𑁫. 𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑁂𑀦𑁂𑀯𑀲𑁆𑀲 𑀉𑀧𑁆𑀧𑀢𑁆𑀢𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀢𑁆𑀣𑀯𑀡𑁆𑀡𑀦𑀸𑀬𑀜𑁆𑀘 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀕𑀬𑀸𑀬𑀁 𑀯𑀺𑀳𑀭𑀢𑀺 𑀝𑀗𑁆𑀓𑀺𑀢𑀫𑀜𑁆𑀘𑁂 𑀲𑀽𑀘𑀺𑀮𑁄𑀫𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂𑀢𑀺 𑀏𑀢𑁆𑀣 𑀧𑀦 𑀓𑀸 𑀕𑀬𑀸, 𑀓𑁄 𑀝𑀗𑁆𑀓𑀺𑀢𑀫𑀜𑁆𑀘𑁄, 𑀓𑀲𑁆𑀫𑀸 𑀘 𑀪𑀕𑀯𑀸 𑀢𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂 𑀯𑀺𑀳𑀭𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀕𑀬𑀸𑀢𑀺 𑀕𑀸𑀫𑁄𑀧𑀺 𑀢𑀺𑀢𑁆𑀣𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀢𑀤𑀼𑀪𑀬𑀫𑁆𑀧𑀺 𑀇𑀥 𑀯𑀝𑁆𑀝𑀢𑀺. 𑀕𑀬𑀸𑀕𑀸𑀫𑀲𑁆𑀲 𑀳𑀺 𑀅𑀯𑀺𑀤𑀽𑀭𑁂 𑀤𑁂𑀲𑁂 𑀯𑀺𑀳𑀭𑀦𑁆𑀢𑁄𑀧𑀺 ‘‘𑀕𑀬𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀘 𑀕𑀸𑀫𑀲𑁆𑀲 𑀲𑀫𑀻𑀧𑁂 𑀅𑀯𑀺𑀤𑀽𑀭𑁂 𑀤𑁆𑀯𑀸𑀭𑀲𑀦𑁆𑀢𑀺𑀓𑁂 𑀲𑁄 𑀝𑀗𑁆𑀓𑀺𑀢𑀫𑀜𑁆𑀘𑁄. 𑀕𑀬𑀸𑀢𑀺𑀢𑁆𑀣𑁂 𑀯𑀺𑀳𑀭𑀦𑁆𑀢𑁄𑀧𑀺 ‘‘𑀕𑀬𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀕𑀬𑀸𑀢𑀺𑀢𑁆𑀣𑁂 𑀘 𑀲𑁄 𑀝𑀗𑁆𑀓𑀺𑀢𑀫𑀜𑁆𑀘𑁄. 𑀝𑀗𑁆𑀓𑀺𑀢𑀫𑀜𑁆𑀘𑁄𑀢𑀺 𑀘𑀢𑀼𑀦𑁆𑀦𑀁 𑀧𑀸𑀲𑀸𑀡𑀸𑀦𑀁 𑀉𑀧𑀭𑀺 𑀯𑀺𑀢𑁆𑀣𑀢𑀁 𑀧𑀸𑀲𑀸𑀡𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑁄 𑀧𑀸𑀲𑀸𑀡𑀫𑀜𑁆𑀘𑁄. 𑀢𑀁 𑀦𑀺𑀲𑁆𑀲𑀸𑀬 𑀬𑀓𑁆𑀔𑀲𑁆𑀲 𑀪𑀯𑀦𑀁 𑀆𑀴𑀯𑀓𑀲𑁆𑀲 𑀪𑀯𑀦𑀁 𑀯𑀺𑀬. 𑀬𑀲𑁆𑀫𑀸 𑀯𑀸 𑀧𑀦 𑀪𑀕𑀯𑀸 𑀢𑀁 𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀽𑀘𑀺𑀮𑁄𑀫𑀲𑁆𑀲 𑀘 𑀔𑀭𑀮𑁄𑀫𑀲𑁆𑀲 𑀘𑀸𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀬𑀓𑁆𑀔𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀽𑀧𑀦𑀺𑀲𑁆𑀲𑀬𑀁 𑀅𑀤𑁆𑀤𑀲, 𑀢𑀲𑁆𑀫𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀦𑀸𑀦𑀸𑀤𑀺𑀲𑀸𑀳𑀺 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀚𑀦𑀲𑁆𑀲 𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀸𑀲𑀼𑀘𑀺𑀦𑀺𑀲𑁆𑀲𑀦𑁆𑀤𑀓𑀺𑀮𑀺𑀦𑁆𑀦𑀪𑀽𑀫𑀺𑀪𑀸𑀕𑀫𑁆𑀧𑀺 𑀢𑀁 𑀢𑀺𑀢𑁆𑀣𑀧𑁆𑀧𑀤𑁂𑀲𑀁 𑀆𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀝𑀗𑁆𑀓𑀺𑀢𑀫𑀜𑁆𑀘𑁂 𑀦𑀺𑀲𑀻𑀤𑀺 𑀲𑀽𑀘𑀺𑀮𑁄𑀫𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀕𑀬𑀸𑀬𑀁 𑀯𑀺𑀳𑀭𑀢𑀺 𑀝𑀗𑁆𑀓𑀺𑀢𑀫𑀜𑁆𑀘𑁂 𑀲𑀽𑀘𑀺𑀮𑁄𑀫𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑀁 𑀲𑀫𑀬𑀁 𑀪𑀕𑀯𑀸 𑀢𑀢𑁆𑀣 𑀯𑀺𑀳𑀭𑀢𑀺, 𑀢𑁂𑀦 𑀲𑀫𑀬𑁂𑀦. 𑀔𑀭𑁄 𑀘 𑀬𑀓𑁆𑀔𑁄 𑀲𑀽𑀘𑀺𑀮𑁄𑀫𑁄 𑀘 𑀬𑀓𑁆𑀔𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀢𑀺𑀓𑁆𑀓𑀫𑀦𑁆𑀢𑀻𑀢𑀺. 𑀓𑁂 𑀢𑁂 𑀬𑀓𑁆𑀔𑀸, 𑀓𑀲𑁆𑀫𑀸 𑀘 𑀅𑀢𑀺𑀓𑁆𑀓𑀫𑀦𑁆𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑁂𑀲𑀼 𑀢𑀸𑀯 𑀏𑀓𑁄 𑀅𑀢𑀻𑀢𑁂 𑀲𑀗𑁆𑀖𑀲𑁆𑀲 𑀢𑁂𑀮𑀁 𑀅𑀦𑀸𑀧𑀼𑀘𑁆𑀙𑀸 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀫𑀓𑁆𑀔𑁂𑀲𑀺. 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀕𑀬𑀸𑀧𑁄𑀓𑁆𑀔𑀭𑀡𑀺𑀢𑀻𑀭𑁂 𑀬𑀓𑁆𑀔𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀲𑁂𑀯 𑀘𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀯𑀺𑀭𑀽𑀧𑀸𑀦𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀅𑀳𑁂𑀲𑀼𑀁, 𑀇𑀝𑁆𑀞𑀓𑀘𑁆𑀙𑀤𑀦𑀲𑀤𑀺𑀲𑀜𑁆𑀘 𑀔𑀭𑀲𑀫𑁆𑀨𑀲𑁆𑀲𑀁 𑀘𑀫𑁆𑀫𑀁. 𑀲𑁄 𑀓𑀺𑀭 𑀬𑀤𑀸 𑀧𑀭𑀁 𑀪𑀺𑀁𑀲𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀙𑀤𑀦𑀺𑀝𑁆𑀞𑀓𑀲𑀤𑀺𑀲𑀸𑀦𑀺 𑀘𑀫𑁆𑀫𑀓𑀧𑀸𑀮𑀸𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀪𑀺𑀁𑀲𑀸𑀧𑁂𑀢𑀺. 𑀏𑀯𑀁 𑀲𑁄 𑀔𑀭𑀲𑀫𑁆𑀨𑀲𑁆𑀲𑀢𑁆𑀢𑀸 𑀔𑀭𑁄 𑀬𑀓𑁆𑀔𑁄𑀢𑁆𑀯𑁂𑀯 𑀦𑀸𑀫𑀁 𑀮𑀪𑀺.

