𑁬. 𑀓𑀧𑀺𑀮𑀲𑀼𑀢𑁆𑀢-(𑀥𑀫𑁆𑀫𑀘𑀭𑀺𑀬𑀲𑀼𑀢𑁆𑀢)-𑀯𑀡𑁆𑀡𑀦𑀸

𑀥𑀫𑁆𑀫𑀘𑀭𑀺𑀬𑀦𑁆𑀢𑀺 𑀓𑀧𑀺𑀮𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀳𑁂𑀫𑀯𑀢𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑁂 𑀓𑀲𑁆𑀲𑀧𑁂 𑀪𑀕𑀯𑀢𑀺 𑀤𑁆𑀯𑁂 𑀓𑀼𑀮𑀧𑀼𑀢𑁆𑀢𑀸 𑀪𑀸𑀢𑀭𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀚𑁂𑀝𑁆𑀞𑁄 𑀲𑁄𑀥𑀦𑁄 𑀦𑀸𑀫, 𑀓𑀦𑀺𑀝𑁆𑀞𑁄 𑀓𑀧𑀺𑀮𑁄 𑀦𑀸𑀫. 𑀢𑁂𑀲𑀁 𑀫𑀸𑀢𑀸 𑀲𑀸𑀥𑀦𑀻 𑀦𑀸𑀫, 𑀓𑀦𑀺𑀝𑁆𑀞𑀪𑀕𑀺𑀦𑀻 𑀢𑀸𑀧𑀦𑀸 𑀦𑀸𑀫. 𑀢𑀸𑀧𑀺 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀁𑀲𑀼. 𑀢𑀢𑁄 𑀢𑁂 𑀤𑁆𑀯𑁂𑀧𑀺 𑀳𑁂𑀫𑀯𑀢𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀲𑀸𑀲𑀦𑁂 𑀓𑀢𑀺 𑀥𑀼𑀭𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀼𑀢𑁆𑀯𑀸 𑀘 𑀚𑁂𑀝𑁆𑀞𑁄 ‘‘𑀯𑀸𑀲𑀥𑀼𑀭𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀧𑀜𑁆𑀘𑀯𑀲𑁆𑀲𑁄 𑀳𑀼𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀁, 𑀢𑀸𑀯 𑀓𑀫𑁆𑀫𑀝𑁆𑀞𑀸𑀦𑀁 𑀲𑀼𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀓𑀧𑀺𑀮𑁄 ‘‘𑀅𑀳𑀁 𑀢𑀸𑀯 𑀢𑀭𑀼𑀡𑁄, 𑀯𑀼𑀟𑁆𑀠𑀓𑀸𑀮𑁂 𑀯𑀸𑀲𑀥𑀼𑀭𑀁 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀣𑀥𑀼𑀭𑀁 𑀆𑀭𑀪𑀺𑀢𑁆𑀯𑀸 𑀢𑁂𑀧𑀺𑀝𑀓𑁄 𑀅𑀳𑁄𑀲𑀺. 𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀭𑀺𑀯𑀸𑀭𑁄, 𑀧𑀭𑀺𑀯𑀸𑀭𑀁 𑀦𑀺𑀲𑁆𑀲𑀸𑀬 𑀮𑀸𑀪𑁄 𑀘 𑀉𑀤𑀧𑀸𑀤𑀺.

𑀲𑁄 𑀩𑀸𑀳𑀼𑀲𑀘𑁆𑀘𑀫𑀤𑁂𑀦 𑀫𑀢𑁆𑀢𑁄 𑀧𑀡𑁆𑀟𑀺𑀢𑀫𑀸𑀦𑀻 𑀅𑀦𑀜𑁆𑀜𑀸𑀢𑁂𑀧𑀺 𑀅𑀜𑁆𑀜𑀸𑀢𑀫𑀸𑀦𑀻 𑀳𑀼𑀢𑁆𑀯𑀸 𑀧𑀭𑁂𑀳𑀺 𑀯𑀼𑀢𑁆𑀢𑀁 𑀓𑀧𑁆𑀧𑀺𑀬𑀫𑁆𑀧𑀺 𑀅𑀓𑀧𑁆𑀧𑀺𑀬𑀁, 𑀅𑀓𑀧𑁆𑀧𑀺𑀬𑀫𑁆𑀧𑀺 𑀓𑀧𑁆𑀧𑀺𑀬𑀁, 𑀲𑀸𑀯𑀚𑁆𑀚𑀫𑁆𑀧𑀺 𑀅𑀦𑀯𑀚𑁆𑀚𑀁, 𑀅𑀦𑀯𑀚𑁆𑀚𑀫𑁆𑀧𑀺 𑀲𑀸𑀯𑀚𑁆𑀚𑀦𑁆𑀢𑀺 𑀪𑀡𑀢𑀺. 𑀲𑁄 𑀧𑁂𑀲𑀮𑁂𑀳𑀺 𑀪𑀺𑀓𑁆𑀔𑀽𑀳𑀺, ‘‘𑀫𑀸, 𑀆𑀯𑀼𑀲𑁄 𑀓𑀧𑀺𑀮, 𑀏𑀯𑀁 𑀅𑀯𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀑𑀯𑀤𑀺𑀬𑀫𑀸𑀦𑁄 ‘‘𑀢𑀼𑀫𑁆𑀳𑁂 𑀓𑀺𑀁 𑀚𑀸𑀦𑀸𑀣 𑀭𑀺𑀢𑁆𑀢𑀫𑀼𑀝𑁆𑀞𑀺𑀲𑀤𑀺𑀲𑀸’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀔𑀼𑀁𑀲𑁂𑀦𑁆𑀢𑁄 𑀯𑀫𑁆𑀪𑁂𑀦𑁆𑀢𑁄𑀬𑁂𑀯 𑀘𑀭𑀢𑀺. 𑀪𑀺𑀓𑁆𑀔𑀽 𑀢𑀲𑁆𑀲 𑀪𑀸𑀢𑀼𑀦𑁄 𑀲𑁄𑀥𑀦𑀢𑁆𑀣𑁂𑀭𑀲𑁆𑀲𑀸𑀧𑀺 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑁄𑀧𑀺 𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀆𑀯𑀼𑀲𑁄 𑀓𑀧𑀺𑀮, 𑀲𑀸𑀲𑀦𑀲𑁆𑀲 𑀆𑀬𑀼 𑀦𑀸𑀫 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺. 𑀫𑀸, 𑀆𑀯𑀼𑀲𑁄 𑀓𑀧𑀺𑀮, 𑀓𑀧𑁆𑀧𑀺𑀬𑀫𑁆𑀧𑀺 𑀅𑀓𑀧𑁆𑀧𑀺𑀬𑀁, 𑀅𑀓𑀧𑁆𑀧𑀺𑀬𑀫𑁆𑀧𑀺 𑀓𑀧𑁆𑀧𑀺𑀬𑀁, 𑀲𑀸𑀯𑀚𑁆𑀚𑀫𑁆𑀧𑀺 𑀅𑀦𑀯𑀚𑁆𑀚𑀁, 𑀅𑀦𑀯𑀚𑁆𑀚𑀫𑁆𑀧𑀺 𑀲𑀸𑀯𑀚𑁆𑀚𑀦𑁆𑀢𑀺 𑀯𑀤𑁂𑀳𑀻’’𑀢𑀺. 𑀲𑁄 𑀢𑀲𑁆𑀲𑀧𑀺 𑀯𑀘𑀦𑀁 𑀦𑀸𑀤𑀺𑀬𑀺. 𑀢𑀢𑁄 𑀦𑀁 𑀲𑁄𑀥𑀦𑀢𑁆𑀣𑁂𑀭𑁄 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑁋

