𑁪. 𑀫𑁂𑀖𑀺𑀬𑀯𑀕𑁆𑀕𑁄

𑁧. 𑀫𑁂𑀖𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀫𑁂𑀖𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀘𑀸𑀮𑀺𑀓𑀸𑀬𑀦𑁆𑀢𑀺 𑀏𑀯𑀁 𑀦𑀸𑀫𑀓𑁂 𑀦𑀕𑀭𑁂. 𑀢𑀲𑁆𑀲 𑀓𑀺𑀭 𑀦𑀕𑀭𑀲𑁆𑀲 𑀤𑁆𑀯𑀸𑀭𑀝𑁆𑀞𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀫𑀦𑁆𑀢𑀢𑁄 𑀘𑀮𑀧𑀗𑁆𑀓𑀁 𑀳𑁄𑀢𑀺, 𑀢𑀁 𑀘𑀮𑀧𑀗𑁆𑀓𑀁 𑀦𑀺𑀲𑁆𑀲𑀸𑀬 𑀞𑀺𑀢𑀢𑁆𑀢𑀸 𑀑𑀮𑁄𑀓𑁂𑀦𑁆𑀢𑀸𑀦𑀁 𑀘𑀮𑀫𑀸𑀦𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸 ‘‘𑀘𑀸𑀮𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀘𑀸𑀮𑀺𑀓𑁂 𑀧𑀩𑁆𑀩𑀢𑁂𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑁄 𑀧𑀩𑁆𑀩𑀢𑁄, 𑀲𑁄𑀧𑀺 𑀲𑀩𑁆𑀩𑀲𑁂𑀢𑀢𑁆𑀢𑀸 𑀓𑀸𑀮𑀧𑀓𑁆𑀔𑀉𑀧𑁄𑀲𑀣𑁂 𑀑𑀮𑁄𑀓𑁂𑀦𑁆𑀢𑀸𑀦𑀁 𑀘𑀮𑀫𑀸𑀦𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸 ‘‘𑀘𑀸𑀮𑀺𑀓𑀧𑀩𑁆𑀩𑀢𑁄’’𑀢𑀺 𑀲𑀗𑁆𑀔𑀁 𑀕𑀢𑁄. 𑀢𑀢𑁆𑀣 𑀪𑀕𑀯𑀢𑁄 𑀫𑀳𑀦𑁆𑀢𑀁 𑀯𑀺𑀳𑀸𑀭𑀁 𑀓𑀸𑀭𑀬𑀺𑀁𑀲𑀼, 𑀪𑀕𑀯𑀸 𑀢𑀤𑀸 𑀢𑀁 𑀦𑀕𑀭𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀘𑀸𑀮𑀺𑀓𑀧𑀩𑁆𑀩𑀢𑀫𑀳𑀸𑀯𑀺𑀳𑀸𑀭𑁂 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀘𑀸𑀮𑀺𑀓𑀸𑀬𑀁 𑀯𑀺𑀳𑀭𑀢𑀺 𑀘𑀸𑀮𑀺𑀓𑁂 𑀧𑀩𑁆𑀩𑀢𑁂’’𑀢𑀺. 𑀫𑁂𑀖𑀺𑀬𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀉𑀧𑀝𑁆𑀞𑀸𑀓𑁄 𑀳𑁄𑀢𑀻𑀢𑀺 𑀧𑀭𑀺𑀘𑀸𑀭𑀓𑁄 𑀳𑁄𑀢𑀺. 𑀪𑀕𑀯𑀢𑁄 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀉𑀧𑀝𑁆𑀞𑀸𑀓𑀸 𑀅𑀦𑀺𑀩𑀤𑁆𑀥𑀸 𑀅𑀳𑁂𑀲𑀼𑀁, 𑀏𑀓𑀤𑀸 𑀦𑀸𑀕𑀲𑀫𑀸𑀮𑁄, 𑀏𑀓𑀤𑀸 𑀦𑀸𑀕𑀺𑀢𑁄, 𑀏𑀓𑀤𑀸 𑀉𑀧𑀯𑀸𑀦𑁄, 𑀏𑀓𑀤𑀸 𑀲𑀼𑀦𑀓𑁆𑀔𑀢𑁆𑀢𑁄, 𑀢𑀤𑀸𑀧𑀺 𑀫𑁂𑀖𑀺𑀬𑀢𑁆𑀣𑁂𑀭𑁄𑀯 𑀉𑀧𑀝𑁆𑀞𑀸𑀓𑁄. 𑀢𑁂𑀦𑀸𑀳 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀳𑁄𑀢𑀻’’𑀢𑀺.

𑀚𑀦𑁆𑀢𑀼𑀕𑀸𑀫𑀦𑁆𑀢𑀺 𑀏𑀯𑀁 𑀦𑀸𑀫𑀓𑀁 𑀢𑀲𑁆𑀲𑁂𑀯 𑀯𑀺𑀳𑀸𑀭𑀲𑁆𑀲 𑀅𑀧𑀭𑀁 𑀕𑁄𑀘𑀭𑀕𑀸𑀫𑀁. ‘‘𑀚𑀢𑁆𑀢𑀼𑀕𑀸𑀫’’𑀦𑁆𑀢𑀺𑀧𑀺 𑀧𑀸𑀞𑁄. 𑀓𑀺𑀫𑀺𑀓𑀸𑀴𑀸𑀬𑀸𑀢𑀺 𑀓𑀸𑀴𑀓𑀺𑀫𑀻𑀦𑀁 𑀩𑀳𑀼𑀮𑀢𑀸𑀬 ‘‘𑀓𑀺𑀫𑀺𑀓𑀸𑀴𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀦𑀤𑀺𑀬𑀸. 𑀚𑀗𑁆𑀖𑀯𑀺𑀳𑀸𑀭𑀦𑁆𑀢𑀺 𑀘𑀺𑀭𑀦𑀺𑀲𑀚𑁆𑀚𑀸𑀬 𑀚𑀗𑁆𑀖𑀸𑀲𑀼 𑀉𑀧𑁆𑀧𑀦𑁆𑀦𑀓𑀺𑀮𑀫𑀣𑀯𑀺𑀦𑁄𑀤𑀦𑀢𑁆𑀣𑀁 𑀯𑀺𑀘𑀭𑀡𑀁. 𑀧𑀸𑀲𑀸𑀤𑀺𑀓𑀦𑁆𑀢𑀺 𑀅𑀯𑀺𑀭𑀴𑀭𑀼𑀓𑁆𑀔𑀢𑀸𑀬 𑀲𑀺𑀦𑀺𑀤𑁆𑀥𑀧𑀢𑁆𑀢𑀢𑀸𑀬 𑀘 𑀧𑀲𑁆𑀲𑀦𑁆𑀢𑀸𑀦𑀁 𑀧𑀲𑀸𑀤𑀫𑀸𑀯𑀳𑀢𑀻𑀢𑀺 𑀧𑀸𑀲𑀸𑀤𑀺𑀓𑀁. 𑀲𑀦𑁆𑀤𑀘𑁆𑀙𑀸𑀬𑀢𑀸𑀬 𑀫𑀦𑀼𑀜𑁆𑀜𑀪𑀽𑀫𑀺𑀪𑀸𑀕𑀢𑀸𑀬 𑀘 𑀫𑀦𑀼𑀜𑁆𑀜𑀁. 𑀅𑀦𑁆𑀢𑁄 𑀧𑀯𑀺𑀝𑁆𑀞𑀸𑀦𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀦𑀦𑀝𑁆𑀞𑁂𑀦 𑀘𑀺𑀢𑁆𑀢𑀁 𑀭𑀫𑁂𑀢𑀻𑀢𑀺 𑀭𑀫𑀡𑀻𑀬𑀁. 𑀅𑀮𑀦𑁆𑀢𑀺 𑀧𑀭𑀺𑀬𑀢𑁆𑀢𑀁, 𑀬𑀼𑀢𑁆𑀢𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀧𑀥𑀸𑀦𑀢𑁆𑀣𑀺𑀓𑀲𑁆𑀲𑀸𑀢𑀺 𑀬𑁄𑀕𑁂𑀦 𑀪𑀸𑀯𑀦𑀸𑀬 𑀅𑀢𑁆𑀣𑀺𑀓𑀲𑁆𑀲. 𑀧𑀥𑀸𑀦𑀸𑀬𑀸𑀢𑀺 𑀲𑀫𑀡𑀥𑀫𑁆𑀫𑀓𑀭𑀡𑀸𑀬. 𑀆𑀕𑀘𑁆𑀙𑁂𑀬𑁆𑀬𑀸𑀳𑀦𑁆𑀢𑀺 𑀆𑀕𑀘𑁆𑀙𑁂𑀬𑁆𑀬𑀁 𑀅𑀳𑀁. 𑀣𑁂𑀭𑁂𑀦 𑀓𑀺𑀭 𑀧𑀼𑀩𑁆𑀩𑁂 𑀢𑀁 𑀞𑀸𑀦𑀁 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀭𑀜𑁆𑀜𑀸 𑀏𑀯 𑀲𑀢𑀸 𑀅𑀦𑀼𑀪𑀽𑀢𑀁 𑀉𑀬𑁆𑀬𑀸𑀦𑀁 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀢𑀢𑁆𑀣 𑀯𑀺𑀳𑀭𑀺𑀢𑀼𑀁 𑀘𑀺𑀢𑁆𑀢𑀁 𑀦𑀫𑀺. 𑀆𑀕𑀫𑁂𑀳𑀺 𑀢𑀸𑀯𑀸𑀢𑀺 𑀲𑀢𑁆𑀣𑀸 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀦 𑀢𑀸𑀯𑀲𑁆𑀲 𑀜𑀸𑀡𑀁 𑀧𑀭𑀺𑀧𑀸𑀓𑀁 𑀕𑀢’’𑀦𑁆𑀢𑀺 𑀜𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀏𑀯𑀫𑀸𑀳. 𑀏𑀓𑀓𑀫𑁆𑀳𑀺 𑀢𑀸𑀯𑀸𑀢𑀺 𑀇𑀤𑀁 𑀧𑀦𑀲𑁆𑀲 ‘‘𑀏𑀯𑀫𑀬𑀁 𑀕𑀦𑁆𑀢𑁆𑀯𑀸𑀧𑀺 𑀓𑀫𑁆𑀫𑁂 𑀅𑀦𑀺𑀧𑁆𑀨𑀚𑁆𑀚𑀫𑀸𑀦𑁂 𑀦𑀺𑀭𑀸𑀲𑀗𑁆𑀓𑁄 𑀳𑀼𑀢𑁆𑀯𑀸 𑀧𑁂𑀫𑀯𑀲𑁂𑀦 𑀧𑀼𑀦 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀘𑀺𑀢𑁆𑀢𑀫𑀤𑁆𑀤𑀯𑀚𑀦𑀦𑀢𑁆𑀣𑀁 𑀆𑀳. 𑀬𑀸𑀯 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀻𑀢𑀺 𑀅𑀜𑁆𑀜𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀫𑀫 𑀲𑀦𑁆𑀢𑀺𑀓𑀁 𑀬𑀸𑀯 𑀆𑀕𑀘𑁆𑀙𑀢𑀺, 𑀢𑀸𑀯 𑀆𑀕𑀫𑁂𑀳𑀻𑀢𑀺 𑀅𑀢𑁆𑀣𑁄. ‘‘𑀓𑁄𑀘𑀺 𑀪𑀺𑀓𑁆𑀔𑀼 𑀤𑀺𑀲𑁆𑀲𑀢𑀻’’𑀢𑀺𑀧𑀺 𑀧𑀸𑀞𑁄. ‘‘𑀆𑀕𑀘𑁆𑀙𑀢𑀽’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀣𑀸 ‘‘𑀤𑀺𑀲𑁆𑀲𑀢𑀽’’𑀢𑀺.

𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀤𑀻𑀦𑀁 𑀲𑁄𑀴𑀲𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀓𑀢𑀢𑁆𑀢𑀸, 𑀅𑀪𑀺𑀲𑀫𑁆𑀩𑁄𑀥𑀺𑀬𑀸 𑀯𑀸 𑀅𑀥𑀺𑀕𑀢𑀢𑁆𑀢𑀸 𑀢𑀢𑁄 𑀅𑀜𑁆𑀜𑀁 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁 𑀦𑀸𑀫 𑀦𑀢𑁆𑀣𑀺. 𑀦𑀢𑁆𑀣𑀺 𑀓𑀢𑀲𑁆𑀲 𑀯𑀸 𑀧𑀢𑀺𑀘𑀬𑁄𑀢𑀺 𑀓𑀢𑀲𑁆𑀲 𑀯𑀸 𑀧𑀼𑀦 𑀧𑀢𑀺𑀘𑀬𑁄𑀧𑀺 𑀦𑀢𑁆𑀣𑀺. 𑀦 𑀳𑀺 𑀪𑀸𑀯𑀺𑀢𑀫𑀕𑁆𑀕𑁄 𑀧𑀼𑀦 𑀪𑀸𑀯𑀻𑀬𑀢𑀺, 𑀧𑀳𑀻𑀦𑀓𑀺𑀮𑁂𑀲𑀸𑀦𑀁 𑀯𑀸 𑀧𑀼𑀦 𑀧𑀳𑀸𑀦𑁂𑀦 𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀅𑀢𑁆𑀣𑀺 𑀓𑀢𑀲𑁆𑀲 𑀧𑀢𑀺𑀘𑀬𑁄𑀢𑀺 𑀫𑀬𑁆𑀳𑀁 𑀲𑀦𑁆𑀢𑀸𑀦𑁂 𑀦𑀺𑀧𑁆𑀨𑀸𑀤𑀺𑀢𑀲𑁆𑀲 𑀲𑀻𑀮𑀸𑀤𑀺𑀥𑀫𑁆𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 𑀢𑀤𑀢𑁆𑀣𑀁 𑀧𑀼𑀦 𑀯𑀟𑁆𑀠𑀦𑀲𑀗𑁆𑀔𑀸𑀢𑁄 𑀧𑀢𑀺𑀘𑀬𑁄 𑀅𑀢𑁆𑀣𑀺, 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀧𑀥𑀸𑀦𑀦𑁆𑀢𑀺 𑀔𑁄 𑀫𑁂𑀖𑀺𑀬 𑀯𑀤𑀫𑀸𑀦𑀁 𑀓𑀺𑀦𑁆𑀢𑀺 𑀯𑀤𑁂𑀬𑁆𑀬𑀸𑀫𑀸𑀢𑀺 ‘‘𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀻’’𑀢𑀺 𑀢𑀁 𑀯𑀤𑀫𑀸𑀦𑀁 𑀫𑀬𑀁 𑀅𑀜𑁆𑀜𑀁 𑀓𑀺𑀁 𑀦𑀸𑀫 𑀯𑀤𑁂𑀬𑁆𑀬𑀸𑀫?

𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀻𑀢𑀺 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀦𑀺𑀲𑀻𑀤𑀺. 𑀦𑀺𑀲𑀺𑀦𑁆𑀦𑁄 𑀘 𑀬𑀲𑁆𑀫𑀺𑀁 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀧𑀼𑀩𑁆𑀩𑁂 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀭𑀸𑀚𑀸 𑀳𑀼𑀢𑁆𑀯𑀸 𑀉𑀬𑁆𑀬𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀯𑀺𑀯𑀺𑀥𑀦𑀸𑀝𑀓𑀧𑀭𑀺𑀯𑀸𑀭𑁄 𑀦𑀺𑀲𑀺𑀦𑁆𑀦𑀧𑀼𑀩𑁆𑀩𑁄, 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀫𑀡𑀪𑀸𑀯𑁄 𑀯𑀺𑀕𑀢𑁄 𑀯𑀺𑀬 𑀅𑀳𑁄𑀲𑀺, 𑀭𑀸𑀚𑀯𑁂𑀲𑀁 𑀕𑀳𑁂𑀢𑁆𑀯𑀸 𑀦𑀸𑀝𑀓𑀧𑀭𑀺𑀯𑀸𑀭𑀧𑀭𑀺𑀯𑀼𑀢𑁄 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀚𑀸𑀢𑁄. 𑀅𑀣𑀲𑁆𑀲 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀲𑁆𑀲𑀸𑀤𑀬𑀢𑁄 𑀓𑀸𑀫𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺. 𑀲𑁄 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀲𑀳𑁄𑀟𑁆𑀠𑀁 𑀕𑀳𑀺𑀢𑁂 𑀤𑁆𑀯𑁂 𑀘𑁄𑀭𑁂 𑀆𑀦𑁂𑀢𑁆𑀯𑀸 𑀧𑀼𑀭𑀢𑁄 𑀞𑀧𑀺𑀢𑁂 𑀯𑀺𑀬 𑀅𑀤𑁆𑀤𑀲. 𑀢𑁂𑀲𑀼 𑀏𑀓𑀲𑁆𑀲 𑀯𑀥𑀁 𑀆𑀡𑀸𑀧𑀦𑀯𑀲𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀺, 𑀏𑀓𑀲𑁆𑀲 𑀩𑀦𑁆𑀥𑀦𑀁 𑀆𑀡𑀸𑀧𑀦𑀯𑀲𑁂𑀦 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄, 𑀏𑀯𑀁 𑀲𑁄 𑀮𑀢𑀸𑀚𑀸𑀮𑁂𑀦 𑀭𑀼𑀓𑁆𑀔𑁄 𑀯𑀺𑀬 𑀫𑀥𑀼𑀫𑀓𑁆𑀔𑀺𑀓𑀸𑀳𑀺 𑀫𑀥𑀼𑀖𑀸𑀢𑀓𑁄 𑀯𑀺𑀬 𑀘 𑀅𑀓𑀼𑀲𑀮𑀯𑀺𑀢𑀓𑁆𑀓𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀲𑀫𑁆𑀧𑀭𑀺𑀓𑀺𑀡𑁆𑀡𑁄 𑀅𑀳𑁄𑀲𑀺. 𑀢𑀁 𑀲𑀦𑁆𑀥𑀸𑀬 ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑁂𑀖𑀺𑀬𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄𑀢𑀺 𑀕𑀭𑀳𑀡𑀘𑁆𑀙𑀭𑀺𑀬𑀁 𑀦𑀸𑀫 𑀓𑀺𑀭𑁂𑀢𑀁 𑀬𑀣𑀸 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀯𑀮𑀺𑀬𑀕𑀢𑁆𑀢𑀁 𑀤𑀺𑀲𑁆𑀯𑀸 𑀅𑀯𑁄𑀘 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂’’𑀢𑀺 (𑀲𑀁. 𑀦𑀺. 𑁫.𑁫𑁧𑁧). 𑀅𑀧𑀭𑁂 𑀧𑀦 ‘‘𑀢𑀲𑁆𑀫𑀺𑀁 𑀲𑀫𑀬𑁂 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀻𑀲𑀼 𑀮𑁄𑀪𑀯𑀲𑁂𑀦 𑀓𑀸𑀫𑀯𑀺𑀢𑀓𑁆𑀓𑁄, 𑀔𑀭𑀲𑁆𑀲𑀭𑀸𑀦𑀁 𑀧𑀓𑁆𑀔𑀺𑀆𑀤𑀻𑀦𑀁 𑀲𑀤𑁆𑀤𑀲𑁆𑀲𑀯𑀦𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀮𑁂𑀟𑁆𑀟𑀼𑀆𑀤𑀻𑀳𑀺 𑀢𑁂𑀲𑀁 𑀧𑀝𑀺𑀩𑀸𑀳𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄, ‘𑀇𑀥𑁂𑀯𑀸𑀳𑀁 𑀯𑀲𑁂𑀬𑁆𑀬’𑀦𑁆𑀢𑀺 𑀢𑀢𑁆𑀣 𑀲𑀸𑀧𑁂𑀓𑁆𑀔𑀢𑀸𑀯𑀲𑁂𑀦 𑀓𑀸𑀫𑀯𑀺𑀢𑀓𑁆𑀓𑁄, 𑀯𑀦𑀘𑀭𑀓𑁂 𑀢𑀢𑁆𑀣 𑀢𑀢𑁆𑀣 𑀤𑀺𑀲𑁆𑀯𑀸 𑀢𑁂𑀲𑀼 𑀘𑀺𑀢𑁆𑀢𑀤𑀼𑀩𑁆𑀪𑀦𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀢𑁂𑀲𑀁 𑀯𑀺𑀳𑁂𑀞𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀢𑀲𑁆𑀲 𑀉𑀧𑁆𑀧𑀚𑁆𑀚𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀬𑀣𑀸 𑀯𑀸 𑀢𑀣𑀸 𑀯𑀸 𑀢𑀲𑁆𑀲 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀼𑀧𑁆𑀧𑀢𑁆𑀢𑀺𑀬𑁂𑀯 𑀅𑀘𑁆𑀙𑀭𑀺𑀬𑀓𑀸𑀭𑀡𑀁. 𑀅𑀦𑁆𑀯𑀸𑀲𑀢𑁆𑀢𑀸𑀢𑀺 𑀅𑀦𑀼𑀮𑀕𑁆𑀕𑀸 𑀯𑁄𑀓𑀺𑀡𑁆𑀡𑀸. 𑀅𑀢𑁆𑀢𑀦𑀺 𑀕𑀭𑀼𑀫𑁆𑀳𑀺 𑀘 𑀏𑀓𑀢𑁆𑀢𑁂𑀧𑀺 𑀩𑀳𑀼𑀯𑀘𑀦𑀁 𑀤𑀺𑀲𑁆𑀲𑀢𑀺. ‘‘𑀅𑀦𑀼𑀲𑀦𑁆𑀢𑁄’’𑀢𑀺𑀧𑀺 𑀧𑀸𑀞𑁄.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀏𑀯𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡𑁄 𑀓𑀫𑁆𑀫𑀝𑁆𑀞𑀸𑀦𑀲𑀧𑁆𑀧𑀸𑀬𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀇𑀤𑀁 𑀯𑀢 𑀤𑀺𑀲𑁆𑀯𑀸 𑀤𑀻𑀖𑀤𑀲𑁆𑀲𑀻 𑀪𑀕𑀯𑀸 𑀧𑀝𑀺𑀲𑁂𑀥𑁂𑀲𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀇𑀫𑀁 𑀓𑀸𑀭𑀡𑀁 𑀤𑀲𑀩𑀮𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀯𑀼𑀝𑁆𑀞𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺.

𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀩𑀳𑀼𑀮𑀁 𑀅𑀪𑀺𑀓𑁆𑀔𑀡𑀁. 𑀧𑀸𑀧𑀓𑀸𑀢𑀺 𑀮𑀸𑀫𑀓𑀸. 𑀅𑀓𑀼𑀲𑀮𑀸𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸. 𑀤𑀼𑀕𑁆𑀕𑀢𑀺𑀲𑀫𑁆𑀧𑀸𑀧𑀦𑀝𑁆𑀞𑁂𑀦 𑀯𑀸 𑀧𑀸𑀧𑀓𑀸, 𑀓𑀼𑀲𑀮𑀧𑀝𑀺𑀧𑀓𑁆𑀔𑀢𑀸𑀬 𑀅𑀓𑀼𑀲𑀮𑀸. 𑀯𑀺𑀢𑀓𑁆𑀓𑁂𑀢𑀺 𑀊𑀳𑀢𑀺 𑀆𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑁂𑀢𑀻𑀢𑀺 𑀯𑀺𑀢𑀓𑁆𑀓𑁄, 𑀓𑀸𑀫𑀲𑀳𑀕𑀢𑁄 𑀯𑀺𑀢𑀓𑁆𑀓𑁄 𑀓𑀸𑀫𑀯𑀺𑀢𑀓𑁆𑀓𑁄, 𑀓𑀺𑀮𑁂𑀲𑀓𑀸𑀫𑀲𑀫𑁆𑀧𑀬𑀼𑀢𑁆𑀢𑁄 𑀯𑀢𑁆𑀣𑀼𑀓𑀸𑀫𑀸𑀭𑀫𑁆𑀫𑀡𑁄 𑀯𑀺𑀢𑀓𑁆𑀓𑁄𑀢𑀺 𑀅𑀢𑁆𑀣𑁄. 𑀩𑁆𑀬𑀸𑀧𑀸𑀤𑀲𑀳𑀕𑀢𑁄 𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄. 𑀯𑀺𑀳𑀺𑀁𑀲𑀸𑀲𑀳𑀕𑀢𑁄 𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑁂𑀲𑀼 𑀓𑀸𑀫𑀸𑀦𑀁 𑀅𑀪𑀺𑀦𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑁄 𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀓𑁆𑀔𑁄 𑀓𑀸𑀫𑀯𑀺𑀢𑀓𑁆𑀓𑁄, ‘‘𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀼 𑀯𑀸 𑀯𑀺𑀦𑀲𑁆𑀲𑀦𑁆𑀢𑀼 𑀯𑀸 𑀫𑀸 𑀯𑀸 𑀅𑀳𑁂𑀲𑀼’’𑀦𑁆𑀢𑀺 𑀲𑀢𑁆𑀢𑁂𑀲𑀼 𑀲𑀫𑁆𑀧𑀤𑀼𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄 𑀫𑁂𑀢𑁆𑀢𑀸𑀧𑀝𑀺𑀧𑀓𑁆𑀔𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀧𑀸𑀡𑀺𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀲𑀢𑁆𑀢𑀸𑀦𑀁 𑀯𑀺𑀳𑁂𑀞𑁂𑀢𑀼𑀓𑀸𑀫𑀢𑀸𑀯𑀲𑁂𑀦 𑀧𑀯𑀢𑁆𑀢𑁄 𑀓𑀭𑀼𑀡𑀸𑀧𑀝𑀺𑀧𑀓𑁆𑀔𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄.

𑀓𑀲𑁆𑀫𑀸 𑀧𑀦𑀲𑁆𑀲 𑀪𑀕𑀯𑀸 𑀢𑀢𑁆𑀣 𑀕𑀫𑀦𑀁 𑀅𑀦𑀼𑀚𑀸𑀦𑀺? ‘‘𑀅𑀦𑀦𑀼𑀜𑁆𑀜𑀸𑀢𑁄𑀧𑀺 𑀘𑀸𑀬𑀁 𑀫𑀁 𑀑𑀳𑀸𑀬 𑀕𑀘𑁆𑀙𑀺𑀲𑁆𑀲𑀢𑁂𑀯, ‘𑀧𑀭𑀺𑀘𑀸𑀭𑀓𑀸𑀫𑀢𑀸𑀬 𑀫𑀜𑁆𑀜𑁂 𑀪𑀕𑀯𑀸 𑀕𑀦𑁆𑀢𑀼𑀁 𑀦 𑀤𑁂𑀢𑀻’𑀢𑀺 𑀘𑀲𑁆𑀲 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁. 𑀢𑀤𑀲𑁆𑀲 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’’𑀢𑀺 𑀅𑀦𑀼𑀚𑀸𑀦𑀺.

𑀏𑀯𑀁 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀅𑀣𑀲𑁆𑀲 𑀪𑀕𑀯𑀸 𑀲𑀧𑁆𑀧𑀸𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 ‘‘𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑀭𑀺𑀧𑀓𑁆𑀓𑀸𑀬𑀸𑀢𑀺 𑀧𑀭𑀺𑀧𑀸𑀓𑀁 𑀅𑀧𑁆𑀧𑀢𑁆𑀢𑀸𑀬. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀓𑀺𑀮𑁂𑀲𑁂𑀳𑀺 𑀘𑁂𑀢𑀲𑁄 𑀯𑀺𑀫𑀼𑀢𑁆𑀢𑀺𑀬𑀸. 𑀧𑀼𑀩𑁆𑀩𑀪𑀸𑀕𑁂 𑀳𑀺 𑀢𑀤𑀗𑁆𑀕𑀯𑀲𑁂𑀦 𑀘𑁂𑀯 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀘 𑀓𑀺𑀮𑁂𑀲𑁂𑀳𑀺 𑀘𑁂𑀢𑀲𑁄 𑀯𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀅𑀧𑀭𑀪𑀸𑀕𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘𑁂𑀯 𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀘. 𑀲𑀸𑀬𑀁 𑀯𑀺𑀫𑀼𑀢𑁆𑀢𑀺 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀢𑁄 𑀓𑀣𑀺𑀢𑀸𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀆𑀲𑀬𑁂 𑀧𑀭𑀺𑀧𑀸𑀘𑀺𑀢𑁂 𑀧𑀩𑁄𑀥𑀺𑀢𑁂 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺𑀬𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀺𑀬𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀭𑀺𑀧𑀓𑁆𑀓𑀸 𑀦𑀸𑀫 𑀳𑁄𑀢𑀺, 𑀢𑀤𑀪𑀸𑀯𑁂 𑀅𑀧𑀭𑀺𑀧𑀓𑁆𑀓𑀸.

𑀓𑀢𑀫𑁂 𑀧𑀦 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀺𑀲𑀼𑀤𑁆𑀥𑀺𑀓𑀭𑀡𑀯𑀲𑁂𑀦 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀲𑁆𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀧𑀲𑀸𑀤𑀦𑀻𑀬𑁂 𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑁋 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀓𑀼𑀲𑀻𑀢𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀲𑀫𑁆𑀫𑀧𑁆𑀧𑀥𑀸𑀦𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑁋 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀫𑀼𑀝𑁆𑀞𑀲𑁆𑀲𑀢𑀻 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀲𑀢𑀺𑀧𑀝𑁆𑀞𑀸𑀦𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑁋 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀅𑀲𑀫𑀸𑀳𑀺𑀢𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀲𑀫𑀸𑀳𑀺𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀛𑀸𑀦𑀯𑀺𑀫𑁄𑀓𑁆𑀔𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑁋 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀤𑀼𑀧𑁆𑀧𑀜𑁆𑀜𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀧𑀜𑁆𑀜𑀯𑀦𑁆𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑁋 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀇𑀢𑀺 𑀇𑀫𑁂 𑀧𑀜𑁆𑀘 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀧𑀜𑁆𑀘 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀧𑀜𑁆𑀘 𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑁋 𑀇𑀫𑁂𑀳𑀺 𑀧𑀦𑁆𑀦𑀭𑀲𑀳𑀺 𑀆𑀓𑀸𑀭𑁂𑀳𑀺, 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁮𑁫).

𑀅𑀧𑀭𑁂𑀧𑀺 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑁋 𑀲𑀤𑁆𑀥𑀸𑀧𑀜𑁆𑀘𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀅𑀦𑀺𑀘𑁆𑀘𑀲𑀜𑁆𑀜𑀸 𑀤𑀼𑀓𑁆𑀔𑀲𑀜𑁆𑀜𑀸 𑀅𑀦𑀢𑁆𑀢𑀲𑀜𑁆𑀜𑀸 𑀧𑀳𑀸𑀦𑀲𑀜𑁆𑀜𑀸 𑀯𑀺𑀭𑀸𑀕𑀲𑀜𑁆𑀜𑀸𑀢𑀺 𑀇𑀫𑀸 𑀧𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀜𑁆𑀜𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀲𑀻𑀮𑀲𑀁𑀯𑀭𑁄 𑀅𑀪𑀺𑀲𑀮𑁆𑀮𑁂𑀔𑀢𑀸 𑀯𑀻𑀭𑀺𑀬𑀸𑀭𑀫𑁆𑀪𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸𑀢𑀺. 𑀢𑁂𑀲𑀼 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁄 𑀲𑀢𑁆𑀣𑀸 𑀯𑀺𑀦𑁂𑀬𑁆𑀬𑀲𑁆𑀲 𑀫𑁂𑀖𑀺𑀬𑀢𑁆𑀣𑁂𑀭𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀇𑀥 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀬𑁄 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑁂 𑀥𑀫𑁆𑀫𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀘 𑀥𑀫𑁆𑀫𑀸 𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑁂 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 ‘‘𑀇𑀥, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀢𑀺 𑀓𑀮𑁆𑀬𑀸𑀡𑁄 𑀪𑀤𑁆𑀤𑁄 𑀲𑀼𑀦𑁆𑀤𑀭𑁄 𑀫𑀺𑀢𑁆𑀢𑁄 𑀏𑀢𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁄. 𑀬𑀲𑁆𑀲 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄 ‘‘𑀅𑀖𑀲𑁆𑀲 𑀖𑀸𑀢𑀸, 𑀳𑀺𑀢𑀲𑁆𑀲 𑀯𑀺𑀥𑀸𑀢𑀸’’𑀢𑀺 𑀏𑀯𑀁 𑀲𑀩𑁆𑀩𑀸𑀓𑀸𑀭𑁂𑀦 𑀉𑀧𑀓𑀸𑀭𑁄 𑀫𑀺𑀢𑁆𑀢𑁄 𑀳𑁄𑀢𑀺, 𑀲𑁄 𑀧𑀼𑀕𑁆𑀕𑀮𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀯. 𑀬𑀣𑀸𑀯𑀼𑀢𑁆𑀢𑁂𑀳𑀺 𑀓𑀮𑁆𑀬𑀸𑀡𑀧𑀼𑀕𑁆𑀕𑀮𑁂𑀳𑁂𑀯 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀲𑀳 𑀅𑀬𑀢𑀺 𑀧𑀯𑀢𑁆𑀢𑀢𑀺, 𑀦 𑀯𑀺𑀦𑀸 𑀢𑁂𑀳𑀻𑀢𑀺 𑀓𑀮𑁆𑀬𑀸𑀡𑀲𑀳𑀸𑀬𑁄.𑀓𑀮𑁆𑀬𑀸𑀡𑀧𑀼𑀕𑁆𑀕𑀮𑁂𑀲𑀼 𑀏𑀯 𑀘𑀺𑀢𑁆𑀢𑁂𑀦 𑀘𑁂𑀯 𑀓𑀸𑀬𑁂𑀦 𑀘 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄. 𑀧𑀤𑀢𑁆𑀢𑀬𑁂𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑁂 𑀆𑀤𑀭𑀁 𑀉𑀧𑁆𑀧𑀸𑀤𑁂𑀢𑀺.

