𑁮. 𑀥𑀫𑁆𑀫𑀲𑀼𑀢𑁆𑀢-(𑀦𑀸𑀯𑀸𑀲𑀼𑀢𑁆𑀢)-𑀯𑀡𑁆𑀡𑀦𑀸

𑁩𑁧𑁯. 𑀬𑀲𑁆𑀫𑀸 𑀳𑀺 𑀥𑀫𑁆𑀫𑀦𑁆𑀢𑀺 𑀥𑀫𑁆𑀫𑀲𑀼𑀢𑁆𑀢𑀁, ‘‘𑀦𑀸𑀯𑀸𑀲𑀼𑀢𑁆𑀢’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀤𑀁 𑀲𑀼𑀢𑁆𑀢𑀁 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀉𑀧𑁆𑀧𑀢𑁆𑀢𑀺𑀢𑁄 𑀧𑀪𑀼𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀦𑀼𑀧𑁆𑀧𑀦𑁆𑀦𑁂 𑀓𑀺𑀭 𑀪𑀕𑀯𑀢𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀢𑁂𑀲𑀁 𑀧𑀞𑀫𑁄 𑀘𑀯𑀺𑀢𑁆𑀯𑀸 𑀭𑀸𑀚𑀕𑀳𑀲𑁆𑀲 𑀅𑀯𑀺𑀤𑀽𑀭𑁂 𑀉𑀧𑀢𑀺𑀲𑁆𑀲𑀕𑀸𑀫𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑁄𑀕𑀕𑀸𑀫𑁄 𑀅𑀢𑁆𑀣𑀺, 𑀢𑀢𑁆𑀣 𑀲𑀝𑁆𑀞𑀺𑀅𑀥𑀺𑀓𑀧𑀜𑁆𑀘𑀓𑁄𑀝𑀺𑀲𑀢𑀥𑀦𑀯𑀺𑀪𑀯𑀲𑁆𑀲 𑀕𑀸𑀫𑀲𑀸𑀫𑀺𑀦𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀭𑀽𑀧𑀲𑀸𑀭𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻, 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀤𑀼𑀢𑀺𑀬𑁄 𑀢𑀲𑁆𑀲𑁂𑀯𑀸𑀯𑀺𑀤𑀽𑀭𑁂 𑀓𑁄𑀮𑀺𑀢𑀕𑀸𑀫𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑁄𑀕𑀕𑀸𑀫𑁄 𑀅𑀢𑁆𑀣𑀺. 𑀢𑀢𑁆𑀣 𑀢𑀣𑀸𑀭𑀽𑀧𑀯𑀺𑀪𑀯𑀲𑁆𑀲𑁂𑀯 𑀕𑀸𑀫𑀲𑀸𑀫𑀺𑀦𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑁄𑀕𑁆𑀕𑀮𑁆𑀮𑀸𑀦𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻, 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀢𑀁 𑀤𑀺𑀯𑀲𑀫𑁂𑀯 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀏𑀯𑀁 𑀢𑁂𑀲𑀁 𑀏𑀓𑀤𑀺𑀯𑀲𑀫𑁂𑀯 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀜𑁆𑀘 𑀕𑀩𑁆𑀪𑀯𑀼𑀝𑁆𑀞𑀸𑀦𑀜𑁆𑀘 𑀅𑀳𑁄𑀲𑀺. 𑀏𑀓𑀤𑀺𑀯𑀲𑁂𑀬𑁂𑀯 𑀘 𑀦𑁂𑀲𑀁 𑀏𑀓𑀲𑁆𑀲 𑀉𑀧𑀢𑀺𑀲𑁆𑀲𑀕𑀸𑀫𑁂 𑀚𑀸𑀢𑀢𑁆𑀢𑀸 𑀉𑀧𑀢𑀺𑀲𑁆𑀲𑁄, 𑀏𑀓𑀲𑁆𑀲 𑀓𑁄𑀮𑀺𑀢𑀕𑀸𑀫𑁂 𑀚𑀸𑀢𑀢𑁆𑀢𑀸 𑀓𑁄𑀮𑀺𑀢𑁄𑀢𑀺 𑀦𑀸𑀫𑀫𑀓𑀁𑀲𑀼.

