𑁧𑁩. 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑀼𑀢𑁆𑀢-(𑀫𑀳𑀸𑀲𑀫𑀬𑀲𑀼𑀢𑁆𑀢)-𑀯𑀡𑁆𑀡𑀦𑀸

𑁩𑁬𑁨. 𑀧𑀼𑀘𑁆𑀙𑀸𑀫𑀺 𑀫𑀼𑀦𑀺𑀁 𑀧𑀳𑀽𑀢𑀧𑀜𑁆𑀜𑀦𑁆𑀢𑀺 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑀼𑀢𑁆𑀢𑀁, ‘‘𑀫𑀳𑀸𑀲𑀫𑀬𑀲𑀼𑀢𑁆𑀢’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺 𑀫𑀳𑀸𑀲𑀫𑀬𑀤𑀺𑀯𑀲𑁂 𑀓𑀣𑀺𑀢𑀢𑁆𑀢𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀧𑀼𑀘𑁆𑀙𑀸𑀯𑀲𑀺𑀓𑀸 𑀉𑀧𑁆𑀧𑀢𑁆𑀢𑀺. 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀳𑀺 𑀧𑀼𑀝𑁆𑀞𑁄 𑀪𑀕𑀯𑀸 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺, 𑀢𑀁 𑀲𑀤𑁆𑀥𑀺𑀁 𑀧𑀼𑀘𑁆𑀙𑀸𑀬 ‘‘𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀸𑀓𑀺𑀬𑀓𑁄𑀮𑀺𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀢𑁄 𑀧𑀪𑀼𑀢𑀺 𑀧𑁄𑀭𑀸𑀡𑁂𑀳𑀺 𑀯𑀡𑁆𑀡𑀻𑀬𑀢𑀺.

𑀢𑀢𑁆𑀭𑀸𑀬𑀁 𑀉𑀤𑁆𑀤𑁂𑀲𑀫𑀕𑁆𑀕𑀯𑀡𑁆𑀡𑀦𑀸 𑁋 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀓𑀺𑀭 𑀭𑀜𑁆𑀜𑁄 𑀫𑀳𑀸𑀲𑀫𑁆𑀫𑀢𑀲𑁆𑀲 𑀭𑁄𑀚𑁄 𑀦𑀸𑀫 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀭𑁄𑀚𑀲𑁆𑀲 𑀯𑀭𑀭𑁄𑀚𑁄, 𑀯𑀭𑀭𑁄𑀚𑀲𑁆𑀲 𑀓𑀮𑁆𑀬𑀸𑀡𑁄, 𑀓𑀮𑁆𑀬𑀸𑀡𑀲𑁆𑀲 𑀯𑀭𑀓𑀮𑁆𑀬𑀸𑀡𑁄, 𑀯𑀭𑀓𑀮𑁆𑀬𑀸𑀡𑀲𑁆𑀲 𑀫𑀦𑁆𑀥𑀸𑀢𑀸, 𑀫𑀦𑁆𑀥𑀸𑀢𑀼𑀲𑁆𑀲 𑀯𑀭𑀫𑀦𑁆𑀥𑀸𑀢𑀸, 𑀯𑀭𑀫𑀦𑁆𑀥𑀸𑀢𑀼𑀲𑁆𑀲 𑀉𑀧𑁄𑀲𑀣𑁄, 𑀉𑀧𑁄𑀲𑀣𑀲𑁆𑀲 𑀯𑀭𑁄, 𑀯𑀭𑀲𑁆𑀲 𑀉𑀧𑀯𑀭𑁄, 𑀉𑀧𑀯𑀭𑀲𑁆𑀲 𑀫𑀖𑀤𑁂𑀯𑁄, 𑀫𑀖𑀤𑁂𑀯𑀲𑁆𑀲 𑀧𑀭𑀫𑁆𑀧𑀭𑀸 𑀘𑀢𑀼𑀭𑀸𑀲𑀻𑀢𑀺 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑁂𑀲𑀁 𑀧𑀭𑀢𑁄 𑀢𑀬𑁄 𑀑𑀓𑁆𑀓𑀸𑀓𑀯𑀁𑀲𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀢𑀢𑀺𑀬𑀑𑀓𑁆𑀓𑀸𑀓𑀲𑁆𑀲 𑀧𑀜𑁆𑀘 𑀫𑀳𑁂𑀲𑀺𑀬𑁄 𑀅𑀳𑁂𑀲𑀼𑀁 𑁋 𑀳𑀢𑁆𑀣𑀸, 𑀘𑀺𑀢𑁆𑀢𑀸, 𑀚𑀦𑁆𑀢𑀼, 𑀚𑀸𑀮𑀺𑀦𑀻, 𑀯𑀺𑀲𑀸𑀔𑀸𑀢𑀺. 𑀏𑀓𑁂𑀓𑀺𑀲𑁆𑀲𑀸 𑀧𑀜𑁆𑀘 𑀧𑀜𑁆𑀘 𑀇𑀢𑁆𑀣𑀺𑀲𑀢𑀸𑀦𑀺 𑀧𑀭𑀺𑀯𑀸𑀭𑀸. 𑀲𑀩𑁆𑀩𑀚𑁂𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑁋 𑀑𑀓𑁆𑀓𑀸𑀫𑀼𑀔𑁄, 𑀓𑀭𑀓𑀡𑁆𑀟𑀼, 𑀳𑀢𑁆𑀣𑀺𑀦𑀺𑀓𑁄, 𑀲𑀺𑀦𑀺𑀧𑀼𑀭𑁄𑀢𑀺; 𑀧𑀜𑁆𑀘 𑀥𑀻𑀢𑀭𑁄 𑁋 𑀧𑀺𑀬𑀸, 𑀲𑀼𑀧𑁆𑀧𑀺𑀬𑀸, 𑀆𑀦𑀦𑁆𑀤𑀸, 𑀯𑀺𑀚𑀺𑀢𑀸, 𑀯𑀺𑀚𑀺𑀢𑀲𑁂𑀦𑀸𑀢𑀺. 𑀏𑀯𑀁 𑀲𑀸 𑀦𑀯 𑀧𑀼𑀢𑁆𑀢𑁂 𑀮𑀪𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺.

𑀅𑀣 𑀭𑀸𑀚𑀸 𑀅𑀜𑁆𑀜𑀁 𑀤𑀳𑀭𑀁 𑀅𑀪𑀺𑀭𑀽𑀧𑀁 𑀭𑀸𑀚𑀥𑀻𑀢𑀭𑀁 𑀆𑀦𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸𑀧𑀺 𑀚𑀦𑁆𑀢𑀼𑀁 𑀦𑀸𑀫 𑀏𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀁 𑀚𑀦𑁆𑀢𑀼𑀓𑀼𑀫𑀸𑀭𑀁 𑀧𑀜𑁆𑀘𑀫𑀤𑀺𑀯𑀲𑁂 𑀅𑀮𑀗𑁆𑀓𑀭𑀺𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑀫𑀳𑁂𑀲𑀺𑀬𑀸 𑀯𑀭𑀁 𑀅𑀤𑀸𑀲𑀺. 𑀲𑀸 𑀜𑀸𑀢𑀓𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀬𑀸𑀘𑀺. 𑀭𑀸𑀚𑀸 ‘‘𑀦𑀲𑁆𑀲 𑀯𑀲𑀮𑀺, 𑀫𑀫 𑀧𑀼𑀢𑁆𑀢𑀸𑀦𑀁 𑀅𑀦𑁆𑀢𑀭𑀸𑀬𑀫𑀺𑀘𑁆𑀙𑀲𑀻’’𑀢𑀺 𑀦𑀸𑀤𑀸𑀲𑀺. 𑀲𑀸 𑀧𑀼𑀦𑀧𑁆𑀧𑀼𑀦𑀁 𑀭𑀳𑁄 𑀭𑀸𑀚𑀸𑀦𑀁 𑀧𑀭𑀺𑀢𑁄𑀲𑁂𑀢𑁆𑀯𑀸 ‘‘𑀦, 𑀫𑀳𑀸𑀭𑀸𑀚, 𑀫𑀼𑀲𑀸𑀯𑀸𑀤𑁄 𑀯𑀝𑁆𑀝𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀬𑀸𑀘𑀢𑀺 𑀏𑀯. 𑀅𑀣 𑀭𑀸𑀚𑀸 𑀧𑀼𑀢𑁆𑀢𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀳𑀁, 𑀢𑀸𑀢𑀸, 𑀢𑀼𑀫𑁆𑀳𑀸𑀓𑀁 𑀓𑀦𑀺𑀝𑁆𑀞𑀁 𑀚𑀦𑁆𑀢𑀼𑀓𑀼𑀫𑀸𑀭𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀫𑀸𑀢𑀼𑀬𑀸 𑀲𑀳𑀲𑀸 𑀯𑀭𑀁 𑀅𑀤𑀸𑀲𑀺𑀁. 𑀲𑀸 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀧𑀭𑀺𑀡𑀸𑀫𑁂𑀢𑀼𑀁 𑀇𑀘𑁆𑀙𑀢𑀺. 𑀢𑀼𑀫𑁆𑀳𑁂 𑀫𑀫𑀘𑁆𑀘𑀬𑁂𑀦 𑀆𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀬𑁆𑀬𑀸𑀣𑀸’’𑀢𑀺 𑀅𑀝𑁆𑀞𑀳𑀺 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀉𑀬𑁆𑀬𑁄𑀚𑁂𑀲𑀺. 𑀢𑁂 𑀪𑀕𑀺𑀦𑀺𑀬𑁄 𑀆𑀤𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺𑀁𑀲𑀼. ‘‘𑀓𑀼𑀫𑀸𑀭𑀸 𑀧𑀺𑀢𑀼𑀅𑀘𑁆𑀘𑀬𑁂𑀦 𑀆𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀦𑁆𑀢𑀺, 𑀕𑀘𑁆𑀙𑀸𑀫 𑀦𑁂 𑀉𑀧𑀝𑁆𑀞𑀳𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑀳𑀽 𑀫𑀦𑀼𑀲𑁆𑀲𑀸 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀧𑀞𑀫𑀤𑀺𑀯𑀲𑁂 𑀬𑁄𑀚𑀦𑀫𑀢𑁆𑀢𑀸 𑀲𑁂𑀦𑀸 𑀅𑀳𑁄𑀲𑀺, 𑀤𑀼𑀢𑀺𑀬𑀤𑀺𑀯𑀲𑁂 𑀤𑁆𑀯𑀺𑀬𑁄𑀚𑀦𑀫𑀢𑁆𑀢𑀸, 𑀢𑀢𑀺𑀬𑀤𑀺𑀯𑀲𑁂 𑀢𑀺𑀬𑁄𑀚𑀦𑀫𑀢𑁆𑀢𑀸. 𑀓𑀼𑀫𑀸𑀭𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀫𑀳𑀸 𑀅𑀬𑀁 𑀩𑀮𑀓𑀸𑀬𑁄, 𑀲𑀘𑁂 𑀫𑀬𑀁 𑀓𑀜𑁆𑀘𑀺 𑀲𑀸𑀫𑀦𑁆𑀢𑀭𑀸𑀚𑀸𑀦𑀁 𑀅𑀓𑁆𑀓𑀫𑀺𑀢𑁆𑀯𑀸 𑀚𑀦𑀧𑀤𑀁 𑀕𑀡𑁆𑀳𑀺𑀲𑁆𑀲𑀸𑀫, 𑀲𑁄𑀧𑀺 𑀦𑁄 𑀦 𑀧𑀳𑁄𑀲𑁆𑀲𑀢𑀺, 𑀓𑀺𑀁 𑀧𑀭𑁂𑀲𑀁 𑀧𑀻𑀴𑀁 𑀓𑀢𑁆𑀯𑀸 𑀮𑀤𑁆𑀥𑀭𑀚𑁆𑀚𑁂𑀦, 𑀫𑀳𑀸 𑀚𑀫𑁆𑀩𑀼𑀤𑀻𑀧𑁄, 𑀅𑀭𑀜𑁆𑀜𑁂 𑀦𑀕𑀭𑀁 𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑀸 𑀅𑀕𑀫𑀺𑀁𑀲𑀼.

𑀢𑀢𑁆𑀣 𑀦𑀕𑀭𑀫𑀸𑀧𑀦𑁄𑀓𑀸𑀲𑀁 𑀧𑀭𑀺𑀬𑁂𑀲𑀫𑀸𑀦𑀸 𑀳𑀺𑀫𑀯𑀢𑀺 𑀓𑀧𑀺𑀮𑁄 𑀦𑀸𑀫 𑀖𑁄𑀭𑀢𑀧𑁄 𑀢𑀸𑀧𑀲𑁄 𑀧𑀝𑀺𑀯𑀲𑀢𑀺 𑀧𑁄𑀓𑁆𑀔𑀭𑀡𑀺𑀢𑀻𑀭𑁂 𑀫𑀳𑀸𑀲𑀸𑀓𑀲𑀡𑁆𑀟𑁂, 𑀢𑀲𑁆𑀲 𑀯𑀲𑀦𑁄𑀓𑀸𑀲𑀁 𑀕𑀢𑀸. 𑀲𑁄 𑀢𑁂 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑁂𑀲𑀼 𑀅𑀦𑀼𑀓𑀫𑁆𑀧𑀁 𑀅𑀓𑀸𑀲𑀺. 𑀲𑁄 𑀓𑀺𑀭 𑀪𑀼𑀫𑁆𑀫𑀚𑀸𑀮𑀁 𑀦𑀸𑀫 𑀯𑀺𑀚𑁆𑀚𑀁 𑀚𑀸𑀦𑀸𑀢𑀺, 𑀬𑀸𑀬 𑀉𑀤𑁆𑀥𑀁 𑀅𑀲𑀻𑀢𑀺𑀳𑀢𑁆𑀣𑁂 𑀆𑀓𑀸𑀲𑁂 𑀘 𑀳𑁂𑀝𑁆𑀞𑀸 𑀪𑀽𑀫𑀺𑀬𑀜𑁆𑀘 𑀕𑀼𑀡𑀤𑁄𑀲𑁂 𑀧𑀲𑁆𑀲𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀧𑀤𑁂𑀲𑁂 𑀲𑀽𑀓𑀭𑀫𑀺𑀕𑀸 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄 𑀢𑀸𑀲𑁂𑀢𑁆𑀯𑀸 𑀧𑀭𑀺𑀧𑀸𑀢𑁂𑀦𑁆𑀢𑀺, 𑀫𑀡𑁆𑀟𑀽𑀓𑀫𑀽𑀲𑀺𑀓𑀸 𑀲𑀧𑁆𑀧𑁂 𑀪𑀺𑀁𑀲𑀸𑀧𑁂𑀦𑁆𑀢𑀺. 𑀲𑁄 𑀢𑁂 𑀤𑀺𑀲𑁆𑀯𑀸 ‘‘𑀅𑀬𑀁 𑀪𑀽𑀫𑀺𑀧𑁆𑀧𑀤𑁂𑀲𑁄 𑀧𑀣𑀯𑀻𑀅𑀕𑁆𑀕’’𑀦𑁆𑀢𑀺 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀅𑀲𑁆𑀲𑀫𑀁 𑀫𑀸𑀧𑁂𑀲𑀺. 𑀢𑀢𑁄 𑀲𑁄 𑀭𑀸𑀚𑀓𑀼𑀫𑀸𑀭𑁂 𑀆𑀳 𑁋 ‘‘𑀲𑀘𑁂 𑀫𑀫 𑀦𑀸𑀫𑁂𑀦 𑀦𑀕𑀭𑀁 𑀓𑀭𑁄𑀣, 𑀤𑁂𑀫𑀺 𑀯𑁄 𑀇𑀫𑀁 𑀑𑀓𑀸𑀲’’𑀦𑁆𑀢𑀺. 𑀢𑁂 𑀢𑀣𑀸 𑀧𑀝𑀺𑀚𑀸𑀦𑀺𑀁𑀲𑀼. 𑀢𑀸𑀧𑀲𑁄 ‘‘𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀞𑀢𑁆𑀯𑀸 𑀘𑀡𑁆𑀟𑀸𑀮𑀧𑀼𑀢𑁆𑀢𑁄𑀧𑀺 𑀘𑀓𑁆𑀓𑀯𑀢𑁆𑀢𑀺𑀁 𑀩𑀮𑁂𑀦 𑀅𑀢𑀺𑀲𑁂𑀢𑀻’’𑀢𑀺 𑀯𑀢𑁆𑀯𑀸 ‘‘𑀅𑀲𑁆𑀲𑀫𑁂 𑀭𑀜𑁆𑀜𑁄 𑀖𑀭𑀁 𑀫𑀸𑀧𑁂𑀢𑁆𑀯𑀸 𑀦𑀕𑀭𑀁 𑀫𑀸𑀧𑁂𑀣𑀸’’𑀢𑀺 𑀢𑀁 𑀑𑀓𑀸𑀲𑀁 𑀤𑀢𑁆𑀯𑀸 𑀲𑀬𑀁 𑀅𑀯𑀺𑀤𑀽𑀭𑁂 𑀧𑀩𑁆𑀩𑀢𑀧𑀸𑀤𑁂 𑀅𑀲𑁆𑀲𑀫𑀁 𑀓𑀢𑁆𑀯𑀸 𑀯𑀲𑀺. 𑀢𑀢𑁄 𑀓𑀼𑀫𑀸𑀭𑀸 𑀢𑀢𑁆𑀣 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀓𑀧𑀺𑀮𑀲𑁆𑀲 𑀯𑀼𑀢𑁆𑀣𑁄𑀓𑀸𑀲𑁂 𑀓𑀢𑀢𑁆𑀢𑀸 ‘‘𑀓𑀧𑀺𑀮𑀯𑀢𑁆𑀣𑀽’’𑀢𑀺 𑀦𑀸𑀫𑀁 𑀆𑀭𑁄𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀼𑀁.

