𑁧𑁪. 𑀥𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀥𑀫𑁆𑀫𑀺𑀓𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀢𑀺𑀝𑁆𑀞𑀫𑀸𑀦𑁂 𑀓𑀺𑀭 𑀪𑀕𑀯𑀢𑀺 𑀮𑁄𑀓𑀦𑀸𑀣𑁂 𑀥𑀫𑁆𑀫𑀺𑀓𑁄 𑀦𑀸𑀫 𑀉𑀧𑀸𑀲𑀓𑁄 𑀅𑀳𑁄𑀲𑀺 𑀦𑀸𑀫𑁂𑀦 𑀘 𑀧𑀝𑀺𑀧𑀢𑁆𑀢𑀺𑀬𑀸 𑀘. 𑀲𑁄 𑀓𑀺𑀭 𑀲𑀭𑀡𑀲𑀫𑁆𑀧𑀦𑁆𑀦𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 𑀩𑀳𑀼𑀲𑁆𑀲𑀼𑀢𑁄 𑀧𑀺𑀝𑀓𑀢𑁆𑀢𑀬𑀥𑀭𑁄 𑀅𑀦𑀸𑀕𑀸𑀫𑀻 𑀅𑀪𑀺𑀜𑁆𑀜𑀸𑀮𑀸𑀪𑀻 𑀆𑀓𑀸𑀲𑀘𑀸𑀭𑀻 𑀅𑀳𑁄𑀲𑀺. 𑀢𑀲𑁆𑀲 𑀧𑀭𑀺𑀯𑀸𑀭𑀸 𑀧𑀜𑁆𑀘𑀲𑀢𑀸 𑀉𑀧𑀸𑀲𑀓𑀸, 𑀢𑁂𑀧𑀺 𑀢𑀸𑀤𑀺𑀲𑀸 𑀏𑀯 𑀅𑀳𑁂𑀲𑀼𑀁. 𑀢𑀲𑁆𑀲𑁂𑀓𑀤𑀺𑀯𑀲𑀁 𑀉𑀧𑁄𑀲𑀣𑀺𑀓𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀫𑀚𑁆𑀛𑀺𑀫𑀬𑀸𑀫𑀸𑀯𑀲𑀸𑀦𑀲𑀫𑀬𑁂 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀅𑀕𑀸𑀭𑀺𑀬𑀅𑀦𑀕𑀸𑀭𑀺𑀬𑀸𑀦𑀁 𑀧𑀝𑀺𑀧𑀤𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀲𑁄 𑀧𑀜𑁆𑀘𑀳𑀺 𑀉𑀧𑀸𑀲𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺, 𑀪𑀕𑀯𑀸 𑀘𑀲𑁆𑀲 𑀩𑁆𑀬𑀸𑀓𑀸𑀲𑀺. 𑀢𑀢𑁆𑀣 𑀧𑀼𑀩𑁆𑀩𑁂 𑀯𑀡𑁆𑀡𑀺𑀢𑀲𑀤𑀺𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀅𑀧𑀼𑀩𑁆𑀩𑀁 𑀯𑀡𑁆𑀡𑀬𑀺𑀲𑁆𑀲𑀸𑀫.

𑁩𑁭𑁯. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀓𑀣𑀁𑀓𑀭𑁄𑀢𑀺 𑀓𑀣𑀁 𑀓𑀭𑁄𑀦𑁆𑀢𑁄 𑀓𑀣𑀁 𑀧𑀝𑀺𑀧𑀚𑁆𑀚𑀦𑁆𑀢𑁄. 𑀲𑀸𑀥𑀼 𑀳𑁄𑀢𑀻𑀢𑀺 𑀲𑀼𑀦𑁆𑀤𑀭𑁄 𑀅𑀦𑀯𑀚𑁆𑀚𑁄 𑀅𑀢𑁆𑀣𑀲𑀸𑀥𑀦𑁄 𑀳𑁄𑀢𑀺. 𑀉𑀧𑀸𑀲𑀓𑀸𑀲𑁂𑀢𑀺 𑀉𑀧𑀸𑀲𑀓𑀸𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀫𑀢𑁆𑀣𑀢𑁄 𑀧𑀸𑀓𑀝𑀫𑁂𑀯. 𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀬𑁄 𑀯𑀸 𑀅𑀕𑀸𑀭𑀸 𑀅𑀦𑀕𑀸𑀭𑀫𑁂𑀢𑀺 𑀧𑀩𑁆𑀩𑀚𑀢𑀺, 𑀬𑁂 𑀯𑀸 𑀅𑀕𑀸𑀭𑀺𑀦𑁄 𑀉𑀧𑀸𑀲𑀓𑀸, 𑀏𑀢𑁂𑀲𑀼 𑀤𑀼𑀯𑀺𑀥𑁂𑀲𑀼 𑀲𑀸𑀯𑀓𑁂𑀲𑀼 𑀓𑀣𑀁𑀓𑀭𑁄 𑀲𑀸𑀯𑀓𑁄 𑀲𑀸𑀥𑀼 𑀳𑁄𑀢𑀻𑀢𑀺.

𑁩𑁮𑁦-𑁧. 𑀇𑀤𑀸𑀦𑀺 𑀏𑀯𑀁 𑀧𑀼𑀝𑁆𑀞𑀲𑁆𑀲 𑀪𑀕𑀯𑀢𑁄 𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑀢𑀁 𑀤𑀻𑀧𑁂𑀦𑁆𑀢𑁄 ‘‘𑀢𑀼𑀯𑀜𑁆𑀳𑀻’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀕𑀢𑀺𑀦𑁆𑀢𑀺 𑀅𑀚𑁆𑀛𑀸𑀲𑀬𑀕𑀢𑀺𑀁. 𑀧𑀭𑀸𑀬𑀡𑀦𑁆𑀢𑀺 𑀦𑀺𑀧𑁆𑀨𑀢𑁆𑀢𑀺𑀁. 𑀅𑀣 𑀯𑀸 𑀕𑀢𑀺𑀦𑁆𑀢𑀺 𑀦𑀺𑀭𑀬𑀸𑀤𑀺𑀧𑀜𑁆𑀘𑀧𑁆𑀧𑀪𑁂𑀤𑀁. 𑀧𑀭𑀸𑀬𑀡𑀦𑁆𑀢𑀺 𑀕𑀢𑀺𑀢𑁄 𑀧𑀭𑀁 𑀅𑀬𑀦𑀁 𑀕𑀢𑀺𑀯𑀺𑀧𑁆𑀧𑀫𑁄𑀓𑁆𑀔𑀁 𑀧𑀭𑀺𑀦𑀺𑀩𑁆𑀩𑀸𑀦𑀁, 𑀦 𑀘𑀢𑁆𑀣𑀺 𑀢𑀼𑀮𑁆𑀬𑁄𑀢𑀺 𑀢𑀬𑀸 𑀲𑀤𑀺𑀲𑁄 𑀦𑀢𑁆𑀣𑀺. 𑀲𑀩𑁆𑀩𑀁 𑀢𑀼𑀯𑀁 𑀜𑀸𑀡𑀫𑀯𑁂𑀘𑁆𑀘 𑀥𑀫𑁆𑀫𑀁, 𑀧𑀓𑀸𑀲𑁂𑀲𑀺 𑀲𑀢𑁆𑀢𑁂 𑀅𑀦𑀼𑀓𑀫𑁆𑀧𑀫𑀸𑀦𑁄𑀢𑀺 𑀢𑁆𑀯𑀁 𑀪𑀕𑀯𑀸 𑀬𑀤𑀢𑁆𑀣𑀺 𑀜𑁂𑀬𑁆𑀬𑀁 𑀦𑀸𑀫, 𑀢𑀁 𑀅𑀦𑀯𑀲𑁂𑀲𑀁 𑀅𑀯𑁂𑀘𑁆𑀘 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀢𑁆𑀢𑁂 𑀅𑀦𑀼𑀓𑀫𑁆𑀧𑀫𑀸𑀦𑁄 𑀲𑀩𑁆𑀩𑀁 𑀜𑀸𑀡𑀜𑁆𑀘 𑀥𑀫𑁆𑀫𑀜𑁆𑀘 𑀧𑀓𑀸𑀲𑁂𑀲𑀺. 𑀬𑀁 𑀬𑀁 𑀬𑀲𑁆𑀲 𑀳𑀺𑀢𑀁 𑀳𑁄𑀢𑀺, 𑀢𑀁 𑀢𑀁 𑀢𑀲𑁆𑀲 𑀆𑀯𑀺𑀓𑀸𑀲𑀺𑀬𑁂𑀯 𑀤𑁂𑀲𑁂𑀲𑀺𑀬𑁂𑀯, 𑀦 𑀢𑁂 𑀅𑀢𑁆𑀣𑀺 𑀆𑀘𑀭𑀺𑀬𑀫𑀼𑀝𑁆𑀞𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀭𑁄𑀘𑀲𑀺 𑀯𑀺𑀫𑀮𑁄𑀢𑀺 𑀥𑀽𑀫𑀭𑀚𑀸𑀤𑀺𑀯𑀺𑀭𑀳𑀺𑀢𑁄 𑀯𑀺𑀬 𑀘𑀦𑁆𑀤𑁄, 𑀭𑀸𑀕𑀸𑀤𑀺𑀫𑀮𑀸𑀪𑀸𑀯𑁂𑀦 𑀯𑀺𑀫𑀮𑁄 𑀯𑀺𑀭𑁄𑀘𑀲𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩𑁮𑁨. 𑀇𑀤𑀸𑀦𑀺 𑀬𑁂𑀲𑀁 𑀢𑀤𑀸 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑁂 𑀤𑁂𑀯𑀧𑀼𑀢𑁆𑀢𑁂 𑀓𑀺𑀢𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀲𑀁𑀲𑀦𑁆𑀢𑁄 ‘‘𑀆𑀕𑀜𑁆𑀙𑀻 𑀢𑁂 𑀲𑀦𑁆𑀢𑀺𑀓𑁂’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀦𑀸𑀕𑀭𑀸𑀚𑀸 𑀏𑀭𑀸𑀯𑀡𑁄 𑀦𑀸𑀫𑀸𑀢𑀺 𑀅𑀬𑀁 𑀓𑀺𑀭 𑀏𑀭𑀸𑀯𑀡𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀓𑀸𑀫𑀭𑀽𑀧𑀻 𑀤𑀺𑀩𑁆𑀩𑁂 𑀯𑀺𑀫𑀸𑀦𑁂 𑀯𑀲𑀢𑀺. 𑀲𑁄 𑀬𑀤𑀸 𑀲𑀓𑁆𑀓𑁄 𑀉𑀬𑁆𑀬𑀸𑀦𑀓𑀻𑀴𑀁 𑀕𑀘𑁆𑀙𑀢𑀺, 𑀢𑀤𑀸 𑀤𑀺𑀬𑀟𑁆𑀠𑀲𑀢𑀬𑁄𑀚𑀦𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑁂𑀢𑁆𑀢𑀺𑀁𑀲 𑀓𑀼𑀫𑁆𑀪𑁂 𑀫𑀸𑀧𑁂𑀢𑁆𑀯𑀸 𑀏𑀭𑀸𑀯𑀡𑁄 𑀦𑀸𑀫 𑀳𑀢𑁆𑀣𑀻 𑀳𑁄𑀢𑀺. 𑀢𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀓𑀼𑀫𑁆𑀪𑁂 𑀤𑁆𑀯𑁂 𑀤𑁆𑀯𑁂 𑀤𑀦𑁆𑀢𑀸 𑀳𑁄𑀦𑁆𑀢𑀺, 𑀏𑀓𑁂𑀓𑀲𑁆𑀫𑀺𑀁 𑀤𑀦𑁆𑀢𑁂 𑀲𑀢𑁆𑀢 𑀲𑀢𑁆𑀢 𑀧𑁄𑀓𑁆𑀔𑀭𑀡𑀺𑀬𑁄, 𑀏𑀓𑁂𑀓𑀺𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀬𑀸 𑀲𑀢𑁆𑀢 𑀲𑀢𑁆𑀢 𑀧𑀤𑀼𑀫𑀺𑀦𑀺𑀬𑁄, 𑀏𑀓𑁂𑀓𑀺𑀲𑁆𑀲𑀸 𑀧𑀤𑀼𑀫𑀺𑀦𑀺𑀬𑀸 𑀲𑀢𑁆𑀢 𑀲𑀢𑁆𑀢 𑀧𑀼𑀧𑁆𑀨𑀸𑀦𑀺, 𑀏𑀓𑁂𑀓𑀲𑁆𑀫𑀺𑀁 𑀧𑀼𑀧𑁆𑀨𑁂 𑀲𑀢𑁆𑀢 𑀲𑀢𑁆𑀢 𑀧𑀢𑁆𑀢𑀸𑀦𑀺, 𑀏𑀓𑁂𑀓𑀲𑁆𑀫𑀺𑀁 𑀧𑀢𑁆𑀢𑁂 𑀲𑀢𑁆𑀢 𑀲𑀢𑁆𑀢 𑀅𑀘𑁆𑀙𑀭𑀸𑀬𑁄 𑀦𑀘𑁆𑀘𑀦𑁆𑀢𑀺 𑀧𑀤𑀼𑀫𑀘𑁆𑀙𑀭𑀸𑀬𑁄𑀢𑁆𑀯𑁂𑀯 𑀯𑀺𑀲𑁆𑀲𑀼𑀢𑀸 𑀲𑀓𑁆𑀓𑀲𑁆𑀲 𑀦𑀸𑀝𑀓𑀺𑀢𑁆𑀣𑀺𑀬𑁄, 𑀬𑀸 𑀘 𑀯𑀺𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 ‘‘𑀪𑀫𑀦𑁆𑀢𑀺 𑀓𑀜𑁆𑀜𑀸 𑀧𑀤𑀼𑀫𑁂𑀲𑀼 𑀲𑀺𑀓𑁆𑀔𑀺𑀢𑀸’’𑀢𑀺 (𑀯𑀺. 𑀯. 𑁧𑁦𑁩𑁪) 𑀆𑀕𑀢𑀸. 𑀢𑁂𑀲𑀁 𑀧𑀦 𑀢𑁂𑀢𑁆𑀢𑀺𑀲𑀁𑀓𑀼𑀫𑁆𑀪𑀸𑀦𑀁 𑀫𑀚𑁆𑀛𑁂 𑀲𑀼𑀤𑀲𑁆𑀲𑀦𑀓𑀼𑀫𑁆𑀪𑁄 𑀦𑀸𑀫 𑀢𑀺𑀁𑀲𑀬𑁄𑀚𑀦𑀫𑀢𑁆𑀢𑁄 𑀳𑁄𑀢𑀺, 𑀢𑀢𑁆𑀣 𑀬𑁄𑀚𑀦𑀧𑁆𑀧𑀫𑀸𑀡𑁄 𑀫𑀡𑀺𑀧𑀮𑁆𑀮𑀗𑁆𑀓𑁄 𑀢𑀺𑀬𑁄𑀚𑀦𑀼𑀩𑁆𑀩𑁂𑀥𑁂 𑀧𑀼𑀧𑁆𑀨𑀫𑀡𑁆𑀟𑀧𑁂 𑀅𑀢𑁆𑀣𑀭𑀻𑀬𑀢𑀺. 𑀢𑀢𑁆𑀣 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀲𑀓𑁆𑀓𑁂 𑀧𑀦 𑀤𑁂𑀯𑀸𑀦𑀫𑀺𑀦𑁆𑀤𑁂 𑀉𑀬𑁆𑀬𑀸𑀦𑀓𑀻𑀴𑀸𑀢𑁄 𑀧𑀝𑀺𑀦𑀺𑀯𑀢𑁆𑀢𑁂 𑀧𑀼𑀦 𑀢𑀁 𑀭𑀽𑀧𑀁 𑀲𑀁𑀳𑀭𑀺𑀢𑁆𑀯𑀸𑀦 𑀤𑁂𑀯𑀧𑀼𑀢𑁆𑀢𑁄𑀯 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀆𑀕𑀜𑁆𑀙𑀺 𑀢𑁂 𑀲𑀦𑁆𑀢𑀺𑀓𑁂 𑀦𑀸𑀕𑀭𑀸𑀚𑀸 𑀏𑀭𑀸𑀯𑀡𑁄 𑀦𑀸𑀫𑀸’’𑀢𑀺. 𑀚𑀺𑀦𑁄𑀢𑀺 𑀲𑀼𑀢𑁆𑀯𑀸𑀢𑀺 ‘‘𑀯𑀺𑀚𑀺𑀢𑀧𑀸𑀧𑀥𑀫𑁆𑀫𑁄 𑀏𑀲 𑀪𑀕𑀯𑀸’’𑀢𑀺 𑀏𑀯𑀁 𑀲𑀼𑀢𑁆𑀯𑀸. 𑀲𑁄𑀧𑀺 𑀢𑀬𑀸 𑀫𑀦𑁆𑀢𑀬𑀺𑀢𑁆𑀯𑀸𑀢𑀺 𑀢𑀬𑀸 𑀲𑀤𑁆𑀥𑀺𑀁 𑀫𑀦𑁆𑀢𑀬𑀺𑀢𑁆𑀯𑀸, 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀚𑁆𑀛𑀕𑀫𑀸𑀢𑀺 𑀅𑀥𑀺𑀅𑀕𑀫𑀸, 𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀥𑀽𑀢𑀺 𑀲𑀼𑀢𑁆𑀯𑀸𑀦 𑀧𑀢𑀻𑀢𑀭𑀽𑀧𑁄𑀢𑀺 𑀢𑀁 𑀧𑀜𑁆𑀳𑀁 𑀲𑀼𑀢𑁆𑀯𑀸 ‘‘𑀲𑀸𑀥𑀼 𑀪𑀦𑁆𑀢𑁂’’𑀢𑀺 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀢𑀼𑀝𑁆𑀞𑀭𑀽𑀧𑁄 𑀕𑀢𑁄𑀢𑀺 𑀅𑀢𑁆𑀣𑁄.