‘‘𑀏𑀓𑀯𑀸𑀘𑀫𑁆𑀧𑀺 𑀤𑁆𑀯𑀺𑀯𑀸𑀘𑀁, 𑀪𑀡𑁂𑀬𑁆𑀬 𑀅𑀦𑀼𑀓𑀫𑁆𑀧𑀓𑁄;

𑀢𑀢𑀼𑀢𑁆𑀢𑀭𑀺𑀁 𑀦 𑀪𑀸𑀲𑁂𑀬𑁆𑀬, 𑀤𑀸𑀲𑁄𑀯𑀬𑁆𑀬𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺. (𑀚𑀸. 𑁨.𑁧𑁯.𑁩𑁪) 𑁋

𑀧𑀭𑀺𑀯𑀚𑁆𑀚𑁂𑀢𑁆𑀯𑀸 ‘‘𑀢𑁆𑀯𑀫𑁂𑀯, 𑀆𑀯𑀼𑀲𑁄, 𑀲𑀓𑁂𑀦 𑀓𑀫𑁆𑀫𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀲𑀻’’𑀢𑀺 𑀧𑀓𑁆𑀓𑀸𑀫𑀺. 𑀢𑀢𑁄 𑀧𑀪𑀼𑀢𑀺 𑀦𑀁 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀙𑀟𑁆𑀟𑁂𑀲𑀼𑀁.

𑀲𑁄 𑀤𑀼𑀭𑀸𑀘𑀸𑀭𑁄 𑀳𑀼𑀢𑁆𑀯𑀸 𑀤𑀼𑀭𑀸𑀘𑀸𑀭𑀧𑀭𑀺𑀯𑀼𑀢𑁄 𑀯𑀺𑀳𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 ‘‘𑀉𑀧𑁄𑀲𑀣𑀁 𑀑𑀲𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀲𑀻𑀳𑀸𑀲𑀦𑀁 𑀅𑀪𑀺𑀭𑀼𑀬𑁆𑀳 𑀘𑀺𑀢𑁆𑀭𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 ‘‘𑀯𑀢𑁆𑀢𑀢𑀺, 𑀆𑀯𑀼𑀲𑁄, 𑀏𑀢𑁆𑀣 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔𑁄’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀆𑀳. 𑀅𑀣𑁂𑀓𑁄 𑀪𑀺𑀓𑁆𑀔𑀼𑀧𑀺 ‘‘𑀫𑀬𑁆𑀳𑀁 𑀯𑀢𑁆𑀢𑀢𑀻’’𑀢𑀺 𑀦 𑀅𑀯𑁄𑀘. 𑀦 𑀘 𑀢𑀲𑁆𑀲 𑀢𑁂𑀲𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑁄 𑀯𑀢𑁆𑀢𑀢𑀺. 𑀢𑀢𑁄 𑀲𑁄 ‘‘𑀧𑀸𑀢𑀺𑀫𑁄𑀓𑁆𑀔𑁂 𑀲𑀼𑀢𑁂𑀧𑀺 𑀅𑀲𑀼𑀢𑁂𑀧𑀺 𑀯𑀺𑀦𑀬𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀲𑀦𑀸 𑀯𑀼𑀝𑁆𑀞𑀸𑀲𑀺. 𑀏𑀯𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀲𑀺 𑀯𑀺𑀦𑀸𑀲𑁂𑀲𑀺. 𑀅𑀣 𑀲𑁄𑀥𑀦𑀢𑁆𑀣𑁂𑀭𑁄 𑀢𑀤𑀳𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑁄𑀧𑀺 𑀓𑀧𑀺𑀮𑁄 𑀏𑀯𑀁 𑀢𑀁 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀢𑁆𑀯𑀸 𑀓𑀸𑀮𑀓𑀢𑁄 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺, 𑀲𑀸𑀧𑀺𑀲𑁆𑀲 𑀫𑀸𑀢𑀸 𑀘 𑀪𑀕𑀺𑀦𑀻 𑀘 𑀢𑀲𑁆𑀲𑁂𑀯 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀫𑀸𑀦𑀸 𑀧𑀭𑀺𑀪𑀸𑀲𑀫𑀸𑀦𑀸 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼.

𑀢𑀲𑁆𑀫𑀺𑀁𑀬𑁂𑀯 𑀘 𑀓𑀸𑀮𑁂 𑀧𑀜𑁆𑀘𑀲𑀢𑀸 𑀧𑀼𑀭𑀺𑀲𑀸 𑀕𑀸𑀫𑀖𑀸𑀢𑀸𑀤𑀻𑀦𑀺 𑀓𑀢𑁆𑀯𑀸 𑀘𑁄𑀭𑀺𑀓𑀸𑀬 𑀚𑀻𑀯𑀦𑁆𑀢𑀸 𑀚𑀦𑀧𑀤𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀩𑀤𑁆𑀥𑀸 𑀧𑀮𑀸𑀬𑀫𑀸𑀦𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀓𑀺𑀜𑁆𑀘𑀺 𑀕𑀳𑀦𑀁 𑀯𑀸 𑀧𑀝𑀺𑀲𑀭𑀡𑀁 𑀯𑀸 𑀅𑀧𑀲𑁆𑀲𑀦𑁆𑀢𑀸 𑀅𑀯𑀺𑀤𑀽𑀭𑁂 𑀧𑀸𑀲𑀸𑀡𑁂 𑀯𑀲𑀦𑁆𑀢𑀁 𑀅𑀜𑁆𑀜𑀢𑀭𑀁 𑀆𑀭𑀜𑁆𑀜𑀺𑀓𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀧𑀝𑀺𑀲𑀭𑀡𑀁 𑀳𑁄𑀣𑀸’’𑀢𑀺 𑀪𑀡𑀺𑀁𑀲𑀼. 𑀣𑁂𑀭𑁄 ‘‘𑀢𑀼𑀫𑁆𑀳𑀸𑀓𑀁 𑀲𑀻𑀮𑀲𑀤𑀺𑀲𑀁 𑀧𑀝𑀺𑀲𑀭𑀡𑀁 𑀦𑀢𑁆𑀣𑀺, 𑀲𑀩𑁆𑀩𑁂 𑀧𑀜𑁆𑀘 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀁𑀲𑀼. 𑀣𑁂𑀭𑁄 ‘‘𑀢𑀼𑀫𑁆𑀳𑁂 𑀲𑀻𑀮𑀯𑀦𑁆𑀢𑁄, 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀯𑀺𑀦𑀸𑀲𑁂𑀦𑁆𑀢𑁂𑀲𑀼𑀧𑀺 𑀫𑀸 𑀫𑀦𑁄 𑀧𑀤𑀽𑀲𑀬𑀺𑀢𑁆𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀅𑀣 𑀢𑁂 𑀚𑀸𑀦𑀧𑀤𑀸 𑀲𑀫𑁆𑀧𑀢𑁆𑀢𑀸 𑀇𑀢𑁄 𑀘𑀺𑀢𑁄 𑀘 𑀫𑀕𑁆𑀕𑀫𑀸𑀦𑀸 𑀢𑁂 𑀘𑁄𑀭𑁂 𑀤𑀺𑀲𑁆𑀯𑀸 𑀲𑀩𑁆𑀩𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁. 𑀢𑁂 𑀓𑀸𑀮𑀁 𑀓𑀢𑁆𑀯𑀸 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀼 𑀚𑁂𑀝𑁆𑀞𑀓𑀘𑁄𑀭𑁄 𑀚𑁂𑀝𑁆𑀞𑀓𑀤𑁂𑀯𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀇𑀢𑀭𑁂 𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀸.

