𑁧𑁬. 𑀧𑀺𑀗𑁆𑀕𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁨𑁭. 𑀚𑀺𑀡𑁆𑀡𑁄𑀳𑀫𑀲𑁆𑀫𑀻𑀢𑀺 𑀧𑀺𑀗𑁆𑀕𑀺𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄𑀢𑀺 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀚𑀭𑀸𑀪𑀺𑀪𑀽𑀢𑁄 𑀯𑀻𑀲𑀯𑀲𑁆𑀲𑀲𑀢𑀺𑀓𑁄 𑀚𑀸𑀢𑀺𑀬𑀸, 𑀤𑀼𑀩𑁆𑀩𑀮𑁄 𑀘 ‘‘𑀇𑀥 𑀧𑀤𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀢𑁆𑀣𑁂𑀯 𑀓𑀭𑁄𑀢𑀺, 𑀯𑀺𑀦𑀝𑁆𑀞𑀧𑀼𑀭𑀺𑀫𑀘𑁆𑀙𑀯𑀺𑀯𑀡𑁆𑀡𑁄 𑀘. 𑀢𑁂𑀦𑀸𑀳 𑁋 ‘‘𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄’’𑀢𑀺. 𑀫𑀸𑀳𑀁 𑀦𑀲𑁆𑀲𑀁 𑀫𑁄𑀫𑀼𑀳𑁄 𑀅𑀦𑁆𑀢𑀭𑀸𑀯𑀸𑀢𑀺 𑀫𑀸𑀳𑀁 𑀢𑀼𑀬𑁆𑀳𑀁 𑀥𑀫𑁆𑀫𑀁 𑀅𑀲𑀘𑁆𑀙𑀺𑀓𑀢𑁆𑀯𑀸 𑀅𑀦𑁆𑀢𑀭𑀸𑀬𑁂𑀯 𑀅𑀯𑀺𑀤𑁆𑀯𑀸 𑀳𑀼𑀢𑁆𑀯𑀸 𑀅𑀦𑀲𑁆𑀲𑀺𑀁. 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀦𑁆𑀢𑀺 𑀇𑀥𑁂𑀯 𑀢𑀯 𑀧𑀸𑀤𑀫𑀽𑀮𑁂 𑀧𑀸𑀲𑀸𑀡𑀓𑁂 𑀯𑀸 𑀘𑁂𑀢𑀺𑀬 𑀚𑀸𑀢𑀺𑀚𑀭𑀸𑀬 𑀯𑀺𑀧𑁆𑀧𑀳𑀸𑀦𑀁 𑀦𑀺𑀩𑁆𑀩𑀸𑀦𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁, 𑀢𑀁 𑀫𑁂 𑀆𑀘𑀺𑀓𑁆𑀔.

𑁧𑁧𑁨𑁮. 𑀇𑀤𑀸𑀦𑀺 𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄 𑀓𑀸𑀬𑁂 𑀲𑀸𑀧𑁂𑀓𑁆𑀔𑀢𑀸𑀬 ‘‘𑀚𑀺𑀡𑁆𑀡𑁄𑀳𑀫𑀲𑁆𑀫𑀻’’𑀢𑀺 𑀕𑀸𑀣𑀫𑀸𑀳 𑀢𑁂𑀦𑀲𑁆𑀲 𑀪𑀕𑀯𑀸 𑀓𑀸𑀬𑁂 𑀲𑀺𑀦𑁂𑀳𑀧𑁆𑀧𑀳𑀸𑀦𑀢𑁆𑀣𑀁 ‘‘𑀤𑀺𑀲𑁆𑀯𑀸𑀦 𑀭𑀽𑀧𑁂𑀲𑀼 𑀯𑀺𑀳𑀜𑁆𑀜𑀫𑀸𑀦𑁂’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀭𑀽𑀧𑁂𑀲𑀽𑀢𑀺 𑀭𑀽𑀧𑀳𑁂𑀢𑀼 𑀭𑀽𑀧𑀧𑀘𑁆𑀘𑀬𑀸. 𑀯𑀺𑀳𑀜𑁆𑀜𑀫𑀸𑀦𑁂𑀢𑀺 𑀓𑀫𑁆𑀫𑀓𑀸𑀭𑀡𑀸𑀤𑀻𑀳𑀺 𑀉𑀧𑀳𑀜𑁆𑀜𑀫𑀸𑀦𑁂. 𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀽𑀢𑀺 𑀘𑀓𑁆𑀔𑀼𑀭𑁄𑀕𑀸𑀤𑀻𑀳𑀺 𑀘 𑀭𑀽𑀧𑀳𑁂𑀢𑀼𑀬𑁂𑀯 𑀚𑀦𑀸 𑀭𑀼𑀧𑁆𑀧𑀦𑁆𑀢𑀺 𑀩𑀸𑀥𑀻𑀬𑀦𑁆𑀢𑀺.