𑀇𑀢𑀭𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀉𑀧𑀸𑀲𑀓𑁄 𑀳𑀼𑀢𑁆𑀯𑀸 𑀫𑀸𑀲𑀲𑁆𑀲 𑀅𑀝𑁆𑀞 𑀤𑀺𑀯𑀲𑁂 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀥𑀫𑁆𑀫𑀲𑁆𑀲𑀯𑀦𑁂 𑀖𑁄𑀲𑀺𑀢𑁂 𑀲𑀗𑁆𑀖𑀸𑀭𑀸𑀫𑀤𑁆𑀯𑀸𑀭𑁂 𑀅𑀢𑁆𑀢𑀦𑁄 𑀔𑁂𑀢𑁆𑀢𑀁 𑀓𑁂𑀮𑀸𑀬𑀦𑁆𑀢𑁄 𑀉𑀕𑁆𑀖𑁄𑀲𑀦𑀁 𑀲𑀼𑀢𑁆𑀯𑀸 ‘‘𑀲𑀘𑁂 𑀦𑁆𑀳𑀸𑀬𑀸𑀫𑀺, 𑀘𑀺𑀭𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀺𑀮𑀺𑀝𑁆𑀞𑀕𑀢𑁆𑀢𑁄𑀯 𑀉𑀧𑁄𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀳𑀕𑁆𑀖𑁂 𑀪𑀼𑀫𑁆𑀫𑀢𑁆𑀣𑀭𑀡𑁂 𑀅𑀦𑀸𑀤𑀭𑁂𑀦 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀼𑀧𑀺. 𑀪𑀺𑀓𑁆𑀔𑀼 𑀏𑀯𑀸𑀬𑀁, 𑀦 𑀉𑀧𑀸𑀲𑀓𑁄𑀢𑀺 𑀲𑀁𑀬𑀼𑀢𑁆𑀢𑀪𑀸𑀡𑀓𑀸. 𑀲𑁄 𑀢𑁂𑀦 𑀘 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀘 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀕𑀬𑀸𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀬𑀓𑁆𑀔𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀤𑀼𑀤𑁆𑀤𑀲𑀺𑀓𑁄 𑀅𑀳𑁄𑀲𑀺, 𑀲𑀭𑀻𑀭𑁂 𑀘𑀲𑁆𑀲 𑀲𑀽𑀘𑀺𑀲𑀤𑀺𑀲𑀸𑀦𑀺 𑀮𑁄𑀫𑀸𑀦𑀺 𑀅𑀳𑁂𑀲𑀼𑀁. 𑀲𑁄 𑀳𑀺 𑀪𑀺𑀁𑀲𑀸𑀧𑁂𑀢𑀩𑁆𑀩𑀓𑁂 𑀲𑀢𑁆𑀢𑁂 𑀲𑀽𑀘𑀻𑀳𑀺 𑀯𑀺𑀚𑁆𑀛𑀦𑁆𑀢𑁄 𑀯𑀺𑀬 𑀪𑀺𑀁𑀲𑀸𑀧𑁂𑀢𑀺. 𑀏𑀯𑀁 𑀲𑁄 𑀲𑀽𑀘𑀺𑀲𑀤𑀺𑀲𑀮𑁄𑀫𑀢𑁆𑀢𑀸 𑀲𑀽𑀘𑀺𑀮𑁄𑀫𑁄 𑀬𑀓𑁆𑀔𑁄𑀢𑁆𑀯𑁂𑀯 𑀦𑀸𑀫𑀁 𑀮𑀪𑀺. 𑀢𑁂 𑀅𑀢𑁆𑀢𑀦𑁄 𑀕𑁄𑀘𑀭𑀢𑁆𑀣𑀸𑀬 𑀪𑀯𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀕𑀦𑁆𑀢𑁆𑀯𑀸 𑀕𑀢𑀫𑀕𑁆𑀕𑁂𑀦𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀇𑀢𑀭𑀁 𑀤𑀺𑀲𑀸𑀪𑀸𑀕𑀁 𑀕𑀘𑁆𑀙𑀦𑁆𑀢𑀸 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀢𑀺𑀓𑁆𑀓𑀫𑀦𑁆𑀢𑀺.

𑀅𑀣 𑀔𑁄 𑀔𑀭𑁄𑀢𑀺 𑀓𑀲𑁆𑀫𑀸 𑀢𑁂 𑀏𑀯𑀫𑀸𑀳𑀁𑀲𑀼? 𑀔𑀭𑁄 𑀲𑀫𑀡𑀓𑀧𑁆𑀧𑀁 𑀤𑀺𑀲𑁆𑀯𑀸 𑀆𑀳. 𑀲𑀽𑀘𑀺𑀮𑁄𑀫𑁄 𑀧𑀦 ‘‘𑀬𑁄 𑀪𑀸𑀬𑀢𑀺 𑀦 𑀲𑁄 𑀲𑀫𑀡𑁄, 𑀲𑀫𑀡𑀧𑀝𑀺𑀭𑀽𑀧𑀓𑀢𑁆𑀢𑀸 𑀧𑀦 𑀲𑀫𑀡𑀓𑁄 𑀳𑁄𑀢𑀻’’𑀢𑀺 𑀏𑀯𑀁𑀮𑀤𑁆𑀥𑀺𑀓𑁄. 𑀢𑀲𑁆𑀫𑀸 𑀢𑀸𑀤𑀺𑀲𑀁 𑀪𑀕𑀯𑀦𑁆𑀢𑀁 𑀫𑀜𑁆𑀜𑀫𑀸𑀦𑁄 ‘‘𑀦𑁂𑀲𑁄 𑀲𑀫𑀡𑁄, 𑀲𑀫𑀡𑀓𑁄 𑀏𑀲𑁄’’𑀢𑀺 𑀲𑀳𑀲𑀸𑀯 𑀯𑀢𑁆𑀯𑀸𑀧𑀺 𑀧𑀼𑀦 𑀯𑀻𑀫𑀁𑀲𑀺𑀢𑀼𑀓𑀸𑀫𑁄 𑀆𑀳 𑁋 ‘‘𑀬𑀸𑀯𑀸𑀳𑀁 𑀚𑀸𑀦𑀸𑀫𑀻’’𑀢𑀺. ‘‘𑀅𑀣 𑀔𑁄’’𑀢𑀺 𑀏𑀯𑀁 𑀯𑀢𑁆𑀯𑀸 𑀢𑀢𑁄. 