𑁧𑁭. 𑀢𑀺𑀁𑀲𑀦𑀺𑀧𑀸𑀢𑁄

𑁧. 𑀨𑀼𑀲𑁆𑀲𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀢𑀺𑀁𑀲𑀦𑀺𑀧𑀸𑀢𑁂 𑀧𑀸𑀲𑀸𑀤𑀺𑀓𑁂 𑀩𑀳𑀽 𑀤𑀺𑀲𑁆𑀯𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀨𑀼𑀲𑁆𑀲𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀲 𑀫𑀡𑁆𑀟𑀮𑀺𑀓𑀭𑀜𑁆𑀜𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀨𑀼𑀲𑁆𑀲𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀔𑀢𑁆𑀢𑀺𑀬𑀓𑀼𑀫𑀸𑀭𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄. 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑁆𑀢𑀸 𑀓𑀸𑀫𑁂𑀲𑀼 𑀅𑀮𑀕𑁆𑀕𑀘𑀺𑀢𑁆𑀢𑁄 𑀅𑀜𑁆𑀜𑀢𑀭𑀲𑁆𑀲 𑀫𑀳𑀸𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀘𑀭𑀺𑀬𑀸𑀦𑀼𑀓𑀽𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀧𑀸𑀤𑀓𑀁 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀧𑀡𑁆𑀟𑀭𑀕𑁄𑀢𑁆𑀢𑁄 𑀦𑀸𑀫 𑀏𑀓𑁄 𑀢𑀸𑀧𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑁂 𑀲𑀼𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁂 𑀪𑀸𑀯𑀺𑀢𑀓𑀸𑀬𑁂 𑀪𑀸𑀯𑀺𑀢𑀘𑀺𑀢𑁆𑀢𑁂 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 ‘‘𑀲𑀸𑀥𑀼 𑀯𑀢𑀸𑀬𑀁 𑀧𑀝𑀺𑀧𑀢𑁆𑀢𑀺 𑀮𑁄𑀓𑁂 𑀘𑀺𑀭𑀁 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀣𑁂𑀭𑀁 𑀧𑀼𑀘𑁆𑀙𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

𑁯𑁪𑁯. ‘‘𑀧𑀸𑀲𑀸𑀤𑀺𑀓𑁂 𑀩𑀳𑀽 𑀤𑀺𑀲𑁆𑀯𑀸, 𑀪𑀸𑀯𑀺𑀢𑀢𑁆𑀢𑁂 𑀲𑀼𑀲𑀁𑀯𑀼𑀢𑁂;

𑀇𑀲𑀺 𑀧𑀡𑁆𑀟𑀭𑀲𑀕𑁄𑀢𑁆𑀢𑁄, 𑀅𑀧𑀼𑀘𑁆𑀙𑀺 𑀨𑀼𑀲𑁆𑀲𑀲𑀯𑁆𑀳𑀬’’𑀦𑁆𑀢𑀺. 𑁋 𑀕𑀸𑀣𑀁 𑀆𑀤𑀺𑀢𑁄 𑀞𑀧𑁂𑀲𑀼𑀁;

𑀢𑀢𑁆𑀣 𑀧𑀸𑀲𑀸𑀤𑀺𑀓𑁂𑀢𑀺 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀬𑀸 𑀧𑀲𑀸𑀤𑀸𑀭𑀳𑁂. 𑀩𑀳𑀽𑀢𑀺 𑀲𑀫𑁆𑀩𑀳𑀼𑀮𑁂. 𑀪𑀸𑀯𑀺𑀢𑀢𑁆𑀢𑁂𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀳𑀺 𑀪𑀸𑀯𑀺𑀢𑀘𑀺𑀢𑁆𑀢𑁂. 𑀲𑀼𑀲𑀁𑀯𑀼𑀢𑁂𑀢𑀺 𑀲𑀼𑀝𑁆𑀞𑀼 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁂. 𑀇𑀲𑀻𑀢𑀺 𑀢𑀸𑀧𑀲𑁄. 𑀧𑀡𑁆𑀟𑀭𑀲𑀕𑁄𑀢𑁆𑀢𑁄𑀢𑀺 𑀧𑀡𑁆𑀟𑀭𑀲𑁆𑀲 𑀦𑀸𑀫 𑀇𑀲𑀺𑀦𑁄 𑀯𑀁𑀲𑁂 𑀚𑀸𑀢𑀢𑁆𑀢𑀸 𑀢𑁂𑀦 𑀲𑀫𑀸𑀦𑀕𑁄𑀢𑁆𑀢𑁄. 𑀨𑀼𑀲𑁆𑀲𑀲𑀯𑁆𑀳𑀬𑀦𑁆𑀢𑀺 𑀨𑀼𑀲𑁆𑀲𑀲𑀤𑁆𑀤𑁂𑀦 𑀅𑀯𑁆𑀳𑀸𑀢𑀩𑁆𑀩𑀁, 𑀨𑀼𑀲𑁆𑀲𑀦𑀸𑀫𑀓𑀦𑁆𑀢𑀺 𑀅𑀢𑁆𑀣𑁄.

𑁯𑁫𑁦. ‘‘𑀓𑀺𑀁 𑀙𑀦𑁆𑀤𑀸 𑀓𑀺𑀫𑀥𑀺𑀧𑁆𑀧𑀸𑀬𑀸, 𑀓𑀺𑀫𑀸𑀓𑀧𑁆𑀧𑀸 𑀪𑀯𑀺𑀲𑁆𑀲𑀭𑁂;

𑀅𑀦𑀸𑀕𑀢𑀫𑁆𑀳𑀺 𑀓𑀸𑀮𑀫𑁆𑀳𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺. 𑁋

𑀅𑀬𑀁 𑀢𑀲𑁆𑀲 𑀇𑀲𑀺𑀦𑁄 𑀧𑀼𑀘𑁆𑀙𑀸𑀕𑀸𑀣𑀸.

𑀢𑀢𑁆𑀣 𑀓𑀺𑀁 𑀙𑀦𑁆𑀤𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀦𑀸𑀕𑀢𑁂 𑀪𑀺𑀓𑁆𑀔𑀽 𑀓𑀻𑀤𑀺𑀲𑀘𑁆𑀙𑀦𑁆𑀤𑀸 𑀓𑀻𑀤𑀺𑀲𑀸𑀥𑀺𑀫𑀼𑀢𑁆𑀢𑀺𑀓𑀸, 𑀓𑀺𑀁 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸, 𑀉𑀤𑀸𑀳𑀼 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀓𑀺𑀫𑀥𑀺𑀧𑁆𑀧𑀸𑀬𑀸𑀢𑀺 𑀓𑀻𑀤𑀺𑀲𑀸𑀥𑀺𑀧𑁆𑀧𑀸𑀬𑀸 𑀓𑀻𑀤𑀺𑀲𑀚𑁆𑀛𑀸𑀲𑀬𑀸, 𑀓𑀺𑀁 𑀲𑀁𑀓𑀺𑀮𑁂𑀲𑀚𑁆𑀛𑀸𑀲𑀬𑀸, 𑀉𑀤𑀸𑀳𑀼 𑀯𑁄𑀤𑀸𑀦𑀚𑁆𑀛𑀸𑀲𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀙𑀦𑁆𑀤𑀸 𑀦𑀸𑀫 𑀓𑀢𑁆𑀢𑀼𑀓𑀫𑁆𑀬𑀢𑀸, 𑀢𑀲𑁆𑀫𑀸 𑀓𑀻𑀤𑀺𑀲𑀻 𑀢𑁂𑀲𑀁 𑀓𑀢𑁆𑀢𑀼𑀓𑀫𑁆𑀬𑀢𑀸𑀢𑀺 𑀅𑀢𑁆𑀣𑁄. 𑀅𑀥𑀺𑀧𑁆𑀧𑀸𑀬𑁄 𑀅𑀚𑁆𑀛𑀸𑀲𑀬𑁄𑀬𑁂𑀯. 𑀓𑀺𑀫𑀸𑀓𑀧𑁆𑀧𑀸𑀢𑀺 𑀓𑀻𑀤𑀺𑀲𑀸𑀓𑀧𑁆𑀧𑀸. 𑀆𑀓𑀧𑁆𑀧𑀸𑀢𑀺 𑀘 𑀯𑁂𑀲𑀕𑀳𑀡𑀸𑀤𑀺𑀯𑀸𑀭𑀺𑀢𑁆𑀢𑀘𑀸𑀭𑀺𑀢𑁆𑀢𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀪𑀯𑀺𑀲𑁆𑀲𑀭𑁂𑀢𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀁 𑀫𑁂𑀢𑀺 𑀢𑀁 𑀅𑀦𑀸𑀕𑀢𑁂 𑀪𑀺𑀓𑁆𑀔𑀽𑀦𑀁 𑀙𑀦𑁆𑀤𑀸𑀥𑀺𑀧𑁆𑀧𑀸𑀬𑀸𑀓𑀧𑁆𑀧𑀪𑁂𑀤𑀁 𑀧𑀼𑀘𑁆𑀙𑀺𑀢𑁄 𑀫𑀬𑁆𑀳𑀁 𑀅𑀓𑁆𑀔𑀸𑀳𑀺 𑀓𑀣𑁂𑀳𑀻𑀢𑀺 𑀣𑁂𑀭𑀁 𑀅𑀚𑁆𑀛𑁂𑀲𑀢𑀺. 𑀢𑀲𑁆𑀲 𑀣𑁂𑀭𑁄 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀦𑁆𑀢𑁄 𑀲𑀓𑁆𑀓𑀘𑁆𑀘𑀲𑀯𑀦𑁂 𑀢𑀸𑀯 𑀦𑀺𑀬𑁄𑀚𑁂𑀢𑀼𑀁 𑁋

𑁯𑁫𑁧. ‘‘𑀲𑀼𑀡𑁄𑀳𑀺 𑀯𑀘𑀦𑀁 𑀫𑀬𑁆𑀳𑀁, 𑀇𑀲𑀺 𑀧𑀡𑁆𑀟𑀭𑀲𑀯𑁆𑀳𑀬;

𑀲𑀓𑁆𑀓𑀘𑁆𑀘𑀁 𑀉𑀧𑀥𑀸𑀭𑁂𑀳𑀺, 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑁆𑀬𑀦𑀸𑀕𑀢’’𑀦𑁆𑀢𑀺. 𑁋 𑀕𑀸𑀣𑀫𑀸𑀳;

𑀢𑀲𑁆𑀲𑀢𑁆𑀣𑁄 𑁋 𑀪𑁄 𑀧𑀡𑁆𑀟𑀭𑀦𑀸𑀫 𑀇𑀲𑀺, 𑀬𑀁 𑀢𑁆𑀯𑀁 𑀫𑀁 𑀧𑀼𑀘𑁆𑀙𑀲𑀺, 𑀢𑀁 𑀢𑁂 𑀅𑀦𑀸𑀕𑀢𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺, 𑀆𑀘𑀺𑀓𑁆𑀔𑀢𑁄 𑀧𑀦 𑀫𑀫 𑀯𑀘𑀦𑀁 𑀲𑀼𑀡𑀸𑀳𑀺 𑀅𑀦𑀸𑀕𑀢𑀢𑁆𑀣𑀤𑀻𑀧𑀦𑀢𑁄 𑀲𑀁𑀯𑁂𑀕𑀸𑀯𑀳𑀢𑁄 𑀘 𑀲𑀓𑁆𑀓𑀘𑁆𑀘𑀁 𑀉𑀧𑀥𑀸𑀭𑁂𑀳𑀻𑀢𑀺.

𑀅𑀣 𑀣𑁂𑀭𑁄 𑀅𑀦𑀸𑀕𑀢𑀁𑀲𑀜𑀸𑀡𑁂𑀦 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀪𑀸𑀯𑀺𑀦𑀺𑀁 𑀧𑀯𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀆𑀘𑀺𑀓𑁆𑀔𑀦𑁆𑀢𑁄 𑁋

𑁯𑁫𑁨. ‘‘𑀓𑁄𑀥𑀦𑀸 𑀉𑀧𑀦𑀸𑀳𑀻 𑀘, 𑀫𑀓𑁆𑀔𑀻 𑀣𑀫𑁆𑀪𑀻 𑀲𑀞𑀸 𑀩𑀳𑀽;

𑀇𑀲𑁆𑀲𑀼𑀓𑀻 𑀦𑀸𑀦𑀸𑀯𑀸𑀤𑀸 𑀘, 𑀪𑀯𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑁂.

𑁯𑁫𑁩. ‘‘𑀅𑀜𑁆𑀜𑀸𑀢𑀫𑀸𑀦𑀺𑀦𑁄 𑀥𑀫𑁆𑀫𑁂, 𑀕𑀫𑁆𑀪𑀻𑀭𑁂 𑀢𑀻𑀭𑀕𑁄𑀘𑀭𑀸;

𑀮𑀳𑀼𑀓𑀸 𑀅𑀕𑀭𑀽 𑀥𑀫𑁆𑀫𑁂, 𑀅𑀜𑁆𑀜𑀫𑀜𑁆𑀜𑀫𑀕𑀸𑀭𑀯𑀸.

𑁯𑁫𑁪. ‘‘𑀩𑀳𑀽 𑀆𑀤𑀻𑀦𑀯𑀸 𑀮𑁄𑀓𑁂, 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑁆𑀬𑀦𑀸𑀕𑀢𑁂;

𑀲𑀼𑀤𑁂𑀲𑀺𑀢𑀁 𑀇𑀫𑀁 𑀥𑀫𑁆𑀫𑀁, 𑀓𑀺𑀮𑁂𑀲𑀺𑀲𑁆𑀲𑀦𑁆𑀢𑀺 𑀤𑀼𑀫𑁆𑀫𑀢𑀻.

𑁯𑁫𑁫. ‘‘𑀕𑀼𑀡𑀳𑀻𑀦𑀸𑀧𑀺 𑀲𑀗𑁆𑀖𑀫𑁆𑀳𑀺, 𑀯𑁄𑀳𑀭𑀦𑁆𑀢𑀸 𑀯𑀺𑀲𑀸𑀭𑀤𑀸;

𑀩𑀮𑀯𑀦𑁆𑀢𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀼𑀔𑀭𑀸 𑀅𑀲𑁆𑀲𑀼𑀢𑀸𑀯𑀺𑀦𑁄.

𑁯𑁫𑁬. ‘‘𑀕𑀼𑀡𑀯𑀦𑁆𑀢𑁄𑀧𑀺 𑀲𑀗𑁆𑀖𑀫𑁆𑀳𑀺, 𑀯𑁄𑀳𑀭𑀦𑁆𑀢𑀸 𑀬𑀣𑀸𑀢𑁆𑀣𑀢𑁄;

𑀤𑀼𑀩𑁆𑀩𑀮𑀸 𑀢𑁂 𑀪𑀯𑀺𑀲𑁆𑀲𑀦𑁆𑀢𑀺, 𑀳𑀺𑀭𑀻𑀫𑀦𑀸 𑀅𑀦𑀢𑁆𑀣𑀺𑀓𑀸.

𑁯𑁫𑁭. ‘‘𑀭𑀚𑀢𑀁 𑀚𑀸𑀢𑀭𑀽𑀧𑀜𑁆𑀘, 𑀔𑁂𑀢𑁆𑀢𑀁 𑀯𑀢𑁆𑀣𑀼𑀫𑀚𑁂𑀴𑀓𑀁.

𑀤𑀸𑀲𑀺𑀤𑀸𑀲𑀜𑁆𑀘 𑀤𑀼𑀫𑁆𑀫𑁂𑀥𑀸, 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑁆𑀬𑀦𑀸𑀕𑀢𑁂.

𑁯𑁫𑁮. ‘‘𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑁄 𑀩𑀸𑀮𑀸, 𑀲𑀻𑀮𑁂𑀲𑀼 𑀅𑀲𑀫𑀸𑀳𑀺𑀢𑀸;

𑀉𑀦𑁆𑀦𑀴𑀸 𑀯𑀺𑀘𑀭𑀺𑀲𑁆𑀲𑀦𑁆𑀢𑀺, 𑀓𑀮𑀳𑀸𑀪𑀺𑀭𑀢𑀸 𑀫𑀕𑀸.

𑁯𑁫𑁯. ‘‘𑀉𑀤𑁆𑀥𑀢𑀸 𑀘 𑀪𑀯𑀺𑀲𑁆𑀲𑀦𑁆𑀢𑀺, 𑀦𑀻𑀮𑀘𑀻𑀯𑀭𑀧𑀸𑀭𑀼𑀢𑀸;

𑀓𑀼𑀳𑀸 𑀣𑀤𑁆𑀥𑀸 𑀮𑀧𑀸 𑀲𑀺𑀗𑁆𑀕𑀻, 𑀘𑀭𑀺𑀲𑁆𑀲𑀦𑁆𑀢𑁆𑀬𑀭𑀺𑀬𑀸 𑀯𑀺𑀬.

𑁯𑁬𑁦. ‘‘𑀢𑁂𑀮𑀲𑀡𑁆𑀞𑁂𑀳𑀺 𑀓𑁂𑀲𑁂𑀳𑀺, 𑀘𑀧𑀮𑀸 𑀅𑀜𑁆𑀚𑀦𑀓𑁆𑀔𑀺𑀓𑀸;

𑀭𑀣𑀺𑀬𑀸𑀬 𑀕𑀫𑀺𑀲𑁆𑀲𑀦𑁆𑀢𑀺, 𑀤𑀦𑁆𑀢𑀯𑀡𑁆𑀡𑀺𑀓𑀧𑀸𑀭𑀼𑀢𑀸.

𑁯𑁬𑁧. ‘‘𑀅𑀚𑁂𑀕𑀼𑀘𑁆𑀙𑀁 𑀯𑀺𑀫𑀼𑀢𑁆𑀢𑁂𑀳𑀺, 𑀲𑀼𑀭𑀢𑁆𑀢𑀁 𑀅𑀭𑀳𑀤𑁆𑀥𑀚𑀁;

𑀚𑀺𑀕𑀼𑀘𑁆𑀙𑀺𑀲𑁆𑀲𑀦𑁆𑀢𑀺 𑀓𑀸𑀲𑀸𑀯𑀁, 𑀑𑀤𑀸𑀢𑁂𑀲𑀼 𑀲𑀫𑀼𑀘𑁆𑀙𑀺𑀢𑀸.

