𑁩. 𑀙𑀢𑁆𑀢𑀫𑀸𑀡𑀯𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀬𑁄 𑀯𑀤𑀢𑀁 𑀧𑀯𑀭𑁄 𑀫𑀦𑀼𑀚𑁂𑀲𑀽𑀢𑀺 𑀙𑀢𑁆𑀢𑀫𑀸𑀡𑀯𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀲𑁂𑀢𑀩𑁆𑀬𑀸𑀬𑀁 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀺𑀘𑁆𑀙𑀸𑀮𑀤𑁆𑀥𑁄 𑀧𑀼𑀢𑁆𑀢𑁄 𑀙𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀭𑀸 𑀧𑁂𑀲𑀺𑀢𑁄 𑀉𑀓𑁆𑀓𑀝𑁆𑀞𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀲𑀦𑁆𑀢𑀺𑀓𑁂 𑀫𑁂𑀥𑀸𑀯𑀺𑀢𑀸𑀬 𑀅𑀦𑀮𑀲𑀢𑀸𑀬 𑀘 𑀦 𑀘𑀺𑀭𑁂𑀦𑁂𑀯 𑀫𑀦𑁆𑀢𑁂 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀦𑀺 𑀘 𑀉𑀕𑁆𑀕𑀳𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄. 𑀲𑁄 𑀆𑀘𑀭𑀺𑀬𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 ‘‘𑀫𑀬𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑀁, 𑀓𑀺𑀁 𑀯𑁄 𑀕𑀭𑀼𑀤𑀓𑁆𑀔𑀺𑀡𑀁 𑀤𑁂𑀫𑀻’’𑀢𑀺 𑀆𑀳. 𑀆𑀘𑀭𑀺𑀬𑁄 ‘‘𑀕𑀭𑀼𑀤𑀓𑁆𑀔𑀺𑀡𑀸 𑀦𑀸𑀫 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀯𑀺𑀪𑀯𑀸𑀦𑀼𑀭𑀽𑀧𑀸, 𑀓𑀳𑀸𑀧𑀡𑀲𑀳𑀲𑁆𑀲𑀫𑀸𑀦𑁂𑀳𑀻’’𑀢𑀺 𑀆𑀳. 𑀙𑀢𑁆𑀢𑀫𑀸𑀡𑀯𑁄 𑀆𑀘𑀭𑀺𑀬𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀲𑁂𑀢𑀩𑁆𑀬𑀁 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀢𑁂𑀳𑀺 𑀅𑀪𑀺𑀦𑀦𑁆𑀤𑀺𑀬𑀫𑀸𑀦𑁄 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀢𑀫𑀢𑁆𑀣𑀁 𑀧𑀺𑀢𑀼 𑀆𑀭𑁄𑀘𑁂𑀢𑁆𑀯𑀸 ‘‘𑀤𑁂𑀣 𑀫𑁂 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁, 𑀅𑀚𑁆𑀚𑁂𑀯 𑀤𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀢𑀸𑀢, 𑀅𑀚𑁆𑀚 𑀯𑀺𑀓𑀸𑀮𑁄, 𑀲𑁆𑀯𑁂 𑀕𑀫𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀓𑀳𑀸𑀧𑀡𑁂 𑀦𑀻𑀳𑀭𑀺𑀢𑁆𑀯𑀸 𑀪𑀡𑁆𑀟𑀺𑀓𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀞𑀧𑁂𑀲𑀼𑀁. 𑀘𑁄𑀭𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀙𑀢𑁆𑀢𑀫𑀸𑀡𑀯𑀓𑀲𑁆𑀲 𑀕𑀫𑀦𑀫𑀕𑁆𑀕𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀕𑀳𑀦𑁂 𑀦𑀺𑀮𑀻𑀦𑀸 𑀅𑀘𑁆𑀙𑀺𑀁𑀲𑀼 ‘‘𑀫𑀸𑀡𑀯𑀁 𑀫𑀸𑀭𑁂𑀢𑁆𑀯𑀸 𑀓𑀳𑀸𑀧𑀡𑁂 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺.

𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀙𑀢𑁆𑀢𑀫𑀸𑀡𑀯𑀓𑀲𑁆𑀲 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀦𑀁, 𑀘𑁄𑀭𑁂𑀳𑀺 𑀫𑀸𑀭𑀺𑀢𑀲𑁆𑀲 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁, 𑀢𑀢𑁄 𑀲𑀳 𑀯𑀺𑀫𑀸𑀦𑁂𑀦 𑀆𑀕𑀢𑀲𑁆𑀲 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬 𑀘 𑀥𑀫𑁆𑀫𑀸𑀪𑀺𑀲𑀫𑀬𑀁 𑀤𑀺𑀲𑁆𑀯𑀸 𑀧𑀞𑀫𑀢𑀭𑀫𑁂𑀯 𑀕𑀦𑁆𑀢𑁆𑀯𑀸 𑀫𑀸𑀡𑀯𑀓𑀲𑁆𑀲 𑀕𑀫𑀦𑀫𑀕𑁆𑀕𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀫𑀸𑀡𑀯𑁄 𑀆𑀘𑀭𑀺𑀬𑀥𑀦𑀁 𑀕𑀳𑁂𑀢𑁆𑀯𑀸 𑀲𑁂𑀢𑀩𑁆𑀬𑀢𑁄 𑀉𑀓𑁆𑀓𑀝𑁆𑀞𑀸𑀪𑀺𑀫𑀼𑀔𑁄 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀪𑀕𑀯𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. ‘‘𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀻’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑁄 ‘‘𑀉𑀓𑁆𑀓𑀝𑁆𑀞𑀁, 𑀪𑁄 𑀕𑁄𑀢𑀫, 𑀕𑀫𑀺𑀲𑁆𑀲𑀸𑀫𑀺 𑀫𑀬𑁆𑀳𑀁 𑀆𑀘𑀭𑀺𑀬𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀕𑀭𑀼𑀤𑀓𑁆𑀔𑀺𑀡𑀁 𑀤𑀸𑀢𑀼’’𑀦𑁆𑀢𑀺 𑀆𑀳. 𑀅𑀣 𑀪𑀕𑀯𑀸 ‘‘𑀚𑀸𑀦𑀸𑀲𑀺 𑀧𑀦 𑀢𑁆𑀯𑀁, 𑀫𑀸𑀡𑀯, 𑀢𑀻𑀡𑀺 𑀲𑀭𑀡𑀸𑀦𑀺, 𑀧𑀜𑁆𑀘 𑀲𑀻𑀮𑀸𑀦𑀻’’𑀢𑀺 𑀯𑀢𑁆𑀯𑀸 𑀢𑁂𑀦 ‘‘𑀦𑀸𑀳𑀁 𑀚𑀸𑀦𑀸𑀫𑀺, 𑀓𑀺𑀫𑀢𑁆𑀣𑀺𑀬𑀸𑀦𑀺 𑀧𑀦𑁂𑀢𑀸𑀦𑀺 𑀓𑀻𑀤𑀺𑀲𑀸𑀦𑀺 𑀘𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀫𑀻𑀤𑀺𑀲’’𑀦𑁆𑀢𑀺 𑀲𑀭𑀡𑀕𑀫𑀦𑀲𑁆𑀲 𑀲𑀻𑀮𑀲𑀫𑀸𑀤𑀸𑀦𑀲𑁆𑀲 𑀘 𑀨𑀮𑀸𑀦𑀺𑀲𑀁𑀲𑀁 𑀯𑀺𑀪𑀸𑀯𑁂𑀢𑁆𑀯𑀸 ‘‘𑀉𑀕𑁆𑀕𑀡𑁆𑀳𑀸𑀳𑀺 𑀢𑀸𑀯, 𑀫𑀸𑀡𑀯𑀓, 𑀲𑀭𑀡𑀕𑀫𑀦𑀯𑀺𑀥𑀺’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑀸𑀥𑀼 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺, 𑀓𑀣𑁂𑀣 𑀪𑀦𑁆𑀢𑁂 𑀪𑀕𑀯𑀸’’𑀢𑀺 𑀢𑁂𑀦 𑀬𑀸𑀘𑀺𑀢𑁄 𑀢𑀲𑁆𑀲 𑀭𑀼𑀘𑀺𑀬𑀸 𑀅𑀦𑀼𑀭𑀽𑀧𑀁 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀲𑀭𑀡𑀕𑀫𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑁋

𑁮𑁮𑁬. ‘‘𑀬𑁄 𑀯𑀤𑀢𑀁 𑀧𑀯𑀭𑁄 𑀫𑀦𑀼𑀚𑁂𑀲𑀼, 𑀲𑀓𑁆𑀬𑀫𑀼𑀦𑀻 𑀪𑀕𑀯𑀸 𑀓𑀢𑀓𑀺𑀘𑁆𑀘𑁄;

𑀧𑀸𑀭𑀕𑀢𑁄 𑀩𑀮𑀯𑀻𑀭𑀺𑀬𑀲𑀫𑀗𑁆𑀕𑀻, 𑀢𑀁 𑀲𑀼𑀕𑀢𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀺.

𑁮𑁮𑁭. ‘‘𑀭𑀸𑀕𑀯𑀺𑀭𑀸𑀕𑀫𑀦𑁂𑀚𑀫𑀲𑁄𑀓𑀁, 𑀥𑀫𑁆𑀫𑀫𑀲𑀗𑁆𑀔𑀢𑀫𑀧𑁆𑀧𑀝𑀺𑀓𑀽𑀮𑀁;

𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀁, 𑀥𑀫𑁆𑀫𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀺.

𑁮𑁮𑁮. ‘‘𑀬𑀢𑁆𑀣 𑀘 𑀤𑀺𑀦𑁆𑀦 𑀫𑀳𑀧𑁆𑀨𑀮𑀫𑀸𑀳𑀼, 𑀘𑀢𑀽𑀲𑀼 𑀲𑀼𑀘𑀻𑀲𑀼 𑀧𑀼𑀭𑀺𑀲𑀬𑀼𑀕𑁂𑀲𑀼;

𑀅𑀝𑁆𑀞 𑀘 𑀧𑀼𑀕𑁆𑀕𑀮 𑀥𑀫𑁆𑀫𑀤𑀲𑀸 𑀢𑁂, 𑀲𑀗𑁆𑀖𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺. 𑁋

𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺.

