𑁧𑁪. 𑀫𑀳𑀸𑀭𑀣𑀯𑀺𑀫𑀸𑀦𑀯𑀡𑁆𑀡𑀦𑀸

𑀲𑀳𑀲𑁆𑀲𑀬𑀼𑀢𑁆𑀢𑀁 𑀳𑀬𑀯𑀸𑀳𑀦𑀁 𑀲𑀼𑀪𑀦𑁆𑀢𑀺 𑀫𑀳𑀸𑀭𑀣𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑁂 𑀕𑁄𑀧𑀸𑀮𑀲𑁆𑀲 𑀦𑀸𑀫 𑀤𑁂𑀯𑀧𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀯𑀺𑀫𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀳𑀲𑁆𑀲𑀬𑀼𑀢𑁆𑀢𑀁 𑀫𑀳𑀦𑁆𑀢𑀁 𑀤𑀺𑀩𑁆𑀩𑀭𑀣𑀁 𑀅𑀪𑀺𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀳𑀢𑀺𑀬𑀸 𑀤𑁂𑀯𑀺𑀤𑁆𑀥𑀺𑀬𑀸 𑀉𑀬𑁆𑀬𑀸𑀦𑀓𑀻𑀴𑀦𑀢𑁆𑀣𑀁 𑀕𑀘𑁆𑀙𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀧𑀸𑀢𑀼𑀭𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀤𑁂𑀯𑀧𑀼𑀢𑁆𑀢𑁄 𑀲𑀜𑁆𑀚𑀸𑀢𑀕𑀸𑀭𑀯𑀩𑀳𑀼𑀫𑀸𑀦𑁄 𑀲𑀳𑀲𑀸 𑀭𑀣𑀢𑁄 𑀑𑀭𑀼𑀬𑁆𑀳 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀲𑀺𑀭𑀲𑀺 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺.

𑀢𑀲𑁆𑀲𑀺𑀤𑀁 𑀧𑀼𑀩𑁆𑀩𑀓𑀫𑁆𑀫𑀁 𑁋 𑀲𑁄 𑀓𑀺𑀭 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀲𑀼𑀯𑀡𑁆𑀡𑀫𑀸𑀮𑀸𑀬 𑀧𑀽𑀚𑁂𑀢𑁆𑀯𑀸 ‘‘𑀇𑀫𑀲𑁆𑀲 𑀧𑀼𑀜𑁆𑀜𑀲𑁆𑀲 𑀆𑀦𑀼𑀪𑀸𑀯𑁂𑀦 𑀫𑀬𑁆𑀳𑀁 𑀪𑀯𑁂 𑀪𑀯𑁂 𑀲𑁄𑀯𑀡𑁆𑀡𑀫𑀬𑀸 𑀉𑀭𑀘𑁆𑀙𑀤𑀫𑀸𑀮𑀸 𑀦𑀺𑀩𑁆𑀩𑀢𑁆𑀢𑀢𑀽’’𑀢𑀺 𑀓𑀢𑀧𑀡𑀺𑀥𑀸𑀦𑀸𑀬 𑀅𑀦𑁂𑀓𑀓𑀧𑁆𑀧𑁂𑀲𑀼 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀺𑀬𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸𑀬 𑀬𑀣𑀸𑀧𑀡𑀺𑀥𑀸𑀦𑀁 𑀲𑀼𑀯𑀡𑁆𑀡𑀫𑀸𑀮𑀸𑀮𑀸𑀪𑁂𑀦 ‘‘𑀉𑀭𑀘𑁆𑀙𑀤𑀫𑀸𑀮𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀤𑁂𑀯𑀓𑀜𑁆𑀜𑀸𑀲𑀤𑀺𑀲𑀸𑀬 𑀭𑀸𑀚𑀥𑀻𑀢𑀸𑀬 𑀆𑀘𑀭𑀺𑀬𑁄 𑀕𑁄𑀧𑀸𑀮𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀲𑀲𑀸𑀯𑀓𑀲𑀗𑁆𑀖𑀲𑁆𑀲 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀅𑀲𑀤𑀺𑀲𑀤𑀸𑀦𑀸𑀤𑀻𑀦𑀺 𑀫𑀳𑀸𑀤𑀸𑀦𑀸𑀦𑀺 𑀧𑀯𑀢𑁆𑀢𑁂𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀧𑀭𑀺𑀧𑀓𑁆𑀓𑀪𑀸𑀯𑁂𑀦 𑀅𑀢𑁆𑀢𑀸𑀦𑀁 𑀭𑀸𑀚𑀥𑀻𑀢𑀭𑀜𑁆𑀘 𑀉𑀤𑁆𑀤𑀺𑀲𑁆𑀲 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀧𑀺 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀫𑁂𑀯 𑀓𑀢𑁆𑀯𑀸 𑀬𑀣𑀽𑀧𑀘𑀺𑀢𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀢𑀸𑀯𑀢𑀺𑀁𑀲𑁂𑀲𑀼 𑀬𑁄𑀚𑀦𑀲𑀢𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺, 𑀅𑀦𑁂𑀓𑀓𑁄𑀝𑀺𑀅𑀘𑁆𑀙𑀭𑀸𑀧𑀭𑀺𑀯𑀸𑀭𑁄 𑀅𑀳𑁄𑀲𑀺, 𑀲𑀢𑁆𑀢𑀭𑀢𑀦𑀫𑀬𑁄 𑀘𑀲𑁆𑀲 𑀲𑀳𑀲𑁆𑀲𑀬𑀼𑀢𑁆𑀢𑁄 𑀲𑀼𑀯𑀺𑀪𑀢𑁆𑀢𑀪𑀺𑀢𑁆𑀢𑀺𑀯𑀺𑀘𑀺𑀢𑁆𑀢𑁄 𑀲𑀺𑀦𑀺𑀤𑁆𑀥𑀫𑀥𑀼𑀭𑀦𑀺𑀕𑁆𑀖𑁄𑀲𑁄 𑀅𑀢𑁆𑀢𑀦𑁄 𑀧𑀪𑀸𑀲𑀫𑀼𑀤𑀬𑁂𑀦 𑀅𑀯𑀳𑀲𑀦𑁆𑀢𑁄 𑀯𑀺𑀬 𑀤𑀺𑀯𑀗𑁆𑀓𑀭𑀫𑀡𑁆𑀟𑀮𑀁 𑀤𑀺𑀩𑁆𑀩𑁄 𑀆𑀚𑀜𑁆𑀜𑀭𑀣𑁄 𑀦𑀺𑀩𑁆𑀩𑀢𑁆𑀢𑀺.

𑀲𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀤𑁂𑀯𑁂𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀬𑀣𑀸𑀯𑀼𑀢𑁆𑀢𑀲𑀫𑁆𑀧𑀢𑁆𑀢𑀺𑀯𑀺𑀪𑀯𑁄 𑀕𑁄𑀧𑀸𑀮𑁄 𑀏𑀯 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼𑀬𑁂𑀯 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄…𑀧𑁂… 𑀅𑀜𑁆𑀚𑀮𑀺𑀁 𑀲𑀺𑀭𑀲𑀺 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀻’’𑀢𑀺.

𑀏𑀯𑀁 𑀧𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀞𑀺𑀢𑀁 𑀢𑀁 𑀤𑁂𑀯𑀧𑀼𑀢𑁆𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺 𑁋

𑁧𑁦𑁧𑁫. ‘‘𑀲𑀳𑀲𑁆𑀲𑀬𑀼𑀢𑁆𑀢𑀁 𑀳𑀬𑀯𑀸𑀳𑀦𑀁 𑀲𑀼𑀪𑀁, 𑀆𑀭𑀼𑀬𑁆𑀳𑀺𑀫𑀁 𑀲𑀦𑁆𑀤𑀦𑀁 𑀦𑁂𑀓𑀘𑀺𑀢𑁆𑀢𑀁;

𑀉𑀬𑁆𑀬𑀸𑀦𑀪𑀽𑀫𑀺𑀁 𑀅𑀪𑀺𑀢𑁄 𑀅𑀦𑀼𑀓𑁆𑀓𑀫𑀁, 𑀧𑀼𑀭𑀺𑀦𑁆𑀤𑀤𑁄 𑀪𑀽𑀢𑀧𑀢𑀻𑀯 𑀯𑀸𑀲𑀯𑁄.

𑁧𑁦𑁧𑁬. ‘‘𑀲𑁄𑀯𑀡𑁆𑀡𑀫𑀬𑀸 𑀢𑁂 𑀭𑀣𑀓𑀼𑀩𑁆𑀩𑀭𑀸 𑀉𑀪𑁄, 𑀨𑀮𑁂𑀳𑀺 𑀅𑀁𑀲𑁂𑀳𑀺 𑀅𑀢𑀻𑀯 𑀲𑀗𑁆𑀕𑀢𑀸;

𑀲𑀼𑀚𑀸𑀢𑀕𑀼𑀫𑁆𑀩𑀸 𑀦𑀭𑀯𑀻𑀭𑀦𑀺𑀝𑁆𑀞𑀺𑀢𑀸, 𑀯𑀺𑀭𑁄𑀘𑀢𑀺 𑀧𑀦𑁆𑀦𑀭𑀲𑁂𑀯 𑀘𑀦𑁆𑀤𑁄.

𑁧𑁦𑁧𑁭. ‘‘𑀲𑀼𑀯𑀡𑁆𑀡𑀚𑀸𑀮𑀸𑀯𑀢𑀢𑁄 𑀭𑀣𑁄 𑀅𑀬𑀁, 𑀩𑀳𑀽𑀳𑀺 𑀦𑀸𑀦𑀸𑀭𑀢𑀦𑁂𑀳𑀺 𑀘𑀺𑀢𑁆𑀢𑀺𑀢𑁄;

𑀲𑀼𑀦𑀦𑁆𑀤𑀺𑀖𑁄𑀲𑁄 𑀘 𑀲𑀼𑀪𑀲𑁆𑀲𑀭𑁄 𑀘, 𑀯𑀺𑀭𑁄𑀘𑀢𑀻 𑀘𑀸𑀫𑀭𑀳𑀢𑁆𑀣𑀩𑀸𑀳𑀼𑀪𑀺.

𑁧𑁦𑁧𑁮. ‘‘𑀇𑀫𑀸 𑀘 𑀦𑀸𑀪𑁆𑀬𑁄 𑀫𑀦𑀲𑀸𑀪𑀺𑀦𑀺𑀫𑁆𑀫𑀺𑀢𑀸, 𑀭𑀣𑀲𑁆𑀲 𑀧𑀸𑀤𑀦𑁆𑀢𑀭𑀫𑀚𑁆𑀛𑀪𑀽𑀲𑀺𑀢𑀸;

𑀇𑀫𑀸 𑀘 𑀦𑀸𑀪𑁆𑀬𑁄 𑀲𑀢𑀭𑀸𑀚𑀺𑀘𑀺𑀢𑁆𑀢𑀺𑀢𑀸, 𑀲𑀢𑁂𑀭𑀢𑀸 𑀯𑀺𑀚𑁆𑀚𑀼𑀭𑀺𑀯𑀧𑁆𑀧𑀪𑀸𑀲𑀭𑁂.

𑁧𑁦𑁧𑁯. ‘‘𑀅𑀦𑁂𑀓𑀘𑀺𑀢𑁆𑀢𑀸𑀯𑀢𑀢𑁄 𑀭𑀣𑁄 𑀅𑀬𑀁, 𑀧𑀼𑀣𑀽 𑀘 𑀦𑁂𑀫𑀻 𑀘 𑀲𑀳𑀲𑁆𑀲𑀭𑀁𑀲𑀺𑀓𑁄;

𑀢𑁂𑀲𑀁 𑀲𑀭𑁄 𑀲𑀼𑀬𑁆𑀬𑀢𑀺 𑀯𑀕𑁆𑀕𑀼𑀭𑀽𑀧𑁄, 𑀧𑀜𑁆𑀘𑀗𑁆𑀕𑀺𑀓𑀁 𑀢𑀽𑀭𑀺𑀬𑀫𑀺𑀯𑀧𑁆𑀧𑀯𑀸𑀤𑀺𑀢𑀁.

𑁧𑁦𑁨𑁦. ‘‘𑀲𑀺𑀭𑀲𑁆𑀫𑀺𑀁 𑀘𑀺𑀢𑁆𑀢𑀁 𑀫𑀡𑀺𑀘𑀦𑁆𑀤𑀓𑀧𑁆𑀧𑀺𑀢𑀁, 𑀲𑀤𑀸 𑀯𑀺𑀲𑀼𑀤𑁆𑀥𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀁;

𑀲𑀼𑀯𑀡𑁆𑀡𑀭𑀸𑀚𑀻𑀳𑀺 𑀅𑀢𑀻𑀯 𑀲𑀗𑁆𑀕𑀢𑀁, 𑀯𑁂𑀴𑀼𑀭𑀺𑀬𑀭𑀸𑀚𑀻𑀯 𑀅𑀢𑀻𑀯 𑀲𑁄𑀪𑀢𑀺.

𑁧𑁦𑁨𑁧. ‘‘𑀇𑀫𑁂 𑀘 𑀯𑀸𑀴𑀻 𑀫𑀡𑀺𑀘𑀦𑁆𑀤𑀓𑀧𑁆𑀧𑀺𑀢𑀸, 𑀆𑀭𑁄𑀳𑀓𑀫𑁆𑀩𑀽 𑀲𑀼𑀚𑀯𑀸 𑀩𑁆𑀭𑀳𑀽𑀧𑀫𑀸;

𑀩𑁆𑀭𑀳𑀸 𑀫𑀳𑀦𑁆𑀢𑀸 𑀩𑀮𑀺𑀦𑁄 𑀫𑀳𑀸𑀚𑀯𑀸, 𑀫𑀦𑁄 𑀢𑀯𑀜𑁆𑀜𑀸𑀬 𑀢𑀣𑁂𑀯 𑀲𑀺𑀁𑀲𑀭𑁂.

𑁧𑁦𑁨𑁨. ‘‘𑀇𑀫𑁂 𑀘 𑀲𑀩𑁆𑀩𑁂 𑀲𑀳𑀺𑀢𑀸 𑀘𑀢𑀼𑀓𑁆𑀓𑀫𑀸, 𑀫𑀦𑁄 𑀢𑀯𑀜𑁆𑀜𑀸𑀬 𑀢𑀣𑁂𑀯 𑀲𑀺𑀁𑀲𑀭𑁂;

𑀲𑀫𑀁 𑀯𑀳𑀦𑁆𑀢𑀻 𑀫𑀼𑀤𑀼𑀓𑀸 𑀅𑀦𑀼𑀤𑁆𑀥𑀢𑀸, 𑀆𑀫𑁄𑀤𑀫𑀸𑀦𑀸 𑀢𑀼𑀭𑀕𑀸𑀦𑀫𑀼𑀢𑁆𑀢𑀫𑀸.

𑁧𑁦𑁨𑁩. ‘‘𑀥𑀼𑀦𑀦𑁆𑀢𑀺 𑀯𑀕𑁆𑀕𑀦𑁆𑀢𑀺 𑀧𑀢𑀦𑁆𑀢𑀺 𑀘𑀫𑁆𑀩𑀭𑁂, 𑀅𑀩𑁆𑀪𑀼𑀤𑁆𑀥𑀼𑀦𑀦𑁆𑀢𑀸 𑀲𑀼𑀓𑀢𑁂 𑀧𑀺𑀴𑀦𑁆𑀥𑀦𑁂;

𑀢𑁂𑀲𑀁 𑀲𑀭𑁄 𑀲𑀼𑀬𑁆𑀬𑀢𑀺 𑀯𑀕𑁆𑀕𑀼𑀭𑀽𑀧𑁄, 𑀧𑀜𑁆𑀘𑀗𑁆𑀕𑀺𑀓𑀁 𑀢𑀽𑀭𑀺𑀬𑀫𑀺𑀯𑀧𑁆𑀧𑀯𑀸𑀤𑀺𑀢𑀁.

