𑁧𑁨. 𑀢𑀢𑀺𑀬𑀦𑀸𑀕𑀯𑀺𑀫𑀸𑀦𑀯𑀡𑁆𑀡𑀦𑀸

𑀓𑁄 𑀦𑀼 𑀤𑀺𑀩𑁆𑀩𑁂𑀦 𑀬𑀸𑀦𑁂𑀦𑀸𑀢𑀺 𑀢𑀢𑀺𑀬𑀦𑀸𑀕𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀲𑀫𑀬𑁂𑀦 𑀢𑀬𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑀸 𑀕𑀸𑀫𑀓𑀸𑀯𑀸𑀲𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑁂 𑀯𑀼𑀢𑁆𑀣𑀯𑀲𑁆𑀲𑀸 𑀧𑀯𑀸𑀭𑁂𑀢𑁆𑀯𑀸 ‘‘𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀭𑀸𑀚𑀕𑀳𑀁 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀸𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀘𑁆𑀙𑀼𑀔𑁂𑀢𑁆𑀢𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀉𑀘𑁆𑀙𑀼𑀧𑀸𑀮𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀆𑀯𑀼𑀲𑁄, 𑀲𑀓𑁆𑀓𑀸 𑀅𑀚𑁆𑀚 𑀭𑀸𑀚𑀕𑀳𑀁 𑀧𑀸𑀧𑀼𑀡𑀺𑀢𑀼’’𑀦𑁆𑀢𑀺. ‘‘𑀦 𑀲𑀓𑁆𑀓𑀸, 𑀪𑀦𑁆𑀢𑁂, 𑀇𑀢𑁄 𑀅𑀟𑁆𑀠𑀬𑁄𑀚𑀦𑁂 𑀭𑀸𑀚𑀕𑀳𑀁, 𑀇𑀥𑁂𑀯 𑀯𑀲𑀺𑀢𑁆𑀯𑀸 𑀲𑁆𑀯𑁂 𑀕𑀘𑁆𑀙𑀣𑀸’’𑀢𑀺 𑀆𑀳. ‘‘𑀅𑀢𑁆𑀣𑁂𑀢𑁆𑀣 𑀓𑁄𑀘𑀺 𑀯𑀲𑀦𑀬𑁄𑀕𑁆𑀕𑁄 𑀆𑀯𑀸𑀲𑁄’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀅𑀳𑀁 𑀧𑀦 𑀯𑁄 𑀯𑀲𑀦𑀝𑁆𑀞𑀸𑀦𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀣𑁂𑀭𑀸 𑀅𑀥𑀺𑀯𑀸𑀲𑁂𑀲𑀼𑀁.