𑀅𑀣 𑀅𑀫𑀘𑁆𑀘𑀸 ‘‘𑀇𑀫𑁂 𑀓𑀼𑀫𑀸𑀭𑀸 𑀯𑀬𑀧𑁆𑀧𑀢𑁆𑀢𑀸, 𑀬𑀤𑀺 𑀦𑁂𑀲𑀁 𑀧𑀺𑀢𑀸 𑀲𑀦𑁆𑀢𑀺𑀓𑁂 𑀪𑀯𑁂𑀬𑁆𑀬, 𑀲𑁄 𑀆𑀯𑀸𑀳𑀯𑀺𑀯𑀸𑀳𑀁 𑀓𑀸𑀭𑁂𑀬𑁆𑀬. 𑀇𑀤𑀸𑀦𑀺 𑀧𑀦 𑀅𑀫𑁆𑀳𑀸𑀓𑀁 𑀪𑀸𑀭𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀼𑀫𑀸𑀭𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀼𑀁. 𑀓𑀼𑀫𑀸𑀭𑀸 ‘‘𑀅𑀫𑁆𑀳𑀸𑀓𑀁 𑀲𑀤𑀺𑀲𑀸 𑀔𑀢𑁆𑀢𑀺𑀬𑀥𑀻𑀢𑀭𑁄 𑀦 𑀧𑀲𑁆𑀲𑀸𑀫, 𑀢𑀸𑀲𑀫𑁆𑀧𑀺 𑀪𑀕𑀺𑀦𑀻𑀦𑀁 𑀲𑀤𑀺𑀲𑁂 𑀔𑀢𑁆𑀢𑀺𑀬𑀓𑀼𑀫𑀸𑀭𑁂, 𑀚𑀸𑀢𑀺𑀲𑀫𑁆𑀪𑁂𑀤𑀜𑁆𑀘 𑀦 𑀓𑀭𑁄𑀫𑀸’’𑀢𑀺. 𑀢𑁂 𑀚𑀸𑀢𑀺𑀲𑀫𑁆𑀪𑁂𑀤𑀪𑀬𑁂𑀦 𑀚𑁂𑀝𑁆𑀞𑀪𑀕𑀺𑀦𑀺𑀁 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀳𑀺 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀢𑁂𑀲𑀁 𑀧𑀺𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀲𑀓𑁆𑀬𑀸 𑀯𑀢, 𑀪𑁄 𑀓𑀼𑀫𑀸𑀭𑀸, 𑀧𑀭𑀫𑀲𑀓𑁆𑀬𑀸 𑀯𑀢, 𑀪𑁄 𑀓𑀼𑀫𑀸𑀭𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀅𑀬𑀁 𑀢𑀸𑀯 𑀲𑀓𑁆𑀬𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀅𑀣 𑀔𑁄, 𑀅𑀫𑁆𑀩𑀝𑁆𑀞, 𑀭𑀸𑀚𑀸 𑀑𑀓𑁆𑀓𑀸𑀓𑁄 𑀅𑀫𑀘𑁆𑀘𑁂 𑀧𑀸𑀭𑀺𑀲𑀚𑁆𑀚𑁂 𑀆𑀫𑀦𑁆𑀢𑁂𑀲𑀺 𑁋 ‘𑀓𑀳𑀁 𑀦𑀼 𑀔𑁄, 𑀪𑁄, 𑀏𑀢𑀭𑀳𑀺 𑀓𑀼𑀫𑀸𑀭𑀸 𑀲𑀫𑁆𑀫𑀦𑁆𑀢𑀻’𑀢𑀺. 𑀅𑀢𑁆𑀣𑀺, 𑀤𑁂𑀯, 𑀳𑀺𑀫𑀯𑀦𑁆𑀢𑀧𑀲𑁆𑀲𑁂 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀫𑀳𑀸𑀲𑀸𑀓𑀲𑀡𑁆𑀟𑁄, 𑀢𑀢𑁆𑀣𑁂𑀢𑀭𑀳𑀺 𑀓𑀼𑀫𑀸𑀭𑀸 𑀲𑀫𑁆𑀫𑀦𑁆𑀢𑀺. 𑀢𑁂 𑀚𑀸𑀢𑀺𑀲𑀫𑁆𑀪𑁂𑀤𑀪𑀬𑀸 𑀲𑀓𑀸𑀳𑀺 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀻𑀢𑀺. 𑀅𑀣 𑀔𑁄, 𑀅𑀫𑁆𑀩𑀝𑁆𑀞, 𑀭𑀸𑀚𑀸 𑀑𑀓𑁆𑀓𑀸𑀓𑁄 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀲𑀓𑁆𑀬𑀸 𑀯𑀢, 𑀪𑁄 𑀓𑀼𑀫𑀸𑀭𑀸, 𑀧𑀭𑀫𑀲𑀓𑁆𑀬𑀸 𑀯𑀢, 𑀪𑁄 𑀓𑀼𑀫𑀸𑀭𑀸’𑀢𑀺, 𑀢𑀤𑀕𑁆𑀕𑁂 𑀔𑁄 𑀧𑀦, 𑀅𑀫𑁆𑀩𑀝𑁆𑀞, 𑀲𑀓𑁆𑀬𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀲𑁄 𑀘 𑀲𑀓𑁆𑀬𑀸𑀦𑀁 𑀧𑀼𑀩𑁆𑀩𑀧𑀼𑀭𑀺𑀲𑁄’’𑀢𑀺 (𑀤𑀻. 𑀦𑀺. 𑁧.𑁨𑁬𑁭).

𑀢𑀢𑁄 𑀦𑁂𑀲𑀁 𑀚𑁂𑀝𑁆𑀞𑀪𑀕𑀺𑀦𑀺𑀬𑀸 𑀓𑀼𑀝𑁆𑀞𑀭𑁄𑀕𑁄 𑀉𑀤𑀧𑀸𑀤𑀺, 𑀓𑁄𑀯𑀺𑀴𑀸𑀭𑀧𑀼𑀧𑁆𑀨𑀲𑀤𑀺𑀲𑀸𑀦𑀺 𑀕𑀢𑁆𑀢𑀸𑀦𑀺 𑀅𑀳𑁂𑀲𑀼𑀁. 𑀭𑀸𑀚𑀓𑀼𑀫𑀸𑀭𑀸 ‘‘𑀇𑀫𑀸𑀬 𑀲𑀤𑁆𑀥𑀺𑀁 𑀏𑀓𑀢𑁄 𑀦𑀺𑀲𑀚𑁆𑀚𑀝𑁆𑀞𑀸𑀦𑀪𑁄𑀚𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀉𑀧𑀭𑀺 𑀏𑀲 𑀭𑁄𑀕𑁄 𑀲𑀗𑁆𑀓𑀫𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀬𑁆𑀬𑀸𑀦𑀓𑀻𑀴𑀁 𑀕𑀘𑁆𑀙𑀦𑁆𑀢𑀸 𑀯𑀺𑀬 𑀢𑀁 𑀬𑀸𑀦𑁂 𑀆𑀭𑁄𑀧𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸𑀧𑁂𑀢𑁆𑀯𑀸 𑀢𑀁 𑀢𑀢𑁆𑀣 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂𑀳𑀺 𑀲𑀤𑁆𑀥𑀺𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺 𑀧𑀤𑀭𑀁 𑀧𑀝𑀺𑀘𑁆𑀙𑀸𑀤𑀸𑀧𑁂𑀢𑁆𑀯𑀸 𑀧𑀁𑀲𑀼𑀁 𑀤𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀫𑁄 𑀦𑀸𑀫 𑀭𑀸𑀚𑀸 𑀓𑀼𑀝𑁆𑀞𑀭𑁄𑀕𑀻 𑀑𑀭𑁄𑀥𑁂𑀳𑀺 𑀘 𑀦𑀸𑀝𑀓𑁂𑀳𑀺 𑀘 𑀚𑀺𑀕𑀼𑀘𑁆𑀙𑀺𑀬𑀫𑀸𑀦𑁄 𑀢𑁂𑀦 𑀲𑀁𑀯𑁂𑀕𑁂𑀦 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀤𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀧𑀡𑁆𑀡𑀫𑀽𑀮𑀨𑀮𑀸𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑁄𑀕𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀳𑀼𑀢𑁆𑀯𑀸, 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑁄 𑀫𑀳𑀦𑁆𑀢𑀁 𑀲𑀼𑀲𑀺𑀭𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀢𑀲𑁆𑀲𑀩𑁆𑀪𑀦𑁆𑀢𑀭𑁂 𑀲𑁄𑀴𑀲𑀳𑀢𑁆𑀣𑀧𑁆𑀧𑀫𑀸𑀡𑀁 𑀢𑀁 𑀓𑁄𑀮𑀸𑀧𑀁 𑀲𑁄𑀥𑁂𑀢𑁆𑀯𑀸, 𑀤𑁆𑀯𑀸𑀭𑀜𑁆𑀘 𑀯𑀸𑀢𑀧𑀸𑀦𑀜𑁆𑀘 𑀓𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀅𑀗𑁆𑀕𑀸𑀭𑀓𑀝𑀸𑀳𑁂 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀭𑀢𑁆𑀢𑀺𑀁 𑀯𑀺𑀲𑁆𑀲𑀭𑀜𑁆𑀘 𑀲𑀼𑀲𑁆𑀲𑀭𑀜𑁆𑀘 𑀲𑀼𑀡𑀦𑁆𑀢𑁄 𑀲𑀬𑀢𑀺. 𑀲𑁄 ‘‘𑀅𑀲𑀼𑀓𑀲𑁆𑀫𑀺𑀁 𑀧𑀤𑁂𑀲𑁂 𑀲𑀻𑀳𑁄 𑀲𑀤𑁆𑀤𑀫𑀓𑀸𑀲𑀺, 𑀅𑀲𑀼𑀓𑀲𑁆𑀫𑀺𑀁 𑀩𑁆𑀬𑀕𑁆𑀖𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀪𑀸𑀢𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀺𑀖𑀸𑀲𑀫𑀁𑀲𑀁 𑀆𑀤𑀸𑀬 𑀧𑀘𑀺𑀢𑁆𑀯𑀸 𑀔𑀸𑀤𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀲𑁄 𑀧𑀘𑁆𑀘𑀽𑀲𑀲𑀫𑀬𑁂 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀢𑁂𑀦 𑀘 𑀲𑀫𑀬𑁂𑀦 𑀢𑀲𑁆𑀲𑀸 𑀭𑀸𑀚𑀥𑀻𑀢𑀸𑀬 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀩𑁆𑀬𑀕𑁆𑀖𑁄 𑀢𑀁 𑀧𑀤𑁂𑀲𑀁 𑀔𑀡𑀺𑀢𑁆𑀯𑀸 𑀧𑀤𑀭𑀢𑁆𑀣𑀭𑁂 𑀯𑀺𑀯𑀭𑀫𑀓𑀸𑀲𑀺. 𑀢𑁂𑀦 𑀯𑀺𑀯𑀭𑁂𑀦 𑀲𑀸 𑀩𑁆𑀬𑀕𑁆𑀖𑀁 𑀤𑀺𑀲𑁆𑀯𑀸 𑀪𑀻𑀢𑀸 𑀯𑀺𑀲𑁆𑀲𑀭𑀫𑀓𑀸𑀲𑀺. 𑀲𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀇𑀢𑁆𑀣𑀺𑀲𑀤𑁆𑀤𑁄 𑀏𑀲𑁄’’𑀢𑀺 𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀸𑀢𑁄𑀯 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀓𑁄 𑀏𑀢𑁆𑀣𑀸’’𑀢𑀺 𑀆𑀳. ‘‘𑀫𑀸𑀢𑀼𑀕𑀸𑀫𑁄 𑀲𑀸𑀫𑀻’’𑀢𑀺. ‘‘𑀦𑀺𑀓𑁆𑀔𑀫𑀸’’𑀢𑀺. ‘‘𑀦 𑀦𑀺𑀓𑁆𑀔𑀫𑀸𑀫𑀻’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀔𑀢𑁆𑀢𑀺𑀬𑀓𑀜𑁆𑀜𑀸 𑀅𑀳’’𑀦𑁆𑀢𑀺. 𑀏𑀯𑀁 𑀲𑁄𑀩𑁆𑀪𑁂 𑀦𑀺𑀔𑀸𑀢𑀸𑀧𑀺 𑀫𑀸𑀦𑀫𑁂𑀯 𑀓𑀭𑁄𑀢𑀺. 𑀲𑁄 𑀲𑀩𑁆𑀩𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑁄’’𑀢𑀺 𑀚𑀸𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀏𑀳𑀺 𑀤𑀸𑀦𑀺 𑀔𑀻𑀭𑁂 𑀧𑀓𑁆𑀔𑀺𑀢𑁆𑀢𑀲𑀧𑁆𑀧𑀺 𑀯𑀺𑀬 𑀚𑀸𑀢’’𑀦𑁆𑀢𑀺 𑀆𑀳. 𑀲𑀸 ‘‘𑀓𑀼𑀝𑁆𑀞𑀭𑁄𑀕𑀺𑀦𑀻𑀫𑁆𑀳𑀺 𑀲𑀸𑀫𑀺, 𑀦 𑀲𑀓𑁆𑀓𑀸 𑀦𑀺𑀓𑁆𑀔𑀫𑀺𑀢𑀼’’𑀦𑁆𑀢𑀺 𑀆𑀳. 𑀲𑁄 ‘‘𑀓𑀢𑀓𑀫𑁆𑀫𑁄 𑀤𑀸𑀦𑀺 𑀅𑀳𑀁 𑀲𑀓𑁆𑀓𑀸 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺 𑀦𑀺𑀲𑁆𑀲𑁂𑀡𑀺𑀁 𑀤𑀢𑁆𑀯𑀸 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑁄𑀓𑀸𑀲𑀁 𑀦𑁂𑀢𑁆𑀯𑀸 𑀲𑀬𑀁 𑀧𑀭𑀺𑀪𑀼𑀢𑁆𑀢𑀪𑁂𑀲𑀚𑁆𑀚𑀸𑀦𑀺 𑀏𑀯 𑀤𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑁄𑀕𑀁 𑀲𑀼𑀯𑀡𑁆𑀡𑀯𑀡𑁆𑀡𑀫𑀓𑀸𑀲𑀺. 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸 𑀧𑀞𑀫𑀲𑀁𑀯𑀸𑀲𑁂𑀦𑁂𑀯 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀤𑁆𑀯𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺, 𑀧𑀼𑀦𑀧𑀺 𑀤𑁆𑀯𑁂𑀢𑀺 𑀏𑀯𑀁 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀯𑀺𑀚𑀸𑀬𑀺. 𑀏𑀯𑀁 𑀢𑁂 𑀤𑁆𑀯𑀢𑁆𑀢𑀺𑀁𑀲 𑀪𑀸𑀢𑀭𑁄 𑀅𑀳𑁂𑀲𑀼𑀁. 𑀢𑁂 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁂 𑀧𑀺𑀢𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀲𑀺𑀓𑁆𑀔𑀸𑀧𑁂𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀭𑀸𑀫𑀭𑀜𑁆𑀜𑁄 𑀦𑀕𑀭𑀯𑀸𑀲𑀻 𑀧𑀩𑁆𑀩𑀢𑁂 𑀭𑀢𑀦𑀸𑀦𑀺 𑀕𑀯𑁂𑀲𑀦𑁆𑀢𑁄 𑀢𑀁 𑀧𑀤𑁂𑀲𑀁 𑀆𑀕𑀢𑁄 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀅𑀜𑁆𑀜𑀸𑀲𑀺. ‘‘𑀚𑀸𑀦𑀸𑀫𑀳𑀁, 𑀤𑁂𑀯, 𑀢𑀼𑀫𑁆𑀳𑁂’’𑀢𑀺 𑀆𑀳. ‘‘𑀓𑀼𑀢𑁄 𑀢𑁆𑀯𑀁 𑀆𑀕𑀢𑁄𑀲𑀻’’𑀢𑀺 𑀘 𑀢𑁂𑀦 𑀧𑀼𑀝𑁆𑀞𑁄 ‘‘𑀦𑀕𑀭𑀢𑁄 𑀤𑁂𑀯𑀸’’𑀢𑀺 𑀆𑀳. 𑀢𑀢𑁄 𑀦𑀁 𑀭𑀸𑀚𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺. 𑀏𑀯𑀁 𑀢𑁂𑀲𑀼 𑀲𑀫𑀼𑀮𑁆𑀮𑀧𑀫𑀸𑀦𑁂𑀲𑀼 𑀢𑁂 𑀤𑀸𑀭𑀓𑀸 𑀆𑀕𑀫𑀺𑀁𑀲𑀼. 𑀲𑁄 𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀓𑁂 𑀤𑁂𑀯𑀸’’𑀢𑀺 𑀧𑀼𑀘𑁆𑀙𑀺. ‘‘𑀧𑀼𑀢𑁆𑀢𑀸 𑀫𑁂 𑀪𑀡𑁂’’𑀢𑀺. ‘‘𑀇𑀫𑁂𑀳𑀺 𑀤𑀸𑀦𑀺, 𑀤𑁂𑀯, 𑀤𑁆𑀯𑀢𑁆𑀢𑀺𑀁𑀲𑀓𑀼𑀫𑀸𑀭𑁂𑀳𑀺 𑀧𑀭𑀺𑀯𑀼𑀢𑁄 𑀯𑀦𑁂 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀏𑀳𑀺 𑀭𑀚𑁆𑀚𑀫𑀦𑀼𑀲𑀸𑀲𑀸’’𑀢𑀺? ‘‘𑀅𑀮𑀁, 𑀪𑀡𑁂, 𑀇𑀥𑁂𑀯 𑀲𑀼𑀔’’𑀦𑁆𑀢𑀺. 𑀲𑁄 ‘‘𑀮𑀤𑁆𑀥𑀁 𑀤𑀸𑀦𑀺 𑀫𑁂 𑀓𑀣𑀸𑀧𑀸𑀪𑀢’’𑀦𑁆𑀢𑀺 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀼𑀢𑁆𑀢𑀲𑁆𑀲𑀸𑀭𑁄𑀘𑁂𑀲𑀺. 𑀭𑀜𑁆𑀜𑁄 𑀧𑀼𑀢𑁆𑀢𑁄 ‘‘𑀧𑀺𑀢𑀭𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀧𑀺𑀢𑀭𑀁 𑀬𑀸𑀘𑀺. 𑀲𑁄𑀧𑀺 ‘‘𑀅𑀮𑀁, 𑀢𑀸𑀢 𑀓𑀼𑀫𑀸𑀭, 𑀇𑀥𑁂𑀯 𑀲𑀼𑀔’’𑀦𑁆𑀢𑀺 𑀦𑁂𑀯 𑀇𑀘𑁆𑀙𑀺. 𑀢𑀢𑁄 𑀭𑀸𑀚𑀧𑀼𑀢𑁆𑀢𑁄 ‘‘𑀦 𑀤𑀸𑀦𑀺 𑀭𑀸𑀚𑀸 𑀆𑀕𑀦𑁆𑀢𑀼𑀁 𑀇𑀘𑁆𑀙𑀢𑀺, 𑀳𑀦𑁆𑀤𑀲𑁆𑀲 𑀇𑀥𑁂𑀯 𑀦𑀕𑀭𑀁 𑀫𑀸𑀧𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀓𑁄𑀮𑀭𑀼𑀓𑁆𑀔𑀁 𑀉𑀤𑁆𑀥𑀭𑀺𑀢𑁆𑀯𑀸 𑀖𑀭𑀁 𑀓𑀢𑁆𑀯𑀸 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀓𑁄𑀮𑀭𑀼𑀓𑁆𑀔𑀁 𑀅𑀧𑀦𑁂𑀢𑁆𑀯𑀸 𑀓𑀢𑀢𑁆𑀢𑀸 ‘‘𑀓𑁄𑀮𑀦𑀕𑀭’’𑀦𑁆𑀢𑀺 𑀘 𑀩𑁆𑀬𑀕𑁆𑀖𑀧𑀣𑁂 𑀓𑀢𑀢𑁆𑀢𑀸 ‘‘𑀩𑁆𑀬𑀕𑁆𑀖𑀧𑀚𑁆𑀚’’𑀦𑁆𑀢𑀺 𑀘𑀸𑀢𑀺 𑀤𑁆𑀯𑁂 𑀦𑀸𑀫𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀅𑀕𑀫𑀸𑀲𑀺.