𑀢𑁂 𑀲𑀳𑀧𑀁𑀲𑀼𑀁 𑀓𑀻𑀴𑀦𑁆𑀢𑀸 𑀲𑀳𑀸𑀬𑀓𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀁 𑀧𑀸𑀧𑀼𑀡𑀺𑀁𑀲𑀼, 𑀏𑀓𑀫𑁂𑀓𑀲𑁆𑀲 𑀘 𑀧𑀜𑁆𑀘𑀧𑀜𑁆𑀘𑀫𑀸𑀡𑀯𑀓𑀲𑀢𑀸𑀦𑀺 𑀧𑀭𑀺𑀯𑀸𑀭𑀸 𑀅𑀳𑁂𑀲𑀼𑀁. 𑀢𑁂 𑀉𑀬𑁆𑀬𑀸𑀦𑀁 𑀯𑀸 𑀦𑀤𑀻𑀢𑀺𑀢𑁆𑀣𑀁 𑀯𑀸 𑀕𑀘𑁆𑀙𑀦𑁆𑀢𑀸 𑀲𑀧𑀭𑀺𑀯𑀸𑀭𑀸𑀬𑁂𑀯 𑀕𑀘𑁆𑀙𑀦𑁆𑀢𑀺. 𑀏𑀓𑁄 𑀧𑀜𑁆𑀘𑀳𑀺 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀲𑀢𑁂𑀳𑀺, 𑀤𑀼𑀢𑀺𑀬𑁄 𑀧𑀜𑁆𑀘𑀳𑀺 𑀆𑀚𑀜𑁆𑀜𑀭𑀣𑀲𑀢𑁂𑀳𑀺. 𑀢𑀤𑀸 𑀘 𑀭𑀸𑀚𑀕𑀳𑁂 𑀓𑀸𑀮𑀸𑀦𑀼𑀓𑀸𑀮𑀁 𑀕𑀺𑀭𑀕𑁆𑀕𑀲𑀫𑀚𑁆𑀚𑁄 𑀦𑀸𑀫 𑀳𑁄𑀢𑀺. 𑀲𑀸𑀬𑀦𑁆𑀳𑀲𑀫𑀬𑁂 𑀦𑀕𑀭𑀯𑁂𑀫𑀚𑁆𑀛𑁂 𑀬𑀢𑁆𑀣 𑀲𑀓𑀮𑀅𑀗𑁆𑀕𑀫𑀕𑀥𑀯𑀸𑀲𑀺𑀦𑁄 𑀅𑀪𑀺𑀜𑁆𑀜𑀸𑀢𑀸 𑀔𑀢𑁆𑀢𑀺𑀬𑀓𑀼𑀫𑀸𑀭𑀸𑀤𑀬𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀼𑀧𑀜𑁆𑀜𑀢𑁆𑀢𑁂𑀲𑀼 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀸 𑀲𑀫𑀚𑁆𑀚𑀯𑀺𑀪𑀽𑀢𑀺𑀁 𑀧𑀲𑁆𑀲𑀦𑁆𑀢𑀺. 𑀅𑀣 𑀢𑁂 𑀲𑀳𑀸𑀬𑀓𑀸 𑀢𑁂𑀦 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁄 𑀉𑀧𑀢𑀺𑀲𑁆𑀲𑁄 𑀲𑀫𑀚𑁆𑀚𑀯𑀺𑀪𑀽𑀢𑀺𑀁 𑀧𑀲𑁆𑀲𑀦𑁆𑀢𑁄 𑀫𑀳𑀸𑀚𑀦𑀓𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀁 𑀤𑀺𑀲𑁆𑀯𑀸 ‘‘𑀏𑀢𑁆𑀢𑀓𑁄 𑀚𑀦𑀓𑀸𑀬𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀢𑁆𑀯𑀸𑀯 𑀫𑀭𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀲𑁆𑀲 𑀫𑀭𑀡𑀁 𑀆𑀕𑀦𑁆𑀢𑁆𑀯𑀸 𑀦𑀮𑀸𑀝𑀦𑁆𑀢𑁂 𑀧𑀢𑀺𑀝𑁆𑀞𑀺𑀢𑀁 𑀯𑀺𑀬 𑀅𑀳𑁄𑀲𑀺, 𑀢𑀣𑀸 𑀓𑁄𑀮𑀺𑀢𑀲𑁆𑀲. 𑀢𑁂𑀲𑀁 𑀅𑀦𑁂𑀓𑀧𑁆𑀧𑀓𑀸𑀭𑁂𑀲𑀼 𑀦𑀝𑁂𑀲𑀼 𑀦𑀘𑁆𑀘𑀦𑁆𑀢𑁂𑀲𑀼 𑀤𑀲𑁆𑀲𑀦𑀫𑀢𑁆𑀢𑁂𑀧𑀺 𑀘𑀺𑀢𑁆𑀢𑀁 𑀦 𑀦𑀫𑀺, 𑀅𑀜𑁆𑀜𑀤𑀢𑁆𑀣𑀼 𑀲𑀁𑀯𑁂𑀕𑁄𑀬𑁂𑀯 𑀉𑀤𑀧𑀸𑀤𑀺.

𑀅𑀣 𑀯𑀼𑀝𑁆𑀞𑀺𑀢𑁂 𑀲𑀫𑀚𑁆𑀚𑁂 𑀧𑀓𑁆𑀓𑀦𑁆𑀢𑀸𑀬 𑀧𑀭𑀺𑀲𑀸𑀬 𑀲𑀓𑀧𑀭𑀺𑀯𑀸𑀭𑁂𑀦 𑀧𑀓𑁆𑀓𑀦𑁆𑀢𑁂𑀲𑀼 𑀢𑁂𑀲𑀼 𑀲𑀳𑀸𑀬𑁂𑀲𑀼 𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀲𑀫𑁆𑀫, 𑀦𑀸𑀝𑀓𑀸𑀤𑀺𑀤𑀲𑁆𑀲𑀦𑁂𑀦 𑀢𑀯 𑀧𑀫𑁄𑀤𑀦𑀫𑀢𑁆𑀢𑀫𑁆𑀧𑀺 𑀦𑀸𑀳𑁄𑀲𑀻’’𑀢𑀺? 𑀲𑁄 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀢𑀫𑁆𑀧𑀺 𑀢𑀣𑁂𑀯 𑀧𑀝𑀺𑀧𑀼𑀘𑁆𑀙𑀺. 