𑀲𑀽𑀘𑀺𑀮𑁄𑀫𑁄 𑀬𑀓𑁆𑀔𑁄𑀢𑀺 𑀇𑀢𑁄 𑀧𑀪𑀼𑀢𑀺 𑀬𑀸𑀯 𑀅𑀧𑀺𑀘 𑀔𑁄 𑀢𑁂 𑀲𑀫𑁆𑀨𑀲𑁆𑀲𑁄 𑀧𑀸𑀧𑀓𑁄𑀢𑀺, 𑀢𑀸𑀯 𑀉𑀢𑁆𑀢𑀸𑀦𑀢𑁆𑀣𑀫𑁂𑀯 𑀓𑁂𑀯𑀮𑀜𑁆𑀘𑁂𑀢𑁆𑀣 𑀪𑀕𑀯𑀢𑁄 𑀓𑀸𑀬𑀦𑁆𑀢𑀺 𑀅𑀢𑁆𑀢𑀦𑁄 𑀓𑀸𑀬𑀁 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀻𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁄 𑀅𑀪𑀸𑀬𑀦𑁆𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀧𑀜𑁆𑀳𑀁 𑀢𑀁 𑀲𑀫𑀡𑀸’’𑀢𑀺𑀆𑀤𑀺𑀫𑀸𑀳. 𑀓𑀺𑀁 𑀓𑀸𑀭𑀡𑀸? 𑀲𑁄 𑀳𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀺𑀦𑀸𑀧𑀺 𑀦𑀸𑀫 𑀫𑁂 𑀏𑀯𑀁 𑀔𑀭𑁂𑀦 𑀅𑀫𑀦𑀼𑀲𑁆𑀲𑀲𑀫𑁆𑀨𑀲𑁆𑀲𑁂𑀦 𑀫𑀦𑀼𑀲𑁆𑀲𑁄 𑀲𑀫𑀸𑀦𑁄 𑀅𑀬𑀁 𑀦 𑀪𑀸𑀬𑀢𑀺, 𑀳𑀦𑁆𑀤𑀸𑀳𑀁 𑀏𑀢𑀁 𑀩𑀼𑀤𑁆𑀥𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀸𑀫𑀺, 𑀅𑀤𑁆𑀥𑀸 𑀅𑀬𑀁 𑀢𑀢𑁆𑀣 𑀦 𑀲𑀫𑁆𑀧𑀸𑀬𑀺𑀲𑁆𑀲𑀢𑀺, 𑀢𑀢𑁄 𑀦𑀁 𑀏𑀯𑀁 𑀯𑀺𑀳𑁂𑀞𑁂𑀲𑁆𑀲𑀸𑀫𑀻’’𑀢𑀺. 𑀪𑀕𑀯𑀸 𑀢𑀁 𑀲𑀼𑀢𑁆𑀯𑀸 ‘‘𑀦 𑀔𑁆𑀯𑀸𑀳𑀁 𑀢𑀁 𑀆𑀯𑀼𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀆𑀴𑀯𑀓𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑀸𑀓𑀸𑀭𑁂𑀳𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁭𑁩. 𑀅𑀣 𑀔𑁄 𑀲𑀽𑀘𑀺𑀮𑁄𑀫𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 ‘‘𑀭𑀸𑀕𑁄 𑀘 𑀤𑁄𑀲𑁄 𑀘𑀸’’𑀢𑀺. 𑀢𑀢𑁆𑀣 𑀭𑀸𑀕𑀤𑁄𑀲𑀸 𑀯𑀼𑀢𑁆𑀢𑀦𑀬𑀸 𑀏𑀯. 𑀓𑀼𑀢𑁄𑀦𑀺𑀤𑀸𑀦𑀸𑀢𑀺 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀳𑁂𑀢𑀼𑀓𑀸. 𑀓𑀼𑀢𑁄𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀢𑁄-𑀆𑀤𑁂𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀫𑀸𑀲𑁂 𑀘𑀲𑁆𑀲 𑀮𑁄𑀧𑀸𑀪𑀸𑀯𑁄. 