𑁭. 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁂𑀯 𑀬𑀸𑀲𑁆𑀲 𑀦𑀺𑀤𑀸𑀦𑁂 ‘‘𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀫𑁆𑀩𑀳𑀼𑀮𑀸𑀢𑀺 𑀩𑀳𑀽 𑀅𑀦𑁂𑀓𑁂. 𑀓𑁄𑀲𑀮𑀓𑀸𑀢𑀺 𑀓𑁄𑀲𑀮𑀭𑀝𑁆𑀞𑀯𑀸𑀲𑀺𑀦𑁄. 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀢𑀺 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀫𑀳𑀸𑀲𑀸𑀭𑀢𑀸𑀬 𑀫𑀳𑀸𑀲𑀸𑀮𑀸. 𑀬𑁂𑀲𑀁 𑀓𑀺𑀭 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀁𑀬𑁂𑀯 𑀅𑀲𑀻𑀢𑀺𑀓𑁄𑀝𑀺𑀲𑀗𑁆𑀔𑁆𑀬𑀁 𑀥𑀦𑀫𑀢𑁆𑀣𑀺, 𑀢𑁂 ‘‘𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀫𑁂 𑀘 𑀢𑀸𑀤𑀺𑀲𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸’’𑀢𑀺. 𑀚𑀺𑀡𑁆𑀡𑀸𑀢𑀺 𑀚𑀚𑁆𑀚𑀭𑀻𑀪𑀽𑀢𑀸 𑀚𑀭𑀸𑀬 𑀔𑀡𑁆𑀟𑀺𑀘𑁆𑀘𑀸𑀤𑀺𑀪𑀸𑀯𑀫𑀸𑀧𑀸𑀤𑀺𑀢𑀸. 𑀯𑀼𑀟𑁆𑀠𑀸𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀯𑀼𑀟𑁆𑀠𑀺𑀫𑀭𑀺𑀬𑀸𑀤𑀁 𑀧𑀢𑁆𑀢𑀸. 𑀫𑀳𑀮𑁆𑀮𑀓𑀸𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑀢𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀘𑀺𑀭𑀓𑀸𑀮𑀧𑁆𑀧𑀲𑀼𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀤𑁆𑀥𑀕𑀢𑀸𑀢𑀺 𑀅𑀤𑁆𑀥𑀸𑀦𑀁 𑀕𑀢𑀸, 𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂 𑀅𑀢𑀻𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀬𑁄 𑀅𑀦𑀼𑀧𑁆𑀧𑀢𑁆𑀢𑀸𑀢𑀺 𑀧𑀘𑁆𑀙𑀺𑀫𑀯𑀬𑀁 𑀲𑀫𑁆𑀧𑀢𑁆𑀢𑀸. 𑀅𑀧𑀺𑀘 𑀚𑀺𑀡𑁆𑀡𑀸𑀢𑀺 𑀧𑁄𑀭𑀸𑀡𑀸, 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀓𑀼𑀮𑀦𑁆𑀯𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀟𑁆𑀠𑀸𑀢𑀺 𑀲𑀻𑀮𑀸𑀘𑀸𑀭𑀸𑀤𑀺𑀕𑀼𑀡𑀯𑀼𑀟𑁆𑀠𑀺𑀬𑀼𑀢𑁆𑀢𑀸. 𑀫𑀳𑀮𑁆𑀮𑀓𑀸𑀢𑀺 𑀯𑀺𑀪𑀯𑀫𑀳𑀦𑁆𑀢𑀢𑀸𑀬 𑀲𑀫𑀦𑁆𑀦𑀸𑀕𑀢𑀸 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸. 𑀅𑀤𑁆𑀥𑀕𑀢𑀸𑀢𑀺 𑀫𑀕𑁆𑀕𑀧𑀝𑀺𑀧𑀦𑁆𑀦𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀢𑀘𑀭𑀺𑀬𑀸𑀤𑀺𑀫𑀭𑀺𑀬𑀸𑀤𑀁 𑀅𑀯𑀻𑀢𑀺𑀓𑁆𑀓𑀫𑁆𑀫 𑀘𑀭𑀫𑀸𑀦𑀸. 𑀯𑀬𑁄 𑀅𑀦𑀼𑀧𑁆𑀧𑀢𑁆𑀢𑀸𑀢𑀺 𑀚𑀸𑀢𑀺𑀯𑀼𑀟𑁆𑀠𑀪𑀸𑀯𑀫𑁆𑀧𑀺 𑀅𑀦𑁆𑀢𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀽𑀢𑀺 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀸 𑀅𑀳𑁂𑀲𑀼𑀁. 𑀬𑀸𑀬 𑀘 ‘‘𑀓𑀘𑁆𑀘𑀺 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀅𑀧𑁆𑀧𑀸𑀩𑀸𑀥𑀁, 𑀅𑀧𑁆𑀧𑀸𑀢𑀗𑁆𑀓𑀁, 𑀩𑀮𑀁, 𑀮𑀳𑀼𑀝𑁆𑀞𑀸𑀦𑀁, 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺𑀆𑀤𑀺𑀓𑀸𑀬 𑀓𑀣𑀸𑀬 𑀲𑀫𑁆𑀫𑁄𑀤𑀺𑀁𑀲𑀼, 𑀢𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀲𑀗𑁆𑀔𑀸𑀢𑀲𑀫𑁆𑀫𑁄𑀤𑀚𑀦𑀦𑀢𑁄 𑀲𑀫𑁆𑀫𑁄𑀤𑀺𑀢𑀼𑀁 𑀅𑀭𑀳𑀢𑁄 𑀘 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀢𑁆𑀣𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀲𑀸𑀭𑁂𑀢𑀼𑀁 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑁂𑀢𑀼𑀁 𑀅𑀭𑀳𑀢𑁄 𑀲𑀭𑀺𑀢𑀩𑁆𑀩𑀪𑀸𑀯𑀢𑁄 𑀘 𑀲𑀸𑀭𑀡𑀻𑀬𑀁. 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄 𑀘 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄 𑀲𑀸𑀭𑀡𑀻𑀬𑀁, 𑀢𑀣𑀸 𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀸𑀭𑀡𑀻𑀬𑀦𑁆𑀢𑀺 𑀏𑀯𑀁 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑁂𑀦𑀢𑁆𑀣𑁂𑀦 𑀆𑀕𑀢𑀸, 𑀢𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀢𑀁 𑁋

‘‘𑀦 𑀧𑀘𑁆𑀙𑀢𑁄 𑀦 𑀧𑀼𑀭𑀢𑁄, 𑀦𑀸𑀧𑀺 𑀆𑀲𑀦𑁆𑀦𑀤𑀽𑀭𑀢𑁄;

𑀦 𑀧𑀲𑁆𑀲𑁂 𑀦𑀸𑀧𑀺 𑀧𑀝𑀺𑀯𑀸𑀢𑁂, 𑀦 𑀘𑀸𑀧𑀺 𑀑𑀡𑀢𑀼𑀡𑁆𑀡𑀢𑁂’’𑀢𑀺. 𑁋

𑀆𑀤𑀺𑀦𑀸 𑀦𑀬𑁂𑀦 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯.

𑀏𑀯𑀁 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀁 𑀢’’𑀦𑁆𑀢𑀺? ‘‘𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀦𑀼 𑀔𑁄’’𑀢𑀺𑀆𑀤𑀺. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀓𑁂𑀯𑀮𑀜𑁆𑀳𑁂𑀢𑁆𑀣 𑀩𑁆𑀭𑀸𑀳𑁆𑀫𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂𑀢𑀺 𑀤𑁂𑀲𑀓𑀸𑀮𑀸𑀤𑀺𑀥𑀫𑁆𑀫𑁂 𑀙𑀟𑁆𑀟𑁂𑀢𑁆𑀯𑀸 𑀬𑁄 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁄, 𑀢𑀲𑁆𑀫𑀺𑀁𑀬𑁂𑀯. 𑀢𑁂𑀦 𑀳𑀺 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑀲𑁆𑀫𑀸 𑀫𑀁 𑀢𑀼𑀫𑁆𑀳𑁂 𑀬𑀸𑀘𑀺𑀢𑁆𑀣, 𑀢𑀲𑁆𑀫𑀸 𑀩𑁆𑀭𑀸𑀳𑁆𑀫𑀡𑀸 𑀲𑀼𑀡𑀸𑀣, 𑀲𑁄𑀢𑀁 𑀑𑀤𑀳𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀣. 𑀢𑀣𑀸 𑀧𑀬𑁄𑀕𑀲𑀼𑀤𑁆𑀥𑀺𑀬𑀸 𑀲𑀼𑀡𑀸𑀣, 𑀆𑀲𑀬𑀲𑀼𑀤𑁆𑀥𑀺𑀬𑀸 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣. 𑀅𑀯𑀺𑀓𑁆𑀔𑁂𑀧𑁂𑀦 𑀲𑀼𑀡𑀸𑀣, 𑀧𑀕𑁆𑀕𑀳𑁂𑀦 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀢𑁂𑀲𑀁 𑀧𑀤𑀸𑀦𑀁 𑀧𑀼𑀩𑁆𑀩𑁂 𑀅𑀯𑀼𑀢𑁆𑀢𑁄𑀧𑀺 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀢𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀸 ‘‘𑀏𑀯𑀁 𑀪𑁄’’𑀢𑀺 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁, 𑀪𑀕𑀯𑀢𑁄 𑀯𑀘𑀦𑀁 𑀅𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀅𑀲𑁆𑀲𑁄𑀲𑀼𑀁. 𑀅𑀣 𑀯𑀸 𑀧𑀝𑀺𑀲𑁆𑀲𑀼𑀡𑀺𑀁𑀲𑀼. ‘‘𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀓𑀢𑁆𑀢𑀼𑀓𑀸𑀫𑀢𑀸𑀬 𑀧𑀝𑀺𑀚𑀸𑀦𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀢𑁂𑀲𑀁 𑀏𑀯𑀁 𑀧𑀝𑀺𑀲𑁆𑀲𑀼𑀢𑀯𑀢𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀢’’𑀦𑁆𑀢𑀺? ‘‘𑀇𑀲𑀬𑁄 𑀧𑀼𑀩𑁆𑀩𑀓𑀸’’𑀢𑀺𑀆𑀤𑀺.

𑁨𑁮𑁭. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀲𑀜𑁆𑀜𑀢𑀢𑁆𑀢𑀸𑀢𑀺 𑀲𑀻𑀮𑀲𑀁𑀬𑀫𑁂𑀦 𑀲𑀁𑀬𑀢𑀘𑀺𑀢𑁆𑀢𑀸. 𑀢𑀧𑀲𑁆𑀲𑀺𑀦𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀢𑀧𑀬𑀼𑀢𑁆𑀢𑀸. 𑀅𑀢𑁆𑀢𑀤𑀢𑁆𑀣𑀫𑀘𑀸𑀭𑀺𑀲𑀼𑀦𑁆𑀢𑀺 𑀫𑀦𑁆𑀢𑀚𑁆𑀛𑁂𑀦𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀤𑀺𑀁 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀅𑀓𑀁𑀲𑀼. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁨𑁮𑁮. 𑀤𑀼𑀢𑀺𑀬𑀕𑀸𑀣𑀸𑀤𑀻𑀲𑀼𑀧𑀺 𑀅𑀬𑀁 𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑁋 𑀦 𑀧𑀲𑀽 𑀩𑁆𑀭𑀸𑀳𑁆𑀫𑀡𑀸𑀦𑀸𑀲𑀼𑀦𑁆𑀢𑀺 𑀧𑁄𑀭𑀸𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀲𑀽 𑀦 𑀆𑀲𑀼𑀁, 𑀦 𑀢𑁂 𑀧𑀲𑀼𑀧𑀭𑀺𑀕𑁆𑀕𑀳𑀫𑀓𑀁𑀲𑀼. 𑀦 𑀳𑀺𑀭𑀜𑁆𑀜𑀁 𑀦 𑀥𑀸𑀦𑀺𑀬𑀦𑁆𑀢𑀺 𑀳𑀺𑀭𑀜𑁆𑀜𑀜𑁆𑀘 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀦𑁆𑀢𑀫𑀲𑁄 𑀚𑀢𑀼𑀫𑀸𑀲𑀓𑁄𑀧𑀺 𑀦𑀸𑀳𑁄𑀲𑀺, 𑀢𑀣𑀸 𑀯𑀻𑀳𑀺𑀲𑀸𑀮𑀺𑀬𑀯𑀕𑁄𑀥𑀽𑀫𑀸𑀤𑀺 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀪𑁂𑀤𑀁 𑀥𑀸𑀦𑀺𑀬𑀫𑁆𑀧𑀺 𑀢𑁂𑀲𑀁 𑀦𑀸𑀳𑁄𑀲𑀺. 𑀢𑁂 𑀳𑀺 𑀦𑀺𑀓𑁆𑀔𑀺𑀢𑁆𑀢𑀚𑀸𑀢𑀭𑀽𑀧𑀭𑀚𑀢𑀸 𑀅𑀲𑀦𑁆𑀦𑀺𑀥𑀺𑀓𑀸𑀭𑀓𑀸𑀯 𑀳𑀼𑀢𑁆𑀯𑀸 𑀓𑁂𑀯𑀮𑀁 𑀲𑀚𑁆𑀛𑀸𑀬𑀥𑀦𑀥𑀜𑁆𑀜𑀸 𑀅𑀢𑁆𑀢𑀦𑁄 𑀫𑀦𑁆𑀢𑀚𑁆𑀛𑁂𑀦𑀲𑀗𑁆𑀔𑀸𑀢𑁂𑀦𑁂𑀯 𑀥𑀦𑁂𑀦 𑀥𑀜𑁆𑀜𑁂𑀦 𑀘 𑀲𑀫𑀦𑁆𑀦𑀸𑀕𑀢𑀸 𑀅𑀳𑁂𑀲𑀼𑀁. 𑀬𑁄 𑀘𑀸𑀬𑀁 𑀫𑁂𑀢𑁆𑀢𑀸𑀤𑀺𑀯𑀺𑀳𑀸𑀭𑁄 𑀲𑁂𑀝𑁆𑀞𑀢𑁆𑀢𑀸 𑀅𑀦𑀼𑀕𑀸𑀫𑀺𑀓𑀢𑁆𑀢𑀸 𑀘 𑀩𑁆𑀭𑀳𑁆𑀫𑀦𑀺𑀥𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀩𑁆𑀭𑀳𑁆𑀫𑀁 𑀦𑀺𑀥𑀺𑀫𑀧𑀸𑀮𑀬𑀼𑀁 𑀲𑀤𑀸 𑀢𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑁂𑀦.