𑀲𑁄 𑀉𑀘𑁆𑀙𑀽𑀲𑀼𑀬𑁂𑀯 𑀬𑀣𑀸𑀞𑀺𑀢𑁂𑀲𑀼 𑀲𑀸𑀔𑀸𑀫𑀡𑁆𑀟𑀧𑀸𑀓𑀸𑀭𑁂𑀦 𑀤𑀡𑁆𑀟𑀓𑀸𑀦𑀺 𑀩𑀦𑁆𑀥𑀺𑀢𑁆𑀯𑀸 𑀉𑀘𑁆𑀙𑀼𑀧𑀡𑁆𑀡𑁂𑀳𑀺 𑀙𑀸𑀤𑁂𑀢𑁆𑀯𑀸 𑀳𑁂𑀝𑁆𑀞𑀸 𑀧𑀮𑀸𑀮𑀁 𑀅𑀢𑁆𑀣𑀭𑀺𑀢𑁆𑀯𑀸 𑀏𑀓𑀲𑁆𑀲 𑀣𑁂𑀭𑀲𑁆𑀲 𑀅𑀤𑀸𑀲𑀺, 𑀤𑀼𑀢𑀺𑀬𑀲𑁆𑀲 𑀣𑁂𑀭𑀲𑁆𑀲 𑀢𑀻𑀳𑀺 𑀉𑀘𑁆𑀙𑀽𑀳𑀺 𑀤𑀡𑁆𑀟𑀓𑀲𑀗𑁆𑀔𑁂𑀧𑁂𑀦 𑀩𑀦𑁆𑀥𑀺𑀢𑁆𑀯𑀸 𑀢𑀺𑀡𑁂𑀦 𑀙𑀸𑀤𑁂𑀢𑁆𑀯𑀸 𑀳𑁂𑀝𑁆𑀞𑀸 𑀘 𑀢𑀺𑀡𑀲𑀦𑁆𑀣𑀭𑀁 𑀓𑀢𑁆𑀯𑀸 𑀅𑀤𑀸𑀲𑀺, 𑀇𑀢𑀭𑀲𑁆𑀲 𑀅𑀢𑁆𑀢𑀦𑁄 𑀓𑀼𑀝𑀺𑀬𑀁 𑀤𑁆𑀯𑁂 𑀢𑀬𑁄 𑀤𑀡𑁆𑀟𑀓𑁂 𑀲𑀸𑀔𑀸𑀬𑁄 𑀘 𑀦𑀻𑀳𑀭𑀺𑀢𑁆𑀯𑀸 𑀘𑀻𑀯𑀭𑁂𑀦 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀘𑀻𑀯𑀭𑀓𑀼𑀝𑀺𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀢𑁂 𑀢𑀢𑁆𑀣 𑀯𑀲𑀺𑀁𑀲𑀼. 𑀅𑀣 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀓𑀸𑀮𑀲𑁆𑀲𑁂𑀯 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀜𑁆𑀘 𑀫𑀼𑀔𑁄𑀤𑀓𑀜𑁆𑀘 𑀤𑀢𑁆𑀯𑀸 𑀲𑀳 𑀉𑀘𑁆𑀙𑀼𑀭𑀲𑁂𑀦 𑀪𑀢𑁆𑀢𑀁 𑀅𑀤𑀸𑀲𑀺. 𑀢𑁂𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀦𑀁 𑀏𑀓𑁂𑀓𑀁 𑀉𑀘𑁆𑀙𑀼𑀁 𑀅𑀤𑀸𑀲𑀺 ‘‘𑀫𑀬𑁆𑀳𑀁 𑀪𑀸𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀣𑁄𑀓𑀁 𑀫𑀕𑁆𑀕𑀁 𑀣𑁂𑀭𑁂 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑁄 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀜𑁆𑀘 𑀤𑀸𑀦𑀜𑁆𑀘 𑀆𑀭𑀩𑁆𑀪 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀦𑀺𑀯𑀢𑁆𑀢𑀺.

𑀔𑁂𑀢𑁆𑀢𑀲𑀸𑀫𑀺𑀓𑁄 𑀧𑀦 𑀕𑀘𑁆𑀙𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀧𑀣𑁂𑀦 𑀆𑀕𑀘𑁆𑀙𑀦𑁆𑀢𑁄 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 ‘‘𑀓𑀼𑀢𑁄 𑀯𑁄 𑀉𑀘𑁆𑀙𑀼 𑀮𑀤𑁆𑀥𑀸’’𑀢𑀺? ‘‘𑀉𑀘𑁆𑀙𑀼𑀧𑀸𑀮𑀓𑁂𑀦 𑀤𑀺𑀦𑁆𑀦𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀢𑀝𑀢𑀝𑀸𑀬𑀫𑀸𑀦𑁄 𑀓𑁄𑀥𑀸𑀪𑀺𑀪𑀽𑀢𑁄 𑀢𑀲𑁆𑀲 𑀧𑀺𑀝𑁆𑀞𑀺𑀢𑁄 𑀉𑀧𑀥𑀸𑀯𑀺𑀢𑁆𑀯𑀸 𑀫𑀼𑀕𑁆𑀕𑀭𑁂𑀦 𑀢𑀁 𑀧𑀳𑀭𑀦𑁆𑀢𑁄 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀲𑁄 𑀅𑀢𑁆𑀢𑀦𑀸 𑀓𑀢𑀧𑀼𑀜𑁆𑀜𑀓𑀫𑁆𑀫𑀫𑁂𑀯 𑀅𑀦𑀼𑀲𑁆𑀲𑀭𑀦𑁆𑀢𑁄 𑀓𑀸𑀮𑀁 𑀓𑀢𑁆𑀯𑀸 𑀲𑀼𑀥𑀫𑁆𑀫𑀸𑀤𑁂𑀯𑀲𑀪𑀸𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀲𑀩𑁆𑀩𑀲𑁂𑀢𑁄 𑀫𑀳𑀦𑁆𑀢𑁄 𑀤𑀺𑀩𑁆𑀩𑀯𑀭𑀯𑀸𑀭𑀡𑁄 𑀦𑀺𑀩𑁆𑀩𑀢𑁆𑀢𑀺.

