𑁩. 𑀆𑀦𑀦𑁆𑀤𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀺𑀲𑀼𑀡𑁂𑀦 𑀘 𑀓𑁄𑀥𑀦𑁂𑀦𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀲𑀢𑁆𑀣𑀼 𑀯𑁂𑀫𑀸𑀢𑀺𑀓𑀪𑀸𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀲𑀼𑀫𑀦𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀧𑀺𑀢𑀸 𑀧𑀦𑀲𑁆𑀲 𑀆𑀦𑀦𑁆𑀤𑀭𑀸𑀚𑀸 𑀦𑀸𑀫. 𑀲𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀲𑀼𑀫𑀦𑀓𑀼𑀫𑀸𑀭𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀳𑀁𑀲𑀯𑀢𑀺𑀢𑁄 𑀯𑀻𑀲𑀬𑁄𑀚𑀦𑀲𑀢𑁂 𑀞𑀸𑀦𑁂 𑀪𑁄𑀕𑀦𑀕𑀭𑀁 𑀅𑀤𑀸𑀲𑀺. 𑀲𑁄 𑀓𑀤𑀸𑀘𑀺 𑀓𑀤𑀸𑀘𑀺 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀸𑀦𑀜𑁆𑀘 𑀧𑀺𑀢𑀭𑀜𑁆𑀘 𑀧𑀲𑁆𑀲𑀢𑀺. 𑀢𑀤𑀸 𑀭𑀸𑀚𑀸 𑀲𑀢𑁆𑀣𑀸𑀭𑀜𑁆𑀘 𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀲𑀬𑀫𑁂𑀯 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺, 𑀅𑀜𑁆𑀜𑁂𑀲𑀁 𑀉𑀧𑀝𑁆𑀞𑀸𑀢𑀼𑀁 𑀦 𑀤𑁂𑀢𑀺.

𑀢𑁂𑀦 𑀲𑀫𑀬𑁂𑀦 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄 𑀅𑀳𑁄𑀲𑀺. 𑀓𑀼𑀫𑀸𑀭𑁄 𑀢𑀲𑁆𑀲 𑀓𑀼𑀧𑀺𑀢𑀪𑀸𑀯𑀁 𑀭𑀜𑁆𑀜𑁄 𑀅𑀦𑀸𑀭𑁄𑀘𑁂𑀢𑁆𑀯𑀸 𑀲𑀬𑀫𑁂𑀯 𑀢𑀁 𑀯𑀽𑀧𑀲𑀫𑁂𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀼𑀝𑁆𑀞𑀫𑀸𑀦𑀲𑁄 𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀯𑀭𑀁 𑀢𑁂, 𑀢𑀸𑀢 𑀤𑀫𑁆𑀫𑀺, 𑀯𑀭𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀓𑀼𑀫𑀸𑀭𑁄 ‘‘𑀲𑀢𑁆𑀣𑀸𑀭𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀢𑁂𑀫𑀸𑀲𑀁 𑀉𑀧𑀝𑁆𑀞𑀳𑀦𑁆𑀢𑁄 𑀚𑀻𑀯𑀺𑀢𑀁 𑀅𑀯𑀜𑁆𑀛𑀁 𑀓𑀸𑀢𑀼𑀁 𑀇𑀘𑁆𑀙𑀸𑀫𑀻’’𑀢𑀺 𑀆𑀳. ‘‘𑀏𑀢𑀁 𑀦 𑀲𑀓𑁆𑀓𑀸, 𑀅𑀜𑁆𑀜𑀁 𑀯𑀤𑁂𑀳𑀻’’𑀢𑀺. ‘‘𑀤𑁂𑀯, 𑀔𑀢𑁆𑀢𑀺𑀬𑀸𑀦𑀁 𑀤𑁆𑀯𑁂𑀓𑀣𑀸 𑀦𑀸𑀫 𑀦𑀢𑁆𑀣𑀺, 𑀏𑀢𑀤𑁂𑀯 𑀫𑁂 𑀤𑁂𑀳𑀺, 𑀦 𑀫𑀬𑁆𑀳𑀁 𑀅𑀜𑁆𑀜𑁂𑀦 𑀅𑀢𑁆𑀣𑁄’’𑀢𑀺. ‘‘𑀲𑀘𑁂 𑀲𑀢𑁆𑀣𑀸 𑀅𑀦𑀼𑀚𑀸𑀦𑀸𑀢𑀺, 𑀤𑀺𑀦𑁆𑀦𑀫𑁂𑀯𑀸’’𑀢𑀺. 𑀲𑁄 ‘‘𑀲𑀢𑁆𑀣𑀼 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀢𑁄.

𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁄 𑀳𑁄𑀢𑀺. 𑀲𑁄 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀆𑀕𑀢𑁄, 𑀤𑀲𑁆𑀲𑁂𑀣 𑀫𑁂 𑀪𑀕𑀯𑀦𑁆𑀢’’𑀦𑁆𑀢𑀺 𑀆𑀳. 𑀪𑀺𑀓𑁆𑀔𑀽 ‘‘𑀲𑀼𑀫𑀦𑁄 𑀦𑀸𑀫 𑀣𑁂𑀭𑁄 𑀲𑀢𑁆𑀣𑀼 𑀉𑀧𑀝𑁆𑀞𑀸𑀓𑁄, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀳𑀻’’𑀢𑀺 𑀆𑀳𑀁𑀲𑀼. 𑀲𑁄 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁, 𑀪𑀦𑁆𑀢𑁂, 𑀫𑁂 𑀤𑀲𑁆𑀲𑁂𑀣𑀸’’𑀢𑀺 𑀆𑀳. 𑀅𑀣 𑀣𑁂𑀭𑁄 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀭𑀸𑀚𑀧𑀼𑀢𑁆𑀢𑁄 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀸𑀬 𑀆𑀕𑀢𑁄’’𑀢𑀺 𑀆𑀳. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀼, 𑀩𑀳𑀺 𑀆𑀲𑀦𑀁 𑀧𑀜𑁆𑀜𑀸𑀧𑁂𑀳𑀻’’𑀢𑀺. 𑀣𑁂𑀭𑁄 𑀧𑀼𑀦𑀧𑀺 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀩𑀼𑀤𑁆𑀥𑀸𑀲𑀦𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀩𑀳𑀺𑀧𑀭𑀺𑀯𑁂𑀡𑁂 𑀧𑀸𑀢𑀼𑀪𑀯𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀺. 𑀓𑀼𑀫𑀸𑀭𑁄 𑀢𑀁 𑀤𑀺𑀲𑁆𑀯𑀸 ‘‘𑀫𑀳𑀦𑁆𑀢𑁄 𑀯𑀢𑀸𑀬𑀁 𑀪𑀺𑀓𑁆𑀔𑀽’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺.

𑀪𑀕𑀯𑀸𑀧𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀭𑀸𑀚𑀧𑀼𑀢𑁆𑀢𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸, 𑀅𑀬𑀁, 𑀪𑀦𑁆𑀢𑁂, 𑀣𑁂𑀭𑁄 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀯𑀮𑁆𑀮𑀪𑁄 𑀫𑀜𑁆𑀜𑁂𑀢𑀺. ‘‘𑀆𑀫 𑀓𑀼𑀫𑀸𑀭, 𑀯𑀮𑁆𑀮𑀪𑁄’’𑀢𑀺? ‘‘𑀓𑀺𑀁 𑀓𑀢𑁆𑀯𑀸, 𑀪𑀦𑁆𑀢𑁂, 𑀏𑀲 𑀯𑀮𑁆𑀮𑀪𑁄 𑀳𑁄𑀢𑀻’’𑀢𑀺?‘‘𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸’’𑀢𑀺. ‘‘𑀪𑀕𑀯𑀸, 𑀅𑀳𑀫𑁆𑀧𑀺 𑀅𑀬𑀁 𑀣𑁂𑀭𑁄 𑀯𑀺𑀬 𑀅𑀦𑀸𑀕𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀯𑀮𑁆𑀮𑀪𑁄 𑀳𑁄𑀢𑀼𑀓𑀸𑀫𑁄’’𑀢𑀺 𑀲𑀢𑁆𑀣𑀸𑀳𑀁 𑀔𑀦𑁆𑀥𑀸𑀯𑀸𑀭𑀪𑀢𑁆𑀢𑀁 𑀦𑀸𑀫 𑀤𑀢𑁆𑀯𑀸𑀧𑀺 𑀲𑀢𑁆𑀢𑀫𑁂 𑀤𑀺𑀯𑀲𑁂, 𑀪𑀦𑁆𑀢𑁂, 𑀫𑀬𑀸 𑀧𑀺𑀢𑀼 𑀲𑀦𑁆𑀢𑀺𑀓𑀸 𑀢𑁂𑀫𑀸𑀲𑀁 𑀢𑀼𑀫𑁆𑀳𑀸𑀓𑀁 𑀧𑀝𑀺𑀚𑀕𑁆𑀕𑀦𑀯𑀭𑁄 𑀮𑀤𑁆𑀥𑁄, 𑀢𑁂𑀫𑀸𑀲𑀁 𑀫𑁂 𑀯𑀲𑁆𑀲𑀸𑀯𑀸𑀲𑀁 𑀅𑀥𑀺𑀯𑀸𑀲𑁂𑀣𑀸𑀢𑀺. 𑀪𑀕𑀯𑀸, ‘‘𑀅𑀢𑁆𑀣𑀺 𑀦𑀼 𑀔𑁄 𑀢𑀢𑁆𑀣 𑀕𑀢𑁂𑀦 𑀅𑀢𑁆𑀣𑁄’’𑀢𑀺 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀢𑁆𑀣𑀻’’𑀢𑀺 𑀤𑀺𑀲𑁆𑀯𑀸 ‘‘𑀲𑀼𑀜𑁆𑀜𑀸𑀕𑀸𑀭𑁂 𑀔𑁄, 𑀓𑀼𑀫𑀸𑀭, 𑀢𑀣𑀸𑀕𑀢𑀸 𑀅𑀪𑀺𑀭𑀫𑀦𑁆𑀢𑀻’’𑀢𑀺 𑀆𑀳. 𑀓𑀼𑀫𑀸𑀭𑁄 ‘‘𑀅𑀜𑁆𑀜𑀸𑀢𑀁 𑀪𑀕𑀯𑀸, 𑀅𑀜𑁆𑀜𑀸𑀢𑀁 𑀲𑀼𑀕𑀢𑀸’’𑀢𑀺 𑀯𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀧𑀼𑀭𑀺𑀫𑀢𑀭𑀁 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑁂𑀫𑀺, 𑀫𑀬𑀸 𑀧𑁂𑀲𑀺𑀢𑁂 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀤𑀺𑀦𑁆𑀦𑀸 𑀫𑁂, 𑀤𑁂𑀯, 𑀪𑀕𑀯𑀢𑀸 𑀧𑀝𑀺𑀜𑁆𑀜𑀸, 𑀫𑀬𑀸 𑀧𑀳𑀺𑀢𑁂 𑀪𑀕𑀯𑀦𑁆𑀢𑀁 𑀧𑁂𑀲𑁂𑀬𑁆𑀬𑀸𑀣𑀸’’𑀢𑀺 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑁄 𑀯𑀻𑀲𑀬𑁄𑀚𑀦𑀲𑀢𑀁 𑀅𑀤𑁆𑀥𑀸𑀦𑀁 𑀕𑀢𑁄. 𑀕𑀦𑁆𑀢𑁆𑀯𑀸 𑀘 𑀅𑀢𑁆𑀢𑀦𑁄 𑀦𑀕𑀭𑁂 𑀯𑀺𑀳𑀸𑀭𑀝𑁆𑀞𑀸𑀦𑀁 𑀯𑀺𑀘𑀺𑀦𑀦𑁆𑀢𑁄 𑀲𑁄𑀪𑀦𑀲𑁆𑀲 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀉𑀬𑁆𑀬𑀸𑀦𑀁 𑀤𑀺𑀲𑁆𑀯𑀸 𑀲𑀢𑀲𑀳𑀲𑁆𑀲𑁂𑀦 𑀓𑀺𑀡𑀺𑀢𑁆𑀯𑀸 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑁂𑀲𑀺. 𑀢𑀢𑁆𑀣 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺𑀁 𑀲𑁂𑀲𑀪𑀺𑀓𑁆𑀔𑀽𑀦𑀜𑁆𑀘 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀢𑁆𑀣𑀸𑀬 𑀓𑀼𑀝𑀺𑀮𑁂𑀡𑀫𑀡𑁆𑀟𑀧𑁂 𑀓𑀸𑀭𑁂𑀢𑁆𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀜𑁆𑀘 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 ‘‘𑀦𑀺𑀝𑁆𑀞𑀺𑀢𑀁 𑀫𑀬𑁆𑀳𑀁 𑀓𑀺𑀘𑁆𑀘𑀁, 𑀲𑀢𑁆𑀣𑀸𑀭𑀁 𑀧𑀳𑀺𑀡𑀣𑀸’’𑀢𑀺.

