𑁧𑁮. 𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑁄

𑁧. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑁂 𑀦 𑀕𑀡𑁂𑀦 𑀧𑀼𑀭𑀓𑁆𑀔𑀢𑁄𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀯𑁂𑀤𑁂𑀳𑁄 𑀦𑀸𑀫 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀓𑀼𑀝𑀼𑀫𑁆𑀩𑀺𑀓𑁄 𑀅𑀳𑁄𑀲𑀺. 𑀲𑁄 𑀩𑀼𑀤𑁆𑀥𑀫𑀸𑀫𑀓𑁄, 𑀥𑀫𑁆𑀫𑀫𑀸𑀫𑀓𑁄, 𑀲𑀗𑁆𑀖𑀫𑀸𑀫𑀓𑁄 𑀉𑀧𑀸𑀲𑀓𑁄 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀏𑀓𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑁂 𑀧𑀸𑀢𑁄𑀯 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀜𑁆𑀘 𑀔𑀡𑁂 𑀲𑀢𑁆𑀣𑀸 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑀁 𑀦𑀸𑀫 𑀢𑀢𑀺𑀬𑀲𑀸𑀯𑀓𑀁 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀢𑀯𑀸𑀤𑀸𑀦𑀁, 𑀬𑀤𑀺𑀤𑀁 𑀦𑀺𑀲𑀪𑁄’’𑀢𑀺 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀉𑀧𑀸𑀲𑀓𑁄 𑀢𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀥𑀫𑁆𑀫𑀓𑀣𑀸𑀯𑀲𑀸𑀦𑁂 𑀫𑀳𑀸𑀚𑀦𑁂 𑀉𑀝𑁆𑀞𑀸𑀬 𑀕𑀢𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀲𑁆𑀯𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀲𑀺. ‘‘𑀫𑀳𑀸 𑀔𑁄, 𑀉𑀧𑀸𑀲𑀓, 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺. ‘‘𑀓𑀺𑀢𑁆𑀢𑀓𑁄, 𑀪𑀦𑁆𑀢𑁂’’𑀢𑀺? ‘‘𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲’’𑀦𑁆𑀢𑀺. ‘‘𑀪𑀦𑁆𑀢𑁂, 𑀏𑀓𑀁 𑀲𑀸𑀫𑀡𑁂𑀭𑀫𑁆𑀧𑀺 𑀯𑀺𑀳𑀸𑀭𑁂 𑀅𑀲𑁂𑀲𑁂𑀢𑁆𑀯𑀸 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀣𑀸’’𑀢𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀉𑀧𑀸𑀲𑀓𑁄 𑀲𑀢𑁆𑀣𑀼 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀼 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺. 𑀲𑀢𑁆𑀣𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀉𑀧𑀸𑀲𑀓𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀤𑀓𑁆𑀔𑀺𑀡𑁄𑀤𑀓𑀸𑀯𑀲𑀸𑀦𑁂 𑀬𑀸𑀕𑀼𑀆𑀤𑀻𑀦𑀺 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀁 𑀅𑀓𑀸𑀲𑀺. 𑀉𑀧𑀸𑀲𑀓𑁄𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀫𑁂𑀯 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺. 𑀉𑀧𑀸𑀲𑀓𑁄 𑀤𑀺𑀲𑁆𑀯𑀸 𑀉𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀢𑁆𑀢𑀁, 𑀪𑀦𑁆𑀢𑁂, 𑀤𑁂𑀣𑀸’’𑀢𑀺 𑀆𑀳. 𑀣𑁂𑀭𑁄 𑀧𑀢𑁆𑀢𑀁 𑀅𑀤𑀸𑀲𑀺. ‘‘𑀪𑀦𑁆𑀢𑁂, 𑀇𑀥𑁂𑀯 𑀧𑀯𑀺𑀲𑀣, 𑀲𑀢𑁆𑀣𑀸𑀧𑀺 𑀕𑁂𑀳𑁂 𑀦𑀺𑀲𑀺𑀦𑁆𑀦𑁄’’𑀢𑀺. ‘‘𑀦 𑀯𑀝𑁆𑀝𑀺𑀲𑁆𑀲𑀢𑀺, 𑀉𑀧𑀸𑀲𑀓𑀸’’𑀢𑀺. 𑀲𑁄 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁄 𑀣𑁂𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑁄, 𑀪𑀦𑁆𑀢𑁂, ‘𑀲𑀢𑁆𑀣𑀸𑀧𑀺 𑀕𑁂𑀳𑁂 𑀦𑀺𑀲𑀺𑀦𑁆𑀦𑁄’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀯𑀺𑀲𑀺𑀢𑀼𑀁 𑀦 𑀇𑀘𑁆𑀙𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑀲𑁆𑀲 𑀢𑀼𑀫𑁆𑀳𑀸𑀓𑀁 𑀕𑀼𑀡𑁂𑀳𑀺 𑀅𑀢𑀺𑀭𑁂𑀓𑀕𑀼𑀡𑁄’’𑀢𑀺. 𑀩𑀼𑀤𑁆𑀥𑀸𑀦𑀜𑁆𑀘 𑀯𑀡𑁆𑀡𑀫𑀘𑁆𑀙𑁂𑀭𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀢𑁆𑀣𑀸 𑀏𑀯𑀫𑀸𑀳 𑁋 ‘‘𑀉𑀧𑀸𑀲𑀓, 𑀫𑀬𑀁 𑀪𑀺𑀓𑁆𑀔𑀁 𑀆𑀕𑀫𑀬𑀫𑀸𑀦𑀸 𑀕𑁂𑀳𑁂 𑀦𑀺𑀲𑀻𑀤𑀸𑀫, 𑀲𑁄 𑀧𑀦 𑀪𑀺𑀓𑁆𑀔𑀼 𑀦 𑀏𑀯𑀁 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀉𑀤𑀺𑀓𑁆𑀔𑀢𑀺, 𑀫𑀬𑀁 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑀸𑀫, 𑀲𑁄 𑀅𑀭𑀜𑁆𑀜𑀲𑁆𑀫𑀺𑀁𑀬𑁂𑀯 𑀯𑀲𑀢𑀺, 𑀫𑀬𑀁 𑀙𑀦𑁆𑀦𑁂 𑀯𑀲𑀸𑀫, 𑀲𑁄 𑀅𑀩𑁆𑀪𑁄𑀓𑀸𑀲𑁂𑀬𑁂𑀯 𑀯𑀲𑀢𑀻’’𑀢𑀺 𑀪𑀕𑀯𑀸 ‘‘𑀅𑀬𑀜𑁆𑀘 𑀅𑀬𑀜𑁆𑀘𑁂𑀢𑀲𑁆𑀲 𑀕𑀼𑀡𑁄’’𑀢𑀺 𑀫𑀳𑀸𑀲𑀫𑀼𑀤𑁆𑀤𑀁 𑀧𑀽𑀭𑀬𑀫𑀸𑀦𑁄 𑀯𑀺𑀬 𑀢𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺.

𑀉𑀧𑀸𑀲𑀓𑁄 𑀧𑀓𑀢𑀺𑀬𑀸𑀧𑀺 𑀚𑀮𑀫𑀸𑀦𑀧𑀤𑀻𑀧𑁄 𑀢𑁂𑀮𑁂𑀦 𑀆𑀲𑀺𑀢𑁆𑀢𑁄 𑀯𑀺𑀬 𑀲𑀼𑀝𑁆𑀞𑀼𑀢𑀭𑀁 𑀧𑀲𑀦𑁆𑀦𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀫𑀬𑁆𑀳𑀁 𑀅𑀜𑁆𑀜𑀸𑀬 𑀲𑀫𑁆𑀧𑀢𑁆𑀢𑀺𑀬𑀸, 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀥𑀼𑀢𑀯𑀸𑀤𑀸𑀦𑀁 𑀅𑀕𑁆𑀕𑀪𑀸𑀯𑀢𑁆𑀣𑀸𑀬 𑀧𑀢𑁆𑀣𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀼𑀦𑀧𑀺 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀲𑀢𑁆𑀢 𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑀺𑀘𑀻𑀯𑀭𑀸𑀦𑀺 𑀤𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀬𑀁 𑀫𑁂, 𑀪𑀦𑁆𑀢𑁂, 𑀲𑀢𑁆𑀢 𑀤𑀺𑀯𑀲𑁂 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁, 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁, 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁, 𑀇𑀫𑀺𑀦𑀸𑀳𑀁 𑀦 𑀅𑀜𑁆𑀜𑀁 𑀤𑁂𑀯𑀲𑀫𑁆𑀧𑀢𑁆𑀢𑀺𑀁 𑀯𑀸 𑀲𑀓𑁆𑀓𑀫𑀸𑀭𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀯𑀸 𑀧𑀢𑁆𑀣𑁂𑀫𑀺, 𑀇𑀤𑀁 𑀧𑀦 𑀫𑁂 𑀓𑀫𑁆𑀫𑀁 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑁂𑀦 𑀧𑀢𑁆𑀢𑀝𑁆𑀞𑀸𑀦𑀦𑁆𑀢𑀭𑀁 𑀧𑀸𑀧𑀼𑀡𑀦𑀢𑁆𑀣𑀸𑀬 𑀢𑁂𑀭𑀲𑀥𑀼𑀢𑀗𑁆𑀕𑀥𑀭𑀸𑀦𑀁 𑀅𑀕𑁆𑀕𑀪𑀸𑀯𑀲𑁆𑀲 𑀅𑀥𑀺𑀓𑀸𑀭𑁄 𑀳𑁄𑀢𑀽’’𑀢𑀺. 𑀲𑀢𑁆𑀣𑀸 ‘‘𑀫𑀳𑀦𑁆𑀢𑀁 𑀞𑀸𑀦𑀁 𑀇𑀫𑀺𑀦𑀸 𑀧𑀢𑁆𑀣𑀺𑀢𑀁, 𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄, 𑀦𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀫𑀦𑀸𑀧𑀁 𑀢𑁂 𑀞𑀸𑀦𑀁 𑀧𑀢𑁆𑀣𑀺𑀢𑀁, 𑀅𑀦𑀸𑀕𑀢𑁂 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀯𑀲𑀸𑀦𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑁆𑀯𑀁 𑀢𑀢𑀺𑀬𑀲𑀸𑀯𑀓𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀦𑀸𑀫 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀉𑀧𑀸𑀲𑀓𑁄 ‘‘𑀩𑀼𑀤𑁆𑀥𑀸𑀦𑀁 𑀤𑁆𑀯𑁂 𑀓𑀣𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀧𑀢𑁆𑀢𑀩𑁆𑀩𑀁 𑀯𑀺𑀬 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀫𑀜𑁆𑀜𑀺𑀢𑁆𑀣. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀤𑀸𑀦𑀁 𑀤𑀢𑁆𑀯𑀸, 𑀲𑀻𑀮𑀁 𑀲𑀫𑀸𑀤𑀸𑀬 𑀭𑀓𑁆𑀔𑀺𑀢𑁆𑀯𑀸, 𑀦𑀸𑀦𑀧𑁆𑀧𑀓𑀸𑀭𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀢𑁆𑀯𑀸, 𑀓𑀸𑀮𑀁 𑀓𑀢𑁆𑀯𑀸, 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀇𑀢𑁄 𑀏𑀓𑀦𑀯𑀼𑀢𑁂 𑀓𑀧𑁆𑀧𑁂 𑀯𑀺𑀧𑀲𑁆𑀲𑀺𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀦𑁆𑀢𑁂 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀭𑀺𑀚𑀺𑀡𑁆𑀡𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀲𑀢𑁆𑀢𑀫𑁂 𑀲𑀢𑁆𑀢𑀫𑁂 𑀲𑀁𑀯𑀘𑁆𑀙𑀭𑁂 𑀥𑀫𑁆𑀫𑀁 𑀓𑀣𑁂𑀲𑀺, 𑀫𑀳𑀦𑁆𑀢𑀁 𑀓𑁄𑀮𑀸𑀳𑀮𑀁 𑀳𑁄𑀢𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀤𑁂𑀯𑀢𑀸 ‘‘𑀲𑀢𑁆𑀣𑀸 𑀥𑀫𑁆𑀫𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀆𑀭𑁄𑀘𑁂𑀲𑀼𑀁. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀲𑀸𑀲𑀦𑀁 𑀅𑀲𑁆𑀲𑁄𑀲𑀺. 𑀢𑀲𑁆𑀲 𑀘 𑀦𑀺𑀯𑀸𑀲𑀦𑀲𑀸𑀝𑀓𑁄 𑀏𑀓𑁄𑀬𑁂𑀯 𑀳𑁄𑀢𑀺, 𑀢𑀣𑀸 𑀩𑁆𑀭𑀸𑀳𑁆𑀫𑀡𑀺𑀬𑀸. 𑀧𑀸𑀭𑀼𑀧𑀦𑀁 𑀧𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀫𑁂𑀯. 𑀲𑁄 𑀲𑀓𑀮𑀦𑀕𑀭𑁂 ‘‘𑀏𑀓𑀲𑀸𑀝𑀓𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀧𑀜𑁆𑀜𑀸𑀬𑀺. 𑀲𑁄 𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑁂𑀦𑀘𑀺𑀤𑁂𑀯 𑀓𑀺𑀘𑁆𑀘𑁂𑀦 𑀲𑀦𑁆𑀦𑀺𑀧𑀸𑀢𑁂 𑀲𑀢𑀺 𑀩𑁆𑀭𑀸𑀳𑁆𑀫𑀡𑀺𑀁 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀲𑀬𑀁 𑀢𑀁 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀩𑁆𑀭𑀸𑀳𑁆𑀫𑀡𑀻𑀦𑀁 𑀲𑀦𑁆𑀦𑀺𑀧𑀸𑀢𑁂 𑀲𑀢𑀺 𑀲𑀬𑀁 𑀕𑁂𑀳𑁂 𑀅𑀘𑁆𑀙𑀢𑀺, 𑀩𑁆𑀭𑀸𑀳𑁆𑀫𑀡𑀻 𑀢𑀁 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀺𑀁 𑀆𑀳 𑁋 ‘‘𑀪𑁄𑀢𑀺, 𑀓𑀺𑀁 𑀭𑀢𑁆𑀢𑀺𑀁 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀲𑀺, 𑀤𑀺𑀯𑀸’’𑀢𑀺? ‘‘𑀫𑀬𑀁 𑀫𑀸𑀢𑀼𑀕𑀸𑀫𑀚𑀸𑀢𑀺𑀓𑀸 𑀦𑀸𑀫 𑀭𑀢𑁆𑀢𑀺𑀁 𑀲𑁄𑀢𑀼𑀁 𑀦 𑀲𑀓𑁆𑀓𑁄𑀫, 𑀤𑀺𑀯𑀸 𑀲𑁄𑀲𑁆𑀲𑀸𑀫𑀸’’𑀢𑀺 𑀩𑁆𑀭𑀸𑀳𑁆𑀫𑀡𑀁 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀢𑀁 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀉𑀧𑀸𑀲𑀺𑀓𑀸𑀳𑀺 𑀲𑀤𑁆𑀥𑀺𑀁 𑀤𑀺𑀯𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀦𑀺𑀲𑀺𑀦𑁆𑀦𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀉𑀧𑀸𑀲𑀺𑀓𑀸𑀳𑀺𑀬𑁂𑀯 𑀲𑀤𑁆𑀥𑀺𑀁 𑀆𑀕𑀫𑀸𑀲𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀺𑀁 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀢𑀁 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁄.

𑀢𑀲𑁆𑀫𑀺𑀁 𑀲𑀫𑀬𑁂 𑀲𑀢𑁆𑀣𑀸 𑀧𑀭𑀺𑀲𑀫𑀚𑁆𑀛𑁂 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀘𑀺𑀢𑁆𑀢𑀩𑀻𑀚𑀦𑀺𑀁 𑀆𑀤𑀸𑀬 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬, 𑀲𑀺𑀦𑁂𑀭𑀼𑀁 𑀫𑀦𑁆𑀣𑀁 𑀓𑀢𑁆𑀯𑀸 𑀲𑀸𑀕𑀭𑀁 𑀦𑀺𑀫𑁆𑀫𑀣𑁂𑀦𑁆𑀢𑁄 𑀯𑀺𑀬, 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑀲𑁆𑀲 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲 𑀧𑀞𑀫𑀬𑀸𑀫𑀲𑁆𑀫𑀺𑀁𑀬𑁂𑀯 𑀲𑀓𑀮𑀲𑀭𑀻𑀭𑀁 𑀧𑀽𑀭𑀬𑀫𑀸𑀦𑀸 𑀧𑀜𑁆𑀘𑀯𑀡𑁆𑀡𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀲𑁄 𑀧𑀸𑀭𑀼𑀢𑀯𑀢𑁆𑀣𑀁 𑀲𑀗𑁆𑀖𑀭𑀺𑀢𑁆𑀯𑀸 ‘‘𑀤𑀲𑀩𑀮𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀆𑀤𑀻𑀦𑀯𑀲𑀳𑀲𑁆𑀲𑀁 𑀤𑀲𑁆𑀲𑀬𑀫𑀸𑀦𑀁 𑀫𑀘𑁆𑀙𑁂𑀭𑀁 𑀉𑀧𑁆𑀧𑀚𑁆𑀚𑀺. 𑀲𑁄 ‘‘𑀩𑁆𑀭𑀸𑀳𑁆𑀫𑀡𑀺𑀬𑀸 𑀫𑀬𑁆𑀳𑀜𑁆𑀘 𑀏𑀓𑀫𑁂𑀯 𑀯𑀢𑁆𑀣𑀁, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀧𑀸𑀭𑀼𑀧𑀦𑀁 𑀦𑀢𑁆𑀣𑀺, 𑀅𑀧𑀸𑀭𑀼𑀧𑀺𑀢𑁆𑀯𑀸 𑀘 𑀦𑀸𑀫 𑀩𑀳𑀺 𑀯𑀺𑀘𑀭𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀲𑀩𑁆𑀩𑀣𑀸𑀧𑀺 𑀅𑀤𑀸𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀅𑀣𑀲𑁆𑀲 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑀬𑀸𑀫𑁂 𑀫𑀚𑁆𑀛𑀺𑀫𑀬𑀸𑀫𑁂𑀧𑀺 𑀢𑀣𑁂𑀯 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀢𑀣𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑁂𑀯 𑀅𑀤𑀸𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀫𑀚𑁆𑀛𑀺𑀫𑀬𑀸𑀫𑁂 𑀦𑀺𑀓𑁆𑀔𑀦𑁆𑀢𑁂 𑀧𑀘𑁆𑀙𑀺𑀫𑀬𑀸𑀫𑁂𑀧𑀺 𑀢𑀣𑁂𑀯 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀢𑀤𑀸 𑀲𑁄 ‘‘𑀬𑀁 𑀯𑀸 𑀳𑁄𑀢𑀼 𑀢𑀁 𑀯𑀸 𑀧𑀘𑁆𑀙𑀸𑀧𑀺 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀣𑀁 𑀲𑀗𑁆𑀖𑀭𑀺𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀞𑀧𑁂𑀲𑀺. 𑀢𑀢𑁄 𑀯𑀸𑀫𑀳𑀢𑁆𑀣𑀁 𑀆𑀪𑀼𑀚𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀅𑀧𑁆𑀨𑁄𑀝𑁂𑀢𑁆𑀯𑀸 ‘‘𑀚𑀺𑀢𑀁 𑀫𑁂, 𑀚𑀺𑀢𑀁 𑀫𑁂’’𑀢𑀺 𑀢𑀬𑁄 𑀯𑀸𑀭𑁂 𑀦𑀤𑀺.

𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀩𑀦𑁆𑀥𑀼𑀫𑀭𑀸𑀚𑀸 𑀥𑀫𑁆𑀫𑀸𑀲𑀦𑀲𑁆𑀲 𑀧𑀘𑁆𑀙𑀢𑁄 𑀅𑀦𑁆𑀢𑁄𑀲𑀸𑀡𑀺𑀬𑀁 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀭𑀜𑁆𑀜𑁄 𑀘 𑀦𑀸𑀫 ‘‘𑀚𑀺𑀢𑀁 𑀫𑁂’’𑀢𑀺 𑀲𑀤𑁆𑀤𑁄 𑀅𑀫𑀦𑀸𑀧𑁄 𑀳𑁄𑀢𑀺. 𑀲𑁄 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙, 𑀏𑀢𑀁 𑀧𑀼𑀘𑁆𑀙 𑀓𑀺𑀁 𑀯𑀤𑀲𑀻’’𑀢𑀺. 𑀲𑁄 𑀢𑁂𑀦 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁄 ‘‘𑀅𑀯𑀲𑁂𑀲𑀸 𑀳𑀢𑁆𑀣𑀺𑀬𑀸𑀦𑀸𑀤𑀻𑀦𑀺 𑀆𑀭𑀼𑀬𑁆𑀳 𑀅𑀲𑀺𑀘𑀫𑁆𑀫𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀭𑀲𑁂𑀦𑀁 𑀚𑀺𑀦𑀦𑁆𑀢𑀺, 𑀦 𑀢𑀁 𑀅𑀘𑁆𑀙𑀭𑀺𑀬𑀁. 𑀅𑀳𑀁 𑀧𑀦 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀲𑁆𑀲 𑀓𑀽𑀝𑀕𑁄𑀡𑀲𑁆𑀲 𑀫𑀼𑀕𑁆𑀕𑀭𑁂𑀦 𑀲𑀻𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀁 𑀧𑀮𑀸𑀧𑁂𑀦𑁆𑀢𑁄 𑀯𑀺𑀬 𑀫𑀘𑁆𑀙𑁂𑀭𑀘𑀺𑀢𑁆𑀢𑀁 𑀫𑀤𑁆𑀤𑀺𑀢𑁆𑀯𑀸 𑀧𑀸𑀭𑀼𑀢𑀯𑀢𑁆𑀣𑀁 𑀤𑀲𑀩𑀮𑀲𑁆𑀲 𑀅𑀤𑀸𑀲𑀺𑀁, 𑀢𑀁 𑀫𑁂 𑀫𑀘𑁆𑀙𑀭𑀺𑀬𑀁 𑀚𑀺𑀢’’𑀦𑁆𑀢𑀺 𑀆𑀳. 𑀲𑁄 𑀧𑀼𑀭𑀺𑀲𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀆𑀳 𑁋 ‘‘𑀅𑀫𑁆𑀳𑁂, 𑀪𑀡𑁂, 𑀤𑀲𑀩𑀮𑀲𑁆𑀲 𑀅𑀦𑀼𑀭𑀽𑀧𑀁 𑀦 𑀚𑀸𑀦𑀺𑀫𑁆𑀳, 𑀩𑁆𑀭𑀸𑀳𑁆𑀫𑀡𑁄 𑀚𑀸𑀦𑀻’’𑀢𑀺 𑀯𑀢𑁆𑀣𑀬𑀼𑀕𑀁 𑀧𑁂𑀲𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑀬𑁆𑀳𑀁 𑀢𑀼𑀡𑁆𑀳𑀻𑀦𑀺𑀲𑀺𑀦𑁆𑀦𑀲𑁆𑀲 𑀧𑀞𑀫𑀁 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀲𑀢𑁆𑀣𑀼 𑀕𑀼𑀡𑁂 𑀓𑀣𑁂𑀦𑁆𑀢𑀲𑁆𑀲 𑀅𑀤𑀸𑀲𑀺. 𑀲𑀢𑁆𑀣𑀼 𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑁂𑀦 𑀧𑀦 𑀫𑀬𑁆𑀳𑀁 𑀓𑁄 𑀅𑀢𑁆𑀣𑁄’’𑀢𑀺 𑀢𑀫𑁆𑀧𑀺 𑀯𑀢𑁆𑀣𑀬𑀼𑀕𑀁 𑀤𑀲𑀩𑀮𑀲𑁆𑀲𑁂𑀯 𑀅𑀤𑀸𑀲𑀺. 𑀭𑀸𑀚𑀸𑀧𑀺 ‘‘𑀓𑀺𑀁 𑀩𑁆𑀭𑀸𑀳𑁆𑀫𑀡𑁂𑀦 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀫𑁆𑀧𑀺 𑀢𑁂𑀦 𑀯𑀢𑁆𑀣𑀬𑀼𑀕𑀁 𑀢𑀣𑀸𑀕𑀢𑀲𑁆𑀲𑁂𑀯 𑀤𑀺𑀦𑁆𑀦’’𑀦𑁆𑀢𑀺 𑀲𑀼𑀢𑁆𑀯𑀸 𑀅𑀜𑁆𑀜𑀸𑀦𑀺𑀧𑀺 𑀤𑁆𑀯𑁂 𑀯𑀢𑁆𑀣𑀬𑀼𑀕𑀸𑀦𑀺 𑀧𑁂𑀲𑁂𑀲𑀺, 𑀲𑁄 𑀢𑀸𑀦𑀺𑀧𑀺 𑀅𑀤𑀸𑀲𑀺. 𑀭𑀸𑀚𑀸 𑀅𑀜𑁆𑀜𑀸𑀦𑀺𑀧𑀺 𑀘𑀢𑁆𑀢𑀸𑀭𑀻𑀢𑀺 𑀏𑀯𑀁 𑀬𑀸𑀯 𑀤𑁆𑀯𑀢𑁆𑀢𑀺𑀁𑀲𑀯𑀢𑁆𑀣𑀬𑀼𑀕𑀸𑀦𑀺 𑀧𑁂𑀲𑁂𑀲𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀇𑀤𑀁 𑀯𑀟𑁆𑀠𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀕𑀳𑀡𑀁 𑀯𑀺𑀬 𑀳𑁄𑀢𑀻’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀏𑀓𑀁, 𑀩𑁆𑀭𑀸𑀳𑁆𑀫𑀡𑀺𑀬𑀸 𑀏𑀓𑀦𑁆𑀢𑀺 𑀤𑁆𑀯𑁂 𑀯𑀢𑁆𑀣𑀬𑀼𑀕𑀸𑀦𑀺 𑀕𑀳𑁂𑀢𑁆𑀯𑀸 𑀢𑀺𑀁𑀲𑀬𑀼𑀕𑀸𑀦𑀺 𑀢𑀣𑀸𑀕𑀢𑀲𑁆𑀲𑁂𑀯 𑀅𑀤𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀘 𑀲𑁄 𑀲𑀢𑁆𑀣𑀼 𑀯𑀺𑀲𑁆𑀲𑀸𑀲𑀺𑀓𑁄 𑀚𑀸𑀢𑁄.

𑀅𑀣 𑀦𑀁 𑀭𑀸𑀚𑀸 𑀏𑀓𑀤𑀺𑀯𑀲𑀁 𑀲𑀻𑀢𑀲𑀫𑀬𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀅𑀢𑁆𑀢𑀦𑀸 𑀧𑀸𑀭𑀼𑀢𑀭𑀢𑁆𑀢𑀓𑀫𑁆𑀩𑀮𑀁 𑀤𑀢𑁆𑀯𑀸 𑀆𑀳 𑁋 ‘‘𑀇𑀢𑁄 𑀧𑀝𑁆𑀞𑀸𑀬 𑀇𑀫𑀁 𑀧𑀸𑀭𑀼𑀧𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀸𑀳𑀻’’𑀢𑀺. 𑀲𑁄 ‘‘𑀓𑀺𑀁 𑀫𑁂 𑀇𑀫𑀺𑀦𑀸 𑀓𑀫𑁆𑀩𑀮𑁂𑀦 𑀇𑀫𑀲𑁆𑀫𑀺𑀁 𑀧𑀽𑀢𑀺𑀓𑀸𑀬𑁂 𑀉𑀧𑀦𑀻𑀢𑁂𑀦𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁 𑀢𑀣𑀸𑀕𑀢𑀲𑁆𑀲 𑀫𑀜𑁆𑀘𑀲𑁆𑀲 𑀉𑀧𑀭𑀺 𑀯𑀺𑀢𑀸𑀦𑀁 𑀓𑀢𑁆𑀯𑀸 𑀅𑀕𑀫𑀸𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀧𑀸𑀢𑁄𑀯 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀓𑀫𑁆𑀩𑀮𑁂 𑀧𑀝𑀺𑀳𑀜𑁆𑀜𑀦𑁆𑀢𑀺, 𑀓𑀫𑁆𑀩𑀮𑁄 𑀅𑀢𑀺𑀯𑀺𑀬 𑀯𑀺𑀭𑁄𑀘𑀢𑀺. 𑀭𑀸𑀚𑀸 𑀉𑀮𑁆𑀮𑁄𑀓𑁂𑀦𑁆𑀢𑁄 𑀲𑀜𑁆𑀚𑀸𑀦𑀺𑀢𑁆𑀯𑀸 𑀆𑀳 𑁋 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀏𑀲 𑀓𑀫𑁆𑀩𑀮𑁄, 𑀅𑀫𑁆𑀳𑁂𑀳𑀺 𑀏𑀓𑀲𑀸𑀝𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀺𑀦𑁆𑀦𑁄’’𑀢𑀺. ‘‘𑀢𑀼𑀫𑁆𑀳𑁂𑀳𑀺, 𑀫𑀳𑀸𑀭𑀸𑀚, 𑀩𑁆𑀭𑀸𑀳𑁆𑀫𑀡𑁄 𑀧𑀽𑀚𑀺𑀢𑁄, 𑀩𑁆𑀭𑀸𑀳𑁆𑀫𑀡𑁂𑀦 𑀫𑀬𑀁 𑀧𑀽𑀚𑀺𑀢𑀸’’𑀢𑀺. 𑀭𑀸𑀚𑀸 ‘‘𑀩𑁆𑀭𑀸𑀳𑁆𑀫𑀡𑁄 𑀬𑀼𑀢𑁆𑀢𑀁 𑀅𑀜𑁆𑀜𑀸𑀲𑀺, 𑀦 𑀫𑀬’’𑀦𑁆𑀢𑀺 𑀧𑀲𑀻𑀤𑀺𑀢𑁆𑀯𑀸 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀸𑀭𑀪𑀽𑀢𑀁, 𑀢𑀁 𑀲𑀩𑁆𑀩𑀁 𑀅𑀝𑁆𑀞𑀝𑁆𑀞𑀓𑀁 𑀓𑀢𑁆𑀯𑀸 𑀲𑀩𑁆𑀩𑀝𑁆𑀞𑀓𑀁 𑀦𑀸𑀫 𑀤𑀸𑀦𑀁 𑀤𑀢𑁆𑀯𑀸 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁄𑀧𑀺 ‘‘𑀅𑀝𑁆𑀞𑀝𑁆𑀞𑀓𑀁 𑀦𑀸𑀮 𑀘𑀢𑀼𑀲𑀝𑁆𑀞𑀺 𑀳𑁄𑀢𑀻’’𑀢𑀺 𑀘𑀢𑀼𑀲𑀝𑁆𑀞𑀺 𑀲𑀮𑀸𑀓𑀪𑀢𑁆𑀢𑀸𑀦𑀺 𑀉𑀧𑀦𑀺𑀩𑀦𑁆𑀥𑀸𑀧𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺.

𑀧𑀼𑀦 𑀢𑀢𑁄 𑀘𑀼𑀢𑁄 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀓𑁄𑀡𑀸𑀕𑀫𑀦𑀲𑁆𑀲 𑀘 𑀪𑀕𑀯𑀢𑁄 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀅𑀦𑁆𑀢𑀭𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀝𑀼𑀫𑁆𑀩𑀺𑀬𑀖𑀭𑁂 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑁂 𑀚𑀗𑁆𑀖𑀯𑀺𑀳𑀸𑀭𑀁 𑀘𑀭𑀢𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀤𑀻𑀢𑀻𑀭𑁂 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀦𑀼𑀯𑀸𑀢𑁂 𑀅𑀧𑁆𑀧𑀳𑁄𑀦𑁆𑀢𑁂 𑀲𑀗𑁆𑀖𑀭𑀺𑀢𑁆𑀯𑀸 𑀞𑀧𑁂𑀢𑀼𑀁 𑀆𑀭𑀤𑁆𑀥𑁄. 𑀲𑁄 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀲𑀗𑁆𑀖𑀭𑀺𑀢𑁆𑀯𑀸 𑀞𑀧𑁂𑀣𑀸’’𑀢𑀺 𑀆𑀳. ‘‘𑀅𑀦𑀼𑀯𑀸𑀢𑁄 𑀦𑀧𑁆𑀧𑀳𑁄𑀢𑀻’’𑀢𑀺. ‘‘𑀇𑀫𑀺𑀦𑀸, 𑀪𑀦𑁆𑀢𑁂, 𑀓𑀭𑁄𑀣𑀸’’𑀢𑀺 𑀉𑀢𑁆𑀢𑀭𑀲𑀸𑀝𑀓𑀁 𑀤𑀢𑁆𑀯𑀸 ‘‘𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀫𑁂 𑀓𑁂𑀦𑀘𑀺 𑀧𑀭𑀺𑀳𑀸𑀦𑀺 𑀫𑀸 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺.

𑀖𑀭𑁂𑀧𑀺𑀲𑁆𑀲 𑀪𑀕𑀺𑀦𑀺𑀬𑀸 𑀲𑀤𑁆𑀥𑀺𑀁 𑀪𑀭𑀺𑀬𑀸𑀬 𑀓𑀮𑀳𑀁 𑀓𑀭𑁄𑀦𑁆𑀢𑀺𑀬𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣𑀲𑁆𑀲 𑀪𑀕𑀺𑀦𑀻 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀢𑀲𑁆𑀲 𑀪𑀭𑀺𑀬𑀁 𑀲𑀦𑁆𑀥𑀸𑀬 ‘‘𑀏𑀯𑀭𑀽𑀧𑀁 𑀩𑀸𑀮𑀁 𑀬𑁄𑀚𑀦𑀲𑀢𑁂𑀦 𑀧𑀭𑀺𑀯𑀚𑁆𑀚𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺. 𑀲𑀸 𑀕𑁂𑀳𑀗𑁆𑀕𑀡𑁂 𑀞𑀺𑀢𑀸 𑀲𑀼𑀢𑁆𑀯𑀸 ‘‘𑀇𑀫𑀸𑀬 𑀤𑀺𑀦𑁆𑀦𑀪𑀢𑁆𑀢𑀁 𑀫𑀸 𑀏𑀲 𑀪𑀼𑀜𑁆𑀚𑀢𑀽’’𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀙𑀟𑁆𑀟𑁂𑀢𑁆𑀯𑀸 𑀓𑀮𑀮𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀇𑀢𑀭𑀸 𑀤𑀺𑀲𑁆𑀯𑀸 ‘‘𑀩𑀸𑀮𑁂, 𑀢𑁆𑀯𑀁 𑀫𑀁 𑀢𑀸𑀯 𑀅𑀓𑁆𑀓𑁄𑀲 𑀯𑀸 𑀧𑀳𑀭 𑀯𑀸, 𑀏𑀯𑀭𑀽𑀧𑀲𑁆𑀲 𑀧𑀦 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀽𑀭𑀺𑀢𑀧𑀸𑀭𑀫𑀺𑀲𑁆𑀲 𑀧𑀢𑁆𑀢𑀢𑁄 𑀪𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀓𑀮𑀮𑀁 𑀤𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀆𑀳. 𑀅𑀣𑀲𑁆𑀲 𑀪𑀭𑀺𑀬𑀸𑀬 𑀧𑀝𑀺𑀲𑀗𑁆𑀔𑀸𑀦𑀁 𑀉𑀧𑁆𑀧𑀚𑁆𑀚𑀺. 𑀲𑀸 ‘‘𑀢𑀺𑀝𑁆𑀞𑀣, 𑀪𑀦𑁆𑀢𑁂’’𑀢𑀺 𑀓𑀮𑀮𑀁 𑀙𑀟𑁆𑀟𑁂𑀢𑁆𑀯𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑁂𑀦. 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀧𑀡𑀻𑀢𑀪𑀢𑁆𑀢𑀲𑁆𑀲 𑀘𑀢𑀼𑀫𑀥𑀼𑀭𑀲𑁆𑀲 𑀘 𑀧𑀽𑀭𑁂𑀢𑁆𑀯𑀸 𑀉𑀧𑀭𑀺 𑀆𑀲𑀺𑀢𑁆𑀢𑁂𑀦 𑀧𑀤𑀼𑀫𑀕𑀩𑁆𑀪𑀯𑀡𑁆𑀡𑁂𑀦 𑀲𑀧𑁆𑀧𑀺𑀦𑀸 𑀯𑀺𑀚𑁆𑀚𑁄𑀢𑀫𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 ‘‘𑀬𑀣𑀸 𑀅𑀬𑀁 𑀧𑀺𑀡𑁆𑀟𑀧𑀸𑀢𑁄 𑀑𑀪𑀸𑀲𑀚𑀸𑀢𑁄, 𑀏𑀯𑀁 𑀑𑀪𑀸𑀲𑀚𑀸𑀢𑀁 𑀫𑁂 𑀲𑀭𑀻𑀭𑀁 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀦𑀼𑀫𑁄𑀤𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺.

𑀢𑁂𑀧𑀺 𑀚𑀸𑀬𑀫𑁆𑀧𑀢𑀺𑀓𑀸 𑀬𑀸𑀯𑀢𑀸𑀬𑀼𑀓𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀼𑀦 𑀢𑀢𑁄 𑀘𑀯𑀺𑀢𑁆𑀯𑀸 𑀉𑀧𑀸𑀲𑀓𑁄 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀇𑀢𑀭𑀸𑀧𑀺 𑀢𑀸𑀤𑀺𑀲𑀲𑁆𑀲𑁂𑀯 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀲𑁆𑀲 𑀢𑀫𑁂𑀯 𑀲𑁂𑀝𑁆𑀞𑀺𑀥𑀻𑀢𑀭𑀁 𑀆𑀦𑀬𑀺𑀁𑀲𑀼. 𑀢𑀲𑁆𑀲𑀸 𑀧𑀼𑀩𑁆𑀩𑁂 𑀅𑀦𑀺𑀝𑁆𑀞𑀯𑀺𑀧𑀸𑀓𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁂𑀦 𑀧𑀢𑀺𑀓𑀼𑀮𑀁 𑀧𑀯𑀺𑀝𑁆𑀞𑀫𑀢𑁆𑀢𑀸𑀬 𑀉𑀫𑁆𑀫𑀸𑀭𑀩𑁆𑀪𑀦𑁆𑀢𑀭𑁂 𑀲𑀓𑀮𑀲𑀭𑀻𑀭𑀁 𑀉𑀕𑁆𑀖𑀸𑀝𑀺𑀢𑀯𑀘𑁆𑀘𑀓𑀼𑀝𑀺 𑀯𑀺𑀬 𑀤𑀼𑀕𑁆𑀕𑀦𑁆𑀥𑀁 𑀚𑀸𑀢𑀁. 𑀲𑁂𑀝𑁆𑀞𑀺𑀓𑀼𑀫𑀸𑀭𑁄 ‘‘𑀓𑀲𑁆𑀲𑀸𑀬𑀁 𑀕𑀦𑁆𑀥𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀲𑁂𑀝𑁆𑀞𑀺𑀓𑀜𑁆𑀜𑀸𑀬𑀸’’𑀢𑀺 𑀲𑀼𑀢𑁆𑀯𑀸, ‘‘𑀦𑀻𑀳𑀭𑀣, 𑀦𑀻𑀳𑀭𑀣𑀸’’𑀢𑀺 𑀆𑀪𑀢𑀦𑀺𑀬𑀸𑀫𑁂𑀦𑁂𑀯 𑀓𑀼𑀮𑀖𑀭𑀁 𑀧𑁂𑀲𑁂𑀲𑀺. 𑀲𑀸 𑀏𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀝𑀺𑀦𑀺𑀯𑀢𑁆𑀢𑀺𑀢𑀸.

𑀢𑁂𑀦 𑀘 𑀲𑀫𑀬𑁂𑀦 𑀓𑀲𑁆𑀲𑀧𑀤𑀲𑀩𑀮𑁄 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀲 𑀖𑀦𑀓𑁄𑀝𑁆𑀝𑀺𑀫𑀸𑀳𑀺 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀳𑀺 𑀭𑀢𑁆𑀢𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀳𑀺 𑀬𑁄𑀚𑀦𑀼𑀩𑁆𑀩𑁂𑀥𑀁 𑀘𑁂𑀢𑀺𑀬𑀁 𑀆𑀭𑀪𑀺𑀁𑀲𑀼. 𑀢𑀲𑁆𑀫𑀺𑀁 𑀘𑁂𑀢𑀺𑀬𑁂 𑀓𑀭𑀻𑀬𑀫𑀸𑀦𑁂 𑀲𑀸 𑀲𑁂𑀝𑁆𑀞𑀺𑀥𑀻𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀝𑀺𑀦𑀺𑀯𑀢𑁆𑀢𑀺𑀢𑀸, 𑀓𑀺𑀁 𑀫𑁂 𑀚𑀻𑀯𑀺𑀢𑁂𑀦𑀸’’𑀢𑀺 𑀅𑀢𑁆𑀢𑀦𑁄 𑀆𑀪𑀭𑀡𑀪𑀡𑁆𑀟𑀁 𑀪𑀜𑁆𑀚𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀺𑀝𑁆𑀞𑀓𑀁 𑀓𑀸𑀭𑁂𑀲𑀺 𑀭𑀢𑀦𑀸𑀬𑀢𑀁 𑀯𑀺𑀤𑀢𑁆𑀣𑀺𑀯𑀺𑀢𑁆𑀣𑀺𑀦𑁆𑀦𑀁 𑀘𑀢𑀼𑀭𑀗𑁆𑀕𑀼𑀮𑀼𑀩𑁆𑀩𑁂𑀥𑀁. 𑀢𑀢𑁄 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞 𑀉𑀧𑁆𑀧𑀮𑀳𑀢𑁆𑀣𑀓𑁂 𑀆𑀤𑀸𑀬 𑀘𑁂𑀢𑀺𑀬𑀓𑀭𑀡𑀝𑁆𑀞𑀸𑀦𑀁 𑀕𑀢𑀸. 𑀢𑀲𑁆𑀫𑀺𑀜𑁆𑀘 𑀔𑀡𑁂 𑀏𑀓𑀸 𑀇𑀝𑁆𑀞𑀓𑀸𑀧𑀦𑁆𑀢𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀕𑀘𑁆𑀙𑀫𑀸𑀦𑀸 𑀖𑀝𑀦𑀺𑀝𑁆𑀞𑀓𑀸𑀬 𑀊𑀦𑀸 𑀳𑁄𑀢𑀺, 𑀲𑁂𑀝𑁆𑀞𑀺𑀥𑀻𑀢𑀸 𑀯𑀟𑁆𑀠𑀓𑀺𑀁 𑀆𑀳 𑁋 ‘‘𑀇𑀫𑀁 𑀇𑀝𑁆𑀞𑀓𑀁 𑀏𑀢𑁆𑀣 𑀞𑀧𑁂𑀣𑀸’’𑀢𑀺. ‘‘𑀅𑀫𑁆𑀫, 𑀪𑀤𑁆𑀤𑀓𑁂 𑀓𑀸𑀮𑁂 𑀆𑀕𑀢𑀸𑀲𑀺, 𑀲𑀬𑀫𑁂𑀯 𑀞𑀧𑁂𑀳𑀻’’𑀢𑀺. 𑀲𑀸 𑀆𑀭𑀼𑀬𑁆𑀳 𑀢𑁂𑀮𑁂𑀦 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀧𑀺𑀡𑁆𑀟𑀁 𑀬𑁄𑀚𑁂𑀢𑁆𑀯𑀸 𑀢𑁂𑀦 𑀩𑀦𑁆𑀥𑀦𑁂𑀦 𑀇𑀝𑁆𑀞𑀓𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀉𑀧𑀭𑀺 𑀅𑀝𑁆𑀞𑀳𑀺 𑀉𑀧𑁆𑀧𑀮𑀳𑀢𑁆𑀣𑀓𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀫𑁂 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀼, 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀕𑀫𑀸𑀲𑀺.

