𑁫. 𑀫𑀳𑀸𑀭𑀣𑀯𑀕𑁆𑀕𑁄

𑁧. 𑀫𑀡𑁆𑀟𑀽𑀓𑀤𑁂𑀯𑀧𑀼𑀢𑁆𑀢𑀯𑀺𑀫𑀸𑀦𑀯𑀡𑁆𑀡𑀦𑀸

𑀫𑀳𑀸𑀭𑀣𑀯𑀕𑁆𑀕𑁂 𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀻𑀢𑀺 𑀫𑀡𑁆𑀟𑀽𑀓𑀤𑁂𑀯𑀧𑀼𑀢𑁆𑀢𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀘𑀫𑁆𑀧𑀸𑀬𑀁 𑀯𑀺𑀳𑀭𑀢𑀺 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂. 𑀲𑁄 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀯𑁂𑀦𑁂𑀬𑁆𑀬𑀩𑀦𑁆𑀥𑀯𑁂 𑀲𑀢𑁆𑀢𑁂 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 ‘‘𑀅𑀚𑁆𑀚 𑀫𑀬𑀺 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀏𑀓𑁄 𑀫𑀡𑁆𑀟𑀽𑀓𑁄 𑀫𑀫 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀧𑀭𑀽𑀧𑀓𑁆𑀓𑀫𑁂𑀦 𑀫𑀭𑀺𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀳𑀢𑀸 𑀤𑁂𑀯𑀧𑀭𑀺𑀯𑀸𑀭𑁂𑀦 𑀫𑀳𑀸𑀚𑀦𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀆𑀕𑀫𑀺𑀲𑁆𑀲𑀢𑀺, 𑀢𑀢𑁆𑀣 𑀩𑀳𑀽𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀘𑀫𑁆𑀧𑀸𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸, 𑀪𑀺𑀓𑁆𑀔𑀽𑀦𑀁 𑀲𑀼𑀮𑀪𑀧𑀺𑀡𑁆𑀟𑀧𑀸𑀢𑀁 𑀓𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀽𑀲𑀼 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑀁 𑀕𑀢𑁂𑀲𑀼 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀤𑀺𑀯𑀲𑀪𑀸𑀕𑀁 𑀔𑁂𑀧𑁂𑀢𑁆𑀯𑀸, 𑀲𑀸𑀬𑀦𑁆𑀳𑀲𑀫𑀬𑁂 𑀘𑀢𑀽𑀲𑀼 𑀧𑀭𑀺𑀲𑀸𑀲𑀼 𑀲𑀦𑁆𑀦𑀺𑀧𑀢𑀺𑀢𑀸𑀲𑀼 𑀲𑀼𑀭𑀪𑀺𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬𑁂𑀦 𑀧𑁄𑀓𑁆𑀔𑀭𑀡𑀺𑀢𑀻𑀭𑁂 𑀥𑀫𑁆𑀫𑀲𑀪𑀸𑀫𑀡𑁆𑀟𑀧𑀁 𑀧𑀯𑀺𑀲𑀺𑀢𑁆𑀯𑀸 𑀅𑀮𑀗𑁆𑀓𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀫𑀦𑁄𑀲𑀺𑀮𑀸𑀢𑀮𑁂 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀅𑀙𑀫𑁆𑀪𑀻𑀢𑀓𑁂𑀲𑀭𑀲𑀻𑀳𑁄 𑀯𑀺𑀬 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀅𑀘𑀺𑀦𑁆𑀢𑁂𑀬𑁆𑀬𑁂𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀦𑀼𑀧𑀫𑀸𑀬 𑀩𑀼𑀤𑁆𑀥𑀮𑀻𑀮𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀆𑀭𑀪𑀺.

𑀢𑀲𑁆𑀫𑀺𑀜𑁆𑀘 𑀔𑀡𑁂 𑀏𑀓𑁄 𑀫𑀡𑁆𑀟𑀽𑀓𑁄 𑀧𑁄𑀓𑁆𑀔𑀭𑀡𑀺𑀢𑁄 𑀆𑀕𑀦𑁆𑀢𑁆𑀯𑀸 ‘‘𑀥𑀫𑁆𑀫𑁄 𑀏𑀲𑁄 𑀯𑀼𑀘𑁆𑀘𑀢𑀻’’𑀢𑀺 𑀥𑀫𑁆𑀫𑀲𑀜𑁆𑀜𑀸𑀬 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀧𑀚𑁆𑀚𑀺. 𑀅𑀣𑁂𑀓𑁄 𑀯𑀘𑁆𑀙𑀧𑀸𑀮𑁄 𑀢𑀁 𑀧𑀤𑁂𑀲𑀁 𑀆𑀕𑀢𑁄 𑀲𑀢𑁆𑀣𑀸𑀭𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀧𑀭𑀺𑀲𑀜𑁆𑀘 𑀧𑀭𑀫𑁂𑀦 𑀉𑀧𑀲𑀫𑁂𑀦 𑀥𑀫𑁆𑀫𑀁 𑀲𑀼𑀡𑀦𑁆𑀢𑀁 𑀤𑀺𑀲𑁆𑀯𑀸 𑀢𑀕𑁆𑀕𑀢𑀫𑀸𑀦𑀲𑁄 𑀤𑀡𑁆𑀟𑀫𑁄𑀮𑀼𑀩𑁆𑀪 𑀢𑀺𑀝𑁆𑀞𑀦𑁆𑀢𑁄 𑀫𑀡𑁆𑀟𑀽𑀓𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀢𑀲𑁆𑀲 𑀲𑀻𑀲𑁂 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀥𑀫𑁆𑀫𑀲𑀜𑁆𑀜𑀸𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀢𑀸𑀯𑀤𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀢𑀢𑁆𑀣 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑀁 𑀅𑀢𑁆𑀢𑀸𑀦𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀦𑀼 𑀔𑁄 𑀇𑀥 𑀅𑀳𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀧𑀼𑀭𑀺𑀫𑀚𑀸𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀳𑀫𑁆𑀧𑀺 𑀦𑀸𑀫 𑀇𑀥 𑀉𑀧𑁆𑀧𑀚𑁆𑀚𑀺𑀁, 𑀈𑀤𑀺𑀲𑀜𑁆𑀘 𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀺𑀁, 𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀅𑀓𑀸𑀲𑀺’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀅𑀜𑁆𑀜𑀁 𑀦 𑀅𑀤𑁆𑀤𑀲 𑀅𑀜𑁆𑀜𑀢𑁆𑀭 𑀪𑀕𑀯𑀢𑁄 𑀲𑀭𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀸. 𑀲𑁄 𑀢𑀸𑀯𑀤𑁂𑀯 𑀲𑀳 𑀯𑀺𑀫𑀸𑀦𑁂𑀦 𑀆𑀕𑀦𑁆𑀢𑁆𑀯𑀸 𑀯𑀺𑀫𑀸𑀦𑀢𑁄 𑀑𑀢𑀭𑀺𑀢𑁆𑀯𑀸, 𑀫𑀳𑀸𑀚𑀦𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀫𑀳𑀦𑁆𑀢𑁂𑀦 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀪𑀕𑀯𑀸 𑀚𑀸𑀦𑀦𑁆𑀢𑁄𑀯 𑀫𑀳𑀸𑀚𑀦𑀲𑁆𑀲 𑀓𑀫𑁆𑀫𑀨𑀮𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀜𑁆𑀘 𑀧𑀘𑁆𑀘𑀓𑁆𑀔𑀁 𑀓𑀸𑀢𑀼𑀁 𑁋

𑁮𑁫𑁭. ‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺. 𑁋

𑀧𑀼𑀘𑁆𑀙𑀺. 𑀢𑀢𑁆𑀣 𑀓𑁄𑀢𑀺 𑀤𑁂𑀯𑀦𑀸𑀕𑀬𑀓𑁆𑀔𑀫𑀦𑀼𑀲𑁆𑀲𑀸𑀤𑀻𑀲𑀼 𑀓𑁄, 𑀓𑀢𑀫𑁄𑀢𑀺 𑀅𑀢𑁆𑀣𑁄. 𑀫𑁂𑀢𑀺 𑀫𑀫. 𑀧𑀸𑀤𑀸𑀦𑀻𑀢𑀺 𑀧𑀸𑀤𑁂. 𑀇𑀤𑁆𑀥𑀺𑀬𑀸𑀢𑀺 𑀇𑀫𑀸𑀬 𑀈𑀤𑀺𑀲𑀸𑀬 𑀤𑁂𑀯𑀺𑀤𑁆𑀥𑀺𑀬𑀸. 𑀬𑀲𑀲𑀸𑀢𑀺 𑀇𑀫𑀺𑀦𑀸 𑀈𑀤𑀺𑀲𑁂𑀦 𑀧𑀭𑀺𑀯𑀸𑀭𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘. 𑀚𑀮𑀦𑁆𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑁄. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑁂𑀦 𑀓𑀫𑀦𑀻𑀬𑁂𑀦 𑀲𑀼𑀦𑁆𑀤𑀭𑁂𑀦. 𑀯𑀡𑁆𑀡𑁂𑀦𑀸𑀢𑀺 𑀙𑀯𑀺𑀯𑀡𑁆𑀡𑁂𑀦, 𑀲𑀭𑀻𑀭𑀯𑀡𑁆𑀡𑀦𑀺𑀪𑀸𑀬𑀸𑀢𑀺 𑀅𑀢𑁆𑀣𑁄.

𑀅𑀣 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀧𑀼𑀭𑀺𑀫𑀚𑀸𑀢𑀺𑀆𑀤𑀺𑀁 𑀆𑀯𑀺 𑀓𑀭𑁄𑀦𑁆𑀢𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁮𑁫𑁮. ‘‘𑀫𑀡𑁆𑀟𑀽𑀓𑁄𑀳𑀁 𑀧𑀼𑀭𑁂 𑀆𑀲𑀺𑀁, 𑀉𑀤𑀓𑁂 𑀯𑀸𑀭𑀺𑀕𑁄𑀘𑀭𑁄;

𑀢𑀯 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲, 𑀅𑀯𑀥𑀻 𑀯𑀘𑁆𑀙𑀧𑀸𑀮𑀓𑁄.

𑁮𑁫𑁯. ‘‘𑀫𑀼𑀳𑀼𑀢𑁆𑀢𑀁 𑀘𑀺𑀢𑁆𑀢𑀧𑀲𑀸𑀤𑀲𑁆𑀲, 𑀇𑀤𑁆𑀥𑀺𑀁 𑀧𑀲𑁆𑀲 𑀬𑀲𑀜𑁆𑀘 𑀫𑁂;

𑀆𑀦𑀼𑀪𑀸𑀯𑀜𑁆𑀘 𑀫𑁂 𑀧𑀲𑁆𑀲, 𑀯𑀡𑁆𑀡𑀁 𑀧𑀲𑁆𑀲 𑀚𑀼𑀢𑀺𑀜𑁆𑀘 𑀫𑁂.

𑁮𑁬𑁦. ‘‘𑀬𑁂 𑀘 𑀢𑁂 𑀤𑀻𑀖𑀫𑀤𑁆𑀥𑀸𑀦𑀁, 𑀥𑀫𑁆𑀫𑀁 𑀅𑀲𑁆𑀲𑁄𑀲𑀼𑀁 𑀕𑁄𑀢𑀫;

𑀧𑀢𑁆𑀢𑀸 𑀢𑁂 𑀅𑀘𑀮𑀝𑁆𑀞𑀸𑀦𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂’’𑀢𑀺.

𑁮𑁫𑁮. 𑀢𑀢𑁆𑀣 𑀧𑀼𑀭𑁂𑀢𑀺 𑀧𑀼𑀭𑀺𑀫𑀚𑀸𑀢𑀺𑀬𑀁. 𑀉𑀤𑀓𑁂𑀢𑀺 𑀇𑀤𑀁 𑀢𑀤𑀸 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀤𑀲𑁆𑀲𑀦𑀁. 𑀉𑀤𑀓𑁂 𑀫𑀡𑁆𑀟𑀽𑀓𑁄𑀢𑀺 𑀏𑀢𑁂𑀦 𑀉𑀤𑁆𑀥𑀼𑀫𑀸𑀬𑀺𑀓𑀸𑀤𑀺𑀓𑀲𑁆𑀲 𑀣𑀮𑁂 𑀫𑀡𑁆𑀟𑀽𑀓𑀲𑁆𑀲 𑀦𑀺𑀯𑀢𑁆𑀢𑀦𑀁 𑀓𑀢𑀁 𑀳𑁄𑀢𑀺. 𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀕𑁄𑀘𑀭𑁄 𑀯𑀺𑀬𑀸𑀢𑀺 𑀕𑁄𑀘𑀭𑁄, 𑀖𑀸𑀲𑁂𑀲𑀦𑀝𑁆𑀞𑀸𑀦𑀁. 𑀯𑀸𑀭𑀺 𑀉𑀤𑀓𑀁 𑀕𑁄𑀘𑀭𑁄 𑀏𑀢𑀲𑁆𑀲𑀸𑀢𑀺 𑀯𑀸𑀭𑀺𑀕𑁄𑀘𑀭𑁄. 𑀉𑀤𑀓𑀘𑀸𑀭𑀻𑀧𑀺 𑀳𑀺 𑀓𑁄𑀘𑀺 𑀓𑀘𑁆𑀙𑀧𑀸𑀤𑀺 𑀅𑀯𑀸𑀭𑀺𑀕𑁄𑀘𑀭𑁄𑀧𑀺 𑀳𑁄𑀢𑀻𑀢𑀺 ‘‘𑀯𑀸𑀭𑀺𑀕𑁄𑀘𑀭𑁄’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀯 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀦𑀸 𑀤𑁂𑀲𑁂𑀦𑁆𑀢𑀲𑁆𑀲 𑀢𑀯 𑀥𑀫𑁆𑀫𑀁 ‘‘𑀥𑀫𑁆𑀫𑁄 𑀏𑀲𑁄 𑀯𑀼𑀘𑁆𑀘𑀢𑀻’’𑀢𑀺 𑀲𑀭𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀯𑀲𑁂𑀦 𑀲𑀼𑀡𑀦𑁆𑀢𑀲𑁆𑀲, 𑀅𑀦𑀸𑀤𑀭𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀯𑀥𑀻 𑀯𑀘𑁆𑀙𑀧𑀸𑀮𑀓𑁄𑀢𑀺 𑀯𑀘𑁆𑀙𑁂 𑀭𑀓𑁆𑀔𑀦𑁆𑀢𑁄 𑀕𑁄𑀧𑀸𑀮𑀤𑀸𑀭𑀓𑁄 𑀫𑀫 𑀲𑀫𑀻𑀧𑀁 𑀆𑀕𑀦𑁆𑀢𑁆𑀯𑀸 𑀤𑀡𑁆𑀟𑀫𑁄𑀮𑀼𑀩𑁆𑀪𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑁄 𑀫𑀫 𑀲𑀻𑀲𑁂 𑀤𑀡𑁆𑀟𑀁 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀫𑀁 𑀫𑀸𑀭𑁂𑀲𑀺.

𑁮𑁫𑁯. 𑀫𑀼𑀳𑀼𑀢𑁆𑀢𑀁 𑀘𑀺𑀢𑁆𑀢𑀧𑀲𑀸𑀤𑀲𑁆𑀲𑀸𑀢𑀺 𑀢𑀯 𑀥𑀫𑁆𑀫𑁂 𑀫𑀼𑀳𑀼𑀢𑁆𑀢𑀫𑀢𑁆𑀢𑀁 𑀉𑀧𑁆𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀧𑀲𑀸𑀤𑀲𑁆𑀲 𑀳𑁂𑀢𑀼𑀪𑀽𑀢𑀲𑁆𑀲 𑀇𑀤𑁆𑀥𑀺𑀦𑁆𑀢𑀺 𑀲𑀫𑀺𑀤𑁆𑀥𑀺𑀁, 𑀤𑀺𑀩𑁆𑀩𑀯𑀺𑀪𑀽𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀬𑀲𑀦𑁆𑀢𑀺 𑀧𑀭𑀺𑀯𑀸𑀭𑀁. 𑀆𑀦𑀼𑀪𑀸𑀯𑀦𑁆𑀢𑀺 𑀓𑀸𑀫𑀯𑀡𑁆𑀡𑀺𑀢𑀸𑀤𑀺𑀤𑀺𑀩𑁆𑀩𑀸𑀦𑀼𑀪𑀸𑀯𑀁. 𑀯𑀡𑁆𑀡𑀦𑁆𑀢𑀺 𑀲𑀭𑀻𑀭𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀁. 𑀚𑀼𑀢𑀺𑀦𑁆𑀢𑀺 𑀤𑁆𑀯𑀸𑀤𑀲𑀬𑁄𑀚𑀦𑀸𑀦𑀺 𑀨𑀭𑀡𑀲𑀫𑀢𑁆𑀣𑀁 𑀧𑀪𑀸𑀯𑀺𑀲𑁂𑀲𑀁.

𑁮𑁬𑁦. 𑀬𑁂𑀢𑀺 𑀬𑁂 𑀲𑀢𑁆𑀢𑀸. 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁂. 𑀢𑁂𑀢𑀺 𑀢𑀯. 𑀤𑀻𑀖𑀫𑀤𑁆𑀥𑀸𑀦𑀦𑁆𑀢𑀺 𑀩𑀳𑀼𑀯𑁂𑀮𑀁. 𑀅𑀲𑁆𑀲𑁄𑀲𑀼𑀦𑁆𑀢𑀺 𑀲𑀼𑀡𑀺𑀁𑀲𑀼. 𑀕𑁄𑀢𑀫𑀸𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀅𑀘𑀮𑀝𑁆𑀞𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀕𑁄𑀢𑀫 𑀪𑀕𑀯𑀸 𑀅𑀳𑀁 𑀯𑀺𑀬 𑀇𑀢𑁆𑀢𑀭𑀫𑁂𑀯 𑀓𑀸𑀮𑀁 𑀅𑀲𑀼𑀡𑀺𑀢𑁆𑀯𑀸 𑀬𑁂 𑀧𑀦 𑀓𑀢𑀧𑀼𑀜𑁆𑀜𑀸 𑀘𑀺𑀭𑀁 𑀓𑀸𑀮𑀁 𑀢𑀯 𑀥𑀫𑁆𑀫𑀁 𑀅𑀲𑁆𑀲𑁄𑀲𑀼𑀁 𑀲𑁄𑀢𑀼𑀁 𑀮𑀪𑀺𑀁𑀲𑀼, 𑀢𑁂 𑀤𑀻𑀖𑀭𑀢𑁆𑀢𑀁 𑀲𑀁𑀲𑀸𑀭𑀩𑁆𑀬𑀲𑀦𑀸𑀪𑀺𑀪𑀽𑀢𑀸 𑀇𑀫𑁂 𑀲𑀢𑁆𑀢𑀸 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑁂𑀬𑁆𑀬𑀼𑀁, 𑀢𑀁 𑀅𑀲𑁄𑀓𑀁 𑀲𑀲𑁆𑀲𑀢𑀪𑀸𑀯𑁂𑀦 𑀅𑀘𑀮𑀁 𑀲𑀦𑁆𑀢𑀺𑀧𑀤𑀁 𑀧𑀢𑁆𑀢𑀸 𑀏𑀯, 𑀦 𑀢𑁂𑀲𑀁 𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑁄𑀢𑀺.