𑀢𑁂 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀲𑀁𑀲𑀭𑀦𑁆𑀢𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀮𑁄𑀓𑁂 𑀔𑁂𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀚𑁂𑀝𑁆𑀞𑀓𑀤𑁂𑀯𑀧𑀼𑀢𑁆𑀢𑁄 𑀲𑀸𑀯𑀢𑁆𑀣𑀺𑀤𑁆𑀯𑀸𑀭𑁂 𑀓𑁂𑀯𑀝𑁆𑀝𑀕𑀸𑀫𑁄 𑀅𑀢𑁆𑀣𑀺, 𑀢𑀢𑁆𑀣 𑀧𑀜𑁆𑀘𑀲𑀢𑀓𑀼𑀮𑀚𑁂𑀝𑁆𑀞𑀲𑁆𑀲 𑀓𑁂𑀯𑀝𑁆𑀝𑀲𑁆𑀲 𑀧𑀚𑀸𑀧𑀢𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺, 𑀇𑀢𑀭𑁂 𑀅𑀯𑀲𑁂𑀲𑀓𑁂𑀯𑀝𑁆𑀝𑀧𑀚𑀸𑀧𑀢𑀻𑀦𑀁. 𑀏𑀯𑀁 𑀢𑁂𑀲𑀁 𑀏𑀓𑀤𑀺𑀯𑀲𑀁𑀬𑁂𑀯 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀜𑁆𑀘 𑀕𑀩𑁆𑀪𑀯𑀼𑀝𑁆𑀞𑀸𑀦𑀜𑁆𑀘 𑀅𑀳𑁄𑀲𑀺. 𑀅𑀣 𑀓𑁂𑀯𑀝𑁆𑀝𑀚𑁂𑀝𑁆𑀞𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀇𑀫𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑁂𑀧𑀺 𑀤𑀸𑀭𑀓𑀸 𑀅𑀚𑁆𑀚 𑀚𑀸𑀢𑀸’’𑀢𑀺 𑀯𑀺𑀘𑀺𑀦𑀦𑁆𑀢𑁄 𑀢𑁂 𑀤𑀸𑀭𑀓𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀫𑁂 𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀩𑁆𑀩𑁂𑀲𑀁 𑀧𑁄𑀲𑀸𑀯𑀦𑀺𑀓𑀁 𑀅𑀤𑀸𑀲𑀺. 𑀢𑁂 𑀲𑀩𑁆𑀩𑁂 𑀲𑀳𑀸𑀬𑀓𑀸 𑀲𑀳𑀧𑀁𑀲𑀼𑀁 𑀓𑀻𑀴𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀬𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁. 𑀬𑀲𑁄𑀚𑁄 𑀢𑁂𑀲𑀁 𑀅𑀕𑁆𑀕𑁄 𑀅𑀳𑁄𑀲𑀺.

𑀓𑀧𑀺𑀮𑁄𑀧𑀺 𑀢𑀤𑀸 𑀦𑀺𑀭𑀬𑁂 𑀧𑀓𑁆𑀓𑀸𑀯𑀲𑁂𑀲𑁂𑀦 𑀅𑀘𑀺𑀭𑀯𑀢𑀺𑀬𑀸 𑀲𑀼𑀯𑀡𑁆𑀡𑀯𑀡𑁆𑀡𑁄 𑀤𑀼𑀕𑁆𑀕𑀦𑁆𑀥𑀫𑀼𑀔𑁄 𑀫𑀘𑁆𑀙𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀩𑁆𑀩𑁂𑀧𑀺 𑀓𑁂𑀯𑀝𑁆𑀝𑀤𑀸𑀭𑀓𑀸 𑀚𑀸𑀮𑀸𑀦𑀺 𑀕𑀳𑁂𑀢𑁆𑀯𑀸 ‘‘𑀫𑀘𑁆𑀙𑁂 𑀩𑀦𑁆𑀥𑀺𑀲𑁆𑀲𑀸𑀫𑀸’’𑀢𑀺 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀚𑀸𑀮𑀸𑀦𑀺 𑀧𑀓𑁆𑀔𑀺𑀧𑀺𑀁𑀲𑀼. 𑀢𑁂𑀲𑀁 𑀚𑀸𑀮𑀁 𑀲𑁄 𑀫𑀘𑁆𑀙𑁄 𑀧𑀸𑀯𑀺𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑀩𑁆𑀩𑁄 𑀓𑁂𑀯𑀝𑁆𑀝𑀕𑀸𑀫𑁄 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑁄 𑀅𑀳𑁄𑀲𑀺 𑁋 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀸 𑀧𑀞𑀫𑀁 𑀫𑀘𑁆𑀙𑁂 𑀩𑀦𑁆𑀥𑀦𑁆𑀢𑀸 𑀲𑀼𑀯𑀡𑁆𑀡𑀫𑀘𑁆𑀙𑀁 𑀩𑀦𑁆𑀥𑀺𑀁𑀲𑀼, 𑀯𑀼𑀟𑁆𑀠𑀺 𑀦𑁂𑀲𑀁 𑀤𑀸𑀭𑀓𑀸𑀦𑀁, 𑀇𑀤𑀸𑀦𑀺 𑀘 𑀦𑁄 𑀭𑀸𑀚𑀸 𑀧𑀳𑀽𑀢𑀁 𑀥𑀦𑀁 𑀤𑀲𑁆𑀲𑀢𑀻’’𑀢𑀺. 𑀅𑀣 𑀢𑁂 𑀧𑀜𑁆𑀘𑀲𑀢𑀸𑀧𑀺 𑀤𑀸𑀭𑀓𑀲𑀳𑀸𑀬𑀓𑀸 𑀫𑀘𑁆𑀙𑀁 𑀦𑀸𑀯𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀸𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀓𑀺𑀁 𑀏𑀢𑀁 𑀪𑀡𑁂’’𑀢𑀺 𑀆𑀳. ‘‘𑀫𑀘𑁆𑀙𑁄 𑀤𑁂𑀯𑀸’’𑀢𑀺. 𑀭𑀸𑀚𑀸 𑀲𑀼𑀯𑀡𑁆𑀡𑀯𑀡𑁆𑀡𑀁 𑀫𑀘𑁆𑀙𑀁 𑀤𑀺𑀲𑁆𑀯𑀸 ‘‘𑀪𑀕𑀯𑀸 𑀏𑀢𑀲𑁆𑀲 𑀯𑀡𑁆𑀡𑀓𑀸𑀭𑀡𑀁 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀫𑀘𑁆𑀙𑀁 𑀕𑀸𑀳𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀫𑀘𑁆𑀙𑀲𑁆𑀲 𑀫𑀼𑀔𑀯𑀺𑀯𑀭𑀡𑀓𑀸𑀮𑁂 𑀚𑁂𑀢𑀯𑀦𑀁 𑀅𑀢𑀺𑀯𑀺𑀬 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺.