𑀢𑀢𑁄 𑀯𑀬𑀧𑁆𑀧𑀢𑁆𑀢𑁂 𑀓𑀼𑀫𑀸𑀭𑁂 𑀫𑀸𑀢𑀸 𑀆𑀡𑀸𑀧𑁂𑀲𑀺 𑁋 ‘‘𑀢𑀸𑀢𑀸, 𑀢𑀼𑀫𑁆𑀳𑀸𑀓𑀁 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀦𑁄 𑀲𑀓𑁆𑀬𑀸 𑀫𑀸𑀢𑀼𑀮𑀸 𑀳𑁄𑀦𑁆𑀢𑀺, 𑀥𑀻𑀢𑀭𑁄 𑀦𑁂𑀲𑀁 𑀕𑀡𑁆𑀳𑀣𑀸’’𑀢𑀺. 𑀢𑁂 𑀬𑀁 𑀤𑀺𑀯𑀲𑀁 𑀔𑀢𑁆𑀢𑀺𑀬𑀓𑀜𑁆𑀜𑀸𑀬𑁄 𑀦𑀤𑀻𑀓𑀻𑀴𑀦𑀁 𑀕𑀘𑁆𑀙𑀦𑁆𑀢𑀺, 𑀢𑀁 𑀤𑀺𑀯𑀲𑀁 𑀕𑀦𑁆𑀢𑁆𑀯𑀸 𑀦𑀤𑀻𑀢𑀺𑀢𑁆𑀣𑀁 𑀉𑀧𑀭𑀼𑀦𑁆𑀥𑀺𑀢𑁆𑀯𑀸 𑀦𑀸𑀫𑀸𑀦𑀺 𑀲𑀸𑀯𑁂𑀢𑁆𑀯𑀸 𑀧𑀢𑁆𑀣𑀺𑀢𑀸 𑀧𑀢𑁆𑀣𑀺𑀢𑀸 𑀭𑀸𑀚𑀥𑀻𑀢𑀭𑁄 𑀕𑀳𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀲𑀓𑁆𑀬𑀭𑀸𑀚𑀸𑀦𑁄 𑀲𑀼𑀢𑁆𑀯𑀸 ‘‘𑀳𑁄𑀢𑀼 𑀪𑀡𑁂, 𑀅𑀫𑁆𑀳𑀸𑀓𑀁 𑀜𑀸𑀢𑀓𑀸 𑀏𑀯𑀸’’𑀢𑀺 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀬𑀁 𑀓𑁄𑀮𑀺𑀬𑀸𑀦𑀁 𑀉𑀧𑁆𑀧𑀢𑁆𑀢𑀺.

𑀏𑀯𑀁 𑀢𑁂𑀲𑀁 𑀲𑀸𑀓𑀺𑀬𑀓𑁄𑀮𑀺𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑁄𑀦𑁆𑀢𑀸𑀦𑀁 𑀆𑀕𑀢𑁄 𑀯𑀁𑀲𑁄 𑀬𑀸𑀯 𑀲𑀻𑀳𑀳𑀦𑀼𑀭𑀸𑀚𑀸, 𑀢𑀸𑀯 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀲𑀻𑀳𑀳𑀦𑀼𑀭𑀜𑁆𑀜𑁄 𑀓𑀺𑀭 𑀧𑀜𑁆𑀘 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁 𑁋 𑀲𑀼𑀤𑁆𑀥𑁄𑀤𑀦𑁄, 𑀅𑀫𑀺𑀢𑁄𑀤𑀦𑁄, 𑀥𑁄𑀢𑁄𑀤𑀦𑁄, 𑀲𑀓𑁆𑀓𑁄𑀤𑀦𑁄, 𑀲𑀼𑀓𑁆𑀓𑁄𑀤𑀦𑁄𑀢𑀺. 𑀢𑁂𑀲𑀼 𑀲𑀼𑀤𑁆𑀥𑁄𑀤𑀦𑁂 𑀭𑀚𑁆𑀚𑀁 𑀓𑀸𑀭𑀬𑀫𑀸𑀦𑁂 𑀢𑀲𑁆𑀲 𑀧𑀚𑀸𑀧𑀢𑀺𑀬𑀸 𑀅𑀜𑁆𑀚𑀦𑀭𑀜𑁆𑀜𑁄 𑀥𑀻𑀢𑀸𑀬 𑀫𑀳𑀸𑀫𑀸𑀬𑀸𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀽𑀭𑀺𑀢𑀧𑀸𑀭𑀫𑀻 𑀫𑀳𑀸𑀧𑀼𑀭𑀺𑀲𑁄 𑀚𑀸𑀢𑀓𑀦𑀺𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦 𑀢𑀼𑀲𑀺𑀢𑀧𑀼𑀭𑀸 𑀘𑀯𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑀢𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑁄 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀓𑁆𑀓𑀫𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸𑀤𑀬𑁄 𑀅𑀭𑀺𑀬𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀢𑁆𑀯𑀸 𑀧𑀼𑀦𑀧𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀦𑁆𑀦𑀭𑀲𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀳𑀭𑀢𑀺 𑀦𑀺𑀕𑁆𑀭𑁄𑀥𑀸𑀭𑀸𑀫𑁂.

𑀢𑀢𑁆𑀣 𑀯𑀺𑀳𑀭𑀦𑁆𑀢𑁂 𑀘 𑀪𑀕𑀯𑀢𑀺 𑀲𑀸𑀓𑀺𑀬𑀓𑁄𑀮𑀺𑀬𑀸𑀦𑀁 𑀉𑀤𑀓𑀁 𑀧𑀝𑀺𑀘𑁆𑀘 𑀓𑀮𑀳𑁄 𑀅𑀳𑁄𑀲𑀺. 𑀓𑀣𑀁? 𑀦𑁂𑀲𑀁 𑀓𑀺𑀭 𑀉𑀪𑀺𑀦𑁆𑀦𑀫𑁆𑀧𑀺 𑀓𑀧𑀺𑀮𑀧𑀼𑀭𑀓𑁄𑀮𑀺𑀬𑀧𑀼𑀭𑀸𑀦𑀁 𑀅𑀦𑁆𑀢𑀭𑁂 𑀭𑁄𑀳𑀺𑀡𑀻 𑀦𑀸𑀫 𑀦𑀤𑀻 𑀧𑀯𑀢𑁆𑀢𑀢𑀺. 𑀲𑀸 𑀓𑀤𑀸𑀘𑀺 𑀅𑀧𑁆𑀧𑁄𑀤𑀓𑀸 𑀳𑁄𑀢𑀺, 𑀓𑀤𑀸𑀘𑀺 𑀫𑀳𑁄𑀤𑀓𑀸. 𑀅𑀧𑁆𑀧𑁄𑀤𑀓𑀓𑀸𑀮𑁂 𑀲𑁂𑀢𑀼𑀁 𑀓𑀢𑁆𑀯𑀸 𑀲𑀸𑀓𑀺𑀬𑀸𑀧𑀺 𑀓𑁄𑀮𑀺𑀬𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀲𑁆𑀲𑀧𑀸𑀬𑀦𑀢𑁆𑀣𑀁 𑀉𑀤𑀓𑀁 𑀆𑀦𑁂𑀦𑁆𑀢𑀺. 𑀢𑁂𑀲𑀁 𑀫𑀦𑀼𑀲𑁆𑀲𑀸 𑀏𑀓𑀤𑀺𑀯𑀲𑀁 𑀲𑁂𑀢𑀼𑀁 𑀓𑀭𑁄𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀪𑀡𑁆𑀟𑀦𑁆𑀢𑀸 ‘‘𑀅𑀭𑁂 𑀢𑀼𑀫𑁆𑀳𑀸𑀓𑀁 𑀭𑀸𑀚𑀓𑀼𑀮𑀁 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺 𑀓𑀼𑀓𑁆𑀓𑀼𑀝𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀺𑀢𑀺𑀭𑀘𑁆𑀙𑀸𑀦𑀸 𑀯𑀺𑀬, 𑀢𑀼𑀫𑁆𑀳𑀸𑀓𑀁 𑀭𑀸𑀚𑀓𑀼𑀮𑀁 𑀲𑀼𑀲𑀺𑀭𑀭𑀼𑀓𑁆𑀔𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺 𑀧𑀺𑀲𑀸𑀘𑀺𑀮𑁆𑀮𑀺𑀓𑀸 𑀯𑀺𑀬𑀸’’𑀢𑀺 𑀏𑀯𑀁 𑀚𑀸𑀢𑀺𑀯𑀸𑀤𑁂𑀦 𑀔𑀼𑀁𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀸𑀚𑀽𑀦𑀁 𑀆𑀭𑁄𑀘𑁂𑀲𑀼𑀁. 𑀢𑁂 𑀓𑀼𑀤𑁆𑀥𑀸 𑀬𑀼𑀤𑁆𑀥𑀲𑀚𑁆𑀚𑀸 𑀳𑀼𑀢𑁆𑀯𑀸 𑀭𑁄𑀳𑀺𑀡𑀻𑀦𑀤𑀻𑀢𑀻𑀭𑀁 𑀲𑀫𑁆𑀧𑀢𑁆𑀢𑀸. 𑀏𑀯𑀁 𑀲𑀸𑀕𑀭𑀲𑀤𑀺𑀲𑀁 𑀩𑀮𑀁 𑀅𑀝𑁆𑀞𑀸𑀲𑀺.

