𑁧𑁧. 𑀭𑀸𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩𑁮. 𑀓𑀘𑁆𑀘𑀺 𑀅𑀪𑀺𑀡𑁆𑀳𑀲𑀁𑀯𑀸𑀲𑀸𑀢𑀺 𑀭𑀸𑀳𑀼𑀮𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀭𑀸𑀳𑀼𑀮𑀓𑀼𑀫𑀸𑀭𑁂𑀦 ‘‘𑀤𑀸𑀬𑀚𑁆𑀚𑀁 𑀫𑁂 𑀲𑀫𑀡 𑀤𑁂𑀳𑀻’’𑀢𑀺 𑀤𑀸𑀬𑀚𑁆𑀚𑀁 𑀬𑀸𑀘𑀺𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀡𑀸𑀧𑁂𑀲𑀺 𑁋 ‘‘𑀭𑀸𑀳𑀼𑀮𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀢𑀁 𑀲𑀩𑁆𑀩𑀁 𑀔𑀦𑁆𑀥𑀓𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁦𑁫) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀧𑀩𑁆𑀩𑀚𑀺𑀢𑀁 𑀧𑀦 𑀭𑀸𑀳𑀼𑀮𑀓𑀼𑀫𑀸𑀭𑀁 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀯 𑀉𑀧𑀲𑀫𑁆𑀧𑀸𑀤𑁂𑀲𑀺, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀅𑀲𑁆𑀲 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄 𑀅𑀳𑁄𑀲𑀺. 𑀢𑀁 𑀪𑀕𑀯𑀸 ‘‘𑀅𑀬𑀁 𑀓𑀼𑀫𑀸𑀭𑁄 𑀚𑀸𑀢𑀺𑀆𑀤𑀺𑀲𑀫𑁆𑀧𑀦𑁆𑀦𑁄, 𑀲𑁄 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀯𑀸 𑀫𑀤𑀁 𑀯𑀸 𑀫𑀸 𑀅𑀓𑀸𑀲𑀻’’𑀢𑀺 𑀤𑀳𑀭𑀓𑀸𑀮𑀢𑁄 𑀧𑀪𑀼𑀢𑀺 𑀬𑀸𑀯 𑀦 𑀅𑀭𑀺𑀬𑀪𑀽𑀫𑀺𑀁 𑀧𑀸𑀧𑀼𑀡𑀺, 𑀢𑀸𑀯 𑀑𑀯𑀤𑀦𑁆𑀢𑁄 𑀅𑀪𑀺𑀡𑁆𑀳𑀁 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺. 𑀢𑀲𑁆𑀫𑀸 𑀘𑁂𑀢𑀁 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂𑀧𑀺 𑀯𑀼𑀢𑁆𑀢𑀁 ‘‘𑀇𑀢𑁆𑀣𑀁 𑀲𑀼𑀤𑀁 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀡𑁆𑀳𑀁 𑀑𑀯𑀤𑀢𑀻’’𑀢𑀺. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬𑀁 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 ‘‘𑀓𑀘𑁆𑀘𑀺 𑀢𑁆𑀯𑀁, 𑀭𑀸𑀳𑀼𑀮, 𑀅𑀪𑀺𑀡𑁆𑀳𑀁 𑀲𑀁𑀯𑀸𑀲𑀳𑁂𑀢𑀼 𑀚𑀸𑀢𑀺𑀆𑀤𑀻𑀦𑀁 𑀅𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀦 𑀧𑀭𑀺𑀪𑀯𑀲𑀺 𑀧𑀡𑁆𑀟𑀺𑀢𑀁, 𑀜𑀸𑀡𑀧𑀤𑀻𑀧𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀧𑀤𑀻𑀧𑀲𑁆𑀲 𑀘 𑀥𑀸𑀭𑀡𑀢𑁄 𑀉𑀓𑁆𑀓𑀸𑀥𑀸𑀭𑁄 𑀫𑀦𑀼𑀲𑁆𑀲𑀸𑀦𑀁 𑀓𑀘𑁆𑀘𑀺 𑀅𑀧𑀘𑀺𑀢𑁄 𑀢𑀬𑀸, 𑀓𑀘𑁆𑀘𑀺 𑀦𑀺𑀘𑁆𑀘𑀁 𑀧𑀽𑀚𑀺𑀢𑁄 𑀢𑀬𑀸’’𑀢𑀺 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀲𑀦𑁆𑀥𑀸𑀬 𑀪𑀡𑀢𑀺.