𑀭𑀸𑀚𑀸 𑀪𑀕𑀯𑀦𑁆𑀢𑀁 𑀪𑁄𑀚𑁂𑀢𑁆𑀯𑀸 ‘‘𑀪𑀕𑀯𑀸 𑀲𑀼𑀫𑀦𑀲𑁆𑀲 𑀓𑀺𑀘𑁆𑀘𑀁 𑀦𑀺𑀝𑁆𑀞𑀺𑀢𑀁, 𑀢𑀼𑀫𑁆𑀳𑀸𑀓𑀁 𑀕𑀫𑀦𑀁 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺 𑀆𑀳. 𑀪𑀕𑀯𑀸 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀼𑀢𑁄 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑁂𑀲𑀼 𑀯𑀲𑀫𑀸𑀦𑁄 𑀅𑀕𑀫𑀸𑀲𑀺. 𑀓𑀼𑀫𑀸𑀭𑁄 ‘‘𑀲𑀢𑁆𑀣𑀸 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀬𑁄𑀚𑀦𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑁄 𑀲𑀢𑀲𑀳𑀲𑁆𑀲𑁂𑀦 𑀓𑀻𑀢𑁂 𑀲𑁄𑀪𑀦𑁂 𑀦𑀸𑀫 𑀉𑀬𑁆𑀬𑀸𑀦𑁂 𑀲𑀢𑀲𑀳𑀲𑁆𑀲𑁂𑀦 𑀓𑀸𑀭𑀺𑀢𑀁 𑀯𑀺𑀳𑀸𑀭𑀁 𑀧𑀯𑁂𑀲𑁂𑀢𑁆𑀯𑀸 𑁋

‘‘𑀲𑀢𑀲𑀳𑀲𑁆𑀲𑁂𑀦 𑀫𑁂 𑀓𑀻𑀢𑀁, 𑀲𑀢𑀲𑀳𑀲𑁆𑀲𑁂𑀦 𑀫𑀸𑀧𑀺𑀢𑀁;

𑀲𑁄𑀪𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁, 𑀧𑀝𑀺𑀕𑁆𑀕𑀡𑁆𑀳 𑀫𑀳𑀸𑀫𑀼𑀦𑀻’’𑀢𑀺. 𑁋

𑀢𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀲𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 ‘‘𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀤𑀸𑀦𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺 𑀧𑀼𑀢𑁆𑀢𑀤𑀸𑀭𑁂 𑀅𑀫𑀘𑁆𑀘𑁂 𑀘 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀘 𑀦𑀺𑀬𑁄𑀚𑁂𑀢𑁆𑀯𑀸 𑀲𑀬𑀁 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀲𑀫𑀻𑀧𑁂𑀬𑁂𑀯 𑀯𑀲𑀦𑁆𑀢𑁄 𑀢𑁂𑀫𑀸𑀲𑀁 𑀲𑀢𑁆𑀣𑀸𑀭𑀁 𑀉𑀧𑀝𑁆𑀞𑀳𑀦𑁆𑀢𑁄 𑀉𑀧𑀓𑀝𑁆𑀞𑀸𑀬 𑀧𑀯𑀸𑀭𑀡𑀸𑀬 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀢𑁆𑀣𑀼 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀲𑁆𑀲 𑀘 𑀧𑀸𑀤𑀫𑀽𑀮𑁂 𑀢𑀺𑀘𑀻𑀯𑀭𑀸𑀦𑀺 𑀞𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀬𑀤𑁂𑀢𑀁 𑀫𑀬𑀸 𑀲𑀢𑁆𑀢𑀸𑀳𑀁 𑀔𑀦𑁆𑀥𑀸𑀯𑀸𑀭𑀤𑀸𑀦𑀢𑁄 𑀧𑀝𑁆𑀞𑀸𑀬 𑀧𑀼𑀜𑁆𑀜𑀁 𑀓𑀢𑀁, 𑀦 𑀢𑀁 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀆𑀤𑀻𑀦𑀁 𑀅𑀢𑁆𑀣𑀸𑀬, 𑀅𑀣 𑀔𑁄 𑀅𑀳𑀁 𑀅𑀬𑀁 𑀲𑀼𑀫𑀦𑀢𑁆𑀣𑁂𑀭𑁄 𑀯𑀺𑀬 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑀝𑁆𑀞𑀸𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸𑀧𑀺𑀲𑁆𑀲 𑀅𑀦𑀦𑁆𑀢𑀭𑀸𑀬𑀢𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄𑀧𑀺 𑀢𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀧𑀭𑀫𑁆𑀧𑀺 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀉𑀴𑀸𑀭𑀸𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀧𑀺𑀡𑁆𑀟𑀸𑀬 𑀘𑀭𑀢𑁄 𑀏𑀓𑀲𑁆𑀲 𑀣𑁂𑀭𑀲𑁆𑀲 𑀧𑀢𑁆𑀢𑀕𑁆𑀕𑀳𑀡𑀢𑁆𑀣𑀁 𑀉𑀢𑁆𑀢𑀭𑀲𑀸𑀝𑀓𑀁 𑀤𑀢𑁆𑀯𑀸 𑀧𑀽𑀚𑀁 𑀅𑀓𑀸𑀲𑀺. 𑀧𑀼𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀳𑀼𑀢𑁆𑀯𑀸 𑀅𑀝𑁆𑀞 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀢𑁂 𑀪𑁄𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀗𑁆𑀕𑀮𑀼𑀬𑁆𑀬𑀸𑀦𑁂 𑀅𑀝𑁆𑀞 𑀧𑀡𑁆𑀡𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀢𑁂𑀲𑀁 𑀦𑀺𑀲𑀻𑀤𑀦𑀢𑁆𑀣𑀸𑀬 𑀅𑀝𑁆𑀞 𑀲𑀩𑁆𑀩𑀭𑀢𑀦𑀫𑀬𑀧𑀻𑀞𑁂 𑀘𑁂𑀯 𑀫𑀡𑀺𑀆𑀥𑀸𑀭𑀓𑁂 𑀘 𑀧𑀝𑀺𑀬𑀸𑀤𑁂𑀢𑁆𑀯𑀸 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀉𑀧𑀝𑁆𑀞𑀸𑀦𑀁 𑀅𑀓𑀸𑀲𑀺. 𑀏𑀢𑀸𑀦𑀺 𑀧𑀸𑀓𑀝𑀝𑁆𑀞𑀸𑀦𑀸𑀦𑀺.

𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀦 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄𑀯 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀫𑀺𑀢𑁄𑀤𑀦𑀲𑀓𑁆𑀓𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀲𑀩𑁆𑀩𑁂 𑀜𑀸𑀢𑀓𑁂 𑀆𑀦𑀦𑁆𑀤𑀺𑀢𑁂 𑀓𑀭𑁄𑀦𑁆𑀢𑁄 𑀚𑀸𑀢𑁄𑀢𑀺 𑀆𑀦𑀦𑁆𑀤𑁄𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀅𑀦𑀼𑀓𑁆𑀓𑀫𑁂𑀦 𑀯𑀬𑀧𑁆𑀧𑀢𑁆𑀢𑁄 𑀓𑀢𑀸𑀪𑀺𑀦𑀺𑀓𑁆𑀔𑀫𑀦𑁂 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀧𑀞𑀫𑀁 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀦𑁆𑀢𑁂 𑀪𑀕𑀯𑀢𑀺 𑀢𑀲𑁆𑀲 𑀧𑀭𑀺𑀯𑀸𑀭𑀢𑁆𑀣𑀁 𑀧𑀩𑁆𑀩𑀚𑀺𑀢𑀼𑀁 𑀦𑀺𑀓𑁆𑀔𑀦𑁆𑀢𑁂𑀳𑀺 𑀪𑀤𑁆𑀤𑀺𑀬𑀸𑀤𑀻𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀲𑁆𑀲 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀢𑁄 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀅𑀦𑀺𑀩𑀤𑁆𑀥𑀉𑀧𑀝𑁆𑀞𑀸𑀓𑀸 𑀅𑀳𑁂𑀲𑀼𑀁. 𑀏𑀓𑀤𑀸 𑀦𑀸𑀕𑀲𑀫𑀸𑀮𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺, 𑀏𑀓𑀤𑀸 𑀦𑀸𑀕𑀺𑀢𑁄, 𑀏𑀓𑀤𑀸 𑀉𑀧𑀯𑀸𑀦𑁄, 𑀏𑀓𑀤𑀸 𑀲𑀼𑀦𑀓𑁆𑀔𑀢𑁆𑀢𑁄, 𑀏𑀓𑀤𑀸 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄, 𑀏𑀓𑀤𑀸 𑀲𑀸𑀕𑀢𑁄, 𑀏𑀓𑀤𑀸 𑀫𑁂𑀖𑀺𑀬𑁄, 𑀢𑁂 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀣𑀼 𑀘𑀺𑀢𑁆𑀢𑀁 𑀦𑀸𑀭𑀸𑀥𑀬𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺𑀫𑁆𑀳𑀺 𑀫𑀳𑀮𑁆𑀮𑀓𑁄, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 ‘𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑁂𑀦 𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀫𑀬𑁆𑀳𑀁 𑀧𑀢𑁆𑀢𑀘𑀻𑀯𑀭𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀫𑀬𑁆𑀳𑀁 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀁 𑀪𑀺𑀓𑁆𑀔𑀼𑀁 𑀚𑀸𑀦𑀸𑀣𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀲𑀁𑀯𑁂𑀕𑁄 𑀉𑀤𑀧𑀸𑀤𑀺. 𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀉𑀝𑁆𑀞𑀸𑀬 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀁 𑀪𑀕𑀯𑀸 𑀧𑀝𑀺𑀓𑁆𑀔𑀺𑀧𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀫𑀳𑀸𑀲𑀸𑀯𑀓𑀸 𑁋 ‘‘𑀅𑀳𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀅𑀳𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀳𑀺𑀁𑀲𑀼 𑀞𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁, 𑀢𑁂𑀧𑀺 𑀪𑀕𑀯𑀸 𑀧𑀝𑀺𑀓𑁆𑀔𑀺𑀧𑀺. 𑀲𑁄 𑀧𑀦 𑀢𑀼𑀡𑁆𑀳𑀻𑀬𑁂𑀯 𑀦𑀺𑀲𑀻𑀤𑀺. 𑀅𑀣 𑀦𑀁 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄, 𑀢𑁆𑀯𑀫𑁆𑀧𑀺 𑀲𑀢𑁆𑀣𑀼 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀬𑀸𑀘𑀸𑀳𑀻’’𑀢𑀺. 𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑀝𑁆𑀞𑀸𑀦𑀁 𑀦𑀸𑀫 𑀓𑀻𑀤𑀺𑀲𑀁 𑀳𑁄𑀢𑀺, 𑀲𑀘𑁂 𑀭𑀼𑀘𑁆𑀘𑀢𑀺, 𑀲𑀢𑁆𑀣𑀸 𑀲𑀬𑀫𑁂𑀯 𑀯𑀓𑁆𑀔𑀢𑀻𑀢𑀺. 𑀅𑀣 𑀪𑀕𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄 𑀅𑀜𑁆𑀜𑁂𑀳𑀺 𑀉𑀲𑁆𑀲𑀸𑀳𑁂𑀢𑀩𑁆𑀩𑁄, 𑀲𑀬𑀫𑁂𑀯 𑀚𑀸𑀦𑀺𑀢𑁆𑀯𑀸 𑀫𑀁 𑀉𑀧𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑀢𑁄 𑀪𑀺𑀓𑁆𑀔𑀽 ‘‘𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄 𑀆𑀦𑀦𑁆𑀤, 𑀲𑀢𑁆𑀣𑀸𑀭𑀁 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀬𑀸𑀘𑀸𑀳𑀻’’𑀢𑀺 𑀆𑀳𑀁𑀲𑀼.

𑀣𑁂𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀡𑀻𑀢𑀘𑀻𑀯𑀭𑀁 𑀦 𑀤𑀲𑁆𑀲𑀢𑀺, 𑀧𑀡𑀻𑀢𑀧𑀺𑀡𑁆𑀟𑀧𑀸𑀢𑀁 𑀦 𑀤𑀲𑁆𑀲𑀢𑀺, 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑀼𑀁 𑀦 𑀤𑀲𑁆𑀲𑀢𑀺, 𑀦𑀺𑀫𑀦𑁆𑀢𑀦𑀁 𑀕𑀳𑁂𑀢𑁆𑀯𑀸 𑀦 𑀕𑀫𑀺𑀲𑁆𑀲𑀢𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀏𑀢𑁆𑀢𑀓𑁂 𑀕𑀼𑀡𑁂 𑀮𑀪𑀢𑁄 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑁂 𑀓𑁄 𑀪𑀸𑀭𑁄’’𑀢𑀺 𑀉𑀧𑀯𑀸𑀤𑀫𑁄𑀘𑀦𑀢𑁆𑀣𑀁 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀝𑀺𑀓𑁆𑀔𑁂𑀧𑀸 𑀘 𑁋 ‘‘𑀲𑀘𑁂, 𑀪𑀦𑁆𑀢𑁂, 𑀪𑀕𑀯𑀸 𑀫𑀬𑀸 𑀕𑀳𑀺𑀢𑀦𑀺𑀫𑀦𑁆𑀢𑀦𑀁 𑀕𑀫𑀺𑀲𑁆𑀲𑀢𑀺, 𑀲𑀘𑀸𑀳𑀁 𑀤𑁂𑀲𑀦𑁆𑀢𑀭𑀢𑁄 𑀆𑀕𑀢𑀸𑀕𑀢𑁂 𑀢𑀸𑀯𑀤𑁂𑀯 𑀤𑀲𑁆𑀲𑁂𑀢𑀼𑀁 𑀮𑀘𑁆𑀙𑀸𑀫𑀺; 𑀬𑀤𑀸 𑀫𑁂 𑀓𑀗𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯𑀤𑁂𑀯 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀮𑀘𑁆𑀙𑀸𑀫𑀺, 𑀲𑀘𑁂 𑀪𑀕𑀯𑀸 𑀧𑀭𑀫𑁆𑀫𑀼𑀔𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀧𑀼𑀦 𑀫𑀬𑁆𑀳𑀁 𑀓𑀣𑁂𑀲𑁆𑀲𑀢𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 ‘‘𑀏𑀢𑁆𑀢𑀓𑀫𑁆𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀅𑀦𑀼𑀕𑁆𑀕𑀳𑀁 𑀦 𑀮𑀪𑀢𑀻’’𑀢𑀺 𑀉𑀧𑀯𑀸𑀤𑀫𑁄𑀘𑀦𑀢𑁆𑀣𑀜𑁆𑀘𑁂𑀯 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀪𑀸𑀯𑀧𑀸𑀭𑀫𑀻𑀧𑀽𑀭𑀡𑀢𑁆𑀣𑀜𑁆𑀘 𑀇𑀫𑀸 𑀘𑀢𑀲𑁆𑀲𑁄 𑀆𑀬𑀸𑀘𑀦𑀸 𑀘𑀸𑀢𑀺 𑀅𑀝𑁆𑀞 𑀯𑀭𑁂 𑀕𑀳𑁂𑀢𑁆𑀯𑀸 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀢𑀲𑁆𑀲𑁂𑀯 𑀞𑀸𑀦𑀦𑁆𑀢𑀭𑀲𑁆𑀲 𑀅𑀢𑁆𑀣𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀽𑀭𑀺𑀢𑀸𑀦𑀁 𑀧𑀸𑀭𑀫𑀻𑀦𑀁 𑀨𑀮𑀁 𑀧𑀸𑀧𑀼𑀡𑀺. 𑀲𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑀲𑀩𑀮𑀁 𑀤𑀼𑀯𑀺𑀥𑁂𑀦 𑀉𑀤𑀓𑁂𑀦, 𑀢𑀺𑀯𑀺𑀥𑁂𑀦 𑀤𑀦𑁆𑀢𑀓𑀝𑁆𑀞𑁂𑀦, 𑀳𑀢𑁆𑀣𑀧𑀸𑀤𑀧𑀭𑀺𑀓𑀫𑁆𑀫𑁂𑀦 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑁂𑀦, 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑁂𑀦𑀸𑀢𑀺 𑀏𑀯𑀫𑀸𑀤𑀻𑀳𑀺 𑀓𑀺𑀘𑁆𑀘𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑁄 ‘‘𑀇𑀫𑀸𑀬 𑀦𑀸𑀫 𑀯𑁂𑀮𑀸𑀬 𑀲𑀢𑁆𑀣𑀼 𑀇𑀤𑀁 𑀦𑀸𑀫 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀦𑀸𑀫 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀺𑀯𑀲𑀪𑀸𑀕𑀁 𑀲𑀦𑁆𑀢𑀺𑀓𑀸𑀯𑀘𑀭𑁄 𑀳𑀼𑀢𑁆𑀯𑀸, 𑀭𑀢𑁆𑀢𑀺𑀪𑀸𑀕𑁂 𑀫𑀳𑀦𑁆𑀢𑀁 𑀤𑀡𑁆𑀟𑀤𑀻𑀧𑀺𑀓𑀁 𑀕𑀳𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀁 𑀦𑀯 𑀯𑀸𑀭𑁂 𑀅𑀦𑀼𑀧𑀭𑀺𑀬𑀸𑀬𑀢𑀺, 𑀲𑀢𑁆𑀣𑀭𑀺 𑀧𑀓𑁆𑀓𑁄𑀲𑀦𑁆𑀢𑁂 𑀧𑀝𑀺𑀯𑀘𑀦𑀤𑀸𑀦𑀸𑀬 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀢𑁆𑀣𑀁.