𑀅𑀣 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀬𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀧𑀞𑀫𑀁 𑀕𑁂𑀳𑀁 𑀦𑀻𑀢𑀸, 𑀢𑀲𑁆𑀲 𑀢𑀁 𑀆𑀭𑀩𑁆𑀪 𑀲𑀢𑀺 𑀉𑀤𑀧𑀸𑀤𑀺. 𑀦𑀕𑀭𑁂𑀧𑀺 𑀦𑀓𑁆𑀔𑀢𑁆𑀢𑀁 𑀲𑀗𑁆𑀖𑀼𑀝𑁆𑀞𑀁 𑀳𑁄𑀢𑀺. 𑀲𑁄 𑀉𑀧𑀝𑁆𑀞𑀸𑀓𑁂 𑀆𑀳 𑁋 ‘‘𑀢𑀤𑀸 𑀇𑀥 𑀆𑀦𑀻𑀢𑀸 𑀲𑁂𑀝𑁆𑀞𑀺𑀥𑀻𑀢𑀸 𑀅𑀢𑁆𑀣𑀺, 𑀓𑀳𑀁 𑀲𑀸’’𑀢𑀺? ‘‘𑀓𑀼𑀮𑀕𑁂𑀳𑁂 𑀲𑀸𑀫𑀻’’𑀢𑀺. ‘‘𑀆𑀦𑁂𑀣 𑀦𑀁, 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀸 ‘‘𑀓𑀺𑀁, 𑀢𑀸𑀢𑀸, 𑀆𑀕𑀢𑀢𑁆𑀣𑀸’’𑀢𑀺 𑀢𑀸𑀬 𑀧𑀼𑀝𑁆𑀞𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀁𑀲𑀼. ‘‘𑀢𑀸𑀢𑀸, 𑀫𑀬𑀸 𑀆𑀪𑀭𑀡𑀪𑀡𑁆𑀟𑁂𑀦 𑀘𑁂𑀢𑀺𑀬𑀁 𑀧𑀽𑀚𑀺𑀢𑀁, 𑀆𑀪𑀭𑀡𑀁 𑀫𑁂 𑀦𑀢𑁆𑀣𑀻’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀆𑀦𑁂𑀣 𑀦𑀁, 𑀧𑀺𑀴𑀦𑁆𑀥𑀦𑀁 𑀮𑀪𑀺𑀲𑁆𑀲𑀢𑀻𑀢𑀺. 𑀢𑁂 𑀆𑀦𑀬𑀺𑀁𑀲𑀼. 𑀢𑀲𑁆𑀲𑀸 𑀲𑀳 𑀖𑀭𑀧𑀯𑁂𑀲𑀦𑁂𑀦 𑀲𑀓𑀮𑀕𑁂𑀳𑀁 𑀘𑀦𑁆𑀤𑀦𑀕𑀦𑁆𑀥𑁄 𑀘𑁂𑀯 𑀦𑀻𑀮𑀼𑀧𑁆𑀧𑀮𑀕𑀦𑁆𑀥𑁄 𑀘 𑀯𑀸𑀬𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑀁 𑀧𑀼𑀘𑁆𑀙𑀺 𑁋 ‘‘𑀧𑀞𑀫𑀁 𑀢𑀯 𑀲𑀭𑀻𑀭𑀢𑁄 𑀤𑀼𑀕𑁆𑀕𑀦𑁆𑀥𑁄 𑀯𑀸𑀬𑀺, 𑀇𑀤𑀸𑀦𑀺 𑀧𑀦 𑀢𑁂 𑀲𑀭𑀻𑀭𑀢𑁄 𑀘𑀦𑁆𑀤𑀦𑀕𑀦𑁆𑀥𑁄, 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄 𑀯𑀸𑀬𑀢𑀺. 𑀓𑀺𑀁 𑀏𑀢’’𑀦𑁆𑀢𑀺? 𑀲𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀆𑀭𑁄𑀘𑁂𑀲𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 ‘‘𑀦𑀺𑀬𑁆𑀬𑀸𑀦𑀺𑀓𑀁 𑀯𑀢 𑀩𑀼𑀤𑁆𑀥𑀲𑀸𑀲𑀦’’𑀦𑁆𑀢𑀺 𑀧𑀲𑀻𑀤𑀺𑀢𑁆𑀯𑀸 𑀬𑁄𑀚𑀦𑀺𑀓𑀁 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀓𑀫𑁆𑀩𑀮𑀓𑀜𑁆𑀘𑀼𑀓𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀭𑀣𑀘𑀓𑁆𑀓𑀧𑁆𑀧𑀫𑀸𑀡𑁂𑀳𑀺 𑀲𑀼𑀯𑀡𑁆𑀡𑀧𑀤𑀼𑀫𑁂𑀳𑀺 𑀅𑀮𑀗𑁆𑀓𑀭𑀺. 𑀢𑁂𑀲𑀁 𑀤𑁆𑀯𑀸𑀤𑀲𑀳𑀢𑁆𑀣𑀸 𑀑𑀮𑀫𑁆𑀩𑀓𑀸 𑀳𑁄𑀦𑁆𑀢𑀺.

𑀲𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀩𑀸𑀭𑀸𑀡𑀲𑀺𑀢𑁄 𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀲𑁂𑀝𑁆𑀞𑀺𑀓𑀜𑁆𑀜𑀸𑀧𑀺 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀭𑀸𑀚𑀓𑀼𑀮𑁂 𑀚𑁂𑀝𑁆𑀞𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀲𑀼 𑀯𑀬𑀧𑁆𑀧𑀢𑁆𑀢𑁂𑀲𑀼 𑀓𑀼𑀫𑀸𑀭𑀲𑁆𑀲 𑀯𑀲𑀦𑀕𑀸𑀫𑁂 𑀦𑀓𑁆𑀔𑀢𑁆𑀢𑀁 𑀲𑀗𑁆𑀖𑀼𑀝𑁆𑀞𑀁. 𑀲𑁄 𑀫𑀸𑀢𑀭𑀁 𑀆𑀳 𑁋 ‘‘𑀲𑀸𑀝𑀓𑀁 𑀫𑁂, 𑀅𑀫𑁆𑀫, 𑀤𑁂𑀳𑀺, 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀥𑁄𑀢𑀯𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. ‘‘𑀅𑀫𑁆𑀫, 𑀣𑀽𑀮𑀁 𑀇𑀤’’𑀦𑁆𑀢𑀺 𑀆𑀳. 𑀲𑀸 𑀅𑀜𑁆𑀜𑀁 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺, 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺. 𑀅𑀣 𑀦𑀁 𑀫𑀸𑀢𑀸 𑀆𑀳 𑁋 ‘‘𑀢𑀸𑀢, 𑀬𑀸𑀤𑀺𑀲𑁂 𑀕𑁂𑀳𑁂 𑀫𑀬𑀁 𑀚𑀸𑀢𑀸, 𑀦𑀢𑁆𑀣𑀺 𑀦𑁄 𑀇𑀢𑁄 𑀲𑀼𑀔𑀼𑀫𑀢𑀭𑀲𑁆𑀲 𑀧𑀝𑀺𑀮𑀸𑀪𑀸𑀬 𑀧𑀼𑀜𑁆𑀜’’𑀦𑁆𑀢𑀺. ‘‘𑀢𑁂𑀦 𑀳𑀺 𑀮𑀪𑀦𑀝𑁆𑀞𑀸𑀦𑀁 𑀕𑀘𑁆𑀙𑀸𑀫𑀺 𑀅𑀫𑁆𑀫𑀸’’𑀢𑀺. ‘‘𑀧𑀼𑀢𑁆𑀢, 𑀅𑀳𑀁 𑀅𑀚𑁆𑀚𑁂𑀯 𑀢𑀼𑀬𑁆𑀳𑀁 𑀩𑀸𑀭𑀸𑀡𑀲𑀺𑀦𑀕𑀭𑁂 𑀭𑀚𑁆𑀚𑀧𑀝𑀺𑀮𑀸𑀪𑀫𑁆𑀧𑀺 𑀇𑀘𑁆𑀙𑀸𑀫𑀻’’𑀢𑀺. 𑀲𑁄 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀕𑀘𑁆𑀙𑀸𑀫𑀺, 𑀅𑀫𑁆𑀫𑀸’’𑀢𑀺. ‘‘𑀕𑀘𑁆𑀙, 𑀢𑀸𑀢𑀸’’𑀢𑀺. 𑀏𑀯𑀁 𑀓𑀺𑀭𑀲𑁆𑀲𑀸 𑀘𑀺𑀢𑁆𑀢𑀁 𑀅𑀳𑁄𑀲𑀺 𑁋 ‘‘𑀓𑀳𑀁 𑀕𑀫𑀺𑀲𑁆𑀲𑀢𑀺? 𑀇𑀥 𑀯𑀸 𑀏𑀢𑁆𑀣 𑀯𑀸 𑀕𑁂𑀳𑁂 𑀦𑀺𑀲𑀻𑀤𑀺𑀲𑁆𑀲𑀢𑀻’’𑀢𑀺. 𑀲𑁄 𑀧𑀦 𑀧𑀼𑀜𑁆𑀜𑀦𑀺𑀬𑀸𑀫𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀲𑁄 𑀘 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀸𑀮𑀗𑁆𑀓𑀢𑀲𑁆𑀲 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀳𑁄𑀢𑀺.

𑀅𑀫𑀘𑁆𑀘𑀸 𑀭𑀜𑁆𑀜𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀭𑀜𑁆𑀜𑁄 𑀏𑀓𑀸 𑀥𑀻𑀢𑀸𑀯 𑀅𑀢𑁆𑀣𑀺, 𑀧𑀼𑀢𑁆𑀢𑁄 𑀦𑀢𑁆𑀣𑀺, 𑀅𑀭𑀸𑀚𑀓𑀁 𑀭𑀚𑁆𑀚𑀁 𑀦𑀲𑁆𑀲𑀢𑀺, 𑀓𑁄 𑀭𑀸𑀚𑀸 𑀳𑁄𑀢𑀻’’𑀢𑀺? ‘‘𑀢𑁆𑀯𑀁 𑀳𑁄𑀳𑀺, 𑀢𑁆𑀯𑀁 𑀳𑁄𑀳𑀻’’𑀢𑀺 𑀆𑀳𑀁𑀲𑀼. 𑀧𑀼𑀭𑁄𑀳𑀺𑀢𑁄 𑀆𑀳 𑁋 ‘‘𑀩𑀳𑀼𑀁 𑀑𑀮𑁄𑀓𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀨𑀼𑀲𑁆𑀲𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀫𑀸’’𑀢𑀺. 𑀢𑁂 𑀓𑀼𑀫𑀼𑀤𑀯𑀡𑁆𑀡𑁂 𑀘𑀢𑁆𑀢𑀸𑀭𑁄 𑀲𑀺𑀦𑁆𑀥𑀯𑁂 𑀬𑁄𑀚𑁂𑀢𑁆𑀯𑀸 𑀧𑀜𑁆𑀘𑀯𑀺𑀥𑀁 𑀭𑀸𑀚𑀓𑀓𑀼𑀥𑀪𑀡𑁆𑀟𑀁 𑀲𑁂𑀢𑀘𑁆𑀙𑀢𑁆𑀢𑀜𑁆𑀘 𑀭𑀣𑀲𑁆𑀫𑀺𑀁𑀬𑁂𑀯 𑀞𑀧𑁂𑀢𑁆𑀯𑀸 𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀘𑁆𑀙𑀢𑁄 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀲𑀼𑀁. 𑀭𑀣𑁄 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀅𑀳𑁄𑀲𑀺. ‘‘𑀧𑀭𑀺𑀘𑀬𑁂𑀦 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺, 𑀦𑀺𑀯𑀢𑁆𑀢𑁂𑀫𑀸’’𑀢𑀺 𑀓𑁂𑀘𑀺 𑀆𑀳𑀁𑀲𑀼. 𑀧𑀼𑀭𑁄𑀳𑀺𑀢𑁄 ‘‘𑀫𑀸 𑀦𑀺𑀯𑀢𑁆𑀢𑀬𑀺𑀢𑁆𑀣𑀸’’𑀢𑀺 𑀆𑀳. 𑀭𑀣𑁄 𑀓𑀼𑀫𑀸𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀭𑁄𑀳𑀦𑀲𑀚𑁆𑀚𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀧𑀼𑀭𑁄𑀳𑀺𑀢𑁄 𑀧𑀸𑀭𑀼𑀧𑀦𑀓𑀡𑁆𑀡𑀁 𑀅𑀧𑀦𑁂𑀢𑁆𑀯𑀸 𑀧𑀸𑀤𑀢𑀮𑀸𑀦𑀺 𑀑𑀮𑁄𑀓𑁂𑀦𑁆𑀢𑁄, ‘‘𑀢𑀺𑀝𑁆𑀞𑀢𑀼 𑀅𑀬𑀁 𑀤𑀻𑀧𑁄, 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀏𑀲 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀬𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 ‘‘𑀧𑀼𑀦𑀧𑀺 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀣, 𑀧𑀼𑀦𑀧𑀺 𑀧𑀕𑁆𑀕𑀡𑁆𑀳𑀣𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀲𑀺.

𑀅𑀣 𑀓𑀼𑀫𑀸𑀭𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸, ‘‘𑀓𑁂𑀦 𑀓𑀫𑁆𑀫𑁂𑀦 𑀆𑀕𑀢𑀢𑁆𑀣𑀸’’𑀢𑀺 𑀆𑀳. ‘‘𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀭𑀚𑁆𑀚𑀁 𑀧𑀸𑀧𑀼𑀡𑀸𑀢𑀻’’𑀢𑀺. ‘‘𑀭𑀸𑀚𑀸 𑀓𑀳’’𑀦𑁆𑀢𑀺? ‘‘𑀤𑁂𑀯𑀢𑁆𑀢𑀁 𑀕𑀢𑁄, 𑀲𑀸𑀫𑀻’’𑀢𑀺. ‘‘𑀓𑀢𑀺 𑀤𑀺𑀯𑀲𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺? ‘‘𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄’’𑀢𑀺. ‘‘𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀦𑀢𑁆𑀣𑀻’’𑀢𑀺? ‘‘𑀥𑀻𑀢𑀸 𑀅𑀢𑁆𑀣𑀺 𑀤𑁂𑀯, 𑀧𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺. ‘‘𑀓𑀭𑀺𑀲𑁆𑀲𑀸𑀫𑀺 𑀭𑀚𑁆𑀚’’𑀦𑁆𑀢𑀺. 𑀢𑁂 𑀢𑀸𑀯𑀤𑁂𑀯 𑀅𑀪𑀺𑀲𑁂𑀓𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸, 𑀉𑀬𑁆𑀬𑀸𑀦𑀁 𑀆𑀦𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀁 𑀅𑀓𑀁𑀲𑀼. 𑀅𑀣𑀲𑁆𑀲 𑀓𑀢𑀸𑀪𑀺𑀲𑁂𑀓𑀲𑁆𑀲 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀯𑀢𑁆𑀣𑀁 𑀉𑀧𑀳𑀭𑀺𑀁𑀲𑀼. 𑀲𑁄 ‘‘𑀓𑀺𑀫𑀺𑀤𑀁, 𑀢𑀸𑀢𑀸’’𑀢𑀺 𑀆𑀳. ‘‘𑀦𑀺𑀯𑀸𑀲𑀦𑀯𑀢𑁆𑀣𑀁 𑀤𑁂𑀯𑀸’’𑀢𑀺. ‘‘𑀦𑀦𑀼, 𑀢𑀸𑀢𑀸, 𑀣𑀽𑀮’’𑀦𑁆𑀢𑀺? ‘‘𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀪𑁄𑀕𑀯𑀢𑁆𑀣𑁂𑀲𑀼 𑀇𑀢𑁄 𑀲𑀼𑀔𑀼𑀫𑀢𑀭𑀁 𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀭𑀸𑀚𑀸 𑀏𑀯𑀭𑀽𑀧𑀁 𑀦𑀺𑀯𑀸𑀲𑁂𑀲𑀻’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀦 𑀫𑀜𑁆𑀜𑁂 𑀧𑀼𑀜𑁆𑀜𑀯𑀸 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸, 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑀁 𑀆𑀳𑀭𑀣, 𑀮𑀪𑀺𑀲𑁆𑀲𑀸𑀫 𑀯𑀢𑁆𑀣’’𑀦𑁆𑀢𑀺. 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑀁 𑀆𑀳𑀭𑀺𑀁𑀲𑀼. 𑀲𑁄 𑀉𑀝𑁆𑀞𑀸𑀬 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀳𑀢𑁆𑀣𑁂𑀦 𑀉𑀤𑀓𑀁 𑀆𑀤𑀸𑀬 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀅𑀩𑁆𑀪𑀼𑀓𑁆𑀓𑀺𑀭𑀺. 𑀢𑀸𑀯𑀤𑁂𑀯 𑀖𑀦𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞 𑀓𑀧𑁆𑀧𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼. 𑀧𑀼𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀸𑀬𑀁 𑀧𑀘𑁆𑀙𑀺𑀫𑀸𑀬𑀁 𑀉𑀢𑁆𑀢𑀭𑀸𑀬𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀩𑁆𑀪𑀼𑀓𑁆𑀓𑀺𑀭𑀺. 𑀲𑀩𑁆𑀩𑀤𑀺𑀲𑀸𑀲𑀼 𑀅𑀝𑁆𑀞𑀝𑁆𑀞𑀓𑀁 𑀓𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲 𑀓𑀧𑁆𑀧𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼. 𑀲𑁄 𑀏𑀓𑀁 𑀤𑀺𑀩𑁆𑀩𑀤𑀼𑀲𑁆𑀲𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 ‘‘𑀦𑀦𑁆𑀤𑀭𑀜𑁆𑀜𑁄 𑀯𑀺𑀚𑀺𑀢𑁂 𑀲𑀼𑀢𑁆𑀢𑀓𑀦𑁆𑀢𑀺𑀓𑀸 𑀇𑀢𑁆𑀣𑀺𑀬𑁄 𑀫𑀸 𑀲𑀼𑀢𑁆𑀢𑀁 𑀓𑀦𑁆𑀢𑀺𑀁𑀲𑀽𑀢𑀺 𑀏𑀯𑀁 𑀪𑁂𑀭𑀺𑀁 𑀘𑀭𑀸𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺.

