𑁬. 𑀚𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧𑁧. 𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀦𑁆𑀢𑀺 𑀚𑀭𑀸𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀬𑀸𑀦𑀺 𑀢𑀸𑀦𑀺 𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀸𑀭𑁄𑀕𑁆𑀬𑀲𑀫𑁆𑀧𑀸𑀤𑀦𑀁 𑀅𑀦𑀼𑀧𑁆𑀧𑀦𑁆𑀦𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀯𑁂𑀦𑁂𑀬𑁆𑀬𑀤𑀫𑀦𑀁 𑀢𑀣𑀸𑀭𑀽𑀧𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀚𑀸𑀢𑀓𑀸𑀤𑀺𑀓𑀣𑀦𑀦𑁆𑀢𑀺𑀆𑀤𑀻𑀦𑀺 𑀚𑀦𑀧𑀤𑀘𑀸𑀭𑀺𑀓𑀸𑀦𑀺𑀫𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀲𑀫𑀯𑁂𑀓𑁆𑀔𑀺𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀲𑀸𑀬𑀁 𑀲𑀸𑀓𑁂𑀢𑀁 𑀅𑀦𑀼𑀧𑁆𑀧𑀢𑁆𑀢𑁄 𑀅𑀜𑁆𑀚𑀦𑀯𑀦𑀁 𑀧𑀸𑀯𑀺𑀲𑀺. 𑀲𑀸𑀓𑁂𑀢𑀯𑀸𑀲𑀺𑀦𑁄 𑀲𑀼𑀢𑁆𑀯𑀸 ‘‘𑀅𑀓𑀸𑀮𑁄 𑀇𑀤𑀸𑀦𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀽𑀚𑀦𑀯𑀦𑁆𑀤𑀦𑀲𑀫𑁆𑀫𑁄𑀤𑀦𑀸𑀤𑀻𑀦𑀺 𑀓𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼 𑀬𑀸𑀯 𑀪𑀕𑀯𑀢𑁄 𑀕𑀸𑀫𑀧𑁆𑀧𑀯𑁂𑀲𑀦𑀯𑁂𑀮𑀸, 𑀅𑀣 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑀁 𑀅𑀜𑁆𑀜𑀢𑀭𑁄 𑀲𑀸𑀓𑁂𑀢𑀓𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀦𑀕𑀭𑀸 𑀦𑀺𑀓𑁆𑀔𑀦𑁆𑀢𑁄 𑀦𑀕𑀭𑀤𑁆𑀯𑀸𑀭𑁂 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀘𑀺𑀭𑀤𑀺𑀝𑁆𑀞𑁄𑀲𑀺, 𑀧𑀼𑀢𑁆𑀢, 𑀫𑀬𑀸’’𑀢𑀺 𑀧𑀭𑀺𑀤𑁂𑀯𑀬𑀫𑀸𑀦𑁄 𑀅𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀪𑀕𑀯𑀸 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀲𑀺 𑁋 ‘‘𑀅𑀬𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑁄 𑀬𑀁 𑀇𑀘𑁆𑀙𑀢𑀺, 𑀢𑀁 𑀓𑀭𑁄𑀢𑀼, 𑀦 𑀯𑀸𑀭𑁂𑀢𑀩𑁆𑀩𑁄’’𑀢𑀺.

