𑁧𑁨. 𑀦𑀺𑀕𑁆𑀭𑁄𑀥𑀓𑀧𑁆𑀧𑀲𑀼𑀢𑁆𑀢-(𑀯𑀗𑁆𑀕𑀻𑀲𑀲𑀼𑀢𑁆𑀢)-𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀦𑀺𑀕𑁆𑀭𑁄𑀥𑀓𑀧𑁆𑀧𑀲𑀼𑀢𑁆𑀢𑀁, ‘‘𑀯𑀗𑁆𑀕𑀻𑀲𑀲𑀼𑀢𑁆𑀢’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁂𑀯 𑀬𑀸𑀲𑁆𑀲 𑀦𑀺𑀤𑀸𑀦𑁂 𑀯𑀼𑀢𑁆𑀢𑀸. 𑀢𑀢𑁆𑀣 𑀏𑀯𑀁 𑀫𑁂𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯, 𑀬𑀢𑁄 𑀢𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀢𑀣𑀸𑀯𑀺𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀅𑀯𑀼𑀢𑁆𑀢𑀦𑀬𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂𑀢𑀺 𑀆𑀴𑀯𑀺𑀬𑀁 𑀅𑀕𑁆𑀕𑀘𑁂𑀢𑀺𑀬𑁂. 𑀅𑀦𑀼𑀧𑁆𑀧𑀦𑁆𑀦𑁂 𑀳𑀺 𑀪𑀕𑀯𑀢𑀺 𑀅𑀕𑁆𑀕𑀸𑀴𑀯𑀕𑁄𑀢𑀫𑀓𑀸𑀤𑀻𑀦𑀺 𑀅𑀦𑁂𑀓𑀸𑀦𑀺 𑀘𑁂𑀢𑀺𑀬𑀸𑀦𑀺 𑀅𑀳𑁂𑀲𑀼𑀁 𑀬𑀓𑁆𑀔𑀦𑀸𑀕𑀸𑀤𑀻𑀦𑀁 𑀪𑀯𑀦𑀸𑀦𑀺. 𑀢𑀸𑀦𑀺 𑀉𑀧𑁆𑀧𑀦𑁆𑀦𑁂 𑀪𑀕𑀯𑀢𑀺 𑀫𑀦𑀼𑀲𑁆𑀲𑀸 𑀯𑀺𑀦𑀸𑀲𑁂𑀢𑁆𑀯𑀸 𑀯𑀺𑀳𑀸𑀭𑁂 𑀅𑀓𑀁𑀲𑀼, 𑀢𑁂𑀦𑁂𑀯 𑀘 𑀦𑀸𑀫𑁂𑀦 𑀯𑁄𑀳𑀭𑀺𑀁𑀲𑀼. 𑀢𑀢𑁄 𑀅𑀕𑁆𑀕𑀸𑀴𑀯𑀘𑁂𑀢𑀺𑀬𑀲𑀗𑁆𑀔𑀸𑀢𑁂 𑀯𑀺𑀳𑀸𑀭𑁂 𑀯𑀺𑀳𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲𑀸𑀢𑀺 𑀏𑀢𑁆𑀣 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁, 𑀯𑀗𑁆𑀕𑀻𑀲𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀲𑁄 𑀚𑀸𑀢𑀺𑀢𑁄 𑀧𑀪𑀼𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁄 𑀓𑀺𑀭 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀧𑀼𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑁄 𑀅𑀜𑁆𑀜𑀢𑀭𑀁 𑀯𑀺𑀚𑁆𑀚𑀁 𑀚𑀸𑀦𑀸𑀢𑀺, 𑀬𑀲𑁆𑀲𑀸𑀦𑀼𑀪𑀸𑀯𑁂𑀦 𑀙𑀯𑀲𑀻𑀲𑀁 𑀆𑀓𑁄𑀝𑁂𑀢𑁆𑀯𑀸 𑀲𑀢𑁆𑀢𑀸𑀦𑀁 𑀕𑀢𑀺𑀁 𑀚𑀸𑀦𑀸𑀢𑀺. 𑀫𑀦𑀼𑀲𑁆𑀲𑀸𑀧𑀺 𑀲𑀼𑀤𑀁 𑀅𑀢𑁆𑀢𑀦𑁄 𑀜𑀸𑀢𑀻𑀦𑀁 𑀓𑀸𑀮𑀓𑀢𑀸𑀦𑀁 𑀲𑀼𑀲𑀸𑀦𑀢𑁄 𑀲𑀻𑀲𑀸𑀦𑀺 𑀆𑀦𑁂𑀢𑁆𑀯𑀸 𑀢𑀁 𑀢𑁂𑀲𑀁 𑀕𑀢𑀺𑀁 𑀧𑀼𑀘𑁆𑀙𑀦𑁆𑀢𑀺. 𑀲𑁄 ‘‘𑀅𑀲𑀼𑀓𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄, 𑀅𑀲𑀼𑀓𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺 𑀯𑀤𑀢𑀺. 𑀢𑁂 𑀢𑁂𑀦 𑀯𑀺𑀫𑁆𑀳𑀺𑀢𑀸 𑀢𑀲𑁆𑀲 𑀩𑀳𑀼𑀁 𑀥𑀦𑀁 𑀤𑁂𑀦𑁆𑀢𑀺. 𑀏𑀯𑀁 𑀲𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀅𑀳𑁄𑀲𑀺.

𑀲𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑀁 𑀧𑀽𑀭𑀺𑀢𑀧𑀸𑀭𑀫𑀻 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀧𑀜𑁆𑀘𑀳𑀺 𑀧𑀼𑀭𑀺𑀲𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀚𑀦𑀧𑀤𑀭𑀸𑀚𑀥𑀸𑀦𑀻𑀲𑀼 𑀯𑀺𑀘𑀭𑀦𑁆𑀢𑁄 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀲𑀼𑀦𑀺𑀯𑀢𑁆𑀣𑀸 𑀲𑀼𑀧𑀸𑀭𑀼𑀢𑀸 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀚𑁂𑀢𑀯𑀦𑀁 𑀕𑀘𑁆𑀙𑀦𑁆𑀢𑀺. 𑀲𑁄 𑀢𑁂 𑀤𑀺𑀲𑁆𑀯𑀸 ‘‘𑀫𑀳𑀸𑀚𑀦𑀓𑀸𑀬𑁄 𑀓𑀼𑀳𑀺𑀁 𑀕𑀘𑁆𑀙𑀢𑀻’’𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀢𑁂 𑀆𑀘𑀺𑀓𑁆𑀔𑀺𑀁𑀲𑀼 𑁋 ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀲𑁄 𑀩𑀳𑀼𑀚𑀦𑀳𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺. 𑀲𑁄𑀧𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀧𑀭𑀺𑀯𑀸𑀭𑁄 𑀕𑀦𑁆𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀪𑀕𑀯𑀸 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁, 𑀯𑀗𑁆𑀕𑀻𑀲, 𑀚𑀸𑀦𑀸𑀲𑀺 𑀓𑀺𑀭 𑀢𑀸𑀤𑀺𑀲𑀁 𑀯𑀺𑀚𑁆𑀚𑀁, 𑀬𑀸𑀬 𑀲𑀢𑁆𑀢𑀸𑀦𑀁 𑀙𑀯𑀲𑀻𑀲𑀸𑀦𑀺 𑀆𑀓𑁄𑀝𑁂𑀢𑁆𑀯𑀸 𑀕𑀢𑀺𑀁 𑀧𑀯𑁂𑀤𑁂𑀲𑀻’’𑀢𑀺? ‘‘𑀏𑀯𑀁, 𑀪𑁄 𑀕𑁄𑀢𑀫, 𑀚𑀸𑀦𑀸𑀫𑀻’’𑀢𑀺. 𑀪𑀕𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀲𑀻𑀲𑀁 𑀆𑀳𑀭𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀲𑀺, 𑀲𑁄 𑀦𑀔𑁂𑀦 𑀆𑀓𑁄𑀝𑁂𑀢𑁆𑀯𑀸 ‘‘𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀲𑀻𑀲𑀁 𑀪𑁄 𑀕𑁄𑀢𑀫𑀸’’𑀢𑀺 𑀆𑀳. 𑀏𑀯𑀁 𑀲𑀩𑁆𑀩𑀕𑀢𑀺𑀦𑀺𑀩𑁆𑀩𑀢𑁆𑀢𑀸𑀦𑀁 𑀲𑀻𑀲𑀸𑀦𑀺 𑀤𑀲𑁆𑀲𑁂𑀲𑀺, 𑀲𑁄𑀧𑀺 𑀢𑀣𑁂𑀯 𑀜𑀢𑁆𑀯𑀸 𑀆𑀭𑁄𑀘𑁂𑀲𑀺. 𑀅𑀣𑀲𑁆𑀲 𑀪𑀕𑀯𑀸 𑀔𑀻𑀡𑀸𑀲𑀯𑀲𑀻𑀲𑀁 𑀤𑀲𑁆𑀲𑁂𑀲𑀺, 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀆𑀓𑁄𑀝𑁂𑀢𑁆𑀯𑀸 𑀦 𑀅𑀜𑁆𑀜𑀸𑀲𑀺. 𑀢𑀢𑁄 𑀪𑀕𑀯𑀸 ‘‘𑀅𑀯𑀺𑀲𑀬𑁄 𑀢𑁂 𑀏𑀢𑁆𑀣 𑀯𑀗𑁆𑀕𑀻𑀲, 𑀫𑀫𑁂𑀯𑁂𑀲𑁄 𑀯𑀺𑀲𑀬𑁄, 𑀔𑀻𑀡𑀸𑀲𑀯𑀲𑀻𑀲’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀪𑀸𑀲𑀺 𑁋