𑀏𑀯𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀏𑀓𑀤𑀺𑀯𑀲𑀁 𑀤𑁂𑀯𑀻 𑀭𑀜𑁆𑀜𑁄 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸, ‘‘𑀅𑀳𑁄 𑀢𑀧𑀲𑁆𑀲𑀻’’𑀢𑀺 𑀓𑀸𑀭𑀼𑀜𑁆𑀜𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. ‘‘𑀓𑀺𑀫𑀺𑀤𑀁, 𑀤𑁂𑀯𑀻’’𑀢𑀺 𑀘 𑀧𑀼𑀝𑁆𑀞𑀸 ‘‘𑀅𑀢𑀺𑀫𑀳𑀢𑀻 𑀢𑁂, 𑀤𑁂𑀯, 𑀲𑀫𑁆𑀧𑀢𑁆𑀢𑀺. 𑀅𑀢𑀻𑀢𑁂 𑀩𑀼𑀤𑁆𑀥𑀸𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀓𑀮𑁆𑀬𑀸𑀡𑀁 𑀅𑀓𑀢𑁆𑀣, 𑀇𑀤𑀸𑀦𑀺 𑀅𑀦𑀸𑀕𑀢𑀲𑁆𑀲 𑀧𑀘𑁆𑀘𑀬𑀁 𑀓𑀼𑀲𑀮𑀁 𑀦 𑀓𑀭𑁄𑀣𑀸’’𑀢𑀺 𑀆𑀳. ‘‘𑀓𑀲𑁆𑀲 𑀤𑀲𑁆𑀲𑀸𑀫, 𑀲𑀻𑀮𑀯𑀦𑁆𑀢𑁄 𑀦𑀢𑁆𑀣𑀻’’𑀢𑀺? ‘‘𑀅𑀲𑀼𑀜𑁆𑀜𑁄, 𑀤𑁂𑀯, 𑀚𑀫𑁆𑀩𑀼𑀤𑀻𑀧𑁄 𑀅𑀭𑀳𑀦𑁆𑀢𑁂𑀳𑀺, 𑀢𑀼𑀫𑁆𑀳𑁂 𑀤𑀸𑀦𑀫𑁂𑀯 𑀲𑀚𑁆𑀚𑁂𑀣, 𑀅𑀳𑀁 𑀅𑀭𑀳𑀦𑁆𑀢𑁂 𑀮𑀘𑁆𑀙𑀸𑀫𑀻’’𑀢𑀺 𑀆𑀳. 𑀭𑀸𑀚𑀸 𑀧𑀼𑀦𑀤𑀺𑀯𑀲𑁂 𑀧𑀸𑀘𑀻𑀦𑀤𑁆𑀯𑀸𑀭𑁂 𑀤𑀸𑀦𑀁 𑀲𑀚𑁆𑀚𑀸𑀧𑁂𑀲𑀺. 𑀤𑁂𑀯𑀻 𑀧𑀸𑀢𑁄𑀯 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀉𑀧𑀭𑀺𑀧𑀸𑀲𑀸𑀤𑁂 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑀸 𑀉𑀭𑁂𑀦 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀲𑀘𑁂 𑀏𑀢𑀺𑀲𑁆𑀲𑀁 𑀤𑀺𑀲𑀸𑀬𑀁 𑀅𑀭𑀳𑀦𑁆𑀢𑁄 𑀅𑀢𑁆𑀣𑀺, 𑀲𑁆𑀯𑁂𑀯 𑀆𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀆𑀳. 𑀢𑀲𑁆𑀲𑀁 𑀤𑀺𑀲𑀸𑀬𑀁 𑀅𑀭𑀳𑀦𑁆𑀢𑁄 𑀦𑀸𑀳𑁂𑀲𑀼𑀁, 𑀢𑀁 𑀲𑀓𑁆𑀓𑀸𑀭𑀁 𑀓𑀧𑀡𑀬𑀸𑀘𑀓𑀸𑀦𑀁 𑀅𑀤𑀁𑀲𑀼. 𑀧𑀼𑀦𑀤𑀺𑀯𑀲𑁂 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀢𑀣𑁂𑀯 𑀅𑀓𑀸𑀲𑀺, 𑀧𑀼𑀦𑀤𑀺𑀯𑀲𑁂 𑀧𑀘𑁆𑀙𑀺𑀫𑀤𑁆𑀯𑀸𑀭𑁂. 𑀉𑀢𑁆𑀢𑀭𑀤𑁆𑀯𑀸𑀭𑁂 𑀲𑀚𑁆𑀚𑀺𑀢𑀤𑀺𑀯𑀲𑁂 𑀧𑀦 𑀤𑁂𑀯𑀺𑀬𑀸 𑀢𑀣𑁂𑀯 𑀦𑀺𑀫𑀦𑁆𑀢𑁂𑀦𑁆𑀢𑀺𑀬𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑀸𑀦𑀁 𑀧𑀤𑀼𑀫𑀯𑀢𑀺𑀬𑀸 𑀧𑀼𑀢𑁆𑀢𑀸𑀦𑀁 𑀧𑀜𑁆𑀘𑀲𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀚𑁂𑀝𑁆𑀞𑀓𑁄 𑀫𑀳𑀸𑀧𑀤𑀼𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀸𑀢𑀺𑀓𑁂 𑀆𑀫𑀦𑁆𑀢𑁂𑀲𑀺, ‘‘𑀫𑀸𑀭𑀺𑀲𑀸, 𑀦𑀦𑁆𑀤𑀭𑀸𑀚𑀸, 𑀢𑀼𑀫𑁆𑀳𑁂 𑀦𑀺𑀫𑀦𑁆𑀢𑁂𑀢𑀺, 𑀅𑀥𑀺𑀯𑀸𑀲𑁂𑀣 𑀢𑀲𑁆𑀲𑀸’’𑀢𑀺. 𑀢𑁂 𑀅𑀥𑀺𑀯𑀸𑀲𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀦𑁄𑀢𑀢𑁆𑀢𑀤𑀳𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸, 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀤𑁆𑀯𑀸𑀭𑁂 𑀑𑀢𑀭𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 ‘‘𑀧𑀜𑁆𑀘𑀲𑀢𑀸, 𑀤𑁂𑀯, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀆𑀕𑀢𑀸’’𑀢𑀺 𑀭𑀜𑁆𑀚𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀲𑀤𑁆𑀥𑀺𑀁 𑀤𑁂𑀯𑀺𑀬𑀸 𑀕𑀦𑁆𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸, 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸, 𑀢𑀢𑁆𑀭 𑀦𑁂𑀲𑀁 𑀤𑀸𑀦𑀁 𑀤𑀢𑁆𑀯𑀸, 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀭𑀸𑀚𑀸 𑀲𑀗𑁆𑀖𑀢𑁆𑀣𑁂𑀭𑀲𑁆𑀲, 𑀤𑁂𑀯𑀻, 𑀲𑀗𑁆𑀖𑀦𑀯𑀓𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀅𑀬𑁆𑀬𑀸 𑀧𑀘𑁆𑀘𑀬𑁂𑀳𑀺 𑀦 𑀓𑀺𑀮𑀫𑀺𑀲𑁆𑀲𑀦𑁆𑀢𑀺, 𑀫𑀬𑀁 𑀧𑀼𑀜𑁆𑀜𑁂𑀦 𑀦 𑀳𑀸𑀬𑀺𑀲𑁆𑀲𑀸𑀫. 𑀅𑀫𑁆𑀳𑀸𑀓𑀁 𑀬𑀸𑀯𑀚𑀻𑀯𑀁 𑀇𑀥 𑀦𑀺𑀯𑀸𑀲𑀸𑀬 𑀧𑀝𑀺𑀜𑁆𑀜𑀁 𑀤𑁂𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀧𑀜𑁆𑀘𑀧𑀡𑁆𑀡𑀲𑀸𑀮𑀸𑀲𑀢𑀸𑀦𑀺 𑀧𑀜𑁆𑀘𑀘𑀗𑁆𑀓𑀫𑀦𑀲𑀢𑀸𑀦𑀻𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀦𑀺𑀯𑀸𑀲𑀦𑀝𑁆𑀞𑀸𑀦𑀸𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀯𑀲𑀸𑀧𑁂𑀲𑀼𑀁.

𑀏𑀯𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄. 𑀲𑁄 ‘‘𑀅𑀳𑀁 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑀼𑀁 𑀕𑀘𑁆𑀙𑀸𑀫𑀺, 𑀢𑁆𑀯𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀫𑀸 𑀧𑀫𑀚𑁆𑀚𑀻’’𑀢𑀺 𑀤𑁂𑀯𑀺𑀁 𑀑𑀯𑀤𑀺𑀢𑁆𑀯𑀸 𑀕𑀢𑁄. 𑀢𑀲𑁆𑀫𑀺𑀁 𑀅𑀦𑀸𑀕𑀢𑁂𑀬𑁂𑀯 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀆𑀬𑀼𑀲𑀗𑁆𑀔𑀸𑀭𑀸 𑀔𑀻𑀡𑀸. 𑀫𑀳𑀸𑀧𑀤𑀼𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀺𑀬𑀸𑀫𑀭𑀢𑁆𑀢𑀺𑀁 𑀛𑀸𑀦𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑁂 𑀆𑀮𑀫𑁆𑀩𑀦𑀨𑀮𑀓𑀁 𑀆𑀮𑀫𑁆𑀩𑀺𑀢𑁆𑀯𑀸 𑀞𑀺𑀢𑀓𑁄𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑁂𑀲𑀸𑀧𑀻𑀢𑀺 𑀲𑀩𑁆𑀩𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑀸. 𑀧𑀼𑀦𑀤𑀺𑀯𑀲𑁂 𑀤𑁂𑀯𑀻 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀳𑀭𑀺𑀢𑀽𑀧𑀮𑀺𑀢𑁆𑀢𑀁 𑀓𑀸𑀭𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸, 𑀥𑀽𑀧𑀁 𑀤𑀢𑁆𑀯𑀸 𑀢𑁂𑀲𑀁 𑀆𑀕𑀫𑀦𑀁 𑀑𑀮𑁄𑀓𑀬𑀦𑁆𑀢𑀻 𑀦𑀺𑀲𑀺𑀦𑁆𑀦𑀸 𑀆𑀕𑀫𑀦𑀁 𑀅𑀧𑀲𑁆𑀲𑀦𑁆𑀢𑀻 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙, 𑀢𑀸𑀢, 𑀚𑀸𑀦𑀸𑀳𑀺, 𑀓𑀺𑀁 𑀅𑀬𑁆𑀬𑀸𑀦𑀁 𑀓𑀺𑀜𑁆𑀘𑀺 𑀅𑀨𑀸𑀲𑀼𑀓’’𑀦𑁆𑀢𑀺? 𑀲𑁄 𑀕𑀦𑁆𑀢𑁆𑀯𑀸 𑀫𑀳𑀸𑀧𑀤𑀼𑀫𑀲𑁆𑀲 𑀧𑀡𑁆𑀡𑀲𑀸𑀮𑀸𑀬 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀢𑁆𑀣 𑀅𑀧𑀲𑁆𑀲𑀦𑁆𑀢𑁄 𑀘𑀗𑁆𑀓𑀫𑀦𑀁 𑀕𑀦𑁆𑀢𑁆𑀯𑀸 𑀆𑀮𑀫𑁆𑀩𑀦𑀨𑀮𑀓𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀸𑀮𑁄, 𑀪𑀦𑁆𑀢𑁂’’𑀢𑀺 𑀆𑀳. ‘‘𑀧𑀭𑀺𑀦𑀺𑀩𑁆𑀩𑀼𑀢𑀲𑀭𑀻𑀭𑀁 𑀓𑀺𑀁 𑀓𑀣𑁂𑀲𑁆𑀲𑀢𑀺? 𑀲𑁄 𑀦𑀺𑀤𑁆𑀤𑀸𑀬𑀢𑀺 𑀫𑀜𑁆𑀜𑁂’’𑀢𑀺 𑀕𑀦𑁆𑀢𑁆𑀯𑀸 𑀧𑀺𑀝𑁆𑀞𑀺𑀧𑀸𑀤𑁂 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 𑀧𑀸𑀤𑀸𑀦𑀁 𑀲𑀻𑀢𑀮𑀢𑀸𑀬 𑀘𑁂𑀯 𑀣𑀤𑁆𑀥𑀢𑀸𑀬 𑀘 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀜𑀢𑁆𑀯𑀸, 𑀤𑀼𑀢𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀏𑀯𑀁 𑀢𑀢𑀺𑀬𑀲𑁆𑀲𑀸𑀢𑀺 𑀲𑀩𑁆𑀩𑁂𑀲𑀁 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀜𑀢𑁆𑀯𑀸 𑀭𑀸𑀚𑀓𑀼𑀮𑀁 𑀕𑀢𑁄. ‘‘𑀓𑀳𑀁, 𑀢𑀸𑀢, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸’’𑀢𑀺 𑀧𑀼𑀝𑁆𑀞𑁄 ‘‘𑀧𑀭𑀺𑀦𑀺𑀩𑁆𑀩𑀼𑀢𑀸, 𑀤𑁂𑀯𑀻’’𑀢𑀺 𑀆𑀳. 𑀤𑁂𑀯𑀻 𑀓𑀦𑁆𑀤𑀦𑁆𑀢𑀻 𑀭𑁄𑀤𑀦𑁆𑀢𑀻 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀸𑀕𑀭𑁂𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀸𑀥𑀼𑀓𑀻𑀴𑀺𑀢𑀁 𑀓𑀸𑀭𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀆𑀕𑀢𑀁 𑀤𑁂𑀯𑀺𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀪𑀤𑁆𑀤𑁂, 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀦𑀧𑁆𑀧𑀫𑀚𑁆𑀚𑀺, 𑀦𑀺𑀭𑁄𑀕𑀸 𑀅𑀬𑁆𑀬𑀸’’𑀢𑀺? ‘‘𑀧𑀭𑀺𑀦𑀺𑀩𑁆𑀩𑀼𑀢𑀸 𑀤𑁂𑀯𑀸’’𑀢𑀺. 𑀭𑀸𑀚𑀸 𑀘𑀺𑀦𑁆𑀢𑁂𑀢𑀺 ‘‘𑀏𑀯𑀭𑀽𑀧𑀸𑀦𑀫𑁆𑀧𑀺 𑀧𑀡𑁆𑀟𑀺𑀢𑀸𑀦𑀁 𑀫𑀭𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀫𑁆𑀳𑀸𑀓𑀁 𑀓𑀼𑀢𑁄 𑀫𑁄𑀓𑁆𑀔𑁄’’𑀢𑀺. 𑀲𑁄 𑀦𑀕𑀭𑀁 𑀅𑀕𑀦𑁆𑀢𑁆𑀯𑀸, 𑀉𑀬𑁆𑀬𑀸𑀦𑀫𑁂𑀯 𑀧𑀯𑀺𑀲𑀺𑀢𑁆𑀯𑀸 𑀚𑁂𑀝𑁆𑀞𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, 𑀢𑀲𑁆𑀲 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸, 𑀲𑀬𑀁 𑀲𑀫𑀡𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀤𑁂𑀯𑀻𑀧𑀺 ‘‘𑀇𑀫𑀲𑁆𑀫𑀺𑀁 𑀧𑀩𑁆𑀩𑀚𑀺𑀢𑁂 𑀅𑀳𑀁 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣𑁂𑀯 𑀉𑀬𑁆𑀬𑀸𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀤𑁆𑀯𑁂𑀧𑀺 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼.

𑀢𑁂𑀲𑀼 𑀢𑀢𑁆𑀣𑁂𑀯 𑀯𑀲𑀦𑁆𑀢𑁂𑀲𑀼 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺. 𑀲𑀢𑁆𑀣𑀭𑀺 𑀢𑀢𑁆𑀣 𑀧𑀝𑀺𑀯𑀲𑀦𑁆𑀢𑁂 𑀅𑀬𑀁 𑀧𑀺𑀧𑁆𑀧𑀮𑀺𑀫𑀸𑀡𑀯𑁄 𑀫𑀕𑀥𑀭𑀝𑁆𑀞𑁂 𑀫𑀳𑀸𑀢𑀺𑀢𑁆𑀣𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀓𑀧𑀺𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄. 𑀅𑀬𑀁 𑀪𑀤𑁆𑀤𑀸 𑀓𑀸𑀧𑀺𑀮𑀸𑀦𑀻 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑁂 𑀓𑁄𑀲𑀺𑀬𑀕𑁄𑀢𑁆𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀸. 𑀢𑁂𑀲𑀁 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀫𑀸𑀦𑀸𑀦𑀁 𑀧𑀺𑀧𑁆𑀧𑀮𑀺𑀫𑀸𑀡𑀯𑀲𑁆𑀲 𑀯𑀻𑀲𑀢𑀺𑀫𑁂, 𑀪𑀤𑁆𑀤𑀸𑀬 𑀲𑁄𑀴𑀲𑀫𑁂 𑀯𑀲𑁆𑀲𑁂 𑀲𑀫𑁆𑀧𑀢𑁆𑀢𑁂 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀯𑀬𑀧𑁆𑀧𑀢𑁆𑀢𑁄, 𑀓𑀼𑀮𑀯𑀁𑀲𑁄 𑀦𑀸𑀫 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑁄’’𑀢𑀺 𑀅𑀢𑀺𑀯𑀺𑀬 𑀦𑀺𑀧𑁆𑀧𑀻𑀴𑀬𑀺𑀁𑀲𑀼. 𑀫𑀸𑀡𑀯𑁄 𑀆𑀳 ‘‘𑀫𑀬𑁆𑀳𑀁 𑀲𑁄𑀢𑀧𑀣𑁂 𑀏𑀯𑀭𑀽𑀧𑀁 𑀓𑀣𑀁 𑀫𑀸 𑀓𑀣𑁂𑀣. 𑀅𑀳𑀁 𑀬𑀸𑀯 𑀢𑀼𑀫𑁆𑀳𑁂 𑀥𑀭𑀣, 𑀢𑀸𑀯 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀓𑀢𑀺𑀧𑀸𑀳𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 𑀓𑀣𑀬𑀺𑀁𑀲𑀼. 𑀲𑁄𑀧𑀺 𑀢𑀣𑁂𑀯 𑀧𑀝𑀺𑀓𑁆𑀔𑀺𑀧𑀺. 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀭𑀦𑁆𑀢𑀭𑀁 𑀓𑀣𑁂𑀢𑀺𑀬𑁂𑀯.

𑀫𑀸𑀡𑀯𑁄 ‘‘𑀫𑀫 𑀫𑀸𑀢𑀭𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑀲𑁆𑀲 𑀦𑀺𑀓𑁆𑀔𑀲𑀳𑀲𑁆𑀲𑀁 𑀤𑀢𑁆𑀯𑀸 𑀲𑀩𑁆𑀩𑀓𑀸𑀫𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀓𑀸𑀭𑁂𑀳𑀺 𑀏𑀓𑀁 𑀇𑀢𑁆𑀣𑀺𑀭𑀽𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑀲𑁆𑀲 𑀫𑀚𑁆𑀚𑀦𑀖𑀝𑁆𑀝𑀦𑀸𑀤𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂 𑀢𑀁 𑀭𑀢𑁆𑀢𑀯𑀢𑁆𑀣𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀯𑀡𑁆𑀡𑀲𑀫𑁆𑀧𑀦𑁆𑀦𑁂𑀳𑀺 𑀧𑀼𑀧𑁆𑀨𑁂𑀳𑀺 𑀘𑁂𑀯 𑀦𑀸𑀦𑀸𑀅𑀮𑀗𑁆𑀓𑀸𑀭𑁂𑀳𑀺 𑀘 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀫𑀸𑀢𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 ‘‘𑀅𑀫𑁆𑀫, 𑀏𑀯𑀭𑀽𑀧𑀁 𑀆𑀭𑀫𑁆𑀫𑀡𑀁 𑀮𑀪𑀦𑁆𑀢𑁄 𑀕𑁂𑀳𑁂 𑀯𑀲𑀺𑀲𑁆𑀲𑀸𑀫𑀺 𑀅𑀮𑀪𑀦𑁆𑀢𑁄 𑀦 𑀯𑀲𑀺𑀲𑁆𑀲𑀸𑀫𑀻’’𑀢𑀺. 𑀧𑀡𑁆𑀟𑀺𑀢𑀸 𑀩𑁆𑀭𑀸𑀳𑁆𑀫𑀡𑀻 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄 𑀧𑀼𑀜𑁆𑀜𑀯𑀸 𑀤𑀺𑀦𑁆𑀦𑀤𑀸𑀦𑁄 𑀓𑀢𑀸𑀪𑀺𑀦𑀻𑀳𑀸𑀭𑁄, 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑁄 𑀦 𑀏𑀓𑀓𑁄𑀯 𑀅𑀓𑀸𑀲𑀺, 𑀅𑀤𑁆𑀥𑀸 𑀏𑀢𑁂𑀦 𑀲𑀳𑀓𑀢𑀧𑀼𑀜𑁆𑀜𑀸 𑀲𑀼𑀯𑀡𑁆𑀡𑀭𑀽𑀧𑀧𑀝𑀺𑀪𑀸𑀕𑀸𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀩𑁆𑀩𑀓𑀸𑀫𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀽𑀧𑀓𑀁 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀢𑀸𑀢𑀸, 𑀬𑀢𑁆𑀣 𑀅𑀫𑁆𑀳𑀸𑀓𑀁 𑀚𑀸𑀢𑀺𑀕𑁄𑀢𑁆𑀢𑀪𑁄𑀕𑁂𑀳𑀺 𑀲𑀫𑀸𑀦𑁂 𑀓𑀼𑀮𑁂 𑀏𑀯𑀭𑀽𑀧𑀁 𑀤𑀸𑀭𑀺𑀓𑀁 𑀧𑀲𑁆𑀲𑀣, 𑀇𑀫𑀫𑁂𑀯 𑀲𑀼𑀯𑀡𑁆𑀡𑀭𑀽𑀧𑀓𑀁 𑀧𑀡𑁆𑀡𑀸𑀓𑀸𑀭𑀁 𑀓𑀢𑁆𑀯𑀸 𑀏𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺.