𑁨𑁮𑁯. 𑀏𑀯𑀁 𑀯𑀺𑀳𑀸𑀭𑀻𑀦𑀁 𑀬𑀁 𑀦𑁂𑀲𑀁 𑀧𑀓𑀢𑀁 𑀆𑀲𑀺, 𑀬𑀁 𑀏𑀢𑁂𑀲𑀁 𑀧𑀓𑀢𑀁 𑀏𑀢𑁂 𑀩𑁆𑀭𑀸𑀳𑁆𑀫𑀡𑁂 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀅𑀳𑁄𑀲𑀺. 𑀤𑁆𑀯𑀸𑀭𑀪𑀢𑁆𑀢𑀁 𑀉𑀧𑀝𑁆𑀞𑀺𑀢𑀦𑁆𑀢𑀺 ‘‘𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀲𑀚𑁆𑀚𑁂𑀢𑁆𑀯𑀸 𑀢𑁂𑀳𑀺 𑀢𑁂𑀳𑀺 𑀤𑀸𑀬𑀓𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑁂 𑀞𑀧𑀺𑀢𑀪𑀢𑁆𑀢𑀁. 𑀲𑀤𑁆𑀥𑀸𑀧𑀓𑀢𑀦𑁆𑀢𑀺 𑀲𑀤𑁆𑀥𑀸𑀬 𑀧𑀓𑀢𑀁, 𑀲𑀤𑁆𑀥𑀸𑀤𑁂𑀬𑁆𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲𑀸𑀦𑀦𑁆𑀢𑀺 𑀏𑀲𑀦𑁆𑀢𑀻𑀢𑀺 𑀏𑀲𑀸, 𑀢𑁂𑀲𑀁 𑀏𑀲𑀸𑀦𑀁, 𑀏𑀲𑀫𑀸𑀦𑀸𑀦𑀁 𑀧𑀭𑀺𑀬𑁂𑀲𑀫𑀸𑀦𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀸𑀢𑀯𑁂𑀢𑀺 𑀤𑀸𑀢𑀩𑁆𑀩𑀁. 𑀢𑀤𑀫𑀜𑁆𑀜𑀺𑀲𑀼𑀦𑁆𑀢𑀺 𑀢𑀁 𑀅𑀫𑀜𑁆𑀜𑀺𑀁𑀲𑀼, 𑀢𑀁 𑀤𑁆𑀯𑀸𑀭𑁂 𑀲𑀚𑁆𑀚𑁂𑀢𑁆𑀯𑀸 𑀞𑀧𑀺𑀢𑀁 𑀪𑀢𑁆𑀢𑀁 𑀲𑀤𑁆𑀥𑀸𑀤𑁂𑀬𑁆𑀬𑀁 𑀧𑀭𑀺𑀬𑁂𑀲𑀫𑀸𑀦𑀸𑀦𑀁 𑀏𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀸𑀢𑀩𑁆𑀩𑀁 𑀅𑀫𑀜𑁆𑀜𑀺𑀁𑀲𑀼 𑀤𑀸𑀬𑀓𑀸 𑀚𑀦𑀸, 𑀦 𑀢𑀢𑁄 𑀧𑀭𑀁. 𑀅𑀦𑀢𑁆𑀣𑀺𑀓𑀸 𑀳𑀺 𑀢𑁂 𑀅𑀜𑁆𑀜𑁂𑀦 𑀅𑀳𑁂𑀲𑀼𑀁, 𑀓𑁂𑀯𑀮𑀁 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬 𑀲𑀦𑁆𑀢𑀼𑀝𑁆𑀞𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁯𑁦. 𑀦𑀸𑀦𑀸𑀭𑀢𑁆𑀢𑁂𑀳𑀻𑀢𑀺 𑀦𑀸𑀦𑀸𑀯𑀺𑀥𑀭𑀸𑀕𑀭𑀢𑁆𑀢𑁂𑀳𑀺 𑀯𑀢𑁆𑀣𑁂𑀳𑀺 𑀯𑀺𑀘𑀺𑀢𑁆𑀭𑀢𑁆𑀣𑀭𑀡𑀢𑁆𑀣𑀢𑁂𑀳𑀺, 𑀲𑀬𑀦𑁂𑀳𑀺 𑀏𑀓𑀪𑀽𑀫𑀺𑀓𑀤𑁆𑀯𑀺𑀪𑀽𑀫𑀺𑀓𑀸𑀤𑀺𑀧𑀸𑀲𑀸𑀤𑀯𑀭𑁂𑀳𑀺. 𑀆𑀯𑀲𑀣𑁂𑀳𑀻𑀢𑀺 𑀏𑀯𑀭𑀽𑀧𑁂𑀳𑀺 𑀉𑀧𑀓𑀭𑀡𑁂𑀳𑀺. 𑀨𑀻𑀢𑀸 𑀚𑀦𑀧𑀤𑀸 𑀭𑀝𑁆𑀞𑀸 𑀏𑀓𑁂𑀓𑀧𑁆𑀧𑀤𑁂𑀲𑀪𑀽𑀢𑀸 𑀚𑀦𑀧𑀤𑀸 𑀘 𑀓𑁂𑀘𑀺 𑀓𑁂𑀘𑀺 𑀲𑀓𑀮𑀭𑀝𑁆𑀞𑀸 𑀘 ‘‘𑀦𑀫𑁄 𑀩𑁆𑀭𑀸𑀳𑁆𑀫𑀡𑀸𑀦’’𑀦𑁆𑀢𑀺 𑀲𑀸𑀬𑀁 𑀧𑀸𑀢𑀁 𑀩𑁆𑀭𑀸𑀳𑁆𑀫𑀡𑁂 𑀤𑁂𑀯𑁂 𑀯𑀺𑀬 𑀦𑀫𑀲𑁆𑀲𑀺𑀁𑀲𑀼.

𑁨𑁯𑁧. 𑀢𑁂 𑀏𑀯𑀁 𑀦𑀫𑀲𑁆𑀲𑀺𑀬𑀫𑀸𑀦𑀸 𑀮𑁄𑀓𑁂𑀦 𑀅𑀯𑀚𑁆𑀛𑀸 𑀩𑁆𑀭𑀸𑀳𑁆𑀫𑀡𑀸 𑀆𑀲𑀼𑀁, 𑀦 𑀓𑁂𑀯𑀮𑀜𑁆𑀘 𑀅𑀯𑀚𑁆𑀛𑀸, 𑀅𑀚𑁂𑀬𑁆𑀬𑀸 𑀯𑀺𑀳𑀺𑀁𑀲𑀺𑀢𑀼𑀫𑁆𑀧𑀺 𑀅𑀦𑀪𑀺𑀪𑀯𑀦𑀻𑀬𑀢𑁆𑀢𑀸 𑀅𑀚𑁂𑀬𑁆𑀬𑀸 𑀘 𑀅𑀳𑁂𑀲𑀼𑀁. 𑀓𑀺𑀁 𑀓𑀸𑀭𑀡𑀸? 𑀥𑀫𑁆𑀫𑀭𑀓𑁆𑀔𑀺𑀢𑀸, 𑀬𑀲𑁆𑀫𑀸 𑀥𑀫𑁆𑀫𑁂𑀦 𑀭𑀓𑁆𑀔𑀺𑀢𑀸. 𑀢𑁂 𑀳𑀺 𑀧𑀜𑁆𑀘 𑀯𑀭𑀲𑀻𑀮𑀥𑀫𑁆𑀫𑁂 𑀭𑀓𑁆𑀔𑀺𑀁𑀲𑀼, ‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺’’𑀦𑁆𑀢𑀺 (𑀚𑀸. 𑁧.𑁧𑁦.𑁧𑁦𑁨; 𑁧.𑁧𑁫.𑁩𑁮𑁫) 𑀥𑀫𑁆𑀫𑀭𑀓𑁆𑀔𑀺𑀢𑀸 𑀳𑀼𑀢𑁆𑀯𑀸 𑀅𑀯𑀚𑁆𑀛𑀸 𑀅𑀚𑁂𑀬𑁆𑀬𑀸 𑀘 𑀅𑀳𑁂𑀲𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀦𑁂 𑀓𑁄𑀘𑀺 𑀦𑀺𑀯𑀸𑀭𑁂𑀲𑀻𑀢𑀺 𑀢𑁂 𑀩𑁆𑀭𑀸𑀳𑁆𑀫𑀡𑁂 𑀓𑀼𑀮𑀸𑀦𑀁 𑀤𑁆𑀯𑀸𑀭𑁂𑀲𑀼 𑀲𑀩𑁆𑀩𑀲𑁄 𑀩𑀸𑀳𑀺𑀭𑁂𑀲𑀼 𑀘 𑀅𑀩𑁆𑀪𑀦𑁆𑀢𑀭𑁂𑀲𑀼 𑀘 𑀲𑀩𑁆𑀩𑀤𑁆𑀯𑀸𑀭𑁂𑀲𑀼 𑀬𑀲𑁆𑀫𑀸 𑀢𑁂𑀲𑀼 𑀧𑀺𑀬𑀲𑀫𑁆𑀫𑀢𑁂𑀲𑀼 𑀯𑀭𑀲𑀻𑀮𑀲𑀫𑀦𑁆𑀦𑀸𑀕𑀢𑁂𑀲𑀼 𑀫𑀸𑀢𑀸𑀧𑀺𑀢𑀽𑀲𑀼 𑀯𑀺𑀬 𑀅𑀢𑀺𑀯𑀺𑀲𑁆𑀲𑀢𑁆𑀣𑀸 𑀫𑀦𑀼𑀲𑁆𑀲𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀸 ‘‘𑀇𑀤𑀁 𑀦𑀸𑀫 𑀞𑀸𑀦𑀁 𑀢𑀬𑀸 𑀦 𑀧𑀯𑀺𑀲𑀺𑀢𑀩𑁆𑀩’’𑀦𑁆𑀢𑀺 𑀦 𑀓𑁄𑀘𑀺 𑀦𑀺𑀯𑀸𑀭𑁂𑀲𑀺.

𑁨𑁯𑁨. 𑀏𑀯𑀁 𑀥𑀫𑁆𑀫𑀭𑀓𑁆𑀔𑀺𑀢𑀸 𑀓𑀼𑀮𑀤𑁆𑀯𑀸𑀭𑁂𑀲𑀼 𑀅𑀦𑀺𑀯𑀸𑀭𑀺𑀢𑀸 𑀘𑀭𑀦𑁆𑀢𑀸 𑀅𑀝𑁆𑀞 𑀘 𑀘𑀢𑁆𑀢𑀸𑀮𑀻𑀲𑀜𑁆𑀘𑀸𑀢𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀁 𑀯𑀲𑁆𑀲𑀸𑀦𑀺 𑀓𑀼𑀫𑀸𑀭𑀪𑀸𑀯𑀢𑁄 𑀧𑀪𑀼𑀢𑀺 𑀘𑀭𑀡𑁂𑀦 𑀓𑁄𑀫𑀸𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀁𑀲𑀼 𑀢𑁂. 𑀬𑁂𑀧𑀺 𑀩𑁆𑀭𑀸𑀳𑁆𑀫𑀡𑀘𑀡𑁆𑀟𑀸𑀮𑀸 𑀅𑀳𑁂𑀲𑀼𑀁, 𑀓𑁄 𑀧𑀦 𑀯𑀸𑀤𑁄 𑀩𑁆𑀭𑀳𑁆𑀫𑀲𑀫𑀸𑀤𑀻𑀲𑀽𑀢𑀺 𑀏𑀯𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸 𑀏𑀯 𑀳𑀺 𑀯𑀺𑀚𑁆𑀚𑀸𑀘𑀭𑀡𑀧𑀭𑀺𑀬𑁂𑀝𑁆𑀞𑀺𑀁 𑀅𑀘𑀭𑀼𑀁 𑀩𑁆𑀭𑀸𑀳𑁆𑀫𑀡𑀸 𑀧𑀼𑀭𑁂, 𑀦 𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀳𑀼𑀢𑁆𑀯𑀸. 𑀢𑀢𑁆𑀣 𑀯𑀺𑀚𑁆𑀚𑀸𑀧𑀭𑀺𑀬𑁂𑀝𑁆𑀞𑀻𑀢𑀺 𑀫𑀦𑁆𑀢𑀚𑁆𑀛𑁂𑀦𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 ‘‘𑀲𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑀫𑀦𑁆𑀢𑁂 𑀅𑀥𑀻𑀬𑀫𑀸𑀦𑁄’’𑀢𑀺 (𑀅. 𑀦𑀺. 𑁫.𑁧𑁯𑁨). 𑀘𑀭𑀡𑀧𑀭𑀺𑀬𑁂𑀝𑁆𑀞𑀻𑀢𑀺 𑀲𑀻𑀮𑀭𑀓𑁆𑀔𑀡𑀁. ‘‘𑀯𑀺𑀚𑁆𑀚𑀸𑀘𑀭𑀡𑀧𑀭𑀺𑀬𑁂𑀝𑁆𑀞𑀼’’𑀦𑁆𑀢𑀺𑀧𑀺 𑀧𑀸𑀞𑁄, 𑀯𑀺𑀚𑁆𑀚𑀸𑀘𑀭𑀡𑀁 𑀧𑀭𑀺𑀬𑁂𑀲𑀺𑀢𑀼𑀁 𑀅𑀘𑀭𑀼𑀦𑁆𑀢𑀺 𑀅𑀢𑁆𑀣𑁄.

𑁨𑁯𑁩. 𑀬𑀣𑀸𑀯𑀼𑀢𑁆𑀢𑀜𑁆𑀘 𑀓𑀸𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀖𑀭𑀸𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀸𑀧𑀺 𑀦 𑀩𑁆𑀭𑀸𑀳𑁆𑀫𑀡𑀸 𑀅𑀜𑁆𑀜𑀫𑀕𑀫𑀼𑀁 𑀔𑀢𑁆𑀢𑀺𑀬𑀁 𑀯𑀸 𑀯𑁂𑀲𑁆𑀲𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀸, 𑀬𑁂 𑀅𑀳𑁂𑀲𑀼𑀁 𑀤𑁂𑀯𑀲𑀫𑀸 𑀯𑀸 𑀫𑀭𑀺𑀬𑀸𑀤𑀸 𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀤𑀢𑁆𑀯𑀸 𑀦𑀧𑀺 𑀪𑀭𑀺𑀬𑀁 𑀓𑀺𑀡𑀺𑀁𑀲𑀼 𑀢𑁂, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀏𑀓𑀘𑁆𑀘𑁂 𑀓𑀺𑀡𑀦𑁆𑀢𑀺. 𑀢𑁂 𑀳𑀺 𑀥𑀫𑁆𑀫𑁂𑀦 𑀤𑀸𑀭𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀓𑀣𑀁? 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀁 𑀯𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸 𑀓𑀜𑁆𑀜𑀸𑀪𑀺𑀓𑁆𑀔𑀁 𑀆𑀳𑀺𑀡𑁆𑀟𑀦𑁆𑀢𑀺 𑁋 ‘‘𑀅𑀳𑀁 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀘𑀺𑀡𑁆𑀡𑀩𑁆𑀭𑀳𑁆𑀫𑀘𑀭𑀺𑀬𑁄, 𑀬𑀤𑀺 𑀯𑀬𑀧𑁆𑀧𑀢𑁆𑀢𑀸 𑀤𑀸𑀭𑀺𑀓𑀸 𑀅𑀢𑁆𑀣𑀺, 𑀤𑁂𑀣 𑀫𑁂’’𑀢𑀺. 𑀢𑀢𑁄 𑀬𑀲𑁆𑀲 𑀯𑀬𑀧𑁆𑀧𑀢𑁆𑀢𑀸 𑀤𑀸𑀭𑀺𑀓𑀸 𑀳𑁄𑀢𑀺, 𑀲𑁄 𑀢𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀤𑁆𑀯𑀸𑀭𑁂 𑀞𑀺𑀢𑀲𑁆𑀲𑁂𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀢𑁆𑀣𑁂 𑀉𑀤𑀓𑀁 𑀆𑀲𑀺𑀜𑁆𑀘𑀦𑁆𑀢𑁄 ‘‘𑀇𑀫𑀁 𑀢𑁂, 𑀩𑁆𑀭𑀸𑀳𑁆𑀫𑀡, 𑀪𑀭𑀺𑀬𑀁 𑀧𑁄𑀲𑀸𑀯𑀦𑀢𑁆𑀣𑀸𑀬 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀤𑁂𑀢𑀺.