𑁧𑁦𑁨𑁪. ‘‘𑀭𑀣𑀲𑁆𑀲 𑀖𑁄𑀲𑁄 𑀅𑀧𑀺𑀴𑀦𑁆𑀥𑀦𑀸𑀦 𑀘, 𑀔𑀼𑀭𑀲𑁆𑀲 𑀦𑀸𑀤𑁄 𑀅𑀪𑀺𑀳𑀺𑀁𑀲𑀦𑀸𑀬 𑀘;

𑀖𑁄𑀲𑁄 𑀲𑀼𑀯𑀕𑁆𑀕𑀽 𑀲𑀫𑀺𑀢𑀲𑁆𑀲 𑀲𑀼𑀬𑁆𑀬𑀢𑀺, 𑀕𑀦𑁆𑀥𑀩𑁆𑀩𑀢𑀽𑀭𑀺𑀬𑀸𑀦𑀺 𑀯𑀺𑀘𑀺𑀢𑁆𑀭𑀲𑀁𑀯𑀦𑁂.

𑁧𑁦𑁨𑁫. ‘‘𑀭𑀣𑁂 𑀞𑀺𑀢𑀸𑀢𑀸 𑀫𑀺𑀕𑀫𑀦𑁆𑀤𑀮𑁄𑀘𑀦𑀸, 𑀆𑀴𑀸𑀭𑀧𑀫𑁆𑀳𑀸 𑀳𑀲𑀺𑀢𑀸 𑀧𑀺𑀬𑀁𑀯𑀤𑀸;

𑀯𑁂𑀴𑀼𑀭𑀺𑀬𑀚𑀸𑀮𑀸𑀯𑀢𑀢𑀸 𑀢𑀦𑀼𑀘𑁆𑀙𑀯𑀸, 𑀲𑀤𑁂𑀯 𑀕𑀦𑁆𑀥𑀩𑁆𑀩𑀲𑀽𑀭𑀕𑁆𑀕𑀧𑀽𑀚𑀺𑀢𑀸.

𑁧𑁦𑁨𑁬. ‘‘𑀢𑀸 𑀭𑀢𑁆𑀢𑀭𑀢𑁆𑀢𑀫𑁆𑀩𑀭𑀧𑀻𑀢𑀯𑀸𑀲𑀲𑀸, 𑀯𑀺𑀲𑀸𑀮𑀦𑁂𑀢𑁆𑀢𑀸 𑀅𑀪𑀺𑀭𑀢𑁆𑀢𑀮𑁄𑀘𑀦𑀸;

𑀓𑀼𑀮𑁂 𑀲𑀼𑀚𑀸𑀢𑀸 𑀲𑀼𑀢𑀦𑀽 𑀲𑀼𑀘𑀺𑀫𑁆𑀳𑀺𑀢𑀸, 𑀭𑀣𑁂 𑀞𑀺𑀢𑀸 𑀧𑀜𑁆𑀚𑀮𑀺𑀓𑀸 𑀉𑀧𑀝𑁆𑀞𑀺𑀢𑀸.

𑁧𑁦𑁨𑁭. ‘‘𑀢𑀸 𑀓𑀫𑁆𑀩𑀼𑀓𑁂𑀬𑀽𑀭𑀥𑀭𑀸 𑀲𑀼𑀯𑀸𑀲𑀲𑀸, 𑀲𑀼𑀫𑀚𑁆𑀛𑀺𑀫𑀸 𑀊𑀭𑀼𑀣𑀦𑀽𑀧𑀧𑀦𑁆𑀦𑀸;

𑀯𑀝𑁆𑀝𑀗𑁆𑀕𑀼𑀮𑀺𑀬𑁄 𑀲𑀼𑀫𑀼𑀔𑀸 𑀲𑀼𑀤𑀲𑁆𑀲𑀦𑀸, 𑀭𑀣𑁂 𑀞𑀺𑀢𑀸 𑀧𑀜𑁆𑀚𑀮𑀺𑀓𑀸 𑀉𑀧𑀝𑁆𑀞𑀺𑀢𑀸.

𑁧𑁦𑁨𑁮. ‘‘𑀅𑀜𑁆𑀜𑀸 𑀲𑀼𑀯𑁂𑀡𑀻 𑀲𑀼𑀲𑀼 𑀫𑀺𑀲𑁆𑀲𑀓𑁂𑀲𑀺𑀬𑁄, 𑀲𑀫𑀁 𑀯𑀺𑀪𑀢𑁆𑀢𑀸𑀳𑀺 𑀧𑀪𑀲𑁆𑀲𑀭𑀸𑀳𑀺 𑀘;

𑀅𑀦𑀼𑀩𑁆𑀩𑀢𑀸 𑀢𑀸 𑀢𑀯 𑀫𑀸𑀦𑀲𑁂 𑀭𑀢𑀸, 𑀭𑀣𑁂 𑀞𑀺𑀢𑀸 𑀧𑀜𑁆𑀚𑀮𑀺𑀓𑀸 𑀉𑀧𑀝𑁆𑀞𑀺𑀢𑀸.

𑁧𑁦𑁨𑁯. ‘‘𑀆𑀯𑁂𑀴𑀺𑀦𑀺𑀬𑁄 𑀧𑀤𑀼𑀫𑀼𑀧𑁆𑀧𑀮𑀘𑁆𑀙𑀤𑀸, 𑀅𑀮𑀗𑁆𑀓𑀢𑀸 𑀘𑀦𑁆𑀤𑀦𑀲𑀸𑀭𑀯𑀸𑀲𑀺𑀢𑀸;

𑀅𑀦𑀼𑀩𑁆𑀩𑀢𑀸 𑀢𑀸 𑀢𑀯 𑀫𑀸𑀦𑀲𑁂 𑀭𑀢𑀸, 𑀭𑀣𑁂 𑀞𑀺𑀢𑀸 𑀧𑀜𑁆𑀚𑀮𑀺𑀓𑀸 𑀉𑀧𑀝𑁆𑀞𑀺𑀢𑀸.

𑁧𑁦𑁩𑁦. ‘‘𑀢𑀸 𑀫𑀸𑀮𑀺𑀦𑀺𑀬𑁄 𑀧𑀤𑀼𑀫𑀼𑀧𑁆𑀧𑀮𑀘𑁆𑀙𑀤𑀸, 𑀅𑀮𑀗𑁆𑀓𑀢𑀸 𑀘𑀦𑁆𑀤𑀦𑀲𑀸𑀭𑀯𑀸𑀲𑀺𑀢𑀸;

𑀅𑀦𑀼𑀩𑁆𑀩𑀢𑀸 𑀢𑀸 𑀢𑀯 𑀫𑀸𑀦𑀲𑁂 𑀭𑀢𑀸, 𑀭𑀣𑁂 𑀞𑀺𑀢𑀸 𑀧𑀜𑁆𑀚𑀮𑀺𑀓𑀸 𑀉𑀧𑀝𑁆𑀞𑀺𑀢𑀸.

𑁧𑁦𑁩𑁧. ‘‘𑀓𑀡𑁆𑀞𑁂𑀲𑀼 𑀢𑁂 𑀬𑀸𑀦𑀺 𑀧𑀺𑀴𑀦𑁆𑀥𑀦𑀸𑀦𑀺, 𑀳𑀢𑁆𑀣𑁂𑀲𑀼 𑀧𑀸𑀤𑁂𑀲𑀼 𑀢𑀣𑁂𑀯 𑀲𑀻𑀲𑁂;

𑀑𑀪𑀸𑀲𑀬𑀦𑁆𑀢𑀻 𑀤𑀲 𑀲𑀩𑁆𑀩𑀲𑁄 𑀤𑀺𑀲𑀸, 𑀅𑀩𑁆𑀪𑀼𑀤𑁆𑀤𑀬𑀁 𑀲𑀸𑀭𑀤𑀺𑀓𑁄𑀯 𑀪𑀸𑀡𑀼𑀫𑀸.

𑁧𑁦𑁩𑁨. ‘‘𑀯𑀸𑀢𑀲𑁆𑀲 𑀯𑁂𑀕𑁂𑀦 𑀘 𑀲𑀫𑁆𑀧𑀓𑀫𑁆𑀧𑀺𑀢𑀸, 𑀪𑀼𑀚𑁂𑀲𑀼 𑀫𑀸𑀮𑀸 𑀅𑀧𑀺𑀴𑀦𑁆𑀥𑀦𑀸𑀦𑀺 𑀘;

𑀫𑀼𑀜𑁆𑀘𑀦𑁆𑀢𑀺 𑀖𑁄𑀲𑀁 𑀭𑀼𑀘𑀺𑀭𑀁 𑀲𑀼𑀘𑀺𑀁 𑀲𑀼𑀪𑀁, 𑀲𑀩𑁆𑀩𑁂𑀳𑀺 𑀯𑀺𑀜𑁆𑀜𑀽𑀳𑀺 𑀲𑀼𑀢𑀩𑁆𑀩𑀭𑀽𑀧𑀁.

𑁧𑁦𑁩𑁩. ‘‘𑀉𑀬𑁆𑀬𑀸𑀦𑀪𑀽𑀫𑁆𑀬𑀸 𑀘 𑀤𑀼𑀯𑀤𑁆𑀥𑀢𑁄 𑀞𑀺𑀢𑀸, 𑀭𑀣𑀸 𑀘 𑀦𑀸𑀕𑀸 𑀢𑀽𑀭𑀺𑀬𑀸𑀦𑀺 𑀘 𑀲𑀭𑁄;

𑀢𑀫𑁂𑀯 𑀤𑁂𑀯𑀺𑀦𑁆𑀤 𑀧𑀫𑁄𑀤𑀬𑀦𑁆𑀢𑀺, 𑀯𑀻𑀡𑀸 𑀬𑀣𑀸 𑀧𑁄𑀓𑁆𑀔𑀭𑀧𑀢𑁆𑀢𑀩𑀸𑀳𑀼𑀪𑀺.

𑁧𑁦𑁩𑁪. ‘‘𑀇𑀫𑀸𑀲𑀼 𑀯𑀻𑀡𑀸𑀲𑀼 𑀩𑀳𑀽𑀲𑀼 𑀯𑀕𑁆𑀕𑀽𑀲𑀼, 𑀫𑀦𑀼𑀜𑁆𑀜𑀭𑀽𑀧𑀸𑀲𑀼 𑀳𑀤𑀬𑁂𑀭𑀺𑀢𑀁 𑀧𑀻𑀢𑀺𑀁;

𑀧𑀯𑀚𑁆𑀚𑀫𑀸𑀦𑀸𑀲𑀼 𑀅𑀢𑀻𑀯 𑀅𑀘𑁆𑀙𑀭𑀸, 𑀪𑀫𑀦𑁆𑀢𑀺 𑀓𑀜𑁆𑀜𑀸 𑀧𑀤𑀼𑀫𑁂𑀲𑀼 𑀲𑀺𑀓𑁆𑀔𑀺𑀢𑀸.

𑁧𑁦𑁩𑁫. ‘‘𑀬𑀤𑀸 𑀘 𑀕𑀻𑀢𑀸𑀦𑀺 𑀘 𑀯𑀸𑀤𑀺𑀢𑀸𑀦𑀺 𑀘, 𑀦𑀘𑁆𑀘𑀸𑀦𑀺 𑀘𑀺𑀫𑀸𑀦𑀺 𑀲𑀫𑁂𑀦𑁆𑀢𑀺 𑀏𑀓𑀢𑁄;

𑀅𑀣𑁂𑀢𑁆𑀣 𑀦𑀘𑁆𑀘𑀦𑁆𑀢𑀺 𑀅𑀣𑁂𑀢𑁆𑀣 𑀅𑀘𑁆𑀙𑀭𑀸, 𑀑𑀪𑀸𑀲𑀬𑀦𑁆𑀢𑀻 𑀉𑀪𑀢𑁄 𑀯𑀭𑀺𑀢𑁆𑀣𑀺𑀬𑁄.

𑁧𑁦𑁩𑁬. ‘‘𑀲𑁄 𑀫𑁄𑀤𑀲𑀺 𑀢𑀽𑀭𑀺𑀬𑀕𑀡𑀧𑁆𑀧𑀩𑁄𑀥𑀦𑁄, 𑀫𑀳𑀻𑀬𑀫𑀸𑀦𑁄 𑀯𑀚𑀺𑀭𑀸𑀯𑀼𑀥𑁄𑀭𑀺𑀯;

𑀇𑀫𑀸𑀲𑀼 𑀯𑀻𑀡𑀸𑀲𑀼 𑀩𑀳𑀽𑀲𑀼 𑀯𑀕𑁆𑀕𑀽𑀲𑀼, 𑀫𑀦𑀼𑀜𑁆𑀜𑀭𑀽𑀧𑀸𑀲𑀼 𑀳𑀤𑀬𑁂𑀭𑀺𑀢𑀁 𑀧𑀻𑀢𑀺𑀁.

𑁧𑁦𑁩𑁭. ‘‘𑀓𑀺𑀁 𑀢𑁆𑀯𑀁 𑀧𑀼𑀭𑁂 𑀓𑀫𑁆𑀫𑀫𑀓𑀸𑀲𑀺 𑀅𑀢𑁆𑀢𑀦𑀸, 𑀫𑀦𑀼𑀲𑁆𑀲𑀪𑀽𑀢𑁄 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸;

𑀉𑀧𑁄𑀲𑀣𑀁 𑀓𑀁 𑀯𑀸 𑀢𑀼𑀯𑀁 𑀉𑀧𑀸𑀯𑀲𑀺, 𑀓𑀁 𑀥𑀫𑁆𑀫𑀘𑀭𑀺𑀬𑀁 𑀯𑀢𑀫𑀸𑀪𑀺𑀭𑁄𑀘𑀬𑀺.

𑁧𑁦𑁩𑁮. ‘‘𑀦𑀬𑀻𑀤𑀫𑀧𑁆𑀧𑀲𑁆𑀲 𑀓𑀢𑀲𑁆𑀲 𑀓𑀫𑁆𑀫𑀼𑀦𑁄, 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀲𑁆𑀲 𑀉𑀧𑁄𑀲𑀣𑀲𑁆𑀲 𑀯𑀸;

𑀇𑀤𑁆𑀥𑀸𑀦𑀼𑀪𑀸𑀯𑁄 𑀯𑀺𑀧𑀼𑀮𑁄 𑀅𑀬𑀁 𑀢𑀯, 𑀬𑀁 𑀤𑁂𑀯𑀲𑀗𑁆𑀖𑀁 𑀅𑀪𑀺𑀭𑁄𑀘𑀲𑁂 𑀪𑀼𑀲𑀁.