𑀅𑀣𑀲𑁆𑀲 𑀪𑀕𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀘 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀲𑀳 𑀧𑀭𑀺𑀯𑀸𑀭𑁂𑀦 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄𑀢𑀺.

𑀫𑀡𑁆𑀟𑀽𑀓𑀤𑁂𑀯𑀧𑀼𑀢𑁆𑀢𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑁂𑀯𑀢𑀻𑀯𑀺𑀫𑀸𑀦𑀯𑀡𑁆𑀡𑀦𑀸

𑀉𑀝𑁆𑀞𑁂𑀳𑀺 𑀭𑁂𑀯𑀢𑁂 𑀲𑀼𑀧𑀸𑀧𑀥𑀫𑁆𑀫𑁂𑀢𑀺 𑀭𑁂𑀯𑀢𑀻𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀬𑀁 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀲𑁆𑀲 𑀓𑀼𑀮𑀲𑁆𑀲 𑀧𑀼𑀢𑁆𑀢𑁄 𑀦𑀦𑁆𑀤𑀺𑀬𑁄 𑀦𑀸𑀫 𑀉𑀧𑀸𑀲𑀓𑁄 𑀅𑀳𑁄𑀲𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀲𑀗𑁆𑀖𑀼𑀧𑀝𑁆𑀞𑀸𑀓𑁄. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑀫𑁆𑀫𑀼𑀔𑀕𑁂𑀳𑀢𑁄 𑀫𑀸𑀢𑀼𑀮𑀥𑀻𑀢𑀭𑀁 𑀭𑁂𑀯𑀢𑀺𑀁 𑀦𑀸𑀫 𑀓𑀜𑁆𑀜𑀁 𑀆𑀦𑁂𑀢𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀲𑀸 𑀧𑀦 𑀅𑀲𑁆𑀲𑀤𑁆𑀥𑀸 𑀅𑀤𑀸𑀦𑀲𑀻𑀮𑀸, 𑀦𑀦𑁆𑀤𑀺𑀬𑁄 𑀢𑀁 𑀦 𑀇𑀘𑁆𑀙𑀺. 𑀢𑀲𑁆𑀲 𑀫𑀸𑀢𑀸 𑀭𑁂𑀯𑀢𑀺𑀁 𑀆𑀳 ‘‘𑀅𑀫𑁆𑀫, 𑀢𑁆𑀯𑀁 𑀇𑀫𑀁 𑀕𑁂𑀳𑀁 𑀆𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀳𑀭𑀺𑀢𑁂𑀦 𑀕𑁄𑀫𑀬𑁂𑀦 𑀉𑀧𑀮𑀺𑀫𑁆𑀧𑀺𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀳𑀺, 𑀆𑀥𑀸𑀭𑀓𑁂 𑀞𑀧𑁂𑀳𑀺, 𑀪𑀺𑀓𑁆𑀔𑀽𑀦𑀁 𑀆𑀕𑀢𑀓𑀸𑀮𑁂 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀥𑀫𑀓𑀭𑀡𑁂𑀦 𑀧𑀸𑀦𑀻𑀬𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀪𑀼𑀢𑁆𑀢𑀓𑀸𑀮𑁂 𑀧𑀢𑁆𑀢𑀸𑀦𑀺 𑀥𑁄𑀯𑀸𑀳𑀺, 𑀏𑀯𑀁 𑀫𑁂 𑀧𑀼𑀢𑁆𑀢𑀲𑁆𑀲 𑀆𑀭𑀸𑀥𑀺𑀓𑀸 𑀪𑀯𑀺𑀲𑁆𑀲𑀲𑀻’’𑀢𑀺. 𑀲𑀸 𑀢𑀣𑀸 𑀅𑀓𑀸𑀲𑀺. 𑀅𑀣 𑀦𑀁 ‘‘𑀑𑀯𑀸𑀤𑀓𑁆𑀔𑀫𑀸 𑀚𑀸𑀢𑀸’’𑀢𑀺 𑀧𑀼𑀢𑁆𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀆𑀯𑀸𑀳𑀁 𑀓𑀭𑀺𑀁𑀲𑀼.

𑀅𑀣 𑀦𑀁 𑀦𑀦𑁆𑀤𑀺𑀬𑁄 𑀆𑀳 ‘‘𑀲𑀘𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀫𑀸𑀢𑀸𑀧𑀺𑀢𑀭𑁄 𑀘 𑀫𑁂 𑀉𑀧𑀝𑁆𑀞𑀳𑀺𑀲𑁆𑀲𑀲𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀯𑀲𑀺𑀢𑀼𑀁 𑀮𑀪𑀺𑀲𑁆𑀲𑀲𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀳𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀓𑀺𑀜𑁆𑀘𑀺 𑀓𑀸𑀮𑀁 𑀲𑀤𑁆𑀥𑀸 𑀯𑀺𑀬 𑀳𑀼𑀢𑁆𑀯𑀸 𑀪𑀢𑁆𑀢𑀸𑀭𑀁 𑀅𑀦𑀯𑀢𑁆𑀢𑁂𑀦𑁆𑀢𑀻 𑀤𑁆𑀯𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺. 𑀦𑀦𑁆𑀤𑀺𑀬𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀕𑁂𑀳𑁂 𑀲𑀩𑁆𑀩𑀺𑀲𑁆𑀲𑀭𑀺𑀬𑀁 𑀢𑀲𑁆𑀲𑀸 𑀏𑀯 𑀅𑀳𑁄𑀲𑀺. 𑀦𑀦𑁆𑀤𑀺𑀬𑁄𑀧𑀺 𑀫𑀳𑀸𑀤𑀸𑀦𑀧𑀢𑀺 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀧𑀝𑁆𑀞𑀧𑁂𑀲𑀺, 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀫𑁆𑀧𑀺 𑀕𑁂𑀳𑀤𑁆𑀯𑀸𑀭𑁂 𑀧𑀸𑀓𑀯𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀇𑀲𑀺𑀧𑀢𑀦𑀫𑀳𑀸𑀯𑀺𑀳𑀸𑀭𑁂 𑀘𑀢𑀽𑀳𑀺 𑀕𑀩𑁆𑀪𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀁 𑀘𑀢𑀼𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀳𑀢𑁆𑀣𑁂 𑀤𑀓𑁆𑀔𑀺𑀡𑁄𑀤𑀓𑀁 𑀧𑀸𑀢𑁂𑀢𑁆𑀯𑀸 𑀦𑀺𑀬𑁆𑀬𑀸𑀤𑁂𑀲𑀺, 𑀲𑀳 𑀤𑀓𑁆𑀔𑀺𑀡𑁄𑀤𑀓𑀤𑀸𑀦𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑁂 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀲𑀫𑀦𑁆𑀢𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁄 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀲𑀢𑁆𑀢𑀭𑀢𑀦𑀫𑀬𑁄 𑀅𑀘𑁆𑀙𑀭𑀸𑀕𑀡𑀲𑀳𑀲𑁆𑀲𑀲𑀗𑁆𑀖𑀼𑀝𑁆𑀞𑁄 𑀤𑀺𑀩𑁆𑀩𑀧𑀸𑀲𑀸𑀤𑁄 𑀉𑀕𑁆𑀕𑀜𑁆𑀙𑀺.

𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀁 𑀧𑀸𑀲𑀸𑀤𑀁 𑀤𑀺𑀲𑁆𑀯𑀸 𑀅𑀢𑁆𑀢𑀸𑀦𑀁 𑀯𑀦𑁆𑀤𑀺𑀢𑀼𑀁 𑀆𑀕𑀢𑁂 𑀤𑁂𑀯𑀧𑀼𑀢𑁆𑀢𑁂 𑀧𑀼𑀘𑁆𑀙𑀺 ‘‘𑀓𑀲𑁆𑀲𑀸𑀬𑀁 𑀧𑀸𑀲𑀸𑀤𑁄’’𑀢𑀺? ‘‘𑀇𑀫𑀲𑁆𑀲, 𑀪𑀦𑁆𑀢𑁂, 𑀧𑀸𑀲𑀸𑀤𑀲𑁆𑀲 𑀲𑀸𑀫𑀺𑀓𑁄 𑀫𑀦𑀼𑀲𑁆𑀲𑀮𑁄𑀓𑁂 𑀩𑀸𑀭𑀸𑀡𑀲𑀺𑀬𑀁 𑀦𑀦𑁆𑀤𑀺𑀬𑁄 𑀦𑀸𑀫 𑀓𑀼𑀝𑀼𑀫𑁆𑀩𑀺𑀬𑀧𑀼𑀢𑁆𑀢𑁄 𑀲𑀗𑁆𑀖𑀲𑁆𑀲 𑀇𑀲𑀺𑀧𑀢𑀦𑀫𑀳𑀸𑀯𑀺𑀳𑀸𑀭𑁂 𑀘𑀢𑀼𑀲𑀸𑀮𑀁 𑀓𑀸𑀭𑁂𑀲𑀺, 𑀢𑀲𑁆𑀲𑀸𑀬𑀁 𑀦𑀺𑀩𑁆𑀩𑀢𑁆𑀢𑁄 𑀧𑀸𑀲𑀸𑀤𑁄’’𑀢𑀺 𑀆𑀳𑀁𑀲𑀼. 𑀧𑀸𑀲𑀸𑀤𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀘𑁆𑀙𑀭𑀸𑀬𑁄𑀧𑀺 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑀁 𑀩𑀸𑀭𑀸𑀡𑀲𑀺𑀬𑀁 𑀦𑀦𑁆𑀤𑀺𑀬𑀲𑁆𑀲 𑀦𑀸𑀫 𑀉𑀧𑀸𑀲𑀓𑀲𑁆𑀲 𑀧𑀭𑀺𑀘𑀸𑀭𑀺𑀓𑀸 𑀪𑀯𑀺𑀢𑀼𑀁 𑀇𑀥 𑀦𑀺𑀩𑁆𑀩𑀢𑁆𑀢𑀸, 𑀢𑀲𑁆𑀲 𑀏𑀯𑀁 𑀯𑀤𑁂𑀣 ‘‘𑀢𑀼𑀬𑁆𑀳𑀁 𑀧𑀭𑀺𑀘𑀸𑀭𑀺𑀓𑀸 𑀪𑀯𑀺𑀢𑀼𑀁 𑀦𑀺𑀩𑁆𑀩𑀢𑁆𑀢𑀸, 𑀤𑁂𑀯𑀢𑀸𑀬𑁄 𑀢𑀬𑀺 𑀘𑀺𑀭𑀸𑀬𑀦𑁆𑀢𑁂 𑀉𑀓𑁆𑀓𑀡𑁆𑀞𑀺𑀢𑀸, 𑀤𑁂𑀯𑀮𑁄𑀓𑀲𑀫𑁆𑀧𑀢𑁆𑀢𑀺 𑀦𑀸𑀫 𑀫𑀢𑁆𑀢𑀺𑀓𑀸𑀪𑀸𑀚𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀪𑀸𑀚𑀦𑀲𑁆𑀲 𑀕𑀳𑀡𑀁 𑀯𑀺𑀬 𑀅𑀢𑀺𑀫𑀦𑀸𑀧’𑀦𑁆𑀢𑀺 𑀯𑀢𑁆𑀯𑀸 𑀇𑀥𑀸𑀕𑀫𑀦𑀢𑁆𑀣𑀸𑀬 𑀢𑀲𑁆𑀲 𑀯𑀤𑁂𑀣𑀸’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀳𑀲𑀸 𑀤𑁂𑀯𑀮𑁄𑀓𑀢𑁄 𑀆𑀕𑀦𑁆𑀢𑁆𑀯𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺 ‘‘𑀦𑀺𑀩𑁆𑀩𑀢𑁆𑀢𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀓𑀢𑀧𑀼𑀜𑁆𑀜𑀸𑀦𑀁 𑀫𑀦𑀼𑀲𑁆𑀲𑀮𑁄𑀓𑁂 𑀞𑀺𑀢𑀸𑀦𑀁𑀬𑁂𑀯 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀻’’𑀢𑀺? ‘‘𑀦𑀦𑀼 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀦𑀦𑁆𑀤𑀺𑀬𑀲𑁆𑀲 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺 𑀲𑀸𑀫𑀁 𑀤𑀺𑀝𑁆𑀞𑀸, 𑀓𑀲𑁆𑀫𑀸 𑀫𑀁 𑀧𑀼𑀘𑁆𑀙𑀲𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂, 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺. 𑀅𑀣𑀲𑁆𑀲 𑀲𑀢𑁆𑀣𑀸 ‘‘𑀬𑀣𑀸 𑀘𑀺𑀭𑀁 𑀯𑀺𑀧𑁆𑀧𑀯𑀲𑀺𑀢𑁆𑀯𑀸 𑀆𑀕𑀢𑀁 𑀧𑀼𑀭𑀺𑀲𑀁 𑀫𑀺𑀢𑁆𑀢𑀩𑀦𑁆𑀥𑀯𑀸 𑀅𑀪𑀺𑀦𑀦𑁆𑀤𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀏𑀯𑀁 𑀓𑀢𑀧𑀼𑀜𑁆𑀜𑀁 𑀧𑀼𑀕𑁆𑀕𑀮𑀁 𑀇𑀢𑁄 𑀧𑀭𑀮𑁄𑀓𑀁 𑀕𑀢𑀁 𑀲𑀓𑀸𑀦𑀺 𑀧𑀼𑀜𑁆𑀜𑀸𑀦𑀺 𑀲𑀫𑁆𑀧𑀢𑁆𑀢𑀺𑀳𑀢𑁆𑀣𑁂𑀳𑀺 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

𑁮𑁬𑁧. ‘‘𑀘𑀺𑀭𑀧𑁆𑀧𑀯𑀸𑀲𑀺𑀁 𑀧𑀼𑀭𑀺𑀲𑀁, 𑀤𑀽𑀭𑀢𑁄 𑀲𑁄𑀢𑁆𑀣𑀺𑀫𑀸𑀕𑀢𑀁;

𑀜𑀸𑀢𑀺𑀫𑀺𑀢𑁆𑀢𑀸 𑀲𑀼𑀳𑀚𑁆𑀚𑀸 𑀘, 𑀅𑀪𑀺𑀦𑀦𑁆𑀤𑀦𑁆𑀢𑀺 𑀆𑀕𑀢𑀁.

𑁮𑁬𑁨. ‘‘𑀢𑀣𑁂𑀯 𑀓𑀢𑀧𑀼𑀜𑁆𑀜𑀫𑁆𑀧𑀺, 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀕𑀢𑀁;

𑀧𑀼𑀜𑁆𑀜𑀸𑀦𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀧𑀺𑀬𑀁 𑀜𑀸𑀢𑀻𑀯 𑀆𑀕𑀢’’𑀦𑁆𑀢𑀺. 𑁋 𑀕𑀸𑀣𑀸 𑀅𑀪𑀸𑀲𑀺;

𑀦𑀦𑁆𑀤𑀺𑀬𑁄 𑀢𑀁 𑀲𑀼𑀢𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀤𑀸𑀦𑀸𑀦𑀺 𑀤𑁂𑀢𑀺, 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺, 𑀲𑁄 𑀯𑀡𑀺𑀚𑁆𑀚𑀸𑀬 𑀕𑀘𑁆𑀙𑀦𑁆𑀢𑁄 𑀭𑁂𑀯𑀢𑀺𑀁 𑀆𑀳 ‘‘𑀪𑀤𑁆𑀤𑁂, 𑀫𑀬𑀸 𑀧𑀝𑁆𑀞𑀧𑀺𑀢𑀁 𑀲𑀗𑁆𑀖𑀲𑁆𑀲 𑀤𑀸𑀦𑀁 𑀅𑀦𑀸𑀣𑀸𑀦𑀁 𑀧𑀸𑀓𑀯𑀢𑁆𑀢𑀜𑁆𑀘 𑀢𑁆𑀯𑀁 𑀅𑀧𑁆𑀧𑀫𑀢𑁆𑀢𑀸 𑀧𑀯𑀢𑁆𑀢𑁂𑀬𑁆𑀬𑀸𑀲𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺. 𑀲𑁄 𑀧𑀯𑀸𑀲𑀕𑀢𑁄𑀧𑀺 𑀬𑀢𑁆𑀣 𑀬𑀢𑁆𑀣 𑀯𑀸𑀲𑀁 𑀓𑀧𑁆𑀧𑁂𑀢𑀺, 𑀢𑀢𑁆𑀣 𑀢𑀢𑁆𑀣 𑀪𑀺𑀓𑁆𑀔𑀽𑀦𑀁 𑀅𑀦𑀸𑀣𑀸𑀦𑀜𑁆𑀘 𑀬𑀣𑀸𑀯𑀺𑀪𑀯𑀁 𑀤𑀸𑀦𑀁 𑀤𑁂𑀢𑀺𑀬𑁂𑀯. 𑀢𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀔𑀻𑀡𑀸𑀲𑀯𑀸 𑀤𑀽𑀭𑀢𑁄𑀧𑀺 𑀆𑀕𑀦𑁆𑀢𑁆𑀯𑀸 𑀤𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀭𑁂𑀯𑀢𑀻 𑀧𑀦 𑀢𑀲𑁆𑀫𑀺𑀁 𑀕𑀢𑁂 𑀓𑀢𑀺𑀧𑀸𑀳𑀫𑁂𑀯 𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀅𑀦𑀸𑀣𑀸𑀦𑀁 𑀪𑀢𑁆𑀢𑀁 𑀉𑀧𑀘𑁆𑀙𑀺𑀦𑁆𑀤𑀺, 𑀪𑀺𑀓𑁆𑀔𑀽𑀦𑀫𑁆𑀧𑀺 𑀪𑀢𑁆𑀢𑀁 𑀓𑀡𑀸𑀚𑀓𑀁 𑀩𑀺𑀮𑀗𑁆𑀕𑀤𑀼𑀢𑀺𑀬𑀁 𑀅𑀤𑀸𑀲𑀺. 𑀪𑀺𑀓𑁆𑀔𑀽𑀦𑀁 𑀪𑀼𑀢𑁆𑀢𑀝𑁆𑀞𑀸𑀦𑁂 𑀅𑀢𑁆𑀢𑀦𑀸 𑀪𑀼𑀢𑁆𑀢𑀸𑀯𑀲𑁂𑀲𑀸𑀦𑀺 𑀲𑀺𑀢𑁆𑀣𑀸𑀦𑀺 𑀫𑀘𑁆𑀙𑀫𑀁𑀲𑀔𑀡𑁆𑀟𑀫𑀺𑀲𑁆𑀲𑀓𑀸𑀦𑀺 𑀘𑀮𑀓𑀝𑁆𑀞𑀺𑀓𑀸𑀦𑀺 𑀘 𑀧𑀓𑀺𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀤𑀲𑁆𑀲𑁂𑀢𑀺 ‘‘𑀧𑀲𑁆𑀲𑀣 𑀲𑀫𑀡𑀸𑀦𑀁 𑀓𑀫𑁆𑀫𑀁, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀦𑀸𑀫 𑀏𑀯𑀁 𑀙𑀟𑁆𑀟𑁂𑀦𑁆𑀢𑀻’’𑀢𑀺.