𑁩𑁩𑁯. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 ‘‘𑀦𑀸𑀳𑀁 𑀪𑀕𑀯𑀸 𑀦𑀻𑀘𑀧𑀼𑀭𑀺𑀲𑁄 𑀯𑀺𑀬 𑀲𑀁𑀯𑀸𑀲𑀳𑁂𑀢𑀼 𑀫𑀸𑀦𑀁 𑀯𑀸 𑀫𑀤𑀁 𑀯𑀸 𑀓𑀭𑁄𑀫𑀻’’𑀢𑀺 𑀤𑀻𑀧𑁂𑀦𑁆𑀢𑁄 𑀇𑀫𑀁 𑀧𑀝𑀺𑀕𑀸𑀣𑀫𑀸𑀳 ‘‘𑀦𑀸𑀳𑀁 𑀅𑀪𑀺𑀡𑁆𑀳𑀲𑀁𑀯𑀸𑀲𑀸’’𑀢𑀺. 𑀲𑀸 𑀉𑀢𑁆𑀢𑀸𑀦𑀢𑁆𑀣𑀸 𑀏𑀯.

𑁩𑁪𑁦. 𑀢𑀢𑁄 𑀦𑀁 𑀪𑀕𑀯𑀸 𑀉𑀢𑁆𑀢𑀭𑀺𑀁 𑀑𑀯𑀤𑀦𑁆𑀢𑁄 𑀧𑀜𑁆𑀘 𑀓𑀸𑀫𑀕𑀼𑀡𑁂𑀢𑀺𑀆𑀤𑀺𑀓𑀸 𑀅𑀯𑀲𑁂𑀲𑀕𑀸𑀣𑀸𑀬𑁄 𑀆𑀳. 𑀢𑀢𑁆𑀣 𑀬𑀲𑁆𑀫𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀲𑀢𑁆𑀢𑀸𑀦𑀁 𑀧𑀺𑀬𑀭𑀽𑀧𑀸 𑀧𑀺𑀬𑀚𑀸𑀢𑀺𑀓𑀸 𑀅𑀢𑀺𑀯𑀺𑀬 𑀲𑀢𑁆𑀢𑁂𑀳𑀺 𑀇𑀘𑁆𑀙𑀺𑀢𑀸 𑀧𑀢𑁆𑀣𑀺𑀢𑀸, 𑀫𑀦𑁄 𑀘 𑀦𑁂𑀲𑀁 𑀭𑀫𑀬𑀦𑁆𑀢𑀺, 𑀢𑁂 𑀘𑀸𑀬𑀲𑁆𑀫𑀸 𑀭𑀸𑀳𑀼𑀮𑁄 𑀳𑀺𑀢𑁆𑀯𑀸 𑀲𑀤𑁆𑀥𑀸𑀬 𑀖𑀭𑀸 𑀦𑀺𑀓𑁆𑀔𑀦𑁆𑀢𑁄, 𑀦 𑀭𑀸𑀚𑀸𑀪𑀺𑀦𑀻𑀢𑁄, 𑀦 𑀘𑁄𑀭𑀸𑀪𑀺𑀦𑀻𑀢𑁄, 𑀦 𑀇𑀡𑀝𑁆𑀝𑁄, 𑀦 𑀪𑀬𑀝𑁆𑀝𑁄, 𑀦 𑀚𑀻𑀯𑀺𑀓𑀸𑀧𑀓𑀢𑁄, 𑀢𑀲𑁆𑀫𑀸 𑀦𑀁 𑀪𑀕𑀯𑀸 ‘‘𑀧𑀜𑁆𑀘 𑀓𑀸𑀫𑀕𑀼𑀡𑁂 𑀳𑀺𑀢𑁆𑀯𑀸, 𑀧𑀺𑀬𑀭𑀽𑀧𑁂 𑀫𑀦𑁄𑀭𑀫𑁂, 𑀲𑀤𑁆𑀥𑀸𑀬 𑀖𑀭𑀸 𑀦𑀺𑀓𑁆𑀔𑀫𑁆𑀫𑀸’’𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀇𑀫𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑁆𑀲 𑀧𑀢𑀺𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀬𑁄𑀚𑁂𑀦𑁆𑀢𑁄 𑀆𑀳 𑁋 ‘‘𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀪𑀯𑀸’’𑀢𑀺.