𑁧𑁧𑁨𑁯-𑁩𑁦. 𑀏𑀯𑀁 𑀪𑀕𑀯𑀢𑀸 𑀬𑀸𑀯 𑀅𑀭𑀳𑀢𑁆𑀢𑀁 𑀢𑀸𑀯 𑀓𑀣𑀺𑀢𑀁 𑀧𑀝𑀺𑀧𑀢𑁆𑀢𑀺𑀁 𑀲𑀼𑀢𑁆𑀯𑀸𑀧𑀺 𑀧𑀺𑀗𑁆𑀕𑀺𑀬𑁄 𑀚𑀭𑀸𑀤𑀼𑀩𑁆𑀩𑀮𑀢𑀸𑀬 𑀯𑀺𑀲𑁂𑀲𑀁 𑀅𑀦𑀥𑀺𑀕𑀦𑁆𑀢𑁆𑀯𑀸𑀯 𑀧𑀼𑀦 ‘‘𑀤𑀺𑀲𑀸 𑀘𑀢𑀲𑁆𑀲𑁄’’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀪𑀕𑀯𑀦𑁆𑀢𑀁 𑀣𑁄𑀫𑁂𑀦𑁆𑀢𑁄 𑀤𑁂𑀲𑀦𑀁 𑀬𑀸𑀘𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀧𑀼𑀦𑀧𑀺 𑀬𑀸𑀯 𑀅𑀭𑀳𑀢𑁆𑀢𑀁, 𑀢𑀸𑀯 𑀧𑀝𑀺𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀡𑁆𑀳𑀸𑀥𑀺𑀧𑀦𑁆𑀦𑁂’’𑀢𑀺 𑀕𑀸𑀣𑀫𑀸𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀇𑀫𑀫𑁆𑀧𑀺 𑀲𑀼𑀢𑁆𑀢𑀁 𑀪𑀕𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀺𑀗𑁆𑀕𑀺𑀬𑁄 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑁄 𑀓𑀺𑀭 𑀅𑀦𑁆𑀢𑀭𑀦𑁆𑀢𑀭𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀁 𑀯𑀺𑀘𑀺𑀢𑁆𑀭𑀧𑀝𑀺𑀪𑀸𑀦𑀁 𑀦𑀸𑀫 𑀤𑁂𑀲𑀦𑀁 𑀦 𑀮𑀪𑀺 𑀫𑀬𑁆𑀳𑀁 𑀫𑀸𑀢𑀼𑀮𑁄 𑀩𑀸𑀯𑀭𑀻 𑀲𑀯𑀦𑀸𑀬𑀸’’𑀢𑀺. 𑀢𑁂𑀦 𑀲𑀺𑀦𑁂𑀳𑀯𑀺𑀓𑁆𑀔𑁂𑀧𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀦𑁆𑀢𑁂𑀯𑀸𑀲𑀺𑀦𑁄 𑀧𑀦𑀲𑁆𑀲 𑀲𑀳𑀲𑁆𑀲𑀚𑀝𑀺𑀮𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀩𑁆𑀩𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀏𑀳𑀺𑀪𑀺𑀓𑁆𑀔𑀯𑁄 𑀅𑀳𑁂𑀲𑀼𑀦𑁆𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀧𑀺𑀗𑁆𑀕𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑀇𑀢𑁄 𑀧𑀭𑀁 𑀲𑀗𑁆𑀕𑀻𑀢𑀺𑀓𑀸𑀭𑀸 𑀤𑁂𑀲𑀦𑀁 𑀣𑁄𑀫𑁂𑀦𑁆𑀢𑀸 ‘‘𑀇𑀤𑀫𑀯𑁄𑀘 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑀢𑁆𑀣 𑀇𑀤𑀫𑀯𑁄𑀘𑀸𑀢𑀺 𑀇𑀤𑀁 𑀧𑀭𑀸𑀬𑀦𑀁 𑀅𑀯𑁄𑀘. 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀦𑁆𑀢𑀺 𑀩𑀸𑀯𑀭𑀺𑀲𑁆𑀲 𑀧𑀭𑀺𑀘𑀸𑀭𑀓𑁂𑀦 𑀧𑀺𑀗𑁆𑀕𑀺𑀬𑁂𑀦 𑀲𑀳 𑀲𑁄𑀴𑀲𑀦𑁆𑀦𑀁 𑀩𑀼𑀤𑁆𑀥𑀲𑁆𑀲 𑀯𑀸 𑀪𑀕𑀯𑀢𑁄 𑀧𑀭𑀺𑀘𑀸𑀭𑀓𑀸𑀦𑀁 𑀲𑁄𑀴𑀲𑀦𑁆𑀦𑀦𑁆𑀢𑀺 𑀧𑀭𑀺𑀘𑀸𑀭𑀓𑀲𑁄𑀴𑀲𑀦𑁆𑀦𑀁. 𑀢𑁂 𑀏𑀯 𑀘 𑀩𑁆𑀭𑀸𑀳𑁆𑀫𑀡𑀸. 𑀢𑀢𑁆𑀣 𑀲𑁄𑀴𑀲𑀧𑀭𑀺𑀲𑀸 𑀧𑀦 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀯𑀸𑀫𑀧𑀲𑁆𑀲𑀢𑁄 𑀘 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀘 𑀙 𑀙 𑀬𑁄𑀚𑀦𑀸𑀦𑀺 𑀦𑀺𑀲𑀺𑀦𑁆𑀦𑀸 𑀉𑀚𑀼𑀓𑁂𑀦 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸 𑀅𑀳𑁄𑀲𑀺. 𑀅𑀚𑁆𑀛𑀺𑀝𑁆𑀞𑁄𑀢𑀺 𑀬𑀸𑀘𑀺𑀢𑁄 𑀅𑀢𑁆𑀣𑀫𑀜𑁆𑀜𑀸𑀬𑀸𑀢𑀺 𑀧𑀸𑀴𑀺𑀅𑀢𑁆𑀣𑀫𑀜𑁆𑀜𑀸𑀬. 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀧𑀸𑀴𑀺𑀫𑀜𑁆𑀜𑀸𑀬. 𑀧𑀸𑀭𑀸𑀬𑀦𑀦𑁆𑀢𑀺 𑀏𑀯𑀁 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲 𑀅𑀥𑀺𑀯𑀘𑀦𑀁 𑀆𑀭𑁄𑀧𑁂𑀢𑁆𑀯𑀸 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀸𑀫𑀸𑀦𑀺 𑀓𑀺𑀢𑁆𑀢𑀬𑀦𑁆𑀢𑀸 ‘‘𑀅𑀚𑀺𑀢𑁄 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄…𑀧𑁂… 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀼’’𑀦𑁆𑀢𑀺 𑀆𑀳𑀁𑀲𑀼.

