𑁯. 𑀯𑀺𑀲𑀸𑀔𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀦𑀯𑀫𑁂 𑀧𑀼𑀩𑁆𑀩𑀸𑀭𑀸𑀫𑁂𑀢𑀺 𑀲𑀸𑀯𑀢𑁆𑀣𑀺𑀬𑀸 𑀧𑀸𑀘𑀻𑀦𑀤𑀺𑀲𑀸𑀪𑀸𑀕𑁂 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀉𑀢𑁆𑀢𑀫𑀤𑁂𑀯𑀻𑀯𑀺𑀳𑀸𑀭𑀲𑀤𑀺𑀲𑁂 𑀞𑀸𑀦𑁂 𑀓𑀸𑀭𑀺𑀢𑁂 𑀆𑀭𑀸𑀫𑁂. 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂𑀢𑀺 𑀫𑀺𑀕𑀸𑀭𑀫𑀸𑀢𑀼𑀬𑀸 𑀧𑀸𑀲𑀸𑀤𑁂.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀢𑀻𑀢𑁂 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀧𑀤𑀼𑀫𑀼𑀢𑁆𑀢𑀭𑀤𑀲𑀩𑀮𑀁 𑀏𑀓𑀸 𑀉𑀧𑀸𑀲𑀺𑀓𑀸 𑀅𑀜𑁆𑀜𑀢𑀭𑀁 𑀉𑀧𑀸𑀲𑀺𑀓𑀁 𑀅𑀢𑁆𑀢𑀦𑁄 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀪𑀕𑀯𑀢𑁄 𑀦𑀺𑀧𑀘𑁆𑀘𑀓𑀸𑀭𑀁 𑀓𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀸 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀪𑀤𑁆𑀤𑀺𑀬𑀦𑀕𑀭𑁂 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀥𑀦𑀜𑁆𑀚𑀬𑀲𑁂𑀝𑁆𑀞𑀺𑀦𑁄 𑀕𑁂𑀳𑁂 𑀲𑀼𑀫𑀦𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀚𑀸𑀢𑀓𑀸𑀮𑁂 𑀘𑀲𑁆𑀲𑀸 𑀯𑀺𑀲𑀸𑀔𑀸𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑀸 𑀬𑀤𑀸 𑀪𑀕𑀯𑀸 𑀪𑀤𑁆𑀤𑀺𑀬𑀦𑀕𑀭𑀁 𑀅𑀕𑀫𑀸𑀲𑀺, 𑀢𑀤𑀸 𑀧𑀜𑁆𑀘𑀳𑀺 𑀤𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀧𑀞𑀫𑀤𑀲𑁆𑀲𑀦𑁂𑀦𑁂𑀯 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺.

𑀅𑀧𑀭𑀪𑀸𑀕𑁂 𑀲𑀸𑀯𑀢𑁆𑀣𑀺𑀬𑀁 𑀫𑀺𑀕𑀸𑀭𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀧𑀼𑀡𑁆𑀡𑀯𑀟𑁆𑀠𑀦𑀓𑀼𑀫𑀸𑀭𑀲𑁆𑀲 𑀕𑁂𑀳𑀁 𑀕𑀢𑀸, 𑀢𑀢𑁆𑀣 𑀦𑀁 𑀲𑀲𑀼𑀭𑁄 𑀫𑀺𑀕𑀸𑀭𑀲𑁂𑀝𑁆𑀞𑀺 𑀉𑀧𑀓𑀸𑀭𑀯𑀲𑁂𑀦 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑀲𑁆𑀫𑀸 𑀫𑀺𑀕𑀸𑀭𑀫𑀸𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀅𑀢𑁆𑀢𑀦𑁄 𑀫𑀳𑀮𑁆𑀮𑀢𑀸𑀧𑀲𑀸𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀯𑀓𑁄𑀝𑀻𑀳𑀺 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀯𑀲𑀦𑀢𑁆𑀣𑀸𑀬 𑀓𑀭𑀻𑀲𑀫𑀢𑁆𑀢𑁂 𑀪𑀽𑀫𑀺𑀪𑀸𑀕𑁂 𑀉𑀧𑀭𑀺𑀪𑀽𑀫𑀺𑀬𑀁 𑀧𑀜𑁆𑀘𑀕𑀩𑁆𑀪𑀲𑀢𑀸𑀦𑀺 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀧𑀜𑁆𑀘𑀕𑀩𑁆𑀪𑀲𑀢𑀸𑀦𑀻𑀢𑀺 𑀕𑀩𑁆𑀪𑀲𑀳𑀲𑁆𑀲𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀁 𑀧𑀸𑀲𑀸𑀤𑀁 𑀓𑀸𑀭𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂’’𑀢𑀺.

