𑁧𑁦. 𑀉𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩𑁪. 𑀉𑀝𑁆𑀞𑀳𑀣𑀸𑀢𑀺 𑀉𑀝𑁆𑀞𑀸𑀦𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀭𑀢𑁆𑀢𑀺𑀁 𑀚𑁂𑀢𑀯𑀦𑀯𑀺𑀳𑀸𑀭𑁂 𑀯𑀲𑀺𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑀁 𑀅𑀕𑀫𑀸𑀲𑀺 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬. 𑀆𑀘𑀺𑀡𑁆𑀡𑀁 𑀓𑀺𑀭𑁂𑀢𑀁 𑀪𑀕𑀯𑀢𑁄 𑀭𑀢𑁆𑀢𑀺𑀁 𑀚𑁂𑀢𑀯𑀦𑀯𑀺𑀳𑀸𑀭𑁂 𑀯𑀲𑀺𑀢𑁆𑀯𑀸 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀤𑀺𑀯𑀸𑀯𑀺𑀳𑀸𑀭𑀽𑀧𑀕𑀫𑀦𑀁, 𑀭𑀢𑁆𑀢𑀺𑀜𑁆𑀘 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀯𑀲𑀺𑀢𑁆𑀯𑀸 𑀚𑁂𑀢𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀽𑀧𑀕𑀫𑀦𑀁. 𑀓𑀲𑁆𑀫𑀸? 𑀤𑁆𑀯𑀺𑀦𑁆𑀦𑀁 𑀓𑀼𑀮𑀸𑀦𑀁 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀫𑀳𑀸𑀧𑀭𑀺𑀘𑁆𑀘𑀸𑀕𑀕𑀼𑀡𑀧𑀭𑀺𑀤𑀻𑀧𑀦𑀢𑁆𑀣𑀸𑀬 𑀘. 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑀲𑁆𑀲 𑀘 𑀳𑁂𑀝𑁆𑀞𑀸 𑀧𑀜𑁆𑀘 𑀓𑀽𑀝𑀸𑀕𑀸𑀭𑀕𑀩𑁆𑀪𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀲𑀼 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺. 𑀢𑀢𑁆𑀣 𑀬𑀤𑀸 𑀪𑀕𑀯𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀯𑀲𑀢𑀺, 𑀢𑀤𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀕𑀸𑀭𑀯𑁂𑀦 𑀉𑀧𑀭𑀺𑀧𑀸𑀲𑀸𑀤𑀁 𑀦𑀸𑀭𑀼𑀳𑀦𑁆𑀢𑀺. 𑀢𑀁 𑀤𑀺𑀯𑀲𑀁 𑀧𑀦 𑀪𑀕𑀯𑀸 𑀉𑀧𑀭𑀺𑀧𑀸𑀲𑀸𑀤𑁂 𑀓𑀽𑀝𑀸𑀕𑀸𑀭𑀕𑀩𑁆𑀪𑀁 𑀧𑀸𑀯𑀺𑀲𑀺, 𑀢𑁂𑀦 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀧𑀜𑁆𑀘𑀧𑀺 𑀕𑀩𑁆𑀪𑀲𑀢𑀸𑀦𑀺 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀧𑀯𑀺𑀲𑀺𑀁𑀲𑀼. 𑀢𑁂 𑀘 𑀲𑀩𑁆𑀩𑁂𑀯 𑀦𑀯𑀸 𑀳𑁄𑀦𑁆𑀢𑀺 𑀅𑀥𑀼𑀦𑀸𑀕𑀢𑀸 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸. 𑀢𑁂 𑀧𑀯𑀺𑀲𑀺𑀢𑁆𑀯𑀸 𑀤𑀺𑀯𑀸𑀲𑁂𑀬𑁆𑀬𑀁 𑀲𑀼𑀧𑀺𑀢𑁆𑀯𑀸 𑀲𑀸𑀬𑀁 𑀉𑀝𑁆𑀞𑀸𑀬 𑀫𑀳𑀸𑀢𑀮𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀚𑁆𑀚 𑀪𑀢𑁆𑀢𑀕𑁆𑀕𑁂 𑀢𑀼𑀬𑁆𑀳𑀁 𑀓𑀺𑀁 𑀅𑀳𑁄𑀲𑀺, 𑀢𑁆𑀯𑀁 𑀓𑀢𑁆𑀣 𑀅𑀕𑀫𑀸𑀲𑀺, 𑀅𑀳𑀁 𑀆𑀯𑀼𑀲𑁄 𑀓𑁄𑀲𑀮𑀭𑀜𑁆𑀜𑁄 𑀖𑀭𑀁, 𑀅𑀳𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲, 𑀢𑀢𑁆𑀣 𑀏𑀯𑀭𑀽𑀧𑁄 𑀘 𑀏𑀯𑀭𑀽𑀧𑁄 𑀘 𑀪𑁄𑀚𑀦𑀯𑀺𑀥𑀺 𑀅𑀳𑁄𑀲𑀻’’𑀢𑀺 𑀦𑀸𑀦𑀧𑁆𑀧𑀓𑀸𑀭𑀁 𑀆𑀫𑀺𑀲𑀓𑀣𑀁 𑀓𑀣𑁂𑀦𑁆𑀢𑀸 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀅𑀳𑁂𑀲𑀼𑀁.

