𑁯. 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁪𑁨. 𑀤𑀺𑀲𑁆𑀯𑀸𑀦 𑀢𑀡𑁆𑀳𑀦𑁆𑀢𑀺 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀧𑀘𑁆𑀘𑀽𑀲𑀲𑀫𑀬𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀓𑀼𑀭𑀽𑀲𑀼 𑀓𑀫𑁆𑀫𑀸𑀲𑀥𑀫𑁆𑀫𑀦𑀺𑀕𑀫𑀯𑀸𑀲𑀺𑀦𑁄 𑀫𑀸𑀕𑀡𑁆𑀟𑀺𑀬𑀲𑁆𑀲 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀧𑀚𑀸𑀧𑀢𑀺𑀓𑀲𑁆𑀲 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀢𑀸𑀯𑀤𑁂𑀯 𑀲𑀸𑀯𑀢𑁆𑀣𑀺𑀢𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀫𑁆𑀫𑀸𑀲𑀥𑀫𑁆𑀫𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀦𑀺𑀲𑀻𑀤𑀺 𑀲𑀼𑀯𑀡𑁆𑀡𑁄𑀪𑀸𑀲𑀁 𑀫𑀼𑀜𑁆𑀘𑀫𑀸𑀦𑁄. 𑀫𑀸𑀕𑀡𑁆𑀟𑀺𑀬𑁄𑀧𑀺 𑀢𑀗𑁆𑀔𑀡𑀁 𑀢𑀢𑁆𑀣 𑀫𑀼𑀔𑀥𑁄𑀯𑀦𑀢𑁆𑀣𑀁 𑀕𑀢𑁄 𑀲𑀼𑀯𑀡𑁆𑀡𑁄𑀪𑀸𑀲𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀘 𑀧𑁂𑀓𑁆𑀔𑀫𑀸𑀦𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀢𑀲𑁆𑀲 𑀓𑀺𑀭 𑀥𑀻𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸, 𑀢𑀁 𑀩𑀳𑀽 𑀔𑀢𑁆𑀢𑀺𑀬𑀓𑀼𑀫𑀸𑀭𑀸𑀤𑀬𑁄 𑀯𑀸𑀭𑀬𑀦𑁆𑀢𑀸 𑀦 𑀮𑀪𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀁𑀮𑀤𑁆𑀥𑀺𑀓𑁄 𑀳𑁄𑀢𑀺 ‘‘𑀲𑀫𑀡𑀲𑁆𑀲𑁂𑀯 𑀦𑀁 𑀲𑀼𑀯𑀡𑁆𑀡𑀯𑀡𑁆𑀡𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑁂 𑀥𑀻𑀢𑀸𑀬 𑀲𑀫𑀸𑀦𑀯𑀡𑁆𑀡𑁄, 𑀇𑀫𑀲𑁆𑀲 𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀲𑁆𑀫𑀸 𑀤𑀺𑀲𑁆𑀯𑀸𑀯 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀲𑁄 𑀯𑁂𑀕𑁂𑀦 𑀖𑀭𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀆𑀳 𑁋 ‘‘𑀪𑁄𑀢𑀺 𑀪𑁄𑀢𑀺 𑀫𑀬𑀸 𑀥𑀻𑀢𑀸𑀬 𑀲𑀫𑀸𑀦𑀯𑀡𑁆𑀡𑁄 𑀧𑀼𑀭𑀺𑀲𑁄 𑀤𑀺𑀝𑁆𑀞𑁄, 𑀅𑀮𑀗𑁆𑀓𑀭𑁄𑀳𑀺 𑀤𑀸𑀭𑀺𑀓𑀁, 𑀢𑀲𑁆𑀲 𑀦𑀁 𑀤𑀲𑁆𑀲𑀸𑀫𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑀺𑀬𑀸 𑀤𑀸𑀭𑀺𑀓𑀁 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀯𑀢𑁆𑀣𑀧𑀼𑀧𑁆𑀨𑀸𑀮𑀗𑁆𑀓𑀸𑀭𑀸𑀤𑀻𑀳𑀺 𑀅𑀮𑀗𑁆𑀓𑀭𑁄𑀦𑁆𑀢𑀺𑀬𑀸 𑀏𑀯 𑀪𑀕𑀯𑀢𑁄 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸 𑀲𑀫𑁆𑀧𑀢𑁆𑀢𑀸. 𑀅𑀣 𑀪𑀕𑀯𑀸 𑀓𑀫𑁆𑀫𑀸𑀲𑀥𑀫𑁆𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑀢𑁂𑀧𑀺 𑀔𑁄 𑀥𑀻𑀢𑀭𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑁄𑀓𑀸𑀲𑀁 𑀅𑀕𑀫𑀁𑀲𑀼. 𑀢𑀢𑁆𑀣 𑀪𑀕𑀯𑀦𑁆𑀢𑀁 𑀅𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀻 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀦𑁆𑀢𑀻 𑀪𑀕𑀯𑀢𑁄 𑀦𑀺𑀲𑀚𑁆𑀚𑀝𑁆𑀞𑀸𑀦𑀁 𑀢𑀺𑀡𑀲𑀦𑁆𑀣𑀸𑀭𑀓𑀁 𑀅𑀤𑁆𑀤𑀲. 𑀩𑀼𑀤𑁆𑀥𑀸𑀦𑀜𑁆𑀘 𑀅𑀥𑀺𑀝𑁆𑀞𑀸𑀦𑀩𑀮𑁂𑀦 𑀦𑀺𑀲𑀺𑀦𑁆𑀦𑁄𑀓𑀸𑀲𑁄 𑀧𑀤𑀦𑀺𑀓𑁆𑀔𑁂𑀧𑁄 𑀘 𑀅𑀩𑁆𑀬𑀸𑀓𑀼𑀮𑀸 𑀳𑁄𑀦𑁆𑀢𑀺. 𑀲𑀸 𑀩𑁆𑀭𑀸𑀳𑁆𑀫𑀡𑀁 𑀆𑀳 𑁋 ‘‘𑀏𑀲, 𑀩𑁆𑀭𑀸𑀳𑁆𑀫𑀡, 𑀢𑀲𑁆𑀲 𑀢𑀺𑀡𑀲𑀦𑁆𑀣𑀸𑀭𑁄’’𑀢𑀺? ‘‘𑀆𑀫, 𑀪𑁄𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀅𑀫𑁆𑀳𑀸𑀓𑀁 𑀆𑀕𑀫𑀦𑀓𑀫𑁆𑀫𑀁 𑀦 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. ‘‘𑀓𑀲𑁆𑀫𑀸 𑀪𑁄𑀢𑀻’’𑀢𑀺? ‘‘𑀧𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀅𑀩𑁆𑀬𑀸𑀓𑀼𑀮𑁄 𑀢𑀺𑀡𑀲𑀦𑁆𑀣𑀸𑀭𑁄, 𑀦𑁂𑀲𑁄 𑀓𑀸𑀫𑀪𑁄𑀕𑀺𑀦𑁄 𑀧𑀭𑀺𑀪𑀼𑀢𑁆𑀢𑁄’’𑀢𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀫𑀸, 𑀪𑁄𑀢𑀺 𑀫𑀗𑁆𑀕𑀮𑁂 𑀧𑀭𑀺𑀬𑁂𑀲𑀺𑀬𑀫𑀸𑀦𑁂 𑀅𑀯𑀫𑀗𑁆𑀕𑀮𑀁 𑀅𑀪𑀡𑀻’’𑀢𑀺 𑀆𑀳. 𑀧𑀼𑀦𑀧𑀺 𑀩𑁆𑀭𑀸𑀳𑁆𑀫𑀡𑀻 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑀻 𑀪𑀕𑀯𑀢𑁄 𑀧𑀤𑀦𑀺𑀓𑁆𑀔𑁂𑀧𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀆𑀳 ‘‘𑀅𑀬𑀁 𑀢𑀲𑁆𑀲 𑀧𑀤𑀦𑀺𑀓𑁆𑀔𑁂𑀧𑁄’’𑀢𑀺? ‘‘𑀆𑀫, 𑀪𑁄𑀢𑀻’’𑀢𑀺. ‘‘𑀧𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀧𑀤𑀦𑀺𑀓𑁆𑀔𑁂𑀧𑀁, 𑀦𑀸𑀬𑀁 𑀲𑀢𑁆𑀢𑁄 𑀓𑀸𑀫𑁂𑀲𑀼 𑀕𑀥𑀺𑀢𑁄’’𑀢𑀺. ‘‘𑀓𑀣𑀁 𑀢𑁆𑀯𑀁 𑀪𑁄𑀢𑀺 𑀚𑀸𑀦𑀸𑀲𑀻’’𑀢𑀺 𑀘 𑀯𑀼𑀢𑁆𑀢𑀸 𑀅𑀢𑁆𑀢𑀦𑁄 𑀜𑀸𑀡𑀩𑀮𑀁 𑀤𑀲𑁆𑀲𑁂𑀦𑁆𑀢𑀻 𑀆𑀳 𑁋

