𑁨. 𑀫𑀼𑀘𑀮𑀺𑀦𑁆𑀤𑀯𑀕𑁆𑀕𑁄

𑁧. 𑀫𑀼𑀘𑀮𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀫𑀼𑀘𑀮𑀺𑀦𑁆𑀤𑀯𑀕𑁆𑀕𑀲𑁆𑀲 𑀧𑀞𑀫𑁂 𑀫𑀼𑀘𑀮𑀺𑀦𑁆𑀤𑀫𑀽𑀮𑁂𑀢𑀺 𑀏𑀢𑁆𑀣 𑀫𑀼𑀘𑀮𑀺𑀦𑁆𑀤𑁄 𑀯𑀼𑀘𑁆𑀘𑀢𑀺 𑀦𑀻𑀧𑀭𑀼𑀓𑁆𑀔𑁄. 𑀲𑁄 ‘‘𑀦𑀺𑀘𑀼𑀮𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀲𑀫𑀻𑀧𑁂. 𑀓𑁂𑀘𑀺 𑀧𑀦 ‘‘𑀫𑀼𑀘𑀮𑁄𑀢𑀺 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀦𑀸𑀫𑀁, 𑀢𑀁 𑀯𑀦𑀚𑁂𑀝𑁆𑀞𑀓𑀢𑀸𑀬 𑀧𑀦 𑀫𑀼𑀘𑀮𑀺𑀦𑁆𑀤𑁄𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀫𑀳𑀸 𑀅𑀓𑀸𑀮𑀫𑁂𑀖𑁄𑀢𑀺 𑀅𑀲𑀫𑁆𑀧𑀢𑁆𑀢𑁂 𑀯𑀲𑁆𑀲𑀓𑀸𑀮𑁂 𑀉𑀧𑁆𑀧𑀦𑁆𑀦𑀫𑀳𑀸𑀫𑁂𑀖𑁄. 𑀲𑁄 𑀳𑀺 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀧𑀽𑀭𑁂𑀦𑁆𑀢𑁄 𑀉𑀤𑀧𑀸𑀤𑀺. 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀢𑀺 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀲𑀢𑁆𑀢𑀸𑀳𑀁 𑀅𑀯𑀺𑀘𑁆𑀙𑀺𑀦𑁆𑀦𑀯𑀼𑀝𑁆𑀞𑀺𑀓𑀸 𑀅𑀳𑁄𑀲𑀺. 𑀲𑀻𑀢𑀯𑀸𑀢𑀤𑀼𑀤𑁆𑀤𑀺𑀦𑀻𑀢𑀺 𑀲𑀸 𑀘 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸 𑀉𑀤𑀓𑀨𑀼𑀲𑀺𑀢𑀲𑀫𑁆𑀫𑀺𑀲𑁆𑀲𑁂𑀦 𑀲𑀻𑀢𑀯𑀸𑀢𑁂𑀦 𑀲𑀫𑀦𑁆𑀢𑀢𑁄 𑀧𑀭𑀺𑀩𑁆𑀪𑀫𑀦𑁆𑀢𑁂𑀦 𑀤𑀼𑀲𑀺𑀢𑀤𑀺𑀯𑀲𑀢𑁆𑀢𑀸 𑀤𑀼𑀤𑁆𑀤𑀺𑀦𑀻 𑀦𑀸𑀫 𑀅𑀳𑁄𑀲𑀺. 𑀫𑀼𑀘𑀮𑀺𑀦𑁆𑀤𑁄 𑀦𑀸𑀫 𑀦𑀸𑀕𑀭𑀸𑀚𑀸𑀢𑀺 𑀢𑀲𑁆𑀲𑁂𑀯 𑀫𑀼𑀘𑀮𑀺𑀦𑁆𑀤𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑁂 𑀧𑁄𑀓𑁆𑀔𑀭𑀡𑀺𑀬𑀸 𑀳𑁂𑀝𑁆𑀞𑀸 𑀦𑀸𑀕𑀪𑀯𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁄 𑀫𑀳𑀸𑀦𑀼𑀪𑀸𑀯𑁄 𑀦𑀸𑀕𑀭𑀸𑀚𑀸. 𑀲𑀓𑀪𑀯𑀦𑀸𑀢𑀺 𑀅𑀢𑁆𑀢𑀦𑁄 𑀦𑀸𑀕𑀪𑀯𑀦𑀢𑁄. 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀲𑀢𑁆𑀢𑀯𑀸𑀭𑁂 𑀅𑀢𑁆𑀢𑀦𑁄 𑀲𑀭𑀻𑀭𑀪𑁄𑀕𑁂𑀳𑀺 𑀪𑀕𑀯𑀢𑁄 𑀓𑀸𑀬𑀁 𑀧𑀭𑀺𑀯𑀸𑀭𑁂𑀢𑁆𑀯𑀸. 𑀉𑀧𑀭𑀺𑀫𑀼𑀤𑁆𑀥𑀦𑀺 𑀫𑀳𑀦𑁆𑀢𑀁 𑀨𑀡𑀁 𑀯𑀺𑀳𑀘𑁆𑀘𑀸𑀢𑀺 𑀪𑀕𑀯𑀢𑁄 𑀫𑀼𑀤𑁆𑀥𑀧𑁆𑀧𑀤𑁂𑀲𑀲𑁆𑀲 𑀉𑀧𑀭𑀺 𑀅𑀢𑁆𑀢𑀦𑁄 𑀫𑀳𑀦𑁆𑀢𑀁 𑀨𑀡𑀁 𑀧𑀲𑀸𑀭𑁂𑀢𑁆𑀯𑀸. ‘‘𑀨𑀡𑀁 𑀓𑀭𑀺𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄.

𑀢𑀲𑁆𑀲 𑀓𑀺𑀭 𑀦𑀸𑀕𑀭𑀸𑀚𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀪𑀕𑀯𑀸 𑀘 𑀫𑀬𑁆𑀳𑀁 𑀪𑀯𑀦𑀲𑀫𑀻𑀧𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄, 𑀅𑀬𑀜𑁆𑀘 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸 𑀯𑀢𑁆𑀢𑀢𑀺, 𑀯𑀸𑀲𑀸𑀕𑀸𑀭𑀫𑀲𑁆𑀲 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀲𑀢𑁆𑀢𑀭𑀢𑀦𑀫𑀬𑀁 𑀧𑀸𑀲𑀸𑀤𑀁 𑀦𑀺𑀫𑁆𑀫𑀺𑀦𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑁄𑀧𑀺 ‘‘𑀏𑀯𑀁 𑀓𑀢𑁂 𑀓𑀸𑀬𑀲𑀸𑀭𑁄 𑀕𑀳𑀺𑀢𑁄 𑀦 𑀪𑀯𑀺𑀲𑁆𑀲𑀢𑀺, 𑀤𑀲𑀩𑀮𑀲𑁆𑀲 𑀓𑀸𑀬𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺 𑀨𑀡𑀁 𑀓𑀢𑁆𑀯𑀸 𑀥𑀸𑀭𑁂𑀲𑀺. ‘‘𑀧𑀭𑀺𑀓𑁆𑀔𑁂𑀧𑀩𑁆𑀪𑀦𑁆𑀢𑀭𑀁 𑀮𑁄𑀳𑀧𑀸𑀲𑀸𑀤𑁂 𑀪𑀡𑁆𑀟𑀸𑀕𑀸𑀭𑀕𑀩𑁆𑀪𑀧𑁆𑀧𑀫𑀸𑀡𑀁 𑀅𑀳𑁄𑀲𑀻’’𑀢𑀺 𑀔𑀦𑁆𑀥𑀓𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁫) 𑀯𑀼𑀢𑁆𑀢𑀁. 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀳𑁂𑀝𑁆𑀞𑀸𑀮𑁄𑀳𑀧𑀸𑀲𑀸𑀤𑀧𑁆𑀧𑀫𑀸𑀡’’𑀦𑁆𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁨𑁮𑁪). ‘‘𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀲𑀢𑁆𑀣𑀸 𑀯𑀺𑀳𑀭𑀺𑀲𑁆𑀲𑀢𑀻’’𑀢𑀺 𑀓𑀺𑀭 𑀦𑀸𑀕𑀭𑀸𑀚𑀲𑁆𑀲 𑀅𑀚𑁆𑀛𑀸𑀲𑀬𑁄. 𑀪𑀕𑀯𑀸 𑀧𑀦 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀢𑀜𑁆𑀘 𑀞𑀸𑀦𑀁 𑀲𑀼𑀧𑀺𑀳𑀺𑀢𑀯𑀸𑀢𑀧𑀸𑀦𑀁 𑀲𑀼𑀨𑀼𑀲𑀺𑀢𑀅𑀕𑁆𑀕𑀴𑀤𑁆𑀯𑀸𑀭𑀁 𑀓𑀽𑀝𑀸𑀕𑀸𑀭𑀁 𑀯𑀺𑀬 𑀅𑀳𑁄𑀲𑀺. 𑀫𑀸 𑀪𑀕𑀯𑀦𑁆𑀢𑀁 𑀲𑀻𑀢𑀦𑁆𑀢𑀺𑀆𑀤𑀺 𑀢𑀲𑁆𑀲 𑀢𑀣𑀸 𑀓𑀭𑀺𑀢𑁆𑀯𑀸 𑀞𑀸𑀦𑀓𑀸𑀭𑀡𑀧𑀭𑀺𑀤𑀻𑀧𑀦𑀁. 𑀲𑁄 𑀳𑀺 ‘‘𑀫𑀸 𑀪𑀕𑀯𑀦𑁆𑀢𑀁 𑀲𑀻𑀢𑀁 𑀩𑀸𑀥𑀬𑀺𑀢𑁆𑀣, 𑀫𑀸 𑀉𑀡𑁆𑀳𑀁, 𑀫𑀸 𑀟𑀁𑀲𑀸𑀤𑀺𑀲𑀫𑁆𑀨𑀲𑁆𑀲𑁄 𑀩𑀸𑀥𑀬𑀺𑀢𑁆𑀣𑀸’’𑀢𑀺 𑀢𑀣𑀸 𑀓𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀬 𑀉𑀡𑁆𑀳𑀫𑁂𑀯 𑀦𑀢𑁆𑀣𑀺, 𑀲𑀘𑁂 𑀧𑀦 𑀅𑀦𑁆𑀢𑀭𑀦𑁆𑀢𑀭𑀸 𑀫𑁂𑀖𑁄 𑀯𑀺𑀕𑀘𑁆𑀙𑁂𑀬𑁆𑀬, 𑀉𑀡𑁆𑀳𑀁 𑀪𑀯𑁂𑀬𑁆𑀬, 𑀢𑀫𑁆𑀧𑀺 𑀫𑀸 𑀩𑀸𑀥𑀬𑀺𑀢𑁆𑀣𑀸𑀢𑀺 𑀏𑀯𑀁 𑀢𑀲𑁆𑀲 𑀘𑀺𑀦𑁆𑀢𑁂𑀢𑀼𑀁 𑀬𑀼𑀢𑁆𑀢𑀁. 𑀓𑁂𑀘𑀺 𑀧𑀦𑁂𑀢𑁆𑀣 𑀯𑀤𑀦𑁆𑀢𑀺 ‘‘𑀉𑀡𑁆𑀳𑀕𑁆𑀕𑀳𑀡𑀁 𑀪𑁄𑀕𑀧𑀭𑀺𑀓𑁆𑀔𑁂𑀧𑀲𑁆𑀲 𑀯𑀺𑀧𑀼𑀮𑀪𑀸𑀯𑀓𑀭𑀡𑁂 𑀓𑀸𑀭𑀡𑀓𑀺𑀢𑁆𑀢𑀦𑀁. 𑀔𑀼𑀤𑁆𑀤𑀓𑁂 𑀳𑀺 𑀢𑀲𑁆𑀫𑀺𑀁 𑀪𑀕𑀯𑀦𑁆𑀢𑀁 𑀦𑀸𑀕𑀲𑁆𑀲 𑀲𑀭𑀻𑀭𑀲𑀫𑁆𑀪𑀽𑀢𑀸 𑀉𑀲𑁆𑀫𑀸 𑀩𑀸𑀥𑁂𑀬𑁆𑀬, 𑀯𑀺𑀧𑀼𑀮𑀪𑀸𑀯𑀓𑀭𑀡𑁂𑀦 𑀧𑀦 𑀢𑀸𑀤𑀺𑀲𑀁 ‘𑀫𑀸 𑀉𑀡𑁆𑀳𑀁 𑀩𑀸𑀥𑀬𑀺𑀢𑁆𑀣𑀸’𑀢𑀺 𑀢𑀣𑀸 𑀓𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀻’’𑀢𑀺.

𑀯𑀺𑀤𑁆𑀥𑀦𑁆𑀢𑀺 𑀉𑀩𑁆𑀩𑀺𑀤𑁆𑀥𑀁, 𑀫𑁂𑀖𑀯𑀺𑀕𑀫𑁂𑀦 𑀤𑀽𑀭𑀻𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀕𑀢𑀯𑀮𑀸𑀳𑀓𑀦𑁆𑀢𑀺 𑀅𑀧𑀕𑀢𑀫𑁂𑀖𑀁. 𑀤𑁂𑀯𑀦𑁆𑀢𑀺 𑀆𑀓𑀸𑀲𑀁. 𑀯𑀺𑀤𑀺𑀢𑁆𑀯𑀸𑀢𑀺 ‘‘𑀇𑀤𑀸𑀦𑀺 𑀯𑀺𑀕𑀢𑀯𑀮𑀸𑀳𑀓𑁄 𑀆𑀓𑀸𑀲𑁄, 𑀦𑀢𑁆𑀣𑀺 𑀪𑀕𑀯𑀢𑁄 𑀲𑀻𑀢𑀸𑀤𑀺𑀉𑀧𑀤𑁆𑀤𑀯𑁄’’𑀢𑀺 𑀜𑀢𑁆𑀯𑀸. 𑀯𑀺𑀦𑀺𑀯𑁂𑀞𑁂𑀢𑁆𑀯𑀸𑀢𑀺 𑀅𑀧𑀦𑁂𑀢𑁆𑀯𑀸. 𑀲𑀓𑀯𑀡𑁆𑀡𑀦𑁆𑀢𑀺 𑀅𑀢𑁆𑀢𑀦𑁄 𑀦𑀸𑀕𑀭𑀽𑀧𑀁. 𑀧𑀝𑀺𑀲𑀁𑀳𑀭𑀺𑀢𑁆𑀯𑀸𑀢𑀺 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸. 𑀫𑀸𑀡𑀯𑀓𑀯𑀡𑁆𑀡𑀦𑁆𑀢𑀺 𑀓𑀼𑀫𑀸𑀭𑀓𑀭𑀽𑀧𑀁.

𑀏𑀢𑀫𑀢𑁆𑀣𑀦𑁆𑀢𑀺 𑀯𑀺𑀯𑁂𑀓𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀺𑀦𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀼𑀔𑀫𑁂𑀯 𑀳𑁄𑀢𑀻𑀢𑀺 𑀏𑀢𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑁂𑀦 𑀚𑀸𑀦𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀯𑀺𑀯𑁂𑀓𑀲𑀼𑀔𑀸𑀦𑀼𑀪𑀸𑀯𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀼𑀔𑁄 𑀯𑀺𑀯𑁂𑀓𑁄𑀢𑀺 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁄 𑀉𑀧𑀥𑀺𑀯𑀺𑀯𑁂𑀓𑁄 𑀲𑀼𑀔𑁄. 𑀢𑀼𑀝𑁆𑀞𑀲𑁆𑀲𑀸𑀢𑀺 𑀘𑀢𑀼𑀫𑀕𑁆𑀕𑀜𑀸𑀡𑀲𑀦𑁆𑀢𑁄𑀲𑁂𑀦 𑀢𑀼𑀝𑁆𑀞𑀲𑁆𑀲. 𑀲𑀼𑀢𑀥𑀫𑁆𑀫𑀲𑁆𑀲𑀸𑀢𑀺 𑀧𑀓𑀸𑀲𑀺𑀢𑀥𑀫𑁆𑀫𑀲𑁆𑀲 𑀯𑀺𑀲𑁆𑀲𑀼𑀢𑀥𑀫𑁆𑀫𑀲𑁆𑀲. 𑀧𑀲𑁆𑀲𑀢𑁄𑀢𑀺 𑀢𑀁 𑀯𑀺𑀯𑁂𑀓𑀁, 𑀬𑀁 𑀯𑀸 𑀓𑀺𑀜𑁆𑀘𑀺 𑀧𑀲𑁆𑀲𑀺𑀢𑀩𑁆𑀩𑀁 𑀦𑀸𑀫, 𑀢𑀁 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀯𑀻𑀭𑀺𑀬𑀩𑀮𑀸𑀥𑀺𑀕𑀢𑁂𑀦 𑀜𑀸𑀡𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑀲𑁆𑀲. 𑀅𑀩𑁆𑀬𑀸𑀧𑀚𑁆𑀚𑀦𑁆𑀢𑀺 𑀅𑀓𑀼𑀧𑁆𑀧𑀦𑀪𑀸𑀯𑁄, 𑀏𑀢𑁂𑀦 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄 𑀤𑀲𑁆𑀲𑀺𑀢𑁄. 𑀧𑀸𑀡𑀪𑀽𑀢𑁂𑀲𑀼 𑀲𑀁𑀬𑀫𑁄𑀢𑀺 𑀲𑀢𑁆𑀢𑁂𑀲𑀼 𑀘 𑀲𑀁𑀬𑀫𑁄 𑀅𑀯𑀺𑀳𑀺𑀁𑀲𑀦𑀪𑀸𑀯𑁄 𑀲𑀼𑀔𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀤𑀲𑁆𑀲𑀺𑀢𑁄.

𑀲𑀼𑀔𑀸 𑀯𑀺𑀭𑀸𑀕𑀢𑀸 𑀮𑁄𑀓𑁂𑀢𑀺 𑀯𑀺𑀕𑀢𑀭𑀸𑀕𑀢𑀸𑀧𑀺 𑀮𑁄𑀓𑁂 𑀲𑀼𑀔𑀸. 𑀓𑀻𑀤𑀺𑀲𑀻? 𑀓𑀸𑀫𑀸𑀦𑀁 𑀲𑀫𑀢𑀺𑀓𑁆𑀓𑀫𑁄𑀢𑀺, 𑀬𑀸 𑀓𑀸𑀫𑀸𑀦𑀁 𑀲𑀫𑀢𑀺𑀓𑁆𑀓𑀫𑁄𑀢𑀺 𑀯𑀼𑀘𑁆𑀘𑀢𑀺, 𑀲𑀸 𑀯𑀺𑀕𑀢𑀭𑀸𑀕𑀢𑀸𑀧𑀺 𑀲𑀼𑀔𑀸𑀢𑀺 𑀅𑀢𑁆𑀣𑁄, 𑀏𑀢𑁂𑀦 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀓𑀣𑀺𑀢𑁄. 𑀅𑀲𑁆𑀫𑀺𑀫𑀸𑀦𑀲𑁆𑀲 𑀬𑁄 𑀯𑀺𑀦𑀬𑁄𑀢𑀺 𑀇𑀫𑀺𑀦𑀸 𑀧𑀦 𑀅𑀭𑀳𑀢𑁆𑀢𑀁 𑀓𑀣𑀺𑀢𑀁. 𑀅𑀭𑀳𑀢𑁆𑀢𑀜𑁆𑀳𑀺 𑀅𑀲𑁆𑀫𑀺𑀫𑀸𑀦𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀦𑀬𑁄𑀢𑀺 𑀯𑀼𑀘𑁆𑀘𑀢𑀺, 𑀇𑀢𑁄 𑀧𑀭𑀜𑁆𑀘 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀺, 𑀢𑁂𑀦𑀸𑀳 ‘‘𑀏𑀢𑀁 𑀯𑁂 𑀧𑀭𑀫𑀁 𑀲𑀼𑀔’’𑀦𑁆𑀢𑀺. 𑀏𑀯𑀁 𑀅𑀭𑀳𑀢𑁆𑀢𑁂𑀦 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀻𑀢𑀺.

𑀧𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀲𑀫𑁆𑀩𑀳𑀼𑀮𑀸𑀦𑀦𑁆𑀢𑀺 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀢𑀬𑁄 𑀚𑀦𑀸 ‘‘𑀲𑀫𑁆𑀩𑀳𑀼𑀮𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁄 𑀧𑀭𑀁 𑀲𑀗𑁆𑀖𑁄. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀧𑀦 𑀢𑀬𑁄 𑀢𑀬𑁄 𑀏𑀯, 𑀢𑀢𑁄 𑀉𑀤𑁆𑀥𑀁 𑀲𑀫𑁆𑀩𑀳𑀼𑀮𑀸. 𑀢𑀲𑁆𑀫𑀸 𑀇𑀥𑀸𑀧𑀺 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀲𑀫𑁆𑀩𑀳𑀼𑀮𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀦𑁆𑀢𑀺 𑀥𑀫𑁆𑀫𑀲𑀪𑀸𑀫𑀡𑁆𑀟𑀧𑁂. 𑀲𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀆𑀕𑀢𑀲𑁆𑀲 𑀢𑀣𑀸𑀕𑀢𑀲𑁆𑀲 𑀪𑀺𑀓𑁆𑀔𑀽𑀦𑀁 𑀉𑀧𑀝𑁆𑀞𑀸𑀦𑀓𑀭𑀡𑀝𑁆𑀞𑀸𑀦𑀦𑁆𑀢𑀺 ‘‘𑀉𑀧𑀝𑁆𑀞𑀸𑀦𑀲𑀸𑀮𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀬𑀢𑁆𑀣 𑀪𑀺𑀓𑁆𑀔𑀽 𑀯𑀺𑀦𑀬𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀺, 𑀥𑀫𑁆𑀫𑀁 𑀓𑀣𑁂𑀦𑁆𑀢𑀺, 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀲𑀦𑁆𑀦𑀺𑀧𑀢𑀦𑀯𑀲𑁂𑀦 𑀧𑀓𑀢𑀺𑀬𑀸 𑀉𑀧𑀢𑀺𑀝𑁆𑀞𑀦𑁆𑀢𑀺, 𑀲𑀸 𑀲𑀸𑀮𑀸𑀧𑀺 𑀫𑀡𑁆𑀟𑀧𑁄𑀧𑀺 ‘‘𑀉𑀧𑀝𑁆𑀞𑀸𑀦𑀲𑀸𑀮𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀢𑀢𑁆𑀣𑀸𑀧𑀺 𑀳𑀺 𑀩𑀼𑀤𑁆𑀥𑀸𑀲𑀦𑀁 𑀦𑀺𑀘𑁆𑀘𑀁 𑀧𑀜𑁆𑀜𑀢𑁆𑀢𑀫𑁂𑀯 𑀳𑁄𑀢𑀺. 𑀇𑀤𑀜𑁆𑀳𑀺 𑀩𑀼𑀤𑁆𑀥𑀸𑀦𑀁 𑀥𑀭𑀫𑀸𑀦𑀓𑀸𑀮𑁂 𑀪𑀺𑀓𑁆𑀔𑀽𑀦𑀁 𑀘𑀸𑀭𑀺𑀢𑁆𑀢𑀁. 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀦𑁆𑀢𑀺 𑀦𑀺𑀲𑀚𑁆𑀚𑀦𑀯𑀲𑁂𑀦 𑀲𑀗𑁆𑀕𑀫𑁆𑀫 𑀦𑀺𑀲𑀺𑀦𑁆𑀦𑀸𑀦𑀁. 𑀲𑀦𑁆𑀦𑀺𑀧𑀢𑀺𑀢𑀸𑀦𑀦𑁆𑀢𑀺 𑀢𑀢𑁄 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀲𑀦𑁆𑀦𑀺𑀧𑀢𑀦𑀯𑀲𑁂𑀦 𑀲𑀦𑁆𑀦𑀺𑀧𑀢𑀺𑀢𑀸𑀦𑀁. 𑀅𑀣 𑀯𑀸 𑀩𑀼𑀤𑁆𑀥𑀸𑀲𑀦𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀲𑀢𑁆𑀣𑀼 𑀲𑀫𑁆𑀫𑀼𑀔𑁂 𑀯𑀺𑀬 𑀆𑀤𑀭𑀼𑀧𑁆𑀧𑀢𑁆𑀢𑀺𑀬𑀸 𑀲𑀓𑁆𑀓𑀘𑁆𑀘𑀁 𑀦𑀺𑀲𑀻𑀤𑀦𑀯𑀲𑁂𑀦 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁, 𑀲𑀫𑀸𑀦𑀚𑁆𑀛𑀸𑀲𑀬𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀅𑀚𑁆𑀛𑀸𑀲𑀬𑁂𑀦 𑀲𑀼𑀝𑁆𑀞𑀼 𑀲𑀫𑁆𑀫𑀸 𑀘 𑀦𑀺𑀧𑀢𑀦𑀯𑀲𑁂𑀦 𑀲𑀦𑁆𑀦𑀺𑀧𑀢𑀺𑀢𑀸𑀦𑀁. 𑀅𑀬𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀅𑀦𑁆𑀢𑀭𑀸𑀓𑀣𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀁 𑀅𑀦𑁆𑀢𑀭𑀸 𑀅𑀜𑁆𑀜𑀸 𑀏𑀓𑀸 𑀓𑀣𑀸, 𑀅𑀣 𑀯𑀸 𑀫𑀚𑁆𑀛𑀦𑁆𑀳𑀺𑀓𑁂 𑀮𑀤𑁆𑀥𑀲𑁆𑀲 𑀲𑀼𑀕𑀢𑁄𑀯𑀸𑀤𑀲𑁆𑀲, 𑀲𑀸𑀬𑀁 𑀮𑀪𑀺𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀘 𑀅𑀦𑁆𑀢𑀭𑀸 𑀧𑀯𑀢𑁆𑀢𑀢𑁆𑀢𑀸 𑀅𑀦𑁆𑀢𑀭𑀸𑀓𑀣𑀸, 𑀲𑀫𑀡𑀲𑀫𑀸𑀘𑀸𑀭𑀲𑁆𑀲𑁂𑀯 𑀯𑀸 𑀅𑀦𑁆𑀢𑀭𑀸 𑀧𑀯𑀢𑁆𑀢𑀸 𑀅𑀜𑁆𑀜𑀸 𑀏𑀓𑀸 𑀓𑀣𑀸𑀢𑀺 𑀅𑀦𑁆𑀢𑀭𑀸𑀓𑀣𑀸. 𑀉𑀤𑀧𑀸𑀤𑀻𑀢𑀺 𑀉𑀧𑁆𑀧𑀦𑁆𑀦𑀸.

𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀭𑀸𑀚𑀽𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀫𑀳𑀤𑁆𑀥𑀦𑀢𑀭𑁄 𑀯𑀸𑀢𑀺𑀆𑀤𑀻𑀲𑀼 𑀧𑀣𑀯𑀺𑀬𑀁 𑀦𑀺𑀔𑀡𑀺𑀢𑁆𑀯𑀸 𑀞𑀧𑀺𑀢𑀁 𑀲𑀢𑁆𑀢𑀭𑀢𑀦𑀦𑀺𑀘𑀬𑀲𑀗𑁆𑀔𑀸𑀢𑀁 𑀫𑀳𑀦𑁆𑀢𑀁 𑀥𑀦𑀁 𑀏𑀢𑀲𑁆𑀲𑀸𑀢𑀺 𑀫𑀳𑀤𑁆𑀥𑀦𑁄, 𑀤𑁆𑀯𑀻𑀲𑀼 𑀅𑀬𑀁 𑀅𑀢𑀺𑀲𑀬𑁂𑀦 𑀫𑀳𑀤𑁆𑀥𑀦𑁄𑀢𑀺 𑀫𑀳𑀤𑁆𑀥𑀦𑀢𑀭𑁄. 𑀯𑀸𑀲𑀤𑁆𑀤𑁄 𑀯𑀺𑀓𑀧𑁆𑀧𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀦𑀺𑀘𑁆𑀘𑀧𑀭𑀺𑀩𑁆𑀩𑀬𑀯𑀲𑁂𑀦 𑀫𑀳𑀦𑁆𑀢𑁄 𑀪𑁄𑀕𑁄 𑀏𑀢𑀲𑁆𑀲𑀸𑀢𑀺 𑀫𑀳𑀸𑀪𑁄𑀕𑁄. 𑀤𑁂𑀯𑀲𑀺𑀓𑀁 𑀧𑀯𑀺𑀲𑀦𑀆𑀬𑀪𑀽𑀢𑁄 𑀫𑀳𑀦𑁆𑀢𑁄 𑀓𑁄𑀲𑁄 𑀏𑀢𑀲𑁆𑀲𑀸𑀢𑀺 𑀫𑀳𑀸𑀓𑁄𑀲𑁄. 𑀅𑀧𑀭𑁂 𑀧𑀦 ‘‘𑀤𑁂𑀯𑀲𑀺𑀓𑀁 𑀧𑀯𑀺𑀲𑀦𑀆𑀬𑀪𑀽𑀢𑀁 𑀫𑀡𑀺𑀲𑀸𑀭𑀨𑁂𑀕𑁆𑀕𑀼𑀕𑀼𑀫𑁆𑀩𑀸𑀤𑀺𑀪𑁂𑀤𑀪𑀺𑀦𑁆𑀦𑀁 𑀧𑀭𑀺𑀕𑁆𑀕𑀳𑀯𑀢𑁆𑀣𑀼 𑀥𑀦𑀁, 𑀢𑀤𑁂𑀯 𑀲𑀸𑀭𑀕𑀩𑁆𑀪𑀸𑀤𑀻𑀲𑀼 𑀦𑀺𑀳𑀺𑀢𑀁 𑀓𑁄𑀲𑁄’’𑀢𑀺 𑀯𑀤𑀦𑁆𑀢𑀺. 𑀯𑀚𑀺𑀭𑁄, 𑀫𑀳𑀸𑀦𑀻𑀮𑁄, 𑀇𑀦𑁆𑀤𑀦𑀻𑀮𑁄, 𑀫𑀭𑀓𑀢𑁄, 𑀯𑁂𑀴𑀼𑀭𑀺𑀬𑁄, 𑀧𑀤𑀼𑀫𑀭𑀸𑀕𑁄, 𑀨𑀼𑀲𑁆𑀲𑀭𑀸𑀕𑁄, 𑀓𑀓𑁆𑀓𑁂𑀢𑀦𑁄, 𑀧𑀼𑀮𑀸𑀓𑁄, 𑀯𑀺𑀫𑀮𑁄, 𑀮𑁄𑀳𑀺𑀢𑀗𑁆𑀓𑁄, 𑀨𑀮𑀺𑀓𑁄, 𑀧𑀯𑀸𑀴𑁄, 𑀚𑁄𑀢𑀺𑀭𑀲𑁄, 𑀕𑁄𑀫𑀼𑀢𑁆𑀢𑀓𑁄, 𑀕𑁄𑀫𑁂𑀤𑀓𑁄, 𑀲𑁄𑀕𑀦𑁆𑀥𑀺𑀓𑁄, 𑀫𑀼𑀢𑁆𑀢𑀸, 𑀲𑀗𑁆𑀔𑁄, 𑀅𑀜𑁆𑀚𑀦𑀫𑀽𑀮𑁄, 𑀭𑀸𑀚𑀧𑀝𑁆𑀝𑁄, 𑀅𑀫𑀢𑀁𑀲𑀓𑁄, 𑀧𑀺𑀬𑀓𑁄, 𑀩𑁆𑀭𑀸𑀳𑁆𑀫𑀡𑀻 𑀘𑀸𑀢𑀺 𑀘𑀢𑀼𑀩𑁆𑀩𑀻𑀲𑀢𑀺 𑀫𑀡𑀺 𑀦𑀸𑀫. 𑀲𑀢𑁆𑀢 𑀮𑁄𑀳𑀸𑀦𑀺 𑀓𑀳𑀸𑀧𑀡𑁄 𑀘 𑀲𑀸𑀭𑁄 𑀦𑀸𑀫. 𑀲𑀬𑀦𑀘𑁆𑀙𑀸𑀤𑀦𑀧𑀸𑀯𑀼𑀭𑀡𑀕𑀚𑀤𑀦𑁆𑀢𑀲𑀺𑀮𑀸𑀤𑀻𑀦𑀺 𑀨𑁂𑀕𑁆𑀕𑀼 𑀦𑀸𑀫. 𑀘𑀦𑁆𑀤𑀦𑀸𑀕𑀭𑀼𑀓𑀼𑀗𑁆𑀓𑀼𑀫𑀢𑀕𑀭𑀓𑀧𑁆𑀧𑀽𑀭𑀸𑀤𑀺 𑀕𑀼𑀫𑁆𑀩𑀸 𑀦𑀸𑀫. 𑀢𑀢𑁆𑀣 𑀧𑀼𑀭𑀺𑀫𑁂𑀦 𑀆𑀤𑀺𑀲𑀤𑁆𑀤𑁂𑀦 𑀲𑀸𑀮𑀺𑀯𑀻𑀳𑀺𑀆𑀤𑀺𑀫𑀼𑀕𑁆𑀕𑀫𑀸𑀲𑀸𑀤𑀺𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀪𑁂𑀤𑀁 𑀥𑀜𑁆𑀜𑀯𑀺𑀓𑀢𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀁 𑀲𑀢𑁆𑀢𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀪𑀽𑀢𑀁 𑀯𑀢𑁆𑀣𑀼, 𑀢𑀁 𑀲𑀩𑁆𑀩𑀁 𑀲𑀗𑁆𑀕𑀬𑁆𑀳𑀢𑀺. 𑀫𑀳𑀦𑁆𑀢𑀁 𑀯𑀺𑀚𑀺𑀢𑀁 𑀭𑀝𑁆𑀞𑀁 𑀏𑀢𑀲𑁆𑀲𑀸𑀢𑀺 𑀫𑀳𑀸𑀯𑀺𑀚𑀺𑀢𑁄. 𑀫𑀳𑀦𑁆𑀢𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀯𑀸𑀳𑀦𑁄 𑀏𑀢𑀲𑁆𑀲𑀸𑀢𑀺 𑀫𑀳𑀸𑀯𑀸𑀳𑀦𑁄. 𑀫𑀳𑀦𑁆𑀢𑀁 𑀲𑁂𑀦𑀸𑀩𑀮𑀜𑁆𑀘𑁂𑀯 𑀣𑀸𑀫𑀩𑀮𑀜𑁆𑀘 𑀏𑀢𑀲𑁆𑀲𑀸𑀢𑀺 𑀫𑀳𑀩𑁆𑀩𑀮𑁄. 𑀇𑀘𑁆𑀙𑀺𑀢𑀦𑀺𑀩𑁆𑀩𑀢𑁆𑀢𑀺𑀲𑀗𑁆𑀔𑀸𑀢𑀸 𑀧𑀼𑀜𑁆𑀜𑀓𑀫𑁆𑀫𑀦𑀺𑀧𑁆𑀨𑀦𑁆𑀦𑀸 𑀫𑀳𑀢𑀻 𑀇𑀤𑁆𑀥𑀺 𑀏𑀢𑀲𑁆𑀲𑀸𑀢𑀺 𑀫𑀳𑀺𑀤𑁆𑀥𑀺𑀓𑁄. 𑀢𑁂𑀚𑀲𑀗𑁆𑀔𑀸𑀢𑁄 𑀉𑀲𑁆𑀲𑀸𑀳𑀫𑀦𑁆𑀢𑀧𑀪𑀼𑀲𑀢𑁆𑀢𑀺𑀲𑀗𑁆𑀔𑀸𑀢𑁄 𑀯𑀸 𑀫𑀳𑀦𑁆𑀢𑁄 𑀆𑀦𑀼𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀫𑀳𑀸𑀦𑀼𑀪𑀸𑀯𑁄.

