𑁩. 𑀦𑀦𑁆𑀤𑀯𑀕𑁆𑀕𑁄

𑁧. 𑀓𑀫𑁆𑀫𑀯𑀺𑀧𑀸𑀓𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀦𑀦𑁆𑀤𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀽𑀢𑀺 𑀦𑀸𑀫𑀕𑁄𑀢𑁆𑀢𑁂𑀦 𑀅𑀧𑀸𑀓𑀝𑁄 𑀏𑀓𑁄 𑀔𑀻𑀡𑀸𑀲𑀯𑀪𑀺𑀓𑁆𑀔𑀼. 𑀲𑁄 𑀓𑀺𑀭 𑀭𑀸𑀚𑀕𑀳𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀦 𑀲𑀁𑀯𑁂𑀚𑀺𑀢𑁄 𑀲𑀁𑀲𑀸𑀭𑀤𑁄𑀲𑀁 𑀤𑀺𑀲𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀻𑀮𑀸𑀦𑀺 𑀲𑁄𑀥𑁂𑀢𑁆𑀯𑀸 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀅𑀧𑀭𑀪𑀸𑀕𑁂 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀲𑁄 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀅𑀥𑀺𑀯𑀸𑀲𑁂𑀦𑁆𑀢𑁄 𑀯𑀺𑀳𑀭𑀢𑀺. 𑀔𑀻𑀡𑀸𑀲𑀯𑀸𑀦𑀜𑁆𑀳𑀺 𑀘𑁂𑀢𑀲𑀺𑀓𑀤𑀼𑀓𑁆𑀔𑀁 𑀦𑀸𑀫 𑀦𑀢𑁆𑀣𑀺, 𑀓𑀸𑀬𑀺𑀓𑀤𑀼𑀓𑁆𑀔𑀁 𑀧𑀦 𑀳𑁄𑀢𑀺𑀬𑁂𑀯. 𑀲𑁄 𑀏𑀓𑀤𑀺𑀯𑀲𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀦𑀸𑀢𑀺𑀤𑀽𑀭𑁂 𑀞𑀸𑀦𑁂 𑀤𑀼𑀓𑁆𑀔𑀁 𑀅𑀥𑀺𑀯𑀸𑀲𑁂𑀦𑁆𑀢𑁄 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻’’𑀢𑀺𑀆𑀤𑀺.

𑀢𑀢𑁆𑀣 𑀧𑀮𑁆𑀮𑀗𑁆𑀓𑀦𑁆𑀢𑀺 𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦𑀁. 𑀆𑀪𑀼𑀚𑀺𑀢𑁆𑀯𑀸𑀢𑀺 𑀩𑀦𑁆𑀥𑀺𑀢𑁆𑀯𑀸. 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸𑀢𑀺 𑀉𑀧𑀭𑀺𑀫𑀁 𑀲𑀭𑀻𑀭𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸 𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑁂𑀢𑁆𑀯𑀸. 𑀏𑀯𑀜𑁆𑀳𑀺 𑀦𑀺𑀲𑀺𑀦𑁆𑀦𑀲𑁆𑀲 𑀘𑀫𑁆𑀫𑀫𑀁𑀲𑀦𑁆𑀳𑀸𑀭𑀽𑀦𑀺 𑀦 𑀦𑀫𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀢𑀣𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀧𑀼𑀭𑀸𑀡𑀓𑀫𑁆𑀫𑀯𑀺𑀧𑀸𑀓𑀚𑀦𑁆𑀢𑀺 𑀧𑀼𑀩𑁆𑀩𑁂 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀪𑀸𑀯𑁂𑀦 𑀚𑀸𑀢𑀁, 𑀧𑀼𑀭𑀸𑀡𑀓𑀫𑁆𑀫𑀯𑀺𑀧𑀸𑀓𑁂 𑀯𑀸 𑀲𑀼𑀔𑀤𑀼𑀓𑁆𑀔𑀧𑁆𑀧𑀓𑀸𑀭𑁂 𑀯𑀺𑀧𑀸𑀓𑀯𑀝𑁆𑀝𑀲𑀫𑀼𑀤𑀸𑀬𑁂 𑀢𑀤𑁂𑀓𑀤𑁂𑀲𑀪𑀸𑀯𑁂𑀦 𑀚𑀸𑀢𑀁. 𑀓𑀺𑀁 𑀢𑀁? 𑀤𑀼𑀓𑁆𑀔𑀁. 𑀧𑀼𑀭𑀸𑀡𑀓𑀫𑁆𑀫𑀯𑀺𑀧𑀸𑀓𑀚𑀦𑁆𑀢𑀺 𑀘 𑀇𑀫𑀺𑀦𑀸 𑀢𑀲𑁆𑀲 𑀆𑀩𑀸𑀥𑀲𑁆𑀲 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀢𑀁 𑀤𑀲𑁆𑀲𑁂𑀦𑁆𑀢𑁄 𑀑𑀧𑀓𑁆𑀓𑀫𑀺𑀓𑀉𑀢𑀼𑀯𑀺𑀧𑀭𑀺𑀡𑀸𑀫𑀚𑀸𑀤𑀺𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀓𑁆𑀔𑀦𑁆𑀢𑀺 𑀧𑀘𑀼𑀭𑀚𑀦𑁂𑀳𑀺 𑀔𑀫𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁. 𑀢𑀺𑀩𑁆𑀩𑀦𑁆𑀢𑀺 𑀢𑀺𑀔𑀺𑀡𑀁, 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀩𑀳𑀮𑀁 𑀯𑀸. 𑀔𑀭𑀦𑁆𑀢𑀺 𑀓𑀓𑁆𑀔𑀴𑀁. 𑀓𑀝𑀼𑀓𑀦𑁆𑀢𑀺 𑀅𑀲𑀸𑀢𑀁. 𑀅𑀥𑀺𑀯𑀸𑀲𑁂𑀦𑁆𑀢𑁄𑀢𑀺 𑀉𑀧𑀭𑀺 𑀯𑀸𑀲𑁂𑀦𑁆𑀢𑁄 𑀲𑀳𑀦𑁆𑀢𑁄 𑀔𑀫𑀦𑁆𑀢𑁄.

𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀯𑁂𑀤𑀦𑀸𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀁 𑀯𑀲𑁂𑀦 𑀲𑀢𑀺𑀫𑀸 𑀲𑀫𑁆𑀧𑀚𑀸𑀦𑀦𑁆𑀢𑁄 𑀘. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀅𑀬𑀁 𑀯𑁂𑀤𑀦𑀸 𑀦𑀸𑀫 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸, 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸, 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀏𑀓𑀦𑁆𑀢𑁂𑀦 𑀪𑀺𑀚𑁆𑀚𑀦𑀲𑀪𑀸𑀯𑀢𑁆𑀢𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸’’𑀢𑀺 𑀯𑁂𑀤𑀦𑀸𑀬 𑀅𑀦𑀺𑀘𑁆𑀘𑀢𑀸𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀲𑀢𑁄𑀓𑀸𑀭𑀺𑀢𑀸𑀬 𑀲𑀢𑁄, 𑀅𑀯𑀺𑀧𑀭𑀻𑀢𑀲𑀪𑀸𑀯𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦 𑀲𑀫𑁆𑀧𑀚𑀸𑀦𑁄 𑀘 𑀳𑀼𑀢𑁆𑀯𑀸. 𑀅𑀣 𑀯𑀸 𑀲𑀢𑀺𑀯𑁂𑀧𑀼𑀮𑁆𑀮𑀧𑀢𑁆𑀢𑀺𑀬𑀸 𑀲𑀩𑁆𑀩𑀢𑁆𑀣𑁂𑀯 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀲𑀢𑀺𑀢𑀸𑀬 𑀲𑀢𑁄, 𑀢𑀣𑀸 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀧𑀭𑀺𑀕𑁆𑀕𑀳𑀺𑀢𑀲𑀗𑁆𑀔𑀸𑀭𑀢𑀸𑀬 𑀲𑀫𑁆𑀧𑀚𑀸𑀦𑁄. 𑀅𑀯𑀺𑀳𑀜𑁆𑀜𑀫𑀸𑀦𑁄𑀢𑀺 ‘‘𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀯𑀺𑀬 𑀦 𑀯𑀺𑀳𑀜𑁆𑀜𑀫𑀸𑀦𑁄 𑀫𑀕𑁆𑀕𑁂𑀦𑁂𑀯 𑀲𑀫𑀼𑀕𑁆𑀖𑀸𑀢𑀺𑀢𑀢𑁆𑀢𑀸 𑀘𑁂𑀢𑁄𑀤𑀼𑀓𑁆𑀔𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀓𑁂𑀯𑀮𑀁 𑀓𑀫𑁆𑀫𑀯𑀺𑀧𑀸𑀓𑀚𑀁 𑀲𑀭𑀻𑀭𑀤𑀼𑀓𑁆𑀔𑀁 𑀅𑀥𑀺𑀯𑀸𑀲𑁂𑀦𑁆𑀢𑁄 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑁄 𑀯𑀺𑀬 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀤𑁆𑀤𑀲𑀸𑀢𑀺 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀢𑀣𑀸 𑀦𑀺𑀲𑀺𑀦𑁆𑀦𑀁 𑀅𑀤𑁆𑀤𑀓𑁆𑀔𑀺.

𑀏𑀢𑀫𑀢𑁆𑀣𑀦𑁆𑀢𑀺 𑀏𑀢𑀁 𑀢𑀸𑀤𑀺𑀲𑀲𑁆𑀲𑀧𑀺 𑀭𑁄𑀕𑀲𑁆𑀲 𑀯𑁂𑀚𑁆𑀚𑀸𑀤𑀻𑀳𑀺 𑀢𑀺𑀓𑀺𑀘𑁆𑀙𑀦𑀢𑁆𑀣𑀁 𑀅𑀦𑀼𑀲𑁆𑀲𑀼𑀓𑁆𑀓𑀸𑀧𑀚𑁆𑀚𑀦𑀓𑀸𑀭𑀡𑀁 𑀔𑀻𑀡𑀸𑀲𑀯𑀸𑀦𑀁 𑀮𑁄𑀓𑀥𑀫𑁆𑀫𑁂𑀳𑀺 𑀅𑀦𑀼𑀧𑀮𑁂𑀧𑀺𑀢𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀬𑁂𑀳𑀺 𑀓𑁂𑀳𑀺𑀘𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺 𑀅𑀯𑀺𑀖𑀸𑀢𑀧𑀢𑁆𑀢𑀺𑀯𑀺𑀪𑀸𑀯𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀩𑁆𑀩𑀓𑀫𑁆𑀫𑀚𑀳𑀲𑁆𑀲𑀸𑀢𑀺 𑀧𑀳𑀻𑀦𑀲𑀩𑁆𑀩𑀓𑀫𑁆𑀫𑀲𑁆𑀲. 𑀅𑀕𑁆𑀕𑀫𑀕𑁆𑀕𑀲𑁆𑀲 𑀳𑀺 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀭𑀳𑀢𑁄 𑀲𑀩𑁆𑀩𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀺 𑀧𑀳𑀻𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀁 𑀤𑀸𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀢𑁄, 𑀬𑀢𑁄 𑀅𑀭𑀺𑀬𑀫𑀕𑁆𑀕𑀜𑀸𑀡𑀁 𑀓𑀫𑁆𑀫𑀓𑁆𑀔𑀬𑀓𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀪𑀺𑀓𑁆𑀔𑀼𑀦𑁄𑀢𑀺 𑀪𑀺𑀦𑁆𑀦𑀓𑀺𑀮𑁂𑀲𑀢𑀸𑀬 𑀪𑀺𑀓𑁆𑀔𑀼𑀦𑁄. 𑀥𑀼𑀦𑀫𑀸𑀦𑀲𑁆𑀲 𑀧𑀼𑀭𑁂 𑀓𑀢𑀁 𑀭𑀚𑀦𑁆𑀢𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀓𑀢𑀁 𑀭𑀸𑀕𑀭𑀚𑀸𑀤𑀺𑀫𑀺𑀲𑁆𑀲𑀢𑀸𑀬 𑀭𑀚𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀯𑀺𑀧𑀸𑀓𑀧𑀝𑀺𑀲𑀁𑀯𑁂𑀤𑀦𑁂𑀦 𑀢𑀁 𑀥𑀼𑀦𑀦𑁆𑀢𑀲𑁆𑀲 𑀯𑀺𑀤𑁆𑀥𑀁𑀲𑁂𑀦𑁆𑀢𑀲𑁆𑀲, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀧𑀭𑀢𑁄 𑀧𑀦 𑀲𑀸𑀯𑀚𑁆𑀚𑀓𑀺𑀭𑀺𑀬𑀸𑀬 𑀲𑀫𑁆𑀪𑀯𑁄𑀬𑁂𑀯 𑀦𑀢𑁆𑀣𑀺, 𑀅𑀦𑀯𑀚𑁆𑀚𑀓𑀺𑀭𑀺𑀬𑀸 𑀘 𑀪𑀯𑀫𑀽𑀮𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑀫𑀼𑀘𑁆𑀙𑀺𑀦𑁆𑀦𑀫𑀽𑀮𑀢𑀸𑀬 𑀧𑀼𑀧𑁆𑀨𑀁 𑀯𑀺𑀬 𑀨𑀮𑀤𑀸𑀦𑀲𑀫𑀢𑁆𑀣𑀢𑀸𑀬 𑀅𑀪𑀸𑀯𑀢𑁄 𑀓𑀺𑀭𑀺𑀬𑀫𑀢𑁆𑀢𑀸𑀯 𑀳𑁄𑀢𑀺.

𑀅𑀫𑀫𑀲𑁆𑀲𑀸𑀢𑀺 𑀭𑀽𑀧𑀸𑀤𑀻𑀲𑀼 𑀓𑀢𑁆𑀣𑀘𑀺 𑀫𑀫𑀦𑁆𑀢𑀺 𑀕𑀳𑀡𑀸𑀪𑀸𑀯𑀢𑁄 𑀅𑀫𑀫𑀲𑁆𑀲 𑀫𑀫𑀗𑁆𑀓𑀸𑀭𑀭𑀳𑀺𑀢𑀲𑁆𑀲. 𑀬𑀲𑁆𑀲 𑀳𑀺 𑀫𑀫𑀗𑁆𑀓𑀸𑀭𑁄 𑀅𑀢𑁆𑀣𑀺, 𑀲𑁄 𑀅𑀢𑁆𑀢𑀲𑀺𑀦𑁂𑀳𑁂𑀦 𑀯𑁂𑀚𑁆𑀚𑀸𑀤𑀻𑀳𑀺 𑀲𑀭𑀻𑀭𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑀺. 𑀅𑀭𑀳𑀸 𑀧𑀦 𑀅𑀫𑀫𑁄, 𑀢𑀲𑁆𑀫𑀸 𑀲𑁄 𑀲𑀭𑀻𑀭𑀚𑀕𑁆𑀕𑀦𑁂𑀧𑀺 𑀉𑀤𑀸𑀲𑀻𑀦𑀥𑀸𑀢𑀼𑀓𑁄𑀯. 𑀞𑀺𑀢𑀲𑁆𑀲𑀸𑀢𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀑𑀖𑀁 𑀢𑀭𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀣𑀮𑁂 𑀞𑀺𑀢𑀲𑁆𑀲, 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀯𑀸 𑀲𑀦𑁆𑀥𑀸𑀯𑀦𑀲𑁆𑀲 𑀅𑀪𑀸𑀯𑁂𑀦 𑀞𑀺𑀢𑀲𑁆𑀲. 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸 𑀳𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀁𑀲𑀸𑀭𑁂 𑀥𑀸𑀯𑀦𑁆𑀢𑀺 𑀦𑀸𑀫, 𑀅𑀭𑀳𑀸 𑀧𑀦 𑀢𑀤𑀪𑀸𑀯𑀢𑁄 𑀞𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀤𑀲𑀯𑀺𑀥𑁂 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂 𑀅𑀭𑀺𑀬𑀥𑀫𑁆𑀫𑁂 𑀞𑀺𑀢𑀲𑁆𑀲. 𑀢𑀸𑀤𑀺𑀦𑁄𑀢𑀺 ‘‘𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁩.𑁧𑁭) 𑀦𑀬𑁂𑀦 𑀯𑀼𑀢𑁆𑀢𑀸𑀬 𑀧𑀜𑁆𑀘𑀯𑀺𑀥𑀸𑀬 𑀅𑀭𑀺𑀬𑀺𑀤𑁆𑀥𑀺𑀬𑀸 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀦𑀺𑀬𑀸𑀬 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀘 𑀲𑀫𑀦𑁆𑀦𑀸𑀕𑀢𑁂𑀦 𑀇𑀝𑁆𑀞𑀸𑀤𑀻𑀲𑀼 𑀏𑀓𑀲𑀤𑀺𑀲𑀢𑀸𑀲𑀗𑁆𑀔𑀸𑀢𑁂𑀦 𑀢𑀸𑀤𑀻𑀪𑀸𑀯𑁂𑀦 𑀢𑀸𑀤𑀺𑀦𑁄. 𑀅𑀢𑁆𑀣𑁄 𑀦𑀢𑁆𑀣𑀺 𑀚𑀦𑀁 𑀮𑀧𑁂𑀢𑀯𑁂𑀢𑀺 ‘‘𑀫𑀫 𑀪𑁂𑀲𑀚𑁆𑀚𑀸𑀤𑀻𑀦𑀺 𑀓𑀭𑁄𑀣𑀸’’𑀢𑀺 𑀚𑀦𑀁 𑀮𑀧𑀺𑀢𑀼𑀁 𑀓𑀣𑁂𑀢𑀼𑀁 𑀧𑀬𑁄𑀚𑀦𑀁 𑀦𑀢𑁆𑀣𑀺 𑀲𑀭𑀻𑀭𑁂 𑀦𑀺𑀭𑀧𑁂𑀓𑁆𑀔𑀪𑀸𑀯𑀢𑁄. 𑀧𑀡𑁆𑀟𑀼𑀧𑀮𑀸𑀲𑁄 𑀯𑀺𑀬 𑀳𑀺 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑁄 𑀲𑀬𑀫𑁂𑀯𑀸𑀬𑀁 𑀓𑀸𑀬𑁄 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀢𑀽𑀢𑀺 𑀔𑀻𑀡𑀸𑀲𑀯𑀸𑀦𑀁 𑀅𑀚𑁆𑀛𑀸𑀲𑀬𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦𑀸𑀪𑀺𑀓𑀗𑁆𑀔𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀓𑀗𑁆𑀔𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀦𑀺𑀩𑁆𑀩𑀺𑀲𑀁 𑀪𑀢𑀓𑁄 𑀬𑀣𑀸’’𑀢𑀺. (𑀣𑁂𑀭𑀕𑀸. 𑁬𑁦𑁬);

𑀅𑀣 𑀯𑀸 𑀬𑀁𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀺𑀁 𑀅𑀬𑁆𑀬𑀲𑁆𑀲 𑀇𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀚𑀦𑀁 𑀮𑀧𑁂𑀢𑀯𑁂 𑀧𑀘𑁆𑀘𑀬𑁂𑀳𑀺 𑀦𑀺𑀫𑀦𑁆𑀢𑀦𑀯𑀲𑁂𑀦 𑀮𑀧𑀸𑀧𑁂𑀢𑀼𑀁 𑀔𑀻𑀡𑀸𑀲𑀯𑀲𑁆𑀲 𑀅𑀢𑁆𑀣𑁄 𑀦𑀢𑁆𑀣𑀺 𑀢𑀸𑀤𑀺𑀲𑀲𑁆𑀲 𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀫𑀕𑁆𑀕𑁂𑀦𑁂𑀯 𑀲𑀫𑀼𑀕𑁆𑀖𑀸𑀢𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀇𑀢𑀺 𑀪𑀕𑀯𑀸 ‘‘𑀓𑀺𑀲𑁆𑀲𑀸𑀬𑀁 𑀣𑁂𑀭𑁄 𑀅𑀢𑁆𑀢𑀦𑁄 𑀭𑁄𑀕𑀁 𑀯𑁂𑀚𑁆𑀚𑁂𑀳𑀺 𑀅𑀢𑀺𑀓𑀺𑀘𑁆𑀙𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀢𑀲𑁆𑀲 𑀅𑀢𑀺𑀓𑀺𑀘𑁆𑀙𑀸𑀧𑀦𑁂 𑀓𑀸𑀭𑀡𑀁 𑀧𑀓𑀸𑀲𑁂𑀲𑀺.

𑀧𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀤𑀼𑀢𑀺𑀬𑁂 𑀦𑀦𑁆𑀤𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀲𑁄 𑀳𑀺 𑀘𑀓𑁆𑀓𑀯𑀢𑁆𑀢𑀺𑀮𑀓𑁆𑀔𑀡𑀽𑀧𑁂𑀢𑀢𑁆𑀢𑀸 𑀫𑀸𑀢𑀸𑀧𑀺𑀢𑀭𑁄 𑀲𑀧𑀭𑀺𑀚𑀦𑀁 𑀲𑀓𑀮𑀜𑁆𑀘 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀦𑀦𑁆𑀤𑀬𑀦𑁆𑀢𑁄 𑀚𑀸𑀢𑁄𑀢𑀺 ‘‘𑀦𑀦𑁆𑀤𑁄’’𑀢𑀺 𑀦𑀸𑀫𑀁 𑀮𑀪𑀺. 𑀪𑀕𑀯𑀢𑁄 𑀪𑀸𑀢𑀸𑀢𑀺 𑀪𑀕𑀯𑀢𑁄 𑀏𑀓𑀧𑀺𑀢𑀼𑀧𑀼𑀢𑁆𑀢𑀢𑀸𑀬 𑀪𑀸𑀢𑀸. 𑀦 𑀳𑀺 𑀪𑀕𑀯𑀢𑁄 𑀲𑀳𑁄𑀤𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀸𑀢𑀼𑀘𑁆𑀙𑀸𑀧𑀼𑀢𑁆𑀢𑁄’’𑀢𑀺, 𑀘𑀽𑀴𑀫𑀸𑀢𑀼𑀧𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀳𑀺 𑀲𑁄 𑀧𑀼𑀢𑁆𑀢𑁄. 𑀅𑀦𑀪𑀺𑀭𑀢𑁄𑀢𑀺 𑀦 𑀅𑀪𑀺𑀭𑀢𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀘𑀭𑀺𑀬𑀁 𑀏𑀓𑀸𑀲𑀦𑀁 𑀏𑀓𑀲𑁂𑀬𑁆𑀬𑀁 𑀫𑁂𑀣𑀼𑀦𑀯𑀺𑀭𑀢𑀺𑀁. 𑀲𑀦𑁆𑀥𑀸𑀭𑁂𑀢𑀼𑀦𑁆𑀢𑀺 𑀧𑀞𑀫𑀘𑀺𑀢𑁆𑀢𑀢𑁄 𑀬𑀸𑀯𑀘𑀭𑀺𑀫𑀓𑀘𑀺𑀢𑁆𑀢𑀁 𑀲𑀫𑁆𑀫𑀸 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀥𑀸𑀭𑁂𑀢𑀼𑀁 𑀧𑀯𑀢𑁆𑀢𑁂𑀢𑀼𑀁. 𑀤𑀼𑀢𑀺𑀬𑁂𑀦 𑀘𑁂𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀧𑀤𑁂𑀦 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬𑀸𑀢𑀺 𑀉𑀧𑀲𑀫𑁆𑀧𑀤𑀓𑀸𑀮𑁂 𑀪𑀺𑀓𑁆𑀔𑀼𑀪𑀸𑀯𑁂𑀦 𑀲𑀤𑁆𑀥𑀺𑀁 𑀲𑀫𑀸𑀤𑀺𑀦𑁆𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀝𑁆𑀞𑀺𑀢𑀁 𑀢𑀺𑀯𑀺𑀥𑀫𑁆𑀧𑀺 𑀲𑀺𑀓𑁆𑀔𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸, 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀳𑀻𑀦𑀸𑀬𑀸𑀢𑀺 𑀕𑀺𑀳𑀺𑀪𑀸𑀯𑀸𑀬. 𑀆𑀯𑀢𑁆𑀢𑀺𑀲𑁆𑀲𑀸𑀫𑀻𑀢𑀺 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀺.

𑀓𑀲𑁆𑀫𑀸 𑀧𑀦𑀸𑀬𑀁 𑀏𑀯𑀫𑀸𑀭𑁄𑀘𑁂𑀲𑀻𑀢𑀺? 𑀏𑀢𑁆𑀣𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀪𑀕𑀯𑀸 𑀧𑀯𑀢𑁆𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 ‘‘𑀧𑀼𑀢𑁆𑀢𑀁 𑀫𑁂 𑀆𑀦𑁂𑀢𑁆𑀯𑀸 𑀤𑀲𑁆𑀲𑁂𑀣𑀸’’𑀢𑀺 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑁂𑀦 𑀧𑁂𑀲𑀺𑀢𑁂𑀲𑀼 𑀲𑀳𑀲𑁆𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁂𑀲𑀼 𑀤𑀲𑀲𑀼 𑀤𑀽𑀢𑁂𑀲𑀼 𑀲𑀳 𑀧𑀭𑀺𑀯𑀸𑀭𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂𑀲𑀼 𑀲𑀩𑁆𑀩𑀧𑀘𑁆𑀙𑀸 𑀕𑀦𑁆𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂𑀦 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁂𑀦 𑀕𑀫𑀦𑀓𑀸𑀮𑀁 𑀜𑀢𑁆𑀯𑀸 𑀫𑀕𑁆𑀕𑀯𑀡𑁆𑀡𑀦𑀁 𑀯𑀡𑁆𑀡𑁂𑀢𑁆𑀯𑀸 𑀚𑀸𑀢𑀺𑀪𑀽𑀫𑀺𑀕𑀫𑀦𑀸𑀬 𑀬𑀸𑀘𑀺𑀢𑁄 𑀯𑀻𑀲𑀢𑀺𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁆𑀢𑁄 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀁 𑀕𑀦𑁆𑀢𑁆𑀯𑀸 𑀜𑀸𑀢𑀺𑀲𑀫𑀸𑀕𑀫𑁂 𑀧𑁄𑀓𑁆𑀔𑀭𑀯𑀲𑁆𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 (𑀚𑀸. 𑁨.𑁨𑁨.𑁧𑁬𑁫𑁫 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 ‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺 (𑀥. 𑀧. 𑁧𑁬𑁮) 𑀕𑀸𑀣𑀸𑀬 𑀧𑀺𑀢𑀭𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 ‘‘𑀥𑀫𑁆𑀫𑀜𑁆𑀘𑀭𑁂’’𑀢𑀺 (𑀥. 𑀧. 𑁧𑁬𑁯) 𑀕𑀸𑀣𑀸𑀬 𑀫𑀳𑀸𑀧𑀚𑀸𑀧𑀢𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂, 𑀭𑀸𑀚𑀸𑀦𑀁 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀧𑀦 𑀭𑀸𑀳𑀼𑀮𑀫𑀸𑀢𑀼𑀕𑀼𑀡𑀓𑀣𑀁 𑀦𑀺𑀲𑁆𑀲𑀸𑀬 𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀁 (𑀚𑀸. 𑁧.𑁧𑁪.𑁧𑁮 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑁂 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀕𑁂𑀳𑀧𑁆𑀧𑀯𑁂𑀲𑀦𑀯𑀺𑀯𑀸𑀳𑀫𑀗𑁆𑀕𑀮𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀁 𑀤𑀢𑁆𑀯𑀸 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀦𑁆𑀢𑁄 𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀦 𑀕𑀡𑁆𑀳𑀺. 𑀲𑁄𑀧𑀺 𑀢𑀣𑀸𑀕𑀢𑁂 𑀕𑀸𑀭𑀯𑁂𑀦 ‘‘𑀧𑀢𑁆𑀢𑀁 𑀢𑁂, 𑀪𑀦𑁆𑀢𑁂, 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀲𑀺, ‘‘𑀲𑁄𑀧𑀸𑀦𑀲𑀻𑀲𑁂 𑀧𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺, 𑀲𑀢𑁆𑀣𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀦 𑀕𑀡𑁆𑀳𑀺. 𑀇𑀢𑀭𑁄 ‘‘𑀲𑁄𑀧𑀸𑀦𑀫𑀽𑀮𑁂 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺, 𑀲𑀢𑁆𑀣𑀸 𑀢𑀢𑁆𑀣𑀧𑀺 𑀦 𑀕𑀡𑁆𑀳𑀺. 𑀇𑀢𑀭𑁄 ‘‘𑀭𑀸𑀚𑀗𑁆𑀕𑀡𑁂 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺, 𑀲𑀢𑁆𑀣𑀸 𑀢𑀢𑁆𑀣𑀧𑀺 𑀦 𑀕𑀡𑁆𑀳𑀺. 𑀓𑀼𑀫𑀸𑀭𑁄 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄 𑀅𑀦𑀺𑀘𑁆𑀙𑀸𑀬 𑀕𑀘𑁆𑀙𑀦𑁆𑀢𑁄 𑀕𑀸𑀭𑀯𑁂𑀦 ‘‘𑀧𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺, ‘‘𑀇𑀥 𑀕𑀡𑁆𑀳𑀺𑀲𑁆𑀲𑀢𑀺, 𑀏𑀢𑁆𑀣 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀕𑀘𑁆𑀙𑀢𑀺.

𑀢𑀲𑁆𑀫𑀺𑀁 𑀔𑀡𑁂 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀆𑀘𑀺𑀓𑁆𑀔𑀺𑀁𑀲𑀼, ‘‘𑀅𑀬𑁆𑀬𑁂 𑀪𑀕𑀯𑀸, 𑀦𑀦𑁆𑀤𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀼𑀫𑁆𑀳𑁂𑀳𑀺 𑀯𑀺𑀦𑀸 𑀓𑀭𑀺𑀲𑁆𑀲𑀢𑀻’’𑀢𑀺. 𑀲𑀸 𑀉𑀤𑀓𑀩𑀺𑀦𑁆𑀤𑀽𑀳𑀺 𑀧𑀕𑁆𑀖𑀭𑀦𑁆𑀢𑁂𑀳𑀺 𑀅𑀟𑁆𑀠𑀼𑀮𑁆𑀮𑀺𑀔𑀺𑀢𑁂𑀳𑀺 𑀓𑁂𑀲𑁂𑀳𑀺 𑀯𑁂𑀕𑁂𑀦 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀲𑀻𑀳𑀧𑀜𑁆𑀚𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀢𑀼𑀯𑀝𑀁 𑀔𑁄, 𑀅𑀬𑁆𑀬𑀧𑀼𑀢𑁆𑀢, 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀢𑀁 𑀢𑀲𑁆𑀲𑀸 𑀯𑀘𑀦𑀁 𑀢𑀲𑁆𑀲 𑀳𑀤𑀬𑁂 𑀢𑀺𑀭𑀺𑀬𑀁 𑀧𑀢𑀺𑀢𑁆𑀯𑀸 𑀯𑀺𑀬 𑀞𑀺𑀢𑀁. 𑀲𑀢𑁆𑀣𑀸𑀧𑀺𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸𑀯 𑀢𑀁 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 ‘‘𑀧𑀩𑁆𑀩𑀚𑀺𑀲𑁆𑀲𑀲𑀺 𑀦𑀦𑁆𑀤𑀸’’𑀢𑀺 𑀆𑀳. 𑀲𑁄 𑀩𑀼𑀤𑁆𑀥𑀕𑀸𑀭𑀯𑁂𑀦 ‘‘𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀢𑁆𑀯𑀸, ‘‘𑀆𑀫, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀢𑁆𑀣𑀸 𑀢𑁂𑀦 𑀳𑀺 𑀦𑀦𑁆𑀤𑀁 𑀧𑀩𑁆𑀩𑀸𑀚𑁂𑀣𑀸𑀢𑀺 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀁 𑀕𑀦𑁆𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑁂 𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀸𑀢𑀭𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑁂𑀲𑀺𑀢𑀁 ‘‘𑀤𑀸𑀬𑀚𑁆𑀚𑀁 𑀫𑁂, 𑀲𑀫𑀡, 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀆𑀭𑀸𑀫𑀸𑀕𑀢𑀁 𑀭𑀸𑀳𑀼𑀮𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀲𑀺. 𑀧𑀼𑀦𑁂𑀓𑀤𑀺𑀯𑀲𑀁 𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑀁 (𑀚𑀸. 𑁧.𑁧𑁦.𑁯𑁨 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀭𑀸𑀚𑀸𑀦𑀁 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀇𑀢𑀺 𑀪𑀕𑀯𑀸 𑀫𑀳𑀸𑀧𑀚𑀸𑀧𑀢𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂, 𑀧𑀺𑀢𑀭𑀁 𑀢𑀻𑀲𑀼 𑀨𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀲𑀸𑀯𑀢𑁆𑀣𑀺𑀁 𑀆𑀕𑀫𑀦𑀢𑁆𑀣𑀸𑀬 𑀕𑀳𑀺𑀢𑀧𑀝𑀺𑀜𑁆𑀜𑁄 𑀦𑀺𑀝𑁆𑀞𑀺𑀢𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀏𑀯𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀆𑀬𑀲𑁆𑀫𑀸 𑀦𑀦𑁆𑀤𑁄 𑀅𑀢𑁆𑀢𑀦𑁄 𑀅𑀦𑀺𑀘𑁆𑀙𑀸𑀬 𑀧𑀩𑁆𑀩𑀚𑀺𑀢𑁄 𑀓𑀸𑀫𑁂𑀲𑀼 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀯𑀼𑀢𑁆𑀢𑀯𑀘𑀦𑀫𑀦𑀼𑀲𑁆𑀲𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀢𑁆𑀢𑀦𑁄 𑀅𑀦𑀪𑀺𑀭𑀢𑀺𑀁 𑀆𑀭𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀦𑀦𑁆𑀤𑁄…𑀧𑁂… 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺.

𑀓𑀲𑁆𑀫𑀸 𑀧𑀦 𑀦𑀁 𑀪𑀕𑀯𑀸 𑀏𑀯𑀁 𑀧𑀩𑁆𑀩𑀸𑀚𑁂𑀲𑀻𑀢𑀺? ‘‘𑀧𑀼𑀭𑁂𑀢𑀭𑀫𑁂𑀯 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀓𑀸𑀫𑁂𑀳𑀺 𑀦𑀁 𑀯𑀺𑀯𑁂𑀘𑁂𑀢𑀼𑀁 𑀦 𑀲𑀓𑁆𑀓𑀸, 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀦 𑀉𑀧𑀸𑀬𑁂𑀦 𑀢𑀢𑁄 𑀯𑀺𑀯𑁂𑀘𑁂𑀢𑁆𑀯𑀸 𑀉𑀧𑀭𑀺𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀯𑁂𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁄 𑀲𑀢𑁆𑀣𑀸 𑀏𑀯𑀁 𑀦𑀁 𑀧𑀞𑀫𑀁 𑀧𑀩𑁆𑀩𑀸𑀚𑁂𑀲𑀺.

𑀲𑀸𑀓𑀺𑀬𑀸𑀦𑀻𑀢𑀺 𑀲𑀓𑁆𑀬𑀭𑀸𑀚𑀥𑀻𑀢𑀸. 𑀚𑀦𑀧𑀤𑀓𑀮𑁆𑀬𑀸𑀡𑀻𑀢𑀺 𑀚𑀦𑀧𑀤𑀫𑁆𑀳𑀺 𑀓𑀮𑁆𑀬𑀸𑀡𑀻 𑀭𑀽𑀧𑁂𑀦 𑀉𑀢𑁆𑀢𑀫𑀸 𑀙𑀲𑀭𑀻𑀭𑀤𑁄𑀲𑀭𑀳𑀺𑀢𑀸, 𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀸. 𑀲𑀸 𑀳𑀺 𑀬𑀲𑁆𑀫𑀸 𑀦𑀸𑀢𑀺𑀤𑀻𑀖𑀸 𑀦𑀸𑀢𑀺𑀭𑀲𑁆𑀲𑀸 𑀦𑀸𑀢𑀺𑀓𑀺𑀲𑀸 𑀦𑀸𑀢𑀺𑀣𑀽𑀮𑀸 𑀦𑀸𑀢𑀺𑀓𑀸𑀴𑀺𑀓𑀸 𑀦𑀘𑁆𑀘𑁄𑀤𑀸𑀢𑀸 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀓𑀯𑀡𑁆𑀡𑀁 𑀅𑀧𑁆𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡𑀁, 𑀢𑀲𑁆𑀫𑀸 𑀙𑀲𑀭𑀻𑀭𑀤𑁄𑀲𑀭𑀳𑀺𑀢𑀸. 𑀙𑀯𑀺𑀓𑀮𑁆𑀬𑀸𑀡𑀁 𑀫𑀁𑀲𑀓𑀮𑁆𑀬𑀸𑀡𑀁 𑀦𑀔𑀓𑀮𑁆𑀬𑀸𑀡𑀁 𑀅𑀝𑁆𑀞𑀺𑀓𑀮𑁆𑀬𑀸𑀡𑀁 𑀯𑀬𑀓𑀮𑁆𑀬𑀸𑀡𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀓𑀮𑁆𑀬𑀸𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸.

𑀢𑀢𑁆𑀣 𑀅𑀢𑁆𑀢𑀦𑁄 𑀲𑀭𑀻𑀭𑁄𑀪𑀸𑀲𑁂𑀦 𑀤𑀲𑀤𑁆𑀯𑀸𑀤𑀲𑀳𑀢𑁆𑀣𑁂 𑀞𑀸𑀦𑁂 𑀆𑀮𑁄𑀓𑀁 𑀓𑀭𑁄𑀢𑀺, 𑀧𑀺𑀬𑀗𑁆𑀕𑀼𑀲𑀫𑀸 𑀯𑀸 𑀲𑀼𑀯𑀡𑁆𑀡𑀲𑀫𑀸 𑀯𑀸 𑀳𑁄𑀢𑀺, 𑀅𑀬𑀫𑀲𑁆𑀲𑀸 𑀙𑀯𑀺𑀓𑀮𑁆𑀬𑀸𑀡𑀢𑀸. 𑀘𑀢𑁆𑀢𑀸𑀭𑁄 𑀧𑀦𑀲𑁆𑀲𑀸 𑀳𑀢𑁆𑀣𑀧𑀸𑀤𑀸 𑀫𑀼𑀔𑀧𑀭𑀺𑀬𑁄𑀲𑀸𑀦𑀜𑁆𑀘 𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀓𑀢𑀁 𑀯𑀺𑀬 𑀭𑀢𑁆𑀢𑀧𑀯𑀸𑀴𑀭𑀢𑁆𑀢𑀓𑀫𑁆𑀩𑀮𑁂𑀦 𑀲𑀤𑀺𑀲𑀁 𑀳𑁄𑀢𑀺, 𑀅𑀬𑀫𑀲𑁆𑀲𑀸 𑀫𑀁𑀲𑀓𑀮𑁆𑀬𑀸𑀡𑀢𑀸. 𑀯𑀻𑀲𑀢𑀺 𑀦𑀔𑀧𑀢𑁆𑀢𑀸𑀦𑀺 𑀫𑀁𑀲𑀢𑁄 𑀅𑀫𑀼𑀢𑁆𑀢𑀝𑁆𑀞𑀸𑀦𑁂 𑀮𑀸𑀔𑀸𑀭𑀲𑀧𑀭𑀺𑀓𑀺𑀢𑀸𑀦𑀺 𑀯𑀺𑀬 𑀫𑀼𑀢𑁆𑀢𑀝𑁆𑀞𑀸𑀦𑁂 𑀔𑀻𑀭𑀥𑀸𑀭𑀸𑀲𑀤𑀺𑀲𑀸𑀦𑀺 𑀳𑁄𑀦𑁆𑀢𑀺, 𑀅𑀬𑀫𑀲𑁆𑀲𑀸 𑀦𑀔𑀓𑀮𑁆𑀬𑀸𑀡𑀢𑀸. 𑀤𑁆𑀯𑀢𑁆𑀢𑀺𑀁𑀲𑀤𑀦𑁆𑀢𑀸 𑀲𑀼𑀨𑀼𑀲𑀺𑀢𑀸 𑀧𑀭𑀺𑀲𑀼𑀤𑁆𑀥𑀧𑀯𑀸𑀴𑀧𑀦𑁆𑀢𑀺𑀲𑀤𑀺𑀲𑀸 𑀯𑀚𑀺𑀭𑀧𑀦𑁆𑀢𑀻 𑀯𑀺𑀬 𑀔𑀸𑀬𑀦𑁆𑀢𑀺, 𑀅𑀬𑀫𑀲𑁆𑀲𑀸 𑀅𑀝𑁆𑀞𑀺𑀓𑀮𑁆𑀬𑀸𑀡𑀢𑀸. 𑀯𑀻𑀲𑀢𑀺𑀯𑀲𑁆𑀲𑀲𑀢𑀺𑀓𑀸𑀧𑀺 𑀲𑀫𑀸𑀦𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬 𑀳𑁄𑀢𑀺 𑀦𑀺𑀧𑁆𑀧𑀮𑀺𑀢𑀸, 𑀅𑀬𑀫𑀲𑁆𑀲𑀸 𑀯𑀬𑀓𑀮𑁆𑀬𑀸𑀡𑀢𑀸. 𑀲𑀼𑀦𑁆𑀤𑀭𑀻 𑀘 𑀳𑁄𑀢𑀺 𑀏𑀯𑀭𑀽𑀧𑀕𑀼𑀡𑀲𑀫𑀦𑁆𑀦𑀸𑀕𑀢𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀚𑀦𑀧𑀤𑀓𑀮𑁆𑀬𑀸𑀡𑀻’’𑀢𑀺.

