𑁯. 𑀅𑀦𑁆𑀢𑀭𑀸𑀫𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀦𑀯𑀫𑁂 𑀅𑀦𑁆𑀢𑀭𑀸𑀫𑀮𑀸𑀢𑀺 𑀏𑀢𑁆𑀣 𑀅𑀦𑁆𑀢𑀭𑀸𑀲𑀤𑁆𑀤𑁄 𑁋

‘‘𑀦𑀤𑀻𑀢𑀻𑀭𑁂𑀲𑀼 𑀲𑀡𑁆𑀞𑀸𑀦𑁂, 𑀲𑀪𑀸𑀲𑀼 𑀭𑀣𑀺𑀬𑀸𑀲𑀼 𑀘;

𑀚𑀦𑀸 𑀲𑀗𑁆𑀕𑀫𑁆𑀫 𑀫𑀦𑁆𑀢𑁂𑀦𑁆𑀢𑀺, 𑀫𑀜𑁆𑀘 𑀢𑀜𑁆𑀘 𑀓𑀺𑀫𑀦𑁆𑀢𑀭’’𑀦𑁆𑀢𑀺. 𑁋

𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁨𑁮) 𑀓𑀸𑀭𑀡𑁂 𑀆𑀕𑀢𑁄. ‘‘𑀅𑀤𑁆𑀤𑀲𑀸 𑀫𑀁, 𑀪𑀦𑁆𑀢𑁂, 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀪𑀸𑀚𑀦𑀁 𑀥𑁄𑀯𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁪𑁯) 𑀔𑀡𑁂. ‘‘𑀅𑀧𑀺𑀘𑀸𑀬𑀁 𑀢𑀧𑁄𑀤𑀸 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑀺𑀓𑀸𑀬 𑀆𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁩𑁧) 𑀯𑀺𑀯𑀭𑁂.

‘‘𑀧𑀻𑀢𑀯𑀢𑁆𑀣𑁂 𑀧𑀻𑀢𑀥𑀚𑁂, 𑀧𑀻𑀢𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑁂;

𑀧𑀻𑀢𑀦𑁆𑀢𑀭𑀸𑀳𑀺 𑀯𑀕𑁆𑀕𑀽𑀳𑀺, 𑀅𑀧𑀺𑀴𑀦𑁆𑀥𑀸𑀯 𑀲𑁄𑀪𑀲𑀻’’𑀢𑀺. 𑁋

𑀆𑀤𑀻𑀲𑀼 (𑀯𑀺. 𑀯. 𑁬𑁫𑁮) 𑀉𑀢𑁆𑀢𑀭𑀺𑀲𑀸𑀝𑀓𑁂. ‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸’’𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁦) 𑀘𑀺𑀢𑁆𑀢𑁂. 𑀇𑀥𑀸𑀧𑀺 𑀘𑀺𑀢𑁆𑀢𑁂 𑀏𑀯 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀅𑀦𑁆𑀢𑀭𑁂 𑀘𑀺𑀢𑁆𑀢𑁂 𑀪𑀯𑀸 𑀅𑀦𑁆𑀢𑀭𑀸. 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀲 𑀫𑀮𑀺𑀦𑀪𑀸𑀯𑀓𑀭𑀡𑀢𑁄 𑀫𑀮𑀸. 𑀢𑀢𑁆𑀣 𑀫𑀮𑀁 𑀦𑀸𑀫 𑀤𑀼𑀯𑀺𑀥𑀁 𑁋 𑀲𑀭𑀻𑀭𑀫𑀮𑀁, 𑀘𑀺𑀢𑁆𑀢𑀫𑀮𑀦𑁆𑀢𑀺. 𑀢𑁂𑀲𑀼 𑀲𑀭𑀻𑀭𑀫𑀮𑀁 𑀲𑁂𑀤𑀚𑀮𑁆𑀮𑀺𑀓𑀸𑀤𑀺 𑀲𑀭𑀻𑀭𑁂 𑀦𑀺𑀩𑁆𑀩𑀢𑁆𑀢𑀁, 𑀢𑀢𑁆𑀣 𑀮𑀕𑁆𑀕𑀁 𑀆𑀕𑀦𑁆𑀢𑀼𑀓𑀭𑀚𑀜𑁆𑀘, 𑀢𑀁 𑀉𑀤𑀓𑁂𑀦𑀧𑀺 𑀦𑀻𑀳𑀭𑀡𑀻𑀬𑀁, 𑀦 𑀢𑀣𑀸 𑀲𑀁𑀓𑀺𑀮𑁂𑀲𑀺𑀓𑀁. 𑀘𑀺𑀢𑁆𑀢𑀫𑀮𑀁 𑀧𑀦 𑀭𑀸𑀕𑀸𑀤𑀺𑀲𑀁𑀓𑀺𑀮𑁂𑀲𑀺𑀓𑀁, 𑀢𑀁 𑀅𑀭𑀺𑀬𑀫𑀕𑁆𑀕𑁂𑀳𑁂𑀯 𑀦𑀻𑀳𑀭𑀡𑀻𑀬𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀭𑀽𑀧𑁂𑀦 𑀲𑀁𑀓𑀺𑀮𑀺𑀝𑁆𑀞𑁂𑀦, 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀫𑀸𑀡𑀯𑀸;