𑀉𑀘𑁆𑀙𑀼𑀧𑀸𑀮𑀓𑀲𑁆𑀲 𑀫𑀭𑀡𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀘𑁂𑀯 𑀜𑀸𑀢𑀺𑀫𑀺𑀢𑁆𑀢𑀸 𑀘 𑀅𑀲𑁆𑀲𑀼𑀫𑀼𑀔𑀸 𑀭𑁄𑀤𑀫𑀸𑀦𑀸 𑀢𑀁 𑀞𑀸𑀦𑀁 𑀅𑀕𑀫𑀁𑀲𑀼, 𑀲𑀩𑁆𑀩𑁂 𑀘 𑀕𑀸𑀫𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀢𑁆𑀭𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀢𑀁 𑀤𑀺𑀩𑁆𑀩𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀩𑁆𑀩𑀢𑀸𑀴𑀸𑀯𑀘𑀭𑀧𑀭𑀺𑀯𑀼𑀢𑁄 𑀧𑀜𑁆𑀘𑀗𑁆𑀕𑀺𑀓𑁂𑀦 𑀢𑀽𑀭𑀺𑀬𑁂𑀦 𑀧𑀯𑀚𑁆𑀚𑀫𑀸𑀦𑁂𑀦 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀳𑀢𑀺𑀬𑀸 𑀤𑁂𑀯𑀺𑀤𑁆𑀥𑀺𑀬𑀸 𑀤𑁂𑀯𑀮𑁄𑀓𑀢𑁄 𑀆𑀕𑀦𑁆𑀢𑁆𑀯𑀸 𑀢𑀸𑀬 𑀧𑀭𑀺𑀲𑀸𑀬 𑀤𑀺𑀲𑁆𑀲𑀫𑀸𑀦𑀭𑀽𑀧𑁄 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀢𑀢𑁆𑀣 𑀧𑀡𑁆𑀟𑀺𑀢𑀚𑀸𑀢𑀺𑀓𑁄 𑀧𑀼𑀭𑀺𑀲𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀢𑁂𑀦 𑀓𑀢𑀧𑀼𑀜𑁆𑀜𑀓𑀫𑁆𑀫𑀁 𑀧𑀼𑀘𑁆𑀙𑀺 𑁋

𑁯𑁭𑁬. ‘‘𑀓𑁄 𑀦𑀼 𑀤𑀺𑀩𑁆𑀩𑁂𑀦 𑀬𑀸𑀦𑁂𑀦, 𑀲𑀩𑁆𑀩𑀲𑁂𑀢𑁂𑀦 𑀳𑀢𑁆𑀣𑀺𑀦𑀸;

𑀢𑀽𑀭𑀺𑀬𑀢𑀸𑀴𑀺𑀢𑀦𑀺𑀕𑁆𑀖𑁄𑀲𑁄, 𑀅𑀦𑁆𑀢𑀮𑀺𑀓𑁆𑀔𑁂 𑀫𑀳𑀻𑀬𑀢𑀺.