𑀅𑀣 𑀪𑀕𑀯𑀸 ‘‘𑀜𑀸𑀢𑀓𑀸 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀳𑀦𑁆𑀤, 𑀦𑁂 𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀲𑁂𑀦𑀸𑀦𑀁 𑀫𑀚𑁆𑀛𑁂 𑀅𑀝𑁆𑀞𑀸𑀲𑀺. 𑀢𑀫𑁆𑀧𑀺 𑀆𑀯𑀚𑁆𑀚𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀢𑁄 𑀆𑀕𑀢𑁄𑀢𑀺 𑀏𑀓𑁂. 𑀏𑀯𑀁 𑀞𑀢𑁆𑀯𑀸 𑀘 𑀧𑀦 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 (𑀲𑀼. 𑀦𑀺. 𑁯𑁪𑁧 𑀆𑀤𑀬𑁄) 𑀅𑀪𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀲𑀁𑀯𑁂𑀕𑀧𑁆𑀧𑀢𑁆𑀢𑀸 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀁𑀲𑀼, 𑀫𑀳𑀕𑁆𑀖𑀜𑁆𑀘 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀪𑀕𑀯𑀸 𑀑𑀭𑀼𑀬𑁆𑀳 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀼𑀞𑀸𑀭𑀻𑀳𑀢𑁆𑀣𑁄 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀓𑀁 𑀨𑀦𑁆𑀤𑀦𑀚𑀸𑀢𑀓𑀁 (𑀚𑀸. 𑁧.𑁧𑁩.𑁧𑁪), ‘‘𑀯𑀦𑁆𑀤𑀸𑀫𑀺 𑀢𑀁 𑀓𑀼𑀜𑁆𑀚𑀭𑀸’’𑀢𑀺𑀆𑀤𑀺𑀓𑀁 𑀮𑀝𑀼𑀓𑀺𑀓𑀚𑀸𑀢𑀓𑀁 (𑀚𑀸. 𑁧.𑁫.𑁩𑁯).

‘‘𑀲𑀫𑁆𑀫𑁄𑀤𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀚𑀸𑀮𑀫𑀸𑀤𑀸𑀬 𑀧𑀓𑁆𑀔𑀺𑀦𑁄;

𑀬𑀤𑀸 𑀢𑁂 𑀯𑀺𑀯𑀤𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀏𑀳𑀺𑀦𑁆𑀢𑀺 𑀫𑁂 𑀯𑀲’’𑀦𑁆𑀢𑀺. (𑀚𑀸. 𑁧.𑁧.𑁩𑁩) 𑁋

𑀇𑀫𑀁 𑀯𑀝𑁆𑀝𑀓𑀚𑀸𑀢𑀓𑀜𑁆𑀘 𑀓𑀣𑁂𑀢𑁆𑀯𑀸 𑀧𑀼𑀦 𑀢𑁂𑀲𑀁 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀁 𑀜𑀸𑀢𑀺𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀫𑀳𑀸𑀯𑀁𑀲𑀁 𑀓𑀣𑁂𑀲𑀺. 𑀢𑁂 ‘‘𑀧𑀼𑀩𑁆𑀩𑁂 𑀓𑀺𑀭 𑀫𑀬𑀁 𑀜𑀸𑀢𑀓𑀸 𑀏𑀯𑀸’’𑀢𑀺 𑀅𑀢𑀺𑀯𑀺𑀬 𑀧𑀲𑀻𑀤𑀺𑀁𑀲𑀼. 𑀢𑀢𑁄 𑀲𑀓𑁆𑀬𑀸 𑀅𑀟𑁆𑀠𑀢𑁂𑀬𑁆𑀬𑀓𑀼𑀫𑀸𑀭𑀲𑀢𑁂, 𑀓𑁄𑀮𑀺𑀬𑀸 𑀅𑀟𑁆𑀠𑀢𑁂𑀬𑁆𑀬𑀓𑀼𑀫𑀸𑀭𑀲𑀢𑁂𑀢𑀺 𑀧𑀜𑁆𑀘 𑀓𑀼𑀫𑀸𑀭𑀲𑀢𑁂 𑀪𑀕𑀯𑀢𑁄 𑀧𑀭𑀺𑀯𑀸𑀭𑀢𑁆𑀣𑀸𑀬 𑀅𑀤𑀁𑀲𑀼. 𑀪𑀕𑀯𑀸 𑀢𑁂𑀲𑀁 𑀧𑀼𑀩𑁆𑀩𑀳𑁂𑀢𑀼𑀁 𑀤𑀺𑀲𑁆𑀯𑀸 ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀆𑀳. 𑀢𑁂 𑀲𑀩𑁆𑀩𑁂 𑀇𑀤𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀬𑀼𑀢𑁆𑀢𑀸 𑀆𑀓𑀸𑀲𑁂 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀕𑀫𑁆𑀫 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀪𑀕𑀯𑀸 𑀢𑁂 𑀆𑀤𑀸𑀬 𑀫𑀳𑀸𑀯𑀦𑀁 𑀅𑀕𑀫𑀸𑀲𑀺. 𑀢𑁂𑀲𑀁 𑀧𑀚𑀸𑀧𑀢𑀺𑀬𑁄 𑀤𑀽𑀢𑁂 𑀧𑀸𑀳𑁂𑀲𑀼𑀁, 𑀢𑁂 𑀢𑀸𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀧𑀮𑁄𑀪𑀺𑀬𑀫𑀸𑀦𑀸 𑀉𑀓𑁆𑀓𑀡𑁆𑀞𑀺𑀁𑀲𑀼. 𑀪𑀕𑀯𑀸 𑀢𑁂𑀲𑀁 𑀉𑀓𑁆𑀓𑀡𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁆𑀣 𑀓𑀼𑀡𑀸𑀮𑀚𑀸𑀢𑀓𑀓𑀣𑀸𑀬 (𑀚𑀸. 𑁨.𑁨𑁧.𑁨𑁮𑁯 𑀓𑀼𑀡𑀸𑀮𑀚𑀸𑀢𑀓𑀁) 𑀢𑁂𑀲𑀁 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑀼𑀓𑀸𑀫𑁄 𑀆𑀳 𑁋 ‘‘𑀤𑀺𑀝𑁆𑀞𑀧𑀼𑀩𑁆𑀩𑁄 𑀯𑁄, 𑀪𑀺𑀓𑁆𑀔𑀯𑁂, 𑀳𑀺𑀫𑀯𑀸’’𑀢𑀺? ‘‘𑀦 𑀪𑀕𑀯𑀸’’𑀢𑀺. ‘‘𑀏𑀣, 𑀪𑀺𑀓𑁆𑀔𑀯𑁂, 𑀧𑁂𑀓𑁆𑀔𑀣𑀸’’𑀢𑀺 𑀅𑀢𑁆𑀢𑀦𑁄 𑀇𑀤𑁆𑀥𑀺𑀬𑀸 𑀢𑁂 𑀆𑀓𑀸𑀲𑁂𑀦 𑀦𑁂𑀦𑁆𑀢𑁄 ‘‘𑀅𑀬𑀁 𑀲𑀼𑀯𑀡𑁆𑀡𑀧𑀩𑁆𑀩𑀢𑁄, 𑀅𑀬𑀁 𑀭𑀚𑀢𑀧𑀩𑁆𑀩𑀢𑁄, 𑀅𑀬𑀁 𑀫𑀡𑀺𑀧𑀩𑁆𑀩𑀢𑁄’’𑀢𑀺 𑀦𑀸𑀦𑀧𑁆𑀧𑀓𑀸𑀭𑁂 𑀧𑀩𑁆𑀩𑀢𑁂 𑀤𑀲𑁆𑀲𑁂𑀢𑁆𑀯𑀸 𑀓𑀼𑀡𑀸𑀮𑀤𑀳𑁂 𑀫𑀦𑁄𑀲𑀺𑀮𑀸𑀢𑀮𑁂 𑀧𑀘𑁆𑀘𑀼𑀝𑁆𑀞𑀸𑀲𑀺. 𑀢𑀢𑁄 ‘‘𑀳𑀺𑀫𑀯𑀦𑁆𑀢𑁂 𑀲𑀩𑁆𑀩𑁂 𑀘𑀢𑀼𑀧𑁆𑀧𑀤𑀩𑀳𑀼𑀧𑁆𑀧𑀤𑀸𑀤𑀺𑀪𑁂𑀤𑀸 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀆𑀕𑀘𑁆𑀙𑀦𑁆𑀢𑀼, 𑀲𑀩𑁆𑀩𑁂𑀲𑀜𑁆𑀘 𑀧𑀘𑁆𑀙𑀢𑁄 𑀓𑀼𑀡𑀸𑀮𑀲𑀓𑀼𑀡𑁄’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀆𑀕𑀘𑁆𑀙𑀦𑁆𑀢𑁂 𑀘 𑀢𑁂 𑀚𑀸𑀢𑀺𑀦𑀸𑀫𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀯𑀡𑁆𑀡𑁂𑀦𑁆𑀢𑁄 ‘‘𑀏𑀢𑁂, 𑀪𑀺𑀓𑁆𑀔𑀯𑁂, 𑀳𑀁𑀲𑀸, 𑀏𑀢𑁂 𑀓𑁄𑀜𑁆𑀘𑀸, 𑀏𑀢𑁂 𑀘𑀓𑁆𑀓𑀯𑀸𑀓𑀸, 𑀓𑀭𑀯𑀻𑀓𑀸, 𑀳𑀢𑁆𑀣𑀺𑀲𑁄𑀡𑁆𑀟𑀓𑀸, 𑀧𑁄𑀓𑁆𑀔𑀭𑀲𑀸𑀢𑀓𑀸’’𑀢𑀺 𑀢𑁂𑀲𑀁 𑀤𑀲𑁆𑀲𑁂𑀲𑀺.

𑀢𑁂 𑀯𑀺𑀫𑁆𑀳𑀺𑀢𑀳𑀤𑀬𑀸 𑀧𑀲𑁆𑀲𑀦𑁆𑀢𑀸 𑀲𑀩𑁆𑀩𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀁 𑀤𑁆𑀯𑀻𑀳𑀺 𑀤𑀺𑀚𑀓𑀜𑁆𑀜𑀸𑀳𑀺 𑀫𑀼𑀔𑀢𑀼𑀡𑁆𑀟𑀓𑁂𑀦 𑀟𑀁𑀲𑀺𑀢𑁆𑀯𑀸 𑀕𑀳𑀺𑀢𑀓𑀝𑁆𑀞𑀯𑁂𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑀁 𑀲𑀳𑀲𑁆𑀲𑀤𑀺𑀚𑀓𑀜𑁆𑀜𑀸𑀧𑀭𑀺𑀯𑀸𑀭𑀁 𑀓𑀼𑀡𑀸𑀮𑀲𑀓𑀼𑀡𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀪𑀕𑀯𑀦𑁆𑀢𑀁 𑀆𑀳𑀁𑀲𑀼 𑁋 ‘‘𑀓𑀘𑁆𑀘𑀺, 𑀪𑀦𑁆𑀢𑁂, 𑀪𑀕𑀯𑀸𑀧𑀺 𑀇𑀥 𑀓𑀼𑀡𑀸𑀮𑀭𑀸𑀚𑀸 𑀪𑀽𑀢𑀧𑀼𑀩𑁆𑀩𑁄’’𑀢𑀺? ‘‘𑀆𑀫, 𑀪𑀺𑀓𑁆𑀔𑀯𑁂, 𑀫𑀬𑀸𑀯𑁂𑀲 𑀓𑀼𑀡𑀸𑀮𑀯𑀁𑀲𑁄 𑀓𑀢𑁄. 𑀅𑀢𑀻𑀢𑁂 𑀳𑀺 𑀫𑀬𑀁 𑀘𑀢𑁆𑀢𑀸𑀭𑁄 𑀚𑀦𑀸 𑀇𑀥 𑀯𑀲𑀺𑀫𑁆𑀳𑀸 𑁋 𑀦𑀸𑀭𑀤𑁄 𑀤𑁂𑀯𑀺𑀮𑁄 𑀇𑀲𑀺, 𑀆𑀦𑀦𑁆𑀤𑁄 𑀕𑀺𑀚𑁆𑀛𑀭𑀸𑀚𑀸, 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄, 𑀅𑀳𑀁 𑀓𑀼𑀡𑀸𑀮𑁄 𑀲𑀓𑀼𑀡𑁄’’𑀢𑀺 𑀲𑀩𑁆𑀩𑀁 𑀫𑀳𑀸𑀓𑀼𑀡𑀸𑀮𑀚𑀸𑀢𑀓𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑁄 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀪𑀺𑀭𑀢𑀺 𑀯𑀽𑀧𑀲𑀦𑁆𑀢𑀸. 𑀢𑀢𑁄 𑀢𑁂𑀲𑀁 𑀪𑀕𑀯𑀸 𑀲𑀘𑁆𑀘𑀓𑀣𑀁 𑀓𑀣𑁂𑀲𑀺, 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑀧𑀘𑁆𑀙𑀺𑀫𑀓𑁄 𑀲𑁄𑀢𑀸𑀧𑀦𑁆𑀦𑁄, 𑀲𑀩𑁆𑀩𑀉𑀧𑀭𑀺𑀫𑁄 𑀅𑀦𑀸𑀕𑀸𑀫𑀻 𑀅𑀳𑁄𑀲𑀺, 𑀏𑀓𑁄𑀧𑀺 𑀧𑀼𑀣𑀼𑀚𑁆𑀚𑀦𑁄 𑀯𑀸 𑀅𑀭𑀳𑀸 𑀯𑀸 𑀦𑀢𑁆𑀣𑀺. 𑀢𑀢𑁄 𑀪𑀕𑀯𑀸 𑀢𑁂 𑀆𑀤𑀸𑀬 𑀧𑀼𑀦𑀤𑁂𑀯 𑀫𑀳𑀸𑀯𑀦𑁂 𑀑𑀭𑀼𑀳𑀺. 𑀆𑀕𑀘𑁆𑀙𑀫𑀸𑀦𑀸 𑀘 𑀢𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄𑀯 𑀇𑀤𑁆𑀥𑀺𑀬𑀸 𑀆𑀕𑀘𑁆𑀙𑀺𑀁𑀲𑀼.