𑀪𑀕𑀯𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀇𑀫𑁂 𑀫𑀬𑀸 𑀲𑀤𑁆𑀥𑀺𑀁 𑀯𑀲𑀦𑁆𑀢𑀸𑀧𑀺 𑀏𑀯𑀁 𑀧𑀫𑀢𑁆𑀢𑀸, 𑀅𑀳𑁄 𑀅𑀬𑀼𑀢𑁆𑀢𑀓𑀸𑀭𑀺𑀦𑁄’’𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀆𑀕𑀫𑀦𑀁 𑀘𑀺𑀦𑁆𑀢𑁂𑀲𑀺. 𑀢𑀸𑀯𑀤𑁂𑀯 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀢𑁄 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀇𑀤𑁆𑀥𑀺𑀬𑀸 𑀆𑀕𑀫𑁆𑀫 𑀧𑀸𑀤𑀫𑀽𑀮𑁂 𑀯𑀦𑁆𑀤𑀫𑀸𑀦𑁄𑀬𑁂𑀯 𑀅𑀳𑁄𑀲𑀺. 𑀢𑀢𑁄 𑀦𑀁 𑀪𑀕𑀯𑀸 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀢𑁂 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀧𑀫𑀢𑁆𑀢𑀸, 𑀲𑀸𑀥𑀼 𑀦𑁂 𑀲𑀁𑀯𑁂𑀚𑁂𑀳𑀻’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀸𑀯𑀤𑁂𑀯 𑀆𑀧𑁄𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀓𑀭𑀻𑀲𑀪𑀽𑀫𑀺𑀬𑀁 𑀞𑀺𑀢𑀁 𑀫𑀳𑀸𑀧𑀸𑀲𑀸𑀤𑀁 𑀦𑀸𑀯𑀁 𑀯𑀺𑀬 𑀫𑀳𑀸𑀯𑀸𑀢𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀓𑀫𑁆𑀧𑁂𑀲𑀺 𑀲𑀤𑁆𑀥𑀺𑀁 𑀧𑀢𑀺𑀝𑁆𑀞𑀺𑀢𑀧𑀣𑀯𑀺𑀧𑁆𑀧𑀤𑁂𑀲𑁂𑀦. 𑀅𑀣 𑀢𑁂 𑀪𑀺𑀓𑁆𑀔𑀽 𑀪𑀻𑀢𑀸 𑀯𑀺𑀲𑁆𑀲𑀭𑀁 𑀓𑀭𑁄𑀦𑁆𑀢𑀸 𑀲𑀓𑀲𑀓𑀘𑀻𑀯𑀭𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀘𑀢𑀽𑀳𑀺 𑀤𑁆𑀯𑀸𑀭𑁂𑀳𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀪𑀕𑀯𑀸 𑀢𑁂𑀲𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀅𑀜𑁆𑀜𑁂𑀦 𑀤𑁆𑀯𑀸𑀭𑁂𑀦 