𑁯𑁬𑁨. ‘‘𑀮𑀸𑀪𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀼𑀲𑀻𑀢𑀸 𑀳𑀻𑀦𑀯𑀻𑀭𑀺𑀬𑀸;

𑀓𑀺𑀘𑁆𑀙𑀦𑁆𑀢𑀸 𑀯𑀦𑀧𑀢𑁆𑀣𑀸𑀦𑀺, 𑀕𑀸𑀫𑀦𑁆𑀢𑁂𑀲𑀼 𑀯𑀲𑀺𑀲𑁆𑀲𑀭𑁂.

𑁯𑁬𑁩. ‘‘𑀬𑁂 𑀬𑁂 𑀮𑀸𑀪𑀁 𑀮𑀪𑀺𑀲𑁆𑀲𑀦𑁆𑀢𑀺, 𑀫𑀺𑀘𑁆𑀙𑀸𑀚𑀻𑀯𑀭𑀢𑀸 𑀲𑀤𑀸;

𑀢𑁂 𑀢𑁂𑀯 𑀅𑀦𑀼𑀲𑀺𑀓𑁆𑀔𑀦𑁆𑀢𑀸, 𑀪𑀚𑀺𑀲𑁆𑀲𑀦𑁆𑀢𑀺 𑀅𑀲𑀁𑀬𑀢𑀸.

𑁯𑁬𑁪. ‘‘𑀬𑁂 𑀬𑁂 𑀅𑀮𑀸𑀪𑀺𑀦𑁄 𑀮𑀸𑀪𑀁, 𑀦 𑀢𑁂 𑀧𑀼𑀚𑁆𑀚𑀸 𑀪𑀯𑀺𑀲𑁆𑀲𑀭𑁂;

𑀲𑀼𑀧𑁂𑀲𑀮𑁂𑀧𑀺 𑀢𑁂 𑀥𑀻𑀭𑁂, 𑀲𑁂𑀯𑀺𑀲𑁆𑀲𑀦𑁆𑀢𑀺 𑀦 𑀢𑁂 𑀢𑀤𑀸.

𑁯𑁬𑁫. ‘‘𑀫𑀺𑀮𑀓𑁆𑀔𑀼𑀭𑀚𑀦𑀁 𑀭𑀢𑁆𑀢𑀁, 𑀕𑀭𑀳𑀦𑁆𑀢𑀸 𑀲𑀓𑀁 𑀥𑀚𑀁;

𑀢𑀺𑀢𑁆𑀣𑀺𑀬𑀸𑀦𑀁 𑀥𑀚𑀁 𑀓𑁂𑀘𑀺, 𑀥𑀸𑀭𑀺𑀲𑁆𑀲𑀦𑁆𑀢𑁆𑀬𑀯𑀤𑀸𑀢𑀓𑀁.

𑁯𑁬𑁬. ‘‘𑀅𑀕𑀸𑀭𑀯𑁄 𑀘 𑀓𑀸𑀲𑀸𑀯𑁂, 𑀢𑀤𑀸 𑀢𑁂𑀲𑀁 𑀪𑀯𑀺𑀲𑁆𑀲𑀢𑀺;

𑀧𑀝𑀺𑀲𑀗𑁆𑀔𑀸 𑀘 𑀓𑀸𑀲𑀸𑀯𑁂, 𑀪𑀺𑀓𑁆𑀔𑀽𑀦𑀁 𑀦 𑀪𑀯𑀺𑀲𑁆𑀲𑀢𑀺.

𑁯𑁬𑁭. ‘‘𑀅𑀪𑀺𑀪𑀽𑀢𑀲𑁆𑀲 𑀤𑀼𑀓𑁆𑀔𑁂𑀦, 𑀲𑀮𑁆𑀮𑀯𑀺𑀤𑁆𑀥𑀲𑁆𑀲 𑀭𑀼𑀧𑁆𑀧𑀢𑁄;

𑀧𑀝𑀺𑀲𑀗𑁆𑀔𑀸 𑀫𑀳𑀸𑀖𑁄𑀭𑀸, 𑀦𑀸𑀕𑀲𑁆𑀲𑀸𑀲𑀺 𑀅𑀘𑀺𑀦𑁆𑀢𑀺𑀬𑀸.

𑁯𑁬𑁮. ‘‘𑀙𑀤𑁆𑀤𑀦𑁆𑀢𑁄 𑀳𑀺 𑀢𑀤𑀸 𑀤𑀺𑀲𑁆𑀯𑀸, 𑀲𑀼𑀭𑀢𑁆𑀢𑀁 𑀅𑀭𑀳𑀤𑁆𑀥𑀚𑀁;

𑀢𑀸𑀯𑀤𑁂𑀯𑀪𑀡𑀻 𑀕𑀸𑀣𑀸, 𑀕𑀚𑁄 𑀅𑀢𑁆𑀣𑁄𑀧𑀲𑀁𑀳𑀺𑀢𑀸.

𑁯𑁬𑁯. ‘‘𑀅𑀦𑀺𑀓𑁆𑀓𑀲𑀸𑀯𑁄 𑀓𑀸𑀲𑀸𑀯𑀁, 𑀬𑁄 𑀯𑀢𑁆𑀣𑀁 𑀧𑀭𑀺𑀥𑀲𑁆𑀲𑀢𑀺;

𑀅𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀦 𑀲𑁄 𑀓𑀸𑀲𑀸𑀯𑀫𑀭𑀳𑀢𑀺.

𑁯𑁭𑁦. ‘‘𑀬𑁄 𑀘 𑀯𑀦𑁆𑀢𑀓𑀲𑀸𑀯𑀲𑁆𑀲, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄;

𑀉𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀲 𑀯𑁂 𑀓𑀸𑀲𑀸𑀯𑀫𑀭𑀳𑀢𑀺.

𑁯𑁭𑁧. ‘‘𑀯𑀺𑀧𑀦𑁆𑀦𑀲𑀻𑀮𑁄 𑀤𑀼𑀫𑁆𑀫𑁂𑀥𑁄, 𑀧𑀸𑀓𑀝𑁄 𑀓𑀸𑀫𑀓𑀸𑀭𑀺𑀬𑁄;

𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀦𑀺𑀲𑁆𑀲𑀼𑀓𑁆𑀓𑁄, 𑀦 𑀲𑁄 𑀓𑀸𑀲𑀸𑀯𑀫𑀭𑀳𑀢𑀺.

𑁯𑁭𑁨. ‘‘𑀬𑁄 𑀘 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀯𑀻𑀢𑀭𑀸𑀕𑁄 𑀲𑀫𑀸𑀳𑀺𑀢𑁄;

𑀑𑀤𑀸𑀢𑀫𑀦𑀲𑀗𑁆𑀓𑀧𑁆𑀧𑁄, 𑀲 𑀯𑁂 𑀓𑀸𑀲𑀸𑀯𑀫𑀭𑀳𑀢𑀺.

𑁯𑁭𑁩. ‘‘𑀉𑀤𑁆𑀥𑀢𑁄 𑀉𑀦𑁆𑀦𑀴𑁄 𑀩𑀸𑀮𑁄, 𑀲𑀻𑀮𑀁 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀑𑀤𑀸𑀢𑀓𑀁 𑀅𑀭𑀳𑀢𑀺, 𑀓𑀸𑀲𑀸𑀯𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺.

𑁯𑁭𑁪. ‘‘𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘, 𑀤𑀼𑀝𑁆𑀞𑀘𑀺𑀢𑁆𑀢𑀸 𑀅𑀦𑀸𑀤𑀭𑀸;

𑀢𑀸𑀤𑀻𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑀸𑀦𑀁, 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀦𑁆𑀢𑁆𑀬𑀦𑀸𑀕𑀢𑁂.

𑁯𑁭𑁫. ‘‘𑀲𑀺𑀓𑁆𑀔𑀸𑀧𑁂𑀦𑁆𑀢𑀸𑀧𑀺 𑀣𑁂𑀭𑁂𑀳𑀺, 𑀩𑀸𑀮𑀸 𑀘𑀻𑀯𑀭𑀥𑀸𑀭𑀡𑀁;

𑀦 𑀲𑀼𑀡𑀺𑀲𑁆𑀲𑀦𑁆𑀢𑀺 𑀤𑀼𑀫𑁆𑀫𑁂𑀥𑀸, 𑀧𑀸𑀓𑀝𑀸 𑀓𑀸𑀫𑀓𑀸𑀭𑀺𑀬𑀸.

𑁯𑁭𑁬. ‘‘𑀢𑁂 𑀢𑀣𑀸 𑀲𑀺𑀓𑁆𑀔𑀺𑀢𑀸 𑀩𑀸𑀮𑀸, 𑀅𑀜𑁆𑀜𑀫𑀜𑁆𑀜𑀁 𑀅𑀕𑀸𑀭𑀯𑀸;

𑀦𑀸𑀤𑀺𑀬𑀺𑀲𑁆𑀲𑀦𑁆𑀢𑀼𑀧𑀚𑁆𑀛𑀸𑀬𑁂, 𑀔𑀴𑀼𑀗𑁆𑀓𑁄 𑀯𑀺𑀬 𑀲𑀸𑀭𑀣𑀺𑀁.

𑁯𑁭𑁭. ‘‘𑀏𑀯𑀁 𑀅𑀦𑀸𑀕𑀢𑀤𑁆𑀥𑀸𑀦𑀁, 𑀧𑀝𑀺𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀺;

𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀧𑀢𑁆𑀢𑁂 𑀓𑀸𑀮𑀫𑁆𑀳𑀺 𑀧𑀘𑁆𑀙𑀺𑀫𑁂.

𑁯𑁭𑁮. ‘‘𑀧𑀼𑀭𑀸 𑀆𑀕𑀘𑁆𑀙𑀢𑁂 𑀏𑀢𑀁, 𑀅𑀦𑀸𑀕𑀢𑀁 𑀫𑀳𑀩𑁆𑀪𑀬𑀁;

𑀲𑀼𑀩𑁆𑀩𑀘𑀸 𑀳𑁄𑀣 𑀲𑀔𑀺𑀮𑀸, 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸.

𑁯𑁭𑁯. ‘‘𑀫𑁂𑀢𑁆𑀢𑀘𑀺𑀢𑁆𑀢𑀸 𑀓𑀸𑀭𑀼𑀡𑀺𑀓𑀸, 𑀳𑁄𑀣 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;

𑀆𑀭𑀤𑁆𑀥𑀯𑀻𑀭𑀺𑀬𑀸 𑀧𑀳𑀺𑀢𑀢𑁆𑀢𑀸, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑀸.

𑁯𑁮𑁦. ‘‘𑀧𑀫𑀸𑀤𑀁 𑀪𑀬𑀢𑁄 𑀤𑀺𑀲𑁆𑀯𑀸, 𑀅𑀧𑁆𑀧𑀫𑀸𑀤𑀜𑁆𑀘 𑀔𑁂𑀫𑀢𑁄;

𑀪𑀸𑀯𑁂𑀣𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀨𑀼𑀲𑀦𑁆𑀢𑀸 𑀅𑀫𑀢𑀁 𑀧𑀤’’𑀦𑁆𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀓𑁄𑀥𑀦𑀸𑀢𑀺 𑀓𑀼𑀚𑁆𑀛𑀦𑀲𑀻𑀮𑀸. 𑀪𑀯𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀁 𑀣𑁂𑀭𑀲𑁆𑀲 𑀓𑀸𑀮𑁂 𑀢𑀣𑀸 𑀦𑀸𑀳𑁂𑀲𑀼𑀦𑁆𑀢𑀺? 𑀦 𑀦𑀸𑀳𑁂𑀲𑀼𑀁. 𑀢𑀤𑀸 𑀧𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀩𑀳𑀼𑀮𑀢𑀸𑀬 𑀑𑀯𑀸𑀤𑀓𑁂𑀲𑀼 𑀯𑀺𑀜𑁆𑀜𑀸𑀧𑀓𑁂𑀲𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀩𑀳𑀽𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀓𑀺𑀮𑁂𑀲𑁂𑀲𑀼 𑀩𑀮𑀯𑀦𑁆𑀢𑁂𑀲𑀼 𑀧𑀝𑀺𑀲𑀗𑁆𑀔𑀸𑀦𑀩𑀳𑀼𑀮𑀢𑀸𑀬 𑀘 𑀬𑁂𑀪𑀼𑀬𑁆𑀬𑁂𑀦 𑀪𑀺𑀓𑁆𑀔𑀽 𑀅𑀓𑁆𑀓𑁄𑀥𑀦𑀸 𑀅𑀳𑁂𑀲𑀼𑀁, 𑀆𑀬𑀢𑀺𑀁 𑀢𑀩𑁆𑀩𑀺𑀧𑀭𑀺𑀬𑀸𑀬𑁂 𑀅𑀢𑀺𑀓𑁄𑀥𑀦𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 ‘‘𑀅𑀦𑀸𑀕𑀢𑁂’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑀦𑀸𑀳𑀻𑀢𑀺 𑀆𑀖𑀸𑀢𑀯𑀢𑁆𑀣𑀽𑀲𑀼 𑀆𑀖𑀸𑀢𑀲𑁆𑀲 𑀉𑀧𑀦𑀬𑁆𑀳𑀦𑀲𑀻𑀮𑀸 𑀉𑀧𑀦𑀸𑀳𑀲𑀫𑁆𑀪𑀯𑀢𑁄 𑀯𑀸 𑀉𑀧𑀦𑀸𑀳𑀻. 𑀢𑀢𑁆𑀣 𑀧𑀼𑀭𑀺𑀫𑀓𑀸𑀮𑀺𑀓𑁄 𑀩𑁆𑀬𑀸𑀧𑀸𑀤𑁄 𑀓𑁄𑀥𑁄, 𑀅𑀧𑀭𑀓𑀸𑀮𑀺𑀓𑁄 𑀉𑀧𑀦𑀸𑀳𑁄. 𑀲𑀓𑀺𑀁 𑀧𑀯𑀢𑁆𑀢𑁄 𑀯𑀸 𑀤𑁄𑀲𑁄 𑀓𑁄𑀥𑁄, 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑁄 𑀉𑀧𑀦𑀸𑀳𑁄. 𑀧𑀭𑁂𑀲𑀁 𑀯𑀺𑀚𑁆𑀚𑀫𑀸𑀦𑁂 𑀕𑀼𑀡𑁂 𑀫𑀓𑁆𑀔𑀦𑁆𑀢𑀺 𑀧𑀼𑀜𑁆𑀚𑀦𑁆𑀢𑀺, 𑀢𑁂𑀲𑀁 𑀯𑀸 𑀉𑀤𑀓𑀧𑀼𑀜𑁆𑀚𑀦𑀺𑀬𑀸 𑀯𑀺𑀬 𑀉𑀤𑀓𑀲𑁆𑀲 𑀫𑀓𑁆𑀔𑁄 𑀫𑀓𑁆𑀔𑀦𑀁 𑀧𑀼𑀜𑁆𑀚𑀦𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀫𑀓𑁆𑀔𑀻. 𑀅𑀢𑀺𑀫𑀸𑀦𑀮𑀓𑁆𑀔𑀡𑁄 𑀣𑀫𑁆𑀪𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀣𑀫𑁆𑀪𑀻. 𑀲𑀞𑀸𑀢𑀺 𑀅𑀲𑀦𑁆𑀢𑀕𑀼𑀡𑀯𑀺𑀪𑀸𑀯𑀦𑀮𑀓𑁆𑀔𑀡𑁂𑀦 𑀲𑀸𑀞𑁂𑀬𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀇𑀲𑁆𑀲𑀼𑀓𑀻𑀢𑀺 𑀧𑀭𑀲𑀫𑁆𑀧𑀢𑁆𑀢𑀺𑀔𑀺𑀬𑁆𑀬𑀦𑀮𑀓𑁆𑀔𑀡𑀸𑀬 𑀇𑀲𑁆𑀲𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀦𑀸𑀦𑀸𑀯𑀸𑀤𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀯𑀸𑀤𑀸 𑀯𑀺𑀭𑀼𑀤𑁆𑀥𑀤𑀺𑀝𑁆𑀞𑀺𑀓𑀸, 𑀓𑀮𑀳𑀓𑀸𑀭𑀓𑀸 𑀘𑀸𑀢𑀺 𑀅𑀢𑁆𑀣𑁄.