𑀓𑀲𑁆𑀫𑀸 𑀧𑀦 𑀢𑁂 𑀏𑀯𑀁 𑀘𑀺𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸𑀧𑀺 𑀤𑀸𑀭𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀦 𑀬𑀸𑀯𑀚𑀻𑀯𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀳𑁄𑀦𑁆𑀢𑀻𑀢𑀺? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦. 𑀢𑁂𑀲𑀜𑁆𑀳𑀺 𑀏𑀯𑀁𑀤𑀺𑀝𑁆𑀞𑀺 𑀳𑁄𑀢𑀺 𑁋 ‘‘𑀬𑁄 𑀧𑀼𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀢𑀺, 𑀲𑁄 𑀓𑀼𑀮𑀯𑀁𑀲𑀘𑁆𑀙𑁂𑀤𑀓𑀭𑁄 𑀳𑁄𑀢𑀺, 𑀢𑀢𑁄 𑀦𑀺𑀭𑀬𑁂 𑀧𑀘𑁆𑀘𑀢𑀻’’𑀢𑀺. 𑀘𑀢𑁆𑀢𑀸𑀭𑁄 𑀓𑀺𑀭 𑀅𑀪𑀸𑀬𑀺𑀢𑀩𑁆𑀩𑀁 𑀪𑀸𑀬𑀦𑁆𑀢𑀺 𑀕𑀡𑁆𑀟𑀼𑀧𑁆𑀧𑀸𑀤𑁄 𑀓𑀺𑀓𑀻 𑀓𑀼𑀦𑁆𑀢𑀦𑀻 𑀩𑁆𑀭𑀸𑀳𑁆𑀫𑀡𑀸𑀢𑀺. 𑀕𑀡𑁆𑀟𑀼𑀧𑁆𑀧𑀸𑀤𑀸 𑀓𑀺𑀭 𑀫𑀳𑀸𑀧𑀣𑀯𑀺𑀬𑀸 𑀔𑀬𑀪𑀬𑁂𑀦 𑀫𑀢𑁆𑀢𑀪𑁄𑀚𑀺𑀦𑁄 𑀳𑁄𑀦𑁆𑀢𑀺, 𑀦 𑀩𑀳𑀼𑀁 𑀫𑀢𑁆𑀢𑀺𑀓𑀁 𑀔𑀸𑀤𑀦𑁆𑀢𑀺. 𑀓𑀺𑀓𑀻 𑀲𑀓𑀼𑀡𑀺𑀓𑀸 𑀆𑀓𑀸𑀲𑀧𑀢𑀦𑀪𑀬𑁂𑀦 𑀅𑀡𑁆𑀟𑀲𑁆𑀲 𑀉𑀧𑀭𑀺 𑀉𑀢𑁆𑀢𑀸𑀦𑀸 𑀲𑁂𑀢𑀺. 𑀓𑀼𑀦𑁆𑀢𑀦𑀻 𑀲𑀓𑀼𑀡𑀺𑀓𑀸 𑀧𑀣𑀯𑀺𑀓𑀫𑁆𑀧𑀦𑀪𑀬𑁂𑀦 𑀧𑀸𑀤𑁂𑀳𑀺 𑀪𑀽𑀫𑀺𑀁 𑀦 𑀲𑀼𑀝𑁆𑀞𑀼 𑀅𑀓𑁆𑀓𑀫𑀢𑀺. 𑀩𑁆𑀭𑀸𑀳𑁆𑀫𑀡𑀸 𑀓𑀼𑀮𑀯𑀁𑀲𑀽𑀧𑀘𑁆𑀙𑁂𑀤𑀪𑀬𑁂𑀦 𑀤𑀸𑀭𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀆𑀳 𑀘𑁂𑀢𑁆𑀣 𑁋

‘‘𑀕𑀡𑁆𑀟𑀼𑀧𑁆𑀧𑀸𑀤𑁄 𑀓𑀺𑀓𑀻 𑀘𑁂𑀯, 𑀓𑀼𑀦𑁆𑀢𑀻 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑁄;

𑀏𑀢𑁂 𑀅𑀪𑀬𑀁 𑀪𑀸𑀬𑀦𑁆𑀢𑀺, 𑀲𑀫𑁆𑀫𑀽𑀴𑁆𑀳𑀸 𑀘𑀢𑀼𑀭𑁄 𑀚𑀦𑀸’’𑀢𑀺.

𑀏𑀯𑀁 𑀥𑀫𑁆𑀫𑁂𑀦 𑀤𑀸𑀭𑀁 𑀧𑀭𑀺𑀬𑁂𑀲𑀺𑀢𑁆𑀯𑀸𑀧𑀺 𑀘 𑀲𑀫𑁆𑀧𑀺𑀬𑁂𑀦𑁂𑀯 𑀲𑀁𑀯𑀸𑀲𑀁 𑀲𑀗𑁆𑀕𑀦𑁆𑀢𑁆𑀯𑀸 𑀲𑀫𑀭𑁄𑀘𑀬𑀼𑀁, 𑀲𑀫𑁆𑀧𑀺𑀬𑁂𑀦𑁂𑀯 𑀅𑀜𑁆𑀜𑀫𑀜𑁆𑀜𑀁 𑀧𑁂𑀫𑁂𑀦𑁂𑀯 𑀓𑀸𑀬𑁂𑀦 𑀘 𑀘𑀺𑀢𑁆𑀢𑁂𑀦 𑀘 𑀫𑀺𑀲𑁆𑀲𑀻𑀪𑀽𑀢𑀸 𑀲𑀗𑁆𑀖𑀝𑀺𑀢𑀸 𑀲𑀁𑀲𑀝𑁆𑀞𑀸 𑀳𑀼𑀢𑁆𑀯𑀸 𑀲𑀁𑀯𑀸𑀲𑀁 𑀲𑀫𑀭𑁄𑀘𑀬𑀼𑀁, 𑀦 𑀅𑀧𑁆𑀧𑀺𑀬𑁂𑀦 𑀦 𑀦𑀺𑀕𑁆𑀕𑀳𑁂𑀦 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁯𑁪. 𑀏𑀯𑀁 𑀲𑀫𑁆𑀧𑀺𑀬𑁂𑀦𑁂𑀯 𑀲𑀁𑀯𑀸𑀲𑀁 𑀓𑀭𑁄𑀦𑁆𑀢𑀸𑀧𑀺 𑀘 𑀅𑀜𑁆𑀜𑀢𑁆𑀭 𑀢𑀫𑁆𑀳𑀸𑀢𑀺, 𑀬𑁄 𑀲𑁄 𑀉𑀢𑀼𑀲𑀫𑀬𑁄, 𑀬𑀫𑁆𑀳𑀺 𑀲𑀫𑀬𑁂 𑀩𑁆𑀭𑀸𑀳𑁆𑀫𑀡𑀻 𑀩𑁆𑀭𑀸𑀳𑁆𑀫𑀡𑁂𑀦 𑀉𑀧𑀕𑀦𑁆𑀢𑀩𑁆𑀩𑀸, 𑀅𑀜𑁆𑀜𑀢𑁆𑀭 𑀢𑀫𑁆𑀳𑀸 𑀲𑀫𑀬𑀸 𑀞𑀧𑁂𑀢𑁆𑀯𑀸 𑀢𑀁 𑀲𑀫𑀬𑀁 𑀉𑀢𑀼𑀢𑁄 𑀯𑀺𑀭𑀢𑀁 𑀉𑀢𑀼𑀯𑁂𑀭𑀫𑀡𑀺𑀁 𑀧𑀢𑀺 𑀪𑀭𑀺𑀬𑀁, 𑀬𑀸𑀯 𑀧𑀼𑀦 𑀲𑁄 𑀲𑀫𑀬𑁄 𑀆𑀕𑀘𑁆𑀙𑀢𑀺, 𑀢𑀸𑀯 𑀅𑀝𑁆𑀞𑀢𑁆𑀯𑀸 𑀅𑀦𑁆𑀢𑀭𑀸𑀬𑁂𑀯. 𑀫𑁂𑀣𑀼𑀦𑀁 𑀥𑀫𑁆𑀫𑀦𑁆𑀢𑀺 𑀫𑁂𑀣𑀼𑀦𑀸𑀬 𑀥𑀫𑁆𑀫𑀸𑀬. 𑀲𑀫𑁆𑀧𑀤𑀸𑀦𑀯𑀘𑀦𑀧𑀢𑁆𑀢𑀺𑀬𑀸 𑀓𑀺𑀭𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀦𑀸𑀲𑁆𑀲𑀼 𑀕𑀘𑁆𑀙𑀦𑁆𑀢𑀻𑀢𑀺 𑀦𑁂𑀯 𑀕𑀘𑁆𑀙𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁂 𑀳𑁄𑀦𑁆𑀢𑀺 𑀤𑁂𑀯𑀲𑀫𑀸 𑀘 𑀫𑀭𑀺𑀬𑀸𑀤𑀸 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁯𑁫. 𑀅𑀯𑀺𑀲𑁂𑀲𑁂𑀦 𑀧𑀦 𑀲𑀩𑁆𑀩𑁂𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘…𑀧𑁂… 𑀅𑀯𑀡𑁆𑀡𑀬𑀼𑀁. 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺. 𑀲𑀻𑀮𑀦𑁆𑀢𑀺 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀅𑀚𑁆𑀚𑀯𑀦𑁆𑀢𑀺 𑀉𑀚𑀼𑀪𑀸𑀯𑁄, 𑀅𑀢𑁆𑀣𑀢𑁄 𑀅𑀲𑀞𑀢𑀸 𑀅𑀫𑀸𑀬𑀸𑀯𑀺𑀢𑀸 𑀘. 𑀫𑀤𑁆𑀤𑀯𑀦𑁆𑀢𑀺 𑀫𑀼𑀤𑀼𑀪𑀸𑀯𑁄, 𑀅𑀢𑁆𑀣𑀢𑁄 𑀅𑀢𑁆𑀣𑀤𑁆𑀥𑀢𑀸 𑀅𑀦𑀢𑀺𑀫𑀸𑀦𑀺𑀢𑀸 𑀘. 𑀢𑀧𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄. 𑀲𑁄𑀭𑀘𑁆𑀘𑀦𑁆𑀢𑀺 𑀲𑀼𑀭𑀢𑀪𑀸𑀯𑁄 𑀲𑀼𑀔𑀲𑀻𑀮𑀢𑀸 𑀅𑀧𑁆𑀧𑀝𑀺𑀓𑀽𑀮𑀲𑀫𑀸𑀘𑀸𑀭𑀢𑀸. 𑀅𑀯𑀺𑀳𑀺𑀁𑀲𑀸𑀢𑀺 𑀧𑀸𑀡𑀺𑀆𑀤𑀻𑀳𑀺 𑀅𑀯𑀺𑀳𑁂𑀲𑀺𑀓𑀚𑀸𑀢𑀺𑀓𑀢𑀸 𑀲𑀓𑀭𑀼𑀡𑀪𑀸𑀯𑁄. 𑀔𑀦𑁆𑀢𑀻𑀢𑀺 𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺. 𑀇𑀘𑁆𑀘𑁂𑀢𑁂 𑀕𑀼𑀡𑁂 𑀅𑀯𑀡𑁆𑀡𑀬𑀼𑀁. 𑀬𑁂𑀧𑀺 𑀦𑀸𑀲𑀓𑁆𑀔𑀺𑀁𑀲𑀼 𑀲𑀩𑁆𑀩𑀲𑁄 𑀧𑀝𑀺𑀧𑀢𑁆𑀢𑀺𑀬𑀸 𑀆𑀭𑀸𑀥𑁂𑀢𑀼𑀁, 𑀢𑁂𑀧𑀺 𑀢𑀢𑁆𑀣 𑀲𑀸𑀭𑀤𑀲𑁆𑀲𑀺𑀦𑁄 𑀳𑀼𑀢𑁆𑀯𑀸 𑀯𑀸𑀘𑀸𑀬 𑀯𑀡𑁆𑀡𑀬𑀺𑀁𑀲𑀼 𑀧𑀲𑀁𑀲𑀺𑀁𑀲𑀼.

𑁨𑁯𑁬. 𑀏𑀯𑀁 𑀯𑀡𑁆𑀡𑁂𑀦𑁆𑀢𑀸𑀦𑀜𑁆𑀘 𑀬𑁄 𑀦𑁂𑀲𑀁…𑀧𑁂… 𑀦𑀸𑀕𑀫𑀸, 𑀬𑁄 𑀏𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀭𑀫𑁄 𑀩𑁆𑀭𑀳𑁆𑀫𑀸 𑀅𑀳𑁄𑀲𑀺, 𑀩𑁆𑀭𑀳𑁆𑀫𑀲𑀫𑁄 𑀦𑀸𑀫 𑀉𑀢𑁆𑀢𑀫𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺, 𑀤𑀴𑁆𑀳𑁂𑀦 𑀧𑀭𑀓𑁆𑀓𑀫𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀤𑀴𑁆𑀳𑀧𑀭𑀓𑁆𑀓𑀫𑁄. 𑀲 𑀯𑀸𑀢𑀺 𑀯𑀺𑀪𑀸𑀯𑀦𑁂 𑀯𑀸-𑀲𑀤𑁆𑀤𑁄, 𑀢𑁂𑀦 𑀲𑁄 𑀏𑀯𑀭𑀽𑀧𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀢𑀫𑁂𑀯 𑀯𑀺𑀪𑀸𑀯𑁂𑀢𑀺. 𑀫𑁂𑀣𑀼𑀦𑀁 𑀥𑀫𑁆𑀫𑀦𑁆𑀢𑀺 𑀫𑁂𑀣𑀼𑀦𑀲𑀫𑀸𑀧𑀢𑁆𑀢𑀺𑀁. 𑀲𑀼𑀧𑀺𑀦𑀦𑁆𑀢𑁂𑀧𑀺 𑀦𑀸𑀕𑀫𑀸𑀢𑀺 𑀲𑀼𑀧𑀺𑀦𑁂𑀧𑀺 𑀦 𑀅𑀕𑀫𑀸𑀲𑀺.