𑁧𑁧𑁩𑁧-𑁭. 𑀢𑀢𑁆𑀣 𑀲𑀫𑁆𑀧𑀦𑁆𑀦𑀘𑀭𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀤𑀝𑁆𑀞𑀸𑀦𑀪𑀽𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀸𑀤𑀺𑀦𑀸 𑀲𑀫𑁆𑀧𑀦𑁆𑀦𑀁. 𑀇𑀲𑀺𑀦𑁆𑀢𑀺 𑀫𑀳𑁂𑀲𑀺𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀢𑀢𑁄 𑀧𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀽𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀺𑀁𑀲𑀼. 𑀢𑀲𑁆𑀫𑀸 𑀧𑀸𑀭𑀸𑀬𑀦𑀦𑁆𑀢𑀺 𑀢𑀲𑁆𑀲 𑀧𑀸𑀭𑀪𑀽𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀬𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧𑁧𑁩𑁮. 𑀧𑀸𑀭𑀸𑀬𑀦𑀫𑀦𑀼𑀕𑀸𑀬𑀺𑀲𑁆𑀲𑀦𑁆𑀢𑀺 𑀅𑀲𑁆𑀲 𑀅𑀬𑀁 𑀲𑀫𑁆𑀩𑀦𑁆𑀥𑁄 𑁋 𑀪𑀕𑀯𑀢𑀸 𑀳𑀺 𑀧𑀸𑀭𑀸𑀬𑀦𑁂 𑀤𑁂𑀲𑀺𑀢𑁂 𑀲𑁄𑀴𑀲𑀲𑀳𑀲𑁆𑀲𑀸 𑀚𑀝𑀺𑀮𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀅𑀯𑀲𑁂𑀲𑀸𑀦𑀜𑁆𑀘 𑀘𑀼𑀤𑁆𑀤𑀲𑀓𑁄𑀝𑀺𑀲𑀗𑁆𑀔𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀢𑀢𑁄 𑀧𑀸𑀲𑀸𑀡𑀓𑁂 𑀭𑀫𑁆𑀫𑁂, 𑀧𑀸𑀭𑀸𑀬𑀦𑀲𑀫𑀸𑀕𑀫𑁂;

𑀅𑀫𑀢𑀁 𑀧𑀸𑀧𑀬𑀻 𑀩𑀼𑀤𑁆𑀥𑁄, 𑀘𑀼𑀤𑁆𑀤𑀲 𑀧𑀸𑀡𑀓𑁄𑀝𑀺𑀬𑁄’’𑀢𑀺.