‘‘𑀭𑀢𑁆𑀢𑀲𑁆𑀲 𑀳𑀺 𑀉𑀓𑁆𑀓𑀼𑀝𑀺𑀓𑀁 𑀧𑀤𑀁 𑀪𑀯𑁂,

𑀤𑀼𑀝𑁆𑀞𑀲𑁆𑀲 𑀳𑁄𑀢𑀺 𑀅𑀦𑀼𑀓𑀟𑁆𑀠𑀺𑀢𑀁 𑀧𑀤𑀁;

𑀫𑀽𑀴𑁆𑀳𑀲𑁆𑀲 𑀳𑁄𑀢𑀺 𑀲𑀳𑀲𑀸𑀦𑀼𑀧𑀻𑀴𑀺𑀢𑀁,

𑀯𑀺𑀯𑀝𑁆𑀝𑀘𑁆𑀙𑀤𑀲𑁆𑀲 𑀇𑀤𑀫𑀻𑀤𑀺𑀲𑀁 𑀧𑀤’’𑀦𑁆𑀢𑀺. (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁬𑁦-𑁨𑁬𑁧; 𑀥. 𑀧. 𑀅𑀝𑁆𑀞. 𑁧.𑁨 𑀲𑀸𑀫𑀸𑀯𑀢𑀻𑀯𑀢𑁆𑀣𑀼; 𑀯𑀺𑀲𑀼𑀤𑁆𑀥𑀺. 𑁧.𑁪𑁫);