𑀭𑀸𑀚𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺 𑁋 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀫𑀘𑁆𑀙𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀚𑀸𑀢𑁄, 𑀓𑀲𑁆𑀫𑀸 𑀘𑀲𑁆𑀲 𑀫𑀼𑀔𑀢𑁄 𑀤𑀼𑀕𑁆𑀕𑀦𑁆𑀥𑁄 𑀯𑀸𑀬𑀢𑀻’’𑀢𑀺? 𑀅𑀬𑀁, 𑀫𑀳𑀸𑀭𑀸𑀚, 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀧𑀸𑀯𑀘𑀦𑁂 𑀓𑀧𑀺𑀮𑁄 𑀦𑀸𑀫 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄. 𑀅𑀢𑁆𑀢𑀦𑁄 𑀯𑀘𑀦𑀁 𑀅𑀕𑀡𑁆𑀳𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄. 𑀢𑀲𑁆𑀲 𑀘 𑀪𑀕𑀯𑀢𑁄 𑀲𑀸𑀲𑀦𑀯𑀺𑀦𑀸𑀲𑀓𑁄. 𑀬𑀁 𑀲𑁄 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀯𑀺𑀦𑀸𑀲𑁂𑀲𑀺, 𑀢𑁂𑀦 𑀓𑀫𑁆𑀫𑁂𑀦 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺, 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀘 𑀇𑀤𑀸𑀦𑀺 𑀫𑀘𑁆𑀙𑁄 𑀚𑀸𑀢𑁄. 𑀬𑀁 𑀤𑀻𑀖𑀭𑀢𑁆𑀢𑀁 𑀩𑀼𑀤𑁆𑀥𑀯𑀘𑀦𑀁 𑀯𑀸𑀘𑁂𑀲𑀺, 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑀺, 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀈𑀤𑀺𑀲𑀁 𑀯𑀡𑁆𑀡𑀁 𑀧𑀝𑀺𑀮𑀪𑀺. 𑀬𑀁 𑀪𑀺𑀓𑁆𑀔𑀽𑀦𑀁 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀫𑀼𑀔𑀢𑁄 𑀤𑀼𑀕𑁆𑀕𑀦𑁆𑀥𑁄 𑀯𑀸𑀬𑀢𑀺. ‘‘𑀉𑀮𑁆𑀮𑀧𑀸𑀧𑁂𑀫𑀺 𑀦𑀁 𑀫𑀳𑀸𑀭𑀸𑀚𑀸’’𑀢𑀺? ‘‘𑀆𑀫 𑀪𑀕𑀯𑀸’’𑀢𑀺. 𑀅𑀣 𑀪𑀕𑀯𑀸 𑀫𑀘𑁆𑀙𑀁 𑀆𑀮𑀧𑀺 𑁋 ‘‘𑀢𑁆𑀯𑀁𑀲𑀺 𑀓𑀧𑀺𑀮𑁄’’𑀢𑀺? ‘‘𑀆𑀫 𑀪𑀕𑀯𑀸, 𑀅𑀳𑀁 𑀓𑀧𑀺𑀮𑁄’’𑀢𑀺. ‘‘𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺? ‘‘𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀢𑁄 𑀪𑀕𑀯𑀸’’𑀢𑀺. ‘‘𑀲𑁄𑀥𑀦𑁄 𑀓𑀼𑀳𑀺𑀁 𑀕𑀢𑁄’’𑀢𑀺? ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸’’𑀢𑀺. ‘‘𑀲𑀸𑀥𑀦𑀻 𑀓𑀼𑀳𑀺𑀁 𑀕𑀢𑀸’’𑀢𑀺? ‘‘𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸 𑀪𑀕𑀯𑀸’’𑀢𑀺. ‘‘𑀢𑀸𑀧𑀦𑀸 𑀓𑀼𑀳𑀺𑀁 𑀕𑀢𑀸’’𑀢𑀺? ‘‘𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸 𑀪𑀕𑀯𑀸’’𑀢𑀺. ‘‘𑀇𑀤𑀸𑀦𑀺 𑀢𑁆𑀯𑀁 𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀻’’𑀢𑀺? ‘‘𑀫𑀳𑀸𑀦𑀺𑀭𑀬𑀁 𑀪𑀕𑀯𑀸’’𑀢𑀺. 𑀢𑀸𑀯𑀤𑁂𑀯 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀺𑀪𑀽𑀢𑁄 𑀦𑀸𑀯𑀁 𑀲𑀻𑀲𑁂𑀦 𑀧𑀳𑀭𑀺𑀢𑁆𑀯𑀸 𑀓𑀸𑀮𑀓𑀢𑁄 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺. 𑀫𑀳𑀸𑀚𑀦𑁄 𑀲𑀁𑀯𑀺𑀕𑁆𑀕𑁄 𑀅𑀳𑁄𑀲𑀺 𑀮𑁄𑀫𑀳𑀝𑁆𑀞𑀚𑀸𑀢𑁄. 𑀅𑀣 𑀪𑀕𑀯𑀸 𑀢𑀢𑁆𑀣 𑀲𑀫𑁆𑀧𑀢𑁆𑀢𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀧𑀭𑀺𑀲𑀸𑀬 𑀢𑀗𑁆𑀔𑀡𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑁨𑁭𑁭-𑁮. 𑀢𑀢𑁆𑀣 𑀥𑀫𑁆𑀫𑀘𑀭𑀺𑀬𑀦𑁆𑀢𑀺 𑀓𑀸𑀬𑀲𑀼𑀘𑀭𑀺𑀢𑀸𑀤𑀺 𑀥𑀫𑁆𑀫𑀘𑀭𑀺𑀬𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀏𑀢𑀤𑀸𑀳𑀼 𑀯𑀲𑀼𑀢𑁆𑀢𑀫𑀦𑁆𑀢𑀺 𑀏𑀢𑀁 𑀉𑀪𑀬𑀫𑁆𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀲𑀼𑀘𑀭𑀺𑀢𑀁 𑀲𑀕𑁆𑀕𑀫𑁄𑀓𑁆𑀔𑀲𑀼𑀔𑀲𑀫𑁆𑀧𑀸𑀧𑀓𑀢𑁆𑀢𑀸 𑀯𑀲𑀼𑀢𑁆𑀢𑀫𑀦𑁆𑀢𑀺 𑀆𑀳𑀼 𑀅𑀭𑀺𑀬𑀸. 𑀯𑀲𑀼𑀢𑁆𑀢𑀫𑀁 𑀦𑀸𑀫 𑀉𑀢𑁆𑀢𑀫𑀭𑀢𑀦𑀁, 𑀅𑀦𑀼𑀕𑀸𑀫𑀺𑀓𑀁 𑀅𑀢𑁆𑀢𑀸𑀥𑀻𑀦𑀁 𑀭𑀸𑀚𑀸𑀤𑀻𑀦𑀁 𑀅𑀲𑀸𑀥𑀸𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀢𑀸𑀯𑀢𑀸 ‘‘𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑁂𑀯 𑀧𑀝𑀺𑀲𑀭𑀡’’𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀧𑀢𑁆𑀢𑀺𑀯𑀺𑀭𑀳𑀺𑀢𑀸𑀬 𑀧𑀩𑁆𑀩𑀚𑁆𑀚𑀸𑀬 𑀅𑀲𑀸𑀭𑀓𑀢𑁆𑀢𑀤𑀲𑁆𑀲𑀦𑁂𑀦 𑀓𑀧𑀺𑀮𑀁 𑀅𑀜𑁆𑀜𑁂 𑀘 𑀢𑀣𑀸𑀭𑀽𑀧𑁂 𑀕𑀭𑀳𑀦𑁆𑀢𑁄 ‘‘𑀧𑀩𑁆𑀩𑀚𑀺𑀢𑁄𑀧𑀺 𑀘𑁂 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀫𑀸𑀳.