𑀅𑀣 𑀯𑀸 𑀦𑀺𑀤𑀸𑀦𑀸𑀢𑀺 𑀚𑀸𑀢𑀸 𑀉𑀧𑁆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀓𑀼𑀢𑁄𑀦𑀺𑀤𑀸𑀦𑀸, 𑀓𑀼𑀢𑁄𑀚𑀸𑀢𑀸, 𑀓𑀼𑀢𑁄𑀉𑀧𑁆𑀧𑀦𑁆𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀭𑀢𑀻 𑀭𑀢𑀻 𑀮𑁄𑀫𑀳𑀁𑀲𑁄 𑀓𑀼𑀢𑁄𑀚𑀸𑀢𑀺 𑀬𑀸𑀬𑀁 ‘‘𑀧𑀦𑁆𑀢𑁂𑀲𑀼 𑀯𑀸 𑀲𑁂𑀦𑀸𑀲𑀦𑁂𑀲𑀼 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀯𑀸 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀭𑀢𑀺 𑀅𑀭𑀢𑀺𑀢𑀸 𑀅𑀦𑀪𑀺𑀭𑀢𑀺 𑀅𑀦𑀪𑀺𑀭𑀫𑀡𑀸 𑀉𑀓𑁆𑀓𑀡𑁆𑀞𑀺𑀢𑀸 𑀧𑀭𑀺𑀢𑀲𑁆𑀲𑀺𑀢𑀸’’𑀢𑀺 (𑀯𑀺𑀪. 𑁮𑁫𑁬) 𑀏𑀯𑀁 𑀯𑀺𑀪𑀢𑁆𑀢𑀸 𑀅𑀭𑀢𑀺, 𑀬𑀸 𑀘 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑀺, 𑀬𑁄 𑀘 𑀮𑁄𑀫𑀳𑀁𑀲𑀲𑀫𑀼𑀝𑁆𑀞𑀸𑀧𑀦𑀢𑁄 ‘‘𑀮𑁄𑀫𑀳𑀁𑀲𑁄’’𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀢𑁄 𑀘𑀺𑀢𑁆𑀢𑀼𑀢𑁆𑀭𑀸𑀲𑁄. 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀓𑀼𑀢𑁄𑀚𑀸 𑀓𑀼𑀢𑁄𑀚𑀸𑀢𑀸𑀢𑀺 𑀧𑀼𑀘𑁆𑀙𑀢𑀺. 𑀓𑀼𑀢𑁄 𑀲𑀫𑀼𑀝𑁆𑀞𑀸𑀬𑀸𑀢𑀺 𑀓𑀼𑀢𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸. 𑀫𑀦𑁄𑀢𑀺 𑀓𑀼𑀲𑀮𑀘𑀺𑀢𑁆𑀢𑀁, 𑀯𑀺𑀢𑀓𑁆𑀓𑀸𑀢𑀺 𑀉𑀭𑀕𑀲𑀼𑀢𑁆𑀢𑁂 𑀯𑀼𑀢𑁆𑀢𑀸 𑀦𑀯 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄. 𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀻𑀢𑀺 𑀬𑀣𑀸 𑀕𑀸𑀫𑀤𑀸𑀭𑀓𑀸 𑀓𑀻𑀴𑀦𑁆𑀢𑀸 𑀓𑀸𑀓𑀁 𑀲𑀼𑀢𑁆𑀢𑁂𑀦 𑀧𑀸𑀤𑁂 𑀩𑀦𑁆𑀥𑀺𑀢𑁆𑀯𑀸 𑀑𑀲𑁆𑀲𑀚𑀦𑁆𑀢𑀺 𑀔𑀺𑀧𑀦𑁆𑀢𑀺, 𑀏𑀯𑀁 𑀓𑀼𑀲𑀮𑀫𑀦𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑀓𑀼𑀢𑁄 𑀲𑀫𑀼𑀝𑁆𑀞𑀸𑀬 𑀑𑀲𑁆𑀲𑀚𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺.

𑁨𑁭𑁪. 𑀅𑀣𑀲𑁆𑀲 𑀪𑀕𑀯𑀸 𑀢𑁂 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀭𑀸𑀕𑁄 𑀘𑀸’’𑀢𑀺 𑀤𑀼𑀢𑀺𑀬𑀕𑀸𑀣𑀫𑀪𑀸𑀲𑀺. 𑀢𑀢𑁆𑀣 𑀇𑀢𑁄𑀢𑀺 𑀅𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳. 𑀅𑀢𑁆𑀢𑀪𑀸𑀯𑀦𑀺𑀤𑀸𑀦𑀸 𑀳𑀺 𑀭𑀸𑀕𑀤𑁄𑀲𑀸. 𑀅𑀭𑀢𑀺𑀭𑀢𑀺𑀮𑁄𑀫𑀳𑀁𑀲𑀸 𑀘 𑀅𑀢𑁆𑀢𑀪𑀸𑀯𑀢𑁄 𑀚𑀸𑀢𑀸, 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑀘 𑀅𑀢𑁆𑀢𑀪𑀸𑀯𑀢𑁄𑀬𑁂𑀯 𑀲𑀫𑀼𑀝𑁆𑀞𑀸𑀬 𑀓𑀼𑀲𑀮𑀫𑀦𑁄 𑀑𑀲𑁆𑀲𑀚𑀦𑁆𑀢𑀺, 𑀢𑁂𑀦 𑀢𑀤𑀜𑁆𑀜𑀁 𑀧𑀓𑀢𑀺𑀆𑀤𑀺𑀓𑀸𑀭𑀡𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 𑁋 ‘‘𑀇𑀢𑁄𑀦𑀺𑀤𑀸𑀦𑀸 𑀇𑀢𑁄𑀚𑀸 𑀇𑀢𑁄 𑀲𑀫𑀼𑀝𑁆𑀞𑀸𑀬𑀸’’𑀢𑀺. 