𑁧𑁦𑁩𑁯. ‘‘𑀤𑀸𑀦𑀲𑁆𑀲 𑀢𑁂 𑀇𑀤𑀁 𑀨𑀮𑀁, 𑀅𑀣𑁄 𑀲𑀻𑀮𑀲𑁆𑀲 𑀯𑀸 𑀧𑀦;

𑀅𑀣𑁄 𑀅𑀜𑁆𑀚𑀮𑀺𑀓𑀫𑁆𑀫𑀲𑁆𑀲, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑁧𑁦𑁧𑁫. 𑀢𑀢𑁆𑀣 𑀲𑀳𑀲𑁆𑀲𑀬𑀼𑀢𑁆𑀢𑀦𑁆𑀢𑀺 𑀲𑀳𑀲𑁆𑀲𑁂𑀦 𑀬𑀼𑀢𑁆𑀢𑀁, 𑀲𑀳𑀲𑁆𑀲𑀁 𑀯𑀸 𑀬𑀼𑀢𑁆𑀢𑀁 𑀬𑁄𑀚𑀺𑀢𑀁 𑀏𑀢𑀲𑁆𑀫𑀺𑀦𑁆𑀢𑀺 𑀲𑀳𑀲𑁆𑀲𑀬𑀼𑀢𑁆𑀢𑀁. 𑀓𑀲𑁆𑀲 𑀧𑀦𑁂𑀢𑀁 𑀲𑀳𑀲𑁆𑀲𑀦𑁆𑀢𑀺? ‘‘𑀳𑀬𑀯𑀸𑀳𑀦’’𑀦𑁆𑀢𑀺 𑀅𑀦𑀦𑁆𑀢𑀭𑀁 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀳𑀬𑀸𑀦𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑁂𑀯. 𑀳𑀬𑀸 𑀯𑀸𑀳𑀦𑀁 𑀏𑀢𑀲𑁆𑀲𑀸𑀢𑀺 𑀳𑀬𑀯𑀸𑀳𑀦𑀁. 𑀓𑁂𑀘𑀺 𑀧𑀦 ‘‘𑀲𑀳𑀲𑁆𑀲𑀬𑀼𑀢𑁆𑀢𑀳𑀬𑀯𑀸𑀳𑀦’’𑀦𑁆𑀢𑀺 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀏𑀓𑀫𑁂𑀯 𑀲𑀫𑀸𑀲𑀧𑀤𑀁 𑀓𑀢𑁆𑀯𑀸 𑀯𑀡𑁆𑀡𑁂𑀦𑁆𑀢𑀺, 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂 𑀳𑀬𑀯𑀸𑀳𑀦𑀁 𑀯𑀺𑀬 𑀯𑀸𑀳𑀦𑀦𑁆𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀳𑀬𑀯𑀸𑀳𑀦𑀲𑀳𑀲𑁆𑀲𑀬𑀼𑀢𑁆𑀢𑀁 𑀬𑀼𑀢𑁆𑀢𑀳𑀬𑀯𑀸𑀳𑀦𑀲𑀳𑀲𑁆𑀲𑀦𑁆𑀢𑀺 𑀳𑀺 𑀅𑀢𑁆𑀣𑁄. 𑀅𑀧𑀭𑁂 𑀧𑀦 ‘‘𑀲𑀳𑀲𑁆𑀲𑀬𑀼𑀢𑁆𑀢𑀦𑁆𑀢𑀺 𑀲𑀳𑀲𑁆𑀲𑀤𑀺𑀩𑁆𑀩𑀸𑀚𑀜𑁆𑀜𑀬𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀲𑀦𑁆𑀤𑀦𑀦𑁆𑀢𑀺 𑀭𑀣𑀁. 𑀦𑁂𑀓𑀘𑀺𑀢𑁆𑀢𑀦𑁆𑀢𑀺 𑀅𑀦𑁂𑀓𑀘𑀺𑀢𑁆𑀢𑀁 𑀦𑀸𑀦𑀸𑀯𑀺𑀥𑀯𑀺𑀘𑀺𑀢𑁆𑀢𑀯𑀦𑁆𑀢𑀁. 𑀉𑀬𑁆𑀬𑀸𑀦𑀪𑀽𑀫𑀺𑀁 𑀅𑀪𑀺𑀢𑁄𑀢𑀺 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀲𑀫𑀻𑀧𑁂. ‘‘𑀅𑀪𑀺𑀢𑁄’’𑀢𑀺 𑀳𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀸𑀫𑀺𑀅𑀢𑁆𑀣𑁂 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀓𑁂𑀘𑀺 𑀧𑀦 ‘‘𑀉𑀬𑁆𑀬𑀸𑀦𑀪𑀽𑀫𑁆𑀬𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑁂 𑀲𑀤𑁆𑀤𑀦𑀬𑀫𑁆𑀧𑀺 𑀅𑀦𑀼𑀧𑀥𑀸𑀭𑁂𑀦𑁆𑀢𑀸 𑀧𑀞𑀦𑁆𑀢𑀺. 𑀅𑀦𑀼𑀓𑁆𑀓𑀫𑀦𑁆𑀢𑀺 𑀕𑀘𑁆𑀙𑀦𑁆𑀢𑁄 𑀧𑀼𑀭𑀺𑀦𑁆𑀤𑀤𑁄 𑀪𑀽𑀢𑀧𑀢𑀻𑀯 𑀯𑀸𑀲𑀯𑁄 𑀯𑀺𑀭𑁄𑀘𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁦𑁧𑁬. 𑀲𑁄𑀯𑀡𑁆𑀡𑀫𑀬𑀸𑀢𑀺 𑀲𑀼𑀯𑀡𑁆𑀡𑀫𑀬𑀸. 𑀢𑁂𑀢𑀺 𑀢𑀯. 𑀭𑀣𑀓𑀼𑀩𑁆𑀩𑀭𑀸 𑀉𑀪𑁄𑀢𑀺 𑀭𑀣𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀯𑁂𑀤𑀺𑀓𑀸. 𑀬𑁄 𑀳𑀺 𑀭𑀣𑀲𑁆𑀲 𑀲𑁄𑀪𑀦𑀢𑁆𑀣𑀜𑁆𑀘𑁂𑀯 𑀉𑀧𑀭𑀺 𑀞𑀺𑀢𑀸𑀦𑀁 𑀕𑀼𑀢𑁆𑀢𑀢𑁆𑀣𑀜𑁆𑀘 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀯𑁂𑀤𑀺𑀓𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑁂𑀧𑁄 𑀓𑀭𑀻𑀬𑀢𑀺, 𑀢𑀲𑁆𑀲 𑀧𑀼𑀭𑀺𑀫𑀪𑀸𑀕𑁂 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀬𑀸𑀯 𑀭𑀣𑀻𑀲𑀸, 𑀢𑀸𑀯 𑀳𑀢𑁆𑀣𑁂𑀳𑀺 𑀕𑀳𑀡𑀬𑁄𑀕𑁆𑀕𑁄 𑀭𑀣𑀲𑁆𑀲 𑀅𑀯𑀬𑀯𑀯𑀺𑀲𑁂𑀲𑁄, 𑀇𑀥 𑀲𑁄 𑀏𑀯 𑀓𑀼𑀩𑁆𑀩𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑁂𑀯𑀸𑀳 ‘‘𑀉𑀪𑁄’’𑀢𑀺. 𑀅𑀜𑁆𑀜𑀢𑁆𑀣 𑀧𑀦 𑀭𑀣𑀻𑀲𑀸 𑀓𑀼𑀩𑁆𑀩𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀨𑀮𑁂𑀳𑀻𑀢𑀺 𑀭𑀣𑀽𑀧𑀢𑁆𑀣𑀫𑁆𑀪𑀲𑁆𑀲 𑀤𑀓𑁆𑀔𑀺𑀡𑀯𑀸𑀫𑀪𑁂𑀤𑁂𑀳𑀺 𑀤𑁆𑀯𑀻𑀳𑀺 𑀨𑀮𑁂𑀳𑀺, 𑀧𑀭𑀺𑀬𑀦𑁆𑀢𑀸𑀯𑁂𑀢𑁆𑀣 𑀨𑀮𑀸𑀢𑀺 𑀯𑀼𑀢𑁆𑀢𑀸. 𑀅𑀁𑀲𑁂𑀳𑀻𑀢𑀺 𑀓𑀼𑀩𑁆𑀩𑀭𑀨𑀮𑁂 𑀧𑀢𑀺𑀝𑁆𑀞𑀺𑀢𑁂𑀳𑀺 𑀳𑁂𑀝𑁆𑀞𑀺𑀫𑀅𑀁𑀲𑁂𑀳𑀺. 𑀅𑀢𑀻𑀯 𑀲𑀗𑁆𑀕𑀢𑀸𑀢𑀺 𑀅𑀢𑀺𑀯𑀺𑀬 𑀲𑀼𑀝𑁆𑀞𑀼 𑀲𑀗𑁆𑀕𑀢𑀸 𑀲𑀼𑀨𑀲𑁆𑀲𑀺𑀢𑀸 𑀦𑀺𑀩𑁆𑀩𑀺𑀯𑀭𑀸. 𑀇𑀤𑀜𑁆𑀘 𑀲𑀺𑀧𑁆𑀧𑀺𑀯𑀺𑀭𑀘𑀺𑀢𑁂 𑀓𑀺𑀢𑁆𑀢𑀺𑀫𑀭𑀣𑁂 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀁 𑀢𑀢𑁆𑀣 𑀆𑀭𑁄𑀧𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀲𑁄 𑀧𑀦 𑀅𑀧𑁄𑀭𑀺𑀲𑀢𑀸𑀬 𑀅𑀓𑀺𑀢𑁆𑀢𑀺𑀫𑁄 𑀲𑀬𑀁𑀚𑀸𑀢𑁄 𑀓𑁂𑀦𑀘𑀺 𑀅𑀖𑀝𑀺𑀢𑁄𑀬𑁂𑀯. 𑀲𑀼𑀚𑀸𑀢𑀕𑀼𑀫𑁆𑀩𑀸𑀢𑀺 𑀲𑀼𑀲𑀡𑁆𑀞𑀺𑀢𑀣𑀫𑁆𑀪𑀓𑀲𑀫𑀼𑀤𑀸𑀬𑀸. 𑀬𑁂 𑀳𑀺 𑀯𑁂𑀤𑀺𑀓𑀸𑀬 𑀦𑀺𑀭𑀦𑁆𑀢𑀭𑀁 𑀞𑀺𑀢𑀸 𑀲𑀼𑀲𑀡𑁆𑀞𑀺𑀢𑀖𑀝𑀓𑀸𑀤𑀺𑀅𑀯𑀬𑀯𑀯𑀺𑀲𑁂𑀲𑀯𑀦𑁆𑀢𑁄 𑀣𑀫𑁆𑀪𑀓𑀲𑀫𑀼𑀤𑀸𑀬𑀸, 𑀢𑁂𑀲𑀁 𑀯𑀲𑁂𑀦𑁂𑀯𑀁 𑀯𑀼𑀢𑁆𑀢𑀁 ‘‘𑀲𑀼𑀚𑀸𑀢𑀕𑀼𑀫𑁆𑀩𑀸’’𑀢𑀺. 𑀦𑀭𑀯𑀻𑀭𑀦𑀺𑀝𑁆𑀞𑀺𑀢𑀸𑀢𑀺 𑀲𑀺𑀧𑁆𑀧𑀸𑀘𑀭𑀺𑀬𑁂𑀳𑀺 𑀦𑀺𑀝𑁆𑀞𑀸𑀧𑀺𑀢𑀲𑀤𑀺𑀲𑀸. 𑀲𑀺𑀧𑁆𑀧𑀸𑀘𑀭𑀺𑀬𑀸 𑀳𑀺 𑀅𑀢𑁆𑀢𑀦𑁄 𑀲𑀭𑀻𑀭𑀔𑁂𑀤𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀯𑀻𑀭𑀺𑀬𑀩𑀮𑁂𑀦 𑀲𑀺𑀧𑁆𑀧𑀲𑁆𑀲 𑀲𑀼𑀝𑁆𑀞𑀼 𑀯𑀺𑀘𑀸𑀭𑀡𑀢𑁄 𑀦𑀭𑁂𑀲𑀼 𑀯𑀻𑀭𑀺𑀬𑀯𑀦𑁆𑀢𑁄𑀢𑀺 𑀇𑀥 ‘‘𑀦𑀭𑀯𑀻𑀭𑀸’’𑀢𑀺 𑀯𑀼𑀢𑁆𑀢𑀸. 𑀦𑀭𑀯𑀻𑀭𑀸𑀢𑀺 𑀯𑀸 𑀤𑁂𑀯𑀧𑀼𑀢𑁆𑀢𑀲𑁆𑀲 𑀆𑀮𑀧𑀦𑀁. 𑀦𑀺𑀝𑁆𑀞𑀺𑀢𑀸𑀢𑀺 𑀧𑀭𑀺𑀬𑁄𑀲𑀺𑀢𑀸 𑀧𑀭𑀺𑀧𑀼𑀡𑁆𑀡𑀲𑁄𑀪𑀸𑀢𑀺𑀲𑀬𑀸. ‘‘𑀦𑀭𑀯𑀻𑀭𑀦𑀺𑀫𑁆𑀫𑀺𑀢𑀸’’𑀢𑀺 𑀯𑀸 𑀧𑀸𑀞𑁄, 𑀦𑀭𑁂𑀲𑀼 𑀥𑀺𑀢𑀺𑀲𑀫𑁆𑀧𑀦𑁆𑀦𑁂𑀳𑀺 𑀦𑀺𑀫𑁆𑀫𑀺𑀢𑀲𑀤𑀺𑀲𑀸𑀢𑀺 𑀅𑀢𑁆𑀣𑁄. 𑀏𑀯𑀁𑀯𑀺𑀥𑀓𑀼𑀩𑁆𑀩𑀭𑀢𑀸𑀬 𑀅𑀬𑀁 𑀢𑀯 𑀭𑀣𑁄 𑀯𑀺𑀭𑁄𑀘𑀢𑀺. 𑀓𑀺𑀁 𑀯𑀺𑀬? 𑀧𑀦𑁆𑀦𑀭𑀲𑁂𑀯 𑀘𑀦𑁆𑀤𑁄, 𑀲𑀼𑀓𑁆𑀓𑀧𑀓𑁆𑀔𑁂 𑀧𑀦𑁆𑀦𑀭𑀲𑀺𑀬𑀁 𑀧𑀭𑀺𑀧𑀼𑀡𑁆𑀡𑀓𑀸𑀮𑁂 𑀘𑀦𑁆𑀤𑀺𑀫𑀸 𑀯𑀺𑀬.

𑁧𑁦𑁧𑁭. 𑀲𑀼𑀯𑀡𑁆𑀡𑀚𑀸𑀮𑀸𑀯𑀢𑀢𑁄𑀢𑀺 𑀲𑀼𑀯𑀡𑁆𑀡𑀚𑀸𑀮𑀓𑁂𑀳𑀺 𑀅𑀯𑀢𑀢𑁄 𑀙𑀸𑀤𑀺𑀢𑁄. ‘‘𑀲𑀼𑀯𑀡𑁆𑀡𑀚𑀸𑀮𑀸𑀯𑀺𑀢𑀢𑁄’’𑀢𑀺𑀧𑀺 𑀧𑀸𑀞𑁄, 𑀕𑀯𑀘𑁆𑀙𑀺𑀢𑁄𑀢𑀺 𑀅𑀢𑁆𑀣𑁄. 𑀩𑀳𑀽𑀳𑀻𑀢𑀺 𑀅𑀦𑁂𑀓𑁂𑀳𑀺. 𑀦𑀸𑀦𑀸𑀭𑀢𑀦𑁂𑀳𑀻𑀢𑀺 𑀧𑀤𑀼𑀫𑀭𑀸𑀕𑀨𑀼𑀲𑁆𑀲𑀭𑀸𑀕𑀸𑀤𑀺𑀦𑀸𑀦𑀸𑀯𑀺𑀥𑀭𑀢𑀦𑁂𑀳𑀺. 𑀲𑀼𑀦𑀦𑁆𑀤𑀺𑀖𑁄𑀲𑁄𑀢𑀺 𑀲𑀼𑀝𑁆𑀞𑀼 𑀦𑀦𑁆𑀤𑀺𑀢𑀩𑁆𑀩𑀖𑁄𑀲𑁄, 𑀲𑀯𑀦𑀻𑀬𑀫𑀥𑀼𑀭𑀦𑀺𑀦𑁆𑀦𑀸𑀤𑁄𑀢𑀺 𑀅𑀢𑁆𑀣𑁄. 𑀲𑀼𑀦𑀦𑁆𑀤𑀺𑀖𑁄𑀲𑁄𑀢𑀺 𑀯𑀸 𑀲𑀼𑀝𑁆𑀞𑀼 𑀓𑀢𑀦𑀦𑁆𑀤𑀺𑀖𑁄𑀲𑁄, 𑀦𑀘𑁆𑀘𑀦𑀸𑀤𑀻𑀦𑀁 𑀤𑀲𑁆𑀲𑀦𑀸𑀤𑀻𑀲𑀼 𑀧𑀯𑀢𑁆𑀢𑀺𑀢𑀲𑀸𑀥𑀼𑀓𑀸𑀭𑀲𑀤𑁆𑀤𑀸𑀤𑀺𑀯𑀲𑁂𑀦 𑀓𑀢𑀧𑀫𑁄𑀤𑀦𑀺𑀦𑁆𑀦𑀸𑀤𑁄𑀢𑀺 𑀅𑀢𑁆𑀣𑁄, ‘‘𑀓𑀸𑀮𑁂𑀦 𑀓𑀸𑀮𑀁 𑀆𑀲𑀻𑀯𑀸𑀤𑀦𑀯𑀲𑁂𑀦 𑀲𑀼𑀝𑁆𑀞𑀼 𑀧𑀬𑀼𑀢𑁆𑀢𑀦𑀦𑁆𑀤𑀺𑀖𑁄𑀲𑁄’’𑀢𑀺 𑀘 𑀯𑀤𑀦𑁆𑀢𑀺. 𑀲𑀼𑀪𑀲𑁆𑀲𑀭𑁄𑀢𑀺 𑀲𑀼𑀝𑁆𑀞𑀼 𑀅𑀢𑀺𑀯𑀺𑀬 𑀑𑀪𑀸𑀲𑀦𑀲𑀪𑀸𑀯𑁄, 𑀢𑀢𑁆𑀣 𑀯𑀸 𑀧𑀯𑀢𑁆𑀢𑀫𑀸𑀦𑀸𑀦𑀁 𑀤𑁂𑀯𑀢𑀸𑀦𑀁 𑀲𑁄𑀪𑀦𑁂𑀦 𑀕𑀻𑀢𑀯𑀸𑀤𑀺𑀢𑀲𑁆𑀲𑀭𑁂𑀦 𑀲𑀼𑀪𑀲𑁆𑀲𑀭𑁄. 𑀘𑀸𑀫𑀭𑀳𑀢𑁆𑀣𑀩𑀸𑀳𑀼𑀪𑀻𑀢𑀺 𑀘𑀸𑀫𑀭𑀳𑀢𑁆𑀣𑀬𑀼𑀢𑁆𑀢𑀩𑀸𑀳𑀽𑀳𑀺 𑀇𑀢𑁄 𑀘𑀺𑀢𑁄 𑀘 𑀩𑀻𑀚𑀬𑀫𑀸𑀦 𑀘𑀸𑀫𑀭𑀓𑀮𑀸𑀧𑁂𑀳𑀺 𑀤𑁂𑀯𑀢𑀸𑀦𑀁 𑀪𑀼𑀚𑁂𑀳𑀺, 𑀢𑀣𑀸𑀪𑀽𑀢𑀸𑀳𑀺 𑀤𑁂𑀯𑀢𑀸𑀳𑀺 𑀯𑀸 𑀯𑀺𑀭𑁄𑀘𑀢𑀺.