𑀅𑀜𑁆𑀜𑀸𑀢𑀫𑀸𑀦𑀺𑀦𑁄 𑀥𑀫𑁆𑀫𑁂, 𑀕𑀫𑁆𑀪𑀻𑀭𑁂 𑀢𑀻𑀭𑀕𑁄𑀘𑀭𑀸𑀢𑀺 𑀕𑀫𑁆𑀪𑀻𑀭𑁂 𑀤𑀼𑀭𑁄𑀪𑀸𑀲𑁂 𑀲𑀤𑁆𑀥𑀫𑁆𑀫𑁂 𑀅𑀜𑁆𑀜𑀸𑀢𑁂 𑀏𑀯 ‘‘𑀜𑀸𑀢𑁄𑀢𑀺, 𑀤𑀺𑀝𑁆𑀞𑁄’’𑀢𑀺 𑀏𑀯𑀁 𑀫𑀸𑀦𑀺𑀦𑁄, 𑀢𑀢𑁄 𑀏𑀯 𑀢𑀲𑁆𑀲 𑀑𑀭𑀪𑀸𑀕𑁂 𑀧𑀯𑀢𑁆𑀢𑀺𑀢𑀸𑀬 𑀑𑀭𑀺𑀫𑀢𑀻𑀭𑀕𑁄𑀘𑀭𑀸. 𑀮𑀳𑀼𑀓𑀸𑀢𑀺 𑀮𑀳𑀼𑀲𑀪𑀸𑀯𑀸 𑀘𑀧𑀮𑀸. 𑀅𑀕𑀭𑀽 𑀥𑀫𑁆𑀫𑁂𑀢𑀺 𑀲𑀤𑁆𑀥𑀫𑁆𑀫𑁂 𑀕𑀸𑀭𑀯𑀭𑀳𑀺𑀢𑀸. 𑀅𑀜𑁆𑀜𑀫𑀜𑁆𑀜𑀫𑀕𑀸𑀭𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀅𑀧𑁆𑀧𑀢𑀺𑀲𑁆𑀲𑀸, 𑀲𑀗𑁆𑀖𑁂 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀘 𑀕𑀭𑀼𑀕𑀸𑀭𑀯𑀯𑀺𑀭𑀳𑀺𑀢𑀸. 𑀩𑀳𑀽 𑀆𑀤𑀻𑀦𑀯𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸, 𑀯𑀓𑁆𑀔𑀫𑀸𑀦𑀸 𑀘 𑀩𑀳𑀽 𑀅𑀦𑁂𑀓𑀤𑁄𑀲𑀸 𑀅𑀦𑁆𑀢𑀭𑀸𑀬𑀸. 𑀮𑁄𑀓𑁂𑀢𑀺 𑀲𑀢𑁆𑀢𑀮𑁄𑀓𑁂. 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑁆𑀬𑀦𑀸𑀕𑀢𑁂𑀢𑀺 𑀅𑀦𑀸𑀕𑀢𑁂 𑀧𑀸𑀢𑀼 𑀪𑀯𑀺𑀲𑁆𑀲𑀦𑁆𑀢𑀺. 𑀲𑀼𑀤𑁂𑀲𑀺𑀢𑀁 𑀇𑀫𑀁 𑀥𑀫𑁆𑀫𑀦𑁆𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀼𑀝𑁆𑀞𑀼 𑀅𑀯𑀺𑀧𑀭𑀻𑀢𑀁 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀧𑁆𑀧𑀓𑀸𑀭𑁂𑀦 𑀤𑁂𑀲𑀺𑀢𑀁 𑀇𑀫𑀁 𑀆𑀕𑀫𑀲𑀤𑁆𑀥𑀫𑁆𑀫𑀁. 𑀓𑀺𑀮𑁂𑀲𑀺𑀲𑁆𑀲𑀦𑁆𑀢𑀻𑀢𑀺 𑀓𑀺𑀮𑀺𑀝𑁆𑀞𑀁 𑀓𑀺𑀮𑁂𑀲𑀤𑀽𑀲𑀺𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, ‘‘𑀆𑀧𑀢𑁆𑀢𑀺𑀁 ‘𑀅𑀦𑀸𑀧𑀢𑁆𑀢𑀻’𑀢𑀺 𑀕𑀭𑀼𑀓𑀸𑀧𑀢𑁆𑀢𑀺𑀁 ‘𑀮𑀳𑀼𑀓𑀸𑀧𑀢𑁆𑀢𑀻’’’𑀢𑀺𑀆𑀤𑀺𑀦𑀸 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁂𑀦 𑀅𑀲𑀤𑁆𑀥𑀫𑁆𑀫𑁂𑀦 𑀲𑀡𑁆𑀳𑀲𑀼𑀔𑀼𑀫𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀁 𑀧𑀝𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁂𑀦 𑀉𑀪𑀬𑀢𑁆𑀭𑀸𑀧𑀺 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁂𑀦 𑀲𑀁𑀓𑀺𑀮𑁂𑀲𑀺𑀲𑁆𑀲𑀦𑁆𑀢𑀺 𑀫𑀮𑀺𑀦𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀤𑀼𑀫𑁆𑀫𑀢𑀻𑀢𑀺 𑀦𑀺𑀧𑁆𑀧𑀜𑁆𑀜𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀪𑀯𑀺𑀲𑁆𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀦𑀸𑀕𑀢𑀫𑀤𑁆𑀥𑀸𑀦𑀁…𑀧𑁂… 𑀅𑀪𑀺𑀥𑀫𑁆𑀫𑀓𑀣𑀁 𑀯𑁂𑀤𑀮𑁆𑀮𑀓𑀣𑀁 𑀓𑀣𑁂𑀦𑁆𑀢𑀸 𑀓𑀡𑁆𑀳𑀥𑀫𑁆𑀫𑀁 𑀑𑀓𑁆𑀓𑀫𑀫𑀸𑀦𑀸 𑀦 𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺 (𑀅. 𑀦𑀺. 𑁫.𑁭𑁯).

𑀕𑀼𑀡𑀳𑀻𑀦𑀸𑀢𑀺 𑀲𑀻𑀮𑀸𑀤𑀺𑀕𑀼𑀡𑀯𑀺𑀭𑀳𑀺𑀢𑀸 𑀤𑀼𑀲𑁆𑀲𑀻𑀮𑀸, 𑀅𑀮𑀚𑁆𑀚𑀺𑀦𑁄 𑀘. 𑀅𑀣 𑀯𑀸 𑀕𑀼𑀡𑀳𑀻𑀦𑀸𑀢𑀺 𑀯𑀺𑀦𑀬𑀯𑀸𑀭𑀺𑀢𑁆𑀢𑀸𑀤𑀺𑀕𑀼𑀡𑁂𑀦 𑀳𑀻𑀦𑀸 𑀥𑀫𑁆𑀫𑀯𑀺𑀦𑀬𑁂 𑀅𑀧𑁆𑀧𑀓𑀢𑀜𑁆𑀜𑀼𑀦𑁄. 𑀲𑀗𑁆𑀖𑀫𑁆𑀳𑀻𑀢𑀺 𑀲𑀗𑁆𑀖𑀫𑀚𑁆𑀛𑁂. 𑀯𑁄𑀳𑀭𑀦𑁆𑀢𑀸𑀢𑀺 𑀓𑀣𑁂𑀦𑁆𑀢𑀸, 𑀲𑀗𑁆𑀖𑁂 𑀯𑀺𑀦𑀺𑀘𑁆𑀙𑀬𑀓𑀣𑀸𑀬 𑀯𑀢𑁆𑀢𑀫𑀸𑀦𑀸𑀬 𑀬𑀁𑀓𑀺𑀜𑁆𑀘𑀺 𑀪𑀡𑀦𑁆𑀢𑀸. 𑀯𑀺𑀲𑀸𑀭𑀤𑀸𑀢𑀺 𑀦𑀺𑀩𑁆𑀪𑀬𑀸 𑀧𑀕𑀩𑁆𑀪𑀸. 𑀩𑀮𑀯𑀦𑁆𑀢𑁄𑀢𑀺 𑀧𑀓𑁆𑀔𑀩𑀮𑁂𑀦 𑀩𑀮𑀯𑀦𑁆𑀢𑁄. 𑀫𑀼𑀔𑀭𑀸𑀢𑀺 𑀫𑀼𑀔𑀔𑀭𑀸 𑀔𑀭𑀯𑀸𑀤𑀺𑀦𑁄. 𑀅𑀲𑁆𑀲𑀼𑀢𑀸𑀯𑀺𑀦𑁄𑀢𑀺 𑀦 𑀲𑀼𑀢𑀯𑀦𑁆𑀢𑁄, 𑀓𑁂𑀯𑀮𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀬𑁂𑀦 𑀕𑀼𑀡𑀥𑀭𑀸 𑀳𑀼𑀢𑁆𑀯𑀸 ‘‘𑀥𑀫𑁆𑀫𑀁 ‘𑀅𑀥𑀫𑁆𑀫𑁄’𑀢𑀺, 𑀅𑀥𑀫𑁆𑀫𑀜𑁆𑀘 ‘𑀥𑀫𑁆𑀫𑁄’𑀢𑀺, 𑀯𑀺𑀦𑀬𑀁 ‘𑀅𑀯𑀺𑀦𑀬𑁄’𑀢𑀺, 𑀅𑀯𑀺𑀦𑀬𑀜𑁆𑀘 ‘𑀯𑀺𑀦𑀬𑁄’’’𑀢𑀺 𑀏𑀯𑀁 𑀅𑀢𑁆𑀢𑀦𑀸 𑀬𑀣𑀺𑀘𑁆𑀙𑀺𑀢𑀫𑀢𑁆𑀣𑀁 𑀲𑀗𑁆𑀖𑀫𑀚𑁆𑀛𑁂 𑀧𑀢𑀺𑀝𑁆𑀞𑀧𑁂𑀦𑁆𑀢𑀸 𑀩𑀮𑀯𑀦𑁆𑀢𑁄 𑀪𑀯𑀺𑀲𑁆𑀲𑀦𑁆𑀢𑀺.

𑀕𑀼𑀡𑀯𑀦𑁆𑀢𑁄𑀢𑀺 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸. 𑀯𑁄𑀳𑀭𑀦𑁆𑀢𑀸 𑀬𑀣𑀸𑀢𑁆𑀣𑀢𑁄𑀢𑀺 𑀅𑀢𑁆𑀣𑀸𑀦𑀼𑀭𑀽𑀧𑀁, 𑀅𑀯𑀺𑀧𑀭𑀻𑀢𑀢𑁆𑀣𑀁 ‘‘𑀥𑀫𑁆𑀫𑀁 ‘𑀥𑀫𑁆𑀫𑁄’𑀢𑀺, 𑀅𑀥𑀫𑁆𑀫𑀁 ‘𑀅𑀥𑀫𑁆𑀫𑁄’𑀢𑀺, 𑀯𑀺𑀦𑀬𑀁 ‘𑀯𑀺𑀦𑀬𑁄’𑀢𑀺 𑀅𑀯𑀺𑀦𑀬𑀁 ‘𑀅𑀯𑀺𑀦𑀬𑁄’’’𑀢𑀺 𑀏𑀯𑀁 𑀤𑀻𑀧𑁂𑀦𑁆𑀢𑀸. 𑀤𑀼𑀩𑁆𑀩𑀮𑀸 𑀢𑁂 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀧𑀭𑀺𑀲𑀸𑀬𑀁 𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀢𑀸𑀬 𑀩𑀮𑀯𑀺𑀭𑀳𑀺𑀢𑀸 𑀢𑁂 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀯𑀘𑀦𑀁 𑀦 𑀢𑀺𑀝𑁆𑀞𑀺𑀲𑁆𑀲𑀢𑀺. 𑀳𑀺𑀭𑀻𑀫𑀦𑀸 𑀅𑀦𑀢𑁆𑀣𑀺𑀓𑀸𑀢𑀺 𑀳𑀺𑀭𑀻𑀫𑀦𑁆𑀢𑁄 𑀓𑁂𑀦𑀘𑀺 𑀅𑀦𑀢𑁆𑀣𑀺𑀓𑀸. 𑀢𑁂 𑀳𑀺 𑀥𑀫𑁆𑀫𑁂𑀦 𑀯𑀢𑁆𑀢𑀼𑀁 𑀲𑀫𑀢𑁆𑀣𑀸𑀧𑀺 𑀧𑀸𑀧𑀚𑀺𑀕𑀼𑀘𑁆𑀙𑀢𑀸𑀬 𑀅𑀧𑁆𑀧𑀓𑀺𑀘𑁆𑀘𑀢𑀸𑀬 𑀘 𑀓𑁂𑀳𑀺𑀘𑀺 𑀯𑀺𑀭𑁄𑀥𑀁 𑀅𑀓𑀭𑁄𑀦𑁆𑀢𑀸 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀦 𑀯𑀸𑀬𑀫𑀦𑁆𑀢𑀸 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀯𑀸 𑀅𑀥𑀺𑀝𑁆𑀞𑀸𑀦𑀁 𑀯𑀸 𑀅𑀓𑀢𑁆𑀯𑀸 𑀢𑀼𑀡𑁆𑀳𑀻 𑀳𑁄𑀦𑁆𑀢𑀺.

𑀭𑀚𑀢𑀦𑁆𑀢𑀺 𑀭𑀽𑀧𑀺𑀬𑀁, 𑀢𑁂𑀦 𑀓𑀳𑀸𑀧𑀡𑀮𑁄𑀳𑀫𑀸𑀲𑀓𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀁, 𑀢𑁂𑀦 𑀫𑀡𑀺𑀫𑀼𑀢𑁆𑀢𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀯𑀸-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄 ‘‘𑀅𑀧𑀤𑀸 𑀯𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁪; 𑁫.𑁩𑁨; 𑀇𑀢𑀺𑀯𑀼. 𑁯𑁦) 𑀯𑀺𑀬. ‘‘𑀭𑀚𑀢𑀚𑀸𑀢𑀭𑀽𑀧𑀜𑁆𑀘𑀸’’𑀢𑀺 𑀯𑀸 𑀧𑀸𑀞𑁄. 𑀔𑁂𑀢𑁆𑀢𑀦𑁆𑀢𑀺 𑀬𑀢𑁆𑀣 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀁 𑀭𑀼𑀳𑀢𑀺, 𑀢𑀁 𑀔𑁂𑀢𑁆𑀢𑀁. 𑀢𑀤𑀢𑁆𑀣𑀁 𑀅𑀓𑀢𑀪𑀽𑀫𑀺𑀪𑀸𑀕𑁄 𑀯𑀢𑁆𑀣𑀼. 𑀅𑀚𑁂𑀴𑀓𑀦𑁆𑀢𑀺 𑀏𑀴𑀓𑀸 𑀦𑀸𑀫 𑀅𑀚𑀸𑀬𑁂𑀯, 𑀢𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀧𑀲𑀼𑀚𑀸𑀢𑀻 𑀅𑀚𑀸 𑀦𑀸𑀫. 𑀅𑀚𑁂𑀴𑀓𑀕𑁆𑀕𑀳𑀡𑁂𑀦𑁂𑀯 𑀳𑁂𑀢𑁆𑀣 𑀕𑁄𑀫𑀳𑀺𑀁𑀲𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀓𑀢𑁄. 𑀤𑀸𑀲𑀺𑀤𑀸𑀲𑀜𑁆𑀘𑀸𑀢𑀺 𑀤𑀸𑀲𑀺𑀬𑁄 𑀘 𑀤𑀸𑀲𑁂 𑀘. 𑀤𑀼𑀫𑁆𑀫𑁂𑀥𑀸𑀢𑀺 𑀅𑀯𑀺𑀤𑁆𑀤𑀲𑀼𑀦𑁄, 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀲𑀸𑀭𑀼𑀧𑁆𑀧𑀸𑀲𑀸𑀭𑀼𑀧𑁆𑀧𑀁 𑀅𑀚𑀸𑀦𑀦𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀲𑁆𑀲𑀦𑁆𑀢𑀺.

𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑁄𑀢𑀺 𑀧𑀭𑁂 𑀳𑁂𑀝𑁆𑀞𑀢𑁄 𑀓𑀢𑁆𑀯𑀸 𑀑𑀮𑁄𑀓𑀦𑀘𑀺𑀢𑁆𑀢𑀸, 𑀅𑀦𑀼𑀚𑁆𑀛𑀸𑀬𑀺𑀢𑀩𑁆𑀩𑀝𑁆𑀞𑀸𑀦𑁂𑀧𑀺 𑀯𑀸 𑀉𑀚𑁆𑀛𑀸𑀦𑀲𑀻𑀮𑀸. 𑀩𑀸𑀮𑀸𑀢𑀺 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀦𑀸𑀤𑀺𑀦𑀸 𑀩𑀸𑀮𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀢𑀢𑁄 𑀏𑀯 𑀲𑀻𑀮𑁂𑀲𑀼 𑀅𑀲𑀫𑀸𑀳𑀺𑀢𑀸 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀲𑀼 𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑀸. 𑀉𑀦𑁆𑀦𑀴𑀸𑀢𑀺, 𑀲𑀫𑀼𑀲𑁆𑀲𑀺𑀢𑀢𑀼𑀘𑁆𑀙𑀫𑀸𑀦𑀸. 𑀯𑀺𑀘𑀭𑀺𑀲𑁆𑀲𑀦𑁆𑀢𑀻𑀢𑀺 𑀫𑀸𑀦𑀤𑁆𑀥𑀚𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀭𑀺𑀲𑁆𑀲𑀦𑁆𑀢𑀺. 𑀓𑀮𑀳𑀸𑀪𑀺𑀭𑀢𑀸 𑀫𑀕𑀸𑀢𑀺 𑀲𑀸𑀭𑀫𑁆𑀪𑀩𑀳𑀼𑀮𑀢𑀸𑀬 𑀓𑀭𑀡𑀼𑀢𑁆𑀢𑀭𑀺𑀬𑀧𑀲𑀼𑀢𑀸 𑀓𑀮𑀳𑁂 𑀏𑀯 𑀅𑀪𑀺𑀭𑀢𑀸 𑀫𑀕𑀲𑀤𑀺𑀲𑀸 𑀫𑀺𑀕𑀸 𑀯𑀺𑀬 𑀅𑀢𑁆𑀢𑀳𑀺𑀢𑀸𑀧𑁂𑀓𑁆𑀔𑀸 𑀖𑀸𑀲𑁂𑀲𑀦𑀸𑀪𑀺𑀭𑀢𑀸 𑀤𑀼𑀩𑁆𑀩𑀮𑀯𑀺𑀳𑁂𑀲𑀧𑀭𑀸𑀢𑀺 𑀅𑀢𑁆𑀣𑁄.