‘‘𑀕𑀢𑀻 𑀫𑀺𑀕𑀸𑀦𑀁 𑀧𑀯𑀦𑀁, 𑀆𑀓𑀸𑀲𑁄 𑀧𑀓𑁆𑀔𑀺𑀦𑀁 𑀕𑀢𑀺;

𑀯𑀺𑀪𑀯𑁄 𑀕𑀢𑀺 𑀥𑀫𑁆𑀫𑀸𑀦𑀁, 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻’’𑀢𑀺. (𑀧𑀭𑀺. 𑁩𑁩𑁯);

𑀯𑀗𑁆𑀕𑀻𑀲𑁄 𑀕𑀸𑀣𑀁 𑀲𑀼𑀢𑁆𑀯𑀸 ‘‘𑀇𑀫𑀁 𑀫𑁂, 𑀪𑁄 𑀕𑁄𑀢𑀫, 𑀯𑀺𑀚𑁆𑀚𑀁 𑀤𑁂𑀳𑀻’’𑀢𑀺 𑀆𑀳. 𑀪𑀕𑀯𑀸 ‘‘𑀦𑀸𑀬𑀁 𑀯𑀺𑀚𑁆𑀚𑀸 𑀅𑀧𑀩𑁆𑀩𑀚𑀺𑀢𑀸𑀦𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺 𑀆𑀳. 𑀲𑁄 ‘‘𑀧𑀩𑁆𑀩𑀸𑀚𑁂𑀢𑁆𑀯𑀸 𑀯𑀸 𑀫𑀁, 𑀪𑁄 𑀕𑁄𑀢𑀫, 𑀬𑀁 𑀯𑀸 𑀇𑀘𑁆𑀙𑀲𑀺, 𑀢𑀁 𑀓𑀢𑁆𑀯𑀸 𑀇𑀫𑀁 𑀯𑀺𑀚𑁆𑀚𑀁 𑀤𑁂𑀳𑀻’’𑀢𑀺 𑀆𑀳. 𑀢𑀤𑀸 𑀘 𑀪𑀕𑀯𑀢𑁄 𑀦𑀺𑀕𑁆𑀭𑁄𑀥𑀓𑀧𑁆𑀧𑀢𑁆𑀣𑁂𑀭𑁄 𑀲𑀫𑀻𑀧𑁂 𑀳𑁄𑀢𑀺, 𑀢𑀁 𑀪𑀕𑀯𑀸 𑀆𑀡𑀸𑀧𑁂𑀲𑀺 𑁋 ‘‘𑀢𑁂𑀦 𑀳𑀺, 𑀦𑀺𑀕𑁆𑀭𑁄𑀥𑀓𑀧𑁆𑀧, 𑀇𑀫𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀲𑁄 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀯𑀗𑁆𑀕𑀻𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀅𑀭𑀳𑀸 𑀅𑀳𑁄𑀲𑀺. 𑀏𑀢𑀤𑀕𑁆𑀕𑁂 𑀘 𑀪𑀕𑀯𑀢𑀸 𑀦𑀺𑀤𑁆𑀤𑀺𑀝𑁆𑀞𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀪𑀸𑀦𑀯𑀦𑁆𑀢𑀸𑀦𑀁 𑀬𑀤𑀺𑀤𑀁 𑀯𑀗𑁆𑀕𑀻𑀲𑁄’’𑀢𑀺 (𑀅. 𑀦𑀺. 𑁧.𑁨𑁧𑁨).

𑀏𑀯𑀁 𑀲𑀫𑀼𑀤𑀸𑀕𑀢𑀲𑁆𑀲 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀉𑀧𑀚𑁆𑀛𑀸𑀬𑁄 𑀯𑀚𑁆𑀚𑀸𑀯𑀚𑁆𑀚𑀸𑀤𑀺𑀉𑀧𑀦𑀺𑀚𑁆𑀛𑀸𑀬𑀦𑁂𑀦 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑁄 𑀦𑀺𑀕𑁆𑀭𑁄𑀥𑀓𑀧𑁆𑀧𑁄 𑀦𑀸𑀫 𑀣𑁂𑀭𑁄. 𑀓𑀧𑁆𑀧𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁, 𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀦 𑀅𑀭𑀳𑀢𑁆𑀢𑀁 𑀅𑀥𑀺𑀕𑀢𑀢𑁆𑀢𑀸 ‘‘𑀦𑀺𑀕𑁆𑀭𑁄𑀥𑀓𑀧𑁆𑀧𑁄’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑁄. 𑀢𑀢𑁄 𑀦𑀁 𑀪𑀺𑀓𑁆𑀔𑀽𑀧𑀺 𑀏𑀯𑀁 𑀯𑁄𑀳𑀭𑀦𑁆𑀢𑀺. 𑀲𑀸𑀲𑀦𑁂 𑀣𑀺𑀭𑀪𑀸𑀯𑀁 𑀧𑀢𑁆𑀢𑁄𑀢𑀺 𑀣𑁂𑀭𑁄. 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁄 𑀳𑁄𑀢𑀻𑀢𑀺 𑀢𑀲𑁆𑀫𑀺𑀁 𑀘𑁂𑀢𑀺𑀬𑁂 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁄 𑀳𑁄𑀢𑀺. 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲𑀸𑀢𑀺 𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑀢𑁆𑀢𑀸 𑀭𑀳𑁄𑀕𑀢𑀲𑁆𑀲 𑀓𑀸𑀬𑁂𑀦, 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀘𑀺𑀢𑁆𑀢𑁂𑀦 𑀢𑁂𑀳𑀺 𑀢𑁂𑀳𑀺 𑀯𑀺𑀲𑀬𑁂𑀳𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀮𑁆𑀮𑀻𑀦𑀲𑁆𑀲. 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀻𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀺. 𑀓𑀲𑁆𑀫𑀸 𑀧𑀦 𑀉𑀤𑀧𑀸𑀤𑀻𑀢𑀺. 𑀅𑀲𑀫𑁆𑀫𑀼𑀔𑀢𑁆𑀢𑀸 𑀤𑀺𑀝𑁆𑀞𑀸𑀲𑁂𑀯𑀦𑀢𑁆𑀢𑀸 𑀘. 𑀅𑀬𑀜𑁆𑀳𑀺 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀦 𑀲𑀫𑁆𑀫𑀼𑀔𑀸 𑀅𑀳𑁄𑀲𑀺, 𑀤𑀺𑀝𑁆𑀞𑀧𑀼𑀩𑁆𑀩𑀜𑁆𑀘𑀸𑀦𑁂𑀦 𑀅𑀲𑁆𑀲 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀸𑀤𑀺𑀧𑀼𑀩𑁆𑀩𑀸𑀲𑁂𑀯𑀦𑀁, 𑀢𑀸𑀤𑀺𑀲𑀜𑁆𑀘 𑀅𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀳𑁄𑀢𑀺 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀧𑀼𑀩𑁆𑀩𑀧𑀭𑀺𑀘𑀬𑁂𑀦.