𑀢𑀢𑁆𑀭𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀮𑀓𑁆𑀔𑀡𑀁 𑁋 𑀇𑀥 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀼𑀢𑀲𑀫𑁆𑀧𑀦𑁆𑀦𑁄 𑀘𑀸𑀕𑀲𑀫𑁆𑀧𑀦𑁆𑀦𑁄 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄 𑀲𑀢𑀺𑀲𑀫𑁆𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄. 𑀢𑀢𑁆𑀣 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑀓𑀫𑁆𑀫𑀨𑀮𑀜𑁆𑀘, 𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀳𑁂𑀢𑀼𑀪𑀽𑀢𑀁 𑀲𑀢𑁆𑀢𑁂𑀲𑀼 𑀳𑀺𑀢𑁂𑀲𑀺𑀢𑀁 𑀦 𑀧𑀭𑀺𑀘𑁆𑀘𑀚𑀢𑀺. 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 𑀕𑀭𑀼 𑀪𑀸𑀯𑀦𑀻𑀬𑁄 𑀘𑁄𑀤𑀓𑁄 𑀧𑀸𑀧𑀕𑀭𑀳𑀻 𑀯𑀢𑁆𑀢𑀸 𑀯𑀘𑀦𑀓𑁆𑀔𑀫𑁄, 𑀲𑀼𑀢𑀲𑀫𑁆𑀧𑀢𑁆𑀢𑀺𑀬𑀸 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀕𑀫𑁆𑀪𑀻𑀭𑀸𑀦𑀁 𑀓𑀣𑀸𑀦𑀁 𑀓𑀢𑁆𑀢𑀸 𑀳𑁄𑀢𑀺, 𑀘𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄, 𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺 𑀲𑀢𑁆𑀢𑀸𑀦𑀁 𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀬𑀸, 𑀲𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑁄𑀢𑀺, 𑀲𑀫𑀸𑀥𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀯𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺 𑀲𑀫𑀸𑀳𑀺𑀢𑀘𑀺𑀢𑁆𑀢𑁄, 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀅𑀯𑀺𑀧𑀭𑀻𑀢𑀁 𑀚𑀸𑀦𑀸𑀢𑀺. 𑀲𑁄 𑀲𑀢𑀺𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀫𑀸𑀦𑁄 𑀧𑀜𑁆𑀜𑀸𑀬 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀁 𑀬𑀣𑀸𑀪𑀽𑀢𑀁 𑀚𑀸𑀦𑀺𑀢𑁆𑀯𑀸, 𑀲𑀫𑀸𑀥𑀺𑀦𑀸 𑀢𑀢𑁆𑀣 𑀏𑀓𑀕𑁆𑀕𑀘𑀺𑀢𑁆𑀢𑁄 𑀳𑀼𑀢𑁆𑀯𑀸, 𑀯𑀻𑀭𑀺𑀬𑁂𑀦 𑀲𑀢𑁆𑀢𑁂 𑀅𑀳𑀺𑀢𑀸 𑀦𑀺𑀲𑁂𑀥𑁂𑀢𑁆𑀯𑀸 𑀳𑀺𑀢𑁂 𑀦𑀺𑀬𑁄𑀚𑁂𑀢𑀺. 𑀢𑁂𑀦𑀸𑀳 𑁋

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀬𑁂’’𑀢𑀺. (𑀅. 𑀦𑀺. 𑁭.𑁩𑁭);

𑀅𑀬𑀁 𑀧𑀞𑀫𑁄 𑀥𑀫𑁆𑀫𑁄 𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀢𑀻𑀢𑀺, 𑀅𑀬𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀲𑀗𑁆𑀔𑀸𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀆𑀤𑀺𑀪𑀸𑀯𑀢𑁄, 𑀲𑀩𑁆𑀩𑁂𑀲𑀜𑁆𑀘 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀩𑀳𑀼𑀓𑀸𑀭𑀢𑀸𑀬 𑀧𑀥𑀸𑀦𑀪𑀸𑀯𑀢𑁄 𑀘 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀆𑀤𑀺𑀢𑁄 𑀯𑀼𑀢𑁆𑀢𑀢𑁆𑀢𑀸 𑀧𑀞𑀫𑁄 𑀅𑀦𑀯𑀚𑁆𑀚𑀥𑀫𑁆𑀫𑁄 𑀅𑀯𑀺𑀲𑀼𑀤𑁆𑀥𑀸𑀦𑀁 𑀲𑀤𑁆𑀥𑀸𑀤𑀻𑀦𑀁 𑀯𑀺𑀲𑀼𑀤𑁆𑀥𑀺𑀓𑀭𑀡𑀯𑀲𑁂𑀦 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀢𑀺. 𑀏𑀢𑁆𑀣 𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀩𑀳𑀼𑀓𑀸𑀭𑀢𑀸 𑀧𑀥𑀸𑀦𑀢𑀸 𑀘 ‘‘𑀉𑀧𑀟𑁆𑀠𑀫𑀺𑀤𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸’’𑀢𑀺 𑀯𑀤𑀦𑁆𑀢𑀁 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁, ‘‘𑀫𑀸 𑀳𑁂𑀯𑀁, 𑀆𑀦𑀦𑁆𑀤𑀸’’𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀲𑁂𑀥𑁂𑀢𑁆𑀯𑀸, ‘‘𑀲𑀓𑀮𑀫𑁂𑀯 𑀳𑀺𑀤𑀁, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸’’𑀢𑀺𑀆𑀤𑀺𑀲𑀼𑀢𑁆𑀢𑀧𑀤𑁂𑀳𑀺 (𑀲𑀁. 𑀦𑀺. 𑁧.𑁧𑁨𑁯; 𑁫.𑁨) 𑀯𑁂𑀤𑀺𑀢𑀩𑁆𑀩𑀸.

𑀧𑀼𑀦 𑀘𑀧𑀭𑀦𑁆𑀢𑀺 𑀧𑀼𑀦 𑀘 𑀅𑀧𑀭𑀁 𑀥𑀫𑁆𑀫𑀚𑀸𑀢𑀁. 𑀲𑀻𑀮𑀯𑀸𑀢𑀺 𑀏𑀢𑁆𑀣 𑀓𑁂𑀦𑀝𑁆𑀞𑁂𑀦 𑀲𑀻𑀮𑀁? 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀁. 𑀓𑀺𑀫𑀺𑀤𑀁 𑀲𑀻𑀮𑀦𑀁 𑀦𑀸𑀫? 𑀲𑀫𑀸𑀥𑀸𑀦𑀁, 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀲𑀻𑀮𑁆𑀬𑀯𑀲𑁂𑀦 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀧𑀥𑀸𑀭𑀡𑀁, 𑀛𑀸𑀦𑀸𑀤𑀺𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀦𑀯𑀲𑁂𑀦 𑀆𑀥𑀸𑀭𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀲𑀻𑀮𑁂𑀢𑀺 𑀲𑀻𑀮𑀢𑀻𑀢𑀺 𑀯𑀸 𑀲𑀻𑀮𑀁. 𑀅𑀬𑀁 𑀢𑀸𑀯 𑀲𑀤𑁆𑀤𑀮𑀓𑁆𑀔𑀡𑀦𑀬𑁂𑀦 𑀲𑀻𑀮𑀢𑁆𑀣𑁄. 𑀅𑀧𑀭𑁂 𑀧𑀦 ‘‘𑀲𑀺𑀭𑀝𑁆𑀞𑁄 𑀲𑀻𑀢𑀮𑀝𑁆𑀞𑁄 𑀲𑀻𑀮𑀝𑁆𑀞𑁄 𑀲𑀁𑀯𑀭𑀝𑁆𑀞𑁄’’𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀅𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑀺. 𑀢𑀬𑀺𑀤𑀁 𑀧𑀸𑀭𑀺𑀧𑀽𑀭𑀺𑀢𑁄 𑀅𑀢𑀺𑀲𑀬𑀢𑁄 𑀯𑀸 𑀲𑀻𑀮𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀯𑀸, 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄.

𑀬𑀣𑀸 𑀘 𑀲𑀻𑀮𑀯𑀸 𑀳𑁄𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀲𑀻𑀮𑀁. 𑀢𑀜𑁆𑀳𑀺 𑀬𑁄 𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀲𑀁𑀯𑀭𑀡𑀁 𑀲𑀁𑀯𑀭𑁄, 𑀓𑀸𑀬𑀯𑀸𑀘𑀸𑀳𑀺 𑀅𑀯𑀻𑀢𑀺𑀓𑁆𑀓𑀫𑁄. 𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀲𑀁𑀯𑀭𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀢𑁂𑀦 𑀲𑀁𑀯𑀼𑀢𑁄 𑀧𑀺𑀳𑀺𑀢𑀓𑀸𑀬𑀯𑀸𑀘𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄, 𑀇𑀤𑀫𑀲𑁆𑀲 𑀢𑀲𑁆𑀫𑀺𑀁 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀁. 𑀯𑀺𑀳𑀭𑀢𑀻𑀢𑀺 𑀢𑀤𑀦𑀼𑀭𑀽𑀧𑀯𑀺𑀳𑀸𑀭𑀲𑀫𑀗𑁆𑀕𑀺𑀪𑀸𑀯𑀧𑀭𑀺𑀤𑀻𑀧𑀦𑀁. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀳𑁂𑀝𑁆𑀞𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑁆𑀲, 𑀉𑀧𑀭𑀺 𑀯𑀺𑀲𑁂𑀲𑀸𑀦𑀁 𑀬𑁄𑀕𑀲𑁆𑀲 𑀘 𑀉𑀧𑀓𑀸𑀭𑀓𑀥𑀫𑁆𑀫𑀧𑀭𑀺𑀤𑀻𑀧𑀦𑀁. 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀢𑁄 𑀅𑀘𑀯𑀦𑀥𑀫𑁆𑀫𑀢𑀸𑀧𑀭𑀺𑀤𑀻𑀧𑀦𑀁. 𑀲𑀫𑀸𑀤𑀸𑀬𑀸𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀦𑀯𑀲𑁂𑀲𑀢𑁄 𑀆𑀤𑀸𑀦𑀧𑀭𑀺𑀤𑀻𑀧𑀦𑀁. 𑀲𑀺𑀓𑁆𑀔𑀢𑀻𑀢𑀺 𑀲𑀺𑀓𑁆𑀔𑀸𑀬 𑀲𑀫𑀗𑁆𑀕𑀺𑀪𑀸𑀯𑀧𑀭𑀺𑀤𑀻𑀧𑀦𑀁. 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀧𑀭𑀺𑀤𑀻𑀧𑀦𑀁.

𑀅𑀧𑀭𑁄 𑀦𑀬𑁄 𑁋 𑀓𑀺𑀮𑁂𑀲𑀸𑀦𑀁 𑀩𑀮𑀯𑀪𑀸𑀯𑀢𑁄, 𑀧𑀸𑀧𑀓𑀺𑀭𑀺𑀬𑀸𑀬 𑀲𑀼𑀓𑀭𑀪𑀸𑀯𑀢𑁄, 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀩𑀳𑀼𑀓𑁆𑀔𑀢𑁆𑀢𑀼𑀁 𑀅𑀧𑀸𑀬𑁂𑀲𑀼 𑀧𑀢𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀧𑀼𑀣𑀼𑀚𑁆𑀚𑀦𑁄. 𑀅𑀦𑀺𑀘𑁆𑀘𑀢𑀸𑀬 𑀯𑀸 𑀪𑀯𑀸𑀤𑀻𑀲𑀼 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑁄 𑀖𑀝𑀻𑀬𑀦𑁆𑀢𑀁 𑀯𑀺𑀬 𑀅𑀦𑀯𑀝𑁆𑀞𑀸𑀦𑁂𑀦 𑀧𑀭𑀺𑀩𑁆𑀪𑀫𑀦𑀢𑁄 𑀕𑀫𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀫𑀭𑀡𑀯𑀲𑁂𑀦 𑀯𑀸 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀅𑀢𑁆𑀢𑀪𑀸𑀯𑀲𑁆𑀲 𑀧𑀢𑀦𑀲𑀻𑀮𑁄𑀢𑀺 𑀯𑀸 𑀧𑀸𑀢𑀻, 𑀲𑀢𑁆𑀢𑀲𑀦𑁆𑀢𑀸𑀦𑁄 𑀘𑀺𑀢𑁆𑀢𑀫𑁂𑀯 𑀯𑀸. 𑀢𑀁 𑀧𑀸𑀢𑀺𑀦𑀁 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀘𑀺𑀢𑁆𑀢𑀲𑁆𑀲 𑀳𑀺 𑀯𑀺𑀫𑁄𑀓𑁆𑀔𑁂𑀦 𑀲𑀢𑁆𑀢𑁄 ‘‘𑀯𑀺𑀫𑀼𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀺𑀢𑁆𑀢𑀯𑁄𑀤𑀸𑀦𑀸 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁩.𑁧𑁦𑁦), ‘‘𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑁨𑁮) 𑀘.

𑀅𑀣 𑀯𑀸 𑀅𑀯𑀺𑀚𑁆𑀚𑀸𑀤𑀺𑀳𑁂𑀢𑀼𑀦𑀸 𑀲𑀁𑀲𑀸𑀭𑁂 𑀧𑀢𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀸𑀢𑀺, ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁨𑁪) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀸𑀢𑀺𑀦𑁄 𑀲𑀢𑁆𑀢𑀲𑁆𑀲 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀢𑁆𑀢𑀬𑀢𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁄, ‘‘𑀓𑀡𑁆𑀞𑁂𑀓𑀸𑀮𑁄’’𑀢𑀺𑀆𑀤𑀻𑀦𑀁 𑀯𑀺𑀬 𑀲𑀫𑀸𑀲𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀯𑀸 𑀧𑀸𑀢𑁂𑀢𑀺 𑀯𑀺𑀦𑀺𑀧𑀸𑀢𑁂𑀢𑀺 𑀤𑀼𑀓𑁆𑀔𑁂𑀳𑀻𑀢𑀺 𑀧𑀸𑀢𑀺, 𑀘𑀺𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀺𑀢𑁆𑀢𑁂𑀦 𑀦𑀺𑀬𑁆𑀬𑀢𑀻 𑀮𑁄𑀓𑁄, 𑀘𑀺𑀢𑁆𑀢𑁂𑀦 𑀧𑀭𑀺𑀓𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁧.𑁬𑁨). 𑀢𑀲𑁆𑀲 𑀧𑀸𑀢𑀺𑀦𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀧𑀢𑀢𑀺 𑀯𑀸 𑀏𑀢𑁂𑀦 𑀅𑀧𑀸𑀬𑀤𑀼𑀓𑁆𑀔𑁂 𑀲𑀁𑀲𑀸𑀭𑀤𑀼𑀓𑁆𑀔𑁂 𑀘𑀸𑀢𑀺 𑀧𑀸𑀢𑀺, 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀸. 𑀯𑀼𑀢𑁆𑀢𑀜𑁆𑀳𑀺 𑁋 ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁 (𑀲𑀁. 𑀦𑀺. 𑁧.𑁫𑁫-𑁫𑁭), 𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄’’𑀢𑀺 (𑀇𑀢𑀺𑀯𑀼. 𑁧𑁫, 𑁧𑁦𑁫) 𑀘𑀸𑀤𑀺. 𑀢𑀢𑁄 𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄.

𑀅𑀣 𑀯𑀸 𑀧𑀢𑀢𑀺 𑀏𑀢𑁆𑀣𑀸𑀢𑀺 𑀧𑀸𑀢𑀺, 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺. 𑀯𑀼𑀢𑁆𑀢𑀜𑁆𑀳𑀺 𑁋 ‘‘𑀙𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀙𑀲𑀼 𑀓𑀼𑀩𑁆𑀩𑀢𑀺 𑀲𑀦𑁆𑀣𑀯’’𑀦𑁆𑀢𑀺 (𑀲𑀼. 𑀦𑀺. 𑁧𑁭𑁧). 𑀢𑀢𑁄 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀲𑀗𑁆𑀔𑀸𑀢𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀅𑀣 𑀯𑀸 𑀧𑀸𑀢𑁄 𑀯𑀺𑀦𑀺𑀧𑀸𑀢𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀢𑀻, 𑀲𑀁𑀲𑀸𑀭𑁄. 𑀢𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄.

𑀅𑀣 𑀯𑀸 𑀲𑀩𑁆𑀩𑀮𑁄𑀓𑀸𑀥𑀺𑀧𑀢𑀺𑀪𑀸𑀯𑀢𑁄 𑀥𑀫𑁆𑀫𑀺𑀲𑁆𑀲𑀭𑁄 𑀪𑀕𑀯𑀸 𑀧𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀫𑀼𑀘𑁆𑀘𑀢𑀺 𑀏𑀢𑁂𑀦𑀸𑀢𑀺 𑀫𑁄𑀓𑁆𑀔𑁄. 𑀧𑀢𑀺𑀦𑁄 𑀫𑁄𑀓𑁆𑀔𑁄 𑀢𑁂𑀦 𑀧𑀜𑁆𑀜𑀢𑁆𑀢𑀢𑁆𑀢𑀸𑀢𑀺 𑀧𑀢𑀺𑀫𑁄𑀓𑁆𑀔𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀲𑀩𑁆𑀩𑀕𑀼𑀡𑀸𑀦𑀁 𑀯𑀸 𑀢𑀫𑁆𑀫𑀽𑀮𑀪𑀸𑀯𑀢𑁄 𑀉𑀢𑁆𑀢𑀫𑀝𑁆𑀞𑁂𑀦 𑀧𑀢𑀺 𑀘, 𑀲𑁄 𑀬𑀣𑀸𑀯𑀼𑀢𑁆𑀢𑀝𑁆𑀞𑁂𑀦 𑀫𑁄𑀓𑁆𑀔𑁄 𑀘𑀸𑀢𑀺 𑀧𑀢𑀺𑀫𑁄𑀓𑁆𑀔𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺𑀆𑀤𑀺𑀫𑁂𑀢𑀁 𑀫𑀼𑀔𑀫𑁂𑀢’’𑀦𑁆𑀢𑀺 𑀯𑀺𑀢𑁆𑀣𑀸𑀭𑁄.

𑀅𑀣 𑀯𑀸 𑀧𑀇𑀢𑀺 𑀧𑀓𑀸𑀭𑁂, 𑀅𑀢𑀻𑀢𑀺 𑀅𑀘𑁆𑀘𑀦𑁆𑀢𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀧𑀓𑀸𑀭𑁂𑀳𑀺 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀇𑀤𑀜𑁆𑀳𑀺 𑀲𑀻𑀮𑀁 𑀲𑀬𑀁 𑀢𑀤𑀗𑁆𑀕𑀯𑀲𑁂𑀦, 𑀲𑀫𑀸𑀥𑀺𑀲𑀳𑀺𑀢𑀁 𑀧𑀜𑁆𑀜𑀸𑀲𑀳𑀺𑀢𑀜𑁆𑀘 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀧𑀢𑀺 𑀫𑁄𑀓𑁆𑀔𑁄𑀢𑀺 𑀯𑀸 𑀧𑀢𑀺𑀫𑁄𑀓𑁆𑀔𑁄, 𑀢𑀫𑁆𑀳𑀸 𑀢𑀫𑁆𑀳𑀸 𑀯𑀻𑀢𑀺𑀓𑁆𑀓𑀫𑀤𑁄𑀲𑀢𑁄 𑀧𑀘𑁆𑀘𑁂𑀓𑀁 𑀫𑁄𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀫𑁄𑀓𑁆𑀔𑁄𑀢𑀺 𑀯𑀸 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀫𑁄𑀓𑁆𑀔𑀲𑁆𑀲 𑀧𑀝𑀺𑀩𑀺𑀫𑁆𑀩𑀪𑀽𑀢𑁄𑀢𑀺 𑀧𑀢𑀺𑀫𑁄𑀓𑁆𑀔𑁄. 𑀲𑀻𑀮𑀲𑀁𑀯𑀭𑁄 𑀳𑀺 𑀲𑀽𑀭𑀺𑀬𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑀁 𑀯𑀺𑀬 𑀦𑀺𑀩𑁆𑀩𑀸𑀦𑀲𑁆𑀲 𑀉𑀤𑀬𑀪𑀽𑀢𑁄 𑀢𑀧𑁆𑀧𑀝𑀺𑀪𑀸𑀕𑁄 𑀘 𑀬𑀣𑀸𑀭𑀳𑀁 𑀲𑀁𑀓𑀺𑀮𑁂𑀲𑀦𑀺𑀩𑁆𑀩𑀸𑀧𑀦𑀢𑁄. 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀧𑀢𑀺𑀯𑀢𑁆𑀢𑀢𑀺 𑀫𑁄𑀓𑁆𑀔𑁂𑀢𑀺 𑀤𑀼𑀓𑁆𑀔𑀦𑁆𑀢𑀺 𑀯𑀸 𑀧𑀢𑀺𑀫𑁄𑀓𑁆𑀔𑀁, 𑀧𑀢𑀺𑀫𑁄𑀓𑁆𑀔𑀫𑁂𑀯 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀁𑀯𑀭𑀢𑀺 𑀧𑀺𑀤𑀳𑀢𑀺 𑀏𑀢𑁂𑀦𑀸𑀢𑀺 𑀲𑀁𑀯𑀭𑁄, 𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀲𑀁𑀯𑀭𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄. 𑀅𑀢𑁆𑀣𑀢𑁄 𑀧𑀦 𑀢𑀢𑁄 𑀢𑀢𑁄 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁄 𑀯𑀺𑀭𑀢𑀺𑀬𑁄 𑀘𑁂𑀢𑀦𑀸 𑀘. 𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀯𑀼𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀪𑀗𑁆𑀕𑁂 𑁋

‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺 (𑀯𑀺𑀪. 𑁫𑁧𑁧).

𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀇𑀭𑀻𑀬𑀢𑀺 𑀯𑀢𑁆𑀢𑀢𑀺.

𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀯𑁂𑀴𑀼𑀤𑀸𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀓𑀸𑀬𑀧𑀸𑀕𑀩𑁆𑀪𑀺𑀬𑀸𑀤𑀻𑀦𑀜𑁆𑀘 𑀅𑀓𑀭𑀡𑁂𑀦 𑀲𑀩𑁆𑀩𑀲𑁄 𑀅𑀦𑀸𑀘𑀸𑀭𑀁 𑀯𑀚𑁆𑀚𑁂𑀢𑁆𑀯𑀸 ‘‘𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀪𑀺𑀓𑁆𑀔𑀼𑀲𑀸𑀭𑀼𑀧𑁆𑀧𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸, 𑀯𑁂𑀲𑀺𑀬𑀸𑀤𑀺𑀅𑀕𑁄𑀘𑀭𑀁 𑀯𑀚𑁆𑀚𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀸𑀤𑀺𑀅𑀢𑁆𑀣𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀲𑀗𑁆𑀔𑀸𑀢𑁂𑀦 𑀕𑁄𑀘𑀭𑁂𑀦 𑀘 𑀲𑀫𑁆𑀧𑀦𑁆𑀦𑀢𑁆𑀢𑀸 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄.

𑀅𑀧𑀺𑀘 𑀬𑁄 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀲𑀓𑁆𑀓𑀘𑁆𑀘𑀓𑀸𑀭𑀻 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑁄.

𑀕𑁄𑀘𑀭𑁄 𑀧𑀦 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄 𑀆𑀭𑀓𑁆𑀔𑀕𑁄𑀘𑀭𑁄 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄𑀢𑀺 𑀢𑀺𑀯𑀺𑀥𑁄. 𑀢𑀢𑁆𑀣 𑀬𑁄 𑀤𑀲𑀓𑀣𑀸𑀯𑀢𑁆𑀣𑀼𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀯𑀼𑀢𑁆𑀢𑀮𑀓𑁆𑀔𑀡𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄, 𑀬𑀁 𑀦𑀺𑀲𑁆𑀲𑀸𑀬 𑀅𑀲𑀼𑀢𑀁 𑀲𑀼𑀡𑀸𑀢𑀺, 𑀲𑀼𑀢𑀁 𑀧𑀭𑀺𑀬𑁄𑀤𑀸𑀧𑁂𑀢𑀺, 𑀓𑀗𑁆𑀔𑀁 𑀯𑀺𑀢𑀭𑀢𑀺, 𑀤𑀺𑀝𑁆𑀞𑀺𑀁 𑀉𑀚𑀼𑀁 𑀓𑀭𑁄𑀢𑀺, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺, 𑀬𑀜𑁆𑀘 𑀅𑀦𑀼𑀲𑀺𑀓𑁆𑀔𑀦𑁆𑀢𑁄 𑀲𑀤𑁆𑀥𑀸𑀬 𑀯𑀟𑁆𑀠𑀢𑀺, 𑀲𑀻𑀮𑁂𑀦, 𑀲𑀼𑀢𑁂𑀦, 𑀘𑀸𑀕𑁂𑀦, 𑀧𑀜𑁆𑀜𑀸𑀬 𑀯𑀟𑁆𑀠𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄.

𑀬𑁄 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀬𑀼𑀕𑀫𑀢𑁆𑀢𑀤𑀲𑁆𑀲𑀸𑀯𑀻 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀼𑀢𑁄𑀯 𑀕𑀘𑁆𑀙𑀢𑀺, 𑀦 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀅𑀲𑁆𑀲𑀁, 𑀦 𑀭𑀣𑀁, 𑀦 𑀧𑀢𑁆𑀢𑀺𑀁, 𑀦 𑀇𑀢𑁆𑀣𑀺𑀁, 𑀦 𑀧𑀼𑀭𑀺𑀲𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀅𑀥𑁄 𑀑𑀮𑁄𑀓𑁂𑀦𑁆𑀢𑁄, 𑀦 𑀤𑀺𑀲𑀸𑀯𑀺𑀤𑀺𑀲𑀁 𑀧𑁂𑀓𑁆𑀔𑀫𑀸𑀦𑁄 𑀕𑀘𑁆𑀙𑀢𑀺, 𑀅𑀬𑀁 𑀆𑀭𑀓𑁆𑀔𑀕𑁄𑀘𑀭𑁄.

𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄 𑀧𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀬𑀢𑁆𑀣 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀺, 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄, 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 (𑀲𑀁. 𑀦𑀺. 𑁫.𑁩𑁭𑁨).

𑀢𑀢𑁆𑀣 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑀲𑁆𑀲 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀢𑀸 𑀇𑀢𑀭𑁂𑀲𑀁 𑀯𑀲𑁂𑀦𑁂𑀢𑁆𑀣 𑀕𑁄𑀘𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸, 𑀇𑀫𑀸𑀬 𑀘 𑀕𑁄𑀘𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄.

𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀢𑁆𑀢𑀸 𑀅𑀡𑀼𑀧𑁆𑀧𑀫𑀸𑀡𑁂𑀲𑀼 𑀅𑀲𑁆𑀲𑀢𑀺𑀬𑀸 𑀅𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀲𑁂𑀔𑀺𑀬𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀦𑀲𑀻𑀮𑁄. 𑀬𑁄 𑀳𑀺 𑀪𑀺𑀓𑁆𑀔𑀼 𑀧𑀭𑀫𑀸𑀡𑀼𑀫𑀢𑁆𑀢𑀁 𑀯𑀚𑁆𑀚𑀁 𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀧𑀫𑀸𑀡𑀸𑀥𑀺𑀓𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀲𑀤𑀺𑀲𑀁 𑀓𑀢𑁆𑀯𑀸 𑀧𑀲𑁆𑀲𑀢𑀺, 𑀬𑁄𑀧𑀺 𑀲𑀩𑁆𑀩𑀮𑀳𑀼𑀓𑀁 𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀢𑀁 𑀧𑀸𑀭𑀸𑀚𑀺𑀓𑀲𑀤𑀺𑀲𑀁 𑀓𑀢𑁆𑀯𑀸 𑀧𑀲𑁆𑀲𑀢𑀺, 𑀅𑀬𑀫𑁆𑀧𑀺 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻 𑀦𑀸𑀫. 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀬𑀁𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀦𑀯𑀲𑁂𑀲𑀁 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸 𑀲𑀺𑀓𑁆𑀔𑀢𑀺, 𑀧𑀯𑀢𑁆𑀢𑀢𑀺 𑀧𑀭𑀺𑀧𑀽𑀭𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀪𑀺𑀲𑀮𑁆𑀮𑁂𑀔𑀺𑀓𑀸𑀢𑀺 𑀅𑀢𑀺𑀯𑀺𑀬 𑀓𑀺𑀮𑁂𑀲𑀸𑀦𑀁 𑀲𑀮𑁆𑀮𑁂𑀔𑀦𑀻, 𑀢𑁂𑀲𑀁 𑀢𑀦𑀼𑀪𑀸𑀯𑀸𑀬 𑀧𑀳𑀸𑀦𑀸𑀬 𑀬𑀼𑀢𑁆𑀢𑀭𑀽𑀧𑀸. 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸𑀢𑀺 𑀘𑁂𑀢𑀲𑁄 𑀧𑀝𑀺𑀘𑁆𑀙𑀸𑀤𑀓𑀸𑀦𑀁 𑀦𑀻𑀯𑀭𑀡𑀸𑀦𑀁 𑀤𑀽𑀭𑀻𑀪𑀸𑀯𑀓𑀭𑀡𑁂𑀦 𑀘𑁂𑀢𑁄𑀯𑀺𑀯𑀭𑀡𑀲𑀗𑁆𑀔𑀸𑀢𑀸𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀲𑀧𑁆𑀧𑀸𑀬𑀸, 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲𑁂𑀯 𑀯𑀸 𑀯𑀺𑀯𑀭𑀡𑀸𑀬 𑀧𑀸𑀓𑀝𑀻𑀓𑀭𑀡𑀸𑀬 𑀯𑀸 𑀲𑀧𑁆𑀧𑀸𑀬𑀸 𑀉𑀧𑀓𑀸𑀭𑀺𑀓𑀸𑀢𑀺 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸.

𑀇𑀤𑀸𑀦𑀺 𑀬𑁂𑀦 𑀦𑀺𑀩𑁆𑀩𑀺𑀤𑀸𑀤𑀺𑀆𑀯𑀳𑀦𑁂𑀦 𑀅𑀬𑀁 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸 𑀘 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀏𑀓𑀁𑀲𑁂𑀦𑁂𑀯 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬. 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬𑀸𑀢𑀺 𑀢𑀲𑁆𑀲𑁂𑀯 𑀯𑀺𑀭𑀚𑁆𑀚𑀦𑀢𑁆𑀣𑀸𑀬 𑀘 𑀦𑀺𑀭𑀼𑀚𑁆𑀛𑀦𑀢𑁆𑀣𑀸𑀬 𑀘. 𑀉𑀧𑀲𑀫𑀸𑀬𑀸𑀢𑀺 𑀲𑀩𑁆𑀩𑀓𑀺𑀮𑁂𑀲𑀽𑀧𑀲𑀫𑀸𑀬. 𑀅𑀪𑀺𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀲𑁆𑀲𑀸𑀧𑀺 𑀅𑀪𑀺𑀜𑁆𑀜𑁂𑀬𑁆𑀬𑀲𑁆𑀲 𑀅𑀪𑀺𑀚𑀸𑀦𑀦𑀸𑀬. 𑀲𑀫𑁆𑀩𑁄𑀥𑀸𑀬𑀸𑀢𑀺 𑀘𑀢𑀼𑀫𑀕𑁆𑀕𑀲𑀫𑁆𑀩𑁄𑀥𑀸𑀬. 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀸𑀬. 𑀏𑀢𑁂𑀲𑀼 𑀳𑀺 𑀆𑀤𑀺𑀢𑁄 𑀢𑀻𑀳𑀺 𑀧𑀤𑁂𑀳𑀺 𑀯𑀺𑀧𑀲𑁆𑀲𑀦𑀸 𑀯𑀼𑀢𑁆𑀢𑀸, 𑀤𑁆𑀯𑀻𑀳𑀺 𑀫𑀕𑁆𑀕𑁄, 𑀤𑁆𑀯𑀻𑀳𑀺 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀁. 𑀲𑀫𑀣𑀯𑀺𑀧𑀲𑁆𑀲𑀦𑀸 𑀆𑀤𑀺𑀁 𑀓𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑁄 𑀅𑀬𑀁 𑀲𑀩𑁆𑀩𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀦𑁄 𑀲𑀺𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀢𑀁 𑀓𑀣𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀺𑀘𑁆𑀙𑀓𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑁆𑀧𑀺𑀘𑁆𑀙𑁄𑀢𑀺 𑀦 𑀇𑀘𑁆𑀙𑁄, 𑀢𑀲𑁆𑀲 𑀓𑀣𑀸 𑀅𑀧𑁆𑀧𑀺𑀘𑁆𑀙𑀓𑀣𑀸, 𑀅𑀧𑁆𑀧𑀺𑀘𑁆𑀙𑀪𑀸𑀯𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀯𑀸 𑀅𑀧𑁆𑀧𑀺𑀘𑁆𑀙𑀓𑀣𑀸. 𑀏𑀢𑁆𑀣 𑀘 𑀅𑀢𑁆𑀭𑀺𑀘𑁆𑀙𑁄 𑀧𑀸𑀧𑀺𑀘𑁆𑀙𑁄 𑀫𑀳𑀺𑀘𑁆𑀙𑁄 𑀅𑀧𑁆𑀧𑀺𑀘𑁆𑀙𑁄𑀢𑀺 𑀇𑀘𑁆𑀙𑀸𑀯𑀲𑁂𑀦 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸. 𑀢𑁂𑀲𑀼 𑀅𑀢𑁆𑀢𑀦𑀸 𑀬𑀣𑀸𑀮𑀤𑁆𑀥𑁂𑀦 𑀮𑀸𑀪𑁂𑀦 𑀅𑀢𑀺𑀢𑁆𑀢𑁄 𑀉𑀧𑀭𑀽𑀧𑀭𑀺 𑀮𑀸𑀪𑀁 𑀇𑀘𑁆𑀙𑀦𑁆𑀢𑁄 𑀅𑀢𑁆𑀭𑀺𑀘𑁆𑀙𑁄 𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸, 𑀅𑀝𑁆𑀞𑀪𑀺 𑀘𑀸𑀧𑀺 𑀲𑁄𑀴𑀲;

𑀲𑁄𑀴𑀲𑀪𑀺 𑀘 𑀤𑁆𑀯𑀢𑁆𑀢𑀺𑀁𑀲, 𑀅𑀢𑁆𑀭𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄;

𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺. (𑀚𑀸. 𑁧.𑁫.𑁧𑁦𑁩);

‘‘𑀅𑀢𑁆𑀭𑀺𑀘𑁆𑀙𑀸 𑀅𑀢𑀺𑀮𑁄𑀪𑁂𑀦, 𑀅𑀢𑀺𑀮𑁄𑀪𑀫𑀤𑁂𑀦 𑀘𑀸’’𑀢𑀺 𑀘. (𑀚𑀸. 𑁧.𑁨.𑁧𑁬𑁮);

𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑀺𑀓𑀸𑀫𑀬𑀢𑀸𑀬 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄 𑀧𑀸𑀧𑀺𑀘𑁆𑀙𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀢𑀢𑁆𑀣 𑀓𑀢𑀫𑀸 𑀓𑀼𑀳𑀦𑀸? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀸𑀧𑀺𑀘𑁆𑀙𑀲𑁆𑀲 𑀇𑀘𑁆𑀙𑀸𑀧𑀓𑀢𑀲𑁆𑀲 𑀧𑀘𑁆𑀘𑀬𑀧𑁆𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑁂𑀦 𑀯𑀸 𑀲𑀸𑀫𑀦𑁆𑀢𑀚𑀧𑁆𑀧𑀺𑀢𑁂𑀦 𑀯𑀸 𑀇𑀭𑀺𑀬𑀸𑀧𑀣𑀲𑁆𑀲 𑀯𑀸 𑀅𑀞𑀧𑀦𑀸’’𑀢𑀺𑀆𑀤𑀺 (𑀯𑀺𑀪. 𑁮𑁬𑁧).

𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄 𑀧𑀝𑀺𑀕𑁆𑀕𑀳𑀡𑁂 𑀅𑀫𑀢𑁆𑀢𑀜𑁆𑀜𑀽 𑀫𑀳𑀺𑀘𑁆𑀙𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀇𑀥𑁂𑀓𑀘𑁆𑀘𑁄 𑀲𑀤𑁆𑀥𑁄 𑀲𑀫𑀸𑀦𑁄 ‘𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀺, 𑀲𑀻𑀮𑀯𑀸 𑀲𑀫𑀸𑀦𑁄 ‘𑀲𑀻𑀮𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀻’’𑀢𑀺𑀆𑀤𑀺 (𑀯𑀺𑀪. 𑁮𑁫𑁧).

𑀤𑀼𑀢𑁆𑀢𑀧𑁆𑀧𑀺𑀬𑀢𑀸𑀬 𑀳𑀺𑀲𑁆𑀲 𑀯𑀺𑀚𑀸𑀢𑀫𑀸𑀢𑀸𑀧𑀺 𑀘𑀺𑀢𑁆𑀢𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀲𑀫𑀼𑀤𑁆𑀤𑁄 𑀘, 𑀫𑀳𑀺𑀘𑁆𑀙𑁄 𑀘𑀸𑀧𑀺 𑀧𑀼𑀕𑁆𑀕𑀮𑁄;

𑀲𑀓𑀝𑁂𑀳𑀺 𑀧𑀘𑁆𑀘𑀬𑁂 𑀤𑁂𑀦𑁆𑀢𑀼, 𑀢𑀬𑁄𑀧𑁂𑀢𑁂 𑀅𑀢𑀧𑁆𑀧𑀺𑀬𑀸’’𑀢𑀺.

𑀏𑀢𑁂 𑀧𑀦 𑀅𑀢𑁆𑀭𑀺𑀘𑁆𑀙𑀢𑀸𑀤𑀬𑁄 𑀤𑁄𑀲𑁂 𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀲𑀦𑁆𑀢𑀕𑀼𑀡𑀦𑀺𑀕𑀽𑀳𑀦𑀸𑀥𑀺𑀧𑁆𑀧𑀸𑀬𑁄 𑀧𑀝𑀺𑀕𑁆𑀕𑀳𑀡𑁂 𑀘 𑀫𑀢𑁆𑀢𑀜𑁆𑀜𑀽 𑀅𑀧𑁆𑀧𑀺𑀘𑁆𑀙𑁄. 𑀲𑁄 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀼𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀓𑀸𑀫𑀢𑀸𑀬 𑀲𑀤𑁆𑀥𑁄 𑀲𑀫𑀸𑀦𑁄 ‘‘𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀦 𑀇𑀘𑁆𑀙𑀢𑀺, 𑀲𑀻𑀮𑀯𑀸, 𑀩𑀳𑀼𑀲𑁆𑀲𑀼𑀢𑁄, 𑀧𑀯𑀺𑀯𑀺𑀢𑁆𑀢𑁄, 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺, 𑀲𑀫𑀸𑀳𑀺𑀢𑁄, 𑀧𑀜𑁆𑀜𑀯𑀸 𑀲𑀫𑀸𑀦𑁄 ‘‘𑀧𑀜𑁆𑀜𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀦 𑀇𑀘𑁆𑀙𑀢𑀺.

𑀲𑁆𑀯𑀸𑀬𑀁 𑀧𑀘𑁆𑀘𑀬𑀧𑁆𑀧𑀺𑀘𑁆𑀙𑁄 𑀥𑀼𑀢𑀗𑁆𑀕𑀧𑁆𑀧𑀺𑀘𑁆𑀙𑁄 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑁄𑀢𑀺 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀺𑀘𑁆𑀙𑁄 𑀧𑀘𑁆𑀘𑀬𑀤𑀸𑀬𑀓𑀁 𑀤𑁂𑀬𑁆𑀬𑀥𑀫𑁆𑀫𑀁 𑀅𑀢𑁆𑀢𑀦𑁄 𑀣𑀸𑀫𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 𑀲𑀘𑁂𑀧𑀺 𑀳𑀺 𑀤𑁂𑀬𑁆𑀬𑀥𑀫𑁆𑀫𑁄 𑀩𑀳𑀼 𑀳𑁄𑀢𑀺, 𑀤𑀸𑀬𑀓𑁄 𑀅𑀧𑁆𑀧𑀁 𑀤𑀸𑀢𑀼𑀓𑀸𑀫𑁄, 𑀤𑀸𑀬𑀓𑀲𑁆𑀲 𑀯𑀲𑁂𑀦 𑀅𑀧𑁆𑀧𑀫𑁂𑀯 𑀕𑀡𑁆𑀳𑀸𑀢𑀺. 𑀤𑁂𑀬𑁆𑀬𑀥𑀫𑁆𑀫𑁄 𑀘𑁂 𑀅𑀧𑁆𑀧𑁄, 𑀤𑀸𑀬𑀓𑁄 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁂𑀦 𑀅𑀧𑁆𑀧𑀫𑁂𑀯 𑀕𑀡𑁆𑀳𑀸𑀢𑀺. 𑀤𑁂𑀬𑁆𑀬𑀥𑀫𑁆𑀫𑁄𑀧𑀺 𑀘𑁂 𑀩𑀳𑀼, 𑀤𑀸𑀬𑀓𑁄𑀧𑀺 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀅𑀢𑁆𑀢𑀦𑁄 𑀣𑀸𑀫𑀁 𑀜𑀢𑁆𑀯𑀸 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀕𑀡𑁆𑀳𑀸𑀢𑀺. 𑀏𑀯𑀭𑀽𑀧𑁄 𑀳𑀺 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀁 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀣𑀸𑀯𑀭𑀁 𑀓𑀭𑁄𑀢𑀺, 𑀤𑀸𑀬𑀓𑀸𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺. 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀲𑁆𑀲 𑀧𑀦 𑀅𑀢𑁆𑀢𑀦𑀺 𑀅𑀢𑁆𑀣𑀺𑀪𑀸𑀯𑀁 𑀦 𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀥𑀼𑀢𑀗𑁆𑀕𑀧𑁆𑀧𑀺𑀘𑁆𑀙𑁄. 𑀬𑁄 𑀅𑀢𑁆𑀢𑀦𑁄 𑀩𑀳𑀼𑀲𑁆𑀲𑀼𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀬𑀁 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄. 𑀬𑁄 𑀧𑀦 𑀲𑁄𑀢𑀸𑀧𑀦𑁆𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀳𑀼𑀢𑁆𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑁄𑀢𑀸𑀧𑀦𑁆𑀦𑀸𑀤𑀺𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀬𑀁 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑁄. 𑀏𑀯𑀫𑁂𑀢𑁂𑀲𑀁 𑀅𑀧𑁆𑀧𑀺𑀘𑁆𑀙𑀸𑀦𑀁 𑀬𑀸 𑀅𑀧𑁆𑀧𑀺𑀘𑁆𑀙𑀢𑀸, 𑀢𑀲𑁆𑀲𑀸 𑀲𑀤𑁆𑀥𑀺𑀁 𑀲𑀦𑁆𑀤𑀲𑁆𑀲𑀦𑀸𑀤𑀺𑀯𑀺𑀥𑀺𑀦𑀸 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀆𑀦𑀺𑀲𑀁𑀲𑀯𑀺𑀪𑀸𑀯𑀦𑀯𑀲𑁂𑀦, 𑀢𑀧𑁆𑀧𑀝𑀺𑀧𑀓𑁆𑀔𑀲𑁆𑀲 𑀅𑀢𑁆𑀭𑀺𑀘𑁆𑀙𑀸𑀤𑀺𑀪𑁂𑀤𑀲𑁆𑀲 𑀇𑀘𑁆𑀙𑀸𑀘𑀸𑀭𑀲𑁆𑀲 𑀆𑀤𑀻𑀦𑀯𑀯𑀺𑀪𑀸𑀯𑀦𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀓𑀣𑀸 𑀅𑀧𑁆𑀧𑀺𑀘𑁆𑀙𑀓𑀣𑀸.

𑀲𑀦𑁆𑀢𑀼𑀝𑁆𑀞𑀺𑀓𑀣𑀸𑀢𑀺 𑀏𑀢𑁆𑀣 𑀲𑀦𑁆𑀢𑀼𑀝𑁆𑀞𑀻𑀢𑀺 𑀲𑀓𑁂𑀦 𑀅𑀢𑁆𑀢𑀦𑀸 𑀮𑀤𑁆𑀥𑁂𑀦 𑀢𑀼𑀝𑁆𑀞𑀺 𑀲𑀦𑁆𑀢𑀼𑀝𑁆𑀞𑀺. 𑀅𑀣 𑀯𑀸 𑀯𑀺𑀲𑀫𑀁 𑀧𑀘𑁆𑀘𑀬𑀺𑀘𑁆𑀙𑀁 𑀧𑀳𑀸𑀬 𑀲𑀫𑀁 𑀢𑀼𑀝𑁆𑀞𑀺, 𑀲𑀦𑁆𑀢𑀼𑀝𑁆𑀞𑀺. 𑀲𑀦𑁆𑀢𑁂𑀦 𑀯𑀸 𑀯𑀺𑀚𑁆𑀚𑀫𑀸𑀦𑁂𑀦 𑀢𑀼𑀝𑁆𑀞𑀺 𑀲𑀦𑁆𑀢𑀼𑀝𑁆𑀞𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑀦𑁆𑀢𑁄, 𑀦𑀧𑁆𑀧𑀚𑀧𑁆𑀧𑀫𑀦𑀸𑀕𑀢𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑁄, 𑀲𑀦𑁆𑀢𑀼𑀝𑁆𑀞𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀲𑀫𑁆𑀫𑀸 𑀯𑀸 𑀜𑀸𑀬𑁂𑀦 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀯𑀺𑀥𑀺𑀦𑀸 𑀧𑀘𑁆𑀘𑀬𑁂𑀳𑀺 𑀢𑀼𑀝𑁆𑀞𑀺 𑀲𑀦𑁆𑀢𑀼𑀝𑁆𑀞𑀺. 𑀅𑀢𑁆𑀣𑀢𑁄 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁄, 𑀲𑁄 𑀤𑁆𑀯𑀸𑀤𑀲𑀯𑀺𑀥𑁄 𑀳𑁄𑀢𑀺. 𑀓𑀣𑀁? 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄, 𑀬𑀣𑀸𑀩𑀮𑀲𑀦𑁆𑀢𑁄𑀲𑁄, 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀢𑀺 𑀢𑀺𑀯𑀺𑀥𑁄, 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼.

𑀢𑀢𑁆𑀭𑀸𑀬𑀁 𑀧𑀪𑁂𑀤𑀯𑀡𑁆𑀡𑀦𑀸 𑁋 𑀇𑀥 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀮𑀪𑀢𑀺 𑀲𑀼𑀦𑁆𑀤𑀭𑀁 𑀯𑀸 𑀅𑀲𑀼𑀦𑁆𑀤𑀭𑀁 𑀯𑀸, 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀧𑀓𑀢𑀺𑀤𑀼𑀩𑁆𑀩𑀮𑁄 𑀯𑀸 𑀳𑁄𑀢𑀺 𑀆𑀩𑀸𑀥𑀚𑀭𑀸𑀪𑀺𑀪𑀽𑀢𑁄 𑀯𑀸, 𑀕𑀭𑀼𑀁 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁄 𑀓𑀺𑀮𑀫𑀢𑀺, 𑀲𑁄 𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀧𑀝𑁆𑀝𑀘𑀻𑀯𑀭𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀫𑀳𑀕𑁆𑀖𑀘𑀻𑀯𑀭𑀁 𑀮𑀪𑀺𑀢𑁆𑀯𑀸 ‘‘𑀇𑀤𑀁 𑀣𑁂𑀭𑀸𑀦𑀁 𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀁, 𑀇𑀤𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀦𑀼𑀭𑀽𑀧𑀁, 𑀇𑀤𑀁 𑀕𑀺𑀮𑀸𑀦𑀸𑀦𑀁 𑀤𑀼𑀩𑁆𑀩𑀮𑀸𑀦𑀁, 𑀇𑀤𑀁 𑀅𑀧𑁆𑀧𑀮𑀸𑀪𑀻𑀦𑀁 𑀯𑀸 𑀳𑁄𑀢𑀽’’𑀢𑀺 𑀢𑁂𑀲𑀁 𑀤𑀢𑁆𑀯𑀸 𑀅𑀢𑁆𑀢𑀦𑀸 𑀲𑀗𑁆𑀓𑀸𑀭𑀓𑀽𑀝𑀸𑀤𑀺𑀢𑁄 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀓𑀢𑁆𑀯𑀸 𑀢𑁂𑀲𑀁 𑀯𑀸 𑀧𑀼𑀭𑀸𑀡𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀆𑀩𑀸𑀥𑀺𑀓𑁄 𑀳𑁄𑀢𑀺, 𑀮𑀽𑀔𑀁 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀕𑀸𑀴𑁆𑀳𑀁 𑀭𑁄𑀕𑀸𑀢𑀗𑁆𑀓𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀲𑀧𑁆𑀧𑀸𑀬𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀪𑀺𑀓𑁆𑀔𑀼 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀲𑁄 ‘‘𑀅𑀬𑀁 𑀧𑀺𑀡𑁆𑀟𑀧𑀸𑀢𑁄 𑀘𑀺𑀭𑀧𑀩𑁆𑀩𑀚𑀺𑀢𑀸𑀤𑀻𑀦𑀁 𑀅𑀦𑀼𑀭𑀽𑀧𑁄’’𑀢𑀺 𑀘𑀻𑀯𑀭𑀁 𑀯𑀺𑀬 𑀢𑁂𑀲𑀁 𑀤𑀢𑁆𑀯𑀸, 𑀢𑁂𑀲𑀁 𑀯𑀸 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸, 𑀅𑀢𑁆𑀢𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸, 𑀫𑀺𑀲𑁆𑀲𑀓𑀸𑀳𑀸𑀭𑀁 𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀺 𑀫𑀦𑀸𑀧𑀁 𑀯𑀸 𑀅𑀫𑀦𑀸𑀧𑀁 𑀯𑀸 𑀅𑀦𑁆𑀢𑀫𑀲𑁄 𑀢𑀺𑀡𑀓𑀼𑀝𑀺𑀓𑀸𑀧𑀺 𑀢𑀺𑀡𑀲𑀦𑁆𑀣𑀸𑀭𑀓𑀫𑁆𑀧𑀺, 𑀲𑁄 𑀢𑁂𑀦𑁂𑀯 𑀲𑀦𑁆𑀢𑀼𑀲𑁆𑀲𑀢𑀺, 𑀧𑀼𑀦 𑀅𑀜𑁆𑀜𑀁 𑀲𑀼𑀦𑁆𑀤𑀭𑀢𑀭𑀁 𑀯𑀸 𑀧𑀸𑀧𑀼𑀡𑀸𑀢𑀺, 𑀢𑀁 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀆𑀩𑀸𑀥𑀺𑀓𑁄 𑀳𑁄𑀢𑀺 𑀤𑀼𑀩𑁆𑀩𑀮𑁄 𑀯𑀸, 𑀲𑁄 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀲𑁂𑀦𑀸𑀲𑀦𑀁 𑀮𑀪𑀢𑀺, 𑀬𑀢𑁆𑀣𑀲𑁆𑀲 𑀯𑀲𑀢𑁄 𑀅𑀨𑀸𑀲𑀼 𑀳𑁄𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀓𑁂 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑁂 𑀯𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀲𑀼𑀦𑁆𑀤𑀭𑀁 𑀲𑁂𑀦𑀸𑀲𑀦𑀁 𑀧𑀢𑁆𑀢𑀫𑁆𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺 ‘‘𑀧𑀡𑀻𑀢𑀲𑁂𑀦𑀸𑀲𑀦𑀁 𑀧𑀫𑀸𑀤𑀝𑁆𑀞𑀸𑀦’’𑀦𑁆𑀢𑀺, 𑀫𑀳𑀸𑀧𑀼𑀜𑁆𑀜𑀢𑀸𑀬 𑀯𑀸 𑀮𑁂𑀡𑀫𑀡𑁆𑀟𑀧𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀧𑀡𑀻𑀢𑀲𑁂𑀦𑀸𑀲𑀦𑀸𑀦𑀺 𑀮𑀪𑀢𑀺, 𑀲𑁄 𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢𑀸𑀤𑀻𑀦𑀁 𑀤𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀪𑁂𑀲𑀚𑁆𑀚𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀢𑁂𑀦𑁂𑀯 𑀢𑀼𑀲𑁆𑀲𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀢𑁂𑀮𑁂𑀦 𑀅𑀢𑁆𑀣𑀺𑀓𑁄 𑀨𑀸𑀡𑀺𑀢𑀁 𑀮𑀪𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸, 𑀢𑀲𑁆𑀲 𑀳𑀢𑁆𑀣𑀢𑁄 𑀢𑁂𑀮𑀁 𑀕𑀳𑁂𑀢𑁆𑀯𑀸, 𑀪𑁂𑀲𑀚𑁆𑀚𑀁 𑀓𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀫𑀳𑀸𑀧𑀼𑀜𑁆𑀜𑁄 𑀩𑀳𑀼𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀧𑀡𑀻𑀢𑀪𑁂𑀲𑀚𑁆𑀚𑀁 𑀮𑀪𑀢𑀺, 𑀲𑁄 𑀢𑀁 𑀘𑀻𑀯𑀭𑀸𑀤𑀻𑀦𑀺 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢𑀸𑀤𑀻𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀆𑀪𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀬𑁄 𑀧𑀦 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀫𑀼𑀢𑁆𑀢𑀳𑀭𑀻𑀢𑀓𑀁, 𑀏𑀓𑀲𑁆𑀫𑀺𑀁 𑀘𑀢𑀼𑀫𑀥𑀼𑀭𑀁 𑀞𑀧𑁂𑀢𑁆𑀯𑀸 ‘‘𑀕𑀡𑁆𑀳𑀣, 𑀪𑀦𑁆𑀢𑁂, 𑀬𑀤𑀺𑀘𑁆𑀙𑀲𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀲𑀘𑀲𑁆𑀲 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦𑀧𑀺 𑀭𑁄𑀕𑁄 𑀯𑀽𑀧𑀲𑀫𑁆𑀫𑀢𑀺, ‘‘𑀫𑀼𑀢𑁆𑀢𑀳𑀭𑀻𑀢𑀓𑀁 𑀦𑀸𑀫 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢𑀁, 𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸, 𑀢𑀢𑁆𑀣 𑀢𑁂 𑀬𑀸𑀯𑀚𑀻𑀯𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄’’𑀢𑀺 (𑀫𑀳𑀸𑀯. 𑁧𑁨𑁮) 𑀯𑀘𑀦𑀫𑀦𑀼𑀲𑁆𑀲𑀭𑀦𑁆𑀢𑁄 𑀘𑀢𑀼𑀫𑀥𑀼𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀢𑁆𑀢𑀳𑀭𑀻𑀢𑀓𑁂𑀦 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄 𑀧𑀭𑀫𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀲𑁄 𑀏𑀯𑀁𑀧𑀪𑁂𑀤𑁄 𑀲𑀩𑁆𑀩𑁄𑀧𑀺 𑀲𑀦𑁆𑀢𑁄𑀲𑁄 𑀲𑀦𑁆𑀢𑀼𑀝𑁆𑀞𑀻𑀢𑀺 𑀧𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀢𑁄 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁄’’𑀢𑀺. 𑀇𑀢𑀭𑀻𑀢𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀲𑀦𑁆𑀤𑀲𑁆𑀲𑀦𑀸𑀤𑀺𑀯𑀺𑀥𑀺𑀦𑀸 𑀆𑀦𑀺𑀲𑀁𑀲𑀯𑀺𑀪𑀸𑀯𑀦𑀯𑀲𑁂𑀦, 𑀢𑀧𑁆𑀧𑀝𑀺𑀧𑀓𑁆𑀔𑀲𑁆𑀲 𑀅𑀢𑁆𑀭𑀺𑀘𑁆𑀙𑀢𑀸𑀤𑀺𑀪𑁂𑀤𑀲𑁆𑀲 𑀇𑀘𑁆𑀙𑀸𑀧𑀓𑀢𑀢𑁆𑀢𑀲𑁆𑀲 𑀆𑀤𑀻𑀦𑀯𑀯𑀺𑀪𑀸𑀯𑀦𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸. 𑀇𑀢𑁄 𑀧𑀭𑀸𑀲𑀼𑀧𑀺 𑀓𑀣𑀸𑀲𑀼 𑀏𑀲𑁂𑀯 𑀦𑀬𑁄, 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫.

𑀧𑀯𑀺𑀯𑁂𑀓𑀓𑀣𑀸𑀢𑀺 𑀏𑀢𑁆𑀣 𑀓𑀸𑀬𑀯𑀺𑀯𑁂𑀓𑁄 𑀘𑀺𑀢𑁆𑀢𑀯𑀺𑀯𑁂𑀓𑁄 𑀉𑀧𑀥𑀺𑀯𑀺𑀯𑁂𑀓𑁄𑀢𑀺 𑀢𑀬𑁄 𑀯𑀺𑀯𑁂𑀓𑀸. 𑀢𑁂𑀲𑀼 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀅𑀪𑀺𑀓𑁆𑀓𑀫𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺, 𑀏𑀓𑁄 𑀯𑀺𑀳𑀭𑀢𑀻𑀢𑀺 𑀏𑀯𑀁 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀯𑀺𑀯𑀺𑀢𑁆𑀢𑀯𑀸𑀲𑁄 𑀓𑀸𑀬𑀯𑀺𑀯𑁂𑀓𑁄 𑀦𑀸𑀫. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀦 𑀘𑀺𑀢𑁆𑀢𑀯𑀺𑀯𑁂𑀓𑁄 𑀦𑀸𑀫. 𑀦𑀺𑀩𑁆𑀩𑀸𑀦𑀁 𑀉𑀧𑀥𑀺𑀯𑀺𑀯𑁂𑀓𑁄 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁, 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁, 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀼𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦’’𑀦𑁆𑀢𑀺 (𑀫𑀳𑀸𑀦𑀺. 𑁫𑁭).

𑀯𑀺𑀯𑁂𑀓𑁄𑀬𑁂𑀯 𑀧𑀯𑀺𑀯𑁂𑀓𑁄, 𑀧𑀯𑀺𑀯𑁂𑀓𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀧𑀯𑀺𑀯𑁂𑀓𑀓𑀣𑀸.

𑀅𑀲𑀁𑀲𑀕𑁆𑀕𑀓𑀣𑀸𑀢𑀺 𑀏𑀢𑁆𑀣 𑀲𑀯𑀦𑀲𑀁𑀲𑀕𑁆𑀕𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄 𑀓𑀸𑀬𑀲𑀁𑀲𑀕𑁆𑀕𑁄𑀢𑀺 𑀧𑀜𑁆𑀘 𑀲𑀁𑀲𑀕𑁆𑀕𑀸. 𑀢𑁂𑀲𑀼 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸’’𑀢𑀺, 𑀲𑁄 𑀢𑀁 𑀲𑀼𑀢𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺, 𑀏𑀯𑀁 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀲𑀯𑀦𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑀦𑁆𑀣𑀯𑁄 𑀲𑀯𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺, 𑀅𑀧𑀺𑀘 𑀔𑁄 𑀲𑀸𑀫𑀁 𑀧𑀲𑁆𑀲𑀢𑀺 𑀇𑀢𑁆𑀣𑀺𑀁 𑀅𑀪𑀺𑀭𑀽𑀧𑀁 𑀤𑀲𑁆𑀲𑀦𑀻𑀬𑀁 𑀧𑀸𑀲𑀸𑀤𑀺𑀓𑀁 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀁, 𑀲𑁄 𑀢𑀁 𑀤𑀺𑀲𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺, 𑀏𑀯𑀁 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀤𑀲𑁆𑀲𑀦𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑀦𑁆𑀣𑀯𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀤𑀺𑀲𑁆𑀯𑀸 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀆𑀮𑀸𑀧𑀲𑀮𑁆𑀮𑀸𑀧𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀓𑀺𑀮𑁂𑀲𑀲𑀦𑁆𑀣𑀯𑁄 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀲𑀳𑀚𑀕𑁆𑀖𑀦𑀸𑀤𑀻𑀦𑀺𑀧𑀺 𑀏𑀢𑁂𑀦𑁂𑀯 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀢𑁆𑀢𑀦𑁄 𑀧𑀦 𑀲𑀦𑁆𑀢𑀓𑀁 𑀬𑀁𑀓𑀺𑀜𑁆𑀘𑀺 𑀫𑀸𑀢𑀼𑀕𑀸𑀫𑀲𑁆𑀲 𑀤𑀢𑁆𑀯𑀸 𑀯𑀸 𑀅𑀤𑀢𑁆𑀯𑀸 𑀯𑀸 𑀢𑁂𑀦 𑀤𑀺𑀦𑁆𑀦𑀲𑁆𑀲 𑀯𑀦𑀪𑀗𑁆𑀕𑀺𑀬𑀸𑀤𑀺𑀦𑁄 𑀧𑀭𑀺𑀪𑁄𑀕𑀯𑀲𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑀦𑁆𑀣𑀯𑁄 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄 𑀦𑀸𑀫. 𑀫𑀸𑀢𑀼𑀕𑀸𑀫𑀲𑁆𑀲 𑀳𑀢𑁆𑀣𑀕𑁆𑀕𑀸𑀳𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑀦𑁆𑀣𑀯𑁄 𑀓𑀸𑀬𑀲𑀁𑀲𑀕𑁆𑀕𑁄 𑀦𑀸𑀫. 𑀬𑁄𑀧𑀺 𑀘𑁂𑀲 𑁋

‘‘𑀕𑀺𑀳𑀻𑀳𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀦 𑀲𑀁𑀲𑀕𑁆𑀕𑁂𑀦 𑀲𑀳𑀲𑁄𑀓𑀻 𑀲𑀳𑀦𑀦𑁆𑀤𑀻 𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸 𑀉𑀬𑁆𑀬𑁄𑀕𑀁 𑀆𑀧𑀚𑁆𑀚𑀢𑀻’’𑀢𑀺 (𑀲𑀁. 𑀦𑀺. 𑁩.𑁩; 𑀫𑀳𑀸𑀦𑀺. 𑁧𑁬𑁪) 𑁋

𑀏𑀯𑀁 𑀯𑀼𑀢𑁆𑀢𑁄 𑀅𑀦𑀦𑀼𑀮𑁄𑀫𑀺𑀓𑁄 𑀕𑀺𑀳𑀺𑀲𑀁𑀲𑀕𑁆𑀕𑁄, 𑀬𑁄 𑀘 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺𑀧𑀺 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀲𑀁𑀲𑀕𑁆𑀕𑁄, 𑀢𑀁 𑀲𑀩𑁆𑀩𑀁 𑀧𑀳𑀸𑀬 𑀬𑁆𑀯𑀸𑀬𑀁 𑀲𑀁𑀲𑀸𑀭𑁂 𑀣𑀺𑀭𑀢𑀭𑀁 𑀲𑀁𑀯𑁂𑀕𑀁, 𑀲𑀗𑁆𑀔𑀸𑀭𑁂𑀲𑀼 𑀢𑀺𑀩𑁆𑀩𑀁 𑀪𑀬𑀲𑀜𑁆𑀜𑀁, 𑀲𑀭𑀻𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀁, 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀚𑀺𑀕𑀼𑀘𑁆𑀙𑀸𑀧𑀼𑀩𑁆𑀩𑀗𑁆𑀕𑀫𑀁 𑀳𑀺𑀭𑁄𑀢𑁆𑀢𑀧𑁆𑀧𑀁, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀲𑀩𑁆𑀩𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀓𑀫𑀮𑀤𑀮𑁂 𑀚𑀮𑀩𑀺𑀦𑁆𑀤𑀼 𑀯𑀺𑀬 𑀲𑀩𑁆𑀩𑀢𑁆𑀣 𑀅𑀮𑀕𑁆𑀕𑀪𑀸𑀯𑁄, 𑀅𑀬𑀁 𑀲𑀩𑁆𑀩𑀲𑀁𑀲𑀕𑁆𑀕𑀧𑁆𑀧𑀝𑀺𑀧𑀓𑁆𑀔𑀢𑀸𑀬 𑀅𑀲𑀁𑀲𑀕𑁆𑀕𑁄. 𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸.

𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸𑀢𑀺 𑀏𑀢𑁆𑀣 𑀯𑀻𑀭𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀦𑁆𑀢𑀺 𑀯𑀸 𑀯𑀻𑀭𑀺𑀬𑀁, 𑀯𑀺𑀥𑀺𑀦𑀸 𑀈𑀭𑀬𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀯𑀸 𑀯𑀻𑀭𑀺𑀬𑀁, 𑀯𑀻𑀭𑀺𑀬𑀜𑁆𑀘 𑀢𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 𑀆𑀭𑀫𑁆𑀪𑀦𑀁 𑀯𑀻𑀭𑀺𑀬𑀸𑀭𑀫𑁆𑀪𑁄. 𑀲𑁆𑀯𑀸𑀬𑀁 𑀓𑀸𑀬𑀺𑀓𑁄 𑀘𑁂𑀢𑀲𑀺𑀓𑁄 𑀘𑀸𑀢𑀺 𑀤𑀼𑀯𑀺𑀥𑁄, 𑀆𑀭𑀫𑁆𑀪𑀥𑀸𑀢𑀼, 𑀦𑀺𑀓𑁆𑀓𑀫𑀥𑀸𑀢𑀼, 𑀧𑀭𑀓𑁆𑀓𑀫𑀥𑀸𑀢𑀼 𑀘𑀸𑀢𑀺 𑀢𑀺𑀯𑀺𑀥𑁄; 𑀲𑀫𑁆𑀫𑀧𑁆𑀧𑀥𑀸𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀲𑁄 𑀲𑀩𑁆𑀩𑁄𑀧𑀺 𑀬𑁄 𑀪𑀺𑀓𑁆𑀔𑀼 𑀕𑀫𑀦𑁂 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀁 𑀞𑀸𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺; 𑀞𑀸𑀦𑁂 𑀉𑀧𑁆𑀧𑀦𑁆𑀦𑀁 𑀦𑀺𑀲𑀚𑁆𑀚𑀁, 𑀦𑀺𑀲𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀁 𑀲𑀬𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀅𑀚𑀧𑀤𑁂𑀦 𑀤𑀡𑁆𑀟𑁂𑀦 𑀓𑀡𑁆𑀳𑀲𑀧𑁆𑀧𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀯𑀺𑀬, 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀅𑀫𑀺𑀢𑁆𑀢𑀁 𑀕𑀻𑀯𑀸𑀬 𑀧𑀳𑀭𑀦𑁆𑀢𑁄 𑀯𑀺𑀬 𑀘 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀤𑀢𑁆𑀯𑀸 𑀯𑀻𑀭𑀺𑀬𑀩𑀮𑁂𑀦 𑀦𑀺𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀲𑁂𑀯𑀁 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸.

𑀲𑀻𑀮𑀓𑀣𑀸𑀤𑀻𑀲𑀼 𑀤𑀼𑀯𑀺𑀥𑀁 𑀲𑀻𑀮𑀁 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭𑀜𑁆𑀘. 𑀢𑀢𑁆𑀣 𑀮𑁄𑀓𑀺𑀬𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀮𑁄𑀓𑀼𑀢𑁆𑀢𑀭𑀁 𑀫𑀕𑁆𑀕𑀲𑀻𑀮𑀁 𑀨𑀮𑀲𑀻𑀮𑀜𑁆𑀘. 𑀢𑀣𑀸 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀪𑀽𑀢𑀸 𑀲𑀳 𑀉𑀧𑀘𑀸𑀭𑁂𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀮𑁄𑀓𑀺𑀬𑁄 𑀲𑀫𑀸𑀥𑀺, 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀧𑀦𑁂𑀢𑁆𑀣 𑀮𑁄𑀓𑀼𑀢𑁆𑀢𑀭𑁄 𑀲𑀫𑀸𑀥𑀺 𑀦𑀸𑀫. 𑀢𑀣𑀸 𑀧𑀜𑁆𑀜𑀸𑀧𑀺 𑀮𑁄𑀓𑀺𑀬𑀸 𑀲𑀼𑀢𑀫𑀬𑀸 𑀘𑀺𑀦𑁆𑀢𑀸𑀫𑀬𑀸 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀕𑀳𑁂𑀢𑀩𑁆𑀩𑀸, 𑀮𑁄𑀓𑀼𑀢𑁆𑀢𑀭𑀸 𑀫𑀕𑁆𑀕𑀧𑀜𑁆𑀜𑀸 𑀨𑀮𑀧𑀜𑁆𑀜𑀸 𑀘. 𑀯𑀺𑀫𑀼𑀢𑁆𑀢𑀻𑀧𑀺 𑀅𑀭𑀺𑀬𑀨𑀮𑀯𑀺𑀫𑀼𑀢𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀘. 𑀅𑀧𑀭𑁂 𑀧𑀦 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀻𑀦𑀫𑁆𑀧𑀺 𑀯𑀲𑁂𑀦𑁂𑀢𑁆𑀣 𑀅𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑀺. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀫𑁆𑀧𑀺 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀇𑀢𑀺 𑀇𑀫𑁂𑀲𑀁 𑀲𑀻𑀮𑀸𑀤𑀻𑀦𑀁 𑀲𑀤𑁆𑀥𑀺𑀁 𑀲𑀦𑁆𑀤𑀲𑁆𑀲𑀦𑀸𑀤𑀺𑀯𑀺𑀥𑀺𑀦𑀸 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀆𑀦𑀺𑀲𑀁𑀲𑀯𑀺𑀪𑀸𑀯𑀦𑀯𑀲𑁂𑀦 𑀘𑁂𑀯 𑀢𑀧𑁆𑀧𑀝𑀺𑀧𑀓𑁆𑀔𑀸𑀦𑀁 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀦𑀁 𑀆𑀤𑀻𑀦𑀯𑀯𑀺𑀪𑀸𑀯𑀦𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀓𑀣𑀸, 𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀯𑀸 𑀲𑀻𑀮𑀸𑀤𑀺𑀓𑀣𑀸 𑀦𑀸𑀫.