𑁧𑁦𑁧𑁮. 𑀦𑀸𑀪𑁆𑀬𑁄𑀢𑀺 𑀭𑀣𑀘𑀓𑁆𑀓𑀸𑀦𑀁 𑀦𑀸𑀪𑀺𑀬𑁄. 𑀫𑀦𑀲𑀸𑀪𑀺𑀦𑀺𑀫𑁆𑀫𑀺𑀢𑀸𑀢𑀺 ‘‘𑀇𑀫𑁂 𑀈𑀤𑀺𑀲𑀸 𑀳𑁄𑀦𑁆𑀢𑀽’’𑀢𑀺 𑀘𑀺𑀢𑁆𑀢𑁂𑀦 𑀦𑀺𑀫𑁆𑀫𑀺𑀢𑀲𑀤𑀺𑀲𑀸. 𑀭𑀣𑀲𑁆𑀲 𑀧𑀸𑀤𑀦𑁆𑀢𑀭𑀫𑀚𑁆𑀛𑀪𑀽𑀲𑀺𑀢𑀸𑀢𑀺 𑀭𑀣𑀲𑁆𑀲 𑀧𑀸𑀤𑀸𑀦𑀁 𑀭𑀣𑀘𑀓𑁆𑀓𑀸𑀦𑀁 𑀅𑀦𑁆𑀢𑁂𑀦 𑀦𑁂𑀫𑀺𑀦𑀸 𑀦𑀸𑀦𑀸𑀭𑀢𑀦𑀲𑀫𑀼𑀚𑁆𑀚𑀮𑁂𑀦 𑀅𑀭𑀸𑀦𑀁 𑀯𑁂𑀫𑀚𑁆𑀛𑁂𑀦 𑀘 𑀫𑀡𑁆𑀟𑀺𑀢𑀸. 𑀲𑀢𑀭𑀸𑀚𑀺𑀘𑀺𑀢𑁆𑀢𑀺𑀢𑀸𑀢𑀺 𑀅𑀦𑁂𑀓𑀯𑀡𑁆𑀡𑀸𑀳𑀺 𑀅𑀦𑁂𑀓𑀲𑀢𑀸𑀳𑀺 𑀭𑀸𑀚𑀻𑀳𑀺 𑀮𑁂𑀔𑀸𑀳𑀺 𑀘𑀺𑀢𑁆𑀢𑀺𑀢𑀸 𑀯𑀺𑀘𑀺𑀢𑁆𑀢𑀪𑀸𑀯𑀁 𑀕𑀢𑀸. 𑀲𑀢𑁂𑀭𑀢𑀸 𑀯𑀺𑀚𑁆𑀚𑀼𑀭𑀺𑀯𑀸𑀢𑀺 𑀲𑀢𑁂𑀭𑀢𑀲𑀗𑁆𑀔𑀸𑀢𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀧𑀪𑀸𑀲𑀭𑁂 𑀯𑀺𑀚𑁆𑀚𑁄𑀢𑀦𑁆𑀢𑀺.

𑁧𑁦𑁧𑁯. 𑀅𑀦𑁂𑀓𑀘𑀺𑀢𑁆𑀢𑀸𑀯𑀢𑀢𑁄𑀢𑀺 𑀅𑀦𑁂𑀓𑁂𑀳𑀺 𑀫𑀸𑀮𑀸𑀓𑀫𑁆𑀫𑀸𑀤𑀺𑀘𑀺𑀢𑁆𑀢𑁂𑀳𑀺 𑀅𑀯𑀢𑀢𑁄 𑀲𑀫𑁄𑀓𑀺𑀡𑁆𑀡𑁄. ‘‘𑀅𑀦𑁂𑀓𑀘𑀺𑀢𑁆𑀢𑀸𑀯𑀺𑀢𑀢𑁄’’𑀢𑀺𑀧𑀺 𑀧𑀞𑀦𑁆𑀢𑀺, 𑀲𑁄𑀬𑁂𑀯 𑀅𑀢𑁆𑀣𑁄, 𑀕𑀸𑀣𑀸𑀲𑀼𑀔𑀢𑁆𑀣𑀁 𑀧𑀦 𑀤𑀻𑀖𑀓𑀭𑀡𑀁. 𑀧𑀼𑀣𑀽 𑀘 𑀦𑁂𑀫𑀻 𑀘𑀸𑀢𑀺 𑀧𑀼𑀣𑀼𑀮𑀦𑁂𑀫𑀺 𑀘, 𑀏𑀓𑁄 𑀘-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀳𑀲𑁆𑀲𑀭𑀁𑀲𑀺𑀓𑁄𑀢𑀺 𑀅𑀦𑁂𑀓𑀲𑀳𑀲𑁆𑀲𑀭𑀁𑀲𑀺𑀓𑁄. ‘‘𑀲𑀳𑀲𑁆𑀲𑀭𑀁𑀲𑀺𑀬𑁄’’𑀢𑀺𑀧𑀺 𑀧𑀸𑀴𑀺. 𑀅𑀧𑀭𑁂 𑀧𑀦 ‘‘𑀦𑀢𑀸 𑀭𑀁𑀲𑀺𑀬𑁄’’𑀢𑀺 𑀘 𑀧𑀞𑀦𑁆𑀢𑀺, 𑀢𑀢𑁆𑀣 𑀦𑀢𑀸𑀢𑀺 𑀅𑀚𑀺𑀬𑀥𑀦𑀼𑀤𑀡𑁆𑀟𑀓𑁄 𑀯𑀺𑀬 𑀑𑀡𑀢𑀸 𑀦𑁂𑀫𑀺𑀧𑁆𑀧𑀤𑁂𑀲𑀸. 𑀲𑀳𑀲𑁆𑀲𑀭𑀁𑀲𑀺𑀬𑁄𑀢𑀺 𑀲𑀽𑀭𑀺𑀬𑀫𑀡𑁆𑀟𑀮𑀁 𑀯𑀺𑀬 𑀯𑀺𑀧𑁆𑀨𑀼𑀭𑀦𑁆𑀢𑀓𑀺𑀭𑀡𑀚𑀸𑀮𑀸. 𑀢𑁂𑀲𑀦𑁆𑀢𑀺 𑀑𑀮𑀫𑁆𑀩𑀫𑀸𑀦𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸𑀦𑀁 𑀦𑁂𑀫𑀺𑀧𑁆𑀧𑀤𑁂𑀲𑀸𑀦𑀁.

𑁧𑁦𑁨𑁦. 𑀲𑀺𑀭𑀲𑁆𑀫𑀺𑀦𑁆𑀢𑀺 𑀲𑀻𑀲𑁂, 𑀭𑀣𑀲𑁆𑀲 𑀲𑀻𑀲𑁂𑀢𑀺 𑀅𑀢𑁆𑀣𑁄. 𑀲𑀺𑀭𑁄 𑀯𑀸 𑀅𑀲𑁆𑀫𑀺𑀁 𑀭𑀣𑁂. 𑀘𑀺𑀢𑁆𑀢𑀦𑁆𑀢𑀺 𑀯𑀺𑀘𑀺𑀢𑁆𑀢𑀁. 𑀫𑀡𑀺𑀘𑀦𑁆𑀤𑀓𑀧𑁆𑀧𑀺𑀢𑀦𑁆𑀢𑀺 𑀫𑀡𑀺𑀫𑀬𑀫𑀡𑁆𑀟𑀮𑀸𑀦𑀼𑀯𑀺𑀤𑁆𑀥𑀁 𑀘𑀦𑁆𑀤𑀫𑀡𑁆𑀟𑀮𑀲𑀤𑀺𑀲𑁂𑀦 𑀫𑀡𑀺𑀦𑀸 𑀅𑀦𑀼𑀯𑀺𑀤𑁆𑀥𑀁. 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀘𑀦𑁆𑀤𑀫𑀡𑁆𑀟𑀮𑀲𑀤𑀺𑀲𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺, 𑀲𑀤𑀸 𑀯𑀺𑀲𑀼𑀤𑁆𑀥𑀦𑁆𑀢𑀺 𑀇𑀫𑀺𑀦𑀸 𑀧𑀦𑀲𑁆𑀲 𑀘𑀦𑁆𑀤𑀫𑀡𑁆𑀟𑀮𑀢𑁄𑀧𑀺 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀲𑀼𑀯𑀡𑁆𑀡𑀭𑀸𑀚𑀻𑀳𑀻𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀯𑀝𑁆𑀝𑀸𑀓𑀸𑀭𑁂𑀦 𑀲𑀡𑁆𑀞𑀺𑀢𑀸𑀳𑀺 𑀲𑀼𑀯𑀡𑁆𑀡𑀮𑁂𑀔𑀸𑀳𑀺. 𑀲𑀗𑁆𑀕𑀢𑀦𑁆𑀢𑀺 𑀲𑀳𑀺𑀢𑀁. 𑀯𑁂𑀴𑀼𑀭𑀺𑀬𑀭𑀸𑀚𑀻𑀯𑀸𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀲𑀼𑀯𑀡𑁆𑀡𑀭𑀸𑀚𑀻𑀳𑀺 𑀔𑀘𑀺𑀢𑀫𑀡𑀺𑀫𑀡𑁆𑀟𑀮𑀢𑁆𑀢𑀸 𑀯𑁂𑀴𑀼𑀭𑀺𑀬𑀭𑀸𑀚𑀻𑀳𑀺 𑀯𑀺𑀬 𑀲𑁄𑀪𑀢𑀺. ‘‘𑀯𑁂𑀴𑀼𑀭𑀺𑀬𑀭𑀸𑀚𑀻𑀳𑀻’’𑀢𑀺 𑀘 𑀧𑀞𑀦𑁆𑀢𑀺.

𑁧𑁦𑁨𑁧. 𑀯𑀸𑀴𑀻𑀢𑀺 𑀯𑀸𑀴𑀯𑀦𑁆𑀢𑁄 𑀲𑀫𑁆𑀧𑀦𑁆𑀦𑀯𑀸𑀴𑀥𑀺𑀦𑁄, 𑀅𑀲𑁆𑀲𑁂 𑀲𑀦𑁆𑀥𑀸𑀬 𑀯𑀤𑀢𑀺. ‘‘𑀯𑀸𑀚𑀻’’𑀢𑀺 𑀯𑀸 𑀧𑀸𑀞𑁄. 𑀫𑀡𑀺𑀘𑀦𑁆𑀤𑀓𑀧𑁆𑀧𑀺𑀢𑀸𑀢𑀺 𑀘𑀸𑀫𑀭𑁄𑀮𑀫𑁆𑀩𑀦𑀝𑁆𑀞𑀸𑀦𑁂𑀲𑀼 𑀫𑀡𑀺𑀫𑀬𑀘𑀦𑁆𑀤𑀓𑀸𑀦𑀼𑀯𑀺𑀤𑁆𑀥𑀸. 𑀆𑀭𑁄𑀳𑀓𑀫𑁆𑀩𑀽𑀢𑀺 𑀉𑀘𑁆𑀘𑀸 𑀘𑁂𑀯 𑀢𑀤𑀦𑀼𑀭𑀽𑀧𑀧𑀭𑀺𑀡𑀸𑀳𑀸 𑀘, 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀲𑀼𑀚𑀯𑀸𑀢𑀺 𑀲𑀼𑀦𑁆𑀤𑀭𑀚𑀯𑀸 𑀚𑀯𑀯𑀦𑁆𑀢𑁄 𑀫𑀳𑀸𑀚𑀯𑀸, 𑀲𑁄𑀪𑀦𑀕𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀩𑁆𑀭𑀳𑀽𑀧𑀫𑀸𑀢𑀺 𑀩𑁆𑀭𑀳𑀸 𑀯𑀺𑀬 𑀧𑀫𑀺𑀦𑀺𑀢𑀩𑁆𑀩𑀸, 𑀅𑀢𑁆𑀢𑀦𑁄 𑀧𑀫𑀸𑀡𑀢𑁄 𑀅𑀥𑀺𑀓𑀸 𑀯𑀺𑀬 𑀧𑀜𑁆𑀜𑀸𑀬𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀩𑁆𑀭𑀳𑀸𑀢𑀺 𑀯𑀼𑀟𑁆𑀠𑀸 𑀧𑀯𑀟𑁆𑀠𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀸. 𑀫𑀳𑀦𑁆𑀢𑀸𑀢𑀺 𑀫𑀳𑀸𑀦𑀼𑀪𑀸𑀯𑀸 𑀫𑀳𑀺𑀤𑁆𑀥𑀺𑀓𑀸. 𑀩𑀮𑀺𑀦𑁄𑀢𑀺 𑀲𑀭𑀻𑀭𑀩𑀮𑁂𑀦 𑀘 𑀉𑀲𑁆𑀲𑀸𑀳𑀩𑀮𑁂𑀦 𑀘 𑀩𑀮𑀯𑀦𑁆𑀢𑁄. 𑀫𑀳𑀸𑀚𑀯𑀸𑀢𑀺 𑀲𑀻𑀖𑀯𑁂𑀕𑀸. 𑀫𑀦𑁄 𑀢𑀯𑀜𑁆𑀜𑀸𑀬𑀸𑀢𑀺 𑀢𑀯 𑀘𑀺𑀢𑁆𑀢𑀁 𑀜𑀢𑁆𑀯𑀸. 𑀢𑀣𑁂𑀯𑀸𑀢𑀺 𑀘𑀺𑀢𑁆𑀢𑀸𑀦𑀼𑀭𑀽𑀧𑀫𑁂𑀯. 𑀲𑀺𑀁𑀲𑀭𑁂𑀢𑀺 𑀲𑀁𑀲𑀧𑁆𑀧𑀭𑁂, 𑀧𑀯𑀢𑁆𑀢𑀭𑁂𑀢𑀺 𑀅𑀢𑁆𑀣𑁄.