𑀩𑁆𑀭𑀸𑀳𑁆𑀫𑀡𑁄𑀧𑀺 𑀯𑀘𑁆𑀙𑀕𑀺𑀤𑁆𑀥𑀺𑀦𑀻𑀯 𑀕𑀸𑀯𑀻 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀓𑀸𑀬𑀁 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀤𑀓𑁆𑀔𑀺𑀡𑀢𑁄 𑀘 𑀯𑀸𑀫𑀢𑁄 𑀘𑀸𑀢𑀺 𑀲𑀫𑀦𑁆𑀢𑀸 𑀆𑀮𑀺𑀗𑁆𑀕𑀺 ‘‘𑀘𑀺𑀭𑀤𑀺𑀝𑁆𑀞𑁄𑀲𑀺, 𑀧𑀼𑀢𑁆𑀢, 𑀘𑀺𑀭𑀁 𑀯𑀺𑀦𑀸 𑀅𑀳𑁄𑀲𑀻’’𑀢𑀺 𑀪𑀡𑀦𑁆𑀢𑁄. 𑀬𑀤𑀺 𑀧𑀦 𑀲𑁄 𑀢𑀣𑀸 𑀓𑀸𑀢𑀼𑀁 𑀦 𑀮𑀪𑁂𑀬𑁆𑀬, 𑀳𑀤𑀬𑀁 𑀨𑀸𑀮𑁂𑀢𑁆𑀯𑀸 𑀫𑀭𑁂𑀬𑁆𑀬. 𑀲𑁄 𑀪𑀕𑀯𑀦𑁆𑀢𑀁 𑀅𑀯𑁄𑀘 𑁋 ‘‘𑀪𑀕𑀯𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀆𑀕𑀢𑀪𑀺𑀓𑁆𑀔𑀽𑀦𑀁 𑀅𑀳𑀫𑁂𑀯 𑀪𑀺𑀓𑁆𑀔𑀁 𑀤𑀸𑀢𑀼𑀁 𑀲𑀫𑀢𑁆𑀣𑁄, 𑀫𑀫𑁂𑀯 𑀅𑀦𑀼𑀕𑁆𑀕𑀳𑀁 𑀓𑀭𑁄𑀣𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑁂𑀲𑁂𑀲𑀺 𑁋 ‘‘𑀧𑀼𑀢𑁆𑀢𑁄 𑀫𑁂 𑀆𑀕𑀢𑁄, 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑀩𑁆𑀩’’𑀦𑁆𑀢𑀺. 𑀲𑀸 𑀢𑀣𑀸 𑀓𑀢𑁆𑀯𑀸 𑀆𑀕𑀫𑀦𑀁 𑀧𑀲𑁆𑀲𑀦𑁆𑀢𑀻 𑀞𑀺𑀢𑀸 𑀪𑀕𑀯𑀦𑁆𑀢𑀁 𑀅𑀦𑁆𑀢𑀭𑀯𑀻𑀣𑀺𑀬𑀁𑀬𑁂𑀯 𑀤𑀺𑀲𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀘𑀺𑀭𑀤𑀺𑀝𑁆𑀞𑁄𑀲𑀺, 𑀧𑀼𑀢𑁆𑀢, 𑀫𑀬𑀸’’𑀢𑀺 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀖𑀭𑀁 𑀅𑀢𑀺𑀦𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀪𑁄𑀚𑁂𑀲𑀺. 𑀪𑀼𑀢𑁆𑀢𑀸𑀯𑀺𑀦𑁄 𑀩𑁆𑀭𑀸𑀳𑁆𑀫𑀡𑁄 𑀧𑀢𑁆𑀢𑀁 𑀅𑀧𑀦𑀸𑀫𑁂𑀲𑀺. 𑀪𑀕𑀯𑀸 𑀢𑁂𑀲𑀁 𑀲𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀉𑀪𑁄𑀧𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁. 𑀅𑀣 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼 𑁋 ‘‘𑀬𑀸𑀯, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀁 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀅𑀫𑁆𑀳𑀸𑀓𑀁𑀬𑁂𑀯 𑀖𑀭𑁂 𑀪𑀺𑀓𑁆𑀔𑀸 𑀕𑀳𑁂𑀢𑀩𑁆𑀩𑀸’’𑀢𑀺. 𑀪𑀕𑀯𑀸 ‘‘𑀦 𑀩𑀼𑀤𑁆𑀥𑀸 𑀏𑀯𑀁 𑀏𑀓𑀁 𑀦𑀺𑀩𑀤𑁆𑀥𑀝𑁆𑀞𑀸𑀦𑀁𑀬𑁂𑀯 𑀕𑀘𑁆𑀙𑀦𑁆𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀢𑁂 𑀆𑀳𑀁𑀲𑀼 𑁋 ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸𑀧𑀺 𑀢𑀼𑀫𑁆𑀳𑁂 𑀇𑀥𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀘𑁆𑀙𑀣𑀸’’𑀢𑀺. 𑀪𑀕𑀯𑀸 𑀢𑁂𑀲𑀁 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀢𑀣𑀸 𑀅𑀓𑀸𑀲𑀺. 𑀫𑀦𑀼𑀲𑁆𑀲𑀸 𑀩𑁆𑀭𑀸𑀳𑁆𑀫𑀡𑀜𑁆𑀘 𑀩𑁆𑀭𑀸𑀳𑁆𑀫𑀡𑀺𑀜𑁆𑀘 ‘‘𑀩𑀼𑀤𑁆𑀥𑀧𑀺𑀢𑀸 𑀩𑀼𑀤𑁆𑀥𑀫𑀸𑀢𑀸’’ 𑀢𑁆𑀯𑁂𑀯 𑀯𑁄𑀳𑀭𑀺𑀁𑀲𑀼. 𑀢𑀫𑁆𑀧𑀺 𑀓𑀼𑀮𑀁 ‘‘𑀩𑀼𑀤𑁆𑀥𑀓𑀼𑀮’’𑀦𑁆𑀢𑀺 𑀦𑀸𑀫𑀁 𑀮𑀪𑀺.