𑀢𑀣𑀸 𑀳𑀺 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄 𑀧𑀘𑁆𑀙𑀸𑀪𑀢𑁆𑀢𑀁 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀉𑀤𑁂𑀦𑀲𑁆𑀲 𑀉𑀬𑁆𑀬𑀸𑀦𑀫𑁂𑀯 𑀕𑀘𑁆𑀙𑀢𑀺 𑀧𑀼𑀩𑁆𑀩𑁂 𑀭𑀸𑀚𑀸 𑀳𑀼𑀢𑁆𑀯𑀸 𑀢𑀢𑁆𑀣 𑀧𑀭𑀺𑀘𑀸𑀭𑁂𑀲𑀻𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑀧𑀭𑀺𑀘𑀬𑁂𑀦, 𑀕𑀯𑀫𑁆𑀧𑀢𑀺𑀢𑁆𑀣𑁂𑀭𑁄 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀼𑀜𑁆𑀜𑀁 𑀤𑁂𑀯𑀯𑀺𑀫𑀸𑀦𑀁 𑀕𑀘𑁆𑀙𑀢𑀺 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀢𑀢𑁆𑀣 𑀧𑀭𑀺𑀘𑀸𑀭𑁂𑀲𑀻𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑀧𑀭𑀺𑀘𑀬𑁂𑀦. 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀪𑀺𑀓𑁆𑀔𑀽 𑀯𑀲𑀮𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀢𑀺 𑀅𑀩𑁆𑀩𑁄𑀓𑀺𑀡𑁆𑀡𑀸𑀦𑀺 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀢𑀣𑀸 𑀅𑀪𑀸𑀲𑀻𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑀧𑀭𑀺𑀘𑀬𑁂𑀦. 𑀢𑀲𑁆𑀫𑀸 𑀅𑀲𑀫𑁆𑀫𑀼𑀔𑀢𑁆𑀢𑀸 𑀤𑀺𑀝𑁆𑀞𑀸𑀲𑁂𑀯𑀦𑀢𑁆𑀢𑀸 𑀘𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀦𑀼 𑀔𑁄 𑀫𑁂 𑀉𑀧𑀚𑁆𑀛𑀸𑀬𑁄, 𑀉𑀤𑀸𑀳𑀼 𑀦𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀢𑀢𑁄 𑀧𑀭𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀧𑀦 𑀧𑀼𑀦 𑀲𑀡𑁆𑀞𑀸𑀧𑀦𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀏𑀓𑀁𑀲𑀦𑁆𑀢𑀺 𑀘 𑀯𑀸𑀫𑀁𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀞𑀺𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀢𑁄 𑀬𑀣𑀸 𑀯𑀸𑀫𑀁𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺, 𑀢𑀣𑀸 𑀘𑀻𑀯𑀭𑀁 𑀓𑀢𑁆𑀯𑀸𑀢𑀺 𑀏𑀯𑀫𑀲𑁆𑀲𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁩𑁪𑁬. 𑀅𑀦𑁄𑀫𑀧𑀜𑁆𑀜𑀦𑁆𑀢𑀺 𑀑𑀫𑀁 𑀯𑀼𑀘𑁆𑀘𑀢𑀺 𑀧𑀭𑀺𑀢𑁆𑀢𑀁 𑀮𑀸𑀫𑀓𑀁, 𑀦 𑀑𑀫𑀧𑀜𑁆𑀜𑀁, 𑀅𑀦𑁄𑀫𑀧𑀜𑁆𑀜𑀁, 𑀫𑀳𑀸𑀧𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀧𑀘𑁆𑀘𑀓𑁆𑀔𑀫𑁂𑀯, 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂𑀢𑀺 𑀯𑀸 𑀅𑀢𑁆𑀣𑁄. 𑀯𑀺𑀘𑀺𑀓𑀺𑀘𑁆𑀙𑀸𑀦𑀦𑁆𑀢𑀺 𑀏𑀯𑀭𑀽𑀧𑀸𑀦𑀁 𑀧𑀭𑀺𑀯𑀺𑀢𑀓𑁆𑀓𑀸𑀦𑀁. 𑀜𑀸𑀢𑁄𑀢𑀺 𑀧𑀸𑀓𑀝𑁄. 𑀬𑀲𑀲𑁆𑀲𑀻𑀢𑀺 𑀮𑀸𑀪𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄𑀢𑀺 𑀕𑀼𑀢𑁆𑀢𑀘𑀺𑀢𑁆𑀢𑁄 𑀅𑀧𑀭𑀺𑀟𑀬𑁆𑀳𑀫𑀸𑀦𑀘𑀺𑀢𑁆𑀢𑁄 𑀯𑀸.

𑁩𑁪𑁭. 𑀢𑀬𑀸 𑀓𑀢𑀦𑁆𑀢𑀺 𑀦𑀺𑀕𑁆𑀭𑁄𑀥𑀫𑀽𑀮𑁂 𑀦𑀺𑀲𑀺𑀦𑁆𑀦𑀢𑁆𑀢𑀸 ‘‘𑀦𑀺𑀕𑁆𑀭𑁄𑀥𑀓𑀧𑁆𑀧𑁄’’𑀢𑀺 𑀯𑀤𑀢𑀸 𑀢𑀬𑀸 𑀓𑀢𑀦𑁆𑀢𑀺 𑀬𑀣𑀸 𑀅𑀢𑁆𑀢𑀦𑀸 𑀉𑀧𑀮𑀓𑁆𑀔𑁂𑀢𑀺, 𑀢𑀣𑀸 𑀪𑀡𑀢𑀺. 𑀪𑀕𑀯𑀸 𑀧𑀦 𑀦 𑀦𑀺𑀲𑀺𑀦𑁆𑀦𑀢𑁆𑀢𑀸 𑀏𑀯 𑀢𑀁 𑀢𑀣𑀸 𑀆𑀮𑀧𑀺, 𑀅𑀧𑀺𑀘 𑀔𑁄 𑀢𑀢𑁆𑀣 𑀅𑀭𑀳𑀢𑁆𑀢𑀁 𑀧𑀢𑁆𑀢𑀢𑁆𑀢𑀸. 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀚𑀸𑀢𑀺𑀁 𑀲𑀦𑁆𑀥𑀸𑀬 𑀪𑀡𑀢𑀺. 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑀸 𑀧𑀩𑁆𑀩𑀚𑀺𑀢𑁄. 𑀦𑀫𑀲𑁆𑀲𑀁 𑀅𑀘𑀭𑀻𑀢𑀺 𑀦𑀫𑀲𑁆𑀲𑀫𑀸𑀦𑁄 𑀯𑀺𑀳𑀸𑀲𑀺. 𑀫𑀼𑀢𑁆𑀬𑀧𑁂𑀓𑁆𑀔𑁄𑀢𑀺 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀯𑀺𑀫𑀼𑀢𑁆𑀢𑀺𑀁 𑀅𑀧𑁂𑀓𑁆𑀔𑀫𑀸𑀦𑁄, 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑁂𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀴𑁆𑀳𑀥𑀫𑁆𑀫𑀤𑀲𑁆𑀲𑀻𑀢𑀺 𑀪𑀕𑀯𑀦𑁆𑀢𑀁 𑀆𑀮𑀧𑀢𑀺. 𑀤𑀴𑁆𑀳𑀥𑀫𑁆𑀫𑁄 𑀳𑀺 𑀦𑀺𑀩𑁆𑀩𑀸𑀦𑀁 𑀅𑀪𑀺𑀚𑁆𑀚𑀦𑀝𑁆𑀞𑁂𑀦, 𑀢𑀜𑁆𑀘 𑀪𑀕𑀯𑀸 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀢𑀁 ‘‘𑀤𑀴𑁆𑀳𑀥𑀫𑁆𑀫𑀤𑀲𑁆𑀲𑀻’’𑀢𑀺 𑀆𑀳.