𑀉𑀤𑁆𑀥𑀢𑀸𑀢𑀺 𑀉𑀤𑁆𑀥𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀭𑀳𑀺𑀢𑀸. 𑀦𑀻𑀮𑀘𑀻𑀯𑀭𑀧𑀸𑀭𑀼𑀢𑀸𑀢𑀺 𑀅𑀓𑀧𑁆𑀧𑀺𑀬𑀭𑀚𑀦𑀭𑀢𑁆𑀢𑁂𑀦 𑀦𑀻𑀮𑀯𑀡𑁆𑀡𑁂𑀦 𑀘𑀻𑀯𑀭𑁂𑀦 𑀧𑀸𑀭𑀼𑀢𑀸, 𑀢𑀸𑀤𑀺𑀲𑀁 𑀘𑀻𑀯𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀘𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀯𑀺𑀘𑀭𑀡𑀓𑀸. 𑀓𑀼𑀳𑀸𑀢𑀺 𑀲𑀸𑀫𑀦𑁆𑀢𑀚𑀧𑁆𑀧𑀦𑀸𑀤𑀺𑀦𑀸 𑀓𑀼𑀳𑀦𑀯𑀢𑁆𑀣𑀼𑀦𑀸 𑀓𑀼𑀳𑀓𑀸, 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀓𑁄𑀳𑀜𑁆𑀜𑀁 𑀓𑀢𑁆𑀯𑀸 𑀧𑀭𑁂𑀲𑀁 𑀯𑀺𑀫𑁆𑀳𑀸𑀧𑀬𑀸. 𑀣𑀤𑁆𑀥𑀸𑀢𑀺 𑀓𑁄𑀥𑁂𑀦 𑀫𑀸𑀦𑁂𑀦 𑀘 𑀣𑀤𑁆𑀥𑀫𑀸𑀦𑀲𑀸 𑀓𑀓𑁆𑀔𑀴𑀳𑀤𑀬𑀸. 𑀮𑀧𑀸𑀢𑀺 𑀮𑀧𑀦𑀓𑀸 𑀓𑀼𑀳𑀦𑀯𑀼𑀢𑁆𑀢𑀺𑀓𑀸, 𑀧𑀲𑀦𑁆𑀦𑀫𑀸𑀦𑀲𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 ‘‘𑀓𑁂𑀦, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀅𑀢𑁆𑀣𑁄’’𑀢𑀺 𑀧𑀘𑁆𑀘𑀬𑀤𑀸𑀬𑀓𑀸𑀦𑀁 𑀯𑀤𑀸𑀧𑀦𑀓𑀸, 𑀧𑀬𑀼𑀢𑁆𑀢𑀯𑀸𑀘𑀸𑀯𑀲𑁂𑀦, 𑀦𑀺𑀧𑁆𑀧𑁂𑀲𑀺𑀓𑀢𑀸𑀯𑀲𑁂𑀦 𑀘 𑀧𑀘𑁆𑀘𑀬𑀢𑁆𑀣𑀁 𑀮𑀧𑀓𑀸𑀢𑀺 𑀯𑀸 𑀅𑀢𑁆𑀣𑁄. 𑀲𑀺𑀗𑁆𑀕𑀻𑀢𑀺 ‘‘𑀢𑀢𑁆𑀣 𑀓𑀢𑀫𑀁 𑀲𑀺𑀗𑁆𑀕𑀁? 𑀬𑀁 𑀲𑀺𑀗𑁆𑀕𑀁 𑀲𑀺𑀗𑁆𑀕𑀸𑀭𑀢𑀸 𑀘𑀸𑀢𑀼𑀭𑀢𑀸 𑀘𑀸𑀢𑀼𑀭𑀺𑀬𑀁 𑀧𑀭𑀺𑀓𑁆𑀔𑀢𑀢𑀸 𑀧𑀸𑀭𑀺𑀓𑁆𑀔𑀢𑀺𑀬’’𑀦𑁆𑀢𑀺 (𑀯𑀺𑀪. 𑁮𑁫𑁨) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀲𑀺𑀗𑁆𑀕𑀲𑀤𑀺𑀲𑁂𑀳𑀺 𑀧𑀸𑀓𑀝𑀓𑀺𑀮𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀲𑀺𑀗𑁆𑀕𑀸𑀭𑀘𑀭𑀺𑀢𑀸𑀢𑀺 𑀅𑀢𑁆𑀣𑁄. ‘‘𑀅𑀭𑀺𑀬𑀸 𑀯𑀺𑀬𑀸’’𑀢𑀺 𑀇𑀤𑀁 ‘‘𑀓𑀼𑀳𑀸’’𑀢𑀺 𑀏𑀢𑀲𑁆𑀲𑁂𑀯 𑀅𑀢𑁆𑀣𑀤𑀲𑁆𑀲𑀦𑀁. 𑀓𑀼𑀳𑀓𑀸𑀦𑀜𑁆𑀳𑀺 𑀅𑀭𑀺𑀬𑀸𑀦𑀫𑀺𑀯 𑀞𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀅𑀭𑀺𑀬𑀸 𑀯𑀺𑀬 𑀯𑀺𑀘𑀭𑀦𑁆𑀢𑀻𑀢𑀺 𑀆𑀳.

𑀢𑁂𑀮𑀲𑀡𑁆𑀞𑁂𑀳𑀻𑀢𑀺 𑀲𑀺𑀢𑁆𑀣𑀓𑀢𑁂𑀮𑁂𑀦 𑀯𑀸 𑀉𑀤𑀓𑀢𑁂𑀮𑁂𑀦 𑀯𑀸 𑀑𑀲𑀡𑁆𑀞𑀺𑀢𑁂𑀳𑀺. 𑀘𑀧𑀮𑀸𑀢𑀺 𑀓𑀸𑀬𑀫𑀡𑁆𑀟𑀦𑀧𑀭𑀺𑀓𑁆𑀔𑀸𑀭𑀫𑀡𑁆𑀟𑀦𑀸𑀤𑀺𑀦𑀸 𑀘𑀸𑀧𑀮𑁆𑀮𑁂𑀦 𑀬𑀼𑀢𑁆𑀢𑀸. 𑀅𑀜𑁆𑀚𑀦𑀓𑁆𑀔𑀺𑀓𑀸𑀢𑀺 𑀅𑀮𑀗𑁆𑀓𑀸𑀭𑀜𑁆𑀚𑀦𑁂𑀦 𑀅𑀜𑁆𑀚𑀺𑀢𑀦𑁂𑀢𑁆𑀢𑀸. 𑀭𑀣𑀺𑀬𑀸𑀬 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀓𑀼𑀮𑀽𑀧𑀲𑀗𑁆𑀓𑀫𑀦𑀸𑀧𑀤𑁂𑀲𑁂𑀳𑀺, 𑀫𑀳𑀸𑀭𑀘𑁆𑀙𑀸𑀬 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀩𑁆𑀪𑀫𑀺𑀲𑁆𑀲𑀦𑁆𑀢𑀺. 𑀤𑀦𑁆𑀢𑀯𑀡𑁆𑀡𑀺𑀓𑀧𑀸𑀭𑀼𑀢𑀸𑀢𑀺 𑀤𑀦𑁆𑀢𑀯𑀡𑁆𑀡𑀭𑀢𑁆𑀢𑁂𑀦 𑀘𑀻𑀯𑀭𑁂𑀦 𑀧𑀸𑀭𑀼𑀢𑀲𑀭𑀻𑀭𑀸.

𑀅𑀚𑁂𑀕𑀼𑀘𑁆𑀙𑀦𑁆𑀢𑀺 𑀅𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀁. 𑀯𑀺𑀫𑀼𑀢𑁆𑀢𑁂𑀳𑀻𑀢𑀺 𑀅𑀭𑀺𑀬𑁂𑀳𑀺. 𑀲𑀼𑀭𑀢𑁆𑀢𑀦𑁆𑀢𑀺 𑀓𑀧𑁆𑀧𑀺𑀬𑀭𑀚𑀦𑁂𑀦 𑀲𑀼𑀝𑁆𑀞𑀼 𑀭𑀢𑁆𑀢𑀁, 𑀅𑀭𑀳𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀘𑀺𑀡𑁆𑀡𑀢𑀸𑀬 𑀅𑀭𑀳𑀤𑁆𑀥𑀚𑀁 𑀚𑀺𑀕𑀼𑀘𑁆𑀙𑀺𑀲𑁆𑀲𑀦𑁆𑀢𑀺 𑀓𑀸𑀲𑀸𑀯𑀁. 𑀓𑀲𑁆𑀫𑀸? 𑀑𑀤𑀸𑀢𑁂𑀲𑀼 𑀲𑀫𑀼𑀘𑁆𑀙𑀺𑀢𑀸 𑀕𑁂𑀥𑀁 𑀆𑀧𑀦𑁆𑀦𑀸. 𑀤𑀦𑁆𑀢𑀯𑀡𑁆𑀡𑀧𑀸𑀭𑀼𑀧𑀦𑀲𑁆𑀲 𑀳𑀺 𑀇𑀤𑀁 𑀓𑀸𑀭𑀡𑀯𑀘𑀦𑀁. 𑀢𑁂 𑀳𑀺 𑀲𑁂𑀢𑀓𑀁 𑀲𑀫𑁆𑀪𑀸𑀯𑁂𑀦𑁆𑀢𑀸 ‘‘𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑁂𑀢𑀓𑁂 𑀕𑀳𑀺𑀢𑁂 𑀮𑀺𑀗𑁆𑀕𑀧𑀭𑀺𑀘𑁆𑀘𑀸𑀕𑁄 𑀏𑀯 𑀲𑀺𑀬𑀸’’𑀢𑀺 𑀤𑀦𑁆𑀢𑀯𑀡𑁆𑀡𑀁 𑀧𑀸𑀭𑀼𑀧𑀦𑁆𑀢𑀺.

𑀮𑀸𑀪𑀓𑀸𑀫𑀸𑀢𑀺 𑀮𑀸𑀪𑀕𑀺𑀤𑁆𑀥𑀸. 𑀪𑀺𑀓𑁆𑀔𑀸𑀘𑀭𑀺𑀬𑀸𑀲𑀼𑀧𑀺 𑀓𑁄𑀲𑀚𑁆𑀚𑀬𑁄𑀕𑀢𑁄 𑀓𑀼𑀲𑀻𑀢𑀸. 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀘𑀺𑀢𑁆𑀢𑀲𑁆𑀲 𑀉𑀲𑁆𑀲𑀸𑀳𑀸𑀪𑀸𑀯𑁂𑀦 𑀳𑀻𑀦𑀯𑀻𑀭𑀺𑀬𑀸. 𑀓𑀺𑀘𑁆𑀙𑀦𑁆𑀢𑀸𑀢𑀺, 𑀓𑀺𑀮𑀫𑀦𑁆𑀢𑀸, 𑀯𑀦𑀧𑀢𑁆𑀣𑁂𑀲𑀼 𑀯𑀲𑀺𑀢𑀼𑀁 𑀓𑀺𑀘𑁆𑀙𑀦𑁆𑀢𑀸 𑀓𑀺𑀮𑀦𑁆𑀢𑀘𑀺𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀕𑀸𑀫𑀦𑁆𑀢𑁂𑀲𑀽𑀢𑀺 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂𑀲𑀼 𑀕𑀸𑀫𑀲𑀫𑀻𑀧𑁂𑀲𑀼 𑀲𑁂𑀦𑀸𑀲𑀦𑁂𑀲𑀼, 𑀕𑀸𑀫𑀤𑁆𑀯𑀸𑀭𑁂𑀲𑀼 𑀯𑀸 𑀲𑁂𑀦𑀸𑀲𑀦𑁂𑀲𑀼. 𑀯𑀲𑀺𑀲𑁆𑀲𑀭𑁂𑀢𑀺 𑀯𑀲𑀺𑀲𑁆𑀲𑀦𑁆𑀢𑀺.

𑀢𑁂 𑀢𑁂𑀯 𑀅𑀦𑀼𑀲𑀺𑀓𑁆𑀔𑀦𑁆𑀢𑀸𑀢𑀺 𑀬𑁂 𑀬𑁂 𑀫𑀺𑀘𑁆𑀙𑀸𑀚𑀻𑀯𑀧𑁆𑀧𑀬𑁄𑀕𑁂𑀦 𑀮𑀤𑁆𑀥𑀮𑀸𑀪𑀸, 𑀢𑁂 𑀢𑁂 𑀏𑀯 𑀧𑀼𑀕𑁆𑀕𑀮𑁂 𑀅𑀦𑀼𑀲𑀺𑀓𑁆𑀔𑀦𑁆𑀢𑀸 𑀪𑀫𑀺𑀲𑁆𑀲𑀦𑁆𑀢𑀺. 𑀪𑀫𑀺𑀲𑁆𑀲𑀦𑁆𑀢𑀻𑀢𑀺 𑀲𑀬𑀫𑁆𑀧𑀺 𑀢𑁂 𑀯𑀺𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀼𑀁 𑀭𑀸𑀚𑀓𑀼𑀮𑀸𑀤𑀻𑀦𑀺 𑀲𑁂𑀯𑀦𑁆𑀢𑀸 𑀧𑀭𑀺𑀩𑁆𑀪𑀫𑀺𑀲𑁆𑀲𑀦𑁆𑀢𑀺. ‘‘𑀪𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀸 𑀧𑀸𑀞𑁄, 𑀲𑁂𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀲𑀁𑀬𑀢𑀸𑀢𑀺 𑀲𑀻𑀮𑀲𑀁𑀬𑀫𑀭𑀳𑀺𑀢𑀸.

𑀬𑁂 𑀬𑁂 𑀅𑀮𑀸𑀪𑀺𑀦𑁄 𑀮𑀸𑀪𑀦𑁆𑀢𑀺 𑀬𑁂 𑀬𑁂 𑀪𑀺𑀓𑁆𑀔𑀽 𑀫𑀺𑀘𑁆𑀙𑀸𑀚𑀻𑀯𑀧𑀭𑀺𑀯𑀚𑁆𑀚𑀦𑁂𑀦 𑀅𑀧𑁆𑀧𑀧𑀼𑀜𑁆𑀜𑀢𑀸𑀬 𑀘 𑀮𑀸𑀪𑀲𑁆𑀲 𑀧𑀘𑁆𑀘𑀬𑀲𑁆𑀲 𑀦 𑀮𑀸𑀪𑀺𑀦𑁄, 𑀢𑁂 𑀧𑀼𑀚𑁆𑀚𑀸 𑀧𑀽𑀚𑀦𑀻𑀬𑀸 𑀧𑀸𑀲𑀁𑀲𑀸 𑀢𑀤𑀸 𑀅𑀦𑀸𑀕𑀢𑁂 𑀓𑀸𑀮𑁂 𑀦 𑀪𑀯𑀺𑀲𑁆𑀲𑀦𑁆𑀢𑀺. 𑀲𑀼𑀧𑁂𑀲𑀮𑁂𑀧𑀺 𑀢𑁂 𑀥𑀻𑀭𑁂𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑀢𑀸𑀬 𑀥𑀻𑀭𑁂 𑀲𑀼𑀝𑁆𑀞𑀼 𑀧𑁂𑀲𑀮𑁂𑀧𑀺 𑀢𑁂 𑀪𑀺𑀓𑁆𑀔𑀽 𑀦 𑀲𑁂𑀯𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀅𑀦𑀸𑀕𑀢𑁂 𑀢𑁂 𑀮𑀸𑀪𑀺𑀦𑁄 𑀮𑀸𑀪𑀓𑀸𑀫𑀸𑀯 𑀪𑀺𑀓𑁆𑀔𑀽𑀢𑀺 𑀅𑀢𑁆𑀣𑁄.

𑀫𑀺𑀮𑀓𑁆𑀔𑀼𑀭𑀚𑀦𑀁 𑀭𑀢𑁆𑀢𑀦𑁆𑀢𑀺 𑀓𑀸𑀮𑀓𑀘𑁆𑀙𑀓𑀭𑀚𑀦𑁂𑀦 𑀭𑀢𑁆𑀢𑀁. 𑀲𑀫𑀸𑀲𑀧𑀤𑀜𑁆𑀳𑁂𑀢𑀁, 𑀕𑀸𑀣𑀸𑀲𑀼𑀔𑀢𑁆𑀣𑀁 𑀲𑀸𑀦𑀼𑀦𑀸𑀲𑀺𑀓𑀦𑀺𑀤𑁆𑀤𑁂𑀲𑁄. 𑀕𑀭𑀳𑀦𑁆𑀢𑀸 𑀲𑀓𑀁 𑀥𑀚𑀦𑁆𑀢𑀺 𑀅𑀢𑁆𑀢𑀦𑁄 𑀥𑀚𑀪𑀽𑀢𑀁 𑀓𑀸𑀲𑀸𑀯𑀁 𑀚𑀺𑀕𑀼𑀘𑁆𑀙𑀦𑁆𑀢𑀸. 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸𑀦𑀜𑁆𑀳𑀺 𑀓𑀸𑀲𑀸𑀯𑁄 𑀥𑀚𑁄 𑀦𑀸𑀫. 𑀢𑀺𑀢𑁆𑀣𑀺𑀬𑀸𑀦𑀁 𑀥𑀚𑀁 𑀓𑁂𑀘𑀻𑀢𑀺 𑀓𑁂𑀘𑀺 𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑀸 𑀏𑀯 𑀢𑀺𑀢𑁆𑀣𑀺𑀬𑀸𑀦𑀁 𑀲𑁂𑀢𑀯𑀢𑁆𑀣𑀺𑀓𑀸𑀦𑀁 𑀥𑀚𑀪𑀽𑀢𑀁 𑀅𑀯𑀤𑀸𑀢𑀓𑀁 𑀲𑁂𑀢𑀯𑀢𑁆𑀣𑀁 𑀥𑀸𑀭𑁂𑀲𑁆𑀲𑀦𑁆𑀢𑀺.

𑀅𑀕𑀸𑀭𑀯𑁄 𑀘 𑀓𑀸𑀲𑀸𑀯𑁂𑀢𑀺 𑀅𑀭𑀳𑀤𑁆𑀥𑀚𑀪𑀽𑀢𑁂 𑀓𑀸𑀲𑀸𑀯𑁂 𑀅𑀕𑀸𑀭𑀯𑁄 𑀅𑀩𑀳𑀼𑀫𑀸𑀦𑀁 𑀢𑀤𑀸 𑀅𑀦𑀸𑀕𑀢𑁂 𑀢𑁂𑀲𑀁 𑀪𑀯𑀺𑀲𑁆𑀲𑀢𑀺. 𑀧𑀝𑀺𑀲𑀗𑁆𑀔𑀸 𑀘 𑀓𑀸𑀲𑀸𑀯𑁂𑀢𑀺 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀸𑀫𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮) 𑀦𑀬𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀫𑀢𑁆𑀢𑀫𑁆𑀧𑀺 𑀓𑀸𑀲𑀸𑀯𑀧𑀭𑀺𑀪𑁄𑀕𑁂 𑀦 𑀪𑀯𑀺𑀲𑁆𑀲𑀢𑀺.