𑀭𑀽𑀧𑁂 𑀲𑀼𑀤𑁆𑀥𑁂 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀅𑀦𑀓𑁆𑀔𑀸𑀢𑀁 𑀫𑀳𑁂𑀲𑀺𑀦𑀸.

‘‘𑀘𑀺𑀢𑁆𑀢𑁂𑀦 𑀲𑀁𑀓𑀺𑀮𑀺𑀝𑁆𑀞𑁂𑀦, 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀫𑀸𑀡𑀯𑀸;

𑀘𑀺𑀢𑁆𑀢𑁂 𑀲𑀼𑀤𑁆𑀥𑁂 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬);

𑀢𑁂𑀦𑀸𑀳 𑀪𑀕𑀯𑀸 ‘‘𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀘𑀺𑀢𑁆𑀢𑀯𑁄𑀤𑀸𑀦𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁩.𑁧𑁦𑁦). 𑀢𑀲𑁆𑀫𑀸 𑀪𑀕𑀯𑀸 𑀇𑀥𑀸𑀧𑀺 𑀘𑀺𑀢𑁆𑀢𑀫𑀮𑀯𑀺𑀲𑁄𑀥𑀦𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑀸’’𑀢𑀺 𑀆𑀳.

𑀬𑀣𑀸 𑀘𑁂𑀢𑁂 𑀮𑁄𑀪𑀸𑀤𑀬𑁄 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀫𑀮𑀺𑀦𑀪𑀸𑀯𑀓𑀭𑀸 𑀦𑀸𑀦𑀧𑁆𑀧𑀓𑀸𑀭𑀲𑀁𑀓𑀺𑀮𑁂𑀲𑀯𑀺𑀥𑀸𑀬𑀓𑀸𑀢𑀺 𑀅𑀦𑁆𑀢𑀭𑀸𑀫𑀮𑀸, 𑀏𑀯𑀁 𑀏𑀓𑀢𑁄 𑀪𑀼𑀜𑁆𑀚𑀺𑀢𑁆𑀯𑀸, 𑀏𑀓𑀢𑁄 𑀲𑀬𑀺𑀢𑁆𑀯𑀸, 𑀑𑀢𑀸𑀭𑀕𑀯𑁂𑀲𑀻 𑀅𑀫𑀺𑀢𑁆𑀢𑀲𑀢𑁆𑀢𑀼 𑀯𑀺𑀬 𑀘𑀺𑀢𑁆𑀢𑁂 𑀏𑀯 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀸𑀦𑀁 𑀦𑀸𑀦𑀸𑀯𑀺𑀥𑀅𑀦𑀢𑁆𑀣𑀸𑀯𑀳𑀸, 𑀦𑀸𑀦𑀧𑁆𑀧𑀓𑀸𑀭𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀢𑁄 𑀅𑀫𑀺𑀢𑁆𑀢𑀸, 𑀲𑀧𑀢𑁆𑀢𑀓𑀺𑀘𑁆𑀘𑀓𑀭𑀡𑀢𑁄 𑀲𑀧𑀢𑁆𑀢𑀸, 𑀳𑀺𑀁𑀲𑀦𑀢𑁄 𑀯𑀥𑀓𑀸, 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑁄 𑀧𑀘𑁆𑀘𑀢𑁆𑀣𑀺𑀓𑀸.