𑀅𑀣 𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀧𑀲𑀁𑀲𑀺𑀢𑁆𑀯𑀸 ‘‘𑀩𑀳𑀼𑀲𑁆𑀲𑀼𑀢𑀸𑀦𑀁 𑀲𑀢𑀺𑀫𑀦𑁆𑀢𑀸𑀦𑀁 𑀕𑀢𑀺𑀫𑀦𑁆𑀢𑀸𑀦𑀁 𑀥𑀺𑀢𑀺𑀫𑀦𑁆𑀢𑀸𑀦𑀁 𑀉𑀧𑀝𑁆𑀞𑀸𑀓𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀏𑀯𑀁 𑀲𑀢𑁆𑀣𑀸𑀭𑀸 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀢𑁆𑀣𑀼 𑀥𑀫𑁆𑀫𑀓𑁄𑀲𑀸𑀭𑀓𑁆𑀔𑁄 𑀅𑀬𑀁 𑀫𑀳𑀸𑀣𑁂𑀭𑁄 𑀲𑁂𑀔𑁄𑀯 𑀲𑀫𑀸𑀦𑁄 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀪𑀺𑀓𑁆𑀔𑀽𑀳𑀺 𑀲𑀫𑀼𑀢𑁆𑀢𑁂𑀚𑀺𑀢𑁄 𑀤𑁂𑀯𑀢𑀸𑀬 𑀘 𑀲𑀁𑀯𑁂𑀚𑀺𑀢𑁄 ‘‘𑀲𑁆𑀯𑁂𑀬𑁂𑀯 𑀘 𑀤𑀸𑀦𑀺 𑀥𑀫𑁆𑀫𑀲𑀗𑁆𑀕𑀻𑀢𑀺 𑀓𑀸𑀢𑀩𑁆𑀩𑀸, 𑀦 𑀔𑁄 𑀧𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀬𑀁 𑀲𑁂𑀔𑁄 𑀲𑀓𑀭𑀡𑀻𑀬𑁄 𑀳𑀼𑀢𑁆𑀯𑀸 𑀅𑀲𑁂𑀔𑁂𑀳𑀺 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀥𑀫𑁆𑀫𑀁 𑀲𑀗𑁆𑀕𑀸𑀬𑀺𑀢𑀼𑀁 𑀲𑀦𑁆𑀦𑀺𑀧𑀸𑀢𑀁 𑀕𑀦𑁆𑀢𑀼’’𑀦𑁆𑀢𑀺 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀩𑀳𑀼𑀤𑁂𑀯𑀭𑀢𑁆𑀢𑀺𑀁 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀘𑀗𑁆𑀓𑀫𑁂 𑀯𑀻𑀭𑀺𑀬𑀲𑀫𑀢𑀁 𑀅𑀮𑀪𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀬𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀬𑀺𑀢𑀼𑀓𑀸𑀫𑁄 𑀓𑀸𑀬𑀁 𑀆𑀯𑀝𑁆𑀝𑁂𑀲𑀺. 𑀅𑀧𑁆𑀧𑀢𑁆𑀢𑀜𑁆𑀘 𑀲𑀻𑀲𑀁 𑀩𑀺𑀫𑁆𑀩𑁄𑀳𑀦𑀁 𑀧𑀸𑀤𑀸 𑀘 𑀪𑀽𑀫𑀺𑀢𑁄 𑀫𑀼𑀢𑁆𑀢𑀫𑀢𑁆𑀢𑀸, 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁧.𑁬𑁪𑁪-𑁬𑁬𑁩) 𑁋

‘‘𑀆𑀭𑀸𑀫𑀤𑁆𑀯𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀫𑀼𑀦𑀺;

𑀯𑀲𑁆𑀲𑁂𑀦𑁆𑀢𑁄 𑀅𑀫𑀢𑀁 𑀯𑀼𑀝𑁆𑀞𑀺𑀁, 𑀦𑀺𑀩𑁆𑀩𑀸𑀧𑁂𑀲𑀺 𑀫𑀳𑀸𑀚𑀦𑀁.

‘‘𑀲𑀢𑀲𑀳𑀲𑁆𑀲𑀁 𑀢𑁂 𑀥𑀻𑀭𑀸, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀧𑀭𑀺𑀯𑀸𑀭𑁂𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀁, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

‘‘𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑁄 𑀆𑀲𑀺𑀁, 𑀲𑁂𑀢𑀘𑁆𑀙𑀢𑁆𑀢𑀁 𑀯𑀭𑀼𑀢𑁆𑀢𑀫𑀁;

𑀲𑀼𑀘𑀸𑀭𑀼𑀭𑀽𑀧𑀁 𑀤𑀺𑀲𑁆𑀯𑀸𑀦, 𑀯𑀺𑀢𑁆𑀢𑀺 𑀫𑁂 𑀉𑀤𑀧𑀚𑁆𑀚𑀣.

‘‘𑀑𑀭𑀼𑀬𑁆𑀳 𑀳𑀢𑁆𑀣𑀺𑀔𑀦𑁆𑀥𑀫𑁆𑀳𑀸, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀭𑀢𑀦𑀸𑀫𑀬𑀙𑀢𑁆𑀢𑀁 𑀫𑁂, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀥𑀸𑀭𑀬𑀺𑀁.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀇𑀲𑀺;

𑀢𑀁 𑀓𑀣𑀁 𑀞𑀧𑀬𑀺𑀢𑁆𑀯𑀸𑀦, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

‘‘𑀬𑁄 𑀲𑁄 𑀙𑀢𑁆𑀢𑀫𑀥𑀸𑀭𑁂𑀲𑀺, 𑀲𑁄𑀡𑁆𑀡𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀁;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄.

‘‘𑀇𑀢𑁄 𑀕𑀦𑁆𑀢𑁆𑀯𑀸 𑀅𑀬𑀁 𑀧𑁄𑀲𑁄, 𑀢𑀼𑀲𑀺𑀢𑀁 𑀆𑀯𑀲𑀺𑀲𑁆𑀲𑀢𑀺;

𑀅𑀦𑀼𑀪𑁄𑀲𑁆𑀲𑀢𑀺 𑀲𑀫𑁆𑀧𑀢𑁆𑀢𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

‘‘𑀘𑀢𑀼𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀩𑀮𑀸𑀥𑀺𑀧𑁄 𑀅𑀝𑁆𑀞𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

‘‘𑀅𑀝𑁆𑀞𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀫𑀳𑀺𑀬𑀸 𑀓𑀸𑀭𑀬𑀺𑀲𑁆𑀲𑀢𑀺.

‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀲𑀓𑁆𑀬𑀸𑀦𑀁 𑀓𑀼𑀮𑀓𑁂𑀢𑀼𑀲𑁆𑀲, 𑀜𑀸𑀢𑀺𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺;

𑀆𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀉𑀧𑀝𑁆𑀞𑀸𑀓𑁄 𑀫𑀳𑁂𑀲𑀺𑀦𑁄.

‘‘𑀆𑀢𑀸𑀧𑀻 𑀦𑀺𑀧𑀓𑁄 𑀘𑀸𑀧𑀺, 𑀩𑀸𑀳𑀼𑀲𑀘𑁆𑀘𑁂𑀲𑀼 𑀓𑁄𑀯𑀺𑀤𑁄;

𑀦𑀺𑀯𑀸𑀢𑀯𑀼𑀢𑁆𑀢𑀺 𑀅𑀢𑁆𑀣𑀤𑁆𑀥𑁄, 𑀲𑀩𑁆𑀩𑀧𑀸𑀞𑀻 𑀪𑀯𑀺𑀲𑁆𑀲𑀢𑀺.

‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄 𑀲𑁄, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

‘‘𑀲𑀦𑁆𑀢𑀺 𑀆𑀭𑀜𑁆𑀜𑀓𑀸 𑀦𑀸𑀕𑀸, 𑀓𑀼𑀜𑁆𑀚𑀭𑀸 𑀲𑀝𑁆𑀞𑀺𑀳𑀸𑀬𑀦𑀸;

𑀢𑀺𑀥𑀸𑀧𑀪𑀺𑀦𑁆𑀦𑀸 𑀫𑀸𑀢𑀗𑁆𑀕𑀸, 𑀈𑀲𑀸𑀤𑀦𑁆𑀢𑀸 𑀉𑀭𑀽𑀴𑁆𑀳𑀯𑀸.

‘‘𑀅𑀦𑁂𑀓𑀲𑀢𑀲𑀳𑀲𑁆𑀲𑀸, 𑀧𑀡𑁆𑀟𑀺𑀢𑀸𑀧𑀺 𑀫𑀳𑀺𑀤𑁆𑀥𑀺𑀓𑀸;

𑀲𑀩𑁆𑀩𑁂 𑀢𑁂 𑀩𑀼𑀤𑁆𑀥𑀦𑀸𑀕𑀲𑁆𑀲, 𑀦 𑀳𑁄𑀦𑁆𑀢𑀼𑀧𑀡𑀺𑀥𑀺𑀫𑁆𑀳𑀺 𑀢𑁂.

‘‘𑀆𑀤𑀺𑀬𑀸 𑀫𑁂 𑀦𑀫𑀲𑁆𑀲𑀸𑀫𑀺, 𑀫𑀚𑁆𑀛𑀺𑀫𑁂 𑀅𑀣 𑀧𑀘𑁆𑀙𑀺𑀫𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀝𑁆𑀞𑀳𑀺𑀁.

‘‘𑀆𑀢𑀸𑀧𑀻 𑀦𑀺𑀧𑀓𑁄 𑀘𑀸𑀧𑀺, 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄;

𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄, 𑀲𑁂𑀔𑀪𑀽𑀫𑀻𑀲𑀼 𑀓𑁄𑀯𑀺𑀤𑁄.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀪𑀺𑀦𑀻𑀳𑀭𑀺𑀁;

𑀢𑀸𑀳𑀁 𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑁄, 𑀞𑀺𑀢𑀸 𑀲𑀤𑁆𑀥𑀫𑁆𑀫𑀫𑀸𑀘𑀮𑀸.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀙𑀴𑀪𑀺𑀜𑁆𑀜𑁄 𑀧𑀦 𑀳𑀼𑀢𑁆𑀯𑀸 𑀲𑀗𑁆𑀕𑀻𑀢𑀺𑀫𑀡𑁆𑀟𑀧𑀁 𑀧𑀯𑀺𑀲𑀺𑀢𑁆𑀯𑀸 𑀥𑀫𑁆𑀫𑀁 𑀲𑀗𑁆𑀕𑀸𑀬𑀦𑁆𑀢𑁄 𑀢𑀢𑁆𑀣 𑀢𑀢𑁆𑀣 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀤𑀸𑀦𑀯𑀲𑁂𑀦 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀤𑀻𑀧𑀦𑀸𑀤𑀺𑀯𑀲𑁂𑀦 𑀘 𑀪𑀸𑀲𑀺𑀢𑀕𑀸𑀣𑀸 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀯 𑀔𑀼𑀤𑁆𑀤𑀓𑀦𑀺𑀓𑀸𑀬𑀲𑀗𑁆𑀕𑀸𑀬𑀦𑀓𑀸𑀮𑁂 𑀣𑁂𑀭𑀕𑀸𑀣𑀸𑀲𑀼 𑀲𑀗𑁆𑀕𑀻𑀢𑀺𑀁 𑀆𑀭𑁄𑀧𑁂𑀦𑁆𑀢𑁄 𑁋

𑁧𑁦𑁧𑁭. ‘‘𑀧𑀺𑀲𑀼𑀡𑁂𑀦 𑀘 𑀓𑁄𑀥𑀦𑁂𑀦 𑀘, 𑀫𑀘𑁆𑀙𑀭𑀺𑀦𑀸 𑀘 𑀯𑀺𑀪𑀽𑀢𑀦𑀦𑁆𑀤𑀺𑀦𑀸;

𑀲𑀔𑀺𑀢𑀁 𑀦 𑀓𑀭𑁂𑀬𑁆𑀬 𑀧𑀡𑁆𑀟𑀺𑀢𑁄, 𑀧𑀸𑀧𑁄 𑀓𑀸𑀧𑀼𑀭𑀺𑀲𑁂𑀦 𑀲𑀗𑁆𑀕𑀫𑁄.

𑁧𑁦𑁧𑁮. ‘‘𑀲𑀤𑁆𑀥𑁂𑀦 𑀘 𑀧𑁂𑀲𑀮𑁂𑀦 𑀘, 𑀧𑀜𑁆𑀜𑀯𑀢𑀸 𑀩𑀳𑀼𑀲𑁆𑀲𑀼𑀢𑁂𑀦 𑀘;

𑀲𑀔𑀺𑀢𑀁 𑀓𑀭𑁂𑀬𑁆𑀬 𑀧𑀡𑁆𑀟𑀺𑀢𑁄, 𑀪𑀤𑁆𑀤𑁄 𑀲𑀧𑁆𑀧𑀼𑀭𑀺𑀲𑁂𑀦 𑀲𑀗𑁆𑀕𑀫𑁄.