𑀅𑀣 𑀦𑀦𑁆𑀤𑀺𑀬𑁄 𑀯𑁄𑀳𑀸𑀭𑀓𑀲𑀺𑀤𑁆𑀥𑀺 𑀬𑀣𑀸𑀮𑀸𑀪𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀭𑁂𑀯𑀢𑀺𑀁 𑀕𑁂𑀳𑀢𑁄 𑀦𑀻𑀳𑀭𑀺𑀢𑁆𑀯𑀸 𑀕𑁂𑀳𑀁 𑀧𑀸𑀯𑀺𑀲𑀺. 𑀤𑀼𑀢𑀺𑀬𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀦𑀺𑀘𑁆𑀘𑀪𑀢𑁆𑀢𑀁 𑀅𑀦𑀸𑀣𑀪𑀢𑁆𑀢𑀜𑁆𑀘 𑀲𑀫𑁆𑀫𑀤𑁂𑀯 𑀧𑀯𑀢𑁆𑀢𑁂𑀲𑀺, 𑀅𑀢𑁆𑀢𑀦𑁄 𑀲𑀳𑀸𑀬𑁂𑀳𑀺 𑀉𑀧𑀦𑀻𑀢𑀁 𑀭𑁂𑀯𑀢𑀺𑀁 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬 𑀞𑀧𑁂𑀲𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀅𑀢𑁆𑀢𑀦𑁄 𑀯𑀺𑀫𑀸𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺. 𑀭𑁂𑀯𑀢𑀻 𑀧𑀦 𑀲𑀩𑁆𑀩𑀁 𑀤𑀸𑀦𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀇𑀫𑁂𑀲𑀁 𑀯𑀲𑁂𑀦 𑀫𑀬𑁆𑀳𑀁 𑀮𑀸𑀪𑀲𑀓𑁆𑀓𑀸𑀭𑁄 𑀧𑀭𑀺𑀳𑀸𑀬𑀻’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀓𑁆𑀓𑁄𑀲𑀦𑁆𑀢𑀻 𑀧𑀭𑀺𑀪𑀸𑀲𑀦𑁆𑀢𑀻 𑀯𑀺𑀘𑀭𑀢𑀺. 𑀅𑀣 𑀯𑁂𑀲𑁆𑀲𑀯𑀡𑁄 𑀤𑁆𑀯𑁂 𑀬𑀓𑁆𑀔𑁂 𑀆𑀡𑀸𑀧𑁂𑀲𑀺 ‘‘𑀕𑀘𑁆𑀙𑀣, 𑀪𑀡𑁂, 𑀩𑀸𑀭𑀸𑀡𑀲𑀺𑀦𑀕𑀭𑁂 𑀉𑀕𑁆𑀖𑁄𑀲𑀣 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑁂𑀯𑀢𑀻 𑀚𑀻𑀯𑀦𑁆𑀢𑀻𑀬𑁂𑀯 𑀦𑀺𑀭𑀬𑁂 𑀧𑀓𑁆𑀔𑀺𑀧𑀻𑀬𑀢𑀻’𑀢𑀺’’. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀲𑀁𑀯𑁂𑀕𑀚𑀸𑀢𑁄 𑀪𑀻𑀢𑀢𑀲𑀺𑀢𑁄 𑀅𑀳𑁄𑀲𑀺.

𑀅𑀣 𑀭𑁂𑀯𑀢𑀻 𑀧𑀦 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀲𑁆𑀲𑀸 𑀧𑀸𑀧𑀓𑀫𑁆𑀫𑀲𑀜𑁆𑀘𑁄𑀤𑀺𑀢𑁂𑀦 𑀯𑁂𑀲𑁆𑀲𑀯𑀡𑁂𑀦 𑀭𑀜𑁆𑀜𑀸 𑀆𑀡𑀢𑁆𑀢𑀸 𑀚𑀮𑀺𑀢𑀓𑀧𑀺𑀮𑀓𑁂𑀲𑀫𑀲𑁆𑀲𑀼𑀓𑀸 𑀘𑀺𑀧𑀺𑀝𑀯𑀺𑀭𑀽𑀧𑀦𑀸𑀲𑀺𑀓𑀸 𑀧𑀭𑀺𑀡𑀢𑀤𑀸𑀞𑀸 𑀮𑁄𑀳𑀺𑀢𑀓𑁆𑀔𑀸 𑀲𑀚𑀮𑀥𑀭𑀲𑀫𑀸𑀦𑀯𑀡𑁆𑀡𑀸 𑀅𑀢𑀺𑀯𑀺𑀬 𑀪𑀬𑀸𑀦𑀓𑀭𑀽𑀧𑀸 𑀤𑁆𑀯𑁂 𑀬𑀓𑁆𑀔𑀸 𑀉𑀧𑀕𑀦𑁆𑀢𑁆𑀯𑀸 ‘‘𑀉𑀝𑁆𑀞𑁂𑀳𑀺, 𑀭𑁂𑀯𑀢𑁂, 𑀲𑀼𑀧𑀸𑀧𑀥𑀫𑁆𑀫𑁂’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀦𑀸𑀦𑀸𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 ‘‘𑀫𑀳𑀸𑀚𑀦𑁄 𑀧𑀲𑁆𑀲𑀢𑀽’’𑀢𑀺 𑀲𑀓𑀮𑀦𑀕𑀭𑁂 𑀯𑀻𑀣𑀺𑀢𑁄 𑀯𑀻𑀣𑀺𑀁 𑀧𑀭𑀺𑀩𑁆𑀪𑀫𑀸𑀧𑁂𑀢𑁆𑀯𑀸 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀦𑁂𑀢𑁆𑀯𑀸 𑀦𑀦𑁆𑀤𑀺𑀬𑀲𑁆𑀲 𑀯𑀺𑀫𑀸𑀦𑀁 𑀲𑀫𑁆𑀧𑀢𑁆𑀢𑀺𑀜𑁆𑀘𑀲𑁆𑀲𑀸 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀯𑀺𑀮𑀧𑀦𑁆𑀢𑀺𑀁𑀬𑁂𑀯 𑀉𑀲𑁆𑀲𑀤𑀦𑀺𑀭𑀬𑀲𑀫𑀻𑀧𑀁 𑀧𑀸𑀧𑁂𑀲𑀼𑀁. 𑀢𑀁 𑀬𑀫𑀧𑀼𑀭𑀺𑀲𑀸 𑀉𑀲𑁆𑀲𑀤𑀦𑀺𑀭𑀬𑁂 𑀔𑀺𑀧𑀺𑀁𑀲𑀼. 𑀢𑁂𑀦𑀸𑀳 𑁋

𑁮𑁬𑁩. ‘‘𑀉𑀝𑁆𑀞𑁂𑀳𑀺 𑀭𑁂𑀯𑀢𑁂 𑀲𑀼𑀧𑀸𑀧𑀥𑀫𑁆𑀫𑁂, 𑀅𑀧𑀸𑀭𑀼𑀢𑀤𑁆𑀯𑀸𑀭𑁂 𑀅𑀤𑀸𑀦𑀲𑀻𑀮𑁂;

𑀦𑁂𑀲𑁆𑀲𑀸𑀫 𑀢𑀁 𑀬𑀢𑁆𑀣 𑀣𑀼𑀦𑀦𑁆𑀢𑀺 𑀤𑀼𑀕𑁆𑀕𑀢𑀸, 𑀲𑀫𑀧𑁆𑀧𑀺𑀢𑀸 𑀦𑁂𑀭𑀬𑀺𑀓𑀸 𑀤𑀼𑀔𑁂𑀦𑀸’’𑀢𑀺.

𑀢𑀢𑁆𑀣 𑀉𑀝𑁆𑀞𑁂𑀳𑀻𑀢𑀺 𑀉𑀝𑁆𑀞𑀳, 𑀦 𑀤𑀸𑀦𑁂𑀲 𑀧𑀸𑀲𑀸𑀤𑁄 𑀢𑀁 𑀦𑀺𑀭𑀬𑀪𑀬𑀢𑁄 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀲𑀻𑀖𑀁 𑀉𑀝𑁆𑀞𑀳𑀺𑀢𑁆𑀯𑀸 𑀆𑀕𑀘𑁆𑀙𑀸𑀳𑀻𑀢𑀺 𑀅𑀢𑁆𑀣𑁄. 𑀭𑁂𑀯𑀢𑁂𑀢𑀺 𑀢𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀲𑀼𑀧𑀸𑀧𑀥𑀫𑁆𑀫𑁂𑀢𑀺𑀆𑀤𑀺𑀦𑀸 𑀉𑀝𑁆𑀞𑀸𑀦𑀲𑁆𑀲 𑀓𑀸𑀭𑀡𑀁 𑀯𑀤𑀢𑀺. 𑀬𑀲𑁆𑀫𑀸 𑀢𑁆𑀯𑀁 𑀅𑀭𑀺𑀬𑀸𑀦𑀁 𑀅𑀓𑁆𑀓𑁄𑀲𑀦𑀧𑀭𑀺𑀪𑀸𑀲𑀦𑀸𑀤𑀺𑀦𑀸 𑀲𑀼𑀝𑁆𑀝𑀼 𑀮𑀸𑀫𑀓𑀧𑀸𑀧𑀥𑀫𑁆𑀫𑀸, 𑀬𑀲𑁆𑀫𑀸 𑀘 𑀅𑀧𑀸𑀭𑀼𑀢𑀁 𑀤𑁆𑀯𑀸𑀭𑀁 𑀦𑀺𑀭𑀬𑀲𑁆𑀲 𑀢𑀯 𑀧𑀯𑁂𑀲𑀦𑀢𑁆𑀣𑀁, 𑀢𑀲𑁆𑀫𑀸 𑀉𑀝𑁆𑀞𑁂𑀳𑀻𑀢𑀺. 𑀅𑀤𑀸𑀦𑀲𑀻𑀮𑁂𑀢𑀺 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀦 𑀤𑀸𑀦𑀲𑀻𑀮𑁂 𑀓𑀤𑀭𑀺𑀬𑁂 𑀫𑀘𑁆𑀙𑀭𑀺𑀦𑀻, 𑀇𑀤𑀫𑁆𑀧𑀺 𑀉𑀝𑁆𑀞𑀸𑀦𑀲𑁆𑀲𑁂𑀯 𑀓𑀸𑀭𑀡𑀯𑀘𑀦𑀁. 𑀬𑀲𑁆𑀫𑀸 𑀤𑀸𑀦𑀲𑀻𑀮𑀸𑀦𑀁 𑀅𑀫𑀘𑁆𑀙𑀭𑀻𑀦𑀁 𑀢𑀯 𑀲𑀸𑀫𑀺𑀓𑀲𑀤𑀺𑀲𑀸𑀦𑀁 𑀲𑀼𑀕𑀢𑀺𑀬𑀁 𑀦𑀺𑀯𑀸𑀲𑁄, 𑀢𑀸𑀤𑀺𑀲𑀸𑀦𑀁 𑀧𑀦 𑀅𑀤𑀸𑀦𑀲𑀻𑀮𑀸𑀦𑀁 𑀫𑀘𑁆𑀙𑀭𑀻𑀦𑀁 𑀦𑀺𑀭𑀬𑁂 𑀦𑀺𑀯𑀸𑀲𑁄, 𑀢𑀲𑁆𑀫𑀸 𑀉𑀝𑁆𑀞𑁂𑀳𑀺, 𑀫𑀼𑀳𑀼𑀢𑁆𑀢𑀫𑀢𑁆𑀢𑀫𑁆𑀧𑀺 𑀢𑀯 𑀇𑀥 𑀞𑀸𑀢𑀼𑀁 𑀦 𑀤𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀢𑁆𑀣 𑀣𑀼𑀦𑀦𑁆𑀢𑀺 𑀤𑀼𑀕𑁆𑀕𑀢𑀸𑀢𑀺 𑀤𑀼𑀓𑁆𑀔𑀕𑀢𑀢𑁆𑀢𑀸 𑀤𑀼𑀕𑁆𑀕𑀢𑀸. 𑀦𑁂𑀭𑀬𑀺𑀓𑀸𑀢𑀺 𑀦𑀺𑀭𑀬𑀤𑀼𑀓𑁆𑀔𑁂𑀦 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀬𑀲𑁆𑀫𑀺𑀁 𑀦𑀺𑀭𑀬𑁂 𑀣𑀼𑀦𑀦𑁆𑀢𑀺, 𑀬𑀸𑀯 𑀧𑀸𑀧𑀓𑀫𑁆𑀫𑀁 𑀦 𑀩𑁆𑀬𑀦𑁆𑀢𑀺 𑀳𑁄𑀢𑀺, 𑀢𑀸𑀯 𑀦𑀺𑀓𑁆𑀔𑀫𑀺𑀢𑀼𑀁 𑀅𑀮𑀪𑀦𑁆𑀢𑀸 𑀦𑀺𑀢𑁆𑀣𑀼𑀦𑀦𑁆𑀢𑀺, 𑀢𑀢𑁆𑀣 𑀢𑀁 𑀦𑁂𑀲𑁆𑀲𑀸𑀫 𑀦𑀬𑀺𑀲𑁆𑀲𑀸𑀫 𑀔𑀺𑀧𑀺𑀲𑁆𑀲𑀸𑀫𑀸𑀢𑀺 𑀬𑁄𑀚𑀦𑀸.

𑁮𑁬𑁪. ‘‘𑀇𑀘𑁆𑀘𑁂𑀯 𑀯𑀢𑁆𑀯𑀸𑀦 𑀬𑀫𑀲𑁆𑀲 𑀤𑀽𑀢𑀸, 𑀢𑁂 𑀤𑁆𑀯𑁂 𑀬𑀓𑁆𑀔𑀸 𑀮𑁄𑀳𑀺𑀢𑀓𑁆𑀔𑀸 𑀩𑁆𑀭𑀳𑀦𑁆𑀢𑀸;

𑀧𑀘𑁆𑀘𑁂𑀓𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑀭𑁂𑀯𑀢𑀁, 𑀧𑀓𑁆𑀓𑀸𑀫𑀬𑀼𑀁 𑀤𑁂𑀯𑀕𑀡𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺. 𑁋

𑀇𑀤𑀁 𑀲𑀗𑁆𑀕𑀻𑀢𑀺𑀓𑀸𑀭𑀯𑀘𑀦𑀁.

𑀢𑀢𑁆𑀣 𑀇𑀘𑁆𑀘𑁂𑀯 𑀯𑀢𑁆𑀯𑀸𑀦𑀸𑀢𑀺 𑀇𑀢𑀺 𑀏𑀯 ‘‘𑀉𑀝𑁆𑀞𑁂𑀳𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀯𑀸, 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀬𑀫𑀲𑁆𑀲 𑀤𑀽𑀢𑀸𑀢𑀺 𑀅𑀧𑁆𑀧𑀝𑀺𑀲𑁂𑀥𑀦𑀺𑀬𑀢𑀲𑁆𑀲 𑀬𑀫𑀲𑁆𑀲 𑀭𑀜𑁆𑀜𑁄 𑀤𑀽𑀢𑀲𑀤𑀺𑀲𑀸. 𑀯𑁂𑀲𑁆𑀲𑀯𑀡𑁂𑀦 𑀳𑀺 𑀢𑁂 𑀧𑁂𑀲𑀺𑀢𑀸. 𑀢𑀣𑀸 𑀳𑀺 𑀢𑁂 𑀢𑀸𑀯𑀢𑀺𑀁𑀲𑀪𑀯𑀦𑀁 𑀦𑀬𑀺𑀁𑀲𑀼. 𑀓𑁂𑀘𑀺 ‘‘𑀦 𑀬𑀫𑀲𑁆𑀲 𑀤𑀽𑀢𑀸’’𑀢𑀺 𑀦-𑀓𑀸𑀭𑀁 ‘‘𑀬𑀫𑀲𑁆𑀲𑀸’’𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 ‘‘𑀯𑁂𑀲𑁆𑀲𑀯𑀡𑀲𑁆𑀲 𑀤𑀽𑀢𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀦 𑀬𑀫𑀤𑀽𑀢𑀢𑀸𑀬 𑀯𑁂𑀲𑁆𑀲𑀯𑀡𑀲𑁆𑀲 𑀤𑀽𑀢𑀸𑀢𑀺 𑀲𑀺𑀚𑁆𑀛𑀢𑀺. 𑀬𑀚𑀦𑁆𑀢𑀺 𑀢𑀢𑁆𑀣 𑀩𑀮𑀺𑀁 𑀉𑀧𑀳𑀭𑀦𑁆𑀢𑀻𑀢𑀺 𑀬𑀓𑁆𑀔𑀸. 𑀮𑁄𑀳𑀺𑀢𑀓𑁆𑀔𑀸𑀢𑀺 𑀭𑀢𑁆𑀢𑀦𑀬𑀦𑀸. 𑀬𑀓𑁆𑀔𑀸𑀦𑀜𑁆𑀳𑀺 𑀦𑁂𑀢𑁆𑀢𑀸𑀦𑀺 𑀅𑀢𑀺𑀮𑁄𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀩𑁆𑀭𑀳𑀦𑁆𑀢𑀸𑀢𑀺 𑀫𑀳𑀦𑁆𑀢𑀸. 𑀧𑀘𑁆𑀘𑁂𑀓𑀩𑀸𑀳𑀸𑀲𑀽𑀢𑀺 𑀏𑀓𑁄 𑀏𑀓𑀩𑀸𑀳𑀸𑀬𑀁, 𑀇𑀢𑀭𑁄 𑀇𑀢𑀭𑀩𑀸𑀳𑀸𑀬𑀦𑁆𑀢𑀺 𑀧𑀘𑁆𑀘𑁂𑀓𑀁 𑀩𑀸𑀳𑀸𑀲𑀼. 𑀭𑁂𑀯𑀢𑀦𑁆𑀢𑀺 𑀭𑁂𑀯𑀢𑀺𑀁. 𑀭𑁂𑀯𑀢𑀸𑀢𑀺𑀧𑀺 𑀢𑀲𑁆𑀲𑀸 𑀦𑀸𑀫𑀫𑁂𑀯. 𑀢𑀣𑀸 𑀳𑀺 ‘‘𑀭𑁂𑀯𑀢𑁂’’𑀢𑀺 𑀯𑀼𑀢𑁆𑀢𑀁. 𑀧𑀓𑁆𑀓𑀸𑀫𑀬𑀼𑀦𑁆𑀢𑀺 𑀧𑀓𑁆𑀓𑀸𑀫𑁂𑀲𑀼𑀁, 𑀉𑀧𑀦𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀤𑁂𑀯𑀕𑀡𑀲𑁆𑀲𑀸𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀤𑁂𑀯𑀲𑀗𑁆𑀖𑀲𑁆𑀲.