𑀲𑀤𑁆𑀤𑀲𑀺𑀤𑁆𑀥𑀺 𑀘𑁂𑀢𑁆𑀣 𑀧𑀼𑀭𑀺𑀫𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑁨𑁭𑁫-𑁬. 𑀏𑀯𑀁 𑀢𑁂 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀤𑀸𑀦𑀺 𑀬𑁆𑀯𑀸𑀬𑀁 ‘‘𑀇𑀢𑁄𑀦𑀺𑀤𑀸𑀦𑀸’’𑀢𑀺𑀆𑀤𑀻𑀲𑀼 ‘‘𑀅𑀢𑁆𑀢𑀪𑀸𑀯𑀦𑀺𑀤𑀸𑀦𑀸 𑀅𑀢𑁆𑀢𑀪𑀸𑀯𑀢𑁄 𑀚𑀸𑀢𑀸 𑀅𑀢𑁆𑀢𑀪𑀸𑀯𑀢𑁄 𑀲𑀫𑀼𑀝𑁆𑀞𑀸𑀬𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀁 𑀲𑀸𑀥𑁂𑀦𑁆𑀢𑁄 𑀆𑀳 𑁋 ‘‘𑀲𑁆𑀦𑁂𑀳𑀚𑀸 𑀅𑀢𑁆𑀢𑀲𑀫𑁆𑀪𑀽𑀢𑀸’’𑀢𑀺. 𑀏𑀢𑁂 𑀳𑀺 𑀲𑀩𑁆𑀩𑁂𑀧𑀺 𑀭𑀸𑀕𑀸𑀤𑀬𑁄 𑀯𑀺𑀢𑀓𑁆𑀓𑀧𑀭𑀺𑀬𑁄𑀲𑀸𑀦𑀸 𑀢𑀡𑁆𑀳𑀸𑀲𑁆𑀦𑁂𑀳𑁂𑀦 𑀚𑀸𑀢𑀸, 𑀢𑀣𑀸 𑀚𑀸𑀬𑀦𑁆𑀢𑀸 𑀘 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀪𑁂𑀤𑁂 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀬𑁂 𑀅𑀢𑁆𑀢𑀦𑀺 𑀲𑀫𑁆𑀪𑀽𑀢𑀸. 𑀢𑁂𑀦𑀸𑀳 𑁋 ‘‘𑀲𑁆𑀦𑁂𑀳𑀚𑀸 𑀅𑀢𑁆𑀢𑀲𑀫𑁆𑀪𑀽𑀢𑀸’’𑀢𑀺. 𑀇𑀤𑀸𑀦𑀺 𑀢𑀤𑀢𑁆𑀣𑀚𑁄𑀢𑀺𑀓𑀁 𑀉𑀧𑀫𑀁 𑀓𑀭𑁄𑀢𑀺 ‘‘𑀦𑀺𑀕𑁆𑀭𑁄𑀥𑀲𑁆𑀲𑁂𑀯 𑀔𑀦𑁆𑀥𑀚𑀸’’𑀢𑀺. 𑀢𑀢𑁆𑀣 𑀔𑀦𑁆𑀥𑁂𑀲𑀼 𑀚𑀸𑀢𑀸 𑀔𑀦𑁆𑀥𑀚𑀸, 𑀧𑀸𑀭𑁄𑀳𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀦𑀺𑀕𑁆𑀭𑁄𑀥𑀲𑁆𑀲 𑀔𑀦𑁆𑀥𑀚𑀸 𑀦𑀸𑀫 𑀧𑀸𑀭𑁄𑀳𑀸 𑀆𑀧𑁄𑀭𑀲𑀲𑀺𑀦𑁂𑀳𑁂 𑀲𑀢𑀺 𑀚𑀸𑀬𑀦𑁆𑀢𑀺, 𑀚𑀸𑀬𑀦𑁆𑀢𑀸 𑀘 𑀢𑀲𑁆𑀫𑀺𑀁𑀬𑁂𑀯 𑀦𑀺𑀕𑁆𑀭𑁄𑀥𑁂 𑀢𑁂𑀲𑀼 𑀢𑁂𑀲𑀼 𑀲𑀸𑀔𑀧𑁆𑀧𑀪𑁂𑀤𑁂𑀲𑀼 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀫𑁂𑀢𑁂𑀧𑀺 𑀭𑀸𑀕𑀸𑀤𑀬𑁄 𑀅𑀚𑁆𑀛𑀢𑁆𑀢𑀢𑀡𑁆𑀳𑀸𑀲𑁆𑀦𑁂𑀳𑁂 𑀲𑀢𑀺 𑀚𑀸𑀬𑀦𑁆𑀢𑀺, 𑀚𑀸𑀬𑀦𑁆𑀢𑀸 𑀘 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀢𑁂𑀲𑀼 𑀢𑁂𑀲𑀼 𑀘𑀓𑁆𑀔𑀸𑀤𑀺𑀪𑁂𑀤𑁂𑀲𑀼 𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀢𑁆𑀣𑀽𑀲𑀼 𑀲𑀫𑁆𑀪𑀯𑀦𑁆𑀢𑀺. 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 ‘‘𑀅𑀢𑁆𑀢𑀪𑀸𑀯𑀦𑀺𑀤𑀸𑀦𑀸 𑀅𑀢𑁆𑀢𑀪𑀸𑀯𑀚𑀸 𑀅𑀢𑁆𑀢𑀪𑀸𑀯𑀲𑀫𑀼𑀝𑁆𑀞𑀸𑀦𑀸 𑀘 𑀏𑀢𑁂’’𑀢𑀺.