𑀢𑁂 ‘‘𑀅𑀫𑁆𑀳𑀸𑀓𑀁 𑀦𑀸𑀫 𑀏𑀢𑀁 𑀓𑀫𑁆𑀫’’𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀓𑀢𑁆𑀣 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀤𑁆𑀤𑀭𑀝𑁆𑀞𑀁 𑀦𑀸𑀫 𑀇𑀢𑁆𑀣𑀸𑀓𑀭𑁄, 𑀫𑀤𑁆𑀤𑀭𑀝𑁆𑀞𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑀁 𑀅𑀕𑀫𑀁𑀲𑀼. 𑀢𑀢𑁆𑀣 𑀢𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀦𑁆𑀳𑀸𑀦𑀢𑀺𑀢𑁆𑀣𑁂 𑀞𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀪𑀤𑁆𑀤𑀸𑀬 𑀥𑀸𑀢𑀻 𑀪𑀤𑁆𑀤𑀁 𑀦𑁆𑀳𑀸𑀧𑁂𑀢𑁆𑀯𑀸, 𑀅𑀮𑀗𑁆𑀓𑀭𑀺𑀢𑁆𑀯𑀸, 𑀲𑀺𑀭𑀺𑀕𑀩𑁆𑀪𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀬𑀁 𑀦𑁆𑀳𑀸𑀬𑀺𑀢𑀼𑀁 𑀉𑀤𑀓𑀢𑀺𑀢𑁆𑀣𑀁 𑀕𑀢𑀸 𑀢𑀢𑁆𑀣 𑀢𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀤𑀺𑀲𑁆𑀯𑀸 ‘‘𑀓𑀺𑀲𑁆𑀲𑀸𑀬𑀁 𑀅𑀯𑀺𑀦𑀻𑀢𑀸 𑀇𑀥𑀸𑀕𑀦𑁆𑀢𑁆𑀯𑀸 𑀞𑀺𑀢𑀸’’𑀢𑀺 𑀧𑀺𑀝𑁆𑀞𑀺𑀧𑀲𑁆𑀲𑁂 𑀧𑀳𑀭𑀺𑀢𑁆𑀯𑀸 ‘‘𑀲𑀼𑀯𑀡𑁆𑀡𑀭𑀽𑀧𑀓’’𑀦𑁆𑀢𑀺 𑀜𑀢𑁆𑀯𑀸 ‘‘𑀅𑀬𑁆𑀬𑀥𑀻𑀢𑀸 𑀫𑁂’’𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀲𑀺𑀁, ‘‘𑀅𑀬𑀁 𑀧𑀦 𑀫𑁂 𑀅𑀬𑁆𑀬𑀥𑀻𑀢𑀸𑀬 𑀦𑀺𑀯𑀸𑀲𑀦𑀧𑀝𑀺𑀕𑁆𑀕𑀸𑀳𑀺𑀓𑀸𑀬𑀸𑀧𑀺 𑀅𑀲𑀤𑀺𑀲𑀸’’𑀢𑀺 𑀆𑀳. 𑀅𑀣 𑀦𑀁 𑀢𑁂 𑀫𑀦𑀼𑀲𑁆𑀲𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀏𑀯𑀭𑀽𑀧𑀸 𑀢𑁂 𑀲𑀸𑀫𑀺𑀥𑀻𑀢𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀓𑀺𑀁 𑀏𑀲𑀸, 𑀇𑀫𑀸𑀬 𑀲𑀼𑀯𑀡𑁆𑀡𑀧𑀝𑀺𑀫𑀸𑀬 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀫𑀬𑁆𑀳𑀁 𑀅𑀬𑁆𑀬𑀥𑀻𑀢𑀸 𑀅𑀪𑀺𑀭𑀽𑀧𑀢𑀭𑀸, 𑀤𑁆𑀯𑀸𑀤𑀲𑀳𑀢𑁆𑀣𑁂 𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑀸𑀬 𑀧𑀤𑀻𑀧𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀭𑀻𑀭𑁄𑀪𑀸𑀲𑁂𑀦𑁂𑀯 𑀢𑀫𑀁 𑀯𑀺𑀥𑀫𑀢𑀻’’𑀢𑀺. ‘‘𑀢𑁂𑀦 𑀳𑀺 𑀆𑀕𑀘𑁆𑀙𑀸’’𑀢𑀺 𑀢𑀁 𑀔𑀼𑀚𑁆𑀚𑀁 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀽𑀧𑀓𑀁 𑀭𑀣𑁂 𑀆𑀭𑁄𑀧𑁂𑀢𑁆𑀯𑀸 𑀓𑁄𑀲𑀺𑀬𑀕𑁄𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀆𑀕𑀫𑀦𑀁 𑀦𑀺𑀯𑁂𑀤𑀬𑀺𑀁𑀲𑀼.

𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀫𑀕𑀥𑀭𑀝𑁆𑀞𑁂 𑀫𑀳𑀸𑀢𑀺𑀢𑁆𑀣𑀕𑀸𑀫𑁂 𑀓𑀧𑀺𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑀢𑁄’’𑀢𑀺. ‘‘𑀓𑀺𑀁 𑀓𑀸𑀭𑀡𑀸 𑀆𑀕𑀢𑀸’’𑀢𑀺? ‘‘𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦𑀸’’𑀢𑀺. ‘‘𑀓𑀮𑁆𑀬𑀸𑀡𑀁, 𑀢𑀸𑀢𑀸, 𑀲𑀫𑀚𑀸𑀢𑀺𑀕𑁄𑀢𑁆𑀢𑀯𑀺𑀪𑀯𑁄 𑀅𑀫𑁆𑀳𑀸𑀓𑀁 𑀩𑁆𑀭𑀸𑀳𑁆𑀫𑀡𑁄, 𑀤𑀲𑁆𑀲𑀸𑀫𑀺 𑀤𑀸𑀭𑀺𑀓’’𑀦𑁆𑀢𑀺 𑀧𑀡𑁆𑀡𑀸𑀓𑀸𑀭𑀁 𑀕𑀡𑁆𑀳𑀺. 𑀢𑁂 𑀓𑀧𑀺𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼 ‘‘𑀮𑀤𑁆𑀥𑀸 𑀤𑀸𑀭𑀺𑀓𑀸, 𑀓𑀢𑁆𑀢𑀩𑁆𑀩𑀁 𑀓𑀭𑁄𑀣𑀸’’𑀢𑀺. 𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀧𑀺𑀧𑁆𑀧𑀮𑀺𑀫𑀸𑀡𑀯𑀲𑁆𑀲 𑀆𑀭𑁄𑀘𑀬𑀺𑀁𑀲𑀼 ‘‘𑀮𑀤𑁆𑀥𑀸 𑀓𑀺𑀭 𑀤𑀸𑀭𑀺𑀓𑀸’’𑀢𑀺. 𑀫𑀸𑀡𑀯𑁄 ‘‘𑀅𑀳𑀁 ‘𑀦 𑀮𑀪𑀺𑀲𑁆𑀲𑀦𑁆𑀢𑀻’𑀢𑀺 𑀘𑀺𑀦𑁆𑀢𑁂𑀲𑀺𑀁, 𑀇𑀫𑁂 ‘𑀮𑀤𑁆𑀥𑀸’𑀢𑀺 𑀯𑀤𑀦𑁆𑀢𑀺, 𑀅𑀦𑀢𑁆𑀣𑀺𑀓𑁄 𑀳𑀼𑀢𑁆𑀯𑀸 𑀧𑀡𑁆𑀡𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀭𑀳𑁄𑀕𑀢𑁄 𑀧𑀡𑁆𑀡𑀁 𑀮𑀺𑀔𑀺 ‘‘𑀪𑀤𑁆𑀤𑀸, 𑀅𑀢𑁆𑀢𑀦𑁄 𑀚𑀸𑀢𑀺𑀕𑁄𑀢𑁆𑀢𑀪𑁄𑀕𑀸𑀦𑀼𑀭𑀽𑀧𑀁 𑀖𑀭𑀸𑀯𑀸𑀲𑀁 𑀮𑀪𑀢𑀼, 𑀅𑀳𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀻 𑀅𑀳𑁄𑀲𑀻’’𑀢𑀺. 𑀪𑀤𑁆𑀤𑀸𑀧𑀺 ‘‘𑀅𑀲𑀼𑀓𑀲𑁆𑀲 𑀓𑀺𑀭 𑀫𑀁 𑀤𑀸𑀢𑀼𑀓𑀸𑀫𑁄’’𑀢𑀺 𑀲𑀼𑀢𑁆𑀯𑀸 ‘‘𑀧𑀡𑁆𑀡𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀭𑀳𑁄𑀕𑀢𑀸 𑀧𑀡𑁆𑀡𑀁 𑀮𑀺𑀔𑀺 ‘‘𑀅𑀬𑁆𑀬𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀚𑀸𑀢𑀺𑀕𑁄𑀢𑁆𑀢𑀪𑁄𑀕𑀸𑀦𑀼𑀭𑀽𑀧𑀁 𑀖𑀭𑀸𑀯𑀸𑀲𑀁 𑀮𑀪𑀢𑀼, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀻’’𑀢𑀺. 𑀤𑁆𑀯𑁂𑀧𑀺 𑀧𑀡𑁆𑀡𑀸𑀦𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀫𑀸𑀕𑀘𑁆𑀙𑀺𑀁𑀲𑀼. ‘‘𑀇𑀤𑀁 𑀓𑀲𑁆𑀲 𑀧𑀡𑁆𑀡’’𑀦𑁆𑀢𑀺? ‘‘𑀧𑀺𑀧𑁆𑀧𑀮𑀺𑀫𑀸𑀡𑀯𑁂𑀦 𑀪𑀤𑁆𑀤𑀸𑀬 𑀧𑀳𑀺𑀢’’𑀦𑁆𑀢𑀺. ‘‘𑀇𑀤𑀁 𑀓𑀲𑁆𑀲𑀸’’𑀢𑀺? ‘‘𑀪𑀤𑁆𑀤𑀸𑀬 𑀧𑀺𑀧𑁆𑀧𑀮𑀺𑀫𑀸𑀡𑀯𑀲𑁆𑀲 𑀧𑀳𑀺𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀢𑁂 𑀤𑁆𑀯𑁂𑀧𑀺 𑀯𑀸𑀘𑁂𑀢𑁆𑀯𑀸 ‘‘𑀧𑀲𑁆𑀲𑀣 𑀤𑀸𑀭𑀓𑀸𑀦𑀁 𑀓𑀫𑁆𑀫’’𑀦𑁆𑀢𑀺 𑀨𑀸𑀮𑁂𑀢𑁆𑀯𑀸 𑀅𑀭𑀜𑁆𑀜𑁂 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀢𑀁𑀲𑀫𑀸𑀦𑀁 𑀧𑀡𑁆𑀡𑀁 𑀮𑀺𑀔𑀺𑀢𑁆𑀯𑀸 𑀇𑀢𑁄 𑀏𑀢𑁆𑀢𑁄 𑀘 𑀧𑁂𑀲𑁂𑀲𑀼𑀁. 𑀇𑀢𑀺 𑀓𑀼𑀫𑀸𑀭𑀲𑁆𑀲 𑀓𑀼𑀫𑀸𑀭𑀺𑀓𑀸𑀬 𑀘 𑀲𑀤𑀺𑀲𑀁 𑀧𑀡𑁆𑀡𑀁 𑀮𑁄𑀓𑀲𑁆𑀲𑀸𑀤𑀭𑀳𑀺𑀢𑀫𑁂𑀯𑀸𑀢𑀺 𑀅𑀦𑀺𑀘𑁆𑀙𑀫𑀸𑀦𑀸𑀦𑀁𑀬𑁂𑀯 𑀤𑁆𑀯𑀺𑀦𑁆𑀦𑀁 𑀲𑀫𑀸𑀕𑀫𑁄 𑀅𑀳𑁄𑀲𑀺.

𑀢𑀁 𑀤𑀺𑀯𑀲𑀁𑀬𑁂𑀯 𑀧𑀺𑀧𑁆𑀧𑀮𑀺𑀫𑀸𑀡𑀯𑁄 𑀏𑀓𑀁 𑀧𑀼𑀧𑁆𑀨𑀤𑀸𑀫𑀁 𑀕𑀦𑁆𑀣𑀸𑀧𑁂𑀲𑀺 𑀪𑀤𑁆𑀤𑀸𑀧𑀺. 𑀢𑀸𑀦𑀺 𑀲𑀬𑀦𑀫𑀚𑁆𑀛𑁂 𑀞𑀧𑁂𑀲𑀼𑀁 𑀪𑀼𑀢𑁆𑀢𑀲𑀸𑀬𑀫𑀸𑀲𑀸 𑀉𑀪𑁄𑀧𑀺 ‘‘𑀲𑀬𑀦𑀁 𑀆𑀭𑀼𑀳𑀺𑀲𑁆𑀲𑀸𑀫𑀸’’𑀢𑀺 𑀫𑀸𑀡𑀯𑁄 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀬𑀦𑀁 𑀆𑀭𑀼𑀳𑀺. 𑀪𑀤𑁆𑀤𑀸 𑀯𑀸𑀫𑀧𑀲𑁆𑀲𑁂𑀦 𑀅𑀪𑀺𑀭𑀼𑀳𑀺𑀢𑁆𑀯𑀸 𑀆𑀳 𑁋 ‘‘𑀬𑀲𑁆𑀲 𑀧𑀲𑁆𑀲𑁂 𑀧𑀼𑀧𑁆𑀨𑀸𑀦𑀺 𑀫𑀺𑀮𑀸𑀬𑀦𑁆𑀢𑀺, 𑀢𑀲𑁆𑀲 𑀭𑀸𑀕𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑀺𑀚𑀸𑀦𑀺𑀲𑁆𑀲𑀸𑀫, 𑀇𑀫𑀁 𑀧𑀼𑀧𑁆𑀨𑀤𑀸𑀫𑀁 𑀦 𑀅𑀮𑁆𑀮𑀺𑀬𑀺𑀢𑀩𑁆𑀩’’𑀦𑁆𑀢𑀺. 𑀢𑁂 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀲𑀭𑀻𑀭𑀲𑀫𑁆𑀨𑀲𑁆𑀲𑀪𑀬𑁂𑀦 𑀢𑀺𑀬𑀸𑀫𑀭𑀢𑁆𑀢𑀺𑀁 𑀦𑀺𑀤𑁆𑀤𑀁 𑀅𑀦𑁄𑀓𑁆𑀓𑀫𑀦𑁆𑀢𑀸𑀯 𑀯𑀻𑀢𑀺𑀦𑀸𑀫𑁂𑀦𑁆𑀢𑀺, 𑀤𑀺𑀯𑀸 𑀧𑀦 𑀳𑀲𑀺𑀢𑀫𑀢𑁆𑀢𑀫𑁆𑀧𑀺 𑀦𑀸𑀳𑁄𑀲𑀺. 𑀢𑁂 𑀮𑁄𑀓𑀸𑀫𑀺𑀲𑁂𑀦 𑀅𑀲𑀁𑀲𑀝𑁆𑀞𑀸 𑀬𑀸𑀯 𑀫𑀸𑀢𑀸𑀧𑀺𑀢𑀭𑁄 𑀥𑀭𑀦𑁆𑀢𑀺, 𑀢𑀸𑀯 𑀓𑀼𑀝𑀼𑀫𑁆𑀩𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀢𑁂𑀲𑀼 𑀓𑀸𑀮𑀗𑁆𑀓𑀢𑁂𑀲𑀼 𑀯𑀺𑀘𑀸𑀭𑀬𑀺𑀁𑀲𑀼. 𑀫𑀳𑀢𑀻 𑀫𑀸𑀡𑀯𑀲𑁆𑀲 𑀲𑀫𑁆𑀧𑀢𑁆𑀢𑀺 𑁋 𑀏𑀓𑀤𑀺𑀯𑀲𑀁 𑀲𑀭𑀻𑀭𑀁 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀙𑀟𑁆𑀟𑁂𑀢𑀩𑁆𑀩𑀁 𑀲𑀼𑀯𑀡𑁆𑀡𑀘𑀼𑀡𑁆𑀡𑀁 𑀏𑀯 𑀫𑀕𑀥𑀦𑀸𑀴𑀺𑀬𑀸 𑀤𑁆𑀯𑀸𑀤𑀲𑀦𑀸𑀴𑀺𑀫𑀢𑁆𑀢𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀬𑀦𑁆𑀢𑀩𑀤𑁆𑀥𑀸𑀦𑀺 𑀲𑀝𑁆𑀞𑀺𑀫𑀳𑀸𑀢𑀴𑀸𑀓𑀸𑀦𑀺, 𑀓𑀫𑁆𑀫𑀦𑁆𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁄, 𑀅𑀦𑀼𑀭𑀸𑀥𑀧𑀼𑀭𑀧𑀫𑀸𑀡𑀸 𑀘𑀼𑀤𑁆𑀤𑀲 𑀕𑀸𑀫𑀸, 𑀘𑀼𑀤𑁆𑀤𑀲 𑀳𑀢𑁆𑀣𑀸𑀦𑀻𑀓𑀸𑀦𑀺, 𑀘𑀼𑀤𑁆𑀤𑀲 𑀅𑀲𑁆𑀲𑀸𑀦𑀻𑀓𑀸𑀦𑀺, 𑀘𑀼𑀤𑁆𑀤𑀲 𑀭𑀣𑀸𑀦𑀻𑀓𑀸𑀦𑀺.

𑀲𑁄 𑀏𑀓𑀤𑀺𑀯𑀲𑀁 𑀅𑀮𑀗𑁆𑀓𑀢𑀅𑀲𑁆𑀲𑀁 𑀆𑀭𑀼𑀬𑁆𑀳 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀓𑀫𑁆𑀫𑀦𑁆𑀢𑀁 𑀕𑀦𑁆𑀢𑁆𑀯𑀸 𑀔𑁂𑀢𑁆𑀢𑀓𑁄𑀝𑀺𑀬𑀁 𑀞𑀺𑀢𑁄 𑀦𑀗𑁆𑀕𑀮𑁂𑀳𑀺 𑀪𑀺𑀦𑁆𑀦𑀝𑁆𑀞𑀸𑀦𑀢𑁄 𑀓𑀸𑀓𑀸𑀤𑀬𑁄 𑀲𑀓𑀼𑀡𑁂 𑀕𑀡𑁆𑀟𑀼𑀧𑁆𑀧𑀸𑀤𑀸𑀤𑀺𑀧𑀸𑀡𑀓𑁂 𑀉𑀤𑁆𑀥𑀭𑀺𑀢𑁆𑀯𑀸 𑀔𑀸𑀤𑀦𑁆𑀢𑁂 𑀤𑀺𑀲𑁆𑀯𑀸, ‘‘𑀢𑀸𑀢𑀸, 𑀇𑀫𑁂 𑀓𑀺𑀁 𑀔𑀸𑀤𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀕𑀡𑁆𑀟𑀼𑀧𑁆𑀧𑀸𑀤𑁂, 𑀅𑀬𑁆𑀬𑀸’’𑀢𑀺. ‘‘𑀏𑀢𑁂𑀳𑀺 𑀓𑀢𑀁 𑀧𑀸𑀧𑀁 𑀓𑀲𑁆𑀲 𑀳𑁄𑀢𑀻’’𑀢𑀺? ‘‘𑀢𑀼𑀫𑁆𑀳𑀸𑀓𑀁, 𑀅𑀬𑁆𑀬𑀸’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀏𑀢𑁂𑀳𑀺 𑀓𑀢𑀁 𑀧𑀸𑀧𑀁 𑀫𑀬𑁆𑀳𑀁 𑀳𑁄𑀢𑀺, 𑀓𑀺𑀁 𑀫𑁂 𑀓𑀭𑀺𑀲𑁆𑀲𑀢𑀺 𑀲𑀢𑁆𑀢𑀅𑀲𑀻𑀢𑀺𑀓𑁄𑀝𑀺𑀥𑀦𑀁, 𑀓𑀺𑀁 𑀤𑁆𑀯𑀸𑀤𑀲𑀬𑁄𑀚𑀦𑁄 𑀓𑀫𑁆𑀫𑀦𑁆𑀢𑁄, 𑀓𑀺𑀁 𑀬𑀦𑁆𑀢𑀩𑀤𑁆𑀥𑀸𑀦𑀺 𑀢𑀴𑀸𑀓𑀸𑀦𑀺, 𑀓𑀺𑀁 𑀘𑀼𑀤𑁆𑀤𑀲 𑀕𑀸𑀫𑀸, 𑀲𑀩𑁆𑀩𑀫𑁂𑀢𑀁 𑀪𑀤𑁆𑀤𑀸𑀬 𑀓𑀸𑀧𑀺𑀮𑀸𑀦𑀺𑀬𑀸 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.