𑀅𑀬𑀜𑁆𑀘𑀭𑀳𑀺 𑀢𑁂𑀲𑀁 𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀅𑀣 𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀢𑀫𑁂𑀯 𑀯𑀦𑀲𑀡𑁆𑀟𑀁 𑀆𑀕𑀢𑁄. 𑀩𑁆𑀭𑀸𑀳𑁆𑀫𑀡𑀻 𑀪𑀕𑀯𑀢𑁄 𑀯𑀭𑀮𑀓𑁆𑀔𑀡𑀔𑀘𑀺𑀢𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀆𑀳 𑁋 ‘‘𑀏𑀲 𑀢𑀬𑀸, 𑀩𑁆𑀭𑀸𑀳𑁆𑀫𑀡, 𑀤𑀺𑀝𑁆𑀞𑁄’’𑀢𑀺? ‘‘𑀆𑀫 𑀪𑁄𑀢𑀻’’𑀢𑀺. ‘‘𑀆𑀕𑀢𑀓𑀫𑁆𑀫𑀁 𑀦 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑁂𑀯, 𑀏𑀯𑀭𑀽𑀧𑁄 𑀦𑀸𑀫 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺. 𑀢𑁂𑀲𑀁 𑀏𑀯𑀁 𑀯𑀤𑀦𑁆𑀢𑀸𑀦𑀜𑁆𑀜𑁂𑀯 𑀪𑀕𑀯𑀸 𑀢𑀺𑀡𑀲𑀦𑁆𑀣𑀸𑀭𑀓𑁂 𑀦𑀺𑀲𑀻𑀤𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀥𑀻𑀢𑀭𑀁 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀓𑀫𑀡𑁆𑀟𑀮𑀼𑀁 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑁄, 𑀧𑀩𑁆𑀩𑀚𑀺𑀢, 𑀢𑁆𑀯𑀜𑁆𑀘 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀬𑀜𑁆𑀘 𑀤𑀸𑀭𑀺𑀓𑀸, 𑀅𑀦𑀼𑀘𑁆𑀙𑀯𑀺𑀓𑀸 𑀏𑀲𑀸 𑀢𑀯, 𑀇𑀫𑀸𑀳𑀁 𑀪𑁄𑀢𑁄 𑀪𑀭𑀺𑀬𑀁 𑀧𑁄𑀲𑀸𑀯𑀦𑀢𑁆𑀣𑀸𑀬 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀤𑀸𑀢𑀼𑀓𑀸𑀫𑁄 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀁 𑀅𑀦𑀸𑀮𑀧𑀺𑀢𑁆𑀯𑀸 𑀅𑀜𑁆𑀜𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀫𑀸𑀦𑁄 𑀯𑀺𑀬 ‘‘𑀤𑀺𑀲𑁆𑀯𑀸𑀦 𑀢𑀡𑁆𑀳’’𑀦𑁆𑀢𑀺 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀦𑀸𑀦𑀸𑀭𑀽𑀧𑀸𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀅𑀪𑀺𑀓𑀸𑀫𑀫𑀸𑀕𑀢𑀁 𑀫𑀸𑀭𑀥𑀻𑀢𑀭𑀁 𑀤𑀺𑀲𑁆𑀯𑀸𑀦 𑀢𑀡𑁆𑀳𑀁 𑀅𑀭𑀢𑀺𑀁 𑀭𑀕𑀜𑁆𑀘 𑀙𑀦𑁆𑀤𑀫𑀢𑁆𑀢𑀫𑁆𑀧𑀺 𑀫𑁂 𑀫𑁂𑀣𑀼𑀦𑀲𑁆𑀫𑀺𑀁 𑀦𑀸𑀳𑁄𑀲𑀺, 𑀓𑀺𑀫𑁂𑀯𑀺𑀤𑀁 𑀇𑀫𑀺𑀲𑁆𑀲𑀸 𑀤𑀸𑀭𑀺𑀓𑀸𑀬 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀪𑀯𑀺𑀲𑁆𑀲𑀢𑀺 𑀲𑀩𑁆𑀩𑀣𑀸 𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂, 𑀓𑀼𑀢𑁄𑀦𑁂𑀦 𑀲𑀁𑀯𑀲𑀺𑀢𑀼𑀦𑁆𑀢𑀺.

𑁮𑁪𑁩. 𑀢𑀢𑁄 𑀫𑀸𑀕𑀡𑁆𑀟𑀺𑀬𑁄 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀫𑀸𑀦𑀼𑀲𑀓𑁂 𑀓𑀸𑀫𑁂 𑀧𑀳𑀸𑀬 𑀤𑀺𑀩𑁆𑀩𑀓𑀸𑀫𑀢𑁆𑀣𑀸𑀬 𑀧𑀩𑁆𑀩𑀚𑀦𑁆𑀢𑀺, 𑀅𑀬𑀜𑁆𑀘 𑀤𑀺𑀩𑁆𑀩𑁂𑀧𑀺 𑀓𑀸𑀫𑁂 𑀦 𑀇𑀘𑁆𑀙𑀢𑀺, 𑀇𑀤𑀫𑁆𑀧𑀺 𑀇𑀢𑁆𑀣𑀺𑀭𑀢𑀦𑀁, 𑀓𑀸 𑀦𑀼 𑀅𑀲𑁆𑀲 𑀤𑀺𑀝𑁆𑀞𑀻’’𑀢𑀺 𑀧𑀼𑀘𑁆𑀙𑀺𑀢𑀼𑀁 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀏𑀢𑀸𑀤𑀺𑀲𑀁 𑀘𑁂 𑀭𑀢𑀦𑀦𑁆𑀢𑀺 𑀤𑀺𑀩𑁆𑀩𑀺𑀢𑁆𑀣𑀺𑀭𑀢𑀦𑀁 𑀲𑀦𑁆𑀥𑀸𑀬 𑀪𑀡𑀢𑀺, 𑀦𑀸𑀭𑀺𑀦𑁆𑀢𑀺 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀲𑀦𑁆𑀥𑀸𑀬. 𑀤𑀺𑀝𑁆𑀞𑀺𑀕𑀢𑀁 𑀲𑀻𑀮𑀯𑀢𑀁 𑀦𑀼 𑀚𑀻𑀯𑀺𑀢𑀦𑁆𑀢𑀺 𑀤𑀺𑀝𑁆𑀞𑀺𑀜𑁆𑀘 𑀲𑀻𑀮𑀜𑁆𑀘 𑀯𑀢𑀜𑁆𑀘 𑀚𑀻𑀯𑀺𑀢𑀜𑁆𑀘. 𑀪𑀯𑀽𑀧𑀧𑀢𑁆𑀢𑀺𑀜𑁆𑀘 𑀯𑀤𑁂𑀲𑀺 𑀓𑀻𑀤𑀺𑀲𑀦𑁆𑀢𑀺 𑀅𑀢𑁆𑀢𑀦𑁄 𑀪𑀯𑀽𑀧𑀧𑀢𑁆𑀢𑀺𑀜𑁆𑀘 𑀓𑀻𑀤𑀺𑀲𑀁 𑀯𑀤𑀲𑀻𑀢𑀺.