𑀓𑁄𑀘𑀺𑀤𑁂𑀯 𑀅𑀢𑁆𑀣𑁄𑀢𑀺 𑀓𑀺𑀜𑁆𑀘𑀺𑀤𑁂𑀯 𑀧𑀬𑁄𑀚𑀦𑀁. 𑀭𑀜𑁆𑀜𑁂𑀢𑀺 𑀭𑀸𑀚𑀺𑀦𑀺. 𑀧𑀝𑀺𑀩𑀤𑁆𑀥𑁄𑀢𑀺 𑀆𑀬𑀢𑁆𑀢𑁄. 𑀯𑀺𑀲𑀸𑀔𑀸𑀬 𑀜𑀸𑀢𑀺𑀓𑀼𑀮𑀢𑁄 𑀫𑀡𑀺𑀫𑀼𑀢𑁆𑀢𑀸𑀤𑀺𑀭𑀘𑀺𑀢𑀁 𑀢𑀸𑀤𑀺𑀲𑀁 𑀪𑀡𑁆𑀟𑀚𑀸𑀢𑀁 𑀢𑀲𑁆𑀲𑀸 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀧𑁂𑀲𑀺𑀢𑀁, 𑀢𑀁 𑀦𑀕𑀭𑀤𑁆𑀯𑀸𑀭𑀧𑁆𑀧𑀢𑁆𑀢𑀁 𑀲𑀼𑀗𑁆𑀓𑀺𑀓𑀸 𑀢𑀢𑁆𑀣 𑀲𑀼𑀗𑁆𑀓𑀁 𑀕𑀡𑁆𑀳𑀦𑁆𑀢𑀸 𑀢𑀤𑀦𑀼𑀭𑀽𑀧𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀢𑀺𑀭𑁂𑀓𑀁 𑀕𑀡𑁆𑀳𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀯𑀺𑀲𑀸𑀔𑀸 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀦𑀺𑀯𑁂𑀤𑁂𑀢𑀼𑀓𑀸𑀫𑀸 𑀧𑀢𑀺𑀭𑀽𑀧𑀧𑀭𑀺𑀯𑀸𑀭𑁂𑀦 𑀭𑀸𑀚𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺, 𑀢𑀲𑁆𑀫𑀺𑀁 𑀔𑀡𑁂 𑀭𑀸𑀚𑀸 𑀫𑀮𑁆𑀮𑀺𑀓𑀸𑀬 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀳𑁄𑀢𑀺. 𑀯𑀺𑀲𑀸𑀔𑀸 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 ‘‘𑀇𑀤𑀸𑀦𑀺 𑀮𑀪𑀺𑀲𑁆𑀲𑀸𑀫𑀺, 𑀇𑀤𑀸𑀦𑀺 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀪𑁄𑀚𑀦𑀯𑁂𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀙𑀺𑀦𑁆𑀦𑀪𑀢𑁆𑀢𑀸 𑀳𑀼𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀏𑀯𑀁 𑀤𑁆𑀯𑀻𑀳𑀢𑀻𑀳𑀁 𑀕𑀦𑁆𑀢𑁆𑀯𑀸𑀧𑀺 𑀑𑀓𑀸𑀲𑀁 𑀦 𑀮𑀪𑀺𑀬𑁂𑀯. 