𑀪𑀤𑁆𑀤𑀸𑀧𑀺 𑀓𑀸𑀧𑀺𑀮𑀸𑀦𑀻 𑀢𑀲𑁆𑀫𑀺𑀁 𑀔𑀡𑁂 𑀅𑀦𑁆𑀢𑀭𑀯𑀢𑁆𑀣𑀼𑀫𑁆𑀳𑀺 𑀢𑀬𑁄 𑀢𑀺𑀮𑀓𑀼𑀫𑁆𑀪𑁂 𑀧𑀢𑁆𑀣𑀭𑀸𑀧𑁂𑀢𑁆𑀯𑀸 𑀥𑀸𑀢𑀻𑀳𑀺 𑀧𑀭𑀺𑀯𑀼𑀢𑀸 𑀦𑀺𑀲𑀺𑀦𑁆𑀦𑀸 𑀓𑀸𑀓𑁂 𑀢𑀺𑀮𑀧𑀸𑀡𑀓𑁂 𑀔𑀸𑀤𑀫𑀸𑀦𑁂 𑀤𑀺𑀲𑁆𑀯𑀸, ‘‘𑀅𑀫𑁆𑀫𑀸, 𑀓𑀺𑀁 𑀇𑀫𑁂 𑀔𑀸𑀤𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀧𑀸𑀡𑀓𑁂 𑀅𑀬𑁆𑀬𑁂’’𑀢𑀺. ‘‘𑀅𑀓𑀼𑀲𑀮𑀁 𑀓𑀲𑁆𑀲 𑀳𑁄𑀢𑀻’’𑀢𑀺? ‘‘𑀢𑀼𑀫𑁆𑀳𑀸𑀓𑀁, 𑀅𑀬𑁆𑀬𑁂’’𑀢𑀺. 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀘𑀢𑀼𑀳𑀢𑁆𑀣𑀯𑀢𑁆𑀣𑀁 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀬𑀤𑀺 𑀧𑀦𑁂𑀢𑀁 𑀏𑀢𑁆𑀢𑀓𑁂𑀦 𑀚𑀦𑁂𑀦 𑀓𑀢𑀁 𑀅𑀓𑀼𑀲𑀮𑀁 𑀫𑀬𑁆𑀳𑀁 𑀳𑁄𑀢𑀺, 𑀪𑀯𑀲𑀳𑀲𑁆𑀲𑁂𑀦𑀧𑀺 𑀯𑀝𑁆𑀝𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑀸. 𑀅𑀬𑁆𑀬𑀧𑀼𑀢𑁆𑀢𑁂 𑀆𑀕𑀢𑀫𑀢𑁆𑀢𑁂𑀬𑁂𑀯 𑀲𑀩𑁆𑀩𑀁 𑀢𑀲𑁆𑀲 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.

𑀫𑀸𑀡𑀯𑁄 𑀆𑀕𑀦𑁆𑀢𑁆𑀯𑀸, 𑀦𑁆𑀳𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀦𑁄 𑀅𑀦𑀼𑀘𑁆𑀙𑀯𑀺𑀓𑀁 𑀪𑁄𑀚𑀦𑀁 𑀲𑀚𑁆𑀚𑀬𑀺𑀁𑀲𑀼. 𑀤𑁆𑀯𑁂𑀧𑀺 𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑀺𑀚𑀦𑁂 𑀦𑀺𑀓𑁆𑀔𑀦𑁆𑀢𑁂 𑀭𑀳𑁄𑀕𑀢𑀸 𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁄 𑀫𑀸𑀡𑀯𑁄 𑀪𑀤𑁆𑀤𑀁 𑀆𑀳 𑁋 ‘‘𑀪𑀤𑁆𑀤𑁂, 𑀇𑀫𑀁 𑀖𑀭𑀁 𑀆𑀕𑀘𑁆𑀙𑀦𑁆𑀢𑀻 𑀢𑁆𑀯𑀁 𑀓𑀺𑀢𑁆𑀢𑀓𑀁 𑀥𑀦𑀁 𑀆𑀳𑀭𑀲𑀻’’𑀢𑀺? ‘‘𑀧𑀜𑁆𑀘𑀧𑀡𑁆𑀡𑀸𑀲 𑀲𑀓𑀝𑀲𑀳𑀲𑁆𑀲𑀸𑀦𑀺, 𑀅𑀬𑁆𑀬𑀸’’𑀢𑀺. ‘‘𑀢𑀁 𑀲𑀩𑁆𑀩𑀁, 𑀬𑀸 𑀘 𑀇𑀫𑀲𑁆𑀫𑀺𑀁 𑀖𑀭𑁂 𑀲𑀢𑁆𑀢𑀅𑀲𑀻𑀢𑀺𑀓𑁄𑀝𑀺𑀬𑁄 𑀬𑀦𑁆𑀢𑀩𑀤𑁆𑀥𑀲𑀝𑁆𑀞𑀺𑀢𑀴𑀸𑀓𑀸𑀤𑀺𑀪𑁂𑀤𑀸 𑀘 𑀲𑀫𑁆𑀧𑀢𑁆𑀢𑀺 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀜𑁆𑀘 𑀢𑀼𑀬𑁆𑀳𑀁𑀬𑁂𑀯 𑀦𑀺𑀬𑁆𑀬𑀸𑀤𑁂𑀫𑀻’’𑀢𑀺. ‘‘𑀢𑀼𑀫𑁆𑀳𑁂 𑀧𑀦 𑀓𑀳𑀁 𑀕𑀘𑁆𑀙𑀣, 𑀅𑀬𑁆𑀬𑀸’’𑀢𑀺? ‘‘𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀬𑁆𑀬, 𑀅𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁𑀬𑁂𑀯 𑀆𑀕𑀫𑀦𑀁 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀺𑀦𑁆𑀦𑀸. 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀲𑀁 𑀆𑀤𑀺𑀢𑁆𑀢𑀧𑀡𑁆𑀡𑀓𑀼𑀝𑀺 𑀯𑀺𑀬 𑀢𑀬𑁄 𑀪𑀯𑀸 𑀉𑀧𑀝𑁆𑀞𑀳𑀺𑀁𑀲𑀼. 𑀢𑁂 𑀅𑀦𑁆𑀢𑀭𑀸𑀧𑀡𑀢𑁄 𑀓𑀲𑀸𑀬𑀭𑀲𑀧𑀻𑀢𑀸𑀦𑀺 𑀯𑀢𑁆𑀣𑀸𑀦𑀺 𑀫𑀢𑁆𑀢𑀺𑀓𑀸𑀧𑀢𑁆𑀢𑁂 𑀘 𑀆𑀳𑀭𑀸𑀧𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀓𑁂𑀲𑁂 𑀑𑀭𑁄𑀧𑁂𑀢𑁆𑀯𑀸 ‘‘𑀬𑁂 𑀮𑁄𑀓𑁂 𑀅𑀭𑀳𑀦𑁆𑀢𑁄, 𑀢𑁂 𑀉𑀤𑁆𑀤𑀺𑀲𑁆𑀲 𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸’’𑀢𑀺 𑀧𑀩𑁆𑀩𑀚𑀺𑀢𑁆𑀯𑀸, 𑀣𑀯𑀺𑀓𑀸𑀲𑀼 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀁𑀲𑁂 𑀮𑀕𑁆𑀕𑁂𑀢𑁆𑀯𑀸 𑀧𑀸𑀲𑀸𑀤𑀢𑁄 𑀑𑀢𑀭𑀺𑀁𑀲𑀼. 𑀕𑁂𑀳𑁂 𑀤𑀸𑀲𑁂𑀲𑀼 𑀯𑀸 𑀓𑀫𑁆𑀫𑀓𑀭𑁂𑀲𑀼 𑀯𑀸 𑀦 𑀓𑁄𑀘𑀺 𑀲𑀜𑁆𑀚𑀸𑀦𑀺.

𑀅𑀣 𑀦𑁂 𑀩𑁆𑀭𑀸𑀳𑁆𑀫𑀡𑀕𑀸𑀫𑀢𑁄 𑀦𑀺𑀓𑁆𑀔𑀫𑁆𑀫 𑀤𑀸𑀲𑀕𑀸𑀫𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑁂 𑀆𑀓𑀧𑁆𑀧𑀓𑀼𑀢𑁆𑀢𑀯𑀲𑁂𑀦 𑀤𑀸𑀲𑀕𑀸𑀫𑀯𑀸𑀲𑀺𑀦𑁄 𑀲𑀜𑁆𑀚𑀸𑀦𑀺𑀁𑀲𑀼. 𑀢𑁂 𑀭𑁄𑀤𑀦𑁆𑀢𑀸 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 ‘‘𑀓𑀺𑀁, 𑀅𑀫𑁆𑀳𑁂, 𑀅𑀦𑀸𑀣𑁂 𑀓𑀭𑁄𑀣 𑀅𑀬𑁆𑀬𑀸’’𑀢𑀺 𑀆𑀳𑀁𑀲𑀼. ‘‘𑀫𑀬𑀁, ‘𑀪𑀡𑁂, 𑀆𑀤𑀺𑀢𑁆𑀢𑀧𑀡𑁆𑀡𑀲𑀸𑀮𑀸 𑀯𑀺𑀬 𑀢𑀬𑁄 𑀪𑀯𑀸’𑀢𑀺 𑀧𑀩𑁆𑀩𑀚𑀺𑀫𑁆𑀳𑀸. 𑀲𑀘𑁂 𑀢𑀼𑀫𑁆𑀳𑁂𑀲𑀼 𑀏𑀓𑁂𑀓𑀁 𑀪𑀼𑀚𑀺𑀲𑁆𑀲𑀁 𑀓𑀭𑁄𑀫, 𑀯𑀲𑁆𑀲𑀲𑀢𑀫𑁆𑀧𑀺 𑀦𑀧𑁆𑀧𑀳𑁄𑀢𑀺. 𑀢𑀼𑀫𑁆𑀳𑁂𑀯 𑀢𑀼𑀫𑁆𑀳𑀸𑀓𑀁 𑀲𑀻𑀲𑀁 𑀥𑁄𑀯𑀺𑀢𑁆𑀯𑀸 𑀪𑀼𑀚𑀺𑀲𑁆𑀲𑀸 𑀳𑀼𑀢𑁆𑀯𑀸 𑀚𑀻𑀯𑀣𑀸’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀭𑁄𑀤𑀦𑁆𑀢𑀸𑀦𑀁𑀬𑁂𑀯 𑀧𑀓𑁆𑀓𑀫𑀺𑀁𑀲𑀼.

𑀣𑁂𑀭𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁, 𑀪𑀤𑁆𑀤𑀸 𑀓𑀸𑀧𑀺𑀮𑀸𑀦𑀻, 𑀲𑀓𑀮𑀚𑀫𑁆𑀩𑀼𑀤𑀻𑀧𑀕𑁆𑀖𑀦𑀺𑀓𑀸 𑀇𑀢𑁆𑀣𑀻 𑀫𑀬𑁆𑀳𑀁 𑀧𑀘𑁆𑀙𑀢𑁄 𑀆𑀕𑀘𑁆𑀙𑀢𑀺, 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀓𑁄𑀘𑀺𑀤𑁂𑀯 𑀏𑀯𑀁 𑀘𑀺𑀦𑁆𑀢𑁂𑀬𑁆𑀬 ‘𑀇𑀫𑁂 𑀧𑀩𑁆𑀩𑀚𑀺𑀢𑀸𑀧𑀺 𑀯𑀺𑀦𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀭𑁄𑀦𑁆𑀢𑀻’𑀢𑀺, 𑀓𑁄𑀘𑀺 𑀧𑀸𑀧𑁂𑀦 𑀫𑀦𑀁 𑀧𑀤𑀽𑀲𑁂𑀢𑁆𑀯𑀸 𑀅𑀧𑀸𑀬𑀧𑀽𑀭𑀓𑁄 𑀪𑀯𑁂𑀬𑁆𑀬, 𑀇𑀫𑀁 𑀧𑀳𑀸𑀬 𑀫𑀬𑁆𑀳𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀲𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀤𑁆𑀯𑁂𑀥𑀸𑀧𑀣𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀫𑀢𑁆𑀣𑀓𑁂 𑀅𑀝𑁆𑀞𑀸𑀲𑀺. 𑀪𑀤𑁆𑀤𑀸𑀧𑀺 𑀆𑀕𑀦𑁆𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀆𑀳 𑁋 ‘‘𑀪𑀤𑁆𑀤𑁂, 𑀢𑀸𑀤𑀺𑀲𑀺𑀁 𑀇𑀢𑁆𑀣𑀺𑀁 𑀫𑀫 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 ‘𑀇𑀫𑁂 𑀧𑀩𑁆𑀩𑀚𑀺𑀢𑀸𑀧𑀺 𑀯𑀺𑀦𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀫𑁆𑀳𑁂𑀲𑀼 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀫𑀳𑀸𑀚𑀦𑁄 𑀅𑀧𑀸𑀬𑀧𑀽𑀭𑀓𑁄 𑀪𑀯𑁂𑀬𑁆𑀬. 𑀇𑀫𑀲𑁆𑀫𑀺𑀁 𑀤𑁆𑀯𑁂𑀥𑀸𑀧𑀣𑁂 𑀢𑁆𑀯𑀁 𑀏𑀓𑀁 𑀕𑀡𑁆𑀳, 𑀅𑀳𑀫𑁂𑀓𑁂𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀆𑀫, 𑀅𑀬𑁆𑀬, 𑀧𑀩𑁆𑀩𑀚𑀺𑀢𑀸𑀦𑀁 𑀫𑀸𑀢𑀼𑀕𑀸𑀫𑁄 𑀧𑀮𑀺𑀩𑁄𑀥𑁄, ‘𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀯𑀺𑀦𑀸 𑀦 𑀪𑀯𑀦𑁆𑀢𑀻’𑀢𑀺 𑀅𑀫𑁆𑀳𑀸𑀓𑀁 𑀤𑁄𑀲𑀁 𑀤𑀲𑁆𑀲𑁂𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑁂 𑀏𑀓𑀁 𑀫𑀕𑁆𑀕𑀁 𑀕𑀡𑁆𑀳𑀣, 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀲𑀢𑀲𑀳𑀲𑁆𑀲𑀓𑀧𑁆𑀧𑀧𑀭𑀺𑀫𑀸𑀡𑁂 𑀅𑀤𑁆𑀥𑀸𑀦𑁂 𑀓𑀢𑁄 𑀫𑀺𑀢𑁆𑀢𑀲𑀦𑁆𑀣𑀯𑁄 𑀅𑀚𑁆𑀚 𑀪𑀺𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀤𑀓𑁆𑀔𑀺𑀡𑀚𑀸𑀢𑀺𑀓𑀸 𑀦𑀸𑀫, 𑀢𑀼𑀫𑁆𑀳𑀸𑀓𑀁 𑀤𑀓𑁆𑀔𑀺𑀡𑀫𑀕𑁆𑀕𑁄 𑀯𑀝𑁆𑀝𑀢𑀺, 𑀫𑀬𑀁 𑀫𑀸𑀢𑀼𑀕𑀸𑀫𑀸 𑀦𑀸𑀫 𑀯𑀸𑀫𑀚𑀸𑀢𑀺𑀓𑀸, 𑀅𑀫𑁆𑀳𑀸𑀓𑀁 𑀯𑀸𑀫𑀫𑀕𑁆𑀕𑁄 𑀯𑀝𑁆𑀝𑀢𑀻’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸. 𑀢𑁂𑀲𑀁 𑀤𑁆𑀯𑁂𑀥𑀸𑀪𑀽𑀢𑀓𑀸𑀮𑁂 𑀅𑀬𑀁 𑀫𑀳𑀸𑀧𑀣𑀯𑀻 ‘‘𑀅𑀳𑀁 𑀘𑀓𑁆𑀓𑀯𑀸𑀴𑀲𑀺𑀦𑁂𑀭𑀼𑀧𑀩𑁆𑀩𑀢𑁂 𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀧𑀺 𑀢𑀼𑀫𑁆𑀳𑀸𑀓𑀁 𑀕𑀼𑀡𑁂 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀤𑀦𑁆𑀢𑀻 𑀯𑀺𑀬 𑀯𑀺𑀭𑀯𑀫𑀸𑀦𑀸 𑀓𑀫𑁆𑀧𑀺, 𑀆𑀓𑀸𑀲𑁂 𑀅𑀲𑀦𑀺𑀲𑀤𑁆𑀤𑁄 𑀯𑀺𑀬 𑀧𑀯𑀢𑁆𑀢𑀺, 𑀘𑀓𑁆𑀓𑀯𑀸𑀴𑀲𑀺𑀦𑁂𑀭𑀼𑀧𑀩𑁆𑀩𑀢𑁄 𑀉𑀦𑁆𑀦𑀤𑀺.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑁂𑀴𑀼𑀯𑀦𑀫𑀳𑀸𑀯𑀺𑀳𑀸𑀭𑁂 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄 𑀧𑀣𑀯𑀻𑀓𑀫𑁆𑀧𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀲𑁆𑀲 𑀦𑀼 𑀔𑁄 𑀧𑀣𑀯𑀻 𑀓𑀫𑁆𑀧𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀧𑀺𑀧𑁆𑀧𑀮𑀺𑀫𑀸𑀡𑀯𑁄 𑀘 𑀪𑀤𑁆𑀤𑀸 𑀘 𑀓𑀸𑀧𑀺𑀮𑀸𑀦𑀻 𑀫𑀁 𑀉𑀤𑁆𑀤𑀺𑀲𑁆𑀲 𑀅𑀧𑁆𑀧𑀫𑁂𑀬𑁆𑀬𑀁 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸. 𑀢𑁂𑀲𑀁 𑀯𑀺𑀬𑁄𑀕𑀝𑁆𑀞𑀸𑀦𑁂 𑀉𑀪𑀺𑀦𑁆𑀦𑀁 𑀕𑀼𑀡𑀩𑀮𑁂𑀦 𑀅𑀬𑀁 𑀧𑀣𑀯𑀻𑀓𑀫𑁆𑀧𑁄 𑀚𑀸𑀢𑁄. 𑀫𑀬𑀸𑀧𑀺 𑀏𑀢𑁂𑀲𑀁 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀲𑀻𑀢𑀺𑀫𑀳𑀸𑀣𑁂𑀭𑁂𑀲𑀼 𑀓𑀜𑁆𑀘𑀺𑀧𑀺 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀢𑀺𑀕𑀸𑀯𑀼𑀢𑀁 𑀫𑀕𑁆𑀕𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀭𑀸𑀚𑀕𑀳𑀲𑁆𑀲 𑀘 𑀦𑀸𑀮𑀦𑁆𑀤𑀸𑀬 𑀘 𑀅𑀦𑁆𑀢𑀭𑁂 𑀩𑀳𑀼𑀧𑀼𑀢𑁆𑀢𑀓𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀦𑀺𑀲𑀻𑀤𑀦𑁆𑀢𑁄 𑀧𑀦 𑀅𑀜𑁆𑀜𑀢𑀭𑀧𑀁𑀲𑀼𑀓𑀽𑀮𑀺𑀓𑁄 𑀯𑀺𑀬 𑀅𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑀯𑁂𑀲𑀁 𑀕𑀳𑁂𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀇𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀧𑀡𑁆𑀡𑀘𑁆𑀙𑀢𑁆𑀢𑀲𑀓𑀝𑀘𑀓𑁆𑀓𑀓𑀽𑀝𑀸𑀕𑀸𑀭𑀸𑀤𑀺𑀧𑁆𑀧𑀫𑀸𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀨𑀭𑀦𑁆𑀢𑀺𑀬𑁄 𑀯𑀺𑀥𑀸𑀯𑀦𑁆𑀢𑀺𑀬𑁄 𑀘𑀦𑁆𑀤𑀲𑀳𑀲𑁆𑀲𑀲𑀽𑀭𑀺𑀬𑀲𑀳𑀲𑁆𑀲𑀉𑀕𑁆𑀕𑀫𑀦𑀓𑀸𑀮𑁄 𑀯𑀺𑀬 𑀓𑀼𑀭𑀼𑀫𑀸𑀦𑀸 𑀢𑀁 𑀯𑀦𑀦𑁆𑀢𑀁 𑀏𑀓𑁄𑀪𑀸𑀲𑀁 𑀅𑀓𑀁𑀲𑀼. 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀺𑀭𑀺𑀬𑀸 𑀲𑀫𑀼𑀚𑁆𑀚𑀮𑀢𑀸𑀭𑀸𑀕𑀡𑁂𑀦 𑀯𑀺𑀬 𑀕𑀕𑀦𑀁, 𑀲𑀼𑀧𑀼𑀧𑁆𑀨𑀺𑀢𑀓𑀫𑀮𑀓𑀼𑀯𑀮𑀬𑁂𑀦 𑀯𑀺𑀬 𑀲𑀮𑀺𑀮𑀁, 𑀯𑀦𑀦𑁆𑀢𑀁 𑀯𑀺𑀭𑁄𑀘𑀺𑀢𑁆𑀣. 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀲𑁆𑀲 𑀦𑀸𑀫 𑀔𑀦𑁆𑀥𑁄 𑀲𑁂𑀢𑁄 𑀳𑁄𑀢𑀺, 𑀧𑀢𑁆𑀢𑀸𑀦𑀺 𑀦𑀻𑀮𑀸𑀦𑀺, 𑀧𑀓𑁆𑀓𑀸𑀦𑀺 𑀭𑀢𑁆𑀢𑀸𑀦𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀲𑀢𑀲𑀸𑀔𑁄 𑀦𑀺𑀕𑁆𑀭𑁄𑀥𑁄 𑀲𑀼𑀯𑀡𑁆𑀡𑀯𑀡𑁆𑀡𑁄𑀯 𑀅𑀳𑁄𑀲𑀺.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀺, 𑀇𑀫𑀁 𑀅𑀳𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄’’𑀢𑀺 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀡𑀢𑁄𑀡𑀢𑁄𑀯 𑀕𑀦𑁆𑀢𑁆𑀯𑀸 𑀢𑀻𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑁆𑀯𑀸 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀺, 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀆𑀳. 𑀅𑀣 𑀦𑀁 𑀪𑀕𑀯𑀸 𑀆𑀳 ‘‘𑀓𑀲𑁆𑀲𑀧, 𑀲𑀘𑁂 𑀢𑁆𑀯𑀁 𑀇𑀫𑀁 𑀦𑀺𑀧𑀘𑁆𑀘𑀓𑀸𑀭𑀁 𑀫𑀳𑀸𑀧𑀣𑀯𑀺𑀬𑀸 𑀓𑀭𑁂𑀬𑁆𑀬𑀸𑀲𑀺, 𑀲𑀸𑀧𑀺 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀕𑀼𑀡𑀫𑀳𑀦𑁆𑀢𑀢𑀁 𑀚𑀸𑀦𑀢𑀸 𑀢𑀬𑀸 𑀓𑀢𑁄 𑀦𑀺𑀧𑀘𑁆𑀘𑀓𑀸𑀭𑁄 𑀫𑀬𑁆𑀳𑀁, 𑀮𑁄𑀫𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦𑀺𑀲𑀻𑀤, 𑀓𑀲𑁆𑀲𑀧, 𑀤𑀸𑀬𑀚𑁆𑀚𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀢𑀻𑀳𑀺 𑀑𑀯𑀸𑀤𑁂𑀳𑀺 𑀉𑀧𑀲𑀫𑁆𑀧𑀤𑀫𑀤𑀸𑀲𑀺. 𑀤𑀢𑁆𑀯𑀸 𑀩𑀳𑀼𑀧𑀼𑀢𑁆𑀢𑀓𑀦𑀺𑀕𑁆𑀭𑁄𑀥𑀫𑀽𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑀁 𑀧𑀘𑁆𑀙𑀸𑀲𑀫𑀡𑀁 𑀓𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀲𑀢𑁆𑀣𑀼 𑀲𑀭𑀻𑀭𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀺𑀘𑀺𑀢𑁆𑀢𑀁, 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑀭𑀻𑀭𑀁 𑀲𑀢𑁆𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁, 𑀲𑁄 𑀓𑀜𑁆𑀘𑀦𑀫𑀳𑀸𑀦𑀸𑀯𑀸𑀬 𑀧𑀘𑁆𑀙𑀸𑀩𑀤𑁆𑀥𑁄 𑀯𑀺𑀬 𑀲𑀢𑁆𑀣𑀼 𑀧𑀤𑀸𑀦𑀼𑀧𑀤𑀺𑀓𑀁 𑀅𑀦𑀼𑀕𑀘𑁆𑀙𑀺. 𑀲𑀢𑁆𑀣𑀸 𑀣𑁄𑀓𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀚𑁆𑀚𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀣𑁂𑀭𑁄 ‘‘𑀦𑀺𑀲𑀻𑀤𑀺𑀢𑀼𑀓𑀸𑀫𑁄 𑀲𑀢𑁆𑀣𑀸’’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀭𑀼𑀧𑀺𑀢𑀧𑀝𑀧𑀺𑀮𑁄𑀢𑀺𑀓𑀲𑀗𑁆𑀖𑀸𑀝𑀺𑀁 𑀘𑀢𑀼𑀕𑁆𑀕𑀼𑀡𑀁 𑀓𑀢𑁆𑀯𑀸 𑀧𑀜𑁆𑀜𑀧𑁂𑀲𑀺.