𑀏𑀢𑁆𑀣 𑀘 𑀧𑀞𑀫𑁂𑀦 𑀆𑀬𑀲𑀫𑁆𑀧𑀤𑀸, 𑀤𑀼𑀢𑀺𑀬𑁂𑀦 𑀯𑀺𑀢𑁆𑀢𑀽𑀧𑀓𑀭𑀡𑀲𑀫𑁆𑀧𑀤𑀸, 𑀢𑀢𑀺𑀬𑁂𑀦 𑀯𑀺𑀪𑀯𑀲𑀫𑁆𑀧𑀤𑀸, 𑀘𑀢𑀼𑀢𑁆𑀣𑁂𑀦 𑀚𑀦𑀧𑀤𑀲𑀫𑁆𑀧𑀤𑀸, 𑀧𑀜𑁆𑀘𑀫𑁂𑀦 𑀬𑀸𑀦𑀲𑀫𑁆𑀧𑀤𑀸, 𑀙𑀝𑁆𑀞𑁂𑀦 𑀧𑀭𑀺𑀯𑀸𑀭𑀲𑀫𑁆𑀧𑀤𑀸𑀬 𑀲𑀤𑁆𑀥𑀺𑀁 𑀅𑀢𑁆𑀢𑀲𑀫𑁆𑀧𑀤𑀸, 𑀲𑀢𑁆𑀢𑀫𑁂𑀦 𑀧𑀼𑀜𑁆𑀜𑀓𑀫𑁆𑀫𑀲𑀫𑁆𑀧𑀤𑀸, 𑀅𑀝𑁆𑀞𑀫𑁂𑀦 𑀧𑀪𑀸𑀯𑀲𑀫𑁆𑀧𑀤𑀸 𑀢𑁂𑀲𑀁 𑀭𑀸𑀚𑀽𑀦𑀁 𑀧𑀓𑀸𑀲𑀺𑀢𑀸 𑀳𑁄𑀢𑀺. 𑀢𑁂𑀦 𑀬𑀸 𑀲𑀸 𑀲𑀸𑀫𑀺𑀲𑀫𑁆𑀧𑀢𑁆𑀢𑀺, 𑀅𑀫𑀘𑁆𑀘𑀲𑀫𑁆𑀧𑀢𑁆𑀢𑀺, 𑀲𑁂𑀦𑀸𑀲𑀫𑁆𑀧𑀢𑁆𑀢𑀺, 𑀭𑀝𑁆𑀞𑀲𑀫𑁆𑀧𑀢𑁆𑀢𑀺, 𑀯𑀺𑀪𑀯𑀲𑀫𑁆𑀧𑀢𑁆𑀢𑀺, 𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺, 𑀤𑀼𑀕𑁆𑀕𑀲𑀫𑁆𑀧𑀢𑁆𑀢𑀻𑀢𑀺 𑀲𑀢𑁆𑀢 𑀧𑀓𑀢𑀺𑀲𑀫𑁆𑀧𑀤𑀸 𑀭𑀸𑀚𑀽𑀦𑀁 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀸 𑀲𑀩𑁆𑀩𑀸 𑀬𑀣𑀸𑀭𑀳𑀁 𑀧𑀭𑀺𑀤𑀻𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀤𑀸𑀦𑀸𑀤𑀻𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀧𑀭𑀺𑀲𑀁 𑀭𑀜𑁆𑀚𑁂𑀢𑀻𑀢𑀺 𑀭𑀸𑀚𑀸. 𑀫𑀕𑀥𑀸𑀦𑀁 𑀇𑀲𑁆𑀲𑀭𑁄𑀢𑀺 𑀫𑀸𑀕𑀥𑁄. 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑁂𑀦𑀺𑀬𑀕𑁄𑀢𑁆𑀢𑀢𑁆𑀢𑀸 𑀯𑀸 𑀲𑁂𑀦𑀺𑀬𑁄. 𑀩𑀺𑀫𑁆𑀩𑀺 𑀯𑀼𑀘𑁆𑀘𑀢𑀺 𑀲𑀼𑀯𑀡𑁆𑀡𑀁, 𑀢𑀲𑁆𑀫𑀸 𑀲𑀸𑀭𑀩𑀺𑀫𑁆𑀩𑀺𑀯𑀡𑁆𑀡𑀢𑀸𑀬 𑀩𑀺𑀫𑁆𑀩𑀺𑀲𑀸𑀭𑁄. 𑀓𑁂𑀘𑀺 𑀧𑀦 ‘‘𑀦𑀸𑀫𑀫𑁂𑀯𑁂𑀢𑀁 𑀢𑀲𑁆𑀲 𑀭𑀜𑁆𑀜𑁄’’𑀢𑀺 𑀯𑀤𑀦𑁆𑀢𑀺. 𑀧𑀘𑁆𑀘𑀸𑀫𑀺𑀢𑁆𑀢𑀁 𑀧𑀭𑀲𑁂𑀦𑀁 𑀚𑀺𑀦𑀸𑀢𑀻𑀢𑀺 𑀧𑀲𑁂𑀦𑀤𑀺. 𑀓𑁄𑀲𑀮𑀭𑀝𑁆𑀞𑀲𑁆𑀲 𑀅𑀥𑀺𑀧𑀢𑀻𑀢𑀺 𑀓𑁄𑀲𑀮𑁄. 𑀅𑀬𑀜𑁆𑀘𑀭𑀳𑀻𑀢𑀺 𑀏𑀢𑁆𑀣 𑀘𑀭𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀯𑀺𑀧𑁆𑀧𑀓𑀢𑀸𑀢𑀺 𑀅𑀧𑀭𑀺𑀬𑁄𑀲𑀺𑀢𑀸. 𑀅𑀬𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑀸𑀓𑀣𑀸 𑀅𑀦𑀺𑀝𑁆𑀞𑀺𑀢𑀸𑀢𑀺 𑀅𑀢𑁆𑀣𑁄.

𑀲𑀸𑀬𑀦𑁆𑀳𑀲𑀫𑀬𑀦𑁆𑀢𑀺 𑀲𑀸𑀬𑀦𑁆𑀳𑁂 𑀏𑀓𑀁 𑀲𑀫𑀬𑀁. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀢𑀢𑁄 𑀢𑀢𑁄 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀢𑁄 𑀘𑀺𑀢𑁆𑀢𑀲𑁆𑀲 𑀧𑀝𑀺𑀲𑀁𑀳𑀭𑀡𑀢𑁄 𑀧𑀝𑀺𑀲𑀮𑁆𑀮𑀸𑀦𑀲𑀗𑁆𑀔𑀸𑀢𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀬𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀯𑀼𑀝𑁆𑀞𑀺𑀢𑁄. 𑀪𑀕𑀯𑀸 𑀳𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀲𑀼𑀮𑀪𑀧𑀺𑀡𑁆𑀟𑀧𑀸𑀢𑀁 𑀓𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑁆𑀧𑀫𑀼𑀔𑁂 𑀞𑀢𑁆𑀯𑀸 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀞𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀣𑀸𑀲𑀫𑀼𑀝𑁆𑀞𑀺𑀢𑀁 𑀲𑀼𑀕𑀢𑁄𑀯𑀸𑀤𑀁 𑀤𑀢𑁆𑀯𑀸 𑀢𑁂𑀲𑀼 𑀅𑀭𑀜𑁆𑀜𑀭𑀼𑀓𑁆𑀔𑀫𑀽𑀮𑀸𑀤𑀺𑀤𑀺𑀯𑀸𑀝𑁆𑀞𑀸𑀦𑀁 𑀉𑀤𑁆𑀤𑀺𑀲𑁆𑀲 𑀕𑀢𑁂𑀲𑀼 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀤𑀺𑀯𑀲𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀬𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑁂 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬, ‘‘𑀫𑀬𑁆𑀳𑀁 𑀉𑀧𑀕𑀫𑀦𑀁 𑀆𑀕𑀫𑀬𑀫𑀸𑀦𑀸 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀓𑀮𑀯𑀺𑀳𑀸𑀭𑀁 𑀧𑀭𑀺𑀧𑀽𑀭𑁂𑀦𑁆𑀢𑀺𑀬𑁄 𑀦𑀺𑀲𑀺𑀦𑁆𑀦𑀸, 𑀇𑀤𑀸𑀦𑀺 𑀫𑁂 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀥𑀫𑁆𑀫𑀲𑀪𑀸𑀫𑀡𑁆𑀟𑀮𑀁 𑀉𑀧𑀕𑀦𑁆𑀢𑀼𑀁 𑀓𑀸𑀮𑁄’’𑀢𑀺 𑀆𑀲𑀦𑀢𑁄 𑀯𑀼𑀝𑁆𑀞𑀸𑀬, 𑀓𑁂𑀲𑀭𑀲𑀻𑀳𑁄 𑀯𑀺𑀬 𑀓𑀜𑁆𑀘𑀦𑀕𑀼𑀳𑀸𑀬 𑀲𑀼𑀭𑀪𑀺𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀽𑀣𑀁 𑀉𑀧𑀲𑀗𑁆𑀓𑀫𑀦𑁆𑀢𑁄 𑀫𑀢𑁆𑀢𑀯𑀭𑀯𑀸𑀭𑀡𑁄 𑀯𑀺𑀬 𑀅𑀓𑀸𑀬𑀘𑀸𑀧𑀮𑁆𑀮𑁂𑀦 𑀘𑀸𑀭𑀼𑀯𑀺𑀓𑁆𑀓𑀦𑁆𑀢𑀕𑀫𑀦𑁄 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑁆𑀧𑀝𑀺𑀫𑀡𑁆𑀟𑀺𑀢𑀩𑀸𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀫𑀼𑀚𑁆𑀚𑀮𑀸𑀬 𑀩𑁆𑀬𑀸𑀫𑀧𑁆𑀧𑀪𑀸𑀬 𑀧𑀭𑀺𑀓𑁆𑀔𑁂𑀧𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀸𑀬 𑀧𑀪𑀲𑁆𑀲𑀭𑀓𑁂𑀢𑀼𑀫𑀸𑀮𑀸𑀮𑀗𑁆𑀓𑀢𑀸𑀬 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀧𑀪𑀲𑁆𑀲𑀭𑀸𑀦𑀁 𑀯𑀲𑁂𑀦 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺𑀬𑀸 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀸𑀬 𑀅𑀦𑀼𑀧𑀫𑀸𑀬 𑀩𑀼𑀤𑁆𑀥𑀮𑀻𑀮𑀸𑀬 𑀲𑀫𑀦𑁆𑀦𑀸𑀕𑀢𑀸𑀬 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀬𑀸 𑀲𑀓𑀮𑀯𑀺𑀳𑀸𑀭𑀁 𑀏𑀓𑀸𑀮𑁄𑀓𑀁 𑀓𑀼𑀭𑀼𑀫𑀸𑀦𑁄 𑀉𑀧𑀝𑁆𑀞𑀸𑀦𑀲𑀸𑀮𑀁 𑀉𑀧𑀲𑀗𑁆𑀓𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸…𑀧𑁂… 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺.

𑀏𑀯𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀢𑁂 𑀪𑀺𑀓𑁆𑀔𑀽 𑀢𑀼𑀡𑁆𑀳𑀻𑀪𑀽𑀢𑁂 𑀤𑀺𑀲𑁆𑀯𑀸 ‘‘𑀫𑀬𑀺 𑀅𑀓𑀣𑁂𑀦𑁆𑀢𑁂 𑀇𑀫𑁂 𑀪𑀺𑀓𑁆𑀔𑀽 𑀩𑀼𑀤𑁆𑀥𑀕𑀸𑀭𑀯𑁂𑀦 𑀓𑀧𑁆𑀧𑀫𑁆𑀧𑀺 𑀦 𑀓𑀣𑁂𑀲𑁆𑀲𑀦𑁆𑀢𑀻’’𑀢𑀺 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀬 𑀦𑀼𑀢𑁆𑀣𑀸𑀢𑀺 𑀓𑀢𑀫𑀸𑀬 𑀦𑀼 𑀪𑀯𑀣. ‘‘𑀓𑀸𑀬 𑀦𑁄𑀢𑁆𑀣𑀸’’𑀢𑀺𑀧𑀺 𑀧𑀸𑀴𑀺, 𑀲𑁄 𑀏𑀯𑀢𑁆𑀣𑁄, ‘‘𑀓𑀸𑀬 𑀦𑁆𑀯𑁂𑀢𑁆𑀣𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀲𑁆𑀲 𑀓𑀢𑀫𑀸𑀬 𑀦𑀼 𑀏𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀓𑀢𑀫𑀸𑀬 𑀦𑀸𑀫 𑀓𑀣𑀸𑀬 𑀇𑀥 𑀲𑀦𑁆𑀦𑀺𑀲𑀺𑀦𑁆𑀦𑀸 𑀪𑀯𑀣, 𑀓𑀢𑀫𑀸 𑀘 𑀢𑀼𑀫𑁆𑀳𑀸𑀓𑀁 𑀓𑀣𑀸 𑀫𑀫𑀸𑀕𑀫𑀦𑀧𑀘𑁆𑀘𑀬𑀸 𑀅𑀦𑀺𑀝𑁆𑀞𑀺𑀢𑀸, 𑀢𑀁 𑀦𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀻𑀢𑀺 𑀏𑀯𑀁 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀲𑀺.

𑀦 𑀔𑁆𑀯𑁂𑀢𑀦𑁆𑀢𑀺 𑀦 𑀔𑁄 𑀏𑀢𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. ‘‘𑀦 𑀔𑁄𑀢’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀦 𑀔𑁄 𑀏𑀢𑀁 𑀇𑀘𑁆𑀘𑁂𑀯 𑀧𑀤𑀯𑀺𑀪𑀸𑀕𑁄. 𑀓𑀼𑀮𑀧𑀼𑀢𑁆𑀢𑀸𑀦𑀦𑁆𑀢𑀺 𑀚𑀸𑀢𑀺𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸𑀦𑀁. 𑀲𑀤𑁆𑀥𑀸𑀢𑀺 𑀲𑀤𑁆𑀥𑀸𑀬, 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀭𑀢𑀦𑀢𑁆𑀢𑀬𑀲𑀤𑁆𑀥𑀸𑀬 𑀘. 𑀅𑀕𑀸𑀭𑀲𑁆𑀫𑀸𑀢𑀺 𑀖𑀭𑀢𑁄, 𑀕𑀳𑀝𑁆𑀞𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀕𑀸𑀭𑀺𑀬𑀦𑁆𑀢𑀺 𑀧𑀩𑁆𑀩𑀚𑁆𑀚𑀁. 𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺 𑀉𑀧𑀕𑀢𑀸𑀦𑀁. 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁. 𑀢𑀢𑁆𑀣𑀸𑀬𑀁 𑀧𑀤𑀬𑁄𑀚𑀦𑀸 𑁋 ‘‘𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀦𑁂𑀯 𑀭𑀸𑀚𑀸𑀪𑀺𑀦𑀻𑀢𑀸 𑀦 𑀘𑁄𑀭𑀸𑀪𑀺𑀦𑀻𑀢𑀸 𑀦 𑀇𑀡𑀝𑁆𑀝𑀸 𑀦 𑀚𑀻𑀯𑀺𑀢𑀧𑀓𑀢𑀸 𑀧𑀩𑁆𑀩𑀚𑀺𑀢𑀸, 𑀅𑀣 𑀔𑁄 𑀲𑀤𑁆𑀥𑀸𑀬 𑀅𑀕𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸, 𑀢𑀼𑀫𑁆𑀳𑁂 𑀏𑀢𑀭𑀳𑀺 𑀏𑀯𑀭𑀽𑀧𑀺𑀁 𑀭𑀸𑀚𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀬𑁆𑀬𑀸𑀣, 𑀬𑀁 𑀏𑀯𑀭𑀽𑀧𑀸𑀬 𑀓𑀣𑀸𑀬 𑀓𑀣𑀦𑀁, 𑀏𑀢𑀁 𑀢𑀼𑀫𑁆𑀳𑀸𑀓𑀁 𑀦 𑀔𑁄 𑀧𑀢𑀺𑀭𑀽𑀧𑀁 𑀦 𑀬𑀼𑀢𑁆𑀢𑀫𑁂𑀯𑀸’’𑀢𑀺.

𑀏𑀯𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀸𑀦𑀺 𑀦𑁂𑀲𑀁 𑀧𑀢𑀺𑀭𑀽𑀧𑀁 𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀚𑀸𑀦𑀦𑁆𑀢𑁄 ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁 𑀓𑀭𑀡𑀻𑀬𑀁 𑀥𑀫𑁆𑀫𑀻 𑀯𑀸 𑀓𑀣𑀸 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺 𑀆𑀳. 𑀢𑀢𑁆𑀣 𑀯𑁄𑀢𑀺 𑀢𑀼𑀫𑁆𑀳𑀸𑀓𑀁. 𑀓𑀭𑀡𑀻𑀬𑀦𑁆𑀢𑀺 𑀳𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑁆𑀢𑀭𑀺 𑀲𑀸𑀫𑀺𑀯𑀘𑀦𑀫𑁂𑀢𑀁, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀻𑀢𑀺 𑀅𑀢𑁆𑀣𑁄. 𑀤𑁆𑀯𑀬𑀁 𑀓𑀭𑀡𑀻𑀬𑀦𑁆𑀢𑀺 𑀤𑁆𑀯𑁂 𑀓𑀸𑀢𑀩𑁆𑀩𑀸. 𑀥𑀫𑁆𑀫𑀻 𑀓𑀣𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀢𑁄 𑀅𑀦𑀧𑁂𑀢𑀸 𑀓𑀣𑀸, 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀧𑀭𑀺𑀤𑀻𑀧𑀺𑀦𑀻 𑀥𑀫𑁆𑀫𑀤𑁂𑀲𑀦𑀸𑀢𑀺 𑀅𑀢𑁆𑀣𑁄. 𑀤𑀲𑀓𑀣𑀸𑀯𑀢𑁆𑀣𑀼𑀲𑀗𑁆𑀔𑀸𑀢𑀸𑀧𑀺 𑀳𑀺 𑀥𑀫𑁆𑀫𑀓𑀣𑀸 𑀢𑀤𑁂𑀓𑀤𑁂𑀲𑀸 𑀏𑀯𑀸𑀢𑀺. 𑀅𑀭𑀺𑀬𑁄𑀢𑀺 𑀏𑀓𑀦𑁆𑀢𑀳𑀺𑀢𑀸𑀯𑀳𑀢𑁆𑀢𑀸 𑀅𑀭𑀺𑀬𑁄, 𑀯𑀺𑀲𑀼𑀤𑁆𑀥𑁄 𑀉𑀢𑁆𑀢𑀫𑁄𑀢𑀺 𑀯𑀸 𑀅𑀭𑀺𑀬𑁄. 𑀢𑀼𑀡𑁆𑀳𑀻𑀪𑀸𑀯𑁄𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀪𑀽𑀢𑀁 𑀅𑀓𑀣𑀦𑀁. 𑀓𑁂𑀘𑀺 𑀧𑀦 ‘‘𑀯𑀘𑀻𑀲𑀗𑁆𑀔𑀸𑀭𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀤𑀼𑀢𑀺𑀬𑀚𑁆𑀛𑀸𑀦𑀁 𑀅𑀭𑀺𑀬𑁄 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀅𑀭𑀺𑀬𑁄 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺 𑀯𑀤𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 ‘‘𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀯𑀺𑀯𑁂𑀓𑀲𑁆𑀲 𑀧𑀭𑀺𑀩𑁆𑀭𑀽𑀳𑀦𑀢𑁆𑀣𑀁 𑀯𑀺𑀯𑁂𑀓𑀝𑁆𑀞𑀓𑀸𑀬𑀸 𑀲𑀼𑀜𑁆𑀜𑀸𑀕𑀸𑀭𑁂 𑀯𑀺𑀳𑀭𑀦𑁆𑀢𑀸 𑀲𑀘𑁂 𑀓𑀤𑀸𑀘𑀺 𑀲𑀦𑁆𑀦𑀺𑀧𑀢𑀣, 𑀏𑀯𑀁 𑀲𑀦𑁆𑀦𑀺𑀧𑀢𑀺𑀢𑁂𑀳𑀺 𑀢𑀼𑀫𑁆𑀳𑁂𑀳𑀺 ‘𑀅𑀲𑁆𑀲𑀼𑀢𑀁 𑀲𑀸𑀯𑁂𑀢𑀺 𑀲𑀼𑀢𑀁 𑀯𑀸 𑀧𑀭𑀺𑀬𑁄𑀤𑀧𑁂𑀢𑀻’𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀜𑁆𑀜𑀫𑀜𑁆𑀜𑀲𑁆𑀲𑀽𑀧𑀓𑀸𑀭𑀸𑀬 𑀔𑀦𑁆𑀥𑀸𑀤𑀻𑀦𑀁 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀫𑁆𑀫𑀓𑀣𑀸 𑀯𑀸 𑀧𑀯𑀢𑁆𑀢𑁂𑀢𑀩𑁆𑀩𑀸, 𑀅𑀜𑁆𑀜𑀫𑀜𑁆𑀜𑀁 𑀅𑀩𑁆𑀬𑀸𑀩𑀸𑀥𑀦𑀢𑁆𑀣𑀁 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀸 𑀯𑀺𑀳𑀭𑀺𑀢𑀩𑁆𑀩’’𑀦𑁆𑀢𑀺.

𑀢𑀢𑁆𑀣 𑀧𑀼𑀭𑀺𑀫𑁂𑀦 𑀓𑀭𑀡𑀻𑀬𑀯𑀘𑀦𑁂𑀦 𑀅𑀦𑁄𑀢𑀺𑀡𑁆𑀡𑀸𑀦𑀁 𑀲𑀸𑀲𑀦𑁂 𑀑𑀢𑀭𑀡𑀽𑀧𑀸𑀬𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀑𑀢𑀺𑀡𑁆𑀡𑀸𑀦𑀁 𑀲𑀁𑀲𑀸𑀭𑀢𑁄 𑀦𑀺𑀲𑁆𑀲𑀭𑀡𑀽𑀧𑀸𑀬𑀁. 𑀧𑀼𑀭𑀺𑀫𑁂𑀦 𑀯𑀸 𑀆𑀕𑀫𑀯𑁂𑀬𑁆𑀬𑀢𑁆𑀢𑀺𑀬𑁂 𑀦𑀺𑀬𑁄𑀚𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀅𑀥𑀺𑀕𑀫𑀯𑁂𑀬𑁆𑀬𑀢𑁆𑀢𑀺𑀬𑁂. 𑀅𑀣 𑀯𑀸 𑀧𑀼𑀭𑀺𑀫𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀞𑀫𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀁 𑀤𑀻𑀧𑁂𑀢𑀺, 𑀤𑀼𑀢𑀺𑀬𑁂𑀦 𑀤𑀼𑀢𑀺𑀬𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀳𑁂𑀢𑀽 𑀤𑁆𑀯𑁂 𑀧𑀘𑁆𑀘𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬 𑀧𑀭𑀢𑁄 𑀘 𑀖𑁄𑀲𑁄, 𑀧𑀘𑁆𑀘𑀢𑁆𑀢𑀜𑁆𑀘 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄’’𑀢𑀺 (𑀅. 𑀦𑀺. 𑁨.𑁧𑁨𑁭).

𑀧𑀼𑀭𑀺𑀫𑁂𑀦 𑀯𑀸 𑀮𑁄𑀓𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀽𑀮𑀓𑀸𑀭𑀡𑀁 𑀯𑀺𑀪𑀸𑀯𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀮𑁄𑀓𑀼𑀢𑁆𑀢𑀭𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀽𑀮𑀓𑀸𑀭𑀡𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀏𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀺𑀢𑁆𑀢𑀺𑀢𑀓𑀸𑀫𑀲𑀫𑁆𑀧𑀢𑁆𑀢𑀺𑀢𑁄 𑀛𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺 𑀲𑀦𑁆𑀢𑀢𑀭𑀸 𑀘𑁂𑀯 𑀧𑀡𑀻𑀢𑀢𑀭𑀸 𑀘𑀸𑀢𑀺 𑀏𑀢𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀅𑀭𑀺𑀬𑀯𑀺𑀳𑀸𑀭𑀲𑀼𑀔𑀸𑀦𑀼𑀪𑀸𑀯𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀬𑀜𑁆𑀘 𑀓𑀸𑀫𑀲𑀼𑀔𑀁 𑀮𑁄𑀓𑁂𑀢𑀺 𑀮𑁄𑀓𑀲𑀤𑁆𑀤𑁄 ‘‘𑀔𑀦𑁆𑀥𑀮𑁄𑀓𑁄 𑀆𑀬𑀢𑀦𑀮𑁄𑀓𑁄 𑀥𑀸𑀢𑀼𑀮𑁄𑀓𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁩, 𑁭; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨) 𑀲𑀗𑁆𑀔𑀸𑀭𑁂𑀲𑀼 𑀆𑀕𑀢𑁄.

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺,

𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸;

𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄,

𑀏𑀢𑁆𑀣 𑀢𑁂 𑀯𑀢𑁆𑀢𑀢𑀻 𑀯𑀲𑁄’’𑀢𑀺. 𑁋

𑀆𑀤𑀻𑀲𑀼 (𑀫. 𑀦𑀺. 𑁧.𑁫𑁦𑁩) 𑀑𑀓𑀸𑀲𑁂 𑀆𑀕𑀢𑁄. ‘‘𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁯; 𑀫. 𑀦𑀺. 𑁧.𑁨𑁮𑁩) 𑀲𑀢𑁆𑀢𑁂𑀲𑀼. 𑀇𑀥 𑀧𑀦 𑀲𑀢𑁆𑀢𑀮𑁄𑀓𑁂 𑀑𑀓𑀸𑀲𑀮𑁄𑀓𑁂 𑀘 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀅𑀯𑀻𑀘𑀺𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺 𑀩𑁆𑀭𑀳𑁆𑀫𑀮𑁄𑀓𑀢𑁄 𑀳𑁂𑀝𑁆𑀞𑀸 𑀏𑀢𑀲𑁆𑀫𑀺𑀁 𑀮𑁄𑀓𑁂 𑀬𑀁 𑀯𑀢𑁆𑀣𑀼𑀓𑀸𑀫𑁂 𑀧𑀝𑀺𑀘𑁆𑀘 𑀓𑀺𑀮𑁂𑀲𑀓𑀸𑀫𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀓𑀸𑀫𑀲𑀳𑀕𑀢𑀁 𑀲𑀼𑀔𑀁. 𑀬𑀜𑁆𑀘𑀺𑀤𑀁 𑀤𑀺𑀯𑀺𑀬𑀁 𑀲𑀼𑀔𑀦𑁆𑀢𑀺 𑀬𑀜𑁆𑀘 𑀇𑀤𑀁 𑀤𑀺𑀯𑀺 𑀪𑀯𑀁 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀘 𑀮𑀤𑁆𑀥𑀩𑁆𑀩𑀁 𑀩𑁆𑀭𑀳𑁆𑀫𑀸𑀦𑀁 𑀫𑀦𑀼𑀲𑁆𑀲𑀸𑀦𑀜𑁆𑀘 𑀭𑀽𑀧𑀲𑀫𑀸𑀧𑀢𑁆𑀢𑀺𑀲𑀼𑀔𑀁. 𑀢𑀡𑁆𑀳𑀓𑁆𑀔𑀬𑀲𑀼𑀔𑀲𑁆𑀲𑀸𑀢𑀺 𑀬𑀁 𑀆𑀕𑀫𑁆𑀫 𑀢𑀡𑁆𑀳𑀸 𑀔𑀻𑀬𑀢𑀺, 𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑀡𑁆𑀳𑀸𑀬 𑀘 𑀧𑀝𑀺𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀢𑀡𑁆𑀳𑀓𑁆𑀔𑀬𑀲𑀼𑀔𑀁 𑀦𑀸𑀫, 𑀢𑀲𑁆𑀲 𑀢𑀡𑁆𑀳𑀓𑁆𑀔𑀬𑀲𑀼𑀔𑀲𑁆𑀲. 𑀏𑀢𑁂𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀦𑀺𑀤𑁆𑀤𑁂𑀲𑁄, 𑀏𑀢𑀸𑀦𑀺 𑀲𑀼𑀔𑀸𑀦𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀉𑀪𑀬𑀫𑁆𑀧𑀺 𑀲𑀼𑀔𑀲𑀸𑀫𑀜𑁆𑀜𑁂𑀦 𑀕𑀳𑁂𑀢𑁆𑀯𑀸 ‘‘𑀏𑀢’’𑀦𑁆𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 ‘‘𑀓𑀮𑀁 𑀦𑀸𑀕𑁆𑀖𑀢𑀻’’𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁.