𑀇𑀢𑀺 𑀭𑀸𑀚𑀸 𑀅𑀦𑀺𑀯𑁂𑀤𑀺𑀢𑁄𑀧𑀺 𑀢𑀲𑁆𑀲 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀲𑁆𑀲 𑀑𑀓𑀸𑀲𑀸𑀓𑀭𑀡𑁂𑀦 ‘‘𑀬𑀣𑀸𑀥𑀺𑀧𑁆𑀧𑀸𑀬𑀁 𑀦 𑀢𑀻𑀭𑁂𑀢𑀻’’𑀢𑀺 𑀯𑀼𑀢𑁆𑀢𑁄. 𑀢𑀢𑁆𑀣 𑀬𑀣𑀸𑀥𑀺𑀧𑁆𑀧𑀸𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑀽𑀧𑀁. 𑀦 𑀢𑀻𑀭𑁂𑀢𑀻𑀢𑀺 𑀦 𑀦𑀺𑀝𑁆𑀞𑀸𑀧𑁂𑀢𑀺. 𑀫𑀳𑀸𑀉𑀧𑀸𑀲𑀺𑀓𑀸𑀬 𑀳𑀺 𑀭𑀸𑀚𑀸𑀬𑀢𑁆𑀢𑀲𑀼𑀗𑁆𑀓𑀫𑁂𑀯 𑀭𑀜𑁆𑀜𑁄 𑀤𑀢𑁆𑀯𑀸 𑀇𑀢𑀭𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀁 𑀅𑀥𑀺𑀧𑁆𑀧𑀸𑀬𑁄, 𑀲𑁄 𑀭𑀜𑁆𑀜𑀸 𑀦 𑀤𑀺𑀝𑁆𑀞𑀢𑁆𑀢𑀸 𑀏𑀯 𑀦 𑀢𑀻𑀭𑀺𑀢𑁄. 𑀳𑀦𑁆𑀤𑀸𑀢𑀺 𑀯𑁄𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲 𑀤𑀺𑀯𑀸, 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀤𑁆𑀯𑀻𑀳𑀢𑀻𑀳𑀁 𑀭𑀸𑀚𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀕𑀘𑁆𑀙𑀦𑁆𑀢𑀻 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑀺𑀝𑁆𑀞𑀺𑀢𑀢𑁆𑀢𑀸 𑀦𑀺𑀭𑀢𑁆𑀣𑀓𑀫𑁂𑀯 𑀉𑀧𑀲𑀗𑁆𑀓𑀫𑀺𑀁, 𑀪𑀕𑀯𑀢𑀺 𑀉𑀧𑀲𑀗𑁆𑀓𑀫𑀦𑀫𑁂𑀯 𑀧𑀦 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀸𑀤𑀺𑀧𑁆𑀧𑀝𑀺𑀮𑀸𑀪𑀓𑀸𑀭𑀡𑀢𑁆𑀢𑀸 𑀲𑀸𑀢𑁆𑀣𑀓𑀦𑁆𑀢𑀺 𑀏𑀯𑀸𑀳𑀁, 𑀪𑀦𑁆𑀢𑁂, 𑀇𑀫𑀸𑀬 𑀯𑁂𑀮𑀸𑀬 𑀇𑀥𑀸𑀕𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑀻 𑀫𑀳𑀸𑀉𑀧𑀸𑀲𑀺𑀓𑀸 ‘‘𑀇𑀥 𑀫𑁂, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳.