𑁩𑁪𑁮. 𑀲𑀓𑁆𑀬𑀸𑀢𑀺𑀧𑀺 𑀪𑀕𑀯𑀦𑁆𑀢𑀫𑁂𑀯 𑀓𑀼𑀮𑀦𑀸𑀫𑁂𑀦 𑀆𑀮𑀧𑀢𑀺. 𑀫𑀬𑀫𑁆𑀧𑀺 𑀲𑀩𑁆𑀩𑁂𑀢𑀺 𑀦𑀺𑀭𑀯𑀲𑁂𑀲𑀧𑀭𑀺𑀲𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀪𑀡𑀢𑀺. 𑀲𑀫𑀦𑁆𑀢𑀘𑀓𑁆𑀔𑀽𑀢𑀺𑀧𑀺 𑀪𑀕𑀯𑀦𑁆𑀢𑀫𑁂𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀆𑀮𑀧𑀢𑀺. 𑀲𑀫𑀯𑀝𑁆𑀞𑀺𑀢𑀸𑀢𑀺 𑀲𑀫𑁆𑀫𑀸 𑀅𑀯𑀝𑁆𑀞𑀺𑀢𑀸 𑀆𑀪𑁄𑀕𑀁 𑀓𑀢𑁆𑀯𑀸 𑀞𑀺𑀢𑀸. 𑀦𑁄𑀢𑀺 𑀅𑀫𑁆𑀳𑀸𑀓𑀁. 𑀲𑀯𑀦𑀸𑀬𑀸𑀢𑀺 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀲𑁆𑀲𑀯𑀦𑀢𑁆𑀣𑀸𑀬. 𑀲𑁄𑀢𑀸𑀢𑀺 𑀲𑁄𑀢𑀺𑀦𑁆𑀤𑁆𑀭𑀺𑀬𑀸𑀦𑀺. 𑀢𑀼𑀯𑀁 𑀦𑁄 𑀲𑀢𑁆𑀣𑀸 𑀢𑁆𑀯𑀫𑀦𑀼𑀢𑁆𑀢𑀭𑁄𑀲𑀻𑀢𑀺 𑀣𑀼𑀢𑀺𑀯𑀘𑀦𑀫𑀢𑁆𑀢𑀫𑁂𑀯𑁂𑀢𑀁.

𑁩𑁪𑁯. 𑀙𑀺𑀦𑁆𑀤𑁂𑀯 𑀦𑁄 𑀯𑀺𑀘𑀺𑀓𑀺𑀘𑁆𑀙𑀦𑁆𑀢𑀺 𑀅𑀓𑀼𑀲𑀮𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑁄 𑀲𑁄, 𑀯𑀺𑀘𑀺𑀓𑀺𑀘𑁆𑀙𑀸𑀧𑀢𑀺𑀭𑀽𑀧𑀓𑀁 𑀧𑀦 𑀢𑀁 𑀧𑀭𑀺𑀯𑀺𑀢𑀓𑁆𑀓𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀫𑁂 𑀏𑀢𑀁, 𑀬𑀁 𑀫𑀬𑀸 𑀬𑀸𑀘𑀺𑀢𑁄𑀲𑀺 ‘‘𑀢𑀁 𑀲𑀸𑀯𑀓𑀁 𑀲𑀓𑁆𑀬, 𑀫𑀬𑀫𑁆𑀧𑀺 𑀲𑀩𑁆𑀩𑁂 𑀅𑀜𑁆𑀜𑀸𑀢𑀼𑀫𑀺𑀘𑁆𑀙𑀸𑀫𑀸’’𑀢𑀺, 𑀩𑁆𑀭𑀽𑀯𑀦𑁆𑀢𑁄 𑀘 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀧𑀭𑀺𑀦𑀺𑀩𑁆𑀩𑀼𑀢𑀁 𑀯𑁂𑀤𑀬 𑀪𑀽𑀭𑀺𑀧𑀜𑁆𑀜 𑀫𑀚𑁆𑀛𑁂𑀯 𑀦𑁄 𑀪𑀸𑀲, 𑀧𑀭𑀺𑀦𑀺𑀩𑁆𑀩𑀼𑀢𑀁 𑀜𑀢𑁆𑀯𑀸 𑀫𑀳𑀸𑀧𑀜𑁆𑀜𑀁 𑀪𑀕𑀯𑀸 𑀫𑀚𑁆𑀛𑁂𑀯 𑀅𑀫𑁆𑀳𑀸𑀓𑀁 𑀲𑀩𑁆𑀩𑁂𑀲𑀁 𑀪𑀸𑀲, 𑀬𑀣𑀸 𑀲𑀩𑁆𑀩𑁂𑀯 𑀫𑀬𑀁 𑀚𑀸𑀦𑁂𑀬𑁆𑀬𑀸𑀫. 𑀲𑀓𑁆𑀓𑁄𑀯 𑀤𑁂𑀯𑀸𑀦 𑀲𑀳𑀲𑁆𑀲𑀦𑁂𑀢𑁆𑀢𑁄𑀢𑀺 𑀇𑀤𑀁 𑀧𑀦 𑀣𑀼𑀢𑀺𑀯𑀘𑀦𑀫𑁂𑀯. 𑀅𑀧𑀺𑀘𑀲𑁆𑀲 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀲𑀓𑁆𑀓𑁄 𑀲𑀳𑀲𑁆𑀲𑀦𑁂𑀢𑁆𑀢𑁄 𑀤𑁂𑀯𑀸𑀦𑀁 𑀫𑀚𑁆𑀛𑁂 𑀢𑁂𑀳𑀺 𑀲𑀓𑁆𑀓𑀘𑁆𑀘𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀯𑀘𑀦𑁄 𑀪𑀸𑀲𑀢𑀺, 𑀏𑀯𑀁 𑀅𑀫𑁆𑀳𑀸𑀓𑀁 𑀫𑀚𑁆𑀛𑁂 𑀅𑀫𑁆𑀳𑁂𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀯𑀘𑀦𑁄 𑀪𑀸𑀲𑀸𑀢𑀺.