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺, 𑀢𑁂 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀪𑀕𑀯𑀸 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀪𑀻𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺, 𑀢𑁂 ‘‘𑀅𑀬𑀁, 𑀪𑀦𑁆𑀢𑁂, 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄 𑀓𑀫𑁆𑀧𑀺𑀢𑁄’’𑀢𑀺 𑀆𑀳𑀁𑀲𑀼. ‘‘𑀚𑀸𑀦𑀸𑀣, 𑀪𑀺𑀓𑁆𑀔𑀯𑁂, 𑀓𑁂𑀦𑀸’’𑀢𑀺? ‘‘𑀦 𑀚𑀸𑀦𑀸𑀫, 𑀪𑀦𑁆𑀢𑁂’’𑀢𑀺. 𑀅𑀣 𑀪𑀕𑀯𑀸 ‘‘𑀢𑀼𑀫𑁆𑀳𑀸𑀤𑀺𑀲𑀸𑀦𑀁, 𑀪𑀺𑀓𑁆𑀔𑀯𑁂, 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀧𑀫𑀸𑀤𑀯𑀺𑀳𑀸𑀭𑀻𑀦𑀁 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀓𑀫𑁆𑀧𑀺𑀢𑁄’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀉𑀝𑁆𑀞𑀳𑀣𑀸𑀢𑀺 𑀆𑀲𑀦𑀸 𑀉𑀝𑁆𑀞𑀳𑀣 𑀖𑀝𑀣 𑀯𑀸𑀬𑀫𑀣, 𑀫𑀸 𑀓𑀼𑀲𑀻𑀢𑀸 𑀳𑁄𑀣. 𑀦𑀺𑀲𑀻𑀤𑀣𑀸𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀢𑁆𑀣𑀸𑀬 𑀦𑀺𑀲𑀻𑀤𑀣. 𑀓𑁄 𑀅𑀢𑁆𑀣𑁄 𑀲𑀼𑀧𑀺𑀢𑁂𑀦 𑀯𑁄𑀢𑀺 𑀓𑁄 𑀢𑀼𑀫𑁆𑀳𑀸𑀓𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸𑀦𑀁 𑀲𑀼𑀧𑀺𑀢𑁂𑀦 𑀅𑀢𑁆𑀣𑁄. 𑀦 𑀳𑀺 𑀲𑀓𑁆𑀓𑀸 𑀲𑀼𑀧𑀦𑁆𑀢𑁂𑀦 𑀓𑁄𑀘𑀺 𑀅𑀢𑁆𑀣𑁄 𑀧𑀸𑀧𑀼𑀡𑀺𑀢𑀼𑀁. 