𑁧𑁦𑁨𑁨. 𑀇𑀫𑁂𑀢𑀺 𑀬𑀣𑀸𑀯𑀼𑀢𑁆𑀢𑀅𑀲𑁆𑀲𑁂 𑀲𑀦𑁆𑀥𑀸𑀬𑀸𑀳. 𑀲𑀩𑁆𑀩𑁂𑀢𑀺 𑀲𑀳𑀲𑁆𑀲𑀫𑀢𑁆𑀢𑀸𑀧𑀺. 𑀲𑀳𑀺𑀢𑀸𑀢𑀺 𑀲𑀫𑀸𑀦𑀚𑀯𑀢𑀸𑀬 𑀲𑀫𑀸𑀦𑀕𑀫𑀦𑀢𑀸𑀬 𑀘 𑀕𑀢𑀺𑀬𑀁 𑀲𑀳𑀺𑀢𑀸, 𑀅𑀜𑁆𑀜𑀫𑀜𑁆𑀜𑀁 𑀅𑀦𑀽𑀦𑀸𑀥𑀺𑀓𑀕𑀫𑀦𑀸𑀢𑀺 𑀅𑀢𑁆𑀣𑁄. 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀓𑀫𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀘𑀢𑀼𑀓𑁆𑀓𑀫𑀸. 𑀲𑀫𑀁 𑀯𑀳𑀦𑁆𑀢𑀻𑀢𑀺 ‘‘𑀲𑀳𑀺𑀢𑀸’’𑀢𑀺 𑀧𑀤𑁂𑀦 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀫𑀼𑀤𑀼𑀓𑀸𑀢𑀺 𑀫𑀼𑀤𑀼𑀲𑀪𑀸𑀯𑀸, 𑀪𑀤𑁆𑀭𑀸 𑀆𑀚𑀸𑀦𑀻𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀦𑀼𑀤𑁆𑀥𑀢𑀸’’𑀢𑀺, 𑀉𑀤𑁆𑀥𑀢𑀭𑀳𑀺𑀢𑀸 𑀔𑁄𑀪𑀁 𑀅𑀓𑀭𑁄𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀆𑀫𑁄𑀤𑀫𑀸𑀦𑀸𑀢𑀺 𑀧𑀫𑁄𑀤𑀫𑀸𑀦𑀸, 𑀅𑀔𑀴𑀼𑀗𑁆𑀓𑀢𑀸𑀬 𑀅𑀜𑁆𑀜𑀫𑀜𑁆𑀜𑀁 𑀭𑀣𑀺𑀓𑀸𑀤𑀻𑀦𑀜𑁆𑀘 𑀢𑀼𑀝𑁆𑀞𑀺𑀁 𑀧𑀯𑁂𑀤𑀬𑀦𑁆𑀢𑀸𑀢𑀺 𑀅𑀢𑁆𑀣𑁄.

𑁧𑁦𑁨𑁩. 𑀥𑀼𑀦𑀦𑁆𑀢𑀻𑀢𑀺 𑀘𑀸𑀫𑀭𑀪𑀸𑀭𑀁 𑀓𑁂𑀲𑀭𑀪𑀸𑀭𑀁 𑀯𑀸𑀮𑀥𑀺𑀜𑁆𑀘 𑀯𑀺𑀥𑀼𑀦𑀦𑁆𑀢𑀺. 𑀯𑀕𑁆𑀕𑀦𑁆𑀢𑀻𑀢𑀺 𑀓𑀤𑀸𑀘𑀺 𑀧𑀤𑁂 𑀧𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑀸 𑀯𑀕𑁆𑀕𑀦𑁂𑀦 𑀕𑀫𑀦𑁂𑀦 𑀕𑀘𑁆𑀙𑀦𑁆𑀢𑀺. 𑀧𑀢𑀦𑁆𑀢𑀻𑀢𑀺 𑀓𑀤𑀸𑀘𑀺 𑀧𑀯𑀢𑁆𑀢𑀦𑁆𑀢𑀺, 𑀮𑀗𑁆𑀖𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀧𑁆𑀮𑀯𑀦𑁆𑀢𑀻’’𑀢𑀺 𑀘 𑀓𑁂𑀘𑀺 𑀧𑀞𑀦𑁆𑀢𑀺, 𑀲𑁄𑀬𑁂𑀯𑀢𑁆𑀣𑁄. 𑀅𑀩𑁆𑀪𑀼𑀤𑁆𑀥𑀼𑀦𑀦𑁆𑀢𑀸𑀢𑀺 𑀓𑀫𑁆𑀫𑀲𑀺𑀧𑁆𑀧𑀺𑀦𑀸 𑀲𑀼𑀓𑀢𑁂 𑀲𑀼𑀝𑁆𑀞𑀼 𑀦𑀺𑀫𑁆𑀫𑀺𑀢𑁂 𑀔𑀼𑀤𑁆𑀤𑀓𑀖𑀡𑁆𑀝𑀸𑀤𑀺𑀅𑀲𑁆𑀲𑀸𑀮𑀗𑁆𑀓𑀸𑀭𑁂 𑀅𑀪𑀺𑀉𑀤𑁆𑀥𑀼𑀦𑀦𑁆𑀢𑀸 𑀅𑀥𑀺𑀓𑀁 𑀉𑀤𑁆𑀥𑀼𑀦𑀦𑁆𑀢𑀸. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀧𑀺𑀴𑀦𑁆𑀥𑀦𑀸𑀦𑀁.

𑁧𑁦𑁨𑁪. 𑀭𑀣𑀲𑁆𑀲 𑀖𑁄𑀲𑁄𑀢𑀺 𑀬𑀣𑀸𑀯𑀼𑀢𑁆𑀢𑁄 𑀭𑀣𑀦𑀺𑀕𑁆𑀖𑁄𑀲𑁄. 𑀅𑀧𑀺𑀴𑀦𑁆𑀥𑀦𑀸𑀦 𑀘𑀸𑀢𑀺 𑀅-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀺𑀴𑀦𑁆𑀥𑀦𑀸𑀦𑀁 𑀆𑀪𑀭𑀡𑀸𑀦𑀁. 𑀅𑀧𑀺𑀴𑀦𑁆𑀥𑀦𑀦𑁆𑀢𑀺 𑀘 𑀆𑀪𑀭𑀡𑀧𑀭𑀺𑀬𑀸𑀬𑁄𑀢𑀺 𑀯𑀸 𑀯𑀤𑀦𑁆𑀢𑀺, 𑀭𑀣𑀲𑁆𑀲𑀸𑀦𑀁 𑀆𑀪𑀭𑀡𑀸𑀦𑀜𑁆𑀘𑀖𑁄𑀲𑁄𑀢𑀺 𑀅𑀢𑁆𑀣𑁄. 𑀔𑀼𑀭𑀲𑁆𑀲𑀦𑀸𑀤𑁄𑀢𑀺 𑀢𑀼𑀭𑀗𑁆𑀕𑀸𑀦𑀁 𑀔𑀼𑀭𑀦𑀺𑀧𑀸𑀢𑀲𑀤𑁆𑀤𑁄. 𑀓𑀺𑀜𑁆𑀘𑀸𑀧𑀺 𑀅𑀲𑁆𑀲𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀺, 𑀫𑀥𑀼𑀭𑀲𑁆𑀲 𑀧𑀦 𑀔𑀼𑀭𑀦𑀺𑀧𑀸𑀢𑀲𑀤𑁆𑀤𑀲𑁆𑀲 𑀉𑀧𑀮𑀤𑁆𑀥𑀺𑀳𑁂𑀢𑀼𑀪𑀽𑀢𑁂𑀦 𑀓𑀫𑁆𑀫𑀼𑀦𑀸 𑀢𑁂𑀲𑀁 𑀔𑀼𑀭𑀦𑀺𑀓𑁆𑀔𑁂𑀧𑁂 𑀔𑀼𑀭𑀦𑀺𑀓𑁆𑀔𑁂𑀧𑁂 𑀧𑀝𑀺𑀖𑀸𑀢𑁄 𑀮𑀩𑁆𑀪𑀢𑀻𑀢𑀺 𑀯𑀤𑀦𑁆𑀢𑀺. 𑀅𑀪𑀺𑀳𑀺𑀁𑀲𑀦𑀸𑀬 𑀘𑀸𑀢𑀺 𑀅𑀲𑁆𑀲𑀸𑀦𑀁 𑀅𑀥𑀺𑀓𑀳𑀺𑀁𑀲𑀦𑁂𑀦 𑀘, 𑀅𑀦𑁆𑀢𑀭𑀦𑁆𑀢𑀭𑀸 𑀅𑀲𑁆𑀲𑁂𑀳𑀺 𑀧𑀯𑀢𑁆𑀢𑀺𑀢𑀳𑁂𑀲𑀦𑁂𑀦 𑀘𑀸𑀢𑀺 𑀅𑀢𑁆𑀣𑁄. ‘‘𑀅𑀪𑀺𑀳𑁂𑀲𑀦𑀸𑀬 𑀘𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀲𑀫𑀺𑀢𑀲𑁆𑀲𑀸𑀢𑀺 𑀲𑀫𑀼𑀤𑀺𑀢𑀲𑁆𑀲 𑀤𑀺𑀩𑁆𑀩𑀚𑀦𑀲𑁆𑀲 𑀖𑁄𑀲𑁄 𑀘 𑀲𑀼𑀯𑀕𑁆𑀕𑀼 𑀲𑀼𑀫𑀥𑀼𑀭𑀁 𑀲𑀼𑀬𑁆𑀬𑀢𑀺. 𑀓𑀺𑀁 𑀯𑀺𑀬𑀸𑀢𑀺 𑀆𑀳 ‘‘𑀕𑀦𑁆𑀥𑀩𑁆𑀩𑀢𑀽𑀭𑀺𑀬𑀸𑀦𑀺 𑀯𑀺𑀘𑀺𑀢𑁆𑀭𑀲𑀁𑀯𑀦𑁂’’𑀢𑀺, 𑀘𑀺𑀢𑁆𑀭𑀮𑀢𑀸𑀯𑀦𑁂 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀸𑀦𑀁 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀸𑀦𑀺 𑀯𑀺𑀬. 𑀢𑀽𑀭𑀺𑀬𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑀺 𑀲𑀤𑁆𑀤𑁄 ‘‘𑀢𑀽𑀭𑀺𑀬𑀸𑀦𑀻’’𑀢𑀺 𑀯𑀼𑀢𑁆𑀢𑁄 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦. ‘‘𑀕𑀦𑁆𑀥𑀩𑁆𑀩𑀢𑀽𑀭𑀺𑀬𑀸𑀦 𑀘 𑀯𑀺𑀘𑀺𑀢𑁆𑀭𑀲𑀁𑀯𑀦𑁂’’𑀢𑀺 𑀘 𑀧𑀸𑀞𑁄, ‘‘𑀢𑀽𑀭𑀺𑀬𑀸𑀦𑀜𑁆𑀘’’𑀇𑀢𑀺 𑀅𑀦𑀼𑀦𑀸𑀲𑀺𑀓𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀧𑀭𑁂 ‘‘𑀕𑀦𑁆𑀥𑀩𑁆𑀩𑀢𑀽𑀭𑀺𑀬𑀸𑀦𑀺 𑀯𑀺𑀘𑀺𑀢𑁆𑀭𑀧𑀯𑀦𑁂’’𑀢𑀺 𑀧𑀞𑀦𑁆𑀢𑀺.

𑁧𑁦𑁨𑁫. 𑀭𑀣𑁂 𑀞𑀺𑀢𑀸𑀢𑀸𑀢𑀺 𑀭𑀣𑁂 𑀞𑀺𑀢𑀸 𑀏𑀢𑀸. 𑀫𑀺𑀕𑀫𑀦𑁆𑀤𑀮𑁄𑀘𑀦𑀸𑀢𑀺 𑀫𑀺𑀕𑀘𑁆𑀙𑀸𑀧𑀺𑀓𑀸𑀦𑀁 𑀯𑀺𑀬 𑀫𑀼𑀤𑀼𑀲𑀺𑀦𑀺𑀤𑁆𑀥𑀤𑀺𑀝𑁆𑀞𑀺𑀦𑀺𑀧𑀸𑀢𑀸. 𑀆𑀴𑀸𑀭𑀧𑀫𑁆𑀳𑀸𑀢𑀺 𑀩𑀳𑀮𑀲𑀗𑁆𑀕𑀢𑀧𑀔𑀼𑀫𑀸, 𑀕𑁄𑀧𑀔𑀼𑀫𑀸𑀢𑀺 𑀅𑀢𑁆𑀣𑁄. 𑀳𑀲𑀺𑀢𑀸𑀢𑀺 𑀧𑀳𑀲𑀺𑀢𑀸, 𑀧𑀳𑀁𑀲𑀺𑀢𑀫𑀼𑀔𑀸𑀢𑀺 𑀅𑀢𑁆𑀣𑁄. 𑀧𑀺𑀬𑀁𑀯𑀤𑀸𑀢𑀺 𑀧𑀺𑀬𑀯𑀸𑀤𑀺𑀦𑀺𑀬𑁄. 𑀯𑁂𑀴𑀼𑀭𑀺𑀬𑀚𑀸𑀮𑀸𑀯𑀢𑀢𑀸𑀢𑀺 𑀯𑁂𑀴𑀼𑀭𑀺𑀬𑀫𑀡𑀺𑀫𑀬𑁂𑀦 𑀚𑀸𑀮𑁂𑀦 𑀙𑀸𑀤𑀺𑀢𑀲𑀭𑀻𑀭𑀸. 𑀢𑀦𑀼𑀘𑁆𑀙𑀯𑀸𑀢𑀺 𑀲𑀼𑀔𑀼𑀫𑀘𑁆𑀙𑀯𑀺𑀬𑁄. 𑀲𑀤𑁂𑀯𑀸𑀢𑀺 𑀲𑀤𑀸 𑀏𑀯 𑀲𑀩𑁆𑀩𑀓𑀸𑀮𑀫𑁂𑀯. 𑀕𑀦𑁆𑀥𑀩𑁆𑀩𑀲𑀽𑀭𑀕𑁆𑀕𑀧𑀽𑀚𑀺𑀢𑀸𑀢𑀺 𑀕𑀦𑁆𑀥𑀩𑁆𑀩𑀤𑁂𑀯𑀢𑀸𑀳𑀺 𑀘𑁂𑀯 𑀅𑀧𑀭𑀸𑀳𑀺 𑀘 𑀅𑀕𑁆𑀕𑀤𑁂𑀯𑀢𑀸𑀳𑀺 𑀮𑀤𑁆𑀥𑀧𑀽𑀚𑀸.

𑁧𑁦𑁨𑁬. 𑀢𑀸 𑀭𑀢𑁆𑀢𑀭𑀢𑁆𑀢𑀫𑁆𑀩𑀭𑀧𑀻𑀢𑀯𑀸𑀲𑀲𑀸𑀢𑀺 𑀭𑀚𑀦𑀻𑀬𑀭𑀽𑀧𑀸 𑀘 𑀭𑀢𑁆𑀢𑀧𑀻𑀢𑀯𑀢𑁆𑀣𑀸 𑀘. 𑀅𑀪𑀺𑀭𑀢𑁆𑀢𑀮𑁄𑀘𑀦𑀸𑀢𑀺 𑀯𑀺𑀲𑁂𑀲𑀢𑁄 𑀭𑀢𑁆𑀢𑀭𑀸𑀚𑀻𑀳𑀺 𑀉𑀧𑀲𑁄𑀪𑀺𑀢𑀦𑀬𑀦𑀸. 𑀓𑀼𑀮𑁂 𑀲𑀼𑀚𑀸𑀢𑀸𑀢𑀺 𑀲𑀺𑀦𑁆𑀥𑀯𑀓𑀼𑀮𑁂 𑀲𑀼𑀚𑀸𑀢𑀸 𑀯𑀺𑀲𑀺𑀝𑁆𑀞𑀤𑁂𑀯𑀦𑀺𑀓𑀸𑀬𑁂 𑀲𑀫𑁆𑀪𑀯𑀸. 𑀲𑀼𑀢𑀦𑀽𑀢𑀺 𑀲𑀼𑀦𑁆𑀤𑀭𑀲𑀭𑀻𑀭𑀸. 𑀲𑀼𑀘𑀺𑀫𑁆𑀳𑀺𑀢𑀸𑀢𑀺 𑀲𑀼𑀤𑁆𑀥𑀲𑀺𑀢𑀓𑀭𑀡𑀸.

