𑁯. 𑀓𑀺𑀁𑀲𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁭. 𑀓𑀺𑀁𑀲𑀻𑀮𑁄𑀢𑀺 𑀓𑀺𑀁𑀲𑀻𑀮𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀕𑀺𑀳𑀺𑀲𑀳𑀸𑀬𑀓𑁄 𑀏𑀓𑁄 𑀣𑁂𑀭𑀲𑁆𑀲𑁂𑀯 𑀧𑀺𑀢𑀼𑀦𑁄 𑀯𑀗𑁆𑀕𑀦𑁆𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀳𑀸𑀬𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀲𑀝𑁆𑀞𑀺𑀓𑁄𑀝𑀺𑀅𑀥𑀺𑀓𑀁 𑀧𑀜𑁆𑀘𑀲𑀢𑀓𑁄𑀝𑀺𑀥𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀩𑁆𑀩𑀁 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀺. 𑀢𑀲𑁆𑀲 𑀣𑁂𑀭𑁄 𑀩𑀳𑀼𑀲𑁄 𑀑𑀯𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀫𑀤𑀸𑀲𑀺, 𑀲𑁄 𑀢𑁂𑀦 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀢𑀺. 𑀢𑀢𑁄 𑀣𑁂𑀭𑁄 ‘‘𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁄 𑀏𑀲𑁄’’𑀢𑀺 𑀜𑀢𑁆𑀯𑀸 𑀢𑀁 𑀆𑀤𑀸𑀬 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀧𑀼𑀕𑁆𑀕𑀮𑀁 𑀅𑀦𑀺𑀬𑀫𑁂𑀢𑁆𑀯𑀸 ‘‘𑀓𑀺𑀁𑀲𑀻𑀮𑁄’’𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 𑀢𑀢𑁄 𑀧𑀭𑀁 𑀅𑀪𑀸𑀲𑀺. 𑀢𑀢𑁆𑀣 𑀓𑀺𑀁𑀲𑀻𑀮𑁄𑀢𑀺 𑀓𑀻𑀤𑀺𑀲𑁂𑀦 𑀯𑀸𑀭𑀺𑀢𑁆𑀢𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀓𑀻𑀤𑀺𑀲𑀧𑀓𑀢𑀺𑀓𑁄 𑀯𑀸. 𑀓𑀺𑀁𑀲𑀫𑀸𑀘𑀸𑀭𑁄𑀢𑀺 𑀓𑀻𑀤𑀺𑀲𑁂𑀦 𑀘𑀸𑀭𑀺𑀢𑁆𑀢𑁂𑀦 𑀬𑀼𑀢𑁆𑀢𑁄. 𑀓𑀸𑀦𑀺 𑀓𑀫𑁆𑀫𑀸𑀦𑀺 𑀩𑁆𑀭𑀽𑀳𑀬𑀦𑁆𑀢𑀺 𑀓𑀸𑀦𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀯𑀟𑁆𑀠𑁂𑀦𑁆𑀢𑁄. 𑀦𑀭𑁄 𑀲𑀫𑁆𑀫𑀸 𑀦𑀺𑀯𑀺𑀝𑁆𑀞𑀲𑁆𑀲𑀸𑀢𑀺 𑀅𑀪𑀺𑀭𑀢𑁄 𑀦𑀭𑁄 𑀲𑀸𑀲𑀦𑁂 𑀲𑀫𑁆𑀫𑀸 𑀧𑀢𑀺𑀝𑁆𑀞𑀺𑀢𑁄 𑀪𑀯𑁂𑀬𑁆𑀬. 𑀉𑀢𑁆𑀢𑀫𑀢𑁆𑀣𑀜𑁆𑀘 𑀧𑀸𑀧𑀼𑀡𑁂𑀢𑀺 𑀲𑀩𑁆𑀩𑀢𑁆𑀣𑀸𑀦𑀁 𑀉𑀢𑁆𑀢𑀫𑀁 𑀅𑀭𑀳𑀢𑁆𑀢𑀜𑁆𑀘 𑀧𑀸𑀧𑀼𑀡𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁨𑁮. 𑀢𑀢𑁄 𑀪𑀕𑀯𑀸 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀅𑀟𑁆𑀠𑀫𑀸𑀲𑀽𑀧𑀲𑀫𑁆𑀧𑀦𑁆𑀦𑁄 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀓𑀲𑁆𑀫𑀸 𑀆𑀤𑀺𑀓𑀫𑁆𑀫𑀺𑀓𑀧𑀼𑀣𑀼𑀚𑁆𑀚𑀦𑀧𑀜𑁆𑀳𑀁 𑀧𑀼𑀘𑁆𑀙𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀆𑀭𑀩𑁆𑀪𑀸’’𑀢𑀺 𑀜𑀢𑁆𑀯𑀸 𑀧𑀼𑀘𑁆𑀙𑀸𑀬 𑀯𑀼𑀢𑁆𑀢𑀁 𑀘𑀸𑀭𑀺𑀢𑁆𑀢𑀲𑀻𑀮𑀁 𑀅𑀯𑀺𑀪𑀚𑀺𑀢𑁆𑀯𑀸𑀯 𑀢𑀲𑁆𑀲 𑀲𑀧𑁆𑀧𑀸𑀬𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 ‘‘𑀯𑀼𑀟𑁆𑀠𑀸𑀧𑀘𑀸𑀬𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀜𑁆𑀜𑀸𑀯𑀼𑀟𑁆𑀠𑁄, 𑀕𑀼𑀡𑀯𑀼𑀟𑁆𑀠𑁄, 𑀚𑀸𑀢𑀺𑀯𑀼𑀟𑁆𑀠𑁄, 𑀯𑀬𑁄𑀯𑀼𑀟𑁆𑀠𑁄𑀢𑀺 𑀘𑀢𑁆𑀢𑀸𑀭𑁄 𑀯𑀼𑀟𑁆𑀠𑀸. 