𑁨𑁯𑁭. 𑀢𑀢𑁄 𑀢𑀲𑁆𑀲 𑀯𑀢𑁆𑀢𑀁…𑀧𑁂… 𑀅𑀯𑀡𑁆𑀡𑀬𑀼𑀁. 𑀇𑀫𑀸𑀬 𑀕𑀸𑀣𑀸𑀬 𑀦𑀯𑀫𑀕𑀸𑀣𑀸𑀬 𑀯𑀼𑀢𑁆𑀢𑀕𑀼𑀡𑁂𑀬𑁂𑀯 𑀆𑀤𑀺𑀅𑀦𑁆𑀢𑀯𑀲𑁂𑀦 𑀦𑀺𑀤𑁆𑀤𑀺𑀲𑀦𑁆𑀢𑁄 𑀤𑁂𑀯𑀲𑀫𑁂 𑀩𑁆𑀭𑀸𑀳𑁆𑀫𑀡𑁂 𑀧𑀓𑀸𑀲𑁂𑀢𑀺. 𑀢𑁂 𑀳𑀺 𑀯𑀺𑀜𑁆𑀜𑀼𑀚𑀸𑀢𑀺𑀓𑀸 𑀧𑀡𑁆𑀟𑀺𑀢𑀸 𑀢𑀲𑁆𑀲 𑀩𑁆𑀭𑀳𑁆𑀫𑀲𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀢𑁆𑀢𑀁 𑀅𑀦𑀼𑀲𑀺𑀓𑁆𑀔𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀬 𑀛𑀸𑀦𑀪𑀸𑀯𑀦𑀸𑀬 𑀘, 𑀢𑁂 𑀘 𑀇𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀸𑀤𑀺𑀕𑀼𑀡𑁂 𑀧𑀝𑀺𑀧𑀢𑁆𑀢𑀺𑀬𑀸 𑀏𑀯 𑀯𑀡𑁆𑀡𑀬𑀦𑁆𑀢𑀻𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀩𑁆𑀭𑀸𑀳𑁆𑀫𑀡𑀸 𑀧𑀜𑁆𑀘𑀓𑀦𑀺𑀧𑀸𑀢𑁂 𑀤𑁄𑀡𑀲𑀼𑀢𑁆𑀢𑁂 (𑀅. 𑀦𑀺. 𑁫.𑁧𑁯𑁨) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑁨𑁯𑁮. 𑀇𑀤𑀸𑀦𑀺 𑀫𑀭𑀺𑀬𑀸𑀤𑁂 𑀩𑁆𑀭𑀸𑀳𑁆𑀫𑀡𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀢𑀡𑁆𑀟𑀼𑀮𑀁 𑀲𑀬𑀦’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀢𑁂𑀲𑀼 𑀬𑁂 𑀳𑁄𑀦𑁆𑀢𑀺 𑀫𑀭𑀺𑀬𑀸𑀤𑀸, 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀲𑀘𑁂 𑀬𑀜𑁆𑀜𑀁 𑀓𑀧𑁆𑀧𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀅𑀣 𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑀢𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑀓𑀁 𑀢𑀡𑁆𑀟𑀼𑀮𑀜𑁆𑀘, 𑀫𑀜𑁆𑀘𑀧𑀻𑀞𑀸𑀤𑀺𑀪𑁂𑀤𑀁 𑀲𑀬𑀦𑀜𑁆𑀘, 𑀔𑁄𑀫𑀸𑀤𑀺𑀪𑁂𑀤𑀁 𑀯𑀢𑁆𑀣𑀜𑁆𑀘, 𑀕𑁄𑀲𑀧𑁆𑀧𑀺𑀢𑀺𑀮𑀢𑁂𑀮𑀸𑀤𑀺𑀪𑁂𑀤𑀁 𑀲𑀧𑁆𑀧𑀺𑀢𑁂𑀮𑀜𑁆𑀘 𑀬𑀸𑀘𑀺𑀬 𑀥𑀫𑁆𑀫𑁂𑀦, ‘‘𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦 𑀬𑀸𑀘𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦 𑀉𑀤𑁆𑀤𑀺𑀲𑁆𑀲𑀞𑀸𑀦𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑁂𑀦 𑀬𑀸𑀘𑀺𑀢𑁆𑀯𑀸, 𑀅𑀣 𑀬𑁄 𑀬𑀁 𑀇𑀘𑁆𑀙𑀢𑀺 𑀤𑀸𑀢𑀼𑀁, 𑀢𑁂𑀦 𑀢𑀁 𑀤𑀺𑀦𑁆𑀦𑀢𑀡𑁆𑀟𑀼𑀮𑀸𑀤𑀺𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀁𑀓𑀟𑁆𑀠𑀺𑀢𑁆𑀯𑀸. ‘‘𑀲𑀫𑀼𑀤𑀸𑀦𑁂𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀏𑀓𑁄𑀬𑁂𑀯𑀢𑁆𑀣𑁄. 𑀢𑀢𑁄 𑀬𑀜𑁆𑀜𑀫𑀓𑀧𑁆𑀧𑀬𑀼𑀦𑁆𑀢𑀺 𑀢𑀢𑁄 𑀕𑀳𑁂𑀢𑁆𑀯𑀸 𑀤𑀸𑀦𑀫𑀓𑀁𑀲𑀼.

𑁨𑁯𑁯. 𑀓𑀭𑁄𑀦𑁆𑀢𑀸 𑀘 𑀏𑀯𑀫𑁂𑀢𑀲𑁆𑀫𑀺𑀁 𑀉𑀧𑀝𑁆𑀞𑀺𑀢𑀲𑁆𑀫𑀺𑀁 𑀤𑀸𑀦𑀲𑀗𑁆𑀔𑀸𑀢𑁂 𑀬𑀜𑁆𑀜𑀲𑁆𑀫𑀺𑀁 𑀦𑀸𑀲𑁆𑀲𑀼 𑀕𑀸𑀯𑁄 𑀳𑀦𑀺𑀁𑀲𑀼 𑀢𑁂, 𑀦 𑀢𑁂 𑀕𑀸𑀯𑀺𑀬𑁄 𑀳𑀦𑀺𑀁𑀲𑀼. 𑀕𑀸𑀯𑀻𑀫𑀼𑀔𑁂𑀦 𑀘𑁂𑀢𑁆𑀣 𑀲𑀩𑁆𑀩𑀧𑀸𑀡𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀺𑀁𑀓𑀸𑀭𑀡𑀸 𑀦 𑀳𑀦𑀺𑀁𑀲𑀽𑀢𑀺? 𑀩𑁆𑀭𑀳𑁆𑀫𑀘𑀭𑀺𑀬𑀸𑀤𑀺𑀕𑀼𑀡𑀬𑀼𑀢𑁆𑀢𑀢𑁆𑀢𑀸. 𑀅𑀧𑀺𑀘 𑀯𑀺𑀲𑁂𑀲𑀢𑁄 𑀬𑀣𑀸 𑀫𑀸𑀢𑀸…𑀧𑁂… 𑀦𑀸𑀲𑁆𑀲𑀼 𑀕𑀸𑀯𑁄 𑀳𑀦𑀺𑀁𑀲𑀼 𑀢𑁂. 𑀢𑀢𑁆𑀣 𑀬𑀸𑀲𑀼 𑀚𑀸𑀬𑀦𑁆𑀢𑀺 𑀑𑀲𑀥𑀸𑀢𑀺 𑀬𑀸𑀲𑀼 𑀧𑀺𑀢𑁆𑀢𑀸𑀤𑀻𑀦𑀁 𑀪𑁂𑀲𑀚𑁆𑀚𑀪𑀽𑀢𑀸 𑀧𑀜𑁆𑀘 𑀕𑁄𑀭𑀲𑀸 𑀚𑀸𑀬𑀦𑁆𑀢𑀺.

𑁩𑁦𑁦. 𑀅𑀦𑁆𑀦𑀤𑀸𑀢𑀺𑀆𑀤𑀻𑀲𑀼 𑀬𑀲𑁆𑀫𑀸 𑀧𑀜𑁆𑀘 𑀕𑁄𑀭𑀲𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁 𑀔𑀼𑀤𑀸 𑀯𑀽𑀧𑀲𑀫𑁆𑀫𑀢𑀺, 𑀩𑀮𑀁 𑀯𑀟𑁆𑀠𑀢𑀺, 𑀙𑀯𑀺𑀯𑀡𑁆𑀡𑁄 𑀯𑀺𑀧𑁆𑀧𑀲𑀻𑀤𑀢𑀺, 𑀓𑀸𑀬𑀺𑀓𑀫𑀸𑀦𑀲𑀺𑀓𑀁 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀦𑁆𑀦𑀤𑀸 𑀩𑀮𑀤𑀸 𑀯𑀡𑁆𑀡𑀤𑀸 𑀲𑀼𑀔𑀤𑀸 𑀘𑁂𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩𑁦𑁧. 𑀏𑀯𑀁 𑀢𑁂 𑀬𑀜𑁆𑀜𑁂𑀲𑀼 𑀕𑀸𑀯𑁄 𑀅𑀳𑀦𑀦𑁆𑀢𑀸 𑀧𑀼𑀜𑁆𑀜𑀧𑁆𑀧𑀪𑀸𑀯𑀸𑀦𑀼𑀕𑁆𑀕𑀳𑀺𑀢𑀲𑀭𑀻𑀭𑀸 𑀲𑀼𑀔𑀼𑀫𑀸𑀮𑀸…𑀧𑁂… 𑀲𑀼𑀔𑀫𑁂𑀥𑀺𑀢𑁆𑀣 𑀬𑀁 𑀧𑀚𑀸. 𑀢𑀢𑁆𑀣 𑀲𑀼𑀔𑀼𑀫𑀸𑀮𑀸 𑀫𑀼𑀤𑀼𑀢𑀮𑀼𑀡𑀳𑀢𑁆𑀣𑀧𑀸𑀤𑀸𑀤𑀺𑀢𑀸𑀬, 𑀫𑀳𑀸𑀓𑀸𑀬𑀸 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀬𑀸, 𑀯𑀡𑁆𑀡𑀯𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀢𑀸𑀬 𑀲𑀡𑁆𑀞𑀸𑀦𑀬𑀼𑀢𑁆𑀢𑀢𑀸𑀬 𑀘, 𑀬𑀲𑀲𑁆𑀲𑀺𑀦𑁄 𑀮𑀸𑀪𑀧𑀭𑀺𑀯𑀸𑀭𑀲𑀫𑁆𑀧𑀤𑀸𑀬. 𑀲𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀲𑀓𑁂𑀳𑀺 𑀘𑀸𑀭𑀺𑀢𑁆𑀢𑁂𑀳𑀺. 𑀓𑀺𑀘𑁆𑀘𑀸𑀓𑀺𑀘𑁆𑀘𑁂𑀲𑀼 𑀉𑀲𑁆𑀲𑀼𑀓𑀸𑀢𑀺 𑀓𑀺𑀘𑁆𑀘𑁂𑀲𑀼 ‘‘𑀇𑀤𑀁 𑀓𑀸𑀢𑀩𑁆𑀩𑀁’’, 𑀅𑀓𑀺𑀘𑁆𑀘𑁂𑀲𑀼 ‘‘𑀇𑀤𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀢𑁂 𑀧𑁄𑀭𑀸𑀡𑀸 𑀩𑁆𑀭𑀸𑀳𑁆𑀫𑀡𑀸 𑀏𑀯𑀭𑀽𑀧𑀸 𑀳𑀼𑀢𑁆𑀯𑀸 𑀤𑀲𑁆𑀲𑀦𑀻𑀬𑀸 𑀧𑀲𑀸𑀤𑀦𑀻𑀬𑀸 𑀮𑁄𑀓𑀲𑁆𑀲 𑀧𑀭𑀫𑀤𑀓𑁆𑀔𑀺𑀡𑁂𑀬𑁆𑀬𑀸 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀬𑀸𑀯 𑀮𑁄𑀓𑁂 𑀅𑀯𑀢𑁆𑀢𑀺𑀁𑀲𑀼, 𑀢𑀸𑀯 𑀯𑀺𑀕𑀢𑀈𑀢𑀺𑀪𑀬𑀼𑀧𑀤𑁆𑀤𑀯𑀸 𑀳𑀼𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀓𑀁 𑀲𑀼𑀔𑀁 𑀏𑀥𑀺𑀢𑁆𑀣 𑀧𑀸𑀧𑀼𑀡𑀺, 𑀲𑀼𑀔𑀁 𑀯𑀸 𑀏𑀥𑀺𑀢𑁆𑀣 𑀲𑀼𑀔𑀁 𑀯𑀼𑀟𑁆𑀠𑀺𑀁 𑀅𑀕𑀫𑀸𑀲𑀺. 𑀅𑀬𑀁 𑀧𑀚𑀸𑀢𑀺 𑀲𑀢𑁆𑀢𑀮𑁄𑀓𑀁 𑀦𑀺𑀤𑀲𑁆𑀲𑁂𑀢𑀺.