𑁩𑁮𑁩. 𑀭𑀸𑀚𑀸𑀧𑀺 𑀢𑀁 𑀯𑁂𑀲𑁆𑀲𑀯𑀡𑁄 𑀓𑀼𑀯𑁂𑀭𑁄𑀢𑀺 𑀏𑀢𑁆𑀣 𑀲𑁄 𑀬𑀓𑁆𑀔𑁄 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀚𑀸, 𑀯𑀺𑀲𑀸𑀡𑀸𑀬 𑀭𑀸𑀚𑀥𑀸𑀦𑀺𑀬𑀸 𑀭𑀚𑁆𑀚𑀁 𑀓𑀸𑀭𑁂𑀢𑀻𑀢𑀺 𑀯𑁂𑀲𑁆𑀲𑀯𑀡𑁄, 𑀧𑀼𑀭𑀺𑀫𑀦𑀸𑀫𑁂𑀦 𑀓𑀼𑀯𑁂𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀓𑀺𑀭 𑀓𑀼𑀯𑁂𑀭𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀳𑀼𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀯𑀺𑀲𑀸𑀡𑀸𑀬 𑀭𑀸𑀚𑀥𑀸𑀦𑀺𑀬𑀸 𑀅𑀥𑀺𑀧𑀢𑀺 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀫𑀸 ‘‘𑀓𑀼𑀯𑁂𑀭𑁄 𑀯𑁂𑀲𑁆𑀲𑀯𑀡𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑁂 𑁋

‘‘𑀓𑀼𑀯𑁂𑀭𑀲𑁆𑀲 𑀔𑁄 𑀧𑀦, 𑀫𑀸𑀭𑀺𑀲, 𑀫𑀳𑀸𑀭𑀸𑀚𑀲𑁆𑀲 𑀯𑀺𑀲𑀸𑀡𑀸 𑀦𑀸𑀫 𑀭𑀸𑀚𑀥𑀸𑀦𑀻, 𑀢𑀲𑁆𑀫𑀸 𑀓𑀼𑀯𑁂𑀭𑁄 𑀫𑀳𑀸𑀭𑀸𑀚𑀸 ‘𑀯𑁂𑀲𑁆𑀲𑀯𑀡𑁄’𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺 (𑀤𑀻. 𑀦𑀺. 𑁩.𑁨𑁯𑁧) 𑁋

𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑀢𑀢𑁆𑀣 𑀲𑀺𑀬𑀸 𑁋 𑀓𑀲𑁆𑀫𑀸 𑀧𑀦 𑀤𑀽𑀭𑀢𑀭𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀯𑀲𑀦𑁆𑀢𑁄 𑀏𑀭𑀸𑀯𑀡𑁄 𑀧𑀞𑀫𑀁 𑀆𑀕𑀢𑁄, 𑀯𑁂𑀲𑁆𑀲𑀯𑀡𑁄 𑀧𑀘𑁆𑀙𑀸, 𑀏𑀓𑀦𑀕𑀭𑁂𑀯 𑀯𑀲𑀦𑁆𑀢𑁄 𑀅𑀬𑀁 𑀉𑀧𑀸𑀲𑀓𑁄 𑀲𑀩𑁆𑀩𑀧𑀘𑁆𑀙𑀸, 𑀓𑀣𑀜𑁆𑀘 𑀲𑁄 𑀢𑁂𑀲𑀁 𑀆𑀕𑀫𑀦𑀁 𑀅𑀜𑁆𑀜𑀸𑀲𑀺, 𑀬𑁂𑀦 𑀏𑀯𑀫𑀸𑀳𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀯𑁂𑀲𑁆𑀲𑀯𑀡𑁄 𑀓𑀺𑀭 𑀢𑀤𑀸 𑀅𑀦𑁂𑀓𑀲𑀳𑀲𑁆𑀲𑀧𑀯𑀸𑀴𑀧𑀮𑁆𑀮𑀗𑁆𑀓𑀁 𑀤𑁆𑀯𑀸𑀤𑀲𑀬𑁄𑀚𑀦𑀁 𑀦𑀸𑀭𑀺𑀯𑀸𑀳𑀦𑀁 𑀅𑀪𑀺𑀭𑀼𑀬𑁆𑀳 𑀧𑀯𑀸𑀴𑀓𑀼𑀦𑁆𑀢𑀁 𑀉𑀘𑁆𑀘𑀸𑀭𑁂𑀢𑁆𑀯𑀸 𑀤𑀲𑀲𑀳𑀲𑁆𑀲𑀓𑁄𑀝𑀺𑀬𑀓𑁆𑀔𑁂𑀳𑀺 𑀧𑀭𑀺𑀯𑀼𑀢𑁄 ‘‘𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀧𑀭𑀺𑀳𑀭𑀺𑀢𑁆𑀯𑀸 𑀫𑀕𑁆𑀕𑁂𑀦 𑀫𑀕𑁆𑀕𑀁 𑀆𑀕𑀘𑁆𑀙𑀦𑁆𑀢𑁄 𑀯𑁂𑀴𑀼𑀓𑀡𑁆𑀟𑀓𑀦𑀕𑀭𑁂 𑀦𑀦𑁆𑀤𑀫𑀸𑀢𑀸𑀬 𑀉𑀧𑀸𑀲𑀺𑀓𑀸𑀬 𑀦𑀺𑀯𑁂𑀲𑀦𑀲𑁆𑀲 𑀉𑀧𑀭𑀺𑀪𑀸𑀕𑀁 𑀲𑀫𑁆𑀧𑀢𑁆𑀢𑁄. 𑀉𑀧𑀸𑀲𑀺𑀓𑀸𑀬 𑀅𑀬𑀫𑀸𑀦𑀼𑀪𑀸𑀯𑁄 𑁋 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀳𑁄𑀢𑀺, 𑀦𑀺𑀘𑁆𑀘𑀁 𑀯𑀺𑀓𑀸𑀮𑀪𑁄𑀚𑀦𑀸 𑀧𑀝𑀺𑀯𑀺𑀭𑀢𑀸, 𑀧𑀺𑀝𑀓𑀢𑁆𑀢𑀬𑀥𑀸𑀭𑀺𑀦𑀻, 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸. 𑀲𑀸 𑀢𑀫𑁆𑀳𑀺 𑀲𑀫𑀬𑁂 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀉𑀢𑀼𑀕𑁆𑀕𑀳𑀡𑀢𑁆𑀣𑀸𑀬 𑀫𑀸𑀮𑀼𑀢𑁂𑀭𑀺𑀢𑁄𑀓𑀸𑀲𑁂 𑀞𑀢𑁆𑀯𑀸 𑀅𑀝𑁆𑀞𑀓𑀧𑀸𑀭𑀸𑀬𑀦𑀯𑀕𑁆𑀕𑁂 𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀫𑀥𑀼𑀭𑁂𑀦 𑀲𑀭𑁂𑀦 𑀪𑀸𑀲𑀢𑀺. 𑀯𑁂𑀲𑁆𑀲𑀯𑀡𑁄 𑀢𑀢𑁆𑀣𑁂𑀯 𑀬𑀸𑀦𑀸𑀦𑀺 𑀞𑀧𑁂𑀢𑁆𑀯𑀸 𑀬𑀸𑀯 𑀉𑀧𑀸𑀲𑀺𑀓𑀸 ‘‘𑀇𑀤𑀫𑀯𑁄𑀘 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂 𑀧𑀭𑀺𑀘𑀸𑀭𑀓𑀲𑁄𑀴𑀲𑀦𑁆𑀦𑀁 𑀩𑁆𑀭𑀸𑀳𑁆𑀫𑀡𑀸𑀦’’𑀦𑁆𑀢𑀺 𑀦𑀺𑀕𑀫𑀦𑀁 𑀅𑀪𑀸𑀲𑀺, 𑀢𑀸𑀯 𑀲𑀩𑁆𑀩𑀁 𑀲𑀼𑀢𑁆𑀯𑀸 𑀯𑀕𑁆𑀕𑀧𑀭𑀺𑀬𑁄𑀲𑀸𑀦𑁂 𑀲𑀼𑀯𑀡𑁆𑀡𑀫𑀼𑀭𑀚𑀲𑀤𑀺𑀲𑀁 𑀫𑀳𑀦𑁆𑀢𑀁 𑀕𑀻𑀯𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀲𑀸𑀥𑀼 𑀲𑀸𑀥𑀼 𑀪𑀕𑀺𑀦𑀻’’𑀢𑀺 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀲𑀸 ‘‘𑀓𑁄 𑀏𑀢𑁆𑀣𑀸’’𑀢𑀺 𑀆𑀳. ‘‘𑀅𑀳𑀁 𑀪𑀕𑀺𑀦𑀺 𑀯𑁂𑀲𑁆𑀲𑀯𑀡𑁄’’𑀢𑀺. 𑀉𑀧𑀸𑀲𑀺𑀓𑀸 𑀓𑀺𑀭 𑀧𑀞𑀫𑀁 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺, 𑀧𑀘𑁆𑀙𑀸 𑀯𑁂𑀲𑁆𑀲𑀯𑀡𑁄. 𑀢𑀁 𑀲𑁄 𑀥𑀫𑁆𑀫𑀢𑁄 𑀲𑀳𑁄𑀤𑀭𑀪𑀸𑀯𑀁 𑀲𑀦𑁆𑀥𑀸𑀬 𑀉𑀧𑀸𑀲𑀺𑀓𑀁 𑀪𑀕𑀺𑀦𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀢𑀺. 𑀉𑀧𑀸𑀲𑀺𑀓𑀸𑀬 𑀘 ‘‘𑀯𑀺𑀓𑀸𑀮𑁄, 𑀪𑀸𑀢𑀺𑀓 𑀪𑀤𑁆𑀭𑀫𑀼𑀔, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀅𑀳𑀁 𑀪𑀕𑀺𑀦𑀺 𑀢𑀬𑀺 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀫𑀻’’𑀢𑀺 𑀆𑀳. 𑀢𑁂𑀦 𑀳𑀺 𑀪𑀤𑁆𑀭𑀫𑀼𑀔, 𑀫𑀫 𑀔𑁂𑀢𑁆𑀢𑁂 𑀦𑀺𑀧𑁆𑀨𑀦𑁆𑀦𑀁 𑀲𑀸𑀮𑀺𑀁 𑀓𑀫𑁆𑀫𑀓𑀭𑀸 𑀆𑀳𑀭𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀁 𑀢𑀯 𑀧𑀭𑀺𑀲𑀸𑀬 𑀆𑀡𑀸𑀧𑁂𑀳𑀻𑀢𑀺. 𑀲𑁄 ‘‘𑀲𑀸𑀥𑀼 𑀪𑀕𑀺𑀦𑀻’’𑀢𑀺 𑀬𑀓𑁆𑀔𑁂 𑀆𑀡𑀸𑀧𑁂𑀲𑀺. 𑀢𑁂 𑀅𑀟𑁆𑀠𑀢𑁂𑀭𑀲 𑀓𑁄𑀝𑁆𑀞𑀸𑀕𑀸𑀭𑀲𑀢𑀸𑀦𑀺 𑀧𑀽𑀭𑁂𑀲𑀼𑀁. 𑀢𑀢𑁄 𑀧𑀪𑀼𑀢𑀺 𑀓𑁄𑀝𑁆𑀞𑀸𑀕𑀸𑀭𑀁 𑀊𑀦𑀁 𑀦𑀸𑀫 𑀦𑀸𑀳𑁄𑀲𑀺, ‘‘𑀦𑀦𑁆𑀤𑀫𑀸𑀢𑀼 𑀓𑁄𑀝𑁆𑀞𑀸𑀕𑀸𑀭𑀁 𑀯𑀺𑀬𑀸’’𑀢𑀺 𑀮𑁄𑀓𑁂 𑀦𑀺𑀤𑀲𑁆𑀲𑀦𑀁 𑀅𑀳𑁄𑀲𑀺. 𑀯𑁂𑀲𑁆𑀲𑀯𑀡𑁄 𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀧𑀽𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺. 𑀪𑀕𑀯𑀸 ‘‘𑀯𑀺𑀓𑀸𑀮𑁂 𑀆𑀕𑀢𑁄𑀲𑀻’’𑀢𑀺 𑀆𑀳. 𑀅𑀣 𑀪𑀕𑀯𑀢𑁄 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀆𑀲𑀦𑁆𑀦𑀢𑀭𑁂𑀧𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑁂 𑀯𑀲𑀦𑁆𑀢𑁄 𑀯𑁂𑀲𑁆𑀲𑀯𑀡𑁄 𑀧𑀘𑁆𑀙𑀸 𑀆𑀕𑀢𑁄. 𑀏𑀭𑀸𑀯𑀡𑀲𑁆𑀲 𑀧𑀦 𑀦 𑀓𑀺𑀜𑁆𑀘𑀺 𑀅𑀦𑁆𑀢𑀭𑀸 𑀓𑀭𑀡𑀻𑀬𑀁 𑀅𑀳𑁄𑀲𑀺, 𑀢𑁂𑀦 𑀲𑁄 𑀧𑀞𑀫𑀢𑀭𑀁 𑀆𑀕𑀢𑁄.

𑀅𑀬𑀁 𑀧𑀦 𑀉𑀧𑀸𑀲𑀓𑁄 𑀓𑀺𑀜𑁆𑀘𑀸𑀧𑀺 𑀅𑀦𑀸𑀕𑀸𑀫𑀻 𑀧𑀓𑀢𑀺𑀬𑀸𑀯 𑀏𑀓𑀪𑀢𑁆𑀢𑀺𑀓𑁄, 𑀢𑀣𑀸𑀧𑀺 𑀢𑀤𑀸 𑀉𑀧𑁄𑀲𑀣𑀤𑀺𑀯𑀲𑁄𑀢𑀺 𑀓𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀲𑀸𑀬𑀦𑁆𑀳𑀲𑀫𑀬𑀁 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀧𑀜𑁆𑀘𑀲𑀢𑀉𑀧𑀸𑀲𑀓𑀧𑀭𑀺𑀯𑀼𑀢𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀁 𑀆𑀕𑀫𑁆𑀫 𑀢𑁂𑀲𑀁 𑀉𑀧𑀸𑀲𑀓𑀸𑀦𑀁 𑀲𑀭𑀡𑀲𑀻𑀮𑀉𑀧𑁄𑀲𑀣𑀸𑀦𑀺𑀲𑀁𑀲𑀸𑀤𑀺𑀪𑁂𑀤𑀁 𑀉𑀧𑀸𑀲𑀓𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀢𑁂 𑀉𑀧𑀸𑀲𑀓𑁂 𑀉𑀬𑁆𑀬𑁄𑀚𑁂𑀲𑀺. 𑀢𑁂𑀲𑀜𑁆𑀘 𑀢𑀲𑁆𑀲𑁂𑀯 𑀖𑀭𑁂 𑀫𑀼𑀝𑁆𑀞𑀺𑀳𑀢𑁆𑀣𑀧𑁆𑀧𑀫𑀸𑀡𑀧𑀸𑀤𑀓𑀸𑀦𑀺 𑀧𑀜𑁆𑀘 𑀓𑀧𑁆𑀧𑀺𑀬𑀫𑀜𑁆𑀘𑀲𑀢𑀸𑀦𑀺 𑀧𑀸𑀝𑁂𑀓𑁆𑀓𑁄𑀯𑀭𑀓𑁂𑀲𑀼 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀑𑀯𑀭𑀓𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼, 𑀉𑀧𑀸𑀲𑀓𑁄𑀧𑀺 𑀢𑀣𑁂𑀯𑀸𑀓𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀦𑀕𑀭𑁂 𑀲𑀢𑁆𑀢𑀧𑀜𑁆𑀜𑀸𑀲 𑀓𑀼𑀮𑀲𑀢𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑀺, 𑀫𑀦𑀼𑀲𑁆𑀲𑀕𑀡𑀦𑀸𑀬 𑀅𑀝𑁆𑀞𑀸𑀭𑀲𑀓𑁄𑀝𑀺𑀫𑀦𑀼𑀲𑁆𑀲𑀸. 𑀢𑁂𑀦 𑀧𑀞𑀫𑀬𑀸𑀫𑁂 𑀳𑀢𑁆𑀣𑀺𑀅𑀲𑁆𑀲𑀫𑀦𑀼𑀲𑁆𑀲𑀪𑁂𑀭𑀺𑀲𑀤𑁆𑀤𑀸𑀤𑀻𑀳𑀺 𑀲𑀸𑀯𑀢𑁆𑀣𑀺𑀦𑀕𑀭𑀁 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀏𑀓𑀲𑀤𑁆𑀤𑀁 𑀳𑁄𑀢𑀺. 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀲𑁄 𑀲𑀤𑁆𑀤𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀢𑀫𑁆𑀳𑀺 𑀓𑀸𑀮𑁂 𑀉𑀧𑀸𑀲𑀓𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀅𑀢𑁆𑀢𑀦𑁄 𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀬𑁂𑀦𑀸𑀳𑀁 𑀫𑀕𑁆𑀕𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀲𑀼𑀔𑀺𑀢𑁄 𑀯𑀺𑀳𑀭𑀸𑀫𑀺, 𑀇𑀤𑀁 𑀲𑀼𑀔𑀁 𑀓𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑀕𑀯𑀦𑁆𑀢𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀪𑀕𑀯𑀢𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 ‘‘𑀪𑀕𑀯𑀸 𑀏𑀢𑀭𑀳𑀺 𑀓𑀢𑀫𑁂𑀦 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀏𑀭𑀸𑀯𑀡𑀯𑁂𑀲𑁆𑀲𑀯𑀡𑁂 𑀤𑀺𑀲𑁆𑀯𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀢𑁂𑀲𑀁 𑀧𑀲𑀦𑁆𑀦𑀘𑀺𑀢𑁆𑀢𑀢𑀁 𑀜𑀢𑁆𑀯𑀸 ‘‘𑀬𑀁𑀦𑀽𑀦𑀸𑀳𑀫𑁆𑀧𑀺 𑀪𑀕𑀯𑀦𑁆𑀢𑀁 𑀉𑀪𑀬𑀳𑀺𑀢𑀁 𑀧𑀝𑀺𑀧𑀤𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀲𑁆𑀫𑀸 𑀲𑁄 𑀏𑀓𑀦𑀕𑀭𑁂 𑀯𑀲𑀦𑁆𑀢𑁄𑀧𑀺 𑀲𑀩𑁆𑀩𑀧𑀘𑁆𑀙𑀸 𑀆𑀕𑀢𑁄, 𑀏𑀯𑀜𑁆𑀘 𑀦𑁂𑀲𑀁 𑀆𑀕𑀫𑀦𑀁 𑀅𑀜𑁆𑀜𑀸𑀲𑀺. 𑀢𑁂𑀦𑀸𑀳 𑁋 ‘‘𑀆𑀕𑀜𑁆𑀙𑀺 𑀢𑁂 𑀲𑀦𑁆𑀢𑀺𑀓𑁂 𑀦𑀸𑀕𑀭𑀸𑀚𑀸…𑀧𑁂… 𑀲𑁄 𑀘𑀸𑀧𑀺 𑀲𑀼𑀢𑁆𑀯𑀸𑀦 𑀧𑀢𑀻𑀢𑀭𑀽𑀧𑁄’’𑀢𑀺.