𑀚𑀸𑀢𑀺𑀬𑀸 𑀳𑀺 𑀤𑀳𑀭𑁄𑀧𑀺 𑀩𑀳𑀼𑀲𑁆𑀲𑀼𑀢𑁄 𑀪𑀺𑀓𑁆𑀔𑀼 𑀅𑀧𑁆𑀧𑀲𑁆𑀲𑀼𑀢𑀫𑀳𑀮𑁆𑀮𑀓𑀪𑀺𑀓𑁆𑀔𑀽𑀦𑀫𑀦𑁆𑀢𑀭𑁂 𑀩𑀸𑀳𑀼𑀲𑀘𑁆𑀘𑀧𑀜𑁆𑀜𑀸𑀬 𑀯𑀼𑀟𑁆𑀠𑀢𑁆𑀢𑀸 𑀧𑀜𑁆𑀜𑀸𑀯𑀼𑀟𑁆𑀠𑁄. 𑀢𑀲𑁆𑀲 𑀳𑀺 𑀲𑀦𑁆𑀢𑀺𑀓𑁂 𑀫𑀳𑀮𑁆𑀮𑀓𑀪𑀺𑀓𑁆𑀔𑀽𑀧𑀺 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀑𑀯𑀸𑀤𑀯𑀺𑀦𑀺𑀘𑁆𑀙𑀬𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀘 𑀧𑀘𑁆𑀘𑀸𑀲𑀻𑀲𑀦𑁆𑀢𑀺. 𑀢𑀣𑀸 𑀤𑀳𑀭𑁄𑀧𑀺 𑀪𑀺𑀓𑁆𑀔𑀼 𑀅𑀥𑀺𑀕𑀫𑀲𑀫𑁆𑀧𑀦𑁆𑀦𑁄 𑀕𑀼𑀡𑀯𑀼𑀟𑁆𑀠𑁄 𑀦𑀸𑀫. 𑀢𑀲𑁆𑀲 𑀳𑀺 𑀑𑀯𑀸𑀤𑁂 𑀧𑀢𑀺𑀝𑁆𑀞𑀸𑀬 𑀫𑀳𑀮𑁆𑀮𑀓𑀸𑀧𑀺 𑀯𑀺𑀧𑀲𑁆𑀲𑀦𑀸𑀕𑀩𑁆𑀪𑀁 𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑀁 𑀧𑀸𑀧𑀼𑀡𑀦𑁆𑀢𑀺. 𑀢𑀣𑀸 𑀤𑀳𑀭𑁄𑀧𑀺 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀲𑁂𑀲𑀚𑀦𑀲𑁆𑀲 𑀯𑀦𑁆𑀤𑀦𑀸𑀭𑀳𑀢𑁄 𑀚𑀸𑀢𑀺𑀯𑀼𑀟𑁆𑀠𑁄 𑀦𑀸𑀫. 𑀲𑀩𑁆𑀩𑁄 𑀧𑀦 𑀧𑀞𑀫𑀚𑀸𑀢𑁄 𑀯𑀬𑁄𑀯𑀼𑀟𑁆𑀠𑁄 𑀦𑀸𑀫. 𑀢𑀢𑁆𑀣 𑀬𑀲𑁆𑀫𑀸 𑀧𑀜𑁆𑀜𑀸𑀬 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀤𑀺𑀲𑁄 𑀦𑀢𑁆𑀣𑀺 𑀞𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁, 𑀢𑀣𑀸 𑀕𑀼𑀡𑁂𑀦𑀧𑀺 𑀅𑀟𑁆𑀠𑀫𑀸𑀲𑁂𑀦 𑀲𑀩𑁆𑀩𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀧𑀝𑀺𑀯𑀺𑀤𑁆𑀥𑀢𑁆𑀢𑀸. 𑀚𑀸𑀢𑀺𑀬𑀸𑀧𑀺 𑀲𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀫𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀬𑁂𑀦 𑀲𑀫𑀸𑀦𑁄𑀧𑀺 𑀲𑁄 𑀇𑀫𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀯𑀼𑀟𑁆𑀠𑁄. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀧𑀜𑁆𑀜𑀸𑀕𑀼𑀡𑁂𑀳𑀺 𑀏𑀯 𑀯𑀼𑀟𑁆𑀠𑀪𑀸𑀯𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀆𑀳 𑁋 ‘‘𑀯𑀼𑀟𑁆𑀠𑀸𑀧𑀘𑀸𑀬𑀻’’𑀢𑀺. 𑀢𑀲𑁆𑀫𑀸 𑀢𑀸𑀤𑀺𑀲𑀸𑀦𑀁 𑀯𑀼𑀟𑁆𑀠𑀸𑀦𑀁 𑀅𑀧𑀘𑀺𑀢𑀺𑀓𑀭𑀡𑁂𑀦 𑀯𑀼𑀟𑁆𑀠𑀸𑀧𑀘𑀸𑀬𑀻, 𑀢𑁂𑀲𑀫𑁂𑀯 𑀯𑀼𑀟𑁆𑀠𑀸𑀦𑀁 𑀮𑀸𑀪𑀸𑀤𑀻𑀲𑀼 𑀉𑀲𑀽𑀬𑀯𑀺𑀕𑀫𑁂𑀦 𑀅𑀦𑀼𑀲𑀽𑀬𑀓𑁄 𑀘 𑀲𑀺𑀬𑀸𑀢𑀺 𑀅𑀬𑀫𑀸𑀤𑀺𑀧𑀸𑀤𑀲𑁆𑀲 𑀅𑀢𑁆𑀣𑁄.