𑁩𑁫𑁦. 𑀬𑁂 𑀓𑁂𑀘𑀻𑀢𑀺 𑀇𑀫𑀫𑁆𑀧𑀺 𑀕𑀸𑀣𑀁 𑀪𑀕𑀯𑀦𑁆𑀢𑀁 𑀣𑀼𑀦𑀦𑁆𑀢𑁄𑀬𑁂𑀯 𑀯𑀢𑁆𑀢𑀼𑀓𑀸𑀫𑀢𑀁 𑀚𑀦𑁂𑀢𑀼𑀁 𑀪𑀡𑀢𑀺. 𑀢𑀲𑁆𑀲𑀢𑁆𑀣𑁄 𑀬𑁂 𑀓𑁂𑀘𑀺 𑀅𑀪𑀺𑀚𑁆𑀛𑀸𑀤𑀬𑁄 𑀕𑀦𑁆𑀣𑀸 𑀢𑁂𑀲𑀁 𑀅𑀧𑁆𑀧𑀳𑀸𑀦𑁂 𑀫𑁄𑀳𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀧𑀳𑀸𑀦𑀸𑀪𑀸𑀯𑀢𑁄 ‘‘𑀫𑁄𑀳𑀫𑀕𑁆𑀕𑀸’’𑀢𑀺 𑀘 ‘‘𑀅𑀜𑁆𑀜𑀸𑀡𑀧𑀓𑁆𑀔𑀸’’𑀢𑀺 𑀘 ‘‘𑀯𑀺𑀘𑀺𑀓𑀺𑀘𑁆𑀙𑀝𑁆𑀞𑀸𑀦𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀲𑀩𑁆𑀩𑁂 𑀢𑁂 𑀢𑀣𑀸𑀕𑀢𑀁 𑀧𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀤𑁂𑀲𑀦𑀸𑀩𑀮𑁂𑀦 𑀯𑀺𑀤𑁆𑀥𑀁𑀲𑀺𑀢𑀸 𑀦 𑀪𑀯𑀦𑁆𑀢𑀺 𑀦𑀲𑁆𑀲𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀁? 𑀘𑀓𑁆𑀔𑀼𑀜𑁆𑀳𑀺 𑀏𑀢𑀁 𑀧𑀭𑀫𑀁 𑀦𑀭𑀸𑀦𑀁, 𑀬𑀲𑁆𑀫𑀸 𑀢𑀣𑀸𑀕𑀢𑁄 𑀲𑀩𑁆𑀩𑀕𑀦𑁆𑀣𑀯𑀺𑀥𑀫𑀦𑀧𑀜𑁆𑀜𑀸𑀘𑀓𑁆𑀔𑀼𑀚𑀦𑀦𑀢𑁄 𑀦𑀭𑀸𑀦𑀁 𑀧𑀭𑀫𑀁 𑀘𑀓𑁆𑀔𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁫𑁧. 𑀦𑁄 𑀘𑁂 𑀳𑀺 𑀚𑀸𑀢𑀽𑀢𑀺 𑀇𑀫𑀫𑁆𑀧𑀺 𑀕𑀸𑀣𑀁 𑀣𑀼𑀦𑀦𑁆𑀢𑁄𑀬𑁂𑀯 𑀯𑀢𑁆𑀢𑀼𑀓𑀸𑀫𑀢𑀁 𑀚𑀦𑁂𑀦𑁆𑀢𑁄𑀯 𑀪𑀡𑀢𑀺. 𑀢𑀢𑁆𑀣 𑀚𑀸𑀢𑀽𑀢𑀺 𑀏𑀓𑀁𑀲𑀯𑀘𑀦𑀁. 𑀧𑀼𑀭𑀺𑀲𑁄𑀢𑀺 𑀪𑀕𑀯𑀦𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀚𑁄𑀢𑀺𑀫𑀦𑁆𑀢𑁄𑀢𑀺 𑀧𑀜𑁆𑀜𑀸𑀚𑁄𑀢𑀺𑀲𑀫𑀦𑁆𑀦𑀸𑀕𑀢𑀸 𑀲𑀸𑀭𑀺𑀧𑀼𑀢𑁆𑀢𑀸𑀤𑀬𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀺 𑀪𑀕𑀯𑀸 𑀬𑀣𑀸 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑁄 𑀯𑀸𑀢𑁄 𑀅𑀩𑁆𑀪𑀖𑀦𑀁 𑀯𑀺𑀳𑀦𑀢𑀺, 𑀏𑀯𑀁 𑀤𑁂𑀲𑀦𑀸𑀯𑁂𑀕𑁂𑀦 𑀓𑀺𑀮𑁂𑀲𑁂 𑀦 𑀯𑀺𑀳𑀦𑁂𑀬𑁆𑀬. 𑀢𑀣𑀸 𑀬𑀣𑀸 𑀅𑀩𑁆𑀪𑀖𑀦𑁂𑀦 𑀦𑀺𑀯𑀼𑀢𑁄 𑀮𑁄𑀓𑁄 𑀢𑀫𑁄𑀯 𑀳𑁄𑀢𑀺 𑀏𑀓𑀦𑁆𑀥𑀓𑀸𑀭𑁄, 𑀏𑀯𑀁 𑀅𑀜𑁆𑀜𑀸𑀡𑀦𑀺𑀯𑀼𑀢𑁄𑀧𑀺 𑀢𑀫𑁄𑀯𑀲𑁆𑀲. 𑀬𑁂𑀧𑀺 𑀇𑀫𑁂 𑀤𑀸𑀦𑀺 𑀚𑁄𑀢𑀺𑀫𑀦𑁆𑀢𑁄 𑀔𑀸𑀬𑀦𑁆𑀢𑀺 𑀲𑀸𑀭𑀺𑀧𑀼𑀢𑁆𑀢𑀸𑀤𑀬𑁄, 𑀢𑁂𑀧𑀺 𑀦𑀭𑀸 𑀦 𑀢𑀧𑁂𑀬𑁆𑀬𑀼𑀦𑁆𑀢𑀺.

𑁩𑁫𑁨. 𑀥𑀻𑀭𑀸 𑀘𑀸𑀢𑀺 𑀇𑀫𑀫𑁆𑀧𑀺 𑀕𑀸𑀣𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀪𑀡𑀢𑀺. 𑀢𑀲𑁆𑀲𑀢𑁆𑀣𑁄 𑀥𑀻𑀭𑀸 𑀘 𑀧𑀡𑁆𑀟𑀺𑀢𑀸 𑀧𑀼𑀭𑀺𑀲𑀸 𑀧𑀚𑁆𑀚𑁄𑀢𑀓𑀭𑀸 𑀪𑀯𑀦𑁆𑀢𑀺, 𑀧𑀜𑁆𑀜𑀸𑀧𑀚𑁆𑀚𑁄𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀢𑀲𑁆𑀫𑀸 𑀅𑀳𑀁 𑀢𑀁 𑀯𑀻𑀭 𑀧𑀥𑀸𑀦𑀯𑀻𑀭𑀺𑀬𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀸 𑀢𑀣𑁂𑀯 𑀫𑀜𑁆𑀜𑁂 𑀥𑀻𑀭𑁄𑀢𑀺 𑀘 𑀧𑀚𑁆𑀚𑁄𑀢𑀓𑀭𑁄𑀢𑁆𑀯𑁂𑀯 𑀘 𑀫𑀜𑁆𑀜𑀸𑀫𑀺. 𑀫𑀬𑀜𑁆𑀳𑀺 𑀯𑀺𑀧𑀲𑁆𑀲𑀺𑀦𑀁 𑀲𑀩𑁆𑀩𑀥𑀫𑁆𑀫𑁂 𑀬𑀣𑀸𑀪𑀽𑀢𑀁 𑀧𑀲𑁆𑀲𑀦𑁆𑀢𑀁 𑀪𑀕𑀯𑀦𑁆𑀢𑀁 𑀚𑀸𑀦𑀦𑁆𑀢𑀸 𑀏𑀯 𑀉𑀧𑀸𑀕𑀫𑀼𑀫𑁆𑀳𑀸, 𑀢𑀲𑁆𑀫𑀸 𑀧𑀭𑀺𑀲𑀸𑀲𑀼 𑀦𑁄 𑀆𑀯𑀺𑀓𑀭𑁄𑀳𑀺 𑀓𑀧𑁆𑀧𑀁, 𑀦𑀺𑀕𑁆𑀭𑁄𑀥𑀓𑀧𑁆𑀧𑀁 𑀆𑀘𑀺𑀓𑁆𑀔 𑀧𑀓𑀸𑀲𑁂𑀳𑀻𑀢𑀺.