𑁩𑁮𑁪. 𑀇𑀤𑀸𑀦𑀺 𑀇𑀢𑁄 𑀩𑀳𑀺𑀤𑁆𑀥𑀸 𑀮𑁄𑀓𑀲𑀫𑁆𑀫𑀢𑁂𑀳𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀉𑀓𑁆𑀓𑀝𑁆𑀞𑀪𑀸𑀯𑁂𑀦 𑀪𑀕𑀯𑀦𑁆𑀢𑀁 𑀧𑀲𑀁𑀲𑀦𑁆𑀢𑁄 ‘‘𑀬𑁂 𑀓𑁂𑀘𑀺𑀫𑁂’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀢𑀺𑀢𑁆𑀣𑀺𑀬𑀸𑀢𑀺 𑀦𑀦𑁆𑀤𑀯𑀘𑁆𑀙𑀲𑀁𑀓𑀺𑀘𑁆𑀘𑁂𑀳𑀺 𑀆𑀤𑀺𑀧𑀼𑀕𑁆𑀕𑀮𑁂𑀳𑀺 𑀢𑀻𑀳𑀺 𑀢𑀺𑀢𑁆𑀣𑀓𑀭𑁂𑀳𑀺 𑀓𑀢𑁂 𑀤𑀺𑀝𑁆𑀞𑀺𑀢𑀺𑀢𑁆𑀣𑁂 𑀚𑀸𑀢𑀸, 𑀢𑁂𑀲𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸 𑀧𑀽𑀭𑀡𑀸𑀤𑀬𑁄 𑀙 𑀲𑀢𑁆𑀣𑀸𑀭𑁄. 𑀢𑀢𑁆𑀣 𑀦𑀸𑀝𑀧𑀼𑀢𑁆𑀢𑁄 𑀦𑀺𑀕𑀡𑁆𑀞𑁄, 𑀅𑀯𑀲𑁂𑀲𑀸 𑀆𑀚𑀻𑀯𑀓𑀸𑀢𑀺 𑀢𑁂 𑀲𑀩𑁆𑀩𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂 𑀓𑁂𑀘𑀺𑀫𑁂 𑀢𑀺𑀢𑁆𑀣𑀺𑀬𑀸 𑀯𑀸𑀤𑀲𑀻𑀮𑀸’’𑀢𑀺, ‘‘𑀫𑀬𑀁 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸, 𑀅𑀜𑁆𑀜𑁂 𑀫𑀺𑀘𑁆𑀙𑀸 𑀧𑀝𑀺𑀧𑀦𑁆𑀦𑀸’’𑀢𑀺 𑀏𑀯𑀁 𑀯𑀸𑀤𑀓𑀭𑀡𑀲𑀻𑀮𑀸 𑀮𑁄𑀓𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀆𑀚𑀻𑀯𑀓𑀸 𑀯𑀸𑀢𑀺 𑀢𑁂 𑀏𑀓𑀚𑁆𑀛𑀫𑀼𑀤𑁆𑀤𑀺𑀝𑁆𑀞𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀦𑀸𑀢𑀺𑀢𑀭𑀦𑁆𑀢𑀻𑀢𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀺. 𑀲𑀩𑁆𑀩𑁂𑀢𑀺 𑀅𑀜𑁆𑀜𑁂𑀧𑀺 𑀬𑁂 𑀓𑁂𑀘𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀤𑀬𑁄, 𑀢𑁂𑀧𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀆𑀳. ‘‘𑀞𑀺𑀢𑁄 𑀯𑀚𑀦𑁆𑀢𑀁 𑀯𑀺𑀬𑀸’’𑀢𑀺 𑀬𑀣𑀸 𑀓𑁄𑀘𑀺 𑀞𑀺𑀢𑁄 𑀕𑀢𑀺𑀯𑀺𑀓𑀮𑁄 𑀲𑀻𑀖𑀕𑀸𑀫𑀺𑀦𑀁 𑀧𑀼𑀭𑀺𑀲𑀁 𑀕𑀘𑁆𑀙𑀦𑁆𑀢𑀁 𑀦𑀸𑀢𑀺𑀢𑀭𑁂𑀬𑁆𑀬, 𑀏𑀯𑀁 𑀢𑁂 𑀧𑀜𑁆𑀜𑀸𑀕𑀢𑀺𑀬𑀸 𑀅𑀪𑀸𑀯𑁂𑀦 𑀢𑁂 𑀢𑁂 𑀅𑀢𑁆𑀣𑀧𑁆𑀧𑀪𑁂𑀤𑁂 𑀩𑀼𑀚𑁆𑀛𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀞𑀺𑀢𑀸, 𑀅𑀢𑀺𑀚𑀯𑀦𑀧𑀜𑁆𑀜𑀁 𑀪𑀕𑀯𑀦𑁆𑀢𑀁 𑀦𑀸𑀢𑀺𑀢𑀭𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁮𑁫. 𑀩𑁆𑀭𑀸𑀳𑁆𑀫𑀡𑀸 𑀯𑀸𑀤𑀲𑀻𑀮𑀸 𑀯𑀼𑀤𑁆𑀥𑀸 𑀘𑀸𑀢𑀺 𑀏𑀢𑁆𑀢𑀸𑀯𑀢𑀸 𑀘𑀗𑁆𑀓𑀻𑀢𑀸𑀭𑀼𑀓𑁆𑀔𑀧𑁄𑀓𑁆𑀔𑀭𑀲𑀸𑀢𑀺𑀚𑀸𑀡𑀼𑀲𑁆𑀲𑁄𑀡𑀺𑀆𑀤𑀬𑁄 𑀤𑀲𑁆𑀲𑁂𑀢𑀺, 𑀅𑀧𑀺 𑀩𑁆𑀭𑀸𑀳𑁆𑀫𑀡𑀸 𑀲𑀦𑁆𑀢𑀺 𑀓𑁂𑀘𑀻𑀢𑀺 𑀇𑀫𑀺𑀦𑀸 𑀫𑀚𑁆𑀛𑀺𑀫𑀸𑀧𑀺 𑀤𑀳𑀭𑀸𑀧𑀺 𑀓𑁂𑀯𑀮𑀁 𑀩𑁆𑀭𑀸𑀳𑁆𑀫𑀡𑀸 𑀲𑀦𑁆𑀢𑀺 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀺 𑀓𑁂𑀘𑀻𑀢𑀺 𑀏𑀯𑀁 𑀅𑀲𑁆𑀲𑀮𑀸𑀬𑀦𑀯𑀸𑀲𑁂𑀝𑁆𑀞𑀅𑀫𑁆𑀩𑀝𑁆𑀞𑀉𑀢𑁆𑀢𑀭𑀫𑀸𑀡𑀯𑀓𑀸𑀤𑀬𑁄 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀩𑀤𑁆𑀥𑀸𑀢𑀺 ‘‘𑀅𑀧𑀺 𑀦𑀼 𑀔𑁄 𑀇𑀫𑀁 𑀧𑀜𑁆𑀳𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀇𑀫𑀁 𑀓𑀗𑁆𑀔𑀁 𑀙𑀺𑀦𑁆𑀤𑁂𑀬𑁆𑀬𑀸’’𑀢𑀺 𑀏𑀯𑀁 𑀅𑀢𑁆𑀣𑀩𑀤𑁆𑀥𑀸 𑀪𑀯𑀦𑁆𑀢𑀺. 𑀬𑁂 𑀘𑀸𑀧𑀺 𑀅𑀜𑁆𑀜𑁂𑀢𑀺 𑀅𑀜𑁆𑀜𑁂𑀧𑀺 𑀬𑁂 ‘‘𑀫𑀬𑀁 𑀯𑀸𑀤𑀺𑀦𑁄’’𑀢𑀺 𑀏𑀯𑀁 𑀫𑀜𑁆𑀜𑀫𑀸𑀦𑀸 𑀯𑀺𑀘𑀭𑀦𑁆𑀢𑀺 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀩𑁆𑀭𑀸𑀳𑁆𑀫𑀡𑀩𑁆𑀭𑀳𑁆𑀫𑀤𑁂𑀯𑀬𑀓𑁆𑀔𑀸𑀤𑀬𑁄 𑀅𑀧𑀭𑀺𑀫𑀸𑀡𑀸. 𑀢𑁂𑀧𑀺 𑀲𑀩𑁆𑀩𑁂 𑀢𑀬𑀺 𑀅𑀢𑁆𑀣𑀩𑀤𑁆𑀥𑀸 𑀪𑀯𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁩𑁮𑁬-𑁭. 𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀪𑀕𑀯𑀦𑁆𑀢𑀁 𑀧𑀲𑀁𑀲𑀺𑀢𑁆𑀯𑀸 𑀇𑀤𑀸𑀦𑀺 𑀥𑀫𑁆𑀫𑁂𑀦𑁂𑀯 𑀢𑀁 𑀧𑀲𑀁𑀲𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀬𑀸𑀘𑀦𑁆𑀢𑁄 ‘‘𑀅𑀬𑀜𑁆𑀳𑀺 𑀥𑀫𑁆𑀫𑁄’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀅𑀬𑀜𑁆𑀳𑀺 𑀥𑀫𑁆𑀫𑁄𑀢𑀺 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀲𑀦𑁆𑀥𑀸𑀬𑀸𑀳. 𑀦𑀺𑀧𑀼𑀡𑁄𑀢𑀺 𑀲𑀡𑁆𑀳𑁄 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑁄. 𑀲𑀼𑀔𑁄𑀢𑀺 𑀧𑀝𑀺𑀯𑀺𑀤𑁆𑀥𑁄 𑀲𑀫𑀸𑀦𑁄 𑀮𑁄𑀓𑀼𑀢𑁆𑀢𑀭𑀲𑀼𑀔𑀫𑀸𑀯𑀳𑀢𑀺, 𑀢𑀲𑁆𑀫𑀸 𑀲𑀼𑀔𑀸𑀯𑀳𑀢𑁆𑀢𑀸 ‘‘𑀲𑀼𑀔𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀧𑁆𑀧𑀯𑀼𑀢𑁆𑀢𑁄𑀢𑀺 𑀲𑀼𑀤𑁂𑀲𑀺𑀢𑁄. 𑀲𑀼𑀲𑁆𑀲𑀽𑀲𑀫𑀸𑀦𑀸𑀢𑀺 𑀲𑁄𑀢𑀼𑀓𑀸𑀫𑀫𑁆𑀳𑀸𑀢𑀺 𑀅𑀢𑁆𑀣𑁄. 𑀢𑀁 𑀦𑁄 𑀯𑀤𑀸𑀢𑀺 𑀢𑀁 𑀥𑀫𑁆𑀫𑀁 𑀅𑀫𑁆𑀳𑀸𑀓𑀁 𑀯𑀤. ‘‘𑀢𑁆𑀯𑀁 𑀦𑁄’’𑀢𑀺𑀧𑀺 𑀧𑀸𑀞𑁄, 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀯𑀤𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀧𑀺𑀫𑁂 𑀪𑀺𑀓𑁆𑀔𑀯𑁄𑀢𑀺 𑀢𑀗𑁆𑀔𑀡𑀁 𑀦𑀺𑀲𑀺𑀦𑁆𑀦𑀸𑀦𑀺 𑀓𑀺𑀭 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀬𑀸𑀘𑀢𑀺. 𑀉𑀧𑀸𑀲𑀓𑀸 𑀘𑀸𑀧𑀻𑀢𑀺 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀅𑀜𑁆𑀜𑁂 𑀘 𑀤𑀲𑁆𑀲𑁂𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑁩𑁮𑁮. 𑀅𑀣 𑀪𑀕𑀯𑀸 𑀅𑀦𑀕𑀸𑀭𑀺𑀬𑀧𑀝𑀺𑀧𑀤𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀼𑀡𑀸𑀣 𑀫𑁂 𑀪𑀺𑀓𑁆𑀔𑀯𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀥𑀫𑁆𑀫𑀁 𑀥𑀼𑀢𑀁 𑀢𑀜𑁆𑀘 𑀘𑀭𑀸𑀣 𑀲𑀩𑁆𑀩𑁂𑀢𑀺 𑀓𑀺𑀮𑁂𑀲𑁂 𑀥𑀼𑀦𑀸𑀢𑀻𑀢𑀺 𑀥𑀼𑀢𑁄, 𑀏𑀯𑀭𑀽𑀧𑀁 𑀓𑀺𑀮𑁂𑀲𑀥𑀼𑀦𑀦𑀓𑀁 𑀧𑀝𑀺𑀧𑀤𑀸𑀥𑀫𑁆𑀫𑀁 𑀲𑀸𑀯𑀬𑀸𑀫𑀺 𑀯𑁄, 𑀢𑀜𑁆𑀘 𑀫𑀬𑀸 𑀲𑀸𑀯𑀺𑀢𑀁 𑀲𑀩𑁆𑀩𑁂 𑀘𑀭𑀣 𑀧𑀝𑀺𑀧𑀚𑁆𑀚𑀣, 𑀫𑀸 𑀧𑀫𑀸𑀤𑀺𑀢𑁆𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀭𑀺𑀬𑀸𑀧𑀣𑀦𑁆𑀢𑀺 𑀕𑀫𑀦𑀸𑀤𑀺𑀘𑀢𑀼𑀩𑁆𑀩𑀺𑀥𑀁. 𑀧𑀩𑁆𑀩𑀚𑀺𑀢𑀸𑀦𑀼𑀮𑁄𑀫𑀺𑀓𑀦𑁆𑀢𑀺 𑀲𑀫𑀡𑀲𑀸𑀭𑀼𑀧𑁆𑀧𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀬𑀼𑀢𑁆𑀢𑀁. 𑀅𑀭𑀜𑁆𑀜𑁂 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀯𑀲𑁂𑀦 𑀧𑀯𑀢𑁆𑀢𑀫𑁂𑀯𑀸𑀢𑀺 𑀅𑀧𑀭𑁂. 𑀲𑁂𑀯𑁂𑀣 𑀦𑀦𑁆𑀢𑀺 𑀢𑀁 𑀇𑀭𑀺𑀬𑀸𑀧𑀣𑀁 𑀪𑀚𑁂𑀬𑁆𑀬. 𑀅𑀢𑁆𑀣𑀤𑀲𑁄𑀢𑀺 𑀳𑀺𑀢𑀸𑀦𑀼𑀧𑀲𑁆𑀲𑀻. 𑀫𑀼𑀢𑀻𑀫𑀸𑀢𑀺 𑀩𑀼𑀤𑁆𑀥𑀺𑀫𑀸. 𑀲𑁂𑀲𑀫𑁂𑀢𑁆𑀣 𑀕𑀸𑀣𑀸𑀬 𑀧𑀸𑀓𑀝𑀫𑁂𑀯.