𑀓𑀸𑀮𑀜𑁆𑀜𑀽 𑀘𑀲𑁆𑀲𑀸𑀢𑀺 𑀏𑀢𑁆𑀣 𑀧𑀦 𑀭𑀸𑀕𑁂 𑀉𑀧𑁆𑀧𑀦𑁆𑀦𑁂 𑀢𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀸𑀬 𑀕𑀭𑀽𑀦𑀁 𑀤𑀲𑁆𑀲𑀦𑀁 𑀕𑀘𑁆𑀙𑀦𑁆𑀢𑁄𑀧𑀺 𑀓𑀸𑀮𑀜𑁆𑀜𑀽, 𑀤𑁄𑀲𑁂… 𑀫𑁄𑀳𑁂… 𑀓𑁄𑀲𑀚𑁆𑀚𑁂 𑀉𑀧𑁆𑀧𑀦𑁆𑀦𑁂 𑀢𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀸𑀬 𑀕𑀭𑀽𑀦𑀁 𑀤𑀲𑁆𑀲𑀦𑀁 𑀕𑀘𑁆𑀙𑀦𑁆𑀢𑁄𑀧𑀺 𑀓𑀸𑀮𑀜𑁆𑀜𑀽, 𑀬𑀢𑁄 𑀏𑀯𑀁 𑀓𑀸𑀮𑀜𑁆𑀜𑀽 𑀘 𑀅𑀲𑁆𑀲 𑀕𑀭𑀽𑀦𑀁 𑀤𑀲𑁆𑀲𑀦𑀸𑀬. 𑀥𑀫𑁆𑀫𑀺𑀁 𑀓𑀣𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀬𑀼𑀢𑁆𑀢𑀁. 𑀏𑀭𑀬𑀺𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀔𑀡𑀜𑁆𑀜𑀽𑀢𑀺 𑀢𑀲𑁆𑀲𑀸 𑀓𑀣𑀸𑀬 𑀔𑀡𑀯𑁂𑀤𑀻, 𑀤𑀼𑀮𑁆𑀮𑀪𑁄 𑀯𑀸 𑀅𑀬𑀁 𑀈𑀤𑀺𑀲𑀸𑀬 𑀓𑀣𑀸𑀬 𑀲𑀯𑀦𑀓𑁆𑀔𑀡𑁄𑀢𑀺 𑀚𑀸𑀦𑀦𑁆𑀢𑁄. 𑀲𑀼𑀡𑁂𑀬𑁆𑀬 𑀲𑀓𑁆𑀓𑀘𑁆𑀘𑀸𑀢𑀺 𑀢𑀁 𑀓𑀣𑀁 𑀲𑀓𑁆𑀓𑀘𑁆𑀘𑀁 𑀲𑀼𑀡𑁂𑀬𑁆𑀬. 𑀦 𑀓𑁂𑀯𑀮𑀜𑁆𑀘 𑀢𑀫𑁂𑀯, 𑀅𑀜𑁆𑀜𑀸𑀦𑀺𑀧𑀺 𑀩𑀼𑀤𑁆𑀥𑀕𑀼𑀡𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀲𑀼𑀪𑀸𑀲𑀺𑀢𑀸𑀦𑀺 𑀲𑀓𑁆𑀓𑀘𑁆𑀘𑀫𑁂𑀯 𑀲𑀼𑀡𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁩𑁨𑁯. ‘‘𑀓𑀸𑀮𑀜𑁆𑀜𑀽 𑀘𑀲𑁆𑀲 𑀕𑀭𑀽𑀦𑀁 𑀤𑀲𑁆𑀲𑀦𑀸𑀬𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑀜𑁆𑀘 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀭𑀸𑀕𑀸𑀤𑀺𑀯𑀺𑀦𑁄𑀤𑀦𑀓𑀸𑀮𑀁 𑀜𑀢𑁆𑀯𑀸𑀧𑀺 𑀕𑀭𑀽𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀓𑀸𑀮𑁂𑀦 𑀕𑀘𑁆𑀙𑁂 𑀕𑀭𑀽𑀦𑀁 𑀲𑀓𑀸𑀲𑀁, ‘‘𑀅𑀳𑀁 𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀥𑀼𑀢𑀗𑁆𑀕𑀥𑀭𑁄 𑀘𑀸’’𑀢𑀺 𑀓𑀢𑁆𑀯𑀸 𑀦 𑀘𑁂𑀢𑀺𑀬𑀯𑀦𑁆𑀤𑀦𑀩𑁄𑀥𑀺𑀬𑀗𑁆𑀕𑀡𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀅𑀢𑀺𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀫𑀸𑀘𑀭𑀺𑀬𑀁 𑀤𑀺𑀲𑁆𑀯𑀸 𑀧𑀭𑀺𑀧𑀼𑀘𑁆𑀙𑀦𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀲𑀓𑀲𑁂𑀦𑀸𑀲𑀦𑁂 𑀧𑀦 𑀅𑀢𑁆𑀢𑀦𑁄 𑀆𑀲𑀦𑁂 