𑀢𑀢𑁆𑀣 𑀲𑀺𑀬𑀸 ‘‘𑀦𑀦𑀼 𑀘𑀸𑀬𑀲𑁆𑀫𑀸 𑀤𑀸𑀬𑀚𑁆𑀚𑀁 𑀧𑀢𑁆𑀣𑁂𑀦𑁆𑀢𑁄 𑀩𑀮𑀓𑁆𑀓𑀸𑀭𑁂𑀦 𑀧𑀩𑁆𑀩𑀸𑀚𑀺𑀢𑁄, 𑀅𑀣 𑀓𑀲𑁆𑀫𑀸 𑀪𑀕𑀯𑀸 𑀆𑀳 𑁋 ‘𑀲𑀤𑁆𑀥𑀸𑀬 𑀖𑀭𑀸 𑀦𑀺𑀓𑁆𑀔𑀫𑁆𑀫𑀸’’’𑀢𑀺 𑀯𑀼𑀘𑁆𑀘𑀢𑁂 𑁋 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑀢𑁆𑀢𑀸. 𑀅𑀬𑀜𑁆𑀳𑀺 𑀆𑀬𑀲𑁆𑀫𑀸 𑀤𑀻𑀖𑀭𑀢𑁆𑀢𑀁 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑀁 𑀉𑀧𑀭𑁂𑀯𑀢𑀁 𑀦𑀸𑀫 𑀲𑀸𑀫𑀡𑁂𑀭𑀁 𑀤𑀺𑀲𑁆𑀯𑀸 𑀲𑀗𑁆𑀔𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑁂 𑀤𑀸𑀦𑀁 𑀤𑀢𑁆𑀯𑀸 𑀢𑀣𑀸𑀪𑀸𑀯𑀁 𑀧𑀢𑁆𑀣𑁂𑀢𑁆𑀯𑀸 𑀢𑀢𑁄 𑀧𑀪𑀼𑀢𑀺 𑀧𑀢𑁆𑀣𑀦𑀸𑀲𑀫𑁆𑀧𑀦𑁆𑀦𑁄 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑁂 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀦𑁆𑀢𑀺𑀫𑀪𑀯𑀁 𑀉𑀧𑀧𑀦𑁆𑀦𑁄. 𑀏𑀯𑀁 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑀢𑀜𑁆𑀘𑀲𑁆𑀲 𑀪𑀕𑀯𑀸 𑀚𑀸𑀦𑀸𑀢𑀺. 𑀢𑀣𑀸𑀕𑀢𑀩𑀮𑀜𑁆𑀜𑀢𑀭𑀜𑁆𑀳𑀺 𑀏𑀢𑀁 𑀜𑀸𑀡𑀁. 𑀢𑀲𑁆𑀫𑀸 𑀆𑀳 𑁋 ‘‘𑀲𑀤𑁆𑀥𑀸𑀬 𑀖𑀭𑀸 𑀦𑀺𑀓𑁆𑀔𑀫𑁆𑀫𑀸’’𑀢𑀺. 𑀅𑀣 𑀯𑀸 𑀤𑀻𑀖𑀭𑀢𑁆𑀢𑀁 𑀲𑀤𑁆𑀥𑀸𑀬𑁂𑀯 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀇𑀤𑀸𑀦𑀺 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀪𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑁩𑁪𑁧. 𑀇𑀤𑀸𑀦𑀺𑀲𑁆𑀲 𑀆𑀤𑀺𑀢𑁄 𑀧𑀪𑀼𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀺𑀢𑁆𑀢𑁂 𑀪𑀚𑀲𑁆𑀲𑀼 𑀓𑀮𑁆𑀬𑀸𑀡𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀮𑀸𑀤𑀻𑀳𑀺 𑀅𑀥𑀺𑀓𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀦𑀸𑀫, 𑀢𑁂 𑀪𑀚𑀦𑁆𑀢𑁄 𑀳𑀺𑀫𑀯𑀦𑁆𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀲𑀸𑀮𑀸 𑀫𑀽𑀮𑀸𑀤𑀻𑀳𑀺 𑀯𑀺𑀬 𑀲𑀻𑀮𑀸𑀤𑀻𑀳𑀺 𑀯𑀟𑁆𑀠𑀢𑀺. 