𑀏𑀢𑀫𑀢𑁆𑀣𑀦𑁆𑀢𑀺 𑀏𑀢𑀁 𑀧𑀭𑀸𑀬𑀢𑁆𑀢𑀢𑀸𑀬 𑀅𑀥𑀺𑀧𑁆𑀧𑀸𑀬𑀸𑀲𑀫𑀺𑀚𑁆𑀛𑀦𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀧𑀭𑀸𑀥𑀻𑀦𑀸𑀧𑀭𑀸𑀥𑀻𑀦𑀯𑀼𑀢𑁆𑀢𑀻𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑀧𑀭𑀺𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀩𑁆𑀩𑀁 𑀧𑀭𑀯𑀲𑀁 𑀤𑀼𑀓𑁆𑀔𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀣𑀚𑀸𑀢𑀁 𑀧𑀬𑁄𑀚𑀦𑀁 𑀧𑀭𑀯𑀲𑀁 𑀧𑀭𑀸𑀬𑀢𑁆𑀢𑀁 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀦𑀺𑀧𑁆𑀨𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑀼𑀓𑁆𑀔𑀁 𑀤𑀼𑀓𑁆𑀔𑀸𑀯𑀳𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀁 𑀇𑀲𑁆𑀲𑀭𑀺𑀬𑀁 𑀲𑀼𑀔𑀦𑁆𑀢𑀺 𑀤𑀼𑀯𑀺𑀥𑀁 𑀇𑀲𑁆𑀲𑀭𑀺𑀬𑀁 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭𑀜𑁆𑀘. 𑀢𑀢𑁆𑀣 𑀮𑁄𑀓𑀺𑀬𑀁 𑀭𑀸𑀚𑀺𑀲𑁆𑀲𑀭𑀺𑀬𑀸𑀤𑀺 𑀘𑁂𑀯 𑀮𑁄𑀓𑀺𑀬𑀚𑁆𑀛𑀸𑀦𑀸𑀪𑀺𑀜𑁆𑀜𑀸𑀦𑀺𑀩𑁆𑀩𑀢𑁆𑀢𑀁 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀜𑁆𑀘, 𑀮𑁄𑀓𑀼𑀢𑁆𑀢𑀭𑀁 𑀫𑀕𑁆𑀕𑀨𑀮𑀸𑀥𑀺𑀕𑀫𑀦𑀺𑀫𑀺𑀢𑁆𑀢𑀁 𑀦𑀺𑀭𑁄𑀥𑀺𑀲𑁆𑀲𑀭𑀺𑀬𑀁. 𑀢𑁂𑀲𑀼 𑀬𑀁 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀧𑀭𑀺𑀬𑁄𑀲𑀸𑀦𑀁 𑀫𑀦𑀼𑀲𑁆𑀲𑁂𑀲𑀼 𑀇𑀲𑁆𑀲𑀭𑀺𑀬𑀁, 𑀬𑀜𑁆𑀘 𑀲𑀓𑁆𑀓𑀸𑀤𑀻𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑁂𑀯𑀦𑀺𑀓𑀸𑀬𑁂 𑀆𑀥𑀺𑀧𑀘𑁆𑀘𑀪𑀽𑀢𑀁 𑀇𑀲𑁆𑀲𑀭𑀺𑀬𑀁, 𑀢𑀤𑀼𑀪𑀬𑀁 𑀬𑀤𑀺𑀧𑀺 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀬𑀣𑀺𑀘𑁆𑀙𑀺𑀢𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀼𑀔𑀦𑀺𑀫𑀺𑀢𑁆𑀢𑀢𑀸𑀬 𑀲𑀼𑀔𑀁, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 𑀧𑀦 𑀲𑀩𑁆𑀩𑀣𑀸 𑀤𑀼𑀓𑁆𑀔𑀫𑁂𑀯. 𑀢𑀣𑀸 𑀅𑀦𑀺𑀘𑁆𑀘𑀦𑁆𑀢𑀺𑀓𑀢𑀸𑀬 𑀮𑁄𑀓𑀺𑀬𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑀁 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀁, 𑀦𑀺𑀭𑁄𑀥𑀺𑀲𑁆𑀲𑀭𑀺𑀬𑀫𑁂𑀯 𑀧𑀦 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀦𑀻𑀬𑀢𑁄 𑀅𑀦𑀺𑀯𑀢𑁆𑀢𑀺𑀲𑀪𑀸𑀯𑀢𑁆𑀢𑀸 𑀘 𑀏𑀓𑀦𑁆𑀢𑀲𑀼𑀔𑀁 𑀦𑀸𑀫. 𑀬𑀁 𑀧𑀦𑁂𑀢𑁆𑀣 𑀲𑀩𑁆𑀩𑀢𑁆𑀣𑁂𑀯 𑀅𑀧𑀭𑀸𑀥𑀻𑀦𑀢𑀸𑀬 𑀮𑀪𑀢𑀺 𑀘𑀺𑀢𑁆𑀢𑀲𑀼𑀔𑀁, 𑀢𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 ‘‘𑀲𑀩𑁆𑀩𑀁 𑀇𑀲𑁆𑀲𑀭𑀺𑀬𑀁 𑀲𑀼𑀔’’𑀦𑁆𑀢𑀺 𑀆𑀳.