𑀢𑀢𑁆𑀭𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀬𑁄 𑀳𑀺 𑀓𑁄𑀘𑀺 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺 𑀅𑀧𑀦𑁂𑀢𑁆𑀯𑀸 𑀪𑀡𑁆𑀟𑀼𑀓𑀸𑀲𑀸𑀯𑀸𑀤𑀺𑀕𑀳𑀡𑀫𑀢𑁆𑀢𑀁 𑀉𑀧𑀲𑀗𑁆𑀓𑀫𑀦𑁂𑀦 𑀧𑀩𑁆𑀩𑀚𑀺𑀢𑁄𑀧𑀺 𑀘𑁂𑀳𑁄𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀣𑀁 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁, 𑀲𑁄 𑀘𑁂 𑀫𑀼𑀔𑀭𑀚𑀸𑀢𑀺𑀓𑁄 𑀳𑁄𑀢𑀺 𑀨𑀭𑀼𑀲𑀯𑀘𑀦𑁄, 𑀦𑀸𑀦𑀧𑁆𑀧𑀓𑀸𑀭𑀸𑀬 𑀯𑀺𑀳𑁂𑀲𑀸𑀬 𑀅𑀪𑀺𑀭𑀢𑀢𑁆𑀢𑀸 𑀯𑀺𑀳𑁂𑀲𑀸𑀪𑀺𑀭𑀢𑁄, 𑀳𑀺𑀭𑁄𑀢𑁆𑀢𑀧𑁆𑀧𑀸𑀪𑀸𑀯𑁂𑀦 𑀫𑀕𑀲𑀤𑀺𑀲𑀢𑁆𑀢𑀸 𑀫𑀕𑁄, 𑀚𑀻𑀯𑀺𑀢𑀁 𑀢𑀲𑁆𑀲 𑀧𑀸𑀧𑀺𑀬𑁄, 𑀢𑀲𑁆𑀲 𑀏𑀯𑀭𑀽𑀧𑀲𑁆𑀲 𑀚𑀻𑀯𑀺𑀢𑀁 𑀅𑀢𑀺𑀧𑀸𑀧𑀁 𑀅𑀢𑀺𑀳𑀻𑀦𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀇𑀫𑀸𑀬 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀬𑀸 𑀭𑀸𑀕𑀸𑀤𑀺𑀫𑀦𑁂𑀓𑀧𑁆𑀧𑀓𑀸𑀭𑀁 𑀭𑀚𑀁 𑀯𑀟𑁆𑀠𑁂𑀢𑀺 𑀅𑀢𑁆𑀢𑀦𑁄.

𑁨𑁭𑁯. 𑀦 𑀓𑁂𑀯𑀮𑀜𑁆𑀘 𑀇𑀫𑀺𑀦𑀸𑀯 𑀓𑀸𑀭𑀡𑁂𑀦𑀲𑁆𑀲 𑀚𑀻𑀯𑀺𑀢𑀁 𑀧𑀸𑀧𑀺𑀬𑁄, 𑀅𑀧𑀺𑀘 𑀔𑁄 𑀧𑀦 𑀅𑀬𑀁 𑀏𑀯𑀭𑀽𑀧𑁄 𑀫𑀼𑀔𑀭𑀚𑀸𑀢𑀺𑀓𑀢𑁆𑀢𑀸 𑀓𑀮𑀳𑀸𑀪𑀺𑀭𑀢𑁄 𑀪𑀺𑀓𑁆𑀔𑀼 𑀲𑀼𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀯𑀺𑀚𑀸𑀦𑀦𑀲𑀫𑁆𑀫𑁄𑀳𑀦𑁂𑀦 𑀫𑁄𑀳𑀥𑀫𑁆𑀫𑁂𑀦 𑀆𑀯𑀼𑀢𑁄, ‘‘𑀫𑀸, 𑀆𑀯𑀼𑀲𑁄 𑀓𑀧𑀺𑀮, 𑀏𑀯𑀁 𑀅𑀯𑀘, 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀢𑀁 𑀕𑀡𑁆𑀳𑀸𑀳𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀧𑁂𑀲𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀓𑁆𑀔𑀸𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺 𑀥𑀫𑁆𑀫𑀁 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁. 𑀬𑁄 𑀥𑀫𑁆𑀫𑁄 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑁄, 𑀢𑀁 𑀦𑀸𑀦𑀧𑁆𑀧𑀓𑀸𑀭𑁂𑀦 𑀅𑀢𑁆𑀢𑀦𑁄 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀦 𑀚𑀸𑀦𑀸𑀢𑀺. 𑀏𑀯𑀫𑁆𑀧𑀺𑀲𑁆𑀲 𑀚𑀻𑀯𑀺𑀢𑀁 𑀧𑀸𑀧𑀺𑀬𑁄.