𑀖𑀭𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲𑀸𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁, 𑀖𑀭𑀢𑁄 𑀦𑀺𑀓𑁆𑀔𑀫𑀢𑁄𑀢𑀺 𑀅𑀢𑁆𑀣𑁄. ‘‘𑀖𑀭𑀸 𑀦𑀺𑀓𑁆𑀔𑀫𑀦𑁆𑀢’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀉𑀧𑀟𑁆𑀠𑀼𑀮𑁆𑀮𑀺𑀔𑀺𑀢𑁂𑀳𑀺 𑀓𑁂𑀲𑁂𑀳𑀻𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁, 𑀯𑀺𑀧𑁆𑀧𑀓𑀢𑀼𑀮𑁆𑀮𑀺𑀔𑀺𑀢𑁂𑀳𑀺 𑀓𑁂𑀲𑁂𑀳𑀺 𑀉𑀧𑀮𑀓𑁆𑀔𑀺𑀢𑀸𑀢𑀺 𑀅𑀢𑁆𑀣𑁄. ‘‘𑀅𑀟𑁆𑀠𑀼𑀮𑁆𑀮𑀺𑀔𑀺𑀢𑁂𑀳𑀻’’𑀢𑀺𑀧𑀺 𑀧𑀞𑀦𑁆𑀢𑀺. 𑀉𑀮𑁆𑀮𑀺𑀔𑀦𑀦𑁆𑀢𑀺 𑀘 𑀨𑀡𑀓𑀸𑀤𑀻𑀳𑀺 𑀓𑁂𑀲𑀲𑀡𑁆𑀞𑀸𑀧𑀦𑀁, ‘‘𑀅𑀟𑁆𑀠𑀓𑀸𑀭𑀯𑀺𑀥𑀸𑀦’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀧𑀮𑁄𑀓𑁂𑀢𑁆𑀯𑀸𑀢𑀺 𑀲𑀺𑀦𑁂𑀳𑀭𑀲𑀯𑀺𑀧𑁆𑀨𑀸𑀭𑀲𑀁𑀲𑀽𑀘𑀓𑁂𑀦 𑀅𑀟𑁆𑀠𑀓𑁆𑀔𑀺𑀦𑀸 𑀆𑀩𑀦𑁆𑀥𑀦𑁆𑀢𑀻 𑀯𑀺𑀬 𑀑𑀮𑁄𑀓𑁂𑀢𑁆𑀯𑀸. 𑀫𑀁, 𑀪𑀦𑁆𑀢𑁂𑀢𑀺 𑀧𑀼𑀩𑁆𑀩𑁂𑀧𑀺 ‘‘𑀫’’𑀦𑁆𑀢𑀺 𑀯𑀢𑁆𑀯𑀸 𑀉𑀓𑁆𑀓𑀡𑁆𑀞𑀸𑀓𑀼𑀮𑀘𑀺𑀢𑁆𑀢𑀢𑀸𑀬 𑀧𑀼𑀦 ‘‘𑀫𑀁 𑀏𑀢𑀤𑀯𑁄𑀘𑀸’’𑀢𑀺 𑀆𑀳. 𑀢𑀼𑀯𑀝𑀦𑁆𑀢𑀺 𑀲𑀻𑀖𑀁. 𑀢𑀫𑀦𑀼𑀲𑁆𑀲𑀭𑀫𑀸𑀦𑁄𑀢𑀺 𑀢𑀁 𑀢𑀲𑁆𑀲𑀸 𑀯𑀘𑀦𑀁, 𑀢𑀁 𑀯𑀸 𑀢𑀲𑁆𑀲𑀸 𑀆𑀓𑀸𑀭𑀲𑀳𑀺𑀢𑀁 𑀯𑀘𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄.

𑀪𑀕𑀯𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀉𑀧𑀸𑀬𑁂𑀦𑀲𑁆𑀲 𑀭𑀸𑀕𑀁 𑀯𑀽𑀧𑀲𑀫𑁂𑀲𑁆𑀲𑀸𑀫𑀻’’𑀢𑀺 𑀇𑀤𑁆𑀥𑀺𑀩𑀮𑁂𑀦 𑀦𑀁 𑀢𑀸𑀯𑀢𑀺𑀁𑀲𑀪𑀯𑀦𑀁 𑀦𑁂𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀲𑁆𑀫𑀺𑀁 𑀛𑀸𑀫𑀔𑁂𑀢𑁆𑀢𑁂 𑀛𑀸𑀫𑀔𑀸𑀡𑀼𑀫𑀢𑁆𑀣𑀓𑁂 𑀦𑀺𑀲𑀺𑀦𑁆𑀦𑀁 𑀙𑀺𑀦𑁆𑀦𑀓𑀡𑁆𑀡𑀦𑀸𑀲𑀸𑀦𑀗𑁆𑀕𑀼𑀝𑁆𑀞𑀁 𑀏𑀓𑀁 𑀧𑀮𑀼𑀝𑁆𑀞𑀫𑀓𑁆𑀓𑀝𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀦𑁂𑀲𑀺. 𑀧𑀸𑀴𑀺𑀬𑀁 𑀧𑀦 𑀏𑀓𑀓𑁆𑀔𑀡𑁂𑀦𑁂𑀯 𑀲𑀢𑁆𑀣𑀸𑀭𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀢𑀁 𑀯𑀺𑀬 𑀯𑀼𑀢𑁆𑀢𑀁, 𑀢𑀁 𑀕𑀫𑀦𑀁 𑀅𑀯𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀕𑀘𑁆𑀙𑀦𑁆𑀢𑁄𑀬𑁂𑀯 𑀳𑀺 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀦𑀦𑁆𑀤𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑀁 𑀧𑀮𑀼𑀝𑁆𑀞𑀫𑀓𑁆𑀓𑀝𑀺𑀁 𑀤𑀲𑁆𑀲𑁂𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀲𑀫𑀺𑀜𑁆𑀚𑀦𑀸𑀤𑀺𑀦𑀺𑀤𑀲𑁆𑀲𑀦𑀁? 𑀢𑀁 𑀅𑀦𑁆𑀢𑀭𑀥𑀸𑀦𑀦𑀺𑀤𑀲𑁆𑀲𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀲𑀢𑁆𑀣𑀸 𑀢𑀁 𑀢𑀸𑀯𑀢𑀺𑀁𑀲𑀪𑀯𑀦𑀁 𑀦𑁂𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀆𑀕𑀢𑀸𑀦𑀺 𑀓𑀓𑀼𑀝𑀧𑀸𑀤𑀸𑀦𑀺 𑀧𑀜𑁆𑀘 𑀅𑀘𑁆𑀙𑀭𑀸𑀲𑀢𑀸𑀦𑀺 𑀅𑀢𑁆𑀢𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀢𑀸𑀲𑀁 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀘𑁆𑀘 𑀯𑀺𑀲𑁂𑀲𑀁 𑀧𑀼𑀘𑁆𑀙𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸…𑀧𑁂… 𑀓𑀓𑀼𑀝𑀧𑀸𑀤𑀸𑀦𑀻’’𑀢𑀺.

𑀢𑀢𑁆𑀣 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸𑀢𑀺 𑀩𑀸𑀳𑀼𑀫𑁆𑀳𑀺 𑀕𑀳𑁂𑀢𑁆𑀯𑀸 𑀯𑀺𑀬. 𑀪𑀕𑀯𑀸 𑀳𑀺 𑀢𑀤𑀸 𑀢𑀸𑀤𑀺𑀲𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀭𑁂𑀲𑀺, 𑀬𑀣𑀸 𑀆𑀬𑀲𑁆𑀫𑀸 𑀦𑀦𑁆𑀤𑁄 𑀪𑀼𑀚𑁂 𑀕𑀳𑁂𑀢𑁆𑀯𑀸 𑀪𑀕𑀯𑀢𑀸 𑀦𑀻𑀬𑀫𑀸𑀦𑁄 𑀯𑀺𑀬 𑀅𑀳𑁄𑀲𑀺. 𑀢𑀢𑁆𑀣 𑀘 𑀪𑀕𑀯𑀢𑀸 𑀲𑀘𑁂 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑀲𑁆𑀲 𑀤𑀲𑁆𑀲𑀦𑀁 𑀧𑀯𑁂𑀲𑀦𑀫𑁂𑀯 𑀯𑀸 𑀇𑀘𑁆𑀙𑀺𑀢𑀁 𑀲𑀺𑀬𑀸, 𑀬𑀣𑀸𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀢𑀲𑁆𑀲 𑀢𑀁 𑀤𑁂𑀯𑀮𑁄𑀓𑀁 𑀤𑀲𑁆𑀲𑁂𑀬𑁆𑀬 𑀮𑁄𑀓𑀯𑀺𑀯𑀭𑀡𑀺𑀤𑁆𑀥𑀺𑀓𑀸𑀮𑁂 𑀯𑀺𑀬, 𑀢𑀫𑁂𑀯 𑀯𑀸 𑀇𑀤𑁆𑀥𑀺𑀬𑀸 𑀢𑀢𑁆𑀣 𑀧𑁂𑀲𑁂𑀬𑁆𑀬. 𑀬𑀲𑁆𑀫𑀸 𑀧𑀦𑀲𑁆𑀲 𑀤𑀺𑀩𑁆𑀩𑀢𑁆𑀢𑀪𑀸𑀯𑀢𑁄 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀲𑁆𑀲 𑀬𑁄 𑀦𑀺𑀳𑀻𑀦𑀚𑀺𑀕𑀼𑀘𑁆𑀙𑀦𑀻𑀬𑀪𑀸𑀯𑁄, 𑀢𑀲𑁆𑀲 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑀁 𑀫𑀓𑁆𑀓𑀝𑀺𑀁 𑀤𑀲𑁆𑀲𑁂𑀢𑀼𑀓𑀸𑀫𑁄, 𑀤𑁂𑀯𑀮𑁄𑀓𑀲𑀺𑀭𑀺𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀬𑁄 𑀘 𑀑𑀕𑀸𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀢𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀦𑁂𑀲𑀺. 𑀏𑀯𑀜𑁆𑀳𑀺𑀲𑁆𑀲 𑀢𑀤𑀢𑁆𑀣𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁂 𑀯𑀺𑀲𑁂𑀲𑀢𑁄 𑀅𑀪𑀺𑀭𑀢𑀺 𑀪𑀯𑀺𑀲𑁆𑀲𑀢𑀻𑀢𑀺.

𑀓𑀓𑀼𑀝𑀧𑀸𑀤𑀸𑀦𑀻𑀢𑀺 𑀭𑀢𑁆𑀢𑀯𑀡𑁆𑀡𑀢𑀸𑀬 𑀧𑀸𑀭𑀸𑀯𑀢𑀲𑀤𑀺𑀲𑀧𑀸𑀤𑀸𑀦𑀺. 𑀢𑀸 𑀓𑀺𑀭 𑀲𑀩𑁆𑀩𑀸𑀧𑀺 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀸𑀦𑀁 𑀧𑀸𑀤𑀫𑀓𑁆𑀔𑀦𑀢𑁂𑀮𑀤𑀸𑀦𑁂𑀦 𑀢𑀸𑀤𑀺𑀲𑀸 𑀲𑀼𑀓𑀼𑀫𑀸𑀭𑀧𑀸𑀤𑀸 𑀅𑀳𑁂𑀲𑀼𑀁. 𑀧𑀲𑁆𑀲𑀲𑀺 𑀦𑁄𑀢𑀺 𑀧𑀲𑁆𑀲𑀲𑀺 𑀦𑀼. 𑀅𑀪𑀺𑀭𑀽𑀧𑀢𑀭𑀸𑀢𑀺 𑀯𑀺𑀲𑀺𑀝𑁆𑀞𑀭𑀽𑀧𑀢𑀭𑀸. 𑀤𑀲𑁆𑀲𑀦𑀻𑀬𑀢𑀭𑀸𑀢𑀺 𑀤𑀺𑀯𑀲𑀫𑁆𑀧𑀺 𑀧𑀲𑁆𑀲𑀦𑁆𑀢𑀸𑀦𑀁 𑀅𑀢𑀺𑀢𑁆𑀢𑀺𑀓𑀭𑀡𑀝𑁆𑀞𑁂𑀦 𑀧𑀲𑁆𑀲𑀺𑀢𑀩𑁆𑀩𑀢𑀭𑀸. 𑀧𑀸𑀲𑀸𑀤𑀺𑀓𑀢𑀭𑀸𑀢𑀺 𑀲𑀩𑁆𑀩𑀸𑀯𑀬𑀯𑀲𑁄𑀪𑀸𑀬 𑀲𑀫𑀦𑁆𑀢𑀢𑁄 𑀧𑀲𑀸𑀤𑀸𑀯𑀳𑀢𑀭𑀸.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀅𑀯𑀲𑁆𑀲𑀼𑀢𑀘𑀺𑀢𑁆𑀢𑀁 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀅𑀘𑁆𑀙𑀭𑀸𑀬𑁄 𑀑𑀮𑁄𑀓𑀸𑀧𑁂𑀲𑀺? 𑀲𑀼𑀔𑁂𑀦𑁂𑀯𑀲𑁆𑀲 𑀓𑀺𑀮𑁂𑀲𑁂 𑀦𑀻𑀳𑀭𑀺𑀢𑀼𑀁. 𑀬𑀣𑀸 𑀳𑀺 𑀓𑀼𑀲𑀮𑁄 𑀯𑁂𑀚𑁆𑀚𑁄 𑀉𑀲𑁆𑀲𑀦𑁆𑀦𑀤𑁄𑀲𑀁 𑀧𑀼𑀕𑁆𑀕𑀮𑀁 𑀢𑀺𑀓𑀺𑀘𑁆𑀙𑀦𑁆𑀢𑁄 𑀲𑀺𑀦𑁂𑀳𑀧𑀸𑀦𑀸𑀤𑀺𑀦𑀸 𑀧𑀞𑀫𑀁 𑀤𑁄𑀲𑁂 𑀉𑀓𑁆𑀓𑀺𑀮𑁂𑀤𑁂𑀢𑁆𑀯𑀸 𑀧𑀘𑁆𑀙𑀸 𑀯𑀫𑀦𑀯𑀺𑀭𑁂𑀘𑀦𑁂𑀳𑀺 𑀲𑀫𑁆𑀫𑀤𑁂𑀯 𑀦𑀻𑀳𑀭𑀸𑀧𑁂𑀢𑀺, 𑀏𑀯𑀁 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁄 𑀪𑀕𑀯𑀸 𑀉𑀲𑁆𑀲𑀦𑁆𑀦𑀭𑀸𑀕𑀁 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀤𑁂𑀯𑀘𑁆𑀙𑀭𑀸𑀬𑁄 𑀤𑀲𑁆𑀲𑁂𑀢𑁆𑀯𑀸 𑀉𑀓𑁆𑀓𑀺𑀮𑁂𑀤𑁂𑀲𑀺 𑀅𑀭𑀺𑀬𑀫𑀕𑁆𑀕𑀪𑁂𑀲𑀚𑁆𑀚𑁂𑀦 𑀅𑀦𑀯𑀲𑁂𑀲𑀢𑁄 𑀦𑀻𑀳𑀭𑀺𑀢𑀼𑀓𑀸𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀮𑀼𑀝𑁆𑀞𑀫𑀓𑁆𑀓𑀝𑀻𑀢𑀺 𑀛𑀸𑀫𑀗𑁆𑀕𑀧𑀘𑁆𑀘𑀗𑁆𑀕𑀫𑀓𑁆𑀓𑀝𑀻. 𑀏𑀯𑀫𑁂𑀯 𑀔𑁄𑀢𑀺 𑀬𑀣𑀸 𑀲𑀸, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀤𑀲𑁆𑀲𑀺𑀢𑀸 𑀙𑀺𑀦𑁆𑀦𑀓𑀡𑁆𑀡𑀦𑀸𑀲𑀸 𑀧𑀮𑀼𑀝𑁆𑀞𑀫𑀓𑁆𑀓𑀝𑀻 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀉𑀧𑀸𑀤𑀸𑀬, 𑀏𑀯𑀫𑁂𑀯 𑀚𑀦𑀧𑀤𑀓𑀮𑁆𑀬𑀸𑀡𑀻 𑀇𑀫𑀸𑀦𑀺 𑀧𑀜𑁆𑀘 𑀅𑀘𑁆𑀙𑀭𑀸𑀲𑀢𑀸𑀦𑀺 𑀉𑀧𑀸𑀤𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀦𑁆𑀢𑀺 𑀉𑀧𑀬𑁄𑀕𑁂 𑀲𑀸𑀫𑀺𑀯𑀘𑀦𑀁, 𑀧𑀜𑁆𑀘 𑀅𑀘𑁆𑀙𑀭𑀸𑀲𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀯𑀬𑀯𑀲𑀫𑁆𑀩𑀦𑁆𑀥𑁂 𑀯𑀸 𑀏𑀢𑀁 𑀲𑀸𑀫𑀺𑀯𑀘𑀦𑀁, 𑀢𑁂𑀦 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀉𑀧𑀦𑀺𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀦𑀺𑀥𑀸𑀬𑀸𑀢𑀺 𑀘 𑀲𑀫𑀻𑀧𑁂 𑀞𑀧𑁂𑀢𑁆𑀯𑀸, 𑀉𑀧𑀸𑀤𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀔𑁆𑀬𑀦𑁆𑀢𑀺 𑀇𑀢𑁆𑀣𑀻𑀢𑀺 𑀕𑀡𑀦𑀁. 𑀓𑀮𑀪𑀸𑀕𑀦𑁆𑀢𑀺 𑀓𑀮𑀸𑀬𑀧𑀺 𑀪𑀸𑀕𑀁, 𑀏𑀓𑀁 𑀲𑁄𑀴𑀲𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀢𑀢𑁄 𑀏𑀓𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑁆𑀯𑀸 𑀲𑁄𑀴𑀲𑀥𑀸 𑀕𑀡𑀺𑀢𑁂 𑀢𑀢𑁆𑀣 𑀬𑁄 𑀏𑀓𑁂𑀓𑁄 𑀓𑁄𑀝𑁆𑀞𑀸𑀲𑁄, 𑀲𑁄 𑀓𑀮𑀪𑀸𑀕𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀢𑀫𑁆𑀧𑀺 𑀓𑀮𑀪𑀸𑀕𑀁 𑀦 𑀉𑀧𑁂𑀢𑀻𑀢𑀺 𑀯𑀤𑀢𑀺. 𑀉𑀧𑀦𑀺𑀥𑀺𑀦𑁆𑀢𑀺 ‘‘𑀇𑀫𑀸𑀬 𑀅𑀬𑀁 𑀲𑀤𑀺𑀲𑀻’’𑀢𑀺 𑀉𑀧𑀫𑀸𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀲𑀫𑀻𑀧𑁂 𑀞𑀧𑀦𑀫𑁆𑀧𑀺.

𑀬𑀢𑁆𑀣𑀸𑀬𑀁 𑀅𑀦𑀪𑀺𑀭𑀢𑁄, 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀧𑀸𑀓𑀝𑀜𑁆𑀘𑀸𑀢𑀺 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀢𑀢𑁆𑀣 𑀅𑀪𑀺𑀭𑀢𑀺𑀬𑀁 𑀆𑀤𑀭𑀚𑀦𑀦𑀢𑁆𑀣𑀁 𑀅𑀪𑀺𑀭𑀫, 𑀦𑀦𑁆𑀤, 𑀅𑀪𑀺𑀭𑀫, 𑀦𑀦𑁆𑀤𑀸’’𑀢𑀺 𑀆𑀫𑁂𑀟𑀺𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀳𑀁 𑀢𑁂 𑀧𑀸𑀝𑀺𑀪𑁄𑀕𑁄𑀢𑀺 𑀓𑀲𑁆𑀫𑀸 𑀪𑀕𑀯𑀸 𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀇𑀘𑁆𑀙𑀦𑁆𑀢𑁄 𑀅𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀧𑀸𑀝𑀺𑀪𑁄𑀕𑀁 𑀉𑀧𑀕𑀜𑁆𑀙𑀺? 𑀬𑀢𑁆𑀣𑀲𑁆𑀲 𑀆𑀭𑀫𑁆𑀫𑀡𑁂 𑀭𑀸𑀕𑁄 𑀤𑀴𑁆𑀳𑀁 𑀦𑀺𑀧𑀢𑀺, 𑀢𑀁 𑀆𑀕𑀦𑁆𑀢𑀼𑀓𑀸𑀭𑀫𑁆𑀫𑀡𑁂 𑀲𑀗𑁆𑀓𑀸𑀫𑁂𑀢𑁆𑀯𑀸 𑀲𑀼𑀔𑁂𑀦 𑀲𑀓𑁆𑀓𑀸 𑀚𑀳𑀸𑀧𑁂𑀢𑀼𑀦𑁆𑀢𑀺 𑀧𑀸𑀝𑀺𑀪𑁄𑀕𑀁 𑀉𑀧𑀕𑀜𑁆𑀙𑀺. 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀬𑀁 𑀲𑀕𑁆𑀕𑀓𑀣𑀸 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀤𑀲𑁆𑀲𑀦𑀁.

𑀅𑀲𑁆𑀲𑁄𑀲𑀼𑀦𑁆𑀢𑀺 𑀓𑀣𑀫𑀲𑁆𑀲𑁄𑀲𑀼𑀁? 𑀪𑀕𑀯𑀸 𑀳𑀺 𑀢𑀤𑀸 𑀆𑀬𑀲𑁆𑀫𑀦𑁆𑀢𑁂 𑀦𑀦𑁆𑀤𑁂 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑀁 𑀕𑀢𑁂 𑀉𑀧𑀝𑁆𑀞𑀸𑀦𑀁 𑀆𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀁 𑀧𑀯𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀬𑀣𑀸 𑀦𑀸𑀫 𑀓𑀼𑀲𑀮𑁄 𑀧𑀼𑀭𑀺𑀲𑁄 𑀅𑀦𑀺𑀓𑁆𑀔𑀦𑁆𑀢𑀁 𑀆𑀡𑀺𑀁 𑀅𑀜𑁆𑀜𑀸𑀬 𑀆𑀡𑀺𑀬𑀸 𑀦𑀻𑀳𑀭𑀺𑀢𑁆𑀯𑀸 𑀧𑀼𑀦 𑀢𑀁 𑀳𑀢𑁆𑀣𑀸𑀤𑀻𑀳𑀺 𑀲𑀜𑁆𑀘𑀸𑀮𑁂𑀢𑁆𑀯𑀸 𑀅𑀧𑀦𑁂𑀢𑀺, 𑀏𑀯𑀫𑁂𑀯 𑀆𑀘𑀺𑀡𑁆𑀡𑀯𑀺𑀲𑀬𑁂 𑀢𑀲𑁆𑀲 𑀭𑀸𑀕𑀁 𑀆𑀕𑀦𑁆𑀢𑀼𑀓𑀯𑀺𑀲𑀬𑁂𑀦 𑀦𑀻𑀳𑀭𑀺𑀢𑁆𑀯𑀸 𑀧𑀼𑀦 𑀢𑀤𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀫𑀕𑁆𑀕𑀳𑁂𑀢𑀼𑀁 𑀓𑀢𑁆𑀯𑀸 𑀅𑀧𑀦𑁂𑀢𑀼𑀓𑀸𑀫𑁄 ‘‘𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀁 𑀪𑀺𑀓𑁆𑀔𑀼𑀁 𑀪𑀢𑀓𑀯𑀸𑀤𑁂𑀦 𑀘 𑀉𑀧𑀓𑁆𑀓𑀺𑀢𑀓𑀯𑀸𑀤𑁂𑀦 𑀘 𑀲𑀫𑀼𑀤𑀸𑀘𑀭𑀣𑀸’’𑀢𑀺 𑀆𑀡𑀸𑀧𑁂𑀲𑀺, 𑀏𑀯𑀁 𑀪𑀺𑀓𑁆𑀔𑀽 𑀅𑀲𑁆𑀲𑁄𑀲𑀼𑀁. 𑀓𑁂𑀘𑀺 𑀧𑀦 ‘‘𑀪𑀕𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀭𑁂𑀲𑀺, 𑀬𑀣𑀸 𑀢𑁂 𑀪𑀺𑀓𑁆𑀔𑀽 𑀢𑀫𑀢𑁆𑀣𑀁 𑀚𑀸𑀦𑀺𑀁𑀲𑀽’’𑀢𑀺 𑀯𑀤𑀦𑁆𑀢𑀺.

𑀪𑀢𑀓𑀯𑀸𑀤𑁂𑀦𑀸𑀢𑀺 𑀪𑀢𑀓𑁄𑀢𑀺 𑀯𑀸𑀤𑁂𑀦. 𑀬𑁄 𑀳𑀺 𑀪𑀢𑀺𑀬𑀸 𑀓𑀫𑁆𑀫𑀁 𑀓𑀭𑁄𑀢𑀺, 𑀲𑁄 𑀪𑀢𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀅𑀬𑀫𑁆𑀧𑀺 𑀆𑀬𑀲𑁆𑀫𑀸 𑀅𑀘𑁆𑀙𑀭𑀸𑀲𑀫𑁆𑀪𑁄𑀕𑀦𑀺𑀫𑀺𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑁄 𑀪𑀢𑀓𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀪𑀢𑀓𑀯𑀸𑀤𑁂𑀦𑀸’’𑀢𑀺. 𑀉𑀧𑀓𑁆𑀓𑀺𑀢𑀓𑀯𑀸𑀤𑁂𑀦𑀸𑀢𑀺 𑀬𑁄 𑀓𑀳𑀸𑀧𑀡𑀸𑀤𑀻𑀳𑀺 𑀓𑀺𑀜𑁆𑀘𑀺 𑀓𑀺𑀡𑀸𑀢𑀺, 𑀲𑁄 𑀉𑀧𑀓𑁆𑀓𑀺𑀢𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀅𑀬𑀫𑁆𑀧𑀺 𑀆𑀬𑀲𑁆𑀫𑀸 𑀅𑀘𑁆𑀙𑀭𑀸𑀦𑀁 𑀳𑁂𑀢𑀼 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀓𑀺𑀡𑀸𑀢𑀺, 𑀢𑀲𑁆𑀫𑀸 ‘‘𑀉𑀧𑀓𑁆𑀓𑀺𑀢𑀓𑁄’’𑀢𑀺 𑀏𑀯𑀁 𑀯𑀘𑀦𑁂𑀦. 𑀅𑀣 𑀯𑀸 𑀪𑀕𑀯𑀢𑁄 𑀆𑀡𑀸𑀬 𑀅𑀘𑁆𑀙𑀭𑀸𑀲𑀫𑁆𑀪𑁄𑀕𑀲𑀗𑁆𑀔𑀸𑀢𑀸𑀬 𑀪𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑀗𑁆𑀔𑀸𑀢𑀁 𑀚𑀻𑀯𑀺𑀢𑀁 𑀧𑀯𑀢𑁆𑀢𑁂𑀦𑁆𑀢𑁄 𑀢𑀸𑀬 𑀪𑀢𑀺𑀬𑀸 𑀬𑀸𑀧𑀦𑁂 𑀪𑀕𑀯𑀢𑀸 𑀪𑀭𑀺𑀬𑀫𑀸𑀦𑁄 𑀯𑀺𑀬 𑀳𑁄𑀢𑀻𑀢𑀺 ‘‘𑀪𑀢𑀓𑁄’’𑀢𑀺 𑀯𑀼𑀢𑁆𑀢𑁄, 𑀢𑀣𑀸 𑀅𑀘𑁆𑀙𑀭𑀸𑀲𑀫𑁆𑀪𑁄𑀕𑀲𑀗𑁆𑀔𑀸𑀢𑀁 𑀯𑀺𑀓𑁆𑀓𑀬𑀁 𑀆𑀤𑀸𑀢𑀩𑁆𑀩𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀆𑀡𑀢𑁆𑀢𑀺𑀬𑀁 𑀢𑀺𑀝𑁆𑀞𑀦𑁆𑀢𑁄 𑀢𑁂𑀦 𑀯𑀺𑀓𑁆𑀓𑀬𑁂𑀦 𑀪𑀕𑀯𑀢𑀸 𑀉𑀧𑀓𑁆𑀓𑀺𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀓𑁆𑀓𑀺𑀢𑀓𑁄’’𑀢𑀺.

𑀅𑀝𑁆𑀝𑀻𑀬𑀫𑀸𑀦𑁄𑀢𑀺 𑀧𑀻𑀴𑀺𑀬𑀫𑀸𑀦𑁄 𑀤𑀼𑀓𑁆𑀔𑀸𑀧𑀺𑀬𑀫𑀸𑀦𑁄. 𑀳𑀭𑀸𑀬𑀫𑀸𑀦𑁄𑀢𑀺 𑀮𑀚𑁆𑀚𑀫𑀸𑀦𑁄. 𑀚𑀺𑀕𑀼𑀘𑁆𑀙𑀫𑀸𑀦𑁄𑀢𑀺 𑀧𑀸𑀝𑀺𑀓𑀼𑀮𑁆𑀬𑀢𑁄 𑀤𑀳𑀦𑁆𑀢𑁄. 𑀏𑀓𑁄𑀢𑀺 𑀅𑀲𑀳𑀸𑀬𑁄. 𑀯𑀽𑀧𑀓𑀝𑁆𑀞𑁄𑀢𑀺 𑀯𑀢𑁆𑀣𑀼𑀓𑀸𑀫𑁂𑀳𑀺 𑀓𑀺𑀮𑁂𑀲𑀓𑀸𑀫𑁂𑀳𑀺 𑀘 𑀓𑀸𑀬𑁂𑀦 𑀘𑁂𑀯 𑀘𑀺𑀢𑁆𑀢𑁂𑀦 𑀘 𑀯𑀽𑀧𑀓𑀝𑁆𑀞𑁄. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑁂 𑀲𑀢𑀺𑀁 𑀅𑀯𑀺𑀚𑀳𑀦𑁆𑀢𑁄. 𑀆𑀢𑀸𑀧𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀸𑀢𑀸𑀧𑁂𑀦 𑀆𑀢𑀸𑀧𑀯𑀸, 𑀆𑀢𑀸𑀧𑁂𑀢𑀺 𑀓𑀺𑀮𑁂𑀲𑁂𑀢𑀺 𑀆𑀢𑀸𑀧𑁄, 𑀯𑀻𑀭𑀺𑀬𑀁. 𑀧𑀳𑀺𑀢𑀢𑁆𑀢𑁄𑀢𑀺 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀢𑀸𑀬 𑀧𑁂𑀲𑀺𑀢𑀢𑁆𑀢𑁄 𑀯𑀺𑀲𑁆𑀲𑀝𑁆𑀞𑀅𑀢𑁆𑀢𑀪𑀸𑀯𑁄, 𑀦𑀺𑀩𑁆𑀩𑀸𑀦𑁂 𑀯𑀸 𑀧𑁂𑀲𑀺𑀢𑀘𑀺𑀢𑁆𑀢𑁄. 𑀦 𑀘𑀺𑀭𑀲𑁆𑀲𑁂𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀭𑀫𑁆𑀪𑀢𑁄 𑀦 𑀘𑀺𑀭𑁂𑀦𑁂𑀯. 𑀬𑀲𑁆𑀲𑀢𑁆𑀣𑀸𑀬𑀸𑀢𑀺 𑀬𑀲𑁆𑀲 𑀅𑀢𑁆𑀣𑀸𑀬. 𑀓𑀼𑀮𑀧𑀼𑀢𑁆𑀢𑀸𑀢𑀺 𑀤𑀼𑀯𑀺𑀥𑀸 𑀓𑀼𑀮𑀧𑀼𑀢𑁆𑀢𑀸 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸 𑀘 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸 𑀘, 𑀅𑀬𑀁 𑀧𑀦 𑀉𑀪𑀬𑀣𑀸𑀧𑀺 𑀓𑀼𑀮𑀧𑀼𑀢𑁆𑀢𑁄. 𑀲𑀫𑁆𑀫𑀤𑁂𑀯𑀸𑀢𑀺 𑀳𑁂𑀢𑀼𑀦𑀸 𑀘 𑀓𑀸𑀭𑀡𑁂𑀦 𑀘. 𑀅𑀕𑀸𑀭𑀲𑁆𑀫𑀸𑀢𑀺 𑀖𑀭𑀢𑁄. 𑀅𑀦𑀕𑀸𑀭𑀺𑀬𑀦𑁆𑀢𑀺 𑀧𑀩𑁆𑀩𑀚𑁆𑀚𑀁. 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀜𑁆𑀳𑀺 𑀅𑀕𑀸𑀭𑀲𑁆𑀲 𑀳𑀺𑀢𑀦𑁆𑀢𑀺 𑀅𑀕𑀸𑀭𑀺𑀬𑀁 𑀦𑀸𑀫, 𑀢𑀁 𑀏𑀢𑁆𑀣 𑀦𑀢𑁆𑀣𑀻𑀢𑀺 𑀧𑀩𑁆𑀩𑀚𑁆𑀚𑀸 𑀅𑀦𑀕𑀸𑀭𑀺𑀬𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀩𑁆𑀩𑀚𑀦𑁆𑀢𑀻𑀢𑀺 𑀉𑀧𑀕𑀘𑁆𑀙𑀦𑁆𑀢𑀺. 𑀢𑀤𑀦𑀼𑀢𑁆𑀢𑀭𑀦𑁆𑀢𑀺 𑀢𑀁 𑀅𑀦𑀼𑀢𑁆𑀢𑀭𑀁. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀅𑀭𑀳𑀢𑁆𑀢𑀨𑀮𑀁. 𑀢𑀲𑁆𑀲 𑀳𑀺 𑀅𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀇𑀥 𑀧𑀩𑁆𑀩𑀚𑀦𑁆𑀢𑀺. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑀸𑀬𑁂𑀯 𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀅𑀧𑀭𑀧𑁆𑀧𑀘𑁆𑀘𑀬𑁂𑀦 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀻𑀢𑀺 𑀧𑀸𑀧𑀼𑀡𑀺𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀸 𑀯𑀺𑀳𑀸𑀲𑀺. 𑀏𑀯𑀁 𑀯𑀺𑀳𑀭𑀦𑁆𑀢𑁄𑀯 𑀔𑀻𑀡𑀸 𑀚𑀸𑀢𑀺…𑀧𑁂… 𑀅𑀩𑁆𑀪𑀜𑁆𑀜𑀸𑀲𑀻𑀢𑀺. 𑀇𑀫𑀺𑀦𑀸 𑀅𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀪𑀽𑀫𑀺 𑀤𑀲𑁆𑀲𑀺𑀢𑀸.

𑀢𑀢𑁆𑀣 𑀔𑀻𑀡𑀸 𑀚𑀸𑀢𑀻𑀢𑀺 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀚𑀸𑀢𑀺 𑀔𑀻𑀡𑀸 𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸, 𑀦 𑀅𑀦𑀸𑀕𑀢𑀸 𑀅𑀦𑀸𑀕𑀢𑀢𑁆𑀢𑀸 𑀏𑀯, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀫𑀕𑁆𑀕𑀲𑁆𑀲 𑀧𑀦 𑀅𑀪𑀸𑀯𑀺𑀢𑀢𑁆𑀢𑀸 𑀬𑀸 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀧𑁆𑀧𑀪𑁂𑀤𑀸 𑀚𑀸𑀢𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀸 𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁂𑀦 𑀔𑀻𑀡𑀸. 𑀢𑀁 𑀲𑁄 𑀫𑀕𑁆𑀕𑀪𑀸𑀯𑀦𑀸𑀬 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀓𑀺𑀮𑁂𑀲𑀸𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀫𑁆𑀫𑀁 𑀆𑀬𑀢𑀺𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀳𑁄𑀢𑀻𑀢𑀺 𑀚𑀸𑀦𑀦𑁂𑀦 𑀅𑀩𑁆𑀪𑀜𑁆𑀜𑀸𑀲𑀺. 𑀯𑀼𑀲𑀺𑀢𑀦𑁆𑀢𑀺 𑀯𑀼𑀢𑁆𑀣𑀁 𑀧𑀭𑀺𑀯𑀼𑀢𑁆𑀣𑀁 𑀓𑀢𑀁 𑀘𑀭𑀺𑀢𑀁, 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁂𑀦 𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢 𑀲𑁂𑀓𑁆𑀔𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀦𑁆𑀢𑀺 𑀦𑀸𑀫, 𑀔𑀻𑀡𑀸𑀲𑀯𑁄 𑀯𑀼𑀢𑁆𑀣𑀯𑀸𑀲𑁄, 𑀢𑀲𑁆𑀫𑀸 𑀲𑁄 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀓𑀢𑀁 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀯𑀲𑁂𑀦 𑀲𑁄𑀴𑀲𑀯𑀺𑀥𑀫𑁆𑀧𑀺 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑀺𑀢𑀁. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀤𑀬𑁄 𑀳𑀺 𑀢𑀁 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺 𑀦𑀸𑀫, 𑀔𑀻𑀡𑀸𑀲𑀯𑁄 𑀓𑀢𑀓𑀭𑀡𑀻𑀬𑁄, 𑀢𑀲𑁆𑀫𑀸 𑀲𑁄 𑀅𑀢𑁆𑀢𑀦𑁄 𑀓𑀭𑀡𑀻𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀓𑀢𑀁 𑀓𑀭𑀡𑀻𑀬’’𑀦𑁆𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 ‘‘𑀇𑀤𑀸𑀦𑀺 𑀧𑀼𑀦 𑀇𑀢𑁆𑀣𑀪𑀸𑀯𑀸𑀬 𑀏𑀯𑀁 𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬 𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸 𑀫𑀕𑁆𑀕𑀪𑀸𑀯𑀦𑀸𑀬 𑀓𑀺𑀘𑁆𑀘𑀁 𑀫𑁂 𑀦𑀢𑁆𑀣𑀻’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀯𑀸 ‘‘𑀇𑀢𑁆𑀣𑀪𑀸𑀯𑀢𑁄 𑀇𑀫𑀲𑁆𑀫𑀸 𑀏𑀯𑀁𑀧𑀓𑀸𑀭𑀸 𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀸 𑀅𑀧𑀭𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀫𑀬𑁆𑀳𑀁 𑀦𑀢𑁆𑀣𑀺, 𑀇𑀫𑁂 𑀧𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸 𑀢𑀺𑀝𑁆𑀞𑀦𑁆𑀢𑀺 𑀙𑀺𑀦𑁆𑀦𑀫𑀽𑀮𑀓𑀸 𑀯𑀺𑀬 𑀭𑀼𑀓𑁆𑀔𑀸, 𑀢𑁂 𑀘𑀭𑀺𑀫𑀓𑀘𑀺𑀢𑁆𑀢𑀦𑀺𑀭𑁄𑀥𑁂𑀦 𑀅𑀦𑀼𑀧𑀸𑀤𑀸𑀦𑁄 𑀯𑀺𑀬 𑀚𑀸𑀢𑀯𑁂𑀤𑁄 𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄𑀢𑀺 𑀏𑀓𑁄. 𑀅𑀭𑀳𑀢𑀦𑁆𑀢𑀺 𑀪𑀕𑀯𑀢𑁄 𑀲𑀸𑀯𑀓𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑁄 𑀏𑀓𑁄 𑀫𑀳𑀸𑀲𑀸𑀯𑀓𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑀅𑀜𑁆𑀜𑀢𑀭𑀸 𑀤𑁂𑀯𑀢𑀸𑀢𑀺 𑀅𑀥𑀺𑀕𑀢𑀫𑀕𑁆𑀕𑀸 𑀏𑀓𑀸 𑀩𑁆𑀭𑀳𑁆𑀫𑀤𑁂𑀯𑀢𑀸. 𑀲𑀸 𑀳𑀺 𑀲𑀬𑀁 𑀅𑀲𑁂𑀓𑁆𑀔𑀢𑁆𑀢𑀸 𑀅𑀲𑁂𑀓𑁆𑀔𑀯𑀺𑀲𑀬𑀁 𑀅𑀩𑁆𑀪𑀜𑁆𑀜𑀸𑀲𑀺. 𑀲𑁂𑀓𑁆𑀔𑀸 𑀳𑀺 𑀢𑀁 𑀢𑀁 𑀲𑁂𑀓𑁆𑀔𑀯𑀺𑀲𑀬𑀁, 𑀧𑀼𑀣𑀼𑀚𑁆𑀚𑀦𑀸 𑀘 𑀅𑀢𑁆𑀢𑀦𑁄 𑀧𑀼𑀣𑀼𑀚𑁆𑀚𑀦𑀯𑀺𑀲𑀬𑀫𑁂𑀯 𑀚𑀸𑀦𑀦𑁆𑀢𑀺. 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀧𑀭𑀺𑀓𑁆𑀔𑀻𑀡𑀸𑀬 𑀭𑀢𑁆𑀢𑀺𑀬𑀸, 𑀫𑀚𑁆𑀛𑀺𑀫𑀬𑀸𑀫𑁂𑀢𑀺 𑀅𑀢𑁆𑀣𑁄. 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀅𑀢𑀺𑀉𑀢𑁆𑀢𑀫𑀯𑀡𑁆𑀡𑀸. 𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀅𑀦𑀯𑀲𑁂𑀲𑁂𑀦 𑀲𑀫𑀦𑁆𑀢𑀢𑁄. 𑀑𑀪𑀸𑀲𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀧𑀪𑀸𑀬 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀚𑁂𑀢𑀯𑀦𑀁 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀆𑀬𑀲𑁆𑀫𑀢𑁄 𑀦𑀦𑁆𑀤𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀯𑀺𑀤𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 ‘‘𑀢𑀁 𑀪𑀕𑀯𑀢𑁄 𑀧𑀝𑀺𑀯𑁂𑀤𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺.