𑀢𑁂𑀦𑀸𑀳 𑁋 ‘‘𑀫𑀺𑀢𑁆𑀢𑁂 𑀪𑀚𑀲𑁆𑀲𑀼 𑀓𑀮𑁆𑀬𑀸𑀡𑁂’’𑀢𑀺. 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁, 𑀯𑀺𑀯𑀺𑀢𑁆𑀢𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀬𑀜𑁆𑀘 𑀲𑀬𑀦𑀸𑀲𑀦𑀁 𑀧𑀦𑁆𑀢𑀁 𑀤𑀽𑀭𑀁 𑀯𑀺𑀯𑀺𑀢𑁆𑀢𑀁 𑀅𑀧𑁆𑀧𑀸𑀓𑀺𑀡𑁆𑀡𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀬𑀢𑁆𑀣 𑀫𑀺𑀕𑀲𑀽𑀓𑀭𑀸𑀤𑀺𑀲𑀤𑁆𑀤𑁂𑀦 𑀅𑀭𑀜𑁆𑀜𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸𑀭𑀽𑀧𑀁 𑀲𑀬𑀦𑀸𑀲𑀦𑀜𑁆𑀘 𑀪𑀚𑀲𑁆𑀲𑀼. 𑀫𑀢𑁆𑀢𑀜𑁆𑀜𑀽 𑀳𑁄𑀳𑀺 𑀪𑁄𑀚𑀦𑁂𑀢𑀺 𑀧𑀫𑀸𑀡𑀜𑁆𑀜𑀽 𑀳𑁄𑀳𑀺, 𑀧𑀝𑀺𑀕𑁆𑀕𑀳𑀡𑀫𑀢𑁆𑀢𑀁 𑀧𑀭𑀺𑀪𑁄𑀕𑀫𑀢𑁆𑀢𑀜𑁆𑀘 𑀚𑀸𑀦𑀸𑀳𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀝𑀺𑀕𑁆𑀕𑀳𑀡𑀫𑀢𑁆𑀢𑀜𑁆𑀜𑀼𑀦𑀸 𑀤𑁂𑀬𑁆𑀬𑀥𑀫𑁆𑀫𑁂𑀧𑀺 𑀅𑀧𑁆𑀧𑁂 𑀤𑀸𑀬𑀓𑁂𑀧𑀺 𑀅𑀧𑁆𑀧𑀁 𑀤𑀸𑀢𑀼𑀓𑀸𑀫𑁂 𑀅𑀧𑁆𑀧𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀤𑁂𑀬𑁆𑀬𑀥𑀫𑁆𑀫𑁂 𑀅𑀧𑁆𑀧𑁂 𑀤𑀸𑀬𑀓𑁂 𑀧𑀦 𑀩𑀳𑀼𑀁 𑀤𑀸𑀢𑀼𑀓𑀸𑀫𑁂𑀧𑀺 𑀅𑀧𑁆𑀧𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀤𑁂𑀬𑁆𑀬𑀥𑀫𑁆𑀫𑁂 𑀧𑀦 𑀩𑀳𑀼𑀢𑀭𑁂 𑀤𑀸𑀬𑀓𑁂𑀧𑀺 𑀅𑀧𑁆𑀧𑀁 𑀤𑀸𑀢𑀼𑀓𑀸𑀫𑁂 𑀅𑀧𑁆𑀧𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀤𑁂𑀬𑁆𑀬𑀥𑀫𑁆𑀫𑁂𑀧𑀺 𑀩𑀳𑀼𑀢𑀭𑁂 𑀤𑀸𑀬𑀓𑁂𑀧𑀺 𑀩𑀳𑀼𑀁 𑀤𑀸𑀢𑀼𑀓𑀸𑀫𑁂 𑀅𑀢𑁆𑀢𑀦𑁄 𑀩𑀮𑀁 𑀚𑀸𑀦𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀅𑀧𑀺𑀘 𑀫𑀢𑁆𑀢𑀸𑀬𑁂𑀯 𑀯𑀡𑁆𑀡𑀺𑀢𑀸 𑀪𑀕𑀯𑀢𑀸𑀢𑀺 𑀧𑀭𑀺𑀪𑁄𑀕𑀫𑀢𑁆𑀢𑀜𑁆𑀜𑀼𑀦𑀸 𑀧𑀼𑀢𑁆𑀢𑀫𑀁𑀲𑀁 𑀯𑀺𑀬 𑀅𑀓𑁆𑀔𑀩𑁆𑀪𑀜𑁆𑀚𑀦𑀫𑀺𑀯 𑀘 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀪𑁄𑀚𑀦𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺.