𑀓𑀸𑀲𑀸𑀯𑀁 𑀥𑀸𑀭𑁂𑀦𑁆𑀢𑁂𑀦 𑀓𑀸𑀲𑀸𑀯𑀁 𑀩𑀳𑀼𑀫𑀸𑀦𑁂𑀦 ‘‘𑀤𑀼𑀘𑁆𑀘𑀭𑀺𑀢𑀢𑁄 𑀑𑀭𑀫𑀺𑀢𑀩𑁆𑀩’’𑀦𑁆𑀢𑀺 𑀓𑀸𑀲𑀸𑀯𑀲𑁆𑀲 𑀕𑀭𑀼𑀓𑀸𑀢𑀩𑁆𑀩𑀪𑀸𑀯𑁂 𑀙𑀤𑁆𑀤𑀦𑁆𑀢𑀚𑀸𑀢𑀓𑀫𑀼𑀤𑀸𑀳𑀭𑀦𑁆𑀢𑁄 ‘‘𑀅𑀪𑀺𑀪𑀽𑀢𑀲𑁆𑀲 𑀤𑀼𑀓𑁆𑀔𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀮𑁆𑀮𑀯𑀺𑀤𑁆𑀥𑀲𑁆𑀲𑀸𑀢𑀺 𑀧𑀼𑀣𑀼𑀦𑀸 𑀲𑀯𑀺𑀲𑁂𑀦 𑀲𑀮𑁆𑀮𑁂𑀦 𑀯𑀺𑀤𑁆𑀥𑀲𑁆𑀲, 𑀢𑀢𑁄 𑀏𑀯 𑀫𑀳𑀢𑀸 𑀤𑀼𑀓𑁆𑀔𑁂𑀦 𑀅𑀪𑀺𑀪𑀽𑀢𑀲𑁆𑀲. 𑀭𑀼𑀧𑁆𑀧𑀢𑁄𑀢𑀺 𑀲𑀭𑀻𑀭𑀯𑀺𑀓𑀸𑀭𑀁 𑀆𑀧𑀚𑁆𑀚𑀢𑁄. 𑀫𑀳𑀸𑀖𑁄𑀭𑀸𑀢𑀺 𑀲𑀭𑀻𑀭𑀚𑀻𑀯𑀺𑀢𑁂𑀲𑀼 𑀦𑀺𑀭𑀧𑁂𑀓𑁆𑀔𑀢𑀸𑀬 𑀪𑀺𑀫𑁆𑀫𑀸 𑀕𑀭𑀼𑀢𑀭𑀸 𑀧𑀝𑀺𑀲𑀗𑁆𑀔𑀸 𑀅𑀜𑁆𑀜𑁂𑀳𑀺 𑀅𑀘𑀺𑀦𑁆𑀢𑀺𑀬𑀸 𑀘𑀺𑀦𑁆𑀢𑀸𑀫𑀢𑁆𑀢𑁂𑀦 𑀧𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸 𑀙𑀤𑁆𑀤𑀦𑁆𑀢𑀫𑀳𑀸𑀦𑀸𑀕𑀲𑁆𑀲𑀆𑀲𑀺, 𑀅𑀳𑁄𑀲𑀺. 𑀙𑀤𑁆𑀤𑀦𑁆𑀢𑀦𑀸𑀕𑀭𑀸𑀚𑀓𑀸𑀮𑁂 𑀳𑀺 𑀩𑁄𑀥𑀺𑀲𑀢𑁆𑀢𑁄 𑀲𑁄𑀡𑀼𑀢𑁆𑀢𑀭𑁂𑀦 𑀦𑀸𑀫 𑀦𑁂𑀲𑀸𑀤𑁂𑀦 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀯𑀺𑀲𑀧𑀻𑀢𑁂𑀦 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀫𑀳𑀢𑀸 𑀤𑀼𑀓𑁆𑀔𑁂𑀦 𑀅𑀪𑀺𑀪𑀽𑀢𑁄 𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀤𑀳𑀺𑀢𑀁 𑀓𑀸𑀲𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀅𑀭𑀺𑀬𑀤𑁆𑀥𑀚𑁂𑀦 𑀧𑀝𑀺𑀘𑁆𑀙𑀦𑁆𑀦𑁄, 𑀦 𑀫𑀬𑀸 𑀳𑀺𑀁𑀲𑀺𑀢𑀩𑁆𑀩𑁄’’𑀢𑀺 𑀢𑀢𑁆𑀣 𑀫𑁂𑀢𑁆𑀢𑀘𑀺𑀢𑁆𑀢𑀫𑁂𑀯 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀉𑀧𑀭𑀺𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀬𑀣𑀸𑀳 𑁋

‘‘𑀲𑀫𑀧𑁆𑀧𑀺𑀢𑁄 𑀧𑀼𑀣𑀼𑀲𑀮𑁆𑀮𑁂𑀦 𑀦𑀸𑀕𑁄,

𑀅𑀤𑀼𑀝𑁆𑀞𑀘𑀺𑀢𑁆𑀢𑁄 𑀮𑀼𑀤𑁆𑀤𑀓𑀫𑀚𑁆𑀛𑀪𑀸𑀲𑀺;

𑀓𑀺𑀫𑀢𑁆𑀣𑀬𑀁 𑀓𑀺𑀲𑁆𑀲 𑀯𑀸 𑀲𑀫𑁆𑀫 𑀳𑁂𑀢𑀼,

𑀫𑀫𑀁 𑀯𑀥𑀻 𑀓𑀲𑁆𑀲 𑀯𑀸𑀬𑀁 𑀧𑀬𑁄𑀕𑁄’’𑀢𑀺𑀆𑀤𑀺. (𑀚𑀸. 𑁧.𑁧𑁬.𑁧𑁨𑁪);

𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀣𑁂𑀭𑁄 ‘‘𑀙𑀤𑁆𑀤𑀦𑁆𑀢𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀭𑀢𑁆𑀢𑀁 𑀅𑀭𑀳𑀤𑁆𑀥𑀚𑀦𑁆𑀢𑀺 𑀲𑁄𑀡𑀼𑀢𑁆𑀢𑀭𑁂𑀦 𑀧𑀭𑀺𑀤𑀳𑀺𑀢𑀓𑀸𑀲𑀸𑀯𑀁 𑀲𑀦𑁆𑀥𑀸𑀬𑀸𑀳. 𑀅𑀪𑀡𑀻𑀢𑀺 𑀅𑀪𑀸𑀲𑀺. 𑀕𑀸𑀣𑀸𑀢𑀺 𑀕𑀸𑀣𑀸𑀬𑁄. 𑀕𑀚𑁄𑀢𑀺 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸. 𑀅𑀢𑁆𑀣𑁄𑀧𑀲𑀁𑀳𑀺𑀢𑀸𑀢𑀺 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀸 𑀳𑀺𑀢𑀸, 𑀳𑀺𑀢𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀙𑀤𑁆𑀤𑀦𑁆𑀢𑀦𑀸𑀕𑀭𑀸𑀚𑁂𑀦 𑀯𑀼𑀢𑁆𑀢𑀕𑀸𑀣𑀸𑀲𑀼 𑀅𑀦𑀺𑀓𑁆𑀓𑀲𑀸𑀯𑁄𑀢𑀺 𑀭𑀸𑀕𑀸𑀤𑀻𑀳𑀺 𑀓𑀲𑀸𑀯𑁂𑀳𑀺 𑀓𑀲𑀸𑀯𑁄, 𑀧𑀭𑀺𑀤𑀳𑀺𑀲𑁆𑀲𑀢𑀻𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀅𑀢𑁆𑀣𑀭𑀡𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀺. ‘‘𑀧𑀭𑀺𑀥𑀲𑁆𑀲𑀢𑀻’’𑀢𑀺 𑀯𑀸 𑀧𑀸𑀞𑁄. 𑀅𑀧𑁂𑀢𑁄 𑀤𑀫𑀲𑀘𑁆𑀘𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀘𑁂𑀯 𑀧𑀭𑀫𑀢𑁆𑀣𑀲𑀘𑁆𑀘𑀧𑀓𑁆𑀔𑀺𑀓𑁂𑀦 𑀯𑀘𑀻𑀲𑀘𑁆𑀘𑁂𑀦 𑀘 𑀅𑀧𑁂𑀢𑁄, 𑀯𑀺𑀬𑀼𑀢𑁆𑀢𑁄 𑀧𑀭𑀺𑀘𑁆𑀘𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀦 𑀲𑁄𑀢𑀺 𑀲𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀓𑀸𑀲𑀸𑀯𑀁 𑀧𑀭𑀺𑀤𑀳𑀺𑀢𑀼𑀁 𑀦𑀸𑀭𑀳𑀢𑀺.

𑀯𑀦𑁆𑀢𑀓𑀲𑀸𑀯𑀲𑁆𑀲𑀸𑀢𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀯𑀦𑁆𑀢𑀓𑀲𑀸𑀯𑁄 𑀙𑀟𑁆𑀟𑀺𑀢𑀓𑀲𑀸𑀯𑁄 𑀧𑀳𑀻𑀦𑀓𑀲𑀸𑀯𑁄 𑀅𑀲𑁆𑀲 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀻𑀮𑁂𑀲𑀽𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀲𑀼. 𑀲𑀼𑀲𑀫𑀸𑀳𑀺𑀢𑁄𑀢𑀺 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑁄. 𑀉𑀧𑁂𑀢𑁄𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀘𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀘𑁆𑀘𑁂𑀦 𑀘 𑀉𑀧𑀕𑀢𑁄 𑀲𑀫𑀦𑁆𑀦𑀸𑀕𑀢𑁄. 𑀲 𑀯𑁂𑀢𑀺 𑀲𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀢𑀁 𑀕𑀦𑁆𑀥𑀓𑀸𑀲𑀸𑀯𑀯𑀢𑁆𑀣𑀁 𑀏𑀓𑀦𑁆𑀢𑁂𑀦 𑀅𑀭𑀳𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀧𑀦𑁆𑀦𑀲𑀻𑀮𑁄𑀢𑀺 𑀪𑀺𑀦𑁆𑀦𑀲𑀻𑀮𑁄. 𑀤𑀼𑀫𑁆𑀫𑁂𑀥𑁄𑀢𑀺 𑀦𑀺𑀧𑁆𑀧𑀜𑁆𑀜𑁄 𑀲𑀻𑀮𑀯𑀺𑀲𑁄𑀥𑀦𑀧𑀜𑁆𑀜𑀸𑀬 𑀯𑀺𑀭𑀳𑀺𑀢𑁄. 𑀧𑀸𑀓𑀝𑁄𑀢𑀺 ‘‘𑀤𑀼𑀲𑁆𑀲𑀻𑀮𑁄 𑀅𑀬’’𑀦𑁆𑀢𑀺 𑀧𑀸𑀓𑀝𑁄 𑀧𑀓𑀸𑀲𑁄, 𑀯𑀺𑀓𑁆𑀔𑀺𑀢𑁆𑀢𑀺𑀦𑁆𑀤𑁆𑀭𑀺𑀬𑀢𑀸𑀬 𑀯𑀸 𑀧𑀸𑀓𑀝𑁄 𑀧𑀸𑀓𑀝𑀺𑀦𑁆𑀤𑁆𑀭𑀺𑀬𑁄𑀢𑀺 𑀅𑀢𑁆𑀣𑁄. 𑀓𑀸𑀫𑀓𑀸𑀭𑀺𑀬𑁄𑀢𑀺 𑀪𑀺𑀦𑁆𑀦𑀲𑀁𑀯𑀭𑀢𑀸𑀬 𑀬𑀣𑀺𑀘𑁆𑀙𑀺𑀢𑀓𑀸𑀭𑀓𑁄, 𑀓𑀸𑀫𑀲𑁆𑀲 𑀯𑀸 𑀫𑀸𑀭𑀲𑁆𑀲 𑀬𑀣𑀸𑀓𑀸𑀫𑀓𑀭𑀡𑀻𑀬𑁄. 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄𑀢𑀺 𑀭𑀽𑀧𑀸𑀤𑀻𑀲𑀼 𑀯𑀺𑀲𑀬𑁂𑀲𑀼 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄. 𑀦𑀺𑀲𑁆𑀲𑀼𑀓𑁆𑀓𑁄𑀢𑀺 𑀅𑀲𑀼𑀓𑁆𑀓𑁄 𑀲𑀼𑀓𑁆𑀓𑀥𑀫𑁆𑀫𑀭𑀳𑀺𑀢𑁄 𑀳𑀺𑀭𑁄𑀢𑁆𑀢𑀧𑁆𑀧𑀯𑀺𑀯𑀚𑁆𑀚𑀺𑀢𑁄, 𑀓𑀼𑀲𑀮𑀥𑀫𑁆𑀫𑀲𑀫𑁆𑀧𑀸𑀤𑀦𑀉𑀲𑁆𑀲𑀼𑀓𑁆𑀓𑀭𑀳𑀺𑀢𑁄 𑀯𑀸.

𑀯𑀻𑀢𑀭𑀸𑀕𑁄𑀢𑀺 𑀯𑀺𑀕𑀢𑀘𑁆𑀙𑀦𑁆𑀤𑀭𑀸𑀕𑁄. 𑀑𑀤𑀸𑀢𑀫𑀦𑀲𑀗𑁆𑀓𑀧𑁆𑀧𑁄𑀢𑀺 𑀲𑀼𑀯𑀺𑀲𑀼𑀤𑁆𑀥𑀫𑀦𑁄𑀯𑀺𑀢𑀓𑁆𑀓𑁄, 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀯𑀸.

𑀓𑀸𑀲𑀸𑀯𑀁 𑀓𑀺𑀁 𑀓𑀭𑀺𑀲𑁆𑀲𑀢𑀻𑀢𑀺 𑀬𑀲𑁆𑀲 𑀲𑀻𑀮𑀁 𑀦𑀢𑁆𑀣𑀺, 𑀢𑀲𑁆𑀲 𑀓𑀸𑀲𑀸𑀯𑀁 𑀓𑀺𑀁 𑀦𑀸𑀫 𑀧𑀬𑁄𑀚𑀦𑀁 𑀲𑀸𑀥𑁂𑀲𑁆𑀲𑀢𑀺, 𑀘𑀺𑀢𑁆𑀢𑀓𑀢𑀲𑀤𑀺𑀲𑀁 𑀢𑀲𑁆𑀲 𑀧𑀩𑁆𑀩𑀚𑀺𑀢𑀮𑀺𑀗𑁆𑀕𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀝𑁆𑀞𑀘𑀺𑀢𑁆𑀢𑀸𑀢𑀺 𑀭𑀸𑀕𑀸𑀤𑀺𑀤𑁄𑀲𑁂𑀳𑀺 𑀤𑀽𑀲𑀺𑀢𑀘𑀺𑀢𑁆𑀢𑀸. 𑀅𑀦𑀸𑀤𑀭𑀸𑀢𑀺 𑀲𑀢𑁆𑀣𑀭𑀺 𑀥𑀫𑁆𑀫𑁂 𑀅𑀜𑁆𑀜𑀫𑀜𑁆𑀜𑀜𑁆𑀘 𑀆𑀤𑀭𑀭𑀳𑀺𑀢𑀸 𑀅𑀕𑀸𑀭𑀯𑀸. 𑀢𑀸𑀤𑀻𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑀸𑀦𑀦𑁆𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀳𑀤𑀬𑁂 𑀢𑁂𑀦𑁂𑀯 𑀅𑀭𑀳𑀢𑁆𑀢𑀸𑀥𑀺𑀕𑀫𑁂𑀦 𑀇𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑁂 𑀉𑀴𑀸𑀭𑀕𑀼𑀡𑁂. 𑀉𑀧𑀬𑁄𑀕𑀢𑁆𑀣𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁. 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀦𑁆𑀢𑀻𑀢𑀺 ‘‘𑀲𑀻𑀮𑀸𑀤𑀺𑀲𑀫𑁆𑀧𑀦𑁆𑀦𑁂 𑀤𑀺𑀲𑁆𑀯𑀸 𑀢𑁂 𑀲𑀫𑁆𑀪𑀸𑀯𑁂𑀦𑁆𑀢𑀸 𑀯𑀺𑀧𑀦𑁆𑀦𑀲𑀻𑀮𑁂 𑀅𑀫𑁆𑀳𑁂 𑀦 𑀩𑀳𑀼𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀢𑁆𑀢𑀦𑀺 𑀅𑀕𑀸𑀭𑀯𑀪𑀬𑁂𑀦 𑀬𑀣𑀸 𑀢𑁂 𑀉𑀩𑁆𑀩𑀸𑀴𑁆𑀳𑀸 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀺, 𑀢𑀣𑀸 𑀩𑀸𑀥𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀺𑀓𑁆𑀔𑀸𑀧𑁂𑀦𑁆𑀢𑀸𑀧𑀻𑀢𑀺 𑀲𑀺𑀓𑁆𑀔𑀸𑀧𑀺𑀬𑀫𑀸𑀦𑀸𑀧𑀺. 𑀓𑀫𑁆𑀫𑀢𑁆𑀣𑁂 𑀳𑀺 𑀅𑀬𑀁 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀣𑁂𑀭𑁂𑀳𑀻𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺. 𑀘𑀻𑀯𑀭𑀥𑀸𑀭𑀡𑀦𑁆𑀢𑀺 𑀇𑀤𑀁 𑀲𑀫𑀡𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀢𑀲𑁆𑀫𑀸 ‘‘𑀏𑀯𑀁 𑀢𑁂 𑀅𑀪𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀝𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀅. 𑀦𑀺. 𑁪.𑁧𑁨𑁨) 𑀲𑀺𑀓𑁆𑀔𑀸𑀧𑀺𑀬𑀫𑀸𑀦𑀸𑀧𑀻𑀢𑀺 𑀅𑀢𑁆𑀣𑁄. 𑀦 𑀲𑀼𑀡𑀺𑀲𑁆𑀲𑀦𑁆𑀢𑀻𑀢𑀺 𑀑𑀯𑀸𑀤𑀁 𑀦 𑀕𑀡𑁆𑀳𑀺𑀲𑁆𑀲𑀦𑁆𑀢𑀺.

𑀢𑁂 𑀢𑀣𑀸 𑀲𑀺𑀓𑁆𑀔𑀺𑀢𑀸 𑀩𑀸𑀮𑀸𑀢𑀺 𑀢𑁂 𑀅𑀦𑁆𑀥𑀩𑀸𑀮𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀲𑀺𑀓𑁆𑀔𑀸𑀧𑀺𑀬𑀫𑀸𑀦𑀸𑀧𑀺 𑀅𑀦𑀸𑀤𑀭𑀢𑀸𑀬 𑀅𑀲𑀺𑀓𑁆𑀔𑀺𑀢𑀸𑀢𑀺. 𑀦𑀸𑀤𑀺𑀬𑀺𑀲𑁆𑀲𑀦𑁆𑀢𑀼𑀧𑀚𑁆𑀛𑀸𑀬𑁂𑀢𑀺 𑀉𑀧𑀚𑁆𑀛𑀸𑀬𑁂 𑀆𑀘𑀭𑀺𑀬𑁂 𑀘 𑀆𑀤𑀭𑀁 𑀦 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀅𑀦𑀼𑀲𑀸𑀲𑀦𑀺𑀬𑀁 𑀦 𑀢𑀺𑀝𑁆𑀞𑀦𑁆𑀢𑀺. 𑀬𑀣𑀸 𑀓𑀺𑀁? 𑀔𑀴𑀼𑀗𑁆𑀓𑁄 𑀯𑀺𑀬 𑀲𑀸𑀭𑀣𑀺𑀁 𑀬𑀣𑀸 𑀔𑀴𑀼𑀗𑁆𑀓𑁄 𑀤𑀼𑀝𑁆𑀞𑀲𑁆𑀲𑁄 𑀅𑀲𑁆𑀲𑀤𑀫𑀓𑀁 𑀦𑀸𑀤𑀺𑀬𑀢𑀺 𑀦 𑀢𑀲𑁆𑀲 𑀉𑀧𑀤𑁂𑀲𑁂 𑀢𑀺𑀝𑁆𑀞𑀢𑀺, 𑀏𑀯𑀁 𑀢𑁂𑀧𑀺 𑀉𑀧𑀚𑁆𑀛𑀸𑀬𑀸𑀘𑀭𑀺𑀬𑁂 𑀦 𑀪𑀸𑀬𑀦𑁆𑀢𑀺 𑀦 𑀲𑀸𑀭𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄.