𑁮𑁪𑁪. 𑀇𑀢𑁄 𑀧𑀭𑀸 𑀤𑁆𑀯𑁂 𑀕𑀸𑀣𑀸 𑀯𑀺𑀲𑀚𑁆𑀚𑀦𑀧𑀼𑀘𑁆𑀙𑀸𑀦𑀬𑁂𑀦 𑀧𑀯𑀢𑁆𑀢𑀢𑁆𑀢𑀸 𑀧𑀸𑀓𑀝𑀲𑀫𑁆𑀩𑀦𑁆𑀥𑀸𑀬𑁂𑀯. 𑀢𑀸𑀲𑀼 𑀧𑀞𑀫𑀕𑀸𑀣𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀲𑁆𑀲 𑀫𑀬𑁆𑀳𑀁, 𑀫𑀸𑀕𑀡𑁆𑀟𑀺𑀬, 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀏𑀯𑀁 𑀇𑀤𑀁 𑀯𑀤𑀸𑀫𑀻𑀢𑀺 𑀲𑀫𑀼𑀕𑁆𑀕𑀳𑀺𑀢𑀁 𑀦 𑀳𑁄𑀢𑀺 𑀦𑀢𑁆𑀣𑀺 𑀦 𑀯𑀺𑀚𑁆𑀚𑀢𑀺. 𑀓𑀺𑀁𑀓𑀸𑀭𑀡𑀸? 𑀅𑀳𑀜𑁆𑀳𑀺 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀻𑀲𑀼 𑀆𑀤𑀻𑀦𑀯𑀁 𑀓𑀜𑁆𑀘𑀺 𑀤𑀺𑀝𑁆𑀞𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀯𑀺𑀘𑀺𑀦𑀦𑁆𑀢𑁄 𑀅𑀚𑁆𑀛𑀢𑁆𑀢𑀁 𑀭𑀸𑀕𑀸𑀤𑀻𑀦𑀁 𑀲𑀦𑁆𑀢𑀺𑀪𑀸𑀯𑁂𑀦 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀅𑀤𑁆𑀤𑀲𑀦𑁆𑀢𑀺.

𑁮𑁪𑁫. 𑀤𑀼𑀢𑀺𑀬𑀕𑀸𑀣𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀸𑀦𑀺𑀫𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀢𑁂𑀳𑀺 𑀢𑁂𑀳𑀺 𑀲𑀢𑁆𑀢𑁂𑀳𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀕𑀳𑀺𑀢𑀢𑁆𑀢𑀸 𑀯𑀺𑀦𑀺𑀘𑁆𑀙𑀬𑀸𑀢𑀺 𑀘 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀗𑁆𑀔𑀢𑀪𑀸𑀯𑀸𑀤𑀺𑀦𑀸 𑀦𑀬𑁂𑀦 𑀧𑀓𑀧𑁆𑀧𑀺𑀢𑀸𑀦𑀺 𑀘𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀢𑁆𑀯𑀁 𑀫𑀼𑀦𑀺 𑀤𑀺𑀝𑁆𑀞𑀺𑀕𑀢𑀥𑀫𑁆𑀫𑁂 𑀅𑀕𑁆𑀕𑀳𑁂𑀢𑁆𑀯𑀸 𑀅𑀚𑁆𑀛𑀢𑁆𑀢𑀲𑀦𑁆𑀢𑀻𑀢𑀺 𑀬𑀫𑁂𑀢𑀫𑀢𑁆𑀣𑀁 𑀩𑁆𑀭𑀽𑀲𑀺, 𑀆𑀘𑀺𑀓𑁆𑀔 𑀫𑁂, 𑀓𑀣𑀁 𑀦𑀼 𑀥𑀻𑀭𑁂𑀳𑀺 𑀧𑀯𑁂𑀤𑀺𑀢𑀁 𑀓𑀣𑀁 𑀧𑀓𑀸𑀲𑀺𑀢𑀁 𑀥𑀻𑀭𑁂𑀳𑀺 𑀢𑀁 𑀧𑀤𑀦𑁆𑀢𑀺.