𑁩𑁮𑁯. 𑀦𑁄 𑀯𑁂 𑀯𑀺𑀓𑀸𑀮𑁂𑀢𑀺 𑀏𑀯𑀁 𑀧𑀩𑁆𑀩𑀚𑀺𑀢𑀸𑀦𑀼𑀮𑁄𑀫𑀺𑀓𑀁 𑀇𑀭𑀺𑀬𑀸𑀧𑀣𑀁 𑀲𑁂𑀯𑀫𑀸𑀦𑁄 𑀘 𑀤𑀺𑀯𑀸𑀫𑀚𑁆𑀛𑀦𑁆𑀳𑀺𑀓𑀯𑀻𑀢𑀺𑀓𑁆𑀓𑀫𑀁 𑀉𑀧𑀸𑀤𑀸𑀬 𑀯𑀺𑀓𑀸𑀮𑁂 𑀦 𑀘𑀭𑁂𑀬𑁆𑀬 𑀪𑀺𑀓𑁆𑀔𑀼, 𑀬𑀼𑀢𑁆𑀢𑀓𑀸𑀮𑁂 𑀏𑀯 𑀧𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀘𑀭𑁂𑀬𑁆𑀬. 𑀓𑀺𑀁 𑀓𑀸𑀭𑀡𑀁? 𑀅𑀓𑀸𑀮𑀘𑀸𑀭𑀺𑀜𑁆𑀳𑀺 𑀲𑀚𑀦𑁆𑀢𑀺 𑀲𑀗𑁆𑀕𑀸, 𑀅𑀓𑀸𑀮𑀘𑀸𑀭𑀺𑀁 𑀧𑀼𑀕𑁆𑀕𑀮𑀁 𑀭𑀸𑀕𑀲𑀗𑁆𑀕𑀸𑀤𑀬𑁄 𑀅𑀦𑁂𑀓𑁂 𑀲𑀗𑁆𑀕𑀸 𑀲𑀚𑀦𑁆𑀢𑀺 𑀧𑀭𑀺𑀲𑁆𑀲𑀚𑀦𑁆𑀢𑀺 𑀉𑀧𑀕𑀼𑀳𑀦𑁆𑀢𑀺 𑀅𑀮𑁆𑀮𑀻𑀬𑀦𑁆𑀢𑀺. 𑀢𑀲𑁆𑀫𑀸 𑀯𑀺𑀓𑀸𑀮𑁂 𑀦 𑀘𑀭𑀦𑁆𑀢𑀺 𑀩𑀼𑀤𑁆𑀥𑀸, 𑀢𑀲𑁆𑀫𑀸 𑀬𑁂 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑀸 𑀅𑀭𑀺𑀬𑀧𑀼𑀕𑁆𑀕𑀮𑀸, 𑀦 𑀢𑁂 𑀯𑀺𑀓𑀸𑀮𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀻𑀢𑀺. 𑀢𑁂𑀦 𑀓𑀺𑀭 𑀲𑀫𑀬𑁂𑀦 𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀅𑀧𑁆𑀧𑀜𑁆𑀜𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀤𑁂𑀲𑀦𑀸𑀯𑀲𑁂𑀦𑁂𑀯𑁂𑀢𑁆𑀣 𑀧𑀼𑀣𑀼𑀚𑁆𑀚𑀦𑀸𑀦𑀁 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳. 𑀅𑀭𑀺𑀬𑀸 𑀧𑀦 𑀲𑀳 𑀫𑀕𑁆𑀕𑀧𑀝𑀺𑀮𑀸𑀪𑀸 𑀏𑀯 𑀢𑀢𑁄 𑀧𑀝𑀺𑀯𑀺𑀭𑀢𑀸 𑀳𑁄𑀦𑁆𑀢𑀺, 𑀏𑀲𑀸 𑀥𑀫𑁆𑀫𑀢𑀸.

𑁩𑁯𑁦. 𑀏𑀯𑀁 𑀯𑀺𑀓𑀸𑀮𑀘𑀭𑀺𑀬𑀁 𑀧𑀝𑀺𑀲𑁂𑀥𑁂𑀢𑁆𑀯𑀸 ‘‘𑀓𑀸𑀮𑁂 𑀘𑀭𑀦𑁆𑀢𑁂𑀦𑀧𑀺 𑀏𑀯𑀁 𑀘𑀭𑀺𑀢𑀩𑁆𑀩’’𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀽𑀧𑀸 𑀘 𑀲𑀤𑁆𑀤𑀸 𑀘𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀢𑁂 𑀭𑀽𑀧𑀸𑀤𑀬𑁄 𑀦𑀸𑀦𑀧𑁆𑀧𑀓𑀸𑀭𑀓𑀁 𑀫𑀤𑀁 𑀚𑀦𑁂𑀦𑁆𑀢𑀸 𑀲𑀢𑁆𑀢𑁂 𑀲𑀫𑁆𑀫𑀤𑀬𑀦𑁆𑀢𑀺, 𑀢𑁂𑀲𑀼 𑀧𑀺𑀡𑁆𑀟𑀧𑀸𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁩.𑁪𑁩𑁮 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦 𑀙𑀦𑁆𑀤𑀁 𑀯𑀺𑀦𑁄𑀤𑁂𑀢𑁆𑀯𑀸 𑀬𑀼𑀢𑁆𑀢𑀓𑀸𑀮𑁂𑀦𑁂𑀯 𑀧𑀸𑀢𑀭𑀸𑀲𑀁 𑀧𑀯𑀺𑀲𑁂𑀬𑁆𑀬𑀸𑀢𑀺. 𑀏𑀢𑁆𑀣 𑀘 𑀧𑀸𑀢𑁄 𑀅𑀲𑀺𑀢𑀩𑁆𑀩𑁄𑀢𑀺 𑀧𑀸𑀢𑀭𑀸𑀲𑁄, 𑀧𑀺𑀡𑁆𑀟𑀧𑀸𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀬𑁄 𑀬𑀢𑁆𑀣 𑀮𑀩𑁆𑀪𑀢𑀺, 𑀲𑁄 𑀧𑀤𑁂𑀲𑁄𑀧𑀺 𑀢𑀁 𑀬𑁄𑀕𑁂𑀦 ‘‘𑀧𑀸𑀢𑀭𑀸𑀲𑁄’’𑀢𑀺 𑀇𑀥 𑀯𑀼𑀢𑁆𑀢𑁄. 𑀬𑀢𑁄 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀢𑀁 𑀑𑀓𑀸𑀲𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁯𑁧. 𑀏𑀯𑀁 𑀧𑀯𑀺𑀝𑁆𑀞𑁄 𑁋

‘‘𑀧𑀺𑀡𑁆𑀟𑀜𑁆𑀘 𑀪𑀺𑀓𑁆𑀔𑀼 𑀲𑀫𑀬𑁂𑀦 𑀮𑀤𑁆𑀥𑀸,

𑀏𑀓𑁄 𑀧𑀝𑀺𑀓𑁆𑀓𑀫𑁆𑀫 𑀭𑀳𑁄 𑀦𑀺𑀲𑀻𑀤𑁂;

𑀅𑀚𑁆𑀛𑀢𑁆𑀢𑀘𑀺𑀦𑁆𑀢𑀻 𑀦 𑀫𑀦𑁄 𑀩𑀳𑀺𑀤𑁆𑀥𑀸,

𑀦𑀺𑀘𑁆𑀙𑀸𑀭𑀬𑁂 𑀲𑀗𑁆𑀕𑀳𑀺𑀢𑀢𑁆𑀢𑀪𑀸𑀯𑁄’’.

𑀢𑀢𑁆𑀣 𑀧𑀺𑀡𑁆𑀟𑀦𑁆𑀢𑀺 𑀫𑀺𑀲𑁆𑀲𑀓𑀪𑀺𑀓𑁆𑀔𑀁, 𑀲𑀸 𑀳𑀺 𑀢𑀢𑁄 𑀢𑀢𑁄 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀫𑁆𑀧𑀺𑀡𑁆𑀟𑀺𑀢𑀝𑁆𑀞𑁂𑀦 ‘‘𑀧𑀺𑀡𑁆𑀟𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀬𑁂𑀦𑀸𑀢𑀺 𑀅𑀦𑁆𑀢𑁄𑀫𑀚𑁆𑀛𑀦𑁆𑀳𑀺𑀓𑀓𑀸𑀮𑁂. 𑀏𑀓𑁄 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 𑀓𑀸𑀬𑀯𑀺𑀯𑁂𑀓𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀅𑀤𑀼𑀢𑀺𑀬𑁄 𑀦𑀺𑀯𑀢𑁆𑀢𑀺𑀢𑁆𑀯𑀸. 𑀅𑀚𑁆𑀛𑀢𑁆𑀢𑀘𑀺𑀦𑁆𑀢𑀻𑀢𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀔𑀦𑁆𑀥𑀲𑀦𑁆𑀢𑀸𑀦𑀁 𑀘𑀺𑀦𑁆𑀢𑁂𑀦𑁆𑀢𑁄. 𑀦 𑀫𑀦𑁄 𑀩𑀳𑀺𑀤𑁆𑀥𑀸 𑀦𑀺𑀘𑁆𑀙𑀸𑀭𑀬𑁂𑀢𑀺 𑀩𑀳𑀺𑀤𑁆𑀥𑀸 𑀭𑀽𑀧𑀸𑀤𑀻𑀲𑀼 𑀭𑀸𑀕𑀯𑀲𑁂𑀦 𑀘𑀺𑀢𑁆𑀢𑀁 𑀦 𑀦𑀻𑀳𑀭𑁂. 𑀲𑀗𑁆𑀕𑀳𑀺𑀢𑀢𑁆𑀢𑀪𑀸𑀯𑁄𑀢𑀺 𑀲𑀼𑀝𑁆𑀞𑀼 𑀕𑀳𑀺𑀢𑀘𑀺𑀢𑁆𑀢𑁄.