𑀏𑀢𑁆𑀣 𑀘 ‘‘𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺, 𑀅𑀧𑁆𑀧𑀺𑀘𑁆𑀙𑀓𑀣𑀜𑁆𑀘 𑀧𑀭𑁂𑀲𑀁 𑀓𑀢𑁆𑀢𑀸’’𑀢𑀺 (𑀫. 𑀦𑀺. 𑁧.𑁨𑁫𑁨; 𑀅. 𑀦𑀺. 𑁧𑁦.𑁭𑁦) ‘‘𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦, 𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻’’𑀢𑀺 (𑀲𑀁. 𑀦𑀺. 𑁨.𑁧𑁪𑁪; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁮) 𑀘 𑀆𑀤𑀺𑀯𑀘𑀦𑀢𑁄 𑀲𑀬𑀜𑁆𑀘 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁂𑀦 𑀧𑀭𑁂𑀲𑀫𑁆𑀧𑀺 𑀢𑀤𑀢𑁆𑀣𑀸𑀬 𑀳𑀺𑀢𑀚𑁆𑀛𑀸𑀲𑀬𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀸 𑀢𑀣𑀸𑀭𑀽𑀧𑀻 𑀓𑀣𑀸, 𑀬𑀸 𑀇𑀥 𑀅𑀪𑀺𑀲𑀮𑁆𑀮𑁂𑀔𑀺𑀓𑀸𑀤𑀺𑀪𑀸𑀯𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀸 𑀅𑀧𑁆𑀧𑀺𑀘𑁆𑀙𑀓𑀣𑀸𑀤𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀭𑀓𑀲𑁆𑀲𑁂𑀯 𑀳𑀺 𑀓𑀣𑀸 𑀯𑀺𑀲𑁂𑀲𑀢𑁄 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀺𑀦𑀻. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁…𑀧𑁂. … 𑀅𑀓𑀲𑀺𑀭𑀮𑀸𑀪𑀻’’𑀢𑀺.

𑀏𑀯𑀭𑀽𑀧𑀸𑀬𑀸𑀢𑀺 𑀈𑀤𑀺𑀲𑀸𑀬, 𑀬𑀣𑀸𑀯𑀼𑀢𑁆𑀢𑀸𑀬. 𑀦𑀺𑀓𑀸𑀫𑀮𑀸𑀪𑀻𑀢𑀺 𑀬𑀣𑀺𑀘𑁆𑀙𑀺𑀢𑀮𑀸𑀪𑀻 𑀬𑀣𑀸𑀭𑀼𑀘𑀺𑀮𑀸𑀪𑀻, 𑀲𑀩𑁆𑀩𑀓𑀸𑀮𑀁 𑀇𑀫𑀸 𑀓𑀣𑀸 𑀲𑁄𑀢𑀼𑀁 𑀯𑀺𑀘𑀸𑀭𑁂𑀢𑀼𑀜𑁆𑀘 𑀬𑀣𑀸𑀲𑀼𑀔𑀁 𑀮𑀪𑀦𑁆𑀢𑁄. 𑀅𑀓𑀺𑀘𑁆𑀙𑀮𑀸𑀪𑀻𑀢𑀺 𑀦𑀺𑀤𑁆𑀤𑀼𑀓𑁆𑀔𑀮𑀸𑀪𑀻. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀯𑀺𑀧𑀼𑀮𑀮𑀸𑀪𑀻.

𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬𑀸𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀅𑀓𑀼𑀲𑀮𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀧𑀚𑀳𑀦𑀢𑁆𑀣𑀸𑀬. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀓𑀼𑀘𑁆𑀙𑀺𑀢𑀸𑀦𑀁 𑀲𑀮𑀦𑀸𑀤𑀺𑀅𑀢𑁆𑀣𑁂𑀦 𑀅𑀦𑀯𑀚𑁆𑀚𑀝𑁆𑀞𑁂𑀦 𑀘 𑀓𑀼𑀲𑀮𑀸𑀦𑀁 𑀲𑀳𑀯𑀺𑀧𑀲𑁆𑀲𑀦𑀸𑀦𑀁 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁. 𑀉𑀧𑀲𑀫𑁆𑀧𑀤𑀸𑀬𑀸𑀢𑀺 𑀲𑀫𑁆𑀧𑀸𑀤𑀦𑀸𑀬, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀸𑀬. 𑀣𑀸𑀫𑀯𑀸𑀢𑀺 𑀉𑀲𑁆𑀲𑁄𑀴𑁆𑀳𑀺𑀲𑀗𑁆𑀔𑀸𑀢𑁂𑀦 𑀯𑀻𑀭𑀺𑀬𑀣𑀸𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀤𑀴𑁆𑀳𑀧𑀭𑀓𑁆𑀓𑀫𑁄𑀢𑀺 𑀣𑀺𑀭𑀧𑀭𑀓𑁆𑀓𑀫𑁄 𑀅𑀲𑀺𑀣𑀺𑀮𑀯𑀻𑀭𑀺𑀬𑁄. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄𑀢𑀺 𑀅𑀦𑁄𑀭𑁄𑀳𑀺𑀢𑀥𑀼𑀭𑁄 𑀅𑀦𑁄𑀲𑀓𑁆𑀓𑀺𑀢𑀯𑀻𑀭𑀺𑀬𑁄.

𑀧𑀜𑁆𑀜𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀧𑀜𑁆𑀜𑀯𑀸. 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀧𑀝𑀺𑀯𑀺𑀚𑁆𑀛𑀦𑁆𑀢𑀺𑀬𑀸. 𑀅𑀭𑀺𑀬𑀸𑀬𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀓𑀺𑀮𑁂𑀲𑁂𑀳𑀺 𑀆𑀭𑀓𑀸 𑀤𑀽𑀭𑁂 𑀞𑀺𑀢𑀸𑀬 𑀦𑀺𑀤𑁆𑀤𑁄𑀲𑀸𑀬. 𑀦𑀺𑀩𑁆𑀩𑁂𑀥𑀺𑀓𑀸𑀬𑀸𑀢𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸𑀬. 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀔𑁂𑀧𑀦𑀢𑁄 ‘‘𑀤𑀼𑀓𑁆𑀔𑀓𑁆𑀔𑀬𑁄’’𑀢𑀺 𑀮𑀤𑁆𑀥𑀦𑀸𑀫𑀁 𑀅𑀭𑀺𑀬𑀫𑀕𑁆𑀕𑀁 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀜𑀸𑀬𑁂𑀦 𑀕𑀘𑁆𑀙𑀦𑁆𑀢𑀺𑀬𑀸.

𑀇𑀫𑁂𑀲𑀼 𑀘 𑀧𑀦 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀲𑀻𑀮𑀁 𑀯𑀻𑀭𑀺𑀬𑀁 𑀧𑀜𑁆𑀜𑀸 𑀘 𑀬𑁄𑀕𑀺𑀦𑁄 𑀅𑀚𑁆𑀛𑀢𑁆𑀢𑀺𑀓𑀁 𑀅𑀗𑁆𑀕𑀁, 𑀇𑀢𑀭𑀤𑁆𑀯𑀬𑀁 𑀩𑀸𑀳𑀺𑀭𑀁 𑀅𑀗𑁆𑀕𑀁. 𑀢𑀣𑀸𑀧𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁂𑀦𑁂𑀯 𑀲𑁂𑀲𑀁 𑀘𑀢𑀼𑀩𑁆𑀩𑀺𑀥𑀁 𑀇𑀚𑁆𑀛𑀢𑀺, 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀯𑁂𑀢𑁆𑀣 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔’’𑀦𑁆𑀢𑀺𑀆𑀤𑀺𑀦𑀸 𑀤𑁂𑀲𑀦𑀁 𑀯𑀟𑁆𑀠𑁂𑀢𑀺. 𑀢𑀢𑁆𑀣 𑀧𑀸𑀝𑀺𑀓𑀗𑁆𑀔𑀦𑁆𑀢𑀺 𑀏𑀓𑀁𑀲𑁂𑀦 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀯𑀲𑁆𑀲𑀁𑀪𑀸𑀯𑀻𑀢𑀺 𑀅𑀢𑁆𑀣𑁄. 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀻𑀮𑀯𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀮𑀯𑀦𑁆𑀢𑀢𑀸𑀬 𑀪𑀯𑀦𑀁 𑀲𑀻𑀮𑀲𑀫𑁆𑀧𑀦𑁆𑀦𑀢𑁆𑀢𑀁, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀮𑀲𑀫𑁆𑀧𑀦𑁆𑀦𑀢𑁆𑀢𑀸 𑀏𑀢𑀁 𑀢𑀲𑁆𑀲 𑀧𑀸𑀝𑀺𑀓𑀗𑁆𑀔𑀁, 𑀅𑀯𑀲𑁆𑀲𑀁𑀪𑀸𑀯𑀻 𑀏𑀓𑀁𑀲𑁂𑀦𑁂𑀯 𑀢𑀲𑁆𑀲 𑀢𑀢𑁆𑀣 𑀦𑀺𑀬𑁄𑀚𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀺𑀲𑁆𑀲𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀯𑀁 𑀪𑀕𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀉𑀢𑁆𑀢𑀫𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀦𑁄 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀢𑀁 𑀯𑀦𑀲𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸 𑀢𑀸𑀤𑀺𑀲𑀁 𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑀲𑁆𑀲 𑀆𑀬𑀲𑁆𑀫𑀢𑁄 𑀫𑁂𑀖𑀺𑀬𑀲𑁆𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀺𑀦𑀸 𑀲𑀓𑀮𑀁 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸, 𑀇𑀤𑀸𑀦𑀺𑀲𑁆𑀲 𑀢𑀢𑁆𑀣 𑀆𑀤𑀭𑀚𑀸𑀢𑀲𑁆𑀲 𑀧𑀼𑀩𑁆𑀩𑁂 𑀬𑁂𑀳𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀲𑀫𑁆𑀧𑀚𑁆𑀚𑀺, 𑀢𑀲𑁆𑀲 𑀢𑁂𑀲𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀢𑁆𑀢𑀸 𑀘 𑀪𑀸𑀯𑀦𑀸𑀦𑀬𑀁 𑀧𑀓𑀸𑀲𑁂𑀢𑁆𑀯𑀸, 𑀢𑀢𑁄 𑀧𑀭𑀁 𑀅𑀭𑀳𑀢𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀦𑁆𑀢𑁄, ‘‘𑀢𑁂𑀦 𑀘 𑀧𑀦, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑀸 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀉𑀢𑁆𑀢𑀭𑀺 𑀪𑀸𑀯𑁂𑀢𑀩𑁆𑀩𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀦𑀸𑀢𑀺 𑀏𑀯𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁂𑀦 𑀬𑀣𑀸𑀯𑀼𑀢𑁆𑀢𑀲𑀻𑀮𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁂𑀦. 𑀢𑁂𑀦𑁂𑀯𑀸𑀳 ‘‘𑀇𑀫𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬𑀸’’𑀢𑀺. 𑀉𑀢𑁆𑀢𑀭𑀻𑀢𑀺 𑀆𑀭𑀤𑁆𑀥𑀢𑀭𑀼𑀡𑀯𑀺𑀧𑀲𑁆𑀲𑀦𑀲𑁆𑀲 𑀭𑀸𑀕𑀸𑀤𑀺𑀧𑀭𑀺𑀲𑁆𑀲𑀬𑀸 𑀘𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀁 𑀯𑀺𑀲𑁄𑀥𑀦𑀢𑁆𑀣𑀁 𑀢𑀢𑁄 𑀉𑀤𑁆𑀥𑀁 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸 𑀯𑀟𑁆𑀠𑁂𑀢𑀩𑁆𑀩𑀸 𑀘.

𑀅𑀲𑀼𑀪𑀸𑀢𑀺 𑀏𑀓𑀸𑀤𑀲𑀲𑀼 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀬𑀣𑀸𑀭𑀳𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀲𑀼𑀪𑀪𑀸𑀯𑀦𑀸. 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬𑀸𑀢𑀺 𑀓𑀸𑀫𑀭𑀸𑀕𑀲𑁆𑀲 𑀧𑀚𑀳𑀦𑀢𑁆𑀣𑀸𑀬. 𑀅𑀬𑀫𑀢𑁆𑀣𑁄 𑀲𑀸𑀮𑀺𑀮𑀸𑀬𑀓𑁄𑀧𑀫𑀸𑀬 𑀯𑀺𑀪𑀸𑀯𑁂𑀢𑀩𑁆𑀩𑁄 𑁋 𑀏𑀓𑁄 𑀳𑀺 𑀧𑀼𑀭𑀺𑀲𑁄 𑀅𑀲𑀺𑀢𑀁 𑀕𑀳𑁂𑀢𑁆𑀯𑀸 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀲𑀸𑀮𑀺𑀔𑁂𑀢𑁆𑀢𑁂 𑀲𑀸𑀮𑀺𑀬𑁄 𑀮𑀸𑀬𑀢𑀺, 𑀅𑀣𑀲𑁆𑀲 𑀯𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀸𑀯𑁄 𑀧𑀯𑀺𑀲𑀺𑀁𑀲𑀼. 𑀲𑁄 𑀅𑀲𑀺𑀢𑀁 𑀞𑀧𑁂𑀢𑁆𑀯𑀸, 𑀬𑀝𑁆𑀞𑀺𑀁 𑀆𑀤𑀸𑀬, 𑀢𑁂𑀦𑁂𑀯 𑀫𑀕𑁆𑀕𑁂𑀦 𑀕𑀸𑀯𑁄 𑀦𑀻𑀳𑀭𑀺𑀢𑁆𑀯𑀸, 𑀯𑀢𑀺𑀁 𑀧𑀸𑀓𑀢𑀺𑀓𑀁 𑀓𑀢𑁆𑀯𑀸, 𑀧𑀼𑀦 𑀅𑀲𑀺𑀢𑀁 𑀕𑀳𑁂𑀢𑁆𑀯𑀸 𑀲𑀸𑀮𑀺𑀬𑁄 𑀮𑀸𑀬𑀺. 𑀢𑀢𑁆𑀣 𑀲𑀸𑀮𑀺𑀔𑁂𑀢𑁆𑀢𑀁 𑀯𑀺𑀬 𑀩𑀼𑀤𑁆𑀥𑀲𑀸𑀲𑀦𑀁 𑀤𑀝𑁆𑀞𑀩𑁆𑀩𑀁, 𑀲𑀸𑀮𑀺𑀮𑀸𑀬𑀓𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀅𑀲𑀺𑀢𑀁 𑀯𑀺𑀬 𑀧𑀜𑁆𑀜𑀸, 𑀮𑀸𑀬𑀦𑀓𑀸𑀮𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀓𑀭𑀡𑀓𑀸𑀮𑁄, 𑀬𑀝𑁆𑀞𑀺 𑀯𑀺𑀬 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁, 𑀯𑀢𑀺 𑀯𑀺𑀬 𑀲𑀁𑀯𑀭𑁄, 𑀯𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀸𑀯𑀻𑀦𑀁 𑀧𑀯𑀺𑀲𑀦𑀁 𑀯𑀺𑀬 𑀲𑀳𑀲𑀸 𑀅𑀧𑁆𑀧𑀝𑀺𑀲𑀗𑁆𑀔𑀸𑀬 𑀧𑀫𑀸𑀤𑀁 𑀆𑀕𑀫𑁆𑀫 𑀭𑀸𑀕𑀲𑁆𑀲 𑀉𑀧𑁆𑀧𑀚𑁆𑀚𑀦𑀁, 𑀅𑀲𑀺𑀢𑀁 𑀞𑀧𑁂𑀢𑁆𑀯𑀸, 𑀬𑀝𑁆𑀞𑀺𑀁 𑀆𑀤𑀸𑀬, 𑀧𑀯𑀺𑀝𑁆𑀞𑀫𑀕𑁆𑀕𑁂𑀦𑁂𑀯 𑀕𑀸𑀯𑁄 𑀦𑀻𑀳𑀭𑀺𑀢𑁆𑀯𑀸, 𑀯𑀢𑀺𑀁 𑀧𑀝𑀺𑀧𑀸𑀓𑀢𑀺𑀓𑀁 𑀓𑀢𑁆𑀯𑀸, 𑀧𑀼𑀦 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀲𑀸𑀮𑀺𑀮𑀸𑀬𑀦𑀁 𑀯𑀺𑀬 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑁂𑀦 𑀭𑀸𑀕𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸, 𑀧𑀼𑀦 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀓𑀭𑀡𑀓𑀸𑀮𑁄𑀢𑀺 𑀇𑀤𑀫𑁂𑀢𑁆𑀣 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀏𑀯𑀁𑀪𑀽𑀢𑀁 𑀪𑀸𑀯𑀦𑀸𑀯𑀺𑀥𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀲𑀼𑀪𑀸 𑀪𑀸𑀯𑁂𑀢𑀩𑁆𑀩𑀸 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺.

𑀫𑁂𑀢𑁆𑀢𑀸𑀢𑀺 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀁. 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬𑀸𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑁆𑀧𑀦𑁆𑀦𑀓𑁄𑀧𑀲𑁆𑀲 𑀧𑀚𑀳𑀦𑀢𑁆𑀣𑀸𑀬. 𑀆𑀦𑀸𑀧𑀸𑀦𑀲𑁆𑀲𑀢𑀻𑀢𑀺 𑀲𑁄𑀴𑀲𑀯𑀢𑁆𑀣𑀼𑀓𑀸 𑀆𑀦𑀸𑀧𑀸𑀦𑀲𑁆𑀲𑀢𑀺. 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬𑀸𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑁆𑀧𑀦𑁆𑀦𑀸𑀦𑀁 𑀯𑀺𑀢𑀓𑁆𑀓𑀸𑀦𑀁 𑀉𑀧𑀘𑁆𑀙𑁂𑀤𑀦𑀢𑁆𑀣𑀸𑀬. 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀸𑀬𑀸𑀢𑀺 𑀅𑀲𑁆𑀫𑀻𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀦𑀯𑀯𑀺𑀥𑀲𑁆𑀲 𑀫𑀸𑀦𑀲𑁆𑀲 𑀲𑀫𑀼𑀘𑁆𑀙𑁂𑀤𑀦𑀢𑁆𑀣𑀸𑀬. 𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀉𑀤𑀬𑀩𑁆𑀩𑀬𑀯𑀦𑁆𑀢𑀢𑁄 𑀧𑀪𑀗𑁆𑀕𑀼𑀢𑁄 𑀢𑀸𑀯𑀓𑀸𑀮𑀺𑀓𑀢𑁄 𑀦𑀺𑀘𑁆𑀘𑀧𑁆𑀧𑀝𑀺𑀧𑀓𑁆𑀔𑀢𑁄 𑀘 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 (𑀥. 𑀧. 𑁨𑁭𑁭; 𑀘𑀽𑀴𑀦𑀺. 𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁫𑁬) 𑀧𑀯𑀢𑁆𑀢𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄. 𑀅𑀦𑀢𑁆𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀻𑀢𑀺 𑀅𑀲𑀸𑀭𑀓𑀢𑁄 𑀅𑀯𑀲𑀯𑀢𑁆𑀢𑀦𑀢𑁄 𑀧𑀭𑀢𑁄 𑀭𑀺𑀢𑁆𑀢𑀢𑁄 𑀢𑀼𑀘𑁆𑀙𑀢𑁄 𑀲𑀼𑀜𑁆𑀜𑀢𑁄 𑀘 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 (𑀥. 𑀧. 𑁨𑁭𑁯; 𑀘𑀽𑀴𑀦𑀺. 𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁫𑁬) 𑀏𑀯𑀁 𑀧𑀯𑀢𑁆𑀢𑀸 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸 𑀅𑀦𑀢𑁆𑀢𑀲𑀜𑁆𑀜𑀸 𑀘𑀺𑀢𑁆𑀢𑁂 𑀲𑀡𑁆𑀞𑀳𑀢𑀺, 𑀅𑀢𑀺𑀤𑀴𑁆𑀳𑀁 𑀧𑀢𑀺𑀝𑁆𑀞𑀸𑀢𑀺. 𑀅𑀦𑀺𑀘𑁆𑀘𑀮𑀓𑁆𑀔𑀡𑁂 𑀳𑀺 𑀤𑀺𑀝𑁆𑀞𑁂 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀢𑀻𑀲𑀼 𑀳𑀺 𑀮𑀓𑁆𑀔𑀡𑁂𑀲𑀼 𑀏𑀓𑀲𑁆𑀫𑀺𑀁 𑀤𑀺𑀝𑁆𑀞𑁂 𑀇𑀢𑀭𑀤𑁆𑀯𑀬𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄 𑀳𑀺, 𑀫𑁂𑀖𑀺𑀬, 𑀅𑀦𑀢𑁆𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀻’’𑀢𑀺. 𑀅𑀦𑀢𑁆𑀢𑀮𑀓𑁆𑀔𑀡𑁂 𑀤𑀺𑀝𑁆𑀞𑁂 𑀅𑀲𑁆𑀫𑀻𑀢𑀺 𑀉𑀧𑁆𑀧𑀚𑁆𑀚𑀦𑀓𑀫𑀸𑀦𑁄 𑀲𑀼𑀧𑁆𑀧𑀚𑀳𑁄𑀯 𑀳𑁄𑀢𑀻𑀢𑀺 𑀆𑀳 𑁋 ‘‘𑀅𑀦𑀢𑁆𑀢𑀲𑀜𑁆𑀜𑀻 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀦𑁆𑀢𑀺 𑀤𑀺𑀝𑁆𑀞𑁂𑀬𑁂𑀯 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀲𑀼𑀪𑀸𑀤𑀺𑀪𑀸𑀯𑀦𑀸𑀦𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁦𑁨) 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑁄.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀆𑀬𑀲𑁆𑀫𑀢𑁄 𑀫𑁂𑀖𑀺𑀬𑀲𑁆𑀲 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀘𑁄𑀭𑁂𑀳𑀺 𑀓𑀼𑀲𑀮𑀪𑀡𑁆𑀟𑀼𑀧𑀘𑁆𑀙𑁂𑀤𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀚𑀸𑀦𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀅𑀯𑀺𑀦𑁄𑀤𑀦𑁂 𑀯𑀺𑀦𑁄𑀤𑀦𑁂 𑀘 𑀆𑀤𑀻𑀦𑀯𑀸𑀦𑀺𑀲𑀁𑀲𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀔𑀼𑀤𑁆𑀤𑀸𑀢𑀺 𑀳𑀻𑀦𑀸 𑀮𑀸𑀫𑀓𑀸. 𑀯𑀺𑀢𑀓𑁆𑀓𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀢𑀬𑁄 𑀧𑀸𑀧𑀯𑀺𑀢𑀓𑁆𑀓𑀸. 𑀢𑁂 𑀳𑀺 𑀲𑀩𑁆𑀩𑀯𑀺𑀢𑀓𑁆𑀓𑁂𑀳𑀺 𑀧𑀢𑀺𑀓𑀺𑀝𑁆𑀞𑀢𑀸𑀬 𑀇𑀥 𑀔𑀼𑀤𑁆𑀤𑀸𑀢𑀺 𑀯𑀼𑀢𑁆𑀢𑀸 ‘‘𑀦 𑀘 𑀔𑀼𑀤𑁆𑀤𑀫𑀸𑀘𑀭𑁂’’𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁯.𑁩; 𑀲𑀼. 𑀦𑀺. 𑁧𑁪𑁫) 𑀯𑀺𑀬. 𑀲𑀼𑀔𑀼𑀫𑀸𑀢𑀺 𑀜𑀸𑀢𑀺𑀯𑀺𑀢𑀓𑁆𑀓𑀸𑀤𑀬𑁄 𑀅𑀥𑀺𑀧𑁆𑀧𑁂𑀢𑀸. 𑀜𑀸𑀢𑀺𑀯𑀺𑀢𑀓𑁆𑀓𑁄 𑀚𑀦𑀧𑀤𑀯𑀺𑀢𑀓𑁆𑀓𑁄 𑀅𑀫𑀭𑀸𑀯𑀺𑀢𑀓𑁆𑀓𑁄 𑀧𑀭𑀸𑀦𑀼𑀤𑁆𑀤𑀬𑀢𑀸𑀬 𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄𑀢𑀺 𑀏𑀢𑁂 𑀳𑀺 𑀯𑀺𑀢𑀓𑁆𑀓𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀯𑀺𑀬 𑀤𑀸𑀭𑀼𑀡𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀦𑁄𑀴𑀸𑀭𑀺𑀓𑀲𑀪𑀸𑀯𑀢𑀸𑀬 𑀲𑀼𑀔𑀼𑀫𑀸𑀢𑀺 𑀯𑀼𑀢𑁆𑀢𑀸. 𑀅𑀦𑀼𑀕𑀢𑀸𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀯𑀢𑁆𑀢𑀺𑀢𑀸. 𑀯𑀺𑀢𑀓𑁆𑀓𑁂 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁂 𑀘𑀺𑀢𑁆𑀢𑀁 𑀢𑀤𑀦𑀼𑀕𑀢𑀫𑁂𑀯 𑀳𑁄𑀢𑀺 𑀢𑀲𑁆𑀲 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦𑀢𑁄. ‘‘𑀅𑀦𑀼𑀕𑁆𑀕𑀢𑀸’’𑀢𑀺𑀧𑀺 𑀧𑀸𑀴𑀺, 𑀅𑀦𑀼𑀉𑀝𑁆𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀫𑀦𑀲𑁄 𑀉𑀧𑁆𑀧𑀺𑀮𑀸𑀯𑀸𑀢𑀺 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀓𑀭𑀸.

𑀏𑀢𑁂 𑀅𑀯𑀺𑀤𑁆𑀯𑀸 𑀫𑀦𑀲𑁄 𑀯𑀺𑀢𑀓𑁆𑀓𑁂𑀢𑀺 𑀏𑀢𑁂 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀫𑀦𑁄𑀯𑀺𑀢𑀓𑁆𑀓𑁂 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀢𑁄 𑀜𑀸𑀢𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀳𑀺 𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑁄. 𑀳𑀼𑀭𑀸 𑀳𑀼𑀭𑀁 𑀥𑀸𑀯𑀢𑀺 𑀪𑀦𑁆𑀢𑀘𑀺𑀢𑁆𑀢𑁄𑀢𑀺 𑀅𑀧𑁆𑀧𑀳𑀻𑀦𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀢𑁆𑀢𑀸 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑁄 ‘‘𑀓𑀤𑀸𑀘𑀺 𑀭𑀽𑀧𑁂, 𑀓𑀤𑀸𑀘𑀺 𑀲𑀤𑁆𑀤𑁂’’𑀢𑀺𑀆𑀤𑀺𑀦𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀅𑀲𑁆𑀲𑀸𑀤𑀸𑀤𑀺𑀯𑀲𑁂𑀦 𑀅𑀧𑀭𑀸𑀧𑀭𑀁 𑀥𑀸𑀯𑀢𑀺 𑀧𑀭𑀺𑀩𑁆𑀪𑀫𑀢𑀺. 𑀅𑀣 𑀯𑀸 𑀳𑀼𑀭𑀸 𑀳𑀼𑀭𑀁 𑀥𑀸𑀯𑀢𑀺 𑀪𑀦𑁆𑀢𑀘𑀺𑀢𑁆𑀢𑁄𑀢𑀺 𑀅𑀧𑀭𑀺𑀜𑁆𑀜𑀸𑀢𑀯𑀺𑀢𑀓𑁆𑀓𑀢𑁆𑀢𑀸 𑀢𑀦𑁆𑀦𑀺𑀫𑀺𑀢𑁆𑀢𑀸𑀦𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀯𑀲𑁂𑀦 𑀧𑀭𑀺𑀩𑁆𑀪𑀫𑀦𑀫𑀸𑀦𑀲𑁄 𑀇𑀥𑀮𑁄𑀓𑀢𑁄 𑀧𑀭𑀮𑁄𑀓𑀁 𑀆𑀤𑀸𑀦𑀦𑀺𑀓𑁆𑀔𑁂𑀧𑁂𑀳𑀺 𑀅𑀧𑀭𑀸𑀧𑀭𑀁 𑀥𑀸𑀯𑀢𑀺 𑀲𑀁𑀲𑀭𑀢𑀻𑀢𑀺 𑀅𑀢𑁆𑀣𑁄.

𑀏𑀢𑁂 𑀘 𑀯𑀺𑀤𑁆𑀯𑀸 𑀫𑀦𑀲𑁄 𑀯𑀺𑀢𑀓𑁆𑀓𑁂𑀢𑀺 𑀏𑀢𑁂 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑁂 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀫𑀦𑁄𑀯𑀺𑀢𑀓𑁆𑀓𑁂 𑀅𑀲𑁆𑀲𑀸𑀤𑀸𑀤𑀺𑀢𑁄 𑀬𑀣𑀸𑀪𑀽𑀢𑀁 𑀚𑀸𑀦𑀦𑁆𑀢𑁄. 𑀆𑀢𑀸𑀧𑀺𑀬𑁄𑀢𑀺 𑀯𑀻𑀭𑀺𑀬𑀯𑀸. 𑀲𑀁𑀯𑀭𑀢𑀻𑀢𑀺 𑀧𑀺𑀤𑀳𑀢𑀺. 𑀲𑀢𑀺𑀫𑀸𑀢𑀺 𑀲𑀢𑀺𑀲𑀫𑁆𑀧𑀦𑁆𑀦𑁄. 𑀅𑀦𑀼𑀕𑁆𑀕𑀢𑁂𑀢𑀺 𑀤𑀼𑀮𑁆𑀮𑀪𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀫𑀦𑁄𑀯𑀺𑀢𑀓𑁆𑀓𑁂 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀺𑀮𑀸𑀯𑀺𑀢𑀳𑁂𑀢𑀼𑀢𑀸𑀬 𑀫𑀦𑀲𑁄 𑀉𑀧𑁆𑀧𑀺𑀮𑀸𑀯𑁂 𑀯𑀺𑀤𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀲𑀫𑁆𑀫𑀤𑁂𑀯 𑀚𑀸𑀦𑀦𑁆𑀢𑁄, 𑀢𑀲𑁆𑀲 𑀲𑀳𑀸𑀬𑀪𑀽𑀢𑀸𑀦𑀁 𑀲𑀫𑁆𑀫𑀸𑀯𑀸𑀬𑀸𑀫𑀲𑀢𑀻𑀦𑀁 𑀅𑀢𑁆𑀣𑀺𑀢𑀸𑀬 𑀆𑀢𑀸𑀧𑀺𑀬𑁄 𑀲𑀢𑀺𑀫𑀸 𑀢𑁂 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀆𑀬𑀢𑀺𑀁 𑀉𑀧𑁆𑀧𑀢𑁆𑀢𑀺𑀭𑀳𑁂 𑀅𑀦𑀼𑀕𑁆𑀕𑀢𑁂 𑀅𑀦𑀼𑀧𑁆𑀧𑀦𑁆𑀦𑁂 𑀏𑀯 𑀫𑀕𑁆𑀕𑀓𑁆𑀔𑀡𑁂 𑀲𑀁𑀯𑀭𑀢𑀺, 𑀜𑀸𑀡𑀲𑀁𑀯𑀭𑀯𑀲𑁂𑀦 𑀧𑀺𑀤𑀳𑀢𑀺, 𑀆𑀕𑀫𑀦𑀧𑀣𑀁 𑀧𑀘𑁆𑀙𑀺𑀦𑁆𑀤𑀢𑀺, 𑀏𑀯𑀁𑀪𑀽𑀢𑁄 𑀘 𑀘𑀢𑀼𑀲𑀘𑁆𑀘𑀧𑁆𑀧𑀩𑁄𑀥𑁂𑀦 𑀩𑀼𑀤𑁆𑀥𑁄 𑀅𑀭𑀺𑀬𑀲𑀸𑀯𑀓𑁄 𑀅𑀭𑀳𑀢𑁆𑀢𑀸𑀥𑀺𑀕𑀫𑁂𑀦 𑀅𑀲𑁂𑀲𑀁, 𑀅𑀦𑀯𑀲𑁂𑀲𑀁 𑀏𑀢𑁂 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀧𑀚𑀳𑀸𑀲𑀺 𑀲𑀫𑀼𑀘𑁆𑀙𑀺𑀦𑁆𑀤𑀻𑀢𑀺. 𑀏𑀢𑁆𑀣𑀸𑀧𑀺 ‘‘𑀅𑀦𑀼𑀕𑀢𑁂’’𑀢𑀺𑀧𑀺 𑀧𑀞𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑀧𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑁆𑀥𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 𑀓𑀼𑀲𑀺𑀦𑀸𑀭𑀸𑀬𑀦𑁆𑀢𑀺 𑀓𑀼𑀲𑀺𑀦𑀸𑀭𑀸𑀬𑀁 𑀦𑀸𑀫 𑀫𑀮𑁆𑀮𑀭𑀸𑀚𑀽𑀦𑀁 𑀦𑀕𑀭𑁂. 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂𑀢𑀺 𑀬𑀣𑀸 𑀳𑀺 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀣𑀽𑀧𑀸𑀭𑀸𑀫𑁄, 𑀏𑀯𑀁 𑀓𑀼𑀲𑀺𑀦𑀸𑀭𑀸𑀬 𑀉𑀬𑁆𑀬𑀸𑀦𑀁 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀬 𑀳𑁄𑀢𑀺. 𑀬𑀣𑀸 𑀣𑀽𑀧𑀸𑀭𑀸𑀫𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀧𑀯𑀺𑀲𑀦𑀫𑀕𑁆𑀕𑁄 𑀧𑀸𑀘𑀻𑀦𑀫𑀼𑀔𑁄 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀉𑀬𑁆𑀬𑀸𑀦𑀢𑁄 𑀲𑀸𑀮𑀧𑀦𑁆𑀢𑀺 𑀧𑀸𑀘𑀻𑀦𑀫𑀼𑀔𑀸 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀸, 𑀢𑀲𑁆𑀫𑀸 ‘‘𑀉𑀧𑀯𑀢𑁆𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀭𑀸𑀚𑀽𑀦𑀁 𑀲𑀸𑀮𑀯𑀦𑁂. 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀦𑁆𑀢𑀺 𑀲𑀸𑀮𑀧𑀦𑁆𑀢𑀺𑀬𑀸 𑀅𑀯𑀺𑀤𑀽𑀭𑁂 𑀭𑀼𑀓𑁆𑀔𑀕𑀘𑁆𑀙𑀲𑀜𑁆𑀙𑀦𑁆𑀦𑀝𑁆𑀞𑀸𑀦𑁂 𑀓𑀢𑀸 𑀓𑀼𑀝𑀺𑀓𑀸, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀢𑀻’’𑀢𑀺. 𑀢𑁂 𑀧𑀦 𑀪𑀺𑀓𑁆𑀔𑀽 𑀧𑀝𑀺𑀲𑀗𑁆𑀔𑀸𑀦𑀯𑀺𑀭𑀳𑀺𑀢𑀸 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀸 𑀧𑀫𑀢𑁆𑀢𑀯𑀺𑀳𑀸𑀭𑀺𑀦𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀤𑁆𑀥𑀢𑀸’’𑀢𑀺𑀆𑀤𑀺.