𑀅𑀣 𑀦𑁂𑀲𑀁 𑀪𑀕𑀯𑀸 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀧𑀼𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑁂 𑀧𑀜𑁆𑀘𑀲𑀢𑀸𑀧𑀺 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀧𑀞𑀫𑀁 𑀧𑀢𑁆𑀢𑁄 𑀧𑀞𑀫𑀫𑁂𑀯 𑀅𑀕𑀫𑀸𑀲𑀺 ‘‘𑀪𑀕𑀯𑀢𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺. 𑀆𑀕𑀦𑁆𑀢𑁆𑀯𑀸 𑀘 ‘‘𑀅𑀪𑀺𑀭𑀫𑀸𑀫𑀳𑀁 𑀪𑀕𑀯𑀸, 𑀦 𑀉𑀓𑁆𑀓𑀡𑁆𑀞𑀸𑀫𑀻’’𑀢𑀺 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀯𑀁 𑀢𑁂 𑀲𑀩𑁆𑀩𑁂𑀧𑀺 𑀅𑀦𑀼𑀓𑁆𑀓𑀫𑁂𑀦 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼 𑀚𑁂𑀝𑁆𑀞𑀫𑀸𑀲𑀉𑀧𑁄𑀲𑀣𑀤𑀺𑀯𑀲𑁂 𑀲𑀸𑀬𑀦𑁆𑀳𑀲𑀫𑀬𑁂. 𑀢𑀢𑁄 𑀧𑀜𑁆𑀘𑀲𑀢𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑀁 𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀞𑀧𑁂𑀢𑁆𑀯𑀸 𑀅𑀲𑀜𑁆𑀜𑀲𑀢𑁆𑀢𑁂 𑀘 𑀅𑀭𑀽𑀧𑀩𑁆𑀭𑀳𑁆𑀫𑀸𑀦𑁄 𑀘 𑀲𑀓𑀮𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀅𑀯𑀲𑁂𑀲𑀤𑁂𑀯𑀢𑀸𑀤𑀬𑁄 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀲𑀼𑀔𑀼𑀫𑀢𑁆𑀢𑀪𑀸𑀯𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀲𑀫𑁆𑀧𑀭𑀺𑀯𑀸𑀭𑁂𑀲𑀼𑀁 ‘‘𑀯𑀺𑀘𑀺𑀢𑁆𑀭𑀧𑀝𑀺𑀪𑀸𑀦𑀁 𑀥𑀫𑁆𑀫𑀤𑁂𑀲𑀦𑀁 𑀲𑁄𑀲𑁆𑀲𑀸𑀫𑀸’’𑀢𑀺. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀔𑀻𑀡𑀸𑀲𑀯𑀩𑁆𑀭𑀳𑁆𑀫𑀸𑀦𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀩𑁆𑀭𑀳𑁆𑀫𑀕𑀡𑀁 𑀅𑀧𑀲𑁆𑀲𑀦𑁆𑀢𑀸 ‘‘𑀓𑀼𑀳𑀺𑀁 𑀕𑀢𑀸’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀢𑀫𑀢𑁆𑀣𑀁 𑀜𑀢𑁆𑀯𑀸 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀘𑀓𑁆𑀓𑀯𑀸𑀴𑀫𑀼𑀤𑁆𑀥𑀦𑀺 𑀞𑀢𑁆𑀯𑀸 𑀧𑀘𑁆𑀘𑁂𑀓𑀕𑀸𑀣𑀸𑀬𑁄 𑀅𑀪𑀸𑀲𑀺𑀁𑀲𑀼. 𑀬𑀣𑀸𑀳 𑁋

‘‘𑀅𑀣 𑀔𑁄 𑀘𑀢𑀼𑀦𑁆𑀦𑀁 𑀲𑀼𑀤𑁆𑀥𑀸𑀯𑀸𑀲𑀓𑀸𑀬𑀺𑀓𑀸𑀦𑀁 𑀤𑁂𑀯𑀢𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁, 𑀔𑁄, 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀯𑀦𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀺. 𑀤𑀲𑀳𑀺 𑀘 𑀮𑁄𑀓𑀥𑀸𑀢𑀽𑀳𑀺 𑀤𑁂𑀯𑀢𑀸 𑀬𑁂𑀪𑀼𑀬𑁆𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀬𑀁𑀦𑀽𑀦 𑀫𑀬𑀫𑁆𑀧𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀘𑁆𑀘𑁂𑀓𑀁 𑀕𑀸𑀣𑀁 𑀪𑀸𑀲𑁂𑀬𑁆𑀬𑀸𑀫𑀸’’’𑀢𑀺 (𑀤𑀻. 𑀦𑀺. 𑁨.𑁩𑁩𑁧; 𑀲𑀁. 𑀦𑀺. 𑁧.𑁩𑁭).

𑀲𑀩𑁆𑀩𑀁 𑀲𑀕𑀸𑀣𑀸𑀯𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀕𑀦𑁆𑀢𑁆𑀯𑀸 𑀘 𑀢𑀢𑁆𑀣 𑀏𑀓𑁄 𑀩𑁆𑀭𑀳𑁆𑀫𑀸 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀤𑁆𑀥𑀦𑀺 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀞𑀺𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺𑀁…𑀧𑁂…

𑀤𑀓𑁆𑀔𑀺𑀢𑀸𑀬𑁂 𑀅𑀧𑀭𑀸𑀚𑀺𑀢𑀲𑀗𑁆𑀖’’𑀦𑁆𑀢𑀺. (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭);

𑀇𑀫𑀜𑁆𑀘𑀲𑁆𑀲 𑀕𑀸𑀣𑀁 𑀪𑀸𑀲𑀫𑀸𑀦𑀲𑁆𑀲 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂 𑀞𑀺𑀢𑁄 𑀲𑀤𑁆𑀤𑀁 𑀅𑀲𑁆𑀲𑁄𑀲𑀺.

𑀤𑀼𑀢𑀺𑀬𑁄 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀤𑁆𑀥𑀦𑀺 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀞𑀺𑀢𑁄 𑀢𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀢𑀢𑁆𑀭 𑀪𑀺𑀓𑁆𑀔𑀯𑁄 𑀲𑀫𑀸𑀤𑀳𑀁𑀲𑀼…𑀧𑁂…

𑀇𑀦𑁆𑀤𑁆𑀭𑀺𑀬𑀸𑀦𑀺 𑀭𑀓𑁆𑀔𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺. (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭);

𑀢𑀢𑀺𑀬𑁄 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀤𑁆𑀥𑀦𑀺 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀞𑀺𑀢𑁄 𑀢𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀙𑁂𑀢𑁆𑀯𑀸 𑀔𑀻𑀮𑀁 𑀙𑁂𑀢𑁆𑀯𑀸 𑀧𑀮𑀺𑀖𑀁…𑀧𑁂… 𑀲𑀼𑀲𑀼𑀦𑀸𑀕𑀸’’𑀢𑀺. (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭);

𑀘𑀢𑀼𑀢𑁆𑀣𑁄 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀤𑁆𑀥𑀦𑀺 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀞𑀺𑀢𑁄 𑀢𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀪𑀸𑀲𑀺 𑁋

‘‘𑀬𑁂 𑀓𑁂𑀘𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂…𑀧𑁂…

𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺. (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭);

𑀢𑀲𑁆𑀲𑀧𑀺 𑀢𑀁 𑀲𑀤𑁆𑀤𑀁 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀤𑁆𑀥𑀦𑀺 𑀞𑀺𑀢𑁄 𑀅𑀲𑁆𑀲𑁄𑀲𑀺. 𑀏𑀯𑀁 𑀢𑀤𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀸𑀦𑁄 𑀧𑀭𑀺𑀲𑀁 𑀣𑁄𑀫𑁂𑀢𑁆𑀯𑀸 𑀞𑀺𑀢𑀸 𑀅𑀳𑁂𑀲𑀼𑀁, 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀏𑀓𑀘𑀓𑁆𑀓𑀯𑀸𑀴𑀁 𑀙𑀸𑀤𑁂𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀅𑀣 𑀪𑀕𑀯𑀸 𑀤𑁂𑀯𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀅𑀳𑁂𑀲𑀼𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀲𑀫𑁆𑀧𑀺 𑀪𑀕𑀯𑀦𑁆𑀢𑀸𑀦𑀁 𑀏𑀢𑀧𑁆𑀧𑀭𑀫𑀸𑀬𑁂𑀯 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀳𑁂𑀲𑀼𑀁. 𑀲𑁂𑀬𑁆𑀬𑀣𑀸𑀧𑀺 𑀫𑀬𑁆𑀳𑀁 𑀏𑀢𑀭𑀳𑀺, 𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀲𑀫𑁆𑀧𑀺 𑀪𑀕𑀯𑀦𑁆𑀢𑀸𑀦𑀁 𑀏𑀢𑀧𑁆𑀧𑀭𑀫𑀸𑀬𑁂𑀯 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀲𑁂𑀬𑁆𑀬𑀣𑀸𑀧𑀺 𑀫𑀬𑁆𑀳𑀁 𑀏𑀢𑀭𑀳𑀻’’𑀢𑀺. 𑀢𑀢𑁄 𑀢𑀁 𑀤𑁂𑀯𑀧𑀭𑀺𑀲𑀁 𑀪𑀩𑁆𑀩𑀸𑀪𑀩𑁆𑀩𑀯𑀲𑁂𑀦 𑀤𑁆𑀯𑀺𑀥𑀸 𑀯𑀺𑀪𑀚𑀺 ‘‘𑀏𑀢𑁆𑀢𑀓𑀸 𑀪𑀩𑁆𑀩𑀸, 𑀏𑀢𑁆𑀢𑀓𑀸 𑀅𑀪𑀩𑁆𑀩𑀸’’𑀢𑀺. 𑀢𑀢𑁆𑀣 ‘‘𑀅𑀪𑀩𑁆𑀩𑀧𑀭𑀺𑀲𑀸 𑀩𑀼𑀤𑁆𑀥𑀲𑀢𑁂𑀧𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀦 𑀩𑀼𑀚𑁆𑀛𑀢𑀺, 𑀪𑀩𑁆𑀩𑀧𑀭𑀺𑀲𑀸 𑀲𑀓𑁆𑀓𑀸 𑀩𑁄𑀥𑁂𑀢𑀼’’𑀦𑁆𑀢𑀺 𑀜𑀢𑁆𑀯𑀸 𑀧𑀼𑀦 𑀪𑀩𑁆𑀩𑀧𑀼𑀕𑁆𑀕𑀮𑁂 𑀘𑀭𑀺𑀬𑀯𑀲𑁂𑀦 𑀙𑀥𑀸 𑀯𑀺𑀪𑀚𑀺 ‘‘𑀏𑀢𑁆𑀢𑀓𑀸 𑀭𑀸𑀕𑀘𑀭𑀺𑀢𑀸, 𑀏𑀢𑁆𑀢𑀓𑀸 𑀤𑁄𑀲-𑀫𑁄𑀳-𑀯𑀺𑀢𑀓𑁆𑀓-𑀲𑀤𑁆𑀥𑀸-𑀩𑀼𑀤𑁆𑀥𑀺𑀘𑀭𑀺𑀢𑀸’’𑀢𑀺. 𑀏𑀯𑀁 𑀘𑀭𑀺𑀬𑀯𑀲𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀅𑀲𑁆𑀲𑀸 𑀧𑀭𑀺𑀲𑀸𑀬 𑀓𑀻𑀤𑀺𑀲𑀸 𑀥𑀫𑁆𑀫𑀤𑁂𑀲𑀦𑀸 𑀲𑀧𑁆𑀧𑀸𑀬𑀸’’𑀢𑀺 𑀥𑀫𑁆𑀫𑀓𑀣𑀁 𑀯𑀺𑀘𑀺𑀦𑀺𑀢𑁆𑀯𑀸 𑀧𑀼𑀦 𑀢𑀁 𑀧𑀭𑀺𑀲𑀁 𑀫𑀦𑀲𑀸𑀓𑀸𑀲𑀺 𑁋 ‘‘𑀅𑀢𑁆𑀢𑀚𑁆𑀛𑀸𑀲𑀬𑁂𑀦 𑀦𑀼 𑀔𑁄 𑀚𑀸𑀦𑁂𑀬𑁆𑀬, 𑀧𑀭𑀚𑁆𑀛𑀸𑀲𑀬𑁂𑀦, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦, 𑀧𑀼𑀘𑁆𑀙𑀸𑀯𑀲𑁂𑀦𑀸’’𑀢𑀺. 𑀢𑀢𑁄 ‘‘𑀧𑀼𑀘𑁆𑀙𑀸𑀯𑀲𑁂𑀦 𑀚𑀸𑀦𑁂𑀬𑁆𑀬𑀸’’𑀢𑀺 𑀜𑀢𑁆𑀯𑀸 ‘‘𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀲𑀫𑀢𑁆𑀣𑁄 𑀅𑀢𑁆𑀣𑀺, 𑀦𑀢𑁆𑀣𑀻’’𑀢𑀺 𑀧𑀼𑀦 𑀲𑀓𑀮𑀧𑀭𑀺𑀲𑀁 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀦𑀢𑁆𑀣𑀺 𑀓𑁄𑀘𑀻’’𑀢𑀺 𑀜𑀢𑁆𑀯𑀸 ‘‘𑀲𑀘𑁂 𑀅𑀳𑀫𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀅𑀳𑀫𑁂𑀯 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀁, 𑀏𑀯𑀫𑀲𑁆𑀲𑀸 𑀧𑀭𑀺𑀲𑀸𑀬 𑀲𑀧𑁆𑀧𑀸𑀬𑀁 𑀦 𑀳𑁄𑀢𑀺. 𑀬𑀁𑀦𑀽𑀦𑀸𑀳𑀁 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀫𑀸𑀧𑁂𑀬𑁆𑀬𑀦𑁆𑀢𑀺 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀫𑀦𑁄𑀫𑀬𑀺𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀫𑀸𑀧𑁂𑀲𑀺. 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀻 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀧𑀢𑁆𑀢𑀘𑀻𑀯𑀭𑀥𑀭𑁄 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀸𑀤𑀺𑀲𑀫𑁆𑀧𑀦𑁆𑀦𑁄 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀲𑀳 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀢𑁄 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀲𑀫𑀲𑀫𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀏𑀯𑀁 𑀆𑀕𑀦𑁆𑀢𑁆𑀯𑀸 𑀬𑀸𑀦𑀺 𑀪𑀕𑀯𑀢𑀸 𑀇𑀫𑀫𑁆𑀳𑀺 𑀲𑀫𑀸𑀕𑀫𑁂 𑀘𑀭𑀺𑀬𑀯𑀲𑁂𑀦 𑀙 𑀲𑀼𑀢𑁆𑀢𑀸𑀦𑀺 (𑀲𑀼. 𑀦𑀺. 𑁮𑁫𑁪 𑀆𑀤𑀬𑁄, 𑁮𑁬𑁮 𑀆𑀤𑀬𑁄, 𑁮𑁮𑁪 𑀆𑀤𑀬𑁄, 𑁯𑁦𑁧 𑀆𑀤𑀬𑁄, 𑁯𑁨𑁧 𑀆𑀤𑀬𑁄) 𑀓𑀣𑀺𑀢𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀁 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀁 𑀘𑀽𑀴𑀩𑁆𑀬𑀽𑀳𑀁 𑀫𑀳𑀸𑀩𑁆𑀬𑀽𑀳𑀁 𑀢𑀼𑀯𑀝𑀓𑀁 𑀇𑀤𑀫𑁂𑀯 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀦𑁆𑀢𑀺. 𑀢𑁂𑀲𑀼 𑀭𑀸𑀕𑀘𑀭𑀺𑀢𑀤𑁂𑀯𑀢𑀸𑀦𑀁 𑀲𑀧𑁆𑀧𑀸𑀬𑀯𑀲𑁂𑀦 𑀓𑀣𑁂𑀢𑀩𑁆𑀩𑀲𑁆𑀲 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀯𑀢𑁆𑀢𑀦𑀢𑁆𑀣𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀧𑀼𑀘𑁆𑀙𑀸𑀫𑀺 𑀫𑀼𑀦𑀺𑀁 𑀧𑀳𑀽𑀢𑀧𑀜𑁆𑀜’’𑀦𑁆𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑀢𑀢𑁆𑀣 𑀧𑀳𑀽𑀢𑀧𑀜𑁆𑀜𑀦𑁆𑀢𑀺 𑀫𑀳𑀸𑀧𑀜𑁆𑀜𑀁. 𑀢𑀺𑀡𑁆𑀡𑀦𑁆𑀢𑀺 𑀘𑀢𑀼𑀭𑁄𑀖𑀢𑀺𑀡𑁆𑀡𑀁. 𑀧𑀸𑀭𑀗𑁆𑀕𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀁. 𑀧𑀭𑀺𑀦𑀺𑀩𑁆𑀩𑀼𑀢𑀦𑁆𑀢𑀺 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀯𑀲𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑀁. 𑀞𑀺𑀢𑀢𑁆𑀢𑀦𑁆𑀢𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀦𑀻𑀬𑀘𑀺𑀢𑁆𑀢𑀁. 𑀦𑀺𑀓𑁆𑀔𑀫𑁆𑀫 𑀖𑀭𑀸 𑀧𑀦𑀼𑀚𑁆𑀚 𑀓𑀸𑀫𑁂𑀢𑀺 𑀯𑀢𑁆𑀣𑀼𑀓𑀸𑀫𑁂 𑀧𑀦𑀼𑀤𑀺𑀢𑁆𑀯𑀸 𑀖𑀭𑀸𑀯𑀸𑀲𑀸 𑀦𑀺𑀓𑁆𑀔𑀫𑁆𑀫. 𑀓𑀣𑀁 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬𑀸𑀢𑀺 𑀲𑁄 𑀪𑀺𑀓𑁆𑀔𑀼 𑀓𑀣𑀁 𑀮𑁄𑀓𑁂 𑀲𑀫𑁆𑀫𑀸 𑀧𑀭𑀺𑀩𑁆𑀩𑀚𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀅𑀦𑀼𑀧𑀮𑀺𑀢𑁆𑀢𑁄 𑀮𑁄𑀓𑁂𑀦 𑀳𑀼𑀢𑁆𑀯𑀸, 𑀮𑁄𑀓𑀁 𑀅𑀢𑀺𑀓𑁆𑀓𑀫𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯.