𑀢𑀢𑁆𑀣 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀮𑁄𑀪𑀸𑀤𑀻𑀦𑀁 𑀅𑀫𑀺𑀢𑁆𑀢𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀯𑁂𑀭𑀻𑀧𑀼𑀕𑁆𑀕𑀮𑁄 𑀳𑀺 𑀅𑀦𑁆𑀢𑀭𑀁 𑀮𑀪𑀫𑀸𑀦𑁄 𑀅𑀢𑁆𑀢𑀦𑁄 𑀯𑁂𑀭𑀺𑀲𑁆𑀲 𑀲𑀢𑁆𑀣𑁂𑀦 𑀯𑀸 𑀲𑀻𑀲𑀁 𑀧𑀸𑀢𑁂𑀢𑀺, 𑀉𑀧𑀸𑀬𑁂𑀦 𑀯𑀸 𑀫𑀳𑀦𑁆𑀢𑀁 𑀅𑀦𑀢𑁆𑀣𑀁 𑀉𑀧𑁆𑀧𑀸𑀤𑁂𑀢𑀺. 𑀇𑀫𑁂 𑀘 𑀮𑁄𑀪𑀸𑀤𑀬𑁄 𑀧𑀜𑁆𑀜𑀸𑀲𑀺𑀭𑀧𑀸𑀢𑀦𑁂𑀦 𑀬𑁄𑀦𑀺𑀲𑀫𑁆𑀧𑀝𑀺𑀧𑀸𑀤𑀦𑁂𑀦 𑀘 𑀢𑀸𑀤𑀺𑀲𑀁 𑀢𑀢𑁄 𑀩𑀮𑀯𑀢𑀭𑀁 𑀅𑀦𑀢𑁆𑀣𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀓𑀣𑀁? 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀫𑀺𑀜𑁆𑀳𑀺 𑀇𑀝𑁆𑀞𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀆𑀧𑀸𑀣𑀕𑀢𑁂𑀲𑀼 𑀬𑀣𑀸𑀭𑀳𑀁 𑀢𑀸𑀦𑀺 𑀆𑀭𑀩𑁆𑀪 𑀮𑁄𑀪𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸𑀲𑁆𑀲 𑀧𑀜𑁆𑀜𑀸𑀲𑀺𑀭𑀁 𑀧𑀸𑀢𑀺𑀢𑀁 𑀦𑀸𑀫 𑀳𑁄𑀢𑀺. 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀢𑀸𑀯 𑀧𑀜𑁆𑀜𑀸𑀲𑀺𑀭𑀧𑀸𑀢𑀦𑀢𑁄 𑀅𑀫𑀺𑀢𑁆𑀢𑀸𑀤𑀺𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀮𑁄𑀪𑀸𑀤𑀬𑁄 𑀧𑀦 𑀓𑀫𑁆𑀫𑀦𑀺𑀤𑀸𑀦𑀸 𑀳𑀼𑀢𑁆𑀯𑀸 𑀅𑀡𑁆𑀟𑀚𑀸𑀤𑀺𑀪𑁂𑀤𑀸 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄 𑀉𑀧𑀦𑁂𑀦𑁆𑀢𑀺. 𑀢𑀲𑁆𑀲 𑀬𑁄𑀦𑀺𑀉𑀧𑀕𑀫𑀦𑀫𑀽𑀮𑀓𑀸𑀦𑀺 𑀧𑀜𑁆𑀘𑀯𑀻𑀲𑀢𑀺 𑀫𑀳𑀸𑀪𑀬𑀸𑀦𑀺 𑀤𑁆𑀯𑀢𑁆𑀢𑀺𑀁𑀲 𑀓𑀫𑁆𑀫𑀓𑀭𑀡𑀸𑀦𑀺 𑀘 𑀆𑀕𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀏𑀯𑀁 𑀬𑁄𑀦𑀺𑀲𑀫𑁆𑀧𑀝𑀺𑀧𑀸𑀤𑀦𑀢𑁄𑀧𑀺 𑀦𑁂𑀲𑀁 𑀅𑀫𑀺𑀢𑁆𑀢𑀸𑀤𑀺𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀮𑁄𑀪𑀸𑀤𑀬𑁄 𑀅𑀫𑀺𑀢𑁆𑀢𑀸𑀤𑀺𑀲𑀤𑀺𑀲𑀢𑀸𑀬 𑀘𑀺𑀢𑁆𑀢𑀲𑀫𑁆𑀪𑀽𑀢𑀢𑀸𑀬 𑀘 ‘‘𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸. 𑀅𑀧𑀺𑀘 𑀅𑀫𑀺𑀢𑁆𑀢𑁂𑀳𑀺 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀮𑁄𑀪𑀸𑀤𑀬𑁄 𑀓𑀭𑁄𑀦𑁆𑀢𑀺, 𑀅𑀫𑀺𑀢𑁆𑀢𑀸𑀤𑀺𑀪𑀸𑀯𑁄 𑀘 𑀮𑁄𑀪𑀸𑀤𑀻𑀳𑀺 𑀚𑀸𑀬𑀢𑀻𑀢𑀺 𑀢𑁂𑀲𑀁 𑀅𑀫𑀺𑀢𑁆𑀢𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀤𑀺𑀲𑁄 𑀤𑀺𑀲𑀁 𑀬𑀦𑁆𑀢𑀁 𑀓𑀬𑀺𑀭𑀸, 𑀯𑁂𑀭𑀻 𑀯𑀸 𑀧𑀦 𑀯𑁂𑀭𑀺𑀦𑀁;

𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀧𑀸𑀧𑀺𑀬𑁄 𑀦𑀁 𑀢𑀢𑁄 𑀓𑀭𑁂’’𑀢𑀺. (𑀥. 𑀧. 𑁪𑁨; 𑀉𑀤𑀸. 𑁩𑁩);

𑀕𑀸𑀣𑀸𑀲𑀼 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀦𑀢𑁆𑀣𑀁 𑀚𑀦𑁂𑀢𑀻𑀢𑀺 𑀅𑀦𑀢𑁆𑀣𑀚𑀦𑀦𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀤𑀧𑀺 𑀮𑀼𑀤𑁆𑀥𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀢𑀤𑀧𑀺 𑀅𑀓𑀼𑀲𑀮𑀁; 𑀬𑀤𑀧𑀺 𑀮𑀼𑀤𑁆𑀥𑁄 𑀮𑁄𑀪𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀭𑀲𑁆𑀲 𑀅𑀲𑀢𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺 𑀯𑀥𑁂𑀦 𑀯𑀸 𑀩𑀦𑁆𑀥𑁂𑀦 𑀯𑀸 𑀚𑀸𑀦𑀺𑀬𑀸 𑀯𑀸 𑀕𑀭𑀳𑀸𑀬 𑀯𑀸 𑀧𑀩𑁆𑀩𑀸𑀚𑀦𑀸𑀬 𑀯𑀸 𑀩𑀮𑀯𑀫𑁆𑀳𑀺 𑀩𑀮𑀢𑁆𑀣𑁄 𑀇𑀢𑀺, 𑀢𑀤𑀧𑀺 𑀅𑀓𑀼𑀲𑀮𑀁, 𑀇𑀢𑀺𑀲𑁆𑀲𑀫𑁂 𑀮𑁄𑀪𑀚𑀸 𑀮𑁄𑀪𑀦𑀺𑀤𑀸𑀦𑀸 𑀮𑁄𑀪𑀲𑀫𑀼𑀤𑀬𑀸 𑀮𑁄𑀪𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺 (𑀅. 𑀦𑀺. 𑁩.𑁭𑁦).

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋

‘‘𑀭𑀢𑁆𑀢𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁩.𑁫𑁪).

𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄𑀢𑀺 𑀘𑀺𑀢𑁆𑀢𑀲𑀗𑁆𑀔𑁄𑀪𑀦𑁄. 𑀮𑁄𑀪𑁄 𑀳𑀺 𑀮𑁄𑀪𑀦𑀻𑀬𑁂 𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀘𑀺𑀢𑁆𑀢𑀁 𑀔𑁄𑀪𑁂𑀦𑁆𑀢𑁄 𑀧𑀓𑁄𑀧𑁂𑀦𑁆𑀢𑁄 𑀯𑀺𑀧𑀭𑀺𑀡𑀸𑀫𑁂𑀦𑁆𑀢𑁄 𑀯𑀺𑀓𑀸𑀭𑀁 𑀆𑀧𑀸𑀤𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀧𑀲𑀸𑀤𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀺. 𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀻𑀢𑀺 𑀢𑀁 𑀮𑁄𑀪𑀲𑀗𑁆𑀔𑀸𑀢𑀁 𑀅𑀦𑁆𑀢𑀭𑀢𑁄 𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀬𑁂𑀯 𑀚𑀸𑀢𑀁 𑀅𑀦𑀢𑁆𑀣𑀚𑀦𑀦𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑀸𑀤𑀺𑀁 𑀪𑀬𑀁 𑀪𑀬𑀳𑁂𑀢𑀼𑀁 𑀅𑀬𑀁 𑀩𑀸𑀮𑀫𑀳𑀸𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺 𑀦 𑀚𑀸𑀦𑀸𑀢𑀻𑀢𑀺.

𑀮𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑀁 𑀅𑀢𑁆𑀣𑀁 𑀳𑀺𑀢𑀁 𑀮𑀼𑀤𑁆𑀥𑀧𑀼𑀕𑁆𑀕𑀮𑁄 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺. 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀻𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀫𑁆𑀧𑀺 𑀮𑀼𑀤𑁆𑀥𑁄 𑀮𑁄𑀪𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀦 𑀧𑀲𑁆𑀲𑀢𑀺 𑀧𑀘𑁆𑀘𑀓𑁆𑀔𑀢𑁄 𑀦 𑀚𑀸𑀦𑀸𑀢𑀺, 𑀧𑀕𑁂𑀯 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀭𑀢𑁆𑀢𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦 𑀧𑀚𑀸𑀦𑀸𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦 𑀧𑀚𑀸𑀦𑀸𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁩.𑁫𑁫).