‘‘𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀦𑀺𑀕𑀫𑀦𑀁. 𑀢𑀢𑁆𑀣 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀅𑀦𑀸𑀕𑀢𑀤𑁆𑀥𑀸𑀦𑀦𑁆𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀅𑀦𑀸𑀕𑀢𑁂 𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀢𑀁𑀬𑁂𑀯 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀢𑁆𑀢𑁂 𑀓𑀸𑀮𑀫𑁆𑀳𑀺 𑀧𑀘𑁆𑀙𑀺𑀫𑁂’’𑀢𑀺 𑀆𑀳. 𑀢𑀢𑁆𑀣 𑀓𑀢𑀫𑁄 𑀧𑀘𑁆𑀙𑀺𑀫𑀓𑀸𑀮𑁄? ‘‘𑀢𑀢𑀺𑀬𑀲𑀗𑁆𑀕𑀻𑀢𑀺𑀢𑁄 𑀧𑀝𑁆𑀞𑀸𑀬 𑀧𑀘𑁆𑀙𑀺𑀫𑀓𑀸𑀮𑁄’’𑀢𑀺 𑀓𑁂𑀘𑀺, 𑀢𑀁 𑀏𑀓𑁂 𑀦𑀸𑀦𑀼𑀚𑀸𑀦𑀦𑁆𑀢𑀺. 𑀲𑀸𑀲𑀦𑀲𑁆𑀲 𑀳𑀺 𑀧𑀜𑁆𑀘𑀬𑀼𑀕𑀸𑀦𑀺 𑀯𑀺𑀫𑀼𑀢𑁆𑀢𑀺𑀬𑀼𑀕𑀁, 𑀲𑀫𑀸𑀥𑀺𑀬𑀼𑀕𑀁, 𑀲𑀻𑀮𑀬𑀼𑀕𑀁, 𑀲𑀼𑀢𑀬𑀼𑀕𑀁, 𑀤𑀸𑀦𑀬𑀼𑀕𑀦𑁆𑀢𑀺. 𑀢𑁂𑀲𑀼 𑀧𑀞𑀫𑀁 𑀯𑀺𑀫𑀼𑀢𑁆𑀢𑀺𑀬𑀼𑀕𑀁, 𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀲𑀫𑀸𑀥𑀺𑀬𑀼𑀕𑀁 𑀯𑀢𑁆𑀢𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀅𑀦𑁆𑀢𑀭𑀳𑀺𑀢𑁂 𑀲𑀻𑀮𑀬𑀼𑀕𑀁 𑀯𑀢𑁆𑀢𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀅𑀦𑁆𑀢𑀭𑀳𑀺𑀢𑁂 𑀲𑀼𑀢𑀬𑀼𑀕𑀁 𑀯𑀢𑁆𑀢𑀢𑁂𑀯. 𑀅𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀳𑀺 𑀏𑀓𑀤𑁂𑀲𑁂𑀦 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑀁 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑀮𑀸𑀪𑀸𑀤𑀺𑀓𑀸𑀫𑀢𑀸𑀬. 𑀬𑀤𑀸 𑀧𑀦 𑀫𑀸𑀢𑀺𑀓𑀸𑀧𑀭𑀺𑀬𑁄𑀲𑀸𑀦𑀸 𑀧𑀭𑀺𑀬𑀢𑁆𑀢𑀺 𑀲𑀩𑁆𑀩𑀲𑁄 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀮𑀺𑀗𑁆𑀕𑀫𑀢𑁆𑀢𑀫𑁂𑀯 𑀅𑀯𑀲𑀺𑀲𑁆𑀲𑀢𑀺, 𑀢𑀤𑀸 𑀬𑀣𑀸 𑀢𑀣𑀸 𑀥𑀦𑀁 𑀲𑀁𑀳𑀭𑀺𑀢𑁆𑀯𑀸 𑀤𑀸𑀦𑀫𑀼𑀔𑁂𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀲𑀸 𑀓𑀺𑀭 𑀦𑁂𑀲𑀁 𑀘𑀭𑀺𑀫𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺. 𑀢𑀢𑁆𑀣 𑀲𑀼𑀢𑀬𑀼𑀕𑀢𑁄 𑀧𑀝𑁆𑀞𑀸𑀬 𑀧𑀘𑁆𑀙𑀺𑀫𑀓𑀸𑀮𑁄, ‘‘𑀲𑀻𑀮𑀬𑀼𑀕𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀅𑀧𑀭𑁂.

𑀏𑀯𑀁 𑀣𑁂𑀭𑁄 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀉𑀧𑁆𑀧𑀚𑁆𑀚𑀦𑀓𑀁 𑀫𑀳𑀸𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀤𑀤𑀦𑁆𑀢𑁄 ‘‘𑀧𑀼𑀭𑀸 𑀆𑀕𑀘𑁆𑀙𑀢𑁂’’𑀢𑀺𑀆𑀤𑀺𑀦𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀧𑀼𑀭𑀸 𑀆𑀕𑀘𑁆𑀙𑀢𑁂 𑀏𑀢𑀦𑁆𑀢𑀺 𑀏𑀢𑀁 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀯𑀼𑀢𑁆𑀢𑀁 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀸𑀬𑀓𑀭𑀁 𑀅𑀦𑀸𑀕𑀢𑀁 𑀫𑀳𑀸𑀪𑀬𑀁 𑀆𑀕𑀘𑁆𑀙𑀢𑀺 𑀧𑀼𑀭𑀸, 𑀬𑀸𑀯 𑀆𑀕𑀫𑀺𑀲𑁆𑀲𑀢𑀺, 𑀢𑀸𑀯𑀤𑁂𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀩𑁆𑀩𑀘𑀸𑀢𑀺 𑀯𑀘𑀦𑀓𑁆𑀔𑀫𑀸 𑀲𑁄𑀯𑀘𑀲𑁆𑀲𑀓𑀸𑀭𑀓𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀕𑀭𑀽𑀦𑀁 𑀅𑀦𑀼𑀲𑀸𑀲𑀦𑀺𑀬𑁄 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀦𑁄 𑀳𑁄𑀣𑀸𑀢𑀺 𑀅𑀢𑁆𑀣𑁄. 𑀲𑀔𑀺𑀮𑀸𑀢𑀺 𑀫𑀼𑀤𑀼𑀳𑀤𑀬𑀸.

𑀫𑁂𑀢𑁆𑀢𑀘𑀺𑀢𑁆𑀢𑀸𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀳𑀺𑀢𑀽𑀧𑀲𑀁𑀳𑀸𑀭𑀮𑀓𑁆𑀔𑀡𑀸𑀬 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸. 𑀓𑀸𑀭𑀼𑀡𑀺𑀓𑀸𑀢𑀺 𑀓𑀭𑀼𑀡𑀸𑀬 𑀦𑀺𑀬𑀼𑀢𑁆𑀢𑀸 𑀧𑀭𑁂𑀲𑀁 𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀯𑀼𑀢𑁆𑀢𑀺𑀬𑀸 𑀓𑀭𑀼𑀡𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀆𑀭𑀤𑁆𑀥𑀯𑀻𑀭𑀺𑀬𑀸𑀢𑀺 𑀅𑀓𑀼𑀲𑀮𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀸. 𑀧𑀳𑀺𑀢𑀢𑁆𑀢𑀸𑀢𑀺 𑀦𑀺𑀩𑁆𑀩𑀸𑀦𑀁 𑀧𑀝𑀺𑀧𑁂𑀲𑀺𑀢𑀘𑀺𑀢𑁆𑀢𑀸. 𑀦𑀺𑀘𑁆𑀘𑀦𑁆𑀢𑀺 𑀲𑀩𑁆𑀩𑀓𑀸𑀮𑀁. 𑀤𑀴𑁆𑀳𑀧𑀭𑀓𑁆𑀓𑀫𑀸𑀢𑀺 𑀣𑀺𑀭𑀯𑀻𑀭𑀺𑀬𑀸.

𑀧𑀫𑀸𑀤𑀦𑁆𑀢𑀺 𑀧𑀫𑀚𑁆𑀚𑀦𑀁, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀦𑀼𑀝𑁆𑀞𑀸𑀦𑀁, 𑀅𑀓𑀼𑀲𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑁄. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀢𑀢𑁆𑀣 𑀓𑀢𑀫𑁄 𑀧𑀫𑀸𑀤𑁄? 𑀓𑀸𑀬𑀤𑀼𑀘𑁆𑀘𑀭𑀺𑀢𑁂 𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂 𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂 𑀯𑀸 𑀧𑀜𑁆𑀘𑀲𑀼 𑀯𑀸 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄 𑀯𑁄𑀲𑁆𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀁, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸’’𑀢𑀺𑀆𑀤𑀺 (𑀯𑀺𑀪. 𑁯𑁩𑁦).

𑀅𑀧𑁆𑀧𑀫𑀸𑀤𑀦𑁆𑀢𑀺 𑀅𑀧𑁆𑀧𑀫𑀚𑁆𑀚𑀦𑀁, 𑀲𑁄 𑀧𑀫𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀢𑁄 𑀳𑀺 𑀅𑀧𑁆𑀧𑀫𑀸𑀤𑁄 𑀦𑀸𑀫 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁄, 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀏𑀯 𑀘𑁂𑀢𑀁 𑀦𑀸𑀫𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀲𑁆𑀫𑀸 𑀧𑀫𑀸𑀤𑀫𑀽𑀮𑀓𑀸 𑀲𑀩𑁆𑀩𑁂 𑀅𑀦𑀢𑁆𑀣𑀸, 𑀅𑀧𑁆𑀧𑀫𑀸𑀤𑀫𑀽𑀮𑀓𑀸 𑀘 𑀲𑀩𑁆𑀩𑁂 𑀅𑀢𑁆𑀣𑀸, 𑀢𑀲𑁆𑀫𑀸 𑀧𑀫𑀸𑀤𑀁 𑀪𑀬𑀢𑁄 𑀉𑀧𑀤𑁆𑀤𑀯𑀢𑁄 𑀤𑀺𑀲𑁆𑀯𑀸 𑀅𑀧𑁆𑀧𑀫𑀸𑀤𑀜𑁆𑀘 𑀔𑁂𑀫𑀢𑁄 𑀅𑀦𑀼𑀧𑀤𑁆𑀤𑀯𑀢𑁄 𑀤𑀺𑀲𑁆𑀯𑀸 𑀅𑀧𑁆𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀬𑀸 𑀲𑀺𑀔𑀸𑀪𑀽𑀢𑀁 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑀗𑁆𑀕𑀳𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀅𑀝𑁆𑀞𑀗𑁆𑀕𑀺𑀓𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀣, 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀨𑀼𑀲𑀦𑁆𑀢𑀸 𑀲𑀘𑁆𑀙𑀺𑀓𑀭𑁄𑀦𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑁂𑀣, 𑀤𑀲𑁆𑀲𑀦𑀫𑀕𑁆𑀕𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀉𑀧𑁆𑀧𑀸𑀤𑀦𑀯𑀲𑁂𑀦 𑀯𑀟𑁆𑀠𑁂𑀣, 𑀏𑀯𑀁 𑀯𑁄 𑀅𑀧𑁆𑀧𑀫𑀸𑀤𑀪𑀸𑀯𑀦𑀸 𑀲𑀺𑀔𑀸𑀧𑀢𑁆𑀢𑀸 𑀪𑀯𑀺𑀲𑁆𑀲𑀢𑀻𑀢𑀺.

𑀏𑀯𑀁 𑀣𑁂𑀭𑁄 𑀲𑀫𑁆𑀧𑀢𑁆𑀢𑀧𑀭𑀺𑀲𑀁 𑀑𑀯𑀤𑀢𑀺. 𑀇𑀫𑀸 𑀏𑀯 𑀘𑀺𑀫𑀲𑁆𑀲 𑀣𑁂𑀭𑀲𑁆𑀲 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀕𑀸𑀣𑀸 𑀅𑀳𑁂𑀲𑀼𑀦𑁆𑀢𑀺.

𑀨𑀼𑀲𑁆𑀲𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀬𑀣𑀸𑀘𑀸𑀭𑀻 𑀬𑀣𑀸𑀲𑀢𑁄𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀘 𑀯𑀢𑁆𑀣𑀼 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀅𑀢𑀻𑀢𑁂 𑀇𑀢𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑀢𑁆𑀣𑀓𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀦𑀸𑀫𑁂𑀦 𑀲𑀭𑀤𑀫𑀸𑀡𑀯𑁄 𑀦𑀸𑀫 𑀅𑀳𑁄𑀲𑀺. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀦𑀸𑀫𑁂𑀦 𑀲𑀺𑀭𑀺𑀯𑀟𑁆𑀠𑀓𑀼𑀝𑀼𑀫𑁆𑀩𑀺𑀓𑁄 𑀦𑀸𑀫 𑀅𑀳𑁄𑀲𑀺. 𑀢𑁂 𑀉𑀪𑁄𑀧𑀺 𑀲𑀳𑀧𑀁𑀲𑀼𑀓𑀻𑀴𑀓𑀲𑀳𑀸𑀬𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀲𑀭𑀤𑀫𑀸𑀡𑀯𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀓𑀼𑀮𑀲𑀦𑁆𑀢𑀓𑀁 𑀥𑀦𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀭𑀳𑁄𑀕𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀫𑀭𑀡𑀁 𑀦𑀸𑀫 𑀏𑀓𑀦𑁆𑀢𑀺𑀓𑀁, 𑀢𑀲𑁆𑀫𑀸 𑀫𑀬𑀸 𑀏𑀓𑀁 𑀧𑀩𑁆𑀩𑀚𑁆𑀚𑀁 𑀉𑀧𑀕𑀦𑁆𑀢𑁆𑀯𑀸 𑀫𑁄𑀓𑁆𑀔𑀫𑀕𑁆𑀕𑁄 𑀕𑀯𑁂𑀲𑀺𑀢𑀩𑁆𑀩𑁄’’𑀢𑀺 𑀲𑀳𑀸𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀲𑀫𑁆𑀫, 𑀅𑀳𑀁 𑀧𑀩𑁆𑀩𑀚𑀺𑀢𑀼𑀓𑀸𑀫𑁄, 𑀓𑀺𑀁 𑀢𑁆𑀯𑀁 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 ‘‘𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀳𑁄𑀢𑀼 𑀅𑀳𑀫𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀭𑀢𑀦𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀯𑀺𑀯𑀭𑀸𑀧𑁂𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀢𑀲𑁆𑀲 𑀧𑀩𑁆𑀩𑀚𑁆𑀚𑀁 𑀅𑀦𑀼𑀧𑀩𑁆𑀩𑀚𑀺𑀢𑀸 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀲𑁄 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀅𑀝𑁆𑀞 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑁂𑀲𑀫𑁆𑀧𑀺 𑀚𑀝𑀺𑀮𑀸𑀦𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀆𑀘𑀺𑀓𑁆𑀔𑀺. 𑀢𑁂𑀧𑀺 𑀲𑀩𑁆𑀩𑁂 𑀧𑀜𑁆𑀘𑀸𑀪𑀺𑀜𑁆𑀜𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀼𑀁.

𑀢𑁂𑀦 𑀲𑀫𑀬𑁂𑀦 𑀅𑀦𑁄𑀫𑀤𑀲𑁆𑀲𑀻 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀲𑀢𑁆𑀢𑁂 𑀲𑀁𑀲𑀸𑀭𑀫𑀳𑁄𑀖𑀢𑁄 𑀢𑀸𑀭𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 ‘‘𑀲𑀭𑀤𑀢𑀸𑀧𑀲𑀲𑁆𑀲 𑀘 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀜𑁆𑀘 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑁄 𑀅𑀤𑀼𑀢𑀺𑀬𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 ‘‘𑀩𑀼𑀤𑁆𑀥𑀪𑀸𑀯𑀁 𑀫𑁂 𑀚𑀸𑀦𑀸𑀢𑀽’’𑀢𑀺 𑀢𑀸𑀧𑀲𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀺. 𑀲𑀭𑀤𑀢𑀸𑀧𑀲𑁄 𑀲𑀢𑁆𑀣𑀼 𑀲𑀭𑀻𑀭𑁂 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀉𑀧𑀥𑀸𑀭𑁂𑀢𑁆𑀯𑀸 ‘‘𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄𑀬𑁂𑀯𑀸𑀬’’𑀦𑁆𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀲𑀭𑀤𑀢𑀸𑀧𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀚𑀝𑀺𑀮𑀸 𑀧𑀡𑀻𑀢𑀧𑀡𑀻𑀢𑀸𑀦𑀺 𑀑𑀚𑀯𑀦𑁆𑀢𑀸𑀦𑀺 𑀨𑀮𑀸𑀨𑀮𑀸𑀦𑀺 𑀕𑀳𑁂𑀢𑁆𑀯𑀸 𑀆𑀕𑀢𑀸 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑀸 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑁆𑀲 𑀘 𑀲𑀢𑁆𑀣𑀼 𑀘 𑀦𑀺𑀲𑀺𑀦𑁆𑀦𑀸𑀓𑀸𑀭𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀆𑀘𑀭𑀺𑀬, 𑀫𑀬𑀁 𑀧𑀼𑀩𑁆𑀩𑁂 ‘𑀢𑀼𑀫𑁆𑀳𑁂𑀳𑀺 𑀫𑀳𑀦𑁆𑀢𑀢𑀭𑁄 𑀓𑁄𑀘𑀺 𑀦𑀢𑁆𑀣𑀻’𑀢𑀺 𑀯𑀺𑀘𑀭𑀸𑀫, 𑀅𑀬𑀁 𑀧𑀦 𑀧𑀼𑀭𑀺𑀲𑁄 𑀢𑀼𑀫𑁆𑀳𑁂𑀳𑀺 𑀫𑀳𑀦𑁆𑀢𑀢𑀭𑁄 𑀫𑀜𑁆𑀜𑁂’’𑀢𑀺 𑀆𑀳𑀁𑀲𑀼. ‘‘𑀓𑀺𑀁 𑀯𑀤𑁂𑀣, 𑀢𑀸𑀢𑀸? 𑀲𑀸𑀲𑀧𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀲𑀺𑀦𑁂𑀭𑀼𑀁 𑀲𑀫𑀁 𑀓𑀸𑀢𑀼𑀁 𑀇𑀘𑁆𑀙𑀣? 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦 𑀫𑀁 𑀢𑀼𑀮𑁆𑀬𑀁 𑀫𑀸 𑀓𑀭𑀺𑀢𑁆𑀣𑀸’’𑀢𑀺. 𑀅𑀣 𑀢𑁂 𑀢𑀸𑀧𑀲𑀸 𑀆𑀘𑀭𑀺𑀬𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀬𑀸𑀯 𑀫𑀳𑀸 𑀯𑀢𑀸𑀬𑀁 𑀧𑀼𑀭𑀺𑀲𑀼𑀢𑁆𑀢𑀫𑁄’’𑀢𑀺 𑀲𑀩𑁆𑀩𑁂𑀯 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀁𑀲𑀼.