𑁧𑁦𑁧𑁯. ‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀩𑀺𑀫𑁆𑀩𑀁, 𑀅𑀭𑀼𑀓𑀸𑀬𑀁 𑀲𑀫𑀼𑀲𑁆𑀲𑀺𑀢𑀁;

𑀆𑀢𑀼𑀭𑀁 𑀩𑀳𑀼𑀲𑀗𑁆𑀓𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀺.

𑁧𑁦𑁨𑁦. ‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀭𑀽𑀧𑀁, 𑀫𑀡𑀺𑀦𑀸 𑀓𑀼𑀡𑁆𑀟𑀮𑁂𑀦 𑀘;

𑀅𑀝𑁆𑀞𑀺𑀢𑀘𑁂𑀦 𑀑𑀦𑀤𑁆𑀥𑀁, 𑀲𑀳 𑀯𑀢𑁆𑀣𑁂𑀳𑀺 𑀲𑁄𑀪𑀢𑀺.

𑁧𑁦𑁨𑁧. ‘‘𑀅𑀮𑀢𑁆𑀢𑀓𑀓𑀢𑀸 𑀧𑀸𑀤𑀸, 𑀫𑀼𑀔𑀁 𑀘𑀼𑀡𑁆𑀡𑀓𑀫𑀓𑁆𑀔𑀺𑀢𑀁;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

𑁧𑁦𑁨𑁨. ‘‘𑀅𑀝𑁆𑀞𑀧𑀤𑀓𑀢𑀸 𑀓𑁂𑀲𑀸, 𑀦𑁂𑀢𑁆𑀢𑀸 𑀅𑀜𑁆𑀚𑀦𑀫𑀓𑁆𑀔𑀺𑀢𑀸;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

𑁧𑁦𑁨𑁩. ‘‘𑀅𑀜𑁆𑀚𑀦𑀻𑀯 𑀦𑀯𑀸 𑀘𑀺𑀢𑁆𑀢𑀸, 𑀧𑀽𑀢𑀺𑀓𑀸𑀬𑁄 𑀅𑀮𑀗𑁆𑀓𑀢𑁄;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

‘‘𑀑𑀤𑀳𑀺 𑀫𑀺𑀕𑀯𑁄 𑀧𑀸𑀲𑀁, 𑀦𑀸𑀲𑀤𑀸 𑀯𑀸𑀕𑀼𑀭𑀁 𑀫𑀺𑀕𑁄;

𑀪𑀼𑀢𑁆𑀯𑀸 𑀦𑀺𑀯𑀸𑀧𑀁 𑀕𑀘𑁆𑀙𑀸𑀫, 𑀓𑀦𑁆𑀤𑀦𑁆𑀢𑁂 𑀫𑀺𑀕𑀩𑀦𑁆𑀥𑀓𑁂.

‘‘𑀙𑀺𑀦𑁆𑀦𑁄 𑀧𑀸𑀲𑁄 𑀫𑀺𑀕𑀯𑀲𑁆𑀲, 𑀦𑀸𑀲𑀤𑀸 𑀯𑀸𑀕𑀼𑀭𑀁 𑀫𑀺𑀕𑁄;

𑀪𑀼𑀢𑁆𑀯𑀸 𑀦𑀺𑀯𑀸𑀧𑀁 𑀕𑀘𑁆𑀙𑀸𑀫, 𑀲𑁄𑀘𑀦𑁆𑀢𑁂 𑀫𑀺𑀕𑀮𑀼𑀤𑁆𑀤𑀓𑁂.

𑁧𑁦𑁨𑁪. ‘‘𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀢𑀓𑀣𑀻, 𑀩𑀼𑀤𑁆𑀥𑀲𑁆𑀲 𑀧𑀭𑀺𑀘𑀸𑀭𑀓𑁄;

𑀧𑀦𑁆𑀦𑀪𑀸𑀭𑁄 𑀯𑀺𑀲𑀜𑁆𑀜𑀼𑀢𑁆𑀢𑁄, 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺 𑀕𑁄𑀢𑀫𑁄.

𑁧𑁦𑁨𑁫. ‘‘𑀔𑀻𑀡𑀸𑀲𑀯𑁄 𑀯𑀺𑀲𑀜𑁆𑀜𑀼𑀢𑁆𑀢𑁄, 𑀲𑀗𑁆𑀕𑀸𑀢𑀻𑀢𑁄 𑀲𑀼𑀦𑀺𑀩𑁆𑀩𑀼𑀢𑁄;

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑀸𑀢𑀺𑀫𑀭𑀡𑀧𑀸𑀭𑀕𑀽.

𑁧𑁦𑁨𑁬. ‘‘𑀬𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸 𑀥𑀫𑁆𑀫𑀸, 𑀩𑀼𑀤𑁆𑀥𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄;

𑀦𑀺𑀩𑁆𑀩𑀸𑀦𑀕𑀫𑀦𑁂 𑀫𑀕𑁆𑀕𑁂, 𑀲𑁄𑀬𑀁 𑀢𑀺𑀝𑁆𑀞𑀢𑀺 𑀕𑁄𑀢𑀫𑁄.

𑁧𑁦𑁨𑁭. ‘‘𑀤𑁆𑀯𑀸𑀲𑀻𑀢𑀺 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀁, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄;

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀬𑁂 𑀫𑁂 𑀥𑀫𑁆𑀫𑀸 𑀧𑀯𑀢𑁆𑀢𑀺𑀦𑁄.

𑁧𑁦𑁨𑁮. ‘‘𑀅𑀧𑁆𑀧𑀲𑁆𑀲𑀼𑀢𑀸𑀬𑀁 𑀧𑀼𑀭𑀺𑀲𑁄, 𑀩𑀮𑀺𑀩𑀤𑁆𑀤𑁄𑀯 𑀚𑀻𑀭𑀢𑀺;

𑀫𑀁𑀲𑀸𑀦𑀺 𑀢𑀲𑁆𑀲 𑀯𑀟𑁆𑀠𑀦𑁆𑀢𑀺, 𑀧𑀜𑁆𑀜𑀸 𑀢𑀲𑁆𑀲 𑀦 𑀯𑀟𑁆𑀠𑀢𑀺.

𑁧𑁦𑁨𑁯. ‘‘𑀩𑀳𑀼𑀲𑁆𑀲𑀼𑀢𑁄 𑀅𑀧𑁆𑀧𑀲𑁆𑀲𑀼𑀢𑀁, 𑀬𑁄 𑀲𑀼𑀢𑁂𑀦𑀸𑀢𑀺𑀫𑀜𑁆𑀜𑀢𑀺;

𑀅𑀦𑁆𑀥𑁄 𑀧𑀤𑀻𑀧𑀥𑀸𑀭𑁄𑀯, 𑀢𑀣𑁂𑀯 𑀧𑀝𑀺𑀪𑀸𑀢𑀺 𑀫𑀁.

𑁧𑁦𑁩𑁦. ‘‘𑀩𑀳𑀼𑀲𑁆𑀲𑀼𑀢𑀁 𑀉𑀧𑀸𑀲𑁂𑀬𑁆𑀬, 𑀲𑀼𑀢𑀜𑁆𑀘 𑀦 𑀯𑀺𑀦𑀸𑀲𑀬𑁂;

𑀢𑀁 𑀫𑀽𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲, 𑀢𑀲𑁆𑀫𑀸 𑀥𑀫𑁆𑀫𑀥𑀭𑁄 𑀲𑀺𑀬𑀸.

𑁧𑁦𑁩𑁧. ‘‘𑀧𑀼𑀩𑁆𑀩𑀸𑀧𑀭𑀜𑁆𑀜𑀽 𑀅𑀢𑁆𑀣𑀜𑁆𑀜𑀽, 𑀦𑀺𑀭𑀼𑀢𑁆𑀢𑀺𑀧𑀤𑀓𑁄𑀯𑀺𑀤𑁄;

𑀲𑀼𑀕𑁆𑀕𑀳𑀻𑀢𑀜𑁆𑀘 𑀕𑀡𑁆𑀳𑀸𑀢𑀺, 𑀅𑀢𑁆𑀣𑀜𑁆𑀘𑁄𑀧𑀧𑀭𑀺𑀓𑁆𑀔𑀢𑀺.

𑁧𑁦𑁩𑁨. ‘‘𑀔𑀦𑁆𑀢𑁆𑀬𑀸 𑀙𑀦𑁆𑀤𑀺𑀓𑀢𑁄 𑀳𑁄𑀢𑀺, 𑀉𑀲𑁆𑀲𑀳𑀺𑀢𑁆𑀯𑀸 𑀢𑀼𑀮𑁂𑀢𑀺 𑀢𑀁;

𑀲𑀫𑀬𑁂 𑀲𑁄 𑀧𑀤𑀳𑀢𑀺, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑁄.

𑁧𑁦𑁩𑁩. ‘‘𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁, 𑀲𑀧𑁆𑀧𑀜𑁆𑀜𑀁 𑀩𑀼𑀤𑁆𑀥𑀲𑀸𑀯𑀓𑀁;

𑀥𑀫𑁆𑀫𑀯𑀺𑀜𑁆𑀜𑀸𑀡𑀫𑀸𑀓𑀗𑁆𑀔𑀁, 𑀢𑀁 𑀪𑀚𑁂𑀣 𑀢𑀣𑀸𑀯𑀺𑀥𑀁.

𑁧𑁦𑁩𑁪. ‘‘𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄, 𑀓𑁄𑀲𑀸𑀭𑀓𑁆𑀔𑁄 𑀫𑀳𑁂𑀲𑀺𑀦𑁄;

𑀘𑀓𑁆𑀔𑀼 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲, 𑀧𑀽𑀚𑀦𑀻𑀬𑁄 𑀩𑀳𑀼𑀲𑁆𑀲𑀼𑀢𑁄.

𑁧𑁦𑁩𑁫. ‘‘𑀥𑀫𑁆𑀫𑀸𑀭𑀸𑀫𑁄 𑀥𑀫𑁆𑀫𑀭𑀢𑁄, 𑀥𑀫𑁆𑀫𑀁 𑀅𑀦𑀼𑀯𑀺𑀘𑀺𑀦𑁆𑀢𑀬𑀁;

𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀁 𑀪𑀺𑀓𑁆𑀔𑀼, 𑀲𑀤𑁆𑀥𑀫𑁆𑀫𑀸 𑀦 𑀧𑀭𑀺𑀳𑀸𑀬𑀢𑀺.

𑁧𑁦𑁩𑁬. ‘‘𑀓𑀸𑀬𑀫𑀘𑁆𑀙𑁂𑀭𑀕𑀭𑀼𑀦𑁄, 𑀳𑀺𑀬𑁆𑀬𑀫𑀸𑀦𑁂 𑀅𑀦𑀼𑀝𑁆𑀞𑀳𑁂;

𑀲𑀭𑀻𑀭𑀲𑀼𑀔𑀕𑀺𑀤𑁆𑀥𑀲𑁆𑀲, 𑀓𑀼𑀢𑁄 𑀲𑀫𑀡𑀨𑀸𑀲𑀼𑀢𑀸.

𑁧𑁦𑁩𑁭. ‘‘𑀦 𑀧𑀓𑁆𑀔𑀦𑁆𑀢𑀺 𑀤𑀺𑀲𑀸 𑀲𑀩𑁆𑀩𑀸, 𑀥𑀫𑁆𑀫𑀸 𑀦 𑀧𑀝𑀺𑀪𑀦𑁆𑀢𑀺 𑀫𑀁;

𑀕𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑀫𑁆𑀳𑀺, 𑀅𑀦𑁆𑀥𑀓𑀸𑀭𑀁𑀯 𑀔𑀸𑀬𑀢𑀺.

𑁧𑁦𑁩𑁮. ‘‘𑀅𑀩𑁆𑀪𑀢𑀻𑀢𑀲𑀳𑀸𑀬𑀲𑁆𑀲, 𑀅𑀢𑀻𑀢𑀕𑀢𑀲𑀢𑁆𑀣𑀼𑀦𑁄;

𑀦𑀢𑁆𑀣𑀺 𑀏𑀢𑀸𑀤𑀺𑀲𑀁 𑀫𑀺𑀢𑁆𑀢𑀁, 𑀬𑀣𑀸 𑀓𑀸𑀬𑀕𑀢𑀸 𑀲𑀢𑀺.

𑁧𑁦𑁩𑁯. ‘‘𑀬𑁂 𑀧𑀼𑀭𑀸𑀡𑀸 𑀅𑀢𑀻𑀢𑀸 𑀢𑁂, 𑀦𑀯𑁂𑀳𑀺 𑀦 𑀲𑀫𑁂𑀢𑀺 𑀫𑁂;

𑀲𑁆𑀯𑀚𑁆𑀚 𑀏𑀓𑁄𑀯 𑀛𑀸𑀬𑀸𑀫𑀺, 𑀯𑀲𑁆𑀲𑀼𑀧𑁂𑀢𑁄𑀯 𑀧𑀓𑁆𑀔𑀺𑀫𑀸.

𑁧𑁦𑁪𑁦. ‘‘𑀤𑀲𑁆𑀲𑀦𑀸𑀬 𑀅𑀪𑀺𑀓𑁆𑀓𑀦𑁆𑀢𑁂, 𑀦𑀸𑀦𑀸𑀯𑁂𑀭𑀚𑁆𑀚𑀓𑁂 𑀩𑀳𑀽;

𑀫𑀸 𑀯𑀸𑀭𑀬𑀺𑀢𑁆𑀣 𑀲𑁄𑀢𑀸𑀭𑁄, 𑀧𑀲𑁆𑀲𑀦𑁆𑀢𑀼 𑀲𑀫𑀬𑁄 𑀫𑀫𑀁.

𑁧𑁦𑁪𑁧. ‘‘𑀤𑀲𑁆𑀲𑀦𑀸𑀬 𑀅𑀪𑀺𑀓𑁆𑀓𑀦𑁆𑀢𑁂, 𑀦𑀸𑀦𑀸𑀯𑁂𑀭𑀚𑁆𑀚𑀓𑁂 𑀧𑀼𑀣𑀼;

𑀓𑀭𑁄𑀢𑀺 𑀲𑀢𑁆𑀣𑀸 𑀑𑀓𑀸𑀲𑀁, 𑀦 𑀦𑀺𑀯𑀸𑀭𑁂𑀢𑀺 𑀘𑀓𑁆𑀔𑀼𑀫𑀸.

𑁧𑁦𑁪𑁨. ‘‘𑀧𑀡𑁆𑀡𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀲𑁂𑀔𑀪𑀽𑀢𑀲𑁆𑀲 𑀫𑁂 𑀲𑀢𑁄;

𑀦 𑀓𑀸𑀫𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀺, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁.

