𑁧𑁦. 𑀪𑀤𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀅𑀦𑀼𑀧𑀺𑀬𑀸𑀬𑀦𑁆𑀢𑀺 𑀏𑀯𑀁 𑀦𑀸𑀫𑀓𑁂 𑀦𑀕𑀭𑁂. 𑀅𑀫𑁆𑀩𑀯𑀦𑁂𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀫𑀮𑁆𑀮𑀭𑀸𑀚𑀽𑀦𑀁 𑀏𑀓𑀁 𑀅𑀫𑁆𑀩𑀯𑀦𑀁 𑀅𑀳𑁄𑀲𑀺, 𑀢𑀢𑁆𑀣 𑀫𑀮𑁆𑀮𑀭𑀸𑀚𑀽𑀳𑀺 𑀪𑀕𑀯𑀢𑁄 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄, 𑀲𑁄 ‘‘𑀅𑀫𑁆𑀩𑀯𑀦’’𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀅𑀦𑀼𑀧𑀺𑀬𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸 𑀢𑀢𑁆𑀣 𑀪𑀕𑀯𑀸 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼𑀧𑀺𑀬𑀸𑀬𑀁 𑀯𑀺𑀳𑀭𑀢𑀺 𑀅𑀫𑁆𑀩𑀯𑀦𑁂’’𑀢𑀺. 𑀪𑀤𑁆𑀤𑀺𑀬𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀓𑀸𑀴𑀻𑀕𑁄𑀥𑀸𑀬 𑀧𑀼𑀢𑁆𑀢𑁄𑀢𑀺 𑀓𑀸𑀴𑀻𑀕𑁄𑀥𑀸 𑀦𑀸𑀫 𑀲𑀸𑀓𑀺𑀬𑀸𑀦𑀻 𑀲𑀓𑁆𑀬𑀭𑀸𑀚𑀤𑁂𑀯𑀻 𑀅𑀭𑀺𑀬𑀲𑀸𑀯𑀺𑀓𑀸 𑀆𑀕𑀢𑀨𑀮𑀸 𑀯𑀺𑀜𑁆𑀜𑀸𑀢𑀲𑀸𑀲𑀦𑀸, 𑀢𑀲𑁆𑀲𑀸 𑀅𑀬𑀁 𑀧𑀼𑀢𑁆𑀢𑁄. 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀯𑀺𑀥𑀺 𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁩𑁦-𑁩𑁩𑁧) 𑀆𑀕𑀢𑁄𑀯. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺, 𑀢𑁂𑀭𑀲𑀧𑀺 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺. 𑀪𑀕𑀯𑀢𑀸 𑀘 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀘𑁆𑀘𑀓𑀼𑀮𑀺𑀓𑀸𑀦𑀁, 𑀬𑀤𑀺𑀤𑀁 𑀪𑀤𑁆𑀤𑀺𑀬𑁄 𑀓𑀸𑀴𑀻𑀕𑁄𑀥𑀸𑀬 𑀧𑀼𑀢𑁆𑀢𑁄’’𑀢𑀺 (𑀅. 𑀦𑀺. 𑁧.𑁧𑁯𑁩) 𑀉𑀘𑁆𑀘𑀓𑀼𑀮𑀺𑀓𑀪𑀸𑀯𑁂 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄 𑀅𑀲𑀻𑀢𑀺𑀬𑀸 𑀲𑀸𑀯𑀓𑀸𑀦𑀁 𑀅𑀩𑁆𑀪𑀦𑁆𑀢𑀭𑁄.

𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀢𑀺 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀅𑀯𑀲𑁂𑀲𑀁 𑀅𑀭𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀁 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀜𑁆𑀘 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀧𑀩𑁆𑀩𑀢𑀓𑀦𑁆𑀤𑀭𑀸𑀤𑀺 𑀧𑀩𑁆𑀩𑀚𑀺𑀢𑀲𑀸𑀭𑀼𑀧𑁆𑀧𑀁 𑀦𑀺𑀯𑀸𑀲𑀝𑁆𑀞𑀸𑀦𑀁 𑀚𑀦𑀲𑀫𑁆𑀩𑀸𑀥𑀸𑀪𑀸𑀯𑀢𑁄 𑀇𑀥 𑀲𑀼𑀜𑁆𑀜𑀸𑀕𑀸𑀭𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀅𑀣 𑀯𑀸 𑀛𑀸𑀦𑀓𑀡𑁆𑀝𑀓𑀸𑀦𑀁 𑀲𑀤𑁆𑀤𑀸𑀦𑀁 𑀅𑀪𑀸𑀯𑀢𑁄 𑀯𑀺𑀯𑀺𑀢𑁆𑀢𑀁 𑀬𑀁 𑀓𑀺𑀜𑁆𑀘𑀺 𑀅𑀕𑀸𑀭𑀫𑁆𑀧𑀺 𑀲𑀼𑀜𑁆𑀜𑀸𑀕𑀸𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀲𑀼𑀜𑁆𑀜𑀸𑀕𑀸𑀭𑀁 𑀉𑀧𑀕𑀢𑁄. 𑀅𑀪𑀺𑀓𑁆𑀔𑀡𑀦𑁆𑀢𑀺 𑀩𑀳𑀼𑀮𑀁. 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀲𑁄 𑀳𑀺 𑀆𑀬𑀲𑁆𑀫𑀸 𑀅𑀭𑀜𑁆𑀜𑁂 𑀤𑀺𑀯𑀸𑀯𑀺𑀳𑀸𑀭𑀁 𑀉𑀧𑀕𑀢𑁄𑀧𑀺 𑀭𑀢𑁆𑀢𑀺𑀯𑀸𑀲𑀽𑀧𑀕𑀢𑁄𑀧𑀺 𑀬𑁂𑀪𑀼𑀬𑁆𑀬𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀦𑀺𑀭𑁄𑀥𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀢𑀺, 𑀢𑀲𑁆𑀫𑀸 𑀢𑀁 𑀲𑀼𑀔𑀁 𑀲𑀦𑁆𑀥𑀸𑀬 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀅𑀦𑀼𑀪𑀽𑀢𑀁 𑀲𑀪𑀬𑀁 𑀲𑀧𑀭𑀺𑀴𑀸𑀳𑀁 𑀭𑀚𑁆𑀚𑀲𑀼𑀔𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 ‘‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’’𑀦𑁆𑀢𑀺 𑀲𑁄𑀫𑀦𑀲𑁆𑀲𑀲𑀳𑀺𑀢𑀁 𑀜𑀸𑀡𑀲𑀫𑀼𑀝𑁆𑀞𑀸𑀦𑀁 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀁 𑀲𑀫𑀼𑀕𑁆𑀕𑀺𑀭𑀢𑀺.

𑀲𑀼𑀢𑁆𑀯𑀸𑀦 𑀦𑁂𑀲𑀁 𑀏𑀢𑀤𑀳𑁄𑀲𑀻𑀢𑀺 𑀦𑁂𑀲𑀁 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀲𑁆𑀲 𑀆𑀬𑀲𑁆𑀫𑀢𑁄 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺 𑀉𑀤𑀸𑀦𑁂𑀦𑁆𑀢𑀲𑁆𑀲 𑀉𑀤𑀸𑀦𑀁 𑀲𑀼𑀢𑁆𑀯𑀸 ‘‘𑀦𑀺𑀲𑁆𑀲𑀁𑀲𑀬𑀁 𑀏𑀲 𑀅𑀦𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’’𑀢𑀺 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑀺𑀢𑀁 𑀅𑀳𑁄𑀲𑀺. 