𑁯𑁭𑁭. ‘‘𑀤𑁂𑀯𑀢𑀸 𑀦𑀼𑀲𑀺 𑀕𑀦𑁆𑀥𑀩𑁆𑀩𑁄, 𑀅𑀤𑀼 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀅𑀚𑀸𑀦𑀦𑁆𑀢𑀸 𑀢𑀁 𑀧𑀼𑀘𑁆𑀙𑀸𑀫, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

𑀲𑁄𑀧𑀺𑀲𑁆𑀲 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀸𑀲𑀺 𑁋

𑁯𑁭𑁮. ‘‘𑀦𑀸𑀫𑁆𑀳𑀺 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄, 𑀦𑀸𑀧𑀺 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀲𑀼𑀥𑀫𑁆𑀫𑀸 𑀦𑀸𑀫 𑀬𑁂 𑀤𑁂𑀯𑀸, 𑀢𑁂𑀲𑀁 𑀅𑀜𑁆𑀜𑀢𑀭𑁄 𑀅𑀳’’𑀦𑁆𑀢𑀺.

𑁯𑁭𑁯. ‘‘𑀧𑀼𑀘𑁆𑀙𑀸𑀫 𑀤𑁂𑀯𑀁 𑀲𑀼𑀥𑀫𑁆𑀫𑀁, 𑀧𑀼𑀣𑀼𑀁 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀓𑀺𑀁 𑀓𑀢𑁆𑀯𑀸 𑀫𑀸𑀦𑀼𑀲𑁂 𑀓𑀫𑁆𑀫𑀁, 𑀲𑀼𑀥𑀫𑁆𑀫𑀁 𑀉𑀧𑀧𑀚𑁆𑀚𑀢𑀻’’𑀢𑀺 𑁋 𑀧𑀼𑀦𑀧𑀺 𑀧𑀼𑀘𑁆𑀙𑀺;

𑁯𑁮𑁦. ‘‘𑀉𑀘𑁆𑀙𑀸𑀕𑀸𑀭𑀁 𑀢𑀺𑀡𑀸𑀕𑀸𑀭𑀁, 𑀯𑀢𑁆𑀣𑀸𑀕𑀸𑀭𑀜𑁆𑀘 𑀬𑁄 𑀤𑀤𑁂;

𑀢𑀺𑀡𑁆𑀡𑀁 𑀅𑀜𑁆𑀜𑀢𑀭𑀁 𑀤𑀢𑁆𑀯𑀸, 𑀲𑀼𑀥𑀫𑁆𑀫𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑁋 𑀧𑀼𑀦𑀧𑀺 𑀩𑁆𑀬𑀸𑀓𑀸𑀲𑀺;

𑁯𑁭𑁬. 𑀢𑀢𑁆𑀣 𑀢𑀽𑀭𑀺𑀬𑀢𑀸𑀴𑀺𑀢𑀦𑀺𑀕𑁆𑀖𑁄𑀲𑁄𑀢𑀺 𑀢𑀸𑀴𑀺𑀢𑀧𑀜𑁆𑀘𑀗𑁆𑀕𑀺𑀢𑀤𑀺𑀩𑁆𑀩𑀢𑀽𑀭𑀺𑀬𑀦𑀺𑀕𑁆𑀖𑁄𑀲𑁄 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀯𑀚𑁆𑀚𑀫𑀸𑀦𑀤𑀺𑀩𑁆𑀩𑀢𑀽𑀭𑀺𑀬𑀲𑀤𑁆𑀤𑁄. 𑀅𑀦𑁆𑀢𑀮𑀺𑀓𑁆𑀔𑁂 𑀫𑀳𑀻𑀬𑀢𑀻𑀢𑀺 𑀆𑀓𑀸𑀲𑁂 𑀞𑀢𑁆𑀯𑀸 𑀆𑀓𑀸𑀲𑀝𑁆𑀞𑁂𑀦𑁂𑀯 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀧𑀽𑀚𑀻𑀬𑀢𑀺.