𑁧𑁦𑁪𑁩. ‘‘𑀧𑀡𑁆𑀡𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀲𑁂𑀔𑀪𑀽𑀢𑀲𑁆𑀲 𑀫𑁂 𑀲𑀢𑁄;

𑀦 𑀤𑁄𑀲𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀺, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁.

𑁧𑁦𑁪𑁪. ‘‘𑀧𑀡𑁆𑀡𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀁;

𑀫𑁂𑀢𑁆𑀢𑁂𑀦 𑀓𑀸𑀬𑀓𑀫𑁆𑀫𑁂𑀦, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

𑁧𑁦𑁪𑁫. ‘‘𑀧𑀡𑁆𑀡𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀁;

𑀫𑁂𑀢𑁆𑀢𑁂𑀦 𑀯𑀘𑀻𑀓𑀫𑁆𑀫𑁂𑀦, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

𑁧𑁦𑁪𑁬. ‘‘𑀧𑀡𑁆𑀡𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀁;

𑀫𑁂𑀢𑁆𑀢𑁂𑀦 𑀫𑀦𑁄𑀓𑀫𑁆𑀫𑁂𑀦, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

𑁧𑁦𑁪𑁭. ‘‘𑀩𑀼𑀤𑁆𑀥𑀲𑁆𑀲 𑀘𑀗𑁆𑀓𑀫𑀦𑁆𑀢𑀲𑁆𑀲, 𑀧𑀺𑀝𑁆𑀞𑀺𑀢𑁄 𑀅𑀦𑀼𑀘𑀗𑁆𑀓𑀫𑀺𑀁;

𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑀫𑁆𑀳𑀺, 𑀜𑀸𑀡𑀁 𑀫𑁂 𑀉𑀤𑀧𑀚𑁆𑀚𑀣.

𑁧𑁦𑁪𑁮. ‘‘𑀅𑀳𑀁 𑀲𑀓𑀭𑀡𑀻𑀬𑁄𑀫𑁆𑀳𑀺, 𑀲𑁂𑀔𑁄 𑀅𑀧𑁆𑀧𑀢𑁆𑀢𑀫𑀸𑀦𑀲𑁄;

𑀲𑀢𑁆𑀣𑀼 𑀘 𑀧𑀭𑀺𑀦𑀺𑀩𑁆𑀩𑀸𑀦𑀁, 𑀬𑁄 𑀅𑀫𑁆𑀳𑀁 𑀅𑀦𑀼𑀓𑀫𑁆𑀧𑀓𑁄.

𑁧𑁦𑁪𑁯. ‘‘𑀢𑀤𑀸𑀲𑀺 𑀬𑀁 𑀪𑀺𑀁𑀲𑀦𑀓𑀁, 𑀢𑀤𑀸𑀲𑀺 𑀮𑁄𑀫𑀳𑀁𑀲𑀦𑀁;

𑀲𑀩𑁆𑀩𑀓𑀸𑀭𑀯𑀭𑀽𑀧𑁂𑀢𑁂, 𑀲𑀫𑁆𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂.

𑁧𑁦𑁫𑁦. ‘‘𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄, 𑀓𑁄𑀲𑀸𑀭𑀓𑁆𑀔𑁄 𑀫𑀳𑁂𑀲𑀺𑀦𑁄;

𑀘𑀓𑁆𑀔𑀼 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲, 𑀆𑀦𑀦𑁆𑀤𑁄 𑀧𑀭𑀺𑀦𑀺𑀩𑁆𑀩𑀼𑀢𑁄.

𑁧𑁦𑁫𑁧. ‘‘𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄, 𑀓𑁄𑀲𑀸𑀭𑀓𑁆𑀔𑁄 𑀫𑀳𑁂𑀲𑀺𑀦𑁄;

𑀘𑀓𑁆𑀔𑀼 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲, 𑀅𑀦𑁆𑀥𑀓𑀸𑀭𑁂 𑀢𑀫𑁄𑀦𑀼𑀤𑁄.

𑁧𑁦𑁫𑁨. ‘‘𑀕𑀢𑀺𑀫𑀦𑁆𑀢𑁄 𑀲𑀢𑀺𑀫𑀦𑁆𑀢𑁄, 𑀥𑀺𑀢𑀺𑀫𑀦𑁆𑀢𑁄 𑀘 𑀬𑁄 𑀇𑀲𑀺;

𑀲𑀤𑁆𑀥𑀫𑁆𑀫𑀥𑀸𑀭𑀓𑁄 𑀣𑁂𑀭𑁄, 𑀆𑀦𑀦𑁆𑀤𑁄 𑀭𑀢𑀦𑀸𑀓𑀭𑁄.

𑁧𑁦𑁫𑁩. ‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀧𑀺𑀲𑀼𑀡𑁂𑀦 𑀘𑀸𑀢𑀺 𑀆𑀤𑀺𑀢𑁄 𑀤𑁆𑀯𑁂 𑀕𑀸𑀣𑀸 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀤𑁂𑀯𑀤𑀢𑁆𑀢𑀧𑀓𑁆𑀔𑀺𑀬𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀑𑀯𑀸𑀤𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑀸. 𑀢𑀢𑁆𑀣 𑀧𑀺𑀲𑀼𑀡𑁂𑀦𑀸𑀢𑀺 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬. 𑀢𑀸𑀬 𑀳𑀺 𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 ‘‘𑀧𑀺𑀲𑀼𑀡𑁄’’𑀢𑀺 𑀯𑀼𑀢𑁆𑀢𑁄 𑀬𑀣𑀸 𑀦𑀻𑀮𑀕𑀼𑀡𑀬𑀼𑀢𑁆𑀢𑁄 𑀧𑀝𑁄 𑀦𑀻𑀮𑁄𑀢𑀺. 𑀓𑁄𑀥𑀦𑁂𑀦𑀸𑀢𑀺 𑀓𑀼𑀚𑁆𑀛𑀦𑀲𑀻𑀮𑁂𑀦. 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀡𑀮𑀓𑁆𑀔𑀡𑀲𑁆𑀲 𑀫𑀘𑁆𑀙𑁂𑀭𑀲𑁆𑀲 𑀲𑀫𑁆𑀪𑀯𑀢𑁄 𑀫𑀘𑁆𑀙𑀭𑀺𑀦𑀸. 𑀯𑀺𑀪𑀽𑀢𑀦𑀦𑁆𑀤𑀺𑀦𑀸𑀢𑀺 𑀲𑀢𑁆𑀢𑀸𑀦𑀁 𑀯𑀺𑀪𑀽𑀢𑀁 𑀯𑀺𑀪𑀯𑀦𑀁 𑀯𑀺𑀦𑀸𑀲𑀁 𑀇𑀘𑁆𑀙𑀦𑁆𑀢𑁂𑀦, 𑀯𑀺𑀪𑀽𑀢𑀁 𑀯𑀸 𑀯𑀺𑀲𑀼𑀁 𑀪𑀸𑀯𑁄 𑀪𑁂𑀤𑁄, 𑀢𑀁 𑀦𑀦𑁆𑀤𑀦𑁂𑀦, 𑀲𑀩𑁆𑀩𑀫𑁂𑀢𑀁 𑀤𑁂𑀯𑀤𑀢𑁆𑀢𑀧𑀓𑁆𑀔𑀺𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂 𑀳𑀺 𑀧𑀜𑁆𑀘𑀯𑀢𑁆𑀣𑀼𑀤𑀻𑀧𑀦𑀸𑀬 𑀩𑀳𑀽 𑀚𑀦𑁂 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂 𑀪𑀺𑀦𑁆𑀤𑀦𑁆𑀢𑀸 𑀲𑀢𑁆𑀣𑀭𑀺 𑀩𑀳𑀺𑀤𑁆𑀥𑀢𑀸𑀬 𑀣𑀤𑁆𑀥𑀫𑀘𑁆𑀙𑀭𑀺𑀬𑀸𑀤𑀺𑀫𑀘𑁆𑀙𑀭𑀺𑀬𑀧𑀓𑀢𑀸 𑀫𑀳𑀸𑀚𑀦𑀲𑁆𑀲 𑀫𑀳𑀢𑁄 𑀅𑀦𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀲𑀔𑀺𑀢𑀦𑁆𑀢𑀺 𑀲𑀳𑀸𑀬𑀪𑀸𑀯𑀁 𑀲𑀁𑀲𑀕𑁆𑀕𑀁 𑀦 𑀓𑀭𑁂𑀬𑁆𑀬, 𑀓𑀺𑀁𑀓𑀸𑀭𑀡𑀸? 𑀧𑀸𑀧𑁄 𑀓𑀸𑀧𑀼𑀭𑀺𑀲𑁂𑀦 𑀲𑀗𑁆𑀕𑀫𑁄 𑀓𑀸𑀧𑀼𑀭𑀺𑀲𑁂𑀦 𑀧𑀸𑀧𑀧𑀼𑀕𑁆𑀕𑀮𑁂𑀦 𑀲𑀫𑀸𑀕𑀫𑁄 𑀦𑀺𑀳𑀻𑀦𑁄 𑀮𑀸𑀫𑀓𑁄. 𑀬𑁂 𑀳𑀺𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀁 𑀤𑀼𑀘𑀺𑀦𑁆𑀢𑀺𑀢𑀸𑀤𑀺𑀪𑁂𑀤𑀁 𑀩𑀸𑀮𑀮𑀓𑁆𑀔𑀡𑀫𑁂𑀯 𑀆𑀯𑀳𑀢𑀺, 𑀧𑀕𑁂𑀯 𑀯𑀘𑀦𑀓𑀭𑀲𑁆𑀲. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀬𑀸𑀦𑀺 𑀓𑀸𑀦𑀺𑀘𑀺, 𑀪𑀺𑀓𑁆𑀔𑀯𑁂, 𑀪𑀬𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀩𑀸𑀮𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀧𑀡𑁆𑀟𑀺𑀢𑀢𑁄’’𑀢𑀺𑀆𑀤𑀺 (𑀅. 𑀦𑀺. 𑁩.𑁧).

𑀬𑁂𑀦 𑀧𑀦 𑀲𑀁𑀲𑀕𑁆𑀕𑁄 𑀓𑀸𑀢𑀩𑁆𑀩𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀥𑁂𑀦 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀤𑁆𑀥𑁂𑀦𑀸𑀢𑀺 𑀓𑀫𑁆𑀫𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀘𑁂𑀯, 𑀭𑀢𑀦𑀢𑁆𑀢𑀬𑀲𑀤𑁆𑀥𑀸𑀬 𑀘 𑀲𑀫𑀦𑁆𑀦𑀸𑀕𑀢𑁂𑀦. 𑀧𑁂𑀲𑀮𑁂𑀦𑀸𑀢𑀺 𑀧𑀺𑀬𑀲𑀻𑀮𑁂𑀦 𑀲𑀻𑀮𑀲𑀫𑁆𑀧𑀦𑁆𑀦𑁂𑀦. 𑀧𑀜𑁆𑀜𑀯𑀢𑀸𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀦𑀺𑀩𑁆𑀩𑁂𑀥𑀺𑀓𑀸𑀬 𑀧𑀜𑁆𑀜𑀸𑀬 𑀯𑀲𑁂𑀦 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁂𑀦. 𑀩𑀳𑀼𑀲𑁆𑀲𑀼𑀢𑁂𑀦𑀸𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀯𑁂𑀥𑀩𑀸𑀳𑀼𑀲𑀘𑁆𑀘𑀸𑀦𑀁 𑀧𑀸𑀭𑀺𑀧𑀽𑀭𑀺𑀬𑀸 𑀩𑀳𑀼𑀲𑁆𑀲𑀼𑀢𑁂𑀦. 𑀪𑀤𑁆𑀤𑁄𑀢𑀺 𑀢𑁂𑀦 𑀢𑀸𑀤𑀺𑀲𑁂𑀦 𑀲𑀸𑀥𑀼𑀦𑀸 𑀲𑀗𑁆𑀕𑀫𑁄 𑀪𑀤𑁆𑀤𑁄 𑀲𑀼𑀦𑁆𑀤𑀭𑁄 𑀓𑀮𑁆𑀬𑀸𑀡𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀪𑁂𑀤𑀁 𑀅𑀢𑁆𑀣𑀁 𑀆𑀯𑀳𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀲𑁆𑀲 𑀘𑀺𑀢𑁆𑀢𑀓𑀢𑀦𑁆𑀢𑀺𑀆𑀤𑀺𑀓𑀸 𑀲𑀢𑁆𑀢 𑀕𑀸𑀣𑀸 𑀅𑀢𑁆𑀢𑀦𑁄 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀓𑀸𑀫𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀦𑁆𑀢𑀺𑀬𑀸 𑀉𑀢𑁆𑀢𑀭𑀸𑀬 𑀦𑀸𑀫 𑀉𑀧𑀸𑀲𑀺𑀓𑀸𑀬 𑀓𑀸𑀬𑀯𑀺𑀘𑁆𑀙𑀦𑁆𑀤𑀚𑀦𑀦𑀢𑁆𑀣𑀁 𑀪𑀸𑀲𑀺𑀢𑀸. ‘‘𑀅𑀫𑁆𑀩𑀧𑀸𑀮𑀺𑀁 𑀕𑀡𑀺𑀓𑀁 𑀤𑀺𑀲𑁆𑀯𑀸 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀑𑀯𑀸𑀤𑀤𑀸𑀦𑀢𑁆𑀣’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸 𑀏𑀯.

𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀢𑀓𑀣𑀻𑀢𑀺𑀆𑀤𑀺𑀓𑀸 𑀤𑁆𑀯𑁂 𑀕𑀸𑀣𑀸 𑀣𑁂𑀭𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑀪𑀸𑀲𑀺𑀢𑀸. 𑀢𑀢𑁆𑀣 𑀧𑀭𑀺𑀘𑀸𑀭𑀓𑁄𑀢𑀺 𑀉𑀧𑀝𑁆𑀞𑀸𑀓𑁄. 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀻𑀢𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀁 𑀲𑀬𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀣𑁂𑀭𑁄 𑀳𑀺 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀘𑀗𑁆𑀓𑀫𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀭𑀻𑀭𑀁 𑀉𑀢𑀼𑀁 𑀕𑀸𑀳𑀸𑀧𑁂𑀢𑀼𑀁 𑀑𑀯𑀭𑀓𑀁 𑀧𑀯𑀺𑀲𑀺𑀢𑁆𑀯𑀸 𑀲𑀬𑀺𑀢𑀼𑀁 𑀫𑀜𑁆𑀘𑀓𑁂 𑀦𑀺𑀲𑀺𑀦𑁆𑀦𑁄 𑀧𑀸𑀤𑀸 𑀘 𑀪𑀽𑀫𑀺𑀢𑁄 𑀫𑀼𑀢𑁆𑀢𑀸, 𑀅𑀧𑁆𑀧𑀢𑁆𑀢𑀜𑁆𑀘 𑀲𑀻𑀲𑀁 𑀩𑀺𑀫𑁆𑀩𑁄𑀳𑀦𑀁, 𑀏𑀢𑁆𑀣𑀦𑁆𑀢𑀭𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀬𑀺.