𑁧𑁦𑁨𑁭. 𑀢𑀸 𑀓𑀫𑁆𑀩𑀼𑀓𑁂𑀬𑀽𑀭𑀥𑀭𑀸𑀢𑀺 𑀲𑀼𑀯𑀡𑁆𑀡𑀫𑀬𑀓𑁂𑀬𑀽𑀭𑀥𑀭𑀸. 𑀲𑀼𑀫𑀚𑁆𑀛𑀺𑀫𑀸𑀢𑀺 𑀯𑀺𑀮𑀕𑁆𑀕𑀫𑀚𑁆𑀛𑀸. 𑀊𑀭𑀼𑀣𑀦𑀽𑀧𑀧𑀦𑁆𑀦𑀸𑀢𑀺 𑀲𑀫𑁆𑀧𑀦𑁆𑀦𑀊𑀭𑀼𑀣𑀦𑀸, 𑀓𑀤𑀮𑀺𑀓𑁆𑀔𑀦𑁆𑀥𑀲𑀤𑀺𑀲𑀊𑀭𑀼 𑀘𑁂𑀯 𑀲𑀫𑀼𑀕𑁆𑀕𑀲𑀤𑀺𑀲𑀣𑀦𑀸 𑀘. 𑀯𑀝𑁆𑀝𑀗𑁆𑀕𑀼𑀮𑀺𑀬𑁄𑀢𑀺 𑀅𑀦𑀼𑀧𑀼𑀩𑁆𑀩𑀢𑁄 𑀯𑀝𑁆𑀝𑀗𑁆𑀕𑀼𑀮𑀺𑀬𑁄. 𑀲𑀼𑀫𑀼𑀔𑀸𑀢𑀺 𑀲𑀼𑀦𑁆𑀤𑀭𑀫𑀼𑀔𑀸, 𑀧𑀫𑀼𑀤𑀺𑀢𑀫𑀼𑀔𑀸 𑀯𑀸. 𑀲𑀼𑀤𑀲𑁆𑀲𑀦𑀸𑀢𑀺 𑀤𑀲𑁆𑀲𑀦𑀻𑀬𑀸.

𑁧𑁦𑁨𑁮. 𑀅𑀜𑁆𑀜𑀸𑀢𑀺 𑀏𑀓𑀘𑁆𑀘𑀸. 𑀲𑀼𑀯𑁂𑀡𑀻𑀢𑀺 𑀲𑀼𑀦𑁆𑀤𑀭𑀓𑁂𑀲𑀯𑁂𑀡𑀺𑀬𑁄. 𑀲𑀼𑀲𑀽𑀢𑀺 𑀤𑀳𑀭𑀸. 𑀫𑀺𑀲𑁆𑀲𑀓𑁂𑀲𑀺𑀬𑁄𑀢𑀺 𑀭𑀢𑁆𑀢𑀫𑀸𑀮𑀸𑀤𑀻𑀳𑀺 𑀫𑀺𑀲𑁆𑀲𑀺𑀢𑀓𑁂𑀲𑀯𑀝𑁆𑀝𑀺𑀬𑁄. 𑀓𑀣𑀁? 𑀲𑀫𑀁 𑀯𑀺𑀪𑀢𑁆𑀢𑀸𑀳𑀺 𑀧𑀪𑀲𑁆𑀲𑀭𑀸𑀳𑀺 𑀘𑀸𑀢𑀺, 𑀲𑀫𑀁 𑀅𑀜𑁆𑀜𑀫𑀜𑁆𑀜𑀲𑀤𑀺𑀲𑀁 𑀦𑀸𑀦𑀸𑀯𑀺𑀪𑀢𑁆𑀢𑀺𑀯𑀲𑁂𑀦 𑀯𑀺𑀪𑀢𑁆𑀢𑀸𑀳𑀺 𑀲𑀼𑀯𑀡𑁆𑀡𑀘𑀻𑀭𑀸𑀤𑀺𑀔𑀘𑀺𑀢𑀸𑀳𑀺 𑀇𑀦𑁆𑀤𑀦𑀻𑀮𑀫𑀡𑀺𑀆𑀤𑀬𑁄 𑀯𑀺𑀬 𑀧𑀪𑀲𑁆𑀲𑀭𑀸𑀳𑀺 𑀓𑁂𑀲𑀯𑀝𑁆𑀝𑀻𑀳𑀺 𑀫𑀺𑀲𑁆𑀲𑀺𑀢𑀓𑁂𑀲𑀺𑀬𑁄𑀢𑀺 𑀬𑁄𑀚𑀦𑀸. 𑀅𑀦𑀼𑀩𑁆𑀩𑀢𑀸𑀢𑀺 𑀅𑀦𑀼𑀓𑀽𑀮𑀓𑀺𑀭𑀺𑀬𑀸. 𑀢𑀸𑀢𑀺 𑀅𑀘𑁆𑀙𑀭𑀸𑀬𑁄.

𑁧𑁦𑁨𑁯. 𑀘𑀦𑁆𑀤𑀦𑀲𑀸𑀭𑀯𑁄𑀲𑀺𑀢𑀸𑀢𑀺 𑀲𑀸𑀭𑀪𑀽𑀢𑁂𑀦 𑀤𑀺𑀩𑁆𑀩𑀘𑀦𑁆𑀤𑀦𑁂𑀦 𑀉𑀮𑁆𑀮𑀺𑀢𑁆𑀢𑀸 𑀯𑀺𑀘𑁆𑀙𑀼𑀭𑀺𑀢𑀸.

𑁧𑁦𑁩𑁧. 𑀓𑀡𑁆𑀞𑁂𑀲𑀽𑀢𑀺𑀆𑀤𑀺𑀦𑀸 𑀕𑀻𑀯𑀽𑀧𑀕𑀳𑀢𑁆𑀣𑀽𑀧𑀕𑀧𑀸𑀤𑀽𑀧𑀕𑀲𑀻𑀲𑀽𑀧𑀕𑀸𑀤𑀺𑀆𑀪𑀭𑀡𑀸𑀦𑀺 𑀤𑀲𑁆𑀲𑁂𑀢𑀺. 𑀑𑀪𑀸𑀲𑀬𑀦𑁆𑀢𑀻𑀢𑀺 𑀓𑀡𑁆𑀞𑁂𑀲𑀼 𑀬𑀸𑀦𑀺 𑀧𑀺𑀴𑀦𑁆𑀥𑀦𑀸𑀦𑀺, 𑀢𑁂𑀳𑀺 𑀑𑀪𑀸𑀲𑀬𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀅𑀩𑁆𑀪𑀼𑀤𑁆𑀤𑀬𑀦𑁆𑀢𑀺 𑀅𑀪𑀺𑀉𑀕𑁆𑀕𑀘𑁆𑀙𑀦𑁆𑀢𑁄, ‘‘𑀅𑀩𑁆𑀪𑀼𑀤𑁆𑀤𑀲’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀲𑀸𑀭𑀤𑀺𑀓𑁄𑀢𑀺 𑀲𑀭𑀤𑀓𑀸𑀮𑀺𑀓𑁄. 𑀪𑀸𑀡𑀼𑀫𑀸𑀢𑀺 𑀲𑀽𑀭𑀺𑀬𑁄. 𑀲𑁄 𑀳𑀺 𑀅𑀩𑁆𑀪𑀸𑀤𑀺𑀤𑁄𑀲𑀯𑀺𑀭𑀳𑁂𑀦 𑀤𑀲𑀧𑀺 𑀤𑀺𑀲𑀸 𑀲𑀼𑀝𑁆𑀞𑀼 𑀑𑀪𑀸𑀲𑁂𑀢𑀺.

𑁧𑁦𑁩𑁨. 𑀯𑀸𑀢𑀲𑁆𑀲 𑀯𑁂𑀕𑁂𑀦 𑀘𑀸𑀢𑀺 𑀫𑀦𑀼𑀜𑁆𑀜𑀕𑀦𑁆𑀥𑀽𑀧𑀳𑀸𑀭𑀁 𑀲𑀤𑁆𑀤𑀽𑀧𑀳𑀸𑀭𑀜𑁆𑀘 𑀓𑀭𑁄𑀦𑁆𑀢𑁂𑀦 𑀉𑀧𑀳𑀭𑀦𑁆𑀢𑁂𑀦 𑀯𑀺𑀬 𑀯𑀸𑀬𑀦𑁆𑀢𑁂𑀦 𑀯𑀸𑀢𑀲𑁆𑀲 𑀯𑁂𑀕𑁂𑀦 𑀭𑀣𑀢𑀼𑀭𑀗𑁆𑀕𑀯𑁂𑀕𑁂𑀦 𑀘. 𑀫𑀼𑀜𑁆𑀘𑀦𑁆𑀢𑀻𑀢𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀭𑀼𑀘𑀺𑀭𑀦𑁆𑀢𑀺 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀸𑀦𑀺 𑀯𑀺𑀬 𑀉𑀧𑀭𑀽𑀧𑀭𑀺 𑀭𑀼𑀘𑀺𑀤𑀸𑀬𑀓𑀁. 𑀲𑀼𑀘𑀺𑀦𑁆𑀢𑀺 𑀲𑀼𑀤𑁆𑀥𑀁 𑀅𑀲𑀁𑀲𑀝𑁆𑀞𑀁. 𑀲𑀼𑀪𑀦𑁆𑀢𑀺 𑀫𑀦𑀼𑀜𑁆𑀜𑀁. 𑀲𑀩𑁆𑀩𑁂𑀳𑀺 𑀯𑀺𑀜𑁆𑀜𑀽𑀳𑀺 𑀲𑀼𑀢𑀩𑁆𑀩𑀭𑀽𑀧𑀦𑁆𑀢𑀺 𑀲𑀩𑁆𑀩𑁂𑀳𑀺𑀧𑀺 𑀯𑀺𑀜𑁆𑀜𑀼𑀚𑀸𑀢𑀺𑀓𑁂𑀳𑀺 𑀕𑀦𑁆𑀥𑀩𑁆𑀩𑀲𑀫𑀬𑀜𑁆𑀜𑀽𑀳𑀺 𑀲𑁄𑀢𑀩𑁆𑀩𑀁 𑀲𑀯𑀦𑀻𑀬𑀁 𑀉𑀢𑁆𑀢𑀫𑀲𑀪𑀸𑀯𑀁 𑀖𑁄𑀲𑀁 𑀫𑀼𑀜𑁆𑀘𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁧𑁦𑁩𑁩. 𑀉𑀬𑁆𑀬𑀸𑀦𑀪𑀽𑀫𑁆𑀬𑀸𑀢𑀺 𑀉𑀬𑁆𑀬𑀸𑀦𑀪𑀽𑀫𑀺𑀬𑀁. 𑀤𑀼𑀯𑀤𑁆𑀥𑀢𑁄𑀢𑀺 𑀤𑁆𑀯𑀻𑀳𑀺 𑀅𑀤𑁆𑀥𑀧𑀲𑁆𑀲𑁂𑀳𑀺. ‘‘𑀤𑀼𑀪𑀢𑁄 𑀘 𑀞𑀺𑀢𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀲𑁄𑀬𑁂𑀯𑀢𑁆𑀣𑁄. 𑀭𑀣𑀸𑀢𑀺 𑀭𑀣𑁂. 𑀦𑀸𑀕𑀸𑀢𑀺 𑀦𑀸𑀕𑁂. 𑀉𑀧𑀬𑁄𑀕𑀢𑁆𑀣𑁂 𑀳𑀺 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀲𑀭𑁄𑀢𑀺 𑀭𑀣𑀦𑀸𑀕𑀢𑀽𑀭𑀺𑀬𑀸𑀦𑀺 𑀧𑀝𑀺𑀘𑁆𑀘 𑀦𑀺𑀩𑁆𑀩𑀢𑁆𑀢𑁄 𑀲𑀭𑁄. 𑀤𑁂𑀯𑀺𑀦𑁆𑀤𑀸𑀢𑀺 𑀤𑁂𑀯𑀧𑀼𑀢𑁆𑀢𑀁 𑀆𑀮𑀧𑀢𑀺. 𑀯𑀻𑀡𑀸 𑀬𑀣𑀸 𑀧𑁄𑀓𑁆𑀔𑀭𑀧𑀢𑁆𑀢𑀩𑀸𑀳𑀼𑀪𑀻𑀢𑀺 𑀬𑀣𑀸 𑀯𑀻𑀡𑀸 𑀲𑀫𑁆𑀫𑀤𑁂𑀯 𑀬𑁄𑀚𑀺𑀢𑁂𑀳𑀺 𑀤𑁄𑀡𑀺𑀧𑀢𑁆𑀢𑀩𑀸𑀳𑀼𑀤𑀡𑁆𑀟𑁂𑀳𑀺 𑀢𑀁𑀢𑀁𑀫𑀼𑀘𑁆𑀙𑀦𑀸𑀦𑀼𑀭𑀽𑀧𑀁 𑀅𑀯𑀝𑁆𑀞𑀺𑀢𑁂𑀳𑀺 𑀯𑀸𑀤𑀺𑀬𑀫𑀸𑀦𑀸 𑀲𑀼𑀡𑀦𑁆𑀢𑀁 𑀚𑀦𑀁 𑀧𑀫𑁄𑀤𑁂𑀢𑀺, 𑀏𑀯𑀁 𑀢𑀁 𑀭𑀣𑀸𑀤𑀬𑁄 𑀅𑀢𑁆𑀢𑀦𑁄 𑀲𑀭𑁂𑀦 𑀧𑀫𑁄𑀤𑀬𑀦𑁆𑀢𑀺. 𑀲𑀼𑀲𑀺𑀓𑁆𑀔𑀺𑀢𑀪𑀸𑀯𑁂𑀦 𑀧𑁄𑀓𑁆𑀔𑀭𑀪𑀸𑀯𑀁 𑀲𑀼𑀦𑁆𑀤𑀭𑀪𑀸𑀯𑀁 𑀧𑀢𑁆𑀢𑁂𑀳𑀺 𑀯𑀻𑀡𑀸𑀯𑀸𑀤𑀓𑀲𑁆𑀲 𑀳𑀢𑁆𑀣𑁂𑀳𑀺 𑀧𑀯𑀸𑀤𑀺𑀢𑀸 𑀯𑀻𑀡𑀸 𑀬𑀣𑀸 𑀫𑀳𑀸𑀚𑀦𑀁 𑀧𑀫𑁄𑀤𑁂𑀢𑀺, 𑀏𑀯𑀁 𑀢𑀁 𑀭𑀣𑀸𑀤𑀬𑁄 𑀅𑀢𑁆𑀢𑀦𑁄 𑀲𑀭𑁂𑀦 𑀧𑀫𑁄𑀤𑀬𑀦𑁆𑀢𑀻𑀢𑀺.

𑁧𑁦𑁩𑁪. 𑀇𑀫𑀸𑀲𑀼 𑀯𑀻𑀡𑀸𑀲𑀽𑀢𑀺 𑀕𑀸𑀣𑀸𑀬 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀇𑀫𑀸𑀲𑀼 𑀉𑀚𑀼𑀓𑁄𑀝𑀺𑀯𑀗𑁆𑀓𑀩𑁆𑀭𑀳𑀢𑀻𑀦𑀦𑁆𑀤𑀺𑀦𑀻𑀢𑀺𑀲𑀭𑀆𑀤𑀺𑀪𑁂𑀤𑀸𑀲𑀼 𑀩𑀳𑀽𑀲𑀼 𑀯𑀻𑀡𑀸𑀲𑀼 𑀲𑀺𑀦𑀺𑀤𑁆𑀥𑀫𑀥𑀼𑀭𑀲𑁆𑀲𑀭𑀢𑀸𑀬 𑀯𑀕𑁆𑀕𑀽𑀲𑀼 𑀢𑀢𑁄 𑀏𑀯 𑀫𑀦𑀼𑀜𑁆𑀜𑀭𑀽𑀧𑀸𑀲𑀼 𑀳𑀤𑀬𑁂𑀭𑀺𑀢𑀁 𑀳𑀤𑀬𑀗𑁆𑀕𑀫𑀁 𑀳𑀤𑀬𑀳𑀸𑀭𑀺𑀦𑀺𑀁 𑀧𑀻𑀢𑀺𑀁 𑀧𑀻𑀢𑀺𑀦𑀺𑀫𑀺𑀢𑁆𑀢𑀁 𑀧𑀯𑀚𑁆𑀚𑀫𑀸𑀦𑀸𑀲𑀼 𑀧𑀯𑀸𑀤𑀺𑀬𑀫𑀸𑀦𑀸𑀲𑀼 𑀅𑀘𑁆𑀙𑀭𑀸 𑀤𑁂𑀯𑀓𑀜𑁆𑀜𑀸 𑀧𑀻𑀢𑀺𑀯𑁂𑀕𑀼𑀓𑁆𑀔𑀺𑀢𑁆𑀢𑀢𑀸𑀬 𑀅𑀢𑁆𑀢𑀦𑁄 𑀲𑀼𑀲𑀺𑀓𑁆𑀔𑀺𑀢𑀢𑀸𑀬 𑀘 𑀤𑀺𑀩𑁆𑀩𑀧𑀤𑀼𑀫𑁂𑀲𑀼 𑀪𑀫𑀦𑁆𑀢𑀺 𑀦𑀘𑁆𑀘𑀁 𑀤𑀲𑁆𑀲𑁂𑀦𑁆𑀢𑀺𑀬𑁄 𑀲𑀜𑁆𑀘𑀭𑀦𑁆𑀢𑀺.

