𑁪. 𑀓𑀓𑁆𑀓𑀝𑀓𑀭𑀲𑀤𑀸𑀬𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀦𑁆𑀢𑀺 𑀓𑀓𑁆𑀓𑀝𑀓𑀭𑀲𑀤𑀸𑀬𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀓𑀡𑁆𑀡𑀲𑀽𑀮𑁂𑀦 𑀧𑀻𑀴𑀺𑀢𑁄 𑀅𑀓𑀮𑁆𑀮𑀲𑀭𑀻𑀭𑀢𑀸𑀬 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀯𑁂𑀚𑁆𑀚𑁂𑀳𑀺 𑀯𑀼𑀢𑁆𑀢𑀯𑀺𑀥𑀺𑀦𑀸 𑀪𑁂𑀲𑀚𑁆𑀚𑁂 𑀓𑀢𑁂𑀧𑀺 𑀭𑁄𑀕𑁄 𑀦 𑀯𑀽𑀧𑀲𑀫𑀺. 𑀲𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣𑀲𑁆𑀲 𑀪𑀕𑀯𑀸 ‘‘𑀓𑀓𑁆𑀓𑀝𑀓𑀭𑀲𑀪𑁄𑀚𑀦𑀁 𑀲𑀧𑁆𑀧𑀸𑀬’’𑀦𑁆𑀢𑀺 𑀜𑀢𑁆𑀯𑀸 𑀆𑀳 ‘‘𑀕𑀘𑁆𑀙 𑀢𑁆𑀯𑀁 𑀪𑀺𑀓𑁆𑀔𑀼 𑀫𑀕𑀥𑀔𑁂𑀢𑁆𑀢𑁂 𑀧𑀺𑀡𑁆𑀟𑀸𑀬 𑀘𑀭𑀸𑀳𑀻’’𑀢𑀺.

𑀲𑁄 𑀪𑀺𑀓𑁆𑀔𑀼 ‘‘𑀤𑀻𑀖𑀤𑀲𑁆𑀲𑀺𑀦𑀸 𑀅𑀤𑁆𑀥𑀸 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀸𑀥𑀼 𑀪𑀦𑁆𑀢𑁂’’𑀢𑀺 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀕𑀥𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀔𑁂𑀢𑁆𑀢𑀧𑀸𑀮𑀲𑁆𑀲 𑀓𑀼𑀝𑀺𑀬𑀸 𑀤𑁆𑀯𑀸𑀭𑁂 𑀧𑀺𑀡𑁆𑀟𑀸𑀬 𑀅𑀝𑁆𑀞𑀸𑀲𑀺. 𑀲𑁄 𑀘 𑀔𑁂𑀢𑁆𑀢𑀧𑀸𑀮𑁄 𑀓𑀓𑁆𑀓𑀝𑀓𑀭𑀲𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀪𑀢𑁆𑀢𑀜𑁆𑀘 𑀧𑀘𑀺𑀢𑁆𑀯𑀸 ‘‘𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀼𑀝𑀺𑀓𑀸𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀓𑁆𑀓𑀝𑀓𑀭𑀲𑀪𑀢𑁆𑀢𑀁 𑀅𑀤𑀸𑀲𑀺. 𑀣𑁂𑀭𑀲𑁆𑀲 𑀢𑀁 𑀪𑀢𑁆𑀢𑀁 𑀣𑁄𑀓𑀁 𑀪𑀼𑀢𑁆𑀢𑀲𑁆𑀲𑀬𑁂𑀯 𑀓𑀡𑁆𑀡𑀲𑀽𑀮𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺, 𑀖𑀝𑀲𑀢𑁂𑀦 𑀦𑁆𑀳𑀸𑀢𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀲𑀧𑁆𑀧𑀸𑀬𑀸𑀳𑀸𑀭𑀯𑀲𑁂𑀦 𑀘𑀺𑀢𑁆𑀢𑀨𑀸𑀲𑀼𑀓𑀁 𑀮𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀦𑁆𑀢𑁄 𑀅𑀧𑀭𑀺𑀬𑁄𑀲𑀺𑀢𑁂𑀬𑁂𑀯 𑀪𑁄𑀚𑀦𑁂 𑀅𑀦𑀯𑀲𑁂𑀲𑀢𑁄 𑀆𑀲𑀯𑁂 𑀔𑁂𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀬 𑀔𑁂𑀢𑁆𑀢𑀧𑀸𑀮𑀁 𑀆𑀳 ‘‘𑀉𑀧𑀸𑀲𑀓, 𑀢𑀯 𑀧𑀺𑀡𑁆𑀟𑀧𑀸𑀢𑀪𑁄𑀚𑀦𑁂𑀦 𑀫𑀬𑁆𑀳𑀁 𑀭𑁄𑀕𑁄 𑀯𑀽𑀧𑀲𑀦𑁆𑀢𑁄, 𑀓𑀸𑀬𑀘𑀺𑀢𑁆𑀢𑀁 𑀓𑀮𑁆𑀮𑀁 𑀚𑀸𑀢𑀁, 𑀢𑁆𑀯𑀫𑁆𑀧𑀺 𑀇𑀫𑀲𑁆𑀲 𑀧𑀼𑀜𑁆𑀜𑀲𑁆𑀲 𑀨𑀮𑁂𑀦 𑀯𑀺𑀕𑀢𑀓𑀸𑀬𑀘𑀺𑀢𑁆𑀢𑀤𑀼𑀓𑁆𑀔𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀔𑁂𑀢𑁆𑀢𑀧𑀸𑀮𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀫𑀡𑀺𑀣𑀫𑁆𑀪𑁂 𑀓𑀦𑀓𑀯𑀺𑀫𑀸𑀦𑁂 𑀲𑀢𑁆𑀢𑀲𑀢𑀓𑀽𑀝𑀸𑀕𑀸𑀭𑀧𑀝𑀺𑀫𑀡𑁆𑀟𑀺𑀢𑁂 𑀯𑁂𑀴𑀼𑀭𑀺𑀬𑀫𑀬𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀺, 𑀤𑁆𑀯𑀸𑀭𑁂 𑀘𑀲𑁆𑀲 𑀬𑀣𑀽𑀧𑀘𑀺𑀢𑀓𑀫𑁆𑀫𑀲𑀁𑀲𑀽𑀘𑀓𑁄 𑀫𑀼𑀢𑁆𑀢𑀸𑀲𑀺𑀓𑁆𑀓𑀸𑀕𑀢𑁄 𑀲𑀼𑀯𑀡𑁆𑀡𑀓𑀓𑁆𑀓𑀝𑀓𑁄 𑀑𑀮𑀫𑁆𑀩𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀢𑀢𑁆𑀣 𑀕𑀢𑁄 𑀢𑀁 𑀤𑀺𑀲𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺 𑁋