𑁮𑁮𑁬. 𑀢𑀢𑁆𑀣 𑀬𑁄𑀢𑀺 𑀅𑀦𑀺𑀬𑀫𑀺𑀢𑀯𑀘𑀦𑀁, 𑀢𑀲𑁆𑀲 ‘‘𑀢’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀬𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀤𑀢𑀦𑁆𑀢𑀺 𑀯𑀤𑀦𑁆𑀢𑀸𑀦𑀁. 𑀧𑀯𑀭𑁄𑀢𑀺 𑀲𑁂𑀝𑁆𑀞𑁄, 𑀓𑀣𑀺𑀓𑀸𑀦𑀁 𑀉𑀢𑁆𑀢𑀫𑁄 𑀯𑀸𑀤𑀻𑀯𑀭𑁄𑀢𑀺 𑀅𑀢𑁆𑀣𑁄. 𑀫𑀦𑀼𑀚𑁂𑀲𑀽𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀬𑀣𑀸 ‘‘𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺. 𑀪𑀕𑀯𑀸 𑀧𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀩𑁆𑀭𑀳𑁆𑀫𑀸𑀦𑀫𑁆𑀧𑀺 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀧𑀯𑀭𑁄𑀬𑁂𑀯, 𑀪𑀕𑀯𑀢𑁄 𑀘 𑀘𑀭𑀺𑀫𑀪𑀯𑁂 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀦𑁆𑀦𑀢𑀸𑀬 𑀯𑀼𑀢𑁆𑀢𑀁 ‘‘𑀫𑀦𑀼𑀚𑁂𑀲𑀽’’𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀓𑁆𑀬𑀫𑀼𑀦𑀻’’𑀢𑀺. 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑀢𑀸𑀬 𑀲𑀓𑁆𑀬𑁄, 𑀓𑀸𑀬𑀫𑁄𑀦𑁂𑀬𑁆𑀬𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁄 𑀅𑀦𑀯𑀲𑁂𑀲𑀲𑁆𑀲 𑀘 𑀜𑁂𑀬𑁆𑀬𑀲𑁆𑀲 𑀫𑀼𑀦𑀦𑀢𑁄 𑀫𑀼𑀦𑀺 𑀘𑀸𑀢𑀺 𑀲𑀓𑁆𑀬𑀫𑀼𑀦𑀺. 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸. 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀸𑀢𑀩𑁆𑀩𑀲𑁆𑀲 𑀧𑀭𑀺𑀜𑁆𑀜𑀸𑀤𑀺𑀧𑀪𑁂𑀤𑀲𑁆𑀲 𑀲𑁄𑀴𑀲𑀯𑀺𑀥𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀢𑀢𑁆𑀢𑀸 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 𑀓𑀢𑀓𑀺𑀘𑁆𑀘𑁄. 𑀧𑀸𑀭𑀁 𑀲𑀓𑁆𑀓𑀸𑀬𑀲𑁆𑀲 𑀧𑀭𑀢𑀻𑀭𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄 𑀲𑀬𑀫𑁆𑀪𑀼𑀜𑀸𑀡𑁂𑀦 𑀅𑀥𑀺𑀕𑀢𑁄𑀢𑀺 𑀧𑀸𑀭𑀕𑀢𑁄. 𑀅𑀲𑀤𑀺𑀲𑁂𑀦 𑀓𑀸𑀬𑀩𑀮𑁂𑀦, 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀜𑀸𑀡𑀩𑀮𑁂𑀦, 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑁂𑀦 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀩𑀮𑀯𑀻𑀭𑀺𑀬𑀲𑀫𑀗𑁆𑀕𑀻. 𑀲𑁄𑀪𑀦𑀕𑀫𑀦𑀢𑁆𑀢𑀸, 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸, 𑀲𑀫𑁆𑀫𑀸 𑀕𑀢𑀢𑁆𑀢𑀸, 𑀲𑀫𑁆𑀫𑀸 𑀘 𑀕𑀤𑀺𑀢𑀢𑁆𑀢𑀸 𑀲𑀼𑀕𑀢𑁄. 𑀢𑀁 𑀲𑀼𑀕𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀲𑀭𑀡𑀢𑁆𑀣𑀁 𑀲𑀭𑀡𑀸𑀬 𑀧𑀭𑀸𑀬𑀡𑀸𑀬 𑀅𑀧𑀸𑀬𑀤𑀼𑀓𑁆𑀔𑀯𑀝𑁆𑀝𑀤𑀼𑀓𑁆𑀔𑀧𑀭𑀺𑀢𑁆𑀢𑀸𑀡𑀸𑀬 𑀉𑀧𑁂𑀳𑀺 𑀉𑀧𑀕𑀘𑁆𑀙, 𑀅𑀚𑁆𑀚 𑀧𑀝𑁆𑀞𑀸𑀬 𑀅𑀳𑀺𑀢𑀦𑀺𑀯𑀢𑁆𑀢𑀦𑁂𑀦 𑀳𑀺𑀢𑀲𑀁𑀯𑀟𑁆𑀠𑀦𑁂𑀦 ‘‘𑀅𑀬𑀁 𑀫𑁂 𑀪𑀕𑀯𑀸 𑀲𑀭𑀡𑀁 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀡𑀁 𑀕𑀢𑀺 𑀧𑀝𑀺𑀲𑀭𑀡’’𑀦𑁆𑀢𑀺 𑀪𑀚 𑀲𑁂𑀯, 𑀏𑀯𑀁 𑀚𑀸𑀦𑀸𑀳𑀺 𑀯𑀸 𑀩𑀼𑀚𑁆𑀛𑀲𑁆𑀲𑀽𑀢𑀺 𑀅𑀢𑁆𑀣𑁄.

𑁮𑁮𑁭. 𑀭𑀸𑀕𑀯𑀺𑀭𑀸𑀕𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀫𑀸𑀳. 𑀢𑁂𑀦 𑀳𑀺 𑀅𑀭𑀺𑀬𑀸 𑀅𑀦𑀸𑀤𑀺𑀓𑀸𑀮𑀪𑀸𑀯𑀺𑀢𑀫𑁆𑀧𑀺 𑀭𑀸𑀕𑀁 𑀯𑀺𑀭𑀚𑁆𑀚𑁂𑀦𑁆𑀢𑀺. 𑀅𑀦𑁂𑀚𑀫𑀲𑁄𑀓𑀦𑁆𑀢𑀺 𑀅𑀭𑀺𑀬𑀨𑀮𑀁. 𑀢𑀜𑁆𑀳𑀺 𑀏𑀚𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀅𑀯𑀲𑀺𑀝𑁆𑀞𑀸𑀦𑀜𑁆𑀘 𑀲𑁄𑀓𑀦𑀺𑀫𑀺𑀢𑁆𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀢𑁄 ‘‘𑀅𑀦𑁂𑀚𑀁 𑀅𑀲𑁄𑀓’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀦𑁆𑀢𑀺 𑀲𑀪𑀸𑀯𑀥𑀫𑁆𑀫𑀁. 𑀲𑀪𑀸𑀯𑀢𑁄 𑀕𑀳𑁂𑀢𑀩𑁆𑀩𑀥𑀫𑁆𑀫𑁄 𑀳𑁂𑀲 𑀬𑀤𑀺𑀤𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺, 𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀯𑀺𑀬 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀯𑀲𑁂𑀦. 𑀥𑀫𑁆𑀫𑀦𑁆𑀢𑀺 𑀯𑀸 𑀧𑀭𑀫𑀢𑁆𑀣𑀥𑀫𑁆𑀫𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁂𑀘𑁆𑀘 𑀲𑀫𑁆𑀪𑀼𑀬𑁆𑀬 𑀧𑀘𑁆𑀘𑀬𑁂𑀳𑀺 𑀓𑀢𑀁 𑀲𑀗𑁆𑀔𑀢𑀁, 𑀦 𑀲𑀗𑁆𑀔𑀢𑀦𑁆𑀢𑀺 𑀅𑀲𑀗𑁆𑀔𑀢𑀁. 𑀢𑀤𑁂𑀯 𑀦𑀺𑀩𑁆𑀩𑀸𑀦𑀁. 𑀦𑀢𑁆𑀣𑀺 𑀏𑀢𑁆𑀣 𑀓𑀺𑀜𑁆𑀘𑀺𑀧𑀺 𑀧𑀝𑀺𑀓𑀽𑀮𑀦𑁆𑀢𑀺 𑀅𑀧𑁆𑀧𑀝𑀺𑀓𑀽𑀮𑀁. 𑀲𑀯𑀦𑀯𑁂𑀮𑀸𑀬𑀁 𑀉𑀧𑀧𑀭𑀺𑀓𑁆𑀔𑀡𑀯𑁂𑀮𑀸𑀬𑀁 𑀧𑀝𑀺𑀧𑀚𑁆𑀚𑀦𑀯𑁂𑀮𑀸𑀬𑀦𑁆𑀢𑀺 𑀲𑀩𑁆𑀩𑀤𑀸𑀧𑀺 𑀇𑀝𑁆𑀞𑀫𑁂𑀯𑀸𑀢𑀺 𑀫𑀥𑀼𑀭𑀁. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀦𑁆𑀦𑀺𑀲𑁆𑀲𑀬𑀸𑀬 𑀧𑀝𑀺𑀪𑀸𑀦𑀲𑀫𑁆𑀧𑀤𑀸𑀬 𑀧𑀯𑀢𑁆𑀢𑀺𑀢𑀢𑁆𑀢𑀸 𑀲𑀼𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄 𑀦𑀺𑀧𑀼𑀡𑀪𑀸𑀯𑀢𑁄 𑀘 𑀧𑀕𑀼𑀡𑀁. 𑀯𑀺𑀪𑀚𑀺𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀔𑀦𑁆𑀥𑀸𑀤𑀺𑀯𑀲𑁂𑀦 𑀓𑀼𑀲𑀮𑀸𑀤𑀺𑀯𑀲𑁂𑀦 𑀉𑀤𑁆𑀤𑁂𑀲𑀸𑀤𑀺𑀯𑀲𑁂𑀦 𑀘 𑀲𑀼𑀝𑁆𑀞𑀼 𑀯𑀺𑀪𑀚𑀦𑀢𑁄 𑀲𑀼𑀯𑀺𑀪𑀢𑁆𑀢𑀁. 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀫𑁂𑀯 𑀯𑀤𑀢𑀺. 𑀢𑁂𑀦𑁂𑀯 𑀳𑀺𑀲𑁆𑀲 𑀆𑀧𑀸𑀣𑀓𑀸𑀮𑁂 𑀯𑀺𑀬 𑀯𑀺𑀫𑀤𑁆𑀤𑀦𑀓𑀸𑀮𑁂𑀧𑀺 𑀓𑀣𑁂𑀦𑁆𑀢𑀲𑁆𑀲 𑀯𑀺𑀬 𑀲𑀼𑀡𑀦𑁆𑀢𑀲𑁆𑀲𑀸𑀧𑀺 𑀲𑀫𑁆𑀫𑀼𑀔𑀻𑀪𑀸𑀯𑀢𑁄 𑀉𑀪𑀢𑁄𑀧𑀘𑁆𑀘𑀓𑁆𑀔𑀢𑀸𑀬 𑀤𑀲𑁆𑀲𑀦𑀢𑁆𑀣𑀁 ‘‘𑀇𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀦𑁆𑀢𑀺 𑀬𑀣𑀸𑀯𑀧𑀝𑀺𑀧𑀚𑁆𑀚𑀦𑁆𑀢𑁂 𑀅𑀧𑀸𑀬𑀤𑀼𑀓𑁆𑀔𑀧𑀸𑀢𑀢𑁄 𑀥𑀸𑀭𑀡𑀢𑁆𑀣𑁂𑀦 𑀥𑀫𑁆𑀫𑀁, 𑀇𑀤𑀁 𑀘𑀢𑀼𑀩𑁆𑀩𑀺𑀥𑀲𑁆𑀲𑀸𑀧𑀺 𑀥𑀫𑁆𑀫𑀲𑁆𑀲 𑀲𑀸𑀥𑀸𑀭𑀡𑀯𑀘𑀦𑀁. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺 𑀳𑀺 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀦𑀫𑀢𑁆𑀢𑀸𑀬𑀧𑀺 𑀬𑀣𑀸𑀯𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑀸𑀬𑀤𑀼𑀓𑁆𑀔𑀧𑀸𑀢𑀢𑁄 𑀥𑀸𑀭𑁂𑀢𑀺 𑀏𑀯. 𑀇𑀫𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀇𑀤𑀫𑁂𑀯 𑀯𑀺𑀫𑀸𑀦𑀁 𑀲𑀸𑀥𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀸𑀥𑀸𑀭𑀡𑀪𑀸𑀯𑁂𑀦 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 ‘‘𑀇𑀫’’𑀦𑁆𑀢𑀺 𑀆𑀳.

𑁮𑁮𑁮. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀅𑀭𑀺𑀬𑀲𑀗𑁆𑀖𑁂. 𑀤𑀺𑀦𑁆𑀦𑀦𑁆𑀢𑀺 𑀧𑀭𑀺𑀘𑁆𑀘𑀢𑁆𑀢𑀁 𑀅𑀦𑁆𑀦𑀸𑀤𑀺𑀤𑁂𑀬𑁆𑀬𑀥𑀫𑁆𑀫𑀁. 𑀤𑀺𑀦𑁆𑀦 𑀫𑀳𑀧𑁆𑀨𑀮𑀦𑁆𑀢𑀺 𑀕𑀸𑀣𑀸𑀲𑀼𑀔𑀢𑁆𑀣𑀁 𑀅𑀦𑀼𑀦𑀸𑀲𑀺𑀓𑀮𑁄𑀧𑁄 𑀓𑀢𑁄. 𑀅𑀘𑁆𑀘𑀦𑁆𑀢𑀫𑁂𑀯 𑀓𑀺𑀮𑁂𑀲𑀸𑀲𑀼𑀘𑀺𑀢𑁄 𑀯𑀺𑀲𑀼𑀚𑁆𑀛𑀦𑁂𑀦 𑀲𑀼𑀘𑀻𑀲𑀼 ‘‘𑀲𑁄𑀢𑀸𑀧𑀦𑁆𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁮.𑁬𑁦) 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀧𑀼𑀭𑀺𑀲𑀬𑀼𑀕𑁂𑀲𑀼. 𑀅𑀝𑁆𑀞𑀸𑀢𑀺 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑁂𑀲𑀼 𑀬𑀼𑀕𑀴𑁂 𑀅𑀓𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀳𑀡𑁂𑀦 𑀅𑀝𑁆𑀞 𑀧𑀼𑀕𑁆𑀕𑀮𑀸. 𑀕𑀸𑀣𑀸𑀲𑀼𑀔𑀢𑁆𑀣𑀫𑁂𑀯 𑀘𑁂𑀢𑁆𑀣 ‘‘𑀧𑀼𑀕𑁆𑀕𑀮 𑀥𑀫𑁆𑀫𑀤𑀲𑀸’’𑀢𑀺 𑀭𑀲𑁆𑀲𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀥𑀫𑁆𑀫𑀤𑀲𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀸𑀦𑀥𑀫𑁆𑀫𑀲𑁆𑀲 𑀘 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀓𑀸. 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑁂𑀦 𑀲𑀗𑁆𑀖𑀁.