𑀲𑁄𑀧𑀺 𑀢𑀲𑁆𑀲 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀏𑀳𑀺, 𑀲𑀫𑁆𑀫, 𑀧𑀩𑁆𑀩𑀚𑀺𑀢𑁆𑀯𑀸 𑀅𑀫𑀢𑀁 𑀕𑀯𑁂𑀲𑀸𑀫𑀸’’𑀢𑀺 𑀆𑀳. ‘‘𑀲𑀸𑀥𑀼 𑀲𑀫𑁆𑀫𑀸’’𑀢𑀺 𑀉𑀧𑀢𑀺𑀲𑁆𑀲𑁄 𑀢𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀢𑀢𑁄 𑀤𑁆𑀯𑁂𑀧𑀺 𑀚𑀦𑀸 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀙𑀟𑁆𑀟𑁂𑀢𑁆𑀯𑀸 𑀧𑀼𑀦𑀤𑁂𑀯 𑀭𑀸𑀚𑀕𑀳𑀫𑀦𑀼𑀧𑁆𑀧𑀢𑁆𑀢𑀸. 𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀲𑀜𑁆𑀘𑀬𑁄 𑀦𑀸𑀫 𑀧𑀭𑀺𑀩𑁆𑀩𑀸𑀚𑀓𑁄 𑀧𑀝𑀺𑀯𑀲𑀢𑀺. 𑀢𑁂 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘𑀳𑀺 𑀫𑀸𑀡𑀯𑀓𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀢𑀬𑁄 𑀯𑁂𑀤𑁂 𑀲𑀩𑁆𑀩𑀜𑁆𑀘 𑀧𑀭𑀺𑀩𑁆𑀩𑀸𑀚𑀓𑀲𑀫𑀬𑀁 𑀉𑀕𑁆𑀕𑀳𑁂𑀲𑀼𑀁. 𑀢𑁂 𑀢𑁂𑀲𑀁 𑀲𑀢𑁆𑀣𑀸𑀦𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑀸 𑀧𑀭𑀺𑀬𑁄𑀲𑀸𑀦𑀁 𑀅𑀤𑀺𑀲𑁆𑀯𑀸 𑀆𑀘𑀭𑀺𑀬𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀇𑀫𑁂𑀲𑀁 𑀲𑀢𑁆𑀣𑀸𑀦𑀁 𑀆𑀤𑀺𑀫𑀚𑁆𑀛𑀁 𑀤𑀺𑀲𑁆𑀲𑀢𑀺, 𑀧𑀭𑀺𑀬𑁄𑀲𑀸𑀦𑀁 𑀧𑀦 𑀦 𑀤𑀺𑀲𑁆𑀲𑀢𑀺 ‘𑀇𑀤𑀁 𑀦𑀸𑀫 𑀇𑀫𑁂𑀳𑀺 𑀲𑀢𑁆𑀣𑁂𑀳𑀺 𑀧𑀸𑀧𑀼𑀡𑁂𑀬𑁆𑀬𑀸𑀢𑀺, 𑀬𑀢𑁄 𑀉𑀢𑁆𑀢𑀭𑀺 𑀧𑀸𑀧𑀼𑀡𑀺𑀢𑀩𑁆𑀩𑀁 𑀦𑀢𑁆𑀣𑀻’’’𑀢𑀺. 𑀲𑁄𑀧𑀺 𑀆𑀳 𑁋 ‘‘𑀅𑀳𑀫𑁆𑀧𑀺 𑀢𑁂𑀲𑀁 𑀢𑀣𑀸𑀯𑀺𑀥𑀁 𑀧𑀭𑀺𑀬𑁄𑀲𑀸𑀦𑀁 𑀦 𑀧𑀲𑁆𑀲𑀸𑀫𑀻’’𑀢𑀺. 𑀢𑁂 𑀆𑀳𑀁𑀲𑀼 𑁋 ‘‘𑀢𑁂𑀦 𑀳𑀺 𑀫𑀬𑀁 𑀇𑀫𑁂𑀲𑀁 𑀧𑀭𑀺𑀬𑁄𑀲𑀸𑀦𑀁 𑀕𑀯𑁂𑀲𑀸𑀫𑀸’’𑀢𑀺. 𑀢𑁂 𑀆𑀘𑀭𑀺𑀬𑁄 ‘‘𑀬𑀣𑀸𑀲𑀼𑀔𑀁 𑀕𑀯𑁂𑀲𑀣𑀸’’𑀢𑀺 𑀆𑀳. 𑀏𑀯𑀁 𑀢𑁂 𑀢𑁂𑀦 𑀅𑀦𑀼𑀜𑁆𑀜𑀸𑀢𑀸 𑀅𑀫𑀢𑀁 𑀕𑀯𑁂𑀲𑀫𑀸𑀦𑀸 𑀆𑀳𑀺𑀡𑁆𑀟𑀦𑁆𑀢𑀸 𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑀸 𑀅𑀳𑁂𑀲𑀼𑀁. 𑀢𑁂𑀳𑀺 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀤𑀬𑁄 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀉𑀢𑁆𑀢𑀭𑀼𑀢𑁆𑀢𑀭𑀺𑀁 𑀦 𑀲𑀫𑁆𑀧𑀸𑀬𑀦𑁆𑀢𑀺. ‘‘𑀉𑀧𑀢𑀺𑀲𑁆𑀲𑁄 𑀓𑁄𑀮𑀺𑀢𑁄’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀓𑁂 𑀏𑀢𑁂, 𑀦 𑀔𑁄 𑀫𑀬𑀁 𑀚𑀸𑀦𑀸𑀫𑀸’’𑀢𑀺 𑀪𑀡𑀦𑁆𑀢𑀸 𑀦𑀢𑁆𑀣𑀺, 𑀏𑀯𑀁 𑀯𑀺𑀲𑁆𑀲𑀼𑀢𑀸 𑀅𑀳𑁂𑀲𑀼𑀁.