𑁧𑁦𑁩𑁫. 𑀇𑀫𑀸𑀦𑀻𑀢𑀺 𑀇𑀤𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁 ‘‘𑀇𑀫𑀸𑀦𑀺 𑀕𑀻𑀢𑀸𑀦𑀺, 𑀇𑀫𑀸𑀦𑀺 𑀯𑀸𑀤𑀺𑀢𑀸𑀦𑀺, 𑀇𑀫𑀸𑀦𑀺 𑀦𑀘𑁆𑀘𑀸𑀦𑀺 𑀘𑀸’’𑀢𑀺. 𑀲𑀫𑁂𑀦𑁆𑀢𑀺 𑀏𑀓𑀢𑁄𑀢𑀺 𑀏𑀓𑀚𑁆𑀛𑀁 𑀲𑀫𑀭𑀲𑀸𑀦𑀺 𑀳𑁄𑀦𑁆𑀢𑀺. 𑀅𑀣 𑀯𑀸 𑀲𑀫𑁂𑀦𑁆𑀢𑀺 𑀏𑀓𑀢𑁄𑀢𑀺 𑀏𑀓𑀢𑁄 𑀏𑀓𑀚𑁆𑀛𑀁 𑀲𑀫𑀸𑀦𑀺 𑀲𑀫𑀭𑀲𑀸𑀦𑀺 𑀓𑀭𑁄𑀦𑁆𑀢𑀺, 𑀢𑀦𑁆𑀢𑀺𑀲𑁆𑀲𑀭𑀁 𑀕𑀻𑀢𑀲𑁆𑀲𑀭𑁂𑀦, 𑀕𑀻𑀢𑀲𑁆𑀲𑀭𑀜𑁆𑀘 𑀢𑀦𑁆𑀢𑀺𑀲𑁆𑀲𑀭𑁂𑀦 𑀲𑀁𑀲𑀦𑁆𑀤𑀦𑁆𑀢𑀺𑀬𑁄 𑀦𑀘𑁆𑀘𑀦𑁂𑀦 𑀬𑀣𑀸𑀥𑀺𑀕𑀢𑁂 𑀳𑀲𑁆𑀲𑀸𑀤𑀺𑀭𑀲𑁂 𑀅𑀧𑀭𑀺𑀳𑀸𑀧𑁂𑀦𑁆𑀢𑀺𑀬𑁄 𑀲𑀫𑁂𑀦𑁆𑀢𑀺 𑀲𑀫𑀸𑀦𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑁂𑀢𑁆𑀣 𑀦𑀘𑁆𑀘𑀦𑁆𑀢𑀺 𑀅𑀣𑁂𑀢𑁆𑀣 𑀅𑀘𑁆𑀙𑀭𑀸 𑀑𑀪𑀸𑀲𑀬𑀦𑁆𑀢𑀻𑀢𑀺 𑀏𑀯𑀁 𑀕𑀻𑀢𑀸𑀤𑀻𑀦𑀺 𑀲𑀫𑀭𑀲𑁂 𑀓𑀭𑁄𑀦𑁆𑀢𑀺𑀬𑁄 𑀅𑀣 𑀅𑀜𑁆𑀜𑀸 𑀏𑀓𑀘𑁆𑀘𑀸 𑀅𑀘𑁆𑀙𑀭𑀸 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀢𑀯 𑀭𑀣𑁂 𑀦𑀘𑁆𑀘𑀦𑁆𑀢𑀺, 𑀅𑀣 𑀅𑀜𑁆𑀜𑀸 𑀯𑀭𑀺𑀢𑁆𑀣𑀺𑀬𑁄 𑀉𑀢𑁆𑀢𑀫𑀺𑀢𑁆𑀣𑀺𑀬𑁄 𑀦𑀘𑁆𑀘𑀁 𑀧𑀲𑁆𑀲𑀦𑁆𑀢𑀺𑀬𑁄 𑀅𑀢𑁆𑀢𑀦𑁄 𑀲𑀭𑀻𑀭𑁄𑀪𑀸𑀲𑁂𑀦 𑀘𑁂𑀯 𑀯𑀢𑁆𑀣𑀸𑀪𑀭𑀡𑀑𑀪𑀸𑀲𑁂𑀦 𑀘 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀧𑀤𑁂𑀲𑁂 𑀉𑀪𑀢𑁄 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀤𑀲𑀧𑀺 𑀤𑀺𑀲𑀸 𑀓𑁂𑀯𑀮𑀁 𑀑𑀪𑀸𑀲𑀬𑀦𑁆𑀢𑀺 𑀯𑀺𑀚𑁆𑀚𑁄𑀢𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁦𑁩𑁬. 𑀲𑁄𑀢𑀺 𑀲𑁄 𑀢𑁆𑀯𑀁 𑀏𑀯𑀁𑀪𑀽𑀢𑁄. 𑀢𑀽𑀭𑀺𑀬𑀕𑀡𑀧𑁆𑀧𑀩𑁄𑀥𑀦𑁄𑀢𑀺 𑀤𑀺𑀩𑁆𑀩𑀢𑀽𑀭𑀺𑀬𑀲𑀫𑀽𑀳𑁂𑀦 𑀓𑀢𑀧𑀻𑀢𑀺𑀧𑀩𑁄𑀥𑀦𑁄. 𑀫𑀳𑀻𑀬𑀫𑀸𑀦𑁄𑀢𑀺 𑀧𑀽𑀚𑀻𑀬𑀫𑀸𑀦𑁄. 𑀯𑀚𑀺𑀭𑀸𑀯𑀼𑀥𑁄𑀭𑀺𑀯𑀸𑀢𑀺 𑀇𑀦𑁆𑀤𑁄 𑀯𑀺𑀬.

𑁧𑁦𑁩𑁭. 𑀉𑀧𑁄𑀲𑀣𑀁 𑀓𑀁 𑀯𑀸 𑀢𑀼𑀯𑀁 𑀉𑀧𑀸𑀯𑀲𑀻𑀢𑀺 𑀅𑀜𑁆𑀜𑁂𑀳𑀺𑀧𑀺 𑀉𑀧𑁄𑀲𑀣𑁄 𑀉𑀧𑀯𑀲𑀻𑀬𑀢𑀺, 𑀢𑁆𑀯𑀁 𑀓𑀁 𑀯𑀸 𑀓𑀻𑀤𑀺𑀲𑀁 𑀦𑀸𑀫 𑀉𑀧𑁄𑀲𑀣𑀁 𑀉𑀧𑀯𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀥𑀫𑁆𑀫𑀘𑀭𑀺𑀬𑀦𑁆𑀢𑀺 𑀤𑀸𑀦𑀸𑀤𑀺𑀧𑀼𑀜𑁆𑀜𑀧𑀝𑀺𑀧𑀢𑁆𑀢𑀺𑀁. 𑀯𑀢𑀦𑁆𑀢𑀺 𑀯𑀢𑀲𑀫𑀸𑀤𑀸𑀦𑀁. 𑀅𑀪𑀺𑀭𑁄𑀘𑀬𑀻𑀢𑀺 𑀅𑀪𑀺𑀭𑁄𑀘𑁂𑀲𑀺, 𑀭𑀼𑀘𑁆𑀘𑀺𑀢𑁆𑀯𑀸 𑀧𑀽𑀭𑁂𑀲𑀻𑀢𑀺 𑀅𑀢𑁆𑀣𑁄. ‘‘𑀅𑀪𑀺𑀭𑀸𑀥𑀬𑀻’’𑀢𑀺𑀧𑀺 𑀧𑀸𑀞𑁄, 𑀲𑀸𑀥𑁂𑀲𑀺 𑀦𑀺𑀧𑁆𑀨𑀸𑀤𑁂𑀲𑀻𑀢𑀺 𑀅𑀢𑁆𑀣𑁄.

𑁧𑁦𑁩𑁮. 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀇𑀤𑀁 𑀯𑀸 𑀨𑀮𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀪𑀺𑀭𑁄𑀘𑀲𑁂𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀯𑀺𑀚𑁆𑀚𑁄𑀢𑀲𑀺.

𑀏𑀯𑀁 𑀫𑀳𑀸𑀣𑁂𑀭𑁂𑀦 𑀧𑀼𑀝𑁆𑀞𑁄 𑀤𑁂𑀯𑀧𑀼𑀢𑁆𑀢𑁄 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦𑁪𑁦. ‘‘𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑁄;

𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁧𑁦𑁪𑁧. ‘‘𑀚𑀺𑀢𑀺𑀦𑁆𑀤𑁆𑀭𑀺𑀬𑀁 𑀩𑀼𑀤𑁆𑀥𑀫𑀦𑁄𑀫𑀦𑀺𑀓𑁆𑀓𑀫𑀁, 𑀦𑀭𑀼𑀢𑁆𑀢𑀫𑀁 𑀓𑀲𑁆𑀲𑀧𑀫𑀕𑁆𑀕𑀧𑀼𑀕𑁆𑀕𑀮𑀁;

𑀅𑀯𑀸𑀧𑀼𑀭𑀦𑁆𑀢𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀁, 𑀤𑁂𑀯𑀸𑀢𑀺𑀤𑁂𑀯𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀁.

𑁧𑁦𑁪𑁨. ‘‘𑀢𑀫𑀤𑁆𑀤𑀲𑀁 𑀓𑀼𑀜𑁆𑀚𑀭𑀫𑁄𑀖𑀢𑀺𑀡𑁆𑀡𑀁, 𑀲𑀼𑀯𑀡𑁆𑀡𑀲𑀺𑀗𑁆𑀕𑀻𑀦𑀤𑀩𑀺𑀫𑁆𑀩𑀲𑀸𑀤𑀺𑀲𑀁;

𑀤𑀺𑀲𑁆𑀯𑀸𑀦 𑀢𑀁 𑀔𑀺𑀧𑁆𑀧𑀫𑀳𑀼𑀁 𑀲𑀼𑀘𑀻𑀫𑀦𑁄, 𑀢𑀫𑁂𑀯 𑀤𑀺𑀲𑁆𑀯𑀸𑀦 𑀲𑀼𑀪𑀸𑀲𑀺𑀢𑀤𑁆𑀥𑀚𑀁.

𑁧𑁦𑁪𑁩. ‘‘𑀢𑀫𑀦𑁆𑀦𑀧𑀸𑀦𑀁 𑀅𑀣𑀯𑀸𑀧𑀺 𑀘𑀻𑀯𑀭𑀁, 𑀲𑀼𑀘𑀺𑀁 𑀧𑀡𑀻𑀢𑀁 𑀭𑀲𑀲𑀸 𑀉𑀧𑁂𑀢𑀁;

𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀫𑁆𑀳𑀺 𑀲𑀓𑁂 𑀦𑀺𑀯𑁂𑀲𑀦𑁂, 𑀧𑀢𑀺𑀝𑁆𑀞𑀧𑁂𑀲𑀺𑀁 𑀲 𑀅𑀲𑀗𑁆𑀕𑀫𑀸𑀦𑀲𑁄.

𑁧𑁦𑁪𑁪. ‘‘𑀢𑀫𑀦𑁆𑀦𑀧𑀸𑀦𑁂𑀦 𑀘 𑀘𑀻𑀯𑀭𑁂𑀦 𑀘, 𑀔𑀚𑁆𑀚𑁂𑀦 𑀪𑁄𑀚𑁆𑀚𑁂𑀦 𑀘 𑀲𑀸𑀬𑀦𑁂𑀦 𑀘;

𑀲𑀦𑁆𑀢𑀧𑁆𑀧𑀬𑀺𑀢𑁆𑀯𑀸 𑀤𑁆𑀯𑀺𑀧𑀤𑀸𑀦𑀫𑀼𑀢𑁆𑀢𑀫𑀁, 𑀲𑁄 𑀲𑀕𑁆𑀕𑀲𑁄 𑀤𑁂𑀯𑀧𑀼𑀭𑁂 𑀭𑀫𑀸𑀫𑀳𑀁.

𑁧𑁦𑁪𑁫. ‘‘𑀏𑀢𑁂𑀦𑀼𑀧𑀸𑀬𑁂𑀦 𑀇𑀫𑀁 𑀦𑀺𑀭𑀕𑁆𑀕𑀴𑀁, 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀢𑀺𑀯𑀺𑀥𑀁 𑀯𑀺𑀲𑀼𑀤𑁆𑀥𑀁;

𑀧𑀳𑀸𑀬𑀳𑀁 𑀫𑀸𑀦𑀼𑀲𑀓𑀁 𑀲𑀫𑀼𑀲𑁆𑀲𑀬𑀁, 𑀇𑀦𑁆𑀤𑀽𑀧𑀫𑁄 𑀤𑁂𑀯𑀧𑀼𑀭𑁂 𑀭𑀫𑀸𑀫𑀳𑀁.

𑁧𑁦𑁪𑁬. ‘‘𑀆𑀬𑀼𑀜𑁆𑀘 𑀯𑀡𑁆𑀡𑀜𑁆𑀘 𑀲𑀼𑀔𑀁 𑀩𑀮𑀜𑁆𑀘, 𑀧𑀡𑀻𑀢𑀭𑀽𑀧𑀁 𑀅𑀢𑀺𑀓𑀗𑁆𑀔𑀢𑀸 𑀫𑀼𑀦𑀺;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀩𑀳𑀼𑀁 𑀲𑀼𑀲𑀗𑁆𑀔𑀢𑀁, 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑀫𑀲𑀗𑁆𑀕𑀫𑀸𑀦𑀲𑁂.

𑁧𑁦𑁪𑁭. ‘‘𑀦𑀬𑀺𑀫𑀲𑁆𑀫𑀺𑀁 𑀮𑁄𑀓𑁂 𑀧𑀭𑀲𑁆𑀫𑀺𑀁 𑀯𑀸 𑀧𑀦, 𑀩𑀼𑀤𑁆𑀥𑁂𑀦 𑀲𑁂𑀝𑁆𑀞𑁄 𑀯 𑀲𑀫𑁄 𑀯 𑀯𑀺𑀚𑁆𑀚𑀢𑀺;

𑀆𑀳𑀼𑀦𑁂𑀬𑁆𑀬𑀸𑀦𑀁 𑀧𑀭𑀫𑀸𑀳𑀼𑀢𑀺𑀁 𑀕𑀢𑁄, 𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀯𑀺𑀧𑀼𑀮𑀧𑁆𑀨𑀮𑁂𑀲𑀺𑀦’’𑀦𑁆𑀢𑀺.

𑁧𑁦𑁪𑁧. 𑀢𑀢𑁆𑀣 𑀚𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀩𑁄𑀥𑀺𑀫𑀽𑀮𑁂𑀬𑁂𑀯 𑀅𑀕𑁆𑀕𑀫𑀕𑁆𑀕𑁂𑀦 𑀚𑀺𑀢𑀢𑁆𑀢𑀸 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀲𑁆𑀲 𑀓𑀢𑀢𑁆𑀢𑀸 𑀚𑀺𑀢𑀺𑀦𑁆𑀤𑁆𑀭𑀺𑀬𑀁. 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀻𑀦𑀁 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑀢𑁄 𑀅𑀦𑀯𑀲𑁂𑀲𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑀁. 𑀧𑀼𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑀢𑀸𑀬 𑀅𑀦𑁄𑀫𑀦𑀺𑀓𑁆𑀓𑀫𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲 𑀯𑀻𑀭𑀺𑀬𑀲𑁆𑀲 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀲𑁆𑀲 𑀘 𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀦𑀭𑀼𑀢𑁆𑀢𑀫𑀦𑁆𑀢𑀺 𑀦𑀭𑀸𑀦𑀁 𑀉𑀢𑁆𑀢𑀫𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑀁. 𑀓𑀲𑁆𑀲𑀧𑀦𑁆𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀯𑀤𑀢𑀺. 𑀅𑀯𑀸𑀧𑀼𑀭𑀦𑁆𑀢𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀦𑁆𑀢𑀺 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑀢𑁄 𑀧𑀪𑀼𑀢𑀺 𑀧𑀺𑀳𑀺𑀢𑀁 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀲𑁆𑀲 𑀤𑁆𑀯𑀸𑀭𑀁 𑀅𑀭𑀺𑀬𑀫𑀕𑁆𑀕𑀁 𑀯𑀺𑀯𑀭𑀦𑁆𑀢𑀁. 𑀤𑁂𑀯𑀸𑀢𑀺𑀤𑁂𑀯𑀦𑁆𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑀁. 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀦𑁆𑀢𑀺 𑀅𑀦𑁂𑀓𑀲𑀢𑀧𑀼𑀜𑁆𑀜𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁.