𑀦𑀺𑀲𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀤𑀭𑀣𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀸𑀤𑀺𑀯𑀺𑀥𑀺𑀧𑀼𑀘𑁆𑀙𑀦𑀢𑁆𑀣𑀁 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀉𑀧𑀲𑀗𑁆𑀓𑀫𑀦𑁆𑀢𑁄𑀧𑀺 𑀘 𑀣𑀫𑁆𑀪𑀁 𑀦𑀺𑀭𑀁𑀓𑀢𑁆𑀯𑀸 𑀦𑀺𑀯𑀸𑀢𑀯𑀼𑀢𑁆𑀢𑀺 𑀣𑀤𑁆𑀥𑀪𑀸𑀯𑀓𑀭𑀁 𑀫𑀸𑀦𑀁 𑀯𑀺𑀦𑀸𑀲𑁂𑀢𑁆𑀯𑀸 𑀦𑀻𑀘𑀯𑀼𑀢𑁆𑀢𑀺 𑀧𑀸𑀤𑀧𑀼𑀜𑁆𑀙𑀦𑀘𑁄𑀴𑀓𑀙𑀺𑀦𑁆𑀦𑀯𑀺𑀲𑀸𑀡𑀼𑀲𑀪𑀉𑀤𑁆𑀥𑀢𑀤𑀸𑀞𑀲𑀧𑁆𑀧𑀲𑀤𑀺𑀲𑁄 𑀳𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑁂𑀬𑁆𑀬. 𑀅𑀣 𑀢𑁂𑀦 𑀕𑀭𑀼𑀦𑀸 𑀯𑀼𑀢𑁆𑀢𑀁 𑀅𑀢𑁆𑀣𑀁 𑀥𑀫𑁆𑀫𑀁…𑀧𑁂… 𑀲𑀫𑀸𑀘𑀭𑁂 𑀘. 𑀅𑀢𑁆𑀣𑀦𑁆𑀢𑀺 𑀪𑀸𑀲𑀺𑀢𑀢𑁆𑀣𑀁. 𑀥𑀫𑁆𑀫𑀦𑁆𑀢𑀺 𑀧𑀸𑀴𑀺𑀥𑀫𑁆𑀫𑀁. 𑀲𑀁𑀬𑀫𑀦𑁆𑀢𑀺 𑀲𑀻𑀮𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀯𑀲𑁂𑀲𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀅𑀦𑀼𑀲𑁆𑀲𑀭𑁂 𑀘𑁂𑀯 𑀲𑀫𑀸𑀘𑀭𑁂 𑀘𑀸𑀢𑀺 𑀅𑀢𑁆𑀣𑀁 𑀓𑀣𑀺𑀢𑁄𑀓𑀸𑀲𑁂 𑀅𑀦𑀼𑀲𑁆𑀲𑀭𑁂𑀬𑁆𑀬, 𑀥𑀫𑁆𑀫𑀁 𑀲𑀁𑀬𑀫𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀓𑀣𑀺𑀢𑁄𑀓𑀸𑀲𑁂 𑀅𑀦𑀼𑀲𑁆𑀲𑀭𑁂𑀬𑁆𑀬, 𑀅𑀦𑀼𑀲𑁆𑀲𑀭𑀡𑀫𑀢𑁆𑀢𑁂𑀦𑁂𑀯 𑀘 𑀅𑀢𑀼𑀲𑁆𑀲𑀦𑁆𑀢𑁄 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀫𑀸𑀘𑀭𑁂 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬. 𑀢𑀸𑀲𑀁 𑀓𑀣𑀸𑀦𑀁 𑀅𑀢𑁆𑀢𑀦𑀺 𑀧𑀯𑀢𑁆𑀢𑀦𑁂 𑀉𑀲𑁆𑀲𑀼𑀓𑁆𑀓𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀓𑀭𑁄𑀦𑁆𑀢𑁄 𑀳𑀺 𑀓𑀺𑀘𑁆𑀘𑀓𑀭𑁄 𑀳𑁄𑀢𑀺.

𑁩𑁩𑁦. 𑀢𑀢𑁄 𑀧𑀭𑀜𑁆𑀘 𑀥𑀫𑁆𑀫𑀸𑀭𑀸𑀫𑁄 𑀥𑀫𑁆𑀫𑀭𑀢𑁄 𑀥𑀫𑁆𑀫𑁂 𑀞𑀺𑀢𑁄 𑀥𑀫𑁆𑀫𑀯𑀺𑀦𑀺𑀘𑁆𑀙𑀬𑀜𑁆𑀜𑀽 𑀪𑀯𑁂𑀬𑁆𑀬. 𑀲𑀩𑁆𑀩𑀧𑀤𑁂𑀲𑀼 𑀘𑁂𑀢𑁆𑀣 𑀥𑀫𑁆𑀫𑁄𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸, 𑀆𑀭𑀸𑀫𑁄 𑀭𑀢𑀻𑀢𑀺 𑀏𑀓𑁄𑀯 𑀅𑀢𑁆𑀣𑁄, 𑀥𑀫𑁆𑀫𑁂 𑀆𑀭𑀸𑀫𑁄 𑀅𑀲𑁆𑀲𑀸𑀢𑀺 𑀥𑀫𑁆𑀫𑀸𑀭𑀸𑀫𑁄. 𑀥𑀫𑁆𑀫𑁂 𑀭𑀢𑁄, 𑀦 𑀅𑀜𑁆𑀜𑀁 𑀧𑀺𑀳𑁂𑀢𑀻𑀢𑀺 𑀥𑀫𑁆𑀫𑀭𑀢𑁄. 𑀥𑀫𑁆𑀫𑁂 𑀞𑀺𑀢𑁄 𑀥𑀫𑁆𑀫𑀁 𑀯𑀢𑁆𑀢𑀦𑀢𑁄. 𑀥𑀫𑁆𑀫𑀯𑀺𑀦𑀺𑀘𑁆𑀙𑀬𑀁 𑀚𑀸𑀦𑀸𑀢𑀺 ‘‘𑀇𑀤𑀁 𑀉𑀤𑀬𑀜𑀸𑀡𑀁 𑀇𑀤𑀁 𑀯𑀬𑀜𑀸𑀡’’𑀦𑁆𑀢𑀺 𑀥𑀫𑁆𑀫𑀯𑀺𑀦𑀺𑀘𑁆𑀙𑀬𑀜𑁆𑀜𑀽, 𑀏𑀯𑀭𑀽𑀧𑁄 𑀅𑀲𑁆𑀲. 