𑁧𑁩. 𑀘𑀽𑀴𑀭𑀣𑀯𑀺𑀫𑀸𑀦𑀯𑀡𑁆𑀡𑀦𑀸

𑀤𑀴𑁆𑀳𑀥𑀫𑁆𑀫𑀸 𑀦𑀺𑀲𑀸𑀭𑀲𑁆𑀲𑀸𑀢𑀺 𑀘𑀽𑀴𑀭𑀣𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀥𑀸𑀢𑀼𑀯𑀺𑀪𑀸𑀕𑀁 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀲𑀢𑁆𑀣𑀼 𑀣𑀽𑀧𑁂𑀲𑀼 𑀧𑀢𑀺𑀝𑁆𑀞𑀸𑀧𑀺𑀬𑀫𑀸𑀦𑁂𑀲𑀼 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀧𑁆𑀧𑀫𑀼𑀔𑁂𑀲𑀼 𑀥𑀫𑁆𑀫𑀁 𑀲𑀗𑁆𑀕𑀸𑀬𑀺𑀢𑀼𑀁 𑀉𑀘𑁆𑀘𑀺𑀦𑀺𑀢𑁆𑀯𑀸 𑀕𑀳𑀺𑀢𑁂𑀲𑀼 𑀲𑀸𑀯𑀓𑁂𑀲𑀼 𑀬𑀸𑀯 𑀯𑀲𑁆𑀲𑀽𑀧𑀕𑀫𑀦𑀸 𑀯𑁂𑀦𑁂𑀬𑁆𑀬𑀸𑀧𑁂𑀓𑁆𑀔𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀢𑀢𑁆𑀣 𑀢𑀢𑁆𑀣 𑀯𑀲𑀦𑁆𑀢𑁂𑀲𑀼 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑀧𑀘𑁆𑀘𑀦𑁆𑀢𑀤𑁂𑀲𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀭𑀜𑁆𑀜𑀸𑀬𑀢𑀦𑁂 𑀯𑀺𑀳𑀭𑀢𑀺. 𑀢𑁂𑀦 𑀲𑀫𑀬𑁂𑀦 𑀅𑀲𑁆𑀲𑀓𑀭𑀝𑁆𑀞𑁂 𑀧𑁄𑀢𑀮𑀺𑀦𑀕𑀭𑁂 𑀅𑀲𑁆𑀲𑀓𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀢𑀲𑁆𑀲 𑀚𑁂𑀝𑁆𑀞𑀸𑀬 𑀤𑁂𑀯𑀺𑀬𑀸 𑀧𑀼𑀢𑁆𑀢𑁄 𑀲𑀼𑀚𑀸𑀢𑁄 𑀦𑀸𑀫 𑀓𑀼𑀫𑀸𑀭𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀓𑀦𑀺𑀝𑁆𑀞𑀸𑀬 𑀤𑁂𑀯𑀺𑀬𑀸 𑀦𑀺𑀩𑀦𑁆𑀥𑀦𑁂𑀦 𑀧𑀺𑀢𑀭𑀸 𑀭𑀝𑁆𑀞𑀢𑁄 𑀧𑀩𑁆𑀩𑀸𑀚𑀺𑀢𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀦𑀘𑀭𑀓𑁂 𑀦𑀺𑀲𑁆𑀲𑀸𑀬 𑀅𑀭𑀜𑁆𑀜𑁂 𑀯𑀲𑀢𑀺. 𑀲𑁄 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀻𑀮𑀫𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀅𑀧𑀭𑀸𑀧𑀭𑀁 𑀲𑀼𑀕𑀢𑀺𑀬𑀁𑀬𑁂𑀯 𑀧𑀭𑀺𑀩𑁆𑀪𑀫𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀪𑀕𑀯𑀢𑁄 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀢𑀺𑀁𑀲𑀯𑀲𑁆𑀲𑁂 𑀅𑀲𑁆𑀲𑀓𑀭𑀝𑁆𑀞𑁂 𑀅𑀲𑁆𑀲𑀓𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺, ‘‘𑀲𑀼𑀚𑀸𑀢𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀢𑀺.

𑀢𑀲𑁆𑀲 𑀧𑀦 𑀫𑀸𑀢𑀭𑀺 𑀓𑀸𑀮𑀓𑀢𑀸𑀬 𑀭𑀸𑀚𑀸 𑀅𑀜𑁆𑀜𑀁 𑀭𑀸𑀚𑀥𑀻𑀢𑀭𑀁 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸𑀧𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀲𑁆𑀲𑀸 𑀭𑀸𑀚𑀸 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑁄 ‘‘𑀪𑀤𑁆𑀤𑁂, 𑀢𑀬𑀸 𑀇𑀘𑁆𑀙𑀺𑀢𑀁 𑀯𑀭𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀭𑀁 𑀅𑀤𑀸𑀲𑀺. 𑀲𑀸 𑀕𑀳𑀺𑀢𑀓𑀁 𑀓𑀢𑁆𑀯𑀸 𑀞𑀧𑁂𑀢𑁆𑀯𑀸 𑀬𑀤𑀸 𑀲𑀼𑀚𑀸𑀢𑀓𑀼𑀫𑀸𑀭𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀚𑀸𑀢𑁄, 𑀢𑀤𑀸 𑀭𑀸𑀚𑀸𑀦𑀁 𑀆𑀳 ‘‘𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀫𑀫 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑁂𑀳𑀺 𑀯𑀭𑁄 𑀤𑀺𑀦𑁆𑀦𑁄, 𑀢𑀁 𑀇𑀤𑀸𑀦𑀺 𑀤𑁂𑀣𑀸’’𑀢𑀺. ‘‘𑀕𑀡𑁆𑀳, 𑀤𑁂𑀯𑀻’’𑀢𑀺. ‘‘𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀤𑁂𑀣𑀸’’𑀢𑀺. ‘‘𑀦𑀲𑁆𑀲, 𑀯𑀲𑀮𑀺, 𑀫𑀫 𑀚𑁂𑀝𑁆𑀞𑀧𑀼𑀢𑁆𑀢𑁂 𑀤𑁂𑀯𑀓𑀼𑀫𑀸𑀭𑀲𑀤𑀺𑀲𑁂 𑀲𑀼𑀚𑀸𑀢𑀓𑀼𑀫𑀸𑀭𑁂 𑀞𑀺𑀢𑁂 𑀓𑀲𑁆𑀫𑀸 𑀏𑀯𑀁 𑀯𑀤𑀲𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀤𑁂𑀯𑀻 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑀦𑁆𑀥𑀦𑀁 𑀓𑀭𑁄𑀦𑁆𑀢𑀻 𑀫𑀦𑀁 𑀅𑀮𑀪𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀆𑀳 ‘‘𑀤𑁂𑀯, 𑀬𑀤𑀺 𑀲𑀘𑁆𑀘𑁂 𑀢𑀺𑀝𑁆𑀞𑀲𑀺, 𑀤𑁂𑀳𑀺 𑀏𑀯𑀸’’𑀢𑀺. 𑀭𑀸𑀚𑀸 ‘‘𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀫𑀬𑀸 𑀇𑀫𑀺𑀲𑁆𑀲𑀸 𑀯𑀭𑁄 𑀤𑀺𑀦𑁆𑀦𑁄, 𑀅𑀬𑀜𑁆𑀘 𑀏𑀯𑀁 𑀯𑀤𑀢𑀻’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀲𑀼𑀚𑀸𑀢𑀓𑀼𑀫𑀸𑀭𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑁂𑀲𑀺. 𑀓𑀼𑀫𑀸𑀭𑁄 𑀧𑀺𑀢𑀭𑀁 𑀲𑁄𑀘𑀫𑀸𑀦𑀁 𑀤𑀺𑀲𑁆𑀯𑀸 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑁂𑀢𑁆𑀯𑀸 ‘‘𑀅𑀦𑀼𑀚𑀸𑀦𑀸𑀳𑀺, 𑀤𑁂𑀯, 𑀅𑀳𑀁 𑀅𑀜𑁆𑀜𑀢𑁆𑀣 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀭𑀜𑁆𑀜𑀸 ‘‘𑀅𑀜𑁆𑀜𑀁 𑀢𑁂 𑀦𑀕𑀭𑀁 𑀫𑀸𑀧𑁂𑀲𑁆𑀲𑀸𑀫𑀺, 𑀢𑀢𑁆𑀣 𑀯𑀲𑁂𑀬𑁆𑀬𑀸𑀲𑀻’’𑀢𑀺 𑀯𑀼𑀢𑁆𑀢𑁂 𑀓𑀼𑀫𑀸𑀭𑁄 𑀦 𑀇𑀘𑁆𑀙𑀺. ‘‘𑀫𑀫 𑀲𑀳𑀸𑀬𑀸𑀦𑀁 𑀭𑀸𑀚𑀽𑀦𑀁 𑀲𑀦𑁆𑀢𑀺𑀓𑁂 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀘 𑀯𑀼𑀢𑁆𑀢𑁂 𑀢𑀫𑁆𑀧𑀺 𑀦𑀸𑀦𑀼𑀚𑀸𑀦𑀺. 𑀓𑁂𑀯𑀮𑀁 ‘‘𑀤𑁂𑀯, 𑀅𑀭𑀜𑁆𑀜𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀭𑀸𑀚𑀸 𑀧𑀼𑀢𑁆𑀢𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀲𑀻𑀲𑁂 𑀘𑀼𑀫𑁆𑀩𑀺𑀢𑁆𑀯𑀸 ‘‘𑀫𑀫𑀘𑁆𑀘𑀬𑁂𑀦 𑀇𑀥𑀸𑀕𑀦𑁆𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀳𑀸’’𑀢𑀺 𑀯𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺.