𑀅𑀯𑀲𑁂𑀲𑀤𑀺𑀬𑀟𑁆𑀠𑀕𑀸𑀣𑀸𑀬 𑀧𑀦 𑀅𑀬𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀏𑀯𑀁 𑀅𑀢𑁆𑀢𑀲𑀫𑁆𑀪𑀽𑀢𑀸 𑀘 𑀏𑀢𑁂 𑀧𑀼𑀣𑀽 𑀯𑀺𑀲𑀢𑁆𑀢𑀸 𑀓𑀸𑀫𑁂𑀲𑀼. 𑀭𑀸𑀕𑁄𑀧𑀺 𑀳𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀸𑀤𑀺𑀯𑀲𑁂𑀦, 𑀤𑁄𑀲𑁄𑀧𑀺 𑀆𑀖𑀸𑀢𑀯𑀢𑁆𑀣𑀸𑀤𑀺𑀯𑀲𑁂𑀦, 𑀅𑀭𑀢𑀺𑀆𑀤𑀬𑁄𑀧𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀪𑁂𑀤𑀲𑁆𑀲 𑀯𑀲𑁂𑀦𑀸𑀢𑀺 𑀲𑀩𑁆𑀩𑀣𑀸 𑀲𑀩𑁆𑀩𑁂𑀧𑀺𑀫𑁂 𑀓𑀺𑀮𑁂𑀲𑀸 𑀧𑀼𑀣𑀽 𑀅𑀦𑁂𑀓𑀧𑁆𑀧𑀓𑀸𑀭𑀸 𑀳𑀼𑀢𑁆𑀯𑀸 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀢𑁂𑀲𑀼 𑀢𑁂𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀼 𑀢𑀣𑀸 𑀢𑀣𑀸 𑀯𑀺𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀸. 𑀓𑀺𑀫𑀺𑀯? 𑀫𑀸𑀮𑀼𑀯𑀸𑀯 𑀯𑀺𑀢𑀢𑀸 𑀯𑀦𑁂, 𑀬𑀣𑀸 𑀯𑀦𑁂 𑀯𑀺𑀢𑀢𑀸 𑀫𑀸𑀮𑀼𑀯𑀸 𑀢𑁂𑀲𑀼 𑀢𑁂𑀲𑀼 𑀭𑀼𑀓𑁆𑀔𑀲𑁆𑀲 𑀲𑀸𑀔𑀧𑀲𑀸𑀔𑀸𑀤𑀺𑀪𑁂𑀤𑁂𑀲𑀼 𑀯𑀺𑀲𑀢𑁆𑀢𑀸 𑀳𑁄𑀢𑀺 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀸, 𑀏𑀯𑀁 𑀧𑀼𑀣𑀼𑀧𑁆𑀧𑀪𑁂𑀤𑁂𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀼 𑀯𑀺𑀲𑀢𑁆𑀢𑀁 𑀓𑀺𑀮𑁂𑀲𑀕𑀡𑀁 𑀬𑁂 𑀦𑀁 𑀧𑀚𑀸𑀦𑀦𑁆𑀢𑀺 𑀬𑀢𑁄𑀦𑀺𑀤𑀸𑀦𑀁, 𑀢𑁂 𑀦𑀁 𑀯𑀺𑀦𑁄𑀤𑁂𑀦𑁆𑀢𑀺 𑀲𑀼𑀡𑁄𑀳𑀺 𑀬𑀓𑁆𑀔.