𑀢𑁂 𑀪𑀺𑀓𑁆𑀔𑀽 𑀧𑀼𑀣𑀼𑀚𑁆𑀚𑀦𑀸 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀯𑀺𑀯𑁂𑀓𑀲𑀼𑀔𑀁 𑀲𑀦𑁆𑀥𑀸𑀬 𑀉𑀤𑀸𑀦𑀁 𑀅𑀚𑀸𑀦𑀦𑁆𑀢𑀸 𑀏𑀯𑀁 𑀅𑀫𑀜𑁆𑀜𑀺𑀁𑀲𑀼, 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀲𑁆𑀲𑀁𑀲𑀬’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀦𑀺𑀲𑁆𑀲𑀁𑀲𑀬𑀦𑁆𑀢𑀺 𑀅𑀲𑀦𑁆𑀤𑁂𑀳𑁂𑀦 𑀏𑀓𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀬𑀁 𑀲𑁄 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑁄 𑀲𑀫𑀸𑀦𑁄’’𑀢𑀺 𑀧𑀸𑀴𑀺𑀁 𑀯𑀢𑁆𑀯𑀸 ‘‘𑀅𑀦𑀼𑀪𑀯𑀻’’𑀢𑀺 𑀯𑀘𑀦𑀲𑁂𑀲𑁂𑀦 𑀓𑁂𑀘𑀺 𑀅𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑀺, 𑀅𑀧𑀭𑁂 ‘‘𑀬𑀁 𑀲𑀸’’𑀢𑀺 𑀧𑀞𑀦𑁆𑀢𑀺, ‘‘𑀬𑀁𑀲 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑀲𑁆𑀲𑀸’’𑀢𑀺 𑀧𑀦 𑀧𑀸𑀴𑀺. 𑀢𑀢𑁆𑀣 𑀬𑀁𑀲𑀸𑀢𑀺 𑀬𑀁 𑀅𑀲𑁆𑀲, 𑀲𑀦𑁆𑀥𑀺𑀯𑀲𑁂𑀦 𑀳𑀺 𑀅𑀓𑀸𑀭𑀲𑀓𑀸𑀭𑀮𑁄𑀧𑁄 ‘‘𑀏𑀯𑀁𑀲 𑀢𑁂 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮), 𑀧𑀼𑀧𑁆𑀨𑀁𑀲𑀸 𑀉𑀧𑁆𑀧𑀚𑁆𑀚𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁩𑁬) 𑀯𑀺𑀬. 𑀢𑀲𑁆𑀲𑀢𑁆𑀣𑁄 𑁋 𑀅𑀲𑁆𑀲 𑀆𑀬𑀲𑁆𑀫𑀢𑁄 𑀪𑀤𑁆𑀤𑀺𑀬𑀲𑁆𑀲 𑀧𑀩𑁆𑀩𑀚𑀺𑀢𑀢𑁄 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑀲𑁆𑀲 𑀕𑀳𑀝𑁆𑀞𑀲𑁆𑀲 𑀲𑀢𑁄 𑀬𑀁 𑀭𑀚𑁆𑀚𑀲𑀼𑀔𑀁 𑀅𑀦𑀼𑀪𑀽𑀢𑀁. 𑀲𑀸 𑀢𑀫𑀦𑀼𑀲𑁆𑀲𑀭𑀫𑀸𑀦𑁄𑀢𑀺 𑀲𑁄 𑀢𑀁 𑀲𑀼𑀔𑀁 𑀏𑀢𑀭𑀳𑀺 𑀉𑀓𑁆𑀓𑀡𑁆𑀞𑀦𑀯𑀲𑁂𑀦 𑀅𑀦𑀼𑀲𑁆𑀲𑀭𑀦𑁆𑀢𑁄.

𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀦𑁆𑀢𑀺 𑀢𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀉𑀮𑁆𑀮𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑀸 𑀢𑀲𑁆𑀲 𑀅𑀦𑀼𑀕𑁆𑀕𑀳𑀡𑀸𑀥𑀺𑀧𑁆𑀧𑀸𑀬𑁂𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁, 𑀦 𑀉𑀚𑁆𑀛𑀸𑀦𑀯𑀲𑁂𑀦. 𑀅𑀜𑁆𑀜𑀢𑀭𑀦𑁆𑀢𑀺 𑀦𑀸𑀫𑀕𑁄𑀢𑁆𑀢𑁂𑀦 𑀅𑀧𑀸𑀓𑀝𑀁 𑀏𑀓𑀁 𑀪𑀺𑀓𑁆𑀔𑀼𑀁. 𑀆𑀫𑀦𑁆𑀢𑁂𑀲𑀻𑀢𑀺 𑀆𑀡𑀸𑀧𑁂𑀲𑀺 𑀢𑁂 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀢𑀼𑀓𑀸𑀫𑁄. 𑀏𑀯𑀦𑁆𑀢𑀺 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁂, 𑀲𑀸𑀥𑀽𑀢𑀺 𑀅𑀢𑁆𑀣𑁄. 𑀧𑀼𑀦 𑀏𑀯𑀦𑁆𑀢𑀺 𑀧𑀝𑀺𑀜𑁆𑀜𑀸𑀬. 𑀅𑀪𑀺𑀓𑁆𑀔𑀡𑀁 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀬𑀣𑀸 𑀢𑁂 𑀪𑀺𑀓𑁆𑀔𑀽 𑀯𑀤𑀦𑁆𑀢𑀺, 𑀢𑀁 𑀏𑀯𑀁 𑀢𑀣𑁂𑀯𑀸𑀢𑀺 𑀅𑀢𑁆𑀢𑀦𑁄 𑀉𑀤𑀸𑀦𑀁 𑀧𑀝𑀺𑀚𑀸𑀦𑀸𑀢𑀺. 𑀓𑀺𑀁 𑀧𑀦 𑀢𑁆𑀯𑀁 𑀪𑀤𑁆𑀤𑀺𑀬𑀸𑀢𑀺 𑀓𑀲𑁆𑀫𑀸 𑀪𑀕𑀯𑀸 𑀧𑀼𑀘𑁆𑀙𑀢𑀺, 𑀓𑀺𑀁 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀻𑀢𑀺? 𑀦𑁄 𑀦 𑀚𑀸𑀦𑀸𑀢𑀺, 𑀢𑁂𑀦𑁂𑀯 𑀧𑀦 𑀢𑀫𑀢𑁆𑀣𑀁 𑀯𑀤𑀸𑀧𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀢𑀼𑀁 𑀧𑀼𑀘𑁆𑀙𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀚𑀸𑀦𑀦𑁆𑀢𑀸𑀧𑀺 𑀦 𑀧𑀼𑀘𑁆𑀙𑀦𑁆𑀢𑀻’’𑀢𑀺𑀆𑀤𑀺. 𑀅𑀢𑁆𑀣𑀯𑀲𑀦𑁆𑀢𑀺 𑀓𑀸𑀭𑀡𑀁.