𑀲𑁄𑀴𑀲𑀺𑀦𑁆𑀢𑀺 𑀲𑁄𑀴𑀲𑀦𑁆𑀦𑀁 𑀧𑀽𑀭𑀡𑀺𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀘𑀓𑁆𑀓𑀯𑀢𑁆𑀢𑀺𑀲𑀼𑀔𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑀫𑀦𑀼𑀲𑁆𑀲𑀲𑀼𑀔𑀁, 𑀦𑀸𑀕𑀲𑀼𑀧𑀡𑁆𑀡𑀸𑀤𑀺𑀮𑁄𑀓𑁂 𑀦𑀸𑀕𑀸𑀤𑀻𑀳𑀺 𑀅𑀦𑀼𑀪𑀯𑀺𑀢𑀩𑁆𑀩𑀁 𑀲𑀼𑀔𑀁, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀤𑁂𑀯𑀮𑁄𑀓𑁂 𑀙𑀩𑁆𑀩𑀺𑀥𑀁 𑀓𑀸𑀫𑀲𑀼𑀔𑀦𑁆𑀢𑀺 𑀬𑀁 𑀏𑀓𑀸𑀤𑀲𑀯𑀺𑀥𑁂 𑀓𑀸𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀁 𑀓𑀸𑀫𑀲𑀼𑀔𑀁, 𑀬𑀜𑁆𑀘 𑀇𑀤𑀁 𑀭𑀽𑀧𑀸𑀭𑀽𑀧𑀤𑁂𑀯𑁂𑀲𑀼 𑀤𑀺𑀩𑁆𑀩𑀯𑀺𑀳𑀸𑀭𑀪𑀽𑀢𑁂𑀲𑀼 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑁂𑀲𑀼 𑀘 𑀉𑀧𑁆𑀧𑀦𑁆𑀦𑀢𑁆𑀢𑀸 ‘‘𑀤𑀺𑀯𑀺𑀬’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀮𑁄𑀓𑀺𑀬𑀚𑁆𑀛𑀸𑀦𑀲𑀼𑀔𑀁, 𑀲𑀓𑀮𑀫𑁆𑀧𑀺 𑀢𑀤𑀼𑀪𑀬𑀁 𑀢𑀡𑁆𑀳𑀓𑁆𑀔𑀬𑀲𑀼𑀔𑀲𑀗𑁆𑀔𑀸𑀢𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀲𑁄𑀴𑀲 𑀪𑀸𑀕𑁂 𑀓𑀢𑁆𑀯𑀸 𑀢𑀢𑁄 𑀏𑀓𑀪𑀸𑀕𑀁 𑀲𑁄𑀴𑀲𑀪𑀸𑀕𑀕𑀼𑀡𑁂 𑀮𑀤𑁆𑀥𑀁 𑀏𑀓𑀪𑀸𑀕𑀲𑀗𑁆𑀔𑀸𑀢𑀁 𑀓𑀮𑀁 𑀦 𑀅𑀕𑁆𑀖𑀢𑀻𑀢𑀺.

𑀅𑀬𑀜𑁆𑀘 𑀅𑀢𑁆𑀣𑀯𑀡𑁆𑀡𑀦𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀸. 𑀧𑀸𑀴𑀺𑀬𑀁 𑀅𑀯𑀺𑀲𑁂𑀲𑁂𑀦 𑀢𑀡𑁆𑀳𑀓𑁆𑀔𑀬𑀲𑁆𑀲 𑀆𑀕𑀢𑀢𑁆𑀢𑀸 𑀧𑀞𑀫𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀲𑁆𑀲𑀸𑀧𑀺 𑀓𑀮𑀁 𑀮𑁄𑀓𑀺𑀬𑀁 𑀦 𑀅𑀕𑁆𑀖𑀢𑀺 𑀏𑀯. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀧𑀣𑀩𑁆𑀬𑀸 𑀏𑀓𑀭𑀚𑁆𑀚𑁂𑀦, 𑀲𑀕𑁆𑀕𑀲𑁆𑀲 𑀕𑀫𑀦𑁂𑀦 𑀯𑀸;

𑀲𑀩𑁆𑀩𑀮𑁄𑀓𑀸𑀥𑀺𑀧𑀘𑁆𑀘𑁂𑀦, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀭’’𑀦𑁆𑀢𑀺. (𑀥. 𑀧. 𑁧𑁭𑁮);

𑀲𑁄𑀢𑀸𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑁂𑀧𑀺 𑀯𑀼𑀢𑁆𑀢𑀁 𑁋

‘‘𑀓𑀺𑀜𑁆𑀘𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀘𑀢𑀼𑀦𑁆𑀦𑀁 𑀤𑀻𑀧𑀸𑀦𑀁 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁, 𑀲𑁄 𑀢𑀢𑁆𑀣 𑀦𑀦𑁆𑀤𑀦𑁂 𑀯𑀦𑁂 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄 𑀤𑀺𑀩𑁆𑀩𑁂𑀳𑀺 𑀘 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺, 𑀲𑁄 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀅𑀲𑀫𑀦𑁆𑀦𑀸𑀕𑀢𑁄. 𑀅𑀣 𑀔𑁄 𑀲𑁄 𑀅𑀧𑀭𑀺𑀫𑀼𑀢𑁆𑀢𑁄𑀯 𑀦𑀺𑀭𑀬𑀸, 𑀅𑀧𑀭𑀺𑀫𑀼𑀢𑁆𑀢𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸, 𑀅𑀧𑀭𑀺𑀫𑀼𑀢𑁆𑀢𑁄 𑀧𑁂𑀢𑁆𑀢𑀺𑀯𑀺𑀲𑀬𑀸, 𑀅𑀧𑀭𑀺𑀫𑀼𑀢𑁆𑀢𑁄 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸. 𑀓𑀺𑀜𑁆𑀘𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀧𑀺𑀡𑁆𑀟𑀺𑀬𑀸𑀮𑁄𑀧𑁂𑀦 𑀬𑀸𑀧𑁂𑀢𑀺, 𑀦𑀦𑁆𑀢𑀓𑀸𑀦𑀺 𑀘 𑀥𑀸𑀭𑁂𑀢𑀺, 𑀲𑁄 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀅𑀣 𑀔𑁄 𑀲𑁄 𑀧𑀭𑀺𑀫𑀼𑀢𑁆𑀢𑁄 𑀦𑀺𑀭𑀬𑀸, 𑀧𑀭𑀺𑀫𑀼𑀢𑁆𑀢𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸, 𑀧𑀭𑀺𑀫𑀼𑀢𑁆𑀢𑁄 𑀧𑁂𑀢𑁆𑀢𑀺𑀯𑀺𑀲𑀬𑀸, 𑀧𑀭𑀺𑀫𑀼𑀢𑁆𑀢𑁄 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸.

‘‘𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁…𑀧𑁂... 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦…𑀧𑁂… 𑀯𑀺𑀜𑁆𑀜𑀽𑀳𑀻’𑀢𑀺. 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦…𑀧𑁂… 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’𑀢𑀺. 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀇𑀫𑁂𑀳𑀺 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀬𑁄 𑀘, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀤𑀻𑀧𑀸𑀦𑀁 𑀧𑀝𑀺𑀮𑀸𑀪𑁄, 𑀬𑁄 𑀘𑀢𑀼𑀦𑁆𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀮𑀸𑀪𑁄, 𑀘𑀢𑀼𑀦𑁆𑀦𑀁 𑀤𑀻𑀧𑀸𑀦𑀁 𑀧𑀝𑀺𑀮𑀸𑀪𑁄 𑀘𑀢𑀼𑀦𑁆𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀮𑀸𑀪𑀲𑁆𑀲 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺’’𑀦𑁆𑀢𑀺 (𑀲𑀁. 𑀦𑀺. 𑁫.𑁯𑁯𑁭).

𑀏𑀯𑀁 𑀪𑀕𑀯𑀸 𑀲𑀩𑁆𑀩𑀢𑁆𑀣 𑀮𑁄𑀓𑀺𑀬𑀲𑀼𑀔𑀁 𑀲𑀉𑀢𑁆𑀢𑀭𑀁 𑀲𑀸𑀢𑀺𑀲𑀬𑀁, 𑀮𑁄𑀓𑀼𑀢𑁆𑀢𑀭𑀲𑀼𑀔𑀫𑁂𑀯 𑀅𑀦𑀼𑀢𑁆𑀢𑀭𑀦𑁆𑀢𑀺 𑀅𑀢𑀺𑀲𑀬𑀦𑁆𑀢𑀺 𑀪𑀸𑀚𑁂𑀲𑀻𑀢𑀺.

𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀓𑀼𑀫𑀸𑀭𑀓𑀸𑀢𑀺 𑀤𑀸𑀭𑀓𑀸. 𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺𑀁 𑀅𑀦𑁆𑀢𑀭𑀸 𑀘 𑀚𑁂𑀢𑀯𑀦𑀦𑁆𑀢𑀺 𑀅𑀦𑁆𑀢𑀭𑀸𑀲𑀤𑁆𑀤𑁄 ‘‘𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑀸’’𑀢𑀺 (𑀅. 𑀦𑀺. 𑁬.𑁪𑁪; 𑁧𑁦.𑁭𑁫), ‘‘𑀚𑀦𑀸 𑀲𑀗𑁆𑀕𑀫𑁆𑀫 𑀫𑀦𑁆𑀢𑁂𑀦𑁆𑀢𑀺, 𑀫𑀜𑁆𑀘 𑀢𑁆𑀯𑀜𑁆𑀘 𑀓𑀺𑀫𑀦𑁆𑀢𑀭’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁨𑁮) 𑀓𑀸𑀭𑀡𑁂 𑀆𑀕𑀢𑁄. ‘‘𑀅𑀤𑁆𑀤𑀲𑀸 𑀫𑀁, 𑀪𑀦𑁆𑀢𑁂, 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀪𑀸𑀚𑀦𑀁 𑀥𑁄𑀯𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁪𑁯) 𑀔𑀡𑁂. ‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸’’𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁦) 𑀘𑀺𑀢𑁆𑀢𑁂. ‘‘𑀅𑀦𑁆𑀢𑀭𑀸 𑀯𑁄𑀲𑀸𑀦𑀫𑀸𑀧𑀸𑀤𑀻’’𑀢𑀺𑀆𑀤𑀻𑀲𑀼 𑀯𑁂𑀫𑀚𑁆𑀛𑁂. ‘‘𑀅𑀧𑀺𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀢𑀧𑁄𑀤𑀸 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑀺𑀓𑀸𑀬 𑀆𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁩𑁧) 𑀯𑀺𑀯𑀭𑁂. 𑀲𑁆𑀯𑀸𑀬𑀫𑀺𑀥𑀸𑀧𑀺 𑀯𑀺𑀯𑀭𑁂 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀲𑀸𑀯𑀢𑁆𑀣𑀺𑀬𑀸 𑀘 𑀚𑁂𑀢𑀯𑀦𑀲𑁆𑀲 𑀘 𑀯𑀺𑀯𑀭𑁂𑀢𑀺, 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑁆𑀢𑀭𑀸𑀲𑀤𑁆𑀤𑀬𑁄𑀕𑀢𑁄 𑀘𑁂𑀢𑁆𑀣 𑀉𑀧𑀬𑁄𑀕𑀯𑀘𑀦𑀁 ‘‘𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺𑀁 𑀅𑀦𑁆𑀢𑀭𑀸 𑀘 𑀚𑁂𑀢𑀯𑀦’’𑀦𑁆𑀢𑀺. 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 ‘‘𑀅𑀦𑁆𑀢𑀭𑀸 𑀕𑀸𑀫𑀜𑁆𑀘 𑀦𑀤𑀺𑀜𑁆𑀘 𑀕𑀘𑁆𑀙𑀢𑀻’’𑀢𑀺 𑀏𑀓𑀫𑁂𑀯 𑀅𑀦𑁆𑀢𑀭𑀸𑀲𑀤𑁆𑀤𑀁 𑀧𑀬𑀼𑀚𑁆𑀚𑀦𑁆𑀢𑀺, 𑀲𑁄 𑀤𑀼𑀢𑀺𑀬𑀧𑀤𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑁄 𑀳𑁄𑀢𑀺. 𑀇𑀥 𑀧𑀦 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑁄.

𑀅𑀳𑀺𑀁 𑀤𑀡𑁆𑀟𑁂𑀦 𑀳𑀦𑀦𑁆𑀢𑀻𑀢𑀺 𑀩𑀺𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑁄𑀘𑀭𑀸𑀬 𑀕𑀘𑁆𑀙𑀦𑁆𑀢𑀁 𑀓𑀡𑁆𑀳𑀲𑀧𑁆𑀧𑀁 𑀙𑀸𑀢𑀚𑁆𑀛𑀢𑁆𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀬𑀝𑁆𑀞𑀻𑀳𑀺 𑀧𑁄𑀣𑁂𑀦𑁆𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀸 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑁂 𑀤𑀸𑀭𑀓𑁂 𑀅𑀳𑀺𑀁 𑀤𑀡𑁆𑀟𑁂𑀦 𑀳𑀦𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸 𑀓𑀼𑀫𑀸𑀭𑀓𑀸 𑀇𑀫𑀁 𑀅𑀳𑀺𑀁 𑀤𑀡𑁆𑀟𑁂𑀦 𑀳𑀦𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀟𑀁𑀲𑀦𑀪𑀬𑁂𑀦, 𑀪𑀦𑁆𑀢𑁂’’𑀢𑀺 𑀘 𑀯𑀼𑀢𑁆𑀢𑁂 ‘‘𑀇𑀫𑁂 𑀅𑀢𑁆𑀢𑀦𑁄 𑀲𑀼𑀔𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀇𑀫𑀁 𑀧𑀳𑀭𑀦𑁆𑀢𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀲𑁆𑀲𑀦𑁆𑀢𑀺, 𑀅𑀳𑁄 𑀅𑀯𑀺𑀚𑁆𑀚𑀸𑀬 𑀦𑀺𑀓𑀢𑀺𑀓𑁄𑀲𑀮𑁆𑀮’’𑀦𑁆𑀢𑀺 𑀥𑀫𑁆𑀫𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑁂𑀲𑀺. 𑀢𑁂𑀦𑁂𑀯 𑀘 𑀥𑀫𑁆𑀫𑀲𑀁𑀯𑁂𑀕𑁂𑀦 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺.

𑀢𑀢𑁆𑀣 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 ‘‘𑀇𑀫𑁂 𑀤𑀸𑀭𑀓𑀸 𑀅𑀢𑁆𑀢𑀲𑀼𑀔𑀸𑀬 𑀧𑀭𑀤𑀼𑀓𑁆𑀔𑀁 𑀓𑀭𑁄𑀦𑁆𑀢𑀸 𑀲𑀬𑀁 𑀧𑀭𑀢𑁆𑀣 𑀲𑀼𑀔𑀁 𑀦 𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀢𑀫𑀢𑁆𑀣𑀁 𑀚𑀸𑀦𑀺𑀢𑁆𑀯𑀸𑀢𑀺 𑀏𑀯𑀫𑁂𑀓𑁂 𑀯𑀡𑁆𑀡𑁂𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀤𑀼𑀧𑁆𑀧𑀝𑀺𑀧𑀦𑁆𑀦𑀸𑀦𑀁 𑀲𑀼𑀔𑀧𑀭𑀺𑀬𑁂𑀲𑀦𑀁 𑀆𑀬𑀢𑀺𑀁 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀢𑀺, 𑀲𑀼𑀧𑁆𑀧𑀝𑀺𑀧𑀦𑁆𑀦𑀸𑀦𑀁 𑀏𑀓𑀦𑁆𑀢𑁂𑀦 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀲𑁆𑀫𑀸 ‘‘𑀧𑀭𑀯𑀺𑀳𑁂𑀲𑀸𑀯𑀺𑀦𑀺𑀫𑀼𑀢𑁆𑀢𑀸 𑀅𑀘𑁆𑀘𑀦𑁆𑀢𑀫𑁂𑀯 𑀲𑀼𑀔𑀪𑀸𑀕𑀺𑀦𑁄 𑀯𑀢 𑀫𑀬𑁆𑀳𑀁 𑀑𑀯𑀸𑀤𑀧𑁆𑀧𑀝𑀺𑀓𑀭𑀸’’𑀢𑀺 𑀲𑁄𑀫𑀦𑀲𑁆𑀲𑀯𑀲𑁂𑀦𑁂𑀯𑁂𑀢𑀫𑁆𑀧𑀺 𑀲𑀢𑁆𑀣𑀸 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀏𑀯𑀁 𑀢𑁂𑀳𑀺 𑀓𑀼𑀫𑀸𑀭𑀓𑁂𑀳𑀺 𑀧𑀯𑀢𑁆𑀢𑀺𑀢𑀁 𑀧𑀭𑀯𑀺𑀳𑁂𑀞𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀆𑀤𑀻𑀦𑀯𑀢𑁄 𑀯𑀺𑀤𑀺𑀢𑁆𑀯𑀸 𑀧𑀭𑀯𑀺𑀳𑁂𑀲𑀸𑀬 𑀧𑀭𑀸𑀦𑀼𑀓𑀫𑁆𑀧𑀸𑀬 𑀘 𑀬𑀣𑀸𑀓𑁆𑀓𑀫𑀁 𑀆𑀤𑀻𑀦𑀯𑀸𑀦𑀺𑀲𑀁𑀲𑀯𑀺𑀪𑀸𑀯𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺.

𑀢𑀢𑁆𑀣 𑀲𑀼𑀔𑀓𑀸𑀫𑀸𑀦𑀻𑀢𑀺 𑀏𑀓𑀦𑁆𑀢𑁂𑀦𑁂𑀯 𑀅𑀢𑁆𑀢𑀦𑁄 𑀲𑀼𑀔𑀲𑁆𑀲 𑀇𑀘𑁆𑀙𑀦𑀢𑁄 𑀲𑀼𑀔𑀸𑀦𑀼𑀕𑀺𑀤𑁆𑀥𑀸𑀦𑀺. 𑀪𑀽𑀢𑀸𑀦𑀻𑀢𑀺 𑀧𑀸𑀡𑀺𑀦𑁄. 𑀬𑁄 𑀤𑀡𑁆𑀟𑁂𑀦 𑀯𑀺𑀳𑀺𑀁𑀲𑀢𑀻𑀢𑀺 𑀏𑀢𑁆𑀣 𑀤𑀡𑁆𑀟𑁂𑀦𑀸𑀢𑀺 𑀤𑁂𑀲𑀦𑀸𑀫𑀢𑁆𑀢𑀁, 𑀤𑀡𑁆𑀟𑁂𑀦 𑀯𑀸 𑀮𑁂𑀟𑁆𑀟𑀼𑀲𑀢𑁆𑀣𑀧𑀸𑀡𑀺𑀧𑁆𑀧𑀳𑀸𑀭𑀸𑀤𑀻𑀳𑀺 𑀯𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀤𑀡𑁆𑀟𑁂𑀦𑀸𑀢𑀺 𑀤𑀡𑁆𑀟𑀦𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀲𑀼𑀔𑀓𑀸𑀫𑀸𑀦𑀺 𑀲𑀩𑁆𑀩𑀪𑀽𑀢𑀸𑀦𑀺 𑀚𑀸𑀢𑀺𑀆𑀤𑀺𑀦𑀸 𑀖𑀝𑁆𑀝𑀦𑀯𑀲𑁂𑀦 𑀯𑀘𑀻𑀤𑀡𑁆𑀟𑁂𑀦 𑀯𑀸 𑀧𑀸𑀡𑀺𑀫𑀼𑀕𑁆𑀕𑀭𑀲𑀢𑁆𑀣𑀸𑀤𑀻𑀳𑀺 𑀧𑁄𑀣𑀦𑀢𑀸𑀴𑀦𑀘𑁆𑀙𑁂𑀤𑀦𑀸𑀤𑀺𑀯𑀲𑁂𑀦 𑀲𑀭𑀻𑀭𑀤𑀡𑁆𑀟𑁂𑀦 𑀯𑀸 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀞𑀸𑀧𑀦𑀯𑀲𑁂𑀦 𑀥𑀦𑀤𑀡𑁆𑀟𑁂𑀦 𑀯𑀸𑀢𑀺 𑀇𑀫𑁂𑀲𑀼 𑀤𑀡𑁆𑀟𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀤𑀡𑁆𑀟𑁂𑀦 𑀯𑀺𑀳𑀺𑀁𑀲𑀢𑀺 𑀯𑀺𑀳𑁂𑀞𑁂𑀢𑀺 𑀤𑀼𑀓𑁆𑀔𑀁 𑀧𑀸𑀧𑁂𑀢𑀺, 𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀦 𑀮𑀪𑀢𑁂 𑀲𑀼𑀔𑀦𑁆𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀲𑀼𑀔𑀁 𑀏𑀲𑀦𑁆𑀢𑁄 𑀕𑀯𑁂𑀲𑀦𑁆𑀢𑁄 𑀧𑀢𑁆𑀣𑁂𑀦𑁆𑀢𑁄 𑀧𑁂𑀘𑁆𑀘 𑀧𑀭𑀮𑁄𑀓𑁂 𑀫𑀦𑀼𑀲𑁆𑀲𑀲𑀼𑀔𑀁 𑀤𑀺𑀩𑁆𑀩𑀲𑀼𑀔𑀁 𑀦𑀺𑀩𑁆𑀩𑀸𑀦𑀲𑀼𑀔𑀦𑁆𑀢𑀺 𑀢𑀺𑀯𑀺𑀥𑀫𑁆𑀧𑀺 𑀲𑀼𑀔𑀁 𑀦 𑀮𑀪𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀢𑁂𑀦 𑀤𑀡𑁆𑀟𑁂𑀦 𑀤𑀼𑀓𑁆𑀔𑀫𑁂𑀯 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑀧𑁂𑀘𑁆𑀘 𑀲𑁄 𑀮𑀪𑀢𑁂 𑀲𑀼𑀔𑀦𑁆𑀢𑀺 𑀬𑁄 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑁄 ‘‘𑀬𑀣𑀸𑀳𑀁 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀧𑁆𑀧𑀝𑀺𑀓𑀽𑀮𑁄, 𑀏𑀯𑀁 𑀲𑀩𑁆𑀩𑁂𑀧𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀆𑀤𑀻𑀲𑀼 𑀞𑀺𑀢𑁄 𑀯𑀼𑀢𑁆𑀢𑀦𑀬𑁂𑀦 𑀓𑁂𑀦𑀘𑀺 𑀤𑀡𑁆𑀟𑁂𑀦 𑀲𑀩𑁆𑀩𑀸𑀦𑀺𑀧𑀺 𑀪𑀽𑀢𑀸𑀦𑀺 𑀦 𑀳𑀺𑀁𑀲𑀢𑀺 𑀦 𑀩𑀸𑀥𑀢𑀺, 𑀲𑁄 𑀧𑀼𑀕𑁆𑀕𑀮𑁄 𑀧𑀭𑀮𑁄𑀓𑁂 𑀫𑀦𑀼𑀲𑁆𑀲𑀪𑀽𑀢𑁄 𑀫𑀦𑀼𑀲𑁆𑀲𑀲𑀼𑀔𑀁, 𑀤𑁂𑀯𑀪𑀽𑀢𑁄 𑀤𑀺𑀩𑁆𑀩𑀲𑀼𑀔𑀁, 𑀉𑀪𑀬𑀁 𑀅𑀢𑀺𑀓𑁆𑀓𑀫𑀦𑁆𑀢𑁄 𑀦𑀺𑀩𑁆𑀩𑀸𑀦𑀲𑀼𑀔𑀁 𑀮𑀪𑀢𑀻𑀢𑀺. 𑀏𑀢𑁆𑀣 𑀘 𑀢𑀸𑀤𑀺𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀯𑀲𑁆𑀲𑀁𑀪𑀸𑀯𑀺𑀢𑀸𑀬 𑀢𑀁 𑀲𑀼𑀔𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀮𑀪𑀢𑁂’’𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀕𑀸𑀣𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀓𑁆𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀻𑀢𑀺 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑁂𑀲𑀼 𑀘𑀢𑀽𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀧𑀭𑀺𑀧𑀽𑀭𑀺𑀢𑀲𑁆𑀲 𑀧𑀼𑀜𑁆𑀜𑀲𑀫𑁆𑀪𑀸𑀭𑀯𑀺𑀲𑁂𑀲𑀲𑁆𑀲 𑀨𑀮𑀪𑀽𑀢𑁂𑀦 ‘‘𑀇𑀢𑁄 𑀧𑀭𑀁 𑀫𑀬𑁆𑀳𑀁 𑀑𑀓𑀸𑀲𑁄 𑀦𑀢𑁆𑀣𑀻’’𑀢𑀺 𑀉𑀲𑁆𑀲𑀳𑀚𑀸𑀢𑁂𑀦 𑀯𑀺𑀬 𑀉𑀧𑀭𑀽𑀧𑀭𑀺 𑀯𑀟𑁆𑀠𑀫𑀸𑀦𑁂𑀦 𑀲𑀓𑁆𑀓𑀸𑀭𑀸𑀤𑀺𑀦𑀸 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺. 𑀲𑀩𑁆𑀩𑀤𑀺𑀲𑀸𑀲𑀼 𑀳𑀺 𑀬𑀫𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀳𑁄𑀖𑀁 𑀯𑀺𑀬 𑀲𑀩𑁆𑀩𑀧𑀸𑀭𑀫𑀺𑀬𑁄 ‘‘𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑀸 𑀯𑀺𑀬 𑀪𑀕𑀯𑀢𑁄 𑀮𑀸𑀪𑀲𑀓𑁆𑀓𑀸𑀭𑀫𑀳𑁄𑀖𑀁 𑀦𑀺𑀩𑁆𑀩𑀢𑁆𑀢𑀬𑀺𑀁𑀲𑀼. 𑀢𑀢𑁄 𑀅𑀦𑁆𑀦𑀧𑀸𑀦𑀯𑀢𑁆𑀣𑀬𑀸𑀦𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀳𑀢𑁆𑀣𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀩𑀼𑀤𑁆𑀥𑁄, 𑀓𑀳𑀁 𑀪𑀕𑀯𑀸, 𑀓𑀳𑀁 𑀤𑁂𑀯𑀤𑁂𑀯𑁄, 𑀓𑀳𑀁 𑀦𑀭𑀸𑀲𑀪𑁄, 𑀓𑀳𑀁 𑀧𑀼𑀭𑀺𑀲𑀲𑀻𑀳𑁄’’𑀢𑀺 𑀪𑀕𑀯𑀦𑁆𑀢𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀲𑀓𑀝𑀲𑀢𑁂𑀳𑀺 𑀧𑀘𑁆𑀘𑀬𑁂 𑀆𑀳𑀭𑀺𑀢𑁆𑀯𑀸 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀲𑀫𑀦𑁆𑀢𑀸 𑀕𑀸𑀯𑀼𑀢𑀧𑁆𑀧𑀫𑀸𑀡𑁂𑀧𑀺 𑀲𑀓𑀝𑀥𑀼𑀭𑁂𑀦 𑀲𑀓𑀝𑀥𑀼𑀭𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺 𑀘𑁂𑀯 𑀅𑀦𑀼𑀩𑀦𑁆𑀥𑀦𑁆𑀢𑀺 𑀘 𑀅𑀦𑁆𑀥𑀓𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀯𑀺𑀬. 𑀲𑀩𑁆𑀩𑀁 𑀢𑀁 𑀔𑀦𑁆𑀥𑀓𑁂 (𑀫𑀳𑀸𑀯. 𑁨𑁮𑁨) 𑀢𑁂𑀲𑀼 𑀢𑁂𑀲𑀼 𑀘 𑀲𑀼𑀢𑁆𑀢𑁂𑀲𑀼 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘 𑀪𑀕𑀯𑀢𑁄, 𑀏𑀯𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀸𑀯𑀢𑀸 𑀔𑁄, 𑀘𑀼𑀦𑁆𑀤, 𑀏𑀢𑀭𑀳𑀺 𑀲𑀗𑁆𑀖𑀸 𑀯𑀸 𑀕𑀡𑀸 𑀯𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑀸, 𑀦𑀸𑀳𑀁, 𑀘𑀼𑀦𑁆𑀤, 𑀅𑀜𑁆𑀜𑀁 𑀏𑀓𑀲𑀗𑁆𑀖𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀁, 𑀬𑀣𑀭𑀺𑀯𑀸𑀬𑀁, 𑀘𑀼𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 (𑀤𑀻. 𑀦𑀺. 𑁩.𑁧𑁭𑁬).

𑀲𑁆𑀯𑀸𑀬𑀁 𑀪𑀕𑀯𑀢𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀉𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀤𑀻𑀦𑀁 𑀉𑀤𑀓𑁄𑀖𑁄 𑀯𑀺𑀬 𑀅𑀧𑁆𑀧𑀫𑁂𑀬𑁆𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦𑀁, 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀲𑀓𑁆𑀓𑀢𑁄…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺.

𑀢𑀺𑀢𑁆𑀣𑀺𑀬𑀸 𑀧𑀦 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀢𑀸𑀬 𑀘 𑀤𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀬 𑀘 𑀅𑀲𑀓𑁆𑀓𑀢𑀸 𑀅𑀕𑀭𑀼𑀓𑀢𑀸, 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀦 𑀧𑀦 𑀯𑀺𑀲𑁂𑀲𑀢𑁄 𑀯𑀺𑀧𑀦𑁆𑀦𑀲𑁄𑀪𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀔𑀚𑁆𑀚𑁄𑀧𑀦𑀓𑀸 𑀯𑀺𑀬 𑀦𑀺𑀧𑁆𑀧𑀪𑀸 𑀦𑀺𑀢𑁆𑀢𑁂𑀚𑀸 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀅𑀳𑁂𑀲𑀼𑀁. 𑀢𑁂 𑀢𑀸𑀤𑀺𑀲𑀁 𑀪𑀕𑀯𑀢𑁄 𑀲𑀗𑁆𑀖𑀲𑁆𑀲 𑀘 𑀮𑀸𑀪𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑀸 𑀇𑀲𑁆𑀲𑀸𑀧𑀓𑀢𑀸 ‘‘𑀏𑀯𑀁 𑀇𑀫𑁂 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀖𑀝𑁆𑀝𑁂𑀢𑁆𑀯𑀸𑀯 𑀧𑀮𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀉𑀲𑀽𑀬𑀸 𑀯𑀺𑀲𑀼𑀕𑁆𑀕𑀸𑀭𑀁 𑀉𑀕𑁆𑀕𑀺𑀭𑀦𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀦𑁆𑀢𑀸 𑀧𑀭𑀺𑀪𑀸𑀲𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀦 𑀧𑀭𑀺𑀩𑁆𑀩𑀸𑀚𑀓𑀸 𑀅𑀲𑀓𑁆𑀓𑀢𑀸 𑀳𑁄𑀦𑁆𑀢𑀺…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀣 𑀔𑁄 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀪𑀕𑀯𑀢𑁄 𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀕𑀸𑀫𑁂 𑀘 𑀅𑀭𑀜𑁆𑀜𑁂 𑀘 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀭𑁄𑀲𑁂𑀦𑁆𑀢𑀺 𑀯𑀺𑀳𑁂𑀲𑁂𑀦𑁆𑀢𑀻’’𑀢𑀺.