𑁩𑁬𑁩. 𑀅𑀣 𑀪𑀕𑀯𑀸 𑀬𑀲𑁆𑀫𑀸 𑀆𑀲𑀯𑀓𑁆𑀔𑀬𑀁 𑀅𑀧𑁆𑀧𑀢𑁆𑀯𑀸 𑀮𑁄𑀓𑁂 𑀲𑀫𑁆𑀫𑀸 𑀧𑀭𑀺𑀩𑁆𑀩𑀚𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀭𑀸𑀕𑀘𑀭𑀺𑀢𑀸𑀤𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑀺𑀢𑁂 𑀲𑀩𑁆𑀩𑀧𑀼𑀕𑁆𑀕𑀮𑀲𑀫𑀽𑀳𑁂 𑀢𑀁 𑀢𑀁 𑀢𑁂𑀲𑀁 𑀢𑁂𑀲𑀁 𑀲𑀫𑀸𑀦𑀤𑁄𑀲𑀸𑀦𑀁 𑀤𑁂𑀯𑀢𑀸𑀕𑀡𑀸𑀦𑀁 𑀆𑀘𑀺𑀡𑁆𑀡𑀤𑁄𑀲𑀧𑁆𑀧𑀳𑀸𑀦𑀢𑁆𑀣𑀁 ‘‘𑀬𑀲𑁆𑀲 𑀫𑀗𑁆𑀕𑀮𑀸’’𑀢𑀺 𑀆𑀭𑀪𑀺𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀔𑀻𑀡𑀸𑀲𑀯𑀧𑀝𑀺𑀧𑀤𑀁 𑀧𑀓𑀸𑀲𑁂𑀦𑁆𑀢𑁄 𑀧𑀦𑁆𑀦𑀭𑀲 𑀕𑀸𑀣𑀸𑀬𑁄 𑀅𑀪𑀸𑀲𑀺.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀫𑀗𑁆𑀕𑀮𑀸𑀢𑀺 𑀫𑀗𑁆𑀕𑀮𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀁 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑀽𑀳𑀢𑀸𑀢𑀺 𑀲𑀼𑀝𑁆𑀞𑀼 𑀊𑀳𑀢𑀸 𑀧𑀜𑁆𑀜𑀸𑀲𑀢𑁆𑀣𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀸. 𑀉𑀧𑁆𑀧𑀸𑀢𑀸𑀢𑀺 ‘‘𑀉𑀓𑁆𑀓𑀸𑀧𑀸𑀢𑀤𑀺𑀲𑀸𑀟𑀸𑀳𑀸𑀤𑀬𑁄 𑀏𑀯𑀁 𑀯𑀺𑀧𑀸𑀓𑀸 𑀳𑁄𑀦𑁆𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀉𑀧𑁆𑀧𑀸𑀢𑀸𑀪𑀺𑀦𑀺𑀯𑁂𑀲𑀸. 𑀲𑀼𑀧𑀺𑀦𑀸𑀢𑀺 ‘‘𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀲𑀼𑀧𑀺𑀦𑀁 𑀤𑀺𑀲𑁆𑀯𑀸 𑀇𑀤𑀁 𑀦𑀸𑀫 𑀳𑁄𑀢𑀺, 𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀲𑀼 𑀇𑀤𑀁, 𑀯𑀸𑀫𑀧𑀲𑁆𑀲𑁂𑀦 𑀲𑀬𑀢𑀸 𑀤𑀺𑀝𑁆𑀞𑁂 𑀇𑀤𑀁 𑀦𑀸𑀫 𑀳𑁄𑀢𑀺, 𑀤𑀓𑁆𑀔𑀺𑀡𑀧𑀲𑁆𑀲𑀸𑀤𑀻𑀳𑀺 𑀇𑀤𑀁, 𑀲𑀼𑀧𑀺𑀦𑀦𑁆𑀢𑁂 𑀘𑀦𑁆𑀤𑀁 𑀤𑀺𑀲𑁆𑀯𑀸 𑀇𑀤𑀁 𑀦𑀸𑀫 𑀳𑁄𑀢𑀺, 𑀲𑀽𑀭𑀺𑀬𑀸𑀤𑀬𑁄 𑀤𑀺𑀲𑁆𑀯𑀸 𑀇𑀤’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀲𑀼𑀧𑀺𑀦𑀸𑀪𑀺𑀦𑀺𑀯𑁂𑀲𑀸. 𑀮𑀓𑁆𑀔𑀡𑀸𑀢𑀺 𑀤𑀡𑁆𑀟𑀮𑀓𑁆𑀔𑀡𑀯𑀢𑁆𑀣𑀮𑀓𑁆𑀔𑀡𑀸𑀤𑀺𑀧𑀸𑀞𑀁 𑀧𑀞𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀇𑀤𑀁 𑀦𑀸𑀫 𑀳𑁄𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀮𑀓𑁆𑀔𑀡𑀸𑀪𑀺𑀦𑀺𑀯𑁂𑀲𑀸. 𑀢𑁂 𑀲𑀩𑁆𑀩𑁂𑀧𑀺 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑁄 𑀫𑀗𑁆𑀕𑀮𑀤𑁄𑀲𑀯𑀺𑀧𑁆𑀧𑀳𑀻𑀦𑁄𑀢𑀺 𑀅𑀝𑁆𑀞𑀢𑀺𑀁𑀲 𑀫𑀳𑀸𑀫𑀗𑁆𑀕𑀮𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀫𑀗𑁆𑀕𑀮𑀤𑁄𑀲𑀸 𑀦𑀸𑀫. 𑀬𑀲𑁆𑀲 𑀧𑀦𑁂𑀢𑁂 𑀫𑀗𑁆𑀕𑀮𑀸𑀤𑀬𑁄 𑀲𑀫𑀽𑀳𑀢𑀸, 𑀲𑁄 𑀫𑀗𑁆𑀕𑀮𑀤𑁄𑀲𑀯𑀺𑀧𑁆𑀧𑀳𑀻𑀦𑁄 𑀳𑁄𑀢𑀺. 𑀅𑀣 𑀯𑀸 𑀫𑀗𑁆𑀕𑀮𑀸𑀦𑀜𑁆𑀘 𑀉𑀧𑁆𑀧𑀸𑀢𑀸𑀤𑀺𑀤𑁄𑀲𑀸𑀦𑀜𑁆𑀘 𑀧𑀳𑀻𑀦𑀢𑁆𑀢𑀸 𑀫𑀗𑁆𑀕𑀮𑀤𑁄𑀲𑀯𑀺𑀧𑁆𑀧𑀳𑀻𑀦𑁄 𑀳𑁄𑀢𑀺, 𑀦 𑀫𑀗𑁆𑀕𑀮𑀸𑀤𑀻𑀳𑀺 𑀲𑀼𑀤𑁆𑀥𑀺𑀁 𑀧𑀘𑁆𑀘𑁂𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀥𑀺𑀕𑀢𑀢𑁆𑀢𑀸. 𑀢𑀲𑁆𑀫𑀸 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬, 𑀲𑁄 𑀔𑀻𑀡𑀸𑀲𑀯𑁄 𑀲𑀫𑁆𑀫𑀸 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬 𑀅𑀦𑀼𑀧𑀮𑀺𑀢𑁆𑀢𑁄 𑀮𑁄𑀓𑁂𑀦𑀸𑀢𑀺.