𑀏𑀯𑀁 𑀪𑀕𑀯𑀢𑀸 𑀢𑀻𑀳𑀺 𑀕𑀸𑀣𑀸𑀳𑀺 𑀲𑀭𑀡𑀕𑀼𑀡𑀲𑀦𑁆𑀤𑀲𑁆𑀲𑀦𑁂𑀦 𑀲𑀤𑁆𑀥𑀺𑀁 𑀲𑀭𑀡𑀕𑀫𑀦𑀯𑀺𑀥𑀺𑀫𑁆𑀳𑀺 𑀯𑀼𑀢𑁆𑀢𑁂 𑀫𑀸𑀡𑀯𑁄 𑀢𑀁𑀢𑀁𑀲𑀭𑀡𑀕𑀼𑀡𑀸𑀦𑀼𑀲𑁆𑀲𑀭𑀡𑀫𑀼𑀔𑁂𑀦 𑀲𑀭𑀡𑀕𑀫𑀦𑀯𑀺𑀥𑀺𑀦𑁄 𑀅𑀢𑁆𑀢𑀦𑁄 𑀳𑀤𑀬𑁂 𑀞𑀧𑀺𑀢𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀢𑀲𑁆𑀲𑀸 𑀢𑀲𑁆𑀲𑀸 𑀕𑀸𑀣𑀸𑀬 𑀅𑀦𑀦𑁆𑀢𑀭𑀁 ‘‘𑀬𑁄 𑀯𑀤𑀢𑀁 𑀧𑀯𑀭𑁄’’𑀢𑀺𑀆𑀤𑀺𑀦𑀸 𑀢𑀁 𑀢𑀁 𑀕𑀸𑀣𑀁 𑀧𑀘𑁆𑀘𑀦𑀼𑀪𑀸𑀲𑀺. 𑀏𑀯𑀁 𑀧𑀘𑁆𑀘𑀦𑀼𑀪𑀸𑀲𑀺𑀢𑁆𑀯𑀸 𑀞𑀺𑀢𑀲𑁆𑀲 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀭𑀽𑀧𑀢𑁄 𑀨𑀮𑀸𑀦𑀺𑀲𑀁𑀲𑀢𑁄 𑀘 𑀯𑀺𑀪𑀸𑀯𑁂𑀢𑁆𑀯𑀸 𑀢𑁂𑀲𑀁 𑀲𑀫𑀸𑀤𑀸𑀦𑀯𑀺𑀥𑀺𑀁 𑀓𑀣𑁂𑀲𑀺. 𑀲𑁄 𑀢𑀫𑁆𑀧𑀺 𑀲𑀼𑀝𑁆𑀞𑀼 𑀉𑀧𑀥𑀸𑀭𑁂𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 ‘‘𑀳𑀦𑁆𑀤𑀸𑀳𑀁 𑀪𑀕𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀭𑀢𑀦𑀢𑁆𑀢𑀬𑀕𑀼𑀡𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀢𑀁𑀬𑁂𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀪𑀕𑀯𑀸𑀧𑀺 ‘‘𑀅𑀮𑀁 𑀇𑀫𑀲𑁆𑀲 𑀏𑀢𑁆𑀢𑀓𑀁 𑀓𑀼𑀲𑀮𑀁 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀬𑀸’’𑀢𑀺 𑀚𑁂𑀢𑀯𑀦𑀫𑁂𑀯 𑀅𑀕𑀫𑀸𑀲𑀺.

𑀫𑀸𑀡𑀯𑀲𑁆𑀲 𑀧𑀦 𑀧𑀲𑀦𑁆𑀦𑀘𑀺𑀢𑁆𑀢𑀲𑁆𑀲 𑀭𑀢𑀦𑀢𑁆𑀢𑀬𑀕𑀼𑀡𑀁 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 ‘‘𑀲𑀭𑀡𑀁 𑀉𑀧𑁂𑀫𑀻’’𑀢𑀺 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑀸𑀬 𑀲𑀭𑀡𑁂𑀲𑀼 𑀘, 𑀪𑀕𑀯𑀢𑀸 𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀘𑀦𑁆𑀦𑀁 𑀲𑀻𑀮𑀸𑀦𑀁 𑀅𑀥𑀺𑀝𑁆𑀞𑀸𑀦𑁂𑀦 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀺𑀢𑀲𑁆𑀲 𑀢𑁂𑀦𑁂𑀯 𑀦𑀬𑁂𑀦 𑀭𑀢𑀦𑀢𑁆𑀢𑀬𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑁂𑀯 𑀕𑀘𑁆𑀙𑀦𑁆𑀢𑀲𑁆𑀲 𑀘𑁄𑀭𑀸 𑀫𑀕𑁆𑀕𑁂 𑀧𑀭𑀺𑀬𑀼𑀝𑁆𑀞𑀺𑀁𑀲𑀼. 𑀲𑁄 𑀢𑁂 𑀅𑀕𑀡𑁂𑀢𑁆𑀯𑀸 𑀭𑀢𑀦𑀢𑁆𑀢𑀬𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁄𑀬𑁂𑀯 𑀕𑀘𑁆𑀙𑀢𑀺. 𑀢𑀜𑁆𑀘𑁂𑀓𑁄 𑀘𑁄𑀭𑁄 𑀕𑀼𑀫𑁆𑀩𑀦𑁆𑀢𑀭𑀁 𑀉𑀧𑀦𑀺𑀲𑁆𑀲𑀸𑀬 𑀞𑀺𑀢𑁄 𑀯𑀺𑀲𑀧𑀻𑀢𑁂𑀦 𑀲𑀭𑁂𑀦 𑀲𑀳𑀲𑀸𑀯 𑀯𑀺𑀚𑁆𑀛𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀓𑀳𑀸𑀧𑀡𑀪𑀡𑁆𑀟𑀺𑀓𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀳𑀸𑀬𑁂𑀳𑀺 𑀲𑀤𑁆𑀥𑀺𑀁 𑀧𑀓𑁆𑀓𑀸𑀫𑀺. 𑀫𑀸𑀡𑀯𑁄 𑀧𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀢𑀺𑀁𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀲𑀝𑁆𑀞𑀺𑀲𑀓𑀝𑀪𑀸𑀭𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀯𑀺𑀫𑀸𑀦𑀲𑁆𑀲 𑀆𑀪𑀸 𑀲𑀸𑀢𑀺𑀭𑁂𑀓𑀸𑀦𑀺 𑀯𑀻𑀲𑀢𑀺𑀬𑁄𑀚𑀦𑀸𑀦𑀺 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀅𑀣 𑀫𑀸𑀡𑀯𑀁 𑀓𑀸𑀮𑀓𑀢𑀁 𑀤𑀺𑀲𑁆𑀯𑀸 𑀲𑁂𑀢𑀩𑁆𑀬𑀕𑀸𑀫𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀲𑁂𑀢𑀩𑁆𑀬𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀉𑀓𑁆𑀓𑀝𑁆𑀞𑀕𑀸𑀫𑀯𑀸𑀲𑀺𑀦𑁄 𑀘 𑀉𑀓𑁆𑀓𑀝𑁆𑀞𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀓𑀣𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀜𑀸𑀢𑀺𑀫𑀺𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑀘 𑀧𑁄𑀓𑁆𑀔𑀭𑀲𑀸𑀢𑀺 𑀲𑀧𑀭𑀺𑀯𑀸𑀭𑀸 𑀅𑀲𑁆𑀲𑀼𑀫𑀼𑀔𑀸 𑀭𑁄𑀤𑀫𑀸𑀦𑀸 𑀢𑀁 𑀧𑀤𑁂𑀲𑀁 𑀅𑀕𑀫𑀁𑀲𑀼, 𑀬𑁂𑀪𑀼𑀬𑁆𑀬𑁂𑀦 𑀲𑁂𑀢𑀩𑁆𑀬𑀯𑀸𑀲𑀺𑀦𑁄 𑀘 𑀉𑀓𑁆𑀓𑀝𑁆𑀞𑀯𑀸𑀲𑀺𑀦𑁄 𑀘 𑀇𑀘𑁆𑀙𑀸𑀦𑀗𑁆𑀕𑀮𑀯𑀸𑀲𑀺𑀦𑁄 𑀘 𑀲𑀦𑁆𑀦𑀺𑀧𑀢𑀺𑀁𑀲𑀼, 𑀫𑀳𑀸𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀅𑀣 𑀫𑀸𑀡𑀯𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀫𑀕𑁆𑀕𑀲𑁆𑀲 𑀅𑀯𑀺𑀤𑀽𑀭𑁂 𑀘𑀺𑀢𑀓𑀁 𑀲𑀚𑁆𑀚𑁂𑀢𑁆𑀯𑀸 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼.

𑀅𑀣 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀺 𑀕𑀢𑁂 𑀙𑀢𑁆𑀢𑀫𑀸𑀡𑀯𑁄 𑀫𑀁 𑀯𑀦𑁆𑀤𑀺𑀢𑀼𑀁 𑀆𑀕𑀫𑀺𑀲𑁆𑀲𑀢𑀺, 𑀆𑀕𑀢𑀜𑁆𑀘 𑀢𑀁 𑀓𑀢𑀓𑀫𑁆𑀫𑀁 𑀓𑀣𑀸𑀧𑁂𑀦𑁆𑀢𑁄 𑀓𑀫𑁆𑀫𑀨𑀮𑀁 𑀧𑀘𑁆𑀘𑀓𑁆𑀔𑀁 𑀓𑀸𑀭𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀏𑀯𑀁 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀢𑀁 𑀧𑀤𑁂𑀲𑀁 𑀉𑀧𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄. 𑀅𑀣 𑀙𑀢𑁆𑀢𑀫𑀸𑀡𑀯𑀤𑁂𑀯𑀧𑀼𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀢𑀲𑁆𑀲𑀸 𑀓𑀸𑀭𑀡𑀁 𑀉𑀧𑀥𑀸𑀭𑁂𑀦𑁆𑀢𑁄 𑀲𑀭𑀡𑀕𑀫𑀦𑀜𑁆𑀘 𑀲𑀻𑀮𑀲𑀫𑀸𑀤𑀸𑀦𑀜𑁆𑀘 𑀤𑀺𑀲𑁆𑀯𑀸, 𑀯𑀺𑀫𑁆𑀳𑀬𑀚𑀸𑀢𑁄 𑀪𑀕𑀯𑀢𑀺 𑀲𑀜𑁆𑀚𑀸𑀢𑀧𑀲𑀸𑀤𑀩𑀳𑀼𑀫𑀸𑀦𑁄 ‘‘𑀇𑀤𑀸𑀦𑁂𑀯𑀸𑀳𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀺𑀲𑁆𑀲𑀸𑀫𑀺, 𑀭𑀢𑀦𑀢𑁆𑀢𑀬𑀕𑀼𑀡𑁂 𑀘 𑀫𑀳𑀸𑀚𑀦𑀲𑁆𑀲 𑀧𑀸𑀓𑀝𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀢𑀜𑁆𑀜𑀼𑀢𑀁 𑀦𑀺𑀲𑁆𑀲𑀸𑀬 𑀲𑀓𑀮𑀁 𑀢𑀁 𑀅𑀭𑀜𑁆𑀜𑀧𑀤𑁂𑀲𑀁 𑀏𑀓𑀸𑀮𑁄𑀓𑀁 𑀓𑀭𑁄𑀦𑁆𑀢𑁄, 𑀲𑀳 𑀯𑀺𑀫𑀸𑀦𑁂𑀦 𑀆𑀕𑀦𑁆𑀢𑁆𑀯𑀸 𑀯𑀺𑀫𑀸𑀦𑀢𑁄 𑀑𑀭𑀼𑀬𑁆𑀳 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀤𑀺𑀲𑁆𑀲𑀫𑀸𑀦𑀭𑀽𑀧𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀦𑁆𑀢𑁄 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄 ‘‘𑀓𑁄 𑀦𑀼 𑀔𑁄 𑀅𑀬𑀁 𑀤𑁂𑀯𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸’’𑀢𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀲𑀺. 𑀪𑀕𑀯𑀸 𑀢𑁂𑀦 𑀓𑀢𑀧𑀼𑀜𑁆𑀜𑀓𑀫𑁆𑀫𑀁 𑀧𑀸𑀓𑀝𑀁 𑀓𑀸𑀢𑀼𑀁 𑁋

𑁮𑁮𑁯. ‘‘𑀦 𑀢𑀣𑀸 𑀢𑀧𑀢𑀺 𑀦𑀪𑁂 𑀲𑀽𑀭𑀺𑀬𑁄, 𑀘𑀦𑁆𑀤𑁄 𑀘 𑀦 𑀪𑀸𑀲𑀢𑀺 𑀦 𑀨𑀼𑀲𑁆𑀲𑁄;

𑀬𑀣𑀸 𑀅𑀢𑀼𑀮𑀫𑀺𑀤𑀁 𑀫𑀳𑀧𑁆𑀧𑀪𑀸𑀲𑀁, 𑀓𑁄 𑀦𑀼 𑀢𑁆𑀯𑀁 𑀢𑀺𑀤𑀺𑀯𑀸 𑀫𑀳𑀺𑀁 𑀉𑀧𑀸𑀕𑀸.