𑀏𑀯𑀁 𑀢𑁂𑀲𑀼 𑀅𑀫𑀢𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁂𑀲𑀼 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀫𑀦𑀼𑀧𑁆𑀧𑀢𑁆𑀢𑁄. 𑀢𑁂 𑀘 𑀧𑀭𑀺𑀩𑁆𑀩𑀸𑀚𑀓𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀘𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀼 𑀅𑀫𑀢𑀁, 𑀅𑀦𑁆𑀢𑀫𑀲𑁄 𑀧𑀭𑀺𑀬𑁄𑀲𑀸𑀦𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀫𑀢𑁆𑀢𑀫𑁆𑀧𑀺 𑀅𑀮𑀪𑀦𑁆𑀢𑀸 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀅𑀕𑀫𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀚𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀬𑀸𑀯 𑀢𑁂𑀲𑀁 𑀧𑀩𑁆𑀩𑀚𑁆𑀚𑀸, 𑀢𑀸𑀯 𑀲𑀩𑁆𑀩𑀁 𑀧𑀩𑁆𑀩𑀚𑁆𑀚𑀸𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁬𑁦) 𑀆𑀕𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀧𑀩𑁆𑀩𑀚𑀺𑀢𑁂𑀲𑀼 𑀢𑁂𑀲𑀼 𑀤𑁆𑀯𑀻𑀲𑀼 𑀲𑀳𑀸𑀬𑀓𑁂𑀲𑀼 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀟𑁆𑀠𑀫𑀸𑀲𑁂𑀦 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀲𑀘𑁆𑀙𑀸𑀓𑀸𑀲𑀺. 𑀲𑁄 𑀬𑀤𑀸 𑀅𑀲𑁆𑀲𑀚𑀺𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀲𑀢𑀺, 𑀢𑀤𑀸 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀦𑀦𑁆𑀢𑀭𑀁 𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺 ‘‘𑀧𑀼𑀩𑁆𑀩𑀸𑀘𑀭𑀺𑀬𑁄 𑀫𑁂 𑀅𑀬𑀫𑀸𑀬𑀲𑁆𑀫𑀸, 𑀏𑀢𑀫𑀳𑀁 𑀦𑀺𑀲𑁆𑀲𑀸𑀬 𑀪𑀕𑀯𑀢𑁄 𑀲𑀸𑀲𑀦𑀁 𑀅𑀜𑁆𑀜𑀸𑀲𑀺’’𑀦𑁆𑀢𑀺 𑀕𑀸𑀭𑀯𑁂𑀦. 𑀬𑀤𑀸 𑀧𑀦 𑀅𑀲𑁆𑀲𑀚𑀺𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀦 𑀯𑀲𑀢𑀺, 𑀢𑀤𑀸 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀣𑁂𑀭𑁄 𑀯𑀲𑀢𑀺, 𑀢𑀁 𑀤𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀢𑀺. 𑀢𑀁 𑀤𑀺𑀲𑁆𑀯𑀸 𑀓𑁂𑀘𑀺 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀅𑀕𑁆𑀕𑀲𑀸𑀯𑀓𑁄 𑀳𑀼𑀢𑁆𑀯𑀸 𑀤𑀺𑀲𑀁 𑀦𑀫𑀲𑁆𑀲𑀢𑀺, 𑀅𑀚𑁆𑀚𑀸𑀧𑀺 𑀫𑀜𑁆𑀜𑁂 𑀩𑁆𑀭𑀸𑀳𑁆𑀫𑀡𑀤𑀺𑀝𑁆𑀞𑀺 𑀅𑀧𑁆𑀧𑀳𑀻𑀦𑀸’’𑀢𑀺. 𑀅𑀣 𑀪𑀕𑀯𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀢𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑀁𑀬𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺? 𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀁𑀲𑀼. 𑀢𑀢𑁄 𑀪𑀕𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀤𑀺𑀲𑀁 𑀦𑀫𑀲𑁆𑀲𑀢𑀺, 𑀬𑀁 𑀦𑀺𑀲𑁆𑀲𑀸𑀬 𑀲𑀸𑀲𑀦𑀁 𑀅𑀜𑁆𑀜𑀸𑀲𑀺, 𑀢𑀁 𑀅𑀢𑁆𑀢𑀦𑁄 𑀆𑀘𑀭𑀺𑀬𑀁 𑀯𑀦𑁆𑀤𑀢𑀺 𑀦𑀫𑀲𑁆𑀲𑀢𑀺 𑀲𑀫𑁆𑀫𑀸𑀦𑁂𑀢𑀺, 𑀆𑀘𑀭𑀺𑀬𑀧𑀽𑀚𑀓𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀬𑀲𑁆𑀫𑀸 𑀳𑀺 𑀥𑀫𑁆𑀫𑀁 𑀧𑀼𑀭𑀺𑀲𑁄 𑀯𑀺𑀚𑀜𑁆𑀜𑀸𑀢𑀺 𑀬𑀢𑁄 𑀧𑀼𑀕𑁆𑀕𑀮𑀸 𑀧𑀺𑀝𑀓𑀢𑁆𑀢𑀬𑀧𑁆𑀧𑀪𑁂𑀤𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀯𑀸, 𑀧𑀭𑀺𑀬𑀢𑁆𑀢𑀺𑀁 𑀲𑀼𑀢𑁆𑀯𑀸 𑀅𑀥𑀺𑀕𑀦𑁆𑀢𑀩𑁆𑀩𑀁 𑀦𑀯𑀮𑁄𑀓𑀼𑀢𑁆𑀢𑀭𑀧𑁆𑀧𑀪𑁂𑀤𑀁 𑀧𑀝𑀺𑀯𑁂𑀥𑀥𑀫𑁆𑀫𑀁 𑀯𑀸 𑀧𑀼𑀭𑀺𑀲𑁄 𑀯𑀺𑀚𑀜𑁆𑀜𑀸 𑀚𑀸𑀦𑁂𑀬𑁆𑀬 𑀯𑁂𑀤𑁂𑀬𑁆𑀬. ‘‘𑀬𑀲𑁆𑀲𑀸’’𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀇𑀦𑁆𑀤𑀁𑀯 𑀦𑀁 𑀤𑁂𑀯𑀢𑀸 𑀧𑀽𑀚𑀬𑁂𑀬𑁆𑀬𑀸𑀢𑀺 𑀬𑀣𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸 𑀧𑀽𑀚𑁂𑀦𑁆𑀢𑀺, 𑀏𑀯𑀁 𑀲𑁄 𑀧𑀼𑀕𑁆𑀕𑀮𑁄 𑀢𑀁 𑀧𑀼𑀕𑁆𑀕𑀮𑀁 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀉𑀧𑀸𑀳𑀦𑀑𑀫𑀼𑀜𑁆𑀘𑀦𑀸𑀤𑀺𑀁 𑀲𑀩𑁆𑀩𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀭𑁄𑀦𑁆𑀢𑁄 𑀧𑀽𑀚𑁂𑀬𑁆𑀬 𑀲𑀓𑁆𑀓𑀭𑁂𑀬𑁆𑀬 𑀕𑀭𑀼𑀓𑀭𑁂𑀬𑁆𑀬. 𑀓𑀺𑀁 𑀓𑀸𑀭𑀡𑀁? 𑀲𑁄 𑀧𑀽𑀚𑀺𑀢𑁄…𑀧𑁂… 𑀧𑀸𑀢𑀼𑀓𑀭𑁄𑀢𑀺 𑀥𑀫𑁆𑀫𑀁, 𑀲𑁄 𑀆𑀘𑀭𑀺𑀬𑁄 𑀏𑀯𑀁 𑀧𑀽𑀚𑀺𑀢𑁄 𑀢𑀲𑁆𑀫𑀺𑀁 𑀅𑀦𑁆𑀢𑁂𑀯𑀸𑀲𑀺𑀫𑁆𑀳𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀭𑀺𑀬𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀩𑀳𑀼𑀲𑁆𑀲𑀼𑀢𑁄 𑀤𑁂𑀲𑀦𑀸𑀯𑀲𑁂𑀦𑁂𑀯 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀜𑁆𑀘, 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀦𑁆𑀢𑀩𑁆𑀩𑀁 𑀧𑀝𑀺𑀯𑁂𑀥𑀥𑀫𑁆𑀫𑀜𑁆𑀘 𑀧𑀸𑀢𑀼𑀓𑀭𑁄𑀢𑀺 𑀤𑁂𑀲𑁂𑀢𑀺, 𑀤𑁂𑀲𑀦𑀸𑀬 𑀯𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁, 𑀉𑀧𑀫𑀸𑀯𑀲𑁂𑀦 𑀅𑀢𑁆𑀢𑀦𑀸 𑀅𑀥𑀺𑀕𑀢𑀧𑀝𑀺𑀯𑁂𑀥𑀥𑀫𑁆𑀫𑀁 𑀧𑀸𑀢𑀼𑀓𑀭𑁄𑀢𑀺.