𑀦𑀺𑀝𑁆𑀞𑀺𑀢𑀸𑀬 𑀧𑀦 𑀥𑀫𑁆𑀫𑀤𑁂𑀲𑀦𑀸𑀬 𑀢𑀢𑁄 𑀢𑀢𑁄 𑀆𑀕𑀢𑀸 𑀫𑀦𑀼𑀲𑁆𑀲𑀸 𑀪𑀕𑀯𑀢𑁄 𑀆𑀦𑀼𑀪𑀸𑀯𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑀸𑀫𑀦𑀺𑀕𑀫𑀸𑀤𑀻𑀲𑁆𑀯𑁂𑀯 𑀧𑀸𑀢𑀼𑀭𑀳𑁂𑀲𑀼𑀁. 𑀪𑀕𑀯𑀸𑀧𑀺 𑀲𑀸𑀯𑀢𑁆𑀣𑀺𑀫𑁂𑀯 𑀅𑀕𑀫𑀸𑀲𑀺 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄. 𑀢𑀢𑁆𑀣 𑀧𑀺𑀗𑁆𑀕𑀺𑀬𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀕𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀩𑀸𑀯𑀭𑀺𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀆𑀭𑁄𑀘𑁂𑀢𑀼𑀁, 𑀧𑀝𑀺𑀲𑁆𑀲𑀼𑀢𑀜𑁆𑀳𑀺 𑀢𑀲𑁆𑀲 𑀫𑀬𑀸’’𑀢𑀺. 𑀅𑀣 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄 𑀜𑀸𑀡𑀕𑀫𑀦𑁂𑀦𑁂𑀯 𑀕𑁄𑀥𑀸𑀯𑀭𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀧𑀸𑀤𑀕𑀫𑀦𑁂𑀦 𑀅𑀲𑁆𑀲𑀫𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀢𑀫𑁂𑀦𑀁 𑀩𑀸𑀯𑀭𑀻 𑀩𑁆𑀭𑀸𑀳𑁆𑀫𑀡𑁄 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀤𑀽𑀭𑀢𑁄𑀯 𑀔𑀸𑀭𑀺𑀚𑀝𑀸𑀤𑀺𑀯𑀺𑀭𑀳𑀺𑀢𑀁 𑀪𑀺𑀓𑁆𑀔𑀼𑀯𑁂𑀲𑁂𑀦 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀦𑀺𑀝𑁆𑀞𑀁 𑀅𑀕𑀫𑀸𑀲𑀺. 𑀲𑀫𑁆𑀧𑀢𑁆𑀢𑀜𑁆𑀘𑀸𑀧𑀺 𑀦𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀧𑀺𑀗𑁆𑀕𑀺𑀬, 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺. ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀉𑀧𑁆𑀧𑀦𑁆𑀦𑁄, 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂 𑀦𑀺𑀲𑀺𑀦𑁆𑀦𑁄 𑀅𑀫𑁆𑀳𑀸𑀓𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀫𑀳𑀁 𑀢𑀼𑀬𑁆𑀳𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀩𑀸𑀯𑀭𑀻 𑀫𑀳𑀢𑀸 𑀲𑀓𑁆𑀓𑀸𑀭𑁂𑀦 𑀲𑀧𑀭𑀺𑀲𑁄 𑀢𑀁 𑀧𑀽𑀚𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀺. 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀧𑀺𑀗𑁆𑀕𑀺𑀬𑁄 ‘‘𑀧𑀸𑀭𑀸𑀬𑀦𑀫𑀦𑀼𑀕𑀸𑀬𑀺𑀲𑁆𑀲’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀦𑀼𑀕𑀸𑀬𑀺𑀲𑁆𑀲𑀦𑁆𑀢𑀺 𑀪𑀕𑀯𑀢𑀸 𑀕𑀻𑀢𑀁 𑀅𑀦𑀼𑀕𑀸𑀬𑀺𑀲𑁆𑀲𑀁. 𑀬𑀣𑀸𑀤𑁆𑀤𑀓𑁆𑀔𑀻𑀢𑀺 𑀬𑀣𑀸 𑀲𑀸𑀫𑀁 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑁂𑀦 𑀅𑀲𑀸𑀥𑀸𑀭𑀡𑀜𑀸𑀡𑁂𑀦 𑀘 𑀅𑀤𑁆𑀤𑀓𑁆𑀔𑀺. 𑀦𑀺𑀓𑁆𑀓𑀸𑀫𑁄𑀢𑀺 𑀧𑀳𑀻𑀦𑀓𑀸𑀫𑁄. ‘‘𑀦𑀺𑀓𑁆𑀓𑀫𑁄’’𑀢𑀺𑀧𑀺 𑀧𑀸𑀞𑁄, 𑀯𑀻𑀭𑀺𑀬𑀯𑀸𑀢𑀺 𑀅𑀢𑁆𑀣𑁄 𑀦𑀺𑀓𑁆𑀔𑀦𑁆𑀢𑁄 𑀯𑀸 𑀅𑀓𑀼𑀲𑀮𑀧𑀓𑁆𑀔𑀸. 𑀦𑀺𑀩𑁆𑀩𑀦𑁄𑀢𑀺 𑀓𑀺𑀮𑁂𑀲𑀯𑀦𑀯𑀺𑀭𑀳𑀺𑀢𑁄, 𑀢𑀡𑁆𑀳𑀸𑀯𑀺𑀭𑀳𑀺𑀢𑁄 𑀏𑀯 𑀯𑀸. 𑀓𑀺𑀲𑁆𑀲 𑀳𑁂𑀢𑀼 𑀫𑀼𑀲𑀸 𑀪𑀡𑁂𑀢𑀺 𑀬𑁂𑀳𑀺 𑀓𑀺𑀮𑁂𑀲𑁂𑀳𑀺 𑀫𑀼𑀲𑀸 𑀪𑀡𑁂𑀬𑁆𑀬, 𑀏𑀢𑁂 𑀢𑀲𑁆𑀲 𑀧𑀳𑀻𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀯𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺.

𑁧𑁧𑁩𑁯-𑁪𑁧. 𑀯𑀡𑁆𑀡𑀽𑀧𑀲𑀜𑁆𑀳𑀺𑀢𑀦𑁆𑀢𑀺 𑀕𑀼𑀡𑀽𑀧𑀲𑀜𑁆𑀳𑀺𑀢𑀁. 𑀲𑀘𑁆𑀘𑀯𑁆𑀳𑀬𑁄𑀢𑀺 ‘‘𑀩𑀼𑀤𑁆𑀥𑁄’’𑀢𑀺 𑀲𑀘𑁆𑀘𑁂𑀦𑁂𑀯 𑀅𑀯𑁆𑀳𑀸𑀦𑁂𑀦 𑀦𑀸𑀫𑁂𑀦 𑀬𑀼𑀢𑁆𑀢𑁄. 𑀩𑁆𑀭𑀳𑁆𑀫𑁂𑀢𑀺 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀆𑀮𑀧𑀢𑀺. 𑀓𑀼𑀩𑁆𑀩𑀦𑀓𑀦𑁆𑀢𑀺 𑀧𑀭𑀺𑀢𑁆𑀢𑀯𑀦𑀁. 𑀩𑀳𑀼𑀧𑁆𑀨𑀮𑀁 𑀓𑀸𑀦𑀦𑀫𑀸𑀯𑀲𑁂𑀬𑁆𑀬𑀸𑀢𑀺 𑀅𑀦𑁂𑀓𑀨𑀮𑀸𑀤𑀺𑀯𑀺𑀓𑀢𑀺𑀪𑀭𑀺𑀢𑀁 𑀓𑀸𑀦𑀦𑀁 𑀆𑀕𑀫𑁆𑀫 𑀯𑀲𑁂𑀬𑁆𑀬. 𑀅𑀧𑁆𑀧𑀤𑀲𑁆𑀲𑁂𑀢𑀺 𑀩𑀸𑀯𑀭𑀺𑀧𑀪𑀼𑀢𑀺𑀓𑁂 𑀧𑀭𑀺𑀢𑁆𑀢𑀧𑀜𑁆𑀜𑁂. 𑀫𑀳𑁄𑀤𑀥𑀺𑀦𑁆𑀢𑀺 𑀅𑀦𑁄𑀢𑀢𑁆𑀢𑀸𑀤𑀺𑀁 𑀫𑀳𑀦𑁆𑀢𑀁 𑀉𑀤𑀓𑀭𑀸𑀲𑀺𑀁.