𑀅𑀣 𑀢𑁂 𑀆𑀘𑀭𑀺𑀬𑁄 𑀆𑀳 𑁋 ‘‘𑀢𑀸𑀢𑀸, 𑀲𑀢𑁆𑀣𑀼 𑀅𑀦𑀼𑀘𑁆𑀙𑀯𑀺𑀓𑁄 𑀦𑁄 𑀤𑁂𑀬𑁆𑀬𑀥𑀫𑁆𑀫𑁄 𑀦𑀢𑁆𑀣𑀺, 𑀲𑀢𑁆𑀣𑀸 𑀘 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀇𑀥𑀸𑀕𑀢𑁄, 𑀳𑀦𑁆𑀤 𑀫𑀬𑀁 𑀤𑁂𑀬𑁆𑀬𑀥𑀫𑁆𑀫𑀁 𑀬𑀣𑀸𑀩𑀮𑀁 𑀤𑀲𑁆𑀲𑀸𑀫. 𑀢𑀼𑀫𑁆𑀳𑁂𑀳𑀺 𑀬𑀁 𑀬𑀁 𑀧𑀡𑀻𑀢𑀁 𑀨𑀮𑀸𑀨𑀮𑀁 𑀆𑀪𑀢𑀁, 𑀢𑀁 𑀢𑀁 𑀆𑀳𑀭𑀣𑀸’’𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀲𑀬𑀁 𑀢𑀣𑀸𑀕𑀢𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀢𑁆𑀣𑀸𑀭𑀸 𑀘 𑀨𑀮𑀸𑀨𑀮𑁂 𑀧𑀝𑀺𑀕𑁆𑀕𑀡𑁆𑀳𑀺𑀢𑀫𑀢𑁆𑀢𑁂 𑀤𑁂𑀯𑀢𑀸 𑀤𑀺𑀩𑁆𑀩𑁄𑀚𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀢𑀸𑀧𑀲𑁄 𑀉𑀤𑀓𑀫𑁆𑀧𑀺 𑀲𑀬𑀫𑁂𑀯 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁄 𑀪𑁄𑀚𑀦𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀢𑁆𑀣𑀭𑀺 𑀦𑀺𑀲𑀺𑀦𑁆𑀦𑁂 𑀲𑀩𑁆𑀩𑁂 𑀅𑀦𑁆𑀢𑁂𑀯𑀸𑀲𑀺𑀓𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀲𑀸𑀭𑀡𑀻𑀬𑀁 𑀓𑀣𑀁 𑀓𑀣𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑁂 𑀲𑀢𑁆𑀣𑀼 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀢𑀸𑀯𑀤𑁂𑀯 𑀲𑀢𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀸𑀭𑀸 𑀅𑀕𑁆𑀕𑀲𑀸𑀯𑀓𑀸 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼.

𑀢𑀢𑁄 𑀲𑀭𑀤𑀢𑀸𑀧𑀲𑁄 𑀅𑀦𑁆𑀢𑁂𑀯𑀸𑀲𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢𑀸, 𑀲𑀢𑁆𑀣𑀼 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀧𑀼𑀧𑁆𑀨𑀸𑀲𑀦𑁂𑀦 𑀧𑀽𑀚𑀸 𑀓𑀸𑀢𑀩𑁆𑀩𑀸, 𑀢𑀲𑁆𑀫𑀸 𑀧𑀼𑀧𑁆𑀨𑀸𑀦𑀺 𑀆𑀳𑀭𑀣𑀸’’𑀢𑀺. 𑀢𑁂 𑀢𑀸𑀯𑀤𑁂𑀯 𑀇𑀤𑁆𑀥𑀺𑀬𑀸 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀺𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀬𑁄𑀚𑀦𑀧𑁆𑀧𑀫𑀸𑀡𑀁 𑀧𑀼𑀧𑁆𑀨𑀸𑀲𑀦𑀁 𑀧𑀜𑁆𑀜𑀸𑀧𑁂𑀲𑀼𑀁, 𑀉𑀪𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀢𑀺𑀕𑀸𑀯𑀼𑀢𑀁, 𑀲𑁂𑀲𑀪𑀺𑀓𑁆𑀔𑀽𑀦𑀁 𑀅𑀟𑁆𑀠𑀬𑁄𑀚𑀦𑀺𑀓𑀸𑀤𑀺𑀪𑁂𑀤𑀁, 𑀲𑀗𑁆𑀖𑀦𑀯𑀓𑀲𑁆𑀲 𑀉𑀲𑀪𑀫𑀢𑁆𑀢𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀏𑀯𑀁 𑀢𑁂𑀲𑀁 𑀧𑀜𑁆𑀜𑀢𑁆𑀢𑁂𑀲𑀼 𑀆𑀲𑀦𑁂𑀲𑀼 𑀲𑀭𑀤𑀢𑀸𑀧𑀲𑁄 𑀢𑀣𑀸𑀕𑀢𑀲𑁆𑀲 𑀧𑀼𑀭𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀞𑀺𑀢𑁄 𑁋 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀇𑀫𑀁 𑀧𑀼𑀧𑁆𑀨𑀸𑀲𑀦𑀁 𑀅𑀪𑀺𑀭𑀼𑀳𑀣𑀸’’𑀢𑀺 𑀆𑀳. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀼𑀧𑁆𑀨𑀸𑀲𑀦𑁂. 𑀲𑀢𑁆𑀣𑀭𑀺 𑀦𑀺𑀲𑀺𑀦𑁆𑀦𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀲𑁂𑀲𑀪𑀺𑀓𑁆𑀔𑀽 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 ‘‘𑀢𑁂𑀲𑀁 𑀫𑀳𑀧𑁆𑀨𑀮𑀁 𑀳𑁄𑀢𑀽’’𑀢𑀺 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺. 𑀲𑀢𑁆𑀣𑀼 𑀲𑀫𑀸𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸𑀧𑀺 𑀲𑁂𑀲𑀪𑀺𑀓𑁆𑀔𑀽𑀧𑀺 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀁𑀲𑀼. 𑀢𑀸𑀧𑀲𑁄 𑀲𑀢𑁆𑀢𑀸𑀳𑀁 𑀦𑀺𑀭𑀦𑁆𑀢𑀭𑀁 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀇𑀢𑀭𑁂 𑀧𑀦 𑀯𑀦𑀫𑀽𑀮𑀨𑀮𑀸𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀲𑀓𑀸𑀮𑁂 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀁𑀲𑀼.

𑀲𑀢𑁆𑀣𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀬 𑀅𑀕𑁆𑀕𑀲𑀸𑀯𑀓𑀁 𑀦𑀺𑀲𑀪𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀧𑀲𑀸𑀦𑀁 𑀧𑀼𑀧𑁆𑀨𑀸𑀲𑀦𑀸𑀦𑀼𑀫𑁄𑀤𑀦𑀁 𑀓𑀭𑁄𑀳𑀻’’𑀢𑀺. 𑀣𑁂𑀭𑁄 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂 𑀞𑀢𑁆𑀯𑀸 𑀢𑁂𑀲𑀁 𑀧𑀼𑀧𑁆𑀨𑀸𑀲𑀦𑀸𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀢𑀲𑁆𑀲 𑀤𑁂𑀲𑀦𑀸𑀯𑀲𑀸𑀦𑁂 𑀲𑀢𑁆𑀣𑀸 𑀤𑀼𑀢𑀺𑀬𑀁 𑀅𑀕𑁆𑀕𑀲𑀸𑀯𑀓𑀁 𑀅𑀦𑁄𑀫𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁆𑀯𑀫𑁆𑀧𑀺 𑀇𑀫𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀳𑀻’’𑀢𑀺. 𑀲𑁄𑀧𑀺 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀁 𑀓𑀣𑁂𑀲𑀺. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑁂𑀲𑀦𑀸𑀬 𑀏𑀓𑀲𑁆𑀲𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦𑀸𑀳𑁄𑀲𑀺. 𑀅𑀣 𑀲𑀢𑁆𑀣𑀸 𑀩𑀼𑀤𑁆𑀥𑀯𑀺𑀲𑀬𑁂 𑀞𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀞𑀧𑁂𑀢𑁆𑀯𑀸 𑀲𑀭𑀤𑀢𑀸𑀧𑀲𑀁 𑀅𑀯𑀲𑁂𑀲𑀸 𑀲𑀩𑁆𑀩𑁂𑀧𑀺 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀚𑀝𑀺𑀮𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀢𑁆𑀣𑀸 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑁂 𑀢𑀸𑀯𑀤𑁂𑀯 𑀅𑀦𑁆𑀢𑀭𑀳𑀺𑀢𑀢𑀸𑀧𑀲𑀯𑁂𑀲𑀸 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀯𑀭𑀥𑀭𑀸 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀣𑁂𑀭𑀸 𑀯𑀺𑀬 𑀅𑀳𑁂𑀲𑀼𑀁.

𑀲𑀭𑀤𑀢𑀸𑀧𑀲𑁄 𑀧𑀦 ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀅𑀬𑀁 𑀦𑀺𑀲𑀪𑀢𑁆𑀣𑁂𑀭𑁄 𑀯𑀺𑀬 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀲𑀢𑁆𑀣𑀼 𑀤𑁂𑀲𑀦𑀸𑀓𑀸𑀮𑁂 𑀉𑀧𑁆𑀧𑀦𑁆𑀦𑀧𑀭𑀺𑀯𑀺𑀢𑀓𑁆𑀓𑀢𑀸𑀬 𑀅𑀜𑁆𑀜𑀯𑀺𑀳𑀺𑀢𑁄 𑀳𑀼𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀢𑀣𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸𑀧𑀺𑀲𑁆𑀲 𑀅𑀦𑀦𑁆𑀢𑀭𑀸𑀬𑁂𑀦 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 𑁋 ‘‘𑀇𑀢𑁄 𑀢𑁆𑀯𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁄𑀢𑀫𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑁄 𑀲𑀸𑀭𑀺𑀧𑀼𑀢𑁆𑀢𑁄 𑀦𑀸𑀫 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀭𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀯𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺.

𑀲𑀭𑀤𑀢𑀸𑀧𑀲𑁄𑀧𑀺 𑀲𑀳𑀸𑀬𑀓𑀲𑁆𑀲 𑀲𑀺𑀭𑀺𑀯𑀟𑁆𑀠𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀫, 𑀫𑀬𑀸 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀕𑁄𑀢𑀫𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑀺𑀢𑀁, 𑀢𑁆𑀯𑀫𑁆𑀧𑀺 𑀢𑀲𑁆𑀲 𑀤𑀼𑀢𑀺𑀬𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑁂𑀳𑀻𑀢𑀺.

𑀲𑀺𑀭𑀺𑀯𑀟𑁆𑀠𑁄 𑀢𑀁 𑀉𑀧𑀤𑁂𑀲𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀅𑀝𑁆𑀞𑀓𑀭𑀻𑀲𑀫𑀢𑁆𑀢𑀁 𑀞𑀸𑀦𑀁 𑀲𑀫𑀢𑀮𑀁 𑀓𑀸𑀭𑁂𑀢𑁆𑀯𑀸 𑀮𑀸𑀚𑀧𑀜𑁆𑀘𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀘𑁆𑀙𑀤𑀦𑀁 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀫𑁆𑀧𑀺 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀲𑀚𑁆𑀚𑁂𑀢𑁆𑀯𑀸, 𑀲𑀭𑀤𑀢𑀸𑀧𑀲𑁂𑀦 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸, 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀫𑀳𑀸𑀭𑀳𑁂𑀳𑀺 𑀯𑀢𑁆𑀣𑁂𑀳𑀺 𑀅𑀘𑁆𑀙𑀸𑀤𑁂𑀢𑁆𑀯𑀸, 𑀤𑀼𑀢𑀺𑀬𑀲𑀸𑀯𑀓𑀪𑀸𑀯𑀸𑀬 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸𑀧𑀺𑀲𑁆𑀲 𑀅𑀦𑀦𑁆𑀢𑀭𑀸𑀬𑁂𑀦 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀩𑁆𑀬𑀸𑀓𑀭𑀺𑀢𑁆𑀯𑀸 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀺𑀭𑀺𑀯𑀟𑁆𑀠𑁄 𑀳𑀝𑁆𑀞𑀧𑀳𑀝𑁆𑀞𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀲𑀭𑀤𑀢𑀸𑀧𑀲𑁄 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀦𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀅𑀦𑁆𑀢𑀭𑀸𑀓𑀫𑁆𑀫𑀁 𑀦 𑀓𑀣𑀺𑀢𑀁. 𑀅𑀫𑁆𑀳𑀸𑀓𑀁 𑀧𑀦 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀲𑀭𑀤𑀢𑀸𑀧𑀲𑁄 𑀭𑀸𑀚𑀕𑀳𑀲𑁆𑀲 𑀅𑀯𑀺𑀤𑀽𑀭𑁂 𑀉𑀧𑀢𑀺𑀲𑁆𑀲𑀕𑀸𑀫𑁂 𑀭𑀽𑀧𑀲𑀸𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀁𑀤𑀺𑀯𑀲𑀫𑁂𑀯𑀲𑁆𑀲 𑀲𑀳𑀸𑀬𑁄𑀧𑀺 𑀭𑀸𑀚𑀕𑀳𑀲𑁆𑀲𑁂𑀯 𑀅𑀯𑀺𑀤𑀽𑀭𑁂 𑀓𑁄𑀮𑀺𑀢𑀕𑀸𑀫𑁂 𑀫𑁄𑀕𑁆𑀕𑀮𑀺𑀬𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀸𑀦𑀺 𑀓𑀺𑀭 𑀤𑁆𑀯𑁂𑀧𑀺 𑀓𑀼𑀮𑀸𑀦𑀺 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀆𑀩𑀤𑁆𑀥𑀧𑀝𑀺𑀩𑀤𑁆𑀥𑀲𑀳𑀸𑀬𑀓𑀸𑀦𑁂𑀯. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀏𑀓𑀤𑀺𑀯𑀲𑀫𑁂𑀯 𑀕𑀩𑁆𑀪𑀧𑀭𑀺𑀳𑀸𑀭𑀫𑀤𑀁𑀲𑀼. 𑀤𑀲𑀫𑀸𑀲𑀘𑁆𑀘𑀬𑁂𑀦 𑀚𑀸𑀢𑀸𑀦𑀫𑁆𑀧𑀺 𑀢𑁂𑀲𑀁 𑀙𑀲𑀝𑁆𑀞𑀺 𑀥𑀸𑀢𑀺𑀬𑁄 𑀉𑀧𑀝𑁆𑀞𑀸𑀧𑁂𑀲𑀼𑀁, 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀭𑀽𑀧𑀲𑀸𑀭𑀺𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑀲𑁆𑀲 𑀉𑀧𑀢𑀺𑀲𑁆𑀲𑀕𑀸𑀫𑁂 𑀚𑁂𑀝𑁆𑀞𑀓𑀼𑀮𑀲𑁆𑀲 𑀧𑀼𑀢𑁆𑀢𑀢𑁆𑀢𑀸 𑀉𑀧𑀢𑀺𑀲𑁆𑀲𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀇𑀢𑀭𑀲𑁆𑀲 𑀓𑁄𑀮𑀺𑀢𑀕𑀸𑀫𑁂 𑀚𑁂𑀝𑁆𑀞𑀓𑀼𑀮𑀲𑁆𑀲 𑀧𑀼𑀢𑁆𑀢𑀢𑁆𑀢𑀸 𑀓𑁄𑀮𑀺𑀢𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑁂 𑀉𑀪𑁄𑀧𑀺 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀦𑁆𑀢𑀸 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀩𑁆𑀩𑀲𑀺𑀧𑁆𑀧𑀸𑀦𑀁 𑀧𑀸𑀭𑀁 𑀅𑀕𑀫𑀁𑀲𑀼.