𑀢𑀢𑁆𑀣 𑀉𑀤𑁆𑀥𑀘𑁆𑀘𑀩𑀳𑀼𑀮𑀢𑁆𑀢𑀸 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀢𑀸𑀬 𑀉𑀤𑁆𑀥𑀢𑀸. 𑀢𑀼𑀘𑁆𑀙𑀪𑀸𑀯𑁂𑀦 𑀫𑀸𑀦𑁄 𑀦𑀴𑁄 𑀯𑀺𑀬𑀸𑀢𑀺 𑀦𑀴𑁄, 𑀫𑀸𑀦𑀲𑀗𑁆𑀔𑀸𑀢𑁄 𑀉𑀕𑁆𑀕𑀢𑁄 𑀦𑀴𑁄 𑀏𑀢𑁂𑀲𑀦𑁆𑀢𑀺 𑀉𑀦𑁆𑀦𑀴𑀸, 𑀉𑀕𑁆𑀕𑀢𑀢𑀼𑀘𑁆𑀙𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀧𑀢𑁆𑀢𑀘𑀻𑀯𑀭𑀫𑀡𑁆𑀟𑀦𑀸𑀤𑀺𑀘𑀸𑀧𑀮𑁆𑀮𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀩𑀳𑀼𑀓𑀢𑀸𑀬 𑀯𑀸 𑀘𑀧𑀮𑀸. 𑀨𑀭𑀼𑀲𑀯𑀸𑀘𑀢𑀸𑀬 𑀫𑀼𑀔𑁂𑀦 𑀔𑀭𑀸𑀢𑀺 𑀫𑀼𑀔𑀭𑀸. 𑀢𑀺𑀭𑀘𑁆𑀙𑀸𑀦𑀓𑀣𑀸𑀩𑀳𑀼𑀮𑀢𑀸𑀬 𑀯𑀺𑀓𑀺𑀡𑁆𑀡𑀸 𑀩𑁆𑀬𑀸𑀓𑀼𑀮𑀸 𑀯𑀸𑀘𑀸 𑀏𑀢𑁂𑀲𑀦𑁆𑀢𑀺 𑀯𑀺𑀓𑀺𑀡𑁆𑀡𑀯𑀸𑀘𑀸. 𑀫𑀼𑀝𑁆𑀞𑀸 𑀦𑀝𑁆𑀞𑀸 𑀲𑀢𑀺 𑀏𑀢𑁂𑀲𑀦𑁆𑀢𑀺 𑀫𑀼𑀝𑁆𑀞𑀲𑁆𑀲𑀢𑀺𑀦𑁄, 𑀲𑀢𑀺𑀯𑀺𑀭𑀳𑀺𑀢𑀸 𑀧𑀫𑀸𑀤𑀯𑀺𑀳𑀸𑀭𑀺𑀦𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀫𑁆𑀧𑀚𑀜𑁆𑀜𑀸𑀪𑀸𑀯𑀢𑁄 𑀅𑀲𑀫𑁆𑀧𑀚𑀸𑀦𑀸. 𑀕𑀤𑁆𑀤𑀽𑀳𑀦𑀫𑀢𑁆𑀢𑀫𑁆𑀧𑀺 𑀓𑀸𑀮𑀁 𑀘𑀺𑀢𑁆𑀢𑀲𑀫𑀸𑀥𑀸𑀦𑀲𑁆𑀲 𑀅𑀪𑀸𑀯𑀢𑁄 𑀦 𑀲𑀫𑀸𑀳𑀺𑀢𑀸𑀢𑀺 𑀅𑀲𑀫𑀸𑀳𑀺𑀢𑀸. 𑀮𑁄𑀮𑀲𑀪𑀸𑀯𑀢𑁆𑀢𑀸 𑀪𑀦𑁆𑀢𑀫𑀺𑀕𑀲𑀧𑁆𑀧𑀝𑀺𑀪𑀸𑀕𑀢𑀸𑀬 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸. 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀲𑀁𑀯𑀭𑀡𑀢𑁄 𑀅𑀲𑀜𑁆𑀜𑀢𑀺𑀦𑁆𑀤𑁆𑀭𑀺𑀬𑀢𑀸𑀬 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀤𑁆𑀥𑀘𑁆𑀘𑀸𑀤𑀺𑀯𑀲𑁂𑀦 𑀧𑀫𑀸𑀤𑀯𑀺𑀳𑀸𑀭𑀁 𑀚𑀸𑀦𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀧𑀫𑀸𑀤𑀯𑀺𑀳𑀸𑀭𑁂 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑁂 𑀘 𑀬𑀣𑀸𑀓𑁆𑀓𑀫𑀁 𑀆𑀤𑀻𑀦𑀯𑀸𑀦𑀺𑀲𑀁𑀲𑀯𑀺𑀪𑀸𑀯𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀅𑀭𑀓𑁆𑀔𑀺𑀢𑁂𑀦𑀸𑀢𑀺 𑀲𑀢𑀺𑀆𑀭𑀓𑁆𑀔𑀸𑀪𑀸𑀯𑁂𑀦 𑀅𑀕𑀼𑀢𑁆𑀢𑁂𑀦. 𑀓𑀸𑀬𑁂𑀦𑀸𑀢𑀺 𑀙𑀯𑀺𑀜𑁆𑀜𑀸𑀡𑀓𑀸𑀬𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀳𑀺 𑀭𑀽𑀧𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀯𑀲𑁂𑀦 𑀅𑀪𑀺𑀚𑁆𑀛𑀸𑀤𑀺𑀧𑀯𑀢𑁆𑀢𑀺𑀢𑁄 𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀲𑁆𑀲 𑀲𑀢𑀺𑀬𑀸 𑀅𑀭𑀓𑁆𑀔𑀺𑀢𑀪𑀸𑀯𑀢𑁄. 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀙𑀯𑀺𑀜𑁆𑀜𑀸𑀡𑀓𑀸𑀬𑀲𑁆𑀲 𑀅𑀭𑀓𑁆𑀔𑀺𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀭𑀓𑁆𑀔𑀺𑀢𑁂𑀦 𑀓𑀸𑀬𑁂𑀦𑀸’’𑀢𑀺. 𑀓𑁂𑀘𑀺 𑀧𑀦 ‘‘𑀓𑀸𑀬𑁂𑀦𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑀬𑁄𑀚𑀦𑀸𑀬 𑀲𑀢𑀺 𑀬𑀼𑀚𑁆𑀚𑁂𑀬𑁆𑀬. 𑀅𑀧𑀭𑁂 𑀧𑀦 ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀯𑀼𑀢𑁆𑀢𑀦𑀬𑁄 𑀏𑀯 𑀅𑀢𑁆𑀣𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦𑀸𑀢𑀺 𑀲𑀲𑁆𑀲𑀢𑀸𑀤𑀺𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀤𑀽𑀲𑀺𑀢𑁂𑀦. 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦𑀸𑀢𑀺 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸𑀮𑀓𑁆𑀔𑀡𑁂𑀦 𑀣𑀺𑀦𑁂𑀦 𑀓𑀸𑀬𑀲𑁆𑀲 𑀅𑀓𑀮𑁆𑀬𑀢𑀸𑀮𑀓𑁆𑀔𑀡𑁂𑀦 𑀫𑀺𑀤𑁆𑀥𑁂𑀦 𑀘 𑀅𑀚𑁆𑀛𑁄𑀢𑁆𑀣𑀝𑁂𑀦, 𑀢𑁂𑀦 𑀓𑀸𑀬𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀻𑀢𑀺 𑀓𑀺𑀮𑁂𑀲𑀫𑀸𑀭𑀸𑀤𑀺𑀓𑀲𑁆𑀲 𑀲𑀩𑁆𑀩𑀲𑁆𑀲𑀧𑀺 𑀫𑀸𑀭𑀲𑁆𑀲 𑀯𑀲𑀁 𑀬𑀣𑀸𑀓𑀸𑀫𑀓𑀭𑀡𑀻𑀬𑀢𑀁 𑀉𑀧𑀕𑀘𑁆𑀙𑀢𑀺, 𑀢𑁂𑀲𑀁 𑀯𑀺𑀲𑀬𑀁 𑀦𑀸𑀢𑀺𑀓𑁆𑀓𑀫𑀢𑀻𑀢𑀺 𑀅𑀢𑁆𑀣𑁄.

𑀇𑀫𑀸𑀬 𑀳𑀺 𑀕𑀸𑀣𑀸𑀬 𑀪𑀕𑀯𑀸 𑀬𑁂 𑀲𑀢𑀺𑀆𑀭𑀓𑁆𑀔𑀸𑀪𑀸𑀯𑁂𑀦 𑀲𑀩𑁆𑀩𑀲𑁄 𑀅𑀭𑀓𑁆𑀔𑀺𑀢𑀘𑀺𑀢𑁆𑀢𑀸, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀳𑁂𑀢𑀼𑀪𑀽𑀢𑀸𑀬 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁂𑀦 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀯𑀺𑀧𑀭𑀺𑀬𑁂𑀲𑀕𑀸𑀳𑀺𑀦𑁄, 𑀢𑀢𑁄 𑀏𑀯 𑀓𑀼𑀲𑀮𑀓𑀺𑀭𑀺𑀬𑀸𑀬 𑀯𑀻𑀭𑀺𑀬𑀸𑀭𑀫𑁆𑀪𑀸𑀪𑀸𑀯𑀢𑁄 𑀓𑁄𑀲𑀚𑁆𑀚𑀸𑀪𑀺𑀪𑀽𑀢𑀸 𑀲𑀁𑀲𑀸𑀭𑀯𑀝𑁆𑀝𑀢𑁄 𑀲𑀻𑀲𑀁 𑀦 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀻𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀫𑀸𑀤𑀯𑀺𑀳𑀸𑀭𑀕𑀭𑀳𑀸𑀫𑀼𑀔𑁂𑀦 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀢𑀼𑀁, ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀤𑀼𑀢𑀺𑀬𑀕𑀸𑀣𑀫𑀸𑀳.

𑀢𑀢𑁆𑀣 𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀬𑀲𑁆𑀫𑀸 𑀅𑀭𑀓𑁆𑀔𑀺𑀢𑀘𑀺𑀢𑁆𑀢𑁄 𑀫𑀸𑀭𑀲𑁆𑀲 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀳𑀼𑀢𑁆𑀯𑀸 𑀲𑀁𑀲𑀸𑀭𑁂𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀲𑀢𑀺𑀲𑀁𑀯𑀭𑁂𑀦 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀭𑀓𑁆𑀔𑀡𑁂𑀦 𑀧𑀺𑀤𑀳𑀦𑁂𑀦 𑀭𑀓𑁆𑀔𑀺𑀢𑀘𑀺𑀢𑁆𑀢𑁄 𑀅𑀲𑁆𑀲. 𑀘𑀺𑀢𑁆𑀢𑁂 𑀳𑀺 𑀭𑀓𑁆𑀔𑀺𑀢𑁂 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀸𑀦𑀺 𑀭𑀓𑁆𑀔𑀺𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄𑀢𑀺 𑀬𑀲𑁆𑀫𑀸 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄 𑀢𑀣𑀸 𑀢𑀣𑀸 𑀅𑀬𑁄𑀦𑀺𑀲𑁄 𑀯𑀺𑀢𑀓𑁆𑀓𑁂𑀢𑁆𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀫𑀺𑀘𑁆𑀙𑀸𑀤𑀲𑁆𑀲𑀦𑀸𑀦𑀺 𑀕𑀡𑁆𑀳𑀦𑁆𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 𑀘𑀺𑀢𑁆𑀢𑁂𑀦 𑀫𑀸𑀭𑀲𑁆𑀲 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄 𑀅𑀲𑁆𑀲, 𑀛𑀸𑀦𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀫𑁂𑀯 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀓𑀭𑁂𑀬𑁆𑀬. 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑀢𑀸𑀬 𑀯𑀺𑀥𑀽𑀢𑀫𑀺𑀘𑁆𑀙𑀸𑀤𑀲𑁆𑀲𑀦𑁄 𑀧𑀼𑀭𑁂𑀢𑀭𑀁𑀬𑁂𑀯 𑀓𑀫𑁆𑀫𑀲𑁆𑀲𑀓𑀢𑀸𑀮𑀓𑁆𑀔𑀡𑀁, 𑀢𑀢𑁄 𑀬𑀣𑀸𑀪𑀽𑀢𑀜𑀸𑀡𑀮𑀓𑁆𑀔𑀡𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀻𑀮𑀲𑀫𑀸𑀥𑀻𑀲𑀼 𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬𑀁 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀫𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀉𑀤𑀬𑀩𑁆𑀩𑀬𑀜𑀸𑀡𑀫𑀥𑀺𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀭𑀺𑀬𑀫𑀕𑁆𑀕𑀁 𑀕𑀡𑁆𑀳𑀦𑁆𑀢𑁄 𑀅𑀕𑁆𑀕𑀫𑀕𑁆𑀕𑁂𑀦, 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀼 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂𑀢𑀺, 𑀏𑀯𑀁 𑀲𑁄 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀞𑀫𑀫𑁂𑀯 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀣𑀺𑀦𑀫𑀺𑀤𑁆𑀥𑀸𑀦𑀁 𑀅𑀥𑀺𑀕𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀢𑀤𑁂𑀓𑀝𑁆𑀞𑀸𑀦𑀁 𑀫𑀸𑀦𑀸𑀤𑀻𑀦𑀫𑁆𑀧𑀺 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀲𑁄 𑀪𑀺𑀦𑁆𑀦𑀓𑀺𑀮𑁂𑀲𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀢𑀺𑀯𑀺𑀥𑀤𑀼𑀓𑁆𑀔𑀢𑀸𑀬𑁄𑀕𑁂𑀦 𑀤𑀼𑀕𑁆𑀕𑀢𑀺𑀲𑀗𑁆𑀔𑀸𑀢𑀸 𑀲𑀩𑁆𑀩𑀸𑀧𑀺 𑀕𑀢𑀺𑀬𑁄 𑀉𑀘𑁆𑀙𑀺𑀦𑁆𑀦𑀪𑀯𑀫𑀽𑀮𑀢𑁆𑀢𑀸 𑀚𑀳𑁂, 𑀧𑀚𑀳𑁂𑀬𑁆𑀬. 𑀢𑀸𑀲𑀁 𑀧𑀭𑀪𑀸𑀕𑁂 𑀦𑀺𑀩𑁆𑀩𑀸𑀦𑁂 𑀧𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀕𑁄𑀧𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂 𑀓𑁄𑀲𑀮𑁂𑀲𑀽𑀢𑀺 𑀓𑁄𑀲𑀮𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 ‘‘𑀓𑁄𑀲𑀮𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀢𑁂𑀲𑀼 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂. 𑀘𑀸𑀭𑀺𑀓𑀁 𑀘𑀭𑀢𑀻𑀢𑀺 𑀅𑀢𑀼𑀭𑀺𑀢𑀘𑀸𑀭𑀺𑀓𑀸𑀯𑀲𑁂𑀦 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀢𑀺. 𑀫𑀳𑀢𑀸𑀢𑀺 𑀕𑀼𑀡𑀫𑀳𑀢𑁆𑀢𑁂𑀦𑀧𑀺 𑀫𑀳𑀢𑀸, 𑀅𑀧𑀭𑀺𑀘𑁆𑀙𑀺𑀦𑁆𑀦𑀲𑀗𑁆𑀔𑁆𑀬𑀢𑁆𑀢𑀸 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀦𑀧𑀺 𑀫𑀳𑀢𑀸. 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸𑀢𑀺 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀁𑀳𑀢𑁂𑀦 𑀲𑀫𑀡𑀕𑀡𑁂𑀦. 𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄. 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫𑀸𑀢𑀺 𑀫𑀕𑁆𑀕𑀢𑁄 𑀅𑀧𑀓𑁆𑀓𑀫𑀺𑀢𑁆𑀯𑀸. 𑀅𑀜𑁆𑀜𑀢𑀭𑀁 𑀭𑀼𑀓𑁆𑀔𑀫𑀽𑀮𑀦𑁆𑀢𑀺 𑀖𑀦𑀧𑀢𑁆𑀢𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀦𑁆𑀤𑀘𑁆𑀙𑀸𑀬𑀲𑁆𑀲 𑀫𑀳𑀢𑁄 𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑀲𑀗𑁆𑀔𑀸𑀢𑀁 𑀫𑀽𑀮𑀁.

𑀅𑀜𑁆𑀜𑀢𑀭𑁄 𑀕𑁄𑀧𑀸𑀮𑀓𑁄𑀢𑀺 𑀏𑀓𑁄 𑀕𑁄𑀕𑀡𑀭𑀓𑁆𑀔𑀓𑁄, 𑀦𑀸𑀫𑁂𑀦 𑀧𑀦 𑀦𑀦𑁆𑀤𑁄 𑀦𑀸𑀫. 𑀲𑁄 𑀓𑀺𑀭 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄, 𑀬𑀣𑀸 𑀓𑁂𑀡𑀺𑀬𑁄 𑀚𑀝𑀺𑀮𑁄 𑀧𑀩𑁆𑀩𑀚𑁆𑀚𑀸𑀯𑀲𑁂𑀦, 𑀏𑀯𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑁄𑀬𑀽𑀣𑀁 𑀭𑀓𑁆𑀔𑀦𑁆𑀢𑁄 𑀕𑁄𑀧𑀸𑀮𑀓𑀢𑁆𑀢𑁂𑀦 𑀭𑀸𑀚𑀧𑀻𑀴𑀁 𑀅𑀧𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀓𑀼𑀝𑀼𑀫𑁆𑀩𑀁 𑀭𑀓𑁆𑀔𑀢𑀺. 𑀲𑁄 𑀓𑀸𑀮𑁂𑀦 𑀓𑀸𑀮𑀁 𑀧𑀜𑁆𑀘 𑀕𑁄𑀭𑀲𑁂 𑀕𑀳𑁂𑀢𑁆𑀯𑀸, 𑀫𑀳𑀸𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀲𑀢𑁆𑀣𑀸𑀭𑀁 𑀧𑀲𑁆𑀲𑀢𑀺, 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀆𑀕𑀫𑀦𑀢𑁆𑀣𑀸𑀬 𑀲𑀢𑁆𑀣𑀸𑀭𑀁 𑀬𑀸𑀘𑀢𑀺. 𑀲𑀢𑁆𑀣𑀸 𑀢𑀲𑁆𑀲𑁂𑀯 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄 𑀅𑀕𑀦𑁆𑀢𑁆𑀯𑀸, 𑀅𑀧𑀭𑀪𑀸𑀕𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀧𑀭𑀺𑀯𑀼𑀢𑁄 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄, ‘‘𑀇𑀤𑀸𑀦𑀺𑀲𑁆𑀲 𑀜𑀸𑀡𑀁 𑀧𑀭𑀺𑀧𑀓𑁆𑀓’’𑀦𑁆𑀢𑀺 𑀜𑀢𑁆𑀯𑀸 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀲𑁆𑀲 𑀅𑀯𑀺𑀤𑀽𑀭𑁂 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺 𑀢𑀲𑁆𑀲 𑀆𑀕𑀫𑀦𑀁 𑀆𑀕𑀫𑀬𑀫𑀸𑀦𑁄. 𑀦𑀦𑁆𑀤𑁄𑀧𑀺 𑀔𑁄 ‘‘𑀲𑀢𑁆𑀣𑀸 𑀓𑀺𑀭 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀇𑀢𑁄 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸, 𑀳𑀝𑁆𑀞𑀢𑀼𑀝𑁆𑀞𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸, 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀅𑀣𑀲𑁆𑀲 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀧𑀸𑀬𑀸𑀲𑀤𑀸𑀦𑀫𑀤𑀸𑀲𑀺, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀢𑀁 𑀕𑁄𑀧𑀸𑀮𑀓𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺…𑀧𑁂… 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀻’’𑀢𑀺.

𑀢𑀢𑁆𑀣 𑀲𑀦𑁆𑀤𑀲𑁆𑀲𑁂𑀲𑀻𑀢𑀺 ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀓𑀫𑁆𑀫𑀯𑀺𑀧𑀸𑀓𑁂 𑀇𑀥𑀮𑁄𑀓𑀧𑀭𑀮𑁄𑀓𑁂 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀯𑀲𑀸𑀦𑁂 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀲𑀫𑁆𑀫𑀸 𑀤𑀲𑁆𑀲𑁂𑀲𑀺. 𑀲𑀫𑀸𑀤𑀧𑁂𑀲𑀻𑀢𑀺 ‘‘𑀲𑀘𑁆𑀘𑀸𑀥𑀺𑀕𑀫𑀸𑀬 𑀇𑀫𑁂 𑀦𑀸𑀫 𑀥𑀫𑁆𑀫𑀸 𑀅𑀢𑁆𑀢𑀦𑀺 𑀉𑀧𑁆𑀧𑀸𑀤𑁂𑀢𑀩𑁆𑀩𑀸’’𑀢𑀺 𑀲𑀻𑀮𑀸𑀤𑀺𑀥𑀫𑁆𑀫𑁂 𑀲𑀫𑁆𑀫𑀸 𑀕𑀡𑁆𑀳𑀸𑀧𑁂𑀢𑁆𑀯𑀸 𑀢𑁂𑀲𑀼 𑀢𑀁 𑀧𑀢𑀺𑀝𑁆𑀞𑀧𑁂𑀲𑀺. 𑀲𑀫𑀼𑀢𑁆𑀢𑁂𑀚𑁂𑀲𑀻𑀢𑀺 𑀢𑁂 𑀥𑀫𑁆𑀫𑀸 𑀲𑀫𑀸𑀤𑀺𑀦𑁆𑀦𑀸 𑀅𑀦𑀼𑀓𑁆𑀓𑀫𑁂𑀦 𑀪𑀸𑀯𑀺𑀬𑀫𑀸𑀦𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀳𑀼𑀢𑁆𑀯𑀸 𑀢𑀺𑀓𑁆𑀔𑀯𑀺𑀲𑀤𑀸 𑀬𑀣𑀸 𑀔𑀺𑀧𑁆𑀧𑀁 𑀅𑀭𑀺𑀬𑀫𑀕𑁆𑀕𑀁 𑀆𑀯𑀳𑀦𑁆𑀢𑀺, 𑀢𑀣𑀸 𑀲𑀫𑁆𑀫𑀸 𑀉𑀢𑁆𑀢𑁂𑀚𑁂𑀲𑀺 𑀲𑀫𑁆𑀫𑀤𑁂𑀯 𑀢𑁂𑀚𑁂𑀲𑀺. 𑀲𑀫𑁆𑀧𑀳𑀁𑀲𑁂𑀲𑀻𑀢𑀺 𑀪𑀸𑀯𑀦𑀸𑀬 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑁂𑀦 𑀘𑀺𑀢𑁆𑀢𑀲𑁆𑀲 𑀧𑀫𑁄𑀤𑀸𑀧𑀦𑀯𑀲𑁂𑀦 𑀲𑀼𑀝𑁆𑀞𑀼 𑀧𑀳𑀁𑀲𑁂𑀲𑀺. 𑀅𑀧𑀺𑀘𑁂𑀢𑁆𑀣 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀥𑀫𑁆𑀫𑁂𑀲𑀼 𑀤𑀼𑀓𑁆𑀔𑀸𑀤𑀻𑀲𑀼 𑀘 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑁂𑀦 𑀲𑀦𑁆𑀤𑀲𑁆𑀲𑀦𑀁, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀧𑀫𑀸𑀤𑀸𑀧𑀦𑁄𑀤𑀦𑁂𑀦 𑀲𑀫𑀸𑀤𑀧𑀦𑀁, 𑀘𑀺𑀢𑁆𑀢𑀲𑁆𑀲𑀸𑀮𑀲𑀺𑀬𑀸𑀧𑀢𑁆𑀢𑀺𑀯𑀺𑀦𑁄𑀤𑀦𑁂𑀦 𑀲𑀫𑀼𑀢𑁆𑀢𑁂𑀚𑀦𑀁, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀲𑀺𑀤𑁆𑀥𑀺𑀬𑀸 𑀲𑀫𑁆𑀧𑀳𑀁𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑁄 𑀪𑀕𑀯𑀢𑁄 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀅𑀥𑀺𑀯𑀸𑀲𑁂𑀲𑀻𑀢𑀺 𑀢𑁂𑀦 𑀤𑀺𑀝𑁆𑀞𑀲𑀘𑁆𑀘𑁂𑀦 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀦𑀺𑀫𑀦𑁆𑀢𑀺𑀢𑁄 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀁 𑀅𑀘𑁄𑀧𑁂𑀦𑁆𑀢𑁄 𑀘𑀺𑀢𑁆𑀢𑁂𑀦𑁂𑀯 𑀅𑀥𑀺𑀯𑀸𑀲𑁂𑀲𑀺 𑀲𑀸𑀤𑀺𑀬𑀺. 𑀢𑁂𑀦𑁂𑀯𑀸𑀳 ‘‘𑀢𑀼𑀡𑁆𑀳𑀻𑀪𑀸𑀯𑁂𑀦𑀸’’𑀢𑀺.

𑀅𑀧𑁆𑀧𑁄𑀤𑀓𑀧𑀸𑀬𑀸𑀲𑀦𑁆𑀢𑀺 𑀦𑀺𑀭𑀼𑀤𑀓𑀧𑀸𑀬𑀸𑀲𑀁. 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸𑀢𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀚𑁆𑀚𑁂𑀢𑁆𑀯𑀸. 𑀦𑀯𑀜𑁆𑀘 𑀲𑀧𑁆𑀧𑀺𑀦𑁆𑀢𑀺 𑀦𑀯𑀦𑀻𑀢𑀁 𑀕𑀳𑁂𑀢𑁆𑀯𑀸 𑀢𑀸𑀯𑀤𑁂𑀯 𑀯𑀺𑀮𑀻𑀦𑀁 𑀫𑀡𑁆𑀟𑀲𑀧𑁆𑀧𑀺𑀜𑁆𑀘 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸. 𑀲𑀳𑀢𑁆𑀣𑀸𑀢𑀺 𑀆𑀤𑀭𑀚𑀸𑀢𑁄 𑀲𑀳𑀢𑁆𑀣𑁂𑀦𑁂𑀯 𑀧𑀭𑀺𑀯𑀺𑀲𑀦𑁆𑀢𑁄. 𑀲𑀦𑁆𑀢𑀧𑁆𑀧𑁂𑀲𑀻𑀢𑀺 𑀧𑀝𑀺𑀬𑀢𑁆𑀢𑀁 𑀪𑁄𑀚𑀦𑀁 𑀪𑁄𑀚𑁂𑀲𑀺. 𑀲𑀫𑁆𑀧𑀯𑀸𑀭𑁂𑀲𑀻𑀢𑀺 ‘‘𑀅𑀮𑀁 𑀅𑀮’’𑀦𑁆𑀢𑀺 𑀯𑀸𑀘𑀸𑀬 𑀧𑀝𑀺𑀓𑁆𑀔𑀺𑀧𑀸𑀧𑁂𑀲𑀺. 𑀪𑀼𑀢𑁆𑀢𑀸𑀯𑀺𑀦𑁆𑀢𑀺 𑀓𑀢𑀪𑀢𑁆𑀢𑀓𑀺𑀘𑁆𑀘𑀁. 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁆𑀢𑀺 𑀧𑀢𑁆𑀢𑀢𑁄 𑀅𑀧𑀦𑀻𑀢𑀧𑀸𑀡𑀺𑀁, ‘‘𑀥𑁄𑀢𑀧𑀢𑁆𑀢𑀧𑀸𑀡𑀺’’𑀦𑁆𑀢𑀺𑀧𑀺 𑀧𑀸𑀞𑁄, 𑀥𑁄𑀢𑀧𑀢𑁆𑀢𑀳𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀦𑀻𑀘𑀦𑁆𑀢𑀺 𑀅𑀦𑀼𑀘𑁆𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀆𑀲𑀦𑁂𑀬𑁂𑀯 𑀦𑀺𑀲𑀻𑀤𑀦𑀁 𑀅𑀭𑀺𑀬𑀤𑁂𑀲𑀯𑀸𑀲𑀻𑀦𑀁 𑀘𑀸𑀭𑀺𑀢𑁆𑀢𑀁, 𑀲𑁄 𑀧𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀉𑀧𑀘𑀸𑀭𑀯𑀲𑁂𑀦 𑀧𑀜𑁆𑀜𑀢𑁆𑀢𑀲𑁆𑀲 𑀤𑀸𑀭𑀼𑀨𑀮𑀓𑀸𑀲𑀦𑀲𑁆𑀲 𑀲𑀫𑀻𑀧𑁂 𑀦𑀺𑀲𑀻𑀤𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺𑀆𑀤𑀺 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀢𑀁 𑀅𑀦𑀼𑀫𑁄𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀓𑀺𑀭 𑀲𑀢𑁆𑀢𑀸𑀳𑀁 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀢𑀢𑁆𑀣 𑀯𑀲𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀲𑀢𑁆𑀢𑀫𑁂 𑀧𑀦 𑀤𑀺𑀯𑀲𑁂 𑀅𑀧𑁆𑀧𑁄𑀤𑀓𑀧𑀸𑀬𑀸𑀲𑀤𑀸𑀦𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀜𑀸𑀡𑀧𑀭𑀺𑀧𑀸𑀓𑀸𑀪𑀸𑀯𑀢𑁄 𑀅𑀦𑀼𑀫𑁄𑀤𑀦𑀫𑁂𑀯 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀻𑀫𑀦𑁆𑀢𑀭𑀺𑀓𑀸𑀬𑀸𑀢𑀺 𑀲𑀻𑀫𑀦𑁆𑀢𑀭𑁂, 𑀢𑀲𑁆𑀲 𑀕𑀸𑀫𑀲𑁆𑀲 𑀅𑀦𑁆𑀢𑀭𑀁. 𑀕𑀸𑀫𑀯𑀸𑀲𑀺𑀦𑁄 𑀓𑀺𑀭 𑀏𑀓𑀁 𑀢𑀴𑀸𑀓𑀁 𑀦𑀺𑀲𑁆𑀲𑀸𑀬 𑀢𑁂𑀦 𑀲𑀤𑁆𑀥𑀺𑀁 𑀓𑀮𑀳𑀁 𑀅𑀓𑀁𑀲𑀼. 𑀲𑁄 𑀢𑁂 𑀅𑀪𑀺𑀪𑀯𑀺𑀢𑁆𑀯𑀸 𑀢𑀁 𑀢𑀴𑀸𑀓𑀁 𑀕𑀡𑁆𑀳𑀺. 𑀢𑁂𑀦 𑀩𑀤𑁆𑀥𑀸𑀖𑀸𑀢𑁄 𑀏𑀓𑁄 𑀧𑀼𑀭𑀺𑀲𑁄 𑀢𑀁 𑀲𑀢𑁆𑀣𑀼 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀤𑀽𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 ‘‘𑀦𑀺𑀯𑀢𑁆𑀢𑀸𑀳𑀺 𑀉𑀧𑀸𑀲𑀓𑀸’’𑀢𑀺 𑀯𑀼𑀢𑁆𑀢𑁂 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀬𑀸𑀯 𑀤𑀲𑁆𑀲𑀦𑀽𑀧𑀘𑀸𑀭𑀲𑀫𑀢𑀺𑀓𑁆𑀓𑀫𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑀺 𑀧𑀕𑁆𑀕𑀬𑁆𑀳 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀕𑀸𑀫𑀸𑀦𑀁 𑀅𑀦𑁆𑀢𑀭𑁂 𑀅𑀭𑀜𑁆𑀜𑀧𑁆𑀧𑀤𑁂𑀲𑁂 𑀏𑀓𑀓𑀁 𑀕𑀘𑁆𑀙𑀦𑁆𑀢𑀁 𑀲𑀭𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲…𑀧𑁂… 𑀯𑁄𑀭𑁄𑀧𑁂𑀲𑀻’’𑀢𑀺. 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀑𑀳𑀻𑀬𑀺𑀢𑁆𑀯𑀸 𑀧𑀘𑁆𑀙𑀸 𑀕𑀘𑁆𑀙𑀦𑁆𑀢𑀸 𑀪𑀺𑀓𑁆𑀔𑀽 𑀢𑀁 𑀢𑀣𑀸 𑀫𑀢𑀁 𑀤𑀺𑀲𑁆𑀯𑀸 𑀪𑀕𑀯𑀢𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽’’𑀢𑀺𑀆𑀤𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀬𑀲𑁆𑀫𑀸 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀁 𑀅𑀭𑀺𑀬𑀲𑀸𑀯𑀓𑀁 𑀦𑀦𑁆𑀤𑀁 𑀫𑀸𑀭𑁂𑀦𑁆𑀢𑁂𑀦 𑀧𑀼𑀭𑀺𑀲𑁂𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀩𑀳𑀼𑀮𑀁 𑀅𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀢𑀲𑁆𑀫𑀸 𑀬𑀁 𑀘𑁄𑀭𑁂𑀳𑀺 𑀘 𑀯𑁂𑀭𑀻𑀳𑀺 𑀘 𑀓𑀢𑁆𑀢𑀩𑁆𑀩𑀁, 𑀢𑀢𑁄𑀧𑀺 𑀖𑁄𑀭𑀢𑀭𑀁 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁 𑀓𑀭𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀚𑀸𑀦𑀺𑀢𑁆𑀯𑀸 𑀢𑀤𑀢𑁆𑀣𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀤𑀺𑀲𑁄 𑀤𑀺𑀲𑀦𑁆𑀢𑀺 𑀤𑀽𑀲𑀓𑁄 𑀤𑀽𑀲𑀦𑀻𑀬𑀁 𑀘𑁄𑀭𑁄 𑀘𑁄𑀭𑀁, 𑀤𑀺𑀲𑁆𑀯𑀸𑀢𑀺 𑀯𑀘𑀦𑀲𑁂𑀲𑁄. 𑀬𑀁 𑀢𑀁 𑀓𑀬𑀺𑀭𑀸𑀢𑀺 𑀬𑀁 𑀢𑀲𑁆𑀲 𑀅𑀦𑀬𑀩𑁆𑀬𑀲𑀦𑀁 𑀓𑀭𑁂𑀬𑁆𑀬, 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀓𑁄 𑀏𑀓𑀲𑁆𑀲 𑀫𑀺𑀢𑁆𑀢𑀤𑀼𑀩𑁆𑀪𑀻 𑀘𑁄𑀭𑁄 𑀧𑀼𑀢𑁆𑀢𑀤𑀸𑀭𑀔𑁂𑀢𑁆𑀢𑀯𑀢𑁆𑀣𑀼𑀕𑁄𑀫𑀳𑀺𑀁𑀲𑀸𑀤𑀻𑀲𑀼 𑀅𑀧𑀭𑀚𑁆𑀛𑀦𑁆𑀢𑁄 𑀬𑀲𑁆𑀲 𑀅𑀧𑀭𑀚𑁆𑀛𑀢𑀺, 𑀢𑀫𑁆𑀧𑀺 𑀢𑀣𑁂𑀯 𑀅𑀢𑁆𑀢𑀦𑀺 𑀅𑀧𑀭𑀚𑁆𑀛𑀦𑁆𑀢𑀁 𑀘𑁄𑀭𑀁 𑀤𑀺𑀲𑁆𑀯𑀸, 𑀯𑁂𑀭𑀻 𑀯𑀸 𑀧𑀦 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀩𑀤𑁆𑀥𑀯𑁂𑀭𑀁 𑀯𑁂𑀭𑀺𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀓𑀓𑁆𑀔𑀴𑀢𑀸𑀬 𑀤𑀸𑀭𑀼𑀡𑀢𑀸𑀬 𑀬𑀁 𑀢𑀲𑁆𑀲 𑀅𑀦𑀬𑀩𑁆𑀬𑀲𑀦𑀁 𑀓𑀭𑁂𑀬𑁆𑀬, 𑀧𑀼𑀢𑁆𑀢𑀤𑀸𑀭𑀁 𑀯𑀸 𑀧𑀻𑀴𑁂𑀬𑁆𑀬, 𑀔𑁂𑀢𑁆𑀢𑀸𑀤𑀻𑀦𑀺 𑀯𑀸 𑀦𑀸𑀲𑁂𑀬𑁆𑀬, 𑀚𑀻𑀯𑀺𑀢𑀸 𑀯𑀸 𑀯𑁄𑀭𑁄𑀧𑁂𑀬𑁆𑀬, 𑀤𑀲𑀲𑀼 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀫𑀺𑀘𑁆𑀙𑀸𑀞𑀧𑀺𑀢𑀢𑁆𑀢𑀸 𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁 𑀧𑀸𑀧𑀺𑀬𑁄 𑀦𑀁 𑀢𑀢𑁄 𑀓𑀭𑁂, 𑀦𑀁 𑀧𑀼𑀭𑀺𑀲𑀁 𑀧𑀸𑀧𑀢𑀭𑀁 𑀢𑀢𑁄 𑀓𑀭𑁂𑀬𑁆𑀬. 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀳𑀺 𑀤𑀺𑀲𑁄 𑀯𑀸 𑀯𑁂𑀭𑀻 𑀯𑀸 𑀤𑀺𑀲𑀲𑁆𑀲 𑀯𑀸 𑀯𑁂𑀭𑀺𑀦𑁄 𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀤𑀼𑀓𑁆𑀔𑀁 𑀯𑀸 𑀉𑀧𑁆𑀧𑀸𑀤𑁂𑀬𑁆𑀬, 𑀚𑀻𑀯𑀺𑀢𑀓𑁆𑀔𑀬𑀁 𑀯𑀸 𑀓𑀭𑁂𑀬𑁆𑀬. 𑀇𑀤𑀁 𑀧𑀦 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀫𑀺𑀘𑁆𑀙𑀸𑀞𑀧𑀺𑀢𑀁 𑀘𑀺𑀢𑁆𑀢𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀢𑀺, 𑀅𑀢𑁆𑀢𑀪𑀸𑀯𑀲𑀢𑀲𑀳𑀲𑁆𑀲𑁂𑀲𑀼𑀧𑀺 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀔𑀺𑀧𑀺𑀢𑁆𑀯𑀸 𑀲𑀻𑀲𑀫𑀲𑁆𑀲 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀤𑁂𑀢𑀻𑀢𑀺.