𑁨𑁮𑁦. 𑀢𑀣𑀸 𑀲𑁄 𑀏𑀯𑀭𑀽𑀧𑁄 𑀯𑀺𑀳𑁂𑀲𑀸𑀪𑀺𑀭𑀢𑀢𑁆𑀢𑀸 𑀯𑀺𑀳𑁂𑀲𑀁 𑀪𑀸𑀯𑀺𑀢𑀢𑁆𑀢𑀸𑀦𑀁 𑀪𑀸𑀯𑀺𑀢𑀢𑁆𑀢𑁂 𑀔𑀻𑀡𑀸𑀲𑀯𑀪𑀺𑀓𑁆𑀔𑀽 𑀲𑁄𑀥𑀦𑀢𑁆𑀣𑁂𑀭𑀧𑀪𑀼𑀢𑀺𑀓𑁂 ‘‘𑀦 𑀢𑀼𑀫𑁆𑀳𑁂 𑀯𑀺𑀦𑀬𑀁 𑀚𑀸𑀦𑀸𑀣, 𑀦 𑀲𑀼𑀢𑁆𑀢𑀁 𑀦 𑀅𑀪𑀺𑀥𑀫𑁆𑀫𑀁, 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀳𑁂𑀲𑀦𑁆𑀢𑁄. 𑀉𑀧𑀬𑁄𑀕𑀧𑁆𑀧𑀯𑀢𑁆𑀢𑀺𑀬𑀜𑁆𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 ‘‘𑀯𑀺𑀳𑁂𑀲𑀁 𑀪𑀸𑀯𑀺𑀢𑀢𑁆𑀢𑀸𑀦𑀁 𑀓𑀭𑁄𑀦𑁆𑀢𑁄’’𑀢𑀺 𑀧𑀸𑀞𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀦𑀺𑀧𑁆𑀧𑀭𑀺𑀬𑀸𑀬𑀫𑁂𑀯 𑀲𑀸𑀫𑀺𑀯𑀘𑀦𑀁 𑀲𑀺𑀚𑁆𑀛𑀢𑀺. 𑀅𑀯𑀺𑀚𑁆𑀚𑀸𑀬 𑀧𑀼𑀭𑀓𑁆𑀔𑀢𑁄𑀢𑀺 𑀪𑀸𑀯𑀺𑀢𑀢𑁆𑀢𑀯𑀺𑀳𑁂𑀲𑀦𑁂 𑀆𑀤𑀻𑀦𑀯𑀤𑀲𑁆𑀲𑀦𑀧𑀝𑀺𑀘𑁆𑀙𑀸𑀤𑀺𑀓𑀸𑀬 𑀅𑀯𑀺𑀚𑁆𑀚𑀸𑀬 𑀧𑀼𑀭𑀓𑁆𑀔𑀢𑁄 𑀧𑁂𑀲𑀺𑀢𑁄 𑀧𑀬𑁄𑀚𑀺𑀢𑁄 𑀲𑁂𑀲𑀧𑀩𑁆𑀩𑀚𑀺𑀢𑀸𑀦𑀁 𑀪𑀸𑀯𑀺𑀢𑀢𑁆𑀢𑀸𑀦𑀁 𑀯𑀺𑀳𑁂𑀲𑀪𑀸𑀯𑁂𑀦 𑀧𑀯𑀢𑁆𑀢𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀘𑀺𑀢𑁆𑀢𑀯𑀺𑀩𑀸𑀥𑀦𑁂𑀦 𑀲𑀗𑁆𑀓𑀺𑀮𑁂𑀲𑀁, 𑀆𑀬𑀢𑀺𑀜𑁆𑀘 𑀦𑀺𑀭𑀬𑀲𑀫𑁆𑀧𑀸𑀧𑀦𑁂𑀦 𑀫𑀕𑁆𑀕𑀁 𑀦𑀺𑀭𑀬𑀕𑀸𑀫𑀺𑀦𑀁 𑀦 𑀚𑀸𑀦𑀸𑀢𑀺.

𑁨𑁮𑁧. 𑀅𑀚𑀸𑀦𑀦𑁆𑀢𑁄 𑀘 𑀢𑁂𑀦 𑀫𑀕𑁆𑀕𑁂𑀦 𑀘𑀢𑀼𑀩𑁆𑀩𑀺𑀥𑀸𑀧𑀸𑀬𑀪𑁂𑀤𑀁 𑀯𑀺𑀦𑀺𑀧𑀸𑀢𑀁 𑀲𑀫𑀸𑀧𑀦𑁆𑀦𑁄. 𑀢𑀢𑁆𑀣 𑀘 𑀯𑀺𑀦𑀺𑀧𑀸𑀢𑁂 𑀕𑀩𑁆𑀪𑀸 𑀕𑀩𑁆𑀪𑀁 𑀢𑀫𑀸 𑀢𑀫𑀁 𑀏𑀓𑁂𑀓𑀦𑀺𑀓𑀸𑀬𑁂 𑀲𑀢𑀓𑁆𑀔𑀢𑁆𑀢𑀼𑀁 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁆𑀧𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀳𑀺𑀧𑀺 𑀅𑀯𑀺𑀤𑁆𑀥𑀁𑀲𑀦𑀻𑀬𑀸 𑀅𑀲𑀼𑀭𑀓𑀸𑀬𑀢𑀫𑀸 𑀢𑀫𑀜𑁆𑀘 𑀲𑀫𑀸𑀧𑀦𑁆𑀦𑁄. 𑀲 𑀯𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼 𑀧𑁂𑀘𑁆𑀘 𑀇𑀢𑁄 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸 𑀅𑀬𑀁 𑀓𑀧𑀺𑀮𑀫𑀘𑁆𑀙𑁄 𑀯𑀺𑀬 𑀦𑀸𑀦𑀧𑁆𑀧𑀓𑀸𑀭𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺.