𑀲𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀦𑀘𑀭𑀓𑁂 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀫𑀺𑀕𑀯𑀁 𑀕𑀢𑁄. 𑀢𑀲𑁆𑀲 𑀲𑀫𑀡𑀓𑀸𑀮𑁂 𑀲𑀳𑀸𑀬𑀯𑀭𑁄 𑀏𑀓𑁄 𑀤𑁂𑀯𑀧𑀼𑀢𑁆𑀢𑁄 𑀳𑀺𑀢𑁂𑀲𑀺𑀢𑀸𑀬 𑀫𑀺𑀕𑀭𑀽𑀧𑁂𑀦 𑀢𑀁 𑀧𑀮𑁄𑀪𑁂𑀦𑁆𑀢𑁄 𑀥𑀸𑀯𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀬𑀦𑀲𑁆𑀲 𑀯𑀲𑀦𑀝𑁆𑀞𑀸𑀦𑀲𑀫𑀻𑀧𑀁 𑀧𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀺. 𑀲𑁄 ‘‘𑀇𑀫𑀁 𑀫𑀺𑀕𑀁 𑀇𑀤𑀸𑀦𑀺 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀥𑀸𑀯𑀦𑁆𑀢𑁄 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀢𑀁 𑀅𑀧𑀲𑁆𑀲𑀦𑁆𑀢𑁄 𑀩𑀳𑀺 𑀧𑀡𑁆𑀡𑀲𑀸𑀮𑀸𑀬 𑀣𑁂𑀭𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀲𑀫𑀻𑀧𑁂 𑀘𑀸𑀧𑀓𑁄𑀝𑀺𑀁 𑀑𑀮𑀼𑀩𑁆𑀪 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑁋

𑁯𑁮𑁧. ‘‘𑀤𑀴𑁆𑀳𑀥𑀫𑁆𑀫𑀸 𑀦𑀺𑀲𑀸𑀭𑀲𑁆𑀲, 𑀥𑀦𑀼𑀁 𑀑𑀮𑀼𑀩𑁆𑀪 𑀢𑀺𑀝𑁆𑀞𑀲𑀺;

𑀔𑀢𑁆𑀢𑀺𑀬𑁄 𑀦𑀼𑀲𑀺 𑀭𑀸𑀚𑀜𑁆𑀜𑁄, 𑀅𑀤𑀼 𑀮𑀼𑀤𑁆𑀤𑁄 𑀯𑀦𑁂𑀘𑀭𑁄’’𑀢𑀺. 𑁋

𑀧𑀼𑀘𑁆𑀙𑀺. 𑀢𑀢𑁆𑀣 𑀤𑀴𑁆𑀳𑀥𑀫𑁆𑀫𑀸𑀢𑀺 𑀤𑀴𑁆𑀳𑀥𑀦𑀼. 𑀤𑀴𑁆𑀳𑀥𑀦𑀼 𑀦𑀸𑀫 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀯𑀼𑀘𑁆𑀘𑀢𑀺. 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀦𑁆𑀢𑀺 𑀘 𑀬𑀲𑁆𑀲 𑀆𑀭𑁄𑀧𑀺𑀢𑀲𑁆𑀲 𑀚𑀺𑀬𑀸𑀬 𑀩𑀤𑁆𑀥𑁄 𑀮𑁄𑀳𑀲𑀻𑀲𑀸𑀤𑀻𑀦𑀁 𑀪𑀸𑀭𑁄 𑀤𑀡𑁆𑀟𑁂 𑀕𑀳𑁂𑀢𑁆𑀯𑀸 𑀬𑀸𑀯 𑀓𑀡𑁆𑀟𑀧𑁆𑀧𑀫𑀸𑀡𑀸 𑀉𑀓𑁆𑀔𑀺𑀢𑁆𑀢𑀲𑁆𑀲 𑀧𑀣𑀯𑀺𑀢𑁄 𑀫𑀼𑀘𑁆𑀘𑀢𑀺. 𑀦𑀺𑀲𑀸𑀭𑀲𑁆𑀲𑀸𑀢𑀺 𑀦𑀺𑀭𑀢𑀺𑀲𑀬𑀲𑀸𑀭𑀲𑁆𑀲 𑀯𑀺𑀲𑀺𑀝𑁆𑀞𑀲𑀸𑀭𑀲𑁆𑀲 𑀭𑀼𑀓𑁆𑀔𑀲𑁆𑀲 𑀥𑀦𑀼𑀁, 𑀲𑀸𑀭𑀢𑀭𑀭𑀼𑀓𑁆𑀔𑀫𑀬𑀁 𑀥𑀦𑀼𑀦𑁆𑀢𑀺 𑀅𑀢𑁆𑀣𑁄. 𑀑𑀮𑀼𑀩𑁆𑀪𑀸𑀢𑀺 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸. 𑀭𑀸𑀚𑀜𑁆𑀜𑁄𑀢𑀺 𑀭𑀸𑀚𑀓𑀼𑀫𑀸𑀭𑁄. 𑀯𑀦𑁂𑀘𑀭𑁄𑀢𑀺 𑀯𑀦𑀘𑀭𑁄.

𑀅𑀣 𑀲𑁄 𑀅𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀦𑁆𑀢𑁄 𑁋

𑁯𑁮𑁨. ‘‘𑀅𑀲𑁆𑀲𑀓𑀸𑀥𑀺𑀧𑀢𑀺𑀲𑁆𑀲𑀸𑀳𑀁, 𑀪𑀦𑁆𑀢𑁂 𑀧𑀼𑀢𑁆𑀢𑁄 𑀯𑀦𑁂𑀘𑀭𑁄;

𑀦𑀸𑀫𑀁 𑀫𑁂 𑀪𑀺𑀓𑁆𑀔𑀼 𑀢𑁂 𑀩𑁆𑀭𑀽𑀫𑀺, 𑀲𑀼𑀚𑀸𑀢𑁄 𑀇𑀢𑀺 𑀫𑀁 𑀯𑀺𑀤𑀽.

𑁯𑁮𑁩. ‘‘𑀫𑀺𑀕𑁂 𑀕𑀯𑁂𑀲𑀫𑀸𑀦𑁄𑀳𑀁, 𑀑𑀕𑀸𑀳𑀦𑁆𑀢𑁄 𑀩𑁆𑀭𑀳𑀸𑀯𑀦𑀁;

𑀫𑀺𑀕𑀁 𑀢𑀜𑁆𑀘𑁂𑀯 𑀦𑀸𑀤𑁆𑀤𑀓𑁆𑀔𑀺𑀁, 𑀢𑀜𑁆𑀘 𑀤𑀺𑀲𑁆𑀯𑀸 𑀞𑀺𑀢𑁄 𑀅𑀳’’𑀦𑁆𑀢𑀺. 𑁋

𑀆𑀳. 𑀢𑀢𑁆𑀣 𑀅𑀲𑁆𑀲𑀓𑀸𑀥𑀺𑀧𑀢𑀺𑀲𑁆𑀲𑀸𑀢𑀺 𑀅𑀲𑁆𑀲𑀓𑀭𑀝𑁆𑀞𑀸𑀥𑀺𑀧𑀢𑀺𑀦𑁄 𑀅𑀲𑁆𑀲𑀓𑀭𑀸𑀚𑀲𑁆𑀲. 𑀪𑀺𑀓𑁆𑀔𑀽𑀢𑀺 𑀣𑁂𑀭𑀁 𑀆𑀮𑀧𑀢𑀺. 𑀫𑀺𑀕𑁂 𑀕𑀯𑁂𑀲𑀫𑀸𑀦𑁄𑀢𑀺 𑀫𑀺𑀕𑀲𑀽𑀓𑀭𑀸𑀤𑀺𑀓𑁂 𑀕𑀯𑁂𑀲𑀦𑁆𑀢𑁄, 𑀫𑀺𑀕𑀯𑀁 𑀘𑀭𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 𑁋

𑁯𑁮𑁪. ‘‘𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀧𑀼𑀜𑁆𑀜, 𑀅𑀣𑁄 𑀢𑁂 𑀅𑀤𑀼𑀭𑀸𑀕𑀢𑀁;

𑀏𑀢𑁆𑀢𑁄 𑀉𑀤𑀓𑀫𑀸𑀤𑀸𑀬, 𑀧𑀸𑀤𑁂 𑀧𑀓𑁆𑀔𑀸𑀮𑀬𑀲𑁆𑀲𑀼 𑀢𑁂.

𑁯𑁮𑁫. ‘‘𑀇𑀤𑀫𑁆𑀧𑀺 𑀧𑀸𑀦𑀻𑀬𑀁 𑀲𑀻𑀢𑀁, 𑀆𑀪𑀢𑀁 𑀕𑀺𑀭𑀺𑀕𑀩𑁆𑀪𑀭𑀸;

𑀭𑀸𑀚𑀧𑀼𑀢𑁆𑀢 𑀢𑀢𑁄 𑀧𑀺𑀢𑁆𑀯𑀸, 𑀲𑀦𑁆𑀣𑀢𑀲𑁆𑀫𑀺𑀁 𑀉𑀧𑀸𑀯𑀺𑀲𑀸’’𑀢𑀺. 𑁋 𑀆𑀳;

𑁯𑁮𑁪. 𑀢𑀢𑁆𑀣 𑀅𑀤𑀼𑀭𑀸𑀕𑀢𑀦𑁆𑀢𑀺 𑀤𑀼𑀭𑀸𑀕𑀫𑀦𑀯𑀚𑁆𑀚𑀺𑀢𑀁, 𑀫𑀳𑀸𑀧𑀼𑀜𑁆𑀜, 𑀢𑁂 𑀇𑀥𑀸𑀕𑀫𑀦𑀁 𑀲𑁆𑀯𑀸𑀕𑀢𑀁, 𑀦 𑀢𑁂 𑀅𑀧𑁆𑀧𑀓𑀫𑁆𑀧𑀺 𑀤𑀼𑀭𑀸𑀕𑀫𑀦𑀁 𑀅𑀢𑁆𑀣𑀺 𑀢𑀼𑀬𑁆𑀳𑀜𑁆𑀘 𑀫𑀬𑁆𑀳𑀜𑁆𑀘 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀦𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀥𑀼𑀦𑀸𑀕𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀇𑀤𑀸𑀦𑀺 𑀆𑀕𑀫𑀦𑀦𑁆𑀢𑀺 𑀅𑀢𑁆𑀣𑁄.