𑀲𑀸𑀥𑀸𑀭𑀡𑁂 𑀯𑀺𑀳𑀜𑁆𑀜𑀦𑁆𑀢𑀻𑀢𑀺 𑀇𑀤𑀁 ‘‘𑀲𑀩𑁆𑀩𑀁 𑀧𑀭𑀯𑀲𑀁 𑀤𑀼𑀓𑁆𑀔’’𑀦𑁆𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀯𑀺𑀯𑀭𑀡𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀲𑀸𑀥𑀸𑀭𑀡𑁂 𑀧𑀬𑁄𑀚𑀦𑁂 𑀲𑀸𑀥𑁂𑀢𑀩𑁆𑀩𑁂 𑀲𑀢𑀺 𑀢𑀲𑁆𑀲 𑀧𑀭𑀸𑀥𑀻𑀦𑀢𑀸𑀬 𑀬𑀣𑀸𑀥𑀺𑀧𑁆𑀧𑀸𑀬𑀁 𑀅𑀦𑀺𑀧𑁆𑀨𑀸𑀤𑀦𑀢𑁄 𑀇𑀫𑁂 𑀲𑀢𑁆𑀢𑀸 𑀯𑀺𑀳𑀜𑁆𑀜𑀦𑁆𑀢𑀺 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀺 𑀓𑀺𑀮𑀫𑀦𑁆𑀢𑀺. 𑀓𑀲𑁆𑀫𑀸? 𑀬𑁄𑀕𑀸 𑀳𑀺 𑀤𑀼𑀭𑀢𑀺𑀓𑁆𑀓𑀫𑀸𑀢𑀺 𑀬𑀲𑁆𑀫𑀸 𑀓𑀸𑀫𑀬𑁄𑀕𑀪𑀯𑀬𑁄𑀕𑀤𑀺𑀝𑁆𑀞𑀺𑀬𑁄𑀕𑀅𑀯𑀺𑀚𑁆𑀚𑀸𑀬𑁄𑀕𑀸 𑀅𑀦𑀸𑀤𑀺𑀓𑀸𑀮𑀪𑀸𑀯𑀺𑀢𑀸 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑁂𑀳𑀺 𑀧𑀚𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑀼𑀭𑀢𑀺𑀓𑁆𑀓𑀫𑀸. 𑀏𑀢𑁂𑀲𑀼 𑀤𑀺𑀝𑁆𑀞𑀺𑀬𑁄𑀕𑁄 𑀧𑀞𑀫𑀫𑀕𑁆𑀕𑁂𑀦 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑁄, 𑀓𑀸𑀫𑀬𑁄𑀕𑁄 𑀢𑀢𑀺𑀬𑀫𑀕𑁆𑀕𑁂𑀦. 𑀇𑀢𑀭𑁂 𑀅𑀕𑁆𑀕𑀫𑀕𑁆𑀕𑁂𑀦. 𑀇𑀢𑀺 𑀅𑀭𑀺𑀬𑀫𑀕𑁆𑀕𑀸𑀦𑀁 𑀤𑀼𑀭𑀥𑀺𑀕𑀫𑀦𑀻𑀬𑀢𑁆𑀢𑀸 𑀇𑀫𑁂 𑀬𑁄𑀕𑀸 𑀤𑀼𑀭𑀢𑀺𑀓𑁆𑀓𑀫𑀸. 𑀢𑀲𑁆𑀫𑀸 𑀓𑀸𑀫𑀬𑁄𑀕𑀸𑀤𑀺𑀯𑀲𑁂𑀦 𑀇𑀘𑁆𑀙𑀺𑀢𑀸𑀮𑀸𑀪𑀳𑁂𑀢𑀼 𑀲𑀢𑁆𑀢𑀸 𑀯𑀺𑀳𑀜𑁆𑀜𑀦𑁆𑀢𑀺, 𑀅𑀲𑀸𑀥𑀸𑀭𑀡𑁂 𑀧𑀦 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂 𑀦𑀺𑀭𑁄𑀥𑀺𑀲𑁆𑀲𑀭𑀺𑀬𑁂 𑀘 𑀲𑀢𑀺 𑀦 𑀓𑀤𑀸𑀘𑀺𑀧𑀺 𑀯𑀺𑀖𑀸𑀢𑀲𑁆𑀲 