𑀆𑀢𑀼𑀭𑀸𑀦𑀜𑁆𑀳𑀺 𑀓𑀸 𑀦𑀺𑀤𑁆𑀤𑀸, 𑀲𑀮𑁆𑀮𑀯𑀺𑀤𑁆𑀥𑀸𑀦 𑀭𑀼𑀧𑁆𑀧𑀢𑀦𑁆𑀢𑀺 𑀬𑀢𑁆𑀭 𑀘 𑀦𑀸𑀫 𑀅𑀧𑁆𑀧𑀓𑁂𑀧𑀺 𑀲𑀭𑀻𑀭𑀧𑁆𑀧𑀤𑁂𑀲𑁂 𑀉𑀝𑁆𑀞𑀺𑀢𑁂𑀦 𑀘𑀓𑁆𑀔𑀼𑀭𑁄𑀕𑀸𑀤𑀺𑀦𑀸 𑀭𑁄𑀕𑁂𑀦 𑀆𑀢𑀼𑀭𑀸𑀦𑀁 𑀏𑀓𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀧𑀯𑀺𑀝𑁆𑀞𑁂𑀦 𑀅𑀬𑀲𑀮𑁆𑀮𑀅𑀝𑁆𑀞𑀺𑀲𑀮𑁆𑀮𑀤𑀦𑁆𑀢𑀲𑀮𑁆𑀮𑀯𑀺𑀲𑀸𑀡𑀲𑀮𑁆𑀮𑀓𑀝𑁆𑀞𑀲𑀮𑁆𑀮𑀸𑀦𑀁 𑀅𑀜𑁆𑀜𑀢𑀭𑁂𑀦 𑀲𑀮𑁆𑀮𑁂𑀦 𑀭𑀼𑀧𑁆𑀧𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀦𑀺𑀤𑁆𑀤𑀸 𑀦𑀢𑁆𑀣𑀺, 𑀢𑀢𑁆𑀣 𑀢𑀼𑀫𑁆𑀳𑀸𑀓𑀁 𑀲𑀓𑀮𑀘𑀺𑀢𑁆𑀢𑀲𑀭𑀻𑀭𑀲𑀦𑁆𑀢𑀸𑀦𑀁 𑀪𑀜𑁆𑀚𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑀓𑀺𑀮𑁂𑀲𑀭𑁄𑀕𑁂𑀳𑀺 𑀆𑀢𑀼𑀭𑀸𑀦𑀜𑁆𑀳𑀺 𑀓𑀸 𑀦𑀺𑀤𑁆𑀤𑀸 𑀭𑀸𑀕𑀲𑀮𑁆𑀮𑀸𑀤𑀻𑀳𑀺 𑀘 𑀧𑀜𑁆𑀘𑀳𑀺 𑀲𑀮𑁆𑀮𑁂𑀳𑀺 𑀅𑀦𑁆𑀢𑁄𑀳𑀤𑀬𑀁 𑀧𑀯𑀺𑀲𑀺𑀬 𑀯𑀺𑀤𑁆𑀥𑀢𑁆𑀢𑀸 𑀲𑀮𑁆𑀮𑀯𑀺𑀤𑁆𑀥𑀸𑀦𑀁 𑀭𑀼𑀧𑁆𑀧𑀢𑀁.

𑁩𑁩𑁫. 𑀏𑀯𑀁 𑀯𑀢𑁆𑀯𑀸 𑀧𑀼𑀦 𑀪𑀕𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀢𑁂 𑀪𑀺𑀓𑁆𑀔𑀽 𑀉𑀲𑁆𑀲𑀸𑀳𑁂𑀦𑁆𑀢𑁄 𑀲𑀁𑀯𑁂𑀚𑁂𑀦𑁆𑀢𑁄 𑀘 𑀆𑀳 𑁋 ‘‘𑀉𑀝𑁆𑀞𑀳𑀣…𑀧𑁂… 𑀯𑀲𑀸𑀦𑀼𑀕𑁂’’𑀢𑀺. 𑀢𑀢𑁆𑀭𑀸𑀬𑀁 𑀲𑀸𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀏𑀯𑀁 𑀓𑀺𑀮𑁂𑀲𑀲𑀮𑁆𑀮𑀯𑀺𑀤𑁆𑀥𑀸𑀦𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀓𑀸𑀮𑁄 𑀧𑀩𑀼𑀚𑁆𑀛𑀺𑀢𑀼𑀁. 𑀓𑀺𑀁 𑀓𑀸𑀭𑀡𑀁? 𑀫𑀡𑁆𑀟𑀧𑁂𑀬𑁆𑀬𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀲𑀢𑁆𑀣𑀸 𑀲𑀫𑁆𑀫𑀼𑀔𑀻𑀪𑀽𑀢𑁄, 𑀇𑀢𑁄 𑀧𑀼𑀩𑁆𑀩𑁂 𑀧𑀦 𑀯𑁄 𑀤𑀻𑀖𑀭𑀢𑁆𑀢𑀁 𑀲𑀼𑀢𑁆𑀢𑀁, 𑀕𑀺𑀭𑀻𑀲𑀼 𑀲𑀼𑀢𑁆𑀢𑀁, 𑀦𑀤𑀻𑀲𑀼 𑀲𑀼𑀢𑁆𑀢𑀁, 𑀲𑀫𑁂𑀲𑀼 𑀲𑀼𑀢𑁆𑀢𑀁, 𑀯𑀺𑀲𑀫𑁂𑀲𑀼 𑀲𑀼𑀢𑁆𑀢𑀁, 𑀭𑀼𑀓𑁆𑀔𑀕𑁆𑀕𑁂𑀲𑀼𑀧𑀺 𑀲𑀼𑀢𑁆𑀢𑀁 𑀅𑀤𑀲𑁆𑀲𑀦𑀸 𑀅𑀭𑀺𑀬𑀲𑀘𑁆𑀘𑀸𑀦𑀁, 𑀢𑀲𑁆𑀫𑀸 𑀢𑀲𑁆𑀲𑀸 𑀦𑀺𑀤𑁆𑀤𑀸𑀬 𑀅𑀦𑁆𑀢𑀓𑀺𑀭𑀺𑀬𑀢𑁆𑀣𑀁 𑀉𑀝𑁆𑀞𑀳𑀣 𑀦𑀺𑀲𑀻𑀤𑀣 𑀤𑀴𑁆𑀳𑀁 𑀲𑀺𑀓𑁆𑀔𑀣 𑀲𑀦𑁆𑀢𑀺𑀬𑀸.