𑁩𑁨𑁦. 𑀢𑀤𑀝𑁆𑀞𑀺𑀓𑀢𑁆𑀯𑀸𑀦 𑀦𑀺𑀲𑀫𑁆𑀫 𑀥𑀻𑀭𑁄𑀢𑀺 𑀏𑀯𑀁 𑀧𑀲𑀦𑁆𑀦𑁂𑀦 𑀆𑀘𑀭𑀺𑀬𑁂𑀦 𑀧𑀸𑀢𑀼𑀓𑀢𑀁 𑀥𑀫𑁆𑀫𑀁 𑀅𑀝𑁆𑀞𑀺𑀓𑀢𑁆𑀯𑀸𑀦 𑀲𑀼𑀡𑀺𑀢𑁆𑀯𑀸 𑀉𑀧𑀥𑀸𑀭𑀡𑀲𑀫𑀢𑁆𑀣𑀢𑀸𑀬 𑀥𑀻𑀭𑁄 𑀧𑀼𑀭𑀺𑀲𑁄. 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀫𑀸𑀦𑁄𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀼𑀮𑁄𑀫𑀢𑁆𑀢𑀸 𑀅𑀦𑀼𑀥𑀫𑁆𑀫𑀪𑀽𑀢𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀫𑀸𑀦𑁄. 𑀯𑀺𑀜𑁆𑀜𑀽 𑀯𑀺𑀪𑀸𑀯𑀻 𑀦𑀺𑀧𑀼𑀡𑁄 𑀘 𑀳𑁄𑀢𑀻𑀢𑀺 𑀯𑀺𑀜𑁆𑀜𑀼𑀢𑀸𑀲𑀗𑁆𑀔𑀸𑀢𑀸𑀬 𑀧𑀜𑁆𑀜𑀸𑀬 𑀅𑀥𑀺𑀕𑀫𑁂𑀦 𑀯𑀺𑀜𑁆𑀜𑀽, 𑀯𑀺𑀪𑀸𑀯𑁂𑀢𑁆𑀯𑀸 𑀧𑀭𑁂𑀲𑀫𑁆𑀧𑀺 𑀧𑀸𑀓𑀝𑀁 𑀓𑀢𑁆𑀯𑀸 𑀜𑀸𑀧𑀦𑀲𑀫𑀢𑁆𑀣𑀢𑀸𑀬 𑀯𑀺𑀪𑀸𑀯𑀻, 𑀧𑀭𑀫𑀲𑀼𑀔𑀼𑀫𑀢𑁆𑀣𑀧𑀝𑀺𑀯𑁂𑀥𑀢𑀸𑀬 𑀦𑀺𑀧𑀼𑀡𑁄 𑀘 𑀳𑁄𑀢𑀺. 𑀬𑁄 𑀢𑀸𑀤𑀺𑀲𑀁 𑀪𑀚𑀢𑀺 𑀅𑀧𑁆𑀧𑀫𑀢𑁆𑀢𑁄𑀢𑀺 𑀬𑁄 𑀢𑀸𑀤𑀺𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀩𑀳𑀼𑀲𑁆𑀲𑀼𑀢𑀁 𑀅𑀧𑁆𑀧𑀫𑀢𑁆𑀢𑁄 𑀢𑀧𑁆𑀧𑀲𑀸𑀤𑀦𑀧𑀭𑁄 𑀳𑀼𑀢𑁆𑀯𑀸 𑀪𑀚𑀢𑀺.