𑀅𑀣𑁂𑀓𑀤𑀺𑀯𑀲𑀁 𑀢𑁂 𑀭𑀸𑀚𑀕𑀳𑁂 𑀕𑀺𑀭𑀕𑁆𑀕𑀲𑀫𑀚𑁆𑀚𑀁 𑀧𑀲𑁆𑀲𑀦𑁆𑀢𑀸 𑀫𑀳𑀸𑀚𑀦𑀁 𑀲𑀦𑁆𑀦𑀺𑀧𑀢𑀺𑀢𑀁 𑀤𑀺𑀲𑁆𑀯𑀸 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀕𑀢𑀢𑁆𑀢𑀸 𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀸 ‘‘𑀲𑀩𑁆𑀩𑁂𑀧𑀺𑀫𑁂 𑀑𑀭𑀁 𑀯𑀲𑁆𑀲𑀲𑀢𑀸𑀦𑀁 𑀫𑀘𑁆𑀘𑀼𑀫𑀼𑀔𑁂 𑀧𑀢𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀁𑀯𑁂𑀕𑀁 𑀧𑀝𑀺𑀮𑀪𑀺𑀢𑁆𑀯𑀸 ‘‘𑀅𑀫𑁆𑀳𑁂𑀳𑀺 𑀫𑁄𑀓𑁆𑀔𑀥𑀫𑁆𑀫𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄, 𑀢𑀜𑁆𑀘 𑀧𑀭𑀺𑀬𑁂𑀲𑀦𑁆𑀢𑁂𑀳𑀺 𑀏𑀓𑀁 𑀧𑀩𑁆𑀩𑀚𑁆𑀚𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀦𑀺𑀘𑁆𑀙𑀬𑀁 𑀓𑀢𑁆𑀯𑀸 𑀧𑀜𑁆𑀘𑀳𑀺 𑀫𑀸𑀡𑀯𑀓𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑀜𑁆𑀘𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀲𑀁 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀜𑁆𑀘𑀬𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀢𑁂 𑀓𑀢𑀺𑀧𑀸𑀳𑁂𑀦𑁂𑀯 𑀲𑀩𑁆𑀩𑀁 𑀲𑀜𑁆𑀘𑀬𑀲𑁆𑀲 𑀲𑀫𑀬𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀢𑁆𑀣 𑀲𑀸𑀭𑀁 𑀅𑀤𑀺𑀲𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀢𑁂 𑀢𑁂 𑀧𑀡𑁆𑀟𑀺𑀢𑀲𑀫𑁆𑀫𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀢𑁂 𑀢𑁂𑀳𑀺 𑀧𑀼𑀝𑁆𑀞𑀸 𑀦𑁂𑀯 𑀲𑀫𑁆𑀧𑀸𑀬𑀦𑁆𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀢𑁂𑀬𑁂𑀯 𑀢𑁂𑀲𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀏𑀯𑀁 𑀢𑁂 𑀫𑁄𑀓𑁆𑀔𑀁 𑀧𑀭𑀺𑀬𑁂𑀲𑀦𑁆𑀢𑀸 𑀓𑀢𑀺𑀓𑀁 𑀅𑀓𑀁𑀲𑀼 𑁋 ‘‘𑀅𑀫𑁆𑀳𑁂𑀲𑀼 𑀬𑁄 𑀧𑀞𑀫𑀁 𑀅𑀫𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀲𑁄 𑀇𑀢𑀭𑀲𑁆𑀲 𑀆𑀭𑁄𑀘𑁂𑀢𑀽’’𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀲𑀢𑁆𑀣𑀭𑀺 𑀧𑀞𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀅𑀦𑀼𑀧𑀼𑀩𑁆𑀩𑁂𑀦 𑀉𑀭𑀼𑀯𑁂𑀮𑀓𑀲𑁆𑀲𑀧𑀸𑀤𑀺𑀓𑁂 𑀲𑀳𑀲𑁆𑀲𑀚𑀝𑀺𑀮𑁂 𑀤𑀫𑁂𑀢𑁆𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁂 𑀏𑀓𑀤𑀺𑀯𑀲𑀁 𑀉𑀧𑀢𑀺𑀲𑁆𑀲𑁄 𑀧𑀭𑀺𑀩𑁆𑀩𑀸𑀚𑀓𑁄 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀕𑀘𑁆𑀙𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀚𑀺𑀢𑁆𑀣𑁂𑀭𑀁 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀦 𑀫𑀬𑀸 𑀏𑀯𑀭𑀽𑀧𑁄 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑁄 𑀧𑀩𑁆𑀩𑀚𑀺𑀢𑁄 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀲𑀦𑁆𑀢𑀥𑀫𑁆𑀫𑁂𑀦 𑀦𑀸𑀫 𑀏𑀢𑁆𑀣 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀆𑀬𑀲𑁆𑀫𑀦𑁆𑀢𑀁 𑀉𑀤𑀺𑀓𑁆𑀔𑀦𑁆𑀢𑁄 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀣𑁂𑀭𑁄𑀧𑀺 𑀮𑀤𑁆𑀥𑀧𑀺𑀡𑁆𑀟𑀧𑀸𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀢𑀺𑀭𑀽𑀧𑀁 𑀑𑀓𑀸𑀲𑀁 𑀕𑀢𑁄. 𑀧𑀭𑀺𑀩𑁆𑀩𑀸𑀚𑀓𑁄 𑀅𑀢𑁆𑀢𑀦𑁄 𑀧𑀭𑀺𑀩𑁆𑀩𑀸𑀚𑀓𑀧𑀻𑀞𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀘𑀲𑁆𑀲 𑀅𑀢𑁆𑀢𑀦𑁄 𑀓𑀼𑀡𑁆𑀟𑀺𑀓𑀸𑀬 𑀉𑀤𑀓𑀁 𑀅𑀤𑀸𑀲𑀺.

𑀏𑀯𑀁 𑀲𑁄 𑀆𑀘𑀭𑀺𑀬𑀯𑀢𑁆𑀢𑀁 𑀓𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁂𑀦 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑁄 𑀯𑀸 𑀢𑁂 𑀲𑀢𑁆𑀣𑀸, 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀧𑀤𑀺𑀲𑀺. 𑀧𑀼𑀦 𑀢𑁂𑀦 ‘‘𑀓𑀺𑀁𑀯𑀸𑀤𑀻 𑀧𑀦𑀸𑀬𑀲𑁆𑀫𑀢𑁄 𑀲𑀢𑁆𑀣𑀸’’𑀢𑀺 𑀧𑀼𑀝𑁆𑀞𑁄 ‘‘𑀇𑀫𑀲𑁆𑀲 𑀲𑀸𑀲𑀦𑀲𑁆𑀲 𑀕𑀫𑁆𑀪𑀻𑀭𑀢𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀦𑀯𑀓𑀪𑀸𑀯𑀁 𑀧𑀯𑁂𑀤𑁂𑀢𑁆𑀯𑀸 𑀲𑀗𑁆𑀔𑁂𑀧𑀯𑀲𑁂𑀦 𑀘𑀲𑁆𑀲 𑀲𑀸𑀲𑀦𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸’’𑀢𑀺 (𑀫𑀳𑀸𑀯. 𑁬𑁦; 𑀅𑀧. 𑀣𑁂𑀭 𑁧.𑁧.𑁨𑁮𑁬; 𑀧𑁂𑀝𑀓𑁄. 𑁯) 𑀕𑀸𑀣𑀫𑀸𑀳. 𑀧𑀭𑀺𑀩𑁆𑀩𑀸𑀚𑀓𑁄 𑀧𑀞𑀫𑀧𑀤𑀤𑁆𑀯𑀬𑀫𑁂𑀯 𑀲𑀼𑀢𑁆𑀯𑀸 𑀲𑀳𑀲𑁆𑀲𑀦𑀬𑀲𑀫𑁆𑀧𑀦𑁆𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀇𑀢𑀭𑀁 𑀧𑀤𑀤𑁆𑀯𑀬𑀁 𑀲𑁄𑀢𑀸𑀧𑀦𑁆𑀦𑀓𑀸𑀮𑁂 𑀦𑀺𑀝𑁆𑀞𑀸𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀦 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀉𑀧𑀭𑀺 𑀯𑀺𑀲𑁂𑀲𑁂 𑀅𑀧𑁆𑀧𑀯𑀢𑁆𑀢𑁂𑀦𑁆𑀢𑁂 ‘‘𑀪𑀯𑀺𑀲𑁆𑀲𑀢𑀺 𑀏𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀣𑁂𑀭𑀁 𑀆𑀳 𑁋 ‘‘𑀫𑀸, 𑀪𑀦𑁆𑀢𑁂, 𑀉𑀧𑀭𑀺 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑀬𑀺𑀢𑁆𑀣, 𑀏𑀢𑁆𑀢𑀓𑀫𑁂𑀯 𑀳𑁄𑀢𑀼, 𑀓𑀳𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀯𑀲𑀢𑀻’’𑀢𑀺? ‘‘𑀯𑁂𑀴𑀼𑀯𑀦𑁂’’𑀢𑀺. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀧𑀼𑀭𑀢𑁄 𑀕𑀘𑁆𑀙𑀣, 𑀅𑀳𑀁 𑀫𑀬𑁆𑀳𑀁 𑀲𑀳𑀸𑀬𑀓𑀲𑁆𑀲 𑀓𑀢𑀧𑀝𑀺𑀜𑁆𑀜𑀁 𑀫𑁄𑀘𑁂𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀣𑁂𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀅𑀕𑀫𑀸𑀲𑀺.

𑀓𑁄𑀮𑀺𑀢𑀧𑀭𑀺𑀩𑁆𑀩𑀸𑀚𑀓𑁄 𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀼𑀔𑀯𑀡𑁆𑀡𑁄 𑀦 𑀅𑀜𑁆𑀜𑀤𑀺𑀯𑀲𑁂𑀲𑀼 𑀯𑀺𑀬, 𑀅𑀤𑁆𑀥𑀸𑀦𑁂𑀦 𑀅𑀫𑀢𑀁 𑀅𑀥𑀺𑀕𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑁂𑀦𑁂𑀯𑀲𑁆𑀲 𑀯𑀺𑀲𑁂𑀲𑀸𑀥𑀺𑀕𑀫𑀁 𑀲𑀫𑁆𑀪𑀸𑀯𑁂𑀢𑁆𑀯𑀸 𑀅𑀫𑀢𑀸𑀥𑀺𑀕𑀫𑀁 𑀧𑀼𑀘𑁆𑀙𑀺. 𑀲𑁄𑀧𑀺𑀲𑁆𑀲 ‘‘𑀆𑀫𑀸𑀯𑀼𑀲𑁄, 𑀅𑀫𑀢𑀁 𑀅𑀥𑀺𑀕𑀢’’𑀦𑁆𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀢𑀫𑁂𑀯 𑀕𑀸𑀣𑀁 𑀅𑀪𑀸𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀓𑁄𑀮𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀆𑀳 𑁋 ‘‘𑀓𑀳𑀁 𑀦𑁄 𑀲𑀢𑁆𑀣𑀸’’𑀢𑀺? ‘‘𑀯𑁂𑀴𑀼𑀯𑀦𑁂’’𑀢𑀺. ‘‘𑀢𑁂𑀦 𑀳𑀺, 𑀆𑀯𑀼𑀲𑁄, 𑀆𑀬𑀸𑀫, 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺. 𑀉𑀧𑀢𑀺𑀲𑁆𑀲𑁄 𑀲𑀩𑁆𑀩𑀓𑀸𑀮𑀫𑁆𑀧𑀺 𑀆𑀘𑀭𑀺𑀬𑀧𑀽𑀚𑀓𑁄𑀯, 𑀢𑀲𑁆𑀫𑀸 𑀲𑀜𑁆𑀘𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀕𑀼𑀡𑁂 𑀧𑀓𑀸𑀲𑁂𑀢𑁆𑀯𑀸 𑀢𑀫𑁆𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀲𑁄 𑀮𑀸𑀪𑀸𑀲𑀸𑀧𑀓𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀁 𑀅𑀦𑀺𑀘𑁆𑀙𑀦𑁆𑀢𑁄 ‘‘𑀦 𑀲𑀓𑁆𑀓𑁄𑀫𑀺 𑀘𑀸𑀝𑀺 𑀳𑀼𑀢𑁆𑀯𑀸 𑀉𑀤𑀓𑀲𑀺𑀜𑁆𑀘𑀦𑀁 𑀳𑁄𑀢𑀼’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀢𑁂 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀢𑀁 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀅𑀢𑁆𑀢𑀦𑁄 𑀑𑀯𑀸𑀤𑁂 𑀯𑀢𑁆𑀢𑀫𑀸𑀦𑁂𑀳𑀺 𑀅𑀟𑁆𑀠𑀢𑁂𑀬𑁆𑀬𑀲𑀢𑁂𑀳𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀲𑀤𑁆𑀥𑀺𑀁 𑀯𑁂𑀴𑀼𑀯𑀦𑀁 𑀅𑀕𑀫𑀁𑀲𑀼. 𑀲𑀢𑁆𑀣𑀸 𑀢𑁂 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀏𑀢𑀁 𑀫𑁂 𑀲𑀸𑀯𑀓𑀬𑀼𑀕𑀁 𑀪𑀯𑀺𑀲𑁆𑀲𑀢𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀧𑀭𑀺𑀲𑀸𑀬 𑀘𑀭𑀺𑀬𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀉𑀧𑀲𑀫𑁆𑀧𑀤𑀁 𑀅𑀤𑀸𑀲𑀺. 𑀬𑀣𑀸 𑀢𑁂𑀲𑀁, 𑀏𑀯𑀁 𑀅𑀕𑁆𑀕𑀲𑀸𑀯𑀓𑀸𑀦𑀫𑁆𑀧𑀺 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀁 𑀆𑀕𑀢𑀫𑁂𑀯. 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀓𑀺𑀘𑁆𑀘𑀁 𑀧𑀦 𑀦 𑀦𑀺𑀝𑁆𑀞𑀸𑀢𑀺. 𑀓𑀲𑁆𑀫𑀸? 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀫𑀳𑀦𑁆𑀢𑀢𑀸𑀬.

𑀢𑁂𑀲𑀼 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀕𑀥𑀭𑀝𑁆𑀞𑁂 𑀓𑀮𑁆𑀮𑀯𑀸𑀮𑀕𑀸𑀫𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀣𑀺𑀦𑀫𑀺𑀤𑁆𑀥𑁂 𑀑𑀓𑁆𑀓𑀦𑁆𑀢𑁂 𑀲𑀢𑁆𑀣𑀸𑀭𑀸 𑀲𑀁𑀯𑁂𑀚𑀺𑀢𑁄 𑀣𑀺𑀦𑀫𑀺𑀤𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁 (𑀅. 𑀦𑀺. 𑁭.𑁬𑁧) 𑀲𑀼𑀡𑀦𑁆𑀢𑁄 𑀏𑀯 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀁 𑀅𑀥𑀺𑀕𑀦𑁆𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀅𑀟𑁆𑀠𑀫𑀸𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀭𑀸𑀚𑀕𑀳𑁂 𑀲𑀽𑀓𑀭𑀔𑀢𑀮𑁂𑀡𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀲𑀼𑀢𑁆𑀢𑀦𑁆𑀢𑁂 (𑀫. 𑀦𑀺. 𑁨.𑁨𑁦𑁧 𑀆𑀤𑀬𑁄) 𑀤𑁂𑀲𑀺𑀬𑀫𑀸𑀦𑁂 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀧𑀭𑀲𑁆𑀲 𑀯𑀟𑁆𑀠𑀺𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑁄 𑀯𑀺𑀬 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺. 𑀇𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀕𑁆𑀕𑀲𑀸𑀯𑀓𑀸𑀦𑀁 𑀲𑀢𑁆𑀣𑀼 𑀲𑀫𑀻𑀧𑁂 𑀏𑀯 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀫𑀢𑁆𑀣𑀓𑀁 𑀧𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁧.𑁧𑁪𑁧-𑁩𑁭𑁪) 𑁋

‘‘𑀳𑀺𑀫𑀯𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂, 𑀮𑀫𑁆𑀩𑀓𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

‘‘𑀉𑀢𑁆𑀢𑀸𑀦𑀓𑀽𑀮𑀸 𑀦𑀤𑀺𑀓𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀲𑀼𑀲𑀼𑀤𑁆𑀥𑀧𑀼𑀮𑀺𑀦𑀸𑀓𑀺𑀡𑁆𑀡𑀸, 𑀅𑀯𑀺𑀤𑀽𑀭𑁂 𑀫𑀫𑀲𑁆𑀲𑀫𑀁.

‘‘𑀅𑀲𑀓𑁆𑀔𑀭𑀸 𑀅𑀧𑀩𑁆𑀪𑀸𑀭𑀸, 𑀲𑀸𑀤𑀼 𑀅𑀧𑁆𑀧𑀝𑀺𑀕𑀦𑁆𑀥𑀺𑀓𑀸;

𑀲𑀦𑁆𑀤𑀢𑀻 𑀦𑀤𑀺𑀓𑀸 𑀢𑀢𑁆𑀣, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

‘‘𑀓𑀼𑀫𑁆𑀪𑀻𑀮𑀸 𑀫𑀓𑀭𑀸 𑀘𑁂𑀢𑁆𑀣, 𑀲𑀼𑀲𑀼𑀫𑀸𑀭𑀸 𑀘 𑀓𑀘𑁆𑀙𑀧𑀸;

𑀘𑀭𑀦𑁆𑀢𑀺 𑀦𑀤𑀺𑀬𑀸 𑀢𑀢𑁆𑀣, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

‘‘𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 𑀫𑀼𑀜𑁆𑀚𑀭𑁄𑀳𑀺𑀢𑀸;

𑀯𑀕𑁆𑀕𑀴𑀸 𑀧𑀧𑀢𑀸𑀬𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

‘‘𑀉𑀪𑁄 𑀓𑀽𑀮𑁂𑀲𑀼 𑀦𑀤𑀺𑀬𑀸, 𑀧𑀼𑀧𑁆𑀨𑀺𑀦𑁄 𑀨𑀮𑀺𑀦𑁄 𑀤𑀼𑀫𑀸;

𑀉𑀪𑀢𑁄 𑀅𑀪𑀺𑀮𑀫𑁆𑀩𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

‘‘𑀅𑀫𑁆𑀩𑀸 𑀲𑀸𑀮𑀸 𑀘 𑀢𑀺𑀮𑀓𑀸, 𑀧𑀸𑀝𑀮𑀻 𑀲𑀺𑀦𑁆𑀤𑀼𑀯𑀸𑀭𑀓𑀸;

𑀤𑀺𑀩𑁆𑀩𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂.

‘‘𑀘𑀫𑁆𑀫𑀓𑀸 𑀲𑀴𑀮𑀸 𑀦𑀻𑀧𑀸, 𑀦𑀸𑀕𑀧𑀼𑀦𑁆𑀦𑀸𑀕𑀓𑁂𑀢𑀓𑀸;

𑀤𑀺𑀩𑁆𑀩𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂.

‘‘𑀅𑀢𑀺𑀫𑀼𑀢𑁆𑀢𑀸 𑀅𑀲𑁄𑀓𑀸 𑀘, 𑀪𑀕𑀺𑀦𑀻𑀫𑀸𑀮𑀸 𑀘 𑀧𑀼𑀧𑁆𑀨𑀺𑀢𑀸;

𑀅𑀗𑁆𑀓𑁄𑀮𑀸 𑀩𑀺𑀫𑁆𑀩𑀺𑀚𑀸𑀮𑀸 𑀘, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂.

‘‘𑀓𑁂𑀢𑀓𑀸 𑀓𑀦𑁆𑀤𑀮𑀺 𑀘𑁂𑀯, 𑀕𑁄𑀥𑀼𑀓𑀸 𑀢𑀺𑀡𑀲𑀽𑀮𑀺𑀓𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

‘‘𑀓𑀡𑀺𑀓𑀸𑀭𑀸 𑀓𑀡𑁆𑀡𑀺𑀓𑀸 𑀘, 𑀅𑀲𑀦𑀸 𑀅𑀚𑁆𑀚𑀼𑀦𑀸 𑀩𑀳𑀽;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

‘‘𑀧𑀼𑀦𑁆𑀦𑀸𑀕𑀸 𑀕𑀺𑀭𑀺𑀧𑀼𑀦𑁆𑀦𑀸𑀕𑀸, 𑀓𑁄𑀯𑀺𑀴𑀸𑀭𑀸 𑀘 𑀧𑀼𑀧𑁆𑀨𑀺𑀢𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

‘‘𑀉𑀤𑁆𑀤𑀸𑀮𑀓𑀸 𑀘 𑀓𑀼𑀝𑀚𑀸, 𑀓𑀤𑀫𑁆𑀩𑀸 𑀯𑀓𑀼𑀮𑀸 𑀩𑀳𑀽;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.