𑁧𑁧𑁪𑁨-𑁪. 𑀬𑁂𑀫𑁂 𑀧𑀼𑀩𑁆𑀩𑁂𑀢𑀺 𑀬𑁂 𑀇𑀫𑁂 𑀧𑀼𑀩𑁆𑀩𑁂. 𑀢𑀫𑀦𑀼𑀤𑀸𑀲𑀺𑀦𑁄𑀢𑀺 𑀢𑀫𑁄𑀦𑀼𑀤𑁄 𑀆𑀲𑀺𑀦𑁄. 𑀪𑀽𑀭𑀺𑀧𑀜𑁆𑀜𑀸𑀡𑁄𑀢𑀺 𑀜𑀸𑀡𑀥𑀚𑁄. 𑀪𑀽𑀭𑀺𑀫𑁂𑀥𑀲𑁄𑀢𑀺 𑀯𑀺𑀧𑀼𑀮𑀧𑀜𑁆𑀜𑁄. 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀦𑁆𑀢𑀺 𑀲𑀸𑀫𑀁 𑀧𑀲𑁆𑀲𑀺𑀢𑀩𑁆𑀩𑀨𑀮𑀁, 𑀦 𑀘 𑀓𑀸𑀮𑀦𑁆𑀢𑀭𑁂 𑀧𑀢𑁆𑀢𑀩𑁆𑀩𑀨𑀮𑀁. 𑀅𑀦𑀻𑀢𑀺𑀓𑀦𑁆𑀢𑀺 𑀓𑀺𑀮𑁂𑀲𑀈𑀢𑀺𑀯𑀺𑀭𑀳𑀺𑀢𑀁.

𑁧𑁧𑁪𑁫-𑁫𑁦. 𑀅𑀣 𑀦𑀁 𑀩𑀸𑀯𑀭𑀻 𑀆𑀳 ‘‘𑀓𑀺𑀁 𑀦𑀼 𑀢𑀫𑁆𑀳𑀸’’𑀢𑀺 𑀤𑁆𑀯𑁂 𑀕𑀸𑀣𑀸. 𑀢𑀢𑁄 𑀧𑀺𑀗𑁆𑀕𑀺𑀬𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑀸 𑀅𑀯𑀺𑀧𑁆𑀧𑀯𑀸𑀲𑀫𑁂𑀯 𑀤𑀻𑀧𑁂𑀦𑁆𑀢𑁄 ‘‘𑀦𑀸𑀳𑀁 𑀢𑀫𑁆𑀳𑀸’’𑀢𑀺𑀆𑀤𑀺𑀫𑀸𑀳. 𑀧𑀲𑁆𑀲𑀸𑀫𑀺 𑀦𑀁 𑀫𑀦𑀲𑀸 𑀘𑀓𑁆𑀔𑀼𑀦𑀸𑀯𑀸𑀢𑀺 𑀢𑀁 𑀩𑀼𑀤𑁆𑀥𑀁 𑀅𑀳𑀁 𑀘𑀓𑁆𑀔𑀼𑀦𑀸 𑀯𑀺𑀬 𑀫𑀦𑀲𑀸 𑀧𑀲𑁆𑀲𑀸𑀫𑀺. 𑀦𑀫𑀲𑁆𑀲𑀫𑀸𑀦𑁄 𑀯𑀺𑀯𑀲𑁂𑀫𑀺 𑀭𑀢𑁆𑀢𑀺𑀦𑁆𑀢𑀺 𑀦𑀫𑀲𑁆𑀲𑀫𑀸𑀦𑁄𑀯 𑀭𑀢𑁆𑀢𑀺𑀁 𑀅𑀢𑀺𑀦𑀸𑀫𑁂𑀫𑀺. 𑀢𑁂𑀦 𑀢𑁂𑀦𑁂𑀯 𑀦𑀢𑁄𑀢𑀺 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀩𑀼𑀤𑁆𑀥𑁄, 𑀢𑁂𑀦 𑀢𑁂𑀦𑁂𑀯𑀸𑀳𑀫𑁆𑀧𑀺 𑀦𑀢𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄𑀢𑀺 𑀤𑀲𑁆𑀲𑁂𑀢𑀺.

𑁧𑁧𑁫𑁧. 𑀤𑀼𑀩𑁆𑀩𑀮𑀣𑀸𑀫𑀓𑀲𑁆𑀲𑀸𑀢𑀺 𑀅𑀧𑁆𑀧𑀣𑀸𑀫𑀓𑀲𑁆𑀲, 𑀅𑀣 𑀯𑀸 𑀤𑀼𑀩𑁆𑀩𑀮𑀲𑁆𑀲 𑀤𑀼𑀢𑁆𑀣𑀸𑀫𑀓𑀲𑁆𑀲 𑀘 𑀩𑀮𑀯𑀻𑀭𑀺𑀬𑀳𑀻𑀦𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑁂𑀯 𑀓𑀸𑀬𑁄 𑀦 𑀧𑀮𑁂𑀢𑀻𑀢𑀺 𑀢𑁂𑀦𑁂𑀯 𑀤𑀼𑀩𑁆𑀩𑀮𑀣𑀸𑀫𑀓𑀢𑁆𑀢𑁂𑀦 𑀓𑀸𑀬𑁄 𑀦 𑀕𑀘𑁆𑀙𑀢𑀺, 𑀬𑁂𑀦 𑀯𑀸 𑀩𑀼𑀤𑁆𑀥𑁄, 𑀢𑁂𑀦 𑀦 𑀕𑀘𑁆𑀙𑀢𑀺. ‘‘𑀦 𑀧𑀭𑁂𑀢𑀻’’𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂. 𑀲𑀗𑁆𑀓𑀧𑁆𑀧𑀬𑀦𑁆𑀢𑀸𑀬𑀸𑀢𑀺 𑀲𑀗𑁆𑀓𑀧𑁆𑀧𑀕𑀫𑀦𑁂𑀦. 𑀢𑁂𑀦 𑀬𑀼𑀢𑁆𑀢𑁄𑀢𑀺 𑀬𑁂𑀦 𑀩𑀼𑀤𑁆𑀥𑁄, 𑀢𑁂𑀦 𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀅𑀦𑀼𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺.