𑁯𑁭𑁭. 𑀤𑁂𑀯𑀢𑀸 𑀦𑀼𑀲𑀻𑀢𑀺 𑀤𑁂𑀯𑀢𑀸 𑀦𑀼 𑀅𑀲𑀺, 𑀓𑀺𑀁 𑀦𑀼 𑀢𑁆𑀯𑀁 𑀤𑁂𑀯𑁄𑀲𑀻𑀢𑀺 𑀅𑀢𑁆𑀣𑁄. 𑀕𑀦𑁆𑀥𑀩𑁆𑀩𑁄𑀢𑀺 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑀤𑁂𑀯𑁄 𑀅𑀲𑀻𑀢𑀺 𑀅𑀢𑁆𑀣𑁄. 𑀅𑀤𑀼 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄𑀢𑀺 𑀉𑀤𑀸𑀳𑀼 𑀧𑀼𑀭𑁂 𑀤𑀤𑀸𑀢𑀻𑀢𑀺 ‘‘𑀧𑀼𑀭𑀺𑀦𑁆𑀤𑀤𑁄’’𑀢𑀺 𑀯𑀺𑀲𑁆𑀲𑀼𑀢𑁄 𑀲𑀓𑁆𑀓𑁄 𑀦𑀼𑀲𑀺, 𑀅𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀲𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀲𑀢𑀺𑀧𑀺 𑀲𑀓𑁆𑀓𑀕𑀦𑁆𑀥𑀩𑁆𑀩𑀸𑀦𑀁 𑀤𑁂𑀯𑀪𑀸𑀯𑁂 𑀢𑁂𑀲𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀕𑁄𑀩𑀮𑀺𑀩𑀤𑁆𑀥𑀜𑀸𑀬𑁂𑀦 𑀢𑀤𑀜𑁆𑀜𑀤𑁂𑀯𑀯𑀸𑀘𑀓𑁄 𑀤𑁂𑀯𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄.

𑁯𑁭𑁮. 𑀅𑀣 𑀤𑁂𑀯𑀧𑀼𑀢𑁆𑀢𑁄 ‘‘𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀫 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀳𑁄𑀢𑀻’’𑀢𑀺 𑀢𑁂𑀳𑀺 𑀧𑀼𑀘𑁆𑀙𑀺𑀢𑀁 𑀤𑁂𑀯𑀕𑀦𑁆𑀥𑀩𑁆𑀩𑀲𑀓𑁆𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀦𑀫𑁆𑀳𑀺 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀫𑁆𑀳𑀺 𑀤𑁂𑀯𑁄𑀢𑀺 𑀢𑀬𑀸 𑀆𑀲𑀗𑁆𑀓𑀺𑀢𑁄 𑀬𑁄 𑀓𑁄𑀘𑀺 𑀤𑁂𑀯𑁄 𑀦 𑀳𑁄𑀫𑀺 𑀦 𑀕𑀦𑁆𑀥𑀩𑁆𑀩𑁄 𑀦 𑀲𑀓𑁆𑀓𑁄, 𑀅𑀧𑀺𑀘 𑀔𑁄 𑀲𑀼𑀥𑀫𑁆𑀫𑀸 𑀦𑀸𑀫 𑀬𑁂 𑀤𑁂𑀯𑀸, 𑀢𑁂𑀲𑀁 𑀅𑀜𑁆𑀜𑀢𑀭𑁄 𑀅𑀳𑀁, 𑀲𑀼𑀥𑀫𑁆𑀫𑀸 𑀤𑁂𑀯𑀢𑀸 𑀦𑀸𑀫 𑀢𑀸𑀯𑀢𑀺𑀁𑀲𑀤𑁂𑀯𑀦𑀺𑀓𑀸𑀬𑀲𑁆𑀲𑁂𑀯 𑀅𑀜𑁆𑀜𑀢𑀭𑀤𑁂𑀯𑀦𑀺𑀓𑀸𑀬𑁄. 𑀲𑁄 𑀓𑀺𑀭 𑀉𑀘𑁆𑀙𑀼𑀧𑀸𑀮𑁄 𑀢𑁂𑀲𑀁 𑀤𑁂𑀯𑀸𑀦𑀁 𑀲𑀫𑁆𑀧𑀢𑁆𑀢𑀺𑀁 𑀲𑀼𑀢𑁆𑀯𑀸 𑀧𑀕𑁂𑀯 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀡𑀺𑀥𑀸𑀬 𑀞𑀺𑀢𑁄𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺.