𑀆𑀦𑀦𑁆𑀤𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺 𑁋 ‘‘𑀅𑀳𑀁 𑀪𑀕𑀯𑀢𑁄 𑀫𑀸𑀢𑀸𑀧𑀺𑀢𑀭𑁄 𑀚𑀸𑀦𑀸𑀫𑀺, 𑀇𑀫𑁂 𑀧𑀦 𑀓𑀲𑁆𑀫𑀸 𑀯𑀤𑀦𑁆𑀢𑀺 ‘𑀅𑀳𑀁 𑀩𑀼𑀤𑁆𑀥𑀫𑀸𑀢𑀸 𑀅𑀳𑀁 𑀩𑀼𑀤𑁆𑀥𑀧𑀺𑀢𑀸’’’𑀢𑀺. 𑀪𑀕𑀯𑀸 𑀆𑀳 𑁋 ‘‘𑀦𑀺𑀭𑀦𑁆𑀢𑀭𑀁 𑀫𑁂, 𑀆𑀦𑀦𑁆𑀤, 𑀩𑁆𑀭𑀸𑀳𑁆𑀫𑀡𑀻 𑀘 𑀩𑁆𑀭𑀸𑀳𑁆𑀫𑀡𑁄 𑀘 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀸𑀢𑀸𑀧𑀺𑀢𑀭𑁄 𑀅𑀳𑁂𑀲𑀼𑀁, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀸𑀢𑀸𑀧𑀺𑀢𑀽𑀦𑀁 𑀚𑁂𑀝𑁆𑀞𑀓𑀸, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀓𑀦𑀺𑀝𑁆𑀞𑀓𑀸. 𑀢𑁂 𑀧𑀼𑀩𑁆𑀩𑀲𑀺𑀦𑁂𑀳𑁂𑀦𑁂𑀯 𑀓𑀣𑁂𑀦𑁆𑀢𑀻’’𑀢𑀺 𑀇𑀫𑀜𑁆𑀘 𑀕𑀸𑀣𑀫𑀪𑀸𑀲𑀺 𑁋

‘‘𑀧𑀼𑀩𑁆𑀩𑁂𑀯 𑀲𑀦𑁆𑀦𑀺𑀯𑀸𑀲𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸;

𑀏𑀯𑀁 𑀢𑀁 𑀚𑀸𑀬𑀢𑁂 𑀧𑁂𑀫𑀁, 𑀉𑀧𑁆𑀧𑀮𑀁𑀯 𑀬𑀣𑁄𑀤𑀓𑁂’’𑀢𑀺. (𑀚𑀸. 𑁧.𑁨.𑁧𑁭𑁪);

𑀢𑀢𑁄 𑀪𑀕𑀯𑀸 𑀲𑀸𑀓𑁂𑀢𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀧𑀼𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀲𑀸𑀯𑀢𑁆𑀣𑀺𑀫𑁂𑀯 𑀅𑀕𑀫𑀸𑀲𑀺. 𑀲𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑀻 𑀘 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀢𑀺𑀭𑀽𑀧𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁂𑀲𑀫𑀕𑁆𑀕𑁂 𑀧𑀸𑀧𑀼𑀡𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼. 𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀸 𑀲𑀦𑁆𑀦𑀺𑀧𑀢𑀺𑀁𑀲𑀼 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀓𑁂 𑀲𑀓𑁆𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 𑀉𑀧𑀸𑀲𑀓𑀸𑀧𑀺 𑀲𑀦𑁆𑀦𑀺𑀧𑀢𑀺𑀁𑀲𑀼 𑀉𑀧𑀸𑀲𑀺𑀓𑀸𑀬𑁄 𑀘 ‘‘𑀅𑀫𑁆𑀳𑀸𑀓𑀁 𑀲𑀳𑀥𑀫𑁆𑀫𑀺𑀓𑁂 𑀲𑀓𑁆𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀓𑀫𑁆𑀩𑀮𑀓𑀽𑀝𑀸𑀕𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑀸 𑀦𑀕𑀭𑀸 𑀦𑀺𑀓𑁆𑀔𑀸𑀫𑁂𑀲𑀼𑀁.