𑀏𑀯𑀁 𑀢𑁂𑀳𑀺 𑀬𑀓𑁆𑀔𑁂𑀳𑀺 𑀢𑀸𑀯𑀢𑀺𑀁𑀲𑀪𑀯𑀦𑀁 𑀦𑁂𑀢𑁆𑀯𑀸 𑀦𑀦𑁆𑀤𑀺𑀬𑀯𑀺𑀫𑀸𑀦𑀲𑁆𑀲 𑀅𑀯𑀺𑀤𑀽𑀭𑁂 𑀞𑀧𑀺𑀢𑀸 𑀭𑁂𑀯𑀢𑀻 𑀢𑀁 𑀲𑀽𑀭𑀺𑀬𑀫𑀡𑁆𑀟𑀮𑀲𑀤𑀺𑀲𑀁 𑀅𑀢𑀺𑀯𑀺𑀬 𑀧𑀪𑀲𑁆𑀲𑀭𑀁 𑀤𑀺𑀲𑁆𑀯𑀸 𑁋

𑁮𑁬𑁫. ‘‘𑀆𑀤𑀺𑀘𑁆𑀘𑀯𑀡𑁆𑀡𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀁, 𑀩𑁆𑀬𑀫𑁆𑀳𑀁 𑀲𑀼𑀪𑀁 𑀓𑀜𑁆𑀘𑀦𑀚𑀸𑀮𑀙𑀦𑁆𑀦𑀁;

𑀓𑀲𑁆𑀲𑁂𑀢𑀫𑀸𑀓𑀺𑀡𑁆𑀡𑀚𑀦𑀁 𑀯𑀺𑀫𑀸𑀦𑀁, 𑀲𑀼𑀭𑀺𑀬𑀲𑁆𑀲 𑀭𑀁𑀲𑀻𑀭𑀺𑀯 𑀚𑁄𑀢𑀫𑀸𑀦𑀁.

𑁮𑁬𑁬. ‘‘𑀦𑀸𑀭𑀻𑀕𑀡𑀸 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑀸, 𑀉𑀪𑀢𑁄 𑀯𑀺𑀫𑀸𑀦𑀁 𑀉𑀧𑀲𑁄𑀪𑀬𑀦𑁆𑀢𑀺;

𑀢𑀁 𑀤𑀺𑀲𑁆𑀲𑀢𑀺 𑀲𑀼𑀭𑀺𑀬𑀲𑀫𑀸𑀦𑀯𑀡𑁆𑀡𑀁, 𑀓𑁄 𑀫𑁄𑀤𑀢𑀺 𑀲𑀕𑁆𑀕𑀧𑀢𑁆𑀢𑁄 𑀯𑀺𑀫𑀸𑀦𑁂’’𑀢𑀺. 𑁋

𑀢𑁂 𑀬𑀓𑁆𑀔𑁂 𑀧𑀼𑀘𑁆𑀙𑀺. 𑀢𑁂𑀧𑀺 𑀢𑀲𑁆𑀲𑀸 𑁋

𑁮𑁬𑁭. ‘‘𑀩𑀸𑀭𑀸𑀡𑀲𑀺𑀬𑀁 𑀦𑀦𑁆𑀤𑀺𑀬𑁄 𑀦𑀸𑀫𑀸𑀲𑀺, 𑀉𑀧𑀸𑀲𑀓𑁄 𑀅𑀫𑀘𑁆𑀙𑀭𑀻 𑀤𑀸𑀦𑀧𑀢𑀺 𑀯𑀤𑀜𑁆𑀜𑀽;

𑀢𑀲𑁆𑀲𑁂𑀢𑀫𑀸𑀓𑀺𑀡𑁆𑀡𑀚𑀦𑀁 𑀯𑀺𑀫𑀸𑀦𑀁, 𑀲𑀽𑀭𑀺𑀬𑀲𑁆𑀲 𑀭𑀁𑀲𑀻𑀭𑀺𑀯 𑀚𑁄𑀢𑀫𑀸𑀦𑀁.

𑁮𑁬𑁮. ‘‘𑀦𑀸𑀭𑀻𑀕𑀡𑀸 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑀸, 𑀉𑀪𑀢𑁄 𑀯𑀺𑀫𑀸𑀦𑀁 𑀉𑀧𑀲𑁄𑀪𑀬𑀦𑁆𑀢𑀺;

𑀢𑀁 𑀤𑀺𑀲𑁆𑀲𑀢𑀺 𑀲𑀽𑀭𑀺𑀬𑀲𑀫𑀸𑀦𑀯𑀡𑁆𑀡𑀁, 𑀲𑁄 𑀫𑁄𑀤𑀢𑀺 𑀲𑀕𑁆𑀕𑀧𑀢𑁆𑀢𑁄 𑀯𑀺𑀫𑀸𑀦𑁂’’𑀢𑀺. 𑁋

𑀆𑀘𑀺𑀓𑁆𑀔𑀺𑀁𑀲𑀼.

𑁮𑁬𑁮. 𑀢𑀢𑁆𑀣 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑀸𑀢𑀺 𑀲𑀸𑀭𑀪𑀽𑀢𑁂𑀦 𑀘𑀦𑁆𑀤𑀦𑀕𑀦𑁆𑀥𑁂𑀦 𑀅𑀦𑀼𑀮𑀺𑀢𑁆𑀢𑀲𑀭𑀻𑀭𑀸. 𑀉𑀪𑀢𑁄 𑀯𑀺𑀫𑀸𑀦𑀦𑁆𑀢𑀺 𑀯𑀺𑀫𑀸𑀦𑀁 𑀉𑀪𑀢𑁄 𑀅𑀦𑁆𑀢𑁄 𑀘𑁂𑀯 𑀩𑀳𑀺 𑀘 𑀲𑀗𑁆𑀕𑀻𑀢𑀸𑀤𑀻𑀳𑀺 𑀉𑀧𑁂𑀘𑁆𑀘 𑀲𑁄𑀪𑀬𑀦𑁆𑀢𑀺.

𑀅𑀣 𑀭𑁂𑀯𑀢𑀻 𑁋

𑁮𑁬𑁯. ‘‘𑀦𑀦𑁆𑀤𑀺𑀬𑀲𑁆𑀲𑀸𑀳𑀁 𑀪𑀭𑀺𑀬𑀸, 𑀅𑀕𑀸𑀭𑀺𑀦𑀻 𑀲𑀩𑁆𑀩𑀓𑀼𑀮𑀲𑁆𑀲 𑀇𑀲𑁆𑀲𑀭𑀸;

𑀪𑀢𑁆𑀢𑀼 𑀯𑀺𑀫𑀸𑀦𑁂 𑀭𑀫𑀺𑀲𑁆𑀲𑀸𑀫𑀺 𑀤𑀸𑀦𑀳𑀁, 𑀦 𑀧𑀢𑁆𑀣𑀬𑁂 𑀦𑀺𑀭𑀬𑀁 𑀤𑀲𑁆𑀲𑀦𑀸𑀬𑀸’’𑀢𑀺. 𑁋

𑀆𑀳. 𑀢𑀢𑁆𑀣 𑀅𑀕𑀸𑀭𑀺𑀦𑀻𑀢𑀺 𑀕𑁂𑀳𑀲𑀸𑀫𑀺𑀦𑀻. ‘‘𑀪𑀭𑀺𑀬𑀸 𑀲𑀕𑀸𑀫𑀺𑀦𑀻’’𑀢𑀺𑀧𑀺 𑀧𑀞𑀦𑁆𑀢𑀺, 𑀪𑀭𑀺𑀬𑀸 𑀲𑀳𑀕𑀸𑀫𑀺𑀦𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀓𑀼𑀮𑀲𑁆𑀲 𑀇𑀲𑁆𑀲𑀭𑀸 𑀪𑀢𑁆𑀢𑀽𑀢𑀺 𑀫𑀫 𑀪𑀢𑁆𑀢𑀼 𑀦𑀦𑁆𑀤𑀺𑀬𑀲𑁆𑀲 𑀲𑀩𑁆𑀩𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀇𑀲𑁆𑀲𑀭𑀸 𑀲𑀸𑀫𑀺𑀦𑀻 𑀅𑀳𑁄𑀲𑀺𑀁, 𑀢𑀲𑁆𑀫𑀸 𑀇𑀤𑀸𑀦𑀺𑀧𑀺 𑀯𑀺𑀫𑀸𑀦𑁂 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀸𑀫𑀻𑀢𑀺 𑀆𑀳. 𑀯𑀺𑀫𑀸𑀦𑁂 𑀭𑀫𑀺𑀲𑁆𑀲𑀸𑀫𑀺 𑀤𑀸𑀦𑀳𑀦𑁆𑀢𑀺 𑀏𑀯𑀁 𑀧𑀮𑁄𑀪𑁂𑀢𑀼𑀫𑁂𑀯 𑀳𑀺 𑀢𑀁 𑀢𑁂 𑀢𑀢𑁆𑀣 𑀦𑁂𑀲𑀼𑀁. 𑀦 𑀧𑀢𑁆𑀣𑀬𑁂 𑀦𑀺𑀭𑀬𑀁 𑀤𑀲𑁆𑀲𑀦𑀸𑀬𑀸𑀢𑀺 𑀬𑀁 𑀧𑀦 𑀦𑀺𑀭𑀬𑀁 𑀫𑀁 𑀢𑀼𑀫𑁆𑀳𑁂 𑀦𑁂𑀢𑀼𑀓𑀸𑀫𑀸, 𑀢𑀁 𑀦𑀺𑀭𑀬𑀁 𑀤𑀲𑁆𑀲𑀦𑀸𑀬𑀧𑀺 𑀦 𑀧𑀢𑁆𑀣𑀬𑁂, 𑀓𑀼𑀢𑁄 𑀧𑀯𑀺𑀲𑀺𑀢𑀼𑀦𑁆𑀢𑀺 𑀯𑀤𑀢𑀺.

𑀏𑀯𑀁 𑀯𑀤𑀦𑁆𑀢𑀺𑀫𑁂𑀯 ‘‘𑀢𑁆𑀯𑀁 𑀢𑀁 𑀧𑀢𑁆𑀣𑁂𑀳𑀺 𑀯𑀸 𑀫𑀸 𑀯𑀸, 𑀓𑀺𑀁 𑀢𑀯 𑀧𑀢𑁆𑀣𑀦𑀸𑀬𑀸’’𑀢𑀺 𑀦𑀺𑀭𑀬𑀲𑀫𑀻𑀧𑀁 𑀦𑁂𑀢𑁆𑀯𑀸 𑁋

𑁮𑁭𑁦. ‘‘𑀏𑀲𑁄 𑀢𑁂 𑀦𑀺𑀭𑀬𑁄 𑀲𑀼𑀧𑀸𑀧𑀥𑀫𑁆𑀫𑁂, 𑀧𑀼𑀜𑁆𑀜𑀁 𑀢𑀬𑀸 𑀅𑀓𑀢𑀁 𑀚𑀻𑀯𑀮𑁄𑀓𑁂;

𑀦 𑀳𑀺 𑀫𑀘𑁆𑀙𑀭𑀻 𑀭𑁄𑀲𑀓𑁄 𑀧𑀸𑀧𑀥𑀫𑁆𑀫𑁄, 𑀲𑀕𑁆𑀕𑀽𑀧𑀕𑀸𑀦𑀁 𑀮𑀪𑀢𑀺 𑀲𑀳𑀩𑁆𑀬𑀢’’𑀦𑁆𑀢𑀺. 𑁋

𑀕𑀸𑀣𑀫𑀸𑀳𑀁𑀲𑀼. 𑀢𑀲𑁆𑀲𑀢𑁆𑀣𑁄 𑁋 𑀏𑀲𑁄 𑀢𑀯 𑀦𑀺𑀭𑀬𑁄, 𑀢𑀬𑀸 𑀤𑀻𑀖𑀭𑀢𑁆𑀢𑀁 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑀩𑁆𑀩𑀝𑁆𑀞𑀸𑀦𑀪𑀽𑀢𑁄. 𑀓𑀲𑁆𑀫𑀸? 𑀧𑀼𑀜𑁆𑀜𑀁 𑀢𑀬𑀸 𑀅𑀓𑀢𑀁 𑀚𑀻𑀯𑀮𑁄𑀓𑁂, 𑀬𑀲𑁆𑀫𑀸 𑀫𑀦𑀼𑀲𑁆𑀲𑀮𑁄𑀓𑁂 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀢𑀬𑀸 𑀧𑀼𑀜𑁆𑀜𑀁 𑀦𑀸𑀫 𑀦 𑀓𑀢𑀁, 𑀏𑀯𑀁 𑀅𑀓𑀢𑀧𑀼𑀜𑁆𑀜𑁄 𑀧𑀦 𑀢𑀸𑀤𑀺𑀲𑁄 𑀲𑀢𑁆𑀢𑁄 𑀫𑀘𑁆𑀙𑀭𑀻 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀮𑀓𑁆𑀔𑀡𑁂𑀦 𑀫𑀘𑁆𑀙𑀭𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀧𑀭𑁂𑀲𑀁 𑀭𑁄𑀲𑀼𑀧𑁆𑀧𑀸𑀤𑀦𑁂𑀦 𑀭𑁄𑀲𑀓𑁄, 𑀮𑁄𑀪𑀸𑀤𑀻𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀲𑀫𑀗𑁆𑀕𑀻𑀪𑀸𑀯𑀢𑁄 𑀧𑀸𑀧𑀥𑀫𑁆𑀫𑁄 𑀲𑀕𑁆𑀕𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀲𑀳𑀪𑀸𑀯𑀁 𑀦 𑀮𑀪𑀢𑀻𑀢𑀺 𑀬𑁄𑀚𑀦𑀸.

𑀏𑀯𑀁 𑀧𑀦 𑀯𑀢𑁆𑀯𑀸 𑀢𑁂 𑀤𑁆𑀯𑁂 𑀬𑀓𑁆𑀔𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺𑀁𑀲𑀼. 𑀢𑀁𑀲𑀤𑀺𑀲𑁂 𑀧𑀦 𑀤𑁆𑀯𑁂 𑀦𑀺𑀭𑀬𑀧𑀸𑀮𑁂 𑀲𑀁𑀲𑀯𑀓𑁂 𑀦𑀸𑀫 𑀕𑀽𑀣𑀦𑀺𑀭𑀬𑁂 𑀧𑀓𑁆𑀔𑀺𑀧𑀺𑀢𑀼𑀁 𑀆𑀓𑀟𑁆𑀠𑀦𑁆𑀢𑁂 𑀧𑀲𑁆𑀲𑀺𑀢𑁆𑀯𑀸 𑁋

𑁮𑁭𑁧. ‘‘𑀓𑀺𑀁 𑀦𑀼 𑀕𑀽𑀣𑀜𑁆𑀘 𑀫𑀼𑀢𑁆𑀢𑀜𑁆𑀘, 𑀅𑀲𑀼𑀘𑀺 𑀧𑀝𑀺𑀤𑀺𑀲𑁆𑀲𑀢𑀺;

𑀤𑀼𑀕𑁆𑀕𑀦𑁆𑀥𑀁 𑀓𑀺𑀫𑀺𑀤𑀁 𑀫𑀻𑀴𑁆𑀳𑀁, 𑀓𑀺𑀫𑁂𑀢𑀁 𑀉𑀧𑀯𑀸𑀬𑀢𑀻’’𑀢𑀺. 𑁋

𑀢𑀁 𑀦𑀺𑀭𑀬𑀁 𑀧𑀼𑀘𑁆𑀙𑀺.

𑁮𑁭𑁨. ‘‘𑀏𑀲 𑀲𑀁𑀲𑀯𑀓𑁄 𑀦𑀸𑀫, 𑀕𑀫𑁆𑀪𑀻𑀭𑁄 𑀲𑀢𑀧𑁄𑀭𑀺𑀲𑁄;

𑀬𑀢𑁆𑀣 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀢𑀼𑀯𑀁 𑀧𑀘𑁆𑀘𑀲𑀺 𑀭𑁂𑀯𑀢𑁂’’𑀢𑀺. 𑁋

𑀢𑀲𑁆𑀫𑀺𑀁 𑀓𑀣𑀺𑀢𑁂 𑀢𑀢𑁆𑀣 𑀅𑀢𑁆𑀢𑀦𑁄 𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑀻 𑁋

𑁮𑁭𑁩. ‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑁂𑀦 𑀲𑀁𑀲𑀯𑀓𑁄 𑀮𑀤𑁆𑀥𑁄, 𑀕𑀫𑁆𑀪𑀻𑀭𑁄 𑀲𑀢𑀧𑁄𑀭𑀺𑀲𑁄’’𑀢𑀺. 𑁋 𑀆𑀳;

𑁮𑁭𑁪. ‘‘𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀘𑀸𑀧𑀺, 𑀅𑀜𑁆𑀜𑁂 𑀯𑀸𑀧𑀺 𑀯𑀦𑀺𑀩𑁆𑀩𑀓𑁂;

𑀫𑀼𑀲𑀸𑀯𑀸𑀤𑁂𑀦 𑀯𑀜𑁆𑀘𑁂𑀲𑀺, 𑀢𑀁 𑀧𑀸𑀧𑀁 𑀧𑀓𑀢𑀁 𑀢𑀬𑀸’’𑀢𑀺. 𑁋

𑀢𑀲𑁆𑀲𑀸 𑀢𑀁 𑀓𑀫𑁆𑀫𑀁 𑀓𑀣𑁂𑀢𑁆𑀯𑀸 𑀧𑀼𑀦 𑀢𑁂 𑁋

𑁮𑁭𑁫. ‘‘𑀢𑁂𑀦 𑀲𑀁𑀲𑀯𑀓𑁄 𑀮𑀤𑁆𑀥𑁄, 𑀕𑀫𑁆𑀪𑀻𑀭𑁄 𑀲𑀢𑀧𑁄𑀭𑀺𑀲𑁄;

𑀢𑀢𑁆𑀣𑁂 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀢𑀼𑀯𑀁 𑀧𑀘𑁆𑀘𑀲𑀺 𑀭𑁂𑀯𑀢𑁂’’𑀢𑀺. 𑁋

𑀆𑀳𑀁𑀲𑀼. 𑀢𑀢𑁆𑀣 𑀲𑀁𑀲𑀯𑀓𑁄 𑀦𑀸𑀫𑀸𑀢𑀺 𑀦𑀺𑀘𑁆𑀘𑀓𑀸𑀮𑀁 𑀕𑀽𑀣𑀫𑀼𑀢𑁆𑀢𑀸𑀤𑀺𑀅𑀲𑀼𑀘𑀺𑀲𑁆𑀲 𑀲𑀁𑀲𑀯𑀦𑀢𑁄 𑀧𑀕𑁆𑀖𑀭𑀡𑀢𑁄 𑀲𑀁𑀲𑀯𑀓𑁄 𑀦𑀸𑀫.