𑀅𑀣 𑀬𑀸𑀬𑀁 𑀭𑀸𑀚𑀓𑀣𑀸𑀤𑀺𑀢𑀺𑀭𑀘𑁆𑀙𑀸𑀦𑀓𑀣𑀸 𑀢𑀭𑀼𑀡𑀯𑀺𑀧𑀲𑁆𑀲𑀓𑀲𑁆𑀲 𑀩𑀳𑀺𑀤𑁆𑀥𑀸𑀭𑀽𑀧𑀸𑀤𑀻𑀲𑀼 𑀅𑀪𑀺𑀦𑀦𑁆𑀤𑀦𑀼𑀧𑁆𑀧𑀸𑀤𑀦𑁂𑀦 𑀢𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀁 𑀲𑀦𑁆𑀤𑀽𑀲𑁂𑀢𑀺, 𑀢𑀲𑁆𑀫𑀸 ‘‘𑀥𑀫𑁆𑀫𑀲𑀦𑁆𑀤𑁄𑀲𑀯𑀸𑀤𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀦𑁂𑀯𑀸𑀘𑀭𑁂 𑀥𑀫𑁆𑀫𑀲𑀦𑁆𑀤𑁄𑀲𑀯𑀸𑀤𑀁, 𑀅𑀜𑁆𑀜𑀤𑀢𑁆𑀣𑀼 𑀆𑀯𑀸𑀲𑀕𑁄𑀘𑀭𑀸𑀤𑀺𑀲𑀧𑁆𑀧𑀸𑀬𑀸𑀦𑀺 𑀲𑁂𑀯𑀦𑁆𑀢𑁄 𑀢𑀘𑁆𑀙𑁂𑀳𑀺 𑀦𑀻𑀬𑁂𑀣 𑀲𑀼𑀪𑀸𑀲𑀺𑀢𑁂𑀳𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑁂𑀯𑁂𑀢𑁆𑀣 𑀢𑀘𑁆𑀙𑀸𑀦𑀺, 𑀢𑀣𑀸𑀭𑀽𑀧𑁂𑀳𑀺 𑀲𑀼𑀪𑀸𑀲𑀺𑀢𑁂𑀳𑀺 𑀦𑀻𑀬𑁂𑀣 𑀦𑀻𑀬𑁂𑀬𑁆𑀬, 𑀓𑀸𑀮𑀁 𑀔𑁂𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁩𑁩𑁧. 𑀇𑀤𑀸𑀦𑀺 ‘‘𑀥𑀫𑁆𑀫𑀲𑀦𑁆𑀤𑁄𑀲𑀯𑀸𑀤’’𑀦𑁆𑀢𑀺 𑀏𑀢𑁆𑀣 𑀅𑀢𑀺𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀬𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀓𑁆𑀓𑀺𑀮𑁂𑀲𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀢𑀤𑀜𑁆𑀜𑁂𑀦𑀧𑀺 𑀉𑀧𑀓𑁆𑀓𑀺𑀮𑁂𑀲𑁂𑀦 𑀲𑀤𑁆𑀥𑀺𑀁 ‘‘𑀳𑀲𑁆𑀲𑀁 𑀚𑀧𑁆𑀧’’𑀦𑁆𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀳𑀸𑀲𑀦𑁆𑀢𑀺𑀧𑀺 𑀧𑀸𑀞𑁄. 𑀯𑀺𑀧𑀲𑁆𑀲𑀓𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀳𑀲𑀦𑀻𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀢𑀫𑀢𑁆𑀢𑀫𑁂𑀯 𑀓𑀸𑀢𑀩𑁆𑀩𑀁, 𑀦𑀺𑀭𑀢𑁆𑀣𑀓𑀓𑀣𑀸𑀚𑀧𑁆𑀧𑁄 𑀦 𑀪𑀸𑀲𑀺𑀢𑀩𑁆𑀩𑁄, 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀲𑀼 𑀧𑀭𑀺𑀤𑁂𑀯𑁄 𑀦 𑀓𑀸𑀢𑀩𑁆𑀩𑁄, 𑀔𑀸𑀡𑀼𑀓𑀡𑁆𑀝𑀓𑀸𑀤𑀺𑀫𑁆𑀳𑀺 𑀫𑀦𑁄𑀧𑀤𑁄𑀲𑁄 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑁄. 𑀫𑀸𑀬𑀸𑀓𑀢𑀦𑁆𑀢𑀺 𑀯𑀼𑀢𑁆𑀢𑀸 𑀫𑀸𑀬𑀸, 𑀢𑀺𑀯𑀺𑀥𑀁 𑀓𑀼𑀳𑀦𑀁, 𑀧𑀘𑁆𑀘𑀬𑁂𑀲𑀼 𑀕𑀺𑀤𑁆𑀥𑀺, 𑀚𑀸𑀢𑀺𑀆𑀤𑀻𑀳𑀺 𑀫𑀸𑀦𑁄, 𑀧𑀘𑁆𑀘𑀦𑀻𑀓𑀲𑀸𑀢𑀢𑀸𑀲𑀗𑁆𑀔𑀸𑀢𑁄 𑀲𑀸𑀭𑀫𑁆𑀪𑁄, 𑀨𑀭𑀼𑀲𑀯𑀘𑀦𑀮𑀓𑁆𑀔𑀡𑀁 𑀓𑀓𑁆𑀓𑀲𑀁, 𑀭𑀸𑀕𑀸𑀤𑀬𑁄 𑀓𑀲𑀸𑀯𑀸, 𑀅𑀥𑀺𑀫𑀢𑁆𑀢𑀢𑀡𑁆𑀳𑀸𑀮𑀓𑁆𑀔𑀡𑀸 𑀫𑀼𑀘𑁆𑀙𑀸𑀢𑀺 𑀇𑀫𑁂 𑀘 𑀤𑁄𑀲𑀸 𑀲𑀼𑀔𑀓𑀸𑀫𑁂𑀦 𑀅𑀗𑁆𑀕𑀸𑀭𑀓𑀸𑀲𑀼 𑀯𑀺𑀬, 𑀲𑀼𑀘𑀺𑀓𑀸𑀫𑁂𑀦 𑀕𑀽𑀣𑀞𑀸𑀦𑀁 𑀯𑀺𑀬, 𑀚𑀻𑀯𑀺𑀢𑀼𑀓𑀸𑀫𑁂𑀦 𑀆𑀲𑀺𑀯𑀺𑀲𑀸𑀤𑀬𑁄 𑀯𑀺𑀬 𑀘 𑀧𑀳𑀸𑀢𑀩𑁆𑀩𑀸. 