𑀪𑀕𑀯𑀸𑀧𑀺 𑀢𑀁 𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑁂𑀲𑀁 𑀧𑀭𑀺𑀦𑀺𑀩𑁆𑀩𑀸𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀢𑀢𑁆𑀣 𑀫𑀬𑀺 𑀕𑀢𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀩𑀳𑀼𑀚𑀦𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀢𑁄 𑀆𑀕𑀦𑁆𑀢𑁆𑀯𑀸 𑀆𑀴𑀸𑀳𑀦𑀫𑁂𑀯 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘‘𑀫𑀸𑀢𑀸𑀧𑀺𑀢𑀽𑀦𑀁 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀢𑀼𑀓𑀸𑀫𑁄 𑀪𑀕𑀯𑀸 𑀆𑀕𑀢𑁄’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀦𑀸𑀕𑀭𑀸𑀧𑀺 𑀓𑀽𑀝𑀸𑀕𑀸𑀭𑀁 𑀧𑀽𑀚𑁂𑀦𑁆𑀢𑀸 𑀆𑀴𑀸𑀳𑀦𑀁 𑀆𑀦𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀕𑀳𑀝𑁆𑀞𑀅𑀭𑀺𑀬𑀲𑀸𑀯𑀓𑀸 𑀓𑀣𑀁 𑀧𑀽𑀚𑁂𑀢𑀩𑁆𑀩𑀸’’𑀢𑀺. 𑀪𑀕𑀯𑀸 ‘‘𑀬𑀣𑀸 𑀅𑀲𑁂𑀓𑁆𑀔𑀸 𑀧𑀽𑀚𑀺𑀬𑀦𑁆𑀢𑀺, 𑀢𑀣𑀸 𑀧𑀽𑀚𑁂𑀢𑀩𑁆𑀩𑀸 𑀇𑀫𑁂’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀢𑁂𑀲𑀁 𑀅𑀲𑁂𑀓𑁆𑀔𑀫𑀼𑀦𑀺𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀳𑀺𑀁𑀲𑀓𑀸 𑀬𑁂 𑀫𑀼𑀦𑀬𑁄, 𑀦𑀺𑀘𑁆𑀘𑀁 𑀓𑀸𑀬𑁂𑀦 𑀲𑀁𑀯𑀼𑀢𑀸;

𑀢𑁂 𑀬𑀦𑁆𑀢𑀺 𑀅𑀘𑁆𑀘𑀼𑀢𑀁 𑀞𑀸𑀦𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂’’𑀢𑀺. (𑀥. 𑀧. 𑁨𑁨𑁫);

𑀢𑀜𑁆𑀘 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀦𑁆𑀢𑀺 ‘‘𑀇𑀤𑀁 𑀯𑀢 𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀺𑀢𑀁 𑀅𑀧𑁆𑀧𑀁 𑀧𑀭𑀺𑀢𑁆𑀢𑀁 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀲𑀭𑀲𑀧𑀭𑀺𑀢𑁆𑀢𑀢𑀸𑀬𑀸’’𑀢𑀺 𑀲𑀮𑁆𑀮𑀲𑀼𑀢𑁆𑀢𑁂𑀧𑀺 𑀯𑀼𑀢𑁆𑀢𑀦𑀬𑀫𑁂𑀢𑀁. 𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀻𑀢𑀺 𑀯𑀲𑁆𑀲𑀲𑀢𑀸 𑀑𑀭𑀁 𑀓𑀮𑀮𑀸𑀤𑀺𑀓𑀸𑀮𑁂𑀧𑀺 𑀫𑀺𑀬𑁆𑀬𑀢𑀺. 𑀅𑀢𑀺𑀘𑁆𑀘𑀸𑀢𑀺 𑀯𑀲𑁆𑀲𑀲𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀻𑀢𑀺 𑀚𑀭𑀸𑀬𑀧𑀺 𑀫𑀺𑀬𑁆𑀬𑀢𑀺.