𑁩𑁪𑁨. 𑀏𑀯𑀫𑀺𑀫𑀸𑀬 𑀕𑀸𑀣𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀉𑀧𑀓𑀸𑀭𑀪𑀽𑀢𑀸𑀬 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁂𑀯𑀦𑀸𑀬 𑀦𑀺𑀬𑁄𑀚𑁂𑀢𑁆𑀯𑀸 𑀲𑁂𑀦𑀸𑀲𑀦𑀪𑁄𑀚𑀦𑀫𑀼𑀔𑁂𑀦 𑀘 𑀧𑀘𑁆𑀘𑀬𑀧𑀭𑀺𑀪𑁄𑀕𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀲𑀫𑀸𑀤𑀧𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀘𑀻𑀯𑀭𑀸𑀤𑀻𑀲𑀼 𑀢𑀡𑁆𑀳𑀸𑀬 𑀫𑀺𑀘𑁆𑀙𑀸𑀆𑀚𑀻𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀧𑀝𑀺𑀲𑁂𑀥𑁂𑀢𑁆𑀯𑀸 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀲𑀫𑀸𑀤𑀧𑁂𑀦𑁆𑀢𑁄 ‘‘𑀘𑀻𑀯𑀭𑁂 𑀧𑀺𑀡𑁆𑀟𑀧𑀸𑀢𑁂 𑀘𑀸’’𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀘𑁆𑀘𑀬𑁂𑀢𑀺 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑁂. 𑀏𑀢𑁂𑀲𑀽𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀘𑀻𑀯𑀭𑀸𑀤𑀻𑀲𑀼 𑀪𑀺𑀓𑁆𑀔𑀽𑀦𑀁 𑀢𑀡𑁆𑀳𑀼𑀧𑁆𑀧𑀸𑀤𑀯𑀢𑁆𑀣𑀽𑀲𑀼. 𑀢𑀡𑁆𑀳𑀁 𑀫𑀸𑀓𑀸𑀲𑀻𑀢𑀺 ‘‘𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀸𑀤𑀺𑀅𑀢𑁆𑀣𑀫𑁂𑀯 𑀢𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀦𑀺𑀘𑁆𑀘𑀸𑀢𑀼𑀭𑀸𑀦𑀁 𑀧𑀼𑀭𑀺𑀲𑀸𑀦𑀁 𑀧𑀝𑀺𑀓𑀸𑀭𑀪𑀽𑀢𑀸 𑀚𑀚𑁆𑀚𑀭𑀖𑀭𑀲𑁆𑀲𑁂𑀯𑀺𑀫𑀲𑁆𑀲 𑀅𑀢𑀺𑀤𑀼𑀩𑁆𑀩𑀮𑀲𑁆𑀲 𑀓𑀸𑀬𑀲𑁆𑀲 𑀉𑀧𑀢𑁆𑀣𑀫𑁆𑀪𑀪𑀽𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀤𑀻𑀦𑀯𑀁 𑀧𑀲𑁆𑀲𑀦𑁆𑀢𑁄 𑀢𑀡𑁆𑀳𑀁 𑀫𑀸 𑀚𑀦𑁂𑀲𑀺, 𑀅𑀚𑀦𑁂𑀦𑁆𑀢𑁄 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀯𑀺𑀳𑀭𑀸𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁 𑀓𑀸𑀭𑀡𑀁? 𑀫𑀸 𑀮𑁄𑀓𑀁 𑀧𑀼𑀦𑀭𑀸𑀕𑀫𑀺. 𑀏𑀢𑁂𑀲𑀼 𑀳𑀺 𑀢𑀡𑁆𑀳𑀁 𑀓𑀭𑁄𑀦𑁆𑀢𑁄 𑀢𑀡𑁆𑀳𑀸𑀬 𑀆𑀓𑀟𑁆𑀠𑀺𑀬𑀫𑀸𑀦𑁄 𑀧𑀼𑀦𑀧𑀺 𑀇𑀫𑀁 𑀮𑁄𑀓𑀁 𑀆𑀕𑀘𑁆𑀙𑀢𑀺. 