𑁯𑁮𑁫. 𑀲𑀦𑁆𑀣𑀢𑀲𑁆𑀫𑀺𑀁 𑀉𑀧𑀸𑀯𑀺𑀲𑀸𑀢𑀺 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀅𑀦𑀺𑀲𑀻𑀤𑀺𑀢𑁆𑀯𑀸 𑀅𑀫𑀼𑀓𑀲𑁆𑀫𑀺𑀁 𑀢𑀺𑀡𑀲𑀦𑁆𑀣𑀸𑀭𑀓𑁂 𑀦𑀺𑀲𑀻𑀤𑀸𑀢𑀺.

𑀢𑀢𑁄 𑀭𑀸𑀚𑀓𑀼𑀫𑀸𑀭𑁄 𑀣𑁂𑀭𑀲𑁆𑀲 𑀧𑀝𑀺𑀲𑀦𑁆𑀣𑀸𑀭𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀆𑀳 𑁋

𑁯𑁮𑁬. ‘‘𑀓𑀮𑁆𑀬𑀸𑀡𑀻 𑀯𑀢 𑀢𑁂 𑀯𑀸𑀘𑀸, 𑀲𑀯𑀦𑀻𑀬𑀸 𑀫𑀳𑀸𑀫𑀼𑀦𑀺;

𑀦𑁂𑀮𑀸 𑀅𑀢𑁆𑀣𑀯𑀢𑀻 𑀯𑀕𑁆𑀕𑀼, 𑀫𑀦𑁆𑀢𑁆𑀯𑀸 𑀅𑀢𑁆𑀣𑀜𑁆𑀘 𑀪𑀸𑀲𑀲𑀺.

𑁯𑁮𑁭. ‘‘𑀓𑀸 𑀢𑁂 𑀭𑀢𑀺 𑀯𑀦𑁂 𑀯𑀺𑀳𑀭𑀢𑁄, 𑀇𑀲𑀺𑀦𑀺𑀲𑀪 𑀯𑀤𑁂𑀳𑀺 𑀧𑀼𑀝𑁆𑀞𑁄;

𑀢𑀯 𑀯𑀘𑀦𑀧𑀣𑀁 𑀦𑀺𑀲𑀸𑀫𑀬𑀺𑀢𑁆𑀯𑀸, 𑀅𑀢𑁆𑀣𑀥𑀫𑁆𑀫𑀧𑀤𑀁 𑀲𑀫𑀸𑀘𑀭𑁂𑀫𑀲𑁂’’𑀢𑀺.

𑁯𑁮𑁬. 𑀢𑀢𑁆𑀣 𑀓𑀮𑁆𑀬𑀸𑀡𑀻𑀢𑀺 𑀲𑀼𑀦𑁆𑀤𑀭𑀸 𑀲𑁄𑀪𑀦𑀸. 𑀲𑀯𑀦𑀻𑀬𑀸𑀢𑀺 𑀲𑁄𑀢𑀼𑀁 𑀬𑀼𑀢𑁆𑀢𑀸. 𑀦𑁂𑀮𑀸𑀢𑀺 𑀦𑀺𑀤𑁆𑀤𑁄𑀲𑀸. 𑀅𑀢𑁆𑀣𑀯𑀢𑀻𑀢𑀺 𑀅𑀢𑁆𑀣𑀬𑀼𑀢𑁆𑀢𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀦𑀸 𑀳𑀺𑀢𑁂𑀦 𑀉𑀧𑁂𑀢𑀸. 𑀯𑀕𑁆𑀕𑀽𑀢𑀺 𑀫𑀥𑀼𑀭𑀸. 𑀫𑀦𑁆𑀢𑁆𑀯𑀸𑀢𑀺 𑀚𑀸𑀦𑀺𑀢𑁆𑀯𑀸 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀅𑀢𑁆𑀣𑀦𑁆𑀢𑀺 𑀅𑀢𑁆𑀣𑀢𑁄 𑀅𑀦𑀧𑁂𑀢𑀁 𑀏𑀓𑀦𑁆𑀢𑀳𑀺𑀢𑀸𑀯𑀳𑀁.

𑁯𑁮𑁭. 𑀇𑀲𑀺𑀦𑀺𑀲𑀪𑀸𑀢𑀺 𑀇𑀲𑀻𑀲𑀼 𑀦𑀺𑀲𑀪 𑀆𑀚𑀸𑀦𑀻𑀬𑀲𑀤𑀺𑀲. 𑀯𑀘𑀦𑀧𑀣𑀦𑁆𑀢𑀺 𑀯𑀘𑀦𑀁. 𑀯𑀘𑀦𑀫𑁂𑀯 𑀳𑀺 𑀅𑀢𑁆𑀣𑀸𑀥𑀺𑀕𑀫𑀲𑁆𑀲 𑀉𑀧𑀸𑀬𑀪𑀸𑀯𑀢𑁄 ‘‘𑀯𑀘𑀦𑀧𑀣’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀥𑀫𑁆𑀫𑀧𑀤𑀁 𑀲𑀫𑀸𑀘𑀭𑁂𑀫𑀲𑁂𑀢𑀺 𑀇𑀥 𑀘𑁂𑀯 𑀲𑀫𑁆𑀧𑀭𑀸𑀬𑁂 𑀘 𑀅𑀢𑁆𑀣𑀸𑀯𑀳𑀁 𑀲𑀻𑀮𑀸𑀤𑀺𑀥𑀫𑁆𑀫𑀓𑁄𑀝𑁆𑀞𑀸𑀲𑀁 𑀧𑀝𑀺𑀧𑀚𑁆𑀚𑀸𑀫𑀲𑁂.

𑀇𑀤𑀸𑀦𑀺 𑀣𑁂𑀭𑁄 𑀅𑀢𑁆𑀢𑀦𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀯𑀤𑀦𑁆𑀢𑁄 𑁋

𑁯𑁮𑁮. ‘‘𑀅𑀳𑀺𑀁𑀲𑀸 𑀲𑀩𑁆𑀩𑀧𑀸𑀡𑀻𑀦𑀁, 𑀓𑀼𑀫𑀸𑀭𑀫𑁆𑀳𑀸𑀓 𑀭𑀼𑀘𑁆𑀘𑀢𑀺;

𑀣𑁂𑀬𑁆𑀬𑀸 𑀘 𑀅𑀢𑀺𑀘𑀸𑀭𑀸 𑀘, 𑀫𑀚𑁆𑀚𑀧𑀸𑀦𑀸 𑀘 𑀆𑀭𑀢𑀺.

𑁯𑁮𑁯. ‘‘𑀆𑀭𑀢𑀺 𑀲𑀫𑀘𑀭𑀺𑀬𑀸 𑀘, 𑀩𑀸𑀳𑀼𑀲𑀘𑁆𑀘𑀁 𑀓𑀢𑀜𑁆𑀜𑀼𑀢𑀸;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀲𑀁𑀲𑀸, 𑀥𑀫𑁆𑀫𑀸 𑀏𑀢𑁂 𑀧𑀲𑀁𑀲𑀺𑀬𑀸’’𑀢𑀺. 𑁋 𑀆𑀳;

𑁯𑁮𑁯. 𑀢𑀢𑁆𑀣 𑀆𑀭𑀢𑀺 𑀲𑀫𑀘𑀭𑀺𑀬𑀸 𑀘𑀸𑀢𑀺 𑀬𑀣𑀸𑀯𑀼𑀢𑁆𑀢𑀸 𑀘 𑀧𑀸𑀧𑀥𑀫𑁆𑀫𑀢𑁄 𑀆𑀭𑀢𑀺, 𑀧𑀝𑀺𑀯𑀺𑀭𑀢𑀺 𑀓𑀸𑀬𑀲𑀫𑀢𑀸𑀤𑀺𑀲𑀫𑀘𑀭𑀺𑀬𑀸 𑀘. 𑀩𑀸𑀳𑀼𑀲𑀘𑁆𑀘𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑀁. 𑀓𑀢𑀜𑁆𑀜𑀼𑀢𑀸𑀢𑀺 𑀧𑀭𑁂𑀳𑀺 𑀅𑀢𑁆𑀢𑀦𑁄 𑀓𑀢𑀲𑁆𑀲 𑀉𑀧𑀓𑀸𑀭𑀲𑁆𑀲 𑀚𑀸𑀦𑀦𑀸. 𑀧𑀸𑀲𑀁𑀲𑀸𑀢𑀺 𑀅𑀢𑁆𑀣𑀓𑀸𑀫𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀧𑀓𑀸𑀭𑀢𑁄 𑀆𑀲𑀁𑀲𑀺𑀢𑀩𑁆𑀩𑀸. 𑀥𑀫𑁆𑀫𑀸 𑀏𑀢𑁂𑀢𑀺 𑀏𑀢𑁂 𑀬𑀣𑀸𑀯𑀼𑀢𑁆𑀢𑀸 𑀅𑀳𑀺𑀁𑀲𑀸𑀤𑀺𑀥𑀫𑁆𑀫𑀸. 𑀧𑀲𑀁𑀲𑀺𑀬𑀸𑀢𑀺 𑀯𑀺𑀜𑁆𑀜𑀽𑀳𑀺 𑀧𑀲𑀁𑀲𑀺𑀢𑀩𑁆𑀩𑀸.