𑁩𑁫𑁩. 𑀔𑀺𑀧𑁆𑀧𑀦𑁆𑀢𑀺 𑀇𑀫𑀫𑁆𑀧𑀺 𑀕𑀸𑀣𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀪𑀡𑀢𑀺. 𑀢𑀲𑁆𑀲𑀢𑁆𑀣𑁄 𑀔𑀺𑀧𑁆𑀧𑀁 𑀕𑀺𑀭𑀁 𑀏𑀭𑀬 𑀮𑀳𑀼𑀁 𑀅𑀘𑀺𑀭𑀸𑀬𑀫𑀸𑀦𑁄 𑀯𑀘𑀦𑀁 𑀪𑀸𑀲, 𑀯𑀕𑁆𑀕𑀼𑀁 𑀫𑀦𑁄𑀭𑀫𑀁 𑀪𑀕𑀯𑀸. 𑀬𑀣𑀸 𑀲𑀼𑀯𑀡𑁆𑀡𑀳𑀁𑀲𑁄 𑀕𑁄𑀘𑀭𑀧𑀝𑀺𑀓𑁆𑀓𑀦𑁆𑀢𑁄 𑀚𑀸𑀢𑀲𑁆𑀲𑀭𑀯𑀦𑀲𑀡𑁆𑀟𑀁 𑀤𑀺𑀲𑁆𑀯𑀸 𑀕𑀻𑀯𑀁 𑀧𑀕𑁆𑀕𑀬𑁆𑀳 𑀉𑀘𑁆𑀘𑀸𑀭𑁂𑀢𑁆𑀯𑀸 𑀭𑀢𑁆𑀢𑀢𑀼𑀡𑁆𑀟𑁂𑀦 𑀲𑀡𑀺𑀓𑀁 𑀅𑀢𑀭𑀫𑀸𑀦𑁄 𑀯𑀕𑁆𑀕𑀼𑀁 𑀕𑀺𑀭𑀁 𑀦𑀺𑀓𑀽𑀚𑀢𑀺 𑀦𑀺𑀘𑁆𑀙𑀸𑀭𑁂𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀡𑀺𑀓𑀁 𑀦𑀺𑀓𑀽𑀚, 𑀇𑀫𑀺𑀦𑀸 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀜𑁆𑀜𑀢𑀭𑁂𑀦 𑀩𑀺𑀦𑁆𑀤𑀼𑀲𑁆𑀲𑀭𑁂𑀦 𑀲𑀼𑀯𑀺𑀓𑀧𑁆𑀧𑀺𑀢𑁂𑀦 𑀲𑀼𑀝𑁆𑀞𑀼𑀯𑀺𑀓𑀧𑁆𑀧𑀺𑀢𑁂𑀦 𑀅𑀪𑀺𑀲𑀗𑁆𑀔𑀢𑁂𑀦. 𑀏𑀢𑁂 𑀫𑀬𑀁 𑀲𑀩𑁆𑀩𑁂𑀯 𑀉𑀚𑀼𑀕𑀢𑀸 𑀅𑀯𑀺𑀓𑁆𑀔𑀺𑀢𑁆𑀢𑀫𑀸𑀦𑀲𑀸 𑀳𑀼𑀢𑁆𑀯𑀸 𑀢𑀯 𑀦𑀺𑀓𑀽𑀚𑀺𑀢𑀁 𑀲𑀼𑀡𑁄𑀫𑀸𑀢𑀺.

𑁩𑁫𑁪. 𑀧𑀳𑀻𑀦𑀚𑀸𑀢𑀺𑀫𑀭𑀡𑀦𑁆𑀢𑀺 𑀇𑀫𑀫𑁆𑀧𑀺 𑀕𑀸𑀣𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀪𑀡𑀢𑀺. 𑀢𑀢𑁆𑀣 𑀦 𑀲𑁂𑀲𑁂𑀢𑀻𑀢𑀺 𑀅𑀲𑁂𑀲𑁄, 𑀢𑀁 𑀅𑀲𑁂𑀲𑀁. 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀯𑀺𑀬 𑀓𑀺𑀜𑁆𑀘𑀺 𑀅𑀲𑁂𑀲𑁂𑀢𑁆𑀯𑀸 𑀧𑀳𑀻𑀦𑀚𑀸𑀢𑀺𑀫𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀕𑁆𑀕𑀬𑁆𑀳𑀸𑀢𑀺 𑀲𑀼𑀝𑁆𑀞𑀼 𑀬𑀸𑀘𑀺𑀢𑁆𑀯𑀸 𑀦𑀺𑀩𑀦𑁆𑀥𑀺𑀢𑁆𑀯𑀸. 𑀥𑁄𑀦𑀦𑁆𑀢𑀺 𑀥𑀼𑀢𑀲𑀩𑁆𑀩𑀧𑀸𑀧𑀁. 𑀯𑀤𑁂𑀲𑁆𑀲𑀸𑀫𑀻𑀢𑀺 𑀓𑀣𑀸𑀧𑁂𑀲𑁆𑀲𑀸𑀫𑀺 𑀥𑀫𑁆𑀫𑀁. 𑀦 𑀓𑀸𑀫𑀓𑀸𑀭𑁄 𑀳𑀺 𑀧𑀼𑀣𑀼𑀚𑁆𑀚𑀦𑀸𑀦𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸𑀦𑀫𑁂𑀯 𑀳𑀺 𑀓𑀸𑀫𑀓𑀸𑀭𑁄 𑀦𑀢𑁆𑀣𑀺, 𑀬𑀁 𑀧𑀢𑁆𑀣𑁂𑀦𑁆𑀢𑀺 𑀜𑀸𑀢𑀼𑀁 𑀯𑀸 𑀯𑀢𑁆𑀢𑀼𑀁 𑀯𑀸, 𑀢𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑀗𑁆𑀔𑁂𑀬𑁆𑀬𑀓𑀸𑀭𑁄 𑀘 𑀢𑀣𑀸𑀕𑀢𑀸𑀦𑀦𑁆𑀢𑀺 𑀢𑀣𑀸𑀕𑀢𑀸𑀦𑀁 𑀧𑀦 𑀯𑀻𑀫𑀁𑀲𑀓𑀸𑀭𑁄 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸 𑀓𑀺𑀭𑀺𑀬𑀸. 𑀢𑁂 𑀬𑀁 𑀧𑀢𑁆𑀣𑁂𑀦𑁆𑀢𑀺 𑀜𑀸𑀢𑀼𑀁 𑀯𑀸 𑀯𑀢𑁆𑀢𑀼𑀁 𑀯𑀸, 𑀢𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁫𑁫. 𑀇𑀤𑀸𑀦𑀺 𑀢𑀁 𑀲𑀗𑁆𑀔𑁂𑀬𑁆𑀬𑀓𑀸𑀭𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀲𑀫𑁆𑀧𑀦𑁆𑀦𑀯𑁂𑀬𑁆𑀬𑀸𑀓𑀭𑀡’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑀣𑀸 𑀳𑀺 𑀢𑀯 𑀪𑀕𑀯𑀸 𑀇𑀤𑀁 𑀲𑀫𑀼𑀚𑁆𑀚𑀼𑀧𑀜𑁆𑀜𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀲𑀫𑀼𑀕𑁆𑀕𑀳𑀻𑀢𑀁 𑀯𑀼𑀢𑁆𑀢𑀁 𑀧𑀯𑀢𑁆𑀢𑀺𑀢𑀁 𑀲𑀫𑁆𑀧𑀦𑁆𑀦𑀯𑁂𑀬𑁆𑀬𑀸𑀓𑀭𑀡𑀁, ‘‘𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄 𑀲𑀢𑁆𑀢𑀢𑀸𑀮𑀫𑀢𑁆𑀢𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀲𑀼𑀧𑁆𑀧𑀩𑀼𑀤𑁆𑀥𑁄 𑀲𑀓𑁆𑀓𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀣𑀯𑀺𑀁 𑀧𑀯𑀺𑀲𑀺𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀅𑀯𑀺𑀧𑀭𑀻𑀢𑀁 𑀤𑀺𑀝𑁆𑀞𑀁. 𑀢𑀢𑁄 𑀧𑀦 𑀲𑀼𑀝𑁆𑀞𑀼𑀢𑀭𑀁 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀆𑀳 𑁋 𑀅𑀬𑀫𑀜𑁆𑀚𑀮𑀻 𑀧𑀘𑁆𑀙𑀺𑀫𑁄 𑀲𑀼𑀧𑁆𑀧𑀡𑀸𑀫𑀺𑀢𑁄, 𑀅𑀬𑀫𑀧𑀭𑁄𑀧𑀺 𑀅𑀜𑁆𑀚𑀮𑀻 𑀲𑀼𑀝𑁆𑀞𑀼𑀢𑀭𑀁 𑀧𑀡𑀸𑀫𑀺𑀢𑁄. 𑀫𑀸 𑀫𑁄𑀳𑀬𑀻𑀢𑀺 𑀫𑀸 𑀦𑁄 𑀅𑀓𑀣𑀦𑁂𑀦 𑀫𑁄𑀳𑀬𑀺 𑀚𑀸𑀦𑀁 𑀚𑀸𑀦𑀦𑁆𑀢𑁄 𑀓𑀧𑁆𑀧𑀲𑁆𑀲 𑀕𑀢𑀺𑀁. 𑀅𑀦𑁄𑀫𑀧𑀜𑁆𑀜𑀸𑀢𑀺 𑀪𑀕𑀯𑀦𑁆𑀢𑀁 𑀆𑀮𑀧𑀢𑀺.