𑀦 𑀓𑁂𑀯𑀮𑀁 𑀢𑀼𑀬𑁆𑀳𑀁 𑀇𑀥 𑀲𑀁𑀲𑀯𑀓𑀮𑀸𑀪𑁄 𑀏𑀯, 𑀅𑀣 𑀔𑁄 𑀏𑀢𑁆𑀣 𑀅𑀦𑁂𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀺𑀢𑁆𑀯𑀸 𑀉𑀢𑁆𑀢𑀺𑀡𑁆𑀡𑀸𑀬 𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀮𑀸𑀪𑁄𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 𑁋

𑁮𑁭𑁬. ‘‘𑀳𑀢𑁆𑀣𑁂𑀧𑀺 𑀙𑀺𑀦𑁆𑀤𑀦𑁆𑀢𑀺 𑀅𑀣𑁄𑀧𑀺 𑀧𑀸𑀤𑁂, 𑀓𑀡𑁆𑀡𑁂𑀧𑀺 𑀙𑀺𑀦𑁆𑀤𑀦𑁆𑀢𑀺 𑀅𑀣𑁄𑀧𑀺 𑀦𑀸𑀲𑀁;

𑀅𑀣𑁄𑀧𑀺 𑀓𑀸𑀓𑁄𑀴𑀕𑀡𑀸 𑀲𑀫𑁂𑀘𑁆𑀘, 𑀲𑀗𑁆𑀕𑀫𑁆𑀫 𑀔𑀸𑀤𑀦𑁆𑀢𑀺 𑀯𑀺𑀨𑀦𑁆𑀤𑀫𑀸𑀦’’𑀦𑁆𑀢𑀺. 𑁋

𑀢𑀢𑁆𑀣 𑀮𑀤𑁆𑀥𑀩𑁆𑀩𑀓𑀸𑀭𑀡𑀁 𑀆𑀳𑀁𑀲𑀼. 𑀢𑀢𑁆𑀣 𑀓𑀸𑀓𑁄𑀴𑀕𑀡𑀸𑀢𑀺 𑀓𑀸𑀓𑀲𑀗𑁆𑀖𑀸. 𑀢𑁂 𑀓𑀺𑀭𑀲𑁆𑀲𑀸 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁂 𑀲𑀭𑀻𑀭𑁂 𑀅𑀦𑁂𑀓𑀲𑀢𑀸𑀦𑀺 𑀅𑀦𑁂𑀓𑀲𑀳𑀲𑁆𑀲𑀸𑀦𑀺 𑀧𑀢𑀺𑀢𑁆𑀯𑀸 𑀢𑀸𑀮𑀓𑁆𑀔𑀦𑁆𑀥𑀧𑀭𑀺𑀫𑀸𑀡𑁂𑀳𑀺 𑀲𑀼𑀦𑀺𑀲𑀺𑀢𑀕𑁆𑀕𑁂𑀳𑀺 𑀅𑀬𑁄𑀫𑀬𑁂𑀳𑀺 𑀫𑀼𑀔𑀢𑀼𑀡𑁆𑀟𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀫𑀁𑀲𑀁 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑁂 𑀓𑀫𑁆𑀫𑀩𑀮𑁂𑀦 𑀧𑀽𑀭𑀢𑁂𑀯. 𑀢𑁂𑀦𑀸𑀳 ‘‘𑀓𑀸𑀓𑁄𑀴𑀕𑀡𑀸 𑀲𑀫𑁂𑀘𑁆𑀘, 𑀲𑀗𑁆𑀕𑀫𑁆𑀫 𑀔𑀸𑀤𑀦𑁆𑀢𑀺 𑀯𑀺𑀨𑀦𑁆𑀤𑀫𑀸𑀦’’𑀦𑁆𑀢𑀺.

𑀧𑀼𑀦 𑀲𑀸 𑀫𑀦𑀼𑀲𑁆𑀲𑀮𑁄𑀓𑀁 𑀧𑀘𑁆𑀘𑀸𑀦𑀬𑀦𑀸𑀬 𑀬𑀸𑀘𑀦𑀸𑀤𑀺𑀯𑀲𑁂𑀦 𑀢𑀁 𑀢𑀁 𑀯𑀺𑀧𑁆𑀧𑀮𑀧𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮𑁭𑁭. ‘‘𑀲𑀸𑀥𑀼 𑀔𑁄 𑀫𑀁 𑀧𑀝𑀺𑀦𑁂𑀣, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼𑀁;

𑀤𑀸𑀦𑁂𑀦 𑀲𑀫𑀘𑀭𑀺𑀬𑀸𑀬, 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀬𑀁 𑀓𑀢𑁆𑀯𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀺, 𑀦 𑀘 𑀧𑀘𑁆𑀙𑀸𑀦𑀼𑀢𑀧𑁆𑀧𑀭𑁂’’𑀢𑀺.

𑀧𑀼𑀦 𑀦𑀺𑀭𑀬𑀧𑀸𑀮𑀸 𑁋

𑁮𑁭𑁮. ‘‘𑀧𑀼𑀭𑁂 𑀢𑀼𑀯𑀁 𑀧𑀫𑀚𑁆𑀚𑀺𑀢𑁆𑀯𑀸, 𑀇𑀤𑀸𑀦𑀺 𑀧𑀭𑀺𑀤𑁂𑀯𑀲𑀺;

𑀲𑀬𑀁 𑀓𑀢𑀸𑀦𑀁 𑀓𑀫𑁆𑀫𑀸𑀦𑀁, 𑀯𑀺𑀧𑀸𑀓𑀁 𑀅𑀦𑀼𑀪𑁄𑀲𑁆𑀲𑀲𑀻’’𑀢𑀺. 𑁋

𑀆𑀳𑀁𑀲𑀼. 𑀧𑀼𑀦 𑀲𑀸 𑀆𑀳 𑁋

𑁮𑁭𑁯. ‘‘𑀓𑁄 𑀤𑁂𑀯𑀮𑁄𑀓𑀢𑁄 𑀫𑀦𑀼𑀲𑁆𑀲𑀮𑁄𑀓𑀁, 𑀕𑀦𑁆𑀢𑁆𑀯𑀸𑀦 𑀧𑀼𑀝𑁆𑀞𑁄 𑀫𑁂 𑀏𑀯𑀁 𑀯𑀤𑁂𑀬𑁆𑀬;

𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑁂𑀲𑀼 𑀤𑀤𑀸𑀣 𑀤𑀸𑀦𑀁, 𑀅𑀘𑁆𑀙𑀸𑀤𑀦𑀁 𑀲𑁂𑀬𑁆𑀬𑀫𑀣𑀦𑁆𑀦𑀧𑀸𑀦𑀁;

𑀦 𑀳𑀺 𑀫𑀘𑁆𑀙𑀭𑀻 𑀭𑁄𑀲𑀓𑁄 𑀧𑀸𑀧𑀥𑀫𑁆𑀫𑁄, 𑀲𑀕𑁆𑀕𑀽𑀧𑀕𑀸𑀦𑀁 𑀮𑀪𑀢𑀺 𑀲𑀳𑀩𑁆𑀬𑀢𑀁.

𑁮𑁮𑁦. ‘‘𑀲𑀸𑀳𑀁 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀯𑀤𑀜𑁆𑀜𑀽 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼𑀁;

𑀤𑀸𑀦𑁂𑀦 𑀲𑀫𑀘𑀭𑀺𑀬𑀸𑀬, 𑀲𑀁𑀬𑀫𑁂𑀦 𑀤𑀫𑁂𑀦 𑀘.

𑁮𑁮𑁧. ‘‘𑀆𑀭𑀸𑀫𑀸𑀦𑀺 𑀘 𑀭𑁄𑀧𑀺𑀲𑁆𑀲𑀁, 𑀤𑀼𑀕𑁆𑀕𑁂 𑀲𑀗𑁆𑀓𑀫𑀸𑀦𑀺 𑀘;

𑀧𑀧𑀜𑁆𑀘 𑀉𑀤𑀧𑀸𑀦𑀜𑁆𑀘, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁮𑁮𑁨. ‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁮𑁮𑁩. ‘‘𑀉𑀧𑁄𑀲𑀣𑀁 𑀉𑀧𑀯𑀲𑀺𑀲𑁆𑀲𑀁, 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;

𑀦 𑀘 𑀤𑀸𑀦𑁂 𑀧𑀫𑀚𑁆𑀚𑀺𑀲𑁆𑀲𑀁, 𑀲𑀸𑀫𑀁 𑀤𑀺𑀝𑁆𑀞𑀫𑀺𑀤𑀁 𑀫𑀬𑀸’’𑀢𑀺.

𑁮𑁮𑁪. ‘‘𑀇𑀘𑁆𑀘𑁂𑀯𑀁 𑀯𑀺𑀧𑁆𑀧𑀮𑀧𑀦𑁆𑀢𑀺𑀁, 𑀨𑀦𑁆𑀤𑀫𑀸𑀦𑀁 𑀢𑀢𑁄 𑀢𑀢𑁄;

𑀔𑀺𑀧𑀺𑀁𑀲𑀼 𑀦𑀺𑀭𑀬𑁂 𑀖𑁄𑀭𑁂, 𑀉𑀤𑁆𑀥𑀁𑀧𑀸𑀤𑀁 𑀅𑀯𑀁𑀲𑀺𑀭’’𑀦𑁆𑀢𑀺. 𑁋

𑀇𑀤𑀁 𑀲𑀗𑁆𑀕𑀻𑀢𑀺𑀓𑀸𑀭𑀯𑀘𑀦𑀁. 𑀧𑀼𑀦 𑀲𑀸 𑁋

𑁮𑁮𑁫. ‘‘𑀅𑀳𑀁 𑀧𑀼𑀭𑁂 𑀫𑀘𑁆𑀙𑀭𑀺𑀦𑀻 𑀅𑀳𑁄𑀲𑀺𑀁, 𑀧𑀭𑀺𑀪𑀸𑀲𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀯𑀺𑀢𑀣𑁂𑀦 𑀘 𑀲𑀸𑀫𑀺𑀓𑀁 𑀯𑀜𑁆𑀘𑀬𑀺𑀢𑁆𑀯𑀸, 𑀧𑀘𑁆𑀘𑀸𑀫𑀳𑀁 𑀦𑀺𑀭𑀬𑁂 𑀖𑁄𑀭𑀭𑀽𑀧𑁂’’𑀢𑀺. 𑁋

𑀑𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀣 ‘‘𑀅𑀳𑀁 𑀧𑀼𑀭𑁂 𑀫𑀘𑁆𑀙𑀭𑀺𑀦𑀻’’𑀢𑀺 𑀕𑀸𑀣𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸𑀬 𑀯𑀼𑀢𑁆𑀢𑀸, 𑀇𑀢𑀭𑀸 𑀅𑀦𑀺𑀩𑁆𑀩𑀢𑁆𑀢𑀸𑀬 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀪𑀺𑀓𑁆𑀔𑀽 𑀭𑁂𑀯𑀢𑀺𑀬𑀸 𑀬𑀓𑁆𑀔𑁂𑀳𑀺 𑀕𑀳𑁂𑀢𑁆𑀯𑀸 𑀦𑀻𑀢𑀪𑀸𑀯𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀪𑀕𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀇𑀫𑀁 𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸 𑀉𑀧𑀭𑀺 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. 𑀓𑀸𑀫𑀜𑁆𑀘𑁂𑀢𑀁 𑀭𑁂𑀯𑀢𑀻𑀧𑀝𑀺𑀩𑀤𑁆𑀥𑀸𑀬 𑀓𑀣𑀸𑀬 𑀬𑁂𑀪𑀼𑀬𑁆𑀬𑀪𑀸𑀯𑀢𑁄 ‘‘𑀭𑁂𑀯𑀢𑀻𑀯𑀺𑀫𑀸𑀦’’𑀦𑁆𑀢𑀺 𑀯𑁄𑀳𑀭𑀻𑀬𑀢𑀺, 𑀬𑀲𑁆𑀫𑀸 𑀧𑀦 𑀭𑁂𑀯𑀢𑀻 𑀯𑀺𑀫𑀸𑀦𑀤𑁂𑀯𑀢𑀸 𑀦 𑀳𑁄𑀢𑀺, 𑀦𑀦𑁆𑀤𑀺𑀬𑀲𑁆𑀲 𑀧𑀦 𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀺𑀫𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀘𑁂𑀢𑀁, 𑀢𑀲𑁆𑀫𑀸 𑀧𑀼𑀭𑀺𑀲𑀯𑀺𑀫𑀸𑀦𑁂𑀲𑁆𑀯𑁂𑀯 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀭𑁂𑀯𑀢𑀻𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀙𑀢𑁆𑀢𑀫𑀸𑀡𑀯𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀬𑁄 𑀯𑀤𑀢𑀁 𑀧𑀯𑀭𑁄 𑀫𑀦𑀼𑀚𑁂𑀲𑀽𑀢𑀺 𑀙𑀢𑁆𑀢𑀫𑀸𑀡𑀯𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀲𑁂𑀢𑀩𑁆𑀬𑀸𑀬𑀁 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀺𑀘𑁆𑀙𑀸𑀮𑀤𑁆𑀥𑁄 𑀧𑀼𑀢𑁆𑀢𑁄 𑀙𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀭𑀸 𑀧𑁂𑀲𑀺𑀢𑁄 𑀉𑀓𑁆𑀓𑀝𑁆𑀞𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀲𑀦𑁆𑀢𑀺𑀓𑁂 𑀫𑁂𑀥𑀸𑀯𑀺𑀢𑀸𑀬 𑀅𑀦𑀮𑀲𑀢𑀸𑀬 𑀘 𑀦 𑀘𑀺𑀭𑁂𑀦𑁂𑀯 𑀫𑀦𑁆𑀢𑁂 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀦𑀺 𑀘 𑀉𑀕𑁆𑀕𑀳𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄. 𑀲𑁄 𑀆𑀘𑀭𑀺𑀬𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 ‘‘𑀫𑀬𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑀁, 𑀓𑀺𑀁 𑀯𑁄 𑀕𑀭𑀼𑀤𑀓𑁆𑀔𑀺𑀡𑀁 𑀤𑁂𑀫𑀻’’𑀢𑀺 𑀆𑀳. 𑀆𑀘𑀭𑀺𑀬𑁄 ‘‘𑀕𑀭𑀼𑀤𑀓𑁆𑀔𑀺𑀡𑀸 𑀦𑀸𑀫 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀯𑀺𑀪𑀯𑀸𑀦𑀼𑀭𑀽𑀧𑀸, 𑀓𑀳𑀸𑀧𑀡𑀲𑀳𑀲𑁆𑀲𑀫𑀸𑀦𑁂𑀳𑀻’’𑀢𑀺 𑀆𑀳. 𑀙𑀢𑁆𑀢𑀫𑀸𑀡𑀯𑁄 𑀆𑀘𑀭𑀺𑀬𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀲𑁂𑀢𑀩𑁆𑀬𑀁 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀢𑁂𑀳𑀺 𑀅𑀪𑀺𑀦𑀦𑁆𑀤𑀺𑀬𑀫𑀸𑀦𑁄 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀢𑀫𑀢𑁆𑀣𑀁 𑀧𑀺𑀢𑀼 𑀆𑀭𑁄𑀘𑁂𑀢𑁆𑀯𑀸 ‘‘𑀤𑁂𑀣 𑀫𑁂 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁, 𑀅𑀚𑁆𑀚𑁂𑀯 𑀤𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀢𑀸𑀢, 𑀅𑀚𑁆𑀚 𑀯𑀺𑀓𑀸𑀮𑁄, 𑀲𑁆𑀯𑁂 𑀕𑀫𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀓𑀳𑀸𑀧𑀡𑁂 𑀦𑀻𑀳𑀭𑀺𑀢𑁆𑀯𑀸 𑀪𑀡𑁆𑀟𑀺𑀓𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀞𑀧𑁂𑀲𑀼𑀁. 𑀘𑁄𑀭𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀙𑀢𑁆𑀢𑀫𑀸𑀡𑀯𑀓𑀲𑁆𑀲 𑀕𑀫𑀦𑀫𑀕𑁆𑀕𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀕𑀳𑀦𑁂 𑀦𑀺𑀮𑀻𑀦𑀸 𑀅𑀘𑁆𑀙𑀺𑀁𑀲𑀼 ‘‘𑀫𑀸𑀡𑀯𑀁 𑀫𑀸𑀭𑁂𑀢𑁆𑀯𑀸 𑀓𑀳𑀸𑀧𑀡𑁂 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺.

𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀙𑀢𑁆𑀢𑀫𑀸𑀡𑀯𑀓𑀲𑁆𑀲 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀦𑀁, 𑀘𑁄𑀭𑁂𑀳𑀺 𑀫𑀸𑀭𑀺𑀢𑀲𑁆𑀲 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁, 𑀢𑀢𑁄 𑀲𑀳 𑀯𑀺𑀫𑀸𑀦𑁂𑀦 𑀆𑀕𑀢𑀲𑁆𑀲 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬 𑀘 𑀥𑀫𑁆𑀫𑀸𑀪𑀺𑀲𑀫𑀬𑀁 𑀤𑀺𑀲𑁆𑀯𑀸 𑀧𑀞𑀫𑀢𑀭𑀫𑁂𑀯 𑀕𑀦𑁆𑀢𑁆𑀯𑀸 𑀫𑀸𑀡𑀯𑀓𑀲𑁆𑀲 𑀕𑀫𑀦𑀫𑀕𑁆𑀕𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀫𑀸𑀡𑀯𑁄 𑀆𑀘𑀭𑀺𑀬𑀥𑀦𑀁 𑀕𑀳𑁂𑀢𑁆𑀯𑀸 𑀲𑁂𑀢𑀩𑁆𑀬𑀢𑁄 𑀉𑀓𑁆𑀓𑀝𑁆𑀞𑀸𑀪𑀺𑀫𑀼𑀔𑁄 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀪𑀕𑀯𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. ‘‘𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀻’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑁄 ‘‘𑀉𑀓𑁆𑀓𑀝𑁆𑀞𑀁, 𑀪𑁄 𑀕𑁄𑀢𑀫, 𑀕𑀫𑀺𑀲𑁆𑀲𑀸𑀫𑀺 𑀫𑀬𑁆𑀳𑀁 𑀆𑀘𑀭𑀺𑀬𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀕𑀭𑀼𑀤𑀓𑁆𑀔𑀺𑀡𑀁 𑀤𑀸𑀢𑀼’’𑀦𑁆𑀢𑀺 𑀆𑀳. 𑀅𑀣 𑀪𑀕𑀯𑀸 ‘‘𑀚𑀸𑀦𑀸𑀲𑀺 𑀧𑀦 𑀢𑁆𑀯𑀁, 𑀫𑀸𑀡𑀯, 𑀢𑀻𑀡𑀺 𑀲𑀭𑀡𑀸𑀦𑀺, 𑀧𑀜𑁆𑀘 𑀲𑀻𑀮𑀸𑀦𑀻’’𑀢𑀺 𑀯𑀢𑁆𑀯𑀸 𑀢𑁂𑀦 ‘‘𑀦𑀸𑀳𑀁 𑀚𑀸𑀦𑀸𑀫𑀺, 𑀓𑀺𑀫𑀢𑁆𑀣𑀺𑀬𑀸𑀦𑀺 𑀧𑀦𑁂𑀢𑀸𑀦𑀺 𑀓𑀻𑀤𑀺𑀲𑀸𑀦𑀺 𑀘𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀫𑀻𑀤𑀺𑀲’’𑀦𑁆𑀢𑀺 𑀲𑀭𑀡𑀕𑀫𑀦𑀲𑁆𑀲 𑀲𑀻𑀮𑀲𑀫𑀸𑀤𑀸𑀦𑀲𑁆𑀲 𑀘 𑀨𑀮𑀸𑀦𑀺𑀲𑀁𑀲𑀁 𑀯𑀺𑀪𑀸𑀯𑁂𑀢𑁆𑀯𑀸 ‘‘𑀉𑀕𑁆𑀕𑀡𑁆𑀳𑀸𑀳𑀺 𑀢𑀸𑀯, 𑀫𑀸𑀡𑀯𑀓, 𑀲𑀭𑀡𑀕𑀫𑀦𑀯𑀺𑀥𑀺’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑀸𑀥𑀼 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺, 𑀓𑀣𑁂𑀣 𑀪𑀦𑁆𑀢𑁂 𑀪𑀕𑀯𑀸’’𑀢𑀺 𑀢𑁂𑀦 𑀬𑀸𑀘𑀺𑀢𑁄 𑀢𑀲𑁆𑀲 𑀭𑀼𑀘𑀺𑀬𑀸 𑀅𑀦𑀼𑀭𑀽𑀧𑀁 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀲𑀭𑀡𑀕𑀫𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑁋

𑁮𑁮𑁬. ‘‘𑀬𑁄 𑀯𑀤𑀢𑀁 𑀧𑀯𑀭𑁄 𑀫𑀦𑀼𑀚𑁂𑀲𑀼, 𑀲𑀓𑁆𑀬𑀫𑀼𑀦𑀻 𑀪𑀕𑀯𑀸 𑀓𑀢𑀓𑀺𑀘𑁆𑀘𑁄;

𑀧𑀸𑀭𑀕𑀢𑁄 𑀩𑀮𑀯𑀻𑀭𑀺𑀬𑀲𑀫𑀗𑁆𑀕𑀻, 𑀢𑀁 𑀲𑀼𑀕𑀢𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀺.

𑁮𑁮𑁭. ‘‘𑀭𑀸𑀕𑀯𑀺𑀭𑀸𑀕𑀫𑀦𑁂𑀚𑀫𑀲𑁄𑀓𑀁, 𑀥𑀫𑁆𑀫𑀫𑀲𑀗𑁆𑀔𑀢𑀫𑀧𑁆𑀧𑀝𑀺𑀓𑀽𑀮𑀁;

𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀁, 𑀥𑀫𑁆𑀫𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀺.

𑁮𑁮𑁮. ‘‘𑀬𑀢𑁆𑀣 𑀘 𑀤𑀺𑀦𑁆𑀦 𑀫𑀳𑀧𑁆𑀨𑀮𑀫𑀸𑀳𑀼, 𑀘𑀢𑀽𑀲𑀼 𑀲𑀼𑀘𑀻𑀲𑀼 𑀧𑀼𑀭𑀺𑀲𑀬𑀼𑀕𑁂𑀲𑀼;

𑀅𑀝𑁆𑀞 𑀘 𑀧𑀼𑀕𑁆𑀕𑀮 𑀥𑀫𑁆𑀫𑀤𑀲𑀸 𑀢𑁂, 𑀲𑀗𑁆𑀖𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺. 𑁋

𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺.

𑁮𑁮𑁬. 𑀢𑀢𑁆𑀣 𑀬𑁄𑀢𑀺 𑀅𑀦𑀺𑀬𑀫𑀺𑀢𑀯𑀘𑀦𑀁, 𑀢𑀲𑁆𑀲 ‘‘𑀢’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀬𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀤𑀢𑀦𑁆𑀢𑀺 𑀯𑀤𑀦𑁆𑀢𑀸𑀦𑀁. 𑀧𑀯𑀭𑁄𑀢𑀺 𑀲𑁂𑀝𑁆𑀞𑁄, 𑀓𑀣𑀺𑀓𑀸𑀦𑀁 𑀉𑀢𑁆𑀢𑀫𑁄 𑀯𑀸𑀤𑀻𑀯𑀭𑁄𑀢𑀺 𑀅𑀢𑁆𑀣𑁄. 𑀫𑀦𑀼𑀚𑁂𑀲𑀽𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀬𑀣𑀸 ‘‘𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺. 𑀪𑀕𑀯𑀸 𑀧𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀩𑁆𑀭𑀳𑁆𑀫𑀸𑀦𑀫𑁆𑀧𑀺 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀧𑀯𑀭𑁄𑀬𑁂𑀯, 𑀪𑀕𑀯𑀢𑁄 𑀘 𑀘𑀭𑀺𑀫𑀪𑀯𑁂 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀦𑁆𑀦𑀢𑀸𑀬 𑀯𑀼𑀢𑁆𑀢𑀁 ‘‘𑀫𑀦𑀼𑀚𑁂𑀲𑀽’’𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀓𑁆𑀬𑀫𑀼𑀦𑀻’’𑀢𑀺. 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑀢𑀸𑀬 𑀲𑀓𑁆𑀬𑁄, 𑀓𑀸𑀬𑀫𑁄𑀦𑁂𑀬𑁆𑀬𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁄 𑀅𑀦𑀯𑀲𑁂𑀲𑀲𑁆𑀲 𑀘 𑀜𑁂𑀬𑁆𑀬𑀲𑁆𑀲 𑀫𑀼𑀦𑀦𑀢𑁄 𑀫𑀼𑀦𑀺 𑀘𑀸𑀢𑀺 𑀲𑀓𑁆𑀬𑀫𑀼𑀦𑀺. 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸. 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀸𑀢𑀩𑁆𑀩𑀲𑁆𑀲 𑀧𑀭𑀺𑀜𑁆𑀜𑀸𑀤𑀺𑀧𑀪𑁂𑀤𑀲𑁆𑀲 𑀲𑁄𑀴𑀲𑀯𑀺𑀥𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀢𑀢𑁆𑀢𑀸 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 𑀓𑀢𑀓𑀺𑀘𑁆𑀘𑁄. 𑀧𑀸𑀭𑀁 𑀲𑀓𑁆𑀓𑀸𑀬𑀲𑁆𑀲 𑀧𑀭𑀢𑀻𑀭𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄 𑀲𑀬𑀫𑁆𑀪𑀼𑀜𑀸𑀡𑁂𑀦 𑀅𑀥𑀺𑀕𑀢𑁄𑀢𑀺 𑀧𑀸𑀭𑀕𑀢𑁄. 𑀅𑀲𑀤𑀺𑀲𑁂𑀦 𑀓𑀸𑀬𑀩𑀮𑁂𑀦, 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀜𑀸𑀡𑀩𑀮𑁂𑀦, 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑁂𑀦 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀩𑀮𑀯𑀻𑀭𑀺𑀬𑀲𑀫𑀗𑁆𑀕𑀻. 𑀲𑁄𑀪𑀦𑀕𑀫𑀦𑀢𑁆𑀢𑀸, 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸, 𑀲𑀫𑁆𑀫𑀸 𑀕𑀢𑀢𑁆𑀢𑀸, 𑀲𑀫𑁆𑀫𑀸 𑀘 𑀕𑀤𑀺𑀢𑀢𑁆𑀢𑀸 𑀲𑀼𑀕𑀢𑁄. 𑀢𑀁 𑀲𑀼𑀕𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀲𑀭𑀡𑀢𑁆𑀣𑀁 𑀲𑀭𑀡𑀸𑀬 𑀧𑀭𑀸𑀬𑀡𑀸𑀬 𑀅𑀧𑀸𑀬𑀤𑀼𑀓𑁆𑀔𑀯𑀝𑁆𑀝𑀤𑀼𑀓𑁆𑀔𑀧𑀭𑀺𑀢𑁆𑀢𑀸𑀡𑀸𑀬 𑀉𑀧𑁂𑀳𑀺 𑀉𑀧𑀕𑀘𑁆𑀙, 𑀅𑀚𑁆𑀚 𑀧𑀝𑁆𑀞𑀸𑀬 𑀅𑀳𑀺𑀢𑀦𑀺𑀯𑀢𑁆𑀢𑀦𑁂𑀦 𑀳𑀺𑀢𑀲𑀁𑀯𑀟𑁆𑀠𑀦𑁂𑀦 ‘‘𑀅𑀬𑀁 𑀫𑁂 𑀪𑀕𑀯𑀸 𑀲𑀭𑀡𑀁 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀡𑀁 𑀕𑀢𑀺 𑀧𑀝𑀺𑀲𑀭𑀡’’𑀦𑁆𑀢𑀺 𑀪𑀚 𑀲𑁂𑀯, 𑀏𑀯𑀁 𑀚𑀸𑀦𑀸𑀳𑀺 𑀯𑀸 𑀩𑀼𑀚𑁆𑀛𑀲𑁆𑀲𑀽𑀢𑀺 𑀅𑀢𑁆𑀣𑁄.

𑁮𑁮𑁭. 𑀭𑀸𑀕𑀯𑀺𑀭𑀸𑀕𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀫𑀸𑀳. 𑀢𑁂𑀦 𑀳𑀺 𑀅𑀭𑀺𑀬𑀸 𑀅𑀦𑀸𑀤𑀺𑀓𑀸𑀮𑀪𑀸𑀯𑀺𑀢𑀫𑁆𑀧𑀺 𑀭𑀸𑀕𑀁 𑀯𑀺𑀭𑀚𑁆𑀚𑁂𑀦𑁆𑀢𑀺. 𑀅𑀦𑁂𑀚𑀫𑀲𑁄𑀓𑀦𑁆𑀢𑀺 𑀅𑀭𑀺𑀬𑀨𑀮𑀁. 𑀢𑀜𑁆𑀳𑀺 𑀏𑀚𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀅𑀯𑀲𑀺𑀝𑁆𑀞𑀸𑀦𑀜𑁆𑀘 𑀲𑁄𑀓𑀦𑀺𑀫𑀺𑀢𑁆𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀢𑁄 ‘‘𑀅𑀦𑁂𑀚𑀁 𑀅𑀲𑁄𑀓’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀦𑁆𑀢𑀺 𑀲𑀪𑀸𑀯𑀥𑀫𑁆𑀫𑀁. 𑀲𑀪𑀸𑀯𑀢𑁄 𑀕𑀳𑁂𑀢𑀩𑁆𑀩𑀥𑀫𑁆𑀫𑁄 𑀳𑁂𑀲 𑀬𑀤𑀺𑀤𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺, 𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀯𑀺𑀬 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀯𑀲𑁂𑀦. 𑀥𑀫𑁆𑀫𑀦𑁆𑀢𑀺 𑀯𑀸 𑀧𑀭𑀫𑀢𑁆𑀣𑀥𑀫𑁆𑀫𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁂𑀘𑁆𑀘 𑀲𑀫𑁆𑀪𑀼𑀬𑁆𑀬 𑀧𑀘𑁆𑀘𑀬𑁂𑀳𑀺 𑀓𑀢𑀁 𑀲𑀗𑁆𑀔𑀢𑀁, 𑀦 𑀲𑀗𑁆𑀔𑀢𑀦𑁆𑀢𑀺 𑀅𑀲𑀗𑁆𑀔𑀢𑀁. 𑀢𑀤𑁂𑀯 𑀦𑀺𑀩𑁆𑀩𑀸𑀦𑀁. 𑀦𑀢𑁆𑀣𑀺 𑀏𑀢𑁆𑀣 𑀓𑀺𑀜𑁆𑀘𑀺𑀧𑀺 𑀧𑀝𑀺𑀓𑀽𑀮𑀦𑁆𑀢𑀺 𑀅𑀧𑁆𑀧𑀝𑀺𑀓𑀽𑀮𑀁. 𑀲𑀯𑀦𑀯𑁂𑀮𑀸𑀬𑀁 𑀉𑀧𑀧𑀭𑀺𑀓𑁆𑀔𑀡𑀯𑁂𑀮𑀸𑀬𑀁 𑀧𑀝𑀺𑀧𑀚𑁆𑀚𑀦𑀯𑁂𑀮𑀸𑀬𑀦𑁆𑀢𑀺 𑀲𑀩𑁆𑀩𑀤𑀸𑀧𑀺 𑀇𑀝𑁆𑀞𑀫𑁂𑀯𑀸𑀢𑀺 𑀫𑀥𑀼𑀭𑀁. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀦𑁆𑀦𑀺𑀲𑁆𑀲𑀬𑀸𑀬 𑀧𑀝𑀺𑀪𑀸𑀦𑀲𑀫𑁆𑀧𑀤𑀸𑀬 𑀧𑀯𑀢𑁆𑀢𑀺𑀢𑀢𑁆𑀢𑀸 𑀲𑀼𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄 𑀦𑀺𑀧𑀼𑀡𑀪𑀸𑀯𑀢𑁄 𑀘 𑀧𑀕𑀼𑀡𑀁. 𑀯𑀺𑀪𑀚𑀺𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀔𑀦𑁆𑀥𑀸𑀤𑀺𑀯𑀲𑁂𑀦 𑀓𑀼𑀲𑀮𑀸𑀤𑀺𑀯𑀲𑁂𑀦 𑀉𑀤𑁆𑀤𑁂𑀲𑀸𑀤𑀺𑀯𑀲𑁂𑀦 𑀘 𑀲𑀼𑀝𑁆𑀞𑀼 𑀯𑀺𑀪𑀚𑀦𑀢𑁄 𑀲𑀼𑀯𑀺𑀪𑀢𑁆𑀢𑀁. 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀫𑁂𑀯 𑀯𑀤𑀢𑀺. 𑀢𑁂𑀦𑁂𑀯 𑀳𑀺𑀲𑁆𑀲 𑀆𑀧𑀸𑀣𑀓𑀸𑀮𑁂 𑀯𑀺𑀬 𑀯𑀺𑀫𑀤𑁆𑀤𑀦𑀓𑀸𑀮𑁂𑀧𑀺 𑀓𑀣𑁂𑀦𑁆𑀢𑀲𑁆𑀲 𑀯𑀺𑀬 𑀲𑀼𑀡𑀦𑁆𑀢𑀲𑁆𑀲𑀸𑀧𑀺 𑀲𑀫𑁆𑀫𑀼𑀔𑀻𑀪𑀸𑀯𑀢𑁄 𑀉𑀪𑀢𑁄𑀧𑀘𑁆𑀘𑀓𑁆𑀔𑀢𑀸𑀬 𑀤𑀲𑁆𑀲𑀦𑀢𑁆𑀣𑀁 ‘‘𑀇𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀦𑁆𑀢𑀺 𑀬𑀣𑀸𑀯𑀧𑀝𑀺𑀧𑀚𑁆𑀚𑀦𑁆𑀢𑁂 𑀅𑀧𑀸𑀬𑀤𑀼𑀓𑁆𑀔𑀧𑀸𑀢𑀢𑁄 𑀥𑀸𑀭𑀡𑀢𑁆𑀣𑁂𑀦 𑀥𑀫𑁆𑀫𑀁, 𑀇𑀤𑀁 𑀘𑀢𑀼𑀩𑁆𑀩𑀺𑀥𑀲𑁆𑀲𑀸𑀧𑀺 𑀥𑀫𑁆𑀫𑀲𑁆𑀲 𑀲𑀸𑀥𑀸𑀭𑀡𑀯𑀘𑀦𑀁. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺 𑀳𑀺 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀦𑀫𑀢𑁆𑀢𑀸𑀬𑀧𑀺 𑀬𑀣𑀸𑀯𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑀸𑀬𑀤𑀼𑀓𑁆𑀔𑀧𑀸𑀢𑀢𑁄 𑀥𑀸𑀭𑁂𑀢𑀺 𑀏𑀯. 𑀇𑀫𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀇𑀤𑀫𑁂𑀯 𑀯𑀺𑀫𑀸𑀦𑀁 𑀲𑀸𑀥𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀸𑀥𑀸𑀭𑀡𑀪𑀸𑀯𑁂𑀦 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 ‘‘𑀇𑀫’’𑀦𑁆𑀢𑀺 𑀆𑀳.