𑁮𑁪𑁬. 𑀅𑀣𑀲𑁆𑀲 𑀪𑀕𑀯𑀸 𑀬𑀣𑀸 𑀬𑁂𑀦 𑀉𑀧𑀸𑀬𑁂𑀦 𑀢𑀁 𑀧𑀤𑀁 𑀥𑀻𑀭𑁂𑀳𑀺 𑀧𑀓𑀸𑀲𑀺𑀢𑀁, 𑀢𑀁 𑀉𑀧𑀸𑀬𑀁 𑀲𑀧𑀝𑀺𑀧𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀤𑀺𑀝𑁆𑀞𑀺𑀬𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 ‘‘𑀦 𑀤𑀺𑀝𑁆𑀞𑀺𑀬𑀸’’𑀢𑀺𑀆𑀤𑀻𑀳𑀺 𑀤𑀺𑀝𑁆𑀞𑀺𑀲𑀼𑀢𑀺𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑀩𑀸𑀳𑀺𑀭𑀲𑀻𑀮𑀩𑁆𑀩𑀢𑀸𑀦𑀺 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀲𑀼𑀤𑁆𑀥𑀺𑀫𑀸𑀳𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀆𑀳-𑀲𑀤𑁆𑀤𑀁 𑀲𑀩𑁆𑀩𑀢𑁆𑀣 𑀦𑀓𑀸𑀭𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀧𑀼𑀭𑀺𑀲𑀩𑁆𑀬𑀢𑁆𑀢𑀬𑀁 𑀓𑀢𑁆𑀯𑀸 ‘‘𑀤𑀺𑀝𑁆𑀞𑀺𑀬𑀸 𑀲𑀼𑀤𑁆𑀥𑀺𑀁 𑀦𑀸𑀳𑀁 𑀓𑀣𑁂𑀫𑀻’’𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀢𑁆𑀢𑀭𑀧𑀤𑁂𑀲𑀼𑀧𑀺. 𑀢𑀢𑁆𑀣 𑀘 𑀅𑀤𑀺𑀝𑁆𑀞𑀺𑀬𑀸 𑀦𑀸𑀳𑀸𑀢𑀺 𑀤𑀲𑀯𑀢𑁆𑀣𑀼𑀓𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀯𑀺𑀦𑀸 𑀦 𑀓𑀣𑁂𑀫𑀺. 𑀢𑀣𑀸 𑀅𑀲𑁆𑀲𑀼𑀢𑀺𑀬𑀸𑀢𑀺 𑀦𑀯𑀗𑁆𑀕𑀁 𑀲𑀯𑀦𑀁 𑀯𑀺𑀦𑀸. 𑀅𑀜𑀸𑀡𑀸𑀢𑀺 𑀓𑀫𑁆𑀫𑀲𑁆𑀲 𑀓𑀢𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀁 𑀯𑀺𑀦𑀸. 𑀅𑀲𑀻𑀮𑀢𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀁 𑀯𑀺𑀦𑀸. 𑀅𑀩𑁆𑀩𑀢𑀸𑀢𑀺 𑀥𑀼𑀢𑀗𑁆𑀕𑀯𑀢𑀁 𑀯𑀺𑀦𑀸. 𑀦𑁄𑀧𑀺 𑀢𑁂𑀦𑀸𑀢𑀺 𑀢𑁂𑀲𑀼 𑀏𑀓𑀫𑁂𑀓𑁂𑀦 𑀤𑀺𑀝𑁆𑀞𑀺𑀆𑀤𑀺𑀫𑀢𑁆𑀢𑁂𑀦𑀸𑀧𑀺 𑀦𑁄 𑀓𑀣𑁂𑀫𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁂 𑀘 𑀦𑀺𑀲𑁆𑀲𑀚𑁆𑀚 𑀅𑀦𑀼𑀕𑁆𑀕𑀳𑀸𑀬𑀸𑀢𑀺 𑀏𑀢𑁂 𑀘 𑀧𑀼𑀭𑀺𑀫𑁂 𑀤𑀺𑀝𑁆𑀞𑀺𑀆𑀤𑀺𑀪𑁂𑀤𑁂 𑀓𑀡𑁆𑀳𑀧𑀓𑁆𑀔𑀺𑀬𑁂 𑀥𑀫𑁆𑀫𑁂 𑀲𑀫𑀼𑀕𑁆𑀖𑀸𑀢𑀓𑀭𑀡𑁂𑀦 𑀦𑀺𑀲𑁆𑀲𑀚𑁆𑀚, 𑀧𑀘𑁆𑀙𑀺𑀫𑁂 𑀅𑀤𑀺𑀝𑁆𑀞𑀺𑀆𑀤𑀺𑀪𑁂𑀤𑁂 𑀲𑀼𑀓𑁆𑀓𑀧𑀓𑁆𑀔𑀺𑀬𑁂 𑀅𑀢𑀫𑁆𑀫𑀬𑀢𑀸𑀧𑀚𑁆𑀚𑀦𑁂𑀦 𑀅𑀦𑀼𑀕𑁆𑀕𑀳𑀸𑀬. 𑀲𑀦𑁆𑀢𑁄 𑀅𑀦𑀺𑀲𑁆𑀲𑀸𑀬 𑀪𑀯𑀁 𑀦 𑀚𑀧𑁆𑀧𑁂𑀢𑀺 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀭𑀸𑀕𑀸𑀤𑀺𑀯𑀽𑀧𑀲𑀫𑁂𑀦 𑀲𑀦𑁆𑀢𑁄 𑀘𑀓𑁆𑀔𑀸𑀤𑀻𑀲𑀼 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀦𑀺𑀲𑁆𑀲𑀸𑀬 𑀏𑀓𑀫𑁆𑀧𑀺 𑀪𑀯𑀁 𑀅𑀧𑀺𑀳𑁂𑀢𑀼𑀁 𑀅𑀧𑀢𑁆𑀣𑁂𑀢𑀼𑀁 𑀲𑀫𑀢𑁆𑀣𑁄 𑀲𑀺𑀬𑀸, 𑀅𑀬𑀫𑀲𑁆𑀲 𑀅𑀚𑁆𑀛𑀢𑁆𑀢𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁪𑁭. 𑀏𑀯𑀁 𑀯𑀼𑀢𑁆𑀢𑁂 𑀯𑀘𑀦𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀫𑀸𑀕𑀡𑁆𑀟𑀺𑀬𑁄 ‘‘𑀦𑁄 𑀘𑁂 𑀓𑀺𑀭𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀤𑀺𑀝𑁆𑀞𑀸𑀤𑀻𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀓𑀡𑁆𑀳𑀧𑀓𑁆𑀔𑀺𑀬𑀸𑀦𑀺𑀬𑁂𑀯 𑀧𑀦 𑀲𑀦𑁆𑀥𑀸𑀬 𑀉𑀪𑀬𑀢𑁆𑀭𑀸𑀧𑀺 𑀆𑀳. 𑀆𑀳-𑀲𑀤𑁆𑀤𑀁 𑀧𑀦 𑀦𑁄𑀘𑁂𑀓𑀺𑀭-𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀦𑁄 𑀘𑁂 𑀓𑀺𑀭𑀸𑀳 𑀦𑁄 𑀘𑁂 𑀓𑀺𑀭 𑀓𑀣𑁂𑀲𑀻’’𑀢𑀺 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑁄𑀫𑀼𑀳𑀦𑁆𑀢𑀺 𑀅𑀢𑀺𑀫𑀽𑀴𑁆𑀳𑀁, 𑀫𑁄𑀳𑀦𑀁 𑀯𑀸. 𑀧𑀘𑁆𑀘𑁂𑀦𑁆𑀢𑀻𑀢𑀺 𑀚𑀸𑀦𑀦𑁆𑀢𑀺.

𑁮𑁪𑁮. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀧𑀼𑀘𑁆𑀙𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀤𑀺𑀝𑁆𑀞𑀺𑀜𑁆𑀘 𑀦𑀺𑀲𑁆𑀲𑀸𑀬𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑁆𑀯𑀁, 𑀫𑀸𑀕𑀡𑁆𑀟𑀺𑀬, 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀧𑀼𑀦𑀧𑁆𑀧𑀼𑀦𑀁 𑀧𑀼𑀘𑁆𑀙𑀫𑀸𑀦𑁄 𑀬𑀸𑀦𑀺 𑀢𑁂 𑀤𑀺𑀝𑁆𑀞𑀺𑀕𑀢𑀸𑀦𑀺 𑀲𑀫𑀼𑀕𑁆𑀕𑀳𑀺𑀢𑀸𑀦𑀺, 𑀢𑁂𑀲𑁆𑀯𑁂𑀯 𑀲𑀫𑀼𑀕𑁆𑀕𑀳𑀻𑀢𑁂𑀲𑀼 𑀏𑀯𑀁 𑀧𑀫𑁄𑀳𑀁 𑀆𑀕𑀢𑁄, 𑀇𑀢𑁄 𑀘 𑀫𑀬𑀸 𑀯𑀼𑀢𑁆𑀢𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀢𑁄 𑀧𑀝𑀺𑀧𑀢𑁆𑀢𑀺𑀢𑁄 𑀥𑀫𑁆𑀫𑀤𑁂𑀲𑀦𑀢𑁄 𑀯𑀸 𑀅𑀡𑀼𑀫𑁆𑀧𑀺 𑀬𑀼𑀢𑁆𑀢𑀲𑀜𑁆𑀜𑀁 𑀦 𑀧𑀲𑁆𑀲𑀲𑀺, 𑀢𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀁 𑀫𑁄𑀫𑀼𑀳𑀢𑁄 𑀧𑀲𑁆𑀲𑀲𑀻𑀢𑀺.