𑀆𑀲𑀯𑀸𑀦𑀁 𑀔𑀬𑀸𑀢𑀺 𑀏𑀢𑁆𑀣 𑀆𑀲𑀯𑀦𑁆𑀢𑀻𑀢𑀺 𑀆𑀲𑀯𑀸, 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀳𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀆𑀕𑁄𑀢𑁆𑀭𑀪𑀼𑀁 𑀆𑀪𑀯𑀕𑁆𑀕𑀁 𑀯𑀸 𑀲𑀯𑀦𑁆𑀢𑀻𑀢𑀺 𑀆𑀲𑀯𑀸, 𑀏𑀢𑁂 𑀥𑀫𑁆𑀫𑁂 𑀏𑀢𑀜𑁆𑀘 𑀑𑀓𑀸𑀲𑀁 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀫𑀤𑀺𑀭𑀸𑀤𑀺𑀆𑀲𑀯𑀸 𑀯𑀺𑀬𑀸𑀢𑀺 𑀆𑀲𑀯𑀸. ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬𑀸’’𑀢𑀺𑀆𑀤𑀺𑀯𑀘𑀦𑁂𑀳𑀺 (𑀅. 𑀦𑀺. 𑁧𑁦.𑁬𑁧) 𑀦𑁂𑀲𑀁 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀆𑀬𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀯𑀦𑁆𑀢𑀺 𑀧𑀲𑀯𑀦𑁆𑀢𑀻𑀢𑀺𑀧𑀺, 𑀆𑀲𑀯𑀸. 𑀧𑀼𑀭𑀺𑀫𑁄 𑀘𑁂𑀢𑁆𑀣 𑀅𑀢𑁆𑀣𑁄 𑀓𑀺𑀮𑁂𑀲𑁂𑀲𑀼 𑀬𑀼𑀚𑁆𑀚𑀢𑀺, 𑀧𑀘𑁆𑀙𑀺𑀫𑁄 𑀓𑀫𑁆𑀫𑁂𑀧𑀺. 𑀦 𑀓𑁂𑀯𑀮𑀜𑁆𑀘 𑀓𑀫𑁆𑀫𑀓𑀺𑀮𑁂𑀲𑀸 𑀏𑀯 𑀆𑀲𑀯𑀸, 𑀅𑀣 𑀔𑁄 𑀦𑀸𑀦𑀧𑁆𑀧𑀓𑀸𑀭𑀸 𑀉𑀧𑀤𑁆𑀤𑀯𑀸𑀧𑀺. 𑀢𑀣𑀸 𑀳𑀺 ‘‘𑀦𑀸𑀳𑀁, 𑀘𑀼𑀦𑁆𑀤, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁𑀬𑁂𑀯 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀻’’𑀢𑀺 𑀏𑀢𑁆𑀣 (𑀤𑀻. 𑀦𑀺. 𑁩.𑁧𑁮𑁨) 𑀯𑀺𑀯𑀸𑀤𑀫𑀽𑀮𑀪𑀽𑀢𑀸 𑀓𑀺𑀮𑁂𑀲𑀸 𑀆𑀲𑀯𑀸𑀢𑀺 𑀆𑀕𑀢𑀸.

‘‘𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀮𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬) 𑁋

𑀏𑀢𑁆𑀣 𑀢𑁂𑀪𑀽𑀫𑀺𑀓𑀁 𑀓𑀫𑁆𑀫𑀁 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀆𑀲𑀯𑀸𑀢𑀺 𑀆𑀕𑀢𑀸. ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬𑀸’’𑀢𑀺 (𑀧𑀸𑀭𑀸. 𑁩𑁯) 𑀧𑀭𑀽𑀧𑀖𑀸𑀢𑀯𑀺𑀧𑁆𑀧𑀝𑀺𑀲𑀸𑀭𑀯𑀥𑀩𑀦𑁆𑀥𑀸𑀤𑀬𑁄 𑀘𑁂𑀯 𑀅𑀧𑀸𑀬𑀤𑀼𑀓𑁆𑀔𑀪𑀽𑀢𑀸 𑀘 𑀦𑀸𑀦𑀧𑁆𑀧𑀓𑀸𑀭𑀸 𑀉𑀧𑀤𑁆𑀤𑀯𑀸.

𑀢𑁂 𑀧𑀦𑁂𑀢𑁂 𑀆𑀲𑀯𑀸 𑀯𑀺𑀦𑀬𑁂 𑁋 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬𑀸’’𑀢𑀺 (𑀧𑀸𑀭𑀸. 𑁩𑁯) 𑀤𑁆𑀯𑀺𑀥𑀸 𑀆𑀕𑀢𑀸. 𑀲𑀴𑀸𑀬𑀢𑀦𑁂 ‘‘𑀢𑀬𑁄𑀫𑁂, 𑀆𑀯𑀼𑀲𑁄, 𑀆𑀲𑀯𑀸 𑁋 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄’’𑀢𑀺 (𑀤𑀻. 𑀦𑀺. 𑁩.𑁩𑁦𑁫) 𑀢𑀺𑀥𑀸 𑀆𑀕𑀢𑀸, 𑀢𑀣𑀸 𑀅𑀜𑁆𑀜𑁂𑀲𑀼 𑀘 𑀲𑀼𑀢𑁆𑀢𑀦𑁆𑀢𑁂𑀲𑀼. 𑀅𑀪𑀺𑀥𑀫𑁆𑀫𑁂 𑀢𑁂𑀬𑁂𑀯 𑀤𑀺𑀝𑁆𑀞𑀸𑀲𑀯𑁂𑀦 𑀲𑀤𑁆𑀥𑀺𑀁 𑀘𑀢𑀼𑀥𑀸 𑀆𑀕𑀢𑀸. 𑀦𑀺𑀩𑁆𑀩𑁂𑀥𑀺𑀓𑀧𑀭𑀺𑀬𑀸𑀬𑁂 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀦𑀺𑀭𑀬𑀕𑀸𑀫𑀺𑀦𑀺𑀬𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁬.𑁬𑁩) 𑀧𑀜𑁆𑀘𑀥𑀸 𑀆𑀕𑀢𑀸. 𑀙𑀓𑁆𑀓𑀦𑀺𑀧𑀸𑀢𑁂 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀲𑀁𑀯𑀭𑀸𑀬 𑀧𑀳𑀸𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁬.𑁫𑁮) 𑀦𑀬𑁂𑀦 𑀙𑀥𑀸 𑀆𑀕𑀢𑀸. 𑀲𑀩𑁆𑀩𑀸𑀲𑀯𑀧𑀭𑀺𑀬𑀸𑀬𑁂 (𑀫. 𑀦𑀺. 𑁧.𑁨𑁨) 𑀢𑁂𑀬𑁂𑀯 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀥𑀸 𑀆𑀕𑀢𑀸. 𑀇𑀥 𑀧𑀦 𑀅𑀪𑀺𑀥𑀫𑁆𑀫𑀦𑀬𑁂𑀦 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀯𑁂𑀤𑀺𑀢𑀩𑁆𑀩𑀸.

𑀔𑀬𑀸𑀢𑀺 𑀏𑀢𑁆𑀣 𑀧𑀦 ‘‘𑀬𑁄 𑀆𑀲𑀯𑀸𑀦𑀁 𑀔𑀬𑁄 𑀪𑁂𑀤𑁄 𑀧𑀭𑀺𑀪𑁂𑀤𑁄’’𑀢𑀺𑀆𑀤𑀻𑀲𑀼 𑀆𑀲𑀯𑀸𑀦𑀁 𑀲𑀭𑀲𑀪𑁂𑀤𑁄 𑀆𑀲𑀯𑀓𑁆𑀔𑀬𑁄𑀢𑀺 𑀯𑀼𑀢𑁆𑀢𑁄. ‘‘𑀚𑀸𑀦𑀢𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀯𑀤𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁫) 𑀆𑀲𑀯𑀸𑀦𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀆𑀲𑀯𑀓𑁆𑀔𑀬𑁄𑀢𑀺 𑀯𑀼𑀢𑁆𑀢𑁄.

‘‘𑀲𑁂𑀓𑁆𑀔𑀲𑁆𑀲 𑀲𑀺𑀓𑁆𑀔𑀫𑀸𑀦𑀲𑁆𑀲, 𑀉𑀚𑀼𑀫𑀕𑁆𑀕𑀸𑀦𑀼𑀲𑀸𑀭𑀺𑀦𑁄;

𑀔𑀬𑀲𑁆𑀫𑀺𑀁 𑀧𑀞𑀫𑀁 𑀜𑀸𑀡𑀁, 𑀢𑀢𑁄 𑀅𑀜𑁆𑀜𑀸 𑀅𑀦𑀦𑁆𑀢𑀭𑀸’’𑀢𑀺. (𑀇𑀢𑀺𑀯𑀼. 𑁬𑁨) 𑁋

𑀆𑀤𑀻𑀲𑀼 𑀫𑀕𑁆𑀕𑁄 𑀆𑀲𑀯𑀓𑁆𑀔𑀬𑁄𑀢𑀺 𑀯𑀼𑀢𑁆𑀢𑁄. ‘‘𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁩𑁮) 𑀨𑀮𑀁.

‘‘𑀧𑀭𑀯𑀚𑁆𑀚𑀸𑀦𑀼𑀧𑀲𑁆𑀲𑀺𑀲𑁆𑀲, 𑀦𑀺𑀘𑁆𑀘𑀁 𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑁄;

𑀆𑀲𑀯𑀸 𑀢𑀲𑁆𑀲 𑀯𑀟𑁆𑀠𑀦𑁆𑀢𑀺, 𑀆𑀭𑀸 𑀲𑁄 𑀆𑀲𑀯𑀓𑁆𑀔𑀬𑀸’’𑀢𑀺. 𑁋

𑀆𑀤𑀻𑀲𑀼 (𑀥. 𑀧. 𑁨𑁫𑁩) 𑀦𑀺𑀩𑁆𑀩𑀸𑀦𑀁. 𑀇𑀥 𑀧𑀦 𑀆𑀲𑀯𑀸𑀦𑀁 𑀅𑀘𑁆𑀘𑀦𑁆𑀢𑀔𑀬𑁄 𑀅𑀦𑀼𑀧𑁆𑀧𑀸𑀤𑁄 𑀯𑀸 𑀫𑀕𑁆𑀕𑁄 𑀯𑀸 ‘‘𑀆𑀲𑀯𑀸𑀦𑀁 𑀔𑀬𑁄’’𑀢𑀺 𑀯𑀼𑀢𑁆𑀢𑁄.

𑀅𑀦𑀸𑀲𑀯𑀦𑁆𑀢𑀺 𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀲𑀩𑁆𑀩𑀲𑁄 𑀧𑀳𑀻𑀦𑀸𑀲𑀯𑀁. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀁. 𑀉𑀪𑀬𑀯𑀘𑀦𑀁 𑀫𑀕𑁆𑀕𑁂 𑀯𑀺𑀬 𑀨𑀮𑁂𑀧𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀬𑀼𑀕𑀦𑀦𑁆𑀥𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀜𑀸𑀡𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀤𑁂𑀯𑀢𑀸𑀬 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 ‘‘𑀓𑀣𑀁 𑀦𑀼 𑀔𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 ‘‘𑀦𑀦𑁆𑀤𑁂𑀦 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢’’𑀦𑁆𑀢𑀺. 𑀲𑁄 𑀳𑀺 𑀆𑀬𑀲𑁆𑀫𑀸 𑀲𑀳𑀸𑀬𑀪𑀺𑀓𑁆𑀔𑀽𑀳𑀺 𑀢𑀣𑀸 𑀉𑀧𑁆𑀧𑀡𑁆𑀟𑀺𑀬𑀫𑀸𑀦𑁄 ‘‘𑀪𑀸𑀭𑀺𑀬𑀁 𑀯𑀢 𑀫𑀬𑀸 𑀓𑀢𑀁, 𑀬𑁄𑀳𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀘𑁆𑀙𑀭𑀸𑀦𑀁 𑀧𑀝𑀺𑀮𑀸𑀪𑀸𑀬 𑀲𑀢𑁆𑀣𑀸𑀭𑀁 𑀧𑀸𑀝𑀺𑀪𑁄𑀕𑀁 𑀅𑀓𑀸𑀲𑀺’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀪𑀕𑀯𑀦𑁆𑀢𑀁 𑀏𑀢𑀲𑁆𑀫𑀸 𑀧𑀝𑀺𑀲𑁆𑀲𑀯𑀸 𑀫𑁄𑀘𑁂𑀬𑁆𑀬’’𑀦𑁆𑀢𑀺. 𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀦𑁆𑀤𑁄…𑀧𑁂… 𑀏𑀢𑀲𑁆𑀫𑀸 𑀧𑀝𑀺𑀲𑁆𑀲𑀯𑀸’’𑀢𑀺. 𑀢𑀢𑁆𑀣 𑀧𑀝𑀺𑀲𑁆𑀲𑀯𑀸𑀢𑀺 𑀧𑀸𑀝𑀺𑀪𑁄𑀕𑀧𑁆𑀧𑀝𑀺𑀲𑁆𑀲𑀯𑀸, ‘‘𑀅𑀘𑁆𑀙𑀭𑀸𑀦𑀁 𑀧𑀝𑀺𑀮𑀸𑀪𑀸𑀬 𑀅𑀳𑀁 𑀧𑀝𑀺𑀪𑀽𑀢𑁄’’𑀢𑀺 𑀧𑀝𑀺𑀜𑁆𑀜𑀸𑀬.

𑀅𑀣𑀲𑁆𑀲 𑀪𑀕𑀯𑀸 ‘‘𑀬𑀲𑁆𑀫𑀸 𑀢𑀬𑀸 𑀅𑀜𑁆𑀜𑀸 𑀆𑀭𑀸𑀥𑀺𑀢𑀸𑀢𑀺 𑀜𑀸𑀢𑀫𑁂𑀢𑀁 𑀫𑀬𑀸, 𑀤𑁂𑀯𑀢𑀸𑀧𑀺 𑀫𑁂 𑀆𑀭𑁄𑀘𑁂𑀲𑀺, 𑀢𑀲𑁆𑀫𑀸 𑀦𑀸𑀳𑀁 𑀧𑀝𑀺𑀲𑁆𑀲𑀯𑀸 𑀇𑀤𑀸𑀦𑀺 𑀫𑁄𑀘𑁂𑀢𑀩𑁆𑀩𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸𑀯 𑀫𑁄𑀘𑀺𑀢𑀢𑁆𑀢𑀸’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀤𑁂𑀯 𑀔𑁄 𑀢𑁂 𑀦𑀦𑁆𑀤𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀤𑁂𑀯𑀸𑀢𑀺 𑀬𑀤𑀸 𑀏𑀯. 𑀢𑁂𑀢𑀺 𑀢𑀯. 𑀫𑀼𑀢𑁆𑀢𑁄𑀢𑀺 𑀧𑀫𑀼𑀢𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀆𑀲𑀯𑁂𑀳𑀺 𑀢𑀯 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁, 𑀅𑀣 𑀅𑀦𑀦𑁆𑀢𑀭𑀫𑁂𑀯𑀸𑀳𑀁 𑀢𑀢𑁄 𑀧𑀸𑀝𑀺𑀪𑁄𑀕𑀢𑁄 𑀫𑀼𑀢𑁆𑀢𑁄𑀢𑀺.

𑀲𑁄𑀧𑀺 𑀆𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀓𑀸𑀮𑁂𑀬𑁂𑀯 ‘‘𑀬𑀤𑁂𑀯𑀸𑀳𑀁 𑀇𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀁 𑀦𑀺𑀲𑁆𑀲𑀸𑀬 𑀇𑀫𑀁 𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑁄, 𑀢𑀫𑁂𑀯 𑀲𑀼𑀝𑁆𑀞𑀼 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀩𑀮𑀯𑀳𑀺𑀭𑁄𑀢𑁆𑀢𑀧𑁆𑀧𑁄 𑀢𑀢𑁆𑀣 𑀘 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀉𑀓𑁆𑀓𑀝𑁆𑀞𑀧𑀝𑀺𑀧𑀤𑀫𑁆𑀧𑀺 𑀅𑀕𑀫𑀸𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀲𑁆𑀲 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀆𑀮𑁄𑀓𑁂𑀢𑀩𑁆𑀩𑀸 𑀳𑁄𑀢𑀺, 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀦𑀦𑁆𑀤𑁄 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀆𑀮𑁄𑀓𑁂𑀢𑀺 ‘𑀏𑀯𑀁 𑀫𑁂 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀆𑀮𑁄𑀓𑀬𑀢𑁄 𑀦 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼’𑀦𑁆𑀢𑀺, 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀲𑁆𑀲 𑀧𑀘𑁆𑀙𑀺𑀫𑀸…𑀧𑁂… 𑀉𑀢𑁆𑀢𑀭𑀸… 𑀤𑀓𑁆𑀔𑀺𑀡𑀸… 𑀉𑀤𑁆𑀥𑀁… 𑀅𑀥𑁄… 𑀅𑀦𑀼𑀤𑀺𑀲𑀸 𑀆𑀮𑁄𑀓𑁂𑀢𑀩𑁆𑀩𑀸 𑀳𑁄𑀢𑀺, 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀦𑀦𑁆𑀤𑁄 𑀅𑀦𑀼𑀤𑀺𑀲𑀁 𑀆𑀮𑁄𑀓𑁂𑀢𑀺 ‘𑀏𑀯𑀁 𑀫𑁂…𑀧𑁂… 𑀲𑀫𑁆𑀧𑀚𑀸𑀦𑁄 𑀳𑁄𑀢𑀻’’’𑀢𑀺 (𑀅. 𑀦𑀺. 𑁮.𑁯).

𑀢𑁂𑀦𑁂𑀯 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀲𑀢𑁆𑀣𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀬𑀤𑀺𑀤𑀁 𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁩𑁦) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀆𑀬𑀲𑁆𑀫𑀢𑁄 𑀦𑀦𑁆𑀤𑀲𑁆𑀲 𑀲𑀩𑁆𑀩𑀸𑀲𑀯𑁂 𑀔𑁂𑀧𑁂𑀢𑁆𑀯𑀸 𑀲𑀼𑀔𑀸𑀤𑀻𑀲𑀼 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀢𑀤𑀢𑁆𑀣𑀯𑀺𑀪𑀸𑀯𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀲𑁆𑀲 𑀦𑀺𑀢𑁆𑀢𑀺𑀡𑁆𑀡𑁄 𑀧𑀗𑁆𑀓𑁄𑀢𑀺 𑀬𑁂𑀦 𑀅𑀭𑀺𑀬𑀧𑀼𑀕𑁆𑀕𑀮𑁂𑀦 𑀅𑀭𑀺𑀬𑀫𑀕𑁆𑀕𑀲𑁂𑀢𑀼𑀦𑀸 𑀲𑀩𑁆𑀩𑁄 𑀤𑀺𑀝𑁆𑀞𑀺𑀧𑀗𑁆𑀓𑁄 𑀲𑀁𑀲𑀸𑀭𑀧𑀗𑁆𑀓𑁄 𑀏𑀯 𑀯𑀸 𑀦𑀺𑀩𑁆𑀩𑀸𑀦𑀧𑀸𑀭𑀕𑀫𑀦𑁂𑀦 𑀢𑀺𑀡𑁆𑀡𑁄. 𑀫𑀤𑁆𑀤𑀺𑀢𑁄 𑀓𑀸𑀫𑀓𑀡𑁆𑀟𑀓𑁄𑀢𑀺 𑀬𑁂𑀦 𑀲𑀢𑁆𑀢𑀸𑀦𑀁 𑀯𑀺𑀚𑁆𑀛𑀦𑀢𑁄. ‘‘𑀓𑀸𑀫𑀓𑀡𑁆𑀟𑀓𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀲𑀩𑁆𑀩𑁄 𑀓𑀺𑀮𑁂𑀲𑀓𑀸𑀫𑁄 𑀲𑀩𑁆𑀩𑁄 𑀓𑀸𑀫𑀯𑀺𑀲𑀽𑀓𑁄 𑀅𑀕𑁆𑀕𑀜𑀸𑀡𑀤𑀡𑁆𑀟𑁂𑀦 𑀫𑀤𑁆𑀤𑀺𑀢𑁄 𑀪𑀕𑁆𑀕𑁄 𑀅𑀦𑀯𑀲𑁂𑀲𑀢𑁄 𑀫𑀣𑀺𑀢𑁄. 𑀫𑁄𑀳𑀓𑁆𑀔𑀬𑀁 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀏𑀯𑀁𑀪𑀽𑀢𑁄 𑀘 𑀤𑀼𑀓𑁆𑀔𑀸𑀤𑀺𑀯𑀺𑀲𑀬𑀲𑁆𑀲 𑀲𑀩𑁆𑀩𑀲𑁆𑀲 𑀲𑀫𑁆𑀫𑁄𑀳𑀲𑁆𑀲 𑀔𑁂𑀧𑀦𑁂𑀦 𑀫𑁄𑀳𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀭𑀳𑀢𑁆𑀢𑀨𑀮𑀁 𑀦𑀺𑀩𑁆𑀩𑀸𑀦𑀜𑁆𑀘 𑀅𑀦𑀼𑀧𑁆𑀧𑀢𑁆𑀢𑁄. 𑀲𑀼𑀔𑀤𑀼𑀓𑁆𑀔𑁂𑀲𑀼 𑀦 𑀯𑁂𑀥𑀢𑀻 𑀲 𑀪𑀺𑀓𑁆𑀔𑀽𑀢𑀺 𑀲𑁄 𑀪𑀺𑀦𑁆𑀦𑀓𑀺𑀮𑁂𑀲𑁄 𑀪𑀺𑀓𑁆𑀔𑀼 𑀇𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑀢𑁄 𑀉𑀧𑁆𑀧𑀦𑁆𑀦𑁂𑀲𑀼 𑀲𑀼𑀔𑁂𑀲𑀼 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑀢𑁄 𑀉𑀧𑁆𑀧𑀦𑁆𑀦𑁂𑀲𑀼 𑀤𑀼𑀓𑁆𑀔𑁂𑀲𑀼 𑀘 𑀦 𑀯𑁂𑀥𑀢𑀺 𑀦 𑀓𑀫𑁆𑀧𑀢𑀺, 𑀢𑀁 𑀦𑀺𑀫𑀺𑀢𑁆𑀢𑀁 𑀘𑀺𑀢𑁆𑀢𑀯𑀺𑀓𑀸𑀭𑀁 𑀦𑀸𑀧𑀚𑁆𑀚𑀢𑀺. ‘‘𑀲𑀼𑀔𑀤𑀼𑀓𑁆𑀔𑁂𑀲𑀽’’𑀢𑀺 𑀘 𑀤𑁂𑀲𑀦𑀸𑀫𑀢𑁆𑀢𑀁, 𑀲𑀩𑁆𑀩𑁂𑀲𑀼𑀧𑀺 𑀮𑁄𑀓𑀥𑀫𑁆𑀫𑁂𑀲𑀼 𑀦 𑀯𑁂𑀥𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀬𑀲𑁄𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀬𑀲𑁄𑀚𑀧𑁆𑀧𑀫𑀼𑀔𑀸𑀦𑀻𑀢𑀺 𑀏𑀢𑁆𑀣 𑀬𑀲𑁄𑀚𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁, 𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑀢𑁆𑀢𑀸 𑀯𑀺𑀘𑀭𑀡𑀢𑁄 𑀘 𑀢𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 ‘‘𑀬𑀲𑁄𑀚𑀧𑁆𑀧𑀫𑀼𑀔𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺.

𑀢𑁂𑀲𑀁 𑀅𑀬𑀁 𑀧𑀼𑀩𑁆𑀩𑀬𑁄𑀕𑁄 𑁋 𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀆𑀭𑀜𑁆𑀜𑀓𑁄 𑀅𑀭𑀜𑁆𑀜𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀓𑀢𑀧𑀡𑁆𑀡𑀓𑀼𑀝𑀺𑀬𑀁 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀕𑀸𑀫𑀖𑀸𑀢𑀓𑀸𑀤𑀻𑀦𑀺 𑀓𑀢𑁆𑀯𑀸 𑀘𑁄𑀭𑀺𑀓𑀸𑀬 𑀚𑀻𑀯𑀦𑁆𑀢𑀸 𑀘𑁄𑀭𑀓𑀫𑁆𑀫𑀁 𑀓𑀢𑁆𑀯𑀸 𑀚𑀦𑀧𑀤𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀩𑀤𑁆𑀥𑀸 𑀧𑀮𑀸𑀬𑀫𑀸𑀦𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀓𑀺𑀜𑁆𑀘𑀺 𑀕𑀳𑀡𑀁 𑀯𑀸 𑀧𑀝𑀺𑀲𑀭𑀡𑀁 𑀯𑀸 𑀅𑀧𑀲𑁆𑀲𑀦𑁆𑀢𑀸 𑀅𑀯𑀺𑀤𑀽𑀭𑁂 𑀢𑀁 𑀪𑀺𑀓𑁆𑀔𑀼𑀁 𑀧𑀸𑀲𑀸𑀡𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀧𑀝𑀺𑀲𑀭𑀡𑀁 𑀳𑁄𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀣𑁂𑀭𑁄 ‘‘𑀢𑀼𑀫𑁆𑀳𑀸𑀓𑀁 𑀲𑀻𑀮𑀲𑀤𑀺𑀲𑀁 𑀧𑀝𑀺𑀲𑀭𑀡𑀁 𑀦𑀢𑁆𑀣𑀺, 𑀲𑀩𑁆𑀩𑁂 𑀧𑀜𑁆𑀘 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀁𑀲𑀼. 𑀣𑁂𑀭𑁄 ‘‘𑀢𑀼𑀫𑁆𑀳𑁂 𑀇𑀤𑀸𑀦𑀺 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑀸, 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀯𑀺𑀦𑀸𑀲𑀬𑀦𑁆𑀢𑁂𑀲𑀼𑀧𑀺 𑀫𑀸 𑀫𑀦𑀁 𑀧𑀤𑁄𑀲𑀬𑀺𑀢𑁆𑀣𑀸’’𑀢𑀺 𑀓𑀓𑀘𑀽𑀧𑀫𑀯𑀺𑀥𑀺𑀁 (𑀫. 𑀦𑀺. 𑁧.𑁨𑁨𑁨 𑀆𑀤𑀬𑁄) 𑀆𑀘𑀺𑀓𑁆𑀔𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀅𑀣 𑀢𑁂 𑀚𑀸𑀦𑀧𑀤𑀸 𑀢𑀁 𑀲𑀫𑁆𑀧𑀢𑁆𑀢𑀸 𑀇𑀢𑁄 𑀘𑀺𑀢𑁄 𑀘 𑀕𑀯𑁂𑀲𑀦𑁆𑀢𑀸 𑀢𑁂 𑀘𑁄𑀭𑁂 𑀤𑀺𑀲𑁆𑀯𑀸 𑀲𑀩𑁆𑀩𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁. 𑀢𑁂 𑀢𑁂𑀲𑀼 𑀫𑀦𑁄𑀧𑀤𑁄𑀲𑀫𑀢𑁆𑀢𑀫𑁆𑀧𑀺 𑀅𑀓𑀢𑁆𑀯𑀸 𑀅𑀓𑁆𑀔𑀡𑁆𑀟𑀲𑀻𑀮𑀸 𑀓𑀸𑀮𑀁 𑀓𑀢𑁆𑀯𑀸 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀼 𑀚𑁂𑀝𑁆𑀞𑀘𑁄𑀭𑁄 𑀚𑁂𑀝𑁆𑀞𑀤𑁂𑀯𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀇𑀢𑀭𑁂 𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀸.

𑀢𑁂 𑀅𑀧𑀭𑀸𑀧𑀭𑀁 𑀲𑀁𑀲𑀭𑀦𑁆𑀢𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀮𑁄𑀓𑁂 𑀔𑁂𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀚𑁂𑀝𑁆𑀞𑀤𑁂𑀯𑀧𑀼𑀢𑁆𑀢𑁄 𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑁂 𑀓𑁂𑀯𑀝𑁆𑀝𑀕𑀸𑀫𑁂 𑀧𑀜𑁆𑀘𑀲𑀢𑀓𑀼𑀮𑀕𑀸𑀫𑀚𑁂𑀝𑁆𑀞𑀓𑀲𑁆𑀲 𑀓𑁂𑀯𑀝𑁆𑀝𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀬𑀲𑁄𑀚𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀇𑀢𑀭𑁂𑀧𑀺 𑀅𑀯𑀲𑁂𑀲𑀓𑁂𑀯𑀝𑁆𑀝𑀸𑀦𑀁 𑀧𑀼𑀢𑁆𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂 𑀧𑀼𑀩𑁆𑀩𑀲𑀦𑁆𑀦𑀺𑀯𑀸𑀲𑁂𑀦 𑀲𑀩𑁆𑀩𑁂𑀧𑀺 𑀲𑀳𑀸𑀬𑀓𑀸 𑀳𑀼𑀢𑁆𑀯𑀸 𑀲𑀳𑀧𑀁𑀲𑀼𑀓𑀻𑀴𑀺𑀢𑀁 𑀓𑀻𑀴𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀬𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁, 𑀬𑀲𑁄𑀚𑁄 𑀢𑁂𑀲𑀁 𑀅𑀕𑁆𑀕𑁄 𑀅𑀳𑁄𑀲𑀺. 𑀢𑁂 𑀲𑀩𑁆𑀩𑁂𑀯 𑀏𑀓𑀢𑁄 𑀳𑀼𑀢𑁆𑀯𑀸 𑀚𑀸𑀮𑀸𑀦𑀺 𑀕𑀳𑁂𑀢𑁆𑀯𑀸 𑀦𑀤𑀺𑀢𑀴𑀸𑀓𑀸𑀤𑀻𑀲𑀼 𑀫𑀘𑁆𑀙𑁂 𑀩𑀦𑁆𑀥𑀦𑁆𑀢𑀸 𑀯𑀺𑀘𑀭𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀚𑀸𑀮𑁂 𑀔𑀺𑀢𑁆𑀢𑁂 𑀲𑀼𑀯𑀡𑁆𑀡𑀯𑀡𑁆𑀡𑁄 𑀫𑀘𑁆𑀙𑁄 𑀅𑀦𑁆𑀢𑁄𑀚𑀸𑀮𑁂 𑀧𑀸𑀯𑀺𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑀩𑁆𑀩𑁂𑀧𑀺 𑀓𑁂𑀯𑀝𑁆𑀝𑀸 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀸 𑀫𑀘𑁆𑀙𑁂 𑀩𑀦𑁆𑀥𑀦𑁆𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀁 𑀫𑀘𑁆𑀙𑀁 𑀩𑀦𑁆𑀥𑀺𑀁𑀲𑀽’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀅𑀳𑁂𑀲𑀼𑀁. 𑀅𑀣 𑀢𑁂 𑀧𑀜𑁆𑀘𑀲𑀢𑀸𑀧𑀺 𑀲𑀳𑀸𑀬𑀓𑀸 𑀫𑀘𑁆𑀙𑀁 𑀦𑀸𑀯𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀸𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀪𑀕𑀯𑀸 𑀏𑀢𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑀓𑀸𑀭𑀡𑀁 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀫𑀘𑁆𑀙𑀁 𑀕𑀸𑀳𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀤𑀲𑁆𑀲𑁂𑀲𑀺. 𑀲𑀢𑁆𑀣𑀸 ‘‘𑀅𑀬𑀁 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀑𑀲𑀓𑁆𑀓𑀫𑀸𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀺𑀘𑁆𑀙𑀸 𑀧𑀝𑀺𑀧𑀚𑁆𑀚𑀦𑁆𑀢𑁄 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀘𑀺𑀭𑀯𑀢𑀺𑀬𑀁 𑀫𑀘𑁆𑀙𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀫𑀸𑀢𑀼𑀪𑀕𑀺𑀦𑀻𑀦𑀜𑁆𑀘 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀁, 𑀢𑀲𑁆𑀲 𑀪𑀸𑀢𑀺𑀓𑀢𑁆𑀣𑁂𑀭𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀜𑁆𑀘 𑀢𑁂𑀦𑁂𑀯 𑀓𑀣𑀸𑀧𑁂𑀢𑁆𑀯𑀸 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀓𑀧𑀺𑀮𑀲𑀼𑀢𑁆𑀢𑀁 𑀤𑁂𑀲𑁂𑀲𑀺.

𑀲𑀢𑁆𑀣𑀼 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀢𑁂 𑀧𑀜𑁆𑀘𑀲𑀢𑀸 𑀓𑁂𑀯𑀝𑁆𑀝𑀧𑀼𑀢𑁆𑀢𑀸 𑀲𑀁𑀯𑁂𑀕𑀚𑀸𑀢𑀸 𑀳𑀼𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸, 𑀉𑀧𑀲𑀫𑁆𑀧𑀦𑁆𑀦𑀸 𑀳𑀼𑀢𑁆𑀯𑀸 𑀯𑀺𑀯𑁂𑀓𑀯𑀸𑀲𑀁 𑀯𑀲𑀦𑁆𑀢𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀆𑀕𑀫𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀬𑀲𑁄𑀚𑀧𑁆𑀧𑀫𑀼𑀔𑀸𑀦𑀺 𑀧𑀜𑁆𑀘𑀫𑀢𑁆𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀻’’𑀢𑀺𑀆𑀤𑀺.

𑀢𑀢𑁆𑀣 𑀢𑁂𑀥𑀸𑀢𑀺 𑀢𑁂 𑀇𑀥. 𑀦𑁂𑀯𑀸𑀲𑀺𑀓𑁂𑀳𑀻𑀢𑀺 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀫𑀸𑀦𑁂𑀳𑀺. 𑀧𑀝𑀺𑀲𑀫𑁆𑀫𑁄𑀤𑀫𑀸𑀦𑀸𑀢𑀺 𑀦𑁂𑀯𑀸𑀲𑀺𑀓𑀪𑀺𑀓𑁆𑀔𑀽𑀳𑀺 ‘‘𑀓𑀘𑁆𑀘𑀸𑀯𑀼𑀲𑁄, 𑀔𑀫𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀧𑀝𑀺𑀲𑀦𑁆𑀣𑀸𑀭𑀯𑀲𑁂𑀦 𑀲𑀫𑁆𑀫𑁄𑀤𑀦𑀸𑀬 𑀓𑀢𑀸𑀬 ‘‘𑀆𑀫𑀸𑀯𑀼𑀲𑁄, 𑀔𑀫𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸, 𑀧𑀼𑀦 𑀲𑀫𑁆𑀫𑁄𑀤𑀫𑀸𑀦𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀸. 𑀲𑁂𑀦𑀸𑀲𑀦𑀸𑀦𑀺 𑀧𑀜𑁆𑀜𑀸𑀧𑀬𑀫𑀸𑀦𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀅𑀢𑁆𑀢𑀦𑁄 𑀘 𑀧𑀸𑀧𑀼𑀡𑀓𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 𑀦𑁂𑀯𑀸𑀲𑀺𑀓𑁂𑀳𑀺 𑀢𑁂𑀲𑀁 ‘‘𑀇𑀤𑀁 𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑀸𑀦𑀁, 𑀇𑀤𑀁 𑀢𑀼𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑀸𑀦𑀁, 𑀇𑀤𑀁 𑀢𑀼𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀲𑁂𑀦𑀸𑀲𑀦𑀸𑀦𑀺 𑀲𑀁𑀯𑀺𑀥𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀘 𑀢𑀢𑁆𑀣 𑀕𑀦𑁆𑀢𑁆𑀯𑀸, 𑀤𑁆𑀯𑀸𑀭𑀓𑀯𑀸𑀝𑀸𑀦𑀺 𑀯𑀺𑀯𑀭𑀺𑀢𑁆𑀯𑀸, 𑀫𑀜𑁆𑀘𑀧𑀻𑀞𑀓𑀝𑀲𑀸𑀭𑀓𑀸𑀤𑀻𑀦𑀺 𑀦𑀻𑀳𑀭𑀺𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀬𑀣𑀸𑀞𑀸𑀦𑀁 𑀞𑀧𑀦𑀸𑀤𑀺𑀯𑀲𑁂𑀦 𑀧𑀜𑁆𑀜𑀸𑀧𑁂𑀦𑁆𑀢𑀸 𑀘.