𑁩𑁯𑁨. 𑀏𑀯𑀁 𑀯𑀺𑀳𑀭𑀦𑁆𑀢𑁄 𑀘 𑁋

‘‘𑀲𑀘𑁂𑀧𑀺 𑀲𑁄 𑀲𑀮𑁆𑀮𑀧𑁂 𑀲𑀸𑀯𑀓𑁂𑀦,

𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀯𑀸;

𑀥𑀫𑁆𑀫𑀁 𑀧𑀡𑀻𑀢𑀁 𑀢𑀫𑀼𑀤𑀸𑀳𑀭𑁂𑀬𑁆𑀬,

𑀦 𑀧𑁂𑀲𑀼𑀡𑀁 𑀦𑁄𑀧𑀺 𑀧𑀭𑀽𑀧𑀯𑀸𑀤𑀁’’.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀲𑁄 𑀬𑁄𑀕𑀸𑀯𑀘𑀭𑁄 𑀓𑀺𑀜𑁆𑀘𑀺𑀤𑁂𑀯 𑀲𑁄𑀢𑀼𑀓𑀸𑀫𑀢𑀸𑀬 𑀉𑀧𑀕𑀢𑁂𑀦 𑀲𑀸𑀯𑀓𑁂𑀦 𑀯𑀸 𑀓𑁂𑀦𑀘𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀕𑀳𑀝𑁆𑀞𑀸𑀤𑀺𑀦𑀸 𑀯𑀸 𑀇𑀥𑁂𑀯 𑀧𑀩𑁆𑀩𑀚𑀺𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀸 𑀲𑀤𑁆𑀥𑀺𑀁 𑀲𑀘𑁂𑀧𑀺 𑀲𑀮𑁆𑀮𑀧𑁂, 𑀅𑀣 𑀬𑁆𑀯𑀸𑀬𑀁 𑀫𑀕𑁆𑀕𑀨𑀮𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀤𑀲𑀓𑀣𑀸𑀯𑀢𑁆𑀣𑀼𑀪𑁂𑀤𑁄 𑀯𑀸 𑀅𑀢𑀧𑁆𑀧𑀓𑀝𑁆𑀞𑁂𑀦 𑀧𑀡𑀻𑀢𑁄 𑀥𑀫𑁆𑀫𑁄. 𑀢𑀁 𑀥𑀫𑁆𑀫𑀁 𑀧𑀡𑀻𑀢𑀁 𑀉𑀤𑀸𑀳𑀭𑁂𑀬𑁆𑀬, 𑀅𑀜𑁆𑀜𑀁 𑀧𑀦 𑀧𑀺𑀲𑀼𑀡𑀯𑀘𑀦𑀁 𑀯𑀸 𑀧𑀭𑀽𑀧𑀯𑀸𑀤𑀁 𑀯𑀸 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀦 𑀉𑀤𑀸𑀳𑀭𑁂𑀬𑁆𑀬𑀸𑀢𑀺.

𑁩𑁯𑁩. 𑀇𑀤𑀸𑀦𑀺 𑀢𑀲𑁆𑀫𑀺𑀁 𑀧𑀭𑀽𑀧𑀯𑀸𑀤𑁂 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀸𑀤𑀜𑁆𑀳𑀺 𑀏𑀓𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀇𑀥𑁂𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸 𑀧𑀭𑀽𑀧𑀯𑀸𑀤𑀲𑀜𑁆𑀳𑀺𑀢𑀁 𑀦𑀸𑀦𑀧𑁆𑀧𑀓𑀸𑀭𑀁 𑀯𑀺𑀕𑁆𑀕𑀸𑀳𑀺𑀓𑀓𑀣𑀸𑀪𑁂𑀤𑀁 𑀯𑀸𑀤𑀁 𑀧𑀝𑀺𑀲𑁂𑀦𑀺𑀬𑀦𑁆𑀢𑀺 𑀯𑀺𑀭𑀼𑀚𑁆𑀛𑀦𑁆𑀢𑀺, 𑀬𑀼𑀚𑁆𑀛𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀲𑁂𑀦𑀸𑀬 𑀧𑀝𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑁂 𑀫𑀬𑀁 𑀮𑀸𑀫𑀓𑀧𑀜𑁆𑀜𑁂 𑀦 𑀧𑀲𑀁𑀲𑀸𑀫. 𑀓𑀺𑀁 𑀓𑀸𑀭𑀡𑀁? 𑀢𑀢𑁄 𑀢𑀢𑁄 𑀦𑁂 𑀧𑀲𑀚𑀦𑁆𑀢𑀺 𑀲𑀗𑁆𑀕𑀸, 𑀬𑀲𑁆𑀫𑀸 𑀢𑁂 𑀢𑀸𑀤𑀺𑀲𑀓𑁂 𑀧𑀼𑀕𑁆𑀕𑀮𑁂 𑀢𑀢𑁄 𑀢𑀢𑁄 𑀯𑀘𑀦𑀧𑀣𑀢𑁄 𑀲𑀫𑀼𑀝𑁆𑀞𑀸𑀬 𑀯𑀺𑀯𑀸𑀤𑀲𑀗𑁆𑀕𑀸 𑀲𑀚𑀦𑁆𑀢𑀺 𑀅𑀮𑁆𑀮𑀻𑀬𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸 𑀲𑀚𑀦𑁆𑀢𑀻𑀢𑀺? 𑀘𑀺𑀢𑁆𑀢𑀜𑁆𑀳𑀺 𑀢𑁂 𑀢𑀢𑁆𑀣 𑀕𑀫𑁂𑀦𑁆𑀢𑀺 𑀤𑀽𑀭𑁂, 𑀬𑀲𑁆𑀫𑀸 𑀢𑁂 𑀧𑀝𑀺𑀲𑁂𑀦𑀺𑀬𑀦𑁆𑀢𑀸 𑀘𑀺𑀢𑁆𑀢𑀁 𑀢𑀢𑁆𑀣 𑀕𑀫𑁂𑀦𑁆𑀢𑀺, 𑀬𑀢𑁆𑀣 𑀕𑀢𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀤𑀽𑀭𑁂 𑀳𑁄𑀢𑀻𑀢𑀺.

𑁩𑁯𑁪-𑁫. 𑀏𑀯𑀁 𑀧𑀭𑀺𑀢𑁆𑀢𑀧𑀜𑁆𑀜𑀸𑀦𑀁 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑀳𑀸𑀧𑀜𑁆𑀜𑀸𑀦𑀁 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀺𑀡𑁆𑀟𑀁 𑀯𑀺𑀳𑀸𑀭𑀁…𑀧𑁂… 𑀲𑀸𑀯𑀓𑁄’’𑀢𑀺. 𑀢𑀢𑁆𑀣 𑀯𑀺𑀳𑀸𑀭𑁂𑀦 𑀧𑀢𑀺𑀲𑁆𑀲𑀬𑁄, 𑀲𑀬𑀦𑀸𑀲𑀦𑁂𑀦 𑀫𑀜𑁆𑀘𑀧𑀻𑀞𑀦𑁆𑀢𑀺 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀲𑁂𑀦𑀸𑀲𑀦𑀫𑁂𑀯 𑀯𑀼𑀢𑁆𑀢𑀁. 𑀆𑀧𑀦𑁆𑀢𑀺 𑀉𑀤𑀓𑀁. 𑀲𑀗𑁆𑀖𑀸𑀝𑀺𑀭𑀚𑀽𑀧𑀯𑀸𑀳𑀦𑀦𑁆𑀢𑀺 𑀧𑀁𑀲𑀼𑀫𑀮𑀸𑀤𑀺𑀦𑁄 𑀲𑀗𑁆𑀖𑀸𑀝𑀺𑀭𑀚𑀲𑁆𑀲 𑀥𑁄𑀯𑀦𑀁. 𑀲𑀼𑀢𑁆𑀯𑀸𑀦 𑀥𑀫𑁆𑀫𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢𑀦𑁆𑀢𑀺 𑀲𑀩𑁆𑀩𑀸𑀲𑀯𑀲𑀁𑀯𑀭𑀸𑀤𑀻𑀲𑀼 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀺 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮) 𑀦𑀬𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸. 𑀲𑀗𑁆𑀔𑀸𑀬 𑀲𑁂𑀯𑁂 𑀯𑀭𑀧𑀜𑁆𑀜𑀲𑀸𑀯𑀓𑁄𑀢𑀺 𑀏𑀢𑀁 𑀇𑀥 𑀧𑀺𑀡𑁆𑀟𑀦𑁆𑀢𑀺 𑀯𑀼𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀁, 𑀯𑀺𑀳𑀸𑀭𑀸𑀤𑀻𑀳𑀺 𑀯𑀼𑀢𑁆𑀢𑀁 𑀲𑁂𑀦𑀸𑀲𑀦𑀁, 𑀆𑀧𑀫𑀼𑀔𑁂𑀦 𑀤𑀲𑁆𑀲𑀺𑀢𑀁 𑀕𑀺𑀮𑀸𑀦𑀧𑀘𑁆𑀘𑀬𑀁, 𑀲𑀗𑁆𑀖𑀸𑀝𑀺𑀬𑀸 𑀘𑀻𑀯𑀭𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀧𑀘𑁆𑀘𑀬𑀁 𑀲𑀗𑁆𑀔𑀸𑀬 ‘‘𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮) 𑀦𑀬𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑁂𑀯𑁂 𑀯𑀭𑀧𑀜𑁆𑀜𑀲𑀸𑀯𑀓𑁄, 𑀲𑁂𑀯𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬 𑀯𑀭𑀧𑀜𑁆𑀜𑀲𑁆𑀲 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑁄 𑀲𑁂𑀓𑁆𑀔𑁄 𑀯𑀸 𑀧𑀼𑀣𑀼𑀚𑁆𑀚𑀦𑁄 𑀯𑀸, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀘 𑀅𑀭𑀳𑀸. 𑀲𑁄 𑀳𑀺 𑀘𑀢𑀼𑀭𑀸𑀧𑀲𑁆𑀲𑁂𑀦𑁄 ‘‘𑀲𑀗𑁆𑀔𑀸𑀬𑁂𑀓𑀁 𑀧𑀝𑀺𑀲𑁂𑀯𑀢𑀺, 𑀲𑀗𑁆𑀔𑀸𑀬𑁂𑀓𑀁 𑀅𑀥𑀺𑀯𑀸𑀲𑁂𑀢𑀺, 𑀲𑀗𑁆𑀔𑀸𑀬𑁂𑀓𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀗𑁆𑀔𑀸𑀬𑁂𑀓𑀁 𑀯𑀺𑀦𑁄𑀤𑁂𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁦𑁮; 𑀫. 𑀦𑀺. 𑁨.𑁧𑁬𑁮; 𑀅. 𑀦𑀺. 𑁧𑁦.𑁨𑁦) 𑀯𑀼𑀢𑁆𑀢𑁄. 𑀬𑀲𑁆𑀲𑀸 𑀘 𑀲𑀗𑁆𑀔𑀸𑀬 𑀲𑁂𑀯𑁂 𑀯𑀭𑀧𑀜𑁆𑀜𑀲𑀸𑀯𑀓𑁄, 𑀢𑀲𑁆𑀫𑀸 𑀳𑀺 𑀧𑀺𑀡𑁆𑀟𑁂…𑀧𑁂… 𑀬𑀣𑀸 𑀧𑁄𑀓𑁆𑀔𑀭𑁂 𑀯𑀸𑀭𑀺𑀩𑀺𑀦𑁆𑀤𑀼, 𑀢𑀣𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁯𑁬. 𑀏𑀯𑀁 𑀔𑀻𑀡𑀸𑀲𑀯𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀅𑀦𑀕𑀸𑀭𑀺𑀬𑀧𑀝𑀺𑀧𑀤𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀅𑀕𑀸𑀭𑀺𑀬𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀕𑀳𑀝𑁆𑀞𑀯𑀢𑁆𑀢𑀁 𑀧𑀦 𑀯𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀲𑀸𑀯𑀓𑁄𑀢𑀺 𑀅𑀕𑀸𑀭𑀺𑀬𑀲𑀸𑀯𑀓𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀬𑁄 𑀫𑀬𑀸 𑀇𑀢𑁄 𑀧𑀼𑀩𑁆𑀩𑁂 𑀓𑁂𑀯𑀮𑁄 𑀅𑀩𑁆𑀬𑀸𑀫𑀺𑀲𑁆𑀲𑁄 𑀲𑀓𑀮𑁄 𑀧𑀭𑀺𑀧𑀼𑀡𑁆𑀡𑁄 𑀪𑀺𑀓𑁆𑀔𑀼𑀥𑀫𑁆𑀫𑁄 𑀓𑀣𑀺𑀢𑁄. 𑀏𑀲 𑀔𑁂𑀢𑁆𑀢𑀯𑀢𑁆𑀣𑀼𑀆𑀤𑀺𑀧𑀭𑀺𑀕𑁆𑀕𑀳𑁂𑀳𑀺 𑀲𑀧𑀭𑀺𑀕𑁆𑀕𑀳𑁂𑀦 𑀦 𑀮𑀩𑁆𑀪𑀸 𑀨𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀸 𑀅𑀥𑀺𑀕𑀦𑁆𑀢𑀼𑀦𑁆𑀢𑀺.