𑁮𑁪𑁯. 𑀏𑀯𑀁 𑀲𑀫𑀼𑀕𑁆𑀕𑀳𑀺𑀢𑁂𑀲𑀼 𑀧𑀫𑁄𑀳𑁂𑀦 𑀫𑀸𑀕𑀡𑁆𑀟𑀺𑀬𑀲𑁆𑀲 𑀯𑀺𑀯𑀸𑀤𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀅𑀜𑁆𑀜𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀯𑀺𑀕𑀢𑀧𑁆𑀧𑀫𑁄𑀳𑀲𑁆𑀲 𑀅𑀢𑁆𑀢𑀦𑁄 𑀦𑀺𑀩𑁆𑀩𑀺𑀯𑀸𑀤𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁄 𑀯𑀺𑀲𑁂𑀲𑀻’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀏𑀯𑀁 𑀢𑀺𑀯𑀺𑀥𑀫𑀸𑀦𑁂𑀦 𑀯𑀸 𑀤𑀺𑀝𑁆𑀞𑀺𑀬𑀸 𑀯𑀸 𑀫𑀜𑁆𑀜𑀢𑀺, 𑀲𑁄 𑀢𑁂𑀦 𑀫𑀸𑀦𑁂𑀦 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀢𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀺𑀯𑀤𑁂𑀬𑁆𑀬. 𑀬𑁄 𑀧𑀦 𑀅𑀫𑁆𑀳𑀸𑀤𑀺𑀲𑁄 𑀇𑀫𑀸𑀲𑀼 𑀢𑀻𑀲𑀼 𑀯𑀺𑀥𑀸𑀲𑀼 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀲𑀫𑁄 𑀯𑀺𑀲𑁂𑀲𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀺, 𑀦 𑀘 𑀳𑀻𑀦𑁄𑀢𑀺 𑀧𑀸𑀞𑀲𑁂𑀲𑁄.

𑁮𑁫𑁦. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲𑀘𑁆𑀘𑀦𑁆𑀢𑀺 𑀲𑁄𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀲𑁄 𑀏𑀯𑀭𑀽𑀧𑁄 𑀧𑀳𑀻𑀦𑀫𑀸𑀦𑀤𑀺𑀝𑁆𑀞𑀺𑀓𑁄 𑀫𑀸𑀤𑀺𑀲𑁄 𑀩𑀸𑀳𑀺𑀢𑀧𑀸𑀧𑀢𑁆𑀢𑀸𑀤𑀺𑀦𑀸 𑀦𑀬𑁂𑀦 𑀩𑁆𑀭𑀸𑀳𑁆𑀫𑀡𑁄 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀓𑀺𑀁 𑀯𑀤𑁂𑀬𑁆𑀬 𑀓𑀺𑀁 𑀯𑀢𑁆𑀣𑀼𑀁 𑀪𑀡𑁂𑀬𑁆𑀬, 𑀓𑁂𑀦 𑀯𑀸 𑀓𑀸𑀭𑀡𑁂𑀦 𑀪𑀡𑁂𑀬𑁆𑀬, ‘‘𑀫𑀬𑁆𑀳𑀁 𑀲𑀘𑁆𑀘𑀁, 𑀢𑀼𑀬𑁆𑀳𑀁 𑀫𑀼𑀲𑀸’’𑀢𑀺 𑀯𑀸 𑀓𑁂𑀦 𑀫𑀸𑀦𑁂𑀦 𑀤𑀺𑀝𑁆𑀞𑀺𑀬𑀸 𑀧𑀼𑀕𑁆𑀕𑀮𑁂𑀦 𑀯𑀸 𑀯𑀺𑀯𑀤𑁂𑀬𑁆𑀬? 𑀬𑀲𑁆𑀫𑀺𑀁 𑀫𑀸𑀤𑀺𑀲𑁂 𑀔𑀻𑀡𑀸𑀲𑀯𑁂 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀧𑀯𑀢𑁆𑀢𑀺𑀬𑀸 𑀲𑀫𑀁 𑀯𑀸, 𑀇𑀢𑀭𑀤𑁆𑀯𑀬𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸 𑀯𑀺𑀲𑀫𑀁 𑀯𑀸 𑀫𑀜𑁆𑀜𑀺𑀢𑀁 𑀦𑀢𑁆𑀣𑀺, 𑀲𑁄 𑀲𑀫𑀸𑀦𑀸𑀤𑀻𑀲𑀼 𑀓𑁂𑀦 𑀯𑀸𑀤𑀁 𑀧𑀝𑀺𑀲𑀁𑀬𑀼𑀚𑁂𑀬𑁆𑀬 𑀧𑀝𑀺𑀧𑁆𑀨𑀭𑁂𑀬𑁆𑀬𑀸𑀢𑀺. 𑀦𑀦𑀼 𑀏𑀓𑀁𑀲𑁂𑀦𑁂𑀯 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑁋 𑀑𑀓𑀁 𑀧𑀳𑀸𑀬𑀸𑀢𑀺 𑀕𑀸𑀣𑀸?