𑀔𑀻𑀡𑀸𑀲𑀯𑁄𑀢𑀺 𑀧𑀭𑀺𑀓𑁆𑀔𑀻𑀡𑀘𑀢𑀼𑀭𑀸𑀲𑀯𑁄, 𑀢𑀢𑁄 𑀏𑀯 𑀘𑀢𑀽𑀳𑀺𑀧𑀺 𑀬𑁄𑀕𑁂𑀳𑀺 𑀯𑀺𑀲𑀁𑀬𑀼𑀢𑁆𑀢𑁄, 𑀭𑀸𑀕𑀲𑀗𑁆𑀕𑀸𑀤𑀻𑀦𑀁 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀲𑀗𑁆𑀕𑀸𑀢𑀻𑀢𑁄, 𑀲𑀩𑁆𑀩𑀲𑁄 𑀓𑀺𑀮𑁂𑀲𑀧𑀭𑀺𑀴𑀸𑀳𑀲𑁆𑀲 𑀯𑀽𑀧𑀲𑀦𑁆𑀢𑀢𑁆𑀢𑀸 𑀲𑀼𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄𑀢𑀺 𑀅𑀢𑁆𑀣𑁄.

𑀬𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸 𑀥𑀫𑁆𑀫𑀸𑀢𑀺 𑀣𑁂𑀭𑀁 𑀉𑀤𑁆𑀤𑀺𑀲𑁆𑀲 𑀔𑀻𑀡𑀸𑀲𑀯𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀪𑀸𑀲𑀺𑀢𑀸 𑀕𑀸𑀣𑀸. 𑀉𑀧𑀝𑁆𑀞𑀺𑀢𑀸𑀬 𑀳𑀺 𑀥𑀫𑁆𑀫𑀲𑀗𑁆𑀕𑀻𑀢𑀺𑀬𑀸 𑀣𑁂𑀭𑀁 𑀉𑀤𑁆𑀤𑀺𑀲𑁆𑀲 𑀬𑁂𑀳𑀺 𑀪𑀺𑀓𑁆𑀔𑀽𑀳𑀺 ‘‘𑀏𑀓𑁄 𑀪𑀺𑀓𑁆𑀔𑀼 𑀯𑀺𑀲𑁆𑀲𑀕𑀦𑁆𑀥𑀁 𑀯𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀣 𑀣𑁂𑀭𑁄 𑀅𑀥𑀺𑀕𑀢𑁂 𑀅𑀭𑀳𑀢𑁆𑀢𑁂 𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀤𑁆𑀯𑀸𑀭𑀁 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀻𑀤𑀸𑀦𑀢𑁆𑀣𑀁 𑀆𑀕𑀢𑁄, 𑀢𑀲𑁆𑀲 𑀔𑀻𑀡𑀸𑀲𑀯𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀲𑀼𑀤𑁆𑀥𑀸𑀯𑀸𑀲𑀫𑀳𑀸𑀩𑁆𑀭𑀳𑁆𑀫𑀸. 𑀢𑁂 𑀪𑀺𑀓𑁆𑀔𑀽 𑀮𑀚𑁆𑀚𑀸𑀧𑁂𑀦𑁆𑀢𑁄 ‘‘𑀬𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸 𑀥𑀫𑁆𑀫𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀸 𑀢𑁂𑀦𑁂𑀯 𑀅𑀥𑀺𑀕𑀢𑀸 𑀧𑀯𑁂𑀤𑀺𑀢𑀸 𑀘 𑀧𑀝𑀺𑀯𑁂𑀥𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸. 𑀬𑀲𑁆𑀫𑀺𑀁 𑀧𑀼𑀭𑀺𑀲𑀯𑀺𑀲𑁂𑀲𑁂 𑀧𑀢𑀺𑀝𑁆𑀞𑀺𑀢𑀸, 𑀲𑁄𑀬𑀁 𑀕𑁄𑀢𑁆𑀢𑀢𑁄 𑀕𑁄𑀢𑀫𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀇𑀤𑀸𑀦𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀕𑀫𑀦𑁂 𑀫𑀕𑁆𑀕𑁂 𑀧𑀢𑀺𑀝𑁆𑀞𑀳𑀺, 𑀢𑀲𑁆𑀲 𑀏𑀓𑀁𑀲𑀪𑀸𑀕𑀻𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀢𑁆𑀯𑀁 𑀩𑀳𑀼𑀲𑁆𑀲𑀼𑀢𑁄𑀢𑀺 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀸𑀓𑀝𑁄, 𑀓𑀺𑀢𑁆𑀢𑀓𑀸 𑀥𑀫𑁆𑀫𑀸 𑀢𑁂 𑀲𑀢𑁆𑀣𑀸𑀭𑀸 𑀪𑀸𑀲𑀺𑀢𑀸, 𑀢𑀬𑀸 𑀥𑀸𑀭𑀺𑀢𑀸’’𑀢𑀺? 𑀢𑀲𑁆𑀲 𑀣𑁂𑀭𑁄 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑁄 ‘‘𑀤𑁆𑀯𑀸𑀲𑀻𑀢𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀤𑁆𑀯𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀻𑀢𑀺 𑀬𑁄𑀚𑀦𑀸, 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄 𑀉𑀕𑁆𑀕𑀡𑁆𑀳𑀺𑀁 𑀤𑁆𑀯𑀺𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀅𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀅𑀥𑀺𑀕𑀡𑁆𑀳𑀺𑀦𑁆𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄𑀢𑀺 𑀤𑁆𑀯𑁂 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄 𑀕𑀡𑁆𑀳𑀺𑀁, 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀻𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀸 𑀅𑀥𑀺𑀕𑀘𑁆𑀙𑀺𑀁. 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀻𑀢𑀺 𑀢𑀤𑀼𑀪𑀬𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀘𑀢𑀼𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺. 𑀬𑁂 𑀫𑁂 𑀥𑀫𑁆𑀫𑀸 𑀧𑀯𑀢𑁆𑀢𑀺𑀦𑁄𑀢𑀺 𑀬𑁂 𑀬𑀣𑀸𑀯𑀼𑀢𑁆𑀢𑀧𑀭𑀺𑀫𑀸𑀡𑀸 𑀥𑀫𑁆𑀫𑀓𑁆𑀔𑀦𑁆𑀥𑀸 𑀫𑀬𑁆𑀳𑀁 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸 𑀚𑀺𑀯𑁆𑀳𑀕𑁆𑀕𑁂 𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺.

𑀅𑀣𑁂𑀓𑀤𑀸 𑀣𑁂𑀭𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀥𑀼𑀭𑁂𑀧𑀺 𑀕𑀦𑁆𑀣𑀥𑀼𑀭𑁂𑀧𑀺 𑀅𑀦𑀦𑀼𑀬𑀼𑀢𑁆𑀢𑀁 𑀏𑀓𑀁 𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 𑀩𑀸𑀳𑀼𑀲𑀘𑁆𑀘𑀸𑀪𑀸𑀯𑁂 𑀆𑀤𑀻𑀦𑀯𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀅𑀧𑁆𑀧𑀲𑁆𑀲𑀼𑀢𑀸𑀬’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀧𑁆𑀧𑀲𑁆𑀲𑀼𑀢𑀸𑀬𑀦𑁆𑀢𑀺 𑀏𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀯𑀸 𑀧𑀡𑁆𑀡𑀸𑀲𑀸𑀦𑀁, 𑀅𑀣 𑀯𑀸 𑀧𑀦 𑀯𑀕𑁆𑀕𑀸𑀦𑀁 𑀅𑀦𑁆𑀢𑀫𑀲𑁄 𑀏𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀯𑀸 𑀲𑀼𑀢𑁆𑀢𑀦𑁆𑀢𑀸𑀦𑀫𑁆𑀧𑀺 𑀉𑀕𑁆𑀕𑀳𑀺𑀢𑀸𑀦𑀁 𑀅𑀪𑀸𑀯𑁂𑀦 𑀅𑀧𑁆𑀧𑀲𑁆𑀲𑀼𑀢𑁄 𑀅𑀬𑀁, 𑀓𑀫𑁆𑀫𑀝𑁆𑀞𑀸𑀦𑀁 𑀧𑀦 𑀉𑀕𑁆𑀕𑀳𑁂𑀢𑁆𑀯𑀸 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀩𑀳𑀼𑀲𑁆𑀲𑀼𑀢𑁄𑀯. 𑀩𑀮𑀺𑀩𑀤𑁆𑀤𑁄𑀯 𑀚𑀻𑀭𑀢𑀻𑀢𑀺 𑀬𑀣𑀸 𑀩𑀮𑀺𑀩𑀤𑁆𑀤𑁄 𑀚𑀻𑀭𑀫𑀸𑀦𑁄 𑀯𑀟𑁆𑀠𑀫𑀸𑀦𑁄 𑀦𑁂𑀯 𑀫𑀸𑀢𑀼 𑀦 𑀧𑀺𑀢𑀼, 𑀦 𑀲𑁂𑀲𑀜𑀸𑀢𑀓𑀸𑀦𑀁 𑀅𑀢𑁆𑀣𑀸𑀬 𑀯𑀟𑁆𑀠𑀢𑀺, 𑀅𑀣 𑀔𑁄 𑀦𑀺𑀭𑀢𑁆𑀣𑀓𑀫𑁂𑀯 𑀚𑀻𑀭𑀢𑀺; 𑀏𑀯𑀫𑁂𑀯𑀁 𑀅𑀬𑀫𑁆𑀧𑀺 𑀦 𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀓𑀭𑁄𑀢𑀺, 𑀦 𑀆𑀘𑀭𑀺𑀬𑀯𑀢𑁆𑀢𑀁, 𑀦 𑀆𑀕𑀦𑁆𑀢𑀼𑀓𑀯𑀢𑁆𑀢𑀸𑀤𑀻𑀦𑀺, 𑀦 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀢𑀺, 𑀦𑀺𑀭𑀢𑁆𑀣𑀓𑀫𑁂𑀯 𑀚𑀻𑀭𑀢𑀺. 𑀫𑀁𑀲𑀸𑀦𑀺 𑀢𑀲𑁆𑀲 𑀯𑀟𑁆𑀠𑀦𑁆𑀢𑀻𑀢𑀺 𑀬𑀣𑀸 𑀩𑀮𑀺𑀩𑀤𑁆𑀤𑀲𑁆𑀲 ‘‘𑀓𑀲𑀦𑀪𑀸𑀭𑀯𑀳𑀦𑀸𑀤𑀻𑀲𑀼 𑀅𑀲𑀫𑀢𑁆𑀣𑁄 𑀏𑀲𑁄’’𑀢𑀺 𑀅𑀭𑀜𑁆𑀜𑁂 𑀯𑀺𑀲𑁆𑀲𑀝𑁆𑀞𑀲𑁆𑀲 𑀬𑀣𑀸 𑀢𑀣𑀸 𑀯𑀺𑀘𑀭𑀦𑁆𑀢𑀲𑁆𑀲 𑀔𑀸𑀤𑀦𑁆𑀢𑀲𑁆𑀲 𑀧𑀺𑀯𑀦𑁆𑀢𑀲𑁆𑀲 𑀫𑀁𑀲𑀸𑀦𑀺 𑀢𑀲𑁆𑀲 𑀯𑀟𑁆𑀠𑀦𑁆𑀢𑀺; 𑀏𑀯𑀫𑁂𑀯𑀁 𑀇𑀫𑀲𑁆𑀲𑀸𑀧𑀺 𑀉𑀧𑀚𑁆𑀛𑀸𑀬𑀸𑀤𑀻𑀳𑀺 𑀯𑀺𑀲𑁆𑀲𑀝𑁆𑀞𑀲𑁆𑀲 𑀲𑀗𑁆𑀖𑀁 𑀦𑀺𑀲𑁆𑀲𑀸𑀬 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀮𑀪𑀺𑀢𑁆𑀯𑀸 𑀉𑀤𑁆𑀥𑀁𑀯𑀺𑀭𑁂𑀘𑀦𑀸𑀤𑀻𑀦𑀺 𑀓𑀢𑁆𑀯𑀸 𑀓𑀸𑀬𑀁 𑀧𑁄𑀲𑁂𑀦𑁆𑀢𑀲𑁆𑀲 𑀫𑀁𑀲𑀸𑀦𑀺 𑀯𑀟𑁆𑀠𑀦𑁆𑀢𑀺 𑀣𑀽𑀮𑀲𑀭𑀻𑀭𑁄 𑀳𑀼𑀢𑁆𑀯𑀸 𑀯𑀺𑀘𑀭𑀢𑀺. 𑀧𑀜𑁆𑀜𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀧𑀦𑀲𑁆𑀲 𑀧𑀜𑁆𑀜𑀸 𑀏𑀓𑀗𑁆𑀕𑀼𑀮𑀺𑀫𑀢𑁆𑀢𑀸𑀧𑀺 𑀦 𑀯𑀟𑁆𑀠𑀢𑀺, 𑀅𑀭𑀜𑁆𑀜𑁂 𑀕𑀘𑁆𑀙𑀮𑀢𑀸𑀤𑀻𑀦𑀺 𑀯𑀺𑀬 𑀅𑀲𑁆𑀲 𑀙𑀤𑁆𑀯𑀸𑀭𑀸𑀦𑀺 𑀦𑀺𑀲𑁆𑀲𑀸𑀬 𑀢𑀡𑁆𑀳𑀸 𑀘𑁂𑀯 𑀦𑀯𑀯𑀺𑀥𑀫𑀸𑀦𑁄 𑀘 𑀯𑀟𑁆𑀠𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀩𑀳𑀼𑀲𑁆𑀲𑀼𑀢𑁄𑀢𑀺 𑀕𑀸𑀣𑀸 𑀅𑀢𑁆𑀢𑀦𑁄 𑀩𑀸𑀳𑀼𑀲𑀘𑁆𑀘𑀁 𑀦𑀺𑀲𑁆𑀲𑀸𑀬 𑀅𑀜𑁆𑀜𑀁 𑀅𑀢𑀺𑀫𑀜𑁆𑀜𑀦𑁆𑀢𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀼𑀢𑁂𑀦𑀸𑀢𑀺 𑀲𑀼𑀢𑀳𑁂𑀢𑀼 𑀅𑀢𑁆𑀢𑀦𑁄 𑀩𑀸𑀳𑀼𑀲𑀘𑁆𑀘𑀦𑀺𑀫𑀺𑀢𑁆𑀢𑀁. 𑀅𑀢𑀺𑀫𑀜𑁆𑀜𑀢𑀻𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀢𑀺 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀦𑁆𑀢𑁄 𑀧𑀭𑀁 𑀧𑀭𑀺𑀪𑀯𑀢𑀺. 𑀢𑀣𑁂𑀯𑀸𑀢𑀺 𑀬𑀣𑀸 𑀅𑀦𑁆𑀥𑁄 𑀅𑀦𑁆𑀥𑀓𑀸𑀭𑁂 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀦𑁆𑀢𑁄 𑀆𑀮𑁄𑀓𑀤𑀸𑀦𑁂𑀦 𑀧𑀭𑁂𑀲𑀁𑀬𑁂𑀯 𑀅𑀢𑁆𑀣𑀸𑀯𑀳𑁄, 𑀦 𑀅𑀢𑁆𑀢𑀦𑁄, 𑀢𑀣𑁂𑀯 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑁂𑀦 𑀲𑀼𑀢𑀯𑀸 𑀧𑀼𑀕𑁆𑀕𑀮𑁄 𑀲𑀼𑀢𑁂𑀦 𑀅𑀦𑀼𑀧𑀧𑀦𑁆𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀅𑀧𑀭𑀺𑀧𑀽𑀭𑁂𑀦𑁆𑀢𑁄 𑀅𑀦𑁆𑀥𑁄 𑀜𑀸𑀡𑀸𑀮𑁄𑀓𑀤𑀸𑀦𑁂𑀦 𑀧𑀭𑁂𑀲𑀁𑀬𑁂𑀯 𑀅𑀢𑁆𑀣𑀸𑀯𑀳𑁄, 𑀦 𑀅𑀢𑁆𑀢𑀦𑁄, 𑀤𑀻𑀧𑀥𑀸𑀭𑁄 𑀅𑀦𑁆𑀥𑁄 𑀯𑀺𑀬 𑀫𑀬𑁆𑀳𑀁 𑀉𑀧𑀝𑁆𑀞𑀸𑀢𑀻𑀢𑀺.