𑀅𑀦𑁆𑀥𑀢𑀫𑀦𑁆𑀢𑀺 𑀅𑀦𑁆𑀥𑀪𑀸𑀯𑀓𑀭𑀁 𑀢𑀫𑀁. 𑀬𑀦𑁆𑀢𑀺 𑀬𑀢𑁆𑀣. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀬𑀲𑁆𑀫𑀺𑀁 𑀓𑀸𑀮𑁂 𑀮𑁄𑀪𑁄 𑀲𑀳𑀢𑁂 𑀅𑀪𑀺𑀪𑀯𑀢𑀺 𑀦𑀭𑀁, 𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀻𑀢𑀺. 𑀬𑀦𑁆𑀢𑀺 𑀯𑀸 𑀓𑀸𑀭𑀡𑀯𑀘𑀦𑀁. 𑀬𑀲𑁆𑀫𑀸 𑀮𑁄𑀪𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀭𑀁 𑀲𑀳𑀢𑁂 𑀅𑀪𑀺𑀪𑀯𑀢𑀺, 𑀢𑀲𑁆𑀫𑀸 𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸, 𑀬-𑀢-𑀲𑀤𑁆𑀤𑀸𑀦𑀁 𑀏𑀓𑀦𑁆𑀢𑀲𑀫𑁆𑀩𑀦𑁆𑀥𑀪𑀸𑀯𑀢𑁄. 𑀅𑀣 𑀯𑀸 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁, ‘‘𑀮𑁄𑀪𑁄 𑀲𑀳𑀢𑁂’’𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀮𑁄𑀪𑀲𑁆𑀲 𑀲𑀳𑀦𑀁 𑀅𑀪𑀺𑀪𑀯𑀦𑀁 𑀯𑀼𑀢𑁆𑀢𑀁. 𑀏𑀢𑀁 𑀅𑀦𑁆𑀥𑀪𑀸𑀯𑀓𑀭𑀲𑁆𑀲 𑀢𑀫𑀲𑁆𑀲 𑀕𑀫𑀦𑀁 𑀉𑀧𑁆𑀧𑀸𑀤𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀁 𑀦𑀭𑀁 𑀮𑁄𑀪𑁄 𑀲𑀳𑀢𑁂 𑀅𑀪𑀺𑀪𑀯𑀢𑀺, 𑀢𑀲𑁆𑀲 𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀢𑀢𑁄 𑀘 𑀮𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀮𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑁄 𑀘 𑀮𑁄𑀪𑀁 𑀧𑀳𑀦𑁆𑀢𑁆𑀯𑀸𑀦𑀸𑀢𑀺 𑀬𑁄 𑀧𑀼𑀩𑁆𑀩𑀪𑀸𑀕𑁂 𑀢𑀤𑀗𑁆𑀕𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀘 𑀬𑀣𑀸𑀭𑀳𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀮𑁄𑀪𑀁 𑀧𑀚𑀳𑀺𑀢𑁆𑀯𑀸 𑀢𑀣𑀸 𑀧𑀚𑀳𑀦𑀳𑁂𑀢𑀼 𑀮𑁄𑀪𑀦𑁂𑀬𑁆𑀬𑁂 𑀤𑀺𑀩𑁆𑀩𑁂𑀧𑀺 𑀭𑀽𑀧𑀸𑀤𑀺𑀓𑁂 𑀉𑀧𑀝𑁆𑀞𑀺𑀢𑁂 𑀦 𑀮𑀼𑀩𑁆𑀪𑀢𑀺, 𑀩𑀮𑀯𑀯𑀺𑀧𑀲𑁆𑀲𑀦𑀸𑀦𑀼𑀪𑀸𑀯𑁂𑀦 𑀮𑁄𑀪𑁄 𑀧𑀳𑀻𑀬𑀢𑁂 𑀢𑀫𑁆𑀳𑀸𑀢𑀺 𑀢𑀲𑁆𑀫𑀸 𑀅𑀭𑀺𑀬𑀧𑀼𑀕𑁆𑀕𑀮𑀸 𑀅𑀭𑀺𑀬𑀫𑀕𑁆𑀕𑁂𑀦 𑀮𑁄𑀪𑁄 𑀧𑀳𑀻𑀬𑀢𑀺 𑀧𑀚𑀳𑀻𑀬𑀢𑀺, 𑀅𑀘𑁆𑀘𑀦𑁆𑀢𑀫𑁂𑀯 𑀧𑀭𑀺𑀘𑁆𑀘𑀚𑀻𑀬𑀢𑀺. 𑀬𑀣𑀸 𑀓𑀺𑀁? 𑀉𑀤𑀩𑀺𑀦𑁆𑀤𑀽𑀯 𑀧𑁄𑀓𑁆𑀔𑀭𑀸𑀢𑀺 𑀧𑀤𑀼𑀫𑀺𑀦𑀺𑀧𑀡𑁆𑀡𑀢𑁄 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬. 𑀲𑁂𑀲𑀕𑀸𑀣𑀸𑀦𑀫𑁆𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 𑀤𑁄𑀲𑀲𑁆𑀲 𑁋

‘‘𑀬𑀤𑀧𑀺 𑀤𑀼𑀝𑁆𑀞𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀢𑀤𑀧𑀺 𑀅𑀓𑀼𑀲𑀮𑀁; 𑀬𑀤𑀧𑀺 𑀤𑀼𑀝𑁆𑀞𑁄 𑀤𑁄𑀲𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀭𑀲𑁆𑀲 𑀅𑀲𑀢𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺 𑀯𑀥𑁂𑀦 𑀯𑀸 𑀩𑀦𑁆𑀥𑁂𑀦 𑀯𑀸 𑀚𑀸𑀦𑀺𑀬𑀸 𑀯𑀸 𑀕𑀭𑀳𑀸𑀬 𑀯𑀸 𑀧𑀩𑁆𑀩𑀸𑀚𑀦𑀸𑀬 𑀯𑀸 𑀩𑀮𑀯𑀫𑁆𑀳𑀺 𑀩𑀮𑀢𑁆𑀣𑁄 𑀇𑀢𑀺, 𑀢𑀤𑀧𑀺 𑀅𑀓𑀼𑀲𑀮𑀁. 𑀇𑀢𑀺𑀲𑁆𑀲𑀫𑁂 𑀤𑁄𑀲𑀚𑀸 𑀤𑁄𑀲𑀦𑀺𑀤𑀸𑀦𑀸 𑀤𑁄𑀲𑀲𑀫𑀼𑀤𑀬𑀸 𑀤𑁄𑀲𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺 (𑀅. 𑀦𑀺. 𑁩.𑁭𑁦).