𑀲𑀫𑁆𑀪𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀣 𑀯𑀸 𑀲𑀩𑁆𑀩𑀁 𑀧𑀭𑀯𑀲𑀦𑁆𑀢𑀺 𑀬𑀁 𑀅𑀢𑁆𑀢𑀦𑁄 𑀅𑀜𑁆𑀜𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀲𑀗𑁆𑀔𑀸𑀢𑀁, 𑀢𑀁 𑀲𑀩𑁆𑀩𑀁 𑀅𑀦𑀺𑀘𑁆𑀘𑀲𑀪𑀸𑀯𑀢𑀸𑀬 𑀤𑀼𑀓𑁆𑀔𑀁. ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀁 𑀇𑀲𑁆𑀲𑀭𑀺𑀬𑀦𑁆𑀢𑀺 𑀬𑀁 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀝𑀁 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀢𑀸𑀬 𑀇𑀲𑁆𑀲𑀭𑀺𑀬𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀦𑀺𑀩𑁆𑀩𑀸𑀦𑀁, 𑀢𑀁 𑀉𑀧𑀸𑀤𑀺𑀲𑁂𑀲𑀸𑀤𑀺𑀯𑀺𑀪𑀸𑀕𑀁 𑀲𑀩𑁆𑀩𑀁 𑀲𑀼𑀔𑀁. ‘‘𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔’’𑀦𑁆𑀢𑀺 (𑀥. 𑀧. 𑁨𑁦𑁩-𑁨𑁦𑁪) 𑀳𑀺 𑀯𑀼𑀢𑁆𑀢𑀁. 𑀲𑀸𑀥𑀸𑀭𑀡𑁂𑀢𑀺 𑀏𑀯𑀁 𑀤𑀼𑀓𑁆𑀔𑀲𑀼𑀔𑁂 𑀯𑀯𑀢𑁆𑀣𑀺𑀢𑁂 𑀇𑀫𑁂 𑀲𑀢𑁆𑀢𑀸 𑀩𑀳𑀼𑀲𑀸𑀥𑀸𑀭𑀡𑁂 𑀤𑀼𑀓𑁆𑀔𑀓𑀸𑀭𑀡𑁂 𑀦𑀺𑀫𑀼𑀕𑁆𑀕𑀸 𑀳𑀼𑀢𑁆𑀯𑀸 𑀯𑀺𑀳𑀜𑁆𑀜𑀦𑁆𑀢𑀺. 𑀓𑀲𑁆𑀫𑀸? 𑀬𑁄𑀕𑀸 𑀳𑀺 𑀤𑀼𑀭𑀢𑀺𑀓𑁆𑀓𑀫𑀸𑀢𑀺 𑀬𑀲𑁆𑀫𑀸 𑀢𑁂 𑀲𑀩𑁆𑀩𑀢𑁆𑀣 𑀦𑀺𑀫𑀼𑀚𑁆𑀚𑀦𑀲𑁆𑀲 𑀳𑁂𑀢𑀼𑀪𑀽𑀢𑀸 𑀓𑀸𑀫𑀬𑁄𑀕𑀸𑀤𑀬𑁄 𑀤𑀼𑀭𑀢𑀺𑀓𑁆𑀓𑀫𑀸, 𑀢𑀲𑁆𑀫𑀸 𑀢𑁆𑀯𑀫𑁆𑀧𑀺 𑀯𑀺𑀲𑀸𑀔𑁂 𑀧𑀭𑀸𑀬𑀢𑁆𑀢𑀫𑀢𑁆𑀣𑀁 𑀧𑀢𑁆𑀣𑁂𑀢𑁆𑀯𑀸 𑀅𑀮𑀪𑀫𑀸𑀦𑀸 𑀯𑀺𑀳𑀜𑁆𑀜𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀯𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.