𑀅𑀦𑁆𑀢𑁂𑀧𑀼𑀭𑁂𑀢𑀺 𑀇𑀢𑁆𑀣𑀸𑀕𑀸𑀭𑀲𑁆𑀲 𑀲𑀜𑁆𑀘𑀭𑀡𑀝𑁆𑀞𑀸𑀦𑀪𑀽𑀢𑁂 𑀭𑀸𑀚𑀕𑁂𑀳𑀲𑁆𑀲 𑀅𑀩𑁆𑀪𑀦𑁆𑀢𑀭𑁂, 𑀬𑀢𑁆𑀣 𑀭𑀸𑀚𑀸 𑀦𑁆𑀳𑀸𑀦𑀪𑁄𑀚𑀦𑀲𑀬𑀦𑀸𑀤𑀺𑀁 𑀓𑀧𑁆𑀧𑁂𑀢𑀺. 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸𑀢𑀺 𑀆𑀭𑀓𑁆𑀔𑀸𑀤𑀺𑀓𑀢𑀧𑀼𑀭𑀺𑀲𑁂𑀳𑀺 𑀕𑀼𑀢𑁆𑀢𑀺 𑀲𑀼𑀝𑁆𑀞𑀼 𑀲𑀫𑀦𑁆𑀢𑀢𑁄 𑀯𑀺𑀳𑀺𑀢𑀸. 𑀩𑀳𑀺𑀧𑀺 𑀅𑀦𑁆𑀢𑁂𑀧𑀼𑀭𑁂𑀢𑀺 𑀅𑀟𑁆𑀟𑀓𑀭𑀡𑀝𑁆𑀞𑀸𑀦𑀸𑀤𑀺𑀓𑁂 𑀅𑀦𑁆𑀢𑁂𑀧𑀼𑀭𑀢𑁄 𑀩𑀳𑀺𑀪𑀽𑀢𑁂 𑀭𑀸𑀚𑀕𑁂𑀳𑁂. 𑀏𑀯𑀁 𑀭𑀓𑁆𑀔𑀺𑀢𑁄 𑀕𑁄𑀧𑀺𑀢𑁄 𑀲𑀦𑁆𑀢𑁄𑀢𑀺 𑀏𑀯𑀁 𑀭𑀸𑀚𑀕𑁂𑀳𑀭𑀸𑀚𑀥𑀸𑀦𑀺𑀭𑀚𑁆𑀚𑀤𑁂𑀲𑁂𑀲𑀼 𑀅𑀦𑁆𑀢𑁄 𑀘 𑀩𑀳𑀺 𑀘 𑀅𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 𑀅𑀦𑁂𑀓𑀲𑀢𑁂𑀳𑀺 𑀲𑀼𑀲𑀁𑀯𑀺𑀳𑀺𑀢𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀫𑀫𑁂𑀯 𑀦𑀺𑀩𑁆𑀪𑀬𑀢𑁆𑀣𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀁 𑀭𑀓𑁆𑀔𑀺𑀢𑁄 𑀕𑁄𑀧𑀺𑀢𑁄 𑀲𑀫𑀸𑀦𑁄. 𑀪𑀻𑀢𑁄𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀅𑀣 𑀯𑀸 𑀪𑀻𑀢𑁄𑀢𑀺 𑀧𑀭𑀭𑀸𑀚𑀽𑀳𑀺 𑀪𑀸𑀬𑀫𑀸𑀦𑁄. 𑀉𑀩𑁆𑀩𑀺𑀕𑁆𑀕𑁄𑀢𑀺 𑀲𑀓𑀭𑀚𑁆𑀚𑁂𑀧𑀺 𑀧𑀓𑀢𑀺𑀢𑁄 𑀉𑀧𑁆𑀧𑀚𑁆𑀚𑀦𑀓𑀪𑀬𑀼𑀩𑁆𑀩𑁂𑀕𑁂𑀦 𑀉𑀩𑁆𑀩𑀺𑀕𑁆𑀕𑁄 𑀘𑀮𑀺𑀢𑁄. 𑀉𑀲𑁆𑀲𑀗𑁆𑀓𑀻𑀢𑀺 ‘‘𑀭𑀜𑁆𑀜𑀸 𑀦𑀸𑀫 𑀲𑀩𑁆𑀩𑀓𑀸𑀮𑀁 𑀅𑀯𑀺𑀲𑁆𑀲𑀢𑁆𑀣𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑁂𑀦 𑀲𑀩𑁆𑀩𑀢𑁆𑀣 𑀅𑀯𑀺𑀲𑁆𑀲𑀸𑀲𑀯𑀲𑁂𑀦 𑀢𑁂𑀲𑀁 𑀢𑁂𑀲𑀁 𑀓𑀺𑀘𑁆𑀘𑀓𑀭𑀡𑀻𑀬𑀸𑀦𑀁 𑀧𑀘𑁆𑀘𑀬𑀧𑀭𑀺𑀲𑀗𑁆𑀓𑀸𑀬 𑀘 𑀉𑀤𑁆𑀥𑀫𑀼𑀔𑀁 𑀲𑀗𑁆𑀓𑀫𑀸𑀦𑁄. 