𑀏𑀯𑀁 𑀣𑁂𑀭𑁄 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀯𑀢𑁆𑀯𑀸 𑀅𑀦𑀸𑀕𑀢𑀁𑀲𑀜𑀸𑀡𑁂𑀦 𑀆𑀬𑀼𑀲𑀗𑁆𑀔𑀸𑀭𑁂 𑀑𑀮𑁄𑀓𑁂𑀦𑁆𑀢𑁄 ‘‘𑀧𑀜𑁆𑀘𑀫𑀸𑀲𑀫𑀢𑁆𑀢𑀫𑁂𑀯𑀸’’𑀢𑀺 𑀤𑀺𑀲𑁆𑀯𑀸 𑀢𑀁 𑀲𑀁𑀯𑁂𑀚𑁂𑀢𑁆𑀯𑀸 𑀤𑀴𑁆𑀳𑀁 𑀢𑀢𑁆𑀣 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁯𑁦. ‘‘𑀲𑀦𑁆𑀢𑀺𑀓𑁂 𑀫𑀭𑀡𑀁 𑀢𑀼𑀬𑁆𑀳𑀁, 𑀑𑀭𑀁 𑀫𑀸𑀲𑁂𑀳𑀺 𑀧𑀜𑁆𑀘𑀳𑀺;

𑀭𑀸𑀚𑀧𑀼𑀢𑁆𑀢 𑀯𑀺𑀚𑀸𑀦𑀸𑀳𑀺, 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑀬𑀸’’𑀢𑀺.

𑀢𑀢𑁆𑀣 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑀬𑀸𑀢𑀺 𑀅𑀢𑁆𑀢𑀸𑀦𑀁 𑀅𑀧𑀸𑀬𑀤𑀼𑀓𑁆𑀔𑀢𑁄 𑀫𑁄𑀘𑁂𑀳𑀺.

𑀢𑀢𑁄 𑀓𑀼𑀫𑀸𑀭𑁄 𑀅𑀢𑁆𑀢𑀦𑁄 𑀫𑀼𑀢𑁆𑀢𑀺𑀬𑀸 𑀉𑀧𑀸𑀬𑀁 𑀧𑀼𑀘𑁆𑀙𑀦𑁆𑀢𑁄 𑀆𑀳 𑁋

𑁯𑁯𑁧. ‘‘𑀓𑀢𑀫𑀁 𑀲𑁆𑀯𑀸𑀳𑀁 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸, 𑀓𑀺𑀁 𑀓𑀫𑁆𑀫𑀁 𑀓𑀺𑀜𑁆𑀘 𑀧𑁄𑀭𑀺𑀲𑀁;

𑀓𑀸𑀬 𑀯𑀸 𑀧𑀦 𑀯𑀺𑀚𑁆𑀚𑀸𑀬, 𑀪𑀯𑁂𑀬𑁆𑀬𑀁 𑀅𑀚𑀭𑀸𑀫𑀭𑁄’’𑀢𑀺.

𑀢𑀢𑁆𑀣 𑀓𑀢𑀫𑀁 𑀲𑁆𑀯𑀸𑀳𑀦𑁆𑀢𑀺 𑀓𑀢𑀫𑀁 𑀲𑀼 𑀅𑀳𑀁, 𑀓𑀢𑀫𑀁 𑀦𑀽𑀢𑀺 𑀅𑀢𑁆𑀣𑁄. 𑀓𑀺𑀁 𑀓𑀫𑁆𑀫𑀁 𑀓𑀺𑀜𑁆𑀘 𑀧𑁄𑀭𑀺𑀲𑀦𑁆𑀢𑀺 𑀓𑀢𑁆𑀯𑀸𑀢𑀺 𑀯𑀘𑀦𑀲𑁂𑀲𑁄. 𑀧𑁄𑀭𑀺𑀲𑀦𑁆𑀢𑀺 𑀧𑀼𑀭𑀺𑀲𑀓𑀺𑀘𑁆𑀘𑀁.

𑀢𑀢𑁄 𑀣𑁂𑀭𑁄 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀯𑁄𑀘 𑁋

𑁯𑁯𑁨. ‘‘𑀦 𑀯𑀺𑀚𑁆𑀚𑀢𑁂 𑀲𑁄 𑀧𑀤𑁂𑀲𑁄, 𑀓𑀫𑁆𑀫𑀁 𑀯𑀺𑀚𑁆𑀚𑀸 𑀘 𑀧𑁄𑀭𑀺𑀲𑀁;

𑀬𑀢𑁆𑀣 𑀕𑀦𑁆𑀢𑁆𑀯𑀸 𑀪𑀯𑁂 𑀫𑀘𑁆𑀘𑁄, 𑀭𑀸𑀚𑀧𑀼𑀢𑁆𑀢𑀸𑀚𑀭𑀸𑀫𑀭𑁄.

𑁯𑁯𑁩. ‘‘𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸, 𑀭𑀝𑁆𑀞𑀯𑀦𑁆𑀢𑁄𑀧𑀺 𑀔𑀢𑁆𑀢𑀺𑀬𑀸;

𑀧𑀳𑀽𑀢𑀥𑀦𑀥𑀜𑁆𑀜𑀸𑀲𑁂, 𑀢𑁂𑀧𑀺 𑀦𑁄 𑀅𑀚𑀭𑀸𑀫𑀭𑀸.

𑁯𑁯𑁪. ‘‘𑀬𑀤𑀺 𑀢𑁂 𑀲𑀼𑀢𑀸 𑀅𑀦𑁆𑀥𑀓𑀯𑁂𑀡𑁆𑀟𑀼𑀧𑀼𑀢𑁆𑀢𑀸, 𑀲𑀽𑀭𑀸 𑀯𑀻𑀭𑀸 𑀯𑀺𑀓𑁆𑀓𑀦𑁆𑀢𑀧𑁆𑀧𑀳𑀸𑀭𑀺𑀦𑁄;

𑀢𑁂𑀧𑀺 𑀆𑀬𑀼𑀓𑁆𑀔𑀬𑀁 𑀧𑀢𑁆𑀢𑀸, 𑀯𑀺𑀤𑁆𑀥𑀲𑁆𑀢𑀸 𑀲𑀲𑁆𑀲𑀢𑀻𑀲𑀫𑀸.

𑁯𑁯𑁫. ‘‘𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀏𑀢𑁂 𑀘𑀜𑁆𑀜𑁂 𑀘 𑀚𑀸𑀢𑀺𑀬𑀸, 𑀢𑁂𑀧𑀺 𑀦𑁄 𑀅𑀚𑀭𑀸𑀫𑀭𑀸.

𑁯𑁯𑁬. ‘‘𑀬𑁂 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀺, 𑀙𑀴𑀗𑁆𑀕𑀁 𑀩𑁆𑀭𑀳𑁆𑀫𑀘𑀺𑀦𑁆𑀢𑀺𑀢𑀁;

𑀏𑀢𑁂 𑀘𑀜𑁆𑀜𑁂 𑀘 𑀯𑀺𑀚𑁆𑀚𑀸𑀬, 𑀢𑁂𑀧𑀺 𑀦𑁄 𑀅𑀚𑀭𑀸𑀫𑀭𑀸.

𑁯𑁯𑁭. ‘‘𑀇𑀲𑀬𑁄 𑀘𑀸𑀧𑀺 𑀬𑁂 𑀲𑀦𑁆𑀢𑀸, 𑀲𑀜𑁆𑀜𑀢𑀢𑁆𑀢𑀸 𑀢𑀧𑀲𑁆𑀲𑀺𑀦𑁄;

𑀲𑀭𑀻𑀭𑀁 𑀢𑁂𑀧𑀺 𑀓𑀸𑀮𑁂𑀦, 𑀯𑀺𑀚𑀳𑀦𑁆𑀢𑀺 𑀢𑀧𑀲𑁆𑀲𑀺𑀦𑁄.

𑁯𑁯𑁮. ‘‘𑀪𑀸𑀯𑀺𑀢𑀢𑁆𑀢𑀸𑀧𑀺 𑀅𑀭𑀳𑀦𑁆𑀢𑁄, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸;

𑀦𑀺𑀓𑁆𑀔𑀺𑀧𑀦𑁆𑀢𑀺 𑀇𑀫𑀁 𑀤𑁂𑀳𑀁, 𑀧𑀼𑀜𑁆𑀜𑀧𑀸𑀧𑀧𑀭𑀺𑀓𑁆𑀔𑀬𑀸’’𑀢𑀺.

𑁯𑁯𑁨. 𑀢𑀢𑁆𑀣 𑀬𑀢𑁆𑀣 𑀕𑀦𑁆𑀢𑁆𑀯𑀸𑀢𑀺 𑀬𑀁 𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀓𑀫𑁆𑀫𑀁 𑀯𑀺𑀚𑁆𑀚𑀁 𑀧𑁄𑀭𑀺𑀲𑀜𑁆𑀘 𑀓𑀸𑀬𑀧𑀬𑁄𑀕𑁂𑀦 𑀇𑀢𑀭𑀧𑀬𑁄𑀕𑁂𑀦 𑀘 𑀉𑀧𑀕𑀦𑁆𑀢𑁆𑀯𑀸 𑀧𑀸𑀧𑀼𑀡𑀺𑀢𑁆𑀯𑀸 𑀪𑀯𑁂𑀬𑁆𑀬 𑀅𑀚𑀭𑀸𑀫𑀭𑁄𑀢𑀺 𑀅𑀢𑁆𑀣𑁄.