𑀢𑀢𑁆𑀣 𑀧𑀼𑀭𑀺𑀫𑀧𑀸𑀤𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑀦𑀬𑁄 𑀏𑀯. 𑀤𑀼𑀢𑀺𑀬𑀧𑀸𑀤𑁂 𑀧𑀦 𑀲𑀦𑁆𑀢𑀻𑀢𑀺 𑀢𑀺𑀲𑁆𑀲𑁄 𑀲𑀦𑁆𑀢𑀺𑀬𑁄 𑁋 𑀅𑀘𑁆𑀘𑀦𑁆𑀢𑀲𑀦𑁆𑀢𑀺, 𑀢𑀤𑀗𑁆𑀕𑀲𑀦𑁆𑀢𑀺, 𑀲𑀫𑁆𑀫𑀼𑀢𑀺𑀲𑀦𑁆𑀢𑀻𑀢𑀺, 𑀦𑀺𑀩𑁆𑀩𑀸𑀦𑀯𑀺𑀧𑀲𑁆𑀲𑀦𑀸𑀤𑀺𑀝𑁆𑀞𑀺𑀕𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀥 𑀧𑀦 𑀅𑀘𑁆𑀘𑀦𑁆𑀢𑀲𑀦𑁆𑀢𑀺 𑀦𑀺𑀩𑁆𑀩𑀸𑀦𑀫𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀢𑁆𑀣𑀁 𑀤𑀴𑁆𑀳𑀁 𑀲𑀺𑀓𑁆𑀔𑀣, 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀸 𑀳𑀼𑀢𑁆𑀯𑀸 𑀲𑀺𑀓𑁆𑀔𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁 𑀓𑀸𑀭𑀡𑀁? 𑀫𑀸 𑀯𑁄 𑀧𑀫𑀢𑁆𑀢𑁂 𑀯𑀺𑀜𑁆𑀜𑀸𑀬, 𑀫𑀘𑁆𑀘𑀼𑀭𑀸𑀚𑀸 𑀅𑀫𑁄𑀳𑀬𑀺𑀢𑁆𑀣 𑀯𑀲𑀸𑀦𑀼𑀕𑁂, 𑀫𑀸 𑀢𑀼𑀫𑁆𑀳𑁂 ‘‘𑀧𑀫𑀢𑁆𑀢𑀸 𑀏𑀢𑁂’’𑀢𑀺 𑀏𑀯𑀁 𑀜𑀢𑁆𑀯𑀸 𑀫𑀘𑁆𑀘𑀼𑀭𑀸𑀚𑀧𑀭𑀺𑀬𑀸𑀬𑀦𑀸𑀫𑁄 𑀫𑀸𑀭𑁄 𑀯𑀲𑀸𑀦𑀼𑀕𑁂 𑀅𑀫𑁄𑀳𑀬𑀺𑀢𑁆𑀣, 𑀬𑀣𑀸 𑀢𑀲𑁆𑀲 𑀯𑀲𑀁 𑀕𑀘𑁆𑀙𑀣, 𑀏𑀯𑀁 𑀯𑀲𑀸𑀦𑀼𑀕𑁂 𑀓𑀭𑁄𑀦𑁆𑀢𑁄 𑀫𑀸 𑀅𑀫𑁄𑀳𑀬𑀺𑀢𑁆𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁩𑁬. 