𑁯𑁭𑁯. 𑀧𑀼𑀣𑀼𑀦𑁆𑀢𑀺 𑀫𑀳𑀦𑁆𑀢𑀁, 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀤𑀻𑀧𑀦𑀢𑁆𑀣𑀜𑁆𑀳𑁂𑀢𑀁 𑀯𑀼𑀢𑁆𑀢𑀁.

𑁯𑁮𑁦. 𑀲𑀼𑀥𑀫𑁆𑀫𑀸𑀤𑁂𑀯𑀬𑀸𑀦𑀁 𑀧𑀼𑀝𑁆𑀞𑁄 𑀤𑁂𑀯𑀧𑀼𑀢𑁆𑀢𑁄 𑀓𑀓𑀡𑁆𑀝𑀓𑀦𑀺𑀫𑀺𑀢𑁆𑀢𑀁 𑀯𑀤𑀦𑁆𑀢𑁄 𑀯𑀺𑀬 𑀤𑀺𑀝𑁆𑀞𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀧𑀼𑀜𑁆𑀜𑀁 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀉𑀘𑁆𑀙𑀸𑀕𑀸𑀭’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀢𑀺𑀡𑁆𑀡𑀁 𑀅𑀜𑁆𑀜𑀢𑀭𑀁 𑀤𑀢𑁆𑀯𑀸𑀢𑀺 𑀬𑀤𑀺𑀧𑀺 𑀫𑀬𑀸 𑀢𑀻𑀡𑀺 𑀅𑀕𑀸𑀭𑀸𑀦𑀺 𑀤𑀺𑀦𑁆𑀦𑀸𑀦𑀺, 𑀢𑀻𑀲𑀼 𑀧𑀦 𑀅𑀜𑁆𑀜𑀢𑀭𑁂𑀦𑀸𑀢𑀺 𑀅𑀬𑀫𑀢𑁆𑀣𑁄𑀧𑀺 𑀲𑀺𑀚𑁆𑀛𑀢𑀻𑀢𑀺 𑀦𑀬𑀕𑁆𑀕𑀸𑀳𑁂𑀦 𑀤𑁂𑀯𑀧𑀼𑀢𑁆𑀢𑁄 𑀏𑀯𑀫𑀸𑀳. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀯𑀁 𑀲𑁄 𑀢𑁂𑀦 𑀧𑀼𑀘𑁆𑀙𑀺 𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀭𑀢𑀦𑀢𑁆𑀢𑀬𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀦𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄. 𑀫𑀦𑀼𑀲𑁆𑀲𑀸 𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀕𑀯𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 𑀲𑀜𑁆𑀚𑀸𑀢𑀧𑀲𑀸𑀤𑀩𑀳𑀼𑀫𑀸𑀦𑀸 𑀩𑀳𑀼𑀁 𑀤𑀸𑀦𑀽𑀧𑀓𑀭𑀡𑀁 𑀲𑀚𑁆𑀚𑁂𑀢𑁆𑀯𑀸 𑀲𑀓𑀝𑀸𑀦𑀁 𑀧𑀽𑀭𑁂𑀢𑁆𑀯𑀸 𑀯𑁂𑀴𑀼𑀯𑀦𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀣𑀼 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑀬𑀺𑀁𑀲𑀼. 𑀲𑀢𑁆𑀣𑀸 𑀢𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀢𑀣𑁂𑀯 𑀯𑀢𑁆𑀯𑀸 𑀢𑀫𑁂𑀯 𑀅𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑁂 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂 𑀘 𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀸𑀫𑀁 𑀉𑀧𑀕𑀦𑁆𑀢𑁆𑀯𑀸 𑀉𑀘𑁆𑀙𑀼𑀧𑀸𑀮𑀲𑁆𑀲 𑀫𑀢𑀝𑁆𑀞𑀸𑀦𑁂 𑀯𑀺𑀳𑀸𑀭𑀁 𑀓𑀸𑀭𑀬𑀺𑀁𑀲𑀽𑀢𑀺.

𑀢𑀢𑀺𑀬𑀦𑀸𑀕𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.