𑀉𑀢𑁆𑀭𑀸𑀲𑀻𑀢𑀺 ‘‘𑀲𑀦𑁆𑀢𑀺𑀓𑀸𑀯𑀘𑀭𑁂𑀳𑀺𑀧𑀺 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀫𑁂 𑀓𑀤𑀸𑀘𑀺 𑀅𑀦𑀢𑁆𑀣𑁄 𑀪𑀯𑁂𑀬𑁆𑀬𑀸’’𑀢𑀺 𑀉𑀧𑁆𑀧𑀦𑁆𑀦𑁂𑀦 𑀲𑀭𑀻𑀭𑀓𑀫𑁆𑀧𑀁 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑁂𑀦 𑀢𑀸𑀲𑁂𑀦 𑀉𑀢𑁆𑀭𑀸𑀲𑀻. ‘‘𑀉𑀢𑁆𑀭𑀲𑁆𑀢𑁄’’𑀢𑀺𑀧𑀺 𑀧𑀞𑀦𑁆𑀢𑀺. 𑀯𑀺𑀳𑀸𑀲𑀺𑀦𑁆𑀢𑀺 𑀏𑀯𑀁𑀪𑀽𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀺𑀁.

𑀏𑀢𑀭𑀳𑀻𑀢𑀺 𑀇𑀤𑀸𑀦𑀺 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬. 𑀏𑀓𑁄𑀢𑀺 𑀅𑀲𑀳𑀸𑀬𑁄, 𑀢𑁂𑀦 𑀯𑀽𑀧𑀓𑀝𑁆𑀞𑀓𑀸𑀬𑀢𑀁 𑀤𑀲𑁆𑀲𑁂𑀢𑀺. 𑀅𑀪𑀻𑀢𑁄𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀬𑀸𑀤𑀺𑀦𑀺𑀫𑀺𑀢𑁆𑀢𑀲𑁆𑀲 𑀧𑀭𑀺𑀕𑁆𑀕𑀳𑀲𑁆𑀲 𑀢𑀁 𑀦𑀺𑀫𑀺𑀢𑁆𑀢𑀲𑁆𑀲 𑀘 𑀓𑀺𑀮𑁂𑀲𑀲𑁆𑀲 𑀅𑀪𑀸𑀯𑁂𑀦𑁂𑀯𑀲𑁆𑀲 𑀅𑀪𑀻𑀢𑀸𑀤𑀺𑀢𑀸𑀢𑀺. 𑀏𑀢𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑀁 𑀤𑀲𑁆𑀲𑁂𑀢𑀺. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄𑀢𑀺 𑀲𑀭𑀻𑀭𑀕𑀼𑀢𑁆𑀢𑀺𑀬𑀁 𑀦𑀺𑀭𑀼𑀲𑁆𑀲𑀼𑀓𑁆𑀓𑁄. 𑀧𑀦𑁆𑀦𑀮𑁄𑀫𑁄𑀢𑀺 𑀮𑁄𑀫𑀳𑀁𑀲𑀼𑀧𑁆𑀧𑀸𑀤𑀓𑀲𑁆𑀲 𑀙𑀫𑁆𑀪𑀺𑀢𑀢𑁆𑀢𑀲𑁆𑀲 𑀅𑀪𑀸𑀯𑁂𑀦 𑀅𑀦𑀼𑀕𑁆𑀕𑀢𑀮𑁄𑀫𑁄. 𑀧𑀤𑀤𑁆𑀯𑀬𑁂𑀦𑀧𑀺 𑀲𑁂𑀭𑀺𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀺. 