𑀬𑀢𑁄 𑀢𑀲𑁆𑀲 𑀯𑀲𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑀸 𑀬𑀸𑀬 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘…𑀧𑁂… 𑀲𑀫𑀧𑁆𑀧𑀺𑀢𑀸, 𑀬𑀸𑀬 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘 𑀅𑀢𑁆𑀣𑀺𑀓𑀸 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀢𑁆𑀣𑀺𑀓𑀸, 𑀢𑀁 𑀭𑀽𑀧𑀸𑀤𑀺𑀁 𑀲𑀺𑀢𑀸 𑀦𑀺𑀲𑁆𑀲𑀺𑀢𑀸 𑀅𑀮𑁆𑀮𑀻𑀦𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀢𑀭𑀣 𑀲𑀫𑀢𑀺𑀓𑁆𑀓𑀫𑀣 𑀏𑀢𑀁 𑀦𑀸𑀦𑀧𑁆𑀧𑀓𑀸𑀭𑁂𑀲𑀼 𑀯𑀺𑀲𑀬𑁂𑀲𑀼 𑀯𑀺𑀲𑀝𑀯𑀺𑀢𑁆𑀣𑀺𑀡𑁆𑀡𑀯𑀺𑀲𑀸𑀮𑀢𑁆𑀢𑀸 𑀯𑀺𑀲𑀢𑁆𑀢𑀺𑀓𑀁 𑀪𑀯𑀪𑁄𑀕𑀢𑀡𑁆𑀳𑀁. 𑀔𑀡𑁄 𑀯𑁄 𑀫𑀸 𑀉𑀧𑀘𑁆𑀘𑀕𑀸, 𑀅𑀬𑀁 𑀢𑀼𑀫𑁆𑀳𑀸𑀓𑀁 𑀲𑀫𑀡𑀥𑀫𑁆𑀫𑀓𑀭𑀡𑀓𑁆𑀔𑀡𑁄 𑀫𑀸 𑀅𑀢𑀺𑀓𑁆𑀓𑀫𑀺. 𑀬𑁂𑀲𑀜𑁆𑀳𑀺 𑀅𑀬𑀫𑁂𑀯𑀭𑀽𑀧𑁄 𑀔𑀡𑁄 𑀅𑀢𑀺𑀓𑁆𑀓𑀫𑀢𑀺, 𑀬𑁂 𑀘 𑀇𑀫𑀁 𑀔𑀡𑀁 𑀅𑀢𑀺𑀓𑁆𑀓𑀫𑀦𑁆𑀢𑀺, 𑀢𑁂 𑀔𑀡𑀸𑀢𑀻𑀢𑀸 𑀳𑀺 𑀲𑁄𑀘𑀦𑁆𑀢𑀺 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑀸, 𑀦𑀺𑀭𑀲𑁆𑀲𑀸𑀤𑀝𑁆𑀞𑁂𑀦 𑀦𑀺𑀭𑀬𑀲𑀜𑁆𑀜𑀺𑀢𑁂 𑀘𑀢𑀼𑀩𑁆𑀩𑀺𑀥𑁂𑀧𑀺 𑀅𑀧𑀸𑀬𑁂 𑀧𑀢𑀺𑀝𑁆𑀞𑀺𑀢𑀸 ‘‘𑀅𑀓𑀢𑀁 𑀯𑀢 𑀦𑁄 𑀓𑀮𑁆𑀬𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑁄𑀘𑀦𑁆𑀢𑀺.