𑀲𑀢𑁆𑀣𑀸 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 ‘‘𑀫𑀼𑀤𑀼𑀓𑀸 𑀔𑁄 𑀢𑁆𑀬𑀸𑀬𑀁, 𑀓𑀲𑁆𑀲𑀧, 𑀧𑀝𑀧𑀺𑀮𑁄𑀢𑀺𑀓𑀲𑀗𑁆𑀖𑀸𑀝𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀆𑀳. 𑀣𑁂𑀭𑁄 ‘‘𑀲𑀢𑁆𑀣𑀸 𑀫𑀫 𑀲𑀗𑁆𑀖𑀸𑀝𑀺𑀬𑀸 𑀫𑀼𑀤𑀼𑀪𑀸𑀯𑀁 𑀓𑀣𑁂𑀢𑀺, 𑀧𑀸𑀭𑀼𑀧𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀧𑀸𑀭𑀼𑀧𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀲𑀗𑁆𑀖𑀸𑀝𑀺’’𑀦𑁆𑀢𑀺 𑀆𑀳. ‘‘𑀢𑁆𑀯𑀁 𑀓𑀺𑀁 𑀧𑀸𑀭𑀼𑀧𑀺𑀲𑁆𑀲𑀲𑀺, 𑀓𑀲𑁆𑀲𑀧𑀸’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀦𑀺𑀯𑀸𑀲𑀦𑀁 𑀮𑀪𑀦𑁆𑀢𑁄 𑀧𑀸𑀭𑀼𑀧𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀓𑀲𑁆𑀲𑀧, 𑀇𑀫𑀁 𑀧𑀭𑀺𑀪𑁄𑀕𑀚𑀺𑀡𑁆𑀡𑀁 𑀧𑀁𑀲𑀼𑀓𑀽𑀮𑀁 𑀥𑀸𑀭𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺? 𑀫𑀬𑀸 𑀳𑀺 𑀇𑀫𑀲𑁆𑀲 𑀧𑀁𑀲𑀼𑀓𑀽𑀮𑀲𑁆𑀲 𑀕𑀳𑀺𑀢𑀤𑀺𑀯𑀲𑁂 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺, 𑀇𑀫𑀁 𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀚𑀺𑀡𑁆𑀡𑀘𑀻𑀯𑀭𑀁 𑀦𑀸𑀫 𑀦 𑀲𑀓𑁆𑀓𑀸 𑀧𑀭𑀺𑀢𑁆𑀢𑀕𑀼𑀡𑁂𑀦 𑀥𑀸𑀭𑁂𑀢𑀼𑀁, 𑀧𑀝𑀺𑀩𑀮𑁂𑀦𑁂𑀯𑀺𑀤𑀁 𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀲𑀫𑀢𑁆𑀣𑁂𑀦 𑀚𑀸𑀢𑀺𑀧𑀁𑀲𑀼𑀓𑀽𑀮𑀺𑀓𑁂𑀦 𑀥𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀲𑀺.

𑀏𑀯𑀁 𑀧𑀦 𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀁 𑀓𑀢𑁆𑀯𑀸 𑀣𑁂𑀭𑀲𑁆𑀲 𑀧𑀸𑀭𑀼𑀢𑀘𑀻𑀯𑀭𑀁 𑀪𑀕𑀯𑀸 𑀧𑀸𑀭𑀼𑀧𑀺, 𑀲𑀢𑁆𑀣𑀼 𑀘𑀻𑀯𑀭𑀁 𑀣𑁂𑀭𑁄. 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀘𑁂𑀢𑀦𑀸𑀧𑀺 𑀅𑀬𑀁 𑀫𑀳𑀸𑀧𑀣𑀯𑀻 ‘‘𑀤𑀼𑀓𑁆𑀓𑀭𑀁, 𑀪𑀦𑁆𑀢𑁂, 𑀅𑀓𑀢𑁆𑀣, 𑀅𑀢𑁆𑀢𑀦𑀸 𑀧𑀸𑀭𑀼𑀢𑀘𑀻𑀯𑀭𑀁 𑀲𑀸𑀯𑀓𑀲𑁆𑀲 𑀤𑀺𑀦𑁆𑀦𑀧𑀼𑀩𑁆𑀩𑁄 𑀦𑀸𑀫 𑀦𑀢𑁆𑀣𑀺, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀕𑀼𑀡𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀤𑀦𑁆𑀢𑀻 𑀯𑀺𑀬 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀓𑀫𑁆𑀧𑀺. 𑀣𑁂𑀭𑁄𑀧𑀺 ‘‘𑀮𑀤𑁆𑀥𑀁 𑀤𑀸𑀦𑀺 𑀫𑀬𑀸 𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀘𑀻𑀯𑀭𑀁, 𑀓𑀺𑀁 𑀫𑁂 𑀇𑀤𑀸𑀦𑀺 𑀉𑀢𑁆𑀢𑀭𑀺 𑀓𑀢𑁆𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀉𑀦𑁆𑀦𑀢𑀺𑀁 𑀅𑀓𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂𑀬𑁂𑀯 𑀢𑁂𑀭𑀲 𑀥𑀼𑀢𑀕𑀼𑀡𑁂 𑀲𑀫𑀸𑀤𑀸𑀬 𑀲𑀢𑁆𑀢𑀤𑀺𑀯𑀲𑀫𑀢𑁆𑀢𑀁 𑀧𑀼𑀣𑀼𑀚𑁆𑀚𑀦𑁄 𑀅𑀳𑁄𑀲𑀺, 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁧.𑁩𑁯𑁮-𑁪𑁨𑁦) 𑁋

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀧𑀽𑀚𑀁 𑀓𑀼𑀩𑁆𑀩𑀦𑁆𑀢𑀺 𑀲𑀢𑁆𑀣𑀼𑀦𑁄.

‘‘𑀉𑀤𑀕𑁆𑀕𑀘𑀺𑀢𑁆𑀢𑀸 𑀚𑀦𑀢𑀸, 𑀆𑀫𑁄𑀤𑀺𑀢𑀧𑀫𑁄𑀤𑀺𑀢𑀸;

𑀢𑁂𑀲𑀼 𑀲𑀁𑀯𑁂𑀕𑀚𑀸𑀢𑁂𑀲𑀼, 𑀧𑀻𑀢𑀺 𑀲𑁂 𑀉𑀤𑀧𑀚𑁆𑀚𑀣.

‘‘𑀜𑀸𑀢𑀺𑀫𑀺𑀢𑁆𑀢𑁂 𑀲𑀫𑀸𑀦𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

𑀧𑀭𑀺𑀦𑀺𑀩𑁆𑀩𑀼𑀢𑁄 𑀫𑀳𑀸𑀯𑀻𑀭𑁄, 𑀳𑀦𑁆𑀤 𑀧𑀽𑀚𑀁 𑀓𑀭𑁄𑀫𑀲𑁂.

‘‘𑀲𑀸𑀥𑀽𑀢𑀺 𑀢𑁂 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀳𑀸𑀲𑀁 𑀚𑀦𑀺𑀁𑀲𑀼 𑀫𑁂;

𑀩𑀼𑀤𑁆𑀥𑀲𑁆𑀫𑀺𑀁 𑀮𑁄𑀓𑀦𑀸𑀣𑀫𑁆𑀳𑀺, 𑀓𑀸𑀳𑀸𑀫 𑀧𑀼𑀜𑁆𑀜𑀲𑀜𑁆𑀘𑀬𑀁.

‘‘𑀅𑀕𑁆𑀖𑀺𑀬𑀁 𑀲𑀼𑀓𑀢𑀁 𑀓𑀢𑁆𑀯𑀸, 𑀲𑀢𑀳𑀢𑁆𑀣𑀲𑀫𑀼𑀕𑁆𑀕𑀢𑀁;

𑀤𑀺𑀬𑀟𑁆𑀠𑀳𑀢𑁆𑀣𑀧𑀢𑁆𑀣𑀝𑀁, 𑀯𑀺𑀫𑀸𑀦𑀁 𑀦𑀪𑀫𑀼𑀕𑁆𑀕𑀢𑀁.

‘‘𑀓𑀢𑁆𑀯𑀸𑀦 𑀳𑀫𑁆𑀫𑀺𑀬𑀁 𑀢𑀢𑁆𑀣, 𑀢𑀸𑀮𑀧𑀦𑁆𑀢𑀻𑀳𑀺 𑀘𑀺𑀢𑁆𑀢𑀺𑀢𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀘𑁂𑀢𑀺𑀬𑀁 𑀧𑀽𑀚𑀬𑀼𑀢𑁆𑀢𑀫𑀁.

‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯 𑀚𑀮𑀺𑀢𑁄, 𑀓𑀺𑀁𑀲𑀼𑀓𑁄 𑀇𑀯 𑀨𑀼𑀮𑁆𑀮𑀺𑀢𑁄;

𑀇𑀦𑁆𑀤𑀮𑀝𑁆𑀞𑀻𑀯 𑀆𑀓𑀸𑀲𑁂, 𑀑𑀪𑀸𑀲𑁂𑀢𑀺 𑀘𑀢𑀼𑀤𑁆𑀤𑀺𑀲𑀸.

‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀓𑀢𑁆𑀯𑀸𑀦 𑀓𑀼𑀲𑀮𑀁 𑀩𑀳𑀼𑀁;

𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦, 𑀢𑀺𑀤𑀲𑀁 𑀉𑀧𑀧𑀚𑁆𑀚𑀳𑀁.

‘‘𑀲𑀳𑀲𑁆𑀲𑀬𑀼𑀢𑁆𑀢𑀁 𑀳𑀬𑀯𑀸𑀳𑀺𑀁, 𑀤𑀺𑀩𑁆𑀩𑀬𑀸𑀦𑀫𑀥𑀺𑀝𑁆𑀞𑀺𑀢𑁄;

𑀉𑀩𑁆𑀩𑀺𑀤𑁆𑀥𑀁 𑀪𑀯𑀦𑀁 𑀫𑀬𑁆𑀳𑀁, 𑀲𑀢𑁆𑀢𑀪𑀽𑀫𑀁 𑀲𑀫𑀼𑀕𑁆𑀕𑀢𑀁.

‘‘𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀲𑁄𑀡𑁆𑀡𑀫𑀬𑀸 𑀅𑀳𑀼𑀁;

𑀚𑀮𑀦𑁆𑀢𑀺 𑀲𑀓𑀢𑁂𑀚𑁂𑀦, 𑀤𑀺𑀲𑀸 𑀲𑀩𑁆𑀩𑀸 𑀧𑀪𑀸𑀲𑀬𑀁.

‘‘𑀲𑀦𑁆𑀢𑀺 𑀅𑀜𑁆𑀜𑁂𑀧𑀺 𑀦𑀺𑀬𑁆𑀬𑀽𑀳𑀸, 𑀮𑁄𑀳𑀺𑀢𑀗𑁆𑀕𑀫𑀬𑀸 𑀢𑀤𑀸;

𑀢𑁂𑀧𑀺 𑀚𑁄𑀢𑀦𑁆𑀢𑀺 𑀆𑀪𑀸𑀬, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸.

‘‘𑀧𑀼𑀜𑁆𑀜𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸, 𑀓𑀽𑀝𑀸𑀕𑀸𑀭𑀸 𑀲𑀼𑀦𑀺𑀫𑁆𑀫𑀺𑀢𑀸;

𑀫𑀡𑀺𑀫𑀬𑀸𑀧𑀺 𑀚𑁄𑀢𑀦𑁆𑀢𑀺, 𑀤𑀺𑀲𑀸 𑀤𑀲 𑀲𑀫𑀦𑁆𑀢𑀢𑁄.

‘‘𑀢𑁂𑀲𑀁 𑀉𑀚𑁆𑀚𑁄𑀢𑀫𑀸𑀦𑀸𑀦𑀁, 𑀑𑀪𑀸𑀲𑁄 𑀯𑀺𑀧𑀼𑀮𑁄 𑀅𑀳𑀼;

𑀲𑀩𑁆𑀩𑁂 𑀤𑁂𑀯𑁂 𑀅𑀪𑀺𑀪𑁄𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

‘‘𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀉𑀩𑁆𑀩𑀺𑀤𑁆𑀥𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀧𑀣𑀯𑀺𑀁 𑀆𑀯𑀲𑀺𑀁 𑀅𑀳𑀁.

‘‘𑀢𑀣𑁂𑀯 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀅𑀳𑁄𑀲𑀳𑀁;

𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄𑀫𑁆𑀳𑀺, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

‘‘𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑁄;

𑀢𑀢𑁆𑀣𑀸𑀧𑀺 𑀪𑀯𑀦𑀁 𑀫𑀬𑁆𑀳𑀁, 𑀇𑀦𑁆𑀤𑀮𑀝𑁆𑀞𑀻𑀯 𑀉𑀕𑁆𑀕𑀢𑀁.

‘‘𑀆𑀬𑀸𑀫𑀢𑁄 𑀘𑀢𑀼𑀩𑁆𑀩𑀻𑀲𑀁, 𑀯𑀺𑀢𑁆𑀣𑀸𑀭𑁂𑀦 𑀘 𑀤𑁆𑀯𑀸𑀤𑀲;

𑀭𑀫𑁆𑀫𑀡𑀁 𑀦𑀸𑀫 𑀦𑀕𑀭𑀁, 𑀤𑀴𑁆𑀳𑀧𑀸𑀓𑀸𑀭𑀢𑁄𑀭𑀡𑀁.

‘‘𑀆𑀬𑀸𑀫𑀢𑁄 𑀧𑀜𑁆𑀘𑀲𑀢𑀁, 𑀯𑀺𑀢𑁆𑀣𑀸𑀭𑁂𑀦 𑀢𑀤𑀟𑁆𑀠𑀓𑀁;

𑀆𑀓𑀺𑀡𑁆𑀡𑀁 𑀚𑀦𑀓𑀸𑀬𑁂𑀳𑀺, 𑀢𑀺𑀤𑀲𑀸𑀦𑀁 𑀧𑀼𑀭𑀁 𑀯𑀺𑀬.

‘‘𑀬𑀣𑀸 𑀲𑀽𑀘𑀺𑀖𑀭𑁂 𑀲𑀽𑀘𑀻, 𑀧𑀓𑁆𑀔𑀺𑀢𑁆𑀢𑀸 𑀧𑀡𑁆𑀡𑀯𑀻𑀲𑀢𑀺;

𑀅𑀜𑁆𑀜𑀫𑀜𑁆𑀜𑀁 𑀧𑀖𑀝𑁆𑀝𑁂𑀦𑁆𑀢𑀺, 𑀆𑀓𑀺𑀡𑁆𑀡𑀁 𑀳𑁄𑀢𑀺 𑀮𑀗𑁆𑀓𑀢𑀁.

‘‘𑀏𑀯𑀫𑁆𑀧𑀺 𑀦𑀕𑀭𑀁 𑀫𑀬𑁆𑀳𑀁, 𑀳𑀢𑁆𑀣𑀺𑀲𑁆𑀲𑀭𑀣𑀲𑀁𑀓𑀼𑀮𑀁;

𑀫𑀦𑀼𑀲𑁆𑀲𑁂𑀳𑀺 𑀲𑀤𑀸𑀓𑀺𑀡𑁆𑀡𑀁, 𑀭𑀫𑁆𑀫𑀡𑀁 𑀦𑀕𑀭𑀼𑀢𑁆𑀢𑀫𑀁.

‘‘𑀢𑀢𑁆𑀣 𑀪𑀼𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀧𑀼𑀦 𑀤𑁂𑀯𑀢𑁆𑀢𑀦𑀁 𑀕𑀢𑁄;

𑀪𑀯𑁂 𑀧𑀘𑁆𑀙𑀺𑀫𑀓𑁂 𑀫𑀬𑁆𑀳𑀁, 𑀅𑀳𑁄𑀲𑀺 𑀓𑀼𑀮𑀲𑀫𑁆𑀧𑀤𑀸.

‘‘𑀩𑁆𑀭𑀳𑁆𑀫𑀜𑁆𑀜𑀓𑀼𑀮𑀲𑀫𑁆𑀪𑀽𑀢𑁄, 𑀫𑀳𑀸𑀭𑀢𑀦𑀲𑀜𑁆𑀘𑀬𑁄;

𑀅𑀲𑀻𑀢𑀺𑀓𑁄𑀝𑀺𑀬𑁄 𑀳𑀺𑀢𑁆𑀯𑀸, 𑀳𑀺𑀭𑀜𑁆𑀜𑀲𑁆𑀲𑀸𑀧𑀺 𑀧𑀩𑁆𑀩𑀚𑀺𑀁.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀽𑀧𑀫𑁄 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁, 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁, 𑀦𑀺𑀘𑁆𑀘𑀦𑀯𑀓𑁄 𑀓𑀼𑀮𑁂𑀲𑀼 𑀅𑀧𑁆𑀧𑀕𑀩𑁆𑀪𑁄’’𑀢𑀺 𑀏𑀯𑀫𑀸𑀤𑀺𑀦𑀸 (𑀲𑀁. 𑀦𑀺. 𑁨.𑁧𑁪𑁬) 𑀧𑀲𑀁𑀲𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀢𑀯𑀸𑀤𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀲𑁆𑀲𑀧𑁄’’𑀢𑀺 (𑀅. 𑀦𑀺. 𑁧.𑁧𑁮𑁮, 𑁧𑁯𑁧) 𑀥𑀼𑀢𑀗𑁆𑀕𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁄 𑀯𑀺𑀯𑁂𑀓𑀸𑀪𑀺𑀭𑀢𑀺𑀓𑀺𑀢𑁆𑀢𑀦𑀫𑀼𑀔𑁂𑀦 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀤𑁂𑀦𑁆𑀢𑁄 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑁋

𑁧𑁦𑁫𑁪. ‘‘𑀦 𑀕𑀡𑁂𑀦 𑀧𑀼𑀭𑀓𑁆𑀔𑀢𑁄 𑀘𑀭𑁂, 𑀯𑀺𑀫𑀦𑁄 𑀳𑁄𑀢𑀺 𑀲𑀫𑀸𑀥𑀺 𑀤𑀼𑀮𑁆𑀮𑀪𑁄;

𑀦𑀸𑀦𑀸𑀚𑀦𑀲𑀗𑁆𑀕𑀳𑁄 𑀤𑀼𑀔𑁄, 𑀇𑀢𑀺 𑀤𑀺𑀲𑁆𑀯𑀸𑀦 𑀕𑀡𑀁 𑀦 𑀭𑁄𑀘𑀬𑁂.