𑁯𑁯𑁩. 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀓𑁄𑀝𑀺𑀲𑀢𑀸𑀤𑀺𑀧𑀭𑀺𑀫𑀸𑀡𑀁 𑀲𑀁𑀳𑀭𑀺𑀢𑁆𑀯𑀸 𑀞𑀧𑀺𑀢𑀁 𑀫𑀳𑀦𑁆𑀢𑀁 𑀥𑀦𑀁 𑀏𑀢𑁂𑀲𑀦𑁆𑀢𑀺 𑀫𑀳𑀤𑁆𑀥𑀦𑀸. 𑀓𑀼𑀫𑁆𑀪𑀢𑁆𑀢𑀬𑀸𑀤𑀺𑀓𑀳𑀸𑀧𑀡𑀧𑀭𑀺𑀩𑁆𑀩𑀬𑁄 𑀫𑀳𑀦𑁆𑀢𑁄 𑀪𑁄𑀕𑁄 𑀏𑀢𑁂𑀲𑀦𑁆𑀢𑀺 𑀫𑀳𑀸𑀪𑁄𑀕𑀸. 𑀭𑀝𑁆𑀞𑀯𑀦𑁆𑀢𑁄𑀢𑀺 𑀭𑀝𑁆𑀞𑀲𑀸𑀫𑀺𑀓𑀸, 𑀅𑀦𑁂𑀓𑀬𑁄𑀚𑀦𑀧𑀭𑀺𑀫𑀸𑀡𑀁 𑀭𑀝𑁆𑀞𑀁 𑀧𑀲𑀸𑀲𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀔𑀢𑁆𑀢𑀺𑀬𑀸𑀢𑀺 𑀔𑀢𑁆𑀢𑀺𑀬𑀚𑀸𑀢𑀺𑀓𑀸. 𑀧𑀳𑀽𑀢𑀥𑀦𑀥𑀜𑁆𑀜𑀸𑀲𑁂𑀢𑀺 𑀫𑀳𑀸𑀥𑀦𑀥𑀜𑁆𑀜𑀲𑀦𑁆𑀦𑀺𑀘𑀬𑀸, 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀘 𑀲𑀢𑁆𑀢𑀝𑁆𑀞𑀲𑀁𑀯𑀘𑁆𑀙𑀭𑀧𑀳𑁄𑀦𑀓𑀥𑀦𑀥𑀜𑁆𑀜𑀲𑀦𑁆𑀦𑀺𑀘𑀬𑀸. 𑀢𑁂𑀧𑀺 𑀦𑁄 𑀅𑀚𑀭𑀸𑀫𑀭𑀸𑀢𑀺 𑀚𑀭𑀸𑀫𑀭𑀡𑀥𑀫𑁆𑀫𑀸 𑀏𑀯, 𑀫𑀳𑀤𑁆𑀥𑀦𑀢𑀸𑀤𑀻𑀦𑀺𑀧𑀺 𑀢𑁂𑀲𑀁 𑀉𑀧𑀭𑀺 𑀦𑀺𑀧𑀢𑀦𑁆𑀢𑀁 𑀚𑀭𑀸𑀫𑀭𑀡𑀁 𑀦𑀺𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁯𑁯𑁪. 𑀅𑀦𑁆𑀥𑀓𑀯𑁂𑀡𑁆𑀟𑀼𑀧𑀼𑀢𑁆𑀢𑀸𑀢𑀺 𑀅𑀦𑁆𑀥𑀓𑀯𑁂𑀡𑁆𑀟𑀼𑀲𑁆𑀲 𑀧𑀼𑀢𑁆𑀢𑀸𑀢𑀺 𑀧𑀜𑁆𑀜𑀸𑀢𑀸. 𑀲𑀽𑀭𑀸𑀢𑀺 𑀲𑀢𑁆𑀢𑀺𑀫𑀦𑁆𑀢𑁄. 𑀯𑀻𑀭𑀸𑀢𑀺 𑀯𑀻𑀭𑀺𑀬𑀯𑀦𑁆𑀢𑁄. 𑀯𑀺𑀓𑁆𑀓𑀦𑁆𑀢𑀧𑁆𑀧𑀳𑀸𑀭𑀺𑀦𑁄𑀢𑀺 𑀲𑀽𑀭𑀯𑀻𑀭𑀪𑀸𑀯𑁂𑀦𑁂𑀯 𑀧𑀝𑀺𑀲𑀢𑁆𑀢𑀼𑀩𑀮𑀁 𑀯𑀺𑀓𑁆𑀓𑀫𑁆𑀫 𑀧𑀲𑀬𑁆𑀳 𑀧𑀳𑀭𑀡𑀲𑀻𑀮𑀸. 𑀯𑀺𑀤𑁆𑀥𑀲𑁆𑀢𑀸𑀢𑀺 𑀯𑀺𑀦𑀝𑁆𑀞𑀸. 𑀲𑀲𑁆𑀲𑀢𑀻𑀲𑀫𑀸𑀢𑀺 𑀓𑀼𑀮𑀧𑀭𑀫𑁆𑀧𑀭𑀸𑀬 𑀲𑀲𑁆𑀲𑀢𑀻𑀳𑀺 𑀘𑀦𑁆𑀤𑀲𑀽𑀭𑀺𑀬𑀸𑀤𑀻𑀳𑀺 𑀲𑀫𑀸𑀦𑀸, 𑀢𑁂𑀧𑀺 𑀅𑀘𑀺𑀭𑀓𑀸𑀮𑀧𑀯𑀢𑁆𑀢𑀓𑀼𑀮𑀦𑁆𑀯𑀬𑀸𑀢𑀺 𑀅𑀢𑁆𑀣𑁄.

𑁯𑁯𑁫. 𑀚𑀸𑀢𑀺𑀬𑀸𑀢𑀺 𑀅𑀢𑁆𑀢𑀦𑁄 𑀚𑀸𑀢𑀺𑀬𑀸, 𑀯𑀺𑀲𑀺𑀝𑁆𑀞𑀢𑀭𑀸 𑀧𑀦 𑀚𑀸𑀢𑀺𑀧𑀺 𑀦𑁂𑀲𑀁 𑀚𑀭𑀸𑀫𑀭𑀡𑀁 𑀦𑀺𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄.

𑁯𑁯𑁬. 𑀫𑀦𑁆𑀢𑀦𑁆𑀢𑀺 𑀯𑁂𑀤𑀁. 𑀙𑀴𑀗𑁆𑀕𑀦𑁆𑀢𑀺 𑀓𑀧𑁆𑀧𑀩𑁆𑀬𑀸𑀓𑀭𑀡𑀦𑀺𑀭𑀼𑀢𑁆𑀢𑀺𑀲𑀺𑀓𑁆𑀔𑀸𑀙𑀦𑁆𑀤𑁄𑀯𑀺𑀘𑀺𑀢𑀺𑀚𑁄𑀢𑀺𑀲𑀢𑁆𑀣𑀲𑀗𑁆𑀔𑀸𑀢𑁂𑀳𑀺 𑀙𑀳𑀺 𑀅𑀗𑁆𑀕𑁂𑀳𑀺 𑀙𑀴𑀗𑁆𑀕𑀁. 𑀩𑁆𑀭𑀳𑁆𑀫𑀘𑀺𑀦𑁆𑀢𑀺𑀢𑀦𑁆𑀢𑀺 𑀩𑁆𑀭𑀳𑁆𑀫𑁂𑀳𑀺 𑀅𑀝𑁆𑀞𑀓𑀸𑀤𑀻𑀳𑀺 𑀘𑀺𑀦𑁆𑀢𑀺𑀢𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁.

𑁯𑁯𑁭. 𑀲𑀦𑁆𑀢𑀸𑀢𑀺 𑀉𑀧𑀲𑀦𑁆𑀢𑀓𑀸𑀬𑀯𑀘𑀻𑀓𑀫𑁆𑀫𑀦𑁆𑀢𑀸. 𑀲𑀜𑁆𑀜𑀢𑀢𑁆𑀢𑀸𑀢𑀺 𑀲𑀜𑁆𑀜𑀢𑀘𑀺𑀢𑁆𑀢𑀸. 𑀢𑀧𑀲𑁆𑀲𑀺𑀦𑁄𑀢𑀺 𑀢𑀧𑀦𑀺𑀲𑁆𑀲𑀺𑀢𑀸.

𑀇𑀤𑀸𑀦𑀺 𑀓𑀼𑀫𑀸𑀭𑁄 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀁 𑀯𑀤𑀦𑁆𑀢𑁄 𑁋

𑁯𑁯𑁯. ‘‘𑀲𑀼𑀪𑀸𑀲𑀺𑀢𑀸 𑀅𑀢𑁆𑀣𑀯𑀢𑀻, 𑀕𑀸𑀣𑀸𑀬𑁄 𑀢𑁂 𑀫𑀳𑀸𑀫𑀼𑀦𑀺;

𑀦𑀺𑀚𑁆𑀛𑀢𑁆𑀢𑁄𑀫𑁆𑀳𑀺 𑀲𑀼𑀪𑀝𑁆𑀞𑁂𑀦, 𑀢𑁆𑀯𑀜𑁆𑀘 𑀫𑁂 𑀲𑀭𑀡𑀁 𑀪𑀯𑀸’’𑀢𑀺. 𑁋

𑀆𑀳. 𑀢𑀢𑁆𑀣 𑀦𑀺𑀚𑁆𑀛𑀢𑁆𑀢𑁄𑀫𑁆𑀳𑀻𑀢𑀺 𑀦𑀺𑀚𑁆𑀛𑀸𑀧𑀺𑀢𑁄 𑀥𑀫𑁆𑀫𑁄𑀚𑀲𑀜𑁆𑀜𑀸𑀬 𑀲𑀜𑁆𑀜𑀢𑁆𑀢𑀺𑀕𑀢𑁄 𑀅𑀫𑁆𑀳𑀺. 𑀲𑀼𑀪𑀝𑁆𑀞𑁂𑀦𑀸𑀢𑀺 𑀲𑀼𑀝𑁆𑀞𑀼 𑀪𑀸𑀲𑀺𑀢𑁂𑀦.

𑀢𑀢𑁄 𑀣𑁂𑀭𑁄 𑀢𑀁 𑀅𑀦𑀼𑀲𑀸𑀲𑀦𑁆𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

𑁧𑁦𑁦𑁦. ‘‘𑀫𑀸 𑀫𑀁 𑀢𑁆𑀯𑀁 𑀲𑀭𑀡𑀁 𑀕𑀘𑁆𑀙, 𑀢𑀫𑁂𑀯 𑀲𑀭𑀡𑀁 𑀯𑀚;

𑀲𑀓𑁆𑀬𑀧𑀼𑀢𑁆𑀢𑀁 𑀫𑀳𑀸𑀯𑀻𑀭𑀁, 𑀬𑀫𑀳𑀁 𑀲𑀭𑀡𑀁 𑀕𑀢𑁄’’𑀢𑀺.