𑁩𑁬𑁪. 𑀤𑀼𑀢𑀺𑀬𑀕𑀸𑀣𑀸𑀬 𑀭𑀸𑀕𑀁 𑀯𑀺𑀦𑀬𑁂𑀣 𑀫𑀸𑀦𑀼𑀲𑁂𑀲𑀼, 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀘𑀸𑀧𑀺 𑀪𑀺𑀓𑁆𑀔𑀽𑀢𑀺 𑀫𑀸𑀦𑀼𑀲𑁂𑀲𑀼 𑀘 𑀤𑀺𑀩𑁆𑀩𑁂𑀲𑀼 𑀘 𑀓𑀸𑀫𑀕𑀼𑀡𑁂𑀲𑀼 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀦𑁂𑀦𑁆𑀢𑁄 𑀭𑀸𑀕𑀁 𑀯𑀺𑀦𑀬𑁂𑀣. 𑀅𑀢𑀺𑀓𑁆𑀓𑀫𑁆𑀫 𑀪𑀯𑀁 𑀲𑀫𑁂𑀘𑁆𑀘 𑀥𑀫𑁆𑀫𑀦𑁆𑀢𑀺 𑀏𑀯𑀁 𑀭𑀸𑀕𑀁 𑀯𑀺𑀦𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑀢𑁄 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀬𑁄 𑀲𑀸𑀥𑁂𑀦𑁆𑀢𑁄 𑀘𑀢𑀼𑀲𑀘𑁆𑀘𑀪𑁂𑀤𑀫𑁆𑀧𑀺 𑀲𑀫𑁂𑀘𑁆𑀘 𑀥𑀫𑁆𑀫𑀁 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀢𑀺𑀯𑀺𑀥𑀫𑁆𑀧𑀺 𑀅𑀢𑀺𑀓𑁆𑀓𑀫𑁆𑀫 𑀪𑀯𑀁. 𑀲𑀫𑁆𑀫𑀸 𑀲𑁄𑀢𑀺 𑀲𑁄𑀧𑀺 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁬𑁫. 𑀢𑀢𑀺𑀬𑀕𑀸𑀣𑀸𑀬 ‘‘𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀳𑀻𑀦𑁄’’𑀢𑀺 𑀲𑀩𑁆𑀩𑀯𑀢𑁆𑀣𑀽𑀲𑀼 𑀧𑀳𑀻𑀦𑀭𑀸𑀕𑀤𑁄𑀲𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯 𑀲𑀩𑁆𑀩𑀕𑀸𑀣𑀸𑀲𑀼 𑀘 ‘‘𑀲𑁄𑀧𑀺 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬𑀸’’𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀇𑀢𑁄 𑀧𑀭𑀜𑁆𑀳𑀺 𑀬𑁄𑀚𑀦𑀫𑁆𑀧𑀺 𑀅𑀯𑀢𑁆𑀯𑀸 𑀅𑀯𑀼𑀢𑁆𑀢𑀦𑀬𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑁩𑁬𑁬. 𑀘𑀢𑀼𑀢𑁆𑀣𑀕𑀸𑀣𑀸𑀬 𑀲𑀢𑁆𑀢𑀲𑀗𑁆𑀔𑀸𑀭𑀯𑀲𑁂𑀦 𑀤𑀼𑀯𑀺𑀥𑀁 𑀧𑀺𑀬𑀜𑁆𑀘 𑀅𑀧𑁆𑀧𑀺𑀬𑀜𑁆𑀘 𑀯𑁂𑀤𑀺𑀢𑀩𑁆𑀩𑀁, 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑀝𑀺𑀖𑀧𑁆𑀧𑀳𑀸𑀦𑁂𑀦 𑀳𑀺𑀢𑁆𑀯𑀸. 𑀅𑀦𑀼𑀧𑀸𑀤𑀸𑀬𑀸𑀢𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀕𑁆𑀕𑀳𑁂𑀢𑁆𑀯𑀸. 𑀅𑀦𑀺𑀲𑁆𑀲𑀺𑀢𑁄 𑀓𑀼𑀳𑀺𑀜𑁆𑀘𑀻𑀢𑀺 𑀅𑀝𑁆𑀞𑀲𑀢𑀪𑁂𑀤𑁂𑀦 𑀢𑀡𑁆𑀳𑀸𑀦𑀺𑀲𑁆𑀲𑀬𑁂𑀦 𑀤𑁆𑀯𑀸𑀲𑀝𑁆𑀞𑀺𑀪𑁂𑀤𑁂𑀦 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁂𑀦 𑀘 𑀓𑀼𑀳𑀺𑀜𑁆𑀘𑀺 𑀭𑀽𑀧𑀸𑀤𑀺𑀥𑀫𑁆𑀫𑁂 𑀪𑀯𑁂 𑀯𑀸 𑀅𑀦𑀺𑀲𑁆𑀲𑀺𑀢𑁄. 𑀲𑀁𑀬𑁄𑀚𑀦𑀺𑀬𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀥𑀫𑁆𑀫𑀸 𑀤𑀲𑀯𑀺𑀥𑀲𑀁𑀬𑁄𑀚𑀦𑀲𑁆𑀲 𑀯𑀺𑀲𑀬𑀢𑁆𑀢𑀸 𑀲𑀁𑀬𑁄𑀚𑀦𑀺𑀬𑀸, 𑀢𑁂𑀳𑀺 𑀲𑀩𑁆𑀩𑀧𑁆𑀧𑀓𑀸𑀭𑀢𑁄 𑀫𑀕𑁆𑀕𑀪𑀸𑀯𑀦𑀸𑀬 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀘 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀞𑀫𑀧𑀸𑀤𑁂𑀦 𑀘𑁂𑀢𑁆𑀣 𑀭𑀸𑀕𑀤𑁄𑀲𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀁, 𑀤𑀼𑀢𑀺𑀬𑁂𑀦 𑀉𑀧𑀸𑀤𑀸𑀦𑀦𑀺𑀲𑁆𑀲𑀬𑀸𑀪𑀸𑀯𑁄, 𑀢𑀢𑀺𑀬𑁂𑀦 𑀲𑁂𑀲𑀸𑀓𑀼𑀲𑀮𑁂𑀳𑀺 𑀅𑀓𑀼𑀲𑀮𑀯𑀢𑁆𑀣𑀽𑀳𑀺 𑀘 𑀯𑀺𑀧𑁆𑀧𑀫𑁄𑀓𑁆𑀔𑁄. 𑀧𑀞𑀫𑁂𑀦 𑀯𑀸 𑀭𑀸𑀕𑀤𑁄𑀲𑀧𑁆𑀧𑀳𑀸𑀦𑀁, 𑀤𑀼𑀢𑀺𑀬𑁂𑀦 𑀢𑀤𑀼𑀧𑀸𑀬𑁄, 𑀢𑀢𑀺𑀬𑁂𑀦 𑀢𑁂𑀲𑀁 𑀧𑀳𑀻𑀦𑀢𑁆𑀢𑀸 𑀲𑀁𑀬𑁄𑀚𑀦𑀺𑀬𑁂𑀳𑀺 𑀯𑀺𑀧𑁆𑀧𑀫𑁄𑀓𑁆𑀔𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁬𑁭. 𑀧𑀜𑁆𑀘𑀫𑀕𑀸𑀣𑀸𑀬 𑀉𑀧𑀥𑀻𑀲𑀽𑀢𑀺 𑀔𑀦𑁆𑀥𑀼𑀧𑀥𑀻𑀲𑀼. 𑀆𑀤𑀸𑀦𑀦𑁆𑀢𑀺 𑀆𑀤𑀸𑀢𑀩𑁆𑀩𑀝𑁆𑀞𑁂𑀦 𑀢𑁂𑀬𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀅𑀦𑀜𑁆𑀜𑀦𑁂𑀬𑁆𑀬𑁄𑀢𑀺 𑀅𑀦𑀺𑀘𑁆𑀘𑀸𑀤𑀻𑀦𑀁 𑀲𑀼𑀤𑀺𑀝𑁆𑀞𑀢𑁆𑀢𑀸 ‘‘𑀇𑀤𑀁 𑀲𑁂𑀬𑁆𑀬𑁄’’𑀢𑀺 𑀓𑁂𑀦𑀘𑀺 𑀅𑀦𑁂𑀢𑀩𑁆𑀩𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀧𑀤𑀢𑁆𑀣𑀫𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀆𑀤𑀸𑀦𑁂𑀲𑀼 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀙𑀦𑁆𑀤𑀭𑀸𑀕𑀁 𑀯𑀺𑀦𑁂𑀢𑁆𑀯𑀸 𑀲𑁄 𑀯𑀺𑀦𑀻𑀢𑀙𑀦𑁆𑀤𑀭𑀸𑀕𑁄, 𑀢𑁂𑀲𑀼 𑀉𑀧𑀥𑀻𑀲𑀼 𑀦 𑀲𑀸𑀭𑀫𑁂𑀢𑀺, 𑀲𑀩𑁆𑀩𑁂 𑀉𑀧𑀥𑀻 𑀅𑀲𑀸𑀭𑀓𑀢𑁆𑀢𑁂𑀦𑁂𑀯 𑀧𑀲𑁆𑀲𑀢𑀺. 𑀢𑀢𑁄 𑀢𑁂𑀲𑀼 𑀤𑀼𑀯𑀺𑀥𑁂𑀦𑀧𑀺 𑀦𑀺𑀲𑁆𑀲𑀬𑁂𑀦 𑀅𑀦𑀺𑀲𑁆𑀲𑀺𑀢𑁄 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 ‘‘𑀇𑀤𑀁 𑀲𑁂𑀬𑁆𑀬𑁄’’𑀢𑀺 𑀅𑀦𑁂𑀢𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁬𑁮. 𑀙𑀝𑁆𑀞𑀕𑀸𑀣𑀸𑀬 𑀅𑀯𑀺𑀭𑀼𑀤𑁆𑀥𑁄𑀢𑀺 𑀏𑀢𑁂𑀲𑀁 𑀢𑀺𑀡𑁆𑀡𑀁 𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀼𑀘𑀭𑀺𑀢𑁂𑀳𑀺 𑀲𑀤𑁆𑀥𑀺𑀁 𑀅𑀯𑀺𑀭𑀼𑀤𑁆𑀥𑁄. 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀦𑁆𑀢𑀺 𑀫𑀕𑁆𑀕𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀜𑀢𑁆𑀯𑀸. 𑀦𑀺𑀩𑁆𑀩𑀸𑀦𑀧𑀤𑀸𑀪𑀺𑀧𑀢𑁆𑀣𑀬𑀸𑀦𑁄𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀁 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀧𑀤𑀁 𑀧𑀢𑁆𑀣𑀬𑀫𑀸𑀦𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩𑁬𑁯. 𑀲𑀢𑁆𑀢𑀫𑀕𑀸𑀣𑀸𑀬 𑀅𑀓𑁆𑀓𑀼𑀝𑁆𑀞𑁄𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀪𑀺𑀲𑀢𑁆𑀢𑁄. 𑀦 𑀲𑀦𑁆𑀥𑀺𑀬𑁂𑀣𑀸𑀢𑀺 𑀦 𑀉𑀧𑀦𑀬𑁆𑀳𑁂𑀣 𑀦 𑀓𑀼𑀧𑁆𑀧𑁂𑀬𑁆𑀬. 𑀮𑀤𑁆𑀥𑀸 𑀧𑀭𑀪𑁄𑀚𑀦𑀁 𑀦 𑀫𑀚𑁆𑀚𑁂𑀢𑀺 𑀧𑀭𑁂𑀳𑀺 𑀤𑀺𑀦𑁆𑀦𑀁 𑀲𑀤𑁆𑀥𑀸𑀤𑁂𑀬𑁆𑀬𑀁 𑀮𑀪𑀺𑀢𑁆𑀯𑀸 ‘‘𑀅𑀳𑀁 𑀜𑀸𑀢𑁄 𑀬𑀲𑀲𑁆𑀲𑀻 𑀮𑀸𑀪𑀻’’𑀢𑀺 𑀦 𑀫𑀚𑁆𑀚𑁂𑀬𑁆𑀬. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩𑁭𑁦. 𑀅𑀝𑁆𑀞𑀫𑀕𑀸𑀣𑀸𑀬 𑀮𑁄𑀪𑀦𑁆𑀢𑀺 𑀯𑀺𑀲𑀫𑀮𑁄𑀪𑀁. 𑀪𑀯𑀦𑁆𑀢𑀺 𑀓𑀸𑀫𑀪𑀯𑀸𑀤𑀺𑀪𑀯𑀁. 𑀏𑀯𑀁 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀪𑀯𑀪𑁄𑀕𑀢𑀡𑁆𑀳𑀸 𑀯𑀼𑀢𑁆𑀢𑀸. 𑀧𑀼𑀭𑀺𑀫𑁂𑀦 𑀯𑀸 𑀲𑀩𑁆𑀩𑀸𑀧𑀺 𑀢𑀡𑁆𑀳𑀸, 𑀧𑀘𑁆𑀙𑀺𑀫𑁂𑀦 𑀓𑀫𑁆𑀫𑀪𑀯𑁄. 𑀯𑀺𑀭𑀢𑁄 𑀙𑁂𑀤𑀦𑀩𑀦𑁆𑀥𑀦𑀸 𑀘𑀸𑀢𑀺 𑀏𑀯𑀫𑁂𑀢𑁂𑀲𑀁 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀧𑀭𑀲𑀢𑁆𑀢𑀙𑁂𑀤𑀦𑀩𑀦𑁆𑀥𑀦𑀸 𑀘 𑀯𑀺𑀭𑀢𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁩𑁭𑁧. 𑀦𑀯𑀫𑀕𑀸𑀣𑀸𑀬 𑀲𑀸𑀭𑀼𑀧𑁆𑀧𑀁 𑀅𑀢𑁆𑀢𑀦𑁄 𑀯𑀺𑀤𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀪𑀺𑀓𑁆𑀔𑀼𑀪𑀸𑀯𑀲𑁆𑀲 𑀧𑀢𑀺𑀭𑀽𑀧𑀁 𑀅𑀦𑁂𑀲𑀦𑀸𑀤𑀺𑀁 𑀧𑀳𑀸𑀬 𑀲𑀫𑁆𑀫𑀸𑀏𑀲𑀦𑀸𑀤𑀺𑀆𑀚𑀻𑀯𑀲𑀼𑀤𑁆𑀥𑀺𑀁 𑀅𑀜𑁆𑀜𑀜𑁆𑀘 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀢𑀢𑁆𑀣 𑀧𑀢𑀺𑀝𑁆𑀞𑀳𑀦𑁂𑀦 𑀯𑀺𑀤𑀺𑀢𑁆𑀯𑀸. 𑀦 𑀳𑀺 𑀜𑀸𑀢𑀫𑀢𑁆𑀢𑁂𑀦𑁂𑀯 𑀓𑀺𑀜𑁆𑀘𑀺 𑀳𑁄𑀢𑀺. 𑀬𑀣𑀸𑀢𑀣𑀺𑀬𑀦𑁆𑀢𑀺 𑀬𑀣𑀸𑀢𑀣𑀁 𑀬𑀣𑀸𑀪𑀽𑀢𑀁. 𑀥𑀫𑁆𑀫𑀦𑁆𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀺𑀪𑁂𑀤𑀁 𑀬𑀣𑀸𑀪𑀽𑀢𑀜𑀸𑀡𑁂𑀦, 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀸 𑀫𑀕𑁆𑀕𑁂𑀦 𑀯𑀺𑀤𑀺𑀢𑁆𑀯𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩𑁭𑁨. 𑀤𑀲𑀫𑀕𑀸𑀣𑀸𑀬 𑀲𑁄 𑀦𑀺𑀭𑀸𑀲𑁄 𑀅𑀦𑀸𑀲𑀺𑀲𑀸𑀦𑁄𑀢𑀺 𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑁂𑀦 𑀯𑀺𑀦𑀸𑀲𑀺𑀢𑀢𑁆𑀢𑀸 𑀅𑀦𑀼𑀲𑀬𑀸 𑀘 𑀦 𑀲𑀦𑁆𑀢𑀺, 𑀅𑀓𑀼𑀲𑀮𑀫𑀽𑀮𑀸 𑀘 𑀲𑀫𑀽𑀳𑀢𑀸, 𑀲𑁄 𑀦𑀺𑀭𑀸𑀲𑁄 𑀦𑀺𑀢𑁆𑀢𑀡𑁆𑀳𑁄 𑀳𑁄𑀢𑀺. 𑀢𑀢𑁄 𑀆𑀲𑀸𑀬 𑀅𑀪𑀸𑀯𑁂𑀦 𑀓𑀜𑁆𑀘𑀺 𑀭𑀽𑀧𑀸𑀤𑀺𑀥𑀫𑁆𑀫𑀁 𑀦𑀸𑀲𑀻𑀲𑀢𑀺. 𑀢𑁂𑀦𑀸𑀳 ‘‘𑀦𑀺𑀭𑀸𑀲𑁄 𑀅𑀦𑀸𑀲𑀺𑀲𑀸𑀦𑁄’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁩𑁭𑁩. 𑀏𑀓𑀸𑀤𑀲𑀫𑀕𑀸𑀣𑀸𑀬 𑀆𑀲𑀯𑀔𑀻𑀡𑁄𑀢𑀺 𑀔𑀻𑀡𑀘𑀢𑀼𑀭𑀸𑀲𑀯𑁄. 𑀧𑀳𑀻𑀦𑀫𑀸𑀦𑁄𑀢𑀺 𑀧𑀳𑀻𑀦𑀦𑀯𑀯𑀺𑀥𑀫𑀸𑀦𑁄. 𑀭𑀸𑀕𑀧𑀣𑀦𑁆𑀢𑀺 𑀭𑀸𑀕𑀯𑀺𑀲𑀬𑀪𑀽𑀢𑀁 𑀢𑁂𑀪𑀽𑀫𑀓𑀥𑀫𑁆𑀫𑀚𑀸𑀢𑀁. 𑀉𑀧𑀸𑀢𑀺𑀯𑀢𑁆𑀢𑁄𑀢𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑁂𑀳𑀺 𑀅𑀢𑀺𑀓𑁆𑀓𑀦𑁆𑀢𑁄. 𑀤𑀦𑁆𑀢𑁄𑀢𑀺 𑀲𑀩𑁆𑀩𑀤𑁆𑀯𑀸𑀭𑀯𑀺𑀲𑁂𑀯𑀦𑀁 𑀳𑀺𑀢𑁆𑀯𑀸 𑀅𑀭𑀺𑀬𑁂𑀦 𑀤𑀫𑀣𑁂𑀦 𑀤𑀦𑁆𑀢𑀪𑀽𑀫𑀺𑀁 𑀧𑀢𑁆𑀢𑁄. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀕𑁆𑀕𑀺𑀯𑀽𑀧𑀲𑀫𑁂𑀦 𑀲𑀻𑀢𑀺𑀪𑀽𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁩𑁭𑁪. 𑀤𑁆𑀯𑀸𑀤𑀲𑀫𑀕𑀸𑀣𑀸𑀬 𑀲𑀤𑁆𑀥𑁄𑀢𑀺 𑀩𑀼𑀤𑁆𑀥𑀸𑀤𑀺𑀕𑀼𑀡𑁂𑀲𑀼 𑀧𑀭𑀧𑁆𑀧𑀘𑁆𑀘𑀬𑀯𑀺𑀭𑀳𑀺𑀢𑀢𑁆𑀢𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁂𑀦 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀦 𑀧𑀭𑀲𑁆𑀲 𑀲𑀤𑁆𑀥𑀸𑀬 𑀧𑀝𑀺𑀧𑀢𑁆𑀢𑀺𑀬𑀁 𑀕𑀫𑀦𑀪𑀸𑀯𑁂𑀦. 𑀬𑀣𑀸𑀳 𑁋 ‘‘𑀦 𑀔𑁆𑀯𑀸𑀳𑀁 𑀏𑀢𑁆𑀣 𑀪𑀦𑁆𑀢𑁂 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀻’’𑀢𑀺 (𑀅. 𑀦𑀺. 𑁫.𑁩𑁪). 𑀲𑀼𑀢𑀯𑀸𑀢𑀺 𑀯𑁄𑀲𑀺𑀢𑀲𑀼𑀢𑀓𑀺𑀘𑁆𑀘𑀢𑁆𑀢𑀸 𑀧𑀭𑀫𑀢𑁆𑀣𑀺𑀓𑀲𑀼𑀢𑀲𑀫𑀦𑁆𑀦𑀸𑀕𑀢𑁄. 𑀦𑀺𑀬𑀸𑀫𑀤𑀲𑁆𑀲𑀻𑀢𑀺 𑀲𑀁𑀲𑀸𑀭𑀓𑀦𑁆𑀢𑀸𑀭𑀫𑀽𑀴𑁆𑀳𑁂 𑀮𑁄𑀓𑁂 𑀅𑀫𑀢𑀧𑀼𑀭𑀕𑀸𑀫𑀺𑀦𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀪𑀽𑀢𑀲𑁆𑀲 𑀫𑀕𑁆𑀕𑀲𑁆𑀲 𑀤𑀲𑁆𑀲𑀸𑀯𑀻, 𑀤𑀺𑀝𑁆𑀞𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀕𑁆𑀕𑀕𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻𑀢𑀺 𑀯𑀕𑁆𑀕𑀕𑀢𑀸 𑀦𑀸𑀫 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀺𑀓𑀸 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀮𑁄𑀫𑀢𑁆𑀢𑀸, 𑀏𑀯𑀁 𑀯𑀕𑁆𑀕𑀸𑀳𑀺 𑀤𑀺𑀝𑁆𑀞𑀻𑀳𑀺 𑀕𑀢𑁂𑀲𑀼 𑀲𑀢𑁆𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻 𑁋 ‘‘𑀇𑀤𑀁 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀢𑀣𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀤𑀺𑀝𑁆𑀞𑀺𑀯𑀲𑁂𑀦 𑀅𑀕𑀫𑀦𑀢𑁄. 𑀧𑀝𑀺𑀖𑀦𑁆𑀢𑀺 𑀧𑀝𑀺𑀖𑀸𑀢𑀓𑀁, 𑀘𑀺𑀢𑁆𑀢𑀯𑀺𑀖𑀸𑀢𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁄𑀲𑀯𑀺𑀲𑁂𑀲𑀦𑀫𑁂𑀯𑁂𑀢𑀁. 𑀯𑀺𑀦𑁂𑀬𑁆𑀬𑀸𑀢𑀺 𑀯𑀺𑀦𑁂𑀢𑁆𑀯𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁩𑁭𑁫. 𑀢𑁂𑀭𑀲𑀫𑀕𑀸𑀣𑀸𑀬 𑀲𑀁𑀲𑀼𑀤𑁆𑀥𑀚𑀺𑀦𑁄𑀢𑀺 𑀲𑀁𑀲𑀼𑀤𑁆𑀥𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀯𑀺𑀚𑀺𑀢𑀓𑀺𑀮𑁂𑀲𑁄. 𑀯𑀺𑀯𑀝𑁆𑀝𑀘𑁆𑀙𑀤𑁄𑀢𑀺 𑀯𑀺𑀯𑀝𑀭𑀸𑀕𑀤𑁄𑀲𑀫𑁄𑀳𑀙𑀤𑀦𑁄. 𑀥𑀫𑁆𑀫𑁂𑀲𑀼 𑀯𑀲𑀻𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀲𑀼 𑀯𑀲𑀺𑀧𑁆𑀧𑀢𑁆𑀢𑁄. 𑀦 𑀳𑀺𑀲𑁆𑀲 𑀲𑀓𑁆𑀓𑀸 𑀢𑁂 𑀥𑀫𑁆𑀫𑀸 𑀬𑀣𑀸 𑀜𑀸𑀢𑀸 𑀓𑁂𑀦𑀘𑀺 𑀅𑀜𑁆𑀜𑀣𑀸 𑀓𑀸𑀢𑀼𑀁, 𑀢𑁂𑀦 𑀔𑀻𑀡𑀸𑀲𑀯𑁄 ‘‘𑀥𑀫𑁆𑀫𑁂𑀲𑀼 𑀯𑀲𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀭𑀕𑀽𑀢𑀺 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀕𑀢𑁄, 𑀲𑀉𑀧𑀸𑀤𑀺𑀲𑁂𑀲𑀯𑀲𑁂𑀦 𑀅𑀥𑀺𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑁂𑀚𑁄𑀢𑀺 𑀅𑀧𑀕𑀢𑀢𑀡𑁆𑀳𑀸𑀘𑀮𑀦𑁄. 𑀲𑀗𑁆𑀔𑀸𑀭𑀦𑀺𑀭𑁄𑀥𑀜𑀸𑀡𑀓𑀼𑀲𑀮𑁄𑀢𑀺 𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀫𑁆𑀳𑀺 𑀜𑀸𑀡𑀁 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸, 𑀢𑀢𑁆𑀣 𑀓𑀼𑀲𑀮𑁄, 𑀘𑀢𑀼𑀓𑁆𑀔𑀢𑁆𑀢𑀼𑀁 𑀪𑀸𑀯𑀺𑀢𑀢𑁆𑀢𑀸 𑀙𑁂𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁭𑁬. 𑀘𑀼𑀤𑁆𑀤𑀲𑀫𑀕𑀸𑀣𑀸𑀬 𑀅𑀢𑀻𑀢𑁂𑀲𑀽𑀢𑀺 𑀧𑀯𑀢𑁆𑀢𑀺𑀁 𑀧𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑁂𑀲𑀼 𑀧𑀜𑁆𑀘𑀓𑁆𑀔𑀦𑁆𑀥𑁂𑀲𑀼. 𑀅𑀦𑀸𑀕𑀢𑁂𑀲𑀽𑀢𑀺 𑀧𑀯𑀢𑁆𑀢𑀺𑀁 𑀅𑀧𑁆𑀧𑀢𑁆𑀢𑁂𑀲𑀼 𑀧𑀜𑁆𑀘𑀓𑁆𑀔𑀦𑁆𑀥𑁂𑀲𑀼 𑀏𑀯. 𑀓𑀧𑁆𑀧𑀸𑀢𑀻𑀢𑁄𑀢𑀺 ‘‘𑀅𑀳𑀁 𑀫𑀫’’𑀦𑁆𑀢𑀺 𑀓𑀧𑁆𑀧𑀦𑀁 𑀲𑀩𑁆𑀩𑀫𑁆𑀧𑀺 𑀯𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀧𑁆𑀧𑀁 𑀅𑀢𑀻𑀢𑁄. 𑀅𑀢𑀺𑀘𑁆𑀘 𑀲𑀼𑀤𑁆𑀥𑀺𑀧𑀜𑁆𑀜𑁄𑀢𑀺 𑀅𑀢𑀻𑀯 𑀲𑀼𑀤𑁆𑀥𑀺𑀧𑀜𑁆𑀜𑁄, 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀸 𑀲𑀼𑀤𑁆𑀥𑀺𑀧𑀜𑁆𑀜𑁄. 𑀓𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸? 𑀅𑀤𑁆𑀥𑀢𑁆𑀢𑀬𑀁. 𑀅𑀭𑀳𑀸 𑀳𑀺 𑀬𑁆𑀯𑀸𑀬𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑁄 𑀅𑀢𑀻𑀢𑁄 𑀅𑀤𑁆𑀥𑀸, 𑀚𑀸𑀢𑀺𑀚𑀭𑀸𑀫𑀭𑀡𑀲𑀗𑁆𑀔𑀸𑀢𑁄 𑀅𑀦𑀸𑀕𑀢𑁄 𑀅𑀤𑁆𑀥𑀸, 𑀯𑀺𑀜𑁆𑀜𑀸𑀡𑀸𑀤𑀺𑀪𑀯𑀧𑀭𑀺𑀬𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀘 𑀅𑀤𑁆𑀥𑀸, 𑀢𑀁 𑀲𑀩𑁆𑀩𑀫𑁆𑀧𑀺 𑀅𑀢𑀺𑀓𑁆𑀓𑀫𑁆𑀫 𑀓𑀗𑁆𑀔𑀁 𑀯𑀺𑀢𑀭𑀺𑀢𑁆𑀯𑀸 𑀧𑀭𑀫𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀧𑀜𑁆𑀜𑁄 𑀳𑀼𑀢𑁆𑀯𑀸 𑀞𑀺𑀢𑁄. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀅𑀢𑀺𑀘𑁆𑀘 𑀲𑀼𑀤𑁆𑀥𑀺𑀧𑀜𑁆𑀜𑁄’’𑀢𑀺. 𑀲𑀩𑁆𑀩𑀸𑀬𑀢𑀦𑁂𑀳𑀻𑀢𑀺 𑀤𑁆𑀯𑀸𑀤𑀲𑀳𑀸𑀬𑀢𑀦𑁂𑀳𑀺. 𑀅𑀭𑀳𑀸 𑀳𑀺 𑀏𑀯𑀁 𑀓𑀧𑁆𑀧𑀸𑀢𑀻𑀢𑁄. 𑀓𑀧𑁆𑀧𑀸𑀢𑀻𑀢𑀢𑁆𑀢𑀸 𑀅𑀢𑀺𑀘𑁆𑀘 𑀲𑀼𑀤𑁆𑀥𑀺𑀧𑀜𑁆𑀜𑀢𑁆𑀢𑀸 𑀘 𑀆𑀬𑀢𑀺𑀁 𑀦 𑀓𑀺𑀜𑁆𑀘𑀺 𑀆𑀬𑀢𑀦𑀁 𑀉𑀧𑁂𑀢𑀺. 𑀢𑁂𑀦𑀸𑀳 𑁋 ‘‘𑀲𑀩𑁆𑀩𑀸𑀬𑀢𑀦𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑁄’’𑀢𑀺.