𑀳𑀺𑀢𑁆𑀯𑀸 𑀘 𑀆𑀭𑁄𑀕𑁆𑀬𑀫𑀤𑀸𑀤𑀺𑀯𑀺𑀕𑀫𑀸 𑀯𑀻𑀢𑀫𑀤𑁂𑀦 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀸𑀪𑀸𑀯𑀸 𑀞𑀺𑀢𑀢𑁆𑀢𑁂𑀦 𑀘𑀭𑀺𑀢𑀩𑁆𑀩𑀁. 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑀺 𑀲𑀩𑁆𑀩𑀼𑀧𑀓𑁆𑀓𑀺𑀮𑁂𑀲𑀧𑀭𑀺𑀲𑀼𑀤𑁆𑀥𑀸𑀬 𑀪𑀸𑀯𑀦𑀸𑀬 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀳𑀲𑁆𑀲𑀁 𑀚𑀧𑁆𑀧𑀁…𑀧𑁂… 𑀞𑀺𑀢𑀢𑁆𑀢𑁄’’𑀢𑀺.

𑁩𑁩𑁨. 𑀇𑀤𑀸𑀦𑀺 𑀬𑁆𑀯𑀸𑀬𑀁 ‘‘𑀳𑀲𑁆𑀲𑀁 𑀚𑀧𑁆𑀧’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁄 𑀯𑀼𑀢𑁆𑀢𑁄, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀬𑀲𑁆𑀫𑀸 𑀲𑀸𑀳𑀲𑁄 𑀳𑁄𑀢𑀺 𑀅𑀯𑀻𑀫𑀁𑀲𑀓𑀸𑀭𑀻, 𑀭𑀢𑁆𑀢𑁄 𑀭𑀸𑀕𑀯𑀲𑁂𑀦 𑀤𑀼𑀝𑁆𑀞𑁄 𑀤𑁄𑀲𑀯𑀲𑁂𑀦 𑀕𑀘𑁆𑀙𑀢𑀺, 𑀧𑀫𑀢𑁆𑀢𑁄 𑀘 𑀳𑁄𑀢𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀸𑀢𑀘𑁆𑀘𑀓𑀸𑀭𑀻, 𑀢𑀣𑀸𑀭𑀽𑀧𑀲𑁆𑀲 𑀘 ‘‘𑀲𑀼𑀡𑁂𑀬𑁆𑀬 𑀲𑀓𑁆𑀓𑀘𑁆𑀘 𑀲𑀼𑀪𑀸𑀲𑀺𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀑𑀯𑀸𑀤𑁄 𑀦𑀺𑀭𑀢𑁆𑀣𑀓𑁄, 𑀢𑀲𑁆𑀫𑀸 𑀇𑀫𑀲𑁆𑀲 𑀲𑀁𑀓𑀺𑀮𑁂𑀲𑀲𑁆𑀲 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀲𑀼𑀢𑀸𑀤𑀺𑀯𑀼𑀤𑁆𑀥𑀺𑀧𑀝𑀺𑀧𑀓𑁆𑀔𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀜𑁆𑀜𑀸𑀢𑀲𑀸𑀭𑀸𑀦𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑀢𑀲𑁆𑀲𑀢𑁆𑀣𑁄 𑁋 𑀬𑀸𑀦𑀺 𑀳𑁂𑀢𑀸𑀦𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀲𑀼𑀪𑀸𑀲𑀺𑀢𑀸𑀦𑀺, 𑀢𑁂𑀲𑀁 𑀯𑀺𑀚𑀸𑀦𑀦𑀁 𑀲𑀸𑀭𑁄. 𑀬𑀤𑀺 𑀯𑀺𑀜𑁆𑀜𑀸𑀢𑀸𑀦𑀺 𑀲𑀸𑀥𑀼, 𑀅𑀣 𑀲𑀤𑁆𑀤𑀫𑀢𑁆𑀢𑀫𑁂𑀯 𑀕𑀳𑀺𑀢𑀁, 𑀦 𑀓𑀺𑀜𑁆𑀘𑀺 𑀓𑀢𑀁 𑀳𑁄𑀢𑀺, 𑀬𑁂𑀦 𑀏𑀢𑀸𑀦𑀺 𑀲𑀼𑀢𑀫𑀬𑁂𑀦 𑀜𑀸𑀡𑁂𑀦 𑀯𑀺𑀜𑁆𑀜𑀸𑀬𑀦𑁆𑀢𑀺, 𑀢𑀁 𑀲𑀼𑀢𑀁, 𑀏𑀢𑀜𑁆𑀘 𑀲𑀼𑀢𑀫𑀬𑀜𑀸𑀡𑀁 𑀯𑀺𑀜𑁆𑀜𑀸𑀢𑀲𑀫𑀸𑀥𑀺𑀲𑀸𑀭𑀁, 𑀢𑁂𑀲𑀼 𑀯𑀺𑀜𑁆𑀜𑀸𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀲𑀫𑀸𑀥𑀺 𑀘𑀺𑀢𑁆𑀢𑀲𑁆𑀲𑀸𑀯𑀺𑀓𑁆𑀔𑁂𑀧𑁄 𑀢𑀣𑀢𑁆𑀢𑀸𑀬 𑀧𑀝𑀺𑀧𑀢𑁆𑀢𑀺, 𑀅𑀬𑀫𑀲𑁆𑀲 𑀲𑀸𑀭𑁄. 