𑀢𑀢𑁄 𑀭𑀸𑀚𑀓𑀼𑀫𑀸𑀭𑁄 𑀆𑀳 𑁋

𑁧𑁦𑁦𑁧. ‘‘𑀓𑀢𑀭𑀲𑁆𑀫𑀺𑀁 𑀲𑁄 𑀚𑀦𑀧𑀤𑁂, 𑀲𑀢𑁆𑀣𑀸 𑀢𑀼𑀫𑁆𑀳𑀸𑀓 𑀫𑀸𑀭𑀺𑀲;

𑀅𑀳𑀫𑁆𑀧𑀺 𑀤𑀝𑁆𑀞𑀼𑀁 𑀕𑀘𑁆𑀙𑀺𑀲𑁆𑀲𑀁, 𑀚𑀺𑀦𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮’’𑀦𑁆𑀢𑀺.

𑀧𑀼𑀦 𑀣𑁂𑀭𑁄 𑀆𑀳 𑁋

𑁧𑁦𑁦𑁨. ‘‘𑀧𑀼𑀭𑀢𑁆𑀣𑀺𑀫𑀲𑁆𑀫𑀺𑀁 𑀚𑀦𑀧𑀤𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀢𑀢𑁆𑀣𑀸𑀲𑀺 𑀧𑀼𑀭𑀺𑀲𑀸𑀚𑀜𑁆𑀜𑁄, 𑀲𑁄 𑀘 𑀔𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺.

𑀢𑀢𑁆𑀣 𑀣𑁂𑀭𑁂𑀦 𑀦𑀺𑀲𑀺𑀦𑁆𑀦𑀧𑀤𑁂𑀲𑀢𑁄 𑀫𑀚𑁆𑀛𑀺𑀫𑀤𑁂𑀲𑀲𑁆𑀲 𑀧𑀸𑀘𑀻𑀦𑀤𑀺𑀲𑀸𑀪𑀸𑀕𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀼𑀭𑀢𑁆𑀣𑀺𑀫𑀲𑁆𑀫𑀺𑀁 𑀚𑀦𑀧𑀤𑁂’’𑀢𑀺.

𑀏𑀯𑀁 𑀲𑁄 𑀭𑀸𑀚𑀧𑀼𑀢𑁆𑀢𑁄 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀳𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦𑁦𑁩. ‘‘𑀲𑀘𑁂 𑀳𑀺 𑀩𑀼𑀤𑁆𑀥𑁄 𑀢𑀺𑀝𑁆𑀞𑁂𑀬𑁆𑀬, 𑀲𑀢𑁆𑀣𑀸 𑀢𑀼𑀫𑁆𑀳𑀸𑀓 𑀫𑀸𑀭𑀺𑀲;

𑀬𑁄𑀚𑀦𑀸𑀦𑀺 𑀲𑀳𑀲𑁆𑀲𑀸𑀦𑀺, 𑀕𑀘𑁆𑀙𑁂𑀬𑁆𑀬𑀁 𑀧𑀬𑀺𑀭𑀼𑀧𑀸𑀲𑀺𑀢𑀼𑀁.

𑁧𑁦𑁦𑁪. ‘‘𑀬𑀢𑁄 𑀘 𑀔𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀲𑀢𑁆𑀣𑀸 𑀢𑀼𑀫𑁆𑀳𑀸𑀓 𑀫𑀸𑀭𑀺𑀲;

𑀦𑀺𑀩𑁆𑀩𑀼𑀢𑀫𑁆𑀧𑀺 𑀫𑀳𑀸𑀯𑀻𑀭𑀁, 𑀕𑀘𑁆𑀙𑀸𑀫𑀺 𑀲𑀭𑀡𑀁 𑀅𑀳𑀁.

𑁧𑁦𑁦𑁫. ‘‘𑀉𑀧𑁂𑀫𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀜𑁆𑀘𑀸𑀧𑀺 𑀅𑀦𑀼𑀢𑁆𑀢𑀭𑀁;

𑀲𑀗𑁆𑀖𑀜𑁆𑀘 𑀦𑀭𑀤𑁂𑀯𑀲𑁆𑀲, 𑀕𑀘𑁆𑀙𑀸𑀫𑀺 𑀲𑀭𑀡𑀁 𑀅𑀳𑀁.

𑁧𑁦𑁦𑁬. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀸𑀫𑀺 𑀔𑀺𑀧𑁆𑀧𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀸𑀫𑀺;

𑀅𑀫𑀚𑁆𑀚𑀧𑁄 𑀦𑁄 𑀘 𑀫𑀼𑀲𑀸 𑀪𑀡𑀸𑀫𑀺, 𑀲𑀓𑁂𑀦 𑀤𑀸𑀭𑁂𑀦 𑀘 𑀳𑁄𑀫𑀺 𑀢𑀼𑀝𑁆𑀞𑁄’’𑀢𑀺.

𑀏𑀯𑀁 𑀧𑀦 𑀢𑀁 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀺𑀢𑀁 𑀣𑁂𑀭𑁄 𑀏𑀯𑀫𑀸𑀳 ‘‘𑀭𑀸𑀚𑀓𑀼𑀫𑀸𑀭, 𑀢𑀼𑀬𑁆𑀳𑀁 𑀇𑀥 𑀅𑀭𑀜𑁆𑀜𑀯𑀸𑀲𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, 𑀦 𑀘𑀺𑀭𑀁 𑀢𑀯 𑀚𑀻𑀯𑀺𑀢𑀁, 𑀧𑀜𑁆𑀘𑀫𑀸𑀲𑀩𑁆𑀪𑀦𑁆𑀢𑀭𑁂 𑀏𑀯 𑀓𑀸𑀮𑀁 𑀓𑀭𑀺𑀲𑁆𑀲𑀲𑀺, 𑀢𑀲𑁆𑀫𑀸 𑀢𑀯 𑀧𑀺𑀢𑀼 𑀲𑀦𑁆𑀢𑀺𑀓𑀫𑁂𑀯 𑀕𑀦𑁆𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀪𑀯𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀥𑀸𑀢𑀼𑀬𑁄 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀕𑀘𑁆𑀙𑀦𑁆𑀢𑁄 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀯𑀘𑀦𑁂𑀦 𑀇𑀢𑁄 𑀕𑀫𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂𑀳𑀺𑀧𑀺 𑀫𑀬𑁆𑀳𑀁 𑀅𑀦𑀼𑀓𑀫𑁆𑀧𑀸𑀬 𑀢𑀢𑁆𑀣 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀣𑁂𑀭𑀲𑁆𑀲 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀺𑀢𑀼 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀭𑀜𑁆𑀜𑁄 𑀦𑀺𑀯𑁂𑀤𑁂𑀲𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑀧𑀭𑀺𑀯𑀸𑀭𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑀁 𑀦𑁂𑀢𑁆𑀯𑀸 𑀅𑀪𑀺𑀲𑀺𑀜𑁆𑀘𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀓𑀼𑀫𑀸𑀭𑁄 ‘‘𑀤𑁂𑀯, 𑀫𑀬𑁆𑀳𑀁 𑀅𑀧𑁆𑀧𑀓𑀁 𑀆𑀬𑀼, 𑀇𑀢𑁄 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀫𑁂 𑀭𑀚𑁆𑀚𑁂𑀦, 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀧𑀼𑀜𑁆𑀜𑀫𑁂𑀯 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑀲𑁆𑀲 𑀕𑀼𑀡𑀁 𑀭𑀢𑀦𑀢𑁆𑀢𑀬𑀲𑁆𑀲 𑀘 𑀆𑀦𑀼𑀪𑀸𑀯𑀁 𑀧𑀯𑁂𑀤𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀭𑀢𑀦𑀢𑁆𑀢𑀬𑁂 𑀘 𑀣𑁂𑀭𑁂 𑀘 𑀧𑀲𑀦𑁆𑀦𑀫𑀸𑀦𑀲𑁄 𑀫𑀳𑀦𑁆𑀢𑀁 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺. 𑀣𑁂𑀭𑁄𑀧𑀺 𑀭𑀸𑀚𑀸𑀦𑀁 𑀫𑀳𑀸𑀚𑀦𑀜𑁆𑀘 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀆𑀕𑀘𑁆𑀙𑀺. 𑀭𑀸𑀚𑀸 𑀘 𑀲𑀧𑀭𑀺𑀯𑀸𑀭𑁄 𑀤𑀽𑀭𑀢𑁄𑀯 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀣𑁂𑀭𑀁 𑀯𑀺𑀳𑀸𑀭𑀁 𑀧𑀯𑁂𑀲𑁂𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑁄 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀳𑀺. 𑀓𑀼𑀫𑀸𑀭𑁄 𑀘 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀣𑁂𑀭𑀁 𑀪𑀺𑀓𑁆𑀔𑀽 𑀘𑁂𑀯 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑁄 𑀤𑀸𑀦𑀸𑀦𑀺 𑀤𑀤𑀦𑁆𑀢𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀲𑀢𑁆𑀢𑀭𑀢𑀦𑀧𑀝𑀺𑀫𑀡𑁆𑀟𑀺𑀢𑁄 𑀲𑀢𑁆𑀢𑀬𑁄𑀚𑀦𑀧𑁆𑀧𑀫𑀸𑀡𑁄 𑀭𑀣𑁄 𑀉𑀧𑁆𑀧𑀚𑁆𑀚𑀺, 𑀅𑀦𑁂𑀓𑀸𑀦𑀺 𑀘𑀲𑁆𑀲 𑀅𑀘𑁆𑀙𑀭𑀸𑀲𑀳𑀲𑁆𑀲𑀸𑀦𑀺 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺.