𑀢𑀢𑁆𑀣 𑀅𑀲𑀩𑁆𑀪𑀸𑀳𑀻𑀢𑀺 𑀅𑀲𑀪𑀸𑀬𑁄𑀕𑁆𑀕𑀸𑀳𑀺 𑀲𑀪𑀸𑀬𑀁 𑀲𑀸𑀥𑀼𑀚𑀦𑀲𑀫𑀽𑀳𑁂 𑀯𑀢𑁆𑀢𑀼𑀁 𑀅𑀬𑀼𑀢𑁆𑀢𑀸𑀳𑀺, 𑀤𑀼𑀝𑁆𑀞𑀼𑀮𑁆𑀮𑀸𑀳𑀻𑀢𑀺 𑀅𑀢𑁆𑀣𑁄. 𑀨𑀭𑀼𑀲𑀸𑀳𑀻𑀢𑀺 𑀓𑀓𑁆𑀔𑀴𑀸𑀳𑀺 𑀫𑀫𑁆𑀫𑀘𑁆𑀙𑁂𑀤𑀺𑀓𑀸𑀳𑀺. 𑀅𑀓𑁆𑀓𑁄𑀲𑀦𑁆𑀢𑀻𑀢𑀺 𑀚𑀸𑀢𑀺𑀆𑀤𑀻𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀔𑀼𑀁𑀲𑁂𑀦𑁆𑀢𑀺. 𑀧𑀭𑀺𑀪𑀸𑀲𑀦𑁆𑀢𑀻𑀢𑀺 𑀪𑀡𑁆𑀟𑀦𑀯𑀲𑁂𑀦 𑀪𑀬𑀁 𑀉𑀧𑁆𑀧𑀸𑀤𑁂𑀦𑁆𑀢𑀸 𑀢𑀚𑁆𑀚𑁂𑀦𑁆𑀢𑀺. 𑀭𑁄𑀲𑁂𑀦𑁆𑀢𑀻𑀢𑀺 𑀬𑀣𑀸 𑀧𑀭𑀲𑁆𑀲 𑀭𑁄𑀲𑁄 𑀳𑁄𑀢𑀺, 𑀏𑀯𑀁 𑀅𑀦𑀼𑀤𑁆𑀥𑀁𑀲𑀦𑀯𑀲𑁂𑀦 𑀭𑁄𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀯𑀺𑀳𑁂𑀲𑁂𑀦𑁆𑀢𑀻𑀢𑀺 𑀯𑀺𑀳𑁂𑀞𑁂𑀦𑁆𑀢𑀺, 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀅𑀨𑀸𑀲𑀼𑀁 𑀓𑀭𑁄𑀦𑁆𑀢𑀺.

𑀓𑀣𑀁 𑀧𑀦𑁂𑀢𑁂 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁂 𑀪𑀕𑀯𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 𑀅𑀓𑁆𑀓𑁄𑀲𑀸𑀤𑀻𑀦𑀺 𑀧𑀯𑀢𑁆𑀢𑁂𑀲𑀼𑀦𑁆𑀢𑀺? 𑀪𑀕𑀯𑀢𑁄 𑀉𑀧𑁆𑀧𑀸𑀤𑀢𑁄 𑀧𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀢𑀸𑀬 𑀉𑀧𑀳𑀢𑀘𑀺𑀢𑁆𑀢𑀸 𑀧𑀣𑀯𑀺𑀁 𑀔𑀡𑀺𑀢𑁆𑀯𑀸 𑀧𑀓𑁆𑀔𑀮𑀦𑁆𑀢𑀸 𑀯𑀺𑀬 𑀅𑀯𑀡𑁂 𑀯𑁂𑀴𑀼𑀭𑀺𑀬𑀫𑀡𑀺𑀫𑁆𑀳𑀺 𑀯𑀡𑀁 𑀉𑀧𑁆𑀧𑀸𑀤𑁂𑀦𑁆𑀢𑀸 𑀯𑀺𑀬 𑀘 𑀲𑀼𑀦𑁆𑀤𑀭𑀺𑀓𑀁 𑀦𑀸𑀫 𑀧𑀭𑀺𑀩𑁆𑀩𑀸𑀚𑀺𑀓𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑀸𑀬 𑀲𑀢𑁆𑀣𑀼 𑀪𑀺𑀓𑁆𑀔𑀽𑀦𑀜𑁆𑀘 𑀅𑀯𑀡𑁆𑀡𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀓𑁆𑀓𑁄𑀲𑀸𑀤𑀻𑀦𑀺 𑀧𑀯𑀢𑁆𑀢𑁂𑀲𑀼𑀁. 𑀢𑀁 𑀧𑀦𑁂𑀢𑀁 𑀲𑀼𑀦𑁆𑀤𑀭𑀻𑀯𑀢𑁆𑀣𑀼 𑀧𑀭𑀢𑁄 𑀲𑀼𑀦𑁆𑀤𑀭𑀻𑀲𑀼𑀢𑁆𑀢𑁂 (𑀉𑀤𑀸. 𑁩𑁮) 𑀧𑀸𑀴𑀺𑀬𑀁𑀬𑁂𑀯 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀬𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀢𑀢𑁆𑀣𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀫𑀸𑀭𑁄𑀘𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼…𑀧𑁂… 𑀯𑀺𑀳𑁂𑀲𑁂𑀦𑁆𑀢𑀻’’𑀢𑀺. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀇𑀲𑁆𑀲𑀸𑀧𑀓𑀢𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀢𑁂𑀳𑀺 𑀓𑀢𑁂 𑀯𑀺𑀧𑁆𑀧𑀓𑀸𑀭𑁂 𑀧𑀲𑀦𑁆𑀦𑀘𑀺𑀢𑁆𑀢𑁂𑀳𑀺 𑀘 𑀧𑀭𑁂𑀳𑀺 𑀓𑀢𑁂 𑀉𑀧𑀓𑀸𑀭𑁂 𑀢𑀸𑀤𑀺𑀪𑀸𑀯𑀸𑀦𑀼𑀪𑀸𑀯𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀕𑀸𑀫𑁂 𑀅𑀭𑀜𑁆𑀜𑁂 𑀲𑀼𑀔𑀤𑀼𑀓𑁆𑀔𑀨𑀼𑀝𑁆𑀞𑁄𑀢𑀺 𑀕𑀸𑀫𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀼𑀔𑁂𑀦 𑀤𑀼𑀓𑁆𑀔𑁂𑀦 𑀘 𑀨𑀼𑀝𑁆𑀞𑁄 𑀲𑀼𑀔𑀤𑀼𑀓𑁆𑀔𑀸𑀦𑀺 𑀅𑀦𑀼𑀪𑀯𑀦𑁆𑀢𑁄, 𑀢𑁂𑀲𑀁 𑀯𑀸 𑀧𑀘𑁆𑀘𑀬𑁂𑀳𑀺 𑀲𑀫𑀗𑁆𑀕𑀻𑀪𑀽𑀢𑁄. 𑀦𑁂𑀯𑀢𑁆𑀢𑀢𑁄 𑀦𑁄 𑀧𑀭𑀢𑁄 𑀤𑀳𑁂𑀣𑀸𑀢𑀺 ‘‘𑀅𑀳𑀁 𑀲𑀼𑀔𑀺𑀢𑁄, 𑀅𑀳𑀁 𑀤𑀼𑀓𑁆𑀔𑀺𑀢𑁄, 𑀫𑀫 𑀲𑀼𑀔𑀁, 𑀫𑀫 𑀤𑀼𑀓𑁆𑀔𑀁, 𑀧𑀭𑁂𑀦𑀺𑀤𑀁 𑀫𑀬𑁆𑀳𑀁 𑀲𑀼𑀔𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑀺𑀢’’𑀦𑁆𑀢𑀺 𑀘 𑀦𑁂𑀯 𑀅𑀢𑁆𑀢𑀢𑁄 𑀦 𑀧𑀭𑀢𑁄 𑀢𑀁 𑀲𑀼𑀔𑀤𑀼𑀓𑁆𑀔𑀁 𑀞𑀧𑁂𑀣. 𑀓𑀲𑁆𑀫𑀸? 𑀦 𑀳𑁂𑀢𑁆𑀣 𑀔𑀦𑁆𑀥𑀧𑀜𑁆𑀘𑀓𑁂 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀧𑀭𑁄𑀢𑀺 𑀯𑀸 𑀧𑀭𑀲𑁆𑀲𑀸𑀢𑀺 𑀯𑀸 𑀧𑀲𑁆𑀲𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀺𑀜𑁆𑀘𑀺 𑀅𑀢𑁆𑀣𑀺, 𑀓𑁂𑀯𑀮𑀁 𑀲𑀗𑁆𑀔𑀸𑀭𑀸 𑀏𑀯 𑀧𑀦 𑀬𑀣𑀸𑀧𑀘𑁆𑀘𑀬𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑁆𑀢𑀻𑀢𑀺. 𑀲𑀼𑀔𑀤𑀼𑀓𑁆𑀔𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀤𑁂𑀲𑀦𑀸𑀲𑀻𑀲𑀁, 𑀲𑀩𑁆𑀩𑀲𑁆𑀲𑀸𑀧𑀺 𑀮𑁄𑀓𑀥𑀫𑁆𑀫𑀲𑁆𑀲 𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀪𑀕𑀯𑀸 ‘‘𑀦𑀸𑀳𑀁 𑀓𑁆𑀯𑀘𑀦𑀺, 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀁, 𑀦 𑀘 𑀫𑀫 𑀓𑁆𑀯𑀘𑀦𑀺, 𑀓𑀢𑁆𑀣𑀘𑀺 𑀓𑀺𑀜𑁆𑀘𑀦𑀢𑀢𑁆𑀣𑀻’’𑀢𑀺 𑀘𑀢𑀼𑀓𑁄𑀝𑀺𑀓𑀁 𑀲𑀼𑀜𑁆𑀜𑀢𑀁 𑀯𑀺𑀪𑀸𑀯𑁂𑀲𑀺.

𑀇𑀤𑀸𑀦𑀺 𑀢𑀲𑁆𑀲 𑀅𑀢𑁆𑀢𑀢𑁄 𑀧𑀭𑀢𑁄 𑀘 𑀅𑀤𑀳𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺 ‘‘𑀨𑀼𑀲𑀦𑁆𑀢𑀺 𑀨𑀲𑁆𑀲𑀸 𑀉𑀧𑀥𑀺𑀁 𑀧𑀝𑀺𑀘𑁆𑀘𑀸’’𑀢𑀺. 𑀏𑀢𑁂 𑀲𑀼𑀔𑀯𑁂𑀤𑀦𑀻𑀬𑀸 𑀤𑀼𑀓𑁆𑀔𑀯𑁂𑀤𑀦𑀻𑀬𑀸 𑀘 𑀨𑀲𑁆𑀲𑀸 𑀦𑀸𑀫 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑀁 𑀉𑀧𑀥𑀺𑀁 𑀧𑀝𑀺𑀘𑁆𑀘 𑀢𑀲𑁆𑀫𑀺𑀁 𑀲𑀢𑀺 𑀬𑀣𑀸𑀲𑀓𑀁 𑀯𑀺𑀲𑀬𑀁 𑀨𑀼𑀲𑀦𑁆𑀢𑀺, 𑀢𑀢𑁆𑀣 𑀧𑀯𑀢𑁆𑀢𑀦𑁆𑀢𑀺𑀬𑁂𑀯. 𑀅𑀤𑀼𑀓𑁆𑀔𑀫𑀲𑀼𑀔𑀸 𑀳𑀺 𑀯𑁂𑀤𑀦𑀸 𑀲𑀦𑁆𑀢𑀲𑀪𑀸𑀯𑀢𑀸𑀬 𑀲𑀼𑀔𑁂 𑀏𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀤𑀼𑀯𑀺𑀥𑀲𑀫𑁆𑀨𑀲𑁆𑀲𑀯𑀲𑁂𑀦𑁂𑀯𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀓𑀢𑀸.

𑀬𑀣𑀸 𑀧𑀦 𑀢𑁂 𑀨𑀲𑁆𑀲𑀸 𑀦 𑀨𑀼𑀲𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀭𑀼𑀧𑀥𑀺𑀁 𑀓𑁂𑀦 𑀨𑀼𑀲𑁂𑀬𑁆𑀬𑀼𑀁 𑀨𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀲𑁄 𑀳𑀺 𑀔𑀦𑁆𑀥𑀽𑀧𑀥𑀺𑀬𑀸 𑀅𑀲𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀢𑁂 𑀨𑀲𑁆𑀲𑀸 𑀨𑀼𑀲𑁂𑀬𑁆𑀬𑀼𑀁, 𑀦 𑀢𑀁 𑀓𑀸𑀭𑀡𑀁 𑀅𑀢𑁆𑀣𑀺. 𑀬𑀤𑀺 𑀳𑀺 𑀢𑀼𑀫𑁆𑀳𑁂 𑀅𑀓𑁆𑀓𑁄𑀲𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀲𑀼𑀔𑀤𑀼𑀓𑁆𑀔𑀁 𑀦 𑀇𑀘𑁆𑀙𑀣, 𑀲𑀩𑁆𑀩𑀲𑁄 𑀦𑀺𑀭𑀼𑀧𑀥𑀺𑀪𑀸𑀯𑁂𑀬𑁂𑀯 𑀬𑁄𑀕𑀁 𑀓𑀭𑁂𑀬𑁆𑀬𑀸𑀣𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀕𑀸𑀣𑀁 𑀦𑀺𑀝𑁆𑀞𑀧𑁂𑀲𑀺. 𑀏𑀯𑀁 𑀇𑀫𑀺𑀦𑀸 𑀉𑀤𑀸𑀦𑁂𑀦 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑀘𑀢𑀼𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀧𑀸𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 𑀇𑀘𑁆𑀙𑀸𑀦𑀗𑁆𑀕𑀮𑀓𑁄𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀦𑀸𑀫𑀓𑁄 𑀓𑁄𑀲𑀮𑁂𑀲𑀼 𑀏𑀓𑁄 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀁𑀦𑀺𑀯𑀸𑀲𑀺𑀢𑀸𑀬 𑀢𑀢𑁆𑀣 𑀯𑀸 𑀚𑀸𑀢𑁄 𑀪𑀯𑁄𑀢𑀺 𑀯𑀸 𑀇𑀘𑁆𑀙𑀸𑀦𑀗𑁆𑀕𑀮𑀓𑁄. 𑀉𑀧𑀸𑀲𑀓𑁄𑀢𑀺 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀉𑀧𑀸𑀲𑀓𑀪𑀸𑀯𑀲𑁆𑀲 𑀧𑀯𑁂𑀤𑀺𑀢𑀢𑁆𑀢𑀸 𑀉𑀧𑀸𑀲𑀓𑁄 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀺𑀓𑁄 𑀩𑀼𑀤𑁆𑀥𑀫𑀸𑀫𑀓𑁄, 𑀥𑀫𑁆𑀫𑀫𑀸𑀫𑀓𑁄, 𑀲𑀗𑁆𑀖𑀫𑀸𑀫𑀓𑁄. 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸𑀢𑀺 𑀉𑀤𑁆𑀥𑀸𑀭𑀲𑁄𑀥𑀸𑀧𑀦𑀸𑀤𑀺𑀦𑀸 𑀓𑁂𑀦𑀘𑀺𑀤𑁂𑀯 𑀓𑀢𑁆𑀢𑀩𑁆𑀩𑁂𑀦. 𑀢𑀻𑀭𑁂𑀢𑁆𑀯𑀸𑀢𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸. 𑀅𑀬𑀁 𑀓𑀺𑀭 𑀉𑀧𑀸𑀲𑀓𑁄 𑀧𑀼𑀩𑁆𑀩𑁂 𑀅𑀪𑀺𑀡𑁆𑀳𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀢𑀺, 𑀲𑁄 𑀓𑀢𑀺𑀧𑀬𑀁 𑀓𑀸𑀮𑀁 𑀩𑀳𑀼𑀓𑀭𑀡𑀻𑀬𑀢𑀸𑀬 𑀲𑀢𑁆𑀣𑀼 𑀤𑀲𑁆𑀲𑀦𑀁 𑀦𑀸𑀪𑀺𑀲𑀫𑁆𑀪𑁄𑀲𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀘𑀺𑀭𑀲𑁆𑀲𑀁 𑀔𑁄 𑀢𑁆𑀯𑀁, 𑀉𑀧𑀸𑀲𑀓, 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀺, 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬𑀸’’𑀢𑀺.

𑀢𑀢𑁆𑀣 𑀘𑀺𑀭𑀲𑁆𑀲𑀦𑁆𑀢𑀺 𑀘𑀺𑀭𑁂𑀦. 𑀧𑀭𑀺𑀬𑀸𑀬𑀦𑁆𑀢𑀺 𑀯𑀸𑀭𑀁. 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀬𑁄 𑀅𑀬𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀥 𑀫𑀫 𑀲𑀦𑁆𑀢𑀺𑀓𑁂 𑀆𑀕𑀫𑀦𑀸𑀬 𑀬𑁄 𑀅𑀬𑀁 𑀅𑀚𑁆𑀚 𑀓𑀢𑁄 𑀯𑀸𑀭𑁄, 𑀢𑀁 𑀇𑀫𑀁 𑀘𑀺𑀭𑁂𑀦 𑀧𑀧𑀜𑁆𑀘𑀁 𑀓𑀢𑁆𑀯𑀸 𑀅𑀓𑀸𑀲𑀻𑀢𑀺. 𑀘𑀺𑀭𑀧𑀝𑀺𑀓𑀸𑀳𑀦𑁆𑀢𑀺 𑀘𑀺𑀭𑀧𑀝𑀺𑀓𑁄 𑀅𑀳𑀁, 𑀘𑀺𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀳𑀁 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀳𑀺𑀘𑀺 𑀓𑁂𑀳𑀺𑀘𑀻𑀢𑀺 𑀏𑀓𑀘𑁆𑀘𑁂𑀳𑀺 𑀏𑀓𑀘𑁆𑀘𑁂𑀳𑀺. 𑀅𑀣 𑀯𑀸 𑀓𑁂𑀳𑀺𑀘𑀺 𑀓𑁂𑀳𑀺𑀘𑀻𑀢𑀺 𑀬𑁂𑀳𑀺 𑀯𑀸 𑀢𑁂𑀳𑀺 𑀯𑀸. 𑀢𑀢𑁆𑀣 𑀕𑀸𑀭𑀯𑀁 𑀤𑀲𑁆𑀲𑁂𑀢𑀺. 𑀲𑀢𑁆𑀣𑀭𑀺 𑀅𑀪𑀺𑀧𑁆𑀧𑀲𑀦𑁆𑀦𑀲𑁆𑀲 𑀳𑀺 𑀲𑀢𑁆𑀣𑀼𑀤𑀲𑁆𑀲𑀦𑀥𑀫𑁆𑀫𑀲𑁆𑀲𑀯𑀦𑁂𑀲𑀼 𑀯𑀺𑀬 𑀦 𑀅𑀜𑁆𑀜𑀢𑁆𑀣 𑀆𑀤𑀭𑁄 𑀳𑁄𑀢𑀺. 𑀓𑀺𑀘𑁆𑀘𑀓𑀭𑀡𑀻𑀬𑁂𑀳𑀻𑀢𑀺 𑀏𑀢𑁆𑀣 𑀅𑀯𑀲𑁆𑀲𑀁 𑀓𑀸𑀢𑀩𑁆𑀩𑀁 𑀓𑀺𑀘𑁆𑀘𑀁, 𑀇𑀢𑀭𑀁 𑀓𑀭𑀡𑀻𑀬𑀁. 𑀧𑀞𑀫𑀁 𑀯𑀸 𑀓𑀸𑀢𑀩𑁆𑀩𑀁 𑀓𑀺𑀘𑁆𑀘𑀁, 𑀧𑀘𑁆𑀙𑀸 𑀓𑀸𑀢𑀩𑁆𑀩𑀁 𑀓𑀭𑀡𑀻𑀬𑀁. 𑀔𑀼𑀤𑁆𑀤𑀓𑀁 𑀯𑀸 𑀓𑀺𑀘𑁆𑀘𑀁, 𑀫𑀳𑀦𑁆𑀢𑀁 𑀓𑀭𑀡𑀻𑀬𑀁. 𑀩𑁆𑀬𑀸𑀯𑀝𑁄𑀢𑀺 𑀉𑀲𑁆𑀲𑀼𑀓𑁆𑀓𑁄. 𑀏𑀯𑀸𑀳𑀦𑁆𑀢𑀺 𑀏𑀯𑀁 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀅𑀳𑀁 𑀦𑀸𑀲𑀓𑁆𑀔𑀺𑀁 𑀉𑀧𑀲𑀗𑁆𑀓𑀫𑀺𑀢𑀼𑀁, 𑀦 𑀅𑀕𑀸𑀭𑀯𑀸𑀤𑀺𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀤𑀼𑀮𑁆𑀮𑀪𑁂 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀦𑀼𑀲𑁆𑀲𑀢𑁆𑀢𑀮𑀸𑀪𑁂 𑀘 𑀲𑀢𑁆𑀢𑀸𑀦𑀁 𑀲𑀓𑀺𑀜𑁆𑀘𑀦𑀪𑀸𑀯𑁂𑀦 𑀓𑀺𑀘𑁆𑀘𑀧𑀲𑀼𑀢𑀢𑀸𑀬 𑀓𑀼𑀲𑀮𑀦𑁆𑀢𑀭𑀸𑀬𑁄 𑀳𑁄𑀢𑀺, 𑀦 𑀅𑀓𑀺𑀜𑁆𑀘𑀦𑀲𑁆𑀲𑀸𑀢𑀺 𑀏𑀢𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀢𑀤𑀢𑁆𑀣𑀧𑀭𑀺𑀤𑀻𑀧𑀦𑀫𑁂𑀯 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀼𑀔𑀁 𑀯𑀢 𑀢𑀲𑁆𑀲 𑀦 𑀳𑁄𑀢𑀺 𑀓𑀺𑀜𑁆𑀘𑀻𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀺𑀜𑁆𑀘𑀺 𑀭𑀽𑀧𑀸𑀤𑀻𑀲𑀼 𑀏𑀓𑀯𑀢𑁆𑀣𑀼𑀫𑁆𑀧𑀺 ‘‘𑀫𑀫𑁂𑀢’’𑀦𑁆𑀢𑀺 𑀢𑀡𑁆𑀳𑀸𑀬 𑀧𑀭𑀺𑀕𑁆𑀕𑀳𑀺𑀢𑀪𑀸𑀯𑁂𑀦 𑀦 𑀳𑁄𑀢𑀺 𑀦𑀢𑁆𑀣𑀺 𑀦 𑀯𑀺𑀚𑁆𑀚𑀢𑀺, 𑀲𑀼𑀔𑀁 𑀯𑀢 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀅𑀳𑁄 𑀲𑀼𑀔𑀫𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀦 𑀳𑁄𑀲𑀻’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀅𑀢𑀻𑀢𑀓𑀸𑀮𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀘𑀺 𑀧𑀦 𑀦 𑀳𑁄𑀢𑀺 𑀓𑀺𑀜𑁆𑀘𑀻𑀢𑀺 𑀧𑀤𑀲𑁆𑀲 ‘‘𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀁 𑀬𑀲𑁆𑀲 𑀦 𑀳𑁄𑀢𑀻’’𑀢𑀺 𑀅𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 𑀧𑀭𑀺𑀕𑁆𑀕𑀳𑀥𑀫𑁆𑀫𑀯𑀲𑁂𑀦 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸. 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀦𑁆𑀢𑀺 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀲𑁆𑀲𑀸𑀧𑀺 𑀲𑀗𑁆𑀕𑀳𑁂 𑀲𑀢𑀺 𑀬𑀼𑀢𑁆𑀢𑀫𑁂𑀯 𑀯𑀼𑀢𑁆𑀢𑀁 𑀲𑀺𑀬𑀸 𑀅𑀣 𑀯𑀸 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀺𑀜𑁆𑀘𑀺 𑀅𑀧𑁆𑀧𑀫𑁆𑀧𑀺 𑀓𑀺𑀜𑁆𑀘𑀦𑀁 𑀧𑀮𑀺𑀩𑁄𑀥𑀚𑀸𑀢𑀁 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀸𑀪𑀸𑀯𑀢𑁄 𑀏𑀯 𑀦 𑀳𑁄𑀢𑀺, 𑀢𑀁 𑀢𑀲𑁆𑀲 𑀅𑀓𑀺𑀜𑁆𑀘𑀦𑀢𑁆𑀢𑀁 𑀲𑀼𑀔𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄 𑀲𑀼𑀔𑀁 𑀯𑀢𑀁, 𑀅𑀳𑁄 𑀲𑀼𑀔𑀦𑁆𑀢𑀺 𑀅𑀢𑁆𑀣𑁄. 𑀓𑀲𑁆𑀲 𑀧𑀦 𑀦 𑀳𑁄𑀢𑀺 𑀓𑀺𑀜𑁆𑀘𑀦𑀦𑁆𑀢𑀺 𑀘𑁂, 𑀆𑀳 ‘‘𑀲𑀗𑁆𑀔𑀸𑀢𑀥𑀫𑁆𑀫𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲𑀸’’𑀢𑀺. 𑀬𑁄 𑀘𑀢𑀽𑀳𑀺𑀧𑀺 𑀫𑀕𑁆𑀕𑀲𑀗𑁆𑀔𑀸𑀳𑀺 𑀲𑁄𑀴𑀲𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀗𑁆𑀔𑀸𑀢𑀥𑀫𑁆𑀫𑁄 𑀓𑀢𑀓𑀺𑀘𑁆𑀘𑁄, 𑀢𑀢𑁄 𑀏𑀯 𑀧𑀝𑀺𑀯𑁂𑀥𑀩𑀸𑀳𑀼𑀲𑀘𑁆𑀘𑁂𑀦 𑀩𑀳𑀼𑀲𑁆𑀲𑀼𑀢𑁄, 𑀢𑀲𑁆𑀲.

𑀇𑀢𑀺 𑀪𑀕𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀲𑀓𑀺𑀜𑁆𑀘𑀦𑀪𑀸𑀯𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀓𑀺𑀜𑁆𑀘𑀦𑀁 𑀧𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀸𑀦𑀁 𑀆𑀫𑀺𑀲𑀓𑀺𑀜𑁆𑀘𑀦𑀸𑀦𑀜𑁆𑀘 𑀅𑀢𑁆𑀣𑀺𑀢𑀸𑀬 𑀲𑀓𑀺𑀜𑁆𑀘𑀦𑀁, 𑀲𑀓𑀺𑀜𑁆𑀘𑀦𑀢𑁆𑀢𑀸 𑀏𑀯 𑀅𑀮𑀤𑁆𑀥𑀸𑀦𑀜𑁆𑀘 𑀮𑀤𑁆𑀥𑀸𑀦𑀜𑁆𑀘 𑀓𑀸𑀫𑀸𑀦𑀁 𑀧𑀭𑀺𑀬𑁂𑀲𑀦𑀸𑀭𑀓𑁆𑀔𑀡𑀳𑁂𑀢𑀼 𑀓𑀺𑀘𑁆𑀘𑀓𑀭𑀡𑀻𑀬𑀯𑀲𑁂𑀦 ‘‘𑀅𑀳𑀁 𑀫𑀫𑀸’’𑀢𑀺 𑀕𑀳𑀡𑀯𑀲𑁂𑀦 𑀘 𑀯𑀺𑀳𑀜𑁆𑀜𑀫𑀸𑀦𑀁 𑀯𑀺𑀖𑀸𑀢𑀁 𑀆𑀧𑀚𑁆𑀚𑀫𑀸𑀦𑀁 𑀧𑀲𑁆𑀲𑀸𑀢𑀺 𑀥𑀫𑁆𑀫𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀯𑀤𑀢𑀺. 𑀚𑀦𑁄 𑀚𑀦𑀲𑁆𑀫𑀺𑀁 𑀧𑀝𑀺𑀩𑀦𑁆𑀥𑀭𑀽𑀧𑁄𑀢𑀺 𑀲𑀬𑀁 𑀅𑀜𑁆𑀜𑁄 𑀚𑀦𑁄 𑀲𑀫𑀸𑀦𑁄 𑀅𑀜𑁆𑀜𑀲𑁆𑀫𑀺𑀁 𑀚𑀦𑁂 ‘‘𑀅𑀳𑀁 𑀇𑀫𑀲𑁆𑀲, 𑀫𑀫 𑀅𑀬’’𑀦𑁆𑀢𑀺 𑀢𑀡𑁆𑀳𑀸𑀯𑀲𑁂𑀦 𑀧𑀝𑀺𑀩𑀦𑁆𑀥𑀲𑀪𑀸𑀯𑁄 𑀳𑀼𑀢𑁆𑀯𑀸 𑀯𑀺𑀳𑀜𑁆𑀜𑀢𑀺 𑀯𑀺𑀖𑀸𑀢𑀁 𑀆𑀧𑀚𑁆𑀚𑀢𑀺. ‘‘𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑁋

‘‘𑀧𑀼𑀢𑁆𑀢𑀸 𑀫𑀢𑁆𑀣𑀺 𑀥𑀦𑀫𑁆𑀫𑀢𑁆𑀣𑀺, 𑀇𑀢𑀺 𑀩𑀸𑀮𑁄 𑀯𑀺𑀳𑀜𑁆𑀜𑀢𑀺;

𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀢𑁆𑀣𑀺, 𑀓𑀼𑀢𑁄 𑀧𑀼𑀢𑁆𑀢𑀸 𑀓𑀼𑀢𑁄 𑀥𑀦’’𑀦𑁆𑀢𑀺. (𑀥. 𑀧. 𑁬𑁨) 𑁋

𑀆𑀤𑀻𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀤𑀻𑀧𑁂𑀢𑀩𑁆𑀩𑁄𑀢𑀺.