𑁮𑁧𑁨-𑁬. 𑀫𑀫𑀸𑀬𑀺𑀢𑁂𑀢𑀺 𑀫𑀫𑀸𑀬𑀺𑀢𑀯𑀢𑁆𑀣𑀼𑀓𑀸𑀭𑀡𑀸. 𑀯𑀺𑀦𑀸𑀪𑀸𑀯𑀲𑀦𑁆𑀢𑀫𑁂𑀯𑀺𑀤𑀦𑁆𑀢𑀺 𑀲𑀦𑁆𑀢𑀯𑀺𑀦𑀸𑀪𑀸𑀯𑀁 𑀯𑀺𑀚𑁆𑀚𑀫𑀸𑀦𑀯𑀺𑀦𑀸𑀪𑀸𑀯𑀫𑁂𑀯 𑀇𑀤𑀁, 𑀦 𑀲𑀓𑁆𑀓𑀸 𑀅𑀯𑀺𑀦𑀸𑀪𑀸𑀯𑁂𑀦 𑀪𑀯𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀸𑀫𑀓𑁄𑀢𑀺 𑀫𑀫 𑀉𑀧𑀸𑀲𑀓𑁄 𑀪𑀺𑀓𑁆𑀔𑀼 𑀯𑀸𑀢𑀺 𑀲𑀗𑁆𑀔𑀁 𑀕𑀢𑁄, 𑀩𑀼𑀤𑁆𑀥𑀸𑀤𑀻𑀦𑀺 𑀯𑀸 𑀯𑀢𑁆𑀣𑀽𑀦𑀺 𑀫𑀫𑀸𑀬𑀫𑀸𑀦𑁄. 𑀲𑀗𑁆𑀕𑀢𑀦𑁆𑀢𑀺 𑀲𑀫𑀸𑀕𑀢𑀁 𑀤𑀺𑀝𑁆𑀞𑀧𑀼𑀩𑁆𑀩𑀁 𑀯𑀸. 𑀧𑀺𑀬𑀸𑀬𑀺𑀢𑀦𑁆𑀢𑀺 𑀧𑀺𑀬𑀁 𑀓𑀢𑀁. 𑀦𑀸𑀫𑀁𑀬𑁂𑀯𑀸𑀯𑀲𑀺𑀲𑁆𑀲𑀢𑀺 𑀅𑀓𑁆𑀔𑁂𑀬𑁆𑀬𑀦𑁆𑀢𑀺 𑀲𑀩𑁆𑀩𑀁 𑀭𑀽𑀧𑀸𑀤𑀺𑀥𑀫𑁆𑀫𑀚𑀸𑀢𑀁 𑀧𑀳𑀻𑀬𑀢𑀺, 𑀦𑀸𑀫𑀫𑀢𑁆𑀢𑀫𑁂𑀯 𑀢𑀼 𑀅𑀯𑀲𑀺𑀲𑁆𑀲𑀢𑀺 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑁄, 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺 𑀏𑀯𑀁 𑀲𑀗𑁆𑀔𑀸𑀢𑀼𑀁 𑀓𑀣𑁂𑀢𑀼𑀁. 𑀫𑀼𑀦𑀬𑁄𑀢𑀺 𑀔𑀻𑀡𑀸𑀲𑀯𑀫𑀼𑀦𑀬𑁄. 𑀔𑁂𑀫𑀤𑀲𑁆𑀲𑀺𑀦𑁄𑀢𑀺 𑀦𑀺𑀩𑁆𑀩𑀸𑀦𑀤𑀲𑁆𑀲𑀺𑀦𑁄.