𑁩𑁩𑁭. 𑀏𑀯𑀁 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀉𑀲𑁆𑀲𑀸𑀳𑁂𑀢𑁆𑀯𑀸 𑀲𑀁𑀯𑁂𑀚𑁂𑀢𑁆𑀯𑀸 𑀘 𑀇𑀤𑀸𑀦𑀺 𑀢𑁂𑀲𑀁 𑀢𑀁 𑀧𑀫𑀸𑀤𑀯𑀺𑀳𑀸𑀭𑀁 𑀯𑀺𑀕𑀭𑀳𑀺𑀢𑁆𑀯𑀸 𑀲𑀩𑁆𑀩𑁂𑀯 𑀢𑁂 𑀅𑀧𑁆𑀧𑀫𑀸𑀤𑁂 𑀦𑀺𑀬𑁄𑀚𑁂𑀦𑁆𑀢𑁄 ‘‘𑀧𑀫𑀸𑀤𑁄 𑀭𑀚𑁄’’𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀫𑀸𑀤𑁄𑀢𑀺 𑀲𑀗𑁆𑀔𑁂𑀧𑀢𑁄 𑀲𑀢𑀺𑀯𑀺𑀧𑁆𑀧𑀯𑀸𑀲𑁄, 𑀲𑁄 𑀘𑀺𑀢𑁆𑀢𑀫𑀮𑀺𑀦𑀝𑁆𑀞𑁂𑀦 𑀭𑀚𑁄. 𑀢𑀁 𑀧𑀫𑀸𑀤𑀫𑀦𑀼𑀧𑀢𑀺𑀢𑁄 𑀧𑀫𑀸𑀤𑀸𑀦𑀼𑀧𑀢𑀺𑀢𑁄, 𑀧𑀫𑀸𑀤𑀸𑀦𑀼𑀧𑀢𑀺𑀢𑀢𑁆𑀢𑀸 𑀅𑀧𑀭𑀸𑀧𑀭𑀼𑀧𑁆𑀧𑀦𑁆𑀦𑁄 𑀧𑀫𑀸𑀤𑁄 𑀏𑀯, 𑀲𑁄𑀧𑀺 𑀭𑀚𑁄. 𑀦 𑀳𑀺 𑀓𑀤𑀸𑀘𑀺 𑀧𑀫𑀸𑀤𑁄 𑀦𑀸𑀫 𑀅𑀭𑀚𑁄 𑀅𑀢𑁆𑀣𑀺. 𑀢𑁂𑀦 𑀓𑀺𑀁 𑀤𑀻𑀧𑁂𑀢𑀺? 𑀫𑀸 𑀢𑀼𑀫𑁆𑀳𑁂 ‘‘𑀤𑀳𑀭𑀸 𑀢𑀸𑀯 𑀫𑀬𑀁 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀯𑀺𑀲𑁆𑀲𑀸𑀲𑀫𑀸𑀧𑀚𑁆𑀚𑀺𑀢𑁆𑀣. 𑀤𑀳𑀭𑀓𑀸𑀮𑁂𑀧𑀺 𑀳𑀺 𑀧𑀫𑀸𑀤𑁄 𑀭𑀚𑁄, 𑀫𑀚𑁆𑀛𑀺𑀫𑀓𑀸𑀮𑁂𑀧𑀺 𑀣𑁂𑀭𑀓𑀸𑀮𑁂𑀧𑀺 𑀧𑀫𑀸𑀤𑀸𑀦𑀼𑀧𑀢𑀺𑀢𑀢𑁆𑀢𑀸 𑀫𑀳𑀸𑀭𑀚𑁄 𑀲𑀗𑁆𑀓𑀸𑀭𑀓𑀽𑀝𑁄 𑀏𑀯 𑀳𑁄𑀢𑀺, 𑀬𑀣𑀸 𑀖𑀭𑁂 𑀏𑀓𑀤𑁆𑀯𑁂𑀤𑀺𑀯𑀲𑀺𑀓𑁄 𑀭𑀚𑁄 𑀭𑀚𑁄 𑀏𑀯, 𑀯𑀟𑁆𑀠𑀫𑀸𑀦𑁄 𑀧𑀦 𑀕𑀡𑀯𑀲𑁆𑀲𑀺𑀓𑁄 𑀲𑀗𑁆𑀓𑀸𑀭𑀓𑀽𑀝𑁄 𑀏𑀯 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀦 𑀧𑀞𑀫𑀯𑀬𑁂 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀇𑀢𑀭𑀯𑀬𑁂𑀲𑀼 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄, 𑀧𑀞𑀫𑀯𑀬𑁂 𑀯𑀸 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀫𑀚𑁆𑀛𑀺𑀫𑀯𑀬𑁂 𑀲𑀼𑀡𑀺𑀢𑁆𑀯𑀸 𑀧𑀘𑁆𑀙𑀺𑀫𑀯𑀬𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀪𑀺𑀓𑁆𑀔𑀼 𑀧𑀫𑀸𑀤𑀯𑀺𑀳𑀸𑀭𑀻 𑀦 𑀳𑁄𑀢𑀺 𑀅𑀧𑁆𑀧𑀫𑀸𑀤𑀸𑀦𑀼𑀮𑁄𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀢𑁆𑀢𑀸. 