𑀧𑀜𑁆𑀘𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀕𑀩𑁆𑀪𑀺𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀙𑀝𑁆𑀞𑁂 𑀅𑀜𑁆𑀜𑀢𑀭𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲𑀸𑀢𑀺 𑀏𑀓𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲. 𑀤𑀳𑀭𑀸𑀢𑀺 𑀢𑀭𑀼𑀡𑀻. 𑀫𑀸𑀡𑀯𑀺𑀓𑀸𑀢𑀺 𑀩𑁆𑀭𑀸𑀳𑁆𑀫𑀡𑀥𑀻𑀢𑀸𑀬 𑀯𑁄𑀳𑀸𑀭𑁄. 𑀧𑀚𑀸𑀧𑀢𑀻𑀢𑀺 𑀪𑀭𑀺𑀬𑀸. 𑀕𑀩𑁆𑀪𑀺𑀦𑀻𑀢𑀺 𑀆𑀧𑀦𑁆𑀦𑀲𑀢𑁆𑀢𑀸. 𑀉𑀧𑀯𑀺𑀚𑀜𑁆𑀜𑀸𑀢𑀺 𑀅𑀚𑁆𑀚 𑀲𑀼𑀯𑁂𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀯𑀺𑀚𑀸𑀬𑀦𑀓𑀸𑀮𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑁄 𑀲𑀪𑀭𑀺𑀬𑁄 𑀯𑀸𑀤𑀧𑀢𑁆𑀣𑀲𑁆𑀲𑀫𑁂 𑀞𑀺𑀢𑁄, 𑀢𑁂𑀦 𑀦𑀁 𑀲𑀧𑀚𑀸𑀧𑀢𑀺𑀓𑀁 𑀧𑀭𑀺𑀩𑁆𑀩𑀸𑀚𑀓𑀯𑁄𑀳𑀸𑀭𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀪𑀭𑀺𑀬𑀸 𑀧𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀸𑀢𑀺 𑀆𑀮𑀧𑀢𑀺. 𑀢𑁂𑀮𑀦𑁆𑀢𑀺 𑀢𑀺𑀮𑀢𑁂𑀮𑀁. 𑀢𑁂𑀮𑀲𑀻𑀲𑁂𑀦 𑀘𑁂𑀢𑁆𑀣 𑀬𑀁 𑀬𑀁 𑀯𑀺𑀚𑀸𑀢𑀸𑀬 𑀧𑀲𑀯𑀤𑀼𑀓𑁆𑀔𑀧𑁆𑀧𑀝𑀺𑀓𑀸𑀭𑀢𑁆𑀣𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀲𑀧𑁆𑀧𑀺𑀮𑁄𑀡𑀸𑀤𑀺𑀁 𑀆𑀳𑀭𑀸𑀢𑀺 𑀆𑀡𑀸𑀧𑁂𑀢𑀺. 𑀬𑀁 𑀫𑁂 𑀯𑀺𑀚𑀸𑀢𑀸𑀬 𑀪𑀯𑀺𑀲𑁆𑀲𑀢𑀻𑀢𑀺 𑀬𑀁 𑀢𑁂𑀮𑀸𑀤𑀺 𑀫𑀬𑁆𑀳𑀁 𑀯𑀺𑀚𑀸𑀢𑀸𑀬 𑀩𑀳𑀺𑀦𑀺𑀓𑁆𑀔𑀦𑁆𑀢𑀕𑀩𑁆𑀪𑀸𑀬 𑀉𑀧𑀓𑀸𑀭𑀸𑀬 𑀪𑀯𑀺𑀲𑁆𑀲𑀢𑀺. ‘‘𑀧𑀭𑀺𑀩𑁆𑀩𑀸𑀚𑀺𑀓𑀸𑀬𑀸’’𑀢𑀺𑀧𑀺 𑀧𑀸𑀞𑁄. 𑀓𑀼𑀢𑁄𑀢𑀺 𑀓𑀲𑁆𑀫𑀸 𑀞𑀸𑀦𑀸, 𑀬𑀢𑁄 𑀜𑀸𑀢𑀺𑀓𑀼𑀮𑀸 𑀯𑀸 𑀫𑀺𑀢𑁆𑀢𑀓𑀼𑀮𑀸 𑀯𑀸 𑀢𑁂𑀮𑀸𑀤𑀺𑀁 𑀆𑀳𑀭𑁂𑀬𑁆𑀬𑀁, 𑀢𑀁 𑀞𑀸𑀦𑀁 𑀫𑁂 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀮𑀁 𑀆𑀳𑀭𑀸𑀫𑀻𑀢𑀺 𑀯𑀢𑁆𑀢𑀫𑀸𑀦𑀲𑀫𑀻𑀧𑀢𑀸𑀬 𑀯𑀢𑁆𑀢𑀫𑀸𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀢𑁂𑀮𑀁 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀲𑀧𑁆𑀧𑀺𑀲𑁆𑀲 𑀯𑀸 𑀢𑁂𑀮𑀲𑁆𑀲 𑀯𑀸𑀢𑀺 𑀘 𑀲𑀫𑀼𑀘𑁆𑀘𑀬𑀢𑁆𑀣𑁄 𑀯𑀸-𑀲𑀤𑁆𑀤𑁄 ‘‘𑀅𑀕𑁆𑀕𑀺𑀢𑁄 𑀯𑀸 𑀉𑀤𑀓𑀢𑁄 𑀯𑀸 𑀫𑀺𑀣𑀼𑀪𑁂𑀤𑀸 𑀯𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁨𑁮𑁬; 𑀤𑀻. 𑀦𑀺. 𑁨.𑁧𑁫𑁨; 𑀉𑀤𑀸. 𑁭𑁬) 𑀯𑀺𑀬. 𑀲𑀧𑁆𑀧𑀺𑀲𑁆𑀲 𑀯𑀸 𑀢𑁂𑀮𑀲𑁆𑀲 𑀯𑀸𑀢𑀺 𑀧𑀘𑁆𑀘𑀢𑁆𑀢𑁂 𑀲𑀸𑀫𑀺𑀯𑀘𑀦𑀁, 𑀲𑀧𑁆𑀧𑀺 𑀘 𑀢𑁂𑀮𑀜𑁆𑀘 𑀬𑀸𑀯𑀤𑀢𑁆𑀣𑀁 𑀧𑀸𑀢𑀼𑀁 𑀧𑀺𑀯𑀺𑀢𑀼𑀁 𑀤𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀭𑁂 𑀧𑀦 ‘‘𑀲𑀧𑁆𑀧𑀺𑀲𑁆𑀲 𑀯𑀸 𑀢𑁂𑀮𑀲𑁆𑀲 𑀯𑀸𑀢𑀺 𑀅𑀯𑀬𑀯𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁. 𑀲𑀧𑁆𑀧𑀺𑀢𑁂𑀮𑀲𑀫𑀼𑀤𑀸𑀬𑀲𑁆𑀲 𑀳𑀺 𑀅𑀯𑀬𑀯𑁄 𑀇𑀥 𑀬𑀸𑀯𑀤𑀢𑁆𑀣𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀻’’𑀢𑀺 𑀯𑀤𑀦𑁆𑀢𑀺. 𑀦𑁄 𑀦𑀻𑀳𑀭𑀺𑀢𑀼𑀦𑁆𑀢𑀺 𑀪𑀸𑀚𑀦𑁂𑀦 𑀯𑀸 𑀳𑀢𑁆𑀣𑁂𑀦 𑀯𑀸 𑀩𑀳𑀺 𑀦𑁂𑀢𑀼𑀁 𑀦𑁄 𑀤𑀻𑀬𑀢𑀺, 𑀉𑀘𑁆𑀙𑀤𑁆𑀤𑀺𑀢𑁆𑀯𑀸𑀦𑀸𑀢𑀺 𑀯𑀫𑀺𑀢𑁆𑀯𑀸, 𑀬𑀁𑀦𑀽𑀦 𑀤𑀤𑁂𑀬𑁆𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀅𑀳𑀁 𑀭𑀜𑁆𑀜𑁄 𑀓𑁄𑀝𑁆𑀞𑀸𑀕𑀸𑀭𑀁 𑀕𑀦𑁆𑀢𑁆𑀯𑀸 𑀢𑁂𑀮𑀁 𑀓𑀡𑁆𑀞𑀫𑀢𑁆𑀢𑀁 𑀧𑀺𑀯𑀺𑀢𑁆𑀯𑀸 𑀢𑀸𑀯𑀤𑁂𑀯 𑀖𑀭𑀁 𑀆𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀬𑀣𑀸𑀧𑀻𑀢𑀁 𑀯𑀫𑀺𑀢𑁆𑀯𑀸 𑀉𑀤𑁆𑀥𑀦𑀁 𑀆𑀭𑁄𑀧𑁂𑀢𑁆𑀯𑀸 𑀧𑀘𑀺𑀲𑁆𑀲𑀸𑀫𑀺, 𑀬𑀁 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀫𑀺𑀲𑁆𑀲𑀺𑀢𑀁, 𑀢𑀁 𑀅𑀕𑁆𑀕𑀺𑀦𑀸 𑀛𑀸𑀬𑀺𑀲𑁆𑀲𑀢𑀺, 𑀢𑁂𑀮𑀁 𑀧𑀦 𑀕𑀳𑁂𑀢𑁆𑀯𑀸 𑀇𑀫𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀓𑀫𑁆𑀫𑁂 𑀉𑀧𑀦𑁂𑀲𑁆𑀲𑀸𑀫𑀻’’𑀢𑀺.

𑀉𑀤𑁆𑀥𑀁 𑀓𑀸𑀢𑀼𑀦𑁆𑀢𑀺 𑀯𑀫𑀦𑀯𑀲𑁂𑀦 𑀉𑀤𑁆𑀥𑀁 𑀦𑀻𑀳𑀭𑀺𑀢𑀼𑀁. 𑀦 𑀧𑀦 𑀅𑀥𑁄𑀢𑀺 𑀯𑀺𑀭𑀺𑀜𑁆𑀘𑀦𑀯𑀲𑁂𑀦 𑀳𑁂𑀝𑁆𑀞𑀸 𑀦𑀻𑀳𑀭𑀺𑀢𑀼𑀁 𑀦 𑀧𑀦 𑀲𑀓𑁆𑀓𑁄𑀢𑀺. 𑀲𑁄 𑀳𑀺 ‘‘𑀅𑀥𑀺𑀓𑀁 𑀧𑀻𑀢𑀁 𑀲𑀬𑀫𑁂𑀯 𑀫𑀼𑀔𑀢𑁄 𑀦𑀺𑀕𑁆𑀕𑀫𑀺𑀲𑁆𑀲𑀢𑀻’’𑀢𑀺 𑀧𑀺𑀯𑀺𑀢𑁆𑀯𑀸 𑀆𑀲𑀬𑀲𑁆𑀲 𑀅𑀭𑀺𑀢𑁆𑀢𑀢𑀸𑀬 𑀅𑀦𑀺𑀕𑁆𑀕𑀢𑁂 𑀯𑀫𑀦𑀯𑀺𑀭𑁂𑀘𑀦𑀬𑁄𑀕𑀁 𑀅𑀚𑀸𑀦𑀦𑁆𑀢𑁄 𑀅𑀮𑀪𑀦𑁆𑀢𑁄 𑀯𑀸 𑀓𑁂𑀯𑀮𑀁 𑀤𑀼𑀓𑁆𑀔𑀸𑀳𑀺 𑀯𑁂𑀤𑀦𑀸𑀳𑀺 𑀨𑀼𑀝𑁆𑀞𑁄 𑀆𑀯𑀝𑁆𑀝𑀢𑀺 𑀘 𑀧𑀭𑀺𑀯𑀝𑁆𑀝𑀢𑀺 𑀘. 𑀤𑀼𑀓𑁆𑀔𑀸𑀳𑀻𑀢𑀺 𑀤𑀼𑀓𑁆𑀔𑀫𑀸𑀳𑀺. 𑀢𑀺𑀩𑁆𑀩𑀸𑀳𑀻𑀢𑀺 𑀩𑀳𑀮𑀸𑀳𑀺 𑀢𑀺𑀔𑀺𑀡𑀸𑀳𑀺 𑀯𑀸. 𑀔𑀭𑀸𑀳𑀻𑀢𑀺 𑀓𑀓𑁆𑀔𑀴𑀸𑀳𑀺. 𑀓𑀝𑀼𑀓𑀸𑀳𑀻𑀢𑀺 𑀅𑀢𑀺𑀯𑀺𑀬 𑀅𑀦𑀺𑀝𑁆𑀞𑀪𑀸𑀯𑁂𑀦 𑀤𑀸𑀭𑀼𑀡𑀸𑀳𑀺. 𑀆𑀯𑀝𑁆𑀝𑀢𑀻𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀅𑀦𑀺𑀧𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀇𑀢𑁄 𑀘𑀺𑀢𑁄 𑀆𑀓𑀟𑁆𑀠𑀦𑁆𑀢𑁄 𑀆𑀯𑀝𑁆𑀝𑀢𑀺. 𑀧𑀭𑀺𑀯𑀝𑁆𑀝𑀢𑀻𑀢𑀺 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀦𑀺𑀧𑀦𑁆𑀦𑁄𑀧𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀧𑀭𑀺𑀢𑁄 𑀔𑀺𑀧𑀦𑁆𑀢𑁄 𑀯𑀝𑁆𑀝𑀢𑀺, 𑀅𑀪𑀺𑀫𑀼𑀔𑀁 𑀯𑀸 𑀯𑀝𑁆𑀝𑀦𑁆𑀢𑁄 𑀆𑀯𑀝𑁆𑀝𑀢𑀺, 𑀲𑀫𑀦𑁆𑀢𑀢𑁄 𑀯𑀝𑁆𑀝𑀦𑁆𑀢𑁄 𑀧𑀭𑀺𑀯𑀝𑁆𑀝𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 ‘‘𑀲𑀓𑀺𑀜𑁆𑀘𑀦𑀲𑁆𑀲 𑀅𑀧𑁆𑀧𑀝𑀺𑀲𑀗𑁆𑀔𑀸𑀧𑀭𑀺𑀪𑁄𑀕𑀳𑁂𑀢𑀼𑀓𑀸 𑀅𑀬𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺, 𑀅𑀓𑀺𑀜𑁆𑀘𑀦𑀲𑁆𑀲 𑀧𑀦 𑀲𑀩𑁆𑀩𑀲𑁄 𑀅𑀬𑀁 𑀦𑀢𑁆𑀣𑀻’’𑀢𑀺 𑀏𑀢𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀺𑀢𑁆𑀯𑀸 𑀢𑀤𑀢𑁆𑀣𑀧𑁆𑀧𑀓𑀸𑀲𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀼𑀔𑀺𑀦𑁄 𑀯𑀢𑀸𑀢𑀺 𑀲𑀼𑀔𑀺𑀦𑁄 𑀯𑀢 𑀲𑀧𑁆𑀧𑀼𑀭𑀺𑀲𑀸. 𑀓𑁂 𑀧𑀦 𑀢𑁂𑀢𑀺? 𑀬𑁂 𑀅𑀓𑀺𑀜𑁆𑀘𑀦𑀸, 𑀬𑁂 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀲𑁆𑀲 𑀧𑀭𑀺𑀕𑁆𑀕𑀳𑀓𑀺𑀜𑁆𑀘𑀦𑀲𑁆𑀲 𑀘 𑀅𑀪𑀸𑀯𑁂𑀦 𑀅𑀓𑀺𑀜𑁆𑀘𑀦𑀸, 𑀓𑁂𑀲𑀁 𑀧𑀦𑀺𑀤𑀁 𑀓𑀺𑀜𑁆𑀘𑀦𑀁 𑀦𑀢𑁆𑀣𑀻𑀢𑀺 𑀆𑀳 𑁋 ‘‘𑀯𑁂𑀤𑀕𑀼𑀦𑁄 𑀳𑀺 𑀚𑀦𑀸 𑀅𑀓𑀺𑀜𑁆𑀘𑀦𑀸’’𑀢𑀺, 𑀬𑁂 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀁 𑀯𑁂𑀤𑀁 𑀕𑀢𑀸 𑀅𑀥𑀺𑀕𑀢𑀸, 𑀢𑁂𑀦 𑀯𑀸 𑀯𑁂𑀤𑁂𑀦 𑀦𑀺𑀩𑁆𑀩𑀸𑀦𑀁 𑀕𑀢𑀸𑀢𑀺 𑀯𑁂𑀤𑀕𑀼𑀦𑁄, 𑀢𑁂 𑀅𑀭𑀺𑀬𑀚𑀦𑀸 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑀸 𑀅𑀦𑀯𑀲𑁂𑀲𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀸𑀦𑀁 𑀅𑀕𑁆𑀕𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀅𑀓𑀺𑀜𑁆𑀘𑀦𑀸 𑀦𑀸𑀫. 𑀅𑀲𑀢𑀺 𑀳𑀺 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑁂 𑀓𑀼𑀢𑁄 𑀧𑀭𑀺𑀕𑁆𑀕𑀳𑀓𑀺𑀜𑁆𑀘𑀦𑀲𑁆𑀲 𑀲𑀫𑁆𑀪𑀯𑁄. 𑀏𑀯𑀁 𑀕𑀸𑀣𑀸𑀬 𑀧𑀼𑀭𑀺𑀫𑀪𑀸𑀕𑁂𑀦 𑀅𑀭𑀳𑀦𑁆𑀢𑁂 𑀧𑀲𑀁𑀲𑀺𑀢𑁆𑀯𑀸 𑀅𑀧𑀭𑀪𑀸𑀕𑁂𑀦 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁂 𑀕𑀭𑀳𑀦𑁆𑀢𑁄 ‘‘𑀲𑀓𑀺𑀜𑁆𑀘𑀦𑀁 𑀧𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀧𑀼𑀭𑀺𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀏𑀯𑀁 𑀇𑀫𑀸𑀬𑀧𑀺 𑀕𑀸𑀣𑀸𑀬 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑀙𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀏𑀓𑀧𑀼𑀢𑁆𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀲𑀢𑁆𑀢𑀫𑁂 𑀏𑀓𑀧𑀼𑀢𑁆𑀢𑀓𑁄𑀢𑀺 𑀏𑀓𑁄 𑀧𑀼𑀢𑁆𑀢𑁄, 𑀲𑁄 𑀘 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑀝𑁆𑀞𑁂𑀦 𑀏𑀓𑀧𑀼𑀢𑁆𑀢𑀓𑁄, 𑀧𑀺𑀬𑀸𑀬𑀺𑀢𑀩𑁆𑀩𑀝𑁆𑀞𑁂𑀦 𑀧𑀺𑀬𑁄, 𑀫𑀦𑀲𑁆𑀲 𑀯𑀟𑁆𑀠𑀦𑀝𑁆𑀞𑁂𑀦 𑀫𑀦𑀸𑀧𑁄. 𑀲𑀭𑀻𑀭𑀲𑁄𑀪𑀸𑀲𑀫𑁆𑀧𑀢𑁆𑀢𑀺𑀬𑀸 𑀯𑀸 𑀤𑀲𑁆𑀲𑀦𑀻𑀬𑀝𑁆𑀞𑁂𑀦 𑀧𑀺𑀬𑁄, 𑀲𑀻𑀮𑀸𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀓𑀮𑁆𑀬𑀸𑀡𑀥𑀫𑁆𑀫𑀢𑀸𑀬 𑀫𑀦𑀸𑀧𑁄. 𑀓𑀮𑁂𑀢𑀺 𑀲𑀢𑁆𑀢𑁂 𑀔𑁂𑀧𑁂𑀢𑀻𑀢𑀺 𑀓𑀸𑀮𑁄, 𑀫𑀭𑀡𑀁. 𑀢𑀁 𑀓𑀢𑁄 𑀧𑀢𑁆𑀢𑁄𑀢𑀺 𑀓𑀸𑀮𑀗𑁆𑀓𑀢𑁄, 𑀓𑀸𑀮𑁂𑀦 𑀯𑀸 𑀫𑀘𑁆𑀘𑀼𑀦𑀸 𑀓𑀢𑁄 𑀦𑀝𑁆𑀞𑁄 𑀅𑀤𑀲𑁆𑀲𑀦𑀁 𑀕𑀢𑁄𑀢𑀺 𑀓𑀸𑀮𑀗𑁆𑀓𑀢𑁄, 𑀫𑀢𑁄𑀢𑀺 𑀅𑀢𑁆𑀣𑁄.

𑀲𑀫𑁆𑀩𑀳𑀼𑀮𑀸 𑀉𑀧𑀸𑀲𑀓𑀸𑀢𑀺 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀩𑀳𑀽 𑀉𑀧𑀸𑀲𑀓𑀸 𑀫𑀢𑀧𑀼𑀢𑁆𑀢𑀉𑀧𑀸𑀲𑀓𑀲𑁆𑀲 𑀲𑀳𑀲𑁄𑀓𑀻𑀪𑀸𑀯𑁂𑀦 𑀬𑀸𑀯 𑀆𑀴𑀸𑀳𑀦𑀸 𑀧𑀘𑁆𑀙𑀢𑁄 𑀕𑀦𑁆𑀢𑁆𑀯𑀸 𑀫𑀢𑀲𑀭𑀻𑀭𑀲𑁆𑀲 𑀓𑀢𑁆𑀢𑀩𑁆𑀩𑀁 𑀓𑀸𑀭𑁂𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀸 𑀬𑀣𑀸𑀦𑀺𑀯𑀢𑁆𑀣𑀸𑀯 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀲𑀻𑀲𑀁𑀦𑁆𑀳𑀸𑀢𑀸 𑀯𑀢𑁆𑀣𑀸𑀦𑀺 𑀧𑀻𑀴𑁂𑀢𑁆𑀯𑀸 𑀅𑀦𑁄𑀢𑀸𑀧𑁂𑀢𑁆𑀯𑀸𑀯 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸 𑀉𑀧𑀸𑀲𑀓𑀁 𑀧𑀼𑀭𑀢𑁄 𑀓𑀢𑁆𑀯𑀸 ‘‘𑀲𑁄𑀓𑀯𑀺𑀦𑁄𑀤𑀦𑀁 𑀥𑀫𑁆𑀫𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀲𑁄𑀲𑁆𑀲𑀸𑀫𑀸’’𑀢𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀮𑁆𑀮𑀓𑁂𑀲𑀸’’𑀢𑀺𑀆𑀤𑀺.

𑀢𑀢𑁆𑀣 𑀅𑀮𑁆𑀮𑀯𑀢𑁆𑀣𑀸𑀢𑀺 𑀉𑀤𑀓𑁂𑀦 𑀢𑀺𑀦𑁆𑀢𑀯𑀢𑁆𑀣𑀸. 𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲𑀧𑀺 𑀤𑀺𑀯𑀸, 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀚𑀸𑀦𑀦𑁆𑀢𑀸𑀧𑀺 𑀦 𑀧𑀼𑀘𑁆𑀙𑀦𑁆𑀢𑀺. 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀚𑀸𑀦𑀦𑁆𑀢𑁄𑀬𑁂𑀯 𑀪𑀕𑀯𑀸 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀺𑀁 𑀦𑀼 𑀔𑁄 𑀢𑀼𑀫𑁆𑀳𑁂 𑀉𑀧𑀸𑀲𑀓𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑀼𑀫𑁆𑀳𑁂 𑀉𑀧𑀸𑀲𑀓𑀸 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀸 𑀑𑀢𑀸𑀧𑀺𑀢𑀲𑀼𑀤𑁆𑀥𑀯𑀢𑁆𑀣𑀸 𑀲𑀸𑀬𑀦𑁆𑀳𑁂 𑀆𑀕𑀘𑁆𑀙𑀣, 𑀅𑀚𑁆𑀚 𑀧𑀦 𑀅𑀮𑁆𑀮𑀯𑀢𑁆𑀣𑀸 𑀅𑀮𑁆𑀮𑀓𑁂𑀲𑀸 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀇𑀥𑀸𑀕𑀢𑀸, 𑀢𑀁 𑀓𑀺𑀁 𑀓𑀸𑀭𑀡𑀦𑁆𑀢𑀺. 𑀢𑁂𑀦 𑀫𑀬𑀦𑁆𑀢𑀺 𑀢𑁂𑀦 𑀧𑀼𑀢𑁆𑀢𑀯𑀺𑀬𑁄𑀕𑀚𑀦𑀺𑀢𑀘𑀺𑀢𑁆𑀢𑀲𑀦𑁆𑀢𑀸𑀧𑁂𑀦 𑀩𑀮𑀯𑀲𑁄𑀓𑀸𑀪𑀺𑀪𑀽𑀢𑀢𑀸𑀬 𑀏𑀯𑀁𑀪𑀽𑀢𑀸 𑀫𑀬𑀁 𑀇𑀥𑀽𑀧𑀲𑀗𑁆𑀓𑀫𑀦𑁆𑀢𑀸𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀧𑀺𑀬𑀯𑀢𑁆𑀣𑀼𑀲𑀫𑁆𑀪𑀯𑀸 𑀲𑁄𑀓𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀤𑀬𑁄, 𑀅𑀲𑀢𑀺 𑀧𑀺𑀬𑀯𑀢𑁆𑀣𑀼𑀲𑁆𑀫𑀺𑀁 𑀲𑀩𑁆𑀩𑀲𑁄 𑀏𑀢𑁂 𑀦 𑀲𑀦𑁆𑀢𑀻𑀢𑀺 𑀏𑀢𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀺𑀢𑁆𑀯𑀸 𑀢𑀤𑀢𑁆𑀣𑀧𑁆𑀧𑀓𑀸𑀲𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀧𑀺𑀬𑀭𑀽𑀧𑀲𑁆𑀲𑀸𑀤𑀕𑀥𑀺𑀢𑀸𑀲𑁂𑀢𑀺 𑀧𑀺𑀬𑀲𑀪𑀸𑀯𑁂𑀲𑀼 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀲𑀼𑀔𑀯𑁂𑀤𑀦𑀲𑁆𑀲𑀸𑀤𑁂𑀦 𑀕𑀥𑀺𑀢𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸. 𑀕𑀥𑀺𑀢𑀸𑀲𑁂𑀢𑀺 𑀳𑀺 𑀕𑀥𑀺𑀢𑀸𑀇𑀘𑁆𑀘𑁂𑀯𑀢𑁆𑀣𑁄. 𑀲𑁂𑀢𑀺 𑀯𑀸 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀺𑀬𑀭𑀽𑀧𑀸 𑀦𑀸𑀫 𑀘𑀓𑁆𑀔𑀸𑀤𑀬𑁄 𑀧𑀼𑀢𑁆𑀢𑀤𑀸𑀭𑀸𑀤𑀬𑁄 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀓𑀺𑀜𑁆𑀘 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀘𑀓𑁆𑀔𑀼 𑀮𑁄𑀓𑁂 …𑀧𑁂… 𑀥𑀫𑁆𑀫𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧’’𑀦𑁆𑀢𑀺 (𑀘𑀽𑀴𑀦𑀺. 𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁫𑁫).

‘‘𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸, 𑀕𑀯𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀼 𑀓𑀸𑀫𑁂, 𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀻’’𑀢𑀺 𑀘. (𑀲𑀼. 𑀦𑀺. 𑁭𑁭𑁫);

𑀢𑀲𑁆𑀫𑀸 𑀢𑁂𑀲𑀼 𑀧𑀺𑀬𑀭𑀽𑀧𑁂𑀲𑀼 𑀅𑀲𑁆𑀲𑀸𑀤𑁂𑀦 𑀕𑀺𑀤𑁆𑀥𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑀸𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀓𑁂 𑀧𑀦 𑀢𑁂 𑀧𑀺𑀬𑀭𑀽𑀧𑀲𑁆𑀲𑀸𑀤𑀕𑀥𑀺𑀢𑀸𑀢𑀺 𑀢𑁂 𑀤𑀲𑁆𑀲𑁂𑀢𑀺 ‘‘𑀤𑁂𑀯𑀓𑀸𑀬𑀸 𑀧𑀼𑀣𑀼𑀫𑀦𑀼𑀲𑁆𑀲𑀸 𑀘𑀸’’𑀢𑀺, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀬𑁄 𑀩𑀳𑀼𑀤𑁂𑀯𑀲𑀫𑀽𑀳𑀸 𑀘𑁂𑀯 𑀚𑀫𑁆𑀩𑀼𑀤𑀻𑀧𑀓𑀸𑀤𑀺𑀓𑀸 𑀩𑀳𑀼𑀫𑀦𑀼𑀲𑁆𑀲𑀸 𑀘. 𑀅𑀖𑀸𑀯𑀺𑀦𑁄𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑀸. 𑀧𑀭𑀺𑀚𑀼𑀦𑁆𑀦𑀸𑀢𑀺 𑀚𑀭𑀸𑀭𑁄𑀕𑀸𑀤𑀺𑀯𑀺𑀧𑀢𑁆𑀢𑀺𑀬𑀸 𑀬𑁄𑀩𑁆𑀩𑀦𑀸𑀭𑁄𑀕𑁆𑀬𑀸𑀤𑀺𑀲𑀫𑁆𑀧𑀢𑁆𑀢𑀺𑀢𑁄 𑀧𑀭𑀺𑀳𑀻𑀦𑀸. 𑀬𑀣𑀸𑀮𑀸𑀪𑀯𑀲𑁂𑀦 𑀯𑀸𑀬𑀫𑀢𑁆𑀣𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀓𑀸𑀫𑀜𑁆𑀘𑁂𑀓𑀦𑁆𑀢𑀲𑀼𑀔𑀲𑀫𑀧𑁆𑀧𑀺𑀢𑀸𑀦𑀁 𑀤𑁂𑀯𑀸𑀦𑀁 𑀤𑀼𑀓𑁆𑀔𑀚𑀭𑀸𑀭𑁄𑀕𑀸 𑀦 𑀲𑀫𑁆𑀪𑀯𑀦𑁆𑀢𑀺, 𑀢𑀤𑀦𑀢𑀺𑀯𑀢𑁆𑀢𑀲𑀪𑀸𑀯𑀢𑀸𑀬 𑀧𑀦 𑀢𑁂𑀧𑀺 ‘‘𑀅𑀖𑀸𑀯𑀺𑀦𑁄’’𑀢𑀺 ‘‘𑀧𑀭𑀺𑀚𑀼𑀦𑁆𑀦𑀸’’𑀢𑀺 𑀘 𑀯𑀼𑀢𑁆𑀢𑀸. 𑀢𑁂𑀲𑀫𑁆𑀧𑀺 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀚𑀭𑀸𑀬 𑀘𑁂𑀢𑀲𑀺𑀓𑀭𑁄𑀕𑀲𑁆𑀲 𑀘 𑀯𑀲𑁂𑀦 𑀤𑀼𑀓𑁆𑀔𑀸𑀤𑀻𑀦𑀁 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀘𑁆𑀘𑀼𑀭𑀸𑀚𑀲𑁆𑀲 𑀯𑀲𑀁 𑀕𑀘𑁆𑀙𑀦𑁆𑀢𑀻𑀢𑀺 𑀧𑀺𑀬𑀯𑀢𑁆𑀣𑀼𑀯𑀺𑀲𑀬𑀸𑀬 𑀢𑀡𑁆𑀳𑀸𑀬 𑀅𑀧𑁆𑀧𑀳𑀻𑀦𑀢𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀽𑀧𑀕𑀫𑀦𑀢𑁄 𑀥𑀸𑀢𑀼𑀢𑁆𑀢𑀬𑀺𑀲𑁆𑀲𑀭𑀢𑀸𑀬 𑀫𑀘𑁆𑀘𑀼𑀭𑀸𑀚𑀲𑀗𑁆𑀔𑀸𑀢𑀲𑁆𑀲 𑀫𑀭𑀡𑀲𑁆𑀲 𑀯𑀲𑀁 𑀳𑀢𑁆𑀣𑀫𑁂𑀯 𑀕𑀘𑁆𑀙𑀦𑁆𑀢𑀺.