𑁮𑁯𑁦. ‘‘𑀙𑀺𑀦𑁆𑀤𑀢𑀺 𑀭𑀁𑀲𑀻 𑀧𑀪𑀗𑁆𑀓𑀭𑀲𑁆𑀲, 𑀲𑀸𑀥𑀺𑀓𑀯𑀻𑀲𑀢𑀺𑀬𑁄𑀚𑀦𑀸𑀦𑀺 𑀆𑀪𑀸;

𑀭𑀢𑁆𑀢𑀺𑀫𑀧𑀺 𑀬𑀣𑀸 𑀤𑀺𑀯𑀁 𑀓𑀭𑁄𑀢𑀺, 𑀧𑀭𑀺𑀲𑀼𑀤𑁆𑀥𑀁 𑀯𑀺𑀫𑀮𑀁 𑀲𑀼𑀪𑀁 𑀯𑀺𑀫𑀸𑀦𑀁.

𑁮𑁯𑁧. ‘‘𑀩𑀳𑀼𑀧𑀤𑀼𑀫𑀯𑀺𑀘𑀺𑀢𑁆𑀭𑀧𑀼𑀡𑁆𑀟𑀭𑀻𑀓𑀁, 𑀯𑁄𑀓𑀺𑀡𑁆𑀡𑀁 𑀓𑀼𑀲𑀼𑀫𑁂𑀳𑀺 𑀦𑁂𑀓𑀘𑀺𑀢𑁆𑀢𑀁;

𑀅𑀭𑀚𑀯𑀺𑀭𑀚𑀳𑁂𑀫𑀚𑀸𑀮𑀙𑀦𑁆𑀦𑀁, 𑀆𑀓𑀸𑀲𑁂 𑀢𑀧𑀢𑀺 𑀬𑀣𑀸𑀧𑀺 𑀲𑀽𑀭𑀺𑀬𑁄.

𑁮𑁯𑁨. ‘‘𑀭𑀢𑁆𑀢𑀫𑁆𑀩𑀭𑀧𑀻𑀢𑀯𑀸𑀲𑀲𑀸𑀳𑀺, 𑀅𑀕𑀭𑀼𑀧𑀺𑀬𑀗𑁆𑀕𑀼𑀘𑀦𑁆𑀤𑀦𑀼𑀲𑁆𑀲𑀤𑀸𑀳𑀺;

𑀓𑀜𑁆𑀘𑀦𑀢𑀦𑀼𑀲𑀦𑁆𑀦𑀺𑀪𑀢𑁆𑀢𑀘𑀸𑀳𑀺, 𑀧𑀭𑀺𑀧𑀽𑀭𑀁 𑀕𑀕𑀦𑀁𑀯 𑀢𑀸𑀭𑀓𑀸𑀳𑀺.

𑁮𑁯𑁩. ‘‘𑀦𑀭𑀦𑀸𑀭𑀺𑀬𑁄 𑀩𑀳𑀼𑀓𑁂𑀢𑁆𑀣𑀦𑁂𑀓𑀯𑀡𑁆𑀡𑀸, 𑀓𑀼𑀲𑀼𑀫𑀯𑀺𑀪𑀽𑀲𑀺𑀢𑀸𑀪𑀭𑀡𑁂𑀢𑁆𑀣 𑀲𑀼𑀫𑀦𑀸;

𑀅𑀦𑀺𑀮𑀧𑀫𑀼𑀜𑁆𑀘𑀺𑀢𑀸 𑀧𑀯𑀦𑁆𑀢𑀺 𑀲𑀼𑀭𑀪𑀺𑀁, 𑀢𑀧𑀦𑀺𑀬𑀯𑀺𑀢𑀢𑀸 𑀲𑀼𑀯𑀡𑁆𑀡𑀙𑀦𑁆𑀦𑀸.

𑁮𑁯𑁪. ‘‘𑀓𑀺𑀲𑁆𑀲 𑀲𑀁𑀬𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀓𑁂𑀦𑀸𑀲𑀺 𑀓𑀫𑁆𑀫𑀨𑀮𑁂𑀦𑀺𑀥𑀽𑀧𑀧𑀦𑁆𑀦𑁄;

𑀬𑀣𑀸 𑀘 𑀢𑁂 𑀅𑀥𑀺𑀕𑀢𑀫𑀺𑀤𑀁 𑀯𑀺𑀫𑀸𑀦𑀁, 𑀢𑀤𑀦𑀼𑀧𑀤𑀁 𑀅𑀯𑀘𑀸𑀲𑀺 𑀇𑀕𑁆𑀖 𑀧𑀼𑀝𑁆𑀞𑁄’’𑀢𑀺. 𑁋

𑀢𑀁 𑀤𑁂𑀯𑀧𑀼𑀢𑁆𑀢𑀁 𑀧𑀝𑀺𑀧𑀼𑀘𑁆𑀙𑀺.

𑁮𑁮𑁬. 𑀢𑀢𑁆𑀣 𑀢𑀧𑀢𑀻𑀢𑀺 𑀤𑀺𑀧𑁆𑀧𑀢𑀺. 𑀦𑀪𑁂𑀢𑀺 𑀆𑀓𑀸𑀲𑁂. 𑀨𑀼𑀲𑁆𑀲𑁄𑀢𑀺 𑀨𑀼𑀲𑁆𑀲𑀢𑀸𑀭𑀓𑀸. 𑀅𑀢𑀼𑀮𑀦𑁆𑀢𑀺 𑀅𑀦𑀼𑀧𑀫𑀁, 𑀅𑀧𑁆𑀧𑀫𑀸𑀡𑀁 𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀇𑀤𑀁 𑀢𑀯 𑀯𑀺𑀫𑀸𑀦𑀁 𑀅𑀦𑀼𑀧𑀫𑀁 𑀅𑀧𑁆𑀧𑀫𑀸𑀡𑀁 𑀧𑀪𑀲𑁆𑀲𑀭𑀪𑀸𑀯𑁂𑀦 𑀢𑀢𑁄 𑀏𑀯 𑀫𑀳𑀧𑁆𑀧𑀪𑀸𑀲𑀁 𑀆𑀓𑀸𑀲𑁂 𑀤𑀺𑀧𑁆𑀧𑀢𑀺, 𑀦 𑀢𑀣𑀸 𑀢𑀸𑀭𑀓𑀭𑀽𑀧𑀸𑀦𑀺 𑀤𑀺𑀧𑁆𑀧𑀦𑁆𑀢𑀺, 𑀦 𑀘𑀦𑁆𑀤𑁄, 𑀢𑀸𑀦𑀺 𑀢𑀸𑀯 𑀢𑀺𑀝𑁆𑀞𑀦𑁆𑀢𑀼, 𑀦𑀸𑀧𑀺 𑀲𑀽𑀭𑀺𑀬𑁄 𑀤𑀺𑀧𑁆𑀧𑀢𑀺, 𑀏𑀯𑀁𑀪𑀽𑀢𑁄 𑀓𑁄 𑀦𑀼 𑀢𑁆𑀯𑀁 𑀤𑁂𑀯𑀮𑁄𑀓𑀢𑁄 𑀇𑀫𑀁 𑀪𑀽𑀫𑀺𑀧𑀤𑁂𑀲𑀁 𑀉𑀧𑀕𑀢𑁄, 𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀇𑀫𑀲𑁆𑀲 𑀫𑀳𑀸𑀚𑀦𑀲𑁆𑀲 𑀓𑀣𑁂𑀳𑀻𑀢𑀺.

𑁮𑁯𑁦. 𑀙𑀺𑀦𑁆𑀤𑀢𑀻𑀢𑀺 𑀯𑀺𑀘𑁆𑀙𑀺𑀦𑁆𑀤𑀢𑀺, 𑀧𑀯𑀢𑁆𑀢𑀺𑀢𑀼𑀁 𑀅𑀤𑁂𑀦𑁆𑀢𑁄 𑀧𑀝𑀺𑀳𑀦𑀢𑀻𑀢𑀺 𑀅𑀢𑁆𑀣𑁄. 𑀭𑀁𑀲𑀻𑀢𑀺 𑀭𑀲𑁆𑀫𑀺𑀬𑁄. 𑀧𑀪𑀗𑁆𑀓𑀭𑀲𑁆𑀲𑀸𑀢𑀺 𑀲𑀽𑀭𑀺𑀬𑀲𑁆𑀲. 𑀢𑀲𑁆𑀲 𑀘 𑀯𑀺𑀫𑀸𑀦𑀲𑁆𑀲 𑀧𑀪𑀸 𑀲𑀫𑀦𑁆𑀢𑀢𑁄 𑀧𑀜𑁆𑀘𑀯𑀻𑀲𑀢𑀺 𑀬𑁄𑀚𑀦𑀸𑀦𑀺 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 ‘‘𑀲𑀸𑀥𑀺𑀓𑀯𑀻𑀲𑀢𑀺𑀬𑁄𑀚𑀦𑀸𑀦𑀺 𑀆𑀪𑀸’’𑀢𑀺. 𑀭𑀢𑁆𑀢𑀺𑀫𑀧𑀺 𑀬𑀣𑀸 𑀤𑀺𑀯𑀁 𑀓𑀭𑁄𑀢𑀻𑀢𑀺 𑀅𑀢𑁆𑀢𑀦𑁄 𑀧𑀪𑀸𑀬 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀦𑁆𑀢𑀁 𑀭𑀢𑁆𑀢𑀺𑀪𑀸𑀕𑀫𑁆𑀧𑀺 𑀤𑀺𑀯𑀲𑀪𑀸𑀕𑀁 𑀯𑀺𑀬 𑀓𑀭𑁄𑀢𑀺. 𑀧𑀭𑀺𑀲𑀫𑀦𑁆𑀢𑀢𑁄 𑀅𑀦𑁆𑀢𑁄 𑀘𑁂𑀯 𑀩𑀳𑀺 𑀘 𑀲𑀼𑀤𑁆𑀥𑀢𑀸𑀬 𑀧𑀭𑀺𑀲𑀼𑀤𑁆𑀥𑀁. 𑀲𑀩𑁆𑀩𑀲𑁄 𑀫𑀮𑀸𑀪𑀸𑀯𑁂𑀦 𑀯𑀺𑀫𑀮𑀁. 𑀲𑀼𑀦𑁆𑀤𑀭𑀢𑀸𑀬 𑀲𑀼𑀪𑀁.