𑁩𑁦𑁨-𑁩. 𑀓𑀸𑀮𑀘𑁆𑀘𑀬𑁂𑀦 𑀧𑀦 𑀲𑀫𑁆𑀪𑀺𑀦𑁆𑀦𑀫𑀭𑀺𑀬𑀸𑀤𑀪𑀸𑀯𑀁 𑀆𑀧𑀚𑁆𑀚𑀺𑀢𑀼𑀓𑀸𑀫𑀸𑀦𑀁 𑀢𑁂𑀲𑀁 𑀆𑀲𑀺 𑀯𑀺𑀧𑀮𑁆𑀮𑀸𑀲𑁄…𑀧𑁂… 𑀪𑀸𑀕𑀲𑁄 𑀫𑀺𑀢𑁂. 𑀢𑀢𑁆𑀣 𑀯𑀺𑀧𑀮𑁆𑀮𑀸𑀲𑁄𑀢𑀺 𑀯𑀺𑀧𑀭𑀻𑀢𑀲𑀜𑁆𑀜𑀸. 𑀅𑀡𑀼𑀢𑁄 𑀅𑀡𑀼𑀦𑁆𑀢𑀺 𑀮𑀸𑀫𑀓𑀝𑁆𑀞𑁂𑀦 𑀧𑀭𑀺𑀢𑁆𑀢𑀝𑁆𑀞𑁂𑀦 𑀅𑀧𑁆𑀧𑀲𑁆𑀲𑀸𑀤𑀝𑁆𑀞𑁂𑀦 𑀅𑀡𑀼𑀪𑀽𑀢𑀢𑁄 𑀓𑀸𑀫𑀕𑀼𑀡𑀢𑁄 𑀉𑀧𑁆𑀧𑀦𑁆𑀦𑀁 𑀛𑀸𑀦𑀲𑀸𑀫𑀜𑁆𑀜𑀦𑀺𑀩𑁆𑀩𑀸𑀦𑀲𑀼𑀔𑀸𑀦𑀺 𑀉𑀧𑀦𑀺𑀥𑀸𑀬 𑀲𑀗𑁆𑀔𑁆𑀬𑀫𑁆𑀧𑀺 𑀅𑀦𑀼𑀧𑀕𑀫𑀦𑁂𑀦 𑀅𑀡𑀼𑀁 𑀓𑀸𑀫𑀲𑀼𑀔𑀁, 𑀮𑁄𑀓𑀼𑀢𑁆𑀢𑀭𑀲𑀼𑀔𑀁 𑀯𑀸 𑀉𑀧𑀦𑀺𑀥𑀸𑀬 𑀅𑀡𑀼𑀪𑀽𑀢𑀢𑁄 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀲𑀼𑀔𑀢𑁄 𑀅𑀡𑀼𑀁 𑀅𑀧𑁆𑀧𑀓𑀢𑁄𑀧𑀺 𑀅𑀧𑁆𑀧𑀓𑀁 𑀓𑀸𑀫𑀲𑀼𑀔𑀁 𑀤𑀺𑀲𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀸𑀚𑀺𑀦𑁄 𑀘𑀸𑀢𑀺 𑀭𑀜𑁆𑀜𑁄 𑀘. 𑀯𑀺𑀬𑀸𑀓𑀸𑀭𑀦𑁆𑀢𑀺 𑀲𑀫𑁆𑀧𑀢𑁆𑀢𑀺𑀁. 𑀆𑀚𑀜𑁆𑀜𑀲𑀁𑀬𑀼𑀢𑁆𑀢𑁂𑀢𑀺 𑀅𑀲𑁆𑀲𑀸𑀚𑀸𑀦𑀻𑀬𑀲𑀁𑀬𑀼𑀢𑁆𑀢𑁂. 𑀲𑀼𑀓𑀢𑁂𑀢𑀺 𑀤𑀸𑀭𑀼𑀓𑀫𑁆𑀫𑀮𑁄𑀳𑀓𑀫𑁆𑀫𑁂𑀦 𑀲𑀼𑀦𑀺𑀝𑁆𑀞𑀺𑀢𑁂. 𑀘𑀺𑀢𑁆𑀢𑀲𑀺𑀩𑁆𑀩𑀦𑁂𑀢𑀺 𑀲𑀻𑀳𑀘𑀫𑁆𑀫𑀸𑀤𑀻𑀳𑀺 𑀅𑀮𑀗𑁆𑀓𑀭𑀡𑀯𑀲𑁂𑀦 𑀘𑀺𑀢𑁆𑀭𑀲𑀺𑀩𑁆𑀩𑀦𑁂. 𑀦𑀺𑀯𑁂𑀲𑀦𑁂𑀢𑀺 𑀖𑀭𑀯𑀢𑁆𑀣𑀽𑀦𑀺. 𑀦𑀺𑀯𑁂𑀲𑁂𑀢𑀺 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑀺𑀢𑀖𑀭𑀸𑀦𑀺. 𑀯𑀺𑀪𑀢𑁆𑀢𑁂𑀢𑀺 𑀆𑀬𑀸𑀫𑀯𑀺𑀢𑁆𑀣𑀸𑀭𑀯𑀲𑁂𑀦 𑀯𑀺𑀪𑀢𑁆𑀢𑀸𑀦𑀺. 𑀪𑀸𑀕𑀲𑁄 𑀫𑀺𑀢𑁂𑀢𑀺 𑀅𑀗𑁆𑀕𑀡𑀤𑁆𑀯𑀸𑀭𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀺𑀯𑀲𑁂𑀦 𑀓𑁄𑀝𑁆𑀞𑀸𑀲𑀁 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑀫𑀺𑀢𑀸𑀦𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀡𑀼𑀢𑁄 𑀅𑀡𑀼𑀲𑀜𑁆𑀜𑀺𑀢𑀁 𑀓𑀸𑀫𑀲𑀼𑀔𑀜𑁆𑀘 𑀭𑀜𑁆𑀜𑁄 𑀩𑁆𑀬𑀸𑀓𑀸𑀭𑀜𑁆𑀘 𑀅𑀮𑀗𑁆𑀓𑀢𑀦𑀸𑀭𑀺𑀬𑁄 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀭𑀣𑁂 𑀘 𑀦𑀺𑀯𑁂𑀲𑀦𑁂 𑀦𑀺𑀯𑁂𑀲𑁂 𑀘 𑀤𑀺𑀲𑁆𑀯𑀸 𑀤𑀼𑀓𑁆𑀔𑁂𑀲𑀼𑀬𑁂𑀯 𑀏𑀢𑁂𑀲𑀼 𑀯𑀢𑁆𑀣𑀽𑀲𑀼 ‘‘𑀲𑀼𑀔’’𑀦𑁆𑀢𑀺 𑀧𑀯𑀢𑁆𑀢𑀢𑁆𑀢𑀸 𑀧𑀼𑀩𑁆𑀩𑁂 𑀧𑀯𑀢𑁆𑀢𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀲𑀗𑁆𑀔𑀸𑀢𑀸 𑀯𑀺𑀧𑀭𑀻𑀢𑀲𑀜𑁆𑀜𑀸 𑀆𑀲𑀺.

𑁩𑁦𑁪. 𑀢𑁂 𑀏𑀯𑀁 𑀯𑀺𑀧𑀭𑀻𑀢𑀲𑀜𑁆𑀜𑀸 𑀳𑀼𑀢𑁆𑀯𑀸 𑀕𑁄𑀫𑀡𑁆𑀟𑀮𑀧𑀭𑀺𑀩𑁆𑀬𑀽𑀴𑁆𑀳𑀁…𑀧𑁂… 𑀩𑁆𑀭𑀸𑀳𑁆𑀫𑀡𑀸. 𑀢𑀢𑁆𑀣 𑀕𑁄𑀫𑀡𑁆𑀟𑀮𑀧𑀭𑀺𑀩𑁆𑀬𑀽𑀴𑁆𑀳𑀦𑁆𑀢𑀺 𑀕𑁄𑀬𑀽𑀣𑁂𑀳𑀺 𑀧𑀭𑀺𑀓𑀺𑀡𑁆𑀡𑀁. 𑀦𑀸𑀭𑀻𑀯𑀭𑀕𑀡𑀸𑀬𑀼𑀢𑀦𑁆𑀢𑀺 𑀯𑀭𑀦𑀸𑀭𑀻𑀕𑀡𑀲𑀁𑀬𑀼𑀢𑁆𑀢𑀁. 𑀉𑀴𑀸𑀭𑀦𑁆𑀢𑀺 𑀯𑀺𑀧𑀼𑀮𑀁. 𑀫𑀸𑀦𑀼𑀲𑀁 𑀪𑁄𑀕𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀦𑀺𑀯𑁂𑀲𑀦𑀸𑀤𑀺𑀪𑁄𑀕𑀯𑀢𑁆𑀣𑀼𑀁. 𑀅𑀪𑀺𑀚𑁆𑀛𑀸𑀬𑀺𑀁𑀲𑀽𑀢𑀺 ‘‘𑀅𑀳𑁄 𑀯𑀢𑀺𑀤𑀁 𑀅𑀫𑁆𑀳𑀸𑀓𑀁 𑀅𑀲𑁆𑀲𑀸’’𑀢𑀺 𑀢𑀡𑁆𑀳𑀁 𑀯𑀟𑁆𑀠𑁂𑀢𑁆𑀯𑀸 𑀅𑀪𑀺𑀧𑀢𑁆𑀣𑀬𑀫𑀸𑀦𑀸 𑀛𑀸𑀬𑀺𑀁𑀲𑀼.

𑁩𑁦𑁫. 𑀏𑀯𑀁 𑀅𑀪𑀺𑀚𑁆𑀛𑀸𑀬𑀦𑁆𑀢𑀸 𑀘 ‘‘𑀏𑀢𑁂 𑀫𑀦𑀼𑀲𑁆𑀲𑀸 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽 𑀆𑀫𑀼𑀢𑁆𑀢𑀫𑀡𑀺𑀆𑀪𑀭𑀡𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀫𑀬𑀁 𑀧𑀦 𑀏𑀯𑀁 𑀢𑁂𑀳𑀺 𑀦𑀫𑀲𑁆𑀲𑀺𑀬𑀫𑀸𑀦𑀸𑀧𑀺 𑀲𑁂𑀤𑀫𑀮𑀓𑀺𑀮𑀺𑀝𑁆𑀞𑀕𑀢𑁆𑀢𑀸 𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑀸 𑀪𑁄𑀕𑀭𑀳𑀺𑀢𑀸 𑀧𑀭𑀫𑀓𑀸𑀭𑀼𑀜𑁆𑀜𑀢𑀁 𑀧𑀢𑁆𑀢𑀸 𑀯𑀺𑀳𑀭𑀸𑀫. 𑀏𑀢𑁂 𑀘 𑀳𑀢𑁆𑀣𑀺𑀓𑁆𑀔𑀦𑁆𑀥𑀅𑀲𑁆𑀲𑀧𑀺𑀝𑁆𑀞𑀺𑀲𑀺𑀯𑀺𑀓𑀸𑀲𑀼𑀯𑀡𑁆𑀡𑀭𑀣𑀸𑀤𑀻𑀳𑀺 𑀯𑀺𑀘𑀭𑀦𑁆𑀢𑀺, 𑀫𑀬𑀁 𑀧𑀸𑀤𑁂𑀳𑀺. 𑀏𑀢𑁂 𑀤𑁆𑀯𑀺𑀪𑀽𑀫𑀺𑀓𑀸𑀤𑀺𑀧𑀸𑀲𑀸𑀤𑀢𑀮𑁂𑀲𑀼 𑀯𑀲𑀦𑁆𑀢𑀺, 𑀫𑀬𑀁 𑀅𑀭𑀜𑁆𑀜𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼. 𑀏𑀢𑁂 𑀘 𑀕𑁄𑀦𑀓𑀸𑀤𑀻𑀳𑀺 𑀅𑀢𑁆𑀣𑀭𑀡𑁂𑀳𑀺 𑀅𑀢𑁆𑀣𑀢𑀸𑀲𑀼 𑀯𑀭𑀲𑁂𑀬𑁆𑀬𑀸𑀲𑀼 𑀲𑀬𑀦𑁆𑀢𑀺, 𑀫𑀬𑀁 𑀢𑀝𑁆𑀝𑀺𑀓𑀸𑀘𑀫𑁆𑀫𑀔𑀡𑁆𑀟𑀸𑀤𑀻𑀦𑀺 𑀅𑀢𑁆𑀣𑀭𑀺𑀢𑁆𑀯𑀸 𑀪𑀽𑀫𑀺𑀬𑀁. 𑀏𑀢𑁂 𑀦𑀸𑀦𑀸𑀭𑀲𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀦𑁆𑀢𑀺, 𑀫𑀬𑀁 𑀉𑀜𑁆𑀙𑀸𑀘𑀭𑀺𑀬𑀸𑀬 𑀬𑀸𑀧𑁂𑀫. 𑀓𑀣𑀁 𑀦𑀼 𑀔𑁄 𑀫𑀬𑀫𑁆𑀧𑀺 𑀏𑀢𑁂𑀳𑀺 𑀲𑀤𑀺𑀲𑀸 𑀪𑀯𑁂𑀬𑁆𑀬𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀥𑀦𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀦 𑀲𑀓𑁆𑀓𑀸 𑀥𑀦𑀭𑀳𑀺𑀢𑁂𑀳𑀺 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀧𑀸𑀧𑀼𑀡𑀺𑀢𑀼’’𑀦𑁆𑀢𑀺 𑀘 𑀅𑀯𑀥𑀸𑀭𑁂𑀢𑁆𑀯𑀸 𑀯𑁂𑀤𑁂 𑀪𑀺𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀬𑀼𑀢𑁆𑀢𑁂 𑀧𑀼𑀭𑀸𑀡𑀫𑀦𑁆𑀢𑁂 𑀦𑀸𑀲𑁂𑀢𑁆𑀯𑀸 𑀅𑀥𑀫𑁆𑀫𑀬𑀼𑀢𑁆𑀢𑁂 𑀓𑀽𑀝𑀫𑀦𑁆𑀢𑁂 𑀕𑀦𑁆𑀣𑁂𑀢𑁆𑀯𑀸 𑀥𑀦𑀢𑁆𑀣𑀺𑀓𑀸 𑀑𑀓𑁆𑀓𑀸𑀓𑀭𑀸𑀚𑀸𑀦𑀫𑀼𑀧𑀲𑀗𑁆𑀓𑀫𑁆𑀫 𑀲𑁄𑀢𑁆𑀣𑀺𑀯𑀘𑀦𑀸𑀤𑀻𑀦𑀺 𑀧𑀬𑀼𑀜𑁆𑀚𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁, 𑀫𑀳𑀸𑀭𑀸𑀚, 𑀩𑁆𑀭𑀸𑀳𑁆𑀫𑀡𑀯𑀁𑀲𑁂 𑀧𑀯𑁂𑀡𑀺𑀬𑀸 𑀆𑀕𑀢𑀁 𑀧𑁄𑀭𑀸𑀡𑀫𑀦𑁆𑀢𑀧𑀤𑀁 𑀅𑀢𑁆𑀣𑀺, 𑀢𑀁 𑀫𑀬𑀁 𑀆𑀘𑀭𑀺𑀬𑀫𑀼𑀝𑁆𑀞𑀺𑀢𑀸𑀬 𑀦 𑀓𑀲𑁆𑀲𑀘𑀺 𑀪𑀡𑀺𑀫𑁆𑀳𑀸, 𑀢𑀁 𑀫𑀳𑀸𑀭𑀸𑀚𑀸 𑀲𑁄𑀢𑀼𑀫𑀭𑀳𑀢𑀻’’𑀢𑀺 𑀘 𑀯𑀢𑁆𑀯𑀸 𑀅𑀲𑁆𑀲𑀫𑁂𑀥𑀸𑀤𑀺𑀬𑀜𑁆𑀜𑀁 𑀯𑀡𑁆𑀡𑀬𑀺𑀁𑀲𑀼. 𑀯𑀡𑁆𑀡𑀬𑀺𑀢𑁆𑀯𑀸 𑀘 𑀭𑀸𑀚𑀸𑀦𑀁 𑀉𑀲𑁆𑀲𑀸𑀳𑁂𑀦𑁆𑀢𑀸 ‘‘𑀬𑀚, 𑀫𑀳𑀸𑀭𑀸𑀚, 𑀏𑀯𑀁 𑀧𑀳𑀽𑀢𑀥𑀦𑀥𑀜𑁆𑀜𑁄 𑀢𑁆𑀯𑀁, 𑀦𑀢𑁆𑀣𑀺 𑀢𑁂 𑀬𑀜𑁆𑀜𑀲𑀫𑁆𑀪𑀸𑀭𑀯𑁂𑀓𑀮𑁆𑀮𑀁, 𑀏𑀯𑀜𑁆𑀳𑀺 𑀢𑁂 𑀬𑀚𑀢𑁄 𑀲𑀢𑁆𑀢𑀓𑀼𑀮𑀧𑀭𑀺𑀯𑀝𑁆𑀝𑀸 𑀲𑀕𑁆𑀕𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀯𑁄𑀘𑀼𑀁. 𑀢𑁂𑀦 𑀦𑁂𑀲𑀁 𑀢𑀁 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑀪𑀕𑀯𑀸 ‘‘𑀢𑁂 𑀢𑀢𑁆𑀣 𑀫𑀦𑁆𑀢𑁂…𑀧𑁂… 𑀩𑀳𑀼 𑀢𑁂 𑀥𑀦’’𑀦𑁆𑀢𑀺.

𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁, 𑀬𑀁 𑀪𑁄𑀕𑀫𑀪𑀺𑀚𑁆𑀛𑀸𑀬𑀺𑀁𑀲𑀼, 𑀢𑀦𑁆𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀳𑀺 𑀏𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀢𑀤𑀼𑀧𑀸𑀕𑀫𑀼𑀦𑁆𑀢𑀺 𑀢𑀤𑀸 𑀉𑀧𑀸𑀕𑀫𑀼𑀁. 𑀧𑀳𑀽𑀢𑀥𑀦𑀥𑀜𑁆𑀜𑁄𑀲𑀻𑀢𑀺 𑀧𑀳𑀽𑀢𑀥𑀦𑀥𑀜𑁆𑀜𑁄 𑀪𑀯𑀺𑀲𑁆𑀲𑀲𑀺, 𑀅𑀪𑀺𑀲𑀫𑁆𑀧𑀭𑀸𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀲𑀁𑀲𑀸𑀬𑀜𑁆𑀳𑀺 𑀅𑀦𑀸𑀕𑀢𑁂𑀧𑀺 𑀯𑀢𑁆𑀢𑀫𑀸𑀦𑀯𑀘𑀦𑀁 𑀇𑀘𑁆𑀙𑀦𑁆𑀢𑀺 𑀲𑀤𑁆𑀤𑀓𑁄𑀯𑀺𑀤𑀸. 𑀬𑀚𑀲𑁆𑀲𑀽𑀢𑀺 𑀬𑀚𑀸𑀳𑀺. 𑀯𑀺𑀢𑁆𑀢𑀁 𑀥𑀦𑀦𑁆𑀢𑀺 𑀚𑀸𑀢𑀭𑀽𑀧𑀸𑀤𑀺𑀭𑀢𑀦𑀫𑁂𑀯 𑀯𑀺𑀢𑁆𑀢𑀺𑀓𑀸𑀭𑀡𑀢𑁄 𑀯𑀺𑀢𑁆𑀢𑀁, 𑀲𑀫𑀺𑀤𑁆𑀥𑀺𑀓𑀸𑀭𑀡𑀢𑁄 𑀥𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀺𑀢𑁆𑀢𑀦𑁆𑀢𑀺 𑀯𑀺𑀢𑁆𑀢𑀺𑀓𑀸𑀭𑀡𑀪𑀽𑀢𑀫𑁂𑀯 𑀆𑀪𑀭𑀡𑀸𑀤𑀺 𑀉𑀧𑀓𑀭𑀡𑀁, 𑀬𑀁 ‘‘𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁩𑁩𑁧) 𑀆𑀕𑀘𑁆𑀙𑀢𑀺. 𑀥𑀦𑀦𑁆𑀢𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀫𑀦𑁆𑀢𑁂 𑀕𑀦𑁆𑀣𑁂𑀢𑁆𑀯𑀸 𑀢𑀤𑀸 𑀑𑀓𑁆𑀓𑀸𑀓𑀁 𑀉𑀧𑀸𑀕𑀫𑀼𑀁. 𑀓𑀺𑀦𑁆𑀢𑀺? ‘‘𑀫𑀳𑀸𑀭𑀸𑀚, 𑀩𑀳𑀽 𑀢𑁂 𑀯𑀺𑀢𑁆𑀢𑀜𑁆𑀘 𑀥𑀦𑀜𑁆𑀘, 𑀬𑀚𑀲𑁆𑀲𑀼, 𑀆𑀬𑀢𑀺𑀫𑁆𑀧𑀺 𑀧𑀳𑀽𑀢𑀥𑀦𑀥𑀜𑁆𑀜𑁄 𑀪𑀯𑀺𑀲𑁆𑀲𑀲𑀻’’𑀢𑀺.

𑁩𑁦𑁬. 𑀏𑀯𑀁 𑀓𑀸𑀭𑀡𑀁 𑀯𑀢𑁆𑀯𑀸 𑀲𑀜𑁆𑀜𑀸𑀧𑁂𑀦𑁆𑀢𑁂𑀳𑀺 𑀢𑀢𑁄 𑀘 𑀭𑀸𑀚𑀸…𑀧𑁂… 𑀅𑀤𑀸 𑀥𑀦𑀁. 𑀢𑀢𑁆𑀣 𑀲𑀜𑁆𑀜𑀢𑁆𑀢𑁄𑀢𑀺 𑀜𑀸𑀧𑀺𑀢𑁄. 𑀭𑀣𑁂𑀲𑀪𑁄𑀢𑀺 𑀫𑀳𑀸𑀭𑀣𑁂𑀲𑀼 𑀔𑀢𑁆𑀢𑀺𑀬𑁂𑀲𑀼 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀉𑀲𑀪𑀲𑀤𑀺𑀲𑁄. ‘‘𑀅𑀲𑁆𑀲𑀫𑁂𑀥’’𑀦𑁆𑀢𑀺𑀆𑀤𑀻𑀲𑀼 𑀅𑀲𑁆𑀲𑀫𑁂𑀢𑁆𑀣 𑀫𑁂𑀥𑀦𑁆𑀢𑀻𑀢𑀺 𑀅𑀲𑁆𑀲𑀫𑁂𑀥𑁄, 𑀤𑁆𑀯𑀻𑀳𑀺 𑀧𑀭𑀺𑀬𑀜𑁆𑀜𑁂𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀏𑀓𑀯𑀻𑀲𑀢𑀺𑀬𑀽𑀧𑀲𑁆𑀲 𑀞𑀧𑁂𑀢𑁆𑀯𑀸 𑀪𑀽𑀫𑀺𑀜𑁆𑀘 𑀧𑀼𑀭𑀺𑀲𑁂 𑀘 𑀅𑀯𑀲𑁂𑀲𑀲𑀩𑁆𑀩𑀯𑀺𑀪𑀯𑀤𑀓𑁆𑀔𑀺𑀡𑀲𑁆𑀲 𑀬𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀼𑀭𑀺𑀲𑀫𑁂𑀢𑁆𑀣 𑀫𑁂𑀥𑀦𑁆𑀢𑀻𑀢𑀺 𑀧𑀼𑀭𑀺𑀲𑀫𑁂𑀥𑁄, 𑀘𑀢𑀽𑀳𑀺 𑀧𑀭𑀺𑀬𑀜𑁆𑀜𑁂𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀲𑀤𑁆𑀥𑀺𑀁 𑀪𑀽𑀫𑀺𑀬𑀸 𑀅𑀲𑁆𑀲𑀫𑁂𑀥𑁂 𑀯𑀼𑀢𑁆𑀢𑀯𑀺𑀪𑀯𑀤𑀓𑁆𑀔𑀺𑀡𑀲𑁆𑀲 𑀬𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑁆𑀫𑀫𑁂𑀢𑁆𑀣 𑀧𑀸𑀲𑀦𑁆𑀢𑀻𑀢𑀺 𑀲𑀫𑁆𑀫𑀸𑀧𑀸𑀲𑁄, 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀫𑁆𑀫𑀁 𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀧𑀢𑀺𑀢𑁄𑀓𑀸𑀲𑁂 𑀯𑁂𑀤𑀺𑀁 𑀓𑀢𑁆𑀯𑀸 𑀲𑀁𑀳𑀸𑀭𑀺𑀫𑁂𑀳𑀺 𑀬𑀽𑀧𑀸𑀤𑀻𑀳𑀺 𑀲𑀭𑀲𑁆𑀲𑀢𑀺𑀦𑀤𑀺𑀬𑀸 𑀦𑀺𑀫𑀼𑀕𑁆𑀕𑁄𑀓𑀸𑀲𑀢𑁄 𑀧𑀪𑀼𑀢𑀺 𑀧𑀝𑀺𑀮𑁄𑀫𑀁 𑀕𑀘𑁆𑀙𑀦𑁆𑀢𑁂𑀦 𑀬𑀚𑀺𑀢𑀩𑁆𑀩𑀲𑁆𑀲 𑀲𑀢𑁆𑀭𑀬𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀸𑀚𑀫𑁂𑀢𑁆𑀣 𑀧𑀺𑀯𑀦𑁆𑀢𑀻𑀢𑀺 𑀯𑀸𑀚𑀧𑁂𑀬𑁆𑀬𑁄. 𑀏𑀓𑁂𑀦 𑀧𑀭𑀺𑀬𑀜𑁆𑀜𑁂𑀦 𑀲𑀢𑁆𑀢𑀭𑀲𑀳𑀺 𑀧𑀲𑀽𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀩𑁂𑀮𑀼𑀯𑀬𑀽𑀧𑀲𑁆𑀲 𑀲𑀢𑁆𑀢𑀭𑀲𑀓𑀤𑀓𑁆𑀔𑀺𑀡𑀲𑁆𑀲 𑀬𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀦𑀢𑁆𑀣𑀺 𑀏𑀢𑁆𑀣 𑀅𑀕𑁆𑀕𑀴𑀸𑀢𑀺 𑀦𑀺𑀭𑀕𑁆𑀕𑀴𑁄, 𑀦𑀯𑀳𑀺 𑀧𑀭𑀺𑀬𑀜𑁆𑀜𑁂𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀲𑀤𑁆𑀥𑀺𑀁 𑀪𑀽𑀫𑀺𑀬𑀸 𑀘 𑀧𑀼𑀭𑀺𑀲𑁂𑀳𑀺 𑀘 𑀅𑀲𑁆𑀲𑀫𑁂𑀥𑁂 𑀯𑀼𑀢𑁆𑀢𑀯𑀺𑀪𑀯𑀤𑀓𑁆𑀔𑀺𑀡𑀲𑁆𑀲 𑀲𑀩𑁆𑀩𑀫𑁂𑀥𑀧𑀭𑀺𑀬𑀸𑀬𑀦𑀸𑀫𑀲𑁆𑀲 𑀅𑀲𑁆𑀲𑀫𑁂𑀥𑀯𑀺𑀓𑀧𑁆𑀧𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑁩𑁦𑁭-𑁮. 𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 ‘‘𑀩𑁆𑀭𑀸𑀳𑁆𑀫𑀡𑀸𑀦𑀫𑀤𑀸 𑀥𑀦’’𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀕𑀸𑀯𑁄 𑀲𑀬𑀦𑀜𑁆𑀘𑀸’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀲𑁄 𑀳𑀺 𑀭𑀸𑀚𑀸 ‘‘𑀤𑀻𑀖𑀭𑀢𑁆𑀢𑀁 𑀮𑀽𑀔𑀸𑀳𑀸𑀭𑁂𑀦 𑀓𑀺𑀮𑀦𑁆𑀢𑀸 𑀧𑀜𑁆𑀘 𑀕𑁄𑀭𑀲𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀦𑁂𑀲𑀁 𑀲𑀧𑀼𑀗𑁆𑀕𑀯𑀸𑀦𑀺 𑀕𑁄𑀬𑀽𑀣𑀸𑀦𑁂𑀯 𑀅𑀤𑀸𑀲𑀺, 𑀢𑀣𑀸 ‘‘𑀤𑀻𑀖𑀭𑀢𑁆𑀢𑀁 𑀣𑀡𑁆𑀟𑀺𑀮𑀲𑀸𑀬𑀺𑀢𑀸𑀬 𑀣𑀽𑀮𑀲𑀸𑀝𑀓𑀦𑀺𑀯𑀸𑀲𑀦𑁂𑀦 𑀏𑀓𑀲𑁂𑀬𑁆𑀬𑀸𑀬 𑀧𑀸𑀤𑀘𑀸𑀭𑁂𑀦 𑀭𑀼𑀓𑁆𑀔𑀫𑀽𑀮𑀸𑀤𑀺𑀯𑀸𑀲𑁂𑀦 𑀘 𑀓𑀺𑀮𑀦𑁆𑀢𑀸 𑀕𑁄𑀦𑀓𑀸𑀤𑀺𑀅𑀢𑁆𑀣𑀢𑀯𑀭𑀲𑀬𑀦𑀸𑀤𑀻𑀲𑀼 𑀲𑀼𑀔𑀁 𑀅𑀦𑀼𑀪𑁄𑀦𑁆𑀢𑀽’’𑀢𑀺 𑀦𑁂𑀲𑀁 𑀫𑀳𑀕𑁆𑀖𑀸𑀦𑀺 𑀲𑀬𑀦𑀸𑀤𑀻𑀦𑀺 𑀘 𑀅𑀤𑀸𑀲𑀺. 𑀏𑀯𑀫𑁂𑀢𑀁 𑀦𑀸𑀦𑀧𑁆𑀧𑀓𑀸𑀭𑀓𑀁 𑀅𑀜𑁆𑀜𑀜𑁆𑀘 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀥𑀦𑀁 𑀅𑀤𑀸𑀲𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀕𑀸𑀯𑁄 𑀲𑀬𑀦𑀜𑁆𑀘 𑀯𑀢𑁆𑀣𑀜𑁆𑀘…𑀧𑁂… 𑀩𑁆𑀭𑀸𑀳𑁆𑀫𑀡𑀸𑀦𑀫𑀤𑀸 𑀥𑀦’’𑀦𑁆𑀢𑀺.