𑁩𑁯𑁭. 𑀏𑀯𑀁 𑀢𑀲𑁆𑀲 𑀪𑀺𑀓𑁆𑀔𑀼𑀥𑀫𑁆𑀫𑀁 𑀧𑀝𑀺𑀲𑁂𑀥𑁂𑀢𑁆𑀯𑀸 𑀕𑀳𑀝𑁆𑀞𑀥𑀫𑁆𑀫𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀡𑀁 𑀦 𑀳𑀦𑁂’’𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀟𑁆𑀠𑁂𑀦 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀸 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺 𑀯𑀼𑀢𑁆𑀢𑀸, 𑀧𑀘𑁆𑀙𑀺𑀫𑀟𑁆𑀠𑁂𑀦 𑀲𑀢𑁆𑀢𑁂𑀲𑀼 𑀳𑀺𑀢𑀧𑀝𑀺𑀧𑀢𑁆𑀢𑀺. 𑀢𑀢𑀺𑀬𑀧𑀸𑀤𑁄 𑀘𑁂𑀢𑁆𑀣 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑁂 (𑀲𑀼. 𑀦𑀺. 𑁩𑁫 𑀆𑀤𑀬𑁄) 𑀘𑀢𑀼𑀢𑁆𑀣𑀧𑀸𑀤𑁂 𑀣𑀸𑀯𑀭𑀢𑀲𑀪𑁂𑀤𑁄 𑀫𑁂𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀲𑀼. 𑀦𑀺. 𑁧𑁪𑁩 𑀆𑀤𑀬𑁄) 𑀲𑀩𑁆𑀩𑀧𑁆𑀧𑀓𑀸𑀭𑀢𑁄 𑀯𑀡𑁆𑀡𑀺𑀢𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀧𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 𑁋 𑀢𑀲𑀣𑀸𑀯𑀭𑁂𑀲𑀼 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁 𑀦 𑀳𑀦𑁂 𑀦 𑀖𑀸𑀢𑀬𑁂𑀬𑁆𑀬 𑀦𑀸𑀦𑀼𑀚𑀜𑁆𑀜𑀸𑀢𑀺. ‘‘𑀦𑀺𑀥𑀸𑀬 𑀤𑀡𑁆𑀟’’𑀦𑁆𑀢𑀺 𑀇𑀢𑁄 𑀯𑀸 𑀧𑀭𑀁 ‘‘𑀯𑀢𑁆𑀢𑁂𑀬𑁆𑀬𑀸’’𑀢𑀺 𑀧𑀸𑀞𑀲𑁂𑀲𑁄 𑀆𑀳𑀭𑀺𑀢𑀩𑁆𑀩𑁄. 𑀇𑀢𑀭𑀣𑀸 𑀳𑀺 𑀦 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀦𑁆𑀥𑀺𑀬𑀢𑀺.

𑁩𑁯𑁮. 𑀏𑀯𑀁 𑀧𑀞𑀫𑀲𑀺𑀓𑁆𑀔𑀸𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁄 𑀅𑀤𑀺𑀦𑁆𑀦’’𑀦𑁆𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀻𑀢𑀺 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸. 𑀓𑁆𑀯𑀘𑀻𑀢𑀺 𑀕𑀸𑀫𑁂 𑀯𑀸 𑀅𑀭𑀜𑁆𑀜𑁂 𑀯𑀸. 𑀲𑀸𑀯𑀓𑁄𑀢𑀺 𑀅𑀕𑀸𑀭𑀺𑀬𑀲𑀸𑀯𑀓𑁄. 𑀩𑀼𑀚𑁆𑀛𑀫𑀸𑀦𑁄𑀢𑀺 ‘‘𑀧𑀭𑀲𑀦𑁆𑀢𑀓𑀫𑀺𑀤’’𑀦𑁆𑀢𑀺 𑀚𑀸𑀦𑀫𑀸𑀦𑁄. 𑀲𑀩𑁆𑀩𑀁 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑁂𑀬𑁆𑀬𑀸𑀢𑀺 𑀏𑀯𑀜𑁆𑀳𑀺 𑀧𑀝𑀺𑀧𑀚𑁆𑀚𑀫𑀸𑀦𑁄 𑀲𑀩𑁆𑀩𑀁 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀦𑁄 𑀅𑀜𑁆𑀜𑀣𑀸𑀢𑀺 𑀤𑀻𑀧𑁂𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀜𑁆𑀘 𑀧𑀸𑀓𑀝𑀜𑁆𑀘𑀸𑀢𑀺.

𑁩𑁯𑁯. 𑀏𑀯𑀁 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀁 𑀤𑀲𑁆𑀲𑁂𑀢𑁆𑀯𑀸 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄 𑀧𑀪𑀼𑀢𑀺 𑀢𑀢𑀺𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺. 𑀢𑀢𑁆𑀣 𑀅𑀲𑀫𑁆𑀪𑀼𑀡𑀦𑁆𑀢𑁄𑀢𑀺 𑀅𑀲𑀓𑁆𑀓𑁄𑀦𑁆𑀢𑁄.

𑁪𑁦𑁦. 𑀇𑀤𑀸𑀦𑀺 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀪𑀕𑁆𑀕𑀢𑁄 𑀯𑀸’’𑀢𑀺. 𑀢𑀢𑁆𑀣 𑀲𑀪𑀕𑁆𑀕𑀢𑁄𑀢𑀺 𑀲𑀦𑁆𑀣𑀸𑀕𑀸𑀭𑀸𑀤𑀺𑀕𑀢𑁄. 𑀧𑀭𑀺𑀲𑀕𑁆𑀕𑀢𑁄𑀢𑀺 𑀧𑀽𑀕𑀫𑀚𑁆𑀚𑀕𑀢𑁄. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀜𑁆𑀘 𑀧𑀸𑀓𑀝𑀜𑁆𑀘𑀸𑀢𑀺.

𑁪𑁦𑁧. 𑀏𑀯𑀁 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀁 𑀤𑀲𑁆𑀲𑁂𑀢𑁆𑀯𑀸 𑀧𑀜𑁆𑀘𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀚𑁆𑀚𑀜𑁆𑀘 𑀧𑀸𑀦’’𑀦𑁆𑀢𑀺. 𑀢𑀢𑁆𑀣 𑀫𑀚𑁆𑀚𑀜𑁆𑀘 𑀧𑀸𑀦𑀦𑁆𑀢𑀺 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀏𑀯𑀁 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑀢𑁆𑀣𑁄 ‘‘𑀫𑀚𑁆𑀚𑀧𑀸𑀦𑀜𑁆𑀘 𑀦 𑀲𑀫𑀸𑀘𑀭𑁂𑀬𑁆𑀬𑀸’’𑀢𑀺. 𑀥𑀫𑁆𑀫𑀁 𑀇𑀫𑀦𑁆𑀢𑀺 𑀇𑀫𑀁 𑀫𑀚𑁆𑀚𑀧𑀸𑀦𑀯𑁂𑀭𑀫𑀡𑀻𑀥𑀫𑁆𑀫𑀁. 𑀉𑀫𑁆𑀫𑀸𑀤𑀦𑀦𑁆𑀢𑀦𑁆𑀢𑀺 𑀉𑀫𑁆𑀫𑀸𑀤𑀦𑀧𑀭𑀺𑀬𑁄𑀲𑀸𑀦𑀁. 𑀬𑁄 𑀳𑀺 𑀲𑀩𑁆𑀩𑀮𑀳𑀼𑀓𑁄 𑀫𑀚𑁆𑀚𑀧𑀸𑀦𑀲𑁆𑀲 𑀯𑀺𑀧𑀸𑀓𑁄, 𑀲𑁄 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀺. 𑀇𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸𑀢𑀺 𑀇𑀢𑀺 𑀦𑀁 𑀫𑀚𑁆𑀚𑀧𑀸𑀦𑀁 𑀜𑀢𑁆𑀯𑀸. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀜𑁆𑀘 𑀧𑀸𑀓𑀝𑀜𑁆𑀘𑀸𑀢𑀺.

𑁪𑁦𑁨. 𑀏𑀯𑀁 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑀸𑀦𑀫𑁆𑀧𑀺 𑀫𑀚𑁆𑀚𑀧𑀸𑀦𑀫𑁂𑀯 𑀲𑀁𑀓𑀺𑀮𑁂𑀲𑀓𑀭𑀜𑁆𑀘 𑀪𑁂𑀤𑀓𑀭𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀤𑀴𑁆𑀳𑀢𑀭𑀁 𑀢𑀢𑁄 𑀯𑁂𑀭𑀫𑀡𑀺𑀬𑀁 𑀦𑀺𑀬𑁄𑀚𑁂𑀦𑁆𑀢𑁄 𑀆𑀳 ‘‘𑀫𑀤𑀸 𑀳𑀺 𑀧𑀸𑀧𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺. 𑀢𑀢𑁆𑀣 𑀫𑀤𑀸𑀢𑀺 𑀫𑀤𑀳𑁂𑀢𑀼. 𑀳𑀺𑀓𑀸𑀭𑁄 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄. 𑀧𑀸𑀧𑀸𑀦𑀺 𑀓𑀭𑁄𑀦𑁆𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀲𑀩𑁆𑀩𑀸𑀓𑀼𑀲𑀮𑀸𑀦𑀺 𑀓𑀭𑁄𑀦𑁆𑀢𑀺. 𑀉𑀫𑁆𑀫𑀸𑀤𑀦𑀁 𑀫𑁄𑀳𑀦𑀦𑁆𑀢𑀺 𑀧𑀭𑀮𑁄𑀓𑁂 𑀉𑀫𑁆𑀫𑀸𑀤𑀦𑀁 𑀇𑀳𑀮𑁄𑀓𑁂 𑀫𑁄𑀳𑀦𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁪𑁦𑁩-𑁪. 𑀏𑀢𑁆𑀢𑀸𑀯𑀢𑀸 𑀅𑀕𑀸𑀭𑀺𑀬𑀲𑀸𑀯𑀓𑀲𑁆𑀲 𑀦𑀺𑀘𑁆𑀘𑀲𑀻𑀮𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀉𑀧𑁄𑀲𑀣𑀗𑁆𑀕𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀸𑀡𑀁 𑀦 𑀳𑀦𑁂’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀅𑀩𑁆𑀭𑀳𑁆𑀫𑀘𑀭𑀺𑀬𑀸𑀢𑀺 𑀅𑀲𑁂𑀝𑁆𑀞𑀘𑀭𑀺𑀬𑀪𑀽𑀢𑀸. 𑀫𑁂𑀣𑀼𑀦𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀢𑁄. 𑀭𑀢𑁆𑀢𑀺𑀁 𑀦 𑀪𑀼𑀜𑁆𑀚𑁂𑀬𑁆𑀬 𑀯𑀺𑀓𑀸𑀮𑀪𑁄𑀚𑀦𑀦𑁆𑀢𑀺 𑀭𑀢𑁆𑀢𑀺𑀫𑁆𑀧𑀺 𑀦 𑀪𑀼𑀜𑁆𑀚𑁂𑀬𑁆𑀬, 𑀤𑀺𑀯𑀸𑀧𑀺 𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑀪𑁄𑀚𑀦𑀁 𑀦 𑀪𑀼𑀜𑁆𑀚𑁂𑀬𑁆𑀬. 𑀦 𑀘 𑀕𑀦𑁆𑀥𑀦𑁆𑀢𑀺 𑀏𑀢𑁆𑀣 𑀕𑀦𑁆𑀥𑀕𑁆𑀕𑀳𑀡𑁂𑀦 𑀯𑀺𑀮𑁂𑀧𑀦𑀘𑀼𑀡𑁆𑀡𑀸𑀤𑀻𑀦𑀺𑀧𑀺 𑀕𑀳𑀺𑀢𑀸𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀫𑀜𑁆𑀘𑁂𑀢𑀺 𑀓𑀧𑁆𑀧𑀺𑀬𑀫𑀜𑁆𑀘𑁂. 𑀲𑀦𑁆𑀣𑀢𑁂𑀢𑀺 𑀢𑀝𑁆𑀝𑀺𑀓𑀸𑀤𑀻𑀳𑀺 𑀓𑀧𑁆𑀧𑀺𑀬𑀢𑁆𑀣𑀭𑀡𑁂𑀳𑀺 𑀅𑀢𑁆𑀣𑀢𑁂. 𑀙𑀫𑀸𑀬𑀁 𑀧𑀦 𑀕𑁄𑀦𑀓𑀸𑀤𑀺𑀲𑀦𑁆𑀣𑀢𑀸𑀬𑀧𑀺 𑀯𑀝𑁆𑀝𑀢𑀺. 𑀅𑀝𑁆𑀞𑀗𑁆𑀕𑀺𑀓𑀦𑁆𑀢𑀺 𑀧𑀜𑁆𑀘𑀗𑁆𑀕𑀺𑀓𑀁 𑀯𑀺𑀬 𑀢𑀽𑀭𑀺𑀬𑀁, 𑀦 𑀅𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑀁. 𑀤𑀼𑀓𑁆𑀔𑀦𑁆𑀢𑀕𑀼𑀦𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀕𑀢𑁂𑀦. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯. 𑀧𑀘𑁆𑀙𑀺𑀫𑀟𑁆𑀠𑀼𑀁 𑀧𑀦 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀯𑀼𑀢𑁆𑀢𑀦𑁆𑀢𑀺𑀧𑀺 𑀆𑀳𑀼.