𑀦 𑀳𑀺 𑀯𑀺𑀚𑀸𑀦𑀦𑀫𑀢𑁆𑀢𑁂𑀦𑁂𑀯 𑀓𑁄𑀘𑀺 𑀅𑀢𑁆𑀣𑁄 𑀲𑀺𑀚𑁆𑀛𑀢𑀺. 𑀬𑁄 𑀧𑀦𑀸𑀬𑀁 𑀦𑀭𑁄 𑀭𑀸𑀕𑀸𑀤𑀺𑀯𑀲𑁂𑀦 𑀯𑀢𑁆𑀢𑀦𑀢𑁄 𑀲𑀸𑀳𑀲𑁄, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀸𑀢𑀘𑁆𑀘𑀓𑀸𑀭𑀺𑀢𑀸𑀬 𑀧𑀫𑀢𑁆𑀢𑁄, 𑀲𑁄 𑀲𑀤𑁆𑀤𑀫𑀢𑁆𑀢𑀕𑁆𑀕𑀸𑀳𑀻𑀬𑁂𑀯 𑀳𑁄𑀢𑀺. 𑀢𑁂𑀦 𑀢𑀲𑁆𑀲 𑀅𑀢𑁆𑀣𑀯𑀺𑀚𑀸𑀦𑀦𑀸𑀪𑀸𑀯𑀢𑁄 𑀲𑀸 𑀲𑀼𑀪𑀸𑀲𑀺𑀢𑀯𑀺𑀚𑀸𑀦𑀦𑀧𑀜𑁆𑀜𑀸 𑀘, 𑀢𑀣𑀢𑁆𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀲𑀼𑀢𑀜𑁆𑀘 𑀦 𑀯𑀟𑁆𑀠𑀢𑀻𑀢𑀺.

𑁩𑁩𑁩. 𑀏𑀯𑀁 𑀧𑀫𑀢𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀜𑁆𑀜𑀸𑀧𑀭𑀺𑀳𑀸𑀦𑀺𑀁 𑀲𑀼𑀢𑀧𑀭𑀺𑀳𑀸𑀦𑀺𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀧𑁆𑀧𑀫𑀢𑁆𑀢𑀸𑀦𑀁 𑀢𑀤𑀼𑀪𑀬𑀲𑀸𑀭𑀸𑀥𑀺𑀕𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀥𑀫𑁆𑀫𑁂 𑀘 𑀬𑁂…𑀧𑁂… 𑀲𑀸𑀭𑀫𑀚𑁆𑀛𑀕𑀽’’𑀢𑀺. 𑀢𑀢𑁆𑀣 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁄 𑀥𑀫𑁆𑀫𑁄 𑀦𑀸𑀫 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁄. 𑀏𑀓𑁄𑀧𑀺 𑀳𑀺 𑀩𑀼𑀤𑁆𑀥𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀁 𑀅𑀤𑁂𑀲𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀏𑀢𑀲𑁆𑀫𑀺𑀁 𑀥𑀫𑁆𑀫𑁂 𑀘 𑀬𑁂 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂𑀭𑀢𑀸 𑀦𑀺𑀭𑀢𑀸 𑀅𑀧𑁆𑀧𑀫𑀢𑁆𑀢𑀸 𑀲𑀸𑀢𑀘𑁆𑀘𑀸𑀦𑀼𑀬𑁄𑀕𑀺𑀦𑁄, 𑀅𑀦𑀼𑀢𑁆𑀢𑀭𑀸 𑀢𑁂 𑀯𑀘𑀲𑀸 𑀫𑀦𑀲𑀸 𑀓𑀫𑁆𑀫𑀼𑀦𑀸 𑀘, 𑀢𑁂 𑀘𑀢𑀼𑀩𑁆𑀩𑀺𑀥𑁂𑀦 𑀯𑀘𑀻𑀲𑀼𑀘𑀭𑀺𑀢𑁂𑀦 𑀢𑀺𑀯𑀺𑀥𑁂𑀦 𑀫𑀦𑁄𑀲𑀼𑀘𑀭𑀺𑀢𑁂𑀦 𑀢𑀺𑀯𑀺𑀥𑁂𑀦 𑀓𑀸𑀬𑀲𑀼𑀘𑀭𑀺𑀢𑁂𑀦 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀘𑀲𑀸 𑀫𑀦𑀲𑀸 𑀓𑀫𑁆𑀫𑀼𑀦𑀸 𑀘 𑀅𑀦𑀼𑀢𑁆𑀢𑀭𑀸, 𑀅𑀯𑀲𑁂𑀲𑀲𑀢𑁆𑀢𑁂𑀳𑀺 𑀅𑀲𑀫𑀸 𑀅𑀕𑁆𑀕𑀸𑀯𑀺𑀲𑀺𑀝𑁆𑀞𑀸. 