𑁩𑁫𑁬. 𑀧𑀭𑁄𑀯𑀭𑀦𑁆𑀢𑀺 𑀇𑀫𑀁 𑀧𑀦 𑀕𑀸𑀣𑀁 𑀅𑀧𑀭𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀅𑀫𑁄𑀳𑀦𑀫𑁂𑀯 𑀬𑀸𑀘𑀦𑁆𑀢𑁄 𑀆𑀳. 𑀢𑀢𑁆𑀣 𑀧𑀭𑁄𑀯𑀭𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀲𑀼𑀦𑁆𑀤𑀭𑀸𑀲𑀼𑀦𑁆𑀤𑀭𑀁 𑀤𑀽𑀭𑁂𑀲𑀦𑁆𑀢𑀺𑀓𑀁 𑀯𑀸. 𑀅𑀭𑀺𑀬𑀥𑀫𑁆𑀫𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁. 𑀯𑀺𑀤𑀺𑀢𑁆𑀯𑀸𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀚𑀸𑀦𑀦𑁆𑀢𑀺 𑀲𑀩𑁆𑀩𑀁 𑀜𑁂𑀬𑁆𑀬𑀥𑀫𑁆𑀫𑀁 𑀚𑀸𑀦𑀦𑁆𑀢𑁄. 𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀻𑀢𑀺 𑀬𑀣𑀸 𑀖𑀫𑁆𑀫𑀦𑀺 𑀖𑀫𑁆𑀫𑀢𑀢𑁆𑀢𑁄 𑀧𑀼𑀭𑀺𑀲𑁄 𑀓𑀺𑀮𑀦𑁆𑀢𑁄 𑀢𑀲𑀺𑀢𑁄 𑀯𑀸𑀭𑀺𑀁, 𑀏𑀯𑀁 𑀢𑁂 𑀯𑀸𑀘𑀁 𑀅𑀪𑀺𑀓𑀗𑁆𑀔𑀸𑀫𑀺. 𑀲𑀼𑀢𑀁 𑀧𑀯𑀲𑁆𑀲𑀸𑀢𑀺 𑀲𑀼𑀢𑀲𑀗𑁆𑀔𑀸𑀢𑀁 𑀲𑀤𑁆𑀤𑀸𑀬𑀢𑀦𑀁 𑀧𑀯𑀲𑁆𑀲 𑀧𑀕𑁆𑀖𑀭 𑀫𑀼𑀜𑁆𑀘 𑀧𑀯𑀢𑁆𑀢𑁂𑀳𑀺. ‘‘𑀲𑀼𑀢𑀲𑁆𑀲 𑀯𑀲𑁆𑀲𑀸’’𑀢𑀺𑀧𑀺 𑀧𑀸𑀞𑁄, 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀯𑀼𑀝𑁆𑀞𑀺𑀁 𑀯𑀲𑁆𑀲𑀸𑀢𑀺 𑀅𑀢𑁆𑀣𑁄.

𑁩𑁫𑁭. 𑀇𑀤𑀸𑀦𑀺 𑀬𑀸𑀤𑀺𑀲𑀁 𑀯𑀸𑀘𑀁 𑀅𑀪𑀺𑀓𑀗𑁆𑀔𑀢𑀺, 𑀢𑀁 𑀧𑀓𑀸𑀲𑁂𑀦𑁆𑀢𑁄 𑁋

‘‘𑀬𑀤𑀢𑁆𑀣𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀻,

𑀓𑀧𑁆𑀧𑀸𑀬𑀦𑁄 𑀓𑀘𑁆𑀘𑀺𑀲𑁆𑀲 𑀢𑀁 𑀅𑀫𑁄𑀖𑀁;

𑀦𑀺𑀩𑁆𑀩𑀸𑀬𑀺 𑀲𑁄 𑀆𑀤𑀼 𑀲𑀉𑀧𑀸𑀤𑀺𑀲𑁂𑀲𑁄,

𑀬𑀣𑀸 𑀯𑀺𑀫𑀼𑀢𑁆𑀢𑁄 𑀅𑀳𑀼 𑀢𑀁 𑀲𑀼𑀡𑁄𑀫𑀸’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀧𑁆𑀧𑀸𑀬𑀦𑁄𑀢𑀺 𑀓𑀧𑁆𑀧𑀫𑁂𑀯 𑀧𑀽𑀚𑀸𑀯𑀲𑁂𑀦 𑀪𑀡𑀢𑀺. 𑀬𑀣𑀸 𑀯𑀺𑀫𑀼𑀢𑁆𑀢𑁄𑀢𑀺 ‘‘𑀓𑀺𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀬𑀣𑀸 𑀅𑀲𑁂𑀓𑁆𑀔𑀸, 𑀉𑀤𑀸𑀳𑀼 𑀉𑀧𑀸𑀤𑀺𑀲𑁂𑀲𑀸𑀬 𑀬𑀣𑀸 𑀲𑁂𑀓𑁆𑀔𑀸’’𑀢𑀺 𑀧𑀼𑀘𑁆𑀙𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑁩𑁫𑁮. 𑀏𑀯𑀁 𑀤𑁆𑀯𑀸𑀤𑀲𑀳𑀺 𑀕𑀸𑀣𑀸𑀳𑀺 𑀬𑀸𑀘𑀺𑀢𑁄 𑀪𑀕𑀯𑀸 𑀢𑀁 𑀯𑀺𑀬𑀸𑀓𑀭𑁄𑀦𑁆𑀢𑁄 𑁋

‘‘𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀁 𑀇𑀥 𑀦𑀸𑀫𑀭𑀽𑀧𑁂, (𑀇𑀢𑀺 𑀪𑀕𑀯𑀸)

𑀓𑀡𑁆𑀳𑀲𑁆𑀲 𑀲𑁄𑀢𑀁 𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀢𑀁;

𑀅𑀢𑀸𑀭𑀺 𑀚𑀸𑀢𑀺𑀁 𑀫𑀭𑀡𑀁 𑀅𑀲𑁂𑀲𑀁,

𑀇𑀘𑁆𑀘𑀩𑁆𑀭𑀯𑀻 𑀪𑀕𑀯𑀸 𑀧𑀜𑁆𑀘𑀲𑁂𑀝𑁆𑀞𑁄’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀼𑀭𑀺𑀫𑀧𑀤𑀲𑁆𑀲 𑀢𑀸𑀯 𑀅𑀢𑁆𑀣𑁄 𑁋 𑀬𑀸𑀧𑀺 𑀇𑀫𑀲𑁆𑀫𑀺𑀁 𑀦𑀸𑀫𑀭𑀽𑀧𑁂 𑀓𑀸𑀫𑀢𑀡𑁆𑀳𑀸𑀤𑀺𑀪𑁂𑀤𑀸 𑀢𑀡𑁆𑀳𑀸𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀅𑀦𑀼𑀲𑀬𑀺𑀢𑀸 𑀓𑀡𑁆𑀳𑀦𑀸𑀫𑀓𑀲𑁆𑀲 𑀫𑀸𑀭𑀲𑁆𑀲 ‘‘𑀲𑁄𑀢’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀁 𑀓𑀡𑁆𑀳𑀲𑁆𑀲 𑀲𑁄𑀢𑀪𑀽𑀢𑀁 𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀢𑀁 𑀇𑀥 𑀦𑀸𑀫𑀭𑀽𑀧𑁂 𑀢𑀡𑁆𑀳𑀁 𑀓𑀧𑁆𑀧𑀸𑀬𑀦𑁄 𑀙𑀺𑀦𑁆𑀤𑀻𑀢𑀺. 𑀇𑀢𑀺 𑀪𑀕𑀯𑀸𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀲𑀗𑁆𑀕𑀻𑀢𑀺𑀓𑀸𑀭𑀸𑀦𑀁 𑀯𑀘𑀦𑀁. 𑀅𑀢𑀸𑀭𑀺 𑀚𑀸𑀢𑀺𑀁 𑀫𑀭𑀡𑀁 𑀅𑀲𑁂𑀲𑀦𑁆𑀢𑀺 𑀲𑁄 𑀢𑀁 𑀢𑀡𑁆𑀳𑀁 𑀙𑁂𑀢𑁆𑀯𑀸 𑀅𑀲𑁂𑀲𑀁 𑀚𑀸𑀢𑀺𑀫𑀭𑀡𑀁 𑀅𑀢𑀸𑀭𑀺, 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀘𑁆𑀘𑀩𑁆𑀭𑀯𑀻 𑀪𑀕𑀯𑀸 𑀧𑀜𑁆𑀘𑀲𑁂𑀝𑁆𑀞𑁄𑀢𑀺 𑀯𑀗𑁆𑀕𑀻𑀲𑁂𑀦 𑀧𑀼𑀝𑁆𑀞𑁄 𑀪𑀕𑀯𑀸 𑀏𑀢𑀤𑀯𑁄𑀘 𑀧𑀜𑁆𑀘𑀦𑁆𑀦𑀁 𑀧𑀞𑀫𑀲𑀺𑀲𑁆𑀲𑀸𑀦𑀁 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀲𑁂𑀝𑁆𑀞𑁄, 𑀧𑀜𑁆𑀘𑀳𑀺 𑀯𑀸 𑀲𑀤𑁆𑀥𑀸𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺, 𑀲𑀻𑀮𑀸𑀤𑀻𑀳𑀺 𑀯𑀸 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀅𑀢𑀺𑀯𑀺𑀲𑀺𑀝𑁆𑀞𑁂𑀳𑀺 𑀘𑀓𑁆𑀔𑀽𑀳𑀺 𑀘 𑀲𑁂𑀝𑁆𑀞𑁄𑀢𑀺 𑀲𑀗𑁆𑀕𑀻𑀢𑀺𑀓𑀸𑀭𑀸𑀦𑀫𑁂𑀯𑀺𑀤𑀁 𑀯𑀘𑀦𑀁.