𑀧𑀭𑀤𑀢𑁆𑀢𑀯𑀼𑀢𑁆𑀢𑁄𑀢𑀺 𑀧𑀭𑁂𑀳𑀺 𑀤𑀺𑀦𑁆𑀦𑁂𑀦 𑀘𑀻𑀯𑀭𑀸𑀤𑀺𑀦𑀸 𑀯𑀢𑁆𑀢𑀫𑀸𑀦𑁄, 𑀏𑀢𑁂𑀦 𑀲𑀩𑁆𑀩𑀲𑁄 𑀲𑀗𑁆𑀕𑀸𑀪𑀸𑀯𑀤𑀻𑀧𑀦𑀫𑀼𑀔𑁂𑀦 𑀅𑀦𑀯𑀲𑁂𑀲𑀪𑀬𑀳𑁂𑀢𑀼𑀯𑀺𑀭𑀳𑀁 𑀤𑀲𑁆𑀲𑁂𑀢𑀺. 𑀫𑀺𑀕𑀪𑀽𑀢𑁂𑀦 𑀘𑁂𑀢𑀲𑀸𑀢𑀺 𑀯𑀺𑀲𑁆𑀲𑀢𑁆𑀣𑀯𑀺𑀳𑀸𑀭𑀺𑀢𑀸𑀬 𑀫𑀺𑀕𑀲𑁆𑀲 𑀯𑀺𑀬 𑀚𑀸𑀢𑁂𑀦 𑀘𑀺𑀢𑁆𑀢𑁂𑀦. 𑀫𑀺𑀕𑁄 𑀳𑀺 𑀅𑀫𑀦𑀼𑀲𑁆𑀲𑀧𑀣𑁂 𑀅𑀭𑀜𑁆𑀜𑁂 𑀯𑀲𑀫𑀸𑀦𑁄 𑀯𑀺𑀲𑁆𑀲𑀢𑁆𑀣𑁄 𑀢𑀺𑀝𑁆𑀞𑀢𑀺, 𑀦𑀺𑀲𑀻𑀤𑀢𑀺, 𑀦𑀺𑀧𑀚𑁆𑀚𑀢𑀺, 𑀬𑁂𑀦𑀓𑀸𑀫𑀜𑁆𑀘 𑀧𑀓𑁆𑀓𑀫𑀢𑀺 𑀅𑀧𑁆𑀧𑀝𑀺𑀳𑀢𑀘𑀸𑀭𑁄, 𑀏𑀯𑀁 𑀅𑀳𑀫𑁆𑀧𑀺 𑀯𑀺𑀳𑀭𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑁋

‘‘𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄,

𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬;

𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄,

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺. (𑀲𑀼. 𑀦𑀺. 𑁩𑁯; 𑀅𑀧. 𑀣𑁂𑀭 𑁧.𑁧.𑁯𑁫);

𑀇𑀫𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀦𑁆𑀢𑀺, 𑀪𑀦𑁆𑀢𑁂, 𑀪𑀕𑀯𑀸 𑀬𑀤𑀺𑀤𑀁 𑀫𑀫 𑀏𑀢𑀭𑀳𑀺 𑀧𑀭𑀫𑀁 𑀯𑀺𑀯𑁂𑀓𑀲𑀼𑀔𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁, 𑀇𑀤𑀫𑁂𑀯 𑀓𑀸𑀭𑀡𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺𑀦𑁆𑀢𑀺.