𑁩𑁦𑁯-𑁧𑁦. 𑀏𑀯𑀁 𑀢𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀢𑁂 𑀘 𑀢𑀢𑁆𑀣…𑀧𑁂… 𑀧𑀼𑀦 𑀫𑀼𑀧𑀸𑀕𑀫𑀼𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀢𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀢𑁂𑀲𑀼 𑀬𑀸𑀕𑁂𑀲𑀼 𑀥𑀦𑀁 𑀮𑀪𑀺𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀯𑀫𑁂𑀯 𑀖𑀸𑀲𑀘𑁆𑀙𑀸𑀤𑀦𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀓𑀁 𑀯𑀢𑁆𑀣𑀼𑀓𑀸𑀫 𑀲𑀦𑁆𑀦𑀺𑀥𑀺𑀁𑀲𑀫𑀭𑁄𑀘𑀬𑀼𑀁. 𑀢𑀢𑁄 𑀢𑁂𑀲𑀁 𑀇𑀘𑁆𑀙𑀸𑀯𑀢𑀺𑀡𑁆𑀡𑀸𑀦𑀁 𑀔𑀻𑀭𑀸𑀤𑀺𑀧𑀜𑁆𑀘𑀕𑁄𑀭𑀲𑀲𑁆𑀲𑀸𑀤𑀯𑀲𑁂𑀦 𑀭𑀲𑀢𑀡𑁆𑀳𑀸𑀬 𑀑𑀢𑀺𑀡𑁆𑀡𑀘𑀺𑀢𑁆𑀢𑀸𑀦𑀁 ‘‘𑀔𑀻𑀭𑀸𑀤𑀻𑀦𑀺𑀧𑀺 𑀢𑀸𑀯 𑀕𑀼𑀦𑁆𑀦𑀁 𑀲𑀸𑀤𑀽𑀦𑀺, 𑀅𑀤𑁆𑀥𑀸 𑀇𑀫𑀸𑀲𑀁 𑀫𑀁𑀲𑀁 𑀲𑀸𑀤𑀼𑀢𑀭𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀫𑀁𑀲𑀁 𑀧𑀝𑀺𑀘𑁆𑀘 𑀪𑀺𑀬𑁆𑀬𑁄 𑀢𑀡𑁆𑀳𑀸 𑀧𑀯𑀟𑁆𑀠𑀣. 𑀢𑀢𑁄 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀲𑀘𑁂 𑀫𑀬𑀁 𑀫𑀸𑀭𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫, 𑀕𑀸𑀭𑀬𑁆𑀳𑀸 𑀪𑀯𑀺𑀲𑁆𑀲𑀸𑀫, 𑀬𑀁𑀦𑀽𑀦 𑀫𑀦𑁆𑀢𑁂 𑀕𑀦𑁆𑀣𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀧𑀼𑀦𑀧𑀺 𑀯𑁂𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑁂 𑀢𑁂 𑀢𑀢𑁆𑀣 𑀫𑀦𑁆𑀢𑁂 𑀕𑀦𑁆𑀣𑁂𑀢𑁆𑀯𑀸 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀢𑀦𑁆𑀦𑀺𑀫𑀺𑀢𑁆𑀢𑀁 𑀓𑀽𑀝𑀫𑀦𑁆𑀢𑁂 𑀕𑀦𑁆𑀣𑁂𑀢𑁆𑀯𑀸 𑀑𑀓𑁆𑀓𑀸𑀓𑀭𑀸𑀚𑀸𑀦𑀁 𑀧𑀼𑀦 𑀉𑀧𑀸𑀕𑀫𑀺𑀁𑀲𑀼. 𑀇𑀫𑀫𑀢𑁆𑀣𑀁 𑀪𑀸𑀲𑀫𑀸𑀦𑀸 ‘‘𑀬𑀣𑀸 𑀆𑀧𑁄 𑀘…𑀧𑁂… 𑀩𑀳𑀼 𑀢𑁂 𑀥𑀦’’𑀦𑁆𑀢𑀺.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀅𑀫𑁆𑀳𑀸𑀓𑀁, 𑀫𑀳𑀸𑀭𑀸𑀚, 𑀫𑀦𑁆𑀢𑁂𑀲𑀼 𑀏𑀢𑀤𑀸𑀕𑀢𑀁 𑀬𑀣𑀸 𑀆𑀧𑁄 𑀳𑀢𑁆𑀣𑀥𑁄𑀯𑀦𑀸𑀤𑀺𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀧𑀸𑀡𑀻𑀦𑀁 𑀉𑀧𑀬𑁄𑀕𑀁 𑀕𑀘𑁆𑀙𑀢𑀺, 𑀦𑀢𑁆𑀣𑀺 𑀢𑁂𑀲𑀁 𑀢𑀢𑁄𑀦𑀺𑀤𑀸𑀦𑀁 𑀧𑀸𑀧𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀧𑀭𑀺𑀓𑁆𑀔𑀸𑀭𑁄 𑀲𑁄 𑀳𑀺 𑀧𑀸𑀡𑀺𑀦𑀁, 𑀉𑀧𑀓𑀭𑀡𑀢𑁆𑀣𑀸𑀬 𑀉𑀧𑁆𑀧𑀦𑁆𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀘𑀸𑀬𑀁 𑀫𑀳𑀸𑀧𑀣𑀯𑀻 𑀕𑀫𑀦𑀝𑁆𑀞𑀸𑀦𑀸𑀤𑀺𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀓𑀳𑀸𑀧𑀡𑀲𑀗𑁆𑀔𑀸𑀢𑀁 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀪𑁂𑀤𑀁 𑀥𑀦𑀁, 𑀬𑀯𑀕𑁄𑀥𑀽𑀫𑀸𑀤𑀺𑀪𑁂𑀤𑀁 𑀥𑀸𑀦𑀺𑀬𑀜𑁆𑀘, 𑀲𑀁𑀯𑁄𑀳𑀸𑀭𑀸𑀤𑀺𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀉𑀧𑀬𑁄𑀕𑀁 𑀕𑀘𑁆𑀙𑀢𑀺, 𑀏𑀯𑀁 𑀕𑀸𑀯𑁄 𑀫𑀦𑀼𑀲𑁆𑀲𑀸𑀦𑀁 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀉𑀧𑀬𑁄𑀕𑀕𑀫𑀦𑀢𑁆𑀣𑀸𑀬 𑀉𑀧𑁆𑀧𑀦𑁆𑀦𑀸. 𑀢𑀲𑁆𑀫𑀸 𑀏𑀢𑀸 𑀳𑀦𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀓𑁂 𑀬𑀸𑀕𑁂 𑀬𑀚𑀲𑁆𑀲𑀼 𑀩𑀳𑀼 𑀢𑁂 𑀯𑀺𑀢𑁆𑀢𑀁, 𑀬𑀚𑀲𑁆𑀲𑀼 𑀩𑀳𑀼 𑀢𑁂 𑀥𑀦𑀦𑁆𑀢𑀺.

𑁩𑁧𑁧-𑁧𑁨. 𑀏𑀯𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀢𑁄 𑀘 𑀭𑀸𑀚𑀸…𑀧𑁂… 𑀅𑀖𑀸𑀢𑀬𑀺, 𑀬𑀁 𑀢𑀢𑁄 𑀧𑀼𑀩𑁆𑀩𑁂 𑀓𑀜𑁆𑀘𑀺 𑀲𑀢𑁆𑀢𑀁 𑀦 𑀧𑀸𑀤𑀸…𑀧𑁂… 𑀖𑀸𑀢𑀬𑀺. 𑀢𑀤𑀸 𑀓𑀺𑀭 𑀩𑁆𑀭𑀸𑀳𑁆𑀫𑀡𑀸 𑀬𑀜𑁆𑀜𑀸𑀯𑀸𑀝𑀁 𑀕𑀸𑀯𑀻𑀦𑀁 𑀧𑀽𑀭𑁂𑀢𑁆𑀯𑀸 𑀫𑀗𑁆𑀕𑀮𑀉𑀲𑀪𑀁 𑀩𑀦𑁆𑀥𑀺𑀢𑁆𑀯𑀸 𑀭𑀜𑁆𑀜𑁄 𑀫𑀽𑀮𑀁 𑀦𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀕𑁄𑀫𑁂𑀥𑀬𑀜𑁆𑀜𑀁 𑀬𑀚𑀲𑁆𑀲𑀼, 𑀏𑀯𑀁 𑀢𑁂 𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀓𑀢𑀫𑀗𑁆𑀕𑀮𑀓𑀺𑀘𑁆𑀘𑁄 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀼𑀗𑁆𑀕𑀯𑁂𑀦 𑀲𑀳 𑀅𑀦𑁂𑀓𑀲𑀢𑀲𑀳𑀲𑁆𑀲𑀸 𑀕𑀸𑀯𑁄 𑀫𑀸𑀭𑁂𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀬𑀜𑁆𑀜𑀸𑀯𑀸𑀝𑁂 𑀫𑀁𑀲𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀔𑀸𑀤𑀺𑀁𑀲𑀼, 𑀧𑀻𑀢𑀓𑁄𑀤𑀸𑀢𑀭𑀢𑁆𑀢𑀓𑀫𑁆𑀩𑀮𑁂 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀫𑀸𑀭𑁂𑀲𑀼𑀁. 𑀢𑀤𑀼𑀧𑀸𑀤𑀸𑀬 𑀓𑀺𑀭 𑀕𑀸𑀯𑁄 𑀧𑀸𑀭𑀼𑀢𑁂 𑀤𑀺𑀲𑁆𑀯𑀸 𑀉𑀩𑁆𑀩𑀺𑀚𑁆𑀚𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀦 𑀧𑀸𑀤𑀸…𑀧𑁂… 𑀖𑀸𑀢𑀬𑀻’’𑀢𑀺.

𑁩𑁧𑁩. 𑀢𑀢𑁄 𑀤𑁂𑀯𑀸𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀭𑀸𑀚𑀺𑀦𑀺 𑀕𑀸𑀯𑀺𑀬𑁄 𑀖𑀸𑀢𑁂𑀢𑀼𑀫𑀸𑀭𑀤𑁆𑀥𑁂 𑀅𑀣 𑀢𑀤𑀦𑀦𑁆𑀢𑀭𑀫𑁂𑀯 𑀢𑀁 𑀕𑁄𑀖𑀸𑀢𑀓𑀁 𑀤𑀺𑀲𑁆𑀯𑀸 𑀏𑀢𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀬𑁄 𑀤𑁂𑀯𑀸 𑀘, 𑀧𑀺𑀢𑀭𑁄𑀢𑀺 𑀩𑁆𑀭𑀸𑀳𑁆𑀫𑀡𑁂𑀲𑀼 𑀮𑀤𑁆𑀥𑀯𑁄𑀳𑀸𑀭𑀸 𑀩𑁆𑀭𑀳𑁆𑀫𑀸𑀦𑁄 𑀘, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀘, 𑀧𑀩𑁆𑀩𑀢𑀧𑀸𑀤𑀦𑀺𑀯𑀸𑀲𑀺𑀦𑁄 𑀤𑀸𑀦𑀯𑀬𑀓𑁆𑀔𑀲𑀜𑁆𑀜𑀺𑀢𑀸 𑀅𑀲𑀼𑀭𑀭𑀓𑁆𑀔𑀲𑀸 𑀘 ‘‘𑀅𑀥𑀫𑁆𑀫𑁄 𑀅𑀥𑀫𑁆𑀫𑁄’’𑀢𑀺 𑀏𑀯𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑀸 ‘‘𑀥𑀺 𑀫𑀦𑀼𑀲𑁆𑀲𑀸, 𑀥𑀺 𑀫𑀦𑀼𑀲𑁆𑀲𑀸’’𑀢𑀺 𑀘 𑀯𑀤𑀦𑁆𑀢𑀸 𑀧𑀓𑁆𑀓𑀦𑁆𑀤𑀼𑀁. 𑀏𑀯𑀁 𑀪𑀽𑀫𑀺𑀢𑁄 𑀧𑀪𑀼𑀢𑀺 𑀲𑁄 𑀲𑀤𑁆𑀤𑁄 𑀫𑀼𑀳𑀼𑀢𑁆𑀢𑁂𑀦 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀅𑀕𑀫𑀸𑀲𑀺, 𑀏𑀓𑀥𑀺𑀓𑁆𑀓𑀸𑀭𑀧𑀭𑀺𑀧𑀼𑀡𑁆𑀡𑁄 𑀮𑁄𑀓𑁄 𑀅𑀳𑁄𑀲𑀺. 𑀓𑀺𑀁 𑀓𑀸𑀭𑀡𑀁? 𑀬𑀁 𑀲𑀢𑁆𑀣𑀁 𑀦𑀺𑀧𑀢𑀻 𑀕𑀯𑁂, 𑀬𑀲𑁆𑀫𑀸 𑀕𑀸𑀯𑀺𑀫𑁆𑀳𑀺 𑀲𑀢𑁆𑀣𑀁 𑀦𑀺𑀧𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁧𑁪. 𑀦 𑀓𑁂𑀯𑀮𑀜𑁆𑀘 𑀤𑁂𑀯𑀸𑀤𑀬𑁄 𑀧𑀓𑁆𑀓𑀦𑁆𑀤𑀼𑀁, 𑀅𑀬𑀫𑀜𑁆𑀜𑁄𑀧𑀺 𑀮𑁄𑀓𑁂 𑀅𑀦𑀢𑁆𑀣𑁄 𑀉𑀤𑀧𑀸𑀤𑀺 𑁋 𑀬𑁂 𑀳𑀺 𑀢𑁂 𑀢𑀬𑁄 𑀭𑁄𑀕𑀸 𑀧𑀼𑀭𑁂 𑀆𑀲𑀼𑀁, 𑀇𑀘𑁆𑀙𑀸 𑀅𑀦𑀲𑀦𑀁 𑀚𑀭𑀸, 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺𑀤𑁂𑀯 𑀧𑀢𑁆𑀣𑀦𑀢𑀡𑁆𑀳𑀸 𑀘 𑀔𑀼𑀤𑀸 𑀘 𑀧𑀭𑀺𑀧𑀸𑀓𑀚𑀭𑀸 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀧𑀲𑀽𑀦𑀜𑁆𑀘 𑀲𑀫𑀸𑀭𑀫𑁆𑀪𑀸, 𑀅𑀝𑁆𑀞𑀸𑀦𑀯𑀼𑀢𑀺𑀫𑀸𑀕𑀫𑀼𑀁, 𑀘𑀓𑁆𑀔𑀼𑀭𑁄𑀕𑀸𑀤𑀺𑀦𑀸 𑀪𑁂𑀤𑁂𑀦 𑀅𑀝𑁆𑀞𑀦𑀯𑀼𑀢𑀺𑀪𑀸𑀯𑀁 𑀧𑀸𑀧𑀼𑀡𑀺𑀁𑀲𑀽𑀢𑀺 𑀅𑀢𑁆𑀣𑁄.

