀦𑁄’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑁂𑀦 𑀧𑀯𑀢𑁆𑀢𑀺𑀢𑀁 𑀧𑀲𑀸𑀤𑀫𑀢𑁆𑀢𑀁, 𑀦 𑀧𑀦 𑀫𑀫 𑀲𑀦𑁆𑀢𑀓𑀁 𑀓𑀺𑀜𑁆𑀘𑀺 𑀧𑀭𑀺𑀘𑁆𑀘𑀢𑁆𑀢𑀁 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀏𑀯𑀁 𑀓𑀣𑀦𑀫𑀢𑁆𑀢𑁂𑀦 𑀧𑀲𑀸𑀤𑀫𑀢𑁆𑀢𑁂𑀦𑀧𑀺. 𑀞𑀲𑁆𑀲𑀢𑀺 𑀧𑀼𑀜𑁆𑀜𑀓𑀫𑁆𑀫𑁄𑀢𑀺 𑀓𑀢𑀧𑀼𑀜𑁆𑀜𑁄 𑀦𑀸𑀫 𑀳𑀼𑀢𑁆𑀯𑀸 𑀤𑁂𑀯𑀮𑁄𑀓𑁂 𑀞𑀲𑁆𑀲𑀢𑀺 𑀘𑀺𑀭𑀁 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀢𑀺𑀝𑁆𑀞𑀦𑁆𑀢𑁄 𑀘 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀻𑀪𑀽𑀢𑁄 𑀢𑀲𑁆𑀫𑀺𑀁 𑀤𑁂𑀯𑀦𑀺𑀓𑀸𑀬𑁂 𑀤𑁂𑀯𑀸𑀦𑀁 𑀯𑀮𑀜𑁆𑀚𑀦𑀺𑀬𑀸𑀫𑁂𑀦𑁂𑀯 𑀤𑀺𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀗𑁆𑀕𑀻𑀪𑀽𑀢𑁄 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀘𑀸𑀭𑁂𑀦𑁆𑀢𑁄 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑁆𑀯𑀸𑀭𑀧𑀸𑀮𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.