𑁮𑁮𑁮. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀅𑀭𑀺𑀬𑀲𑀗𑁆𑀖𑁂. 𑀤𑀺𑀦𑁆𑀦𑀦𑁆𑀢𑀺 𑀧𑀭𑀺𑀘𑁆𑀘𑀢𑁆𑀢𑀁 𑀅𑀦𑁆𑀦𑀸𑀤𑀺𑀤𑁂𑀬𑁆𑀬𑀥𑀫𑁆𑀫𑀁. 𑀤𑀺𑀦𑁆𑀦 𑀫𑀳𑀧𑁆𑀨𑀮𑀦𑁆𑀢𑀺 𑀕𑀸𑀣𑀸𑀲𑀼𑀔𑀢𑁆𑀣𑀁 𑀅𑀦𑀼𑀦𑀸𑀲𑀺𑀓𑀮𑁄𑀧𑁄 𑀓𑀢𑁄. 𑀅𑀘𑁆𑀘𑀦𑁆𑀢𑀫𑁂𑀯 𑀓𑀺𑀮𑁂𑀲𑀸𑀲𑀼𑀘𑀺𑀢𑁄 𑀯𑀺𑀲𑀼𑀚𑁆𑀛𑀦𑁂𑀦 𑀲𑀼𑀘𑀻𑀲𑀼 ‘‘𑀲𑁄𑀢𑀸𑀧𑀦𑁆𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁮.𑁬𑁦) 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀧𑀼𑀭𑀺𑀲𑀬𑀼𑀕𑁂𑀲𑀼. 𑀅𑀝𑁆𑀞𑀸𑀢𑀺 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑁂𑀲𑀼 𑀬𑀼𑀕𑀴𑁂 𑀅𑀓𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀳𑀡𑁂𑀦 𑀅𑀝𑁆𑀞 𑀧𑀼𑀕𑁆𑀕𑀮𑀸. 𑀕𑀸𑀣𑀸𑀲𑀼𑀔𑀢𑁆𑀣𑀫𑁂𑀯 𑀘𑁂𑀢𑁆𑀣 ‘‘𑀧𑀼𑀕𑁆𑀕𑀮 𑀥𑀫𑁆𑀫𑀤𑀲𑀸’’𑀢𑀺 𑀭𑀲𑁆𑀲𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀥𑀫𑁆𑀫𑀤𑀲𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀸𑀦𑀥𑀫𑁆𑀫𑀲𑁆𑀲 𑀘 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀓𑀸. 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑁂𑀦 𑀲𑀗𑁆𑀖𑀁.

𑀏𑀯𑀁 𑀪𑀕𑀯𑀢𑀸 𑀢𑀻𑀳𑀺 𑀕𑀸𑀣𑀸𑀳𑀺 𑀲𑀭𑀡𑀕𑀼𑀡𑀲𑀦𑁆𑀤𑀲𑁆𑀲𑀦𑁂𑀦 𑀲𑀤𑁆𑀥𑀺𑀁 𑀲𑀭𑀡𑀕𑀫𑀦𑀯𑀺𑀥𑀺𑀫𑁆𑀳𑀺 𑀯𑀼𑀢𑁆𑀢𑁂 𑀫𑀸𑀡𑀯𑁄 𑀢𑀁𑀢𑀁𑀲𑀭𑀡𑀕𑀼𑀡𑀸𑀦𑀼𑀲𑁆𑀲𑀭𑀡𑀫𑀼𑀔𑁂𑀦 𑀲𑀭𑀡𑀕𑀫𑀦𑀯𑀺𑀥𑀺𑀦𑁄 𑀅𑀢𑁆𑀢𑀦𑁄 𑀳𑀤𑀬𑁂 𑀞𑀧𑀺𑀢𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀢𑀲𑁆𑀲𑀸 𑀢𑀲𑁆𑀲𑀸 𑀕𑀸𑀣𑀸𑀬 𑀅𑀦𑀦𑁆𑀢𑀭𑀁 ‘‘𑀬𑁄 𑀯𑀤𑀢𑀁 𑀧𑀯𑀭𑁄’’𑀢𑀺𑀆𑀤𑀺𑀦𑀸 𑀢𑀁 𑀢𑀁 𑀕𑀸𑀣𑀁 𑀧𑀘𑁆𑀘𑀦𑀼𑀪𑀸𑀲𑀺. 𑀏𑀯𑀁 𑀧𑀘𑁆𑀘𑀦𑀼𑀪𑀸𑀲𑀺𑀢𑁆𑀯𑀸 𑀞𑀺𑀢𑀲𑁆𑀲 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀭𑀽𑀧𑀢𑁄 𑀨𑀮𑀸𑀦𑀺𑀲𑀁𑀲𑀢𑁄 𑀘 𑀯𑀺𑀪𑀸𑀯𑁂𑀢𑁆𑀯𑀸 𑀢𑁂𑀲𑀁 𑀲𑀫𑀸𑀤𑀸𑀦𑀯𑀺𑀥𑀺𑀁 𑀓𑀣𑁂𑀲𑀺. 𑀲𑁄 𑀢𑀫𑁆𑀧𑀺 𑀲𑀼𑀝𑁆𑀞𑀼 𑀉𑀧𑀥𑀸𑀭𑁂𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 ‘‘𑀳𑀦𑁆𑀤𑀸𑀳𑀁 𑀪𑀕𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀭𑀢𑀦𑀢𑁆𑀢𑀬𑀕𑀼𑀡𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀢𑀁𑀬𑁂𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀪𑀕𑀯𑀸𑀧𑀺 ‘‘𑀅𑀮𑀁 𑀇𑀫𑀲𑁆𑀲 𑀏𑀢𑁆𑀢𑀓𑀁 𑀓𑀼𑀲𑀮𑀁 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀬𑀸’’𑀢𑀺 𑀚𑁂𑀢𑀯𑀦𑀫𑁂𑀯 𑀅𑀕𑀫𑀸𑀲𑀺.

𑀫𑀸𑀡𑀯𑀲𑁆𑀲 𑀧𑀦 𑀧𑀲𑀦𑁆𑀦𑀘𑀺𑀢𑁆𑀢𑀲𑁆𑀲 𑀭𑀢𑀦𑀢𑁆𑀢𑀬𑀕𑀼𑀡𑀁 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 ‘‘𑀲𑀭𑀡𑀁 𑀉𑀧𑁂𑀫𑀻’’𑀢𑀺 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑀸𑀬 𑀲𑀭𑀡𑁂𑀲𑀼 𑀘, 𑀪𑀕𑀯𑀢𑀸 𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀘𑀦𑁆𑀦𑀁 𑀲𑀻𑀮𑀸𑀦𑀁 𑀅𑀥𑀺𑀝𑁆𑀞𑀸𑀦𑁂𑀦 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀺𑀢𑀲𑁆𑀲 𑀢𑁂𑀦𑁂𑀯 𑀦𑀬𑁂𑀦 𑀭𑀢𑀦𑀢𑁆𑀢𑀬𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑁂𑀯 𑀕𑀘𑁆𑀙𑀦𑁆𑀢𑀲𑁆𑀲 𑀘𑁄𑀭𑀸 𑀫𑀕𑁆𑀕𑁂 𑀧𑀭𑀺𑀬𑀼𑀝𑁆𑀞𑀺𑀁𑀲𑀼. 𑀲𑁄 𑀢𑁂 𑀅𑀕𑀡𑁂𑀢𑁆𑀯𑀸 𑀭𑀢𑀦𑀢𑁆𑀢𑀬𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁄𑀬𑁂𑀯 𑀕𑀘𑁆𑀙𑀢𑀺. 𑀢𑀜𑁆𑀘𑁂𑀓𑁄 𑀘𑁄𑀭𑁄 𑀕𑀼𑀫𑁆𑀩𑀦𑁆𑀢𑀭𑀁 𑀉𑀧𑀦𑀺𑀲𑁆𑀲𑀸𑀬 𑀞𑀺𑀢𑁄 𑀯𑀺𑀲𑀧𑀻𑀢𑁂𑀦 𑀲𑀭𑁂𑀦 𑀲𑀳𑀲𑀸𑀯 𑀯𑀺𑀚𑁆𑀛𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀓𑀳𑀸𑀧𑀡𑀪𑀡𑁆𑀟𑀺𑀓𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀳𑀸𑀬𑁂𑀳𑀺 𑀲𑀤𑁆𑀥𑀺𑀁 𑀧𑀓𑁆𑀓𑀸𑀫𑀺. 𑀫𑀸𑀡𑀯𑁄 𑀧𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀢𑀺𑀁𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀲𑀝𑁆𑀞𑀺𑀲𑀓𑀝𑀪𑀸𑀭𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀯𑀺𑀫𑀸𑀦𑀲𑁆𑀲 𑀆𑀪𑀸 𑀲𑀸𑀢𑀺𑀭𑁂𑀓𑀸𑀦𑀺 𑀯𑀻𑀲𑀢𑀺𑀬𑁄𑀚𑀦𑀸𑀦𑀺 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀅𑀣 𑀫𑀸𑀡𑀯𑀁 𑀓𑀸𑀮𑀓𑀢𑀁 𑀤𑀺𑀲𑁆𑀯𑀸 𑀲𑁂𑀢𑀩𑁆𑀬𑀕𑀸𑀫𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀲𑁂𑀢𑀩𑁆𑀬𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀉𑀓𑁆𑀓𑀝𑁆𑀞𑀕𑀸𑀫𑀯𑀸𑀲𑀺𑀦𑁄 𑀘 𑀉𑀓𑁆𑀓𑀝𑁆𑀞𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀓𑀣𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀜𑀸𑀢𑀺𑀫𑀺𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑀘 𑀧𑁄𑀓𑁆𑀔𑀭𑀲𑀸𑀢𑀺 𑀲𑀧𑀭𑀺𑀯𑀸𑀭𑀸 𑀅𑀲𑁆𑀲𑀼𑀫𑀼𑀔𑀸 𑀭𑁄𑀤𑀫𑀸𑀦𑀸 𑀢𑀁 𑀧𑀤𑁂𑀲𑀁 𑀅𑀕𑀫𑀁𑀲𑀼, 𑀬𑁂𑀪𑀼𑀬𑁆𑀬𑁂𑀦 𑀲𑁂𑀢𑀩𑁆𑀬𑀯𑀸𑀲𑀺𑀦𑁄 𑀘 𑀉𑀓𑁆𑀓𑀝𑁆𑀞𑀯𑀸𑀲𑀺𑀦𑁄 𑀘 𑀇𑀘𑁆𑀙𑀸𑀦𑀗𑁆𑀕𑀮𑀯𑀸𑀲𑀺𑀦𑁄 𑀘 𑀲𑀦𑁆𑀦𑀺𑀧𑀢𑀺𑀁𑀲𑀼, 𑀫𑀳𑀸𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀅𑀣 𑀫𑀸𑀡𑀯𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀫𑀕𑁆𑀕𑀲𑁆𑀲 𑀅𑀯𑀺𑀤𑀽𑀭𑁂 𑀘𑀺𑀢𑀓𑀁 𑀲𑀚𑁆𑀚𑁂𑀢𑁆𑀯𑀸 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼.

𑀅𑀣 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀺 𑀕𑀢𑁂 𑀙𑀢𑁆𑀢𑀫𑀸𑀡𑀯𑁄 𑀫𑀁 𑀯𑀦𑁆𑀤𑀺𑀢𑀼𑀁 𑀆𑀕𑀫𑀺𑀲𑁆𑀲𑀢𑀺, 𑀆𑀕𑀢𑀜𑁆𑀘 𑀢𑀁 𑀓𑀢𑀓𑀫𑁆𑀫𑀁 𑀓𑀣𑀸𑀧𑁂𑀦𑁆𑀢𑁄 𑀓𑀫𑁆𑀫𑀨𑀮𑀁 𑀧𑀘𑁆𑀘𑀓𑁆𑀔𑀁 𑀓𑀸𑀭𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀏𑀯𑀁 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀢𑀁 𑀧𑀤𑁂𑀲𑀁 𑀉𑀧𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄. 𑀅𑀣 𑀙𑀢𑁆𑀢𑀫𑀸𑀡𑀯𑀤𑁂𑀯𑀧𑀼𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀢𑀲𑁆𑀲𑀸 𑀓𑀸𑀭𑀡𑀁 𑀉𑀧𑀥𑀸𑀭𑁂𑀦𑁆𑀢𑁄 𑀲𑀭𑀡𑀕𑀫𑀦𑀜𑁆𑀘 𑀲𑀻𑀮𑀲𑀫𑀸𑀤𑀸𑀦𑀜𑁆𑀘 𑀤𑀺𑀲𑁆𑀯𑀸, 𑀯𑀺𑀫𑁆𑀳𑀬𑀚𑀸𑀢𑁄 𑀪𑀕𑀯𑀢𑀺 𑀲𑀜𑁆𑀚𑀸𑀢𑀧𑀲𑀸𑀤𑀩𑀳𑀼𑀫𑀸𑀦𑁄 ‘‘𑀇𑀤𑀸𑀦𑁂𑀯𑀸𑀳𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀺𑀲𑁆𑀲𑀸𑀫𑀺, 𑀭𑀢𑀦𑀢𑁆𑀢𑀬𑀕𑀼𑀡𑁂 𑀘 𑀫𑀳𑀸𑀚𑀦𑀲𑁆𑀲 𑀧𑀸𑀓𑀝𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀢𑀜𑁆𑀜𑀼𑀢𑀁 𑀦𑀺𑀲𑁆𑀲𑀸𑀬 𑀲𑀓𑀮𑀁 𑀢𑀁 𑀅𑀭𑀜𑁆𑀜𑀧𑀤𑁂𑀲𑀁 𑀏𑀓𑀸𑀮𑁄𑀓𑀁 𑀓𑀭𑁄𑀦𑁆𑀢𑁄, 𑀲𑀳 𑀯𑀺𑀫𑀸𑀦𑁂𑀦 𑀆𑀕𑀦𑁆𑀢𑁆𑀯𑀸 𑀯𑀺𑀫𑀸𑀦𑀢𑁄 𑀑𑀭𑀼𑀬𑁆𑀳 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀤𑀺𑀲𑁆𑀲𑀫𑀸𑀦𑀭𑀽𑀧𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀦𑁆𑀢𑁄 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄 ‘‘𑀓𑁄 𑀦𑀼 𑀔𑁄 𑀅𑀬𑀁 𑀤𑁂𑀯𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸’’𑀢𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀲𑀺. 𑀪𑀕𑀯𑀸 𑀢𑁂𑀦 𑀓𑀢𑀧𑀼𑀜𑁆𑀜𑀓𑀫𑁆𑀫𑀁 𑀧𑀸𑀓𑀝𑀁 𑀓𑀸𑀢𑀼𑀁 𑁋

𑁮𑁮𑁯. ‘‘𑀦 𑀢𑀣𑀸 𑀢𑀧𑀢𑀺 𑀦𑀪𑁂 𑀲𑀽𑀭𑀺𑀬𑁄, 𑀘𑀦𑁆𑀤𑁄 𑀘 𑀦 𑀪𑀸𑀲𑀢𑀺 𑀦 𑀨𑀼𑀲𑁆𑀲𑁄;

𑀬𑀣𑀸 𑀅𑀢𑀼𑀮𑀫𑀺𑀤𑀁 𑀫𑀳𑀧𑁆𑀧𑀪𑀸𑀲𑀁, 𑀓𑁄 𑀦𑀼 𑀢𑁆𑀯𑀁 𑀢𑀺𑀤𑀺𑀯𑀸 𑀫𑀳𑀺𑀁 𑀉𑀧𑀸𑀕𑀸.

𑁮𑁯𑁦. ‘‘𑀙𑀺𑀦𑁆𑀤𑀢𑀺 𑀭𑀁𑀲𑀻 𑀧𑀪𑀗𑁆𑀓𑀭𑀲𑁆𑀲, 𑀲𑀸𑀥𑀺𑀓𑀯𑀻𑀲𑀢𑀺𑀬𑁄𑀚𑀦𑀸𑀦𑀺 𑀆𑀪𑀸;

𑀭𑀢𑁆𑀢𑀺𑀫𑀧𑀺 𑀬𑀣𑀸 𑀤𑀺𑀯𑀁 𑀓𑀭𑁄𑀢𑀺, 𑀧𑀭𑀺𑀲𑀼𑀤𑁆𑀥𑀁 𑀯𑀺𑀫𑀮𑀁 𑀲𑀼𑀪𑀁 𑀯𑀺𑀫𑀸𑀦𑀁.

𑁮𑁯𑁧. ‘‘𑀩𑀳𑀼𑀧𑀤𑀼𑀫𑀯𑀺𑀘𑀺𑀢𑁆𑀭𑀧𑀼𑀡𑁆𑀟𑀭𑀻𑀓𑀁, 𑀯𑁄𑀓𑀺𑀡𑁆𑀡𑀁 𑀓𑀼𑀲𑀼𑀫𑁂𑀳𑀺 𑀦𑁂𑀓𑀘𑀺𑀢𑁆𑀢𑀁;

𑀅𑀭𑀚𑀯𑀺𑀭𑀚𑀳𑁂𑀫𑀚𑀸𑀮𑀙𑀦𑁆𑀦𑀁, 𑀆𑀓𑀸𑀲𑁂 𑀢𑀧𑀢𑀺 𑀬𑀣𑀸𑀧𑀺 𑀲𑀽𑀭𑀺𑀬𑁄.

𑁮𑁯𑁨. ‘‘𑀭𑀢𑁆𑀢𑀫𑁆𑀩𑀭𑀧𑀻𑀢𑀯𑀸𑀲𑀲𑀸𑀳𑀺, 𑀅𑀕𑀭𑀼𑀧𑀺𑀬𑀗𑁆𑀕𑀼𑀘𑀦𑁆𑀤𑀦𑀼𑀲𑁆𑀲𑀤𑀸𑀳𑀺;

𑀓𑀜𑁆𑀘𑀦𑀢𑀦𑀼𑀲𑀦𑁆𑀦𑀺𑀪𑀢𑁆𑀢𑀘𑀸𑀳𑀺, 𑀧𑀭𑀺𑀧𑀽𑀭𑀁 𑀕𑀕𑀦𑀁𑀯 𑀢𑀸𑀭𑀓𑀸𑀳𑀺.

𑁮𑁯𑁩. ‘‘𑀦𑀭𑀦𑀸𑀭𑀺𑀬𑁄 𑀩𑀳𑀼𑀓𑁂𑀢𑁆𑀣𑀦𑁂𑀓𑀯𑀡𑁆𑀡𑀸, 𑀓𑀼𑀲𑀼𑀫𑀯𑀺𑀪𑀽𑀲𑀺𑀢𑀸𑀪𑀭𑀡𑁂𑀢𑁆𑀣 𑀲𑀼𑀫𑀦𑀸;

𑀅𑀦𑀺𑀮𑀧𑀫𑀼𑀜𑁆𑀘𑀺𑀢𑀸 𑀧𑀯𑀦𑁆𑀢𑀺 𑀲𑀼𑀭𑀪𑀺𑀁, 𑀢𑀧𑀦𑀺𑀬𑀯𑀺𑀢𑀢𑀸 𑀲𑀼𑀯𑀡𑁆𑀡𑀙𑀦𑁆𑀦𑀸.

𑁮𑁯𑁪. ‘‘𑀓𑀺𑀲𑁆𑀲 𑀲𑀁𑀬𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀓𑁂𑀦𑀸𑀲𑀺 𑀓𑀫𑁆𑀫𑀨𑀮𑁂𑀦𑀺𑀥𑀽𑀧𑀧𑀦𑁆𑀦𑁄;

𑀬𑀣𑀸 𑀘 𑀢𑁂 𑀅𑀥𑀺𑀕𑀢𑀫𑀺𑀤𑀁 𑀯𑀺𑀫𑀸𑀦𑀁, 𑀢𑀤𑀦𑀼𑀧𑀤𑀁 𑀅𑀯𑀘𑀸𑀲𑀺 𑀇𑀕𑁆𑀖 𑀧𑀼𑀝𑁆𑀞𑁄’’𑀢𑀺. 𑁋

𑀢𑀁 𑀤𑁂𑀯𑀧𑀼𑀢𑁆𑀢𑀁 𑀧𑀝𑀺𑀧𑀼𑀘𑁆𑀙𑀺.