𑀲𑁄 𑀢𑁆𑀯𑀁 𑀏𑀢𑁂𑀲𑀼 𑀢𑀡𑁆𑀳𑀁 𑀫𑀸𑀓𑀸𑀲𑀺, 𑀏𑀯𑀁 𑀲𑀦𑁆𑀢𑁂 𑀦 𑀧𑀼𑀦 𑀇𑀫𑀁 𑀮𑁄𑀓𑀁 𑀆𑀕𑀫𑀺𑀲𑁆𑀲𑀲𑀻𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 ‘‘𑀘𑀻𑀯𑀭𑁂 𑀢𑀡𑁆𑀳𑀁 𑀫𑀸𑀓𑀸𑀲𑀻𑀢𑀺 𑀫𑀁 𑀪𑀕𑀯𑀸 𑀆𑀳𑀸’’𑀢𑀺 𑀘𑀻𑀯𑀭𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀤𑁆𑀯𑁂 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀜𑁆𑀘, 𑀢𑁂𑀘𑀻𑀯𑀭𑀺𑀓𑀗𑁆𑀕𑀜𑁆𑀘. ‘‘𑀧𑀺𑀡𑁆𑀟𑀧𑀸𑀢𑁂 𑀢𑀡𑁆𑀳𑀁 𑀫𑀸𑀓𑀸𑀲𑀻𑀢𑀺 𑀫𑀁 𑀪𑀕𑀯𑀸 𑀆𑀳𑀸’’𑀢𑀺 𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀧𑀜𑁆𑀘 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺 𑁋 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁, 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁, 𑀏𑀓𑀸𑀲𑀦𑀺𑀓𑀗𑁆𑀕𑀁, 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀁, 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀦𑁆𑀢𑀺. ‘‘𑀲𑁂𑀦𑀸𑀲𑀦𑁂 𑀢𑀡𑁆𑀳𑀁 𑀫𑀸𑀓𑀸𑀲𑀻𑀢𑀺 𑀫𑀁 𑀪𑀕𑀯𑀸 𑀆𑀳𑀸’’𑀢𑀺 𑀲𑁂𑀦𑀸𑀲𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀙 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺 𑁋 𑀆𑀭𑀜𑁆𑀜𑀺𑀓𑀗𑁆𑀕𑀁, 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀁, 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀁, 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀁, 𑀲𑁄𑀲𑀸𑀦𑀺𑀓𑀗𑁆𑀕𑀁, 𑀦𑁂𑀲𑀚𑁆𑀚𑀺𑀓𑀗𑁆𑀕𑀦𑁆𑀢𑀺. ‘‘𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑁂 𑀢𑀡𑁆𑀳𑀁 𑀫𑀸𑀓𑀸𑀲𑀻𑀢𑀺 𑀫𑀁 𑀪𑀕𑀯𑀸 𑀆𑀳𑀸’’𑀢𑀺 𑀲𑀩𑁆𑀩𑀧𑁆𑀧𑀘𑁆𑀘𑀬𑁂𑀲𑀼 𑀬𑀣𑀸𑀮𑀸𑀪𑀁 𑀬𑀣𑀸𑀩𑀮𑀁 𑀬𑀣𑀸𑀲𑀸𑀭𑀼𑀧𑁆𑀧𑀦𑁆𑀢𑀺 𑀢𑀻𑀳𑀺 𑀲𑀦𑁆𑀢𑁄𑀲𑁂𑀳𑀺 𑀲𑀦𑁆𑀢𑀼𑀝𑁆𑀞𑁄 𑀅𑀳𑁄𑀲𑀺, 𑀬𑀣𑀸 𑀢𑀁 𑀲𑀼𑀩𑁆𑀩𑀘𑁄 𑀓𑀼𑀮𑀧𑀼𑀢𑁆𑀢𑁄 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻 𑀅𑀦𑀼𑀲𑀸𑀲𑀦𑀺𑀦𑁆𑀢𑀺.