𑁩𑁨𑁧. 𑀏𑀯𑀁 𑀧𑀡𑁆𑀟𑀺𑀢𑀸𑀘𑀭𑀺𑀬𑀲𑁂𑀯𑀦𑀁 𑀧𑀲𑀁𑀲𑀺𑀢𑁆𑀯𑀸 𑀇𑀤𑀸𑀦𑀺 𑀩𑀸𑀮𑀸𑀘𑀭𑀺𑀬𑀲𑁂𑀯𑀦𑀁 𑀦𑀺𑀦𑁆𑀤𑀦𑁆𑀢𑁄 ‘‘𑀔𑀼𑀤𑁆𑀤𑀜𑁆𑀘 𑀩𑀸𑀮’’𑀦𑁆𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀔𑀼𑀤𑁆𑀤𑀦𑁆𑀢𑀺 𑀔𑀼𑀤𑁆𑀤𑁂𑀦 𑀓𑀸𑀬𑀓𑀫𑁆𑀫𑀸𑀤𑀺𑀦𑀸 𑀲𑀫𑀦𑁆𑀦𑀸𑀕𑀢𑀁, 𑀧𑀜𑁆𑀜𑀸𑀪𑀸𑀯𑀢𑁄 𑀩𑀸𑀮𑀁. 𑀅𑀦𑀸𑀕𑀢𑀢𑁆𑀣𑀦𑁆𑀢𑀺 𑀅𑀦𑀥𑀺𑀕𑀢𑀧𑀭𑀺𑀬𑀢𑁆𑀢𑀺𑀧𑀝𑀺𑀯𑁂𑀥𑀢𑁆𑀣𑀁. 𑀉𑀲𑀽𑀬𑀓𑀦𑁆𑀢𑀺 𑀇𑀲𑁆𑀲𑀸𑀫𑀦𑀓𑀢𑀸𑀬 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀯𑀼𑀟𑁆𑀠𑀺𑀁 𑀅𑀲𑀳𑀫𑀸𑀦𑀁. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯 𑀧𑀤𑀢𑁄. 𑀅𑀥𑀺𑀧𑁆𑀧𑀸𑀬𑀢𑁄 𑀧𑀦 𑀬𑁄 𑀩𑀳𑀼𑀘𑀻𑀯𑀭𑀸𑀤𑀺𑀮𑀸𑀪𑀻 𑀆𑀘𑀭𑀺𑀬𑁄 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀘𑀻𑀯𑀭𑀸𑀤𑀻𑀦𑀺 𑀦 𑀲𑀓𑁆𑀓𑁄𑀢𑀺 𑀤𑀸𑀢𑀼𑀁, 𑀥𑀫𑁆𑀫𑀤𑀸𑀦𑁂 𑀧𑀦 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀯𑀘𑀦𑀫𑀢𑁆𑀢𑀫𑁆𑀧𑀺 𑀦 𑀲𑀓𑁆𑀓𑁄𑀢𑀺. 𑀏𑀢𑁂𑀳𑀺 𑀔𑀼𑀤𑁆𑀤𑀢𑀸𑀤𑀺𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀁 𑀔𑀼𑀤𑁆𑀤𑀁 𑀩𑀸𑀮𑀁 𑀅𑀦𑀸𑀕𑀢𑀢𑁆𑀣𑀁 𑀉𑀲𑀽𑀬𑀓𑀁 𑀆𑀘𑀭𑀺𑀬𑀁 𑀉𑀧𑀲𑁂𑀯𑀫𑀸𑀦𑁄 ‘‘𑀧𑀽𑀢𑀺𑀫𑀘𑁆𑀙𑀁 𑀓𑀼𑀲𑀕𑁆𑀕𑁂𑀦𑀸’’𑀢𑀺 (𑀇𑀢𑀺𑀯𑀼. 𑁭𑁬; 𑀚𑀸. 𑁧.𑁧𑁫.𑁧𑁮𑁩) 𑀯𑀼𑀢𑁆𑀢𑀦𑀬𑁂𑀦 𑀲𑀬𑀫𑁆𑀧𑀺 𑀩𑀸𑀮𑁄 𑀳𑁄𑀢𑀺. 𑀢𑀲𑁆𑀫𑀸 𑀇𑀥 𑀲𑀸𑀲𑀦𑁂 𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀧𑀝𑀺𑀯𑁂𑀥𑀥𑀫𑁆𑀫𑀁 𑀯𑀸 𑀅𑀯𑀺𑀪𑀸𑀯𑀬𑀺𑀢𑁆𑀯𑀸 𑀘 𑀅𑀯𑀺𑀚𑀸𑀦𑀺𑀢𑁆𑀯𑀸 𑀘 𑀬𑀲𑁆𑀲 𑀥𑀫𑁆𑀫𑁂𑀲𑀼 𑀓𑀗𑁆𑀔𑀸, 𑀢𑀁 𑀅𑀢𑀭𑀺𑀢𑁆𑀯𑀸 𑀫𑀭𑀡𑀁 𑀉𑀧𑁂𑀢𑀻𑀢𑀺 𑀏𑀯𑀫𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁨𑁨-𑁩. 𑀇𑀤𑀸𑀦𑀺 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀢𑁆𑀣𑀁 ‘‘𑀬𑀣𑀸 𑀦𑀭𑁄’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀆𑀧𑀕𑀦𑁆𑀢𑀺 𑀦𑀤𑀺𑀁. 𑀫𑀳𑁄𑀤𑀓𑀦𑁆𑀢𑀺 𑀩𑀳𑀼𑀉𑀤𑀓𑀁. 𑀲𑀮𑀺𑀮𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀘 𑀕𑀢𑀁, 𑀯𑀺𑀢𑁆𑀣𑀺𑀡𑁆𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀭𑀺𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀲𑀻𑀖𑀲𑁄𑀢𑀦𑁆𑀢𑀺 𑀳𑀸𑀭𑀳𑀸𑀭𑀺𑀓𑀁, 𑀯𑁂𑀕𑀯𑀢𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁 𑀲𑁄𑀢𑀺 𑀏𑀢𑁆𑀣 ‘‘𑀲𑁄 𑀯𑀼𑀬𑁆𑀳𑀫𑀸𑀦𑁄’’𑀢𑀺 𑀇𑀫𑀺𑀦𑀸 𑀘 𑀲𑁄𑀓𑀸𑀭𑁂𑀦 𑀢𑀲𑁆𑀲 𑀦𑀭𑀲𑁆𑀲 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀦𑀺𑀧𑀸𑀢𑀫𑀢𑁆𑀢𑁄 𑀲𑁄𑀓𑀸𑀭𑁄. 𑀓𑀺𑀁 𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 𑀬𑀣𑀸 ‘‘𑀦 𑀪𑀯𑀺𑀲𑁆𑀲𑀸𑀫𑀺 𑀦𑀸𑀫 𑀲𑁄, 𑀯𑀺𑀦𑀲𑁆𑀲𑀺𑀲𑁆𑀲𑀸𑀫𑀺 𑀦𑀸𑀫 𑀲𑁄’’𑀢𑀺. 𑀥𑀫𑁆𑀫𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀤𑀼𑀯𑀺𑀥𑀫𑁂𑀯. 𑀅𑀦𑀺𑀲𑀸𑀫𑀬𑀢𑁆𑀣𑀦𑁆𑀢𑀺 𑀅𑀦𑀺𑀲𑀸𑀫𑁂𑀢𑁆𑀯𑀸 𑀅𑀢𑁆𑀣𑀁. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯 𑀧𑀤𑀢𑁄.