𑁮𑁫𑁧. 𑀢𑀢𑁆𑀣 𑀑𑀓𑀁 𑀧𑀳𑀸𑀬𑀸𑀢𑀺 𑀭𑀽𑀧𑀯𑀢𑁆𑀣𑀸𑀤𑀺𑀯𑀺𑀜𑁆𑀜𑀸𑀡𑀲𑁆𑀲 𑀑𑀓𑀸𑀲𑀁 𑀢𑀢𑁆𑀭 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀙𑀟𑁆𑀟𑁂𑀢𑁆𑀯𑀸. 𑀅𑀦𑀺𑀓𑁂𑀢𑀲𑀸𑀭𑀻𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀸𑀤𑀻𑀦𑀺 𑀢𑀡𑁆𑀳𑀸𑀯𑀲𑁂𑀦 𑀅𑀲𑀭𑀦𑁆𑀢𑁄. 𑀕𑀸𑀫𑁂 𑀅𑀓𑀼𑀩𑁆𑀩𑀁 𑀫𑀼𑀦𑀺 𑀲𑀦𑁆𑀣𑀯𑀸𑀦𑀻𑀢𑀺 𑀕𑀸𑀫𑁂 𑀕𑀺𑀳𑀺𑀲𑀦𑁆𑀣𑀯𑀸𑀦𑀺 𑀅𑀓𑀭𑁄𑀦𑁆𑀢𑁄. 𑀓𑀸𑀫𑁂𑀳𑀺 𑀭𑀺𑀢𑁆𑀢𑁄𑀢𑀺 𑀓𑀸𑀫𑁂𑀲𑀼 𑀙𑀦𑁆𑀤𑀭𑀸𑀕𑀸𑀪𑀸𑀯𑁂𑀦 𑀲𑀩𑁆𑀩𑀓𑀸𑀫𑁂𑀳𑀺 𑀧𑀼𑀣𑀼𑀪𑀽𑀢𑁄. 𑀅𑀧𑀼𑀭𑁂𑀓𑁆𑀔𑀭𑀸𑀦𑁄𑀢𑀺 𑀆𑀬𑀢𑀺𑀁 𑀅𑀢𑁆𑀢𑀪𑀸𑀯𑀁 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄. 𑀓𑀣𑀁 𑀦 𑀯𑀺𑀕𑁆𑀕𑀬𑁆𑀳 𑀚𑀦𑁂𑀦 𑀓𑀬𑀺𑀭𑀸𑀢𑀺 𑀚𑀦𑁂𑀦 𑀲𑀤𑁆𑀥𑀺𑀁 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀦 𑀓𑀣𑁂𑀬𑁆𑀬. 𑀲𑁄 𑀏𑀯𑀭𑀽𑀧𑁄 𑁋 𑀬𑁂𑀳𑀺 𑀯𑀺𑀯𑀺𑀢𑁆𑀢𑁄𑀢𑀺 𑀕𑀸𑀣𑀸.

𑁮𑁫𑁨. 𑀢𑀢𑁆𑀣 𑀬𑁂𑀳𑀻𑀢𑀺 𑀬𑁂𑀳𑀺 𑀤𑀺𑀝𑁆𑀞𑀺𑀕𑀢𑁂𑀳𑀺. 𑀯𑀺𑀯𑀺𑀢𑁆𑀢𑁄 𑀯𑀺𑀘𑀭𑁂𑀬𑁆𑀬𑀸𑀢𑀺 𑀭𑀺𑀢𑁆𑀢𑁄 𑀘𑀭𑁂𑀬𑁆𑀬. 𑀦 𑀢𑀸𑀦𑀺 𑀉𑀕𑁆𑀕𑀬𑁆𑀳 𑀯𑀤𑁂𑀬𑁆𑀬 𑀦𑀸𑀕𑁄𑀢𑀺 ‘‘𑀆𑀕𑀼𑀁 𑀦 𑀓𑀭𑁄𑀢𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀦𑀺. 𑀪𑀤𑁆𑀭𑀸𑀯𑀼𑀥𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁭𑁦; 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁨) 𑀦𑀬𑁂𑀦 𑀦𑀸𑀕𑁄 𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀦 𑀯𑀤𑁂𑀬𑁆𑀬. 𑀚𑀮𑀫𑁆𑀩𑀼𑀚𑀦𑁆𑀢𑀺 𑀚𑀮𑀲𑀜𑁆𑀜𑀺𑀢𑁂 𑀅𑀫𑁆𑀩𑀼𑀫𑁆𑀳𑀺 𑀚𑀸𑀢𑀁 𑀓𑀡𑁆𑀝𑀓𑀦𑀸𑀴𑀁 𑀯𑀸𑀭𑀺𑀚𑀁, 𑀧𑀤𑀼𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀚𑀮𑁂𑀦 𑀧𑀗𑁆𑀓𑁂𑀦 𑀘 𑀦𑀽𑀧𑀮𑀺𑀢𑁆𑀢𑀦𑁆𑀢𑀺 𑀢𑀁 𑀧𑀤𑀼𑀫𑀁 𑀬𑀣𑀸 𑀚𑀮𑁂𑀦 𑀘 𑀧𑀗𑁆𑀓𑁂𑀦 𑀘 𑀅𑀦𑀼𑀧𑀮𑀺𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀫𑀼𑀦𑀺 𑀲𑀦𑁆𑀢𑀺𑀯𑀸𑀤𑁄 𑀅𑀕𑀺𑀤𑁆𑀥𑁄𑀢𑀺 𑀏𑀯𑀁 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀯𑀸𑀤𑁄 𑀫𑀼𑀦𑀺 𑀕𑁂𑀥𑀸𑀪𑀸𑀯𑁂𑀦 𑀅𑀕𑀺𑀤𑁆𑀥𑁄. 𑀓𑀸𑀫𑁂 𑀘 𑀮𑁄𑀓𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄𑀢𑀺 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀅𑀧𑀸𑀬𑀸𑀤𑀺𑀓𑁂 𑀘 𑀮𑁄𑀓𑁂 𑀤𑁆𑀯𑀻𑀳𑀺𑀧𑀺 𑀮𑁂𑀧𑁂𑀳𑀺 𑀅𑀦𑀼𑀧𑀮𑀺𑀢𑁆𑀢𑁄 𑀳𑁄𑀢𑀺.