𑁩𑁪𑁩. 𑀏𑀯𑀁 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀲𑀫𑀸𑀤𑀧𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀲𑁂𑀲𑀲𑀻𑀮𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀘 𑀲𑀫𑀸𑀤𑀧𑁂𑀢𑀼𑀁 ‘‘𑀲𑀁𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑁆𑀫𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀁𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑁆𑀫𑀺𑀦𑁆𑀢𑀺 𑀏𑀢𑁆𑀣 𑀪𑀯𑀲𑁆𑀲𑀽𑀢𑀺 𑀧𑀸𑀞𑀲𑁂𑀲𑁄. 𑀪𑀯𑀸𑀢𑀺 𑀅𑀦𑁆𑀢𑀺𑀫𑀧𑀤𑁂𑀦 𑀯𑀸 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀣𑀸 𑀤𑀼𑀢𑀺𑀬𑀧𑀤𑁂. 𑀏𑀯𑀫𑁂𑀢𑁂𑀳𑀺 𑀤𑁆𑀯𑀻𑀳𑀺 𑀯𑀘𑀦𑁂𑀳𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑁂 𑀘 𑀲𑀫𑀸𑀤𑀧𑁂𑀲𑀺. 𑀧𑀸𑀓𑀝𑀯𑀲𑁂𑀦 𑀘𑁂𑀢𑁆𑀣 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀮𑀓𑁆𑀔𑀡𑀢𑁄 𑀧𑀦 𑀙𑀝𑁆𑀞𑀫𑁆𑀧𑀺 𑀯𑀼𑀢𑁆𑀢𑀁𑀬𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀢𑀺 𑀓𑀸𑀬𑀕𑀢𑀸 𑀢𑁆𑀬𑀢𑁆𑀣𑀽𑀢𑀺 𑀏𑀯𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀢𑀼𑀬𑁆𑀳𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀘𑀢𑀼𑀩𑁆𑀩𑀺𑀥𑀲𑀫𑁆𑀧𑀚𑀜𑁆𑀜𑀸𑀦𑀸𑀧𑀸𑀦𑀲𑁆𑀲𑀢𑀺𑀆𑀳𑀸𑀭𑁂𑀧𑀝𑀺𑀓𑀽𑀮𑀲𑀜𑁆𑀜𑀸𑀪𑀸𑀯𑀦𑀸𑀤𑀺𑀪𑁂𑀤𑀸 𑀓𑀸𑀬𑀕𑀢𑀸 𑀲𑀢𑀺 𑀅𑀢𑁆𑀣𑀼 𑀪𑀯𑀢𑀼, 𑀪𑀸𑀯𑁂𑀳𑀺 𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀺𑀤𑀸𑀩𑀳𑀼𑀮𑁄 𑀪𑀯𑀸𑀢𑀺 𑀲𑀁𑀲𑀸𑀭𑀯𑀝𑁆𑀝𑁂 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀻 𑀳𑁄𑀳𑀻𑀢𑀺 𑀅𑀢𑁆𑀣𑁄.

𑁩𑁪𑁪. 𑀏𑀢𑁆𑀢𑀸𑀯𑀢𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀉𑀧𑀘𑀸𑀭𑀪𑀽𑀫𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀧𑁆𑀧𑀦𑀸𑀪𑀽𑀫𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀫𑀺𑀢𑁆𑀢𑀁 𑀧𑀭𑀺𑀯𑀚𑁆𑀚𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀦𑁆𑀢𑀺 𑀭𑀸𑀕𑀝𑁆𑀞𑀸𑀦𑀺𑀬𑀁 𑀲𑀼𑀪𑀦𑀺𑀫𑀺𑀢𑁆𑀢𑀁. 𑀢𑁂𑀦𑁂𑀯 𑀦𑀁 𑀧𑀭𑀢𑁄 𑀯𑀺𑀲𑁂𑀲𑁂𑀦𑁆𑀢𑁄 𑀆𑀳 𑁋 ‘‘𑀲𑀼𑀪𑀁 𑀭𑀸𑀕𑀽𑀧𑀲𑀜𑁆𑀳𑀺𑀢’’𑀦𑁆𑀢𑀺. 𑀧𑀭𑀺𑀯𑀚𑁆𑀚𑁂𑀳𑀻𑀢𑀺 𑀅𑀫𑀦𑀲𑀺𑀓𑀸𑀭𑁂𑀦 𑀧𑀭𑀺𑀘𑁆𑀘𑀚𑀸𑀳𑀺. 𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀻𑀢𑀺 𑀬𑀣𑀸 𑀲𑀯𑀺𑀜𑁆𑀜𑀸𑀡𑀓𑁂 𑀅𑀯𑀺𑀜𑁆𑀜𑀸𑀡𑀓𑁂 𑀯𑀸 𑀓𑀸𑀬𑁂 𑀅𑀲𑀼𑀪𑀪𑀸𑀯𑀦𑀸 𑀲𑀫𑁆𑀧𑀚𑁆𑀚𑀢𑀺, 𑀏𑀯𑀁 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺. 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀦𑁆𑀢𑀺 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀏𑀓𑀕𑁆𑀕𑀁, 𑀅𑀧𑁆𑀧𑀦𑀸𑀲𑀫𑀸𑀥𑀺𑀦𑀸 𑀲𑀼𑀲𑀫𑀸𑀳𑀺𑀢𑀁. 𑀬𑀣𑀸 𑀢𑁂 𑀈𑀤𑀺𑀲𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀣𑀸 𑀦𑀁 𑀪𑀸𑀯𑁂𑀳𑀻𑀢𑀺 𑀅𑀢𑁆𑀣𑁄.