𑀇𑀤𑀸𑀦𑀺 𑀩𑀸𑀳𑀼𑀲𑀘𑁆𑀘𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀳𑀼𑀲𑁆𑀲𑀼𑀢’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀉𑀧𑀸𑀲𑁂𑀬𑁆𑀬𑀸𑀢𑀺 𑀧𑀬𑀺𑀭𑀼𑀧𑀸𑀲𑁂𑀬𑁆𑀬. 𑀲𑀼𑀢𑀜𑁆𑀘 𑀦 𑀯𑀺𑀦𑀸𑀲𑀬𑁂𑀢𑀺 𑀩𑀳𑀼𑀲𑁆𑀲𑀼𑀢𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀮𑀤𑁆𑀥𑀁 𑀲𑀼𑀢𑀜𑁆𑀘 𑀦 𑀯𑀺𑀦𑀸𑀲𑁂𑀬𑁆𑀬, 𑀦 𑀲𑀼𑀲𑁆𑀲𑁂𑀬𑁆𑀬 𑀥𑀸𑀭𑀡𑀧𑀭𑀺𑀘𑀬𑀧𑀭𑀺𑀧𑀼𑀘𑁆𑀙𑀸𑀫𑀦𑀲𑀺𑀓𑀸𑀭𑁂𑀳𑀺 𑀯𑀟𑁆𑀠𑁂𑀬𑁆𑀬. 𑀢𑀁 𑀫𑀽𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸𑀢𑀺 𑀬𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀮𑀤𑁆𑀥𑀁 𑀢𑀁 𑀲𑀼𑀢𑀁 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀫𑀽𑀮𑀁 𑀧𑀥𑀸𑀦𑀓𑀸𑀭𑀡𑀁. 𑀢𑀲𑁆𑀫𑀸 𑀥𑀫𑁆𑀫𑀥𑀭𑁄 𑀲𑀺𑀬𑀸 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀞𑀢𑁆𑀯𑀸 𑀬𑀣𑀸𑀲𑀼𑀢𑀲𑁆𑀲 𑀥𑀫𑁆𑀫𑀲𑁆𑀲 𑀥𑀸𑀭𑀡𑁂 𑀧𑀞𑀫𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀥𑀭𑁄 𑀪𑀯𑁂𑀬𑁆𑀬.

𑀇𑀤𑀸𑀦𑀺 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑁂𑀦 𑀲𑀸𑀥𑁂𑀢𑀩𑁆𑀩𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑀸𑀧𑀭𑀜𑁆𑀜𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀩𑁆𑀩𑀜𑁆𑀘 𑀅𑀧𑀭𑀜𑁆𑀘 𑀚𑀸𑀦𑀸𑀢𑀻𑀢𑀺 𑀧𑀼𑀩𑁆𑀩𑀸𑀧𑀭𑀜𑁆𑀜𑀽. 𑀏𑀓𑀺𑀲𑁆𑀲𑀸 𑀳𑀺 𑀕𑀸𑀣𑀸𑀬 𑀧𑀼𑀩𑁆𑀩𑀪𑀸𑀕𑁂 𑀅𑀧𑀜𑁆𑀜𑀸𑀬𑀫𑀸𑀦𑁂𑀧𑀺 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀧𑀜𑁆𑀜𑀸𑀬𑀫𑀸𑀦𑁂 𑀅𑀧𑀭𑀪𑀸𑀕𑁂 𑀅𑀧𑀜𑁆𑀜𑀸𑀬𑀫𑀸𑀦𑁂𑀧𑀺 ‘‘𑀇𑀫𑀲𑁆𑀲 𑀅𑀧𑀭𑀪𑀸𑀕𑀲𑁆𑀲 𑀇𑀫𑀺𑀦𑀸 𑀧𑀼𑀩𑁆𑀩𑀪𑀸𑀕𑁂𑀦, 𑀇𑀫𑀲𑁆𑀲 𑀯𑀸 𑀧𑀼𑀩𑁆𑀩𑀪𑀸𑀕𑀲𑁆𑀲 𑀇𑀫𑀺𑀦𑀸 𑀅𑀧𑀭𑀪𑀸𑀕𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀚𑀸𑀦𑀦𑁆𑀢𑁄 𑀧𑀼𑀩𑁆𑀩𑀸𑀧𑀭𑀜𑁆𑀜𑀽 𑀦𑀸𑀫. 𑀅𑀢𑁆𑀢𑀢𑁆𑀣𑀸𑀤𑀺𑀪𑁂𑀤𑀁 𑀢𑀲𑁆𑀲 𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑀜𑁆𑀜𑀽. 𑀦𑀺𑀭𑀼𑀢𑁆𑀢𑀺𑀧𑀤𑀓𑁄𑀯𑀺𑀤𑁄𑀢𑀺 𑀦𑀺𑀭𑀼𑀢𑁆𑀢𑀺𑀬𑀁 𑀲𑁂𑀲𑀧𑀤𑁂𑀲𑀼𑀧𑀺 𑀘𑀸𑀢𑀺 𑀘𑀢𑀽𑀲𑀼𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀙𑁂𑀓𑁄. 𑀲𑀼𑀕𑁆𑀕𑀳𑀻𑀢𑀜𑁆𑀘 𑀕𑀡𑁆𑀳𑀸𑀢𑀻𑀢𑀺 𑀢𑁂𑀦𑁂𑀯 𑀓𑁄𑀯𑀺𑀤𑀪𑀸𑀯𑁂𑀦 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀘 𑀥𑀫𑁆𑀫𑀁 𑀲𑀼𑀕𑀳𑀺𑀢𑀫𑁂𑀯 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀅𑀢𑁆𑀣𑀜𑁆𑀘𑁄𑀧𑀧𑀭𑀺𑀓𑁆𑀔𑀢𑀻𑀢𑀺 𑀬𑀣𑀸𑀲𑀼𑀢𑀲𑁆𑀲 𑀬𑀣𑀸𑀧𑀭𑀺𑀬𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀺 ‘‘𑀇𑀢𑀺 𑀲𑀻𑀮𑀁, 𑀇𑀢𑀺 𑀲𑀫𑀸𑀥𑀺, 𑀇𑀢𑀺 𑀧𑀜𑁆𑀜𑀸, 𑀇𑀫𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸’’𑀢𑀺 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀢𑀺.

𑀔𑀦𑁆𑀢𑁆𑀬𑀸 𑀙𑀦𑁆𑀤𑀺𑀓𑀢𑁄 𑀳𑁄𑀢𑀻𑀢𑀺 𑀢𑁂𑀲𑀼 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀦𑀺𑀚𑁆𑀛𑀸𑀦𑀁 𑀔𑀫𑀸𑀧𑁂𑀢𑁆𑀯𑀸 𑀭𑀽𑀧𑀧𑀭𑀺𑀕𑁆𑀕𑀳𑀸𑀤𑀺𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁂 𑀙𑀦𑁆𑀤𑀺𑀓𑀢𑁄 𑀙𑀦𑁆𑀤𑀚𑀸𑀢𑁄 𑀳𑁄𑀢𑀺. 𑀢𑀣𑀸𑀪𑀽𑀢𑁄 𑀘 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀉𑀲𑁆𑀲𑀳𑀺𑀢𑁆𑀯𑀸 𑀢𑀼𑀮𑁂𑀢𑀺 𑀢𑀁𑀢𑀁𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀯𑀲𑁂𑀦 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀢𑀢𑁄 𑀧𑀭𑀁 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀢𑀼𑀮𑁂𑀢𑀺 ‘‘𑀅𑀦𑀺𑀘𑁆𑀘’’𑀦𑁆𑀢𑀺𑀧𑀺, ‘‘𑀤𑀼𑀓𑁆𑀔’’𑀦𑁆𑀢𑀺𑀧𑀺, ‘‘𑀅𑀦𑀢𑁆𑀢𑀸’’𑀢𑀺𑀧𑀺 𑀢𑀁 𑀦𑀸𑀫𑀭𑀽𑀧𑀁 𑀢𑀻𑀭𑁂𑀢𑀺 𑀯𑀺𑀧𑀲𑁆𑀲𑀢𑀺. 𑀲𑀫𑀬𑁂 𑀲𑁄 𑀧𑀤𑀳𑀢𑀺, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑁄𑀢𑀺 𑀲𑁄 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀧𑀕𑁆𑀕𑀳𑁂𑀢𑀩𑁆𑀩𑀸𑀤𑀺𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀸𑀤𑀺𑀦𑀸 𑀧𑀤𑀳𑀢𑀺, 𑀧𑀤𑀳𑀦𑁆𑀢𑁄 𑀘 𑀅𑀚𑁆𑀛𑀢𑁆𑀢𑀁 𑀕𑁄𑀘𑀭𑀚𑁆𑀛𑀢𑁆𑀢𑁂 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀦𑀸 𑀫𑀕𑁆𑀕𑀲𑀫𑀸𑀥𑀺𑀦𑀸 𑀘 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑁄 𑀪𑀯𑁂𑀬𑁆𑀬, 𑀅𑀲𑀫𑀸𑀥𑀸𑀦𑀳𑁂𑀢𑀼𑀪𑀽𑀢𑁂 𑀓𑀺𑀮𑁂𑀲𑁂 𑀧𑀚𑀳𑁂𑀬𑁆𑀬. 𑀲𑁆𑀯𑀸𑀬𑀁 𑀕𑀼𑀡𑁄 𑀲𑀩𑁆𑀩𑁄𑀧𑀺 𑀬𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀲𑀧𑁆𑀧𑀜𑁆𑀜𑀁 𑀩𑀼𑀤𑁆𑀥𑀲𑀸𑀯𑀓𑀁 𑀧𑀬𑀺𑀭𑀼𑀧𑀸𑀲𑀦𑁆𑀢𑀲𑁆𑀲 𑀳𑁄𑀢𑀺, 𑀢𑀲𑁆𑀫𑀸 𑀅𑀲𑀗𑁆𑀔𑀢𑀁 𑀥𑀫𑁆𑀫𑀁 𑀆𑀭𑀩𑁆𑀪 𑀤𑀼𑀓𑁆𑀔𑀸𑀤𑀻𑀲𑀼 𑀧𑀭𑀺𑀜𑁆𑀜𑀸𑀤𑀺𑀯𑀺𑀲𑀺𑀝𑁆𑀞𑀓𑀺𑀘𑁆𑀘𑀢𑀸𑀬 𑀥𑀫𑁆𑀫𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀁 𑀥𑀫𑁆𑀫𑀜𑀸𑀡𑀁 𑀆𑀓𑀗𑁆𑀔𑀦𑁆𑀢𑁄 𑀢𑀣𑀸𑀯𑀺𑀥𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀪𑀚𑁂𑀣, 𑀲𑁂𑀯𑁂𑀬𑁆𑀬 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀩𑀳𑀼𑀧𑀓𑀸𑀭𑀢𑀸𑀬 𑀢𑀲𑁆𑀲 𑀧𑀽𑀚𑀦𑀻𑀬𑀓𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀳𑀼𑀲𑁆𑀲𑀼𑀢𑁄’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺 𑀩𑀳𑀼 𑀲𑀼𑀢𑀁 𑀏𑀢𑀲𑁆𑀲𑀸𑀢𑀺 𑀩𑀳𑀼𑀲𑁆𑀲𑀼𑀢𑁄. 𑀢𑀫𑁂𑀯 𑀤𑁂𑀲𑀦𑀸𑀥𑀫𑁆𑀫𑀁 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸 𑀯𑀺𑀬 𑀅𑀯𑀺𑀦𑀲𑁆𑀲𑀦𑁆𑀢𑀁 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑀥𑀭𑁄. 𑀢𑀢𑁄 𑀏𑀯 𑀫𑀳𑁂𑀲𑀺𑀦𑁄 𑀪𑀕𑀯𑀢𑁄 𑀥𑀫𑁆𑀫𑀓𑁄𑀲𑀁 𑀥𑀫𑁆𑀫𑀭𑀢𑀦𑀁 𑀆𑀭𑀓𑁆𑀔𑀢𑀻𑀢𑀺 𑀓𑁄𑀲𑀸𑀭𑀓𑁆𑀔𑁄. 𑀬𑀲𑁆𑀫𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀤𑀲𑁆𑀲𑀦𑁂𑀦 𑀘𑀓𑁆𑀔𑀼𑀪𑀽𑀢𑁄, 𑀢𑀲𑁆𑀫𑀸 𑀘𑀓𑁆𑀔𑀼 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲 𑀧𑀽𑀚𑀦𑀻𑀬𑁄 𑀫𑀸𑀦𑀦𑀻𑀬𑁄𑀢𑀺, 𑀩𑀳𑀼𑀲𑁆𑀲𑀼𑀢𑀪𑀸𑀯𑁂𑀦 𑀩𑀳𑀼𑀚𑀦𑀲𑁆𑀲 𑀧𑀽𑀚𑀦𑀻𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀦𑀺𑀕𑀫𑀦𑀯𑀲𑁂𑀦 𑀧𑀼𑀦𑀧𑀺 ‘‘𑀩𑀳𑀼𑀲𑁆𑀲𑀼𑀢𑁄’’𑀢𑀺 𑀯𑀼𑀢𑁆𑀢𑀁.