𑀢𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀬𑀓𑁆𑀔𑀧𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀓𑀧𑁄𑀢𑀓𑀦𑁆𑀤𑀭𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀯𑀺𑀳𑀸𑀭𑁂. 𑀢𑀲𑁆𑀫𑀺𑀁 𑀓𑀺𑀭 𑀧𑀩𑁆𑀩𑀢𑀓𑀦𑁆𑀤𑀭𑁂 𑀧𑀼𑀩𑁆𑀩𑁂 𑀩𑀳𑀽 𑀓𑀧𑁄𑀢𑀸 𑀯𑀲𑀺𑀁𑀲𑀼, 𑀢𑁂𑀦 𑀲𑀸 𑀧𑀩𑁆𑀩𑀢𑀓𑀦𑁆𑀤𑀭𑀸 ‘‘𑀓𑀧𑁄𑀢𑀓𑀦𑁆𑀤𑀭𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀭𑀪𑀸𑀕𑁂 𑀢𑀢𑁆𑀣 𑀓𑀢𑀯𑀺𑀳𑀸𑀭𑁄𑀧𑀺 ‘‘𑀓𑀧𑁄𑀢𑀓𑀦𑁆𑀤𑀭𑀸’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀓𑀧𑁄𑀢𑀓𑀦𑁆𑀤𑀭𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀯𑀺𑀳𑀸𑀭𑁂’’𑀢𑀺. 𑀚𑀼𑀡𑁆𑀳𑀸𑀬 𑀭𑀢𑁆𑀢𑀺𑀬𑀸𑀢𑀺 𑀲𑀼𑀓𑁆𑀓𑀧𑀓𑁆𑀔𑀭𑀢𑁆𑀢𑀺𑀬𑀁. 𑀦𑀯𑁄𑀭𑁄𑀧𑀺𑀢𑁂𑀳𑀺 𑀓𑁂𑀲𑁂𑀳𑀻𑀢𑀺 𑀅𑀘𑀺𑀭𑀑𑀳𑀸𑀭𑀺𑀢𑁂𑀳𑀺 𑀓𑁂𑀲𑁂𑀳𑀺, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀅𑀩𑁆𑀪𑁄𑀓𑀸𑀲𑁂𑀢𑀺 𑀬𑀢𑁆𑀣 𑀉𑀧𑀭𑀺𑀘𑁆𑀙𑀤𑀦𑀁 𑀧𑀭𑀺𑀓𑁆𑀔𑁂𑀧𑁄 𑀯𑀸 𑀦𑀢𑁆𑀣𑀺, 𑀢𑀸𑀤𑀺𑀲𑁂 𑀆𑀓𑀸𑀲𑀗𑁆𑀕𑀡𑁂.

𑀢𑀢𑁆𑀣 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀦𑀻𑀮𑀼𑀧𑁆𑀧𑀮𑀯𑀡𑁆𑀡𑁄. 𑀉𑀪𑁄𑀧𑀺 𑀧𑀦 𑀢𑁂 𑀫𑀳𑀸𑀣𑁂𑀭𑀸 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀚𑀘𑁆𑀘𑀸 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀸 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸 𑀫𑀳𑀸𑀔𑀻𑀡𑀸𑀲𑀯𑀸 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀲𑀢𑁆𑀢𑀲𑀝𑁆𑀞𑀺𑀬𑀸 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀸𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀏𑀢𑀁 𑀓𑀧𑁄𑀢𑀓𑀦𑁆𑀤𑀭𑀯𑀺𑀳𑀸𑀭𑀁 𑀉𑀧𑀲𑁄𑀪𑀬𑀦𑁆𑀢𑀸 𑀏𑀓𑀁 𑀓𑀦𑀓𑀕𑀼𑀳𑀁 𑀧𑀯𑀺𑀝𑁆𑀞𑀸 𑀤𑁆𑀯𑁂 𑀲𑀻𑀳𑀸 𑀯𑀺𑀬, 𑀏𑀓𑀁 𑀯𑀺𑀚𑀫𑁆𑀪𑀦𑀪𑀽𑀫𑀺𑀁 𑀑𑀢𑀺𑀡𑁆𑀡𑀸 𑀤𑁆𑀯𑁂 𑀩𑁆𑀬𑀕𑁆𑀖𑀸 𑀯𑀺𑀬, 𑀏𑀓𑀁 𑀲𑀼𑀧𑀼𑀧𑁆𑀨𑀺𑀢𑀲𑀸𑀮𑀯𑀦𑀁 𑀧𑀯𑀺𑀝𑁆𑀞𑀸 𑀤𑁆𑀯𑁂 𑀙𑀤𑁆𑀤𑀦𑁆𑀢𑀦𑀸𑀕𑀭𑀸𑀚𑀸𑀦𑁄 𑀯𑀺𑀬, 𑀏𑀓𑀁 𑀲𑀺𑀫𑁆𑀩𑀮𑀺𑀯𑀦𑀁 𑀧𑀯𑀺𑀝𑁆𑀞𑀸 𑀤𑁆𑀯𑁂 𑀲𑀼𑀧𑀡𑁆𑀡𑀭𑀸𑀚𑀸𑀦𑁄 𑀯𑀺𑀬, 𑀏𑀓𑀁 𑀦𑀭𑀯𑀸𑀳𑀦𑀬𑀸𑀦𑀁 𑀅𑀪𑀺𑀭𑀼𑀴𑁆𑀳𑀸 𑀤𑁆𑀯𑁂 𑀯𑁂𑀲𑁆𑀲𑀯𑀡𑀸 𑀯𑀺𑀬, 𑀏𑀓𑀁 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀅𑀪𑀺𑀦𑀺𑀲𑀺𑀦𑁆𑀦𑀸 𑀤𑁆𑀯𑁂 𑀲𑀓𑁆𑀓𑀸 𑀯𑀺𑀬, 𑀏𑀓𑀯𑀺𑀫𑀸𑀦𑀩𑁆𑀪𑀦𑁆𑀢𑀭𑀕𑀢𑀸 𑀤𑁆𑀯𑁂 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀯𑀺𑀬, 𑀏𑀓𑀲𑁆𑀫𑀺𑀁 𑀕𑀕𑀦𑀝𑁆𑀞𑀸𑀦𑁂 𑀞𑀺𑀢𑀸𑀦𑀺 𑀤𑁆𑀯𑁂 𑀘𑀦𑁆𑀤𑀫𑀡𑁆𑀟𑀮𑀸𑀦𑀺 𑀯𑀺𑀬, 𑀤𑁆𑀯𑁂 𑀲𑀽𑀭𑀺𑀬𑀫𑀡𑁆𑀟𑀮𑀸𑀦𑀺 𑀯𑀺𑀬 𑀘 𑀯𑀺𑀭𑁄𑀘𑀺𑀁𑀲𑀼. 𑀢𑁂𑀲𑀼 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀺, 𑀆𑀬𑀲𑁆𑀫𑀸 𑀧𑀦 𑀲𑀸𑀭𑀺𑀧𑀼𑀢𑁆𑀢𑁄 𑀲𑀫𑀸𑀧𑀚𑁆𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀜𑁆𑀜𑀢𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸’’𑀢𑀺.

𑀢𑀢𑁆𑀣 𑀅𑀜𑁆𑀜𑀢𑀭𑀁 𑀲𑀫𑀸𑀥𑀺𑀦𑁆𑀢𑀺 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀁. 𑀓𑁂𑀘𑀺 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺’’𑀦𑁆𑀢𑀺 𑀯𑀤𑀦𑁆𑀢𑀺, 𑀅𑀧𑀭𑁂 𑀧𑀦𑀸𑀳𑀼 ‘‘𑀆𑀭𑀼𑀧𑁆𑀧𑀧𑀸𑀤𑀓𑀁 𑀨𑀮𑀲𑀫𑀸𑀧𑀢𑁆𑀢𑀺’’𑀦𑁆𑀢𑀺. 𑀇𑀫𑀸 𑀏𑀯 𑀳𑀺 𑀢𑀺𑀲𑁆𑀲𑁄 𑀓𑀸𑀬𑀭𑀓𑁆𑀔𑀡𑀲𑀫𑀢𑁆𑀣𑀸 𑀲𑀫𑀸𑀧𑀢𑁆𑀢𑀺𑀬𑁄. 𑀢𑀢𑁆𑀣 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀥𑀺𑀧𑀭𑀺𑀬𑀸𑀬𑀲𑀫𑁆𑀪𑀯𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯, 𑀧𑀘𑁆𑀙𑀺𑀫𑀁𑀬𑁂𑀯 𑀧𑀦 𑀆𑀘𑀭𑀺𑀬𑀸 𑀯𑀡𑁆𑀡𑁂𑀦𑁆𑀢𑀺. 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀕𑀘𑁆𑀙𑀦𑁆𑀢𑀻𑀢𑀺 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀬𑀓𑁆𑀔𑀲𑀫𑀸𑀕𑀫𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀪𑀯𑀦𑀁 𑀕𑀦𑁆𑀢𑀼𑀁 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀕𑀘𑁆𑀙𑀦𑁆𑀢𑀺. 𑀧𑀝𑀺𑀪𑀸𑀢𑀺 𑀫𑀦𑁆𑀢𑀺 𑀉𑀧𑀝𑁆𑀞𑀸𑀢𑀺 𑀫𑀫. 𑀫𑀦𑁆𑀢𑀺 𑀳𑀺 𑀧𑀝𑀺𑀲𑀤𑁆𑀤𑀬𑁄𑀕𑁂𑀦 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀇𑀫𑀲𑁆𑀲 𑀲𑀻𑀲𑁂 𑀧𑀳𑀸𑀭𑀁 𑀤𑀸𑀢𑀼𑀁 𑀘𑀺𑀢𑁆𑀢𑀁 𑀫𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀓𑀺𑀭 𑀧𑀼𑀭𑀺𑀫𑀚𑀸𑀢𑀺𑀬𑀁 𑀣𑁂𑀭𑁂 𑀩𑀤𑁆𑀥𑀸𑀖𑀸𑀢𑁄, 𑀢𑁂𑀦𑀲𑁆𑀲 𑀣𑁂𑀭𑀁 𑀤𑀺𑀲𑁆𑀯𑀸 𑀧𑀤𑀼𑀝𑁆𑀞𑀘𑀺𑀢𑁆𑀢𑀲𑁆𑀲 𑀏𑀯𑀁 𑀅𑀳𑁄𑀲𑀺. 𑀇𑀢𑀭𑁄 𑀧𑀦 𑀲𑀧𑁆𑀧𑀜𑁆𑀜𑀚𑀸𑀢𑀺𑀓𑁄, 𑀢𑀲𑁆𑀫𑀸 𑀢𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 ‘‘𑀅𑀮𑀁 𑀲𑀫𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀸 𑀆𑀲𑀸𑀤𑁂𑀲𑀻𑀢𑀺 𑀫𑀸 𑀖𑀝𑁆𑀝𑁂𑀲𑀺, 𑀫𑀸 𑀧𑀳𑀸𑀭𑀁 𑀤𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀴𑀸𑀭𑁄𑀢𑀺 𑀉𑀴𑀸𑀭𑁂𑀳𑀺 𑀉𑀢𑁆𑀢𑀫𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄.

𑀅𑀦𑀸𑀤𑀺𑀬𑀺𑀢𑁆𑀯𑀸𑀢𑀺 𑀆𑀤𑀭𑀁 𑀅𑀓𑀢𑁆𑀯𑀸, 𑀢𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸. 𑀬𑀲𑁆𑀫𑀸 𑀧𑀦 𑀢𑀲𑁆𑀲 𑀯𑀘𑀦𑀁 𑀅𑀕𑁆𑀕𑀡𑁆𑀳𑀦𑁆𑀢𑁄 𑀢𑀁 𑀅𑀦𑀸𑀤𑀺𑀬𑀦𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀢𑀁 𑀬𑀓𑁆𑀔𑀁 𑀅𑀦𑀸𑀤𑀺𑀬𑀺𑀢𑁆𑀯𑀸’’𑀢𑀺. 𑀲𑀻𑀲𑁂 𑀧𑀳𑀸𑀭𑀁 𑀅𑀤𑀸𑀲𑀻𑀢𑀺 𑀲𑀩𑁆𑀩𑀣𑀸𑀫𑁂𑀦 𑀉𑀲𑁆𑀲𑀸𑀳𑀁 𑀚𑀦𑁂𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄𑀯 𑀲𑀻𑀲𑁂 𑀔𑀝𑀓𑀁 𑀅𑀤𑀸𑀲𑀺, 𑀫𑀼𑀤𑁆𑀥𑀦𑀺 𑀫𑀼𑀝𑁆𑀞𑀺𑀖𑀸𑀢𑀁 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀸𑀯 𑀫𑀳𑀸𑀢𑀺 𑀣𑀸𑀫𑀫𑀳𑀢𑁆𑀢𑁂𑀦 𑀢𑀢𑁆𑀢𑀓𑀁 𑀫𑀳𑀦𑁆𑀢𑁄 𑀧𑀳𑀸𑀭𑁄 𑀅𑀳𑁄𑀲𑀺. 𑀢𑁂𑀦 𑀧𑀳𑀸𑀭𑁂𑀦𑀸𑀢𑀺 𑀢𑁂𑀦 𑀧𑀳𑀸𑀭𑁂𑀦 𑀓𑀭𑀡𑀪𑀽𑀢𑁂𑀦. 𑀲𑀢𑁆𑀢𑀭𑀢𑀦𑀦𑁆𑀢𑀺 𑀧𑀫𑀸𑀡𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀭𑀢𑀦𑁂𑀦 𑀲𑀢𑁆𑀢𑀭𑀢𑀦𑀁. 𑀦𑀸𑀕𑀦𑁆𑀢𑀺 𑀳𑀢𑁆𑀣𑀺𑀦𑀸𑀕𑀁. 𑀑𑀲𑀸𑀤𑁂𑀬𑁆𑀬𑀸𑀢𑀺 𑀧𑀣𑀯𑀺𑀬𑀁 𑀑𑀲𑀻𑀤𑀸𑀧𑁂𑀬𑁆𑀬 𑀦𑀺𑀫𑀼𑀚𑁆𑀚𑀸𑀧𑁂𑀬𑁆𑀬. ‘‘𑀑𑀲𑀸𑀭𑁂𑀬𑁆𑀬𑀸’’𑀢𑀺𑀧𑀺 𑀧𑀸𑀞𑁄, 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀟𑁆𑀠𑀝𑁆𑀞𑀫𑀭𑀢𑀦𑀦𑁆𑀢𑀺 𑀅𑀟𑁆𑀠𑁂𑀦 𑀅𑀝𑁆𑀞𑀦𑁆𑀦𑀁 𑀧𑀽𑀭𑀡𑀸𑀦𑀺 𑀅𑀟𑁆𑀠𑀝𑁆𑀞𑀫𑀸𑀦𑀺, 𑀅𑀟𑁆𑀠𑀝𑁆𑀞𑀫𑀸𑀦𑀺 𑀭𑀢𑀦𑀸𑀦𑀺 𑀧𑀫𑀸𑀡𑀁 𑀏𑀢𑀲𑁆𑀲𑀸𑀢𑀺 𑀅𑀟𑁆𑀠𑀝𑁆𑀞𑀫𑀭𑀢𑀦𑁄, 𑀢𑀁 𑀅𑀟𑁆𑀠𑀝𑁆𑀞𑀫𑀭𑀢𑀦𑀁. 𑀫𑀳𑀦𑁆𑀢𑀁 𑀧𑀩𑁆𑀩𑀢𑀓𑀽𑀝𑀦𑁆𑀢𑀺 𑀓𑁂𑀮𑀸𑀲𑀓𑀽𑀝𑀧𑁆𑀧𑀫𑀸𑀡𑀁 𑀯𑀺𑀧𑀼𑀮𑀁 𑀕𑀺𑀭𑀺𑀓𑀽𑀝𑀁. 𑀧𑀤𑀸𑀮𑁂𑀬𑁆𑀬𑀸𑀢𑀺 𑀲𑀓𑀮𑀺𑀓𑀸𑀓𑀸𑀭𑁂𑀦 𑀪𑀺𑀦𑁆𑀤𑁂𑀬𑁆𑀬. 𑀅𑀧𑀺 𑀑𑀲𑀸𑀤𑁂𑀬𑁆𑀬, 𑀅𑀧𑀺 𑀧𑀤𑀸𑀮𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀸𑀯𑀤𑁂𑀯 𑀘𑀲𑁆𑀲 𑀲𑀭𑀻𑀭𑁂 𑀫𑀳𑀸𑀧𑀭𑀺𑀴𑀸𑀳𑁄 𑀉𑀧𑁆𑀧𑀚𑁆𑀚𑀺, 𑀲𑁄 𑀯𑁂𑀤𑀦𑀸𑀢𑀼𑀭𑁄 𑀆𑀓𑀸𑀲𑁂 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀽𑀫𑀺𑀬𑀁 𑀧𑀢𑀺, 𑀢𑀗𑁆𑀔𑀡𑀜𑁆𑀜𑁂𑀯 𑀅𑀝𑁆𑀞𑀲𑀝𑁆𑀞𑀺𑀲𑀳𑀲𑁆𑀲𑀸𑀥𑀺𑀓𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀲𑀺𑀦𑁂𑀭𑀼𑀫𑁆𑀧𑀺 𑀧𑀩𑁆𑀩𑀢𑀭𑀸𑀚𑀸𑀦𑀁 𑀲𑀦𑁆𑀥𑀸𑀭𑁂𑀦𑁆𑀢𑀻 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸 𑀫𑀳𑀸𑀧𑀣𑀯𑀻 𑀢𑀁 𑀧𑀸𑀧𑀲𑀢𑁆𑀢𑀁 𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀯𑀺𑀬 𑀯𑀺𑀯𑀭𑀫𑀤𑀸𑀲𑀺. 𑀅𑀯𑀻𑀘𑀺𑀢𑁄 𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀓𑀦𑁆𑀤𑀦𑁆𑀢𑀁𑀬𑁂𑀯 𑀢𑀁 𑀕𑀡𑁆𑀳𑀺𑀁𑀲𑀼, 𑀲𑁄 𑀓𑀦𑁆𑀤𑀦𑁆𑀢𑁄 𑀯𑀺𑀧𑁆𑀧𑀮𑀧𑀦𑁆𑀢𑁄 𑀧𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀘 𑀧𑀦 𑀲𑁄 𑀬𑀓𑁆𑀔𑁄 ‘𑀟𑀬𑁆𑀳𑀸𑀫𑀺 𑀟𑀬𑁆𑀳𑀸𑀫𑀻’𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀫𑀳𑀸𑀦𑀺𑀭𑀬𑀁 𑀅𑀧𑀢𑀸𑀲𑀻𑀢𑀺. 𑀢𑀢𑁆𑀣 𑀅𑀧𑀢𑀸𑀲𑀻𑀢𑀺 𑀅𑀧𑀢𑀺.

𑀓𑀺𑀁 𑀧𑀦 𑀲𑁄 𑀬𑀓𑁆𑀔𑀢𑁆𑀢𑀪𑀸𑀯𑁂𑀦𑁂𑀯 𑀦𑀺𑀭𑀬𑀁 𑀉𑀧𑀕𑀘𑁆𑀙𑀻𑀢𑀺? 𑀦 𑀉𑀧𑀕𑀘𑁆𑀙𑀺, 𑀬𑀜𑁆𑀳𑁂𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀧𑀸𑀧𑀓𑀫𑁆𑀫𑀁 𑀅𑀳𑁄𑀲𑀺, 𑀢𑀲𑁆𑀲 𑀩𑀮𑁂𑀦 𑀬𑀓𑁆𑀔𑀢𑁆𑀢𑀪𑀸𑀯𑁂 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺. 𑀬𑀁 𑀧𑀦 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁, 𑀢𑁂𑀦 𑀘𑀼𑀢𑀺𑀅𑀦𑀦𑁆𑀢𑀭𑀁 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀻𑀢𑀺. 𑀣𑁂𑀭𑀲𑁆𑀲 𑀧𑀦 𑀲𑀫𑀸𑀧𑀢𑁆𑀢𑀺𑀩𑀮𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑀲𑀭𑀻𑀭𑀲𑁆𑀲 𑀦 𑀓𑁄𑀘𑀺 𑀯𑀺𑀓𑀸𑀭𑁄 𑀅𑀳𑁄𑀲𑀺. 𑀲𑀫𑀸𑀧𑀢𑁆𑀢𑀺𑀢𑁄 𑀅𑀯𑀼𑀝𑁆𑀞𑀺𑀢𑀓𑀸𑀮𑁂 𑀳𑀺 𑀢𑀁 𑀬𑀓𑁆𑀔𑁄 𑀧𑀳𑀭𑀺, 𑀢𑀣𑀸 𑀧𑀳𑀭𑀦𑁆𑀢𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀉𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀦𑀲𑀫𑀓𑀸𑀮𑀫𑁂𑀯 𑀘 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀫𑀸𑀧𑀢𑁆𑀢𑀺𑀢𑁄 𑀉𑀝𑁆𑀞𑀸𑀲𑀺. 𑀅𑀣 𑀦𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀭𑀻𑀭𑀯𑀼𑀢𑁆𑀢𑀺𑀁 𑀧𑀼𑀘𑁆𑀙𑀺, 𑀲𑁄𑀧𑀺𑀲𑁆𑀲 𑀩𑁆𑀬𑀸𑀓𑀸𑀲𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄…𑀧𑁂… 𑀅𑀧𑀺 𑀘 𑀫𑁂 𑀲𑀻𑀲𑀁 𑀣𑁄𑀓𑀁 𑀤𑀼𑀓𑁆𑀔’’𑀦𑁆𑀢𑀺.

𑀢𑀢𑁆𑀣 𑀣𑁄𑀓𑀁 𑀤𑀼𑀓𑁆𑀔𑀦𑁆𑀢𑀺 𑀣𑁄𑀓𑀁 𑀅𑀧𑁆𑀧𑀫𑀢𑁆𑀢𑀓𑀁 𑀫𑀥𑀼𑀭𑀓𑀚𑀸𑀢𑀁 𑀯𑀺𑀬 𑀫𑁂 𑀲𑀻𑀲𑀁 𑀤𑀼𑀓𑁆𑀔𑀺𑀢𑀁, 𑀤𑀼𑀓𑁆𑀔𑀧𑁆𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀸𑀥𑀺𑀝𑁆𑀞𑀸𑀦𑀜𑁆𑀳𑀺 𑀲𑀻𑀲𑀁 𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑀻𑀲𑁂 𑀣𑁄𑀓𑀁 𑀤𑀼𑀓𑁆𑀔’’𑀦𑁆𑀢𑀺𑀧𑀺 𑀧𑀸𑀞𑁄. 𑀓𑀣𑀁 𑀧𑀦 𑀲𑀫𑀸𑀧𑀢𑁆𑀢𑀺𑀩𑀮𑁂𑀦 𑀲𑀭𑀻𑀭𑁂 𑀉𑀧𑀢𑁆𑀣𑀫𑁆𑀪𑀺𑀢𑁂 𑀣𑁂𑀭𑀲𑁆𑀲 𑀲𑀻𑀲𑁂 𑀣𑁄𑀓𑀫𑁆𑀧𑀺 𑀤𑀼𑀓𑁆𑀔𑀁 𑀅𑀳𑁄𑀲𑀻𑀢𑀺? 𑀅𑀘𑀺𑀭𑁂𑀦𑁂𑀯 𑀯𑀼𑀝𑁆𑀞𑀺𑀢𑀢𑁆𑀢𑀸. 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀅𑀧𑀜𑁆𑀜𑀸𑀬𑀫𑀸𑀦𑀤𑀼𑀓𑁆𑀔𑀜𑁆𑀳𑀺 𑀓𑀸𑀬𑀦𑀺𑀲𑁆𑀲𑀺𑀢𑀢𑁆𑀢𑀸 𑀦𑀺𑀤𑁆𑀤𑀁 𑀉𑀧𑀕𑀢𑀲𑁆𑀲 𑀫𑀓𑀲𑀸𑀤𑀺𑀚𑀦𑀺𑀢𑀁 𑀯𑀺𑀬 𑀧𑀝𑀺𑀩𑀼𑀤𑁆𑀥𑀲𑁆𑀲 𑀣𑁄𑀓𑀁 𑀧𑀜𑁆𑀜𑀸𑀬𑀺𑀢𑁆𑀣.

‘‘𑀫𑀳𑀸𑀩𑀮𑁂𑀦 𑀬𑀓𑁆𑀔𑁂𑀦 𑀢𑀣𑀸 𑀲𑀩𑁆𑀩𑀼𑀲𑁆𑀲𑀸𑀳𑁂𑀦 𑀧𑀳𑀝𑁂 𑀲𑀭𑀻𑀭𑁂𑀧𑀺 𑀯𑀺𑀓𑀸𑀭𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁂𑀦 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 ‘‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀫𑀳𑀸𑀦𑀼𑀪𑀸𑀯𑀢𑀸𑀬 𑀯𑀺𑀪𑀸𑀯𑀺𑀢𑀸𑀬 𑀲𑁄𑀧𑀺𑀲𑁆𑀲 ‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺𑀆𑀤𑀺𑀦𑀸 𑀇𑀤𑁆𑀥𑀸𑀦𑀼𑀪𑀸𑀯𑀫𑀳𑀦𑁆𑀢𑀢𑀸𑀧𑀓𑀸𑀲𑀦𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀳𑀗𑁆𑀓𑀸𑀭𑀸𑀤𑀺𑀫𑀮𑀸𑀦𑀁 𑀲𑀼𑀧𑁆𑀧𑀳𑀻𑀦𑀢𑀁 𑀤𑀻𑀧𑁂𑀢𑀺. 𑀧𑀁𑀲𑀼𑀧𑀺𑀲𑀸𑀘𑀓𑀫𑁆𑀧𑀺 𑀦 𑀧𑀲𑁆𑀲𑀸𑀫𑀸𑀢𑀺 𑀲𑀗𑁆𑀓𑀸𑀭𑀓𑀽𑀝𑀸𑀤𑀻𑀲𑀼 𑀯𑀺𑀘𑀭𑀡𑀓𑀔𑀼𑀤𑁆𑀤𑀓𑀧𑁂𑀢𑀫𑁆𑀧𑀺 𑀦 𑀧𑀲𑁆𑀲𑀸𑀫. 𑀇𑀢𑀺 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑀸𑀦𑀁 𑀅𑀕𑁆𑀕𑀪𑀽𑀢𑁄 𑀫𑀳𑀸𑀣𑁂𑀭𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀦𑀸𑀯𑀚𑁆𑀚𑀦𑁂𑀦 𑀢𑁂𑀲𑀁 𑀅𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦𑁂𑀯𑀸𑀳 ‘‘𑀏𑀢𑀭𑀳𑀻’’𑀢𑀺.