𑁮𑁯𑁧. 𑀩𑀳𑀼𑀧𑀤𑀼𑀫𑀯𑀺𑀘𑀺𑀢𑁆𑀭𑀧𑀼𑀡𑁆𑀟𑀭𑀻𑀓𑀦𑁆𑀢𑀺 𑀩𑀳𑀼𑀯𑀺𑀥𑀭𑀢𑁆𑀢𑀓𑀫𑀮𑀜𑁆𑀘𑁂𑀯 𑀯𑀺𑀘𑀺𑀢𑁆𑀢𑀯𑀡𑁆𑀡𑀲𑁂𑀢𑀓𑀫𑀮𑀜𑁆𑀘. 𑀲𑁂𑀢𑀓𑀫𑀮𑀁 𑀧𑀤𑀼𑀫𑀁, 𑀭𑀢𑁆𑀢𑀓𑀫𑀮𑀁 𑀧𑀼𑀡𑁆𑀟𑀭𑀻𑀓𑀦𑁆𑀢𑀺 𑀯𑀤𑀦𑁆𑀢𑀺. 𑀯𑁄𑀓𑀺𑀡𑁆𑀡𑀁 𑀓𑀼𑀲𑀼𑀫𑁂𑀳𑀻𑀢𑀺 𑀅𑀜𑁆𑀜𑁂𑀳𑀺 𑀘 𑀦𑀸𑀦𑀸𑀯𑀺𑀥𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀫𑁄𑀓𑀺𑀡𑁆𑀡𑀁. 𑀦𑁂𑀓𑀘𑀺𑀢𑁆𑀢𑀦𑁆𑀢𑀺 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀸𑀤𑀺𑀦𑀸𑀦𑀸𑀯𑀺𑀥𑀯𑀺𑀘𑀺𑀢𑁆𑀢𑀁. 𑀅𑀭𑀚𑀯𑀺𑀭𑀚𑀳𑁂𑀫𑀚𑀸𑀮𑀙𑀦𑁆𑀦𑀦𑁆𑀢𑀺 𑀲𑀬𑀁 𑀅𑀧𑀕𑀢𑀭𑀚𑀁 𑀯𑀺𑀭𑀚𑁂𑀦 𑀦𑀺𑀤𑁆𑀤𑁄𑀲𑁂𑀦 𑀓𑀜𑁆𑀘𑀦𑀚𑀸𑀮𑁂𑀦 𑀙𑀸𑀤𑀺𑀢𑀁.

𑁮𑁯𑁨. 𑀭𑀢𑁆𑀢𑀫𑁆𑀩𑀭𑀧𑀻𑀢𑀯𑀸𑀲𑀲𑀸𑀳𑀻𑀢𑀺 𑀭𑀢𑁆𑀢𑀯𑀢𑁆𑀣𑀸𑀳𑀺 𑀘𑁂𑀯 𑀧𑀻𑀢𑀯𑀢𑁆𑀣𑀸𑀳𑀺 𑀘. 𑀏𑀓𑀸 𑀳𑀺 𑀭𑀢𑁆𑀢𑀁 𑀤𑀺𑀩𑁆𑀩𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀻𑀢𑀁 𑀉𑀢𑁆𑀢𑀭𑀺𑀬𑀁 𑀓𑀭𑁄𑀢𑀺, 𑀅𑀧𑀭𑀸 𑀧𑀻𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀭𑀢𑁆𑀢𑀁 𑀉𑀢𑁆𑀢𑀭𑀺𑀬𑀁 𑀓𑀭𑁄𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀭𑀢𑁆𑀢𑀫𑁆𑀩𑀭𑀧𑀻𑀢𑀯𑀸𑀲𑀲𑀸𑀳𑀻’’𑀢𑀺. 𑀅𑀕𑀭𑀼𑀧𑀺𑀬𑀗𑁆𑀕𑀼𑀘𑀦𑁆𑀤𑀦𑀼𑀲𑁆𑀲𑀤𑀸𑀳𑀻𑀢𑀺 𑀅𑀕𑀭𑀼𑀕𑀦𑁆𑀥𑁂𑀦 𑀧𑀺𑀬𑀗𑁆𑀕𑀼𑀫𑀸𑀮𑀸𑀳𑀺 𑀘𑀦𑁆𑀤𑀦𑀕𑀦𑁆𑀥𑁂𑀳𑀺 𑀘 𑀉𑀲𑁆𑀲𑀤𑀸𑀳𑀺, 𑀉𑀲𑁆𑀲𑀦𑁆𑀦𑀤𑀺𑀩𑁆𑀩𑀸𑀕𑀭𑀼𑀕𑀦𑁆𑀥𑀸𑀤𑀺𑀓𑀸𑀳𑀻𑀢𑀺 𑀅𑀢𑁆𑀣𑁄. 𑀓𑀜𑁆𑀘𑀦𑀢𑀦𑀼𑀲𑀦𑁆𑀦𑀺𑀪𑀢𑁆𑀢𑀘𑀸𑀳𑀻𑀢𑀺 𑀓𑀦𑀓𑀲𑀤𑀺𑀲𑀲𑀼𑀔𑀼𑀫𑀘𑁆𑀙𑀯𑀻𑀳𑀺. 𑀧𑀭𑀺𑀧𑀽𑀭𑀦𑁆𑀢𑀺 𑀢𑀳𑀁 𑀢𑀳𑀁 𑀯𑀺𑀘𑀭𑀦𑁆𑀢𑀻𑀳𑀺 𑀲𑀗𑁆𑀕𑀻𑀢𑀺𑀧𑀲𑀼𑀢𑀸𑀳𑀺 𑀘 𑀧𑀭𑀺𑀧𑀼𑀡𑁆𑀡𑀁.

𑁮𑁯𑁩. 𑀩𑀳𑀼𑀓𑁂𑀢𑁆𑀣𑀸𑀢𑀺 𑀩𑀳𑀼𑀓𑀸 𑀏𑀢𑁆𑀣. 𑀅𑀦𑁂𑀓𑀯𑀡𑁆𑀡𑀸𑀢𑀺 𑀦𑀸𑀦𑀸𑀭𑀽𑀧𑀸. 𑀓𑀼𑀲𑀫𑀯𑀺𑀪𑀽𑀲𑀺𑀢𑀸𑀪𑀭𑀡𑀸𑀢𑀺 𑀯𑀺𑀲𑁂𑀲𑀢𑁄 𑀲𑀼𑀭𑀪𑀺𑀯𑀸𑀬𑀦𑀢𑁆𑀣𑀁 𑀤𑀺𑀩𑁆𑀩𑀓𑀼𑀲𑀼𑀫𑁂𑀳𑀺 𑀅𑀮𑀗𑁆𑀓𑀢𑀤𑀺𑀩𑁆𑀩𑀸𑀪𑀭𑀡𑀸. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀺𑀫𑀸𑀦𑁂. 𑀲𑀼𑀫𑀦𑀸𑀢𑀺 𑀲𑀼𑀦𑁆𑀤𑀭𑀫𑀦𑀸 𑀧𑀫𑀼𑀤𑀺𑀢𑀘𑀺𑀢𑁆𑀢𑀸. 𑀅𑀦𑀺𑀮𑀧𑀫𑀼𑀜𑁆𑀘𑀺𑀢𑀸 𑀧𑀯𑀦𑁆𑀢𑀺 𑀲𑀼𑀭𑀪𑀺𑀦𑁆𑀢𑀺 𑀅𑀦𑀺𑀮𑁂𑀦 𑀧𑀫𑀼𑀜𑁆𑀘𑀺𑀢𑀕𑀦𑁆𑀥𑀸𑀦𑀁 𑀧𑀼𑀧𑁆𑀨𑀸𑀦𑀁 𑀯𑀸𑀬𑀼𑀦𑀸 𑀯𑀺𑀫𑀼𑀢𑁆𑀢𑀧𑀢𑁆𑀢𑀧𑀼𑀝𑀁 𑀯𑀺𑀬 𑀯𑀺𑀩𑀦𑁆𑀥𑀢𑀸𑀬 𑀯𑀺𑀓𑀲𑀺𑀢𑀢𑀸𑀬 𑀘 𑀲𑀼𑀕𑀦𑁆𑀥𑀁 𑀧𑀯𑀸𑀬𑀦𑁆𑀢𑀺. ‘‘𑀅𑀦𑀺𑀮𑀧𑀥𑀽𑀧𑀺𑀢𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀯𑀸𑀢𑁂𑀦 𑀫𑀦𑁆𑀤𑀁 𑀆𑀯𑀼𑀬𑁆𑀳𑀫𑀸𑀦𑀸 𑀳𑁂𑀫𑀫𑀬𑀧𑀼𑀧𑁆𑀨𑀸𑀢𑀺 𑀅𑀢𑁆𑀣𑁄. 𑀓𑀦𑀓𑀘𑀻𑀭𑀓𑀸𑀤𑀻𑀳𑀺 𑀯𑁂𑀡𑀺𑀆𑀤𑀻𑀲𑀼 𑀑𑀢𑀢𑀢𑀸𑀬 𑀢𑀧𑀦𑀺𑀬𑀯𑀺𑀢𑀢𑀸. 𑀬𑁂𑀪𑀼𑀬𑁆𑀬𑁂𑀦 𑀓𑀜𑁆𑀘𑀦𑀸𑀪𑀭𑀡𑁂𑀳𑀺 𑀅𑀘𑁆𑀙𑀸𑀤𑀺𑀢𑀲𑀭𑀻𑀭𑀢𑀸𑀬 𑀲𑀼𑀯𑀡𑁆𑀡𑀙𑀦𑁆𑀦𑀸. 𑀦𑀭𑀦𑀸𑀭𑀺𑀬𑁄𑀢𑀺 𑀤𑁂𑀯𑀧𑀼𑀢𑁆𑀢𑀸 𑀤𑁂𑀯𑀥𑀻𑀢𑀭𑁄 𑀘 𑀩𑀳𑀼𑀓𑀸 𑀏𑀢𑁆𑀣 𑀢𑀯 𑀯𑀺𑀫𑀸𑀦𑁂𑀢𑀺 𑀤𑀲𑁆𑀲𑁂𑀢𑀺.

𑁮𑁯𑁪. 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄 𑀧𑀼𑀝𑁆𑀞𑁄𑀢𑀺 𑀧𑀼𑀘𑁆𑀙𑀺𑀢𑁄 𑀇𑀫𑀲𑁆𑀲 𑀫𑀳𑀸𑀚𑀦𑀲𑁆𑀲 𑀓𑀫𑁆𑀫𑀨𑀮𑀧𑀘𑁆𑀘𑀓𑁆𑀔𑀪𑀸𑀯𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁄 𑀤𑁂𑀯𑀧𑀼𑀢𑁆𑀢𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁮𑁯𑁫. ‘‘𑀲𑀬𑀫𑀺𑀥 𑀧𑀣𑁂 𑀲𑀫𑁂𑀘𑁆𑀘 𑀫𑀸𑀡𑀯𑁂𑀦, 𑀲𑀢𑁆𑀣𑀸𑀦𑀼𑀲𑀸𑀲𑀺 𑀅𑀦𑀼𑀓𑀫𑁆𑀧𑀫𑀸𑀦𑁄;

𑀢𑀯 𑀭𑀢𑀦𑀯𑀭𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸, 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘 𑀩𑁆𑀭𑀯𑀺𑀢𑁆𑀣 𑀙𑀢𑁆𑀢𑁄.

𑁮𑁯𑁬. ‘‘𑀚𑀺𑀦𑀯𑀭𑀧𑀯𑀭𑀁 𑀉𑀧𑁂𑀳𑀺 𑀲𑀭𑀡𑀁, 𑀥𑀫𑁆𑀫𑀜𑁆𑀘𑀸𑀧𑀺 𑀢𑀣𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀁;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁮𑁯𑁭. ‘‘𑀫𑀸 𑀘 𑀧𑀸𑀡𑀯𑀥𑀁 𑀯𑀺𑀯𑀺𑀥𑀁 𑀘𑀭𑀲𑁆𑀲𑀼 𑀅𑀲𑀼𑀘𑀺𑀁,

𑀦 𑀳𑀺 𑀧𑀸𑀡𑁂𑀲𑀼 𑀅𑀲𑀜𑁆𑀜𑀢𑀁 𑀅𑀯𑀡𑁆𑀡𑀬𑀺𑀁𑀲𑀼 𑀲𑀧𑁆𑀧𑀜𑁆𑀜𑀸;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁮𑁯𑁮. ‘‘𑀫𑀸 𑀘 𑀧𑀭𑀚𑀦𑀲𑁆𑀲 𑀭𑀓𑁆𑀔𑀺𑀢𑀫𑁆𑀧𑀺, 𑀆𑀤𑀸𑀢𑀩𑁆𑀩𑀫𑀫𑀜𑁆𑀜𑀺𑀣𑁄 𑀅𑀤𑀺𑀦𑁆𑀦𑀁;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁮𑁯𑁯. ‘‘𑀫𑀸 𑀘 𑀧𑀭𑀚𑀦𑀲𑁆𑀲 𑀭𑀓𑁆𑀔𑀺𑀢𑀸𑀬𑁄, 𑀧𑀭𑀪𑀭𑀺𑀬𑀸 𑀅𑀕𑀫𑀸 𑀅𑀦𑀭𑀺𑀬𑀫𑁂𑀢𑀁;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁯𑁦𑁦. ‘‘𑀫𑀸 𑀘 𑀯𑀺𑀢𑀣𑀁 𑀅𑀜𑁆𑀜𑀣𑀸 𑀅𑀪𑀸𑀡𑀺, 𑀦 𑀳𑀺 𑀫𑀼𑀲𑀸𑀯𑀸𑀤𑀁 𑀅𑀯𑀡𑁆𑀡𑀬𑀺𑀁𑀲𑀼 𑀲𑀧𑁆𑀧𑀜𑁆𑀜𑀸;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁯𑁦𑁧. ‘‘𑀬𑁂𑀦 𑀘 𑀧𑀼𑀭𑀺𑀲𑀲𑁆𑀲 𑀅𑀧𑁂𑀢𑀺 𑀲𑀜𑁆𑀜𑀸, 𑀢𑀁 𑀫𑀚𑁆𑀚𑀁 𑀧𑀭𑀺𑀯𑀚𑁆𑀚𑀬𑀲𑁆𑀲𑀼 𑀲𑀩𑁆𑀩𑀁;

𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂, 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀁.