𑁩𑁫𑁯. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀢𑁄 𑀪𑀸𑀲𑀺𑀢𑀫𑀪𑀺𑀦𑀦𑁆𑀤𑀫𑀸𑀦𑀲𑁄 𑀯𑀗𑁆𑀕𑀻𑀲𑁄 ‘‘𑀏𑀲 𑀲𑀼𑀢𑁆𑀯𑀸’’𑀢𑀺𑀆𑀤𑀺𑀕𑀸𑀣𑀸𑀬𑁄 𑀆𑀳. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀇𑀲𑀺𑀲𑀢𑁆𑀢𑀫𑀸𑀢𑀺 𑀪𑀕𑀯𑀸 𑀇𑀲𑀺 𑀘 𑀲𑀢𑁆𑀢𑀫𑁄 𑀘 𑀉𑀢𑁆𑀢𑀫𑀝𑁆𑀞𑁂𑀦 𑀯𑀺𑀧𑀲𑁆𑀲𑀻𑀲𑀺𑀔𑀻𑀯𑁂𑀲𑁆𑀲𑀪𑀽𑀓𑀓𑀼𑀲𑀦𑁆𑀥𑀓𑁄𑀡𑀸𑀕𑀫𑀦𑀓𑀲𑁆𑀲𑀧𑀦𑀸𑀫𑀓𑁂 𑀙 𑀇𑀲𑀬𑁄 𑀅𑀢𑁆𑀢𑀦𑀸 𑀲𑀳 𑀲𑀢𑁆𑀢 𑀓𑀭𑁄𑀦𑁆𑀢𑁄 𑀧𑀸𑀢𑀼𑀪𑀽𑀢𑁄𑀢𑀺𑀧𑀺 𑀇𑀲𑀺𑀲𑀢𑁆𑀢𑀫𑁄, 𑀢𑀁 𑀆𑀮𑀧𑀦𑁆𑀢𑁄 𑀆𑀳. 𑀦 𑀫𑀁 𑀯𑀜𑁆𑀘𑁂𑀲𑀻𑀢𑀺 𑀬𑀲𑁆𑀫𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑀲𑁆𑀫𑀸 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀇𑀘𑁆𑀙𑀦𑁆𑀢𑀁 𑀫𑀁 𑀦 𑀯𑀜𑁆𑀘𑁂𑀲𑀺, 𑀦 𑀯𑀺𑀲𑀁𑀯𑀸𑀤𑁂𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑁩𑁬𑁦. 𑀤𑀼𑀢𑀺𑀬𑀕𑀸𑀣𑀸𑀬 𑀬𑀲𑁆𑀫𑀸 𑀫𑀼𑀢𑁆𑀬𑀧𑁂𑀓𑁆𑀔𑁄 𑀯𑀺𑀳𑀸𑀲𑀺, 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀅𑀳𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄’’𑀢𑀺. 𑀫𑀘𑁆𑀘𑀼𑀦𑁄 𑀚𑀸𑀮𑀁 𑀢𑀢𑀦𑁆𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑁂 𑀯𑀺𑀢𑁆𑀣𑀢𑀁 𑀫𑀸𑀭𑀲𑁆𑀲 𑀢𑀡𑁆𑀳𑀸𑀚𑀸𑀮𑀁. 𑀫𑀸𑀬𑀸𑀯𑀺𑀦𑁄𑀢𑀺 𑀩𑀳𑀼𑀫𑀸𑀬𑀲𑁆𑀲. ‘‘𑀢𑀣𑀸 𑀫𑀸𑀬𑀸𑀯𑀺𑀦𑁄’’𑀢𑀺𑀧𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀬𑁄 𑀅𑀦𑁂𑀓𑀸𑀳𑀺 𑀫𑀸𑀬𑀸𑀳𑀺 𑀅𑀦𑁂𑀓𑀓𑁆𑀔𑀢𑁆𑀢𑀼𑀫𑁆𑀧𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺, 𑀢𑀲𑁆𑀲 𑀢𑀣𑀸 𑀫𑀸𑀬𑀸𑀯𑀺𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁬𑁧. 𑀢𑀢𑀺𑀬𑀕𑀸𑀣𑀸𑀬 𑀆𑀤𑀻𑀢𑀺 𑀓𑀸𑀭𑀡𑀁. 𑀉𑀧𑀸𑀤𑀸𑀦𑀲𑁆𑀲𑀸𑀢𑀺 𑀯𑀝𑁆𑀝𑀲𑁆𑀲. 𑀯𑀝𑁆𑀝𑀜𑁆𑀳𑀺 𑀉𑀧𑀸𑀤𑀸𑀢𑀩𑁆𑀩𑀝𑁆𑀞𑁂𑀦 𑀇𑀥 ‘‘𑀉𑀧𑀸𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲𑁂𑀯 𑀉𑀧𑀸𑀤𑀸𑀦𑀲𑁆𑀲 𑀆𑀤𑀺𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀺𑀪𑁂𑀤𑀁 𑀓𑀸𑀭𑀡𑀁 𑀅𑀤𑁆𑀤𑀲 𑀓𑀧𑁆𑀧𑁄𑀢𑀺 𑀏𑀯𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀪𑀕𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀅𑀘𑁆𑀘𑀕𑀸 𑀯𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑁄 𑀯𑀢. 𑀫𑀘𑁆𑀘𑀼𑀥𑁂𑀬𑁆𑀬𑀦𑁆𑀢𑀺 𑀫𑀘𑁆𑀘𑀼 𑀏𑀢𑁆𑀣 𑀥𑀺𑀬𑀢𑀻𑀢𑀺 𑀫𑀘𑁆𑀘𑀼𑀥𑁂𑀬𑁆𑀬𑀁, 𑀢𑁂𑀪𑀽𑀫𑀓𑀯𑀝𑁆𑀝𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀲𑀼𑀤𑀼𑀢𑁆𑀢𑀭𑀁 𑀫𑀘𑁆𑀘𑀼𑀥𑁂𑀬𑁆𑀬𑀁 𑀅𑀘𑁆𑀘𑀕𑀸 𑀯𑀢𑀸𑀢𑀺 𑀯𑁂𑀤𑀚𑀸𑀢𑁄 𑀪𑀡𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀦𑀺𑀕𑁆𑀭𑁄𑀥𑀓𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.