𑀏𑀯𑀭𑀽𑀧𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀮𑀪𑀺𑀢𑁆𑀯𑀸𑀧𑀺 𑀓𑀸𑀭𑀓𑀲𑁆𑀲𑁂𑀯 𑀅𑀧𑀭𑀺𑀳𑀸𑀦𑀺, 𑀦 𑀅𑀓𑀸𑀭𑀓𑀲𑁆𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑀸𑀭𑀸𑀫𑁄’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀦𑀺𑀯𑀸𑀲𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁄 𑀆𑀭𑀸𑀫𑁄, 𑀢𑀲𑁆𑀫𑀺𑀁 𑀏𑀯 𑀥𑀫𑁆𑀫𑁂 𑀭𑀢𑁄 𑀅𑀪𑀺𑀭𑀢𑁄𑀢𑀺 𑀥𑀫𑁆𑀫𑀭𑀢𑁄, 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀯𑀺𑀘𑀺𑀦𑁆𑀢𑀦𑁂𑀦 𑀥𑀫𑁆𑀫𑀁 𑀅𑀦𑀼𑀯𑀺𑀘𑀺𑀦𑁆𑀢𑀬𑀁 𑀥𑀫𑁆𑀫𑀁 𑀆𑀯𑀚𑁆𑀚𑁂𑀦𑁆𑀢𑁄 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀲𑁆𑀲𑀭𑀦𑁆𑀢𑀺 𑀢𑀫𑁂𑀯 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑁄. 𑀲𑀤𑁆𑀥𑀫𑁆𑀫𑀸𑀢𑀺 𑀏𑀯𑀭𑀽𑀧𑁄 𑀪𑀺𑀓𑁆𑀔𑀼 𑀲𑀢𑁆𑀢𑀢𑀺𑀁𑀲𑀧𑀪𑁂𑀤𑀸 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀘 𑀦 𑀧𑀭𑀺𑀳𑀸𑀬𑀢𑀺, 𑀦 𑀓𑀤𑀸𑀘𑀺 𑀢𑀲𑁆𑀲 𑀢𑀢𑁄 𑀧𑀭𑀺𑀳𑀸𑀦𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀣𑁂𑀓𑀤𑀺𑀯𑀲𑀁 𑀓𑀸𑀬𑁂 𑀅𑀯𑀻𑀢𑀭𑀸𑀕𑀁 𑀓𑀼𑀲𑀻𑀢𑀁 𑀳𑀻𑀦𑀯𑀻𑀭𑀺𑀬𑀁 𑀓𑁄𑀲𑀮𑁆𑀮𑀸𑀬𑀸 𑀢𑀺 𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑀁𑀯𑁂𑀚𑁂𑀦𑁆𑀢𑁄 ‘‘𑀓𑀸𑀬𑀫𑀘𑁆𑀙𑁂𑀭𑀕𑀭𑀼𑀦𑁄’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀸𑀬𑀫𑀘𑁆𑀙𑁂𑀭𑀕𑀭𑀼𑀦𑁄𑀢𑀺 ‘‘𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀲𑁆𑀲 𑀓𑀸𑀬𑁂 𑀫𑀫𑀢𑁆𑀢𑀲𑁆𑀲 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀫𑁆𑀧𑀺 𑀓𑀸𑀬𑁂𑀦 𑀓𑀢𑁆𑀢𑀩𑁆𑀩𑀁 𑀓𑀺𑀜𑁆𑀘𑀺 𑀅𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀲𑁆𑀲. 𑀳𑀺𑀬𑁆𑀬𑀫𑀸𑀦𑁂𑀢𑀺 𑀅𑀢𑁆𑀢𑀦𑁄 𑀓𑀸𑀬𑁂 𑀚𑀻𑀯𑀺𑀢𑁂 𑀘 𑀔𑀡𑁂 𑀔𑀡𑁂 𑀧𑀭𑀺𑀳𑀺𑀬𑁆𑀬𑀫𑀸𑀦𑁂. 𑀅𑀦𑀼𑀝𑁆𑀞𑀳𑁂𑀢𑀺 𑀲𑀻𑀮𑀸𑀤𑀻𑀦𑀁 𑀧𑀭𑀺𑀧𑀽𑀭𑀡𑀯𑀲𑁂𑀦 𑀉𑀝𑁆𑀞𑀸𑀦𑀯𑀻𑀭𑀺𑀬𑀁 𑀦 𑀓𑀭𑁂𑀬𑁆𑀬. 𑀲𑀭𑀻𑀭𑀲𑀼𑀔𑀕𑀺𑀤𑁆𑀥𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀲𑁆𑀲 𑀲𑀼𑀔𑀸𑀧𑀦𑁂𑀦𑁂𑀯 𑀕𑁂𑀥𑀁 𑀆𑀧𑀦𑁆𑀦𑀲𑁆𑀲. 𑀓𑀼𑀢𑁄 𑀲𑀫𑀡𑀨𑀸𑀲𑀼𑀢𑀸𑀢𑀺 𑀏𑀯𑀭𑀽𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀸𑀫𑀜𑁆𑀜𑀯𑀲𑁂𑀦 𑀓𑀼𑀢𑁄 𑀲𑀼𑀔𑀯𑀺𑀳𑀸𑀭𑁄, 𑀨𑀸𑀲𑀼𑀯𑀺𑀳𑀸𑀭𑁄 𑀦 𑀢𑀲𑁆𑀲 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀦 𑀧𑀓𑁆𑀔𑀦𑁆𑀢𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀲𑀼𑀢𑁆𑀯𑀸 𑀣𑁂𑀭𑁂𑀦 𑀪𑀸𑀲𑀺𑀢𑀸. 𑀢𑀢𑁆𑀣 𑀦 𑀧𑀓𑁆𑀔𑀦𑁆𑀢𑀺 𑀤𑀺𑀲𑀸 𑀲𑀩𑁆𑀩𑀸𑀢𑀺 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸 𑀲𑀩𑁆𑀩𑀸 𑀤𑀺𑀲𑀸 𑀦 𑀧𑀓𑁆𑀔𑀬𑀦𑁆𑀢𑀺, 𑀤𑀺𑀲𑀸𑀫𑀽𑀴𑁆𑀳𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸 𑀦 𑀧𑀝𑀺𑀪𑀦𑁆𑀢𑀺 𑀫𑀦𑁆𑀢𑀺 𑀧𑀼𑀩𑁆𑀩𑁂 𑀲𑀼𑀝𑁆𑀞𑀼 𑀧𑀕𑀼𑀡𑀸𑀧𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸 𑀇𑀤𑀸𑀦𑀺 𑀲𑀓𑁆𑀓𑀘𑁆𑀘𑀁 𑀲𑀫𑀦𑁆𑀦𑀸𑀳𑀭𑀺𑀬𑀫𑀸𑀦𑀸𑀧𑀺 𑀫𑀬𑁆𑀳𑀁 𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀕𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑀫𑁆𑀳𑀻𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀪𑀽𑀢𑁂 𑀥𑀫𑁆𑀫𑀲𑁂𑀦𑀸𑀧𑀢𑀺𑀫𑁆𑀳𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀁 𑀕𑀢𑁂. 𑀅𑀦𑁆𑀥𑀓𑀸𑀭𑀁𑀯 𑀔𑀸𑀬𑀢𑀻𑀢𑀺 𑀲𑀩𑁆𑀩𑁄𑀧𑀸𑀬𑀁 𑀮𑁄𑀓𑁄 𑀅𑀦𑁆𑀥𑀓𑀸𑀭𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺.

𑀅𑀩𑁆𑀪𑀢𑀻𑀢𑀲𑀳𑀸𑀬𑀲𑁆𑀲𑀸𑀢𑀺 𑀅𑀧𑀕𑀢𑀲𑀳𑀸𑀬𑀲𑁆𑀲, 𑀓𑀮𑁆𑀬𑀸𑀡𑀫𑀺𑀢𑁆𑀢𑀭𑀳𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀢𑀻𑀢𑀕𑀢𑀲𑀢𑁆𑀣𑀼𑀦𑁄𑀢𑀺 𑀆𑀬𑀲𑁆𑀫𑀢𑁄 𑀅𑀢𑀻𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀸𑀦𑀕𑀢𑀲𑀢𑁆𑀣𑀼𑀓𑀲𑁆𑀲, 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂𑀢𑀺 𑀅𑀢𑁆𑀣𑁄. 𑀬𑀣𑀸 𑀓𑀸𑀬𑀕𑀢𑀸 𑀲𑀢𑀻𑀢𑀺 𑀓𑀸𑀬𑀕𑀢𑀸𑀲𑀢𑀺𑀪𑀸𑀯𑀦𑀸 𑀢𑀓𑁆𑀓𑀭𑀲𑁆𑀲 𑀬𑀣𑀸 𑀏𑀓𑀦𑁆𑀢𑀳𑀺𑀢𑀸𑀯𑀳𑀸, 𑀏𑀯𑀁 𑀏𑀢𑀸𑀤𑀺𑀲𑀁 𑀅𑀦𑀸𑀣𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀓𑀦𑁆𑀢𑀳𑀺𑀢𑀸𑀯𑀳𑀁 𑀅𑀜𑁆𑀜𑀁 𑀫𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀲𑀦𑀸𑀣𑀲𑁆𑀲 𑀅𑀜𑁆𑀜𑀸𑀧𑀺 𑀪𑀸𑀯𑀦𑀸 𑀳𑀺𑀢𑀸𑀯𑀳𑀸 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀼𑀭𑀸𑀡𑀸𑀢𑀺 𑀧𑁄𑀭𑀸𑀡𑀸, 𑀲𑀸𑀭𑀺𑀧𑀼𑀢𑁆𑀢𑀸𑀤𑀺𑀓𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑀯𑁂𑀳𑀻𑀢𑀺 𑀦𑀯𑀓𑁂𑀳𑀺. 𑀦 𑀲𑀫𑁂𑀢𑀺 𑀫𑁂𑀢𑀺 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀦 𑀲𑀫𑀸𑀕𑀘𑁆𑀙𑀢𑀺, 𑀦 𑀢𑁂 𑀫𑀫 𑀘𑀺𑀢𑁆𑀢𑀁 𑀆𑀭𑀸𑀥𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁆𑀯𑀚𑁆𑀚 𑀏𑀓𑁄𑀯 𑀛𑀸𑀬𑀸𑀫𑀻𑀢𑀺 𑀲𑁄𑀳𑀁 𑀅𑀚𑁆𑀚 𑀯𑀼𑀟𑁆𑀠𑀢𑀭𑁂𑀳𑀺 𑀯𑀺𑀭𑀳𑀺𑀢𑁄 𑀏𑀓𑁄𑀯 𑀳𑀼𑀢𑁆𑀯𑀸 𑀛𑀸𑀬𑀸𑀫𑀺 𑀛𑀸𑀦𑀧𑀲𑀼𑀢𑁄 𑀳𑁄𑀫𑀺. 𑀯𑀲𑁆𑀲𑀼𑀧𑁂𑀢𑁄𑀢𑀺 𑀯𑀲𑁆𑀲𑀓𑀸𑀮𑁂 𑀓𑀼𑀮𑀸𑀯𑀓𑀁 𑀉𑀧𑁂𑀢𑁄 𑀧𑀓𑁆𑀔𑀻 𑀯𑀺𑀬. ‘‘𑀯𑀸𑀲𑀼𑀧𑁂𑀢𑁄’’𑀢𑀺𑀧𑀺 𑀧𑀸𑀴𑀺, 𑀯𑀸𑀲𑀁 𑀉𑀧𑀕𑀢𑁄𑀢𑀺 𑀅𑀢𑁆𑀣𑁄.

𑀤𑀲𑁆𑀲𑀦𑀸𑀬 𑀅𑀪𑀺𑀓𑁆𑀓𑀦𑁆𑀢𑁂𑀢𑀺 𑀕𑀸𑀣𑀸 𑀲𑀢𑁆𑀣𑀸𑀭𑀸 𑀪𑀸𑀲𑀺𑀢𑀸. 𑀢𑀲𑁆𑀲𑀢𑁆𑀣𑁄 𑁋 𑀫𑀫 𑀤𑀲𑁆𑀲𑀦𑀸𑀬 𑀅𑀪𑀺𑀓𑁆𑀓𑀦𑁆𑀢𑁂 𑀦𑀸𑀦𑀸𑀯𑀺𑀥𑀯𑀺𑀤𑁂𑀲𑀧𑀯𑀸𑀲𑀺𑀓𑀩𑀳𑀼𑀚𑀦𑁂, 𑀆𑀦𑀦𑁆𑀤, 𑀫𑀫 𑀉𑀧𑀲𑀗𑁆𑀓𑀫𑀦𑀁 𑀫𑀸 𑀯𑀸𑀭𑁂𑀲𑀺. 𑀓𑀲𑁆𑀫𑀸? 𑀢𑁂 𑀲𑁄𑀢𑀸𑀭𑁄 𑀥𑀫𑁆𑀫𑀲𑁆𑀲, 𑀫𑀫𑀁 𑀧𑀲𑁆𑀲𑀦𑁆𑀢𑀼, 𑀅𑀬𑀫𑁂𑀯 𑀤𑀲𑁆𑀲𑀦𑀸𑀬 𑀲𑀫𑀬𑁄𑀢𑀺.