𑁮𑁮𑁬. 𑀢𑀢𑁆𑀣 𑀢𑀧𑀢𑀻𑀢𑀺 𑀤𑀺𑀧𑁆𑀧𑀢𑀺. 𑀦𑀪𑁂𑀢𑀺 𑀆𑀓𑀸𑀲𑁂. 𑀨𑀼𑀲𑁆𑀲𑁄𑀢𑀺 𑀨𑀼𑀲𑁆𑀲𑀢𑀸𑀭𑀓𑀸. 𑀅𑀢𑀼𑀮𑀦𑁆𑀢𑀺 𑀅𑀦𑀼𑀧𑀫𑀁, 𑀅𑀧𑁆𑀧𑀫𑀸𑀡𑀁 𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀇𑀤𑀁 𑀢𑀯 𑀯𑀺𑀫𑀸𑀦𑀁 𑀅𑀦𑀼𑀧𑀫𑀁 𑀅𑀧𑁆𑀧𑀫𑀸𑀡𑀁 𑀧𑀪𑀲𑁆𑀲𑀭𑀪𑀸𑀯𑁂𑀦 𑀢𑀢𑁄 𑀏𑀯 𑀫𑀳𑀧𑁆𑀧𑀪𑀸𑀲𑀁 𑀆𑀓𑀸𑀲𑁂 𑀤𑀺𑀧𑁆𑀧𑀢𑀺, 𑀦 𑀢𑀣𑀸 𑀢𑀸𑀭𑀓𑀭𑀽𑀧𑀸𑀦𑀺 𑀤𑀺𑀧𑁆𑀧𑀦𑁆𑀢𑀺, 𑀦 𑀘𑀦𑁆𑀤𑁄, 𑀢𑀸𑀦𑀺 𑀢𑀸𑀯 𑀢𑀺𑀝𑁆𑀞𑀦𑁆𑀢𑀼, 𑀦𑀸𑀧𑀺 𑀲𑀽𑀭𑀺𑀬𑁄 𑀤𑀺𑀧𑁆𑀧𑀢𑀺, 𑀏𑀯𑀁𑀪𑀽𑀢𑁄 𑀓𑁄 𑀦𑀼 𑀢𑁆𑀯𑀁 𑀤𑁂𑀯𑀮𑁄𑀓𑀢𑁄 𑀇𑀫𑀁 𑀪𑀽𑀫𑀺𑀧𑀤𑁂𑀲𑀁 𑀉𑀧𑀕𑀢𑁄, 𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀇𑀫𑀲𑁆𑀲 𑀫𑀳𑀸𑀚𑀦𑀲𑁆𑀲 𑀓𑀣𑁂𑀳𑀻𑀢𑀺.

𑁮𑁯𑁦. 𑀙𑀺𑀦𑁆𑀤𑀢𑀻𑀢𑀺 𑀯𑀺𑀘𑁆𑀙𑀺𑀦𑁆𑀤𑀢𑀺, 𑀧𑀯𑀢𑁆𑀢𑀺𑀢𑀼𑀁 𑀅𑀤𑁂𑀦𑁆𑀢𑁄 𑀧𑀝𑀺𑀳𑀦𑀢𑀻𑀢𑀺 𑀅𑀢𑁆𑀣𑁄. 𑀭𑀁𑀲𑀻𑀢𑀺 𑀭𑀲𑁆𑀫𑀺𑀬𑁄. 𑀧𑀪𑀗𑁆𑀓𑀭𑀲𑁆𑀲𑀸𑀢𑀺 𑀲𑀽𑀭𑀺𑀬𑀲𑁆𑀲. 𑀢𑀲𑁆𑀲 𑀘 𑀯𑀺𑀫𑀸𑀦𑀲𑁆𑀲 𑀧𑀪𑀸 𑀲𑀫𑀦𑁆𑀢𑀢𑁄 𑀧𑀜𑁆𑀘𑀯𑀻𑀲𑀢𑀺 𑀬𑁄𑀚𑀦𑀸𑀦𑀺 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 ‘‘𑀲𑀸𑀥𑀺𑀓𑀯𑀻𑀲𑀢𑀺𑀬𑁄𑀚𑀦𑀸𑀦𑀺 𑀆𑀪𑀸’’𑀢𑀺. 𑀭𑀢𑁆𑀢𑀺𑀫𑀧𑀺 𑀬𑀣𑀸 𑀤𑀺𑀯𑀁 𑀓𑀭𑁄𑀢𑀻𑀢𑀺 𑀅𑀢𑁆𑀢𑀦𑁄 𑀧𑀪𑀸𑀬 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀦𑁆𑀢𑀁 𑀭𑀢𑁆𑀢𑀺𑀪𑀸𑀕𑀫𑁆𑀧𑀺 𑀤𑀺𑀯𑀲𑀪𑀸𑀕𑀁 𑀯𑀺𑀬 𑀓𑀭𑁄𑀢𑀺. 𑀧𑀭𑀺𑀲𑀫𑀦𑁆𑀢𑀢𑁄 𑀅𑀦𑁆𑀢𑁄 𑀘𑁂𑀯 𑀩𑀳𑀺 𑀘 𑀲𑀼𑀤𑁆𑀥𑀢𑀸𑀬 𑀧𑀭𑀺𑀲𑀼𑀤𑁆𑀥𑀁. 𑀲𑀩𑁆𑀩𑀲𑁄 𑀫𑀮𑀸𑀪𑀸𑀯𑁂𑀦 𑀯𑀺𑀫𑀮𑀁. 𑀲𑀼𑀦𑁆𑀤𑀭𑀢𑀸𑀬 𑀲𑀼𑀪𑀁.

𑁮𑁯𑁧. 𑀩𑀳𑀼𑀧𑀤𑀼𑀫𑀯𑀺𑀘𑀺𑀢𑁆𑀭𑀧𑀼𑀡𑁆𑀟𑀭𑀻𑀓𑀦𑁆𑀢𑀺 𑀩𑀳𑀼𑀯𑀺𑀥𑀭𑀢𑁆𑀢𑀓𑀫𑀮𑀜𑁆𑀘𑁂𑀯 𑀯𑀺𑀘𑀺𑀢𑁆𑀢𑀯𑀡𑁆𑀡𑀲𑁂𑀢𑀓𑀫𑀮𑀜𑁆𑀘. 𑀲𑁂𑀢𑀓𑀫𑀮𑀁 𑀧𑀤𑀼𑀫𑀁, 𑀭𑀢𑁆𑀢𑀓𑀫𑀮𑀁 𑀧𑀼𑀡𑁆𑀟𑀭𑀻𑀓𑀦𑁆𑀢𑀺 𑀯𑀤𑀦𑁆𑀢𑀺. 𑀯𑁄𑀓𑀺𑀡𑁆𑀡𑀁 𑀓𑀼𑀲𑀼𑀫𑁂𑀳𑀻𑀢𑀺 𑀅𑀜𑁆𑀜𑁂𑀳𑀺 𑀘 𑀦𑀸𑀦𑀸𑀯𑀺𑀥𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀫𑁄𑀓𑀺𑀡𑁆𑀡𑀁. 𑀦𑁂𑀓𑀘𑀺𑀢𑁆𑀢𑀦𑁆𑀢𑀺 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀸𑀤𑀺𑀦𑀸𑀦𑀸𑀯𑀺𑀥𑀯𑀺𑀘𑀺𑀢𑁆𑀢𑀁. 𑀅𑀭𑀚𑀯𑀺𑀭𑀚𑀳𑁂𑀫𑀚𑀸𑀮𑀙𑀦𑁆𑀦𑀦𑁆𑀢𑀺 𑀲𑀬𑀁 𑀅𑀧𑀕𑀢𑀭𑀚𑀁 𑀯𑀺𑀭𑀚𑁂𑀦 𑀦𑀺𑀤𑁆𑀤𑁄𑀲𑁂𑀦 𑀓𑀜𑁆𑀘𑀦𑀚𑀸𑀮𑁂𑀦 𑀙𑀸𑀤𑀺𑀢𑀁.

𑁮𑁯𑁨. 𑀭𑀢𑁆𑀢𑀫𑁆𑀩𑀭𑀧𑀻𑀢𑀯𑀸𑀲𑀲𑀸𑀳𑀻𑀢𑀺 𑀭𑀢𑁆𑀢𑀯𑀢𑁆𑀣𑀸𑀳𑀺 𑀘𑁂𑀯 𑀧𑀻𑀢𑀯𑀢𑁆𑀣𑀸𑀳𑀺 𑀘. 𑀏𑀓𑀸 𑀳𑀺 𑀭𑀢𑁆𑀢𑀁 𑀤𑀺𑀩𑁆𑀩𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀻𑀢𑀁 𑀉𑀢𑁆𑀢𑀭𑀺𑀬𑀁 𑀓𑀭𑁄𑀢𑀺, 𑀅𑀧𑀭𑀸 𑀧𑀻𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀭𑀢𑁆𑀢𑀁 𑀉𑀢𑁆𑀢𑀭𑀺𑀬𑀁 𑀓𑀭𑁄𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀭𑀢𑁆𑀢𑀫𑁆𑀩𑀭𑀧𑀻𑀢𑀯𑀸𑀲𑀲𑀸𑀳𑀻’’𑀢𑀺. 𑀅𑀕𑀭𑀼𑀧𑀺𑀬𑀗𑁆𑀕𑀼𑀘𑀦𑁆𑀤𑀦𑀼𑀲𑁆𑀲𑀤𑀸𑀳𑀻𑀢𑀺 𑀅𑀕𑀭𑀼𑀕𑀦𑁆𑀥𑁂𑀦 𑀧𑀺𑀬𑀗𑁆𑀕𑀼𑀫𑀸𑀮𑀸𑀳𑀺 𑀘𑀦𑁆𑀤𑀦𑀕𑀦𑁆𑀥𑁂𑀳𑀺 𑀘 𑀉𑀲𑁆𑀲𑀤𑀸𑀳𑀺, 𑀉𑀲𑁆𑀲𑀦𑁆𑀦𑀤𑀺𑀩𑁆𑀩𑀸𑀕𑀭𑀼𑀕𑀦𑁆𑀥𑀸𑀤𑀺𑀓𑀸𑀳𑀻𑀢𑀺 𑀅𑀢𑁆𑀣𑁄. 𑀓𑀜𑁆𑀘𑀦𑀢𑀦𑀼𑀲𑀦𑁆𑀦𑀺𑀪𑀢𑁆𑀢𑀘𑀸𑀳𑀻𑀢𑀺 𑀓𑀦𑀓𑀲𑀤𑀺𑀲𑀲𑀼𑀔𑀼𑀫𑀘𑁆𑀙𑀯𑀻𑀳𑀺. 𑀧𑀭𑀺𑀧𑀽𑀭𑀦𑁆𑀢𑀺 𑀢𑀳𑀁 𑀢𑀳𑀁 𑀯𑀺𑀘𑀭𑀦𑁆𑀢𑀻𑀳𑀺 𑀲𑀗𑁆𑀕𑀻𑀢𑀺𑀧𑀲𑀼𑀢𑀸𑀳𑀺 𑀘 𑀧𑀭𑀺𑀧𑀼𑀡𑁆𑀡𑀁.

𑁮𑁯𑁩. 𑀩𑀳𑀼𑀓𑁂𑀢𑁆𑀣𑀸𑀢𑀺 𑀩𑀳𑀼𑀓𑀸 𑀏𑀢𑁆𑀣. 𑀅𑀦𑁂𑀓𑀯𑀡𑁆𑀡𑀸𑀢𑀺 𑀦𑀸𑀦𑀸𑀭𑀽𑀧𑀸. 𑀓𑀼𑀲𑀫𑀯𑀺𑀪𑀽𑀲𑀺𑀢𑀸𑀪𑀭𑀡𑀸𑀢𑀺 𑀯𑀺𑀲𑁂𑀲𑀢𑁄 𑀲𑀼𑀭𑀪𑀺𑀯𑀸𑀬𑀦𑀢𑁆𑀣𑀁 𑀤𑀺𑀩𑁆𑀩𑀓𑀼𑀲𑀼𑀫𑁂𑀳𑀺 𑀅𑀮𑀗𑁆𑀓𑀢𑀤𑀺𑀩𑁆𑀩𑀸𑀪𑀭𑀡𑀸. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀺𑀫𑀸𑀦𑁂. 𑀲𑀼𑀫𑀦𑀸𑀢𑀺 𑀲𑀼𑀦𑁆𑀤𑀭𑀫𑀦𑀸 𑀧𑀫𑀼𑀤𑀺𑀢𑀘𑀺𑀢𑁆𑀢𑀸. 𑀅𑀦𑀺𑀮𑀧𑀫𑀼𑀜𑁆𑀘𑀺𑀢𑀸 𑀧𑀯𑀦𑁆𑀢𑀺 𑀲𑀼𑀭𑀪𑀺𑀦𑁆𑀢𑀺 𑀅𑀦𑀺𑀮𑁂𑀦 𑀧𑀫𑀼𑀜𑁆𑀘𑀺𑀢𑀕𑀦𑁆𑀥𑀸𑀦𑀁 𑀧𑀼𑀧𑁆𑀨𑀸𑀦𑀁 𑀯𑀸𑀬𑀼𑀦𑀸 𑀯𑀺𑀫𑀼𑀢𑁆𑀢𑀧𑀢𑁆𑀢𑀧𑀼𑀝𑀁 𑀯𑀺𑀬 𑀯𑀺𑀩𑀦𑁆𑀥𑀢𑀸𑀬 𑀯𑀺𑀓𑀲𑀺𑀢𑀢𑀸𑀬 𑀘 𑀲𑀼𑀕𑀦𑁆𑀥𑀁 𑀧𑀯𑀸𑀬𑀦𑁆𑀢𑀺. ‘‘𑀅𑀦𑀺𑀮𑀧𑀥𑀽𑀧𑀺𑀢𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀯𑀸𑀢𑁂𑀦 𑀫𑀦𑁆𑀤𑀁 𑀆𑀯𑀼𑀬𑁆𑀳𑀫𑀸𑀦𑀸 𑀳𑁂𑀫𑀫𑀬𑀧𑀼𑀧𑁆𑀨𑀸𑀢𑀺 𑀅𑀢𑁆𑀣𑁄. 𑀓𑀦𑀓𑀘𑀻𑀭𑀓𑀸𑀤𑀻𑀳𑀺 𑀯𑁂𑀡𑀺𑀆𑀤𑀻𑀲𑀼 𑀑𑀢𑀢𑀢𑀸𑀬 𑀢𑀧𑀦𑀺𑀬𑀯𑀺𑀢𑀢𑀸. 𑀬𑁂𑀪𑀼𑀬𑁆𑀬𑁂𑀦 𑀓𑀜𑁆𑀘𑀦𑀸𑀪𑀭𑀡𑁂𑀳𑀺 𑀅𑀘𑁆𑀙𑀸𑀤𑀺𑀢𑀲𑀭𑀻𑀭𑀢𑀸𑀬 𑀲𑀼𑀯𑀡𑁆𑀡𑀙𑀦𑁆𑀦𑀸. 𑀦𑀭𑀦𑀸𑀭𑀺𑀬𑁄𑀢𑀺 𑀤𑁂𑀯𑀧𑀼𑀢𑁆𑀢𑀸 𑀤𑁂𑀯𑀥𑀻𑀢𑀭𑁄 𑀘 𑀩𑀳𑀼𑀓𑀸 𑀏𑀢𑁆𑀣 𑀢𑀯 𑀯𑀺𑀫𑀸𑀦𑁂𑀢𑀺 𑀤𑀲𑁆𑀲𑁂𑀢𑀺.

𑁮𑁯𑁪. 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄 𑀧𑀼𑀝𑁆𑀞𑁄𑀢𑀺 𑀧𑀼𑀘𑁆𑀙𑀺𑀢𑁄 𑀇𑀫𑀲𑁆𑀲 𑀫𑀳𑀸𑀚𑀦𑀲𑁆𑀲 𑀓𑀫𑁆𑀫𑀨𑀮𑀧𑀘𑁆𑀘𑀓𑁆𑀔𑀪𑀸𑀯𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁄 𑀤𑁂𑀯𑀧𑀼𑀢𑁆𑀢𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁮𑁯𑁫. ‘‘𑀲𑀬𑀫𑀺𑀥 𑀧𑀣𑁂 𑀲𑀫𑁂𑀘𑁆𑀘 𑀫𑀸𑀡𑀯𑁂𑀦, 𑀲𑀢𑁆𑀣𑀸𑀦𑀼𑀲𑀸𑀲𑀺 𑀅𑀦𑀼𑀓𑀫𑁆𑀧𑀫𑀸𑀦𑁄;

𑀢𑀯 𑀭𑀢𑀦𑀯𑀭𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸, 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘 𑀩𑁆𑀭𑀯𑀺𑀢𑁆𑀣 𑀙𑀢𑁆𑀢𑁄.

𑁮𑁯𑁬. ‘‘𑀚𑀺𑀦𑀯𑀭𑀧𑀯𑀭𑀁 𑀉𑀧𑁂𑀳𑀺 𑀲𑀭𑀡𑀁, 𑀥𑀫𑁆𑀫𑀜𑁆𑀘𑀸𑀧𑀺 𑀢𑀣𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀁;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁮𑁯𑁭. ‘‘𑀫𑀸 𑀘 𑀧𑀸𑀡𑀯𑀥𑀁 𑀯𑀺𑀯𑀺𑀥𑀁 𑀘𑀭𑀲𑁆𑀲𑀼 𑀅𑀲𑀼𑀘𑀺𑀁,

𑀦 𑀳𑀺 𑀧𑀸𑀡𑁂𑀲𑀼 𑀅𑀲𑀜𑁆𑀜𑀢𑀁 𑀅𑀯𑀡𑁆𑀡𑀬𑀺𑀁𑀲𑀼 𑀲𑀧𑁆𑀧𑀜𑁆𑀜𑀸;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁮𑁯𑁮. ‘‘𑀫𑀸 𑀘 𑀧𑀭𑀚𑀦𑀲𑁆𑀲 𑀭𑀓𑁆𑀔𑀺𑀢𑀫𑁆𑀧𑀺, 𑀆𑀤𑀸𑀢𑀩𑁆𑀩𑀫𑀫𑀜𑁆𑀜𑀺𑀣𑁄 𑀅𑀤𑀺𑀦𑁆𑀦𑀁;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.