𑀧𑀢𑁆𑀢𑀘𑀻𑀯𑀭𑀸𑀦𑀺 𑀧𑀝𑀺𑀲𑀸𑀫𑀬𑀫𑀸𑀦𑀸𑀢𑀺, ‘‘𑀪𑀦𑁆𑀢𑁂, 𑀇𑀫𑀁 𑀫𑁂 𑀧𑀢𑁆𑀢𑀁 𑀞𑀧𑁂𑀣, 𑀇𑀤𑀁 𑀘𑀻𑀯𑀭𑀁, 𑀇𑀤𑀁 𑀣𑀸𑀮𑀓𑀁, 𑀇𑀤𑀁 𑀉𑀤𑀓𑀢𑀼𑀫𑁆𑀩𑀁, 𑀇𑀤𑀁 𑀫𑁂 𑀓𑀢𑁆𑀢𑀭𑀬𑀝𑁆𑀞𑀺’’𑀦𑁆𑀢𑀺 𑀏𑀯𑀁 𑀲𑀫𑀡𑀧𑀭𑀺𑀓𑁆𑀔𑀸𑀭𑀁 𑀲𑀁𑀕𑁄𑀧𑀬𑀫𑀸𑀦𑀸. 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸𑀢𑀺 𑀉𑀤𑁆𑀥𑀁 𑀕𑀢𑀝𑁆𑀞𑁂𑀦 𑀉𑀘𑁆𑀘𑁄 𑀲𑀤𑁆𑀤𑁄 𑀬𑁂𑀲𑀦𑁆𑀢𑁂 𑀉𑀘𑁆𑀘𑀸𑀲𑀤𑁆𑀤𑀸 𑀅𑀓𑀸𑀭𑀲𑁆𑀲 𑀆𑀓𑀸𑀭𑀁 𑀓𑀢𑁆𑀯𑀸. 𑀲𑀫𑀦𑁆𑀢𑀢𑁄 𑀧𑀢𑁆𑀣𑀝𑀝𑁆𑀞𑁂𑀦 𑀫𑀳𑀦𑁆𑀢𑁄 𑀲𑀤𑁆𑀤𑁄 𑀬𑁂𑀲𑀦𑁆𑀢𑁂 𑀫𑀳𑀸𑀲𑀤𑁆𑀤𑀸. 𑀓𑁂𑀯𑀝𑁆𑀝𑀸 𑀫𑀜𑁆𑀜𑁂 𑀫𑀘𑁆𑀙𑀯𑀺𑀮𑁄𑀧𑁂𑀢𑀺 𑀓𑁂𑀯𑀝𑁆𑀝𑀸 𑀯𑀺𑀬 𑀫𑀘𑁆𑀙𑀯𑀺𑀮𑀼𑀫𑁆𑀧𑀦𑁂. 𑀬𑀣𑀸 𑀦𑀸𑀫 𑀓𑁂𑀯𑀝𑁆𑀝𑀸 𑀉𑀤𑀓𑁂 𑀯𑀝𑁆𑀝𑀦𑀢𑁄 𑀫𑀘𑁆𑀙𑀕𑁆𑀕𑀳𑀡𑀢𑁆𑀣𑀁 𑀧𑀯𑀢𑁆𑀢𑀦𑀢𑁄 ‘‘𑀓𑁂𑀯𑀝𑁆𑀝𑀸’’𑀢𑀺 𑀮𑀤𑁆𑀥𑀦𑀸𑀫𑀸 𑀫𑀘𑁆𑀙𑀩𑀦𑁆𑀥𑀸 𑀫𑀘𑁆𑀙𑀕𑁆𑀕𑀳𑀡𑀢𑁆𑀣𑀁 𑀚𑀮𑁂 𑀚𑀸𑀮𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀧𑀯𑀺𑀝𑁆𑀞𑁄 𑀦 𑀧𑀯𑀺𑀝𑁆𑀞𑁄, 𑀕𑀳𑀺𑀢𑁄 𑀦 𑀕𑀳𑀺𑀢𑁄’’𑀢𑀺𑀆𑀤𑀺𑀦𑀸 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀳𑁄𑀦𑁆𑀢𑀺. 𑀬𑀣𑀸 𑀘 𑀢𑁂 𑀫𑀘𑁆𑀙𑀧𑀘𑁆𑀙𑀺𑀆𑀤𑀻𑀦𑀺 𑀞𑀧𑀺𑀢𑀝𑁆𑀞𑀸𑀦𑁂 𑀫𑀳𑀸𑀚𑀦𑁂 𑀕𑀦𑁆𑀢𑁆𑀯𑀸 ‘‘𑀫𑀬𑁆𑀳𑀁 𑀏𑀓𑀁 𑀫𑀘𑁆𑀙𑀁 𑀤𑁂𑀣, 𑀫𑀬𑁆𑀳𑀁 𑀏𑀓𑀁 𑀫𑀘𑁆𑀙𑀨𑀸𑀮𑀁 𑀤𑁂𑀣, 𑀅𑀫𑀼𑀓𑀲𑁆𑀲 𑀤𑀺𑀦𑁆𑀦𑁄 𑀫𑀳𑀦𑁆𑀢𑁄, 𑀫𑀬𑁆𑀳𑀁 𑀔𑀼𑀤𑁆𑀤𑀓𑁄’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀯𑀺𑀮𑀼𑀫𑁆𑀧𑀫𑀸𑀦𑁂 𑀢𑁂𑀲𑀁 𑀧𑀝𑀺𑀲𑁂𑀥𑀦𑀸𑀤𑀺𑀯𑀲𑁂𑀦 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀘 𑀳𑁄𑀦𑁆𑀢𑀺, 𑀏𑀯𑀫𑁂𑀢𑁂 𑀪𑀺𑀓𑁆𑀔𑀽𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀢𑁂𑀢𑀺 𑀢𑁂 𑀏𑀢𑁂. 𑀓𑀺𑀁𑀦𑀽𑀢𑀺 𑀓𑀺𑀲𑁆𑀲 𑀦𑀼, 𑀓𑀺𑀫𑀢𑁆𑀣𑀁 𑀦𑀽𑀢𑀺 𑀅𑀢𑁆𑀣𑁄. 𑀢𑁂𑀫𑁂𑀢𑀺 𑀢𑁂 𑀇𑀫𑁂. 𑀧𑀡𑀸𑀫𑁂𑀫𑀻𑀢𑀺 𑀦𑀻𑀳𑀭𑀸𑀫𑀺. 𑀯𑁄𑀢𑀺 𑀢𑀼𑀫𑁆𑀳𑁂. 𑀦 𑀯𑁄 𑀫𑀫 𑀲𑀦𑁆𑀢𑀺𑀓𑁂 𑀯𑀢𑁆𑀣𑀩𑁆𑀩𑀦𑁆𑀢𑀺 𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀲𑀦𑁆𑀢𑀺𑀓𑁂 𑀦 𑀯𑀲𑀺𑀢𑀩𑁆𑀩𑀁. 𑀬𑁂 𑀢𑀼𑀫𑁆𑀳𑁂 𑀫𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀏𑀯𑀁 𑀫𑀳𑀸𑀲𑀤𑁆𑀤𑀁 𑀓𑀭𑁄𑀣, 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀯𑀲𑀦𑁆𑀢𑀸 𑀓𑀺𑀁 𑀦𑀸𑀫 𑀲𑀸𑀭𑀼𑀧𑁆𑀧𑀁 𑀓𑀭𑀺𑀲𑁆𑀲𑀣, 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀫𑀫 𑀲𑀦𑁆𑀢𑀺𑀓𑁂 𑀯𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀏𑀯𑀁 𑀧𑀡𑀸𑀫𑀺𑀢𑁂𑀲𑀼 𑀘 𑀪𑀕𑀯𑀢𑀸 𑀢𑁂𑀲𑀼 𑀏𑀓𑀪𑀺𑀓𑁆𑀔𑀼𑀧𑀺 ‘‘𑀪𑀕𑀯𑀸 𑀢𑀼𑀫𑁆𑀳𑁂 𑀫𑀳𑀸𑀲𑀤𑁆𑀤𑀫𑀢𑁆𑀢𑀓𑁂𑀦 𑀅𑀫𑁆𑀳𑁂 𑀧𑀡𑀸𑀫𑁂𑀣𑀸’’𑀢𑀺 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀧𑀝𑀺𑀯𑀘𑀦𑀁 𑀅𑀯𑀢𑁆𑀯𑀸 𑀩𑀼𑀤𑁆𑀥𑀕𑀸𑀭𑀯𑁂𑀦 𑀲𑀩𑁆𑀩𑁂 𑀪𑀕𑀯𑀢𑁄 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀸 ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀏𑀯𑀁 𑀧𑀦 𑀢𑁂𑀲𑀁 𑀅𑀳𑁄𑀲𑀺 ‘‘𑀫𑀬𑀁 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫, 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀯𑀲𑀺𑀲𑁆𑀲𑀸𑀫𑀸𑀢𑀺 𑀆𑀕𑀢𑀸, 𑀏𑀯𑀭𑀽𑀧𑀲𑁆𑀲 𑀧𑀦 𑀕𑀭𑀼𑀦𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀓𑀭𑀺𑀫𑁆𑀳𑀸, 𑀅𑀫𑁆𑀳𑀸𑀓𑀫𑁂𑀯 𑀤𑁄𑀲𑁄𑀬𑀁, 𑀧𑀡𑀸𑀫𑀺𑀢𑀫𑁆𑀳𑀸 𑀢𑀢𑁄, 𑀦 𑀮𑀤𑁆𑀥𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀯𑀢𑁆𑀣𑀼𑀁, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀑𑀮𑁄𑀓𑁂𑀢𑀼𑀁, 𑀫𑀥𑀼𑀭𑀲𑁆𑀲𑀭𑁂𑀦 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑁄𑀢𑀼’’𑀦𑁆𑀢𑀺. 𑀢𑁂 𑀩𑀮𑀯𑀤𑁄𑀫𑀦𑀲𑁆𑀲𑀚𑀸𑀢𑀸 𑀳𑀼𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀲𑀁𑀲𑀸𑀫𑁂𑀢𑁆𑀯𑀸𑀢𑀺 𑀲𑀼𑀕𑀼𑀢𑁆𑀢𑀁 𑀓𑀢𑁆𑀯𑀸. 𑀯𑀚𑁆𑀚𑀻𑀢𑀺 𑀏𑀯𑀁𑀦𑀸𑀫𑀓𑁄 𑀚𑀦𑀧𑀤𑁄, 𑀯𑀚𑁆𑀚𑀻 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀯𑀲𑁂𑀦 ‘‘𑀯𑀚𑁆𑀚𑀻’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀚𑁆𑀚𑀻𑀲𑀽’’𑀢𑀺. 𑀯𑀕𑁆𑀕𑀼𑀫𑀼𑀤𑀸𑀢𑀺 𑀏𑀯𑀁𑀦𑀸𑀫 𑀮𑁄𑀓𑀲𑁆𑀲 𑀧𑀼𑀜𑁆𑀜𑀲𑀫𑁆𑀫𑀢𑀸 𑀏𑀓𑀸 𑀦𑀤𑀻. ‘‘𑀯𑀕𑁆𑀕𑀫𑀼𑀤𑀸’’𑀢𑀺𑀧𑀺 𑀧𑀸𑀞𑁄. 𑀅𑀢𑁆𑀣𑀓𑀸𑀫𑁂𑀦𑀸𑀢𑀺 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀅𑀢𑁆𑀣𑀫𑁂𑀯 𑀇𑀘𑁆𑀙𑀦𑁆𑀢𑁂𑀦. 𑀳𑀺𑀢𑁂𑀲𑀺𑀦𑀸𑀢𑀺 𑀅𑀢𑁆𑀣𑀁 𑀇𑀘𑁆𑀙𑀦𑁆𑀢𑁂𑀦, ‘‘𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀯𑀝𑁆𑀝𑀤𑀼𑀓𑁆𑀔𑀸 𑀧𑀭𑀺𑀫𑀼𑀘𑁆𑀘𑁂𑀬𑁆𑀬𑀼’’𑀦𑁆𑀢𑀺 𑀢𑀲𑁆𑀲 𑀅𑀢𑁆𑀣𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸 𑀳𑁂𑀢𑀼𑀪𑀽𑀢𑀲𑁆𑀲 𑀳𑀺𑀢𑀲𑁆𑀲 𑀏𑀲𑀦𑀲𑀻𑀮𑁂𑀦. 𑀢𑀢𑁄 𑀏𑀯 𑀅𑀢𑁆𑀢𑀦𑁄 𑀲𑀭𑀻𑀭𑀔𑁂𑀤𑀁 𑀅𑀕𑀡𑁂𑀢𑁆𑀯𑀸 𑀤𑀽𑀭𑁂𑀧𑀺 𑀯𑁂𑀦𑁂𑀬𑁆𑀬𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀦𑀼𑀓𑀫𑁆𑀧𑀦𑀢𑁄 𑀅𑀦𑀼𑀓𑀫𑁆𑀧𑀓𑁂𑀦. 𑀢𑀫𑁂𑀯 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀫𑀬𑀁 𑀧𑀡𑀸𑀫𑀺𑀢𑀸, 𑀦 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀸𑀤𑀺𑀧𑀘𑁆𑀘𑀸𑀲𑀻𑀲𑀸𑀬. 𑀬𑀲𑁆𑀫𑀸 𑀥𑀫𑁆𑀫𑀕𑀭𑀼𑀦𑁄 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸𑀯 𑀧𑀽𑀚𑁂𑀢𑀩𑁆𑀩𑀸, 𑀬𑁂 𑀉𑀘𑁆𑀘𑀸𑀲𑀤𑁆𑀤𑀓𑀭𑀡𑀫𑀢𑁆𑀢𑁂𑀧𑀺 𑀧𑀡𑀸𑀫𑁂𑀦𑁆𑀢𑀺, 𑀢𑀲𑁆𑀫𑀸 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀢𑀣𑀸 𑀯𑀺𑀳𑀸𑀭𑀁 𑀓𑀧𑁆𑀧𑁂𑀫 𑀲𑀩𑁆𑀩𑀢𑁆𑀣 𑀲𑀢𑀺𑀲𑀫𑁆𑀧𑀚𑀜𑁆𑀜𑀬𑁄𑀕𑁂𑀦 𑀅𑀧𑀡𑁆𑀡𑀓𑀧𑁆𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑀸 𑀬𑀣𑀸𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀦𑁆𑀢𑀸 𑀘𑀢𑀼𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀁 𑀓𑀧𑁆𑀧𑁂𑀫 𑀯𑀺𑀳𑀭𑀸𑀫. 𑀬𑀣𑀸 𑀦𑁄 𑀯𑀺𑀳𑀭𑀢𑀦𑁆𑀢𑀺 𑀬𑀣𑀸 𑀅𑀫𑁆𑀳𑁂𑀲𑀼 𑀯𑀺𑀳𑀭𑀦𑁆𑀢𑁂𑀲𑀼, 𑀪𑀕𑀯𑀸 𑀅𑀢𑁆𑀢𑀫𑀦𑁄 𑀅𑀲𑁆𑀲, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀧𑀽𑀚𑀸𑀬 𑀆𑀭𑀸𑀥𑀺𑀢𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀢𑁂𑀦𑁂𑀯𑀦𑁆𑀢𑀭𑀯𑀲𑁆𑀲𑁂𑀦𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀅𑀦𑁆𑀢𑀭𑀯𑀲𑁆𑀲𑁂 𑀫𑀳𑀸𑀧𑀯𑀸𑀭𑀡𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯. 𑀲𑀩𑁆𑀩𑁂𑀯 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀸𑀓𑀁𑀲𑀽𑀢𑀺 𑀲𑀩𑁆𑀩𑁂𑀬𑁂𑀯 𑀢𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀆𑀲𑀯𑀓𑁆𑀔𑀬𑀜𑀸𑀡𑀦𑁆𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀓𑁆𑀔𑀦𑁆𑀥𑀸𑀤𑀻𑀦𑀁 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦 𑀯𑀺𑀚𑁆𑀚𑀸 𑀅𑀢𑁆𑀢𑀧𑀘𑁆𑀘𑀓𑁆𑀔𑀸 𑀅𑀓𑀁𑀲𑀼. 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀼 𑀇𑀫𑀸𑀬𑁂𑀯 𑀤𑁆𑀯𑁂 𑀅𑀪𑀺𑀜𑁆𑀜𑀸 𑀆𑀲𑀯𑀓𑁆𑀔𑀬𑀜𑀸𑀡𑀲𑁆𑀲 𑀩𑀳𑀽𑀧𑀓𑀸𑀭𑀸, 𑀦 𑀢𑀣𑀸 𑀤𑀺𑀩𑁆𑀩𑀲𑁄𑀢𑀘𑁂𑀢𑁄𑀧𑀭𑀺𑀬𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀦𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀺𑀚𑁆𑀚𑀢𑁆𑀢𑀬𑀫𑁂𑀯𑁂𑀢𑁆𑀣 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀥𑀺𑀕𑀫𑀤𑀲𑁆𑀲𑀦𑀯𑀲𑁂𑀦 𑀉𑀤𑁆𑀥𑀝𑀁. 𑀢𑀣𑀸 𑀳𑀺 𑀯𑁂𑀭𑀜𑁆𑀚𑀲𑀼𑀢𑁆𑀢𑁂 (𑀅. 𑀦𑀺. 𑁮.𑁧𑁧) 𑀪𑀕𑀯𑀸 𑀯𑁂𑀭𑀜𑁆𑀚𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑁆𑀢𑀦𑁄 𑀅𑀥𑀺𑀕𑀫𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀚𑁆𑀚𑀢𑁆𑀢𑀬𑀫𑁂𑀯 𑀤𑁂𑀲𑁂𑀲𑀺, 𑀦 𑀤𑀺𑀩𑁆𑀩𑀲𑁄𑀢𑀜𑀸𑀡𑀸𑀤𑀻𑀦𑀁 𑀅𑀪𑀸𑀯𑀢𑁄. 𑀏𑀯𑀁 𑀢𑁂𑀲𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀯𑀺𑀚𑁆𑀚𑀫𑀸𑀦𑀸𑀦𑀺𑀧𑀺 𑀤𑀺𑀩𑁆𑀩𑀲𑁄𑀢𑀜𑀸𑀡𑀸𑀤𑀻𑀦𑀺 𑀦 𑀉𑀤𑁆𑀥𑀝𑀸𑀦𑀺. 𑀙𑀴𑀪𑀺𑀜𑁆𑀜𑀸 𑀳𑀺 𑀢𑁂 𑀪𑀺𑀓𑁆𑀔𑀽. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀯𑀕𑁆𑀕𑀼𑀫𑀼𑀤𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀅𑀦𑁆𑀢𑀭𑀳𑀺𑀢𑀸 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀪𑀕𑀯𑀢𑁄 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁂𑀲𑀼’’𑀦𑁆𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀇𑀤𑁆𑀥𑀺𑀯𑀴𑀜𑁆𑀚𑀦𑀁 𑀯𑀓𑁆𑀔𑀢𑀺.

𑀬𑀣𑀸𑀪𑀺𑀭𑀦𑁆𑀢𑀦𑁆𑀢𑀺 𑀬𑀣𑀸𑀪𑀺𑀭𑀢𑀺𑀁 𑀬𑀣𑀸𑀚𑁆𑀛𑀸𑀲𑀬𑀁. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑁆𑀢𑀸𑀦𑀁 𑀙𑀸𑀬𑀽𑀤𑀓𑀯𑀺𑀧𑀢𑁆𑀢𑀺𑀁 𑀯𑀸 𑀅𑀨𑀸𑀲𑀼𑀓𑀲𑁂𑀦𑀸𑀲𑀦𑀁 𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑀁 𑀯𑀸 𑀆𑀕𑀫𑁆𑀫 𑀅𑀦𑀪𑀺𑀭𑀢𑀺 𑀦𑀸𑀫 𑀦𑀢𑁆𑀣𑀺, 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀬𑀸 ‘‘𑀨𑀸𑀲𑀼𑀁 𑀯𑀺𑀳𑀭𑀸𑀫𑀸’’𑀢𑀺 𑀘𑀺𑀭𑀯𑀺𑀳𑀸𑀭𑁄𑀧𑀺 𑀦𑀢𑁆𑀣𑀺. 𑀬𑀢𑁆𑀣 𑀧𑀦 𑀪𑀕𑀯𑀢𑀺 𑀯𑀺𑀳𑀭𑀦𑁆𑀢𑁂 𑀫𑀦𑀼𑀲𑁆𑀲𑀸 𑀲𑀭𑀡𑁂𑀲𑀼 𑀯𑀸 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀲𑀻𑀮𑀸𑀦𑀺 𑀯𑀸 𑀲𑀫𑀸𑀤𑀺𑀬𑀦𑁆𑀢𑀺 𑀧𑀩𑁆𑀩𑀚𑀦𑁆𑀢𑀺, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀦𑀺 𑀯𑀸 𑀧𑀸𑀧𑀼𑀡𑀦𑁆𑀢𑀺, 𑀲𑀢𑁆𑀣𑀸 𑀢𑀸𑀲𑀼 𑀲𑀫𑁆𑀧𑀢𑁆𑀢𑀻𑀲𑀼 𑀢𑁂𑀲𑀁 𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀯𑀲𑀢𑀺, 𑀢𑀤𑀪𑀸𑀯𑁂 𑀧𑀓𑁆𑀓𑀫𑀢𑀺. 𑀢𑀤𑀸 𑀳𑀺 𑀲𑀸𑀯𑀢𑁆𑀣𑀺𑀬𑀁 𑀓𑀢𑁆𑀢𑀩𑁆𑀩𑀩𑀼𑀤𑁆𑀥𑀓𑀺𑀘𑁆𑀘𑀁 𑀦𑀸𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀻’’𑀢𑀺.

𑀘𑀸𑀭𑀺𑀓𑀁 𑀘𑀭𑀫𑀸𑀦𑁄𑀢𑀺 𑀅𑀤𑁆𑀥𑀸𑀦𑀕𑀫𑀦𑀁 𑀕𑀘𑁆𑀙𑀦𑁆𑀢𑁄. 𑀘𑀸𑀭𑀺𑀓𑀸 𑀘 𑀦𑀸𑀫𑁂𑀲𑀸 𑀪𑀕𑀯𑀢𑁄 𑀤𑀼𑀯𑀺𑀥𑀸 𑀢𑀼𑀭𑀺𑀢𑀘𑀸𑀭𑀺𑀓𑀸 𑀅𑀢𑀼𑀭𑀺𑀢𑀘𑀸𑀭𑀺𑀓𑀸𑀢𑀺. 𑀢𑀢𑁆𑀣 𑀤𑀽𑀭𑁂𑀧𑀺 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀩𑁄𑀥𑀦𑀢𑁆𑀣𑀁 𑀲𑀳𑀲𑀸 𑀕𑀫𑀦𑀁 𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫, 𑀲𑀸 𑀫𑀳𑀸𑀓𑀲𑁆𑀲𑀧𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀻𑀲𑀼 𑀤𑀝𑁆𑀞𑀩𑁆𑀩𑀸. 𑀬𑀸 𑀧𑀦 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀧𑀝𑀺𑀧𑀸𑀝𑀺𑀬𑀸 𑀤𑁂𑀯𑀲𑀺𑀓𑀁 𑀬𑁄𑀚𑀦𑀤𑁆𑀥𑀬𑁄𑀚𑀦𑀯𑀲𑁂𑀦 𑀧𑀺𑀡𑁆𑀟𑀧𑀸𑀢𑀘𑀭𑀺𑀬𑀸𑀤𑀻𑀳𑀺 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀕𑀘𑁆𑀙𑀢𑀺, 𑀅𑀬𑀁 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫, 𑀅𑀬𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑀤𑀯𑀲𑀭𑀻𑀢𑀺 𑀢𑁂𑀦 𑀅𑀯𑀲𑀭𑀺, 𑀢𑀁 𑀯𑀸 𑀅𑀯𑀲𑀭𑀺, 𑀢𑀢𑁆𑀣 𑀅𑀯𑀲𑀭𑀺, 𑀧𑀸𑀯𑀺𑀲𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀭𑀸𑀢𑀺 𑀢𑀲𑁆𑀲𑀁. 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀯𑁂𑀲𑀸𑀮𑀺𑀬𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀲𑀸𑀮𑀻𑀪𑀽𑀢𑀢𑁆𑀢𑀸 ‘‘𑀯𑁂𑀲𑀸𑀮𑀻’’𑀢𑀺 𑀮𑀤𑁆𑀥𑀦𑀸𑀫𑁂 𑀮𑀺𑀘𑁆𑀙𑀯𑀺𑀭𑀸𑀚𑀽𑀦𑀁 𑀦𑀕𑀭𑁂. 𑀫𑀳𑀸𑀯𑀦𑁂𑀢𑀺 𑀫𑀳𑀸𑀯𑀦𑀁 𑀦𑀸𑀫 𑀲𑀬𑀁𑀚𑀸𑀢𑀁 𑀅𑀭𑁄𑀧𑀺𑀫𑀁 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀁. 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑀸 𑀧𑀦 𑀫𑀳𑀸𑀯𑀦𑀁 𑀳𑀺𑀫𑀯𑀦𑁆𑀢𑁂𑀦 𑀲𑀳 𑀏𑀓𑀸𑀩𑀤𑁆𑀥𑀁 𑀅𑀧𑀭𑀺𑀘𑁆𑀙𑁂𑀤𑀁 𑀳𑀼𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀆𑀳𑀘𑁆𑀘 𑀞𑀺𑀢𑀁. 𑀇𑀤𑀁 𑀢𑀸𑀤𑀺𑀲𑀁 𑀦 𑀳𑁄𑀢𑀺, 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀦𑁆𑀢𑀺 𑀫𑀳𑀸𑀯𑀦𑀁. 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀦𑁆𑀢𑀺 𑀢𑀲𑁆𑀫𑀺𑀁 𑀫𑀳𑀸𑀯𑀦𑁂 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀓𑀢𑁂 𑀆𑀭𑀸𑀫𑁂 𑀓𑀽𑀝𑀸𑀕𑀸𑀭𑀁 𑀅𑀦𑁆𑀢𑁄 𑀓𑀢𑁆𑀯𑀸 𑀳𑀁𑀲𑀯𑀝𑁆𑀝𑀓𑀘𑁆𑀙𑀦𑁆𑀦𑁂𑀦 𑀓𑀢𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺 𑀓𑀽𑀝𑀸𑀕𑀸𑀭𑀲𑀸𑀮𑀸 𑀦𑀸𑀫, 𑀢𑀲𑁆𑀲𑀁 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀸𑀦𑀦𑁆𑀢𑀺 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀯𑀸𑀲𑀻𑀦𑀁. 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀫𑀦𑀲𑀺 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦 𑀢𑁂𑀲𑀁 𑀘𑀺𑀢𑁆𑀢𑀁 𑀧𑀭𑀺𑀘𑁆𑀙𑀺𑀚𑁆𑀚 𑀫𑀦𑀲𑀺 𑀓𑀭𑀺𑀢𑁆𑀯𑀸, 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀯𑀸 𑀢𑁂𑀳𑀺 𑀅𑀥𑀺𑀕𑀢𑀯𑀺𑀲𑁂𑀲𑀁 𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀆𑀮𑁄𑀓𑀚𑀸𑀢𑀸 𑀯𑀺𑀬𑀸𑀢𑀺 𑀲𑀜𑁆𑀚𑀸𑀢𑀸𑀮𑁄𑀓𑀸 𑀯𑀺𑀬. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀘𑀦𑁆𑀤𑀲𑀳𑀲𑁆𑀲𑀲𑀽𑀭𑀺𑀬𑀲𑀳𑀲𑁆𑀲𑁂𑀳𑀺 𑀑𑀪𑀸𑀲𑀺𑀢𑀸 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀢𑁂 𑀬𑀲𑁄𑀚𑀧𑁆𑀧𑀫𑀼𑀔𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀲𑀩𑁆𑀩𑀲𑁄 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀯𑀺𑀥𑀫𑀦𑁂𑀦 𑀆𑀮𑁄𑀓𑀪𑀽𑀢𑀸 𑀑𑀪𑀸𑀲𑀪𑀽𑀢𑀸 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀢𑁂𑀳𑀺 𑀞𑀺𑀢𑀤𑀺𑀲𑀸𑀬 ‘‘𑀆𑀮𑁄𑀓𑀚𑀸𑀢𑀸 𑀯𑀺𑀬 𑀫𑁂, 𑀆𑀦𑀦𑁆𑀤, 𑀏𑀲𑀸 𑀤𑀺𑀲𑀸’’𑀢𑀺𑀆𑀤𑀺𑀦𑀸 𑀯𑀡𑁆𑀡𑀪𑀡𑀦𑀸𑀧𑀤𑁂𑀲𑁂𑀦 𑀢𑁂 𑀪𑀺𑀓𑁆𑀔𑀽 𑀧𑀲𑀁𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀲𑁆𑀲𑀁 𑀤𑀺𑀲𑀸𑀬𑀁 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀻’’𑀢𑀺. 𑀅𑀧𑁆𑀧𑀝𑀺𑀓𑀽𑀮𑀸𑀢𑀺 𑀦 𑀧𑀝𑀺𑀓𑀽𑀮𑀸, 𑀫𑀦𑀸𑀧𑀸 𑀫𑀦𑁄𑀳𑀭𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀺𑀜𑁆𑀳𑀺 𑀧𑀤𑁂𑀲𑁂 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸 𑀫𑀳𑁂𑀲𑀺𑀦𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀓𑀺𑀜𑁆𑀘𑀸𑀧𑀺 𑀉𑀓𑁆𑀓𑀽𑀮𑀯𑀺𑀓𑀽𑀮𑀯𑀺𑀲𑀫𑀤𑀼𑀕𑁆𑀕𑀸𑀓𑀸𑀭𑀁, 𑀅𑀣 𑀔𑁄 𑀫𑀦𑀼𑀜𑁆𑀜𑀁 𑀭𑀫𑀡𑀻𑀬𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓’’𑀦𑁆𑀢𑀺. (𑀥. 𑀧. 𑁯𑁮);

𑀧𑀳𑀺𑀡𑁂𑀬𑁆𑀬𑀸𑀲𑀻𑀢𑀺 𑀧𑁂𑀲𑁂𑀬𑁆𑀬𑀸𑀲𑀺. 𑀲𑀢𑁆𑀣𑀸 𑀆𑀬𑀲𑁆𑀫𑀦𑁆𑀢𑀸𑀦𑀁 𑀤𑀲𑁆𑀲𑀦𑀓𑀸𑀫𑁄𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀧𑀳𑁂𑀡𑀸𑀓𑀸𑀭𑀤𑀲𑁆𑀲𑀦𑀁. 𑀇𑀢𑀺 𑀪𑀕𑀯𑀸 𑀬𑀤𑀢𑁆𑀣𑀁 𑀢𑁂 𑀪𑀺𑀓𑁆𑀔𑀽 𑀧𑀡𑀸𑀫𑁂𑀲𑀺, 𑀢𑀫𑀢𑁆𑀣𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀤𑀺𑀲𑁆𑀯𑀸 𑀆𑀭𑀤𑁆𑀥𑀘𑀺𑀢𑁆𑀢𑁄 𑀢𑁂𑀲𑀁 𑀤𑀲𑁆𑀲𑀦𑀓𑀸𑀫𑀢𑀁 𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀅𑀳𑀁 𑀇𑀫𑁂 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀓𑀭𑀡𑁂 𑀧𑀡𑀸𑀫𑁂𑀲𑁆𑀲𑀸𑀫𑀺, 𑀅𑀣 𑀢𑁂 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀯𑀺𑀬 𑀓𑀲𑀸𑀪𑀺𑀖𑀸𑀢𑁂𑀦, 𑀢𑁂𑀦 𑀘𑁄𑀤𑀺𑀢𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑀸 𑀫𑀫𑀸𑀭𑀸𑀥𑀦𑀢𑁆𑀣𑀁 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀖𑀝𑁂𑀦𑁆𑀢𑀸 𑀯𑀸𑀬𑀫𑀦𑁆𑀢𑀸 𑀔𑀺𑀧𑁆𑀧𑀫𑁂𑀯 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀇𑀤𑀸𑀦𑀺 𑀢𑁂 𑀅𑀕𑁆𑀕𑀨𑀮𑀧𑁆𑀧𑀢𑁆𑀢𑁂 𑀤𑀺𑀲𑁆𑀯𑀸 𑀢𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀆𑀭𑀸𑀥𑀺𑀢𑀘𑀺𑀢𑁆𑀢𑁄 𑀢𑁂𑀲𑀁 𑀤𑀲𑁆𑀲𑀦𑀓𑀸𑀫𑁄 𑀳𑀼𑀢𑁆𑀯𑀸 𑀏𑀯𑀁 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀆𑀡𑀸𑀧𑁂𑀲𑀺.

𑀲𑁄 𑀪𑀺𑀓𑁆𑀔𑀽𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀢𑀣𑀸 𑀆𑀡𑀢𑁆𑀢𑁄 𑀙𑀴𑀪𑀺𑀜𑁆𑀜𑁄 𑀏𑀓𑁄 𑀪𑀺𑀓𑁆𑀔𑀼. 𑀧𑀫𑀼𑀔𑁂𑀢𑀺 𑀲𑀫𑁆𑀫𑀼𑀔𑁂. 𑀆𑀦𑁂𑀜𑁆𑀚𑀲𑀫𑀸𑀥𑀺𑀦𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀓𑁂𑀦 𑀅𑀕𑁆𑀕𑀨𑀮𑀲𑀫𑀸𑀥𑀺𑀦𑀸, ‘‘𑀅𑀭𑀽𑀧𑀚𑁆𑀛𑀸𑀦𑀧𑀸𑀤𑀓𑁂𑀦𑀸’’𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀆𑀦𑁂𑀜𑁆𑀚𑁂𑀦 𑀲𑀫𑀸𑀥𑀺𑀦𑀸’’𑀢𑀺𑀧𑀺 𑀧𑀸𑀞𑁄. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀆𑀕𑀫𑀦𑀁 𑀚𑀸𑀦𑀦𑁆𑀢𑁄 𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁𑀬𑁂𑀯 𑀲𑀫𑀸𑀧𑀚𑁆𑀚𑀺? 𑀢𑁂𑀲𑀁 𑀅𑀢𑁆𑀢𑀦𑀸 𑀲𑀫𑀸𑀧𑀦𑁆𑀦𑀲𑀫𑀸𑀧𑀢𑁆𑀢𑀺𑀁 𑀚𑀸𑀦𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀦𑀢𑁆𑀣𑀁, 𑀢𑁂𑀲𑀁 𑀧𑀼𑀩𑁆𑀩𑁂 𑀧𑀡𑀸𑀫𑀺𑀢𑀸𑀦𑀁 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀲𑀫𑀸𑀦𑀲𑀫𑁆𑀪𑁄𑀕𑀤𑀲𑁆𑀲𑀦𑀢𑁆𑀣𑀁, 𑀆𑀦𑀼𑀪𑀸𑀯𑀤𑀻𑀧𑀦𑀢𑁆𑀣𑀁, 𑀯𑀺𑀦𑀸 𑀯𑀘𑀻𑀪𑁂𑀤𑁂𑀦 𑀅𑀜𑁆𑀜𑀩𑁆𑀬𑀸𑀓𑀭𑀡𑀤𑀻𑀧𑀦𑀢𑁆𑀣𑀜𑁆𑀘. 𑀅𑀧𑀭𑁂 𑀧𑀦𑀸𑀳𑀼 ‘‘𑀧𑀼𑀩𑁆𑀩𑁂 𑀧𑀡𑀸𑀫𑀺𑀢𑀸𑀦𑀁 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀸𑀦𑀁 𑀅𑀦𑀼𑀢𑁆𑀢𑀭𑀲𑀼𑀔𑀼𑀧𑁆𑀧𑀸𑀤𑀦𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀧𑀝𑀺𑀲𑀦𑁆𑀣𑀸𑀭𑀓𑀭𑀡𑀢𑁆𑀣’’𑀦𑁆𑀢𑀺. 𑀢𑁂𑀧𑀺 𑀆𑀬𑀲𑁆𑀫𑀦𑁆𑀢𑁄 𑀪𑀕𑀯𑀢𑁄 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 𑀢𑀁𑀬𑁂𑀯 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀓𑀢𑀫𑁂𑀦 𑀦𑀼 𑀔𑁄 𑀪𑀕𑀯𑀸 𑀯𑀺𑀳𑀸𑀭𑁂𑀦 𑀏𑀢𑀭𑀳𑀺 𑀯𑀺𑀳𑀭𑀢𑀻’’𑀢𑀺𑀆𑀤𑀺.

𑀏𑀢𑁆𑀣 𑀘 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀓𑁄𑀲𑀚𑁆𑀚𑀸𑀤𑀻𑀦𑀁 𑀧𑀸𑀭𑀺𑀧𑀦𑁆𑀢𑀺𑀓𑀥𑀫𑁆𑀫𑀸𑀦𑀁 𑀲𑀼𑀯𑀺𑀤𑀽𑀭𑀪𑀸𑀯𑀢𑁄 𑀇𑀤𑁆𑀥𑀺𑀬𑀸 𑀫𑀽𑀮𑀪𑀽𑀢𑁂𑀳𑀺 𑀅𑀦𑁄𑀡𑀫𑀦𑀸𑀤𑀻𑀳𑀺 𑀲𑁄𑀴𑀲𑀳𑀺 𑀯𑁄𑀤𑀸𑀦𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀫𑀦𑀢𑁄 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀲𑀬𑀁 𑀅𑀦𑀺𑀜𑁆𑀚𑀦𑀝𑁆𑀞𑁂𑀦 𑀆𑀦𑁂𑀜𑁆𑀚𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀦𑁄𑀡𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀅𑀦𑀼𑀡𑁆𑀡𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀅𑀦𑀪𑀺𑀭𑀢𑀁 𑀘𑀺𑀢𑁆𑀢𑀁 𑀭𑀸𑀕𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀅𑀦𑀧𑀦𑀢𑀁 𑀘𑀺𑀢𑁆𑀢𑀁 𑀩𑁆𑀬𑀸𑀧𑀸𑀤𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀅𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑀁 𑀤𑀺𑀝𑁆𑀞𑀺𑀬𑀸 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀅𑀧𑁆𑀧𑀝𑀺𑀩𑀤𑁆𑀥𑀁 𑀘𑀺𑀢𑁆𑀢𑀁 𑀙𑀦𑁆𑀤𑀭𑀸𑀕𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀯𑀺𑀧𑁆𑀧𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀓𑀸𑀫𑀭𑀸𑀕𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀯𑀺𑀲𑀁𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀓𑀺𑀮𑁂𑀲𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀯𑀺𑀫𑀭𑀺𑀬𑀸𑀤𑀺𑀓𑀢𑀁 𑀘𑀺𑀢𑁆𑀢𑀁 𑀓𑀺𑀮𑁂𑀲𑀫𑀭𑀺𑀬𑀸𑀤𑀸𑀬 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀏𑀓𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀦𑀸𑀦𑀢𑁆𑀢𑀓𑀺𑀮𑁂𑀲𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀲𑀤𑁆𑀥𑀸𑀬 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀅𑀲𑁆𑀲𑀤𑁆𑀥𑀺𑀬𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀯𑀻𑀭𑀺𑀬𑁂𑀦 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀲𑀢𑀺𑀬𑀸 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀧𑀫𑀸𑀤𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀲𑀫𑀸𑀥𑀺𑀦𑀸 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀧𑀜𑁆𑀜𑀸𑀬 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀅𑀯𑀺𑀚𑁆𑀚𑀸𑀬 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑀁. 𑀑𑀪𑀸𑀲𑀕𑀢𑀁 𑀘𑀺𑀢𑁆𑀢𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑁂 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚’’𑀦𑁆𑀢𑀺.

𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯 𑀘 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀺𑀢𑀁, 𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀦 𑀘𑀢𑀼𑀩𑁆𑀩𑀺𑀥𑀁 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀦𑁆𑀢𑀺 𑀏𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀛𑀸𑀦𑀸𑀦𑀁 𑀆𑀦𑁂𑀜𑁆𑀚𑀯𑁄𑀳𑀸𑀭𑁄. 𑀢𑁂𑀲𑀁 𑀬𑀁 𑀓𑀺𑀜𑁆𑀘𑀺 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀫𑀸𑀧𑀦𑁆𑀦𑀸 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺 𑀆𑀦𑁂𑀜𑁆𑀚𑀲𑀫𑀸𑀥𑀻𑀢𑀺 𑀧𑁄𑀭𑀸𑀡𑀸.

𑀅𑀪𑀺𑀓𑁆𑀓𑀦𑁆𑀢𑀸𑀬𑀸𑀢𑀺 𑀅𑀢𑀻𑀢𑀸𑀬. 𑀦𑀺𑀓𑁆𑀔𑀦𑁆𑀢𑁂𑀢𑀺 𑀦𑀺𑀕𑁆𑀕𑀢𑁂, 𑀅𑀧𑀕𑀢𑁂𑀢𑀺 𑀅𑀢𑁆𑀣𑁄. 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀪𑀕𑀯𑀸 𑀅𑀭𑀺𑀬𑁂𑀦 𑀢𑀼𑀡𑁆𑀳𑀻𑀪𑀸𑀯𑁂𑀦 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂𑀢𑀺 𑀉𑀕𑁆𑀕𑀢𑁂 𑀅𑀭𑀼𑀡𑁂, 𑀅𑀭𑀼𑀡𑁄 𑀦𑀸𑀫 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀲𑀽𑀭𑀺𑀬𑁄𑀤𑀬𑀢𑁄 𑀧𑀼𑀭𑁂𑀢𑀭𑀫𑁂𑀯 𑀉𑀝𑁆𑀞𑀺𑀢𑁄𑀪𑀸𑀲𑁄. 𑀦𑀦𑁆𑀤𑀺𑀫𑀼𑀔𑀺𑀬𑀸𑀢𑀺 𑀭𑀢𑁆𑀢𑀺𑀬𑀸 𑀅𑀭𑀼𑀡𑀲𑁆𑀲 𑀉𑀕𑁆𑀕𑀢𑀢𑁆𑀢𑀸 𑀏𑀯 𑀅𑀭𑀼𑀡𑀧𑁆𑀧𑀪𑀸𑀬 𑀲𑀽𑀭𑀺𑀬𑀸𑀮𑁄𑀓𑀽𑀧𑀚𑀻𑀯𑀺𑀦𑁄 𑀲𑀢𑁆𑀢𑁂 𑀦𑀦𑁆𑀤𑀸𑀧𑀦𑀫𑀼𑀔𑀺𑀬𑀸 𑀯𑀺𑀬 𑀭𑀢𑁆𑀢𑀺𑀬𑀸 𑀚𑀸𑀢𑀸𑀬, 𑀯𑀺𑀪𑀸𑀬𑀫𑀸𑀦𑀸𑀬𑀸𑀢𑀺 𑀅𑀢𑁆𑀣𑁄.

𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀬𑀣𑀸𑀧𑀭𑀺𑀘𑁆𑀙𑁂𑀤𑀁 𑀢𑀢𑁄 𑀆𑀦𑁂𑀜𑁆𑀚𑀲𑀫𑀸𑀥𑀺𑀢𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀉𑀝𑁆𑀞𑀸𑀬. 𑀲𑀘𑁂 𑀔𑁄 𑀢𑁆𑀯𑀁, 𑀆𑀦𑀦𑁆𑀤, 𑀚𑀸𑀦𑁂𑀬𑁆𑀬𑀸𑀲𑀻𑀢𑀺 𑀪𑀕𑀯𑀸 ‘‘𑀇𑀫𑁂 𑀘 𑀪𑀺𑀓𑁆𑀔𑀽 𑀏𑀢𑁆𑀢𑀓𑀁 𑀓𑀸𑀮𑀁 𑀇𑀫𑀺𑀦𑀸 𑀦𑀸𑀫 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀻’’𑀢𑀺, 𑀆𑀦𑀦𑁆𑀤, 𑀬𑀤𑀺 𑀢𑁆𑀯𑀁 𑀚𑀸𑀦𑁂𑀬𑁆𑀬𑀸𑀲𑀺. 𑀏𑀢𑁆𑀢𑀓𑀫𑁆𑀧𑀺 𑀢𑁂 𑀦𑀧𑁆𑀧𑀝𑀺𑀪𑀸𑀲𑁂𑀬𑁆𑀬𑀸𑀢𑀺 𑀮𑁄𑀓𑀺𑀬𑀧𑀝𑀺𑀲𑀫𑁆𑀫𑁄𑀤𑀦𑀁 𑀲𑀦𑁆𑀥𑀸𑀬 𑀬𑀤𑀺𑀤𑀁 𑀢𑁂 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀪𑀸𑀦𑀁 𑀉𑀧𑀝𑁆𑀞𑀺𑀢𑀁, 𑀢𑀬𑀺𑀤𑀁 𑀏𑀢𑁆𑀢𑀓𑀫𑁆𑀧𑀺 𑀢𑁂 𑀦 𑀉𑀧𑀝𑁆𑀞𑀳𑁂𑀬𑁆𑀬. 𑀬𑀲𑁆𑀫𑀸 𑀘 𑀔𑁄 𑀢𑁆𑀯𑀁, 𑀆𑀦𑀦𑁆𑀤, 𑀲𑁂𑀓𑁆𑀔𑁄 𑀅𑀲𑁂𑀓𑁆𑀔𑀁 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀁 𑀦 𑀚𑀸𑀦𑀸𑀲𑀺, 𑀢𑀲𑁆𑀫𑀸 𑀫𑀁 𑀇𑀫𑁂𑀲𑀁 𑀪𑀺𑀓𑁆𑀔𑀽𑀦𑀁 𑀮𑁄𑀓𑀺𑀬𑀧𑀝𑀺𑀲𑀫𑁆𑀫𑁄𑀤𑀦𑀁 𑀓𑀸𑀭𑁂𑀢𑀼𑀁 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀺. 𑀅𑀳𑀁 𑀧𑀦 𑀇𑀫𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀮𑁄𑀓𑀼𑀢𑁆𑀢𑀭𑀧𑀝𑀺𑀲𑀫𑁆𑀫𑁄𑀤𑀦𑁂𑀦𑁂𑀯 𑀢𑀺𑀬𑀸𑀫𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀲𑀺𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀆𑀳 𑁋 ‘‘𑀅𑀳𑀜𑁆𑀘, 𑀆𑀦𑀦𑁆𑀤, 𑀇𑀫𑀸𑀦𑀺 𑀘 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀲𑀩𑁆𑀩𑁂𑀯 𑀆𑀦𑁂𑀜𑁆𑀚𑀲𑀫𑀸𑀥𑀺𑀦𑀸 𑀦𑀺𑀲𑀻𑀤𑀺𑀫𑁆𑀳𑀸’’𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀢𑁆𑀢𑀦𑀸 𑀲𑀫𑀁 𑀆𑀦𑁂𑀜𑁆𑀚𑀲𑀫𑀸𑀥𑀺𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸𑀲𑀗𑁆𑀔𑀸𑀢𑀁 𑀯𑀲𑀻𑀪𑀸𑀯𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑀯𑀲𑁂𑀲𑀭𑀸𑀕𑀸𑀤𑀺𑀧𑁆𑀧𑀳𑀸𑀦𑀲𑀁𑀲𑀺𑀤𑁆𑀥𑀺𑀢𑀸𑀤𑀺𑀲𑀪𑀸𑀯𑀤𑀻𑀧𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀲𑁆𑀲 𑀚𑀺𑀢𑁄 𑀓𑀸𑀫𑀓𑀡𑁆𑀟𑀓𑁄𑀢𑀺 𑀓𑀼𑀲𑀮𑀧𑀓𑁆𑀔𑀯𑀺𑀚𑁆𑀛𑀦𑀝𑁆𑀞𑁂𑀦 𑀓𑀡𑁆𑀟𑀓𑀪𑀽𑀢𑁄 𑀓𑀺𑀮𑁂𑀲𑀓𑀸𑀫𑁄 𑀬𑁂𑀦 𑀅𑀭𑀺𑀬𑀧𑀼𑀕𑁆𑀕𑀮𑁂𑀦 𑀅𑀦𑀯𑀲𑁂𑀲𑀁 𑀚𑀺𑀢𑁄 𑀧𑀳𑀻𑀦𑁄, 𑀏𑀢𑁂𑀦𑀲𑁆𑀲 𑀅𑀦𑀼𑀦𑀬𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀕𑀸𑀫𑀓𑀡𑁆𑀝𑀓𑁄’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀕𑀸𑀫𑁂 𑀓𑀡𑁆𑀝𑀓𑁄 𑀓𑀡𑁆𑀝𑀓𑀝𑁆𑀞𑀸𑀦𑀺𑀬𑁄 𑀲𑀓𑀮𑁄 𑀯𑀢𑁆𑀣𑀼𑀓𑀸𑀫𑁄 𑀬𑀲𑁆𑀲 𑀚𑀺𑀢𑁄𑀢𑀺. 𑀚𑀬𑁄 𑀘𑀲𑁆𑀲 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀦 𑀢𑁂𑀲𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀅𑀓𑁆𑀓𑁄𑀲𑁄 𑀘 𑀚𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀥𑁄 𑀘 𑀩𑀦𑁆𑀥𑀦𑀜𑁆𑀘𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀲𑀼 𑀅𑀓𑁆𑀓𑁄𑀲𑀚𑀬𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀪𑀸𑀯𑁄, 𑀇𑀢𑀭𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀢𑁂𑀦 𑀢𑀁𑀦𑀺𑀫𑀺𑀢𑁆𑀢𑀓𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑁂𑀦 𑀢𑀢𑀺𑀬𑀫𑀕𑁆𑀕𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀅𑀣 𑀯𑀸 𑀅𑀓𑁆𑀓𑁄𑀲𑀸𑀤𑀺𑀚𑀬𑀯𑀘𑀦𑁂𑀦 𑀢𑀢𑀺𑀬𑀫𑀕𑁆𑀕𑁄 𑀯𑀼𑀢𑁆𑀢𑁄 𑀳𑁄𑀢𑀺, 𑀅𑀓𑁆𑀓𑁄𑀲𑀸𑀤𑀻𑀦𑀁 𑀅𑀘𑁆𑀘𑀦𑁆𑀢𑀔𑀫𑀦𑀁 𑀢𑀢𑁆𑀣 𑀧𑀓𑀸𑀲𑀺𑀢𑀁 𑀳𑁄𑀢𑀺, 𑀉𑀪𑀬𑀣𑀸𑀧𑀺 𑀦𑁂𑀲𑀁 𑀯𑀺𑀭𑁄𑀥𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀩𑁆𑀩𑀢𑁄 𑀯𑀺𑀬 𑀲𑁄 𑀞𑀺𑀢𑁄 𑀅𑀦𑁂𑀚𑁄𑀢𑀺 𑀏𑀚𑀸 𑀯𑀼𑀘𑁆𑀘𑀢𑀺 𑀘𑀮𑀦𑀓𑀺𑀮𑁂𑀲𑀧𑀭𑀺𑀧𑀦𑁆𑀣𑁄, 𑀏𑀚𑀸𑀳𑁂𑀢𑀽𑀦𑀁 𑀅𑀯𑀲𑁂𑀲𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀅𑀦𑁂𑀚𑁄, 𑀅𑀦𑁂𑀚𑀢𑁆𑀢𑀸𑀬𑁂𑀯 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀧𑀭𑀯𑀸𑀤𑀯𑀸𑀢𑁂𑀳𑀺 𑀘 𑀅𑀓𑀫𑁆𑀧𑀦𑀻𑀬𑀢𑁆𑀢𑀸 𑀞𑀺𑀢𑁄 𑀏𑀓𑀕𑁆𑀖𑀦𑀧𑀩𑁆𑀩𑀢𑀲𑀤𑀺𑀲𑁄. 𑀲𑀼𑀔𑀤𑀼𑀓𑁆𑀔𑁂𑀲𑀼 𑀦 𑀯𑁂𑀥𑀢𑀺 𑀲 𑀪𑀺𑀓𑁆𑀔𑀽𑀢𑀺 𑀲𑁄 𑀪𑀺𑀦𑁆𑀦𑀓𑀺𑀮𑁂𑀲𑁄 𑀪𑀺𑀓𑁆𑀔𑀼 𑀲𑀼𑀔𑀤𑀼𑀓𑁆𑀔𑀦𑀺𑀫𑀺𑀢𑁆𑀢𑀁 𑀦 𑀓𑀫𑁆𑀧𑀢𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀪𑀕𑀯𑀸 𑀢𑁂𑀲𑀁 𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀭𑀳𑀢𑁆𑀢𑀸𑀥𑀺𑀕𑀫𑁂𑀦 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀏𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺.

𑀢𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀘𑀢𑀼𑀢𑁆𑀣𑁂 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀲𑀢𑀺𑀁 𑀞𑀧𑀬𑀺𑀢𑁆𑀯𑀸 𑀫𑀼𑀔𑀲𑀫𑀻𑀧𑁂 𑀓𑀢𑁆𑀯𑀸. 𑀢𑀣𑀸 𑀳𑀺 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁 𑁋

‘‘𑀅𑀬𑀁 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺 𑀲𑀼𑀧𑀝𑁆𑀞𑀺𑀢𑀸 𑀦𑀸𑀲𑀺𑀓𑀕𑁆𑀕𑁂 𑀯𑀸 𑀫𑀼𑀔𑀦𑀺𑀫𑀺𑀢𑁆𑀢𑁂 𑀯𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 (𑀯𑀺𑀪. 𑁫𑁩𑁭).

𑀅𑀣 𑀯𑀸 ‘‘𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄, 𑀫𑀼𑀔𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀲𑀢𑀻𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑁄, 𑀢𑁂𑀦 𑀯𑀼𑀘𑁆𑀘𑀢𑀺 ‘𑀧𑀭𑀺𑀫𑀼𑀔𑀁 𑀲𑀢𑀺’’’𑀦𑁆𑀢𑀺. 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁧𑁬𑁪) 𑀯𑀼𑀢𑁆𑀢𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀲𑀢𑀺𑀁 𑀓𑀢𑁆𑀯𑀸𑀢𑀺. 𑀦𑀺𑀬𑁆𑀬𑀸𑀦𑀦𑁆𑀢𑀺 𑀘 𑀲𑀢𑀺𑀬𑀸 𑀑𑀕𑀸𑀳𑀺𑀢𑀩𑁆𑀩𑀁 𑀆𑀭𑀫𑁆𑀫𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀧𑀼𑀭𑀺𑀫𑁄 𑀧𑀘𑁆𑀙𑀺𑀫𑁄 𑀘 𑀅𑀢𑁆𑀣𑁄 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦, 𑀇𑀢𑀭𑁄 𑀲𑀫𑀸𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑀪𑀸𑀕𑀲𑀫𑀦𑁆𑀦𑀸𑀳𑀸𑀭𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀲𑀢𑀻𑀢𑀺 𑀯𑀸 𑀲𑀢𑀺𑀲𑀻𑀲𑁂𑀦 𑀛𑀸𑀦𑀁 𑀯𑀼𑀢𑁆𑀢𑀁 ‘‘𑀬𑁂 𑀓𑀸𑀬𑀕𑀢𑀸𑀲𑀢𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧.𑁬𑁦𑁦) 𑀯𑀺𑀬. 𑀓𑀢𑀫𑀁 𑀧𑀦 𑀢𑀁 𑀛𑀸𑀦𑀦𑁆𑀢𑀺? 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀫𑀸𑀧𑀦𑁆𑀦𑀁 𑀅𑀭𑀳𑀢𑁆𑀢𑀨𑀮𑀚𑁆𑀛𑀸𑀦𑀁. 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺? 𑀆𑀦𑁂𑀜𑁆𑀚𑀲𑀫𑀸𑀥𑀺𑀬𑁄𑀕𑁂𑀦 𑀣𑁂𑀭𑀲𑁆𑀲 𑀲𑀯𑀺𑀲𑁂𑀲𑀁 𑀦𑀺𑀘𑁆𑀘𑀮𑀪𑀸𑀯𑀁 𑀓𑁂𑀦𑀘𑀺 𑀅𑀓𑀫𑁆𑀧𑀦𑀻𑀬𑀢𑀜𑁆𑀘 𑀧𑀩𑁆𑀩𑀢𑁄𑀧𑀫𑀸𑀬 𑀧𑀓𑀸𑀲𑁂𑀦𑁆𑀢𑁄 𑀪𑀕𑀯𑀸 𑀇𑀫𑀁 𑀉𑀤𑀸𑀦𑀁 𑀅𑀪𑀸𑀲𑀻𑀢𑀺 𑀕𑀸𑀣𑀸𑀬 𑀏𑀯 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀦 𑀘𑀸𑀬𑀁 𑀦𑀺𑀲𑀚𑁆𑀚𑀸 𑀣𑁂𑀭𑀲𑁆𑀲 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀸𑀬, 𑀅𑀣 𑀔𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀬. 𑀧𑀼𑀩𑁆𑀩𑁂𑀬𑁂𑀯 𑀳𑀺 𑀲𑀽𑀓𑀭𑀔𑀢𑀮𑁂𑀡𑁂 (𑀫. 𑀦𑀺. 𑁨.𑁨𑁦𑁧) 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀪𑀕𑀯𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀅𑀬𑀁 𑀫𑀳𑀸𑀣𑁂𑀭𑁄 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑀻𑀢𑀺.

𑀏𑀢𑀫𑀢𑁆𑀣𑀦𑁆𑀢𑀺 𑀏𑀢𑀁 𑀣𑁂𑀭𑀲𑁆𑀲 𑀆𑀦𑁂𑀜𑁆𑀚𑀲𑀫𑀸𑀥𑀺𑀬𑁄𑀕𑁂𑀦 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀘 𑀓𑁂𑀦𑀘𑀺 𑀅𑀓𑀫𑁆𑀧𑀦𑀻𑀬𑀢𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀯𑀺𑀪𑀸𑀯𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀣𑀸𑀧𑀺 𑀧𑀩𑁆𑀩𑀢𑁄 𑀲𑁂𑀮𑁄𑀢𑀺 𑀬𑀣𑀸 𑀲𑀺𑀮𑀸𑀫𑀬𑁄 𑀏𑀓𑀕𑁆𑀖𑀦𑀲𑀺𑀮𑀸𑀧𑀩𑁆𑀩𑀢𑁄, 𑀦 𑀧𑀁𑀲𑀼𑀧𑀩𑁆𑀩𑀢𑁄 𑀦 𑀫𑀺𑀲𑁆𑀲𑀓𑀧𑀩𑁆𑀩𑀢𑁄𑀢𑀺 𑀅𑀢𑁆𑀣𑁄. 𑀅𑀘𑀮𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀫𑀽𑀮𑁄 𑀧𑀓𑀢𑀺𑀯𑀸𑀢𑁂𑀳𑀺 𑀅𑀘𑀮𑁄 𑀅𑀓𑀫𑁆𑀧𑀦𑀻𑀬𑁄 𑀳𑁄𑀢𑀺. 𑀏𑀯𑀁 𑀫𑁄𑀳𑀓𑁆𑀔𑀬𑀸 𑀪𑀺𑀓𑁆𑀔𑀼, 𑀧𑀩𑁆𑀩𑀢𑁄𑀯 𑀦 𑀯𑁂𑀥𑀢𑀻𑀢𑀺 𑀫𑁄𑀳𑀲𑁆𑀲 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀸 𑀫𑁄𑀳𑀫𑀽𑀮𑀓𑀢𑁆𑀢𑀸 𑀘 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀧𑀳𑀻𑀦𑀲𑀩𑁆𑀩𑀸𑀓𑀼𑀲𑀮𑁄 𑀪𑀺𑀓𑁆𑀔𑀼, 𑀬𑀣𑀸 𑀲𑁄 𑀧𑀩𑁆𑀩𑀢𑁄 𑀧𑀓𑀢𑀺𑀯𑀸𑀢𑁂𑀳𑀺, 𑀏𑀯𑀁 𑀮𑁄𑀓𑀥𑀫𑁆𑀫𑁂𑀳𑀺 𑀦 𑀯𑁂𑀥𑀢𑀺 𑀦 𑀓𑀫𑁆𑀧𑀢𑀺. 𑀫𑁄𑀳𑀓𑁆𑀔𑀬𑁄𑀢𑀺 𑀯𑀸 𑀬𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁆𑀢𑀜𑁆𑀘 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀫𑁄𑀳𑀓𑁆𑀔𑀬𑀲𑁆𑀲 𑀳𑁂𑀢𑀼 𑀦𑀺𑀩𑁆𑀩𑀸𑀦𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀯𑀸 𑀅𑀥𑀺𑀕𑀢𑀢𑁆𑀢𑀸 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀅𑀲𑀫𑀸𑀧𑀦𑁆𑀦𑀓𑀸𑀮𑁂𑀧𑀺 𑀬𑀣𑀸𑀯𑀼𑀢𑁆𑀢𑀧𑀩𑁆𑀩𑀢𑁄 𑀯𑀺𑀬 𑀦 𑀓𑁂𑀦𑀘𑀺 𑀯𑁂𑀥𑀢𑀺, 𑀧𑀕𑁂𑀯 𑀲𑀫𑀸𑀧𑀦𑁆𑀦𑀓𑀸𑀮𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀘𑀢𑀼𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀧𑀜𑁆𑀘𑀫𑁂 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀓𑀸𑀬𑁂 𑀕𑀢𑀸𑀬 𑀓𑀸𑀬𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀇𑀤𑀁 𑀓𑀭𑀡𑀯𑀘𑀦𑀁. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀇𑀥 𑀅𑀚𑁆𑀛𑀢𑁆𑀢𑀁 𑀦𑀸𑀫 𑀦𑀺𑀬𑀓𑀚𑁆𑀛𑀢𑁆𑀢𑀁, 𑀢𑀲𑁆𑀫𑀸 𑀅𑀢𑁆𑀢𑀦𑀺 𑀅𑀢𑁆𑀢𑀲𑀦𑁆𑀢𑀸𑀦𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀲𑁆𑀫𑀸 𑀓𑀫𑁆𑀫𑀝𑁆𑀞𑀸𑀦𑀪𑀽𑀢𑁄 𑀓𑁂𑀲𑀸𑀤𑀺𑀓𑁄 𑀤𑁆𑀯𑀢𑁆𑀢𑀺𑀁𑀲𑀓𑁄𑀝𑁆𑀞𑀸𑀲𑀲𑀫𑀼𑀤𑀸𑀬𑁄 𑀇𑀥 𑀓𑀸𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀅𑀚𑁆𑀛𑀢𑁆𑀢𑀦𑁆𑀢𑀺 𑀧𑀤𑀲𑁆𑀲 𑀕𑁄𑀘𑀭𑀚𑁆𑀛𑀢𑁆𑀢𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀽𑀧𑀝𑁆𑀞𑀺𑀢𑀸𑀬𑀸𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀪𑀽𑀢𑁂 𑀕𑁄𑀘𑀭𑀚𑁆𑀛𑀢𑁆𑀢𑀪𑀽𑀢𑁂 𑀯𑀸 𑀓𑀸𑀬𑁂 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀸𑀬. 𑀓𑀸 𑀧𑀦𑀸𑀬𑀁 𑀲𑀢𑀺, 𑀬𑀸 ‘‘𑀅𑀚𑁆𑀛𑀢𑁆𑀢𑀁 𑀲𑀽𑀧𑀝𑁆𑀞𑀺𑀢𑀸’’𑀢𑀺 𑀯𑀼𑀢𑁆𑀢𑀸? 𑀬𑁆𑀯𑀸𑀬𑀁 𑀪𑀕𑀯𑀢𑀸 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁩𑁭𑁭; 𑀫. 𑀦𑀺. 𑁧.𑁧𑁧𑁦; 𑀔𑀼. 𑀧𑀸. 𑁩.𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭) 𑀅𑀚𑁆𑀛𑀢𑁆𑀢𑀓𑁂𑀲𑀸𑀤𑀺𑀓𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁄 𑀓𑀸𑀬𑁄 𑀯𑀼𑀢𑁆𑀢𑁄, 𑀢𑀢𑁆𑀣 𑀬𑀸 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀉𑀧𑀘𑀸𑀭𑀧𑁆𑀧𑀦𑀸𑀯𑀲𑁂𑀦 𑀓𑀸𑀬𑁂 𑀉𑀧𑀝𑁆𑀞𑀺𑀢𑀸 𑀲𑀢𑀺, 𑀲𑀸 ‘‘𑀓𑀸𑀬𑀕𑀢𑀸 𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀘𑀸𑀬𑀁, 𑀏𑀯𑀁 𑀆𑀦𑀸𑀧𑀸𑀦𑀘𑀢𑀼𑀇𑀭𑀺𑀬𑀸𑀧𑀣𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀁 𑀯𑀲𑁂𑀦 𑀉𑀤𑁆𑀥𑀼𑀫𑀸𑀢𑀓𑀯𑀺𑀦𑀻𑀮𑀓𑀸𑀤𑀺𑀯𑀲𑁂𑀦 𑀘 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀬𑀣𑀸𑀭𑀳𑀁 𑀉𑀧𑀘𑀸𑀭𑀧𑁆𑀧𑀦𑀸𑀯𑀲𑁂𑀦 𑀓𑀸𑀬𑁂 𑀉𑀧𑀝𑁆𑀞𑀺𑀢𑀸 𑀲𑀢𑀺 ‘‘𑀓𑀸𑀬𑀕𑀢𑀸 𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀅𑀚𑁆𑀛𑀢𑁆𑀢𑀁 𑀓𑀸𑀬𑀕𑀢𑀸 𑀲𑀢𑀺 𑀧𑀣𑀯𑀻𑀆𑀤𑀺𑀓𑀸 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑀸𑀤𑀻𑀲𑀼 𑀘𑀢𑀽𑀲𑀼 𑀬𑁂𑀦 𑀓𑁂𑀦𑀘𑀺 𑀏𑀓𑁂𑀦𑀸𑀓𑀸𑀭𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑁂𑀲𑀁 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀉𑀧𑀝𑁆𑀞𑀺𑀢𑀸 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 ‘‘𑀓𑀸𑀬𑀕𑀢𑀸 𑀲𑀢𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀣𑁂𑀭𑁄 𑀧𑀦 𑀢𑀣𑀸 𑀯𑀺𑀧𑀲𑁆𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑀫𑀸𑀧𑀢𑁆𑀢𑀺𑀫𑁂𑀯 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀇𑀥𑀸𑀧𑀺 𑀕𑀸𑀣𑀸𑀬 𑀏𑀯𑀁 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀢𑀩𑁆𑀩𑀢𑀸 ‘‘𑀦 𑀘𑀸𑀬𑀁 𑀦𑀺𑀲𑀚𑁆𑀚𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀬𑁄𑀚𑁂𑀢𑀩𑁆𑀩𑀸.

𑀏𑀢𑀫𑀢𑁆𑀣𑀦𑁆𑀢𑀺 𑀏𑀢𑀁 𑀣𑁂𑀭𑀲𑁆𑀲 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀫𑀼𑀔𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑁂𑀦 𑀯𑀺𑀧𑀲𑁆𑀲𑀦𑀁 𑀑𑀕𑀸𑀳𑁂𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀢𑀺 𑀓𑀸𑀬𑀕𑀢𑀸 𑀉𑀧𑀝𑁆𑀞𑀺𑀢𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀮𑀓𑁆𑀔𑀡𑀸 𑀲𑀢𑀺 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀸𑀦𑀁 𑀲𑀫𑀸𑀥𑀺𑀯𑀻𑀭𑀺𑀬𑀧𑀜𑁆𑀜𑀸𑀦𑀁 𑀬𑀣𑀸𑀲𑀓𑀁 𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑁂𑀦 𑀲𑀳𑀸𑀬𑀪𑀸𑀯𑀁 𑀆𑀧𑀦𑁆𑀦𑀢𑁆𑀢𑀸 𑀧𑀳𑀻𑀦𑀧𑁆𑀧𑀝𑀺𑀧𑀓𑁆𑀔𑀸 𑀢𑀢𑁄 𑀏𑀯 𑀢𑀺𑀓𑁆𑀔𑀯𑀺𑀲𑀤𑀪𑀽𑀢𑀸 𑀘 𑀬𑀣𑀸𑀯𑀼𑀢𑁆𑀢𑀓𑀸𑀬𑀲𑀁𑀯𑀭𑀡𑀯𑀲𑁂𑀦 𑀏𑀓𑀢𑁆𑀣𑀲𑀫𑁄𑀲𑀭𑀡𑀯𑀲𑁂𑀦 𑀘 𑀅𑀯𑀺𑀧𑀭𑀻𑀢𑀲𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀻 𑀉𑀧𑀕𑀦𑁆𑀢𑁆𑀯𑀸 𑀞𑀺𑀢𑀸 𑀳𑁄𑀢𑀺, 𑀏𑀢𑁂𑀦 𑀓𑀸𑀬𑀲𑀗𑁆𑀔𑀸𑀢𑀸𑀦𑀁 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀢𑀦𑁆𑀦𑀺𑀲𑁆𑀲𑀺𑀢𑀸𑀦𑀜𑁆𑀘 𑀉𑀧𑀸𑀤𑀸𑀭𑀽𑀧𑀸𑀦𑀁 𑀲𑀮𑁆𑀮𑀓𑁆𑀔𑀡𑀯𑀲𑁂𑀦, 𑀧𑀘𑁆𑀘𑀬𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀢𑁂𑀲𑀁 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀘 𑀧𑀯𑀢𑁆𑀢𑀁 𑀜𑀸𑀡𑀧𑀭𑀫𑁆𑀧𑀭𑀸𑀕𑀢𑀁 𑀲𑀢𑀺𑀁 𑀤𑀲𑁆𑀲𑁂𑀢𑀺, 𑀲𑀢𑀺𑀲𑀻𑀲𑁂𑀦 𑀯𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀧𑀭𑀺𑀜𑁆𑀜𑀸𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀜𑀸𑀡𑀧𑀭𑀫𑁆𑀧𑀭𑀫𑁂𑀯 𑀤𑀲𑁆𑀲𑁂𑀢𑀺. 𑀙𑀲𑀼 𑀨𑀲𑁆𑀲𑀸𑀬𑀢𑀦𑁂𑀲𑀼 𑀲𑀁𑀯𑀼𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀓𑀸𑀬𑁂 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀘𑀓𑁆𑀔𑀸𑀤𑀻𑀲𑀼 𑀨𑀲𑁆𑀲𑀲𑁆𑀲 𑀓𑀸𑀭𑀡𑀪𑀽𑀢𑁂𑀲𑀼 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀅𑀪𑀸𑀯𑀺𑀢𑀸𑀬 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀅𑀪𑀺𑀚𑁆𑀛𑀸𑀤𑀻𑀦𑀁 𑀢𑀲𑁆𑀲𑀸 𑀪𑀸𑀯𑀺𑀢𑀢𑁆𑀢𑀸 𑀜𑀸𑀡𑀧𑁆𑀧𑀯𑀢𑁆𑀢𑀺𑀁 𑀧𑀝𑀺𑀯𑁂𑀥𑁂𑀦𑁆𑀢𑁄 𑀢𑁂 𑀧𑀺𑀤𑀳𑀦𑁆𑀢𑁄 ‘‘𑀢𑀢𑁆𑀣 𑀲𑀁𑀯𑀼𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀢𑁂𑀦 𑀜𑀸𑀡𑀲𑀁𑀯𑀭𑀁 𑀤𑀲𑁆𑀲𑁂𑀢𑀺.

𑀲𑀢𑀢𑀁 𑀪𑀺𑀓𑁆𑀔𑀼 𑀲𑀫𑀸𑀳𑀺𑀢𑁄𑀢𑀺 𑀲𑁄 𑀪𑀺𑀓𑁆𑀔𑀼 𑀏𑀯𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀲𑀩𑁆𑀩𑀢𑁆𑀣 𑀘 𑀲𑀁𑀯𑀼𑀢𑁄 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀫𑁆𑀫𑀲𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀜𑀸𑀡𑁂 𑀢𑀺𑀓𑁆𑀔𑁂 𑀲𑀽𑀭𑁂 𑀯𑀳𑀦𑁆𑀢𑁂 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀦𑀸 𑀢𑀸𑀯 𑀲𑀢𑀢𑀁 𑀦𑀺𑀭𑀦𑁆𑀢𑀭𑀁 𑀲𑀫𑀸𑀳𑀺𑀢𑁄 𑀅𑀦𑀼𑀮𑁄𑀫𑀜𑀸𑀡𑀸𑀦𑀦𑁆𑀢𑀭𑀁 𑀕𑁄𑀢𑁆𑀭𑀪𑀼𑀜𑀸𑀡𑁄𑀤𑀬𑀢𑁄 𑀧𑀝𑁆𑀞𑀸𑀬. 𑀚𑀜𑁆𑀜𑀸 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺 𑀅𑀜𑁆𑀜𑁂𑀲𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀧𑀺 𑀅𑀕𑁄𑀘𑀭𑀪𑀸𑀯𑀢𑁄, 𑀅𑀭𑀺𑀬𑀸𑀦𑀁 𑀧𑀦 𑀢𑀲𑁆𑀲 𑀢𑀲𑁆𑀲𑁂𑀯 𑀆𑀯𑁂𑀡𑀺𑀓𑀢𑁆𑀢𑀸 𑀅𑀢𑁆𑀢𑀲𑀤𑀺𑀲𑀢𑁆𑀢𑀸 𑀘 ‘‘𑀅𑀢𑁆𑀢𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑀲𑁆𑀲 𑀫𑀕𑁆𑀕𑀨𑀮𑀜𑀸𑀡𑀲𑁆𑀲 𑀲𑀸𑀢𑀺𑀲𑀬𑀯𑀺𑀲𑀬𑀪𑀸𑀯𑀢𑁄 𑀏𑀓𑀦𑁆𑀢𑀲𑀼𑀔𑀸𑀯𑀳𑀁 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀥𑀸𑀢𑀼 ‘‘𑀅𑀢𑁆𑀢𑀦𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦𑀺𑀩𑁆𑀩𑀸𑀦𑀁 𑀚𑀜𑁆𑀜𑀸 𑀚𑀸𑀦𑁂𑀬𑁆𑀬, 𑀫𑀕𑁆𑀕𑀨𑀮𑀜𑀸𑀡𑁂𑀳𑀺 𑀧𑀝𑀺𑀯𑀺𑀚𑁆𑀛𑁂𑀬𑁆𑀬, 𑀲𑀘𑁆𑀙𑀺𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀅𑀭𑀺𑀬𑀸𑀦𑀁 𑀦𑀺𑀩𑁆𑀩𑀸𑀦𑁂 𑀅𑀥𑀺𑀫𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀅𑀭𑀺𑀬𑀸 𑀳𑀺 𑀅𑀥𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑀸𑀮𑁂𑀧𑀺 𑀏𑀓𑀦𑁆𑀢𑁂𑀦𑁂𑀯 𑀦𑀺𑀩𑁆𑀩𑀸𑀦𑁂 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦 𑀯𑀺𑀳𑀭𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀲 𑀲𑀢𑀺 𑀓𑀸𑀬𑀕𑀢𑀸 𑀉𑀧𑀝𑁆𑀞𑀺𑀢𑀸, 𑀲𑁄 𑀪𑀺𑀓𑁆𑀔𑀼 𑀙𑀲𑀼 𑀨𑀲𑁆𑀲𑀸𑀬𑀢𑀦𑁂𑀲𑀼 𑀲𑀁𑀯𑀼𑀢𑁄, 𑀢𑀢𑁄 𑀏𑀯 𑀲𑀢𑀢𑀁 𑀲𑀫𑀸𑀳𑀺𑀢𑁄 𑀅𑀢𑁆𑀢𑀧𑀘𑁆𑀘𑀓𑁆𑀔𑀓𑀭𑀡𑁂𑀦 𑀦𑀺𑀩𑁆𑀩𑀸𑀦𑀁 𑀅𑀢𑁆𑀢𑀦𑁄 𑀚𑀸𑀦𑁂𑀬𑁆𑀬𑀸𑀢𑀺 𑀏𑀯𑀁 𑀕𑀸𑀣𑀸𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀫𑀼𑀔𑁂𑀦 𑀬𑀸𑀯 𑀅𑀭𑀳𑀢𑁆𑀢𑀸 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑁆𑀬𑀸𑀦𑀫𑀕𑁆𑀕𑀁 𑀤𑀲𑁆𑀲𑁂𑀢𑀺 𑀥𑀫𑁆𑀫𑀭𑀸𑀚𑀸.

𑀅𑀧𑀭𑁄 𑀦𑀬𑁄 𑁋 𑀲𑀢𑀺 𑀓𑀸𑀬𑀕𑀢𑀸 𑀉𑀧𑀝𑁆𑀞𑀺𑀢𑀸𑀢𑀺 𑀏𑀢𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀙𑀲𑀼 𑀨𑀲𑁆𑀲𑀸𑀬𑀢𑀦𑁂𑀲𑀼 𑀲𑀁𑀯𑀼𑀢𑁄𑀢𑀺 𑀨𑀲𑁆𑀲𑁄 𑀆𑀬𑀢𑀦𑀁 𑀓𑀸𑀭𑀡𑀁 𑀏𑀢𑁂𑀲𑀦𑁆𑀢𑀺 𑀨𑀲𑁆𑀲𑀸𑀬𑀢𑀦𑀸𑀦𑀺, 𑀢𑁂𑀲𑀼 𑀨𑀲𑁆𑀲𑀸𑀬𑀢𑀦𑁂𑀲𑀼. 𑀨𑀲𑁆𑀲𑀳𑁂𑀢𑀼𑀓𑁂𑀲𑀼 𑀨𑀲𑁆𑀲𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑁂𑀲𑀼 𑀙𑀲𑀼 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀯𑁂𑀤𑀬𑀺𑀢𑁂𑀲𑀼 𑀢𑀡𑁆𑀳𑀸𑀤𑀻𑀦𑀁 𑀅𑀧𑁆𑀧𑀯𑀢𑁆𑀢𑀺𑀬𑀸 𑀲𑀁𑀯𑀼𑀢𑁄, 𑀏𑀢𑁂𑀦 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀲𑀢𑀢𑀁 𑀪𑀺𑀓𑁆𑀔𑀼 𑀲𑀫𑀸𑀳𑀺𑀢𑁄𑀢𑀺 𑀲𑀢𑀢𑀁 𑀦𑀺𑀘𑁆𑀘𑀓𑀸𑀮𑀁 𑀦𑀺𑀭𑀦𑁆𑀢𑀭𑀁 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀲𑀫𑀸𑀳𑀺𑀢𑁄 𑀪𑀺𑀓𑁆𑀔𑀼. 𑀲𑁄 𑀘𑀸𑀬𑀁 𑀅𑀯𑀺𑀓𑁆𑀔𑁂𑀧𑁄 𑀲𑀩𑁆𑀩𑀲𑁄 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀫𑀢𑁆𑀣𑀓𑀧𑁆𑀧𑀢𑁆𑀢𑀸𑀬 𑀳𑁄𑀢𑀺. 𑀲𑀫𑁆𑀫𑀲𑀦𑁆𑀢𑁄 𑀳𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀦𑀯𑀲𑁂𑀲𑀢𑁄𑀯 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀫𑁆𑀫𑀲𑀢𑀻𑀢𑀺. 𑀏𑀢𑁂𑀦 𑀲𑁂𑀲𑀲𑀢𑀺𑀧𑀝𑁆𑀞𑀸𑀦𑁂 𑀤𑀲𑁆𑀲𑁂𑀢𑀺. 𑀚𑀜𑁆𑀜𑀸 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺 𑀏𑀯𑀁 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀞𑀺𑀢𑁄 𑀪𑀺𑀦𑁆𑀦𑀓𑀺𑀮𑁂𑀲𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀲𑀬𑀫𑁂𑀯 𑀚𑀸𑀦𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀅𑀣 𑀯𑀸 𑀲𑀢𑀺 𑀓𑀸𑀬𑀕𑀢𑀸 𑀉𑀧𑀝𑁆𑀞𑀺𑀢𑀸𑀢𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀓𑀸𑀬𑀲𑁆𑀲 𑀬𑀣𑀸𑀲𑀪𑀸𑀯𑀧𑀭𑀺𑀜𑁆𑀜𑀸𑀤𑀻𑀧𑀦𑁂𑀦 𑀣𑁂𑀭𑀲𑁆𑀲 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺 𑀤𑀻𑀧𑀺𑀢𑀸. 𑀙𑀲𑀼 𑀨𑀲𑁆𑀲𑀸𑀬𑀢𑀦𑁂𑀲𑀼 𑀲𑀁𑀯𑀼𑀢𑁄𑀢𑀺 𑀘𑀓𑁆𑀔𑀸𑀤𑀻𑀲𑀼 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀅𑀘𑁆𑀘𑀦𑁆𑀢𑀲𑀁𑀯𑀭𑀤𑀻𑀧𑀦𑁂𑀦 𑀲𑀢𑀢𑀯𑀺𑀳𑀸𑀭𑀺𑀯𑀲𑁂𑀦 𑀣𑁂𑀭𑀲𑁆𑀲 𑀲𑀫𑁆𑀧𑀚𑀜𑁆𑀜𑀧𑁆𑀧𑀓𑀸𑀲𑀺𑀦𑀻 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺 𑀤𑀻𑀧𑀺𑀢𑀸. 𑀲𑀢𑀢𑀁 𑀪𑀺𑀓𑁆𑀔𑀼 𑀲𑀫𑀸𑀳𑀺𑀢𑁄𑀢𑀺 𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑀢𑀸𑀤𑀲𑁆𑀲𑀦𑁂𑀦 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀤𑀲𑁆𑀲𑀺𑀢𑀸. 𑀏𑀯𑀁𑀪𑀽𑀢𑁄 𑀧𑀦 𑀪𑀺𑀓𑁆𑀔𑀼 𑀚𑀜𑁆𑀜𑀸 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺 𑀓𑀢𑀓𑀺𑀘𑁆𑀘𑀢𑁆𑀢𑀸 𑀉𑀢𑁆𑀢𑀭𑀺 𑀓𑀭𑀡𑀻𑀬𑀸𑀪𑀸𑀯𑀢𑁄 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀫𑁂𑀯 𑀚𑀸𑀦𑁂𑀬𑁆𑀬 𑀘𑀺𑀦𑁆𑀢𑁂𑀬𑁆𑀬, 𑀅𑀜𑁆𑀜𑀫𑁆𑀧𑀺 𑀢𑀲𑁆𑀲 𑀘𑀺𑀦𑁆𑀢𑁂𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀜𑁆𑀘𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀙𑀝𑁆𑀞𑁂 𑀧𑀺𑀮𑀺𑀦𑁆𑀤𑀯𑀘𑁆𑀙𑁄𑀢𑀺 𑀧𑀺𑀮𑀺𑀦𑁆𑀤𑀸𑀢𑀺𑀲𑁆𑀲 𑀦𑀸𑀫𑀁, 𑀯𑀘𑁆𑀙𑁄𑀢𑀺 𑀕𑁄𑀢𑁆𑀢𑀯𑀲𑁂𑀦 𑀣𑁂𑀭𑀁 𑀲𑀜𑁆𑀚𑀸𑀦𑀦𑁆𑀢𑀺. 𑀯𑀲𑀮𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀢𑀻𑀢𑀺 ‘‘𑀏𑀳𑀺, 𑀯𑀲𑀮, 𑀅𑀧𑁂𑀳𑀺, 𑀯𑀲𑀮𑀸’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀽 𑀯𑀲𑀮𑀯𑀸𑀤𑁂𑀦 𑀯𑁄𑀳𑀭𑀢𑀺 𑀆𑀮𑀧𑀢𑀺. 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽𑀢𑀺 𑀩𑀳𑀽 𑀪𑀺𑀓𑁆𑀔𑀽. 𑀢𑁂 𑀣𑁂𑀭𑀁 𑀢𑀣𑀸 𑀲𑀫𑀼𑀤𑀸𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀭𑀳𑀸𑀯 𑀲𑀫𑀸𑀦𑁄 𑀅𑀧𑁆𑀧𑀳𑀻𑀦𑀯𑀸𑀲𑀦𑀢𑁆𑀢𑀸 𑀏𑀯𑀁 𑀪𑀡𑀢𑀻’’𑀢𑀺 𑀅𑀚𑀸𑀦𑀦𑁆𑀢𑀸 ‘‘𑀤𑁄𑀲𑀦𑁆𑀢𑀭𑁄 𑀫𑀜𑁆𑀜𑁂 𑀅𑀬𑀁 𑀣𑁂𑀭𑁄 𑀏𑀯𑀁 𑀲𑀫𑀼𑀤𑀸𑀘𑀭𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀸 𑀢𑀁 𑀢𑀢𑁄 𑀯𑀼𑀝𑁆𑀞𑀸𑀧𑁂𑀢𑀼𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀪𑀺𑀓𑁆𑀔𑀽 𑀯𑀲𑀮𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀢𑀻’’𑀢𑀺. 𑀓𑁂𑀘𑀺 𑀧𑀦𑀸𑀳𑀼 𑁋 ‘‘𑀇𑀫𑀁 𑀣𑁂𑀭𑀁 𑀪𑀺𑀓𑁆𑀔𑀽 ‘𑀅𑀭𑀳𑀸’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, 𑀅𑀬𑀜𑁆𑀘 𑀪𑀺𑀓𑁆𑀔𑀽 𑀨𑀭𑀼𑀲𑀯𑀘𑀦𑁂𑀦 𑀏𑀯𑀁 𑀲𑀫𑀼𑀤𑀸𑀘𑀭𑀢𑀺, ‘𑀅𑀪𑀽𑀢𑁄 𑀏𑀯 𑀦𑀼 𑀔𑁄 𑀇𑀫𑀲𑁆𑀫𑀺𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄’𑀢𑀺 𑀯𑀸𑀲𑀦𑀸𑀯𑀲𑁂𑀦 𑀢𑀲𑁆𑀲 𑀢𑀣𑀸 𑀲𑀫𑀼𑀤𑀸𑀘𑀸𑀭𑀁 𑀅𑀚𑀸𑀦𑀦𑁆𑀢𑀸 𑀅𑀭𑀺𑀬𑀪𑀸𑀯𑀜𑁆𑀘𑀲𑁆𑀲 𑀅𑀲𑀤𑁆𑀤𑀳𑀦𑁆𑀢𑀸 𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑁄 𑀪𑀕𑀯𑀢𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼’’𑀦𑁆𑀢𑀺. 𑀪𑀕𑀯𑀸 𑀣𑁂𑀭𑀲𑁆𑀲 𑀤𑁄𑀲𑀦𑁆𑀢𑀭𑀸𑀪𑀸𑀯𑀁 𑀧𑀓𑀸𑀲𑁂𑀢𑀼𑀓𑀸𑀫𑁄 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀫𑁆𑀫𑀼𑀔𑀸 𑀢𑀲𑁆𑀲 ‘‘𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦𑀸𑀬𑀁 𑀢𑀣𑀸 𑀲𑀫𑀼𑀤𑀸𑀘𑀭𑀢𑀺, 𑀦 𑀨𑀭𑀼𑀲𑀯𑀘𑀦𑀸𑀥𑀺𑀧𑁆𑀧𑀸𑀬𑁄’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀻’’𑀢𑀺𑀆𑀤𑀺.