𑁪𑁦𑁫. 𑀏𑀯𑀁 𑀉𑀧𑁄𑀲𑀣𑀗𑁆𑀕𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀉𑀧𑁄𑀲𑀣𑀓𑀸𑀮𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁄 𑀘 𑀧𑀓𑁆𑀔𑀲𑁆𑀲𑀸’’𑀢𑀺. 𑀢𑀢𑁆𑀣 𑀢𑀢𑁄𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄. 𑀧𑀓𑁆𑀔𑀲𑁆𑀲𑀼𑀧𑀯𑀲𑁆𑀲𑀼𑀧𑁄𑀲𑀣𑀦𑁆𑀢𑀺 𑀏𑀯𑀁 𑀧𑀭𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀁 ‘‘𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁 𑀅𑀝𑁆𑀞𑀫𑀺𑀦𑁆𑀢𑀺 𑀏𑀢𑁂 𑀢𑀬𑁄 𑀤𑀺𑀯𑀲𑁂 𑀉𑀧𑀯𑀲𑁆𑀲 𑀉𑀧𑁄𑀲𑀣𑀁, 𑀏𑀢𑀁 𑀅𑀝𑁆𑀞𑀗𑁆𑀕𑀺𑀓𑀉𑀧𑁄𑀲𑀣𑀁 𑀉𑀧𑀕𑀫𑁆𑀫 𑀯𑀲𑀺𑀢𑁆𑀯𑀸’’𑀢𑀺. 𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘𑀸𑀢𑀺 𑀏𑀢𑁆𑀣 𑀧𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀧𑀼𑀭𑀺𑀫𑀪𑀸𑀕𑁂 𑀆𑀲𑀸𑀴𑁆𑀳𑀫𑀸𑀲𑁄, 𑀅𑀦𑁆𑀢𑁄𑀯𑀲𑁆𑀲𑀁 𑀢𑀬𑁄 𑀫𑀸𑀲𑀸, 𑀓𑀢𑁆𑀢𑀺𑀓𑀫𑀸𑀲𑁄𑀢𑀺 𑀇𑀫𑁂 𑀧𑀜𑁆𑀘 𑀫𑀸𑀲𑀸 ‘‘𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀆𑀲𑀸𑀴𑁆𑀳𑀓𑀢𑁆𑀢𑀺𑀓𑀨𑀕𑁆𑀕𑀼𑀡𑀫𑀸𑀲𑀸 𑀢𑀬𑁄 𑀏𑀯𑀸𑀢𑀺 𑀅𑀧𑀭𑁂. 𑀧𑀓𑁆𑀔𑀼𑀧𑁄𑀲𑀣𑀤𑀺𑀯𑀲𑀸𑀦𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀤𑀺𑀯𑀲𑀯𑀲𑁂𑀦 𑀧𑀓𑁆𑀔𑁂 𑀧𑀓𑁆𑀔𑁂 𑀢𑁂𑀭𑀲𑀻𑀧𑀸𑀝𑀺𑀧𑀤𑀲𑀢𑁆𑀢𑀫𑀻𑀦𑀯𑀫𑀻𑀲𑀗𑁆𑀔𑀸𑀢𑀸 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀤𑀺𑀯𑀲𑀸𑀢𑀺 𑀅𑀧𑀭𑁂. 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁. 𑀲𑀩𑁆𑀩𑀁 𑀯𑀸 𑀧𑀦 𑀧𑀼𑀜𑁆𑀜𑀓𑀸𑀫𑀻𑀦𑀁 𑀪𑀸𑀲𑀺𑀢𑀩𑁆𑀩𑀁. 𑀏𑀯𑀫𑁂𑀢𑀁 𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘 𑀧𑀲𑀦𑁆𑀦𑀫𑀸𑀦𑀲𑁄 𑀲𑀼𑀲𑀫𑀢𑁆𑀢𑀭𑀽𑀧𑀁 𑀲𑀼𑀧𑀭𑀺𑀧𑀼𑀡𑁆𑀡𑀭𑀽𑀧𑀁 𑀏𑀓𑀫𑁆𑀧𑀺 𑀤𑀺𑀯𑀲𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑁄 𑀅𑀝𑁆𑀞𑀗𑁆𑀕𑀼𑀧𑁂𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑁪𑁦𑁬. 𑀏𑀯𑀁 𑀉𑀧𑁄𑀲𑀣𑀓𑀸𑀮𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀓𑀸𑀮𑁂𑀲𑀼 𑀏𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑁆𑀲 𑀬𑀁 𑀓𑀸𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁄 𑀘 𑀧𑀸𑀢𑁄’’𑀢𑀺. 𑀏𑀢𑁆𑀣𑀸𑀧𑀺 𑀢𑀢𑁄𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄, 𑀅𑀦𑀦𑁆𑀢𑀭𑀢𑁆𑀣𑁂 𑀯𑀸, 𑀅𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀢𑁄𑀢𑀺 𑀅𑀧𑀭𑀚𑁆𑀚𑀼𑀤𑀺𑀯𑀲𑀧𑀼𑀩𑁆𑀩𑀪𑀸𑀕𑁂. 𑀉𑀧𑀯𑀼𑀢𑁆𑀣𑀼𑀧𑁄𑀲𑀣𑁄𑀢𑀺 𑀉𑀧𑀯𑀲𑀺𑀢𑀉𑀧𑁄𑀲𑀣𑁄. 𑀅𑀦𑁆𑀦𑁂𑀦𑀸𑀢𑀺 𑀬𑀸𑀕𑀼𑀪𑀢𑁆𑀢𑀸𑀤𑀺𑀦𑀸. 𑀧𑀸𑀦𑁂𑀦𑀸𑀢𑀺 𑀅𑀝𑁆𑀞𑀯𑀺𑀥𑀧𑀸𑀦𑁂𑀦. 𑀅𑀦𑀼𑀫𑁄𑀤𑀫𑀸𑀦𑁄𑀢𑀺 𑀅𑀦𑀼𑀧𑀫𑁄𑀤𑀫𑀸𑀦𑁄, 𑀦𑀺𑀭𑀦𑁆𑀢𑀭𑀁 𑀫𑁄𑀤𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀭𑀳𑀦𑁆𑀢𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦, 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀁𑀯𑀺𑀪𑀚𑁂𑀣𑀸𑀢𑀺 𑀪𑀸𑀚𑁂𑀬𑁆𑀬 𑀧𑀢𑀺𑀫𑀸𑀦𑁂𑀬𑁆𑀬. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁪𑁦𑁭. 𑀏𑀯𑀁 𑀉𑀧𑀯𑀼𑀢𑁆𑀣𑀼𑀧𑁄𑀲𑀣𑀲𑁆𑀲 𑀓𑀺𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑀸𑀯𑀚𑀻𑀯𑀺𑀓𑀁 𑀕𑀭𑀼𑀯𑀢𑁆𑀢𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀜𑁆𑀘 𑀓𑀣𑁂𑀢𑁆𑀯𑀸 𑀢𑀸𑀬 𑀧𑀝𑀺𑀧𑀤𑀸𑀬 𑀅𑀥𑀺𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀥𑀫𑁆𑀫𑁂𑀦 𑀫𑀸𑀢𑀸𑀧𑀺𑀢𑀭𑁄’’𑀢𑀺. 𑀢𑀢𑁆𑀣 𑀥𑀫𑁆𑀫𑁂𑀦𑀸𑀢𑀺 𑀥𑀫𑁆𑀫𑀮𑀤𑁆𑀥𑁂𑀦 𑀪𑁄𑀕𑁂𑀦. 𑀪𑀭𑁂𑀬𑁆𑀬𑀸𑀢𑀺 𑀧𑁄𑀲𑁂𑀬𑁆𑀬. 𑀥𑀫𑁆𑀫𑀺𑀓𑀁 𑀲𑁄 𑀯𑀡𑀺𑀚𑁆𑀚𑀦𑁆𑀢𑀺 𑀲𑀢𑁆𑀢𑀯𑀡𑀺𑀚𑁆𑀚𑀸, 𑀲𑀢𑁆𑀣𑀯𑀡𑀺𑀚𑁆𑀚𑀸, 𑀯𑀺𑀲𑀯𑀡𑀺𑀚𑁆𑀚𑀸, 𑀫𑀁𑀲𑀯𑀡𑀺𑀚𑁆𑀚𑀸, 𑀲𑀼𑀭𑀸𑀯𑀡𑀺𑀚𑁆𑀚𑀸𑀢𑀺 𑀇𑀫𑀸 𑀧𑀜𑁆𑀘 𑀅𑀥𑀫𑁆𑀫𑀯𑀡𑀺𑀚𑁆𑀚𑀸 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀸 𑀥𑀫𑁆𑀫𑀺𑀓𑀯𑀡𑀺𑀚𑁆𑀚𑀸. 𑀯𑀡𑀺𑀚𑁆𑀚𑀸𑀫𑀼𑀔𑁂𑀦 𑀘𑁂𑀢𑁆𑀣 𑀓𑀲𑀺𑀕𑁄𑀭𑀓𑁆𑀔𑀸𑀤𑀺 𑀅𑀧𑀭𑁄𑀧𑀺 𑀥𑀫𑁆𑀫𑀺𑀓𑁄 𑀯𑁄𑀳𑀸𑀭𑁄 𑀲𑀗𑁆𑀕𑀳𑀺𑀢𑁄. 𑀲𑁂𑀲𑀫𑀼𑀢𑁆𑀢𑀸𑀦𑀢𑁆𑀣𑀫𑁂𑀯. 𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀲𑁄 𑀦𑀺𑀘𑁆𑀘𑀲𑀻𑀮𑀉𑀧𑁄𑀲𑀣𑀲𑀻𑀮𑀤𑀸𑀦𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀧𑀬𑁄𑀚𑀬𑁂 𑀥𑀫𑁆𑀫𑀺𑀓𑀁 𑀯𑀡𑀺𑀚𑁆𑀚𑀁, 𑀢𑀢𑁄 𑀮𑀤𑁆𑀥𑁂𑀦 𑀘 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑁂𑀦 𑀪𑁄𑀕𑁂𑀦 𑀫𑀸𑀢𑀸𑀧𑀺𑀢𑀭𑁄 𑀪𑀭𑁂𑀬𑁆𑀬. 𑀅𑀣 𑀲𑁄 𑀕𑀺𑀳𑀻 𑀏𑀯𑀁 𑀅𑀧𑁆𑀧𑀫𑀢𑁆𑀢𑁄 𑀆𑀤𑀺𑀢𑁄 𑀧𑀪𑀼𑀢𑀺 𑀯𑀼𑀢𑁆𑀢𑀁 𑀇𑀫𑀁 𑀯𑀢𑁆𑀢𑀁 𑀯𑀢𑁆𑀢𑀬𑀦𑁆𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀬𑁂 𑀢𑁂 𑀅𑀢𑁆𑀢𑀦𑁄 𑀆𑀪𑀸𑀬 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑁆𑀯𑀸 𑀆𑀮𑁄𑀓𑀓𑀭𑀡𑁂𑀦 𑀲𑀬𑀫𑁆𑀧𑀪𑀸𑀢𑀺 𑀮𑀤𑁆𑀥𑀦𑀸𑀫𑀸 𑀙 𑀓𑀸𑀫𑀸𑀯𑀘𑀭𑀤𑁂𑀯𑀸, 𑀢𑁂 𑀲𑀬𑀫𑁆𑀧𑀪𑁂 𑀦𑀸𑀫 𑀤𑁂𑀯𑁂 𑀉𑀧𑁂𑀢𑀺 𑀪𑀚𑀢𑀺 𑀅𑀮𑁆𑀮𑀻𑀬𑀢𑀺, 𑀢𑁂𑀲𑀁 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀥𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀘 𑀤𑀼𑀢𑀺𑀬𑁄 𑀯𑀕𑁆𑀕𑁄 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑀢𑁄, 𑀦𑀸𑀫𑁂𑀦

𑀘𑀽𑀴𑀯𑀕𑁆𑀕𑁄𑀢𑀺.