𑁩𑁭𑁭. 𑀧𑀦𑁆𑀦𑀭𑀲𑀫𑀕𑀸𑀣𑀸𑀬 𑀅𑀜𑁆𑀜𑀸𑀬 𑀧𑀤𑀦𑁆𑀢𑀺 𑀬𑁂 𑀢𑁂 ‘‘𑀲𑀘𑁆𑀘𑀸𑀦𑀁 𑀘𑀢𑀼𑀭𑁄 𑀧𑀤𑀸’’𑀢𑀺 𑀯𑀼𑀢𑁆𑀢𑀸, 𑀢𑁂𑀲𑀼 𑀏𑀓𑁂𑀓𑀧𑀤𑀁 𑀧𑀼𑀩𑁆𑀩𑀪𑀸𑀕𑀲𑀘𑁆𑀘𑀯𑀯𑀢𑁆𑀣𑀸𑀧𑀦𑀧𑀜𑁆𑀜𑀸𑀬 𑀜𑀢𑁆𑀯𑀸. 𑀲𑀫𑁂𑀘𑁆𑀘 𑀥𑀫𑁆𑀫𑀦𑁆𑀢𑀺 𑀢𑀢𑁄 𑀧𑀭𑀁 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀲𑀫𑁂𑀘𑁆𑀘. 𑀯𑀺𑀯𑀝𑀁 𑀤𑀺𑀲𑁆𑀯𑀸𑀦 𑀧𑀳𑀸𑀦𑀫𑀸𑀲𑀯𑀸𑀦𑀦𑁆𑀢𑀺 𑀅𑀣 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀆𑀲𑀯𑀓𑁆𑀔𑀬𑀲𑀜𑁆𑀜𑀺𑀢𑀁 𑀦𑀺𑀩𑁆𑀩𑀸𑀦𑀁 𑀯𑀺𑀯𑀝𑀁 𑀧𑀸𑀓𑀝𑀫𑀦𑀸𑀯𑀝𑀁 𑀤𑀺𑀲𑁆𑀯𑀸. 𑀲𑀩𑁆𑀩𑀼𑀧𑀥𑀻𑀦𑀁 𑀧𑀭𑀺𑀓𑁆𑀔𑀬𑀸𑀢𑀺 𑀲𑀩𑁆𑀩𑁂𑀲𑀁 𑀔𑀦𑁆𑀥𑀓𑀸𑀫𑀕𑀼𑀡𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀪𑁂𑀤𑀸𑀦𑀁 𑀉𑀧𑀥𑀻𑀦𑀁 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀓𑀢𑁆𑀣𑀘𑀺 𑀅𑀲𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬 𑀯𑀺𑀳𑀭𑁂𑀬𑁆𑀬, 𑀅𑀦𑀮𑁆𑀮𑀻𑀬𑀦𑁆𑀢𑁄 𑀮𑁄𑀓𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑁩𑁭𑁮. 𑀢𑀢𑁄 𑀲𑁄 𑀦𑀺𑀫𑁆𑀫𑀺𑀢𑁄 𑀥𑀫𑁆𑀫𑀤𑁂𑀲𑀦𑀁 𑀣𑁄𑀫𑁂𑀦𑁆𑀢𑁄 ‘‘𑀅𑀤𑁆𑀥𑀸 𑀳𑀺 𑀪𑀕𑀯𑀸’’𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀬𑁄 𑀲𑁄 𑀏𑀯𑀁 𑀯𑀺𑀳𑀸𑀭𑀻𑀢𑀺 𑀬𑁄 𑀲𑁄 𑀫𑀗𑁆𑀕𑀮𑀸𑀤𑀻𑀦𑀺 𑀲𑀫𑀽𑀳𑀦𑀺𑀢𑁆𑀯𑀸 𑀲𑀩𑁆𑀩𑀫𑀗𑁆𑀕𑀮𑀤𑁄𑀲𑀧𑁆𑀧𑀳𑀸𑀦𑀯𑀺𑀳𑀸𑀭𑀻, 𑀬𑁄𑀧𑀺 𑀲𑁄 𑀤𑀺𑀩𑁆𑀩𑀫𑀸𑀦𑀼𑀲𑀓𑁂𑀲𑀼 𑀓𑀸𑀫𑁂𑀲𑀼 𑀭𑀸𑀕𑀁 𑀯𑀺𑀦𑁂𑀬𑁆𑀬 𑀪𑀯𑀸𑀢𑀺𑀓𑁆𑀓𑀫𑁆𑀫 𑀥𑀫𑁆𑀫𑀸𑀪𑀺𑀲𑀫𑀬𑀯𑀺𑀳𑀸𑀭𑀻𑀢𑀺 𑀏𑀯𑀁 𑀢𑀸𑀬 𑀢𑀸𑀬 𑀕𑀸𑀣𑀸𑀬 𑀦𑀺𑀤𑁆𑀤𑀺𑀝𑁆𑀞𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀅𑀤𑁆𑀥𑀸 𑀳𑀺 𑀪𑀕𑀯𑀸 𑀢𑀣𑁂𑀯 𑀏𑀢𑀁 𑀬𑀁 𑀢𑁆𑀯𑀁 ‘‘𑀬𑀲𑁆𑀲 𑀫𑀗𑁆𑀕𑀮𑀸 𑀲𑀫𑀽𑀳𑀢𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀢𑀲𑁆𑀲𑀸 𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 ‘‘𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬𑀸’’𑀢𑀺 𑀅𑀯𑀘. 𑀓𑀺𑀁 𑀓𑀸𑀭𑀡𑀁? 𑀬𑁄 𑀲𑁄 𑀏𑀯𑀁𑀯𑀺𑀳𑀸𑀭𑀻 𑀪𑀺𑀓𑁆𑀔𑀼, 𑀲𑁄 𑀉𑀢𑁆𑀢𑀫𑁂𑀦 𑀤𑀫𑀣𑁂𑀦 𑀤𑀦𑁆𑀢𑁄, 𑀲𑀩𑁆𑀩𑀸𑀦𑀺 𑀘 𑀤𑀲𑀧𑀺 𑀲𑀁𑀬𑁄𑀚𑀦𑀸𑀦𑀺 𑀘𑀢𑀼𑀭𑁄 𑀘 𑀬𑁄𑀕𑁂 𑀯𑀻𑀢𑀺𑀯𑀢𑁆𑀢𑁄 𑀳𑁄𑀢𑀺. 𑀢𑀲𑁆𑀫𑀸 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬, 𑀦𑀢𑁆𑀣𑀺 𑀫𑁂 𑀏𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀇𑀢𑀺 𑀤𑁂𑀲𑀦𑀸𑀣𑁄𑀫𑀦𑀕𑀸𑀣𑀫𑁆𑀧𑀺 𑀯𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸𑀦𑀁 𑀅𑀕𑁆𑀕𑀨𑀮𑀧𑁆𑀧𑀢𑁆𑀢𑀺 𑀅𑀳𑁄𑀲𑀺, 𑀲𑁄𑀢𑀸𑀧𑀢𑁆𑀢𑀺𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀨𑀮𑀧𑁆𑀧𑀢𑁆𑀢𑀸 𑀧𑀦 𑀕𑀡𑀦𑀢𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀝𑁆𑀞𑀺𑀢𑀸.