𑀬𑁄 𑀧𑀦 𑀲𑀩𑁆𑀩𑀯𑀬𑁂𑀲𑀼 𑀧𑀫𑀸𑀤𑀯𑀺𑀳𑀸𑀭𑀻 𑀤𑀺𑀯𑀸𑀲𑁂𑀬𑁆𑀬𑀁 𑀆𑀫𑀺𑀲𑀓𑀣𑀜𑁆𑀘 𑀅𑀦𑀼𑀬𑀼𑀢𑁆𑀢𑁄, 𑀲𑁂𑀬𑁆𑀬𑀣𑀸𑀧𑀺 𑀢𑀼𑀫𑁆𑀳𑁂, 𑀢𑀲𑁆𑀲𑁂𑀯 𑀲𑁄 𑀧𑀞𑀫𑀯𑀬𑁂 𑀧𑀫𑀸𑀤𑁄 𑀭𑀚𑁄, 𑀇𑀢𑀭𑀯𑀬𑁂𑀲𑀼 𑀧𑀫𑀸𑀤𑀸𑀦𑀼𑀧𑀢𑀺𑀢𑁄 𑀫𑀳𑀸𑀧𑀫𑀸𑀤𑁄 𑀘 𑀫𑀳𑀸𑀭𑀚𑁄 𑀏𑀯𑀸𑀢𑀺.

𑀏𑀯𑀁 𑀢𑁂𑀲𑀁 𑀧𑀫𑀸𑀤𑀯𑀺𑀳𑀸𑀭𑀁 𑀯𑀺𑀕𑀭𑀳𑀺𑀢𑁆𑀯𑀸 𑀅𑀧𑁆𑀧𑀫𑀸𑀤𑁂 𑀦𑀺𑀬𑁄𑀚𑁂𑀦𑁆𑀢𑁄 𑀆𑀳 𑁋 ‘‘𑀅𑀧𑁆𑀧𑀫𑀸𑀤𑁂𑀦 𑀯𑀺𑀚𑁆𑀚𑀸𑀬, 𑀅𑀩𑁆𑀩𑀳𑁂 𑀲𑀮𑁆𑀮𑀫𑀢𑁆𑀢𑀦𑁄’’𑀢𑀺, 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀫𑀸 𑀏𑀯𑀫𑁂𑀲𑁄 𑀲𑀩𑁆𑀩𑀤𑀸𑀧𑀺 𑀧𑀫𑀸𑀤𑁄 𑀭𑀚𑁄, 𑀢𑀲𑁆𑀫𑀸 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑀲𑀗𑁆𑀔𑀸𑀢𑁂𑀦 𑀅𑀧𑁆𑀧𑀫𑀸𑀤𑁂𑀦 𑀆𑀲𑀯𑀸𑀦𑀁 𑀔𑀬𑀜𑀸𑀡𑀲𑀗𑁆𑀔𑀸𑀢𑀸𑀬 𑀘 𑀯𑀺𑀚𑁆𑀚𑀸𑀬 𑀧𑀡𑁆𑀟𑀺𑀢𑁄 𑀓𑀼𑀮𑀧𑀼𑀢𑁆𑀢𑁄 𑀉𑀤𑁆𑀥𑀭𑁂 𑀅𑀢𑁆𑀢𑀦𑁄 𑀳𑀤𑀬𑀦𑀺𑀲𑁆𑀲𑀺𑀢𑀁 𑀭𑀸𑀕𑀸𑀤𑀺𑀧𑀜𑁆𑀘𑀯𑀺𑀥𑀁 𑀲𑀮𑁆𑀮𑀦𑁆𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀲𑀫𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀁𑀯𑁂𑀕𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀫𑁂𑀯 𑀥𑀫𑁆𑀫𑀤𑁂𑀲𑀦𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀜𑁆𑀘𑀲𑀢𑀸𑀧𑀺 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀉𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.