𑁧𑁦𑁫𑁫. ‘‘𑀦 𑀓𑀼𑀮𑀸𑀦𑀺 𑀉𑀧𑀩𑁆𑀩𑀚𑁂 𑀫𑀼𑀦𑀺, 𑀯𑀺𑀫𑀦𑁄 𑀳𑁄𑀢𑀺 𑀲𑀫𑀸𑀥𑀺 𑀤𑀼𑀮𑁆𑀮𑀪𑁄;

𑀲𑁄 𑀉𑀲𑁆𑀲𑀼𑀓𑁆𑀓𑁄 𑀭𑀲𑀸𑀦𑀼𑀕𑀺𑀤𑁆𑀥𑁄, 𑀅𑀢𑁆𑀣𑀁 𑀭𑀺𑀜𑁆𑀘𑀢𑀺 𑀬𑁄 𑀲𑀼𑀔𑀸𑀯𑀳𑁄.

𑁧𑁦𑁫𑁬. ‘‘𑀧𑀗𑁆𑀓𑁄𑀢𑀺 𑀳𑀺 𑀦𑀁 𑀅𑀯𑁂𑀤𑀬𑀼𑀁, 𑀬𑀸𑀬𑀁 𑀯𑀦𑁆𑀤𑀦𑀧𑀽𑀚𑀦𑀸 𑀓𑀼𑀮𑁂𑀲𑀼;

𑀲𑀼𑀔𑀼𑀫𑀁 𑀲𑀮𑁆𑀮𑀁 𑀤𑀼𑀭𑀼𑀩𑁆𑀩𑀳𑀁, 𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑁂𑀦 𑀤𑀼𑀚𑁆𑀚𑀳𑁄.

𑁧𑁦𑁫𑁭. ‘‘𑀲𑁂𑀦𑀸𑀲𑀦𑀫𑁆𑀳𑀸 𑀑𑀭𑀼𑀬𑁆𑀳, 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁;

𑀪𑀼𑀜𑁆𑀚𑀦𑁆𑀢𑀁 𑀧𑀼𑀭𑀺𑀲𑀁 𑀓𑀼𑀝𑁆𑀞𑀺𑀁, 𑀲𑀓𑁆𑀓𑀘𑁆𑀘𑀁 𑀢𑀁 𑀉𑀧𑀝𑁆𑀞𑀳𑀺𑀁.

𑁧𑁦𑁫𑁮. ‘‘𑀲𑁄 𑀫𑁂 𑀧𑀓𑁆𑀓𑁂𑀦 𑀳𑀢𑁆𑀣𑁂𑀦, 𑀆𑀮𑁄𑀧𑀁 𑀉𑀧𑀦𑀸𑀫𑀬𑀺;

𑀆𑀮𑁄𑀧𑀁 𑀧𑀓𑁆𑀔𑀺𑀧𑀦𑁆𑀢𑀲𑁆𑀲, 𑀅𑀗𑁆𑀕𑀼𑀮𑀺 𑀘𑁂𑀢𑁆𑀣 𑀙𑀺𑀚𑁆𑀚𑀣.

𑁧𑁦𑁫𑁯. ‘‘𑀓𑀼𑀝𑁆𑀝𑀫𑀽𑀮𑀜𑁆𑀘 𑀦𑀺𑀲𑁆𑀲𑀸𑀬, 𑀆𑀮𑁄𑀧𑀁 𑀢𑀁 𑀅𑀪𑀼𑀜𑁆𑀚𑀺𑀲𑀁;

𑀪𑀼𑀜𑁆𑀚𑀫𑀸𑀦𑁂 𑀯𑀸 𑀪𑀼𑀢𑁆𑀢𑁂 𑀯𑀸, 𑀚𑁂𑀕𑀼𑀘𑁆𑀙𑀁 𑀫𑁂 𑀦 𑀯𑀺𑀚𑁆𑀚𑀢𑀺.

𑁧𑁦𑁬𑁦. ‘‘𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑁄 𑀆𑀳𑀸𑀭𑁄, 𑀧𑀽𑀢𑀺𑀫𑀼𑀢𑁆𑀢𑀜𑁆𑀘 𑀑𑀲𑀥𑀁;

𑀲𑁂𑀦𑀸𑀲𑀦𑀁 𑀭𑀼𑀓𑁆𑀔𑀫𑀽𑀮𑀁, 𑀧𑀁𑀲𑀼𑀓𑀽𑀮𑀜𑁆𑀘 𑀘𑀻𑀯𑀭𑀁;

𑀬𑀲𑁆𑀲𑁂𑀢𑁂 𑀅𑀪𑀺𑀲𑀫𑁆𑀪𑀼𑀢𑁆𑀯𑀸, 𑀲 𑀯𑁂 𑀘𑀸𑀢𑀼𑀤𑁆𑀤𑀺𑀲𑁄 𑀦𑀭𑁄.

𑁧𑁦𑁬𑁧. ‘‘𑀬𑀢𑁆𑀣 𑀏𑀓𑁂 𑀯𑀺𑀳𑀜𑁆𑀜𑀦𑁆𑀢𑀺, 𑀆𑀭𑀼𑀳𑀦𑁆𑀢𑀸 𑀲𑀺𑀮𑀼𑀘𑁆𑀘𑀬𑀁;

𑀢𑀢𑁆𑀣 𑀩𑀼𑀤𑁆𑀥𑀲𑁆𑀲 𑀤𑀸𑀬𑀸𑀤𑁄, 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄;

𑀇𑀤𑁆𑀥𑀺𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑁄, 𑀓𑀲𑁆𑀲𑀧𑁄 𑀅𑀪𑀺𑀭𑀽𑀳𑀢𑀺.

𑁧𑁦𑁬𑁨. ‘‘𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄, 𑀲𑁂𑀮𑀫𑀸𑀭𑀼𑀬𑁆𑀳 𑀓𑀲𑁆𑀲𑀧𑁄;

𑀛𑀸𑀬𑀢𑀺 𑀅𑀦𑀼𑀧𑀸𑀤𑀸𑀦𑁄, 𑀧𑀳𑀻𑀦𑀪𑀬𑀪𑁂𑀭𑀯𑁄.

𑁧𑁦𑁬𑁩. ‘‘𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄, 𑀲𑁂𑀮𑀫𑀸𑀭𑀼𑀬𑁆𑀳 𑀓𑀲𑁆𑀲𑀧𑁄;

𑀛𑀸𑀬𑀢𑀺 𑀅𑀦𑀼𑀧𑀸𑀤𑀸𑀦𑁄, 𑀟𑀬𑁆𑀳𑀫𑀸𑀦𑁂𑀲𑀼 𑀦𑀺𑀩𑁆𑀩𑀼𑀢𑁄.

𑁧𑁦𑁬𑁪. ‘‘𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄, 𑀲𑁂𑀮𑀫𑀸𑀭𑀼𑀬𑁆𑀳 𑀓𑀲𑁆𑀲𑀧𑁄;

𑀛𑀸𑀬𑀢𑀺 𑀅𑀦𑀼𑀧𑀸𑀤𑀸𑀦𑁄, 𑀓𑀢𑀓𑀺𑀘𑁆𑀘𑁄 𑀅𑀦𑀸𑀲𑀯𑁄.

𑁧𑁦𑁬𑁫. ‘‘𑀓𑀭𑁂𑀭𑀺𑀫𑀸𑀮𑀸𑀯𑀺𑀢𑀢𑀸, 𑀪𑀽𑀫𑀺𑀪𑀸𑀕𑀸 𑀫𑀦𑁄𑀭𑀫𑀸;

𑀓𑀼𑀜𑁆𑀚𑀭𑀸𑀪𑀺𑀭𑀼𑀤𑀸 𑀭𑀫𑁆𑀫𑀸, 𑀢𑁂 𑀲𑁂𑀮𑀸 𑀭𑀫𑀬𑀦𑁆𑀢𑀺 𑀫𑀁.

𑁧𑁦𑁬𑁬. ‘‘𑀦𑀻𑀮𑀩𑁆𑀪𑀯𑀡𑁆𑀡𑀸 𑀭𑀼𑀘𑀺𑀭𑀸, 𑀯𑀸𑀭𑀺𑀲𑀻𑀢𑀸 𑀲𑀼𑀘𑀺𑀦𑁆𑀥𑀭𑀸;

𑀇𑀦𑁆𑀤𑀕𑁄𑀧𑀓𑀲𑀜𑁆𑀙𑀦𑁆𑀦𑀸, 𑀢𑁂 𑀲𑁂𑀮𑀸 𑀭𑀫𑀬𑀦𑁆𑀢𑀺 𑀫𑀁.

𑁧𑁦𑁬𑁭. ‘‘𑀦𑀻𑀮𑀩𑁆𑀪𑀓𑀽𑀝𑀲𑀤𑀺𑀲𑀸, 𑀓𑀽𑀝𑀸𑀕𑀸𑀭𑀯𑀭𑀽𑀧𑀫𑀸;

𑀯𑀸𑀭𑀡𑀸𑀪𑀺𑀭𑀼𑀤𑀸 𑀭𑀫𑁆𑀫𑀸, 𑀢𑁂 𑀲𑁂𑀮𑀸 𑀭𑀫𑀬𑀦𑁆𑀢𑀺 𑀫𑀁.

𑁧𑁦𑁬𑁮. ‘‘𑀅𑀪𑀺𑀯𑀼𑀝𑁆𑀞𑀸 𑀭𑀫𑁆𑀫𑀢𑀮𑀸, 𑀦𑀕𑀸 𑀇𑀲𑀺𑀪𑀺 𑀲𑁂𑀯𑀺𑀢𑀸;

𑀅𑀩𑁆𑀪𑀼𑀦𑁆𑀦𑀤𑀺𑀢𑀸 𑀲𑀺𑀔𑀻𑀳𑀺, 𑀢𑁂 𑀲𑁂𑀮𑀸 𑀭𑀫𑀬𑀦𑁆𑀢𑀺 𑀫𑀁.

𑁧𑁦𑁬𑁯. ‘‘𑀅𑀮𑀁 𑀛𑀸𑀬𑀺𑀢𑀼𑀓𑀸𑀫𑀲𑁆𑀲, 𑀧𑀳𑀺𑀢𑀢𑁆𑀢𑀲𑁆𑀲 𑀫𑁂 𑀲𑀢𑁄;

𑀅𑀮𑀁 𑀫𑁂 𑀅𑀢𑁆𑀣𑀓𑀸𑀫𑀲𑁆𑀲, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁧𑁦𑁭𑁦. ‘‘𑀅𑀮𑀁 𑀫𑁂 𑀨𑀸𑀲𑀼𑀓𑀸𑀫𑀲𑁆𑀲, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀮𑀁 𑀫𑁂 𑀬𑁄𑀕𑀓𑀸𑀫𑀲𑁆𑀲, 𑀧𑀳𑀺𑀢𑀢𑁆𑀢𑀲𑁆𑀲 𑀢𑀸𑀤𑀺𑀦𑁄.

𑁧𑁦𑁭𑁧. ‘‘𑀉𑀫𑀸𑀧𑀼𑀧𑁆𑀨𑁂𑀦 𑀲𑀫𑀸𑀦𑀸, 𑀕𑀕𑀦𑀸𑀯𑀩𑁆𑀪𑀙𑀸𑀤𑀺𑀢𑀸;

𑀦𑀸𑀦𑀸𑀤𑀺𑀚𑀕𑀡𑀸𑀓𑀺𑀡𑁆𑀡𑀸, 𑀢𑁂 𑀲𑁂𑀮𑀸 𑀭𑀫𑀬𑀦𑁆𑀢𑀺 𑀫𑀁.

𑁧𑁦𑁭𑁨. ‘‘𑀅𑀦𑀸𑀓𑀺𑀡𑁆𑀡𑀸 𑀕𑀳𑀝𑁆𑀞𑁂𑀳𑀺, 𑀫𑀺𑀕𑀲𑀗𑁆𑀖𑀦𑀺𑀲𑁂𑀯𑀺𑀢𑀸;

𑀦𑀸𑀦𑀸𑀤𑀺𑀚𑀕𑀡𑀸𑀓𑀺𑀡𑁆𑀡𑀸, 𑀢𑁂 𑀲𑁂𑀮𑀸 𑀭𑀫𑀬𑀦𑁆𑀢𑀺 𑀫𑀁.

𑁧𑁦𑁭𑁩. ‘‘𑀅𑀘𑁆𑀙𑁄𑀤𑀺𑀓𑀸 𑀧𑀼𑀣𑀼𑀲𑀺𑀮𑀸, 𑀕𑁄𑀦𑀗𑁆𑀕𑀼𑀮𑀫𑀺𑀕𑀸𑀬𑀼𑀢𑀸;

𑀅𑀫𑁆𑀩𑀼𑀲𑁂𑀯𑀸𑀮𑀲𑀜𑁆𑀙𑀦𑁆𑀦𑀸, 𑀢𑁂 𑀲𑁂𑀮𑀸 𑀭𑀫𑀬𑀦𑁆𑀢𑀺 𑀫𑀁.

𑁧𑁦𑁭𑁪. ‘‘𑀦 𑀧𑀜𑁆𑀘𑀗𑁆𑀕𑀺𑀓𑁂𑀦 𑀢𑀽𑀭𑀺𑀬𑁂𑀦, 𑀭𑀢𑀺 𑀫𑁂 𑀳𑁄𑀢𑀺 𑀢𑀸𑀤𑀺𑀲𑀻;

𑀬𑀣𑀸 𑀏𑀓𑀕𑁆𑀕𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

𑁧𑁦𑁭𑁫. ‘‘𑀓𑀫𑁆𑀫𑀁 𑀩𑀳𑀼𑀓𑀁 𑀦 𑀓𑀸𑀭𑀬𑁂, 𑀧𑀭𑀺𑀯𑀚𑁆𑀚𑁂𑀬𑁆𑀬 𑀚𑀦𑀁 𑀦 𑀉𑀬𑁆𑀬𑀫𑁂;

𑀉𑀲𑁆𑀲𑀼𑀓𑁆𑀓𑁄 𑀲𑁄 𑀭𑀲𑀸𑀦𑀼𑀕𑀺𑀤𑁆𑀥𑁄, 𑀅𑀢𑁆𑀣𑀁 𑀭𑀺𑀜𑁆𑀘𑀢𑀺 𑀬𑁄 𑀲𑀼𑀔𑀸𑀯𑀳𑁄.

𑁧𑁦𑁭𑁬. ‘‘𑀓𑀫𑁆𑀫𑀁 𑀩𑀳𑀼𑀓𑀁 𑀦 𑀓𑀸𑀭𑀬𑁂, 𑀧𑀭𑀺𑀯𑀚𑁆𑀚𑁂𑀬𑁆𑀬 𑀅𑀦𑀢𑁆𑀢𑀦𑁂𑀬𑁆𑀬𑀫𑁂𑀢𑀁;

𑀓𑀺𑀘𑁆𑀙𑀢𑀺 𑀓𑀸𑀬𑁄 𑀓𑀺𑀮𑀫𑀢𑀺, 𑀤𑀼𑀓𑁆𑀔𑀺𑀢𑁄 𑀲𑁄 𑀲𑀫𑀣𑀁 𑀦 𑀯𑀺𑀦𑁆𑀤𑀢𑀺.

𑁧𑁦𑁭𑁭. ‘‘𑀑𑀝𑁆𑀞𑀧𑁆𑀧𑀳𑀢𑀫𑀢𑁆𑀢𑁂𑀦, 𑀅𑀢𑁆𑀢𑀸𑀦𑀫𑁆𑀧𑀺 𑀦 𑀧𑀲𑁆𑀲𑀢𑀺;

𑀧𑀢𑁆𑀣𑀤𑁆𑀥𑀕𑀻𑀯𑁄 𑀘𑀭𑀢𑀺, 𑀅𑀳𑀁 𑀲𑁂𑀬𑁆𑀬𑁄𑀢𑀺 𑀫𑀜𑁆𑀜𑀢𑀺.

𑁧𑁦𑁭𑁮. ‘‘𑀅𑀲𑁂𑀬𑁆𑀬𑁄 𑀲𑁂𑀬𑁆𑀬𑀲𑀫𑀸𑀦𑀁, 𑀩𑀸𑀮𑁄 𑀫𑀜𑁆𑀜𑀢𑀺 𑀅𑀢𑁆𑀢𑀸𑀦𑀁;

𑀦 𑀢𑀁 𑀯𑀺𑀜𑁆𑀜𑀽 𑀧𑀲𑀁𑀲𑀦𑁆𑀢𑀺, 𑀧𑀢𑁆𑀣𑀤𑁆𑀥𑀫𑀸𑀦𑀲𑀁 𑀦𑀭𑀁.

𑁧𑁦𑁭𑁯. ‘‘𑀬𑁄 𑀘 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺, 𑀦𑀸𑀳𑀁 𑀲𑁂𑀬𑁆𑀬𑁄𑀢𑀺 𑀯𑀸 𑀧𑀦;

𑀳𑀻𑀦𑁄 𑀢𑀁𑀲𑀤𑀺𑀲𑁄 𑀯𑀸𑀢𑀺, 𑀯𑀺𑀥𑀸𑀲𑀼 𑀦 𑀯𑀺𑀓𑀫𑁆𑀧𑀢𑀺.

𑁧𑁦𑁮𑁦. ‘‘𑀧𑀜𑁆𑀜𑀯𑀦𑁆𑀢𑀁 𑀢𑀣𑀸 𑀢𑀸𑀤𑀺𑀁, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑀁;

𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑀁, 𑀢𑀜𑁆𑀘𑁂 𑀯𑀺𑀜𑁆𑀜𑀽 𑀧𑀲𑀁𑀲𑀭𑁂.

𑁧𑁦𑁮𑁧. ‘‘𑀬𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼, 𑀕𑀸𑀭𑀯𑁄 𑀦𑀽𑀧𑀮𑀩𑁆𑀪𑀢𑀺;

𑀆𑀭𑀓𑀸 𑀳𑁄𑀢𑀺 𑀲𑀤𑁆𑀥𑀫𑁆𑀫𑀸, 𑀦𑀪𑀢𑁄 𑀧𑀼𑀣𑀯𑀻 𑀬𑀣𑀸.

𑁧𑁦𑁮𑁨. ‘‘𑀬𑁂𑀲𑀜𑁆𑀘 𑀳𑀺𑀭𑀺 𑀑𑀢𑁆𑀢𑀧𑁆𑀧𑀁, 𑀲𑀤𑀸 𑀲𑀫𑁆𑀫𑀸 𑀉𑀧𑀝𑁆𑀞𑀺𑀢𑀁;

𑀯𑀺𑀭𑀽𑀴𑁆𑀳𑀩𑁆𑀭𑀳𑁆𑀫𑀘𑀭𑀺𑀬𑀸 𑀢𑁂, 𑀢𑁂𑀲𑀁 𑀔𑀻𑀡𑀸 𑀧𑀼𑀦𑀩𑁆𑀪𑀯𑀸.

𑁧𑁦𑁮𑁩. ‘‘𑀉𑀤𑁆𑀥𑀢𑁄 𑀘𑀧𑀮𑁄 𑀪𑀺𑀓𑁆𑀔𑀼, 𑀧𑀁𑀲𑀼𑀓𑀽𑀮𑁂𑀦 𑀧𑀸𑀭𑀼𑀢𑁄;

𑀓𑀧𑀻𑀯 𑀲𑀻𑀳𑀘𑀫𑁆𑀫𑁂𑀦, 𑀦 𑀲𑁄 𑀢𑁂𑀦𑀼𑀧𑀲𑁄𑀪𑀢𑀺.

𑁧𑁦𑁮𑁪. ‘‘𑀅𑀦𑀼𑀤𑁆𑀥𑀢𑁄 𑀅𑀘𑀧𑀮𑁄, 𑀦𑀺𑀧𑀓𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄;

𑀲𑁄𑀪𑀢𑀺 𑀧𑀁𑀲𑀼𑀓𑀽𑀮𑁂𑀦, 𑀲𑀻𑀳𑁄𑀯 𑀕𑀺𑀭𑀺𑀕𑀩𑁆𑀪𑀭𑁂.

𑁧𑁦𑁮𑁫. ‘‘𑀏𑀢𑁂 𑀲𑀫𑁆𑀩𑀳𑀼𑀮𑀸 𑀤𑁂𑀯𑀸, 𑀇𑀤𑁆𑀥𑀺𑀫𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀤𑀲𑀤𑁂𑀯𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑁂 𑀢𑁂 𑀩𑁆𑀭𑀳𑁆𑀫𑀓𑀸𑀬𑀺𑀓𑀸.

𑁧𑁦𑁮𑁬. ‘‘𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀯𑀻𑀭𑀁, 𑀫𑀳𑀸𑀛𑀸𑀬𑀺𑀁 𑀲𑀫𑀸𑀳𑀺𑀢𑀁;

𑀲𑀸𑀭𑀺𑀧𑀼𑀢𑁆𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀢𑀺𑀝𑁆𑀞𑀦𑁆𑀢𑀺 𑀧𑀜𑁆𑀚𑀮𑀻𑀓𑀢𑀸.

𑁧𑁦𑁮𑁭. ‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;