𑁧𑁧𑁫𑁨. 𑀧𑀗𑁆𑀓𑁂 𑀲𑀬𑀸𑀦𑁄𑀢𑀺 𑀓𑀸𑀫𑀓𑀤𑁆𑀤𑀫𑁂 𑀲𑀬𑀫𑀸𑀦𑁄. 𑀤𑀻𑀧𑀸 𑀤𑀻𑀧𑀁 𑀉𑀧𑀧𑁆𑀮𑀯𑀺𑀦𑁆𑀢𑀺 𑀲𑀢𑁆𑀣𑀸𑀭𑀸𑀤𑀺𑀢𑁄 𑀲𑀢𑁆𑀣𑀸𑀭𑀸𑀤𑀺𑀁 𑀅𑀪𑀺𑀕𑀘𑁆𑀙𑀺𑀁. 𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑁄𑀳𑀁 𑀏𑀯𑀁 𑀤𑀼𑀤𑁆𑀤𑀺𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀅𑀦𑁆𑀯𑀸𑀳𑀺𑀡𑁆𑀟𑀦𑁆𑀢𑁄 𑀅𑀣 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂 𑀩𑀼𑀤𑁆𑀥𑀫𑀤𑁆𑀤𑀓𑁆𑀔𑀺𑀁.

𑁧𑁧𑁫𑁩. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀯𑀲𑀸𑀦𑁂 𑀧𑀺𑀗𑁆𑀕𑀺𑀬𑀲𑁆𑀲 𑀘 𑀩𑀸𑀯𑀭𑀺𑀲𑁆𑀲 𑀘 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀞𑀺𑀢𑁄𑀬𑁂𑀯 𑀲𑀼𑀯𑀡𑁆𑀡𑁄𑀪𑀸𑀲𑀁 𑀫𑀼𑀜𑁆𑀘𑀺. 𑀧𑀺𑀗𑁆𑀕𑀺𑀬𑁄 𑀩𑀸𑀯𑀭𑀺𑀲𑁆𑀲 𑀩𑀼𑀤𑁆𑀥𑀕𑀼𑀡𑁂 𑀯𑀡𑁆𑀡𑀬𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀏𑀯 𑀢𑀁 𑀑𑀪𑀸𑀲𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀯𑀺𑀮𑁄𑀓𑁂𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀢𑁆𑀢𑀦𑁄 𑀧𑀼𑀭𑀢𑁄 𑀞𑀺𑀢𑀁 𑀯𑀺𑀬 𑀤𑀺𑀲𑁆𑀯𑀸 𑀩𑀸𑀯𑀭𑀺𑀩𑁆𑀭𑀸𑀳𑁆𑀫𑀡𑀲𑁆𑀲 ‘‘𑀩𑀼𑀤𑁆𑀥𑁄 𑀆𑀕𑀢𑁄’’𑀢𑀺 𑀆𑀭𑁄𑀘𑁂𑀲𑀺, 𑀩𑁆𑀭𑀸𑀳𑁆𑀫𑀡𑁄 𑀉𑀝𑁆𑀞𑀸𑀬𑀸𑀲𑀦𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀪𑀕𑀯𑀸𑀧𑀺 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀉𑀪𑀺𑀦𑁆𑀦𑀫𑁆𑀧𑀺 𑀲𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑀧𑀺𑀗𑁆𑀕𑀺𑀬𑀫𑁂𑀯 𑀆𑀮𑀧𑀫𑀸𑀦𑁄 ‘‘𑀬𑀣𑀸 𑀅𑀳𑀽 𑀯𑀓𑁆𑀓𑀮𑀻’’𑀢𑀺 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀯𑀓𑁆𑀓𑀮𑀺𑀢𑁆𑀣𑁂𑀭𑁄 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄 𑀅𑀳𑁄𑀲𑀺, 𑀲𑀤𑁆𑀥𑀸𑀥𑀼𑀭𑁂𑀦 𑀘 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀬𑀣𑀸 𑀘 𑀲𑁄𑀴𑀲𑀦𑁆𑀦𑀁 𑀏𑀓𑁄 𑀪𑀤𑁆𑀭𑀸𑀯𑀼𑀥𑁄 𑀦𑀸𑀫 𑀬𑀣𑀸 𑀘 𑀆𑀴𑀯𑀺 𑀕𑁄𑀢𑀫𑁄, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀧𑀫𑀼𑀜𑁆𑀘𑀲𑁆𑀲𑀼 𑀲𑀤𑁆𑀥𑀁. 𑀢𑀢𑁄 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀫𑀺𑀲𑁆𑀲𑀲𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀺𑀗𑁆𑀕𑀺𑀬𑁄 𑀅𑀭𑀳𑀢𑁆𑀢𑁂 𑀩𑀸𑀯𑀭𑀻 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀩𑀸𑀯𑀭𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀺𑀲𑁆𑀲𑀸 𑀧𑀦 𑀧𑀜𑁆𑀘𑀲𑀢𑀸 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁.