𑁮𑁫𑁩. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀦 𑀯𑁂𑀤𑀕𑀽𑀢𑀺 𑀕𑀸𑀣𑀸. 𑀢𑀢𑁆𑀣 𑀦 𑀯𑁂𑀤𑀕𑀽 𑀤𑀺𑀝𑁆𑀞𑀺𑀬𑀸𑀬𑀓𑁄𑀢𑀺 𑀘𑀢𑀼𑀫𑀕𑁆𑀕𑀯𑁂𑀤𑀕𑀽 𑀫𑀸𑀤𑀺𑀲𑁄 𑀤𑀺𑀝𑁆𑀞𑀺𑀬𑀸𑀬𑀓𑁄 𑀦 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸 𑀕𑀘𑁆𑀙𑀦𑁆𑀢𑁄 𑀯𑀸, 𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀦𑁆𑀢𑁄 𑀯𑀸 𑀦 𑀳𑁄𑀢𑀺. 𑀢𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀬𑀸𑀬𑀢𑀻𑀢𑀺 𑀬𑀸𑀬𑀓𑁄, 𑀓𑀭𑀡𑀯𑀘𑀦𑁂𑀦 𑀤𑀺𑀝𑁆𑀞𑀺𑀬𑀸 𑀬𑀸𑀢𑀻𑀢𑀺 𑀤𑀺𑀝𑁆𑀞𑀺𑀬𑀸𑀬𑀓𑁄. 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑁂𑀦 𑀤𑀺𑀝𑁆𑀞𑀺𑀬𑀸 𑀬𑀸𑀢𑀻𑀢𑀺𑀧𑀺 𑀤𑀺𑀝𑁆𑀞𑀺𑀬𑀸𑀬𑀓𑁄. 𑀦 𑀫𑀼𑀢𑀺𑀬𑀸 𑀲 𑀫𑀸𑀦𑀫𑁂𑀢𑀻𑀢𑀺 𑀫𑀼𑀢𑀭𑀽𑀧𑀸𑀤𑀺𑀪𑁂𑀤𑀸𑀬 𑀫𑀼𑀢𑀺𑀬𑀸𑀧𑀺 𑀲𑁄 𑀫𑀸𑀦𑀁 𑀦 𑀏𑀢𑀺. 𑀦 𑀳𑀺 𑀢𑀫𑁆𑀫𑀬𑁄 𑀲𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀢𑀫𑁆𑀫𑀬𑁄 𑀳𑁄𑀢𑀺 𑀢𑀧𑁆𑀧𑀭𑀸𑀬𑀡𑁄, 𑀅𑀬𑀁 𑀧𑀦 𑀦 𑀢𑀸𑀤𑀺𑀲𑁄. 𑀦 𑀓𑀫𑁆𑀫𑀼𑀦𑀸 𑀦𑁄𑀧𑀺 𑀲𑀼𑀢𑁂𑀦 𑀦𑁂𑀬𑁆𑀬𑁄𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀦𑀸 𑀓𑀫𑁆𑀫𑀼𑀦𑀸 𑀯𑀸 𑀲𑀼𑀢𑀲𑀼𑀤𑁆𑀥𑀺𑀆𑀤𑀺𑀦𑀸 𑀲𑀼𑀢𑁂𑀦 𑀯𑀸 𑀲𑁄 𑀦𑁂𑀢𑀩𑁆𑀩𑁄 𑀦 𑀳𑁄𑀢𑀺. 𑀅𑀦𑀽𑀧𑀦𑀻𑀢𑁄 𑀲 𑀦𑀺𑀯𑁂𑀲𑀦𑁂𑀲𑀽𑀢𑀺 𑀲𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀉𑀧𑀬𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑁂𑀲𑀼 𑀅𑀦𑀽𑀧𑀦𑀻𑀢𑁄. 𑀢𑀲𑁆𑀲 𑀘 𑀏𑀯𑀁𑀯𑀺𑀥𑀲𑁆𑀲 𑁋 𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲𑀸𑀢𑀺 𑀕𑀸𑀣𑀸.

𑁮𑁫𑁪. 𑀢𑀢𑁆𑀣 𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲𑀸𑀢𑀺 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀪𑀸𑀯𑀦𑀸𑀬 𑀧𑀳𑀻𑀦𑀓𑀸𑀫𑀸𑀤𑀺𑀲𑀜𑁆𑀜𑀲𑁆𑀲. 𑀇𑀫𑀺𑀦𑀸 𑀧𑀤𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀲𑀫𑀣𑀬𑀸𑀦𑀺𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀪𑀸𑀯𑀦𑀸𑀬 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀲𑁆𑀲. 𑀇𑀫𑀺𑀦𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀜𑁆𑀜𑀜𑁆𑀘 𑀤𑀺𑀝𑁆𑀞𑀺𑀜𑁆𑀘 𑀬𑁂 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀖𑀝𑁆𑀝𑀬𑀦𑁆𑀢𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂𑀢𑀺 𑀬𑁂 𑀓𑀸𑀫𑀲𑀜𑁆𑀜𑀸𑀤𑀺𑀓𑀁 𑀲𑀜𑁆𑀜𑀁 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀯𑀺𑀲𑁂𑀲𑀢𑁄 𑀕𑀳𑀝𑁆𑀞𑀸 𑀓𑀸𑀫𑀸𑀥𑀺𑀓𑀭𑀡𑀁, 𑀬𑁂 𑀘 𑀤𑀺𑀝𑁆𑀞𑀺𑀁 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀯𑀺𑀲𑁂𑀲𑀢𑁄 𑀧𑀩𑁆𑀩𑀚𑀺𑀢𑀸 𑀥𑀫𑁆𑀫𑀸𑀥𑀺𑀓𑀭𑀡𑀁 𑀅𑀜𑁆𑀜𑀫𑀜𑁆𑀜𑀁 𑀖𑀝𑁆𑀝𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀻𑀢𑀺. 𑀲𑁂𑀲𑀫𑁂𑀢𑁆𑀣 𑀬𑀁 𑀅𑀯𑀼𑀢𑁆𑀢𑀁, 𑀢𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑀻 𑀘 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.