𑁯𑁧𑁦. ‘‘𑀉𑀘𑁆𑀘𑀫𑀺𑀤𑀁 𑀫𑀡𑀺𑀣𑀽𑀡𑀁 𑀯𑀺𑀫𑀸𑀦𑀁, 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺;

𑀓𑀽𑀝𑀸𑀕𑀸𑀭𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀯𑁂𑀴𑀼𑀭𑀺𑀬𑀣𑀫𑁆𑀪𑀸 𑀭𑀼𑀘𑀓𑀢𑁆𑀣𑀢𑀸 𑀲𑀼𑀪𑀸.

𑁯𑁧𑁧. ‘‘𑀢𑀢𑁆𑀣𑀘𑁆𑀙𑀲𑀺 𑀧𑀺𑀯𑀲𑀺 𑀔𑀸𑀤𑀲𑀺 𑀘, 𑀤𑀺𑀩𑁆𑀩𑀸 𑀘 𑀯𑀻𑀡𑀸 𑀧𑀯𑀤𑀦𑁆𑀢𑀺 𑀯𑀕𑁆𑀕𑀼𑀁;

𑀤𑀺𑀩𑁆𑀩𑀸 𑀭𑀲𑀸 𑀓𑀸𑀫𑀕𑀼𑀡𑁂𑀢𑁆𑀣 𑀧𑀜𑁆𑀘, 𑀦𑀸𑀭𑀺𑀬𑁄 𑀘 𑀦𑀘𑁆𑀘𑀦𑁆𑀢𑀺 𑀲𑀼𑀯𑀡𑁆𑀡𑀙𑀦𑁆𑀦𑀸.

𑁯𑁧𑁨. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁯𑁧𑁩. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑁄 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑁄, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀲𑁄𑀧𑀺𑀲𑁆𑀲 𑀩𑁆𑀬𑀸𑀓𑀸𑀲𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑁋

𑁯𑁧𑁪. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑁄;

𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋 𑀯𑀼𑀢𑁆𑀢𑀁;

𑁯𑁧𑁫. ‘‘𑀲𑀢𑀺𑀲𑀫𑀼𑀧𑁆𑀧𑀸𑀤𑀓𑀭𑁄, 𑀤𑁆𑀯𑀸𑀭𑁂 𑀓𑀓𑁆𑀓𑀝𑀓𑁄 𑀞𑀺𑀢𑁄;

𑀦𑀺𑀝𑁆𑀞𑀺𑀢𑁄 𑀚𑀸𑀢𑀭𑀽𑀧𑀲𑁆𑀲, 𑀲𑁄𑀪𑀢𑀺 𑀤𑀲𑀧𑀸𑀤𑀓𑁄.