𑀏𑀢𑁆𑀢𑀸𑀯𑀢𑀸 𑀲𑀤𑁆𑀥𑀺𑀁 𑀧𑀼𑀩𑁆𑀩𑀪𑀸𑀕𑀲𑀻𑀮𑁂𑀦 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀲𑀻𑀮𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀢𑁂 𑀲𑀦𑁆𑀢𑀺𑀲𑁄𑀭𑀘𑁆𑀘𑀲𑀫𑀸𑀥𑀺𑀲𑀡𑁆𑀞𑀺𑀢𑀸, 𑀲𑀼𑀢𑀲𑁆𑀲 𑀧𑀜𑁆𑀜𑀸𑀬 𑀘 𑀲𑀸𑀭𑀫𑀚𑁆𑀛𑀕𑀽, 𑀬𑁂 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑁂 𑀭𑀢𑀸, 𑀢𑁂 𑀦 𑀓𑁂𑀯𑀮𑀁 𑀯𑀸𑀘𑀸𑀤𑀻𑀳𑀺 𑀅𑀦𑀼𑀢𑁆𑀢𑀭𑀸 𑀳𑁄𑀦𑁆𑀢𑀺, 𑀅𑀧𑀺𑀘 𑀔𑁄 𑀧𑀦 𑀲𑀦𑁆𑀢𑀺𑀲𑁄𑀭𑀘𑁆𑀘𑁂 𑀲𑀫𑀸𑀥𑀺𑀫𑁆𑀳𑀺 𑀘 𑀲𑀡𑁆𑀞𑀺𑀢𑀸 𑀳𑀼𑀢𑁆𑀯𑀸 𑀲𑀼𑀢𑀲𑁆𑀲 𑀧𑀜𑁆𑀜𑀸𑀬 𑀘 𑀲𑀸𑀭𑀫𑀚𑁆𑀛𑀕𑀽 𑀅𑀥𑀺𑀕𑀢𑀸 𑀇𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀆𑀲𑀁𑀲𑀸𑀬𑀁 𑀪𑀽𑀢𑀯𑀘𑀦𑀁. 𑀢𑀢𑁆𑀣 𑀲𑀦𑁆𑀢𑀻𑀢𑀺 𑀦𑀺𑀩𑁆𑀩𑀸𑀦𑀁, 𑀲𑁄𑀭𑀘𑁆𑀘𑀦𑁆𑀢𑀺 𑀲𑀼𑀦𑁆𑀤𑀭𑁂 𑀭𑀢𑀪𑀸𑀯𑁂𑀦 𑀬𑀣𑀸𑀪𑀽𑀢𑀧𑀝𑀺𑀯𑁂𑀥𑀺𑀓𑀸 𑀧𑀜𑁆𑀜𑀸, 𑀲𑀦𑁆𑀢𑀺𑀬𑀸 𑀲𑁄𑀭𑀘𑁆𑀘𑀦𑁆𑀢𑀺 𑀲𑀦𑁆𑀢𑀺𑀲𑁄𑀭𑀘𑁆𑀘𑀁, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀬 𑀫𑀕𑁆𑀕𑀧𑀜𑁆𑀜𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑀸𑀥𑀻𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀯 𑀫𑀕𑁆𑀕𑀲𑀫𑀸𑀥𑀺. 𑀲𑀡𑁆𑀞𑀺𑀢𑀸𑀢𑀺 𑀢𑀤𑀼𑀪𑀬𑁂 𑀧𑀢𑀺𑀝𑁆𑀞𑀺𑀢𑀸. 𑀲𑀼𑀢𑀧𑀜𑁆𑀜𑀸𑀦𑀁 𑀲𑀸𑀭𑀁 𑀦𑀸𑀫 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺. 𑀯𑀺𑀫𑀼𑀢𑁆𑀢𑀺𑀲𑀸𑀭𑀜𑁆𑀳𑀺 𑀇𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁.

𑀏𑀯𑀫𑁂𑀢𑁆𑀣 𑀪𑀕𑀯𑀸 𑀥𑀫𑁆𑀫𑁂𑀦 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁, ‘‘𑀅𑀦𑀼𑀢𑁆𑀢𑀭𑀸 𑀯𑀘𑀲𑀸’’𑀢𑀺𑀆𑀤𑀻𑀳𑀺 𑀲𑀻𑀮𑀓𑁆𑀔𑀦𑁆𑀥𑀁, 𑀲𑀦𑁆𑀢𑀺𑀲𑁄𑀭𑀘𑁆𑀘𑀲𑀫𑀸𑀥𑀻𑀳𑀺 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀢𑀺 𑀢𑀻𑀳𑀺𑀧𑀺 𑀇𑀫𑁂𑀳𑀺 𑀔𑀦𑁆𑀥𑁂𑀳𑀺 𑀅𑀧𑀭𑀪𑀸𑀕𑀧𑀝𑀺𑀧𑀤𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀲𑀼𑀢𑀧𑀜𑁆𑀜𑀸𑀲𑀸𑀭𑁂𑀦 𑀅𑀓𑀼𑀧𑁆𑀧𑀯𑀺𑀫𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀲𑀫𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀧𑀼𑀦 𑀦 𑀘𑀺𑀭𑀲𑁆𑀲𑁂𑀯 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀓𑀺𑀁𑀲𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.