𑁧𑁧𑁫𑁪-𑁫. 𑀇𑀤𑀸𑀦𑀺 𑀧𑀺𑀗𑁆𑀕𑀺𑀬𑁄 𑀅𑀢𑁆𑀢𑀦𑁄 𑀧𑀲𑀸𑀤𑀁 𑀧𑀯𑁂𑀤𑁂𑀦𑁆𑀢𑁄 ‘‘𑀏𑀲 𑀪𑀺𑀬𑁆𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀝𑀺𑀪𑀸𑀦𑀯𑀸𑀢𑀺 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀉𑀧𑁂𑀢𑁄. 𑀅𑀥𑀺𑀤𑁂𑀯𑁂 𑀅𑀪𑀺𑀜𑁆𑀜𑀸𑀬𑀸𑀢𑀺 𑀅𑀥𑀺𑀤𑁂𑀯𑀓𑀭𑁂 𑀥𑀫𑁆𑀫𑁂 𑀜𑀢𑁆𑀯𑀸. 𑀧𑀭𑁄𑀯𑀭𑀦𑁆𑀢𑀺 𑀳𑀻𑀦𑀧𑀡𑀻𑀢𑀁, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀅𑀥𑀺𑀤𑁂𑀯𑀢𑁆𑀢𑀓𑀭𑀁 𑀲𑀩𑁆𑀩𑀁 𑀥𑀫𑁆𑀫𑀚𑀸𑀢𑀁 𑀯𑁂𑀤𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀗𑁆𑀔𑀻𑀦𑀁 𑀧𑀝𑀺𑀚𑀸𑀦𑀢𑀦𑁆𑀢𑀺 𑀓𑀗𑁆𑀔𑀻𑀦𑀁𑀬𑁂𑀯 𑀲𑀢𑀁 ‘‘𑀦𑀺𑀓𑁆𑀓𑀗𑁆𑀔𑀫𑁆𑀳𑀸’’𑀢𑀺 𑀧𑀝𑀺𑀚𑀸𑀦𑀦𑁆𑀢𑀸𑀦𑀁.

𑁧𑁧𑁫𑁬. 𑀅𑀲𑀁𑀳𑀻𑀭𑀦𑁆𑀢𑀺 𑀭𑀸𑀕𑀸𑀤𑀻𑀳𑀺 𑀅𑀲𑀁𑀳𑀸𑀭𑀺𑀬𑀁. 𑀅𑀲𑀁𑀓𑀼𑀧𑁆𑀧𑀦𑁆𑀢𑀺 𑀅𑀓𑀼𑀧𑁆𑀧𑀁 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁. 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀦𑀺𑀩𑁆𑀩𑀸𑀦𑀁 𑀪𑀡𑀢𑀺. 𑀅𑀤𑁆𑀥𑀸 𑀕𑀫𑀺𑀲𑁆𑀲𑀸𑀫𑀻𑀢𑀺 𑀏𑀓𑀁𑀲𑁂𑀦𑁂𑀯 𑀢𑀁 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀕𑀫𑀺𑀲𑁆𑀲𑀸𑀫𑀺. 𑀦 𑀫𑁂𑀢𑁆𑀣 𑀓𑀗𑁆𑀔𑀸𑀢𑀺 𑀦𑀢𑁆𑀣𑀺 𑀫𑁂 𑀏𑀢𑁆𑀣 𑀦𑀺𑀩𑁆𑀩𑀸𑀦𑁂 𑀓𑀗𑁆𑀔𑀸. 𑀏𑀯𑀁 𑀫𑀁 𑀥𑀸𑀭𑁂𑀳𑀺 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑀦𑁆𑀢𑀺 𑀧𑀺𑀗𑁆𑀕𑀺𑀬𑁄 ‘‘𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀧𑀫𑀼𑀜𑁆𑀘𑀲𑁆𑀲𑀼 𑀲𑀤𑁆𑀥’’𑀦𑁆𑀢𑀺. 𑀇𑀫𑀺𑀦𑀸 𑀪𑀕𑀯𑀢𑁄 𑀑𑀯𑀸𑀤𑁂𑀦 𑀅𑀢𑁆𑀢𑀦𑀺 𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀤𑁆𑀥𑀸𑀥𑀼𑀭𑁂𑀦𑁂𑀯 𑀘 𑀯𑀺𑀫𑀼𑀜𑁆𑀘𑀺𑀢𑁆𑀯𑀸 𑀢𑀁 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀢𑀁 𑀧𑀓𑀸𑀲𑁂𑀦𑁆𑀢𑁄 𑀪𑀕𑀯𑀦𑁆𑀢𑀁 𑀆𑀳 𑁋 ‘‘𑀏𑀯𑀁 𑀫𑀁 𑀥𑀸𑀭𑁂𑀳𑀺 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢’’𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 ‘‘𑀬𑀣𑀸 𑀫𑀁 𑀢𑁆𑀯𑀁 𑀅𑀯𑀘, 𑀏𑀯𑀫𑁂𑀯 𑀅𑀥𑀺𑀫𑀼𑀢𑁆𑀢𑀁 𑀥𑀸𑀭𑁂𑀳𑀻’’𑀢𑀺.