𑀢𑀢𑁆𑀣 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸𑀢𑀺 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀯𑀘𑁆𑀙, 𑀪𑀺𑀓𑁆𑀔𑀽 𑀯𑀲𑀮𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀲𑀻’’𑀢𑀺 𑀣𑁂𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀅𑀬𑀁 𑀯𑀘𑁆𑀙𑁄 𑀓𑀺𑀮𑁂𑀲𑀯𑀸𑀲𑀦𑀸𑀬 𑀯𑀲𑀮𑀯𑀸𑀤𑀁 𑀦 𑀧𑀭𑀺𑀘𑁆𑀘𑀚𑀢𑀺, 𑀓𑀺𑀁 𑀦𑀼 𑀔𑁄 𑀅𑀢𑀻𑀢𑁂𑀲𑀼𑀧𑀺 𑀅𑀢𑁆𑀢𑀪𑀸𑀯𑁂𑀲𑀼 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑁄 𑀅𑀳𑁄𑀲𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀯𑀸 𑀢𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀳𑀢𑁆𑀣𑀢𑀮𑁂 𑀞𑀧𑀺𑀢𑀁 𑀆𑀫𑀮𑀓𑀁 𑀯𑀺𑀬 𑀧𑀘𑁆𑀘𑀓𑁆𑀔𑀓𑀭𑀡𑀯𑀲𑁂𑀦 𑀅𑀢𑁆𑀢𑀦𑁄 𑀫𑀦𑀲𑀺 𑀓𑀢𑁆𑀯𑀸. 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀢𑁂 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀢𑀼𑀁 𑀆𑀮𑀧𑀺, 𑀅𑀪𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀸 𑀔𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺.

𑀢𑀢𑁆𑀣 𑀫𑀸𑀢𑀺 𑀧𑀝𑀺𑀲𑁂𑀥𑁂 𑀦𑀺𑀧𑀸𑀢𑁄, 𑀢𑀲𑁆𑀲 ‘‘𑀉𑀚𑁆𑀛𑀸𑀬𑀺𑀢𑁆𑀣𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀫𑀸 𑀉𑀚𑁆𑀛𑀸𑀬𑀺𑀢𑁆𑀣𑀸𑀢𑀺 𑀫𑀸 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀑𑀮𑁄𑀓𑀬𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀯𑀘𑁆𑀙𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀘 𑀉𑀚𑁆𑀛𑀸𑀬𑀦𑀲𑁆𑀲 𑀉𑀲𑀽𑀬𑀦𑀢𑁆𑀣𑀢𑁆𑀢𑀸 𑀲𑀫𑁆𑀧𑀤𑀸𑀦𑀯𑀘𑀦𑀁. 𑀇𑀤𑀸𑀦𑀺𑀲𑁆𑀲 𑀅𑀦𑀼𑀚𑁆𑀛𑀸𑀬𑀺𑀢𑀩𑁆𑀩𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦, 𑀪𑀺𑀓𑁆𑀔𑀯𑁂, 𑀯𑀘𑁆𑀙𑁄 𑀤𑁄𑀲𑀦𑁆𑀢𑀭𑁄 𑀪𑀺𑀓𑁆𑀔𑀽 𑀯𑀲𑀮𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀢𑀻’’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀅𑀬𑀁 𑀯𑀘𑁆𑀙𑁄 𑀤𑁄𑀲𑀦𑁆𑀢𑀭𑁄 𑀤𑁄𑀲𑀘𑀺𑀢𑁆𑀢𑁄 𑀤𑁄𑀲𑁂𑀦 𑀩𑁆𑀬𑀸𑀧𑀸𑀤𑁂𑀦 𑀤𑀽𑀲𑀺𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀽 𑀯𑀲𑀮𑀯𑀸𑀤𑁂𑀦 𑀦 𑀲𑀫𑀼𑀤𑀸𑀘𑀭𑀢𑀺, 𑀫𑀕𑁆𑀕𑁂𑀦𑁂𑀯 𑀘𑀲𑁆𑀲 𑀩𑁆𑀬𑀸𑀧𑀸𑀤𑁄 𑀲𑀫𑀼𑀕𑁆𑀖𑀸𑀢𑀺𑀢𑁄. 𑀏𑀯𑀁 𑀅𑀤𑁄𑀲𑀦𑁆𑀢𑀭𑀢𑁆𑀢𑁂𑀧𑀺 𑀢𑀲𑁆𑀲 𑀢𑀣𑀸 𑀲𑀫𑀼𑀤𑀸𑀘𑀸𑀭𑀲𑁆𑀲 𑀧𑀼𑀭𑀺𑀫𑀚𑀸𑀢𑀺𑀲𑀺𑀤𑁆𑀥𑀁 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀘𑁆𑀙𑀲𑁆𑀲, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀩𑁆𑀩𑁄𑀓𑀺𑀡𑁆𑀡𑀸𑀦𑀻𑀢𑀺 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀺𑀅𑀦𑁆𑀢𑀭𑁂𑀳𑀺 𑀅𑀯𑁄𑀫𑀺𑀲𑁆𑀲𑀸𑀦𑀺 𑀅𑀦𑀦𑁆𑀢𑀭𑀺𑀢𑀸𑀦𑀺. 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑀸𑀦𑀻𑀢𑀺 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀯𑀘𑁆𑀙𑀲𑁆𑀲 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀏𑀯 𑀚𑀸𑀢𑀸𑀦𑀺, 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀢𑀲𑁆𑀲 𑀯𑀲𑀮𑀯𑀸𑀤𑁄 𑀤𑀻𑀖𑀭𑀢𑁆𑀢𑀁 𑀲𑀫𑀼𑀤𑀸𑀘𑀺𑀡𑁆𑀡𑁄𑀢𑀺 𑀬𑁄 𑀏𑀢𑀭𑀳𑀺 𑀔𑀻𑀡𑀸𑀲𑀯𑁂𑀦𑀧𑀺 𑀲𑀢𑀸 𑀧𑀯𑀢𑁆𑀢𑀺𑀬𑀢𑀺, 𑀲𑁄 𑀢𑀲𑁆𑀲 𑀯𑀘𑁆𑀙𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀲𑀮𑀯𑀸𑀤𑁄 𑀤𑀻𑀖𑀭𑀢𑁆𑀢𑀁 𑀇𑀢𑁄 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁 𑀆𑀭𑁄𑀳𑀦𑀯𑀲𑁂𑀦 𑀧𑀜𑁆𑀘𑀚𑀸𑀢𑀺𑀲𑀢𑀫𑀢𑁆𑀢𑀁 𑀓𑀸𑀮𑀁 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀢𑁆𑀢𑀸 𑀲𑀫𑀼𑀤𑀸𑀘𑀺𑀡𑁆𑀡𑁄 𑀲𑀫𑀼𑀤𑀸𑀘𑀭𑀺𑀢𑁄 𑀅𑀳𑁄𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀳𑀺 𑀚𑀸𑀢𑀺𑀲𑀺𑀤𑁆𑀥𑁂𑀦 𑀫𑀸𑀦𑁂𑀦 𑀣𑀤𑁆𑀥𑀸 𑀅𑀜𑁆𑀜𑀁 𑀯𑀲𑀮𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺. ‘‘𑀅𑀚𑁆𑀛𑀸𑀘𑀺𑀡𑁆𑀡𑁄’’𑀢𑀺𑀧𑀺 𑀧𑀞𑀦𑁆𑀢𑀺, 𑀲𑁄 𑀏𑀯 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀢𑁂𑀦 𑀤𑀻𑀖𑀭𑀢𑁆𑀢𑀁 𑀢𑀣𑀸 𑀲𑀫𑀼𑀤𑀸𑀘𑀺𑀡𑁆𑀡𑀪𑀸𑀯𑁂𑀦, 𑀏𑀢𑁂𑀦𑀲𑁆𑀲 𑀢𑀣𑀸 𑀲𑀫𑀼𑀤𑀸𑀘𑀸𑀭𑀲𑁆𑀲 𑀓𑀸𑀭𑀡𑀁 𑀯𑀸𑀲𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀸 𑀧𑀦𑀸𑀬𑀁 𑀯𑀸𑀲𑀦𑀸 𑀦𑀸𑀫? 𑀬𑀁 𑀓𑀺𑀮𑁂𑀲𑀭𑀳𑀺𑀢𑀲𑁆𑀲𑀸𑀧𑀺 𑀲𑀦𑁆𑀢𑀸𑀦𑁂 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀸𑀦𑀁 𑀲𑀫𑀸𑀘𑀸𑀭𑀲𑀤𑀺𑀲𑀲𑀫𑀸𑀘𑀸𑀭𑀳𑁂𑀢𑀼𑀪𑀽𑀢𑀁, 𑀅𑀦𑀸𑀤𑀺𑀓𑀸𑀮𑀪𑀸𑀯𑀺𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀆𑀳𑀺𑀢𑀁 𑀲𑀸𑀫𑀢𑁆𑀣𑀺𑀬𑀫𑀢𑁆𑀢𑀁, 𑀢𑀣𑀸𑀭𑀽𑀧𑀸 𑀅𑀥𑀺𑀫𑀼𑀢𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀦𑁂𑀢𑀁 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀯𑀲𑁂𑀦 𑀬𑀢𑁆𑀣 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑀢𑁆𑀣 𑀪𑀕𑀯𑀢𑁄 𑀲𑀦𑁆𑀢𑀸𑀦𑁂 𑀦𑀢𑁆𑀣𑀺. 𑀬𑀢𑁆𑀣 𑀧𑀦 𑀢𑀣𑀸 𑀓𑀺𑀮𑁂𑀲𑀸 𑀦 𑀧𑀳𑀻𑀦𑀸, 𑀢𑀢𑁆𑀣 𑀲𑀸𑀯𑀓𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀲𑀦𑁆𑀢𑀸𑀦𑁂 𑀅𑀢𑁆𑀣𑀺, 𑀢𑀢𑁄 𑀢𑀣𑀸𑀕𑀢𑁄𑀯 𑀅𑀦𑀸𑀯𑀭𑀡𑀜𑀸𑀡𑀤𑀲𑁆𑀲𑀦𑁄.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀲𑀢𑀺𑀧𑀺 𑀯𑀲𑀮𑀲𑀫𑀼𑀤𑀸𑀘𑀸𑀭𑁂 𑀤𑁄𑀲𑀦𑁆𑀢𑀭𑀸𑀪𑀸𑀯𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀢𑀲𑁆𑀲 𑀅𑀕𑁆𑀕𑀨𑀮𑀸𑀥𑀺𑀕𑀫𑀯𑀺𑀪𑀸𑀯𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀫𑁆𑀳𑀺 𑀦 𑀫𑀸𑀬𑀸 𑀯𑀲𑀢𑀺 𑀦 𑀫𑀸𑀦𑁄𑀢𑀺 𑀬𑀲𑁆𑀫𑀺𑀁 𑀅𑀭𑀺𑀬𑀧𑀼𑀕𑁆𑀕𑀮𑁂 𑀲𑀦𑁆𑀢𑀤𑁄𑀲𑀧𑁆𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸 𑀫𑀸𑀬𑀸, ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀲𑀫𑁆𑀧𑀕𑁆𑀕𑀳𑀯𑀲𑁂𑀦 𑀧𑀯𑀢𑁆𑀢𑁄 𑀉𑀡𑁆𑀡𑀢𑀺𑀮𑀓𑁆𑀔𑀡𑁄 𑀫𑀸𑀦𑁄 𑀘 𑀦 𑀯𑀲𑀢𑀺, 𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀺𑀢𑀢𑁆𑀢𑀸 𑀦 𑀧𑀯𑀢𑁆𑀢𑀢𑀺 𑀦 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀯𑀻𑀢𑀮𑁄𑀪𑁄 𑀅𑀫𑀫𑁄 𑀦𑀺𑀭𑀸𑀲𑁄𑀢𑀺 𑀬𑁄 𑀘 𑀭𑀸𑀕𑀸𑀤𑀺𑀧𑀭𑀺𑀬𑀸𑀬𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀕𑁆𑀕𑀳𑀡𑀮𑀓𑁆𑀔𑀡𑀲𑁆𑀲 𑀮𑁄𑀪𑀲𑁆𑀲 𑀲𑀩𑁆𑀩𑀣𑀸 𑀯𑀺𑀕𑀢𑀢𑁆𑀢𑀸 𑀯𑀻𑀢𑀮𑁄𑀪𑁄, 𑀢𑀢𑁄 𑀏𑀯 𑀭𑀽𑀧𑀸𑀤𑀻𑀲𑀼 𑀓𑀢𑁆𑀣𑀘𑀺 𑀫𑀫𑀸𑀬𑀦𑀸𑀪𑀸𑀯𑀢𑁄 𑀅𑀫𑀫𑁄 𑀅𑀧𑀭𑀺𑀕𑁆𑀕𑀳𑁄, 𑀅𑀦𑀸𑀕𑀢𑀸𑀦𑀫𑁆𑀧𑀺 𑀪𑀯𑀸𑀤𑀻𑀦𑀁 𑀅𑀦𑀸𑀲𑀻𑀲𑀦𑀢𑁄 𑀦𑀺𑀭𑀸𑀲𑁄. 𑀧𑀦𑀼𑀡𑁆𑀡𑀓𑁄𑀥𑁄𑀢𑀺 𑀓𑀼𑀚𑁆𑀛𑀦𑀮𑀓𑁆𑀔𑀡𑀲𑁆𑀲 𑀓𑁄𑀥𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸 𑀧𑀦𑀼𑀡𑁆𑀡𑀓𑁄𑀥𑁄 𑀲𑀫𑀼𑀘𑁆𑀙𑀺𑀦𑁆𑀦𑀸𑀖𑀸𑀢𑁄. 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄𑀢𑀺 𑀬𑁄 𑀏𑀯𑀁 𑀫𑀸𑀬𑀸𑀫𑀸𑀦𑀮𑁄𑀪𑀓𑁄𑀥𑀸𑀦𑀁 𑀲𑀫𑀼𑀕𑁆𑀖𑀸𑀢𑁂𑀦 𑀢𑀤𑁂𑀓𑀝𑁆𑀞𑀢𑀸𑀬 𑀲𑀩𑁆𑀩𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀲𑁄 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀅𑀪𑀺𑀦𑀺𑀩𑁆𑀩𑀼𑀢𑀘𑀺𑀢𑁆𑀢𑁄 𑀲𑀻𑀢𑀺𑀪𑀽𑀢𑁄. 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄 𑀲𑀫𑀡𑁄 𑀲 𑀪𑀺𑀓𑁆𑀔𑀽𑀢𑀺 𑀲𑁄 𑀏𑀯𑀭𑀽𑀧𑁄 𑀔𑀻𑀡𑀸𑀲𑀯𑁄 𑀲𑀩𑁆𑀩𑀲𑁄 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄, 𑀲𑁄 𑀏𑀯 𑀲𑀫𑀺𑀢𑀧𑀸𑀧𑀢𑁆𑀢𑀸 𑀲𑀫𑀘𑀭𑀺𑀬𑀸𑀬 𑀘 𑀲𑀫𑀡𑁄, 𑀲𑁄 𑀏𑀯 𑀘 𑀲𑀩𑁆𑀩𑀲𑁄 𑀪𑀺𑀦𑁆𑀦𑀓𑀺𑀮𑁂𑀲𑀢𑁆𑀢𑀸 𑀪𑀺𑀓𑁆𑀔𑀼 𑀦𑀸𑀫. 𑀏𑀯𑀁𑀪𑀽𑀢𑁄 𑀘, 𑀪𑀺𑀓𑁆𑀔𑀯𑁂, 𑀯𑀘𑁆𑀙𑁄 𑀲𑁄 𑀓𑀣𑀁 𑀤𑁄𑀲𑀦𑁆𑀢𑀭𑁄 𑀓𑀺𑀜𑁆𑀘𑀺 𑀓𑀸𑀬𑀓𑀫𑁆𑀫𑀸𑀤𑀺𑀁 𑀧𑀯𑀢𑁆𑀢𑁂𑀬𑁆𑀬, 𑀓𑁂𑀯𑀮𑀁 𑀧𑀦 𑀯𑀸𑀲𑀦𑀸𑀬 𑀅𑀧𑁆𑀧𑀳𑀻𑀦𑀢𑁆𑀢𑀸 𑀯𑀲𑀮𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀢𑀻𑀢𑀺.

𑀙𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀓𑁆𑀓𑀼𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀢𑁆𑀢𑀫𑁂 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀅𑀜𑁆𑀜𑀢𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀢𑀺 𑀏𑀢𑁆𑀣 𑀓𑁂𑀘𑀺 𑀢𑀸𑀯 𑀆𑀳𑀼 ‘‘𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀇𑀥 ‘𑀅𑀜𑁆𑀜𑀢𑀭𑁄 𑀲𑀫𑀸𑀥𑀻’𑀢𑀺 𑀅𑀥𑀺𑀧𑁆𑀧𑁂𑀢𑁄’’𑀢𑀺. 𑀢𑀜𑁆𑀳𑀺 𑀲𑁄 𑀆𑀬𑀲𑁆𑀫𑀸 𑀩𑀳𑀼𑀮𑀁 𑀲𑀫𑀸𑀧𑀚𑁆𑀚𑀢𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁, 𑀧𑀳𑁄𑀢𑀺 𑀘 𑀲𑀢𑁆𑀢𑀸𑀳𑀫𑁆𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑀼𑀁. 𑀢𑀣𑀸 𑀳𑀺 𑀪𑀕𑀯𑀢𑀸 𑁋

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺, 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺…𑀧𑁂… 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀯𑀺𑀳𑀭𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁨) 𑁋

𑀆𑀤𑀺𑀦𑀸 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀙𑀴𑀪𑀺𑀜𑁆𑀜𑀸𑀤𑀺𑀪𑁂𑀤𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀸𑀦𑁂 𑀞𑀧𑀺𑀢𑁄, 𑀦 𑀘𑁂𑀢𑁆𑀣 ‘‘𑀬𑀤𑀺 𑀏𑀯𑀁 𑀣𑁂𑀭𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀫𑁆𑀧𑀺 𑀓𑀭𑁂𑀬𑁆𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀸𑀯𑀓𑀲𑀸𑀥𑀸𑀭𑀡𑀸𑀦𑀁𑀬𑁂𑀯 𑀛𑀸𑀦𑀸𑀤𑀻𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺.

𑀧𑁄𑀭𑀸𑀡𑀸 𑀧𑀦𑀸𑀳𑀼 𑁋 𑀅𑀜𑁆𑀜𑀢𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸. 𑀓𑀣𑀁 𑀧𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀲𑀫𑀸𑀥𑀻𑀢𑀺 𑀯𑀼𑀢𑁆𑀢𑀸? 𑀲𑀫𑀸𑀥𑀸𑀦𑀝𑁆𑀞𑁂𑀦. 𑀓𑁄 𑀧𑀦𑀸𑀬𑀁 𑀲𑀫𑀸𑀥𑀸𑀦𑀝𑁆𑀞𑁄? 𑀲𑀫𑁆𑀫𑀤𑁂𑀯 𑀆𑀥𑀸𑀢𑀩𑁆𑀩𑀢𑀸. 𑀬𑀸 𑀳𑀺 𑀏𑀲𑀸 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀦𑀻𑀬𑀸 𑀩𑀮𑀧𑁆𑀧𑀢𑁆𑀢𑀺𑀬𑀸 𑀲𑀫𑀣𑀩𑀮𑀁 𑀯𑀺𑀧𑀲𑁆𑀲𑀦𑀸𑀩𑀮𑀦𑁆𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀩𑀮𑁂𑀳𑀺, 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀦𑀺𑀭𑁄𑀥𑀧𑀝𑀺𑀦𑀺𑀲𑁆𑀲𑀕𑁆𑀕𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸 𑀘𑀢𑁆𑀢𑀸𑀭𑀺 𑀫𑀕𑁆𑀕𑀜𑀸𑀡𑀸𑀦𑀺 𑀘𑀢𑁆𑀢𑀸𑀭𑀺 𑀘 𑀨𑀮𑀜𑀸𑀡𑀸𑀦𑀻𑀢𑀺 𑀇𑀫𑁂𑀲𑀁 𑀲𑁄𑀴𑀲𑀦𑁆𑀦𑀁 𑀜𑀸𑀡𑀸𑀦𑀁 𑀯𑀲𑁂𑀦 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺, 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀆𑀤𑀬𑁄 𑀅𑀝𑁆𑀞 𑀲𑀫𑀸𑀥𑀻 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀕𑀳𑀺𑀢𑁄 𑀢𑁂𑀲𑀁 𑀉𑀧𑀘𑀸𑀭𑀲𑀫𑀸𑀥𑀺 𑀘𑀸𑀢𑀺 𑀇𑀫𑁂𑀲𑀁 𑀦𑀯𑀦𑁆𑀦𑀁 𑀲𑀫𑀸𑀥𑀻𑀦𑀁 𑀯𑀲𑁂𑀦 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺 𑀓𑀸𑀬𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀗𑁆𑀔𑀸𑀭𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀢𑀣𑀸 𑀯𑀺𑀳𑀭𑀺𑀢𑀼𑀓𑀸𑀫𑁂𑀦 𑀬𑀣𑀸𑀯𑀼𑀢𑁆𑀢𑁂𑀲𑀼 𑀞𑀸𑀦𑁂𑀲𑀼 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁂𑀦 𑀅𑀭𑀳𑀢𑀸 𑀅𑀦𑀸𑀕𑀸𑀫𑀺𑀦𑀸 𑀯𑀸 𑀬𑀣𑀸𑀥𑀺𑀧𑁆𑀧𑁂𑀢𑀁 𑀓𑀸𑀮𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀦𑁆𑀢𑀸𑀦𑀲𑁆𑀲 𑀲𑀫𑁆𑀫𑀤𑁂𑀯 𑀅𑀧𑁆𑀧𑀯𑀢𑁆𑀢𑀺 𑀆𑀥𑀸𑀢𑀩𑁆𑀩𑀸, 𑀢𑀲𑁆𑀲𑀸 𑀢𑀣𑀸 𑀲𑀫𑀸𑀥𑀸𑀢𑀩𑁆𑀩𑀢𑀸 𑀇𑀥 𑀲𑀫𑀸𑀥𑀸𑀦𑀝𑁆𑀞𑁄, 𑀢𑁂𑀦𑀸𑀬𑀁 𑀯𑀺𑀳𑀸𑀭𑁄 𑀲𑀫𑀸𑀥𑀻𑀢𑀺 𑀯𑀼𑀢𑁆𑀢𑁄, 𑀦 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦. 𑀏𑀢𑁂𑀦𑀲𑁆𑀲 𑀲𑀫𑀸𑀧𑀢𑁆𑀢𑀺𑀅𑀢𑁆𑀣𑁄𑀧𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀜𑁆𑀳𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑁋

‘‘𑀓𑀣𑀁 𑀤𑁆𑀯𑀻𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀺𑀡𑁆𑀡𑀁 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺 𑀯𑀲𑀻𑀪𑀸𑀯𑀢𑀸𑀬 𑀲𑀜𑁆𑀜𑀸𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁮𑁩) 𑁋

𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑁆𑀯𑀻𑀳𑀺 𑀩𑀮𑁂𑀳𑀻’’𑀢𑀺 𑀤𑁆𑀯𑁂 𑀩𑀮𑀸𑀦𑀺 𑀲𑀫𑀣𑀩𑀮𑀁 𑀯𑀺𑀧𑀲𑁆𑀲𑀦𑀸𑀩𑀮𑀦𑁆𑀢𑀺 𑀯𑀺𑀢𑁆𑀣𑀸𑀭𑁄. 𑀲𑀸𑀬𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁮𑁬𑁭 𑀆𑀤𑀬𑁄) 𑀲𑀁𑀯𑀡𑁆𑀡𑀺𑀢𑀸𑀯. 𑀓𑀲𑁆𑀫𑀸 𑀧𑀦𑀸𑀬𑀁 𑀣𑁂𑀭𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺? 𑀲𑀢𑁆𑀢𑁂𑀲𑀼 𑀅𑀦𑀼𑀓𑀫𑁆𑀧𑀸𑀬. 𑀅𑀬𑀜𑁆𑀳𑀺 𑀫𑀳𑀸𑀣𑁂𑀭𑁄 𑀲𑀩𑁆𑀩𑀸𑀧𑀺 𑀲𑀫𑀸𑀧𑀢𑁆𑀢𑀺𑀬𑁄 𑀯𑀴𑀜𑁆𑀚𑁂𑀢𑀺, 𑀲𑀢𑁆𑀢𑀸𑀦𑀼𑀕𑁆𑀕𑀳𑁂𑀦 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀢𑀺. 𑀢𑀜𑁆𑀳𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀓𑀢𑁄 𑀅𑀧𑁆𑀧𑀓𑁄𑀧𑀺 𑀲𑀓𑁆𑀓𑀸𑀭𑁄 𑀯𑀺𑀲𑁂𑀲𑀢𑁄 𑀫𑀳𑀧𑁆𑀨𑀮𑁄 𑀫𑀳𑀸𑀦𑀺𑀲𑀁𑀲𑁄 𑀳𑁄𑀢𑀻𑀢𑀺.

𑀯𑀼𑀝𑁆𑀞𑀸𑀲𑀻𑀢𑀺 𑀅𑀭𑀳𑀢𑁆𑀢𑀨𑀮𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀲𑀺. 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀳𑀺 𑀅𑀭𑀳𑀸 𑀘𑁂 𑀅𑀭𑀳𑀢𑁆𑀢𑀨𑀮𑀲𑁆𑀲, 𑀅𑀦𑀸𑀕𑀸𑀫𑀻 𑀘𑁂 𑀅𑀦𑀸𑀕𑀸𑀫𑀺𑀨𑀮𑀲𑁆𑀲 𑀉𑀧𑁆𑀧𑀸𑀤𑁂𑀦 𑀯𑀼𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀻𑀢𑀺 𑀓𑀣𑀁 𑀢𑀲𑁆𑀲 𑀤𑀸𑀢𑀼𑀓𑀸𑀫𑀢𑀸 𑀚𑀸𑀢𑀸? 𑀬𑀸𑀦𑀺 ‘‘𑀢𑀸𑀦𑀺 𑀧𑀜𑁆𑀘𑀫𑀢𑁆𑀢𑀸𑀦𑀺 𑀤𑁂𑀯𑀢𑀸𑀲𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺, 𑀢𑀸 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀭𑀺𑀘𑀸𑀭𑀺𑀓𑀸 𑀓𑀓𑀼𑀝𑀧𑀸𑀤𑀺𑀦𑀺𑀬𑁄 𑀧𑀼𑀩𑁆𑀩𑁂 ‘‘𑀅𑀬𑁆𑀬𑁄 𑀫𑀳𑀸𑀓𑀲𑁆𑀲𑀧𑁄 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀕𑀘𑁆𑀙𑀣 𑀣𑁂𑀭𑀲𑁆𑀲 𑀤𑀸𑀦𑀁 𑀤𑁂𑀣𑀸’’𑀢𑀺 𑀲𑀓𑁆𑀓𑁂𑀦 𑀧𑁂𑀲𑀺𑀢𑀸 𑀉𑀧𑀕𑀦𑁆𑀢𑁆𑀯𑀸 𑀤𑀺𑀩𑁆𑀩𑀸𑀳𑀸𑀭𑀁 𑀤𑀸𑀢𑀼𑀓𑀸𑀫𑀸 𑀞𑀺𑀢𑀸 𑀣𑁂𑀭𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑀸. 𑀇𑀤𑀸𑀦𑀺 𑀧𑀼𑀭𑀺𑀫𑀧𑁆𑀧𑀝𑀺𑀓𑁆𑀔𑁂𑀧𑀁 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀤𑀸𑀘𑀺 𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀣𑁂𑀭𑀲𑁆𑀲 𑀤𑀸𑀦𑀁 𑀤𑀸𑀢𑀼𑀓𑀸𑀫𑀸 𑀲𑀓𑁆𑀓𑀲𑁆𑀲 𑀅𑀦𑀸𑀭𑁄𑀘𑁂𑀢𑁆𑀯𑀸 𑀲𑀬𑀫𑁂𑀯 𑀆𑀕𑀦𑁆𑀢𑁆𑀯𑀸 𑀤𑀺𑀩𑁆𑀩𑀪𑁄𑀚𑀦𑀸𑀦𑀺 𑀉𑀧𑀦𑁂𑀦𑁆𑀢𑀺𑀬𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀣𑁂𑀭𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑁂𑀦 ‘‘𑀓𑀳𑀁 𑀕𑀢𑀢𑁆𑀣𑀸’’𑀢𑀺 𑀧𑀼𑀝𑁆𑀞𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀤𑀺𑀦𑁆𑀦𑁄 𑀯𑁄 𑀣𑁂𑀭𑀲𑁆𑀲 𑀧𑀺𑀡𑁆𑀟𑀧𑀸𑀢𑁄’’𑀢𑀺 𑀲𑀓𑁆𑀓𑁂𑀦 𑀯𑀼𑀢𑁆𑀢𑁂 ‘‘𑀕𑀡𑁆𑀳𑀺𑀢𑀼𑀁 𑀦 𑀇𑀘𑁆𑀙𑀢𑀻’’𑀢𑀺. ‘‘𑀓𑀺𑀁 𑀓𑀣𑁂𑀲𑀻’’𑀢𑀺? ‘‘‘𑀤𑀼𑀕𑁆𑀕𑀢𑀸𑀦𑀁 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀆𑀳, 𑀤𑁂𑀯𑀸’’𑀢𑀺. ‘‘𑀢𑀼𑀫𑁆𑀳𑁂 𑀓𑁂𑀦𑀸𑀓𑀸𑀭𑁂𑀦 𑀕𑀢𑀸’’𑀢𑀺? ‘‘𑀇𑀫𑀺𑀦𑀸𑀯, 𑀤𑁂𑀯𑀸’’𑀢𑀺. 𑀲𑀓𑁆𑀓𑁄 ‘‘𑀢𑀼𑀫𑁆𑀳𑀸𑀤𑀺𑀲𑀺𑀬𑁄 𑀣𑁂𑀭𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀓𑀺𑀁 𑀤𑀲𑁆𑀲𑀦𑁆𑀢𑀻’’𑀢𑀺? 𑀲𑀬𑀁 𑀤𑀸𑀢𑀼𑀓𑀸𑀫𑁄, 𑀚𑀭𑀸𑀚𑀺𑀡𑁆𑀡𑁄 𑀔𑀡𑁆𑀟𑀤𑀦𑁆𑀢𑁄 𑀧𑀮𑀺𑀢𑀓𑁂𑀲𑁄 𑀑𑀪𑀕𑁆𑀕𑀲𑀭𑀻𑀭𑁄 𑀫𑀳𑀮𑁆𑀮𑀓𑁄 𑀢𑀦𑁆𑀢𑀯𑀸𑀬𑁄 𑀳𑀼𑀢𑁆𑀯𑀸, 𑀲𑀼𑀚𑀫𑁆𑀧𑀺 𑀅𑀲𑀼𑀭𑀥𑀻𑀢𑀭𑀁 𑀢𑀣𑀸𑀭𑀽𑀧𑀺𑀫𑁂𑀯 𑀫𑀳𑀮𑁆𑀮𑀺𑀓𑀁 𑀓𑀢𑁆𑀯𑀸, 𑀏𑀓𑀁 𑀧𑁂𑀲𑀓𑀸𑀭𑀯𑀻𑀣𑀺𑀁 𑀫𑀸𑀧𑁂𑀢𑁆𑀯𑀸 𑀢𑀦𑁆𑀢𑀁 𑀧𑀲𑀸𑀭𑁂𑀦𑁆𑀢𑁄 𑀅𑀘𑁆𑀙𑀺, 𑀲𑀼𑀚𑀸 𑀢𑀲𑀭𑀁 𑀧𑀽𑀭𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄…𑀧𑁂… 𑀢𑀲𑀭𑀁 𑀧𑀽𑀭𑁂𑀢𑀻’’𑀢𑀺.

𑀢𑀢𑁆𑀣 𑀢𑀦𑁆𑀢𑀁 𑀯𑀺𑀦𑀸𑀢𑀻𑀢𑀺 𑀧𑀲𑀸𑀭𑀺𑀢𑀢𑀦𑁆𑀢𑀁 𑀯𑀺𑀦𑀦𑁆𑀢𑁄 𑀯𑀺𑀬 𑀳𑁄𑀢𑀺. 𑀢𑀲𑀭𑀁 𑀧𑀽𑀭𑁂𑀢𑀻𑀢𑀺 𑀢𑀲𑀭𑀯𑀝𑁆𑀝𑀺𑀁 𑀯𑀟𑁆𑀠𑁂𑀦𑁆𑀢𑀻 𑀯𑀺𑀬. 𑀬𑁂𑀦 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀣𑁂𑀭𑁄 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 ‘‘𑀤𑀼𑀕𑁆𑀕𑀢𑀚𑀦𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀕𑀭𑀸𑀪𑀺𑀫𑀼𑀔𑁄 𑀕𑀘𑁆𑀙𑀦𑁆𑀢𑁄 𑀩𑀳𑀺𑀦𑀕𑀭𑁂 𑀲𑀓𑁆𑀓𑁂𑀦 𑀫𑀸𑀧𑀺𑀢𑀁 𑀧𑁂𑀲𑀓𑀸𑀭𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀚𑀺𑀡𑁆𑀡𑀲𑀸𑀮𑀁 𑀢𑀢𑁆𑀣 𑀘 𑀢𑁂 𑀚𑀸𑀬𑀫𑁆𑀧𑀢𑀺𑀓𑁂 𑀬𑀣𑀸𑀯𑀼𑀢𑁆𑀢𑀭𑀽𑀧𑁂 𑀢𑀦𑁆𑀢𑀯𑀸𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀇𑀫𑁂𑀳𑀺 𑀤𑀼𑀕𑁆𑀕𑀢𑀢𑀭𑀸 𑀦𑀢𑁆𑀣𑀺 𑀫𑀜𑁆𑀜𑁂. 𑀇𑀫𑁂𑀳𑀺 𑀤𑀺𑀦𑁆𑀦𑀁 𑀲𑀸𑀓𑀫𑀢𑁆𑀢𑀫𑁆𑀧𑀺 𑀕𑀳𑁂𑀢𑁆𑀯𑀸 𑀇𑀫𑁂𑀲𑀁 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑁂𑀲𑀁 𑀕𑁂𑀳𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀲𑀓𑁆𑀓𑁄 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀼𑀚𑀁 𑀆𑀳 𑁋 ‘‘𑀪𑀤𑁆𑀤𑁂, 𑀫𑀬𑁆𑀳𑀁 𑀅𑀬𑁆𑀬𑁄 𑀇𑀢𑁄 𑀆𑀕𑀘𑁆𑀙𑀢𑀺, 𑀢𑀁 𑀢𑁆𑀯𑀁 𑀅𑀧𑀲𑁆𑀲𑀦𑁆𑀢𑀻 𑀯𑀺𑀬 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀦𑀺𑀲𑀻𑀤. 𑀔𑀡𑁂𑀦𑁂𑀯 𑀯𑀜𑁆𑀘𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀤𑀲𑁆𑀲𑀸𑀫𑀸’’𑀢𑀺 𑀣𑁂𑀭𑁄 𑀕𑀦𑁆𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀢𑁂𑀧𑀺 𑀅𑀧𑀲𑁆𑀲𑀦𑁆𑀢𑀸 𑀯𑀺𑀬 𑀅𑀢𑁆𑀢𑀦𑁄 𑀓𑀫𑁆𑀫𑀫𑁂𑀯 𑀓𑀭𑁄𑀦𑁆𑀢𑀸 𑀣𑁄𑀓𑀁 𑀆𑀕𑀫𑀬𑀺𑀁𑀲𑀼. 𑀅𑀣 𑀲𑀓𑁆𑀓𑁄 ‘‘𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑁄 𑀏𑀓𑁄 𑀣𑁂𑀭𑁄 𑀯𑀺𑀬 𑀔𑀸𑀬𑀢𑀺, 𑀉𑀧𑀥𑀸𑀭𑁂𑀳𑀺 𑀢𑀸𑀯𑀸’’𑀢𑀺 𑀆𑀳. ‘‘𑀢𑀼𑀫𑁆𑀳𑁂 𑀕𑀦𑁆𑀢𑁆𑀯𑀸 𑀉𑀧𑀥𑀸𑀭𑁂𑀣, 𑀲𑀸𑀫𑀻’’𑀢𑀺. 𑀲𑁄 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀚𑀡𑁆𑀡𑀼𑀓𑀸𑀦𑀺 𑀑𑀮𑀼𑀫𑁆𑀩𑀺𑀢𑁆𑀯𑀸 𑀦𑀺𑀢𑁆𑀣𑀼𑀦𑀦𑁆𑀢𑁄 𑀉𑀝𑁆𑀞𑀸𑀬 ‘‘𑀓𑀢𑀭𑀢𑁆𑀣𑁂𑀭𑁄 𑀦𑀼 𑀔𑁄 𑀅𑀬𑁆𑀬𑁄’’𑀢𑀺 𑀣𑁄𑀓𑀁 𑀑𑀲𑀓𑁆𑀓𑀺𑀢𑁆𑀯𑀸 ‘‘𑀅𑀓𑁆𑀔𑀻𑀦𑀺 𑀫𑁂 𑀥𑀽𑀫𑀸𑀬𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀦𑀮𑀸𑀝𑁂 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 ‘‘𑀅𑀳𑁄 𑀤𑀼𑀓𑁆𑀔𑀁 𑀅𑀬𑁆𑀬𑁄 𑀦𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄𑀯 𑀘𑀺𑀭𑀲𑁆𑀲𑀁 𑀫𑁂 𑀓𑀼𑀝𑀺𑀤𑁆𑀯𑀸𑀭𑀁 𑀆𑀕𑀢𑁄. 𑀅𑀢𑁆𑀣𑀺 𑀦𑀼 𑀔𑁄 𑀓𑀺𑀜𑁆𑀘𑀺 𑀕𑁂𑀳𑁂’’𑀢𑀺 𑀆𑀳. 𑀲𑀼𑀚𑀸 𑀣𑁄𑀓𑀁 𑀆𑀓𑀼𑀮𑀸 𑀯𑀺𑀬 𑀳𑀼𑀢𑁆𑀯𑀸 ‘‘𑀅𑀢𑁆𑀣𑀺, 𑀲𑀸𑀫𑀻’’𑀢𑀺 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺. 𑀲𑀓𑁆𑀓𑁄, ‘‘𑀪𑀦𑁆𑀢𑁂, 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀲𑀗𑁆𑀕𑀳𑀁 𑀦𑁄 𑀓𑀭𑁄𑀣𑀸’’𑀢𑀺 𑀧𑀢𑁆𑀢𑀁 𑀕𑀡𑁆𑀳𑀺. 𑀣𑁂𑀭𑁄 𑀧𑀢𑁆𑀢𑀁 𑀤𑁂𑀦𑁆𑀢𑁄 ‘‘𑀇𑀫𑁂𑀲𑀁 𑀏𑀯 𑀤𑀼𑀕𑁆𑀕𑀢𑀸𑀦𑀁 𑀚𑀭𑀸𑀚𑀺𑀡𑁆𑀡𑀸𑀦𑀁 𑀫𑀬𑀸 𑀲𑀗𑁆𑀕𑀳𑁄 𑀓𑀸𑀢𑀩𑁆𑀩𑁄’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑁄 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀖𑀝𑀺𑀑𑀤𑀦𑀁 𑀦𑀸𑀫 𑀖𑀝𑀺𑀢𑁄 𑀉𑀤𑁆𑀥𑀭𑀺𑀢𑁆𑀯𑀸, 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸, 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲𑀸 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄…𑀧𑁂… 𑀅𑀤𑀸𑀲𑀻’’𑀢𑀺.