𑀏𑀢𑁆𑀢𑀸𑀯𑀢𑀸 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀬𑁂 𑀯𑁂 𑀤𑀺𑀯𑀸’’𑀢𑀺𑀆𑀤𑀺𑀦𑀸 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀬𑁂 𑀯𑁂 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀅𑀧𑁆𑀧𑀫𑀢𑁆𑀢𑀸𑀢𑀺 ‘‘𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀤𑀺𑀯𑀲𑀪𑀸𑀕𑁂 𑀭𑀢𑁆𑀢𑀺𑀪𑀸𑀕𑁂 𑀘 𑀤𑀴𑁆𑀳𑀁 𑀅𑀧𑁆𑀧𑀫𑀢𑁆𑀢𑀸 𑀅𑀧𑁆𑀧𑀫𑀸𑀤𑀧𑁆𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑀺. 𑀚𑀳𑀦𑁆𑀢𑀺 𑀧𑀺𑀬𑀭𑀽𑀧𑀦𑁆𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀧𑀺𑀬𑀭𑀽𑀧𑀁 𑀧𑀺𑀬𑀚𑀸𑀢𑀺𑀓𑀁 𑀘𑀓𑁆𑀔𑀸𑀤𑀺𑀧𑀺𑀬𑀯𑀢𑁆𑀣𑀼𑀁 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀚𑀳𑀦𑁂𑀦 𑀚𑀳𑀦𑁆𑀢𑀺. 𑀢𑁂 𑀯𑁂 𑀔𑀡𑀦𑁆𑀢𑀺 𑀅𑀖𑀫𑀽𑀮𑀁, 𑀫𑀘𑁆𑀘𑀼𑀦𑁄 𑀆𑀫𑀺𑀲𑀁 𑀤𑀼𑀭𑀢𑀺𑀯𑀢𑁆𑀢𑀦𑁆𑀢𑀺 𑀢𑁂 𑀅𑀭𑀺𑀬𑀧𑀼𑀕𑁆𑀕𑀮𑀸 𑀅𑀖𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀫𑀽𑀮𑀪𑀽𑀢𑀁, 𑀫𑀘𑁆𑀘𑀼𑀦𑀸 𑀫𑀭𑀡𑁂𑀦 𑀆𑀫𑀲𑀺𑀢𑀩𑁆𑀩𑀢𑁄 𑀆𑀫𑀺𑀲𑀁, 𑀇𑀢𑁄 𑀩𑀳𑀺𑀤𑁆𑀥𑀸 𑀓𑁂𑀳𑀺𑀘𑀺𑀧𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀦𑀺𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑀼𑀭𑀢𑀺𑀯𑀢𑁆𑀢𑀁, 𑀲𑀳 𑀅𑀯𑀺𑀚𑁆𑀚𑀸𑀬 𑀢𑀡𑁆𑀳𑀁 𑀅𑀭𑀺𑀬𑀫𑀕𑁆𑀕𑀜𑀸𑀡𑀓𑀼𑀤𑀸𑀮𑁂𑀦 𑀔𑀡𑀦𑁆𑀢𑀺, 𑀮𑁂𑀲𑀫𑀢𑁆𑀢𑀫𑁆𑀧𑀺 𑀅𑀦𑀯𑀲𑁂𑀲𑀦𑁆𑀢𑀸 𑀉𑀫𑁆𑀫𑀽𑀮𑀬𑀦𑁆𑀢𑀻𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑁋

‘‘𑀅𑀧𑁆𑀧𑀫𑀸𑀤𑁄 𑀅𑀫𑀢𑀧𑀤𑀁, 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁;

𑀅𑀧𑁆𑀧𑀫𑀢𑁆𑀢𑀸 𑀦 𑀫𑀻𑀬𑀦𑁆𑀢𑀺, 𑀬𑁂 𑀧𑀫𑀢𑁆𑀢𑀸 𑀬𑀣𑀸 𑀫𑀢𑀸’’𑀢𑀺. (𑀥. 𑀧. 𑁨𑁧) 𑁋

𑀆𑀤𑀻𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄𑀢𑀺.

𑀲𑀢𑁆𑀢𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀼𑀧𑁆𑀧𑀯𑀸𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮. 𑀅𑀝𑁆𑀞𑀫𑁂 𑀓𑀼𑀡𑁆𑀟𑀺𑀓𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀓𑁄𑀮𑀺𑀬𑀸𑀦𑀁 𑀦𑀕𑀭𑁂. 𑀓𑀼𑀡𑁆𑀟𑀥𑀸𑀦𑀯𑀦𑁂𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀓𑀼𑀡𑁆𑀟𑀥𑀸𑀦𑀲𑀗𑁆𑀔𑀸𑀢𑁂 𑀯𑀦𑁂.

𑀧𑀼𑀩𑁆𑀩𑁂 𑀓𑀺𑀭 𑀓𑀼𑀡𑁆𑀟𑁄 𑀦𑀸𑀫 𑀏𑀓𑁄 𑀬𑀓𑁆𑀔𑁄 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀓𑀼𑀡𑁆𑀟𑀥𑀸𑀦𑀫𑀺𑀲𑁆𑀲𑀓𑁂𑀦 𑀘 𑀩𑀮𑀺𑀓𑀫𑁆𑀫𑁂𑀦 𑀢𑀼𑀲𑁆𑀲𑀢𑀻𑀢𑀺 𑀢𑀲𑁆𑀲 𑀢𑀣𑀸 𑀢𑀢𑁆𑀣 𑀩𑀮𑀺𑀁 𑀉𑀧𑀳𑀭𑀦𑁆𑀢𑀺, 𑀢𑁂𑀦𑁂𑀢𑀁 𑀯𑀦𑀲𑀡𑁆𑀟𑀁 𑀓𑀼𑀡𑁆𑀟𑀥𑀸𑀦𑀯𑀦𑀦𑁆𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀸 𑀕𑀸𑀫𑀧𑀢𑀺𑀓𑀸 𑀅𑀳𑁄𑀲𑀺, 𑀲𑀸𑀧𑀺 𑀢𑀲𑁆𑀲 𑀬𑀓𑁆𑀔𑀲𑁆𑀲 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀦𑀺𑀯𑀺𑀝𑁆𑀞𑀢𑁆𑀢𑀸 𑀢𑁂𑀦𑁂𑀯 𑀧𑀭𑀺𑀧𑀸𑀮𑀺𑀢𑀢𑁆𑀢𑀸 𑀓𑀼𑀡𑁆𑀟𑀺𑀓𑀸𑀢𑀺 𑀯𑁄𑀳𑀭𑀻𑀬𑀺𑀢𑁆𑀣. 𑀅𑀧𑀭𑀪𑀸𑀕𑁂 𑀢𑀢𑁆𑀣 𑀓𑁄𑀮𑀺𑀬𑀭𑀸𑀚𑀸𑀦𑁄 𑀦𑀕𑀭𑀁 𑀓𑀸𑀭𑁂𑀲𑀼𑀁, 𑀢𑀫𑁆𑀧𑀺 𑀧𑀼𑀭𑀺𑀫𑀯𑁄𑀳𑀸𑀭𑁂𑀦 𑀓𑀼𑀡𑁆𑀟𑀺𑀓𑀸𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀜𑁆𑀘 𑀯𑀦𑀲𑀡𑁆𑀟𑁂 𑀓𑁄𑀮𑀺𑀬𑀭𑀸𑀚𑀸𑀦𑁄 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀯𑀲𑀦𑀢𑁆𑀣𑀸𑀬 𑀯𑀺𑀳𑀸𑀭𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁, 𑀢𑀫𑁆𑀧𑀺 𑀓𑀼𑀡𑁆𑀟𑀥𑀸𑀦𑀯𑀦𑀦𑁆𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀣 𑀪𑀕𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀢𑀁 𑀯𑀺𑀳𑀸𑀭𑀁 𑀧𑀢𑁆𑀯𑀸 𑀢𑀢𑁆𑀣 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀡𑁆𑀟𑀺𑀓𑀸𑀬𑀁 𑀯𑀺𑀳𑀭𑀢𑀺 𑀓𑀼𑀡𑁆𑀟𑀥𑀸𑀦𑀯𑀦𑁂’’𑀢𑀺.

𑀲𑀼𑀧𑁆𑀧𑀯𑀸𑀲𑀸𑀢𑀺 𑀢𑀲𑁆𑀲𑀸 𑀉𑀧𑀸𑀲𑀺𑀓𑀸𑀬 𑀦𑀸𑀫𑀁. 𑀓𑁄𑀮𑀺𑀬𑀥𑀻𑀢𑀸𑀢𑀺 𑀓𑁄𑀮𑀺𑀬𑀭𑀸𑀚𑀧𑀼𑀢𑁆𑀢𑀻. 𑀲𑀸 𑀳𑀺 𑀪𑀕𑀯𑀢𑁄 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀸 𑀧𑀡𑀻𑀢𑀤𑀸𑀬𑀺𑀓𑀸𑀦𑀁 𑀲𑀸𑀯𑀺𑀓𑀸𑀦𑀁 𑀏𑀢𑀤𑀕𑁆𑀕𑁂 𑀞𑀧𑀺𑀢𑀸 𑀲𑁄𑀢𑀸𑀧𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀪𑀕𑀯𑀢𑁄 𑀬𑀼𑀢𑁆𑀢𑀭𑀽𑀧𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀪𑁂𑀲𑀚𑁆𑀚𑀁 𑀯𑀸 𑀦 𑀢𑀢𑁆𑀣 𑀅𑀜𑁆𑀜𑀸𑀳𑀺 𑀲𑀁𑀯𑀺𑀥𑀸𑀢𑀩𑁆𑀩𑀁 𑀅𑀢𑁆𑀣𑀺, 𑀲𑀩𑁆𑀩𑀁 𑀢𑀁 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀧𑀜𑁆𑀜𑀸𑀬 𑀯𑀺𑀘𑀸𑀭𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀉𑀧𑀦𑁂𑀢𑀺. 𑀤𑁂𑀯𑀲𑀺𑀓𑀜𑁆𑀘 𑀅𑀝𑁆𑀞𑀲𑀢𑀁 𑀲𑀗𑁆𑀖𑀪𑀢𑁆𑀢𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀪𑀢𑁆𑀢𑀸𑀦𑀺 𑀤𑁂𑀢𑀺. 𑀬𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀢𑀁 𑀓𑀼𑀮𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀭𑀺𑀢𑁆𑀢𑀳𑀢𑁆𑀣𑁄 𑀦 𑀕𑀘𑁆𑀙𑀢𑀺. 𑀏𑀯𑀁 𑀫𑀼𑀢𑁆𑀢𑀘𑀸𑀕𑀸 𑀧𑀬𑀢𑀧𑀸𑀡𑀻 𑀯𑁄𑀲𑁆𑀲𑀕𑁆𑀕𑀭𑀢𑀸 𑀬𑀸𑀘𑀬𑁄𑀕𑀸 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑀸. 𑀅𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀧𑀘𑁆𑀙𑀺𑀫𑀪𑀯𑀺𑀓𑁄 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑁄 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀸 𑀢𑀁 𑀕𑀩𑁆𑀪𑀁 𑀓𑁂𑀦𑀘𑀺𑀤𑁂𑀯 𑀧𑀸𑀧𑀓𑀫𑁆𑀫𑁂𑀦 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺, 𑀲𑀢𑁆𑀢𑀸𑀳𑀜𑁆𑀘 𑀫𑀽𑀴𑁆𑀳𑀕𑀩𑁆𑀪𑀸 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀢𑁆𑀢 𑀯𑀲𑁆𑀲𑀸𑀦𑀺 𑀕𑀩𑁆𑀪𑀁 𑀥𑀸𑀭𑁂𑀢𑀺 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸’’𑀢𑀺.

𑀢𑀢𑁆𑀣 𑀲𑀢𑁆𑀢 𑀯𑀲𑁆𑀲𑀸𑀦𑀻𑀢𑀺 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁. 𑀕𑀩𑁆𑀪𑀁 𑀥𑀸𑀭𑁂𑀢𑀻𑀢𑀺 𑀕𑀩𑁆𑀪𑀁 𑀯𑀳𑀢𑀺, 𑀕𑀩𑁆𑀪𑀺𑀦𑀻 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸𑀢𑀺 𑀲𑀢𑁆𑀢 𑀅𑀳𑀸𑀦𑀺 𑀩𑁆𑀬𑀸𑀓𑀼𑀮𑀕𑀩𑁆𑀪𑀸. 𑀕𑀩𑁆𑀪𑁄 𑀳𑀺 𑀧𑀭𑀺𑀧𑀓𑁆𑀓𑁄 𑀲𑀫𑁆𑀧𑀚𑁆𑀚𑀫𑀸𑀦𑁄 𑀯𑀺𑀚𑀸𑀬𑀦𑀓𑀸𑀮𑁂 𑀓𑀫𑁆𑀫𑀚𑀯𑀸𑀢𑁂𑀳𑀺 𑀲𑀜𑁆𑀘𑀸𑀮𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁄 𑀉𑀤𑁆𑀥𑀁𑀧𑀸𑀤𑁄 𑀅𑀥𑁄𑀲𑀺𑀭𑁄 𑀳𑀼𑀢𑁆𑀯𑀸 𑀬𑁄𑀦𑀺𑀫𑀼𑀔𑀸𑀪𑀺𑀫𑀼𑀔𑁄 𑀳𑁄𑀢𑀺, 𑀏𑀯𑀁 𑀲𑁄 𑀓𑀢𑁆𑀣𑀘𑀺 𑀅𑀮𑀕𑁆𑀕𑁄 𑀩𑀳𑀺 𑀦𑀺𑀓𑁆𑀔𑀫𑀢𑀺. 𑀯𑀺𑀧𑀚𑁆𑀚𑀫𑀸𑀦𑁄 𑀧𑀦 𑀯𑀺𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀬𑁄𑀦𑀺𑀫𑀕𑁆𑀕𑀁 𑀧𑀺𑀤𑀳𑀺𑀢𑁆𑀯𑀸 𑀢𑀺𑀭𑀺𑀬𑀁 𑀦𑀺𑀧𑀚𑁆𑀚𑀢𑀺, 𑀲𑀬𑀫𑁂𑀯 𑀯𑀸 𑀬𑁄𑀦𑀺𑀫𑀕𑁆𑀕𑁄 𑀧𑀺𑀤𑀳𑀢𑀺, 𑀲𑁄 𑀢𑀢𑁆𑀣 𑀓𑀫𑁆𑀫𑀚𑀯𑀸𑀢𑁂𑀳𑀺 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀫𑀸𑀦𑁄 𑀩𑁆𑀬𑀸𑀓𑀼𑀮𑁄 𑀫𑀽𑀴𑁆𑀳𑀕𑀩𑁆𑀪𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀸𑀧𑀺 𑀲𑀢𑁆𑀢 𑀤𑀺𑀯𑀲𑁂 𑀏𑀯𑀁 𑀅𑀳𑁄𑀲𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸’’𑀢𑀺.

𑀅𑀬𑀜𑁆𑀘 𑀕𑀩𑁆𑀪𑁄 𑀲𑀻𑀯𑀮𑀺𑀢𑁆𑀣𑁂𑀭𑁄. 𑀢𑀲𑁆𑀲 𑀓𑀣𑀁 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀕𑀩𑁆𑀪𑀯𑀸𑀲𑀤𑀼𑀓𑁆𑀔𑀁, 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀪𑀸𑀯𑀧𑁆𑀧𑀢𑁆𑀢𑀺, 𑀫𑀸𑀢𑀼 𑀘𑀲𑁆𑀲𑀸𑀧𑀺 𑀲𑁄𑀢𑀸𑀧𑀦𑁆𑀦𑀸𑀬 𑀅𑀭𑀺𑀬𑀲𑀸𑀯𑀺𑀓𑀸𑀬 𑀢𑀣𑀸 𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀚𑀸𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀢𑀻𑀢𑁂 𑀓𑀸𑀲𑀺𑀓𑀭𑀸𑀚𑁂 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑁄 𑀓𑁄𑀲𑀮𑀭𑀸𑀚𑀸 𑀫𑀳𑀦𑁆𑀢𑁂𑀦 𑀩𑀮𑁂𑀦𑀸𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀳𑁂𑀢𑁆𑀯𑀸 𑀢𑀁 𑀭𑀸𑀚𑀸𑀦𑀁 𑀫𑀸𑀭𑁂𑀢𑁆𑀯𑀸 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀅𑀢𑁆𑀢𑀦𑁄 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀸𑀲𑀺. 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀦 𑀧𑀼𑀢𑁆𑀢𑁄 𑀧𑀺𑀢𑀼 𑀫𑀭𑀡𑀓𑀸𑀮𑁂 𑀦𑀺𑀤𑁆𑀥𑀫𑀦𑀤𑁆𑀯𑀸𑀭𑁂𑀦 𑀧𑀮𑀸𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀜𑀸𑀢𑀺𑀫𑀺𑀢𑁆𑀢𑀩𑀦𑁆𑀥𑀯𑁂 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀩𑀮𑀁 𑀲𑀁𑀳𑀭𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀆𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀫𑀳𑀦𑁆𑀢𑀁 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀢𑀲𑁆𑀲 𑀭𑀜𑁆𑀜𑁄 𑀧𑀡𑁆𑀡𑀁 𑀧𑁂𑀲𑁂𑀲𑀺 ‘‘𑀭𑀚𑁆𑀚𑀁 𑀯𑀸 𑀤𑁂𑀢𑀼, 𑀬𑀼𑀤𑁆𑀥𑀁 𑀯𑀸’’𑀢𑀺. 𑀭𑀸𑀚𑀓𑀼𑀫𑀸𑀭𑀲𑁆𑀲 𑀫𑀸𑀢𑀸 𑀲𑀸𑀲𑀦𑀁 𑀲𑀼𑀢𑁆𑀯𑀸 ‘‘𑀬𑀼𑀤𑁆𑀥𑁂𑀦 𑀓𑀫𑁆𑀫𑀁 𑀦𑀢𑁆𑀣𑀺, 𑀲𑀩𑁆𑀩𑀤𑀺𑀲𑀸𑀲𑀼 𑀲𑀜𑁆𑀘𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑀼, 𑀢𑀢𑁄 𑀤𑀸𑀭𑀽𑀤𑀓𑀪𑀢𑁆𑀢𑀧𑀭𑀺𑀓𑁆𑀔𑀬𑁂𑀦 𑀓𑀺𑀮𑀦𑁆𑀢𑀸 𑀦𑀕𑀭𑁂 𑀫𑀦𑀼𑀲𑁆𑀲𑀸 𑀯𑀺𑀦𑀸𑀯 𑀬𑀼𑀤𑁆𑀥𑁂𑀦 𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀦𑁆𑀢𑀻’’𑀢𑀺 𑀧𑀡𑁆𑀡𑀁 𑀧𑁂𑀲𑁂𑀲𑀺. 𑀲𑁄 𑀫𑀸𑀢𑀼 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀘𑀢𑁆𑀢𑀸𑀭𑀺 𑀫𑀳𑀸𑀤𑁆𑀯𑀸𑀭𑀸𑀦𑀺 𑀭𑀓𑁆𑀔𑀦𑁆𑀢𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀦𑀕𑀭𑀁 𑀉𑀧𑀭𑀼𑀦𑁆𑀥𑀺, 𑀦𑀕𑀭𑁂 𑀫𑀦𑀼𑀲𑁆𑀲𑀸 𑀘𑀽𑀴𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀸𑀭𑀽𑀤𑀓𑀸𑀦𑀺 𑀆𑀳𑀭𑀦𑁆𑀢𑀺, 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀺.

𑀅𑀣 𑀭𑀸𑀚𑀓𑀼𑀫𑀸𑀭𑀲𑁆𑀲 𑀫𑀸𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀩𑀸𑀮𑁄 𑀫𑀫 𑀧𑀼𑀢𑁆𑀢𑁄 𑀉𑀧𑀸𑀬𑀁 𑀦 𑀚𑀸𑀦𑀸𑀢𑀺, 𑀕𑀘𑁆𑀙𑀣, 𑀅𑀲𑁆𑀲 𑀘𑀽𑀴𑀤𑁆𑀯𑀸𑀭𑀸𑀦𑀺 𑀧𑀺𑀥𑀸𑀬 𑀦𑀕𑀭𑀁 𑀉𑀧𑀭𑀼𑀦𑁆𑀥𑀢𑀽𑀢𑀺 𑀯𑀤𑁂𑀣𑀸’’𑀢𑀺 𑀧𑀼𑀢𑁆𑀢𑀲𑁆𑀲 𑀕𑀽𑀴𑁆𑀳𑀲𑀸𑀲𑀦𑀁 𑀧𑀳𑀺𑀡𑀺. 𑀲𑁄 𑀫𑀸𑀢𑀼 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑁂 𑀢𑀣𑀸 𑀅𑀓𑀸𑀲𑀺. 𑀦𑀸𑀕𑀭𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀁 𑀅𑀮𑀪𑀦𑁆𑀢𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀲𑁆𑀲 𑀭𑀜𑁆𑀜𑁄 𑀲𑀻𑀲𑀁 𑀕𑀳𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀅𑀤𑀁𑀲𑀼. 𑀓𑀼𑀫𑀸𑀭𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀚𑁆𑀚𑀁 𑀅𑀕𑁆𑀕𑀳𑁂𑀲𑀺. 𑀲𑁄 𑀢𑀤𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀦𑀕𑀭𑀭𑀼𑀦𑁆𑀥𑀦𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 𑀏𑀢𑀭𑀳𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑀸𑀢𑀼𑀓𑀼𑀘𑁆𑀙𑀺𑀲𑀗𑁆𑀔𑀸𑀢𑀸𑀬 𑀮𑁄𑀳𑀺𑀢𑀓𑀼𑀫𑁆𑀪𑀺𑀬𑀸 𑀯𑀲𑀺, 𑀅𑀯𑀲𑁂𑀲𑀢𑁄 𑀧𑀦 𑀲𑀢𑁆𑀢𑀸𑀳𑀁 𑀦𑀕𑀭𑀽𑀧𑀭𑀼𑀦𑁆𑀥𑀦𑁂𑀦 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀪𑀸𑀯𑀁 𑀆𑀧𑀚𑁆𑀚𑀺. 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀢𑁆𑀢 𑀤𑀺𑀯𑀲𑀸𑀦𑀺 𑀦𑀕𑀭𑀁 𑀭𑀼𑀦𑁆𑀥𑀺𑀢𑁆𑀯𑀸 𑀕𑀳𑀺𑀢𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 𑀲𑀢𑁆𑀢𑀯𑀲𑁆𑀲𑀸𑀦𑀺 𑀮𑁄𑀳𑀺𑀢𑀓𑀼𑀫𑁆𑀪𑀺𑀬𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀪𑀸𑀯𑀁 𑀆𑀧𑀚𑁆𑀚𑀻’’𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀲𑁄 𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀸𑀤𑀫𑀽𑀮𑁂 ‘‘𑀮𑀸𑀪𑀻𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀢𑁆𑀣𑀦𑀁 𑀅𑀓𑀸𑀲𑀺, 𑀬𑀜𑁆𑀘 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀦𑀸𑀕𑀭𑁂𑀳𑀺 𑀲𑀤𑁆𑀥𑀺𑀁 𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀕𑀼𑀴𑀤𑀥𑀺𑀁 𑀤𑀢𑁆𑀯𑀸 𑀧𑀢𑁆𑀣𑀦𑀁 𑀅𑀓𑀸𑀲𑀺, 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀮𑀸𑀪𑀻𑀦𑀁 𑀅𑀕𑁆𑀕𑁄 𑀚𑀸𑀢𑁄. 𑀲𑀼𑀧𑁆𑀧𑀯𑀸𑀲𑀸𑀧𑀺 ‘‘𑀦𑀕𑀭𑀁 𑀭𑀼𑀦𑁆𑀥𑀺𑀢𑁆𑀯𑀸 𑀕𑀡𑁆𑀳, 𑀢𑀸𑀢𑀸’’𑀢𑀺 𑀧𑁂𑀲𑀺𑀢𑀪𑀸𑀯𑁂𑀦 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀓𑀼𑀘𑁆𑀙𑀺𑀦𑀸 𑀕𑀩𑁆𑀪𑀁 𑀧𑀭𑀺𑀳𑀭𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸𑀚𑀸𑀢𑀸. 𑀏𑀯𑀁 𑀢𑁂 𑀫𑀸𑀢𑀸𑀧𑀼𑀢𑁆𑀢𑀸 𑀅𑀢𑁆𑀢𑀦𑁄 𑀓𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀁 𑀈𑀤𑀺𑀲𑀁 𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑀺𑀁𑀲𑀼.

𑀢𑀻𑀳𑀺 𑀯𑀺𑀢𑀓𑁆𑀓𑁂𑀳𑀻𑀢𑀺 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁂𑀳𑀺 𑀢𑀻𑀳𑀺 𑀲𑀫𑁆𑀫𑀸𑀯𑀺𑀢𑀓𑁆𑀓𑁂𑀳𑀺. 𑀅𑀥𑀺𑀯𑀸𑀲𑁂𑀢𑀻𑀢𑀺 𑀫𑀽𑀴𑁆𑀳𑀕𑀩𑁆𑀪𑀢𑀸𑀬 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑀁 𑀲𑀳𑀢𑀺. 𑀲𑀸 𑀳𑀺 𑀪𑀕𑀯𑀢𑁄 𑀲𑀫𑁆𑀩𑀼𑀤𑁆𑀥𑀪𑀸𑀯𑀁, 𑀅𑀭𑀺𑀬𑀲𑀗𑁆𑀖𑀲𑁆𑀲 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀁, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀪𑀸𑀯𑀁 𑀅𑀦𑀼𑀲𑁆𑀲𑀭𑀦𑁆𑀢𑀻 𑀅𑀢𑁆𑀢𑀦𑁄 𑀉𑀧𑁆𑀧𑀚𑁆𑀚𑀫𑀸𑀦𑀤𑀼𑀓𑁆𑀔𑀁 𑀅𑀫𑀦𑀲𑀺𑀓𑀭𑀡𑁂𑀦𑁂𑀯 𑀅𑀪𑀺𑀪𑀯𑀺𑀢𑁆𑀯𑀸 𑀔𑀫𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀻𑀳𑀺 𑀯𑀺𑀢𑀓𑁆𑀓𑁂𑀳𑀺 𑀅𑀥𑀺𑀯𑀸𑀲𑁂𑀢𑀻’’𑀢𑀺.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢𑀸𑀢𑀺𑀆𑀤𑀺 𑀢𑁂𑀲𑀁 𑀯𑀺𑀢𑀓𑁆𑀓𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀪𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀮𑁄𑀓𑀦𑀸𑀣𑁄 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁 𑀲𑀸𑀫𑀁 𑀲𑀬𑀫𑁂𑀯 𑀲𑀩𑁆𑀩𑀥𑀫𑁆𑀫𑁂 𑀅𑀳𑁄 𑀯𑀢 𑀩𑀼𑀤𑁆𑀥𑁄, 𑀲𑁄 𑀪𑀕𑀯𑀸 𑀏𑀯𑀭𑀽𑀧𑀲𑁆𑀲 𑀏𑀢𑀭𑀳𑀺 𑀫𑀬𑀸 𑀅𑀦𑀼𑀪𑀯𑀺𑀬𑀫𑀸𑀦𑀲𑁆𑀲 𑀅𑀜𑁆𑀜𑀲𑁆𑀲 𑀘 𑀏𑀯𑀁𑀚𑀸𑀢𑀺𑀓𑀲𑁆𑀲 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀅𑀘𑁆𑀘𑀦𑁆𑀢𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀸𑀬 𑀥𑀫𑁆𑀫𑀁 𑀓𑀣𑁂𑀢𑀺, 𑀅𑀯𑀺𑀧𑀭𑀻𑀢𑀥𑀫𑁆𑀫𑀁 𑀓𑀣𑁂𑀢𑀺. 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀢𑀸𑀬 𑀳𑀺 𑀲𑀢𑁆𑀣𑀼 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀺𑀤𑁆𑀥𑀺. 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑁂 𑀚𑀸𑀢𑀢𑁆𑀢𑀸 𑀲𑀻𑀮𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀢𑁆𑀢𑀸 𑀘 𑀲𑀸𑀯𑀓𑀲𑀗𑁆𑀖𑁄𑀢𑀺 𑀮𑀤𑁆𑀥𑀦𑀸𑀫𑁄 𑀅𑀝𑁆𑀞𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀯𑀢 𑀅𑀳𑁄 𑀯𑀢 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄, 𑀬𑁄 𑀅𑀭𑀺𑀬𑀲𑀗𑁆𑀖𑁄 𑀏𑀯𑀭𑀽𑀧𑀲𑁆𑀲 𑀈𑀤𑀺𑀲𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀸𑀬 𑀅𑀦𑀺𑀯𑀢𑁆𑀢𑀺𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄. 𑀲𑀼𑀲𑀼𑀔𑀁 𑀯𑀢 𑀅𑀳𑁄 𑀯𑀢 𑀲𑀼𑀝𑁆𑀞𑀼 𑀲𑀼𑀔𑀁 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀝𑀁 𑀦𑀺𑀩𑁆𑀩𑀸𑀦𑀁, 𑀬𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑁂 𑀈𑀤𑀺𑀲𑀁 𑀯𑀝𑁆𑀝𑀤𑀼𑀓𑁆𑀔𑀁 𑀦 𑀉𑀧𑀮𑀩𑁆𑀪𑀢𑀻𑀢𑀺. 𑀏𑀢𑁆𑀣 𑀘 𑀧𑀝𑀺𑀧𑀚𑁆𑀚𑀫𑀸𑀦𑀸𑀧𑀺 𑀧𑀝𑀺𑀧𑀦𑁆𑀦𑀸 𑀇𑀘𑁆𑀘𑁂𑀯 𑀯𑀼𑀢𑁆𑀢𑀸 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀺𑀯𑀢𑁆𑀢𑀺𑀪𑀸𑀯𑀢𑁄. 𑀅𑀣 𑀯𑀸 𑀉𑀧𑁆𑀧𑀦𑁆𑀦𑀲𑀤𑁆𑀤𑁄 𑀯𑀺𑀬 𑀧𑀝𑀺𑀧𑀦𑁆𑀦𑀲𑀤𑁆𑀤𑁄 𑀯𑀢𑁆𑀢𑀫𑀸𑀦𑀢𑁆𑀣𑁄𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺.

𑀲𑀸𑀫𑀺𑀓𑀦𑁆𑀢𑀺 𑀅𑀢𑁆𑀢𑀦𑁄 𑀧𑀢𑀺𑀁 𑀓𑁄𑀮𑀺𑀬𑀭𑀸𑀚𑀧𑀼𑀢𑁆𑀢𑀁. 𑀆𑀫𑀦𑁆𑀢𑁂𑀲𑀻𑀢𑀺 𑀅𑀪𑀸𑀲𑀺. 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀸𑀳𑀻𑀢𑀺 𑀫𑀬𑁆𑀳𑀁 𑀯𑀘𑀦𑁂𑀦 𑀘𑀓𑁆𑀓𑀮𑀓𑁆𑀔𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑀸𑀦𑀺 𑀯𑀺𑀓𑀲𑀺𑀢𑀧𑀤𑀼𑀫𑀲𑀲𑁆𑀲𑀺𑀭𑀻𑀓𑀸𑀦𑀺 𑀪𑀕𑀯𑀢𑁄 𑀘𑀭𑀡𑀸𑀦𑀺 𑀢𑀯 𑀲𑀺𑀭𑀲𑀸 𑀯𑀦𑁆𑀤𑀸𑀳𑀺, 𑀉𑀢𑁆𑀢𑀫𑀗𑁆𑀕𑁂𑀦 𑀅𑀪𑀺𑀯𑀸𑀤𑀦𑀁 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀸𑀩𑀸𑀥𑀦𑁆𑀢𑀺𑀆𑀤𑀻𑀲𑀼 𑀆𑀩𑀸𑀥𑁄𑀢𑀺 𑀯𑀺𑀲𑀪𑀸𑀕𑀯𑁂𑀤𑀦𑀸 𑀯𑀼𑀘𑁆𑀘𑀢𑀺, 𑀬𑀸 𑀏𑀓𑀤𑁂𑀲𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀧𑀺 𑀲𑀓𑀮𑀲𑀭𑀻𑀭𑀁 𑀅𑀬𑀧𑀝𑁆𑀝𑁂𑀦 𑀆𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀕𑀡𑁆𑀳𑀢𑀺. 𑀆𑀢𑀗𑁆𑀓𑁄𑀢𑀺 𑀓𑀺𑀘𑁆𑀙𑀚𑀻𑀯𑀺𑀢𑀓𑀭𑁄 𑀭𑁄𑀕𑁄. 𑀅𑀣 𑀯𑀸 𑀬𑀸𑀧𑁂𑀢𑀩𑁆𑀩𑀭𑁄𑀕𑁄 𑀆𑀢𑀗𑁆𑀓𑁄, 𑀇𑀢𑀭𑁄 𑀆𑀩𑀸𑀥𑁄. 𑀔𑀼𑀤𑁆𑀤𑀓𑁄 𑀯𑀸 𑀭𑁄𑀕𑁄 𑀆𑀢𑀗𑁆𑀓𑁄, 𑀩𑀮𑀯𑀸 𑀆𑀩𑀸𑀥𑁄. 𑀓𑁂𑀘𑀺 𑀧𑀦 ‘‘𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀆𑀩𑀸𑀥𑁄, 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑁄 𑀆𑀢𑀗𑁆𑀓𑁄’’𑀢𑀺 𑀯𑀤𑀦𑁆𑀢𑀺. 𑀢𑀤𑀼𑀪𑀬𑀲𑁆𑀲𑀸𑀧𑀺 𑀅𑀪𑀸𑀯𑀁 𑀧𑀼𑀘𑁆𑀙𑀸𑀢𑀺 𑀯𑀤𑀢𑀺. 𑀕𑀺𑀮𑀸𑀦𑀲𑁆𑀲𑁂𑀯 𑀘 𑀉𑀝𑁆𑀞𑀸𑀦𑀁 𑀦𑀸𑀫 𑀕𑀭𑀼𑀓𑀁 𑀳𑁄𑀢𑀺, 𑀓𑀸𑀬𑁂 𑀩𑀮𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀕𑁆𑀕𑁂𑀮𑀜𑁆𑀜𑀢𑀸𑀬 𑀮𑀳𑀼𑀧𑀭𑀺𑀯𑀢𑁆𑀢𑀺𑀲𑀗𑁆𑀔𑀸𑀢𑀁 𑀓𑀸𑀬𑀲𑁆𑀲 𑀮𑀳𑀼𑀝𑁆𑀞𑀸𑀦𑀁 𑀲𑀭𑀻𑀭𑀩𑀮𑀜𑁆𑀘 𑀧𑀼𑀘𑁆𑀙𑀸𑀢𑀺 𑀯𑀤𑀢𑀺. 𑀨𑀸𑀲𑀼𑀯𑀺𑀳𑀸𑀭𑀦𑁆𑀢𑀺 𑀞𑀸𑀦𑀦𑀺𑀲𑀺𑀦𑁆𑀦𑀕𑀫𑀦𑀲𑀬𑀦𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀲𑀼𑀔𑀯𑀺𑀳𑀸𑀭𑀜𑁆𑀘 𑀧𑀼𑀘𑁆𑀙𑀸𑀢𑀺 𑀯𑀤𑀢𑀺. 𑀅𑀣𑀲𑁆𑀲 𑀧𑀼𑀘𑁆𑀙𑀺𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀻 ‘‘𑀲𑀼𑀧𑁆𑀧𑀯𑀸𑀲𑀸, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀏𑀯𑀜𑁆𑀘 𑀯𑀤𑁂𑀳𑀻𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀸𑀓𑀸𑀭𑀁 𑀦𑀺𑀤𑀲𑁆𑀲𑁂𑀢𑀺.