𑁨𑁮𑁨. 𑀓𑀺𑀁 𑀓𑀸𑀭𑀡𑀸? 𑀕𑀽𑀣𑀓𑀽𑀧𑁄 𑀬𑀣𑀸 𑀅𑀲𑁆𑀲, 𑀲𑀫𑁆𑀧𑀼𑀡𑁆𑀡𑁄 𑀕𑀡𑀯𑀲𑁆𑀲𑀺𑀓𑁄,𑀬𑀣𑀸 𑀯𑀘𑁆𑀘𑀓𑀼𑀝𑀺𑀕𑀽𑀣𑀓𑀽𑀧𑁄 𑀕𑀡𑀯𑀲𑁆𑀲𑀺𑀓𑁄 𑀅𑀦𑁂𑀓𑀯𑀲𑁆𑀲𑀺𑀓𑁄 𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 𑀫𑀼𑀔𑀢𑁄 𑀕𑀽𑀣𑁂𑀦 𑀧𑀽𑀭𑀺𑀬𑀫𑀸𑀦𑁄 𑀲𑀫𑁆𑀧𑀼𑀡𑁆𑀡𑁄 𑀅𑀲𑁆𑀲, 𑀲𑁄 𑀉𑀤𑀓𑀓𑀼𑀫𑁆𑀪𑀲𑀢𑁂𑀳𑀺 𑀉𑀤𑀓𑀓𑀼𑀫𑁆𑀪𑀲𑀳𑀲𑁆𑀲𑁂𑀳𑀺 𑀥𑁄𑀯𑀺𑀬𑀫𑀸𑀦𑁄𑀧𑀺 𑀤𑀼𑀕𑁆𑀕𑀦𑁆𑀥𑀤𑀼𑀩𑁆𑀩𑀡𑁆𑀡𑀺𑀬𑀸𑀦𑀧𑀕𑀫𑀸 𑀤𑀼𑀩𑁆𑀩𑀺𑀲𑁄𑀥𑁄 𑀳𑁄𑀢𑀺, 𑀏𑀯𑀫𑁂𑀯 𑀬𑁄 𑀏𑀯𑀭𑀽𑀧𑁄 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀲𑀁𑀓𑀺𑀮𑀺𑀝𑁆𑀞𑀓𑀫𑁆𑀫𑀦𑁆𑀢𑁄 𑀕𑀽𑀣𑀓𑀽𑀧𑁄 𑀯𑀺𑀬 𑀕𑀽𑀣𑁂𑀦 𑀧𑀸𑀧𑁂𑀦 𑀲𑀫𑁆𑀧𑀼𑀡𑁆𑀡𑀢𑁆𑀢𑀸 𑀲𑀫𑁆𑀧𑀼𑀡𑁆𑀡𑁄 𑀧𑀼𑀕𑁆𑀕𑀮𑁄, 𑀲𑁄 𑀤𑀼𑀩𑁆𑀩𑀺𑀲𑁄𑀥𑁄 𑀳𑀺 𑀲𑀸𑀗𑁆𑀕𑀡𑁄, 𑀘𑀺𑀭𑀓𑀸𑀮𑀁 𑀢𑀲𑁆𑀲 𑀅𑀗𑁆𑀕𑀡𑀲𑁆𑀲 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑁄𑀧𑀺 𑀦 𑀲𑀼𑀚𑁆𑀛𑀢𑀺. 𑀢𑀲𑁆𑀫𑀸 𑀯𑀲𑁆𑀲𑀕𑀡𑀦𑀸𑀬 𑀅𑀧𑀭𑀺𑀫𑀸𑀡𑀫𑁆𑀧𑀺 𑀓𑀸𑀮𑀁 𑀲 𑀯𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼 𑀧𑁂𑀘𑁆𑀘 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀻𑀢𑀺. 𑀅𑀣 𑀯𑀸 𑀅𑀬𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑁋 𑀬𑀁 𑀯𑀼𑀢𑁆𑀢𑀁 ‘‘𑀲 𑀯𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼, 𑀧𑁂𑀘𑁆𑀘 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀻’’𑀢𑀺, 𑀢𑀢𑁆𑀭 𑀲𑀺𑀬𑀸 𑀢𑀼𑀫𑁆𑀳𑀸𑀓𑀁 ‘‘𑀲𑀓𑁆𑀓𑀸 𑀧𑀦𑀸𑀬𑀁 𑀢𑀣𑀸 𑀓𑀸𑀢𑀼𑀁, 𑀬𑀣𑀸 𑀧𑁂𑀘𑁆𑀘 𑀤𑀼𑀓𑁆𑀔𑀁 𑀦 𑀦𑀺𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀦 𑀲𑀓𑁆𑀓𑀸. 𑀓𑀲𑁆𑀫𑀸? 𑀬𑀲𑁆𑀫𑀸 𑀕𑀽𑀣𑀓𑀽𑀧𑁄…𑀧𑁂… 𑀲𑀸𑀗𑁆𑀕𑀡𑁄𑀢𑀺.

𑁨𑁮𑁩-𑁪. 𑀬𑀢𑁄 𑀧𑀝𑀺𑀓𑀘𑁆𑀘𑁂𑀯 𑀬𑀁 𑀏𑀯𑀭𑀽𑀧𑀁 𑀚𑀸𑀦𑀸𑀣, 𑀪𑀺𑀓𑁆𑀔𑀯𑁄 𑀕𑁂𑀳𑀦𑀺𑀲𑁆𑀲𑀺𑀢𑀁, 𑀬𑀁 𑀏𑀯𑀭𑀽𑀧𑀁 𑀧𑀜𑁆𑀘𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀁 𑀚𑀸𑀦𑁂𑀬𑁆𑀬𑀸𑀣 𑀅𑀪𑀽𑀢𑀕𑀼𑀡𑀧𑀢𑁆𑀣𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀸𑀬 𑀧𑀸𑀧𑀺𑀓𑀸𑀬 𑀇𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀸𑀧𑀺𑀘𑁆𑀙𑀁, 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀸𑀧𑀲𑀗𑁆𑀓𑀧𑁆𑀧𑀁, 𑀓𑀸𑀬𑀺𑀓𑀯𑀻𑀢𑀺𑀓𑁆𑀓𑀫𑀸𑀤𑀺𑀦𑀸 𑀯𑁂𑀴𑀼𑀤𑀸𑀦𑀸𑀤𑀺𑀪𑁂𑀤𑁂𑀦 𑀘 𑀧𑀸𑀧𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀸𑀧𑀸𑀘𑀸𑀭𑀁, 𑀯𑁂𑀲𑀺𑀬𑀸𑀤𑀺𑀧𑀸𑀧𑀕𑁄𑀘𑀭𑀢𑁄 𑀧𑀸𑀧𑀕𑁄𑀘𑀭𑀁, 𑀲𑀩𑁆𑀩𑁂 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸𑀦 𑀅𑀪𑀺𑀦𑀺𑀩𑁆𑀩𑀚𑁆𑀚𑀺𑀬𑀸𑀣 𑀦𑀁. 𑀢𑀢𑁆𑀣 𑀅𑀪𑀺𑀦𑀺𑀩𑁆𑀩𑀚𑁆𑀚𑀺𑀬𑀸𑀣𑀸𑀢𑀺 𑀯𑀺𑀯𑀚𑁆𑀚𑁂𑀬𑁆𑀬𑀸𑀣 𑀫𑀸 𑀪𑀚𑁂𑀬𑁆𑀬𑀸𑀣, 𑀫𑀸 𑀘𑀲𑁆𑀲 𑀅𑀪𑀺𑀦𑀺𑀩𑁆𑀩𑀚𑁆𑀚𑀦𑀫𑀢𑁆𑀢𑁂𑀦𑁂𑀯 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀣, 𑀅𑀧𑀺𑀘 𑀔𑁄 𑀧𑀦 𑀓𑀸𑀭𑀡𑁆𑀟𑀯𑀁 𑀦𑀺𑀤𑁆𑀥𑀫𑀣, 𑀓𑀲𑀫𑁆𑀩𑀼𑀁 𑀅𑀧𑀓𑀲𑁆𑀲𑀣, 𑀢𑀁 𑀓𑀘𑀯𑀭𑀪𑀽𑀢𑀁 𑀧𑀼𑀕𑁆𑀕𑀮𑀁 𑀓𑀘𑀯𑀭𑀫𑀺𑀯 𑀅𑀦𑀧𑁂𑀓𑁆𑀔𑀸 𑀦𑀺𑀤𑁆𑀥𑀫𑀣, 𑀓𑀲𑀝𑀪𑀽𑀢𑀜𑁆𑀘 𑀦𑀁 𑀔𑀢𑁆𑀢𑀺𑀬𑀸𑀤𑀻𑀦𑀁 𑀫𑀚𑁆𑀛𑁂 𑀧𑀯𑀺𑀝𑁆𑀞𑀁 𑀧𑀪𑀺𑀦𑁆𑀦𑀧𑀕𑁆𑀖𑀭𑀺𑀢𑀓𑀼𑀝𑁆𑀞𑀁 𑀘𑀡𑁆𑀟𑀸𑀮𑀁 𑀯𑀺𑀬 𑀅𑀧𑀓𑀲𑁆𑀲𑀣, 𑀳𑀢𑁆𑀣𑁂 𑀯𑀸 𑀲𑀻𑀲𑁂 𑀯𑀸 𑀕𑀳𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀣. 𑀲𑁂𑀬𑁆𑀬𑀣𑀸𑀧𑀺 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑀼𑀕𑁆𑀕𑀮𑀁 𑀧𑀸𑀧𑀥𑀫𑁆𑀫𑀁 𑀩𑀸𑀳𑀸𑀬 𑀕𑀳𑁂𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀲𑀽𑀘𑀺𑀖𑀝𑀺𑀓𑀁 𑀅𑀤𑀸𑀲𑀺, 𑀏𑀯𑀁 𑀅𑀧𑀓𑀲𑁆𑀲𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀁 𑀓𑀸𑀭𑀡𑀸? 𑀲𑀗𑁆𑀖𑀸𑀭𑀸𑀫𑁄 𑀦𑀸𑀫 𑀲𑀻𑀮𑀯𑀦𑁆𑀢𑀸𑀦𑀁 𑀓𑀢𑁄, 𑀦 𑀤𑀼𑀲𑁆𑀲𑀻𑀮𑀸𑀦𑀁.