𑀢𑀢𑁆𑀣 𑀖𑀝𑀺𑀬𑀸𑀢𑀺 𑀪𑀢𑁆𑀢𑀖𑀝𑀺𑀢𑁄. ‘‘𑀖𑀝𑀺𑀑𑀤𑀦’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀖𑀝𑀺𑀑𑀤𑀦𑀁 𑀦𑀸𑀫 𑀤𑁂𑀯𑀸𑀦𑀁 𑀓𑁄𑀘𑀺 𑀆𑀳𑀸𑀭𑀯𑀺𑀲𑁂𑀲𑁄𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀉𑀤𑁆𑀥𑀭𑀺𑀢𑁆𑀯𑀸𑀢𑀺 𑀓𑀼𑀢𑁄𑀘𑀺 𑀪𑀸𑀚𑀦𑀢𑁄 𑀉𑀤𑁆𑀥𑀭𑀺𑀢𑁆𑀯𑀸. 𑀅𑀦𑁂𑀓𑀲𑀽𑀧𑁄 𑀲𑁄 𑀏𑀯 𑀆𑀳𑀸𑀭𑁄 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀞𑀧𑀦𑀓𑀸𑀮𑁂 𑀓𑀧𑀡𑀸𑀦𑀁 𑀉𑀧𑀓𑀧𑁆𑀧𑀦𑀓𑀮𑀽𑀔𑀸𑀳𑀸𑀭𑁄 𑀯𑀺𑀬 𑀧𑀜𑁆𑀜𑀸𑀬𑀺𑀢𑁆𑀣, 𑀳𑀢𑁆𑀣𑁂 𑀞𑀧𑀺𑀢𑀫𑀢𑁆𑀢𑁂 𑀧𑀦 𑀅𑀢𑁆𑀢𑀦𑁄 𑀤𑀺𑀩𑁆𑀩𑀲𑀪𑀸𑀯𑁂𑀦𑁂𑀯 𑀅𑀝𑁆𑀞𑀸𑀲𑀺. 𑀅𑀦𑁂𑀓𑀲𑀽𑀧𑁄𑀢𑀺 𑀫𑀼𑀕𑁆𑀕𑀫𑀸𑀲𑀸𑀤𑀺𑀲𑀽𑀧𑁂𑀳𑀺 𑀘𑁂𑀯 𑀔𑀚𑁆𑀚𑀯𑀺𑀓𑀢𑀻𑀳𑀺 𑀘 𑀅𑀦𑁂𑀓𑀯𑀺𑀥𑀲𑀽𑀧𑁄. 𑀅𑀦𑁂𑀓𑀩𑁆𑀬𑀜𑁆𑀚𑀦𑁄𑀢𑀺 𑀦𑀸𑀦𑀸𑀯𑀺𑀥𑀉𑀢𑁆𑀢𑀭𑀺𑀪𑀗𑁆𑀕𑁄. 𑀅𑀦𑁂𑀓𑀭𑀲𑀩𑁆𑀬𑀜𑁆𑀚𑀦𑁄𑀢𑀺 𑀅𑀦𑁂𑀓𑁂𑀳𑀺 𑀲𑀽𑀧𑁂𑀳𑀺 𑀘𑁂𑀯 𑀩𑁆𑀬𑀜𑁆𑀚𑀦𑁂𑀳𑀺 𑀘 𑀫𑀥𑀼𑀭𑀸𑀤𑀺𑀫𑀽𑀮𑀭𑀲𑀸𑀦𑀜𑁆𑀘𑁂𑀯 𑀲𑀫𑁆𑀪𑀺𑀦𑁆𑀦𑀭𑀲𑀸𑀦𑀜𑁆𑀘 𑀅𑀪𑀺𑀩𑁆𑀬𑀜𑁆𑀚𑀓𑁄, 𑀦𑀸𑀦𑀕𑁆𑀕𑀭𑀲𑀲𑀽𑀧𑀩𑁆𑀬𑀜𑁆𑀚𑀦𑁄𑀢𑀺 𑀅𑀢𑁆𑀣𑁄.

𑀲𑁄 𑀓𑀺𑀭 𑀧𑀺𑀡𑁆𑀟𑀧𑀸𑀢𑁄 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀞𑀧𑀺𑀢𑀓𑀸𑀮𑁂 𑀭𑀸𑀚𑀕𑀳𑀦𑀕𑀭𑀁 𑀅𑀢𑁆𑀢𑀦𑁄 𑀤𑀺𑀩𑁆𑀩𑀕𑀦𑁆𑀥𑁂𑀦 𑀅𑀚𑁆𑀛𑁄𑀢𑁆𑀣𑀭𑀺, 𑀢𑀢𑁄 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀧𑀼𑀭𑀺𑀲𑁄 𑀅𑀧𑁆𑀧𑁂𑀲𑀓𑁆𑀔𑁄, 𑀧𑀺𑀡𑁆𑀟𑀧𑀸𑀢𑁄 𑀅𑀢𑀺𑀯𑀺𑀬 𑀧𑀡𑀻𑀢𑁄 𑀲𑀓𑁆𑀓𑀲𑁆𑀲 𑀪𑁄𑀚𑀦𑀲𑀤𑀺𑀲𑁄. 𑀓𑁄 𑀦𑀼 𑀔𑁄 𑀏𑀲𑁄’’𑀢𑀺? 𑀅𑀣 𑀦𑀁 ‘‘𑀲𑀓𑁆𑀓𑁄’’𑀢𑀺 𑀜𑀢𑁆𑀯𑀸 𑀆𑀳 𑁋 ‘‘𑀪𑀸𑀭𑀺𑀬𑀁 𑀢𑁂, 𑀓𑁄𑀲𑀺𑀬, 𑀓𑀫𑁆𑀫𑀁 𑀓𑀢𑀁 𑀤𑀼𑀕𑁆𑀕𑀢𑀸𑀦𑀁 𑀲𑀫𑁆𑀧𑀢𑁆𑀢𑀺𑀁 𑀯𑀺𑀮𑀼𑀫𑁆𑀧𑀦𑁆𑀢𑁂𑀦, 𑀅𑀚𑁆𑀚 𑀫𑀬𑁆𑀳𑀁 𑀤𑀸𑀦𑀁 𑀤𑀢𑁆𑀯𑀸 𑀓𑁄𑀘𑀺𑀤𑁂𑀯 𑀤𑀼𑀕𑁆𑀕𑀢𑁄 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀯𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀯𑀸 𑀮𑀪𑁂𑀬𑁆𑀬𑀸’’𑀢𑀺. ‘‘𑀓𑁄 𑀫𑀬𑀸 𑀤𑀼𑀕𑁆𑀕𑀢𑀢𑀭𑁄 𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺? ‘‘𑀓𑀣𑀁 𑀢𑁆𑀯𑀁 𑀤𑀼𑀕𑁆𑀕𑀢𑁄 𑀤𑁂𑀯𑀭𑀚𑁆𑀚𑀲𑀺𑀭𑀺𑀁 𑀅𑀦𑀼𑀪𑀯𑀦𑁆𑀢𑁄’’𑀢𑀺? ‘‘𑀪𑀦𑁆𑀢𑁂, 𑀏𑀯𑀁 𑀦𑀸𑀫𑁂𑀢𑀁, 𑀫𑀬𑀸 𑀧𑀦 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀢𑀁, 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀧𑀦 𑀯𑀢𑁆𑀢𑀫𑀸𑀦𑁂 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀘𑀽𑀴𑀭𑀣𑀤𑁂𑀯𑀧𑀼𑀢𑁆𑀢𑁄 𑀫𑀳𑀸𑀭𑀣𑀤𑁂𑀯𑀧𑀼𑀢𑁆𑀢𑁄 𑀅𑀦𑁂𑀓𑀯𑀡𑁆𑀡𑀤𑁂𑀯𑀧𑀼𑀢𑁆𑀢𑁄𑀢𑀺 𑀇𑀫𑁂 𑀢𑀬𑁄 𑀤𑁂𑀯𑀧𑀼𑀢𑁆𑀢𑀸 𑀫𑀫𑀸𑀲𑀦𑁆𑀦𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀸 𑀫𑀳𑀸𑀢𑁂𑀚𑀯𑀦𑁆𑀢𑀢𑀭𑀸. 𑀅𑀳𑀁 𑀢𑁂𑀲𑀼 𑀤𑁂𑀯𑀧𑀼𑀢𑁆𑀢𑁂𑀲𑀼 ‘𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸’𑀢𑀺 𑀧𑀭𑀺𑀘𑀸𑀭𑀺𑀓𑀸𑀬𑁄 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀑𑀢𑀺𑀡𑁆𑀡𑁂𑀲𑀼 𑀧𑀮𑀸𑀬𑀺𑀢𑁆𑀯𑀸 𑀕𑁂𑀳𑀁 𑀧𑀯𑀺𑀲𑀸𑀫𑀺. 𑀢𑁂𑀲𑀜𑁆𑀳𑀺 𑀲𑀭𑀻𑀭𑀢𑁄 𑀢𑁂𑀚𑁄 𑀫𑀫 𑀲𑀭𑀻𑀭𑀁 𑀑𑀢𑁆𑀣𑀭𑀢𑀺, 𑀫𑀫 𑀲𑀭𑀻𑀭𑀢𑁄 𑀢𑁂𑀚𑁄 𑀢𑁂𑀲𑀁 𑀲𑀭𑀻𑀭𑀁 𑀦 𑀑𑀢𑁆𑀣𑀭𑀢𑀺. 𑀓𑁄 𑀫𑀬𑀸 𑀤𑀼𑀕𑁆𑀕𑀢𑀢𑀭𑁄, 𑀪𑀦𑁆𑀢𑁂’’𑀢𑀺? ‘‘𑀏𑀯𑀁 𑀲𑀦𑁆𑀢𑁂𑀧𑀺 𑀇𑀢𑁄 𑀧𑀝𑁆𑀞𑀸𑀬 𑀫𑀬𑁆𑀳𑀁 𑀫𑀸 𑀏𑀯𑀁 𑀯𑀜𑁆𑀘𑁂𑀢𑁆𑀯𑀸 𑀤𑀸𑀦𑀫𑀤𑀸𑀲𑀻’’𑀢𑀺. ‘‘𑀯𑀜𑁆𑀘𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀤𑀸𑀦𑁂 𑀤𑀺𑀦𑁆𑀦𑁂 𑀫𑀬𑁆𑀳𑀁 𑀓𑀼𑀲𑀮𑀁 𑀅𑀢𑁆𑀣𑀺 𑀦𑀢𑁆𑀣𑀻’’𑀢𑀺? ‘‘𑀅𑀢𑁆𑀣𑀺, 𑀆𑀯𑀼𑀲𑁄’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀓𑀼𑀲𑀮𑀓𑀭𑀡𑀁 𑀦𑀸𑀫 𑀫𑀬𑁆𑀳𑀁 𑀪𑀸𑀭𑁄, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀲𑀼𑀚𑀁 𑀆𑀤𑀸𑀬 𑀣𑁂𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸, 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 ‘‘𑀅𑀳𑁄 𑀤𑀸𑀦𑀁 𑀧𑀭𑀫𑀤𑀸𑀦𑀁, 𑀓𑀲𑁆𑀲𑀧𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀏𑀢𑀤𑀳𑁄𑀲𑀻’’𑀢𑀺𑀆𑀤𑀺.

𑀢𑀢𑁆𑀣 𑀓𑁄𑀲𑀺𑀬𑀸𑀢𑀺 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀧𑀼𑀜𑁆𑀜𑁂𑀦 𑀅𑀢𑁆𑀣𑁄𑀢𑀺 𑀧𑀼𑀜𑁆𑀜𑁂𑀦 𑀧𑀬𑁄𑀚𑀦𑀁. 𑀅𑀢𑁆𑀣𑀻𑀢𑀺 𑀯𑀘𑀦𑀲𑁂𑀲𑁄. 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸𑀢𑀺 𑀧𑀣𑀯𑀺𑀢𑁄 𑀯𑁂𑀳𑀸𑀲𑀁 𑀅𑀪𑀺𑀉𑀕𑁆𑀕𑀦𑁆𑀢𑁆𑀯𑀸. 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂𑀢𑀺 𑀆𑀓𑀸𑀲𑀫𑁂𑀯 𑀧𑀭𑀺𑀬𑀸𑀬𑀲𑀤𑁆𑀤𑁂𑀦 𑀅𑀦𑁆𑀢𑀮𑀺𑀓𑁆𑀔𑁂𑀢𑀺 𑀯𑀤𑀦𑁆𑀢𑀺. 𑀅𑀣 𑀯𑀸 𑀅𑀦𑁆𑀢𑀮𑀺𑀓𑁆𑀔𑀲𑀗𑁆𑀔𑀸𑀢𑁂 𑀆𑀓𑀸𑀲𑁂 𑀦 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀤𑀺𑀆𑀓𑀸𑀲𑁂𑀢𑀺 𑀯𑀺𑀲𑁂𑀲𑁂𑀦𑁆𑀢𑁄 𑀯𑀤𑀢𑀺. 𑀅𑀳𑁄 𑀤𑀸𑀦𑀦𑁆𑀢𑀺 𑀏𑀢𑁆𑀣 𑀅𑀳𑁄𑀢𑀺 𑀅𑀘𑁆𑀙𑀭𑀺𑀬𑀢𑁆𑀣𑁂 𑀦𑀺𑀧𑀸𑀢𑁄. 𑀲𑀓𑁆𑀓𑁄 𑀳𑀺 𑀤𑁂𑀯𑀸𑀦𑀫𑀺𑀦𑁆𑀤𑁄, ‘‘𑀬𑀲𑁆𑀫𑀸 𑀦𑀺𑀭𑁄𑀥𑀸 𑀯𑀼𑀝𑁆𑀞𑀺𑀢𑀲𑁆𑀲 𑀅𑀬𑁆𑀬𑀲𑁆𑀲 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀲𑀓𑁆𑀓𑀘𑁆𑀘𑀁 𑀲𑀳𑀢𑁆𑀣𑁂𑀦 𑀘𑀺𑀢𑁆𑀢𑀻𑀓𑀢𑁆𑀯𑀸 𑀅𑀦𑀧𑀯𑀺𑀤𑁆𑀥𑀁 𑀓𑀸𑀮𑁂𑀦 𑀧𑀭𑁂𑀲𑀁 𑀅𑀦𑀼𑀧𑀳𑀘𑁆𑀘, 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀇𑀤𑀫𑀻𑀤𑀺𑀲𑀁 𑀫𑀬𑀸 𑀤𑀺𑀩𑁆𑀩𑀪𑁄𑀚𑀦𑀤𑀸𑀦𑀁 𑀤𑀺𑀦𑁆𑀦𑀁, 𑀢𑀲𑁆𑀫𑀸 𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑀫𑁆𑀧𑀢𑁆𑀢𑀺 𑀘𑀺𑀢𑁆𑀢𑀲𑀫𑁆𑀧𑀢𑁆𑀢𑀻𑀢𑀺, 𑀢𑀺𑀯𑀺𑀥𑀸𑀬𑀧𑀺 𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀁 𑀯𑀢 𑀫𑀬𑀸 𑀤𑀸𑀦𑀁 𑀧𑀯𑀢𑁆𑀢𑀺𑀢’’𑀦𑁆𑀢𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑀢𑀤𑀸 𑀅𑀢𑁆𑀢𑀦𑁄 𑀳𑀤𑀬𑀩𑁆𑀪𑀦𑁆𑀢𑀭𑀕𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀲𑀫𑀼𑀕𑁆𑀕𑀺𑀭𑀦𑁆𑀢𑁄 ‘‘𑀅𑀳𑁄 𑀤𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀤𑀸𑀦𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀉𑀢𑁆𑀢𑀫𑀤𑀸𑀦𑀪𑀸𑀯𑀁 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑀜𑁆𑀘 𑀧𑀓𑀸𑀲𑁂𑀦𑁆𑀢𑁄 ‘‘𑀧𑀭𑀫𑀤𑀸𑀦𑀁 𑀓𑀲𑁆𑀲𑀧𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀏𑀯𑀁 𑀧𑀦 𑀲𑀓𑁆𑀓𑀲𑁆𑀲 𑀉𑀤𑀸𑀦𑁂𑀦𑁆𑀢𑀲𑁆𑀲 𑀪𑀕𑀯𑀸 𑀯𑀺𑀳𑀸𑀭𑁂 𑀞𑀺𑀢𑁄𑀬𑁂𑀯 𑀤𑀺𑀩𑁆𑀩𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢’’𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀯𑀢𑁆𑀯𑀸 𑀢𑁂𑀳𑀺 ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀢𑁂𑀦 𑀓𑀢’’𑀦𑁆𑀢𑀺 𑀧𑀼𑀝𑁆𑀞𑁄 ‘‘𑀫𑀫 𑀧𑀼𑀢𑁆𑀢𑀲𑁆𑀲 𑀓𑀲𑁆𑀲𑀧𑀲𑁆𑀲 𑀯𑀜𑁆𑀘𑁂𑀢𑁆𑀯𑀸 𑀤𑀸𑀦𑀁 𑀅𑀤𑀸𑀲𑀺, 𑀢𑁂𑀦 𑀘 𑀅𑀢𑁆𑀢𑀫𑀦𑁄 𑀉𑀤𑀸𑀦𑁂𑀲𑀻’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸’’𑀢𑀺𑀆𑀤𑀺.

𑀢𑀢𑁆𑀣 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀸. 𑀤𑁂𑀯𑀢𑀸𑀦𑀜𑁆𑀳𑀺 𑀲𑀼𑀘𑀭𑀺𑀢𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀸 𑀉𑀧𑀓𑁆𑀓𑀺𑀮𑁂𑀲𑀯𑀺𑀦𑀺𑀫𑀼𑀢𑁆𑀢𑀢𑀸𑀬 𑀤𑀽𑀭𑁂𑀧𑀺 𑀆𑀭𑀫𑁆𑀫𑀡𑀁 𑀕𑀳𑁂𑀢𑀼𑀁 𑀲𑀫𑀢𑁆𑀣𑀸 𑀤𑀺𑀩𑁆𑀩𑀧𑀲𑀸𑀤𑀲𑁄𑀢𑀥𑀸𑀢𑀼 𑀳𑁄𑀢𑀺. 𑀅𑀬𑀜𑁆𑀘𑀸𑀧𑀺 𑀪𑀕𑀯𑀢𑁄 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑀦𑀺𑀩𑁆𑀩𑀢𑁆𑀢𑀸 𑀜𑀸𑀡𑀫𑀬𑀸 𑀲𑁄𑀢𑀥𑀸𑀢𑀼 𑀢𑀸𑀤𑀺𑀲𑀸 𑀏𑀯𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀸. 𑀅𑀧𑀺 𑀘 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑀸 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀧𑀺 𑀤𑀺𑀩𑁆𑀩𑀸. 𑀲𑀯𑀦𑀝𑁆𑀞𑁂𑀦 𑀘 𑀲𑀪𑀸𑀯𑀥𑀸𑀭𑀡𑀝𑁆𑀞𑁂𑀦 𑀘 𑀲𑁄𑀢𑀥𑀸𑀢𑀼, 𑀲𑁄𑀢𑀥𑀸𑀢𑀼𑀬𑀸𑀧𑀺 𑀓𑀺𑀘𑁆𑀘𑀓𑀭𑀡𑁂𑀦 𑀲𑁄𑀢𑀥𑀸𑀢𑀼 𑀯𑀺𑀬𑀸𑀢𑀺 𑀲𑁄𑀢𑀥𑀸𑀢𑀼, 𑀢𑀸𑀬 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸. 𑀯𑀺𑀲𑀼𑀤𑁆𑀥𑀸𑀬𑀸𑀢𑀺 𑀧𑀭𑀺𑀲𑀼𑀤𑁆𑀥𑀸𑀬 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀸𑀬. 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬𑀸𑀢𑀺 𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀤𑁆𑀤𑀲𑁆𑀲𑀯𑀦𑁂𑀦 𑀫𑀸𑀦𑀼𑀲𑀺𑀓𑀫𑀁𑀲𑀲𑁄𑀢𑀥𑀸𑀢𑀼𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸𑀬.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 ‘‘𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀕𑀼𑀡𑀯𑀺𑀲𑁂𑀲𑁂 𑀧𑀢𑀺𑀝𑁆𑀞𑀺𑀢𑀁 𑀧𑀼𑀭𑀺𑀲𑀸𑀢𑀺𑀲𑀬𑀁 𑀤𑁂𑀯𑀸𑀧𑀺 𑀫𑀦𑀼𑀲𑁆𑀲𑀸𑀧𑀺 𑀆𑀤𑀭𑀚𑀸𑀢𑀸 𑀅𑀢𑀺𑀯𑀺𑀬 𑀧𑀺𑀳𑀬𑀦𑁆𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀭 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀲𑀗𑁆𑀔𑀸𑀢𑀁 𑀥𑀼𑀢𑀗𑁆𑀕𑀁 𑀲𑀫𑀸𑀤𑀸𑀬 𑀢𑀲𑁆𑀲 𑀧𑀭𑀺𑀧𑀽𑀭𑀡𑁂𑀦 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲. 𑀦𑀦𑀼 𑀘𑀸𑀬𑀁 𑀕𑀸𑀣𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀪𑀸𑀲𑀺𑀢𑀸, 𑀣𑁂𑀭𑁄 𑀘 𑀲𑀩𑁆𑀩𑁂𑀲𑀁 𑀥𑀼𑀢𑀯𑀸𑀤𑀸𑀦𑀁 𑀅𑀕𑁆𑀕𑁄 𑀢𑁂𑀭𑀲𑀥𑀼𑀢𑀗𑁆𑀕𑀥𑀭𑁄, 𑀲𑁄 𑀓𑀲𑁆𑀫𑀸 𑀏𑀓𑁂𑀦𑁂𑀯 𑀥𑀼𑀢𑀗𑁆𑀕𑁂𑀦 𑀓𑀺𑀢𑁆𑀢𑀺𑀢𑁄𑀢𑀺? 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄. 𑀅𑀣 𑀯𑀸 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁, 𑀇𑀫𑀺𑀦𑀸 𑀤𑁂𑀲𑀦𑀸𑀲𑀻𑀲𑁂𑀦 𑀲𑀩𑁆𑀩𑁂𑀧𑀺𑀲𑁆𑀲 𑀥𑀼𑀢𑀗𑁆𑀕𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 ‘‘𑀬𑀣𑀸𑀧𑀺 𑀪𑀫𑀭𑁄 𑀧𑀼𑀧𑁆𑀨’’𑀦𑁆𑀢𑀺 (𑀥. 𑀧. 𑁪𑁯) 𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦 𑀧𑀭𑀫𑀧𑁆𑀧𑀺𑀘𑁆𑀙𑀢𑀸𑀬 𑀓𑀼𑀮𑀸𑀦𑀼𑀤𑁆𑀤𑀬𑀢𑀸𑀬 𑀘𑀲𑁆𑀲 𑀲𑀩𑁆𑀩𑀁 𑀧𑀺𑀡𑁆𑀟𑀧𑀸𑀢𑀺𑀓𑀯𑀢𑁆𑀢𑀁 𑀅𑀓𑁆𑀔𑀡𑁆𑀟𑁂𑀢𑁆𑀯𑀸 𑀢𑀢𑁆𑀣 𑀲𑀸𑀢𑀺𑀲𑀬𑀁 𑀧𑀝𑀺𑀧𑀢𑁆𑀢𑀺𑀬𑀸 𑀧𑀓𑀸𑀲𑀦𑀢𑁆𑀣𑀁 ‘‘𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲𑀸𑀢𑀺 𑀘 𑀧𑀺𑀳𑀬𑀦𑁆𑀢𑀻𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀫𑁆𑀧𑀤𑀸𑀦𑀯𑀘𑀦𑀁, 𑀢𑀁 𑀉𑀧𑀬𑁄𑀕𑀢𑁆𑀣𑁂 𑀤𑀝𑁆𑀞𑀩𑁆𑀩𑀁. 𑀅𑀢𑁆𑀢𑀪𑀭𑀲𑁆𑀲𑀸𑀢𑀺 ‘‘𑀅𑀧𑁆𑀧𑀸𑀦𑀺 𑀘 𑀢𑀸𑀦𑀺 𑀲𑀼𑀮𑀪𑀸𑀦𑀺 𑀅𑀦𑀯𑀚𑁆𑀚𑀸𑀦𑀻’’𑀢𑀺 (𑀅. 𑀦𑀺. 𑁪.𑁨𑁭; 𑀇𑀢𑀺𑀯𑀼. 𑁧𑁦𑁧) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀅𑀧𑁆𑀧𑀸𑀦𑀯𑀚𑁆𑀚𑀲𑀼𑀮𑀪𑀭𑀽𑀧𑁂𑀳𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀅𑀢𑁆𑀢𑀸𑀦𑀫𑁂𑀯 𑀪𑀭𑀦𑁆𑀢𑀲𑁆𑀲. 𑀅𑀦𑀜𑁆𑀜𑀧𑁄𑀲𑀺𑀦𑁄𑀢𑀺 𑀆𑀫𑀺𑀲𑀲𑀗𑁆𑀕𑀡𑁆𑀳𑀦𑁂𑀦 𑀅𑀜𑁆𑀜𑁂 𑀲𑀺𑀲𑁆𑀲𑀸𑀤𑀺𑀓𑁂 𑀧𑁄𑀲𑁂𑀢𑀼𑀁 𑀅𑀦𑀼𑀲𑁆𑀲𑀼𑀓𑁆𑀓𑀢𑀸𑀬 𑀅𑀦𑀜𑁆𑀜𑀧𑁄𑀲𑀺𑀦𑁄. 𑀧𑀤𑀤𑁆𑀯𑀬𑁂𑀦𑀲𑁆𑀲 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦 𑀯𑀺𑀘𑀭𑀡𑀢𑁄 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀁 𑀲𑀼𑀪𑀭𑀢𑀁 𑀧𑀭𑀫𑀜𑁆𑀘 𑀲𑀦𑁆𑀢𑀼𑀝𑁆𑀞𑀺𑀁 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀅𑀢𑁆𑀢𑀪𑀭𑀲𑁆𑀲𑀸𑀢𑀺 𑀏𑀓𑀯𑀘𑀦𑀺𑀘𑁆𑀙𑀸𑀬 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀏𑀓𑀁𑀬𑁂𑀯 𑀇𑀫𑀁 𑀅𑀢𑁆𑀢𑀸𑀦𑀁 𑀪𑀭𑀢𑀺, 𑀦 𑀇𑀢𑁄 𑀧𑀭𑀁 𑀅𑀜𑁆𑀜𑀦𑁆𑀢𑀺 𑀅𑀢𑁆𑀢𑀪𑀭𑁄, 𑀢𑀢𑁄 𑀏𑀯 𑀅𑀢𑁆𑀢𑀦𑀸 𑀅𑀜𑁆𑀜𑀲𑁆𑀲 𑀧𑁄𑀲𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀅𑀦𑀜𑁆𑀜𑀧𑁄𑀲𑀻, 𑀢𑀲𑁆𑀲 𑀅𑀢𑁆𑀢𑀪𑀭𑀲𑁆𑀲 𑀅𑀦𑀜𑁆𑀜𑀧𑁄𑀲𑀺𑀦𑁄. 𑀧𑀤𑀤𑁆𑀯𑀬𑁂𑀦𑀧𑀺 𑀔𑀻𑀡𑀸𑀲𑀯𑀪𑀸𑀯𑁂𑀦 𑀆𑀬𑀢𑀺𑀁 𑀅𑀦𑀸𑀤𑀸𑀦𑀢𑀁 𑀤𑀲𑁆𑀲𑁂𑀢𑀺.

𑀤𑁂𑀯𑀸 𑀧𑀺𑀳𑀬𑀦𑁆𑀢𑀺…𑀧𑁂… 𑀲𑀢𑀻𑀫𑀢𑁄𑀢𑀺 𑀢𑀁 𑀅𑀕𑁆𑀕𑀨𑀮𑀸𑀥𑀺𑀕𑀫𑁂𑀦 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀸𑀦𑀁 𑀯𑀽𑀧𑀲𑀫𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀉𑀧𑀲𑀦𑁆𑀢𑀁, 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀦𑀺𑀘𑁆𑀘𑀓𑀸𑀮𑀁 𑀲𑀢𑁄𑀓𑀸𑀭𑀺𑀢𑀸𑀬 𑀲𑀢𑀺𑀫𑀦𑁆𑀢𑀁, 𑀢𑀢𑁄 𑀏𑀯 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀁 𑀔𑀻𑀡𑀸𑀲𑀯𑀁 𑀲𑀓𑁆𑀓𑀸𑀤𑀬𑁄 𑀤𑁂𑀯𑀸 𑀧𑀺𑀳𑀬𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀺, 𑀢𑀲𑁆𑀲 𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑁂𑀲𑀼 𑀩𑀳𑀼𑀫𑀸𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑀸 𑀆𑀤𑀭𑀁 𑀚𑀦𑁂𑀦𑁆𑀢𑀺, 𑀧𑀕𑁂𑀯 𑀫𑀦𑀼𑀲𑁆𑀲𑀸𑀢𑀺.

𑀲𑀢𑁆𑀢𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀺𑀡𑁆𑀟𑀧𑀸𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀅𑀝𑁆𑀞𑀫𑁂 𑀧𑀘𑁆𑀙𑀸𑀪𑀢𑁆𑀢𑀦𑁆𑀢𑀺 𑀏𑀓𑀸𑀲𑀦𑀺𑀓𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀸𑀦𑀁 𑀧𑀸𑀢𑁄𑀯 𑀪𑀼𑀢𑁆𑀢𑀸𑀦𑀁 𑀅𑀦𑁆𑀢𑁄𑀫𑀚𑁆𑀛𑀦𑁆𑀳𑀺𑀓𑁄𑀧𑀺 𑀧𑀘𑁆𑀙𑀸𑀪𑀢𑁆𑀢𑀫𑁂𑀯, 𑀇𑀥 𑀧𑀦 𑀧𑀓𑀢𑀺𑀪𑀢𑁆𑀢𑀲𑁆𑀲𑁂𑀯 𑀧𑀘𑁆𑀙𑀢𑁄 𑀧𑀘𑁆𑀙𑀸𑀪𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀦𑁆𑀢𑀺 𑀧𑀺𑀡𑁆𑀟𑀧𑀸𑀢𑀢𑁄 𑀧𑀝𑀺𑀓𑁆𑀓𑀦𑁆𑀢𑀸𑀦𑀁, 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀸𑀧𑀦𑀯𑀲𑁂𑀦 𑀢𑀢𑁄 𑀦𑀺𑀯𑀢𑁆𑀢𑀸𑀦𑀁. 𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑁂𑀢𑀺 𑀏𑀢𑁆𑀣 𑀓𑀭𑁂𑀭𑀻𑀢𑀺 𑀯𑀭𑀼𑀡𑀭𑀼𑀓𑁆𑀔𑀲𑁆𑀲 𑀦𑀸𑀫𑀁. 𑀲𑁄 𑀓𑀺𑀭 𑀕𑀦𑁆𑀥𑀓𑀼𑀝𑀺𑀬𑀸 𑀫𑀡𑁆𑀟𑀧𑀲𑁆𑀲 𑀲𑀸𑀮𑀸𑀬 𑀘 𑀅𑀦𑁆𑀢𑀭𑁂 𑀳𑁄𑀢𑀺, 𑀢𑁂𑀦 𑀕𑀦𑁆𑀥𑀓𑀼𑀝𑀻𑀧𑀺 ‘‘𑀓𑀭𑁂𑀭𑀺𑀓𑀼𑀝𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺, 𑀫𑀡𑁆𑀟𑀧𑁄𑀧𑀺 𑀲𑀸𑀮𑀸𑀧𑀺 ‘‘𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑁄’’𑀢𑀺. 𑀢𑀲𑁆𑀫𑀸 𑀓𑀭𑁂𑀭𑀺𑀭𑀼𑀓𑁆𑀔𑀲𑁆𑀲 𑀅𑀯𑀺𑀤𑀽𑀭𑁂 𑀓𑀢𑁂 𑀦𑀺𑀲𑀻𑀤𑀦𑀲𑀸𑀮𑀲𑀗𑁆𑀔𑀸𑀢𑁂 𑀫𑀡𑁆𑀟𑀮𑀫𑀸𑀴𑁂. 𑀢𑀺𑀡𑀧𑀡𑁆𑀡𑀘𑁆𑀙𑀤𑀦𑀁 𑀅𑀦𑁄𑀯𑀲𑁆𑀲𑀓𑀁 ‘‘𑀫𑀡𑁆𑀟𑀮𑀫𑀸𑀴𑁄’’𑀢𑀺 𑀯𑀤𑀦𑁆𑀢𑀺, 𑀅𑀢𑀺𑀫𑀼𑀢𑁆𑀢𑀓𑀸𑀤𑀺𑀮𑀢𑀸𑀫𑀡𑁆𑀟𑀧𑁄 ‘‘𑀫𑀡𑁆𑀟𑀮𑀫𑀸𑀴𑁄’’𑀢𑀺 𑀅𑀧𑀭𑁂.

𑀓𑀸𑀮𑁂𑀦 𑀓𑀸𑀮𑀦𑁆𑀢𑀺 𑀓𑀸𑀮𑁂 𑀓𑀸𑀮𑁂 𑀅𑀦𑁆𑀢𑀭𑀦𑁆𑀢𑀭𑀸, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀫𑀦𑀸𑀧𑀺𑀓𑁂𑀢𑀺 𑀫𑀦𑀯𑀟𑁆𑀠𑀓𑁂, 𑀧𑀺𑀬𑀭𑀽𑀧𑁂 𑀇𑀝𑁆𑀞𑁂𑀢𑀺 𑀅𑀢𑁆𑀣𑁄. 𑀇𑀝𑁆𑀞𑀸𑀦𑀺𑀝𑁆𑀞𑀪𑀸𑀯𑁄 𑀘 𑀧𑀼𑀕𑁆𑀕𑀮𑀯𑀲𑁂𑀦 𑀘 𑀤𑁆𑀯𑀸𑀭𑀯𑀲𑁂𑀦 𑀘 𑀕𑀳𑁂𑀢𑀩𑁆𑀩𑁄. 𑀏𑀓𑀘𑁆𑀘𑀲𑁆𑀲 𑀳𑀺 𑀇𑀝𑁆𑀞𑀸𑀪𑀺𑀫𑀢𑁄 𑀏𑀓𑀘𑁆𑀘𑀲𑁆𑀲 𑀅𑀦𑀺𑀝𑁆𑀞𑁄 𑀳𑁄𑀢𑀺, 𑀏𑀓𑀘𑁆𑀘𑀲𑁆𑀲 𑀅𑀦𑀺𑀝𑁆𑀞𑀸𑀪𑀺𑀫𑀢𑁄 𑀏𑀓𑀘𑁆𑀘𑀲𑁆𑀲 𑀇𑀝𑁆𑀞𑁄. 𑀢𑀣𑀸 𑀏𑀓𑀲𑁆𑀲 𑀤𑁆𑀯𑀸𑀭𑀲𑁆𑀲 𑀇𑀝𑁆𑀞𑁄 𑀅𑀜𑁆𑀜𑀲𑁆𑀲 𑀅𑀦𑀺𑀝𑁆𑀞𑁄. 𑀯𑀺𑀧𑀸𑀓𑀯𑀲𑁂𑀦 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀼𑀲𑀮𑀯𑀺𑀧𑀸𑀓𑁄 𑀳𑀺 𑀏𑀓𑀦𑁆𑀢𑁂𑀦 𑀇𑀝𑁆𑀞𑁄, 𑀅𑀓𑀼𑀲𑀮𑀯𑀺𑀧𑀸𑀓𑁄 𑀅𑀦𑀺𑀝𑁆𑀞𑁄 𑀏𑀯𑀸𑀢𑀺. 𑀘𑀓𑁆𑀔𑀼𑀦𑀸 𑀭𑀽𑀧𑁂 𑀧𑀲𑁆𑀲𑀺𑀢𑀼𑀦𑁆𑀢𑀺 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀉𑀧𑀸𑀲𑀓𑁂𑀳𑀺 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀧𑀽𑀚𑀸𑀲𑀓𑁆𑀓𑀸𑀭𑀓𑀭𑀡𑀢𑁆𑀣𑀁 𑀉𑀧𑀦𑀻𑀢𑁂𑀲𑀼 𑀆𑀲𑀦𑀯𑀺𑀢𑀸𑀦𑀸𑀤𑀻𑀲𑀼 𑀦𑀸𑀦𑀸𑀯𑀺𑀭𑀸𑀕𑀲𑀫𑀼𑀚𑁆𑀚𑀮𑀯𑀡𑁆𑀡𑀲𑀗𑁆𑀔𑀸𑀢𑁂 𑀭𑀚𑀦𑀻𑀬𑁂 𑀅𑀜𑁆𑀜𑁂 𑀘 𑀲𑀯𑀺𑀜𑁆𑀜𑀸𑀡𑀓𑀭𑀽𑀧𑁂 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑁂𑀳𑀺 𑀧𑀲𑁆𑀲𑀺𑀢𑀼𑀁. 𑀲𑀤𑁆𑀤𑁂𑀢𑀺 𑀢𑀣𑁂𑀯 𑀇𑀲𑁆𑀲𑀭𑀚𑀦𑀸𑀦𑀁 𑀕𑁂𑀳𑀁 𑀧𑀯𑀺𑀝𑁆𑀞𑁄 𑀢𑁂𑀲𑀁 𑀧𑀬𑀼𑀢𑁆𑀢𑁂 𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑁂 𑀲𑁄𑀢𑀼𑀁. 𑀕𑀦𑁆𑀥𑁂𑀢𑀺 𑀢𑀣𑀸 𑀢𑁂𑀳𑀺 𑀧𑀽𑀚𑀸𑀲𑀓𑁆𑀓𑀸𑀭𑀯𑀲𑁂𑀦 𑀉𑀧𑀦𑀻𑀢𑁂 𑀧𑀼𑀧𑁆𑀨𑀥𑀽𑀫𑀸𑀤𑀺𑀕𑀦𑁆𑀥𑁂 𑀖𑀸𑀬𑀺𑀢𑀼𑀁. 𑀭𑀲𑁂𑀢𑀺 𑀢𑁂𑀳𑀺 𑀤𑀺𑀦𑁆𑀦𑀸𑀳𑀸𑀭𑀧𑀭𑀺𑀪𑁄𑀕𑁂 𑀦𑀸𑀦𑀕𑁆𑀕𑀭𑀲𑁂 𑀲𑀸𑀬𑀺𑀢𑀼𑀁. 𑀨𑁄𑀝𑁆𑀞𑀩𑁆𑀩𑁂𑀢𑀺 𑀫𑀳𑀕𑁆𑀖𑀧𑀘𑁆𑀘𑀢𑁆𑀣𑀭𑀡𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀺𑀦𑁆𑀦𑀓𑀸𑀮𑁂 𑀲𑀼𑀔𑀲𑀫𑁆𑀨𑀲𑁆𑀲𑁂 𑀨𑁄𑀝𑁆𑀞𑀩𑁆𑀩𑁂 𑀨𑀼𑀲𑀺𑀢𑀼𑀁. 𑀏𑀯𑀜𑁆𑀘 𑀧𑀜𑁆𑀘𑀤𑁆𑀯𑀸𑀭𑀺𑀓𑀇𑀝𑁆𑀞𑀸𑀭𑀫𑁆𑀫𑀡𑀧𑁆𑀧𑀝𑀺𑀮𑀸𑀪𑀁 𑀓𑀺𑀢𑁆𑀢𑁂𑀢𑁆𑀯𑀸 𑀇𑀤𑀸𑀦𑀺 𑀫𑀦𑁄𑀤𑁆𑀯𑀸𑀭𑀺𑀓𑀇𑀝𑁆𑀞𑀸𑀭𑀫𑁆𑀫𑀡𑀧𑁆𑀧𑀝𑀺𑀮𑀸𑀪𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀓𑁆𑀓𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀓𑀺𑀁 𑀧𑀦 𑀅𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀅𑀬𑀁 𑀦𑀬𑁄 𑀦 𑀮𑀩𑁆𑀪𑀢𑀻𑀢𑀺? 𑀮𑀩𑁆𑀪𑀢𑀺. 𑀢𑁂𑀲𑀫𑁆𑀧𑀺 𑀳𑀺 𑀦𑀺𑀫𑀦𑁆𑀢𑀦𑀲𑀮𑀸𑀓𑀪𑀢𑁆𑀢𑀸𑀤𑀺𑀅𑀢𑁆𑀣𑀁 𑀕𑀸𑀫𑀁 𑀕𑀢𑀓𑀸𑀮𑁂 𑀉𑀴𑀸𑀭𑀯𑀺𑀪𑀯𑀸 𑀉𑀧𑀸𑀲𑀓𑀸 𑀢𑀣𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀭𑁄𑀦𑁆𑀢𑀺𑀬𑁂𑀯, 𑀢𑀁 𑀧𑀦 𑀅𑀦𑀺𑀬𑀢𑀁. 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀧𑀦 𑀢𑀤𑀸 𑀦𑀺𑀘𑁆𑀘𑀫𑁂𑀯 𑀢𑀢𑁆𑀣 𑀧𑀽𑀚𑀸𑀲𑀓𑁆𑀓𑀸𑀭𑀁 𑀓𑀭𑀺𑀬𑀫𑀸𑀦𑀁 𑀤𑀺𑀲𑁆𑀯𑀸, 𑀲𑀓𑁆𑀓𑀸𑀭𑀕𑀭𑀼𑀢𑀸𑀬 𑀅𑀦𑀺𑀲𑁆𑀲𑀭𑀡𑀫𑀕𑁆𑀕𑁂 𑀞𑀢𑁆𑀯𑀸, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀲𑁂𑀦 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼. 𑀢𑁂𑀦𑁂𑀯𑀸𑀳 𑁋 ‘‘𑀳𑀦𑁆𑀤𑀸𑀯𑀼𑀲𑁄, 𑀫𑀬𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀺𑀓𑀸 𑀳𑁄𑀫𑀸’’𑀢𑀺𑀆𑀤𑀺.