𑁯𑁦𑁨. ‘‘𑀲𑁆𑀯𑀸𑀳𑀁 𑀇𑀥 𑀧𑀜𑁆𑀘 𑀲𑀺𑀓𑁆𑀔𑀸 𑀓𑀭𑀺𑀢𑁆𑀯𑀸, 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂;

𑀤𑁆𑀯𑁂𑀧𑀣𑀫𑀕𑀫𑀸𑀲𑀺𑀁 𑀘𑁄𑀭𑀫𑀚𑁆𑀛𑁂, 𑀢𑁂 𑀫𑀁 𑀢𑀢𑁆𑀣 𑀯𑀥𑀺𑀁𑀲𑀼 𑀪𑁄𑀕𑀳𑁂𑀢𑀼.

𑁯𑁦𑁩. ‘‘𑀏𑀢𑁆𑀢𑀓𑀫𑀺𑀤𑀁 𑀅𑀦𑀼𑀲𑁆𑀲𑀭𑀸𑀫𑀺 𑀓𑀼𑀲𑀮𑀁, 𑀢𑀢𑁄 𑀧𑀭𑀁 𑀦 𑀫𑁂 𑀯𑀺𑀚𑁆𑀚𑀢𑀺 𑀅𑀜𑁆𑀜𑀁;

𑀢𑁂𑀦 𑀲𑀼𑀘𑀭𑀺𑀢𑁂𑀦 𑀓𑀫𑁆𑀫𑀼𑀦𑀸𑀳𑀁, 𑀉𑀧𑁆𑀧𑀦𑁆𑀦𑁄 𑀢𑀺𑀤𑀺𑀯𑁂𑀲𑀼 𑀓𑀸𑀫𑀓𑀸𑀫𑀻.

𑁯𑁦𑁪. ‘‘𑀧𑀲𑁆𑀲 𑀔𑀡𑀫𑀼𑀳𑀼𑀢𑁆𑀢𑀲𑀜𑁆𑀜𑀫𑀲𑁆𑀲, 𑀅𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀧𑀸𑀓𑀁;

𑀚𑀮𑀫𑀺𑀯 𑀬𑀲𑀲𑀸 𑀲𑀫𑁂𑀓𑁆𑀔𑀫𑀸𑀦𑀸, 𑀩𑀳𑀼𑀓𑀸𑀫𑀁 𑀧𑀺𑀳𑀬𑀦𑁆𑀢𑀺 𑀳𑀻𑀦𑀓𑀫𑁆𑀫𑀸.

𑁯𑁦𑁫. ‘‘𑀧𑀲𑁆𑀲 𑀓𑀢𑀺𑀧𑀬𑀸𑀬 𑀤𑁂𑀲𑀦𑀸𑀬, 𑀲𑀼𑀕𑀢𑀺𑀜𑁆𑀘𑀫𑁆𑀳𑀺 𑀕𑀢𑁄 𑀲𑀼𑀔𑀜𑁆𑀘 𑀧𑀢𑁆𑀢𑁄;

𑀬𑁂 𑀘 𑀢𑁂 𑀲𑀢𑀢𑀁 𑀲𑀼𑀡𑀦𑁆𑀢𑀺 𑀥𑀫𑁆𑀫𑀁, 𑀫𑀜𑁆𑀜𑁂 𑀢𑁂 𑀅𑀫𑀢𑀁 𑀨𑀼𑀲𑀦𑁆𑀢𑀺 𑀔𑁂𑀫𑀁.

𑁯𑁦𑁬. ‘‘𑀅𑀧𑁆𑀧𑀫𑁆𑀧𑀺 𑀓𑀢𑀁 𑀫𑀳𑀸𑀯𑀺𑀧𑀸𑀓𑀁, 𑀯𑀺𑀧𑀼𑀮𑀁 𑀳𑁄𑀢𑀺 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂;

𑀧𑀲𑁆𑀲 𑀓𑀢𑀧𑀼𑀜𑁆𑀜𑀢𑀸𑀬 𑀙𑀢𑁆𑀢𑁄, 𑀑𑀪𑀸𑀲𑁂𑀢𑀺 𑀧𑀣𑀯𑀺𑀁 𑀬𑀣𑀸𑀧𑀺 𑀲𑀽𑀭𑀺𑀬𑁄.

𑁯𑁦𑁭. ‘‘𑀓𑀺𑀫𑀺𑀤𑀁 𑀓𑀼𑀲𑀮𑀁 𑀓𑀺𑀫𑀸𑀘𑀭𑁂𑀫, 𑀇𑀘𑁆𑀘𑁂𑀓𑁂 𑀳𑀺 𑀲𑀫𑁂𑀘𑁆𑀘 𑀫𑀦𑁆𑀢𑀬𑀦𑁆𑀢𑀺;

𑀢𑁂 𑀫𑀬𑀁 𑀧𑀼𑀦𑀭𑁂𑀯 𑀮𑀤𑁆𑀥 𑀫𑀸𑀦𑀼𑀲𑀢𑁆𑀢𑀁, 𑀧𑀝𑀺𑀧𑀦𑁆𑀦𑀸 𑀯𑀺𑀳𑀭𑁂𑀫𑀼 𑀲𑀻𑀮𑀯𑀦𑁆𑀢𑁄.

𑁯𑁦𑁮. ‘‘𑀩𑀳𑀼𑀓𑀸𑀭𑁄 𑀅𑀦𑀼𑀓𑀫𑁆𑀧𑀓𑁄 𑀘 𑀲𑀢𑁆𑀣𑀸, 𑀇𑀢𑀺 𑀫𑁂 𑀲𑀢𑀺 𑀅𑀕𑀫𑀸 𑀤𑀺𑀯𑀸 𑀤𑀺𑀯𑀲𑁆𑀲;

𑀲𑁆𑀯𑀸𑀳𑀁 𑀉𑀧𑀕𑀢𑁄𑀫𑁆𑀳𑀺 𑀲𑀘𑁆𑀘𑀦𑀸𑀫𑀁, 𑀅𑀦𑀼𑀓𑀫𑁆𑀧𑀲𑁆𑀲𑀼 𑀧𑀼𑀦𑀧𑀺 𑀲𑀼𑀡𑁂𑀫𑁆𑀳 𑀥𑀫𑁆𑀫𑀁.

𑁯𑁦𑁯. ‘‘𑀬𑁂 𑀘𑀺𑀥 𑀧𑀚𑀳𑀦𑁆𑀢𑀺 𑀓𑀸𑀫𑀭𑀸𑀕𑀁, 𑀪𑀯𑀭𑀸𑀕𑀸𑀦𑀼𑀲𑀬𑀜𑁆𑀘 𑀧𑀳𑀸𑀬 𑀫𑁄𑀳𑀁;

𑀦 𑀘 𑀢𑁂 𑀧𑀼𑀦 𑀫𑀼𑀧𑁂𑀦𑁆𑀢𑀺 𑀕𑀩𑁆𑀪𑀲𑁂𑀬𑁆𑀬𑀁, 𑀧𑀭𑀺𑀦𑀺𑀩𑁆𑀩𑀸𑀦𑀕𑀢𑀸 𑀳𑀺 𑀲𑀻𑀢𑀺𑀪𑀽𑀢𑀸’’𑀢𑀺.

𑁮𑁯𑁫. 𑀢𑀢𑁆𑀣 𑀲𑀬𑀫𑀺𑀥 𑀧𑀣𑁂 𑀲𑀫𑁂𑀘𑁆𑀘 𑀫𑀸𑀡𑀯𑁂𑀦𑀸𑀢𑀺 𑀇𑀥 𑀇𑀫𑀲𑁆𑀫𑀺𑀁 𑀧𑀣𑁂 𑀫𑀳𑀸𑀫𑀕𑁆𑀕𑁂 𑀲𑀬𑀫𑁂𑀯 𑀉𑀧𑀕𑀢𑁂𑀦 𑀫𑀸𑀡𑀯𑁂𑀦 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁂𑀦 𑀲𑀫𑁂𑀘𑁆𑀘 𑀲𑀫𑀸𑀕𑀦𑁆𑀢𑁆𑀯𑀸. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀲𑀢𑁆𑀢𑀸𑀦𑀁 𑀬𑀣𑀸𑀭𑀳𑀫𑀦𑀼𑀲𑀸𑀲𑀦𑀢𑁄 𑀲𑀢𑁆𑀣𑀸 𑀪𑀕𑀯𑀸, 𑀢𑁆𑀯𑀁 𑀬𑀁 𑀫𑀸𑀡𑀯𑀁 𑀬𑀣𑀸𑀥𑀫𑁆𑀫𑀁 𑀅𑀦𑀼𑀲𑀸𑀲𑀺 𑀅𑀦𑀼𑀓𑀫𑁆𑀧𑀫𑀸𑀦𑁄 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄, 𑀢𑀯 𑀭𑀢𑀦𑀯𑀭𑀲𑁆𑀲 𑀅𑀕𑁆𑀕𑀭𑀢𑀦𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀇𑀢𑀺 𑀏𑀯𑀁 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺, 𑀲𑁄 𑀙𑀢𑁆𑀢𑁄 𑀙𑀢𑁆𑀢𑀦𑀸𑀫𑀓𑁄 𑀫𑀸𑀡𑀯𑁄 𑀩𑁆𑀭𑀯𑀺𑀢𑁆𑀣 𑀓𑀣𑁂𑀲𑀻𑀢𑀺 𑀧𑀤𑀬𑁄𑀚𑀦𑀸.

𑁮𑁯𑁬. 𑀏𑀯𑀁 𑀬𑀣𑀸𑀧𑀼𑀘𑁆𑀙𑀺𑀢𑀁 𑀓𑀫𑁆𑀫𑀁 𑀓𑀸𑀭𑀡𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀲𑀭𑀽𑀧𑀢𑁄 𑀯𑀺𑀪𑀸𑀕𑀢𑁄 𑀘 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸𑀭𑀸 𑀲𑀫𑀸𑀤𑀧𑀺𑀢𑀪𑀸𑀯𑀁 𑀅𑀢𑁆𑀢𑀦𑀸 𑀘 𑀢𑀢𑁆𑀣 𑀧𑀘𑁆𑀙𑀸 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀺𑀦𑀯𑀭𑀧𑀯𑀭’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑁄𑀢𑀺 𑀧𑀞𑀫𑀁 𑀅𑀯𑁄𑀘𑀳𑀁 𑀪𑀦𑁆𑀢𑁂𑀢𑀺 𑀪𑀦𑁆𑀢𑁂 𑀪𑀕𑀯𑀸 ‘‘𑀲𑀭𑀡𑀕𑀫𑀦𑀁 𑀚𑀸𑀦𑀸𑀲𑀻’’𑀢𑀺 𑀢𑀬𑀸 𑀯𑀼𑀢𑁆𑀢𑁄 ‘‘𑀦𑁄’’𑀢𑀺 𑀦 ‘‘𑀚𑀸𑀦𑀸𑀫𑀻’’𑀢𑀺 𑀧𑀞𑀫𑀁 𑀅𑀯𑁄𑀘𑀁 𑀅𑀳𑀁. 𑀧𑀘𑁆𑀙𑀸 𑀢𑁂 𑀯𑀘𑀦𑀁 𑀢𑀣𑁂𑀯𑀓𑀸𑀲𑀺𑀦𑁆𑀢𑀺 𑀧𑀘𑁆𑀙𑀸 𑀢𑀬𑀸 𑀯𑀼𑀢𑁆𑀢𑀁 𑀓𑀣𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀢𑀯 𑀯𑀘𑀦𑀁 𑀢𑀣𑁂𑀯 𑀅𑀓𑀸𑀲𑀺𑀁 𑀧𑀝𑀺𑀧𑀚𑁆𑀚𑀺𑀁, 𑀢𑀻𑀡𑀺𑀧𑀺 𑀲𑀭𑀡𑀸𑀦𑀺 𑀉𑀧𑀕𑀘𑁆𑀙𑀺𑀦𑁆𑀢𑀺 𑀅𑀢𑁆𑀣𑁄.