𑀅𑀥𑀺𑀧𑁆𑀧𑀸𑀬𑀢𑁄 𑀧𑀦 𑀬𑀣𑀸 𑀬𑁄 𑀓𑁄𑀘𑀺𑀤𑁂𑀯 𑀦𑀭𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀢𑀸𑀬 𑀦𑀤𑀺𑀬𑀸 𑀯𑀼𑀬𑁆𑀳𑀫𑀸𑀦𑁄 𑀅𑀦𑀼𑀲𑁄𑀢𑀕𑀸𑀫𑀻 𑀲𑁄𑀢𑀫𑁂𑀯 𑀅𑀦𑀼𑀕𑀘𑁆𑀙𑀦𑁆𑀢𑁄 𑀧𑀭𑁂 𑀧𑀸𑀭𑀢𑁆𑀣𑀺𑀓𑁂 𑀓𑀺𑀁 𑀲𑀓𑁆𑀔𑀢𑀺 𑀧𑀸𑀭𑀁 𑀦𑁂𑀢𑀼𑀁. ‘‘𑀲𑀓𑁆𑀓𑀢𑀻’’𑀢𑀺𑀧𑀺 𑀧𑀸𑀞𑁄. 𑀢𑀣𑁂𑀯 𑀤𑀼𑀯𑀺𑀥𑀫𑁆𑀧𑀺 𑀥𑀫𑁆𑀫𑀁 𑀅𑀢𑁆𑀢𑀦𑁄 𑀧𑀜𑁆𑀜𑀸𑀬 𑀅𑀯𑀺𑀪𑀸𑀯𑀬𑀺𑀢𑁆𑀯𑀸 𑀩𑀳𑀼𑀲𑁆𑀲𑀼𑀢𑀸𑀦𑀜𑁆𑀘 𑀲𑀦𑁆𑀢𑀺𑀓𑁂 𑀅𑀢𑁆𑀣𑀁 𑀅𑀦𑀺𑀲𑀸𑀫𑁂𑀢𑁆𑀯𑀸 𑀲𑀬𑀁 𑀅𑀯𑀺𑀪𑀸𑀯𑀺𑀢𑀢𑁆𑀢𑀸 𑀅𑀚𑀸𑀦𑀦𑁆𑀢𑁄 𑀅𑀦𑀺𑀲𑀸𑀫𑀺𑀢𑀢𑁆𑀢𑀸 𑀘 𑀅𑀯𑀺𑀢𑀺𑀡𑁆𑀡𑀓𑀗𑁆𑀔𑁄 𑀧𑀭𑁂 𑀓𑀺𑀁 𑀲𑀓𑁆𑀔𑀢𑀺 𑀦𑀺𑀚𑁆𑀛𑀸𑀧𑁂𑀢𑀼𑀁 𑀧𑁂𑀓𑁆𑀔𑀸𑀧𑁂𑀢𑀼𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀲𑁄 𑀯𑀢, 𑀘𑀼𑀦𑁆𑀤, 𑀅𑀢𑁆𑀢𑀦𑀸 𑀧𑀮𑀺𑀧𑀧𑀮𑀺𑀧𑀦𑁆𑀦𑁄’’𑀢𑀺𑀆𑀤𑀺𑀓𑀜𑁆𑀘𑁂𑀢𑁆𑀣 (𑀫. 𑀦𑀺. 𑁧.𑁮𑁭) 𑀲𑀼𑀢𑁆𑀢𑀧𑀤𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑁩𑁨𑁪-𑁫. 𑀏𑀯𑀁 𑀩𑀸𑀮𑀲𑁂𑀯𑀦𑀸𑀬 𑀩𑀸𑀮𑀲𑁆𑀲 𑀧𑀭𑀁 𑀦𑀺𑀚𑁆𑀛𑀸𑀧𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀧𑀸𑀓𑀝𑀓𑀭𑀡𑀢𑁆𑀣𑀁 𑀉𑀧𑀫𑀁 𑀯𑀢𑁆𑀯𑀸 𑀇𑀤𑀸𑀦𑀺 ‘‘𑀬𑁄 𑀢𑀸𑀤𑀺𑀲𑀁 𑀪𑀚𑀢𑀺 𑀅𑀧𑁆𑀧𑀫𑀢𑁆𑀢𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀧𑀭𑁂 𑀦𑀺𑀚𑁆𑀛𑀸𑀧𑁂𑀢𑀼𑀁 𑀲𑀫𑀢𑁆𑀣𑀢𑀸𑀬 𑀧𑀸𑀓𑀝𑀓𑀭𑀡𑀢𑁆𑀣𑀁 ‘‘𑀬𑀣𑀸𑀧𑀺 𑀦𑀸𑀯’’𑀦𑁆𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀨𑀺𑀬𑁂𑀦𑀸𑀢𑀺 𑀤𑀩𑁆𑀩𑀺𑀧𑀤𑀭𑁂𑀦. 𑀭𑀺𑀢𑁆𑀢𑁂𑀦𑀸𑀢𑀺 𑀯𑁂𑀴𑀼𑀤𑀡𑁆𑀟𑁂𑀦. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀦𑀸𑀯𑀸𑀬𑀁. 𑀢𑀢𑁆𑀭𑀽𑀧𑀬𑀜𑁆𑀜𑀽𑀢𑀺 𑀢𑀲𑁆𑀲𑀸 𑀦𑀸𑀯𑀸𑀬 𑀆𑀳𑀭𑀡𑀧𑀝𑀺𑀳𑀭𑀡𑀸𑀤𑀺𑀉𑀧𑀸𑀬𑀚𑀸𑀦𑀦𑁂𑀦 𑀫𑀕𑁆𑀕𑀧𑀝𑀺𑀧𑀸𑀤𑀦𑁂𑀦 𑀉𑀧𑀸𑀬𑀜𑁆𑀜𑀽. 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀢𑀸𑀬 𑀲𑀼𑀓𑀼𑀲𑀮𑀳𑀢𑁆𑀣𑀢𑀸𑀬 𑀘 𑀓𑀼𑀲𑀮𑁄. 𑀉𑀧𑁆𑀧𑀦𑁆𑀦𑀼𑀧𑀤𑁆𑀤𑀯𑀧𑀝𑀺𑀓𑀸𑀭𑀲𑀫𑀢𑁆𑀣𑀢𑀸𑀬 𑀫𑀼𑀢𑀻𑀫𑀸. 𑀯𑁂𑀤𑀕𑀽𑀢𑀺 𑀯𑁂𑀤𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀫𑀕𑁆𑀕𑀜𑀸𑀡𑁂𑀳𑀺 𑀕𑀢𑁄. 𑀪𑀸𑀯𑀺𑀢𑀢𑁆𑀢𑁄𑀢𑀺 𑀢𑀸𑀬𑁂𑀯 𑀫𑀕𑁆𑀕𑀪𑀸𑀯𑀦𑀸𑀬 𑀪𑀸𑀯𑀺𑀢𑀘𑀺𑀢𑁆𑀢𑁄. 