𑀧𑀭𑀫𑀦𑁆𑀢𑀺 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀁. 𑀢𑁂𑀦 𑀲𑀸𑀥𑀼, 𑀪𑀤𑁆𑀤𑁂, 𑀬𑀣𑀸 𑀯𑀼𑀢𑁆𑀢𑀁, 𑀢𑀣𑀸 𑀧𑀝𑀺𑀧𑀚𑁆𑀚𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀓𑁄𑀮𑀺𑀬𑀧𑀼𑀢𑁆𑀢𑁄𑀢𑀺 𑀲𑀼𑀧𑁆𑀧𑀯𑀸𑀲𑀸𑀬 𑀲𑀸𑀫𑀺𑀓𑁄 𑀓𑁄𑀮𑀺𑀬𑀭𑀸𑀚𑀧𑀼𑀢𑁆𑀢𑁄. 𑀲𑀼𑀔𑀺𑀦𑀻 𑀳𑁄𑀢𑀽𑀢𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄 𑀲𑀢𑁆𑀣𑀸 𑀲𑀼𑀧𑁆𑀧𑀯𑀸𑀲𑀸𑀬 𑀧𑁂𑀲𑀺𑀢𑀯𑀦𑁆𑀤𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀅𑀢𑁆𑀢𑀦𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑀲𑀁𑀲𑀽𑀘𑀓𑀁 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑀲𑀼𑀔𑀽𑀧𑀲𑀁𑀳𑀸𑀭𑀁 𑀢𑀲𑁆𑀲𑀸 𑀲𑀸𑀫𑀜𑁆𑀜𑀢𑁄 𑀧𑀓𑀸𑀲𑁂𑀢𑁆𑀯𑀸 𑀧𑀼𑀦 𑀢𑀲𑁆𑀲𑀸 𑀧𑀼𑀢𑁆𑀢𑀲𑁆𑀲 𑀘 𑀕𑀩𑁆𑀪𑀯𑀺𑀧𑀢𑁆𑀢𑀺𑀫𑀽𑀮𑀓𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀲𑀼𑀔𑀽𑀧𑀲𑀁𑀳𑀸𑀭𑀁 𑀦𑀺𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀔𑀺𑀦𑀻…𑀧𑁂… 𑀅𑀭𑁄𑀕𑀸, 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀢𑀽’’𑀢𑀺 𑀆𑀳.

𑀲𑀳 𑀯𑀘𑀦𑀸𑀢𑀺 𑀪𑀕𑀯𑀢𑁄 𑀯𑀘𑀦𑁂𑀦 𑀲𑀳𑁂𑀯. 𑀬𑀲𑁆𑀫𑀺𑀁 𑀓𑀸𑀮𑁂 𑀪𑀕𑀯𑀸 𑀢𑀣𑀸 𑀅𑀯𑁄𑀘, 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀢𑀫𑁆𑀧𑀺 𑀓𑀫𑁆𑀫𑀁 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺. 𑀢𑀲𑁆𑀲 𑀧𑀭𑀺𑀓𑁆𑀔𑀻𑀡𑀪𑀸𑀯𑀁 𑀑𑀮𑁄𑀓𑁂𑀢𑁆𑀯𑀸 𑀲𑀢𑁆𑀣𑀸 𑀢𑀣𑀸 𑀅𑀪𑀸𑀲𑀺. 𑀅𑀧𑀭𑁂 𑀧𑀦 𑀯𑀤𑀦𑁆𑀢𑀺 𑁋 𑀲𑀘𑁂 𑀢𑀣𑀸 𑀲𑀢𑁆𑀣𑀸 𑀦𑀸𑀘𑀺𑀓𑁆𑀔𑀺𑀲𑁆𑀲𑀸, 𑀢𑀢𑁄 𑀧𑀭𑀫𑁆𑀧𑀺 𑀓𑀺𑀜𑁆𑀘𑀺 𑀓𑀸𑀮𑀁 𑀢𑀲𑁆𑀲𑀸 𑀢𑀁 𑀤𑀼𑀓𑁆𑀔𑀁 𑀅𑀦𑀼𑀩𑀦𑁆𑀥𑀺𑀲𑁆𑀲𑀸. 𑀬𑀲𑁆𑀫𑀸 𑀧𑀦 𑀪𑀕𑀯𑀢𑀸 ‘‘𑀲𑀼𑀔𑀺𑀦𑀻 𑀅𑀭𑁄𑀕𑀸 𑀅𑀭𑁄𑀕𑀜𑁆𑀘 𑀧𑀼𑀢𑁆𑀢𑀁 𑀯𑀺𑀚𑀸𑀬𑀢𑀽’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀲𑁆𑀲 𑀯𑀘𑀦𑀲𑀫𑀓𑀸𑀮𑀫𑁂𑀯 𑀲𑁄 𑀕𑀩𑁆𑀪𑁄 𑀩𑁆𑀬𑀸𑀓𑀼𑀮𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀲𑀼𑀔𑁂𑀦𑁂𑀯 𑀩𑀳𑀺 𑀦𑀺𑀓𑁆𑀔𑀫𑀺, 𑀏𑀯𑀁 𑀢𑁂𑀲𑀁 𑀫𑀸𑀢𑀸𑀧𑀼𑀢𑁆𑀢𑀸𑀦𑀁 𑀲𑁄𑀢𑁆𑀣𑀺 𑀅𑀳𑁄𑀲𑀺. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑁄. 𑀬𑀣𑀸 𑀳𑀺 𑀧𑀝𑀸𑀘𑀸𑀭𑀸𑀬 𑀧𑀺𑀬𑀯𑀺𑀧𑁆𑀧𑀬𑁄𑀕𑀲𑀫𑁆𑀪𑀽𑀢𑁂𑀦 𑀲𑁄𑀓𑁂𑀦 𑀉𑀫𑁆𑀫𑀸𑀤𑀁 𑀧𑀢𑁆𑀯𑀸 𑁋

‘‘𑀉𑀪𑁄 𑀧𑀼𑀢𑁆𑀢𑀸 𑀓𑀸𑀮𑀓𑀢𑀸, 𑀧𑀦𑁆𑀣𑁂 𑀫𑀬𑁆𑀳𑀁 𑀧𑀢𑀻 𑀫𑀢𑁄;

𑀫𑀸𑀢𑀸 𑀧𑀺𑀢𑀸 𑀘 𑀪𑀸𑀢𑀸 𑀘, 𑀏𑀓𑀘𑀺𑀢𑀓𑀫𑁆𑀳𑀺 𑀛𑀸𑀬𑀭𑁂’’𑀢𑀺. (𑀅𑀧. 𑀣𑁂𑀭𑀻 𑁨.𑁨.𑁪𑁯𑁮) 𑁋

𑀯𑀢𑁆𑀯𑀸 𑀚𑀸𑀢𑀭𑀽𑀧𑁂𑀦𑁂𑀯 𑀘𑀭𑀦𑁆𑀢𑀺𑀬𑀸 ‘‘𑀲𑀢𑀺𑀁 𑀧𑀝𑀺𑀮𑀪𑀸𑀳𑀺 𑀪𑀕𑀺𑀦𑀻’’𑀢𑀺 𑀪𑀕𑀯𑀢𑁄 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀉𑀫𑁆𑀫𑀸𑀤𑁄 𑀯𑀽𑀧𑀲𑀫𑀺, 𑀢𑀣𑀸 𑀲𑀼𑀧𑁆𑀧𑀺𑀬𑀸𑀧𑀺 𑀉𑀧𑀸𑀲𑀺𑀓𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀊𑀭𑀼𑀬𑀁 𑀓𑀢𑁂𑀦 𑀫𑀳𑀸𑀯𑀡𑁂𑀦 𑀯𑀼𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀲𑀬𑀦𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑀸 ‘‘𑀆𑀕𑀦𑁆𑀢𑁆𑀯𑀸 𑀫𑀁 𑀯𑀦𑁆𑀤𑀢𑀽’’𑀢𑀺 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀯𑀡𑁂 𑀧𑀸𑀓𑀢𑀺𑀓𑁂 𑀚𑀸𑀢𑁂 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀻𑀢𑀺 𑀏𑀯𑀫𑀸𑀤𑀻𑀦𑀺 𑀯𑀢𑁆𑀣𑀽𑀦𑀺 𑀇𑀥 𑀉𑀤𑀸𑀳𑀭𑀺𑀢𑀩𑁆𑀩𑀸𑀦𑀻𑀢𑀺.

𑀏𑀯𑀁, 𑀪𑀦𑁆𑀢𑁂𑀢𑀺, 𑀪𑀦𑁆𑀢𑁂, 𑀬𑀣𑀸 𑀪𑀕𑀯𑀸 𑀲𑀧𑀼𑀢𑁆𑀢𑀸𑀬 𑀫𑀸𑀢𑀼𑀬𑀸 𑀅𑀭𑁄𑀕𑀪𑀸𑀯𑀁 𑀆𑀲𑀻𑀲𑀦𑁆𑀢𑁄 𑀆𑀳 𑁋 ‘‘𑀲𑀼𑀔𑀺𑀦𑀻 𑀅𑀭𑁄𑀕𑀸 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀢𑀽’’𑀢𑀺, 𑀢𑀁 𑀏𑀯𑀫𑁂𑀯. 𑀦 𑀳𑀺 𑀓𑀤𑀸𑀘𑀺 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀯𑀘𑀦𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 ‘‘𑀏𑀯𑀫𑀢𑁆𑀣𑀽’’𑀢𑀺 𑀯𑀤𑀦𑁆𑀢𑀺, 𑀅𑀧𑀭𑁂 ‘‘𑀳𑁄𑀢𑀽’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀆𑀦𑁂𑀢𑁆𑀯𑀸 𑀯𑀡𑁆𑀡𑀬𑀦𑁆𑀢𑀺. 𑀅𑀪𑀺𑀦𑀦𑁆𑀤𑀺𑀢𑁆𑀯𑀸𑀢𑀺 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀦𑀸 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀪𑀕𑀯𑀢𑀸 𑀯𑀼𑀘𑁆𑀘𑀫𑀸𑀦𑁂 𑀢𑀲𑁆𑀫𑀺𑀁 𑀯𑀘𑀦𑁂 𑀧𑀻𑀢𑀺𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀢𑁄 𑀅𑀪𑀺𑀫𑀼𑀔𑀪𑀸𑀯𑁂𑀦 𑀦𑀦𑁆𑀤𑀺𑀢𑁆𑀯𑀸. 𑀅𑀦𑀼𑀫𑁄𑀤𑀺𑀢𑁆𑀯𑀸𑀢𑀺 𑀢𑀢𑁄 𑀧𑀘𑁆𑀙𑀸𑀧𑀺 𑀲𑀫𑁆𑀫𑁄𑀤𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸, 𑀘𑀺𑀢𑁆𑀢𑁂𑀦 𑀯𑀸 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀯𑀸𑀘𑀸𑀬 𑀅𑀦𑀼𑀫𑁄𑀤𑀺𑀢𑁆𑀯𑀸, 𑀯𑀘𑀦𑀲𑀫𑁆𑀧𑀢𑁆𑀢𑀺𑀬𑀸 𑀯𑀸 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑀼𑀫𑁄𑀤𑀺𑀢𑁆𑀯𑀸. 𑀲𑀓𑀁 𑀖𑀭𑀁 𑀧𑀘𑁆𑀘𑀸𑀬𑀸𑀲𑀻𑀢𑀺 𑀅𑀢𑁆𑀢𑀦𑁄 𑀖𑀭𑀁 𑀧𑀝𑀺𑀕𑀘𑁆𑀙𑀺. 𑀬𑁂 𑀧𑀦 ‘‘𑀬𑁂𑀦 𑀲𑀓𑀁 𑀖𑀭’’𑀦𑁆𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀬𑀤𑀺𑀧𑀺 𑀬-𑀢-𑀲𑀤𑁆𑀤𑀸𑀦𑀁 𑀲𑀫𑁆𑀩𑀦𑁆𑀥𑀪𑀸𑀯𑀢𑁄 ‘‘𑀢𑁂𑀦𑀸’’𑀢𑀺 𑀧𑀤𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺, 𑀢𑀣𑀸𑀧𑀺 ‘‘𑀧𑀝𑀺𑀬𑀸𑀬𑀺𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄 𑀬𑁄𑀚𑁂𑀢𑀩𑁆𑀩𑁄 𑀳𑁄𑀢𑀺.

𑀯𑀺𑀚𑀸𑀢𑀦𑁆𑀢𑀺 𑀧𑀚𑀸𑀢𑀁, 𑀧𑀲𑀼𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀘𑁆𑀙𑀭𑀺𑀬𑀦𑁆𑀢𑀺 𑀅𑀦𑁆𑀥𑀲𑁆𑀲 𑀧𑀩𑁆𑀩𑀢𑀸𑀭𑁄𑀳𑀦𑀁 𑀯𑀺𑀬 𑀦𑀺𑀘𑁆𑀘𑀁 𑀦 𑀳𑁄𑀢𑀻𑀢𑀺 𑀅𑀘𑁆𑀙𑀭𑀺𑀬𑀁, 𑀅𑀬𑀁 𑀢𑀸𑀯 𑀲𑀤𑁆𑀤𑀦𑀬𑁄. 𑀅𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀅𑀘𑁆𑀙𑀭𑀸𑀬𑁄𑀕𑁆𑀕𑀁 𑀅𑀘𑁆𑀙𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀢𑀸𑀢𑀺 𑀲𑀫𑁆𑀪𑀸𑀯𑀦𑁂, 𑀅𑀳𑁄 𑀅𑀘𑁆𑀙𑀭𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀪𑁄𑀢𑀺 𑀥𑀫𑁆𑀫𑀸𑀮𑀧𑀦𑀁. 𑀅𑀪𑀽𑀢𑀧𑀼𑀩𑁆𑀩𑀁 𑀪𑀽𑀢𑀦𑁆𑀢𑀺 𑀅𑀩𑁆𑀪𑀼𑀢𑀁.

𑀢𑀣𑀸𑀕𑀢𑀲𑁆𑀲𑀸𑀢𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄 𑁋 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄, 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄.

𑀓𑀣𑀁 𑀪𑀕𑀯𑀸 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀬𑀣𑀸 𑀲𑀩𑁆𑀩𑀮𑁄𑀓𑀳𑀺𑀢𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑀸 𑀧𑀼𑀭𑀺𑀫𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀆𑀕𑀢𑀸𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁂𑀦 𑀅𑀪𑀺𑀦𑀻𑀳𑀸𑀭𑁂𑀦 𑀢𑁂 𑀪𑀕𑀯𑀦𑁆𑀢𑁄 𑀆𑀕𑀢𑀸, 𑀢𑁂𑀦 𑀅𑀝𑁆𑀞𑀕𑀼𑀡𑀲𑀫𑀦𑁆𑀦𑀸𑀕𑀢𑁂𑀦 𑀅𑀬𑀫𑁆𑀧𑀺 𑀪𑀕𑀯𑀸 𑀆𑀕𑀢𑁄. 𑀬𑀣𑀸 𑀘 𑀢𑁂 𑀪𑀕𑀯𑀦𑁆𑀢𑁄 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸 𑀲𑀻𑀮𑀦𑁂𑀓𑁆𑀔𑀫𑁆𑀫𑀧𑀜𑁆𑀜𑀸𑀯𑀻𑀭𑀺𑀬𑀔𑀦𑁆𑀢𑀺𑀲𑀘𑁆𑀘𑀅𑀥𑀺𑀝𑁆𑀞𑀸𑀦𑀫𑁂𑀢𑁆𑀢𑀸𑀉𑀧𑁂𑀓𑁆𑀔𑀸𑀧𑀸𑀭𑀫𑀻𑀢𑀺 𑀇𑀫𑀸 𑀤𑀲 𑀧𑀸𑀭𑀫𑀺𑀬𑁄, 𑀤𑀲 𑀉𑀧𑀧𑀸𑀭𑀫𑀺𑀬𑁄, 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀼𑀩𑁆𑀩𑀬𑁄𑀕𑀧𑀼𑀩𑁆𑀩𑀘𑀭𑀺𑀬𑀥𑀫𑁆𑀫𑀓𑁆𑀔𑀸𑀦𑀜𑀸𑀢𑀢𑁆𑀣𑀘𑀭𑀺𑀬𑀸𑀤𑀬𑁄 𑀧𑀽𑀭𑁂𑀢𑁆𑀯𑀸 𑀩𑀼𑀤𑁆𑀥𑀺𑀘𑀭𑀺𑀬𑀸𑀬 𑀓𑁄𑀝𑀺𑀁 𑀧𑀢𑁆𑀯𑀸 𑀆𑀕𑀢𑀸, 𑀢𑀣𑀸 𑀅𑀬𑀫𑁆𑀧𑀺 𑀪𑀕𑀯𑀸 𑀆𑀕𑀢𑁄. 𑀬𑀣𑀸 𑀘 𑀢𑁂 𑀪𑀕𑀯𑀦𑁆𑀢𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂…𑀧𑁂… 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀩𑁆𑀭𑀽𑀳𑁂𑀢𑁆𑀯𑀸 𑀆𑀕𑀢𑀸, 𑀢𑀣𑀸 𑀅𑀬𑀫𑁆𑀧𑀺 𑀪𑀕𑀯𑀸 𑀆𑀕𑀢𑁄. 𑀏𑀯𑀁 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄.

𑀓𑀣𑀁 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀬𑀣𑀸 𑀲𑀫𑁆𑀧𑀢𑀺𑀚𑀸𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑀸 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀢𑀸, 𑀲𑁂𑀢𑀘𑁆𑀙𑀢𑁆𑀢𑁂 𑀥𑀸𑀭𑀺𑀬𑀫𑀸𑀦𑁂 𑀲𑀩𑁆𑀩𑀸𑀯 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀲𑀼𑀁, 𑀆𑀲𑀪𑀺𑀜𑁆𑀘 𑀯𑀸𑀘𑀁 𑀪𑀸𑀲𑀺𑀁𑀲𑀼 𑀮𑁄𑀓𑁂 𑀅𑀢𑁆𑀢𑀦𑁄 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑀸, 𑀢𑀜𑁆𑀘 𑀦𑁂𑀲𑀁 𑀕𑀫𑀦𑀁 𑀢𑀣𑀁 𑀅𑀳𑁄𑀲𑀺 𑀅𑀯𑀺𑀢𑀣𑀁 𑀅𑀦𑁂𑀓𑁂𑀲𑀁 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁂𑀦, 𑀢𑀣𑀸 𑀅𑀬𑀫𑁆𑀧𑀺 𑀪𑀕𑀯𑀸 𑀕𑀢𑁄, 𑀢𑀜𑁆𑀘𑀲𑁆𑀲 𑀕𑀫𑀦𑀁 𑀓𑀣𑀁 𑀅𑀳𑁄𑀲𑀺 𑀅𑀯𑀺𑀢𑀣𑀁 𑀢𑁂𑀲𑀜𑁆𑀜𑁂𑀯 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁂𑀦. 𑀏𑀯𑀁 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄.

𑀬𑀣𑀸 𑀯𑀸 𑀢𑁂 𑀪𑀕𑀯𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀁 𑀧𑀳𑀸𑀬 𑀕𑀢𑀸, 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀁, 𑀆𑀮𑁄𑀓𑀲𑀜𑁆𑀜𑀸𑀬 𑀣𑀺𑀦𑀫𑀺𑀤𑁆𑀥𑀁, 𑀅𑀯𑀺𑀓𑁆𑀔𑁂𑀧𑁂𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁, 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀕𑀢𑀸, 𑀜𑀸𑀡𑁂𑀦 𑀅𑀯𑀺𑀚𑁆𑀚𑀁 𑀧𑀤𑀸𑀮𑁂𑀢𑁆𑀯𑀸, 𑀧𑀸𑀫𑁄𑀚𑁆𑀚𑁂𑀦 𑀅𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀅𑀝𑁆𑀞𑀲𑀫𑀸𑀧𑀢𑁆𑀢𑀻𑀳𑀺 𑀅𑀝𑁆𑀞𑀸𑀭𑀲𑀳𑀺 𑀫𑀳𑀸𑀯𑀺𑀧𑀲𑁆𑀲𑀦𑀸𑀳𑀺 𑀘𑀢𑀽𑀳𑀺 𑀘 𑀅𑀭𑀺𑀬𑀫𑀕𑁆𑀕𑁂𑀳𑀺 𑀢𑀁 𑀢𑀁 𑀧𑀝𑀺𑀧𑀓𑁆𑀔𑀁 𑀧𑀳𑀸𑀬 𑀕𑀢𑀸, 𑀏𑀯𑀁 𑀅𑀬𑀫𑁆𑀧𑀺 𑀪𑀕𑀯𑀸 𑀕𑀢𑁄. 𑀏𑀯𑀫𑁆𑀧𑀺 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄.

𑀓𑀣𑀁 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀧𑀣𑀯𑀻𑀥𑀸𑀢𑀼𑀬𑀸 𑀓𑀓𑁆𑀔𑀴𑀮𑀓𑁆𑀔𑀡𑀁, 𑀆𑀧𑁄𑀥𑀸𑀢𑀼𑀬𑀸 𑀧𑀕𑁆𑀖𑀭𑀡𑀮𑀓𑁆𑀔𑀡𑀁, 𑀢𑁂𑀚𑁄𑀥𑀸𑀢𑀼𑀬𑀸 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀁, 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁, 𑀆𑀓𑀸𑀲𑀥𑀸𑀢𑀼𑀬𑀸 𑀅𑀲𑀫𑁆𑀨𑀼𑀝𑁆𑀞𑀮𑀓𑁆𑀔𑀡𑀁, 𑀭𑀽𑀧𑀲𑁆𑀲 𑀭𑀼𑀧𑁆𑀧𑀦𑀮𑀓𑁆𑀔𑀡𑀁, 𑀯𑁂𑀤𑀦𑀸𑀬 𑀯𑁂𑀤𑀬𑀺𑀢𑀮𑀓𑁆𑀔𑀡𑀁, 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀁, 𑀲𑀗𑁆𑀔𑀸𑀭𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀁, 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀚𑀸𑀦𑀦𑀮𑀓𑁆𑀔𑀡𑀦𑁆𑀢𑀺 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁, 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁, 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁, 𑀩𑀸𑀯𑀻𑀲𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑀸𑀦𑀁, 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁, 𑀤𑁆𑀯𑀸𑀤𑀲𑀧𑀤𑀺𑀓𑀲𑁆𑀲 𑀧𑀘𑁆𑀘𑀬𑀸𑀓𑀸𑀭𑀲𑁆𑀲, 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁, 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁, 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁, 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁, 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁, 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁, 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲, 𑀲𑀢𑁆𑀢𑀦𑁆𑀦𑀁 𑀯𑀺𑀲𑀼𑀤𑁆𑀥𑀻𑀦𑀁, 𑀅𑀫𑀢𑁄𑀕𑀥𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲𑀸𑀢𑀺 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀬𑀁 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀁, 𑀢𑀁 𑀢𑀣𑀁 𑀅𑀯𑀺𑀢𑀣𑀁 𑀅𑀦𑀜𑁆𑀜𑀣𑀁 𑀮𑀓𑁆𑀔𑀡𑀁 𑀜𑀸𑀡𑀕𑀢𑀺𑀬𑀸 𑀆𑀕𑀢𑁄 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀧𑀢𑁆𑀢𑁄 𑀅𑀥𑀺𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀏𑀯𑀁 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄.

𑀓𑀣𑀁 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄? 𑀢𑀣𑀥𑀫𑁆𑀫𑀸 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀬𑀣𑀸𑀳 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀫𑁂𑀢𑀁 𑀅𑀯𑀺𑀢𑀣𑀫𑁂𑀢𑀁 𑀅𑀦𑀜𑁆𑀜𑀣𑀫𑁂𑀢’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁦) 𑀯𑀺𑀢𑁆𑀣𑀸𑀭𑁄. 𑀢𑀸𑀦𑀺 𑀘 𑀪𑀕𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀢𑀣𑀸𑀦𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄.

𑀅𑀧𑀺𑀘 𑀚𑀭𑀸𑀫𑀭𑀡𑀲𑁆𑀲 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀢𑀣𑁄 𑀅𑀯𑀺𑀢𑀣𑁄 𑀅𑀦𑀜𑁆𑀜𑀣𑁄…𑀧𑁂… 𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀢𑀣𑁄 𑀅𑀯𑀺𑀢𑀣𑁄 𑀅𑀦𑀜𑁆𑀜𑀣𑁄, 𑀢𑀣𑀸 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄…𑀧𑁂... 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑀝𑁆𑀞𑁄 𑀢𑀣𑁄 𑀅𑀯𑀺𑀢𑀣𑁄 𑀅𑀦𑀜𑁆𑀜𑀣𑁄, 𑀢𑀁 𑀲𑀩𑁆𑀩𑀁 𑀪𑀕𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸𑀧𑀺 𑀢𑀣𑀸𑀦𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄. 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀣𑁄 𑀳𑀺 𑀏𑀢𑁆𑀣 𑀕𑀢𑀲𑀤𑁆𑀤𑁄𑀢𑀺. 𑀏𑀯𑀁 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄.

𑀓𑀣𑀁 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄? 𑀬𑀁 𑀲𑀤𑁂𑀯𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀪𑀕𑀯𑀸 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀁 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀘 𑀢𑁂𑀦 𑀢𑀁 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀺𑀯𑀲𑁂𑀦 𑀯𑀸 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼 𑀮𑀩𑁆𑀪𑀫𑀸𑀦𑀓𑀧𑀤𑀯𑀲𑁂𑀦 𑀯𑀸 ‘‘𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁, 𑀬𑀁 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀦𑀻𑀮𑀁 𑀧𑀻𑀢𑀓’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁬𑁧𑁬) 𑀦𑀬𑁂𑀦 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺 𑀢𑁂𑀭𑀲𑀳𑀺 𑀯𑀸𑀭𑁂𑀳𑀺 𑀤𑁆𑀯𑀺𑀧𑀜𑁆𑀜𑀸𑀲𑀸𑀬 𑀦𑀬𑁂𑀳𑀺 𑀯𑀺𑀪𑀚𑁆𑀚𑀫𑀸𑀦𑀁 𑀢𑀣𑀫𑁂𑀯 𑀳𑁄𑀢𑀺, 𑀯𑀺𑀢𑀣𑀁 𑀦𑀢𑁆𑀣𑀺. 𑀏𑀲 𑀦𑀬𑁄 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑁂𑀲𑀼 𑀲𑀤𑁆𑀤𑀸𑀤𑀻𑀲𑀼. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑀳𑀁 𑀚𑀸𑀦𑀸𑀫𑀺, 𑀢𑀫𑀳𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, 𑀢𑀁 𑀢𑀣𑀸𑀕𑀢𑀲𑁆𑀲 𑀯𑀺𑀤𑀺𑀢𑀁, 𑀢𑀁 𑀢𑀣𑀸𑀕𑀢𑁄 𑀦 𑀉𑀧𑀝𑁆𑀞𑀸𑀲𑀻’’𑀢𑀺 (𑀅. 𑀦𑀺. 𑁪.𑁨𑁪).

𑀏𑀯𑀁 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄. 𑀢𑀢𑁆𑀣 𑀢𑀣𑀤𑀲𑁆𑀲𑀻𑀅𑀢𑁆𑀣𑁂 𑀢𑀣𑀸𑀕𑀢𑁄𑀢𑀺 𑀧𑀤𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀣𑀁 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄? 𑀬𑀁 𑀭𑀢𑁆𑀢𑀺𑀁 𑀪𑀕𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀬𑀜𑁆𑀘 𑀭𑀢𑁆𑀢𑀺𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀏𑀢𑁆𑀣𑀦𑁆𑀢𑀭𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀧𑀭𑀺𑀫𑀸𑀡𑀓𑀸𑀮𑀁 𑀬𑀁 𑀪𑀕𑀯𑀢𑀸 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺, 𑀲𑀩𑁆𑀩𑀁 𑀢𑀁 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀧𑀼𑀡𑁆𑀡𑀁 𑀭𑀸𑀕𑀫𑀤𑀸𑀤𑀺𑀦𑀺𑀫𑁆𑀫𑀣𑀦𑀁 𑀏𑀓𑀲𑀤𑀺𑀲𑀁 𑀢𑀣𑀁 𑀅𑀯𑀺𑀢𑀣𑀁. 𑀢𑁂𑀦𑀸𑀳 𑁋

‘‘𑀬𑀜𑁆𑀘, 𑀘𑀼𑀦𑁆𑀤, 𑀭𑀢𑁆𑀢𑀺𑀁 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀬𑀜𑁆𑀘 𑀭𑀢𑁆𑀢𑀺𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀪𑀸𑀲𑀢𑀺 𑀮𑀧𑀢𑀺 𑀦𑀺𑀤𑁆𑀤𑀺𑀲𑀢𑀺, 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸, 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀤𑀻. 𑀦𑀺. 𑁩.𑁧𑁮𑁮).

𑀕𑀤𑀅𑀢𑁆𑀣𑁄 𑀏𑀢𑁆𑀣 𑀕𑀢𑀲𑀤𑁆𑀤𑁄. 𑀏𑀯𑀁 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄.