𑁮𑁯𑁭. 𑀯𑀺𑀯𑀺𑀥𑀦𑁆𑀢𑀺 𑀉𑀘𑁆𑀘𑀸𑀯𑀘𑀁, 𑀅𑀧𑁆𑀧𑀲𑀸𑀯𑀚𑁆𑀚𑀁 𑀫𑀳𑀸𑀲𑀸𑀯𑀚𑁆𑀚𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀫𑀸 𑀘𑀭𑀲𑁆𑀲𑀽𑀢𑀺 𑀫𑀸 𑀅𑀓𑀸𑀲𑀺. 𑀅𑀲𑀼𑀘𑀺𑀦𑁆𑀢𑀺 𑀓𑀺𑀮𑁂𑀲𑀸𑀲𑀼𑀘𑀺𑀫𑀺𑀲𑁆𑀲𑀢𑀸𑀬 𑀦 𑀲𑀼𑀘𑀺𑀁. 𑀧𑀸𑀡𑁂𑀲𑀼 𑀅𑀲𑀜𑁆𑀜𑀢𑀦𑁆𑀢𑀺 𑀧𑀸𑀡𑀖𑀸𑀢𑀢𑁄 𑀅𑀯𑀺𑀭𑀢𑀁. 𑀦 𑀳𑀺 𑀅𑀯𑀡𑁆𑀡𑀬𑀺𑀁𑀲𑀽𑀢𑀺 𑀦 𑀳𑀺 𑀯𑀡𑁆𑀡𑀬𑀦𑁆𑀢𑀺. 𑀧𑀘𑁆𑀘𑀽𑀧𑁆𑀧𑀦𑁆𑀦𑀓𑀸𑀮𑀢𑁆𑀣𑁂 𑀳𑀺 𑀇𑀤𑀁 𑀅𑀢𑀻𑀢𑀓𑀸𑀮𑀯𑀘𑀦𑀁. 𑀅𑀣 𑀯𑀸 ‘‘𑀅𑀯𑀡𑁆𑀡𑀬𑀺𑀁𑀲𑀽’’𑀢𑀺 𑀏𑀓𑀤𑁂𑀲𑁂𑀦 𑀲𑀓𑀮𑀲𑁆𑀲 𑀓𑀸𑀮𑀲𑁆𑀲 𑀉𑀧𑀮𑀓𑁆𑀔𑀡𑀁, 𑀢𑀲𑁆𑀫𑀸 𑀬𑀣𑀸 𑀦 𑀯𑀡𑁆𑀡𑀬𑀺𑀁𑀲𑀼 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀏𑀯𑀁 𑀏𑀢𑀭𑀳𑀺𑀧𑀺 𑀦 𑀯𑀡𑁆𑀡𑀬𑀦𑁆𑀢𑀺, 𑀅𑀦𑀸𑀕𑀢𑁂𑀧𑀺 𑀦 𑀯𑀡𑁆𑀡𑀬𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁮𑁯𑁮-𑁯𑁦𑁦. 𑀧𑀭𑀚𑀦𑀲𑁆𑀲 𑀭𑀓𑁆𑀔𑀺𑀢𑀦𑁆𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀯𑀢𑁆𑀣𑀼. 𑀢𑁂𑀦𑀸𑀳 ‘‘𑀅𑀤𑀺𑀦𑁆𑀦’’𑀦𑁆𑀢𑀺. 𑀫𑀸 𑀅𑀕𑀫𑀸𑀢𑀺 𑀫𑀸 𑀅𑀚𑁆𑀛𑀸𑀘𑀭𑀺. 𑀯𑀺𑀢𑀣𑀦𑁆𑀢𑀺 𑀅𑀢𑀣𑀁, 𑀫𑀼𑀲𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸𑀢𑀺 𑀅𑀜𑁆𑀜𑀣𑀸𑀯, 𑀯𑀺𑀢𑀣𑀲𑀜𑁆𑀜𑀻 𑀏𑀯𑀁 𑀯𑀺𑀢𑀣𑀦𑁆𑀢𑀺 𑀚𑀸𑀦𑀦𑁆𑀢𑁄 𑀏𑀯𑀁 𑀫𑀸 𑀪𑀡𑀻𑀢𑀺 𑀅𑀢𑁆𑀣𑁄.

𑁯𑁦𑁧. 𑀬𑁂𑀦𑀸𑀢𑀺 𑀬𑁂𑀦 𑀫𑀚𑁆𑀚𑁂𑀦, 𑀧𑀻𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑁂𑀢𑀻𑀢𑀺 𑀯𑀺𑀕𑀘𑁆𑀙𑀢𑀺. 𑀲𑀜𑁆𑀜𑀸𑀢𑀺 𑀥𑀫𑁆𑀫𑀲𑀜𑁆𑀜𑀸, 𑀮𑁄𑀓𑀲𑀜𑁆𑀜𑀸 𑀏𑀯 𑀯𑀸. 𑀲𑀩𑁆𑀩𑀦𑁆𑀢𑀺 𑀅𑀦𑀯𑀲𑁂𑀲𑀁, 𑀩𑀻𑀚𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄.

𑁯𑁦𑁨. 𑀲𑁆𑀯𑀸𑀳𑀦𑁆𑀢𑀺 𑀲𑁄 𑀢𑀤𑀸 𑀙𑀢𑁆𑀢𑀫𑀸𑀡𑀯𑀪𑀽𑀢𑁄 𑀅𑀳𑀁. 𑀇𑀥 𑀇𑀫𑀲𑁆𑀫𑀺𑀁 𑀫𑀕𑁆𑀕𑀧𑀤𑁂𑀲𑁂, 𑀇𑀫𑀲𑁆𑀫𑀺𑀁 𑀯𑀸 𑀢𑀯 𑀲𑀸𑀲𑀦𑁂. 𑀢𑁂𑀦𑀸𑀳 ‘‘𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂’’𑀢𑀺. 𑀧𑀜𑁆𑀘 𑀲𑀺𑀓𑁆𑀔𑀸𑀢𑀺 𑀧𑀜𑁆𑀘 𑀲𑀻𑀮𑀸𑀦𑀺. 𑀓𑀭𑀺𑀢𑁆𑀯𑀸𑀢𑀺 𑀆𑀤𑀺𑀬𑀺𑀢𑁆𑀯𑀸, 𑀅𑀥𑀺𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄. 𑀤𑁆𑀯𑁂𑀧𑀣𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀕𑀸𑀫𑀲𑀻𑀫𑀸𑀦𑀁 𑀯𑁂𑀫𑀚𑁆𑀛𑀪𑀽𑀢𑀁 𑀧𑀣𑀁, 𑀲𑀻𑀫𑀦𑁆𑀢𑀭𑀺𑀓𑀧𑀣𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀢𑀺 𑀢𑁂 𑀘𑁄𑀭𑀸. 𑀢𑀢𑁆𑀣𑀸𑀢𑀺 𑀲𑀻𑀫𑀦𑁆𑀢𑀭𑀺𑀓𑀫𑀕𑁆𑀕𑁂. 𑀪𑁄𑀕𑀳𑁂𑀢𑀽𑀢𑀺 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀦𑀺𑀫𑀺𑀢𑁆𑀢𑀁.

𑁯𑁦𑁩. 𑀢𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀓𑀼𑀲𑀮𑀢𑁄 𑀧𑀭𑀁 𑀉𑀧𑀭𑀺 𑀅𑀜𑁆𑀜𑀁 𑀓𑀼𑀲𑀮𑀁 𑀦 𑀯𑀺𑀚𑁆𑀚𑀢𑀺 𑀦 𑀉𑀧𑀮𑀩𑁆𑀪𑀢𑀺, 𑀬𑀫𑀳𑀁 𑀅𑀦𑀼𑀲𑁆𑀲𑀭𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀫𑀓𑀸𑀫𑀻𑀢𑀺 𑀬𑀣𑀺𑀘𑁆𑀙𑀺𑀢𑀓𑀸𑀫𑀕𑀼𑀡𑀲𑀫𑀗𑁆𑀕𑀻.

𑁯𑁦𑁪. 𑀔𑀡𑀫𑀼𑀳𑀼𑀢𑁆𑀢𑀲𑀜𑁆𑀜𑀫𑀲𑁆𑀲𑀸𑀢𑀺 𑀔𑀡𑀫𑀼𑀳𑀼𑀢𑁆𑀢𑀫𑀢𑁆𑀢𑀁 𑀧𑀯𑀢𑁆𑀢𑀲𑀻𑀮𑀲𑁆𑀲. 𑀅𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀬𑀣𑀸𑀥𑀺𑀕𑀢𑀲𑁆𑀲 𑀨𑀮𑀲𑁆𑀲 𑀅𑀦𑀼𑀭𑀽𑀧𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲 𑀪𑀕𑀯𑀸 𑀧𑀲𑁆𑀲, 𑀢𑀼𑀬𑁆𑀳𑀁 𑀑𑀯𑀸𑀤𑀥𑀫𑁆𑀫𑀲𑁆𑀲 𑀯𑀸 𑀅𑀦𑀼𑀭𑀽𑀧𑀸𑀬 𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀲𑀭𑀡𑀕𑀫𑀦𑀲𑁆𑀲 𑀲𑀻𑀮𑀲𑀫𑀸𑀤𑀸𑀦𑀲𑁆𑀲 𑀘𑀸𑀢𑀺 𑀅𑀢𑁆𑀣𑁄. 𑀚𑀮𑀫𑀺𑀯 𑀬𑀲𑀲𑀸𑀢𑀺 𑀇𑀤𑁆𑀥𑀺𑀬𑀸 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀚𑀮𑀦𑁆𑀢𑀁 𑀯𑀺𑀬. 𑀲𑀫𑁂𑀓𑁆𑀔𑀫𑀸𑀦𑀸𑀢𑀺 𑀧𑀲𑁆𑀲𑀦𑁆𑀢𑀸. 𑀩𑀳𑀼𑀓𑀸𑀢𑀺 𑀩𑀳𑀯𑁄. 𑀧𑀺𑀳𑀬𑀦𑁆𑀢𑀻𑀢𑀺 ‘‘𑀓𑀣𑀁 𑀦𑀼 𑀔𑁄 𑀫𑀬𑀁 𑀏𑀤𑀺𑀲𑀸 𑀪𑀯𑁂𑀬𑁆𑀬𑀸𑀫𑀸’’𑀢𑀺 𑀧𑀢𑁆𑀣𑁂𑀦𑁆𑀢𑀺. 𑀳𑀻𑀦𑀓𑀫𑁆𑀫𑀸𑀢𑀺 𑀫𑀫 𑀲𑀫𑁆𑀧𑀢𑁆𑀢𑀺𑀢𑁄 𑀦𑀺𑀳𑀻𑀦𑀪𑁄𑀕𑀸.

𑁯𑁦𑁫. 𑀓𑀢𑀺𑀧𑀬𑀸𑀬𑀸𑀢𑀺 𑀅𑀧𑁆𑀧𑀺𑀓𑀸𑀬. 𑀬𑁂𑀢𑀺 𑀬𑁂 𑀪𑀺𑀓𑁆𑀔𑀽 𑀘𑁂𑀯 𑀉𑀧𑀸𑀲𑀓𑀸𑀤𑀬𑁄 𑀘. 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁂. 𑀢𑁂𑀢𑀺 𑀢𑀯. 𑀲𑀢𑀢𑀦𑁆𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂.