𑀏𑀢𑀫𑀢𑁆𑀣𑀦𑁆𑀢𑀺 𑀏𑀢𑀁 𑀪𑀤𑁆𑀤𑀺𑀬𑀢𑁆𑀣𑁂𑀭𑀲𑁆𑀲 𑀧𑀼𑀣𑀼𑀚𑁆𑀚𑀦𑀯𑀺𑀲𑀬𑀸𑀢𑀻𑀢𑀁 𑀯𑀺𑀯𑁂𑀓𑀲𑀼𑀔𑀲𑀗𑁆𑀔𑀸𑀢𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀤𑀁 𑀲𑀳𑁂𑀢𑀼𑀓𑀪𑀬𑀲𑁄𑀓𑀯𑀺𑀕𑀫𑀸𑀦𑀼𑀪𑀸𑀯𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸𑀢𑀺 𑀬𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀅𑀦𑁆𑀢𑀭𑀢𑁄 𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀘𑀺𑀢𑁆𑀢𑀓𑀸𑀮𑀼𑀲𑁆𑀲𑀺𑀬𑀓𑀭𑀡𑀢𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀸 𑀭𑀸𑀕𑀸𑀤𑀬𑁄 𑀆𑀖𑀸𑀢𑀯𑀢𑁆𑀣𑀼𑀆𑀤𑀺𑀓𑀸𑀭𑀡𑀪𑁂𑀤𑀢𑁄 𑀅𑀦𑁂𑀓𑀪𑁂𑀤𑀸 𑀤𑁄𑀲𑀓𑁄𑀧𑀸 𑀏𑀯 𑀓𑁄𑀧𑀸 𑀦 𑀲𑀦𑁆𑀢𑀺 𑀫𑀕𑁆𑀕𑁂𑀦 𑀧𑀳𑀻𑀦𑀢𑁆𑀢𑀸 𑀦 𑀯𑀺𑀚𑁆𑀚𑀦𑁆𑀢𑀺. 𑀅𑀬𑀜𑁆𑀳𑀺 𑀅𑀦𑁆𑀢𑀭𑀲𑀤𑁆𑀤𑁄 𑀓𑀺𑀜𑁆𑀘𑀸𑀧𑀺 ‘‘𑀫𑀜𑁆𑀘 𑀢𑁆𑀯𑀜𑁆𑀘 𑀓𑀺𑀫𑀦𑁆𑀢𑀭’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁨𑁮) 𑀓𑀸𑀭𑀡𑁂 𑀤𑀺𑀲𑁆𑀲𑀢𑀺, ‘‘𑀅𑀦𑁆𑀢𑀭𑀝𑁆𑀞𑀓𑁂 𑀳𑀺𑀫𑀧𑀸𑀢𑀲𑀫𑀬𑁂’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁩𑁪𑁬) 𑀯𑁂𑀫𑀚𑁆𑀛𑁂, ‘‘𑀅𑀦𑁆𑀢𑀭𑀸 𑀘 𑀚𑁂𑀢𑀯𑀦𑀁 𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺’’𑀦𑁆𑀢𑀺𑀆𑀤𑀻𑀲𑀼 (𑀉𑀤𑀸. 𑁧𑁩, 𑁪𑁪) 𑀯𑀺𑀯𑀭𑁂, ‘‘𑀪𑀬𑀫𑀦𑁆𑀢𑀭𑀢𑁄 𑀚𑀸𑀢’’𑀦𑁆𑀢𑀺𑀆𑀤𑀻𑀲𑀼 (𑀇𑀢𑀺𑀯𑀼. 𑁮𑁮; 𑀫𑀳𑀸𑀦𑀺. 𑁫) 𑀘𑀺𑀢𑁆𑀢𑁂, 𑀇𑀥𑀸𑀧𑀺 𑀘𑀺𑀢𑁆𑀢𑁂 𑀏𑀯 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑁆𑀢𑀭𑀢𑁄 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂’’𑀢𑀺.

𑀇𑀢𑀺𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄𑀢𑀺 𑀬𑀲𑁆𑀫𑀸 𑀪𑀯𑁄𑀢𑀺 𑀲𑀫𑁆𑀧𑀢𑁆𑀢𑀺, 𑀅𑀪𑀯𑁄𑀢𑀺 𑀯𑀺𑀧𑀢𑁆𑀢𑀺. 𑀢𑀣𑀸 𑀪𑀯𑁄𑀢𑀺 𑀯𑀼𑀤𑁆𑀥𑀺, 𑀅𑀪𑀯𑁄𑀢𑀺 𑀳𑀸𑀦𑀺. 𑀪𑀯𑁄𑀢𑀺 𑀯𑀸 𑀲𑀲𑁆𑀲𑀢𑀁, 𑀅𑀪𑀯𑁄𑀢𑀺 𑀉𑀘𑁆𑀙𑁂𑀤𑁄. 𑀪𑀯𑁄𑀢𑀺 𑀯𑀸 𑀧𑀼𑀜𑁆𑀜𑀁, 𑀅𑀪𑀯𑁄𑀢𑀺 𑀧𑀸𑀧𑀁. 