𑁩𑁧𑁫. 𑀇𑀤𑀸𑀦𑀺 𑀪𑀕𑀯𑀸 𑀢𑀁 𑀧𑀲𑀼𑀲𑀫𑀸𑀭𑀫𑁆𑀪𑀁 𑀦𑀺𑀦𑁆𑀤𑀦𑁆𑀢𑁄 𑀆𑀳 ‘‘𑀏𑀲𑁄 𑀅𑀥𑀫𑁆𑀫𑁄’’𑀢𑀺. 𑀢𑀲𑁆𑀲𑀢𑁆𑀣𑁄 𑀏𑀲𑁄 𑀧𑀲𑀼𑀲𑀫𑀸𑀭𑀫𑁆𑀪𑀲𑀗𑁆𑀔𑀸𑀢𑁄 𑀓𑀸𑀬𑀤𑀡𑁆𑀟𑀸𑀤𑀻𑀦𑀁 𑀢𑀺𑀡𑁆𑀡𑀁 𑀤𑀡𑁆𑀟𑀸𑀦𑀁 𑀅𑀜𑁆𑀜𑀢𑀭𑀤𑀡𑁆𑀟𑀪𑀽𑀢𑁄 𑀥𑀫𑁆𑀫𑀢𑁄 𑀅𑀧𑁂𑀢𑀢𑁆𑀢𑀸 𑀅𑀥𑀫𑁆𑀫𑁄 𑀑𑀓𑁆𑀓𑀦𑁆𑀢𑁄 𑀅𑀳𑀼, 𑀧𑀯𑀢𑁆𑀢𑁄 𑀆𑀲𑀺, 𑀲𑁄 𑀘 𑀔𑁄 𑀢𑀢𑁄 𑀧𑀪𑀼𑀢𑀺 𑀧𑀯𑀢𑁆𑀢𑀢𑁆𑀢𑀸 𑀧𑀼𑀭𑀸𑀡𑁄, 𑀬𑀲𑁆𑀲 𑀑𑀓𑁆𑀓𑀫𑀦𑀢𑁄 𑀧𑀪𑀼𑀢𑀺 𑀓𑁂𑀦𑀘𑀺 𑀧𑀸𑀤𑀸𑀤𑀺𑀦𑀸 𑀅𑀳𑀺𑀁𑀲𑀦𑀢𑁄 𑀅𑀤𑀽𑀲𑀺𑀓𑀸𑀬𑁄 𑀕𑀸𑀯𑁄 𑀳𑀜𑁆𑀜𑀦𑁆𑀢𑀺. 𑀬𑀸 𑀖𑀸𑀢𑁂𑀦𑁆𑀢𑀸 𑀥𑀫𑁆𑀫𑀸 𑀥𑀁𑀲𑀦𑁆𑀢𑀺 𑀘𑀯𑀦𑁆𑀢𑀺 𑀧𑀭𑀺𑀳𑀸𑀬𑀦𑁆𑀢𑀺 𑀬𑀸𑀚𑀓𑀸 𑀬𑀜𑁆𑀜𑀬𑀸𑀚𑀺𑀦𑁄 𑀚𑀦𑀸𑀢𑀺.

𑁩𑁧𑁬. 𑀏𑀯𑀫𑁂𑀲𑁄 𑀅𑀡𑀼𑀥𑀫𑁆𑀫𑁄𑀢𑀺 𑀏𑀯𑀁 𑀏𑀲𑁄 𑀮𑀸𑀫𑀓𑀥𑀫𑁆𑀫𑁄 𑀳𑀻𑀦𑀥𑀫𑁆𑀫𑁄, 𑀅𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀫𑀸 𑀯𑀸 𑀏𑀢𑁆𑀣 𑀤𑀸𑀦𑀥𑀫𑁆𑀫𑁄𑀧𑀺 𑀅𑀧𑁆𑀧𑀓𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀡𑀼𑀥𑀫𑁆𑀫𑁄’’𑀢𑀺. 𑀧𑁄𑀭𑀸𑀡𑁄𑀢𑀺 𑀢𑀸𑀯 𑀘𑀺𑀭𑀓𑀸𑀮𑀢𑁄 𑀧𑀪𑀼𑀢𑀺 𑀧𑀯𑀢𑁆𑀢𑀢𑁆𑀢𑀸 𑀧𑁄𑀭𑀸𑀡𑁄. 𑀯𑀺𑀜𑁆𑀜𑀽𑀳𑀺 𑀧𑀦 𑀕𑀭𑀳𑀺𑀢𑀢𑁆𑀢𑀸 𑀯𑀺𑀜𑁆𑀜𑀽𑀕𑀭𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀘 𑀯𑀺𑀜𑁆𑀜𑀼𑀕𑀭𑀳𑀺𑀢𑁄, 𑀢𑀲𑁆𑀫𑀸 𑀬𑀢𑁆𑀣 𑀏𑀤𑀺𑀲𑀓𑀁 𑀧𑀲𑁆𑀲𑀢𑀺, 𑀬𑀸𑀚𑀓𑀁 𑀕𑀭𑀳𑀢𑀻 𑀚𑀦𑁄. 𑀓𑀣𑀁? ‘‘𑀅𑀩𑁆𑀩𑀼𑀤𑀁 𑀩𑁆𑀭𑀸𑀳𑁆𑀫𑀡𑁂𑀳𑀺 𑀉𑀧𑁆𑀧𑀸𑀤𑀺𑀢𑀁, 𑀕𑀸𑀯𑁄 𑀯𑀥𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀻𑀦𑀺 𑀯𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀲𑁆𑀲𑀯𑁄.

𑁩𑁧𑁭. 𑀏𑀯𑀁 𑀥𑀫𑁆𑀫𑁂 𑀯𑀺𑀬𑀸𑀧𑀦𑁆𑀦𑁂𑀢𑀺 𑀏𑀯𑀁 𑀧𑁄𑀭𑀸𑀡𑁂 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂 𑀦𑀝𑁆𑀞𑁂. ‘‘𑀯𑀺𑀬𑀸𑀯𑀢𑁆𑀢𑁂’’𑀢𑀺𑀧𑀺 𑀧𑀸𑀞𑁄, 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀜𑁆𑀜𑀣𑀸 𑀪𑀽𑀢𑁂𑀢𑀺 𑀅𑀢𑁆𑀣𑁄. 𑀯𑀺𑀪𑀺𑀦𑁆𑀦𑀸 𑀲𑀼𑀤𑁆𑀤𑀯𑁂𑀲𑁆𑀲𑀺𑀓𑀸𑀢𑀺 𑀧𑀼𑀩𑁆𑀩𑁂 𑀲𑀫𑀕𑁆𑀕𑀸 𑀯𑀺𑀳𑀭𑀦𑁆𑀢𑀸 𑀲𑀼𑀤𑁆𑀤𑀸 𑀘 𑀯𑁂𑀲𑁆𑀲𑀸 𑀘 𑀢𑁂 𑀯𑀺𑀪𑀺𑀦𑁆𑀦𑀸. 𑀧𑀼𑀣𑀽 𑀯𑀺𑀪𑀺𑀦𑁆𑀦𑀸 𑀔𑀢𑁆𑀢𑀺𑀬𑀸𑀢𑀺 𑀔𑀢𑁆𑀢𑀺𑀬𑀸𑀧𑀺 𑀩𑀳𑀽 𑀅𑀜𑁆𑀜𑀫𑀜𑁆𑀜𑀁 𑀪𑀺𑀦𑁆𑀦𑀸. 𑀧𑀢𑀺𑀁 𑀪𑀭𑀺𑀬𑀸𑀯𑀫𑀜𑁆𑀜𑀣𑀸𑀢𑀺 𑀪𑀭𑀺𑀬𑀸 𑀘 𑀖𑀭𑀸𑀯𑀸𑀲𑀢𑁆𑀣𑀁 𑀇𑀲𑁆𑀲𑀭𑀺𑀬𑀩𑀮𑁂 𑀞𑀧𑀺𑀢𑀸 𑀧𑀼𑀢𑁆𑀢𑀩𑀮𑀸𑀤𑀻𑀳𑀺 𑀉𑀧𑁂𑀢𑀸 𑀳𑀼𑀢𑁆𑀯𑀸 𑀧𑀢𑀺𑀁 𑀅𑀯𑀫𑀜𑁆𑀜𑀣, 𑀧𑀭𑀺𑀪𑀯𑀺 𑀅𑀯𑀫𑀜𑁆𑀜𑀺 𑀦 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀸𑀲𑀺.

𑁩𑁧𑁮. 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀪𑀺𑀦𑁆𑀦𑀸 𑀲𑀫𑀸𑀦𑀸 𑀔𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀩𑀦𑁆𑀥𑀽 𑀘…𑀧𑁂… 𑀓𑀸𑀫𑀸𑀦𑀁 𑀯𑀲𑀫𑀦𑁆𑀯𑀕𑀼𑀦𑁆𑀢𑀺. 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀬𑁂 𑀘𑀜𑁆𑀜𑁂 𑀯𑁂𑀲𑁆𑀲𑀲𑀼𑀤𑁆𑀤𑀸 𑀬𑀣𑀸 𑀲𑀗𑁆𑀓𑀭𑀁 𑀦𑀸𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑁄𑀢𑁆𑀢𑁂𑀦 𑀭𑀓𑁆𑀔𑀺𑀢𑀢𑁆𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸. 𑀢𑁂 𑀲𑀩𑁆𑀩𑁂𑀧𑀺 𑀢𑀁 𑀚𑀸𑀢𑀺𑀯𑀸𑀤𑀁 𑀦𑀺𑀭𑀁𑀓𑀢𑁆𑀯𑀸, ‘‘𑀅𑀳𑀁 𑀔𑀢𑁆𑀢𑀺𑀬𑁄, 𑀅𑀳𑀁 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀏𑀢𑀁 𑀲𑀩𑁆𑀩𑀫𑁆𑀧𑀺 𑀦𑀸𑀲𑁂𑀢𑁆𑀯𑀸 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀸𑀦𑀁 𑀓𑀸𑀫𑀸𑀦𑀁 𑀯𑀲𑀁 𑀅𑀦𑁆𑀯𑀕𑀼𑀁 𑀆𑀲𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀓𑀸𑀫𑀳𑁂𑀢𑀼 𑀦 𑀓𑀺𑀜𑁆𑀘𑀺 𑀅𑀓𑀢𑁆𑀢𑀩𑁆𑀩𑀁 𑀦𑀸𑀓𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀫𑁂𑀢𑁆𑀣 𑀪𑀕𑀯𑀸 ‘‘𑀇𑀲𑀬𑁄 𑀧𑀼𑀩𑁆𑀩𑀓𑀸’’𑀢𑀺𑀆𑀤𑀻𑀳𑀺 𑀦𑀯𑀳𑀺 𑀕𑀸𑀣𑀸𑀳𑀺 𑀧𑁄𑀭𑀸𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 ‘‘𑀬𑁄 𑀦𑁂𑀲𑀁 𑀧𑀭𑀫𑁄’’𑀢𑀺 𑀕𑀸𑀣𑀸𑀬 𑀩𑁆𑀭𑀳𑁆𑀫𑀲𑀫𑀁, ‘‘𑀢𑀲𑁆𑀲 𑀯𑀢𑁆𑀢𑀫𑀦𑀼𑀲𑀺𑀓𑁆𑀔𑀦𑁆𑀢𑀸’’𑀢𑀺 𑀕𑀸𑀣𑀸𑀬 𑀤𑁂𑀯𑀲𑀫𑀁, ‘‘𑀢𑀡𑁆𑀟𑀼𑀮𑀁 𑀲𑀬𑀦’’𑀦𑁆𑀢𑀺𑀆𑀤𑀺𑀓𑀸𑀳𑀺 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀫𑀭𑀺𑀬𑀸𑀤𑀁, ‘‘𑀢𑁂𑀲𑀁 𑀆𑀲𑀺 𑀯𑀺𑀧𑀮𑁆𑀮𑀸𑀲𑁄’’𑀢𑀺𑀆𑀤𑀻𑀳𑀺 𑀲𑀢𑁆𑀢𑀭𑀲𑀳𑀺 𑀕𑀸𑀣𑀸𑀳𑀺 𑀲𑀫𑁆𑀪𑀺𑀦𑁆𑀦𑀫𑀭𑀺𑀬𑀸𑀤𑀁, 𑀢𑀲𑁆𑀲 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀤𑁂𑀯𑀸𑀤𑀻𑀦𑀁 𑀧𑀓𑁆𑀓𑀦𑁆𑀤𑀦𑀸𑀤𑀺𑀤𑀻𑀧𑀦𑀢𑁆𑀣𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑀘𑀡𑁆𑀟𑀸𑀮𑁄 𑀧𑀦 𑀇𑀥 𑀅𑀯𑀼𑀢𑁆𑀢𑁄𑀬𑁂𑀯. 𑀓𑀲𑁆𑀫𑀸? 𑀬𑀲𑁆𑀫𑀸 𑀯𑀺𑀧𑀢𑁆𑀢𑀺𑀬𑀸 𑀅𑀓𑀸𑀭𑀡𑀁. 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑀸 𑀳𑀺 𑀩𑁆𑀭𑀳𑁆𑀫𑀲𑀫𑀤𑁂𑀯𑀲𑀫𑀫𑀭𑀺𑀬𑀸𑀤𑀸 𑀓𑀸𑀭𑀡𑀁 𑀳𑁄𑀦𑁆𑀢𑀺, 𑀯𑀺𑀧𑀢𑁆𑀢𑀺𑀬𑀸 𑀲𑀫𑁆𑀪𑀺𑀦𑁆𑀦𑀫𑀭𑀺𑀬𑀸𑀤𑁄. 𑀅𑀬𑀁 𑀧𑀦 𑀤𑁄𑀡𑀲𑀼𑀢𑁆𑀢𑁂 (𑀅. 𑀦𑀺. 𑁫.𑁧𑁯𑁨) 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑀘𑀡𑁆𑀟𑀸𑀮𑁄 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀯𑀺𑀧𑀢𑁆𑀢𑀺𑀬𑀸𑀧𑀺 𑀅𑀓𑀸𑀭𑀡𑀁. 𑀓𑀲𑁆𑀫𑀸? 𑀯𑀺𑀧𑀦𑁆𑀦𑁂 𑀥𑀫𑁆𑀫𑁂 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀢𑀲𑁆𑀫𑀸 𑀢𑀁 𑀅𑀤𑀲𑁆𑀲𑁂𑀢𑁆𑀯𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀏𑀢𑀭𑀳𑀺 𑀧𑀦 𑀲𑁄𑀧𑀺 𑀩𑁆𑀭𑀸𑀳𑁆𑀫𑀡𑀘𑀡𑁆𑀟𑀸𑀮𑁄 𑀤𑀼𑀮𑁆𑀮𑀪𑁄. 𑀏𑀯𑀫𑀬𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀥𑀫𑁆𑀫𑁄 𑀯𑀺𑀦𑀝𑁆𑀞𑁄. 𑀢𑁂𑀦𑁂𑀯𑀸𑀳 𑀤𑁄𑀡𑁄 𑀩𑁆𑀭𑀸𑀳𑁆𑀫𑀡𑁄 𑁋 ‘‘𑀏𑀯𑀁 𑀲𑀦𑁆𑀢𑁂 𑀫𑀬𑀁, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀘𑀡𑁆𑀟𑀸𑀮𑀫𑁆𑀧𑀺 𑀦 𑀧𑀽𑀭𑁂𑀫𑀸’’𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.