𑁯𑁦𑁬. 𑀯𑀺𑀧𑀼𑀮𑀦𑁆𑀢𑀺 𑀉𑀴𑀸𑀭𑀨𑀮𑀁 𑀯𑀺𑀧𑀼𑀮𑀸𑀦𑀼𑀪𑀸𑀯𑀁. 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂𑀢𑀺 𑀢𑀣𑀸𑀕𑀢𑀲𑁆𑀲 𑀲𑀸𑀲𑀦𑁂 𑀑𑀯𑀸𑀤𑁂 𑀞𑀢𑁆𑀯𑀸 𑀓𑀢𑀦𑁆𑀢𑀺 𑀬𑁄𑀚𑀦𑀸. 𑀏𑀯𑀁 𑀅𑀦𑀼𑀤𑁆𑀤𑁂𑀲𑀺𑀓𑀯𑀲𑁂𑀦 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀲𑁆𑀲𑀸𑀢𑀺 𑀪𑀕𑀯𑀦𑁆𑀢𑀁 𑀯𑀤𑀢𑀺, 𑀅𑀢𑁆𑀢𑀸𑀦𑀫𑁂𑀯 𑀯𑀸 𑀅𑀜𑁆𑀜𑀁 𑀯𑀺𑀬 𑀘 𑀓𑀢𑁆𑀯𑀸 𑀯𑀤𑀢𑀺.

𑁯𑁦𑁭. 𑀓𑀺𑀫𑀺𑀤𑀁 𑀓𑀼𑀲𑀮𑀁 𑀓𑀺𑀫𑀸𑀘𑀭𑁂𑀫𑀸𑀢𑀺 𑀓𑀼𑀲𑀮𑀁 𑀦𑀸𑀫𑁂𑀢𑀁 𑀓𑀺𑀁𑀲𑀪𑀸𑀯𑀁 𑀓𑀻𑀤𑀺𑀲𑀁, 𑀓𑀣𑀁 𑀯𑀸 𑀢𑀁 𑀆𑀘𑀭𑁂𑀬𑁆𑀬𑀸𑀫. 𑀇𑀘𑁆𑀘𑁂𑀓𑁂 𑀳𑀺 𑀲𑀫𑁂𑀘𑁆𑀘 𑀫𑀦𑁆𑀢𑀬𑀦𑁆𑀢𑀻𑀢𑀺 𑀏𑀯𑀫𑁂𑀓𑁂 𑀲𑀫𑁂𑀘𑁆𑀘 𑀲𑀫𑀸𑀕𑀦𑁆𑀢𑁆𑀯𑀸 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀸 𑀯𑀺𑀬 𑀲𑀺𑀦𑁂𑀭𑀼𑀁 𑀉𑀓𑁆𑀔𑀺𑀧𑀦𑁆𑀢𑀸 𑀯𑀺𑀬 𑀘 𑀲𑀼𑀤𑀼𑀓𑁆𑀓𑀭𑀁 𑀓𑀢𑁆𑀯𑀸 𑀫𑀦𑁆𑀢𑀬𑀦𑁆𑀢𑀺 𑀯𑀺𑀘𑀸𑀭𑁂𑀦𑁆𑀢𑀺, 𑀫𑀬𑀁 𑀧𑀦 𑀅𑀓𑀺𑀘𑁆𑀙𑁂𑀦𑁂𑀯 𑀧𑀼𑀦𑀧𑀺 𑀓𑀼𑀲𑀮𑀁 𑀆𑀘𑀭𑁂𑀬𑁆𑀬𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀸𑀳 ‘‘𑀫𑀬’’𑀦𑁆𑀢𑀺𑀆𑀤𑀺.

𑁯𑁦𑁮. 𑀩𑀳𑀼𑀓𑀸𑀭𑁄𑀢𑀺 𑀩𑀳𑀽𑀧𑀓𑀸𑀭𑁄, 𑀫𑀳𑀸𑀉𑀧𑀓𑀸𑀭𑁄 𑀯𑀸. 𑀅𑀦𑀼𑀓𑀫𑁆𑀧𑀓𑁄𑀢𑀺 𑀓𑀸𑀭𑀼𑀡𑀺𑀓𑁄. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀇𑀢𑀻𑀢𑀺 𑀏𑀯𑀁, 𑀪𑀕𑀯𑀢𑁄 𑀅𑀢𑁆𑀢𑀦𑀺 𑀧𑀝𑀺𑀧𑀦𑁆𑀦𑀸𑀓𑀸𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀫𑁂 𑀲𑀢𑀻𑀢𑀺 𑀫𑀬𑀺 𑀲𑀢𑀺 𑀯𑀺𑀚𑁆𑀚𑀫𑀸𑀦𑁂, 𑀘𑁄𑀭𑁂𑀳𑀺 𑀅𑀯𑀥𑀺𑀢𑁂 𑀏𑀯𑀸𑀢𑀺 𑀅𑀢𑁆𑀣𑁄. 𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲𑀧𑀺 𑀤𑀺𑀯𑀸, 𑀓𑀸𑀮𑀲𑁆𑀲𑁂𑀯𑀸𑀢𑀺 𑀅𑀢𑁆𑀣𑁄. 𑀲𑁆𑀯𑀸𑀳𑀦𑁆𑀢𑀺 𑀲𑁄 𑀙𑀢𑁆𑀢𑀫𑀸𑀡𑀯𑀪𑀽𑀢𑁄 𑀅𑀳𑀁. 𑀲𑀘𑁆𑀘𑀦𑀸𑀫𑀦𑁆𑀢𑀺 ‘‘𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸𑀫𑁂𑀳𑀺 𑀅𑀯𑀺𑀢𑀣𑀦𑀸𑀫𑀁 𑀪𑀽𑀢𑀢𑁆𑀣𑀦𑀸𑀫𑀁. 𑀅𑀦𑀼𑀓𑀫𑁆𑀧𑀲𑁆𑀲𑀽𑀢𑀺 𑀅𑀦𑀼𑀕𑁆𑀕𑀡𑁆𑀳𑀸𑀳𑀺. 𑀧𑀼𑀦𑀧𑀻𑀢𑀺 𑀪𑀺𑀬𑁆𑀬𑁄𑀧𑀺 𑀲𑀼𑀡𑁂𑀫𑀼, 𑀢𑀯 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬𑀸𑀫𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀤𑁂𑀯𑀧𑀼𑀢𑁆𑀢𑁄 𑀲𑀩𑁆𑀩𑀫𑁂𑀢𑀁 𑀓𑀢𑀜𑁆𑀜𑀼𑀢𑀸𑀪𑀸𑀯𑁂 𑀞𑀢𑁆𑀯𑀸 𑀲𑀢𑁆𑀣𑀼 𑀧𑀬𑀺𑀭𑀼𑀧𑀸𑀲𑀦𑁂 𑀘 𑀥𑀫𑁆𑀫𑀲𑁆𑀲𑀯𑀦𑁂 𑀘 𑀅𑀢𑀺𑀢𑁆𑀢𑀺𑀫𑁂𑀯 𑀤𑀻𑀧𑁂𑀦𑁆𑀢𑁄 𑀯𑀤𑀢𑀺. 𑀪𑀕𑀯𑀸 𑀤𑁂𑀯𑀧𑀼𑀢𑁆𑀢𑀲𑁆𑀲 𑀘 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬 𑀘 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀺𑀓𑀣𑀁 𑀓𑀣𑁂𑀲𑀺. 𑀅𑀣 𑀦𑁂𑀲𑀁 𑀅𑀮𑁆𑀮𑀘𑀺𑀢𑁆𑀢𑀢𑀁 𑀜𑀢𑁆𑀯𑀸 𑀲𑀸𑀫𑀼𑀓𑁆𑀓𑀁𑀲𑀺𑀓𑀁 𑀥𑀫𑁆𑀫𑀤𑁂𑀲𑀦𑀁 𑀧𑀓𑀸𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀧𑀼𑀢𑁆𑀢𑁄 𑀘𑁂𑀯 𑀫𑀸𑀢𑀸𑀧𑀺𑀢𑀭𑁄 𑀘𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀫𑀳𑀢𑁄 𑀘 𑀚𑀦𑀓𑀸𑀬𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑁯𑁦𑁯. 𑀧𑀞𑀫𑀨𑀮𑁂 𑀧𑀢𑀺𑀝𑁆𑀞𑀺𑀢𑁄 𑀤𑁂𑀯𑀧𑀼𑀢𑁆𑀢𑁄 𑀉𑀧𑀭𑀺𑀫𑀕𑁆𑀕𑁂𑀲𑀼 𑀅𑀢𑁆𑀢𑀦𑁄 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀁, 𑀢𑀤𑀥𑀺𑀕𑀫𑀲𑁆𑀲 𑀘 𑀫𑀳𑀸𑀦𑀺𑀲𑀁𑀲𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑁂 𑀘𑀺𑀥 𑀧𑀚𑀳𑀦𑁆𑀢𑀺 𑀓𑀸𑀫𑀭𑀸𑀕’’𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀞𑀺𑀢𑀸 𑀧𑀚𑀳𑀦𑁆𑀢𑀺 𑀅𑀦𑀯𑀲𑁂𑀲𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺 𑀓𑀸𑀫𑀭𑀸𑀕𑀁, 𑀦 𑀘 𑀢𑁂 𑀧𑀼𑀦 𑀉𑀧𑁂𑀦𑁆𑀢𑀺 𑀕𑀩𑁆𑀪𑀲𑁂𑀬𑁆𑀬𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀬𑁂 𑀘 𑀧𑀦 𑀧𑀳𑀸𑀬 𑀫𑁄𑀳𑀁 𑀲𑀩𑁆𑀩𑀲𑁄 𑀲𑀫𑀼𑀕𑁆𑀖𑀸𑀢𑁂𑀢𑁆𑀯𑀸 𑀪𑀯𑀭𑀸𑀕𑀸𑀦𑀼𑀲𑀬𑀜𑁆𑀘 𑀧𑀚𑀳𑀦𑁆𑀢𑀺, 𑀢𑁂 𑀧𑀼𑀦 𑀉𑀧𑁂𑀦𑁆𑀢𑀺 𑀕𑀩𑁆𑀪𑀲𑁂𑀬𑁆𑀬𑀦𑁆𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀓𑀲𑁆𑀫𑀸? 𑀧𑀭𑀺𑀦𑀺𑀩𑁆𑀩𑀸𑀦𑀕𑀢𑀸 𑀳𑀺 𑀲𑀻𑀢𑀺𑀪𑀽𑀢𑀸, 𑀢𑁂 𑀳𑀺 𑀉𑀢𑁆𑀢𑀫𑀧𑀼𑀭𑀺𑀲𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀕𑀢𑀸 𑀏𑀯𑀁 𑀇𑀥𑁂𑀯 𑀲𑀩𑁆𑀩𑀯𑁂𑀤𑀬𑀺𑀢𑀸𑀦𑀁 𑀲𑀩𑁆𑀩𑀧𑀭𑀺𑀴𑀸𑀳𑀸𑀦𑀁 𑀩𑁆𑀬𑀦𑁆𑀢𑀺𑀪𑀸𑀯𑁂𑀦 𑀲𑀻𑀢𑀺𑀪𑀽𑀢𑀸.

𑀇𑀢𑀺 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀅𑀭𑀺𑀬𑀲𑁄𑀢𑀲𑀫𑀸𑀧𑀦𑁆𑀦𑀪𑀸𑀯𑀁 𑀧𑀯𑁂𑀤𑁂𑀦𑁆𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀳𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀆𑀧𑀼𑀘𑁆𑀙𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄, 𑀲𑀢𑁆𑀣𑀸𑀧𑀺 𑀉𑀝𑁆𑀞𑀸𑀬𑀸𑀲𑀦𑀸 𑀕𑀢𑁄 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀫𑀸𑀡𑀯𑀲𑁆𑀲 𑀧𑀦 𑀫𑀸𑀢𑀸𑀧𑀺𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀲𑀩𑁆𑀩𑁄 𑀘 𑀫𑀳𑀸𑀚𑀦𑁄 𑀪𑀕𑀯𑀦𑁆𑀢𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀪𑀕𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀸𑀬 𑀧𑀭𑀺𑀲𑀸𑀬 𑀇𑀫𑀁 𑀯𑀺𑀫𑀸𑀦𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀙𑀢𑁆𑀢𑀫𑀸𑀡𑀯𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.