𑁩𑁪𑁫. 𑀏𑀯𑀫𑀲𑁆𑀲 𑀅𑀧𑁆𑀧𑀦𑀸𑀪𑀽𑀫𑀺𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀻𑀢𑀺 𑀏𑀯𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂𑀦 𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑁄 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀧𑀲𑁆𑀲𑀦𑀸 𑀳𑀺 ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀢𑁄 𑀯𑀺𑀫𑀼𑀘𑁆𑀘𑀢𑀻𑀢𑀺 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀭𑀸𑀕𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀯𑀸 𑀅𑀕𑁆𑀕𑀳𑀡𑁂𑀦 𑀅𑀦𑀺𑀫𑀺𑀢𑁆𑀢𑀯𑁄𑀳𑀸𑀭𑀁 𑀮𑀪𑀢𑀺. 𑀬𑀣𑀸𑀳 𑁋

‘‘𑀲𑁄 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀢𑀲𑁆𑀲 𑀫𑀬𑁆𑀳𑀁, 𑀆𑀯𑀼𑀲𑁄, 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑁄 𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁪.𑁩𑁪𑁦).

𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳𑀸𑀢𑀺 𑀇𑀫𑀸𑀬 𑀅𑀦𑀺𑀫𑀺𑀢𑁆𑀢𑀪𑀸𑀯𑀦𑀸𑀬 𑀅𑀦𑀺𑀘𑁆𑀘𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 ‘‘𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄, 𑀫𑁂𑀖𑀺𑀬, 𑀅𑀦𑀢𑁆𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀺, 𑀅𑀦𑀢𑁆𑀢𑀲𑀜𑁆𑀜𑀻 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 (𑀅. 𑀦𑀺. 𑁯.𑁩; 𑀉𑀤𑀸. 𑁩𑁧) 𑀅𑀦𑀼𑀓𑁆𑀓𑀫𑁂𑀦 𑀫𑀸𑀦𑀸𑀦𑀼𑀲𑀬𑀁 𑀉𑀚𑁆𑀚𑀳 𑀧𑀚𑀳 𑀧𑀭𑀺𑀘𑁆𑀘𑀚𑀸𑀳𑀻𑀢𑀺 𑀅𑀢𑁆𑀣𑁄. 𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻𑀢𑀺 𑀅𑀣𑁂𑀯𑀁 𑀅𑀭𑀺𑀬𑀫𑀕𑁆𑀕𑁂𑀦 𑀫𑀸𑀦𑀲𑁆𑀲 𑀅𑀪𑀺𑀲𑀫𑀬𑀸 𑀔𑀬𑀸 𑀯𑀬𑀸 𑀧𑀳𑀸𑀦𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀉𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀩𑁆𑀩𑀤𑀭𑀣𑀧𑀭𑀺𑀴𑀸𑀳𑀯𑀺𑀭𑀳𑀺𑀢𑁄 𑀬𑀸𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀲𑀺, 𑀢𑀸𑀯 𑀲𑀼𑀜𑁆𑀜𑀢𑀸𑀦𑀺𑀫𑀺𑀢𑁆𑀢𑀸𑀧𑁆𑀧𑀡𑀺𑀳𑀺𑀢𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀦 𑀘𑀭𑀺𑀲𑁆𑀲𑀲𑀺 𑀯𑀺𑀳𑀭𑀺𑀲𑁆𑀲𑀲𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀢𑀢𑁄 𑀧𑀭𑀁 ‘‘𑀇𑀢𑁆𑀣𑀁 𑀲𑀼𑀤𑀁 𑀪𑀕𑀯𑀸’’𑀢𑀺𑀆𑀤𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑀸𑀦𑀁 𑀯𑀘𑀦𑀁. 𑀢𑀢𑁆𑀣 𑀇𑀢𑁆𑀣𑀁 𑀲𑀼𑀤𑀦𑁆𑀢𑀺 𑀇𑀢𑁆𑀣𑀁 𑀲𑀼 𑀇𑀤𑀁, 𑀏𑀯𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀏𑀯𑀁 𑀑𑀯𑀤𑀺𑀬𑀫𑀸𑀦𑁄 𑀘𑀸𑀬𑀲𑁆𑀫𑀸 𑀭𑀸𑀳𑀼𑀮𑁄 𑀧𑀭𑀺𑀧𑀸𑀓𑀕𑀢𑁂𑀲𑀼 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀅𑀦𑁂𑀓𑁂𑀳𑀺 𑀤𑁂𑀯𑀢𑀸𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀭𑀸𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.