𑀇𑀢𑀺 𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀲𑁄𑀴𑀲𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀘 𑀧𑀜𑁆𑀘𑀫𑁄 𑀯𑀕𑁆𑀕𑁄 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑀢𑁄, 𑀦𑀸𑀫𑁂𑀦

𑀧𑀸𑀭𑀸𑀬𑀦𑀯𑀕𑁆𑀕𑁄𑀢𑀺.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑀬𑀁 𑀯𑀼𑀢𑁆𑀢𑀁 𑁋

‘‘𑀉𑀢𑁆𑀢𑀫𑀁 𑀯𑀦𑁆𑀤𑀦𑁂𑀬𑁆𑀬𑀸𑀦𑀁, 𑀯𑀦𑁆𑀤𑀺𑀢𑁆𑀯𑀸 𑀭𑀢𑀦𑀢𑁆𑀢𑀬𑀁;

𑀬𑁄 𑀔𑀼𑀤𑁆𑀤𑀓𑀦𑀺𑀓𑀸𑀬𑀫𑁆𑀳𑀺, 𑀔𑀼𑀤𑁆𑀤𑀸𑀘𑀸𑀭𑀧𑁆𑀧𑀳𑀸𑀬𑀺𑀦𑀸.

‘‘𑀤𑁂𑀲𑀺𑀢𑁄 𑀮𑁄𑀓𑀦𑀸𑀣𑁂𑀦, 𑀮𑁄𑀓𑀦𑀺𑀢𑁆𑀣𑀭𑀡𑁂𑀲𑀺𑀦𑀸;

𑀢𑀲𑁆𑀲 𑀲𑀼𑀢𑁆𑀢𑀦𑀺𑀧𑀸𑀢𑀲𑁆𑀲, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺.

𑀏𑀢𑁆𑀣 𑀉𑀭𑀕𑀯𑀕𑁆𑀕𑀸𑀤𑀺𑀧𑀜𑁆𑀘𑀯𑀕𑁆𑀕𑀲𑀗𑁆𑀕𑀳𑀺𑀢𑀲𑁆𑀲 𑀉𑀭𑀕𑀲𑀼𑀢𑁆𑀢𑀸𑀤𑀺𑀲𑀢𑁆𑀢𑀢𑀺𑀲𑀼𑀢𑁆𑀢𑀧𑁆𑀧𑀪𑁂𑀤𑀲𑁆𑀲 𑀲𑀼𑀢𑁆𑀢𑀦𑀺𑀧𑀸𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀓𑀢𑀸 𑀳𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀇𑀫𑀁 𑀲𑀼𑀢𑁆𑀢𑀦𑀺𑀧𑀸𑀢𑀲𑁆𑀲, 𑀓𑀭𑁄𑀦𑁆𑀢𑁂𑀦𑀢𑁆𑀣𑀯𑀡𑁆𑀡𑀦𑀁;

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑀸𑀫𑁂𑀦, 𑀬𑀁 𑀧𑀢𑁆𑀢𑀁 𑀓𑀼𑀲𑀮𑀁 𑀫𑀬𑀸.

‘‘𑀢𑀲𑁆𑀲𑀸𑀦𑀼𑀪𑀸𑀯𑀢𑁄 𑀔𑀺𑀧𑁆𑀧𑀁, 𑀥𑀫𑁆𑀫𑁂 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂;

𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁, 𑀧𑀸𑀧𑀼𑀡𑀸𑀢𑀼 𑀅𑀬𑀁 𑀚𑀦𑁄’’𑀢𑀺.

(𑀧𑀭𑀺𑀬𑀢𑁆𑀢𑀺𑀧𑁆𑀧𑀫𑀸𑀡𑀢𑁄 𑀘𑀢𑀼𑀘𑀢𑁆𑀢𑀸𑀮𑀻𑀲𑀫𑀢𑁆𑀢𑀸 𑀪𑀸𑀡𑀯𑀸𑀭𑀸.)

𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀧𑁆𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁂𑀦 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑁂 𑀲𑀸𑀝𑁆𑀞𑀓𑀣𑁂 𑀲𑀢𑁆𑀣𑀼𑀲𑀸𑀲𑀦𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀮𑀸𑀯𑀡𑁆𑀡𑀬𑀼𑀢𑁆𑀢𑁂𑀦 𑀬𑀼𑀢𑁆𑀢𑀫𑀼𑀢𑁆𑀢𑀯𑀸𑀤𑀺𑀦𑀸 𑀯𑀸𑀤𑀻𑀯𑀭𑁂𑀦 𑀫𑀳𑀸𑀓𑀯𑀺𑀦𑀸 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀧𑁆𑀧𑀪𑁂𑀤𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀩𑀼𑀤𑁆𑀥𑀻𑀦𑀁 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁 𑀣𑁂𑀭𑀸𑀦𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑀸 𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀓𑀢𑀸 𑀅𑀬𑀁 𑀧𑀭𑀫𑀢𑁆𑀣𑀚𑁄𑀢𑀺𑀓𑀸 𑀦𑀸𑀫 𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸 𑁋

𑀢𑀸𑀯 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀮𑁄𑀓𑀦𑀺𑀢𑁆𑀣𑀭𑀡𑁂𑀲𑀺𑀦𑀁;

𑀤𑀲𑁆𑀲𑁂𑀦𑁆𑀢𑀻 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀦𑀬𑀁 𑀧𑀜𑁆𑀜𑀸𑀯𑀺𑀲𑀼𑀤𑁆𑀥𑀺𑀬𑀸.

𑀬𑀸𑀯 𑀩𑀼𑀤𑁆𑀥𑁄𑀢𑀺 𑀦𑀸𑀫𑀫𑁆𑀧𑀺, 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀮𑁄𑀓𑀫𑁆𑀳𑀺 𑀮𑁄𑀓𑀚𑁂𑀝𑁆𑀞𑀲𑁆𑀲, 𑀧𑀯𑀢𑁆𑀢𑀢𑀺 𑀫𑀳𑁂𑀲𑀺𑀦𑁄𑀢𑀺.

𑀲𑀼𑀢𑁆𑀢𑀦𑀺𑀧𑀸𑀢-𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.