𑀭𑀸𑀚𑀸 𑀓𑀼𑀫𑀸𑀭𑀲𑁆𑀲 𑀲𑀭𑀻𑀭𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀘𑁂𑀢𑀺𑀬𑀲𑁆𑀲 𑀧𑀽𑀚𑀁 𑀅𑀓𑀸𑀲𑀺, 𑀢𑀢𑁆𑀣 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺, 𑀣𑁂𑀭𑁄𑀧𑀺 𑀲𑀧𑀭𑀺𑀯𑀸𑀭𑁄 𑀢𑀁 𑀧𑀤𑁂𑀲𑀁 𑀉𑀧𑀕𑀜𑁆𑀙𑀺. 𑀅𑀣 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀦𑀸 𑀓𑀢𑀓𑀼𑀲𑀮𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀓𑀢𑀜𑁆𑀜𑀼𑀢𑀸𑀬 ‘‘𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀲𑁆𑀲𑀸𑀫𑀺, 𑀲𑀸𑀲𑀦𑀕𑀼𑀡𑁂 𑀘 𑀧𑀸𑀓𑀝𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑀭𑀣𑀁 𑀆𑀭𑀼𑀬𑁆𑀳 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀤𑀺𑀲𑁆𑀲𑀫𑀸𑀦𑀭𑀽𑀧𑁄 𑀆𑀕𑀦𑁆𑀢𑁆𑀯𑀸 𑀭𑀣𑀸 𑀑𑀭𑀼𑀬𑁆𑀳 𑀣𑁂𑀭𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀣𑁂𑀭𑀁 𑀧𑀬𑀺𑀭𑀼𑀧𑀸𑀲𑀫𑀸𑀦𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀢𑀁 𑀣𑁂𑀭𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺 𑁋

𑁧𑁦𑁦𑁭. ‘‘𑀲𑀳𑀲𑁆𑀲𑀭𑀁𑀲𑀻𑀯 𑀬𑀣𑀸𑀫𑀳𑀧𑁆𑀧𑀪𑁄, 𑀤𑀺𑀲𑀁 𑀬𑀣𑀸 𑀪𑀸𑀢𑀺 𑀦𑀪𑁂 𑀅𑀦𑀼𑀓𑁆𑀓𑀫𑀁;

𑀢𑀣𑀸𑀧𑀓𑀸𑀭𑁄 𑀢𑀯𑀸𑀬𑀁 𑀫𑀳𑀸𑀭𑀣𑁄, 𑀲𑀫𑀦𑁆𑀢𑀢𑁄 𑀬𑁄𑀚𑀦𑀲𑀢𑁆𑀢𑀫𑀸𑀬𑀢𑁄.

𑁧𑁦𑁦𑁮. ‘‘𑀲𑀼𑀯𑀡𑁆𑀡𑀧𑀝𑁆𑀝𑁂𑀳𑀺 𑀲𑀫𑀦𑁆𑀢𑀫𑁄𑀢𑁆𑀣𑀝𑁄, 𑀉𑀭𑀲𑁆𑀲 𑀫𑀼𑀢𑁆𑀢𑀸𑀳𑀺 𑀫𑀡𑀻𑀳𑀺 𑀘𑀺𑀢𑁆𑀢𑀺𑀢𑁄;

𑀮𑁂𑀔𑀸 𑀲𑀼𑀯𑀡𑁆𑀡𑀲𑁆𑀲 𑀘 𑀭𑀽𑀧𑀺𑀬𑀲𑁆𑀲 𑀘, 𑀲𑁄𑀪𑁂𑀦𑁆𑀢𑀺 𑀯𑁂𑀴𑀼𑀭𑀺𑀬𑀫𑀬𑀸 𑀲𑀼𑀦𑀺𑀫𑁆𑀫𑀺𑀢𑀸.

𑁧𑁦𑁦𑁯. ‘‘𑀲𑀻𑀲𑀜𑁆𑀘𑀺𑀤𑀁 𑀯𑁂𑀴𑀼𑀭𑀺𑀬𑀲𑁆𑀲 𑀦𑀺𑀫𑁆𑀫𑀺𑀢𑀁, 𑀬𑀼𑀕𑀜𑁆𑀘𑀺𑀤𑀁 𑀮𑁄𑀳𑀺𑀢𑀓𑀸𑀬 𑀘𑀺𑀢𑁆𑀢𑀺𑀢𑀁;

𑀬𑀼𑀢𑁆𑀢𑀸 𑀲𑀼𑀯𑀡𑁆𑀡𑀲𑁆𑀲 𑀘 𑀭𑀽𑀧𑀺𑀬𑀲𑁆𑀲 𑀘, 𑀲𑁄𑀪𑀦𑁆𑀢𑀺 𑀅𑀲𑁆𑀲𑀸 𑀘 𑀇𑀫𑁂 𑀫𑀦𑁄𑀚𑀯𑀸.

𑁧𑁦𑁧𑁦. ‘‘𑀲𑁄 𑀢𑀺𑀝𑁆𑀞𑀲𑀺 𑀳𑁂𑀫𑀭𑀣𑁂 𑀅𑀥𑀺𑀝𑁆𑀞𑀺𑀢𑁄, 𑀤𑁂𑀯𑀸𑀦𑀫𑀺𑀦𑁆𑀤𑁄𑀯 𑀲𑀳𑀲𑁆𑀲𑀯𑀸𑀳𑀦𑁄;

𑀧𑀼𑀘𑁆𑀙𑀸𑀫𑀺 𑀢𑀸𑀳𑀁 𑀬𑀲𑀯𑀦𑁆𑀢 𑀓𑁄𑀯𑀺𑀤𑀁, 𑀓𑀣𑀁 𑀢𑀬𑀸 𑀮𑀤𑁆𑀥𑁄 𑀅𑀬𑀁 𑀉𑀴𑀸𑀭𑁄’’𑀢𑀺.

𑁧𑁦𑁦𑁭. 𑀢𑀢𑁆𑀣 𑀲𑀳𑀲𑁆𑀲𑀭𑀁𑀲𑀻𑀢𑀺 𑀲𑀽𑀭𑀺𑀬𑁄. 𑀲𑁄 𑀳𑀺 𑀅𑀦𑁂𑀓𑀲𑀳𑀲𑁆𑀲𑀭𑀁𑀲𑀺𑀫𑀦𑁆𑀢𑀢𑀸𑀬 ‘‘𑀲𑀳𑀲𑁆𑀲𑀭𑀁𑀲𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀫𑀳𑀧𑁆𑀧𑀪𑁄𑀢𑀺 𑀅𑀢𑁆𑀢𑀦𑁄 𑀫𑀳𑀢𑁆𑀢𑀲𑁆𑀲 𑀅𑀦𑀼𑀭𑀽𑀧𑀧𑁆𑀧𑀪𑁄. 𑀬𑀣𑀸 𑀳𑀺 𑀫𑀳𑀢𑁆𑀢𑁂𑀦 𑀲𑀽𑀭𑀺𑀬𑀫𑀡𑁆𑀟𑀮𑁂𑀦 𑀲𑀤𑀺𑀲𑀁 𑀚𑁄𑀢𑀺𑀫𑀡𑁆𑀟𑀮𑀁 𑀦𑀢𑁆𑀣𑀺, 𑀏𑀯𑀁 𑀧𑀪𑀸𑀬𑀧𑀺. 𑀢𑀣𑀸 𑀳𑀺 𑀢𑀁 𑀏𑀓𑀲𑁆𑀫𑀺𑀁 𑀔𑀡𑁂 𑀢𑀻𑀲𑀼 𑀫𑀳𑀸𑀤𑀻𑀧𑁂𑀲𑀼 𑀆𑀮𑁄𑀓𑀁 𑀨𑀭𑀦𑁆𑀢𑀁 𑀢𑀺𑀝𑁆𑀞𑀢𑀺. 𑀤𑀺𑀲𑀁 𑀬𑀣𑀸 𑀪𑀸𑀢𑀺 𑀦𑀪𑁂 𑀅𑀦𑀼𑀓𑁆𑀓𑀫𑀦𑁆𑀢𑀺 𑀦𑀪𑁂 𑀆𑀓𑀸𑀲𑁂 𑀬𑀣𑁂𑀯 𑀤𑀺𑀲𑀁 𑀅𑀦𑀼𑀓𑁆𑀓𑀫𑀦𑁆𑀢𑁄 𑀕𑀘𑁆𑀙𑀦𑁆𑀢𑁄 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀪𑀸𑀢𑀺 𑀤𑀺𑀩𑁆𑀩𑀢𑀺 𑀚𑁄𑀢𑀢𑀺. 𑀢𑀣𑀸𑀧𑀓𑀸𑀭𑁄𑀢𑀺 𑀢𑀸𑀤𑀺𑀲𑀸𑀓𑀸𑀭𑁄. 𑀢𑀯𑀸𑀬𑀦𑁆𑀢𑀺 𑀢𑀯 𑀅𑀬𑀁.