𑀩𑀳𑀼𑀲𑁆𑀲𑀼𑀢𑁄𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀅𑀯𑁂𑀥𑀥𑀫𑁆𑀫𑁄𑀢𑀺 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀦𑀺𑀬𑀲𑀪𑀸𑀯𑁄. 𑀲𑁄𑀢𑀸𑀯𑀥𑀸𑀦𑀽𑀧𑀦𑀺𑀲𑀽𑀧𑀧𑀦𑁆𑀦𑁂𑀢𑀺 𑀲𑁄𑀢𑀑𑀤𑀳𑀦𑁂𑀦 𑀘 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁂𑀦 𑀘 𑀉𑀧𑀧𑀦𑁆𑀦𑁂. 𑀲𑁂𑀲𑀁 𑀉𑀢𑁆𑀢𑀸𑀦𑀧𑀤𑀢𑁆𑀣𑀫𑁂𑀯. 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸𑀧𑀺 𑀲𑀓𑁆𑀓𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀚𑀸𑀦𑀺𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀸.

𑁩𑁨𑁬. 𑀏𑀯𑀁 𑀧𑀡𑁆𑀟𑀺𑀢𑀲𑁆𑀲 𑀧𑀭𑁂 𑀦𑀺𑀚𑁆𑀛𑀸𑀧𑁂𑀢𑀼𑀁 𑀲𑀫𑀢𑁆𑀣𑀪𑀸𑀯𑀧𑀸𑀓𑀝𑀓𑀭𑀡𑀢𑁆𑀣𑀁 𑀉𑀧𑀫𑀁 𑀯𑀢𑁆𑀯𑀸 𑀢𑀲𑁆𑀲𑀸 𑀧𑀡𑁆𑀟𑀺𑀢𑀲𑁂𑀯𑀦𑀸𑀬 𑀦𑀺𑀬𑁄𑀚𑁂𑀦𑁆𑀢𑁄 ‘‘𑀢𑀲𑁆𑀫𑀸 𑀳𑀯𑁂’’𑀢𑀺 𑀇𑀫𑀁 𑀅𑀯𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀲𑁆𑀫𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀧𑀡𑁆𑀟𑀺𑀢𑀲𑁂𑀯𑀦𑁂𑀦 𑀯𑀺𑀲𑁂𑀲𑀁 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀫𑀸 𑀳𑀯𑁂 𑀲𑀧𑁆𑀧𑀼𑀭𑀺𑀲𑀁 𑀪𑀚𑁂𑀣. 𑀓𑀻𑀤𑀺𑀲𑀁 𑀲𑀧𑁆𑀧𑀼𑀭𑀺𑀲𑀁 𑀪𑀚𑁂𑀣? 𑀫𑁂𑀥𑀸𑀯𑀺𑀦𑀜𑁆𑀘𑁂𑀯 𑀩𑀳𑀼𑀲𑁆𑀲𑀼𑀢𑀜𑁆𑀘, 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀫𑁂𑀥𑀸𑀯𑀺𑀦𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀼𑀢𑀤𑁆𑀯𑀬𑁂𑀦 𑀘 𑀩𑀳𑀼𑀲𑁆𑀲𑀼𑀢𑀁. 𑀢𑀸𑀤𑀺𑀲𑀜𑁆𑀳𑀺 𑀪𑀚𑀫𑀸𑀦𑁄 𑀢𑁂𑀦 𑀪𑀸𑀲𑀺𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀬 𑀅𑀢𑁆𑀣𑀁 𑀏𑀯𑀁 𑀜𑀢𑁆𑀯𑀸 𑀘 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁄 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀯𑁂𑀥𑀯𑀲𑁂𑀦 𑀯𑀺𑀜𑁆𑀜𑀸𑀢𑀥𑀫𑁆𑀫𑁄 𑀲𑁄 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑁆𑀧𑀪𑁂𑀤𑀁 𑀮𑁄𑀓𑀼𑀢𑁆𑀢𑀭𑀲𑀼𑀔𑀁 𑀮𑀪𑁂𑀣 𑀅𑀥𑀺𑀕𑀘𑁆𑀙𑁂𑀬𑁆𑀬 𑀧𑀸𑀧𑀼𑀡𑁂𑀬𑁆𑀬𑀸𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀲𑀫𑀸𑀧𑁂𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.