𑀪𑀯𑁄𑀢𑀺 𑀯𑀸 𑀲𑀼𑀕𑀢𑀺, 𑀅𑀪𑀯𑁄𑀢𑀺 𑀤𑀼𑀕𑁆𑀕𑀢𑀺. 𑀪𑀯𑁄𑀢𑀺 𑀯𑀸 𑀔𑀼𑀤𑁆𑀤𑀓𑁄, 𑀅𑀪𑀯𑁄𑀢𑀺 𑀫𑀳𑀦𑁆𑀢𑁄. 𑀢𑀲𑁆𑀫𑀸 𑀬𑀸 𑀲𑀸 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀯𑀼𑀟𑁆𑀠𑀺𑀳𑀸𑀦𑀺𑀲𑀲𑁆𑀲𑀢𑀼𑀘𑁆𑀙𑁂𑀤𑀧𑀼𑀜𑁆𑀜𑀧𑀸𑀧𑀲𑀼𑀕𑀢𑀺𑀤𑀼𑀕𑁆𑀕𑀢𑀺- 𑀔𑀼𑀤𑁆𑀤𑀓𑀫𑀳𑀦𑁆𑀢𑀉𑀧𑀧𑀢𑁆𑀢𑀺𑀪𑀯𑀸𑀦𑀁 𑀯𑀲𑁂𑀦 𑀇𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀸 𑀪𑀯𑀸𑀪𑀯𑀢𑀸 𑀯𑀼𑀘𑁆𑀘𑀢𑀺. 𑀘𑀢𑀽𑀳𑀺𑀧𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀬𑀣𑀸𑀲𑀫𑁆𑀪𑀯𑀁 𑀢𑁂𑀦 𑀢𑁂𑀦 𑀦𑀬𑁂𑀦 𑀢𑀁 𑀇𑀢𑀺𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄 𑀅𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺. 𑀅𑀢𑁆𑀣𑀯𑀲𑁂𑀦 𑀯𑀺𑀪𑀢𑁆𑀢𑀺 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀸. 𑀢𑀁 𑀯𑀺𑀕𑀢𑀪𑀬𑀦𑁆𑀢𑀺 𑀢𑀁 𑀏𑀯𑀭𑀽𑀧𑀁 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀔𑀻𑀡𑀸𑀲𑀯𑀁 𑀘𑀺𑀢𑁆𑀢𑀓𑁄𑀧𑀸𑀪𑀸𑀯𑀢𑁄 𑀇𑀢𑀺𑀪𑀯𑀸𑀪𑀯𑀲𑀫𑀢𑀺𑀓𑁆𑀓𑀫𑀢𑁄 𑀘 𑀪𑀬𑀳𑁂𑀢𑀼𑀯𑀺𑀕𑀫𑁂𑀦 𑀯𑀺𑀕𑀢𑀪𑀬𑀁, 𑀯𑀺𑀯𑁂𑀓𑀲𑀼𑀔𑁂𑀦 𑀅𑀕𑁆𑀕𑀨𑀮𑀲𑀼𑀔𑁂𑀦 𑀘 𑀲𑀼𑀔𑀺𑀁, 𑀯𑀺𑀕𑀢𑀪𑀬𑀢𑁆𑀢𑀸 𑀏𑀯 𑀅𑀲𑁄𑀓𑀁. 𑀤𑁂𑀯𑀸 𑀦𑀸𑀦𑀼𑀪𑀯𑀦𑁆𑀢𑀺 𑀤𑀲𑁆𑀲𑀦𑀸𑀬𑀸𑀢𑀺 𑀅𑀥𑀺𑀕𑀢𑀫𑀕𑁆𑀕𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀸𑀬𑀫𑀦𑁆𑀢𑀸𑀧𑀺 𑀘𑀺𑀢𑁆𑀢𑀘𑀸𑀭𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑀦𑀸𑀬 𑀤𑀝𑁆𑀞𑀼𑀁 𑀦𑀸𑀦𑀼𑀪𑀯𑀦𑁆𑀢𑀺 𑀦 𑀅𑀪𑀺𑀲𑀫𑁆𑀪𑀼𑀡𑀦𑁆𑀢𑀺 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀕𑁂𑀯 𑀫𑀦𑀼𑀲𑁆𑀲𑀸. 𑀲𑁂𑀓𑁆𑀔𑀸𑀧𑀺 𑀳𑀺 𑀧𑀼𑀣𑀼𑀚𑁆𑀚𑀦𑀸 𑀯𑀺𑀬 𑀅𑀭𑀳𑀢𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀦 𑀚𑀸𑀦𑀦𑁆𑀢𑀺.

𑀤𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀫𑀼𑀘𑀮𑀺𑀦𑁆𑀤𑀯𑀕𑁆𑀕𑀯𑀡𑁆𑀡𑀦𑀸.