𑀪𑀕𑀯𑀸 𑀧𑀦 𑀯𑁂𑀴𑀼𑀯𑀦𑁂 𑀞𑀺𑀢𑁄 𑀉𑀪𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁 𑀤𑀺𑀩𑁆𑀩𑀲𑁄𑀢𑁂𑀦 𑀅𑀲𑁆𑀲𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸’’𑀢𑀺𑀆𑀤𑀺, 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀩𑀮𑀽𑀧𑀕𑀢𑀁 𑀇𑀤𑁆𑀥𑀸𑀦𑀼𑀪𑀸𑀯𑀫𑀳𑀦𑁆𑀢𑀢𑀁 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀢𑀲𑁆𑀲𑁂𑀯 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺𑀤𑀻𑀧𑀓𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀲𑁆𑀲 𑀲𑁂𑀮𑀽𑀧𑀫𑀁 𑀘𑀺𑀢𑁆𑀢𑀁, 𑀞𑀺𑀢𑀁 𑀦𑀸𑀦𑀼𑀧𑀓𑀫𑁆𑀧𑀢𑀻𑀢𑀺 𑀬𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀖𑀦𑀲𑀺𑀮𑀸𑀫𑀬𑀧𑀩𑁆𑀩𑀢𑀽𑀧𑀫𑀁 𑀲𑀩𑁆𑀩𑁂𑀲𑀁 𑀇𑀜𑁆𑀚𑀦𑀸𑀦𑀁 𑀅𑀪𑀸𑀯𑀢𑁄 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸𑀯 𑀞𑀺𑀢𑀁 𑀲𑀩𑁆𑀩𑁂𑀳𑀺𑀧𑀺 𑀮𑁄𑀓𑀥𑀫𑁆𑀫𑁂𑀳𑀺 𑀦𑀸𑀦𑀼𑀧𑀓𑀫𑁆𑀧𑀢𑀺 𑀦 𑀧𑀯𑁂𑀥𑀢𑀺. 𑀇𑀤𑀸𑀦𑀺𑀲𑁆𑀲 𑀅𑀓𑀫𑁆𑀧𑀦𑀸𑀓𑀸𑀭𑀁 𑀲𑀤𑁆𑀥𑀺𑀁 𑀓𑀸𑀭𑀡𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀭𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀭𑀢𑁆𑀢𑀁 𑀭𑀚𑀦𑀻𑀬𑁂𑀲𑀽𑀢𑀺 𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀭𑀚𑀦𑀻𑀬𑁂𑀲𑀼 𑀭𑀸𑀕𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑁂𑀲𑀼 𑀲𑀩𑁆𑀩𑁂𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀯𑀺𑀭𑀢𑁆𑀢𑀁, 𑀢𑀢𑁆𑀣 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀭𑀸𑀕𑀦𑁆𑀢𑀺 𑀅𑀢𑁆𑀣𑁄. 𑀓𑁄𑀧𑀦𑁂𑀬𑁆𑀬𑁂𑀢𑀺 𑀧𑀝𑀺𑀖𑀝𑁆𑀞𑀸𑀦𑀻𑀬𑁂 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀆𑀖𑀸𑀢𑀯𑀢𑁆𑀣𑀼𑀲𑁆𑀫𑀺𑀁 𑀦 𑀓𑀼𑀧𑁆𑀧𑀢𑀺 𑀦 𑀤𑀼𑀲𑁆𑀲𑀢𑀺 𑀦 𑀯𑀺𑀓𑀸𑀭𑀁 𑀆𑀧𑀚𑁆𑀚𑀢𑀺. 𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀬𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀁 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀢𑀸𑀤𑀺𑀪𑀸𑀯𑀸𑀯𑀳𑀦𑀪𑀸𑀯𑁂𑀦 𑀪𑀸𑀯𑀺𑀢𑀁. 𑀓𑀼𑀢𑁄 𑀢𑀁 𑀤𑀼𑀓𑁆𑀔𑀫𑁂𑀲𑁆𑀲𑀢𑀻𑀢𑀺 𑀢𑀁 𑀉𑀢𑁆𑀢𑀫𑀧𑀼𑀕𑁆𑀕𑀮𑀁 𑀓𑀼𑀢𑁄 𑀲𑀢𑁆𑀢𑀢𑁄 𑀲𑀗𑁆𑀔𑀸𑀭𑀢𑁄 𑀯𑀸 𑀤𑀼𑀓𑁆𑀔𑀁 𑀉𑀧𑀕𑀫𑀺𑀲𑁆𑀲𑀢𑀺, 𑀦 𑀢𑀸𑀤𑀺𑀲𑀲𑁆𑀲 𑀤𑀼𑀓𑁆𑀔𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀘𑀢𑀼𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 𑀓𑁄𑀲𑀫𑁆𑀩𑀺𑀬𑀦𑁆𑀢𑀺 𑀓𑀼𑀲𑀼𑀫𑁆𑀩𑁂𑀦 𑀦𑀸𑀫 𑀇𑀲𑀺𑀦𑀸 𑀯𑀲𑀺𑀢𑀝𑁆𑀞𑀸𑀦𑁂 𑀫𑀸𑀧𑀺𑀢𑀢𑁆𑀢𑀸 ‘‘𑀓𑁄𑀲𑀫𑁆𑀩𑀻’’𑀢𑀺 𑀏𑀯𑀁𑀮𑀤𑁆𑀥𑀦𑀸𑀫𑀓𑁂 𑀦𑀕𑀭𑁂. 𑀖𑁄𑀲𑀺𑀢𑀸𑀭𑀸𑀫𑁂𑀢𑀺 𑀖𑁄𑀲𑀺𑀢𑀲𑁂𑀝𑁆𑀞𑀺𑀦𑀸 𑀓𑀸𑀭𑀺𑀢𑁂 𑀆𑀭𑀸𑀫𑁂. 𑀪𑀕𑀯𑀸 𑀆𑀓𑀺𑀡𑁆𑀡𑁄 𑀯𑀺𑀳𑀭𑀢𑀻𑀢𑀺 𑀪𑀕𑀯𑀸 𑀲𑀫𑁆𑀩𑀸𑀥𑀧𑁆𑀧𑀢𑁆𑀢𑁄 𑀯𑀺𑀳𑀭𑀢𑀺. 𑀓𑀺𑀁 𑀧𑀦 𑀪𑀕𑀯𑀢𑁄 𑀲𑀫𑁆𑀩𑀸𑀥𑁄 𑀅𑀢𑁆𑀣𑀺, 𑀲𑀁𑀲𑀕𑁆𑀕𑁄 𑀯𑀸𑀢𑀺? 𑀦𑀢𑁆𑀣𑀺. 𑀦 𑀳𑀺 𑀓𑁄𑀘𑀺 𑀪𑀕𑀯𑀦𑁆𑀢𑀁 𑀅𑀦𑀺𑀘𑁆𑀙𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀤𑀼𑀭𑀸𑀲𑀤𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀲𑀩𑁆𑀩𑀢𑁆𑀣 𑀘 𑀅𑀦𑀼𑀧𑀮𑀺𑀢𑁆𑀢𑀢𑁆𑀢𑀸. 𑀳𑀺𑀢𑁂𑀲𑀺𑀢𑀸𑀬 𑀧𑀦 𑀲𑀢𑁆𑀢𑁂𑀲𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 ‘‘𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀁 𑀅𑀝𑁆𑀞𑀦𑁆𑀦𑀁 𑀧𑀭𑀺𑀲𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀦𑀁 𑀅𑀥𑀺𑀯𑀸𑀲𑁂𑀢𑀺, 𑀲𑀬𑀜𑁆𑀘 𑀫𑀳𑀸𑀓𑀭𑀼𑀡𑀸𑀲𑀫𑀼𑀲𑁆𑀲𑀸𑀳𑀺𑀢𑁄 𑀓𑀸𑀮𑀜𑁆𑀜𑀽 𑀳𑀼𑀢𑁆𑀯𑀸 𑀢𑀢𑁆𑀣 𑀉𑀧𑀲𑀗𑁆𑀓𑀫𑀢𑀺, 𑀇𑀤𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀁, 𑀅𑀬𑀫𑀺𑀥 𑀆𑀓𑀺𑀡𑁆𑀡𑀯𑀺𑀳𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄.

𑀇𑀥 𑀧𑀦 𑀓𑁄𑀲𑀫𑁆𑀩𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀮𑀳𑀚𑀸𑀢𑀸𑀦𑀁 𑀲𑀢𑁆𑀣𑀸 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀯𑀢𑁆𑀣𑀼𑀁 𑀆𑀳𑀭𑀺𑀢𑁆𑀯𑀸, ‘‘𑀦 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀺, 𑀲𑀫𑁆𑀫𑀦𑁆𑀢𑀻𑀥 𑀓𑀼𑀤𑀸𑀘𑀦’’𑀦𑁆𑀢𑀺𑀆𑀤𑀺𑀦𑀸 (𑀥. 𑀧. 𑁫; 𑀫. 𑀦𑀺. 𑁩.𑁨𑁩𑁭; 𑀫𑀳𑀸𑀯. 𑁪𑁬𑁪) 𑀑𑀯𑀸𑀤𑀁 𑀅𑀤𑀸𑀲𑀺, 𑀢𑀁 𑀤𑀺𑀯𑀲𑀁 𑀢𑁂𑀲𑀁 𑀓𑀮𑀳𑀁 𑀓𑀭𑁄𑀦𑁆𑀢𑀸𑀦𑀁𑀬𑁂𑀯 𑀭𑀢𑁆𑀢𑀺 𑀯𑀺𑀪𑀸𑀢𑀸. 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀪𑀕𑀯𑀸 𑀢𑀫𑁂𑀯 𑀯𑀢𑁆𑀣𑀼𑀁 𑀓𑀣𑁂𑀲𑀺, 𑀢𑀁 𑀤𑀺𑀯𑀲𑀫𑁆𑀧𑀺 𑀢𑁂𑀲𑀁 𑀓𑀮𑀳𑀁 𑀓𑀭𑁄𑀦𑁆𑀢𑀸𑀦𑀁𑀬𑁂𑀯 𑀭𑀢𑁆𑀢𑀺 𑀯𑀺𑀪𑀸𑀢𑀸. 𑀢𑀢𑀺𑀬𑀤𑀺𑀯𑀲𑁂𑀧𑀺 𑀪𑀕𑀯𑀸 𑀢𑀫𑁂𑀯 𑀯𑀢𑁆𑀣𑀼𑀁 𑀓𑀣𑁂𑀲𑀺, 𑀅𑀣𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀯𑀫𑀸𑀳 𑁋 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂 𑀪𑀕𑀯𑀸, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼, 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺. 𑀲𑀢𑁆𑀣𑀸 ‘‘𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸 𑀔𑁄 𑀇𑀫𑁂 𑀫𑁄𑀖𑀧𑀼𑀭𑀺𑀲𑀸 𑀦 𑀤𑀸𑀦𑀺𑀫𑁂 𑀲𑀓𑁆𑀓𑀸 𑀲𑀜𑁆𑀜𑀸𑀧𑁂𑀢𑀼𑀁, 𑀦𑀢𑁆𑀣𑀺 𑀘𑁂𑀢𑁆𑀣 𑀲𑀜𑁆𑀜𑀸𑀧𑁂𑀢𑀩𑁆𑀩𑀸, 𑀬𑀁𑀦𑀽𑀦𑀸𑀳𑀁 𑀏𑀓𑀘𑀸𑀭𑀺𑀓𑀯𑀸𑀲𑀁 𑀯𑀲𑁂𑀬𑁆𑀬𑀁, 𑀏𑀯𑀁 𑀇𑀫𑁂 𑀪𑀺𑀓𑁆𑀔𑀽 𑀓𑀮𑀳𑀢𑁄 𑀑𑀭𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀏𑀯𑀁 𑀢𑁂𑀳𑀺 𑀓𑀮𑀳𑀓𑀸𑀭𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀸𑀲𑀁 𑀯𑀺𑀦𑁂𑀢𑀩𑁆𑀩𑀸𑀪𑀸𑀯𑀢𑁄 𑀉𑀧𑀸𑀲𑀓𑀸𑀤𑀻𑀳𑀺 𑀉𑀧𑀲𑀗𑁆𑀓𑀫𑀦𑀜𑁆𑀘 𑀆𑀓𑀺𑀡𑁆𑀡𑀯𑀺𑀳𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀆𑀓𑀺𑀡𑁆𑀡𑁄 𑀯𑀺𑀳𑀭𑀢𑀻’’𑀢𑀺𑀆𑀤𑀺.

𑀢𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀦 𑀲𑀼𑀔𑀁, 𑀅𑀦𑀸𑀭𑀸𑀥𑀺𑀢𑀘𑀺𑀢𑁆𑀢𑀢𑀸𑀬 𑀦 𑀇𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀦 𑀨𑀸𑀲𑀼 𑀯𑀺𑀳𑀭𑀸𑀫𑀻’’𑀢𑀺. 𑀯𑀽𑀧𑀓𑀝𑁆𑀞𑁄𑀢𑀺 𑀧𑀯𑀺𑀯𑁂𑀓𑀝𑁆𑀞𑁄 𑀤𑀽𑀭𑀻𑀪𑀽𑀢𑁄. 𑀢𑀣𑀸 𑀘𑀺𑀦𑁆𑀢𑁂𑀢𑁆𑀯𑀸𑀯 𑀪𑀕𑀯𑀸 𑀧𑀸𑀢𑁄𑀯 𑀲𑀭𑀻𑀭𑀧𑁆𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀓𑁄𑀲𑀫𑁆𑀩𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀜𑁆𑀘𑀺 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀏𑀓𑁄 𑀅𑀤𑀼𑀢𑀺𑀬𑁄 𑀕𑀦𑁆𑀢𑁆𑀯𑀸 𑀓𑁄𑀲𑀮𑀭𑀝𑁆𑀞𑁂 𑀧𑀸𑀮𑀺𑀮𑁂𑀬𑁆𑀬𑀓𑁂 𑀯𑀦𑀲𑀡𑁆𑀟𑁂 𑀪𑀤𑁆𑀤𑀲𑀸𑀮𑀫𑀽𑀮𑁂 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁…𑀧𑁂… 𑀪𑀤𑁆𑀤𑀲𑀸𑀮𑀫𑀽𑀮𑁂’’𑀢𑀺. 𑀢𑀢𑁆𑀣 𑀲𑀸𑀫𑀦𑁆𑀢𑀺 𑀲𑀬𑀁. 𑀲𑀁𑀲𑀸𑀫𑁂𑀢𑁆𑀯𑀸𑀢𑀺 𑀧𑀝𑀺𑀲𑀸𑀫𑁂𑀢𑁆𑀯𑀸. 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀲𑀸𑀫𑀦𑁆𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀉𑀧𑀝𑁆𑀞𑀸𑀓𑁂𑀢𑀺 𑀓𑁄𑀲𑀫𑁆𑀩𑀺𑀦𑀕𑀭𑀯𑀸𑀲𑀺𑀦𑁄 𑀖𑁄𑀲𑀺𑀢𑀲𑁂𑀝𑁆𑀞𑀺𑀆𑀤𑀺𑀓𑁂 𑀉𑀧𑀝𑁆𑀞𑀸𑀓𑁂, 𑀯𑀺𑀳𑀸𑀭𑁂 𑀘 𑀅𑀕𑁆𑀕𑀼𑀧𑀝𑁆𑀞𑀸𑀓𑀁 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀦𑀸𑀫𑀦𑁆𑀢𑁂𑀢𑁆𑀯𑀸.

𑀏𑀯𑀁 𑀕𑀢𑁂 𑀲𑀢𑁆𑀣𑀭𑀺 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄 𑀆𑀦𑀦𑁆𑀤, 𑀲𑀢𑁆𑀣𑀸 𑀏𑀓𑀓𑁄𑀯 𑀕𑀢𑁄, 𑀫𑀬𑀁 𑀅𑀦𑀼𑀩𑀦𑁆𑀥𑀺𑀲𑁆𑀲𑀸𑀫𑀸’’𑀢𑀺. ‘‘𑀆𑀯𑀼𑀲𑁄, 𑀬𑀤𑀸 𑀪𑀕𑀯𑀸 𑀲𑀸𑀫𑀁 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑁂 𑀘 𑀅𑀦𑀧𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀤𑀼𑀢𑀺𑀬𑁄 𑀕𑀘𑁆𑀙𑀢𑀺, 𑀢𑀤𑀸 𑀏𑀓𑀘𑀸𑀭𑀁 𑀘𑀭𑀺𑀢𑀼𑀁 𑀪𑀕𑀯𑀢𑁄 𑀅𑀚𑁆𑀛𑀸𑀲𑀬𑁄, 𑀲𑀸𑀯𑀓𑁂𑀦 𑀦𑀸𑀫 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀦 𑀇𑀫𑁂𑀲𑀼 𑀤𑀺𑀯𑀲𑁂𑀲𑀼 𑀪𑀕𑀯𑀸 𑀅𑀦𑀼𑀕𑀦𑁆𑀢𑀩𑁆𑀩𑁄’’𑀢𑀺 𑀦𑀺𑀯𑀸𑀭𑁂𑀲𑀺, 𑀲𑀬𑀫𑁆𑀧𑀺 𑀦𑀸𑀦𑀼𑀕𑀘𑁆𑀙𑀺.

𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 𑀅𑀦𑀼𑀓𑁆𑀓𑀫𑁂𑀦, 𑀕𑀸𑀫𑀦𑀺𑀕𑀫𑀧𑀝𑀺𑀧𑀸𑀝𑀺𑀬𑀸 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 ‘‘𑀏𑀓𑀘𑀸𑀭𑀯𑀸𑀲𑀁 𑀢𑀸𑀯 𑀯𑀲𑀫𑀸𑀦𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀩𑀸𑀮𑀓𑀮𑁄𑀡𑀓𑀸𑀭𑀕𑀸𑀫𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀪𑀕𑀼𑀢𑁆𑀣𑁂𑀭𑀲𑁆𑀲 𑀲𑀓𑀮𑀁 𑀧𑀘𑁆𑀙𑀸𑀪𑀢𑁆𑀢𑀜𑁆𑀘𑁂𑀯 𑀢𑀺𑀬𑀸𑀫𑀜𑁆𑀘 𑀭𑀢𑁆𑀢𑀺𑀁 𑀏𑀓𑀘𑀸𑀭𑀯𑀸𑀲𑁂 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀢𑀁 𑀢𑀢𑁆𑀣𑁂𑀯 𑀦𑀺𑀯𑀢𑁆𑀢𑁂𑀢𑁆𑀯𑀸 ‘‘𑀲𑀫𑀕𑁆𑀕𑀯𑀸𑀲𑀁 𑀯𑀲𑀫𑀸𑀦𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀘𑀻𑀦𑀯𑀁𑀲𑀫𑀺𑀕𑀤𑀸𑀬𑀁 𑀕𑀦𑁆𑀢𑁆𑀯𑀸 𑀢𑁂𑀲𑀫𑁆𑀧𑀺 𑀲𑀓𑀮𑀭𑀢𑁆𑀢𑀺𑀁 𑀲𑀫𑀕𑁆𑀕𑀯𑀸𑀲𑁂 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀢𑁂𑀧𑀺 𑀢𑀢𑁆𑀣𑁂𑀯 𑀦𑀺𑀯𑀢𑁆𑀢𑁂𑀢𑁆𑀯𑀸 𑀏𑀓𑀓𑁄𑀯 𑀧𑀸𑀮𑀺𑀮𑁂𑀬𑁆𑀬𑀕𑀸𑀫𑀁 𑀲𑀫𑁆𑀧𑀢𑁆𑀢𑁄. 𑀧𑀸𑀮𑀺𑀮𑁂𑀬𑁆𑀬𑀕𑀸𑀫𑀯𑀸𑀲𑀺𑀦𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀤𑀸𑀦𑀁 𑀤𑀢𑁆𑀯𑀸 𑀧𑀸𑀮𑀺𑀮𑁂𑀬𑁆𑀬𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁄 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀪𑀕𑀯𑀢𑁄 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 ‘‘𑀏𑀢𑁆𑀣 𑀪𑀕𑀯𑀸 𑀯𑀲𑀢𑀽’’𑀢𑀺 𑀬𑀸𑀘𑀺𑀢𑁆𑀯𑀸 𑀯𑀸𑀲𑀬𑀺𑀁𑀲𑀼. 𑀪𑀤𑁆𑀤𑀲𑀸𑀮𑁄𑀢𑀺 𑀧𑀦 𑀢𑀢𑁆𑀣𑁂𑀓𑁄 𑀫𑀦𑀸𑀧𑁄 𑀪𑀤𑁆𑀤𑀓𑁄 𑀲𑀸𑀮𑀭𑀼𑀓𑁆𑀔𑁄, 𑀪𑀕𑀯𑀸 𑀢𑀁 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀦𑀲𑀡𑁆𑀟𑁂 𑀧𑀡𑁆𑀡𑀲𑀸𑀮𑀲𑀫𑀻𑀧𑁂 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀸𑀮𑀺𑀮𑁂𑀬𑁆𑀬𑀓𑁂 𑀯𑀺𑀳𑀭𑀢𑀺 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁂 𑀪𑀤𑁆𑀤𑀲𑀸𑀮𑀫𑀽𑀮𑁂’’𑀢𑀺.

𑀳𑀢𑁆𑀣𑀺𑀦𑀸𑀕𑁄𑀢𑀺 𑀫𑀳𑀸𑀳𑀢𑁆𑀣𑀻 𑀬𑀽𑀣𑀧𑀢𑀺. 𑀳𑀢𑁆𑀣𑀺𑀓𑀮𑀪𑁂𑀳𑀻𑀢𑀺 𑀳𑀢𑁆𑀣𑀺𑀧𑁄𑀢𑀓𑁂𑀳𑀺. 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀻𑀢𑀺 𑀔𑀻𑀭𑀽𑀧𑀕𑁂𑀳𑀺 𑀤𑀳𑀭𑀳𑀢𑁆𑀣𑀺𑀧𑁄𑀢𑀓𑁂𑀳𑀺, 𑀬𑁂 ‘‘𑀪𑀺𑀗𑁆𑀓𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀙𑀺𑀦𑁆𑀦𑀕𑁆𑀕𑀸𑀦𑀻𑀢𑀺 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁂𑀳𑀺 𑀢𑁂𑀳𑀺 𑀳𑀢𑁆𑀣𑀺𑀆𑀤𑀻𑀳𑀺 𑀙𑀺𑀦𑁆𑀦𑀕𑁆𑀕𑀸𑀦𑀺 𑀔𑀸𑀤𑀺𑀢𑀸𑀯𑀲𑁂𑀲𑀸𑀦𑀺 𑀔𑀸𑀡𑀼𑀲𑀤𑀺𑀲𑀸𑀦𑀺 𑀔𑀸𑀤𑀢𑀺. 𑀑𑀪𑀕𑁆𑀕𑁄𑀪𑀕𑁆𑀕𑀦𑁆𑀢𑀺 𑀢𑁂𑀦 𑀳𑀢𑁆𑀣𑀺𑀦𑀸𑀕𑁂𑀦 𑀉𑀘𑁆𑀘𑀝𑁆𑀞𑀸𑀦𑀢𑁄 𑀪𑀜𑁆𑀚𑀺𑀢𑁆𑀯𑀸 𑀪𑀜𑁆𑀚𑀺𑀢𑁆𑀯𑀸 𑀧𑀸𑀢𑀺𑀢𑀁. 𑀅𑀲𑁆𑀲 𑀲𑀸𑀔𑀸𑀪𑀗𑁆𑀕𑀦𑁆𑀢𑀺 𑀏𑀢𑀲𑁆𑀲 𑀲𑀦𑁆𑀢𑀓𑀁 𑀲𑀸𑀔𑀸𑀪𑀗𑁆𑀕𑀁 𑀢𑁂 𑀔𑀸𑀤𑀦𑁆𑀢𑀺. 𑀆𑀯𑀺𑀮𑀸𑀦𑀻𑀢𑀺 𑀢𑁂𑀳𑀺 𑀧𑀞𑀫𑀢𑀭𑀁 𑀑𑀢𑀭𑀺𑀢𑁆𑀯𑀸 𑀧𑀺𑀯𑀦𑁆𑀢𑁂𑀳𑀺 𑀆𑀮𑀼𑀴𑀺𑀢𑀢𑁆𑀢𑀸 𑀆𑀯𑀺𑀮𑀸𑀦𑀺 𑀓𑀤𑁆𑀤𑀫𑀫𑀺𑀲𑁆𑀲𑀸𑀦𑀺 𑀧𑀸𑀦𑀻𑀬𑀸𑀦𑀺 𑀧𑀺𑀯𑀢𑀺. 𑀑𑀕𑀸𑀳𑀸𑀢𑀺 𑀢𑀺𑀢𑁆𑀣𑀢𑁄. ‘‘𑀑𑀕𑀸𑀳’’𑀦𑁆𑀢𑀺𑀧𑀺 𑀧𑀸𑀴𑀺. 𑀅𑀲𑁆𑀲𑀸𑀢𑀺 𑀳𑀢𑁆𑀣𑀺𑀦𑀸𑀕𑀲𑁆𑀲. 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄𑀢𑀺 𑀖𑀝𑁆𑀝𑁂𑀦𑁆𑀢𑀺𑀬𑁄, 𑀉𑀧𑀦𑀺𑀖𑀁𑀲𑀺𑀬𑀫𑀸𑀦𑁄𑀧𑀺 𑀅𑀢𑁆𑀢𑀦𑁄 𑀉𑀴𑀸𑀭𑀪𑀸𑀯𑁂𑀦 𑀦 𑀓𑀼𑀚𑁆𑀛𑀢𑀺, 𑀢𑁂𑀦 𑀢𑀸 𑀢𑀁 𑀖𑀁𑀲𑀦𑁆𑀢𑀺𑀬𑁂𑀯. 𑀬𑀽𑀣𑀸𑀢𑀺 𑀳𑀢𑁆𑀣𑀺𑀖𑀝𑀸.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀲𑁄 𑀓𑀺𑀭 𑀳𑀢𑁆𑀣𑀺𑀦𑀸𑀕𑁄 𑀬𑀽𑀣𑀯𑀸𑀲𑁂 𑀉𑀓𑁆𑀓𑀡𑁆𑀞𑀺𑀢𑁄 𑀢𑀁 𑀯𑀦𑀲𑀡𑁆𑀟𑀁 𑀧𑀯𑀺𑀝𑁆𑀞𑁄 𑀢𑀢𑁆𑀣 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀖𑀝𑀲𑀳𑀲𑁆𑀲𑁂𑀦 𑀦𑀺𑀩𑁆𑀩𑀸𑀧𑀺𑀢𑀲𑀦𑁆𑀢𑀸𑀧𑁄 𑀯𑀺𑀬 𑀦𑀺𑀩𑁆𑀩𑀼𑀢𑁄 𑀳𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺, 𑀢𑀢𑁄 𑀧𑀝𑁆𑀞𑀸𑀬 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀪𑀤𑁆𑀤𑀲𑀸𑀮𑀲𑁆𑀲 𑀧𑀡𑁆𑀡𑀲𑀸𑀮𑀸𑀬 𑀘 𑀲𑀫𑀦𑁆𑀢𑀢𑁄 𑀅𑀧𑁆𑀧𑀳𑀭𑀺𑀢𑀓𑀁 𑀓𑀢𑁆𑀯𑀸 𑀲𑀸𑀔𑀸𑀪𑀗𑁆𑀕𑁂𑀳𑀺 𑀲𑀫𑁆𑀫𑀚𑁆𑀚𑀢𑀺, 𑀪𑀕𑀯𑀢𑁄 𑀫𑀼𑀔𑀥𑁄𑀯𑀦𑀁 𑀤𑁂𑀢𑀺, 𑀦𑁆𑀳𑀸𑀦𑁄𑀤𑀓𑀁 𑀆𑀳𑀭𑀢𑀺, 𑀤𑀦𑁆𑀢𑀓𑀝𑁆𑀞𑀁 𑀤𑁂𑀢𑀺, 𑀅𑀭𑀜𑁆𑀜𑀢𑁄 𑀫𑀥𑀼𑀭𑀸𑀦𑀺 𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀲𑀢𑁆𑀣𑀼 𑀉𑀧𑀦𑁂𑀢𑀺, 𑀲𑀢𑁆𑀣𑀸 𑀢𑀸𑀦𑀺 𑀧𑀭𑀺𑀪𑀼𑀜𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀢𑁆𑀭 𑀲𑀼𑀤𑀁 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀪𑀕𑀯𑀸 𑀯𑀺𑀳𑀭𑀢𑀺, 𑀢𑀁 𑀧𑀤𑁂𑀲𑀁 𑀅𑀧𑁆𑀧𑀳𑀭𑀺𑀢𑀜𑁆𑀘 𑀓𑀭𑁄𑀢𑀺, 𑀲𑁄𑀡𑁆𑀟𑀸𑀬 𑀪𑀕𑀯𑀢𑁄 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀻’’𑀢𑀺. 𑀲𑁄𑀡𑁆𑀟𑀸𑀬 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀖𑀁𑀲𑀺𑀢𑁆𑀯𑀸 𑀅𑀕𑁆𑀕𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀤𑀸𑀭𑀽𑀦𑀺 𑀚𑀸𑀮𑀸𑀧𑁂𑀢𑁆𑀯𑀸 𑀢𑀢𑁆𑀣 𑀧𑀸𑀲𑀸𑀡𑀔𑀡𑁆𑀟𑀸𑀦𑀺 𑀢𑀸𑀧𑁂𑀢𑁆𑀯𑀸 𑀢𑀸𑀦𑀺 𑀤𑀡𑁆𑀟𑀓𑁂𑀳𑀺 𑀧𑀯𑀝𑁆𑀝𑁂𑀢𑁆𑀯𑀸 𑀲𑁄𑀡𑁆𑀟𑀺𑀬𑀁 𑀔𑀺𑀧𑀺𑀢𑁆𑀯𑀸 𑀉𑀤𑀓𑀲𑁆𑀲 𑀢𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀪𑀕𑀯𑀸 ‘‘𑀳𑀢𑁆𑀣𑀺𑀦𑀸𑀕𑁄 𑀫𑀫 𑀦𑁆𑀳𑀸𑀦𑀁 𑀇𑀘𑁆𑀙𑀢𑀻’’𑀢𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑁆𑀳𑀸𑀦𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀧𑀸𑀦𑀻𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀺𑀁 𑀧𑀦 𑀲𑀻𑀢𑀮𑁂 𑀲𑀜𑁆𑀚𑀸𑀢𑁂 𑀉𑀧𑀲𑀗𑁆𑀓𑀫𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑁄𑀡𑁆𑀟𑀸𑀬 𑀪𑀕𑀯𑀢𑁄 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲𑀸𑀢𑀺𑀆𑀤𑀺 𑀉𑀪𑀺𑀦𑁆𑀦𑀁 𑀫𑀳𑀸𑀦𑀸𑀕𑀸𑀦𑀁 𑀯𑀺𑀯𑁂𑀓𑀲𑀼𑀔𑀧𑀘𑁆𑀘𑀯𑁂𑀓𑁆𑀔𑀡𑀤𑀲𑁆𑀲𑀦𑀁, 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀢𑁆𑀢𑀦𑁄 𑀘 𑀧𑀯𑀺𑀯𑁂𑀓𑀁 𑀯𑀺𑀤𑀺𑀢𑁆𑀯𑀸𑀢𑀺 𑀓𑁂𑀳𑀺𑀘𑀺 𑀅𑀦𑀸𑀓𑀺𑀡𑁆𑀡𑀪𑀸𑀯𑀮𑀤𑁆𑀥𑀁 𑀓𑀸𑀬𑀯𑀺𑀯𑁂𑀓𑀁 𑀚𑀸𑀦𑀺𑀢𑁆𑀯𑀸, 𑀇𑀢𑀭𑁂 𑀧𑀦 𑀯𑀺𑀯𑁂𑀓𑀸 𑀪𑀕𑀯𑀢𑁄 𑀲𑀩𑁆𑀩𑀓𑀸𑀮𑀁 𑀯𑀺𑀚𑁆𑀚𑀦𑁆𑀢𑀺𑀬𑁂𑀯.

𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀅𑀢𑁆𑀢𑀦𑁄 𑀳𑀢𑁆𑀣𑀺𑀦𑀸𑀕𑀲𑁆𑀲 𑀘 𑀧𑀯𑀺𑀯𑁂𑀓𑀸𑀪𑀺𑀭𑀢𑀺𑀬𑀸 𑀲𑀫𑀸𑀦𑀚𑁆𑀛𑀸𑀲𑀬𑀪𑀸𑀯𑀤𑀻𑀧𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀏𑀢𑀁 𑀈𑀲𑀸𑀤𑀦𑁆𑀢𑀲𑁆𑀲 𑀭𑀣𑀈𑀲𑀸𑀲𑀤𑀺𑀲𑀤𑀦𑁆𑀢𑀲𑁆𑀲 𑀳𑀢𑁆𑀣𑀺𑀦𑀸𑀕𑀲𑁆𑀲 𑀘𑀺𑀢𑁆𑀢𑀁 𑀦𑀸𑀕𑁂𑀦 𑀩𑀼𑀤𑁆𑀥𑀦𑀸𑀕𑀲𑁆𑀲 𑀘𑀺𑀢𑁆𑀢𑁂𑀦 𑀲𑀫𑁂𑀢𑀺 𑀲𑀁𑀲𑀦𑁆𑀤𑀢𑀺. 𑀓𑀣𑀁 𑀲𑀫𑁂𑀢𑀺 𑀘𑁂? 𑀬𑀤𑁂𑀓𑁄 𑀭𑀫𑀢𑀻 𑀯𑀦𑁂 𑀬𑀲𑁆𑀫𑀸 𑀩𑀼𑀤𑁆𑀥𑀦𑀸𑀕𑁄 ‘‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀆𑀓𑀺𑀡𑁆𑀡𑁄 𑀯𑀺𑀳𑀸𑀲𑀺’’𑀦𑁆𑀢𑀺 𑀧𑀼𑀭𑀺𑀫𑀁 𑀆𑀓𑀺𑀡𑁆𑀡𑀯𑀺𑀳𑀸𑀭𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀯𑀺𑀯𑁂𑀓𑀁 𑀉𑀧𑀩𑁆𑀭𑀽𑀳𑀬𑀫𑀸𑀦𑁄 𑀇𑀤𑀸𑀦𑀺 𑀬𑀣𑀸 𑀏𑀓𑁄 𑀅𑀤𑀼𑀢𑀺𑀬𑁄 𑀯𑀦𑁂 𑀅𑀭𑀜𑁆𑀜𑁂 𑀭𑀫𑀢𑀺 𑀅𑀪𑀺𑀭𑀫𑀢𑀺, 𑀏𑀯𑀁 𑀅𑀬𑀫𑁆𑀧𑀺 𑀳𑀢𑁆𑀣𑀺𑀦𑀸𑀕𑁄 𑀧𑀼𑀩𑁆𑀩𑁂 𑀅𑀢𑁆𑀢𑀦𑁄 𑀳𑀢𑁆𑀣𑀺𑀆𑀤𑀻𑀳𑀺 𑀆𑀓𑀺𑀡𑁆𑀡𑀯𑀺𑀳𑀸𑀭𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀯𑀺𑀯𑁂𑀓𑀁 𑀉𑀧𑀩𑁆𑀭𑀽𑀳𑀬𑀫𑀸𑀦𑁄 𑀇𑀤𑀸𑀦𑀺 𑀏𑀓𑁄 𑀅𑀲𑀳𑀸𑀬𑁄 𑀯𑀦𑁂 𑀅𑀭𑀜𑁆𑀜𑁂 𑀭𑀫𑀢𑀺 𑀅𑀪𑀺𑀭𑀫𑀢𑀺. 𑀢𑀲𑁆𑀫𑀸𑀲𑁆𑀲 𑀘𑀺𑀢𑁆𑀢𑀁 𑀦𑀸𑀕𑁂𑀦 𑀲𑀫𑁂𑀢𑀺 𑀢𑀲𑁆𑀲 𑀘𑀺𑀢𑁆𑀢𑁂𑀦 𑀲𑀫𑁂𑀢𑀻𑀢𑀺 𑀓𑀢𑁆𑀯𑀸 𑀏𑀓𑀻𑀪𑀸𑀯𑀭𑀢𑀺𑀬𑀸 𑀏𑀓𑀲𑀤𑀺𑀲𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀺𑀡𑁆𑀟𑁄𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀙𑀝𑁆𑀞𑁂 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄𑀢𑀺 𑀧𑀺𑀡𑁆𑀟𑀁 𑀉𑀮𑀫𑀸𑀦𑁄 𑀧𑀭𑀺𑀬𑁂𑀲𑀫𑀸𑀦𑁄 𑀧𑀩𑁆𑀩𑀚𑀺𑀢𑁄𑀢𑀺 𑀧𑀺𑀡𑁆𑀟𑁄𑀮𑁄. 𑀲𑁄 𑀓𑀺𑀭 𑀧𑀭𑀺𑀚𑀺𑀡𑁆𑀡𑀪𑁄𑀕𑁄 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀫𑀳𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀁 𑀤𑀺𑀲𑁆𑀯𑀸 𑀧𑀺𑀡𑁆𑀟𑀢𑁆𑀣𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄. 𑀲𑁄 𑀫𑀳𑀦𑁆𑀢𑀁 𑀓𑀧𑀮𑁆𑀮𑀁 ‘‘𑀧𑀢𑁆𑀢’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀘𑀭𑀢𑀺, 𑀓𑀧𑀮𑁆𑀮𑀧𑀽𑀭𑀁 𑀬𑀸𑀕𑀼𑀁 𑀧𑀺𑀯𑀢𑀺, 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀧𑀽𑀯𑀔𑀚𑁆𑀚𑀓𑀜𑁆𑀘 𑀔𑀸𑀤𑀢𑀺. 𑀅𑀣𑀲𑁆𑀲 𑀫𑀳𑀕𑁆𑀖𑀲𑀪𑀸𑀯𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑀲𑁆𑀲 𑀧𑀢𑁆𑀢𑀢𑁆𑀣𑀯𑀺𑀓𑀁 𑀦𑀸𑀦𑀼𑀚𑀸𑀦𑀺, 𑀳𑁂𑀝𑁆𑀞𑀸𑀫𑀜𑁆𑀘𑁂 𑀧𑀢𑁆𑀢𑀁 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀞𑀧𑁂𑀢𑀺, 𑀲𑁄 𑀞𑀧𑁂𑀦𑁆𑀢𑁄𑀧𑀺 𑀖𑀁𑀲𑁂𑀦𑁆𑀢𑁄𑀯 𑀧𑀡𑀸𑀫𑁂𑀢𑁆𑀯𑀸 𑀞𑀧𑁂𑀢𑀺, 𑀕𑀡𑁆𑀳𑀦𑁆𑀢𑁄𑀧𑀺 𑀖𑀁𑀲𑁂𑀦𑁆𑀢𑁄𑀯 𑀆𑀓𑀟𑁆𑀠𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀢𑀁 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀖𑀁𑀲𑀦𑁂𑀦 𑀧𑀭𑀺𑀓𑁆𑀔𑀻𑀡𑀁, 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀲𑁆𑀲𑁂𑀯 𑀕𑀡𑁆𑀳𑀦𑀓𑀁 𑀚𑀸𑀢𑀁. 𑀢𑀢𑁄 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁, 𑀅𑀣𑀲𑁆𑀲 𑀲𑀢𑁆𑀣𑀸 𑀧𑀢𑁆𑀢𑀢𑁆𑀣𑀯𑀺𑀓𑀁 𑀅𑀦𑀼𑀚𑀸𑀦𑀺. 𑀣𑁂𑀭𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀁 𑀪𑀸𑀯𑁂𑀦𑁆𑀢𑁄 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀇𑀢𑀺 𑀲𑁄 𑀧𑀼𑀩𑁆𑀩𑁂 𑀲𑀯𑀺𑀲𑁂𑀲𑀁 𑀧𑀺𑀡𑁆𑀟𑀢𑁆𑀣𑀸𑀬 𑀉𑀮𑀢𑀻𑀢𑀺 𑀧𑀺𑀡𑁆𑀟𑁄𑀮𑁄, 𑀕𑁄𑀢𑁆𑀢𑁂𑀦 𑀧𑀦 𑀪𑀸𑀭𑀤𑁆𑀯𑀸𑀚𑁄𑀢𑀺 𑀉𑀪𑀬𑀁 𑀏𑀓𑀢𑁄 𑀓𑀢𑁆𑀯𑀸 ‘‘𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄’’𑀢𑀺 𑀯𑀼𑀘𑁆𑀘𑀢𑀺.

𑀆𑀭𑀜𑁆𑀜𑀓𑁄𑀢𑀺 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀧𑀝𑀺𑀓𑁆𑀔𑀺𑀧𑀦𑁂𑀦 𑀅𑀭𑀜𑁆𑀜𑁂 𑀦𑀺𑀯𑀸𑀲𑁄 𑀅𑀲𑁆𑀲𑀸𑀢𑀺 𑀆𑀭𑀜𑁆𑀜𑀓𑁄, 𑀆𑀭𑀜𑁆𑀜𑀓𑀥𑀼𑀢𑀗𑁆𑀕𑀁 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀣𑀸 𑀪𑀺𑀓𑁆𑀔𑀸𑀲𑀗𑁆𑀔𑀸𑀢𑀸𑀦𑀁 𑀆𑀫𑀺𑀲𑀧𑀺𑀡𑁆𑀟𑀸𑀦𑀁 𑀧𑀸𑀢𑁄 𑀧𑀺𑀡𑁆𑀟𑀧𑀸𑀢𑁄, 𑀧𑀭𑁂𑀳𑀺 𑀤𑀺𑀦𑁆𑀦𑀸𑀦𑀁 𑀧𑀺𑀡𑁆𑀟𑀸𑀦𑀁 𑀧𑀢𑁆𑀢𑁂 𑀦𑀺𑀧𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀺𑀡𑁆𑀟𑀧𑀸𑀢𑀁 𑀉𑀜𑁆𑀙𑀢𑀺 𑀢𑀁 𑀢𑀁 𑀓𑀼𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑁄 𑀕𑀯𑁂𑀲𑀢𑀻𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑁄, 𑀧𑀺𑀡𑁆𑀟𑀸𑀬 𑀯𑀸 𑀧𑀢𑀺𑀢𑀼𑀁 𑀘𑀭𑀺𑀢𑀼𑀁 𑀯𑀢𑀫𑁂𑀢𑀲𑁆𑀲𑀸𑀢𑀺 𑀧𑀺𑀡𑁆𑀟𑀧𑀸𑀢𑀻, 𑀧𑀺𑀡𑁆𑀟𑀧𑀸𑀢𑀻𑀬𑁂𑀯 𑀧𑀺𑀡𑁆𑀟𑀧𑀸𑀢𑀺𑀓𑁄. 𑀲𑀗𑁆𑀓𑀸𑀭𑀓𑀽𑀝𑀸𑀤𑀻𑀲𑀼 𑀧𑀁𑀲𑀽𑀦𑀁 𑀉𑀧𑀭𑀺 𑀞𑀺𑀢𑀢𑁆𑀢𑀸 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀧𑀁𑀲𑀼𑀓𑀽𑀮𑀁 𑀯𑀺𑀬𑀸𑀢𑀺 𑀧𑀁𑀲𑀼𑀓𑀽𑀮𑀁, 𑀧𑀁𑀲𑀼 𑀯𑀺𑀬 𑀯𑀸 𑀓𑀼𑀘𑁆𑀙𑀺𑀢𑀪𑀸𑀯𑀁 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀧𑀁𑀲𑀼𑀓𑀽𑀮𑀁, 𑀧𑀁𑀲𑀼𑀓𑀽𑀮𑀲𑁆𑀲 𑀥𑀸𑀭𑀡𑀁 𑀧𑀁𑀲𑀼𑀓𑀽𑀮𑀁, 𑀢𑀁 𑀲𑀻𑀮𑀁 𑀏𑀢𑀲𑁆𑀲𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑁄. 𑀲𑀗𑁆𑀖𑀸𑀝𑀺𑀉𑀢𑁆𑀢𑀭𑀸𑀲𑀗𑁆𑀕𑀅𑀦𑁆𑀢𑀭𑀯𑀸𑀲𑀓𑀲𑀗𑁆𑀔𑀸𑀢𑀸𑀦𑀺 𑀢𑀻𑀡𑀺 𑀘𑀻𑀯𑀭𑀸𑀦𑀺 𑀢𑀺𑀘𑀻𑀯𑀭𑀁, 𑀢𑀺𑀘𑀻𑀯𑀭𑀲𑁆𑀲 𑀥𑀸𑀭𑀡𑀁 𑀢𑀺𑀘𑀻𑀯𑀭𑀁, 𑀢𑀁 𑀲𑀻𑀮𑀁 𑀏𑀢𑀲𑁆𑀲𑀸𑀢𑀺 𑀢𑁂𑀘𑀻𑀯𑀭𑀺𑀓𑁄. 𑀅𑀧𑁆𑀧𑀺𑀘𑁆𑀙𑁄𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑀥𑀼𑀢𑀯𑀸𑀤𑁄𑀢𑀺 𑀥𑀼𑀢𑁄 𑀯𑀼𑀘𑁆𑀘𑀢𑀺 𑀥𑀼𑀢𑀓𑀺𑀮𑁂𑀲𑁄 𑀧𑀼𑀕𑁆𑀕𑀮𑁄, 𑀓𑀺𑀮𑁂𑀲𑀥𑀼𑀦𑀦𑀓𑀥𑀫𑁆𑀫𑁄 𑀯𑀸. 𑀢𑀢𑁆𑀣 𑀅𑀢𑁆𑀣𑀺 𑀥𑀼𑀢𑁄, 𑀦 𑀥𑀼𑀢𑀯𑀸𑀤𑁄, 𑀅𑀢𑁆𑀣𑀺 𑀦 𑀥𑀼𑀢𑁄, 𑀥𑀼𑀢𑀯𑀸𑀤𑁄, 𑀅𑀢𑁆𑀣𑀺 𑀦𑁂𑀯 𑀥𑀼𑀢𑁄, 𑀦 𑀥𑀼𑀢𑀯𑀸𑀤𑁄, 𑀅𑀢𑁆𑀣𑀺 𑀥𑀼𑀢𑁄 𑀘𑁂𑀯, 𑀥𑀼𑀢𑀯𑀸𑀤𑁄 𑀘𑀸𑀢𑀺 𑀇𑀤𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀲𑀼 𑀬𑁄 𑀲𑀬𑀁 𑀥𑀼𑀢𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀦 𑀧𑀭𑀁 𑀢𑀤𑀢𑁆𑀣𑀸𑀬 𑀲𑀫𑀸𑀤𑀧𑁂𑀢𑀺, 𑀅𑀬𑀁 𑀧𑀞𑀫𑁄. 𑀬𑁄 𑀧𑀦 𑀲𑀬𑀁 𑀦 𑀥𑀼𑀢𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀧𑀭𑀁 𑀲𑀫𑀸𑀤𑀧𑁂𑀢𑀺, 𑀅𑀬𑀁 𑀤𑀼𑀢𑀺𑀬𑁄. 𑀬𑁄 𑀉𑀪𑀬𑀭𑀳𑀺𑀢𑁄, 𑀅𑀬𑀁 𑀢𑀢𑀺𑀬𑁄. 𑀬𑁄 𑀧𑀦 𑀉𑀪𑀬𑀲𑀫𑁆𑀧𑀦𑁆𑀦𑁄, 𑀅𑀬𑀁 𑀘𑀢𑀼𑀢𑁆𑀣𑁄. 𑀏𑀯𑀭𑀽𑀧𑁄 𑀘 𑀆𑀬𑀲𑁆𑀫𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀥𑀼𑀢𑀯𑀸𑀤𑁄’’𑀢𑀺. 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀯𑀲𑁂𑀦 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄 𑀬𑀣𑀸 𑀢𑀁 ‘‘𑀦𑀸𑀫𑀭𑀽𑀧’’𑀦𑁆𑀢𑀺.

𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄𑀢𑀺 𑀏𑀢𑁆𑀣 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀫𑁆𑀧𑀬𑁄𑀕𑀢𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑁆𑀧𑀬𑁄𑀕𑀢𑁄 𑀯𑀸 𑀘𑀺𑀢𑁆𑀢𑀲𑁆𑀲 𑀅𑀥𑀺𑀘𑀺𑀢𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀇𑀥 𑀧𑀦 ‘‘𑀅𑀭𑀳𑀢𑁆𑀢𑀨𑀮𑀘𑀺𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁𑀢𑀁𑀲𑀫𑀸𑀧𑀢𑁆𑀢𑀻𑀲𑀼 𑀲𑀫𑀸𑀥𑀺 𑀏𑀯 𑀅𑀥𑀺𑀘𑀺𑀢𑁆𑀢𑀁, 𑀇𑀥 𑀧𑀦 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀘𑀺 𑀧𑀦 ‘‘𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀓𑀸𑀮𑁂𑀦 𑀓𑀸𑀮𑀁 𑀢𑀻𑀡𑀺 𑀦𑀺𑀫𑀺𑀢𑁆𑀢𑀸𑀦𑀺 𑀫𑀦𑀲𑀺 𑀓𑀸𑀢𑀩𑁆𑀩𑀸𑀦𑀻𑀢𑀺 𑀏𑀢𑀲𑁆𑀫𑀺𑀁 𑀅𑀥𑀺𑀘𑀺𑀢𑁆𑀢𑀲𑀼𑀢𑁆𑀢𑁂 (𑀅. 𑀦𑀺. 𑁩.𑁧𑁦𑁩) 𑀯𑀺𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀧𑀼𑀭𑀺𑀫𑁄𑀬𑁂𑀯𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀆𑀬𑀲𑁆𑀫𑀢𑁄 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀲𑁆𑀲 𑀅𑀥𑀺𑀝𑁆𑀞𑀸𑀦𑀧𑀭𑀺𑀓𑁆𑀔𑀸𑀭𑀲𑀫𑁆𑀧𑀤𑀸𑀲𑀫𑁆𑀧𑀦𑁆𑀦𑀁 𑀅𑀥𑀺𑀘𑀺𑀢𑁆𑀢𑀸𑀦𑀼𑀬𑁄𑀕𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀏𑀯𑀁 ‘‘𑀅𑀥𑀺𑀘𑀺𑀢𑁆𑀢𑀸𑀦𑀼𑀬𑁄𑀕𑁄 𑀫𑀫 𑀲𑀸𑀲𑀦𑀸𑀦𑀼𑀝𑁆𑀞𑀸𑀦’’𑀦𑁆𑀢𑀺 𑀤𑀻𑀧𑁂𑀦𑁆𑀢𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀅𑀦𑀽𑀧𑀯𑀸𑀤𑁄𑀢𑀺 𑀯𑀸𑀘𑀸𑀬 𑀓𑀲𑁆𑀲𑀘𑀺𑀧𑀺 𑀅𑀦𑀼𑀧𑀯𑀤𑀦𑀁. 𑀅𑀦𑀽𑀧𑀖𑀸𑀢𑁄𑀢𑀺 𑀓𑀸𑀬𑁂𑀦 𑀓𑀲𑁆𑀲𑀘𑀺 𑀉𑀧𑀖𑀸𑀢𑀸𑀓𑀭𑀡𑀁. 𑀧𑀸𑀢𑀺𑀫𑁄𑀓𑁆𑀔𑁂𑀢𑀺 𑀏𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀧𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀯𑀼𑀢𑁆𑀢𑁄, 𑀢𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑁂. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑁄 𑀲𑀁𑀯𑀭𑁄. 𑀫𑀢𑁆𑀢𑀜𑁆𑀜𑀼𑀢𑀸𑀢𑀺 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀯𑀲𑁂𑀦 𑀧𑀫𑀸𑀡𑀜𑁆𑀜𑀼𑀢𑀸. 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀦𑁆𑀢𑀺 𑀯𑀺𑀯𑀺𑀢𑁆𑀢𑀁 𑀲𑀗𑁆𑀖𑀝𑁆𑀝𑀦𑀯𑀺𑀭𑀳𑀺𑀢𑀁 𑀲𑁂𑀦𑀸𑀲𑀦𑀁. 𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄𑀢𑀺 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀥𑀺𑀕𑀫𑀸𑀬 𑀪𑀸𑀯𑀦𑀸𑀦𑀼𑀬𑁄𑀕𑁄.

𑀅𑀧𑀭𑁄 𑀦𑀬𑁄 𑁋 𑀅𑀦𑀽𑀧𑀯𑀸𑀤𑁄𑀢𑀺 𑀓𑀲𑁆𑀲𑀘𑀺𑀧𑀺 𑀉𑀧𑀭𑀼𑀚𑁆𑀛𑀦𑀯𑀘𑀦𑀲𑁆𑀲 𑀅𑀯𑀤𑀦𑀁. 𑀢𑁂𑀦 𑀲𑀩𑁆𑀩𑀫𑁆𑀧𑀺 𑀯𑀸𑀘𑀲𑀺𑀓𑀁 𑀲𑀻𑀮𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀽𑀧𑀖𑀸𑀢𑁄𑀢𑀺 𑀓𑀸𑀬𑁂𑀦 𑀓𑀲𑁆𑀲𑀘𑀺 𑀉𑀧𑀖𑀸𑀢𑀲𑁆𑀲 𑀧𑀭𑀯𑀺𑀳𑁂𑀞𑀦𑀲𑁆𑀲 𑀅𑀓𑀭𑀡𑀁. 𑀢𑁂𑀦 𑀲𑀩𑁆𑀩𑀫𑁆𑀧𑀺 𑀓𑀸𑀬𑀺𑀓𑀁 𑀲𑀻𑀮𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀸𑀤𑀺𑀲𑀁 𑀧𑀦𑀺𑀤𑀁 𑀉𑀪𑀬𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀦𑁆𑀢𑁄𑀕𑀥𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄’’𑀢𑀺 𑀯𑀼𑀢𑁆𑀢𑀁. 𑀘𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀪𑀽𑀢𑁄 𑀅𑀦𑀽𑀧𑀯𑀸𑀤𑁄 𑀅𑀦𑀽𑀧𑀖𑀸𑀢𑁄 𑀘𑀸𑀢𑀺 𑀅𑀢𑁆𑀣𑁄.

𑀅𑀣 𑀯𑀸 𑀧𑀸𑀢𑀺𑀫𑁄𑀓𑁆𑀔𑁂𑀢𑀺 𑀅𑀥𑀺𑀓𑀭𑀡𑁂 𑀪𑀼𑀫𑁆𑀫𑀁. 𑀧𑀸𑀢𑀺𑀫𑁄𑀓𑁆𑀔𑁂 𑀦𑀺𑀲𑁆𑀲𑀬𑀪𑀽𑀢𑁂 𑀲𑀁𑀯𑀭𑁄. 𑀓𑁄 𑀧𑀦 𑀲𑁄𑀢𑀺? 𑀅𑀦𑀽𑀧𑀯𑀸𑀤𑁄 𑀅𑀦𑀽𑀧𑀖𑀸𑀢𑁄. 𑀉𑀧𑀲𑀫𑁆𑀧𑀤𑀯𑁂𑀮𑀸𑀬𑀜𑁆𑀳𑀺 𑀅𑀯𑀺𑀲𑁂𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀁 𑀲𑀫𑀸𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑁂 𑀞𑀺𑀢𑀲𑁆𑀲 𑀢𑀢𑁄 𑀧𑀭𑀁 𑀉𑀧𑀯𑀸𑀤𑀽𑀧𑀖𑀸𑀢𑀸𑀦𑀁 𑀅𑀓𑀭𑀡𑀯𑀲𑁂𑀦 𑀲𑀁𑀯𑀭𑁄, 𑀲𑁄 𑀅𑀦𑀽𑀧𑀯𑀸𑀤𑁄 𑀅𑀦𑀽𑀧𑀖𑀸𑀢𑁄 𑀘𑀸𑀢𑀺 𑀯𑀼𑀢𑁆𑀢𑁄.

𑀅𑀣 𑀯𑀸 𑀧𑀸𑀢𑀺𑀫𑁄𑀓𑁆𑀔𑁂𑀢𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀪𑀼𑀫𑁆𑀫𑀁 𑀬𑀣𑀸 ‘‘𑀘𑁂𑀢𑀲𑁄 𑀅𑀯𑀽𑀧𑀲𑀫𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁫.𑁨𑁩𑁨). 𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑁂𑀦 𑀲𑀸𑀥𑁂𑀢𑀩𑁆𑀩𑁄 𑀅𑀦𑀽𑀧𑀯𑀸𑀤𑁄 𑀅𑀦𑀽𑀧𑀖𑀸𑀢𑁄, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀗𑁆𑀕𑀳𑀺𑀢𑁄 𑀅𑀦𑀽𑀧𑀯𑀸𑀤𑁄 𑀅𑀦𑀽𑀧𑀖𑀸𑀢𑁄𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀲𑀁𑀯𑀭𑁄𑀢𑀺 𑀇𑀫𑀺𑀦𑀸 𑀧𑀦 𑀲𑀢𑀺𑀲𑀁𑀯𑀭𑁄, 𑀜𑀸𑀡𑀲𑀁𑀯𑀭𑁄, 𑀔𑀦𑁆𑀢𑀺𑀲𑀁𑀯𑀭𑁄, 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀲𑀁𑀯𑀭𑀸𑀦𑀁 𑀕𑀳𑀡𑀁, 𑀧𑀸𑀢𑀺𑀫𑁄𑀓𑁆𑀔𑀲𑀸𑀥𑀦𑀁 𑀇𑀤𑀁 𑀲𑀁𑀯𑀭𑀘𑀢𑀼𑀓𑁆𑀓𑀁.

𑀫𑀢𑁆𑀢𑀜𑁆𑀜𑀼𑀢𑀸 𑀘 𑀪𑀢𑁆𑀢𑀲𑁆𑀫𑀺𑀦𑁆𑀢𑀺 𑀧𑀭𑀺𑀬𑁂𑀲𑀦𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀯𑀲𑁂𑀦 𑀪𑁄𑀚𑀦𑁂 𑀧𑀫𑀸𑀡𑀜𑁆𑀜𑀼𑀢𑀸. 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀦𑁆𑀢𑀺 𑀪𑀸𑀯𑀦𑀸𑀦𑀼𑀓𑀽𑀮𑀁 𑀅𑀭𑀜𑁆𑀜𑀭𑀼𑀓𑁆𑀔𑀫𑀽𑀮𑀸𑀤𑀺𑀯𑀺𑀯𑀺𑀢𑁆𑀢𑀲𑁂𑀦𑀸𑀲𑀦𑀁. 𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄𑀢𑀺 𑀲𑀩𑁆𑀩𑀘𑀺𑀢𑁆𑀢𑀸𑀦𑀁 𑀅𑀥𑀺𑀓𑀢𑁆𑀢𑀸 𑀉𑀢𑁆𑀢𑀫𑀢𑁆𑀢𑀸 𑀅𑀥𑀺𑀘𑀺𑀢𑁆𑀢𑀲𑀗𑁆𑀔𑀸𑀢𑁂 𑀅𑀭𑀳𑀢𑁆𑀢𑀨𑀮𑀘𑀺𑀢𑁆𑀢𑁂 𑀲𑀸𑀥𑁂𑀢𑀩𑁆𑀩𑁂 𑀢𑀲𑁆𑀲 𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀯𑀲𑁂𑀦 𑀆𑀬𑁄𑀕𑁄. 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀦𑁆𑀢𑀺 𑀏𑀢𑀁 𑀧𑀭𑀲𑁆𑀲 𑀅𑀦𑀽𑀧𑀯𑀤𑀦𑀁, 𑀅𑀦𑀽𑀧𑀖𑀸𑀢𑀦𑀁, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀧𑀭𑀺𑀬𑁂𑀲𑀦𑀧𑀝𑀺𑀕𑁆𑀕𑀳𑀡𑀸𑀤𑀻𑀲𑀼 𑀫𑀢𑁆𑀢𑀜𑁆𑀜𑀼𑀢𑀸, 𑀯𑀺𑀯𑀺𑀢𑁆𑀢𑀯𑀸𑀲𑁄, 𑀬𑀣𑀸𑀯𑀼𑀢𑁆𑀢𑀅𑀥𑀺𑀘𑀺𑀢𑁆𑀢𑀸𑀦𑀼𑀬𑁄𑀕𑁄 𑀘 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀑𑀯𑀸𑀤𑁄 𑀅𑀦𑀼𑀲𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀇𑀫𑀸𑀬 𑀕𑀸𑀣𑀸𑀬 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀙𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀲𑀢𑁆𑀢𑀫𑁂 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺. 𑀕𑀸𑀣𑀸𑀬 𑀅𑀥𑀺𑀘𑁂𑀢𑀲𑁄𑀢𑀺 𑀅𑀥𑀺𑀘𑀺𑀢𑁆𑀢𑀯𑀢𑁄, 𑀲𑀩𑁆𑀩𑀘𑀺𑀢𑁆𑀢𑀸𑀦𑀁 𑀅𑀥𑀺𑀓𑁂𑀦 𑀅𑀭𑀳𑀢𑁆𑀢𑀨𑀮𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀚𑁆𑀚𑀢𑁄𑀢𑀺 𑀦 𑀧𑀫𑀚𑁆𑀚𑀢𑁄, 𑀅𑀧𑁆𑀧𑀫𑀸𑀤𑁂𑀦 𑀅𑀦𑀯𑀚𑁆𑀚𑀥𑀫𑁆𑀫𑁂𑀲𑀼 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀦𑀺𑀦𑁄𑀢𑀺 ‘‘𑀬𑁄 𑀫𑀼𑀦𑀸𑀢𑀺 𑀉𑀪𑁄 𑀮𑁄𑀓𑁂, 𑀫𑀼𑀦𑀺 𑀢𑁂𑀦 𑀧𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁨𑁬𑁯; 𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁧) 𑀏𑀯𑀁 𑀉𑀪𑀬𑀮𑁄𑀓𑀫𑀼𑀦𑀦𑁂𑀦 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀢𑁂𑀦 𑀅𑀭𑀳𑀢𑁆𑀢𑀨𑀮𑀜𑀸𑀡𑀲𑀗𑁆𑀔𑀸𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀸 𑀔𑀻𑀡𑀸𑀲𑀯𑁄 𑀫𑀼𑀦𑀺 𑀦𑀸𑀫, 𑀢𑀲𑁆𑀲 𑀫𑀼𑀦𑀺𑀦𑁄. 𑀫𑁄𑀦𑀧𑀣𑁂𑀲𑀼 𑀲𑀺𑀓𑁆𑀔𑀢𑁄𑀢𑀺 𑀅𑀭𑀳𑀢𑁆𑀢𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀫𑁄𑀦𑀲𑁆𑀲 𑀧𑀣𑁂𑀲𑀼 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀢𑀻𑀲𑀼 𑀯𑀸 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀢𑁄. 𑀇𑀤𑀜𑁆𑀘 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑁄 𑀳𑀺 𑀅𑀭𑀳𑀸, 𑀢𑀲𑁆𑀫𑀸 𑀏𑀯𑀁 𑀲𑀺𑀓𑁆𑀔𑀢𑁄, 𑀇𑀫𑀸𑀬 𑀲𑀺𑀓𑁆𑀔𑀸𑀬 𑀫𑀼𑀦𑀺𑀪𑀸𑀯𑀁 𑀧𑀢𑁆𑀢𑀲𑁆𑀲 𑀫𑀼𑀦𑀺𑀦𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀘 𑀏𑀢𑀤𑁂𑀯, 𑀢𑀲𑁆𑀫𑀸 𑀳𑁂𑀝𑁆𑀞𑀺𑀫𑀫𑀕𑁆𑀕𑀨𑀮𑀘𑀺𑀢𑁆𑀢𑀸𑀦𑀁 𑀯𑀲𑁂𑀦 𑀅𑀥𑀺𑀘𑁂𑀢𑀲𑁄, 𑀘𑀢𑀼𑀲𑀘𑁆𑀘𑀲𑀫𑁆𑀩𑁄𑀥𑀧𑀝𑀺𑀧𑀢𑁆𑀢𑀺𑀬𑀁 𑀅𑀧𑁆𑀧𑀫𑀸𑀤𑀯𑀲𑁂𑀦 𑀅𑀧𑁆𑀧𑀫𑀚𑁆𑀚𑀢𑁄, 𑀫𑀕𑁆𑀕𑀜𑀸𑀡𑀲𑀫𑀦𑁆𑀦𑀸𑀕𑀫𑁂𑀦 𑀫𑀼𑀦𑀺𑀦𑁄𑀢𑀺 𑀏𑀯𑀫𑁂𑀢𑁂𑀲𑀁 𑀢𑀺𑀡𑁆𑀡𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺𑀬𑁂𑀯. 𑀅𑀣 𑀯𑀸 ‘‘𑀅𑀧𑁆𑀧𑀫𑀚𑁆𑀚𑀢𑁄 𑀲𑀺𑀓𑁆𑀔𑀢𑁄’’𑀢𑀺 𑀧𑀤𑀸𑀦𑀁 𑀳𑁂𑀢𑀼𑀅𑀢𑁆𑀣𑀢𑀸 𑀤𑀝𑁆𑀞𑀩𑁆𑀩𑀸 𑀅𑀧𑁆𑀧𑀫𑀚𑁆𑀚𑀦𑀳𑁂𑀢𑀼 𑀲𑀺𑀓𑁆𑀔𑀦𑀳𑁂𑀢𑀼 𑀘 𑀅𑀥𑀺𑀘𑁂𑀢𑀲𑁄𑀢𑀺.

𑀲𑁄𑀓𑀸 𑀦 𑀪𑀯𑀦𑁆𑀢𑀺 𑀢𑀸𑀤𑀺𑀦𑁄𑀢𑀺 𑀢𑀸𑀤𑀺𑀲𑀲𑁆𑀲 𑀔𑀻𑀡𑀸𑀲𑀯𑀫𑀼𑀦𑀺𑀦𑁄 𑀅𑀩𑁆𑀪𑀦𑁆𑀢𑀭𑁂 𑀇𑀝𑁆𑀞𑀯𑀺𑀬𑁄𑀕𑀸𑀤𑀺𑀯𑀢𑁆𑀣𑀼𑀓𑀸 𑀲𑁄𑀓𑀸 𑀘𑀺𑀢𑁆𑀢𑀲𑀦𑁆𑀢𑀸𑀧𑀸 𑀦 𑀳𑁄𑀦𑁆𑀢𑀺. 𑀅𑀣 𑀯𑀸 𑀢𑀸𑀤𑀺𑀦𑁄𑀢𑀺 𑀢𑀸𑀤𑀺𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑀲𑁆𑀲 𑀏𑀯𑀭𑀽𑀧𑀲𑁆𑀲 𑀫𑀼𑀦𑀺𑀦𑁄 𑀲𑁄𑀓𑀸 𑀦 𑀪𑀯𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀉𑀧𑀲𑀦𑁆𑀢𑀲𑁆𑀲𑀸𑀢𑀺 𑀭𑀸𑀕𑀸𑀤𑀻𑀦𑀁 𑀅𑀘𑁆𑀘𑀦𑁆𑀢𑀽𑀧𑀲𑀫𑁂𑀦 𑀉𑀧𑀲𑀦𑁆𑀢𑀲𑁆𑀲. 𑀲𑀤𑀸 𑀲𑀢𑀻𑀫𑀢𑁄𑀢𑀺 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀦𑀺𑀘𑁆𑀘𑀓𑀸𑀮𑀁 𑀲𑀢𑀺𑀬𑀸 𑀅𑀯𑀺𑀭𑀳𑀺𑀢𑀲𑁆𑀲.

𑀏𑀢𑁆𑀣 𑀘 ‘‘𑀅𑀥𑀺𑀘𑁂𑀢𑀲𑁄’’𑀢𑀺 𑀇𑀫𑀺𑀦𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, ‘‘𑀅𑀧𑁆𑀧𑀫𑀚𑁆𑀚𑀢𑁄’’𑀢𑀺 𑀏𑀢𑁂𑀦 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, ‘‘𑀫𑀼𑀦𑀺𑀦𑁄 𑀫𑁄𑀦𑀧𑀣𑁂𑀲𑀼 𑀲𑀺𑀓𑁆𑀔𑀢𑁄’’𑀢𑀺 𑀏𑀢𑁂𑀳𑀺 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. ‘‘𑀫𑀼𑀦𑀺𑀦𑁄’’𑀢𑀺 𑀯𑀸 𑀏𑀢𑁂𑀦 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸, ‘‘𑀫𑁄𑀦𑀧𑀣𑁂𑀲𑀼 𑀲𑀺𑀓𑁆𑀔𑀢𑁄’’𑀢𑀺 𑀏𑀢𑁂𑀦 𑀢𑀸𑀲𑀁 𑀮𑁄𑀓𑀼𑀢𑁆𑀢𑀭𑀲𑀺𑀓𑁆𑀔𑀸𑀦𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸, ‘‘𑀲𑁄𑀓𑀸 𑀦 𑀪𑀯𑀦𑁆𑀢𑀻’’𑀢𑀺𑀆𑀤𑀻𑀳𑀺 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀺𑀬𑀸 𑀆𑀦𑀺𑀲𑀁𑀲𑁄 𑀧𑀓𑀸𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀢𑁆𑀢𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀼𑀦𑁆𑀤𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀅𑀝𑁆𑀞𑀫𑁂 𑀲𑀓𑁆𑀓𑀢𑁄𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀡𑁆𑀡𑀺𑀢𑁄𑀬𑁂𑀯. 𑀅𑀲𑀳𑀫𑀸𑀦𑀸𑀢𑀺 𑀦 𑀲𑀳𑀫𑀸𑀦𑀸, 𑀉𑀲𑀽𑀬𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.