𑁯𑁧𑁬. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁯𑁧𑁭. ‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑁄 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑁄, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁯𑁧𑁦. 𑀢𑀢𑁆𑀣 𑀉𑀘𑁆𑀘𑀦𑁆𑀢𑀺 𑀅𑀘𑁆𑀘𑀼𑀕𑁆𑀕𑀢𑀁. 𑀫𑀡𑀺𑀣𑀽𑀡𑀦𑁆𑀢𑀺 𑀧𑀤𑀼𑀫𑀭𑀸𑀕𑀸𑀤𑀺𑀫𑀡𑀺𑀫𑀬𑀣𑀫𑁆𑀪𑀁. 𑀲𑀫𑀦𑁆𑀢𑀢𑁄𑀢𑀺 𑀘𑀢𑀽𑀲𑀼𑀧𑀺 𑀧𑀲𑁆𑀲𑁂𑀲𑀼. 𑀭𑀼𑀘𑀓𑀢𑁆𑀣𑀢𑀸𑀢𑀺 𑀢𑀲𑁆𑀲𑀁 𑀢𑀲𑁆𑀲𑀁 𑀪𑀽𑀫𑀺𑀬𑀁 𑀲𑀼𑀯𑀡𑁆𑀡𑀨𑀮𑀓𑁂𑀳𑀺 𑀅𑀢𑁆𑀣𑀢𑀸.

𑁯𑁧𑁧. 𑀧𑀺𑀯𑀲𑀺 𑀔𑀸𑀤𑀲𑀺 𑀘𑀸𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀬𑀼𑀚𑁆𑀚𑀫𑀸𑀦𑀁 𑀕𑀦𑁆𑀥𑀧𑀸𑀦𑀁 𑀲𑀼𑀥𑀸𑀪𑁄𑀚𑀦𑀜𑁆𑀘 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀯𑀤𑀦𑁆𑀢𑀻𑀢𑀺 𑀧𑀯𑀚𑁆𑀚𑀦𑁆𑀢𑀺. 𑀤𑀺𑀩𑁆𑀩𑀸 𑀭𑀲𑀸 𑀓𑀸𑀫𑀕𑀼𑀡𑁂𑀢𑁆𑀣 𑀧𑀜𑁆𑀘𑀸𑀢𑀺 𑀤𑀺𑀩𑁆𑀩𑀸 𑀭𑀲𑀸 𑀅𑀦𑀧𑁆𑀧𑀓𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀢𑀯 𑀯𑀺𑀫𑀸𑀦𑁂 𑀲𑀁𑀯𑀺𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀯𑀡𑁆𑀡𑀙𑀦𑁆𑀦𑀸𑀢𑀺 𑀳𑁂𑀫𑀸𑀪𑀭𑀡𑀯𑀺𑀪𑀽𑀲𑀺𑀢𑀸.

𑁯𑁧𑁫. 𑀲𑀢𑀺𑀲𑀫𑀼𑀧𑁆𑀧𑀸𑀤𑀓𑀭𑁄𑀢𑀺 𑀲𑀢𑀼𑀧𑁆𑀧𑀸𑀤𑀓𑀭𑁄, 𑀬𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀅𑀬𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺 𑀫𑀬𑀸 𑀮𑀤𑁆𑀥𑀸, 𑀢𑀢𑁆𑀣 𑀲𑀢𑀼𑀧𑁆𑀧𑀸𑀤𑀲𑁆𑀲 𑀓𑀸𑀭𑀓𑁄, ‘‘𑀓𑀓𑁆𑀓𑀝𑀓𑀭𑀲𑀤𑀸𑀦𑁂𑀦 𑀅𑀬𑀁 𑀢𑀬𑀸 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺 𑀏𑀯𑀁 𑀲𑀢𑀼𑀧𑁆𑀧𑀸𑀤𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀝𑁆𑀞𑀺𑀢𑁄 𑀚𑀸𑀢𑀭𑀽𑀧𑀲𑁆𑀲𑀸𑀢𑀺 𑀚𑀸𑀢𑀭𑀽𑀧𑁂𑀦 𑀲𑀺𑀤𑁆𑀥𑁄 𑀚𑀸𑀢𑀭𑀽𑀧𑀫𑀬𑁄. 𑀏𑀓𑀫𑁂𑀓𑀲𑁆𑀫𑀺𑀁 𑀧𑀲𑁆𑀲𑁂 𑀧𑀜𑁆𑀘 𑀧𑀜𑁆𑀘 𑀓𑀢𑁆𑀯𑀸 𑀤𑀲 𑀧𑀸𑀤𑀸 𑀏𑀢𑀲𑁆𑀲𑀸𑀢𑀺 𑀤𑀲𑀧𑀸𑀤𑀓𑁄 𑀤𑁆𑀯𑀸𑀭𑁂 𑀓𑀓𑁆𑀓𑀝𑀓𑁄 𑀞𑀺𑀢𑁄 𑀲𑁄𑀪𑀢𑀺. 𑀲𑁄 𑀏𑀯 𑀫𑀫 𑀧𑀼𑀜𑁆𑀜𑀓𑀫𑁆𑀫𑀁 𑀢𑀸𑀤𑀺𑀲𑀸𑀦𑀁 𑀫𑀳𑁂𑀲𑀻𑀦𑀁 𑀯𑀺𑀪𑀸𑀯𑁂𑀢𑀺, 𑀦 𑀏𑀢𑁆𑀣 𑀫𑀬𑀸 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄’’𑀢𑀺𑀆𑀤𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀓𑀓𑁆𑀓𑀝𑀓𑀭𑀲𑀤𑀸𑀬𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.