𑁧𑁦𑁪𑁨. 𑀓𑀼𑀜𑁆𑀚𑀭𑀦𑁆𑀢𑀺 𑀓𑀺𑀮𑁂𑀲𑀧𑀝𑀺𑀲𑀢𑁆𑀢𑀼𑀦𑀺𑀫𑁆𑀫𑀤𑁆𑀤𑀦𑁂𑀦 𑀓𑀼𑀜𑁆𑀚𑀭𑀲𑀤𑀺𑀲𑀁, 𑀫𑀳𑀸𑀦𑀸𑀕𑀦𑁆𑀢𑀺 𑀅𑀢𑁆𑀣𑁄. 𑀘𑀢𑀼𑀦𑁆𑀦𑀁 𑀑𑀖𑀸𑀦𑀁 𑀲𑀁𑀲𑀸𑀭𑀫𑀳𑁄𑀖𑀲𑁆𑀲 𑀢𑀭𑀺𑀢𑀢𑁆𑀢𑀸 𑀑𑀖𑀢𑀺𑀡𑁆𑀡𑀁. 𑀲𑀼𑀯𑀡𑁆𑀡𑀲𑀺𑀗𑁆𑀕𑀻𑀦𑀤𑀩𑀺𑀫𑁆𑀩𑀲𑀸𑀤𑀺𑀲𑀦𑁆𑀢𑀺 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀚𑀫𑁆𑀩𑀼𑀦𑀤𑀲𑀼𑀯𑀡𑁆𑀡𑀭𑀽𑀧𑀲𑀤𑀺𑀲𑀁, 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀲𑁆𑀯𑀸𑀦 𑀢𑀁 𑀔𑀺𑀧𑁆𑀧𑀫𑀳𑀼𑀁 𑀲𑀼𑀘𑀻𑀫𑀦𑁄𑀢𑀺 𑀢𑀁 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀔𑀺𑀧𑁆𑀧𑀁 𑀢𑀸𑀯𑀤𑁂𑀯 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀧𑀲𑀸𑀤𑀯𑀲𑁂𑀦 𑀓𑀺𑀮𑁂𑀲𑀫𑀮𑀸𑀧𑀕𑀫𑀦𑁂𑀦 𑀲𑀼𑀘𑀺𑀫𑀦𑁄 𑀯𑀺𑀲𑀼𑀤𑁆𑀥𑀫𑀦𑁄 𑀅𑀳𑁄𑀲𑀺𑀁, 𑀢𑀜𑁆𑀘 𑀔𑁄 𑀢𑀫𑁂𑀯 𑀤𑀺𑀲𑁆𑀯𑀸𑀦 𑀢𑀁 𑀤𑀺𑀲𑁆𑀯𑀸 𑀏𑀯. 𑀲𑀼𑀪𑀸𑀲𑀺𑀢𑀤𑁆𑀥𑀚𑀦𑁆𑀢𑀺 𑀥𑀫𑁆𑀫𑀤𑁆𑀥𑀚𑀁.

𑁧𑁦𑁪𑁩. 𑀢𑀫𑀦𑁆𑀦𑀧𑀸𑀦𑀦𑁆𑀢𑀺 𑀢𑀫𑁆𑀳𑀺 𑀪𑀕𑀯𑀢𑀺 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘. 𑀅𑀣𑀯𑀸𑀧𑀺 𑀘𑀻𑀯𑀭𑀦𑁆𑀢𑀺 𑀅𑀣 𑀘𑀻𑀯𑀭𑀫𑁆𑀧𑀺. 𑀭𑀲𑀲𑀸 𑀉𑀧𑁂𑀢𑀦𑁆𑀢𑀺 𑀭𑀲𑁂𑀦 𑀉𑀧𑁂𑀢𑀁 𑀲𑀸𑀤𑀼𑀭𑀲𑀁, 𑀉𑀴𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀫𑁆𑀳𑀻𑀢𑀺 𑀕𑀦𑁆𑀣𑀺𑀢𑁂𑀳𑀺 𑀘 𑀅𑀕𑀦𑁆𑀣𑀺𑀓𑁂𑀳𑀺 𑀘 𑀧𑀼𑀧𑁆𑀨𑁂𑀳𑀺 𑀑𑀮𑀫𑁆𑀩𑀦𑀯𑀲𑁂𑀦 𑀲𑀦𑁆𑀣𑀭𑀡𑀯𑀲𑁂𑀦 𑀘 𑀅𑀪𑀺𑀓𑀺𑀡𑁆𑀡𑁂. 𑀧𑀢𑀺𑀝𑁆𑀞𑀧𑁂𑀲𑀺𑀦𑁆𑀢𑀺 𑀧𑀝𑀺𑀧𑀸𑀤𑁂𑀲𑀺𑀁 𑀅𑀤𑀸𑀲𑀺𑀁. 𑀅𑀲𑀗𑁆𑀕𑀫𑀸𑀦𑀲𑁄𑀢𑀺 𑀓𑀢𑁆𑀣𑀘𑀺 𑀅𑀮𑀕𑁆𑀕𑀘𑀺𑀢𑁆𑀢𑁄 𑀲𑁄 𑀅𑀳𑀦𑁆𑀢𑀺 𑀬𑁄𑀚𑀦𑀸.

𑁧𑁦𑁪𑁪. 𑀲𑀕𑁆𑀕𑀲𑁄𑀢𑀺 𑀅𑀧𑀭𑀸𑀧𑀭𑀽𑀧𑀧𑀢𑁆𑀢𑀺𑀯𑀲𑁂𑀦 𑀲𑀕𑁆𑀕𑁂 𑀲𑀕𑁆𑀕𑁂, 𑀢𑀢𑁆𑀣𑀸𑀧𑀺 𑀘 𑀤𑁂𑀯𑀧𑀼𑀭𑁂 𑀲𑀼𑀤𑀲𑁆𑀲𑀦𑀫𑀳𑀸𑀦𑀕𑀭𑁂. 𑀭𑀫𑀸𑀫𑀻𑀢𑀺 𑀓𑀻𑀴𑀸𑀫𑀺 𑀫𑁄𑀤𑀸𑀫𑀺.

𑁧𑁦𑁪𑁫. 𑀏𑀢𑁂𑀦𑀼𑀧𑀸𑀬𑁂𑀦𑀸𑀢𑀺 𑀕𑁄𑀧𑀸𑀮𑀩𑁆𑀭𑀸𑀳𑁆𑀫𑀡𑀓𑀸𑀮𑁂 𑀲𑀲𑀸𑀯𑀓𑀲𑀗𑁆𑀖𑀲𑁆𑀲 𑀓𑀲𑁆𑀲𑀧𑀪𑀕𑀯𑀢𑁄 𑀬𑀣𑀸 𑀅𑀲𑀤𑀺𑀲𑀤𑀸𑀦𑀁 𑀅𑀤𑀸𑀲𑀺𑀁, 𑀏𑀢𑁂𑀦 𑀉𑀧𑀸𑀬𑁂𑀦. 𑀇𑀫𑀁 𑀦𑀺𑀭𑀕𑁆𑀕𑀴𑀁 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀢𑀺𑀯𑀺𑀥𑀁 𑀯𑀺𑀲𑀼𑀤𑁆𑀥𑀦𑁆𑀢𑀺 𑀅𑀦𑀸𑀯𑀝𑀤𑁆𑀯𑀸𑀭𑀢𑀸𑀬 𑀫𑀼𑀢𑁆𑀢𑀘𑀸𑀕𑀢𑀸𑀬 𑀘 𑀦𑀺𑀭𑀕𑁆𑀕𑀴𑀁, 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀓𑀭𑀡𑀓𑀸𑀭𑀸𑀧𑀦𑀸𑀦𑀼𑀲𑁆𑀲𑀭𑀡𑀯𑀺𑀥𑀻𑀳𑀺 𑀲𑀫𑁆𑀧𑀦𑁆𑀦𑀢𑀸𑀬 𑀢𑀺𑀯𑀺𑀥𑀁, 𑀢𑀢𑁆𑀣 𑀲𑀁𑀓𑀺𑀮𑁂𑀲𑀸𑀪𑀸𑀯𑁂𑀦 𑀯𑀺𑀲𑀼𑀤𑁆𑀥𑀁 𑀅𑀧𑀭𑀺𑀫𑀺𑀢𑀥𑀦𑀧𑀭𑀺𑀘𑁆𑀘𑀸𑀕𑀪𑀸𑀯𑁂𑀦 𑀫𑀳𑀸𑀘𑀸𑀕𑀢𑀸𑀬 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸, 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀤𑀸𑀦𑀁 𑀘𑀺𑀭𑀓𑀢𑀫𑁆𑀧𑀺 𑀔𑁂𑀢𑁆𑀢𑀯𑀢𑁆𑀣𑀼𑀘𑀺𑀢𑁆𑀢𑀸𑀦𑀁 𑀉𑀴𑀸𑀭𑀢𑀸𑀬 𑀅𑀦𑁆𑀢𑀭𑀦𑁆𑀢𑀭𑀸 𑀅𑀦𑀼𑀲𑁆𑀲𑀭𑀡𑁂𑀦 𑀅𑀢𑁆𑀢𑀦𑁄 𑀧𑀸𑀓𑀝𑀁 𑀆𑀲𑀦𑁆𑀦𑀁 𑀧𑀘𑁆𑀘𑀓𑁆𑀔𑀁 𑀯𑀺𑀬 𑀉𑀧𑀝𑁆𑀞𑀺𑀢𑀁 𑀕𑀳𑁂𑀢𑁆𑀯𑀸 𑀆𑀳 ‘‘𑀇𑀫’’𑀦𑁆𑀢𑀺.

𑁧𑁦𑁪𑁬. 𑀏𑀯𑀁 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀣𑁂𑀭𑀲𑁆𑀲 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀢𑀸𑀤𑀺𑀲𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑁂𑀧𑀺 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑀢𑀁 𑀢𑀣𑀸𑀕𑀢𑁂 𑀘 𑀉𑀢𑁆𑀢𑀫𑀁 𑀅𑀢𑁆𑀢𑀦𑁄 𑀧𑀲𑀸𑀤𑀩𑀳𑀼𑀫𑀸𑀦𑀁 𑀧𑀯𑁂𑀤𑁂𑀦𑁆𑀢𑁄 ‘‘𑀆𑀬𑀼𑀜𑁆𑀘 𑀯𑀡𑁆𑀡𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀅𑀪𑀺𑀓𑀗𑁆𑀔𑀢𑀸𑀢𑀺 𑀇𑀘𑁆𑀙𑀦𑁆𑀢𑁂𑀦. 𑀫𑀼𑀦𑀻𑀢𑀺 𑀣𑁂𑀭𑀁 𑀆𑀮𑀧𑀢𑀺.

𑁧𑁦𑁪𑁭. 𑀦𑀬𑀺𑀫𑀲𑁆𑀫𑀺𑀁 𑀮𑁄𑀓𑁂𑀢𑀺 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀪𑀽𑀢𑀁 𑀮𑁄𑀓𑀁 𑀯𑀤𑀢𑀺. 𑀧𑀭𑀲𑁆𑀫𑀺𑀦𑁆𑀢𑀺 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁. 𑀏𑀢𑁂𑀦 𑀲𑀩𑁆𑀩𑁂𑀧𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀤𑀲𑁆𑀲𑁂𑀢𑀺. 𑀲𑀫𑁄 𑀘 𑀯𑀺𑀚𑁆𑀚𑀢𑀻𑀢𑀺 𑀲𑁂𑀝𑁆𑀞𑁄 𑀢𑀸𑀯 𑀢𑀺𑀝𑁆𑀞𑀢𑀼, 𑀲𑀫𑁄 𑀏𑀯 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀆𑀳𑀼𑀦𑁂𑀬𑁆𑀬𑀸𑀦𑀁 𑀧𑀭𑀫𑀸𑀳𑀼𑀢𑀺𑀁 𑀕𑀢𑁄𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀬𑀢𑁆𑀢𑀓𑀸 𑀆𑀳𑀼𑀦𑁂𑀬𑁆𑀬𑀸 𑀦𑀸𑀫, 𑀢𑁂𑀲𑀼 𑀲𑀩𑁆𑀩𑁂𑀲𑀼 𑀧𑀭𑀫𑀸𑀳𑀼𑀢𑀺𑀁 𑀧𑀭𑀫𑀁 𑀆𑀳𑀼𑀦𑁂𑀬𑁆𑀬𑀪𑀸𑀯𑀁 𑀕𑀢𑁄. ‘‘𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀧𑀭𑀫𑀕𑁆𑀕𑀢𑀁 𑀕𑀢𑁄’’𑀢𑀺 𑀯𑀸 𑀧𑀸𑀞𑁄, 𑀢𑀢𑁆𑀣 𑀧𑀭𑀫𑀕𑁆𑀕𑀢𑀦𑁆𑀢𑀺 𑀧𑀭𑀫𑀁 𑀅𑀕𑁆𑀕𑀪𑀸𑀯𑀁, 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀲𑀦𑁆𑀢𑀺 𑀆𑀳 ‘‘𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀯𑀺𑀧𑀼𑀮𑀧𑁆𑀨𑀮𑁂𑀲𑀺𑀦’’𑀦𑁆𑀢𑀺, 𑀧𑀼𑀜𑁆𑀜𑁂𑀦 𑀅𑀢𑁆𑀣𑀺𑀓𑀸𑀦𑀁 𑀯𑀺𑀧𑀼𑀮𑀁 𑀫𑀳𑀦𑁆𑀢𑀁 𑀧𑀼𑀜𑁆𑀜𑀨𑀮𑀁 𑀇𑀘𑁆𑀙𑀦𑁆𑀢𑀸𑀦𑀁, 𑀢𑀣𑀸𑀕𑀢𑁄 𑀏𑀯 𑀮𑁄𑀓𑀲𑁆𑀲 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀘𑀺 𑀧𑀦 ‘‘𑀆𑀳𑀼𑀦𑁂𑀬𑁆𑀬𑀸𑀦𑀁 𑀧𑀭𑀫𑀕𑁆𑀕𑀢𑀁 𑀕𑀢𑁄’’𑀢𑀺 𑀧𑀞𑀦𑁆𑀢𑀺, 𑀲𑁄𑀬𑁂𑀯𑀢𑁆𑀣𑁄.

𑀏𑀯𑀁 𑀓𑀣𑁂𑀦𑁆𑀢𑀫𑁂𑀯 𑀢𑀁 𑀣𑁂𑀭𑁄 𑀓𑀮𑁆𑀮𑀘𑀺𑀢𑁆𑀢𑀁 𑀫𑀼𑀤𑀼𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁 𑀉𑀤𑀕𑁆𑀕𑀘𑀺𑀢𑁆𑀢𑀁 𑀧𑀲𑀦𑁆𑀦𑀘𑀺𑀢𑁆𑀢𑀜𑁆𑀘 𑀜𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺. 𑀲𑁄 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀅𑀣 𑀣𑁂𑀭𑁄 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀢𑀫𑀢𑁆𑀣𑀁 𑀅𑀢𑁆𑀢𑀦𑀸 𑀘 𑀤𑁂𑀯𑀧𑀼𑀢𑁆𑀢𑁂𑀦 𑀘 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀫𑀳𑀸𑀭𑀣𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀔𑀼𑀤𑁆𑀤𑀓𑀝𑁆𑀞𑀓𑀣𑀸𑀬 𑀯𑀺𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀁

𑀘𑀼𑀤𑁆𑀤𑀲𑀯𑀢𑁆𑀣𑀼𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀧𑀜𑁆𑀘𑀫𑀲𑁆𑀲 𑀫𑀳𑀸𑀭𑀣𑀯𑀕𑁆𑀕𑀲𑁆𑀲

𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.