𑀢𑀢𑁆𑀣 𑀳𑀦𑁆𑀤𑀸𑀢𑀺 𑀯𑁄𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀮𑀘𑁆𑀙𑀸𑀫𑀸𑀢𑀺 𑀮𑀪𑀺𑀲𑁆𑀲𑀸𑀫. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀢𑀢𑁆𑀣 𑀲𑀼𑀭𑀪𑀺𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄 𑀢𑁂𑀲𑀁 𑀢𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀢𑁆𑀯𑀸 ‘‘𑀇𑀫𑁂 𑀪𑀺𑀓𑁆𑀔𑀽 𑀫𑀸𑀤𑀺𑀲𑀲𑁆𑀲 𑀦𑀸𑀫 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀲𑀦𑁆𑀢𑀸𑀧𑀺 𑀏𑀯𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀲𑁂𑀦 𑀓𑀣𑀁 𑀧𑀯𑀢𑁆𑀢𑁂𑀦𑁆𑀢𑀺, 𑀲𑀮𑁆𑀮𑁂𑀔𑁂 𑀦 𑀯𑀢𑁆𑀢𑀦𑁆𑀢𑀺, 𑀳𑀦𑁆𑀤 𑀢𑁂 𑀢𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀲𑀮𑁆𑀮𑁂𑀔𑀯𑀺𑀳𑀸𑀭𑁂 𑀦𑀺𑀬𑁄𑀚𑁂𑀲𑁆𑀲𑀸𑀫𑀻’’𑀢𑀺 𑀫𑀡𑁆𑀟𑀮𑀫𑀸𑀴𑀁 𑀉𑀧𑀲𑀗𑁆𑀓𑀫𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 ‘‘𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀢𑀸𑀲𑀮𑁆𑀮𑁂𑀔𑀸𑀦𑀁 𑀯𑀲𑁂𑀦 𑀓𑀺𑀮𑁂𑀲𑁂 𑀥𑀼𑀦𑀺𑀢𑀼𑀁 𑀢𑀡𑁆𑀳𑀁 𑀯𑀺𑀲𑁄𑀲𑁂𑀢𑀼𑀁 𑀧𑀝𑀺𑀧𑀦𑁆𑀦𑁄𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀲𑀢𑁄 𑀤𑁂𑀯𑀸 𑀧𑀺𑀳𑀬𑀦𑁆𑀢𑀺, 𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀬𑀸 𑀆𑀤𑀭𑀚𑀸𑀢𑀸 𑀧𑀺𑀬𑀸𑀬𑀦𑁆𑀢𑀺, 𑀦 𑀇𑀢𑁄 𑀅𑀜𑁆𑀜𑀣𑀸’’𑀢𑀺 𑀇𑀫𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀦𑁄 𑀘𑁂 𑀲𑀤𑁆𑀤𑀲𑀺𑀮𑁄𑀓𑀦𑀺𑀲𑁆𑀲𑀺𑀢𑁄𑀢𑀺 ‘‘𑀅𑀳𑁄 𑀅𑀬𑁆𑀬𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀭𑀫𑀲𑀮𑁆𑀮𑁂𑀔𑀯𑀼𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀭𑁂𑀳𑀺 𑀓𑀺𑀢𑁆𑀢𑀺𑀢𑀩𑁆𑀩𑀲𑀤𑁆𑀤𑀲𑀗𑁆𑀔𑀸𑀢𑀁 𑀲𑀺𑀮𑁄𑀓𑀁. 𑀢𑀡𑁆𑀳𑀸𑀬 𑀦𑀺𑀲𑁆𑀲𑀺𑀢𑁄 𑀦 𑀳𑁄𑀢𑀺 𑀘𑁂𑀢𑀺 𑀅𑀢𑁆𑀣𑁄. 𑀲𑀤𑁆𑀤𑁄 𑀯𑀸 𑀲𑀫𑁆𑀫𑀼𑀔𑀸 𑀯𑀡𑁆𑀡𑀪𑀡𑀦𑀣𑀼𑀢𑀺𑀖𑁄𑀲𑁄, 𑀲𑀺𑀮𑁄𑀓𑁄 𑀧𑀭𑀫𑁆𑀫𑀼𑀔𑀪𑀽𑀢𑀸 𑀧𑀲𑀁𑀲𑀸 𑀧𑀢𑁆𑀣𑀝𑀬𑀲𑀢𑀸 𑀯𑀸. 𑀲𑁂𑀲𑀁 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀝𑁆𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀺𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀦𑀯𑀫𑁂 𑀓𑁄 𑀦𑀼 𑀔𑁄, 𑀆𑀯𑀼𑀲𑁄, 𑀲𑀺𑀧𑁆𑀧𑀁 𑀚𑀸𑀦𑀸𑀢𑀻𑀢𑀺, 𑀆𑀯𑀼𑀲𑁄, 𑀅𑀫𑁆𑀳𑁂𑀲𑀼 𑀇𑀥 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀓𑁄 𑀦𑀼 𑀚𑀻𑀯𑀺𑀢𑀦𑀺𑀫𑀺𑀢𑁆𑀢𑀁 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 ‘‘𑀲𑀺𑀧𑁆𑀧’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀬𑀁𑀓𑀺𑀜𑁆𑀘𑀺 𑀆𑀚𑀻𑀯𑀁 𑀯𑀺𑀚𑀸𑀦𑀸𑀢𑀺? 𑀓𑁄 𑀓𑀺𑀁 𑀲𑀺𑀧𑁆𑀧𑀁 𑀲𑀺𑀓𑁆𑀔𑀻𑀢𑀺 𑀓𑁄 𑀤𑀻𑀖𑀭𑀢𑁆𑀢𑀁 𑀲𑀺𑀧𑁆𑀧𑀸𑀘𑀭𑀺𑀬𑀓𑀼𑀮𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀆𑀕𑀫𑀢𑁄 𑀧𑀬𑁄𑀕𑀢𑁄 𑀘 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀻𑀲𑀼 𑀓𑀺𑀁 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺? 𑀓𑀢𑀭𑀁 𑀲𑀺𑀧𑁆𑀧𑀁 𑀲𑀺𑀧𑁆𑀧𑀸𑀦𑀁 𑀅𑀕𑁆𑀕𑀦𑁆𑀢𑀺 𑀲𑀩𑁆𑀩𑀲𑀺𑀧𑁆𑀧𑀸𑀦𑀁 𑀅𑀕𑀸𑀭𑀬𑁆𑀳𑀢𑀸𑀬 𑀫𑀳𑀧𑁆𑀨𑀮𑀢𑀸𑀬 𑀅𑀓𑀺𑀘𑁆𑀙𑀲𑀺𑀤𑁆𑀥𑀺𑀬𑀸 𑀘 𑀓𑀢𑀭𑀁 𑀲𑀺𑀧𑁆𑀧𑀁 𑀅𑀕𑁆𑀕𑀁 𑀉𑀢𑁆𑀢𑀫𑀁? 𑀬𑀁 𑀦𑀺𑀲𑁆𑀲𑀸𑀬 𑀲𑀼𑀔𑁂𑀦 𑀲𑀓𑁆𑀓𑀸 𑀚𑀻𑀯𑀺𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣𑁂𑀓𑀘𑁆𑀘𑁂𑀢𑀺 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽. 𑀬𑁂 𑀳𑀢𑁆𑀣𑀸𑀘𑀭𑀺𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 𑀢𑁂. 𑀏𑀯𑀫𑀸𑀳𑀁𑀲𑀽𑀢𑀺 𑀢𑁂 𑀏𑀯𑀁 𑀪𑀡𑀺𑀁𑀲𑀼. 𑀇𑀢𑁄 𑀧𑀭𑀫𑁆𑀧𑀺 ‘‘𑀏𑀓𑀘𑁆𑀘𑁂’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀏𑀲𑁂𑀯 𑀦𑀬𑁄. 𑀳𑀢𑁆𑀣𑀺𑀲𑀺𑀧𑁆𑀧𑀦𑁆𑀢𑀺 𑀬𑀁 𑀳𑀢𑁆𑀣𑀻𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑀤𑀫𑀦𑀲𑀸𑀭𑀡𑀭𑁄𑀕𑀢𑀺𑀓𑀺𑀘𑁆𑀙𑀸𑀤𑀺𑀪𑁂𑀤𑀁 𑀓𑀢𑁆𑀢𑀩𑁆𑀩𑀁, 𑀢𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀲𑀺𑀧𑁆𑀧𑀁 𑀇𑀥 ‘‘𑀳𑀢𑁆𑀣𑀺𑀲𑀺𑀧𑁆𑀧’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀅𑀲𑁆𑀲𑀲𑀺𑀧𑁆𑀧𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀭𑀣𑀲𑀺𑀧𑁆𑀧𑀁 𑀧𑀦 𑀭𑀣𑀬𑁄𑀕𑁆𑀕𑀸𑀦𑀁 𑀤𑀫𑀦𑀲𑀸𑀭𑀡𑀸𑀤𑀺𑀯𑀺𑀥𑀸𑀦𑀯𑀲𑁂𑀦 𑀘𑁂𑀯 𑀭𑀣𑀲𑁆𑀲 𑀓𑀭𑀡𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑀁. 𑀥𑀦𑀼𑀲𑀺𑀧𑁆𑀧𑀦𑁆𑀢𑀺 𑀇𑀲𑁆𑀲𑀸𑀲𑀲𑀺𑀧𑁆𑀧𑀁, 𑀬𑁄 𑀥𑀦𑀼𑀩𑁆𑀩𑁂𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀣𑀭𑀼𑀲𑀺𑀧𑁆𑀧𑀦𑁆𑀢𑀺 𑀲𑁂𑀲𑀆𑀯𑀼𑀥𑀲𑀺𑀧𑁆𑀧𑀁. 𑀫𑀼𑀤𑁆𑀤𑀸𑀲𑀺𑀧𑁆𑀧𑀦𑁆𑀢𑀺 𑀳𑀢𑁆𑀣𑀫𑀼𑀤𑁆𑀤𑀸𑀬 𑀕𑀡𑀦𑀲𑀺𑀧𑁆𑀧𑀁. 𑀕𑀡𑀦𑀲𑀺𑀧𑁆𑀧𑀦𑁆𑀢𑀺 𑀅𑀘𑁆𑀙𑀺𑀤𑁆𑀤𑀓𑀕𑀡𑀦𑀲𑀺𑀧𑁆𑀧𑀁. 𑀲𑀗𑁆𑀔𑀸𑀦𑀲𑀺𑀧𑁆𑀧𑀦𑁆𑀢𑀺 𑀲𑀗𑁆𑀓𑀮𑀦𑀧𑀝𑀼𑀧𑁆𑀧𑀸𑀤𑀦𑀸𑀤𑀺𑀯𑀲𑁂𑀦 𑀧𑀺𑀡𑁆𑀟𑀕𑀡𑀦𑀲𑀺𑀧𑁆𑀧𑀁. 𑀢𑀁 𑀬𑀲𑁆𑀲 𑀧𑀕𑀼𑀡𑀁 𑀳𑁄𑀢𑀺, 𑀲𑁄 𑀭𑀼𑀓𑁆𑀔𑀫𑁆𑀧𑀺 𑀤𑀺𑀲𑁆𑀯𑀸 ‘‘𑀏𑀢𑁆𑀢𑀓𑀸𑀦𑀺 𑀏𑀢𑁆𑀣 𑀧𑀡𑁆𑀡𑀸𑀦𑀻’’𑀢𑀺 𑀕𑀡𑀺𑀢𑀼𑀁 𑀚𑀸𑀦𑀸𑀢𑀺. 𑀮𑁂𑀔𑀸𑀲𑀺𑀧𑁆𑀧𑀦𑁆𑀢𑀺 𑀦𑀸𑀦𑀸𑀓𑀸𑀭𑁂𑀳𑀺 𑀅𑀓𑁆𑀔𑀭𑀮𑀺𑀔𑀦𑀲𑀺𑀧𑁆𑀧𑀁, 𑀮𑀺𑀧𑀺𑀜𑀸𑀡𑀁 𑀯𑀸. 𑀓𑀸𑀯𑁂𑀬𑁆𑀬𑀲𑀺𑀧𑁆𑀧𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀦𑁆𑀢𑀸𑀯𑀲𑁂𑀦 𑀯𑀸 𑀧𑀭𑀢𑁄 𑀧𑀝𑀺𑀮𑀤𑁆𑀥𑀲𑀼𑀢𑀯𑀲𑁂𑀦 𑀯𑀸, ‘‘𑀇𑀫𑀲𑁆𑀲 𑀅𑀬𑀫𑀢𑁆𑀣𑁄, 𑀏𑀯𑀁 𑀦𑀁 𑀬𑁄𑀚𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀢𑁆𑀣𑀯𑀲𑁂𑀦 𑀯𑀸, 𑀓𑀺𑀜𑁆𑀘𑀺𑀤𑁂𑀯 𑀓𑀩𑁆𑀩𑀁 𑀤𑀺𑀲𑁆𑀯𑀸, ‘‘𑀢𑀧𑁆𑀧𑀝𑀺𑀪𑀸𑀕𑀁 𑀓𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑀯𑀲𑁂𑀦 𑀯𑀸 𑀘𑀺𑀦𑁆𑀢𑀸𑀓𑀯𑀺𑀆𑀤𑀻𑀦𑀁 𑀘𑀢𑀼𑀦𑁆𑀦𑀁 𑀓𑀯𑀻𑀦𑀁 𑀓𑀩𑁆𑀩𑀓𑀭𑀡𑀲𑀺𑀧𑁆𑀧𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀓𑀯𑀻 𑁋 𑀘𑀺𑀦𑁆𑀢𑀸𑀓𑀯𑀺, 𑀲𑀼𑀢𑀓𑀯𑀺, 𑀅𑀢𑁆𑀣𑀓𑀯𑀺, 𑀧𑀝𑀺𑀪𑀸𑀦𑀓𑀯𑀻’’𑀢𑀺 (𑀅. 𑀦𑀺. 𑁪.𑁨𑁩𑁧).

𑀮𑁄𑀓𑀸𑀬𑀢𑀲𑀺𑀧𑁆𑀧𑀦𑁆𑀢𑀺 ‘‘𑀓𑀸𑀓𑁄 𑀲𑁂𑀢𑁄 𑀅𑀝𑁆𑀞𑀻𑀦𑀁 𑀲𑁂𑀢𑀢𑁆𑀢𑀸, 𑀩𑀮𑀸𑀓𑀸 𑀭𑀢𑁆𑀢𑀸 𑀮𑁄𑀳𑀺𑀢𑀲𑁆𑀲 𑀭𑀢𑁆𑀢𑀢𑁆𑀢𑀸’’𑀢𑀺 𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀧𑀭𑀮𑁄𑀓𑀦𑀺𑀩𑁆𑀩𑀸𑀦𑀸𑀦𑀁 𑀧𑀝𑀺𑀲𑁂𑀥𑀓𑀁 𑀯𑀺𑀢𑀡𑁆𑀟𑀲𑀢𑁆𑀣𑀲𑀺𑀧𑁆𑀧𑀁. 𑀔𑀢𑁆𑀢𑀯𑀺𑀚𑁆𑀚𑀸𑀲𑀺𑀧𑁆𑀧𑀦𑁆𑀢𑀺 𑀅𑀩𑁆𑀪𑁂𑀬𑁆𑀬𑀫𑀸𑀲𑀼𑀭𑀓𑁆𑀔𑀸𑀤𑀺𑀦𑀻𑀢𑀺𑀲𑀢𑁆𑀣𑀲𑀺𑀧𑁆𑀧𑀁. 𑀇𑀫𑀸𑀦𑀺 𑀓𑀺𑀭 𑀤𑁆𑀯𑀸𑀤𑀲 𑀫𑀳𑀸𑀲𑀺𑀧𑁆𑀧𑀸𑀦𑀺 𑀦𑀸𑀫. 𑀢𑁂𑀦𑁂𑀯𑀸𑀳 𑀢𑀢𑁆𑀣 𑀢𑀢𑁆𑀣 ‘‘𑀲𑀺𑀧𑁆𑀧𑀸𑀦𑀁 𑀅𑀕𑁆𑀕’’𑀦𑁆𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀲𑀩𑁆𑀩𑀲𑀺𑀧𑁆𑀧𑀸𑀬𑀢𑀦𑀸𑀦𑀁 𑀚𑀻𑀯𑀺𑀓𑀢𑁆𑀣𑀢𑀸𑀬 𑀯𑀝𑁆𑀝𑀤𑀼𑀓𑁆𑀔𑀢𑁄 𑀅𑀦𑀺𑀲𑁆𑀲𑀭𑀡𑀪𑀸𑀯𑀁, 𑀲𑀻𑀮𑀸𑀤𑀻𑀦𑀁𑀬𑁂𑀯 𑀧𑀦 𑀲𑀼𑀧𑀭𑀺𑀲𑀼𑀤𑁆𑀥𑀸𑀦𑀁 𑀦𑀺𑀲𑁆𑀲𑀭𑀡𑀪𑀸𑀯𑀁, 𑀢𑀁 𑀲𑀫𑀗𑁆𑀕𑀺𑀦𑁄𑀬𑁂𑀯 𑀘 𑀪𑀺𑀓𑁆𑀔𑀼𑀪𑀸𑀯𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸 𑀢𑀤𑀢𑁆𑀣𑀯𑀺𑀪𑀸𑀯𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀅𑀲𑀺𑀧𑁆𑀧𑀚𑀻𑀯𑀻𑀢𑀺 𑀘𑀢𑀼𑀦𑁆𑀦𑀁 𑀢𑀡𑁆𑀳𑀼𑀧𑁆𑀧𑀸𑀤𑀸𑀦𑀁 𑀲𑀫𑀼𑀘𑁆𑀙𑁂𑀤𑀯𑀺𑀓𑁆𑀔𑀫𑁆𑀪𑀦𑁂𑀦 𑀧𑀘𑁆𑀘𑀬𑀸𑀲𑀸𑀬 𑀯𑀺𑀲𑁄𑀲𑀺𑀢𑀢𑁆𑀢𑀸 𑀬𑀁𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀺𑀓𑀁 𑀦 𑀓𑀧𑁆𑀧𑁂𑀢𑀻𑀢𑀺 𑀅𑀲𑀺𑀧𑁆𑀧𑀚𑀻𑀯𑀻, 𑀏𑀢𑁂𑀦 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀤𑀲𑁆𑀲𑁂𑀢𑀺. 𑀮𑀳𑀽𑀢𑀺 𑀅𑀧𑁆𑀧𑀓𑀺𑀘𑁆𑀘𑀢𑀸𑀬 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀸𑀬 𑀘 𑀮𑀳𑀼 𑀅𑀩𑀳𑀼𑀮𑀲𑀫𑁆𑀪𑀸𑀭𑁄, 𑀏𑀢𑁂𑀦 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀲𑀺𑀤𑁆𑀥𑀁 𑀲𑀼𑀪𑀭𑀢𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀓𑀸𑀫𑁄𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀢𑁆𑀣𑀫𑁂𑀯 𑀓𑀸𑀫𑁂𑀢𑀻𑀢𑀺 𑀅𑀢𑁆𑀣𑀓𑀸𑀫𑁄, 𑀏𑀢𑁂𑀦 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀧𑀭𑀺𑀯𑀚𑁆𑀚𑀦𑀲𑁆𑀲 𑀧𑀓𑀸𑀲𑀺𑀢𑀢𑁆𑀢𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀤𑀲𑁆𑀲𑁂𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀦𑀢𑁆𑀣𑀯𑀺𑀭𑀫𑀡𑀧𑀭𑀺𑀤𑀻𑀧𑀦𑀢𑁄. 𑀬𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀘𑀓𑁆𑀔𑀸𑀤𑀻𑀦𑀁 𑀙𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀪𑀺𑀚𑁆𑀛𑀸𑀤𑁆𑀬𑀧𑁆𑀧𑀯𑀢𑁆𑀢𑀺𑀢𑁄 𑀲𑀁𑀬𑀫𑁂𑀦 𑀬𑀢𑀺𑀦𑁆𑀤𑁆𑀭𑀺𑀬𑁄, 𑀏𑀢𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀏𑀯𑀁 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑁂 𑀅𑀯𑀝𑁆𑀞𑀺𑀢𑁄 𑀲𑀧𑁆𑀧𑀘𑁆𑀘𑀬𑀁 𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀧𑀝𑀺𑀧𑀸𑀝𑀺𑀬𑀸 𑀧𑀯𑀢𑁆𑀢𑀺𑀢𑁂𑀳𑀺 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀲𑀁𑀬𑁄𑀚𑀦𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀣 𑀪𑀯𑀸𑀤𑀻𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁄.

𑀅𑀦𑁄𑀓𑀲𑀸𑀭𑀻 𑀅𑀫𑀫𑁄 𑀦𑀺𑀭𑀸𑀲𑁄𑀢𑀺 𑀢𑀣𑀸 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑀢𑁆𑀢𑀸 𑀏𑀯 𑀑𑀓𑀲𑀗𑁆𑀔𑀸𑀢𑁂𑀲𑀼 𑀙𑀲𑀼𑀧𑀺 𑀆𑀬𑀢𑀦𑁂𑀲𑀼 𑀢𑀡𑁆𑀳𑀸𑀪𑀺𑀲𑀭𑀡𑀲𑁆𑀲 𑀅𑀪𑀸𑀯𑁂𑀦 𑀅𑀦𑁄𑀓𑀲𑀸𑀭𑀻, 𑀭𑀽𑀧𑀸𑀤𑀻𑀲𑀼 𑀓𑀢𑁆𑀣𑀘𑀺 𑀫𑀫𑀗𑁆𑀓𑀸𑀭𑀸𑀪𑀸𑀯𑀢𑁄 𑀅𑀫𑀫𑁄, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀦𑀸𑀲𑀻𑀲𑀦𑀢𑁄 𑀦𑀺𑀭𑀸𑀲𑁄. 𑀳𑀺𑀢𑁆𑀯𑀸 𑀫𑀸𑀦𑀁 𑀏𑀓𑀘𑀭𑁄 𑀲 𑀪𑀺𑀓𑁆𑀔𑀽𑀢𑀺 𑀏𑀯𑀁𑀪𑀽𑀢𑁄 𑀘 𑀲𑁄 𑀅𑀭𑀳𑀢𑁆𑀢𑀫𑀕𑁆𑀕𑀧𑁆𑀧𑀢𑁆𑀢𑀺𑀲𑀫𑀓𑀸𑀮𑀫𑁂𑀯 𑀅𑀦𑀯𑀲𑁂𑀲𑀁 𑀫𑀸𑀦𑀁 𑀳𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀇𑀫𑁂 𑀪𑀺𑀓𑁆𑀔𑀽 𑀯𑀺𑀬 𑀕𑀡𑀲𑀗𑁆𑀕𑀡𑀺𑀓𑀁 𑀅𑀓𑀢𑁆𑀯𑀸 𑀧𑀯𑀺𑀯𑁂𑀓𑀓𑀸𑀫𑀢𑀸𑀬 𑀢𑀡𑁆𑀳𑀸𑀲𑀳𑀸𑀬𑀯𑀺𑀭𑀳𑁂𑀦 𑀘 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀏𑀓𑀘𑀭𑁄, 𑀲𑁄 𑀲𑀩𑁆𑀩𑀲𑁄 𑀪𑀺𑀦𑁆𑀦𑀓𑀺𑀮𑁂𑀲𑀢𑁆𑀢𑀸 𑀧𑀭𑀫𑀢𑁆𑀣𑀢𑁄 𑀪𑀺𑀓𑁆𑀔𑀼 𑀦𑀸𑀫. 𑀏𑀢𑁆𑀣 𑀘 ‘‘𑀅𑀲𑀺𑀧𑁆𑀧𑀚𑀻𑀯𑀻’’𑀢𑀺𑀆𑀤𑀺𑀦𑀸 𑀮𑁄𑀓𑀺𑀬𑀕𑀼𑀡𑀸 𑀓𑀣𑀺𑀢𑀸, ‘‘𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀮𑁄𑀓𑀼𑀢𑁆𑀢𑀭𑀕𑀼𑀡𑀸 𑀓𑀣𑀺𑀢𑀸. 𑀢𑀢𑁆𑀣 𑀅𑀲𑀺𑀧𑁆𑀧𑀚𑀻𑀯𑀻𑀢𑀺𑀆𑀤𑀺 ‘‘𑀯𑀺𑀪𑀯𑁂 𑀞𑀺𑀢𑀲𑁆𑀲𑁂𑀯 𑀅𑀬𑀁 𑀥𑀫𑁆𑀫𑁄, 𑀦 𑀲𑀺𑀧𑁆𑀧𑀁 𑀦𑀺𑀲𑁆𑀲𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀲𑁆𑀲, 𑀢𑀲𑁆𑀫𑀸 𑀲𑀺𑀧𑁆𑀧𑁂𑀲𑀼 𑀲𑀸𑀭𑀕𑁆𑀕𑀳𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀥𑀺𑀲𑀻𑀮𑀸𑀤𑀻𑀲𑀼𑀬𑁂𑀯 𑀢𑀼𑀫𑁆𑀳𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀦𑀯𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀢𑀺 𑀏𑀢𑁆𑀣 𑀆𑀲𑀬𑀸𑀦𑀼𑀲𑀬𑀜𑀸𑀡𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀜𑁆𑀘 𑀩𑀼𑀤𑁆𑀥𑀘𑀓𑁆𑀔𑀼 𑀦𑀸𑀫. 𑀬𑀣𑀸𑀳 𑁋

‘‘𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂’’𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁮𑁩; 𑁨.𑁩𑁩𑁯).

𑀮𑁄𑀓𑀦𑁆𑀢𑀺 𑀢𑀬𑁄 𑀮𑁄𑀓𑀸 𑁋 𑀑𑀓𑀸𑀲𑀮𑁄𑀓𑁄, 𑀲𑀗𑁆𑀔𑀸𑀭𑀮𑁄𑀓𑁄, 𑀲𑀢𑁆𑀢𑀮𑁄𑀓𑁄𑀢𑀺. 𑀢𑀢𑁆𑀣 𑁋

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺,

𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸;

𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄,

𑀏𑀢𑁆𑀣 𑀢𑁂 𑀯𑀢𑁆𑀢𑀢𑀻 𑀯𑀲𑁄’’𑀢𑀺. 𑁋

𑀆𑀤𑀻𑀲𑀼 (𑀫. 𑀦𑀺. 𑁧.𑁫𑁦𑁩) 𑀑𑀓𑀸𑀲𑀮𑁄𑀓𑁄. ‘‘𑀏𑀓𑁄 𑀮𑁄𑀓𑁄 𑁋 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸, 𑀤𑁆𑀯𑁂 𑀮𑁄𑀓𑀸 𑁋 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀢𑀬𑁄 𑀮𑁄𑀓𑀸 𑁋 𑀢𑀺𑀲𑁆𑀲𑁄 𑀯𑁂𑀤𑀦𑀸, 𑀘𑀢𑁆𑀢𑀸𑀭𑁄 𑀮𑁄𑀓𑀸 𑁋 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀧𑀜𑁆𑀘 𑀮𑁄𑀓𑀸 𑁋 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀙 𑀮𑁄𑀓𑀸 𑁋 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀲𑀢𑁆𑀢 𑀮𑁄𑀓𑀸 𑁋 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀅𑀝𑁆𑀞 𑀮𑁄𑀓𑀸 𑁋 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸, 𑀦𑀯 𑀮𑁄𑀓𑀸 𑁋 𑀦𑀯 𑀲𑀢𑁆𑀢𑀸𑀯𑀸𑀲𑀸, 𑀤𑀲 𑀮𑁄𑀓𑀸 𑁋 𑀤𑀲𑀸𑀬𑀢𑀦𑀸𑀦𑀺, 𑀤𑁆𑀯𑀸𑀤𑀲 𑀮𑁄𑀓𑀸 𑁋 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀮𑁄𑀓𑀸 𑁋 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁧𑁧𑁨) 𑀲𑀗𑁆𑀔𑀸𑀭𑀮𑁄𑀓𑁄. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺𑀆𑀤𑀻𑀲𑀼 𑀲𑀢𑁆𑀢𑀮𑁄𑀓𑁄 𑀯𑀼𑀢𑁆𑀢𑁄. 𑀇𑀥𑀸𑀧𑀺 𑀲𑀢𑁆𑀢𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀮𑁄𑀓𑀻𑀬𑀢𑀺 𑀯𑀺𑀘𑀺𑀢𑁆𑀢𑀸𑀓𑀸𑀭𑀢𑁄 𑀤𑀺𑀲𑁆𑀲𑀢𑀻𑀢𑀺 𑀘𑀓𑁆𑀓𑀯𑀸𑀴𑀲𑀗𑁆𑀔𑀸𑀢𑁄 𑀮𑁄𑀓𑁄 𑀑𑀓𑀸𑀲𑀮𑁄𑀓𑁄, 𑀲𑀗𑁆𑀔𑀸𑀭𑁄 𑀮𑀼𑀚𑁆𑀚𑀢𑀺 𑀧𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄, 𑀮𑁄𑀓𑀻𑀬𑀢𑀺 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀁 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀲𑀢𑁆𑀢𑀮𑁄𑀓𑁄. 𑀢𑁂𑀲𑀼 𑀪𑀕𑀯𑀸 𑀫𑀳𑀸𑀓𑀭𑀼𑀡𑀸𑀬 𑀅𑀦𑀼𑀓𑀫𑁆𑀧𑀫𑀸𑀦𑁄 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀫𑁄𑀘𑁂𑀢𑀼𑀓𑀸𑀫𑁄 𑀲𑀢𑁆𑀢𑀮𑁄𑀓𑀁 𑀑𑀮𑁄𑀓𑁂𑀲𑀺. 𑀓𑀢𑀫𑀲𑁆𑀲 𑀧𑀦 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀑𑀮𑁄𑀓𑁂𑀲𑀺? 𑀧𑀞𑀫𑀲𑁆𑀲 𑀲𑀢𑁆𑀢𑀸𑀳𑀲𑁆𑀲. 𑀪𑀕𑀯𑀸 𑀳𑀺 𑀧𑀮𑁆𑀮𑀗𑁆𑀓𑀲𑀢𑁆𑀢𑀸𑀳𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 𑀧𑀘𑁆𑀙𑀺𑀫𑀬𑀸𑀫𑀸𑀯𑀲𑀸𑀦𑁂 ‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸…𑀧𑁂… 𑀲𑀽𑀭𑀺𑀬𑁄𑀯 𑀑𑀪𑀸𑀲𑀬𑀫𑀦𑁆𑀢𑀮𑀺𑀓𑁆𑀔’’𑀦𑁆𑀢𑀺 (𑀉𑀤𑀸. 𑁧-𑁩; 𑀓𑀣𑀸. 𑁩𑁨𑁧; 𑀫𑀳𑀸𑀯. 𑁧-𑁩) 𑀇𑀫𑀁 𑀅𑀭𑀺𑀬𑀫𑀕𑁆𑀕𑀸𑀦𑀼𑀪𑀸𑀯𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸, ‘‘𑀅𑀳𑀁 𑀢𑀸𑀯 𑀏𑀯𑀁 𑀲𑀼𑀤𑀼𑀢𑁆𑀢𑀭𑀁 𑀲𑀁𑀲𑀸𑀭𑀫𑀳𑁄𑀖𑀁 𑀇𑀫𑀸𑀬 𑀥𑀫𑁆𑀫𑀦𑀸𑀯𑀸𑀬 𑀲𑀫𑀼𑀢𑁆𑀢𑀭𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀸𑀭𑁂 𑀞𑀺𑀢𑁄, 𑀳𑀦𑁆𑀤 𑀤𑀸𑀦𑀺 𑀮𑁄𑀓𑀫𑁆𑀧𑀺 𑀢𑀸𑀭𑁂𑀲𑁆𑀲𑀸𑀫𑀺, 𑀓𑀻𑀤𑀺𑀲𑁄 𑀦𑀼 𑀔𑁄 𑀮𑁄𑀓𑁄’’𑀢𑀺 𑀮𑁄𑀓𑀁 𑀯𑁄𑀮𑁄𑀓𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀲𑀻’’𑀢𑀺.

𑀢𑀢𑁆𑀣 𑀯𑁄𑀮𑁄𑀓𑁂𑀲𑀻𑀢𑀺 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀧𑀲𑁆𑀲𑀺, 𑀳𑀢𑁆𑀣𑀢𑀮𑁂 𑀞𑀧𑀺𑀢𑀆𑀫𑀮𑀓𑀁 𑀯𑀺𑀬 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀁 𑀅𑀓𑀸𑀲𑀺. 𑀅𑀦𑁂𑀓𑁂𑀳𑀺 𑀲𑀦𑁆𑀢𑀸𑀧𑁂𑀳𑀻𑀢𑀺𑀆𑀤𑀺 𑀯𑁄𑀮𑁄𑀓𑀺𑀢𑀸𑀓𑀸𑀭𑀤𑀲𑁆𑀲𑀦𑀁. 𑀅𑀦𑁂𑀓𑁂𑀳𑀺 𑀲𑀦𑁆𑀢𑀸𑀧𑁂𑀳𑀻𑀢𑀺 𑀅𑀦𑁂𑀓𑁂𑀳𑀺 𑀤𑀼𑀓𑁆𑀔𑁂𑀳𑀺. 𑀤𑀼𑀓𑁆𑀔𑀜𑁆𑀳𑀺 𑀲𑀦𑁆𑀢𑀸𑀧𑀦𑀧𑀻𑀴𑀦𑀝𑁆𑀞𑁂𑀦 𑀲𑀦𑁆𑀢𑀸𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄’’𑀢𑀺 (𑀧𑀝𑀺. 𑀫. 𑁧.𑁧𑁭). 𑀢𑀜𑁆𑀘 𑀤𑀼𑀓𑁆𑀔𑀤𑀼𑀓𑁆𑀔𑀸𑀤𑀺𑀯𑀲𑁂𑀦 𑀘𑁂𑀯 𑀚𑀸𑀢𑀺𑀆𑀤𑀺𑀯𑀲𑁂𑀦 𑀘 𑀅𑀦𑁂𑀓𑀧𑁆𑀧𑀓𑀸𑀭𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑁂𑀓𑁂𑀳𑀺 𑀲𑀦𑁆𑀢𑀸𑀧𑁂𑀳𑀻’’𑀢𑀺. 𑀅𑀦𑁂𑀓𑁂𑀳𑀺 𑀤𑀼𑀓𑁆𑀔𑁂𑀳𑀺 𑀲𑀦𑁆𑀢𑀧𑁆𑀧𑀫𑀸𑀦𑁂 𑀧𑀻𑀴𑀺𑀬𑀫𑀸𑀦𑁂 𑀩𑀸𑀥𑀺𑀬𑀫𑀸𑀦𑁂. 𑀧𑀭𑀺𑀴𑀸𑀳𑁂𑀳𑀻𑀢𑀺 𑀧𑀭𑀺𑀤𑀸𑀳𑁂𑀳𑀺. 𑀧𑀭𑀺𑀟𑀬𑁆𑀳𑀫𑀸𑀦𑁂𑀢𑀺 𑀇𑀦𑁆𑀥𑀦𑀁 𑀯𑀺𑀬 𑀅𑀕𑁆𑀕𑀺𑀦𑀸 𑀲𑀫𑀦𑁆𑀢𑀢𑁄 𑀟𑀬𑁆𑀳𑀫𑀸𑀦𑁂. 𑀭𑀸𑀕𑀚𑁂𑀳𑀻𑀢𑀺 𑀭𑀸𑀕𑀲𑀫𑁆𑀪𑀽𑀢𑁂𑀳𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀭𑀸𑀕𑀸𑀤𑀬𑁄 𑀳𑀺 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀦𑀺𑀤𑁆𑀤𑀳𑀦𑁆𑀢𑀸 𑀯𑀺𑀬 𑀯𑀺𑀩𑀸𑀥𑁂𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀻 𑁋 𑀭𑀸𑀕𑀕𑁆𑀕𑀺, 𑀤𑁄𑀲𑀕𑁆𑀕𑀺, 𑀫𑁄𑀳𑀕𑁆𑀕𑀻’’𑀢𑀺 (𑀇𑀢𑀺𑀯𑀼. 𑁯𑁩). 𑀬𑀢𑁄 𑀢𑁂 𑀘𑀺𑀢𑁆𑀢𑀁 𑀓𑀸𑀬𑀜𑁆𑀘 𑀓𑀺𑀮𑁂𑀲𑁂𑀦𑁆𑀢𑀻𑀢𑀺 𑀓𑀺𑀮𑁂𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁆𑀣 𑀘 𑀧𑀭𑀺𑀟𑀬𑁆𑀳𑀫𑀸𑀦𑁂𑀢𑀺 𑀏𑀢𑁂𑀦 𑀪𑀕𑀯𑀸 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀁 𑀧𑀯𑀢𑁆𑀢𑀺𑀤𑀼𑀓𑁆𑀔𑀢𑀁, 𑀢𑁂𑀦 𑀘 𑀲𑀢𑁆𑀢𑀸𑀦𑀁 𑀅𑀪𑀺𑀪𑀽𑀢𑀢𑀁 𑀤𑀲𑁆𑀲𑁂𑀢𑀺. 𑀲𑀦𑁆𑀢𑀧𑁆𑀧𑀫𑀸𑀦𑁂𑀢𑀺 𑀇𑀫𑀺𑀦𑀸 𑀧𑀦 𑀢𑁂𑀲𑀁 𑀓𑀸𑀮𑀦𑁆𑀢𑀭𑀤𑀼𑀓𑁆𑀔𑀢𑀁, 𑀢𑁂𑀦 𑀦𑀺𑀭𑀦𑁆𑀢𑀭𑁄𑀧𑀤𑁆𑀤𑀯𑀢𑀜𑁆𑀘 𑀤𑀲𑁆𑀲𑁂𑀢𑀺.