𑁬. 𑀧𑀞𑀫𑀓𑀭𑀡𑀻𑀬𑀯𑀺𑀫𑀸𑀦𑀯𑀡𑁆𑀡𑀦𑀸

𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀦𑁆𑀢𑀺 𑀓𑀭𑀡𑀻𑀬𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀯𑀸𑀲𑀻 𑀏𑀓𑁄 𑀉𑀧𑀸𑀲𑀓𑁄 𑀦𑁆𑀳𑀸𑀦𑁄𑀧𑀓𑀭𑀡𑀸𑀦𑀺 𑀕𑀳𑁂𑀢𑁆𑀯𑀸 𑀅𑀘𑀺𑀭𑀯𑀢𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀪𑀕𑀯𑀦𑁆𑀢𑀁 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳 ‘‘𑀪𑀦𑁆𑀢𑁂 𑀓𑁂𑀦 𑀦𑀺𑀫𑀦𑁆𑀢𑀺𑀢𑀸’’𑀢𑀺. 𑀪𑀕𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑁄 𑀓𑁂𑀦𑀘𑀺 𑀅𑀦𑀺𑀫𑀦𑁆𑀢𑀺𑀢𑀪𑀸𑀯𑀁 𑀜𑀢𑁆𑀯𑀸 𑀆𑀳 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀪𑀢𑁆𑀢𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀲𑁄 𑀪𑀕𑀯𑀦𑁆𑀢𑀁 𑀅𑀢𑁆𑀢𑀦𑁄 𑀕𑁂𑀳𑀁 𑀦𑁂𑀢𑁆𑀯𑀸 𑀩𑀼𑀤𑁆𑀥𑀸𑀭𑀳𑀁 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀪𑀕𑀯𑀦𑁆𑀢𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑁂𑀦 𑀅𑀦𑁆𑀦𑀧𑀸𑀦𑁂𑀦 𑀲𑀦𑁆𑀢𑀧𑁆𑀧𑁂𑀲𑀺. 𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁂𑀲𑀁 𑀅𑀦𑀦𑁆𑀢𑀭𑀯𑀺𑀫𑀸𑀦𑀲𑀤𑀺𑀲𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑁯𑁨𑁬. ‘‘𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀁…𑀧𑁂… 𑀦𑀸𑀭𑀺𑀬𑁄 𑀘 𑀦𑀘𑁆𑀘𑀦𑁆𑀢𑀺 𑀲𑀼𑀯𑀡𑁆𑀡𑀙𑀦𑁆𑀦𑀸.

𑁯𑁨𑁮. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂… 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁯𑁩𑁦. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁯𑁩𑁧. ‘‘𑀓𑀭𑀡𑀻𑀬𑀸𑀦𑀺 𑀧𑀼𑀜𑁆𑀜𑀸𑀦𑀺, 𑀧𑀡𑁆𑀟𑀺𑀢𑁂𑀦 𑀯𑀺𑀚𑀸𑀦𑀢𑀸;

𑀲𑀫𑁆𑀫𑀕𑁆𑀕𑀢𑁂𑀲𑀼 𑀩𑀼𑀤𑁆𑀥𑁂𑀲𑀼, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁯𑁩𑁧. ‘‘𑀅𑀢𑁆𑀣𑀸𑀬 𑀯𑀢 𑀫𑁂 𑀩𑀼𑀤𑁆𑀥𑁄, 𑀅𑀭𑀜𑁆𑀜𑀸 𑀕𑀸𑀫𑀫𑀸𑀕𑀢𑁄;

𑀓𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀢𑀸𑀯𑀢𑀺𑀁𑀲𑀽𑀧𑀕𑁄 𑀅𑀳𑀁.

𑁯𑁩𑁩. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂… 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁯𑁩𑁧. 𑀢𑀢𑁆𑀣 𑀧𑀡𑁆𑀟𑀺𑀢𑁂𑀦𑀸𑀢𑀺 𑀲𑀧𑁆𑀧𑀜𑁆𑀜𑁂𑀦. 𑀯𑀺𑀚𑀸𑀦𑀢𑀸𑀢𑀺 𑀅𑀢𑁆𑀢𑀦𑁄 𑀳𑀺𑀢𑀸𑀳𑀺𑀢𑀁 𑀚𑀸𑀦𑀦𑁆𑀢𑁂𑀦. 𑀲𑀫𑁆𑀫𑀕𑁆𑀕𑀢𑁂𑀲𑀽𑀢𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂𑀲𑀼, 𑀩𑀼𑀤𑁆𑀥𑁂𑀲𑀽𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼.

𑁯𑁩𑁨. 𑀅𑀢𑁆𑀣𑀸𑀬𑀸𑀢𑀺 𑀳𑀺𑀢𑀸𑀬, 𑀯𑀼𑀟𑁆𑀠𑀺𑀬𑀸 𑀯𑀸. 𑀅𑀭𑀜𑁆𑀜𑀸𑀢𑀺 𑀯𑀺𑀳𑀸𑀭𑀢𑁄, 𑀚𑁂𑀢𑀯𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀸𑀯𑀢𑀺𑀁𑀲𑀽𑀧𑀕𑁄𑀢𑀺 𑀢𑀸𑀯𑀢𑀺𑀁𑀲𑀤𑁂𑀯𑀓𑀸𑀬𑀁, 𑀢𑀸𑀯𑀢𑀺𑀁𑀲𑀪𑀯𑀦𑀁 𑀯𑀸 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀉𑀧𑀕𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀓𑀭𑀡𑀻𑀬𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.