𑀅𑀧𑀺𑀘 𑀆𑀕𑀤𑀦𑀁 𑀆𑀕𑀤𑁄, 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀣𑁄 𑀅𑀯𑀺𑀢𑀣𑁄 𑀅𑀯𑀺𑀧𑀭𑀻𑀢𑁄 𑀆𑀕𑀤𑁄 𑀅𑀲𑁆𑀲𑀸𑀢𑀺 𑀤𑀓𑀸𑀭𑀲𑁆𑀲 𑀢𑀓𑀸𑀭𑀁 𑀓𑀢𑁆𑀯𑀸 𑀢𑀣𑀸𑀕𑀢𑁄𑀢𑀺 𑀏𑀯𑀫𑁂𑀢𑁆𑀣 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀣𑀁 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄? 𑀪𑀕𑀯𑀢𑁄 𑀳𑀺 𑀯𑀸𑀘𑀸𑀬 𑀓𑀸𑀬𑁄 𑀅𑀦𑀼𑀮𑁄𑀫𑁂𑀢𑀺, 𑀓𑀸𑀬𑀲𑁆𑀲𑀧𑀺 𑀯𑀸𑀘𑀸, 𑀢𑀲𑁆𑀫𑀸 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻 𑀘 𑀳𑁄𑀢𑀺. 𑀏𑀯𑀁𑀪𑀽𑀢𑀲𑁆𑀲 𑀘𑀲𑁆𑀲 𑀬𑀣𑀸𑀯𑀸𑀘𑀸, 𑀓𑀸𑀬𑁄𑀧𑀺 𑀢𑀣𑀸 𑀕𑀢𑁄 𑀧𑀯𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀘 𑀓𑀸𑀬𑁄, 𑀯𑀸𑀘𑀸𑀧𑀺 𑀢𑀣𑀸 𑀕𑀢𑀸 𑀧𑀯𑀢𑁆𑀢𑀸𑀢𑀺 𑀢𑀣𑀸𑀕𑀢𑁄. 𑀢𑁂𑀦𑀸𑀳 𑁋

‘‘𑀬𑀣𑀸𑀯𑀸𑀤𑀻, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻. 𑀇𑀢𑀺 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻. 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁪.𑁨𑁩).

𑀏𑀯𑀁 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄.

𑀓𑀣𑀁 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄? 𑀬𑀲𑁆𑀫𑀸 𑀉𑀧𑀭𑀺 𑀪𑀯𑀕𑁆𑀕𑀁 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀢𑀺𑀭𑀺𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀲𑀩𑁆𑀩𑀲𑀢𑁆𑀢𑁂 𑀅𑀪𑀺𑀪𑀯𑀢𑀺 𑀲𑀻𑀮𑁂𑀦𑀧𑀺 𑀲𑀫𑀸𑀥𑀺𑀦𑀸𑀧𑀺 𑀧𑀜𑁆𑀜𑀸𑀬𑀧𑀺 𑀯𑀺𑀫𑀼𑀢𑁆𑀢𑀺𑀬𑀸𑀧𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦𑀧𑀺, 𑀦 𑀢𑀲𑁆𑀲 𑀢𑀼𑀮𑀸 𑀯𑀸 𑀧𑀫𑀸𑀡𑀁 𑀯𑀸 𑀅𑀢𑁆𑀣𑀺, 𑀅𑀣 𑀔𑁄 𑀅𑀢𑀼𑀮𑁄 𑀅𑀧𑁆𑀧𑀫𑁂𑀬𑁆𑀬𑁄 𑀅𑀦𑀼𑀢𑁆𑀢𑀭𑁄 𑀤𑁂𑀯𑀤𑁂𑀯𑁄 𑀲𑀓𑁆𑀓𑀸𑀦𑀁 𑀅𑀢𑀺𑀲𑀓𑁆𑀓𑁄, 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄, 𑀢𑀲𑁆𑀫𑀸 𑀢𑀣𑀸𑀕𑀢𑁄. 𑀢𑁂𑀦𑀸𑀳 𑁋

‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀢𑀣𑀸𑀕𑀢𑁄 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀺, 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁪.𑁨𑁩).

𑀢𑀢𑁆𑀭𑀸𑀬𑀁 𑀧𑀤𑀲𑀺𑀤𑁆𑀥𑀺 𑁋 𑀅𑀕𑀤𑁄 𑀯𑀺𑀬 𑀅𑀕𑀤𑁄, 𑀤𑁂𑀲𑀦𑀸𑀯𑀺𑀮𑀸𑀲𑁄 𑀘𑁂𑀯 𑀧𑀼𑀜𑁆𑀜𑀼𑀲𑁆𑀲𑀬𑁄 𑀘. 𑀢𑁂𑀦 𑀲𑁄 𑀫𑀳𑀸𑀦𑀼𑀪𑀸𑀯𑁄 𑀪𑀺𑀲𑀓𑁆𑀓𑁄 𑀯𑀺𑀬 𑀤𑀺𑀩𑁆𑀩𑀸𑀕𑀤𑁂𑀦 𑀲𑀧𑁆𑀧𑁂 𑀲𑀩𑁆𑀩𑀧𑀭𑀧𑁆𑀧𑀯𑀸𑀤𑀺𑀦𑁄 𑀲𑀤𑁂𑀯𑀓𑀜𑁆𑀘 𑀮𑁄𑀓𑀁 𑀅𑀪𑀺𑀪𑀯𑀢𑀺. 𑀇𑀢𑀺 𑀲𑀩𑁆𑀩𑀮𑁄𑀓𑀸𑀪𑀺𑀪𑀯𑀦𑁂 𑀢𑀣𑁄 𑀅𑀯𑀺𑀢𑀣𑁄 𑀅𑀯𑀺𑀧𑀭𑀻𑀢𑁄 𑀬𑀣𑀸𑀯𑀼𑀢𑁆𑀢𑁄𑀯 𑀅𑀕𑀤𑁄 𑀏𑀢𑀲𑁆𑀲𑀸𑀢𑀺 𑀤𑀓𑀸𑀭𑀲𑁆𑀲 𑀢𑀓𑀸𑀭𑀁 𑀓𑀢𑁆𑀯𑀸 𑀢𑀣𑀸𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄.

𑀅𑀧𑀺𑀘 𑀢𑀣𑀸𑀬 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀁 𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀢𑀢𑁆𑀣 𑀲𑀓𑀮𑀮𑁄𑀓𑀁 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀢𑀣𑀸𑀬 𑀕𑀢𑁄 𑀅𑀯𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀮𑁄𑀓𑀲𑀫𑀼𑀤𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀢𑀣𑀸𑀬 𑀕𑀢𑁄 𑀅𑀢𑀻𑀢𑁄𑀢𑀺 𑀢𑀣𑀸𑀕𑀢𑁄. 𑀮𑁄𑀓𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀢𑀣𑀸𑀬 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀢𑀣𑀁 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀢𑀣𑀸𑀕𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀮𑁄𑀓𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀮𑁄𑀓𑀲𑁆𑀫𑀸 𑀢𑀣𑀸𑀕𑀢𑁄 𑀯𑀺𑀲𑀁𑀬𑀼𑀢𑁆𑀢𑁄. 𑀮𑁄𑀓𑀲𑀫𑀼𑀤𑀬𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀮𑁄𑀓𑀲𑀫𑀼𑀤𑀬𑁄 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑁄, 𑀮𑁄𑀓𑀦𑀺𑀭𑁄𑀥𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀮𑁄𑀓𑀦𑀺𑀭𑁄𑀥𑁄 𑀢𑀣𑀸𑀕𑀢𑀲𑁆𑀲 𑀲𑀘𑁆𑀙𑀺𑀓𑀢𑁄. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀢𑀣𑀸𑀕𑀢𑀲𑁆𑀲 𑀪𑀸𑀯𑀺𑀢𑀸. 𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲…𑀧𑁂… 𑀲𑀩𑁆𑀩𑀁 𑀢𑀁 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀁. 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁪.𑁨𑁩).

𑀅𑀧𑀭𑁂𑀳𑀺𑀧𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄 𑁋 𑀢𑀣𑀸𑀬 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸𑀬 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸𑀦𑀺 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸𑀯𑀺𑀥𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸 𑀧𑀯𑀢𑁆𑀢𑀺𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑁂𑀳𑀺 𑀅𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸 𑀕𑀢𑀪𑀸𑀯𑁂𑀦 𑀢𑀣𑀸𑀕𑀢𑁄.

𑀓𑀣𑀁 𑀢𑀣𑀸𑀬 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀬𑀸 𑀲𑀸 𑀪𑀕𑀯𑀢𑀸 𑀲𑀼𑀫𑁂𑀥𑀪𑀽𑀢𑁂𑀦 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑁋

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁,

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀻’’𑀢𑀺. (𑀩𑀼. 𑀯𑀁. 𑁨.𑁫𑁯) 𑁋

𑀏𑀯𑀁 𑀯𑀼𑀢𑁆𑀢𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀅𑀪𑀺𑀦𑀻𑀳𑀸𑀭𑀁 𑀲𑀫𑁆𑀧𑀸𑀤𑁂𑀦𑁆𑀢𑁂𑀦 ‘‘𑀅𑀳𑀁 𑀲𑀤𑁂𑀯𑀓𑀁 𑀮𑁄𑀓𑀁 𑀢𑀺𑀡𑁆𑀡𑁄 𑀢𑀸𑀭𑁂𑀲𑁆𑀲𑀸𑀫𑀺, 𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀺, 𑀤𑀦𑁆𑀢𑁄 𑀤𑀫𑁂𑀲𑁆𑀲𑀸𑀫𑀺, 𑀲𑀦𑁆𑀢𑁄 𑀲𑀫𑁂𑀲𑁆𑀲𑀸𑀫𑀺, 𑀅𑀲𑁆𑀲𑀢𑁆𑀣𑁄 𑀅𑀲𑁆𑀲𑀸𑀲𑁂𑀲𑁆𑀲𑀸𑀫𑀺, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀸𑀫𑀺, 𑀩𑀼𑀤𑁆𑀥𑁄 𑀩𑁄𑀥𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀸𑀧𑀝𑀺𑀜𑁆𑀜𑀸 𑀧𑀯𑀢𑁆𑀢𑀺𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀺𑀁 𑀫𑁂 𑀏𑀓𑁂𑀦 𑀢𑀺𑀡𑁆𑀡𑁂𑀦, 𑀧𑀼𑀭𑀺𑀲𑁂𑀦 𑀣𑀸𑀫𑀤𑀲𑁆𑀲𑀺𑀦𑀸;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀲𑀦𑁆𑀢𑀸𑀭𑁂𑀲𑁆𑀲𑀁 𑀲𑀤𑁂𑀯𑀓𑀁.

‘‘𑀇𑀫𑀺𑀦𑀸 𑀫𑁂 𑀅𑀥𑀺𑀓𑀸𑀭𑁂𑀦, 𑀓𑀢𑁂𑀦 𑀧𑀼𑀭𑀺𑀲𑀼𑀢𑁆𑀢𑀫𑁂;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀢𑀸𑀭𑁂𑀫𑀺 𑀚𑀦𑀢𑀁 𑀩𑀳𑀼𑀁.

‘‘𑀲𑀁𑀲𑀸𑀭𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀢𑀬𑁄 𑀪𑀯𑁂;

𑀥𑀫𑁆𑀫𑀦𑀸𑀯𑀁 𑀲𑀫𑀸𑀭𑀼𑀬𑁆𑀳, 𑀲𑀦𑁆𑀢𑀸𑀭𑁂𑀲𑁆𑀲𑀁 𑀲𑀤𑁂𑀯𑀓𑀁.

‘‘𑀓𑀺𑀁 𑀫𑁂 𑀅𑀜𑁆𑀜𑀸𑀢𑀯𑁂𑀲𑁂𑀦, 𑀥𑀫𑁆𑀫𑀁 𑀲𑀘𑁆𑀙𑀺𑀓𑀢𑁂𑀦𑀺𑀥;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀩𑀼𑀤𑁆𑀥𑁄 𑀳𑁂𑀲𑁆𑀲𑀁 𑀲𑀤𑁂𑀯𑀓𑁂’’𑀢𑀺. (𑀩𑀼. 𑀯𑀁. 𑁨.𑁫𑁫-𑁫𑁮);

𑀢𑀁 𑀧𑀦𑁂𑀢𑀁 𑀫𑀳𑀸𑀧𑀝𑀺𑀜𑁆𑀜𑀁 𑀲𑀓𑀮𑀲𑁆𑀲𑀸𑀧𑀺 𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀫𑀼𑀤𑀸𑀬𑀲𑁆𑀲 𑀧𑀯𑀺𑀘𑀬 𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑀸𑀤𑀸𑀦𑀸𑀦𑀁 𑀓𑀸𑀭𑀡𑀪𑀽𑀢𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀮𑁄𑀓𑀦𑀸𑀬𑀓𑁄 𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀦𑀺𑀭𑀯𑀲𑁂𑀲𑀢𑁄 𑀤𑀸𑀦𑀧𑀸𑀭𑀫𑀺𑀆𑀤𑀬𑁄 𑀲𑀫𑀢𑀺𑀁𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸, 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀸𑀤𑀬𑁄 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸, 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺 𑀧𑀭𑀺𑀩𑁆𑀭𑀽𑀳𑁂𑀢𑁆𑀯𑀸, 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁂 𑀲𑀫𑁆𑀪𑀭𑀺𑀢𑁆𑀯𑀸, 𑀧𑀼𑀩𑁆𑀩𑀬𑁄𑀕𑀧𑀼𑀩𑁆𑀩𑀘𑀭𑀺𑀬𑀥𑀫𑁆𑀫𑀓𑁆𑀔𑀸𑀦𑀜𑀸𑀢𑀢𑁆𑀣𑀘𑀭𑀺𑀬𑀸𑀤𑀬𑁄 𑀉𑀓𑁆𑀓𑀁𑀲𑀸𑀧𑁂𑀢𑁆𑀯𑀸, 𑀩𑀼𑀤𑁆𑀥𑀺𑀘𑀭𑀺𑀬𑀁 𑀧𑀭𑀫𑀓𑁄𑀝𑀺𑀁 𑀧𑀸𑀧𑁂𑀢𑁆𑀯𑀸, 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀲𑁆𑀫𑀸 𑀢𑀲𑁆𑀲𑁂𑀯 𑀲𑀸 𑀫𑀳𑀸𑀧𑀝𑀺𑀜𑁆𑀜𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸, 𑀦 𑀢𑀲𑁆𑀲 𑀯𑀸𑀮𑀕𑁆𑀕𑀫𑀢𑁆𑀢𑀫𑁆𑀧𑀺 𑀯𑀺𑀢𑀣𑀁 𑀅𑀢𑁆𑀣𑀺. 𑀢𑀣𑀸 𑀳𑀺 𑀤𑀻𑀧𑀗𑁆𑀓𑀭𑀤𑀲𑀩𑀮𑁄 𑀓𑁄𑀡𑁆𑀟𑀜𑁆𑀜𑁄 𑀫𑀗𑁆𑀕𑀮𑁄…𑀧𑁂… 𑀓𑀲𑁆𑀲𑀧𑁄 𑀪𑀕𑀯𑀸𑀢𑀺 𑀇𑀫𑁂 𑀘𑀢𑀼𑀯𑀻𑀲𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀧𑀝𑀺𑀧𑀸𑀝𑀺𑀬𑀸 𑀉𑀧𑁆𑀧𑀦𑁆𑀦𑀸 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀏𑀯𑀁 𑀘𑀢𑀼𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀬𑁂 𑀢𑁂 𑀓𑀢𑀸𑀪𑀺𑀦𑀻𑀳𑀸𑀭𑁂𑀳𑀺 𑀩𑁄𑀥𑀺𑀲𑀢𑁆𑀢𑁂𑀳𑀺 𑀮𑀤𑁆𑀥𑀩𑁆𑀩𑀸 𑀆𑀦𑀺𑀲𑀁𑀲𑀸, 𑀢𑁂 𑀮𑀪𑀺𑀢𑁆𑀯𑀸𑀯 𑀆𑀕𑀢𑁄𑀢𑀺 𑀢𑀸𑀬 𑀬𑀣𑀸𑀯𑀼𑀢𑁆𑀢𑀸𑀬 𑀫𑀳𑀸𑀧𑀝𑀺𑀜𑁆𑀜𑀸𑀬 𑀢𑀣𑀸𑀬 𑀅𑀪𑀺𑀲𑀫𑁆𑀩𑀼𑀤𑁆𑀥𑀪𑀸𑀯𑀁 𑀆𑀕𑀢𑁄 𑀅𑀥𑀺𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀏𑀯𑀁 𑀢𑀣𑀸𑀬 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄.

𑀓𑀣𑀁 𑀢𑀣𑀸𑀬 𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀬𑀸𑀬 𑀫𑀳𑀸𑀓𑀭𑀼𑀡𑀸𑀬 𑀮𑁄𑀓𑀦𑀸𑀣𑁄 𑀫𑀳𑀸𑀤𑀼𑀓𑁆𑀔𑀲𑀫𑁆𑀩𑀸𑀥𑀧𑁆𑀧𑀝𑀺𑀧𑀦𑁆𑀦𑀁 𑀲𑀢𑁆𑀢𑀦𑀺𑀓𑀸𑀬𑀁 𑀤𑀺𑀲𑁆𑀯𑀸 ‘‘𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀧𑀝𑀺𑀲𑁆𑀲𑀭𑀡𑀁, 𑀅𑀳𑀫𑁂𑀯 𑀦𑀫𑀺𑀢𑁄 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁄 𑀫𑀳𑀸𑀪𑀺𑀦𑀻𑀳𑀸𑀭𑀫𑀓𑀸𑀲𑀺. 𑀓𑀢𑁆𑀯𑀸 𑀘 𑀬𑀣𑀸𑀧𑀡𑀺𑀥𑀸𑀦𑀁 𑀲𑀓𑀮𑀮𑁄𑀓𑀳𑀺𑀢𑀲𑀫𑁆𑀧𑀸𑀤𑀦𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑁄 𑀅𑀢𑁆𑀢𑀦𑁄 𑀓𑀸𑀬𑀚𑀻𑀯𑀺𑀢𑀦𑀺𑀭𑀧𑁂𑀓𑁆𑀔𑁄 𑀧𑀭𑁂𑀲𑀁 𑀲𑁄𑀢𑀧𑀣𑀸𑀕𑀫𑀦𑀫𑀢𑁆𑀢𑁂𑀦𑀧𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀲𑀫𑀼𑀧𑁆𑀧𑀸𑀤𑀺𑀓𑀸 𑀅𑀢𑀺𑀤𑀼𑀓𑁆𑀓𑀭𑀸 𑀤𑀼𑀓𑁆𑀓𑀭𑀘𑀭𑀺𑀬𑀸 𑀲𑀫𑀸𑀘𑀭𑀦𑁆𑀢𑁄 𑀬𑀣𑀸 𑀫𑀳𑀸𑀩𑁄𑀥𑀺𑀬𑀸 𑀧𑀝𑀺𑀧𑀢𑁆𑀢𑀺 𑀳𑀸𑀦𑀪𑀸𑀕𑀺𑀬𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸 𑀞𑀺𑀢𑀺𑀪𑀸𑀕𑀺𑀬𑀸 𑀯𑀸 𑀦 𑀳𑁄𑀢𑀺, 𑀅𑀣 𑀔𑁄 𑀉𑀢𑁆𑀢𑀭𑀼𑀢𑁆𑀢𑀭𑀺 𑀯𑀺𑀲𑁂𑀲𑀪𑀸𑀕𑀺𑀬𑀸𑀯 𑀳𑁄𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀭𑀯𑀲𑁂𑀲𑁂 𑀩𑁄𑀥𑀺𑀲𑀫𑁆𑀪𑀸𑀭𑁂 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺. 𑀢𑀢𑁄 𑀧𑀭𑀜𑁆𑀘 𑀢𑀸𑀬𑁂𑀯 𑀫𑀳𑀸𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀧𑀯𑀺𑀯𑁂𑀓𑀭𑀢𑀺𑀁 𑀧𑀭𑀫𑀜𑁆𑀘 𑀲𑀦𑁆𑀢𑀁 𑀯𑀺𑀫𑁄𑀓𑁆𑀔𑀲𑀼𑀔𑀁 𑀧𑀳𑀸𑀬 𑀩𑀸𑀮𑀚𑀦𑀩𑀳𑀼𑀮𑁂 𑀮𑁄𑀓𑁂 𑀢𑁂𑀳𑀺 𑀲𑀫𑀼𑀧𑁆𑀧𑀸𑀤𑀺𑀢𑀁 𑀲𑀫𑁆𑀫𑀸𑀦𑀸𑀯𑀫𑀸𑀦𑀯𑀺𑀧𑁆𑀧𑀓𑀸𑀭𑀁 𑀅𑀕𑀡𑁂𑀢𑁆𑀯𑀸 𑀯𑀺𑀦𑁂𑀬𑁆𑀬𑀚𑀦𑀲𑁆𑀲 𑀯𑀺𑀦𑀬𑀦𑁂𑀦 𑀦𑀺𑀭𑀯𑀲𑁂𑀲𑀁 𑀩𑀼𑀤𑁆𑀥𑀓𑀺𑀘𑁆𑀘𑀁 𑀦𑀺𑀝𑁆𑀞𑀧𑁂𑀲𑀺. 𑀢𑀢𑁆𑀣 𑀬𑁄 𑀪𑀕𑀯𑀢𑁄 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸𑀬 𑀲𑀫𑁄𑀓𑁆𑀓𑀫𑀦𑀸𑀓𑀸𑀭𑁄, 𑀲𑁄 𑀧𑀭𑀢𑁄 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀬𑀣𑀸 𑀘 𑀩𑀼𑀤𑁆𑀥𑀪𑀽𑀢𑀲𑁆𑀲 𑀮𑁄𑀓𑀦𑀸𑀣𑀲𑁆𑀲 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸, 𑀏𑀯𑀁 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲𑀧𑀺 𑀫𑀳𑀸𑀪𑀺𑀦𑀻𑀳𑀸𑀭𑀓𑀸𑀮𑀸𑀤𑀻𑀲𑀽𑀢𑀺 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀘 𑀏𑀓𑀲𑀤𑀺𑀲𑀢𑀸𑀬 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸, 𑀢𑀲𑁆𑀫𑀸 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀲𑀩𑁆𑀩𑀲𑀢𑁆𑀢𑁂𑀲𑀼 𑀲𑀫𑀸𑀦𑀭𑀲𑀸𑀬 𑀢𑀣𑀸𑀬 𑀫𑀳𑀸𑀓𑀭𑀼𑀡𑀸𑀬 𑀲𑀓𑀮𑀮𑁄𑀓𑀳𑀺𑀢𑀸𑀬 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀢𑀣𑀸𑀕𑀢𑁄. 𑀏𑀯𑀁 𑀢𑀣𑀸𑀬 𑀕𑀢𑁄𑀢𑀺 𑀢𑀣𑀸𑀕𑀢𑁄.

𑀓𑀣𑀁 𑀢𑀣𑀸𑀦𑀺 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀢𑀣𑀸𑀦𑀺 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀭𑀺𑀬𑀫𑀕𑁆𑀕𑀜𑀸𑀡𑀸𑀦𑀺. 𑀢𑀸𑀦𑀺 𑀳𑀺 𑀇𑀤𑀁 𑀤𑀼𑀓𑁆𑀔𑀁, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀏𑀯𑀁 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀲𑀗𑁆𑀕𑀸𑀳𑀓𑀸𑀦𑀁 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀢𑀤𑀼𑀪𑀬𑀳𑁂𑀢𑀼𑀪𑀽𑀢𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄, 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄 𑀦𑀺𑀤𑀸𑀦𑀝𑁆𑀞𑁄 𑀲𑀁𑀬𑁄𑀕𑀝𑁆𑀞𑁄 𑀧𑀮𑀺𑀩𑁄𑀥𑀝𑁆𑀞𑁄, 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄 𑀯𑀺𑀯𑁂𑀓𑀝𑁆𑀞𑁄 𑀅𑀲𑀗𑁆𑀔𑀢𑀝𑁆𑀞𑁄 𑀅𑀫𑀢𑀝𑁆𑀞𑁄, 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄 𑀳𑁂𑀢𑁆𑀯𑀝𑁆𑀞𑁄 𑀤𑀲𑁆𑀲𑀦𑀝𑁆𑀞𑁄 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄𑀢𑀺𑀆𑀤𑀻𑀦𑀁 𑀢𑀩𑁆𑀩𑀺𑀪𑀸𑀕𑀸𑀦𑀜𑁆𑀘 𑀬𑀣𑀸𑀪𑀽𑀢𑀲𑀪𑀸𑀯𑀸𑀯𑀩𑁄𑀥𑀯𑀺𑀩𑀦𑁆𑀥𑀓𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀧𑀝𑀺𑀮𑀤𑁆𑀥𑀸𑀬 𑀢𑀢𑁆𑀣 𑀅𑀲𑀫𑁆𑀫𑁄𑀳𑀸𑀪𑀺𑀲𑀫𑀬𑀲𑀗𑁆𑀔𑀸𑀢𑀸𑀬 𑀅𑀯𑀺𑀧𑀭𑀻𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀥𑀫𑁆𑀫𑀸𑀦𑀁 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑀢𑁄 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺, 𑀢𑀸𑀦𑀺 𑀪𑀕𑀯𑀸 𑀅𑀦𑀜𑁆𑀜𑀦𑁂𑀬𑁆𑀬𑁄 𑀲𑀬𑀫𑁂𑀯 𑀆𑀕𑀢𑁄 𑀅𑀥𑀺𑀕𑀢𑁄, 𑀢𑀲𑁆𑀫𑀸 𑀢𑀣𑀸𑀦𑀺 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄.

𑀬𑀣𑀸 𑀘 𑀫𑀕𑁆𑀕𑀜𑀸𑀡𑀸𑀦𑀺, 𑀏𑀯𑀁 𑀪𑀕𑀯𑀢𑁄 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀸𑀦𑀺 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀺 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀸𑀦𑀺 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀜𑀸𑀡𑀸𑀦𑀺 𑀙𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀯𑀺𑀪𑀸𑀯𑀦𑀜𑀸𑀡𑀸𑀦𑀺 𑀅𑀝𑁆𑀞𑀫𑀕𑁆𑀕𑀗𑁆𑀕𑀯𑀺𑀪𑀸𑀯𑀦𑀜𑀸𑀡𑀸𑀦𑀺 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀜𑀸𑀡𑀸𑀦𑀺 𑀤𑀲𑀩𑀮𑀜𑀸𑀡𑀸𑀦𑀺 𑀘 𑀢𑀣𑀪𑀸𑀯𑁂 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀢𑁆𑀭𑀸𑀬𑀁 𑀯𑀺𑀪𑀸𑀯𑀦𑀸 𑁋 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀳𑀻𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀲𑀼 𑀅𑀢𑀻𑀢𑀸𑀲𑀼 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀲𑀼 𑀲𑀪𑀸𑀯𑀓𑀺𑀘𑁆𑀘𑀸𑀤𑀺 𑀅𑀯𑀢𑁆𑀣𑀸𑀯𑀺𑀲𑁂𑀲𑀸𑀤𑀺 𑀔𑀦𑁆𑀥𑀧𑁆𑀧𑀝𑀺𑀩𑀤𑁆𑀥𑀦𑀸𑀫𑀕𑁄𑀢𑁆𑀢𑀸𑀤𑀺 𑀘 𑀚𑀸𑀦𑀺𑀢𑀩𑁆𑀩𑀁. 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀲𑀼 𑀘 𑀅𑀢𑀺𑀲𑀼𑀔𑀼𑀫𑀢𑀺𑀭𑁄𑀳𑀺𑀢𑀯𑀺𑀤𑀽𑀭𑀤𑁂𑀲𑁂𑀲𑀼𑀧𑀺 𑀭𑀽𑀧𑀥𑀫𑁆𑀫𑁂𑀲𑀼 𑀬𑁄 𑀢𑀁𑀢𑀁𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀯𑀡𑁆𑀡𑀲𑀡𑁆𑀞𑀸𑀦𑀕𑀦𑁆𑀥𑀭𑀲𑀨𑀲𑁆𑀲𑀸𑀤𑀺𑀯𑀺𑀲𑁂𑀲𑁄, 𑀢𑀢𑁆𑀣 𑀲𑀩𑁆𑀩𑀢𑁆𑀣𑁂𑀯 𑀳𑀢𑁆𑀣𑀢𑀮𑁂 𑀞𑀧𑀺𑀢𑀆𑀫𑀮𑀓𑁂 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀅𑀧𑁆𑀧𑀝𑀺𑀳𑀢𑀁 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑀣𑀸 𑀅𑀦𑀸𑀕𑀢𑀸𑀲𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀲𑀼 𑀘𑀸𑀢𑀺 𑀇𑀫𑀸𑀦𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀸𑀦𑀺 𑀦𑀸𑀫. 𑀬𑀣𑀸𑀳 𑁋

‘‘𑀅𑀢𑀻𑀢𑀁𑀲𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀅𑀦𑀸𑀕𑀢𑀁𑀲𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀲𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁩.𑁫).

𑀢𑀸𑀦𑀺 𑀧𑀦𑁂𑀢𑀸𑀦𑀺 𑀢𑀢𑁆𑀣 𑀢𑀢𑁆𑀣 𑀥𑀫𑁆𑀫𑀸𑀦𑀁 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑀢𑁄 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺, 𑀢𑀸𑀦𑀺 𑀪𑀕𑀯𑀸 𑀲𑀬𑀫𑁆𑀪𑀽𑀜𑀸𑀡𑁂𑀦 𑀅𑀥𑀺𑀕𑀜𑁆𑀙𑀻𑀢𑀺. 𑀏𑀯𑀫𑁆𑀧𑀺 𑀢𑀣𑀸𑀦𑀺 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄.

𑀢𑀣𑀸 𑀅𑀢𑁆𑀣𑀧𑁆𑀧𑀝𑀺𑀲𑀫𑁆𑀪𑀺𑀤𑀸 𑀥𑀫𑁆𑀫𑀧𑁆𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀭𑀼𑀢𑁆𑀢𑀺𑀧𑁆𑀧𑀝𑀺𑀲𑀫𑁆𑀪𑀺𑀤𑀸 𑀧𑀝𑀺𑀪𑀸𑀦𑀧𑁆𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸. 𑀢𑀢𑁆𑀣 𑀅𑀢𑁆𑀣𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀅𑀢𑁆𑀣𑀧𑁆𑀧𑀪𑁂𑀤𑀕𑀢𑀁 𑀜𑀸𑀡𑀁 𑀅𑀢𑁆𑀣𑀧𑁆𑀧𑀝𑀺𑀲𑀫𑁆𑀪𑀺𑀤𑀸. 𑀥𑀫𑁆𑀫𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀥𑀫𑁆𑀫𑀧𑁆𑀧𑀪𑁂𑀤𑀕𑀢𑀁 𑀜𑀸𑀡𑀁 𑀥𑀫𑁆𑀫𑀧𑁆𑀧𑀝𑀺𑀲𑀫𑁆𑀪𑀺𑀤𑀸. 𑀦𑀺𑀭𑀼𑀢𑁆𑀢𑀺𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑁆𑀧𑀝𑀺𑀲𑀫𑁆𑀪𑀺𑀤𑀸. 𑀧𑀝𑀺𑀪𑀸𑀦𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀧𑀝𑀺𑀪𑀸𑀦𑀧𑁆𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀝𑀺𑀪𑀸𑀦𑀧𑁆𑀧𑀝𑀺𑀲𑀫𑁆𑀪𑀺𑀤𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀢𑁆𑀣𑁂 𑀜𑀸𑀡𑀁 𑀅𑀢𑁆𑀣𑀧𑁆𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑁂 𑀜𑀸𑀡𑀁 𑀥𑀫𑁆𑀫𑀧𑁆𑀧𑀝𑀺𑀲𑀫𑁆𑀪𑀺𑀤𑀸, 𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑁆𑀧𑀝𑀺𑀲𑀫𑁆𑀪𑀺𑀤𑀸, 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑁆𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁮-𑁭𑁨𑁧).