𑀢𑀢𑁆𑀣 𑀬𑀢𑁄𑀦𑀺𑀤𑀸𑀦𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀢𑁂𑀦 𑀓𑀺𑀁 𑀤𑀻𑀧𑁂𑀢𑀺? 𑀬𑁂 𑀲𑀢𑁆𑀢𑀸 𑀦𑀁 𑀓𑀺𑀮𑁂𑀲𑀕𑀡𑀁 ‘‘𑀬𑀢𑁄𑀦𑀺𑀤𑀸𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀁 𑀚𑀸𑀦𑀦𑁆𑀢𑀺, 𑀢𑁂 𑀦𑀁 ‘‘𑀢𑀡𑁆𑀳𑀸𑀲𑁆𑀦𑁂𑀳𑀲𑁆𑀦𑁂𑀳𑀺𑀢𑁂 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀜𑀢𑁆𑀯𑀸 𑀢𑀁 𑀢𑀡𑁆𑀳𑀸𑀲𑁆𑀦𑁂𑀳𑀁 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀤𑀺𑀪𑀸𑀯𑀦𑀸𑀜𑀸𑀡𑀕𑁆𑀕𑀺𑀦𑀸 𑀯𑀺𑀲𑁄𑀲𑁂𑀦𑁆𑀢𑀸 𑀯𑀺𑀦𑁄𑀤𑁂𑀦𑁆𑀢𑀺 𑀧𑀚𑀳𑀦𑁆𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀦𑁆𑀢𑀺 𑀘, 𑀏𑀢𑀁 𑀅𑀫𑁆𑀳𑀸𑀓𑀁 𑀲𑀼𑀪𑀸𑀲𑀺𑀢𑀁 𑀲𑀼𑀡𑁄𑀳𑀺 𑀬𑀓𑁆𑀔𑀸𑀢𑀺. 𑀏𑀯𑀫𑁂𑀢𑁆𑀣 𑀅𑀢𑁆𑀢𑀪𑀸𑀯𑀚𑀸𑀦𑀦𑁂𑀦 𑀤𑀼𑀓𑁆𑀔𑀧𑀭𑀺𑀜𑁆𑀜𑀁 𑀢𑀡𑁆𑀳𑀸𑀲𑁆𑀦𑁂𑀳𑀭𑀸𑀕𑀸𑀤𑀺𑀓𑀺𑀮𑁂𑀲𑀕𑀡𑀯𑀺𑀦𑁄𑀤𑀦𑁂𑀦 𑀲𑀫𑀼𑀤𑀬𑀧𑁆𑀧𑀳𑀸𑀦𑀜𑁆𑀘 𑀤𑀻𑀧𑁂𑀢𑀺.

𑀬𑁂 𑀘 𑀦𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀢𑁂 𑀤𑀼𑀢𑁆𑀢𑀭𑀁 𑀑𑀖𑀫𑀺𑀫𑀁 𑀢𑀭𑀦𑁆𑀢𑀺 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬. 𑀏𑀢𑁂𑀦 𑀫𑀕𑁆𑀕𑀪𑀸𑀯𑀦𑀁 𑀦𑀺𑀭𑁄𑀥𑀲𑀘𑁆𑀙𑀺𑀓𑀺𑀭𑀺𑀬𑀜𑁆𑀘 𑀤𑀻𑀧𑁂𑀢𑀺. 𑀬𑁂 𑀳𑀺 𑀦𑀁 𑀓𑀺𑀮𑁂𑀲𑀕𑀡𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀢𑁂 𑀅𑀯𑀲𑁆𑀲𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀺. 𑀦 𑀳𑀺 𑀫𑀕𑁆𑀕𑀪𑀸𑀯𑀦𑀁 𑀯𑀺𑀦𑀸 𑀓𑀺𑀮𑁂𑀲𑀯𑀺𑀦𑁄𑀤𑀦𑀁 𑀅𑀢𑁆𑀣𑀺. 𑀬𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀺, 𑀢𑁂 𑀤𑀼𑀢𑁆𑀢𑀭𑀁 𑀧𑀓𑀢𑀺𑀜𑀸𑀡𑁂𑀦 𑀓𑀸𑀫𑁄𑀖𑀸𑀤𑀺𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀑𑀖𑀫𑀺𑀫𑀁 𑀢𑀭𑀦𑁆𑀢𑀺. 𑀫𑀕𑁆𑀕𑀪𑀸𑀯𑀦𑀸 𑀳𑀺 𑀑𑀖𑀢𑀭𑀡𑀁. 𑀅𑀢𑀺𑀡𑁆𑀡𑀧𑀼𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀅𑀯𑀻𑀢𑀺𑀓𑁆𑀓𑀦𑁆𑀢𑀧𑀼𑀩𑁆𑀩𑀁. 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀸𑀬. 𑀏𑀯𑀫𑀺𑀫𑀁 𑀘𑀢𑀼𑀲𑀘𑁆𑀘𑀤𑀻𑀧𑀺𑀓𑀁 𑀕𑀸𑀣𑀁 𑀲𑀼𑀡𑀦𑁆𑀢𑀸 ‘‘𑀲𑀼𑀢𑁆𑀯𑀸 𑀥𑀫𑁆𑀫𑀁 𑀥𑀸𑀭𑁂𑀦𑁆𑀢𑀺, 𑀥𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀫𑀼𑀧𑀧𑀭𑀺𑀓𑁆𑀔𑀦𑁆𑀢𑀻’’𑀢𑀺𑀆𑀤𑀺𑀓𑀁 𑀓𑀣𑀁 𑀲𑀼𑀪𑀸𑀯𑀺𑀦𑀺𑀬𑀸 𑀧𑀜𑁆𑀜𑀸𑀬 𑀅𑀦𑀼𑀓𑁆𑀓𑀫𑀫𑀸𑀦𑀸 𑀢𑁂 𑀤𑁆𑀯𑁂𑀧𑀺 𑀲𑀳𑀸𑀬𑀓𑀸 𑀬𑀓𑁆𑀔𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂𑀬𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀧𑀸𑀲𑀸𑀤𑀺𑀓𑀸 𑀘 𑀅𑀳𑁂𑀲𑀼𑀁 𑀲𑀼𑀯𑀡𑁆𑀡𑀯𑀡𑁆𑀡𑀸 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.