𑁮𑁧𑁭. 𑀲𑀢𑁆𑀢𑀫𑀕𑀸𑀣𑀸 𑀏𑀯𑀁 𑀫𑀭𑀡𑀩𑁆𑀪𑀸𑀳𑀢𑁂 𑀮𑁄𑀓𑁂 𑀅𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀢𑀢𑁆𑀣 𑀧𑀢𑀺𑀮𑀻𑀦𑀘𑀭𑀲𑁆𑀲𑀸𑀢𑀺 𑀢𑀢𑁄 𑀢𑀢𑁄 𑀧𑀢𑀺𑀮𑀻𑀦𑀁 𑀘𑀺𑀢𑁆𑀢𑀁 𑀓𑀢𑁆𑀯𑀸 𑀘𑀭𑀦𑁆𑀢𑀲𑁆𑀲. 𑀪𑀺𑀓𑁆𑀔𑀼𑀦𑁄𑀢𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁂𑀓𑁆𑀔𑀲𑁆𑀲 𑀯𑀸. 𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲𑀢𑀁,𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂𑀢𑀺 𑀢𑀲𑁆𑀲𑁂𑀢𑀁 𑀧𑀢𑀺𑀭𑀽𑀧𑀫𑀸𑀳𑀼, 𑀬𑁄 𑀏𑀯𑀁𑀧𑀝𑀺𑀧𑀦𑁆𑀦𑁄 𑀦𑀺𑀭𑀬𑀸𑀤𑀺𑀪𑁂𑀤𑁂 𑀪𑀯𑀦𑁂 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀬𑁆𑀬. 𑀏𑀯𑀜𑁆𑀳𑀺 𑀲𑁄 𑀇𑀫𑀫𑁆𑀳𑀸 𑀫𑀭𑀡𑀸 𑀫𑀼𑀘𑁆𑀘𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁧𑁮-𑁨𑁦. 𑀇𑀤𑀸𑀦𑀺 𑀬𑁄 ‘‘𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂’’𑀢𑀺 𑀏𑀯𑀁 𑀔𑀻𑀡𑀸𑀲𑀯𑁄 𑀯𑀺𑀪𑀸𑀯𑀺𑀢𑁄, 𑀢𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀇𑀢𑁄 𑀧𑀭𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀆𑀳. 𑀢𑀢𑁆𑀣 𑀲𑀩𑁆𑀩𑀢𑁆𑀣𑀸𑀢𑀺 𑀤𑁆𑀯𑀸𑀤𑀲𑀲𑀼 𑀆𑀬𑀢𑀦𑁂𑀲𑀼. 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀁 𑀫𑀼𑀢𑁂𑀲𑀼 𑀯𑀸𑀢𑀺 𑀏𑀢𑁆𑀣 𑀧𑀦 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀁, 𑀏𑀢𑁆𑀣 𑀯𑀸 𑀫𑀼𑀢𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀏𑀯𑀁 𑀫𑀼𑀦𑀺 𑀦 𑀉𑀧𑀮𑀺𑀫𑁆𑀧𑀢𑀻𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀁 𑀫𑀼𑀢𑁂𑀲𑀼 𑀯𑀸𑀢𑀺 𑀅𑀢𑁆𑀭𑀸𑀧𑀺 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑁆𑀢𑀁, 𑀢𑁂𑀦 𑀯𑀢𑁆𑀣𑀼𑀦𑀸 𑀦 𑀫𑀜𑁆𑀜𑀢𑀺, 𑀫𑀼𑀢𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀦 𑀫𑀜𑁆𑀜𑀢𑀻𑀢𑀺 𑀏𑀯𑀫𑁂𑀯 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀳𑀺 𑀲𑁄 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀻𑀢𑀺. 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀯𑀺𑀬 𑀦 𑀭𑀚𑁆𑀚𑀢𑀺, 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁂𑀓𑁆𑀔𑀸 𑀯𑀺𑀬 𑀦 𑀯𑀺𑀭𑀚𑁆𑀚𑀢𑀺, 𑀭𑀸𑀕𑀲𑁆𑀲 𑀧𑀦 𑀔𑀻𑀡𑀢𑁆𑀢𑀸 ‘‘𑀯𑀺𑀭𑀸𑀕𑁄’’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀚𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.