𑁨𑁮𑁫-𑁬. 𑀬𑀢𑁄 𑀏𑀢𑀤𑁂𑀯 𑀢𑀢𑁄 𑀧𑀮𑀸𑀧𑁂 𑀯𑀸𑀳𑁂𑀣, 𑀅𑀲𑁆𑀲𑀫𑀡𑁂 𑀲𑀫𑀡𑀫𑀸𑀦𑀺𑀦𑁂, 𑀬𑀣𑀸 𑀳𑀺 𑀧𑀮𑀸𑀧𑀸 𑀅𑀦𑁆𑀢𑁄 𑀢𑀡𑁆𑀟𑀼𑀮𑀭𑀳𑀺𑀢𑀸𑀧𑀺 𑀩𑀳𑀺 𑀣𑀼𑀲𑁂𑀳𑀺 𑀯𑀻𑀳𑀻 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀧𑀸𑀧𑀪𑀺𑀓𑁆𑀔𑀽 𑀅𑀦𑁆𑀢𑁄 𑀲𑀻𑀮𑀸𑀤𑀺𑀯𑀺𑀭𑀳𑀺𑀢𑀸𑀧𑀺 𑀩𑀳𑀺 𑀓𑀸𑀲𑀸𑀯𑀸𑀤𑀺𑀧𑀭𑀺𑀓𑁆𑀔𑀸𑀭𑁂𑀦 𑀪𑀺𑀓𑁆𑀔𑀽 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 ‘‘𑀧𑀮𑀸𑀧𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀧𑀮𑀸𑀧𑁂 𑀯𑀸𑀳𑁂𑀣, 𑀑𑀧𑀼𑀦𑀸𑀣, 𑀯𑀺𑀥𑀫𑀣 𑀧𑀭𑀫𑀢𑁆𑀣𑀢𑁄 𑀅𑀲𑁆𑀲𑀫𑀡𑁂 𑀯𑁂𑀲𑀫𑀢𑁆𑀢𑁂𑀦 𑀲𑀫𑀡𑀫𑀸𑀦𑀺𑀦𑁂. 𑀏𑀯𑀁 𑀦𑀺𑀤𑁆𑀥𑀫𑀺𑀢𑁆𑀯𑀸𑀦…𑀧𑁂… 𑀧𑀢𑀺𑀲𑁆𑀲𑀢𑀸. 𑀢𑀢𑁆𑀣 𑀓𑀧𑁆𑀧𑀬𑀯𑁆𑀳𑁄𑀢𑀺 𑀓𑀧𑁆𑀧𑁂𑀣, 𑀓𑀭𑁄𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀢𑀺𑀲𑁆𑀲𑀢𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸. 𑀢𑀢𑁄 𑀲𑀫𑀕𑁆𑀕𑀸 𑀦𑀺𑀧𑀓𑀸, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣𑀸𑀢𑀺 𑀅𑀣𑁂𑀯𑀁 𑀢𑀼𑀫𑁆𑀳𑁂 𑀲𑀼𑀤𑁆𑀥𑀸 𑀲𑀼𑀤𑁆𑀥𑁂𑀳𑀺 𑀲𑀁𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀸, 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀢𑀸𑀬 𑀲𑀫𑀕𑁆𑀕𑀸, 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀧𑀸𑀓𑀕𑀢𑀸𑀬 𑀧𑀜𑁆𑀜𑀸𑀬 𑀦𑀺𑀧𑀓𑀸, 𑀲𑀩𑁆𑀩𑀲𑁆𑀲𑁂𑀯𑀺𑀫𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀸𑀤𑀺𑀦𑁄 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀣𑀸𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀢𑁂 𑀧𑀜𑁆𑀘𑀲𑀢𑀸 𑀓𑁂𑀯𑀝𑁆𑀝𑀧𑀼𑀢𑁆𑀢𑀸 𑀲𑀁𑀯𑁂𑀕𑀫𑀸𑀧𑀚𑁆𑀚𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀁 𑀧𑀢𑁆𑀣𑀬𑀫𑀸𑀦𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀆𑀦𑁂𑀜𑁆𑀚𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑀧𑀭𑀺𑀪𑁄𑀕𑁂𑀦 𑀏𑀓𑀧𑀭𑀺𑀪𑁄𑀕𑀸 𑀅𑀳𑁂𑀲𑀼𑀁. 𑀲𑀸 𑀘 𑀦𑁂𑀲𑀁 𑀏𑀯𑀁 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀏𑀓𑀧𑀭𑀺𑀪𑁄𑀕𑀢𑀸 𑀉𑀤𑀸𑀦𑁂 𑀯𑀼𑀢𑁆𑀢𑀬𑀲𑁄𑀚𑀲𑀼𑀢𑁆𑀢𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀓𑀧𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.