𑁧𑁦𑁦𑁮. 𑀲𑀼𑀯𑀡𑁆𑀡𑀧𑀝𑁆𑀝𑁂𑀳𑀻𑀢𑀺 𑀲𑀼𑀯𑀡𑁆𑀡𑀫𑀬𑁂𑀳𑀺 𑀧𑀝𑁆𑀝𑁂𑀳𑀺. 𑀲𑀫𑀦𑁆𑀢𑀫𑁄𑀢𑁆𑀣𑀝𑁄 𑀲𑀫𑀦𑁆𑀢𑀢𑁄 𑀙𑀸𑀤𑀺𑀢𑁄. 𑀉𑀭𑀲𑁆𑀲𑀸𑀢𑀺 𑀉𑀭𑁄 𑀅𑀲𑁆𑀲, 𑀭𑀣𑀲𑁆𑀲 𑀉𑀭𑁄𑀢𑀺 𑀘 𑀈𑀲𑀸𑀫𑀽𑀮𑀁 𑀯𑀤𑀢𑀺. 𑀮𑁂𑀔𑀸𑀢𑀺 𑀯𑁂𑀴𑀼𑀭𑀺𑀬𑀫𑀬𑀸 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀸𑀤𑀺𑀮𑁂𑀔𑀸. 𑀢𑀸𑀲𑀁 𑀲𑀼𑀯𑀡𑁆𑀡𑀧𑀝𑁆𑀝𑁂𑀲𑀼 𑀘 𑀭𑀚𑀢𑀧𑀝𑁆𑀝𑁂𑀲𑀼 𑀘 𑀤𑀺𑀲𑁆𑀲𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀼𑀯𑀡𑁆𑀡𑀲𑁆𑀲 𑀘 𑀭𑀽𑀧𑀺𑀬𑀲𑁆𑀲 𑀘𑀸’’𑀢𑀺. 𑀲𑁄𑀪𑁂𑀦𑁆𑀢𑀻𑀢𑀺 𑀭𑀣𑀁 𑀲𑁄𑀪𑀬𑀦𑁆𑀢𑀺.

𑁧𑁦𑁦𑁯. 𑀲𑀻𑀲𑀦𑁆𑀢𑀺 𑀭𑀣𑀓𑀼𑀩𑁆𑀩𑀭𑀲𑀻𑀲𑀁. 𑀯𑁂𑀴𑀼𑀭𑀺𑀬𑀲𑁆𑀲 𑀦𑀺𑀫𑁆𑀫𑀺𑀢𑀦𑁆𑀢𑀺 𑀯𑁂𑀴𑀼𑀭𑀺𑀬𑁂𑀦 𑀦𑀺𑀫𑁆𑀫𑀺𑀢𑀁, 𑀯𑁂𑀴𑀼𑀭𑀺𑀬𑀫𑀡𑀺𑀫𑀬𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀳𑀺𑀢𑀓𑀸𑀬𑀸𑀢𑀺 𑀮𑁄𑀳𑀺𑀢𑀓𑀫𑀡𑀺𑀦𑀸, 𑀬𑁂𑀦 𑀓𑁂𑀦𑀘𑀺 𑀭𑀢𑁆𑀢𑀫𑀡𑀺𑀦𑀸 𑀯𑀸. 𑀬𑀼𑀢𑁆𑀢𑀸𑀢𑀺 𑀬𑁄𑀚𑀺𑀢𑀸, 𑀅𑀣 𑀯𑀸 𑀬𑁄𑀢𑁆𑀢𑀸 𑀲𑀼𑀯𑀡𑁆𑀡𑀲𑁆𑀲 𑀘 𑀭𑀽𑀧𑀺𑀬𑀲𑁆𑀲 𑀘𑀸𑀢𑀺 𑀲𑀼𑀯𑀡𑁆𑀡𑀫𑀬𑀸 𑀘 𑀭𑀽𑀧𑀺𑀬𑀫𑀬𑀸 𑀘 𑀬𑁄𑀢𑁆𑀢𑀸, 𑀲𑀗𑁆𑀔𑀮𑀺𑀓𑀸𑀢𑀺 𑀅𑀢𑁆𑀣𑁄.

𑁧𑁦𑁧𑁦. 𑀅𑀥𑀺𑀝𑁆𑀞𑀺𑀢𑁄𑀢𑀺 𑀅𑀢𑁆𑀢𑀦𑁄 𑀤𑁂𑀯𑀺𑀤𑁆𑀥𑀺𑀬𑀸 𑀲𑀓𑀮𑀫𑀺𑀤𑀁 𑀞𑀸𑀦𑀁 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄. 𑀲𑀳𑀲𑁆𑀲𑀯𑀸𑀳𑀦𑁄𑀢𑀺 𑀲𑀳𑀲𑁆𑀲𑀬𑀼𑀢𑁆𑀢𑀯𑀸𑀳𑀦𑁄, 𑀲𑀳𑀲𑁆𑀲𑀆𑀚𑀸𑀦𑀻𑀬𑀬𑀼𑀢𑁆𑀢𑀭𑀣𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑀯𑀦𑁆𑀢𑀸𑀢𑀺 𑀆𑀮𑀧𑀦𑀁, 𑀬𑀲𑀲𑁆𑀲𑀻𑀢𑀺 𑀅𑀢𑁆𑀣𑁄. 𑀓𑁄𑀯𑀺𑀤𑀦𑁆𑀢𑀺 𑀓𑀼𑀲𑀮𑀜𑀸𑀡𑀯𑀦𑁆𑀢𑀁, 𑀭𑀣𑀸𑀭𑁄𑀳𑀦𑁂 𑀯𑀸 𑀙𑁂𑀓𑀁. 𑀅𑀬𑀁 𑀉𑀴𑀸𑀭𑁄𑀢𑀺 𑀅𑀬𑀁 𑀉𑀴𑀸𑀭𑁄 𑀫𑀳𑀦𑁆𑀢𑁄 𑀬𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀣𑁂𑀭𑁂𑀦 𑀧𑀼𑀝𑁆𑀞𑁄 𑀤𑁂𑀯𑀧𑀼𑀢𑁆𑀢𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁧𑁦𑁧𑁧. ‘‘𑀲𑀼𑀚𑀸𑀢𑁄 𑀦𑀸𑀫𑀳𑀁 𑀪𑀦𑁆𑀢𑁂, 𑀭𑀸𑀚𑀧𑀼𑀢𑁆𑀢𑁄 𑀧𑀼𑀭𑁂 𑀅𑀳𑀼𑀁;

𑀢𑁆𑀯𑀜𑁆𑀘 𑀫𑀁 𑀅𑀦𑀼𑀓𑀫𑁆𑀧𑀸𑀬, 𑀲𑀜𑁆𑀜𑀫𑀲𑁆𑀫𑀺𑀁 𑀦𑀺𑀯𑁂𑀲𑀬𑀺.

𑁧𑁦𑁧𑁨. ‘‘𑀔𑀻𑀡𑀸𑀬𑀼𑀓𑀜𑁆𑀘 𑀫𑀁 𑀜𑀢𑁆𑀯𑀸, 𑀲𑀭𑀻𑀭𑀁 𑀧𑀸𑀤𑀸𑀲𑀺 𑀲𑀢𑁆𑀣𑀼𑀦𑁄;

𑀇𑀫𑀁 𑀲𑀼𑀚𑀸𑀢 𑀧𑀽𑀚𑁂𑀳𑀺, 𑀢𑀁 𑀢𑁂 𑀅𑀢𑁆𑀣𑀸𑀬 𑀳𑁂𑀳𑀺𑀢𑀺.

𑁧𑁦𑁧𑁩. ‘‘𑀢𑀸𑀳𑀁 𑀕𑀦𑁆𑀥𑁂𑀳𑀺 𑀫𑀸𑀮𑁂𑀳𑀺, 𑀧𑀽𑀚𑀬𑀺𑀢𑁆𑀯𑀸 𑀲𑀫𑀼𑀬𑁆𑀬𑀼𑀢𑁄;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀉𑀧𑀧𑀦𑁆𑀦𑁄𑀫𑁆𑀳𑀺 𑀦𑀦𑁆𑀤𑀦𑀁.

𑁧𑁦𑁧𑁪. ‘‘𑀦𑀦𑁆𑀤𑀦𑁂 𑀘 𑀯𑀦𑁂 𑀭𑀫𑁆𑀫𑁂, 𑀦𑀸𑀦𑀸𑀤𑀺𑀚𑀕𑀡𑀸𑀬𑀼𑀢𑁂;

𑀭𑀫𑀸𑀫𑀺 𑀦𑀘𑁆𑀘𑀕𑀻𑀢𑁂𑀳𑀺, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄’’𑀢𑀺.

𑁧𑁦𑁧𑁨-𑁩. 𑀢𑀢𑁆𑀣 𑀲𑀭𑀻𑀭𑀦𑁆𑀢𑀻 𑀲𑀭𑀻𑀭𑀥𑀸𑀢𑀼𑀁. 𑀳𑁂𑀳𑀺𑀢𑀻𑀢𑀺 𑀪𑀯𑀺𑀲𑁆𑀲𑀢𑀺. 𑀲𑀫𑀼𑀬𑁆𑀬𑀼𑀢𑁄𑀢𑀺 𑀲𑀫𑁆𑀫𑀸 𑀉𑀬𑁆𑀬𑀼𑀢𑁆𑀢𑁄, 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀏𑀯𑀁 𑀤𑁂𑀯𑀧𑀼𑀢𑁆𑀢𑁄 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀓𑀣𑁂𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀺𑀢𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀭𑀣𑀁 𑀆𑀭𑀼𑀬𑁆𑀳 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄. 𑀣𑁂𑀭𑁄𑀧𑀺 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀲𑀸 𑀥𑀫𑁆𑀫𑀓𑀣𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀺. 𑀅𑀣 𑀣𑁂𑀭𑁄 𑀢𑀁 𑀲𑀩𑁆𑀩𑀁 𑀅𑀢𑁆𑀢𑀦𑀸 𑀘 𑀢𑁂𑀦 𑀘 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀲𑀗𑁆𑀕𑀻𑀢𑀺𑀓𑀸𑀮𑁂 𑀥𑀫𑁆𑀫𑀲𑀗𑁆𑀕𑀸𑀳𑀓𑀸𑀦𑀁 𑀆𑀭𑁄𑀘𑁂𑀲𑀺, 𑀢𑁂 𑀘 𑀢𑀁 𑀢𑀣𑀸 𑀲𑀗𑁆𑀕𑀳𑀁 𑀆𑀭𑁄𑀧𑁂𑀲𑀼𑀦𑁆𑀢𑀺.

𑀘𑀽𑀴𑀭𑀣𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.