𑀢𑀣𑀸 𑁋

‘‘𑀤𑀼𑀝𑁆𑀞𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀤𑁄𑀲𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 (𑀅. 𑀦𑀺. 𑁩.𑁫𑁫).

𑀢𑀣𑀸 𑁋

‘‘𑀤𑀼𑀝𑁆𑀞𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀤𑁄𑀲𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦 𑀧𑀚𑀸𑀦𑀸𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦 𑀧𑀚𑀸𑀦𑀸𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀬𑀣𑀸 𑀪𑀽𑀢𑀁 𑀦 𑀧𑀚𑀸𑀦𑀸𑀢𑀻’’𑀢𑀺 (𑀅. 𑀦𑀺. 𑁩.𑁫𑁫) 𑁋

𑀆𑀤𑀺𑀲𑀼𑀢𑁆𑀢𑀧𑀤𑀸𑀦𑀼𑀲𑀸𑀭𑁂𑀦 𑀅𑀦𑀢𑁆𑀣𑀚𑀦𑀦𑀢𑀸 𑀅𑀢𑁆𑀣𑀳𑀸𑀦𑀺𑀳𑁂𑀢𑀼𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸 𑀫𑁄𑀳𑀲𑁆𑀲 ‘‘𑀬𑀤𑀧𑀺 𑀫𑀽𑀴𑁆𑀳𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁩.𑁭𑁦), ‘‘𑀫𑀽𑀴𑁆𑀳𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀻’’𑀢𑀺𑀆𑀤𑀺𑀦𑀸(𑀅. 𑀦𑀺. 𑁩.𑁫𑁫), ‘‘𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁩.𑁫𑁫) 𑀘 𑀆𑀕𑀢𑀲𑀼𑀢𑁆𑀢𑀧𑀤𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀢𑀸𑀮𑀧𑀓𑁆𑀓𑀁𑀯 𑀩𑀦𑁆𑀥𑀦𑀸𑀢𑀺 𑀢𑀸𑀮𑀨𑀮𑀁 𑀯𑀺𑀬 𑀉𑀲𑀼𑀫𑀼𑀧𑁆𑀧𑀸𑀤𑁂𑀦 𑀯𑀡𑁆𑀝𑀢𑁄, 𑀢𑀢𑀺𑀬𑀫𑀕𑁆𑀕𑀜𑀸𑀡𑀼𑀧𑁆𑀧𑀸𑀤𑁂𑀦 𑀢𑀲𑁆𑀲 𑀘𑀺𑀢𑁆𑀢𑀢𑁄 𑀤𑁄𑀲𑁄 𑀧𑀳𑀻𑀬𑀢𑀺, 𑀧𑀭𑀺𑀘𑁆𑀘𑀚𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀫𑁄𑀳𑀁 𑀯𑀺𑀳𑀦𑁆𑀢𑀺 𑀲𑁄 𑀲𑀩𑁆𑀩𑀦𑁆𑀢𑀺 𑀲𑁄 𑀅𑀭𑀺𑀬𑀧𑀼𑀕𑁆𑀕𑀮𑁄 𑀲𑀩𑁆𑀩𑀁 𑀅𑀦𑀯𑀲𑁂𑀲𑀁 𑀫𑁄𑀳𑀁 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀯𑀺𑀳𑀦𑁆𑀢𑀺 𑀯𑀺𑀥𑀫𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀺. 𑀆𑀤𑀺𑀘𑁆𑀘𑁄𑀯𑀼𑀤𑀬𑀁 𑀢𑀫𑀦𑁆𑀢𑀺 𑀆𑀤𑀺𑀘𑁆𑀘𑁄 𑀯𑀺𑀬 𑀉𑀤𑀬𑀁 𑀉𑀕𑁆𑀕𑀘𑁆𑀙𑀦𑁆𑀢𑁄 𑀢𑀫𑀁 𑀅𑀦𑁆𑀥𑀓𑀸𑀭𑀁.

𑀦𑀯𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.